𑁪𑁫𑁪. 𑀖𑀝𑀧𑀡𑁆𑀟𑀺𑀢𑀚𑀸𑀢𑀓𑀁 (𑁧𑁬)

𑁧𑁬𑁫. 𑀉𑀝𑁆𑀞𑁂𑀳𑀺 𑀓𑀡𑁆𑀳 𑀓𑀺𑀁 𑀲𑁂𑀲𑀺, 𑀓𑁄 𑀅𑀢𑁆𑀣𑁄 𑀲𑀼𑀧𑀦𑁂𑀦 𑀢𑁂;

𑀬𑁄𑀧𑀺 𑀢𑀼𑀬𑁆𑀳𑀁 [𑀢𑀸𑀬𑀁 (𑀧𑀻.)] 𑀲𑀓𑁄 𑀪𑀸𑀢𑀸, 𑀳𑀤𑀬𑀁 𑀘𑀓𑁆𑀔𑀼 𑀘 [𑀘𑀓𑁆𑀔𑀼𑀁𑀯 (𑀧𑀻.)] 𑀤𑀓𑁆𑀔𑀺𑀡𑀁;

𑀢𑀲𑁆𑀲 𑀯𑀸𑀢𑀸 𑀩𑀮𑀻𑀬𑀦𑁆𑀢𑀺, 𑀖𑀝𑁄 𑀚𑀧𑁆𑀧𑀢𑀺 [𑀲𑀲𑀁 𑀚𑀧𑁆𑀧𑀢𑀺 (?)] 𑀓𑁂𑀲𑀯.

𑁧𑁬𑁬. 𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀭𑁄𑀳𑀺𑀡𑁂𑀬𑁆𑀬𑀲𑁆𑀲 𑀓𑁂𑀲𑀯𑁄;

𑀢𑀭𑀫𑀸𑀦𑀭𑀽𑀧𑁄 𑀯𑀼𑀝𑁆𑀞𑀸𑀲𑀺, 𑀪𑀸𑀢𑀼𑀲𑁄𑀓𑁂𑀦 𑀅𑀝𑁆𑀝𑀺𑀢𑁄.

𑁧𑁬𑁭. 𑀓𑀺𑀁 𑀦𑀼 𑀉𑀫𑁆𑀫𑀢𑁆𑀢𑀭𑀽𑀧𑁄𑀯, 𑀓𑁂𑀯𑀮𑀁 𑀤𑁆𑀯𑀸𑀭𑀓𑀁 𑀇𑀫𑀁;

𑀲𑀲𑁄 𑀲𑀲𑁄𑀢𑀺 𑀮𑀧𑀲𑀺, 𑀓𑁄 𑀦𑀼 𑀢𑁂 𑀲𑀲𑀫𑀸𑀳𑀭𑀺.

𑁧𑁬𑁮. 𑀲𑁄𑀯𑀡𑁆𑀡𑀫𑀬𑀁 𑀫𑀡𑀻𑀫𑀬𑀁, 𑀮𑁄𑀳𑀫𑀬𑀁 𑀅𑀣 𑀭𑀽𑀧𑀺𑀬𑀸𑀫𑀬𑀁;

𑀲𑀗𑁆𑀔𑀲𑀺𑀮𑀸𑀧𑀯𑀸𑀴𑀫𑀬𑀁, 𑀓𑀸𑀭𑀬𑀺𑀲𑁆𑀲𑀸𑀫𑀺 𑀢𑁂 𑀲𑀲𑀁.

𑁧𑁬𑁯. 𑀲𑀦𑁆𑀢𑀺 𑀅𑀜𑁆𑀜𑁂𑀧𑀺 𑀲𑀲𑀓𑀸, 𑀅𑀭𑀜𑁆𑀜𑁂 𑀯𑀦𑀕𑁄𑀘𑀭𑀸;

𑀢𑁂𑀧𑀺 𑀢𑁂 𑀆𑀦𑀬𑀺𑀲𑁆𑀲𑀸𑀫𑀺, 𑀓𑀻𑀤𑀺𑀲𑀁 𑀲𑀲𑀫𑀺𑀘𑁆𑀙𑀲𑀺.

𑁧𑁭𑁦. 𑀦 𑀘𑀸𑀳𑀫𑁂𑀢𑁂 [𑀦 𑀘𑀸𑀳𑀫𑁂𑀢𑀁 (𑀲𑀻.), 𑀦 𑀯𑀸𑀳𑀫𑁂𑀢𑁂 (𑀲𑁆𑀬𑀸.), 𑀦 𑀯𑀸𑀳𑀫𑁂𑀢𑀁 (𑀧𑀻.)] 𑀇𑀘𑁆𑀙𑀸𑀫𑀺, 𑀬𑁂 𑀲𑀲𑀸 𑀧𑀣𑀯𑀺𑀲𑁆𑀲𑀺𑀢𑀸 [𑀧𑀞𑀯𑀺𑀁𑀲𑀺𑀢𑀸 (𑀲𑀻. 𑀲𑁆𑀬𑀸. 𑀧𑀻.)];

𑀘𑀦𑁆𑀤𑀢𑁄 𑀲𑀲𑀫𑀺𑀘𑁆𑀙𑀸𑀫𑀺, 𑀢𑀁 𑀫𑁂 𑀑𑀳𑀭 𑀓𑁂𑀲𑀯.

𑁧𑁭𑁧. 𑀲𑁄 𑀦𑀽𑀦 𑀫𑀥𑀼𑀭𑀁 𑀜𑀸𑀢𑀺, 𑀚𑀻𑀯𑀺𑀢𑀁 𑀯𑀺𑀚𑀳𑀺𑀲𑁆𑀲𑀲𑀺;

𑀅𑀧𑀢𑁆𑀣𑀺𑀬𑀁 𑀬𑁄 𑀧𑀢𑁆𑀣𑀬𑀲𑀺, 𑀘𑀦𑁆𑀤𑀢𑁄 𑀲𑀲𑀫𑀺𑀘𑁆𑀙𑀲𑀺.

𑁧𑁭𑁨. 𑀏𑀯𑀁 𑀘𑁂 𑀓𑀡𑁆𑀳 𑀚𑀸𑀦𑀸𑀲𑀺, 𑀬𑀤𑀜𑁆𑀜𑀫𑀦𑀼𑀲𑀸𑀲𑀲𑀺;

𑀓𑀲𑁆𑀫𑀸 𑀧𑀼𑀭𑁂 𑀫𑀢𑀁 𑀧𑀼𑀢𑁆𑀢𑀁, 𑀅𑀚𑁆𑀚𑀸𑀧𑀺 𑀫𑀦𑀼𑀲𑁄𑀘𑀲𑀺.

𑁧𑁭𑁩. 𑀬𑀁 𑀦 𑀮𑀩𑁆𑀪𑀸 𑀫𑀦𑀼𑀲𑁆𑀲𑁂𑀦, 𑀅𑀫𑀦𑀼𑀲𑁆𑀲𑁂𑀦 𑀯𑀸 𑀧𑀼𑀦 [𑀧𑀦 (𑀧𑁂. 𑀯. 𑁨𑁧𑁫)];

𑀚𑀸𑀢𑁄 𑀫𑁂 𑀫𑀸 𑀫𑀭𑀻 𑀧𑀼𑀢𑁆𑀢𑁄, 𑀓𑀼𑀢𑁄 𑀮𑀩𑁆𑀪𑀸 𑀅𑀮𑀩𑁆𑀪𑀺𑀬𑀁.

𑁧𑁭𑁪. 𑀦 𑀫𑀦𑁆𑀢𑀸 𑀫𑀽𑀮𑀪𑁂𑀲𑀚𑁆𑀚𑀸, 𑀑𑀲𑀥𑁂𑀳𑀺 𑀥𑀦𑁂𑀦 𑀯𑀸;

𑀲𑀓𑁆𑀓𑀸 𑀆𑀦𑀬𑀺𑀢𑀼𑀁 𑀓𑀡𑁆𑀳, 𑀬𑀁 𑀧𑁂𑀢𑀫𑀦𑀼𑀲𑁄𑀘𑀲𑀺.

𑁧𑁭𑁫. 𑀬𑀲𑁆𑀲 𑀏𑀢𑀸𑀤𑀺𑀲𑀸 𑀅𑀲𑁆𑀲𑀼, 𑀅𑀫𑀘𑁆𑀘𑀸 𑀧𑀼𑀭𑀺𑀲𑀧𑀡𑁆𑀟𑀺𑀢𑀸;

𑀬𑀣𑀸 𑀦𑀺𑀚𑁆𑀛𑀸𑀧𑀬𑁂 𑀅𑀚𑁆𑀚, 𑀖𑀝𑁄 𑀧𑀼𑀭𑀺𑀲𑀧𑀡𑁆𑀟𑀺𑀢𑁄.

𑁧𑁭𑁬. 𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁧𑁭𑁭. 𑀅𑀩𑁆𑀩𑀳𑀻 𑀯𑀢 𑀫𑁂 𑀲𑀮𑁆𑀮𑀁, 𑀬𑀫𑀸𑀲𑀺 𑀳𑀤𑀬𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀼𑀢𑁆𑀢𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁧𑁭𑁮. 𑀲𑁄𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀯𑀻𑀢𑀲𑁄𑀓𑁄 𑀅𑀦𑀸𑀯𑀺𑀮𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀫𑀸𑀡𑀯 [𑀪𑀸𑀢𑀺𑀓 (𑀧𑁂. 𑀯. 𑁨𑁨𑁪)].

𑁧𑁭𑁯. 𑀏𑀯𑀁 𑀓𑀭𑁄𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸;

𑀦𑀺𑀯𑀢𑁆𑀢𑀬𑀦𑁆𑀢𑀺 𑀲𑁄𑀓𑀫𑁆𑀳𑀸, 𑀖𑀝𑁄 𑀚𑁂𑀝𑁆𑀞𑀁𑀯 𑀪𑀸𑀢𑀭𑀦𑁆𑀢𑀺.

𑀖𑀝𑀧𑀡𑁆𑀟𑀺𑀢𑀚𑀸𑀢𑀓𑀁 𑀲𑁄𑀴𑀲𑀫𑀁.

𑀤𑀲𑀓𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.