𑁪𑁫𑁯. 𑀧𑀸𑀦𑀻𑀬𑀚𑀸𑀢𑀓𑀁 (𑁫)

𑁫𑁯. 𑀫𑀺𑀢𑁆𑀢𑁄 𑀫𑀺𑀢𑁆𑀢𑀲𑁆𑀲 𑀧𑀸𑀦𑀻𑀬𑀁, 𑀅𑀤𑀺𑀦𑁆𑀦𑀁 𑀧𑀭𑀺𑀪𑀼𑀜𑁆𑀚𑀺𑀲𑀁;

𑀢𑁂𑀦 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁬𑁦. 𑀧𑀭𑀤𑀸𑀭𑀜𑁆𑀘 𑀤𑀺𑀲𑁆𑀯𑀸𑀦, 𑀙𑀦𑁆𑀤𑁄 𑀫𑁂 𑀉𑀤𑀧𑀚𑁆𑀚𑀣 [𑀉𑀧𑀧𑀚𑁆𑀚𑀣 (𑀲𑁆𑀬𑀸. 𑀓.)];

𑀢𑁂𑀦 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁬𑁧. 𑀧𑀺𑀢𑀭𑀁 𑀫𑁂 𑀫𑀳𑀸𑀭𑀸𑀚, 𑀘𑁄𑀭𑀸 𑀅𑀕𑀡𑁆𑀳𑀼 [𑀅𑀕𑀡𑁆𑀳𑀼𑀁 (𑀲𑀻. 𑀧𑀻.), 𑀅𑀕𑀡𑁆𑀳𑀺 (𑀓.)] 𑀓𑀸𑀦𑀦𑁂;

𑀢𑁂𑀲𑀸𑀳𑀁 𑀧𑀼𑀘𑁆𑀙𑀺𑀢𑁄 𑀚𑀸𑀦𑀁, 𑀅𑀜𑁆𑀜𑀣𑀸 𑀦𑀁 𑀯𑀺𑀬𑀸𑀓𑀭𑀺𑀁.

𑁬𑁨. 𑀢𑁂𑀦 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁬𑁩. 𑀧𑀸𑀡𑀸𑀢𑀺𑀧𑀸𑀢𑀫𑀓𑀭𑀼𑀁, 𑀲𑁄𑀫𑀬𑀸𑀕𑁂 𑀉𑀧𑀝𑁆𑀞𑀺𑀢𑁂;

𑀢𑁂𑀲𑀸𑀳𑀁 𑀲𑀫𑀦𑀼𑀜𑁆𑀜𑀸𑀲𑀺𑀁, 𑀢𑁂𑀦 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁.

𑁬𑁪. 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸, 𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁;

𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁬𑁫. 𑀲𑀼𑀭𑀸𑀫𑁂𑀭𑀬𑀫𑀸𑀥𑀼𑀓𑀸 [𑀫𑀥𑀼𑀓𑀸 (𑀲𑀻. 𑀲𑁆𑀬𑀸. 𑀧𑀻.)], 𑀬𑁂 𑀚𑀦𑀸 𑀧𑀞𑀫𑀸𑀲𑀼 𑀦𑁄;

𑀩𑀳𑀽𑀦𑀁 𑀢𑁂 𑀅𑀦𑀢𑁆𑀣𑀸𑀬, 𑀫𑀚𑁆𑀚𑀧𑀸𑀦𑀫𑀓𑀧𑁆𑀧𑀬𑀼𑀁.

𑁬𑁬. 𑀢𑁂𑀲𑀸𑀳𑀁 𑀲𑀫𑀦𑀼𑀜𑁆𑀜𑀸𑀲𑀺𑀁, 𑀢𑁂𑀦 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁;

𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸, 𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁;

𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁬𑁭. 𑀥𑀺𑀭𑀢𑁆𑀣𑀼 𑀲𑀼𑀩𑀳𑀽 𑀓𑀸𑀫𑁂, 𑀤𑀼𑀕𑁆𑀕𑀦𑁆𑀥𑁂 𑀩𑀳𑀼𑀓𑀡𑁆𑀝𑀓𑁂;

𑀬𑁂 𑀅𑀳𑀁 𑀧𑀝𑀺𑀲𑁂𑀯𑀦𑁆𑀢𑁄, 𑀦𑀸𑀮𑀪𑀺𑀁 𑀢𑀸𑀤𑀺𑀲𑀁 𑀲𑀼𑀔𑀁.

𑁬𑁮. 𑀫𑀳𑀲𑁆𑀲𑀸𑀤𑀸 𑀲𑀼𑀔𑀸 𑀓𑀸𑀫𑀸, 𑀦𑀢𑁆𑀣𑀺 𑀓𑀸𑀫𑀸 𑀧𑀭𑀁 [𑀓𑀸𑀫𑀧𑀭𑀁 (𑀲𑀻. 𑀧𑀻.)] 𑀲𑀼𑀔𑀁;

𑀬𑁂 𑀓𑀸𑀫𑁂 𑀧𑀝𑀺𑀲𑁂𑀯𑀦𑁆𑀢𑀺, 𑀲𑀕𑁆𑀕𑀁 𑀢𑁂 𑀉𑀧𑀧𑀚𑁆𑀚𑀭𑁂.

𑁬𑁯. 𑀅𑀧𑁆𑀧𑀲𑁆𑀲𑀸𑀤𑀸 𑀤𑀼𑀔𑀸 𑀓𑀸𑀫𑀸, 𑀦𑀢𑁆𑀣𑀺 𑀓𑀸𑀫𑀸 𑀧𑀭𑀁 𑀤𑀼𑀔𑀁;

𑀬𑁂 𑀓𑀸𑀫𑁂 𑀧𑀝𑀺𑀲𑁂𑀯𑀦𑁆𑀢𑀺, 𑀦𑀺𑀭𑀬𑀁 𑀢𑁂 𑀉𑀧𑀧𑀚𑁆𑀚𑀭𑁂.

𑁭𑁦. 𑀅𑀲𑀻 𑀬𑀣𑀸 𑀲𑀼𑀦𑀺𑀲𑀺𑀢𑁄, 𑀦𑁂𑀢𑁆𑀢𑀺𑀁𑀲𑁄𑀯 𑀲𑀼𑀧𑀸𑀬𑀺𑀓𑁄 [𑀲𑀼𑀧𑀸𑀲𑀺𑀢𑁄 (𑀓. 𑀲𑀻. 𑀦𑀺𑀬𑁆𑀬), 𑀲𑀼𑀧𑀸𑀬𑀺𑀢𑁄 (𑀓. 𑀅𑀝𑁆𑀞.)];

𑀲𑀢𑁆𑀢𑀻𑀯 𑀉𑀭𑀲𑀺 𑀔𑀺𑀢𑁆𑀢𑀸, 𑀓𑀸𑀫𑀸 𑀤𑀼𑀓𑁆𑀔𑀢𑀭𑀸 𑀢𑀢𑁄.

𑁭𑁧. 𑀅𑀗𑁆𑀕𑀸𑀭𑀸𑀦𑀁𑀯 𑀚𑀮𑀺𑀢𑀁, 𑀓𑀸𑀲𑀼𑀁 𑀲𑀸𑀥𑀺𑀓𑀧𑁄𑀭𑀺𑀲𑀁;

𑀨𑀸𑀮𑀁𑀯 𑀤𑀺𑀯𑀲𑀁𑀢𑀢𑁆𑀢𑀁, 𑀓𑀸𑀫𑀸 𑀤𑀼𑀓𑁆𑀔𑀢𑀭𑀸 𑀢𑀢𑁄.

𑁭𑁨. 𑀯𑀺𑀲𑀁 𑀬𑀣𑀸 𑀳𑀮𑀸𑀳𑀮𑀁, 𑀢𑁂𑀮𑀁 𑀧𑀓𑁆𑀓𑀼𑀣𑀺𑀢𑀁 [𑀉𑀓𑁆𑀓𑀝𑁆𑀞𑀺𑀢𑀁 (𑀲𑀻. 𑀧𑀻.), 𑀧𑀓𑁆𑀓𑀼𑀝𑁆𑀞𑀺𑀢𑀁 (𑀲𑁆𑀬𑀸.)] 𑀬𑀣𑀸;

𑀢𑀫𑁆𑀩𑀮𑁄𑀳 [𑀢𑀫𑁆𑀧𑀮𑁄𑀳𑀁 (𑀲𑁆𑀬𑀸.)] 𑀯𑀺𑀮𑀻𑀦𑀁𑀯, 𑀓𑀸𑀫𑀸 𑀤𑀼𑀓𑁆𑀔𑀢𑀭𑀸 𑀢𑀢𑁄𑀢𑀺.

𑀧𑀸𑀦𑀻𑀬𑀚𑀸𑀢𑀓𑀁 𑀧𑀜𑁆𑀘𑀫𑀁.