𑁪𑁫𑁧. 𑀘𑀓𑁆𑀓𑀯𑀸𑀓𑀚𑀸𑀢𑀓𑀁 (𑁧𑁩)

𑁧𑁩𑁫. 𑀯𑀡𑁆𑀡𑀯𑀸 𑀅𑀪𑀺𑀭𑀽𑀧𑁄𑀲𑀺, 𑀖𑀦𑁄 𑀲𑀜𑁆𑀚𑀸𑀢𑀭𑁄𑀳𑀺𑀢𑁄;

𑀘𑀓𑁆𑀓𑀯𑀸𑀓 𑀲𑀼𑀭𑀽𑀧𑁄𑀲𑀺, 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑀺𑀦𑁆𑀤𑁆𑀭𑀺𑀬𑁄.

𑁧𑁩𑁬. 𑀧𑀸𑀞𑀻𑀦𑀁 𑀧𑀸𑀯𑀼𑀲𑀁 𑀫𑀘𑁆𑀙𑀁, 𑀩𑀮𑀚𑀁 [𑀯𑀸𑀮𑀚𑀁 (𑀲𑀻. 𑀧𑀻.), 𑀩𑀮𑀚𑁆𑀚𑀁 (𑀲𑁆𑀬𑀸.)] 𑀫𑀼𑀜𑁆𑀚𑀭𑁄𑀳𑀺𑀢𑀁;

𑀕𑀗𑁆𑀕𑀸𑀬 𑀢𑀻𑀭𑁂 𑀦𑀺𑀲𑀺𑀦𑁆𑀦𑁄 [𑀕𑀗𑁆𑀕𑀸𑀢𑀻𑀭𑁂 𑀦𑀺𑀲𑀺𑀦𑁆𑀦𑁄𑀲𑀺 (𑀲𑁆𑀬𑀸. 𑀓.)], 𑀏𑀯𑀁 𑀪𑀼𑀜𑁆𑀚𑀲𑀺 𑀪𑁄𑀚𑀦𑀁.

𑁧𑁩𑁭. 𑀦 𑀯𑀸𑀳𑀫𑁂𑀢𑀁 [𑀲𑀩𑁆𑀩𑀢𑁆𑀣𑀧𑀺 𑀲𑀫𑀸𑀦𑀁] 𑀪𑀼𑀜𑁆𑀚𑀸𑀫𑀺, 𑀚𑀗𑁆𑀕𑀮𑀸𑀦𑁄𑀤𑀓𑀸𑀦𑀺 𑀯𑀸;

𑀅𑀜𑁆𑀜𑀢𑁆𑀭 𑀲𑁂𑀯𑀸𑀮𑀧𑀡𑀓𑀸, 𑀏𑀢𑀁 [𑀅𑀜𑁆𑀜𑀁 (𑀲𑁆𑀬𑀸.)] 𑀫𑁂 𑀲𑀫𑁆𑀫 𑀪𑁄𑀚𑀦𑀁.

𑁧𑁩𑁮. 𑀦 𑀯𑀸𑀳𑀫𑁂𑀢𑀁 𑀲𑀤𑁆𑀤𑀳𑀸𑀫𑀺, 𑀘𑀓𑁆𑀓𑀯𑀸𑀓𑀲𑁆𑀲 𑀪𑁄𑀚𑀦𑀁;

𑀅𑀳𑀫𑁆𑀧𑀺 𑀲𑀫𑁆𑀫 𑀪𑀼𑀜𑁆𑀚𑀸𑀫𑀺, 𑀕𑀸𑀫𑁂 𑀮𑁄𑀡𑀺𑀬𑀢𑁂𑀮𑀺𑀬𑀁.

𑁧𑁩𑁯. 𑀫𑀦𑀼𑀲𑁆𑀲𑁂𑀲𑀼 𑀓𑀢𑀁 𑀪𑀢𑁆𑀢𑀁, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁;

𑀦 𑀘 𑀫𑁂 𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀘𑀓𑁆𑀓𑀯𑀸𑀓 𑀬𑀣𑀸 𑀢𑀼𑀯𑀁.

𑁧𑁪𑁦. 𑀲𑀫𑁆𑀧𑀲𑁆𑀲𑀁 𑀅𑀢𑁆𑀢𑀦𑀺 𑀯𑁂𑀭𑀁, 𑀳𑀺𑀁𑀲𑀬𑀁 [𑀳𑀺𑀁𑀲𑀸𑀬 (𑀲𑁆𑀬𑀸. 𑀧𑀻. 𑀓.)] 𑀫𑀸𑀦𑀼𑀲𑀺𑀁 𑀧𑀚𑀁;

𑀉𑀢𑁆𑀭𑀲𑁆𑀢𑁄 𑀖𑀲𑀲𑀻 𑀪𑀻𑀢𑁄, 𑀢𑁂𑀦 𑀯𑀡𑁆𑀡𑁄 𑀢𑀯𑁂𑀤𑀺𑀲𑁄.

𑁧𑁪𑁧. 𑀲𑀩𑁆𑀩𑀮𑁄𑀓𑀯𑀺𑀭𑀼𑀤𑁆𑀥𑁄𑀲𑀺, 𑀥𑀗𑁆𑀓 𑀧𑀸𑀧𑁂𑀦 𑀓𑀫𑁆𑀫𑀼𑀦𑀸;

𑀮𑀤𑁆𑀥𑁄 𑀧𑀺𑀡𑁆𑀟𑁄 𑀦 𑀧𑀻𑀡𑁂𑀢𑀺, 𑀢𑁂𑀦 𑀯𑀡𑁆𑀡𑁄 𑀢𑀯𑁂𑀤𑀺𑀲𑁄.

𑁧𑁪𑁨. 𑀅𑀳𑀫𑁆𑀧𑀺 [𑀅𑀳𑀜𑁆𑀘 (?)] 𑀲𑀫𑁆𑀫 𑀪𑀼𑀜𑁆𑀚𑀸𑀫𑀺, 𑀅𑀳𑀺𑀁𑀲𑀁 𑀲𑀩𑁆𑀩𑀧𑀸𑀡𑀺𑀦𑀁;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀦𑀺𑀭𑀸𑀲𑀗𑁆𑀓𑀻, 𑀅𑀲𑁄𑀓𑁄 𑀅𑀓𑀼𑀢𑁄𑀪𑀬𑁄.

𑁧𑁪𑁩. 𑀲𑁄 𑀓𑀭𑀲𑁆𑀲𑀼 𑀆𑀦𑀼𑀪𑀸𑀯𑀁, 𑀯𑀻𑀢𑀺𑀯𑀢𑁆𑀢𑀲𑁆𑀲𑀼 𑀲𑀻𑀮𑀺𑀬𑀁;

𑀅𑀳𑀺𑀁𑀲𑀸𑀬 𑀘𑀭 𑀮𑁄𑀓𑁂, 𑀧𑀺𑀬𑁄 𑀳𑁄𑀳𑀺𑀲𑀺 𑀫𑀁𑀫𑀺𑀯.

𑁧𑁪𑁪. 𑀬𑁄 𑀦 𑀳𑀦𑁆𑀢𑀺 𑀦 𑀖𑀸𑀢𑁂𑀢𑀺, 𑀦 𑀚𑀺𑀦𑀸𑀢𑀺 𑀦 𑀚𑀸𑀧𑀬𑁂;

𑀫𑁂𑀢𑁆𑀢𑀁𑀲𑁄 𑀲𑀩𑁆𑀩𑀪𑀽𑀢𑁂𑀲𑀼, 𑀯𑁂𑀭𑀁 𑀢𑀲𑁆𑀲 𑀦 𑀓𑁂𑀦𑀘𑀻𑀢𑀺.

𑀘𑀓𑁆𑀓𑀯𑀸𑀓𑀚𑀸𑀢𑀓𑀁 𑀢𑁂𑀭𑀲𑀫𑀁.