𑁯. 𑀤𑀼𑀢𑀺𑀬𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁯𑁧. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀤𑀼𑀢𑀺𑀬𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀳𑀦𑁆𑀤 𑀫𑀬𑀁 𑀆𑀯𑀼𑀲𑁄 𑀇𑀫𑀁 𑀙𑀕𑀮𑀓𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀦𑀸𑀫 𑀓𑀭𑁄𑀫𑀸𑀢𑀺 𑀢𑁂 𑀓𑀺𑀭 𑀧𑀞𑀫𑀯𑀢𑁆𑀣𑀼𑀲𑁆𑀫𑀺𑀁 𑀅𑀢𑁆𑀢𑀦𑁄 𑀫𑀦𑁄𑀭𑀣𑀁 𑀲𑀫𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀮𑀤𑁆𑀥𑀦𑀺𑀕𑁆𑀕𑀳𑀸 𑀯𑀺𑀖𑀸𑀢𑀧𑁆𑀧𑀢𑁆𑀢𑀸 ‘‘𑀇𑀤𑀸𑀦𑀺 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀢𑀸𑀤𑀺𑀲𑀁 𑀯𑀢𑁆𑀣𑀼𑀁 𑀧𑀭𑀺𑀬𑁂𑀲𑀫𑀸𑀦𑀸 𑀯𑀺𑀘𑀭𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀸 𑀅𑀜𑁆𑀜𑀫𑀜𑁆𑀜𑀁 𑀑𑀮𑁄𑀓𑁂𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀇𑀫𑀁 𑀙𑀕𑀮𑀓𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀦𑀸𑀫 𑀓𑀭𑁄𑀫𑀸’’𑀢𑀺, ‘‘𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀦𑀸𑀫𑀸𑀬’’𑀦𑁆𑀢𑀺 𑀏𑀯𑀫𑀲𑁆𑀲 𑀦𑀸𑀫𑀁 𑀓𑀭𑁄𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀫𑁂𑀢𑁆𑀢𑀺𑀬𑀁 𑀦𑀸𑀫 𑀪𑀺𑀓𑁆𑀔𑀼𑀦𑀺𑀦𑁆𑀢𑀺 𑀏𑀢𑁆𑀣𑀸𑀧𑀺.

𑀢𑁂 𑀪𑀺𑀓𑁆𑀔𑀽 𑀫𑁂𑀢𑁆𑀢𑀺𑀬𑀪𑀼𑀫𑀚𑀓𑁂 𑀪𑀺𑀓𑁆𑀔𑀽 𑀅𑀦𑀼𑀬𑀼𑀜𑁆𑀚𑀺𑀁𑀲𑀽𑀢𑀺 𑀏𑀯𑀁 𑀅𑀦𑀼𑀬𑀼𑀜𑁆𑀚𑀺𑀁𑀲𑀼 𑁋‘‘𑀆𑀯𑀼𑀲𑁄, 𑀓𑀼𑀳𑀺𑀁 𑀢𑀼𑀫𑁆𑀳𑁂𑀳𑀺 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀫𑁂𑀢𑁆𑀢𑀺𑀬𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀤𑀺𑀝𑁆𑀞𑁄’’𑀢𑀺? ‘‘𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑀧𑀸𑀤𑁂’’𑀢𑀺. ‘‘𑀓𑀸𑀬 𑀯𑁂𑀮𑀸𑀬’’𑀢𑀺? ‘‘𑀪𑀺𑀓𑁆𑀔𑀸𑀘𑀸𑀭𑀕𑀫𑀦𑀯𑁂𑀮𑀸𑀬𑀸’’𑀢𑀺. 𑀆𑀯𑀼𑀲𑁄 𑀤𑀩𑁆𑀩 𑀇𑀫𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀢𑁆𑀯𑀁 𑀢𑀤𑀸 𑀓𑀼𑀳𑀺’’𑀦𑁆𑀢𑀺? ‘‘𑀯𑁂𑀴𑀼𑀯𑀦𑁂 𑀪𑀢𑁆𑀢𑀸𑀦𑀺 𑀉𑀤𑁆𑀤𑀺𑀲𑀸𑀫𑀻’’𑀢𑀺. ‘‘𑀢𑀯 𑀢𑀸𑀬 𑀯𑁂𑀮𑀸𑀬 𑀯𑁂𑀴𑀼𑀯𑀦𑁂 𑀅𑀢𑁆𑀣𑀺𑀪𑀸𑀯𑀁 𑀓𑁄 𑀚𑀸𑀦𑀸𑀢𑀻’’𑀢𑀺? ‘‘𑀪𑀺𑀓𑁆𑀔𑀼𑀲𑀗𑁆𑀖𑁄, 𑀪𑀦𑁆𑀢𑁂’’𑀢𑀺. 𑀢𑁂 𑀲𑀗𑁆𑀖𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀚𑀸𑀦𑀸𑀣 𑀢𑀼𑀫𑁆𑀳𑁂 𑀢𑀸𑀬 𑀯𑁂𑀮𑀸𑀬 𑀇𑀫𑀲𑁆𑀲 𑀯𑁂𑀴𑀼𑀯𑀦𑁂 𑀅𑀢𑁆𑀣𑀺𑀪𑀸𑀯’’𑀦𑁆𑀢𑀺. ‘‘𑀆𑀫, 𑀆𑀯𑀼𑀲𑁄, 𑀚𑀸𑀦𑀸𑀫, 𑀣𑁂𑀭𑁄 𑀲𑀫𑁆𑀫𑀼𑀢𑀺𑀮𑀤𑁆𑀥𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑁂𑀴𑀼𑀯𑀦𑁂𑀬𑁂𑀯𑀸’’𑀢𑀺. 𑀢𑀢𑁄 𑀫𑁂𑀢𑁆𑀢𑀺𑀬𑀪𑀼𑀫𑀚𑀓𑁂 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀓𑀣𑀸 𑀦 𑀲𑀫𑁂𑀢𑀺, 𑀓𑀘𑁆𑀘𑀺 𑀦𑁄 𑀮𑁂𑀲𑀁 𑀑𑀟𑁆𑀟𑁂𑀢𑁆𑀯𑀸 𑀯𑀤𑀣𑀸’’𑀢𑀺. 𑀏𑀯𑀁 𑀢𑁂 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀸 𑀆𑀫 𑀆𑀯𑀼𑀲𑁄𑀢𑀺 𑀯𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀓𑀺𑀁 𑀧𑀦 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲𑀸𑀢𑀺 𑀏𑀢𑁆𑀣 𑀅𑀜𑁆𑀜𑀪𑀸𑀕𑀲𑁆𑀲 𑀇𑀤𑀁, 𑀅𑀜𑁆𑀜𑀪𑀸𑀕𑁄 𑀯𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀜𑁆𑀜𑀪𑀸𑀕𑀺𑀬𑀁. 𑀅𑀥𑀺𑀓𑀭𑀡𑀦𑁆𑀢𑀺 𑀆𑀥𑀸𑀭𑁄 𑀯𑁂𑀤𑀺𑀢𑀩𑁆𑀩𑁄, 𑀯𑀢𑁆𑀣𑀼 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀳𑀺 𑀲𑁄 ‘‘𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀦𑀸𑀫𑀸’’𑀢𑀺 𑀙𑀕𑀮𑀓𑁄 𑀯𑀼𑀢𑁆𑀢𑁄, 𑀲𑁄 𑀬𑁆𑀯𑀸𑀬𑀁 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀪𑀸𑀕𑁄 𑀓𑁄𑀝𑁆𑀞𑀸𑀲𑁄 𑀧𑀓𑁆𑀔𑁄 𑀫𑀦𑀼𑀲𑁆𑀲𑀚𑀸𑀢𑀺 𑀘𑁂𑀯 𑀪𑀺𑀓𑁆𑀔𑀼𑀪𑀸𑀯𑁄 𑀘 𑀢𑀢𑁄 𑀅𑀜𑁆𑀜𑀲𑁆𑀲 𑀪𑀸𑀕𑀲𑁆𑀲 𑀓𑁄𑀝𑁆𑀞𑀸𑀲𑀲𑁆𑀲 𑀧𑀓𑁆𑀔𑀲𑁆𑀲 𑀳𑁄𑀢𑀺 𑀢𑀺𑀭𑀘𑁆𑀙𑀸𑀦𑀚𑀸𑀢𑀺𑀬𑀸 𑀘𑁂𑀯 𑀙𑀕𑀮𑀓𑀪𑀸𑀯𑀲𑁆𑀲 𑀘 𑀲𑁄 𑀯𑀸 𑀅𑀜𑁆𑀜𑀪𑀸𑀕𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀢𑀲𑁆𑀫𑀸 𑀅𑀜𑁆𑀜𑀪𑀸𑀕𑀺𑀬𑀲𑀗𑁆𑀔𑁆𑀬𑀁 𑀮𑀪𑀢𑀺. 𑀬𑀲𑁆𑀫𑀸 𑀘 𑀢𑁂𑀲𑀁 ‘‘𑀇𑀫𑀁 𑀫𑀬𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀦𑀸𑀫 𑀓𑀭𑁄𑀫𑀸’’𑀢𑀺 𑀯𑀤𑀦𑁆𑀢𑀸𑀦𑀁 𑀢𑀲𑁆𑀲𑀸 𑀦𑀸𑀫𑀓𑀭𑀡𑀲𑀜𑁆𑀜𑀸𑀬 𑀆𑀥𑀸𑀭𑁄 𑀯𑀢𑁆𑀣𑀼 𑀅𑀥𑀺𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀅𑀥𑀺𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀜𑁆𑀳𑀺 𑀲𑀦𑁆𑀥𑀸𑀬 ‘‘𑀢𑁂 𑀪𑀺𑀓𑁆𑀔𑀽 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲𑀸’’𑀢𑀺 𑀆𑀳𑀁𑀲𑀼, 𑀦 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀁. 𑀓𑀲𑁆𑀫𑀸? 𑀅𑀲𑀫𑁆𑀪𑀯𑀢𑁄. 𑀦 𑀳𑀺 𑀢𑁂 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀲𑁆𑀲𑀘𑀺 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀓𑀜𑁆𑀘𑀺𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀺𑀬𑀺𑀁𑀲𑀼. 𑀦 𑀘 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀮𑁂𑀲𑁄 𑀦𑀸𑀫 𑀅𑀢𑁆𑀣𑀺. 𑀚𑀸𑀢𑀺𑀮𑁂𑀲𑀸𑀤𑀬𑁄 𑀳𑀺 𑀧𑀼𑀕𑁆𑀕𑀮𑀸𑀦𑀁𑀬𑁂𑀯 𑀮𑁂𑀲𑀸 𑀯𑀼𑀢𑁆𑀢𑀸, 𑀦 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀻𑀦𑀁. 𑀇𑀤𑀜𑁆𑀘 ‘‘𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄’’𑀢𑀺 𑀦𑀸𑀫𑀁 𑀢𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀸𑀥𑀺𑀓𑀭𑀡𑀪𑀸𑀯𑁂 𑀞𑀺𑀢𑀲𑁆𑀲 𑀙𑀕𑀮𑀓𑀲𑁆𑀲 𑀓𑁄𑀘𑀺 𑀤𑁂𑀲𑁄 𑀳𑁄𑀢𑀺 𑀣𑁂𑀭𑀁 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀅𑀦𑀼𑀤𑁆𑀥𑀁𑀲𑁂𑀢𑀼𑀁 𑀮𑁂𑀲𑀫𑀢𑁆𑀢𑁄.

𑀏𑀢𑁆𑀣 𑀘 𑀤𑀺𑀲𑁆𑀲𑀢𑀺 𑀅𑀧𑀤𑀺𑀲𑁆𑀲𑀢𑀺 𑀅𑀲𑁆𑀲 𑀅𑀬𑀦𑁆𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑀤𑁂𑀲𑁄. 𑀚𑀸𑀢𑀺𑀆𑀤𑀻𑀲𑀼 𑀅𑀜𑁆𑀜𑀢𑀭𑀓𑁄𑀝𑁆𑀞𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼𑀁 𑀮𑀺𑀲𑁆𑀲𑀢𑀺 𑀲𑀺𑀮𑀺𑀲𑁆𑀲𑀢𑀺 𑀯𑁄𑀳𑀸𑀭𑀫𑀢𑁆𑀢𑁂𑀦𑁂𑀯 𑀈𑀲𑀓𑀁 𑀅𑀮𑁆𑀮𑀻𑀬𑀢𑀻𑀢𑀺 𑀮𑁂𑀲𑁄. 𑀚𑀸𑀢𑀺𑀆𑀤𑀻𑀦𑀁𑀬𑁂𑀯 𑀅𑀜𑁆𑀜𑀢𑀭𑀓𑁄𑀝𑁆𑀞𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁄 𑀧𑀭𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀫𑁆𑀧𑀺 𑀅𑀬𑀫𑁂𑀯𑀢𑁆𑀣𑁄. 𑀧𑀤𑀪𑀸𑀚𑀦𑁂 𑀧𑀦 𑀬𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀓𑀺𑀜𑁆𑀘𑀺𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀬𑁆𑀬, 𑀢𑀁 𑀬𑀲𑁆𑀫𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑁂𑀯 𑀆𑀯𑀺𑀪𑀽𑀢𑀁, 𑀢𑀲𑁆𑀫𑀸 𑀦 𑀯𑀺𑀪𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁩𑁯𑁩. 𑀬𑀸𑀦𑀺 𑀧𑀦 𑀅𑀥𑀺𑀓𑀭𑀡𑀦𑁆𑀢𑀺 𑀯𑀘𑀦𑀲𑀸𑀫𑀜𑁆𑀜𑀢𑁄 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺, 𑀢𑁂𑀲𑀁 𑀅𑀜𑁆𑀜𑀪𑀸𑀕𑀺𑀬𑀢𑀸 𑀘 𑀢𑀩𑁆𑀪𑀸𑀕𑀺𑀬𑀢𑀸 𑀘 𑀬𑀲𑁆𑀫𑀸 𑀅𑀧𑀸𑀓𑀝𑀸 𑀚𑀸𑀦𑀺𑀢𑀩𑁆𑀩𑀸 𑀘 𑀯𑀺𑀦𑀬𑀥𑀭𑁂𑀳𑀺, 𑀢𑀲𑁆𑀫𑀸 𑀯𑀘𑀦𑀲𑀸𑀫𑀜𑁆𑀜𑀢𑁄 𑀮𑀤𑁆𑀥𑀁 𑀅𑀥𑀺𑀓𑀭𑀡𑀁 𑀦𑀺𑀲𑁆𑀲𑀸𑀬 𑀢𑀁 𑀆𑀯𑀺𑀓𑀭𑁄𑀦𑁆𑀢𑁄 ‘‘𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲𑀸𑀢𑀺 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀯𑀸 𑀳𑁄𑀢𑀺 𑀅𑀥𑀺𑀓𑀭𑀡𑀜𑁆𑀜𑀪𑀸𑀕𑀺𑀬𑀁 𑀯𑀸’’𑀢𑀺𑀆𑀤𑀺𑀫𑀸𑀳. 𑀬𑀸 𑀘 𑀲𑀸 𑀅𑀯𑀲𑀸𑀦𑁂 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀯𑀲𑁂𑀦 𑀘𑁄𑀤𑀦𑀸 𑀯𑀼𑀢𑁆𑀢𑀸, 𑀢𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 𑀅𑀬𑀁 𑀲𑀩𑁆𑀩𑀸𑀥𑀺𑀓𑀭𑀡𑀸𑀦𑀁 𑀢𑀩𑁆𑀪𑀸𑀕𑀺𑀬𑀅𑀜𑁆𑀜𑀪𑀸𑀕𑀺𑀬𑀢𑀸 𑀲𑀫𑀸𑀳𑀝𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀘 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀯𑀸𑀢𑀺 𑀧𑀞𑀫𑀁 𑀉𑀤𑁆𑀤𑀺𑀝𑁆𑀞𑀢𑁆𑀢𑀸 ‘‘𑀓𑀣𑀜𑁆𑀘 𑀆𑀧𑀢𑁆𑀢𑀺 𑀆𑀧𑀢𑁆𑀢𑀺𑀬𑀸 𑀅𑀜𑁆𑀜𑀪𑀸𑀕𑀺𑀬𑀸 𑀳𑁄𑀢𑀻’’𑀢𑀺 𑀦𑀺𑀤𑁆𑀤𑁂𑀲𑁂 𑀆𑀭𑀪𑀺𑀢𑀩𑁆𑀩𑁂 𑀬𑀲𑁆𑀫𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀢𑀩𑁆𑀪𑀸𑀕𑀺𑀬𑀯𑀺𑀘𑀸𑀭𑀡𑀸𑀬𑀁𑀬𑁂𑀯 𑀅𑀬𑀫𑀢𑁆𑀣𑁄 𑀆𑀕𑀫𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀏𑀯𑀁 𑀅𑀦𑀸𑀭𑀪𑀺𑀢𑁆𑀯𑀸 ‘‘𑀓𑀣𑀜𑁆𑀘 𑀅𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀲𑁆𑀲 𑀅𑀜𑁆𑀜𑀪𑀸𑀕𑀺𑀬’’𑀦𑁆𑀢𑀺 𑀧𑀘𑁆𑀙𑀺𑀫𑀧𑀤𑀁𑀬𑁂𑀯 𑀕𑀳𑁂𑀢𑁆𑀯𑀸 𑀦𑀺𑀤𑁆𑀤𑁂𑀲𑁄 𑀆𑀭𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀅𑀜𑁆𑀜𑀪𑀸𑀕𑀺𑀬𑀯𑀸𑀭𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯. 𑀏𑀓𑀫𑁂𑀓𑀜𑁆𑀳𑀺 𑀅𑀥𑀺𑀓𑀭𑀡𑀁 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀅𑀜𑁆𑀜𑀪𑀸𑀕𑀺𑀬𑀁 𑀅𑀜𑁆𑀜𑀧𑀓𑁆𑀔𑀺𑀬𑀁 𑀅𑀜𑁆𑀜𑀓𑁄𑀝𑁆𑀞𑀸𑀲𑀺𑀬𑀁 𑀳𑁄𑀢𑀺, 𑀯𑀢𑁆𑀣𑀼𑀯𑀺𑀲𑀪𑀸𑀕𑀢𑁆𑀢𑀸, 𑀢𑀩𑁆𑀪𑀸𑀕𑀺𑀬𑀯𑀸𑀭𑁂 𑀧𑀦 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀢𑀩𑁆𑀪𑀸𑀕𑀺𑀬𑀁 𑀢𑀧𑁆𑀧𑀓𑁆𑀔𑀺𑀬𑀁 𑀢𑀁𑀓𑁄𑀝𑁆𑀞𑀸𑀲𑀺𑀬𑀁 𑀯𑀢𑁆𑀣𑀼𑀲𑀪𑀸𑀕𑀢𑁆𑀢𑀸, 𑀢𑀣𑀸 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲. 𑀓𑀣𑀁? 𑀩𑀼𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀯𑀺𑀯𑀸𑀤𑁄 𑀘 𑀇𑀤𑀸𑀦𑀺 𑀉𑀧𑁆𑀧𑀚𑁆𑀚𑀦𑀓𑀯𑀺𑀯𑀸𑀤𑁄 𑀘 𑀯𑀢𑁆𑀣𑀼𑀲𑀪𑀸𑀕𑀢𑀸𑀬 𑀏𑀓𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀫𑁂𑀯 𑀳𑁄𑀢𑀺, 𑀢𑀣𑀸 𑀩𑀼𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀅𑀦𑀼𑀯𑀸𑀤𑁄 𑀘 𑀇𑀤𑀸𑀦𑀺 𑀉𑀧𑁆𑀧𑀚𑁆𑀚𑀦𑀓𑀅𑀦𑀼𑀯𑀸𑀤𑁄 𑀘 𑀯𑀢𑁆𑀣𑀼𑀲𑀪𑀸𑀕𑀢𑀸𑀬 𑀏𑀓𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀫𑁂𑀯 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀲𑀪𑀸𑀕𑀯𑀺𑀲𑀪𑀸𑀕𑀯𑀢𑁆𑀣𑀼𑀢𑁄 𑀲𑀪𑀸𑀕𑀲𑀭𑀺𑀓𑁆𑀔𑀸𑀲𑀭𑀺𑀓𑁆𑀔𑀢𑁄 𑀘 𑀏𑀓𑀁𑀲𑁂𑀦 𑀢𑀩𑁆𑀪𑀸𑀕𑀺𑀬𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀲𑀺𑀬𑀸 𑀢𑀩𑁆𑀪𑀸𑀕𑀺𑀬𑀁 𑀲𑀺𑀬𑀸 𑀅𑀜𑁆𑀜𑀪𑀸𑀕𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀧𑀞𑀫𑀁 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀇𑀥𑀸𑀧𑀺 𑀅𑀜𑁆𑀜𑀪𑀸𑀕𑀺𑀬𑀫𑁂𑀯 𑀧𑀞𑀫𑀁 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀢𑁆𑀣 𑀅𑀜𑁆𑀜𑀪𑀸𑀕𑀺𑀬𑀢𑁆𑀢𑀜𑁆𑀘 𑀧𑀭𑀢𑁄 𑀢𑀩𑁆𑀪𑀸𑀕𑀺𑀬𑀢𑁆𑀢𑀜𑁆𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀢𑀩𑁆𑀪𑀸𑀕𑀺𑀬𑀦𑁆𑀢𑀺 𑀏𑀢𑁆𑀣 𑀧𑀦 𑀩𑀼𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀢𑁆𑀢𑀸𑀭𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁 𑀅𑀥𑀺𑀓𑀭𑀡𑀜𑁆𑀘 𑀇𑀤𑀸𑀦𑀺 𑀘𑀢𑁆𑀢𑀸𑀭𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀁 𑀅𑀥𑀺𑀓𑀭𑀡𑀜𑁆𑀘 𑀲𑀪𑀸𑀕𑀢𑀸𑀬 𑀲𑀭𑀺𑀓𑁆𑀔𑀢𑀸𑀬 𑀘 𑀏𑀓𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀫𑁂𑀯 𑀳𑁄𑀢𑀺. 𑀓𑀺𑀁 𑀧𑀦 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁 𑀅𑀥𑀺𑀓𑀭𑀡𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀉𑀤𑀸𑀳𑀼 𑀲𑀗𑁆𑀖𑀓𑀫𑁆𑀫𑀸𑀦𑀫𑁂𑀯𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺? 𑀲𑀗𑁆𑀖𑀓𑀫𑁆𑀫𑀸𑀦𑀫𑁂𑀯𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀗𑁆𑀖𑀓𑀫𑁆𑀫𑀁 𑀦𑀸𑀫 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀏𑀯𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀬𑀁 𑀓𑀫𑁆𑀫𑀮𑀓𑁆𑀔𑀡𑀁 𑀫𑀦𑀲𑀺𑀓𑀭𑁄𑀢𑀺 𑀢𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀢𑁄 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀲𑀗𑁆𑀖𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀢𑁄 𑀘 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁 𑀅𑀥𑀺𑀓𑀭𑀡𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁.

𑁩𑁯𑁪. 𑀓𑀺𑀜𑁆𑀘𑀺 𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬𑀸𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀫𑀸 𑀤𑁂𑀲𑁄𑀢𑀺 𑀯𑀸 𑀮𑁂𑀲𑀫𑀢𑁆𑀢𑁄𑀢𑀺 𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀩𑁆𑀬𑀜𑁆𑀚𑀦𑀢𑁄 𑀦𑀸𑀦𑀁 𑀅𑀢𑁆𑀣𑀢𑁄 𑀏𑀓𑀁, 𑀢𑀲𑁆𑀫𑀸 ‘‘𑀮𑁂𑀲𑁄 𑀦𑀸𑀫 𑀤𑀲 𑀮𑁂𑀲𑀸 𑀚𑀸𑀢𑀺𑀮𑁂𑀲𑁄 𑀦𑀸𑀫𑀮𑁂𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀸𑀢𑀺𑀬𑁂𑀯 𑀚𑀸𑀢𑀺𑀮𑁂𑀲𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼.

𑁩𑁯𑁫. 𑀇𑀤𑀸𑀦𑀺 𑀢𑀫𑁂𑀯 𑀮𑁂𑀲𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑀬𑀣𑀸 𑀢𑀁 𑀉𑀧𑀸𑀤𑀸𑀬 𑀅𑀦𑀼𑀤𑁆𑀥𑀁𑀲𑀦𑀸 𑀳𑁄𑀢𑀺 𑀢𑀣𑀸 𑀲𑀯𑀢𑁆𑀣𑀼𑀓𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀚𑀸𑀢𑀺𑀮𑁂𑀲𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀤𑀺𑀝𑁆𑀞𑁄 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑀢𑁆𑀢𑀺𑀬𑁄 𑀤𑀺𑀝𑁆𑀞𑁄 𑀳𑁄𑀢𑀻𑀢𑀺 𑀅𑀜𑁆𑀜𑁄 𑀓𑁄𑀘𑀺 𑀔𑀢𑁆𑀢𑀺𑀬𑀚𑀸𑀢𑀺𑀬𑁄 𑀇𑀫𑀺𑀦𑀸 𑀘𑁄𑀤𑀓𑁂𑀦 𑀤𑀺𑀝𑁆𑀞𑁄 𑀳𑁄𑀢𑀺. 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄𑀢𑀺 𑀫𑁂𑀣𑀼𑀦𑀥𑀫𑁆𑀫𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀆𑀧𑀚𑁆𑀚𑀦𑁆𑀢𑁄. 𑀅𑀜𑁆𑀜𑀁 𑀔𑀢𑁆𑀢𑀺𑀬𑀁 𑀧𑀲𑁆𑀲𑀺𑀢𑁆𑀯𑀸 𑀘𑁄𑀤𑁂𑀢𑀻𑀢𑀺 𑀅𑀣 𑀲𑁄 𑀅𑀜𑁆𑀜𑀁 𑀅𑀢𑁆𑀢𑀦𑁄 𑀯𑁂𑀭𑀺𑀁 𑀔𑀢𑁆𑀢𑀺𑀬𑀚𑀸𑀢𑀺𑀬𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑁆𑀯𑀸 𑀢𑀁 𑀔𑀢𑁆𑀢𑀺𑀬𑀚𑀸𑀢𑀺𑀮𑁂𑀲𑀁 𑀕𑀳𑁂𑀢𑁆𑀯𑀸 𑀏𑀯𑀁 𑀘𑁄𑀤𑁂𑀢𑀺 ‘‘𑀔𑀢𑁆𑀢𑀺𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄, 𑀢𑁆𑀯𑀁 𑀔𑀢𑁆𑀢𑀺𑀬𑁄, 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀻’’ 𑀅𑀣 𑀯𑀸 ‘‘𑀢𑁆𑀯𑀁 𑀲𑁄 𑀔𑀢𑁆𑀢𑀺𑀬𑁄, 𑀦 𑀅𑀜𑁆𑀜𑁄, 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺 𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺, 𑀆𑀧𑀢𑁆𑀢𑀺 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀏𑀢𑁆𑀣 𑀘 𑀢𑁂𑀲𑀁 𑀔𑀢𑁆𑀢𑀺𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀲𑀤𑀺𑀲𑀲𑁆𑀲 𑀢𑀲𑁆𑀲 𑀢𑀲𑁆𑀲 𑀤𑀻𑀖𑀸𑀤𑀺𑀦𑁄 𑀯𑀸 𑀤𑀺𑀝𑁆𑀞𑀸𑀤𑀺𑀦𑁄 𑀯𑀸 𑀯𑀲𑁂𑀦 𑀅𑀜𑁆𑀜𑀪𑀸𑀕𑀺𑀬𑀢𑀸 𑀔𑀢𑁆𑀢𑀺𑀬𑀚𑀸𑀢𑀺𑀧𑀜𑁆𑀜𑀢𑁆𑀢𑀺𑀬𑀸 𑀆𑀥𑀸𑀭𑀯𑀲𑁂𑀦 𑀅𑀥𑀺𑀓𑀭𑀡𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸, 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁦𑁦. 𑀧𑀢𑁆𑀢𑀮𑁂𑀲𑀦𑀺𑀤𑁆𑀤𑁂𑀲𑁂 𑀘 𑀲𑀸𑀝𑀓𑀧𑀢𑁆𑀢𑁄𑀢𑀺 𑀮𑁄𑀳𑀧𑀢𑁆𑀢𑀲𑀤𑀺𑀲𑁄 𑀲𑀼𑀲𑀡𑁆𑀞𑀸𑀦𑁄 𑀲𑀼𑀘𑁆𑀙𑀯𑀺 𑀲𑀺𑀦𑀺𑀤𑁆𑀥𑁄 𑀪𑀫𑀭𑀯𑀡𑁆𑀡𑁄 𑀫𑀢𑁆𑀢𑀺𑀓𑀸𑀧𑀢𑁆𑀢𑁄 𑀯𑀼𑀘𑁆𑀘𑀢𑀺. 𑀲𑀼𑀫𑁆𑀪𑀓𑀧𑀢𑁆𑀢𑁄𑀢𑀺 𑀧𑀓𑀢𑀺𑀫𑀢𑁆𑀢𑀺𑀓𑀸𑀧𑀢𑁆𑀢𑁄.

𑁪𑁦𑁬. 𑀬𑀲𑁆𑀫𑀸 𑀧𑀦 𑀆𑀧𑀢𑁆𑀢𑀺𑀮𑁂𑀲𑀲𑁆𑀲 𑀏𑀓𑀧𑀤𑁂𑀦𑁂𑀯 𑀲𑀗𑁆𑀔𑁂𑀧𑀢𑁄 𑀦𑀺𑀤𑁆𑀤𑁂𑀲𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀯𑀺𑀢𑁆𑀣𑀸𑀭𑀢𑁄𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦𑀲𑁆𑀲 𑀢𑀢𑁆𑀣𑁂𑀯 𑀦𑀺𑀤𑁆𑀤𑁂𑀲𑀁 𑀅𑀯𑀢𑁆𑀯𑀸 𑀇𑀥 𑀯𑀺𑀲𑀼𑀁 𑀯𑀼𑀢𑁆𑀢𑁄𑀢𑀺? 𑀲𑁂𑀲𑀦𑀺𑀤𑁆𑀤𑁂𑀲𑁂𑀳𑀺 𑀅𑀲𑀪𑀸𑀕𑀢𑁆𑀢𑀸. 𑀲𑁂𑀲𑀦𑀺𑀤𑁆𑀤𑁂𑀲𑀸 𑀳𑀺 𑀅𑀜𑁆𑀜𑀁 𑀤𑀺𑀲𑁆𑀯𑀸 𑀅𑀜𑁆𑀜𑀲𑁆𑀲 𑀘𑁄𑀤𑀦𑀸𑀯𑀲𑁂𑀦 𑀯𑀼𑀢𑁆𑀢𑀸. 𑀅𑀬𑀁 𑀧𑀦 𑀏𑀓𑀫𑁂𑀯 𑀅𑀜𑁆𑀜𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀁 𑀤𑀺𑀲𑁆𑀯𑀸 𑀅𑀜𑁆𑀜𑀸𑀬 𑀆𑀧𑀢𑁆𑀢𑀺𑀬𑀸 𑀘𑁄𑀤𑀦𑀸𑀯𑀲𑁂𑀦 𑀯𑀼𑀢𑁆𑀢𑁄. 𑀬𑀤𑀺 𑀏𑀯𑀁 𑀓𑀣𑀁 𑀅𑀜𑁆𑀜𑀪𑀸𑀕𑀺𑀬𑀁 𑀅𑀥𑀺𑀓𑀭𑀡𑀁 𑀳𑁄𑀢𑀻𑀢𑀺? 𑀆𑀧𑀢𑁆𑀢𑀺𑀬𑀸. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋 ‘‘𑀏𑀯𑀫𑁆𑀧𑀺 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀜𑁆𑀘 𑀳𑁄𑀢𑀺 𑀮𑁂𑀲𑁄 𑀘 𑀉𑀧𑀸𑀤𑀺𑀦𑁆𑀦𑁄’’𑀢𑀺. 𑀬𑀜𑁆𑀳𑀺 𑀲𑁄 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑁄 𑀢𑀁 𑀧𑀸𑀭𑀸𑀚𑀺𑀓𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀁 𑀅𑀥𑀺𑀓𑀭𑀡𑀁. 𑀢𑀲𑁆𑀲 𑀧𑀦 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀮𑁂𑀲𑁄 𑀦𑀸𑀫 𑀬𑁄 𑀲𑁄 𑀲𑀩𑁆𑀩𑀔𑀢𑁆𑀢𑀺𑀬𑀸𑀦𑀁 𑀲𑀸𑀥𑀸𑀭𑀡𑁄 𑀔𑀢𑁆𑀢𑀺𑀬𑀪𑀸𑀯𑁄 𑀯𑀺𑀬 𑀲𑀩𑁆𑀩𑀸𑀧𑀢𑁆𑀢𑀻𑀦𑀁 𑀲𑀸𑀥𑀸𑀭𑀡𑁄 𑀆𑀧𑀢𑁆𑀢𑀺𑀪𑀸𑀯𑁄. 𑀏𑀢𑁂𑀦𑀼𑀧𑀸𑀬𑁂𑀦 𑀲𑁂𑀲𑀸𑀧𑀢𑁆𑀢𑀺𑀫𑀽𑀮𑀓𑀦𑀬𑁄 𑀘𑁄𑀤𑀸𑀧𑀓𑀯𑀸𑀭𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑁪𑁦𑁮. 𑀅𑀦𑀸𑀧𑀢𑁆𑀢𑀺 𑀢𑀣𑀸𑀲𑀜𑁆𑀜𑀻 𑀘𑁄𑀤𑁂𑀢𑀺 𑀯𑀸 𑀘𑁄𑀤𑀸𑀧𑁂𑀢𑀺 𑀯𑀸𑀢𑀺 ‘‘𑀧𑀸𑀭𑀸𑀚𑀺𑀓𑀁𑀬𑁂𑀯 𑀅𑀬𑀁 𑀆𑀧𑀦𑁆𑀦𑁄’’𑀢𑀺 𑀬𑁄 𑀏𑀯𑀁 𑀢𑀣𑀸𑀲𑀜𑁆𑀜𑀻 𑀘𑁄𑀤𑁂𑀢𑀺 𑀯𑀸 𑀘𑁄𑀤𑀸𑀧𑁂𑀢𑀺 𑀯𑀸 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺𑀧𑀺 𑀧𑀞𑀫𑀤𑀼𑀝𑁆𑀞𑀤𑁄𑀲𑀲𑀤𑀺𑀲𑀸𑀦𑁂𑀯𑀸𑀢𑀺.

𑀤𑀼𑀢𑀺𑀬𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.