𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀘𑀭𑀺𑀬𑀸𑀧𑀺𑀝𑀓𑀧𑀸𑀴𑀺

𑁧. 𑀅𑀓𑀺𑀢𑁆𑀢𑀺𑀯𑀕𑁆𑀕𑁄

𑁧. 𑀅𑀓𑀺𑀢𑁆𑀢𑀺𑀘𑀭𑀺𑀬𑀸

𑁧. ‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂;

𑀏𑀢𑁆𑀣𑀦𑁆𑀢𑀭𑁂 𑀬𑀁 𑀘𑀭𑀺𑀢𑀁, 𑀲𑀩𑁆𑀩𑀁 𑀢𑀁 𑀩𑁄𑀥𑀺𑀧𑀸𑀘𑀦𑀁.

𑁨. ‘‘𑀅𑀢𑀻𑀢𑀓𑀧𑁆𑀧𑁂 𑀘𑀭𑀺𑀢𑀁, 𑀞𑀧𑀬𑀺𑀢𑁆𑀯𑀸 𑀪𑀯𑀸𑀪𑀯𑁂;

𑀇𑀫𑀫𑁆𑀳𑀺 𑀓𑀧𑁆𑀧𑁂 𑀘𑀭𑀺𑀢𑀁, 𑀧𑀯𑀓𑁆𑀔𑀺𑀲𑁆𑀲𑀁 𑀲𑀼𑀡𑁄𑀳𑀺 𑀫𑁂.

𑁩. ‘‘𑀬𑀤𑀸 𑀅𑀳𑀁 𑀩𑁆𑀭𑀳𑀸𑀭𑀜𑁆𑀜𑁂, 𑀲𑀼𑀜𑁆𑀜𑁂 𑀯𑀺𑀧𑀺𑀦𑀓𑀸𑀦𑀦𑁂;

𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 [𑀅𑀚𑁆𑀛𑁄𑀕𑀳𑁂𑀢𑁆𑀯𑀸 (𑀲𑀻. 𑀲𑁆𑀬𑀸.)] 𑀯𑀺𑀳𑀭𑀸𑀫𑀺, 𑀅𑀓𑀺𑀢𑁆𑀢𑀺 𑀦𑀸𑀫 𑀢𑀸𑀧𑀲𑁄.

𑁪. ‘‘𑀢𑀤𑀸 𑀫𑀁 𑀢𑀧𑀢𑁂𑀚𑁂𑀦, 𑀲𑀦𑁆𑀢𑀢𑁆𑀢𑁄 𑀢𑀺𑀤𑀺𑀯𑀸𑀪𑀺𑀪𑀽;

𑀥𑀸𑀭𑁂𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑀁, 𑀪𑀺𑀓𑁆𑀔𑀸𑀬 𑀫𑀁 𑀉𑀧𑀸𑀕𑀫𑀺.

𑁫. ‘‘𑀧𑀯𑀦𑀸 𑀆𑀪𑀢𑀁 𑀧𑀡𑁆𑀡𑀁, 𑀅𑀢𑁂𑀮𑀜𑁆𑀘 𑀅𑀮𑁄𑀡𑀺𑀓𑀁;

𑀫𑀫 𑀤𑁆𑀯𑀸𑀭𑁂 𑀞𑀺𑀢𑀁 𑀤𑀺𑀲𑁆𑀯𑀸, 𑀲𑀓𑀝𑀸𑀳𑁂𑀦 𑀆𑀓𑀺𑀭𑀺𑀁.

𑁬. ‘‘𑀢𑀲𑁆𑀲 𑀤𑀢𑁆𑀯𑀸𑀦𑀳𑀁 𑀧𑀡𑁆𑀡𑀁, 𑀦𑀺𑀓𑁆𑀓𑀼𑀚𑁆𑀚𑀺𑀢𑁆𑀯𑀸𑀦 𑀪𑀸𑀚𑀦𑀁;

𑀧𑀼𑀦𑁂𑀲𑀦𑀁 𑀚𑀳𑀺𑀢𑁆𑀯𑀸𑀦, 𑀧𑀸𑀯𑀺𑀲𑀺𑀁 𑀧𑀡𑁆𑀡𑀲𑀸𑀮𑀓𑀁.

𑁭. ‘‘𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺, 𑀉𑀧𑀕𑀜𑁆𑀙𑀺 𑀫𑀫𑀦𑁆𑀢𑀺𑀓𑀁;

𑀅𑀓𑀫𑁆𑀧𑀺𑀢𑁄 𑀅𑀦𑁄𑀮𑀕𑁆𑀕𑁄, 𑀏𑀯𑀫𑁂𑀯𑀫𑀤𑀸𑀲𑀳𑀁.

𑁮. ‘‘𑀦 𑀫𑁂 𑀢𑀧𑁆𑀧𑀘𑁆𑀘𑀬𑀸 𑀅𑀢𑁆𑀣𑀺, 𑀲𑀭𑀻𑀭𑀲𑁆𑀫𑀺𑀁 𑀯𑀺𑀯𑀡𑁆𑀡𑀺𑀬𑀁;

𑀧𑀻𑀢𑀺𑀲𑀼𑀔𑁂𑀦 𑀭𑀢𑀺𑀬𑀸, 𑀯𑀻𑀢𑀺𑀦𑀸𑀫𑁂𑀫𑀺 𑀢𑀁 𑀤𑀺𑀯𑀁.

𑁯. ‘‘𑀬𑀤𑀺 𑀫𑀸𑀲𑀫𑁆𑀧𑀺 𑀤𑁆𑀯𑁂𑀫𑀸𑀲𑀁, 𑀤𑀓𑁆𑀔𑀺𑀡𑁂𑀬𑁆𑀬𑀁 𑀯𑀭𑀁 𑀮𑀪𑁂;

𑀅𑀓𑀫𑁆𑀧𑀺𑀢𑁄 𑀅𑀦𑁄𑀮𑀻𑀦𑁄, 𑀤𑀤𑁂𑀬𑁆𑀬𑀁 𑀤𑀸𑀦𑀫𑀼𑀢𑁆𑀢𑀫𑀁.

𑁧𑁦. ‘‘𑀦 𑀢𑀲𑁆𑀲 𑀤𑀸𑀦𑀁 𑀤𑀤𑀫𑀸𑀦𑁄, 𑀬𑀲𑀁 𑀮𑀸𑀪𑀜𑁆𑀘 𑀧𑀢𑁆𑀣𑀬𑀺𑀁;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀣𑀬𑀸𑀦𑁄, 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀆𑀘𑀭𑀺’’𑀦𑁆𑀢𑀺.

𑀅𑀓𑀺𑀢𑁆𑀢𑀺𑀘𑀭𑀺𑀬𑀁 𑀧𑀞𑀫𑀁.

𑁨. 𑀲𑀗𑁆𑀔𑀘𑀭𑀺𑀬𑀸

𑁧𑁧. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀩𑁆𑀭𑀸𑀳𑁆𑀫𑀡𑁄 𑀲𑀗𑁆𑀔𑀲𑀯𑁆𑀳𑀬𑁄;

𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀺𑀢𑀼𑀓𑀸𑀫𑁄, 𑀉𑀧𑀕𑀘𑁆𑀙𑀸𑀫𑀺 𑀧𑀝𑁆𑀝𑀦𑀁.

𑁧𑁨. ‘‘𑀢𑀢𑁆𑀣𑀤𑁆𑀤𑀲𑀁 𑀧𑀝𑀺𑀧𑀣𑁂, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁;

𑀓𑀦𑁆𑀢𑀸𑀭𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑀁 [𑀓𑀦𑁆𑀢𑀸𑀭𑀤𑁆𑀥𑀸𑀦𑀧𑀝𑀺𑀧𑀦𑁆𑀦𑀁 (𑀲𑀻. 𑀲𑁆𑀬𑀸.)], 𑀢𑀢𑁆𑀢𑀸𑀬 𑀓𑀞𑀺𑀦𑀪𑀽𑀫𑀺𑀬𑀸.

𑁧𑁩. ‘‘𑀢𑀫𑀳𑀁 𑀧𑀝𑀺𑀧𑀣𑁂 𑀤𑀺𑀲𑁆𑀯𑀸, 𑀇𑀫𑀫𑀢𑁆𑀣𑀁 𑀯𑀺𑀘𑀺𑀦𑁆𑀢𑀬𑀺𑀁;

‘𑀇𑀤𑀁 𑀔𑁂𑀢𑁆𑀢𑀁 𑀅𑀦𑀼𑀧𑁆𑀧𑀢𑁆𑀢𑀁, 𑀧𑀼𑀜𑁆𑀜𑀓𑀸𑀫𑀲𑁆𑀲 𑀚𑀦𑁆𑀢𑀼𑀦𑁄.

𑁧𑁪. ‘‘‘𑀬𑀣𑀸 𑀓𑀲𑁆𑀲𑀓𑁄 𑀧𑀼𑀭𑀺𑀲𑁄, 𑀔𑁂𑀢𑁆𑀢𑀁 𑀤𑀺𑀲𑁆𑀯𑀸 𑀫𑀳𑀸𑀕𑀫𑀁;

𑀢𑀢𑁆𑀣 𑀩𑀻𑀚𑀁 𑀦 𑀭𑁄𑀧𑁂𑀢𑀺, 𑀦 𑀲𑁄 𑀥𑀜𑁆𑀜𑁂𑀦 𑀅𑀢𑁆𑀣𑀺𑀓𑁄.

𑁧𑁫. ‘‘‘𑀏𑀯𑀫𑁂𑀯𑀸𑀳𑀁 𑀧𑀼𑀜𑁆𑀜𑀓𑀸𑀫𑁄, 𑀤𑀺𑀲𑁆𑀯𑀸 𑀔𑁂𑀢𑁆𑀢𑀯𑀭𑀼𑀢𑁆𑀢𑀫𑀁;

𑀬𑀤𑀺 𑀢𑀢𑁆𑀣 𑀓𑀸𑀭𑀁 𑀦 𑀓𑀭𑁄𑀫𑀺, 𑀦𑀸𑀳𑀁 𑀧𑀼𑀜𑁆𑀜𑁂𑀦 𑀅𑀢𑁆𑀣𑀺𑀓𑁄.

𑁧𑁬. ‘‘‘𑀬𑀣𑀸 𑀅𑀫𑀘𑁆𑀘𑁄 𑀫𑀼𑀤𑁆𑀤𑀺𑀓𑀸𑀫𑁄, 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑁂 𑀚𑀦𑁂;

𑀦 𑀤𑁂𑀢𑀺 𑀢𑁂𑀲𑀁 𑀥𑀦𑀥𑀜𑁆𑀜𑀁, 𑀫𑀼𑀤𑁆𑀤𑀺𑀢𑁄 𑀧𑀭𑀺𑀳𑀸𑀬𑀢𑀺.

𑁧𑁭. ‘‘‘𑀏𑀯𑀫𑁂𑀯𑀸𑀳𑀁 𑀧𑀼𑀜𑁆𑀜𑀓𑀸𑀫𑁄, 𑀯𑀺𑀧𑀼𑀮𑀁 𑀤𑀺𑀲𑁆𑀯𑀸𑀦 𑀤𑀓𑁆𑀔𑀺𑀡𑀁;

𑀬𑀤𑀺 𑀢𑀲𑁆𑀲 𑀤𑀸𑀦𑀁 𑀦 𑀤𑀤𑀸𑀫𑀺, 𑀧𑀭𑀺𑀳𑀸𑀬𑀺𑀲𑁆𑀲𑀸𑀫𑀺 𑀧𑀼𑀜𑁆𑀜𑀢𑁄’.

𑁧𑁮. ‘‘𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀑𑀭𑁄𑀳𑀺𑀢𑁆𑀯𑀸 𑀉𑀧𑀸𑀳𑀦𑀸;

𑀢𑀲𑁆𑀲 𑀧𑀸𑀤𑀸𑀦𑀺 𑀯𑀦𑁆𑀤𑀺𑀢𑁆𑀯𑀸, 𑀅𑀤𑀸𑀲𑀺𑀁 𑀙𑀢𑁆𑀢𑀼𑀧𑀸𑀳𑀦𑀁.

𑁧𑁯. ‘‘𑀢𑁂𑀦𑁂𑀯𑀸𑀳𑀁 𑀲𑀢𑀕𑀼𑀡𑀢𑁄, 𑀲𑀼𑀔𑀼𑀫𑀸𑀮𑁄 𑀲𑀼𑀔𑁂𑀥𑀺𑀢𑁄;

𑀅𑀧𑀺 𑀘 𑀤𑀸𑀦𑀁 𑀧𑀭𑀺𑀧𑀽𑀭𑁂𑀦𑁆𑀢𑁄, 𑀏𑀯𑀁 𑀢𑀲𑁆𑀲 𑀅𑀤𑀸𑀲𑀳’’𑀦𑁆𑀢𑀺.

𑀲𑀗𑁆𑀔𑀘𑀭𑀺𑀬𑀁 𑀤𑀼𑀢𑀺𑀬𑀁.

𑁩. 𑀓𑀼𑀭𑀼𑀭𑀸𑀚𑀘𑀭𑀺𑀬𑀸

𑁨𑁦. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀇𑀦𑁆𑀤𑀧𑀢𑁆𑀣𑁂 [𑀇𑀦𑁆𑀤𑀧𑀢𑁆𑀢𑁂 (𑀲𑀻. 𑀓.)] 𑀧𑀼𑀭𑀼𑀢𑁆𑀢𑀫𑁂;

𑀭𑀸𑀚𑀸 𑀥𑀦𑀜𑁆𑀘𑀬𑁄 𑀦𑀸𑀫, 𑀓𑀼𑀲𑀮𑁂 𑀤𑀲𑀳𑀼𑀧𑀸𑀕𑀢𑁄.

𑁨𑁧. ‘‘𑀓𑀮𑀺𑀗𑁆𑀕𑀭𑀝𑁆𑀞𑀯𑀺𑀲𑀬𑀸, 𑀩𑁆𑀭𑀸𑀳𑁆𑀫𑀡𑀸 𑀉𑀧𑀕𑀜𑁆𑀙𑀼 𑀫𑀁;

𑀆𑀬𑀸𑀘𑀼𑀁 𑀫𑀁 𑀳𑀢𑁆𑀣𑀺𑀦𑀸𑀕𑀁, 𑀥𑀜𑁆𑀜𑀁 𑀫𑀗𑁆𑀕𑀮𑀲𑀫𑁆𑀫𑀢𑀁.

𑁨𑁨. ‘‘‘𑀅𑀯𑀼𑀝𑁆𑀞𑀺𑀓𑁄 𑀚𑀦𑀧𑀤𑁄, 𑀤𑀼𑀩𑁆𑀪𑀺𑀓𑁆𑀔𑁄 𑀙𑀸𑀢𑀓𑁄 𑀫𑀳𑀸;

𑀤𑀤𑀸𑀳𑀺 𑀧𑀯𑀭𑀁 𑀦𑀸𑀕𑀁, 𑀦𑀻𑀮𑀁 𑀅𑀜𑁆𑀚𑀦𑀲𑀯𑁆𑀳𑀬𑀁.

𑁨𑁩. ‘‘‘𑀦 𑀫𑁂 𑀬𑀸𑀘𑀓𑀫𑀦𑀼𑀧𑁆𑀧𑀢𑁆𑀢𑁂, 𑀧𑀝𑀺𑀓𑁆𑀔𑁂𑀧𑁄 𑀅𑀦𑀼𑀘𑁆𑀙𑀯𑁄;

𑀫𑀸 𑀫𑁂 𑀪𑀺𑀚𑁆𑀚𑀺 𑀲𑀫𑀸𑀤𑀸𑀦𑀁, 𑀤𑀲𑁆𑀲𑀸𑀫𑀺 𑀯𑀺𑀧𑀼𑀮𑀁 𑀕𑀚𑀁’.

𑁨𑁪. ‘‘𑀦𑀸𑀕𑀁 𑀕𑀳𑁂𑀢𑁆𑀯𑀸 𑀲𑁄𑀡𑁆𑀟𑀸𑀬, 𑀪𑀺𑀗𑁆𑀕𑀸𑀭𑁂 [𑀪𑀺𑀗𑁆𑀓𑀸𑀭𑁂 (𑀲𑀻.)] 𑀭𑀢𑀦𑀸𑀫𑀬𑁂;

𑀚𑀮𑀁 𑀳𑀢𑁆𑀣𑁂 𑀆𑀓𑀺𑀭𑀺𑀢𑁆𑀯𑀸, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀤𑀁 𑀕𑀚𑀁.

𑁨𑁫. ‘‘𑀢𑀲𑁆𑀲 𑀦𑀸𑀕𑁂 𑀧𑀤𑀺𑀦𑁆𑀦𑀫𑁆𑀳𑀺, 𑀅𑀫𑀘𑁆𑀘𑀸 𑀏𑀢𑀤𑀩𑁆𑀭𑀯𑀼𑀁;

‘𑀓𑀺𑀁 𑀦𑀼 𑀢𑀼𑀬𑁆𑀳𑀁 𑀯𑀭𑀁 𑀦𑀸𑀕𑀁, 𑀬𑀸𑀘𑀓𑀸𑀦𑀁 𑀧𑀤𑀲𑁆𑀲𑀲𑀺.

𑁨𑁬. ‘‘‘𑀥𑀜𑁆𑀜𑀁 𑀫𑀗𑁆𑀕𑀮𑀲𑀫𑁆𑀧𑀦𑁆𑀦𑀁, 𑀲𑀗𑁆𑀕𑀸𑀫𑀯𑀺𑀚𑀬𑀼𑀢𑁆𑀢𑀫𑀁;

𑀢𑀲𑁆𑀫𑀺𑀁 𑀦𑀸𑀕𑁂 𑀧𑀤𑀺𑀦𑁆𑀦𑀫𑁆𑀳𑀺, 𑀓𑀺𑀁 𑀢𑁂 𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

𑁨𑁭. ‘‘‘𑀭𑀚𑁆𑀚𑀫𑁆𑀧𑀺 𑀫𑁂 𑀤𑀤𑁂 𑀲𑀩𑁆𑀩𑀁, 𑀲𑀭𑀻𑀭𑀁 𑀤𑀚𑁆𑀚𑀫𑀢𑁆𑀢𑀦𑁄;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀦𑀸𑀕𑀁 𑀅𑀤𑀸𑀲𑀳’’’𑀦𑁆𑀢𑀺.

𑀓𑀼𑀭𑀼𑀭𑀸𑀚𑀘𑀭𑀺𑀬𑀁 𑀢𑀢𑀺𑀬𑀁.

𑁪. 𑀫𑀳𑀸𑀲𑀼𑀤𑀲𑁆𑀲𑀦𑀘𑀭𑀺𑀬𑀸

𑁨𑁮. ‘‘𑀓𑀼𑀲𑀸𑀯𑀢𑀺𑀫𑁆𑀳𑀺 𑀦𑀕𑀭𑁂, 𑀬𑀤𑀸 𑀆𑀲𑀺𑀁 𑀫𑀳𑀻𑀧𑀢𑀺;

𑀫𑀳𑀸𑀲𑀼𑀤𑀲𑁆𑀲𑀦𑁄 𑀦𑀸𑀫, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁯. ‘‘𑀢𑀢𑁆𑀣𑀸𑀳𑀁 𑀤𑀺𑀯𑀲𑁂 𑀢𑀺𑀓𑁆𑀔𑀢𑁆𑀢𑀼𑀁, 𑀖𑁄𑀲𑀸𑀧𑁂𑀫𑀺 𑀢𑀳𑀺𑀁 𑀢𑀳𑀺𑀁;

‘𑀓𑁄 𑀓𑀺𑀁 𑀇𑀘𑁆𑀙𑀢𑀺 𑀧𑀢𑁆𑀣𑁂𑀢𑀺, 𑀓𑀲𑁆𑀲 𑀓𑀺𑀁 𑀤𑀻𑀬𑀢𑀽 𑀥𑀦𑀁.

𑁩𑁦. ‘‘‘𑀓𑁄 𑀙𑀸𑀢𑀓𑁄 𑀓𑁄 𑀢𑀲𑀺𑀢𑁄, 𑀓𑁄 𑀫𑀸𑀮𑀁 𑀓𑁄 𑀯𑀺𑀮𑁂𑀧𑀦𑀁;

𑀦𑀸𑀦𑀸𑀭𑀢𑁆𑀢𑀸𑀦𑀺 𑀯𑀢𑁆𑀣𑀸𑀦𑀺, 𑀓𑁄 𑀦𑀕𑁆𑀕𑁄 𑀧𑀭𑀺𑀤𑀳𑀺𑀲𑁆𑀲𑀢𑀺.

𑁩𑁧. ‘‘‘𑀓𑁄 𑀧𑀣𑁂 𑀙𑀢𑁆𑀢𑀫𑀸𑀤𑁂𑀢𑀺, 𑀓𑁄𑀧𑀸𑀳𑀦𑀸 𑀫𑀼𑀤𑀽 𑀲𑀼𑀪𑀸’;

𑀇𑀢𑀺 𑀲𑀸𑀬𑀜𑁆𑀘 𑀧𑀸𑀢𑁄 𑀘, 𑀖𑁄𑀲𑀸𑀧𑁂𑀫𑀺 𑀢𑀳𑀺𑀁 𑀢𑀳𑀺𑀁.

𑁩𑁨. ‘‘𑀦 𑀢𑀁 𑀤𑀲𑀲𑀼 𑀞𑀸𑀦𑁂𑀲𑀼, 𑀦𑀧𑀺 𑀞𑀸𑀦𑀲𑀢𑁂𑀲𑀼 𑀯𑀸;

𑀅𑀦𑁂𑀓𑀲𑀢𑀞𑀸𑀦𑁂𑀲𑀼, 𑀧𑀝𑀺𑀬𑀢𑁆𑀢𑀁 𑀬𑀸𑀘𑀓𑁂 𑀥𑀦𑀁.

𑁩𑁩. ‘‘𑀤𑀺𑀯𑀸 𑀯𑀸 𑀬𑀤𑀺 𑀯𑀸 𑀭𑀢𑁆𑀢𑀺𑀁, 𑀬𑀤𑀺 𑀏𑀢𑀺 𑀯𑀦𑀺𑀩𑁆𑀩𑀓𑁄;

𑀮𑀤𑁆𑀥𑀸 𑀬𑀤𑀺𑀘𑁆𑀙𑀓𑀁 𑀪𑁄𑀕𑀁, 𑀧𑀽𑀭𑀳𑀢𑁆𑀣𑁄𑀯 𑀕𑀘𑁆𑀙𑀢𑀺.

𑁩𑁪. ‘‘𑀏𑀯𑀭𑀽𑀧𑀁 𑀫𑀳𑀸𑀤𑀸𑀦𑀁, 𑀅𑀤𑀸𑀲𑀺𑀁 𑀬𑀸𑀯𑀚𑀻𑀯𑀺𑀓𑀁;

𑀦𑀧𑀸𑀳𑀁 𑀤𑁂𑀲𑁆𑀲𑀁 𑀥𑀦𑀁 𑀤𑀫𑁆𑀫𑀺, 𑀦𑀧𑀺 𑀦𑀢𑁆𑀣𑀺 𑀦𑀺𑀘𑀬𑁄 𑀫𑀬𑀺.

𑁩𑁫. ‘‘𑀬𑀣𑀸𑀧𑀺 𑀆𑀢𑀼𑀭𑁄 𑀦𑀸𑀫, 𑀭𑁄𑀕𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸;

𑀥𑀦𑁂𑀦 𑀯𑁂𑀚𑁆𑀚𑀁 𑀢𑀧𑁆𑀧𑁂𑀢𑁆𑀯𑀸, 𑀭𑁄𑀕𑀢𑁄 𑀧𑀭𑀺𑀫𑀼𑀘𑁆𑀘𑀢𑀺.

𑁩𑁬. ‘‘𑀢𑀣𑁂𑀯𑀸𑀳𑀁 𑀚𑀸𑀦𑀫𑀸𑀦𑁄, 𑀧𑀭𑀺𑀧𑀽𑀭𑁂𑀢𑀼𑀫𑀲𑁂𑀲𑀢𑁄;

𑀊𑀦𑀫𑀦𑀁 𑀧𑀽𑀭𑀬𑀺𑀢𑀼𑀁, 𑀤𑁂𑀫𑀺 𑀤𑀸𑀦𑀁 𑀯𑀦𑀺𑀩𑁆𑀩𑀓𑁂;

𑀦𑀺𑀭𑀸𑀮𑀬𑁄 𑀅𑀧𑀘𑁆𑀘𑀸𑀲𑁄, 𑀲𑀫𑁆𑀩𑁄𑀥𑀺𑀫𑀦𑀼𑀧𑀢𑁆𑀢𑀺𑀬𑀸’’𑀢𑀺.

𑀫𑀳𑀸𑀲𑀼𑀤𑀲𑁆𑀲𑀦𑀘𑀭𑀺𑀬𑀁 𑀘𑀢𑀼𑀢𑁆𑀣𑀁.

𑁫. 𑀫𑀳𑀸𑀕𑁄𑀯𑀺𑀦𑁆𑀤𑀘𑀭𑀺𑀬𑀸

𑁩𑁭. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀲𑀢𑁆𑀢𑀭𑀸𑀚𑀧𑀼𑀭𑁄𑀳𑀺𑀢𑁄;

𑀧𑀽𑀚𑀺𑀢𑁄 𑀦𑀭𑀤𑁂𑀯𑁂𑀳𑀺, 𑀫𑀳𑀸𑀕𑁄𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑁄.

𑁩𑁮. ‘‘𑀢𑀤𑀸𑀳𑀁 𑀲𑀢𑁆𑀢𑀭𑀚𑁆𑀚𑁂𑀲𑀼, 𑀬𑀁 𑀫𑁂 𑀆𑀲𑀺 𑀉𑀧𑀸𑀬𑀦𑀁;

𑀢𑁂𑀦 𑀤𑁂𑀫𑀺 𑀫𑀳𑀸𑀤𑀸𑀦𑀁, 𑀅𑀓𑁆𑀔𑁄𑀩𑁆𑀪𑀁 [𑀅𑀓𑁆𑀔𑁄𑀪𑀁 (𑀲𑁆𑀬𑀸. 𑀓𑀁.)] 𑀲𑀸𑀕𑀭𑀽𑀧𑀫𑀁.

𑁩𑁯. ‘‘𑀦 𑀫𑁂 𑀤𑁂𑀲𑁆𑀲𑀁 𑀥𑀦𑀁 𑀥𑀜𑁆𑀜𑀁, 𑀦𑀧𑀺 𑀦𑀢𑁆𑀣𑀺 𑀦𑀺𑀘𑀬𑁄 𑀫𑀬𑀺;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀤𑁂𑀫𑀺 𑀯𑀭𑀁 𑀥𑀦’’𑀦𑁆𑀢𑀺.

𑀫𑀳𑀸𑀕𑁄𑀯𑀺𑀦𑁆𑀤𑀘𑀭𑀺𑀬𑀁 𑀧𑀜𑁆𑀘𑀫𑀁.

𑁬. 𑀦𑀺𑀫𑀺𑀭𑀸𑀚𑀘𑀭𑀺𑀬𑀸

𑁪𑁦. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀫𑀺𑀣𑀺𑀮𑀸𑀬𑀁 𑀧𑀼𑀭𑀼𑀢𑁆𑀢𑀫𑁂;

𑀦𑀺𑀫𑀺 𑀦𑀸𑀫 𑀫𑀳𑀸𑀭𑀸𑀚𑀸, 𑀧𑀡𑁆𑀟𑀺𑀢𑁄 𑀓𑀼𑀲𑀮𑀢𑁆𑀣𑀺𑀓𑁄.

𑁪𑁧. ‘‘𑀢𑀤𑀸𑀳𑀁 𑀫𑀸𑀧𑀬𑀺𑀢𑁆𑀯𑀸𑀦, 𑀘𑀢𑀼𑀲𑁆𑀲𑀸𑀮𑀁 𑀘𑀢𑀼𑀫𑁆𑀫𑀼𑀔𑀁;

𑀢𑀢𑁆𑀣 𑀤𑀸𑀦𑀁 𑀧𑀯𑀢𑁆𑀢𑁂𑀲𑀺𑀁, 𑀫𑀺𑀕𑀧𑀓𑁆𑀔𑀺𑀦𑀭𑀸𑀤𑀺𑀦𑀁.

𑁪𑁨. ‘‘𑀅𑀘𑁆𑀙𑀸𑀤𑀦𑀜𑁆𑀘 𑀲𑀬𑀦𑀁, 𑀅𑀦𑁆𑀦𑀁 𑀧𑀸𑀦𑀜𑁆𑀘 𑀪𑁄𑀚𑀦𑀁;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀓𑀭𑀺𑀢𑁆𑀯𑀸𑀦, 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺𑀁.

𑁪𑁩. ‘‘𑀬𑀣𑀸𑀧𑀺 𑀲𑁂𑀯𑀓𑁄 𑀲𑀸𑀫𑀺𑀁, 𑀥𑀦𑀳𑁂𑀢𑀼𑀫𑀼𑀧𑀸𑀕𑀢𑁄;

𑀓𑀸𑀬𑁂𑀦 𑀯𑀸𑀘𑀸 𑀫𑀦𑀲𑀸, 𑀆𑀭𑀸𑀥𑀦𑀻𑀬𑀫𑁂𑀲𑀢𑀺.

𑁪𑁪. ‘‘𑀢𑀣𑁂𑀯𑀸𑀳𑀁 𑀲𑀩𑁆𑀩𑀪𑀯𑁂, 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺 𑀩𑁄𑀥𑀺𑀚𑀁;

𑀤𑀸𑀦𑁂𑀦 𑀲𑀢𑁆𑀢𑁂 𑀢𑀧𑁆𑀧𑁂𑀢𑁆𑀯𑀸, 𑀇𑀘𑁆𑀙𑀸𑀫𑀺 𑀩𑁄𑀥𑀺𑀫𑀼𑀢𑁆𑀢𑀫’’𑀦𑁆𑀢𑀺.

𑀦𑀺𑀫𑀺𑀭𑀸𑀚𑀘𑀭𑀺𑀬𑀁 𑀙𑀝𑁆𑀞𑀁.

𑁭. 𑀘𑀦𑁆𑀤𑀓𑀼𑀫𑀸𑀭𑀘𑀭𑀺𑀬𑀸

𑁪𑁫. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀏𑀓𑀭𑀸𑀚𑀲𑁆𑀲 𑀅𑀢𑁆𑀭𑀚𑁄;

𑀦𑀕𑀭𑁂 𑀧𑀼𑀧𑁆𑀨𑀯𑀢𑀺𑀬𑀸, 𑀓𑀼𑀫𑀸𑀭𑁄 𑀘𑀦𑁆𑀤𑀲𑀯𑁆𑀳𑀬𑁄.

𑁪𑁬. ‘‘𑀢𑀤𑀸𑀳𑀁 𑀬𑀚𑀦𑀸 𑀫𑀼𑀢𑁆𑀢𑁄, 𑀦𑀺𑀓𑁆𑀔𑀦𑁆𑀢𑁄 𑀬𑀜𑁆𑀜𑀯𑀸𑀝𑀢𑁄;

𑀲𑀁𑀯𑁂𑀕𑀁 𑀚𑀦𑀬𑀺𑀢𑁆𑀯𑀸𑀦, 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺𑀁.

𑁪𑁭. ‘‘𑀦𑀸𑀳𑀁 𑀧𑀺𑀯𑀸𑀫𑀺 𑀔𑀸𑀤𑀸𑀫𑀺, 𑀦𑀧𑀺 𑀪𑀼𑀜𑁆𑀚𑀸𑀫𑀺 𑀪𑁄𑀚𑀦𑀁;

𑀤𑀓𑁆𑀔𑀺𑀡𑁂𑀬𑁆𑀬𑁂 𑀅𑀤𑀢𑁆𑀯𑀸𑀦, 𑀅𑀧𑀺 𑀙𑀧𑁆𑀧𑀜𑁆𑀘𑀭𑀢𑁆𑀢𑀺𑀬𑁄.

𑁪𑁮. ‘‘𑀬𑀣𑀸𑀧𑀺 𑀯𑀸𑀡𑀺𑀚𑁄 𑀦𑀸𑀫, 𑀓𑀢𑁆𑀯𑀸𑀦 𑀪𑀡𑁆𑀟𑀲𑀜𑁆𑀘𑀬𑀁;

𑀬𑀢𑁆𑀣 𑀮𑀸𑀪𑁄 𑀫𑀳𑀸 𑀳𑁄𑀢𑀺, 𑀢𑀢𑁆𑀣 𑀢𑀁 [𑀢𑀢𑁆𑀣 𑀦𑀁 (𑀲𑀻.), 𑀢𑀢𑁆𑀣 (𑀓.)] 𑀳𑀭𑀢𑀺 𑀪𑀡𑁆𑀟𑀓𑀁.

𑁪𑁯. ‘‘𑀢𑀣𑁂𑀯 𑀲𑀓𑀪𑀼𑀢𑁆𑀢𑀸𑀧𑀺, 𑀧𑀭𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁;

𑀢𑀲𑁆𑀫𑀸 𑀧𑀭𑀲𑁆𑀲 𑀤𑀸𑀢𑀩𑁆𑀩𑀁, 𑀲𑀢𑀪𑀸𑀕𑁄 𑀪𑀯𑀺𑀲𑁆𑀲𑀢𑀺.

𑁫𑁦. ‘‘𑀏𑀢𑀫𑀢𑁆𑀣𑀯𑀲𑀁 𑀜𑀢𑁆𑀯𑀸, 𑀤𑁂𑀫𑀺 𑀤𑀸𑀦𑀁 𑀪𑀯𑀸𑀪𑀯𑁂;

𑀦 𑀧𑀝𑀺𑀓𑁆𑀓𑀫𑀸𑀫𑀺 𑀤𑀸𑀦𑀢𑁄, 𑀲𑀫𑁆𑀩𑁄𑀥𑀺𑀫𑀦𑀼𑀧𑀢𑁆𑀢𑀺𑀬𑀸’’𑀢𑀺.

𑀘𑀦𑁆𑀤𑀓𑀼𑀫𑀸𑀭𑀘𑀭𑀺𑀬𑀁 𑀲𑀢𑁆𑀢𑀫𑀁.

𑁮. 𑀲𑀺𑀯𑀺𑀭𑀸𑀚𑀘𑀭𑀺𑀬𑀸

𑁫𑁧. ‘‘𑀅𑀭𑀺𑀝𑁆𑀞𑀲𑀯𑁆𑀳𑀬𑁂 𑀦𑀕𑀭𑁂, 𑀲𑀺𑀯𑀺𑀦𑀸𑀫𑀸𑀲𑀺 𑀔𑀢𑁆𑀢𑀺𑀬𑁄;

𑀦𑀺𑀲𑀚𑁆𑀚 𑀧𑀸𑀲𑀸𑀤𑀯𑀭𑁂, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸.

𑁫𑁨. ‘‘‘𑀬𑀁 𑀓𑀺𑀜𑁆𑀘𑀺 𑀫𑀸𑀦𑀼𑀲𑀁 𑀤𑀸𑀦𑀁, 𑀅𑀤𑀺𑀦𑁆𑀦𑀁 𑀫𑁂 𑀦 𑀯𑀺𑀚𑁆𑀚𑀢𑀺;

𑀬𑁄𑀧𑀺 𑀬𑀸𑀘𑁂𑀬𑁆𑀬 𑀫𑀁 𑀘𑀓𑁆𑀔𑀼𑀁, 𑀤𑀤𑁂𑀬𑁆𑀬𑀁 𑀅𑀯𑀺𑀓𑀫𑁆𑀧𑀺𑀢𑁄’.

𑁫𑁩. ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀲𑁆𑀲𑀭𑁄;

𑀦𑀺𑀲𑀺𑀦𑁆𑀦𑁄 𑀤𑁂𑀯𑀧𑀭𑀺𑀲𑀸𑀬, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁫𑁪. ‘‘‘𑀦𑀺𑀲𑀚𑁆𑀚 𑀧𑀸𑀲𑀸𑀤𑀯𑀭𑁂, 𑀲𑀺𑀯𑀺𑀭𑀸𑀚𑀸 𑀫𑀳𑀺𑀤𑁆𑀥𑀺𑀓𑁄;

𑀘𑀺𑀦𑁆𑀢𑁂𑀦𑁆𑀢𑁄 𑀯𑀺𑀯𑀺𑀥𑀁 𑀤𑀸𑀦𑀁, 𑀅𑀤𑁂𑀬𑁆𑀬𑀁 𑀲𑁄 𑀦 𑀧𑀲𑁆𑀲𑀢𑀺.

𑁫𑁫. ‘‘‘𑀢𑀣𑀁 𑀦𑀼 𑀯𑀺𑀢𑀣𑀁 𑀦𑁂𑀢𑀁, 𑀳𑀦𑁆𑀤 𑀯𑀻𑀫𑀁𑀲𑀬𑀸𑀫𑀺 𑀢𑀁;

𑀫𑀼𑀳𑀼𑀢𑁆𑀢𑀁 𑀆𑀕𑀫𑁂𑀬𑁆𑀬𑀸𑀣, 𑀬𑀸𑀯 𑀚𑀸𑀦𑀸𑀫𑀺 𑀢𑀁 𑀫𑀦𑀁’.

𑁫𑁬. ‘‘𑀧𑀯𑁂𑀥𑀫𑀸𑀦𑁄 𑀧𑀮𑀺𑀢𑀲𑀺𑀭𑁄, 𑀯𑀮𑀺𑀕𑀢𑁆𑀢𑁄 [𑀯𑀮𑀺𑀢𑀕𑀢𑁆𑀢𑁄 (𑀲𑀻.)] 𑀚𑀭𑀸𑀢𑀼𑀭𑁄;

𑀅𑀦𑁆𑀥𑀯𑀡𑁆𑀡𑁄𑀯 𑀳𑀼𑀢𑁆𑀯𑀸𑀦, 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺.

𑁫𑁭. ‘‘𑀲𑁄 𑀢𑀤𑀸 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀯𑀸𑀫𑀁 𑀤𑀓𑁆𑀔𑀺𑀡𑀩𑀸𑀳𑀼 𑀘;

𑀲𑀺𑀭𑀲𑁆𑀫𑀺𑀁 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁫𑁮. ‘‘‘𑀬𑀸𑀘𑀸𑀫𑀺 𑀢𑀁 𑀫𑀳𑀸𑀭𑀸𑀚, 𑀥𑀫𑁆𑀫𑀺𑀓 𑀭𑀝𑁆𑀞𑀯𑀟𑁆𑀠𑀦;

𑀢𑀯 𑀤𑀸𑀦𑀭𑀢𑀸 𑀓𑀺𑀢𑁆𑀢𑀺, 𑀉𑀕𑁆𑀕𑀢𑀸 𑀤𑁂𑀯𑀫𑀸𑀦𑀼𑀲𑁂.

𑁫𑁯. ‘‘‘𑀉𑀪𑁄𑀧𑀺 𑀦𑁂𑀢𑁆𑀢𑀸 𑀦𑀬𑀦𑀸, 𑀅𑀦𑁆𑀥𑀸 𑀉𑀧𑀳𑀢𑀸 𑀫𑀫;

𑀏𑀓𑀁 𑀫𑁂 𑀦𑀬𑀦𑀁 𑀤𑁂𑀳𑀺, 𑀢𑁆𑀯𑀫𑁆𑀧𑀺 𑀏𑀓𑁂𑀦 𑀬𑀸𑀧𑀬’.

𑁬𑁦. ‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀳𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

𑀓𑀢𑀜𑁆𑀚𑀮𑀻 𑀯𑁂𑀤𑀚𑀸𑀢𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁬𑁧. ‘‘‘𑀇𑀤𑀸𑀦𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀧𑀸𑀲𑀸𑀤𑀢𑁄 𑀇𑀥𑀸𑀕𑀢𑁄;

𑀢𑁆𑀯𑀁 𑀫𑀫 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀦𑁂𑀢𑁆𑀢𑀁 𑀬𑀸𑀘𑀺𑀢𑀼𑀫𑀸𑀕𑀢𑁄.

𑁬𑁨. ‘‘‘𑀅𑀳𑁄 𑀫𑁂 𑀫𑀸𑀦𑀲𑀁 𑀲𑀺𑀤𑁆𑀥𑀁, 𑀲𑀗𑁆𑀓𑀧𑁆𑀧𑁄 𑀧𑀭𑀺𑀧𑀽𑀭𑀺𑀢𑁄;

𑀅𑀤𑀺𑀦𑁆𑀦𑀧𑀼𑀩𑁆𑀩𑀁 𑀤𑀸𑀦𑀯𑀭𑀁, 𑀅𑀚𑁆𑀚 𑀤𑀲𑁆𑀲𑀸𑀫𑀺 𑀬𑀸𑀘𑀓𑁂.

𑁬𑁩. ‘‘‘𑀏𑀳𑀺 𑀲𑀺𑀯𑀓 𑀉𑀝𑁆𑀞𑁂𑀳𑀺, 𑀫𑀸 𑀤𑀦𑁆𑀥𑀬𑀺 𑀫𑀸 𑀧𑀯𑁂𑀥𑀬𑀺;

𑀉𑀪𑁄𑀧𑀺 𑀦𑀬𑀦𑀁 𑀤𑁂𑀳𑀺, 𑀉𑀧𑁆𑀧𑀸𑀝𑁂𑀢𑁆𑀯𑀸 𑀯𑀡𑀺𑀩𑁆𑀩𑀓𑁂’.

𑁬𑁪. ‘‘𑀢𑀢𑁄 𑀲𑁄 𑀘𑁄𑀤𑀺𑀢𑁄 𑀫𑀬𑁆𑀳𑀁, 𑀲𑀺𑀯𑀓𑁄 𑀯𑀘𑀦𑀁 𑀓𑀭𑁄;

𑀉𑀤𑁆𑀥𑀭𑀺𑀢𑁆𑀯𑀸𑀦 𑀧𑀸𑀤𑀸𑀲𑀺, 𑀢𑀸𑀮𑀫𑀺𑀜𑁆𑀚𑀁𑀯 𑀬𑀸𑀘𑀓𑁂.

𑁬𑁫. ‘‘𑀤𑀤𑀫𑀸𑀦𑀲𑁆𑀲 𑀤𑁂𑀦𑁆𑀢𑀲𑁆𑀲, 𑀤𑀺𑀦𑁆𑀦𑀤𑀸𑀦𑀲𑁆𑀲 𑀫𑁂 𑀲𑀢𑁄;

𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀸 𑀦𑀢𑁆𑀣𑀺, 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸.