𑁧𑁦. 𑀫𑀘𑁆𑀙𑀭𑀸𑀚𑀘𑀭𑀺𑀬𑀸

𑁮𑁩. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀫𑀘𑁆𑀙𑀭𑀸𑀚𑀸 𑀫𑀳𑀸𑀲𑀭𑁂;

𑀉𑀡𑁆𑀳𑁂 𑀲𑀽𑀭𑀺𑀬𑀲𑀦𑁆𑀢𑀸𑀧𑁂, 𑀲𑀭𑁂 𑀉𑀤𑀓 𑀔𑀻𑀬𑀣.

𑁮𑁪. ‘‘𑀢𑀢𑁄 𑀓𑀸𑀓𑀸 𑀘 𑀕𑀺𑀚𑁆𑀛𑀸 𑀘, 𑀓𑀗𑁆𑀓𑀸 [𑀩𑀓𑀸 (𑀲𑀻.)] 𑀓𑀼𑀮𑀮𑀲𑁂𑀦𑀓𑀸;

𑀪𑀓𑁆𑀔𑀬𑀦𑁆𑀢𑀺 𑀤𑀺𑀯𑀸𑀭𑀢𑁆𑀢𑀺𑀁, 𑀫𑀘𑁆𑀙𑁂 𑀉𑀧𑀦𑀺𑀲𑀻𑀤𑀺𑀬.

𑁮𑁫. ‘‘𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀢𑁆𑀣, 𑀲𑀳 𑀜𑀸𑀢𑀻𑀳𑀺 𑀧𑀻𑀴𑀺𑀢𑁄;

‘𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦, 𑀜𑀸𑀢𑀻 𑀤𑀼𑀓𑁆𑀔𑀸 𑀧𑀫𑁄𑀘𑀬𑁂’.

𑁮𑁬. ‘‘𑀯𑀺𑀘𑀺𑀦𑁆𑀢𑀬𑀺𑀢𑁆𑀯𑀸 𑀥𑀫𑁆𑀫𑀢𑁆𑀣𑀁, 𑀲𑀘𑁆𑀘𑀁 𑀅𑀤𑁆𑀤𑀲 𑀧𑀲𑁆𑀲𑀬𑀁;

𑀲𑀘𑁆𑀘𑁂 𑀞𑀢𑁆𑀯𑀸 𑀧𑀫𑁄𑀘𑁂𑀲𑀺𑀁, 𑀜𑀸𑀢𑀻𑀦𑀁 𑀢𑀁 𑀅𑀢𑀺𑀓𑁆𑀔𑀬𑀁.

𑁮𑁭. ‘‘𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑀢𑀁 𑀥𑀫𑁆𑀫𑀁, 𑀧𑀭𑀫𑀢𑁆𑀣𑀁 𑀯𑀺𑀘𑀺𑀦𑁆𑀢𑀬𑀁;

𑀅𑀓𑀸𑀲𑀺 𑀲𑀘𑁆𑀘𑀓𑀺𑀭𑀺𑀬𑀁, 𑀬𑀁 𑀮𑁄𑀓𑁂 𑀥𑀼𑀯𑀲𑀲𑁆𑀲𑀢𑀁.

𑁮𑁮. ‘‘‘𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦𑀁, 𑀬𑀢𑁄 𑀧𑀢𑁆𑀢𑁄𑀲𑁆𑀫𑀺 𑀯𑀺𑀜𑁆𑀜𑀼𑀢𑀁;

𑀦𑀸𑀪𑀺𑀚𑀸𑀦𑀸𑀫𑀺 𑀲𑀜𑁆𑀘𑀺𑀘𑁆𑀘, 𑀏𑀓𑀧𑀸𑀡𑀫𑁆𑀧𑀺 𑀳𑀺𑀁𑀲𑀺𑀢𑀁.

𑁮𑁯. ‘‘‘𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀧𑀚𑁆𑀚𑀼𑀦𑁆𑀦𑁄 𑀅𑀪𑀺𑀯𑀲𑁆𑀲𑀢𑀼;

𑀅𑀪𑀺𑀢𑁆𑀣𑀦𑀬 𑀧𑀚𑁆𑀚𑀼𑀦𑁆𑀦, 𑀦𑀺𑀥𑀺𑀁 𑀓𑀸𑀓𑀲𑁆𑀲 𑀦𑀸𑀲𑀬;

𑀓𑀸𑀓𑀁 𑀲𑁄𑀓𑀸𑀬 𑀭𑀦𑁆𑀥𑁂𑀳𑀺, 𑀫𑀘𑁆𑀙𑁂 𑀲𑁄𑀓𑀸 𑀧𑀫𑁄𑀘𑀬’.

𑁯𑁦. ‘‘𑀲𑀳𑀓𑀢𑁂 𑀲𑀘𑁆𑀘𑀯𑀭𑁂, 𑀧𑀚𑁆𑀚𑀼𑀦𑁆𑀦𑁄 𑀅𑀪𑀺𑀕𑀚𑁆𑀚𑀺𑀬;

𑀣𑀮𑀁 𑀦𑀺𑀦𑁆𑀦𑀜𑁆𑀘 𑀧𑀽𑀭𑁂𑀦𑁆𑀢𑁄, 𑀔𑀡𑁂𑀦 𑀅𑀪𑀺𑀯𑀲𑁆𑀲𑀣.

𑁯𑁧. ‘‘𑀏𑀯𑀭𑀽𑀧𑀁 𑀲𑀘𑁆𑀘𑀯𑀭𑀁, 𑀓𑀢𑁆𑀯𑀸 𑀯𑀻𑀭𑀺𑀬𑀫𑀼𑀢𑁆𑀢𑀫𑀁;

𑀯𑀲𑁆𑀲𑀸𑀧𑁂𑀲𑀺𑀁 𑀫𑀳𑀸𑀫𑁂𑀖𑀁, 𑀲𑀘𑁆𑀘𑀢𑁂𑀚𑀩𑀮𑀲𑁆𑀲𑀺𑀢𑁄;

𑀲𑀘𑁆𑀘𑁂𑀦 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀲𑀘𑁆𑀘𑀧𑀸𑀭𑀫𑀻’’𑀢𑀺.

𑀫𑀘𑁆𑀙𑀭𑀸𑀚𑀘𑀭𑀺𑀬𑀁 𑀤𑀲𑀫𑀁.