𑁪𑁪𑁮. 𑀓𑀼𑀓𑁆𑀓𑀼𑀝𑀚𑀸𑀢𑀓𑀁 (𑁧𑁦)

𑁧𑁦𑁪. 𑀦𑀸𑀲𑁆𑀫𑀲𑁂 𑀓𑀢𑀧𑀸𑀧𑀫𑁆𑀳𑀺, 𑀦𑀸𑀲𑁆𑀫𑀲𑁂 𑀅𑀮𑀺𑀓𑀯𑀸𑀤𑀺𑀦𑁂;

𑀦𑀸𑀲𑁆𑀫𑀲𑁂 𑀅𑀢𑁆𑀢𑀢𑁆𑀣𑀧𑀜𑁆𑀜𑀫𑁆𑀳𑀺, 𑀅𑀢𑀺𑀲𑀦𑁆𑀢𑁂𑀧𑀺 𑀦𑀸𑀲𑁆𑀫𑀲𑁂.

𑁧𑁦𑁫. 𑀪𑀯𑀦𑁆𑀢𑀺 𑀳𑁂𑀓𑁂 𑀧𑀼𑀭𑀺𑀲𑀸, 𑀕𑁄𑀧𑀺𑀧𑀸𑀲𑀺𑀓𑀚𑀸𑀢𑀺𑀓𑀸 [𑀕𑁄𑀧𑀺𑀧𑀸𑀲𑀓𑀚𑀸𑀢𑀺𑀓𑀸 (𑀲𑀻. 𑀲𑁆𑀬𑀸. 𑀧𑀻.)];

𑀖𑀲𑀦𑁆𑀢𑀺 𑀫𑀜𑁆𑀜𑁂 𑀫𑀺𑀢𑁆𑀢𑀸𑀦𑀺, 𑀯𑀸𑀘𑀸𑀬 𑀦 𑀘 𑀓𑀫𑁆𑀫𑀼𑀦𑀸.

𑁧𑁦𑁬. 𑀲𑀼𑀓𑁆𑀔𑀜𑁆𑀚𑀮𑀺𑀧𑀕𑁆𑀕𑀳𑀺𑀢𑀸, 𑀯𑀸𑀘𑀸𑀬 𑀧𑀮𑀺𑀕𑀼𑀡𑁆𑀞𑀺𑀢𑀸;

𑀫𑀦𑀼𑀲𑁆𑀲𑀨𑁂𑀕𑁆𑀕𑀽 𑀦𑀸𑀲𑀻𑀤𑁂, 𑀬𑀲𑁆𑀫𑀺𑀁 𑀦𑀢𑁆𑀣𑀺 𑀓𑀢𑀜𑁆𑀜𑀼𑀢𑀸.

𑁧𑁦𑁭. 𑀦 𑀳𑀺 𑀅𑀜𑁆𑀜𑀜𑁆𑀜𑀘𑀺𑀢𑁆𑀢𑀸𑀦𑀁, 𑀇𑀢𑁆𑀣𑀻𑀦𑀁 𑀧𑀼𑀭𑀺𑀲𑀸𑀦 𑀯𑀸;

𑀦𑀸𑀦𑀸𑀯𑀺𑀓𑀢𑁆𑀯𑀸 [𑀦𑀸𑀦𑀸𑀯 𑀓𑀢𑁆𑀯𑀸 (𑀲𑀻. 𑀧𑀻.)] 𑀲𑀁𑀲𑀕𑁆𑀕𑀁, 𑀢𑀸𑀤𑀺𑀲𑀫𑁆𑀧𑀺 𑀘 𑀦𑀸𑀲𑁆𑀫𑀲𑁂 [𑀢𑀸𑀤𑀺𑀲𑀫𑁆𑀧𑀺 𑀦 𑀯𑀺𑀲𑁆𑀲𑀲𑁂 (𑀲𑁆𑀬𑀸.)].

𑁧𑁦𑁮. 𑀅𑀦𑀭𑀺𑀬𑀓𑀫𑁆𑀫𑀫𑁄𑀓𑁆𑀓𑀦𑁆𑀢𑀁, 𑀅𑀣𑁂𑀢𑀁 [𑀅𑀢𑁆𑀣𑁂𑀢𑀁 (𑀲𑀻. 𑀲𑁆𑀬𑀸. 𑀧𑀻.)] 𑀲𑀩𑁆𑀩𑀖𑀸𑀢𑀺𑀦𑀁;

𑀦𑀺𑀲𑀺𑀢𑀁𑀯 𑀧𑀝𑀺𑀘𑁆𑀙𑀦𑁆𑀦𑀁, 𑀢𑀸𑀤𑀺𑀲𑀫𑁆𑀧𑀺 𑀘 𑀦𑀸𑀲𑁆𑀫𑀲𑁂.

𑁧𑁦𑁯. 𑀫𑀺𑀢𑁆𑀢𑀭𑀽𑀧𑁂𑀦𑀺𑀥𑁂𑀓𑀘𑁆𑀘𑁂, 𑀲𑀸𑀔𑀮𑁆𑀬𑁂𑀦 𑀅𑀘𑁂𑀢𑀲𑀸;

𑀯𑀺𑀯𑀺𑀥𑁂𑀳𑀺 𑀉𑀧𑀸𑀬𑀦𑁆𑀢𑀺, 𑀢𑀸𑀤𑀺𑀲𑀫𑁆𑀧𑀺 𑀘 𑀦𑀸𑀲𑁆𑀫𑀲𑁂.

𑁧𑁧𑁦. 𑀆𑀫𑀺𑀲𑀁 𑀯𑀸 𑀥𑀦𑀁 𑀯𑀸𑀧𑀺, 𑀬𑀢𑁆𑀣 𑀧𑀲𑁆𑀲𑀢𑀺 𑀢𑀸𑀤𑀺𑀲𑁄;

𑀤𑀼𑀩𑁆𑀪𑀺𑀁 𑀓𑀭𑁄𑀢𑀺 𑀤𑀼𑀫𑁆𑀫𑁂𑀥𑁄, 𑀢𑀜𑁆𑀘 𑀳𑀦𑁆𑀢𑁆𑀯𑀸𑀦 [𑀛𑀸𑀢𑁆𑀯𑀸𑀦 (𑀲𑀻. 𑀧𑀻.), 𑀳𑀺𑀢𑁆𑀯𑀸𑀦 (𑀲𑁆𑀬𑀸.)] 𑀕𑀘𑁆𑀙𑀢𑀺.

𑁧𑁧𑁧. 𑀫𑀺𑀢𑁆𑀢𑀭𑀽𑀧𑁂𑀦 𑀩𑀳𑀯𑁄, 𑀙𑀦𑁆𑀦𑀸 𑀲𑁂𑀯𑀦𑁆𑀢𑀺 𑀲𑀢𑁆𑀢𑀯𑁄;

𑀚𑀳𑁂 𑀓𑀸𑀧𑀼𑀭𑀺𑀲𑁂 𑀳𑁂𑀢𑁂, 𑀓𑀼𑀓𑁆𑀓𑀼𑀝𑁄 𑀯𑀺𑀬 𑀲𑁂𑀦𑀓𑀁.

𑁧𑁧𑁨. 𑀬𑁄 𑀘 [𑀬𑁄𑀥 (𑀚𑀸. 𑁧.𑁮.𑁨𑁫 𑀲𑀼𑀮𑀲𑀸𑀚𑀸𑀢𑀓𑁂)] 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀦 𑀔𑀺𑀧𑁆𑀧𑀫𑀦𑀼𑀩𑀼𑀚𑁆𑀛𑀢𑀺;

𑀅𑀫𑀺𑀢𑁆𑀢𑀯𑀲𑀫𑀦𑁆𑀯𑁂𑀢𑀺, 𑀧𑀘𑁆𑀙𑀸 𑀘 𑀅𑀦𑀼𑀢𑀧𑁆𑀧𑀢𑀺.

𑁧𑁧𑁩. 𑀬𑁄 𑀘 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀔𑀺𑀧𑁆𑀧𑀫𑁂𑀯 𑀦𑀺𑀩𑁄𑀥𑀢𑀺;

𑀫𑀼𑀘𑁆𑀘𑀢𑁂 𑀲𑀢𑁆𑀢𑀼𑀲𑀫𑁆𑀩𑀸𑀥𑀸, 𑀓𑀼𑀓𑁆𑀓𑀼𑀝𑁄 𑀯𑀺𑀬 𑀲𑁂𑀦𑀓𑀸;

𑁧𑁧𑁪. 𑀢𑀁 𑀢𑀸𑀤𑀺𑀲𑀁 𑀓𑀽𑀝𑀫𑀺𑀯𑁄𑀟𑁆𑀟𑀺𑀢𑀁 𑀯𑀦𑁂, 𑀅𑀥𑀫𑁆𑀫𑀺𑀓𑀁 𑀦𑀺𑀘𑁆𑀘𑀯𑀺𑀥𑀁𑀲𑀓𑀸𑀭𑀺𑀦𑀁;

𑀆𑀭𑀸 𑀯𑀺𑀯𑀚𑁆𑀚𑁂𑀬𑁆𑀬 𑀦𑀭𑁄 𑀯𑀺𑀘𑀓𑁆𑀔𑀡𑁄, 𑀲𑁂𑀦𑀁 𑀬𑀣𑀸 𑀓𑀼𑀓𑁆𑀓𑀼𑀝𑁄 𑀯𑀁𑀲𑀓𑀸𑀦𑀦𑁂𑀢𑀺.

𑀓𑀼𑀓𑁆𑀓𑀼𑀝𑀚𑀸𑀢𑀓𑀁 𑀤𑀲𑀫𑀁.