𑁫. 𑀲𑁄𑀡𑀧𑀡𑁆𑀟𑀺𑀢𑀘𑀭𑀺𑀬𑀸

𑁪𑁨. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀦𑀕𑀭𑁂 𑀩𑁆𑀭𑀳𑁆𑀫𑀯𑀟𑁆𑀠𑀦𑁂;

𑀢𑀢𑁆𑀣 𑀓𑀼𑀮𑀯𑀭𑁂 𑀲𑁂𑀝𑁆𑀞𑁂, 𑀫𑀳𑀸𑀲𑀸𑀮𑁂 𑀅𑀚𑀸𑀬𑀳𑀁.

𑁪𑁩. ‘‘𑀢𑀤𑀸𑀧𑀺 𑀮𑁄𑀓𑀁 𑀤𑀺𑀲𑁆𑀯𑀸𑀦, 𑀅𑀦𑁆𑀥𑀻𑀪𑀽𑀢𑀁 𑀢𑀫𑁄𑀢𑁆𑀣𑀝𑀁;

𑀘𑀺𑀢𑁆𑀢𑀁 𑀪𑀯𑀢𑁄 𑀧𑀢𑀺𑀓𑀼𑀝𑀢𑀺, 𑀢𑀼𑀢𑁆𑀢𑀯𑁂𑀕𑀳𑀢𑀁 𑀯𑀺𑀬.

𑁪𑁪. ‘‘𑀤𑀺𑀲𑁆𑀯𑀸𑀦 𑀯𑀺𑀯𑀺𑀥𑀁 𑀧𑀸𑀧𑀁, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

‘𑀓𑀤𑀸𑀳𑀁 𑀕𑁂𑀳𑀸 𑀦𑀺𑀓𑁆𑀔𑀫𑁆𑀫, 𑀧𑀯𑀺𑀲𑀺𑀲𑁆𑀲𑀸𑀫𑀺 𑀓𑀸𑀦𑀦𑀁’.

𑁪𑁫. ‘‘𑀢𑀤𑀸𑀧𑀺 𑀫𑀁 𑀦𑀺𑀫𑀦𑁆𑀢𑁂𑀲𑀼𑀁, 𑀓𑀸𑀫𑀪𑁄𑀕𑁂𑀳𑀺 𑀜𑀸𑀢𑀬𑁄;

𑀢𑁂𑀲𑀫𑁆𑀧𑀺 𑀙𑀦𑁆𑀤𑀫𑀸𑀘𑀺𑀓𑁆𑀔𑀺𑀁, ‘𑀫𑀸 𑀦𑀺𑀫𑀦𑁆𑀢𑁂𑀣 𑀢𑁂𑀳𑀺 𑀫𑀁’.

𑁪𑁬. ‘‘𑀬𑁄 𑀫𑁂 𑀓𑀦𑀺𑀝𑁆𑀞𑀓𑁄 𑀪𑀸𑀢𑀸, 𑀦𑀦𑁆𑀤𑁄 𑀦𑀸𑀫𑀸𑀲𑀺 𑀧𑀡𑁆𑀟𑀺𑀢𑁄;

𑀲𑁄𑀧𑀺 𑀫𑀁 𑀅𑀦𑀼𑀲𑀺𑀓𑁆𑀔𑀦𑁆𑀢𑁄, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺.

𑁪𑁭. ‘‘𑀅𑀳𑀁 𑀲𑁄𑀡𑁄 𑀘 𑀦𑀦𑁆𑀤𑁄 𑀘, 𑀉𑀪𑁄 𑀫𑀸𑀢𑀸𑀧𑀺𑀢𑀸 𑀫𑀫;

𑀢𑀤𑀸𑀧𑀺 𑀪𑁄𑀕𑁂 𑀙𑀟𑁆𑀟𑁂𑀢𑁆𑀯𑀸, 𑀧𑀸𑀯𑀺𑀲𑀺𑀫𑁆𑀳𑀸 𑀫𑀳𑀸𑀯𑀦’’𑀦𑁆𑀢𑀺.

𑀲𑁄𑀡𑀧𑀡𑁆𑀟𑀺𑀢𑀘𑀭𑀺𑀬𑀁 𑀧𑀜𑁆𑀘𑀫𑀁.