𑁪𑁫𑁩. 𑀫𑀳𑀸𑀫𑀗𑁆𑀕𑀮𑀚𑀸𑀢𑀓𑀁 (𑁧𑁫)

𑁧𑁫𑁫. 𑀓𑀺𑀁𑀲𑀼 𑀦𑀭𑁄 𑀚𑀧𑁆𑀧𑀫𑀥𑀺𑀘𑁆𑀘𑀓𑀸𑀮𑁂, 𑀓𑀁 𑀯𑀸 𑀯𑀺𑀚𑁆𑀚𑀁 𑀓𑀢𑀫𑀁 𑀯𑀸 𑀲𑀼𑀢𑀸𑀦𑀁;

𑀲𑁄 𑀫𑀘𑁆𑀘𑁄 𑀅𑀲𑁆𑀫𑀺𑀜𑁆𑀘 [𑀅𑀲𑁆𑀫𑀺𑀁𑀯 (𑀧𑀻.)] 𑀧𑀭𑀫𑁆𑀳𑀺 𑀮𑁄𑀓𑁂, 𑀓𑀣𑀁 𑀓𑀭𑁄 𑀲𑁄𑀢𑁆𑀣𑀸𑀦𑁂𑀦 𑀕𑀼𑀢𑁆𑀢𑁄.

𑁧𑁫𑁬. 𑀬𑀲𑁆𑀲 𑀤𑁂𑀯𑀸 𑀧𑀺𑀢𑀭𑁄 𑀘 𑀲𑀩𑁆𑀩𑁂, 𑀲𑀭𑀻𑀲𑀧𑀸 [𑀲𑀺𑀭𑀺𑀁𑀲𑀧𑀸 (𑀲𑀻. 𑀲𑁆𑀬𑀸. 𑀧𑀻.)] 𑀲𑀩𑁆𑀩𑀪𑀽𑀢𑀸𑀦𑀺 𑀘𑀸𑀧𑀺;

𑀫𑁂𑀢𑁆𑀢𑀸𑀬 𑀦𑀺𑀘𑁆𑀘𑀁 𑀅𑀧𑀘𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀪𑀽𑀢𑁂𑀲𑀼 𑀯𑁂 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀼.

𑁧𑁫𑁭. 𑀬𑁄 𑀲𑀩𑁆𑀩𑀮𑁄𑀓𑀲𑁆𑀲 𑀦𑀺𑀯𑀸𑀢𑀯𑀼𑀢𑁆𑀢𑀺, 𑀇𑀢𑁆𑀣𑀻𑀧𑀼𑀫𑀸𑀦𑀁 𑀲𑀳𑀤𑀸𑀭𑀓𑀸𑀦𑀁;

𑀔𑀦𑁆𑀢𑀸 𑀤𑀼𑀭𑀼𑀢𑁆𑀢𑀸𑀦𑀫𑀧𑁆𑀧𑀝𑀺𑀓𑀽𑀮𑀯𑀸𑀤𑀻, 𑀅𑀥𑀺𑀯𑀸𑀲𑀦𑀁 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀼.

𑁧𑁫𑁮. 𑀬𑁄 𑀦𑀸𑀯𑀚𑀸𑀦𑀸𑀢𑀺 𑀲𑀳𑀸𑀬𑀫𑀺𑀢𑁆𑀢𑁂 [𑀲𑀳𑀸𑀬𑀫𑀢𑁆𑀢𑁂 (𑀲𑀻. 𑀧𑀻.)], 𑀲𑀺𑀧𑁆𑀧𑁂𑀦 𑀓𑀼𑀮𑁆𑀬𑀸𑀳𑀺 𑀥𑀦𑁂𑀦 𑀚𑀘𑁆𑀘𑀸;

𑀭𑀼𑀘𑀺𑀧𑀜𑁆𑀜𑁄 𑀅𑀢𑁆𑀣𑀓𑀸𑀮𑁂 𑀫𑀢𑀻𑀫𑀸 [𑀫𑀼𑀢𑀻𑀫𑀸 (𑀲𑀻. 𑀧𑀻.)], 𑀲𑀳𑀸𑀬𑁂𑀲𑀼 𑀯𑁂 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀼.

𑁧𑁫𑁯. 𑀫𑀺𑀢𑁆𑀢𑀸𑀦𑀺 𑀯𑁂 𑀬𑀲𑁆𑀲 𑀪𑀯𑀦𑁆𑀢𑀺 𑀲𑀦𑁆𑀢𑁄, 𑀲𑀁𑀯𑀺𑀲𑁆𑀲𑀢𑁆𑀣𑀸 𑀅𑀯𑀺𑀲𑀁𑀯𑀸𑀤𑀓𑀲𑁆𑀲;

𑀦 𑀫𑀺𑀢𑁆𑀢𑀤𑀼𑀩𑁆𑀪𑀻 𑀲𑀁𑀯𑀺𑀪𑀸𑀕𑀻 𑀥𑀦𑁂𑀦, 𑀫𑀺𑀢𑁆𑀢𑁂𑀲𑀼 𑀯𑁂 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀼.

𑁧𑁬𑁦. 𑀬𑀲𑁆𑀲 𑀪𑀭𑀺𑀬𑀸 𑀢𑀼𑀮𑁆𑀬𑀯𑀬𑀸 𑀲𑀫𑀕𑁆𑀕𑀸, 𑀅𑀦𑀼𑀩𑁆𑀩𑀢𑀸 𑀥𑀫𑁆𑀫𑀓𑀸𑀫𑀸 𑀧𑀚𑀸𑀢𑀸 [𑀲𑀚𑀸𑀢𑀸 (𑀓.)];

𑀓𑁄𑀮𑀺𑀦𑀺𑀬𑀸 𑀲𑀻𑀮𑀯𑀢𑀻 𑀧𑀢𑀺𑀩𑁆𑀩𑀢𑀸, 𑀤𑀸𑀭𑁂𑀲𑀼 𑀯𑁂 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀼.

𑁧𑁬𑁧. 𑀬𑀲𑁆𑀲 𑀭𑀸𑀚𑀸 𑀪𑀽𑀢𑀧𑀢𑀺 [𑀪𑀽𑀢𑀧𑀢𑀻 (𑀲𑀻. 𑀲𑁆𑀬𑀸. 𑀧𑀻.)] 𑀬𑀲𑀲𑁆𑀲𑀻, 𑀚𑀸𑀦𑀸𑀢𑀺 𑀲𑁄𑀘𑁂𑀬𑁆𑀬𑀁 𑀧𑀭𑀓𑁆𑀓𑀫𑀜𑁆𑀘;

𑀅𑀤𑁆𑀯𑁂𑀚𑁆𑀛𑀢𑀸 𑀲𑀼𑀳𑀤𑀬𑀁 𑀫𑀫𑀦𑁆𑀢𑀺, 𑀭𑀸𑀚𑀽𑀲𑀼 𑀯𑁂 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀼.

𑁧𑁬𑁨. 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀤𑀤𑀸𑀢𑀺 𑀲𑀤𑁆𑀥𑁄, 𑀫𑀸𑀮𑀜𑁆𑀘 𑀕𑀦𑁆𑀥𑀜𑁆𑀘 𑀯𑀺𑀮𑁂𑀧𑀦𑀜𑁆𑀘;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀅𑀦𑀼𑀫𑁄𑀤𑀫𑀸𑀦𑁄, 𑀲𑀕𑁆𑀕𑁂𑀲𑀼 𑀯𑁂 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀼.

𑁧𑁬𑁩. 𑀬𑀫𑀭𑀺𑀬𑀥𑀫𑁆𑀫𑁂𑀦 𑀧𑀼𑀦𑀦𑁆𑀢𑀺 𑀯𑀼𑀤𑁆𑀥𑀸, 𑀆𑀭𑀸𑀥𑀺𑀢𑀸 𑀲𑀫𑀘𑀭𑀺𑀬𑀸𑀬 𑀲𑀦𑁆𑀢𑁄;

𑀩𑀳𑀼𑀲𑁆𑀲𑀼𑀢𑀸 𑀇𑀲𑀬𑁄 𑀲𑀻𑀮𑀯𑀦𑁆𑀢𑁄, 𑀅𑀭𑀳𑀦𑁆𑀢𑀫𑀚𑁆𑀛𑁂 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀼.

𑁧𑁬𑁪. 𑀏𑀢𑀸𑀦𑀺 𑀔𑁄 𑀲𑁄𑀢𑁆𑀣𑀸𑀦𑀸𑀦𑀺 𑀮𑁄𑀓𑁂, 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀲𑀼𑀔𑀼𑀤𑁆𑀭𑀬𑀸𑀦𑀺 [𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀦𑀺 (𑀧𑀻.)];

𑀢𑀸𑀦𑀻𑀥 𑀲𑁂𑀯𑁂𑀣 𑀦𑀭𑁄 𑀲𑀧𑀜𑁆𑀜𑁄, 𑀦 𑀳𑀺 𑀫𑀗𑁆𑀕𑀮𑁂 𑀓𑀺𑀜𑁆𑀘𑀦𑀫𑀢𑁆𑀣𑀺 𑀲𑀘𑁆𑀘𑀦𑁆𑀢𑀺.

𑀫𑀳𑀸𑀫𑀗𑁆𑀕𑀮𑀚𑀸𑀢𑀓𑀁 𑀧𑀦𑁆𑀦𑀭𑀲𑀫𑀁.