𑁧𑁫. 𑀫𑀳𑀸𑀮𑁄𑀫𑀳𑀁𑀲𑀘𑀭𑀺𑀬𑀸

𑁧𑁧𑁯. ‘‘𑀲𑀼𑀲𑀸𑀦𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀙𑀯𑀝𑁆𑀞𑀺𑀓𑀁 𑀉𑀧𑀦𑀺𑀥𑀸𑀬𑀳𑀁;

𑀕𑀸𑀫𑀡𑁆𑀟𑀮𑀸 [𑀕𑁄𑀫𑀡𑁆𑀟𑀮𑀸 (𑀲𑀻.), 𑀕𑀸𑀫𑀫𑀡𑁆𑀟𑀮𑀸 (𑀲𑁆𑀬𑀸.)] 𑀉𑀧𑀸𑀕𑀦𑁆𑀢𑁆𑀯𑀸, 𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑀺𑀦𑀧𑁆𑀧𑀓𑀁.

𑁧𑁨𑁦. ‘‘𑀅𑀧𑀭𑁂 𑀕𑀦𑁆𑀥𑀫𑀸𑀮𑀜𑁆𑀘, 𑀪𑁄𑀚𑀦𑀁 𑀯𑀺𑀯𑀺𑀥𑀁 𑀩𑀳𑀼𑀁;

𑀉𑀧𑀸𑀬𑀦𑀸𑀦𑀽𑀧𑀦𑁂𑀦𑁆𑀢𑀺, 𑀳𑀝𑁆𑀞𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑀸.

𑁧𑁨𑁧. ‘‘𑀬𑁂 𑀫𑁂 𑀤𑀼𑀓𑁆𑀔𑀁 𑀉𑀧𑀳𑀭𑀦𑁆𑀢𑀺, 𑀬𑁂 𑀘 𑀤𑁂𑀦𑁆𑀢𑀺 𑀲𑀼𑀔𑀁 𑀫𑀫;

𑀲𑀩𑁆𑀩𑁂𑀲𑀁 𑀲𑀫𑀓𑁄 𑀳𑁄𑀫𑀺, 𑀤𑀬𑀸 𑀓𑁄𑀧𑁄 𑀦 𑀯𑀺𑀚𑁆𑀚𑀢𑀺.

𑁧𑁨𑁨. ‘‘𑀲𑀼𑀔𑀤𑀼𑀓𑁆𑀔𑁂 𑀢𑀼𑀮𑀸𑀪𑀽𑀢𑁄, 𑀬𑀲𑁂𑀲𑀼 𑀅𑀬𑀲𑁂𑀲𑀼 𑀘;

𑀲𑀩𑁆𑀩𑀢𑁆𑀣 𑀲𑀫𑀓𑁄 𑀳𑁄𑀫𑀺, 𑀏𑀲𑀸 𑀫𑁂 𑀉𑀧𑁂𑀓𑁆𑀔𑀸𑀧𑀸𑀭𑀫𑀻’’𑀢𑀺.

𑀫𑀳𑀸𑀮𑁄𑀫𑀳𑀁𑀲𑀘𑀭𑀺𑀬𑀁 𑀧𑀦𑁆𑀦𑀭𑀲𑀫𑀁.

𑀬𑀼𑀥𑀜𑁆𑀚𑀬𑀯𑀕𑁆𑀕𑁄 𑀢𑀢𑀺𑀬𑁄.