𑁧𑁧. 𑀓𑀡𑁆𑀳𑀤𑀻𑀧𑀸𑀬𑀦𑀘𑀭𑀺𑀬𑀸

𑁯𑁨. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀓𑀡𑁆𑀳𑀤𑀻𑀧𑀸𑀬𑀦𑁄 𑀇𑀲𑀺;

𑀧𑀭𑁄𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀺, 𑀅𑀦𑀪𑀺𑀭𑀢𑁄𑀘𑀭𑀺𑀁 𑀅𑀳𑀁.

𑁯𑁩. ‘‘𑀦 𑀓𑁄𑀘𑀺 𑀏𑀢𑀁 𑀚𑀸𑀦𑀸𑀢𑀺, 𑀅𑀦𑀪𑀺𑀭𑀢𑀺𑀫𑀦𑀁 𑀫𑀫;

𑀅𑀳𑀜𑁆𑀳𑀺 𑀓𑀲𑁆𑀲𑀘𑀺 𑀦𑀸𑀘𑀺𑀓𑁆𑀔𑀺𑀁, 𑀅𑀭𑀢𑀺 𑀫𑁂 𑀘𑀭𑀢𑀺 𑀫𑀸𑀦𑀲𑁂.

𑁯𑁪. ‘‘𑀲𑀩𑁆𑀭𑀳𑁆𑀫𑀘𑀸𑀭𑀻 𑀫𑀡𑁆𑀟𑀩𑁆𑀬𑁄, 𑀲𑀳𑀸𑀬𑁄 𑀫𑁂 𑀫𑀳𑀸𑀇𑀲𑀺;

𑀧𑀼𑀩𑁆𑀩𑀓𑀫𑁆𑀫𑀲𑀫𑀸𑀬𑀼𑀢𑁆𑀢𑁄, 𑀲𑀽𑀮𑀫𑀸𑀭𑁄𑀧𑀦𑀁 𑀮𑀪𑀺.

𑁯𑁫. ‘‘𑀢𑀫𑀳𑀁 𑀉𑀧𑀝𑁆𑀞𑀳𑀺𑀢𑁆𑀯𑀸𑀦, 𑀆𑀭𑁄𑀕𑁆𑀬𑀫𑀦𑀼𑀧𑀸𑀧𑀬𑀺𑀁;

𑀆𑀧𑀼𑀘𑁆𑀙𑀺𑀢𑁆𑀯𑀸𑀦 𑀆𑀕𑀜𑁆𑀙𑀺𑀁, 𑀬𑀁 𑀫𑀬𑁆𑀳𑀁 𑀲𑀓𑀫𑀲𑁆𑀲𑀫𑀁.

𑁯𑁬. ‘‘𑀲𑀳𑀸𑀬𑁄 𑀩𑁆𑀭𑀸𑀳𑁆𑀫𑀡𑁄 𑀫𑀬𑁆𑀳𑀁, 𑀪𑀭𑀺𑀬𑀁 𑀆𑀤𑀸𑀬 𑀧𑀼𑀢𑁆𑀢𑀓𑀁;

𑀢𑀬𑁄 𑀚𑀦𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀆𑀕𑀜𑁆𑀙𑀼𑀁 𑀧𑀸𑀳𑀼𑀦𑀸𑀕𑀢𑀁.

𑁯𑁭. ‘‘𑀲𑀫𑁆𑀫𑁄𑀤𑀫𑀸𑀦𑁄 𑀢𑁂𑀳𑀺 𑀲𑀳, 𑀦𑀺𑀲𑀺𑀦𑁆𑀦𑁄 𑀲𑀓𑀫𑀲𑁆𑀲𑀫𑁂;

𑀤𑀸𑀭𑀓𑁄 𑀯𑀝𑁆𑀝𑀫𑀦𑀼𑀓𑁆𑀔𑀺𑀧𑀁, 𑀆𑀲𑀻𑀯𑀺𑀲𑀫𑀓𑁄𑀧𑀬𑀺.

𑁯𑁮. ‘‘𑀢𑀢𑁄 𑀲𑁄 𑀯𑀝𑁆𑀝𑀕𑀢𑀁 𑀫𑀕𑁆𑀕𑀁, 𑀅𑀦𑁆𑀯𑁂𑀲𑀦𑁆𑀢𑁄 𑀓𑀼𑀫𑀸𑀭𑀓𑁄;

𑀆𑀲𑀻𑀯𑀺𑀲𑀲𑁆𑀲 𑀳𑀢𑁆𑀣𑁂𑀦, 𑀉𑀢𑁆𑀢𑀫𑀗𑁆𑀕𑀁 𑀧𑀭𑀸𑀫𑀲𑀺.

𑁯𑁯. ‘‘𑀢𑀲𑁆𑀲 𑀆𑀫𑀲𑀦𑁂 𑀓𑀼𑀤𑁆𑀥𑁄, 𑀲𑀧𑁆𑀧𑁄 𑀯𑀺𑀲𑀩𑀮𑀲𑁆𑀲𑀺𑀢𑁄;

𑀓𑀼𑀧𑀺𑀢𑁄 𑀧𑀭𑀫𑀓𑁄𑀧𑁂𑀦, 𑀅𑀟𑀁𑀲𑀺 𑀤𑀸𑀭𑀓𑀁 𑀔𑀡𑁂.

𑁧𑁦𑁦. ‘‘𑀲𑀳𑀤𑀝𑁆𑀞𑁄 𑀆𑀲𑀻𑀯𑀺𑀲𑁂𑀦 [𑀅𑀢𑀺𑀯𑀺𑀲𑁂𑀦 (𑀧𑀻. 𑀓.)], 𑀤𑀸𑀭𑀓𑁄 𑀧𑀧𑀢𑀺 [𑀧𑀢𑀢𑀺 (𑀓.)] 𑀪𑀽𑀫𑀺𑀬𑀁;

𑀢𑁂𑀦𑀸𑀳𑀁 𑀤𑀼𑀓𑁆𑀔𑀺𑀢𑁄 𑀆𑀲𑀺𑀁, 𑀫𑀫 𑀯𑀸𑀳𑀲𑀺 𑀢𑀁 𑀤𑀼𑀓𑁆𑀔𑀁.

𑁧𑁦𑁧. ‘‘𑀢𑁆𑀬𑀸𑀳𑀁 𑀅𑀲𑁆𑀲𑀸𑀲𑀬𑀺𑀢𑁆𑀯𑀸𑀦, 𑀤𑀼𑀓𑁆𑀔𑀺𑀢𑁂 𑀲𑁄𑀓𑀲𑀮𑁆𑀮𑀺𑀢𑁂;

𑀧𑀞𑀫𑀁 𑀅𑀓𑀸𑀲𑀺𑀁 𑀓𑀺𑀭𑀺𑀬𑀁, 𑀅𑀕𑁆𑀕𑀁 𑀲𑀘𑁆𑀘𑀁 𑀯𑀭𑀼𑀢𑁆𑀢𑀫𑀁.

𑁧𑁦𑁨. ‘‘‘𑀲𑀢𑁆𑀢𑀸𑀳𑀫𑁂𑀯𑀸𑀳𑀁 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀧𑀼𑀜𑁆𑀜𑀢𑁆𑀣𑀺𑀓𑁄 𑀅𑀘𑀭𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀁;

𑀅𑀣𑀸𑀧𑀭𑀁 𑀬𑀁 𑀘𑀭𑀺𑀢𑀁 𑀫𑀫𑁂𑀤𑀁, 𑀯𑀲𑁆𑀲𑀸𑀦𑀺 𑀧𑀜𑁆𑀜𑀸𑀲𑀲𑀫𑀸𑀥𑀺𑀓𑀸𑀦𑀺.

𑁧𑁦𑁩. ‘‘‘𑀅𑀓𑀸𑀫𑀓𑁄 𑀯𑀸𑀳𑀺 𑀅𑀳𑀁 𑀘𑀭𑀸𑀫𑀺, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼;

𑀳𑀢𑀁 𑀯𑀺𑀲𑀁 𑀚𑀻𑀯𑀢𑀼 𑀬𑀜𑁆𑀜𑀤𑀢𑁆𑀢𑁄’.

𑁧𑁦𑁪. ‘‘𑀲𑀳 𑀲𑀘𑁆𑀘𑁂 𑀓𑀢𑁂 𑀫𑀬𑁆𑀳𑀁, 𑀯𑀺𑀲𑀯𑁂𑀕𑁂𑀦 𑀯𑁂𑀥𑀺𑀢𑁄;

𑀅𑀩𑀼𑀚𑁆𑀛𑀺𑀢𑁆𑀯𑀸𑀦 𑀯𑀼𑀝𑁆𑀞𑀸𑀲𑀺, 𑀅𑀭𑁄𑀕𑁄 𑀘𑀸𑀲𑀺 𑀫𑀸𑀡𑀯𑁄;

𑀲𑀘𑁆𑀘𑁂𑀦 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀲𑀘𑁆𑀘𑀧𑀸𑀭𑀫𑀻’’𑀢𑀺.

𑀓𑀡𑁆𑀳𑀤𑀻𑀧𑀸𑀬𑀦𑀘𑀭𑀺𑀬𑀁 𑀏𑀓𑀸𑀤𑀲𑀫𑀁.