𑁪𑁫𑁦. 𑀩𑀺𑀮𑀸𑀭𑀓𑁄𑀲𑀺𑀬𑀚𑀸𑀢𑀓𑀁 (𑁧𑁨)

𑁧𑁨𑁫. 𑀅𑀧𑀘𑀦𑁆𑀢𑀸𑀧𑀺 𑀤𑀺𑀘𑁆𑀙𑀦𑁆𑀢𑀺, 𑀲𑀦𑁆𑀢𑁄 𑀮𑀤𑁆𑀥𑀸𑀦 𑀪𑁄𑀚𑀦𑀁;

𑀓𑀺𑀫𑁂𑀯 𑀢𑁆𑀯𑀁 𑀧𑀘𑀫𑀸𑀦𑁄, 𑀬𑀁 𑀦 𑀤𑀚𑁆𑀚𑀸 𑀦 𑀢𑀁 𑀲𑀫𑀁.

𑁧𑁨𑁬. 𑀫𑀘𑁆𑀙𑁂𑀭𑀸 𑀘 𑀧𑀫𑀸𑀤𑀸 𑀘, 𑀏𑀯𑀁 𑀤𑀸𑀦𑀁 𑀦 𑀤𑀺𑀬𑁆𑀬𑀢𑀺;

𑀧𑀼𑀜𑁆𑀜𑀁 𑀆𑀓𑀗𑁆𑀔𑀫𑀸𑀦𑁂𑀦, 𑀤𑁂𑀬𑁆𑀬𑀁 𑀳𑁄𑀢𑀺 𑀯𑀺𑀚𑀸𑀦𑀢𑀸.

𑁧𑁨𑁭. 𑀬𑀲𑁆𑀲𑁂𑀯 𑀪𑀻𑀢𑁄 𑀦 𑀤𑀤𑀸𑀢𑀺 𑀫𑀘𑁆𑀙𑀭𑀻, 𑀢𑀤𑁂𑀯𑀸𑀤𑀤𑀢𑁄 𑀪𑀬𑀁;

𑀚𑀺𑀖𑀘𑁆𑀙𑀸 𑀘 𑀧𑀺𑀧𑀸𑀲𑀸 𑀘, 𑀬𑀲𑁆𑀲 𑀪𑀸𑀬𑀢𑀺 𑀫𑀘𑁆𑀙𑀭𑀻;

𑀢𑀫𑁂𑀯 𑀩𑀸𑀮𑀁 𑀨𑀼𑀲𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

𑁧𑁨𑁮. 𑀢𑀲𑁆𑀫𑀸 𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀁, 𑀤𑀚𑁆𑀚𑀸 𑀤𑀸𑀦𑀁 𑀫𑀮𑀸𑀪𑀺𑀪𑀽;

𑀧𑀼𑀜𑁆𑀜𑀸𑀦𑀺 𑀧𑀭𑀮𑁄𑀓𑀲𑁆𑀫𑀺𑀁, 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦𑀁.

𑁧𑁨𑁯. 𑀤𑀼𑀤𑁆𑀤𑀤𑀁 𑀤𑀤𑀫𑀸𑀦𑀸𑀦𑀁, 𑀤𑀼𑀓𑁆𑀓𑀭𑀁 𑀓𑀫𑁆𑀫 𑀓𑀼𑀩𑁆𑀩𑀢𑀁;

𑀅𑀲𑀦𑁆𑀢𑁄 𑀦𑀸𑀦𑀼𑀓𑀼𑀩𑁆𑀩𑀦𑁆𑀢𑀺, 𑀲𑀢𑀁 𑀥𑀫𑁆𑀫𑁄 𑀤𑀼𑀭𑀦𑁆𑀦𑀬𑁄.

𑁧𑁩𑁦. 𑀢𑀲𑁆𑀫𑀸 𑀲𑀢𑀜𑁆𑀘 𑀅𑀲𑀢𑀁 [𑀅𑀲𑀢𑀜𑁆𑀘 (𑀲𑀻. 𑀲𑁆𑀬𑀸. 𑀧𑀻.)], 𑀦𑀸𑀦𑀸 𑀳𑁄𑀢𑀺 𑀇𑀢𑁄 𑀕𑀢𑀺;

𑀅𑀲𑀦𑁆𑀢𑁄 𑀦𑀺𑀭𑀬𑀁 𑀬𑀦𑁆𑀢𑀺, 𑀲𑀦𑁆𑀢𑁄 𑀲𑀕𑁆𑀕𑀧𑀭𑀸𑀬𑀦𑀸.

𑁧𑁩𑁧. 𑀅𑀧𑁆𑀧𑀲𑁆𑀫𑁂𑀓𑁂 [𑀅𑀧𑁆𑀧𑀫𑁆𑀧𑁂𑀓𑁂 (𑀲𑁆𑀬𑀸.)] 𑀧𑀯𑁂𑀘𑁆𑀙𑀦𑁆𑀢𑀺, 𑀩𑀳𑀼𑀦𑁂𑀓𑁂 𑀦 𑀤𑀺𑀘𑁆𑀙𑀭𑁂;

𑀅𑀧𑁆𑀧𑀲𑁆𑀫𑀸 𑀤𑀓𑁆𑀔𑀺𑀡𑀸 𑀤𑀺𑀦𑁆𑀦𑀸, 𑀲𑀳𑀲𑁆𑀲𑁂𑀦 𑀲𑀫𑀁 𑀫𑀺𑀢𑀸.

𑁧𑁩𑁨. 𑀥𑀫𑁆𑀫𑀁 𑀘𑀭𑁂 𑀬𑁄𑀧𑀺 𑀲𑀫𑀼𑀜𑁆𑀙𑀓𑀁 𑀘𑀭𑁂, 𑀤𑀸𑀭𑀜𑁆𑀘 𑀧𑁄𑀲𑀁 𑀤𑀤𑀫𑀧𑁆𑀧𑀓𑀲𑁆𑀫𑀺𑀁 [𑀤𑀤𑀁 𑀅𑀧𑁆𑀧𑀓𑀲𑁆𑀫𑀺𑀧𑀺 (𑀧𑀻.)];

𑀲𑀢𑀁 𑀲𑀳𑀲𑁆𑀲𑀸𑀦𑀁 𑀲𑀳𑀲𑁆𑀲𑀬𑀸𑀕𑀺𑀦𑀁, 𑀓𑀮𑀫𑁆𑀧𑀺 𑀦𑀸𑀕𑁆𑀖𑀦𑁆𑀢𑀺 𑀢𑀣𑀸𑀯𑀺𑀥𑀲𑁆𑀲 𑀢𑁂.

𑁧𑁩𑁩. 𑀓𑁂𑀦𑁂𑀲 𑀬𑀜𑁆𑀜𑁄 𑀯𑀺𑀧𑀼𑀮𑁄 𑀫𑀳𑀕𑁆𑀖𑀢𑁄 [𑀫𑀳𑀕𑁆𑀕𑀢𑁄 (𑀲𑀁. 𑀦𑀺. 𑁧.𑁩𑁨)], 𑀲𑀫𑁂𑀦 𑀤𑀺𑀦𑁆𑀦𑀲𑁆𑀲 𑀦 𑀅𑀕𑁆𑀖𑀫𑁂𑀢𑀺;

𑀓𑀣𑀁 𑀲𑀢𑀁 𑀲𑀳𑀲𑁆𑀲𑀸𑀦𑀁 [𑀓𑀣𑀁 𑀲𑀳𑀲𑁆𑀲𑀸𑀦𑀁 (𑀲𑀻. 𑀲𑁆𑀬𑀸. 𑀧𑀻.)] 𑀲𑀳𑀲𑁆𑀲𑀬𑀸𑀕𑀺𑀦𑀁, 𑀓𑀮𑀫𑁆𑀧𑀺 𑀦𑀸𑀕𑁆𑀖𑀦𑁆𑀢𑀺 𑀢𑀣𑀸𑀯𑀺𑀥𑀲𑁆𑀲 𑀢𑁂.

𑁧𑁩𑁪. 𑀤𑀤𑀦𑁆𑀢𑀺 𑀳𑁂𑀓𑁂 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀸, 𑀙𑁂𑀢𑁆𑀯𑀸 [𑀛𑀢𑁆𑀯𑀸 (𑀲𑀻. 𑀧𑀻.), 𑀖𑀢𑁆𑀯𑀸 (𑀲𑁆𑀬𑀸.)] 𑀯𑀥𑀺𑀢𑁆𑀯𑀸 𑀅𑀣 𑀲𑁄𑀘𑀬𑀺𑀢𑁆𑀯𑀸;

𑀲𑀸 𑀤𑀓𑁆𑀔𑀺𑀡𑀸 𑀅𑀲𑁆𑀲𑀼𑀫𑀼𑀔𑀸 𑀲𑀤𑀡𑁆𑀟𑀸, 𑀲𑀫𑁂𑀦 𑀤𑀺𑀦𑁆𑀦𑀲𑁆𑀲 𑀦 𑀅𑀕𑁆𑀖𑀫𑁂𑀢𑀺;

𑀏𑀯𑀁 𑀲𑀢𑀁 𑀲𑀳𑀲𑁆𑀲𑀸𑀦𑀁 [𑀏𑀯𑀁 𑀲𑀳𑀲𑁆𑀲𑀸𑀦𑀁 (𑀲𑀻. 𑀲𑁆𑀬𑀸. 𑀧𑀻.)] 𑀲𑀳𑀲𑁆𑀲𑀬𑀸𑀕𑀺𑀦𑀁, 𑀓𑀮𑀫𑁆𑀧𑀺 𑀦𑀸𑀕𑁆𑀖𑀦𑁆𑀢𑀺 𑀢𑀣𑀸𑀯𑀺𑀥𑀲𑁆𑀲 𑀢𑁂𑀢𑀺.

𑀩𑀺𑀮𑀸𑀭𑀓𑁄𑀲𑀺𑀬𑀚𑀸𑀢𑀓𑀁 𑀤𑁆𑀯𑀸𑀤𑀲𑀫𑀁.