𑁪. 𑀪𑀺𑀲𑀘𑀭𑀺𑀬𑀸

𑁩𑁪. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀓𑀸𑀲𑀻𑀦𑀁 𑀧𑀼𑀭𑀯𑀭𑀼𑀢𑁆𑀢𑀫𑁂;

𑀪𑀕𑀺𑀦𑀻 𑀘 𑀪𑀸𑀢𑀭𑁄 𑀲𑀢𑁆𑀢, 𑀦𑀺𑀩𑁆𑀩𑀢𑁆𑀢𑀸 𑀲𑁄𑀢𑁆𑀣𑀺𑀬𑁂 𑀓𑀼𑀮𑁂.

𑁩𑁫. ‘‘𑀏𑀢𑁂𑀲𑀁 𑀧𑀼𑀩𑁆𑀩𑀚𑁄 𑀆𑀲𑀺𑀁, 𑀳𑀺𑀭𑀻𑀲𑀼𑀓𑁆𑀓𑀫𑀼𑀧𑀸𑀕𑀢𑁄;

𑀪𑀯𑀁 𑀤𑀺𑀲𑁆𑀯𑀸𑀦 𑀪𑀬𑀢𑁄, 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑁄 𑀅𑀳𑀁.

𑁩𑁬. ‘‘𑀫𑀸𑀢𑀸𑀧𑀺𑀢𑀽𑀳𑀺 𑀧𑀳𑀺𑀢𑀸, 𑀲𑀳𑀸𑀬𑀸 𑀏𑀓𑀫𑀸𑀦𑀲𑀸;

𑀓𑀸𑀫𑁂𑀳𑀺 𑀫𑀁 𑀦𑀺𑀫𑀦𑁆𑀢𑁂𑀦𑁆𑀢𑀺, ‘𑀓𑀼𑀮𑀯𑀁𑀲𑀁 𑀥𑀭𑁂𑀳𑀺’𑀢𑀺.

𑁩𑁭. ‘‘𑀬𑀁 𑀢𑁂𑀲𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀕𑀺𑀳𑀻𑀥𑀫𑁆𑀫𑁂 𑀲𑀼𑀔𑀸𑀯𑀳𑀁;

𑀢𑀁 𑀫𑁂 𑀅𑀳𑁄𑀲𑀺 𑀓𑀞𑀺𑀦𑀁, 𑀢𑀢𑁆𑀢 [𑀲𑀦𑁆𑀢𑀢𑁆𑀢 (𑀓.)] 𑀨𑀸𑀮𑀲𑀫𑀁 𑀯𑀺𑀬.

𑁩𑁮. ‘‘𑀢𑁂 𑀫𑀁 𑀢𑀤𑀸 𑀉𑀓𑁆𑀔𑀺𑀧𑀦𑁆𑀢𑀁, 𑀧𑀼𑀘𑁆𑀙𑀺𑀁𑀲𑀼 𑀧𑀢𑁆𑀣𑀺𑀢𑀁 𑀫𑀫;

‘𑀓𑀺𑀁 𑀢𑁆𑀯𑀁 𑀧𑀢𑁆𑀣𑀬𑀲𑁂 𑀲𑀫𑁆𑀫, 𑀬𑀤𑀺 𑀓𑀸𑀫𑁂 𑀦 𑀪𑀼𑀜𑁆𑀚𑀲𑀺’.

𑁩𑁯. ‘‘𑀢𑁂𑀲𑀸𑀳𑀁 𑀏𑀯𑀫𑀯𑀘𑀁, 𑀅𑀢𑁆𑀣𑀓𑀸𑀫𑁄 𑀳𑀺𑀢𑁂𑀲𑀺𑀦𑀁;

‘𑀦𑀸𑀳𑀁 𑀧𑀢𑁆𑀣𑁂𑀫𑀺 𑀕𑀺𑀳𑀻𑀪𑀸𑀯𑀁, 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑁄 𑀅𑀳𑀁’.

𑁪𑁦. ‘‘𑀢𑁂 𑀫𑀬𑁆𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀧𑀺𑀢𑀼𑀫𑀸𑀢𑀼 𑀘 𑀲𑀸𑀯𑀬𑀼𑀁;

𑀫𑀸𑀢𑀸𑀧𑀺𑀢𑀸 𑀏𑀯𑀫𑀸𑀳𑀼, ‘𑀲𑀩𑁆𑀩𑁂𑀯 𑀧𑀩𑁆𑀩𑀚𑀸𑀫 𑀪𑁄’.

𑁪𑁧. ‘‘𑀉𑀪𑁄 𑀫𑀸𑀢𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀕𑀺𑀦𑀻 𑀘 𑀲𑀢𑁆𑀢 𑀪𑀸𑀢𑀭𑁄;

𑀅𑀫𑀺𑀢𑀥𑀦𑀁 𑀙𑀟𑁆𑀟𑀬𑀺𑀢𑁆𑀯𑀸, 𑀧𑀸𑀯𑀺𑀲𑀺𑀫𑁆𑀳𑀸 𑀫𑀳𑀸𑀯𑀦’’𑀦𑁆𑀢𑀺.

𑀪𑀺𑀲𑀘𑀭𑀺𑀬𑀁 𑀘𑀢𑀼𑀢𑁆𑀣𑀁.