𑁪𑁬𑁦. 𑀬𑀼𑀥𑀜𑁆𑀘𑀬𑀚𑀸𑀢𑀓𑀁 (𑁬)

𑁭𑁩. 𑀫𑀺𑀢𑁆𑀢𑀸𑀫𑀘𑁆𑀘𑀧𑀭𑀺𑀩𑁆𑀬𑀽𑀴𑁆𑀳𑀁 [𑀧𑀭𑀺𑀩𑁆𑀩𑀽𑀴𑁆𑀳𑀁 (𑀲𑀻. 𑀧𑀻.)], 𑀅𑀳𑀁 𑀯𑀦𑁆𑀤𑁂 𑀭𑀣𑁂𑀲𑀪𑀁;

𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁 𑀭𑀸𑀚 [𑀧𑀩𑁆𑀩𑀚𑀺𑀲𑁆𑀲𑀁 𑀫𑀳𑀸𑀭𑀸𑀚 (𑀲𑀻. 𑀧𑀻.)], 𑀢𑀁 𑀤𑁂𑀯𑁄 𑀅𑀦𑀼𑀫𑀜𑁆𑀜𑀢𑀼.

𑁭𑁪. 𑀲𑀘𑁂 𑀢𑁂 𑀊𑀦𑀁 𑀓𑀸𑀫𑁂𑀳𑀺, 𑀅𑀳𑀁 𑀧𑀭𑀺𑀧𑀽𑀭𑀬𑀸𑀫𑀺 [𑀅𑀳𑀁𑀯 𑀧𑀽𑀭𑀬𑀸𑀫𑀺 (𑀓.)] 𑀢𑁂;

𑀬𑁄 𑀢𑀁 𑀳𑀺𑀁𑀲𑀢𑀺 𑀯𑀸𑀭𑁂𑀫𑀺, 𑀫𑀸 𑀧𑀩𑁆𑀩𑀚 [𑀧𑀩𑁆𑀩𑀚𑀺 (𑀧𑀻.)] 𑀬𑀼𑀥𑀜𑁆𑀘𑀬 [𑀬𑀼𑀥𑀜𑁆𑀚𑀬 (𑀲𑀻. 𑀲𑁆𑀬𑀸.), 𑀬𑀼𑀯𑀜𑁆𑀚𑀬 (𑀧𑀻.)].

𑁭𑁫. 𑀦 𑀫𑀢𑁆𑀣𑀺 𑀊𑀦𑀁 𑀓𑀸𑀫𑁂𑀳𑀺, 𑀳𑀺𑀁𑀲𑀺𑀢𑀸 𑀫𑁂 𑀦 𑀯𑀺𑀚𑁆𑀚𑀢𑀺;

𑀤𑀻𑀧𑀜𑁆𑀘 𑀓𑀸𑀢𑀼𑀫𑀺𑀘𑁆𑀙𑀸𑀫𑀺, 𑀬𑀁 𑀚𑀭𑀸 𑀦𑀸𑀪𑀺𑀓𑀻𑀭𑀢𑀺.

𑁭𑁬. 𑀧𑀼𑀢𑁆𑀢𑁄 𑀯𑀸 𑀧𑀺𑀢𑀭𑀁 𑀬𑀸𑀘𑁂, 𑀧𑀺𑀢𑀸 𑀯𑀸 𑀧𑀼𑀢𑁆𑀢𑀫𑁄𑀭𑀲𑀁;

𑀦𑁂𑀕𑀫𑁄 𑀢𑀁 𑀬𑀸𑀘𑁂 [𑀦𑁂𑀕𑀫𑁄 𑀬𑀸𑀘𑀢𑁂 (𑀲𑀻. 𑀲𑁆𑀬𑀸. 𑀧𑀻.)] 𑀢𑀸𑀢, 𑀫𑀸 𑀧𑀩𑁆𑀩𑀚 𑀬𑀼𑀥𑀜𑁆𑀘𑀬.

𑁭𑁭. 𑀫𑀸 𑀫𑀁 𑀤𑁂𑀯 𑀦𑀺𑀯𑀸𑀭𑁂𑀳𑀺, 𑀧𑀩𑁆𑀩𑀚𑀦𑁆𑀢𑀁 𑀭𑀣𑁂𑀲𑀪;

𑀫𑀸𑀳𑀁 𑀓𑀸𑀫𑁂𑀳𑀺 𑀲𑀫𑁆𑀫𑀢𑁆𑀢𑁄, 𑀚𑀭𑀸𑀬 𑀯𑀲𑀫𑀦𑁆𑀯𑀕𑀽.

𑁭𑁮. 𑀅𑀳𑀁 𑀢𑀁 𑀢𑀸𑀢 𑀬𑀸𑀘𑀸𑀫𑀺, 𑀅𑀳𑀁 𑀧𑀼𑀢𑁆𑀢 𑀦𑀺𑀯𑀸𑀭𑀬𑁂;

𑀘𑀺𑀭𑀁 𑀢𑀁 𑀤𑀝𑁆𑀞𑀼𑀫𑀺𑀘𑁆𑀙𑀸𑀫𑀺, 𑀫𑀸 𑀧𑀩𑁆𑀩𑀚 𑀬𑀼𑀥𑀜𑁆𑀘𑀬.

𑁭𑁯. 𑀉𑀲𑁆𑀲𑀸𑀯𑁄𑀯 𑀢𑀺𑀡𑀕𑁆𑀕𑀫𑁆𑀳𑀺, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺;

𑀏𑀯𑀫𑀸𑀬𑀼 𑀫𑀦𑀼𑀲𑁆𑀲𑀸𑀦𑀁, 𑀫𑀸 𑀫𑀁 𑀅𑀫𑁆𑀫 𑀦𑀺𑀯𑀸𑀭𑀬.

𑁮𑁦. 𑀢𑀭𑀫𑀸𑀦𑁄 𑀇𑀫𑀁 𑀬𑀸𑀦𑀁, 𑀆𑀭𑁄𑀧𑁂𑀢𑀼 [𑀢𑀭𑀫𑀸𑀦𑀸 𑀇𑀫𑀁 𑀬𑀸𑀦𑀁, 𑀆𑀭𑁄𑀧𑁂𑀦𑁆𑀢𑀼 (𑀲𑀻. 𑀧𑀻.)] 𑀭𑀣𑁂𑀲𑀪;

𑀫𑀸 𑀫𑁂 𑀫𑀸𑀢𑀸 𑀢𑀭𑀦𑁆𑀢𑀲𑁆𑀲, 𑀅𑀦𑁆𑀢𑀭𑀸𑀬𑀓𑀭𑀸 𑀅𑀳𑀼.

𑁮𑁧. 𑀅𑀪𑀺𑀥𑀸𑀯𑀣 𑀪𑀤𑁆𑀤𑀦𑁆𑀢𑁂, 𑀲𑀼𑀜𑁆𑀜𑀁 𑀳𑁂𑀲𑁆𑀲𑀢𑀺 𑀭𑀫𑁆𑀫𑀓𑀁;

𑀬𑀼𑀥𑀜𑁆𑀘𑀬𑁄 𑀅𑀦𑀼𑀜𑁆𑀜𑀸𑀢𑁄, 𑀲𑀩𑁆𑀩𑀤𑀢𑁆𑀢𑁂𑀦 𑀭𑀸𑀚𑀺𑀦𑀸.

𑁮𑁨. 𑀬𑁄𑀳𑀼 𑀲𑁂𑀝𑁆𑀞𑁄 𑀲𑀳𑀲𑁆𑀲𑀲𑁆𑀲 [𑀫𑀦𑀼𑀲𑁆𑀲𑀸𑀦𑀁 (𑀲𑁆𑀬𑀸.), 𑀲𑀳𑀲𑁆𑀲𑀸𑀦𑀁 (𑀓.)], 𑀬𑀼𑀯𑀸 𑀓𑀜𑁆𑀘𑀦𑀲𑀦𑁆𑀦𑀺𑀪𑁄;

𑀲𑁄𑀬𑀁 𑀓𑀼𑀫𑀸𑀭𑁄 𑀧𑀩𑁆𑀩𑀚𑀺𑀢𑁄, 𑀓𑀸𑀲𑀸𑀬𑀯𑀲𑀦𑁄 𑀩𑀮𑀻.

𑁮𑁩. 𑀉𑀪𑁄 𑀓𑀼𑀫𑀸𑀭𑀸 𑀧𑀩𑁆𑀩𑀚𑀺𑀢𑀸, 𑀬𑀼𑀥𑀜𑁆𑀘𑀬𑁄 𑀬𑀼𑀥𑀺𑀝𑁆𑀞𑀺𑀮𑁄;

𑀧𑀳𑀸𑀬 𑀫𑀸𑀢𑀸𑀧𑀺𑀢𑀭𑁄, 𑀲𑀗𑁆𑀕𑀁 𑀙𑁂𑀢𑁆𑀯𑀸𑀦 𑀫𑀘𑁆𑀘𑀼𑀦𑁄𑀢𑀺.

𑀬𑀼𑀥𑀜𑁆𑀘𑀬𑀚𑀸𑀢𑀓𑀁 𑀙𑀝𑁆𑀞𑀁.