𑁪𑁫𑁨. 𑀪𑀽𑀭𑀺𑀧𑀜𑁆𑀜𑀚𑀸𑀢𑀓𑀁 (𑁧𑁪)

𑁧𑁪𑁫. 𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀅𑀧𑀺 [𑀢𑁆𑀯𑀫𑁆𑀧𑀺 (𑀲𑀻.), 𑀢𑀼𑀯𑀫𑁆𑀧𑀺 (𑀲𑁆𑀬𑀸.), 𑀢𑁆𑀯𑀁 𑀅𑀲𑀺 (𑀓.)] 𑀪𑀽𑀭𑀺𑀧𑀜𑁆𑀜, 𑀬𑀸 𑀢𑀸𑀤𑀺𑀲𑀻 𑀲𑀻𑀭𑀺 𑀥𑀺𑀢𑀻 𑀫𑀢𑀻 𑀘;

𑀦 𑀢𑀸𑀬𑀢𑁂𑀪𑀸𑀯𑀯𑀲𑀽𑀧𑀦𑀺𑀢𑀁, 𑀬𑁄 𑀬𑀯𑀓𑀁 𑀪𑀼𑀜𑁆𑀚𑀲𑀺 𑀅𑀧𑁆𑀧𑀲𑀽𑀧𑀁.

𑁧𑁪𑁬. 𑀲𑀼𑀔𑀁 𑀤𑀼𑀓𑁆𑀔𑁂𑀦 𑀧𑀭𑀺𑀧𑀸𑀘𑀬𑀦𑁆𑀢𑁄, 𑀓𑀸𑀮𑀸 𑀓𑀸𑀮𑀁 𑀯𑀺𑀘𑀺𑀦𑀁 𑀙𑀦𑁆𑀤𑀙𑀦𑁆𑀦𑁄;

𑀅𑀢𑁆𑀣𑀲𑁆𑀲 𑀤𑁆𑀯𑀸𑀭𑀸𑀦𑀺 𑀅𑀯𑀸𑀧𑀼𑀭𑀦𑁆𑀢𑁄, 𑀢𑁂𑀦𑀸𑀳𑀁 𑀢𑀼𑀲𑁆𑀲𑀸𑀫𑀺 𑀬𑀯𑁄𑀤𑀦𑁂𑀦.

𑁧𑁪𑁭. 𑀓𑀸𑀮𑀜𑁆𑀘 𑀜𑀢𑁆𑀯𑀸 𑀅𑀪𑀺𑀚𑀻𑀳𑀦𑀸𑀬, 𑀫𑀦𑁆𑀢𑁂𑀳𑀺 𑀅𑀢𑁆𑀣𑀁 𑀧𑀭𑀺𑀧𑀸𑀘𑀬𑀺𑀢𑁆𑀯𑀸;

𑀯𑀺𑀚𑀫𑁆𑀪𑀺𑀲𑁆𑀲𑀁 𑀲𑀻𑀳𑀯𑀺𑀚𑀫𑁆𑀪𑀺𑀢𑀸𑀦𑀺, 𑀢𑀸𑀬𑀺𑀤𑁆𑀥𑀺𑀬𑀸 𑀤𑀓𑁆𑀔𑀲𑀺 𑀫𑀁 𑀧𑀼𑀦𑀸𑀧𑀺.

𑁧𑁪𑁮. 𑀲𑀼𑀔𑀻𑀧𑀺 𑀳𑁂𑀓𑁂 [𑀲𑀼𑀔𑀻 𑀳𑀺 𑀏𑀓𑁂 (𑀲𑀻.), 𑀲𑀼𑀔𑀻𑀢𑀺 𑀳𑁂𑀓𑁂 (?)] 𑀦 𑀓𑀭𑁄𑀦𑁆𑀢𑀺 𑀧𑀸𑀧𑀁, 𑀅𑀯𑀡𑁆𑀡𑀲𑀁𑀲𑀕𑁆𑀕𑀪𑀬𑀸 𑀧𑀼𑀦𑁂𑀓𑁂;

𑀧𑀳𑀽 𑀲𑀫𑀸𑀦𑁄 𑀯𑀺𑀧𑀼𑀮𑀢𑁆𑀣𑀘𑀺𑀦𑁆𑀢𑀻, 𑀓𑀺𑀁𑀓𑀸𑀭𑀡𑀸 𑀫𑁂 𑀦 𑀓𑀭𑁄𑀲𑀺 𑀤𑀼𑀓𑁆𑀔𑀁.

𑁧𑁪𑁯. 𑀦 𑀧𑀡𑁆𑀟𑀺𑀢𑀸 𑀅𑀢𑁆𑀢𑀲𑀼𑀔𑀲𑁆𑀲 𑀳𑁂𑀢𑀼, 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀲𑀫𑀸𑀘𑀭𑀦𑁆𑀢𑀺;

𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑀸 𑀔𑀮𑀺𑀢𑀸𑀧𑀺 𑀲𑀦𑁆𑀢𑀸, 𑀙𑀦𑁆𑀤𑀸 𑀘 𑀤𑁄𑀲𑀸 𑀦 𑀚𑀳𑀦𑁆𑀢𑀺 𑀥𑀫𑁆𑀫𑀁.

𑁧𑁫𑁦. 𑀬𑁂𑀦 𑀓𑁂𑀦𑀘𑀺 𑀯𑀡𑁆𑀡𑁂𑀦, 𑀫𑀼𑀤𑀼𑀦𑀸 𑀤𑀸𑀭𑀼𑀡𑁂𑀦 𑀯𑀸;

𑀉𑀤𑁆𑀥𑀭𑁂 𑀤𑀻𑀦𑀫𑀢𑁆𑀢𑀸𑀦𑀁, 𑀧𑀘𑁆𑀙𑀸 𑀥𑀫𑁆𑀫𑀁 𑀲𑀫𑀸𑀘𑀭𑁂.

𑁧𑁫𑁧. 𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;

𑀦 𑀢𑀲𑁆𑀲 𑀲𑀸𑀔𑀁 𑀪𑀜𑁆𑀚𑁂𑀬𑁆𑀬, 𑀫𑀺𑀢𑁆𑀢𑀤𑀼𑀩𑁆𑀪𑁄 𑀳𑀺 𑀧𑀸𑀧𑀓𑁄.

𑁧𑁫𑁨. 𑀬𑀲𑁆𑀲𑀸𑀧𑀺 [𑀬𑀲𑁆𑀲 𑀳𑀺 (𑀲𑀻. 𑀓.)] 𑀥𑀫𑁆𑀫𑀁 𑀧𑀼𑀭𑀺𑀲𑁄 [𑀫𑀦𑀼𑀚𑁄 (𑀲𑀻.)] 𑀯𑀺𑀚𑀜𑁆𑀜𑀸, 𑀬𑁂 𑀘𑀲𑁆𑀲 𑀓𑀗𑁆𑀔𑀁 𑀯𑀺𑀦𑀬𑀦𑁆𑀢𑀺 𑀲𑀦𑁆𑀢𑁄;

𑀢𑀁 𑀳𑀺𑀲𑁆𑀲 𑀤𑀻𑀧𑀜𑁆𑀘 𑀧𑀭𑀸𑀬𑀦𑀜𑁆𑀘, 𑀦 𑀢𑁂𑀦 𑀫𑁂𑀢𑁆𑀢𑀺𑀁 𑀚𑀭𑀬𑁂𑀣 𑀧𑀜𑁆𑀜𑁄.

𑁧𑁫𑁩. 𑀅𑀮𑀲𑁄 𑀕𑀺𑀳𑀻 𑀓𑀸𑀫𑀪𑁄𑀕𑀻 𑀦 𑀲𑀸𑀥𑀼, 𑀅𑀲𑀜𑁆𑀜𑀢𑁄 𑀧𑀩𑁆𑀩𑀚𑀺𑀢𑁄 𑀦 𑀲𑀸𑀥𑀼;

𑀭𑀸𑀚𑀸 𑀦 𑀲𑀸𑀥𑀼 𑀅𑀦𑀺𑀲𑀫𑁆𑀫𑀓𑀸𑀭𑀻, 𑀬𑁄 𑀧𑀡𑁆𑀟𑀺𑀢𑁄 𑀓𑁄𑀥𑀦𑁄 𑀢𑀁 𑀦 𑀲𑀸𑀥𑀼.

𑁧𑁫𑁪. 𑀦𑀺𑀲𑀫𑁆𑀫 𑀔𑀢𑁆𑀢𑀺𑀬𑁄 𑀓𑀬𑀺𑀭𑀸, 𑀦𑀸𑀦𑀺𑀲𑀫𑁆𑀫 𑀤𑀺𑀲𑀫𑁆𑀧𑀢𑀺;

𑀦𑀺𑀲𑀫𑁆𑀫𑀓𑀸𑀭𑀺𑀦𑁄 𑀭𑀸𑀚, 𑀬𑀲𑁄 𑀓𑀺𑀢𑁆𑀢𑀺 𑀘 𑀯𑀟𑁆𑀠𑀢𑀻𑀢𑀺.

𑀪𑀽𑀭𑀺𑀧𑀜𑁆𑀜𑀚𑀸𑀢𑀓𑀁 𑀘𑀼𑀤𑁆𑀤𑀲𑀫𑀁.