𑁩. 𑀬𑀼𑀥𑀜𑁆𑀚𑀬𑀯𑀕𑁆𑀕𑁄

𑁧. 𑀬𑀼𑀥𑀜𑁆𑀚𑀬𑀘𑀭𑀺𑀬𑀸

𑁧. ‘‘𑀬𑀤𑀸𑀳𑀁 𑀅𑀫𑀺𑀢𑀬𑀲𑁄, 𑀭𑀸𑀚𑀧𑀼𑀢𑁆𑀢𑁄 𑀬𑀼𑀥𑀜𑁆𑀚𑀬𑁄;

𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀁 𑀲𑀽𑀭𑀺𑀬𑀸𑀢𑀧𑁂, 𑀧𑀢𑀺𑀢𑀁 𑀤𑀺𑀲𑁆𑀯𑀸𑀦 𑀲𑀁𑀯𑀺𑀚𑀺𑀁.

𑁨. ‘‘𑀢𑀜𑁆𑀜𑁂𑀯𑀸𑀥𑀺𑀧𑀢𑀺𑀁 𑀓𑀢𑁆𑀯𑀸, 𑀲𑀁𑀯𑁂𑀕𑀫𑀦𑀼𑀩𑁆𑀭𑀽𑀳𑀬𑀺𑀁;

𑀫𑀸𑀢𑀸𑀧𑀺𑀢𑀽 𑀘 𑀯𑀦𑁆𑀤𑀺𑀢𑁆𑀯𑀸, 𑀧𑀩𑁆𑀩𑀚𑁆𑀚𑀫𑀦𑀼𑀬𑀸𑀘𑀳𑀁.

𑁩. ‘‘𑀬𑀸𑀘𑀦𑁆𑀢𑀺 𑀫𑀁 𑀧𑀜𑁆𑀚𑀮𑀺𑀓𑀸, 𑀲𑀦𑁂𑀕𑀫𑀸 𑀲𑀭𑀝𑁆𑀞𑀓𑀸;

‘𑀅𑀚𑁆𑀚𑁂𑀯 𑀧𑀼𑀢𑁆𑀢 𑀧𑀝𑀺𑀧𑀚𑁆𑀚, 𑀇𑀤𑁆𑀥𑀁 𑀨𑀻𑀢𑀁 𑀫𑀳𑀸𑀫𑀳𑀺𑀁’.

𑁪. ‘‘𑀲𑀭𑀸𑀚𑀓𑁂 𑀲𑀳𑁄𑀭𑁄𑀥𑁂, 𑀲𑀦𑁂𑀕𑀫𑁂 𑀲𑀭𑀝𑁆𑀞𑀓𑁂;

𑀓𑀭𑀼𑀡𑀁 𑀧𑀭𑀺𑀤𑁂𑀯𑀦𑁆𑀢𑁂, 𑀅𑀦𑀧𑁂𑀓𑁆𑀔𑁄𑀯 𑀧𑀭𑀺𑀘𑁆𑀘𑀚𑀺𑀁.

𑁫. ‘‘𑀓𑁂𑀯𑀮𑀁 𑀧𑀣𑀯𑀺𑀁 𑀭𑀚𑁆𑀚𑀁, 𑀜𑀸𑀢𑀺𑀧𑀭𑀺𑀚𑀦𑀁 𑀬𑀲𑀁;

𑀘𑀚𑀫𑀸𑀦𑁄 𑀦 𑀘𑀺𑀦𑁆𑀢𑁂𑀲𑀺𑀁, 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸.

𑁬. ‘‘𑀫𑀸𑀢𑀸𑀧𑀺𑀢𑀸 𑀦 𑀫𑁂 𑀤𑁂𑀲𑁆𑀲𑀸, 𑀦𑀧𑀺 𑀫𑁂 𑀤𑁂𑀲𑁆𑀲𑀁 𑀫𑀳𑀸𑀬𑀲𑀁;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀭𑀚𑁆𑀚𑀁 𑀧𑀭𑀺𑀘𑁆𑀘𑀚𑀺’’𑀦𑁆𑀢𑀺.

𑀬𑀼𑀥𑀜𑁆𑀚𑀬𑀘𑀭𑀺𑀬𑀁 𑀧𑀞𑀫𑀁.

𑁨. 𑀲𑁄𑀫𑀦𑀲𑁆𑀲𑀘𑀭𑀺𑀬𑀸

𑁭. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀇𑀦𑁆𑀤𑀧𑀢𑁆𑀣𑁂 𑀧𑀼𑀭𑀼𑀢𑁆𑀢𑀫𑁂;

𑀓𑀸𑀫𑀺𑀢𑁄 𑀤𑀬𑀺𑀢𑁄 𑀧𑀼𑀢𑁆𑀢𑁄, 𑀲𑁄𑀫𑀦𑀲𑁆𑀲𑁄𑀢𑀺 𑀯𑀺𑀲𑁆𑀲𑀼𑀢𑁄.

𑁮. ‘‘𑀲𑀻𑀮𑀯𑀸 𑀕𑀼𑀡𑀲𑀫𑁆𑀧𑀦𑁆𑀦𑁄, 𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑀯𑀸;

𑀯𑀼𑀟𑁆𑀠𑀸𑀧𑀘𑀸𑀬𑀻 𑀳𑀺𑀭𑀻𑀫𑀸, 𑀲𑀗𑁆𑀕𑀳𑁂𑀲𑀼 𑀘 𑀓𑁄𑀯𑀺𑀤𑁄.

𑁯. ‘‘𑀢𑀲𑁆𑀲 𑀭𑀜𑁆𑀜𑁄 𑀧𑀢𑀺𑀓𑀭𑁄, 𑀅𑀳𑁄𑀲𑀺 𑀓𑀼𑀳𑀓𑀢𑀸𑀧𑀲𑁄;

𑀆𑀭𑀸𑀫𑀁 𑀫𑀸𑀮𑀸𑀯𑀘𑁆𑀙𑀜𑁆𑀘, 𑀭𑁄𑀧𑀬𑀺𑀢𑁆𑀯𑀸𑀦 𑀚𑀻𑀯𑀢𑀺.

𑁧𑁦. ‘‘𑀢𑀫𑀳𑀁 𑀤𑀺𑀲𑁆𑀯𑀸𑀦 𑀓𑀼𑀳𑀓𑀁, 𑀣𑀼𑀲𑀭𑀸𑀲𑀺𑀁𑀯 𑀅𑀢𑀡𑁆𑀟𑀼𑀮𑀁;

𑀤𑀼𑀫𑀁𑀯 𑀅𑀦𑁆𑀢𑁄 𑀲𑀼𑀲𑀺𑀭𑀁, 𑀓𑀤𑀮𑀺𑀁𑀯 𑀅𑀲𑀸𑀭𑀓𑀁.

𑁧𑁧. ‘‘𑀦𑀢𑁆𑀣𑀺𑀫𑀲𑁆𑀲 𑀲𑀢𑀁 𑀥𑀫𑁆𑀫𑁄, 𑀲𑀸𑀫𑀜𑁆𑀜𑀸𑀧𑀕𑀢𑁄 𑀅𑀬𑀁;

𑀳𑀺𑀭𑀻𑀲𑀼𑀓𑁆𑀓𑀥𑀫𑁆𑀫𑀚𑀳𑀺𑀢𑁄, 𑀚𑀻𑀯𑀺𑀢𑀯𑀼𑀢𑁆𑀢𑀺𑀓𑀸𑀭𑀡𑀸.

𑁧𑁨. ‘‘𑀓𑀼𑀧𑀺𑀢𑁄 𑀅𑀳𑀼 [𑀅𑀳𑁄𑀲𑀺 (𑀲𑀻.), 𑀆𑀲𑀺 (𑀲𑁆𑀬𑀸.)] 𑀧𑀘𑁆𑀘𑀦𑁆𑀢𑁄, 𑀅𑀝𑀯𑀻𑀳𑀺 𑀧𑀭𑀦𑁆𑀢𑀺𑀳𑀺;

𑀢𑀁 𑀦𑀺𑀲𑁂𑀥𑁂𑀢𑀼𑀁 𑀕𑀘𑁆𑀙𑀦𑁆𑀢𑁄, 𑀅𑀦𑀼𑀲𑀸𑀲𑀺 𑀧𑀺𑀢𑀸 𑀫𑀫𑀁.

𑁧𑁩. ‘‘‘𑀫𑀸 𑀧𑀫𑀚𑁆𑀚𑀺 𑀢𑀼𑀯𑀁 𑀢𑀸𑀢, 𑀚𑀝𑀺𑀮𑀁 𑀉𑀕𑁆𑀕𑀢𑀸𑀧𑀦𑀁;

𑀬𑀤𑀺𑀘𑁆𑀙𑀓𑀁 𑀧𑀯𑀢𑁆𑀢𑁂𑀳𑀺, 𑀲𑀩𑁆𑀩𑀓𑀸𑀫𑀤𑀤𑁄 𑀳𑀺 𑀲𑁄’.

𑁧𑁪. ‘‘𑀢𑀫𑀳𑀁 𑀕𑀦𑁆𑀢𑁆𑀯𑀸𑀦𑀼𑀧𑀝𑁆𑀞𑀸𑀦𑀁, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁;

‘𑀓𑀘𑁆𑀘𑀺 𑀢𑁂 𑀕𑀳𑀧𑀢𑀺 𑀓𑀼𑀲𑀮𑀁, 𑀓𑀺𑀁 𑀯𑀸 𑀢𑁂 𑀆𑀳𑀭𑀻𑀬𑀢𑀼’.

𑁧𑁫. ‘‘𑀢𑁂𑀦 𑀲𑁄 𑀓𑀼𑀧𑀺𑀢𑁄 𑀆𑀲𑀺, 𑀓𑀼𑀳𑀓𑁄 𑀫𑀸𑀦𑀦𑀺𑀲𑁆𑀲𑀺𑀢𑁄;

‘𑀖𑀸𑀢𑀸𑀧𑁂𑀫𑀺 𑀢𑀼𑀯𑀁 𑀅𑀚𑁆𑀚, 𑀭𑀝𑁆𑀞𑀸 𑀧𑀩𑁆𑀩𑀸𑀚𑀬𑀸𑀫𑀺 𑀯𑀸’.

𑁧𑁬. ‘‘𑀦𑀺𑀲𑁂𑀥𑀬𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀁, 𑀭𑀸𑀚𑀸 𑀓𑀼𑀳𑀓𑀫𑀩𑁆𑀭𑀯𑀺;

‘𑀓𑀘𑁆𑀘𑀺 𑀢𑁂 𑀪𑀦𑁆𑀢𑁂 𑀔𑀫𑀦𑀻𑀬𑀁, 𑀲𑀫𑁆𑀫𑀸𑀦𑁄 𑀢𑁂 𑀧𑀯𑀢𑁆𑀢𑀺𑀢𑁄’.

𑁧𑁭. ‘‘𑀢𑀲𑁆𑀲 𑀆𑀘𑀺𑀓𑁆𑀔𑀢𑀻 𑀧𑀸𑀧𑁄, 𑀓𑀼𑀫𑀸𑀭𑁄 𑀬𑀣𑀸 𑀦𑀸𑀲𑀺𑀬𑁄;

𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀆𑀡𑀸𑀧𑁂𑀲𑀺 𑀫𑀳𑀻𑀧𑀢𑀺.

𑁧𑁮. ‘‘‘𑀲𑀻𑀲𑀁 𑀢𑀢𑁆𑀣𑁂𑀯 𑀙𑀺𑀦𑁆𑀤𑀺𑀢𑁆𑀯𑀸, 𑀓𑀢𑁆𑀯𑀸𑀦 𑀘𑀢𑀼𑀔𑀡𑁆𑀟𑀺𑀓𑀁;

𑀭𑀣𑀺𑀬𑀸 𑀭𑀣𑀺𑀬𑀁 𑀤𑀲𑁆𑀲𑁂𑀣, 𑀲𑀸 𑀕𑀢𑀺 𑀚𑀝𑀺𑀮𑀳𑀻𑀴𑀺𑀢𑀸’.

𑁧𑁯. ‘‘𑀢𑀢𑁆𑀣 𑀓𑀸𑀭𑀡𑀺𑀓𑀸 𑀕𑀦𑁆𑀢𑁆𑀯𑀸, 𑀘𑀡𑁆𑀟𑀸 𑀮𑀼𑀤𑁆𑀤𑀸 𑀅𑀓𑀸𑀭𑀼𑀡𑀸;

𑀫𑀸𑀢𑀼𑀅𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲, 𑀆𑀓𑀟𑁆𑀠𑀺𑀢𑁆𑀯𑀸 𑀦𑀬𑀦𑁆𑀢𑀺 𑀫𑀁.

𑁨𑁦. ‘‘𑀢𑁂𑀲𑀸𑀳𑀁 𑀏𑀯𑀫𑀯𑀘𑀁, 𑀩𑀦𑁆𑀥𑀢𑀁 𑀕𑀸𑀴𑁆𑀳𑀩𑀦𑁆𑀥𑀦𑀁;

‘𑀭𑀜𑁆𑀜𑁄 𑀤𑀲𑁆𑀲𑁂𑀣 𑀫𑀁 𑀔𑀺𑀧𑁆𑀧𑀁, 𑀭𑀸𑀚𑀓𑀺𑀭𑀺𑀬𑀸𑀦𑀺 𑀅𑀢𑁆𑀣𑀺 𑀫𑁂’.

𑁨𑁧. ‘‘𑀢𑁂 𑀫𑀁 𑀭𑀜𑁆𑀜𑁄 𑀤𑀲𑁆𑀲𑀬𑀺𑀁𑀲𑀼, 𑀧𑀸𑀧𑀲𑁆𑀲 𑀧𑀸𑀧𑀲𑁂𑀯𑀺𑀦𑁄;

𑀤𑀺𑀲𑁆𑀯𑀸𑀦 𑀢𑀁 𑀲𑀜𑁆𑀜𑀸𑀧𑁂𑀲𑀺𑀁, 𑀫𑀫𑀜𑁆𑀘 𑀯𑀲𑀫𑀸𑀦𑀬𑀺𑀁.

𑁨𑁨. ‘‘𑀲𑁄 𑀫𑀁 𑀢𑀢𑁆𑀣 𑀔𑀫𑀸𑀧𑁂𑀲𑀺, 𑀫𑀳𑀸𑀭𑀚𑁆𑀚𑀫𑀤𑀸𑀲𑀺 𑀫𑁂;

𑀲𑁄𑀳𑀁 𑀢𑀫𑀁 𑀤𑀸𑀮𑀬𑀺𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁨𑁩. ‘‘𑀦 𑀫𑁂 𑀤𑁂𑀲𑁆𑀲𑀁 𑀫𑀳𑀸𑀭𑀚𑁆𑀚𑀁, 𑀓𑀸𑀫𑀪𑁄𑀕𑁄 𑀦 𑀤𑁂𑀲𑁆𑀲𑀺𑀬𑁄;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀭𑀚𑁆𑀚𑀁 𑀧𑀭𑀺𑀘𑁆𑀘𑀚𑀺’’𑀦𑁆𑀢𑀺.

𑀲𑁄𑀫𑀦𑀲𑁆𑀲𑀘𑀭𑀺𑀬𑀁 𑀤𑀼𑀢𑀺𑀬𑀁.

𑁩. 𑀅𑀬𑁄𑀖𑀭𑀘𑀭𑀺𑀬𑀸

𑁨𑁪. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀓𑀸𑀲𑀺𑀭𑀸𑀚𑀲𑁆𑀲 𑀅𑀢𑁆𑀭𑀚𑁄;

𑀅𑀬𑁄𑀖𑀭𑀫𑁆𑀳𑀺 𑀲𑀁𑀯𑀟𑁆𑀠𑁄, 𑀦𑀸𑀫𑁂𑀦𑀸𑀲𑀺 𑀅𑀬𑁄𑀖𑀭𑁄.

𑁨𑁫. ‘‘𑀤𑀼𑀓𑁆𑀔𑁂𑀦 𑀚𑀻𑀯𑀺𑀢𑁄 𑀮𑀤𑁆𑀥𑁄, 𑀲𑀁𑀧𑀻𑀴𑁂 𑀧𑀢𑀺𑀧𑁄𑀲𑀺𑀢𑁄;

𑀅𑀚𑁆𑀚𑁂𑀯 𑀧𑀼𑀢𑁆𑀢 𑀧𑀝𑀺𑀧𑀚𑁆𑀚, 𑀓𑁂𑀯𑀮𑀁 𑀯𑀲𑀼𑀥𑀁 𑀇𑀫𑀁.

𑁨𑁬. ‘‘𑀲𑀭𑀝𑁆𑀞𑀓𑀁 𑀲𑀦𑀺𑀕𑀫𑀁, 𑀲𑀚𑀦𑀁 𑀯𑀦𑁆𑀤𑀺𑀢𑁆𑀯 𑀔𑀢𑁆𑀢𑀺𑀬𑀁;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁨𑁭. ‘‘‘𑀬𑁂 𑀓𑁂𑀘𑀺 𑀫𑀳𑀺𑀬𑀸 𑀲𑀢𑁆𑀢𑀸, 𑀳𑀻𑀦𑀫𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀸;

𑀦𑀺𑀭𑀸𑀭𑀓𑁆𑀔𑀸 𑀲𑀓𑁂 𑀕𑁂𑀳𑁂, 𑀯𑀟𑁆𑀠𑀦𑁆𑀢𑀺 𑀲𑀓𑀜𑀸𑀢𑀺𑀪𑀺.

𑁨𑁮. ‘‘‘𑀇𑀤𑀁 𑀮𑁄𑀓𑁂 𑀉𑀢𑁆𑀢𑀭𑀺𑀬𑀁, 𑀲𑀁𑀧𑀻𑀴𑁂 𑀫𑀫 𑀧𑁄𑀲𑀦𑀁;

𑀅𑀬𑁄𑀖𑀭𑀫𑁆𑀳𑀺 𑀲𑀁𑀯𑀟𑁆𑀠𑁄, 𑀅𑀧𑁆𑀧𑀪𑁂 𑀘𑀦𑁆𑀤𑀲𑀽𑀭𑀺𑀬𑁂.

𑁨𑁯. ‘‘‘𑀧𑀽𑀢𑀺𑀓𑀼𑀡𑀧𑀲𑀫𑁆𑀧𑀼𑀡𑁆𑀡𑀸, 𑀫𑀼𑀘𑁆𑀘𑀺𑀢𑁆𑀯𑀸 𑀫𑀸𑀢𑀼 𑀓𑀼𑀘𑁆𑀙𑀺𑀢𑁄;

𑀢𑀢𑁄 𑀖𑁄𑀭𑀢𑀭𑁂 𑀤𑀼𑀓𑁆𑀔𑁂, 𑀧𑀼𑀦 𑀧𑀓𑁆𑀔𑀺𑀢𑁆𑀢𑀬𑁄𑀖𑀭𑁂.

𑁩𑁦. ‘‘‘𑀬𑀤𑀺𑀳𑀁 𑀢𑀸𑀤𑀺𑀲𑀁 𑀧𑀢𑁆𑀯𑀸, 𑀤𑀼𑀓𑁆𑀔𑀁 𑀧𑀭𑀫𑀤𑀸𑀭𑀼𑀡𑀁;

𑀭𑀚𑁆𑀚𑁂𑀲𑀼 𑀬𑀤𑀺 𑀭𑀚𑁆𑀚𑀸𑀫𑀺 [𑀭𑀜𑁆𑀚𑀸𑀫𑀺 (𑀲𑀻.)], 𑀧𑀸𑀧𑀸𑀦𑀁 𑀉𑀢𑁆𑀢𑀫𑁄 𑀲𑀺𑀬𑀁.

𑁩𑁧. ‘‘‘𑀉𑀓𑁆𑀓𑀡𑁆𑀞𑀺𑀢𑁄𑀫𑁆𑀳𑀺 𑀓𑀸𑀬𑁂𑀦, 𑀭𑀚𑁆𑀚𑁂𑀦𑀫𑁆𑀳𑀺 𑀅𑀦𑀢𑁆𑀣𑀺𑀓𑁄;

𑀦𑀺𑀩𑁆𑀩𑀼𑀢𑀺𑀁 𑀧𑀭𑀺𑀬𑁂𑀲𑀺𑀲𑁆𑀲𑀁, 𑀬𑀢𑁆𑀣 𑀫𑀁 𑀫𑀘𑁆𑀘𑀼 𑀦 𑀫𑀤𑁆𑀤𑀺𑀬𑁂’.

𑁩𑁨. ‘‘𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀯𑀺𑀭𑀯𑀦𑁆𑀢𑁂 𑀫𑀳𑀸𑀚𑀦𑁂;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀧𑀸𑀯𑀺𑀲𑀺𑀁 𑀓𑀸𑀦𑀦𑀁 𑀯𑀦𑀁.

𑁩𑁩. ‘‘𑀫𑀸𑀢𑀸𑀧𑀺𑀢𑀸 𑀦 𑀫𑁂 𑀤𑁂𑀲𑁆𑀲𑀸, 𑀦𑀧𑀺 𑀫𑁂 𑀤𑁂𑀲𑁆𑀲𑀁 𑀫𑀳𑀸𑀬𑀲𑀁;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀭𑀚𑁆𑀚𑀁 𑀧𑀭𑀺𑀘𑁆𑀘𑀚𑀺’’𑀦𑁆𑀢𑀺.

𑀅𑀬𑁄𑀖𑀭𑀘𑀭𑀺𑀬𑀁 𑀢𑀢𑀺𑀬𑀁.

𑁪. 𑀪𑀺𑀲𑀘𑀭𑀺𑀬𑀸

𑁩𑁪. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀓𑀸𑀲𑀻𑀦𑀁 𑀧𑀼𑀭𑀯𑀭𑀼𑀢𑁆𑀢𑀫𑁂;

𑀪𑀕𑀺𑀦𑀻 𑀘 𑀪𑀸𑀢𑀭𑁄 𑀲𑀢𑁆𑀢, 𑀦𑀺𑀩𑁆𑀩𑀢𑁆𑀢𑀸 𑀲𑁄𑀢𑁆𑀣𑀺𑀬𑁂 𑀓𑀼𑀮𑁂.

𑁩𑁫. ‘‘𑀏𑀢𑁂𑀲𑀁 𑀧𑀼𑀩𑁆𑀩𑀚𑁄 𑀆𑀲𑀺𑀁, 𑀳𑀺𑀭𑀻𑀲𑀼𑀓𑁆𑀓𑀫𑀼𑀧𑀸𑀕𑀢𑁄;

𑀪𑀯𑀁 𑀤𑀺𑀲𑁆𑀯𑀸𑀦 𑀪𑀬𑀢𑁄, 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑁄 𑀅𑀳𑀁.

𑁩𑁬. ‘‘𑀫𑀸𑀢𑀸𑀧𑀺𑀢𑀽𑀳𑀺 𑀧𑀳𑀺𑀢𑀸, 𑀲𑀳𑀸𑀬𑀸 𑀏𑀓𑀫𑀸𑀦𑀲𑀸;

𑀓𑀸𑀫𑁂𑀳𑀺 𑀫𑀁 𑀦𑀺𑀫𑀦𑁆𑀢𑁂𑀦𑁆𑀢𑀺, ‘𑀓𑀼𑀮𑀯𑀁𑀲𑀁 𑀥𑀭𑁂𑀳𑀺’𑀢𑀺.

𑁩𑁭. ‘‘𑀬𑀁 𑀢𑁂𑀲𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀕𑀺𑀳𑀻𑀥𑀫𑁆𑀫𑁂 𑀲𑀼𑀔𑀸𑀯𑀳𑀁;

𑀢𑀁 𑀫𑁂 𑀅𑀳𑁄𑀲𑀺 𑀓𑀞𑀺𑀦𑀁, 𑀢𑀢𑁆𑀢 [𑀲𑀦𑁆𑀢𑀢𑁆𑀢 (𑀓.)] 𑀨𑀸𑀮𑀲𑀫𑀁 𑀯𑀺𑀬.

𑁩𑁮. ‘‘𑀢𑁂 𑀫𑀁 𑀢𑀤𑀸 𑀉𑀓𑁆𑀔𑀺𑀧𑀦𑁆𑀢𑀁, 𑀧𑀼𑀘𑁆𑀙𑀺𑀁𑀲𑀼 𑀧𑀢𑁆𑀣𑀺𑀢𑀁 𑀫𑀫;

‘𑀓𑀺𑀁 𑀢𑁆𑀯𑀁 𑀧𑀢𑁆𑀣𑀬𑀲𑁂 𑀲𑀫𑁆𑀫, 𑀬𑀤𑀺 𑀓𑀸𑀫𑁂 𑀦 𑀪𑀼𑀜𑁆𑀚𑀲𑀺’.

𑁩𑁯. ‘‘𑀢𑁂𑀲𑀸𑀳𑀁 𑀏𑀯𑀫𑀯𑀘𑀁, 𑀅𑀢𑁆𑀣𑀓𑀸𑀫𑁄 𑀳𑀺𑀢𑁂𑀲𑀺𑀦𑀁;

‘𑀦𑀸𑀳𑀁 𑀧𑀢𑁆𑀣𑁂𑀫𑀺 𑀕𑀺𑀳𑀻𑀪𑀸𑀯𑀁, 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑁄 𑀅𑀳𑀁’.

𑁪𑁦. ‘‘𑀢𑁂 𑀫𑀬𑁆𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀧𑀺𑀢𑀼𑀫𑀸𑀢𑀼 𑀘 𑀲𑀸𑀯𑀬𑀼𑀁;

𑀫𑀸𑀢𑀸𑀧𑀺𑀢𑀸 𑀏𑀯𑀫𑀸𑀳𑀼, ‘𑀲𑀩𑁆𑀩𑁂𑀯 𑀧𑀩𑁆𑀩𑀚𑀸𑀫 𑀪𑁄’.

𑁪𑁧. ‘‘𑀉𑀪𑁄 𑀫𑀸𑀢𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀕𑀺𑀦𑀻 𑀘 𑀲𑀢𑁆𑀢 𑀪𑀸𑀢𑀭𑁄;

𑀅𑀫𑀺𑀢𑀥𑀦𑀁 𑀙𑀟𑁆𑀟𑀬𑀺𑀢𑁆𑀯𑀸, 𑀧𑀸𑀯𑀺𑀲𑀺𑀫𑁆𑀳𑀸 𑀫𑀳𑀸𑀯𑀦’’𑀦𑁆𑀢𑀺.

𑀪𑀺𑀲𑀘𑀭𑀺𑀬𑀁 𑀘𑀢𑀼𑀢𑁆𑀣𑀁.

𑁫. 𑀲𑁄𑀡𑀧𑀡𑁆𑀟𑀺𑀢𑀘𑀭𑀺𑀬𑀸

𑁪𑁨. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀦𑀕𑀭𑁂 𑀩𑁆𑀭𑀳𑁆𑀫𑀯𑀟𑁆𑀠𑀦𑁂;

𑀢𑀢𑁆𑀣 𑀓𑀼𑀮𑀯𑀭𑁂 𑀲𑁂𑀝𑁆𑀞𑁂, 𑀫𑀳𑀸𑀲𑀸𑀮𑁂 𑀅𑀚𑀸𑀬𑀳𑀁.

𑁪𑁩. ‘‘𑀢𑀤𑀸𑀧𑀺 𑀮𑁄𑀓𑀁 𑀤𑀺𑀲𑁆𑀯𑀸𑀦, 𑀅𑀦𑁆𑀥𑀻𑀪𑀽𑀢𑀁 𑀢𑀫𑁄𑀢𑁆𑀣𑀝𑀁;

𑀘𑀺𑀢𑁆𑀢𑀁 𑀪𑀯𑀢𑁄 𑀧𑀢𑀺𑀓𑀼𑀝𑀢𑀺, 𑀢𑀼𑀢𑁆𑀢𑀯𑁂𑀕𑀳𑀢𑀁 𑀯𑀺𑀬.

𑁪𑁪. ‘‘𑀤𑀺𑀲𑁆𑀯𑀸𑀦 𑀯𑀺𑀯𑀺𑀥𑀁 𑀧𑀸𑀧𑀁, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

‘𑀓𑀤𑀸𑀳𑀁 𑀕𑁂𑀳𑀸 𑀦𑀺𑀓𑁆𑀔𑀫𑁆𑀫, 𑀧𑀯𑀺𑀲𑀺𑀲𑁆𑀲𑀸𑀫𑀺 𑀓𑀸𑀦𑀦𑀁’.

𑁪𑁫. ‘‘𑀢𑀤𑀸𑀧𑀺 𑀫𑀁 𑀦𑀺𑀫𑀦𑁆𑀢𑁂𑀲𑀼𑀁, 𑀓𑀸𑀫𑀪𑁄𑀕𑁂𑀳𑀺 𑀜𑀸𑀢𑀬𑁄;

𑀢𑁂𑀲𑀫𑁆𑀧𑀺 𑀙𑀦𑁆𑀤𑀫𑀸𑀘𑀺𑀓𑁆𑀔𑀺𑀁, ‘𑀫𑀸 𑀦𑀺𑀫𑀦𑁆𑀢𑁂𑀣 𑀢𑁂𑀳𑀺 𑀫𑀁’.

𑁪𑁬. ‘‘𑀬𑁄 𑀫𑁂 𑀓𑀦𑀺𑀝𑁆𑀞𑀓𑁄 𑀪𑀸𑀢𑀸, 𑀦𑀦𑁆𑀤𑁄 𑀦𑀸𑀫𑀸𑀲𑀺 𑀧𑀡𑁆𑀟𑀺𑀢𑁄;

𑀲𑁄𑀧𑀺 𑀫𑀁 𑀅𑀦𑀼𑀲𑀺𑀓𑁆𑀔𑀦𑁆𑀢𑁄, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺.

𑁪𑁭. ‘‘𑀅𑀳𑀁 𑀲𑁄𑀡𑁄 𑀘 𑀦𑀦𑁆𑀤𑁄 𑀘, 𑀉𑀪𑁄 𑀫𑀸𑀢𑀸𑀧𑀺𑀢𑀸 𑀫𑀫;

𑀢𑀤𑀸𑀧𑀺 𑀪𑁄𑀕𑁂 𑀙𑀟𑁆𑀟𑁂𑀢𑁆𑀯𑀸, 𑀧𑀸𑀯𑀺𑀲𑀺𑀫𑁆𑀳𑀸 𑀫𑀳𑀸𑀯𑀦’’𑀦𑁆𑀢𑀺.

𑀲𑁄𑀡𑀧𑀡𑁆𑀟𑀺𑀢𑀘𑀭𑀺𑀬𑀁 𑀧𑀜𑁆𑀘𑀫𑀁.

𑁬. 𑀢𑁂𑀫𑀺𑀬𑀘𑀭𑀺𑀬𑀸

𑁪𑁮. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀓𑀸𑀲𑀺𑀭𑀸𑀚𑀲𑁆𑀲 𑀅𑀢𑁆𑀭𑀚𑁄;

𑀫𑀽𑀕𑀧𑀓𑁆𑀔𑁄𑀢𑀺 𑀦𑀸𑀫𑁂𑀦, 𑀢𑁂𑀫𑀺𑀬𑁄𑀢𑀺 𑀯𑀤𑀦𑁆𑀢𑀺 𑀫𑀁.

𑁪𑁯. ‘‘𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀁, 𑀦 𑀯𑀺𑀚𑁆𑀚𑀢𑀺 𑀧𑀼𑀫𑁄 𑀢𑀤𑀸 [𑀲𑀤𑀸 (𑀲𑀻.)];

𑀅𑀳𑁄𑀭𑀢𑁆𑀢𑀸𑀦𑀁 𑀅𑀘𑁆𑀘𑀬𑁂𑀦, 𑀦𑀺𑀩𑁆𑀩𑀢𑁆𑀢𑁄 𑀅𑀳𑀫𑁂𑀓𑀓𑁄.

𑁫𑁦. ‘‘𑀓𑀺𑀘𑁆𑀙𑀸 𑀮𑀤𑁆𑀥𑀁 𑀧𑀺𑀬𑀁 𑀧𑀼𑀢𑁆𑀢𑀁, 𑀅𑀪𑀺𑀚𑀸𑀢𑀁 𑀚𑀼𑀢𑀺𑀦𑁆𑀥𑀭𑀁;

𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀬𑀺𑀢𑁆𑀯𑀸𑀦, 𑀲𑀬𑀦𑁂 𑀧𑁄𑀲𑁂𑀢𑀺 𑀫𑀁 𑀧𑀺𑀢𑀸.

𑁫𑁧. ‘‘𑀦𑀺𑀤𑁆𑀤𑀸𑀬𑀫𑀸𑀦𑁄 𑀲𑀬𑀦𑀯𑀭𑁂, 𑀧𑀩𑀼𑀚𑁆𑀛𑀺𑀢𑁆𑀯𑀸𑀦𑀳𑀁 𑀢𑀤𑀸;

𑀅𑀤𑁆𑀤𑀲𑀁 𑀧𑀡𑁆𑀟𑀭𑀁 𑀙𑀢𑁆𑀢𑀁, 𑀬𑁂𑀦𑀸𑀳𑀁 𑀦𑀺𑀭𑀬𑀁 𑀕𑀢𑁄.

𑁫𑁨. ‘‘𑀲𑀳 𑀤𑀺𑀝𑁆𑀞𑀲𑁆𑀲 𑀫𑁂 𑀙𑀢𑁆𑀢𑀁, 𑀢𑀸𑀲𑁄 𑀉𑀧𑁆𑀧𑀚𑁆𑀚𑀺 𑀪𑁂𑀭𑀯𑁄;

𑀯𑀺𑀦𑀺𑀘𑁆𑀙𑀬𑀁 𑀲𑀫𑀸𑀧𑀦𑁆𑀦𑁄, ‘𑀓𑀣𑀸𑀳𑀁 𑀇𑀫𑀁 𑀫𑀼𑀜𑁆𑀘𑀺𑀲𑁆𑀲𑀁’.

𑁫𑁩. ‘‘𑀧𑀼𑀩𑁆𑀩𑀲𑀸𑀮𑁄𑀳𑀺𑀢𑀸 𑀫𑀬𑁆𑀳𑀁, 𑀤𑁂𑀯𑀢𑀸 𑀅𑀢𑁆𑀣𑀓𑀸𑀫𑀺𑀦𑀻;

𑀲𑀸 𑀫𑀁 𑀤𑀺𑀲𑁆𑀯𑀸𑀦 𑀤𑀼𑀓𑁆𑀔𑀺𑀢𑀁, 𑀢𑀻𑀲𑀼 𑀞𑀸𑀦𑁂𑀲𑀼 𑀬𑁄𑀚𑀬𑀺.

𑁫𑁪. ‘‘‘𑀫𑀸 𑀧𑀡𑁆𑀟𑀺𑀘𑁆𑀘𑀬𑀁 𑀯𑀺𑀪𑀸𑀯𑀬, 𑀩𑀸𑀮𑀫𑀢𑁄 𑀪𑀯 𑀲𑀩𑁆𑀩𑀧𑀸𑀡𑀺𑀦𑀁;

𑀲𑀩𑁆𑀩𑁄 𑀢𑀁 𑀚𑀦𑁄 𑀑𑀘𑀺𑀦𑀸𑀬𑀢𑀼, 𑀏𑀯𑀁 𑀢𑀯 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀺’.

𑁫𑁫. ‘‘𑀏𑀯𑀁 𑀯𑀼𑀢𑁆𑀢𑀸𑀬𑀳𑀁 𑀢𑀲𑁆𑀲𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁;

‘𑀓𑀭𑁄𑀫𑀺 𑀢𑁂 𑀢𑀁 𑀯𑀘𑀦𑀁, 𑀬𑀁 𑀢𑁆𑀯𑀁 𑀪𑀡𑀲𑀺 𑀤𑁂𑀯𑀢𑁂;

𑀅𑀢𑁆𑀣𑀓𑀸𑀫𑀸𑀲𑀺 𑀫𑁂 𑀅𑀫𑁆𑀫, 𑀳𑀺𑀢𑀓𑀸𑀫𑀸𑀲𑀺 𑀤𑁂𑀯𑀢𑁂’.

𑁫𑁬. ‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀸𑀕𑀭𑁂𑀯 𑀣𑀮𑀁 𑀮𑀪𑀺𑀁;

𑀳𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄, 𑀢𑀬𑁄 𑀅𑀗𑁆𑀕𑁂 𑀅𑀥𑀺𑀝𑁆𑀞𑀳𑀺𑀁.

𑁫𑁭. ‘‘𑀫𑀽𑀕𑁄 𑀅𑀳𑁄𑀲𑀺𑀁 𑀩𑀥𑀺𑀭𑁄, 𑀧𑀓𑁆𑀔𑁄 𑀕𑀢𑀺𑀯𑀺𑀯𑀚𑁆𑀚𑀺𑀢𑁄;

𑀏𑀢𑁂 𑀅𑀗𑁆𑀕𑁂 𑀅𑀥𑀺𑀝𑁆𑀞𑀸𑀬, 𑀯𑀲𑁆𑀲𑀸𑀦𑀺 𑀲𑁄𑀴𑀲𑀁 𑀯𑀲𑀺𑀁.

𑁫𑁮. ‘‘𑀢𑀢𑁄 𑀫𑁂 𑀳𑀢𑁆𑀣𑀧𑀸𑀤𑁂 𑀘, 𑀚𑀺𑀯𑁆𑀳𑀁 𑀲𑁄𑀢𑀜𑁆𑀘 𑀫𑀤𑁆𑀤𑀺𑀬;

𑀅𑀦𑀽𑀦𑀢𑀁 𑀫𑁂 𑀧𑀲𑁆𑀲𑀺𑀢𑁆𑀯𑀸, ‘𑀓𑀸𑀴𑀓𑀡𑁆𑀡𑀻’𑀢𑀺 𑀦𑀺𑀦𑁆𑀤𑀺𑀲𑀼𑀁.

𑁫𑁯. ‘‘𑀢𑀢𑁄 𑀚𑀸𑀦𑀧𑀤𑀸 𑀲𑀩𑁆𑀩𑁂, 𑀲𑁂𑀦𑀸𑀧𑀢𑀺𑀧𑀼𑀭𑁄𑀳𑀺𑀢𑀸;

𑀲𑀩𑁆𑀩𑁂 𑀏𑀓𑀫𑀦𑀸 𑀳𑀼𑀢𑁆𑀯𑀸, 𑀙𑀟𑁆𑀟𑀦𑀁 𑀅𑀦𑀼𑀫𑁄𑀤𑀺𑀲𑀼𑀁.

𑁬𑁦. ‘‘𑀲𑁄𑀳𑀁 𑀢𑁂𑀲𑀁 𑀫𑀢𑀺𑀁 𑀲𑀼𑀢𑁆𑀯𑀸, 𑀳𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

𑀬𑀲𑁆𑀲𑀢𑁆𑀣𑀸𑀬 𑀢𑀧𑁄𑀘𑀺𑀡𑁆𑀡𑁄, 𑀲𑁄 𑀫𑁂 𑀅𑀢𑁆𑀣𑁄 𑀲𑀫𑀺𑀚𑁆𑀛𑀣.

𑁬𑁧. ‘‘𑀦𑁆𑀳𑀸𑀧𑁂𑀢𑁆𑀯𑀸 𑀅𑀦𑀼𑀮𑀺𑀫𑁆𑀧𑀺𑀢𑁆𑀯𑀸, 𑀯𑁂𑀞𑁂𑀢𑁆𑀯𑀸 𑀭𑀸𑀚𑀯𑁂𑀞𑀦𑀁;

𑀙𑀢𑁆𑀢𑁂𑀦 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸, 𑀓𑀸𑀭𑁂𑀲𑀼𑀁 𑀧𑀼𑀭𑀁 𑀧𑀤𑀓𑁆𑀔𑀺𑀡𑀁.

𑁬𑁨. ‘‘𑀲𑀢𑁆𑀢𑀸𑀳𑀁 𑀥𑀸𑀭𑀬𑀺𑀢𑁆𑀯𑀸𑀦, 𑀉𑀕𑁆𑀕𑀢𑁂 𑀭𑀯𑀺𑀫𑀡𑁆𑀟𑀮𑁂;

𑀭𑀣𑁂𑀦 𑀫𑀁 𑀦𑀻𑀳𑀭𑀺𑀢𑁆𑀯𑀸, 𑀲𑀸𑀭𑀣𑀻 𑀯𑀦𑀫𑀼𑀧𑀸𑀕𑀫𑀺.

𑁬𑁩. ‘‘𑀏𑀓𑁄𑀓𑀸𑀲𑁂 𑀭𑀣𑀁 𑀓𑀢𑁆𑀯𑀸, 𑀲𑀚𑁆𑀚𑀲𑁆𑀲𑀁 𑀳𑀢𑁆𑀣𑀫𑀼𑀘𑁆𑀘𑀺𑀢𑁄 [𑀳𑀢𑁆𑀣𑀫𑀼𑀜𑁆𑀘𑀺𑀢𑁄 (𑀲𑀻. 𑀲𑁆𑀬𑀸.)];

𑀲𑀸𑀭𑀣𑀻 𑀔𑀡𑀢𑀻 𑀓𑀸𑀲𑀼𑀁, 𑀦𑀺𑀔𑀸𑀢𑀼𑀁 𑀧𑀣𑀯𑀺𑀬𑀸 𑀫𑀫𑀁.

𑁬𑁪. ‘‘𑀅𑀥𑀺𑀝𑁆𑀞𑀺𑀢𑀫𑀥𑀺𑀝𑁆𑀞𑀸𑀦𑀁, 𑀢𑀚𑁆𑀚𑁂𑀦𑁆𑀢𑁄 𑀯𑀺𑀯𑀺𑀥𑀓𑀸𑀭𑀡𑀸;

𑀦 𑀪𑀺𑀦𑁆𑀤𑀺𑀁 𑀢𑀫𑀥𑀺𑀝𑁆𑀞𑀸𑀦𑀁, 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸.

𑁬𑁫. ‘‘𑀫𑀸𑀢𑀸𑀧𑀺𑀢𑀸 𑀦 𑀫𑁂 𑀤𑁂𑀲𑁆𑀲𑀸, 𑀅𑀢𑁆𑀢𑀸 𑀫𑁂 𑀦 𑀘 𑀤𑁂𑀲𑁆𑀲𑀺𑀬𑁄;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀯𑀢𑀫𑀥𑀺𑀝𑁆𑀞𑀳𑀺𑀁.

𑁬𑁬. ‘‘𑀏𑀢𑁂 𑀅𑀗𑁆𑀕𑁂 𑀅𑀥𑀺𑀝𑁆𑀞𑀸𑀬, 𑀯𑀲𑁆𑀲𑀸𑀦𑀺 𑀲𑁄𑀴𑀲𑀁 𑀯𑀲𑀺𑀁;

𑀅𑀥𑀺𑀝𑁆𑀞𑀸𑀦𑁂𑀦 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻’’𑀢𑀺.

𑀢𑁂𑀫𑀺𑀬𑀘𑀭𑀺𑀬𑀁 𑀙𑀝𑁆𑀞𑀁.

𑁭. 𑀓𑀧𑀺𑀭𑀸𑀚𑀘𑀭𑀺𑀬𑀸

𑁬𑁭. ‘‘𑀬𑀤𑀸 𑀅𑀳𑀁 𑀓𑀧𑀺 𑀆𑀲𑀺𑀁, 𑀦𑀤𑀻𑀓𑀽𑀮𑁂 𑀤𑀭𑀻𑀲𑀬𑁂;

𑀧𑀻𑀴𑀺𑀢𑁄 𑀲𑀼𑀲𑀼𑀫𑀸𑀭𑁂𑀦, 𑀕𑀫𑀦𑀁 𑀦 𑀮𑀪𑀸𑀫𑀳𑀁.

𑁬𑁮. ‘‘𑀬𑀫𑁆𑀳𑁄𑀓𑀸𑀲𑁂 𑀅𑀳𑀁 𑀞𑀢𑁆𑀯𑀸, 𑀑𑀭𑀸 𑀧𑀸𑀭𑀁 𑀧𑀢𑀸𑀫𑀳𑀁;