𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀧𑀸𑀘𑀺𑀢𑁆𑀢𑀺𑀬-𑀅𑀝𑁆𑀞𑀓𑀣𑀸

𑁫. 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑀁

𑁧. 𑀫𑀼𑀲𑀸𑀯𑀸𑀤𑀯𑀕𑁆𑀕𑁄

𑁧. 𑀫𑀼𑀲𑀸𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀬𑁂𑀲𑀁 𑀦𑀯𑀳𑀺 𑀯𑀕𑁆𑀕𑁂𑀳𑀺, 𑀲𑀗𑁆𑀕𑀳𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄;

𑀔𑀼𑀤𑁆𑀤𑀓𑀸𑀦𑀁 𑀅𑀬𑀁 𑀤𑀸𑀦𑀺, 𑀢𑁂𑀲𑀁 𑀪𑀯𑀢𑀺 𑀯𑀡𑁆𑀡𑀦𑀸.

𑁧. 𑀢𑀢𑁆𑀣 𑀫𑀼𑀲𑀸𑀯𑀸𑀤𑀯𑀕𑁆𑀕𑀲𑁆𑀲 𑀢𑀸𑀯 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀳𑀢𑁆𑀣𑀓𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀲𑀓𑁆𑀬𑀸𑀦𑀁 𑀧𑀼𑀢𑁆𑀢𑁄𑀢𑀺 𑀲𑀓𑁆𑀬𑀧𑀼𑀢𑁆𑀢𑁄. 𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀲𑀓𑁆𑀬𑀓𑀼𑀮𑀢𑁄 𑀅𑀲𑀻𑀢𑀺 𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀁𑀲𑀼, 𑀢𑁂𑀲𑀁 𑀲𑁄 𑀅𑀜𑁆𑀜𑀢𑀭𑁄𑀢𑀺. 𑀯𑀸𑀤𑀓𑁆𑀔𑀺𑀢𑁆𑀢𑁄𑀢𑀺 ‘‘𑀯𑀸𑀤𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑀺𑀢𑁂𑀦 𑀯𑀸𑀤𑁂𑀦 𑀧𑀭𑀯𑀸𑀤𑀺𑀲𑀦𑁆𑀢𑀺𑀓𑀁 𑀔𑀺𑀢𑁆𑀢𑁄 𑀧𑀓𑁆𑀔𑀺𑀢𑁆𑀢𑁄 𑀧𑀳𑀺𑀢𑁄 𑀧𑁂𑀲𑀺𑀢𑁄𑀢𑀺 𑀅𑀢𑁆𑀣𑁄. 𑀯𑀸𑀤𑀫𑁆𑀳𑀺 𑀯𑀸 𑀲𑀓𑁂𑀦 𑀘𑀺𑀢𑁆𑀢𑁂𑀦 𑀔𑀺𑀢𑁆𑀢𑁄. 𑀬𑀢𑁆𑀭 𑀬𑀢𑁆𑀭 𑀯𑀸𑀤𑁄 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀦𑁆𑀤𑀺𑀲𑁆𑀲𑀢𑀻𑀢𑀺𑀧𑀺 𑀯𑀸𑀤𑀓𑁆𑀔𑀺𑀢𑁆𑀢𑁄. 𑀅𑀯𑀚𑀸𑀦𑀺𑀢𑁆𑀯𑀸 𑀅𑀯𑀚𑀸𑀦𑀸𑀢𑀻𑀢𑀺 𑀅𑀢𑁆𑀢𑀦𑁄 𑀯𑀸𑀤𑁂 𑀓𑀜𑁆𑀘𑀺 𑀤𑁄𑀲𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 ‘‘𑀦𑀸𑀬𑀁 𑀫𑀫 𑀯𑀸𑀤𑁄’’𑀢𑀺 𑀅𑀯𑀚𑀸𑀦𑀺𑀢𑁆𑀯𑀸 𑀧𑀼𑀦 𑀓𑀣𑁂𑀦𑁆𑀢𑁄 𑀓𑀣𑁂𑀦𑁆𑀢𑁄 𑀦𑀺𑀤𑁆𑀤𑁄𑀲𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀫𑀫𑁂𑀯 𑀅𑀬𑀁 𑀯𑀸𑀤𑁄’’𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀧𑀝𑀺𑀚𑀸𑀦𑀺𑀢𑁆𑀯𑀸 𑀅𑀯𑀚𑀸𑀦𑀸𑀢𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀯𑀘𑀦𑁂 𑀆𑀦𑀺𑀲𑀁𑀲𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 ‘‘𑀅𑀬𑀁 𑀫𑀫 𑀯𑀸𑀤𑁄’’𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀧𑀼𑀦 𑀓𑀣𑁂𑀦𑁆𑀢𑁄 𑀓𑀣𑁂𑀦𑁆𑀢𑁄 𑀢𑀢𑁆𑀣 𑀤𑁄𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀦𑀸𑀬𑀁 𑀫𑀫 𑀯𑀸𑀤𑁄’’𑀢𑀺 𑀅𑀯𑀚𑀸𑀦𑀸𑀢𑀺. 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀻𑀢𑀺 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀅𑀜𑁆𑀜𑀁 𑀓𑀸𑀭𑀡𑀁 𑀧𑀝𑀺𑀘𑀭𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺, ‘‘𑀭𑀽𑀧𑀁 𑀅𑀦𑀺𑀘𑁆𑀘𑀁 𑀚𑀸𑀦𑀺𑀢𑀩𑁆𑀩𑀢𑁄’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀚𑀸𑀢𑀺𑀥𑀫𑁆𑀫𑀢𑁄’’𑀢𑀺𑀆𑀤𑀻𑀦𑀺 𑀯𑀤𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀏𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼𑀁 𑀅𑀜𑁆𑀜𑀁 𑀩𑀳𑀼𑀁 𑀓𑀣𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀁 𑀢𑀁 𑀧𑀝𑀺𑀚𑀸𑀦𑀦𑀜𑁆𑀘 𑀅𑀯𑀚𑀸𑀦𑀦𑀜𑁆𑀘, 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 ‘‘𑀓𑁄 𑀆𑀳, 𑀓𑀺𑀁 𑀆𑀳, 𑀓𑀺𑀲𑁆𑀫𑀺𑀁 𑀆𑀳𑀸’’𑀢𑀺 𑀏𑀯𑀫𑀸𑀤𑀺 𑀩𑀳𑀼𑀁 𑀪𑀸𑀲𑀢𑀻𑀢𑀺. 𑀧𑀼𑀦 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘‘𑀅𑀯𑀚𑀸𑀦𑀺𑀢𑁆𑀯𑀸 𑀧𑀝𑀺𑀚𑀸𑀦𑀦𑁆𑀢𑁄 𑀧𑀝𑀺𑀚𑀸𑀦𑀺𑀢𑁆𑀯𑀸 𑀅𑀯𑀚𑀸𑀦𑀦𑁆𑀢𑁄 𑀏𑀯 𑀘 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀻𑀢𑀺 𑀚𑀸𑀦𑀦𑁆𑀢𑁄 𑀫𑀼𑀲𑀸 𑀪𑀸𑀲𑀢𑀺. 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸 𑀯𑀺𑀲𑀁𑀯𑀸𑀤𑁂𑀢𑀻𑀢𑀺 𑀧𑀼𑀭𑁂𑀪𑀢𑁆𑀢𑀸𑀤𑀻𑀲𑀼 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀧𑀤𑁂𑀲𑁂 𑀯𑀸𑀤𑁄 𑀳𑁄𑀢𑀽’’𑀢𑀺 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸 𑀲𑀗𑁆𑀓𑁂𑀢𑀢𑁄 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀕𑀦𑁆𑀢𑁆𑀯𑀸 ‘‘𑀧𑀲𑁆𑀲𑀣 𑀪𑁄, 𑀢𑀺𑀢𑁆𑀣𑀺𑀬𑀸 𑀦 𑀆𑀕𑀢𑀸 𑀧𑀭𑀸𑀚𑀺𑀢𑀸’’𑀢𑀺 𑀧𑀓𑁆𑀓𑀫𑀢𑀺.

𑁨. 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂𑀢𑀺 𑀚𑀸𑀦𑀺𑀢𑁆𑀯𑀸 𑀚𑀸𑀦𑀦𑁆𑀢𑀲𑁆𑀲 𑀘 𑀫𑀼𑀲𑀸 𑀪𑀡𑀦𑁂.

𑁩. 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀲𑁆𑀲𑀸𑀢𑀺 𑀯𑀺𑀲𑀁𑀯𑀸𑀤𑀦𑀘𑀺𑀢𑁆𑀢𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀯𑀤𑀦𑁆𑀢𑀲𑁆𑀲. 𑀯𑀸𑀘𑀸𑀢𑀺 𑀫𑀺𑀘𑁆𑀙𑀸𑀯𑀸𑀘𑀸𑀧𑀭𑀺𑀬𑀸𑀧𑀦𑁆𑀦𑀯𑀘𑀦𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸. 𑀕𑀺𑀭𑀸𑀢𑀺 𑀢𑀸𑀬 𑀘𑁂𑀢𑀦𑀸𑀬 𑀲𑀫𑀼𑀝𑁆𑀞𑀸𑀧𑀺𑀢𑀲𑀤𑁆𑀤𑀁 𑀤𑀲𑁆𑀲𑁂𑀢𑀺. 𑀩𑁆𑀬𑀧𑁆𑀧𑀣𑁄𑀢𑀺 𑀯𑀘𑀦𑀧𑀣𑁄; 𑀯𑀸𑀘𑀸𑀬𑁂𑀯 𑀳𑀺 𑀅𑀜𑁆𑀜𑁂𑀲𑀫𑁆𑀧𑀺 𑀤𑀺𑀝𑁆𑀞𑀸𑀦𑀼𑀕𑀢𑀺𑀫𑀸𑀧𑀚𑁆𑀚𑀦𑁆𑀢𑀸𑀦𑀁 𑀧𑀣𑀪𑀽𑀢𑀢𑁄 𑀩𑁆𑀬𑀧𑁆𑀧𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀘𑀻𑀪𑁂𑀤𑁄𑀢𑀺 𑀯𑀘𑀻𑀲𑀜𑁆𑀜𑀺𑀢𑀸𑀬 𑀯𑀸𑀘𑀸𑀬 𑀪𑁂𑀤𑁄; 𑀧𑀪𑁂𑀤𑀕𑀢𑀸 𑀯𑀸𑀘𑀸 𑀏𑀯 𑀏𑀯𑀁 𑀯𑀼𑀘𑁆𑀘𑀢𑀺. 𑀯𑀸𑀘𑀲𑀺𑀓𑀸 𑀯𑀺𑀜𑁆𑀜𑀢𑁆𑀢𑀻𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺. 𑀏𑀯𑀁 𑀧𑀞𑀫𑀧𑀤𑁂𑀦 𑀲𑀼𑀤𑁆𑀥𑀘𑁂𑀢𑀦𑀸, 𑀫𑀚𑁆𑀛𑁂 𑀢𑀻𑀳𑀺 𑀢𑀁𑀲𑀫𑀼𑀝𑁆𑀞𑀸𑀧𑀺𑀢𑀲𑀤𑁆𑀤𑀲𑀳𑀺𑀢𑀸 𑀘𑁂𑀢𑀦𑀸, 𑀅𑀦𑁆𑀢𑁂 𑀏𑀓𑁂𑀦 𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀸 𑀘𑁂𑀢𑀦𑀸 ‘‘𑀓𑀣𑀺𑀢𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀭𑀺𑀬𑀯𑁄𑀳𑀸𑀭𑀸𑀢𑀺 𑀅𑀦𑀭𑀺𑀬𑀸𑀦𑀁 𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑁄𑀳𑀸𑀭𑀸.

𑀏𑀯𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑁆𑀢𑁂 𑀯𑀼𑀢𑁆𑀢𑀸𑀦𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀲𑀗𑁆𑀔𑀸𑀢𑀸𑀦𑀁 𑀅𑀦𑀭𑀺𑀬𑀯𑁄𑀳𑀸𑀭𑀸𑀦𑀁 𑀮𑀓𑁆𑀔𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀤𑀺𑀝𑁆𑀞𑀁 𑀤𑀺𑀝𑁆𑀞𑀁 𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀤𑀺𑀝𑁆𑀞𑀁 𑀤𑀺𑀝𑁆𑀞𑀁 𑀫𑁂𑀢𑀺 𑀏𑀯𑀁 𑀯𑀤𑀢𑁄 𑀯𑀘𑀦𑀁 𑀢𑀁𑀲𑀫𑀼𑀝𑁆𑀞𑀸𑀧𑀺𑀓𑀸 𑀯𑀸 𑀘𑁂𑀢𑀦𑀸 𑀏𑀓𑁄 𑀅𑀦𑀭𑀺𑀬𑀯𑁄𑀳𑀸𑀭𑁄𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘𑁂𑀢𑁆𑀣 𑀘𑀓𑁆𑀔𑀼𑀯𑀲𑁂𑀦 𑀅𑀕𑁆𑀕𑀳𑀺𑀢𑀸𑀭𑀫𑁆𑀫𑀡𑀁 𑀅𑀤𑀺𑀝𑁆𑀞𑀁, 𑀲𑁄𑀢𑀯𑀲𑁂𑀦 𑀅𑀕𑁆𑀕𑀳𑀺𑀢𑀁 𑀅𑀲𑀼𑀢𑀁, 𑀖𑀸𑀦𑀸𑀤𑀺𑀯𑀲𑁂𑀦 𑀫𑀼𑀦𑀺𑀢𑁆𑀯𑀸 𑀢𑀻𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀏𑀓𑀸𑀩𑀤𑁆𑀥𑀁 𑀯𑀺𑀬 𑀓𑀢𑁆𑀯𑀸 𑀧𑀢𑁆𑀯𑀸 𑀅𑀕𑁆𑀕𑀳𑀺𑀢𑀁 𑀅𑀫𑀼𑀢𑀁, 𑀅𑀜𑁆𑀜𑀢𑁆𑀭 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀼𑀤𑁆𑀥𑁂𑀦 𑀯𑀺𑀜𑁆𑀜𑀸𑀡𑁂𑀦𑁂𑀯 𑀅𑀕𑁆𑀕𑀳𑀺𑀢𑀁 𑀅𑀯𑀺𑀜𑁆𑀜𑀸𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀴𑀺𑀬𑀁 𑀧𑀦 ‘‘𑀅𑀤𑀺𑀝𑁆𑀞𑀁 𑀦𑀸𑀫 𑀦 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞’’𑀦𑁆𑀢𑀺 𑀏𑀯𑀁 𑀑𑀴𑀸𑀭𑀺𑀓𑁂𑀦𑁂𑀯 𑀦𑀬𑁂𑀦 𑀤𑁂𑀲𑀦𑀸 𑀓𑀢𑀸𑀢𑀺. 𑀤𑀺𑀝𑁆𑀞𑀸𑀤𑀻𑀲𑀼 𑀘 𑀅𑀢𑁆𑀢𑀦𑀸𑀧𑀺 𑀧𑀭𑁂𑀦𑀧𑀺 𑀤𑀺𑀝𑁆𑀞𑀁 𑀤𑀺𑀝𑁆𑀞𑀫𑁂𑀯. 𑀏𑀯𑀁 𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀸𑀦𑀻𑀢𑀺 𑀅𑀬𑀫𑁂𑀓𑁄 𑀧𑀭𑀺𑀬𑀸𑀬𑁄. 𑀅𑀧𑀭𑁄 𑀦𑀬𑁄 𑀬𑀁 𑀅𑀢𑁆𑀢𑀦𑀸 𑀤𑀺𑀝𑁆𑀞𑀁 𑀤𑀺𑀝𑁆𑀞𑀫𑁂𑀯 𑀢𑀁. 𑀏𑀲 𑀦𑀬𑁄 𑀲𑀼𑀢𑀸𑀤𑀻𑀲𑀼. 𑀬𑀁 𑀧𑀦 𑀧𑀭𑁂𑀦 𑀤𑀺𑀝𑁆𑀞𑀁, 𑀢𑀁 𑀅𑀢𑁆𑀢𑀦𑀸 𑀲𑀼𑀢𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀏𑀯𑀁 𑀫𑀼𑀢𑀸𑀤𑀻𑀦𑀺𑀧𑀺.

𑁪. 𑀇𑀤𑀸𑀦𑀺 𑀢𑁂𑀲𑀁 𑀅𑀦𑀭𑀺𑀬𑀯𑁄𑀳𑀸𑀭𑀸𑀦𑀁 𑀯𑀲𑁂𑀦 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀻𑀳𑀸𑀓𑀸𑀭𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 ‘‘𑀢𑀻𑀳𑀺 𑀆𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀺𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀧𑀸𑀴𑀺𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺 𑀇𑀥 ‘‘𑀅𑀤𑀺𑀝𑁆𑀞𑀁 𑀤𑀺𑀝𑁆𑀞𑀁 𑀫𑁂’’𑀢𑀺, 𑀢𑀢𑁆𑀣 𑀘 ‘‘𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 ‘‘𑀇𑀥 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀏𑀯𑀁 𑀯𑀢𑁆𑀣𑀼𑀫𑀢𑁆𑀢𑁂 𑀆𑀧𑀢𑁆𑀢𑀺𑀫𑀢𑁆𑀢𑁂 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀏𑀓𑀮𑀓𑁆𑀔𑀡𑀫𑁂𑀯𑀸𑀢𑀺.

𑁯. 𑀢𑀻𑀳𑀸𑀓𑀸𑀭𑁂𑀳𑀺 𑀤𑀺𑀝𑁆𑀞𑁂 𑀯𑁂𑀫𑀢𑀺𑀓𑁄𑀢𑀺𑀆𑀤𑀻𑀦𑀫𑁆𑀧𑀺 𑀅𑀢𑁆𑀣𑁄 ‘‘𑀤𑀺𑀝𑁆𑀞𑀲𑁆𑀲 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁂 𑀯𑁂𑀫𑀢𑀺𑀓𑁄’’𑀢𑀺 𑀏𑀯𑀫𑀸𑀤𑀺𑀤𑀼𑀝𑁆𑀞𑀤𑁄𑀲𑀧𑀸𑀴𑀺𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀧𑀸𑀴𑀺𑀫𑀢𑁆𑀢𑀫𑁂𑀯 𑀳𑀺 𑀏𑀢𑁆𑀣 𑀯𑀺𑀲𑁂𑀲𑁄, 𑀅𑀢𑁆𑀣𑁂 𑀧𑀦 𑀲𑀣𑁂𑀭𑀯𑀸𑀤𑁂 𑀓𑀺𑀜𑁆𑀘𑀺 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺.

𑁧𑁧. 𑀲𑀳𑀲𑀸 𑀪𑀡𑀢𑀻𑀢𑀺 𑀅𑀯𑀻𑀫𑀁𑀲𑀺𑀢𑁆𑀯𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀯𑀸 𑀯𑁂𑀕𑁂𑀦 𑀤𑀺𑀝𑁆𑀞𑀫𑁆𑀧𑀺 ‘‘𑀅𑀤𑀺𑀝𑁆𑀞𑀁 𑀫𑁂’’𑀢𑀺 𑀪𑀡𑀢𑀺. 𑀅𑀜𑁆𑀜𑀁 𑀪𑀡𑀺𑀲𑁆𑀲𑀸𑀫𑀻𑀢𑀺 𑀅𑀜𑁆𑀜𑀁 𑀪𑀡𑀢𑀻𑀢𑀺 𑀫𑀦𑁆𑀤𑀢𑁆𑀢𑀸 𑀚𑀴𑀢𑁆𑀢𑀸 𑀧𑀓𑁆𑀔𑀮𑀦𑁆𑀢𑁄 ‘‘𑀘𑀻𑀯𑀭’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀘𑀻𑀭’’𑀦𑁆𑀢𑀺 𑀆𑀤𑀺𑀁 𑀪𑀡𑀢𑀺. 𑀬𑁄 𑀧𑀦 𑀲𑀸𑀫𑀡𑁂𑀭𑁂𑀦 ‘‘𑀅𑀧𑀺 𑀪𑀦𑁆𑀢𑁂 𑀫𑀬𑁆𑀳𑀁 𑀉𑀧𑀚𑁆𑀛𑀸𑀬𑀁 𑀧𑀲𑁆𑀲𑀺𑀢𑁆𑀣𑀸’’𑀢𑀺 𑀯𑀼𑀢𑁆𑀢𑁄 𑀓𑁂𑀴𑀺𑀁 𑀓𑀼𑀭𑀼𑀫𑀸𑀦𑁄 ‘‘𑀢𑀯 𑀉𑀧𑀚𑁆𑀛𑀸𑀬𑁄 𑀤𑀸𑀭𑀼𑀲𑀓𑀝𑀁 𑀬𑁄𑀚𑁂𑀢𑁆𑀯𑀸 𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀸 𑀲𑀺𑀗𑁆𑀕𑀸𑀮𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀲𑁆𑀲𑀸𑀬𑀁 𑀪𑀦𑁆𑀢𑁂 𑀲𑀤𑁆𑀤𑁄’’𑀢𑀺 𑀯𑀼𑀢𑁆𑀢𑁄 ‘‘𑀫𑀸𑀢𑀼𑀬𑀸 𑀢𑁂 𑀬𑀸𑀦𑁂𑀦 𑀕𑀘𑁆𑀙𑀦𑁆𑀢𑀺𑀬𑀸 𑀓𑀤𑁆𑀤𑀫𑁂 𑀮𑀕𑁆𑀕𑀘𑀓𑁆𑀓𑀁 𑀉𑀤𑁆𑀥𑀭𑀦𑁆𑀢𑀸𑀦𑀁 𑀅𑀬𑀁 𑀲𑀤𑁆𑀤𑁄’’𑀢𑀺 𑀯𑀸 𑀏𑀯𑀁 𑀦𑁂𑀯 𑀤𑀯𑀸 𑀦 𑀭𑀯𑀸 𑀅𑀜𑁆𑀜𑀁 𑀪𑀡𑀢𑀺, 𑀲𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺𑀬𑁂𑀯. 𑀅𑀜𑁆𑀜𑀸 𑀧𑀽𑀭𑀡𑀓𑀣𑀸 𑀦𑀸𑀫 𑀳𑁄𑀢𑀺, 𑀏𑀓𑁄 𑀕𑀸𑀫𑁂 𑀣𑁄𑀓𑀁 𑀢𑁂𑀮𑀁 𑀮𑀪𑀺𑀢𑁆𑀯𑀸 𑀯𑀺𑀳𑀸𑀭𑀁 𑀆𑀕𑀢𑁄 𑀲𑀸𑀫𑀡𑁂𑀭𑀁 𑀪𑀡𑀢𑀺 𑁋 ‘‘𑀢𑁆𑀯𑀁 𑀅𑀚𑁆𑀚 𑀓𑀼𑀳𑀺𑀁 𑀕𑀢𑁄, 𑀕𑀸𑀫𑁄 𑀏𑀓𑀢𑁂𑀮𑁄 𑀅𑀳𑁄𑀲𑀻’’𑀢𑀺 𑀯𑀸 𑀧𑀘𑁆𑀙𑀺𑀓𑀸𑀬 𑀞𑀧𑀺𑀢𑀁 𑀧𑀽𑀯𑀔𑀡𑁆𑀟𑀁 𑀮𑀪𑀺𑀢𑁆𑀯𑀸 ‘‘𑀅𑀚𑁆𑀚 𑀕𑀸𑀫𑁂 𑀧𑀘𑁆𑀙𑀺𑀓𑀸𑀳𑀺 𑀧𑀽𑀯𑁂 𑀘𑀸𑀭𑁂𑀲𑀼’’𑀦𑁆𑀢𑀺 𑀯𑀸, 𑀅𑀬𑀁 𑀫𑀼𑀲𑀸𑀯𑀸𑀤𑁄𑀯 𑀳𑁄𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀫𑀼𑀲𑀸𑀯𑀸𑀤𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀁.

𑁨. 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑀑𑀫𑀲𑀦𑁆𑀢𑀻𑀢𑀺 𑀑𑀯𑀺𑀚𑁆𑀛𑀦𑁆𑀢𑀺. 𑀔𑀼𑀁𑀲𑁂𑀦𑁆𑀢𑀻𑀢𑀺 𑀅𑀓𑁆𑀓𑁄𑀲𑀦𑁆𑀢𑀺. 𑀯𑀫𑁆𑀪𑁂𑀦𑁆𑀢𑀻𑀢𑀺 𑀧𑀥𑀁𑀲𑁂𑀦𑁆𑀢𑀺.

𑁧𑁩. 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀇𑀤𑀁 𑀯𑀢𑁆𑀣𑀼𑀁 𑀪𑀕𑀯𑀸 𑀑𑀫𑀲𑀯𑀸𑀤𑀕𑀭𑀳𑀡𑀢𑁆𑀣𑀁 𑀆𑀳𑀭𑀺. 𑀦𑀦𑁆𑀤𑀺𑀯𑀺𑀲𑀸𑀮𑁄 𑀦𑀸𑀫𑀸𑀢𑀺 𑀦𑀦𑁆𑀤𑀻𑀢𑀺 𑀢𑀲𑁆𑀲 𑀩𑀮𑀻𑀩𑀤𑁆𑀤𑀲𑁆𑀲 𑀦𑀸𑀫𑀁, 𑀯𑀺𑀲𑀸𑀡𑀸𑀦𑀺 𑀧𑀦𑀲𑁆𑀲 𑀯𑀺𑀲𑀸𑀮𑀸𑀦𑀺, 𑀢𑀲𑁆𑀫𑀸 ‘‘𑀦𑀦𑁆𑀤𑀺𑀯𑀺𑀲𑀸𑀮𑁄’’𑀢𑀺 𑀯𑀼𑀘𑁆𑀘𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑁂𑀦 𑀲𑀫𑀬𑁂𑀦 𑀦𑀦𑁆𑀤𑀺𑀯𑀺𑀲𑀸𑀮𑁄 𑀦𑀸𑀫 𑀳𑁄𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀬𑀸𑀕𑀼𑀪𑀢𑁆𑀢𑀸𑀤𑀻𑀳𑀺 𑀅𑀢𑀺𑀯𑀺𑀬 𑀧𑁄𑀲𑁂𑀲𑀺. 𑀅𑀣 𑀲𑁄 𑀩𑁆𑀭𑀸𑀳𑁆𑀫𑀡𑀁 𑀅𑀦𑀼𑀓𑀫𑁆𑀧𑀫𑀸𑀦𑁄 ‘‘𑀕𑀘𑁆𑀙 𑀢𑁆𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑁂𑀯 𑀅𑀝𑁆𑀞𑀸𑀲𑀻𑀢𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀮𑁂𑀧𑀺 𑀧𑀭𑀔𑀼𑀁𑀲𑀦𑀁 𑀅𑀫𑀦𑀸𑀧𑀢𑁄𑀬𑁂𑀯 𑀧𑀘𑁆𑀘𑁂𑀲𑀺, 𑀢𑀲𑁆𑀫𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑁄𑀲𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀅𑀝𑁆𑀞𑀸𑀲𑀺. 𑀲𑀓𑀝𑀲𑀢𑀁 𑀅𑀢𑀺𑀩𑀤𑁆𑀥𑀁 𑀧𑀯𑀝𑁆𑀝𑁂𑀲𑀻𑀢𑀺 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑁆𑀯𑀸 𑀳𑁂𑀝𑁆𑀞𑀸𑀭𑀼𑀓𑁆𑀔𑁂 𑀤𑀢𑁆𑀯𑀸 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀫𑀼𑀕𑁆𑀕𑀫𑀸𑀲𑀯𑀸𑀮𑀼𑀓𑀸𑀤𑀻𑀳𑀺 𑀧𑀼𑀡𑁆𑀡𑀁 𑀲𑀓𑀝𑀲𑀢𑀁 𑀧𑀯𑀝𑁆𑀝𑁂𑀦𑁆𑀢𑁄, 𑀓𑀺𑀜𑁆𑀘𑀸𑀧𑀺 𑀧𑀼𑀩𑁆𑀩𑁂 𑀧𑀢𑀺𑀝𑁆𑀞𑀺𑀢𑀸𑀭𑀧𑁆𑀧𑀤𑁂𑀲𑀁 𑀧𑀼𑀦 𑀅𑀭𑁂 𑀧𑀢𑁆𑀢𑁂 𑀧𑀯𑀝𑁆𑀝𑀺𑀢𑀁 𑀳𑁄𑀢𑀺, 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀧𑀼𑀭𑀺𑀫𑀲𑀓𑀝𑁂𑀦 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑁂 𑀧𑀘𑁆𑀙𑀺𑀫𑀲𑀓𑀝𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀲𑀓𑀝𑀲𑀢𑀧𑁆𑀧𑀫𑀸𑀡𑀁 𑀧𑀤𑁂𑀲𑀁 𑀧𑀯𑀝𑁆𑀝𑁂𑀲𑀺. 𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀲𑀺𑀣𑀺𑀮𑀓𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀢𑁂𑀦 𑀘𑀢𑁆𑀢𑀫𑀦𑁄 𑀅𑀳𑀽𑀢𑀺 𑀢𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀦𑀮𑀸𑀪𑁂𑀦 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀘 𑀲𑁄 𑀦𑀦𑁆𑀤𑀺𑀯𑀺𑀲𑀸𑀮𑁄 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺.

𑁧𑁫. 𑀅𑀓𑁆𑀓𑁄𑀲𑁂𑀦𑀧𑀻𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀫𑀸 𑀧𑀭𑀢𑁄 ‘‘𑀤𑁆𑀯𑁂 𑀅𑀓𑁆𑀓𑁄𑀲𑀸 𑁋 𑀳𑀻𑀦𑁄 𑀘 𑀅𑀓𑁆𑀓𑁄𑀲𑁄 𑀉𑀓𑁆𑀓𑀝𑁆𑀞𑁄 𑀘 𑀅𑀓𑁆𑀓𑁄𑀲𑁄’’𑀢𑀺 𑀯𑀺𑀪𑀚𑀺𑀢𑀼𑀓𑀸𑀫𑁄, 𑀢𑀲𑁆𑀫𑀸 𑀬𑀣𑀸 𑀧𑀼𑀩𑁆𑀩𑁂 ‘‘𑀳𑀻𑀦𑁂𑀦𑀧𑀺 𑀅𑀓𑁆𑀓𑁄𑀲𑁂𑀦 𑀔𑀼𑀁𑀲𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁; 𑀏𑀯𑀁 𑀅𑀯𑀢𑁆𑀯𑀸 ‘‘𑀅𑀓𑁆𑀓𑁄𑀲𑁂𑀦’’ 𑀇𑀘𑁆𑀘𑁂𑀯𑀫𑀸𑀳. 𑀯𑁂𑀦𑀚𑀸𑀢𑀻𑀢𑀺 𑀢𑀘𑁆𑀙𑀓𑀚𑀸𑀢𑀺; 𑀯𑁂𑀡𑀼𑀓𑀸𑀭𑀚𑀸𑀢𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀦𑁂𑀲𑀸𑀤𑀚𑀸𑀢𑀻𑀢𑀺 𑀫𑀺𑀕𑀮𑀼𑀤𑁆𑀤𑀓𑀸𑀤𑀺𑀚𑀸𑀢𑀺.

𑀭𑀣𑀓𑀸𑀭𑀚𑀸𑀢𑀻𑀢𑀺 𑀘𑀫𑁆𑀫𑀓𑀸𑀭𑀚𑀸𑀢𑀺. 𑀧𑀼𑀓𑁆𑀓𑀼𑀲𑀚𑀸𑀢𑀻𑀢𑀺 𑀧𑀼𑀧𑁆𑀨𑀙𑀟𑁆𑀟𑀓𑀚𑀸𑀢𑀺. 𑀅𑀯𑀓𑀡𑁆𑀡𑀓𑀸𑀤𑀺 𑀤𑀸𑀲𑀸𑀦𑀁 𑀦𑀸𑀫𑀁 𑀳𑁄𑀢𑀺; 𑀢𑀲𑁆𑀫𑀸 𑀳𑀻𑀦𑀁. 𑀑𑀜𑁆𑀜𑀸𑀢𑀦𑁆𑀢𑀺 𑀅𑀯𑀜𑁆𑀜𑀸𑀢𑀁; ‘‘𑀉𑀜𑁆𑀜𑀸𑀢’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀅𑀯𑀜𑁆𑀜𑀸𑀢𑀦𑁆𑀢𑀺 𑀯𑀫𑁆𑀪𑁂𑀢𑁆𑀯𑀸 𑀜𑀸𑀢𑀁. 𑀳𑀻𑀴𑀺𑀢𑀦𑁆𑀢𑀺 𑀚𑀺𑀕𑀼𑀘𑁆𑀙𑀺𑀢𑀁. 𑀧𑀭𑀺𑀪𑀽𑀢𑀦𑁆𑀢𑀺 𑀓𑀺𑀫𑁂𑀢𑁂𑀦𑀸𑀢𑀺𑀢𑀺 𑀧𑀭𑀺𑀪𑀯𑀓𑀢𑀁. 𑀅𑀘𑀺𑀢𑁆𑀢𑀻𑀓𑀢𑀦𑁆𑀢𑀺 𑀦 𑀕𑀭𑀼𑀓𑀢𑀁.

𑀓𑁄𑀝𑁆𑀞𑀓𑀓𑀫𑁆𑀫𑀦𑁆𑀢𑀺 𑀢𑀘𑁆𑀙𑀓𑀓𑀫𑁆𑀫𑀁. 𑀫𑀼𑀤𑁆𑀤𑀸𑀢𑀺 𑀳𑀢𑁆𑀣𑀫𑀼𑀤𑁆𑀤𑀸𑀕𑀡𑀦𑀸. 𑀕𑀡𑀦𑀸𑀢𑀺 𑀅𑀘𑁆𑀙𑀺𑀤𑁆𑀤𑀓𑀸𑀤𑀺𑀅𑀯𑀲𑁂𑀲𑀕𑀡𑀦𑀸. 𑀮𑁂𑀔𑀸𑀢𑀺 𑀅𑀓𑁆𑀔𑀭𑀮𑁂𑀔𑀸. 𑀫𑀥𑀼𑀫𑁂𑀳𑀸𑀩𑀸𑀥𑁄 𑀯𑁂𑀤𑀦𑀸𑀬 𑀅𑀪𑀸𑀯𑀢𑁄 ‘‘𑀉𑀓𑁆𑀓𑀝𑁆𑀞𑁄’’𑀢𑀺 𑀯𑀼𑀢𑁆𑀢𑁄. 𑀧𑀸𑀝𑀺𑀓𑀗𑁆𑀔𑀸𑀢𑀺 𑀇𑀘𑁆𑀙𑀺𑀢𑀩𑁆𑀩𑀸. 𑀬𑀓𑀸𑀭𑁂𑀦 𑀯𑀸 𑀪𑀓𑀸𑀭𑁂𑀦 𑀯𑀸𑀢𑀺 𑀬𑀓𑀸𑀭𑀪𑀓𑀸𑀭𑁂 𑀬𑁄𑀚𑁂𑀢𑁆𑀯𑀸 𑀬𑁄 𑀅𑀓𑁆𑀓𑁄𑀲𑁄. 𑀓𑀸𑀝𑀓𑁄𑀝𑀘𑀺𑀓𑀸𑀬 𑀯𑀸𑀢𑀺 ‘‘𑀓𑀸𑀝’’𑀦𑁆𑀢𑀺 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁, ‘‘𑀓𑁄𑀝𑀘𑀺𑀓𑀸’’𑀢𑀺 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁; 𑀏𑀢𑁂𑀳𑀺 𑀯𑀸 𑀬𑁄 𑀅𑀓𑁆𑀓𑁄𑀲𑁄, 𑀏𑀲𑁄 𑀳𑀻𑀦𑁄 𑀦𑀸𑀫 𑀅𑀓𑁆𑀓𑁄𑀲𑁄𑀢𑀺.

𑁧𑁬. 𑀇𑀤𑀸𑀦𑀺 𑀢𑁂𑀲𑀁 𑀚𑀸𑀢𑀺𑀆𑀤𑀻𑀦𑀁 𑀧𑀪𑁂𑀤𑀯𑀲𑁂𑀦 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑀼𑀁𑀲𑁂𑀢𑀼𑀓𑀸𑀫𑁄 𑀯𑀫𑁆𑀪𑁂𑀢𑀼𑀓𑀸𑀫𑁄 𑀫𑀗𑁆𑀓𑀼𑀓𑀢𑁆𑀢𑀼𑀓𑀸𑀫𑁄𑀢𑀺 𑀅𑀓𑁆𑀓𑁄𑀲𑀺𑀢𑀼𑀓𑀸𑀫𑁄 𑀧𑀥𑀁𑀲𑀺𑀢𑀼𑀓𑀸𑀫𑁄 𑀕𑀭𑀳𑀺𑀢𑀼𑀓𑀸𑀫𑁄 𑀦𑀺𑀢𑁆𑀢𑁂𑀚𑀁 𑀓𑀢𑁆𑀢𑀼𑀓𑀸𑀫𑁄𑀢𑀺 𑀅𑀢𑁆𑀣𑁄. 𑀳𑀻𑀦𑁂𑀦 𑀳𑀻𑀦𑀦𑁆𑀢𑀺 𑀳𑀻𑀦𑁂𑀦 𑀚𑀸𑀢𑀺𑀯𑀘𑀦𑁂𑀦 𑀳𑀻𑀦𑀚𑀸𑀢𑀺𑀓𑀁. 𑀏𑀢𑁂𑀦 𑀉𑀧𑀸𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀳𑀻𑀦𑁂𑀦 𑀳𑀻𑀦𑀁 𑀯𑀤𑀦𑁆𑀢𑁄 𑀓𑀺𑀜𑁆𑀘𑀸𑀧𑀺 𑀲𑀘𑁆𑀘𑀁 𑀯𑀤𑀢𑀺, 𑀑𑀫𑀲𑀺𑀢𑀼𑀓𑀸𑀫𑀢𑀸𑀬 𑀧𑀦𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀉𑀓𑁆𑀓𑀝𑁆𑀞𑁂𑀦 𑀳𑀻𑀦𑀁 𑀯𑀤𑀦𑁆𑀢𑁄 𑀘 𑀓𑀺𑀜𑁆𑀘𑀸𑀧𑀺 𑀅𑀮𑀺𑀓𑀁 𑀪𑀡𑀢𑀺, 𑀑𑀫𑀲𑀺𑀢𑀼𑀓𑀸𑀫𑀢𑀸𑀬 𑀧𑀦 𑀇𑀫𑀺𑀦𑀸𑀯 𑀲𑀺𑀓𑁆𑀔𑀸𑀧𑀤𑁂𑀦 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀺, 𑀦 𑀧𑀼𑀭𑀺𑀫𑁂𑀦. 𑀬𑁄𑀧𑀺 ‘‘𑀅𑀢𑀺𑀘𑀡𑁆𑀟𑀸𑀮𑁄𑀲𑀺, 𑀅𑀢𑀺𑀩𑁆𑀭𑀸𑀳𑁆𑀫𑀡𑁄𑀲𑀺, 𑀤𑀼𑀝𑁆𑀞𑀘𑀡𑁆𑀟𑀸𑀮𑁄𑀲𑀺, 𑀤𑀼𑀝𑁆𑀞𑀩𑁆𑀭𑀸𑀳𑁆𑀫𑀡𑁄𑀲𑀻’’𑀢𑀺𑀆𑀤𑀻𑀦𑀺 𑀯𑀤𑀢𑀺, 𑀲𑁄𑀧𑀺 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄.

𑁨𑁬. 𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁂𑀢𑀺 𑀯𑀸𑀭𑁂 𑀧𑀦 𑀧𑀭𑀺𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀪𑀸𑀯𑁂𑀦 𑀤𑀼𑀓𑁆𑀓𑀝𑀁. 𑀏𑀲𑁂𑀯 𑀦𑀬𑁄 𑀬𑁂 𑀦𑀽𑀦…𑀧𑁂… 𑀦 𑀫𑀬𑀦𑁆𑀢𑀺 𑀯𑀸𑀭𑁂𑀲𑀼𑀧𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀧𑀦 𑀘𑀢𑀽𑀲𑀼𑀧𑀺 𑀯𑀸𑀭𑁂𑀲𑀼 𑀤𑀼𑀓𑁆𑀓𑀝𑀫𑁂𑀯. 𑀘𑁄𑀭𑁄𑀲𑀺 𑀕𑀡𑁆𑀞𑀺𑀪𑁂𑀤𑀓𑁄𑀲𑀻𑀢𑀺𑀆𑀤𑀺𑀯𑀘𑀦𑁂𑀳𑀺 𑀧𑀦 𑀉𑀧𑀲𑀫𑁆𑀧𑀦𑁆𑀦𑁂𑀧𑀺 𑀅𑀦𑀼𑀧𑀫𑁆𑀧𑀦𑁆𑀦𑁂𑀧𑀺 𑀲𑀩𑁆𑀩𑀯𑀸𑀭𑁂𑀲𑀼 𑀤𑀼𑀓𑁆𑀓𑀝𑀫𑁂𑀯. 𑀤𑀯𑀓𑀫𑁆𑀬𑀢𑀸𑀬 𑀧𑀦 𑀉𑀧𑀲𑀫𑁆𑀧𑀦𑁆𑀦𑁂𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀧𑀺 𑀲𑀩𑁆𑀩𑀯𑀸𑀭𑁂𑀲𑀼 𑀤𑀼𑀩𑁆𑀪𑀸𑀲𑀺𑀢𑀁. 𑀤𑀯𑀓𑀫𑁆𑀬𑀢𑀸 𑀦𑀸𑀫 𑀓𑁂𑀴𑀺𑀳𑀲𑀸𑀥𑀺𑀧𑁆𑀧𑀸𑀬𑀢𑀸. 𑀇𑀫𑀲𑁆𑀫𑀺𑀜𑁆𑀘 𑀲𑀺𑀓𑁆𑀔𑀸𑀧𑀤𑁂 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀼𑀦𑀻𑀆𑀤𑀬𑁄 𑀲𑀩𑁆𑀩𑀲𑀢𑁆𑀢𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀞𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁩𑁫. 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑀲𑁆𑀲𑀸𑀢𑀺𑀆𑀤𑀻𑀲𑀼 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑁄 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑁄; 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑁄 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑁄; 𑀅𑀦𑀼𑀲𑀺𑀝𑁆𑀞𑀺𑀬𑀁 𑀞𑀢𑁆𑀯𑀸 ‘‘𑀇𑀤𑀸𑀦𑀺𑀧𑀺 𑀘𑀡𑁆𑀟𑀸𑀮𑁄𑀲𑀺, 𑀧𑀸𑀧𑀁 𑀫𑀸 𑀅𑀓𑀸𑀲𑀺, 𑀫𑀸 𑀢𑀫𑁄 𑀢𑀫𑀧𑀭𑀸𑀬𑀡𑁄 𑀅𑀳𑁄𑀲𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀣𑁂𑀦𑁆𑀢𑁄 𑀅𑀦𑀼𑀲𑀸𑀲𑀦𑀻𑀧𑀼𑀭𑁂𑀓𑁆𑀔𑀸𑀭𑁄 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺. 𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺 𑀧𑀦𑁂𑀢𑁆𑀣 𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀁 𑀲𑀼𑀔𑀸 𑀘 𑀫𑀚𑁆𑀛𑀢𑁆𑀢𑀸 𑀘𑀸𑀢𑀺.

𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑀁 𑀤𑀼𑀢𑀺𑀬𑀁.

𑁩. 𑀧𑁂𑀲𑀼𑀜𑁆𑀜𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁬. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑁋 𑀪𑀡𑁆𑀟𑀦𑀚𑀸𑀢𑀸𑀦𑀦𑁆𑀢𑀺 𑀲𑀜𑁆𑀚𑀸𑀢𑀪𑀡𑁆𑀟𑀦𑀸𑀦𑀁. 𑀪𑀡𑁆𑀟𑀦𑀦𑁆𑀢𑀺 𑀓𑀮𑀳𑀲𑁆𑀲 𑀧𑀼𑀩𑁆𑀩𑀪𑀸𑀕𑁄, ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀇𑀤𑀁 𑀓𑀢𑀁; 𑀏𑀯𑀁 𑀯𑀼𑀢𑁆𑀢𑁂 𑀏𑀯𑀁 𑀯𑀓𑁆𑀔𑀸𑀫𑀸’’𑀢𑀺𑀆𑀤𑀺𑀓𑀁 𑀲𑀓𑀲𑀓𑀧𑀓𑁆𑀔𑁂 𑀲𑀫𑁆𑀫𑀦𑁆𑀢𑀦𑀁. 𑀓𑀮𑀳𑁄𑀢𑀺 𑀆𑀧𑀢𑁆𑀢𑀺𑀕𑀸𑀫𑀺𑀓𑁄 𑀓𑀸𑀬𑀯𑀸𑀘𑀸𑀯𑀻𑀢𑀺𑀓𑁆𑀓𑀫𑁄. 𑀯𑀺𑀯𑀸𑀤𑁄𑀢𑀺 𑀯𑀺𑀕𑁆𑀕𑀸𑀳𑀺𑀓𑀓𑀣𑀸. 𑀢𑀁 𑀯𑀺𑀯𑀸𑀤𑀁 𑀆𑀧𑀦𑁆𑀦𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁. 𑀧𑁂𑀲𑀼𑀜𑁆𑀜𑀦𑁆𑀢𑀺 𑀧𑀺𑀲𑀼𑀡𑀯𑀸𑀘𑀁, 𑀧𑀺𑀬𑀪𑀸𑀯𑀲𑁆𑀲 𑀲𑀼𑀜𑁆𑀜𑀓𑀭𑀡𑀯𑀸𑀘𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁭. 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑁂𑀢𑀺 𑀪𑀺𑀓𑁆𑀔𑀽𑀦𑀁 𑀧𑁂𑀲𑀼𑀜𑁆𑀜𑁂; 𑀪𑀺𑀓𑁆𑀔𑀼𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀼𑀦𑀸 𑀪𑀺𑀓𑁆𑀔𑀼𑀲𑁆𑀲 𑀉𑀧𑀲𑀁𑀳𑀝𑀧𑁂𑀲𑀼𑀜𑁆𑀜𑁂𑀢𑀺 𑀅𑀢𑁆𑀣𑁄.

𑁩𑁮. 𑀤𑁆𑀯𑀻𑀳𑀸𑀓𑀸𑀭𑁂𑀳𑀻𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺. 𑀧𑀺𑀬𑀓𑀫𑁆𑀬𑀲𑁆𑀲 𑀯𑀸𑀢𑀺 ‘‘𑀏𑀯𑀁 𑀅𑀳𑀁 𑀏𑀢𑀲𑁆𑀲 𑀧𑀺𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑀲𑁆𑀲 𑀯𑀸. 𑀪𑁂𑀤𑀸𑀥𑀺𑀧𑁆𑀧𑀸𑀬𑀲𑁆𑀲 𑀯𑀸𑀢𑀺 ‘‘𑀏𑀯𑀫𑀬𑀁 𑀏𑀢𑁂𑀦 𑀲𑀤𑁆𑀥𑀺𑀁 𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀧𑀭𑀲𑁆𑀲 𑀧𑀭𑁂𑀦 𑀪𑁂𑀤𑀁 𑀇𑀘𑁆𑀙𑀦𑁆𑀢𑀲𑁆𑀲 𑀯𑀸. 𑀚𑀸𑀢𑀺𑀢𑁄𑀧𑀻𑀢𑀺𑀆𑀤𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀥𑀸𑀧𑀺 𑀪𑀺𑀓𑁆𑀔𑀼𑀦𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀸 𑀦𑀸𑀫.

𑀦 𑀧𑀺𑀬𑀓𑀫𑁆𑀬𑀲𑁆𑀲 𑀦 𑀪𑁂𑀤𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀏𑀓𑀁 𑀅𑀓𑁆𑀓𑁄𑀲𑀦𑁆𑀢𑀁 𑀏𑀓𑀜𑁆𑀘 𑀔𑀫𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀦𑀺𑀮𑁆𑀮𑀚𑁆𑀚𑁄, 𑀈𑀤𑀺𑀲𑀫𑁆𑀧𑀺 𑀦𑀸𑀫 𑀪𑀯𑀦𑁆𑀢𑀁 𑀧𑀼𑀦 𑀯𑀢𑁆𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀓𑁂𑀯𑀮𑀁 𑀧𑀸𑀧𑀕𑀭𑀳𑀺𑀢𑀸𑀬 𑀪𑀡𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀧𑁂𑀲𑀼𑀜𑁆𑀜𑀲𑀺𑀓𑁆𑀔𑀸𑀧𑀤𑀁 𑀢𑀢𑀺𑀬𑀁.

𑁪. 𑀧𑀤𑀲𑁄𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁪. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑁂 𑁋 𑀅𑀧𑁆𑀧𑀢𑀺𑀲𑁆𑀲𑀸𑀢𑀺 𑀅𑀧𑁆𑀧𑀢𑀺𑀲𑁆𑀲𑀯𑀸. 𑀉𑀧𑀸𑀲𑀓𑀸𑀢𑀺 𑀯𑀼𑀢𑁆𑀢𑁂 𑀯𑀘𑀦𑀫𑁆𑀧𑀺 𑀦 𑀲𑁄𑀢𑀼𑀓𑀸𑀫𑀸; 𑀅𑀦𑀸𑀤𑀭𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀢𑀺𑀲𑁆𑀲𑀬𑀸 𑀯𑀸 𑀅𑀦𑀻𑀘𑀯𑀼𑀢𑁆𑀢𑀺𑀦𑁄𑀢𑀺 𑀅𑀢𑁆𑀣𑁄. 𑀅𑀲𑀪𑀸𑀕𑀯𑀼𑀢𑁆𑀢𑀺𑀓𑀸𑀢𑀺 𑀯𑀺𑀲𑀪𑀸𑀕𑀚𑀻𑀯𑀺𑀓𑀸, 𑀬𑀣𑀸 𑀪𑀺𑀓𑁆𑀔𑀽𑀲𑀼 𑀯𑀢𑁆𑀢𑀺𑀢𑀩𑁆𑀩𑀁; 𑀏𑀯𑀁 𑀅𑀧𑁆𑀧𑀯𑀢𑁆𑀢𑀯𑀼𑀢𑁆𑀢𑀺𑀦𑁄𑀢𑀺 𑀅𑀢𑁆𑀣𑁄.

𑁪𑁫. 𑀧𑀤𑀲𑁄 𑀥𑀫𑁆𑀫𑀁 𑀯𑀸𑀘𑁂𑀬𑁆𑀬𑀸𑀢𑀺 𑀏𑀓𑀢𑁄 𑀧𑀤𑀁 𑀧𑀤𑀁 𑀥𑀫𑁆𑀫𑀁 𑀯𑀸𑀘𑁂𑀬𑁆𑀬; 𑀓𑁄𑀝𑁆𑀞𑀸𑀲𑀁 𑀓𑁄𑀝𑁆𑀞𑀸𑀲𑀁 𑀯𑀸𑀘𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀢𑀁 𑀓𑁄𑀝𑁆𑀞𑀸𑀲𑀦𑀸𑀫𑀓𑀁 𑀧𑀤𑀁 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀤𑀁 𑀅𑀦𑀼𑀧𑀤𑀁 𑀅𑀦𑁆𑀯𑀓𑁆𑀔𑀭𑀁 𑀅𑀦𑀼𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀤𑀦𑁆𑀢𑀺 𑀏𑀓𑁄 𑀕𑀸𑀣𑀸𑀧𑀸𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀦𑀼𑀧𑀤𑀦𑁆𑀢𑀺 𑀤𑀼𑀢𑀺𑀬𑀧𑀸𑀤𑁄. 𑀅𑀦𑁆𑀯𑀓𑁆𑀔𑀭𑀦𑁆𑀢𑀺 𑀏𑀓𑁂𑀓𑀫𑀓𑁆𑀔𑀭𑀁. 𑀅𑀦𑀼𑀩𑁆𑀬𑀜𑁆𑀚𑀦𑀦𑁆𑀢𑀺 𑀧𑀼𑀭𑀺𑀫𑀩𑁆𑀬𑀜𑁆𑀚𑀦𑁂𑀦 𑀲𑀤𑀺𑀲𑀁 𑀧𑀘𑁆𑀙𑀸𑀩𑁆𑀬𑀜𑁆𑀚𑀦𑀁. 𑀬𑀁 𑀓𑀺𑀜𑁆𑀘𑀺 𑀯𑀸 𑀏𑀓𑀫𑀓𑁆𑀔𑀭𑀁 𑀅𑀦𑁆𑀯𑀓𑁆𑀔𑀭𑀁, 𑀅𑀓𑁆𑀔𑀭𑀲𑀫𑀽𑀳𑁄 𑀅𑀦𑀼𑀩𑁆𑀬𑀜𑁆𑀚𑀦𑀁, 𑀅𑀓𑁆𑀔𑀭𑀸𑀦𑀼𑀩𑁆𑀬𑀜𑁆𑀚𑀦𑀲𑀫𑀽𑀳𑁄 𑀧𑀤𑀁. 𑀧𑀞𑀫𑀧𑀤𑀁 𑀧𑀤𑀫𑁂𑀯, 𑀤𑀼𑀢𑀺𑀬𑀁 𑀅𑀦𑀼𑀧𑀤𑀦𑁆𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀸𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀧𑀤𑀁 𑀦𑀸𑀫 𑀏𑀓𑀢𑁄 𑀧𑀝𑁆𑀞𑀧𑁂𑀢𑁆𑀯𑀸 𑀏𑀓𑀢𑁄 𑀑𑀲𑀸𑀧𑁂𑀦𑁆𑀢𑀻𑀢𑀺 𑀕𑀸𑀣𑀸𑀩𑀦𑁆𑀥𑀁 𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑁄 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 𑀏𑀓𑀫𑁂𑀓𑀁 𑀧𑀤𑀁 𑀲𑀸𑀫𑀡𑁂𑀭𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀆𑀭𑀪𑀺𑀢𑁆𑀯𑀸 𑀏𑀓𑀢𑁄𑀬𑁂𑀯 𑀦𑀺𑀝𑁆𑀞𑀸𑀧𑁂𑀢𑀺. 𑀏𑀯𑀁 𑀯𑀸𑀘𑁂𑀦𑁆𑀢𑀲𑁆𑀲 𑀧𑀤𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀼𑀧𑀤𑀁 𑀦𑀸𑀫 𑀧𑀸𑀝𑁂𑀓𑁆𑀓𑀁 𑀧𑀝𑁆𑀞𑀧𑁂𑀢𑁆𑀯𑀸 𑀏𑀓𑀢𑁄 𑀑𑀲𑀸𑀧𑁂𑀦𑁆𑀢𑀻𑀢𑀺 𑀣𑁂𑀭𑁂𑀦 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁂 𑀲𑀸𑀫𑀡𑁂𑀭𑁄 𑀢𑀁 𑀧𑀤𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 ‘‘𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸’’𑀢𑀺 𑀤𑀼𑀢𑀺𑀬𑀧𑀤𑀁 𑀏𑀓𑀢𑁄 𑀪𑀡𑀢𑀺, 𑀇𑀫𑁂 𑀧𑀸𑀝𑁂𑀓𑁆𑀓𑀁 𑀧𑀝𑁆𑀞𑀧𑁂𑀢𑁆𑀯𑀸 𑀏𑀓𑀢𑁄 𑀑𑀲𑀸𑀧𑁂𑀦𑁆𑀢𑀺 𑀦𑀸𑀫. 𑀏𑀯𑀁 𑀯𑀸𑀘𑁂𑀦𑁆𑀢𑀲𑁆𑀲𑀸𑀧𑀺 𑀅𑀦𑀼𑀧𑀤𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸. 𑀅𑀦𑁆𑀯𑀓𑁆𑀔𑀭𑀁 𑀦𑀸𑀫 𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀭𑀽’’𑀢𑀺 𑀑𑀧𑀸𑀢𑁂𑀢𑀻𑀢𑀺 ‘‘𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀪𑀡 𑀲𑀸𑀫𑀡𑁂𑀭𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀭𑀽𑀓𑀸𑀭𑀫𑀢𑁆𑀢𑀫𑁂𑀯 𑀏𑀓𑀢𑁄 𑀯𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀏𑀯𑀁 𑀯𑀸𑀘𑁂𑀦𑁆𑀢𑀲𑁆𑀲𑀸𑀧𑀺 𑀅𑀦𑁆𑀯𑀓𑁆𑀔𑀭𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸. 𑀕𑀸𑀣𑀸𑀩𑀦𑁆𑀥𑁂𑀧𑀺 𑀘 𑀏𑀲 𑀦𑀬𑁄 𑀮𑀩𑁆𑀪𑀢𑀺𑀬𑁂𑀯. 𑀅𑀦𑀼𑀩𑁆𑀬𑀜𑁆𑀚𑀦𑀁 𑀦𑀸𑀫 𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸𑀢𑀺 𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀢𑀻𑀢𑀺 ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸’’𑀢𑀺 𑀇𑀫𑀁 𑀲𑀼𑀢𑁆𑀢𑀁 𑀯𑀸𑀘𑀬𑀫𑀸𑀦𑁄 𑀣𑁂𑀭𑁂𑀦 ‘‘𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄 𑀲𑀸𑀫𑀡𑁂𑀭𑁄 𑀲𑀻𑀖𑀧𑀜𑁆𑀜𑀢𑀸𑀬 ‘‘𑀯𑁂𑀤𑀦𑀸 𑀅𑀦𑀺𑀘𑁆𑀘𑀸’’𑀢𑀺 𑀇𑀫𑀁 𑀅𑀦𑀺𑀘𑁆𑀘𑀧𑀤𑀁 𑀣𑁂𑀭𑀲𑁆𑀲 ‘‘𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀏𑀢𑁂𑀦 𑀅𑀦𑀺𑀘𑁆𑀘𑀧𑀤𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀡𑀦𑁆𑀢𑁄 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑀺. 𑀏𑀯𑀁 𑀯𑀸𑀘𑁂𑀦𑁆𑀢𑀲𑁆𑀲𑀸𑀧𑀺 𑀅𑀦𑀼𑀩𑁆𑀬𑀜𑁆𑀚𑀦𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀇𑀫𑁂𑀲𑀼 𑀧𑀤𑀸𑀤𑀻𑀲𑀼 𑀬𑀁 𑀬𑀁 𑀏𑀓𑀢𑁄 𑀪𑀡𑀢𑀺 𑀢𑁂𑀦 𑀢𑁂𑀦 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺.

𑀩𑀼𑀤𑁆𑀥𑀪𑀸𑀲𑀺𑀢𑁄𑀢𑀺 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀥𑀫𑁆𑀫𑀧𑀤𑀁 𑀘𑀭𑀺𑀬𑀸𑀧𑀺𑀝𑀓𑀁 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀲𑀼𑀢𑁆𑀢𑀦𑀺𑀧𑀸𑀢𑁄 𑀯𑀺𑀫𑀸𑀦𑀯𑀢𑁆𑀣𑀼 𑀧𑁂𑀢𑀯𑀢𑁆𑀣𑀼 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀦𑀺 𑀘 𑀲𑀼𑀢𑁆𑀢𑀸𑀦𑀺. 𑀲𑀸𑀯𑀓𑀪𑀸𑀲𑀺𑀢𑁄𑀢𑀺 𑀘𑀢𑀼𑀧𑀭𑀺𑀲𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀲𑀸𑀯𑀓𑁂𑀳𑀺 𑀪𑀸𑀲𑀺𑀢𑁄 𑀅𑀦𑀗𑁆𑀕𑀡𑀲𑀫𑁆𑀫𑀸𑀤𑀺𑀝𑁆𑀞𑀺𑀅𑀦𑀼𑀫𑀸𑀦𑀲𑀼𑀢𑁆𑀢𑀘𑀼𑀴𑀯𑁂𑀤𑀮𑁆𑀮𑀫𑀳𑀸𑀯𑁂𑀤𑀮𑁆𑀮𑀸𑀤𑀺𑀓𑁄. 𑀇𑀲𑀺𑀪𑀸𑀲𑀺𑀢𑁄𑀢𑀺 𑀩𑀸𑀳𑀺𑀭𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀪𑀸𑀲𑀺𑀢𑁄 𑀲𑀓𑀮𑁄 𑀧𑀭𑀺𑀩𑁆𑀩𑀸𑀚𑀓𑀯𑀕𑁆𑀕𑁄, 𑀩𑀸𑀯𑀭𑀺𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀲𑁄𑀴𑀲𑀦𑁆𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀘𑁆𑀙𑀸𑀢𑀺 𑀏𑀯𑀫𑀸𑀤𑀺. 𑀤𑁂𑀯𑀢𑀸𑀪𑀸𑀲𑀺𑀢𑁄𑀢𑀺 𑀤𑁂𑀯𑀢𑀸𑀳𑀺 𑀪𑀸𑀲𑀺𑀢𑁄; 𑀲𑁄 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀤𑁂𑀯𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑀫𑀸𑀭𑀲𑀁𑀬𑀼𑀢𑁆𑀢𑀩𑁆𑀭𑀳𑁆𑀫𑀲𑀁𑀬𑀼𑀢𑁆𑀢𑀲𑀓𑁆𑀓𑀲𑀁𑀬𑀼𑀢𑁆𑀢𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀅𑀢𑁆𑀣𑀽𑀧𑀲𑀜𑁆𑀳𑀺𑀢𑁄𑀢𑀺 𑀅𑀝𑁆𑀞𑀓𑀣𑀸𑀦𑀺𑀲𑁆𑀲𑀺𑀢𑁄. 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑁄𑀢𑀺 𑀧𑀸𑀴𑀺𑀦𑀺𑀲𑁆𑀲𑀺𑀢𑁄; 𑀉𑀪𑀬𑁂𑀦𑀸𑀧𑀺 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀺𑀢𑀫𑁂𑀯 𑀯𑀤𑀢𑀺. 𑀓𑀺𑀜𑁆𑀘𑀸𑀧𑀺 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀺𑀢𑀁 𑀯𑀤𑀢𑀺, 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑀥𑀫𑁆𑀫𑀁𑀬𑁂𑀯 𑀧𑀦 𑀧𑀤𑀲𑁄 𑀯𑀸𑀘𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺. 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀺𑀢𑁂𑀧𑀺 𑀦𑀸𑀦𑀸𑀪𑀸𑀲𑀸𑀯𑀲𑁂𑀦 𑀕𑀸𑀣𑀸𑀲𑀺𑀮𑁄𑀓𑀩𑀦𑁆𑀥𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀢𑁂 𑀅𑀦𑀸𑀧𑀢𑁆𑀢𑀺. 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀅𑀦𑀸𑀭𑀼𑀴𑁆𑀳𑁂𑀧𑀺 𑀓𑀼𑀮𑀼𑀫𑁆𑀩𑀲𑀼𑀢𑁆𑀢𑀁 𑀭𑀸𑀚𑁄𑀯𑀸𑀤𑀲𑀼𑀢𑁆𑀢𑀁 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀘𑀢𑀼𑀧𑀭𑀺𑀯𑀝𑁆𑀝𑀁 𑀦𑀦𑁆𑀤𑁄𑀧𑀦𑀦𑁆𑀤𑀦𑁆𑀢𑀺 𑀈𑀤𑀺𑀲𑁂 𑀆𑀧𑀢𑁆𑀢𑀺𑀬𑁂𑀯. 𑀅𑀧𑀮𑀸𑀮𑀤𑀫𑀦𑀫𑁆𑀧𑀺 𑀯𑀼𑀢𑁆𑀢𑀁, 𑀫𑀳𑀸𑀧𑀘𑁆𑀘𑀭𑀺𑀬𑀫𑁆𑀧𑀦 𑀧𑀝𑀺𑀲𑀺𑀤𑁆𑀥𑀁. 𑀫𑁂𑀡𑁆𑀟𑀓𑀫𑀺𑀮𑀺𑀦𑁆𑀤𑀧𑀜𑁆𑀳𑁂𑀲𑀼 𑀣𑁂𑀭𑀲𑁆𑀲 𑀲𑀓𑀧𑀝𑀺𑀪𑀸𑀦𑁂 𑀅𑀦𑀸𑀧𑀢𑁆𑀢𑀺, 𑀬𑀁 𑀭𑀜𑁆𑀜𑁄 𑀲𑀜𑁆𑀜𑀸𑀧𑀦𑀢𑁆𑀣𑀁 𑀆𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀢𑁆𑀣 𑀆𑀧𑀢𑁆𑀢𑀺. 𑀯𑀡𑁆𑀡𑀧𑀺𑀝𑀓𑀅𑀗𑁆𑀕𑀼𑀮𑀺𑀫𑀸𑀮𑀧𑀺𑀝𑀓𑀭𑀝𑁆𑀞𑀧𑀸𑀮𑀕𑀅𑀚𑀢𑀆𑀴𑀯𑀓𑀕𑀚𑁆𑀚𑀺𑀢𑀕𑀼𑀴𑁆𑀳𑀫𑀕𑁆𑀕𑀕𑀼𑀴𑁆𑀳𑀯𑁂𑀲𑁆𑀲𑀦𑁆𑀢𑀭𑀕𑀼𑀴𑁆𑀳𑀯𑀺𑀦𑀬𑀯𑁂𑀤𑀮𑁆𑀮𑀧𑀺𑀝𑀓𑀸𑀦𑀺 𑀧𑀦 𑀅𑀩𑀼𑀤𑁆𑀥𑀯𑀘𑀦𑀸𑀦𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀲𑀻𑀮𑀽𑀧𑀤𑁂𑀲𑁄 𑀦𑀸𑀫 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀯𑀼𑀢𑁆𑀢𑁄𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀺𑀁 𑀆𑀧𑀢𑁆𑀢𑀺𑀬𑁂𑀯. 𑀅𑀜𑁆𑀜𑀸𑀦𑀺𑀧𑀺 𑀫𑀕𑁆𑀕𑀓𑀣𑀸𑀆𑀭𑀫𑁆𑀫𑀡𑀓𑀣𑀸𑀩𑀼𑀤𑁆𑀥𑀺𑀓𑀤𑀡𑁆𑀟𑀓 𑀜𑀸𑀡𑀯𑀢𑁆𑀣𑀼𑀅𑀲𑀼𑀪𑀓𑀣𑀸𑀤𑀻𑀦𑀺 𑀅𑀢𑁆𑀣𑀺, 𑀢𑁂𑀲𑀼 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀯𑀺𑀪𑀢𑁆𑀢𑀸, 𑀥𑀼𑀢𑀗𑁆𑀕𑀧𑀜𑁆𑀳𑁂 𑀧𑀝𑀺𑀧𑀤𑀸 𑀯𑀺𑀪𑀢𑁆𑀢𑀸; 𑀢𑀲𑁆𑀫𑀸 𑀢𑁂𑀲𑀼 𑀆𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀧𑀦 𑀲𑀗𑁆𑀕𑀻𑀢𑀺𑀁 𑀅𑀦𑀸𑀭𑀼𑀴𑁆𑀳𑁂𑀲𑀼 𑀭𑀸𑀚𑁄𑀯𑀸𑀤𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀘𑀢𑀼𑀧𑀭𑀺𑀯𑀝𑁆𑀝𑀦𑀦𑁆𑀤𑁄𑀧𑀦𑀦𑁆𑀤𑀓𑀼𑀮𑀼𑀫𑁆𑀩𑀲𑀼𑀢𑁆𑀢𑁂𑀲𑀼𑀬𑁂𑀯 𑀆𑀧𑀢𑁆𑀢𑀻𑀢𑀺 𑀯𑀢𑁆𑀯𑀸 𑀅𑀯𑀲𑁂𑀲𑁂𑀲𑀼 𑀬𑀁 𑀩𑀼𑀤𑁆𑀥𑀯𑀘𑀦𑀢𑁄 𑀆𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀤𑁂𑀯 𑀆𑀧𑀢𑁆𑀢𑀺𑀯𑀢𑁆𑀣𑀼 𑀳𑁄𑀢𑀺, 𑀦 𑀇𑀢𑀭𑀦𑁆𑀢𑀺 𑀅𑀬𑀫𑀢𑁆𑀣𑁄 𑀧𑀭𑀺𑀕𑁆𑀕𑀳𑀺𑀢𑁄.

𑁪𑁮. 𑀏𑀓𑀢𑁄 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑁄𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀉𑀤𑁆𑀤𑁂𑀲𑀁 𑀕𑀡𑁆𑀳𑀦𑁆𑀢𑁄𑀧𑀺 𑀏𑀓𑀢𑁄 𑀯𑀤𑀢𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀉𑀧𑀲𑀫𑁆𑀧𑀦𑁆𑀦𑁄 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀘 𑀦𑀺𑀲𑀻𑀤𑀺𑀢𑁆𑀯𑀸 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑀺. 𑀆𑀘𑀭𑀺𑀬𑁄 𑀦𑀺𑀲𑀺𑀦𑁆𑀦𑀸𑀦𑀁 𑀪𑀡𑀸𑀫𑀻𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀯𑀤𑀢𑀺, 𑀆𑀘𑀭𑀺𑀬𑀲𑁆𑀲 𑀆𑀧𑀢𑁆𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀤𑁆𑀯𑁂𑀧𑀺 𑀞𑀺𑀢𑀸 𑀕𑀡𑁆𑀳𑀦𑁆𑀢𑀺, 𑀏𑀲𑁂𑀯 𑀦𑀬𑁄. 𑀤𑀳𑀭𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁄, 𑀲𑀸𑀫𑀡𑁂𑀭𑁄 𑀞𑀺𑀢𑁄, 𑀦𑀺𑀲𑀺𑀦𑁆𑀦𑀲𑁆𑀲 𑀪𑀡𑀸𑀫𑀻𑀢𑀺 𑀪𑀡𑀢𑁄 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀤𑀳𑀭𑁄 𑀢𑀺𑀝𑁆𑀞𑀢𑀺, 𑀇𑀢𑀭𑁄 𑀦𑀺𑀲𑀻𑀤𑀢𑀺, 𑀞𑀺𑀢𑀲𑁆𑀲 𑀪𑀡𑀸𑀫𑀻𑀢𑀺 𑀪𑀡𑀢𑁄𑀧𑀺 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀩𑀳𑀽𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑁂 𑀏𑀓𑁄 𑀲𑀸𑀫𑀡𑁂𑀭𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁂 𑀧𑀤𑀲𑁄 𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑀲𑁆𑀲 𑀆𑀘𑀭𑀺𑀬𑀲𑁆𑀲 𑀅𑀘𑀺𑀢𑁆𑀢𑀓𑀸𑀧𑀢𑁆𑀢𑀺. 𑀲𑀘𑁂 𑀲𑀸𑀫𑀡𑁂𑀭𑁄 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀞𑀺𑀢𑁄 𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀺, 𑀬𑁂𑀲𑀁 𑀯𑀸𑀘𑁂𑀢𑀺, 𑀢𑁂𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀏𑀓𑁂𑀦 𑀤𑀺𑀲𑀸𑀪𑀸𑀕𑁂𑀦 𑀧𑀮𑀸𑀬𑀦𑀓𑀕𑀦𑁆𑀣𑀁 𑀦𑀸𑀫 𑀕𑀡𑁆𑀳𑀸𑀢𑀻𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀺. 𑀏𑀓𑀢𑁄 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀉𑀧𑀲𑀫𑁆𑀧𑀦𑁆𑀦𑁄 𑀏𑀓𑀢𑁄 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄 𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀪𑀡𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀦𑁆𑀢𑀺𑀓𑁂 𑀉𑀤𑁆𑀤𑁂𑀲𑀁 𑀕𑀡𑁆𑀳𑀦𑁆𑀢𑀲𑁆𑀲𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀡𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀬𑀫𑁆𑀧𑀺 𑀳𑀺 𑀏𑀓𑀢𑁄 𑀲𑀚𑁆𑀛𑀸𑀬𑀁 𑀓𑀭𑁄𑀢𑀺𑀘𑁆𑀘𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺.

𑀬𑁂𑀪𑀼𑀬𑁆𑀬𑁂𑀦 𑀧𑀕𑀼𑀡𑀁 𑀕𑀦𑁆𑀣𑀁 𑀪𑀡𑀦𑁆𑀢𑀁 𑀑𑀧𑀸𑀢𑁂𑀢𑀻𑀢𑀺 𑀲𑀘𑁂 𑀏𑀓𑀕𑀸𑀣𑀸𑀬 𑀏𑀓𑁄 𑀧𑀸𑀤𑁄 𑀦 𑀆𑀕𑀘𑁆𑀙𑀢𑀺, 𑀲𑁂𑀲𑀁 𑀆𑀕𑀘𑁆𑀙𑀢𑀺, 𑀅𑀬𑀁 𑀬𑁂𑀪𑀼𑀬𑁆𑀬𑁂𑀦 𑀧𑀕𑀼𑀡𑀕𑀦𑁆𑀣𑁄 𑀦𑀸𑀫. 𑀏𑀢𑁂𑀦 𑀦𑀬𑁂𑀦 𑀲𑀼𑀢𑁆𑀢𑁂𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀁 𑀑𑀧𑀸𑀢𑁂𑀦𑁆𑀢𑀲𑁆𑀲 𑀏𑀯𑀁 𑀪𑀡𑀸𑀳𑀻𑀢𑀺 𑀏𑀓𑀢𑁄𑀧𑀺 𑀪𑀡𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀑𑀲𑀸𑀭𑁂𑀦𑁆𑀢𑀁 𑀑𑀧𑀸𑀢𑁂𑀢𑀻𑀢𑀺 𑀲𑀼𑀢𑁆𑀢𑀁 𑀉𑀘𑁆𑀘𑀸𑀭𑁂𑀦𑁆𑀢𑀁 𑀧𑀭𑀺𑀲𑀫𑀚𑁆𑀛𑁂 𑀧𑀭𑀺𑀲𑀗𑁆𑀓𑀫𑀸𑀦𑀁 𑀏𑀯𑀁 𑀯𑀤𑁂𑀳𑀻𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄𑀧𑀺 𑀯𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀬𑀁 𑀧𑀦 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 ‘‘𑀫𑀬𑀸 𑀲𑀤𑁆𑀥𑀺𑀁 𑀫𑀸 𑀯𑀤𑀸’’𑀢𑀺 𑀯𑀼𑀢𑁆𑀢𑁄 𑀬𑀤𑀺 𑀯𑀤𑀢𑀺, ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀦𑀢𑁆𑀣𑀺, 𑀦𑀢𑁆𑀣𑀺𑀪𑀸𑀯𑁄𑀬𑁂𑀯 𑀘𑀲𑁆𑀲 𑀬𑀼𑀢𑁆𑀢𑁄. 𑀓𑀲𑁆𑀫𑀸? 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀢𑁆𑀢𑀸. 𑀇𑀢𑀭𑀣𑀸 𑀳𑀺 𑀓𑀺𑀭𑀺𑀬𑀸𑀓𑀺𑀭𑀺𑀬𑀁 𑀪𑀯𑁂𑀬𑁆𑀬. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀧𑀤𑀲𑁄𑀥𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑁋 𑀯𑀸𑀘𑀢𑁄 𑀘 𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀧𑀤𑀲𑁄𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀁 𑀘𑀢𑀼𑀢𑁆𑀣𑀁.

𑁫. 𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁯. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑁂 𑁋 𑀫𑀼𑀝𑁆𑀞𑀲𑁆𑀲𑀢𑀻 𑀅𑀲𑀫𑁆𑀧𑀚𑀸𑀦𑀸𑀢𑀺 𑀧𑀼𑀩𑁆𑀩𑀪𑀸𑀕𑁂 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲 𑀅𑀓𑀭𑀡𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁, 𑀪𑀯𑀗𑁆𑀕𑁄𑀢𑀺𑀡𑁆𑀡𑀓𑀸𑀮𑁂 𑀧𑀦 𑀓𑀼𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀦𑁆𑀢𑀺! 𑀯𑀺𑀓𑀽𑀚𑀫𑀸𑀦𑀸𑀢𑀺 𑀯𑀺𑀧𑁆𑀧𑀮𑀧𑀫𑀸𑀦𑀸. 𑀓𑀸𑀓𑀘𑁆𑀙𑀫𑀸𑀦𑀸𑀢𑀺 𑀦𑀸𑀲𑀸𑀬 𑀓𑀸𑀓𑀲𑀤𑁆𑀤𑀁 𑀯𑀺𑀬 𑀦𑀺𑀭𑀢𑁆𑀣𑀓𑀲𑀤𑁆𑀤𑀁 𑀫𑀼𑀜𑁆𑀘𑀫𑀸𑀦𑀸. 𑀉𑀧𑀸𑀲𑀓𑀸𑀢𑀺 𑀧𑀞𑀫𑀢𑀭𑀁 𑀉𑀝𑁆𑀞𑀺𑀢𑀉𑀧𑀸𑀲𑀓𑀸.

𑁫𑁦. 𑀏𑀢𑀤𑀯𑁄𑀘𑀼𑀦𑁆𑀢𑀺 ‘‘𑀪𑀕𑀯𑀢𑀸 𑀆𑀯𑀼𑀲𑁄 𑀭𑀸𑀳𑀼𑀮 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀪𑀺𑀓𑁆𑀔𑀽 𑀲𑀺𑀓𑁆𑀔𑀸𑀧𑀤𑀕𑀸𑀭𑀯𑁂𑀦𑁂𑀯 𑀏𑀢𑀁 𑀅𑀯𑁄𑀘𑀼𑀁. 𑀧𑀓𑀢𑀺𑀬𑀸 𑀧𑀦 𑀢𑁂 𑀪𑀕𑀯𑀢𑀺 𑀘 𑀕𑀸𑀭𑀯𑁂𑀦 𑀆𑀬𑀲𑁆𑀫𑀢𑁄 𑀘 𑀭𑀸𑀳𑀼𑀮𑀲𑁆𑀲 𑀲𑀺𑀓𑁆𑀔𑀸𑀓𑀸𑀫𑀢𑀸𑀬 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀯𑀲𑀦𑀝𑁆𑀞𑀸𑀦𑀁 𑀆𑀕𑀢𑀲𑁆𑀲 𑀘𑀽𑀴𑀫𑀜𑁆𑀘𑀓𑀁 𑀯𑀸 𑀅𑀧𑀲𑁆𑀲𑁂𑀦𑀁 𑀯𑀸 𑀬𑀁 𑀅𑀢𑁆𑀣𑀺 𑀢𑀁 𑀧𑀜𑁆𑀜𑀧𑁂𑀢𑁆𑀯𑀸 𑀘𑀻𑀯𑀭𑀁 𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀁 𑀯𑀸 𑀉𑀲𑁆𑀲𑀻𑀲𑀓𑀭𑀡𑀢𑁆𑀣𑀸𑀬 𑀤𑁂𑀦𑁆𑀢𑀺. 𑀢𑀢𑁆𑀭𑀺𑀤𑀁 𑀢𑀲𑁆𑀲𑀸𑀬𑀲𑁆𑀫𑀢𑁄 𑀲𑀺𑀓𑁆𑀔𑀸𑀓𑀸𑀫𑀢𑀸𑀬 𑁋 𑀪𑀺𑀓𑁆𑀔𑀽 𑀓𑀺𑀭 𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀫𑀼𑀝𑁆𑀞𑀺𑀲𑀫𑁆𑀫𑀼𑀜𑁆𑀚𑀦𑀺𑀜𑁆𑀘 𑀓𑀘𑀯𑀭𑀙𑀟𑁆𑀟𑀦𑀓𑀜𑁆𑀘 𑀩𑀳𑀺 𑀔𑀺𑀧𑀦𑁆𑀢𑀺. 𑀅𑀣𑀜𑁆𑀜𑁂𑀳𑀺 ‘‘𑀆𑀯𑀼𑀲𑁄 𑀓𑁂𑀦𑀺𑀤𑀁 𑀧𑀸𑀢𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀜𑁆𑀜𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀪𑀦𑁆𑀢𑁂, 𑀭𑀸𑀳𑀼𑀮𑁄 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀲𑀜𑁆𑀘𑀭𑀺, 𑀢𑁂𑀦 𑀦𑀼 𑀔𑁄 𑀧𑀸𑀢𑀺𑀢’’𑀦𑁆𑀢𑀺. 𑀲𑁄 𑀧𑀦𑀸𑀬𑀲𑁆𑀫𑀸 ‘‘𑀦 𑀫𑀬𑁆𑀳𑀁 𑀪𑀦𑁆𑀢𑁂 𑀇𑀤𑀁 𑀓𑀫𑁆𑀫’’𑀦𑁆𑀢𑀺 𑀏𑀓𑀤𑀺𑀯𑀲𑀫𑁆𑀧𑀺 𑀅𑀯𑀢𑁆𑀯𑀸 𑀢𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀪𑀺𑀓𑁆𑀔𑀽 𑀔𑀫𑀸𑀧𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀯𑀘𑁆𑀘𑀓𑀼𑀝𑀺𑀬𑀸 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀻𑀢𑀺 𑀢𑀁𑀬𑁂𑀯 𑀲𑀺𑀓𑁆𑀔𑀸𑀓𑀸𑀫𑀢𑀁 𑀅𑀦𑀼𑀩𑁆𑀭𑀽𑀳𑀦𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀆𑀦𑀦𑁆𑀤𑀢𑁆𑀣𑁂𑀭𑀸𑀤𑀻𑀦𑀁 𑀲𑀦𑁆𑀢𑀺𑀓𑀁 𑀅𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀯𑀴𑀜𑁆𑀚𑀦𑀓𑀯𑀘𑁆𑀘𑀓𑀼𑀝𑀺𑀬𑀁 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀲𑀸 𑀓𑀺𑀭 𑀓𑀼𑀝𑀺 𑀓𑀯𑀸𑀝𑀩𑀤𑁆𑀥𑀸 𑀕𑀦𑁆𑀥𑀧𑀭𑀺𑀪𑀡𑁆𑀟𑀓𑀢𑀸 𑀲𑀫𑁄𑀲𑀭𑀺𑀢𑀧𑀼𑀧𑁆𑀨𑀤𑀸𑀫𑀸 𑀘𑁂𑀢𑀺𑀬𑀝𑁆𑀞𑀸𑀦𑀫𑀺𑀯 𑀢𑀺𑀝𑁆𑀞𑀢𑀺, 𑀅𑀧𑀭𑀺𑀪𑁄𑀕𑀸 𑀅𑀜𑁆𑀜𑁂𑀲𑀁.

𑁫𑁧. 𑀉𑀢𑁆𑀢𑀭𑀺𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀦𑁆𑀢𑀺 𑀪𑀕𑀯𑀸 𑀲𑀸𑀫𑀡𑁂𑀭𑀸𑀦𑀁 𑀲𑀗𑁆𑀕𑀳𑀓𑀭𑀡𑀢𑁆𑀣𑀸𑀬 𑀢𑀺𑀭𑀢𑁆𑀢𑀁 𑀧𑀭𑀺𑀳𑀸𑀭𑀁 𑀅𑀤𑀸𑀲𑀺. 𑀦 𑀳𑀺 𑀬𑀼𑀢𑁆𑀢𑀁 𑀓𑀼𑀮𑀤𑀸𑀭𑀓𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀦𑀸𑀦𑀼𑀕𑁆𑀕𑀳𑁂𑀢𑀼𑀦𑁆𑀢𑀺. 𑀲𑀳𑀲𑁂𑀬𑁆𑀬𑀦𑁆𑀢𑀺 𑀏𑀓𑀢𑁄 𑀲𑁂𑀬𑁆𑀬𑀁. 𑀲𑁂𑀬𑁆𑀬𑀸𑀢𑀺 𑀓𑀸𑀬𑀧𑁆𑀧𑀲𑀸𑀭𑀡𑀲𑀗𑁆𑀔𑀸𑀢𑀁 𑀲𑀬𑀦𑀫𑁆𑀧𑀺 𑀯𑀼𑀘𑁆𑀘𑀢𑀺, 𑀬𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀲𑀬𑀦𑁆𑀢𑀺, 𑀢𑀫𑁆𑀧𑀺. 𑀢𑀢𑁆𑀣 𑀲𑁂𑀦𑀸𑀲𑀦𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀲𑁂𑀬𑁆𑀬𑀸 𑀦𑀸𑀫 𑀲𑀩𑁆𑀩𑀘𑁆𑀙𑀦𑁆𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀬𑀧𑁆𑀧𑀲𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀦𑀺𑀧𑀦𑁆𑀦𑁂 𑀪𑀺𑀓𑁆𑀔𑀼 𑀦𑀺𑀧𑀚𑁆𑀚𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑁋 ‘‘𑀲𑁂𑀦𑀸𑀲𑀦𑀲𑀗𑁆𑀔𑀸𑀢𑀁 𑀲𑁂𑀬𑁆𑀬𑀁 𑀧𑀯𑀺𑀲𑀺𑀢𑁆𑀯𑀸 𑀓𑀸𑀬𑀧𑁆𑀧𑀲𑀸𑀭𑀡𑀲𑀗𑁆𑀔𑀸𑀢𑀁 𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬 𑀯𑀺𑀤𑀳𑁂𑀬𑁆𑀬 𑀲𑀫𑁆𑀧𑀸𑀤𑁂𑀬𑁆𑀬𑀸’’𑀢𑀺. 𑀲𑀩𑁆𑀩𑀘𑁆𑀙𑀦𑁆𑀦𑀸𑀢𑀺𑀆𑀤𑀺𑀦𑀸 𑀧𑀦 𑀢𑀲𑁆𑀲𑀸 𑀲𑁂𑀦𑀸𑀲𑀦𑀲𑀗𑁆𑀔𑀸𑀢𑀸𑀬 𑀲𑁂𑀬𑁆𑀬𑀸𑀬 𑀮𑀓𑁆𑀔𑀡𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀁 𑀲𑁂𑀦𑀸𑀲𑀦𑀁 𑀉𑀧𑀭𑀺 𑀧𑀜𑁆𑀘𑀳𑀺 𑀙𑀤𑀦𑁂𑀳𑀺 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀲𑀩𑁆𑀩𑀫𑁂𑀯 𑀧𑀝𑀺𑀘𑁆𑀙𑀦𑁆𑀦𑀁, 𑀅𑀬𑀁 𑀲𑀩𑁆𑀩𑀘𑁆𑀙𑀦𑁆𑀦𑀸 𑀦𑀸𑀫 𑀲𑁂𑀬𑁆𑀬𑀸. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀧𑀸𑀓𑀝𑀯𑁄𑀳𑀸𑀭𑀁 𑀕𑀳𑁂𑀢𑁆𑀯𑀸 𑀯𑀸𑀘𑀼𑀕𑁆𑀕𑀢𑀯𑀲𑁂𑀦 ‘‘𑀲𑀩𑁆𑀩𑀘𑁆𑀙𑀦𑁆𑀦𑀸 𑀦𑀸𑀫 𑀧𑀜𑁆𑀘𑀳𑀺 𑀙𑀤𑀦𑁂𑀳𑀺 𑀙𑀦𑁆𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀁? 𑀅𑀣 𑀔𑁄 𑀤𑀼𑀲𑁆𑀲𑀓𑀼𑀝𑀺𑀬𑀁 𑀯𑀲𑀦𑁆𑀢𑀲𑁆𑀲𑀸𑀧𑀺 𑀦 𑀲𑀓𑁆𑀓𑀸 𑀅𑀦𑀸𑀧𑀢𑁆𑀢𑀺 𑀓𑀸𑀢𑀼𑀁, 𑀢𑀲𑁆𑀫𑀸 𑀬𑀁 𑀓𑀺𑀜𑁆𑀘𑀺 𑀧𑀝𑀺𑀘𑁆𑀙𑀸𑀤𑀦𑀲𑀫𑀢𑁆𑀣𑀁 𑀇𑀥 𑀙𑀤𑀦𑀜𑁆𑀘 𑀧𑀭𑀺𑀘𑁆𑀙𑀦𑁆𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀘𑀯𑀺𑀥𑀘𑁆𑀙𑀤𑀦𑁂𑀬𑁂𑀯 𑀳𑀺 𑀕𑀬𑁆𑀳𑀫𑀸𑀦𑁂 𑀧𑀤𑀭𑀘𑁆𑀙𑀦𑁆𑀦𑁂𑀧𑀺 𑀲𑀳𑀲𑁂𑀬𑁆𑀬𑀸 𑀦 𑀪𑀯𑁂𑀬𑁆𑀬. 𑀬𑀁 𑀧𑀦 𑀲𑁂𑀦𑀸𑀲𑀦𑀁 𑀪𑀽𑀫𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀙𑀤𑀦𑀁 𑀆𑀳𑀘𑁆𑀘 𑀧𑀸𑀓𑀸𑀭𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀅𑀦𑁆𑀢𑀫𑀲𑁄 𑀯𑀢𑁆𑀣𑁂𑀦𑀸𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀅𑀬𑀁 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀸 𑀦𑀸𑀫 𑀲𑁂𑀬𑁆𑀬𑀸. 𑀙𑀤𑀦𑀁 𑀅𑀦𑀸𑀳𑀘𑁆𑀘 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀬𑀸𑀬𑁂𑀦 𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁂𑀦 𑀧𑀸𑀓𑀸𑀭𑀸𑀤𑀺𑀦𑀸 𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀺 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀸𑀬𑁂𑀯𑀸𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀬𑀲𑁆𑀲𑀸 𑀧𑀦 𑀉𑀧𑀭𑀺 𑀩𑀳𑀼𑀢𑀭𑀁 𑀞𑀸𑀦𑀁 𑀙𑀦𑁆𑀦𑀁, 𑀅𑀧𑁆𑀧𑀁 𑀅𑀘𑁆𑀙𑀦𑁆𑀦𑀁, 𑀲𑀫𑀦𑁆𑀢𑀢𑁄 𑀯𑀸 𑀩𑀳𑀼𑀢𑀭𑀁 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀅𑀧𑁆𑀧𑀁 𑀅𑀧𑀭𑀺𑀓𑁆𑀔𑀺𑀢𑁆𑀢𑀁, 𑀅𑀬𑀁 𑀬𑁂𑀪𑀼𑀬𑁆𑀬𑁂𑀦 𑀙𑀦𑁆𑀦𑀸 𑀬𑁂𑀪𑀼𑀬𑁆𑀬𑁂𑀦 𑀧𑀭𑀺𑀘𑁆𑀙𑀦𑁆𑀦𑀸 𑀦𑀸𑀫. 𑀇𑀫𑀺𑀦𑀸 𑀳𑀺 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂𑀧𑀺 𑀲𑀢𑁆𑀢𑀪𑀽𑀫𑀓𑁄 𑀧𑀸𑀲𑀸𑀤𑁄 𑀏𑀓𑀽𑀧𑀘𑀸𑀭𑁄 𑀳𑁄𑀢𑀺, 𑀲𑀢𑀕𑀩𑁆𑀪𑀁 𑀯𑀸 𑀘𑀢𑀼𑀲𑁆𑀲𑀸𑀮𑀁 𑀯𑀸, 𑀏𑀓𑀲𑁂𑀬𑁆𑀬𑀸𑀇𑀘𑁆𑀘𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀦𑀺𑀧𑀦𑁆𑀦𑁂 𑀪𑀺𑀓𑁆𑀔𑀼 𑀦𑀺𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺𑀆𑀤𑀺.

𑀢𑀢𑁆𑀣 𑀘 𑀦𑀺𑀧𑀚𑁆𑀚𑀦𑀫𑀢𑁆𑀢𑁂𑀦𑁂𑀯 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀧𑀦 𑀲𑀫𑁆𑀩𑀳𑀼𑀮𑀸 𑀲𑀸𑀫𑀡𑁂𑀭𑀸, 𑀏𑀓𑁄 𑀪𑀺𑀓𑁆𑀔𑀼, 𑀲𑀸𑀫𑀡𑁂𑀭𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸. 𑀢𑁂 𑀘𑁂 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀦𑀺𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀧𑀬𑁄𑀕𑁂 𑀧𑀬𑁄𑀕𑁂 𑀪𑀺𑀓𑁆𑀔𑀼𑀲𑁆𑀲 𑀆𑀧𑀢𑁆𑀢𑀺. 𑀪𑀺𑀓𑁆𑀔𑀼𑀲𑁆𑀲 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀦𑀺𑀧𑀚𑁆𑀚𑀦𑁂 𑀧𑀦 𑀪𑀺𑀓𑁆𑀔𑀼𑀲𑁆𑀲𑁂𑀯 𑀧𑀬𑁄𑀕𑁂𑀦 𑀪𑀺𑀓𑁆𑀔𑀼𑀲𑁆𑀲 𑀆𑀧𑀢𑁆𑀢𑀺. 𑀲𑀘𑁂 𑀧𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀏𑀓𑁄 𑀲𑀸𑀫𑀡𑁂𑀭𑁄 𑀲𑀩𑁆𑀩𑁂𑀲𑀁 𑀆𑀧𑀢𑁆𑀢𑀺𑀁 𑀓𑀭𑁄𑀢𑀺, 𑀢𑀲𑁆𑀲 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀦𑀺𑀧𑀚𑁆𑀚𑀦𑁂𑀦𑀧𑀺 𑀪𑀺𑀓𑁆𑀔𑀽𑀦𑀁 𑀆𑀧𑀢𑁆𑀢𑀺𑀬𑁂𑀯. 𑀉𑀪𑀬𑁂𑀲𑀁 𑀲𑀫𑁆𑀩𑀳𑀼𑀮𑀪𑀸𑀯𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀧𑀺𑀘𑁂𑀢𑁆𑀣 𑀏𑀓𑀸𑀯𑀸𑀲𑀸𑀤𑀺𑀓𑀫𑁆𑀧𑀺 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀳𑀺 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂 𑀏𑀓𑁂𑀦𑁂𑀯 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲 𑀘𑀢𑀼𑀢𑁆𑀣𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑁂𑀯𑀲𑀺𑀓𑀸 𑀆𑀧𑀢𑁆𑀢𑀺. 𑀬𑁄𑀧𑀺 𑀏𑀓𑀲𑁆𑀫𑀺𑀁𑀬𑁂𑀯 𑀆𑀯𑀸𑀲𑁂 𑀦𑀸𑀦𑀸𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀲𑀤𑁆𑀥𑀺𑀁 𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲𑀧𑀺. 𑀬𑁄𑀧𑀺 𑀦𑀸𑀦𑀸𑀆𑀯𑀸𑀲𑁂𑀲𑀼 𑀏𑀓𑁂𑀦𑁂𑀯 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲𑀧𑀺. 𑀬𑁄𑀧𑀺 𑀦𑀸𑀦𑀸𑀆𑀯𑀸𑀲𑁂𑀲𑀼 𑀦𑀸𑀦𑀸𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑀦𑀲𑀢𑀫𑁆𑀧𑀺 𑀕𑀦𑁆𑀢𑁆𑀯𑀸 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲𑀧𑀺 𑀘𑀢𑀼𑀢𑁆𑀣𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑁂𑀯𑀲𑀺𑀓𑀸 𑀆𑀧𑀢𑁆𑀢𑀺.

𑀅𑀬𑀜𑁆𑀘 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺 𑀦𑀸𑀫 ‘‘𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦𑀸𑀫𑀸’’𑀢𑀺 𑀯𑀘𑀦𑀢𑁄 𑀢𑀺𑀭𑀘𑁆𑀙𑀸𑀦𑀕𑀢𑁂𑀦𑀧𑀺 𑀲𑀤𑁆𑀥𑀺𑀁 𑀳𑁄𑀢𑀺, 𑀢𑀢𑁆𑀭 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 𑀫𑁂𑀣𑀼𑀦𑀥𑀫𑁆𑀫𑀸𑀧𑀢𑁆𑀢𑀺𑀬𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸 𑀲𑀘𑁂𑀧𑀺 𑀕𑁄𑀥𑀸𑀩𑀺𑀴𑀸𑀮𑀫𑀗𑁆𑀕𑀼𑀲𑀸𑀤𑀻𑀲𑀼 𑀓𑁄𑀘𑀺 𑀧𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑁄 𑀯𑀲𑀦𑀲𑁂𑀦𑀸𑀲𑀦𑁂 𑀏𑀓𑀽𑀧𑀘𑀸𑀭𑀝𑁆𑀞𑀸𑀦𑁂 𑀲𑀬𑀢𑀺, 𑀲𑀳𑀲𑁂𑀬𑁆𑀬𑀸𑀯 𑀳𑁄𑀢𑀺.

𑀬𑀤𑀺 𑀧𑀦 𑀣𑀫𑁆𑀪𑀸𑀦𑀁 𑀉𑀧𑀭𑀺 𑀓𑀢𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀫𑀢𑀮𑁂𑀦 𑀲𑀤𑁆𑀥𑀺𑀁 𑀅𑀲𑀫𑁆𑀩𑀤𑁆𑀥𑀪𑀺𑀢𑁆𑀢𑀺𑀓𑀲𑁆𑀲 𑀪𑀺𑀢𑁆𑀢𑀺𑀬𑀸 𑀉𑀧𑀭𑀺 𑀞𑀺𑀢𑀲𑀼𑀲𑀺𑀭𑀢𑀼𑀮𑀸𑀲𑀻𑀲𑀲𑁆𑀲 𑀲𑀼𑀲𑀺𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀢𑀼𑀮𑀸𑀬 𑀅𑀩𑁆𑀪𑀦𑁆𑀢𑀭𑁂 𑀲𑀬𑀺𑀢𑁆𑀯𑀸 𑀢𑁂𑀦𑁂𑀯 𑀲𑀼𑀲𑀺𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀲𑀬𑀺𑀢𑀪𑀺𑀓𑁆𑀔𑀼𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀙𑀤𑀦𑁂 𑀙𑀺𑀤𑁆𑀤𑀁 𑀳𑁄𑀢𑀺, 𑀢𑁂𑀦 𑀧𑀯𑀺𑀲𑀺𑀢𑁆𑀯𑀸 𑀅𑀦𑁆𑀢𑁄𑀙𑀤𑀦𑁂 𑀯𑀲𑀺𑀢𑁆𑀯𑀸 𑀢𑁂𑀦𑁂𑀯 𑀧𑀓𑁆𑀓𑀫𑀢𑀺, 𑀦𑀸𑀦𑀽𑀧𑀘𑀸𑀭𑁂 𑀉𑀧𑀭𑀺𑀫𑀢𑀮𑁂 𑀙𑀤𑀦𑀩𑁆𑀪𑀦𑁆𑀢𑀭𑁂 𑀲𑀬𑀺𑀢𑀲𑁆𑀲 𑀆𑀧𑀢𑁆𑀢𑀺, 𑀳𑁂𑀝𑁆𑀞𑀺𑀫𑀢𑀮𑁂 𑀲𑀬𑀺𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀅𑀦𑁆𑀢𑁄𑀧𑀸𑀲𑀸𑀤𑁂𑀦𑁂𑀯 𑀆𑀭𑁄𑀳𑀺𑀢𑁆𑀯𑀸 𑀲𑀩𑁆𑀩𑀢𑀮𑀸𑀦𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀏𑀓𑀽𑀧𑀘𑀸𑀭𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀬𑀺𑀢𑀲𑁆𑀲 𑀆𑀧𑀢𑁆𑀢𑀺.

𑀲𑀪𑀸𑀲𑀗𑁆𑀔𑁂𑀧𑁂𑀦 𑀓𑀢𑁂 𑀅𑀟𑁆𑀠𑀓𑀼𑀝𑁆𑀝𑀓𑀲𑁂𑀦𑀸𑀲𑀦𑁂 𑀲𑀬𑀺𑀢𑀲𑁆𑀲 𑀯𑀸𑀴𑀲𑀗𑁆𑀖𑀸𑀝𑀸𑀤𑀻𑀲𑀼 𑀓𑀧𑁄𑀢𑀸𑀤𑀬𑁄 𑀧𑀯𑀺𑀲𑀺𑀢𑁆𑀯𑀸 𑀲𑀬𑀦𑁆𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀧𑀭𑀺𑀓𑁆𑀔𑁂𑀧𑀲𑁆𑀲 𑀩𑀳𑀺𑀕𑀢𑁂 𑀦𑀺𑀩𑁆𑀩𑀓𑁄𑀲𑀩𑁆𑀪𑀦𑁆𑀢𑀭𑁂 𑀲𑀬𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺. 𑀧𑀭𑀺𑀫𑀡𑁆𑀟𑀮𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸 𑀏𑀓𑀘𑁆𑀙𑀤𑀦𑀸𑀬 𑀕𑀩𑁆𑀪𑀫𑀸𑀮𑀸𑀬 𑀲𑀢𑀕𑀩𑁆𑀪𑀁 𑀘𑁂𑀧𑀺 𑀲𑁂𑀦𑀸𑀲𑀦𑀁 𑀳𑁄𑀢𑀺, 𑀢𑀢𑁆𑀭 𑀘𑁂 𑀏𑀓𑁂𑀦 𑀲𑀸𑀥𑀸𑀭𑀡𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀯𑀺𑀲𑀼𑀁 𑀧𑀸𑀓𑀸𑀭𑁂𑀦 𑀅𑀧𑀭𑀺𑀘𑁆𑀙𑀺𑀦𑁆𑀦𑀕𑀩𑁆𑀪𑀽𑀧𑀘𑀸𑀭𑁂 𑀲𑀩𑁆𑀩𑀕𑀩𑁆𑀪𑁂 𑀧𑀯𑀺𑀲𑀦𑁆𑀢𑀺, 𑀏𑀓𑀕𑀩𑁆𑀪𑁂𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀦𑀺𑀧𑀦𑁆𑀦𑁂 𑀲𑀩𑁆𑀩𑀕𑀩𑁆𑀪𑁂𑀲𑀼 𑀦𑀺𑀧𑀦𑁆𑀦𑀸𑀦𑀁 𑀆𑀧𑀢𑁆𑀢𑀺. 𑀲𑀘𑁂 𑀲𑀧𑀫𑀼𑀔𑀸 𑀕𑀩𑁆𑀪𑀸 𑀳𑁄𑀦𑁆𑀢𑀺, 𑀧𑀫𑀼𑀔𑀲𑁆𑀲 𑀉𑀧𑀭𑀺 𑀅𑀘𑁆𑀙𑀦𑁆𑀦𑀁 𑀉𑀘𑁆𑀘𑀯𑀢𑁆𑀣𑀼𑀓𑀁 𑀘𑁂𑀧𑀺 𑀳𑁄𑀢𑀺, 𑀧𑀫𑀼𑀔𑁂 𑀲𑀬𑀺𑀢𑁄 𑀕𑀩𑁆𑀪𑁂 𑀲𑀬𑀺𑀢𑀸𑀦𑀁 𑀆𑀧𑀢𑁆𑀢𑀺𑀁 𑀦 𑀓𑀭𑁄𑀢𑀺. 𑀲𑀘𑁂 𑀧𑀦 𑀕𑀩𑁆𑀪𑀘𑁆𑀙𑀤𑀦𑁂𑀦𑁂𑀯 𑀲𑀤𑁆𑀥𑀺𑀁 𑀲𑀫𑁆𑀩𑀤𑁆𑀥𑀘𑁆𑀙𑀤𑀦𑀁 𑀳𑁄𑀢𑀺, 𑀢𑀢𑁆𑀭 𑀲𑀬𑀺𑀢𑁄 𑀲𑀩𑁆𑀩𑁂𑀲𑀁 𑀆𑀧𑀢𑁆𑀢𑀺𑀁 𑀓𑀭𑁄𑀢𑀺. 𑀓𑀲𑁆𑀫𑀸? 𑀲𑀩𑁆𑀩𑀘𑁆𑀙𑀦𑁆𑀦𑀢𑁆𑀢𑀸 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀢𑁆𑀢𑀸 𑀘, 𑀕𑀩𑁆𑀪𑀧𑀭𑀺𑀓𑁆𑀔𑁂𑀧𑁄𑀬𑁂𑀯 𑀳𑀺𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀢𑀺. 𑀏𑀢𑁂𑀦𑁂𑀯 𑀳𑀺 𑀦𑀬𑁂𑀦 𑀅𑀝𑁆𑀞𑀓𑀣𑀸𑀲𑀼 𑀮𑁄𑀳𑀧𑀸𑀲𑀸𑀤𑀧𑀭𑀺𑀓𑁆𑀔𑁂𑀧𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀲𑀼 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸.

𑀬𑀁 𑀧𑀦 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀧𑀫𑀼𑀔𑁂 𑀅𑀦𑀸𑀧𑀢𑁆𑀢𑀻𑀢𑀺 𑀪𑀽𑀫𑀺𑀬𑀁 𑀯𑀺𑀦𑀸 𑀚𑀕𑀢𑀺𑀬𑀸 𑀧𑀫𑀼𑀔𑀁 𑀲𑀦𑁆𑀥𑀸𑀬 𑀓𑀣𑀺𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀦𑁆𑀥𑀓𑀭𑀝𑁆𑀞𑁂 𑀧𑀸𑀝𑁂𑀓𑁆𑀓𑀲𑀦𑁆𑀦𑀺𑀯𑁂𑀲𑀸 𑀏𑀓𑀘𑁆𑀙𑀤𑀦𑀸 𑀕𑀩𑁆𑀪𑀧𑀸𑀴𑀺𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀜𑁆𑀘 𑀢𑀢𑁆𑀣 ‘‘𑀪𑀽𑀫𑀺𑀬𑀁 𑀯𑀺𑀦𑀸 𑀚𑀕𑀢𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦𑁂𑀯 𑀅𑀝𑁆𑀞𑀓𑀣𑀸𑀲𑀼 𑀅𑀢𑁆𑀣𑀺; 𑀦 𑀧𑀸𑀴𑀺𑀬𑀸 𑀲𑀫𑁂𑀢𑀺. 𑀤𑀲𑀳𑀢𑁆𑀣𑀼𑀩𑁆𑀩𑁂𑀥𑀸𑀧𑀺 𑀳𑀺 𑀚𑀕𑀢𑀺 𑀧𑀭𑀺𑀓𑁆𑀔𑁂𑀧𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀬𑀫𑁆𑀧𑀺 𑀢𑀢𑁆𑀣 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑀚𑀕𑀢𑀺𑀬𑀸 𑀧𑀫𑀸𑀡𑀁 𑀯𑀢𑁆𑀯𑀸 ‘‘𑀏𑀢𑀁 𑀏𑀓𑀽𑀧𑀘𑀸𑀭𑀁 𑀧𑀭𑀺𑀘𑁆𑀙𑀦𑁆𑀦𑀁 𑀦𑀸𑀫 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀬𑁂𑀧𑀺 𑀏𑀓𑀲𑀸𑀮𑀤𑁆𑀯𑀺𑀲𑀸𑀮𑀢𑀺𑀲𑀸𑀮𑀘𑀢𑀼𑀲𑁆𑀲𑀸𑀮𑀲𑀦𑁆𑀦𑀺𑀯𑁂𑀲𑀸 𑀫𑀳𑀸𑀧𑀸𑀲𑀸𑀤𑀸 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀯𑀺𑀝𑁆𑀞𑁂𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀲𑀩𑁆𑀩𑀢𑁆𑀣 𑀅𑀦𑀼𑀧𑀭𑀺𑀕𑀦𑁆𑀢𑀼𑀁, 𑀢𑁂𑀲𑀼𑀧𑀺 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀬𑀸 𑀦 𑀫𑀼𑀘𑁆𑀘𑀢𑀺. 𑀲𑀘𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀉𑀧𑀘𑀸𑀭𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀸 𑀳𑁄𑀦𑁆𑀢𑀺, 𑀏𑀓𑀽𑀧𑀘𑀸𑀭𑀝𑁆𑀞𑀸𑀦𑁂𑀬𑁂𑀯 𑀆𑀧𑀢𑁆𑀢𑀺.

𑀤𑁆𑀯𑀻𑀳𑀺 𑀤𑁆𑀯𑀸𑀭𑁂𑀳𑀺 𑀬𑀼𑀢𑁆𑀢𑀲𑁆𑀲 𑀲𑀼𑀥𑀸𑀙𑀤𑀦𑀫𑀡𑁆𑀟𑀧𑀲𑁆𑀲 𑀫𑀚𑁆𑀛𑁂 𑀧𑀸𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀏𑀓𑁂𑀦 𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀭𑀺𑀘𑁆𑀙𑁂𑀤𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀲𑀬𑀢𑀺, 𑀏𑀓𑀲𑁆𑀫𑀺𑀁 𑀪𑀺𑀓𑁆𑀔𑀼, 𑀅𑀦𑀸𑀧𑀢𑁆𑀢𑀺. 𑀧𑀸𑀓𑀸𑀭𑁂 𑀕𑁄𑀥𑀸𑀤𑀻𑀦𑀁 𑀧𑀯𑀺𑀲𑀦𑀫𑀢𑁆𑀢𑀫𑁆𑀧𑀺 𑀙𑀺𑀤𑁆𑀤𑀁 𑀳𑁄𑀢𑀺, 𑀏𑀓𑀲𑁆𑀫𑀺𑀜𑁆𑀘 𑀧𑀭𑀺𑀘𑁆𑀙𑁂𑀤𑁂 𑀕𑁄𑀥𑀸 𑀲𑀬𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀦 𑀳𑀺 𑀙𑀺𑀤𑁆𑀤𑁂𑀦 𑀕𑁂𑀳𑀁 𑀏𑀓𑀽𑀧𑀘𑀸𑀭𑀁 𑀦𑀸𑀫 𑀳𑁄𑀢𑀺. 𑀲𑀘𑁂 𑀧𑀸𑀓𑀸𑀭𑀫𑀚𑁆𑀛𑁂 𑀙𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑀸𑀭𑀁 𑀬𑁄𑀚𑁂𑀦𑁆𑀢𑀺, 𑀏𑀓𑀽𑀧𑀘𑀸𑀭𑀢𑀸𑀬 𑀆𑀧𑀢𑁆𑀢𑀺. 𑀢𑀁 𑀤𑁆𑀯𑀸𑀭𑀁 𑀓𑀯𑀸𑀝𑁂𑀦 𑀧𑀺𑀤𑀳𑀺𑀢𑁆𑀯𑀸 𑀲𑀬𑀦𑁆𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀦 𑀳𑀺 𑀤𑁆𑀯𑀸𑀭𑀧𑀺𑀤𑀳𑀦𑁂𑀦 𑀕𑁂𑀳𑀁 𑀦𑀸𑀦𑀽𑀧𑀘𑀸𑀭𑀁 𑀦𑀸𑀫 𑀳𑁄𑀢𑀺, 𑀤𑁆𑀯𑀸𑀭𑀁 𑀯𑀸 𑀅𑀤𑁆𑀯𑀸𑀭𑀁. 𑀓𑀯𑀸𑀝𑀜𑁆𑀳𑀺 𑀲𑀁𑀯𑀭𑀡𑀯𑀺𑀯𑀭𑀡𑁂𑀳𑀺 𑀬𑀣𑀸𑀲𑀼𑀔𑀁 𑀯𑀴𑀜𑁆𑀚𑀦𑀢𑁆𑀣𑀸𑀬 𑀓𑀢𑀁, 𑀦 𑀯𑀴𑀜𑁆𑀚𑀦𑀽𑀧𑀘𑁆𑀙𑁂𑀤𑀦𑀢𑁆𑀣𑀸𑀬. 𑀲𑀘𑁂 𑀧𑀦 𑀢𑀁 𑀤𑁆𑀯𑀸𑀭𑀁 𑀧𑀼𑀦 𑀇𑀝𑁆𑀞𑀓𑀸𑀳𑀺 𑀧𑀺𑀤𑀳𑀦𑁆𑀢𑀺, 𑀅𑀤𑁆𑀯𑀸𑀭𑀁 𑀳𑁄𑀢𑀺, 𑀧𑀼𑀭𑀺𑀫𑁂 𑀦𑀸𑀦𑀽𑀧𑀘𑀸𑀭𑀪𑀸𑀯𑁂𑀬𑁂𑀯 𑀢𑀺𑀝𑁆𑀞𑀢𑀺. 𑀤𑀻𑀖𑀧𑀫𑀼𑀔𑀁 𑀘𑁂𑀢𑀺𑀬𑀖𑀭𑀁 𑀳𑁄𑀢𑀺. 𑀏𑀓𑀁 𑀓𑀯𑀸𑀝𑀁 𑀅𑀦𑁆𑀢𑁄, 𑀏𑀓𑀁 𑀩𑀳𑀺, 𑀤𑁆𑀯𑀺𑀦𑁆𑀦𑀁 𑀓𑀯𑀸𑀝𑀸𑀦𑀁 𑀅𑀦𑁆𑀢𑀭𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀅𑀦𑁆𑀢𑁄𑀘𑁂𑀢𑀺𑀬𑀖𑀭𑁂 𑀲𑀬𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀁 𑀓𑀭𑁄𑀢𑀺, 𑀏𑀓𑀽𑀧𑀘𑀸𑀭𑀢𑁆𑀢𑀸.

𑀢𑀢𑁆𑀭 𑀬𑀲𑁆𑀲 ‘‘𑀲𑀺𑀬𑀸 𑀅𑀬𑀁 𑀏𑀓𑀽𑀧𑀘𑀸𑀭𑀦𑀸𑀦𑀽𑀧𑀘𑀸𑀭𑀢𑀸 𑀦𑀸𑀫 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀸, 𑀇𑀥 𑀧𑀦 ‘𑀲𑁂𑀬𑁆𑀬𑀸 𑀦𑀸𑀫 𑀲𑀩𑁆𑀩𑀘𑁆𑀙𑀦𑁆𑀦𑀸 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀸 𑀬𑁂𑀪𑀼𑀬𑁆𑀬𑁂𑀦 𑀙𑀦𑁆𑀦𑀸 𑀬𑁂𑀪𑀼𑀬𑁆𑀬𑁂𑀦 𑀧𑀭𑀺𑀘𑁆𑀙𑀦𑁆𑀦𑀸’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀧𑀺𑀳𑀺𑀢𑀤𑁆𑀯𑀸𑀭𑁄 𑀘 𑀕𑀩𑁆𑀪𑁄 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁄𑀯 𑀳𑁄𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀅𑀦𑁆𑀢𑁄 𑀲𑀬𑀺𑀢𑁂𑀦𑁂𑀯 𑀲𑀤𑁆𑀥𑀺𑀁 𑀆𑀧𑀢𑁆𑀢𑀺, 𑀩𑀳𑀺 𑀲𑀬𑀺𑀢𑁂𑀦 𑀅𑀦𑀸𑀧𑀢𑁆𑀢𑀻’’𑀢𑀺. 𑀲𑁄 𑀏𑀯𑀁 𑀯𑀢𑁆𑀢𑀩𑁆𑀩𑁄 𑁋 ‘‘𑀅𑀧𑀺𑀳𑀺𑀢𑀤𑁆𑀯𑀸𑀭𑁂 𑀧𑀦 𑀓𑀲𑁆𑀫𑀸 𑀩𑀳𑀺 𑀲𑀬𑀺𑀢𑁂𑀦 𑀆𑀧𑀢𑁆𑀢𑀻’’𑀢𑀺? 𑀧𑀫𑀼𑀔𑀲𑁆𑀲 𑀕𑀩𑁆𑀪𑁂𑀦 𑀲𑀤𑁆𑀥𑀺𑀁 𑀲𑀩𑁆𑀩𑀘𑁆𑀙𑀦𑁆𑀦𑀢𑁆𑀢𑀸. ‘‘𑀓𑀺𑀁 𑀧𑀦 𑀕𑀩𑁆𑀪𑁂 𑀧𑀺𑀳𑀺𑀢𑁂 𑀙𑀤𑀦𑀁 𑀯𑀺𑀤𑁆𑀥𑀲𑁆𑀢𑀁 𑀳𑁄𑀢𑀻’’𑀢𑀺? 𑀦 𑀯𑀺𑀤𑁆𑀥𑀲𑁆𑀢𑀁, 𑀕𑀩𑁆𑀪𑁂𑀦 𑀲𑀤𑁆𑀥𑀺𑀁 𑀧𑀫𑀼𑀔𑀲𑁆𑀲 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀢𑀸 𑀦 𑀳𑁄𑀢𑀺. ‘‘𑀓𑀺𑀁 𑀧𑀭𑀺𑀓𑁆𑀔𑁂𑀧𑁄 𑀯𑀺𑀤𑁆𑀥𑀲𑁆𑀢𑁄’’𑀢𑀺? 𑀅𑀤𑁆𑀥𑀸 𑀯𑀓𑁆𑀔𑀢𑀺 ‘‘𑀦 𑀯𑀺𑀤𑁆𑀥𑀲𑁆𑀢𑁄, 𑀓𑀯𑀸𑀝𑁂𑀦 𑀉𑀧𑀘𑀸𑀭𑁄 𑀧𑀭𑀺𑀘𑁆𑀙𑀦𑁆𑀦𑁄’’𑀢𑀺. 𑀏𑀯𑀁 𑀤𑀽𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀧𑀼𑀦 𑀏𑀓𑀽𑀧𑀘𑀸𑀭𑀦𑀸𑀦𑀽𑀧𑀘𑀸𑀭𑀢𑀁𑀬𑁂𑀯 𑀧𑀘𑁆𑀘𑀸𑀕𑀫𑀺𑀲𑁆𑀲𑀢𑀺.

𑀅𑀧𑀺𑀘 𑀬𑀤𑀺 𑀩𑁆𑀬𑀜𑁆𑀚𑀦𑀫𑀢𑁆𑀢𑁂𑀬𑁂𑀯 𑀅𑀢𑁆𑀣𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀲𑀺𑀬𑀸, 𑀲𑀩𑁆𑀩𑀘𑁆𑀙𑀦𑁆𑀦𑀸𑀢𑀺 𑀯𑀘𑀦𑀢𑁄 𑀧𑀜𑁆𑀘𑀦𑁆𑀦𑀁 𑀅𑀜𑁆𑀜𑀢𑀭𑁂𑀦 𑀙𑀤𑀦𑁂𑀦 𑀙𑀦𑁆𑀦𑀸 𑀏𑀯 𑀲𑁂𑀬𑁆𑀬𑀸 𑀲𑀺𑀬𑀸, 𑀦 𑀅𑀜𑁆𑀜𑁂𑀦. 𑀏𑀯𑀜𑁆𑀘 𑀲𑀢𑀺 𑀧𑀤𑀭𑀘𑁆𑀙𑀦𑁆𑀦𑀸𑀤𑀻𑀲𑀼 𑀅𑀦𑀸𑀧𑀢𑁆𑀢𑀺 𑀲𑀺𑀬𑀸. 𑀢𑀢𑁄 𑀬𑀤𑀢𑁆𑀣𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀲𑁆𑀯𑁂𑀯 𑀅𑀢𑁆𑀣𑁄 𑀧𑀭𑀺𑀳𑀸𑀬𑁂𑀬𑁆𑀬. 𑀧𑀭𑀺𑀳𑀸𑀬𑀢𑀼 𑀯𑀸 𑀫𑀸 𑀯𑀸, 𑀓𑀣𑀁 𑀅𑀯𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺; 𑀓𑁄 𑀯𑀸 𑀯𑀤𑀢𑀺 ‘‘𑀅𑀯𑀼𑀢𑁆𑀢𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀦𑀺𑀬𑀢𑁂𑀲𑀼 𑁋 ‘‘𑀧𑀝𑀺𑀘𑁆𑀙𑀦𑁆𑀦𑀁 𑀦𑀸𑀫 𑀆𑀲𑀦𑀁 𑀓𑀼𑀝𑁆𑀝𑁂𑀦 𑀯𑀸 𑀓𑀯𑀸𑀝𑁂𑀦 𑀯𑀸 𑀓𑀺𑀮𑀜𑁆𑀚𑁂𑀦 𑀯𑀸 𑀲𑀸𑀡𑀺𑀧𑀸𑀓𑀸𑀭𑁂𑀦 𑀯𑀸 𑀭𑀼𑀓𑁆𑀔𑁂𑀦 𑀯𑀸 𑀣𑀫𑁆𑀪𑁂𑀦 𑀯𑀸 𑀓𑁄𑀝𑁆𑀞𑀮𑀺𑀓𑀸𑀬 𑀯𑀸 𑀬𑁂𑀦 𑀓𑁂𑀦𑀘𑀺 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀻’’𑀢𑀺. 𑀢𑀲𑁆𑀫𑀸 𑀬𑀣𑀸 𑀢𑀢𑁆𑀣 𑀬𑁂𑀦 𑀓𑁂𑀦𑀘𑀺 𑀧𑀝𑀺𑀘𑁆𑀙𑀦𑁆𑀦𑀁 𑀧𑀝𑀺𑀘𑁆𑀙𑀦𑁆𑀦𑀫𑁂𑀯, 𑀏𑀯𑀫𑀺𑀥𑀸𑀧𑀺 𑀕𑀳𑁂𑀢𑀩𑁆𑀩𑀁. 𑀢𑀲𑁆𑀫𑀸 𑀲𑁂𑀦𑀸𑀲𑀦𑀁 𑀔𑀼𑀤𑁆𑀤𑀓𑀁 𑀯𑀸 𑀳𑁄𑀢𑀼 𑀫𑀳𑀦𑁆𑀢𑀁 𑀯𑀸 𑀅𑀜𑁆𑀜𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀤𑁆𑀥𑀁 𑀯𑀸 𑀅𑀲𑀫𑁆𑀩𑀤𑁆𑀥𑀁 𑀯𑀸 𑀤𑀻𑀖𑀁 𑀯𑀸 𑀯𑀝𑁆𑀝𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸 𑀏𑀓𑀪𑀽𑀫𑀓𑀁 𑀯𑀸, 𑀅𑀦𑁂𑀓𑀪𑀽𑀫𑀓𑀁 𑀯𑀸, 𑀬𑀁 𑀬𑀁 𑀏𑀓𑀽𑀧𑀘𑀸𑀭𑀁 𑀲𑀩𑁆𑀩𑀢𑁆𑀣 𑀬𑁂𑀦 𑀓𑁂𑀦𑀘𑀺 𑀧𑀝𑀺𑀘𑁆𑀙𑀸𑀤𑀦𑁂𑀦 𑀲𑀩𑁆𑀩𑀘𑁆𑀙𑀦𑁆𑀦𑁂 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦 𑀯𑀸 𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦 𑀯𑀸 𑀧𑀭𑀺𑀘𑁆𑀙𑀦𑁆𑀦𑁂 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺 𑀳𑁄𑀢𑀻𑀢𑀺.

𑁫𑁩. 𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀢𑁆𑀣 𑀲𑀩𑁆𑀩𑀘𑁆𑀙𑀦𑁆𑀦𑁂 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂𑀢𑀺 𑀏𑀯𑀫𑀸𑀤𑀻𑀲𑀼𑀧𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀩𑁆𑀩𑀘𑁆𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀩𑁆𑀩𑀘𑁆𑀙𑀦𑁆𑀦𑁂 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀬𑁂𑀪𑀼𑀬𑁆𑀬𑁂𑀦𑀙𑀦𑁆𑀦𑁂 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀩𑁆𑀩𑀧𑀭𑀺𑀙𑀦𑁆𑀦𑁂 𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀦𑁆𑀦𑁂 𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀧𑀸𑀴𑀺𑀬𑀁 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢 𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 𑀯𑀼𑀢𑁆𑀢𑀁. ‘‘𑀲𑀩𑁆𑀩𑀘𑁆𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀬𑁂𑀪𑀼𑀬𑁆𑀬𑁂𑀦𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀘𑀽𑀴𑀓𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀦𑁆𑀦𑁂 𑀘𑀽𑀴𑀓𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀧𑀸𑀴𑀺𑀬𑀁 𑀤𑀼𑀓𑁆𑀓𑀝𑁂𑀦 𑀲𑀳 𑀧𑀜𑁆𑀘 𑀤𑀼𑀓𑁆𑀓𑀝𑀸𑀦𑀻’’𑀢𑀺 𑀯𑀼𑀢𑁆𑀢𑀁.

‘‘𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂 𑀅𑀦𑀸𑀧𑀢𑁆𑀢𑀺, 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂 𑀘𑀽𑀴𑀓𑀘𑁆𑀙𑀦𑁆𑀦𑁂 𑀅𑀦𑀸𑀧𑀢𑁆𑀢𑀺, 𑀘𑀽𑀴𑀓𑀘𑁆𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂 𑀅𑀦𑀸𑀧𑀢𑁆𑀢𑀺, 𑀲𑀩𑁆𑀩𑀘𑁆𑀙𑀦𑁆𑀦𑁂 𑀲𑀩𑁆𑀩𑀅𑀧𑀭𑀺𑀘𑁆𑀙𑀦𑁆𑀦𑁂𑀢𑀺 𑀘 𑀏𑀢𑁆𑀣 𑀲𑁂𑀦𑀫𑁆𑀩𑀫𑀡𑁆𑀟𑀧𑀯𑀡𑁆𑀡𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸𑀧𑁂𑀢𑀁 𑀯𑁂𑀤𑀺𑀢𑀩𑁆𑀩𑀁 𑁋 ‘‘𑀬𑀣𑀸 𑀚𑀕𑀢𑀺 𑀧𑀭𑀺𑀓𑁆𑀔𑁂𑀧𑀲𑀗𑁆𑀔𑀬 𑀦 𑀕𑀘𑁆𑀙𑀢𑀻’’𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀢𑁄 𑀘 𑀓𑀸𑀬𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁫. 𑀤𑀼𑀢𑀺𑀬𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑁂 𑁋 𑀆𑀯𑀲𑀣𑀸𑀕𑀸𑀭𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀯𑀲𑀦𑀸𑀕𑀸𑀭𑀁. 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻𑀢𑀺 𑀧𑀼𑀜𑁆𑀜𑀓𑀸𑀫𑀢𑀸𑀬 𑀓𑀢𑁆𑀯𑀸 𑀞𑀧𑀺𑀢𑀁 𑀳𑁄𑀢𑀺. 𑀬𑁂𑀦 𑀲𑀸 𑀇𑀢𑁆𑀣𑀻 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀆𑀯𑀲𑀣𑀸𑀕𑀸𑀭𑀁 𑀧𑀜𑁆𑀜𑀢𑁆𑀢𑀁 𑀅𑀢𑁆𑀣𑀻𑀢𑀺 𑀫𑀦𑀼𑀲𑁆𑀲𑀸𑀦𑀁 𑀲𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀕𑀦𑁆𑀥𑀕𑀦𑁆𑀥𑀺𑀦𑀻𑀢𑀺 𑀅𑀕𑀭𑀼𑀓𑀼𑀗𑁆𑀓𑀼𑀫𑀸𑀤𑀻𑀦𑀁 𑀕𑀦𑁆𑀥𑀸𑀦𑀁 𑀕𑀦𑁆𑀥𑁄 𑀕𑀦𑁆𑀥𑀕𑀦𑁆𑀥𑁄, 𑀲𑁄 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀕𑀦𑁆𑀥𑀕𑀦𑁆𑀥𑀺𑀦𑀻. 𑀲𑀸𑀝𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀧𑁆𑀧𑁂𑀯 𑀦𑀸𑀫𑀲𑁆𑀲 𑀇𑀫𑀫𑁆𑀧𑀺 𑀯𑀺𑀧𑁆𑀧𑀓𑀸𑀭𑀁 𑀧𑀲𑁆𑀲𑀦𑁆𑀢𑀲𑁆𑀲 𑀭𑀸𑀕𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀓𑀸𑀲𑀺. 𑀑𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀥𑁄 𑀔𑀺𑀧𑀺𑀢𑁆𑀯𑀸. 𑀅𑀘𑁆𑀘𑀬𑁄𑀢𑀺 𑀅𑀧𑀭𑀸𑀥𑁄. 𑀫𑀁 𑀅𑀘𑁆𑀘𑀕𑀫𑀸𑀢𑀺 𑀫𑀁 𑀅𑀢𑀺𑀓𑁆𑀓𑀫𑁆𑀫 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑁄. 𑀲𑁂𑀲𑀁 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁂𑀯 𑀳𑀺 𑀯𑀺𑀲𑁂𑀲𑁄 𑁋 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀘𑀢𑀼𑀢𑁆𑀣𑀤𑀺𑀯𑀲𑁂 𑀆𑀧𑀢𑁆𑀢𑀺 𑀇𑀥 𑀧𑀞𑀫𑀤𑀺𑀯𑀲𑁂𑀧𑀺. 𑀬𑀓𑁆𑀔𑀻𑀧𑁂𑀢𑀻𑀳𑀺 𑀤𑀺𑀲𑁆𑀲𑀫𑀸𑀦𑀓𑀭𑀽𑀧𑀸𑀳𑀺 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀘 𑀫𑁂𑀣𑀼𑀦𑀥𑀫𑁆𑀫𑀯𑀢𑁆𑀣𑀼𑀪𑀽𑀢𑀸𑀬 𑀏𑀯 𑀤𑀼𑀓𑁆𑀓𑀝𑀁. 𑀲𑁂𑀲𑀸𑀳𑀺 𑀅𑀦𑀸𑀧𑀢𑁆𑀢𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀲𑀤𑀺𑀲𑀸𑀦𑁂𑀯𑀸𑀢𑀺.

𑀤𑀼𑀢𑀺𑀬𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀁 𑀙𑀝𑁆𑀞𑀁.

𑁭. 𑀥𑀫𑁆𑀫𑀤𑁂𑀲𑀦𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁦. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑁂 𑁋 𑀖𑀭𑀡𑀻𑀢𑀺 𑀖𑀭𑀲𑀸𑀫𑀺𑀦𑀻. 𑀦𑀺𑀯𑁂𑀲𑀦𑀤𑁆𑀯𑀸𑀭𑁂𑀢𑀺 𑀦𑀺𑀯𑁂𑀲𑀦𑀲𑁆𑀲 𑀫𑀳𑀸𑀤𑁆𑀯𑀸𑀭𑁂. 𑀖𑀭𑀲𑀼𑀡𑁆𑀳𑀸𑀢𑀺 𑀢𑀲𑁆𑀫𑀺𑀁 𑀖𑀭𑁂 𑀲𑀼𑀡𑁆𑀳𑀸. 𑀆𑀯𑀲𑀣𑀤𑁆𑀯𑀸𑀭𑁂𑀢𑀺 𑀑𑀯𑀭𑀓𑀤𑁆𑀯𑀸𑀭𑁂. 𑀯𑀺𑀲𑁆𑀲𑀝𑁆𑀞𑁂𑀦𑀸𑀢𑀺 𑀲𑀼𑀦𑀺𑀕𑁆𑀕𑀢𑁂𑀦 𑀲𑀤𑁆𑀤𑁂𑀦. 𑀯𑀺𑀯𑀝𑁂𑀦𑀸𑀢𑀺 𑀲𑀼𑀝𑁆𑀞𑀼 𑀧𑀓𑀸𑀲𑁂𑀦 𑀅𑀲𑀁𑀯𑀼𑀢𑁂𑀦. 𑀥𑀫𑁆𑀫𑁄 𑀤𑁂𑀲𑁂𑀢𑀩𑁆𑀩𑁄𑀢𑀺 𑀅𑀬𑀁 𑀲𑀭𑀡𑀲𑀻𑀮𑀸𑀤𑀺𑀪𑁂𑀤𑁄 𑀥𑀫𑁆𑀫𑁄 𑀓𑀣𑁂𑀢𑀩𑁆𑀩𑁄. 𑀅𑀜𑁆𑀜𑀸𑀢𑀼𑀦𑁆𑀢𑀺 𑀆𑀚𑀸𑀦𑀺𑀢𑀼𑀁. 𑀯𑀺𑀜𑁆𑀜𑀼𑀦𑀸 𑀧𑀼𑀭𑀺𑀲𑀯𑀺𑀕𑁆𑀕𑀳𑁂𑀦𑀸𑀢𑀺 𑀯𑀺𑀜𑁆𑀜𑀼𑀦𑀸 𑀧𑀼𑀭𑀺𑀲𑁂𑀦, 𑀧𑀼𑀭𑀺𑀲𑀯𑀺𑀕𑁆𑀕𑀳𑀁 𑀕𑀳𑁂𑀢𑁆𑀯𑀸𑀧𑀺 𑀞𑀺𑀢𑁂𑀦 𑀦 𑀬𑀓𑁆𑀔𑁂𑀦 𑀦 𑀧𑁂𑀢𑁂𑀦 𑀦 𑀢𑀺𑀭𑀘𑁆𑀙𑀸𑀦𑀕𑀢𑁂𑀦.

𑁬𑁬. 𑀅𑀦𑀸𑀧𑀢𑁆𑀢𑀺 𑀯𑀺𑀜𑁆𑀜𑀼𑀦𑀸 𑀧𑀼𑀭𑀺𑀲𑀯𑀺𑀕𑁆𑀕𑀳𑁂𑀦𑀸𑀢𑀺 𑀯𑀺𑀜𑁆𑀜𑀼𑀦𑀸 𑀧𑀼𑀭𑀺𑀲𑀯𑀺𑀕𑁆𑀕𑀳𑁂𑀦 𑀲𑀤𑁆𑀥𑀺𑀁 𑀞𑀺𑀢𑀸𑀬 𑀩𑀳𑀼𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀻𑀢𑀺 𑀙𑀳𑀺 𑀧𑀜𑁆𑀘𑀳𑀺 𑀯𑀸𑀘𑀸𑀳𑀺 𑀬𑁄 𑀤𑁂𑀲𑁂𑀢𑀺, 𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀺. 𑀢𑀢𑁆𑀣 𑀏𑀓𑁄 𑀕𑀸𑀣𑀸𑀧𑀸𑀤𑁄 𑀏𑀓𑀯𑀸𑀘𑀸𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀯𑀸𑀘𑀸𑀧𑀫𑀸𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁂 𑀅𑀝𑁆𑀞𑀓𑀣𑀁 𑀥𑀫𑁆𑀫𑀧𑀤𑀁 𑀚𑀸𑀢𑀓𑀸𑀤𑀺𑀯𑀢𑁆𑀣𑀼𑀁 𑀯𑀸 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀙𑀧𑁆𑀧𑀜𑁆𑀘𑀧𑀤𑀫𑀢𑁆𑀢𑀫𑁂𑀯 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀸𑀴𑀺𑀬𑀸 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁂𑀦 𑀏𑀓𑀧𑀤𑀁 𑀧𑀸𑀴𑀺𑀢𑁄 𑀧𑀜𑁆𑀘 𑀅𑀝𑁆𑀞𑀓𑀣𑀸𑀢𑁄𑀢𑀺 𑀏𑀯𑀁 𑀙 𑀧𑀤𑀸𑀦𑀺 𑀅𑀦𑀢𑀺𑀓𑁆𑀓𑀸𑀫𑁂𑀢𑁆𑀯𑀸𑀯 𑀓𑀣𑁂𑀢𑀩𑁆𑀩𑁄. 𑀧𑀤𑀲𑁄𑀥𑀫𑁆𑀫𑁂 𑀯𑀼𑀢𑁆𑀢𑀧𑁆𑀧𑀪𑁂𑀤𑁄 𑀳𑀺 𑀇𑀥𑀸𑀧𑀺 𑀲𑀩𑁆𑀩𑁄 𑀥𑀫𑁆𑀫𑁄𑀬𑁂𑀯. 𑀢𑀲𑁆𑀫𑀺𑀁 𑀤𑁂𑀲𑁂𑀢𑀻𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀤𑁂𑀲𑁂𑀢𑀺. 𑀲𑀫𑁆𑀧𑀤𑀸𑀦𑀢𑁆𑀣𑁂 𑀯𑀸 𑀏𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀢𑀲𑁆𑀲𑀸 𑀤𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀺𑀲𑁆𑀲𑀸 𑀫𑀸𑀢𑀼𑀕𑀸𑀫𑀲𑁆𑀲𑀸𑀢𑀺 𑀏𑀓𑀺𑀲𑁆𑀲𑀸 𑀤𑁂𑀲𑁂𑀢𑁆𑀯𑀸 𑀧𑀼𑀦 𑀆𑀕𑀢𑀸𑀕𑀢𑀸𑀬 𑀅𑀜𑁆𑀜𑀺𑀲𑁆𑀲𑀸𑀧𑀺 𑀤𑁂𑀲𑁂𑀢𑀻𑀢𑀺 𑀏𑀯𑀁 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀫𑀸𑀢𑀼𑀕𑀸𑀫𑀲𑀢𑀲𑀳𑀲𑁆𑀲𑀦𑁆𑀦𑀫𑁆𑀧𑀺 𑀤𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀫𑀳𑀸𑀧𑀘𑁆𑀘𑀭𑀺𑀬𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 𑀲𑀫𑀁 𑀦𑀺𑀲𑀺𑀦𑁆𑀦𑀸𑀦𑀁 𑀫𑀸𑀢𑀼𑀕𑀸𑀫𑀸𑀦𑀁 ‘‘𑀢𑀼𑀫𑁆𑀳𑀸𑀓𑀁 𑀏𑀓𑁂𑀓𑀺𑀲𑁆𑀲𑀸 𑀏𑀓𑁂𑀓𑀁 𑀕𑀸𑀣𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣𑀸𑀢𑀺 𑀤𑁂𑀲𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀧𑀞𑀫𑀁 𑀏𑀓𑁂𑀓𑀺𑀲𑁆𑀲𑀸 𑀏𑀓𑁂𑀓𑀁 𑀕𑀸𑀣𑀁 𑀓𑀣𑁂𑀲𑁆𑀲𑀸𑀫𑀻𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀚𑀸𑀦𑀸𑀧𑁂𑀢𑁆𑀯𑀸 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀧𑀘𑁆𑀙𑀸𑀢𑀺. 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀓𑀣𑁂𑀢𑀻𑀢𑀺 𑀫𑀸𑀢𑀼𑀕𑀸𑀫𑁄 ‘‘𑀤𑀻𑀖𑀦𑀺𑀓𑀸𑀬𑁄 𑀦𑀸𑀫 𑀪𑀦𑁆𑀢𑁂 𑀓𑀺𑀫𑀢𑁆𑀣𑀁 𑀤𑀻𑀧𑁂𑀢𑀻’’𑀢𑀺 𑀧𑀼𑀘𑁆𑀙𑀢𑀺. 𑀏𑀯𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀪𑀺𑀓𑁆𑀔𑀼 𑀲𑀩𑁆𑀩𑀁 𑀘𑁂𑀧𑀺 𑀤𑀻𑀖𑀦𑀺𑀓𑀸𑀬𑀁 𑀓𑀣𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀧𑀤𑀲𑁄𑀥𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑁋 𑀯𑀸𑀘𑀢𑁄 𑀘 𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀥𑀫𑁆𑀫𑀤𑁂𑀲𑀦𑀸𑀲𑀺𑀓𑁆𑀔𑀸𑀧𑀤𑀁 𑀲𑀢𑁆𑀢𑀫𑀁.

𑁮. 𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁭. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀯𑀢𑁆𑀣𑀼𑀓𑀣𑀸𑀬 𑀢𑀸𑀯 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀫𑁂𑀯 𑀳𑀺 𑀯𑀺𑀲𑁂𑀲𑁄 𑁋 𑀢𑀢𑁆𑀣 𑀅𑀪𑀽𑀢𑀁 𑀆𑀭𑁄𑀘𑁂𑀲𑀼𑀁, 𑀇𑀥 𑀪𑀽𑀢𑀁. 𑀪𑀽𑀢𑀫𑁆𑀧𑀺 𑀧𑀼𑀣𑀼𑀚𑁆𑀚𑀦𑀸 𑀆𑀭𑁄𑀘𑁂𑀲𑀼𑀁, 𑀦 𑀅𑀭𑀺𑀬𑀸. 𑀅𑀭𑀺𑀬𑀸𑀦𑀜𑁆𑀳𑀺 𑀧𑀬𑀼𑀢𑁆𑀢𑀯𑀸𑀘𑀸 𑀦𑀸𑀫 𑀦𑀢𑁆𑀣𑀺, 𑀅𑀢𑁆𑀢𑀦𑁄 𑀕𑀼𑀡𑁂 𑀆𑀭𑁄𑀘𑀬𑀫𑀸𑀦𑁂 𑀧𑀦 𑀅𑀜𑁆𑀜𑁂 𑀦 𑀧𑀝𑀺𑀲𑁂𑀥𑁂𑀲𑀼𑀁, 𑀢𑀣𑀸𑀉𑀧𑁆𑀧𑀦𑁆𑀦𑁂 𑀘 𑀧𑀘𑁆𑀘𑀬𑁂 𑀲𑀸𑀤𑀺𑀬𑀺𑀁𑀲𑀼, 𑀢𑀣𑀸𑀉𑀧𑁆𑀧𑀦𑁆𑀦𑀪𑀸𑀯𑀁 𑀅𑀚𑀸𑀦𑀦𑁆𑀢𑀸.

‘‘𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼’’𑀦𑁆𑀢𑀺𑀆𑀤𑀺𑀫𑁆𑀳𑀺 𑀧𑀦 𑀬𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀁𑀲𑀼, 𑀢𑁂 𑀆𑀭𑁄𑀘𑁂𑀲𑀼𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀓𑀘𑁆𑀘𑀺 𑀧𑀦 𑀯𑁄 𑀪𑀺𑀓𑁆𑀔𑀯𑁂 𑀪𑀽𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁂 𑀧𑀦 𑀲𑀩𑁆𑀩𑁂𑀧𑀺 ‘‘𑀪𑀽𑀢𑀁 𑀪𑀕𑀯𑀸’’𑀢𑀺 𑀧𑀝𑀺𑀚𑀸𑀦𑀺𑀁𑀲𑀼. 𑀅𑀭𑀺𑀬𑀸𑀦𑀫𑁆𑀧𑀺 𑀳𑀺 𑀅𑀩𑁆𑀪𑀦𑁆𑀢𑀭𑁂 𑀪𑀽𑀢𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄𑀢𑀺. 𑀅𑀣 𑀪𑀕𑀯𑀸 𑀅𑀭𑀺𑀬𑀫𑀺𑀲𑁆𑀲𑀓𑀢𑁆𑀢𑀸 ‘‘𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀅𑀯𑀢𑁆𑀯𑀸 ‘‘𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂 𑀪𑀺𑀓𑁆𑀔𑀯𑁂’’𑀢𑀺 𑀯𑀢𑁆𑀯𑀸 ‘‘𑀉𑀤𑀭𑀲𑁆𑀲 𑀓𑀸𑀭𑀡𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀅𑀭𑀺𑀬𑀸 𑀅𑀜𑁆𑀜𑁂𑀲𑀁 𑀲𑀼𑀢𑁆𑀯𑀸 ‘‘𑀅𑀬𑁆𑀬𑁄 𑀓𑀺𑀭, 𑀪𑀦𑁆𑀢𑁂, 𑀲𑁄𑀢𑀸𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀲𑀦𑁆𑀦𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀧𑀼𑀘𑁆𑀙𑀺𑀬𑀫𑀸𑀦𑀸 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀦𑁄 𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀯𑀺𑀲𑁂𑀲𑀸𑀥𑀺𑀕𑀫𑀁 𑀧𑀝𑀺𑀚𑀸𑀦𑀺𑀁𑀲𑀼. 𑀏𑀯𑀁 𑀧𑀝𑀺𑀚𑀸𑀦𑀦𑁆𑀢𑁂𑀳𑀺 𑀘 𑀢𑁂𑀳𑀺 𑀬𑀁 𑀅𑀜𑁆𑀜𑁂 𑀉𑀤𑀭𑀲𑁆𑀲 𑀓𑀸𑀭𑀡𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀉𑀧𑁆𑀧𑀸𑀤𑁂𑀲𑀼𑀁, 𑀢𑀁 𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀲𑀸𑀤𑀺𑀬𑀦𑁆𑀢𑁂𑀳𑀺𑀧𑀺 𑀉𑀤𑀭𑀲𑁆𑀲 𑀓𑀸𑀭𑀡𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀯𑀡𑁆𑀡𑁄 𑀪𑀸𑀲𑀺𑀢𑁄 𑀯𑀺𑀬 𑀳𑁄𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑁂𑀦𑁂𑀯 𑀦𑀬𑁂𑀦 ‘‘𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀉𑀤𑀭𑀲𑁆𑀲 𑀓𑀸𑀭𑀡𑀸 𑀕𑀺𑀳𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀲𑁆𑀲𑀣𑀸’’𑀢𑀺 𑀆𑀳. 𑀲𑁂𑀲𑀁 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀲𑀤𑀺𑀲𑀫𑁂𑀯. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂𑀧𑀺 𑀓𑁂𑀯𑀮𑀁 𑀢𑀢𑁆𑀣 𑀧𑀸𑀭𑀸𑀚𑀺𑀓𑀜𑁆𑀘𑁂𑀯 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀇𑀥 𑀪𑀽𑀢𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀜𑁆𑀘𑁂𑀯 𑀤𑀼𑀓𑁆𑀓𑀝𑀜𑁆𑀘 𑀅𑀬𑀁 𑀯𑀺𑀲𑁂𑀲𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁭𑁭. ‘‘𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀪𑀽𑀢𑀁 𑀆𑀭𑁄𑀘𑁂𑀢𑀻’’𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀳𑀺 𑀅𑀦𑁆𑀢𑀭𑀸 𑀯𑀸 𑀅𑀢𑀺𑀓𑀟𑁆𑀠𑀺𑀬𑀫𑀸𑀦𑁂𑀦 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀪𑀽𑀢𑀁 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀼𑀢𑀧𑀭𑀺𑀬𑀢𑁆𑀢𑀺𑀲𑀻𑀮𑀕𑀼𑀡𑀁 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲𑀸𑀧𑀺 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀺. 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀅𑀦𑀸𑀧𑀢𑁆𑀢𑀺. ‘‘𑀉𑀫𑁆𑀫𑀢𑁆𑀢𑀓𑀲𑁆𑀲𑀸’’𑀢𑀺 𑀇𑀤𑀁 𑀧𑀦 𑀇𑀥 𑀦 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀸𑀦𑀁 𑀉𑀫𑁆𑀫𑀸𑀤𑀲𑁆𑀲 𑀯𑀸 𑀘𑀺𑀢𑁆𑀢𑀓𑁆𑀔𑁂𑀧𑀲𑁆𑀲 𑀯𑀸 𑀅𑀪𑀸𑀯𑀸𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀫𑁆𑀧𑀺 𑀳𑀺 𑀯𑀺𑀘𑀸𑀭𑀺𑀢𑀁 ‘‘𑀛𑀸𑀦𑀮𑀸𑀪𑀻 𑀧𑀦 𑀧𑀭𑀺𑀳𑀻𑀦𑁂 𑀛𑀸𑀦𑁂 𑀉𑀫𑁆𑀫𑀢𑁆𑀢𑀓𑁄 𑀪𑀯𑁂𑀬𑁆𑀬, 𑀢𑀲𑁆𑀲𑀧𑀺 𑀪𑀽𑀢𑀸𑀭𑁄𑀘𑀦𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀪𑀽𑀢𑀲𑁆𑀲𑁂𑀯 𑀅𑀪𑀸𑀯𑀢𑁄’’𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀪𑀽𑀢𑀸𑀭𑁄𑀘𑀦𑀁 𑀦𑀸𑀫𑁂𑀢𑀁 𑀧𑀼𑀩𑁆𑀩𑁂 𑀅𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀢𑀺 𑁋 𑀓𑀸𑀬𑀢𑁄 𑀯𑀸𑀘𑀢𑁄 𑀓𑀸𑀬𑀯𑀸𑀘𑀢𑁄 𑀘𑀸𑀢𑀺. 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑁂𑀳𑀺 𑀤𑁆𑀯𑀺𑀘𑀺𑀢𑁆𑀢𑀁, 𑀲𑀼𑀔𑀫𑀚𑁆𑀛𑀢𑁆𑀢𑀯𑁂𑀤𑀦𑀸𑀳𑀺 𑀤𑁆𑀯𑀺𑀯𑁂𑀤𑀦𑀦𑁆𑀢𑀺.

𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀁 𑀅𑀝𑁆𑀞𑀫𑀁.

𑁯. 𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁮. 𑀦𑀯𑀫𑀲𑀺𑀓𑁆𑀔𑀸𑀧𑀤𑁂 𑁋 𑀤𑀼𑀝𑁆𑀞𑀼𑀮𑁆𑀮𑀸 𑀦𑀸𑀫 𑀆𑀧𑀢𑁆𑀢𑀺 𑀘𑀢𑁆𑀢𑀸𑀭𑀺 𑀘 𑀧𑀸𑀭𑀸𑀚𑀺𑀓𑀸𑀦𑀺 𑀢𑁂𑀭𑀲 𑀘 𑀲𑀗𑁆𑀖𑀸𑀤𑀺𑀲𑁂𑀲𑀸𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 ‘‘𑀧𑀸𑀭𑀸𑀚𑀺𑀓𑀸𑀦𑀺 𑀤𑀼𑀝𑁆𑀞𑀼𑀮𑁆𑀮𑀲𑀤𑁆𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀦 𑀇𑀥 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀯𑀺𑀘𑀸𑀭𑀡𑀸 𑁋 𑀲𑀘𑁂 𑀧𑀸𑀭𑀸𑀚𑀺𑀓𑀁 𑀆𑀭𑁄𑀘𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀦 𑀪𑀯𑁂𑀬𑁆𑀬, 𑀬𑀣𑀸 𑀲𑀫𑀸𑀦𑁂𑀧𑀺 𑀪𑀺𑀓𑁆𑀔𑀼-𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀲𑀫𑁆𑀧𑀦𑁆𑀦𑀲𑀤𑁆𑀤𑁂 𑀬𑀢𑁆𑀣 𑀪𑀺𑀓𑁆𑀔𑀼𑀦𑀻 𑀅𑀦𑀥𑀺𑀧𑁆𑀧𑁂𑀢𑀸 𑀳𑁄𑀢𑀺, 𑀢𑀢𑁆𑀣 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀺; 𑀏𑀯𑀫𑀺𑀥 𑀲𑀫𑀸𑀦𑁂𑀧𑀺 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁 𑀤𑀼𑀝𑁆𑀞𑀼𑀮𑁆𑀮𑀲𑀤𑁆𑀤𑁂 𑀬𑀤𑀺 𑀧𑀸𑀭𑀸𑀚𑀺𑀓𑀁 𑀅𑀦𑀥𑀺𑀧𑁆𑀧𑁂𑀢𑀁, ‘‘𑀤𑀼𑀝𑁆𑀞𑀼𑀮𑁆𑀮𑀸 𑀦𑀸𑀫 𑀆𑀧𑀢𑁆𑀢𑀺 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸’’𑀢𑀺 𑀏𑀢𑀤𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀢𑁆𑀣 𑀪𑀯𑁂𑀬𑁆𑀬 ‘‘𑀬𑁄 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄, 𑀲𑁄 𑀪𑀺𑀓𑁆𑀔𑀼𑀪𑀸𑀯𑀢𑁄 𑀘𑀼𑀢𑁄, 𑀢𑀲𑁆𑀫𑀸 𑀢𑀲𑁆𑀲 𑀆𑀧𑀢𑁆𑀢𑀺𑀁 𑀆𑀭𑁄𑀘𑁂𑀦𑁆𑀢𑁄 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻’’𑀢𑀺. 𑀏𑀯𑀁 𑀲𑀢𑀺 𑀅𑀓𑁆𑀓𑁄𑀲𑀦𑁆𑀢𑁄𑀧𑀺 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀘 𑀆𑀧𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀲𑀼𑀤𑁆𑀥𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄 𑀅𑀜𑁆𑀜𑀢𑀭𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀢𑀜𑁆𑀘𑁂 𑀅𑀲𑀼𑀤𑁆𑀥𑀤𑀺𑀝𑁆𑀞𑀺 𑀲𑀫𑀸𑀦𑁄 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁄 𑀯𑀤𑀢𑀺, 𑀆𑀧𑀢𑁆𑀢𑀺 𑀑𑀫𑀲𑀯𑀸𑀤𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁮𑁯). 𑀏𑀯𑀁 𑀧𑀸𑀴𑀺𑀬𑀸 𑀯𑀺𑀘𑀸𑀭𑀺𑀬𑀫𑀸𑀦𑀸𑀬 𑀧𑀸𑀭𑀸𑀚𑀺𑀓𑀁 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀤𑀺𑀲𑁆𑀲𑀢𑀺. 𑀓𑀺𑀜𑁆𑀘𑀸𑀧𑀺 𑀤𑀺𑀲𑁆𑀲𑀢𑀺, 𑀅𑀣 𑀔𑁄 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀢𑁆𑀢𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀯 𑀏𑀢𑁆𑀣 𑀧𑀫𑀸𑀡𑀁, 𑀦 𑀅𑀜𑁆𑀜𑀸 𑀯𑀺𑀘𑀸𑀭𑀡𑀸. 𑀧𑀼𑀩𑁆𑀩𑁂𑀧𑀺 𑀘 𑀆𑀯𑁄𑀘𑀼𑀫𑁆𑀳 𑁋 ‘‘𑀩𑀼𑀤𑁆𑀥𑁂𑀦 𑀥𑀫𑁆𑀫𑁄 𑀯𑀺𑀦𑀬𑁄 𑀘 𑀯𑀼𑀢𑁆𑀢𑁄, 𑀬𑁄 𑀢𑀲𑁆𑀲 𑀧𑀼𑀢𑁆𑀢𑁂𑀳𑀺 𑀢𑀣𑁂𑀯 𑀜𑀸𑀢𑁄’’𑀢𑀺𑀆𑀤𑀺 (𑀧𑀸𑀭𑀸. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸). 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀳𑀺 𑀩𑀼𑀤𑁆𑀥𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀚𑀸𑀦𑀦𑁆𑀢𑀺.

𑀇𑀫𑀺𑀦𑀸𑀧𑀺 𑀘𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸𑀢𑀺 𑀳𑀺 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸 𑀘 𑀆𑀭𑁄𑀘𑀦𑀁 𑀆𑀬𑀢𑀺𑀁 𑀲𑀁𑀯𑀭𑀢𑁆𑀣𑀸𑀬 𑀧𑀼𑀦 𑀢𑀣𑀸𑀭𑀽𑀧𑀁 𑀆𑀧𑀢𑁆𑀢𑀺𑀁 𑀅𑀦𑀸𑀧𑀚𑁆𑀚𑀦𑀢𑁆𑀣𑀸𑀬 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁, 𑀦 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀯𑀡𑁆𑀡𑀫𑀢𑁆𑀢𑀧𑁆𑀧𑀓𑀸𑀲𑀦𑀢𑁆𑀣𑀸𑀬, 𑀲𑀸𑀲𑀦𑁂 𑀘𑀲𑁆𑀲 𑀧𑀢𑀺𑀝𑁆𑀞𑀸𑀦𑀺𑀲𑁂𑀥𑀦𑀢𑁆𑀣𑀸𑀬, 𑀦 𑀘 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀲𑁆𑀲 𑀧𑀼𑀦 𑀢𑀣𑀸𑀭𑀽𑀧𑀸𑀬 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀚𑁆𑀚𑀦𑁂𑀦 𑀪𑀺𑀓𑁆𑀔𑀼𑀪𑀸𑀯𑁄 𑀦𑀸𑀫 𑀅𑀢𑁆𑀣𑀺. 𑀢𑀲𑁆𑀫𑀸 ‘‘𑀧𑀸𑀭𑀸𑀚𑀺𑀓𑀸𑀦𑀺 𑀤𑀼𑀝𑁆𑀞𑀼𑀮𑁆𑀮𑀲𑀤𑁆𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢’’𑀦𑁆𑀢𑀺 𑀬𑀁 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀼𑀢𑁆𑀢𑀫𑁂𑀯.

𑁮𑁦. 𑀅𑀢𑁆𑀣𑀺 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀸𑀢𑀺𑀆𑀤𑀻𑀲𑀼 𑀧𑀦 𑀬𑀸 𑀅𑀬𑀁 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺 𑀯𑀼𑀢𑁆𑀢𑀸, 𑀲𑀸 𑀦 𑀓𑀢𑁆𑀣𑀘𑀺 𑀆𑀕𑀢𑀸, 𑀇𑀥 𑀯𑀼𑀢𑁆𑀢𑀢𑁆𑀢𑀸𑀬𑁂𑀯 𑀧𑀦 𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀏𑀯𑀫𑁂𑀲 𑀧𑀭𑁂𑀲𑀼 𑀳𑀺𑀭𑁄𑀢𑁆𑀢𑀧𑁆𑀧𑁂𑀦𑀸𑀧𑀺 𑀆𑀬𑀢𑀺𑀁 𑀲𑀁𑀯𑀭𑀁 𑀆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀳𑀺𑀢𑁂𑀲𑀺𑀢𑀸𑀬 𑀢𑀺𑀓𑁆𑀔𑀢𑁆𑀢𑀼𑀁 𑀅𑀧𑀮𑁄𑀓𑁂𑀢𑁆𑀯𑀸 𑀲𑀗𑁆𑀖𑁂𑀦 𑀓𑀸𑀢𑀩𑁆𑀩𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

𑁮𑁨. 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀆𑀭𑁄𑀘𑁂𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀧𑀜𑁆𑀘𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀆𑀭𑁄𑀘𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀧𑀸𑀭𑀸𑀚𑀺𑀓𑀁 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀁 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀁 𑀯𑀸 𑀅𑀚𑁆𑀛𑀸𑀘𑀸𑀭𑀦𑁆𑀢𑀺 𑀏𑀢𑁆𑀣 𑀆𑀤𑀺𑀢𑁄 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀤𑀼𑀝𑁆𑀞𑀼𑀮𑁆𑀮𑁄 𑀦𑀸𑀫 𑀅𑀚𑁆𑀛𑀸𑀘𑀸𑀭𑁄, 𑀲𑁂𑀲𑀸𑀦𑀺 𑀅𑀤𑀼𑀝𑁆𑀞𑀼𑀮𑁆𑀮𑁄. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀓𑀸𑀬𑀲𑀁𑀲𑀕𑁆𑀕𑀤𑀼𑀝𑁆𑀞𑀼𑀮𑁆𑀮𑀅𑀢𑁆𑀢𑀓𑀸𑀫𑀸 𑀧𑀦𑀲𑁆𑀲 𑀅𑀚𑁆𑀛𑀸𑀘𑀸𑀭𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁.

𑁮𑁩. 𑀯𑀢𑁆𑀣𑀼𑀁 𑀆𑀭𑁄𑀘𑁂𑀢𑀻𑀢𑀺 ‘‘𑀅𑀬𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀆𑀧𑀦𑁆𑀦𑁄, 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀦𑁆𑀦𑁄, 𑀅𑀢𑁆𑀢𑀓𑀸𑀫𑀁 𑀆𑀧𑀦𑁆𑀦𑁄’’ 𑀓𑀸𑀬𑀲𑀁𑀲𑀕𑁆𑀕𑀁 𑀆𑀧𑀦𑁆𑀦𑁄𑀢𑀺 𑀏𑀯𑀁 𑀯𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀆𑀧𑀢𑁆𑀢𑀺𑀁 𑀆𑀭𑁄𑀘𑁂𑀢𑀻𑀢𑀺 𑀏𑀢𑁆𑀣 ‘‘𑀅𑀬𑀁 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀣𑀼𑀮𑁆𑀮𑀘𑁆𑀘𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀧𑀸𑀝𑀺𑀤𑁂𑀲𑀦𑀻𑀬𑀁 𑀤𑀼𑀓𑁆𑀓𑀝𑀁 𑀤𑀼𑀩𑁆𑀪𑀸𑀲𑀺𑀢𑀁 𑀆𑀧𑀦𑁆𑀦𑁄’’𑀢𑀺 𑀯𑀤𑀢𑀺 𑀅𑀦𑀸𑀧𑀢𑁆𑀢𑀺. ‘‘𑀅𑀬𑀁 𑀅𑀲𑀼𑀘𑀺𑀁 𑀫𑁄𑀘𑁂𑀢𑁆𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀧𑀦 𑀦𑀬𑁂𑀦 𑀯𑀢𑁆𑀣𑀼𑀦𑀸 𑀲𑀤𑁆𑀥𑀺𑀁 𑀆𑀧𑀢𑁆𑀢𑀺𑀁 𑀖𑀝𑁂𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀁 𑀦𑀯𑀫𑀁.

𑁧𑁦. 𑀧𑀣𑀯𑀻𑀔𑀡𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁬. 𑀤𑀲𑀫𑀲𑀺𑀓𑁆𑀔𑀸𑀧𑀤𑁂 𑁋 𑀚𑀸𑀢𑀸 𑀘 𑀧𑀣𑀯𑀻 𑀅𑀚𑀸𑀢𑀸 𑀘 𑀧𑀣𑀯𑀻𑀢𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀚𑀸𑀢𑀧𑀣𑀯𑀺𑀜𑁆𑀘 𑀅𑀚𑀸𑀢𑀧𑀣𑀯𑀺𑀜𑁆𑀘 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀧𑀸𑀲𑀸𑀡𑀸𑀤𑀻𑀲𑀼 𑀅𑀧𑁆𑀧𑀸 𑀧𑀸𑀲𑀸𑀡𑀸 𑀏𑀢𑁆𑀣𑀸𑀢𑀺 𑀅𑀧𑁆𑀧𑀧𑀸𑀲𑀸𑀡𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀢𑁄 𑀉𑀧𑀭𑀺 𑀧𑀸𑀲𑀸𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀸 𑀲𑀓𑁆𑀔𑀭𑀸. 𑀓𑀣𑀮𑀸𑀢𑀺 𑀓𑀧𑀸𑀮𑀔𑀡𑁆𑀟𑀸𑀦𑀺. 𑀫𑀭𑀼𑀫𑁆𑀩𑀸𑀢𑀺 𑀓𑀝𑀲𑀓𑁆𑀔𑀭𑀸. 𑀯𑀸𑀮𑀺𑀓𑀸𑀢𑀺 𑀯𑀸𑀮𑀼𑀓𑀸𑀬𑁂𑀯. 𑀬𑁂𑀪𑀼𑀬𑁆𑀬𑁂𑀦 𑀧𑀁𑀲𑀼𑀓𑀸𑀢𑀺 𑀢𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀧𑀁𑀲𑀼, 𑀏𑀓𑁄 𑀧𑀸𑀲𑀸𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑁄. 𑀅𑀤𑀟𑁆𑀠𑀸𑀧𑀻𑀢𑀺 𑀉𑀤𑁆𑀥𑀦𑀧𑀢𑁆𑀢𑀧𑀘𑀦𑀓𑀼𑀫𑁆𑀪𑀓𑀸𑀭𑀸𑀯𑀸𑀧𑀸𑀤𑀺𑀯𑀲𑁂𑀦 𑀢𑀣𑀸 𑀢𑀣𑀸 𑀅𑀤𑀟𑁆𑀠𑀸. 𑀲𑀸 𑀧𑀦 𑀯𑀺𑀲𑀼𑀁 𑀦𑀢𑁆𑀣𑀺, 𑀲𑀼𑀤𑁆𑀥𑀧𑀁𑀲𑀼𑀆𑀤𑀻𑀲𑀼 𑀅𑀜𑁆𑀜𑀢𑀭𑀸𑀯 𑀯𑁂𑀤𑀺𑀢𑀩𑁆𑀩𑀸. 𑀬𑁂𑀪𑀼𑀬𑁆𑀬𑁂𑀦𑀲𑀓𑁆𑀔𑀭𑀸𑀢𑀺 𑀩𑀳𑀼𑀢𑀭𑀸 𑀲𑀓𑁆𑀔𑀭𑀸. 𑀳𑀢𑁆𑀣𑀺𑀓𑀼𑀘𑁆𑀙𑀺𑀬𑀁 𑀓𑀺𑀭 𑀏𑀓𑀧𑀘𑁆𑀙𑀺𑀧𑀽𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀤𑁄𑀡𑀺𑀬𑀁 𑀥𑁄𑀯𑀺𑀢𑁆𑀯𑀸 𑀧𑀣𑀯𑀺𑀬𑀸 𑀬𑁂𑀪𑀼𑀬𑁆𑀬𑁂𑀦 𑀲𑀓𑁆𑀔𑀭𑀪𑀸𑀯𑀁 𑀜𑀢𑁆𑀯𑀸 𑀲𑀬𑀁 𑀪𑀺𑀓𑁆𑀔𑀽 𑀧𑁄𑀓𑁆𑀔𑀭𑀡𑀺𑀁 𑀔𑀡𑀺𑀁𑀲𑀼. 𑀬𑀸𑀦𑀺 𑀧𑀦 𑀫𑀚𑁆𑀛𑁂 ‘‘𑀅𑀧𑁆𑀧𑀧𑀁𑀲𑀼 𑀅𑀧𑁆𑀧𑀫𑀢𑁆𑀢𑀺𑀓𑀸’’𑀢𑀺 𑀤𑁆𑀯𑁂 𑀧𑀤𑀸𑀦𑀺, 𑀢𑀸𑀦𑀺 𑀬𑁂𑀪𑀼𑀬𑁆𑀬𑁂𑀦𑀧𑀸𑀲𑀸𑀡𑀸𑀤𑀺𑀧𑀜𑁆𑀘𑀓𑀫𑁂𑀯 𑀧𑀯𑀺𑀲𑀦𑁆𑀢𑀺 𑀢𑁂𑀲𑀁𑀬𑁂𑀯 𑀳𑀺 𑀤𑁆𑀯𑀺𑀦𑁆𑀦𑀁 𑀧𑀪𑁂𑀤𑀤𑀲𑁆𑀲𑀦𑀫𑁂𑀢𑀁. 𑀲𑀬𑀁 𑀔𑀡𑀢𑀺 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀏𑀢𑁆𑀣 𑀧𑀳𑀸𑀭𑁂 𑀧𑀳𑀸𑀭𑁂 𑀧𑀸𑀘𑀺𑀢𑁆𑀢𑀺𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀓𑀺𑀁 𑀆𑀡𑀢𑁆𑀢𑁄 𑀩𑀳𑀼𑀓𑀫𑁆𑀧𑀺 𑀔𑀡𑀢𑀻𑀢𑀺 𑀲𑀘𑁂𑀧𑀺 𑀲𑀓𑀮𑀤𑀺𑀯𑀲𑀁 𑀔𑀡𑀢𑀺, 𑀆𑀡𑀸𑀧𑀓𑀲𑁆𑀲 𑀏𑀓𑀁𑀬𑁂𑀯 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀧𑀦 𑀓𑀼𑀲𑀺𑀢𑁄 𑀳𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀆𑀡𑀸𑀧𑁂𑀢𑀩𑁆𑀩𑁄. 𑀢𑀁 𑀆𑀡𑀸𑀧𑁂𑀢𑁆𑀯𑀸 𑀔𑀡𑀸𑀧𑁂𑀦𑁆𑀢𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀬𑀁 𑀢𑀸𑀯 𑀧𑀸𑀴𑀺𑀯𑀡𑁆𑀡𑀦𑀸.

𑀅𑀬𑀁 𑀧𑀦 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄 𑁋 ‘‘𑀧𑁄𑀓𑁆𑀔𑀭𑀡𑀺𑀁 𑀔𑀡𑀸’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺. 𑀔𑀢𑀸𑀬𑁂𑀯 𑀳𑀺 𑀧𑁄𑀓𑁆𑀔𑀭𑀡𑀻 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀅𑀬𑀁 𑀓𑀧𑁆𑀧𑀺𑀬𑀯𑁄𑀳𑀸𑀭𑁄. 𑀏𑀲 𑀦𑀬𑁄 ‘‘𑀯𑀸𑀧𑀺𑀁 𑀢𑀴𑀸𑀓𑀁 𑀆𑀯𑀸𑀝𑀁 𑀔𑀡𑀸’’𑀢𑀺𑀆𑀤𑀻𑀲𑀼𑀧𑀺. ‘‘𑀇𑀫𑀁 𑀑𑀓𑀸𑀲𑀁 𑀔𑀡, 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀧𑁄𑀓𑁆𑀔𑀭𑀡𑀺𑀁 𑀔𑀡𑀸’’𑀢𑀺 𑀯𑀢𑁆𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀺. ‘‘𑀓𑀦𑁆𑀤𑀁 𑀔𑀡, 𑀫𑀽𑀮𑀁 𑀔𑀡𑀸’’𑀢𑀺 𑀅𑀦𑀺𑀬𑀸𑀫𑁂𑀢𑁆𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀇𑀫𑀁 𑀯𑀮𑁆𑀮𑀺𑀁 𑀔𑀡, 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀓𑀦𑁆𑀤𑀁 𑀯𑀸 𑀫𑀽𑀮𑀁 𑀯𑀸 𑀔𑀡𑀸’’𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑁄𑀓𑁆𑀔𑀭𑀡𑀺𑀁 𑀲𑁄𑀥𑁂𑀦𑁆𑀢𑁂𑀳𑀺 𑀬𑁄 𑀓𑀼𑀝𑁂𑀳𑀺 𑀉𑀲𑁆𑀲𑀺𑀜𑁆𑀘𑀺𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺 𑀢𑀦𑀼𑀓𑀓𑀤𑁆𑀤𑀫𑁄, 𑀢𑀁 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺, 𑀩𑀳𑀮𑀁 𑀦 𑀯𑀝𑁆𑀝𑀢𑀺. 𑀆𑀢𑀧𑁂𑀦 𑀲𑀼𑀓𑁆𑀔𑀓𑀤𑁆𑀤𑀫𑁄 𑀨𑀮𑀢𑀺, 𑀢𑀢𑁆𑀭 𑀬𑁄 𑀳𑁂𑀝𑁆𑀞𑀸 𑀧𑀣𑀯𑀺𑀬𑀸 𑀅𑀲𑀫𑁆𑀩𑀤𑁆𑀥𑁄, 𑀢𑀫𑁂𑀯 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀉𑀤𑀓𑁂𑀦 𑀕𑀢𑀝𑁆𑀞𑀸𑀦𑁂 𑀉𑀤𑀓𑀧𑀧𑁆𑀧𑀝𑀓𑁄 𑀦𑀸𑀫 𑀳𑁄𑀢𑀺, 𑀯𑀸𑀢𑀧𑁆𑀧𑀳𑀸𑀭𑁂𑀦 𑀘𑀮𑀢𑀺, 𑀢𑀁 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺.

𑀧𑁄𑀓𑁆𑀔𑀭𑀡𑀻𑀆𑀤𑀻𑀦𑀁 𑀢𑀝𑀁 𑀪𑀺𑀚𑁆𑀚𑀺𑀢𑁆𑀯𑀸 𑀉𑀤𑀓𑀲𑀸𑀫𑀦𑁆𑀢𑀸 𑀧𑀢𑀢𑀺, 𑀲𑀘𑁂 𑀑𑀫𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑀁, 𑀙𑀺𑀦𑁆𑀤𑀺𑀢𑀼𑀁 𑀯𑀸 𑀪𑀺𑀦𑁆𑀤𑀺𑀢𑀼𑀁 𑀯𑀸 𑀯𑀝𑁆𑀝𑀢𑀺, 𑀘𑀸𑀢𑀼𑀫𑀸𑀲𑀢𑁄 𑀉𑀤𑁆𑀥𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀉𑀤𑀓𑁂𑀬𑁂𑀯 𑀧𑀢𑀢𑀺, 𑀤𑁂𑀯𑁂 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁂𑀧𑀺 𑀉𑀤𑀓𑁂𑀬𑁂𑀯 𑀉𑀤𑀓𑀲𑁆𑀲 𑀧𑀢𑀺𑀢𑀢𑁆𑀢𑀸 𑀯𑀝𑁆𑀝𑀢𑀺. 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀲𑁄𑀡𑁆𑀟𑀺𑀁 𑀔𑀡𑀦𑁆𑀢𑀺, 𑀲𑀘𑁂 𑀢𑀢𑁆𑀣 𑀧𑀞𑀫𑀫𑁂𑀯 𑀲𑀼𑀔𑀼𑀫𑀭𑀚𑀁 𑀧𑀢𑀢𑀺, 𑀢𑀜𑁆𑀘𑁂 𑀤𑁂𑀯𑁂𑀦 𑀑𑀯𑀝𑁆𑀞𑀁 𑀳𑁄𑀢𑀺, 𑀘𑀸𑀢𑀼𑀫𑀸𑀲𑀘𑁆𑀘𑀬𑁂𑀦 𑀅𑀓𑀧𑁆𑀧𑀺𑀬𑀧𑀣𑀯𑀻𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀉𑀤𑀓𑁂 𑀧𑀭𑀺𑀬𑀸𑀤𑀺𑀡𑁆𑀡𑁂 𑀲𑁄𑀡𑁆𑀟𑀺𑀁 𑀲𑁄𑀥𑁂𑀦𑁆𑀢𑁂𑀳𑀺 𑀢𑀁 𑀯𑀺𑀓𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀞𑀫𑀫𑁂𑀯 𑀉𑀤𑀓𑁂𑀦 𑀧𑀽𑀭𑀢𑀺, 𑀧𑀘𑁆𑀙𑀸 𑀭𑀚𑀁 𑀧𑀢𑀢𑀺, 𑀢𑀁 𑀯𑀺𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁆𑀣 𑀳𑀺 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂𑀧𑀺 𑀉𑀤𑀓𑁂𑀬𑁂𑀯 𑀉𑀤𑀓𑀁 𑀧𑀢𑀢𑀻𑀢𑀺. 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀲𑀼𑀔𑀼𑀫𑀭𑀚𑀁 𑀳𑁄𑀢𑀺, 𑀤𑁂𑀯𑁂 𑀨𑀼𑀲𑀸𑀬𑀦𑁆𑀢𑁂 𑀅𑀮𑁆𑀮𑀻𑀬𑀢𑀺, 𑀢𑀫𑁆𑀧𑀺 𑀘𑀸𑀢𑀼𑀫𑀸𑀲𑀘𑁆𑀘𑀬𑁂𑀦 𑀯𑀺𑀓𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀅𑀓𑀢𑀧𑀩𑁆𑀪𑀸𑀭𑁂 𑀯𑀫𑁆𑀫𑀺𑀓𑁄 𑀉𑀝𑁆𑀞𑀺𑀢𑁄 𑀳𑁄𑀢𑀺, 𑀬𑀣𑀸𑀲𑀼𑀔𑀁 𑀯𑀺𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀅𑀩𑁆𑀪𑁄𑀓𑀸𑀲𑁂 𑀉𑀝𑁆𑀞𑀳𑀢𑀺, 𑀑𑀫𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁄𑀬𑁂𑀯 𑀯𑀝𑁆𑀝𑀢𑀺. 𑀭𑀼𑀓𑁆𑀔𑀸𑀤𑀻𑀲𑀼 𑀆𑀭𑀼𑀴𑁆𑀳𑀉𑀧𑀘𑀺𑀓𑀸𑀫𑀢𑁆𑀢𑀺𑀓𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀕𑀡𑁆𑀟𑀼𑀧𑁆𑀧𑀸𑀤𑀕𑀽𑀣𑀫𑀽𑀲𑀺𑀓𑀼𑀓𑁆𑀓𑀭𑀕𑁄𑀓𑀡𑁆𑀝𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀕𑁄𑀓𑀡𑁆𑀝𑀓𑁄 𑀦𑀸𑀫 𑀕𑀸𑀯𑀻𑀦𑀁 𑀔𑀼𑀭𑀘𑁆𑀙𑀺𑀦𑁆𑀦𑀓𑀤𑁆𑀤𑀫𑁄 𑀯𑀼𑀘𑁆𑀘𑀢𑀺. 𑀲𑀘𑁂 𑀧𑀦 𑀳𑁂𑀝𑁆𑀞𑀺𑀫𑀢𑀮𑁂𑀦 𑀪𑀽𑀫𑀺𑀲𑀫𑁆𑀩𑀦𑁆𑀥𑁄 𑀳𑁄𑀢𑀺, 𑀏𑀓𑀤𑀺𑀯𑀲𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀓𑀲𑀺𑀢𑀝𑁆𑀞𑀸𑀦𑁂𑀧𑀺 𑀦𑀗𑁆𑀕𑀮𑀘𑁆𑀙𑀺𑀦𑁆𑀦𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀕𑀡𑁆𑀳𑀦𑁆𑀢𑀲𑁆𑀲 𑀏𑀲𑁂𑀯 𑀦𑀬𑁄. 𑀧𑀼𑀭𑀸𑀡𑀲𑁂𑀦𑀸𑀲𑀦𑀁 𑀳𑁄𑀢𑀺 𑀅𑀘𑁆𑀙𑀤𑀦𑀁 𑀯𑀸 𑀯𑀺𑀦𑀝𑁆𑀞𑀘𑁆𑀙𑀤𑀦𑀁 𑀯𑀸, 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑀁 𑀚𑀸𑀢𑀧𑀣𑀯𑀻𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺. 𑀢𑀢𑁄 𑀅𑀯𑀲𑁂𑀲𑀁 𑀙𑀤𑀦𑀺𑀝𑁆𑀞𑀓𑀁 𑀯𑀸 𑀕𑁄𑀧𑀸𑀦𑀲𑀻𑀆𑀤𑀺𑀓𑀁 𑀉𑀧𑀓𑀭𑀡𑀁 𑀯𑀸 ‘‘𑀇𑀝𑁆𑀞𑀓𑀁 𑀕𑀡𑁆𑀳𑀸𑀫𑀺 𑀕𑁄𑀧𑀦𑀲𑀺𑀁 𑀪𑀺𑀢𑁆𑀢𑀺𑀧𑀸𑀤𑀁 𑀧𑀤𑀭𑀢𑁆𑀣𑀭𑀡𑀁 𑀧𑀸𑀲𑀸𑀡𑀢𑁆𑀣𑀫𑁆𑀪𑀁 𑀕𑀡𑁆𑀳𑀸𑀫𑀻’’𑀢𑀺 𑀲𑀜𑁆𑀜𑀸𑀬 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦 𑀲𑀤𑁆𑀥𑀺𑀁 𑀫𑀢𑁆𑀢𑀺𑀓𑀸 𑀧𑀢𑀢𑀺, 𑀅𑀦𑀸𑀧𑀢𑁆𑀢𑀺. 𑀪𑀺𑀢𑁆𑀢𑀺𑀫𑀢𑁆𑀢𑀺𑀓𑀁 𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀆𑀧𑀢𑁆𑀢𑀺. 𑀲𑀘𑁂 𑀬𑀸 𑀬𑀸 𑀅𑀢𑀺𑀦𑁆𑀢𑀸 𑀢𑀁 𑀢𑀁 𑀕𑀡𑁆𑀳𑀸𑀢𑀺, 𑀅𑀦𑀸𑀧𑀢𑁆𑀢𑀺.

𑀅𑀦𑁆𑀢𑁄𑀕𑁂𑀳𑁂 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀏𑀓𑀤𑀺𑀯𑀲𑀁 𑀑𑀯𑀝𑁆𑀞𑁂 𑀕𑁂𑀳𑀁 𑀙𑀸𑀤𑁂𑀦𑁆𑀢𑀺, 𑀲𑀘𑁂 𑀲𑀩𑁆𑀩𑁄 𑀢𑀺𑀦𑁆𑀢𑁄 𑀘𑀸𑀢𑀼𑀫𑀸𑀲𑀘𑁆𑀘𑀬𑁂𑀦 𑀚𑀸𑀢𑀧𑀣𑀯𑀻𑀬𑁂𑀯. 𑀅𑀣𑀲𑁆𑀲 𑀉𑀧𑀭𑀺𑀪𑀸𑀕𑁄𑀬𑁂𑀯 𑀢𑀺𑀦𑁆𑀢𑁄, 𑀅𑀦𑁆𑀢𑁄 𑀅𑀢𑀺𑀦𑁆𑀢𑁄, 𑀬𑀢𑁆𑀢𑀓𑀁 𑀢𑀺𑀦𑁆𑀢𑀁 𑀢𑀁 𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀅𑀧𑀦𑀸𑀫𑁂𑀢𑁆𑀯𑀸 𑀲𑁂𑀲𑀁 𑀬𑀣𑀸𑀲𑀼𑀔𑀁 𑀯𑀴𑀜𑁆𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀏𑀓𑀸𑀩𑀤𑁆𑀥𑀸𑀬𑁂𑀯 𑀳𑀺 𑀚𑀸𑀢𑀧𑀣𑀯𑀻 𑀳𑁄𑀢𑀺, 𑀦 𑀇𑀢𑀭𑀸𑀢𑀺.

𑀅𑀩𑁆𑀪𑁄𑀓𑀸𑀲𑁂 𑀫𑀢𑁆𑀢𑀺𑀓𑀸𑀧𑀸𑀓𑀸𑀭𑁄 𑀳𑁄𑀢𑀺, 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀁 𑀘𑁂 𑀑𑀯𑀝𑁆𑀞𑁄 𑀚𑀸𑀢𑀧𑀣𑀯𑀻𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀮𑀕𑁆𑀕𑀧𑀁𑀲𑀼𑀁 𑀧𑀦 𑀅𑀮𑁆𑀮𑀳𑀢𑁆𑀣𑁂𑀦 𑀙𑀼𑀧𑀺𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀇𑀝𑁆𑀞𑀓𑀧𑀸𑀓𑀸𑀭𑁄 𑀳𑁄𑀢𑀺, 𑀬𑁂𑀪𑀼𑀬𑁆𑀬𑁂𑀦𑀓𑀣𑀮𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀬𑀣𑀸𑀲𑀼𑀔𑀁 𑀯𑀺𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀩𑁆𑀪𑁄𑀓𑀸𑀲𑁂 𑀞𑀺𑀢𑀫𑀡𑁆𑀟𑀧𑀢𑁆𑀣𑀫𑁆𑀪𑀁 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀸𑀮𑁂𑀢𑁆𑀯𑀸 𑀧𑀣𑀯𑀺𑀁 𑀯𑀺𑀓𑁄𑀧𑁂𑀦𑁆𑀢𑁂𑀦 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀉𑀚𑀼𑀓𑀫𑁂𑀯 𑀉𑀤𑁆𑀥𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀜𑁆𑀜𑀫𑁆𑀧𑀺 𑀲𑀼𑀓𑁆𑀔𑀭𑀼𑀓𑁆𑀔𑀁 𑀯𑀸 𑀲𑀼𑀓𑁆𑀔𑀔𑀸𑀡𑀼𑀓𑀁 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀏𑀲𑁂𑀯 𑀦𑀬𑁄. 𑀦𑀯𑀓𑀫𑁆𑀫𑀢𑁆𑀣𑀁 𑀧𑀸𑀲𑀸𑀡𑀁 𑀯𑀸 𑀭𑀼𑀓𑁆𑀔𑀁 𑀯𑀸 𑀤𑀡𑁆𑀟𑀓𑁂𑀳𑀺 𑀉𑀘𑁆𑀘𑀸𑀮𑁂𑀢𑁆𑀯𑀸 𑀧𑀯𑀝𑁆𑀝𑁂𑀦𑁆𑀢𑀸 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀧𑀣𑀯𑀻 𑀪𑀺𑀚𑁆𑀚𑀢𑀺, 𑀲𑀘𑁂 𑀲𑀼𑀤𑁆𑀥𑀘𑀺𑀢𑁆𑀢𑀸 𑀧𑀯𑀝𑁆𑀝𑁂𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀣 𑀧𑀦 𑀢𑁂𑀦 𑀅𑀧𑀤𑁂𑀲𑁂𑀦 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑀼𑀓𑀸𑀫𑀸𑀬𑁂𑀯 𑀳𑁄𑀦𑁆𑀢𑀺, 𑀆𑀧𑀢𑁆𑀢𑀺. 𑀲𑀸𑀔𑀸𑀤𑀻𑀦𑀺 𑀓𑀟𑁆𑀠𑀦𑁆𑀢𑀸𑀦𑀫𑁆𑀧𑀺 𑀧𑀣𑀯𑀺𑀬𑀁 𑀤𑀸𑀭𑀽𑀦𑀺 𑀨𑀸𑀮𑁂𑀦𑁆𑀢𑀸𑀦𑀫𑁆𑀧𑀺 𑀏𑀲𑁂𑀯 𑀦𑀬𑁄.

𑀧𑀣𑀯𑀺𑀬𑀁 𑀅𑀝𑁆𑀞𑀺𑀲𑀽𑀘𑀺𑀓𑀡𑁆𑀝𑀓𑀸𑀤𑀻𑀲𑀼𑀧𑀺 𑀬𑀁𑀓𑀺𑀜𑁆𑀘𑀺 𑀆𑀓𑁄𑀝𑁂𑀢𑀼𑀁 𑀯𑀸 𑀧𑀯𑁂𑀲𑁂𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺. 𑀧𑀲𑁆𑀲𑀸𑀯𑀥𑀸𑀭𑀸𑀬 𑀯𑁂𑀕𑁂𑀦 𑀧𑀣𑀯𑀺𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀧𑀲𑁆𑀲𑀸𑀯𑀫𑁆𑀧𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑀭𑁄𑀦𑁆𑀢𑀲𑁆𑀲 𑀪𑀺𑀚𑁆𑀚𑀢𑀺, 𑀆𑀧𑀢𑁆𑀢𑀺. 𑀯𑀺𑀲𑀫𑀪𑀽𑀫𑀺𑀁 𑀲𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀫𑀼𑀜𑁆𑀚𑀦𑀺𑀬𑀸 𑀖𑀁𑀲𑀺𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀯𑀢𑁆𑀢𑀲𑀻𑀲𑁂𑀦𑁂𑀯 𑀳𑀺 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀓𑁂𑀘𑀺 𑀓𑀢𑁆𑀢𑀭𑀬𑀝𑁆𑀞𑀺𑀬𑀸 𑀪𑀽𑀫𑀺𑀁 𑀓𑁄𑀝𑁆𑀝𑁂𑀦𑁆𑀢𑀺, 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀯𑀺𑀮𑀺𑀔𑀦𑁆𑀢𑀺, ‘‘𑀘𑀗𑁆𑀓𑀫𑀺𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀽𑀫𑀺𑀁 𑀪𑀺𑀦𑁆𑀤𑀦𑁆𑀢𑀸 𑀘𑀗𑁆𑀓𑀫𑀦𑁆𑀢𑀺, 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺. 𑀯𑀻𑀭𑀺𑀬𑀲𑀫𑁆𑀧𑀕𑁆𑀕𑀳𑀢𑁆𑀣𑀁 𑀧𑀦 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁂𑀦 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀘𑀗𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺, ‘‘𑀳𑀢𑁆𑀣𑀁 𑀥𑁄𑀯𑀺𑀲𑁆𑀲𑀸𑀫𑀸’’𑀢𑀺 𑀧𑀣𑀯𑀺𑀬𑀁 𑀖𑀁𑀲𑀦𑁆𑀢𑀺, 𑀦 𑀯𑀝𑁆𑀝𑀢𑀺. 𑀅𑀖𑀁𑀲𑀦𑁆𑀢𑁂𑀦 𑀧𑀦 𑀅𑀮𑁆𑀮𑀳𑀢𑁆𑀣𑀁 𑀧𑀣𑀯𑀺𑀬𑀁 𑀞𑀧𑁂𑀢𑁆𑀯𑀸 𑀭𑀚𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀓𑁂𑀘𑀺 𑀓𑀡𑁆𑀟𑀼𑀓𑀘𑁆𑀙𑀼𑀆𑀤𑀻𑀳𑀺 𑀆𑀩𑀸𑀥𑀺𑀓𑀸 𑀙𑀺𑀦𑁆𑀦𑀢𑀝𑀸𑀤𑀻𑀲𑀼 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀖𑀁𑀲𑀦𑁆𑀢𑀺 𑀦 𑀯𑀝𑁆𑀝𑀢𑀺.

𑁮𑁭. 𑀔𑀡𑀢𑀺 𑀯𑀸 𑀔𑀡𑀸𑀧𑁂𑀢𑀺 𑀯𑀸𑀢𑀺 𑀅𑀦𑁆𑀢𑀫𑀲𑁄 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦𑀧𑀺 𑀲𑀫𑁆𑀫𑀚𑁆𑀚𑀦𑀻𑀲𑀮𑀸𑀓𑀸𑀬𑀧𑀺 𑀲𑀬𑀁 𑀯𑀸 𑀔𑀡𑀢𑀺, 𑀅𑀜𑁆𑀜𑁂𑀦 𑀯𑀸 𑀔𑀡𑀸𑀧𑁂𑀢𑀺. 𑀪𑀺𑀦𑁆𑀤𑀢𑀺 𑀯𑀸 𑀪𑁂𑀤𑀸𑀧𑁂𑀢𑀺 𑀯𑀸𑀢𑀺 𑀅𑀦𑁆𑀢𑀫𑀲𑁄 𑀉𑀤𑀓𑀫𑁆𑀧𑀺 𑀙𑀟𑁆𑀟𑁂𑀦𑁆𑀢𑁄 𑀲𑀬𑀁 𑀯𑀸 𑀪𑀺𑀦𑁆𑀤𑀢𑀺, 𑀅𑀜𑁆𑀜𑁂𑀦 𑀯𑀸 𑀪𑀺𑀦𑁆𑀤𑀸𑀧𑁂𑀢𑀺. 𑀤𑀳𑀢𑀺 𑀯𑀸 𑀤𑀳𑀸𑀧𑁂𑀢𑀺 𑀯𑀸𑀢𑀺 𑀅𑀦𑁆𑀢𑀫𑀲𑁄 𑀧𑀢𑁆𑀢𑀫𑁆𑀧𑀺 𑀧𑀘𑀦𑁆𑀢𑁄 𑀲𑀬𑀁 𑀯𑀸 𑀤𑀳𑀢𑀺, 𑀅𑀜𑁆𑀜𑁂𑀦 𑀯𑀸 𑀤𑀳𑀸𑀧𑁂𑀢𑀺. 𑀬𑀢𑁆𑀢𑀓𑁂𑀲𑀼 𑀞𑀸𑀦𑁂𑀲𑀼 𑀅𑀕𑁆𑀕𑀺𑀁 𑀤𑁂𑀢𑀺 𑀯𑀸 𑀤𑀸𑀧𑁂𑀢𑀺 𑀯𑀸 𑀢𑀢𑁆𑀢𑀓𑀸𑀦𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀧𑀢𑁆𑀢𑀁 𑀧𑀘𑀦𑁆𑀢𑁂𑀦𑀧𑀺 𑀳𑀺 𑀧𑀼𑀩𑁆𑀩𑁂 𑀧𑀓𑁆𑀓𑀝𑁆𑀞𑀸𑀦𑁂𑀬𑁂𑀯 𑀳𑀺 𑀧𑀘𑀺𑀢𑀩𑁆𑀩𑁄. 𑀅𑀤𑀟𑁆𑀠𑀸𑀬 𑀧𑀣𑀯𑀺𑀬𑀸 𑀅𑀕𑁆𑀕𑀺𑀁 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀢𑁆𑀢𑀧𑀘𑀦𑀓𑀧𑀸𑀮𑀲𑁆𑀲 𑀧𑀦 𑀉𑀧𑀭𑀺 𑀅𑀕𑁆𑀕𑀺𑀁 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀤𑀸𑀭𑀽𑀦𑀁 𑀉𑀧𑀭𑀺 𑀞𑀧𑁂𑀢𑀺, 𑀲𑁄 𑀅𑀕𑁆𑀕𑀺 𑀢𑀸𑀦𑀺 𑀤𑀳𑀦𑁆𑀢𑁄 𑀕𑀦𑁆𑀢𑁆𑀯𑀸 𑀧𑀣𑀯𑀺𑀁 𑀤𑀳𑀢𑀺, 𑀦 𑀯𑀝𑁆𑀝𑀢𑀺. 𑀇𑀝𑁆𑀞𑀓𑀓𑀧𑀸𑀮𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀭𑀸𑀧𑀺 𑀳𑀺 𑀇𑀝𑁆𑀞𑀓𑀸𑀤𑀻𑀦𑀁𑀬𑁂𑀯 𑀉𑀧𑀭𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀢𑁂𑀲𑀁 𑀅𑀦𑀼𑀧𑀸𑀤𑀸𑀦𑀢𑁆𑀢𑀸. 𑀦 𑀳𑀺 𑀢𑀸𑀦𑀺 𑀅𑀕𑁆𑀕𑀺𑀲𑁆𑀲 𑀉𑀧𑀸𑀤𑀸𑀦𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀲𑀼𑀓𑁆𑀔𑀔𑀸𑀡𑀼𑀲𑀼𑀓𑁆𑀔𑀭𑀼𑀓𑁆𑀔𑀸𑀤𑀻𑀲𑀼𑀧𑀺 𑀅𑀕𑁆𑀕𑀺𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀧𑀣𑀯𑀺𑀁 𑀅𑀧𑁆𑀧𑀢𑁆𑀢𑀫𑁂𑀯 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻𑀢𑀺 𑀤𑁂𑀢𑀺, 𑀯𑀝𑁆𑀝𑀢𑀺. 𑀧𑀘𑁆𑀙𑀸 𑀦𑀺𑀩𑁆𑀩𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀯𑀺𑀲𑀬𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. 𑀢𑀺𑀡𑀼𑀓𑁆𑀓𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀳𑀢𑁆𑀣𑁂 𑀟𑀬𑁆𑀳𑀫𑀸𑀦𑁂 𑀪𑀽𑀫𑀺𑀬𑀁 𑀧𑀸𑀢𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀧𑀢𑀺𑀢𑀝𑁆𑀞𑀸𑀦𑁂𑀬𑁂𑀯 𑀉𑀧𑀸𑀤𑀸𑀦𑀁 𑀤𑀢𑁆𑀯𑀸 𑀅𑀕𑁆𑀕𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀤𑀟𑁆𑀠𑀧𑀣𑀯𑀺𑀬𑀸 𑀘 𑀬𑀢𑁆𑀢𑀓𑀁 𑀞𑀸𑀦𑀁 𑀉𑀲𑀼𑀫𑀸𑀬 𑀅𑀦𑀼𑀕𑀢𑀁, 𑀲𑀩𑁆𑀩𑀁 𑀯𑀺𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀢𑀢𑁆𑀣𑁂𑀯 𑀯𑀼𑀢𑁆𑀢𑀁. 𑀬𑁄 𑀧𑀦 𑀅𑀚𑀸𑀦𑀦𑀓𑁄 𑀪𑀺𑀓𑁆𑀔𑀼 𑀅𑀭𑀡𑀻𑀲𑀳𑀺𑀢𑁂𑀦 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀢𑁆𑀣𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀫𑀻’’𑀢𑀺 𑀯𑀤𑀢𑀺, ‘‘𑀚𑀸𑀮𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄, ‘‘𑀳𑀢𑁆𑀣𑁄 𑀟𑀬𑁆𑀳𑀢𑀻’’𑀢𑀺 𑀯𑀤𑀢𑀺, ‘‘𑀬𑀣𑀸 𑀦 𑀟𑀬𑁆𑀳𑀢𑀺 𑀢𑀣𑀸 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. ‘‘𑀪𑀽𑀫𑀺𑀬𑀁 𑀧𑀸𑀢𑁂𑀳𑀻’’𑀢𑀺 𑀧𑀦 𑀦 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀳𑀢𑁆𑀣𑁂 𑀟𑀬𑁆𑀳𑀫𑀸𑀦𑁂 𑀧𑀸𑀢𑁂𑀢𑀺 ‘‘𑀧𑀣𑀯𑀺𑀁 𑀤𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀧𑀸𑀢𑀺𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. 𑀧𑀢𑀺𑀢𑀝𑁆𑀞𑀸𑀦𑁂 𑀧𑀦 𑀅𑀕𑁆𑀕𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁.

𑁮𑁮. 𑀅𑀦𑀸𑀧𑀢𑁆𑀢𑀺 𑀇𑀫𑀁 𑀚𑀸𑀦𑀸𑀢𑀺𑀆𑀤𑀻𑀲𑀼 ‘‘𑀇𑀫𑀲𑁆𑀲 𑀣𑀫𑁆𑀪𑀲𑁆𑀲 𑀆𑀯𑀸𑀝𑀁 𑀚𑀸𑀦, 𑀫𑀳𑀸𑀫𑀢𑁆𑀢𑀺𑀓𑀁 𑀚𑀸𑀦, 𑀣𑀼𑀲𑀫𑀢𑁆𑀢𑀺𑀓𑀁 𑀚𑀸𑀦, 𑀫𑀳𑀸𑀫𑀢𑁆𑀢𑀺𑀓𑀁 𑀤𑁂𑀳𑀺, 𑀣𑀼𑀲𑀫𑀢𑁆𑀢𑀺𑀓𑀁 𑀤𑁂𑀳𑀺, 𑀫𑀢𑁆𑀢𑀺𑀓𑀁 𑀆𑀳𑀭, 𑀧𑀁𑀲𑀼𑀁 𑀆𑀳𑀭, 𑀫𑀢𑁆𑀢𑀺𑀓𑀸𑀬 𑀅𑀢𑁆𑀣𑁄, 𑀧𑀁𑀲𑀼𑀦𑀸 𑀅𑀢𑁆𑀣𑁄, 𑀇𑀫𑀲𑁆𑀲 𑀣𑀫𑁆𑀪𑀲𑁆𑀲 𑀆𑀯𑀸𑀝𑀁 𑀓𑀧𑁆𑀧𑀺𑀬𑀁 𑀓𑀭𑁄𑀳𑀺, 𑀇𑀫𑀁 𑀫𑀢𑁆𑀢𑀺𑀓𑀁 𑀓𑀧𑁆𑀧𑀺𑀬𑀁 𑀓𑀭𑁄𑀳𑀺, 𑀇𑀫𑀁 𑀧𑀁𑀲𑀼𑀁 𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀧𑀸𑀲𑀸𑀡𑀭𑀼𑀓𑁆𑀔𑀸𑀤𑀻𑀦𑀺 𑀯𑀸 𑀧𑀯𑀝𑁆𑀝𑁂𑀦𑁆𑀢𑀲𑁆𑀲 𑀓𑀢𑁆𑀢𑀭𑀤𑀡𑁆𑀟𑁂𑀦 𑀯𑀸 𑀆𑀳𑀘𑁆𑀘 𑀆𑀳𑀘𑁆𑀘 𑀕𑀘𑁆𑀙𑀦𑁆𑀢𑀲𑁆𑀲 𑀧𑀣𑀯𑀻 𑀪𑀺𑀚𑁆𑀚𑀢𑀺, 𑀲𑀸 ‘‘𑀢𑁂𑀦 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀲𑀜𑁆𑀘𑀺𑀘𑁆𑀘 𑀅𑀪𑀺𑀦𑁆𑀦𑀢𑁆𑀢𑀸 𑀅𑀲𑀜𑁆𑀘𑀺𑀘𑁆𑀘 𑀪𑀺𑀦𑁆𑀦𑀸 𑀦𑀸𑀫 𑀳𑁄𑀢𑀺. 𑀇𑀢𑀺 𑀅𑀲𑀜𑁆𑀘𑀺𑀘𑁆𑀘 𑀪𑀺𑀦𑁆𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀲𑀢𑀺𑀬𑀸𑀢𑀺 𑀅𑀜𑁆𑀜𑀯𑀺𑀳𑀺𑀢𑁄 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀓𑀺𑀜𑁆𑀘𑀺 𑀓𑀣𑁂𑀦𑁆𑀢𑁄 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀯𑀸 𑀓𑀢𑁆𑀢𑀭𑀬𑀝𑁆𑀞𑀺𑀬𑀸 𑀯𑀸 𑀧𑀣𑀯𑀺𑀁 𑀯𑀺𑀮𑀺𑀔𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀏𑀯𑀁 𑀅𑀲𑀢𑀺𑀬𑀸 𑀯𑀺𑀮𑀺𑀔𑀦𑁆𑀢𑀲𑁆𑀲 𑀯𑀸 𑀪𑀺𑀦𑁆𑀤𑀦𑁆𑀢𑀲𑁆𑀲 𑀯𑀸 𑀅𑀦𑀸𑀧𑀢𑁆𑀢𑀺. 𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀅𑀦𑁆𑀢𑁄𑀕𑁂𑀳𑁂 𑀑𑀯𑀝𑁆𑀞𑀁 𑀙𑀦𑁆𑀦𑀁 𑀧𑀣𑀯𑀺𑀁 ‘‘𑀅𑀓𑀧𑁆𑀧𑀺𑀬𑀧𑀣𑀯𑀻’’𑀢𑀺 𑀦 𑀚𑀸𑀦𑀸𑀢𑀺, ‘‘𑀓𑀧𑁆𑀧𑀺𑀬𑀧𑀣𑀯𑀻’’𑀢𑀺 𑀲𑀜𑁆𑀜𑀸𑀬 𑀯𑀺𑀓𑁄𑀧𑁂𑀢𑀺, ‘‘𑀔𑀡𑀸𑀫𑀺 𑀪𑀺𑀦𑁆𑀤𑀸𑀫𑀺 𑀤𑀳𑀸𑀫𑀻’’𑀢𑀺 𑀯𑀸 𑀦 𑀚𑀸𑀦𑀸𑀢𑀺, 𑀓𑁂𑀯𑀮𑀁 𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀔𑀡𑀺𑀢𑁆𑀢𑀸𑀤𑀻𑀦𑀺 𑀯𑀸 𑀞𑀧𑁂𑀢𑀺, 𑀟𑀬𑁆𑀳𑀫𑀸𑀦𑀳𑀢𑁆𑀣𑁄 𑀯𑀸 𑀅𑀕𑁆𑀕𑀺𑀁 𑀧𑀸𑀢𑁂𑀢𑀺, 𑀏𑀯𑀁 𑀅𑀚𑀸𑀦𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀧𑀣𑀯𑀻𑀔𑀡𑀦𑀲𑀺𑀓𑁆𑀔𑀸𑀧𑀤𑀁 𑀤𑀲𑀫𑀁.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀫𑀼𑀲𑀸𑀯𑀸𑀤𑀯𑀕𑁆𑀕𑁄 𑀧𑀞𑀫𑁄.

𑁨. 𑀪𑀽𑀢𑀕𑀸𑀫𑀯𑀕𑁆𑀕𑁄

𑁧. 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁯. 𑀲𑁂𑀦𑀸𑀲𑀦𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀅𑀦𑀸𑀤𑀺𑀬𑀦𑁆𑀢𑁄𑀢𑀺 𑀢𑀲𑁆𑀲𑀸 𑀯𑀘𑀦𑀁 𑀅𑀕𑀡𑁆𑀳𑀦𑁆𑀢𑁄. 𑀤𑀸𑀭𑀓𑀲𑁆𑀲 𑀩𑀸𑀳𑀼𑀁 𑀆𑀓𑁄𑀝𑁂𑀲𑀻𑀢𑀺 𑀉𑀓𑁆𑀔𑀺𑀢𑁆𑀢𑀁 𑀨𑀭𑀲𑀼𑀁 𑀦𑀺𑀕𑁆𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀦𑀼𑀲𑁆𑀲𑀸𑀦𑀁 𑀘𑀓𑁆𑀔𑀼𑀯𑀺𑀲𑀬𑀸𑀢𑀻𑀢𑁂 𑀫𑀳𑀸𑀭𑀸𑀚𑀲𑀦𑁆𑀢𑀺𑀓𑀸 𑀮𑀤𑁆𑀥𑁂 𑀭𑀼𑀓𑁆𑀔𑀝𑁆𑀞𑀓𑀤𑀺𑀩𑁆𑀩𑀯𑀺𑀫𑀸𑀦𑁂 𑀦𑀺𑀧𑀦𑁆𑀦𑀲𑁆𑀲 𑀤𑀸𑀭𑀓𑀲𑁆𑀲 𑀩𑀸𑀳𑀼𑀁 𑀣𑀦𑀫𑀽𑀮𑁂𑀬𑁂𑀯 𑀙𑀺𑀦𑁆𑀤𑀺. 𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀦𑁆𑀢𑀺𑀆𑀤𑀺𑀫𑁆𑀳𑀺 𑀅𑀬𑀁 𑀲𑀗𑁆𑀔𑁂𑀧𑀯𑀡𑁆𑀡𑀦𑀸 𑁋 𑀳𑀺𑀫𑀯𑀦𑁆𑀢𑁂 𑀓𑀺𑀭 𑀧𑀓𑁆𑀔𑀤𑀺𑀯𑀲𑁂𑀲𑀼 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄 𑀳𑁄𑀢𑀺, 𑀢𑀢𑁆𑀣 𑀭𑀼𑀓𑁆𑀔𑀥𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀢𑁆𑀯𑀁 𑀭𑀼𑀓𑁆𑀔𑀥𑀫𑁆𑀫𑁂 𑀞𑀺𑀢𑀸 𑀦 𑀞𑀺𑀢𑀸’’𑀢𑀺? 𑀭𑀼𑀓𑁆𑀔𑀥𑀫𑁆𑀫𑁄 𑀦𑀸𑀫 𑀭𑀼𑀓𑁆𑀔𑁂 𑀙𑀺𑀚𑁆𑀚𑀫𑀸𑀦𑁂 𑀭𑀼𑀓𑁆𑀔𑀤𑁂𑀯𑀢𑀸𑀬 𑀫𑀦𑁄𑀧𑀤𑁄𑀲𑀲𑁆𑀲 𑀅𑀓𑀭𑀡𑀁. 𑀢𑀢𑁆𑀣 𑀬𑀸 𑀤𑁂𑀯𑀢𑀸 𑀭𑀼𑀓𑁆𑀔𑀥𑀫𑁆𑀫𑁂 𑀅𑀝𑁆𑀞𑀺𑀢𑀸 𑀳𑁄𑀢𑀺, 𑀲𑀸 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑀁 𑀧𑀯𑀺𑀲𑀺𑀢𑀼𑀁 𑀦 𑀮𑀪𑀢𑀺. 𑀇𑀢𑀺 𑀲𑀸 𑀤𑁂𑀯𑀢𑀸 𑀇𑀫𑀜𑁆𑀘 𑀭𑀼𑀓𑁆𑀔𑀥𑀫𑁆𑀫𑁂 𑀅𑀝𑁆𑀞𑀸𑀦𑀧𑀘𑁆𑀘𑀬𑀁 𑀆𑀤𑀻𑀦𑀯𑀁 𑀅𑀤𑁆𑀤𑀲, 𑀪𑀕𑀯𑀢𑁄 𑀘 𑀲𑀫𑁆𑀫𑀼𑀔𑀸 𑀲𑀼𑀢𑀧𑀼𑀩𑁆𑀩𑀥𑀫𑁆𑀫𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀢𑀣𑀸𑀕𑀢𑀲𑁆𑀲 𑀙𑀤𑁆𑀤𑀦𑁆𑀢𑀸𑀤𑀺𑀓𑀸𑀮𑁂 𑀧𑀼𑀩𑁆𑀩𑀘𑀭𑀺𑀢𑀁 𑀅𑀦𑀼𑀲𑁆𑀲𑀭𑀺. 𑀢𑁂𑀦𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁…𑀧𑁂… 𑀯𑁄𑀭𑁄𑀧𑁂𑀬𑁆𑀬’’𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀬𑁆𑀬𑀦𑁆𑀢𑀺 𑀇𑀤𑀁 𑀧𑀦𑀲𑁆𑀲𑀸 ‘‘𑀅𑀬𑀁 𑀪𑀺𑀓𑁆𑀔𑀼 𑀲𑀧𑀺𑀢𑀺𑀓𑁄 𑀧𑀼𑀢𑁆𑀢𑁄, 𑀅𑀤𑁆𑀥𑀸 𑀪𑀕𑀯𑀸 𑀇𑀫𑀁 𑀇𑀫𑀲𑁆𑀲 𑀅𑀚𑁆𑀛𑀸𑀘𑀸𑀭𑀁 𑀲𑀼𑀢𑁆𑀯𑀸 𑀫𑀭𑀺𑀬𑀸𑀤𑀁 𑀩𑀦𑁆𑀥𑀺𑀲𑁆𑀲𑀢𑀺, 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀢𑀻’’𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀦𑁆𑀢𑀺𑀬𑀸 𑀅𑀳𑁄𑀲𑀺. 𑀲𑀘𑀚𑁆𑀚 𑀢𑁆𑀯𑀁 𑀤𑁂𑀯𑀢𑁂𑀢𑀺 𑀲𑀘𑁂 𑀅𑀚𑁆𑀚 𑀢𑁆𑀯𑀁 𑀤𑁂𑀯𑀢𑁂. 𑀧𑀲𑀯𑁂𑀬𑁆𑀬𑀸𑀲𑀻𑀢𑀺 𑀚𑀦𑁂𑀬𑁆𑀬𑀸𑀲𑀺 𑀉𑀧𑁆𑀧𑀸𑀤𑁂𑀬𑁆𑀬𑀸𑀲𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀪𑀕𑀯𑀸 𑀢𑀁 𑀤𑁂𑀯𑀢𑀁 𑀲𑀜𑁆𑀜𑀸𑀧𑁂𑀦𑁆𑀢𑁄 𑁋

‘‘𑀬𑁄 𑀯𑁂 𑀉𑀧𑁆𑀧𑀢𑀺𑀢𑀁 𑀓𑁄𑀥𑀁, 𑀭𑀣𑀁 𑀪𑀦𑁆𑀢𑀁𑀯 𑀯𑀸𑀭𑀬𑁂;

𑀢𑀫𑀳𑀁 𑀲𑀸𑀭𑀣𑀺𑀁 𑀩𑁆𑀭𑀽𑀫𑀺, 𑀭𑀲𑁆𑀫𑀺𑀕𑁆𑀕𑀸𑀳𑁄 𑀇𑀢𑀭𑁄 𑀚𑀦𑁄’’𑀢𑀺. (𑀥. 𑀧. 𑁨𑁨𑁨);

𑀇𑀫𑀁 𑀕𑀸𑀣𑀫𑀪𑀸𑀲𑀺. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑀸 𑀤𑁂𑀯𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀧𑀼𑀦 𑀪𑀕𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑁋

‘‘𑀬𑁄 𑀉𑀧𑁆𑀧𑀢𑀺𑀢𑀁 𑀯𑀺𑀦𑁂𑀢𑀺 𑀓𑁄𑀥𑀁, 𑀯𑀺𑀲𑀝𑀁 𑀲𑀧𑁆𑀧𑀯𑀺𑀲𑀁𑀯 𑀑𑀲𑀥𑁂𑀳𑀺;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡’’𑀦𑁆𑀢𑀺. (𑀲𑀼. 𑀦𑀺. 𑁧);

𑀇𑀫𑀁 𑀕𑀸𑀣𑀫𑀪𑀸𑀲𑀺. 𑀢𑀢𑁆𑀭 𑀧𑀞𑀫𑀕𑀸𑀣𑀸 𑀥𑀫𑁆𑀫𑀧𑀤𑁂 𑀲𑀗𑁆𑀕𑀳𑀁 𑀆𑀭𑀼𑀴𑁆𑀳𑀸, 𑀤𑀼𑀢𑀺𑀬𑀸 𑀲𑀼𑀢𑁆𑀢𑀦𑀺𑀧𑀸𑀢𑁂, 𑀯𑀢𑁆𑀣𑀼 𑀧𑀦 𑀯𑀺𑀦𑀬𑁂𑀢𑀺. 𑀅𑀣 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀬𑁂𑀯 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀯𑀲𑀦𑀝𑁆𑀞𑀸𑀦𑀁 𑀆𑀯𑀚𑁆𑀚𑀦𑁆𑀢𑁄 𑀧𑀢𑀺𑀭𑀽𑀧𑀁 𑀞𑀸𑀦𑀁 𑀤𑀺𑀲𑁆𑀯𑀸 ‘‘𑀕𑀘𑁆𑀙, 𑀤𑁂𑀯𑀢𑁂, 𑀅𑀲𑀼𑀓𑀲𑁆𑀫𑀺𑀁 𑀑𑀓𑀸𑀲𑁂 𑀭𑀼𑀓𑁆𑀔𑁄 𑀯𑀺𑀯𑀺𑀢𑁆𑀢𑁄, 𑀢𑀲𑁆𑀫𑀺𑀁 𑀉𑀧𑀕𑀘𑁆𑀙𑀸’’𑀢𑀺 𑀆𑀳. 𑀲𑁄 𑀓𑀺𑀭 𑀭𑀼𑀓𑁆𑀔𑁄 𑀦 𑀆𑀴𑀯𑀺𑀭𑀝𑁆𑀞𑁂, 𑀚𑁂𑀢𑀯𑀦𑀲𑁆𑀲 𑀅𑀦𑁆𑀢𑁄𑀧𑀭𑀺𑀓𑁆𑀔𑁂𑀧𑁂, 𑀬𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀧𑀭𑀺𑀕𑁆𑀕𑀳𑁄 𑀅𑀳𑁄𑀲𑀺, 𑀲𑁄 𑀘𑀼𑀢𑁄; 𑀢𑀲𑁆𑀫𑀸 ‘‘𑀯𑀺𑀯𑀺𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄. 𑀢𑀢𑁄 𑀧𑀝𑁆𑀞𑀸𑀬 𑀘 𑀧𑀦 𑀲𑀸 𑀤𑁂𑀯𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄 𑀮𑀤𑁆𑀥𑀧𑀭𑀺𑀳𑀸𑀭𑀸 𑀩𑀼𑀤𑁆𑀥𑀼𑀧𑀝𑁆𑀞𑀸𑀬𑀺𑀓𑀸 𑀅𑀳𑁄𑀲𑀺. 𑀬𑀤𑀸 𑀤𑁂𑀯𑀢𑀸𑀲𑀫𑀸𑀕𑀫𑁄 𑀳𑁄𑀢𑀺, 𑀢𑀤𑀸 𑀫𑀳𑁂𑀲𑀓𑁆𑀔𑀤𑁂𑀯𑀢𑀸𑀲𑀼 𑀆𑀕𑀘𑁆𑀙𑀦𑁆𑀢𑀻𑀲𑀼 𑀅𑀜𑁆𑀜𑀸 𑀅𑀧𑁆𑀧𑁂𑀲𑀓𑁆𑀔𑀸 𑀤𑁂𑀯𑀢𑀸 𑀬𑀸𑀯 𑀫𑀳𑀸𑀲𑀫𑀼𑀤𑁆𑀤𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀸 𑀢𑀸𑀯 𑀧𑀝𑀺𑀓𑁆𑀓𑀫𑀦𑁆𑀢𑀺. 𑀅𑀬𑀁 𑀧𑀦 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸𑀯 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀬𑀫𑁆𑀧𑀺 𑀧𑀞𑀫𑀬𑀸𑀫𑁂 𑀪𑀺𑀓𑁆𑀔𑀽 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀫𑀚𑁆𑀛𑀺𑀫𑀬𑀸𑀫𑁂 𑀤𑁂𑀯𑀢𑀸, 𑀢𑀁 𑀲𑀩𑁆𑀩𑀁 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀡𑀸𑀢𑀺. 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑀸𑀦𑁄𑀧𑀺 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀢𑀁 𑀤𑁂𑀯𑀢𑀁 𑀤𑀺𑀲𑁆𑀯𑀸𑀯 𑀕𑀘𑁆𑀙𑀦𑁆𑀢𑀺.

𑁯𑁦. 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬𑀸𑀢𑀺 𑀏𑀢𑁆𑀣 𑀪𑀯𑀦𑁆𑀢𑀺 𑀅𑀳𑀼𑀯𑀼𑀜𑁆𑀘𑀸𑀢𑀺 𑀪𑀽𑀢𑀸; 𑀚𑀸𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀚𑀸𑀢𑀸 𑀯𑀟𑁆𑀠𑀺𑀢𑀸 𑀘𑀸𑀢𑀺 𑀅𑀢𑁆𑀣𑁄. 𑀕𑀸𑀫𑁄𑀢𑀺 𑀭𑀸𑀲𑀺; 𑀪𑀽𑀢𑀸𑀦𑀁 𑀕𑀸𑀫𑁄𑀢𑀺 𑀪𑀽𑀢𑀕𑀸𑀫𑁄; 𑀪𑀽𑀢𑀸 𑀏𑀯 𑀯𑀸 𑀕𑀸𑀫𑁄 𑀪𑀽𑀢𑀕𑀸𑀫𑁄; 𑀧𑀢𑀺𑀝𑁆𑀞𑀺𑀢𑀳𑀭𑀺𑀢𑀢𑀺𑀡𑀭𑀼𑀓𑁆𑀔𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀸𑀢𑀩𑁆𑀬𑀲𑁆𑀲 𑀪𑀸𑀯𑁄 𑀧𑀸𑀢𑀩𑁆𑀬𑀢𑀸; 𑀙𑁂𑀤𑀦𑀪𑁂𑀤𑀦𑀸𑀤𑀻𑀳𑀺 𑀬𑀣𑀸𑀭𑀼𑀘𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬; 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀳𑁂𑀢𑀼, 𑀪𑀽𑀢𑀕𑀸𑀫𑀲𑁆𑀲 𑀙𑁂𑀤𑀦𑀸𑀤𑀺𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄.

𑁯𑁧. 𑀇𑀤𑀸𑀦𑀺 𑀢𑀁 𑀪𑀽𑀢𑀕𑀸𑀫𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀪𑀽𑀢𑀕𑀸𑀫𑁄 𑀦𑀸𑀫 𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀽𑀢𑀕𑀸𑀫𑁄 𑀦𑀸𑀫𑀸𑀢𑀺 𑀪𑀽𑀢𑀕𑀸𑀫𑀁 𑀉𑀤𑁆𑀥𑀭𑀺𑀢𑁆𑀯𑀸 𑀬𑀲𑁆𑀫𑀺𑀁 𑀲𑀢𑀺 𑀪𑀽𑀢𑀕𑀸𑀫𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀻’’𑀢𑀺 𑀆𑀳𑀸𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀫𑀽𑀮𑁂 𑀚𑀸𑀬𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀦 𑀲𑀫𑁂𑀦𑁆𑀢𑀺. 𑀦 𑀳𑀺 𑀫𑀽𑀮𑀩𑀻𑀚𑀸𑀤𑀻𑀦𑀺 𑀫𑀽𑀮𑀸𑀤𑀻𑀲𑀼 𑀚𑀸𑀬𑀦𑁆𑀢𑀺, 𑀫𑀽𑀮𑀸𑀤𑀻𑀲𑀼 𑀚𑀸𑀬𑀫𑀸𑀦𑀸𑀦𑀺 𑀧𑀦 𑀢𑀸𑀦𑀺 𑀩𑀻𑀚𑀸𑀓𑀢𑀸𑀦𑀺, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀪𑀽𑀢𑀕𑀸𑀫𑁄 𑀦𑀸𑀫𑀸𑀢𑀺 𑀯𑀺𑀪𑀚𑀺𑀢𑀩𑁆𑀩𑀧𑀤𑀁. 𑀧𑀜𑁆𑀘𑀸𑀢𑀺 𑀢𑀲𑁆𑀲 𑀯𑀺𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀩𑀻𑀚𑀚𑀸𑀢𑀸𑀦𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀢𑀲𑁆𑀲𑀢𑁆𑀣𑁄 𑁋 𑀩𑀻𑀚𑁂𑀳𑀺 𑀚𑀸𑀢𑀸𑀦𑀺 𑀩𑀻𑀚𑀚𑀸𑀢𑀸𑀦𑀺; 𑀭𑀼𑀓𑁆𑀔𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀧𑀭𑁄 𑀦𑀬𑁄 𑁋 𑀩𑀻𑀚𑀸𑀦𑀺 𑀘 𑀢𑀸𑀦𑀺 𑀯𑀺𑀚𑀸𑀢𑀸𑀦𑀺 𑀘 𑀧𑀲𑀽𑀢𑀸𑀦𑀺 𑀦𑀺𑀩𑁆𑀩𑀢𑁆𑀢𑀧𑀡𑁆𑀡𑀫𑀽𑀮𑀸𑀦𑀻𑀢𑀺 𑀩𑀻𑀚𑀚𑀸𑀢𑀸𑀦𑀺. 𑀏𑀢𑁂𑀦 𑀅𑀮𑁆𑀮𑀯𑀸𑀮𑀺𑀓𑀸𑀤𑀻𑀲𑀼 𑀞𑀧𑀺𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑀧𑀡𑁆𑀡𑀫𑀽𑀮𑀸𑀦𑀁 𑀲𑀺𑀗𑁆𑀕𑀺𑀯𑁂𑀭𑀸𑀤𑀻𑀦𑀁 𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀺.

𑀇𑀤𑀸𑀦𑀺 𑀬𑁂𑀳𑀺 𑀩𑀻𑀚𑁂𑀳𑀺 𑀚𑀸𑀢𑀢𑁆𑀢𑀸 𑀭𑀼𑀓𑁆𑀔𑀸𑀤𑀻𑀦𑀺 𑀩𑀻𑀚𑀚𑀸𑀢𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀽𑀮𑀩𑀻𑀚’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀲𑀁 𑀉𑀤𑁆𑀤𑁂𑀲𑁄 𑀧𑀸𑀓𑀝𑁄 𑀏𑀯. 𑀦𑀺𑀤𑁆𑀤𑁂𑀲𑁂 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀫𑀽𑀮𑁂 𑀚𑀸𑀬𑀦𑁆𑀢𑀺 𑀫𑀽𑀮𑁂 𑀲𑀜𑁆𑀚𑀸𑀬𑀦𑁆𑀢𑀻𑀢𑀺 𑀏𑀢𑁆𑀣 𑀩𑀻𑀚𑀢𑁄 𑀦𑀺𑀩𑁆𑀩𑀢𑁆𑀢𑁂𑀦 𑀩𑀻𑀚𑀁 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀆𑀮𑀼𑀯𑀓𑀲𑁂𑀭𑀼𑀓𑀫𑀮𑀼𑀧𑁆𑀧𑀮𑀧𑀼𑀡𑁆𑀟𑀭𑀻𑀓𑀓𑀼𑀯𑀮𑀬𑀓𑀦𑁆𑀤𑀧𑀸𑀝𑀮𑀺𑀫𑀽𑀮𑀸𑀤𑀺𑀪𑁂𑀤𑁂 𑀫𑀽𑀮𑁂 𑀕𑀘𑁆𑀙𑀯𑀮𑁆𑀮𑀺𑀭𑀼𑀓𑁆𑀔𑀸𑀤𑀻𑀦𑀺 𑀚𑀸𑀬𑀦𑁆𑀢𑀺 𑀲𑀜𑁆𑀚𑀸𑀬𑀦𑁆𑀢𑀺, 𑀢𑀸𑀦𑀺 𑀬𑀫𑁆𑀳𑀺 𑀫𑀽𑀮𑁂 𑀚𑀸𑀬𑀦𑁆𑀢𑀺 𑀘𑁂𑀯 𑀲𑀜𑁆𑀚𑀸𑀬𑀦𑁆𑀢𑀺 𑀘 𑀢𑀜𑁆𑀘, 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 𑀳𑀮𑀺𑀤𑁆𑀤𑀸𑀤𑀺 𑀘 𑀲𑀩𑁆𑀩𑀫𑁆𑀧𑀺 𑀏𑀢𑀁 𑀫𑀽𑀮𑀩𑀻𑀚𑀁 𑀦𑀸𑀫. 𑀏𑀲𑁂𑀯 𑀦𑀬𑁄 𑀔𑀦𑁆𑀥𑀩𑀻𑀚𑀸𑀤𑀻𑀲𑀼. 𑀬𑁂𑀯𑀸𑀧𑀦𑀓𑀔𑀦𑁆𑀥𑀩𑀻𑀚𑁂𑀲𑀼 𑀧𑀦𑁂𑀢𑁆𑀣 𑀅𑀫𑁆𑀩𑀸𑀝𑀓𑀇𑀦𑁆𑀤𑀲𑀸𑀮𑀦𑀼𑀳𑀻𑀧𑀸𑀴𑀺𑀪𑀤𑁆𑀤𑀓𑀡𑀺𑀓𑀸𑀭𑀸𑀤𑀻𑀦𑀺 𑀔𑀦𑁆𑀥𑀩𑀻𑀚𑀸𑀦𑀺, 𑀅𑀫𑀽𑀮𑀯𑀮𑁆𑀮𑀺 𑀘𑀢𑀼𑀭𑀲𑁆𑀲𑀯𑀮𑁆𑀮𑀺𑀓𑀡𑀯𑀻𑀭𑀸𑀤𑀻𑀦𑀺 𑀨𑀴𑀼𑀩𑀻𑀚𑀸𑀦𑀺 𑀫𑀓𑀘𑀺𑀲𑀼𑀫𑀦𑀚𑀬𑀲𑀼𑀫𑀦𑀸𑀤𑀻𑀦𑀺 𑀅𑀕𑁆𑀕𑀩𑀻𑀚𑀸𑀦𑀺, 𑀅𑀫𑁆𑀩𑀚𑀫𑁆𑀩𑀽𑀧𑀦𑀲𑀝𑁆𑀞𑀺𑀆𑀤𑀻𑀦𑀺 𑀩𑀻𑀚𑀩𑀻𑀚𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺.

𑁯𑁨. 𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀢𑀢𑁆𑀣 𑀲𑀜𑁆𑀜𑀸𑀯𑀲𑁂𑀦 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀪𑁂𑀤𑀁 𑀧𑀸𑀢𑀩𑁆𑀬𑀢𑀸𑀪𑁂𑀤𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀩𑀻𑀚𑁂 𑀩𑀻𑀚𑀲𑀜𑁆𑀜𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 ‘‘𑀲𑀸𑀮𑀻𑀦𑀁 𑀘𑁂𑀧𑀺 𑀑𑀤𑀦𑀁 𑀪𑀼𑀜𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁭𑁬) 𑀲𑀸𑀮𑀺𑀢𑀡𑁆𑀟𑀼𑀮𑀸𑀦𑀁 𑀑𑀤𑀦𑁄 ‘‘𑀲𑀸𑀮𑀻𑀦𑀁 𑀑𑀤𑀦𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀩𑀻𑀚𑀢𑁄 𑀲𑀫𑁆𑀪𑀽𑀢𑁄 𑀪𑀽𑀢𑀕𑀸𑀫𑁄 ‘‘𑀩𑀻𑀚’’𑀦𑁆𑀢𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀧𑀦 ‘‘𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁦) 𑀯𑀼𑀢𑁆𑀢𑀁 𑀪𑀽𑀢𑀕𑀸𑀫𑀧𑀭𑀺𑀫𑁄𑀘𑀦𑀁 𑀓𑀢𑁆𑀯𑀸 𑀞𑀧𑀺𑀢𑀁 𑀩𑀻𑀚𑀁, 𑀢𑀁 𑀤𑀼𑀓𑁆𑀓𑀝𑀯𑀢𑁆𑀣𑀼. 𑀅𑀣 𑀯𑀸 𑀬𑀤𑁂𑀢𑀁 ‘‘𑀪𑀽𑀢𑀕𑀸𑀫𑁄 𑀦𑀸𑀫𑀸’’𑀢𑀺 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑀲𑁆𑀲 𑀆𑀤𑀺𑀧𑀤𑀁, 𑀢𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀬𑀁 𑀩𑀻𑀚𑀁 𑀪𑀽𑀢𑀕𑀸𑀫𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀺𑀁 𑀩𑀻𑀚𑁂 𑀩𑀻𑀚𑀲𑀜𑁆𑀜𑀻 𑀲𑀢𑁆𑀣𑀓𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀲𑀬𑀁 𑀯𑀸 𑀙𑀺𑀦𑁆𑀤𑀢𑀺 𑀅𑀜𑁆𑀜𑁂𑀦 𑀯𑀸 𑀙𑁂𑀤𑀸𑀧𑁂𑀢𑀺, 𑀧𑀸𑀲𑀸𑀡𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀲𑀬𑀁 𑀯𑀸 𑀪𑀺𑀦𑁆𑀤𑀢𑀺 𑀅𑀜𑁆𑀜𑁂𑀦 𑀯𑀸 𑀪𑁂𑀤𑀸𑀧𑁂𑀢𑀺, 𑀅𑀕𑁆𑀕𑀺𑀁 𑀉𑀧𑀲𑀁𑀳𑀭𑀺𑀢𑁆𑀯𑀸 𑀲𑀬𑀁 𑀯𑀸 𑀧𑀘𑀢𑀺 𑀅𑀜𑁆𑀜𑁂𑀦 𑀯𑀸 𑀧𑀘𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀭𑀼𑀢𑀁 𑀧𑀦 𑀕𑀳𑁂𑀢𑁆𑀯𑀸 𑀪𑀽𑀢𑀕𑀸𑀫𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀩𑀻𑀚𑀲𑁆𑀲 𑀙𑀺𑀦𑁆𑀤𑀦𑀸𑀤𑀺𑀪𑁂𑀤𑀸𑀬 𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀦 𑀯𑀢𑁆𑀢𑀩𑁆𑀩𑀁.

𑀅𑀬𑀜𑁆𑀳𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑀓𑀣𑀸 𑁋 𑀪𑀽𑀢𑀕𑀸𑀫𑀁 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀪𑀽𑀢𑀕𑀸𑀫𑀧𑀭𑀺𑀫𑁄𑀘𑀺𑀢𑀁 𑀧𑀜𑁆𑀘𑀯𑀺𑀥𑀫𑁆𑀧𑀺 𑀩𑀻𑀚𑀕𑀸𑀫𑀁 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑁄 𑀦𑀸𑀫𑁂𑀲 𑀅𑀢𑁆𑀣𑀺 𑀉𑀤𑀓𑀝𑁆𑀞𑁄, 𑀅𑀢𑁆𑀣𑀺 𑀣𑀮𑀝𑁆𑀞𑁄. 𑀢𑀢𑁆𑀣 𑀉𑀤𑀓𑀝𑁆𑀞𑁄 𑀲𑀸𑀲𑀧𑀫𑀢𑁆𑀢𑀺𑀓𑀸 𑀢𑀺𑀮𑀩𑀻𑀚𑀓𑀸𑀤𑀺𑀪𑁂𑀤𑀸 𑀲𑀧𑀡𑁆𑀡𑀺𑀓𑀸 𑀅𑀧𑀡𑁆𑀡𑀺𑀓𑀸 𑀘 𑀲𑀩𑁆𑀩𑀸 𑀲𑁂𑀯𑀸𑀮𑀚𑀸𑀢𑀺 𑀅𑀦𑁆𑀢𑀫𑀲𑁄 𑀉𑀤𑀓𑀧𑀧𑁆𑀧𑀝𑀓𑀁 𑀉𑀧𑀸𑀤𑀸𑀬 ‘‘𑀪𑀽𑀢𑀕𑀸𑀫𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀉𑀤𑀓𑀧𑀧𑁆𑀧𑀝𑀓𑁄 𑀦𑀸𑀫 𑀉𑀧𑀭𑀺 𑀣𑀤𑁆𑀥𑁄 𑀨𑀭𑀼𑀲𑀯𑀡𑁆𑀡𑁄, 𑀳𑁂𑀝𑁆𑀞𑀸 𑀫𑀼𑀤𑀼 𑀦𑀻𑀮𑀯𑀡𑁆𑀡𑁄 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀲 𑀲𑁂𑀯𑀸𑀮𑀲𑁆𑀲 𑀫𑀽𑀮𑀁 𑀑𑀭𑀽𑀳𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀁, 𑀢𑀲𑁆𑀲 𑀧𑀣𑀯𑀻 𑀞𑀸𑀦𑀁. 𑀬𑁄 𑀉𑀤𑀓𑁂 𑀲𑀜𑁆𑀘𑀭𑀢𑀺, 𑀢𑀲𑁆𑀲 𑀉𑀤𑀓𑀁. 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀉𑀤𑁆𑀥𑀭𑀺𑀢𑁆𑀯𑀸 𑀯𑀸 𑀞𑀸𑀦𑀦𑁆𑀢𑀭𑀁 𑀲𑀗𑁆𑀓𑀸𑀫𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀉𑀤𑀓𑁂 𑀲𑀜𑁆𑀘𑀭𑀦𑁆𑀢𑀁 𑀯𑀺𑀓𑁄𑀧𑁂𑀦𑁆𑀢𑀲𑁆𑀲𑁂𑀯 𑀧𑀸𑀘𑀺𑀢𑁆𑀢𑀺𑀬𑀁. 𑀳𑀢𑁆𑀣𑁂𑀳𑀺 𑀧𑀦 𑀇𑀢𑁄 𑀘𑀺𑀢𑁄 𑀘 𑀯𑀺𑀬𑀽𑀳𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀯𑀝𑁆𑀝𑀢𑀺, 𑀲𑀓𑀮𑀜𑁆𑀳𑀺 𑀉𑀤𑀓𑀁 𑀢𑀲𑁆𑀲 𑀞𑀸𑀦𑀁. 𑀢𑀲𑁆𑀫𑀸 𑀦 𑀲𑁄 𑀏𑀢𑁆𑀢𑀸𑀯𑀢𑀸 𑀞𑀸𑀦𑀦𑁆𑀢𑀭𑀁 𑀲𑀗𑁆𑀓𑀸𑀫𑀺𑀢𑁄 𑀳𑁄𑀢𑀺. 𑀉𑀤𑀓𑀢𑁄 𑀧𑀦 𑀉𑀤𑀓𑁂𑀦 𑀯𑀺𑀦𑀸 𑀲𑀜𑁆𑀘𑀺𑀘𑁆𑀘 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀉𑀤𑀓𑁂𑀦 𑀲𑀤𑁆𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀉𑀤𑀓𑁂 𑀧𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀭𑀺𑀲𑁆𑀲𑀸𑀯𑀦𑀦𑁆𑀢𑀭𑁂𑀦 𑀦𑀺𑀓𑁆𑀔𑀫𑀢𑀺, 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸𑀯 𑀉𑀤𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀉𑀧𑁆𑀧𑀮𑀺𑀦𑀻𑀧𑀤𑀼𑀫𑀺𑀦𑀻𑀆𑀤𑀻𑀦𑀺 𑀚𑀮𑀚𑀯𑀮𑁆𑀮𑀺𑀢𑀺𑀡𑀸𑀦𑀺 𑀉𑀤𑀓𑀢𑁄 𑀉𑀤𑁆𑀥𑀭𑀦𑁆𑀢𑀲𑁆𑀲 𑀯𑀸 𑀢𑀢𑁆𑀣𑁂𑀯 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀭𑁂𑀳𑀺 𑀉𑀧𑁆𑀧𑀸𑀝𑀺𑀢𑀸𑀦𑀺 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀢𑀸𑀦𑀺 𑀳𑀺 𑀩𑀻𑀚𑀕𑀸𑀫𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀢𑀺𑀮𑀩𑀻𑀚𑀓𑀲𑀸𑀲𑀧𑀫𑀢𑁆𑀢𑀓𑀲𑁂𑀯𑀸𑀮𑁄𑀧𑀺 𑀉𑀤𑀓𑀢𑁄 𑀉𑀤𑁆𑀥𑀢𑁄 𑀅𑀫𑀺𑀮𑀸𑀢𑁄 𑀅𑀕𑁆𑀕𑀩𑀻𑀚𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 ‘‘𑀅𑀦𑀦𑁆𑀢𑀓𑀢𑀺𑀮𑀩𑀻𑀚𑀓𑀉𑀤𑀓𑀧𑀧𑁆𑀧𑀝𑀓𑀸𑀤𑀻𑀦𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀲𑀫𑁆𑀧𑀼𑀡𑁆𑀡𑀪𑀽𑀢𑀕𑀸𑀫𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀦 𑀲𑀫𑁂𑀢𑀺, 𑀪𑀽𑀢𑀕𑀸𑀫𑁂 𑀳𑀺 𑀧𑀸𑀘𑀺𑀢𑁆𑀢𑀺𑀬𑀁, 𑀩𑀻𑀚𑀕𑀸𑀫𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀅𑀲𑀫𑁆𑀧𑀼𑀡𑁆𑀡𑀪𑀽𑀢𑀕𑀸𑀫𑁄 𑀦𑀸𑀫 𑀢𑀢𑀺𑀬𑁄 𑀓𑁄𑀝𑁆𑀞𑀸𑀲𑁄 𑀦𑁂𑀯 𑀧𑀸𑀴𑀺𑀬𑀁 𑀦 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑁄. 𑀅𑀣 𑀏𑀢𑀁 𑀩𑀻𑀚𑀕𑀸𑀫𑀲𑀗𑁆𑀕𑀳𑀁 𑀕𑀘𑁆𑀙𑀺𑀲𑁆𑀲𑀢𑀻𑀢𑀺, 𑀢𑀫𑁆𑀧𑀺 𑀦 𑀬𑀼𑀢𑁆𑀢𑀁, 𑀅𑀪𑀽𑀢𑀕𑀸𑀫𑀫𑀽𑀮𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 𑀩𑀻𑀚𑀕𑀸𑀫𑀲𑁆𑀲𑀸𑀢𑀺. 𑀅𑀧𑀺𑀘 ‘‘𑀕𑀭𑀼𑀓𑀮𑀳𑀼𑀓𑁂𑀲𑀼 𑀕𑀭𑀼𑀓𑁂 𑀞𑀸𑀢𑀩𑁆𑀩’’𑀦𑁆𑀢𑀺 𑀏𑀢𑀁 𑀯𑀺𑀦𑀬𑀮𑀓𑁆𑀔𑀡𑀁.

𑀣𑀮𑀝𑁆𑀞𑁂 𑁋 𑀙𑀺𑀦𑁆𑀦𑀭𑀼𑀓𑁆𑀔𑀸𑀦𑀁 𑀅𑀯𑀲𑀺𑀝𑁆𑀞𑁄 𑀳𑀭𑀺𑀢𑀔𑀸𑀡𑀼 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀓𑀓𑀼𑀥𑀓𑀭𑀜𑁆𑀚𑀧𑀺𑀬𑀗𑁆𑀕𑀼𑀧𑀦𑀲𑀸𑀤𑀻𑀦𑀁 𑀔𑀸𑀡𑀼 𑀉𑀤𑁆𑀥𑀁 𑀯𑀟𑁆𑀠𑀢𑀺, 𑀲𑁄 𑀪𑀽𑀢𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑁄. 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀻𑀦𑀁 𑀔𑀸𑀡𑀼 𑀉𑀤𑁆𑀥𑀁 𑀦 𑀯𑀟𑁆𑀠𑀢𑀺, 𑀲𑁄 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑁄. 𑀓𑀤𑀮𑀺𑀬𑀸 𑀧𑀦 𑀅𑀨𑀮𑀺𑀢𑀸𑀬 𑀔𑀸𑀡𑀼 𑀪𑀽𑀢𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑁄, 𑀨𑀮𑀺𑀢𑀸𑀬 𑀩𑀻𑀚𑀕𑀸𑀫𑁂𑀦. 𑀓𑀤𑀮𑀻 𑀧𑀦 𑀨𑀮𑀺𑀢𑀸 𑀬𑀸𑀯 𑀦𑀻𑀮𑀧𑀡𑁆𑀡𑀸, 𑀢𑀸𑀯 𑀪𑀽𑀢𑀕𑀸𑀫𑁂𑀦𑁂𑀯 𑀲𑀗𑁆𑀕𑀳𑀺𑀢𑀸, 𑀢𑀣𑀸 𑀨𑀮𑀺𑀢𑁄 𑀯𑁂𑀴𑀼. 𑀬𑀤𑀸 𑀧𑀦 𑀅𑀕𑁆𑀕𑀢𑁄 𑀧𑀝𑁆𑀞𑀸𑀬 𑀲𑀼𑀲𑁆𑀲𑀢𑀺, 𑀢𑀤𑀸 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀓𑀢𑀭𑀩𑀻𑀚𑀕𑀸𑀫𑁂𑀦? 𑀨𑀴𑀼𑀩𑀻𑀚𑀕𑀸𑀫𑁂𑀦. 𑀓𑀺𑀁 𑀢𑀢𑁄 𑀦𑀺𑀩𑁆𑀩𑀢𑁆𑀢𑀢𑀺? 𑀦 𑀓𑀺𑀜𑁆𑀘𑀺. 𑀬𑀤𑀺 𑀳𑀺 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀪𑀽𑀢𑀕𑀸𑀫𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑁂𑀬𑁆𑀬. 𑀇𑀦𑁆𑀤𑀲𑀸𑀮𑀸𑀤𑀺𑀭𑀼𑀓𑁆𑀔𑁂 𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀲𑀺𑀁 𑀓𑀭𑁄𑀦𑁆𑀢𑀺, 𑀓𑀺𑀜𑁆𑀘𑀸𑀧𑀺 𑀭𑀸𑀲𑀺𑀓𑀢𑀤𑀡𑁆𑀟𑀓𑁂𑀳𑀺 𑀭𑀢𑀦𑀧𑁆𑀧𑀫𑀸𑀡𑀸𑀧𑀺 𑀲𑀸𑀔𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀩𑀻𑀚𑀕𑀸𑀫𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀫𑀡𑁆𑀟𑀧𑀢𑁆𑀣𑀸𑀬 𑀯𑀸 𑀯𑀢𑀺𑀅𑀢𑁆𑀣𑀸𑀬 𑀯𑀸 𑀯𑀮𑁆𑀮𑀺𑀆𑀭𑁄𑀧𑀦𑀢𑁆𑀣𑀸𑀬 𑀯𑀸 𑀪𑀽𑀫𑀺𑀬𑀁 𑀦𑀺𑀔𑀡𑀦𑁆𑀢𑀺, 𑀫𑀽𑀮𑁂𑀲𑀼 𑀘𑁂𑀯 𑀧𑀡𑁆𑀡𑁂𑀲𑀼 𑀘 𑀦𑀺𑀕𑁆𑀕𑀢𑁂𑀲𑀼 𑀧𑀼𑀦 𑀪𑀽𑀢𑀕𑀸𑀫𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀫𑀽𑀮𑀫𑀢𑁆𑀢𑁂𑀲𑀼 𑀧𑀦 𑀧𑀡𑁆𑀡𑀫𑀢𑁆𑀢𑁂𑀲𑀼 𑀯𑀸 𑀦𑀺𑀕𑁆𑀕𑀢𑁂𑀲𑀼 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑀸 𑀏𑀯.

𑀬𑀸𑀦𑀺 𑀓𑀸𑀦𑀺𑀘𑀺 𑀩𑀻𑀚𑀸𑀦𑀺 𑀧𑀣𑀯𑀺𑀬𑀁 𑀯𑀸 𑀉𑀤𑀓𑁂𑀦 𑀲𑀺𑀜𑁆𑀘𑀺𑀢𑁆𑀯𑀸 𑀞𑀧𑀺𑀢𑀸𑀦𑀺, 𑀓𑀧𑀸𑀮𑀸𑀤𑀻𑀲𑀼 𑀯𑀸 𑀅𑀮𑁆𑀮𑀧𑀁𑀲𑀼𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀫𑀽𑀮𑀫𑀢𑁆𑀢𑁂 𑀧𑀡𑁆𑀡𑀫𑀢𑁆𑀢𑁂 𑀯𑀸 𑀦𑀺𑀕𑁆𑀕𑀢𑁂𑀧𑀺 𑀩𑀻𑀚𑀸𑀦𑀺𑀬𑁂𑀯. 𑀲𑀘𑁂𑀧𑀺 𑀫𑀽𑀮𑀸𑀦𑀺 𑀘 𑀉𑀧𑀭𑀺 𑀅𑀗𑁆𑀓𑀼𑀭𑁄 𑀘 𑀦𑀺𑀕𑁆𑀕𑀘𑁆𑀙𑀢𑀺, 𑀬𑀸𑀯 𑀅𑀗𑁆𑀓𑀼𑀭𑁄 𑀳𑀭𑀺𑀢𑁄 𑀦 𑀳𑁄𑀢𑀺, 𑀢𑀸𑀯 𑀩𑀻𑀚𑀸𑀦𑀺𑀬𑁂𑀯. 𑀫𑀼𑀕𑁆𑀕𑀸𑀤𑀻𑀦𑀁 𑀧𑀦 𑀧𑀡𑁆𑀡𑁂𑀲𑀼 𑀉𑀝𑁆𑀞𑀺𑀢𑁂𑀲𑀼 𑀯𑀻𑀳𑀺𑀆𑀤𑀻𑀦𑀁 𑀯𑀸 𑀅𑀗𑁆𑀓𑀼𑀭𑁂 𑀳𑀭𑀺𑀢𑁂 𑀦𑀻𑀮𑀧𑀡𑁆𑀡𑀯𑀡𑁆𑀡𑁂 𑀚𑀸𑀢𑁂 𑀪𑀽𑀢𑀕𑀸𑀫𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀢𑀸𑀮𑀝𑁆𑀞𑀻𑀦𑀁 𑀧𑀞𑀫𑀁 𑀲𑀽𑀓𑀭𑀤𑀸𑀞𑀸 𑀯𑀺𑀬 𑀫𑀽𑀮𑀁 𑀦𑀺𑀕𑁆𑀕𑀘𑁆𑀙𑀢𑀺. 𑀦𑀺𑀕𑁆𑀕𑀢𑁂𑀧𑀺 𑀬𑀸𑀯 𑀉𑀧𑀭𑀺 𑀧𑀢𑁆𑀢𑀯𑀝𑁆𑀝𑀺 𑀦 𑀦𑀺𑀕𑁆𑀕𑀘𑁆𑀙𑀢𑀺, 𑀢𑀸𑀯 𑀩𑀻𑀚𑀕𑀸𑀫𑁄𑀬𑁂𑀯. 𑀦𑀸𑀴𑀺𑀓𑁂𑀭𑀲𑁆𑀲 𑀢𑀘𑀁 𑀪𑀺𑀦𑁆𑀤𑀺𑀢𑁆𑀯𑀸 𑀤𑀦𑁆𑀢𑀲𑀽𑀘𑀺 𑀯𑀺𑀬 𑀅𑀗𑁆𑀓𑀼𑀭𑁄 𑀦𑀺𑀕𑁆𑀕𑀘𑁆𑀙𑀢𑀺, 𑀬𑀸𑀯 𑀫𑀺𑀕𑀲𑀺𑀗𑁆𑀕𑀲𑀤𑀺𑀲𑀸 𑀦𑀻𑀮𑀧𑀢𑁆𑀢𑀯𑀝𑁆𑀝𑀺 𑀦 𑀳𑁄𑀢𑀺, 𑀢𑀸𑀯 𑀩𑀻𑀚𑀕𑀸𑀫𑁄𑀬𑁂𑀯. 𑀫𑀽𑀮𑁂 𑀅𑀦𑀺𑀕𑁆𑀕𑀢𑁂𑀧𑀺 𑀢𑀸𑀤𑀺𑀲𑀸𑀬 𑀧𑀢𑁆𑀢𑀯𑀝𑁆𑀝𑀺𑀬𑀸 𑀚𑀸𑀢𑀸𑀬 𑀅𑀫𑀽𑀮𑀓𑀪𑀽𑀢𑀕𑀸𑀫𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺.

𑀅𑀫𑁆𑀩𑀝𑁆𑀞𑀺𑀆𑀤𑀻𑀦𑀺 𑀯𑀻𑀳𑀺𑀆𑀤𑀻𑀳𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀸𑀦𑀺. 𑀯𑀦𑁆𑀤𑀸𑀓𑀸 𑀯𑀸 𑀅𑀜𑁆𑀜𑀸 𑀯𑀸 𑀬𑀸 𑀓𑀸𑀘𑀺 𑀭𑀼𑀓𑁆𑀔𑁂 𑀚𑀸𑀬𑀺𑀢𑁆𑀯𑀸 𑀭𑀼𑀓𑁆𑀔𑀁 𑀑𑀢𑁆𑀣𑀭𑀢𑀺, 𑀭𑀼𑀓𑁆𑀔𑁄𑀯 𑀢𑀲𑁆𑀲𑀸 𑀞𑀸𑀦𑀁, 𑀢𑀁 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀯𑀸 𑀢𑀢𑁄 𑀉𑀤𑁆𑀥𑀭𑀦𑁆𑀢𑀲𑁆𑀲 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀏𑀓𑀸 𑀅𑀫𑀽𑀮𑀺𑀓𑀸 𑀮𑀢𑀸 𑀳𑁄𑀢𑀺, 𑀅𑀗𑁆𑀕𑀼𑀮𑀺𑀯𑁂𑀞𑀓𑁄 𑀯𑀺𑀬 𑀯𑀦𑀧𑁆𑀧𑀕𑀼𑀫𑁆𑀩𑀤𑀡𑁆𑀟𑀓𑁂 𑀯𑁂𑀞𑁂𑀢𑀺, 𑀢𑀲𑁆𑀲𑀸𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄. 𑀕𑁂𑀳𑀫𑀼𑀔𑀧𑀸𑀓𑀸𑀭𑀯𑁂𑀤𑀺𑀓𑀸𑀘𑁂𑀢𑀺𑀬𑀸𑀤𑀻𑀲𑀼 𑀦𑀻𑀮𑀯𑀡𑁆𑀡𑁄 𑀲𑁂𑀯𑀸𑀮𑁄 𑀳𑁄𑀢𑀺, 𑀬𑀸𑀯 𑀤𑁆𑀯𑁂 𑀢𑀻𑀡𑀺 𑀧𑀢𑁆𑀢𑀸𑀦𑀺 𑀦 𑀲𑀜𑁆𑀚𑀸𑀬𑀦𑁆𑀢𑀺 𑀢𑀸𑀯 𑀅𑀕𑁆𑀕𑀩𑀻𑀚𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀧𑀢𑁆𑀢𑁂𑀲𑀼 𑀚𑀸𑀢𑁂𑀲𑀼 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼. 𑀢𑀲𑁆𑀫𑀸 𑀢𑀸𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀲𑀼𑀥𑀸𑀮𑁂𑀧𑀫𑁆𑀧𑀺 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀮𑀺𑀢𑁆𑀢𑀲𑁆𑀲 𑀉𑀧𑀭𑀺𑀲𑁆𑀦𑁂𑀳𑀮𑁂𑀧𑁄 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀦𑀺𑀤𑀸𑀖𑀲𑀫𑀬𑁂 𑀲𑀼𑀓𑁆𑀔𑀲𑁂𑀯𑀸𑀮𑁄 𑀢𑀺𑀝𑁆𑀞𑀢𑀺, 𑀢𑀁 𑀲𑀫𑁆𑀫𑀼𑀜𑁆𑀚𑀦𑀻𑀆𑀤𑀻𑀳𑀺 𑀖𑀁𑀲𑀺𑀢𑁆𑀯𑀸 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀸𑀦𑀻𑀬𑀖𑀝𑀸𑀤𑀻𑀦𑀁 𑀩𑀳𑀺 𑀲𑁂𑀯𑀸𑀮𑁄 𑀤𑀼𑀓𑁆𑀓𑀝𑀯𑀢𑁆𑀣𑀼, 𑀅𑀦𑁆𑀢𑁄 𑀅𑀩𑁆𑀩𑁄𑀳𑀸𑀭𑀺𑀓𑁄. 𑀤𑀦𑁆𑀢𑀓𑀝𑁆𑀞𑀧𑀽𑀯𑀸𑀤𑀻𑀲𑀼 𑀓𑀡𑁆𑀡𑀓𑀫𑁆𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀘𑁂 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸’’𑀢𑀺 (𑀫𑀳𑀸𑀯. 𑁬𑁬).

𑀧𑀸𑀲𑀸𑀡𑀚𑀸𑀢𑀺𑀧𑀸𑀲𑀸𑀡𑀤𑀤𑁆𑀤𑀼𑀲𑁂𑀯𑀸𑀮𑀲𑁂𑀮𑁂𑀬𑁆𑀬𑀓𑀸𑀤𑀻𑀦𑀺 𑀅𑀳𑀭𑀺𑀢𑀯𑀡𑁆𑀡𑀸𑀦𑀺 𑀅𑀧𑀢𑁆𑀢𑀓𑀸𑀦𑀺 𑀘 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸𑀦𑀺. 𑀅𑀳𑀺𑀘𑁆𑀙𑀢𑁆𑀢𑀓𑀁 𑀬𑀸𑀯 𑀫𑀓𑀼𑀴𑀁 𑀳𑁄𑀢𑀺, 𑀢𑀸𑀯 𑀤𑀼𑀓𑁆𑀓𑀝𑀯𑀢𑁆𑀣𑀼. 𑀧𑀼𑀧𑁆𑀨𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀩𑁆𑀩𑁄𑀳𑀸𑀭𑀺𑀓𑀁. 𑀅𑀮𑁆𑀮𑀭𑀼𑀓𑁆𑀔𑀢𑁄 𑀧𑀦 𑀅𑀳𑀺𑀘𑁆𑀙𑀢𑁆𑀢𑀓𑀁 𑀕𑀡𑁆𑀳𑀦𑁆𑀢𑁄 𑀭𑀼𑀓𑁆𑀔𑀢𑁆𑀢𑀘𑀁 𑀯𑀺𑀓𑁄𑀧𑁂𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀁. 𑀭𑀼𑀓𑁆𑀔𑀧𑀧𑁆𑀧𑀝𑀺𑀓𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀬𑀸 𑀧𑀦 𑀇𑀦𑁆𑀤𑀲𑀸𑀮𑀓𑀓𑀼𑀥𑀸𑀤𑀻𑀦𑀁 𑀧𑀧𑁆𑀧𑀝𑀺𑀓𑀸 𑀭𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀁 𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀦𑀺𑀬𑁆𑀬𑀸𑀲𑀫𑁆𑀧𑀺 𑀭𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀞𑀺𑀢𑀁 𑀲𑀼𑀓𑁆𑀔𑀭𑀼𑀓𑁆𑀔𑁂 𑀯𑀸 𑀮𑀕𑁆𑀕𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀮𑁆𑀮𑀭𑀼𑀓𑁆𑀔𑀢𑁄 𑀦 𑀯𑀝𑁆𑀝𑀢𑀺. 𑀮𑀸𑀔𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀭𑀼𑀓𑁆𑀔𑀁 𑀘𑀸𑀮𑁂𑀢𑁆𑀯𑀸 𑀧𑀡𑁆𑀟𑀼𑀧𑀮𑀸𑀲𑀁 𑀯𑀸 𑀧𑀭𑀺𑀡𑀢𑀓𑀡𑀺𑀓𑀸𑀭𑀸𑀤𑀺𑀧𑀼𑀧𑁆𑀨𑀁 𑀯𑀸 𑀧𑀸𑀢𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑁂𑀦 𑀫𑀼𑀤𑀼𑀓𑁂𑀲𑀼 𑀇𑀦𑁆𑀤𑀲𑀸𑀮𑀦𑀼𑀳𑀻𑀔𑀦𑁆𑀥𑀸𑀤𑀻𑀲𑀼 𑀯𑀸 𑀢𑀢𑁆𑀣𑀚𑀸𑀢𑀓𑀢𑀸𑀮𑀧𑀡𑁆𑀡𑀸𑀤𑀻𑀲𑀼 𑀯𑀸 𑀅𑀓𑁆𑀔𑀭𑀁 𑀙𑀺𑀦𑁆𑀤𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄.

𑀲𑀸𑀫𑀡𑁂𑀭𑀸𑀦𑀁 𑀧𑀼𑀧𑁆𑀨𑀁 𑀑𑀘𑀺𑀦𑀦𑁆𑀢𑀸𑀦𑀁 𑀲𑀸𑀔𑀁 𑀑𑀦𑀸𑀫𑁂𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀳𑀺 𑀧𑀦 𑀧𑀼𑀧𑁆𑀨𑁂𑀳𑀺 𑀧𑀸𑀦𑀻𑀬𑀁 𑀦 𑀯𑀸𑀲𑁂𑀢𑀩𑁆𑀩𑀁. 𑀧𑀸𑀦𑀻𑀬𑀯𑀸𑀲𑀢𑁆𑀣𑀺𑀓𑁂𑀦 𑀲𑀸𑀫𑀡𑁂𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀘𑀺𑀦𑀸𑀧𑁂𑀢𑀩𑁆𑀩𑀸𑀦𑀺. 𑀨𑀮𑀲𑀸𑀔𑀸𑀧𑀺 𑀅𑀢𑁆𑀢𑀦𑀸 𑀔𑀸𑀤𑀺𑀢𑀼𑀓𑀸𑀫𑁂𑀦 𑀦 𑀑𑀦𑀸𑀫𑁂𑀢𑀩𑁆𑀩𑀸. 𑀲𑀸𑀫𑀡𑁂𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀨𑀮𑀁 𑀕𑀸𑀳𑀸𑀧𑁂𑀢𑀩𑁆𑀩𑀁. 𑀬𑀁𑀓𑀺𑀜𑁆𑀘𑀺 𑀕𑀘𑁆𑀙𑀁 𑀯𑀸 𑀮𑀢𑀁 𑀯𑀸 𑀉𑀧𑁆𑀧𑀸𑀝𑁂𑀦𑁆𑀢𑁂𑀳𑀺 𑀲𑀸𑀫𑀡𑁂𑀭𑁂𑀳𑀺 𑀲𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑁂𑀲𑀁 𑀧𑀦 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀅𑀦𑀸𑀓𑀟𑁆𑀠𑀦𑁆𑀢𑁂𑀦 𑀓𑀟𑁆𑀠𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁂𑀦 𑀯𑀺𑀬 𑀅𑀕𑁆𑀕𑁂 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀬𑁂𑀲𑀁 𑀭𑀼𑀓𑁆𑀔𑀸𑀦𑀁 𑀲𑀸𑀔𑀸 𑀭𑀼𑀳𑀢𑀺, 𑀢𑁂𑀲𑀁 𑀲𑀸𑀔𑀁 𑀫𑀓𑁆𑀔𑀺𑀓𑀸𑀩𑀻𑀚𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀓𑀧𑁆𑀧𑀺𑀬𑀁 𑀅𑀓𑀸𑀭𑀸𑀧𑁂𑀢𑁆𑀯𑀸 𑀕𑀳𑀺𑀢𑀁 𑀢𑀘𑁂 𑀯𑀸 𑀧𑀢𑁆𑀢𑁂 𑀯𑀸 𑀅𑀦𑁆𑀢𑀫𑀲𑁄 𑀦𑀔𑁂𑀦𑀧𑀺 𑀯𑀺𑀮𑀺𑀔𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀅𑀮𑁆𑀮𑀲𑀺𑀗𑁆𑀕𑀺𑀯𑁂𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀻𑀢𑀮𑁂 𑀧𑀤𑁂𑀲𑁂 𑀞𑀧𑀺𑀢𑀲𑁆𑀲 𑀫𑀽𑀮𑀁 𑀲𑀜𑁆𑀚𑀸𑀬𑀢𑀺, 𑀉𑀧𑀭𑀺𑀪𑀸𑀕𑁂 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀅𑀗𑁆𑀓𑀼𑀭𑁄 𑀚𑀸𑀬𑀢𑀺, 𑀳𑁂𑀝𑁆𑀞𑀸𑀪𑀸𑀕𑁂 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀽𑀮𑁂 𑀘 𑀦𑀻𑀮𑀗𑁆𑀓𑀼𑀭𑁂 𑀘 𑀚𑀸𑀢𑁂 𑀦 𑀯𑀝𑁆𑀝𑀢𑀺.

𑀙𑀺𑀦𑁆𑀤𑀢𑀺 𑀯𑀸 𑀙𑁂𑀤𑀸𑀧𑁂𑀢𑀺 𑀯𑀸𑀢𑀺 𑀅𑀦𑁆𑀢𑀫𑀲𑁄 𑀲𑀫𑁆𑀫𑀼𑀜𑁆𑀚𑀦𑁄𑀲𑀮𑀸𑀓𑀸𑀬𑀧𑀺 𑀢𑀺𑀡𑀸𑀦𑀺 𑀙𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀪𑀽𑀫𑀺𑀁 𑀲𑀫𑁆𑀫𑀚𑁆𑀚𑀦𑁆𑀢𑁄 𑀲𑀬𑀁 𑀯𑀸 𑀙𑀺𑀦𑁆𑀤𑀢𑀺, 𑀅𑀜𑁆𑀜𑁂𑀦 𑀯𑀸 𑀙𑁂𑀤𑀸𑀧𑁂𑀢𑀺. 𑀪𑀺𑀦𑁆𑀤𑀢𑀺 𑀯𑀸 𑀪𑁂𑀤𑀸𑀧𑁂𑀢𑀺 𑀯𑀸𑀢𑀺 𑀅𑀦𑁆𑀢𑀫𑀲𑁄 𑀘𑀗𑁆𑀓𑀫𑀦𑁆𑀢𑁄𑀧𑀺 𑀙𑀺𑀚𑁆𑀚𑀦𑀓𑀁 𑀙𑀺𑀚𑁆𑀚𑀢𑀼, 𑀪𑀺𑀚𑁆𑀚𑀦𑀓𑀁 𑀪𑀺𑀚𑁆𑀚𑀢𑀼, 𑀘𑀗𑁆𑀓𑀫𑀺𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀻𑀢𑀺 𑀲𑀜𑁆𑀘𑀺𑀘𑁆𑀘 𑀧𑀸𑀤𑁂𑀳𑀺 𑀅𑀓𑁆𑀓𑀫𑀦𑁆𑀢𑁄 𑀢𑀺𑀡𑀯𑀮𑁆𑀮𑀺𑀆𑀤𑀻𑀦𑀺 𑀲𑀬𑀁 𑀯𑀸 𑀪𑀺𑀦𑁆𑀤𑀢𑀺 𑀅𑀜𑁆𑀜𑁂𑀦 𑀯𑀸 𑀪𑁂𑀤𑀸𑀧𑁂𑀢𑀺. 𑀲𑀘𑁂𑀧𑀺 𑀳𑀺 𑀢𑀺𑀡𑀁 𑀯𑀸 𑀮𑀢𑀁 𑀯𑀸 𑀕𑀡𑁆𑀞𑀺𑀁 𑀓𑀭𑁄𑀦𑁆𑀢𑀲𑁆𑀲 𑀪𑀺𑀚𑁆𑀚𑀢𑀺, 𑀕𑀡𑁆𑀞𑀺𑀧𑀺 𑀦 𑀓𑀸𑀢𑀩𑁆𑀩𑁄. 𑀢𑀸𑀮𑀭𑀼𑀓𑁆𑀔𑀸𑀤𑀻𑀲𑀼 𑀧𑀦 𑀘𑁄𑀭𑀸𑀦𑀁 𑀅𑀦𑀸𑀭𑀼𑀳𑀦𑀢𑁆𑀣𑀸𑀬 𑀤𑀸𑀭𑀼𑀫𑀓𑁆𑀓𑀝𑀓𑀁 𑀆𑀓𑁄𑀝𑁂𑀦𑁆𑀢𑀺, 𑀓𑀡𑁆𑀝𑀓𑁂 𑀩𑀦𑁆𑀥𑀦𑁆𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀏𑀯𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀤𑀸𑀭𑀼𑀫𑀓𑁆𑀓𑀝𑀓𑁄 𑀭𑀼𑀓𑁆𑀔𑁂 𑀅𑀮𑁆𑀮𑀻𑀦𑀫𑀢𑁆𑀢𑁄𑀯 𑀳𑁄𑀢𑀺, 𑀭𑀼𑀓𑁆𑀔𑀁 𑀦 𑀧𑀻𑀴𑁂𑀢𑀺, 𑀯𑀝𑁆𑀝𑀢𑀺. ‘‘𑀭𑀼𑀓𑁆𑀔𑀁 𑀙𑀺𑀦𑁆𑀤, 𑀮𑀢𑀁 𑀙𑀺𑀦𑁆𑀤, 𑀓𑀦𑁆𑀤𑀁 𑀯𑀸 𑀫𑀽𑀮𑀁 𑀯𑀸 𑀉𑀧𑁆𑀧𑀸𑀝𑁂𑀳𑀻’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀅𑀦𑀺𑀬𑀸𑀫𑀺𑀢𑀢𑁆𑀢𑀸. 𑀦𑀺𑀬𑀸𑀫𑁂𑀢𑁆𑀯𑀸 𑀧𑀦 ‘‘𑀇𑀫𑀁 𑀭𑀼𑀓𑁆𑀔𑀁 𑀙𑀺𑀦𑁆𑀤𑀸’’𑀢𑀺𑀆𑀤𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀦𑀸𑀫𑀁 𑀕𑀳𑁂𑀢𑁆𑀯𑀸𑀧𑀺 ‘‘𑀅𑀫𑁆𑀩𑀭𑀼𑀓𑁆𑀔𑀁 𑀘𑀢𑀼𑀭𑀲𑁆𑀲𑀯𑀮𑁆𑀮𑀺𑀁 𑀆𑀮𑀼𑀯𑀓𑀦𑁆𑀤𑀁 𑀫𑀼𑀜𑁆𑀚𑀢𑀺𑀡𑀁 𑀅𑀲𑀼𑀓𑀭𑀼𑀓𑁆𑀔𑀘𑁆𑀙𑀮𑁆𑀮𑀺𑀁 𑀙𑀺𑀦𑁆𑀤 𑀪𑀺𑀦𑁆𑀤 𑀉𑀧𑁆𑀧𑀸𑀝𑁂𑀳𑀻’’𑀢𑀺𑀆𑀤𑀺𑀯𑀘𑀦𑀫𑁆𑀧𑀺 𑀅𑀦𑀺𑀬𑀸𑀫𑀺𑀢𑀫𑁂𑀯 𑀳𑁄𑀢𑀺. ‘‘𑀇𑀫𑀁 𑀅𑀫𑁆𑀩𑀭𑀼𑀓𑁆𑀔’’𑀦𑁆𑀢𑀺𑀆𑀤𑀺𑀯𑀘𑀦𑀫𑁂𑀯 𑀳𑀺 𑀦𑀺𑀬𑀸𑀫𑀺𑀢𑀁 𑀦𑀸𑀫, 𑀢𑀁 𑀦 𑀯𑀝𑁆𑀝𑀢𑀺.

𑀧𑀘𑀢𑀺 𑀯𑀸 𑀧𑀘𑀸𑀧𑁂𑀢𑀺 𑀯𑀸𑀢𑀺 𑀅𑀦𑁆𑀢𑀫𑀲𑁄 𑀧𑀢𑁆𑀢𑀫𑁆𑀧𑀺 𑀧𑀘𑀺𑀢𑀼𑀓𑀸𑀫𑁄 𑀢𑀺𑀡𑀸𑀤𑀻𑀦𑀁 𑀉𑀧𑀭𑀺 𑀲𑀜𑁆𑀘𑀺𑀘𑁆𑀘 𑀅𑀕𑁆𑀕𑀺𑀁 𑀓𑀭𑁄𑀦𑁆𑀢𑁄 𑀲𑀬𑀁 𑀯𑀸 𑀧𑀘𑀢𑀺, 𑀅𑀜𑁆𑀜𑁂𑀦 𑀯𑀸 𑀧𑀘𑀸𑀧𑁂𑀢𑀻𑀢𑀺 𑀲𑀩𑁆𑀩𑀁 𑀧𑀣𑀯𑀻𑀔𑀡𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀺𑀬𑀸𑀫𑁂𑀢𑁆𑀯𑀸 𑀧𑀦 ‘‘𑀫𑀼𑀕𑁆𑀕𑁂 𑀧𑀘, 𑀫𑀸𑀲𑁂 𑀧𑀘𑀸’’𑀢𑀺𑀆𑀤𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀇𑀫𑁂 𑀫𑀼𑀕𑁆𑀕𑁂 𑀧𑀘, 𑀇𑀫𑁂 𑀫𑀸𑀲𑁂 𑀧𑀘𑀸’’𑀢𑀺 𑀏𑀯𑀁 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺.

𑀅𑀦𑀸𑀧𑀢𑁆𑀢𑀺 𑀇𑀫𑀁 𑀚𑀸𑀦𑀸𑀢𑀺𑀆𑀤𑀻𑀲𑀼 ‘‘𑀇𑀫𑀁 𑀫𑀽𑀮𑀪𑁂𑀲𑀚𑁆𑀚𑀁 𑀚𑀸𑀦, 𑀇𑀫𑀁 𑀫𑀽𑀮𑀁 𑀯𑀸 𑀧𑀡𑁆𑀡𑀁 𑀯𑀸 𑀤𑁂𑀳𑀺, 𑀇𑀫𑀁 𑀭𑀼𑀓𑁆𑀔𑀁 𑀯𑀸 𑀮𑀢𑀁 𑀯𑀸 𑀆𑀳𑀭, 𑀇𑀫𑀺𑀦𑀸 𑀧𑀼𑀧𑁆𑀨𑁂𑀦 𑀯𑀸 𑀨𑀮𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀅𑀢𑁆𑀣𑁄, 𑀇𑀫𑀁 𑀭𑀼𑀓𑁆𑀔𑀁 𑀯𑀸 𑀮𑀢𑀁 𑀯𑀸 𑀨𑀮𑀁 𑀯𑀸 𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀪𑀽𑀢𑀕𑀸𑀫𑀧𑀭𑀺𑀫𑁄𑀘𑀦𑀁 𑀓𑀢𑀁 𑀳𑁄𑀢𑀺. 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦 𑀧𑀦 𑀩𑀻𑀚𑀕𑀸𑀫𑀧𑀭𑀺𑀫𑁄𑀘𑀦𑀢𑁆𑀣𑀁 𑀧𑀼𑀦 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑀩𑁆𑀩𑀁.

𑀓𑀧𑁆𑀧𑀺𑀬𑀓𑀭𑀡𑀜𑁆𑀘𑁂𑀢𑁆𑀣 𑀇𑀫𑀺𑀦𑀸 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀕𑁆𑀕𑀺𑀧𑀭𑀺𑀚𑀺𑀢𑀁 𑀲𑀢𑁆𑀣𑀧𑀭𑀺𑀚𑀺𑀢𑀁 𑀦𑀔𑀧𑀭𑀺𑀚𑀺𑀢𑀁 𑀅𑀩𑀻𑀚𑀁 𑀦𑀺𑀩𑁆𑀩𑀝𑁆𑀝𑀩𑀻𑀚𑀫𑁂𑀯 𑀧𑀜𑁆𑀘𑀫’’𑀦𑁆𑀢𑀺. 𑀢𑀢𑁆𑀣 ‘‘𑀅𑀕𑁆𑀕𑀺𑀧𑀭𑀺𑀚𑀺𑀢’’𑀦𑁆𑀢𑀺 𑀅𑀕𑁆𑀕𑀺𑀦𑀸 𑀧𑀭𑀺𑀚𑀺𑀢𑀁 𑀅𑀥𑀺𑀪𑀽𑀢𑀁 𑀤𑀟𑁆𑀠𑀁 𑀨𑀼𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀢𑁆𑀣𑀧𑀭𑀺𑀚𑀺𑀢’’𑀦𑁆𑀢𑀺 𑀲𑀢𑁆𑀣𑁂𑀦 𑀧𑀭𑀺𑀚𑀺𑀢𑀁 𑀅𑀥𑀺𑀪𑀽𑀢𑀁 𑀙𑀺𑀦𑁆𑀦𑀁 𑀯𑀺𑀤𑁆𑀥𑀁 𑀯𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀦𑀔𑀧𑀭𑀺𑀚𑀺𑀢𑁂. 𑀅𑀩𑀻𑀚𑀦𑀺𑀩𑁆𑀩𑀝𑁆𑀝𑀩𑀻𑀚𑀸𑀦𑀺 𑀲𑀬𑀫𑁂𑀯 𑀓𑀧𑁆𑀧𑀺𑀬𑀸𑀦𑀺. 𑀅𑀕𑁆𑀕𑀺𑀦𑀸 𑀓𑀧𑁆𑀧𑀺𑀬𑀁 𑀓𑀭𑁄𑀦𑁆𑀢𑁂𑀦 𑀓𑀝𑁆𑀞𑀕𑁆𑀕𑀺𑀕𑁄𑀫𑀬𑀕𑁆𑀕𑀺𑀆𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀦𑁆𑀢𑀫𑀲𑁄 𑀮𑁄𑀳𑀔𑀡𑁆𑀟𑁂𑀦𑀧𑀺 𑀆𑀤𑀺𑀢𑁆𑀢𑁂𑀦 𑀓𑀧𑁆𑀧𑀺𑀬𑀁 𑀓𑀸𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀏𑀓𑀤𑁂𑀲𑁂 𑀨𑀼𑀲𑀦𑁆𑀢𑁂𑀦 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸𑀯 𑀓𑀸𑀢𑀩𑁆𑀩𑀁. 𑀲𑀢𑁆𑀣𑁂𑀦 𑀓𑀭𑁄𑀦𑁆𑀢𑁂𑀦 𑀬𑀲𑁆𑀲 𑀓𑀲𑁆𑀲𑀘𑀺 𑀮𑁄𑀳𑀫𑀬𑀲𑀢𑁆𑀣𑀲𑁆𑀲 𑀅𑀦𑁆𑀢𑀫𑀲𑁄 𑀲𑀽𑀘𑀺𑀦𑀔𑀘𑁆𑀙𑁂𑀤𑀦𑀸𑀦𑀫𑁆𑀧𑀺 𑀢𑀼𑀡𑁆𑀟𑁂𑀦 𑀯𑀸 𑀥𑀸𑀭𑀸𑀬 𑀯𑀸 𑀙𑁂𑀤𑀁 𑀯𑀸 𑀯𑁂𑀥𑀁 𑀯𑀸 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸𑀯 𑀓𑀸𑀢𑀩𑁆𑀩𑀁. 𑀦𑀔𑁂𑀦 𑀓𑀧𑁆𑀧𑀺𑀬𑀁 𑀓𑀭𑁄𑀦𑁆𑀢𑁂𑀦 𑀧𑀽𑀢𑀺𑀦𑀔𑁂𑀦 𑀦 𑀓𑀸𑀢𑀩𑁆𑀩𑀁. 𑀫𑀦𑀼𑀲𑁆𑀲𑀸𑀦𑀁 𑀧𑀦 𑀲𑀻𑀳𑀩𑁆𑀬𑀕𑁆𑀖𑀤𑀻𑀧𑀺𑀫𑀓𑁆𑀓𑀝𑀸𑀤𑀻𑀦𑀁 𑀲𑀓𑀼𑀦𑁆𑀢𑀸𑀦𑀜𑁆𑀘 𑀦𑀔𑀸 𑀢𑀺𑀔𑀺𑀡𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀓𑀸𑀢𑀩𑁆𑀩𑀁. 𑀅𑀲𑁆𑀲𑀫𑀳𑀺𑀁𑀲𑀲𑀽𑀓𑀭𑀫𑀺𑀕𑀕𑁄𑀭𑀽𑀧𑀸𑀤𑀻𑀦𑀁 𑀔𑀼𑀭𑀸 𑀅𑀢𑀺𑀔𑀺𑀡𑀸, 𑀢𑁂𑀳𑀺 𑀦 𑀓𑀸𑀢𑀩𑁆𑀩𑀁, 𑀓𑀢𑀫𑁆𑀧𑀺 𑀅𑀓𑀢𑀁 𑀳𑁄𑀢𑀺. 𑀳𑀢𑁆𑀣𑀺𑀦𑀔𑀸 𑀧𑀦 𑀔𑀼𑀭𑀸 𑀦 𑀳𑁄𑀦𑁆𑀢𑀺, 𑀢𑁂𑀳𑀺 𑀯𑀝𑁆𑀝𑀢𑀺. 𑀬𑁂𑀳𑀺 𑀧𑀦 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑁂𑀳𑀺 𑀢𑀢𑁆𑀣𑀚𑀸𑀢𑀓𑁂𑀳𑀺𑀧𑀺 𑀉𑀤𑁆𑀥𑀭𑀺𑀢𑁆𑀯𑀸 𑀕𑀳𑀺𑀢𑀓𑁂𑀳𑀺𑀧𑀺 𑀙𑁂𑀤𑀁 𑀯𑀸 𑀯𑁂𑀥𑀁 𑀯𑀸 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸𑀯 𑀓𑀸𑀢𑀩𑁆𑀩𑀁.

𑀢𑀢𑁆𑀣 𑀲𑀘𑁂𑀧𑀺 𑀩𑀻𑀚𑀸𑀦𑀁 𑀧𑀩𑁆𑀩𑀢𑀫𑀢𑁆𑀢𑁄 𑀭𑀸𑀲𑀺 𑀭𑀼𑀓𑁆𑀔𑀲𑀳𑀲𑁆𑀲𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀉𑀘𑁆𑀙𑀽𑀦𑀁 𑀯𑀸 𑀫𑀳𑀸𑀪𑀸𑀭𑁄 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁄 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀩𑀻𑀚𑁂 𑀯𑀸 𑀭𑀼𑀓𑁆𑀔𑀲𑀸𑀔𑀸𑀬 𑀯𑀸 𑀉𑀘𑁆𑀙𑀼𑀫𑁆𑀳𑀺 𑀯𑀸 𑀓𑀧𑁆𑀧𑀺𑀬𑁂 𑀓𑀢𑁂 𑀲𑀩𑁆𑀩𑀁 𑀓𑀢𑀁 𑀳𑁄𑀢𑀺. 𑀉𑀘𑁆𑀙𑀽 𑀘 𑀤𑀸𑀭𑀽𑀦𑀺 𑀘 𑀏𑀓𑀢𑁄 𑀩𑀤𑁆𑀥𑀸𑀦𑀺 𑀳𑁄𑀦𑁆𑀢𑀺, 𑀉𑀘𑁆𑀙𑀼𑀁 𑀓𑀧𑁆𑀧𑀺𑀬𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀤𑀸𑀭𑀼𑀁 𑀯𑀺𑀚𑁆𑀛𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀲𑀘𑁂 𑀧𑀦 𑀬𑀸𑀬 𑀭𑀚𑁆𑀚𑀼𑀬𑀸 𑀯𑀸 𑀯𑀮𑁆𑀮𑀺𑀬𑀸 𑀯𑀸 𑀩𑀤𑁆𑀥𑀸𑀦𑀺, 𑀢𑀁 𑀯𑀺𑀚𑁆𑀛𑀢𑀺, 𑀦 𑀯𑀝𑁆𑀝𑀢𑀺. 𑀉𑀘𑁆𑀙𑀼𑀔𑀡𑁆𑀟𑀸𑀦𑀁 𑀧𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸 𑀆𑀳𑀭𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀔𑀡𑁆𑀟𑁂 𑀓𑀧𑁆𑀧𑀺𑀬𑁂 𑀓𑀢𑁂 𑀲𑀩𑁆𑀩𑀁 𑀓𑀢𑀫𑁂𑀯 𑀳𑁄𑀢𑀺. 𑀫𑀭𑀺𑀘𑀧𑀓𑁆𑀓𑀸𑀤𑀻𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀪𑀢𑁆𑀢𑀁 𑀆𑀳𑀭𑀦𑁆𑀢𑀺, ‘‘𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀲𑀘𑁂𑀧𑀺 𑀪𑀢𑁆𑀢𑀲𑀺𑀢𑁆𑀣𑁂 𑀯𑀺𑀚𑁆𑀛𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀢𑀺𑀮𑀢𑀡𑁆𑀟𑀼𑀮𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀸𑀕𑀼𑀬𑀸 𑀧𑀓𑁆𑀔𑀺𑀢𑁆𑀢𑀸𑀦𑀺 𑀧𑀦 𑀏𑀓𑀸𑀩𑀤𑁆𑀥𑀸𑀦𑀺 𑀳𑀼𑀢𑁆𑀯𑀸 𑀦 𑀲𑀦𑁆𑀢𑀺𑀝𑁆𑀞𑀦𑁆𑀢𑀺, 𑀢𑀢𑁆𑀣 𑀏𑀓𑀫𑁂𑀓𑀁 𑀯𑀺𑀚𑁆𑀛𑀺𑀢𑁆𑀯𑀸 𑀓𑀧𑁆𑀧𑀺𑀬𑀁 𑀓𑀸𑀢𑀩𑁆𑀩𑀫𑁂𑀯. 𑀓𑀧𑀺𑀢𑁆𑀣𑀨𑀮𑀸𑀤𑀻𑀦𑀁 𑀅𑀦𑁆𑀢𑁄 𑀫𑀺𑀜𑁆𑀚𑀁 𑀓𑀝𑀸𑀳𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀜𑁆𑀘𑀭𑀢𑀺, 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑀩𑁆𑀩𑀁. 𑀏𑀓𑀸𑀩𑀤𑁆𑀥𑀁 𑀳𑁄𑀢𑀺, 𑀓𑀝𑀸𑀳𑁂𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀧𑀸𑀲𑀸𑀡𑀭𑀼𑀓𑁆𑀔𑀸𑀤𑀻𑀦𑀺 𑀯𑀸 𑀧𑀯𑀝𑁆𑀝𑁂𑀦𑁆𑀢𑀲𑁆𑀲 𑀲𑀸𑀔𑀁 𑀯𑀸 𑀓𑀟𑁆𑀠𑀦𑁆𑀢𑀲𑁆𑀲 𑀓𑀢𑁆𑀢𑀭𑀤𑀡𑁆𑀟𑁂𑀦 𑀯𑀸 𑀪𑀽𑀫𑀺𑀁 𑀧𑀳𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀢𑀺𑀡𑀸𑀦𑀺 𑀙𑀺𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀢𑁂𑀦 𑀙𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀲𑀜𑁆𑀘𑀺𑀘𑁆𑀘 𑀅𑀘𑁆𑀙𑀺𑀦𑁆𑀦𑀢𑁆𑀢𑀸 𑀅𑀲𑀜𑁆𑀘𑀺𑀘𑁆𑀘 𑀙𑀺𑀦𑁆𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀇𑀢𑀺 𑀅𑀲𑀜𑁆𑀘𑀺𑀘𑁆𑀘 𑀙𑀺𑀦𑁆𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀅𑀲𑀢𑀺𑀬𑀸𑀢𑀺 𑀅𑀜𑁆𑀜𑀯𑀺𑀳𑀺𑀢𑁄 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀓𑀺𑀜𑁆𑀘𑀺 𑀓𑀣𑁂𑀦𑁆𑀢𑁄 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀯𑀸 𑀳𑀢𑁆𑀣𑁂𑀦 𑀯𑀸 𑀢𑀺𑀡𑀁 𑀯𑀸 𑀮𑀢𑀁 𑀯𑀸 𑀙𑀺𑀦𑁆𑀤𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀏𑀯𑀁 𑀅𑀲𑀢𑀺𑀬𑀸 𑀙𑀺𑀦𑁆𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣𑀩𑁆𑀪𑀦𑁆𑀢𑀭𑁂 𑀩𑀻𑀚𑀕𑀸𑀫𑁄𑀢𑀺 𑀯𑀸 𑀪𑀽𑀢𑀕𑀸𑀫𑁄𑀢𑀺 𑀯𑀸 𑀦 𑀚𑀸𑀦𑀸𑀢𑀺, 𑀙𑀺𑀦𑁆𑀤𑀸𑀫𑀻𑀢𑀺𑀧𑀺 𑀦 𑀚𑀸𑀦𑀸𑀢𑀺, 𑀓𑁂𑀯𑀮𑀁 𑀯𑀢𑀺𑀬𑀸 𑀯𑀸 𑀧𑀮𑀸𑀮𑀧𑀼𑀜𑁆𑀚𑁂 𑀯𑀸 𑀦𑀺𑀔𑀸𑀤𑀦𑀁 𑀯𑀸 𑀔𑀡𑀺𑀢𑁆𑀢𑀺𑀁 𑀯𑀸 𑀓𑀼𑀤𑀸𑀮𑀁 𑀯𑀸 𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀞𑀧𑁂𑀢𑀺, 𑀟𑀬𑁆𑀳𑀫𑀸𑀦𑀳𑀢𑁆𑀣𑁄 𑀯𑀸 𑀅𑀕𑁆𑀕𑀺𑀁 𑀧𑀸𑀢𑁂𑀢𑀺, 𑀢𑀢𑁆𑀭 𑀘𑁂 𑀢𑀺𑀡𑀸𑀦𑀺 𑀙𑀺𑀚𑁆𑀚𑀦𑁆𑀢𑀺 𑀯𑀸 𑀟𑀬𑁆𑀳𑀦𑁆𑀢𑀺 𑀯𑀸 𑀅𑀦𑀸𑀧𑀢𑁆𑀢𑀺. 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 𑀧𑀦 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 ‘‘𑀲𑀘𑁂 𑀪𑀺𑀓𑁆𑀔𑀼 𑀭𑀼𑀓𑁆𑀔𑁂𑀦 𑀯𑀸 𑀅𑀚𑁆𑀛𑁄𑀢𑁆𑀣𑀝𑁄 𑀳𑁄𑀢𑀺, 𑀑𑀧𑀸𑀢𑁂 𑀯𑀸 𑀧𑀢𑀺𑀢𑁄 𑀲𑀓𑁆𑀓𑀸 𑀘 𑀳𑁄𑀢𑀺 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀪𑀽𑀫𑀺𑀁 𑀯𑀸 𑀔𑀡𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀼𑀁, 𑀚𑀻𑀯𑀺𑀢𑀳𑁂𑀢𑀼𑀧𑀺 𑀅𑀢𑁆𑀢𑀦𑀸 𑀦 𑀓𑀸𑀢𑀩𑁆𑀩𑀁. 𑀅𑀜𑁆𑀜𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀪𑀽𑀫𑀺𑀁 𑀯𑀸 𑀔𑀡𑀺𑀢𑁆𑀯𑀸 𑀭𑀼𑀓𑁆𑀔𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀅𑀮𑁆𑀮𑀭𑀼𑀓𑁆𑀔𑀢𑁄 𑀯𑀸 𑀤𑀡𑁆𑀟𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀁 𑀭𑀼𑀓𑁆𑀔𑀁 𑀧𑀯𑀝𑁆𑀝𑁂𑀢𑁆𑀯𑀸 𑀦𑀺𑀓𑁆𑀔𑀸𑀫𑁂𑀢𑀼𑀁 𑀯𑀝𑁆𑀝𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀯𑀟𑀸𑀳𑁂 𑀟𑀬𑁆𑀳𑀫𑀸𑀦𑁂 𑀧𑀝𑀕𑁆𑀕𑀺𑀁 𑀤𑀸𑀢𑀼𑀁, 𑀧𑀭𑀺𑀢𑁆𑀢𑀁 𑀓𑀸𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁮𑁩) 𑀇𑀤𑀁 𑀧𑀦 𑀏𑀓𑀫𑁂𑀯 𑀲𑀼𑀢𑁆𑀢𑀁 𑀤𑀺𑀲𑁆𑀲𑀢𑀺. 𑀲𑀘𑁂 𑀏𑀢𑀲𑁆𑀲 𑀅𑀦𑀼𑀮𑁄𑀫𑀁 ‘‘𑀅𑀢𑁆𑀢𑀦𑁄 𑀦 𑀯𑀝𑁆𑀝𑀢𑀺, 𑀅𑀜𑁆𑀜𑀲𑁆𑀲 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀦𑀸𑀦𑀸𑀓𑀭𑀡𑀁 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀭𑁄𑀦𑁆𑀢𑁄 𑀅𑀢𑁆𑀢𑀲𑀺𑀦𑁂𑀳𑁂𑀦 𑀅𑀓𑀼𑀲𑀮𑀘𑀺𑀢𑁆𑀢𑁂𑀦𑁂𑀯 𑀓𑀭𑁄𑀢𑀺, 𑀧𑀭𑁄 𑀧𑀦 𑀓𑀸𑀭𑀼𑀜𑁆𑀜𑁂𑀦, 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀻𑀢𑀺 𑀘𑁂. 𑀏𑀢𑀫𑁆𑀧𑀺 𑀅𑀓𑀸𑀭𑀡𑀁. 𑀓𑀼𑀲𑀮𑀘𑀺𑀢𑁆𑀢𑁂𑀦𑀸𑀧𑀺 𑀳𑀺 𑀇𑀫𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀧𑀝𑀺𑀲𑁂𑀥𑁂𑀢𑀼𑀁. 𑀕𑀯𑁂𑀲𑀺𑀢𑀩𑁆𑀩𑀸 𑀏𑀢𑁆𑀣 𑀬𑀼𑀢𑁆𑀢𑀺. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀯𑀸 𑀲𑀤𑁆𑀥𑀸𑀬 𑀕𑀦𑁆𑀢𑀩𑁆𑀩𑀦𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀁.

𑁨. 𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁪. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑁋 𑀅𑀦𑀸𑀘𑀸𑀭𑀁 𑀆𑀘𑀭𑀺𑀢𑁆𑀯𑀸𑀢𑀺 𑀅𑀓𑀸𑀢𑀩𑁆𑀩𑀁 𑀓𑀢𑁆𑀯𑀸; 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀻𑀢𑀺 𑀅𑀜𑁆𑀜𑁂𑀦 𑀯𑀘𑀦𑁂𑀦 𑀅𑀜𑁆𑀜𑀁 𑀯𑀘𑀦𑀁 𑀧𑀝𑀺𑀘𑀭𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺; 𑀇𑀤𑀸𑀦𑀺 𑀢𑀁 𑀧𑀝𑀺𑀘𑀭𑀡𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑁄 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀯𑀘𑀦𑀲𑀫𑁆𑀩𑀦𑁆𑀥𑁄 𑁋 𑀲𑁄 𑀓𑀺𑀭 𑀓𑀺𑀜𑁆𑀘𑀺 𑀯𑀻𑀢𑀺𑀓𑁆𑀓𑀫𑀁 𑀤𑀺𑀲𑁆𑀯𑀸 ‘‘𑀆𑀯𑀼𑀲𑁄, 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀲𑀗𑁆𑀖𑀫𑀚𑁆𑀛𑁂 𑀆𑀧𑀢𑁆𑀢𑀺𑀬𑀸 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 ‘‘𑀓𑁄 𑀆𑀧𑀦𑁆𑀦𑁄’’𑀢𑀺 𑀯𑀤𑀢𑀺. ‘‘𑀢𑀢𑁄 𑀢𑁆𑀯’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀓𑀺𑀁 𑀆𑀧𑀦𑁆𑀦𑁄’’𑀢𑀺 𑀯𑀤𑀢𑀺. 𑀅𑀣 ‘‘𑀧𑀸𑀘𑀺𑀢𑁆𑀢𑀺𑀬𑀁 𑀯𑀸 𑀤𑀼𑀓𑁆𑀓𑀝𑀁 𑀯𑀸’’𑀢𑀺 𑀯𑀼𑀢𑁆𑀢𑁂 𑀯𑀢𑁆𑀣𑀼𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀅𑀳𑀁 𑀓𑀺𑀲𑁆𑀫𑀺𑀁 𑀆𑀧𑀦𑁆𑀦𑁄’’𑀢𑀺 𑀯𑀤𑀢𑀺. 𑀢𑀢𑁄 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀓𑀣𑀁 𑀆𑀧𑀦𑁆𑀦𑁄, 𑀓𑀺𑀁 𑀓𑀭𑁄𑀦𑁆𑀢𑁄 𑀆𑀧𑀦𑁆𑀦𑁄𑀫𑁆𑀳𑀻’’𑀢𑀺 𑀧𑀼𑀘𑁆𑀙𑀢𑀺. 𑀅𑀣 ‘‘𑀇𑀤𑀁 𑀦𑀸𑀫 𑀓𑀭𑁄𑀦𑁆𑀢𑁄 𑀆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 ‘‘𑀓𑀁 𑀪𑀡𑀣𑀸’’𑀢𑀺 𑀯𑀤𑀢𑀺. 𑀢𑀢𑁄 ‘‘𑀢𑀁 𑀪𑀡𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀪𑀡𑀣𑀸’’𑀢𑀺 𑀯𑀤𑀢𑀺.

𑀅𑀧𑀺𑀘𑁂𑀢𑁆𑀣 𑀅𑀬𑀁 𑀧𑀸𑀴𑀺𑀫𑀼𑀢𑁆𑀢𑀓𑁄𑀧𑀺 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀡𑀯𑀺𑀥𑀺 𑁋 𑀪𑀺𑀓𑁆𑀔𑀽𑀳𑀺 ‘‘𑀢𑀯 𑀲𑀺𑀧𑀸𑀝𑀺𑀓𑀸𑀬 𑀓𑀳𑀸𑀧𑀡𑁄 𑀤𑀺𑀝𑁆𑀞𑁄, 𑀓𑀺𑀲𑁆𑀲𑁂𑀯𑀫𑀲𑀸𑀭𑀼𑀧𑁆𑀧𑀁 𑀓𑀭𑁄𑀲𑀻’’𑀢𑀺 𑀯𑀼𑀢𑁆𑀢𑁄 ‘‘𑀲𑀼𑀤𑀺𑀝𑁆𑀞𑀁, 𑀪𑀦𑁆𑀢𑁂, 𑀦 𑀧𑀦𑁂𑀲𑁄 𑀓𑀳𑀸𑀧𑀡𑁄; 𑀢𑀺𑀧𑀼𑀫𑀡𑁆𑀟𑀮𑀁 𑀏𑀢’’𑀦𑁆𑀢𑀺 𑀪𑀡𑀦𑁆𑀢𑁄 𑀯𑀸 ‘‘𑀢𑁆𑀯𑀁 𑀲𑀼𑀭𑀁 𑀧𑀺𑀯𑀦𑁆𑀢𑁄 𑀤𑀺𑀝𑁆𑀞𑁄, 𑀓𑀺𑀲𑁆𑀲𑁂𑀯𑀁 𑀓𑀭𑁄𑀲𑀻’’𑀢𑀺 𑀯𑀼𑀢𑁆𑀢𑁄 ‘‘𑀲𑀼𑀤𑀺𑀝𑁆𑀞𑁄, 𑀪𑀦𑁆𑀢𑁂, 𑀦 𑀧𑀦𑁂𑀲𑀸 𑀲𑀼𑀭𑀸, 𑀪𑁂𑀲𑀚𑁆𑀚𑀢𑁆𑀣𑀸𑀬 𑀲𑀫𑁆𑀧𑀸𑀤𑀺𑀢𑀁 𑀅𑀭𑀺𑀝𑁆𑀞’’𑀦𑁆𑀢𑀺 𑀪𑀡𑀦𑁆𑀢𑁄 𑀯𑀸 ‘‘𑀢𑁆𑀯𑀁 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀦𑀺𑀲𑀺𑀦𑁆𑀦𑁄 𑀤𑀺𑀝𑁆𑀞𑁄, 𑀓𑀺𑀲𑁆𑀲𑁂𑀯𑀫𑀲𑀸𑀭𑀼𑀧𑁆𑀧𑀁 𑀓𑀭𑁄𑀲𑀻’’𑀢𑀺 𑀯𑀼𑀢𑁆𑀢𑁄 ‘‘𑀬𑁂𑀦 𑀤𑀺𑀝𑁆𑀞𑀁 𑀲𑀼𑀤𑀺𑀝𑁆𑀞𑀁, 𑀯𑀺𑀜𑁆𑀜𑀽 𑀧𑀦𑁂𑀢𑁆𑀣 𑀤𑀼𑀢𑀺𑀬𑁄 𑀅𑀢𑁆𑀣𑀺, 𑀲𑁄 𑀓𑀺𑀲𑁆𑀲 𑀦 𑀤𑀺𑀝𑁆𑀞𑁄’’𑀢𑀺 𑀪𑀡𑀦𑁆𑀢𑁄 𑀯𑀸, ‘‘𑀈𑀤𑀺𑀲𑀁 𑀢𑀬𑀸 𑀓𑀺𑀜𑁆𑀘𑀺 𑀤𑀺𑀝𑁆𑀞’’𑀦𑁆𑀢𑀺 𑀧𑀼𑀝𑁆𑀞𑁄 ‘‘𑀦 𑀲𑀼𑀡𑀸𑀫𑀻’’𑀢𑀺 𑀲𑁄𑀢𑀫𑀼𑀧𑀦𑁂𑀦𑁆𑀢𑁄 𑀯𑀸, 𑀲𑁄𑀢𑀤𑁆𑀯𑀸𑀭𑁂 𑀧𑀼𑀘𑁆𑀙𑀦𑁆𑀢𑀸𑀦𑀁 𑀘𑀓𑁆𑀔𑀼𑀁 𑀉𑀧𑀦𑁂𑀦𑁆𑀢𑁄 𑀯𑀸, 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀯𑀸𑀤𑀓𑀁 𑀭𑁄𑀧𑁂𑀢𑀽𑀢𑀺 𑀅𑀜𑁆𑀜𑀯𑀸𑀤𑀓𑀁 𑀆𑀭𑁄𑀧𑁂𑀢𑀼; 𑀧𑀢𑀺𑀝𑁆𑀞𑀸𑀧𑁂𑀢𑀽𑀢𑀺 𑀅𑀢𑁆𑀣𑁄. 𑀯𑀺𑀳𑁂𑀲𑀓𑀁 𑀭𑁄𑀧𑁂𑀢𑀽𑀢𑀺 𑀏𑀢𑀲𑁆𑀫𑀺𑀫𑁆𑀧𑀺 𑀏𑀲𑁂𑀯 𑀦𑀬𑁄.

𑁯𑁮. 𑀅𑀜𑁆𑀜𑀯𑀸𑀤𑀓𑁂 𑀯𑀺𑀳𑁂𑀲𑀓𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀢𑁆𑀣 𑀅𑀜𑁆𑀜𑀁 𑀯𑀤𑀢𑀻𑀢𑀺 𑀅𑀜𑁆𑀜𑀯𑀸𑀤𑀓𑀁; 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀯𑀺𑀳𑁂𑀲𑁂𑀢𑀻𑀢𑀺 𑀯𑀺𑀳𑁂𑀲𑀓𑀁; 𑀢𑀼𑀡𑁆𑀳𑀻𑀪𑀽𑀢𑀲𑁆𑀲𑁂𑀢𑀁 𑀦𑀸𑀫𑀁, 𑀢𑀲𑁆𑀫𑀺𑀁 𑀅𑀜𑁆𑀜𑀯𑀸𑀤𑀓𑁂 𑀯𑀺𑀳𑁂𑀲𑀓𑁂. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀢𑁆𑀣𑀼𑀤𑁆𑀯𑀬𑁂 𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁 𑀯𑀼𑀢𑁆𑀢𑀁.

𑁧𑁦𑁦. 𑀅𑀭𑁄𑀧𑀺𑀢𑁂 𑀅𑀜𑁆𑀜𑀯𑀸𑀤𑀓𑁂𑀢𑀺 𑀓𑀫𑁆𑀫𑀯𑀸𑀘𑀸𑀬 𑀅𑀦𑀸𑀭𑁄𑀧𑀺𑀢𑁂 𑀅𑀜𑁆𑀜𑀯𑀸𑀤𑀓𑁂. 𑀅𑀭𑁄𑀧𑀺𑀢𑁂 𑀯𑀺𑀳𑁂𑀲𑀓𑁂𑀢𑀺 𑀏𑀢𑀲𑁆𑀫𑀺𑀫𑁆𑀧𑀺 𑀏𑀲𑁂𑀯 𑀦𑀬𑁄.

𑁧𑁦𑁧. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻𑀢𑀺𑀆𑀤𑀻𑀲𑀼 𑀬𑀁 𑀢𑀁 𑀅𑀜𑁆𑀜𑀯𑀸𑀤𑀓𑀯𑀺𑀳𑁂𑀲𑀓𑀭𑁄𑀧𑀦𑀓𑀫𑁆𑀫𑀁 𑀓𑀢𑀁, 𑀢𑀜𑁆𑀘𑁂 𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺, 𑀲𑁄 𑀘 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻 𑀅𑀜𑁆𑀜𑀯𑀸𑀤𑀓𑀜𑁆𑀘 𑀯𑀺𑀳𑁂𑀲𑀓𑀜𑁆𑀘 𑀓𑀭𑁄𑀢𑀺, 𑀅𑀣𑀲𑁆𑀲 𑀢𑀲𑁆𑀫𑀺𑀁 𑀅𑀜𑁆𑀜𑀯𑀸𑀤𑀓𑁂 𑀘 𑀯𑀺𑀳𑁂𑀲𑀓𑁂 𑀘 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁦𑁨. 𑀅𑀚𑀸𑀦𑀦𑁆𑀢𑁄 𑀧𑀼𑀘𑁆𑀙𑀢𑀻𑀢𑀺 𑀆𑀧𑀢𑁆𑀢𑀺𑀁 𑀯𑀸 𑀆𑀧𑀦𑁆𑀦𑀪𑀸𑀯𑀁 𑀅𑀚𑀸𑀦𑀦𑁆𑀢𑁄𑀬𑁂𑀯 ‘‘𑀓𑀺𑀁 𑀢𑀼𑀫𑁆𑀳𑁂 𑀪𑀡𑀣, 𑀅𑀳𑀁 𑀦 𑀚𑀸𑀦𑀸𑀫𑀻’’𑀢𑀺 𑀧𑀼𑀘𑁆𑀙𑀢𑀺. 𑀕𑀺𑀮𑀸𑀦𑁄 𑀯𑀸 𑀦 𑀓𑀣𑁂𑀢𑀻𑀢𑀺 𑀫𑀼𑀔𑁂 𑀢𑀸𑀤𑀺𑀲𑁄 𑀩𑁆𑀬𑀸𑀥𑀺 𑀳𑁄𑀢𑀺, 𑀬𑁂𑀦 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀯𑀸𑀢𑀺𑀆𑀤𑀻𑀲𑀼 𑀲𑀗𑁆𑀖𑀫𑀚𑁆𑀛𑁂 𑀓𑀣𑀺𑀢𑁂 𑀢𑀧𑁆𑀧𑀘𑁆𑀘𑀬𑀸 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀯𑀸 𑀓𑀮𑀳𑁄 𑀯𑀸 𑀯𑀺𑀯𑀸𑀤𑁄 𑀯𑀸 𑀪𑀯𑀺𑀲𑁆𑀲𑀢𑀺, 𑀲𑁄 𑀫𑀸 𑀅𑀳𑁄𑀲𑀻𑀢𑀺 𑀫𑀜𑁆𑀜𑀫𑀸𑀦𑁄 𑀦 𑀓𑀣𑁂𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀲𑀺𑀬𑀸 𑀓𑀺𑀭𑀺𑀬𑀁, 𑀲𑀺𑀬𑀸 𑀅𑀓𑀺𑀭𑀺𑀬𑀁, 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀦𑁆𑀢𑀲𑁆𑀲 𑀳𑀺 𑀓𑀺𑀭𑀺𑀬𑀁 𑀳𑁄𑀢𑀺, 𑀢𑀼𑀡𑁆𑀳𑀻𑀪𑀸𑀯𑁂𑀦 𑀯𑀺𑀳𑁂𑀲𑀦𑁆𑀢𑀲𑁆𑀲 𑀅𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀁 𑀤𑀼𑀢𑀺𑀬𑀁.

𑁩. 𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁩. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑁋 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀪𑀺𑀓𑁆𑀔𑀽 𑀉𑀚𑁆𑀛𑀸𑀧𑁂𑀦𑁆𑀢𑀻𑀢𑀺 ‘‘𑀙𑀦𑁆𑀤𑀸𑀬 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀯𑀚𑀸𑀦𑀸𑀧𑁂𑀦𑁆𑀢𑀺, 𑀅𑀯𑀜𑁆𑀜𑀸𑀬 𑀑𑀮𑁄𑀓𑀸𑀧𑁂𑀦𑁆𑀢𑀺, 𑀮𑀸𑀫𑀓𑀢𑁄 𑀯𑀸 𑀘𑀺𑀦𑁆𑀢𑀸𑀧𑁂𑀦𑁆𑀢𑀻’’𑀢𑀺 𑀅𑀢𑁆𑀣𑁄. 𑀮𑀓𑁆𑀔𑀡𑀁 𑀧𑀦𑁂𑀢𑁆𑀣 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀑𑀚𑁆𑀛𑀸𑀧𑁂𑀦𑁆𑀢𑀻𑀢𑀺𑀧𑀺 𑀧𑀸𑀞𑁄. 𑀅𑀬𑀫𑁂𑀯𑀢𑁆𑀣𑁄. 𑀙𑀦𑁆𑀤𑀸𑀬𑀸𑀢𑀺 𑀙𑀦𑁆𑀤𑁂𑀦 𑀧𑀓𑁆𑀔𑀧𑀸𑀢𑁂𑀦; 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸𑀦𑀁 𑀧𑀡𑀻𑀢𑀸𑀦𑀺 𑀧𑀜𑁆𑀜𑀧𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀔𑀺𑀬𑁆𑀬𑀦𑁆𑀢𑀻𑀢𑀺 ‘‘𑀙𑀦𑁆𑀤𑀸𑀬 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀧𑀓𑀸𑀲𑁂𑀦𑁆𑀢𑀺.

𑁧𑁦𑁫. 𑀉𑀚𑁆𑀛𑀸𑀧𑀦𑀓𑁂 𑀔𑀺𑀬𑁆𑀬𑀦𑀓𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀢𑁆𑀣 𑀬𑁂𑀦 𑀯𑀘𑀦𑁂𑀦 𑀉𑀚𑁆𑀛𑀸𑀧𑁂𑀦𑁆𑀢𑀺, 𑀢𑀁 𑀉𑀚𑁆𑀛𑀸𑀧𑀦𑀓𑀁. 𑀬𑁂𑀦 𑀘 𑀔𑀺𑀬𑁆𑀬𑀦𑁆𑀢𑀺 𑀢𑀁 𑀔𑀺𑀬𑁆𑀬𑀦𑀓𑀁. 𑀢𑀲𑁆𑀫𑀺𑀁 𑀉𑀚𑁆𑀛𑀸𑀧𑀦𑀓𑁂 𑀔𑀺𑀬𑁆𑀬𑀦𑀓𑁂. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀢𑁆𑀣𑀼𑀤𑁆𑀯𑀬𑁂 𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁 𑀯𑀼𑀢𑁆𑀢𑀁.

𑁧𑁦𑁬. 𑀉𑀚𑁆𑀛𑀸𑀧𑀦𑀓𑀁 𑀦𑀸𑀫 𑀉𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀁 𑀯𑀸…𑀧𑁂… 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀦𑀓𑀁 𑀯𑀸𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 ‘‘𑀫𑀗𑁆𑀓𑀼𑀓𑀢𑁆𑀢𑀼𑀓𑀸𑀫𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀯𑀡𑁆𑀡𑀁 𑀓𑀢𑁆𑀢𑀼𑀓𑀸𑀫𑁄 𑀅𑀬𑀲𑀁 𑀓𑀢𑁆𑀢𑀼𑀓𑀸𑀫𑁄𑀢𑀺 𑀇𑀫𑁂𑀲𑀁 𑀧𑀦 𑀯𑀲𑁂𑀦 𑀉𑀧𑀲𑀫𑁆𑀧𑀦𑁆𑀦𑀦𑁆𑀢𑀺𑀆𑀤𑀻𑀲𑀼 ‘‘𑀉𑀧𑀲𑀫𑁆𑀧𑀦𑁆𑀦𑀲𑁆𑀲𑀸’’𑀢𑀺 𑀏𑀯𑀁 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄 𑀓𑀸𑀢𑀩𑁆𑀩𑁄. 𑀉𑀚𑁆𑀛𑀸𑀧𑁂𑀢𑀺 𑀯𑀸 𑀔𑀺𑀬𑁆𑀬𑀢𑀺 𑀯𑀸 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀫𑀸 ‘‘𑀔𑀺𑀬𑁆𑀬𑀦𑀓𑀁 𑀦𑀸𑀫𑀸’’𑀢𑀺 𑀏𑀯𑀁 𑀫𑀸𑀢𑀺𑀓𑀸𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸𑀧𑀺 ‘‘𑀉𑀚𑁆𑀛𑀸𑀧𑀦𑀓𑀁 𑀦𑀸𑀫𑀸’’𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 𑀯𑀼𑀢𑁆𑀢𑀯𑀺𑀪𑀗𑁆𑀕𑁄𑀬𑁂𑀯 𑀯𑀢𑁆𑀢𑀩𑁆𑀩𑁄 𑀳𑁄𑀢𑀺, 𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑁂 𑀯𑀺𑀬 𑀅𑀜𑁆𑀜𑁄 𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀁 𑀯𑀺𑀲𑀼𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀅𑀯𑀺𑀪𑀚𑀺𑀢𑁆𑀯𑀸 𑀦𑀺𑀕𑀫𑀦𑀫𑁂𑀯 𑀏𑀓𑀢𑁄 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻𑀢𑀺𑀆𑀤𑀻𑀲𑀼 𑀬𑀁 𑀢𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀫𑁆𑀫𑀼𑀢𑀺𑀓𑀫𑁆𑀫𑀁 𑀓𑀢𑀁 𑀢𑀜𑁆𑀘𑁂 𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺, 𑀲𑁄 𑀘 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻 𑀉𑀚𑁆𑀛𑀸𑀧𑀦𑀓𑀜𑁆𑀘 𑀔𑀺𑀬𑁆𑀬𑀦𑀓𑀜𑁆𑀘 𑀓𑀭𑁄𑀢𑀺, 𑀅𑀣𑀲𑁆𑀲 𑀢𑀲𑁆𑀫𑀺𑀁 𑀉𑀚𑁆𑀛𑀸𑀧𑀦𑀓𑁂 𑀘 𑀔𑀺𑀬𑁆𑀬𑀦𑀓𑁂 𑀘 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀉𑀚𑁆𑀛𑀸𑀧𑁂𑀢𑀺 𑀯𑀸 𑀔𑀺𑀬𑁆𑀬𑀢𑀺 𑀯𑀸𑀢𑀺 𑀏𑀢𑁆𑀣 𑀉𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀅𑀜𑁆𑀜𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀉𑀚𑁆𑀛𑀸𑀧𑁂𑀢𑀺 𑀅𑀯𑀚𑀸𑀦𑀸𑀧𑁂𑀢𑀺, 𑀢𑀲𑁆𑀲 𑀯𑀸 𑀢𑀁 𑀲𑀦𑁆𑀢𑀺𑀓𑁂 𑀔𑀺𑀬𑁆𑀬𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀦𑁆𑀢𑀺 𑀓𑀫𑁆𑀫𑀯𑀸𑀘𑀸𑀬 𑀅𑀲𑀫𑁆𑀫𑀢𑀁 𑀓𑁂𑀯𑀮𑀁 ‘‘𑀢𑀯𑁂𑀲𑁄 𑀪𑀸𑀭𑁄’’𑀢𑀺 𑀲𑀗𑁆𑀖𑁂𑀦 𑀆𑀭𑁄𑀧𑀺𑀢𑀪𑀸𑀭𑀁 𑀪𑀺𑀓𑁆𑀔𑀽𑀦𑀁 𑀯𑀸 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬 𑀲𑀬𑀫𑁂𑀯 𑀢𑀁 𑀪𑀸𑀭𑀁 𑀯𑀳𑀦𑁆𑀢𑀁, 𑀬𑀢𑁆𑀭 𑀯𑀸 𑀤𑁆𑀯𑁂 𑀢𑀬𑁄 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀢𑀢𑁆𑀭 𑀯𑀸 𑀢𑀸𑀤𑀺𑀲𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀯𑀸 𑀅𑀲𑀫𑁆𑀫𑀢𑀁 𑀯𑀸𑀢𑀺 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀢𑁂𑀭𑀲 𑀲𑀫𑁆𑀫𑀼𑀢𑀺𑀬𑁄 𑀤𑀸𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺. 𑀅𑀣 𑀔𑁄 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁄 𑀧𑀘𑁆𑀙𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀪𑀸𑀯𑁂 𑀞𑀺𑀢𑁄, 𑀢𑀁 𑀲𑀦𑁆𑀥𑀸𑀬 ‘‘𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀲 𑀧𑀦 𑀩𑁆𑀬𑀢𑁆𑀢𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀓𑁂𑀯𑀮𑀁 𑀲𑀗𑁆𑀖𑁂𑀦 𑀯𑀸 𑀲𑀫𑁆𑀫𑀢𑁂𑀦 𑀯𑀸 𑀪𑀺𑀓𑁆𑀔𑀼𑀦𑀸 ‘‘𑀢𑁆𑀯𑀁 𑀇𑀤𑀁 𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀪𑀸𑀭𑁄 𑀓𑀢𑁄, 𑀢𑀸𑀤𑀺𑀲𑀁 𑀲𑀦𑁆𑀥𑀸𑀬 ‘‘𑀅𑀲𑀫𑁆𑀫𑀢𑀁 𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀁 𑀢𑀢𑀺𑀬𑀁.

𑁪. 𑀧𑀞𑀫𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁮. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑁂 𑁋 𑀳𑁂𑀫𑀦𑁆𑀢𑀺𑀓𑁂 𑀓𑀸𑀮𑁂𑀢𑀺 𑀳𑁂𑀫𑀦𑁆𑀢𑀓𑀸𑀮𑁂 𑀳𑀺𑀫𑀧𑀸𑀢𑀲𑀫𑀬𑁂. 𑀓𑀸𑀬𑀁 𑀑𑀢𑀸𑀧𑁂𑀦𑁆𑀢𑀸𑀢𑀺 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀦𑀺𑀲𑀺𑀦𑁆𑀦𑀸 𑀩𑀸𑀮𑀸𑀢𑀧𑁂𑀦 𑀓𑀸𑀬𑀁 𑀑𑀢𑀸𑀧𑁂𑀦𑁆𑀢𑀸. 𑀓𑀸𑀮𑁂 𑀆𑀭𑁄𑀘𑀺𑀢𑁂𑀢𑀺 𑀬𑀸𑀕𑀼𑀪𑀢𑁆𑀢𑀸𑀤𑀻𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀓𑀸𑀮𑁂 𑀆𑀭𑁄𑀘𑀺𑀢𑁂. 𑀑𑀯𑀝𑁆𑀞𑀁 𑀳𑁄𑀢𑀻𑀢𑀺 𑀳𑀺𑀫𑀯𑀲𑁆𑀲𑁂𑀦 𑀑𑀯𑀝𑁆𑀞𑀁 𑀢𑀺𑀦𑁆𑀢𑀁 𑀳𑁄𑀢𑀺.

𑁧𑁧𑁦. 𑀅𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑁂𑀢𑀺 𑀯𑀲𑁆𑀲𑀺𑀓𑀯𑀲𑁆𑀲𑀸𑀦𑀫𑀸𑀲𑀸𑀢𑀺 𑀏𑀯𑀁 𑀅𑀧𑀜𑁆𑀜𑀢𑁆𑀢𑁂 𑀘𑀢𑁆𑀢𑀸𑀭𑁄 𑀳𑁂𑀫𑀦𑁆𑀢𑀺𑀓𑁂 𑀘𑀢𑁆𑀢𑀸𑀭𑁄 𑀘 𑀕𑀺𑀫𑁆𑀳𑀺𑀓𑁂 𑀅𑀝𑁆𑀞 𑀫𑀸𑀲𑁂𑀢𑀺 𑀅𑀢𑁆𑀣𑁄. 𑀫𑀡𑁆𑀟𑀧𑁂 𑀯𑀸𑀢𑀺 𑀲𑀸𑀔𑀸𑀫𑀡𑁆𑀟𑀧𑁂 𑀯𑀸 𑀧𑀤𑀭𑀫𑀡𑁆𑀟𑀧𑁂 𑀯𑀸. 𑀭𑀼𑀓𑁆𑀔𑀫𑀽𑀮𑁂 𑀯𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸. 𑀬𑀢𑁆𑀣 𑀓𑀸𑀓𑀸 𑀯𑀸 𑀓𑀼𑀮𑀮𑀸 𑀯𑀸 𑀦 𑀊𑀳𑀤𑀦𑁆𑀢𑀻𑀢𑀺 𑀬𑀢𑁆𑀣 𑀥𑀼𑀯𑀦𑀺𑀯𑀸𑀲𑁂𑀦 𑀓𑀼𑀮𑀸𑀯𑀓𑁂 𑀓𑀢𑁆𑀯𑀸 𑀯𑀲𑀫𑀸𑀦𑀸 𑀏𑀢𑁂 𑀓𑀸𑀓𑀓𑀼𑀮𑀮𑀸 𑀯𑀸 𑀅𑀜𑁆𑀜𑁂 𑀯𑀸 𑀲𑀓𑀼𑀦𑁆𑀢𑀸 𑀢𑀁 𑀲𑁂𑀦𑀸𑀲𑀦𑀁 𑀦 𑀊𑀳𑀤𑀦𑁆𑀢𑀺, 𑀢𑀸𑀤𑀺𑀲𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺. 𑀢𑀲𑁆𑀫𑀸 𑀬𑀢𑁆𑀣 𑀕𑁄𑀘𑀭𑀧𑁆𑀧𑀲𑀼𑀢𑀸 𑀲𑀓𑀼𑀦𑁆𑀢𑀸 𑀯𑀺𑀲𑁆𑀲𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀲𑁆𑀫𑀺𑀁 𑀧𑀦 𑀥𑀼𑀯𑀦𑀺𑀯𑀸𑀲𑁂𑀦 𑀓𑀼𑀮𑀸𑀯𑀓𑁂 𑀓𑀢𑁆𑀯𑀸 𑀯𑀲𑀦𑁆𑀢𑀺, 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀦 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. ‘‘𑀅𑀝𑁆𑀞 𑀫𑀸𑀲𑁂’’𑀢𑀺 𑀯𑀘𑀦𑀢𑁄 𑀬𑁂𑀲𑀼 𑀚𑀦𑀧𑀤𑁂𑀲𑀼 𑀯𑀲𑁆𑀲𑀓𑀸𑀮𑁂 𑀦 𑀯𑀲𑁆𑀲𑀢𑀺, 𑀢𑁂𑀲𑀼𑀧𑀺 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺𑀬𑁂𑀯. ‘‘𑀅𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑁂’’𑀢𑀺 𑀯𑀘𑀦𑀢𑁄 𑀬𑀢𑁆𑀣 𑀳𑁂𑀫𑀦𑁆𑀢𑁂 𑀤𑁂𑀯𑁄 𑀯𑀲𑁆𑀲𑀢𑀺, 𑀢𑀢𑁆𑀣 𑀳𑁂𑀫𑀦𑁆𑀢𑁂𑀧𑀺 𑀅𑀚𑁆𑀛𑁄𑀓𑀸𑀲𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀕𑀺𑀫𑁆𑀳𑁂 𑀧𑀦 𑀲𑀩𑁆𑀩𑀢𑁆𑀣 𑀯𑀺𑀕𑀢𑀯𑀮𑀸𑀳𑀓𑀁 𑀯𑀺𑀲𑀼𑀤𑁆𑀥𑀁 𑀦𑀪𑀁 𑀳𑁄𑀢𑀺, 𑀏𑀯𑀭𑀽𑀧𑁂 𑀓𑀸𑀮𑁂 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀅𑀚𑁆𑀛𑁄𑀓𑀸𑀲𑁂 𑀫𑀜𑁆𑀘𑀧𑀻𑀞𑀁 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺.

𑀅𑀩𑁆𑀪𑁄𑀓𑀸𑀲𑀺𑀓𑁂𑀦𑀸𑀧𑀺 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁, 𑀢𑀲𑁆𑀲 𑀳𑀺 𑀲𑀘𑁂 𑀧𑀼𑀕𑁆𑀕𑀮𑀺𑀓𑀫𑀜𑁆𑀘𑀓𑁄 𑀅𑀢𑁆𑀣𑀺, 𑀢𑀢𑁆𑀣𑁂𑀯 𑀲𑀬𑀺𑀢𑀩𑁆𑀩𑀁. 𑀲𑀗𑁆𑀖𑀺𑀓𑀁 𑀕𑀡𑁆𑀳𑀦𑁆𑀢𑁂𑀦 𑀯𑁂𑀢𑁆𑀢𑁂𑀦 𑀯𑀸 𑀯𑀸𑀓𑁂𑀦 𑀯𑀸 𑀯𑀻𑀢𑀫𑀜𑁆𑀘𑀓𑁄 𑀕𑀳𑁂𑀢𑀩𑁆𑀩𑁄. 𑀢𑀲𑁆𑀫𑀺𑀁 𑀅𑀲𑀢𑀺 𑀧𑀼𑀭𑀸𑀡𑀫𑀜𑁆𑀘𑀓𑁄 𑀕𑀳𑁂𑀢𑀩𑁆𑀩𑁄. 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀦𑀯𑀯𑀸𑀬𑀺𑀫𑁄 𑀯𑀸 𑀑𑀦𑀤𑁆𑀥𑀓𑁄 𑀯𑀸 𑀕𑀳𑁂𑀢𑀩𑁆𑀩𑁄. 𑀕𑀳𑁂𑀢𑁆𑀯𑀸 𑀘 𑀧𑀦 ‘‘𑀅𑀳𑀁 𑀉𑀓𑁆𑀓𑀝𑁆𑀞𑀭𑀼𑀓𑁆𑀔𑀫𑀽𑀮𑀺𑀓𑁄 𑀉𑀓𑁆𑀓𑀝𑁆𑀞𑀅𑀩𑁆𑀪𑁄𑀓𑀸𑀲𑀺𑀓𑁄’’𑀢𑀺 𑀘𑀻𑀯𑀭𑀓𑀼𑀝𑀺𑀫𑁆𑀧𑀺 𑀅𑀓𑀢𑁆𑀯𑀸 𑀅𑀲𑀫𑀬𑁂 𑀅𑀚𑁆𑀛𑁄𑀓𑀸𑀲𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀘𑀢𑀼𑀕𑁆𑀕𑀼𑀡𑁂𑀦𑀧𑀺 𑀘𑀻𑀯𑀭𑁂𑀦 𑀓𑀢𑀓𑀼𑀝𑀺 𑀅𑀢𑁂𑀫𑁂𑀦𑁆𑀢𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀤𑀻𑀦𑀺 𑀪𑀯𑀦𑁆𑀢𑀺, 𑀪𑀺𑀓𑁆𑀔𑀼𑀦𑁄 𑀓𑀸𑀬𑀸𑀦𑀼𑀕𑀢𑀺𑀓𑀢𑁆𑀢𑀸 𑀯𑀝𑁆𑀝𑀢𑀺.

𑀅𑀭𑀜𑁆𑀜𑁂 𑀧𑀡𑁆𑀡𑀓𑀼𑀝𑀻𑀲𑀼 𑀯𑀲𑀦𑁆𑀢𑀸𑀦𑀁 𑀲𑀻𑀮𑀲𑀫𑁆𑀧𑀤𑀸𑀬 𑀧𑀲𑀦𑁆𑀦𑀘𑀺𑀢𑁆𑀢𑀸 𑀫𑀦𑀼𑀲𑁆𑀲𑀸 𑀦𑀯𑀁 𑀫𑀜𑁆𑀘𑀧𑀻𑀞𑀁 𑀤𑁂𑀦𑁆𑀢𑀺 ‘‘𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀯𑀲𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀳𑀺 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀲𑀪𑀸𑀕𑀪𑀺𑀓𑁆𑀔𑀽𑀦𑀁 𑀧𑁂𑀲𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁, 𑀲𑀪𑀸𑀕𑀸𑀦𑀁 𑀅𑀪𑀸𑀯𑁂 𑀅𑀦𑁄𑀯𑀲𑁆𑀲𑀓𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁, 𑀅𑀦𑁄𑀯𑀲𑁆𑀲𑀓𑁂 𑀅𑀲𑀢𑀺 𑀭𑀼𑀓𑁆𑀔𑁂 𑀮𑀕𑁆𑀕𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀘𑁂𑀢𑀺𑀬𑀗𑁆𑀕𑀡𑁂 𑀲𑀫𑁆𑀫𑀚𑁆𑀚𑀦𑀺𑀁 𑀕𑀳𑁂𑀢𑁆𑀯𑀸 𑀪𑁄𑀚𑀦𑀲𑀸𑀮𑀗𑁆𑀕𑀡𑀁 𑀯𑀸 𑀉𑀧𑁄𑀲𑀣𑀸𑀕𑀸𑀭𑀗𑁆𑀕𑀡𑀁 𑀯𑀸 𑀧𑀭𑀺𑀯𑁂𑀡𑀤𑀺𑀯𑀸𑀝𑁆𑀞𑀸𑀦𑀅𑀕𑁆𑀕𑀺𑀲𑀸𑀮𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀧𑀼𑀦 𑀲𑀫𑁆𑀫𑀚𑁆𑀚𑀦𑀻𑀫𑀸𑀴𑀓𑁂𑀬𑁂𑀯 𑀞𑀧𑁂𑀢𑀩𑁆𑀩𑀸. 𑀉𑀧𑁄𑀲𑀣𑀸𑀕𑀸𑀭𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀳𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀲𑀫𑁆𑀫𑀚𑁆𑀚𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄.