𑁨. 𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀁

𑁧. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀬𑀁 𑀧𑀸𑀭𑀸𑀚𑀺𑀓𑀓𑀡𑁆𑀟𑀲𑁆𑀲, 𑀲𑀗𑁆𑀕𑀻𑀢𑀁 𑀲𑀫𑀦𑀦𑁆𑀢𑀭𑀁;

𑀢𑀲𑁆𑀲 𑀢𑁂𑀭𑀲𑀓𑀲𑁆𑀲𑀸𑀬𑀫𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸.

𑁨𑁩𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑁂𑀬𑁆𑀬𑀲𑀓𑁄 𑀅𑀦𑀪𑀺𑀭𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻𑀢𑀺 𑀏𑀢𑁆𑀣 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁. 𑀲𑁂𑀬𑁆𑀬𑀲𑀓𑁄𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀫𑀁. 𑀅𑀦𑀪𑀺𑀭𑀢𑁄𑀢𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀓𑀸𑀫𑀭𑀸𑀕𑀧𑀭𑀺𑀴𑀸𑀳𑁂𑀦 𑀧𑀭𑀺𑀟𑀬𑁆𑀳𑀫𑀸𑀦𑁄 𑀦 𑀧𑀦 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄. 𑀲𑁄 𑀢𑁂𑀦 𑀓𑀺𑀲𑁄 𑀳𑁄𑀢𑀻𑀢𑀺 𑀲𑁄 𑀲𑁂𑀬𑁆𑀬𑀲𑀓𑁄 𑀢𑁂𑀦 𑀅𑀦𑀪𑀺𑀭𑀢𑀪𑀸𑀯𑁂𑀦 𑀓𑀺𑀲𑁄 𑀳𑁄𑀢𑀺.

𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻𑀢𑀺 𑀏𑀢𑁆𑀣 𑀉𑀤𑀸𑀬𑀻𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁, 𑀅𑀬𑀜𑁆𑀳𑀺 𑀲𑁂𑀬𑁆𑀬𑀲𑀓𑀲𑁆𑀲 𑀉𑀧𑀚𑁆𑀛𑀸𑀬𑁄 𑀮𑀸𑀴𑀼𑀤𑀸𑀬𑀻 𑀦𑀸𑀫 𑀪𑀦𑁆𑀢𑀫𑀺𑀕𑀲𑀧𑁆𑀧𑀝𑀺𑀪𑀸𑀕𑁄 𑀦𑀺𑀤𑁆𑀤𑀸𑀭𑀸𑀫𑀢𑀸𑀤𑀺𑀫𑀦𑀼𑀬𑀼𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑁄 𑀮𑁄𑀮𑀪𑀺𑀓𑁆𑀔𑀼. 𑀓𑀘𑁆𑀘𑀺 𑀦𑁄 𑀢𑁆𑀯𑀦𑁆𑀢𑀺 𑀓𑀘𑁆𑀘𑀺 𑀦𑀼 𑀢𑁆𑀯𑀁. 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀸𑀢𑀺𑀆𑀤𑀻𑀲𑀼 𑀬𑀸𑀯𑀢𑀸 𑀅𑀢𑁆𑀣𑁄𑀢𑀺 𑀬𑀸𑀯𑀤𑀢𑁆𑀣𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸𑀯𑀢𑀸 𑀢𑁂 𑀪𑁄𑀚𑀦𑁂𑀦 𑀅𑀢𑁆𑀣𑁄 𑀬𑀢𑁆𑀢𑀓𑀁 𑀢𑁆𑀯𑀁 𑀇𑀘𑁆𑀙𑀲𑀺 𑀢𑀢𑁆𑀢𑀓𑀁 𑀪𑀼𑀜𑁆𑀚, 𑀬𑀢𑁆𑀢𑀓𑀁 𑀓𑀸𑀮𑀁 𑀭𑀢𑁆𑀢𑀺𑀁 𑀯𑀸 𑀤𑀺𑀯𑀸 𑀯𑀸 𑀲𑀼𑀧𑀺𑀢𑀼𑀁 𑀇𑀘𑁆𑀙𑀲𑀺 𑀢𑀢𑁆𑀢𑀓𑀁 𑀲𑀼𑀧, 𑀫𑀢𑁆𑀢𑀺𑀓𑀸𑀤𑀻𑀳𑀺 𑀓𑀸𑀬𑀁 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀘𑀼𑀡𑁆𑀡𑀸𑀤𑀻𑀳𑀺 𑀖𑀁𑀲𑀺𑀢𑁆𑀯𑀸 𑀬𑀢𑁆𑀢𑀓𑀁 𑀦𑁆𑀳𑀸𑀦𑀁 𑀇𑀘𑁆𑀙𑀲𑀺 𑀢𑀢𑁆𑀢𑀓𑀁 𑀦𑁆𑀳𑀸𑀬, 𑀉𑀤𑁆𑀤𑁂𑀲𑁂𑀦 𑀯𑀸 𑀧𑀭𑀺𑀧𑀼𑀘𑁆𑀙𑀸𑀬 𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀓𑀫𑁆𑀫𑀝𑁆𑀞𑀸𑀦𑁂𑀦 𑀯𑀸 𑀅𑀢𑁆𑀣𑁄 𑀦𑀢𑁆𑀣𑀻𑀢𑀺. 𑀬𑀤𑀸 𑀢𑁂 𑀅𑀦𑀪𑀺𑀭𑀢𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀢𑀯 𑀓𑀸𑀫𑀭𑀸𑀕𑀯𑀲𑁂𑀦 𑀉𑀓𑁆𑀓𑀡𑁆𑀞𑀺𑀢𑀢𑀸 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀢𑀸 𑀉𑀧𑁆𑀧𑀚𑁆𑀚𑀢𑀺. 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀻𑀢𑀺 𑀓𑀸𑀫𑀭𑀸𑀕𑁄 𑀘𑀺𑀢𑁆𑀢𑀁 𑀥𑀁𑀲𑁂𑀢𑀺 𑀧𑀥𑀁𑀲𑁂𑀢𑀺 𑀯𑀺𑀓𑁆𑀔𑀺𑀧𑀢𑀺 𑀘𑁂𑀯 𑀫𑀺𑀮𑀸𑀧𑁂𑀢𑀺 𑀘. 𑀢𑀤𑀸 𑀳𑀢𑁆𑀣𑁂𑀦 𑀉𑀧𑀓𑁆𑀓𑀫𑀺𑀢𑁆𑀯𑀸 𑀅𑀲𑀼𑀘𑀺𑀁 𑀫𑁄𑀘𑁂𑀳𑀻𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀳𑀢𑁆𑀣𑁂𑀦 𑀯𑀸𑀬𑀫𑀺𑀢𑁆𑀯𑀸 𑀅𑀲𑀼𑀘𑀺𑀫𑁄𑀘𑀦𑀁 𑀓𑀭𑁄𑀳𑀺, 𑀏𑀯𑀜𑁆𑀳𑀺 𑀢𑁂 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀪𑀯𑀺𑀲𑁆𑀲𑀢𑀺. 𑀇𑀢𑀺 𑀢𑀁 𑀉𑀧𑀚𑁆𑀛𑀸𑀬𑁄 𑀅𑀦𑀼𑀲𑀸𑀲𑀺 𑀬𑀣𑀸 𑀢𑀁 𑀩𑀸𑀮𑁄 𑀩𑀸𑀮𑀁 𑀫𑀕𑁄 𑀫𑀕𑀁.

𑁨𑁩𑁫. 𑀢𑁂𑀲𑀁 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦𑀦𑁆𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀧𑀳𑀸𑀬 𑀦𑀺𑀤𑁆𑀤𑀁 𑀑𑀢𑀭𑀦𑁆𑀢𑀸𑀦𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦𑀁 𑀅𑀩𑁆𑀬𑀸𑀓𑀢𑁄 𑀪𑀯𑀗𑁆𑀕𑀯𑀸𑀭𑁄 𑀧𑀯𑀢𑁆𑀢𑀢𑀺, 𑀲𑀢𑀺𑀲𑀫𑁆𑀧𑀚𑀜𑁆𑀜𑀯𑀸𑀭𑁄 𑀕𑀴𑀢𑀺, 𑀢𑀣𑀸𑀧𑀺 𑀲𑀬𑀦𑀓𑀸𑀮𑁂 𑀫𑀦𑀲𑀺𑀓𑀸𑀭𑁄 𑀓𑀸𑀢𑀩𑁆𑀩𑁄. 𑀤𑀺𑀯𑀸 𑀲𑀼𑀧𑀦𑁆𑀢𑁂𑀦 𑀬𑀸𑀯 𑀦𑁆𑀳𑀸𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑁂𑀲𑀸 𑀦 𑀲𑀼𑀓𑁆𑀔𑀦𑁆𑀢𑀺 𑀢𑀸𑀯 𑀲𑀼𑀧𑀺𑀢𑁆𑀯𑀸 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺 𑀲𑀉𑀲𑁆𑀲𑀸𑀳𑁂𑀦 𑀲𑀼𑀧𑀺𑀢𑀩𑁆𑀩𑀁. 𑀭𑀢𑁆𑀢𑀺𑀁 𑀲𑀼𑀧𑀦𑁆𑀢𑁂𑀦 𑀏𑀢𑁆𑀢𑀓𑀁 𑀦𑀸𑀫 𑀭𑀢𑁆𑀢𑀺𑀪𑀸𑀕𑀁 𑀲𑀼𑀧𑀺𑀢𑁆𑀯𑀸 𑀘𑀦𑁆𑀤𑁂𑀦 𑀯𑀸 𑀢𑀸𑀭𑀓𑀸𑀬 𑀯𑀸 𑀇𑀤𑀁 𑀦𑀸𑀫 𑀞𑀸𑀦𑀁 𑀧𑀢𑁆𑀢𑀓𑀸𑀮𑁂 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺 𑀲𑀉𑀲𑁆𑀲𑀸𑀳𑁂𑀦 𑀲𑀼𑀧𑀺𑀢𑀩𑁆𑀩𑀁. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀻𑀲𑀼 𑀘 𑀤𑀲𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀏𑀓𑀁 𑀅𑀜𑁆𑀜𑀁 𑀯𑀸 𑀘𑀺𑀢𑁆𑀢𑀭𑀼𑀘𑀺𑀬𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀦𑀺𑀤𑁆𑀤𑀸 𑀑𑀓𑁆𑀓𑀫𑀺𑀢𑀩𑁆𑀩𑀸. 𑀏𑀯𑀁 𑀓𑀭𑁄𑀦𑁆𑀢𑁄 𑀳𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀲𑀢𑀺𑀜𑁆𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀅𑀯𑀺𑀚𑀳𑀺𑀢𑁆𑀯𑀸𑀯 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑁂 𑀧𑀦 𑀪𑀺𑀓𑁆𑀔𑀽 𑀩𑀸𑀮𑀸 𑀮𑁄𑀮𑀸 𑀪𑀦𑁆𑀢𑀫𑀺𑀕𑀲𑀧𑁆𑀧𑀝𑀺𑀪𑀸𑀕𑀸 𑀦 𑀏𑀯𑀫𑀓𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀲𑀁 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦’’𑀦𑁆𑀢𑀺.

𑀅𑀢𑁆𑀣𑀺 𑀘𑁂𑀢𑁆𑀣 𑀘𑁂𑀢𑀦𑀸 𑀮𑀩𑁆𑀪𑀢𑀻𑀢𑀺 𑀏𑀢𑁆𑀣 𑀘 𑀲𑀼𑀧𑀺𑀦𑀦𑁆𑀢𑁂 𑀅𑀲𑁆𑀲𑀸𑀤𑀘𑁂𑀢𑀦𑀸 𑀅𑀢𑁆𑀣𑀺 𑀉𑀧𑀮𑀩𑁆𑀪𑀢𑀺. 𑀅𑀢𑁆𑀣𑁂𑀲𑀸, 𑀪𑀺𑀓𑁆𑀔𑀯𑁂, 𑀘𑁂𑀢𑀦𑀸; 𑀲𑀸 𑀘 𑀔𑁄 𑀅𑀩𑁆𑀩𑁄𑀳𑀸𑀭𑀺𑀓𑀸𑀢𑀺 𑀪𑀺𑀓𑁆𑀔𑀯𑁂 𑀏𑀲𑀸 𑀅𑀲𑁆𑀲𑀸𑀤𑀘𑁂𑀢𑀦𑀸 𑀅𑀢𑁆𑀣𑀺, 𑀲𑀸 𑀘 𑀔𑁄 𑀅𑀯𑀺𑀲𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀩𑁆𑀩𑁄𑀳𑀸𑀭𑀺𑀓𑀸, 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀦 𑀳𑁄𑀢𑀺. 𑀇𑀢𑀺 𑀪𑀕𑀯𑀸 𑀲𑀼𑀧𑀺𑀦𑀦𑁆𑀢𑁂 𑀘𑁂𑀢𑀦𑀸𑀬 𑀅𑀩𑁆𑀩𑁄𑀳𑀸𑀭𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀏𑀯𑀜𑁆𑀘 𑀧𑀦 𑀪𑀺𑀓𑁆𑀔𑀯𑁂 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣, 𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀲𑀸𑀦𑀼𑀧𑀜𑁆𑀜𑀢𑁆𑀢𑀺𑀓𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑀺.

𑁨𑁩𑁬-𑁨𑁩𑁭. 𑀢𑀢𑁆𑀣 𑀲𑀁𑀯𑀺𑀚𑁆𑀚𑀢𑀺 𑀘𑁂𑀢𑀦𑀸 𑀅𑀲𑁆𑀲𑀸𑀢𑀺 𑀲𑀜𑁆𑀘𑁂𑀢𑀦𑀸, 𑀲𑀜𑁆𑀘𑁂𑀢𑀦𑀸𑀯 𑀲𑀜𑁆𑀘𑁂𑀢𑀦𑀺𑀓𑀸, 𑀲𑀜𑁆𑀘𑁂𑀢𑀦𑀸 𑀯𑀸 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀲𑀜𑁆𑀘𑁂𑀢𑀦𑀺𑀓𑀸. 𑀬𑀲𑁆𑀫𑀸 𑀧𑀦 𑀬𑀲𑁆𑀲 𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀳𑁄𑀢𑀺 𑀲𑁄 𑀚𑀸𑀦𑀦𑁆𑀢𑁄 𑀲𑀜𑁆𑀚𑀸𑀦𑀦𑁆𑀢𑁄 𑀳𑁄𑀢𑀺, 𑀲𑀸 𑀘𑀲𑁆𑀲 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀘𑁂𑀘𑁆𑀘 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁄 𑀳𑁄𑀢𑀺, 𑀢𑀲𑁆𑀫𑀸 𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸 𑀅𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀦𑀦𑁆𑀢𑁄 𑀲𑀜𑁆𑀚𑀸𑀦𑀦𑁆𑀢𑁄 𑀘𑁂𑀘𑁆𑀘 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁄’’𑀢𑀺 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀸𑀦𑀦𑁆𑀢𑁄𑀢𑀺 𑀉𑀧𑀓𑁆𑀓𑀫𑀸𑀫𑀻𑀢𑀺 𑀚𑀸𑀦𑀦𑁆𑀢𑁄. 𑀲𑀜𑁆𑀚𑀸𑀦𑀦𑁆𑀢𑁄𑀢𑀺 𑀲𑀼𑀓𑁆𑀓𑀁 𑀫𑁄𑀘𑁂𑀫𑀻𑀢𑀺 𑀲𑀜𑁆𑀚𑀸𑀦𑀦𑁆𑀢𑁄, 𑀢𑁂𑀦𑁂𑀯 𑀉𑀧𑀓𑁆𑀓𑀫𑀚𑀸𑀦𑀦𑀸𑀓𑀸𑀭𑁂𑀦 𑀲𑀤𑁆𑀥𑀺𑀁 𑀚𑀸𑀦𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀘𑁂𑀘𑁆𑀘𑀸𑀢𑀺 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸. 𑀅𑀪𑀺𑀯𑀺𑀢𑀭𑀺𑀢𑁆𑀯𑀸𑀢𑀺 𑀉𑀧𑀓𑁆𑀓𑀫𑀯𑀲𑁂𑀦 𑀫𑀤𑁆𑀤𑀦𑁆𑀢𑁄 𑀦𑀺𑀭𑀸𑀲𑀗𑁆𑀓𑀘𑀺𑀢𑁆𑀢𑀁 𑀧𑁂𑀲𑁂𑀢𑁆𑀯𑀸. 𑀯𑀻𑀢𑀺𑀓𑁆𑀓𑀫𑁄𑀢𑀺 𑀏𑀯𑀁 𑀧𑀯𑀢𑁆𑀢𑀲𑁆𑀲 𑀬𑁄 𑀯𑀻𑀢𑀺𑀓𑁆𑀓𑀫𑁄 𑀅𑀬𑀁 𑀲𑀜𑁆𑀘𑁂𑀢𑀦𑀺𑀓𑀸𑀲𑀤𑁆𑀤𑀲𑁆𑀲 𑀲𑀺𑀔𑀸𑀧𑁆𑀧𑀢𑁆𑀢𑁄 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀻𑀢𑀺 𑀏𑀢𑁆𑀣 𑀬𑀲𑁆𑀲 𑀲𑀼𑀓𑁆𑀓𑀲𑁆𑀲 𑀯𑀺𑀲𑁆𑀲𑀝𑁆𑀞𑀺 𑀢𑀁 𑀢𑀸𑀯 𑀲𑀗𑁆𑀔𑁆𑀬𑀸𑀢𑁄 𑀯𑀡𑁆𑀡𑀪𑁂𑀤𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀓𑁆𑀓𑀦𑁆𑀢𑀺 𑀤𑀲 𑀲𑀼𑀓𑁆𑀓𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀓𑁆𑀓𑀸𑀦𑀁 𑀆𑀲𑀬𑀪𑁂𑀤𑀢𑁄 𑀥𑀸𑀢𑀼𑀦𑀸𑀦𑀢𑁆𑀢𑀢𑁄 𑀘 𑀦𑀻𑀮𑀸𑀤𑀺𑀯𑀡𑁆𑀡𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀲𑁆𑀲𑀝𑁆𑀞𑀻𑀢𑀺 𑀯𑀺𑀲𑁆𑀲𑀕𑁆𑀕𑁄, 𑀅𑀢𑁆𑀣𑀢𑁄 𑀧𑀦𑁂𑀢𑀁 𑀞𑀸𑀦𑀸𑀘𑀸𑀯𑀦𑀁 𑀳𑁄𑀢𑀺, 𑀢𑁂𑀦𑀸𑀳 𑁋 ‘‘𑀯𑀺𑀲𑁆𑀲𑀝𑁆𑀞𑀻𑀢𑀺 𑀞𑀸𑀦𑀢𑁄𑀘𑀸𑀯𑀦𑀸 𑀯𑀼𑀘𑁆𑀘𑀢𑀻’’𑀢𑀺. 𑀢𑀢𑁆𑀣 𑀯𑀢𑁆𑀣𑀺𑀲𑀻𑀲𑀁 𑀓𑀝𑀺 𑀓𑀸𑀬𑁄𑀢𑀺 𑀢𑀺𑀥𑀸 𑀲𑀼𑀓𑁆𑀓𑀲𑁆𑀲 𑀞𑀸𑀦𑀁 𑀧𑀓𑀧𑁆𑀧𑁂𑀦𑁆𑀢𑀺, 𑀏𑀓𑁄 𑀓𑀺𑀭𑀸𑀘𑀭𑀺𑀬𑁄 ‘‘𑀯𑀢𑁆𑀣𑀺𑀲𑀻𑀲𑀁 𑀲𑀼𑀓𑁆𑀓𑀲𑁆𑀲 𑀞𑀸𑀦’’𑀦𑁆𑀢𑀺 𑀆𑀳. 𑀏𑀓𑁄 ‘‘𑀓𑀝𑀻’’𑀢𑀺, 𑀏𑀓𑁄 ‘‘𑀲𑀓𑀮𑁄 𑀓𑀸𑀬𑁄’’𑀢𑀺, 𑀢𑁂𑀲𑀼 𑀢𑀢𑀺𑀬𑀲𑁆𑀲 𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢𑀁. 𑀓𑁂𑀲𑀮𑁄𑀫𑀦𑀔𑀤𑀦𑁆𑀢𑀸𑀦𑀜𑁆𑀳𑀺 𑀫𑀁𑀲𑀯𑀺𑀦𑀺𑀫𑀼𑀢𑁆𑀢𑀝𑁆𑀞𑀸𑀦𑀁 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀣𑀤𑁆𑀥𑀲𑀼𑀓𑁆𑀔𑀘𑀫𑁆𑀫𑀸𑀦𑀺 𑀘 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑁄 𑀙𑀯𑀺𑀫𑀁𑀲𑀮𑁄𑀳𑀺𑀢𑀸𑀦𑀼𑀕𑀢𑁄 𑀲𑀩𑁆𑀩𑁄𑀧𑀺 𑀓𑀸𑀬𑁄 𑀓𑀸𑀬𑀧𑁆𑀧𑀲𑀸𑀤𑀪𑀸𑀯𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀩𑀤𑁆𑀥𑀧𑀺𑀢𑁆𑀢𑀸𑀦𑀁 𑀲𑀫𑁆𑀪𑀯𑀲𑁆𑀲 𑀘 𑀞𑀸𑀦𑀫𑁂𑀯. 𑀢𑀣𑀸 𑀳𑀺 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦𑀸𑀪𑀺𑀪𑀽𑀢𑀸𑀦𑀁 𑀳𑀢𑁆𑀣𑀻𑀦𑀁 𑀉𑀪𑁄𑀳𑀺 𑀓𑀡𑁆𑀡𑀘𑀽𑀴𑀺𑀓𑀸𑀳𑀺 𑀲𑀫𑁆𑀪𑀯𑁄 𑀦𑀺𑀓𑁆𑀔𑀫𑀢𑀺, 𑀫𑀳𑀸𑀲𑁂𑀦𑀭𑀸𑀚𑀸 𑀘 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁄 𑀲𑀫𑁆𑀪𑀯𑀯𑁂𑀕𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀢𑁆𑀣𑁂𑀦 𑀩𑀸𑀳𑀼𑀲𑀻𑀲𑀁 𑀨𑀸𑀮𑁂𑀢𑁆𑀯𑀸 𑀯𑀡𑀫𑀼𑀔𑁂𑀦 𑀦𑀺𑀓𑁆𑀔𑀦𑁆𑀢𑀁 𑀲𑀫𑁆𑀪𑀯𑀁 𑀤𑀲𑁆𑀲𑁂𑀲𑀻𑀢𑀺.

𑀏𑀢𑁆𑀣 𑀧𑀦 𑀧𑀞𑀫𑀲𑁆𑀲 𑀆𑀘𑀭𑀺𑀬𑀲𑁆𑀲 𑀯𑀸𑀤𑁂 𑀫𑁄𑀘𑀦𑀲𑁆𑀲𑀸𑀤𑁂𑀦 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀢𑁄 𑀬𑀢𑁆𑀢𑀓𑀁 𑀏𑀓𑀸 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸 𑀧𑀺𑀯𑁂𑀬𑁆𑀬 𑀢𑀢𑁆𑀢𑀓𑁂 𑀅𑀲𑀼𑀘𑀺𑀫𑁆𑀳𑀺 𑀯𑀢𑁆𑀣𑀺𑀲𑀻𑀲𑀢𑁄 𑀫𑀼𑀜𑁆𑀘𑀺𑀢𑁆𑀯𑀸 𑀤𑀓𑀲𑁄𑀢𑀁 𑀑𑀢𑀺𑀡𑁆𑀡𑀫𑀢𑁆𑀢𑁂 𑀩𑀳𑀺 𑀦𑀺𑀓𑁆𑀔𑀦𑁆𑀢𑁂 𑀯𑀸 𑀅𑀦𑀺𑀓𑁆𑀔𑀦𑁆𑀢𑁂 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀤𑀼𑀢𑀺𑀬𑀲𑁆𑀲 𑀯𑀸𑀤𑁂 𑀢𑀣𑁂𑀯 𑀓𑀝𑀺𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀤𑀓𑀲𑁄𑀢𑀁 𑀑𑀢𑀺𑀡𑁆𑀡𑀫𑀢𑁆𑀢𑁂, 𑀢𑀢𑀺𑀬𑀲𑁆𑀲 𑀯𑀸𑀤𑁂 𑀢𑀣𑁂𑀯 𑀲𑀓𑀮𑀓𑀸𑀬𑀁 𑀲𑀗𑁆𑀔𑁄𑀪𑁂𑀢𑁆𑀯𑀸 𑀢𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀤𑀓𑀲𑁄𑀢𑀁 𑀑𑀢𑀺𑀡𑁆𑀡𑀫𑀢𑁆𑀢𑁂 𑀩𑀳𑀺 𑀦𑀺𑀓𑁆𑀔𑀦𑁆𑀢𑁂 𑀯𑀸 𑀅𑀦𑀺𑀓𑁆𑀔𑀦𑁆𑀢𑁂 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀤𑀓𑀲𑁄𑀢𑁄𑀭𑁄𑀳𑀡𑀜𑁆𑀘𑁂𑀢𑁆𑀣 𑀅𑀥𑀺𑀯𑀸𑀲𑁂𑀢𑁆𑀯𑀸 𑀅𑀦𑁆𑀢𑀭𑀸 𑀦𑀺𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀯𑀼𑀢𑁆𑀢𑀁, 𑀞𑀸𑀦𑀸 𑀘𑀼𑀢𑀜𑁆𑀳𑀺 𑀅𑀯𑀲𑁆𑀲𑀁 𑀤𑀓𑀲𑁄𑀢𑀁 𑀑𑀢𑀭𑀢𑀺. 𑀢𑀲𑁆𑀫𑀸 𑀞𑀸𑀦𑀸 𑀘𑀸𑀯𑀦𑀫𑀢𑁆𑀢𑁂𑀦𑁂𑀯𑁂𑀢𑁆𑀣 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀲𑀸 𑀘 𑀔𑁄 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀦𑁆𑀢𑀲𑁆𑀲𑁂𑀯 𑀳𑀢𑁆𑀣𑀧𑀭𑀺𑀓𑀫𑁆𑀫𑀧𑀸𑀤𑀧𑀭𑀺𑀓𑀫𑁆𑀫𑀕𑀢𑁆𑀢𑀧𑀭𑀺𑀓𑀫𑁆𑀫𑀓𑀭𑀡𑁂𑀦 𑀲𑀘𑁂𑀧𑀺 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀬𑀁 𑀲𑀩𑁆𑀩𑀸𑀘𑀭𑀺𑀬𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑁄.

𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸𑀢𑀺 𑀏𑀢𑁆𑀣 𑀲𑀼𑀧𑀺𑀦𑁄 𑀏𑀯 𑀲𑀼𑀧𑀺𑀦𑀦𑁆𑀢𑁄, 𑀢𑀁 𑀞𑀧𑁂𑀢𑁆𑀯𑀸 𑀅𑀧𑀦𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀜𑁆𑀘 𑀧𑀦 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀲𑁆𑀲𑀢𑀺 𑀥𑀸𑀢𑀼𑀓𑁆𑀔𑁄𑀪𑀢𑁄 𑀯𑀸 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀯𑀸 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀯𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀯𑀸𑀢𑀺.

𑀢𑀢𑁆𑀣 𑀧𑀺𑀢𑁆𑀢𑀸𑀤𑀻𑀦𑀁 𑀔𑁄𑀪𑀓𑀭𑀡𑀧𑀘𑁆𑀘𑀬𑀬𑁄𑀕𑁂𑀦 𑀔𑀼𑀪𑀺𑀢𑀥𑀸𑀢𑀼𑀓𑁄 𑀥𑀸𑀢𑀼𑀓𑁆𑀔𑁄𑀪𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀧𑀲𑁆𑀲𑀦𑁆𑀢𑁄 𑀘 𑀦𑀸𑀦𑀸𑀯𑀺𑀥𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺 𑁋 𑀧𑀩𑁆𑀩𑀢𑀸 𑀧𑀢𑀦𑁆𑀢𑁄 𑀯𑀺𑀬, 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀬, 𑀯𑀸𑀴𑀫𑀺𑀕𑀳𑀢𑁆𑀣𑀻𑀘𑁄𑀭𑀸𑀤𑀻𑀳𑀺 𑀅𑀦𑀼𑀩𑀤𑁆𑀥𑁄 𑀯𑀺𑀬 𑀳𑁄𑀢𑀺. 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀧𑀲𑁆𑀲𑀦𑁆𑀢𑁄 𑀧𑀼𑀩𑁆𑀩𑁂 𑀅𑀦𑀼𑀪𑀽𑀢𑀧𑀼𑀩𑁆𑀩𑀁 𑀆𑀭𑀫𑁆𑀫𑀡𑀁 𑀧𑀲𑁆𑀲𑀢𑀺. 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀧𑀲𑁆𑀲𑀦𑁆𑀢𑀲𑁆𑀲 𑀤𑁂𑀯𑀢𑀸 𑀅𑀢𑁆𑀣𑀓𑀸𑀫𑀢𑀸𑀬 𑀯𑀸 𑀅𑀦𑀢𑁆𑀣𑀓𑀸𑀫𑀢𑀸𑀬 𑀯𑀸 𑀅𑀢𑁆𑀣𑀸𑀬 𑀯𑀸 𑀅𑀦𑀢𑁆𑀣𑀸𑀬 𑀯𑀸 𑀦𑀸𑀦𑀸𑀯𑀺𑀥𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀉𑀧𑀲𑀁𑀳𑀭𑀦𑁆𑀢𑀺, 𑀲𑁄 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀆𑀦𑀼𑀪𑀸𑀯𑁂𑀦 𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀧𑀲𑁆𑀲𑀢𑀺. 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑁄 𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀲𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸 𑀅𑀦𑀢𑁆𑀣𑀲𑁆𑀲 𑀯𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀽𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀩𑁄𑀥𑀺𑀲𑀢𑁆𑀢𑀲𑁆𑀲𑀫𑀸𑀢𑀸 𑀯𑀺𑀬 𑀧𑀼𑀢𑁆𑀢𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀁, 𑀩𑁄𑀥𑀺𑀲𑀢𑁆𑀢𑁄 𑀯𑀺𑀬 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑁂 (𑀅. 𑀦𑀺. 𑁫.𑁧𑁯𑁬), 𑀓𑁄𑀲𑀮𑀭𑀸𑀚𑀸 𑀯𑀺𑀬 𑀲𑁄𑀴𑀲 𑀲𑀼𑀧𑀺𑀦𑁂𑀢𑀺.

𑀢𑀢𑁆𑀣 𑀬𑀁 𑀥𑀸𑀢𑀼𑀓𑁆𑀔𑁄𑀪𑀢𑁄 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀘 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺 𑀦 𑀢𑀁 𑀲𑀘𑁆𑀘𑀁 𑀳𑁄𑀢𑀺. 𑀬𑀁 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀧𑀲𑁆𑀲𑀢𑀺 𑀢𑀁 𑀲𑀘𑁆𑀘𑀁 𑀯𑀸 𑀳𑁄𑀢𑀺 𑀅𑀮𑀻𑀓𑀁 𑀯𑀸, 𑀓𑀼𑀤𑁆𑀥𑀸 𑀳𑀺 𑀤𑁂𑀯𑀢𑀸 𑀉𑀧𑀸𑀬𑁂𑀦 𑀯𑀺𑀦𑀸𑀲𑁂𑀢𑀼𑀓𑀸𑀫𑀸 𑀯𑀺𑀧𑀭𑀻𑀢𑀫𑁆𑀧𑀺 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺. 𑀬𑀁 𑀧𑀦 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀧𑀲𑁆𑀲𑀢𑀺 𑀢𑀁 𑀏𑀓𑀦𑁆𑀢𑀲𑀘𑁆𑀘𑀫𑁂𑀯 𑀳𑁄𑀢𑀺. 𑀏𑀢𑁂𑀲𑀜𑁆𑀘 𑀘𑀢𑀼𑀦𑁆𑀦𑀁 𑀫𑀽𑀮𑀓𑀸𑀭𑀡𑀸𑀦𑀁 𑀲𑀁𑀲𑀕𑁆𑀕𑀪𑁂𑀤𑀢𑁄𑀧𑀺 𑀲𑀼𑀧𑀺𑀦𑀪𑁂𑀤𑁄 𑀳𑁄𑀢𑀺𑀬𑁂𑀯.

𑀢𑀜𑁆𑀘 𑀧𑀦𑁂𑀢𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑀼𑀧𑀺𑀦𑀁 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀯 𑀧𑀲𑁆𑀲𑀦𑁆𑀢𑀺 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸, 𑀅𑀲𑁂𑀓𑁆𑀔𑀸 𑀧𑀦 𑀦 𑀧𑀲𑁆𑀲𑀦𑁆𑀢𑀺 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸. 𑀓𑀺𑀁 𑀧𑀦𑁂𑀢𑀁 𑀧𑀲𑁆𑀲𑀦𑁆𑀢𑁄 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺 𑀧𑀝𑀺𑀩𑀼𑀤𑁆𑀥𑁄, 𑀉𑀤𑀸𑀳𑀼 𑀦𑁂𑀯 𑀲𑀼𑀢𑁆𑀢𑁄 𑀦 𑀧𑀝𑀺𑀩𑀼𑀤𑁆𑀥𑁄𑀢𑀺? 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀢𑀸𑀯 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺 𑀅𑀪𑀺𑀥𑀫𑁆𑀫𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺, 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀳𑀺 𑀲𑀼𑀧𑀢𑀺 𑀢𑀁 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀁 𑀯𑀸 𑀦 𑀳𑁄𑀢𑀺, 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀲𑁆𑀲 𑀘 𑀈𑀤𑀺𑀲𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺 𑀯𑀺𑀦𑀬𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺, 𑀬𑀜𑁆𑀳𑀺 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺 𑀢𑀁 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺, 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦 𑀘 𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀅𑀦𑀸𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁂𑀦 𑀧𑀦 𑀓𑀢𑁂𑀧𑀺 𑀯𑀻𑀢𑀺𑀓𑁆𑀓𑀫𑁂 𑀏𑀓𑀦𑁆𑀢𑀁 𑀅𑀦𑀸𑀧𑀢𑁆𑀢𑀺 𑀏𑀯. 𑀅𑀣 𑀦𑁂𑀯 𑀲𑀼𑀢𑁆𑀢𑁄 𑀦 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀓𑁄 𑀦𑀸𑀫 𑀧𑀲𑁆𑀲𑀢𑀺; 𑀏𑀯𑀜𑁆𑀘 𑀲𑀢𑀺 𑀲𑀼𑀧𑀺𑀦𑀲𑁆𑀲 𑀅𑀪𑀸𑀯𑁄𑀯 𑀆𑀧𑀚𑁆𑀚𑀢𑀻𑀢𑀺, 𑀦 𑀅𑀪𑀸𑀯𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀧𑀲𑁆𑀲𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀔𑁄, 𑀫𑀳𑀸𑀭𑀸𑀚, 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻’’𑀢𑀺. 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄𑀢𑀺 𑀫𑀓𑁆𑀓𑀝𑀦𑀺𑀤𑁆𑀤𑀸𑀬 𑀬𑀼𑀢𑁆𑀢𑁄. 𑀬𑀣𑀸 𑀳𑀺 𑀫𑀓𑁆𑀓𑀝𑀲𑁆𑀲 𑀦𑀺𑀤𑁆𑀤𑀸 𑀮𑀳𑀼𑀧𑀭𑀺𑀯𑀢𑁆𑀢𑀸 𑀳𑁄𑀢𑀺; 𑀏𑀯𑀁 𑀬𑀸 𑀦𑀺𑀤𑁆𑀤𑀸 𑀧𑀼𑀦𑀧𑁆𑀧𑀼𑀦𑀁 𑀓𑀼𑀲𑀮𑀸𑀤𑀺𑀘𑀺𑀢𑁆𑀢𑀯𑁄𑀓𑀺𑀡𑁆𑀡𑀢𑁆𑀢𑀸 𑀮𑀳𑀼𑀧𑀭𑀺𑀯𑀢𑁆𑀢𑀸, 𑀬𑀲𑁆𑀲𑀸 𑀧𑀯𑀢𑁆𑀢𑀺𑀬𑀁 𑀧𑀼𑀦𑀧𑁆𑀧𑀼𑀦𑀁 𑀪𑀯𑀗𑁆𑀕𑀢𑁄 𑀉𑀢𑁆𑀢𑀭𑀡𑀁 𑀳𑁄𑀢𑀺 𑀢𑀸𑀬 𑀬𑀼𑀢𑁆𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀢𑁂𑀦𑀸𑀬𑀁 𑀲𑀼𑀧𑀺𑀦𑁄 𑀓𑀼𑀲𑀮𑁄𑀧𑀺 𑀳𑁄𑀢𑀺 𑀅𑀓𑀼𑀲𑀮𑁄𑀧𑀺 𑀅𑀩𑁆𑀬𑀸𑀓𑀢𑁄𑀧𑀺. 𑀢𑀢𑁆𑀣 𑀲𑀼𑀧𑀺𑀦𑀦𑁆𑀢𑁂 𑀘𑁂𑀢𑀺𑀬𑀯𑀦𑁆𑀤𑀦𑀥𑀫𑁆𑀫𑀲𑁆𑀲𑀯𑀦𑀥𑀫𑁆𑀫𑀤𑁂𑀲𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀓𑀼𑀲𑀮𑁄, 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀅𑀓𑀼𑀲𑀮𑁄, 𑀤𑁆𑀯𑀻𑀳𑀺 𑀅𑀦𑁆𑀢𑁂𑀳𑀺 𑀫𑀼𑀢𑁆𑀢𑁄 𑀆𑀯𑀚𑁆𑀚𑀦𑀢𑀤𑀸𑀭𑀫𑁆𑀫𑀡𑀓𑁆𑀔𑀡𑁂 𑀅𑀩𑁆𑀬𑀸𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁆𑀯𑀸𑀬𑀁 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸 𑀘𑁂𑀢𑀦𑀸𑀬 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑀼𑀁 𑀅𑀲𑀫𑀢𑁆𑀣𑁄, 𑀧𑀯𑀢𑁆𑀢𑁂 𑀧𑀦 𑀅𑀜𑁆𑀜𑁂𑀳𑀺 𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀢𑁄 𑀯𑀺𑀧𑀸𑀓𑀁 𑀤𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀯𑀺𑀧𑀸𑀓𑀁 𑀤𑁂𑀢𑀺? 𑀅𑀣 𑀔𑁄 𑀅𑀯𑀺𑀲𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀩𑁆𑀩𑁄𑀳𑀸𑀭𑀺𑀓𑀸𑀯 𑀲𑀼𑀧𑀺𑀦𑀦𑁆𑀢𑀘𑁂𑀢𑀦𑀸. 𑀢𑁂𑀦𑀸𑀳 𑁋 ‘‘𑀞𑀧𑁂𑀢𑁆𑀯𑀸 𑀲𑀼𑀧𑀺𑀦𑀦𑁆𑀢’’𑀦𑁆𑀢𑀺.

𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀇𑀫𑀲𑁆𑀲 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲 𑀦𑀸𑀫𑀁. 𑀢𑀲𑁆𑀫𑀸 𑀬𑀸 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸 𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺, 𑀅𑀬𑀁 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦𑀸𑀫 𑀆𑀧𑀢𑁆𑀢𑀺𑀦𑀺𑀓𑀸𑀬𑁄𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀲𑀗𑁆𑀖𑁄 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 𑀘 𑀇𑀘𑁆𑀙𑀺𑀢𑀩𑁆𑀩𑁄 𑀅𑀲𑁆𑀲𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀇𑀫𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀼𑀓𑀸𑀫𑀲𑁆𑀲 𑀬𑀁 𑀢𑀁 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁, 𑀢𑀲𑁆𑀲 𑀆𑀤𑀺𑀫𑁆𑀳𑀺 𑀘𑁂𑀯 𑀧𑀭𑀺𑀯𑀸𑀲𑀤𑀸𑀦𑀢𑁆𑀣𑀸𑀬 𑀆𑀤𑀺𑀢𑁄 𑀲𑁂𑀲𑁂 𑀘 𑀫𑀚𑁆𑀛𑁂 𑀫𑀸𑀦𑀢𑁆𑀢𑀤𑀸𑀦𑀢𑁆𑀣𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑁂𑀦 𑀯𑀸 𑀲𑀳 𑀫𑀸𑀦𑀢𑁆𑀢𑀤𑀸𑀦𑀢𑁆𑀣𑀸𑀬 𑀅𑀯𑀲𑀸𑀦𑁂 𑀅𑀩𑁆𑀪𑀸𑀦𑀢𑁆𑀣𑀸𑀬 𑀲𑀗𑁆𑀖𑁄 𑀇𑀘𑁆𑀙𑀺𑀢𑀩𑁆𑀩𑁄. 𑀦 𑀳𑁂𑀢𑁆𑀣 𑀏𑀓𑀫𑁆𑀧𑀺 𑀓𑀫𑁆𑀫𑀁 𑀯𑀺𑀦𑀸 𑀲𑀗𑁆𑀖𑁂𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀲𑀗𑁆𑀖𑁄 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 𑀘 𑀇𑀘𑁆𑀙𑀺𑀢𑀩𑁆𑀩𑁄 𑀅𑀲𑁆𑀲𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺. 𑀩𑁆𑀬𑀜𑁆𑀚𑀦𑀁 𑀧𑀦 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀖𑁄𑀯 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀁 𑀤𑁂𑀢𑀺, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺, 𑀫𑀸𑀦𑀢𑁆𑀢𑀁 𑀤𑁂𑀢𑀺, 𑀅𑀩𑁆𑀪𑁂𑀢𑀺 𑀦 𑀲𑀫𑁆𑀩𑀳𑀼𑀮𑀸 𑀦 𑀏𑀓𑀧𑀼𑀕𑁆𑀕𑀮𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀇𑀤𑀫𑀲𑁆𑀲 𑀧𑀤𑀪𑀸𑀚𑀦𑀁 𑁋

‘‘𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀲𑀗𑁆𑀖𑁄𑀯 𑀤𑁂𑀢𑀺 𑀧𑀭𑀺𑀯𑀸𑀲𑀁, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺;

𑀫𑀸𑀦𑀢𑁆𑀢𑀁 𑀤𑁂𑀢𑀺 𑀅𑀩𑁆𑀪𑁂𑀢𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀧𑀭𑀺. 𑁩𑁩𑁯) 𑁋

𑀧𑀭𑀺𑀯𑀸𑀭𑁂 𑀯𑀘𑀦𑀓𑀸𑀭𑀡𑀜𑁆𑀘 𑀯𑀼𑀢𑁆𑀢𑀁, 𑀢𑀢𑁆𑀣 𑀧𑀭𑀺𑀯𑀸𑀲𑀤𑀸𑀦𑀸𑀤𑀻𑀦𑀺 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁂 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀸𑀦𑀺, 𑀢𑀢𑁆𑀣𑁂𑀯 𑀦𑁂𑀲𑀁 𑀲𑀁𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫.

𑀢𑀲𑁆𑀲𑁂𑀯 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲𑀸𑀢𑀺 𑀢𑀲𑁆𑀲 𑀏𑀯 𑀆𑀧𑀢𑁆𑀢𑀺𑀲𑀫𑀽𑀳𑀲𑁆𑀲. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀬𑀁 𑀏𑀓𑀸𑀯 𑀆𑀧𑀢𑁆𑀢𑀺, 𑀭𑀽𑀴𑁆𑀳𑀺𑀲𑀤𑁆𑀤𑁂𑀦 𑀧𑀦 𑀅𑀯𑀬𑀯𑁂 𑀲𑀫𑀽𑀳𑀯𑁄𑀳𑀸𑀭𑁂𑀦 𑀯𑀸 ‘‘𑀦𑀺𑀓𑀸𑀬𑁄’’𑀢𑀺 𑀯𑀼𑀢𑁆𑀢𑁄 𑁋 ‘‘𑀏𑀓𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀏𑀓𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 𑀯𑀺𑀬.

𑀏𑀯𑀁 𑀉𑀤𑁆𑀤𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀧𑀤𑀸𑀦𑀼𑀓𑁆𑀓𑀫𑁂𑀦 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀇𑀫𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀆𑀧𑀚𑁆𑀚𑀦𑁆𑀢𑀲𑁆𑀲 𑀉𑀧𑀸𑀬𑀜𑁆𑀘 𑀓𑀸𑀮𑀜𑁆𑀘 𑀅𑀥𑀺𑀧𑁆𑀧𑀸𑀬𑀜𑁆𑀘 𑀅𑀥𑀺𑀧𑁆𑀧𑀸𑀬𑀯𑀢𑁆𑀣𑀼𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀚𑁆𑀛𑀢𑁆𑀢𑀭𑀽𑀧𑁂 𑀫𑁄𑀘𑁂𑀢𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀳𑀺 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀉𑀧𑀸𑀬𑁄 𑀤𑀲𑁆𑀲𑀺𑀢𑁄, 𑀅𑀚𑁆𑀛𑀢𑁆𑀢𑀭𑀽𑀧𑁂 𑀯𑀸 𑀫𑁄𑀘𑁂𑀬𑁆𑀬 𑀩𑀳𑀺𑀤𑁆𑀥𑀸𑀭𑀽𑀧𑁂 𑀯𑀸 𑀉𑀪𑀬𑀢𑁆𑀣 𑀯𑀸 𑀆𑀓𑀸𑀲𑁂 𑀯𑀸 𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑁄, 𑀇𑀢𑁄 𑀧𑀭𑀁 𑀅𑀜𑁆𑀜𑁄 𑀉𑀧𑀸𑀬𑁄 𑀦𑀢𑁆𑀣𑀺. 𑀢𑀢𑁆𑀣 𑀭𑀽𑀧𑁂 𑀖𑀝𑁆𑀝𑁂𑀢𑁆𑀯𑀸 𑀫𑁄𑀘𑁂𑀦𑁆𑀢𑁄𑀧𑀺 𑀭𑀽𑀧𑁂𑀦 𑀖𑀝𑁆𑀝𑁂𑀢𑁆𑀯𑀸 𑀫𑁄𑀘𑁂𑀦𑁆𑀢𑁄𑀧𑀺 𑀭𑀽𑀧𑁂 𑀫𑁄𑀘𑁂𑀢𑀺𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀭𑀽𑀧𑁂 𑀳𑀺 𑀲𑀢𑀺 𑀲𑁄 𑀫𑁄𑀘𑁂𑀢𑀺 𑀦 𑀭𑀽𑀧𑀁 𑀅𑀮𑀪𑀺𑀢𑁆𑀯𑀸. 𑀭𑀸𑀕𑀽𑀧𑀢𑁆𑀣𑀫𑁆𑀪𑀸𑀤𑀻𑀳𑀺 𑀧𑀦 𑀧𑀜𑁆𑀘𑀳𑀺 𑀓𑀸𑀮𑁄 𑀤𑀲𑁆𑀲𑀺𑀢𑁄. 𑀭𑀸𑀕𑀽𑀧𑀢𑁆𑀣𑀫𑁆𑀪𑀸𑀤𑀺𑀓𑀸𑀮𑁂𑀲𑀼 𑀳𑀺 𑀅𑀗𑁆𑀕𑀚𑀸𑀢𑀁 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺, 𑀬𑀲𑁆𑀲 𑀓𑀫𑁆𑀫𑀦𑀺𑀬𑀢𑁆𑀢𑁂 𑀲𑀢𑀺 𑀫𑁄𑀘𑁂𑀢𑀺. 𑀇𑀢𑁄 𑀧𑀭𑀁 𑀅𑀜𑁆𑀜𑁄 𑀓𑀸𑀮𑁄 𑀦𑀢𑁆𑀣𑀺, 𑀦 𑀳𑀺 𑀯𑀺𑀦𑀸 𑀭𑀸𑀕𑀽𑀧𑀢𑁆𑀣𑀫𑁆𑀪𑀸𑀤𑀻𑀳𑀺 𑀧𑀼𑀩𑁆𑀩𑀡𑁆𑀳𑀸𑀤𑀬𑁄 𑀓𑀸𑀮𑀪𑁂𑀤𑀸 𑀫𑁄𑀘𑀦𑁂 𑀦𑀺𑀫𑀺𑀢𑁆𑀢𑀁 𑀳𑁄𑀦𑁆𑀢𑀺.

𑀆𑀭𑁄𑀕𑁆𑀬𑀢𑁆𑀣𑀸𑀬𑀸𑀢𑀺𑀆𑀤𑀻𑀳𑀺 𑀤𑀲𑀳𑀺 𑀅𑀥𑀺𑀧𑁆𑀧𑀸𑀬𑁄 𑀤𑀲𑁆𑀲𑀺𑀢𑁄, 𑀏𑀯𑀭𑀽𑀧𑁂𑀦 𑀳𑀺 𑀅𑀥𑀺𑀧𑁆𑀧𑀸𑀬𑀪𑁂𑀤𑁂𑀦 𑀫𑁄𑀘𑁂𑀢𑀺 𑀦 𑀅𑀜𑁆𑀜𑀣𑀸. 𑀦𑀻𑀮𑀸𑀤𑀻𑀳𑀺 𑀧𑀦 𑀤𑀲𑀳𑀺 𑀦𑀯𑀫𑀲𑁆𑀲 𑀅𑀥𑀺𑀧𑁆𑀧𑀸𑀬𑀲𑁆𑀲 𑀯𑀢𑁆𑀣𑀼 𑀤𑀲𑁆𑀲𑀺𑀢𑀁, 𑀯𑀻𑀫𑀁𑀲𑀦𑁆𑀢𑁄 𑀳𑀺 𑀦𑀻𑀮𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀲 𑀯𑀲𑁂𑀦 𑀯𑀻𑀫𑀁𑀲𑀢𑀺 𑀦 𑀢𑁂𑀳𑀺 𑀯𑀺𑀦𑀺𑀫𑀼𑀢𑁆𑀢𑀦𑁆𑀢𑀺.

𑁨𑁩𑁮. 𑀇𑀢𑁄 𑀧𑀭𑀁 𑀧𑀦 𑀇𑀫𑁂𑀲𑀁𑀬𑁂𑀯 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀦𑀁 𑀧𑀤𑀸𑀦𑀁 𑀧𑀓𑀸𑀲𑀦𑀢𑁆𑀣𑀁 ‘‘𑀅𑀚𑁆𑀛𑀢𑁆𑀢𑀭𑀽𑀧𑁂𑀢𑀺 𑀅𑀚𑁆𑀛𑀢𑁆𑀢𑀁 𑀉𑀧𑀸𑀤𑀺𑀦𑁆𑀦𑁂 𑀭𑀽𑀧𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀅𑀚𑁆𑀛𑀢𑁆𑀢𑀁 𑀉𑀧𑀸𑀤𑀺𑀦𑁆𑀦𑁂 𑀭𑀽𑀧𑁂𑀢𑀺 𑀅𑀢𑁆𑀢𑀦𑁄 𑀳𑀢𑁆𑀣𑀸𑀤𑀺𑀪𑁂𑀤𑁂 𑀭𑀽𑀧𑁂. 𑀩𑀳𑀺𑀤𑁆𑀥𑀸 𑀉𑀧𑀸𑀤𑀺𑀦𑁆𑀦𑁂𑀢𑀺 𑀧𑀭𑀲𑁆𑀲 𑀢𑀸𑀤𑀺𑀲𑁂𑀬𑁂𑀯. 𑀅𑀦𑀼𑀧𑀸𑀤𑀺𑀦𑁆𑀦𑁂𑀢𑀺 𑀢𑀸𑀴𑀘𑁆𑀙𑀺𑀤𑁆𑀤𑀸𑀤𑀺𑀪𑁂𑀤𑁂. 𑀢𑀤𑀼𑀪𑀬𑁂𑀢𑀺 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀭𑀽𑀧𑁂, 𑀉𑀪𑀬𑀖𑀝𑁆𑀝𑀦𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀭𑀽𑀧𑁂𑀦 𑀘 𑀅𑀦𑀼𑀧𑀸𑀤𑀺𑀦𑁆𑀦𑀭𑀽𑀧𑁂𑀦 𑀘 𑀏𑀓𑀢𑁄 𑀖𑀝𑁆𑀝𑀦𑁂𑀧𑀺 𑀮𑀩𑁆𑀪𑀢𑀺. 𑀆𑀓𑀸𑀲𑁂 𑀯𑀸𑀬𑀫𑀦𑁆𑀢𑀲𑁆𑀲𑀸𑀢𑀺 𑀓𑁂𑀦𑀘𑀺 𑀭𑀽𑀧𑁂𑀦 𑀅𑀖𑀝𑁆𑀝𑁂𑀢𑁆𑀯𑀸 𑀆𑀓𑀸𑀲𑁂𑀬𑁂𑀯 𑀓𑀝𑀺𑀓𑀫𑁆𑀧𑀦𑀧𑀬𑀑𑀕𑁂𑀦 𑀅𑀗𑁆𑀕𑀚𑀸𑀢𑀁 𑀘𑀸𑀮𑁂𑀦𑁆𑀢𑀲𑁆𑀲.

𑀭𑀸𑀕𑀽𑀧𑀢𑁆𑀣𑀫𑁆𑀪𑁂𑀢𑀺 𑀭𑀸𑀕𑀲𑁆𑀲 𑀩𑀮𑀯𑀪𑀸𑀯𑁂, 𑀭𑀸𑀕𑁂𑀦 𑀯𑀸 𑀅𑀗𑁆𑀕𑀚𑀸𑀢𑀲𑁆𑀲 𑀉𑀧𑀢𑁆𑀣𑀫𑁆𑀪𑁂, 𑀣𑀤𑁆𑀥𑀪𑀸𑀯𑁂 𑀲𑀜𑁆𑀚𑀸𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀫𑁆𑀫𑀦𑀺𑀬𑀁 𑀳𑁄𑀢𑀻𑀢𑀺 𑀫𑁄𑀘𑀦𑀓𑀫𑁆𑀫𑀓𑁆𑀔𑀫𑀁 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀼 𑀉𑀧𑀓𑁆𑀓𑀫𑀸𑀭𑀳𑀁 𑀳𑁄𑀢𑀺.

𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀤𑀝𑁆𑀞𑀽𑀧𑀢𑁆𑀣𑀫𑁆𑀪𑁂𑀢𑀺 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀤𑀝𑁆𑀞𑁂𑀦 𑀅𑀗𑁆𑀕𑀚𑀸𑀢𑁂 𑀉𑀧𑀢𑁆𑀣𑀫𑁆𑀪𑁂. 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀸 𑀦𑀸𑀫 𑀮𑁄𑀫𑀲𑀧𑀸𑀡𑀓𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀮𑁄𑀫𑁂𑀳𑀺 𑀨𑀼𑀝𑁆𑀞𑀁 𑀅𑀗𑁆𑀕𑀚𑀸𑀢𑀁 𑀓𑀡𑁆𑀟𑀼𑀁 𑀕𑀳𑁂𑀢𑁆𑀯𑀸 𑀣𑀤𑁆𑀥𑀁 𑀳𑁄𑀢𑀺, 𑀢𑀢𑁆𑀣 𑀬𑀲𑁆𑀫𑀸 𑀢𑀸𑀦𑀺 𑀮𑁄𑀫𑀸𑀦𑀺 𑀅𑀗𑁆𑀕𑀚𑀸𑀢𑀁 𑀟𑀁𑀲𑀦𑁆𑀢𑀸𑀦𑀺 𑀯𑀺𑀬 𑀯𑀺𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 ‘‘𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀤𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀦 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀮𑁄𑀫𑀯𑁂𑀥𑀦𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁩𑁯. 𑀅𑀭𑁄𑀕𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀫𑁄𑀘𑁂𑀢𑁆𑀯𑀸 𑀅𑀭𑁄𑀕𑁄 𑀪𑀯𑀺𑀲𑁆𑀲𑀸𑀫𑀺. 𑀲𑀼𑀔𑀁 𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀫𑁄𑀘𑀦𑁂𑀦 𑀘 𑀫𑀼𑀘𑁆𑀘𑀦𑀼𑀧𑁆𑀧𑀢𑁆𑀢𑀺𑀬𑀸 𑀫𑀼𑀢𑁆𑀢𑀧𑀘𑁆𑀘𑀬𑀸 𑀘 𑀬𑀸 𑀲𑀼𑀔𑀸 𑀯𑁂𑀤𑀦𑀸 𑀳𑁄𑀢𑀺, 𑀢𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀪𑁂𑀲𑀚𑁆𑀚𑀁 𑀪𑀯𑀺𑀲𑁆𑀲𑀢𑀻𑀢𑀺 𑀇𑀤𑀁 𑀫𑁂 𑀫𑁄𑀘𑀺𑀢𑀁 𑀓𑀺𑀜𑁆𑀘𑀺𑀤𑁂𑀯 𑀪𑁂𑀲𑀚𑁆𑀚𑀁 𑀪𑀯𑀺𑀲𑁆𑀲𑀢𑀺. 𑀤𑀸𑀦𑀁 𑀤𑀲𑁆𑀲𑀸𑀫𑀻𑀢𑀺 𑀫𑁄𑀘𑁂𑀢𑁆𑀯𑀸 𑀓𑀻𑀝𑀓𑀺𑀧𑀺𑀮𑁆𑀮𑀺𑀓𑀸𑀤𑀻𑀦𑀁 𑀤𑀸𑀦𑀁 𑀤𑀲𑁆𑀲𑀸𑀫𑀺. 𑀧𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀻𑀢𑀺 𑀫𑁄𑀘𑁂𑀢𑁆𑀯𑀸 𑀓𑀻𑀝𑀸𑀤𑀻𑀦𑀁 𑀤𑁂𑀦𑁆𑀢𑀲𑁆𑀲 𑀧𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀺. 𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫𑀻𑀢𑀺 𑀫𑁄𑀘𑁂𑀢𑁆𑀯𑀸 𑀓𑀻𑀝𑀸𑀤𑀻𑀦𑀁 𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫𑀺. 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀫𑀦𑁆𑀢𑀧𑀤𑀁 𑀯𑀢𑁆𑀯𑀸 𑀤𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀫𑁄𑀘𑁂𑀢𑁆𑀯𑀸 𑀓𑀻𑀝𑀸𑀤𑀻𑀦𑀁 𑀤𑀺𑀦𑁆𑀦𑀤𑀸𑀦𑁂𑀦 𑀯𑀸 𑀧𑀼𑀜𑁆𑀜𑁂𑀦 𑀯𑀸 𑀬𑀜𑁆𑀜𑁂𑀦 𑀯𑀸 𑀲𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀺. 𑀩𑀻𑀚𑀁 𑀪𑀯𑀺𑀲𑁆𑀲𑀢𑀻𑀢𑀺 𑀓𑀼𑀮𑀯𑀁𑀲𑀗𑁆𑀓𑀼𑀭𑀲𑁆𑀲 𑀤𑀸𑀭𑀓𑀲𑁆𑀲 𑀩𑀻𑀚𑀁 𑀪𑀯𑀺𑀲𑁆𑀲𑀢𑀺, ‘‘𑀇𑀫𑀺𑀦𑀸 𑀩𑀻𑀚𑁂𑀦 𑀧𑀼𑀢𑁆𑀢𑁄 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀫𑁄𑀘𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀻𑀫𑀁𑀲𑀢𑁆𑀣𑀸𑀬𑀸𑀢𑀺 𑀚𑀸𑀦𑀦𑀢𑁆𑀣𑀸𑀬. 𑀦𑀻𑀮𑀁 𑀪𑀯𑀺𑀲𑁆𑀲𑀢𑀻𑀢𑀺𑀆𑀤𑀻𑀲𑀼 𑀚𑀸𑀦𑀺𑀲𑁆𑀲𑀸𑀫𑀺 𑀢𑀸𑀯 𑀓𑀺𑀁 𑀫𑁂 𑀫𑁄𑀘𑀺𑀢𑀁 𑀦𑀻𑀮𑀁 𑀪𑀯𑀺𑀲𑁆𑀲𑀢𑀺 𑀧𑀻𑀢𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀯𑀡𑁆𑀡𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑁄𑀢𑀺 𑀔𑀺𑀟𑁆𑀟𑀸𑀧𑀲𑀼𑀢𑁄, 𑀢𑁂𑀦 𑀢𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀓𑀻𑀴𑀦𑁆𑀢𑁄 𑀫𑁄𑀘𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁪𑁦. 𑀇𑀤𑀸𑀦𑀺 𑀬𑀤𑀺𑀤𑀁 ‘‘𑀅𑀚𑁆𑀛𑀢𑁆𑀢𑀭𑀽𑀧𑁂 𑀫𑁄𑀘𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑀢𑀢𑁆𑀣 𑀬𑀣𑀸 𑀫𑁄𑀘𑁂𑀦𑁆𑀢𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀢𑁂𑀲𑀜𑁆𑀘 𑀧𑀤𑀸𑀦𑀁 𑀯𑀲𑁂𑀦 𑀬𑀢𑁆𑀢𑀓𑁄 𑀆𑀧𑀢𑁆𑀢𑀺𑀪𑁂𑀤𑁄 𑀳𑁄𑀢𑀺, 𑀢𑀁 𑀲𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀚𑁆𑀛𑀢𑁆𑀢𑀭𑀽𑀧𑁂 𑀘𑁂𑀢𑁂𑀢𑀺 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀺 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀘𑁂𑀢𑁂𑀢𑀻𑀢𑀺 𑀫𑁄𑀘𑀦𑀲𑁆𑀲𑀸𑀤𑀲𑀫𑁆𑀧𑀬𑀼𑀢𑁆𑀢𑀸𑀬 𑀘𑁂𑀢𑀦𑀸𑀬 𑀫𑀼𑀘𑁆𑀘𑀢𑀽𑀢𑀺 𑀘𑁂𑀢𑁂𑀢𑀺. 𑀉𑀧𑀓𑁆𑀓𑀫𑀢𑀻𑀢𑀺 𑀢𑀤𑀦𑀼𑀭𑀽𑀧𑀁 𑀯𑀸𑀬𑀸𑀫𑀁 𑀓𑀭𑁄𑀢𑀺. 𑀫𑀼𑀘𑁆𑀘𑀢𑀻𑀢𑀺 𑀏𑀯𑀁 𑀘𑁂𑀢𑁂𑀦𑁆𑀢𑀲𑁆𑀲 𑀢𑀤𑀦𑀼𑀭𑀽𑀧𑁂𑀦 𑀯𑀸𑀬𑀸𑀫𑁂𑀦 𑀯𑀸𑀬𑀫𑀢𑁄 𑀲𑀼𑀓𑁆𑀓𑀁 𑀞𑀸𑀦𑀸 𑀘𑀯𑀢𑀺. 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦𑀸𑀫 𑀆𑀧𑀢𑁆𑀢𑀺𑀦𑀺𑀓𑀸𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀩𑀳𑀺𑀤𑁆𑀥𑀸𑀭𑀽𑀧𑁂𑀢𑀺𑀆𑀤𑀻𑀲𑀼𑀧𑀺 𑀅𑀯𑀲𑁂𑀲𑁂𑀲𑀼 𑀅𑀝𑁆𑀞𑀯𑀻𑀲𑀢𑀺𑀬𑀸 𑀧𑀤𑁂𑀲𑀼.

𑀏𑀢𑁆𑀣 𑀧𑀦 𑀤𑁆𑀯𑁂 𑀆𑀧𑀢𑁆𑀢𑀺𑀲𑀳𑀲𑁆𑀲𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀓𑀣𑀁? 𑀅𑀚𑁆𑀛𑀢𑁆𑀢𑀭𑀽𑀧𑁂 𑀢𑀸𑀯 𑀭𑀸𑀕𑀽𑀧𑀢𑁆𑀣𑀫𑁆𑀪𑁂 𑀆𑀭𑁄𑀕𑁆𑀬𑀢𑁆𑀣𑀸𑀬 𑀦𑀻𑀮𑀁 𑀫𑁄𑀘𑁂𑀦𑁆𑀢𑀲𑁆𑀲 𑀏𑀓𑀸 𑀆𑀧𑀢𑁆𑀢𑀺, 𑀅𑀚𑁆𑀛𑀢𑁆𑀢𑀭𑀽𑀧𑁂𑀬𑁂𑀯 𑀭𑀸𑀕𑀽𑀧𑀢𑁆𑀣𑀫𑁆𑀪𑁂 𑀆𑀭𑁄𑀕𑁆𑀬𑀢𑁆𑀣𑀸𑀬 𑀧𑀻𑀢𑀸𑀤𑀻𑀦𑀁 𑀫𑁄𑀘𑀦𑀯𑀲𑁂𑀦 𑀅𑀧𑀭𑀸 𑀦𑀯𑀸𑀢𑀺 𑀤𑀲. 𑀬𑀣𑀸 𑀘 𑀆𑀭𑁄𑀕𑁆𑀬𑀢𑁆𑀣𑀸𑀬 𑀤𑀲, 𑀏𑀯𑀁 𑀲𑀼𑀔𑀸𑀤𑀻𑀦𑀁 𑀦𑀯𑀦𑁆𑀦𑀁 𑀧𑀤𑀸𑀦𑀁 𑀅𑀢𑁆𑀣𑀸𑀬 𑀏𑀓𑁂𑀓𑀧𑀤𑁂 𑀤𑀲 𑀤𑀲 𑀓𑀢𑁆𑀯𑀸 𑀦𑀯𑀼𑀢𑀺, 𑀇𑀢𑀺 𑀇𑀫𑀸 𑀘 𑀦𑀯𑀼𑀢𑀺 𑀧𑀼𑀭𑀺𑀫𑀸 𑀘 𑀤𑀲𑀸𑀢𑀺 𑀭𑀸𑀕𑀽𑀧𑀢𑁆𑀣𑀫𑁆𑀪𑁂 𑀢𑀸𑀯 𑀲𑀢𑀁. 𑀬𑀣𑀸 𑀧𑀦 𑀭𑀸𑀕𑀽𑀧𑀢𑁆𑀣𑀫𑁆𑀪𑁂 𑀏𑀯𑀁 𑀯𑀘𑁆𑀘𑀽𑀧𑀢𑁆𑀣𑀫𑁆𑀪𑀸𑀤𑀻𑀲𑀼𑀧𑀺 𑀘𑀢𑀽𑀲𑀼 𑀏𑀓𑁂𑀓𑀲𑁆𑀫𑀺𑀁 𑀉𑀧𑀢𑁆𑀣𑀫𑁆𑀪𑁂 𑀲𑀢𑀁 𑀲𑀢𑀁 𑀓𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺, 𑀇𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀼𑀭𑀺𑀫𑀜𑁆𑀘 𑀏𑀓𑀦𑁆𑀢𑀺 𑀅𑀚𑁆𑀛𑀢𑁆𑀢𑀭𑀽𑀧𑁂 𑀢𑀸𑀯 𑀧𑀜𑁆𑀘𑀦𑁆𑀦𑀁 𑀉𑀧𑀢𑁆𑀣𑀫𑁆𑀪𑀸𑀦𑀁 𑀯𑀲𑁂𑀦 𑀧𑀜𑁆𑀘 𑀲𑀢𑀸𑀦𑀺. 𑀬𑀣𑀸 𑀘 𑀅𑀚𑁆𑀛𑀢𑁆𑀢𑀭𑀽𑀧𑁂 𑀧𑀜𑁆𑀘, 𑀏𑀯𑀁 𑀩𑀳𑀺𑀤𑁆𑀥𑀸𑀭𑀽𑀧𑁂 𑀧𑀜𑁆𑀘, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀽𑀧𑁂 𑀧𑀜𑁆𑀘, 𑀆𑀓𑀸𑀲𑁂 𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑀲𑁆𑀲 𑀧𑀜𑁆𑀘𑀸𑀢𑀺 𑀲𑀩𑁆𑀩𑀸𑀦𑀺𑀧𑀺 𑀘𑀢𑀼𑀦𑁆𑀦𑀁 𑀧𑀜𑁆𑀘𑀓𑀸𑀦𑀁 𑀯𑀲𑁂𑀦 𑀤𑁆𑀯𑁂 𑀆𑀧𑀢𑁆𑀢𑀺𑀲𑀳𑀲𑁆𑀲𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀇𑀤𑀸𑀦𑀺 𑀆𑀭𑁄𑀕𑁆𑀬𑀢𑁆𑀣𑀸𑀬𑀸𑀢𑀺𑀆𑀤𑀻𑀲𑀼 𑀢𑀸𑀯 𑀤𑀲𑀲𑀼 𑀧𑀤𑁂𑀲𑀼 𑀧𑀝𑀺𑀧𑀸𑀝𑀺𑀬𑀸 𑀯𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀸 𑀳𑁂𑀝𑁆𑀞𑀸 𑀯𑀸 𑀕𑀳𑁂𑀢𑁆𑀯𑀸 𑀉𑀧𑀭𑀺 𑀕𑀡𑁆𑀳𑀦𑁆𑀢𑀲𑁆𑀲, 𑀉𑀧𑀭𑀺 𑀯𑀸 𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀸 𑀕𑀡𑁆𑀳𑀦𑁆𑀢𑀲𑁆𑀲, 𑀉𑀪𑀢𑁄 𑀯𑀸 𑀕𑀳𑁂𑀢𑁆𑀯𑀸 𑀫𑀚𑁆𑀛𑁂 𑀞𑀧𑁂𑀦𑁆𑀢𑀲𑁆𑀲, 𑀫𑀚𑁆𑀛𑁂 𑀯𑀸 𑀕𑀳𑁂𑀢𑁆𑀯𑀸 𑀉𑀪𑀢𑁄 𑀳𑀭𑀦𑁆𑀢𑀲𑁆𑀲, 𑀲𑀩𑁆𑀩𑀫𑀽𑀮𑀁 𑀯𑀸 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀘𑁂𑀢𑀦𑀽𑀧𑀓𑁆𑀓𑀫𑀫𑁄𑀘𑀦𑁂 𑀲𑀢𑀺 𑀯𑀺𑀲𑀗𑁆𑀓𑁂𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀆𑀭𑁄𑀕𑁆𑀬𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘𑀸’’𑀢𑀺 𑀔𑀡𑁆𑀟𑀘𑀓𑁆𑀓𑀩𑀤𑁆𑀥𑀘𑀓𑁆𑀓𑀸𑀤𑀺𑀪𑁂𑀤𑀯𑀺𑀘𑀺𑀢𑁆𑀢𑀁 𑀧𑀸𑀴𑀺𑀫𑀸𑀳.

𑀢𑀢𑁆𑀣 𑀆𑀭𑁄𑀕𑁆𑀬𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘 𑀆𑀭𑁄𑀕𑁆𑀬𑀢𑁆𑀣𑀜𑁆𑀘 𑀪𑁂𑀲𑀚𑁆𑀚𑀢𑁆𑀣𑀜𑁆𑀘𑀸 𑀢𑀺 𑀏𑀯𑀁 𑀆𑀭𑁄𑀕𑁆𑀬𑀧𑀤𑀁 𑀲𑀩𑁆𑀩𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑀫𑁂𑀓𑀁 𑀔𑀡𑁆𑀟𑀘𑀓𑁆𑀓𑀁. 𑀲𑀼𑀔𑀧𑀤𑀸𑀤𑀻𑀦𑀺 𑀲𑀩𑁆𑀩𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 𑀬𑀸𑀯 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀢𑀻𑀢𑀸𑀦𑀦𑁆𑀢𑀭𑀧𑀤𑀁 𑀢𑀸𑀯 𑀆𑀦𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 𑀦𑀯 𑀩𑀤𑁆𑀥𑀘𑀓𑁆𑀓𑀸𑀦𑀻𑀢𑀺 𑀏𑀯𑀁 𑀏𑀓𑁂𑀓𑀫𑀽𑀮𑀓𑀸𑀦𑀺 𑀤𑀲 𑀘𑀓𑁆𑀓𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀤𑀼𑀫𑀽𑀮𑀓𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀲𑀫𑁆𑀫𑁄𑀳𑀢𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀢𑁆𑀣𑁄 𑀧𑀦𑁂𑀢𑁆𑀣 𑀧𑀸𑀓𑀝𑁄𑀬𑁂𑀯.

𑀬𑀣𑀸 𑀘 𑀆𑀭𑁄𑀕𑁆𑀬𑀢𑁆𑀣𑀸𑀬𑀸𑀢𑀺𑀆𑀤𑀻𑀲𑀼 𑀤𑀲𑀲𑀼 𑀧𑀤𑁂𑀲𑀼, 𑀏𑀯𑀁 𑀦𑀻𑀮𑀸𑀤𑀻𑀲𑀼𑀧𑀺 ‘‘𑀦𑀻𑀮𑀜𑁆𑀘 𑀧𑀻𑀢𑀓𑀜𑁆𑀘 𑀘𑁂𑀢𑁂𑀢𑀺 𑀉𑀧𑀓𑁆𑀓𑀫𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀲 𑀘𑀓𑁆𑀓𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺𑀧𑀺 𑀅𑀲𑀫𑁆𑀫𑁄𑀳𑀢𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀢𑁆𑀣𑁄 𑀧𑀦𑁂𑀢𑁆𑀣 𑀧𑀸𑀓𑀝𑁄𑀬𑁂𑀯.

𑀧𑀼𑀦 𑀆𑀭𑁄𑀕𑁆𑀬𑀢𑁆𑀣𑀜𑁆𑀘 𑀦𑀻𑀮𑀜𑁆𑀘 𑀆𑀭𑁄𑀕𑁆𑀬𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘 𑀦𑀻𑀮𑀜𑁆𑀘 𑀧𑀻𑀢𑀓𑀜𑁆𑀘𑀸𑀢𑀺 𑀏𑀓𑁂𑀦𑁂𑀓𑀁 𑀤𑁆𑀯𑀻𑀳𑀺 𑀤𑁆𑀯𑁂…𑀧𑁂… 𑀤𑀲𑀳𑀺 𑀤𑀲𑀸𑀢𑀺 𑀏𑀯𑀁 𑀧𑀼𑀭𑀺𑀫𑀧𑀤𑁂𑀳𑀺 𑀲𑀤𑁆𑀥𑀺𑀁 𑀧𑀘𑁆𑀙𑀺𑀫𑀧𑀤𑀸𑀦𑀺 𑀬𑁄𑀚𑁂𑀢𑁆𑀯𑀸 𑀏𑀓𑀁 𑀫𑀺𑀲𑁆𑀲𑀓𑀘𑀓𑁆𑀓𑀁 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀬𑀲𑁆𑀫𑀸 ‘‘𑀦𑀻𑀮𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀘𑁂𑀢𑁂𑀢𑁆𑀯𑀸 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀧𑀻𑀢𑀓𑀸𑀤𑀻𑀲𑀼 𑀫𑀼𑀢𑁆𑀢𑁂𑀲𑀼𑀧𑀺 𑀧𑀻𑀢𑀓𑀸𑀤𑀺𑀯𑀲𑁂𑀦 𑀘𑁂𑀢𑁂𑀢𑁆𑀯𑀸 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀇𑀢𑀭𑁂𑀲𑀼 𑀫𑀼𑀢𑁆𑀢𑁂𑀲𑀼𑀧𑀺 𑀦𑁂𑀯𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄, 𑀢𑀲𑁆𑀫𑀸 𑀏𑀢𑀫𑁆𑀧𑀺 𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀻𑀮𑀁 𑀫𑁄𑀘𑁂𑀲𑁆𑀲𑀸𑀫𑀻𑀢𑀺 𑀘𑁂𑀢𑁂𑀢𑀺 𑀉𑀧𑀓𑁆𑀓𑀫𑀢𑀺 𑀧𑀻𑀢𑀓𑀁 𑀫𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀓𑁆𑀓𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀢𑁄 𑀧𑀭𑀁 𑀲𑀩𑁆𑀩𑀧𑀘𑁆𑀙𑀺𑀫𑀧𑀤𑀁 𑀦𑀻𑀮𑀸𑀤𑀻𑀳𑀺 𑀦𑀯𑀳𑀺 𑀧𑀤𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀓𑀼𑀘𑁆𑀙𑀺𑀘𑀓𑁆𑀓𑀁 𑀦𑀸𑀫 𑀯𑀼𑀢𑁆𑀢𑀁. 𑀢𑀢𑁄 𑀧𑀻𑀢𑀓𑀸𑀤𑀻𑀦𑀺 𑀦𑀯 𑀧𑀤𑀸𑀦𑀺 𑀏𑀓𑁂𑀦 𑀦𑀻𑀮𑀧𑀤𑁂𑀦𑁂𑀯 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀧𑀺𑀝𑁆𑀞𑀺𑀘𑀓𑁆𑀓𑀁 𑀦𑀸𑀫 𑀯𑀼𑀢𑁆𑀢𑀁. 𑀢𑀢𑁄 𑀮𑁄𑀳𑀺𑀢𑀓𑀸𑀤𑀻𑀦𑀺 𑀦𑀯 𑀧𑀤𑀸𑀦𑀺 𑀏𑀓𑁂𑀦 𑀧𑀻𑀢𑀓𑀧𑀤𑁂𑀦𑁂𑀯 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀤𑀼𑀢𑀺𑀬𑀁 𑀧𑀺𑀝𑁆𑀞𑀺𑀘𑀓𑁆𑀓𑀁 𑀯𑀼𑀢𑁆𑀢𑀁. 𑀏𑀯𑀁 𑀮𑁄𑀳𑀺𑀢𑀓𑀧𑀤𑀸𑀤𑀻𑀳𑀺 𑀲𑀤𑁆𑀥𑀺𑀁 𑀇𑀢𑀭𑀸𑀦𑀺 𑀦𑀯 𑀦𑀯 𑀧𑀤𑀸𑀦𑀺 𑀬𑁄𑀚𑁂𑀢𑁆𑀯𑀸 𑀅𑀜𑁆𑀜𑀸𑀦𑀺𑀧𑀺 𑀅𑀝𑁆𑀞 𑀘𑀓𑁆𑀓𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀏𑀯𑀁 𑀤𑀲𑀕𑀢𑀺𑀓𑀁 𑀧𑀺𑀝𑁆𑀞𑀺𑀘𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀔𑀡𑁆𑀟𑀘𑀓𑁆𑀓𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀘𑀓𑁆𑀓𑀸𑀦𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀕𑀭𑀼𑀓𑀸𑀧𑀢𑁆𑀢𑀺𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀗𑁆𑀕𑀯𑀲𑁂𑀦𑁂𑀯 𑀕𑀭𑀼𑀓𑀸𑀧𑀢𑁆𑀢𑀺𑀜𑁆𑀘 𑀮𑀳𑀼𑀓𑀸𑀧𑀢𑁆𑀢𑀺𑀜𑁆𑀘 𑀅𑀦𑀸𑀧𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀘𑁂𑀢𑁂𑀢𑀺 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀭𑀺𑀫𑀦𑀬𑁂𑀦 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀼 𑀭𑀸𑀕𑀸𑀤𑀺𑀉𑀧𑀢𑁆𑀣𑀫𑁆𑀪𑁂 𑀲𑀢𑀺 𑀆𑀭𑁄𑀕𑁆𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 𑀘𑁂𑀢𑁂𑀦𑁆𑀢𑀲𑁆𑀲 𑀉𑀧𑀓𑁆𑀓𑀫𑀺𑀢𑁆𑀯𑀸 𑀅𑀲𑀼𑀘𑀺𑀫𑁄𑀘𑀦𑁂 𑀢𑀺𑀯𑀗𑁆𑀕𑀲𑀫𑁆𑀧𑀦𑁆𑀦𑀸 𑀕𑀭𑀼𑀓𑀸𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀤𑀼𑀢𑀺𑀬𑁂𑀦 𑀦𑀬𑁂𑀦 𑀘𑁂𑀢𑁂𑀦𑁆𑀢𑀲𑁆𑀲 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀘 𑀫𑁄𑀘𑀦𑁂 𑀅𑀲𑀢𑀺 𑀤𑀼𑀯𑀗𑁆𑀕𑀲𑀫𑁆𑀧𑀦𑁆𑀦𑀸 𑀮𑀳𑀼𑀓𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺. ‘‘𑀘𑁂𑀢𑁂𑀢𑀺 𑀦 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀻’’𑀢𑀺𑀆𑀤𑀻𑀳𑀺 𑀙𑀳𑀺 𑀦𑀬𑁂𑀳𑀺 𑀅𑀦𑀸𑀧𑀢𑁆𑀢𑀺.

𑀅𑀬𑀁 𑀧𑀦 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀪𑁂𑀤𑁄 𑀲𑀡𑁆𑀳𑁄 𑀲𑀼𑀔𑀼𑀫𑁄, 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄. 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑀺𑀢𑁂𑀦 𑀆𑀧𑀢𑁆𑀢𑀺 𑀯𑀸 𑀅𑀦𑀸𑀧𑀢𑁆𑀢𑀺 𑀯𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀸, 𑀯𑀺𑀦𑀬𑀓𑀫𑁆𑀫𑀁 𑀯𑀸 𑀓𑀸𑀢𑀩𑁆𑀩𑀁. 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀭𑁄𑀦𑁆𑀢𑁄 𑀳𑀺 𑀭𑁄𑀕𑀦𑀺𑀤𑀸𑀦𑀁 𑀅𑀚𑀸𑀦𑀺𑀢𑁆𑀯𑀸 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄 𑀯𑁂𑀚𑁆𑀚𑁄 𑀯𑀺𑀬 𑀯𑀺𑀖𑀸𑀢𑀜𑁆𑀘 𑀆𑀧𑀚𑁆𑀚𑀢𑀺, 𑀦 𑀘 𑀢𑀁 𑀧𑀼𑀕𑁆𑀕𑀮𑀁 𑀢𑀺𑀓𑀺𑀘𑁆𑀙𑀺𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺. 𑀢𑀢𑁆𑀭𑀸𑀬𑀁 𑀲𑀮𑁆𑀮𑀓𑁆𑀔𑀡𑀯𑀺𑀥𑀺 𑁋 𑀓𑀼𑀓𑁆𑀓𑀼𑀘𑁆𑀘𑁂𑀦 𑀆𑀕𑀢𑁄 𑀪𑀺𑀓𑁆𑀔𑀼 𑀬𑀸𑀯𑀢𑀢𑀺𑀬𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘‘𑀓𑀢𑀭𑁂𑀦 𑀧𑀬𑁄𑀕𑁂𑀦 𑀓𑀢𑀭𑁂𑀦 𑀭𑀸𑀕𑁂𑀦 𑀆𑀧𑀦𑁆𑀦𑁄𑀲𑀻’’𑀢𑀺. 𑀲𑀘𑁂 𑀧𑀞𑀫𑀁 𑀅𑀜𑁆𑀜𑀁 𑀯𑀢𑁆𑀯𑀸 𑀧𑀘𑁆𑀙𑀸 𑀅𑀜𑁆𑀜𑀁 𑀯𑀤𑀢𑀺 𑀦 𑀏𑀓𑀫𑀕𑁆𑀕𑁂𑀦 𑀓𑀣𑁂𑀢𑀺, 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀢𑁆𑀯𑀁 𑀦 𑀏𑀓𑀫𑀕𑁆𑀕𑁂𑀦 𑀓𑀣𑁂𑀲𑀺 𑀧𑀭𑀺𑀳𑀭𑀲𑀺, 𑀦 𑀲𑀓𑁆𑀓𑀸 𑀢𑀯 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀼𑀁 𑀕𑀘𑁆𑀙 𑀲𑁄𑀢𑁆𑀣𑀺𑀁 𑀕𑀯𑁂𑀲𑀸’’𑀢𑀺. 𑀲𑀘𑁂 𑀧𑀦 𑀢𑀺𑀓𑁆𑀔𑀢𑁆𑀢𑀼𑀫𑁆𑀧𑀺 𑀏𑀓𑀫𑀕𑁆𑀕𑁂𑀦𑁂𑀯 𑀓𑀣𑁂𑀢𑀺, 𑀬𑀣𑀸𑀪𑀽𑀢𑀁 𑀅𑀢𑁆𑀢𑀸𑀦𑀁 𑀆𑀯𑀺𑀓𑀭𑁄𑀢𑀺, 𑀅𑀣𑀲𑁆𑀲 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀕𑀭𑀼𑀓𑀮𑀳𑀼𑀓𑀸𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀢𑁆𑀣𑀁 𑀏𑀓𑀸𑀤𑀲𑀦𑁆𑀦𑀁 𑀭𑀸𑀕𑀸𑀦𑀁 𑀯𑀲𑁂𑀦 𑀏𑀓𑀸𑀤𑀲 𑀧𑀬𑁄𑀕𑀸 𑀲𑀫𑀯𑁂𑀓𑁆𑀔𑀺𑀢𑀩𑁆𑀩𑀸.

𑀢𑀢𑁆𑀭𑀺𑀫𑁂 𑀏𑀓𑀸𑀤𑀲 𑀭𑀸𑀕𑀸 𑁋 𑀫𑁄𑀘𑀦𑀲𑁆𑀲𑀸𑀤𑁄, 𑀫𑀼𑀘𑁆𑀘𑀦𑀲𑁆𑀲𑀸𑀤𑁄, 𑀫𑀼𑀢𑁆𑀢𑀲𑁆𑀲𑀸𑀤𑁄, 𑀫𑁂𑀣𑀼𑀦𑀲𑁆𑀲𑀸𑀤𑁄, 𑀨𑀲𑁆𑀲𑀲𑁆𑀲𑀸𑀤𑁄, 𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁄, 𑀤𑀲𑁆𑀲𑀦𑀲𑁆𑀲𑀸𑀤𑁄, 𑀦𑀺𑀲𑀚𑁆𑀚𑀲𑁆𑀲𑀸𑀤𑁄, 𑀯𑀸𑀘𑀲𑁆𑀲𑀸𑀤𑁄, 𑀕𑁂𑀳𑀲𑁆𑀲𑀺𑀢𑀧𑁂𑀫𑀁, 𑀯𑀦𑀪𑀗𑁆𑀕𑀺𑀬𑀦𑁆𑀢𑀺. 𑀢𑀢𑁆𑀣 𑀫𑁄𑀘𑁂𑀢𑀼𑀁 𑀅𑀲𑁆𑀲𑀸𑀤𑁄 𑀫𑁄𑀘𑀦𑀲𑁆𑀲𑀸𑀤𑁄, 𑀫𑀼𑀘𑁆𑀘𑀦𑁂 𑀅𑀲𑁆𑀲𑀸𑀤𑁄 𑀫𑀼𑀘𑁆𑀘𑀦𑀲𑁆𑀲𑀸𑀤𑁄, 𑀫𑀼𑀢𑁆𑀢𑁂 𑀅𑀲𑁆𑀲𑀸𑀤𑁄 𑀫𑀼𑀢𑁆𑀢𑀲𑁆𑀲𑀸𑀤𑁄, 𑀫𑁂𑀣𑀼𑀦𑁂 𑀅𑀲𑁆𑀲𑀸𑀤𑁄 𑀫𑁂𑀣𑀼𑀦𑀲𑁆𑀲𑀸𑀤𑁄, 𑀨𑀲𑁆𑀲𑁂 𑀅𑀲𑁆𑀲𑀸𑀤𑁄 𑀨𑀲𑁆𑀲𑀲𑁆𑀲𑀸𑀤𑁄, 𑀓𑀡𑁆𑀟𑀼𑀯𑀦𑁂 𑀅𑀲𑁆𑀲𑀸𑀤𑁄 𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁄, 𑀤𑀲𑁆𑀲𑀦𑁂 𑀅𑀲𑁆𑀲𑀸𑀤𑁄 𑀤𑀲𑁆𑀲𑀦𑀲𑁆𑀲𑀸𑀤𑁄, 𑀦𑀺𑀲𑀚𑁆𑀚𑀸𑀬 𑀅𑀲𑁆𑀲𑀸𑀤𑁄 𑀦𑀺𑀲𑀚𑁆𑀚𑀲𑁆𑀲𑀸𑀤𑁄, 𑀯𑀸𑀘𑀸𑀬 𑀅𑀲𑁆𑀲𑀸𑀤𑁄 𑀯𑀸𑀘𑀲𑁆𑀲𑀸𑀤𑁄, 𑀕𑁂𑀳𑀲𑁆𑀲𑀺𑀢𑀁 𑀧𑁂𑀫𑀁 𑀕𑁂𑀳𑀲𑁆𑀲𑀺𑀢𑀧𑁂𑀫𑀁, 𑀯𑀦𑀪𑀗𑁆𑀕𑀺𑀬𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀧𑀼𑀧𑁆𑀨𑀨𑀮𑀸𑀤𑀺 𑀯𑀦𑀢𑁄 𑀪𑀜𑁆𑀚𑀺𑀢𑁆𑀯𑀸 𑀆𑀳𑀝𑀁. 𑀏𑀢𑁆𑀣 𑀘 𑀦𑀯𑀳𑀺 𑀧𑀤𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀅𑀲𑁆𑀲𑀸𑀤𑀲𑀻𑀲𑁂𑀦 𑀭𑀸𑀕𑁄 𑀯𑀼𑀢𑁆𑀢𑁄. 𑀏𑀓𑁂𑀦 𑀧𑀤𑁂𑀦 𑀲𑀭𑀽𑀧𑁂𑀦𑁂𑀯, 𑀏𑀓𑁂𑀦 𑀧𑀤𑁂𑀦 𑀯𑀢𑁆𑀣𑀼𑀦𑀸 𑀯𑀼𑀢𑁆𑀢𑁄, 𑀯𑀦𑀪𑀗𑁆𑀕𑁄 𑀳𑀺 𑀭𑀸𑀕𑀲𑁆𑀲 𑀯𑀢𑁆𑀣𑀼 𑀦 𑀭𑀸𑀕𑁄𑀬𑁂𑀯.

𑀏𑀢𑁂𑀲𑀁 𑀧𑀦 𑀭𑀸𑀕𑀸𑀦𑀁 𑀯𑀲𑁂𑀦 𑀏𑀯𑀁 𑀧𑀬𑁄𑀕𑀸 𑀲𑀫𑀯𑁂𑀓𑁆𑀔𑀺𑀢𑀩𑁆𑀩𑀸 𑁋 𑀫𑁄𑀘𑀦𑀲𑁆𑀲𑀸𑀤𑁂 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸𑀬 𑀘𑁂𑀢𑁂𑀦𑁆𑀢𑁄 𑀘𑁂𑀯 𑀅𑀲𑁆𑀲𑀸𑀤𑁂𑀦𑁆𑀢𑁄 𑀘 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀢𑀣𑁂𑀯 𑀘𑁂𑀢𑁂𑀦𑁆𑀢𑁄 𑀘 𑀅𑀲𑁆𑀲𑀸𑀤𑁂𑀦𑁆𑀢𑁄 𑀘 𑀉𑀧𑀓𑁆𑀓𑀫𑀢𑀺 𑀦 𑀫𑀼𑀘𑁆𑀘𑀢𑀺 𑀣𑀼𑀮𑁆𑀮𑀘𑁆𑀘𑀬𑀁. 𑀲𑀘𑁂 𑀧𑀦 𑀲𑀬𑀦𑀓𑀸𑀮𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁄 𑀳𑀼𑀢𑁆𑀯𑀸 𑀊𑀭𑀼𑀦𑀸 𑀯𑀸 𑀫𑀼𑀝𑁆𑀞𑀺𑀦𑀸 𑀯𑀸 𑀅𑀗𑁆𑀕𑀚𑀸𑀢𑀁 𑀕𑀸𑀴𑁆𑀳𑀁 𑀧𑀻𑀴𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀲𑀉𑀲𑁆𑀲𑀸𑀳𑁄𑀯 𑀲𑀼𑀧𑀢𑀺, 𑀲𑀼𑀧𑀦𑁆𑀢𑀲𑁆𑀲 𑀘𑀲𑁆𑀲 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑀘𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀲𑀼𑀪𑀫𑀦𑀲𑀺𑀓𑀸𑀭𑁂𑀦 𑀯𑀽𑀧𑀲𑀫𑁂𑀢𑁆𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁄 𑀲𑀼𑀧𑀢𑀺, 𑀲𑀼𑀧𑀦𑁆𑀢𑀲𑁆𑀲 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺.

𑀫𑀼𑀘𑁆𑀘𑀦𑀲𑁆𑀲𑀸𑀤𑁂 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀼𑀘𑁆𑀘𑀫𑀸𑀦𑀁 𑀅𑀲𑁆𑀲𑀸𑀤𑁂𑀢𑀺 𑀦 𑀉𑀧𑀓𑁆𑀓𑀫𑀢𑀺 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀧𑀦 𑀫𑀼𑀘𑁆𑀘𑀫𑀸𑀦𑀁 𑀅𑀲𑁆𑀲𑀸𑀤𑁂𑀦𑁆𑀢𑁄 𑀉𑀧𑀓𑁆𑀓𑀫𑀢𑀺, 𑀢𑁂𑀦 𑀉𑀧𑀓𑁆𑀓𑀫𑁂𑀦 𑀫𑀼𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀼𑀘𑁆𑀘𑀫𑀸𑀦𑁂 ‘‘𑀫𑀸 𑀓𑀸𑀲𑀸𑀯𑀁 𑀯𑀸 𑀲𑁂𑀦𑀸𑀲𑀦𑀁 𑀯𑀸 𑀤𑀼𑀲𑁆𑀲𑀻’’𑀢𑀺 𑀅𑀗𑁆𑀕𑀚𑀸𑀢𑀁 𑀕𑀳𑁂𑀢𑁆𑀯𑀸 𑀚𑀕𑁆𑀕𑀦𑀢𑁆𑀣𑀸𑀬 𑀉𑀤𑀓𑀝𑁆𑀞𑀸𑀦𑀁 𑀕𑀘𑁆𑀙𑀢𑀺 𑀯𑀝𑁆𑀝𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁.

𑀫𑀼𑀢𑁆𑀢𑀲𑁆𑀲𑀸𑀤𑁂 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀼𑀢𑁆𑀢𑁂 𑀞𑀸𑀦𑀸 𑀘𑀼𑀢𑁂 𑀅𑀲𑀼𑀘𑀺𑀫𑁆𑀳𑀺 𑀧𑀘𑁆𑀙𑀸 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀯𑀺𑀦𑀸 𑀉𑀧𑀓𑁆𑀓𑀫𑁂𑀦 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀅𑀲𑁆𑀲𑀸𑀤𑁂𑀢𑁆𑀯𑀸 𑀧𑀼𑀦 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀫𑁂𑀣𑀼𑀦𑀲𑁆𑀲𑀸𑀤𑁂 𑀫𑁂𑀣𑀼𑀦𑀭𑀸𑀕𑁂𑀦 𑀫𑀸𑀢𑀼𑀕𑀸𑀫𑀁 𑀕𑀡𑁆𑀳𑀸𑀢𑀺, 𑀢𑁂𑀦 𑀧𑀬𑁄𑀕𑁂𑀦 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀬𑁄𑀕𑀢𑁆𑀢𑀸 𑀧𑀦 𑀢𑀸𑀤𑀺𑀲𑁂 𑀕𑀳𑀡𑁂 𑀤𑀼𑀓𑁆𑀓𑀝𑀁, 𑀲𑀻𑀲𑀁 𑀧𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀫𑁂𑀣𑀼𑀦𑀭𑀸𑀕𑁂𑀦 𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀨𑀲𑁆𑀲𑀲𑁆𑀲𑀸𑀤𑁂 𑀤𑀼𑀯𑀺𑀥𑁄 𑀨𑀲𑁆𑀲𑁄 𑁋 𑀅𑀚𑁆𑀛𑀢𑁆𑀢𑀺𑀓𑁄, 𑀩𑀸𑀳𑀺𑀭𑁄 𑀘. 𑀅𑀚𑁆𑀛𑀢𑁆𑀢𑀺𑀓𑁂 𑀢𑀸𑀯 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑀁 𑀣𑀤𑁆𑀥𑀁 𑀫𑀼𑀤𑀼𑀓𑀦𑁆𑀢𑀺 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀯𑀸 𑀮𑁄𑀮𑀪𑀸𑀯𑁂𑀦 𑀯𑀸 𑀓𑀻𑀴𑀸𑀧𑀬𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀓𑀻𑀴𑀸𑀧𑁂𑀦𑁆𑀢𑁄 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀩𑀸𑀳𑀺𑀭𑀨𑀲𑁆𑀲𑁂 𑀧𑀦 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀫𑀸𑀢𑀼𑀕𑀸𑀫𑀲𑁆𑀲 𑀅𑀗𑁆𑀕𑀫𑀗𑁆𑀕𑀸𑀦𑀺 𑀧𑀭𑀸𑀫𑀲𑀢𑁄 𑀘𑁂𑀯 𑀆𑀮𑀺𑀗𑁆𑀕𑀢𑁄 𑀘 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀦 𑀆𑀧𑀚𑁆𑀚𑀢𑀺. 𑀲𑀘𑁂 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺 𑀯𑀺𑀲𑀝𑁆𑀞𑀺𑀧𑀘𑁆𑀘𑀬𑀸𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁂 𑀤𑀤𑁆𑀤𑀼𑀓𑀘𑁆𑀙𑀼𑀧𑀺𑀴𑀓𑀧𑀸𑀡𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀓𑀡𑁆𑀟𑀼𑀯𑀫𑀸𑀦𑀁 𑀦𑀺𑀫𑀺𑀢𑁆𑀢𑀁 𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁂 𑀦𑁂𑀯 𑀓𑀡𑁆𑀟𑀼𑀯𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁂𑀦 𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀤𑀲𑁆𑀲𑀦𑀲𑁆𑀲𑀸𑀤𑁂 𑀤𑀲𑁆𑀲𑀦𑀲𑁆𑀲𑀸𑀤𑁂𑀦 𑀧𑀼𑀦𑀧𑁆𑀧𑀼𑀦𑀁 𑀫𑀸𑀢𑀼𑀕𑀸𑀫𑀲𑁆𑀲 𑀅𑀦𑁄𑀓𑀸𑀲𑀁 𑀉𑀧𑀦𑀺𑀚𑁆𑀛𑀸𑀬𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑀸𑀢𑀼𑀕𑀸𑀫𑀲𑁆𑀲 𑀅𑀦𑁄𑀓𑀸𑀲𑀼𑀧𑀦𑀺𑀚𑁆𑀛𑀸𑀦𑁂 𑀧𑀦 𑀤𑀼𑀓𑁆𑀓𑀝𑀁. 𑀲𑀘𑁂 𑀤𑀲𑁆𑀲𑀦𑀲𑁆𑀲𑀸𑀤𑁂𑀦 𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀦𑀺𑀲𑀚𑁆𑀚𑀲𑁆𑀲𑀸𑀤𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀦𑀺𑀲𑀚𑁆𑀚𑀲𑁆𑀲𑀸𑀤𑀭𑀸𑀕𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀭𑀳𑁄 𑀦𑀺𑀲𑀚𑁆𑀚𑀧𑀘𑁆𑀘𑀬𑀸 𑀧𑀦 𑀆𑀧𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀦𑀺𑀲𑀚𑁆𑀚𑀲𑁆𑀲𑀸𑀤𑁂𑀦 𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀯𑀸𑀘𑀲𑁆𑀲𑀸𑀤𑁂 𑀯𑀸𑀘𑀲𑁆𑀲𑀸𑀤𑀭𑀸𑀕𑁂𑀦 𑀫𑀸𑀢𑀼𑀕𑀸𑀫𑀁 𑀫𑁂𑀣𑀼𑀦𑀲𑀦𑁆𑀦𑀺𑀲𑁆𑀲𑀺𑀢𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀦𑁆𑀢𑀲𑁆𑀲 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀦 𑀆𑀧𑀚𑁆𑀚𑀢𑀺. 𑀲𑀘𑁂 𑀯𑀸𑀘𑀲𑁆𑀲𑀸𑀤𑁂𑀦 𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀕𑁂𑀳𑀲𑁆𑀲𑀺𑀢𑀧𑁂𑀫𑁂 𑀫𑀸𑀢𑀭𑀁 𑀯𑀸 𑀫𑀸𑀢𑀼𑀧𑁂𑀫𑁂𑀦 𑀪𑀕𑀺𑀦𑀺𑀁 𑀯𑀸 𑀪𑀕𑀺𑀦𑀺𑀧𑁂𑀫𑁂𑀦 𑀧𑀼𑀦𑀧𑁆𑀧𑀼𑀦𑀁 𑀧𑀭𑀸𑀫𑀲𑀢𑁄 𑀘𑁂𑀯 𑀆𑀮𑀺𑀗𑁆𑀕𑀢𑁄 𑀘 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀕𑁂𑀳𑀲𑁆𑀲𑀺𑀢𑀧𑁂𑀫𑁂𑀦 𑀧𑀦 𑀨𑀼𑀲𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁. 𑀲𑀘𑁂 𑀕𑁂𑀳𑀲𑁆𑀲𑀺𑀢𑀧𑁂𑀫𑁂𑀦 𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀯𑀦𑀪𑀗𑁆𑀕𑁂 𑀇𑀢𑁆𑀣𑀺𑀧𑀼𑀭𑀺𑀲𑀸 𑀅𑀜𑁆𑀜𑀫𑀜𑁆𑀜𑀁 𑀓𑀺𑀜𑁆𑀘𑀺𑀤𑁂𑀯 𑀢𑀫𑁆𑀩𑀽𑀮𑀕𑀦𑁆𑀥𑀧𑀼𑀧𑁆𑀨𑀯𑀸𑀲𑀸𑀤𑀺𑀧𑁆𑀧𑀓𑀸𑀭𑀁 𑀧𑀡𑁆𑀡𑀸𑀓𑀸𑀭𑀁 𑀫𑀺𑀢𑁆𑀢𑀲𑀦𑁆𑀣𑀯𑀪𑀸𑀯𑀲𑁆𑀲 𑀤𑀴𑁆𑀳𑀪𑀸𑀯𑀢𑁆𑀣𑀸𑀬 𑀧𑁂𑀲𑁂𑀦𑁆𑀢𑀺 𑀅𑀬𑀁 𑀯𑀦𑀪𑀗𑁆𑀕𑁄 𑀦𑀸𑀫. 𑀢𑀜𑁆𑀘𑁂 𑀫𑀸𑀢𑀼𑀕𑀸𑀫𑁄 𑀓𑀲𑁆𑀲𑀘𑀺 𑀲𑀁𑀲𑀝𑁆𑀞𑀯𑀺𑀳𑀸𑀭𑀺𑀓𑀲𑁆𑀲 𑀓𑀼𑀮𑀽𑀧𑀓𑀪𑀺𑀓𑁆𑀔𑀼𑀦𑁄 𑀧𑁂𑀲𑁂𑀢𑀺, 𑀢𑀲𑁆𑀲 𑀘 ‘‘𑀅𑀲𑀼𑀓𑀸𑀬 𑀦𑀸𑀫 𑀇𑀤𑀁 𑀧𑁂𑀲𑀺𑀢’’𑀦𑁆𑀢𑀺 𑀲𑀸𑀭𑀢𑁆𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀳𑀢𑁆𑀣𑁂𑀳𑀺 𑀢𑀁 𑀯𑀦𑀪𑀗𑁆𑀕𑀁 𑀓𑀻𑀴𑀸𑀧𑀬𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀯𑀦𑀪𑀗𑁆𑀕𑁂 𑀲𑀸𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑀘𑁂 𑀉𑀧𑀓𑁆𑀓𑀫𑀦𑁆𑀢𑁂𑀧𑀺 𑀦 𑀫𑀼𑀘𑁆𑀘𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁.

𑀏𑀯𑀫𑁂𑀢𑁂𑀲𑀁 𑀏𑀓𑀸𑀤𑀲𑀦𑁆𑀦𑀁 𑀭𑀸𑀕𑀸𑀦𑀁 𑀯𑀲𑁂𑀦 𑀇𑀫𑁂 𑀏𑀓𑀸𑀤𑀲 𑀧𑀬𑁄𑀕𑁂 𑀲𑀫𑁂𑀯𑁂𑀓𑁆𑀔𑀺𑀢𑁆𑀯𑀸 𑀆𑀧𑀢𑁆𑀢𑀺 𑀯𑀸 𑀅𑀦𑀸𑀧𑀢𑁆𑀢𑀺 𑀯𑀸 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸. 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀘𑁂 𑀕𑀭𑀼𑀓𑀸 𑀳𑁄𑀢𑀺 ‘‘𑀕𑀭𑀼𑀓𑀸’’𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀸. 𑀲𑀘𑁂 𑀮𑀳𑀼𑀓𑀸 𑀳𑁄𑀢𑀺 ‘‘𑀮𑀳𑀼𑀓𑀸’’𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀸. 𑀢𑀤𑀦𑀼𑀭𑀽𑀧𑀜𑁆𑀘 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀓𑀢𑀁 𑀲𑀼𑀓𑀢𑀁 𑀳𑁄𑀢𑀺 𑀭𑁄𑀕𑀦𑀺𑀤𑀸𑀦𑀁 𑀜𑀢𑁆𑀯𑀸 𑀯𑁂𑀚𑁆𑀚𑁂𑀦 𑀓𑀢𑀪𑁂𑀲𑀚𑁆𑀚𑀫𑀺𑀯, 𑀢𑀲𑁆𑀲 𑀘 𑀧𑀼𑀕𑁆𑀕𑀮𑀲𑁆𑀲 𑀲𑁄𑀢𑁆𑀣𑀺𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

𑁨𑁬𑁨. 𑀘𑁂𑀢𑁂𑀢𑀺 𑀦 𑀉𑀧𑀓𑁆𑀓𑀫𑀢𑀻𑀢𑀺𑀆𑀤𑀻𑀲𑀼 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸𑀬 𑀘𑁂𑀢𑁂𑀢𑀺, 𑀦 𑀉𑀧𑀓𑁆𑀓𑀫𑀢𑀺, 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑁄𑀘𑀦𑀲𑁆𑀲𑀸𑀤𑀧𑀻𑀴𑀺𑀢𑁄 ‘‘𑀅𑀳𑁄 𑀯𑀢 𑀫𑀼𑀘𑁆𑀘𑁂𑀬𑁆𑀬𑀸’’𑀢𑀺 𑀘𑁂𑀢𑁂𑀢𑀺, 𑀦 𑀉𑀧𑀓𑁆𑀓𑀫𑀢𑀺, 𑀦 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑁄𑀘𑀦𑀲𑁆𑀲𑀸𑀤𑁂𑀦 𑀦 𑀘𑁂𑀢𑁂𑀢𑀺, 𑀨𑀲𑁆𑀲𑀲𑁆𑀲𑀸𑀤𑁂𑀦 𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁂𑀦 𑀯𑀸 𑀉𑀧𑀓𑁆𑀓𑀫𑀢𑀺, 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀢𑀣𑁂𑀯 𑀦 𑀘𑁂𑀢𑁂𑀢𑀺, 𑀉𑀧𑀓𑁆𑀓𑀫𑀢𑀺, 𑀦 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀓𑀸𑀫𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀫𑁄𑀘𑀦𑀢𑁆𑀣𑀸𑀬 𑀦 𑀘𑁂𑀢𑁂𑀢𑀺, 𑀦 𑀉𑀧𑀓𑁆𑀓𑀫𑀢𑀺, 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀧𑀦𑀲𑁆𑀲 𑀯𑀺𑀢𑀓𑁆𑀓𑀬𑀢𑁄𑀧𑀺 𑀦 𑀫𑀼𑀘𑁆𑀘𑀢𑀺 𑀇𑀤𑀁 𑀆𑀕𑀢𑀫𑁂𑀯 𑀳𑁄𑀢𑀺, ‘‘𑀦 𑀘𑁂𑀢𑁂𑀢𑀺, 𑀦 𑀉𑀧𑀓𑁆𑀓𑀫𑀢𑀺, 𑀦 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺.

𑀅𑀦𑀸𑀧𑀢𑁆𑀢𑀺 𑀲𑀼𑀧𑀺𑀦𑀦𑁆𑀢𑁂𑀦𑀸𑀢𑀺 𑀲𑀼𑀢𑁆𑀢𑀲𑁆𑀲 𑀲𑀼𑀧𑀺𑀦𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀯𑀺𑀬 𑀓𑀸𑀬𑀲𑀁𑀲𑀕𑁆𑀕𑀸𑀤𑀻𑀦𑀺 𑀆𑀧𑀚𑁆𑀚𑀦𑁆𑀢𑀲𑁆𑀲 𑀯𑀺𑀬 𑀲𑀼𑀧𑀺𑀦𑀦𑁆𑀢𑁂𑀦𑁂𑀯 𑀓𑀸𑀭𑀡𑁂𑀦 𑀬𑀲𑁆𑀲 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑀼𑀧𑀺𑀦𑁂 𑀧𑀦 𑀉𑀧𑁆𑀧𑀦𑁆𑀦𑀸𑀬 𑀅𑀲𑁆𑀲𑀸𑀤𑀘𑁂𑀢𑀦𑀸𑀬 𑀲𑀘𑀲𑁆𑀲 𑀯𑀺𑀲𑀬𑁄 𑀳𑁄𑀢𑀺, 𑀦𑀺𑀘𑁆𑀘𑀮𑁂𑀦 𑀪𑀯𑀺𑀢𑀩𑁆𑀩𑀁, 𑀦 𑀳𑀢𑁆𑀣𑁂𑀦 𑀦𑀺𑀫𑀺𑀢𑁆𑀢𑀁 𑀓𑀻𑀴𑀸𑀧𑁂𑀢𑀩𑁆𑀩𑀁, 𑀓𑀸𑀲𑀸𑀯𑀧𑀘𑁆𑀘𑀢𑁆𑀣𑀭𑀡𑀭𑀓𑁆𑀔𑀡𑀢𑁆𑀣𑀁 𑀧𑀦 𑀳𑀢𑁆𑀣𑀧𑀼𑀝𑁂𑀦 𑀕𑀳𑁂𑀢𑁆𑀯𑀸 𑀚𑀕𑁆𑀕𑀦𑀢𑁆𑀣𑀸𑀬 𑀉𑀤𑀓𑀝𑁆𑀞𑀸𑀦𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺.

𑀦𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀬𑀲𑁆𑀲 𑀪𑁂𑀲𑀚𑁆𑀚𑁂𑀦 𑀯𑀸 𑀦𑀺𑀫𑀺𑀢𑁆𑀢𑀁 𑀆𑀮𑀺𑀫𑁆𑀧𑀦𑁆𑀢𑀲𑁆𑀲 𑀉𑀘𑁆𑀘𑀸𑀭𑀸𑀤𑀻𑀦𑀺 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀦𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀫𑀼𑀘𑁆𑀘𑀢𑀺, 𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀉𑀫𑁆𑀫𑀢𑁆𑀢𑀓𑀲𑁆𑀲 𑀤𑀼𑀯𑀺𑀥𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀇𑀥 𑀲𑁂𑀬𑁆𑀬𑀲𑀓𑁄 𑀆𑀤𑀺𑀓𑀫𑁆𑀫𑀺𑀓𑁄, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀸, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀁, 𑀲𑀼𑀔𑀫𑀚𑁆𑀛𑀢𑁆𑀢𑀤𑁆𑀯𑀬𑁂𑀦𑀸𑀢𑀺.

𑁨𑁬𑁩. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀲𑀼𑀧𑀺𑀦𑀯𑀢𑁆𑀣𑀼 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀯𑀺𑀢𑀓𑁆𑀓𑀯𑀢𑁆𑀣𑀼𑀲𑁆𑀫𑀺𑀁 𑀓𑀸𑀫𑀯𑀺𑀢𑀓𑁆𑀓𑀦𑁆𑀢𑀺 𑀕𑁂𑀳𑀲𑁆𑀲𑀺𑀢𑀓𑀸𑀫𑀯𑀺𑀢𑀓𑁆𑀓𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀅𑀣 𑀔𑁄 𑀯𑀺𑀢𑀓𑁆𑀓𑀕𑀢𑀺𑀓𑁂𑀦 𑀦 𑀪𑀯𑀺𑀢𑀩𑁆𑀩𑀁. 𑀉𑀡𑁆𑀳𑁄𑀤𑀓𑀯𑀢𑁆𑀣𑀽𑀲𑀼 𑀧𑀞𑀫𑀁 𑀉𑀢𑁆𑀢𑀸𑀦𑀫𑁂𑀯. 𑀤𑀼𑀢𑀺𑀬𑁂 𑀲𑁄 𑀪𑀺𑀓𑁆𑀔𑀼 𑀫𑁄𑀘𑁂𑀢𑀼𑀓𑀸𑀫𑁄 𑀉𑀡𑁆𑀳𑁄𑀤𑀓𑁂𑀦 𑀦𑀺𑀫𑀺𑀢𑁆𑀢𑀁 𑀧𑀳𑀭𑀺𑀢𑁆𑀯𑀸 𑀧𑀳𑀭𑀺𑀢𑁆𑀯𑀸 𑀦𑁆𑀳𑀸𑀬𑀺, 𑀢𑁂𑀦𑀲𑁆𑀲 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀢𑀢𑀺𑀬𑁂 𑀉𑀧𑀓𑁆𑀓𑀫𑀲𑁆𑀲 𑀅𑀢𑁆𑀣𑀺𑀢𑀸𑀬 𑀣𑀼𑀮𑁆𑀮𑀘𑁆𑀘𑀬𑀁. 𑀪𑁂𑀲𑀚𑁆𑀚𑀓𑀡𑁆𑀟𑀼𑀯𑀦𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁨𑁬𑁪. 𑀫𑀕𑁆𑀕𑀯𑀢𑁆𑀣𑀽𑀲𑀼 𑀧𑀞𑀫𑀲𑁆𑀲 𑀣𑀼𑀮𑀊𑀭𑀼𑀓𑀲𑁆𑀲 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀲𑁆𑀲 𑀲𑀫𑁆𑀩𑀸𑀥𑀝𑁆𑀞𑀸𑀦𑁂 𑀖𑀝𑁆𑀝𑀦𑀸𑀬 𑀅𑀲𑀼𑀘𑀺 𑀫𑀼𑀘𑁆𑀘𑀺, 𑀢𑀲𑁆𑀲 𑀦𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. 𑀤𑀼𑀢𑀺𑀬𑀲𑁆𑀲 𑀢𑀣𑁂𑀯 𑀫𑀼𑀘𑁆𑀘𑀺, 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀢𑁆𑀢𑀸 𑀧𑀦 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀢𑀢𑀺𑀬𑀲𑁆𑀲 𑀦 𑀫𑀼𑀘𑁆𑀘𑀺, 𑀉𑀧𑀓𑁆𑀓𑀫𑀲𑀩𑁆𑀪𑀸𑀯𑀢𑁄 𑀧𑀦 𑀣𑀼𑀮𑁆𑀮𑀘𑁆𑀘𑀬𑀁. 𑀢𑀲𑁆𑀫𑀸 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂𑀦 𑀉𑀧𑁆𑀧𑀦𑁆𑀦𑁂 𑀧𑀭𑀺𑀴𑀸𑀳𑁂 𑀦 𑀕𑀦𑁆𑀢𑀩𑁆𑀩𑀁, 𑀕𑀫𑀦𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀲𑀼𑀪𑀸𑀤𑀺𑀫𑀦𑀲𑀺𑀓𑀸𑀭𑁂𑀦 𑀘𑀺𑀢𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀆𑀤𑀸𑀬 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀞𑀺𑀢𑁄 𑀯𑀺𑀦𑁄𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀆𑀤𑀸𑀬 𑀲𑀼𑀤𑁆𑀥𑀘𑀺𑀢𑁆𑀢𑁂𑀦𑁂𑀯 𑀕𑀦𑁆𑀢𑀩𑁆𑀩𑀁.

𑀯𑀢𑁆𑀣𑀺𑀯𑀢𑁆𑀣𑀽𑀲𑀼 𑀢𑁂 𑀪𑀺𑀓𑁆𑀔𑀽 𑀯𑀢𑁆𑀣𑀺𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀸 𑀕𑀸𑀫𑀤𑀸𑀭𑀓𑀸 𑀯𑀺𑀬 𑀧𑀲𑁆𑀲𑀸𑀯𑀫𑀓𑀁𑀲𑀼. 𑀚𑀦𑁆𑀢𑀸𑀖𑀭𑀯𑀢𑁆𑀣𑀼𑀲𑁆𑀫𑀺𑀁 𑀉𑀤𑀭𑀁 𑀢𑀸𑀧𑁂𑀦𑁆𑀢𑀲𑁆𑀲 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀧𑀺 𑀅𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀧𑀺 𑀫𑀼𑀢𑁆𑀢𑁂 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀘𑀸𑀮𑀦𑀯𑀲𑁂𑀦 𑀅𑀲𑀼𑀘𑀺 𑀫𑀼𑀘𑁆𑀘𑀺, 𑀢𑀲𑁆𑀫𑀸 𑀆𑀧𑀢𑁆𑀢𑀺𑀝𑁆𑀞𑀸𑀦𑁂 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸.

𑁨𑁬𑁫. 𑀊𑀭𑀼𑀖𑀝𑁆𑀝𑀸𑀧𑀦𑀯𑀢𑁆𑀣𑀽𑀲𑀼 𑀬𑁂𑀲𑀁 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀢𑁂 𑀅𑀗𑁆𑀕𑀚𑀸𑀢𑀫𑁆𑀧𑀺 𑀨𑀼𑀲𑀸𑀧𑁂𑀲𑀼𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀯𑀁 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀲𑀸𑀫𑀡𑁂𑀭𑀸𑀤𑀺𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁨𑁬𑁬. 𑀓𑀸𑀬𑀢𑁆𑀣𑀫𑁆𑀪𑀦𑀯𑀢𑁆𑀣𑀼𑀲𑁆𑀫𑀺𑀁 𑀓𑀸𑀬𑀁 𑀣𑀫𑁆𑀪𑁂𑀦𑁆𑀢𑀲𑁆𑀲𑀸𑀢𑀺 𑀘𑀺𑀭𑀁 𑀦𑀺𑀲𑀻𑀤𑀺𑀢𑁆𑀯𑀸 𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀯𑀸 𑀦𑀯𑀓𑀫𑁆𑀫𑀁 𑀯𑀸 𑀓𑀢𑁆𑀯𑀸 𑀆𑀮𑀲𑀺𑀬𑀯𑀺𑀫𑁄𑀘𑀦𑀢𑁆𑀣𑀁 𑀯𑀺𑀚𑀫𑁆𑀪𑁂𑀦𑁆𑀢𑀲𑁆𑀲.

𑀉𑀧𑀦𑀺𑀚𑁆𑀛𑀸𑀬𑀦𑀯𑀢𑁆𑀣𑀼𑀲𑁆𑀫𑀺𑀁 𑀲𑀘𑁂𑀧𑀺 𑀧𑀝𑀲𑀢𑀁 𑀦𑀺𑀯𑀢𑁆𑀣𑀸 𑀳𑁄𑀢𑀺 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀞𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯. 𑀅𑀦𑀺𑀯𑀢𑁆𑀣𑀸𑀦𑀁 𑀕𑀸𑀫𑀤𑀸𑀭𑀺𑀓𑀸𑀦𑀁 𑀦𑀺𑀫𑀺𑀢𑁆𑀢𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀧𑀦 𑀓𑀺𑀫𑁂𑀯 𑀯𑀢𑁆𑀢𑀩𑁆𑀩𑀁. 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀦𑀺𑀫𑀺𑀢𑁆𑀢𑁂 𑀏𑀲𑁂𑀯 𑀦𑀬𑁄. 𑀇𑀢𑁄 𑀘𑀺𑀢𑁄 𑀘 𑀅𑀯𑀺𑀮𑁄𑀓𑁂𑀢𑁆𑀯𑀸 𑀧𑀦 𑀤𑀺𑀯𑀲𑀫𑁆𑀧𑀺 𑀏𑀓𑀧𑀬𑁄𑀕𑁂𑀦 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀏𑀓𑀫𑁂𑀯 𑀤𑀼𑀓𑁆𑀓𑀝𑀁. 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀉𑀫𑁆𑀫𑀻𑀮𑀦𑀦𑀺𑀫𑀻𑀮𑀦𑀯𑀲𑁂𑀦 𑀧𑀦 𑀦 𑀓𑀸𑀭𑁂𑀢𑀩𑁆𑀩𑁄. 𑀲𑀳𑀲𑀸 𑀉𑀧𑀦𑀺𑀚𑁆𑀛𑀸𑀬𑀺𑀢𑁆𑀯𑀸 𑀧𑀼𑀦 𑀧𑀝𑀺𑀲𑀗𑁆𑀔𑀸𑀬 𑀲𑀁𑀯𑀭𑁂 𑀢𑀺𑀝𑁆𑀞𑀢𑁄 𑀅𑀦𑀸𑀧𑀢𑁆𑀢𑀺, 𑀢𑀁 𑀲𑀁𑀯𑀭𑀁 𑀧𑀳𑀸𑀬 𑀧𑀼𑀦 𑀉𑀧𑀦𑀺𑀚𑁆𑀛𑀸𑀬𑀢𑁄 𑀤𑀼𑀓𑁆𑀓𑀝𑀫𑁂𑀯.

𑁨𑁬𑁭. 𑀢𑀸𑀴𑀘𑁆𑀙𑀺𑀤𑁆𑀤𑀸𑀤𑀺𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀦𑁆𑀳𑀸𑀦𑀯𑀢𑁆𑀣𑀽𑀲𑀼 𑀬𑁂 𑀉𑀤𑀓𑀲𑁄𑀢𑀁 𑀦𑀺𑀫𑀺𑀢𑁆𑀢𑁂𑀦 𑀧𑀳𑀭𑀺𑀁𑀲𑀼 𑀢𑁂𑀲𑀁 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀉𑀤𑀜𑁆𑀚𑀮𑀯𑀢𑁆𑀣𑀽𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀉𑀤𑀜𑁆𑀚𑀮𑀦𑁆𑀢𑀺 𑀉𑀤𑀓𑀘𑀺𑀓𑁆𑀔𑀮𑁆𑀮𑁄 𑀯𑀼𑀘𑁆𑀘𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀇𑀢𑁄 𑀧𑀭𑀸𑀦𑀺 𑀲𑀩𑁆𑀩𑀸𑀦𑁂𑀯 𑀉𑀤𑀓𑁂 𑀥𑀸𑀯𑀦𑀸𑀤𑀺𑀯𑀢𑁆𑀣𑀽𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄. 𑀧𑀼𑀧𑁆𑀨𑀸𑀯𑀴𑀺𑀬𑀯𑀢𑁆𑀣𑀽𑀲𑀼 𑀲𑀘𑁂𑀧𑀺 𑀦𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀓𑀻𑀴𑀦𑀧𑀘𑁆𑀘𑀬𑀸 𑀧𑀦 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁬𑁯. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀅𑀭𑀜𑁆𑀜𑁂 𑀯𑀺𑀳𑀭𑀢𑀻𑀢𑀺 𑀦 𑀆𑀯𑁂𑀡𑀺𑀓𑁂 𑀅𑀭𑀜𑁆𑀜𑁂, 𑀚𑁂𑀢𑀯𑀦𑀯𑀺𑀳𑀸𑀭𑀲𑁆𑀲𑁂𑀯 𑀧𑀘𑁆𑀘𑀦𑁆𑀢𑁂 𑀏𑀓𑀧𑀲𑁆𑀲𑁂. 𑀫𑀚𑁆𑀛𑁂 𑀕𑀩𑁆𑀪𑁄𑀢𑀺 𑀢𑀲𑁆𑀲 𑀘 𑀯𑀺𑀳𑀸𑀭𑀲𑁆𑀲 𑀫𑀚𑁆𑀛𑁂 𑀕𑀩𑁆𑀪𑁄 𑀳𑁄𑀢𑀺. 𑀲𑀫𑀦𑁆𑀢𑀸 𑀧𑀭𑀺𑀬𑀸𑀕𑀸𑀭𑁄𑀢𑀺 𑀲𑀫𑀦𑁆𑀢𑀸 𑀧𑀦𑀲𑁆𑀲 𑀫𑀡𑁆𑀟𑀮𑀫𑀸𑀴𑀧𑀭𑀺𑀓𑁆𑀔𑁂𑀧𑁄 𑀳𑁄𑀢𑀺. 𑀲𑁄 𑀓𑀺𑀭 𑀫𑀚𑁆𑀛𑁂 𑀘𑀢𑀼𑀭𑀲𑁆𑀲𑀁 𑀕𑀩𑁆𑀪𑀁 𑀓𑀢𑁆𑀯𑀸 𑀩𑀳𑀺 𑀫𑀡𑁆𑀟𑀮𑀫𑀸𑀴𑀧𑀭𑀺𑀓𑁆𑀔𑁂𑀧𑁂𑀦 𑀓𑀢𑁄, 𑀬𑀣𑀸 𑀲𑀓𑁆𑀓𑀸 𑀳𑁄𑀢𑀺 𑀅𑀦𑁆𑀢𑁄𑀬𑁂𑀯 𑀆𑀯𑀺𑀜𑁆𑀙𑀦𑁆𑀢𑁂𑀳𑀺 𑀯𑀺𑀘𑀭𑀺𑀢𑀼𑀁.

𑀲𑀼𑀧𑀜𑁆𑀜𑀢𑁆𑀢𑀦𑁆𑀢𑀺 𑀲𑀼𑀝𑁆𑀞 𑀞𑀧𑀺𑀢𑀁, 𑀬𑀣𑀸 𑀬𑀣𑀸 𑀬𑀲𑁆𑀫𑀺𑀁 𑀬𑀲𑁆𑀫𑀺𑀜𑁆𑀘 𑀑𑀓𑀸𑀲𑁂 𑀞𑀧𑀺𑀢𑀁 𑀧𑀸𑀲𑀸𑀤𑀺𑀓𑀁 𑀳𑁄𑀢𑀺 𑀮𑁄𑀓𑀭𑀜𑁆𑀚𑀓𑀁 𑀢𑀣𑀸 𑀢𑀣𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀑𑀓𑀸𑀲𑁂 𑀞𑀧𑀺𑀢𑀁, 𑀯𑀢𑁆𑀢𑀲𑀻𑀲𑁂𑀦 𑀳𑀺 𑀲𑁄𑀁 𑀏𑀓𑀓𑀺𑀘𑁆𑀘𑀫𑁆𑀧𑀺 𑀦 𑀓𑀭𑁄𑀢𑀺. 𑀏𑀓𑀘𑁆𑀘𑁂 𑀯𑀸𑀢𑀧𑀸𑀦𑁂 𑀯𑀺𑀯𑀭𑀦𑁆𑀢𑁄𑀢𑀺 𑀬𑁂𑀲𑀼 𑀯𑀺𑀯𑀝𑁂𑀲𑀼 𑀅𑀦𑁆𑀥𑀓𑀸𑀭𑁄 𑀳𑁄𑀢𑀺 𑀢𑀸𑀦𑀺 𑀯𑀺𑀯𑀭𑀦𑁆𑀢𑁄 𑀬𑁂𑀲𑀼 𑀯𑀺𑀯𑀝𑁂𑀲𑀼 𑀆𑀮𑁄𑀓𑁄 𑀳𑁄𑀢𑀺 𑀢𑀸𑀦𑀺 𑀣𑀓𑁂𑀦𑁆𑀢𑁄.

𑀏𑀯𑀁 𑀯𑀼𑀢𑁆𑀢𑁂 𑀲𑀸 𑀩𑁆𑀭𑀸𑀳𑁆𑀫𑀡𑀻 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘𑀸𑀢𑀺 𑀏𑀯𑀁 𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀧𑀲𑀁𑀲𑀺𑀢𑁆𑀯𑀸 𑀯𑀼𑀢𑁆𑀢𑁂 𑀲𑀸 𑀩𑁆𑀭𑀸𑀳𑁆𑀫𑀡𑀻 ‘‘𑀧𑀲𑀦𑁆𑀦𑁄 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀫𑀜𑁆𑀜𑁂’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀕𑀽𑀳𑀺𑀢𑀩𑁆𑀩𑀫𑁆𑀧𑀺 𑀢𑀁 𑀅𑀢𑁆𑀢𑀦𑁄 𑀯𑀺𑀧𑁆𑀧𑀓𑀸𑀭𑀁 𑀧𑀓𑀸𑀲𑁂𑀦𑁆𑀢𑀻 𑀓𑁂𑀯𑀮𑀁 𑀢𑀲𑁆𑀲 𑀲𑀤𑁆𑀥𑀸𑀯𑀺𑀖𑀸𑀢𑀸𑀧𑁂𑀓𑁆𑀔𑀸 𑀳𑀼𑀢𑁆𑀯𑀸 𑀏𑀢𑀁 ‘‘𑀓𑀼𑀢𑁄 𑀢𑀲𑁆𑀲 𑀉𑀴𑀸𑀭𑀢𑁆𑀢𑀢𑀸’’𑀢𑀺𑀆𑀤𑀺𑀯𑀘𑀦𑀫𑀯𑁄𑀘. 𑀢𑀢𑁆𑀣 𑀉𑀴𑀸𑀭𑁄 𑀅𑀢𑁆𑀢𑀸 𑀅𑀲𑁆𑀲𑀸𑀢𑀺 𑀉𑀴𑀸𑀭𑀢𑁆𑀢𑀸, 𑀉𑀴𑀸𑀭𑀢𑁆𑀢𑀦𑁄 𑀪𑀸𑀯𑁄 𑀉𑀝𑁆𑀞𑀸𑀭𑀢𑁆𑀢𑀢𑀸. 𑀓𑀼𑀮𑀺𑀢𑁆𑀣𑀻𑀳𑀻𑀢𑀺𑀆𑀤𑀻𑀲𑀼 𑀓𑀼𑀮𑀺𑀢𑁆𑀣𑀺𑀬𑁄 𑀦𑀸𑀫 𑀖𑀭𑀲𑁆𑀲𑀸𑀫𑀺𑀦𑀺𑀬𑁄. 𑀓𑀼𑀮𑀥𑀻𑀢𑀭𑁄 𑀦𑀸𑀫 𑀧𑀼𑀭𑀺𑀲𑀦𑁆𑀢𑀭𑀕𑀢𑀸 𑀓𑀼𑀮𑀥𑀻𑀢𑀭𑁄. 𑀓𑀼𑀮𑀓𑀼𑀫𑀸𑀭𑀺𑀬𑁄 𑀦𑀸𑀫 𑀅𑀦𑀺𑀯𑀺𑀝𑁆𑀞𑀸 𑀯𑀼𑀘𑁆𑀘𑀦𑁆𑀢𑀺. 𑀓𑀼𑀮𑀲𑀼𑀡𑁆𑀳𑀸 𑀦𑀸𑀫 𑀧𑀭𑀓𑀼𑀮𑀢𑁄 𑀆𑀦𑀻𑀢𑀸 𑀓𑀼𑀮𑀤𑀸𑀭𑀓𑀸𑀦𑀁 𑀯𑀥𑀼𑀬𑁄.

𑁨𑁭𑁦. 𑀑𑀢𑀺𑀡𑁆𑀡𑁄𑀢𑀺 𑀬𑀓𑁆𑀔𑀸𑀤𑀻𑀳𑀺 𑀯𑀺𑀬 𑀲𑀢𑁆𑀢𑀸 𑀅𑀦𑁆𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑁂𑀦 𑀭𑀸𑀕𑁂𑀦 𑀑𑀢𑀺𑀡𑁆𑀡𑁄, 𑀓𑀽𑀧𑀸𑀤𑀻𑀦𑀺 𑀯𑀺𑀬 𑀲𑀢𑁆𑀢𑀸 𑀅𑀲𑀫𑀧𑁂𑀓𑁆𑀔𑀺𑀢𑁆𑀯𑀸 𑀭𑀚𑀦𑀻𑀬𑁂 𑀞𑀸𑀦𑁂 𑀭𑀚𑁆𑀚𑀦𑁆𑀢𑁄 𑀲𑀬𑀁 𑀯𑀸 𑀭𑀸𑀕𑀁 𑀑𑀢𑀺𑀡𑁆𑀡𑁄, 𑀬𑀲𑁆𑀫𑀸 𑀧𑀦 𑀉𑀪𑀬𑀣𑀸𑀧𑀺 𑀭𑀸𑀕𑀲𑀫𑀗𑁆𑀕𑀺𑀲𑁆𑀲𑁂𑀯𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 ‘‘𑀑𑀢𑀺𑀡𑁆𑀡𑁄 𑀦𑀸𑀫 𑀲𑀸𑀭𑀢𑁆𑀢𑁄 𑀅𑀧𑁂𑀓𑁆𑀔𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄’’𑀢𑀺 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀸𑀭𑀢𑁆𑀢𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀲𑀼𑀝𑁆𑀞𑀼 𑀭𑀢𑁆𑀢𑁄. 𑀅𑀧𑁂𑀓𑁆𑀔𑀯𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀸𑀧𑁂𑀓𑁆𑀔𑀸𑀬 𑀅𑀧𑁂𑀓𑁆𑀔𑀯𑀸. 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑁂𑀯 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄. 𑀯𑀺𑀧𑀭𑀺𑀡𑀢𑁂𑀦𑀸𑀢𑀺 𑀧𑀭𑀺𑀲𑀼𑀤𑁆𑀥𑀪𑀯𑀗𑁆𑀕𑀲𑀦𑁆𑀢𑀢𑀺𑀲𑀗𑁆𑀔𑀸𑀢𑀁 𑀧𑀓𑀢𑀺𑀁 𑀯𑀺𑀚𑀳𑀺𑀢𑁆𑀯𑀸 𑀅𑀜𑁆𑀜𑀣𑀸 𑀧𑀯𑀢𑁆𑀢𑁂𑀦, 𑀯𑀺𑀭𑀽𑀧𑀁 𑀯𑀸 𑀧𑀭𑀺𑀡𑀢𑁂𑀦 𑀯𑀺𑀭𑀽𑀧𑀁 𑀧𑀭𑀺𑀯𑀢𑁆𑀢𑁂𑀦, 𑀬𑀣𑀸 𑀧𑀭𑀺𑀯𑀢𑁆𑀢𑀫𑀸𑀦𑀁 𑀯𑀺𑀭𑀽𑀧𑀁 𑀳𑁄𑀢𑀺 𑀏𑀯𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁭𑁧. 𑀬𑀲𑁆𑀫𑀸 𑀧𑀦𑁂𑀢𑀁 𑀭𑀸𑀕𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 ‘‘𑀯𑀺𑀧𑀭𑀺𑀡𑀢𑀦𑁆𑀢𑀺 𑀭𑀢𑁆𑀢𑀫𑁆𑀧𑀺 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦𑀲𑁆𑀲 𑀧𑀤𑀪𑀸𑀚𑀦𑀁 𑀯𑀢𑁆𑀯𑀸 𑀅𑀦𑁆𑀢𑁂 𑀇𑀥𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘 𑀭𑀢𑁆𑀢𑀁 𑀘𑀺𑀢𑁆𑀢𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀁 𑀯𑀺𑀧𑀭𑀺𑀡𑀢’’𑀦𑁆𑀢𑀺 𑀆𑀳.

𑀢𑀤𑀳𑀼𑀚𑀸𑀢𑀸𑀢𑀺 𑀢𑀁𑀤𑀺𑀯𑀲𑀁 𑀚𑀸𑀢𑀸 𑀚𑀸𑀢𑀫𑀢𑁆𑀢𑀸 𑀅𑀮𑁆𑀮𑀫𑀁𑀲𑀧𑁂𑀲𑀺𑀯𑀡𑁆𑀡𑀸, 𑀏𑀯𑀭𑀽𑀧𑀸𑀬𑀧𑀺 𑀳𑀺 𑀲𑀤𑁆𑀥𑀺𑀁 𑀓𑀸𑀬𑀲𑀁𑀲𑀕𑁆𑀕𑁂 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀫𑁂𑀣𑀼𑀦𑀯𑀻𑀢𑀺𑀓𑁆𑀓𑀫𑁂 𑀧𑀸𑀭𑀸𑀚𑀺𑀓𑀁, 𑀭𑀳𑁄 𑀦𑀺𑀲𑀚𑁆𑀚𑀲𑁆𑀲𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀳𑁄𑀢𑀺. 𑀧𑀕𑁂𑀯𑀸𑀢𑀺 𑀧𑀞𑀫𑀫𑁂𑀯.

𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸𑀢𑀺 𑀳𑀢𑁆𑀣𑀕𑁆𑀕𑀳𑀡𑀸𑀤𑀺𑀓𑀸𑀬𑀲𑀫𑁆𑀧𑀬𑁄𑀕𑀁 𑀓𑀸𑀬𑀫𑀺𑀲𑁆𑀲𑀻𑀪𑀸𑀯𑀁 𑀲𑀫𑀸𑀧𑀚𑁆𑀚𑁂𑀬𑁆𑀬, 𑀬𑀲𑁆𑀫𑀸 𑀧𑀦𑁂𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀬𑁄 𑀲𑁄 𑀓𑀸𑀬𑀲𑀁𑀲𑀕𑁆𑀕𑁄 𑀦𑀸𑀫 𑀲𑁄 𑀅𑀢𑁆𑀣𑀢𑁄 𑀅𑀚𑁆𑀛𑀸𑀘𑀸𑀭𑁄 𑀳𑁄𑀢𑀺, 𑀭𑀸𑀕𑀯𑀲𑁂𑀦 𑀅𑀪𑀺𑀪𑀯𑀺𑀢𑁆𑀯𑀸 𑀲𑀜𑁆𑀜𑀫𑀯𑁂𑀮𑀁 𑀆𑀘𑀸𑀭𑁄, 𑀢𑀲𑁆𑀫𑀸𑀲𑁆𑀲 𑀲𑀗𑁆𑀔𑁂𑀧𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀚𑁆𑀛𑀸𑀘𑀸𑀭𑁄 𑀯𑀼𑀘𑁆𑀘𑀢𑀻’’𑀢𑀺 𑀧𑀤𑀪𑀸𑀚𑀦𑀫𑀸𑀳.

𑀳𑀢𑁆𑀣𑀕𑁆𑀕𑀸𑀳𑀁 𑀯𑀸𑀢𑀺𑀆𑀤𑀺𑀪𑁂𑀤𑀁 𑀧𑀦𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀤𑀲𑁆𑀲𑀦𑀁. 𑀢𑀢𑁆𑀣 𑀳𑀢𑁆𑀣𑀸𑀤𑀻𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 ‘‘𑀳𑀢𑁆𑀣𑁄 𑀦𑀸𑀫 𑀓𑀧𑁆𑀧𑀭𑀁 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀺𑀫𑀸𑀳 𑀢𑀢𑁆𑀣 𑀓𑀧𑁆𑀧𑀭𑀁 𑀉𑀧𑀸𑀤𑀸𑀬𑀸𑀢𑀺 𑀤𑀼𑀢𑀺𑀬𑀁. 𑀫𑀳𑀸𑀲𑀦𑁆𑀥𑀺𑀁 𑀉𑀧𑀸𑀤𑀸𑀬. 𑀅𑀜𑁆𑀜𑀢𑁆𑀣 𑀧𑀦 𑀫𑀡𑀺𑀩𑀦𑁆𑀥𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀦𑀔𑀸 𑀳𑀢𑁆𑀣𑁄 𑀇𑀥 𑀲𑀤𑁆𑀥𑀺𑀁 𑀅𑀕𑁆𑀕𑀩𑀸𑀳𑀸𑀬 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀅𑀥𑀺𑀧𑁆𑀧𑁂𑀢𑁄.

𑀲𑀼𑀤𑁆𑀥𑀓𑁂𑀲𑀸 𑀯𑀸𑀢𑀺 𑀲𑀼𑀢𑁆𑀢𑀸𑀤𑀻𑀳𑀺 𑀅𑀫𑀺𑀲𑁆𑀲𑀸 𑀲𑀼𑀤𑁆𑀥𑀸 𑀓𑁂𑀲𑀸𑀬𑁂𑀯. 𑀯𑁂𑀡𑀻𑀢𑀺 𑀢𑀻𑀳𑀺 𑀓𑁂𑀲𑀯𑀝𑁆𑀝𑀻𑀳𑀺 𑀯𑀺𑀦𑀦𑁆𑀥𑀺𑀢𑁆𑀯𑀸 𑀓𑀢𑀓𑁂𑀲𑀓𑀮𑀸𑀧𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀼𑀢𑁆𑀢𑀫𑀺𑀲𑁆𑀲𑀸𑀢𑀺 𑀧𑀜𑁆𑀘𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦 𑀓𑁂𑀲𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀸. 𑀫𑀸𑀮𑀸𑀫𑀺𑀲𑁆𑀲𑀸𑀢𑀺 𑀯𑀲𑁆𑀲𑀺𑀓𑀧𑀼𑀧𑁆𑀨𑀸𑀤𑀻𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀢𑀻𑀳𑀺 𑀓𑁂𑀲𑀯𑀝𑁆𑀝𑀻𑀳𑀺 𑀯𑀺𑀦𑀦𑁆𑀥𑀺𑀢𑁆𑀯𑀸 𑀓𑀢𑀸, 𑀅𑀯𑀺𑀦𑀤𑁆𑀥𑁄𑀧𑀺 𑀯𑀸 𑀓𑁂𑀯𑀮𑀁 𑀧𑀼𑀧𑁆𑀨𑀫𑀺𑀲𑁆𑀲𑀓𑁄 𑀓𑁂𑀲𑀓𑀮𑀸𑀧𑁄 𑀇𑀥 ‘‘𑀯𑁂𑀡𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀳𑀺𑀭𑀜𑁆𑀜𑀫𑀺𑀲𑁆𑀲𑀸𑀢𑀺 𑀓𑀳𑀸𑀧𑀡𑀫𑀸𑀮𑀸𑀬 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀸. 𑀲𑀼𑀯𑀡𑁆𑀡𑀫𑀺𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑀘𑀻𑀭𑀓𑁂𑀳𑀺 𑀯𑀸 𑀧𑀸𑀫𑀗𑁆𑀕𑀸𑀤𑀻𑀳𑀺 𑀯𑀸 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀸. 𑀫𑀼𑀢𑁆𑀢𑀸𑀫𑀺𑀲𑁆𑀲𑀸𑀢𑀺 𑀫𑀼𑀢𑁆𑀢𑀸𑀯𑀮𑀻𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀸. 𑀫𑀡𑀺𑀫𑀺𑀲𑁆𑀲𑀸𑀢𑀺 𑀲𑀼𑀢𑁆𑀢𑀸𑀭𑀽𑀴𑁆𑀳𑁂𑀳𑀺 𑀫𑀡𑀻𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀸. 𑀏𑀢𑀸𑀲𑀼 𑀳𑀺 𑀬𑀁𑀓𑀺𑀜𑁆𑀘𑀺 𑀯𑁂𑀡𑀺𑀁 𑀕𑀡𑁆𑀳𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄𑀬𑁂𑀯. ‘‘𑀅𑀳𑀁 𑀫𑀺𑀲𑁆𑀲𑀓𑀯𑁂𑀡𑀺𑀁 𑀅𑀕𑁆𑀕𑀳𑁂𑀲𑀺’’𑀦𑁆𑀢𑀺 𑀯𑀤𑀦𑁆𑀢𑀲𑁆𑀲 𑀫𑁄𑀓𑁆𑀔𑁄 𑀦𑀢𑁆𑀣𑀺. 𑀯𑁂𑀡𑀺𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀓𑁂𑀲𑀸𑀧𑀺 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀬𑁄 𑀏𑀓𑀫𑁆𑀧𑀺 𑀓𑁂𑀲𑀁 𑀕𑀡𑁆𑀳𑀸𑀢𑀺 𑀢𑀲𑁆𑀲𑀧𑀺 𑀆𑀧𑀢𑁆𑀢𑀺𑀬𑁂𑀯.

𑀳𑀢𑁆𑀣𑀜𑁆𑀘 𑀯𑁂𑀡𑀺𑀜𑁆𑀘 𑀞𑀧𑁂𑀢𑁆𑀯𑀸𑀢𑀺 𑀇𑀥 𑀯𑀼𑀢𑁆𑀢𑀮𑀓𑁆𑀔𑀡𑀁 𑀳𑀢𑁆𑀣𑀜𑁆𑀘 𑀲𑀩𑁆𑀩𑀧𑁆𑀧𑀓𑀸𑀭𑀜𑁆𑀘 𑀯𑁂𑀡𑀺𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀲𑀭𑀻𑀭𑀁 ‘‘𑀅𑀗𑁆𑀕’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀳𑀢𑁆𑀣𑀸𑀤𑀻𑀲𑀼 𑀳𑀢𑁆𑀣𑀲𑁆𑀲 𑀕𑀳𑀡𑀁 𑀳𑀢𑁆𑀣𑀕𑁆𑀕𑀸𑀳𑁄, 𑀯𑁂𑀡𑀺𑀬𑀸 𑀕𑀳𑀡𑀁 𑀯𑁂𑀡𑀺𑀕𑁆𑀕𑀸𑀳𑁄, 𑀅𑀯𑀲𑁂𑀲𑀲𑀲𑀭𑀻𑀭𑀲𑁆𑀲 𑀧𑀭𑀸𑀫𑀲𑀦𑀁 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀗𑁆𑀕𑀲𑁆𑀲 𑀧𑀭𑀸𑀫𑀲𑀦𑀁, 𑀬𑁄 𑀢𑀁 𑀳𑀢𑁆𑀣𑀕𑁆𑀕𑀸𑀳𑀁 𑀯𑀸 𑀯𑁂𑀡𑀺𑀕𑁆𑀕𑀸𑀳𑀁 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀗𑁆𑀕𑀲𑁆𑀲 𑀧𑀭𑀸𑀫𑀲𑀦𑀁 𑀲𑀫𑀸𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦𑀸𑀫 𑀆𑀧𑀢𑁆𑀢𑀺𑀦𑀺𑀓𑀸𑀬𑁄 𑀳𑁄𑀢𑀻𑀢𑀺. 𑀅𑀬𑀁 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀢𑁆𑀣𑁄.

𑁨𑁭𑁨. 𑀬𑀲𑁆𑀫𑀸 𑀧𑀦 𑀬𑁄 𑀘 𑀳𑀢𑁆𑀣𑀕𑁆𑀕𑀸𑀳𑁄 𑀬𑁄 𑀘 𑀯𑁂𑀡𑀺𑀕𑁆𑀕𑀸𑀳𑁄 𑀬𑀜𑁆𑀘 𑀅𑀯𑀲𑁂𑀲𑀲𑁆𑀲 𑀅𑀗𑁆𑀕𑀲𑁆𑀲 𑀧𑀭𑀸𑀫𑀲𑀦𑀁 𑀢𑀁 𑀲𑀩𑁆𑀩𑀫𑁆𑀧𑀺 𑀪𑁂𑀤𑀢𑁄 𑀤𑁆𑀯𑀸𑀤𑀲𑀯𑀺𑀥𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀫𑀲𑀦𑀸 𑀧𑀭𑀸𑀫𑀲𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀆𑀫𑀲𑀦𑀸 𑀦𑀸𑀫 𑀆𑀫𑀝𑁆𑀞𑀫𑀢𑁆𑀢𑀸’’𑀢𑀺 𑀬𑀜𑁆𑀘 ‘‘𑀙𑀼𑀧𑀦𑀁 𑀦𑀸𑀫 𑀨𑀼𑀝𑁆𑀞𑀫𑀢𑁆𑀢’’𑀦𑁆𑀢𑀺, 𑀇𑀫𑁂𑀲𑀁 𑀅𑀬𑀁 𑀯𑀺𑀲𑁂𑀲𑁄 𑁋 𑀆𑀫𑀲𑀦𑀸𑀢𑀺 𑀆𑀫𑀚𑁆𑀚𑀦𑀸 𑀨𑀼𑀝𑁆𑀞𑁄𑀓𑀸𑀲𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀢𑀢𑁆𑀣𑁂𑀯 𑀲𑀗𑁆𑀖𑀝𑁆𑀝𑀦𑀸. 𑀅𑀬𑀜𑁆𑀳𑀺 ‘‘𑀆𑀫𑀝𑁆𑀞𑀫𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀙𑀼𑀧𑀦𑀦𑁆𑀢𑀺 𑀅𑀲𑀗𑁆𑀖𑀝𑁆𑀝𑁂𑀢𑁆𑀯𑀸 𑀨𑀼𑀝𑁆𑀞𑀫𑀢𑁆𑀢𑀁.

𑀬𑀫𑁆𑀧𑀺 𑀉𑀫𑁆𑀫𑀲𑀦𑀸𑀬 𑀘 𑀉𑀮𑁆𑀮𑀗𑁆𑀖𑀦𑀸𑀬 𑀘 𑀦𑀺𑀤𑁆𑀤𑁂𑀲𑁂 ‘‘𑀉𑀤𑁆𑀥𑀁 𑀉𑀘𑁆𑀘𑀸𑀭𑀡𑀸’’𑀢𑀺 𑀏𑀓𑀫𑁂𑀯 𑀧𑀤𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀧𑀺 𑀅𑀬𑀁 𑀯𑀺𑀲𑁂𑀲𑁄 𑁋 𑀧𑀞𑀫𑀁 𑀅𑀢𑁆𑀢𑀦𑁄 𑀓𑀸𑀬𑀲𑁆𑀲 𑀇𑀢𑁆𑀣𑀺𑀬𑀸 𑀓𑀸𑀬𑁂 𑀉𑀤𑁆𑀥𑀁 𑀧𑁂𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀤𑀼𑀢𑀺𑀬𑀁 𑀇𑀢𑁆𑀣𑀺𑀬𑀸 𑀓𑀸𑀬𑀁 𑀉𑀓𑁆𑀔𑀺𑀧𑀦𑀯𑀲𑁂𑀦, 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁨𑁭𑁩. 𑀇𑀤𑀸𑀦𑀺 𑀬𑁆𑀯𑀸𑀬𑀁 𑀑𑀢𑀺𑀡𑁆𑀡𑁄 𑀯𑀺𑀧𑀭𑀺𑀡𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀲𑁆𑀲 𑀏𑀢𑁂𑀲𑀁 𑀧𑀤𑀸𑀦𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀓𑀸𑀬𑁂𑀦 𑀓𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀓𑀸𑀬𑁂𑀦 𑀓𑀸𑀬𑀦𑁆𑀢𑀺 𑀲𑁄 𑀲𑀸𑀭𑀢𑁆𑀢𑁄 𑀘 𑀇𑀢𑁆𑀣𑀺𑀲𑀜𑁆𑀜𑀻 𑀘 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀓𑀸𑀬𑁂𑀦. 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀣 𑀯𑀸 𑀏𑀢𑀁 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀳𑀢𑁆𑀣𑀸𑀤𑀺𑀪𑁂𑀤𑀁 𑀓𑀸𑀬𑀁. 𑀆𑀫𑀲𑀢𑀺 𑀧𑀭𑀸𑀫𑀲𑀢𑀻𑀢𑀺 𑀏𑀢𑁂𑀲𑀼 𑀘𑁂 𑀏𑀓𑁂𑀦𑀸𑀧𑀺 𑀆𑀓𑀸𑀭𑁂𑀦 𑀅𑀚𑁆𑀛𑀸𑀘𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀢𑀢𑁆𑀣 𑀲𑀓𑀺𑀁 𑀆𑀫𑀲𑀢𑁄 𑀏𑀓𑀸 𑀆𑀧𑀢𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀆𑀫𑀲𑀢𑁄 𑀧𑀬𑁄𑀕𑁂 𑀧𑀬𑁄𑀕𑁂 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀧𑀭𑀸𑀫𑀲𑀦𑁆𑀢𑁄𑀧𑀺 𑀲𑀘𑁂 𑀓𑀸𑀬𑀢𑁄 𑀅𑀫𑁄𑀘𑁂𑀢𑁆𑀯𑀸𑀯 𑀇𑀢𑁄 𑀘𑀺𑀢𑁄 𑀘 𑀅𑀢𑁆𑀢𑀦𑁄 𑀳𑀢𑁆𑀣𑀁 𑀯𑀸 𑀓𑀸𑀬𑀁 𑀯𑀸 𑀲𑀜𑁆𑀘𑁄𑀧𑁂𑀢𑀺 𑀳𑀭𑀢𑀺 𑀧𑁂𑀲𑁂𑀢𑀺 𑀤𑀺𑀯𑀲𑀫𑁆𑀧𑀺 𑀧𑀭𑀸𑀫𑀲𑀢𑁄 𑀏𑀓𑀸𑀯 𑀆𑀧𑀢𑁆𑀢𑀺. 𑀲𑀘𑁂 𑀓𑀸𑀬𑀢𑁄 𑀫𑁄𑀘𑁂𑀢𑁆𑀯𑀸 𑀫𑁄𑀘𑁂𑀢𑁆𑀯𑀸 𑀧𑀭𑀸𑀫𑀲𑀢𑀺 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺.

𑀑𑀫𑀲𑀦𑁆𑀢𑁄𑀧𑀺 𑀲𑀘𑁂 𑀓𑀸𑀬𑀢𑁄 𑀅𑀫𑁄𑀘𑁂𑀢𑁆𑀯𑀸𑀯 𑀇𑀢𑁆𑀣𑀺𑀬𑀸 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀸𑀤𑀧𑀺𑀝𑁆𑀞𑀺𑀁 𑀑𑀫𑀲𑀢𑀺 𑀏𑀓𑀸𑀯 𑀆𑀧𑀢𑁆𑀢𑀺. 𑀲𑀘𑁂 𑀧𑀦 𑀉𑀤𑀭𑀸𑀤𑀻𑀲𑀼 𑀢𑀁 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀑𑀫𑀲𑀢𑀺 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺. 𑀉𑀫𑁆𑀫𑀲𑀦𑀸𑀬𑀧𑀺 𑀧𑀸𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀻𑀲𑀁 𑀉𑀫𑁆𑀫𑀲𑀦𑁆𑀢𑀲𑁆𑀲 𑀏𑀲𑁂𑀯 𑀦𑀬𑁄.

𑀑𑀮𑀗𑁆𑀖𑀦𑀸𑀬 𑀫𑀸𑀢𑀼𑀕𑀸𑀫𑀁 𑀓𑁂𑀲𑁂𑀲𑀼 𑀕𑀳𑁂𑀢𑁆𑀯𑀸 𑀦𑀸𑀫𑁂𑀢𑁆𑀯𑀸 𑀘𑀼𑀫𑁆𑀩𑀦𑀸𑀤𑀻𑀲𑀼 𑀬𑀁 𑀅𑀚𑁆𑀛𑀸𑀘𑀸𑀭𑀁 𑀇𑀘𑁆𑀙𑀢𑀺 𑀢𑀁 𑀓𑀢𑁆𑀯𑀸 𑀫𑀼𑀜𑁆𑀘𑀢𑁄 𑀏𑀓𑀸𑀯 𑀆𑀧𑀢𑁆𑀢𑀺. 𑀉𑀝𑁆𑀞𑀺𑀢𑀁 𑀧𑀼𑀦𑀧𑁆𑀧𑀼𑀦𑀁 𑀦𑀸𑀫𑀬𑀢𑁄 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺. 𑀉𑀮𑁆𑀮𑀗𑁆𑀖𑀦𑀸𑀬𑀧𑀺 𑀓𑁂𑀲𑁂𑀲𑀼 𑀯𑀸 𑀳𑀢𑁆𑀣𑁂𑀲𑀼 𑀯𑀸 𑀕𑀳𑁂𑀢𑁆𑀯𑀸 𑀯𑀼𑀝𑁆𑀞𑀸𑀧𑀬𑀢𑁄 𑀏𑀲𑁂𑀯 𑀦𑀬𑁄.

𑀆𑀓𑀟𑁆𑀠𑀦𑀸𑀬 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀁 𑀆𑀓𑀟𑁆𑀠𑀦𑁆𑀢𑁄 𑀬𑀸𑀯 𑀦 𑀫𑀼𑀜𑁆𑀘𑀢𑀺 𑀢𑀸𑀯 𑀏𑀓𑀸𑀯 𑀆𑀧𑀢𑁆𑀢𑀺. 𑀫𑀼𑀜𑁆𑀘𑀺𑀢𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺. 𑀧𑀢𑀺𑀓𑀟𑁆𑀠𑀦𑀸𑀬𑀧𑀺 𑀧𑀭𑀫𑁆𑀫𑀼𑀔𑀁 𑀧𑀺𑀝𑁆𑀞𑀺𑀬𑀁 𑀕𑀳𑁂𑀢𑁆𑀯𑀸 𑀧𑀝𑀺𑀧𑁆𑀧𑀡𑀸𑀫𑀬𑀢𑁄 𑀏𑀲𑁂𑀯 𑀦𑀬𑁄.

𑀅𑀪𑀺𑀦𑀺𑀕𑁆𑀕𑀡𑁆𑀳𑀦𑀸𑀬 𑀳𑀢𑁆𑀣𑁂 𑀯𑀸 𑀩𑀸𑀳𑀸𑀬 𑀯𑀸 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀫𑁆𑀧𑀺 𑀕𑀘𑁆𑀙𑀢𑁄 𑀏𑀓𑀸𑀯 𑀆𑀧𑀢𑁆𑀢𑀺. 𑀫𑀼𑀜𑁆𑀘𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀕𑀡𑁆𑀳𑀢𑁄 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺. 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀨𑀼𑀲𑀢𑁄 𑀘 𑀆𑀮𑀺𑀗𑁆𑀕𑀢𑁄 𑀘 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀻𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀫𑀽𑀮𑀕𑁆𑀕𑀳𑀡𑀫𑁂𑀯 𑀧𑀫𑀸𑀡𑀁, 𑀢𑀲𑁆𑀫𑀸 𑀬𑀸𑀯 𑀦 𑀫𑀼𑀜𑁆𑀘𑀢𑀺 𑀢𑀸𑀯 𑀏𑀓𑀸 𑀏𑀯 𑀆𑀧𑀢𑁆𑀢𑀻’’𑀢𑀺.

𑀅𑀪𑀺𑀦𑀺𑀧𑁆𑀧𑀻𑀴𑀦𑀸𑀬 𑀯𑀢𑁆𑀣𑁂𑀦 𑀯𑀸 𑀆𑀪𑀭𑀡𑁂𑀦 𑀯𑀸 𑀲𑀤𑁆𑀥𑀺𑀁 𑀧𑀻𑀴𑀬𑀢𑁄 𑀅𑀗𑁆𑀕𑀁 𑀅𑀨𑀼𑀲𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀨𑀼𑀲𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀏𑀓𑀧𑀬𑁄𑀕𑁂𑀦 𑀏𑀓𑀸 𑀆𑀧𑀢𑁆𑀢𑀺, 𑀦𑀸𑀦𑀸𑀧𑀬𑁄𑀕𑁂𑀦 𑀦𑀸𑀦𑀸.

𑀕𑀳𑀡𑀙𑀼𑀧𑀦𑁂𑀲𑀼 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀯𑀺𑀓𑀸𑀭𑀁 𑀅𑀓𑀭𑁄𑀦𑁆𑀢𑁄𑀧𑀺 𑀕𑀳𑀺𑀢𑀫𑀢𑁆𑀢𑀨𑀼𑀝𑁆𑀞𑀫𑀢𑁆𑀢𑁂𑀦𑀸𑀧𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺.

𑀏𑀯𑀫𑁂𑀢𑁂𑀲𑀼 𑀆𑀫𑀲𑀦𑀸𑀤𑀻𑀲𑀼 𑀏𑀓𑁂𑀦𑀸𑀧𑀺 𑀆𑀓𑀸𑀭𑁂𑀦 𑀅𑀚𑁆𑀛𑀸𑀘𑀸𑀭𑀢𑁄 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀯𑁂𑀫𑀢𑀺𑀓𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀡𑁆𑀟𑀓𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀲𑀜𑁆𑀜𑀺𑀲𑁆𑀲𑀸𑀧𑀺 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀧𑀡𑁆𑀟𑀓𑁂 𑀧𑀡𑁆𑀟𑀓𑀲𑀜𑁆𑀜𑀺𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀯𑁂𑀫𑀢𑀺𑀓𑀲𑁆𑀲 𑀤𑀼𑀓𑁆𑀓𑀝𑀁. 𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀇𑀢𑁆𑀣𑀺𑀲𑀜𑁆𑀜𑀺𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀧𑀼𑀭𑀺𑀲𑁂 𑀧𑀼𑀭𑀺𑀲𑀲𑀜𑁆𑀜𑀺𑀲𑁆𑀲𑀸𑀧𑀺 𑀯𑁂𑀫𑀢𑀺𑀓𑀲𑁆𑀲𑀸𑀧𑀺 𑀇𑀢𑁆𑀣𑀺𑀧𑀡𑁆𑀟𑀓𑀢𑀺𑀭𑀘𑁆𑀙𑀸𑀦𑀕𑀢𑀲𑀜𑁆𑀜𑀺𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀢𑀺𑀭𑀘𑁆𑀙𑀸𑀦𑀕𑀢𑁂𑀧𑀺 𑀲𑀩𑁆𑀩𑀸𑀓𑀸𑀭𑁂𑀦 𑀤𑀼𑀓𑁆𑀓𑀝𑀫𑁂𑀯𑀸𑀢𑀺. 𑀇𑀫𑀸 𑀏𑀓𑀫𑀽𑀮𑀓𑀦𑀬𑁂 𑀯𑀼𑀢𑁆𑀢𑀸 𑀆𑀧𑀢𑁆𑀢𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀇𑀫𑀺𑀦𑀸𑀯 𑀉𑀧𑀸𑀬𑁂𑀦 ‘‘𑀤𑁆𑀯𑁂 𑀇𑀢𑁆𑀣𑀺𑀬𑁄 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀻𑀦’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀯𑀼𑀢𑁆𑀢𑁂 𑀤𑀼𑀫𑀽𑀮𑀓𑀦𑀬𑁂𑀧𑀺 𑀤𑀺𑀕𑀼𑀡𑀸 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀤𑁆𑀯𑀻𑀲𑀼 𑀇𑀢𑁆𑀣𑀻𑀲𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸; 𑀏𑀯𑀁 𑀲𑀫𑁆𑀩𑀳𑀼𑀮𑀸𑀲𑀼 𑀲𑀫𑁆𑀩𑀳𑀼𑀮𑀸 𑀯𑁂𑀤𑀺𑀢𑀩𑁆𑀩𑀸.

𑀬𑁄 𑀳𑀺 𑀏𑀓𑀢𑁄 𑀞𑀺𑀢𑀸 𑀲𑀫𑁆𑀩𑀳𑀼𑀮𑀸 𑀇𑀢𑁆𑀣𑀺𑀬𑁄 𑀩𑀸𑀳𑀸𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀸𑀢𑀺 𑀲𑁄 𑀬𑀢𑁆𑀢𑀓𑀸 𑀇𑀢𑁆𑀣𑀺𑀬𑁄 𑀨𑀼𑀝𑁆𑀞𑀸 𑀢𑀸𑀲𑀁 𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁂 𑀆𑀧𑀚𑁆𑀚𑀢𑀺, 𑀫𑀚𑁆𑀛𑀕𑀢𑀸𑀦𑀁 𑀕𑀡𑀦𑀸𑀬 𑀣𑀼𑀮𑁆𑀮𑀘𑁆𑀘𑀬𑁂. 𑀢𑀸 𑀳𑀺 𑀢𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀆𑀫𑀝𑁆𑀞𑀸 𑀳𑁄𑀦𑁆𑀢𑀺. 𑀬𑁄 𑀧𑀦 𑀲𑀫𑁆𑀩𑀳𑀼𑀮𑀸𑀦𑀁 𑀅𑀗𑁆𑀕𑀼𑀮𑀺𑀬𑁄 𑀯𑀸 𑀓𑁂𑀲𑁂 𑀯𑀸 𑀏𑀓𑀢𑁄 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀲𑁄 𑀅𑀗𑁆𑀕𑀼𑀮𑀺𑀬𑁄 𑀘 𑀓𑁂𑀲𑁂 𑀘 𑀅𑀕𑀡𑁂𑀢𑁆𑀯𑀸 𑀇𑀢𑁆𑀣𑀺𑀬𑁄 𑀕𑀡𑁂𑀢𑁆𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁂𑀳𑀺 𑀓𑀸𑀭𑁂𑀢𑀩𑁆𑀩𑁄. 𑀬𑀸𑀲𑀜𑁆𑀘 𑀇𑀢𑁆𑀣𑀻𑀦𑀁 𑀅𑀗𑁆𑀕𑀼𑀮𑀺𑀬𑁄 𑀯𑀸 𑀓𑁂𑀲𑀸 𑀯𑀸 𑀫𑀚𑁆𑀛𑀕𑀢𑀸 𑀳𑁄𑀦𑁆𑀢𑀺, 𑀢𑀸𑀲𑀁 𑀕𑀡𑀦𑀸𑀬 𑀣𑀼𑀮𑁆𑀮𑀘𑁆𑀘𑀬𑁂 𑀆𑀧𑀚𑁆𑀚𑀢𑀺. 𑀢𑀸 𑀳𑀺 𑀢𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀆𑀫𑀝𑁆𑀞𑀸 𑀳𑁄𑀦𑁆𑀢𑀺, 𑀲𑀫𑁆𑀩𑀳𑀼𑀮𑀸 𑀧𑀦 𑀇𑀢𑁆𑀣𑀺𑀬𑁄 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀳𑀺 𑀭𑀚𑁆𑀚𑀼𑀯𑀢𑁆𑀣𑀸𑀤𑀻𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀲𑀩𑁆𑀩𑀸𑀲𑀁𑀬𑁂𑀯 𑀅𑀦𑁆𑀢𑁄𑀧𑀭𑀺𑀓𑁆𑀔𑁂𑀧𑀕𑀢𑀸𑀦𑀁 𑀕𑀡𑀦𑀸𑀬 𑀣𑀼𑀮𑁆𑀮𑀘𑁆𑀘𑀬𑁂 𑀆𑀧𑀚𑁆𑀚𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀅𑀨𑀼𑀝𑁆𑀞𑀸𑀲𑀼 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀸 𑀧𑀸𑀴𑀺𑀬𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀧𑁆𑀧𑀝𑀺𑀩𑀤𑁆𑀥𑁂𑀦 𑀆𑀫𑀲𑀦𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑀫𑁆𑀧𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀧𑁆𑀧𑀝𑀺𑀩𑀤𑁆𑀥𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀫𑀳𑀸𑀅𑀝𑁆𑀞𑀓𑀣𑀸𑀬𑀜𑁆𑀘 𑀓𑀼𑀭𑀼𑀦𑁆𑀤𑀺𑀬𑀜𑁆𑀘 𑀯𑀼𑀢𑁆𑀢𑁄 𑀧𑀼𑀭𑀺𑀫𑀦𑀬𑁄𑀬𑁂𑀯𑁂𑀢𑁆𑀣 𑀬𑀼𑀢𑁆𑀢𑀢𑀭𑁄 𑀤𑀺𑀲𑁆𑀲𑀢𑀺.

𑀬𑁄 𑀳𑀺 𑀳𑀢𑁆𑀣𑁂𑀦 𑀳𑀢𑁆𑀣𑀁 𑀕𑀳𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑀸𑀲𑀼 𑀇𑀢𑁆𑀣𑀻𑀲𑀼 𑀲𑀫𑀲𑀸𑀭𑀸𑀕𑁄 𑀏𑀓𑀁 𑀳𑀢𑁆𑀣𑁂 𑀕𑀡𑁆𑀳𑀸𑀢𑀺, 𑀲𑁄 𑀕𑀳𑀺𑀢𑀺𑀢𑁆𑀣𑀺𑀬𑀸 𑀯𑀲𑁂𑀦 𑀏𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺, 𑀇𑀢𑀭𑀸𑀲𑀁 𑀕𑀡𑀦𑀸𑀬 𑀧𑀼𑀭𑀺𑀫𑀦𑀬𑁂𑀦𑁂𑀯 𑀣𑀼𑀮𑁆𑀮𑀘𑁆𑀘𑀬𑁂. 𑀲𑀘𑁂 𑀲𑁄 𑀢𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂 𑀯𑀢𑁆𑀣𑁂 𑀯𑀸 𑀧𑀼𑀧𑁆𑀨𑁂 𑀯𑀸 𑀕𑀡𑁆𑀳𑀸𑀢𑀺, 𑀲𑀩𑁆𑀩𑀸𑀲𑀁 𑀕𑀡𑀦𑀸𑀬 𑀣𑀼𑀮𑁆𑀮𑀘𑁆𑀘𑀬𑁂 𑀆𑀧𑀚𑁆𑀚𑀢𑀺. 𑀬𑀣𑁂𑀯 𑀳𑀺 𑀭𑀚𑁆𑀚𑀼𑀯𑀢𑁆𑀣𑀸𑀤𑀻𑀳𑀺 𑀧𑀭𑀺𑀓𑁆𑀔𑀺𑀧𑀦𑁆𑀢𑁂𑀦 𑀲𑀩𑁆𑀩𑀸𑀧𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀆𑀫𑀝𑁆𑀞𑀸 𑀳𑁄𑀦𑁆𑀢𑀺, 𑀢𑀣𑀸 𑀇𑀥𑀸𑀧𑀺 𑀲𑀩𑁆𑀩𑀸𑀧𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀆𑀫𑀝𑁆𑀞𑀸 𑀳𑁄𑀦𑁆𑀢𑀺. 𑀲𑀘𑁂 𑀧𑀦 𑀢𑀸 𑀇𑀢𑁆𑀣𑀺𑀬𑁄 𑀅𑀜𑁆𑀜𑀫𑀜𑁆𑀜𑀁 𑀯𑀢𑁆𑀣𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸 𑀳𑁄𑀦𑁆𑀢𑀺, 𑀢𑀢𑁆𑀭 𑀘𑁂𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀞𑀫𑀁 𑀇𑀢𑁆𑀣𑀺𑀁 𑀳𑀢𑁆𑀣𑁂 𑀕𑀡𑁆𑀳𑀸𑀢𑀺 𑀕𑀳𑀺𑀢𑀸𑀬 𑀯𑀲𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺, 𑀇𑀢𑀭𑀸𑀲𑀁 𑀕𑀡𑀦𑀸𑀬 𑀤𑀼𑀓𑁆𑀓𑀝𑀸𑀦𑀺. 𑀲𑀩𑁆𑀩𑀸𑀲𑀜𑁆𑀳𑀺 𑀢𑀸𑀲𑀁 𑀢𑁂𑀦 𑀧𑀼𑀭𑀺𑀫𑀦𑀬𑁂𑀦𑁂𑀯 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀆𑀫𑀝𑁆𑀞𑀁 𑀳𑁄𑀢𑀺. 𑀲𑀘𑁂 𑀧𑀦 𑀲𑁄𑀧𑀺 𑀢𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀬𑁂𑀯 𑀕𑀡𑁆𑀳𑀸𑀢𑀺 𑀢𑀲𑁆𑀲𑀸 𑀯𑀲𑁂𑀦 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀢𑀺, 𑀇𑀢𑀭𑀸𑀲𑀁 𑀕𑀡𑀦𑀸𑀬 𑀅𑀦𑀦𑁆𑀢𑀭𑀦𑀬𑁂𑀦𑁂𑀯 𑀤𑀼𑀓𑁆𑀓𑀝𑀸𑀦𑀺.

𑀬𑁄 𑀧𑀦 𑀖𑀦𑀯𑀢𑁆𑀣𑀦𑀺𑀯𑀢𑁆𑀣𑀁 𑀇𑀢𑁆𑀣𑀺𑀁 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀯𑀢𑁆𑀣𑁂 𑀖𑀝𑁆𑀝𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀯𑀺𑀭𑀴𑀯𑀢𑁆𑀣𑀦𑀺𑀯𑀢𑁆𑀣𑀁 𑀖𑀝𑁆𑀝𑁂𑀢𑀺, 𑀢𑀢𑁆𑀭 𑀘𑁂 𑀯𑀢𑁆𑀣𑀦𑁆𑀢𑀭𑁂𑀳𑀺 𑀇𑀢𑁆𑀣𑀺𑀬𑀸 𑀯𑀸 𑀦𑀺𑀓𑁆𑀔𑀦𑁆𑀢𑀮𑁄𑀫𑀸𑀦𑀺 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀼𑀦𑁄 𑀯𑀸 𑀧𑀯𑀺𑀝𑁆𑀞𑀮𑁄𑀫𑀸𑀦𑀺 𑀇𑀢𑁆𑀣𑀺𑀁 𑀨𑀼𑀲𑀦𑁆𑀢𑀺, 𑀉𑀪𑀺𑀦𑁆𑀦𑀁 𑀮𑁄𑀫𑀸𑀦𑀺𑀬𑁂𑀯 𑀯𑀸 𑀮𑁄𑀫𑀸𑀦𑀺 𑀨𑀼𑀲𑀦𑁆𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀉𑀧𑀸𑀤𑀺𑀦𑁆𑀦𑀓𑁂𑀦 𑀳𑀺 𑀓𑀫𑁆𑀫𑀚𑀭𑀽𑀧𑁂𑀦 𑀉𑀧𑀸𑀤𑀺𑀦𑁆𑀦𑀓𑀁 𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀦𑀧𑀺 𑀓𑁂𑀦𑀘𑀺 𑀓𑁂𑀲𑀸𑀤𑀺𑀦𑀸 𑀉𑀧𑀸𑀤𑀺𑀦𑁆𑀦𑀓𑀁 𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀯𑀸 𑀨𑀼𑀲𑀦𑁆𑀢𑁄𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺𑀬𑁂𑀯.

𑀢𑀢𑁆𑀣 𑀓𑀼𑀭𑀼𑀦𑁆𑀤𑀺𑀬𑀁 ‘‘𑀮𑁄𑀫𑀸𑀦𑀺 𑀕𑀡𑁂𑀢𑁆𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀮𑁄𑀫𑀸𑀦𑀺 𑀕𑀡𑁂𑀢𑁆𑀯𑀸 𑀆𑀧𑀢𑁆𑀢𑀺𑀬𑀸 𑀦 𑀓𑀸𑀭𑁂𑀢𑀩𑁆𑀩𑁄, 𑀏𑀓𑀫𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺. 𑀲𑀗𑁆𑀖𑀺𑀓𑀫𑀜𑁆𑀘𑁂 𑀧𑀦 𑀅𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀮𑁄𑀫𑀸𑀦𑀺 𑀕𑀡𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁, 𑀢𑀤𑁂𑀯 𑀬𑀼𑀢𑁆𑀢𑀁. 𑀇𑀢𑁆𑀣𑀺𑀯𑀲𑁂𑀦 𑀳𑀺 𑀅𑀬𑀁 𑀆𑀧𑀢𑁆𑀢𑀺, 𑀦 𑀓𑁄𑀝𑁆𑀞𑀸𑀲𑀯𑀲𑁂𑀦𑀸𑀢𑀺.

𑀏𑀢𑁆𑀣𑀸𑀳 ‘‘𑀬𑁄 𑀧𑀦 ‘𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀓𑀸𑀬𑀁 𑀕𑀡𑁆𑀳𑀸𑀢𑀺, ‘𑀓𑀸𑀬𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀸𑀢𑀺, 𑀲𑁄 𑀓𑀺𑀁 𑀆𑀧𑀚𑁆𑀚𑀢𑀻’’𑀢𑀺. 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀢𑀸𑀯 ‘‘𑀬𑀣𑀸𑀯𑀢𑁆𑀣𑀼𑀓𑀫𑁂𑀯𑀸’’𑀢𑀺 𑀯𑀤𑀢𑀺. 𑀅𑀬𑀁 𑀓𑀺𑀭𑀲𑁆𑀲 𑀮𑀤𑁆𑀥𑀺 𑁋

‘‘𑀯𑀢𑁆𑀣𑀼 𑀲𑀜𑁆𑀜𑀸 𑀘 𑀭𑀸𑀕𑁄 𑀘, 𑀨𑀲𑁆𑀲𑀧𑁆𑀧𑀝𑀺𑀯𑀺𑀚𑀸𑀦𑀦𑀸;

𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀦𑀺𑀤𑁆𑀤𑁂𑀲𑁂, 𑀕𑀭𑀼𑀓𑀁 𑀢𑁂𑀦 𑀓𑀸𑀭𑀬𑁂’’𑀢𑀺.

𑀏𑀢𑁆𑀣 ‘‘𑀯𑀢𑁆𑀣𑀽’’𑀢𑀺 𑀇𑀢𑁆𑀣𑀻. ‘‘𑀲𑀜𑁆𑀜𑀸’’𑀢𑀺 𑀇𑀢𑁆𑀣𑀺𑀲𑀜𑁆𑀜𑀸. ‘‘𑀭𑀸𑀕𑁄’’𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄. ‘‘𑀨𑀲𑁆𑀲𑀧𑁆𑀧𑀝𑀺𑀯𑀺𑀚𑀸𑀦𑀦𑀸’’𑀢𑀺 𑀓𑀸𑀬𑀲𑀁𑀲𑀕𑁆𑀕𑀨𑀲𑁆𑀲𑀚𑀸𑀦𑀦𑀸. 𑀢𑀲𑁆𑀫𑀸 𑀬𑁄 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀻 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 ‘‘𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀧𑀯𑀢𑁆𑀢𑁄𑀧𑀺 𑀓𑀸𑀬𑀁 𑀨𑀼𑀲𑀢𑀺, 𑀕𑀭𑀼𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑀁𑀬𑁂𑀯 𑀆𑀧𑀚𑁆𑀚𑀢𑀺. 𑀇𑀢𑀭𑁄𑀧𑀺 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋

‘‘𑀲𑀜𑁆𑀜𑀸𑀬 𑀯𑀺𑀭𑀸𑀕𑀺𑀢𑀫𑁆𑀳𑀺, 𑀕𑀳𑀡𑁂 𑀘 𑀯𑀺𑀭𑀸𑀕𑀺𑀢𑁂;

𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀦𑀺𑀤𑁆𑀤𑁂𑀲𑁂, 𑀕𑀭𑀼𑀓𑀁 𑀢𑀢𑁆𑀣 𑀦 𑀤𑀺𑀲𑁆𑀲𑀢𑀻’’𑀢𑀺.

𑀅𑀲𑁆𑀲𑀸𑀧𑀸𑀬𑀁 𑀮𑀤𑁆𑀥𑀺 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁄 𑀯𑀼𑀢𑁆𑀢𑁄. 𑀇𑀫𑀺𑀦𑀸 𑀘 𑀇𑀢𑁆𑀣𑀺𑀲𑀜𑁆𑀜𑀸 𑀯𑀺𑀭𑀸𑀕𑀺𑀢𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀲𑀜𑁆𑀜𑀸 𑀉𑀧𑁆𑀧𑀸𑀤𑀺𑀢𑀸, 𑀢𑀁 𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀘 𑀕𑀳𑀡𑀫𑁆𑀧𑀺 𑀯𑀺𑀭𑀸𑀕𑀺𑀢𑀁 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀇𑀢𑁆𑀣𑀻 𑀕𑀳𑀺𑀢𑀸, 𑀢𑀲𑁆𑀫𑀸 𑀏𑀢𑁆𑀣 𑀇𑀢𑁆𑀣𑀺𑀲𑀜𑁆𑀜𑀸𑀬 𑀅𑀪𑀸𑀯𑀢𑁄 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦 𑀤𑀺𑀲𑁆𑀲𑀢𑀺, 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀲𑁆𑀲 𑀅𑀕𑁆𑀕𑀳𑀺𑀢𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀁 𑀦 𑀤𑀺𑀲𑁆𑀲𑀢𑀺, 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀨𑀼𑀝𑁆𑀞𑀢𑁆𑀢𑀸 𑀧𑀦 𑀤𑀼𑀓𑁆𑀓𑀝𑀁. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀳𑀺 𑀇𑀫𑀁 𑀦𑀸𑀫 𑀯𑀢𑁆𑀣𑀼𑀁 𑀨𑀼𑀲𑀢𑁄 𑀅𑀦𑀸𑀧𑀢𑁆𑀢𑀻𑀢𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀤𑀼𑀓𑁆𑀓𑀝𑀫𑁂𑀯𑀸𑀢𑀺.

𑀇𑀤𑀜𑁆𑀘 𑀧𑀦 𑀯𑀢𑁆𑀯𑀸 𑀇𑀤𑀁 𑀘𑀢𑀼𑀓𑁆𑀓𑀫𑀸𑀳. ‘‘𑀲𑀸𑀭𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀲𑀸𑀭𑀢𑁆𑀢𑀁 𑀕𑀡𑁆𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁄, ‘𑀯𑀺𑀭𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀯𑀺𑀭𑀢𑁆𑀢𑀁 𑀕𑀡𑁆𑀳𑀺 𑀤𑀼𑀓𑁆𑀓𑀝𑀁, ‘𑀲𑀸𑀭𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀯𑀺𑀭𑀢𑁆𑀢𑀁 𑀕𑀡𑁆𑀳𑀺 𑀤𑀼𑀓𑁆𑀓𑀝𑀁, ‘𑀯𑀺𑀭𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀲𑀸𑀭𑀢𑁆𑀢𑀁 𑀕𑀡𑁆𑀳𑀺 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺. 𑀓𑀺𑀜𑁆𑀘𑀸𑀧𑀺 𑀏𑀯𑀫𑀸𑀳? 𑀅𑀣 𑀔𑁄 𑀫𑀳𑀸𑀲𑀼𑀫𑀢𑁆𑀣𑁂𑀭𑀯𑀸𑀤𑁄𑀬𑁂𑀯𑁂𑀢𑁆𑀣 ‘‘𑀇𑀢𑁆𑀣𑀺 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀓𑀸𑀬𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀆𑀫𑀲𑀢𑀺 𑀧𑀭𑀸𑀫𑀲𑀢𑀺…𑀧𑁂… 𑀕𑀡𑁆𑀳𑀸𑀢𑀺 𑀙𑀼𑀧𑀢𑀺 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 ‘‘𑀬𑁄 𑀳𑀺 𑀏𑀓𑀢𑁄 𑀞𑀺𑀢𑀸 𑀲𑀫𑁆𑀩𑀳𑀼𑀮𑀸 𑀇𑀢𑁆𑀣𑀺𑀬𑁄 𑀩𑀸𑀳𑀸𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀲𑁄 𑀬𑀢𑁆𑀢𑀓𑀸 𑀇𑀢𑁆𑀣𑀺𑀬𑁄 𑀨𑀼𑀝𑁆𑀞𑀸 𑀢𑀸𑀲𑀁 𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁂 𑀆𑀧𑀚𑁆𑀚𑀢𑀺, 𑀫𑀚𑁆𑀛𑀕𑀢𑀸𑀦𑀁 𑀕𑀡𑀦𑀸𑀬 𑀣𑀼𑀮𑁆𑀮𑀘𑁆𑀘𑀬𑁂’’𑀢𑀺𑀆𑀤𑀻𑀳𑀺 𑀅𑀝𑁆𑀞𑀓𑀣𑀸𑀯𑀺𑀦𑀺𑀘𑁆𑀙𑀬𑁂𑀳𑀺 𑀘 𑀲𑀫𑁂𑀢𑀺. 𑀬𑀤𑀺 𑀳𑀺 𑀲𑀜𑁆𑀜𑀸𑀤𑀺𑀯𑀺𑀭𑀸𑀕𑁂𑀦 𑀯𑀺𑀭𑀸𑀕𑀺𑀢𑀁 𑀦𑀸𑀫 𑀪𑀯𑁂𑀬𑁆𑀬 ‘‘𑀧𑀡𑁆𑀟𑀓𑁄 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻’’𑀢𑀺𑀆𑀤𑀻𑀲𑀼 𑀯𑀺𑀬 ‘‘𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀜𑁆𑀘 𑀳𑁄𑀢𑀺 𑀓𑀸𑀬𑀲𑀜𑁆𑀜𑀻 𑀘𑀸’’𑀢𑀺𑀆𑀤𑀺𑀦𑀸𑀧𑀺 𑀦𑀬𑁂𑀦 𑀧𑀸𑀴𑀺𑀬𑀁 𑀯𑀺𑀲𑁂𑀲𑀁 𑀯𑀤𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀲𑁄 𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀸𑀬 𑀲𑀢𑀺 𑀇𑀢𑁆𑀣𑀺𑀁 𑀆𑀫𑀲𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀆𑀫𑀲𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀬𑀣𑀸𑀯𑀢𑁆𑀣𑀼𑀓𑀫𑁂𑀯 𑀬𑀼𑀚𑁆𑀚𑀢𑀺.

𑀫𑀳𑀸𑀧𑀘𑁆𑀘𑀭𑀺𑀬𑀫𑁆𑀧𑀺 𑀘𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀦𑀻𑀮𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀬𑀺𑀢𑀸𑀬 𑀓𑀸𑀴𑀺𑀢𑁆𑀣𑀺𑀬𑀸 𑀓𑀸𑀬𑀁 𑀖𑀝𑁆𑀝𑁂𑀲𑁆𑀲𑀸𑀫𑀻’𑀢𑀺 𑀓𑀸𑀬𑀁 𑀖𑀝𑁆𑀝𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄; ‘𑀓𑀸𑀬𑀁 𑀖𑀝𑁆𑀝𑁂𑀲𑁆𑀲𑀸𑀫𑀻’𑀢𑀺 𑀦𑀻𑀮𑀁 𑀖𑀝𑁆𑀝𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁; ‘𑀦𑀻𑀮𑀁 𑀖𑀝𑁆𑀝𑁂𑀲𑁆𑀲𑀸𑀫𑀻’𑀢𑀺 𑀓𑀸𑀬𑀁 𑀖𑀝𑁆𑀝𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄; ‘𑀦𑀻𑀮𑀁 𑀖𑀝𑁆𑀝𑁂𑀲𑁆𑀲𑀸𑀫𑀻’𑀢𑀺 𑀦𑀻𑀮𑀁 𑀖𑀝𑁆𑀝𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺. 𑀬𑁄𑀧𑀸𑀬𑀁 ‘‘𑀇𑀢𑁆𑀣𑀻 𑀘 𑀧𑀡𑁆𑀟𑀓𑁄 𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀢𑁆𑀣𑀼𑀫𑀺𑀲𑁆𑀲𑀓𑀦𑀬𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀺𑀫𑁆𑀧𑀺 𑀯𑀢𑁆𑀣𑀼 𑀲𑀜𑁆𑀜𑀸𑀯𑀺𑀫𑀢𑀺𑀯𑀲𑁂𑀦 𑀯𑀼𑀢𑁆𑀢𑀸 𑀆𑀧𑀢𑁆𑀢𑀺𑀬𑁄 𑀧𑀸𑀴𑀺𑀬𑀁 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀬𑁂𑀦𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀯𑀸𑀭𑁂 𑀧𑀦 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀲𑁆𑀲 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀢𑁄 𑀣𑀼𑀮𑁆𑀮𑀘𑁆𑀘𑀬𑀁, 𑀲𑁂𑀲𑁂 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦𑀓𑀸𑀬𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦𑀓𑀆𑀬𑀧𑁆𑀧𑀝𑀺𑀩𑀤𑁆𑀥𑀯𑀸𑀭𑁂 𑀘 𑀦𑀺𑀲𑁆𑀲𑀕𑁆𑀕𑀺𑀬𑁂𑀦𑀓𑀸𑀬𑀯𑀸𑀭𑀸𑀤𑀻𑀲𑀼 𑀘𑀲𑁆𑀲 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀫𑁂𑀯.

‘‘𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘 𑀇𑀢𑁆𑀣𑀻 𑀘 𑀦𑀁 𑀪𑀺𑀓𑁆𑀔𑀼𑀲𑁆𑀲 𑀓𑀸𑀬𑁂𑀦 𑀓𑀸𑀬’’𑀦𑁆𑀢𑀺𑀆𑀤𑀺𑀯𑀸𑀭𑁄 𑀧𑀦 𑀪𑀺𑀓𑁆𑀔𑀼𑀫𑁆𑀳𑀺 𑀫𑀸𑀢𑀼𑀕𑀸𑀫𑀲𑁆𑀲 𑀭𑀸𑀕𑀯𑀲𑁂𑀦 𑀯𑀼𑀢𑁆𑀢𑁄. 𑀢𑀢𑁆𑀣 𑀇𑀢𑁆𑀣𑀻 𑀘 𑀦𑀁 𑀪𑀺𑀓𑁆𑀔𑀼𑀲𑁆𑀲 𑀓𑀸𑀬𑁂𑀦 𑀓𑀸𑀬𑀦𑁆𑀢𑀺 𑀪𑀺𑀓𑁆𑀔𑀼𑀫𑁆𑀳𑀺 𑀲𑀸𑀭𑀢𑁆𑀢𑀸 𑀇𑀢𑁆𑀣𑀻 𑀢𑀲𑁆𑀲 𑀦𑀺𑀲𑀺𑀦𑁆𑀦𑁄𑀓𑀸𑀲𑀁 𑀯𑀸 𑀦𑀺𑀧𑀦𑁆𑀦𑁄𑀓𑀸𑀲𑀁 𑀯𑀸 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀢𑀁 𑀪𑀺𑀓𑁆𑀔𑀼𑀲𑁆𑀲 𑀓𑀸𑀬𑀁 𑀆𑀫𑀲𑀢𑀺…𑀧𑁂… 𑀙𑀼𑀧𑀢𑀺. 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀏𑀯𑀁 𑀢𑀸𑀬 𑀆𑀫𑀝𑁆𑀞𑁄 𑀯𑀸 𑀙𑀼𑀧𑀺𑀢𑁄 𑀯𑀸 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄 𑀳𑀼𑀢𑁆𑀯𑀸 𑀲𑀘𑁂 𑀨𑀲𑁆𑀲𑀧𑁆𑀧𑀝𑀺𑀯𑀺𑀚𑀸𑀦𑀦𑀢𑁆𑀣𑀁 𑀈𑀲𑀓𑀫𑁆𑀧𑀺 𑀓𑀸𑀬𑀁 𑀘𑀸𑀮𑁂𑀢𑀺 𑀨𑀦𑁆𑀤𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺.

𑀤𑁆𑀯𑁂 𑀇𑀢𑁆𑀣𑀺𑀬𑁄𑀢𑀺 𑀏𑀢𑁆𑀣 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑁂 𑀆𑀧𑀚𑁆𑀚𑀢𑀺, 𑀇𑀢𑁆𑀣𑀺𑀬𑀸 𑀘 𑀧𑀡𑁆𑀟𑀓𑁂 𑀘 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀲𑀳 𑀤𑀼𑀓𑁆𑀓𑀝𑀁. 𑀏𑀢𑁂𑀦 𑀉𑀧𑀸𑀬𑁂𑀦 𑀬𑀸𑀯 ‘‘𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀆𑀫𑀲𑀢𑀺, 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄 𑀓𑀸𑀬𑁂𑀦 𑀯𑀸𑀬𑀫𑀢𑀺 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀢𑀸𑀯 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀧𑀢𑁆𑀢𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀓𑀸𑀬𑁂𑀦 𑀯𑀸𑀬𑀫𑀢𑀺 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀢𑀦𑀸 𑀦𑀺𑀲𑁆𑀲𑀝𑁆𑀞𑀁 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀇𑀢𑁆𑀣𑀺𑀁 𑀅𑀢𑁆𑀢𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀧𑀼𑀧𑁆𑀨𑁂𑀦 𑀯𑀸 𑀨𑀮𑁂𑀦 𑀯𑀸 𑀧𑀳𑀭𑀦𑁆𑀢𑀺𑀁 𑀤𑀺𑀲𑁆𑀯𑀸 𑀓𑀸𑀬𑁂𑀦 𑀯𑀺𑀓𑀸𑀭𑀁 𑀓𑀭𑁄𑀢𑀺, 𑀅𑀗𑁆𑀕𑀼𑀮𑀺𑀁 𑀯𑀸 𑀘𑀸𑀮𑁂𑀢𑀺, 𑀪𑀫𑀼𑀓𑀁 𑀯𑀸 𑀉𑀓𑁆𑀔𑀺𑀧𑀢𑀺, 𑀅𑀓𑁆𑀔𑀺𑀁 𑀯𑀸 𑀦𑀺𑀔𑀡𑀢𑀺, 𑀅𑀜𑁆𑀜𑀁 𑀯𑀸 𑀏𑀯𑀭𑀽𑀧𑀁 𑀯𑀺𑀓𑀸𑀭𑀁 𑀓𑀭𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀸𑀬𑁂𑀦 𑀯𑀸𑀬𑀫𑀢𑀺 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀻’’𑀢𑀺. 𑀅𑀬𑀫𑁆𑀧𑀺 𑀓𑀸𑀬𑁂𑀦 𑀯𑀸𑀬𑀫𑀺𑀢𑀢𑁆𑀢𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺, 𑀤𑁆𑀯𑀻𑀲𑀼 𑀇𑀢𑁆𑀣𑀻𑀲𑀼 𑀤𑁆𑀯𑁂, 𑀇𑀢𑁆𑀣𑀻𑀧𑀡𑁆𑀟𑀓𑁂𑀲𑀼𑀧𑀺 𑀤𑁆𑀯𑁂 𑀏𑀯 𑀤𑀼𑀓𑁆𑀓𑀝𑁂 𑀆𑀧𑀚𑁆𑀚𑀢𑀺.

𑁨𑁭𑁯. 𑀏𑀯𑀁 𑀯𑀢𑁆𑀣𑀼𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀮𑀓𑁆𑀔𑀡𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀆𑀧𑀢𑁆𑀢𑀺𑀪𑁂𑀤𑀜𑁆𑀘 𑀅𑀦𑀸𑀧𑀢𑁆𑀢𑀺𑀪𑁂𑀤𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀭𑀺𑀫𑀦𑀬𑁂 𑀇𑀢𑁆𑀣𑀺𑀬𑀸 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀤𑀼𑀢𑀺𑀬𑁂 𑀦𑀬𑁂 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀸𑀫𑀲𑀦𑁂 𑀯𑀺𑀬 𑀯𑀸𑀬𑀫𑀺𑀢𑁆𑀯𑀸 𑀅𑀙𑀼𑀧𑀦𑁂 𑀯𑀺𑀬 𑀘 𑀨𑀲𑁆𑀲𑀲𑁆𑀲 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑀢𑁄 𑀤𑀼𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀢𑀢𑀺𑀬𑁂 𑀓𑀸𑀬𑁂𑀦 𑀅𑀯𑀸𑀬𑀫𑀢𑁄 𑀅𑀦𑀸𑀧𑀢𑁆𑀢𑀺. 𑀬𑁄 𑀳𑀺 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄𑀧𑀺 𑀦𑀺𑀘𑁆𑀘𑀮𑁂𑀦 𑀓𑀸𑀬𑁂𑀦 𑀓𑁂𑀯𑀮𑀁 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀲𑀸𑀤𑀺𑀬𑀢𑀺 𑀅𑀦𑀼𑀪𑁄𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂 𑀆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀅𑀦𑀸𑀧𑀢𑁆𑀢𑀺. 𑀘𑀢𑀼𑀢𑁆𑀣𑁂 𑀧𑀦 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀸𑀫𑀲𑀦𑁂 𑀯𑀺𑀬 𑀨𑀲𑁆𑀲𑀧𑁆𑀧𑀝𑀺𑀯𑀺𑀚𑀸𑀦𑀦𑀸𑀧𑀺 𑀦𑀢𑁆𑀣𑀺, 𑀓𑁂𑀯𑀮𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀺. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀲𑁆𑀲 𑀲𑀩𑁆𑀩𑀸𑀓𑀸𑀭𑁂𑀲𑀼 𑀅𑀦𑀸𑀧𑀢𑁆𑀢𑀺𑀬𑁂𑀯.

𑀏𑀢𑁆𑀣 𑀧𑀦 𑀬𑁄 𑀇𑀢𑁆𑀣𑀺𑀬𑀸 𑀕𑀳𑀺𑀢𑁄 𑀢𑀁 𑀅𑀢𑁆𑀢𑀦𑁄 𑀲𑀭𑀻𑀭𑀸 𑀫𑁄𑀘𑁂𑀢𑀼𑀓𑀸𑀫𑁄 𑀧𑀝𑀺𑀧𑁆𑀧𑀡𑀸𑀫𑁂𑀢𑀺 𑀯𑀸 𑀧𑀳𑀭𑀢𑀺 𑀯𑀸 𑀅𑀬𑀁 𑀓𑀸𑀬𑁂𑀦 𑀯𑀸𑀬𑀫𑀢𑀺 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺. 𑀬𑁄 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 𑀢𑀢𑁄 𑀫𑀼𑀜𑁆𑀘𑀺𑀢𑀼𑀓𑀸𑀫𑁄 𑀉𑀢𑁆𑀢𑀸𑀲𑁂𑀢𑁆𑀯𑀸 𑀧𑀮𑀸𑀧𑁂𑀢𑀺, 𑀅𑀬𑀁 𑀓𑀸𑀬𑁂𑀦 𑀯𑀸𑀬𑀫𑀢𑀺 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺. 𑀬𑁄 𑀢𑀸𑀤𑀺𑀲𑀁 𑀤𑀻𑀖𑀚𑀸𑀢𑀺𑀁 𑀓𑀸𑀬𑁂 𑀆𑀭𑀽𑀴𑁆𑀳𑀁 𑀤𑀺𑀲𑁆𑀯𑀸 ‘‘𑀲𑀡𑀺𑀓𑀁 𑀕𑀘𑁆𑀙𑀢𑀼 𑀖𑀝𑁆𑀝𑀺𑀬𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸’’𑀢𑀺 𑀦 𑀖𑀝𑁆𑀝𑁂𑀢𑀺, 𑀇𑀢𑁆𑀣𑀺𑀫𑁂𑀯 𑀯𑀸 𑀅𑀗𑁆𑀕𑀁 𑀨𑀼𑀲𑀫𑀸𑀦𑀁 𑀜𑀢𑁆𑀯𑀸 ‘‘𑀏𑀲𑀸 ‘𑀅𑀦𑀢𑁆𑀣𑀺𑀓𑁄 𑀅𑀬𑀁 𑀫𑀬𑀸’𑀢𑀺 𑀲𑀬𑀫𑁂𑀯 𑀧𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀦𑀺𑀘𑁆𑀘𑀮𑁄 𑀳𑁄𑀢𑀺, 𑀩𑀮𑀯𑀺𑀢𑁆𑀣𑀺𑀬𑀸 𑀯𑀸 𑀕𑀸𑀴𑁆𑀳𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀕𑀳𑀺𑀢𑁄 𑀤𑀳𑀭𑀪𑀺𑀓𑁆𑀔𑀼 𑀧𑀮𑀸𑀬𑀺𑀢𑀼𑀓𑀸𑀫𑁄𑀧𑀺 𑀲𑀼𑀝𑁆𑀞𑀼 𑀕𑀳𑀺𑀢𑀢𑁆𑀢𑀸 𑀦𑀺𑀘𑁆𑀘𑀮𑁄 𑀳𑁄𑀢𑀺, 𑀅𑀬𑀁 𑀦 𑀘 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺. 𑀬𑁄 𑀧𑀦 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀆𑀕𑀘𑁆𑀙𑀢𑀼 𑀢𑀸𑀯 𑀢𑀢𑁄 𑀦𑀁 𑀧𑀳𑀭𑀺𑀢𑁆𑀯𑀸 𑀯𑀸 𑀧𑀡𑀸𑀫𑁂𑀢𑁆𑀯𑀸 𑀯𑀸 𑀧𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀘𑁆𑀘𑀮𑁄 𑀳𑁄𑀢𑀺, 𑀅𑀬𑀁 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁄 𑀦 𑀘 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁨𑁮𑁦. 𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀇𑀫𑀁 𑀨𑀼𑀲𑀺𑀲𑁆𑀲𑀸𑀫𑀻𑀢𑀺 𑀅𑀘𑁂𑀢𑁂𑀢𑁆𑀯𑀸, 𑀏𑀯𑀜𑁆𑀳𑀺 𑀅𑀘𑁂𑀢𑁂𑀢𑁆𑀯𑀸 𑀧𑀢𑁆𑀢𑀧𑁆𑀧𑀝𑀺𑀕𑁆𑀕𑀳𑀡𑀸𑀤𑀻𑀲𑀼 𑀫𑀸𑀢𑀼𑀕𑀸𑀫𑀲𑁆𑀲 𑀅𑀗𑁆𑀕𑁂 𑀨𑀼𑀝𑁆𑀞𑁂𑀧𑀺 𑀅𑀦𑀸𑀧𑀢𑁆𑀢𑀺.

𑀅𑀲𑀢𑀺𑀬𑀸𑀢𑀺 𑀅𑀜𑁆𑀜𑀯𑀺𑀳𑀺𑀢𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑀁 𑀨𑀼𑀲𑀸𑀫𑀻𑀢𑀺 𑀲𑀢𑀺 𑀦𑀢𑁆𑀣𑀺, 𑀏𑀯𑀁 𑀅𑀲𑀢𑀺𑀬𑀸 𑀳𑀢𑁆𑀣𑀧𑀸𑀤𑀧𑀲𑀸𑀭𑀡𑀸𑀤𑀺𑀓𑀸𑀮𑁂 𑀨𑀼𑀲𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀤𑀸𑀭𑀓𑀯𑁂𑀲𑁂𑀦 𑀞𑀺𑀢𑀁 𑀤𑀸𑀭𑀺𑀓𑀁 ‘‘𑀇𑀢𑁆𑀣𑀻’’𑀢𑀺 𑀅𑀚𑀸𑀦𑀦𑁆𑀢𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀨𑀼𑀲𑀢𑀺, 𑀏𑀯𑀁 ‘‘𑀇𑀢𑁆𑀣𑀻’’𑀢𑀺 𑀅𑀚𑀸𑀦𑀦𑁆𑀢𑀲𑁆𑀲 𑀨𑀼𑀲𑀢𑁄 𑀅𑀦𑀸𑀧𑀢𑁆𑀢𑀺.

𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀁 𑀅𑀲𑀸𑀤𑀺𑀬𑀦𑁆𑀢𑀲𑁆𑀲, 𑀢𑀲𑁆𑀲 𑀩𑀸𑀳𑀸𑀧𑀭𑀫𑁆𑀧𑀭𑀸𑀬 𑀦𑀻𑀢𑀪𑀺𑀓𑁆𑀔𑀼𑀲𑁆𑀲 𑀯𑀺𑀬 𑀅𑀦𑀸𑀧𑀢𑁆𑀢𑀺. 𑀉𑀫𑁆𑀫𑀢𑁆𑀢𑀓𑀸𑀤𑀬𑁄 𑀯𑀼𑀢𑁆𑀢𑀦𑀬𑀸𑀏𑀯. 𑀇𑀥 𑀧𑀦 𑀉𑀤𑀸𑀬𑀺𑀢𑁆𑀣𑁂𑀭𑁄 𑀆𑀤𑀺𑀓𑀫𑁆𑀫𑀺𑀓𑁄, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀁, 𑀲𑀼𑀔𑀫𑀚𑁆𑀛𑀢𑁆𑀢𑀤𑁆𑀯𑀬𑁂𑀦𑀸𑀢𑀺.

𑁨𑁮𑁧. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑁋 𑀫𑀸𑀢𑀼𑀬𑀸 𑀫𑀸𑀢𑀼𑀧𑁂𑀫𑁂𑀦𑀸𑀢𑀺 𑀫𑀸𑀢𑀼𑀧𑁂𑀫𑁂𑀦 𑀫𑀸𑀢𑀼𑀬𑀸 𑀓𑀸𑀬𑀁 𑀆𑀫𑀲𑀺. 𑀏𑀲 𑀦𑀬𑁄 𑀥𑀻𑀢𑀼𑀪𑀕𑀺𑀦𑀺𑀯𑀢𑁆𑀣𑀽𑀲𑀼. 𑀢𑀢𑁆𑀣 𑀬𑀲𑁆𑀫𑀸 𑀫𑀸𑀢𑀸 𑀯𑀸 𑀳𑁄𑀢𑀼 𑀥𑀻𑀢𑀸 𑀯𑀸 𑀇𑀢𑁆𑀣𑀻 𑀦𑀸𑀫 𑀲𑀩𑁆𑀩𑀸𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀸𑀭𑀺𑀧𑀦𑁆𑀣𑀺𑀓𑀸𑀯. 𑀢𑀲𑁆𑀫𑀸 ‘‘𑀅𑀬𑀁 𑀫𑁂 𑀫𑀸𑀢𑀸 𑀅𑀬𑀁 𑀥𑀻𑀢𑀸 𑀅𑀬𑀁 𑀫𑁂 𑀪𑀕𑀺𑀦𑀻’’𑀢𑀺 𑀕𑁂𑀳𑀲𑁆𑀲𑀺𑀢𑀧𑁂𑀫𑁂𑀦 𑀆𑀫𑀲𑀢𑁄𑀧𑀺 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁.

𑀇𑀫𑀁 𑀧𑀦 𑀪𑀕𑀯𑀢𑁄 𑀆𑀡𑀁 𑀅𑀦𑀼𑀲𑁆𑀲𑀭𑀦𑁆𑀢𑁂𑀦 𑀲𑀘𑁂𑀧𑀺 𑀦𑀤𑀻𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀁 𑀫𑀸𑀢𑀭𑀁 𑀧𑀲𑁆𑀲𑀢𑀺 𑀦𑁂𑀯 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑀩𑁆𑀩𑀸. 𑀧𑀡𑁆𑀟𑀺𑀢𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀦𑀸𑀯𑀸 𑀯𑀸 𑀨𑀮𑀓𑀁 𑀯𑀸 𑀓𑀤𑀮𑀺𑀓𑁆𑀔𑀦𑁆𑀥𑁄 𑀯𑀸 𑀤𑀸𑀭𑀼𑀓𑁆𑀔𑀦𑁆𑀥𑁄 𑀯𑀸 𑀉𑀧𑀲𑀁𑀳𑀭𑀺𑀢𑀩𑁆𑀩𑁄. 𑀢𑀲𑁆𑀫𑀺𑀁 𑀅𑀲𑀢𑀺 𑀓𑀸𑀲𑀸𑀯𑀫𑁆𑀧𑀺 𑀉𑀧𑀲𑀁𑀳𑀭𑀺𑀢𑁆𑀯𑀸 𑀧𑀼𑀭𑀢𑁄 𑀞𑀧𑁂𑀢𑀩𑁆𑀩𑀁, ‘‘𑀏𑀢𑁆𑀣 𑀕𑀡𑁆𑀳𑀸𑀳𑀻’’𑀢𑀺 𑀧𑀦 𑀦 𑀯𑀢𑁆𑀢𑀩𑁆𑀩𑀸. 𑀕𑀳𑀺𑀢𑁂 𑀧𑀭𑀺𑀓𑁆𑀔𑀸𑀭𑀁 𑀓𑀟𑁆𑀠𑀸𑀫𑀻𑀢𑀺 𑀓𑀟𑁆𑀠𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀪𑀸𑀬𑀢𑀺 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 ‘‘𑀫𑀸 𑀪𑀸𑀬𑀻’’𑀢𑀺 𑀲𑀫𑀲𑁆𑀲𑀸𑀲𑁂𑀢𑀩𑁆𑀩𑀸. 𑀲𑀘𑁂 𑀪𑀸𑀬𑀫𑀸𑀦𑀸 𑀧𑀼𑀢𑁆𑀢𑀲𑁆𑀲 𑀲𑀳𑀲𑀸 𑀔𑀦𑁆𑀥𑁂 𑀯𑀸 𑀅𑀪𑀺𑀭𑀼𑀳𑀢𑀺, 𑀳𑀢𑁆𑀣𑁂 𑀯𑀸 𑀕𑀡𑁆𑀳𑀸𑀢𑀺, 𑀦 ‘‘𑀅𑀧𑁂𑀳𑀺 𑀫𑀳𑀮𑁆𑀮𑀺𑀓𑁂’’𑀢𑀺 𑀦𑀺𑀤𑁆𑀥𑀼𑀦𑀺𑀢𑀩𑁆𑀩𑀸, 𑀣𑀮𑀁 𑀧𑀸𑀧𑁂𑀢𑀩𑁆𑀩𑀸. 𑀓𑀤𑁆𑀤𑀫𑁂 𑀮𑀕𑁆𑀕𑀸𑀬𑀧𑀺 𑀓𑀽𑀧𑁂 𑀧𑀢𑀺𑀢𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀭𑀧𑀺 𑀳𑀺 𑀬𑁄𑀢𑁆𑀢𑀁 𑀯𑀸 𑀯𑀢𑁆𑀣𑀁 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀳𑀢𑁆𑀣𑁂𑀦 𑀕𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 𑀉𑀤𑁆𑀥𑀭𑀺𑀢𑀩𑁆𑀩𑀸, 𑀦𑀢𑁆𑀯𑁂𑀯 𑀆𑀫𑀲𑀺𑀢𑀩𑁆𑀩𑀸. 𑀦 𑀓𑁂𑀯𑀮𑀜𑁆𑀘 𑀫𑀸𑀢𑀼𑀕𑀸𑀫𑀲𑁆𑀲 𑀲𑀭𑀻𑀭𑀫𑁂𑀯 𑀅𑀦𑀸𑀫𑀸𑀲𑀁, 𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀫𑁆𑀧𑀺 𑀆𑀪𑀭𑀡𑀪𑀡𑁆𑀟𑀫𑁆𑀧𑀺 𑀢𑀺𑀡𑀡𑁆𑀟𑀼𑀧𑀓𑀁 𑀯𑀸 𑀢𑀸𑀴𑀧𑀡𑁆𑀡𑀫𑀼𑀤𑁆𑀤𑀺𑀓𑀁 𑀯𑀸 𑀉𑀧𑀸𑀤𑀸𑀬 𑀅𑀦𑀸𑀫𑀸𑀲𑀫𑁂𑀯, 𑀢𑀜𑁆𑀘 𑀔𑁄 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀧𑀺𑀴𑀦𑁆𑀥𑀦𑀢𑁆𑀣𑀸𑀬 𑀞𑀧𑀺𑀢𑀫𑁂𑀯. 𑀲𑀘𑁂 𑀧𑀦 𑀦𑀺𑀯𑀸𑀲𑀦𑀁 𑀯𑀸 𑀧𑀸𑀭𑀼𑀧𑀦𑀁 𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀘𑀻𑀯𑀭𑀢𑁆𑀣𑀸𑀬 𑀧𑀸𑀤𑀫𑀽𑀮𑁂 𑀞𑀧𑁂𑀢𑀺 𑀯𑀝𑁆𑀝𑀢𑀺. 𑀆𑀪𑀭𑀡𑀪𑀡𑁆𑀟𑁂𑀲𑀼 𑀧𑀦 𑀲𑀻𑀲𑀧𑀲𑀸𑀥𑀦𑀓𑀤𑀦𑁆𑀢𑀲𑀽𑀘𑀺𑀆𑀤𑀺𑀓𑀧𑁆𑀧𑀺𑀬𑀪𑀡𑁆𑀟𑀁 ‘‘𑀇𑀫𑀁 𑀪𑀦𑁆𑀢𑁂 𑀢𑀼𑀫𑁆𑀳𑀸𑀓𑀁 𑀕𑀡𑁆𑀳𑀣𑀸’’𑀢𑀺 𑀤𑀺𑀬𑁆𑀬𑀫𑀸𑀦𑀁 𑀲𑀺𑀧𑀸𑀝𑀺𑀓𑀸𑀲𑀽𑀘𑀺𑀆𑀤𑀺𑀉𑀧𑀓𑀭𑀡𑀢𑁆𑀣𑀸𑀬 𑀕𑀳𑁂𑀢𑀩𑁆𑀩𑀁. 𑀲𑀼𑀯𑀡𑁆𑀡𑀭𑀚𑀢𑀫𑀼𑀢𑁆𑀢𑀸𑀤𑀺𑀫𑀬𑀁 𑀧𑀦 𑀅𑀦𑀸𑀫𑀸𑀲𑀫𑁂𑀯 𑀤𑀻𑀬𑁆𑀬𑀫𑀸𑀦𑀫𑁆𑀧𑀺 𑀦 𑀕𑀳𑁂𑀢𑀩𑁆𑀩𑀁. 𑀦 𑀓𑁂𑀯𑀮𑀜𑁆𑀘 𑀏𑀢𑀸𑀲𑀁 𑀲𑀭𑀻𑀭𑀽𑀧𑀕𑀫𑁂𑀯 𑀅𑀦𑀸𑀫𑀸𑀲𑀁, 𑀇𑀢𑁆𑀣𑀺𑀲𑀡𑁆𑀞𑀸𑀦𑁂𑀦 𑀓𑀢𑀁 𑀓𑀝𑁆𑀞𑀭𑀽𑀧𑀫𑁆𑀧𑀺 𑀤𑀦𑁆𑀢𑀭𑀽𑀧𑀫𑁆𑀧𑀺 𑀅𑀬𑀭𑀽𑀧𑀫𑁆𑀧𑀺 𑀮𑁄𑀳𑀭𑀽𑀧𑀫𑁆𑀧𑀺 𑀢𑀺𑀧𑀼𑀭𑀽𑀧𑀫𑁆𑀧𑀺 𑀧𑁄𑀢𑁆𑀣𑀓𑀭𑀽𑀧𑀫𑁆𑀧𑀺 𑀲𑀩𑁆𑀩𑀭𑀢𑀦𑀭𑀽𑀧𑀫𑁆𑀧𑀺 𑀅𑀦𑁆𑀢𑀫𑀲𑁄 𑀧𑀺𑀝𑁆𑀞𑀫𑀬𑀭𑀽𑀧𑀫𑁆𑀧𑀺 𑀅𑀦𑀸𑀫𑀸𑀲𑀫𑁂𑀯. 𑀧𑀭𑀺𑀪𑁄𑀕𑀢𑁆𑀣𑀸𑀬 𑀧𑀦 ‘‘𑀇𑀤𑀁 𑀢𑀼𑀫𑁆𑀳𑀸𑀓𑀁 𑀳𑁄𑀢𑀽’’𑀢𑀺 𑀮𑀪𑀺𑀢𑁆𑀯𑀸 𑀞𑀧𑁂𑀢𑁆𑀯𑀸 𑀲𑀩𑁆𑀩𑀭𑀢𑀦𑀫𑀬𑀁 𑀅𑀯𑀲𑁂𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀧𑀓𑀭𑀡𑀸𑀭𑀳𑀁 𑀉𑀧𑀓𑀭𑀡𑁂 𑀧𑀭𑀺𑀪𑁄𑀕𑀸𑀭𑀳𑀁 𑀧𑀭𑀺𑀪𑁄𑀕𑁂 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀺.

𑀬𑀣𑀸 𑀘 𑀇𑀢𑁆𑀣𑀺𑀭𑀽𑀧𑀓𑀁; 𑀏𑀯𑀁 𑀲𑀢𑁆𑀢𑀯𑀺𑀥𑀫𑁆𑀧𑀺 𑀥𑀜𑁆𑀜𑀁 𑀅𑀦𑀸𑀫𑀸𑀲𑀁. 𑀢𑀲𑁆𑀫𑀸 𑀔𑁂𑀢𑁆𑀢𑀫𑀚𑁆𑀛𑁂𑀦 𑀕𑀘𑁆𑀙𑀢𑀸 𑀢𑀢𑁆𑀣𑀚𑀸𑀢𑀓𑀫𑁆𑀧𑀺 𑀥𑀜𑁆𑀜𑀨𑀮𑀁 𑀦 𑀆𑀫𑀲𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀖𑀭𑀤𑁆𑀯𑀸𑀭𑁂 𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀸 𑀥𑀜𑁆𑀜𑀁 𑀧𑀲𑀸𑀭𑀺𑀢𑀁 𑀳𑁄𑀢𑀺 𑀧𑀲𑁆𑀲𑁂𑀦 𑀘 𑀫𑀕𑁆𑀕𑁄 𑀅𑀢𑁆𑀣𑀺 𑀦 𑀫𑀤𑁆𑀤𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀁. 𑀕𑀫𑀦𑀫𑀕𑁆𑀕𑁂 𑀅𑀲𑀢𑀺 𑀫𑀕𑁆𑀕𑀁 𑀅𑀥𑀺𑀝𑁆𑀞𑀸𑀬 𑀕𑀦𑁆𑀢𑀩𑁆𑀩𑀁. 𑀅𑀦𑁆𑀢𑀭𑀖𑀭𑁂 𑀥𑀜𑁆𑀜𑀲𑁆𑀲 𑀉𑀧𑀭𑀺 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑁂𑀦𑁆𑀢𑀺 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀓𑁂𑀘𑀺 𑀆𑀲𑀦𑀲𑀸𑀮𑀸𑀬𑀁 𑀥𑀜𑁆𑀜𑀁 𑀆𑀓𑀺𑀭𑀦𑁆𑀢𑀺, 𑀲𑀘𑁂 𑀲𑀓𑁆𑀓𑀸 𑀳𑁄𑀢𑀺 𑀳𑀭𑀸𑀧𑁂𑀢𑀼𑀁 𑀳𑀭𑀸𑀧𑁂𑀢𑀩𑁆𑀩𑀁, 𑀦𑁄 𑀘𑁂 𑀏𑀓𑀫𑀦𑁆𑀢𑀁 𑀥𑀜𑁆𑀜𑀁 𑀅𑀫𑀤𑁆𑀤𑀦𑁆𑀢𑁂𑀦 𑀧𑀻𑀞𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀲𑀘𑁂 𑀑𑀓𑀸𑀲𑁄 𑀦 𑀳𑁄𑀢𑀺, 𑀫𑀦𑀼𑀲𑁆𑀲𑀸 𑀥𑀜𑁆𑀜𑀫𑀚𑁆𑀛𑁂𑀬𑁂𑀯 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀢𑀢𑁆𑀣𑀚𑀸𑀢𑀓𑀸𑀦𑀺 𑀫𑀼𑀕𑁆𑀕𑀫𑀸𑀲𑀸𑀤𑀻𑀦𑀺 𑀅𑀧𑀭𑀡𑁆𑀡𑀸𑀦𑀺𑀧𑀺 𑀢𑀸𑀮𑀧𑀦𑀲𑀸𑀤𑀻𑀦𑀺 𑀯𑀸 𑀨𑀮𑀸𑀦𑀺 𑀓𑀻𑀴𑀦𑁆𑀢𑁂𑀦 𑀦 𑀆𑀫𑀲𑀺𑀢𑀩𑁆𑀩𑀸𑀦𑀺. 𑀫𑀦𑀼𑀲𑁆𑀲𑁂𑀳𑀺 𑀭𑀸𑀲𑀺𑀓𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀭𑀜𑁆𑀜𑁂 𑀧𑀦 𑀭𑀼𑀓𑁆𑀔𑀢𑁄 𑀧𑀢𑀺𑀢𑀸𑀦𑀺 𑀨𑀮𑀸𑀦𑀺 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺.

𑀫𑀼𑀢𑁆𑀢𑀸, 𑀫𑀡𑀺, 𑀯𑁂𑀴𑀼𑀭𑀺𑀬𑁄, 𑀲𑀗𑁆𑀔𑁄, 𑀲𑀺𑀮𑀸, 𑀧𑀯𑀸𑀴𑀁, 𑀭𑀚𑀢𑀁, 𑀚𑀸𑀢𑀭𑀽𑀧𑀁, 𑀮𑁄𑀳𑀺𑀢𑀗𑁆𑀓𑁄, 𑀫𑀲𑀸𑀭𑀕𑀮𑁆𑀮𑀦𑁆𑀢𑀺 𑀇𑀫𑁂𑀲𑀼 𑀤𑀲𑀲𑀼 𑀭𑀢𑀦𑁂𑀲𑀼 𑀫𑀼𑀢𑁆𑀢𑀸 𑀅𑀥𑁄𑀢𑀸 𑀅𑀦𑀺𑀯𑀺𑀤𑁆𑀥𑀸 𑀬𑀣𑀸𑀚𑀸𑀢𑀸𑀯 𑀆𑀫𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀸 𑀅𑀦𑀸𑀫𑀸𑀲𑀸𑀢𑀺 𑀯𑀤𑀦𑁆𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀫𑀼𑀢𑁆𑀢𑀸 𑀥𑁄𑀢𑀸𑀧𑀺 𑀅𑀥𑁄𑀢𑀸𑀧𑀺 𑀅𑀦𑀸𑀫𑀸𑀲𑀸 𑀪𑀡𑁆𑀟𑀫𑀽𑀮𑀢𑁆𑀣𑀸𑀬 𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑀼𑀝𑁆𑀞𑀭𑁄𑀕𑀲𑁆𑀲 𑀪𑁂𑀲𑀚𑁆𑀚𑀢𑁆𑀣𑀸𑀬 𑀧𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑁆𑀢𑀫𑀲𑁄 𑀚𑀸𑀢𑀺𑀨𑀮𑀺𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑁄𑀧𑀺 𑀦𑀻𑀮𑀧𑀻𑀢𑀸𑀤𑀺𑀯𑀡𑁆𑀡𑀪𑁂𑀤𑁄 𑀫𑀡𑀺 𑀥𑁄𑀢𑀯𑀺𑀤𑁆𑀥𑀯𑀝𑁆𑀝𑀺𑀢𑁄 𑀅𑀦𑀸𑀫𑀸𑀲𑁄, 𑀬𑀣𑀸𑀚𑀸𑀢𑁄 𑀧𑀦 𑀆𑀓𑀭𑀫𑀼𑀢𑁆𑀢𑁄 𑀧𑀢𑁆𑀢𑀸𑀤𑀺𑀪𑀡𑁆𑀟𑀫𑀽𑀮𑀢𑁆𑀣𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑁄. 𑀲𑁄𑀧𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑁄, 𑀧𑀘𑀺𑀢𑁆𑀯𑀸 𑀓𑀢𑁄 𑀓𑀸𑀘𑀫𑀡𑀺𑀬𑁂𑀯𑁂𑀓𑁄 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑁄. 𑀯𑁂𑀴𑀼𑀭𑀺𑀬𑁂𑀧𑀺 𑀫𑀡𑀺𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

𑀲𑀗𑁆𑀔𑁄 𑀥𑀫𑀦𑀲𑀗𑁆𑀔𑁄 𑀘 𑀥𑁄𑀢𑀯𑀺𑀤𑁆𑀥𑁄 𑀘 𑀭𑀢𑀦𑀫𑀺𑀲𑁆𑀲𑁄 𑀅𑀦𑀸𑀫𑀸𑀲𑁄. 𑀧𑀸𑀦𑀻𑀬𑀲𑀗𑁆𑀔𑁄 𑀥𑁄𑀢𑁄𑀧𑀺 𑀅𑀥𑁄𑀢𑁄𑀧𑀺 𑀆𑀫𑀸𑀲𑁄𑀯 𑀲𑁂𑀲𑀜𑁆𑀘 𑀅𑀜𑁆𑀚𑀦𑀸𑀤𑀺𑀪𑁂𑀲𑀚𑁆𑀚𑀢𑁆𑀣𑀸𑀬𑀧𑀺 𑀪𑀡𑁆𑀟𑀫𑀽𑀮𑀢𑁆𑀣𑀸𑀬𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀺𑀮𑀸 𑀥𑁄𑀢𑀯𑀺𑀤𑁆𑀥𑀸 𑀭𑀢𑀦𑀲𑀁𑀬𑀼𑀢𑁆𑀢𑀸 𑀫𑀼𑀕𑁆𑀕𑀯𑀡𑁆𑀡𑀸𑀯 𑀅𑀦𑀸𑀫𑀸𑀲𑀸. 𑀲𑁂𑀲𑀸 𑀲𑀢𑁆𑀣𑀓𑀦𑀺𑀲𑀸𑀦𑀸𑀤𑀺𑀅𑀢𑁆𑀣𑀸𑀬 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀣 𑀘 𑀭𑀢𑀦𑀲𑀁𑀬𑀼𑀢𑁆𑀢𑀸𑀢𑀺 𑀲𑀼𑀯𑀡𑁆𑀡𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀓𑀢𑀸𑀢𑀺 𑀯𑀤𑀦𑁆𑀢𑀺. 𑀧𑀯𑀸𑀴𑀁 𑀥𑁄𑀢𑀯𑀺𑀤𑁆𑀥𑀁 𑀅𑀦𑀸𑀫𑀸𑀲𑀁. 𑀲𑁂𑀲𑀁 𑀆𑀫𑀸𑀲𑀁 𑀪𑀡𑁆𑀟𑀫𑀽𑀮𑀢𑁆𑀣𑀜𑁆𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀥𑁄𑀢𑀫𑁆𑀧𑀺 𑀅𑀥𑁄𑀢𑀫𑁆𑀧𑀺 𑀲𑀩𑁆𑀩𑀁 𑀅𑀦𑀸𑀫𑀸𑀲𑀁, 𑀦 𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑀭𑀚𑀢𑀁 𑀚𑀸𑀢𑀭𑀽𑀧𑀜𑁆𑀘 𑀓𑀢𑀪𑀡𑁆𑀟𑀫𑁆𑀧𑀺 𑀅𑀓𑀢𑀪𑀡𑁆𑀟𑀫𑁆𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀅𑀦𑀸𑀫𑀸𑀲𑀜𑁆𑀘 𑀅𑀲𑀫𑁆𑀧𑀝𑀺𑀘𑁆𑀙𑀺𑀬𑀜𑁆𑀘, 𑀉𑀢𑁆𑀢𑀭𑀭𑀸𑀚𑀧𑀼𑀢𑁆𑀢𑁄 𑀓𑀺𑀭 𑀲𑀼𑀯𑀡𑁆𑀡𑀘𑁂𑀢𑀺𑀬𑀁 𑀓𑀸𑀭𑁂𑀢𑁆𑀯𑀸 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑀲𑁆𑀲 𑀧𑁂𑀲𑁂𑀲𑀺. 𑀣𑁂𑀭𑁄 ‘‘𑀦 𑀓𑀧𑁆𑀧𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀘𑁂𑀢𑀺𑀬𑀖𑀭𑁂 𑀲𑀼𑀯𑀡𑁆𑀡𑀧𑀤𑀼𑀫𑀲𑀼𑀯𑀡𑁆𑀡𑀩𑀼𑀩𑁆𑀩𑀼𑀴𑀓𑀸𑀤𑀻𑀦𑀺 𑀳𑁄𑀦𑁆𑀢𑀺, 𑀏𑀢𑀸𑀦𑀺𑀧𑀺 𑀅𑀦𑀸𑀫𑀸𑀲𑀸𑀦𑀺. 𑀘𑁂𑀢𑀺𑀬𑀖𑀭𑀕𑁄𑀧𑀓𑀸 𑀧𑀦 𑀭𑀽𑀧𑀺𑀬𑀙𑀟𑁆𑀟𑀓𑀝𑁆𑀞𑀸𑀦𑁂 𑀞𑀺𑀢𑀸, 𑀢𑀲𑁆𑀫𑀸 𑀢𑁂𑀲𑀁 𑀓𑁂𑀴𑀸𑀧𑀬𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀲𑀼𑀯𑀡𑁆𑀡𑀘𑁂𑀢𑀺𑀬𑁂 𑀓𑀘𑀯𑀭𑀫𑁂𑀯 𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁆𑀢𑀓𑀫𑁂𑀯 𑀅𑀦𑀼𑀜𑁆𑀜𑀸𑀢𑀁. 𑀆𑀭𑀓𑀽𑀝𑀮𑁄𑀳𑀫𑁆𑀧𑀺 𑀚𑀸𑀢𑀭𑀽𑀧𑀕𑀢𑀺𑀓𑀫𑁂𑀯 𑀅𑀦𑀸𑀫𑀸𑀲𑀦𑁆𑀢𑀺 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁄 𑀧𑀦 𑀲𑀩𑁆𑀩𑀓𑀧𑁆𑀧𑀺𑀬𑁄, 𑀢𑀲𑁆𑀫𑀸 𑀚𑀸𑀢𑀭𑀽𑀧𑀭𑀚𑀢𑀫𑀬𑀸 𑀲𑀩𑁆𑀩𑁂𑀧𑀺 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸 𑀆𑀫𑀸𑀲𑀸. 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀯𑀺𑀦𑀬𑀯𑀡𑁆𑀡𑀦𑀝𑁆𑀞𑀸𑀦𑁂 𑀭𑀢𑀦𑀫𑀡𑁆𑀟𑀧𑁂 𑀓𑀭𑁄𑀦𑁆𑀢𑀺 𑀨𑀮𑀺𑀓𑀢𑁆𑀣𑀫𑁆𑀪𑁂 𑀭𑀢𑀦𑀤𑀸𑀫𑀧𑀢𑀺𑀫𑀡𑁆𑀟𑀺𑀢𑁂, 𑀢𑀢𑁆𑀣 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀪𑀺𑀓𑁆𑀔𑀽𑀦𑀁 𑀧𑀝𑀺𑀚𑀕𑁆𑀕𑀺𑀢𑀼𑀁 𑀯𑀝𑁆𑀝𑀢𑀺.

𑀮𑁄𑀳𑀺𑀢𑀗𑁆𑀓𑀫𑀲𑀸𑀭𑀕𑀮𑁆𑀮𑀸 𑀥𑁄𑀢𑀯𑀺𑀤𑁆𑀥𑀸 𑀅𑀦𑀸𑀫𑀸𑀲𑀸, 𑀇𑀢𑀭𑁂 𑀆𑀫𑀸𑀲𑀸, 𑀪𑀡𑁆𑀟𑀫𑀽𑀮𑀢𑁆𑀣𑀸𑀬 𑀯𑀝𑁆𑀝𑀦𑁆𑀢𑀻𑀢𑀺 𑀯𑀼𑀢𑁆𑀢𑀸. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀥𑁄𑀢𑀸𑀧𑀺 𑀅𑀥𑁄𑀢𑀸𑀧𑀺 𑀲𑀩𑁆𑀩𑀲𑁄 𑀅𑀦𑀸𑀫𑀸𑀲𑀸 𑀦 𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀲𑀩𑁆𑀩𑀁 𑀆𑀯𑀼𑀥𑀪𑀡𑁆𑀟𑀁 𑀅𑀦𑀸𑀫𑀸𑀲𑀁, 𑀪𑀡𑁆𑀟𑀫𑀽𑀮𑀢𑁆𑀣𑀸𑀬 𑀤𑀻𑀬𑁆𑀬𑀫𑀸𑀦𑀫𑁆𑀧𑀺 𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀲𑀢𑁆𑀣𑀯𑀡𑀺𑀚𑁆𑀚𑀸 𑀦𑀸𑀫 𑀦 𑀯𑀝𑁆𑀝𑀢𑀺. 𑀲𑀼𑀤𑁆𑀥𑀥𑀦𑀼𑀤𑀡𑁆𑀟𑁄𑀧𑀺 𑀥𑀦𑀼𑀚𑀺𑀬𑀸𑀧𑀺 𑀧𑀢𑁄𑀤𑁄𑀧𑀺 𑀅𑀗𑁆𑀓𑀼𑀲𑁄𑀧𑀺 𑀅𑀦𑁆𑀢𑀫𑀲𑁄 𑀯𑀸𑀲𑀺𑀨𑀭𑀲𑀼𑀆𑀤𑀻𑀦𑀺𑀧𑀺 𑀆𑀯𑀼𑀥𑀲𑀗𑁆𑀔𑁂𑀧𑁂𑀦 𑀓𑀢𑀸𑀦𑀺 𑀅𑀦𑀸𑀫𑀸𑀲𑀸𑀦𑀺. 𑀲𑀘𑁂 𑀓𑁂𑀦𑀘𑀺 𑀯𑀺𑀳𑀸𑀭𑁂 𑀲𑀢𑁆𑀢𑀺 𑀯𑀸 𑀢𑁄𑀫𑀭𑁄 𑀯𑀸 𑀞𑀧𑀺𑀢𑁄 𑀳𑁄𑀢𑀺, 𑀯𑀺𑀳𑀸𑀭𑀁 𑀚𑀕𑁆𑀕𑀦𑁆𑀢𑁂𑀦 ‘‘𑀳𑀭𑀦𑁆𑀢𑀽’’𑀢𑀺 𑀲𑀸𑀫𑀺𑀓𑀸𑀦𑀁 𑀧𑁂𑀲𑁂𑀢𑀩𑁆𑀩𑀁. 𑀲𑀘𑁂 𑀦 𑀳𑀭𑀦𑁆𑀢𑀺, 𑀢𑀁 𑀅𑀘𑀸𑀮𑁂𑀦𑁆𑀢𑁂𑀦 𑀯𑀺𑀳𑀸𑀭𑁄 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑁄. 𑀬𑀼𑀤𑁆𑀥𑀪𑀽𑀫𑀺𑀬𑀁 𑀧𑀢𑀺𑀢𑀁 𑀅𑀲𑀺𑀁 𑀯𑀸 𑀲𑀢𑁆𑀢𑀺𑀁 𑀯𑀸 𑀢𑁄𑀫𑀭𑀁 𑀯𑀸 𑀤𑀺𑀲𑁆𑀯𑀸 𑀧𑀸𑀲𑀸𑀡𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀅𑀲𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀓𑀢𑁆𑀣𑀸𑀬 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀇𑀢𑀭𑀸𑀦𑀺𑀧𑀺 𑀯𑀺𑀬𑁄𑀚𑁂𑀢𑁆𑀯𑀸 𑀓𑀺𑀜𑁆𑀘𑀺 𑀲𑀢𑁆𑀣𑀓𑀢𑁆𑀣𑀸𑀬 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺 𑀓𑀺𑀜𑁆𑀘𑀺 𑀓𑀢𑁆𑀢𑀭𑀤𑀡𑁆𑀟𑀸𑀤𑀺𑀅𑀢𑁆𑀣𑀸𑀬. ‘‘𑀇𑀤𑀁 𑀕𑀡𑁆𑀳𑀣𑀸’’𑀢𑀺 𑀤𑀻𑀬𑁆𑀬𑀫𑀸𑀦𑀁 𑀧𑀦 ‘‘𑀯𑀺𑀦𑀸𑀲𑁂𑀢𑁆𑀯𑀸 𑀓𑀧𑁆𑀧𑀺𑀬𑀪𑀡𑁆𑀟𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑀫𑁆𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺.

𑀫𑀘𑁆𑀙𑀚𑀸𑀮𑀧𑀓𑁆𑀔𑀺𑀚𑀸𑀮𑀸𑀤𑀻𑀦𑀺𑀧𑀺 𑀨𑀮𑀓𑀚𑀸𑀮𑀺𑀓𑀸𑀤𑀻𑀦𑀺 𑀲𑀭𑀧𑀭𑀺𑀢𑁆𑀢𑀸𑀦𑀸𑀦𑀻𑀧𑀺 𑀲𑀩𑁆𑀩𑀸𑀦𑀺 𑀅𑀦𑀸𑀫𑀸𑀲𑀸𑀦𑀺. 𑀧𑀭𑀺𑀪𑁄𑀕𑀢𑁆𑀣𑀸𑀬 𑀮𑀩𑁆𑀪𑀫𑀸𑀦𑁂𑀲𑀼 𑀧𑀦 𑀚𑀸𑀮𑀁 𑀢𑀸𑀯 ‘‘𑀆𑀲𑀦𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀉𑀧𑀭𑀺 𑀩𑀦𑁆𑀥𑀺𑀲𑁆𑀲𑀸𑀫𑀺, 𑀙𑀢𑁆𑀢𑀁 𑀯𑀸 𑀯𑁂𑀞𑁂𑀲𑁆𑀲𑀸𑀫𑀻’’𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀭𑀧𑀭𑀺𑀢𑁆𑀢𑀸𑀦𑀁 𑀲𑀩𑁆𑀩𑀫𑁆𑀧𑀺 𑀪𑀡𑁆𑀟𑀫𑀽𑀮𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀭𑀽𑀧𑀭𑁄𑀥𑀦𑀺𑀯𑀸𑀭𑀡𑀜𑁆𑀳𑀺 𑀏𑀢𑀁 𑀦 𑀉𑀧𑀭𑁄𑀥𑀓𑀭𑀦𑁆𑀢𑀺 𑀨𑀮𑀓𑀁 𑀤𑀦𑁆𑀢𑀓𑀝𑁆𑀞𑀪𑀸𑀚𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀘𑀫𑁆𑀫𑀯𑀺𑀦𑀤𑁆𑀥𑀸𑀦𑀺 𑀯𑀻𑀡𑀸𑀪𑁂𑀭𑀺𑀆𑀤𑀻𑀦𑀺 𑀅𑀦𑀸𑀫𑀸𑀲𑀸𑀦𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀪𑁂𑀭𑀺𑀲𑀗𑁆𑀖𑀸𑀝𑁄𑀧𑀺 𑀯𑀻𑀡𑀸𑀲𑀗𑁆𑀖𑀸𑀝𑁄𑀧𑀺 𑀢𑀼𑀘𑁆𑀙𑀧𑁄𑀓𑁆𑀔𑀭𑀫𑁆𑀧𑀺 𑀫𑀼𑀔𑀯𑀝𑁆𑀝𑀺𑀬𑀁 𑀆𑀭𑁄𑀧𑀺𑀢𑀘𑀫𑁆𑀫𑀫𑁆𑀧𑀺 𑀯𑀻𑀡𑀸𑀤𑀡𑁆𑀟𑀓𑁄𑀧𑀺 𑀲𑀩𑁆𑀩𑀁 𑀅𑀦𑀸𑀫𑀸𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀑𑀦𑀳𑀺𑀢𑀼𑀁 𑀯𑀸 𑀑𑀦𑀳𑀸𑀧𑁂𑀢𑀼𑀁 𑀯𑀸 𑀯𑀸𑀤𑁂𑀢𑀼𑀁 𑀯𑀸 𑀯𑀸𑀤𑀸𑀧𑁂𑀢𑀼𑀁 𑀯𑀸 𑀦 𑀮𑀩𑁆𑀪𑀢𑀺𑀬𑁂𑀯. 𑀘𑁂𑀢𑀺𑀬𑀗𑁆𑀕𑀡𑁂 𑀧𑀽𑀚𑀁 𑀓𑀢𑁆𑀯𑀸 𑀫𑀦𑀼𑀲𑁆𑀲𑁂𑀳𑀺 𑀙𑀟𑁆𑀟𑀺𑀢𑀁 𑀤𑀺𑀲𑁆𑀯𑀸𑀧𑀺 𑀅𑀘𑀸𑀮𑁂𑀢𑁆𑀯𑀸𑀯 𑀅𑀦𑁆𑀢𑀭𑀦𑁆𑀢𑀭𑁂 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁, 𑀓𑀘𑀯𑀭𑀙𑀟𑁆𑀟𑀦𑀓𑀸𑀮𑁂 𑀧𑀦 𑀓𑀘𑀯𑀭𑀦𑀺𑀬𑀸𑀫𑁂𑀦𑁂𑀯 𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀪𑀡𑁆𑀟𑀫𑀽𑀮𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀭𑀺𑀪𑁄𑀕𑀢𑁆𑀣𑀸𑀬 𑀮𑀩𑁆𑀪𑀫𑀸𑀦𑁂𑀲𑀼 𑀧𑀦 𑀯𑀻𑀡𑀸𑀤𑁄𑀡𑀺𑀓𑀜𑁆𑀘 𑀪𑁂𑀭𑀺𑀧𑁄𑀓𑁆𑀔𑀭𑀜𑁆𑀘 𑀤𑀦𑁆𑀢𑀓𑀝𑁆𑀞𑀪𑀸𑀚𑀦𑀁 𑀓𑀭𑀺𑀲𑁆𑀲𑀸𑀫 𑀘𑀫𑁆𑀫𑀁 𑀲𑀢𑁆𑀣𑀓𑀓𑁄𑀲𑀓𑀦𑁆𑀢𑀺 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀲𑁆𑀲 𑀉𑀧𑀓𑀭𑀡𑀢𑁆𑀣𑀸𑀬 𑀕𑀳𑁂𑀢𑁆𑀯𑀸 𑀢𑀣𑀸 𑀢𑀣𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀯𑀢𑁆𑀣𑀼 𑀉𑀢𑁆𑀢𑀸𑀦𑀫𑁂𑀯. 𑀬𑀓𑁆𑀔𑀺𑀯𑀢𑁆𑀣𑀼𑀲𑁆𑀫𑀺𑀁 𑀲𑀘𑁂𑀧𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀢𑀺 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀧𑀡𑁆𑀟𑀓𑀯𑀢𑁆𑀣𑀼 𑀘 𑀲𑀼𑀢𑁆𑀢𑀺𑀢𑁆𑀣𑀺𑀯𑀢𑁆𑀣𑀼 𑀘 𑀧𑀸𑀓𑀝𑀫𑁂𑀯. 𑀫𑀢𑀺𑀢𑁆𑀣𑀺𑀯𑀢𑁆𑀣𑀼𑀲𑁆𑀫𑀺𑀁 𑀧𑀸𑀭𑀸𑀚𑀺𑀓𑀧𑁆𑀧𑀳𑁄𑀦𑀓𑀓𑀸𑀮𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀢𑁄 𑀧𑀭𑀁 𑀤𑀼𑀓𑁆𑀓𑀝𑀁. 𑀢𑀺𑀭𑀘𑁆𑀙𑀸𑀦𑀕𑀢𑀯𑀢𑁆𑀣𑀼𑀲𑁆𑀫𑀺𑀁 𑀦𑀸𑀕𑀫𑀸𑀡𑀯𑀺𑀓𑀸𑀬𑀧𑀺 𑀲𑀼𑀧𑀡𑁆𑀡𑀫𑀸𑀡𑀯𑀺𑀓𑀸𑀬𑀧𑀺 𑀓𑀺𑀦𑁆𑀦𑀭𑀺𑀬𑀸𑀧𑀺 𑀕𑀸𑀯𑀺𑀬𑀸𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀤𑀸𑀭𑀼𑀥𑀻𑀢𑀮𑀺𑀓𑀸𑀯𑀢𑁆𑀣𑀼𑀲𑁆𑀫𑀺𑀁 𑀦 𑀓𑁂𑀯𑀮𑀁 𑀤𑀸𑀭𑀼𑀦𑀸 𑀏𑀯, 𑀅𑀦𑁆𑀢𑀫𑀲𑁄 𑀘𑀺𑀢𑁆𑀢𑀓𑀫𑁆𑀫𑀮𑀺𑀔𑀺𑀢𑁂𑀧𑀺 𑀇𑀢𑁆𑀣𑀺𑀭𑀽𑀧𑁂 𑀤𑀼𑀓𑁆𑀓𑀝𑀫𑁂𑀯.

𑁨𑁮𑁨. 𑀲𑀫𑁆𑀧𑀻𑀴𑀦𑀯𑀢𑁆𑀣𑀼 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀲𑀗𑁆𑀓𑀫𑀯𑀢𑁆𑀣𑀼𑀲𑁆𑀫𑀺𑀁 𑀏𑀓𑀧𑀤𑀺𑀓𑀲𑀗𑁆𑀓𑀫𑁄 𑀯𑀸 𑀳𑁄𑀢𑀼 𑀲𑀓𑀝𑀫𑀕𑁆𑀕𑀲𑀗𑁆𑀓𑀫𑁄 𑀯𑀸, 𑀘𑀸𑀮𑁂𑀲𑁆𑀲𑀸𑀫𑀻𑀢𑀺 𑀧𑀬𑁄𑀕𑁂 𑀓𑀢𑀫𑀢𑁆𑀢𑁂𑀯 𑀘𑀸𑀮𑁂𑀢𑀼 𑀯𑀸 𑀫𑀸 𑀯𑀸, 𑀤𑀼𑀓𑁆𑀓𑀝𑀁. 𑀫𑀕𑁆𑀕𑀯𑀢𑁆𑀣𑀼 𑀧𑀸𑀓𑀝𑀫𑁂𑀯. 𑀭𑀼𑀓𑁆𑀔𑀯𑀢𑁆𑀣𑀼𑀲𑁆𑀫𑀺𑀁 𑀭𑀼𑀓𑁆𑀔𑁄 𑀫𑀳𑀦𑁆𑀢𑁄 𑀯𑀸 𑀳𑁄𑀢𑀼 𑀫𑀳𑀸𑀚𑀫𑁆𑀩𑀼𑀧𑁆𑀧𑀫𑀸𑀡𑁄 𑀔𑀼𑀤𑁆𑀤𑀓𑁄 𑀯𑀸, 𑀢𑀁 𑀘𑀸𑀮𑁂𑀢𑀼𑀁 𑀲𑀓𑁆𑀓𑁄𑀢𑀼 𑀯𑀸 𑀫𑀸 𑀯𑀸, 𑀧𑀬𑁄𑀕𑀫𑀢𑁆𑀢𑁂𑀦 𑀤𑀼𑀓𑁆𑀓𑀝𑀁. 𑀦𑀸𑀯𑀸𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀭𑀚𑁆𑀚𑀯𑀢𑁆𑀣𑀼𑀲𑁆𑀫𑀺𑀁 𑀬𑀁 𑀭𑀚𑁆𑀚𑀼𑀁 𑀆𑀯𑀺𑀜𑁆𑀙𑀦𑁆𑀢𑁄 𑀞𑀸𑀦𑀸 𑀘𑀸𑀮𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀢𑁆𑀣 𑀣𑀼𑀮𑁆𑀮𑀘𑁆𑀘𑀬𑀁. 𑀬𑀸 𑀫𑀳𑀸𑀭𑀚𑁆𑀚𑀼 𑀳𑁄𑀢𑀺, 𑀈𑀲𑀓𑀫𑁆𑀧𑀺 𑀞𑀸𑀦𑀸 𑀦 𑀘𑀮𑀢𑀺, 𑀢𑀢𑁆𑀣 𑀤𑀼𑀓𑁆𑀓𑀝𑀁. 𑀤𑀡𑁆𑀟𑁂𑀧𑀺 𑀏𑀲𑁂𑀯 𑀦𑀬𑁄. 𑀪𑀽𑀫𑀺𑀬𑀁 𑀧𑀢𑀺𑀢𑀫𑀳𑀸𑀭𑀼𑀓𑁆𑀔𑁄𑀧𑀺 𑀳𑀺 𑀤𑀡𑁆𑀟𑀕𑁆𑀕𑀳𑀡𑁂𑀦𑁂𑀯 𑀇𑀥 𑀕𑀳𑀺𑀢𑁄. 𑀧𑀢𑁆𑀢𑀯𑀢𑁆𑀣𑀼 𑀧𑀸𑀓𑀝𑀫𑁂𑀯. 𑀯𑀦𑁆𑀤𑀦𑀯𑀢𑁆𑀣𑀼𑀲𑁆𑀫𑀺𑀁 𑀇𑀢𑁆𑀣𑀻 𑀧𑀸𑀤𑁂 𑀲𑀫𑁆𑀩𑀸𑀳𑀺𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑀸 𑀯𑀸𑀭𑁂𑀢𑀩𑁆𑀩𑀸 𑀧𑀸𑀤𑀸 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀸, 𑀦𑀺𑀘𑁆𑀘𑀮𑁂𑀦 𑀯𑀸 𑀪𑀯𑀺𑀢𑀩𑁆𑀩𑀁. 𑀦𑀺𑀘𑁆𑀘𑀮𑀲𑁆𑀲 𑀳𑀺 𑀘𑀺𑀢𑁆𑀢𑁂𑀦 𑀲𑀸𑀤𑀺𑀬𑀢𑁄𑀧𑀺 𑀅𑀦𑀸𑀧𑀢𑁆𑀢𑀺. 𑀅𑀯𑀲𑀸𑀦𑁂 𑀕𑀳𑀡𑀯𑀢𑁆𑀣𑀼𑀧𑀸𑀓𑀝𑀫𑁂𑀯𑀸𑀢𑀺.

𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁮𑁩. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀆𑀤𑀺𑀲𑁆𑀲𑀸𑀢𑀺 𑀅𑀧𑀤𑀺𑀲𑀺𑀢𑁆𑀯𑀸. 𑀯𑀡𑁆𑀡𑀫𑁆𑀧𑀺 𑀪𑀡𑀢𑀻𑀢𑀺𑀆𑀤𑀻𑀦𑀺 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀙𑀺𑀦𑁆𑀦𑀺𑀓𑀸𑀢𑀺 𑀙𑀺𑀦𑁆𑀦𑀑𑀢𑁆𑀢𑀧𑁆𑀧𑀸. 𑀥𑀼𑀢𑁆𑀢𑀺𑀓𑀸𑀢𑀺 𑀲𑀞𑀸. 𑀅𑀳𑀺𑀭𑀺𑀓𑀸𑀬𑁄𑀢𑀺 𑀦𑀺𑀮𑁆𑀮𑀚𑁆𑀚𑀸. 𑀉𑀳𑀲𑀦𑁆𑀢𑀻𑀢𑀺 𑀲𑀺𑀢𑀁 𑀓𑀢𑁆𑀯𑀸 𑀫𑀦𑁆𑀤𑀳𑀲𑀺𑀢𑀁 𑀳𑀲𑀦𑁆𑀢𑀺. 𑀉𑀮𑁆𑀮𑀧𑀦𑁆𑀢𑀻𑀢𑀺 ‘‘𑀅𑀳𑁄 𑀅𑀬𑁆𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀘𑁆𑀘𑀓𑀭𑀡𑀺𑀁 𑀦𑀸𑀦𑀸𑀯𑀺𑀥𑀁 𑀧𑀮𑁄𑀪𑀦𑀓𑀣𑀁 𑀓𑀣𑁂𑀦𑁆𑀢𑀺. 𑀉𑀚𑁆𑀚𑀕𑁆𑀖𑀦𑁆𑀢𑀻𑀢𑀺 𑀫𑀳𑀸𑀳𑀲𑀺𑀢𑀁 𑀳𑀲𑀦𑁆𑀢𑀺. 𑀉𑀧𑁆𑀧𑀡𑁆𑀟𑁂𑀦𑁆𑀢𑀻𑀢𑀺 ‘‘𑀧𑀡𑁆𑀟𑀓𑁄 𑀅𑀬𑀁, 𑀦𑀸𑀬𑀁 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑀺.

𑁨𑁮𑁫. 𑀲𑀸𑀭𑀢𑁆𑀢𑁄𑀢𑀺 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀭𑀸𑀕𑁂𑀦 𑀲𑀸𑀭𑀢𑁆𑀢𑁄. 𑀅𑀧𑁂𑀓𑁆𑀔𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀯𑀼𑀢𑁆𑀢𑀦𑀬𑀫𑁂𑀯, 𑀓𑁂𑀯𑀮𑀁 𑀇𑀥 𑀯𑀸𑀘𑀲𑁆𑀲𑀸𑀤𑀭𑀸𑀕𑁄 𑀬𑁄𑀚𑁂𑀢𑀩𑁆𑀩𑁄. 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀻𑀢𑀺 𑀏𑀢𑁆𑀣 𑀅𑀥𑀺𑀧𑁆𑀧𑁂𑀢𑀁 𑀫𑀸𑀢𑀼𑀕𑀸𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀸𑀢𑀼𑀕𑀸𑀫𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀜𑁆𑀜𑀽 𑀧𑀝𑀺𑀩𑀮𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀚𑀸𑀦𑀺𑀢𑀼𑀦𑁆𑀢𑀺 𑀬𑀸 𑀧𑀡𑁆𑀟𑀺𑀢𑀸 𑀲𑀸𑀢𑁆𑀣𑀓𑀦𑀺𑀭𑀢𑁆𑀣𑀓𑀓𑀣𑀁 𑀅𑀲𑀤𑁆𑀥𑀫𑁆𑀫𑀲𑀤𑁆𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀜𑁆𑀘 𑀚𑀸𑀦𑀺𑀢𑀼𑀁 𑀧𑀝𑀺𑀩𑀮𑀸, 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀬𑀸 𑀧𑀦 𑀫𑀳𑀮𑁆𑀮𑀺𑀓𑀸𑀧𑀺 𑀩𑀸𑀮𑀸 𑀏𑀮𑀫𑀽𑀕𑀸 𑀅𑀬𑀁 𑀇𑀥 𑀅𑀦𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀑𑀪𑀸𑀲𑁂𑀬𑁆𑀬𑀸𑀢𑀺 𑀅𑀯𑀪𑀸𑀲𑁂𑀬𑁆𑀬 𑀦𑀸𑀦𑀸𑀧𑁆𑀧𑀓𑀸𑀭𑀓𑀁 𑀅𑀲𑀤𑁆𑀥𑀫𑁆𑀫𑀯𑀘𑀦𑀁 𑀯𑀤𑁂𑀬𑁆𑀬. 𑀬𑀲𑁆𑀫𑀸 𑀧𑀦𑁂𑀯𑀁 𑀑𑀪𑀸𑀲𑀦𑁆𑀢𑀲𑁆𑀲 𑀬𑁄 𑀲𑁄 𑀑𑀪𑀸𑀲𑁄 𑀦𑀸𑀫, 𑀲𑁄 𑀅𑀢𑁆𑀣𑀢𑁄 𑀅𑀚𑁆𑀛𑀸𑀘𑀸𑀭𑁄 𑀳𑁄𑀢𑀺 𑀭𑀸𑀕𑀯𑀲𑁂𑀦 𑀅𑀪𑀺𑀪𑀯𑀺𑀢𑁆𑀯𑀸 𑀲𑀜𑁆𑀜𑀫𑀯𑁂𑀮𑀁 𑀆𑀘𑀸𑀭𑁄, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀑𑀪𑀸𑀲𑁂𑀬𑁆𑀬𑀸𑀢𑀺 𑀅𑀚𑁆𑀛𑀸𑀘𑀸𑀭𑁄 𑀯𑀼𑀘𑁆𑀘𑀢𑀻’’𑀢𑀺 𑀆𑀳. 𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀣𑀸 𑀬𑀼𑀯𑀸 𑀬𑀼𑀯𑀢𑀺𑀦𑁆𑀢𑀺 𑀅𑀢𑁆𑀣𑁄.

𑀤𑁆𑀯𑁂 𑀫𑀕𑁆𑀕𑁂 𑀆𑀤𑀺𑀲𑁆𑀲𑀸𑀢𑀺𑀆𑀤𑀺 𑀬𑁂𑀦𑀸𑀓𑀸𑀭𑁂𑀦 𑀑𑀪𑀸𑀲𑀢𑁄 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑁆𑀯𑁂 𑀫𑀕𑁆𑀕𑁂𑀢𑀺 𑀯𑀘𑁆𑀘𑀫𑀕𑁆𑀕𑀜𑁆𑀘 𑀧𑀲𑁆𑀲𑀸𑀯𑀫𑀕𑁆𑀕𑀜𑁆𑀘. 𑀲𑁂𑀲𑀁 𑀉𑀤𑁆𑀤𑁂𑀲𑁂 𑀢𑀸𑀯 𑀧𑀸𑀓𑀝𑀫𑁂𑀯. 𑀦𑀺𑀤𑁆𑀤𑁂𑀲𑁂 𑀧𑀦 𑀣𑁄𑀫𑁂𑀢𑀻𑀢𑀺 ‘‘𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀼𑀪𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺 𑀯𑀤𑀢𑀺, 𑀦 𑀢𑀸𑀯 𑀲𑀻𑀲𑀁 𑀏𑀢𑀺. ‘‘𑀢𑀯 𑀯𑀘𑁆𑀘𑀫𑀕𑁆𑀕𑁄 𑀘 𑀧𑀲𑁆𑀲𑀸𑀯𑀫𑀕𑁆𑀕𑁄 𑀘 𑀈𑀤𑀺𑀲𑁄 𑀢𑁂𑀦 𑀦𑀸𑀫 𑀈𑀤𑀺𑀲𑁂𑀦 𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀼𑀪𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺 𑀯𑀤𑀢𑀺, 𑀲𑀻𑀲𑀁 𑀏𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀯𑀡𑁆𑀡𑁂𑀢𑀺 𑀧𑀲𑀁𑀲𑀢𑀻𑀢𑀺 𑀇𑀫𑀸𑀦𑀺 𑀧𑀦 𑀣𑁄𑀫𑀦𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺.

𑀔𑀼𑀁𑀲𑁂𑀢𑀻𑀢𑀺 𑀯𑀸𑀘𑀸𑀧𑀢𑁄𑀤𑁂𑀦 𑀖𑀝𑁆𑀝𑁂𑀢𑀺. 𑀯𑀫𑁆𑀪𑁂𑀢𑀻𑀢𑀺 𑀅𑀧𑀲𑀸𑀤𑁂𑀢𑀺. 𑀕𑀭𑀳𑀢𑀻𑀢𑀺 𑀤𑁄𑀲𑀁 𑀤𑁂𑀢𑀺. 𑀧𑀭𑀢𑁄 𑀧𑀦 𑀧𑀸𑀴𑀺𑀬𑀸 𑀆𑀕𑀢𑁂𑀳𑀺 ‘‘𑀅𑀦𑀺𑀫𑀺𑀢𑁆𑀢𑀸𑀲𑀻’’𑀢𑀺𑀆𑀤𑀻𑀳𑀺 𑀏𑀓𑀸𑀤𑀲𑀳𑀺 𑀧𑀤𑁂𑀳𑀺 𑀅𑀖𑀝𑀺𑀢𑁂 𑀲𑀻𑀲𑀁 𑀦 𑀏𑀢𑀺, 𑀖𑀝𑀺𑀢𑁂𑀧𑀺 𑀢𑁂𑀲𑀼 𑀲𑀺𑀔𑀭𑀡𑀻𑀲𑀺 𑀲𑀫𑁆𑀪𑀺𑀦𑁆𑀦𑀸𑀲𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀖𑀝𑀺𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀤𑁂𑀳𑀺 𑀫𑁂𑀢𑀺 𑀬𑀸𑀘𑀦𑀸𑀬𑀧𑀺 𑀏𑀢𑁆𑀢𑀓𑁂𑀦𑁂𑀯 𑀲𑀻𑀲𑀁 𑀦 𑀏𑀢𑀺, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀤𑁂𑀳𑀻’’𑀢𑀺 𑀏𑀯𑀁 𑀫𑁂𑀣𑀼𑀦𑀥𑀫𑁆𑀫𑁂𑀦 𑀖𑀝𑀺𑀢𑁂 𑀏𑀯 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀓𑀤𑀸 𑀢𑁂 𑀫𑀸𑀢𑀸 𑀧𑀲𑀻𑀤𑀺𑀲𑁆𑀲𑀢𑀻𑀢𑀺𑀆𑀤𑀻𑀲𑀼 𑀆𑀬𑀸𑀘𑀦𑀯𑀘𑀦𑁂𑀲𑀼𑀧𑀺 𑀏𑀢𑁆𑀢𑀓𑁂𑀦𑁂𑀯 𑀲𑀻𑀲𑀁 𑀦 𑀏𑀢𑀺, ‘‘𑀓𑀤𑀸 𑀢𑁂 𑀫𑀸𑀢𑀸 𑀧𑀲𑀻𑀤𑀺𑀲𑁆𑀲𑀢𑀺, 𑀓𑀤𑀸 𑀢𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀢𑀯 𑀫𑀸𑀢𑀭𑀺 𑀧𑀲𑀦𑁆𑀦𑀸𑀬 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀆𑀤𑀺𑀦𑀸 𑀧𑀦 𑀦𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑁂𑀦 𑀖𑀝𑀺𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀓𑀣𑀁 𑀢𑁆𑀯𑀁 𑀲𑀸𑀫𑀺𑀓𑀲𑁆𑀲 𑀤𑁂𑀲𑀻𑀢𑀺𑀆𑀤𑀻𑀲𑀼 𑀧𑀼𑀘𑁆𑀙𑀸𑀯𑀘𑀦𑁂𑀲𑀼𑀧𑀺 𑀫𑁂𑀣𑀼𑀦𑀥𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀦 𑀇𑀢𑀭𑀣𑀸. 𑀏𑀯𑀁 𑀓𑀺𑀭 𑀢𑁆𑀯𑀁 𑀲𑀸𑀫𑀺𑀓𑀲𑁆𑀲 𑀤𑁂𑀲𑀻𑀢𑀺 𑀧𑀝𑀺𑀧𑀼𑀘𑁆𑀙𑀸𑀯𑀘𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀆𑀘𑀺𑀓𑁆𑀔𑀦𑀸𑀬 𑀧𑀼𑀝𑁆𑀞𑁄 𑀪𑀡𑀢𑀻𑀢𑀺 ‘‘𑀓𑀣𑀁 𑀤𑀤𑀫𑀸𑀦𑀸 𑀲𑀸𑀫𑀺𑀓𑀲𑁆𑀲 𑀧𑀺𑀬𑀸 𑀳𑁄𑀢𑀻’’𑀢𑀺 𑀏𑀯𑀁 𑀧𑀼𑀝𑁆𑀞𑁄 𑀆𑀘𑀺𑀓𑁆𑀔𑀢𑀺. 𑀏𑀢𑁆𑀣 𑀘 ‘‘𑀏𑀯𑀁 𑀤𑁂𑀳𑀺 𑀏𑀯𑀁 𑀤𑀤𑀫𑀸𑀦𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀻𑀲𑀁 𑀦 𑀏𑀢𑀺. ‘‘𑀫𑁂𑀣𑀼𑀦𑀥𑀫𑁆𑀫𑀁 𑀏𑀯𑀁 𑀤𑁂𑀳𑀺 𑀏𑀯𑀁 𑀉𑀧𑀦𑁂𑀳𑀺 𑀏𑀯𑀁 𑀫𑁂𑀣𑀼𑀦𑀥𑀫𑁆𑀫𑀁 𑀤𑀤𑀫𑀸𑀦𑀸 𑀉𑀧𑀦𑀬𑀫𑀸𑀦𑀸 𑀧𑀺𑀬𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀧𑀦 𑀦𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑁂𑀦 𑀖𑀝𑀺𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀦𑀼𑀲𑀸𑀲𑀦𑀻𑀯𑀘𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀓𑁆𑀓𑁄𑀲𑀦𑀺𑀤𑁆𑀤𑁂𑀲𑁂 𑁋 𑀅𑀦𑀺𑀫𑀺𑀢𑁆𑀢𑀸𑀲𑀻𑀢𑀺 𑀦𑀺𑀫𑀺𑀢𑁆𑀢𑀭𑀳𑀺𑀢𑀸𑀲𑀺, 𑀓𑀼𑀜𑁆𑀘𑀺𑀓𑀧𑀡𑀸𑀮𑀺𑀫𑀢𑁆𑀢𑀫𑁂𑀯 𑀢𑀯 𑀤𑀓𑀲𑁄𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀦𑀺𑀫𑀺𑀢𑁆𑀢𑀫𑀢𑁆𑀢𑀸𑀲𑀻𑀢𑀺 𑀢𑀯 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀅𑀧𑀭𑀺𑀧𑀼𑀡𑁆𑀡𑀁 𑀲𑀜𑁆𑀜𑀸𑀫𑀢𑁆𑀢𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀮𑁄𑀳𑀺𑀢𑀸𑀢𑀺 𑀲𑀼𑀓𑁆𑀔𑀲𑁄𑀢𑀸. 𑀥𑀼𑀯𑀮𑁄𑀳𑀺𑀢𑀸𑀢𑀺 𑀦𑀺𑀘𑁆𑀘𑀮𑁄𑀳𑀺𑀢𑀸 𑀓𑀺𑀮𑀺𑀦𑁆𑀦𑀤𑀓𑀲𑁄𑀢𑀸. 𑀥𑀼𑀯𑀘𑁄𑀴𑀸𑀢𑀺 𑀦𑀺𑀘𑁆𑀘𑀧𑀓𑁆𑀔𑀺𑀢𑁆𑀢𑀸𑀡𑀺𑀘𑁄𑀴𑀸, 𑀲𑀤𑀸 𑀆𑀡𑀺𑀘𑁄𑀴𑀓𑀁 𑀲𑁂𑀯𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀕𑁆𑀖𑀭𑀦𑁆𑀢𑀻𑀢𑀺 𑀲𑀯𑀦𑁆𑀢𑀻; 𑀲𑀤𑀸 𑀢𑁂 𑀫𑀼𑀢𑁆𑀢𑀁 𑀲𑀯𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀺𑀔𑀭𑀡𑀻𑀢𑀺 𑀩𑀳𑀺𑀦𑀺𑀓𑁆𑀔𑀦𑁆𑀢𑀆𑀡𑀺𑀫𑀁𑀲𑀸. 𑀇𑀢𑁆𑀣𑀺𑀧𑀡𑁆𑀟𑀓𑀸𑀢𑀺 𑀅𑀦𑀺𑀫𑀺𑀢𑁆𑀢𑀸𑀯 𑀯𑀼𑀘𑁆𑀘𑀢𑀺. 𑀯𑁂𑀧𑀼𑀭𑀺𑀲𑀺𑀓𑀸𑀢𑀺 𑀲𑀫𑀲𑁆𑀲𑀼𑀤𑀸𑀞𑀺𑀓𑀸 𑀧𑀼𑀭𑀺𑀲𑀭𑀽𑀧𑀸 𑀇𑀢𑁆𑀣𑀻. 𑀲𑀫𑁆𑀪𑀺𑀦𑁆𑀦𑀸𑀢𑀺 𑀲𑀫𑁆𑀪𑀺𑀦𑁆𑀦𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀸. 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀢𑀺 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂𑀦 𑀘 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂𑀦 𑀘𑀸𑀢𑀺 𑀉𑀪𑁄𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑀸.

𑀇𑀫𑁂𑀲𑀼 𑀘 𑀧𑀦 𑀏𑀓𑀸𑀤𑀲𑀲𑀼 𑀧𑀤𑁂𑀲𑀼 𑀲𑀺𑀔𑀭𑀡𑀻𑀲𑀺 𑀲𑀫𑁆𑀪𑀺𑀦𑁆𑀦𑀸𑀲𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻𑀢𑀺 𑀇𑀫𑀸𑀦𑀺𑀬𑁂𑀯 𑀢𑀻𑀡𑀺 𑀧𑀤𑀸𑀦𑀺 𑀲𑀼𑀤𑁆𑀥𑀸𑀦𑀺 𑀲𑀻𑀲𑀁 𑀏𑀦𑁆𑀢𑀺. 𑀇𑀢𑀺 𑀇𑀫𑀸𑀦𑀺 𑀘 𑀢𑀻𑀡𑀺 𑀧𑀼𑀭𑀺𑀫𑀸𑀦𑀺 𑀘 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑁂𑀣𑀼𑀦𑀥𑀫𑁆𑀫𑀧𑀤𑀸𑀦𑀺 𑀢𑀻𑀡𑀻𑀢𑀺 𑀙 𑀧𑀤𑀸𑀦𑀺 𑀲𑀼𑀤𑁆𑀥𑀸𑀦𑀺 𑀆𑀧𑀢𑁆𑀢𑀺𑀓𑀭𑀸𑀦𑀺. 𑀲𑁂𑀲𑀸𑀦𑀺 𑀅𑀦𑀺𑀫𑀺𑀢𑁆𑀢𑀸𑀢𑀺𑀆𑀤𑀻𑀦𑀺 ‘‘𑀅𑀦𑀺𑀫𑀺𑀢𑁆𑀢𑁂 𑀫𑁂𑀣𑀼𑀦𑀥𑀫𑁆𑀫𑀁 𑀫𑁂 𑀤𑁂𑀳𑀻’’𑀢𑀺 𑀯𑀸 ‘‘𑀅𑀦𑀺𑀫𑀺𑀢𑁆𑀢𑀸𑀲𑀺 𑀫𑁂𑀣𑀼𑀦𑀥𑀫𑁆𑀫𑀁 𑀫𑁂 𑀤𑁂𑀳𑀻’’𑀢𑀺 𑀯𑀸 𑀆𑀤𑀺𑀦𑀸 𑀦𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑁂𑀦 𑀖𑀝𑀺𑀢𑀸𑀦𑁂𑀯 𑀆𑀧𑀢𑁆𑀢𑀺𑀓𑀭𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁨𑁮𑁬. 𑀇𑀤𑀸𑀦𑀺 𑀬𑁆𑀯𑀸𑀬𑀁 𑀑𑀢𑀺𑀡𑁆𑀡𑁄 𑀯𑀺𑀧𑀭𑀺𑀡𑀢𑁂𑀦 𑀘𑀺𑀢𑁆𑀢𑁂𑀦 𑀑𑀪𑀸𑀲𑀢𑀺, 𑀢𑀲𑁆𑀲 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑁂 𑀆𑀤𑀺𑀲𑁆𑀲 𑀏𑀢𑁂𑀲𑀁 𑀯𑀡𑁆𑀡𑀪𑀡𑀦𑀸𑀤𑀻𑀦𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻’’𑀢𑀺𑀆𑀤𑀺𑀫𑀸𑀳. 𑀢𑁂𑀲𑀁 𑀅𑀢𑁆𑀣𑁄 𑀓𑀸𑀬𑀲𑀁𑀲𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀅𑀥𑀓𑁆𑀔𑀓𑀦𑁆𑀢𑀺 𑀅𑀓𑁆𑀔𑀓𑀢𑁄 𑀧𑀝𑁆𑀞𑀸𑀬 𑀅𑀥𑁄. 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮 𑀚𑀸𑀡𑀼𑀫𑀡𑁆𑀟𑀮𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁. 𑀉𑀩𑁆𑀪𑀓𑁆𑀔𑀓𑀦𑁆𑀢𑀺 𑀅𑀓𑁆𑀔𑀓𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁. 𑀅𑀥𑁄 𑀚𑀸𑀡𑀼𑀫𑀡𑁆𑀟𑀮𑀦𑁆𑀢𑀺 𑀚𑀸𑀡𑀼𑀫𑀡𑁆𑀟𑀮𑀢𑁄 𑀧𑀝𑁆𑀞𑀸𑀬 𑀅𑀥𑁄. 𑀅𑀓𑁆𑀔𑀓𑀁 𑀧𑀦 𑀚𑀸𑀡𑀼𑀫𑀡𑁆𑀟𑀮𑀜𑁆𑀘 𑀏𑀢𑁆𑀣𑁂𑀯 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑁂 𑀯𑀺𑀬. 𑀦 𑀳𑀺 𑀩𑀼𑀤𑁆𑀥𑀸 𑀕𑀭𑀼𑀓𑀸𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀁 𑀧𑀜𑁆𑀜𑀧𑁂𑀦𑁆𑀢𑀻𑀢𑀺. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀦𑁆𑀢𑀺 𑀯𑀢𑁆𑀣𑀁 𑀯𑀸 𑀧𑀼𑀧𑁆𑀨𑀁 𑀯𑀸 𑀆𑀪𑀭𑀡𑀁 𑀯𑀸.

𑁨𑁮𑁭. 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑀲𑁆𑀲𑀸𑀢𑀺 𑀅𑀦𑀺𑀫𑀺𑀢𑁆𑀢𑀸𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑀁 𑀓𑀣𑁂𑀦𑁆𑀢𑀲𑁆𑀲, 𑀅𑀝𑁆𑀞𑀓𑀣𑀁 𑀯𑀸 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀲𑁆𑀲.

𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑀲𑁆𑀲𑀸𑀢𑀺 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑀲𑁆𑀲 𑀯𑀸 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀯𑀸. 𑀏𑀯𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀧𑀼𑀭𑀓𑁆𑀔𑀢𑁆𑀯𑀸 𑀪𑀡𑀦𑁆𑀢𑀲𑁆𑀲 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀘 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀘 𑀅𑀦𑀸𑀧𑀢𑁆𑀢𑀺.

𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀲𑁆𑀲𑀸𑀢𑀺 ‘‘𑀇𑀤𑀸𑀦𑀺𑀧𑀺 𑀅𑀦𑀺𑀫𑀺𑀢𑁆𑀢𑀸𑀲𑀺 𑀉𑀪𑀢𑁆𑀢𑁄𑀩𑁆𑀬𑀜𑁆𑀚𑀦𑀸𑀲𑀺 𑀅𑀧𑁆𑀧𑀫𑀸𑀤𑀁 𑀇𑀤𑀸𑀦𑀺 𑀓𑀭𑁂𑀬𑁆𑀬𑀸𑀲𑀺, 𑀬𑀣𑀸 𑀆𑀬𑀢𑀺𑀫𑁆𑀧𑀺 𑀏𑀯𑀭𑀽𑀧𑀸 𑀦 𑀳𑁄𑀳𑀺𑀲𑀻’’𑀢𑀺 𑀏𑀯𑀁 𑀅𑀦𑀼𑀲𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀪𑀡𑀦𑁆𑀢𑀲𑁆𑀲 𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀬𑁄 𑀧𑀦 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑁄 𑀧𑀓𑀢𑀺𑀯𑀸𑀘𑀦𑀸𑀫𑀕𑁆𑀕𑀁 𑀧𑀳𑀸𑀬 𑀳𑀲𑀦𑁆𑀢𑁄 𑀳𑀲𑀦𑁆𑀢𑁄 ‘‘𑀲𑀺𑀔𑀭𑀡𑀻𑀲𑀺 𑀲𑀫𑁆𑀪𑀺𑀦𑁆𑀦𑀸𑀲𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀡𑀢𑀺, 𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯. 𑀉𑀫𑁆𑀫𑀢𑁆𑀢𑀓𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀇𑀥 𑀆𑀤𑀺𑀓𑀫𑁆𑀫𑀺𑀓𑁄 𑀉𑀤𑀸𑀬𑀺𑀢𑁆𑀣𑁂𑀭𑁄, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀢𑀺𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀦𑁆𑀢𑀺.

𑁨𑁮𑁮. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀮𑁄𑀳𑀺𑀢𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀪𑀺𑀓𑁆𑀔𑀼 𑀇𑀢𑁆𑀣𑀺𑀬𑀸 𑀮𑁄𑀳𑀺𑀢𑀓𑀁 𑀦𑀺𑀫𑀺𑀢𑁆𑀢𑀁 𑀲𑀦𑁆𑀥𑀸𑀬𑀸𑀳 𑁋 𑀇𑀢𑀭𑀸 𑀦 𑀅𑀜𑁆𑀜𑀸𑀲𑀺, 𑀢𑀲𑁆𑀫𑀸 𑀤𑀼𑀓𑁆𑀓𑀝𑀁.

𑀓𑀓𑁆𑀓𑀲𑀮𑁄𑀫𑀦𑁆𑀢𑀺 𑀭𑀲𑁆𑀲𑀮𑁄𑀫𑁂𑀳𑀺 𑀩𑀳𑀼𑀮𑁄𑀫𑀁. 𑀆𑀓𑀺𑀡𑁆𑀡𑀮𑁄𑀫𑀦𑁆𑀢𑀺 𑀚𑀝𑀺𑀢𑀮𑁄𑀫𑀁. 𑀔𑀭𑀮𑁄𑀫𑀦𑁆𑀢𑀺 𑀣𑀤𑁆𑀥𑀮𑁄𑀫𑀁. 𑀤𑀻𑀖𑀮𑁄𑀫𑀦𑁆𑀢𑀺 𑀅𑀭𑀲𑁆𑀲𑀮𑁄𑀫𑀁. 𑀲𑀩𑁆𑀩𑀁 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁨𑁮𑁯. 𑀯𑀸𑀧𑀺𑀢𑀁 𑀔𑁄 𑀢𑁂𑀢𑀺 𑀅𑀲𑀤𑁆𑀥𑀫𑁆𑀫𑀁 𑀲𑀦𑁆𑀥𑀸𑀬𑀸𑀳, 𑀲𑀸 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑁄 𑀘 𑀔𑁄 𑀧𑀝𑀺𑀯𑀼𑀢𑁆𑀢𑀦𑁆𑀢𑀺 𑀆𑀳. 𑀧𑀝𑀺𑀯𑀼𑀢𑁆𑀢𑀁 𑀦𑀸𑀫 𑀉𑀤𑀓𑀯𑀧𑁆𑀧𑁂 𑀩𑀻𑀚𑁂𑀳𑀺 𑀅𑀧𑁆𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁂 𑀧𑀸𑀡𑀓𑁂𑀳𑀺 𑀯𑀺𑀦𑀸𑀲𑀺𑀢𑀩𑀻𑀚𑁂 𑀯𑀸 𑀑𑀓𑀸𑀲𑁂 𑀧𑀼𑀦 𑀩𑀻𑀚𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀉𑀤𑀓𑁂𑀦 𑀆𑀲𑀺𑀢𑁆𑀢𑀁, 𑀣𑀮𑀯𑀧𑁆𑀧𑁂 𑀯𑀺𑀲𑀫𑀧𑀢𑀺𑀢𑀸𑀦𑀁 𑀯𑀸 𑀩𑀻𑀚𑀸𑀦𑀁 𑀲𑀫𑀓𑀭𑀡𑀢𑁆𑀣𑀸𑀬 𑀧𑀼𑀦 𑀅𑀝𑁆𑀞𑀤𑀦𑁆𑀢𑀓𑁂𑀦 𑀲𑀫𑀻𑀓𑀢𑀁, 𑀢𑁂𑀲𑀼 𑀅𑀜𑁆𑀜𑀢𑀭𑀁 𑀲𑀦𑁆𑀥𑀸𑀬 𑀏𑀲𑀸 𑀆𑀳.