𑀧𑀸𑀭𑀸𑀚𑀺𑀓𑀓𑀡𑁆𑀟-𑀅𑀝𑁆𑀞𑀓𑀣𑀸 (𑀤𑀼𑀢𑀺𑀬𑁄 𑀪𑀸𑀕𑁄)

𑁩. 𑀢𑀢𑀺𑀬𑀧𑀸𑀭𑀸𑀚𑀺𑀓𑀁

𑀢𑀢𑀺𑀬𑀁 𑀢𑀻𑀳𑀺 𑀲𑀼𑀤𑁆𑀥𑁂𑀦, 𑀬𑀁 𑀩𑀼𑀤𑁆𑀥𑁂𑀦 𑀯𑀺𑀪𑀸𑀯𑀺𑀢𑀁;

𑀧𑀸𑀭𑀸𑀚𑀺𑀓𑀁 𑀢𑀲𑁆𑀲 𑀤𑀸𑀦𑀺, 𑀧𑀢𑁆𑀢𑁄 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄.

𑀬𑀲𑁆𑀫𑀸 𑀢𑀲𑁆𑀫𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀁, 𑀬𑀁 𑀧𑀼𑀩𑁆𑀩𑁂 𑀘 𑀧𑀓𑀸𑀲𑀺𑀢𑀁;

𑀢𑀁 𑀯𑀚𑁆𑀚𑀬𑀺𑀢𑁆𑀯𑀸 𑀅𑀲𑁆𑀲𑀸𑀧𑀺, 𑀳𑁄𑀢𑀺 𑀲𑀁𑀯𑀡𑁆𑀡𑀦𑀸 𑀅𑀬𑀁.

𑀧𑀞𑀫𑀧𑀜𑁆𑀜𑀢𑁆𑀢𑀺𑀦𑀺𑀤𑀸𑀦𑀯𑀡𑁆𑀡𑀦𑀸

𑁧𑁬𑁨. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀦𑁆𑀢𑀺 𑀏𑀢𑁆𑀣 𑀯𑁂𑀲𑀸𑀮𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀯𑁄𑀳𑀸𑀭𑁂 𑀦𑀕𑀭𑁂. 𑀢𑀜𑁆𑀳𑀺 𑀦𑀕𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀯𑀟𑁆𑀠𑀦𑁂𑀦 𑀯𑀺𑀲𑀸𑀮𑀻𑀪𑀽𑀢𑀢𑁆𑀢𑀸 ‘‘𑀯𑁂𑀲𑀸𑀮𑀻’’𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀫𑁆𑀧𑀺 𑀘 𑀦𑀕𑀭𑀁 𑀲𑀩𑁆𑀩𑀜𑁆𑀜𑀼𑀢𑀧𑁆𑀧𑀢𑁆𑀢𑁂𑀬𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀲𑀩𑁆𑀩𑀸𑀓𑀸𑀭𑁂𑀦 𑀯𑁂𑀧𑀼𑀮𑁆𑀮𑀁 𑀧𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀕𑁄𑀘𑀭𑀕𑀸𑀫𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀸𑀲𑀝𑁆𑀞𑀸𑀦 𑀫𑀸𑀳 𑁋 ‘‘𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬’’𑀦𑁆𑀢𑀺. 𑀢𑀢𑁆𑀣 𑀫𑀳𑀸𑀯𑀦𑀁 𑀦𑀸𑀫 𑀲𑀬𑀁𑀚𑀸𑀢𑀁 𑀅𑀭𑁄𑀧𑀺𑀫𑀁 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀁. 𑀓𑀧𑀺𑀮𑀯𑀢𑁆𑀣𑀼𑀲𑀸𑀫𑀦𑁆𑀢𑀸 𑀧𑀦 𑀫𑀳𑀸𑀯𑀦𑀁 𑀳𑀺𑀫𑀯𑀦𑁆𑀢𑁂𑀦 𑀲𑀳 𑀏𑀓𑀸𑀩𑀤𑁆𑀥𑀁 𑀅𑀧𑀭𑀺𑀘𑁆𑀙𑁂𑀤𑀁 𑀳𑀼𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀆𑀳𑀘𑁆𑀘 𑀞𑀺𑀢𑀁. 𑀇𑀤𑀁 𑀢𑀸𑀤𑀺𑀲𑀁 𑀦 𑀳𑁄𑀢𑀺, 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀦𑁆𑀢𑀺 𑀫𑀳𑀸𑀯𑀦𑀁. 𑀓𑀽𑀝𑀸𑀕𑀸𑀭𑀲𑀸𑀮𑀸 𑀧𑀦 𑀫𑀳𑀸𑀯𑀦𑀁 𑀦𑀺𑀲𑁆𑀲𑀸𑀬 𑀓𑀢𑁂 𑀆𑀭𑀸𑀫𑁂 𑀓𑀽𑀝𑀸𑀕𑀸𑀭𑀁 𑀅𑀦𑁆𑀢𑁄 𑀓𑀢𑁆𑀯𑀸 𑀳𑀁𑀲𑀯𑀝𑁆𑀝𑀓𑀘𑁆𑀙𑀤𑀦𑁂𑀦 𑀓𑀢𑀸 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀲𑀼𑀪𑀓𑀣𑀁 𑀓𑀣𑁂𑀢𑀻𑀢𑀺 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀅𑀲𑀼𑀪𑀸𑀓𑀸𑀭𑀲𑀦𑁆𑀤𑀲𑁆𑀲𑀦𑀧𑁆𑀧𑀯𑀢𑁆𑀢𑀁 𑀓𑀸𑀬𑀯𑀺𑀘𑁆𑀙𑀦𑁆𑀤𑀦𑀺𑀬𑀓𑀣𑀁 𑀓𑀣𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸 𑀮𑁄𑀫𑀸…𑀧𑁂. … 𑀫𑀼𑀢𑁆𑀢’’𑀦𑁆𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀩𑁆𑀩𑀸𑀓𑀸𑀭𑁂𑀦𑀧𑀺 𑀯𑀺𑀘𑀺𑀦𑀦𑁆𑀢𑁄 𑀦 𑀓𑁄𑀘𑀺 𑀓𑀺𑀜𑁆𑀘𑀺 𑀫𑀼𑀢𑁆𑀢𑀁 𑀯𑀸 𑀫𑀡𑀺𑀁 𑀯𑀸 𑀯𑁂𑀴𑀼𑀭𑀺𑀬𑀁 𑀯𑀸 𑀅𑀕𑀭𑀼𑀁 𑀯𑀸 𑀘𑀦𑁆𑀤𑀦𑀁 𑀯𑀸 𑀓𑀼𑀗𑁆𑀓𑀼𑀫𑀁 𑀯𑀸 𑀓𑀧𑁆𑀧𑀽𑀭𑀁 𑀯𑀸 𑀯𑀸𑀲𑀘𑀼𑀡𑁆𑀡𑀸𑀤𑀻𑀦𑀺 𑀯𑀸 𑀅𑀡𑀼𑀫𑀢𑁆𑀢𑀫𑁆𑀧𑀺 𑀲𑀼𑀘𑀺𑀪𑀸𑀯𑀁 𑀧𑀲𑁆𑀲𑀢𑀺. 𑀅𑀣 𑀔𑁄 𑀧𑀭𑀫𑀤𑀼𑀕𑁆𑀕𑀦𑁆𑀥𑀁 𑀚𑁂𑀕𑀼𑀘𑁆𑀙𑀁 𑀅𑀲𑁆𑀲𑀺𑀭𑀻𑀓𑀤𑀲𑁆𑀲𑀦𑀁 𑀓𑁂𑀲𑀮𑁄𑀫𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀁 𑀅𑀲𑀼𑀘𑀺𑀁𑀬𑁂𑀯 𑀧𑀲𑁆𑀲𑀢𑀺. 𑀢𑀲𑁆𑀫𑀸 𑀦 𑀏𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀓𑀭𑀡𑀻𑀬𑁄. 𑀬𑁂𑀧𑀺 𑀳𑀺 𑀉𑀢𑁆𑀢𑀫𑀗𑁆𑀕𑁂 𑀲𑀺𑀭𑀲𑁆𑀫𑀺𑀁 𑀚𑀸𑀢𑀸 𑀓𑁂𑀲𑀸 𑀦𑀸𑀫, 𑀢𑁂𑀧𑀺 𑀅𑀲𑀼𑀪𑀸 𑀘𑁂𑀯 𑀅𑀲𑀼𑀘𑀺𑀦𑁄 𑀘 𑀧𑀝𑀺𑀓𑁆𑀓𑀽𑀮𑀸 𑀘. 𑀲𑁄 𑀘 𑀦𑁂𑀲𑀁 𑀅𑀲𑀼𑀪𑀸𑀲𑀼𑀘𑀺𑀧𑀝𑀺𑀓𑁆𑀓𑀽𑀮𑀪𑀸𑀯𑁄 𑀯𑀡𑁆𑀡𑀢𑁄𑀧𑀺 𑀲𑀡𑁆𑀞𑀸𑀦𑀢𑁄𑀧𑀺 𑀕𑀦𑁆𑀥𑀢𑁄𑀧𑀺 𑀆𑀲𑀬𑀢𑁄𑀧𑀺 𑀑𑀓𑀸𑀲𑀢𑁄𑀧𑀻𑀢𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀮𑁄𑀫𑀸𑀤𑀻𑀦𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁮𑁨) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀪𑀕𑀯𑀸 𑀏𑀓𑀫𑁂𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀧𑀜𑁆𑀘𑀧𑀜𑁆𑀘𑀧𑁆𑀧𑀪𑁂𑀤𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀲𑀼𑀪𑀓𑀣𑀁 𑀓𑀣𑁂𑀢𑀺.

𑀅𑀲𑀼𑀪𑀸𑀬 𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀯𑀲𑁂𑀦 𑀅𑀲𑀼𑀪𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀤𑀪𑀸𑀚𑀦𑀻𑀬𑁂𑀦 𑀢𑀁 𑀯𑀺𑀪𑀚𑀦𑁆𑀢𑁄 𑀯𑀡𑁆𑀡𑁂𑀦𑁆𑀢𑁄 𑀲𑀁𑀯𑀡𑁆𑀡𑁂𑀦𑁆𑀢𑁄 𑀅𑀲𑀼𑀪𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺. 𑀅𑀲𑀼𑀪𑀪𑀸𑀯𑀦𑀸𑀬 𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 𑀬𑀸 𑀅𑀬𑀁 𑀓𑁂𑀲𑀸𑀤𑀻𑀲𑀼 𑀯𑀸 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀯𑀢𑁆𑀣𑀽𑀲𑀼 𑀅𑀲𑀼𑀪𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀸𑀯𑀦𑀸 𑀯𑀟𑁆𑀠𑀦𑀸 𑀨𑀸𑀢𑀺𑀓𑀫𑁆𑀫𑀁, 𑀢𑀲𑁆𑀲𑀸 𑀅𑀲𑀼𑀪𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑁄 𑀯𑀡𑁆𑀡𑀁 𑀪𑀸𑀲𑀢𑀺, 𑀕𑀼𑀡𑀁 𑀧𑀭𑀺𑀓𑀺𑀢𑁆𑀢𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀅𑀲𑀼𑀪𑀪𑀸𑀯𑀦𑀸𑀪𑀺𑀬𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁂𑀲𑀸𑀤𑀻𑀲𑀼 𑀯𑀸 𑀯𑀢𑁆𑀣𑀽𑀲𑀼 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀯𑀸 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀧𑀞𑀫𑀁 𑀛𑀸𑀦𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑀁 𑀧𑀞𑀫𑀚𑁆𑀛𑀸𑀦𑀲𑀗𑁆𑀔𑀸𑀢𑀁 𑀘𑀺𑀢𑁆𑀢𑀫𑀜𑁆𑀚𑀽𑀲𑀁 𑀦𑀺𑀲𑁆𑀲𑀸𑀬 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀉𑀢𑁆𑀢𑀫𑀢𑁆𑀣𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺.

𑀢𑀢𑁆𑀭𑀺𑀫𑀸𑀦𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀤𑀲 𑀮𑀓𑁆𑀔𑀡𑀸𑀦𑀺 𑁋 𑀧𑀸𑀭𑀺𑀧𑀦𑁆𑀣𑀺𑀓𑀢𑁄 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺, 𑀫𑀚𑁆𑀛𑀺𑀫𑀲𑁆𑀲 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀲𑁆𑀲 𑀧𑀝𑀺𑀧𑀢𑁆𑀢𑀺, 𑀢𑀢𑁆𑀣 𑀘𑀺𑀢𑁆𑀢𑀧𑀓𑁆𑀔𑀦𑁆𑀤𑀦𑀁, 𑀯𑀺𑀲𑀼𑀤𑁆𑀥𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀁, 𑀲𑀫𑀣𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀁, 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀁, 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀆𑀲𑁂𑀯𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸𑀢𑀺.

𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋 ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀓𑁄 𑀆𑀤𑀺, 𑀓𑀺𑀁 𑀫𑀚𑁆𑀛𑁂, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁? 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀆𑀤𑀺𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀆𑀤𑀺𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑁋 𑀬𑁄 𑀢𑀲𑁆𑀲 𑀧𑀭𑀺𑀧𑀦𑁆𑀣𑁄 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀬𑀜𑁆𑀘 𑀧𑀭𑀺𑀧𑀦𑁆𑀣𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀬𑀜𑁆𑀘 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀬𑀜𑁆𑀘 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀆𑀤𑀺𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀧𑀞𑀫𑀁 𑀛𑀸𑀦𑀁 𑀆𑀤𑀺𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘’.

‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀫𑀚𑁆𑀛𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀫𑀚𑁆𑀛𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑁋 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀲𑀫𑀣𑀧𑁆𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀬𑀜𑁆𑀘 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀬𑀜𑁆𑀘 𑀲𑀫𑀣𑀧𑁆𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀬𑀜𑁆𑀘 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀫𑀚𑁆𑀛𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀧𑀞𑀫𑀁 𑀛𑀸𑀦𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘’.

‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁, 𑀧𑀭𑀺𑀬𑁄𑀲𑀸𑀦𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀧𑀭𑀺𑀬𑁄𑀲𑀸𑀦𑀲𑁆𑀲 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀦𑀺 𑁋 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀆𑀲𑁂𑀯𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁, 𑀧𑀭𑀺𑀬𑁄𑀲𑀸𑀦𑀲𑁆𑀲 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀧𑀞𑀫𑀁 𑀛𑀸𑀦𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀘𑀢𑀼𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘. ‘‘𑀏𑀯𑀁 𑀢𑀺𑀯𑀺𑀥𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀓𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀯𑀺𑀢𑀓𑁆𑀓𑀲𑀫𑁆𑀧𑀦𑁆𑀦𑀜𑁆𑀘𑁂𑀯 𑀳𑁄𑀢𑀺 𑀯𑀺𑀘𑀸𑀭𑀲𑀫𑁆𑀧𑀦𑁆𑀦𑀜𑁆𑀘 𑀧𑀻𑀢𑀺𑀲𑀫𑁆𑀧𑀦𑁆𑀦𑀜𑁆𑀘 𑀲𑀼𑀔𑀲𑀫𑁆𑀧𑀦𑁆𑀦𑀜𑁆𑀘 𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀜𑁆𑀘 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀜𑁆𑀘 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀜𑁆𑀘 𑀲𑀢𑀺𑀲𑀫𑁆𑀧𑀦𑁆𑀦𑀜𑁆𑀘 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀜𑁆𑀘 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀜𑁆𑀘𑀸’’𑀢𑀺 (𑀧𑀝𑀺. 𑀭𑁄. 𑁧.𑁧𑁫𑁮).

𑀆𑀤𑀺𑀲𑁆𑀲 𑀆𑀤𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸 𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 ‘‘𑀏𑀯𑀫𑁆𑀧𑀺 𑀇𑀢𑁆𑀣𑀫𑁆𑀧𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀯𑀢𑁆𑀣𑀸𑀦𑀁 𑀓𑀢𑁆𑀯𑀸 𑀆𑀤𑀺𑀲𑀦𑁆𑀢𑁄 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀦𑀺𑀲𑀁𑀲𑀁 𑀓𑀣𑁂𑀢𑀺, 𑀕𑀼𑀡𑀁 𑀧𑀭𑀺𑀓𑀺𑀢𑁆𑀢𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀅𑀲𑀼𑀪𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀧𑀝𑀺𑀮𑀻𑀬𑀢𑀺 𑀧𑀝𑀺𑀓𑀼𑀝𑀢𑀺 𑀧𑀝𑀺𑀯𑀝𑁆𑀝𑀢𑀺, 𑀦 𑀲𑀫𑁆𑀧𑀲𑀸𑀭𑀻𑀬𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀝𑀧𑀢𑁆𑀢𑀁 𑀯𑀸 𑀦𑁆𑀳𑀸𑀭𑀼𑀤𑀤𑁆𑀤𑀼𑀮𑀁 𑀯𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀁 𑀧𑀝𑀺𑀮𑀻𑀬𑀢𑀺 𑀧𑀝𑀺𑀓𑀼𑀝𑀢𑀺 𑀧𑀝𑀺𑀯𑀝𑁆𑀝𑀢𑀺, 𑀦 𑀲𑀫𑁆𑀧𑀲𑀸𑀭𑀻𑀬𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀼𑀪𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀧𑀝𑀺𑀮𑀻𑀬𑀢𑀺 𑀧𑀝𑀺𑀓𑀼𑀝𑀢𑀺 𑀧𑀝𑀺𑀯𑀝𑁆𑀝𑀢𑀺, 𑀦 𑀲𑀫𑁆𑀧𑀲𑀸𑀭𑀻𑀬𑀢𑀻’’𑀢𑀺 (𑀅. 𑀦𑀺. 𑁭.𑁪𑁯).

𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀦𑁆𑀢𑀺 𑀅𑀳𑀁 𑀪𑀺𑀓𑁆𑀔𑀯𑁂 𑀏𑀓𑀁 𑀅𑀤𑁆𑀥𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁 𑀦𑀺𑀮𑀻𑀬𑀺𑀢𑀼𑀁 𑀏𑀓𑁄𑀯 𑀳𑀼𑀢𑁆𑀯𑀸 𑀯𑀺𑀳𑀭𑀺𑀢𑀼𑀁 𑀇𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀦𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑁂𑀦𑀸𑀢𑀺 𑀬𑁄 𑀅𑀢𑁆𑀢𑀦𑀸 𑀧𑀬𑀼𑀢𑁆𑀢𑀯𑀸𑀘𑀁 𑀅𑀓𑀢𑁆𑀯𑀸 𑀫𑀫𑀢𑁆𑀣𑀸𑀬 𑀲𑀤𑁆𑀥𑁂𑀲𑀼 𑀓𑀼𑀮𑁂𑀲𑀼 𑀧𑀝𑀺𑀬𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀁 𑀦𑀻𑀳𑀭𑀺𑀢𑁆𑀯𑀸 𑀫𑀬𑁆𑀳𑀁 𑀉𑀧𑀦𑀸𑀫𑁂𑀢𑀺, 𑀢𑀁 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀦𑀫𑁆𑀳𑀺 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄𑀢𑀺.

𑀓𑀲𑁆𑀫𑀸 𑀧𑀦 𑀏𑀯𑀫𑀸𑀳𑀸𑀢𑀺? 𑀅𑀢𑀻𑀢𑁂 𑀓𑀺𑀭 𑀧𑀜𑁆𑀘𑀲𑀢𑀸 𑀫𑀺𑀕𑀮𑀼𑀤𑁆𑀤𑀓𑀸 𑀫𑀳𑀢𑀻𑀳𑀺 𑀤𑀡𑁆𑀟𑀯𑀸𑀕𑀼𑀭𑀸𑀳𑀺 𑀅𑀭𑀜𑁆𑀜𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑀸 𑀏𑀓𑀢𑁄𑀬𑁂𑀯 𑀬𑀸𑀯𑀚𑀻𑀯𑀁 𑀫𑀺𑀕𑀧𑀓𑁆𑀔𑀺𑀖𑀸𑀢𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑁆𑀯𑀸 𑀦𑀺𑀭𑀬𑁂 𑀉𑀧𑀧𑀦𑁆𑀦𑀸; 𑀢𑁂 𑀢𑀢𑁆𑀣 𑀧𑀘𑁆𑀘𑀺𑀢𑁆𑀯𑀸 𑀧𑀼𑀩𑁆𑀩𑁂 𑀓𑀢𑁂𑀦 𑀓𑁂𑀦𑀘𑀺𑀤𑁂𑀯 𑀓𑀼𑀲𑀮𑀓𑀫𑁆𑀫𑁂𑀦 𑀫𑀦𑀼𑀲𑁆𑀲𑁂𑀲𑀼 𑀉𑀧𑀧𑀦𑁆𑀦𑀸 𑀓𑀮𑁆𑀬𑀸𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀲𑀩𑁆𑀩𑁂𑀧𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀁𑀲𑀼; 𑀢𑁂𑀲𑀁 𑀢𑀢𑁄 𑀫𑀽𑀮𑀸𑀓𑀼𑀲𑀮𑀓𑀫𑁆𑀫𑀢𑁄 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀅𑀧𑀭𑀸𑀧𑀭𑀘𑁂𑀢𑀦𑀸 𑀢𑀲𑁆𑀫𑀺𑀁 𑀅𑀤𑁆𑀥𑀫𑀸𑀲𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀽𑀧𑀓𑁆𑀓𑀫𑁂𑀦 𑀘 𑀧𑀭𑀽𑀧𑀓𑁆𑀓𑀫𑁂𑀦 𑀘 𑀚𑀻𑀯𑀢𑀼𑀧𑀘𑁆𑀙𑁂𑀤𑀸𑀬 𑀑𑀓𑀸𑀲𑀫𑀓𑀸𑀲𑀺, 𑀢𑀁 𑀪𑀕𑀯𑀸 𑀅𑀤𑁆𑀤𑀲. 𑀓𑀫𑁆𑀫𑀯𑀺𑀧𑀸𑀓𑁄 𑀦𑀸𑀫 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀧𑀝𑀺𑀩𑀸𑀳𑀺𑀢𑀼𑀁. 𑀢𑁂𑀲𑀼 𑀘 𑀪𑀺𑀓𑁆𑀔𑀽𑀲𑀼 𑀧𑀼𑀣𑀼𑀚𑁆𑀚𑀦𑀸𑀧𑀺 𑀅𑀢𑁆𑀣𑀺 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀅𑀦𑀸𑀕𑀸𑀫𑀻𑀔𑀻𑀡𑀸𑀲𑀯𑀸𑀧𑀺. 𑀢𑀢𑁆𑀣 𑀔𑀻𑀡𑀸𑀲𑀯𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸, 𑀇𑀢𑀭𑁂 𑀅𑀭𑀺𑀬𑀲𑀸𑀯𑀓𑀸 𑀦𑀺𑀬𑀢𑀕𑀢𑀺𑀓𑀸 𑀲𑀼𑀕𑀢𑀺𑀧𑀭𑀸𑀬𑀡𑀸, 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀦 𑀕𑀢𑀺 𑀅𑀦𑀺𑀬𑀢𑀸. 𑀅𑀣 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀅𑀢𑁆𑀢𑀪𑀸𑀯𑁂 𑀙𑀦𑁆𑀤𑀭𑀸𑀕𑁂𑀦 𑀫𑀭𑀡𑀪𑀬𑀪𑀻𑀢𑀸 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀕𑀢𑀺𑀁 𑀯𑀺𑀲𑁄𑀥𑁂𑀢𑀼𑀁, 𑀳𑀦𑁆𑀤 𑀦𑁂𑀲𑀁 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀸𑀬 𑀅𑀲𑀼𑀪𑀓𑀣𑀁 𑀓𑀣𑁂𑀫𑀺. 𑀢𑀁 𑀲𑀼𑀢𑁆𑀯𑀸 𑀅𑀢𑁆𑀢𑀪𑀸𑀯𑁂 𑀯𑀺𑀕𑀢𑀘𑁆𑀙𑀦𑁆𑀤𑀭𑀸𑀕𑀢𑀸𑀬 𑀕𑀢𑀺𑀯𑀺𑀲𑁄𑀥𑀦𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀦𑁂𑀲𑀁 𑀫𑀫 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀸 𑀲𑀸𑀢𑁆𑀣𑀺𑀓𑀸 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑀢𑁄 𑀢𑁂𑀲𑀁 𑀅𑀦𑀼𑀕𑁆𑀕𑀳𑀸𑀬 𑀅𑀲𑀼𑀪𑀓𑀣𑀁 𑀓𑀣𑁂𑀲𑀺 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦, 𑀦𑁄 𑀫𑀭𑀡𑀯𑀡𑁆𑀡𑀲𑀁𑀯𑀡𑁆𑀡𑀦𑀸𑀥𑀺𑀧𑁆𑀧𑀸𑀬𑁂𑀦. 𑀓𑀣𑁂𑀢𑁆𑀯𑀸 𑀘 𑀧𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀫𑀁 𑀇𑀫𑀁 𑀅𑀤𑁆𑀥𑀫𑀸𑀲𑀁 𑀪𑀺𑀓𑁆𑀔𑀽 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, ‘𑀅𑀚𑁆𑀚 𑀏𑀓𑁄 𑀪𑀺𑀓𑁆𑀔𑀼 𑀫𑀢𑁄, 𑀅𑀚𑁆𑀚 𑀤𑁆𑀯𑁂…𑀧𑁂… 𑀅𑀚𑁆𑀚 𑀤𑀲𑀸’𑀢𑀺 𑀆𑀕𑀦𑁆𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀲𑁆𑀲𑀦𑁆𑀢𑀺. 𑀅𑀬𑀜𑁆𑀘 𑀓𑀫𑁆𑀫𑀯𑀺𑀧𑀸𑀓𑁄 𑀦 𑀲𑀓𑁆𑀓𑀸 𑀫𑀬𑀸 𑀯𑀸 𑀅𑀜𑁆𑀜𑁂𑀦 𑀯𑀸 𑀧𑀝𑀺𑀩𑀸𑀳𑀺𑀢𑀼𑀁. 𑀲𑁆𑀯𑀸𑀳𑀁 𑀢𑀁 𑀲𑀼𑀢𑁆𑀯𑀸𑀧𑀺 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺? 𑀓𑀺𑀁 𑀫𑁂 𑀅𑀦𑀢𑁆𑀣𑀓𑁂𑀦 𑀅𑀦𑀬𑀩𑁆𑀬𑀲𑀦𑁂𑀦 𑀲𑀼𑀢𑁂𑀦? 𑀳𑀦𑁆𑀤𑀸𑀳𑀁 𑀪𑀺𑀓𑁆𑀔𑀽𑀦𑀁 𑀅𑀤𑀲𑁆𑀲𑀦𑀁 𑀉𑀧𑀕𑀘𑁆𑀙𑀸𑀫𑀻’’𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀫𑀸𑀲𑀁 𑀧𑀢𑀺𑀲𑀮𑁆𑀮𑀻𑀬𑀺𑀢𑀼𑀁; 𑀦𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑁂𑀦𑀸’’𑀢𑀺.

𑀅𑀧𑀭𑁂 𑀧𑀦𑀸𑀳𑀼 𑁋 ‘‘𑀧𑀭𑀽𑀧𑀯𑀸𑀤𑀯𑀺𑀯𑀚𑁆𑀚𑀦𑀢𑁆𑀣𑀁 𑀏𑀯𑀁 𑀯𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀦𑁄’’𑀢𑀺. 𑀧𑀭𑁂 𑀓𑀺𑀭 𑀪𑀕𑀯𑀦𑁆𑀢𑀁 𑀉𑀧𑀯𑀤𑀺𑀲𑁆𑀲𑀦𑁆𑀢𑀺 𑁋 ‘‘𑀅𑀬𑀁 ‘𑀲𑀩𑁆𑀩𑀜𑁆𑀜𑀽, 𑀅𑀳𑀁 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀻’𑀢𑀺 𑀧𑀝𑀺𑀚𑀸𑀦𑀫𑀸𑀦𑁄 𑀅𑀢𑁆𑀢𑀦𑁄𑀧𑀺 𑀲𑀸𑀯𑀓𑁂 𑀅𑀜𑁆𑀜𑀫𑀜𑁆𑀜𑀁 𑀖𑀸𑀢𑁂𑀦𑁆𑀢𑁂 𑀦𑀺𑀯𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀓𑀺𑀫𑀜𑁆𑀜𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺? 𑀢𑀢𑁆𑀣 𑀧𑀡𑁆𑀟𑀺𑀢𑀸 𑀯𑀓𑁆𑀔𑀦𑁆𑀢𑀺 𑁋 ‘‘𑀪𑀕𑀯𑀸 𑀧𑀝𑀺𑀲𑀮𑁆𑀮𑀸𑀦𑀫𑀦𑀼𑀬𑀼𑀢𑁆𑀢𑁄 𑀦𑀬𑀺𑀫𑀁 𑀧𑀯𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀓𑁄𑀘𑀺𑀲𑁆𑀲 𑀆𑀭𑁄𑀘𑀬𑀺𑀢𑀸𑀧𑀺 𑀦𑀢𑁆𑀣𑀺, 𑀲𑀘𑁂 𑀚𑀸𑀦𑁂𑀬𑁆𑀬 𑀅𑀤𑁆𑀥𑀸 𑀦𑀺𑀯𑀸𑀭𑁂𑀬𑁆𑀬𑀸’’𑀢𑀺. 𑀇𑀤𑀁 𑀧𑀦 𑀇𑀘𑁆𑀙𑀸𑀫𑀢𑁆𑀢𑀁, 𑀧𑀞𑀫𑀫𑁂𑀯𑁂𑀢𑁆𑀣 𑀓𑀸𑀭𑀡𑀁. 𑀦𑀸𑀲𑁆𑀲𑀼𑀥𑀸𑀢𑀺 𑀏𑀢𑁆𑀣 ‘‘𑀅𑀲𑁆𑀲𑀼𑀥𑀸’’𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀅𑀯𑀥𑀸𑀭𑀡𑀢𑁆𑀣𑁂 𑀯𑀸 𑀦𑀺𑀧𑀸𑀢𑁄; 𑀦𑁂𑀯 𑀓𑁄𑀘𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀢𑀻𑀢𑀺 𑀅𑀢𑁆𑀣𑁄.

𑀅𑀦𑁂𑀓𑁂𑀳𑀺 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀯𑁄𑀓𑀸𑀭𑁄 𑀅𑀲𑁆𑀲𑀸𑀢𑀺 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑁄; 𑀅𑀦𑁂𑀓𑀸𑀓𑀸𑀭𑀯𑁄𑀓𑀺𑀡𑁆𑀡𑁄 𑀅𑀦𑁂𑀓𑀓𑀸𑀭𑀡𑀲𑀫𑁆𑀫𑀺𑀲𑁆𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁄 𑀲𑁄? 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁄, 𑀢𑀁 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀻𑀢𑀺 𑀬𑀼𑀢𑁆𑀢𑀧𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀅𑀝𑁆𑀝𑀻𑀬𑀦𑁆𑀢𑀻𑀢𑀺 𑀲𑀓𑁂𑀦 𑀓𑀸𑀬𑁂𑀦 𑀅𑀝𑁆𑀝𑀸 𑀤𑀼𑀓𑁆𑀔𑀺𑀢𑀸 𑀳𑁄𑀦𑁆𑀢𑀺. 𑀳𑀭𑀸𑀬𑀦𑁆𑀢𑀻𑀢𑀺 𑀮𑀚𑁆𑀚𑀦𑁆𑀢𑀺. 𑀚𑀺𑀕𑀼𑀘𑁆𑀙𑀦𑁆𑀢𑀻𑀢𑀺 𑀲𑀜𑁆𑀚𑀸𑀢𑀚𑀺𑀕𑀼𑀘𑁆𑀙𑀸 𑀳𑁄𑀦𑁆𑀢𑀺. 𑀤𑀳𑀭𑁄𑀢𑀺 𑀢𑀭𑀼𑀡𑁄. 𑀬𑀼𑀯𑀸𑀢𑀺 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀫𑀡𑁆𑀟𑀦𑀓𑀚𑀸𑀢𑀺𑀓𑁄𑀢𑀺 𑀫𑀡𑁆𑀟𑀦𑀓𑀧𑀓𑀢𑀺𑀓𑁄. 𑀲𑀻𑀲𑀁𑀦𑁆𑀳𑀸𑀢𑁄𑀢𑀺 𑀲𑀻𑀲𑁂𑀦 𑀲𑀤𑁆𑀥𑀺𑀁 𑀦𑁆𑀳𑀸𑀢𑁄. 𑀤𑀳𑀭𑁄 𑀬𑀼𑀯𑀸𑀢𑀺 𑀘𑁂𑀢𑁆𑀣 𑀤𑀳𑀭𑀯𑀘𑀦𑁂𑀦 𑀧𑀞𑀫𑀬𑁄𑀩𑁆𑀩𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀞𑀫𑀬𑁄𑀩𑁆𑀩𑀦𑁂 𑀳𑀺 𑀲𑀢𑁆𑀢𑀸 𑀯𑀺𑀲𑁂𑀲𑁂𑀦 𑀫𑀡𑁆𑀟𑀦𑀓𑀚𑀸𑀢𑀺𑀓𑀸 𑀳𑁄𑀦𑁆𑀢𑀺. 𑀲𑀻𑀲𑀁𑀦𑁆𑀳𑀸𑀢𑁄𑀢𑀺 𑀇𑀫𑀺𑀦𑀸 𑀫𑀡𑁆𑀟𑀦𑀸𑀦𑀼𑀬𑁄𑀕𑀓𑀸𑀮𑀁. 𑀬𑀼𑀯𑀸𑀧𑀺 𑀳𑀺 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀢𑁆𑀯𑀸 𑀲𑀁𑀓𑀺𑀮𑀺𑀝𑁆𑀞𑀲𑀭𑀻𑀭𑁄 𑀦 𑀫𑀡𑁆𑀟𑀦𑀸𑀦𑀼𑀬𑀼𑀢𑁆𑀢𑁄 𑀳𑁄𑀢𑀺; 𑀲𑀻𑀲𑀁𑀦𑁆𑀳𑀸𑀢𑁄 𑀧𑀦 𑀲𑁄 𑀫𑀡𑁆𑀟𑀦𑀫𑁂𑀯𑀸𑀦𑀼𑀬𑀼𑀜𑁆𑀚𑀢𑀺. 𑀅𑀳𑀺𑀓𑀼𑀡𑀧𑀸𑀤𑀻𑀦𑀺 𑀤𑀝𑁆𑀞𑀼𑀫𑁆𑀧𑀺 𑀦 𑀇𑀘𑁆𑀙𑀢𑀺. 𑀲𑁄 𑀢𑀲𑁆𑀫𑀺𑀁 𑀔𑀡𑁂 𑀅𑀳𑀺𑀓𑀼𑀡𑀧𑁂𑀦 𑀯𑀸 𑀓𑀼𑀓𑁆𑀓𑀼𑀭𑀓𑀼𑀡𑀧𑁂𑀦 𑀯𑀸 𑀫𑀦𑀼𑀲𑁆𑀲𑀓𑀼𑀡𑀧𑁂𑀦 𑀯𑀸 𑀓𑀡𑁆𑀞𑁂 𑀆𑀲𑀢𑁆𑀢𑁂𑀦 𑀓𑁂𑀦𑀘𑀺𑀤𑁂𑀯 𑀧𑀘𑁆𑀘𑀢𑁆𑀣𑀺𑀓𑁂𑀦 𑀆𑀦𑁂𑀢𑁆𑀯𑀸 𑀓𑀡𑁆𑀞𑁂 𑀩𑀤𑁆𑀥𑁂𑀦 𑀧𑀝𑀺𑀫𑀼𑀓𑁆𑀓𑁂𑀦 𑀬𑀣𑀸 𑀅𑀝𑁆𑀝𑀻𑀬𑁂𑀬𑁆𑀬 𑀳𑀭𑀸𑀬𑁂𑀬𑁆𑀬 𑀚𑀺𑀕𑀼𑀘𑁆𑀙𑁂𑀬𑁆𑀬; 𑀏𑀯𑀫𑁂𑀯 𑀢𑁂 𑀪𑀺𑀓𑁆𑀔𑀽 𑀲𑀓𑁂𑀦 𑀓𑀸𑀬𑁂𑀦 𑀅𑀝𑁆𑀝𑀻𑀬𑀦𑁆𑀢𑀸 𑀳𑀭𑀸𑀬𑀦𑁆𑀢𑀸 𑀚𑀺𑀕𑀼𑀘𑁆𑀙𑀦𑁆𑀢𑀸 𑀲𑁄 𑀯𑀺𑀬 𑀧𑀼𑀭𑀺𑀲𑁄 𑀢𑀁 𑀓𑀼𑀡𑀧𑀁 𑀯𑀺𑀕𑀢𑀘𑁆𑀙𑀦𑁆𑀤𑀭𑀸𑀕𑀢𑀸𑀬 𑀅𑀢𑁆𑀢𑀦𑁄 𑀓𑀸𑀬𑀁 𑀧𑀭𑀺𑀘𑁆𑀘𑀚𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀲𑀢𑁆𑀣𑀁 𑀆𑀤𑀸𑀬 𑀅𑀢𑁆𑀢𑀦𑀸𑀧𑀺 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺. ‘‘𑀢𑁆𑀯𑀁 𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀺; 𑀅𑀳𑀁 𑀢’’𑀦𑁆𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺.

𑀫𑀺𑀕𑀮𑀡𑁆𑀟𑀺𑀓𑀫𑁆𑀧𑀺 𑀲𑀫𑀡𑀓𑀼𑀢𑁆𑀢𑀓𑀦𑁆𑀢𑀺 𑀫𑀺𑀕𑀮𑀡𑁆𑀟𑀺𑀓𑁄𑀢𑀺 𑀢𑀲𑁆𑀲 𑀦𑀸𑀫𑀁; 𑀲𑀫𑀡𑀓𑀼𑀢𑁆𑀢𑀓𑁄𑀢𑀺 𑀲𑀫𑀡𑀯𑁂𑀲𑀥𑀸𑀭𑀓𑁄. 𑀲𑁄 𑀓𑀺𑀭 𑀲𑀺𑀔𑀸𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑀻𑀲𑀁 𑀫𑀼𑀡𑁆𑀟𑁂𑀢𑁆𑀯𑀸 𑀏𑀓𑀁 𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀅𑀁𑀲𑁂 𑀓𑀢𑁆𑀯𑀸 𑀯𑀺𑀳𑀸𑀭𑀁𑀬𑁂𑀯 𑀉𑀧𑀦𑀺𑀲𑁆𑀲𑀸𑀬 𑀯𑀺𑀖𑀸𑀲𑀸𑀤𑀪𑀸𑀯𑁂𑀦 𑀚𑀻𑀯𑀢𑀺. 𑀢𑀫𑁆𑀧𑀺 𑀫𑀺𑀕𑀮𑀡𑁆𑀟𑀺𑀓𑀁 𑀲𑀫𑀡𑀓𑀼𑀢𑁆𑀢𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺. 𑀲𑀸𑀥𑀽𑀢𑀺 𑀆𑀬𑀸𑀘𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀦𑁄𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀁, 𑀲𑀸𑀥𑀼 𑀆𑀯𑀼𑀲𑁄 𑀅𑀫𑁆𑀳𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀘 𑀅𑀭𑀺𑀬𑀸 𑀦𑁂𑀯 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑀺𑀁𑀲𑀼 𑀦 𑀲𑀫𑀸𑀤𑀧𑁂𑀲𑀼𑀁, 𑀦 𑀲𑀫𑀦𑀼𑀜𑁆𑀜𑀸 𑀅𑀳𑁂𑀲𑀼𑀁. 𑀧𑀼𑀣𑀼𑀚𑁆𑀚𑀦𑀸 𑀧𑀦 𑀲𑀩𑁆𑀩𑀫𑀓𑀁𑀲𑀼. 𑀮𑁄𑀳𑀺𑀢𑀓𑀦𑁆𑀢𑀺 𑀮𑁄𑀳𑀺𑀢𑀫𑀓𑁆𑀔𑀺𑀢𑀁. 𑀬𑁂𑀦 𑀯𑀕𑁆𑀕𑀼𑀫𑀼𑀤𑀸𑀦𑀤𑀻𑀢𑀺 𑀯𑀕𑁆𑀕𑀼𑀫𑀢𑀸 𑀮𑁄𑀓𑀲𑁆𑀲 𑀧𑀼𑀜𑁆𑀜𑀲𑀫𑁆𑀫𑀢𑀸 𑀦𑀤𑀻. 𑀲𑁄𑀧𑀺 𑀓𑀺𑀭 ‘‘𑀢𑀁 𑀧𑀸𑀧𑀁 𑀢𑀢𑁆𑀣 𑀧𑀯𑀸𑀳𑁂𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀜𑀸𑀬 𑀕𑀢𑁄, 𑀦𑀤𑀺𑀬𑀸 𑀆𑀦𑀼𑀪𑀸𑀯𑁂𑀦 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀸𑀧𑀁 𑀧𑀳𑀻𑀦𑀁 𑀦𑀸𑀫 𑀦𑀢𑁆𑀣𑀺.

𑁧𑁬𑁩. 𑀅𑀳𑀼𑀤𑁂𑀯 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀢𑁂𑀲𑀼 𑀓𑀺𑀭 𑀪𑀺𑀓𑁆𑀔𑀽𑀲𑀼 𑀓𑁂𑀦𑀘𑀺𑀧𑀺 𑀓𑀸𑀬𑀯𑀺𑀓𑀸𑀭𑁄 𑀯𑀸 𑀯𑀘𑀻𑀯𑀺𑀓𑀸𑀭𑁄 𑀯𑀸 𑀦 𑀓𑀢𑁄, 𑀲𑀩𑁆𑀩𑁂 𑀲𑀢𑀸 𑀲𑀫𑁆𑀧𑀚𑀸𑀦𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀦𑀺𑀧𑀚𑁆𑀚𑀺𑀁𑀲𑀼. 𑀢𑀁 𑀅𑀦𑀼𑀲𑁆𑀲𑀭𑀢𑁄 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺𑀬𑁂𑀯. 𑀅𑀳𑀼 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀢𑀲𑁆𑀲𑁂𑀯 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀲𑀪𑀸𑀯𑀦𑀺𑀬𑀫𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁. 𑀯𑀺𑀧𑁆𑀧𑀝𑀺𑀲𑀸𑀭𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺, 𑀦 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺. 𑀅𑀮𑀸𑀪𑀸 𑀯𑀢 𑀫𑁂𑀢𑀺𑀆𑀤𑀺 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀮𑀸𑀪𑀸 𑀯𑀢 𑀫𑁂𑀢𑀺 𑀆𑀬𑀢𑀺𑀁 𑀤𑀸𑀦𑀺 𑀫𑀫 𑀳𑀺𑀢𑀲𑀼𑀔𑀮𑀸𑀪𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀦𑀼𑀢𑁆𑀣𑀼𑀦𑀸𑀢𑀺. ‘‘𑀦 𑀯𑀢 𑀫𑁂 𑀮𑀸𑀪𑀸’’𑀢𑀺𑀇𑀫𑀺𑀦𑀸 𑀧𑀦 𑀢𑀫𑁂𑀯𑀢𑁆𑀣𑀁 𑀤𑀴𑁆𑀳𑀁 𑀓𑀭𑁄𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀘𑁂𑀧𑀺 𑀓𑁄𑀘𑀺 ‘‘𑀮𑀸𑀪𑀸 𑀢𑁂’’𑀢𑀺 𑀯𑀤𑁂𑀬𑁆𑀬, 𑀢𑀁 𑀫𑀺𑀘𑁆𑀙𑀸, 𑀦 𑀯𑀢 𑀫𑁂 𑀮𑀸𑀪𑀸𑀢𑀺. 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂𑀢𑀺 𑀓𑀼𑀲𑀮𑀸𑀦𑀼𑀪𑀸𑀯𑁂𑀦 𑀮𑀤𑁆𑀥𑀫𑁆𑀧𑀺 𑀇𑀤𑀁 𑀫𑀦𑀼𑀲𑁆𑀲𑀢𑁆𑀢𑀁 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂. 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀦𑁆𑀢𑀺𑀇𑀫𑀺𑀦𑀸 𑀧𑀦 𑀢𑀫𑁂𑀯𑀢𑁆𑀣𑀁 𑀤𑀴𑁆𑀳𑀁 𑀓𑀭𑁄𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀘𑁂𑀧𑀺 𑀓𑁄𑀘𑀺 ‘‘𑀲𑀼𑀮𑀤𑁆𑀥𑀁 𑀢𑁂’’𑀢𑀺 𑀯𑀤𑁂𑀬𑁆𑀬, 𑀢𑀁 𑀫𑀺𑀘𑁆𑀙𑀸; 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀦𑁆𑀢𑀺. 𑀅𑀧𑀼𑀜𑁆𑀜𑀁 𑀧𑀲𑀼𑀢𑀦𑁆𑀢𑀺 𑀅𑀧𑀼𑀜𑁆𑀜𑀁 𑀉𑀧𑀘𑀺𑀢𑀁 𑀚𑀦𑀺𑀢𑀁 𑀯𑀸. 𑀓𑀲𑁆𑀫𑀸𑀢𑀺 𑀘𑁂? 𑀬𑁄𑀳𑀁 𑀪𑀺𑀓𑁆𑀔𑀽…𑀧𑁂… 𑀯𑁄𑀭𑁄𑀧𑁂𑀲𑀺𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀅𑀳𑀁 𑀲𑀻𑀮𑀯𑀦𑁆𑀢𑁂 𑀢𑀸𑀬 𑀏𑀯 𑀲𑀻𑀮𑀯𑀦𑁆𑀢𑀢𑀸𑀬 𑀓𑀮𑁆𑀬𑀸𑀡𑀥𑀫𑁆𑀫𑁂 𑀉𑀢𑁆𑀢𑀫𑀥𑀫𑁆𑀫𑁂 𑀲𑁂𑀝𑁆𑀞𑀥𑀫𑁆𑀫𑁂 𑀪𑀺𑀓𑁆𑀔𑀽 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺𑀦𑁆𑀢𑀺.

𑀅𑀜𑁆𑀜𑀢𑀭𑀸 𑀫𑀸𑀭𑀓𑀸𑀬𑀺𑀓𑀸𑀢𑀺 𑀦𑀸𑀫𑀯𑀲𑁂𑀦 𑀅𑀧𑀸𑀓𑀝𑀸 𑀏𑀓𑀸 𑀪𑀼𑀫𑁆𑀫𑀤𑁂𑀯𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀸𑀭𑀧𑀓𑁆𑀔𑀺𑀓𑀸 𑀫𑀸𑀭𑀲𑁆𑀲𑀦𑀼𑀯𑀢𑁆𑀢𑀺𑀓𑀸 ‘‘𑀏𑀯𑀫𑀬𑀁 𑀫𑀸𑀭𑀥𑁂𑀬𑁆𑀬𑀁 𑀫𑀸𑀭𑀯𑀺𑀲𑀬𑀁 𑀦𑀸𑀢𑀺𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀩𑁆𑀩𑀸𑀪𑀭𑀡𑀯𑀺𑀪𑀽𑀲𑀺𑀢𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀤𑀲𑁆𑀲𑀬𑀫𑀸𑀦𑀸 𑀅𑀪𑀺𑀚𑁆𑀚𑀫𑀸𑀦𑁂 𑀉𑀤𑀓𑁂 𑀧𑀣𑀯𑀻𑀢𑀮𑁂 𑀘𑀗𑁆𑀓𑀫𑀫𑀸𑀦𑀸 𑀯𑀺𑀬 𑀆𑀕𑀦𑁆𑀢𑁆𑀯𑀸 𑀫𑀺𑀕𑀮𑀡𑁆𑀟𑀺𑀓𑀁 𑀲𑀫𑀡𑀓𑀼𑀢𑁆𑀢𑀓𑀁 𑀏𑀢𑀤𑀯𑁄𑀘. 𑀲𑀸𑀥𑀼 𑀲𑀸𑀥𑀽𑀢𑀺 𑀲𑀫𑁆𑀧𑀳𑀁𑀲𑀦𑀢𑁆𑀣𑁂 𑀦𑀺𑀧𑀸𑀢𑁄; 𑀢𑀲𑁆𑀫𑀸 𑀏𑀯 𑀤𑁆𑀯𑀺𑀯𑀘𑀦𑀁 𑀓𑀢𑀁. 𑀅𑀢𑀺𑀡𑁆𑀡𑁂 𑀢𑀸𑀭𑁂𑀲𑀻𑀢𑀺 𑀲𑀁𑀲𑀸𑀭𑀢𑁄 𑀅𑀢𑀺𑀡𑁆𑀡𑁂 𑀇𑀫𑀺𑀦𑀸 𑀚𑀻𑀯𑀺𑀢𑀸𑀯𑁄𑀭𑁄𑀧𑀦𑁂𑀦 𑀢𑀸𑀭𑁂𑀲𑀺 𑀧𑀭𑀺𑀫𑁄𑀘𑁂𑀲𑀻𑀢𑀺. 𑀅𑀬𑀁 𑀓𑀺𑀭 𑀏𑀢𑀺𑀲𑁆𑀲𑀸 𑀤𑁂𑀯𑀢𑀸𑀬 𑀩𑀸𑀮𑀸𑀬 𑀤𑀼𑀫𑁆𑀫𑁂𑀥𑀸𑀬 𑀮𑀤𑁆𑀥𑀺 ‘‘𑀬𑁂 𑀦 𑀫𑀢𑀸, 𑀢𑁂 𑀲𑀁𑀲𑀸𑀭𑀢𑁄 𑀦 𑀫𑀼𑀢𑁆𑀢𑀸. 𑀬𑁂 𑀫𑀢𑀸, 𑀢𑁂 𑀫𑀼𑀢𑁆𑀢𑀸’’𑀢𑀺. 𑀢𑀲𑁆𑀫𑀸 𑀲𑀁𑀲𑀸𑀭𑀫𑁄𑀘𑀓𑀫𑀺𑀮𑀓𑁆𑀔𑀸 𑀯𑀺𑀬 𑀏𑀯𑀁𑀮𑀤𑁆𑀥𑀺𑀓𑀸 𑀳𑀼𑀢𑁆𑀯𑀸 𑀢𑀫𑁆𑀧𑀺 𑀢𑀢𑁆𑀣 𑀦𑀺𑀬𑁄𑀚𑁂𑀦𑁆𑀢𑀻 𑀏𑀯𑀫𑀸𑀳. 𑀅𑀣 𑀔𑁄 𑀫𑀺𑀕𑀮𑀡𑁆𑀟𑀺𑀓𑁄 𑀲𑀫𑀡𑀓𑀼𑀢𑁆𑀢𑀓𑁄 𑀢𑀸𑀯 𑀪𑀼𑀲𑀁 𑀉𑀧𑁆𑀧𑀦𑁆𑀦𑀯𑀺𑀧𑁆𑀧𑀝𑀺𑀲𑀸𑀭𑁄𑀧𑀺 𑀢𑀁 𑀤𑁂𑀯𑀢𑀸𑀬 𑀆𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀤𑁂𑀯𑀢𑀸 𑀏𑀯𑀫𑀸𑀳 𑁋 𑀅𑀤𑁆𑀥𑀸 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀏𑀯𑀫𑁂𑀯 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 ‘‘𑀮𑀸𑀪𑀸 𑀓𑀺𑀭 𑀫𑁂’’𑀢𑀺𑀆𑀤𑀻𑀦𑀺 𑀧𑀭𑀺𑀓𑀺𑀢𑁆𑀢𑀬𑀦𑁆𑀢𑁄. 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑀁 𑀧𑀭𑀺𑀯𑁂𑀡𑁂𑀦 𑀧𑀭𑀺𑀯𑁂𑀡𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀢𑀻𑀢𑀺 𑀢𑀁 𑀢𑀁 𑀯𑀺𑀳𑀸𑀭𑀜𑁆𑀘 𑀧𑀭𑀺𑀯𑁂𑀡𑀜𑁆𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀽 𑀏𑀯𑀁 𑀯𑀤𑀢𑀺 𑁋 ‘‘𑀓𑁄 𑀅𑀢𑀺𑀡𑁆𑀡𑁄, 𑀓𑀁 𑀢𑀸𑀭𑁂𑀫𑀻’’𑀢𑀺?

𑀳𑁄𑀢𑀺𑀬𑁂𑀯 𑀪𑀬𑀦𑁆𑀢𑀺 𑀫𑀭𑀡𑀁 𑀧𑀝𑀺𑀘𑁆𑀘 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀳𑁄𑀢𑀺. 𑀳𑁄𑀢𑀺 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀳𑀤𑀬𑀫𑀁𑀲𑀁 𑀆𑀤𑀺𑀁 𑀓𑀢𑁆𑀯𑀸 𑀢𑀲𑁆𑀫𑀸 𑀲𑀭𑀻𑀭𑀘𑀮𑀦𑀁 𑀳𑁄𑀢𑀺; 𑀅𑀢𑀺𑀪𑀬𑁂𑀦 𑀣𑀤𑁆𑀥𑀲𑀭𑀻𑀭𑀢𑁆𑀢𑀦𑁆𑀢𑀺𑀧𑀺 𑀏𑀓𑁂, 𑀣𑀫𑁆𑀪𑀺𑀢𑀢𑁆𑀢𑀜𑁆𑀳𑀺 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀮𑁄𑀫𑀳𑀁𑀲𑁄𑀢𑀺 𑀉𑀤𑁆𑀥𑀁𑀞𑀺𑀢𑀮𑁄𑀫𑀢𑀸, 𑀔𑀻𑀡𑀸𑀲𑀯𑀸 𑀧𑀦 𑀲𑀢𑁆𑀢𑀲𑀼𑀜𑁆𑀜𑀢𑀸𑀬 𑀲𑀼𑀤𑀺𑀝𑁆𑀞𑀢𑁆𑀢𑀸 𑀫𑀭𑀡𑀓𑀲𑀢𑁆𑀢𑀫𑁂𑀯 𑀦 𑀧𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀲𑀩𑁆𑀩𑀫𑁆𑀧𑁂𑀢𑀁 𑀦𑀸𑀳𑁄𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀫𑁆𑀧𑀺 𑀪𑀺𑀓𑁆𑀔𑀼𑀁 𑀤𑁆𑀯𑁂𑀧𑀺…𑀧𑁂… 𑀲𑀝𑁆𑀞𑀺𑀫𑁆𑀧𑀺 𑀪𑀺𑀓𑁆𑀔𑀽 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀻𑀢𑀺 𑀏𑀯𑀁 𑀕𑀡𑀦𑀯𑀲𑁂𑀦 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺.

𑁧𑁬𑁪. 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀚𑀻𑀯𑀺𑀢𑀓𑁆𑀔𑀬𑀧𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀢𑀢𑁄 𑀏𑀓𑀻𑀪𑀸𑀯𑀢𑁄 𑀯𑀼𑀝𑁆𑀞𑀺𑀢𑁄 𑀚𑀸𑀦𑀦𑁆𑀢𑁄𑀧𑀺 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺. 𑀓𑀺𑀁 𑀦𑀼 𑀔𑁄 𑀆𑀦𑀦𑁆𑀤 𑀢𑀦𑀼𑀪𑀽𑀢𑁄 𑀯𑀺𑀬 𑀪𑀺𑀓𑁆𑀔𑀼𑀲𑀗𑁆𑀖𑁄𑀢𑀺 𑀆𑀦𑀦𑁆𑀤 𑀇𑀢𑁄 𑀧𑀼𑀩𑁆𑀩𑁂 𑀩𑀳𑀽 𑀪𑀺𑀓𑁆𑀔𑀽 𑀏𑀓𑀢𑁄 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺, 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀕𑀡𑁆𑀳𑀦𑁆𑀢𑀺 𑀲𑀚𑁆𑀛𑀸𑀬𑀦𑁆𑀢𑀺, 𑀏𑀓𑀧𑀚𑁆𑀚𑁄𑀢𑁄 𑀯𑀺𑀬 𑀆𑀭𑀸𑀫𑁄 𑀤𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀧𑀦 𑀅𑀤𑁆𑀥𑀫𑀸𑀲𑀫𑀢𑁆𑀢𑀲𑁆𑀲 𑀅𑀘𑁆𑀘𑀬𑁂𑀦 𑀢𑀦𑀼𑀪𑀽𑀢𑁄 𑀯𑀺𑀬 𑀢𑀦𑀼𑀓𑁄 𑀫𑀦𑁆𑀤𑁄 𑀅𑀧𑁆𑀧𑀓𑁄 𑀯𑀺𑀭𑀴𑀯𑀺𑀭𑀴𑁄 𑀯𑀺𑀬 𑀚𑀸𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀓𑀺𑀦𑁆𑀦𑀼 𑀔𑁄 𑀓𑀸𑀭𑀡𑀁, 𑀓𑀺𑀁 𑀤𑀺𑀲𑀸𑀲𑀼 𑀧𑀓𑁆𑀓𑀦𑁆𑀢𑀸 𑀪𑀺𑀓𑁆𑀔𑀽𑀢𑀺?

𑀅𑀣𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑀫𑁆𑀫𑀯𑀺𑀧𑀸𑀓𑁂𑀦 𑀢𑁂𑀲𑀁 𑀚𑀻𑀯𑀺𑀢𑀓𑁆𑀔𑀬𑀧𑁆𑀧𑀢𑁆𑀢𑀺𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀧𑀘𑁆𑀘𑀬𑀸 𑀧𑀦 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 ‘‘𑀢𑀣𑀸 𑀳𑀺 𑀧𑀦 𑀪𑀦𑁆𑀢𑁂 𑀪𑀕𑀯𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀅𑀜𑁆𑀜𑀁 𑀓𑀫𑁆𑀫𑀝𑁆𑀞𑀸𑀦𑀁 𑀬𑀸𑀘𑀦𑁆𑀢𑁄 ‘‘𑀲𑀸𑀥𑀼 𑀪𑀦𑁆𑀢𑁂 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀲𑀸𑀥𑀼 𑀪𑀦𑁆𑀢𑁂 𑀪𑀕𑀯𑀸 𑀅𑀜𑁆𑀜𑀁 𑀓𑀸𑀭𑀡𑀁 𑀆𑀘𑀺𑀓𑁆𑀔𑀢𑀼, 𑀬𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑁂𑀬𑁆𑀬; 𑀫𑀳𑀸𑀲𑀫𑀼𑀤𑁆𑀤𑀁 𑀑𑀭𑁄𑀳𑀡𑀢𑀺𑀢𑁆𑀣𑀸𑀦𑀺 𑀯𑀺𑀬 𑀳𑀺 𑀅𑀜𑁆𑀜𑀸𑀦𑀺𑀧𑀺 𑀤𑀲𑀸𑀦𑀼𑀲𑁆𑀲𑀢𑀺𑀤𑀲𑀓𑀲𑀺𑀡𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀸𑀧𑀸𑀦𑀲𑀢𑀺𑀧𑁆𑀧𑀪𑁂𑀤𑀸𑀦𑀺 𑀩𑀳𑀽𑀦𑀺 𑀦𑀺𑀩𑁆𑀩𑀸𑀦𑁄𑀭𑁄𑀳𑀡𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀦𑁆𑀢𑀺. 𑀢𑁂𑀲𑀼 𑀪𑀕𑀯𑀸 𑀪𑀺𑀓𑁆𑀔𑀽 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀅𑀜𑁆𑀜𑀢𑀭𑀁 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀣 𑀪𑀕𑀯𑀸 𑀢𑀣𑀸 𑀓𑀸𑀢𑀼𑀓𑀸𑀫𑁄 𑀣𑁂𑀭𑀁 𑀉𑀬𑁆𑀬𑁄𑀚𑁂𑀦𑁆𑀢𑁄 ‘‘𑀢𑁂𑀦𑀳𑀸𑀦𑀦𑁆𑀤𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀲𑀫𑀦𑁆𑀢𑀸 𑀕𑀸𑀯𑀼𑀢𑁂𑀧𑀺 𑀅𑀤𑁆𑀥𑀬𑁄𑀚𑀦𑁂𑀧𑀺 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀲𑀦𑁆𑀦𑀺𑀧𑀸𑀢𑁂𑀳𑀻𑀢𑀺 𑀅𑀢𑁆𑀣𑁄. 𑀢𑁂 𑀲𑀩𑁆𑀩𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑀸 𑀕𑀦𑁆𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀁 𑀲𑀬𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑁆𑀣 𑀤𑀳𑀭𑀪𑀺𑀓𑁆𑀔𑀽 𑀧𑀳𑀺𑀡𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑁂𑀦𑁂𑀯 𑀅𑀦𑀯𑀲𑁂𑀲𑁂 𑀪𑀺𑀓𑁆𑀔𑀽 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀫𑀽𑀳𑀁 𑀓𑀢𑁆𑀯𑀸. 𑀬𑀲𑁆𑀲 𑀤𑀸𑀦𑀺 𑀪𑀦𑁆𑀢𑁂 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻𑀢𑀺 𑀏𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁄 𑀏𑀲 𑀓𑀸𑀮𑁄 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀓𑀣𑀁 𑀓𑀸𑀢𑀼𑀁, 𑀅𑀦𑀼𑀲𑀸𑀲𑀦𑀺𑀁 𑀤𑀸𑀢𑀼𑀁, 𑀇𑀤𑀸𑀦𑀺 𑀬𑀲𑁆𑀲 𑀢𑀼𑀫𑁆𑀳𑁂 𑀓𑀸𑀮𑀁 𑀚𑀸𑀦𑀸𑀣, 𑀢𑀁 𑀓𑀢𑁆𑀢𑀩𑁆𑀩𑀦𑁆𑀢𑀺.

𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀓𑀣𑀸

𑁧𑁬𑁫. 𑀅𑀣 𑀔𑁄 𑀪𑀕𑀯𑀸…𑀧𑁂… 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀅𑀬𑀫𑁆𑀧𑀺 𑀔𑁄 𑀪𑀺𑀓𑁆𑀔𑀯𑁂𑀢𑀺 𑀆𑀫𑀦𑁆𑀢𑁂𑀢𑁆𑀯𑀸 𑀘 𑀧𑀦 𑀪𑀺𑀓𑁆𑀔𑀽𑀦𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑁂 𑀆𑀘𑀺𑀓𑁆𑀔𑀺𑀢𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀢𑁄 𑀅𑀜𑁆𑀜𑀁 𑀧𑀭𑀺𑀬𑀸𑀬𑀁 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻’’𑀢𑀺 𑀆𑀳.

𑀇𑀤𑀸𑀦𑀺 𑀬𑀲𑁆𑀫𑀸 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀧𑀡𑀻𑀢𑀓𑀫𑁆𑀫𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀫𑁂𑀯 𑀅𑀬𑀁 𑀧𑀸𑀴𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀅𑀢𑁆𑀣𑀬𑁄𑀚𑀦𑀸𑀓𑁆𑀓𑀫𑀁 𑀏𑀢𑁆𑀣 𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀺. 𑀢𑀢𑁆𑀭 ‘‘𑀅𑀬𑀫𑁆𑀧𑀺 𑀔𑁄 𑀪𑀺𑀓𑁆𑀔𑀯𑁂’’𑀢𑀺 𑀇𑀫𑀲𑁆𑀲 𑀢𑀸𑀯 𑀧𑀤𑀲𑁆𑀲 𑀅𑀬𑀁 𑀬𑁄𑀚𑀦𑀸 𑁋 𑀪𑀺𑀓𑁆𑀔𑀯𑁂 𑀦 𑀓𑁂𑀯𑀮𑀁 𑀅𑀲𑀼𑀪𑀪𑀸𑀯𑀦𑀸𑀬𑁂𑀯 𑀓𑀺𑀮𑁂𑀲𑀧𑁆𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀅𑀧𑀺𑀘 𑀅𑀬𑀫𑁆𑀧𑀺 𑀔𑁄 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺…𑀧𑁂… 𑀯𑀽𑀧𑀲𑀫𑁂𑀢𑀻𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀆𑀦𑀸𑀧𑀸𑀦𑀲𑁆𑀲𑀢𑀻𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑁋

‘‘𑀆𑀦𑀦𑁆𑀢𑀺 𑀅𑀲𑁆𑀲𑀸𑀲𑁄, 𑀦𑁄 𑀧𑀲𑁆𑀲𑀸𑀲𑁄. 𑀅𑀧𑀸𑀦𑀦𑁆𑀢𑀺 𑀧𑀲𑁆𑀲𑀸𑀲𑁄, 𑀦𑁄 𑀅𑀲𑁆𑀲𑀸𑀲𑁄. 𑀅𑀲𑁆𑀲𑀸𑀲𑀯𑀲𑁂𑀦 𑀉𑀧𑀝𑁆𑀞𑀸𑀦𑀁 𑀲𑀢𑀺, 𑀧𑀲𑁆𑀲𑀸𑀲𑀯𑀲𑁂𑀦 𑀉𑀧𑀝𑁆𑀞𑀸𑀦𑀁 𑀲𑀢𑀺. 𑀬𑁄 𑀅𑀲𑁆𑀲𑀲𑀢𑀺 𑀢𑀲𑁆𑀲𑀼𑀧𑀝𑁆𑀞𑀸𑀢𑀺, 𑀬𑁄 𑀧𑀲𑁆𑀲𑀲𑀢𑀺 𑀢𑀲𑁆𑀲𑀼𑀧𑀝𑁆𑀞𑀸𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁬𑁦).

𑀲𑀫𑀸𑀥𑀻𑀢𑀺 𑀢𑀸𑀬 𑀆𑀦𑀸𑀧𑀸𑀦𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀲𑀢𑀺𑀬𑀸 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸; 𑀲𑀫𑀸𑀥𑀺𑀲𑀻𑀲𑁂𑀦 𑀘𑀸𑀬𑀁 𑀤𑁂𑀲𑀦𑀸, 𑀦 𑀲𑀢𑀺𑀲𑀻𑀲𑁂𑀦. 𑀢𑀲𑁆𑀫𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀬𑀼𑀢𑁆𑀢𑁄 𑀲𑀫𑀸𑀥𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀁 𑀯𑀸 𑀲𑀫𑀸𑀥𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀸𑀯𑀺𑀢𑁄𑀢𑀺 𑀉𑀧𑁆𑀧𑀸𑀤𑀺𑀢𑁄 𑀯𑀟𑁆𑀠𑀺𑀢𑁄 𑀘. 𑀩𑀳𑀼𑀮𑀻𑀓𑀢𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑁄. 𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘𑀸𑀢𑀺 𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘𑁂𑀯, 𑀉𑀪𑀬𑀢𑁆𑀣 𑀏𑀯𑀲𑀤𑁆𑀤𑁂𑀦 𑀦𑀺𑀬𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀅𑀬𑀜𑁆𑀳𑀺 𑀬𑀣𑀸 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀓𑁂𑀯𑀮𑀁 𑀧𑀝𑀺𑀯𑁂𑀥𑀯𑀲𑁂𑀦 𑀲𑀦𑁆𑀢𑀜𑁆𑀘 𑀧𑀡𑀻𑀢𑀜𑁆𑀘 𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑀢𑁆𑀢𑀸 𑀧𑀦 𑀧𑀝𑀺𑀓𑀽𑀮𑀸𑀭𑀫𑁆𑀫𑀡𑀢𑁆𑀢𑀸 𑀘 𑀆𑀭𑀫𑁆𑀫𑀡𑀯𑀲𑁂𑀦 𑀦𑁂𑀯 𑀲𑀦𑁆𑀢𑀁 𑀦 𑀧𑀡𑀻𑀢𑀁, 𑀦 𑀏𑀯𑀁 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀲𑀦𑁆𑀢𑁄 𑀯𑀸 𑀅𑀧𑁆𑀧𑀡𑀻𑀢𑁄 𑀯𑀸, 𑀅𑀧𑀺𑀘 𑀔𑁄 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬𑀧𑀺 𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑀅𑀗𑁆𑀕𑀲𑀦𑁆𑀢𑀢𑀸𑀬𑀧𑀺 𑀆𑀭𑀫𑁆𑀫𑀡𑀧𑁆𑀧𑀡𑀻𑀢𑀢𑀸𑀬𑀧𑀺 𑀧𑀡𑀻𑀢𑁄 𑀅𑀢𑀺𑀢𑁆𑀢𑀺𑀓𑀭𑁄 𑀅𑀗𑁆𑀕𑀧𑁆𑀧𑀡𑀻𑀢𑀢𑀸𑀬𑀧𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘𑀸’’𑀢𑀺.

𑀅𑀲𑁂𑀘𑀦𑀓𑁄 𑀘 𑀲𑀼𑀔𑁄 𑀘 𑀯𑀺𑀳𑀸𑀭𑁄𑀢𑀺 𑀏𑀢𑁆𑀣 𑀧𑀦 𑀦𑀸𑀲𑁆𑀲 𑀲𑁂𑀘𑀦𑀦𑁆𑀢𑀺 𑀅𑀲𑁂𑀘𑀦𑀓𑁄 𑀅𑀦𑀸𑀲𑀺𑀢𑁆𑀢𑀓𑁄 𑀅𑀩𑁆𑀩𑁄𑀓𑀺𑀡𑁆𑀡𑁄 𑀧𑀸𑀝𑁂𑀓𑁆𑀓𑁄 𑀆𑀯𑁂𑀡𑀺𑀓𑁄, 𑀦𑀢𑁆𑀣𑁂𑀢𑁆𑀣 𑀧𑀭𑀺𑀓𑀫𑁆𑀫𑁂𑀦 𑀯𑀸 𑀉𑀧𑀘𑀸𑀭𑁂𑀦 𑀯𑀸 𑀲𑀦𑁆𑀢𑀢𑀸 𑀆𑀤𑀺𑀫𑀦𑀲𑀺𑀓𑀸𑀭𑀢𑁄 𑀧𑀪𑀼𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀲𑀦𑁆𑀢𑁄 𑀘 𑀧𑀡𑀻𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 𑀅𑀲𑁂𑀘𑀦𑀓𑁄𑀢𑀺 𑀅𑀦𑀸𑀲𑀺𑀢𑁆𑀢𑀓𑁄 𑀑𑀚𑀯𑀦𑁆𑀢𑁄 𑀲𑀪𑀸𑀯𑁂𑀦𑁂𑀯 𑀫𑀥𑀼𑀭𑁄𑀢𑀺 𑀯𑀤𑀦𑁆𑀢𑀺. 𑀏𑀯𑀫𑀬𑀁 𑀅𑀲𑁂𑀘𑀦𑀓𑁄 𑀘 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀧𑁆𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑀢𑁄 𑀲𑀼𑀔𑁄 𑀘 𑀯𑀺𑀳𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂𑀢𑀺 𑀅𑀯𑀺𑀓𑁆𑀔𑀫𑁆𑀪𑀺𑀢𑁂 𑀅𑀯𑀺𑀓𑁆𑀔𑀫𑁆𑀪𑀺𑀢𑁂. 𑀧𑀸𑀧𑀓𑁂𑀢𑀺 𑀮𑀸𑀫𑀓𑁂. 𑀅𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑁂 𑀥𑀫𑁆𑀫𑁂. 𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑀔𑀡𑁂𑀦𑁂𑀯 𑀅𑀦𑁆𑀢𑀭𑀥𑀸𑀧𑁂𑀢𑀺 𑀯𑀺𑀓𑁆𑀔𑀫𑁆𑀪𑁂𑀢𑀺. 𑀯𑀽𑀧𑀲𑀫𑁂𑀢𑀻𑀢𑀺 𑀲𑀼𑀝𑁆𑀞𑀼 𑀉𑀧𑀲𑀫𑁂𑀢𑀺, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑁆𑀢𑀸 𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀅𑀭𑀺𑀬𑀫𑀕𑁆𑀕𑀯𑀼𑀟𑁆𑀠𑀺𑀧𑁆𑀧𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀻𑀢𑀺𑀧𑀺 𑀅𑀢𑁆𑀣𑁄.

𑀲𑁂𑀬𑁆𑀬𑀣𑀸𑀧𑀻𑀢𑀺 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀫𑁂𑀢𑀁. 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂𑀢𑀺 𑀆𑀲𑀸𑀴𑁆𑀳𑀫𑀸𑀲𑁂. 𑀊𑀳𑀢𑀁 𑀭𑀚𑁄𑀚𑀮𑁆𑀮𑀦𑁆𑀢𑀺 𑀅𑀤𑁆𑀥𑀫𑀸𑀲𑁂 𑀯𑀸𑀢𑀸𑀢𑀧𑀲𑀼𑀓𑁆𑀔𑀸𑀬 𑀕𑁄𑀫𑀳𑀺𑀁𑀲𑀸𑀤𑀺𑀧𑀸𑀤𑀧𑁆𑀧𑀳𑀸𑀭𑀲𑀫𑁆𑀪𑀺𑀦𑁆𑀦𑀸𑀬 𑀧𑀣𑀯𑀺𑀬𑀸 𑀉𑀤𑁆𑀥𑀁 𑀳𑀢𑀁 𑀊𑀳𑀢𑀁 𑀆𑀓𑀸𑀲𑁂 𑀲𑀫𑀼𑀝𑁆𑀞𑀺𑀢𑀁 𑀭𑀚𑀜𑁆𑀘 𑀭𑁂𑀡𑀼𑀜𑁆𑀘. 𑀫𑀳𑀸 𑀅𑀓𑀸𑀮𑀫𑁂𑀖𑁄𑀢𑀺 𑀲𑀩𑁆𑀩𑀁 𑀦𑀪𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀉𑀝𑁆𑀞𑀺𑀢𑁄 𑀆𑀲𑀸𑀴𑁆𑀳𑀚𑀼𑀡𑁆𑀳𑀧𑀓𑁆𑀔𑁂 𑀲𑀓𑀮𑀁 𑀅𑀤𑁆𑀥𑀫𑀸𑀲𑀁 𑀯𑀲𑁆𑀲𑀦𑀓𑀫𑁂𑀖𑁄. 𑀲𑁄 𑀳𑀺 𑀅𑀲𑀫𑁆𑀧𑀢𑁆𑀢𑁂 𑀯𑀲𑁆𑀲𑀓𑀸𑀮𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀓𑀸𑀮𑀫𑁂𑀖𑁄𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀺 𑀯𑀽𑀧𑀲𑀫𑁂𑀢𑀻𑀢𑀺 𑀔𑀡𑁂𑀦𑁂𑀯 𑀅𑀤𑀲𑁆𑀲𑀦𑀁 𑀦𑁂𑀢𑀺, 𑀧𑀣𑀯𑀺𑀬𑀁 𑀲𑀦𑁆𑀦𑀺𑀲𑀻𑀤𑀸𑀧𑁂𑀢𑀺. 𑀏𑀯𑀫𑁂𑀯 𑀔𑁄𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀫𑁂𑀢𑀁. 𑀢𑀢𑁄 𑀧𑀭𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀇𑀤𑀸𑀦𑀺 𑀓𑀣𑀁 𑀪𑀸𑀯𑀺𑀢𑁄 𑀘 𑀪𑀺𑀓𑁆𑀔𑀯𑁂 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻𑀢𑀺 𑀏𑀢𑁆𑀣 𑀓𑀣𑀦𑁆𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀪𑀸𑀯𑀦𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀢𑁆𑀣𑀸𑀭𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀪𑀸𑀯𑀺𑀢𑁄 𑀘 𑀪𑀺𑀓𑁆𑀔𑀯𑁂 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻𑀢𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀢𑁆𑀣𑀸𑀭𑁂𑀢𑀼𑀓𑀫𑁆𑀬𑀢𑀸𑀬 𑀧𑀼𑀝𑁆𑀞𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀏𑀲 𑀦𑀬𑁄 𑀤𑀼𑀢𑀺𑀬𑀧𑀤𑁂𑀧𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂 𑀓𑁂𑀦𑀧𑀓𑀸𑀭𑁂𑀦 𑀓𑁂𑀦𑀸𑀓𑀸𑀭𑁂𑀦 𑀓𑁂𑀦 𑀯𑀺𑀥𑀺𑀦𑀸 𑀪𑀸𑀯𑀺𑀢𑁄 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺 𑀓𑁂𑀦𑀧𑀓𑀸𑀭𑁂𑀦 𑀩𑀳𑀼𑀮𑀻𑀓𑀢𑁄 𑀲𑀦𑁆𑀢𑁄 𑀘𑁂𑀯…𑀧𑁂… 𑀯𑀽𑀧𑀲𑀫𑁂𑀢𑀻𑀢𑀺.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 ‘‘𑀇𑀥 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽𑀢𑀺 𑀪𑀺𑀓𑁆𑀔𑀯𑁂 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀼. 𑀅𑀬𑀜𑁆𑀳𑁂𑀢𑁆𑀣 𑀇𑀥𑀲𑀤𑁆𑀤𑁄 𑀲𑀩𑁆𑀩𑀧𑁆𑀧𑀓𑀸𑀭𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀦𑀺𑀲𑁆𑀲𑀬𑀪𑀽𑀢𑀲𑀸𑀲𑀦𑀧𑀭𑀺𑀤𑀻𑀧𑀦𑁄 𑀅𑀜𑁆𑀜𑀲𑀸𑀲𑀦𑀲𑁆𑀲 𑀢𑀣𑀸𑀪𑀸𑀯𑀧𑀝𑀺𑀲𑁂𑀥𑀦𑁄 𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄…𑀧𑁂… 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀺 𑀅𑀜𑁆𑀜𑁂𑀳𑀻’’𑀢𑀺 (𑀫. 𑀦𑀺. 𑁧.𑁧𑁩𑁯). 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀽’’𑀢𑀺.

𑀅𑀭𑀜𑁆𑀜𑀕𑀢𑁄 𑀯𑀸…𑀧𑁂… 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸𑀢𑀺 𑀇𑀤𑀫𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀪𑀸𑀯𑀦𑀸𑀦𑀼𑀭𑀽𑀧𑀲𑁂𑀦𑀸𑀲𑀦𑀧𑀭𑀺𑀕𑁆𑀕𑀳𑀧𑀭𑀺𑀤𑀻𑀧𑀦𑀁. 𑀇𑀫𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀤𑀻𑀖𑀭𑀢𑁆𑀢𑀁 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀦𑀼𑀯𑀺𑀲𑀝𑀁 𑀘𑀺𑀢𑁆𑀢𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀆𑀭𑀫𑁆𑀫𑀡𑀁 𑀅𑀪𑀺𑀭𑀼𑀳𑀺𑀢𑀼𑀁 𑀦 𑀇𑀘𑁆𑀙𑀢𑀺. 𑀓𑀽𑀝𑀕𑁄𑀡𑀬𑀼𑀢𑁆𑀢𑀭𑀣𑁄 𑀯𑀺𑀬 𑀉𑀧𑁆𑀧𑀣𑀫𑁂𑀯 𑀥𑀸𑀯𑀢𑀺. 𑀢𑀲𑁆𑀫𑀸 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑁄𑀧𑁄 𑀓𑀽𑀝𑀥𑁂𑀦𑀼𑀬𑀸 𑀲𑀩𑁆𑀩𑀁 𑀔𑀻𑀭𑀁 𑀧𑀺𑀯𑀺𑀢𑁆𑀯𑀸 𑀯𑀟𑁆𑀠𑀺𑀢𑀁 𑀓𑀽𑀝𑀯𑀘𑁆𑀙𑀁 𑀤𑀫𑁂𑀢𑀼𑀓𑀸𑀫𑁄 𑀥𑁂𑀦𑀼𑀢𑁄 𑀅𑀧𑀦𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀫𑀳𑀦𑁆𑀢𑀁 𑀣𑀫𑁆𑀪𑀁 𑀦𑀺𑀔𑀡𑀺𑀢𑁆𑀯𑀸 𑀢𑀢𑁆𑀣 𑀬𑁄𑀢𑁆𑀢𑁂𑀦 𑀩𑀦𑁆𑀥𑁂𑀬𑁆𑀬. 𑀅𑀣𑀲𑁆𑀲 𑀲𑁄 𑀯𑀘𑁆𑀙𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑁆𑀨𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀫𑁂𑀯 𑀣𑀫𑁆𑀪𑀁 𑀉𑀧𑀦𑀺𑀲𑀻𑀤𑁂𑀬𑁆𑀬 𑀯𑀸 𑀉𑀧𑀦𑀺𑀧𑀚𑁆𑀚𑁂𑀬𑁆𑀬 𑀯𑀸; 𑀏𑀯𑀫𑁂𑀯 𑀇𑀫𑀺𑀦𑀸𑀧𑀺 𑀪𑀺𑀓𑁆𑀔𑀼𑀦𑀸 𑀤𑀻𑀖𑀭𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀭𑀲𑀧𑀸𑀦𑀯𑀟𑁆𑀠𑀺𑀢𑀁 𑀤𑀼𑀝𑁆𑀞𑀘𑀺𑀢𑁆𑀢𑀁 𑀤𑀫𑁂𑀢𑀼𑀓𑀸𑀫𑁂𑀦 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀢𑁄 𑀅𑀧𑀦𑁂𑀢𑁆𑀯𑀸 𑀅𑀭𑀜𑁆𑀜𑀁 𑀯𑀸…𑀧𑁂… 𑀲𑀼𑀜𑁆𑀜𑀸𑀕𑀸𑀭𑀁 𑀯𑀸 𑀧𑀯𑁂𑀲𑁂𑀢𑁆𑀯𑀸 𑀢𑀢𑁆𑀣 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀣𑀫𑁆𑀪𑁂 𑀲𑀢𑀺𑀬𑁄𑀢𑁆𑀢𑁂𑀦 𑀩𑀦𑁆𑀥𑀺𑀢𑀩𑁆𑀩𑀁. 𑀏𑀯𑀫𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑁆𑀨𑀦𑁆𑀤𑀺𑀢𑁆𑀯𑀸𑀧𑀺 𑀧𑀼𑀩𑁆𑀩𑁂 𑀆𑀘𑀺𑀡𑁆𑀡𑀸𑀭𑀫𑁆𑀫𑀡𑀁 𑀅𑀮𑀪𑀫𑀸𑀦𑀁 𑀲𑀢𑀺𑀬𑁄𑀢𑁆𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀢𑀫𑁂𑀯𑀸𑀭𑀫𑁆𑀫𑀡𑀁 𑀉𑀧𑀘𑀸𑀭𑀧𑁆𑀧𑀦𑀸𑀯𑀲𑁂𑀦 𑀉𑀧𑀦𑀺𑀲𑀻𑀤𑀢𑀺 𑀘𑁂𑀯 𑀉𑀧𑀦𑀺𑀧𑀚𑁆𑀚𑀢𑀺 𑀘. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀬𑀣𑀸 𑀣𑀫𑁆𑀪𑁂 𑀦𑀺𑀩𑀦𑁆𑀥𑁂𑀬𑁆𑀬, 𑀯𑀘𑁆𑀙𑀁 𑀤𑀫𑁆𑀫𑀁 𑀦𑀭𑁄 𑀇𑀥;

𑀩𑀦𑁆𑀥𑁂𑀬𑁆𑀬𑁂𑀯𑀁 𑀲𑀓𑀁 𑀘𑀺𑀢𑁆𑀢𑀁, 𑀲𑀢𑀺𑀬𑀸𑀭𑀫𑁆𑀫𑀡𑁂 𑀤𑀴𑁆𑀳’’𑀦𑁆𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁧𑁭; 𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁪; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁭; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁬𑁩);

𑀏𑀯𑀫𑀲𑁆𑀲𑁂𑀢𑀁 𑀲𑁂𑀦𑀸𑀲𑀦𑀁 𑀪𑀸𑀯𑀦𑀸𑀦𑀼𑀭𑀽𑀧𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀇𑀤𑀫𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀆𑀥𑀺𑀪𑀸𑀯𑀦𑀸𑀦𑀼𑀭𑀽𑀧𑀲𑁂𑀦𑀸𑀲𑀦𑀧𑀭𑀺𑀕𑁆𑀕𑀳𑀧𑀭𑀺𑀤𑀻𑀧𑀦’’𑀦𑁆𑀢𑀺.

𑀅𑀣 𑀯𑀸 𑀬𑀲𑁆𑀫𑀸 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀧𑁆𑀧𑀪𑁂𑀤𑁂 𑀫𑀼𑀤𑁆𑀥𑀪𑀽𑀢𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀯𑀺𑀲𑁂𑀲𑀸𑀥𑀺𑀕𑀫𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀧𑀤𑀝𑁆𑀞𑀸𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀲𑀤𑁆𑀤𑀲𑀫𑀸𑀓𑀼𑀮𑀁 𑀕𑀸𑀫𑀦𑁆𑀢𑀁 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀦 𑀲𑀼𑀓𑀭𑀁 𑀲𑀫𑁆𑀧𑀸𑀤𑁂𑀢𑀼𑀁, 𑀲𑀤𑁆𑀤𑀓𑀡𑁆𑀝𑀓𑀢𑁆𑀢𑀸 𑀛𑀸𑀦𑀲𑁆𑀲. 𑀅𑀕𑀸𑀫𑀓𑁂 𑀧𑀦 𑀅𑀭𑀜𑁆𑀜𑁂 𑀲𑀼𑀓𑀭𑀁 𑀬𑁄𑀕𑀸𑀯𑀘𑀭𑁂𑀦 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀤𑁂𑀯 𑀘 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀲𑀫𑁆𑀧𑀸𑀧𑀼𑀡𑀺𑀢𑀼𑀁, 𑀢𑀲𑁆𑀫𑀸𑀲𑁆𑀲 𑀅𑀦𑀼𑀭𑀽𑀧𑀁𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀅𑀭𑀜𑁆𑀜𑀕𑀢𑁄 𑀯𑀸’’𑀢𑀺𑀆𑀤𑀺𑀫𑀸𑀳.

𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁄 𑀯𑀺𑀬 𑀳𑀺 𑀪𑀕𑀯𑀸, 𑀲𑁄 𑀬𑀣𑀸 𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁄 𑀦𑀕𑀭𑀪𑀽𑀫𑀺𑀁 𑀧𑀲𑁆𑀲𑀺𑀢𑁆𑀯𑀸 𑀲𑀼𑀝𑁆𑀞𑀼 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 ‘‘𑀏𑀢𑁆𑀣 𑀦𑀕𑀭𑀁 𑀫𑀸𑀧𑁂𑀣𑀸’’𑀢𑀺 𑀉𑀧𑀤𑀺𑀲𑀢𑀺, 𑀲𑁄𑀢𑁆𑀣𑀺𑀦𑀸 𑀘 𑀦𑀕𑀭𑁂 𑀦𑀺𑀝𑁆𑀞𑀺𑀢𑁂 𑀭𑀸𑀚𑀓𑀼𑀮𑀢𑁄 𑀫𑀳𑀸𑀲𑀓𑁆𑀓𑀸𑀭𑀁 𑀮𑀪𑀢𑀺; 𑀏𑀯𑀫𑁂𑀯 𑀬𑁄𑀕𑀸𑀯𑀘𑀭𑀲𑁆𑀲 𑀅𑀦𑀼𑀭𑀽𑀧𑀲𑁂𑀦𑀸𑀲𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀏𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀉𑀧𑀤𑀺𑀲𑀢𑀺. 𑀢𑀢𑁄 𑀢𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀢𑁆𑀢𑁂𑀦 𑀬𑁄𑀕𑀺𑀦𑀸 𑀓𑀫𑁂𑀦 𑀅𑀭𑀳𑀢𑁆𑀢𑁂 𑀧𑀢𑁆𑀢𑁂 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸’’𑀢𑀺 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀮𑀪𑀢𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼 ‘‘𑀤𑀻𑀧𑀺𑀲𑀤𑀺𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀫𑀳𑀸𑀤𑀻𑀧𑀺𑀭𑀸𑀚𑀸 𑀅𑀭𑀜𑁆𑀜𑁂 𑀢𑀺𑀡𑀕𑀳𑀦𑀁 𑀯𑀸 𑀯𑀦𑀕𑀳𑀦𑀁 𑀯𑀸 𑀧𑀩𑁆𑀩𑀢𑀕𑀳𑀦𑀁 𑀯𑀸 𑀦𑀺𑀲𑁆𑀲𑀸𑀬 𑀦𑀺𑀮𑀻𑀬𑀺𑀢𑁆𑀯𑀸 𑀯𑀦𑀫𑀳𑀺𑀁𑀲𑀕𑁄𑀓𑀡𑁆𑀡𑀲𑀽𑀓𑀭𑀸𑀤𑀬𑁄 𑀫𑀺𑀕𑁂 𑀕𑀡𑁆𑀳𑀸𑀢𑀺; 𑀏𑀯𑀫𑁂𑀯𑀸𑀬𑀁 𑀅𑀭𑀜𑁆𑀜𑀸𑀤𑀻𑀲𑀼 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀪𑀺𑀓𑁆𑀔𑀼 𑀬𑀣𑀸𑀓𑁆𑀓𑀫𑁂𑀦 𑀲𑁄𑀢𑀸𑀧𑀢𑁆𑀢𑀺𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀅𑀭𑀳𑀢𑁆𑀢𑀫𑀕𑁆𑀕𑁂 𑀘𑁂𑀯 𑀅𑀭𑀺𑀬𑀨𑀮𑀜𑁆𑀘 𑀕𑀡𑁆𑀳𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀬𑀣𑀸𑀧𑀺 𑀤𑀻𑀧𑀺𑀓𑁄 𑀦𑀸𑀫, 𑀦𑀺𑀮𑀻𑀬𑀺𑀢𑁆𑀯𑀸 𑀕𑀡𑁆𑀳𑀢𑀻 𑀫𑀺𑀕𑁂;

𑀢𑀣𑁂𑀯𑀸𑀬𑀁 𑀩𑀼𑀤𑁆𑀥𑀧𑀼𑀢𑁆𑀢𑁄, 𑀬𑀼𑀢𑁆𑀢𑀬𑁄𑀕𑁄 𑀯𑀺𑀧𑀲𑁆𑀲𑀓𑁄;

𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸𑀦, 𑀕𑀡𑁆𑀳𑀸𑀢𑀺 𑀨𑀮𑀫𑀼𑀢𑁆𑀢𑀫’’𑀦𑁆𑀢𑀺. (𑀫𑀺. 𑀧. 𑁬.𑁧.𑁫);

𑀢𑁂𑀦𑀲𑁆𑀲 𑀧𑀭𑀓𑁆𑀓𑀫𑀚𑀯𑀬𑁄𑀕𑁆𑀕𑀪𑀽𑀫𑀺𑀁 𑀅𑀭𑀜𑁆𑀜𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀅𑀭𑀜𑁆𑀜𑀕𑀢𑁄 𑀯𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀭𑀜𑁆𑀜𑀕𑀢𑁄 𑀯𑀸𑀢𑀺 𑀅𑀭𑀜𑁆𑀜𑀦𑁆𑀢𑀺 ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 (𑀯𑀺𑀪. 𑁫𑁨𑁯) 𑀘 ‘‘𑀆𑀭𑀜𑁆𑀜𑀓𑀁 𑀦𑀸𑀫 𑀲𑁂𑀦𑀸𑀲𑀦𑀁 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 (𑀧𑀸𑀭𑀸. 𑁬𑁫𑁩) 𑀘 𑀏𑀯𑀁 𑀯𑀼𑀢𑁆𑀢𑀮𑀓𑁆𑀔𑀡𑁂𑀲𑀼 𑀅𑀭𑀜𑁆𑀜𑁂𑀲𑀼 𑀅𑀦𑀼𑀭𑀽𑀧𑀁 𑀬𑀁𑀓𑀺𑀜𑁆𑀘𑀺 𑀧𑀯𑀺𑀯𑁂𑀓𑀲𑀼𑀔𑀁 𑀅𑀭𑀜𑁆𑀜𑀁 𑀕𑀢𑁄. 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸𑀢𑀺 𑀭𑀼𑀓𑁆𑀔𑀲𑀫𑀻𑀧𑀁 𑀕𑀢𑁄. 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸𑀢𑀺 𑀲𑀼𑀜𑁆𑀜𑀁 𑀯𑀺𑀯𑀺𑀢𑁆𑀢𑁄𑀓𑀸𑀲𑀁 𑀕𑀢𑁄. 𑀏𑀢𑁆𑀣 𑀘 𑀞𑀧𑁂𑀢𑁆𑀯𑀸 𑀅𑀭𑀜𑁆𑀜𑀜𑁆𑀘 𑀭𑀼𑀓𑁆𑀔𑀫𑀽𑀮𑀜𑁆𑀘 𑀅𑀯𑀲𑁂𑀲𑀲𑀢𑁆𑀢𑀯𑀺𑀥𑀲𑁂𑀦𑀸𑀲𑀦𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀫𑀲𑁆𑀲 𑀉𑀢𑀼𑀢𑁆𑀢𑀬𑀸𑀦𑀼𑀓𑀽𑀮𑀁 𑀥𑀸𑀢𑀼𑀘𑀭𑀺𑀬𑀸𑀦𑀼𑀓𑀽𑀮𑀜𑁆𑀘 𑀆𑀦𑀸𑀧𑀸𑀦𑀲𑁆𑀲𑀢𑀺𑀪𑀸𑀯𑀦𑀸𑀦𑀼𑀭𑀽𑀧𑀁 𑀲𑁂𑀦𑀸𑀲𑀦𑀁 𑀉𑀧𑀤𑀺𑀲𑀺𑀢𑁆𑀯𑀸 𑀅𑀮𑀻𑀦𑀸𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀁 𑀲𑀦𑁆𑀢𑀫𑀺𑀭𑀺𑀬𑀸𑀧𑀣𑀁 𑀉𑀧𑀤𑀺𑀲𑀦𑁆𑀢𑁄 ‘‘𑀦𑀺𑀲𑀻𑀤𑀢𑀻’’𑀢𑀺 𑀆𑀳. 𑀅𑀣𑀲𑁆𑀲 𑀦𑀺𑀲𑀚𑁆𑀚𑀸𑀬 𑀤𑀴𑁆𑀳𑀪𑀸𑀯𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀧𑀯𑀢𑁆𑀢𑀦𑀲𑀼𑀔𑀢𑀁 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀽𑀧𑀸𑀬𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀮𑁆𑀮𑀗𑁆𑀓𑀦𑁆𑀢𑀺 𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦𑀁. 𑀆𑀪𑀼𑀚𑀺𑀢𑁆𑀯𑀸𑀢𑀺 𑀆𑀩𑀦𑁆𑀥𑀺𑀢𑁆𑀯𑀸. 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬𑀸𑀢𑀺 𑀉𑀧𑀭𑀺𑀫𑀁 𑀲𑀭𑀻𑀭𑀁 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸, 𑀅𑀝𑁆𑀞𑀸𑀭𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀧𑀸𑀤𑁂𑀢𑁆𑀯𑀸. 𑀏𑀯𑀜𑁆𑀳𑀺 𑀦𑀺𑀲𑀺𑀦𑁆𑀦𑀲𑁆𑀲 𑀘𑀫𑁆𑀫𑀫𑀁𑀲𑀦𑁆𑀳𑀸𑀭𑀽𑀦𑀺 𑀦 𑀧𑀡𑀫𑀦𑁆𑀢𑀺. 𑀅𑀣𑀲𑁆𑀲 𑀬𑀸 𑀢𑁂𑀲𑀁 𑀧𑀡𑀫𑀦𑀧𑁆𑀧𑀘𑁆𑀘𑀬𑀸 𑀔𑀡𑁂 𑀔𑀡𑁂 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀸𑀲𑀼 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸𑀲𑀼 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺. 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀧𑀭𑀺𑀧𑀢𑀢𑀺. 𑀯𑀼𑀟𑁆𑀠𑀺𑀁 𑀨𑀸𑀢𑀺𑀁 𑀉𑀧𑀕𑀘𑁆𑀙𑀢𑀺.

𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀲𑀢𑀺𑀁 𑀞𑀧𑀬𑀺𑀢𑁆𑀯𑀸. 𑀅𑀣 𑀯𑀸 ‘‘𑀧𑀭𑀻’’𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄; ‘‘𑀫𑀼𑀔’’𑀦𑁆𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁄; ‘‘𑀲𑀢𑀻’’𑀢𑀺 𑀉𑀧𑀝𑁆𑀞𑀸𑀦𑀝𑁆𑀞𑁄; 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺. 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁧𑁬𑁪-𑁧𑁬𑁫) 𑀯𑀼𑀢𑁆𑀢𑀦𑀬𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑁄 𑁋 ‘‘𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀁 𑀲𑀢𑀺𑀁 𑀓𑀢𑁆𑀯𑀸’’𑀢𑀺. 𑀲𑁄 𑀲𑀢𑁄𑀯 𑀅𑀲𑁆𑀲𑀲𑀢𑀻𑀢𑀺 𑀲𑁄 𑀪𑀺𑀓𑁆𑀔𑀼 𑀏𑀯𑀁 𑀦𑀺𑀲𑀻𑀤𑀺𑀢𑁆𑀯𑀸 𑀏𑀯𑀜𑁆𑀘 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀢𑀁 𑀲𑀢𑀺𑀁 𑀅𑀯𑀺𑀚𑀳𑀦𑁆𑀢𑁄 𑀲𑀢𑁄𑀏𑀯 𑀅𑀲𑁆𑀲𑀲𑀢𑀺, 𑀲𑀢𑁄 𑀧𑀲𑁆𑀲𑀲𑀢𑀺, 𑀲𑀢𑁄𑀓𑀸𑀭𑀻 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀬𑁂𑀳𑀸𑀓𑀸𑀭𑁂𑀳𑀺 𑀲𑀢𑁄𑀓𑀸𑀭𑀻 𑀳𑁄𑀢𑀺, 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀻𑀖𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑁋 ‘‘𑀲𑁄 𑀲𑀢𑁄𑀯 𑀅𑀲𑁆𑀲𑀲𑀢𑀺, 𑀲𑀢𑁄 𑀧𑀲𑁆𑀲𑀲𑀢𑀻’’𑀢𑀺 𑀏𑀢𑀲𑁆𑀲𑁂𑀯 𑀯𑀺𑀪𑀗𑁆𑀕𑁂 𑁋

‘‘𑀩𑀸𑀢𑁆𑀢𑀺𑀁𑀲𑀸𑀬 𑀆𑀓𑀸𑀭𑁂𑀳𑀺 𑀲𑀢𑁄𑀓𑀸𑀭𑀻 𑀳𑁄𑀢𑀺. 𑀤𑀻𑀖𑀁 𑀅𑀲𑁆𑀲𑀸𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀁 𑀧𑀚𑀸𑀦𑀢𑁄 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀲𑀢𑁄𑀓𑀸𑀭𑀻 𑀳𑁄𑀢𑀺. 𑀤𑀻𑀖𑀁 𑀧𑀲𑁆𑀲𑀸𑀲𑀯𑀲𑁂𑀦…𑀧𑁂… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀅𑀲𑁆𑀲𑀸𑀲𑀯𑀲𑁂𑀦 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀧𑀲𑁆𑀲𑀸𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀁 𑀧𑀚𑀸𑀦𑀢𑁄 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀲𑀢𑁄𑀓𑀸𑀭𑀻 𑀳𑁄𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁬𑁫).

𑀢𑀢𑁆𑀣 𑀤𑀻𑀖𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄𑀢𑀺 𑀤𑀻𑀖𑀁 𑀯𑀸 𑀅𑀲𑁆𑀲𑀸𑀲𑀁 𑀧𑀯𑀢𑁆𑀢𑁂𑀦𑁆𑀢𑁄. ‘‘𑀅𑀲𑁆𑀲𑀸𑀲𑁄’’𑀢𑀺 𑀩𑀳𑀺 𑀦𑀺𑀓𑁆𑀔𑀫𑀦𑀯𑀸𑀢𑁄. ‘‘𑀧𑀲𑁆𑀲𑀸𑀲𑁄’’𑀢𑀺 𑀅𑀦𑁆𑀢𑁄 𑀧𑀯𑀺𑀲𑀦𑀯𑀸𑀢𑁄. 𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀲𑀼 𑀧𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀆𑀕𑀢𑀁.

𑀢𑀢𑁆𑀣 𑀲𑀩𑁆𑀩𑁂𑀲𑀫𑁆𑀧𑀺 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀓𑀸𑀮𑁂 𑀧𑀞𑀫𑀁 𑀅𑀩𑁆𑀪𑀦𑁆𑀢𑀭𑀯𑀸𑀢𑁄 𑀩𑀳𑀺 𑀦𑀺𑀓𑁆𑀔𑀫𑀢𑀺. 𑀧𑀘𑁆𑀙𑀸 𑀩𑀸𑀳𑀺𑀭𑀯𑀸𑀢𑁄 𑀲𑀼𑀔𑀼𑀫𑀁 𑀭𑀚𑀁 𑀕𑀳𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀁 𑀧𑀯𑀺𑀲𑀦𑁆𑀢𑁄 𑀢𑀸𑀮𑀼𑀁 𑀆𑀳𑀘𑁆𑀘 𑀦𑀺𑀩𑁆𑀩𑀸𑀬𑀢𑀺. 𑀏𑀯𑀁 𑀢𑀸𑀯 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀸 𑀧𑀦 𑀢𑁂𑀲𑀁 𑀤𑀻𑀖𑀭𑀲𑁆𑀲𑀢𑀸, 𑀲𑀸 𑀅𑀤𑁆𑀥𑀸𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀳𑀺 𑀑𑀓𑀸𑀲𑀤𑁆𑀥𑀸𑀦𑀁 𑀨𑀭𑀺𑀢𑁆𑀯𑀸 𑀞𑀺𑀢𑀁 𑀉𑀤𑀓𑀁 𑀯𑀸 𑀯𑀸𑀮𑀺𑀓𑀸 𑀯𑀸 ‘‘𑀤𑀻𑀖𑀫𑀼𑀤𑀓𑀁 𑀤𑀻𑀖𑀸 𑀯𑀸𑀮𑀺𑀓𑀸, 𑀭𑀲𑁆𑀲𑀫𑀼𑀤𑀓𑀁 𑀭𑀲𑁆𑀲𑀸 𑀯𑀸𑀮𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸𑀧𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀳𑀢𑁆𑀣𑀺𑀲𑀭𑀻𑀭𑁂 𑀅𑀳𑀺𑀲𑀭𑀻𑀭𑁂 𑀘 𑀢𑁂𑀲𑀁 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀤𑀻𑀖𑀁 𑀅𑀤𑁆𑀥𑀸𑀦𑀁 𑀲𑀡𑀺𑀓𑀁 𑀧𑀽𑀭𑁂𑀢𑁆𑀯𑀸 𑀲𑀡𑀺𑀓𑀫𑁂𑀯 𑀦𑀺𑀓𑁆𑀔𑀫𑀦𑁆𑀢𑀺, 𑀢𑀲𑁆𑀫𑀸 ‘‘𑀤𑀻𑀖𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀼𑀦𑀔𑀲𑀲𑀸𑀤𑀻𑀦𑀁 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀭𑀲𑁆𑀲𑀁 𑀅𑀤𑁆𑀥𑀸𑀦𑀁 𑀲𑀻𑀖𑀁 𑀧𑀽𑀭𑁂𑀢𑁆𑀯𑀸 𑀲𑀻𑀖𑀫𑁂𑀯 𑀦𑀺𑀓𑁆𑀔𑀫𑀦𑁆𑀢𑀺, 𑀢𑀲𑁆𑀫𑀸 ‘‘𑀭𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀦𑀼𑀲𑁆𑀲𑁂𑀲𑀼 𑀧𑀦 𑀓𑁂𑀘𑀺 𑀳𑀢𑁆𑀣𑀺𑀅𑀳𑀺𑀆𑀤𑀬𑁄 𑀯𑀺𑀬 𑀓𑀸𑀮𑀤𑁆𑀥𑀸𑀦𑀯𑀲𑁂𑀦 𑀤𑀻𑀖𑀁 𑀅𑀲𑁆𑀲𑀲𑀦𑁆𑀢𑀺 𑀘 𑀧𑀲𑁆𑀲𑀲𑀦𑁆𑀢𑀺 𑀘. 𑀓𑁂𑀘𑀺 𑀲𑀼𑀦𑀔𑀲𑀲𑀸𑀤𑀬𑁄 𑀯𑀺𑀬 𑀭𑀲𑁆𑀲𑀁. 𑀢𑀲𑁆𑀫𑀸 𑀢𑁂𑀲𑀁 𑀓𑀸𑀮𑀯𑀲𑁂𑀦 𑀤𑀻𑀖𑀫𑀤𑁆𑀥𑀸𑀦𑀁 𑀦𑀺𑀓𑁆𑀔𑀫𑀦𑁆𑀢𑀸 𑀘 𑀧𑀯𑀺𑀲𑀦𑁆𑀢𑀸 𑀘 𑀢𑁂 𑀤𑀻𑀖𑀸. 𑀇𑀢𑁆𑀢𑀭𑀫𑀤𑁆𑀥𑀸𑀦𑀁 𑀦𑀺𑀓𑁆𑀔𑀫𑀦𑁆𑀢𑀸 𑀘 𑀧𑀯𑀺𑀲𑀦𑁆𑀢𑀸 𑀘 ‘‘𑀭𑀲𑁆𑀲𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀭𑀸𑀬𑀁 𑀪𑀺𑀓𑁆𑀔𑀼 𑀦𑀯𑀳𑀸𑀓𑀸𑀭𑁂𑀳𑀺 𑀤𑀻𑀖𑀁 𑀅𑀲𑁆𑀲𑀲𑀦𑁆𑀢𑁄 𑀘 𑀧𑀲𑁆𑀲𑀲𑀦𑁆𑀢𑁄 𑀘 ‘‘𑀤𑀻𑀖𑀁 𑀅𑀲𑁆𑀲𑀲𑀸𑀫𑀺 𑀧𑀲𑁆𑀲𑀲𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀁 𑀧𑀚𑀸𑀦𑀢𑁄 𑀘𑀲𑁆𑀲 𑀏𑀓𑁂𑀦𑀸𑀓𑀸𑀭𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸 𑀲𑀫𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀳 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑁋

‘‘𑀓𑀣𑀁 𑀤𑀻𑀖𑀁 𑀅𑀲𑁆𑀲𑀲𑀦𑁆𑀢𑁄 ‘𑀤𑀻𑀖𑀁 𑀅𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀤𑀻𑀖𑀁 𑀧𑀲𑁆𑀲𑀲𑀦𑁆𑀢𑁄 ‘𑀤𑀻𑀖𑀁 𑀧𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺? 𑀤𑀻𑀖𑀁 𑀅𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑀺, 𑀤𑀻𑀖𑀁 𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀧𑀲𑁆𑀲𑀲𑀢𑀺, 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑀺𑀧𑀺 𑀧𑀲𑁆𑀲𑀲𑀢𑀺𑀧𑀺. 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑁄𑀧𑀺 𑀧𑀲𑁆𑀲𑀲𑀢𑁄𑀧𑀺 𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀺; 𑀙𑀦𑁆𑀤𑀯𑀲𑁂𑀦 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀤𑀻𑀖𑀁 𑀅𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑀺, 𑀙𑀦𑁆𑀤𑀯𑀲𑁂𑀦 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀤𑀻𑀖𑀁 𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀧𑀲𑁆𑀲𑀲𑀢𑀺, 𑀙𑀦𑁆𑀤𑀯𑀲𑁂𑀦 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑀺𑀧𑀺 𑀧𑀲𑁆𑀲𑀲𑀢𑀺𑀧𑀺. 𑀙𑀦𑁆𑀤𑀯𑀲𑁂𑀦 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑁄𑀧𑀺 𑀧𑀲𑁆𑀲𑀲𑀢𑁄𑀧𑀺 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺; 𑀧𑀸𑀫𑁄𑀚𑁆𑀚𑀯𑀲𑁂𑀦 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀤𑀻𑀖𑀁 𑀅𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑀺, 𑀧𑀸𑀫𑁄𑀚𑁆𑀚𑀯𑀲𑁂𑀦 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀤𑀻𑀖𑀁 𑀧𑀲𑁆𑀲𑀸𑀲𑀁…𑀧𑁂… 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑀺𑀧𑀺 𑀧𑀲𑁆𑀲𑀲𑀢𑀺𑀧𑀺. 𑀧𑀸𑀫𑁄𑀚𑁆𑀚𑀯𑀲𑁂𑀦 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑁄𑀧𑀺 𑀧𑀲𑁆𑀲𑀲𑀢𑁄𑀧𑀺 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀘𑀺𑀢𑁆𑀢𑀁 𑀯𑀺𑀯𑀢𑁆𑀢𑀢𑀺, 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀺. 𑀇𑀫𑁂𑀳𑀺 𑀦𑀯𑀳𑀺 𑀆𑀓𑀸𑀭𑁂𑀳𑀺 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑁄; 𑀉𑀧𑀝𑁆𑀞𑀸𑀦𑀁 𑀲𑀢𑀺; 𑀅𑀦𑀼𑀧𑀲𑁆𑀲𑀦𑀸 𑀜𑀸𑀡𑀁; 𑀓𑀸𑀬𑁄 𑀉𑀧𑀝𑁆𑀞𑀸𑀦𑀁, 𑀦𑁄 𑀲𑀢𑀺; 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀢𑀁 𑀓𑀸𑀬𑀁 𑀅𑀦𑀼𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸’’𑀢𑀺 (𑀧𑀝𑀺. 𑀫. 𑁧.𑁧𑁬𑁬).

𑀏𑀲𑁂𑀯 𑀦𑀬𑁄 𑀭𑀲𑁆𑀲𑀧𑀤𑁂𑀧𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 ‘‘𑀬𑀣𑀸 𑀏𑀢𑁆𑀣 ‘𑀤𑀻𑀖𑀁 𑀅𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂’𑀢𑀺 𑀯𑀼𑀢𑁆𑀢𑀁; 𑀏𑀯𑀫𑀺𑀥 ‘𑀭𑀲𑁆𑀲𑀁 𑀅𑀲𑁆𑀲𑀸𑀲𑀁 𑀇𑀢𑁆𑀢𑀭𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑀻’’𑀢𑀺 𑀆𑀕𑀢𑀁. 𑀢𑀲𑁆𑀫𑀸 𑀢𑀲𑁆𑀲 𑀯𑀲𑁂𑀦 𑀬𑀸𑀯 ‘‘𑀢𑁂𑀦 𑀯𑀼𑀘𑁆𑀘𑀢𑀺 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸’’𑀢𑀺 𑀢𑀸𑀯 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀫𑀬𑀁 𑀅𑀤𑁆𑀥𑀸𑀦𑀯𑀲𑁂𑀦 𑀇𑀢𑁆𑀢𑀭𑀯𑀲𑁂𑀦 𑀘 𑀇𑀫𑁂𑀳𑀸𑀓𑀸𑀭𑁂𑀳𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀚𑀸𑀦𑀦𑁆𑀢𑁄 𑀤𑀻𑀖𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄 ‘‘𑀤𑀻𑀖𑀁 𑀅𑀲𑁆𑀲𑀲𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀺…𑀧𑁂… 𑀭𑀲𑁆𑀲𑀁 𑀯𑀸 𑀧𑀲𑁆𑀲𑀲𑀦𑁆𑀢𑁄 ‘‘𑀭𑀲𑁆𑀲𑀁 𑀧𑀲𑁆𑀲𑀲𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀧𑀚𑀸𑀦𑀢𑁄 𑀘𑀲𑁆𑀲 𑁋

‘‘𑀤𑀻𑀖𑁄 𑀭𑀲𑁆𑀲𑁄 𑀘 𑀅𑀲𑁆𑀲𑀸𑀲𑁄;

𑀧𑀲𑁆𑀲𑀸𑀲𑁄𑀧𑀺 𑀘 𑀢𑀸𑀤𑀺𑀲𑁄;

𑀘𑀢𑁆𑀢𑀸𑀭𑁄 𑀯𑀡𑁆𑀡𑀸 𑀯𑀢𑁆𑀢𑀦𑁆𑀢𑀺;

𑀦𑀸𑀲𑀺𑀓𑀕𑁆𑀕𑁂𑀯 𑀪𑀺𑀓𑁆𑀔𑀼𑀦𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁧𑁯; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁬𑁩);

𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀺…𑀧𑁂… 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻𑀢𑀺 𑀲𑀓𑀮𑀲𑁆𑀲 𑀅𑀲𑁆𑀲𑀸𑀲𑀓𑀸𑀬𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀯𑀺𑀤𑀺𑀢𑀁 𑀓𑀭𑁄𑀦𑁆𑀢𑁄 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀅𑀲𑁆𑀲𑀲𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀓𑁆𑀔𑀢𑀺. 𑀲𑀓𑀮𑀲𑁆𑀲 𑀧𑀲𑁆𑀲𑀸𑀲𑀓𑀸𑀬𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀯𑀺𑀤𑀺𑀢𑀁 𑀓𑀭𑁄𑀦𑁆𑀢𑁄 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀧𑀲𑁆𑀲𑀲𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀓𑁆𑀔𑀢𑀺. 𑀏𑀯𑀁 𑀯𑀺𑀤𑀺𑀢𑀁 𑀓𑀭𑁄𑀦𑁆𑀢𑁄 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀅𑀲𑁆𑀲𑀲𑀢𑀺 𑀘𑁂𑀯 𑀧𑀲𑁆𑀲𑀲𑀢𑀺 𑀘; 𑀢𑀲𑁆𑀫𑀸 ‘‘𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀯𑀺𑀲𑀝𑁂 𑀅𑀲𑁆𑀲𑀸𑀲𑀓𑀸𑀬𑁂 𑀧𑀲𑁆𑀲𑀸𑀲𑀓𑀸𑀬𑁂 𑀯𑀸 𑀆𑀤𑀺 𑀧𑀸𑀓𑀝𑁄 𑀳𑁄𑀢𑀺, 𑀦 𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁. 𑀲𑁄 𑀆𑀤𑀺𑀫𑁂𑀯 𑀧𑀭𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂 𑀓𑀺𑀮𑀫𑀢𑀺. 𑀏𑀓𑀲𑁆𑀲 𑀫𑀚𑁆𑀛𑀁 𑀧𑀸𑀓𑀝𑀁 𑀳𑁄𑀢𑀺, 𑀦 𑀆𑀤𑀺𑀧𑀭𑀺𑀬𑁄𑀲𑀸𑀦𑀁. 𑀲𑁄 𑀫𑀚𑁆𑀛𑀫𑁂𑀯 𑀧𑀭𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀆𑀤𑀺𑀧𑀭𑀺𑀬𑁄𑀲𑀸𑀦𑁂 𑀓𑀺𑀮𑀫𑀢𑀺. 𑀏𑀓𑀲𑁆𑀲 𑀧𑀭𑀺𑀬𑁄𑀲𑀸𑀦𑀁 𑀧𑀸𑀓𑀝𑀁 𑀳𑁄𑀢𑀺, 𑀦 𑀆𑀤𑀺𑀫𑀚𑁆𑀛𑀁. 𑀲𑁄 𑀧𑀭𑀺𑀬𑁄𑀲𑀸𑀦𑀁𑀬𑁂𑀯 𑀧𑀭𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀆𑀤𑀺𑀫𑀚𑁆𑀛𑁂 𑀓𑀺𑀮𑀫𑀢𑀺. 𑀏𑀓𑀲𑁆𑀲 𑀲𑀩𑁆𑀩𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀺, 𑀲𑁄 𑀲𑀩𑁆𑀩𑀫𑁆𑀧𑀺 𑀧𑀭𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀓𑀢𑁆𑀣𑀘𑀺 𑀓𑀺𑀮𑀫𑀢𑀺. 𑀢𑀸𑀤𑀺𑀲𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀺…𑀧𑁂… 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻’’𑀢𑀺.

𑀢𑀢𑁆𑀣 𑀲𑀺𑀓𑁆𑀔𑀢𑀻𑀢𑀺 𑀏𑀯𑀁 𑀖𑀝𑀢𑀺 𑀯𑀸𑀬𑀫𑀢𑀺. 𑀬𑁄 𑀯𑀸 𑀢𑀣𑀸𑀪𑀽𑀢𑀲𑁆𑀲 𑀲𑀁𑀯𑀭𑁄; 𑀅𑀬𑀫𑁂𑀢𑁆𑀣 𑀅𑀥𑀺𑀲𑀻𑀮𑀲𑀺𑀓𑁆𑀔𑀸. 𑀬𑁄 𑀢𑀣𑀸𑀪𑀽𑀢𑀲𑁆𑀲 𑀲𑀫𑀸𑀥𑀺; 𑀅𑀬𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸. 𑀬𑀸 𑀢𑀣𑀸𑀪𑀽𑀢𑀲𑁆𑀲 𑀧𑀜𑁆𑀜𑀸; 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀢𑀺. 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀫𑀦𑀲𑀺𑀓𑀸𑀭𑁂𑀦 𑀲𑀺𑀓𑁆𑀔𑀢𑀺 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀬𑀲𑁆𑀫𑀸 𑀧𑀼𑀭𑀺𑀫𑀦𑀬𑁂 𑀓𑁂𑀯𑀮𑀁 𑀅𑀲𑁆𑀲𑀲𑀺𑀢𑀩𑁆𑀩𑀁 𑀧𑀲𑁆𑀲𑀲𑀺𑀢𑀩𑁆𑀩𑀫𑁂𑀯 𑀘, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀸𑀢𑀩𑁆𑀩𑀁; 𑀇𑀢𑁄 𑀧𑀝𑁆𑀞𑀸𑀬 𑀧𑀦 𑀜𑀸𑀡𑀼𑀧𑁆𑀧𑀸𑀤𑀦𑀸𑀤𑀻𑀲𑀼 𑀬𑁄𑀕𑁄 𑀓𑀭𑀡𑀻𑀬𑁄. 𑀢𑀲𑁆𑀫𑀸 𑀢𑀢𑁆𑀣 ‘‘𑀅𑀲𑁆𑀲𑀲𑀸𑀫𑀻𑀢𑀺 𑀧𑀚𑀸𑀦𑀸𑀢𑀺 𑀧𑀲𑁆𑀲𑀲𑀸𑀫𑀻𑀢𑀺 𑀧𑀚𑀸𑀦𑀸𑀢𑀺’’𑀘𑁆𑀘𑁂𑀯 𑀯𑀢𑁆𑀢𑀫𑀸𑀦𑀓𑀸𑀮𑀯𑀲𑁂𑀦 𑀧𑀸𑀴𑀺𑀁 𑀯𑀢𑁆𑀯𑀸 𑀇𑀢𑁄 𑀧𑀝𑁆𑀞𑀸𑀬 𑀓𑀢𑁆𑀢𑀩𑁆𑀩𑀲𑁆𑀲 𑀜𑀸𑀡𑀼𑀧𑁆𑀧𑀸𑀤𑀦𑀸𑀤𑀺𑀦𑁄 𑀆𑀓𑀸𑀭𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀸𑀕𑀢𑀯𑀘𑀦𑀯𑀲𑁂𑀦 𑀧𑀸𑀴𑀺 𑀆𑀭𑁄𑀧𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀺…𑀧𑁂… 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻𑀢𑀺 𑀑𑀴𑀸𑀭𑀺𑀓𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀫𑁆𑀪𑁂𑀦𑁆𑀢𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑁄 𑀦𑀺𑀭𑁄𑀥𑁂𑀦𑁆𑀢𑁄 𑀯𑀽𑀧𑀲𑀫𑁂𑀦𑁆𑀢𑁄 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺.

𑀢𑀢𑁆𑀭𑁂𑀯𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀘 𑀧𑀲𑁆𑀲𑀤𑁆𑀥𑀺 𑀘 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀧𑀼𑀩𑁆𑀩𑁂 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀓𑀸𑀬𑁄 𑀘 𑀘𑀺𑀢𑁆𑀢𑀜𑁆𑀘 𑀲𑀤𑀭𑀣𑀸 𑀳𑁄𑀦𑁆𑀢𑀺. 𑀑𑀴𑀸𑀭𑀺𑀓𑀸𑀦𑀁 𑀓𑀸𑀬𑀘𑀺𑀢𑁆𑀢𑀸𑀦𑀁 𑀑𑀴𑀸𑀭𑀺𑀓𑀢𑁆𑀢𑁂 𑀅𑀯𑀽𑀧𑀲𑀦𑁆𑀢𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀧𑀺 𑀑𑀴𑀸𑀭𑀺𑀓𑀸 𑀳𑁄𑀦𑁆𑀢𑀺, 𑀩𑀮𑀯𑀢𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀦𑀸𑀲𑀺𑀓𑀸 𑀦𑀧𑁆𑀧𑀳𑁄𑀢𑀺, 𑀫𑀼𑀔𑁂𑀦 𑀅𑀲𑁆𑀲𑀲𑀦𑁆𑀢𑁄𑀧𑀺 𑀧𑀲𑁆𑀲𑀲𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺. 𑀬𑀤𑀸 𑀧𑀦𑀲𑁆𑀲 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀢𑁂 𑀲𑀦𑁆𑀢𑀸 𑀳𑁄𑀦𑁆𑀢𑀺 𑀯𑀽𑀧𑀲𑀦𑁆𑀢𑀸. 𑀢𑁂𑀲𑀼 𑀯𑀽𑀧𑀲𑀦𑁆𑀢𑁂𑀲𑀼 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀲𑀼𑀔𑀼𑀫𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, ‘‘𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’’𑀢𑀺 𑀯𑀺𑀘𑁂𑀢𑀩𑁆𑀩𑀸𑀓𑀸𑀭𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀧𑀼𑀭𑀺𑀲𑀲𑁆𑀲 𑀥𑀸𑀯𑀺𑀢𑁆𑀯𑀸 𑀧𑀩𑁆𑀩𑀢𑀸 𑀯𑀸 𑀑𑀭𑁄𑀳𑀺𑀢𑁆𑀯𑀸 𑀫𑀳𑀸𑀪𑀸𑀭𑀁 𑀯𑀸 𑀲𑀻𑀲𑀢𑁄 𑀑𑀭𑁄𑀧𑁂𑀢𑁆𑀯𑀸 𑀞𑀺𑀢𑀲𑁆𑀲 𑀑𑀴𑀸𑀭𑀺𑀓𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀳𑁄𑀦𑁆𑀢𑀺, 𑀦𑀸𑀲𑀺𑀓𑀸 𑀦𑀧𑁆𑀧𑀳𑁄𑀢𑀺, 𑀫𑀼𑀔𑁂𑀦 𑀅𑀲𑁆𑀲𑀲𑀦𑁆𑀢𑁄𑀧𑀺 𑀧𑀲𑁆𑀲𑀲𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺. 𑀬𑀤𑀸 𑀧𑀦𑁂𑀲 𑀢𑀁 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀅𑀮𑁆𑀮𑀲𑀸𑀝𑀓𑀁 𑀳𑀤𑀬𑁂 𑀓𑀢𑁆𑀯𑀸 𑀲𑀻𑀢𑀸𑀬 𑀙𑀸𑀬𑀸𑀬 𑀦𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀣𑀲𑁆𑀲 𑀢𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀲𑀼𑀔𑀼𑀫𑀸 𑀳𑁄𑀦𑁆𑀢𑀺, ‘‘𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’’𑀢𑀺 𑀯𑀺𑀘𑁂𑀢𑀩𑁆𑀩𑀸𑀓𑀸𑀭𑀧𑁆𑀧𑀢𑁆𑀢𑀸. 𑀏𑀯𑀫𑁂𑀯 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀩𑁆𑀩𑁂 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀓𑀸𑀬𑁄 𑀘…𑀧𑁂… 𑀯𑀺𑀘𑁂𑀢𑀩𑁆𑀩𑀸𑀓𑀸𑀭𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺𑀲𑁆𑀲 𑀧𑀼𑀩𑁆𑀩𑁂 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 ‘‘𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑁂 𑀓𑀸𑀬𑀲𑀗𑁆𑀔𑀸𑀭𑁂 𑀧𑀲𑁆𑀲𑀫𑁆𑀪𑁂𑀫𑀻’’𑀢𑀺 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑀫𑀦𑀲𑀺𑀓𑀸𑀭𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀺, 𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀧𑀦 𑀅𑀢𑁆𑀣𑀺. 𑀢𑁂𑀦𑀲𑁆𑀲 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑀢𑁄 𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀓𑀸𑀬𑀲𑀗𑁆𑀔𑀸𑀭𑁄 𑀲𑀼𑀔𑀼𑀫𑁄 𑀳𑁄𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀲𑀸𑀭𑀤𑁆𑀥𑁂 𑀓𑀸𑀬𑁂 𑀘𑀺𑀢𑁆𑀢𑁂 𑀘, 𑀅𑀥𑀺𑀫𑀢𑁆𑀢𑀁 𑀧𑀯𑀢𑁆𑀢𑀢𑀺;

𑀅𑀲𑀸𑀭𑀤𑁆𑀥𑀫𑁆𑀳𑀺 𑀓𑀸𑀬𑀫𑁆𑀳𑀺, 𑀲𑀼𑀔𑀼𑀫𑀁 𑀲𑀫𑁆𑀧𑀯𑀢𑁆𑀢𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁨𑁦; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁬𑁩);

𑀧𑀭𑀺𑀕𑁆𑀕𑀳𑁂𑀧𑀺 𑀑𑀴𑀸𑀭𑀺𑀓𑁄, 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑁂 𑀲𑀼𑀔𑀼𑀫𑁄; 𑀢𑀲𑁆𑀫𑀺𑀫𑁆𑀧𑀺 𑀑𑀴𑀸𑀭𑀺𑀓𑁄 𑀧𑀞𑀫𑀚𑁆𑀛𑀸𑀦𑁂 𑀲𑀼𑀔𑀼𑀫𑁄. 𑀧𑀞𑀫𑀚𑁆𑀛𑀸𑀦𑁂 𑀘 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀘 𑀑𑀴𑀸𑀭𑀺𑀓𑁄, 𑀤𑀼𑀢𑀺𑀬𑀚𑁆𑀛𑀸𑀦𑁂 𑀲𑀼𑀔𑀼𑀫𑁄. 𑀤𑀼𑀢𑀺𑀬𑀚𑁆𑀛𑀸𑀦𑁂 𑀘 𑀢𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀘 𑀑𑀴𑀸𑀭𑀺𑀓𑁄, 𑀢𑀢𑀺𑀬𑀚𑁆𑀛𑀸𑀦𑁂 𑀲𑀼𑀔𑀼𑀫𑁄. 𑀢𑀢𑀺𑀬𑀚𑁆𑀛𑀸𑀦𑁂 𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑁂 𑀘 𑀑𑀴𑀸𑀭𑀺𑀓𑁄, 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀅𑀢𑀺𑀲𑀼𑀔𑀼𑀫𑁄 𑀅𑀧𑁆𑀧𑀯𑀢𑁆𑀢𑀺𑀫𑁂𑀯 𑀧𑀸𑀧𑀼𑀡𑀸𑀢𑀺. 𑀇𑀤𑀁 𑀢𑀸𑀯 𑀤𑀻𑀖𑀪𑀸𑀡𑀓𑀲𑀁𑀬𑀼𑀢𑁆𑀢𑀪𑀸𑀡𑀓𑀸𑀦𑀁 𑀫𑀢𑀁.

𑀫𑀚𑁆𑀛𑀺𑀫𑀪𑀸𑀡𑀓𑀸 𑀧𑀦 ‘‘𑀧𑀞𑀫𑀚𑁆𑀛𑀸𑀦𑁂 𑀑𑀴𑀸𑀭𑀺𑀓𑁄, 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀲𑀼𑀔𑀼𑀫𑁄’’𑀢𑀺 𑀏𑀯𑀁 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀚𑁆𑀛𑀸𑀦𑀢𑁄 𑀉𑀧𑀭𑀽𑀧𑀭𑀺𑀚𑁆𑀛𑀸𑀦𑀽𑀧𑀘𑀸𑀭𑁂𑀧𑀺 𑀲𑀼𑀔𑀼𑀫𑀢𑀭𑀁 𑀇𑀘𑁆𑀙𑀦𑁆𑀢𑀺. 𑀲𑀩𑁆𑀩𑁂𑀲𑀁𑀬𑁂𑀯 𑀧𑀦 𑀫𑀢𑁂𑀦 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀧𑀯𑀢𑁆𑀢𑀓𑀸𑀬𑀲𑀗𑁆𑀔𑀸𑀭𑁄 𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀧𑀯𑀢𑁆𑀢𑀓𑀸𑀬𑀲𑀗𑁆𑀔𑀸𑀭𑁄 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑁂…𑀧𑁂… 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑁂 𑀧𑀯𑀢𑁆𑀢𑀓𑀸𑀬𑀲𑀗𑁆𑀔𑀸𑀭𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀅𑀬𑀁 𑀢𑀸𑀯 𑀲𑀫𑀣𑁂 𑀦𑀬𑁄.

𑀯𑀺𑀧𑀲𑁆𑀲𑀦𑀸𑀬𑀁 𑀧𑀦 𑀅𑀧𑀭𑀺𑀕𑁆𑀕𑀳𑁂 𑀧𑀯𑀢𑁆𑀢𑁄 𑀓𑀸𑀬𑀲𑀗𑁆𑀔𑀸𑀭𑁄 𑀑𑀴𑀸𑀭𑀺𑀓𑁄, 𑀫𑀳𑀸𑀪𑀽𑀢𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄. 𑀲𑁄𑀧𑀺 𑀑𑀴𑀸𑀭𑀺𑀓𑁄, 𑀉𑀧𑀸𑀤𑀸𑀭𑀽𑀧𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄. 𑀲𑁄𑀧𑀺 𑀑𑀴𑀸𑀭𑀺𑀓𑁄, 𑀲𑀓𑀮𑀭𑀽𑀧𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄. 𑀲𑁄𑀧𑀺 𑀑𑀴𑀸𑀭𑀺𑀓𑁄, 𑀅𑀭𑀽𑀧𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄. 𑀲𑁄𑀧𑀺 𑀑𑀴𑀸𑀭𑀺𑀓𑁄, 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄. 𑀲𑁄𑀧𑀺 𑀑𑀴𑀸𑀭𑀺𑀓𑁄, 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄. 𑀲𑁄𑀧𑀺 𑀑𑀴𑀸𑀭𑀺𑀓𑁄, 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄. 𑀲𑁄𑀧𑀺 𑀑𑀴𑀸𑀭𑀺𑀓𑁄, 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬 𑀲𑀼𑀔𑀼𑀫𑁄. 𑀲𑁄𑀧𑀺 𑀤𑀼𑀩𑁆𑀩𑀮𑀯𑀺𑀧𑀲𑁆𑀲𑀦𑀸𑀬 𑀑𑀴𑀸𑀭𑀺𑀓𑁄, 𑀩𑀮𑀯𑀯𑀺𑀧𑀲𑁆𑀲𑀦𑀸𑀬 𑀲𑀼𑀔𑀼𑀫𑁄. 𑀢𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑁂𑀦 𑀧𑀘𑁆𑀙𑀺𑀫𑁂𑀦 𑀧𑀲𑁆𑀲𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀫𑁂𑀢𑁆𑀣 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀘 𑀧𑀲𑁆𑀲𑀤𑁆𑀥𑀺 𑀘 𑀯𑁂𑀤𑀺𑀢𑀩𑁆𑀩𑀸.

𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀧𑀦𑀲𑁆𑀲 𑀲𑀤𑁆𑀥𑀺𑀁 𑀘𑁄𑀤𑀦𑀸𑀲𑁄𑀥𑀦𑀸𑀳𑀺 𑀏𑀯𑀫𑀢𑁆𑀣𑁄 𑀯𑀼𑀢𑁆𑀢𑁄 𑁋 ‘‘𑀓𑀣𑀁 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀺…𑀧𑁂… 𑀧𑀲𑁆𑀲𑀲𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀓𑁆𑀔𑀢𑀺? 𑀓𑀢𑀫𑁂 𑀓𑀸𑀬𑀲𑀗𑁆𑀔𑀸𑀭𑀸? 𑀤𑀻𑀖𑀁 𑀅𑀲𑁆𑀲𑀸𑀲𑀸 𑀓𑀸𑀬𑀺𑀓𑀸 𑀏𑀢𑁂 𑀥𑀫𑁆𑀫𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸 𑀓𑀸𑀬𑀲𑀗𑁆𑀔𑀸𑀭𑀸, 𑀢𑁂 𑀓𑀸𑀬𑀲𑀗𑁆𑀔𑀸𑀭𑁂 𑀧𑀲𑁆𑀲𑀫𑁆𑀪𑁂𑀦𑁆𑀢𑁄 𑀦𑀺𑀭𑁄𑀥𑁂𑀦𑁆𑀢𑁄 𑀯𑀽𑀧𑀲𑀫𑁂𑀦𑁆𑀢𑁄 𑀲𑀺𑀓𑁆𑀔𑀢𑀺. 𑀤𑀻𑀖𑀁 𑀧𑀲𑁆𑀲𑀸𑀲𑀸 𑀓𑀸𑀬𑀺𑀓𑀸 𑀏𑀢𑁂 𑀥𑀫𑁆𑀫𑀸…𑀧𑁂… 𑀭𑀲𑁆𑀲𑀁 𑀅𑀲𑁆𑀲𑀸𑀲𑀸…𑀧𑁂… 𑀭𑀲𑁆𑀲𑀁 𑀧𑀲𑁆𑀲𑀸𑀲𑀸… 𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀸𑀲𑀸… 𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀸𑀲𑀸 𑀓𑀸𑀬𑀺𑀓𑀸 𑀏𑀢𑁂 𑀥𑀫𑁆𑀫𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸 𑀓𑀸𑀬𑀲𑀗𑁆𑀔𑀸𑀭𑀸, 𑀢𑁂 𑀓𑀸𑀬𑀲𑀗𑁆𑀔𑀸𑀭𑁂 𑀧𑀲𑁆𑀲𑀫𑁆𑀪𑁂𑀦𑁆𑀢𑁄 𑀦𑀺𑀭𑁄𑀥𑁂𑀦𑁆𑀢𑁄 𑀯𑀽𑀧𑀲𑀫𑁂𑀦𑁆𑀢𑁄 𑀲𑀺𑀓𑁆𑀔𑀢𑀺.

𑀬𑀣𑀸𑀭𑀽𑀧𑁂𑀳𑀺 𑀓𑀸𑀬𑀲𑀗𑁆𑀔𑀸𑀭𑁂𑀳𑀺 𑀬𑀸 𑀓𑀸𑀬𑀲𑁆𑀲 𑀆𑀦𑀫𑀦𑀸 𑀯𑀺𑀦𑀫𑀦𑀸 𑀲𑀦𑁆𑀦𑀫𑀦𑀸 𑀧𑀡𑀫𑀦𑀸 𑀇𑀜𑁆𑀚𑀦𑀸 𑀨𑀦𑁆𑀤𑀦𑀸 𑀘𑀮𑀦𑀸 𑀓𑀫𑁆𑀧𑀦𑀸 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺, 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺.

𑀬𑀣𑀸𑀭𑀽𑀧𑁂𑀳𑀺 𑀓𑀸𑀬𑀲𑀗𑁆𑀔𑀸𑀭𑁂𑀳𑀺 𑀬𑀸 𑀓𑀸𑀬𑀲𑁆𑀲 𑀦 𑀆𑀦𑀫𑀦𑀸 𑀦 𑀯𑀺𑀦𑀫𑀦𑀸 𑀦 𑀲𑀦𑁆𑀦𑀫𑀦𑀸 𑀦 𑀧𑀡𑀫𑀦𑀸 𑀅𑀦𑀺𑀜𑁆𑀚𑀦𑀸 𑀅𑀨𑀦𑁆𑀤𑀦𑀸 𑀅𑀘𑀮𑀦𑀸 𑀅𑀓𑀫𑁆𑀧𑀦𑀸, 𑀲𑀦𑁆𑀢𑀁 𑀲𑀼𑀔𑀼𑀫𑀁 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺, 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺.

𑀇𑀢𑀺 𑀓𑀺𑀭 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺, 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀏𑀯𑀁 𑀲𑀦𑁆𑀢𑁂 𑀯𑀸𑀢𑀽𑀧𑀮𑀤𑁆𑀥𑀺𑀬𑀸 𑀘 𑀧𑀪𑀸𑀯𑀦𑀸 𑀦 𑀳𑁄𑀢𑀺, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀜𑁆𑀘 𑀧𑀪𑀸𑀯𑀦𑀸 𑀦 𑀳𑁄𑀢𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀘 𑀧𑀪𑀸𑀯𑀦𑀸 𑀦 𑀳𑁄𑀢𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀘 𑀧𑀪𑀸𑀯𑀦𑀸 𑀦 𑀦 𑀳𑁄𑀢𑀺, 𑀦 𑀘 𑀦𑀁 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀧𑀡𑁆𑀟𑀺𑀢𑀸 𑀲𑀫𑀸𑀧𑀚𑁆𑀚𑀦𑁆𑀢𑀺𑀧𑀺 𑀯𑀼𑀝𑁆𑀞𑀳𑀦𑁆𑀢𑀺𑀧𑀺.

𑀇𑀢𑀺 𑀓𑀺𑀭 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀺…𑀧𑁂… 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀏𑀯𑀁 𑀲𑀦𑁆𑀢𑁂 𑀯𑀸𑀢𑀽𑀧𑀮𑀤𑁆𑀥𑀺𑀬𑀸 𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀜𑁆𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀢𑀜𑁆𑀘 𑀦𑀁 𑀲𑀫𑀸𑀧𑀢𑁆𑀢𑀺𑀁 𑀧𑀡𑁆𑀟𑀺𑀢𑀸 𑀲𑀫𑀸𑀧𑀚𑁆𑀚𑀦𑁆𑀢𑀺𑀧𑀺 𑀯𑀼𑀝𑁆𑀞𑀳𑀦𑁆𑀢𑀺𑀧𑀺.

𑀬𑀣𑀸 𑀓𑀣𑀁 𑀯𑀺𑀬? 𑀲𑁂𑀬𑁆𑀬𑀣𑀸𑀧𑀺 𑀓𑀁𑀲𑁂 𑀆𑀓𑁄𑀝𑀺𑀢𑁂 𑀧𑀞𑀫𑀁 𑀑𑀴𑀸𑀭𑀺𑀓𑀸 𑀲𑀤𑁆𑀤𑀸 𑀧𑀯𑀢𑁆𑀢𑀦𑁆𑀢𑀺, 𑀑𑀴𑀸𑀭𑀺𑀓𑀸𑀦𑀁 𑀲𑀤𑁆𑀤𑀸𑀦𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀢𑁆𑀢𑀸 𑀲𑀼𑀫𑀦𑀲𑀺𑀓𑀢𑀢𑁆𑀢𑀸 𑀲𑀽𑀧𑀥𑀸𑀭𑀺𑀢𑀢𑁆𑀢𑀸 𑀦𑀺𑀭𑀼𑀤𑁆𑀥𑁂𑀧𑀺 𑀑𑀴𑀸𑀭𑀺𑀓𑁂 𑀲𑀤𑁆𑀤𑁂 𑀅𑀣 𑀧𑀘𑁆𑀙𑀸 𑀲𑀼𑀔𑀼𑀫𑀓𑀸 𑀲𑀤𑁆𑀤𑀸 𑀧𑀯𑀢𑁆𑀢𑀦𑁆𑀢𑀺, 𑀲𑀼𑀔𑀼𑀫𑀓𑀸𑀦𑀁 𑀲𑀤𑁆𑀤𑀸𑀦𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀢𑁆𑀢𑀸 𑀲𑀼𑀫𑀦𑀲𑀺𑀓𑀢𑀢𑁆𑀢𑀸 𑀲𑀽𑀧𑀥𑀸𑀭𑀺𑀢𑀢𑁆𑀢𑀸 𑀦𑀺𑀭𑀼𑀤𑁆𑀥𑁂𑀧𑀺 𑀲𑀼𑀔𑀼𑀫𑀓𑁂 𑀲𑀤𑁆𑀤𑁂 𑀅𑀣 𑀧𑀘𑁆𑀙𑀸 𑀲𑀼𑀔𑀼𑀫𑀲𑀤𑁆𑀤𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑀸𑀧𑀺 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺; 𑀏𑀯𑀫𑁂𑀯 𑀧𑀞𑀫𑀁 𑀑𑀴𑀸𑀭𑀺𑀓𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀯𑀢𑁆𑀢𑀦𑁆𑀢𑀺, 𑀑𑀴𑀸𑀭𑀺𑀓𑀸𑀦𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀢𑁆𑀢𑀸 𑀲𑀼𑀫𑀦𑀲𑀺𑀓𑀢𑀢𑁆𑀢𑀸 𑀲𑀽𑀧𑀥𑀸𑀭𑀺𑀢𑀢𑁆𑀢𑀸 𑀦𑀺𑀭𑀼𑀤𑁆𑀥𑁂𑀧𑀺 𑀑𑀴𑀸𑀭𑀺𑀓𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀅𑀣 𑀧𑀘𑁆𑀙𑀸 𑀲𑀼𑀔𑀼𑀫𑀓𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀯𑀢𑁆𑀢𑀦𑁆𑀢𑀺, 𑀲𑀼𑀔𑀼𑀫𑀓𑀸𑀦𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀢𑁆𑀢𑀸 𑀲𑀼𑀫𑀦𑀲𑀺𑀓𑀢𑀢𑁆𑀢𑀸 𑀲𑀽𑀧𑀥𑀸𑀭𑀺𑀢𑀢𑁆𑀢𑀸 𑀦𑀺𑀭𑀼𑀤𑁆𑀥𑁂𑀧𑀺 𑀲𑀼𑀔𑀼𑀫𑀓𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀅𑀣 𑀧𑀘𑁆𑀙𑀸 𑀲𑀼𑀔𑀼𑀫𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑀸𑀧𑀺 𑀘𑀺𑀢𑁆𑀢𑀁 𑀦 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺.

𑀏𑀯𑀁 𑀲𑀦𑁆𑀢𑁂 𑀯𑀸𑀢𑀽𑀧𑀮𑀤𑁆𑀥𑀺𑀬𑀸 𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀜𑁆𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀢𑀜𑁆𑀘 𑀦𑀁 𑀲𑀫𑀸𑀧𑀢𑁆𑀢𑀺𑀁 𑀧𑀡𑁆𑀟𑀺𑀢𑀸 𑀲𑀫𑀸𑀧𑀚𑁆𑀚𑀦𑁆𑀢𑀺𑀧𑀺 𑀯𑀼𑀝𑁆𑀞𑀳𑀦𑁆𑀢𑀺𑀧𑀺.

𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀦𑁆𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑁄, 𑀉𑀧𑀝𑁆𑀞𑀸𑀦𑀁 𑀲𑀢𑀺, 𑀅𑀦𑀼𑀧𑀲𑁆𑀲𑀦𑀸 𑀜𑀸𑀡𑀁. 𑀓𑀸𑀬𑁄 𑀉𑀧𑀝𑁆𑀞𑀸𑀦𑀁 𑀦𑁄 𑀲𑀢𑀺, 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘, 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀢𑀁 𑀓𑀸𑀬𑀁 𑀅𑀦𑀼𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀢𑀺 (𑀧𑀝𑀺. 𑀫. 𑁧.𑁧𑁭𑁧).

𑀅𑀬𑀁 𑀢𑀸𑀯𑁂𑀢𑁆𑀣 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀧𑀞𑀫𑀘𑀢𑀼𑀓𑁆𑀓𑀲𑁆𑀲 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸.

𑀬𑀲𑁆𑀫𑀸 𑀧𑀦𑁂𑀢𑁆𑀣 𑀇𑀤𑀫𑁂𑀯 𑀘𑀢𑀼𑀓𑁆𑀓𑀁 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀢𑀭𑀸𑀦𑀺 𑀧𑀦 𑀢𑀻𑀡𑀺 𑀘𑀢𑀼𑀓𑁆𑀓𑀸𑀦𑀺 𑀏𑀢𑁆𑀣 𑀧𑀢𑁆𑀢𑀚𑁆𑀛𑀸𑀦𑀲𑁆𑀲 𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀲𑁆𑀫𑀸 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀤𑀝𑁆𑀞𑀸𑀦𑀸𑀬 𑀯𑀺𑀧𑀲𑁆𑀲𑀦𑀸𑀬 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀓𑀸𑀫𑁂𑀦 𑀩𑀼𑀤𑁆𑀥𑀧𑀼𑀢𑁆𑀢𑁂𑀦 𑀬𑀁 𑀓𑀸𑀢𑀩𑁆𑀩𑀁 𑀢𑀁 𑀲𑀩𑁆𑀩𑀁 𑀇𑀥𑁂𑀯 𑀢𑀸𑀯 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀲𑁂𑀦 𑀆𑀤𑀺𑀢𑁄 𑀧𑀪𑀼𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀘𑀢𑀼𑀩𑁆𑀩𑀺𑀥𑀁 𑀢𑀸𑀯 𑀲𑀻𑀮𑀁 𑀯𑀺𑀲𑁄𑀥𑁂𑀢𑀩𑁆𑀩𑀁. 𑀢𑀢𑁆𑀣 𑀢𑀺𑀯𑀺𑀥𑀸 𑀯𑀺𑀲𑁄𑀥𑀦𑀸 𑁋 𑀅𑀦𑀸𑀧𑀚𑁆𑀚𑀦𑀁, 𑀆𑀧𑀦𑁆𑀦𑀯𑀼𑀝𑁆𑀞𑀸𑀦𑀁, 𑀓𑀺𑀮𑁂𑀲𑁂𑀳𑀺 𑀘 𑀅𑀧𑁆𑀧𑀢𑀺𑀧𑀻𑀴𑀦𑀁. 𑀏𑀯𑀁 𑀯𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀳𑀺 𑀪𑀸𑀯𑀦𑀸 𑀲𑀫𑁆𑀧𑀚𑁆𑀚𑀢𑀺. 𑀬𑀫𑁆𑀧𑀺𑀤𑀁 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀁 𑀩𑁄𑀥𑀺𑀬𑀗𑁆𑀕𑀡𑀯𑀢𑁆𑀢𑀁 𑀉𑀧𑀚𑁆𑀛𑀸𑀬𑀯𑀢𑁆𑀢𑀁 𑀆𑀘𑀭𑀺𑀬𑀯𑀢𑁆𑀢𑀁 𑀚𑀦𑁆𑀢𑀸𑀖𑀭𑀯𑀢𑁆𑀢𑀁 𑀉𑀧𑁄𑀲𑀣𑀸𑀕𑀸𑀭𑀯𑀢𑁆𑀢𑀁 𑀤𑁆𑀯𑁂𑀅𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀘𑀼𑀤𑁆𑀤𑀲𑀯𑀺𑀥𑀁 𑀫𑀳𑀸𑀯𑀢𑁆𑀢𑀦𑁆𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀁 𑀯𑀼𑀘𑁆𑀘𑀢𑀺, 𑀢𑀫𑁆𑀧𑀺 𑀲𑀸𑀥𑀼𑀓𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁. 𑀬𑁄 𑀳𑀺 ‘‘𑀅𑀳𑀁 𑀲𑀻𑀮𑀁 𑀭𑀓𑁆𑀔𑀸𑀫𑀺, 𑀓𑀺𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀦 𑀓𑀫𑁆𑀫’’𑀦𑁆𑀢𑀺 𑀯𑀤𑁂𑀬𑁆𑀬, 𑀢𑀲𑁆𑀲 𑀲𑀻𑀮𑀁 𑀧𑀭𑀺𑀧𑀽𑀭𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀆𑀪𑀺𑀲𑀫𑀸𑀘𑀸𑀭𑀺𑀓𑀯𑀢𑁆𑀢𑁂 𑀧𑀦 𑀧𑀭𑀺𑀧𑀽𑀭𑁂 𑀲𑀻𑀮𑀁 𑀧𑀭𑀺𑀧𑀽𑀭𑀢𑀺, 𑀲𑀻𑀮𑁂 𑀧𑀭𑀺𑀧𑀽𑀭𑁂 𑀲𑀫𑀸𑀥𑀺 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀥𑀫𑁆𑀫𑀁 𑀅𑀧𑀭𑀺𑀧𑀽𑀭𑁂𑀢𑁆𑀯𑀸 ‘𑀲𑀻𑀮𑀸𑀦𑀺 𑀧𑀭𑀺𑀧𑀽𑀭𑁂𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀅. 𑀦𑀺. 𑁫.𑁨𑁧) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀲𑁆𑀫𑀸 𑀢𑁂𑀦 𑀬𑀫𑁆𑀧𑀺𑀤𑀁 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀺 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀁 𑀯𑀼𑀘𑁆𑀘𑀢𑀺, 𑀢𑀫𑁆𑀧𑀺 𑀲𑀸𑀥𑀼𑀓𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁. 𑀢𑀢𑁄 𑁋

‘‘𑀆𑀯𑀸𑀲𑁄 𑀘 𑀓𑀼𑀮𑀁 𑀮𑀸𑀪𑁄, 𑀕𑀡𑁄 𑀓𑀫𑁆𑀫𑀜𑁆𑀘 𑀧𑀜𑁆𑀘𑀫𑀁;

𑀅𑀤𑁆𑀥𑀸𑀦𑀁 𑀜𑀸𑀢𑀺 𑀆𑀩𑀸𑀥𑁄, 𑀕𑀦𑁆𑀣𑁄 𑀇𑀤𑁆𑀥𑀻𑀢𑀺 𑀢𑁂 𑀤𑀲𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂𑀲𑀼 𑀤𑀲𑀲𑀼 𑀧𑀮𑀺𑀩𑁄𑀥𑁂𑀲𑀼 𑀬𑁄 𑀧𑀮𑀺𑀩𑁄𑀥𑁄 𑀅𑀢𑁆𑀣𑀺, 𑀲𑁄 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄.

𑀏𑀯𑀁 𑀉𑀧𑀘𑁆𑀙𑀺𑀦𑁆𑀦𑀧𑀮𑀺𑀩𑁄𑀥𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀢𑀫𑁆𑀧𑀺 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦𑀜𑁆𑀘. 𑀢𑀢𑁆𑀣 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫 𑀪𑀺𑀓𑁆𑀔𑀼𑀲𑀗𑁆𑀖𑀸𑀤𑀻𑀲𑀼 𑀫𑁂𑀢𑁆𑀢𑀸 𑀫𑀭𑀡𑀲𑁆𑀲𑀢𑀺 𑀘 𑀅𑀲𑀼𑀪𑀲𑀜𑁆𑀜𑀸𑀢𑀺𑀧𑀺 𑀏𑀓𑁂. 𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀧𑀞𑀫𑀁 𑀢𑀸𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀻𑀫𑀝𑁆𑀞𑀓𑀪𑀺𑀓𑁆𑀔𑀼𑀲𑀗𑁆𑀖𑁂 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸; 𑀢𑀢𑁄 𑀲𑀻𑀫𑀝𑁆𑀞𑀓𑀤𑁂𑀯𑀢𑀸𑀲𑀼, 𑀢𑀢𑁄 𑀕𑁄𑀘𑀭𑀕𑀸𑀫𑁂 𑀇𑀲𑁆𑀲𑀭𑀚𑀦𑁂, 𑀢𑀢𑁄 𑀢𑀢𑁆𑀣 𑀫𑀦𑀼𑀲𑁆𑀲𑁂 𑀉𑀧𑀸𑀤𑀸𑀬 𑀲𑀩𑁆𑀩𑀲𑀢𑁆𑀢𑁂𑀲𑀼. 𑀲𑁄 𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀫𑁂𑀢𑁆𑀢𑀸𑀬 𑀲𑀳𑀯𑀸𑀲𑀻𑀦𑀁 𑀫𑀼𑀤𑀼𑀘𑀺𑀢𑁆𑀢𑀢𑀁 𑀚𑀦𑁂𑀢𑀺, 𑀅𑀣𑀲𑁆𑀲 𑀲𑀼𑀔𑀲𑀁𑀯𑀸𑀲𑀢𑀸 𑀳𑁄𑀢𑀺. 𑀲𑀻𑀫𑀝𑁆𑀞𑀓𑀤𑁂𑀯𑀢𑀸𑀲𑀼 𑀫𑁂𑀢𑁆𑀢𑀸𑀬 𑀫𑀼𑀤𑀼𑀓𑀢𑀘𑀺𑀢𑁆𑀢𑀸𑀳𑀺 𑀤𑁂𑀯𑀢𑀸𑀳𑀺 𑀥𑀫𑁆𑀫𑀺𑀓𑀸𑀬 𑀭𑀓𑁆𑀔𑀸𑀬 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑁄 𑀳𑁄𑀢𑀺. 𑀕𑁄𑀘𑀭𑀕𑀸𑀫𑁂 𑀇𑀲𑁆𑀲𑀭𑀚𑀦𑁂 𑀫𑁂𑀢𑁆𑀢𑀸𑀬 𑀫𑀼𑀤𑀼𑀓𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀳𑀺 𑀇𑀲𑁆𑀲𑀭𑁂𑀳𑀺 𑀥𑀫𑁆𑀫𑀺𑀓𑀸𑀬 𑀭𑀓𑁆𑀔𑀸𑀬 𑀲𑀼𑀭𑀓𑁆𑀔𑀺𑀢𑀧𑀭𑀺𑀓𑁆𑀔𑀸𑀭𑁄 𑀳𑁄𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑁂𑀲𑀼 𑀫𑁂𑀢𑁆𑀢𑀸𑀬 𑀧𑀲𑀸𑀤𑀺𑀢𑀘𑀺𑀢𑁆𑀢𑁂𑀳𑀺 𑀢𑁂𑀳𑀺 𑀅𑀧𑀭𑀺𑀪𑀽𑀢𑁄 𑀳𑀼𑀢𑁆𑀯𑀸 𑀯𑀺𑀘𑀭𑀢𑀺. 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀬 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀘𑀸𑀭𑁄 𑀳𑁄𑀢𑀺.

𑀫𑀭𑀡𑀲𑁆𑀲𑀢𑀺𑀬𑀸 𑀧𑀦 ‘‘𑀅𑀯𑀲𑁆𑀲𑀁 𑀫𑀭𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀅𑀦𑁂𑀲𑀦𑀁 𑀧𑀳𑀸𑀬 𑀉𑀧𑀭𑀽𑀧𑀭𑀺𑀯𑀟𑁆𑀠𑀫𑀸𑀦𑀲𑀁𑀯𑁂𑀕𑁄 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀓𑁄 𑀳𑁄𑀢𑀺. 𑀅𑀲𑀼𑀪𑀲𑀜𑁆𑀜𑀸𑀬 𑀤𑀺𑀩𑁆𑀩𑁂𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀢𑀡𑁆𑀳𑀸 𑀦𑀼𑀧𑁆𑀧𑀚𑁆𑀚𑀢𑀺. 𑀢𑁂𑀦𑀲𑁆𑀲𑁂𑀢𑀁 𑀢𑀬𑀁 𑀏𑀯𑀁 𑀩𑀳𑀽𑀧𑀓𑀸𑀭𑀢𑁆𑀢𑀸 ‘‘𑀲𑀩𑁆𑀩𑀢𑁆𑀣 𑀅𑀢𑁆𑀣𑀬𑀺𑀢𑀩𑁆𑀩𑀁 𑀇𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀓𑀢𑁆𑀯𑀸 𑀅𑀥𑀺𑀧𑁆𑀧𑁂𑀢𑀲𑁆𑀲 𑀘 𑀬𑁄𑀕𑀸𑀦𑀼𑀬𑁄𑀕𑀓𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀢𑁆𑀢𑀸 ‘‘𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑁂𑀲𑀼 𑀧𑀦 𑀬𑀁 𑀬𑀲𑁆𑀲 𑀘𑀭𑀺𑀢𑀸𑀦𑀼𑀓𑀽𑀮𑀁, 𑀢𑀁 𑀢𑀲𑁆𑀲 𑀦𑀺𑀘𑁆𑀘𑀁 𑀧𑀭𑀺𑀳𑀭𑀺𑀢𑀩𑁆𑀩𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 ‘‘𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀇𑀤𑀫𑁂𑀯 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 ‘‘𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀻𑀮𑀯𑀺𑀲𑁄𑀥𑀦𑀓𑀣𑀁 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀓𑀣𑀜𑁆𑀘 𑀇𑀘𑁆𑀙𑀦𑁆𑀢𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 𑀕𑀳𑁂𑀢𑀩𑁆𑀩𑁄.

𑀏𑀯𑀁 𑀯𑀺𑀲𑀼𑀤𑁆𑀥𑀲𑀻𑀮𑁂𑀦 𑀧𑀦 𑀉𑀧𑀘𑁆𑀙𑀺𑀦𑁆𑀦𑀧𑀮𑀺𑀩𑁄𑀥𑁂𑀦 𑀘 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀦𑁆𑀢𑁂𑀦 𑀇𑀫𑀺𑀦𑀸𑀯 𑀓𑀫𑁆𑀫𑀝𑁆𑀞𑀸𑀦𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲 𑀩𑀼𑀤𑁆𑀥𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀢𑀁 𑀅𑀮𑀪𑀦𑁆𑀢𑁂𑀦 𑀅𑀦𑀸𑀕𑀸𑀫𑀺𑀲𑁆𑀲, 𑀢𑀫𑁆𑀧𑀺 𑀅𑀮𑀪𑀦𑁆𑀢𑁂𑀦 𑀲𑀓𑀤𑀸𑀕𑀸𑀫𑀺𑀲𑁆𑀲, 𑀢𑀫𑁆𑀧𑀺 𑀅𑀮𑀪𑀦𑁆𑀢𑁂𑀦 𑀲𑁄𑀢𑀸𑀧𑀦𑁆𑀦𑀲𑁆𑀲, 𑀢𑀫𑁆𑀧𑀺 𑀅𑀮𑀪𑀦𑁆𑀢𑁂𑀦 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀮𑀸𑀪𑀺𑀲𑁆𑀲, 𑀢𑀫𑁆𑀧𑀺 𑀅𑀮𑀪𑀦𑁆𑀢𑁂𑀦 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀅𑀲𑀫𑁆𑀫𑀽𑀴𑁆𑀳𑀲𑁆𑀲 𑀯𑀺𑀦𑀺𑀘𑁆𑀙𑀬𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀅𑀭𑀳𑀦𑁆𑀢𑀸𑀤𑀬𑁄 𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑀫𑁂𑀯 𑀆𑀘𑀺𑀓𑁆𑀔𑀦𑁆𑀢𑀺. 𑀅𑀬𑀁 𑀧𑀦 𑀕𑀳𑀦𑀧𑀤𑁂𑀲𑁂 𑀫𑀳𑀸𑀳𑀢𑁆𑀣𑀺𑀧𑀣𑀁 𑀦𑀻𑀳𑀭𑀦𑁆𑀢𑁄 𑀯𑀺𑀬 𑀲𑀩𑁆𑀩𑀢𑁆𑀣 𑀅𑀲𑀫𑁆𑀫𑀽𑀴𑁆𑀳𑁄 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀣𑁂𑀢𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀦𑀸 𑀯𑀺𑀦𑀬𑀸𑀘𑀸𑀭𑀲𑀫𑁆𑀧𑀦𑁆𑀦𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑀸𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀆𑀭𑀸𑀥𑀺𑀢𑀘𑀺𑀢𑁆𑀢𑀲𑁆𑀲 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀜𑁆𑀘𑀲𑀦𑁆𑀥𑀺𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀢𑀢𑁆𑀭𑀺𑀫𑁂 𑀧𑀜𑁆𑀘 𑀲𑀦𑁆𑀥𑀬𑁄 𑁋 𑀉𑀕𑁆𑀕𑀳𑁄, 𑀧𑀭𑀺𑀧𑀼𑀘𑁆𑀙𑀸, 𑀉𑀧𑀝𑁆𑀞𑀸𑀦𑀁, 𑀅𑀧𑁆𑀧𑀦𑀸, 𑀮𑀓𑁆𑀔𑀡𑀦𑁆𑀢𑀺. 𑀢𑀢𑁆𑀣 ‘‘𑀉𑀕𑁆𑀕𑀳𑁄’’ 𑀦𑀸𑀫 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀕𑁆𑀕𑀡𑁆𑀳𑀦𑀁, ‘‘𑀧𑀭𑀺𑀧𑀼𑀘𑁆𑀙𑀸’’ 𑀦𑀸𑀫 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀧𑀭𑀺𑀧𑀼𑀘𑁆𑀙𑀦𑀸, ‘‘𑀉𑀧𑀝𑁆𑀞𑀸𑀦𑀁’’ 𑀦𑀸𑀫 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀧𑀝𑁆𑀞𑀸𑀦𑀁, ‘‘𑀅𑀧𑁆𑀧𑀦𑀸’’ 𑀦𑀸𑀫 𑀓𑀫𑁆𑀫𑀝𑁆𑀞𑀸𑀦𑀧𑁆𑀧𑀦𑀸, ‘‘𑀮𑀓𑁆𑀔𑀡𑀁’’ 𑀦𑀸𑀫 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀮𑀓𑁆𑀔𑀡𑀁. ‘‘𑀏𑀯𑀁𑀮𑀓𑁆𑀔𑀡𑀫𑀺𑀤𑀁 𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑀪𑀸𑀯𑀽𑀧𑀥𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 𑀧𑀜𑁆𑀘𑀲𑀦𑁆𑀥𑀺𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀅𑀢𑁆𑀢𑀦𑀸𑀧𑀺 𑀦 𑀓𑀺𑀮𑀫𑀢𑀺, 𑀆𑀘𑀭𑀺𑀬𑀫𑁆𑀧𑀺 𑀦 𑀯𑀺𑀳𑁂𑀞𑁂𑀢𑀺; 𑀢𑀲𑁆𑀫𑀸 𑀣𑁄𑀓𑀁 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀩𑀳𑀼𑀓𑀸𑀮𑀁 𑀲𑀚𑁆𑀛𑀸𑀬𑀺𑀢𑁆𑀯𑀸 𑀏𑀯𑀁 𑀧𑀜𑁆𑀘𑀲𑀦𑁆𑀥𑀺𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀘𑁂 𑀢𑀢𑁆𑀣 𑀲𑀧𑁆𑀧𑀸𑀬𑀁 𑀳𑁄𑀢𑀺, 𑀢𑀢𑁆𑀣𑁂𑀯 𑀯𑀲𑀺𑀢𑀩𑁆𑀩𑀁. 𑀦𑁄 𑀘𑁂 𑀢𑀢𑁆𑀣 𑀲𑀧𑁆𑀧𑀸𑀬𑀁 𑀳𑁄𑀢𑀺, 𑀆𑀘𑀭𑀺𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀲𑀘𑁂 𑀫𑀦𑁆𑀤𑀧𑀜𑁆𑀜𑁄 𑀬𑁄𑀚𑀦𑀧𑀭𑀫𑀁 𑀕𑀦𑁆𑀢𑁆𑀯𑀸, 𑀲𑀘𑁂 𑀢𑀺𑀓𑁆𑀔𑀧𑀜𑁆𑀜𑁄 𑀤𑀽𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀭𑀲𑀲𑁂𑀦𑀸𑀲𑀦𑀤𑁄𑀲𑀯𑀺𑀯𑀚𑁆𑀚𑀺𑀢𑀁, 𑀧𑀜𑁆𑀘𑀲𑁂𑀦𑀸𑀲𑀦𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀲𑁂𑀦𑀸𑀲𑀦𑀁 𑀉𑀧𑀕𑀫𑁆𑀫 𑀢𑀢𑁆𑀣 𑀯𑀲𑀦𑁆𑀢𑁂𑀦 𑀉𑀧𑀘𑁆𑀙𑀺𑀦𑁆𑀦𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑁂𑀦 𑀓𑀢𑀪𑀢𑁆𑀢𑀓𑀺𑀘𑁆𑀘𑁂𑀦 𑀪𑀢𑁆𑀢𑀲𑀫𑁆𑀫𑀤𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀆𑀘𑀭𑀺𑀬𑀼𑀕𑁆𑀕𑀳𑀢𑁄 𑀏𑀓𑀧𑀤𑀫𑁆𑀧𑀺 𑀅𑀲𑀫𑁆𑀫𑀼𑀲𑁆𑀲𑀦𑁆𑀢𑁂𑀦 𑀇𑀤𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀇𑀫𑀁 𑀓𑀣𑀸𑀫𑀕𑁆𑀕𑀁 𑀇𑀘𑁆𑀙𑀦𑁆𑀢𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 (𑀯𑀺𑀲𑀼𑀤𑁆𑀥𑀺. 𑁧.𑁫𑁫) 𑀕𑀳𑁂𑀢𑀩𑁆𑀩𑁄.

𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀇𑀤𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀸𑀢𑀩𑁆𑀩’’𑀦𑁆𑀢𑀺 𑀢𑀢𑁆𑀭𑀸𑀬𑀁 𑀫𑀦𑀲𑀺𑀓𑀸𑀭𑀯𑀺𑀥𑀺 𑁋

‘‘𑀕𑀡𑀦𑀸 𑀅𑀦𑀼𑀩𑀦𑁆𑀥𑀦𑀸, 𑀨𑀼𑀲𑀦𑀸 𑀞𑀧𑀦𑀸 𑀲𑀮𑁆𑀮𑀓𑁆𑀔𑀡𑀸;

𑀯𑀺𑀯𑀝𑁆𑀝𑀦𑀸 𑀧𑀸𑀭𑀺𑀲𑀼𑀤𑁆𑀥𑀺, 𑀢𑁂𑀲𑀜𑁆𑀘 𑀧𑀝𑀺𑀧𑀲𑁆𑀲𑀦𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁨𑁩; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁬𑁩);

‘‘𑀕𑀡𑀦𑀸’’𑀢𑀺 𑀕𑀡𑀦𑀸𑀬𑁂𑀯. ‘‘𑀅𑀦𑀼𑀩𑀦𑁆𑀥𑀦𑀸’’𑀢𑀺 𑀅𑀦𑀼𑀯𑀳𑀦𑀸. ‘‘𑀨𑀼𑀲𑀦𑀸’’𑀢𑀺 𑀨𑀼𑀝𑁆𑀞𑀝𑁆𑀞𑀸𑀦𑀁. ‘‘𑀞𑀧𑀦𑀸’’𑀢𑀺 𑀅𑀧𑁆𑀧𑀦𑀸. ‘‘𑀲𑀮𑁆𑀮𑀓𑁆𑀔𑀡𑀸’’𑀢𑀺 𑀯𑀺𑀧𑀲𑁆𑀲𑀦𑀸. ‘‘𑀯𑀺𑀯𑀝𑁆𑀝𑀦𑀸’’𑀢𑀺 𑀫𑀕𑁆𑀕𑁄. ‘‘𑀧𑀸𑀭𑀺𑀲𑀼𑀤𑁆𑀥𑀻’’𑀢𑀺 𑀨𑀮𑀁. ‘‘𑀢𑁂𑀲𑀜𑁆𑀘 𑀧𑀝𑀺𑀧𑀲𑁆𑀲𑀦𑀸’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸. 𑀢𑀢𑁆𑀣 𑀇𑀫𑀺𑀦𑀸 𑀆𑀤𑀺𑀓𑀫𑁆𑀫𑀺𑀓𑀓𑀼𑀮𑀧𑀼𑀢𑁆𑀢𑁂𑀦 𑀧𑀞𑀫𑀁 𑀕𑀡𑀦𑀸𑀬 𑀇𑀤𑀁 𑀓𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀕𑀡𑁂𑀦𑁆𑀢𑁂𑀦 𑀘 𑀧𑀜𑁆𑀘𑀦𑁆𑀦𑀁 𑀳𑁂𑀝𑁆𑀞𑀸 𑀦 𑀞𑀧𑁂𑀢𑀩𑁆𑀩𑀁, 𑀤𑀲𑀦𑁆𑀦𑀁 𑀉𑀧𑀭𑀺 𑀦 𑀦𑁂𑀢𑀩𑁆𑀩𑀁, 𑀅𑀦𑁆𑀢𑀭𑁂 𑀔𑀡𑁆𑀟𑀁 𑀦 𑀤𑀲𑁆𑀲𑁂𑀢𑀩𑁆𑀩𑀁. 𑀧𑀜𑁆𑀘𑀦𑁆𑀦𑀁 𑀳𑁂𑀝𑁆𑀞𑀸 𑀞𑀧𑁂𑀦𑁆𑀢𑀲𑁆𑀲 𑀳𑀺 𑀲𑀫𑁆𑀩𑀸𑀥𑁂 𑀑𑀓𑀸𑀲𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀺𑀧𑁆𑀨𑀦𑁆𑀤𑀢𑀺, 𑀲𑀫𑁆𑀩𑀸𑀥𑁂 𑀯𑀚𑁂 𑀲𑀦𑁆𑀦𑀺𑀭𑀼𑀤𑁆𑀥𑀕𑁄𑀕𑀡𑁄 𑀯𑀺𑀬. 𑀤𑀲𑀦𑁆𑀦𑀁 𑀉𑀧𑀭𑀺 𑀦𑁂𑀦𑁆𑀢𑀲𑁆𑀲 𑀕𑀡𑀦𑀸𑀦𑀺𑀲𑁆𑀲𑀺𑀢𑁄𑀯 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀳𑁄𑀢𑀺. 𑀅𑀦𑁆𑀢𑀭𑀸 𑀔𑀡𑁆𑀟𑀁 𑀤𑀲𑁆𑀲𑁂𑀦𑁆𑀢𑀲𑁆𑀲 ‘‘𑀲𑀺𑀔𑀸𑀧𑁆𑀧𑀢𑁆𑀢𑀁 𑀦𑀼 𑀔𑁄 𑀫𑁂 𑀓𑀫𑁆𑀫𑀝𑁆𑀞𑀸𑀦𑀁, 𑀦𑁄’’𑀢𑀺 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀺. 𑀢𑀲𑁆𑀫𑀸 𑀏𑀢𑁂 𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀕𑀡𑁂𑀢𑀩𑁆𑀩𑀁.

𑀕𑀡𑁂𑀦𑁆𑀢𑁂𑀦 𑀘 𑀧𑀞𑀫𑀁 𑀤𑀦𑁆𑀥𑀕𑀡𑀦𑀸𑀬 𑀥𑀜𑁆𑀜𑀫𑀸𑀧𑀓𑀕𑀡𑀦𑀸𑀬 𑀕𑀡𑁂𑀢𑀩𑁆𑀩𑀁. 𑀥𑀜𑁆𑀜𑀫𑀸𑀧𑀓𑁄 𑀳𑀺 𑀦𑀸𑀴𑀺𑀁 𑀧𑀽𑀭𑁂𑀢𑁆𑀯𑀸 ‘‘𑀏𑀓’’𑀦𑁆𑀢𑀺 𑀯𑀢𑁆𑀯𑀸 𑀑𑀓𑀺𑀭𑀢𑀺. 𑀧𑀼𑀦 𑀧𑀽𑀭𑁂𑀦𑁆𑀢𑁄 𑀓𑀺𑀜𑁆𑀘𑀺 𑀓𑀘𑀯𑀭𑀁 𑀤𑀺𑀲𑁆𑀯𑀸 𑀢𑀁 𑀙𑀟𑁆𑀟𑁂𑀦𑁆𑀢𑁄 ‘‘𑀏𑀓𑀁 𑀏𑀓’’𑀦𑁆𑀢𑀺 𑀯𑀤𑀢𑀺. 𑀏𑀲 𑀦𑀬𑁄 ‘‘𑀤𑁆𑀯𑁂 𑀤𑁆𑀯𑁂’’𑀢𑀺𑀆𑀤𑀻𑀲𑀼. 𑀏𑀯𑀫𑁂𑀯 𑀇𑀫𑀺𑀦𑀸𑀧𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀬𑁄 𑀉𑀧𑀝𑁆𑀞𑀸𑀢𑀺 𑀢𑀁 𑀕𑀳𑁂𑀢𑁆𑀯𑀸 ‘‘𑀏𑀓𑀁 𑀏𑀓’’𑀦𑁆𑀢𑀺 𑀆𑀤𑀺𑀁𑀓𑀢𑁆𑀯𑀸 𑀬𑀸𑀯 ‘‘𑀤𑀲 𑀤𑀲𑀸’’𑀢𑀺 𑀧𑀯𑀢𑁆𑀢𑀫𑀸𑀦𑀁 𑀧𑀯𑀢𑁆𑀢𑀫𑀸𑀦𑀁 𑀉𑀧𑀮𑀓𑁆𑀔𑁂𑀢𑁆𑀯𑀸𑀯 𑀕𑀡𑁂𑀢𑀩𑁆𑀩𑀁. 𑀢𑀲𑁆𑀲𑁂𑀯𑀁 𑀕𑀡𑀬𑀢𑁄 𑀦𑀺𑀓𑁆𑀔𑀫𑀦𑁆𑀢𑀸 𑀘 𑀧𑀯𑀺𑀲𑀦𑁆𑀢𑀸 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺.

𑀅𑀣𑀸𑀦𑁂𑀦 𑀢𑀁 𑀤𑀦𑁆𑀥𑀕𑀡𑀦𑀁 𑀥𑀜𑁆𑀜𑀫𑀸𑀧𑀓𑀕𑀡𑀦𑀁 𑀧𑀳𑀸𑀬 𑀲𑀻𑀖𑀕𑀡𑀦𑀸𑀬 𑀕𑁄𑀧𑀸𑀮𑀓𑀕𑀡𑀦𑀸𑀬 𑀕𑀡𑁂𑀢𑀩𑁆𑀩𑀁. 𑀙𑁂𑀓𑁄 𑀳𑀺 𑀕𑁄𑀧𑀸𑀮𑀓𑁄 𑀲𑀓𑁆𑀔𑀭𑀸𑀬𑁄 𑀉𑀘𑁆𑀙𑀗𑁆𑀕𑁂𑀦 𑀕𑀳𑁂𑀢𑁆𑀯𑀸 𑀭𑀚𑁆𑀚𑀼𑀤𑀡𑁆𑀟𑀳𑀢𑁆𑀣𑁄 𑀧𑀸𑀢𑁄𑀯 𑀯𑀚𑀁 𑀕𑀦𑁆𑀢𑁆𑀯𑀸 𑀕𑀸𑀯𑁄 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺𑀢𑁆𑀯𑀸 𑀧𑀮𑀺𑀖𑀢𑁆𑀣𑀫𑁆𑀪𑀫𑀢𑁆𑀣𑀓𑁂 𑀦𑀺𑀲𑀺𑀦𑁆𑀦𑁄 𑀤𑁆𑀯𑀸𑀭𑀁 𑀧𑀢𑁆𑀢𑀁 𑀧𑀢𑁆𑀢𑀁𑀬𑁂𑀯 𑀕𑀸𑀯𑀁 ‘‘𑀏𑀓𑁄 𑀤𑁆𑀯𑁂’’𑀢𑀺 𑀲𑀓𑁆𑀔𑀭𑀁 𑀔𑀺𑀧𑀺𑀢𑁆𑀯𑀸 𑀔𑀺𑀧𑀺𑀢𑁆𑀯𑀸 𑀕𑀡𑁂𑀢𑀺. 𑀢𑀺𑀬𑀸𑀫𑀭𑀢𑁆𑀢𑀺𑀁 𑀲𑀫𑁆𑀩𑀸𑀥𑁂 𑀑𑀓𑀸𑀲𑁂 𑀤𑀼𑀓𑁆𑀔𑀁 𑀯𑀼𑀢𑁆𑀣𑀕𑁄𑀕𑀡𑁄 𑀦𑀺𑀓𑁆𑀔𑀫𑀦𑁆𑀢𑁄 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀖𑀁𑀲𑀦𑁆𑀢𑁄 𑀯𑁂𑀕𑁂𑀦 𑀯𑁂𑀕𑁂𑀦 𑀧𑀼𑀜𑁆𑀚𑁄 𑀧𑀼𑀜𑁆𑀚𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀢𑀺. 𑀲𑁄 𑀯𑁂𑀕𑁂𑀦 𑀯𑁂𑀕𑁂𑀦 ‘‘𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀤𑀲𑀸’’𑀢𑀺 𑀕𑀡𑁂𑀢𑀺𑀬𑁂𑀯. 𑀏𑀯𑀫𑀺𑀫𑀲𑁆𑀲𑀸𑀧𑀺 𑀧𑀼𑀭𑀺𑀫𑀦𑀬𑁂𑀦 𑀕𑀡𑀬𑀢𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀧𑀼𑀦𑀧𑁆𑀧𑀼𑀦𑀁 𑀲𑀜𑁆𑀘𑀭𑀦𑁆𑀢𑀺. 𑀢𑀢𑁄 𑀢𑁂𑀦 ‘‘𑀧𑀼𑀦𑀧𑁆𑀧𑀼𑀦𑀁 𑀲𑀜𑁆𑀘𑀭𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀅𑀕𑁆𑀕𑀳𑁂𑀢𑁆𑀯𑀸 𑀤𑁆𑀯𑀸𑀭𑀧𑁆𑀧𑀢𑁆𑀢𑀁 𑀤𑁆𑀯𑀸𑀭𑀧𑁆𑀧𑀢𑁆𑀢𑀁𑀬𑁂𑀯 𑀕𑀳𑁂𑀢𑁆𑀯𑀸 ‘‘𑀏𑀓𑁄 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘, 𑀏𑀓𑁄 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀙, 𑀏𑀓𑁄 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀙 𑀲𑀢𑁆𑀢…𑀧𑁂… 𑀅𑀝𑁆𑀞… 𑀦𑀯… 𑀤𑀲𑀸’’𑀢𑀺 𑀲𑀻𑀖𑀁 𑀲𑀻𑀖𑀁 𑀕𑀡𑁂𑀢𑀩𑁆𑀩𑀫𑁂𑀯. 𑀕𑀡𑀦𑀸𑀧𑀝𑀺𑀩𑀤𑁆𑀥𑁂 𑀳𑀺 𑀓𑀫𑁆𑀫𑀝𑁆𑀞𑀸𑀦𑁂 𑀕𑀡𑀦𑀸𑀩𑀮𑁂𑀦𑁂𑀯 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺 𑀅𑀭𑀺𑀢𑁆𑀢𑀽𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀘𑀡𑁆𑀟𑀲𑁄𑀢𑁂 𑀦𑀸𑀯𑀸𑀞𑀧𑀦𑀫𑀺𑀯.

𑀢𑀲𑁆𑀲𑁂𑀯𑀁 𑀲𑀻𑀖𑀁 𑀲𑀻𑀖𑀁 𑀕𑀡𑀬𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀁 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀅𑀣 ‘‘𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀢𑀻’’𑀢𑀺 𑀜𑀢𑁆𑀯𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀯𑀸𑀢𑀁 𑀅𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀕𑁂𑀦 𑀯𑁂𑀕𑁂𑀦 𑀕𑀡𑁂𑀢𑀩𑁆𑀩𑀁. 𑀅𑀦𑁆𑀢𑁄𑀧𑀯𑀺𑀲𑀦𑀯𑀸𑀢𑁂𑀦 𑀳𑀺 𑀲𑀤𑁆𑀥𑀺𑀁 𑀘𑀺𑀢𑁆𑀢𑀁 𑀧𑀯𑁂𑀲𑀬𑀢𑁄 𑀅𑀩𑁆𑀪𑀦𑁆𑀢𑀭𑀁 𑀯𑀸𑀢𑀩𑁆𑀪𑀸𑀳𑀢𑀁 𑀫𑁂𑀤𑀧𑀽𑀭𑀺𑀢𑀁 𑀯𑀺𑀬 𑀳𑁄𑀢𑀺, 𑀩𑀳𑀺𑀦𑀺𑀓𑁆𑀔𑀫𑀦𑀯𑀸𑀢𑁂𑀦 𑀲𑀤𑁆𑀥𑀺𑀁 𑀘𑀺𑀢𑁆𑀢𑀁 𑀦𑀻𑀳𑀭𑀢𑁄 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀧𑀢𑀺. 𑀨𑀼𑀝𑁆𑀞𑁄𑀓𑀸𑀲𑁂 𑀧𑀦 𑀲𑀢𑀺𑀁 𑀞𑀧𑁂𑀢𑁆𑀯𑀸 𑀪𑀸𑀯𑁂𑀦𑁆𑀢𑀲𑁆𑀲𑁂𑀯 𑀪𑀸𑀯𑀦𑀸 𑀲𑀫𑁆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑁆𑀢𑁄 𑀘 𑀩𑀳𑀺 𑀘 𑀯𑀸𑀢𑀁 𑀅𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀕𑁂𑀦 𑀯𑁂𑀕𑁂𑀦 𑀕𑀡𑁂𑀢𑀩𑁆𑀩’’𑀦𑁆𑀢𑀺.

𑀓𑀻𑀯 𑀘𑀺𑀭𑀁 𑀧𑀦𑁂𑀢𑀁 𑀕𑀡𑁂𑀢𑀩𑁆𑀩𑀦𑁆𑀢𑀺? 𑀬𑀸𑀯 𑀯𑀺𑀦𑀸 𑀕𑀡𑀦𑀸𑀬 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀭𑀫𑁆𑀫𑀡𑁂 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺. 𑀩𑀳𑀺 𑀯𑀺𑀲𑀝𑀯𑀺𑀢𑀓𑁆𑀓𑀯𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀭𑀫𑁆𑀫𑀡𑁂 𑀲𑀢𑀺 𑀲𑀡𑁆𑀞𑀧𑀦𑀢𑁆𑀣𑀁𑀬𑁂𑀯 𑀳𑀺 𑀕𑀡𑀦𑀸𑀢𑀺.

𑀏𑀯𑀁 𑀕𑀡𑀦𑀸𑀬 𑀫𑀦𑀲𑀺𑀓𑀢𑁆𑀯𑀸 𑀅𑀦𑀼𑀩𑀦𑁆𑀥𑀦𑀸𑀬 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀅𑀦𑀼𑀩𑀦𑁆𑀥𑀦𑀸 𑀦𑀸𑀫 𑀕𑀡𑀦𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀲𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀅𑀦𑀼𑀕𑀫𑀦𑀁; 𑀢𑀜𑁆𑀘 𑀔𑁄 𑀦 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀼𑀕𑀫𑀦𑀯𑀲𑁂𑀦. 𑀩𑀳𑀺𑀦𑀺𑀓𑁆𑀔𑀫𑀦𑀯𑀸𑀢𑀲𑁆𑀲 𑀳𑀺 𑀦𑀸𑀪𑀺 𑀆𑀤𑀺, 𑀳𑀤𑀬𑀁 𑀫𑀚𑁆𑀛𑀁, 𑀦𑀸𑀲𑀺𑀓𑀕𑁆𑀕𑀁 𑀧𑀭𑀺𑀬𑁄𑀲𑀸𑀦𑀁. 𑀅𑀩𑁆𑀪𑀦𑁆𑀢𑀭𑀧𑀯𑀺𑀲𑀦𑀯𑀸𑀢𑀲𑁆𑀲 𑀦𑀸𑀲𑀺𑀓𑀕𑁆𑀕𑀁 𑀆𑀤𑀺, 𑀳𑀤𑀬𑀁 𑀫𑀚𑁆𑀛𑀁, 𑀦𑀸𑀪𑀺 𑀧𑀭𑀺𑀬𑁄𑀲𑀸𑀦𑀁. 𑀢𑀜𑁆𑀘𑀲𑁆𑀲 𑀅𑀦𑀼𑀕𑀘𑁆𑀙𑀢𑁄 𑀯𑀺𑀓𑁆𑀔𑁂𑀧𑀕𑀢𑀁 𑀘𑀺𑀢𑁆𑀢𑀁 𑀲𑀸𑀭𑀤𑁆𑀥𑀸𑀬 𑀘𑁂𑀯 𑀳𑁄𑀢𑀺 𑀇𑀜𑁆𑀚𑀦𑀸𑀬 𑀘. 𑀬𑀣𑀸𑀳 𑁋

‘‘𑀅𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄 𑀅𑀚𑁆𑀛𑀢𑁆𑀢𑀁 𑀯𑀺𑀓𑁆𑀔𑁂𑀧𑀕𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀧𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀕𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘𑀸’’𑀢𑀺 (𑀧𑀝𑀺. 𑀫. 𑁧.𑁧𑁫𑁭).

𑀢𑀲𑁆𑀫𑀸 𑀅𑀦𑀼𑀩𑀦𑁆𑀥𑀦𑀸𑀬 𑀫𑀦𑀲𑀺𑀓𑀭𑁄𑀦𑁆𑀢𑁂𑀦 𑀦 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀅𑀧𑀺𑀘 𑀔𑁄 𑀨𑀼𑀲𑀦𑀸𑀯𑀲𑁂𑀦 𑀘 𑀞𑀧𑀦𑀸𑀯𑀲𑁂𑀦 𑀘 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀕𑀡𑀦𑀸𑀦𑀼𑀩𑀦𑁆𑀥𑀦𑀸𑀯𑀲𑁂𑀦 𑀯𑀺𑀬 𑀳𑀺 𑀨𑀼𑀲𑀦𑀸𑀞𑀧𑀦𑀸𑀯𑀲𑁂𑀦 𑀯𑀺𑀲𑀼𑀁 𑀫𑀦𑀲𑀺𑀓𑀸𑀭𑁄 𑀦𑀢𑁆𑀣𑀺. 𑀨𑀼𑀝𑁆𑀞𑀨𑀼𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀧𑀦 𑀕𑀡𑁂𑀦𑁆𑀢𑁄 𑀕𑀡𑀦𑀸𑀬 𑀘 𑀨𑀼𑀲𑀦𑀸𑀬 𑀘 𑀫𑀦𑀲𑀺 𑀓𑀭𑁄𑀢𑀺. 𑀢𑀢𑁆𑀣𑁂𑀯 𑀕𑀡𑀦𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀢𑁂 𑀲𑀢𑀺𑀬𑀸 𑀅𑀦𑀼𑀩𑀦𑁆𑀥𑀦𑁆𑀢𑁄 𑀅𑀧𑁆𑀧𑀦𑀸𑀯𑀲𑁂𑀦 𑀘 𑀘𑀺𑀢𑁆𑀢𑀁 𑀞𑀧𑁂𑀦𑁆𑀢𑁄 ‘‘𑀅𑀦𑀼𑀩𑀦𑁆𑀥𑀦𑀸𑀬 𑀘 𑀨𑀼𑀲𑀦𑀸𑀬 𑀘 𑀞𑀧𑀦𑀸𑀬 𑀘 𑀫𑀦𑀲𑀺 𑀓𑀭𑁄𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀧𑀗𑁆𑀕𑀼𑀴𑀤𑁄𑀯𑀸𑀭𑀺𑀓𑁄𑀧𑀫𑀸𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑀓𑀓𑀘𑁄𑀧𑀫𑀸𑀬 𑀘 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀸𑀬𑀁 𑀧𑀗𑁆𑀕𑀼𑀴𑁄𑀧𑀫𑀸 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀧𑀗𑁆𑀕𑀼𑀴𑁄 𑀤𑁄𑀮𑀸𑀬 𑀓𑀻𑀴𑀢𑀁 𑀫𑀸𑀢𑀸𑀧𑀼𑀢𑁆𑀢𑀸𑀦𑀁 𑀤𑁄𑀮𑀁 𑀔𑀺𑀧𑀺𑀢𑁆𑀯𑀸 𑀢𑀢𑁆𑀣𑁂𑀯 𑀤𑁄𑀮𑀢𑁆𑀣𑀫𑁆𑀪𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀓𑀫𑁂𑀦 𑀆𑀕𑀘𑁆𑀙𑀦𑁆𑀢𑀲𑁆𑀲 𑀘 𑀕𑀘𑁆𑀙𑀦𑁆𑀢𑀲𑁆𑀲 𑀘 𑀤𑁄𑀮𑀸𑀨𑀮𑀓𑀲𑁆𑀲 𑀉𑀪𑁄 𑀓𑁄𑀝𑀺𑀬𑁄 𑀫𑀚𑁆𑀛𑀜𑁆𑀘 𑀧𑀲𑁆𑀲𑀢𑀺, 𑀦 𑀘 𑀉𑀪𑁄𑀓𑁄𑀝𑀺𑀫𑀚𑁆𑀛𑀸𑀦𑀁 𑀤𑀲𑁆𑀲𑀦𑀢𑁆𑀣𑀁 𑀩𑁆𑀬𑀸𑀯𑀝𑁄 𑀳𑁄𑀢𑀺. 𑀏𑀯𑀫𑁂𑀯𑀸𑀬𑀁 𑀪𑀺𑀓𑁆𑀔𑀼 𑀲𑀢𑀺𑀯𑀲𑁂𑀦 𑀉𑀧𑀦𑀺𑀩𑀦𑁆𑀥𑀦𑀢𑁆𑀣𑀫𑁆𑀪𑀫𑀽𑀮𑁂 𑀞𑀢𑁆𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀤𑁄𑀮𑀁 𑀔𑀺𑀧𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀫𑀺𑀢𑁆𑀢𑁂 𑀲𑀢𑀺𑀬𑀸 𑀦𑀺𑀲𑀺𑀦𑁆𑀦𑁄 𑀓𑀫𑁂𑀦 𑀆𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀨𑀼𑀝𑁆𑀞𑀝𑁆𑀞𑀸𑀦𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀦𑁆𑀢𑁄 𑀢𑀢𑁆𑀣 𑀘 𑀘𑀺𑀢𑁆𑀢𑀁 𑀞𑀧𑁂𑀦𑁆𑀢𑁄 𑀧𑀲𑁆𑀲𑀢𑀺, 𑀦 𑀘 𑀢𑁂𑀲𑀁 𑀤𑀲𑁆𑀲𑀦𑀢𑁆𑀣𑀁 𑀩𑁆𑀬𑀸𑀯𑀝𑁄 𑀳𑁄𑀢𑀺. 𑀅𑀬𑀁 𑀧𑀗𑁆𑀕𑀼𑀴𑁄𑀧𑀫𑀸.

𑀅𑀬𑀁 𑀧𑀦 𑀤𑁄𑀯𑀸𑀭𑀺𑀓𑁄𑀧𑀫𑀸 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀤𑁄𑀯𑀸𑀭𑀺𑀓𑁄 𑀦𑀕𑀭𑀲𑁆𑀲 𑀅𑀦𑁆𑀢𑁄 𑀘 𑀩𑀳𑀺 𑀘 𑀧𑀼𑀭𑀺𑀲𑁂 ‘𑀓𑁄 𑀢𑁆𑀯𑀁, 𑀓𑀼𑀢𑁄 𑀯𑀸 𑀆𑀕𑀢𑁄, 𑀓𑀼𑀳𑀺𑀁 𑀯𑀸 𑀕𑀘𑁆𑀙𑀲𑀺, 𑀓𑀺𑀁 𑀯𑀸 𑀢𑁂 𑀳𑀢𑁆𑀣𑁂’𑀢𑀺 𑀦 𑀯𑀻𑀫𑀁𑀲𑀢𑀺, 𑀦 𑀳𑀺 𑀢𑀲𑁆𑀲 𑀢𑁂 𑀪𑀸𑀭𑀸. 𑀤𑁆𑀯𑀸𑀭𑀧𑁆𑀧𑀢𑁆𑀢𑀁 𑀤𑁆𑀯𑀸𑀭𑀧𑁆𑀧𑀢𑁆𑀢𑀁𑀬𑁂𑀯 𑀧𑀦 𑀯𑀻𑀫𑀁𑀲𑀢𑀺; 𑀏𑀯𑀫𑁂𑀯 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑁄 𑀧𑀯𑀺𑀝𑁆𑀞𑀯𑀸𑀢𑀸 𑀘 𑀩𑀳𑀺 𑀦𑀺𑀓𑁆𑀔𑀦𑁆𑀢𑀯𑀸𑀢𑀸 𑀘 𑀦 𑀪𑀸𑀭𑀸 𑀳𑁄𑀦𑁆𑀢𑀺, 𑀤𑁆𑀯𑀸𑀭𑀧𑁆𑀧𑀢𑁆𑀢𑀸 𑀤𑁆𑀯𑀸𑀭𑀧𑁆𑀧𑀢𑁆𑀢𑀸𑀬𑁂𑀯 𑀪𑀸𑀭𑀸𑀢𑀺. 𑀅𑀬𑀁 𑀤𑁄𑀯𑀸𑀭𑀺𑀓𑁄𑀧𑀫𑀸.

𑀓𑀓𑀘𑁄𑀧𑀫𑀸 𑀧𑀦 𑀆𑀤𑀺𑀢𑁄𑀧𑀪𑀼𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀦𑀺𑀫𑀺𑀢𑁆𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀅𑀦𑀸𑀭𑀫𑁆𑀫𑀡𑀫𑁂𑀓𑀘𑀺𑀢𑁆𑀢𑀲𑁆𑀲;

𑀅𑀚𑀸𑀦𑀢𑁄 𑀘 𑀢𑀬𑁄 𑀥𑀫𑁆𑀫𑁂, 𑀪𑀸𑀯𑀦𑀸𑀦𑀼𑀧𑀮𑀩𑁆𑀪𑀢𑀺.

‘‘𑀦𑀺𑀫𑀺𑀢𑁆𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀅𑀦𑀸𑀭𑀫𑁆𑀫𑀡𑀫𑁂𑀓𑀘𑀺𑀢𑁆𑀢𑀲𑁆𑀲;

𑀚𑀸𑀦𑀢𑁄 𑀘 𑀢𑀬𑁄 𑀥𑀫𑁆𑀫𑁂, 𑀪𑀸𑀯𑀦𑀸 𑀉𑀧𑀮𑀩𑁆𑀪𑀢𑀻’’𑀢𑀺. (𑀧𑀝𑀺. 𑀫. 𑁧.𑁧𑁫𑁯);

𑀓𑀣𑀁 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀏𑀓𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀺, 𑀦 𑀘𑀺𑀫𑁂 𑀢𑀬𑁄 𑀥𑀫𑁆𑀫𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀦 𑀘 𑀘𑀺𑀢𑁆𑀢𑀁 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺, 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀺? 𑀲𑁂𑀬𑁆𑀬𑀣𑀸𑀧𑀺 𑀭𑀼𑀓𑁆𑀔𑁄 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀦𑀺𑀓𑁆𑀔𑀺𑀢𑁆𑀢𑁄, 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀓𑀓𑀘𑁂𑀦 𑀙𑀺𑀦𑁆𑀤𑁂𑀬𑁆𑀬, 𑀭𑀼𑀓𑁆𑀔𑁂 𑀨𑀼𑀝𑁆𑀞𑀓𑀓𑀘𑀤𑀦𑁆𑀢𑀸𑀦𑀁 𑀯𑀲𑁂𑀦 𑀧𑀼𑀭𑀺𑀲𑀲𑁆𑀲 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀦 𑀆𑀕𑀢𑁂 𑀯𑀸 𑀕𑀢𑁂 𑀯𑀸 𑀓𑀓𑀘𑀤𑀦𑁆𑀢𑁂 𑀫𑀦𑀲𑀺 𑀓𑀭𑁄𑀢𑀺, 𑀦 𑀆𑀕𑀢𑀸 𑀯𑀸 𑀕𑀢𑀸 𑀯𑀸 𑀓𑀓𑀘𑀤𑀦𑁆𑀢𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺.

𑀬𑀣𑀸 𑀭𑀼𑀓𑁆𑀔𑁄 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀦𑀺𑀓𑁆𑀔𑀺𑀢𑁆𑀢𑁄; 𑀏𑀯𑀁 𑀉𑀧𑀦𑀺𑀩𑀦𑁆𑀥𑀦𑀦𑀺𑀫𑀺𑀢𑁆𑀢𑀁. 𑀬𑀣𑀸 𑀓𑀓𑀘𑀤𑀦𑁆𑀢𑀸; 𑀏𑀯𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸. 𑀬𑀣𑀸 𑀭𑀼𑀓𑁆𑀔𑁂 𑀨𑀼𑀝𑁆𑀞𑀓𑀓𑀘𑀤𑀦𑁆𑀢𑀸𑀦𑀁 𑀯𑀲𑁂𑀦 𑀧𑀼𑀭𑀺𑀲𑀲𑁆𑀲 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀦 𑀆𑀕𑀢𑁂 𑀯𑀸 𑀕𑀢𑁂 𑀯𑀸 𑀓𑀓𑀘𑀤𑀦𑁆𑀢𑁂 𑀫𑀦𑀲𑀺 𑀓𑀭𑁄𑀢𑀺, 𑀦 𑀆𑀕𑀢𑀸 𑀯𑀸 𑀕𑀢𑀸 𑀯𑀸 𑀓𑀓𑀘𑀤𑀦𑁆𑀢𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀦𑀸𑀲𑀺𑀓𑀕𑁆𑀕𑁂 𑀯𑀸 𑀫𑀼𑀔𑀦𑀺𑀫𑀺𑀢𑁆𑀢𑁂 𑀯𑀸 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀦 𑀆𑀕𑀢𑁂 𑀯𑀸 𑀕𑀢𑁂 𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀫𑀦𑀲𑀺 𑀓𑀭𑁄𑀢𑀺, 𑀦 𑀆𑀕𑀢𑀸 𑀯𑀸 𑀕𑀢𑀸 𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺, 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀺.

𑀧𑀥𑀸𑀦𑀦𑁆𑀢𑀺 𑀓𑀢𑀫𑀁 𑀧𑀥𑀸𑀦𑀁? 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺 𑁋 𑀇𑀤𑀁 𑀧𑀥𑀸𑀦𑀁. 𑀓𑀢𑀫𑁄 𑀧𑀬𑁄𑀕𑁄? 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀯𑀺𑀢𑀓𑁆𑀓𑀸 𑀯𑀽𑀧𑀲𑀫𑁆𑀫𑀦𑁆𑀢𑀺 𑁋 𑀅𑀬𑀁 𑀧𑀬𑁄𑀕𑁄. 𑀓𑀢𑀫𑁄 𑀯𑀺𑀲𑁂𑀲𑁄? 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻 𑀳𑁄𑀦𑁆𑀢𑀺 𑁋 𑀅𑀬𑀁 𑀯𑀺𑀲𑁂𑀲𑁄. 𑀏𑀯𑀁 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀏𑀓𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀸 𑀦 𑀳𑁄𑀦𑁆𑀢𑀺, 𑀦 𑀘𑀺𑀫𑁂 𑀢𑀬𑁄 𑀥𑀫𑁆𑀫𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀦 𑀘 𑀘𑀺𑀢𑁆𑀢𑀁 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺, 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀺.

‘‘𑀆𑀦𑀸𑀧𑀸𑀦𑀲𑁆𑀲𑀢𑀻 𑀬𑀲𑁆𑀲, 𑀧𑀭𑀺𑀧𑀼𑀡𑁆𑀡𑀸 𑀲𑀼𑀪𑀸𑀯𑀺𑀢𑀸;

𑀅𑀦𑀼𑀧𑀼𑀩𑁆𑀩𑀁 𑀧𑀭𑀺𑀘𑀺𑀢𑀸, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸;

𑀲𑁄 𑀇𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸’’𑀢𑀺. (𑀧𑀝𑀺. 𑀫. 𑁧.𑁧𑁬𑁦);

𑀅𑀬𑀁 𑀓𑀓𑀘𑁄𑀧𑀫𑀸. 𑀇𑀥 𑀧𑀦𑀲𑁆𑀲 𑀆𑀕𑀢𑀸𑀕𑀢𑀯𑀲𑁂𑀦 𑀅𑀫𑀦𑀲𑀺𑀓𑀸𑀭𑀫𑀢𑁆𑀢𑀫𑁂𑀯 𑀧𑀬𑁄𑀚𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀢𑁄 𑀓𑀲𑁆𑀲𑀘𑀺 𑀦𑀘𑀺𑀭𑁂𑀦𑁂𑀯 𑀦𑀺𑀫𑀺𑀢𑁆𑀢𑀜𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀅𑀯𑀲𑁂𑀲𑀚𑁆𑀛𑀸𑀦𑀗𑁆𑀕𑀧𑀝𑀺𑀫𑀡𑁆𑀟𑀺𑀢𑀸 𑀅𑀧𑁆𑀧𑀦𑀸𑀲𑀗𑁆𑀔𑀸𑀢𑀸 𑀞𑀧𑀦𑀸 𑀘 𑀲𑀫𑁆𑀧𑀚𑁆𑀚𑀢𑀺. 𑀓𑀲𑁆𑀲𑀘𑀺 𑀧𑀦 𑀕𑀡𑀦𑀸𑀯𑀲𑁂𑀦𑁂𑀯 𑀫𑀦𑀲𑀺𑀓𑀸𑀭𑀓𑀸𑀮𑀢𑁄𑀧𑀪𑀼𑀢𑀺 𑀅𑀦𑀼𑀓𑁆𑀓𑀫𑀢𑁄 𑀑𑀴𑀸𑀭𑀺𑀓𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀭𑁄𑀥𑀯𑀲𑁂𑀦 𑀓𑀸𑀬𑀤𑀭𑀣𑁂 𑀯𑀽𑀧𑀲𑀦𑁆𑀢𑁂 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀮𑀳𑀼𑀓𑀁 𑀳𑁄𑀢𑀺, 𑀲𑀭𑀻𑀭𑀁 𑀆𑀓𑀸𑀲𑁂 𑀮𑀗𑁆𑀖𑀦𑀸𑀓𑀸𑀭𑀧𑁆𑀧𑀢𑁆𑀢𑀁 𑀯𑀺𑀬 𑀳𑁄𑀢𑀺. 𑀬𑀣𑀸 𑀲𑀸𑀭𑀤𑁆𑀥𑀓𑀸𑀬𑀲𑁆𑀲 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀦𑀺𑀲𑀻𑀤𑀢𑁄 𑀫𑀜𑁆𑀘𑀧𑀻𑀞𑀁 𑀑𑀦𑀫𑀢𑀺, 𑀯𑀺𑀓𑀽𑀚𑀢𑀺, 𑀧𑀘𑁆𑀘𑀢𑁆𑀣𑀭𑀡𑀁 𑀯𑀮𑀺𑀁 𑀕𑀡𑁆𑀳𑀸𑀢𑀺. 𑀅𑀲𑀸𑀭𑀤𑁆𑀥𑀓𑀸𑀬𑀲𑁆𑀲 𑀧𑀦 𑀦𑀺𑀲𑀻𑀤𑀢𑁄 𑀦𑁂𑀯 𑀫𑀜𑁆𑀘𑀧𑀻𑀞𑀁 𑀑𑀦𑀫𑀢𑀺, 𑀦 𑀯𑀺𑀓𑀽𑀚𑀢𑀺, 𑀦 𑀧𑀘𑁆𑀘𑀢𑁆𑀣𑀭𑀡𑀁 𑀯𑀮𑀺𑀁 𑀕𑀡𑁆𑀳𑀸𑀢𑀺, 𑀢𑀽𑀮𑀧𑀺𑀘𑀼𑀧𑀽𑀭𑀺𑀢𑀁 𑀯𑀺𑀬 𑀫𑀜𑁆𑀘𑀧𑀻𑀞𑀁 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀲𑀸𑀭𑀤𑁆𑀥𑁄 𑀓𑀸𑀬𑁄 𑀮𑀳𑀼𑀓𑁄 𑀳𑁄𑀢𑀺; 𑀏𑀯𑀫𑁂𑀯 𑀕𑀡𑀦𑀸𑀯𑀲𑁂𑀦 𑀫𑀦𑀲𑀺𑀓𑀸𑀭𑀓𑀸𑀮𑀢𑁄𑀧𑀪𑀼𑀢𑀺 𑀅𑀦𑀼𑀓𑁆𑀓𑀫𑀢𑁄 𑀑𑀴𑀸𑀭𑀺𑀓𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀭𑁄𑀥𑀯𑀲𑁂𑀦 𑀓𑀸𑀬𑀤𑀭𑀣𑁂 𑀯𑀽𑀧𑀲𑀦𑁆𑀢𑁂 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀮𑀳𑀼𑀓𑀁 𑀳𑁄𑀢𑀺, 𑀲𑀭𑀻𑀭𑀁 𑀆𑀓𑀸𑀲𑁂 𑀮𑀗𑁆𑀖𑀦𑀸𑀓𑀸𑀭𑀧𑁆𑀧𑀢𑁆𑀢𑀁 𑀯𑀺𑀬 𑀳𑁄𑀢𑀺.

𑀢𑀲𑁆𑀲 𑀑𑀴𑀸𑀭𑀺𑀓𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦𑀺𑀭𑀼𑀤𑁆𑀥𑁂 𑀲𑀼𑀔𑀼𑀫𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀦𑀺𑀭𑀼𑀤𑁆𑀥𑁂 𑀅𑀧𑀭𑀸𑀧𑀭𑀁 𑀢𑀢𑁄 𑀲𑀼𑀔𑀼𑀫𑀢𑀭𑀲𑀼𑀔𑀼𑀫𑀢𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀧𑀯𑀢𑁆𑀢𑀢𑀺𑀬𑁂𑀯. 𑀓𑀣𑀁? 𑀬𑀣𑀸 𑀧𑀼𑀭𑀺𑀲𑁄 𑀫𑀳𑀢𑀺𑀬𑀸 𑀮𑁄𑀳𑀲𑀮𑀸𑀓𑀸𑀬 𑀓𑀁𑀲𑀢𑀸𑀴𑀁 𑀆𑀓𑁄𑀝𑁂𑀬𑁆𑀬, 𑀏𑀓𑀧𑁆𑀧𑀳𑀸𑀭𑁂𑀦 𑀫𑀳𑀸𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀑𑀴𑀸𑀭𑀺𑀓𑀲𑀤𑁆𑀤𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑁂𑀬𑁆𑀬, 𑀦𑀺𑀭𑀼𑀤𑁆𑀥𑁂 𑀑𑀴𑀸𑀭𑀺𑀓𑁂 𑀲𑀤𑁆𑀤𑁂 𑀅𑀣 𑀧𑀘𑁆𑀙𑀸 𑀲𑀼𑀔𑀼𑀫𑀲𑀤𑁆𑀤𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁, 𑀢𑀲𑁆𑀫𑀺𑀫𑁆𑀧𑀺 𑀦𑀺𑀭𑀼𑀤𑁆𑀥𑁂 𑀅𑀧𑀭𑀸𑀧𑀭𑀁 𑀢𑀢𑁄 𑀲𑀼𑀔𑀼𑀫𑀢𑀭𑀲𑀼𑀔𑀼𑀫𑀢𑀫𑀲𑀤𑁆𑀤𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑁂𑀯; 𑀏𑀯𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀓𑀁𑀲𑁂 𑀆𑀓𑁄𑀝𑀺𑀢𑁂’’𑀢𑀺 (𑀧𑀝𑀺. 𑀫. 𑁧.𑁧𑁭𑁧) 𑀯𑀺𑀢𑁆𑀣𑀸𑀭𑁄.

𑀬𑀣𑀸 𑀳𑀺 𑀅𑀜𑁆𑀜𑀸𑀦𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀉𑀧𑀭𑀽𑀧𑀭𑀺 𑀯𑀺𑀪𑀽𑀢𑀸𑀦𑀺 𑀳𑁄𑀦𑁆𑀢𑀺, 𑀦 𑀢𑀣𑀸 𑀇𑀤𑀁. 𑀇𑀤𑀁 𑀧𑀦 𑀉𑀧𑀭𑀽𑀧𑀭𑀺 𑀪𑀸𑀯𑁂𑀦𑁆𑀢𑀲𑁆𑀲 𑀪𑀸𑀯𑁂𑀦𑁆𑀢𑀲𑁆𑀲 𑀲𑀼𑀔𑀼𑀫𑀢𑁆𑀢𑀁 𑀕𑀘𑁆𑀙𑀢𑀺, 𑀉𑀧𑀝𑁆𑀞𑀸𑀦𑀫𑁆𑀧𑀺 𑀦 𑀉𑀧𑀕𑀘𑁆𑀙𑀢𑀺. 𑀏𑀯𑀁 𑀅𑀦𑀼𑀧𑀝𑁆𑀞𑀳𑀦𑁆𑀢𑁂 𑀧𑀦 𑀢𑀲𑁆𑀫𑀺𑀁 𑀦 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀝𑁆𑀞𑀸𑀬𑀸𑀲𑀦𑀸 𑀘𑀫𑁆𑀫𑀔𑀡𑁆𑀟𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀓𑀺𑀁 𑀓𑀸𑀢𑀩𑁆𑀩𑀁? ‘‘𑀆𑀘𑀭𑀺𑀬𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀦𑀝𑁆𑀞𑀁 𑀤𑀸𑀦𑀺 𑀫𑁂 𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀸 𑀦 𑀯𑀼𑀝𑁆𑀞𑀸𑀢𑀩𑁆𑀩𑀁, 𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀢𑁆𑀯𑀸 𑀕𑀘𑁆𑀙𑀢𑁄 𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀦𑀯𑀦𑀯𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀬𑀣𑀸𑀦𑀺𑀲𑀺𑀦𑁆𑀦𑁂𑀦𑁂𑀯 𑀤𑁂𑀲𑀢𑁄 𑀆𑀳𑀭𑀺𑀢𑀩𑁆𑀩𑀁.

𑀢𑀢𑁆𑀭𑀸𑀬𑀁 𑀆𑀳𑀭𑀡𑀽𑀧𑀸𑀬𑁄. 𑀢𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀦𑀼𑀧𑀝𑁆𑀞𑀳𑀦𑀪𑀸𑀯𑀁 𑀜𑀢𑁆𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘‘𑀇𑀫𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀦𑀸𑀫 𑀓𑀢𑁆𑀣 𑀅𑀢𑁆𑀣𑀺, 𑀓𑀢𑁆𑀣 𑀦𑀢𑁆𑀣𑀺, 𑀓𑀲𑁆𑀲 𑀯𑀸 𑀅𑀢𑁆𑀣𑀺, 𑀓𑀲𑁆𑀲 𑀯𑀸 𑀦𑀢𑁆𑀣𑀻’’𑀢𑀺. 𑀅𑀣𑁂𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀸 ‘‘𑀇𑀫𑁂 𑀅𑀦𑁆𑀢𑁄𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀦𑀢𑁆𑀣𑀺, 𑀉𑀤𑀓𑁂 𑀦𑀺𑀫𑀼𑀕𑁆𑀕𑀸𑀦𑀁 𑀦𑀢𑁆𑀣𑀺, 𑀢𑀣𑀸 𑀅𑀲𑀜𑁆𑀜𑀻𑀪𑀽𑀢𑀸𑀦𑀁 𑀫𑀢𑀸𑀦𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀦𑁆𑀦𑀸𑀦𑀁 𑀭𑀽𑀧𑀸𑀭𑀽𑀧𑀪𑀯𑀲𑀫𑀗𑁆𑀕𑀻𑀦𑀁 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦’’𑀦𑁆𑀢𑀺 𑀜𑀢𑁆𑀯𑀸 𑀏𑀯𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸 𑀧𑀝𑀺𑀘𑁄𑀤𑁂𑀢𑀩𑁆𑀩𑁄 𑁋 ‘‘𑀦𑀦𑀼 𑀢𑁆𑀯𑀁, 𑀧𑀡𑁆𑀟𑀺𑀢, 𑀦𑁂𑀯 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁄, 𑀦 𑀉𑀤𑀓𑁂 𑀦𑀺𑀫𑀼𑀕𑁆𑀕𑁄, 𑀦 𑀅𑀲𑀜𑁆𑀜𑀻𑀪𑀽𑀢𑁄, 𑀦 𑀫𑀢𑁄, 𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀆𑀧𑀦𑁆𑀦𑁄, 𑀦 𑀭𑀽𑀧𑀸𑀭𑀽𑀧𑀪𑀯𑀲𑀫𑀗𑁆𑀕𑀻, 𑀦 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄, 𑀅𑀢𑁆𑀣𑀺𑀬𑁂𑀯 𑀢𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀫𑀦𑁆𑀤𑀧𑀜𑁆𑀜𑀢𑀸𑀬 𑀧𑀦 𑀧𑀭𑀺𑀕𑁆𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀲𑀻’’𑀢𑀺. 𑀅𑀣𑀸𑀦𑁂𑀦 𑀧𑀓𑀢𑀺𑀨𑀼𑀝𑁆𑀞𑀯𑀲𑁂𑀦𑁂𑀯 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀇𑀫𑁂 𑀳𑀺 𑀤𑀻𑀖𑀦𑀸𑀲𑀺𑀓𑀲𑁆𑀲 𑀦𑀸𑀲𑀸 𑀧𑀼𑀝𑀁 𑀖𑀝𑁆𑀝𑁂𑀦𑁆𑀢𑀸 𑀧𑀯𑀢𑁆𑀢𑀦𑁆𑀢𑀺, 𑀭𑀲𑁆𑀲𑀦𑀸𑀲𑀺𑀓𑀲𑁆𑀲 𑀉𑀢𑁆𑀢𑀭𑁄𑀝𑁆𑀞𑀁. 𑀢𑀲𑁆𑀫𑀸𑀦𑁂𑀦 𑀇𑀫𑀁 𑀦𑀸𑀫 𑀞𑀸𑀦𑀁 𑀖𑀝𑁆𑀝𑁂𑀦𑁆𑀢𑀻𑀢𑀺 𑀦𑀺𑀫𑀺𑀢𑁆𑀢𑀁 𑀧𑀝𑁆𑀞𑀧𑁂𑀢𑀩𑁆𑀩𑀁. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀅𑀲𑀫𑁆𑀧𑀚𑀸𑀦𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀪𑀸𑀯𑀦𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁩.𑁧𑁪𑁯; 𑀲𑀁. 𑀦𑀺. 𑁫.𑁯𑁯𑁨). 𑀓𑀺𑀜𑁆𑀘𑀸𑀧𑀺 𑀳𑀺 𑀬𑀁𑀓𑀺𑀜𑁆𑀘𑀺 𑀓𑀫𑁆𑀫𑀝𑁆𑀞𑀸𑀦𑀁 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲𑁂𑀯 𑀲𑀫𑁆𑀧𑀚𑁆𑀚𑀢𑀺, 𑀇𑀢𑁄 𑀅𑀜𑁆𑀜𑀁 𑀧𑀦 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀧𑀸𑀓𑀝𑀁 𑀳𑁄𑀢𑀺. 𑀇𑀤𑀁 𑀧𑀦 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀕𑀭𑀼𑀓𑀁 𑀕𑀭𑀼𑀓𑀪𑀸𑀯𑀦𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁 𑀫𑀳𑀸𑀧𑀼𑀭𑀺𑀲𑀸𑀦𑀫𑁂𑀯 𑀫𑀦𑀲𑀺𑀓𑀸𑀭𑀪𑀽𑀫𑀺𑀪𑀽𑀢𑀁, 𑀦 𑀘𑁂𑀯 𑀇𑀢𑁆𑀢𑀭𑀁, 𑀦 𑀘 𑀇𑀢𑁆𑀢𑀭𑀲𑀢𑁆𑀢𑀲𑀫𑀸𑀲𑁂𑀯𑀺𑀢𑀁. 𑀬𑀣𑀸 𑀬𑀣𑀸 𑀫𑀦𑀲𑀺 𑀓𑀭𑀻𑀬𑀢𑀺, 𑀢𑀣𑀸 𑀢𑀣𑀸 𑀲𑀦𑁆𑀢𑀜𑁆𑀘𑁂𑀯 𑀳𑁄𑀢𑀺 𑀲𑀼𑀔𑀼𑀫𑀜𑁆𑀘. 𑀢𑀲𑁆𑀫𑀸 𑀏𑀢𑁆𑀣 𑀩𑀮𑀯𑀢𑀻 𑀲𑀢𑀺 𑀘 𑀧𑀜𑁆𑀜𑀸 𑀘 𑀇𑀘𑁆𑀙𑀺𑀢𑀩𑁆𑀩𑀸.

𑀬𑀣𑀸 𑀳𑀺 𑀫𑀝𑁆𑀞𑀲𑀸𑀝𑀓𑀲𑁆𑀲 𑀢𑀼𑀦𑁆𑀦𑀓𑀭𑀡𑀓𑀸𑀮𑁂 𑀲𑀽𑀘𑀺𑀧𑀺 𑀲𑀼𑀔𑀼𑀫𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀲𑀽𑀘𑀺𑀧𑀸𑀲𑀯𑁂𑀥𑀦𑀫𑁆𑀧𑀺 𑀢𑀢𑁄 𑀲𑀼𑀔𑀼𑀫𑀢𑀭𑀁; 𑀏𑀯𑀫𑁂𑀯 𑀫𑀝𑁆𑀞𑀲𑀸𑀝𑀓𑀲𑀤𑀺𑀲𑀲𑁆𑀲 𑀇𑀫𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀪𑀸𑀯𑀦𑀸𑀓𑀸𑀮𑁂 𑀲𑀽𑀘𑀺𑀧𑀝𑀺𑀪𑀸𑀕𑀸 𑀲𑀢𑀺𑀧𑀺 𑀲𑀽𑀘𑀺𑀧𑀸𑀲𑀯𑁂𑀥𑀦𑀧𑀝𑀺𑀪𑀸𑀕𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀧𑀜𑁆𑀜𑀸𑀧𑀺 𑀩𑀮𑀯𑀢𑀻 𑀇𑀘𑁆𑀙𑀺𑀢𑀩𑁆𑀩𑀸. 𑀢𑀸𑀳𑀺 𑀘 𑀧𑀦 𑀲𑀢𑀺𑀧𑀜𑁆𑀜𑀸𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀢𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀅𑀜𑁆𑀜𑀢𑁆𑀭 𑀧𑀓𑀢𑀺𑀨𑀼𑀝𑁆𑀞𑁄𑀓𑀸𑀲𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸.

𑀬𑀣𑀸 𑀧𑀦 𑀓𑀲𑁆𑀲𑀓𑁄 𑀓𑀲𑀺𑀁 𑀓𑀲𑀺𑀢𑁆𑀯𑀸 𑀩𑀮𑀺𑀩𑀤𑁆𑀤𑁂 𑀫𑀼𑀜𑁆𑀘𑀺𑀢𑁆𑀯𑀸 𑀕𑁄𑀘𑀭𑀸𑀪𑀺𑀫𑀼𑀔𑁂 𑀓𑀢𑁆𑀯𑀸 𑀙𑀸𑀬𑀸𑀬 𑀦𑀺𑀲𑀺𑀦𑁆𑀦𑁄 𑀯𑀺𑀲𑁆𑀲𑀫𑁂𑀬𑁆𑀬, 𑀅𑀣𑀲𑁆𑀲 𑀢𑁂 𑀩𑀮𑀺𑀩𑀤𑁆𑀤𑀸 𑀯𑁂𑀕𑁂𑀦 𑀅𑀝𑀯𑀺𑀁 𑀧𑀯𑀺𑀲𑁂𑀬𑁆𑀬𑀼𑀁. 𑀬𑁄 𑀳𑁄𑀢𑀺 𑀙𑁂𑀓𑁄 𑀓𑀲𑁆𑀲𑀓𑁄 𑀲𑁄 𑀧𑀼𑀦 𑀢𑁂 𑀕𑀳𑁂𑀢𑁆𑀯𑀸 𑀬𑁄𑀚𑁂𑀢𑀼𑀓𑀸𑀫𑁄 𑀦 𑀢𑁂𑀲𑀁 𑀅𑀦𑀼𑀧𑀤𑀁 𑀕𑀦𑁆𑀢𑁆𑀯𑀸 𑀅𑀝𑀯𑀺𑀁 𑀆𑀳𑀺𑀡𑁆𑀟𑀢𑀺. 𑀅𑀣 𑀔𑁄 𑀭𑀲𑁆𑀫𑀺𑀜𑁆𑀘 𑀧𑀢𑁄𑀤𑀜𑁆𑀘 𑀕𑀳𑁂𑀢𑁆𑀯𑀸 𑀉𑀚𑀼𑀓𑀫𑁂𑀯 𑀢𑁂𑀲𑀁 𑀦𑀺𑀧𑀸𑀢𑀢𑀺𑀢𑁆𑀣𑀁 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀦𑀺𑀧𑀚𑁆𑀚𑀢𑀺 𑀯𑀸. 𑀅𑀣 𑀢𑁂 𑀕𑁄𑀡𑁂 𑀤𑀺𑀯𑀲𑀪𑀸𑀕𑀁 𑀘𑀭𑀺𑀢𑁆𑀯𑀸 𑀦𑀺𑀧𑀸𑀢𑀢𑀺𑀢𑁆𑀣𑀁 𑀑𑀢𑀭𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀞𑀺𑀢𑁂 𑀤𑀺𑀲𑁆𑀯𑀸 𑀭𑀲𑁆𑀫𑀺𑀬𑀸 𑀩𑀦𑁆𑀥𑀺𑀢𑁆𑀯𑀸 𑀧𑀢𑁄𑀤𑁂𑀦 𑀯𑀺𑀚𑁆𑀛𑀦𑁆𑀢𑁄 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑁆𑀯𑀸 𑀧𑀼𑀦 𑀓𑀫𑁆𑀫𑀁 𑀓𑀭𑁄𑀢𑀺; 𑀏𑀯𑀫𑁂𑀯 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀢𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀅𑀜𑁆𑀜𑀢𑁆𑀭 𑀧𑀓𑀢𑀺𑀨𑀼𑀝𑁆𑀞𑁄𑀓𑀸𑀲𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸. 𑀲𑀢𑀺𑀭𑀲𑁆𑀫𑀺𑀁 𑀧𑀦 𑀧𑀜𑁆𑀜𑀸𑀧𑀢𑁄𑀤𑀜𑁆𑀘 𑀕𑀳𑁂𑀢𑁆𑀯𑀸 𑀧𑀓𑀢𑀺𑀨𑀼𑀝𑁆𑀞𑁄𑀓𑀸𑀲𑁂 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀏𑀯𑀜𑁆𑀳𑀺𑀲𑁆𑀲 𑀫𑀦𑀲𑀺𑀓𑀭𑁄𑀢𑁄 𑀦𑀘𑀺𑀭𑀲𑁆𑀲𑁂𑀯 𑀢𑁂 𑀉𑀧𑀝𑁆𑀞𑀳𑀦𑁆𑀢𑀺, 𑀦𑀺𑀧𑀸𑀢𑀢𑀺𑀢𑁆𑀣𑁂 𑀯𑀺𑀬 𑀕𑁄𑀡𑀸. 𑀢𑀢𑁄 𑀢𑁂𑀦 𑀲𑀢𑀺𑀭𑀲𑁆𑀫𑀺𑀬𑀸 𑀩𑀦𑁆𑀥𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀬𑁄𑀚𑁂𑀢𑁆𑀯𑀸 𑀧𑀜𑁆𑀜𑀸𑀧𑀢𑁄𑀤𑁂𑀦 𑀯𑀺𑀚𑁆𑀛𑀦𑁆𑀢𑁂𑀦 𑀧𑀼𑀦 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀁; 𑀢𑀲𑁆𑀲𑁂𑀯𑀫𑀦𑀼𑀬𑀼𑀜𑁆𑀚𑀢𑁄 𑀦𑀘𑀺𑀭𑀲𑁆𑀲𑁂𑀯 𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀢𑀺. 𑀢𑀁 𑀧𑀦𑁂𑀢𑀁 𑀦 𑀲𑀩𑁆𑀩𑁂𑀲𑀁 𑀏𑀓𑀲𑀤𑀺𑀲𑀁 𑀳𑁄𑀢𑀺; 𑀅𑀧𑀺𑀘 𑀔𑁄 𑀓𑀲𑁆𑀲𑀘𑀺 𑀲𑀼𑀔𑀲𑀫𑁆𑀨𑀲𑁆𑀲𑀁 𑀉𑀧𑁆𑀧𑀸𑀤𑀬𑀫𑀸𑀦𑁄 𑀢𑀽𑀮𑀧𑀺𑀘𑀼 𑀯𑀺𑀬, 𑀓𑀧𑁆𑀧𑀸𑀲𑀧𑀺𑀘𑀼 𑀯𑀺𑀬, 𑀯𑀸𑀢𑀥𑀸𑀭𑀸 𑀯𑀺𑀬 𑀘 𑀉𑀧𑀝𑁆𑀞𑀸𑀢𑀻𑀢𑀺 𑀏𑀓𑀘𑁆𑀘𑁂 𑀆𑀳𑀼.

𑀅𑀬𑀁 𑀧𑀦 𑀅𑀝𑁆𑀞𑀓𑀣𑀸𑀯𑀺𑀦𑀺𑀘𑁆𑀙𑀬𑁄 𑁋 𑀇𑀤𑀜𑁆𑀳𑀺 𑀓𑀲𑁆𑀲𑀘𑀺 𑀢𑀸𑀭𑀓𑀭𑀽𑀧𑀁 𑀯𑀺𑀬, 𑀫𑀡𑀺𑀕𑀼𑀴𑀺𑀓𑀸 𑀯𑀺𑀬, 𑀫𑀼𑀢𑁆𑀢𑀸𑀕𑀼𑀴𑀺𑀓𑀸 𑀯𑀺𑀬 𑀘 𑀓𑀲𑁆𑀲𑀘𑀺 𑀔𑀭𑀲𑀫𑁆𑀨𑀲𑁆𑀲𑀁 𑀳𑀼𑀢𑁆𑀯𑀸 𑀓𑀧𑁆𑀧𑀸𑀲𑀝𑁆𑀞𑀺 𑀯𑀺𑀬, 𑀲𑀸𑀭𑀤𑀸𑀭𑀼𑀲𑀽𑀘𑀺 𑀯𑀺𑀬 𑀘 𑀓𑀲𑁆𑀲𑀘𑀺 𑀤𑀻𑀖𑀧𑀸𑀫𑀗𑁆𑀕𑀲𑀼𑀢𑁆𑀢𑀁 𑀯𑀺𑀬, 𑀓𑀼𑀲𑀼𑀫𑀤𑀸𑀫𑀁 𑀯𑀺𑀬, 𑀥𑀽𑀫𑀲𑀺𑀔𑀸 𑀯𑀺𑀬 𑀘 𑀓𑀲𑁆𑀲𑀘𑀺 𑀯𑀺𑀢𑁆𑀣𑀢 𑀫𑀓𑁆𑀓𑀝𑀓𑀲𑀼𑀢𑁆𑀢𑀁 𑀯𑀺𑀬, 𑀯𑀮𑀸𑀳𑀓𑀧𑀝𑀮𑀁 𑀯𑀺𑀬, 𑀧𑀤𑀼𑀫𑀧𑀼𑀧𑁆𑀨𑀁 𑀯𑀺𑀬, 𑀭𑀣𑀘𑀓𑁆𑀓𑀁 𑀯𑀺𑀬, 𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀬, 𑀲𑀽𑀭𑀺𑀬𑀫𑀡𑁆𑀟𑀮𑀁 𑀯𑀺𑀬 𑀘 𑀉𑀧𑀝𑁆𑀞𑀸𑀢𑀺. 𑀢𑀜𑁆𑀘 𑀧𑀦𑁂𑀢𑀁 𑀬𑀣𑀸 𑀲𑀫𑁆𑀩𑀳𑀼𑀮𑁂𑀲𑀼 𑀪𑀺𑀓𑁆𑀔𑀽𑀲𑀼 𑀲𑀼𑀢𑁆𑀢𑀦𑁆𑀢𑀁 𑀲𑀚𑁆𑀛𑀸𑀬𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀲𑀼 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀢𑀼𑀫𑁆𑀳𑀸𑀓𑀁 𑀓𑀻𑀤𑀺𑀲𑀁 𑀳𑀼𑀢𑁆𑀯𑀸 𑀇𑀤𑀁 𑀲𑀼𑀢𑁆𑀢𑀁 𑀉𑀧𑀝𑁆𑀞𑀸𑀢𑀻’’𑀢𑀺 𑀯𑀼𑀢𑁆𑀢𑁂 𑀏𑀓𑁄 ‘‘𑀫𑀬𑁆𑀳𑀁 𑀫𑀳𑀢𑀻 𑀧𑀩𑁆𑀩𑀢𑁂𑀬𑁆𑀬𑀸 𑀦𑀤𑀻 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻’’𑀢𑀺 𑀆𑀳. 𑀅𑀧𑀭𑁄 ‘‘𑀫𑀬𑁆𑀳𑀁 𑀏𑀓𑀸 𑀯𑀦𑀭𑀸𑀚𑀺 𑀯𑀺𑀬’’. 𑀅𑀜𑁆𑀜𑁄 ‘‘𑀫𑀬𑁆𑀳𑀁 𑀲𑀻𑀢𑀘𑁆𑀙𑀸𑀬𑁄 𑀲𑀸𑀔𑀸𑀲𑀫𑁆𑀧𑀦𑁆𑀦𑁄 𑀨𑀮𑀪𑀸𑀭𑀪𑀭𑀺𑀢𑀭𑀼𑀓𑁆𑀔𑁄 𑀯𑀺𑀬𑀸’’𑀢𑀺. 𑀢𑁂𑀲𑀜𑁆𑀳𑀺 𑀢𑀁 𑀏𑀓𑀫𑁂𑀯 𑀲𑀼𑀢𑁆𑀢𑀁 𑀲𑀜𑁆𑀜𑀸𑀦𑀸𑀦𑀢𑀸𑀬 𑀦𑀸𑀦𑀢𑁄 𑀉𑀧𑀝𑁆𑀞𑀸𑀢𑀺. 𑀏𑀯𑀁 𑀏𑀓𑀫𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀲𑀜𑁆𑀜𑀸𑀦𑀸𑀦𑀢𑀸𑀬 𑀦𑀸𑀦𑀢𑁄 𑀉𑀧𑀝𑁆𑀞𑀸𑀢𑀺. 𑀲𑀜𑁆𑀜𑀚𑀜𑁆𑀳𑀺 𑀏𑀢𑀁 𑀲𑀜𑁆𑀜𑀸𑀦𑀺𑀤𑀸𑀦𑀁 𑀲𑀜𑁆𑀜𑀸𑀧𑁆𑀧𑀪𑀯𑀁 𑀢𑀲𑁆𑀫𑀸 𑀲𑀜𑁆𑀜𑀸𑀦𑀸𑀦𑀢𑀸𑀬 𑀦𑀸𑀦𑀢𑁄 𑀉𑀧𑀝𑁆𑀞𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣 𑀘 𑀅𑀜𑁆𑀜𑀫𑁂𑀯 𑀅𑀲𑁆𑀲𑀸𑀲𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀧𑀲𑁆𑀲𑀸𑀲𑀸𑀭𑀫𑁆𑀫𑀡𑀁, 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀬𑀲𑁆𑀲 𑀳𑀺 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀦𑀢𑁆𑀣𑀺, 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀦𑁂𑀯 𑀅𑀧𑁆𑀧𑀦𑀁 𑀦 𑀉𑀧𑀘𑀸𑀭𑀁 𑀧𑀸𑀧𑀼𑀡𑀸𑀢𑀺. 𑀬𑀲𑁆𑀲 𑀧𑀦𑀺𑀫𑁂 𑀢𑀬𑁄 𑀥𑀫𑁆𑀫𑀸 𑀅𑀢𑁆𑀣𑀺, 𑀢𑀲𑁆𑀲𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀅𑀧𑁆𑀧𑀦𑀜𑁆𑀘 𑀉𑀧𑀘𑀸𑀭𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀦𑀺𑀫𑀺𑀢𑁆𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀅𑀦𑀸𑀭𑀫𑁆𑀫𑀡𑀫𑁂𑀓𑀘𑀺𑀢𑁆𑀢𑀲𑁆𑀲;

𑀅𑀚𑀸𑀦𑀢𑁄 𑀘 𑀢𑀬𑁄 𑀥𑀫𑁆𑀫𑁂, 𑀪𑀸𑀯𑀦𑀸𑀦𑀼𑀧𑀮𑀩𑁆𑀪𑀢𑀺.

‘‘𑀦𑀺𑀫𑀺𑀢𑁆𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀅𑀦𑀸𑀭𑀫𑁆𑀫𑀡𑀫𑁂𑀓𑀘𑀺𑀢𑁆𑀢𑀲𑁆𑀲;

𑀚𑀸𑀦𑀢𑁄 𑀘 𑀢𑀬𑁄 𑀥𑀫𑁆𑀫𑁂, 𑀪𑀸𑀯𑀦𑀸 𑀉𑀧𑀮𑀩𑁆𑀪𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁩𑁧);

𑀏𑀯𑀁 𑀉𑀧𑀝𑁆𑀞𑀺𑀢𑁂 𑀧𑀦 𑀦𑀺𑀫𑀺𑀢𑁆𑀢𑁂 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀆𑀘𑀭𑀺𑀬𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁 𑁋 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀭𑀽𑀧𑀁 𑀦𑀸𑀫 𑀉𑀧𑀝𑁆𑀞𑀸𑀢𑀻’’𑀢𑀺. 𑀆𑀘𑀭𑀺𑀬𑁂𑀦 𑀧𑀦 ‘‘𑀏𑀢𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀸 ‘‘𑀦 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀁. ‘‘𑀏𑀯𑀁 𑀳𑁄𑀢𑀺, 𑀆𑀯𑀼𑀲𑁄’’𑀢𑀺 𑀯𑀢𑁆𑀯𑀸 𑀧𑀦 ‘‘𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀯𑁄𑀲𑀸𑀦𑀁 𑀆𑀧𑀚𑁆𑀚𑁂𑀬𑁆𑀬; ‘‘𑀦 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀦𑀺𑀭𑀸𑀲𑁄 𑀯𑀺𑀲𑀻𑀤𑁂𑀬𑁆𑀬. 𑀢𑀲𑁆𑀫𑀸 𑀢𑀤𑀼𑀪𑀬𑀫𑁆𑀧𑀺 𑀅𑀯𑀢𑁆𑀯𑀸 𑀫𑀦𑀲𑀺𑀓𑀸𑀭𑁂𑀬𑁂𑀯 𑀦𑀺𑀬𑁄𑀚𑁂𑀢𑀩𑁆𑀩𑁄𑀢𑀺. 𑀏𑀯𑀁 𑀢𑀸𑀯 𑀤𑀻𑀖𑀪𑀸𑀡𑀓𑀸. 𑀫𑀚𑁆𑀛𑀺𑀫𑀪𑀸𑀡𑀓𑀸 𑀧𑀦𑀸𑀳𑀼 𑁋 ‘‘𑀦𑀺𑀫𑀺𑀢𑁆𑀢𑀫𑀺𑀤𑀁, 𑀆𑀯𑀼𑀲𑁄, 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺 𑀓𑀭𑁄𑀳𑀺 𑀲𑀧𑁆𑀧𑀼𑀭𑀺𑀲𑀸𑀢𑀺 𑀯𑀢𑁆𑀢𑀩𑁆𑀩𑁄’’𑀢𑀺. 𑀅𑀣𑀸𑀦𑁂𑀦 𑀦𑀺𑀫𑀺𑀢𑁆𑀢𑁂𑀬𑁂𑀯 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁. 𑀏𑀯𑀫𑀲𑁆𑀲𑀸𑀬𑀁 𑀇𑀢𑁄 𑀧𑀪𑀼𑀢𑀺 𑀞𑀧𑀦𑀸𑀯𑀲𑁂𑀦 𑀪𑀸𑀯𑀦𑀸 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀦𑀺𑀫𑀺𑀢𑁆𑀢𑁂 𑀞𑀧𑀬𑀁 𑀘𑀺𑀢𑁆𑀢𑀁, 𑀦𑀸𑀦𑀸𑀓𑀸𑀭𑀁 𑀯𑀺𑀪𑀸𑀯𑀬𑀁;

𑀥𑀻𑀭𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂, 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀩𑀦𑁆𑀥𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁩𑁨; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁬𑁩);

𑀢𑀲𑁆𑀲𑁂𑀯𑀁 𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀦𑀢𑁄 𑀧𑀪𑀼𑀢𑀺 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑁂𑀯 𑀳𑁄𑀦𑁆𑀢𑀺 𑀓𑀺𑀮𑁂𑀲𑀸 𑀲𑀦𑁆𑀦𑀺𑀲𑀺𑀦𑁆𑀦𑀸𑀯 𑀲𑀢𑀺 𑀉𑀧𑀝𑁆𑀞𑀺𑀢𑀸𑀬𑁂𑀯, 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀫𑁂𑀯. 𑀇𑀤𑀜𑁆𑀳𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀦𑀸𑀫 𑀳𑁄𑀳𑀺 𑁋 𑀉𑀧𑀘𑀸𑀭𑀪𑀽𑀫𑀺𑀬𑀁 𑀯𑀸 𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦, 𑀧𑀝𑀺𑀮𑀸𑀪𑀪𑀽𑀫𑀺𑀬𑀁 𑀯𑀸 𑀅𑀗𑁆𑀕𑀧𑀸𑀢𑀼𑀪𑀸𑀯𑁂𑀦. 𑀢𑀢𑁆𑀣 ‘‘𑀉𑀧𑀘𑀸𑀭𑀪𑀽𑀫𑀻’’𑀢𑀺 𑀉𑀧𑀘𑀸𑀭𑀲𑀫𑀸𑀥𑀺; ‘‘𑀧𑀝𑀺𑀮𑀸𑀪𑀪𑀽𑀫𑀻’’𑀢𑀺 𑀅𑀧𑁆𑀧𑀦𑀸𑀲𑀫𑀸𑀥𑀺. 𑀢𑁂𑀲𑀁 𑀓𑀺𑀁 𑀦𑀸𑀦𑀸𑀓𑀭𑀡𑀁? 𑀉𑀧𑀘𑀸𑀭𑀲𑀫𑀸𑀥𑀺 𑀓𑀼𑀲𑀮𑀯𑀻𑀣𑀺𑀬𑀁 𑀚𑀯𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺, 𑀅𑀧𑁆𑀧𑀦𑀸𑀲𑀫𑀸𑀥𑀺 𑀤𑀺𑀯𑀲𑀪𑀸𑀕𑁂 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀤𑀺𑀯𑀲𑀪𑀸𑀕𑀫𑁆𑀧𑀺 𑀓𑀼𑀲𑀮𑀯𑀻𑀣𑀺𑀬𑀁 𑀚𑀯𑀢𑀺, 𑀦 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀲𑀫𑀸𑀥𑀻𑀲𑀼 𑀦𑀺𑀫𑀺𑀢𑁆𑀢𑀧𑀸𑀢𑀼𑀪𑀸𑀯𑁂𑀦 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀅𑀣𑀸𑀦𑁂𑀦 𑀢𑀁 𑀦𑀺𑀫𑀺𑀢𑁆𑀢𑀁 𑀦𑁂𑀯 𑀯𑀡𑁆𑀡𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀁, 𑀦 𑀮𑀓𑁆𑀔𑀡𑀢𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁. 𑀅𑀧𑀺𑀘 𑀔𑁄 𑀔𑀢𑁆𑀢𑀺𑀬𑀫𑀳𑁂𑀲𑀺𑀬𑀸 𑀘𑀓𑁆𑀓𑀯𑀢𑁆𑀢𑀺𑀕𑀩𑁆𑀪𑁄 𑀯𑀺𑀬 𑀓𑀲𑁆𑀲𑀓𑁂𑀦 𑀲𑀸𑀮𑀺𑀬𑀯𑀕𑀩𑁆𑀪𑁄 𑀯𑀺𑀬 𑀘 𑀅𑀧𑁆𑀧𑀫𑀢𑁆𑀢𑁂𑀦 𑀭𑀓𑁆𑀔𑀺𑀢𑀩𑁆𑀩𑀁; 𑀭𑀓𑁆𑀔𑀺𑀢𑀁 𑀳𑀺𑀲𑁆𑀲 𑀨𑀮𑀤𑀁 𑀳𑁄𑀢𑀺.

‘‘𑀦𑀺𑀫𑀺𑀢𑁆𑀢𑀁 𑀭𑀓𑁆𑀔𑀢𑁄 𑀮𑀤𑁆𑀥, 𑀧𑀭𑀺𑀳𑀸𑀦𑀺 𑀦 𑀯𑀺𑀚𑁆𑀚𑀢𑀺;

𑀆𑀭𑀓𑁆𑀔𑀫𑁆𑀳𑀺 𑀅𑀲𑀦𑁆𑀢𑀫𑁆𑀳𑀺, 𑀮𑀤𑁆𑀥𑀁 𑀮𑀤𑁆𑀥𑀁 𑀯𑀺𑀦𑀲𑁆𑀲𑀢𑀻’’𑀢𑀺.

𑀢𑀢𑁆𑀭𑀸𑀬𑀁 𑀭𑀓𑁆𑀔𑀡𑀽𑀧𑀸𑀬𑁄 𑁋 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀆𑀯𑀸𑀲𑁄, 𑀕𑁄𑀘𑀭𑁄, 𑀪𑀲𑁆𑀲𑀁, 𑀧𑀼𑀕𑁆𑀕𑀮𑁄, 𑀪𑁄𑀚𑀦𑀁, 𑀉𑀢𑀼, 𑀇𑀭𑀺𑀬𑀸𑀧𑀣𑁄𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀅𑀲𑀧𑁆𑀧𑀸𑀬𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀢𑀸𑀦𑁂𑀯 𑀲𑀢𑁆𑀢 𑀲𑀧𑁆𑀧𑀸𑀬𑀸𑀦𑀺 𑀲𑁂𑀯𑀦𑁆𑀢𑁂𑀦 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀁.

𑀏𑀯𑀁 𑀲𑀧𑁆𑀧𑀸𑀬𑀲𑁂𑀯𑀦𑁂𑀦 𑀦𑀺𑀫𑀺𑀢𑁆𑀢𑀁 𑀣𑀺𑀭𑀁 𑀓𑀢𑁆𑀯𑀸 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀕𑀫𑀬𑀺𑀢𑁆𑀯𑀸 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸, 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸, 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀧𑀕𑁆𑀕𑀳𑁂𑀢𑀩𑁆𑀩 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀧𑀕𑁆𑀕𑀡𑁆𑀳𑀦𑀸, 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀦𑀺𑀕𑁆𑀕𑀡𑁆𑀳𑀦𑀸, 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀧𑀳𑀁𑀲𑁂𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀸, 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀅𑀚𑁆𑀛𑀼𑀧𑁂𑀓𑁆𑀔𑀦𑀸, 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀇𑀫𑀸𑀦𑀺 𑀤𑀲 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀸𑀦𑀺 𑀅𑀯𑀺𑀚𑀳𑀦𑁆𑀢𑁂𑀦 𑀬𑁄𑀕𑁄 𑀓𑀭𑀡𑀻𑀬𑁄.

𑀢𑀲𑁆𑀲𑁂𑀯𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀇𑀤𑀸𑀦𑀺 𑀅𑀧𑁆𑀧𑀦𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀪𑀯𑀗𑁆𑀕𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀜𑁆𑀘 𑀦𑀺𑀭𑀼𑀤𑁆𑀥𑁂 𑀢𑀤𑁂𑀯𑀸𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺, 𑀬𑁂𑀲𑀁 𑀧𑀞𑀫𑀁 𑀧𑀭𑀺𑀓𑀫𑁆𑀫𑀁, 𑀤𑀼𑀢𑀺𑀬𑀁 𑀉𑀧𑀘𑀸𑀭𑀁, 𑀢𑀢𑀺𑀬𑀁 𑀅𑀦𑀼𑀮𑁄𑀫𑀁, 𑀘𑀢𑀼𑀢𑁆𑀣𑀁 𑀕𑁄𑀢𑁆𑀭𑀪𑀼, 𑀧𑀜𑁆𑀘𑀫𑀁 𑀅𑀧𑁆𑀧𑀦𑀸𑀘𑀺𑀢𑁆𑀢𑀁. 𑀧𑀞𑀫𑀁 𑀯𑀸 𑀧𑀭𑀺𑀓𑀫𑁆𑀫𑀜𑁆𑀘𑁂𑀯 𑀉𑀧𑀘𑀸𑀭𑀜𑁆𑀘, 𑀤𑀼𑀢𑀺𑀬𑀁 𑀅𑀦𑀼𑀮𑁄𑀫𑀁, 𑀢𑀢𑀺𑀬𑀁 𑀕𑁄𑀢𑁆𑀭𑀪𑀼, 𑀘𑀢𑀼𑀢𑁆𑀣𑀁 𑀅𑀧𑁆𑀧𑀦𑀸𑀘𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀘𑀢𑀼𑀢𑁆𑀣𑀫𑁂𑀯 𑀳𑀺 𑀧𑀜𑁆𑀘𑀫𑀁 𑀯𑀸 𑀅𑀧𑁆𑀧𑁂𑀢𑀺, 𑀦 𑀙𑀝𑁆𑀞𑀁 𑀲𑀢𑁆𑀢𑀫𑀁 𑀯𑀸 𑀆𑀲𑀦𑁆𑀦𑀪𑀯𑀗𑁆𑀕𑀧𑀸𑀢𑀢𑁆𑀢𑀸.

𑀆𑀪𑀺𑀥𑀫𑁆𑀫𑀺𑀓𑀕𑁄𑀤𑀢𑁆𑀢𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀓𑀼𑀲𑀮𑀸 𑀥𑀫𑁆𑀫𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺; 𑀢𑀲𑁆𑀫𑀸 𑀙𑀝𑁆𑀞𑀁 𑀲𑀢𑁆𑀢𑀫𑀁 𑀯𑀸 𑀅𑀧𑁆𑀧𑁂𑀢𑀻’’𑀢𑀺. 𑀢𑀁 𑀅𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀢𑀢𑁆𑀣 𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺 𑀳𑁄𑀦𑁆𑀢𑀺, 𑀅𑀧𑁆𑀧𑀦𑀸𑀘𑀺𑀢𑁆𑀢𑀁 𑀧𑀦 𑀭𑀽𑀧𑀸𑀯𑀘𑀭𑀁. 𑀏𑀯𑀫𑀦𑁂𑀦 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁, 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁, 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁, 𑀢𑀺𑀯𑀺𑀥𑀓𑀮𑁆𑀬𑀸𑀡𑀁, 𑀧𑀞𑀫𑀚𑁆𑀛𑀸𑀦𑀁 𑀅𑀥𑀺𑀕𑀢𑀁 𑀳𑁄𑀢𑀺. 𑀲𑁄 𑀢𑀲𑁆𑀫𑀺𑀁𑀬𑁂𑀯𑀸𑀭𑀫𑁆𑀫𑀡𑁂 𑀯𑀺𑀢𑀓𑁆𑀓𑀸𑀤𑀬𑁄 𑀯𑀽𑀧𑀲𑀫𑁂𑀢𑁆𑀯𑀸 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀺 𑀧𑀸𑀧𑀼𑀡𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀞𑀧𑀦𑀸𑀯𑀲𑁂𑀦 𑀪𑀸𑀯𑀦𑀸𑀬 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀓𑀣𑀸. 𑀯𑀺𑀢𑁆𑀣𑀸𑀭𑁄 𑀧𑀦 𑀇𑀘𑁆𑀙𑀦𑁆𑀢𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 𑀕𑀳𑁂𑀢𑀩𑁆𑀩𑁄.

𑀏𑀯𑀁 𑀧𑀢𑁆𑀢𑀘𑀢𑀼𑀢𑁆𑀣𑀚𑁆𑀛𑀸𑀦𑁄 𑀧𑀦𑁂𑀢𑁆𑀣 𑀪𑀺𑀓𑁆𑀔𑀼 𑀲𑀮𑁆𑀮𑀓𑁆𑀔𑀡𑀸𑀯𑀺𑀯𑀝𑁆𑀝𑀦𑀸𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀸𑀭𑀺𑀲𑀼𑀤𑁆𑀥𑀺𑀁 𑀧𑀢𑁆𑀢𑀼𑀓𑀸𑀫𑁄 𑀢𑀤𑁂𑀯 𑀛𑀸𑀦𑀁 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀅𑀥𑀺𑀝𑁆𑀞𑀸𑀦𑀯𑀼𑀝𑁆𑀞𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀲𑀺𑀧𑁆𑀧𑀢𑁆𑀢𑀁 𑀧𑀕𑀼𑀡𑀁 𑀓𑀢𑁆𑀯𑀸 𑀅𑀭𑀽𑀧𑀧𑀼𑀩𑁆𑀩𑀗𑁆𑀕𑀫𑀁 𑀯𑀸 𑀭𑀽𑀧𑀁, 𑀭𑀽𑀧𑀧𑀼𑀩𑁆𑀩𑀗𑁆𑀕𑀫𑀁 𑀯𑀸 𑀅𑀭𑀽𑀧𑀦𑁆𑀢𑀺 𑀭𑀽𑀧𑀸𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑀺. 𑀓𑀣𑀁? 𑀲𑁄 𑀳𑀺 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀛𑀸𑀦𑀗𑁆𑀕𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑁂𑀲𑀁 𑀦𑀺𑀲𑁆𑀲𑀬𑀁 𑀳𑀤𑀬𑀯𑀢𑁆𑀣𑀼𑀁 𑀢𑀁 𑀦𑀺𑀲𑁆𑀲𑀬𑀸𑀦𑀺 𑀘 𑀪𑀽𑀢𑀸𑀦𑀺 𑀢𑁂𑀲𑀜𑁆𑀘 𑀦𑀺𑀲𑁆𑀲𑀬𑀁 𑀲𑀓𑀮𑀫𑁆𑀧𑀺 𑀓𑀭𑀚𑀓𑀸𑀬𑀁 𑀧𑀲𑁆𑀲𑀢𑀺. 𑀢𑀢𑁄 ‘‘𑀛𑀸𑀦𑀗𑁆𑀕𑀸𑀦𑀺 𑀅𑀭𑀽𑀧𑀁, 𑀯𑀢𑁆𑀣𑀸𑀤𑀻𑀦𑀺 𑀭𑀽𑀧’’𑀦𑁆𑀢𑀺 𑀭𑀽𑀧𑀸𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑀺.

𑀅𑀣 𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀓𑁂𑀲𑀸𑀤𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀣𑀯𑀻𑀥𑀸𑀢𑀼𑀆𑀤𑀺𑀯𑀲𑁂𑀦 𑀘𑀢𑁆𑀢𑀸𑀭𑀺 𑀪𑀽𑀢𑀸𑀦𑀺 𑀢𑀁𑀦𑀺𑀲𑁆𑀲𑀺𑀢𑀭𑀽𑀧𑀸𑀦𑀺 𑀘 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀸𑀭𑀫𑁆𑀫𑀡𑀁 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀁 𑀯𑀸 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 𑀯𑀺𑀜𑁆𑀜𑀸𑀡𑀜𑁆𑀘 𑀧𑀲𑁆𑀲𑀢𑀺. 𑀢𑀢𑁄 ‘‘𑀪𑀽𑀢𑀸𑀤𑀻𑀦𑀺 𑀭𑀽𑀧𑀁 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 𑀯𑀺𑀜𑁆𑀜𑀸𑀡𑀁 𑀅𑀭𑀽𑀧’’𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺.

𑀅𑀣 𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀲𑀫𑀼𑀤𑀬𑁄 𑀓𑀭𑀚𑀓𑀸𑀬𑁄 𑀘 𑀘𑀺𑀢𑁆𑀢𑀜𑁆𑀘𑀸𑀢𑀺 𑀧𑀲𑁆𑀲𑀢𑀺. 𑀬𑀣𑀸 𑀳𑀺 𑀓𑀫𑁆𑀫𑀸𑀭𑀕𑀕𑁆𑀕𑀭𑀺𑀬𑀸 𑀥𑀫𑀫𑀸𑀦𑀸𑀬 𑀪𑀲𑁆𑀢𑀜𑁆𑀘 𑀧𑀼𑀭𑀺𑀲𑀲𑁆𑀲 𑀘 𑀢𑀚𑁆𑀚𑀁 𑀯𑀸𑀬𑀸𑀫𑀁 𑀧𑀝𑀺𑀘𑁆𑀘 𑀯𑀸𑀢𑁄 𑀲𑀜𑁆𑀘𑀭𑀢𑀺; 𑀏𑀯𑀫𑁂𑀯 𑀓𑀸𑀬𑀜𑁆𑀘 𑀘𑀺𑀢𑁆𑀢𑀜𑁆𑀘 𑀧𑀝𑀺𑀘𑁆𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀢𑀺. 𑀢𑀢𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀘 𑀓𑀸𑀬𑀜𑁆𑀘 𑀭𑀽𑀧𑀁, 𑀘𑀺𑀢𑁆𑀢𑀜𑁆𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀅𑀭𑀽𑀧𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺.

𑀏𑀯𑀁 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀲𑁆𑀲 𑀧𑀘𑁆𑀘𑀬𑀁 𑀧𑀭𑀺𑀬𑁂𑀲𑀢𑀺, 𑀧𑀭𑀺𑀬𑁂𑀲𑀦𑁆𑀢𑁄 𑀘 𑀢𑀁 𑀤𑀺𑀲𑁆𑀯𑀸 𑀢𑀻𑀲𑀼𑀧𑀺 𑀅𑀤𑁆𑀥𑀸𑀲𑀼 𑀦𑀸𑀫𑀭𑀽𑀧𑀲𑁆𑀲 𑀧𑀯𑀢𑁆𑀢𑀺𑀁 𑀆𑀭𑀩𑁆𑀪 𑀓𑀗𑁆𑀔𑀁 𑀯𑀺𑀢𑀭𑀢𑀺. 𑀯𑀺𑀢𑀺𑀡𑁆𑀡𑀓𑀗𑁆𑀔𑁄 𑀓𑀮𑀸𑀧𑀲𑀫𑁆𑀫𑀲𑀦𑀯𑀲𑁂𑀦 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀬 𑀧𑀼𑀩𑁆𑀩𑀪𑀸𑀕𑁂 𑀉𑀧𑁆𑀧𑀦𑁆𑀦𑁂 𑀑𑀪𑀸𑀲𑀸𑀤𑀬𑁄 𑀤𑀲 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑁂 𑀧𑀳𑀸𑀬 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀧𑀝𑀺𑀧𑀤𑀸𑀜𑀸𑀡𑀁 ‘‘𑀫𑀕𑁆𑀕𑁄’’𑀢𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀉𑀤𑀬𑀁 𑀧𑀳𑀸𑀬 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀁 𑀧𑀢𑁆𑀯𑀸 𑀦𑀺𑀭𑀦𑁆𑀢𑀭𑀁 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑁂𑀦 𑀪𑀬𑀢𑁄 𑀉𑀧𑀝𑁆𑀞𑀺𑀢𑁂𑀲𑀼 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀯𑀺𑀭𑀚𑁆𑀚𑀦𑁆𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑁄 𑀬𑀣𑀸𑀓𑁆𑀓𑀫𑀁 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑁂 𑀧𑀸𑀧𑀼𑀡𑀺𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀸𑀬 𑀏𑀓𑀽𑀦𑀯𑀻𑀲𑀢𑀺𑀪𑁂𑀤𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀧𑀭𑀺𑀬𑀦𑁆𑀢𑀧𑁆𑀧𑀢𑁆𑀢𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀘𑀲𑁆𑀲 𑀕𑀡𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀭𑀺𑀬𑁄𑀲𑀸𑀦𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀪𑀸𑀯𑀦𑀸 𑀘 𑀲𑀫𑀢𑁆𑀢𑀸 𑀳𑁄𑀢𑀻𑀢𑀺.

𑀅𑀬𑀁 𑀲𑀩𑁆𑀩𑀸𑀓𑀸𑀭𑀢𑁄 𑀧𑀞𑀫𑀘𑀢𑀼𑀓𑁆𑀓𑀯𑀡𑁆𑀡𑀦𑀸.

𑀇𑀢𑀭𑁂𑀲𑀼 𑀧𑀦 𑀢𑀻𑀲𑀼 𑀘𑀢𑀼𑀓𑁆𑀓𑁂𑀲𑀼 𑀬𑀲𑁆𑀫𑀸 𑀯𑀺𑀲𑀼𑀁 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀦𑀬𑁄 𑀦𑀸𑀫 𑀦𑀢𑁆𑀣𑀺; 𑀢𑀲𑁆𑀫𑀸 𑀅𑀦𑀼𑀧𑀤𑀯𑀡𑁆𑀡𑀦𑀸𑀦𑀬𑁂𑀦𑁂𑀯 𑀦𑁂𑀲𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀻𑀢𑀺𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀧𑀻𑀢𑀺𑀁 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀭𑁄𑀦𑁆𑀢𑁄 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀢𑀢𑁆𑀣 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑁋 𑀆𑀭𑀫𑁆𑀫𑀡𑀢𑁄 𑀘 𑀅𑀲𑀫𑁆𑀫𑁄𑀳𑀢𑁄 𑀘.

𑀓𑀣𑀁 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺? 𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂 𑀲𑀫𑀸𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀛𑀸𑀦𑀧𑀝𑀺𑀮𑀸𑀪𑁂𑀦 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑀆𑀭𑀫𑁆𑀫𑀡𑀲𑁆𑀲 𑀧𑀝𑀺𑀲𑀁𑀯𑀺𑀤𑀺𑀢𑀢𑁆𑀢𑀸.

𑀓𑀣𑀁 𑀅𑀲𑀫𑁆𑀫𑁄𑀳𑀢𑁄? 𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀧𑀻𑀢𑀺𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀢𑀺, 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦 𑀅𑀲𑀫𑁆𑀫𑁄𑀳𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑁋

‘‘𑀤𑀻𑀖𑀁 𑀅𑀲𑁆𑀲𑀸𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀁 𑀧𑀚𑀸𑀦𑀢𑁄 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺. 𑀤𑀻𑀖𑀁 𑀧𑀲𑁆𑀲𑀸𑀲𑀯𑀲𑁂𑀦…𑀧𑁂… 𑀭𑀲𑁆𑀲𑀁 𑀅𑀲𑁆𑀲𑀸𑀲𑀯𑀲𑁂𑀦… 𑀭𑀲𑁆𑀲𑀁 𑀧𑀲𑁆𑀲𑀸𑀲𑀯𑀲𑁂𑀦… 𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀸𑀲𑀯𑀲𑁂𑀦… 𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀸𑀲𑀯𑀲𑁂𑀦… 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀸𑀲𑀯𑀲𑁂𑀦… 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀸𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀁 𑀧𑀚𑀸𑀦𑀢𑁄 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺. 𑀆𑀯𑀚𑁆𑀚𑀢𑁄 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑀚𑀸𑀦𑀢𑁄… 𑀧𑀲𑁆𑀲𑀢𑁄… 𑀧𑀘𑁆𑀘𑀯𑁂𑀓𑁆𑀔𑀢𑁄… 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀢𑁄… 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀢𑁄… 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀢𑁄… 𑀲𑀢𑀺𑀁 𑀉𑀧𑀝𑁆𑀞𑀸𑀧𑀬𑀢𑁄… 𑀘𑀺𑀢𑁆𑀢𑀁 𑀲𑀫𑀸𑀤𑀳𑀢𑁄… 𑀧𑀜𑁆𑀜𑀸𑀬 𑀧𑀚𑀸𑀦𑀢𑁄… 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀢𑁄… 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀢𑁄… 𑀧𑀳𑀸𑀢𑀩𑁆𑀩𑀁 𑀧𑀚𑀳𑀢𑁄… 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑀬𑀢𑁄… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀢𑁄 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺. 𑀏𑀯𑀁 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁭𑁨).

𑀏𑀢𑁂𑀦𑁂𑀯 𑀦𑀬𑁂𑀦 𑀅𑀯𑀲𑁂𑀲𑀧𑀤𑀸𑀦𑀺𑀧𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀤𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑀫𑀢𑁆𑀢𑀁. 𑀢𑀺𑀡𑁆𑀡𑀁 𑀛𑀸𑀦𑀸𑀦𑀁 𑀯𑀲𑁂𑀦 𑀲𑀼𑀔𑀧𑀝𑀺𑀲𑀁𑀯𑁂𑀤𑀺𑀢𑀸 𑀘𑀢𑀼𑀦𑁆𑀦𑀫𑁆𑀧𑀺 𑀯𑀲𑁂𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀝𑀺𑀲𑀁𑀯𑁂𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺 𑀯𑁂𑀤𑀦𑀸𑀤𑀬𑁄 𑀤𑁆𑀯𑁂 𑀔𑀦𑁆𑀥𑀸. 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀺𑀧𑀤𑁂 𑀘𑁂𑀢𑁆𑀣 𑀯𑀺𑀧𑀲𑁆𑀲𑀦𑀸𑀪𑀽𑀫𑀺𑀤𑀲𑁆𑀲𑀦𑀢𑁆𑀣𑀁 ‘‘𑀲𑀼𑀔𑀦𑁆𑀢𑀺 𑀤𑁆𑀯𑁂 𑀲𑀼𑀔𑀸𑀦𑀺 𑁋 𑀓𑀸𑀬𑀺𑀓𑀜𑁆𑀘 𑀲𑀼𑀔𑀁 𑀘𑁂𑀢𑀲𑀺𑀓𑀜𑁆𑀘𑀸’’𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑀁. 𑀧𑀲𑁆𑀲𑀫𑁆𑀪𑀬𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀦𑁆𑀢𑀺 𑀑𑀴𑀸𑀭𑀺𑀓𑀁 𑀑𑀴𑀸𑀭𑀺𑀓𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀁 𑀧𑀲𑁆𑀲𑀫𑁆𑀪𑁂𑀦𑁆𑀢𑁄, 𑀦𑀺𑀭𑁄𑀥𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑁄 𑀯𑀺𑀢𑁆𑀣𑀸𑀭𑀢𑁄 𑀓𑀸𑀬𑀲𑀗𑁆𑀔𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘𑁂𑀢𑁆𑀣 𑀧𑀻𑀢𑀺𑀧𑀤𑁂 𑀧𑀻𑀢𑀺𑀲𑀻𑀲𑁂𑀦 𑀯𑁂𑀤𑀦𑀸 𑀯𑀼𑀢𑁆𑀢𑀸. 𑀲𑀼𑀔𑀧𑀤𑁂 𑀲𑀭𑀽𑀧𑁂𑀦𑁂𑀯 𑀯𑁂𑀤𑀦𑀸. 𑀤𑁆𑀯𑀻𑀲𑀼 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀤𑁂𑀲𑀼 ‘‘𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑁂𑀢𑀲𑀺𑀓𑀸 𑀏𑀢𑁂 𑀥𑀫𑁆𑀫𑀸 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑀸’’𑀢𑀺 (𑀧𑀝𑀺. 𑀫. 𑁧.𑁧𑁭𑁪; 𑀫. 𑀦𑀺. 𑁧.𑁪𑁬𑁩) 𑀯𑀘𑀦𑀢𑁄 𑀲𑀜𑁆𑀜𑀸𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀢𑀺. 𑀏𑀯𑀁 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀦𑀬𑁂𑀦 𑀇𑀤𑀁 𑀘𑀢𑀼𑀓𑁆𑀓𑀁 𑀪𑀸𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑀺𑀬𑀘𑀢𑀼𑀓𑁆𑀓𑁂𑀧𑀺 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀯𑀲𑁂𑀦 𑀘𑀺𑀢𑁆𑀢𑀧𑀝𑀺𑀲𑀁𑀯𑁂𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀧𑁆𑀧𑀫𑁄𑀤𑀬𑀁 𑀘𑀺𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀁 𑀫𑁄𑀤𑁂𑀦𑁆𑀢𑁄 𑀧𑀫𑁄𑀤𑁂𑀦𑁆𑀢𑁄 𑀳𑀸𑀲𑁂𑀦𑁆𑀢𑁄 𑀧𑀳𑀸𑀲𑁂𑀦𑁆𑀢𑁄 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀢𑀢𑁆𑀣 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀅𑀪𑀺𑀧𑁆𑀧𑀫𑁄𑀤𑁄 𑀳𑁄𑀢𑀺 𑁋 𑀲𑀫𑀸𑀥𑀺𑀯𑀲𑁂𑀦 𑀘 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀘.

𑀓𑀣𑀁 𑀲𑀫𑀸𑀥𑀺𑀯𑀲𑁂𑀦? 𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂 𑀲𑀫𑀸𑀧𑀚𑁆𑀚𑀢𑀺, 𑀲𑁄 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀻𑀢𑀺𑀬𑀸 𑀘𑀺𑀢𑁆𑀢𑀁 𑀆𑀫𑁄𑀤𑁂𑀢𑀺 𑀧𑀫𑁄𑀤𑁂𑀢𑀺. 𑀓𑀣𑀁 𑀯𑀺𑀧𑀲𑁆𑀲𑀦𑀸𑀯𑀲𑁂𑀦? 𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀧𑀻𑀢𑀺𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀢𑀺; 𑀏𑀯𑀁 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀧𑀻𑀢𑀺𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀺𑀢𑁆𑀢𑀁 𑀆𑀫𑁄𑀤𑁂𑀢𑀺 𑀧𑀫𑁄𑀤𑁂𑀢𑀺. 𑀏𑀯𑀁 𑀧𑀝𑀺𑀧𑀦𑁆𑀦𑁄 ‘‘𑀅𑀪𑀺𑀧𑁆𑀧𑀫𑁄𑀤𑀬𑀁 𑀘𑀺𑀢𑁆𑀢𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀲𑀫𑀸𑀤𑀳𑀁 𑀘𑀺𑀢𑁆𑀢𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀲𑀫𑀁 𑀆𑀤𑀳𑀦𑁆𑀢𑁄 𑀲𑀫𑀁 𑀞𑀧𑁂𑀦𑁆𑀢𑁄 𑀢𑀸𑀦𑀺 𑀯𑀸 𑀧𑀦 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀘𑀺𑀢𑁆𑀢𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀢𑁄 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦 𑀉𑀧𑁆𑀧𑀚𑁆𑀚𑀢𑀺 𑀔𑀡𑀺𑀓𑀘𑀺𑀢𑁆𑀢𑁂𑀓𑀕𑁆𑀕𑀢𑀸; 𑀏𑀯𑀁 𑀉𑀧𑁆𑀧𑀦𑁆𑀦𑀸𑀬 𑀔𑀡𑀺𑀓𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀯𑀲𑁂𑀦𑀧𑀺 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀲𑀫𑀁 𑀆𑀤𑀳𑀦𑁆𑀢𑁄 𑀲𑀫𑀁 𑀞𑀧𑁂𑀦𑁆𑀢𑁄 ‘‘𑀲𑀫𑀸𑀤𑀳𑀁 𑀘𑀺𑀢𑁆𑀢𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀯𑀺𑀫𑁄𑀘𑀬𑀁 𑀘𑀺𑀢𑁆𑀢𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑁂𑀦 𑀦𑀻𑀯𑀭𑀡𑁂𑀳𑀺 𑀘𑀺𑀢𑁆𑀢𑀁 𑀫𑁄𑀘𑁂𑀦𑁆𑀢𑁄 𑀯𑀺𑀫𑁄𑀘𑁂𑀦𑁆𑀢𑁄, 𑀤𑀼𑀢𑀺𑀬𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺, 𑀢𑀢𑀺𑀬𑁂𑀦 𑀧𑀻𑀢𑀺𑀬𑀸, 𑀘𑀢𑀼𑀢𑁆𑀣𑁂𑀦 𑀲𑀼𑀔𑀤𑀼𑀓𑁆𑀔𑁂𑀳𑀺 𑀘𑀺𑀢𑁆𑀢𑀁 𑀫𑁄𑀘𑁂𑀦𑁆𑀢𑁄 𑀯𑀺𑀫𑁄𑀘𑁂𑀦𑁆𑀢𑁄. 𑀢𑀸𑀦𑀺 𑀯𑀸 𑀧𑀦 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀘𑀺𑀢𑁆𑀢𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀢𑀺. 𑀲𑁄 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀸𑀢𑁄 𑀘𑀺𑀢𑁆𑀢𑀁 𑀫𑁄𑀘𑁂𑀦𑁆𑀢𑁄 𑀯𑀺𑀫𑁄𑀘𑁂𑀦𑁆𑀢𑁄, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀲𑀼𑀔𑀲𑀜𑁆𑀜𑀸𑀢𑁄, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀢𑁆𑀢𑀲𑀜𑁆𑀜𑀸𑀢𑁄, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀦𑀦𑁆𑀤𑀺𑀢𑁄, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬 𑀭𑀸𑀕𑀢𑁄, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀲𑀫𑀼𑀤𑀬𑀢𑁄, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀆𑀤𑀸𑀦𑀢𑁄 𑀘𑀺𑀢𑁆𑀢𑀁 𑀫𑁄𑀘𑁂𑀦𑁆𑀢𑁄 𑀯𑀺𑀫𑁄𑀘𑁂𑀦𑁆𑀢𑁄 𑀅𑀲𑁆𑀲𑀲𑀢𑀺 𑀘𑁂𑀯 𑀧𑀲𑁆𑀲𑀲𑀢𑀺 𑀘. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀺𑀫𑁄𑀘𑀬𑀁 𑀘𑀺𑀢𑁆𑀢𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻’’𑀢𑀺. 𑀏𑀯𑀁 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀇𑀤𑀁 𑀘𑀢𑀼𑀓𑁆𑀓𑀁 𑀪𑀸𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.