𑁪𑁪𑁯. 𑀫𑀝𑁆𑀞𑀓𑀼𑀡𑁆𑀟𑀮𑀻𑀚𑀸𑀢𑀓𑀁 (𑁧𑁧)

𑁧𑁧𑁫. 𑀅𑀮𑀗𑁆𑀓𑀢𑁄 𑀫𑀝𑁆𑀞𑀓𑀼𑀡𑁆𑀟𑀮𑀻 [𑀫𑀝𑁆𑀝𑀓𑀼𑀡𑁆𑀟𑀮𑀻 (𑀲𑀻. 𑀧𑀻.)], 𑀫𑀸𑀮𑀥𑀸𑀭𑀻 [𑀫𑀸𑀮𑀪𑀸𑀭𑀻 (𑀲𑀻. 𑀧𑀻.)] 𑀳𑀭𑀺𑀘𑀦𑁆𑀤𑀦𑀼𑀲𑁆𑀲𑀤𑁄;

𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀲𑀺, 𑀯𑀦𑀫𑀚𑁆𑀛𑁂 𑀓𑀺𑀁 𑀤𑀼𑀓𑁆𑀔𑀺𑀢𑁄 𑀢𑀼𑀯𑀁.

𑁧𑁧𑁬. 𑀲𑁄𑀯𑀡𑁆𑀡𑀫𑀬𑁄 𑀧𑀪𑀲𑁆𑀲𑀭𑁄, 𑀉𑀧𑁆𑀧𑀦𑁆𑀦𑁄 𑀭𑀣𑀧𑀜𑁆𑀚𑀭𑁄 𑀫𑀫;

𑀢𑀲𑁆𑀲 𑀘𑀓𑁆𑀓𑀬𑀼𑀕𑀁 𑀦 𑀯𑀺𑀦𑁆𑀤𑀸𑀫𑀺, 𑀢𑁂𑀦 𑀤𑀼𑀓𑁆𑀔𑁂𑀦 𑀚𑀳𑀸𑀫𑀺 𑀚𑀻𑀯𑀺𑀢𑀁.

𑁧𑁧𑁭. 𑀲𑁄𑀯𑀡𑁆𑀡𑀫𑀬𑀁 𑀫𑀡𑀻𑀫𑀬𑀁, 𑀮𑁄𑀳𑀫𑀬𑀁 𑀅𑀣 𑀭𑀽𑀧𑀺𑀬𑀸𑀫𑀬𑀁;

[𑀆𑀘𑀺𑀓𑁆𑀔 𑀫𑁂 𑀪𑀤𑁆𑀤𑀫𑀸𑀡𑀯 (𑀯𑀺. 𑀯. 𑁧𑁨𑁦𑁯)] 𑀧𑀸𑀯𑀤 𑀭𑀣𑀁 𑀓𑀭𑀺𑀲𑁆𑀲𑀸𑀫𑀺 [𑀓𑀸𑀭𑀬𑀸𑀫𑀺 (𑀲𑀻. 𑀧𑀻.)] 𑀢𑁂 [𑀆𑀘𑀺𑀓𑁆𑀔 𑀫𑁂 𑀪𑀤𑁆𑀤𑀫𑀸𑀡𑀯 (𑀯𑀺. 𑀯. 𑁧𑁨𑁦𑁯)], 𑀘𑀓𑁆𑀓𑀬𑀼𑀕𑀁 𑀧𑀝𑀺𑀧𑀸𑀤𑀬𑀸𑀫𑀺 𑀢𑀁.

𑁧𑁧𑁮. 𑀲𑁄 [𑀅𑀣 (𑀲𑁆𑀬𑀸.)] 𑀫𑀸𑀡𑀯𑁄 𑀢𑀲𑁆𑀲 𑀧𑀸𑀯𑀤𑀺, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 [𑀘𑀦𑁆𑀤𑀺𑀫𑀲𑀽𑀭𑀺𑀬𑀸 (𑀲𑁆𑀬𑀸.)] 𑀉𑀪𑀬𑁂𑀢𑁆𑀣 𑀪𑀸𑀢𑀭𑁄 [𑀤𑀺𑀲𑁆𑀲𑀭𑁂 (𑀯𑀺. 𑀯. 𑁧𑁨𑁧𑁦)];

𑀲𑁄𑀯𑀡𑁆𑀡𑀫𑀬𑁄 𑀭𑀣𑁄 𑀫𑀫, 𑀢𑁂𑀦 𑀘𑀓𑁆𑀓𑀬𑀼𑀕𑁂𑀦 𑀲𑁄𑀪𑀢𑀺.

𑁧𑁧𑁯. 𑀩𑀸𑀮𑁄 𑀔𑁄 𑀢𑁆𑀯𑀁𑀲𑀺 𑀫𑀸𑀡𑀯, 𑀬𑁄 𑀢𑁆𑀯𑀁 𑀧𑀢𑁆𑀣𑀬𑀲𑁂 𑀅𑀧𑀢𑁆𑀣𑀺𑀬𑀁;

𑀫𑀜𑁆𑀜𑀸𑀫𑀺 𑀢𑀼𑀯𑀁 𑀫𑀭𑀺𑀲𑁆𑀲𑀲𑀺, 𑀦 𑀳𑀺 𑀢𑁆𑀯𑀁 𑀮𑀘𑁆𑀙𑀲𑀺 𑀘𑀦𑁆𑀤𑀲𑀽𑀭𑀺𑀬𑁂.

𑁧𑁨𑁦. 𑀕𑀫𑀦𑀸𑀕𑀫𑀦𑀫𑁆𑀧𑀺 𑀤𑀺𑀲𑁆𑀲𑀢𑀺, 𑀯𑀡𑁆𑀡𑀥𑀸𑀢𑀼 𑀉𑀪𑀬𑁂𑀢𑁆𑀣 𑀯𑀻𑀣𑀺𑀬𑁄;

𑀧𑁂𑀢𑁄 𑀧𑀦 𑀦𑁂𑀯 𑀤𑀺𑀲𑁆𑀲𑀢𑀺, 𑀓𑁄 𑀦𑀼 𑀔𑁄 [𑀓𑁄 𑀦𑀺𑀥 (𑀯𑀺. 𑀯. 𑁧𑁨𑁧𑁨)] 𑀓𑀦𑁆𑀤𑀢𑀁 𑀩𑀸𑀮𑁆𑀬𑀢𑀭𑁄.

𑁧𑁨𑁧. 𑀲𑀘𑁆𑀘𑀁 𑀔𑁄 𑀯𑀤𑁂𑀲𑀺 𑀫𑀸𑀡𑀯, 𑀅𑀳𑀫𑁂𑀯 𑀓𑀦𑁆𑀤𑀢𑀁 𑀩𑀸𑀮𑁆𑀬𑀢𑀭𑁄;

𑀘𑀦𑁆𑀤𑀁 𑀯𑀺𑀬 𑀤𑀸𑀭𑀓𑁄 𑀭𑀼𑀤𑀁, 𑀧𑁂𑀢𑀁 𑀓𑀸𑀮𑀓𑀢𑀸𑀪𑀺𑀧𑀢𑁆𑀣𑀬𑁂.

𑁧𑁨𑁨. 𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁧𑁨𑁩. 𑀅𑀩𑁆𑀩𑀳𑀻 [𑀅𑀩𑁆𑀩𑀼𑀳𑀺 (𑀲𑁆𑀬𑀸.), 𑀅𑀩𑁆𑀪𑀼𑀴𑁆𑀳𑀁 (𑀓.)] 𑀯𑀢 𑀫𑁂 𑀲𑀮𑁆𑀮𑀁, 𑀬𑀫𑀸𑀲𑀺 𑀳𑀤𑀬𑀲𑁆𑀲𑀺𑀢𑀁 [𑀲𑁄𑀓𑀁 𑀳𑀤𑀬𑀦𑀺𑀲𑁆𑀲𑀺𑀢𑀁 (𑀯𑀺. 𑀯. 𑁧𑁨𑁧𑁫)];

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀼𑀢𑁆𑀢𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁧𑁨𑁪. 𑀲𑁄𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀯𑀻𑀢𑀲𑁄𑀓𑁄 𑀅𑀦𑀸𑀯𑀺𑀮𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀫𑀸𑀡𑀯𑀸𑀢𑀺.

𑀫𑀝𑁆𑀞𑀓𑀼𑀡𑁆𑀟𑀮𑀻𑀚𑀸𑀢𑀓𑀁 𑀏𑀓𑀸𑀤𑀲𑀫𑀁.