𑁧𑁦. 𑀧𑀞𑀫𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁦𑁯. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀅𑀣 𑀔𑁄 𑀤𑁂𑀯𑀤𑀢𑁆𑀢𑁄𑀢𑀺𑀆𑀤𑀻𑀲𑀼 𑀬𑁄 𑀘 𑀤𑁂𑀯𑀤𑀢𑁆𑀢𑁄, 𑀬𑀣𑀸 𑀘 𑀧𑀩𑁆𑀩𑀚𑀺𑀢𑁄, 𑀬𑁂𑀦 𑀘 𑀓𑀸𑀭𑀡𑁂𑀦 𑀓𑁄𑀓𑀸𑀮𑀺𑀓𑀸𑀤𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀏𑀣 𑀫𑀬𑀁 𑀆𑀯𑀼𑀲𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀗𑁆𑀖𑀪𑁂𑀤𑀁 𑀓𑀭𑀺𑀲𑁆𑀲𑀸𑀫 𑀘𑀓𑁆𑀓𑀪𑁂𑀤’’𑀦𑁆𑀢𑀺 𑀆𑀳. 𑀢𑀁 𑀲𑀩𑁆𑀩𑀁 𑀲𑀗𑁆𑀖𑀪𑁂𑀤𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁪𑁩) 𑀆𑀕𑀢𑀫𑁂𑀯. 𑀧𑀜𑁆𑀘𑀯𑀢𑁆𑀣𑀼𑀬𑀸𑀘𑀦𑀸 𑀧𑀦 𑀓𑀺𑀜𑁆𑀘𑀸𑀧𑀺 𑀢𑀢𑁆𑀣𑁂𑀯 𑀆𑀕𑀫𑀺𑀲𑁆𑀲𑀢𑀺. 𑀅𑀣 𑀔𑁄 𑀇𑀥𑀸𑀧𑀺 𑀆𑀕𑀢𑀢𑁆𑀢𑀸 𑀬𑀤𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫.

𑀲𑀸𑀥𑀼 𑀪𑀦𑁆𑀢𑁂𑀢𑀺 𑀆𑀬𑀸𑀘𑀦𑀸. 𑀪𑀺𑀓𑁆𑀔𑀽 𑀬𑀸𑀯𑀚𑀻𑀯𑀁 𑀆𑀭𑀜𑁆𑀜𑀺𑀓𑀸 𑀅𑀲𑁆𑀲𑀽𑀢𑀺 𑀆𑀭𑀜𑁆𑀜𑀺𑀓𑀥𑀼𑀢𑀗𑁆𑀕𑀁 𑀲𑀫𑀸𑀤𑀸𑀬 𑀲𑀩𑁆𑀩𑁂𑀧𑀺 𑀪𑀺𑀓𑁆𑀔𑀽 𑀬𑀸𑀯 𑀚𑀻𑀯𑀦𑁆𑀢𑀺 𑀢𑀸𑀯 𑀆𑀭𑀜𑁆𑀜𑀺𑀓𑀸 𑀳𑁄𑀦𑁆𑀢𑀼, 𑀅𑀭𑀜𑁆𑀜𑁂𑀬𑁂𑀯 𑀯𑀲𑀦𑁆𑀢𑀼. 𑀬𑁄 𑀕𑀸𑀫𑀦𑁆𑀢𑀁 𑀑𑀲𑀭𑁂𑀬𑁆𑀬 𑀯𑀚𑁆𑀚𑀁 𑀦𑀁 𑀨𑀼𑀲𑁂𑀬𑁆𑀬𑀸𑀢𑀺 𑀬𑁄 𑀏𑀓𑀪𑀺𑀓𑁆𑀔𑀼𑀧𑀺 𑀅𑀭𑀜𑁆𑀜𑀁 𑀧𑀳𑀸𑀬 𑀦𑀺𑀯𑀸𑀲𑀢𑁆𑀣𑀸𑀬 𑀕𑀸𑀫𑀦𑁆𑀢𑀁 𑀑𑀲𑀭𑁂𑀬𑁆𑀬, 𑀯𑀚𑁆𑀚𑀁 𑀢𑀁 𑀨𑀼𑀲𑁂𑀬𑁆𑀬 𑀦𑀁 𑀪𑀺𑀓𑁆𑀔𑀼𑀁 𑀤𑁄𑀲𑁄 𑀨𑀼𑀲𑀢𑀼, 𑀆𑀧𑀢𑁆𑀢𑀺𑀬𑀸 𑀦𑀁 𑀪𑀕𑀯𑀸 𑀓𑀸𑀭𑁂𑀢𑀽’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀏𑀲 𑀦𑀬𑁄 𑀲𑁂𑀲𑀯𑀢𑁆𑀣𑀽𑀲𑀼𑀧𑀺.

𑁪𑁧𑁦. 𑀚𑀦𑀁 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀸𑀢𑀺 𑀚𑀦𑀁 𑀅𑀫𑁆𑀳𑀸𑀓𑀁 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀪𑀸𑀯𑀁 𑀚𑀸𑀦𑀸𑀧𑁂𑀲𑁆𑀲𑀸𑀫, 𑀅𑀣 𑀯𑀸 𑀧𑀭𑀺𑀢𑁄𑀲𑁂𑀲𑁆𑀲𑀸𑀫 𑀧𑀲𑀸𑀤𑁂𑀲𑁆𑀲𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀫𑀸𑀦𑀺 𑀧𑀦 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀬𑀸𑀘𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸𑀯 𑀅𑀜𑁆𑀜𑀸𑀲𑀺 𑀪𑀕𑀯𑀸 ‘‘𑀲𑀗𑁆𑀖𑀪𑁂𑀤𑀢𑁆𑀣𑀺𑀓𑁄 𑀳𑀼𑀢𑁆𑀯𑀸 𑀅𑀬𑀁 𑀬𑀸𑀘𑀢𑀻’’𑀢𑀺. 𑀬𑀲𑁆𑀫𑀸 𑀧𑀦 𑀢𑀸𑀦𑀺 𑀅𑀦𑀼𑀚𑀸𑀦𑀺𑀬𑀫𑀸𑀦𑀸𑀦𑀺 𑀩𑀳𑀽𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀫𑀕𑁆𑀕𑀦𑁆𑀢𑀭𑀸𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀸 ‘‘𑀅𑀮𑀁 𑀤𑁂𑀯𑀤𑀢𑁆𑀢𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀬𑁄 𑀇𑀘𑁆𑀙𑀢𑀺 𑀆𑀭𑀜𑁆𑀜𑀺𑀓𑁄 𑀳𑁄𑀢𑀽’’𑀢𑀺𑀆𑀤𑀺𑀫𑀸𑀳.

𑀏𑀢𑁆𑀣 𑀧𑀦 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑀓𑀼𑀮𑀧𑀼𑀢𑁆𑀢𑁂𑀦 𑀅𑀢𑁆𑀢𑀦𑁄 𑀧𑀢𑀺𑀭𑀽𑀧𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀜𑁆𑀳𑁂𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀏𑀓𑁄 𑀪𑀺𑀓𑁆𑀔𑀼 𑀫𑀳𑀚𑁆𑀛𑀸𑀲𑀬𑁄 𑀳𑁄𑀢𑀺 𑀫𑀳𑀼𑀲𑁆𑀲𑀸𑀳𑁄, 𑀲𑀓𑁆𑀓𑁄𑀢𑀺 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀸𑀢𑀼𑀁. 𑀏𑀓𑁄 𑀤𑀼𑀩𑁆𑀩𑀮𑁄 𑀳𑁄𑀢𑀺 𑀅𑀧𑁆𑀧𑀣𑀸𑀫𑁄 𑀅𑀭𑀜𑁆𑀜𑁂 𑀦 𑀲𑀓𑁆𑀓𑁄𑀢𑀺, 𑀕𑀸𑀫𑀦𑁆𑀢𑁂𑀬𑁂𑀯 𑀲𑀓𑁆𑀓𑁄𑀢𑀺. 𑀏𑀓𑁄 𑀫𑀳𑀩𑁆𑀩𑀮𑁄 𑀲𑀫𑀧𑁆𑀧𑀯𑀢𑁆𑀢𑀥𑀸𑀢𑀼𑀓𑁄 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀲𑀫𑁆𑀧𑀦𑁆𑀦𑁄 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀲𑀫𑀘𑀺𑀢𑁆𑀢𑁄 𑀅𑀭𑀜𑁆𑀜𑁂𑀧𑀺 𑀕𑀸𑀫𑀦𑁆𑀢𑁂𑀧𑀺 𑀲𑀓𑁆𑀓𑁄𑀢𑀺𑀬𑁂𑀯. 𑀏𑀓𑁄 𑀦𑁂𑀯 𑀕𑀸𑀫𑀦𑁆𑀢𑁂 𑀦 𑀅𑀭𑀜𑁆𑀜𑁂 𑀲𑀓𑁆𑀓𑁄𑀢𑀺 𑀧𑀤𑀧𑀭𑀫𑁄 𑀳𑁄𑀢𑀺.

𑀢𑀢𑁆𑀭 𑀬𑁆𑀯𑀸𑀬𑀁 𑀫𑀳𑀚𑁆𑀛𑀸𑀲𑀬𑁄 𑀳𑁄𑀢𑀺 𑀫𑀳𑀼𑀲𑁆𑀲𑀸𑀳𑁄, 𑀲𑀓𑁆𑀓𑁄𑀢𑀺 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀸𑀢𑀼𑀁, 𑀲𑁄 𑀅𑀭𑀜𑁆𑀜𑁂𑀬𑁂𑀯 𑀯𑀲𑀢𑀼, 𑀇𑀤𑀫𑀲𑁆𑀲 𑀧𑀢𑀺𑀭𑀽𑀧𑀁. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄𑀧𑀺 𑀘𑀲𑁆𑀲 𑀅𑀦𑀼𑀲𑀺𑀓𑁆𑀔𑀫𑀸𑀦𑀸 𑀅𑀭𑀜𑁆𑀜𑁂 𑀯𑀺𑀳𑀸𑀢𑀩𑁆𑀩𑀫𑁂𑀯 𑀫𑀜𑁆𑀜𑀺𑀲𑁆𑀲𑀦𑁆𑀢𑀺.

𑀬𑁄 𑀧𑀦 𑀤𑀼𑀩𑁆𑀩𑀮𑁄 𑀳𑁄𑀢𑀺 𑀅𑀧𑁆𑀧𑀣𑀸𑀫𑁄 𑀕𑀸𑀫𑀦𑁆𑀢𑁂𑀬𑁂𑀯 𑀲𑀓𑁆𑀓𑁄𑀢𑀺 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀸𑀢𑀼𑀁, 𑀦 𑀅𑀭𑀜𑁆𑀜𑁂 𑀲𑁄 𑀕𑀸𑀫𑀦𑁆𑀢𑁂𑀬𑁂𑀯 𑀯𑀲𑀢𑀼, 𑀬𑁆𑀯𑀸𑀬𑀁 𑀫𑀳𑀩𑁆𑀩𑀮𑁄 𑀲𑀫𑀧𑁆𑀧𑀯𑀢𑁆𑀢𑀥𑀸𑀢𑀼𑀓𑁄 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀲𑀫𑁆𑀧𑀦𑁆𑀦𑁄 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀲𑀫𑀘𑀺𑀢𑁆𑀢𑁄 𑀅𑀭𑀜𑁆𑀜𑁂𑀧𑀺 𑀕𑀸𑀫𑀦𑁆𑀢𑁂𑀧𑀺 𑀲𑀓𑁆𑀓𑁄𑀢𑀺𑀬𑁂𑀯, 𑀅𑀬𑀫𑁆𑀧𑀺 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀧𑀳𑀸𑀬 𑀅𑀭𑀜𑁆𑀜𑁂 𑀯𑀺𑀳𑀭𑀢𑀼, 𑀇𑀤𑀫𑀲𑁆𑀲 𑀧𑀢𑀺𑀭𑀽𑀧𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀧𑀺 𑀳𑀺𑀲𑁆𑀲 𑀅𑀦𑀼𑀲𑀺𑀓𑁆𑀔𑀫𑀸𑀦𑀸 𑀅𑀭𑀜𑁆𑀜𑁂 𑀯𑀺𑀳𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺.

𑀬𑁄 𑀧𑀦𑀸𑀬𑀁 𑀦𑁂𑀯 𑀕𑀸𑀫𑀦𑁆𑀢𑁂 𑀦 𑀅𑀭𑀜𑁆𑀜𑁂 𑀲𑀓𑁆𑀓𑁄𑀢𑀺 𑀧𑀤𑀧𑀭𑀫𑁄 𑀳𑁄𑀢𑀺. 𑀅𑀬𑀫𑁆𑀧𑀺 𑀅𑀭𑀜𑁆𑀜𑁂𑀬𑁂𑀯 𑀯𑀲𑀢𑀼. 𑀅𑀬𑀁 𑀳𑀺𑀲𑁆𑀲 𑀥𑀼𑀢𑀗𑁆𑀕𑀲𑁂𑀯𑀦𑀸 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸 𑀘 𑀆𑀬𑀢𑀺𑀁 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀪𑀯𑀺𑀲𑁆𑀲𑀢𑀺. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄 𑀘𑀲𑁆𑀲 𑀅𑀦𑀼𑀲𑀺𑀓𑁆𑀔𑀫𑀸𑀦𑀸 𑀅𑀭𑀜𑁆𑀜𑁂 𑀯𑀺𑀳𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺.

𑀏𑀯𑀁 𑀬𑁆𑀯𑀸𑀬𑀁 𑀤𑀼𑀩𑁆𑀩𑀮𑁄 𑀳𑁄𑀢𑀺 𑀅𑀧𑁆𑀧𑀣𑀸𑀫𑁄 𑀕𑀸𑀫𑀦𑁆𑀢𑁂𑀬𑁂𑀯 𑀯𑀺𑀳𑀭𑀦𑁆𑀢𑁄 𑀲𑀓𑁆𑀓𑁄𑀢𑀺 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀸𑀢𑀼𑀁 𑀦 𑀅𑀭𑀜𑁆𑀜𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬 𑀪𑀕𑀯𑀸 ‘‘𑀬𑁄 𑀇𑀘𑁆𑀙𑀢𑀺 𑀕𑀸𑀫𑀦𑁆𑀢𑁂 𑀯𑀺𑀳𑀭𑀢𑀽’’𑀢𑀺 𑀆𑀳. 𑀇𑀫𑀺𑀦𑀸 𑀘 𑀧𑀼𑀕𑁆𑀕𑀮𑁂𑀦 𑀅𑀜𑁆𑀜𑁂𑀲𑀫𑁆𑀧𑀺 𑀤𑁆𑀯𑀸𑀭𑀁 𑀤𑀺𑀦𑁆𑀦𑀁.

𑀬𑀤𑀺 𑀧𑀦 𑀪𑀕𑀯𑀸 𑀤𑁂𑀯𑀤𑀢𑁆𑀢𑀲𑁆𑀲 𑀯𑀸𑀤𑀁 𑀲𑀫𑁆𑀧𑀝𑀺𑀘𑁆𑀙𑁂𑀬𑁆𑀬, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀧𑀓𑀢𑀺𑀬𑀸 𑀤𑀼𑀩𑁆𑀩𑀮𑁄 𑀳𑁄𑀢𑀺 𑀅𑀧𑁆𑀧𑀣𑀸𑀫𑁄, 𑀬𑁄𑀧𑀺 𑀤𑀳𑀭𑀓𑀸𑀮𑁂 𑀅𑀭𑀜𑁆𑀜𑀯𑀸𑀲𑀁 𑀅𑀪𑀺𑀲𑀫𑁆𑀪𑀼𑀡𑀺𑀢𑁆𑀯𑀸 𑀚𑀺𑀡𑁆𑀡𑀓𑀸𑀮𑁂 𑀯𑀸 𑀯𑀸𑀢𑀧𑀺𑀢𑁆𑀢𑀸𑀤𑀻𑀳𑀺 𑀲𑀫𑀼𑀧𑁆𑀧𑀦𑁆𑀦𑀥𑀸𑀢𑀼𑀓𑁆𑀔𑁄𑀪𑀓𑀸𑀮𑁂 𑀯𑀸 𑀦𑀸𑀪𑀺𑀲𑀫𑁆𑀪𑀼𑀡𑀸𑀢𑀺, 𑀕𑀸𑀫𑀦𑁆𑀢𑁂𑀬𑁂𑀯 𑀧𑀦 𑀯𑀺𑀳𑀭𑀦𑁆𑀢𑁄 𑀲𑀓𑁆𑀓𑁄𑀢𑀺 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀸𑀢𑀼𑀁, 𑀢𑁂𑀲𑀁 𑀅𑀭𑀺𑀬𑀫𑀕𑁆𑀕𑀼𑀧𑀘𑁆𑀙𑁂𑀤𑁄 𑀪𑀯𑁂𑀬𑁆𑀬, 𑀅𑀭𑀳𑀢𑁆𑀢𑀨𑀮𑀸𑀥𑀺𑀕𑀫𑁄 𑀦 𑀪𑀯𑁂𑀬𑁆𑀬, 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀯𑀺𑀮𑁄𑀫𑀁 𑀅𑀦𑀺𑀬𑁆𑀬𑀸𑀦𑀺𑀓𑀁 𑀲𑀢𑁆𑀣𑀼 𑀲𑀸𑀲𑀦𑀁 𑀪𑀯𑁂𑀬𑁆𑀬, 𑀲𑀢𑁆𑀣𑀸 𑀘 𑀢𑁂𑀲𑀁 𑀅𑀲𑀩𑁆𑀩𑀜𑁆𑀜𑀽 𑀅𑀲𑁆𑀲 ‘‘𑀲𑀓𑀯𑀸𑀤𑀁 𑀙𑀟𑁆𑀟𑁂𑀢𑁆𑀯𑀸 𑀤𑁂𑀯𑀤𑀢𑁆𑀢𑀯𑀸𑀤𑁂 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀕𑀸𑀭𑀬𑁆𑀳𑁄 𑀘 𑀪𑀯𑁂𑀬𑁆𑀬. 𑀢𑀲𑁆𑀫𑀸 𑀪𑀕𑀯𑀸 𑀏𑀯𑀭𑀽𑀧𑁂 𑀧𑀼𑀕𑁆𑀕𑀮𑁂 𑀲𑀗𑁆𑀕𑀡𑁆𑀳𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺. 𑀏𑀢𑁂𑀦𑁂𑀯𑀽𑀧𑀸𑀬𑁂𑀦 𑀧𑀺𑀡𑁆𑀟𑀧𑀸𑀢𑀺𑀓𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀧𑀁𑀲𑀼𑀓𑀽𑀮𑀺𑀓𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀅𑀝𑁆𑀞 𑀫𑀸𑀲𑁂 𑀭𑀼𑀓𑁆𑀔𑀫𑀽𑀮𑀺𑀓𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀢𑁆𑀢𑀸𑀭𑁄 𑀧𑀦 𑀫𑀸𑀲𑁂 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯.

𑀫𑀘𑁆𑀙𑀫𑀁𑀲𑀯𑀢𑁆𑀣𑀼𑀲𑁆𑀫𑀺𑀁 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀢𑀻𑀳𑀺 𑀓𑁄𑀝𑀻𑀳𑀺 𑀧𑀭𑀺𑀲𑀼𑀤𑁆𑀥𑀁, 𑀤𑀺𑀝𑁆𑀞𑀸𑀤𑀻𑀳𑀺 𑀅𑀧𑀭𑀺𑀲𑀼𑀤𑁆𑀥𑀻𑀳𑀺 𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 𑁋 ‘‘𑀅𑀤𑀺𑀝𑁆𑀞𑀁, 𑀅𑀲𑀼𑀢𑀁, 𑀅𑀧𑀭𑀺𑀲𑀗𑁆𑀓𑀺𑀢’’𑀦𑁆𑀢𑀺. 𑀢𑀢𑁆𑀣 ‘‘𑀅𑀤𑀺𑀝𑁆𑀞𑀁’’ 𑀦𑀸𑀫 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀫𑀺𑀕𑀫𑀘𑁆𑀙𑁂 𑀯𑀥𑀺𑀢𑁆𑀯𑀸 𑀕𑀬𑁆𑀳𑀫𑀸𑀦𑀁 𑀅𑀤𑀺𑀝𑁆𑀞𑀁. ‘‘𑀅𑀲𑀼𑀢𑀁’’ 𑀦𑀸𑀫 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀫𑀺𑀕𑀫𑀘𑁆𑀙𑁂 𑀯𑀥𑀺𑀢𑁆𑀯𑀸 𑀕𑀳𑀺𑀢𑀦𑁆𑀢𑀺 𑀅𑀲𑀼𑀢𑀁. ‘‘𑀅𑀧𑀭𑀺𑀲𑀗𑁆𑀓𑀺𑀢𑀁’’ 𑀧𑀦 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀢𑀤𑀼𑀪𑀬𑀯𑀺𑀫𑀼𑀢𑁆𑀢𑀧𑀭𑀺𑀲𑀗𑁆𑀓𑀺𑀢𑀜𑁆𑀘 𑀜𑀢𑁆𑀯𑀸 𑀢𑀩𑁆𑀩𑀺𑀧𑀓𑁆𑀔𑀢𑁄 𑀚𑀸𑀦𑀺𑀢𑀩𑁆𑀩𑀁. 𑀓𑀣𑀁? 𑀇𑀥 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺 𑀫𑀦𑀼𑀲𑁆𑀲𑁂 𑀚𑀸𑀮𑀯𑀸𑀕𑀼𑀭𑀸𑀤𑀺𑀳𑀢𑁆𑀣𑁂 𑀕𑀸𑀫𑀢𑁄 𑀯 𑀦𑀺𑀓𑁆𑀔𑀫𑀦𑁆𑀢𑁂 𑀅𑀭𑀜𑁆𑀜𑁂 𑀯𑀸 𑀯𑀺𑀘𑀭𑀦𑁆𑀢𑁂, 𑀤𑀼𑀢𑀺𑀬𑀤𑀺𑀯𑀲𑁂 𑀘 𑀦𑁂𑀲𑀁 𑀢𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀸𑀦𑀁 𑀲𑀫𑀘𑁆𑀙𑀫𑀁𑀲𑀁 𑀧𑀺𑀡𑁆𑀟𑀧𑀸𑀢𑀁 𑀅𑀪𑀺𑀳𑀭𑀦𑁆𑀢𑀺. 𑀢𑁂 𑀢𑁂𑀦 𑀤𑀺𑀝𑁆𑀞𑁂𑀦 𑀧𑀭𑀺𑀲𑀗𑁆𑀓𑀦𑁆𑀢𑀺 ‘‘𑀪𑀺𑀓𑁆𑀔𑀽𑀦𑀁 𑀦𑀼𑀔𑁄 𑀅𑀢𑁆𑀣𑀸𑀬 𑀓𑀢’’𑀦𑁆𑀢𑀺 𑀇𑀤𑀁 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁, 𑀦𑀸𑀫 𑀏𑀢𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀁 𑀏𑀯𑀁 𑀅𑀧𑀭𑀺𑀲𑀗𑁆𑀓𑀺𑀢𑀁 𑀢𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀢𑁂 𑀫𑀦𑀼𑀲𑁆𑀲𑀸 ‘‘𑀓𑀲𑁆𑀫𑀸 𑀪𑀦𑁆𑀢𑁂 𑀦 𑀕𑀡𑁆𑀳𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀦𑀬𑀺𑀤𑀁 𑀪𑀦𑁆𑀢𑁂 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀓𑀢𑀁, 𑀅𑀫𑁆𑀳𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀸 𑀭𑀸𑀚𑀬𑀼𑀢𑁆𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀯𑀸 𑀓𑀢’’𑀦𑁆𑀢𑀺 𑀯𑀤𑀦𑁆𑀢𑀺 𑀓𑀧𑁆𑀧𑀢𑀺.

𑀦𑀳𑁂𑀯 𑀔𑁄 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺; 𑀅𑀧𑀺𑀘 𑀲𑀼𑀡𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀓𑀺𑀭 𑀚𑀸𑀮𑀯𑀸𑀕𑀼𑀭𑀸𑀤𑀺𑀳𑀢𑁆𑀣𑀸 𑀕𑀸𑀫𑀢𑁄 𑀯𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀅𑀭𑀜𑁆𑀜𑁂 𑀯𑀸 𑀯𑀺𑀘𑀭𑀦𑁆𑀢𑀻’’𑀢𑀺. 𑀤𑀼𑀢𑀺𑀬𑀤𑀺𑀯𑀲𑁂 𑀘 𑀦𑁂𑀲𑀁 𑀢𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀸𑀦𑀁 ‘‘𑀪𑀺𑀓𑁆𑀔𑀽𑀦𑀁 𑀦𑀼𑀔𑁄 𑀅𑀢𑁆𑀣𑀸𑀬 𑀓𑀢’’𑀦𑁆𑀢𑀺 𑀇𑀤𑀁 ‘‘𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁’’ 𑀦𑀸𑀫. 𑀏𑀢𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀬𑀁 𑀏𑀯𑀁 𑀅𑀧𑀭𑀺𑀲𑀗𑁆𑀓𑀺𑀢𑀁 𑀢𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀢𑁂 𑀫𑀦𑀼𑀲𑁆𑀲𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀦 𑀕𑀡𑁆𑀳𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀦𑀬𑀺𑀤𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀓𑀢𑀁, 𑀅𑀫𑁆𑀳𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀸 𑀭𑀸𑀚𑀬𑀼𑀢𑁆𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀯𑀸 𑀓𑀢’’𑀦𑁆𑀢𑀺 𑀯𑀤𑀦𑁆𑀢𑀺 𑀓𑀧𑁆𑀧𑀢𑀺.

𑀦𑀳𑁂𑀯 𑀔𑁄 𑀧𑀦 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺, 𑀦 𑀲𑀼𑀡𑀦𑁆𑀢𑀺; 𑀅𑀧𑀺𑀘 𑀔𑁄 𑀢𑁂𑀲𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀸𑀦𑀁 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀫𑀘𑁆𑀙𑀫𑀁𑀲𑀁 𑀧𑀺𑀡𑁆𑀟𑀧𑀸𑀢𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀪𑀺𑀳𑀭𑀦𑁆𑀢𑀺, 𑀢𑁂 𑀧𑀭𑀺𑀲𑀗𑁆𑀓𑀦𑁆𑀢𑀺 ‘‘𑀪𑀺𑀓𑁆𑀔𑀽𑀦𑀁 𑀦𑀼𑀔𑁄 𑀅𑀢𑁆𑀣𑀸𑀬 𑀓𑀢’’𑀦𑁆𑀢𑀺 𑀇𑀤𑀁 ‘‘𑀢𑀤𑀼𑀪𑀬𑀯𑀺𑀫𑀼𑀢𑁆𑀢𑀧𑀭𑀺𑀲𑀗𑁆𑀓𑀺𑀢𑀁’’ 𑀦𑀸𑀫. 𑀏𑀢𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀁 𑀏𑀯𑀁 𑀅𑀧𑀭𑀺𑀲𑀗𑁆𑀓𑀺𑀢𑀁 𑀢𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀢𑁂 𑀫𑀦𑀼𑀲𑁆𑀲𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀦 𑀕𑀡𑁆𑀳𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀦𑀬𑀺𑀤𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀓𑀢𑀁 𑀅𑀫𑁆𑀳𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀸 𑀭𑀸𑀚𑀬𑀼𑀢𑁆𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀯𑀸 𑀓𑀢𑀁 𑀧𑀯𑀢𑁆𑀢𑀫𑀁𑀲𑀁 𑀯𑀸 𑀓𑀧𑁆𑀧𑀺𑀬𑀫𑁂𑀯 𑀮𑀪𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀲𑀫𑁆𑀧𑀸𑀤𑀺𑀢’’𑀦𑁆𑀢𑀺 𑀯𑀤𑀦𑁆𑀢𑀺 𑀓𑀧𑁆𑀧𑀢𑀺. 𑀫𑀢𑀸𑀦𑀁 𑀧𑁂𑀢𑀓𑀺𑀘𑁆𑀘𑀢𑁆𑀣𑀸𑀬 𑀫𑀗𑁆𑀕𑀮𑀸𑀤𑀻𑀦𑀁 𑀯𑀸 𑀅𑀢𑁆𑀣𑀸𑀬 𑀓𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀁 𑀬𑀜𑁆𑀳𑀺 𑀪𑀺𑀓𑁆𑀔𑀽𑀦𑀁𑀬𑁂𑀯 𑀅𑀢𑁆𑀣𑀸𑀬 𑀅𑀓𑀢𑀁, 𑀬𑀢𑁆𑀣 𑀘 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑁄𑀢𑀺, 𑀢𑀁 𑀲𑀩𑁆𑀩𑀁 𑀓𑀧𑁆𑀧𑀢𑀺.

𑀲𑀘𑁂 𑀧𑀦 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀳𑁄𑀢𑀺, 𑀢𑁂 𑀘 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀢𑀪𑀸𑀯𑀁 𑀦 𑀚𑀸𑀦𑀦𑁆𑀢𑀺, 𑀅𑀜𑁆𑀜𑁂 𑀚𑀸𑀦𑀦𑁆𑀢𑀺. 𑀬𑁂 𑀚𑀸𑀦𑀦𑁆𑀢𑀺, 𑀢𑁂𑀲𑀁 𑀦 𑀯𑀝𑁆𑀝𑀢𑀺, 𑀇𑀢𑀭𑁂𑀲𑀁 𑀯𑀝𑁆𑀝𑀢𑀺. 𑀅𑀜𑁆𑀜𑁂 𑀦 𑀚𑀸𑀦𑀦𑁆𑀢𑀺, 𑀢𑁂𑀬𑁂𑀯 𑀚𑀸𑀦𑀦𑁆𑀢𑀺, 𑀢𑁂𑀲𑀁𑀬𑁂𑀯 𑀦 𑀯𑀝𑁆𑀝𑀢𑀺, 𑀅𑀜𑁆𑀜𑁂𑀲𑀁 𑀯𑀝𑁆𑀝𑀢𑀺. 𑀢𑁂𑀧𑀺 𑀅𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀓𑀢𑀦𑁆𑀢𑀺 𑀚𑀸𑀦𑀦𑁆𑀢𑀺, 𑀅𑀜𑁆𑀜𑁂𑀧𑀺 𑀏𑀢𑁂𑀲𑀁 𑀅𑀢𑁆𑀣𑀸𑀬 𑀓𑀢𑀦𑁆𑀢𑀺 𑀚𑀸𑀦𑀦𑁆𑀢𑀺, 𑀲𑀩𑁆𑀩𑁂𑀲𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀲𑀩𑁆𑀩𑁂 𑀦 𑀚𑀸𑀦𑀦𑁆𑀢𑀺, 𑀲𑀩𑁆𑀩𑁂𑀲𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀜𑁆𑀘𑀲𑀼 𑀳𑀺 𑀲𑀳𑀥𑀫𑁆𑀫𑀺𑀓𑁂𑀲𑀼 𑀬𑀲𑁆𑀲 𑀯𑀸 𑀢𑀲𑁆𑀲 𑀯𑀸 𑀅𑀢𑁆𑀣𑀸𑀬 𑀉𑀤𑁆𑀤𑀺𑀲𑁆𑀲 𑀓𑀢𑀁, 𑀲𑀩𑁆𑀩𑁂𑀲𑀁 𑀦 𑀓𑀧𑁆𑀧𑀢𑀺.

𑀲𑀘𑁂 𑀧𑀦 𑀓𑁄𑀘𑀺 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀤𑁆𑀤𑀺𑀲𑁆𑀲 𑀧𑀸𑀡𑀁 𑀯𑀥𑀺𑀢𑁆𑀯𑀸 𑀢𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑁂𑀢𑀺, 𑀲𑁄 𑀘 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀢𑀪𑀸𑀯𑀁 𑀚𑀸𑀦𑀁𑀬𑁂𑀯 𑀕𑀳𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀢𑀺, 𑀲𑁄 𑀢𑀲𑁆𑀲 𑀲𑀤𑁆𑀥𑀸𑀬 𑀧𑀭𑀺𑀪𑀼𑀜𑁆𑀚𑀢𑀺, 𑀓𑀲𑁆𑀲 𑀆𑀧𑀢𑁆𑀢𑀻𑀢𑀺? 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺. 𑀬𑀜𑁆𑀳𑀺 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀢𑀲𑁆𑀲 𑀅𑀪𑀼𑀢𑁆𑀢𑀢𑀸𑀬 𑀅𑀦𑀸𑀧𑀢𑁆𑀢𑀺, 𑀇𑀢𑀭𑀲𑁆𑀲 𑀅𑀚𑀸𑀦𑀦𑀢𑀸𑀬. 𑀓𑀧𑁆𑀧𑀺𑀬𑀫𑀁𑀲𑀲𑁆𑀲 𑀳𑀺 𑀧𑀝𑀺𑀕𑁆𑀕𑀳𑀡𑁂 𑀆𑀧𑀢𑁆𑀢𑀺 𑀦𑀢𑁆𑀣𑀺. 𑀉𑀤𑁆𑀤𑀺𑀲𑁆𑀲 𑀓𑀢𑀜𑁆𑀘 𑀅𑀚𑀸𑀦𑀺𑀢𑁆𑀯𑀸 𑀪𑀼𑀢𑁆𑀢𑀲𑁆𑀲 𑀧𑀘𑁆𑀙𑀸 𑀜𑀢𑁆𑀯𑀸 𑀆𑀧𑀢𑁆𑀢𑀺𑀤𑁂𑀲𑀦𑀸𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺, 𑀅𑀓𑀧𑁆𑀧𑀺𑀬𑀫𑀁𑀲𑀁 𑀧𑀦 𑀅𑀚𑀸𑀦𑀺𑀢𑁆𑀯𑀸 𑀪𑀼𑀢𑁆𑀢𑁂𑀦 𑀧𑀘𑁆𑀙𑀸 𑀜𑀢𑁆𑀯𑀸𑀧𑀺 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸, 𑀉𑀤𑁆𑀤𑀺𑀲𑁆𑀲 𑀓𑀢𑀜𑁆𑀳𑀺 𑀜𑀢𑁆𑀯𑀸 𑀪𑀼𑀜𑁆𑀚𑀢𑁄𑀯 𑀆𑀧𑀢𑁆𑀢𑀺. 𑀅𑀓𑀧𑁆𑀧𑀺𑀬𑀫𑀁𑀲𑀁 𑀅𑀚𑀸𑀦𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀆𑀧𑀢𑁆𑀢𑀺𑀪𑀻𑀭𑀼𑀓𑁂𑀦 𑀭𑀽𑀧𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦𑀧𑀺 𑀧𑀼𑀘𑁆𑀙𑀺𑀢𑁆𑀯𑀸𑀯 𑀫𑀁𑀲𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀧𑀭𑀺𑀪𑁄𑀕𑀓𑀸𑀮𑁂 𑀧𑀼𑀘𑁆𑀙𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀯𑀸 𑀕𑀳𑁂𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸. 𑀅𑀘𑁆𑀙𑀫𑀁𑀲𑀁 𑀳𑀺 𑀲𑀽𑀓𑀭𑀫𑀁𑀲𑀲𑀤𑀺𑀲𑀁 𑀳𑁄𑀢𑀺, 𑀤𑀻𑀧𑀺𑀫𑀁𑀲𑀸𑀤𑀻𑀦𑀺𑀧𑀺 𑀫𑀺𑀕𑀫𑀁𑀲𑀸𑀤𑀺𑀲𑀤𑀺𑀲𑀸𑀦𑀺, 𑀢𑀲𑁆𑀫𑀸 𑀧𑀼𑀘𑁆𑀙𑀺𑀢𑁆𑀯𑀸 𑀕𑀳𑀡𑀫𑁂𑀯 𑀯𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺.

𑀳𑀝𑁆𑀞𑁄 𑀉𑀤𑀕𑁆𑀕𑁄𑀢𑀺 𑀢𑀼𑀝𑁆𑀞𑁄 𑀘𑁂𑀯 𑀉𑀦𑁆𑀦𑀢𑀓𑀸𑀬𑀘𑀺𑀢𑁆𑀢𑁄 𑀘 𑀳𑀼𑀢𑁆𑀯𑀸. 𑀲𑁄 𑀓𑀺𑀭 ‘‘𑀦 𑀪𑀕𑀯𑀸 𑀇𑀫𑀸𑀦𑀺 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀅𑀦𑀼𑀚𑀸𑀦𑀸𑀢𑀺, 𑀇𑀤𑀸𑀦𑀺 𑀲𑀓𑁆𑀔𑀺𑀲𑁆𑀲𑀸𑀫𑀺 𑀲𑀗𑁆𑀖𑀪𑁂𑀤𑀁 𑀓𑀸𑀢𑀼’’𑀦𑁆𑀢𑀺 𑀓𑁄𑀓𑀸𑀮𑀺𑀓𑀲𑁆𑀲 𑀇𑀗𑁆𑀕𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀬𑀣𑀸 𑀯𑀺𑀲𑀁 𑀯𑀸 𑀔𑀸𑀤𑀺𑀢𑁆𑀯𑀸 𑀭𑀚𑁆𑀚𑀼𑀬𑀸 𑀯𑀸 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 𑀲𑀢𑁆𑀣𑀁 𑀯𑀸 𑀆𑀳𑀭𑀺𑀢𑁆𑀯𑀸 𑀫𑀭𑀺𑀢𑀼𑀓𑀸𑀫𑁄 𑀧𑀼𑀭𑀺𑀲𑁄 𑀯𑀺𑀲𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀮𑀪𑀺𑀢𑁆𑀯𑀸 𑀢𑀧𑁆𑀧𑀘𑁆𑀘𑀬𑀸 𑀆𑀲𑀦𑁆𑀦𑀫𑁆𑀧𑀺 𑀫𑀭𑀡𑀤𑀼𑀓𑁆𑀔𑀁 𑀅𑀚𑀸𑀦𑀦𑁆𑀢𑁄 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀳𑁄𑀢𑀺; 𑀏𑀯𑀫𑁂𑀯 𑀲𑀗𑁆𑀖𑀪𑁂𑀤𑀧𑀘𑁆𑀘𑀬𑀸 𑀆𑀲𑀦𑁆𑀦𑀫𑁆𑀧𑀺 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀝𑀺𑀲𑀁𑀯𑁂𑀤𑀦𑀻𑀬𑀁 𑀤𑀼𑀓𑁆𑀔𑀁 𑀅𑀚𑀸𑀦𑀦𑁆𑀢𑁄 ‘‘𑀮𑀤𑁆𑀥𑁄 𑀤𑀸𑀦𑀺 𑀫𑁂 𑀲𑀗𑁆𑀖𑀪𑁂𑀤𑀲𑁆𑀲 𑀉𑀧𑀸𑀬𑁄’’𑀢𑀺 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀲𑀧𑀭𑀺𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀢𑁂𑀦𑁂𑀯 𑀳𑀝𑁆𑀞𑀪𑀸𑀯𑁂𑀦 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑁂 𑀫𑀬𑀁 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀯𑀢𑁆𑀣𑀽𑀳𑀺 𑀲𑀫𑀸𑀤𑀸𑀬 𑀯𑀢𑁆𑀢𑀸𑀫𑀸𑀢𑀺 𑀏𑀢𑁆𑀣 𑀧𑀦 ‘‘𑀇𑀫𑀸𑀦𑀺 𑀧𑀜𑁆𑀘 𑀯𑀢𑁆𑀣𑀽𑀦𑀻’’𑀢𑀺 𑀯𑀢𑁆𑀢𑀩𑁆𑀩𑁂𑀧𑀺 𑀢𑁂 𑀫𑀬𑀁 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀯𑀢𑁆𑀣𑀽𑀳𑀺 𑀚𑀦𑀁 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀸𑀢𑀺 𑀅𑀪𑀺𑀡𑁆𑀳𑀁 𑀧𑀭𑀺𑀯𑀺𑀢𑀓𑁆𑀓𑀯𑀲𑁂𑀦 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀪𑀺𑀡𑁆𑀳𑀁 𑀧𑀭𑀺𑀯𑀺𑀢𑀓𑁆𑀓𑀸𑀦𑀼𑀭𑀽𑀧𑀫𑁂𑀯 ‘‘𑀢𑁂 𑀫𑀬𑀁 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀯𑀢𑁆𑀣𑀽𑀳𑀻’’𑀢𑀺 𑀆𑀳, 𑀬𑀣𑀸 𑀢𑀁 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄.

𑀥𑀼𑀢𑀸 𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑁄𑀢𑀺 𑀬𑀸 𑀧𑀝𑀺𑀧𑀤𑀸 𑀓𑀺𑀮𑁂𑀲𑁂 𑀥𑀼𑀦𑀸𑀢𑀺, 𑀢𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀥𑀼𑀢𑀸. 𑀬𑀸 𑀘 𑀓𑀺𑀮𑁂𑀲𑁂 𑀲𑀮𑁆𑀮𑀺𑀔𑀢𑀺, 𑀲𑀸 𑀏𑀢𑁂𑀲𑀁 𑀯𑀼𑀢𑁆𑀢𑀻𑀢𑀺 𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑁄.

𑀩𑀸𑀳𑀼𑀮𑀺𑀓𑁄𑀢𑀺 𑀘𑀻𑀯𑀭𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀩𑀳𑀼𑀮𑀪𑀸𑀯𑁄 𑀩𑀸𑀳𑀼𑀮𑁆𑀮𑀁, 𑀢𑀁 𑀩𑀸𑀳𑀼𑀮𑁆𑀮𑀫𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀯𑀸 𑀩𑀸𑀳𑀼𑀮𑁆𑀮𑁂 𑀦𑀺𑀬𑀼𑀢𑁆𑀢𑁄 𑀞𑀺𑀢𑁄𑀢𑀺 𑀩𑀸𑀳𑀼𑀮𑀺𑀓𑁄. 𑀩𑀸𑀳𑀼𑀮𑁆𑀮𑀸𑀬 𑀘𑁂𑀢𑁂𑀢𑀻𑀢𑀺 𑀩𑀸𑀳𑀼𑀮𑀢𑁆𑀢𑀸𑀬 𑀘𑁂𑀢𑁂𑀢𑀺 𑀓𑀧𑁆𑀧𑁂𑀢𑀺 𑀧𑀓𑀧𑁆𑀧𑁂𑀢𑀺. 𑀓𑀣𑀜𑁆𑀳𑀺 𑀦𑀸𑀫 𑀫𑀬𑁆𑀳𑀜𑁆𑀘 𑀲𑀸𑀯𑀓𑀸𑀦𑀜𑁆𑀘 𑀘𑀻𑀯𑀭𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀩𑀳𑀼𑀮𑀪𑀸𑀯𑁄 𑀪𑀯𑁂𑀬𑁆𑀬𑀸𑀢𑀺 𑀏𑀯𑀁 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀓𑁆𑀓𑀪𑁂𑀤𑀸𑀬𑀸𑀢𑀺 𑀆𑀡𑀸𑀪𑁂𑀤𑀸𑀬.

𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸𑀢𑀺 𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦 ‘‘𑀅𑀮𑀁, 𑀤𑁂𑀯𑀤𑀢𑁆𑀢, 𑀫𑀸 𑀢𑁂 𑀭𑀼𑀘𑁆𑀘𑀺 𑀲𑀗𑁆𑀖𑀪𑁂𑀤𑁄. 𑀕𑀭𑀼𑀓𑁄 𑀔𑁄, 𑀤𑁂𑀯𑀤𑀢𑁆𑀢, 𑀲𑀗𑁆𑀖𑀪𑁂𑀤𑁄. 𑀬𑁄 𑀔𑁄, 𑀤𑁂𑀯𑀤𑀢𑁆𑀢, 𑀲𑀫𑀕𑁆𑀕𑀁 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀓𑀧𑁆𑀧𑀝𑁆𑀞𑀺𑀓𑀁 𑀓𑀺𑀩𑁆𑀩𑀺𑀲𑀁 𑀧𑀲𑀯𑀢𑀺, 𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀺, 𑀬𑁄 𑀘 𑀔𑁄, 𑀤𑁂𑀯𑀤𑀢𑁆𑀢, 𑀪𑀺𑀦𑁆𑀦𑀁 𑀲𑀗𑁆𑀖𑀁 𑀲𑀫𑀕𑁆𑀕𑀁 𑀓𑀭𑁄𑀢𑀺, 𑀩𑁆𑀭𑀳𑁆𑀫𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀢𑀻’’𑀢𑀺 (𑀘𑀽𑀴𑀯. 𑁩𑁪𑁩) 𑀏𑀯𑀫𑀸𑀤𑀺𑀓𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀤𑁂𑀯𑀤𑀢𑁆𑀢𑀲𑁆𑀲 𑀘 𑀪𑀺𑀓𑁆𑀔𑀽𑀦𑀜𑁆𑀘 𑀢𑀤𑀦𑀼𑀘𑁆𑀙𑀯𑀺𑀓𑀁 𑀢𑀤𑀦𑀼𑀮𑁄𑀫𑀺𑀓𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸.

𑁪𑁧𑁧. 𑀲𑀫𑀕𑁆𑀕𑀲𑁆𑀲𑀸𑀢𑀺 𑀲𑀳𑀺𑀢𑀲𑁆𑀲 𑀘𑀺𑀢𑁆𑀢𑁂𑀦 𑀘 𑀲𑀭𑀻𑀭𑁂𑀦 𑀘 𑀅𑀯𑀺𑀬𑀼𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀤𑀪𑀸𑀚𑀦𑁂𑀧𑀺 𑀳𑀺 𑀅𑀬𑀫𑁂𑀯 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀲𑀫𑀸𑀦𑀲𑀁𑀯𑀸𑀲𑀓𑁄𑀢𑀺 𑀳𑀺 𑀯𑀤𑀢𑀸 𑀘𑀺𑀢𑁆𑀢𑁂𑀦 𑀅𑀯𑀺𑀬𑁄𑀕𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑁄𑀢𑀺 𑀯𑀤𑀢𑀸 𑀲𑀭𑀻𑀭𑁂𑀦. 𑀓𑀣𑀁? 𑀲𑀫𑀸𑀦𑀲𑀁𑀯𑀸𑀲𑀓𑁄 𑀳𑀺 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁂𑀦 𑀯𑀸 𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑁂𑀦 𑀯𑀸 𑀯𑀺𑀭𑀳𑀺𑀢𑁄 𑀲𑀫𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑁂𑀦 𑀅𑀯𑀺𑀬𑀼𑀢𑁆𑀢𑁄 𑀳𑁄𑀢𑀺. 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑁄 𑀓𑀸𑀬𑀲𑀸𑀫𑀕𑁆𑀕𑀺𑀤𑀸𑀦𑀢𑁄 𑀲𑀭𑀻𑀭𑁂𑀦 𑀅𑀯𑀺𑀬𑀼𑀢𑁆𑀢𑁄.

𑀪𑁂𑀤𑀦𑀲𑀁𑀯𑀢𑁆𑀢𑀦𑀺𑀓𑀁 𑀯𑀸 𑀅𑀥𑀺𑀓𑀭𑀡𑀦𑁆𑀢𑀺 𑀪𑁂𑀤𑀦𑀲𑁆𑀲 𑀲𑀗𑁆𑀖𑀪𑁂𑀤𑀲𑁆𑀲 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑀺𑀓𑀁 𑀓𑀸𑀭𑀡𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀑𑀓𑀸𑀲𑁂 ‘‘𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁬𑁮) 𑀯𑀺𑀬 𑀓𑀸𑀭𑀡𑀁 𑀅𑀥𑀺𑀓𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀘 𑀬𑀲𑁆𑀫𑀸 𑀅𑀝𑁆𑀞𑀸𑀭𑀲𑀯𑀺𑀥𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀤𑀪𑀸𑀚𑀦𑁂 ‘‘𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀻’’𑀢𑀺 𑀯𑀼𑀢𑁆𑀢𑀁. 𑀢𑀸𑀦𑀺 𑀧𑀦 ‘‘𑀇𑀥𑀽𑀧𑀸𑀮𑀺, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀻’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁩𑁫𑁨) 𑀦𑀬𑁂𑀦 𑀔𑀦𑁆𑀥𑀓𑁂 𑀆𑀕𑀢𑀸𑀦𑀺, 𑀢𑀲𑁆𑀫𑀸 𑀢𑀢𑁆𑀭𑁂𑀯 𑀦𑁂𑀲𑀁 𑀅𑀢𑁆𑀣𑀁 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀬𑁄𑀧𑀺 𑀘𑀸𑀬𑀁 𑀇𑀫𑀸𑀦𑀺 𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀅𑀧𑀭𑁂𑀳𑀺𑀧𑀺 𑀓𑀫𑁆𑀫𑁂𑀦, 𑀉𑀤𑁆𑀤𑁂𑀲𑁂𑀦, 𑀯𑁄𑀳𑀸𑀭𑁂𑀦, 𑀅𑀦𑀼𑀲𑀸𑀯𑀦𑀸𑀬, 𑀲𑀮𑀸𑀓𑀕𑁆𑀕𑀸𑀳𑁂𑀦𑀸𑀢𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀖𑀪𑁂𑀤𑁄 𑀳𑁄𑀢𑀺, 𑀢𑀫𑁆𑀧𑀺 𑀆𑀕𑀢𑀝𑁆𑀞𑀸𑀦𑁂𑀬𑁂𑀯 𑀧𑀓𑀸𑀲𑀬𑀺𑀲𑁆𑀲𑀸𑀫. 𑀲𑀗𑁆𑀔𑁂𑀧𑀢𑁄 𑀧𑀦 𑀪𑁂𑀤𑀦𑀲𑀁𑀯𑀢𑁆𑀢𑀦𑀺𑀓𑀁 𑀯𑀸 𑀅𑀥𑀺𑀓𑀭𑀡𑀁 𑀲𑀫𑀸𑀤𑀸𑀬𑀸𑀢𑀺 𑀏𑀢𑁆𑀣 𑀲𑀗𑁆𑀖𑀪𑁂𑀤𑀲𑁆𑀲 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑀺𑀓𑀁 𑀲𑀗𑁆𑀖𑀪𑁂𑀤𑀦𑀺𑀧𑁆𑀨𑀢𑁆𑀢𑀺𑀲𑀫𑀢𑁆𑀣𑀁 𑀓𑀸𑀭𑀡𑀁 𑀕𑀳𑁂𑀢𑁆𑀯𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀕𑁆𑀕𑀬𑁆𑀳𑀸𑀢𑀺 𑀧𑀕𑁆𑀕𑀳𑀺𑀢𑀁 𑀅𑀩𑁆𑀪𑀼𑀲𑁆𑀲𑀺𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸. 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀬𑀣𑀸𑀧𑀕𑁆𑀕𑀳𑀺𑀢𑀫𑁂𑀯 𑀘 𑀓𑀢𑁆𑀯𑀸 𑀅𑀘𑁆𑀙𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀏𑀯𑀁 𑀧𑀕𑁆𑀕𑀡𑁆𑀳𑀢𑀸 𑀢𑀺𑀝𑁆𑀞𑀢𑀸 𑀘 𑀢𑀁 𑀤𑀻𑀧𑀺𑀢𑀜𑁆𑀘𑁂𑀯 𑀅𑀧𑁆𑀧𑀝𑀺𑀦𑀺𑀲𑁆𑀲𑀝𑁆𑀞𑀜𑁆𑀘 𑀳𑁄𑀢𑀺, 𑀢𑀲𑁆𑀫𑀸 𑀧𑀤𑀪𑀸𑀚𑀦𑁂 ‘‘𑀤𑀻𑀧𑁂𑀬𑁆𑀬𑀸’’𑀢𑀺 𑀘 ‘‘𑀦𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬𑀸’’𑀢𑀺 𑀘 𑀯𑀼𑀢𑁆𑀢𑀁.

𑀪𑀺𑀓𑁆𑀔𑀽𑀳𑀺 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄𑀢𑀺 𑀅𑀜𑁆𑀜𑁂𑀳𑀺 𑀮𑀚𑁆𑀚𑀻𑀳𑀺 𑀪𑀺𑀓𑁆𑀔𑀽𑀳𑀺 𑀏𑀯𑀁 𑀯𑀢𑁆𑀢𑀩𑁆𑀩𑁄 𑀪𑀯𑁂𑀬𑁆𑀬. 𑀧𑀤𑀪𑀸𑀚𑀦𑁂 𑀘𑀲𑁆𑀲 𑀬𑁂 𑀧𑀲𑁆𑀲𑀦𑁆𑀢𑀻𑀢𑀺 𑀬𑁂 𑀲𑀫𑁆𑀫𑀼𑀔𑀸 𑀧𑀕𑁆𑀕𑀬𑁆𑀳 𑀢𑀺𑀝𑁆𑀞𑀦𑁆𑀢𑀁 𑀧𑀲𑁆𑀲𑀦𑁆𑀢𑀺. 𑀬𑁂 𑀲𑀼𑀡𑀦𑁆𑀢𑀻𑀢𑀺 𑀬𑁂𑀧𑀺 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀪𑁂𑀤𑀦𑀲𑀁𑀯𑀢𑁆𑀢𑀦𑀺𑀓𑀁 𑀅𑀥𑀺𑀓𑀭𑀡𑀁 𑀲𑀫𑀸𑀤𑀸𑀬 𑀧𑀕𑁆𑀕𑀬𑁆𑀳 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀲𑀼𑀡𑀦𑁆𑀢𑀺.

𑀲𑀫𑁂𑀢𑀸𑀬𑀲𑁆𑀫𑀸 𑀲𑀗𑁆𑀖𑁂𑀦𑀸𑀢𑀺 𑀆𑀬𑀲𑁆𑀫𑀸 𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀲𑀫𑁂𑀢𑀼 𑀲𑀫𑀸𑀕𑀘𑁆𑀙𑀢𑀼 𑀏𑀓𑀮𑀤𑁆𑀥𑀺𑀓𑁄 𑀳𑁄𑀢𑀽𑀢𑀺 𑀅𑀢𑁆𑀣𑁄. 𑀓𑀺𑀁 𑀓𑀸𑀭𑀡𑀸? 𑀲𑀫𑀕𑁆𑀕𑁄 𑀳𑀺 𑀲𑀗𑁆𑀖𑁄 𑀲𑀫𑁆𑀫𑁄𑀤𑀫𑀸𑀦𑁄 𑀅𑀯𑀺𑀯𑀤𑀫𑀸𑀦𑁄 𑀏𑀓𑀼𑀤𑁆𑀤𑁂𑀲𑁄 𑀨𑀸𑀲𑀼 𑀯𑀺𑀳𑀭𑀢𑀻𑀢𑀺.

𑀢𑀢𑁆𑀣 𑀲𑀫𑁆𑀫𑁄𑀤𑀫𑀸𑀦𑁄𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀢𑁆𑀢𑀺𑀬𑀸 𑀲𑀝𑁆𑀞𑀼 𑀫𑁄𑀤𑀫𑀸𑀦𑁄. 𑀅𑀯𑀺𑀯𑀤𑀫𑀸𑀦𑁄𑀢𑀺 ‘‘𑀅𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄’’𑀢𑀺 𑀏𑀯𑀁 𑀦 𑀯𑀺𑀯𑀤𑀫𑀸𑀦𑁄. 𑀏𑀓𑁄 𑀉𑀤𑁆𑀤𑁂𑀲𑁄 𑀅𑀲𑁆𑀲𑀸𑀢𑀺 𑀏𑀓𑀼𑀤𑁆𑀤𑁂𑀲𑁄, 𑀏𑀓𑀢𑁄 𑀧𑀯𑀢𑁆𑀢𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄, 𑀦 𑀯𑀺𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀨𑀸𑀲𑀼 𑀯𑀺𑀳𑀭𑀢𑀻𑀢𑀺 𑀲𑀼𑀔𑀁 𑀯𑀺𑀳𑀭𑀢𑀺.

𑀇𑀘𑁆𑀘𑁂𑀢𑀁 𑀓𑀼𑀲𑀮𑀦𑁆𑀢𑀺 𑀏𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀁 𑀓𑀼𑀲𑀮𑀁 𑀔𑁂𑀫𑀁 𑀲𑁄𑀢𑁆𑀣𑀺𑀪𑀸𑀯𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀦𑁄 𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀲𑁆𑀲 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑁄 𑀤𑀼𑀓𑁆𑀓𑀝𑀁. 𑀲𑀼𑀢𑁆𑀯𑀸 𑀦 𑀯𑀤𑀦𑁆𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀬𑁂 𑀲𑀼𑀢𑁆𑀯𑀸 𑀦 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀤𑀼𑀓𑁆𑀓𑀝𑀁. 𑀓𑀻𑀯𑀤𑀽𑀭𑁂 𑀲𑀼𑀢𑁆𑀯𑀸 𑀅𑀯𑀤𑀦𑁆𑀢𑀸𑀦𑀁 𑀤𑀼𑀓𑁆𑀓𑀝𑀁? 𑀏𑀓𑀯𑀺𑀳𑀸𑀭𑁂 𑀢𑀸𑀯 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀫𑀦𑁆𑀢𑀸 𑀅𑀤𑁆𑀥𑀬𑁄𑀚𑀦𑁂 𑀪𑀺𑀓𑁆𑀔𑀽𑀦𑀁 𑀪𑀸𑀭𑁄. 𑀤𑀽𑀢𑀁 𑀯𑀸 𑀧𑀡𑁆𑀡𑀁 𑀯𑀸 𑀧𑁂𑀲𑁂𑀢𑁆𑀯𑀸 𑀯𑀤𑀢𑁄𑀧𑀺 𑀆𑀧𑀢𑁆𑀢𑀺𑀫𑁄𑀓𑁆𑀔𑁄 𑀦𑀢𑁆𑀣𑀺. 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 ‘𑀕𑀭𑀼𑀓𑁄 𑀔𑁄, 𑀆𑀯𑀼𑀲𑁄, 𑀲𑀗𑁆𑀖𑀪𑁂𑀤𑁄, 𑀫𑀸 𑀲𑀗𑁆𑀖𑀪𑁂𑀤𑀸𑀬, 𑀧𑀭𑀓𑁆𑀓𑀫𑀻’𑀢𑀺 𑀦𑀺𑀯𑀸𑀭𑁂𑀢𑀩𑁆𑀩𑁄’’𑀢𑀺. 𑀧𑀳𑁄𑀦𑁆𑀢𑁂𑀦 𑀧𑀦 𑀤𑀽𑀭𑀫𑁆𑀧𑀺 𑀕𑀦𑁆𑀢𑀩𑁆𑀩𑀁 𑀅𑀕𑀺𑀮𑀸𑀦𑀸𑀦𑀜𑁆𑀳𑀺 𑀤𑀽𑀭𑁂𑀧𑀺 𑀪𑀸𑀭𑁄𑀬𑁂𑀯.

𑀇𑀤𑀸𑀦𑀺 ‘‘𑀏𑀯𑀜𑁆𑀘 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀯𑀼𑀘𑁆𑀘𑀫𑀸𑀦𑁄’’𑀢𑀺𑀆𑀤𑀻𑀲𑀼 𑀅𑀢𑁆𑀣𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀪𑀺𑀓𑁆𑀔𑀼 𑀲𑀗𑁆𑀖𑀫𑀚𑁆𑀛𑀫𑁆𑀧𑀺 𑀆𑀓𑀟𑁆𑀠𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀗𑁆𑀖𑀫𑀚𑁆𑀛𑀫𑁆𑀧𑀺 𑀆𑀓𑀟𑁆𑀠𑀺𑀢𑁆𑀯𑀸𑀢𑀺 𑀲𑀘𑁂 𑀧𑀼𑀭𑀺𑀫𑀦𑀬𑁂𑀦 𑀯𑀼𑀘𑁆𑀘𑀫𑀸𑀦𑁄 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀳𑀢𑁆𑀣𑁂𑀲𑀼 𑀘 𑀧𑀸𑀤𑁂𑀲𑀼 𑀘 𑀕𑀳𑁂𑀢𑁆𑀯𑀸𑀧𑀺 𑀲𑀗𑁆𑀖𑀫𑀚𑁆𑀛𑀁 𑀆𑀓𑀟𑁆𑀠𑀺𑀢𑁆𑀯𑀸 𑀧𑀼𑀦𑀧𑀺 ‘‘𑀫𑀸 𑀆𑀬𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑁄.

𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑁄𑀢𑀺 𑀬𑀸𑀯 𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀁 𑀢𑀸𑀯 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑁄. 𑀢𑀻𑀳𑀺 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀯𑀸𑀘𑀸𑀳𑀺 𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀤𑀪𑀸𑀚𑀦𑁂 𑀧𑀦𑀲𑁆𑀲 𑀅𑀢𑁆𑀣𑀫𑁂𑀯 𑀕𑀳𑁂𑀢𑁆𑀯𑀸 𑀲𑀫𑀦𑀼𑀪𑀸𑀲𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀪𑀺𑀓𑁆𑀔𑀼 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑁄. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁪𑁧𑁪. 𑀢𑀢𑁆𑀣 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀬𑀜𑁆𑀘 𑀜𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂 𑀤𑀼𑀓𑁆𑀓𑀝𑀁 𑀆𑀧𑀦𑁆𑀦𑁄, 𑀬𑁂 𑀘 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑁂, 𑀢𑀸 𑀢𑀺𑀲𑁆𑀲𑁄𑀧𑀺 𑀆𑀧𑀢𑁆𑀢𑀺𑀬𑁄 ‘‘𑀬𑀲𑁆𑀲 𑀦𑀓𑁆𑀔𑀫𑀢𑀺 𑀲𑁄 𑀪𑀸𑀲𑁂𑀬𑁆𑀬𑀸’’𑀢𑀺 𑀏𑀯𑀁 𑀬𑁆𑀬-𑀓𑀸𑀭𑀧𑁆𑀧𑀢𑁆𑀢𑀫𑀢𑁆𑀢𑀸𑀬 𑀢𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀬𑁂𑀯 𑀢𑀺𑀝𑁆𑀞𑀢𑀺. 𑀓𑀺𑀁 𑀧𑀦 𑀆𑀧𑀦𑁆𑀦𑀸𑀧𑀢𑁆𑀢𑀺𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺 𑀅𑀦𑀸𑀧𑀦𑁆𑀦𑀸𑀢𑀺? 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀢𑀸𑀯 𑀯𑀤𑀢𑀺 ‘‘𑀬𑁄 𑀅𑀯𑀲𑀸𑀦𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀢𑀺, 𑀲𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀦 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀦𑀸𑀧𑀦𑁆𑀦𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻’’𑀢𑀺. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂𑀦 𑀅𑀲𑀸𑀥𑀸𑀭𑀡𑀸𑀧𑀢𑁆𑀢𑀺𑀬𑁄 𑀯𑀺𑀬 𑀆𑀧𑀦𑁆𑀦𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀅𑀦𑀸𑀧𑀦𑁆𑀦𑀸𑀦𑀁 𑀓𑀺𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸’’𑀢𑀺 𑀆𑀳.

𑁪𑁧𑁫. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻𑀢𑀺 𑀢𑀜𑁆𑀘𑁂 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀇𑀥 𑀲𑀜𑁆𑀜𑀸 𑀦 𑀭𑀓𑁆𑀔𑀢𑀺, 𑀓𑀫𑁆𑀫𑀲𑁆𑀲 𑀥𑀫𑁆𑀫𑀺𑀓𑀢𑁆𑀢𑀸 𑀏𑀯 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀧𑀚𑁆𑀚𑀢𑀺.

𑁪𑁧𑁬. 𑀅𑀲𑀫𑀦𑀼𑀪𑀸𑀲𑀦𑁆𑀢𑀲𑁆𑀲𑀸𑀢𑀺 𑀅𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑀲𑁆𑀲 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲𑀸𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀸𑀧𑀢𑁆𑀢𑀺.

𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲𑀸𑀢𑀺 𑀜𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀯𑀸 𑀜𑀢𑁆𑀢𑀺𑀓𑁆𑀔𑀡𑁂 𑀯𑀸 𑀜𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂 𑀯𑀸 𑀧𑀞𑀫𑀸𑀬 𑀯𑀸 𑀅𑀦𑀼𑀲𑀸𑀯𑀦𑀸𑀬 𑀤𑀼𑀢𑀺𑀬𑀸𑀬 𑀯𑀸 𑀢𑀢𑀺𑀬𑀸𑀬 𑀯𑀸 𑀬𑀸𑀯 𑀬𑁆𑀬-𑀓𑀸𑀭𑀁 𑀦 𑀲𑀫𑁆𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀸𑀧𑀢𑁆𑀢𑀺.

𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺. 𑀏𑀢𑁆𑀣 𑀧𑀦 ‘‘𑀤𑁂𑀯𑀤𑀢𑁆𑀢𑁄 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀪𑁂𑀤𑀸𑀬 𑀧𑀭𑀓𑁆𑀓𑀫𑀺, 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀧𑀭𑀺𑀯𑀸𑀭𑁂 (𑀧𑀭𑀺. 𑁧𑁭) 𑀆𑀕𑀢𑀢𑁆𑀢𑀸 𑀤𑁂𑀯𑀤𑀢𑁆𑀢𑁄 𑀆𑀤𑀺𑀓𑀫𑁆𑀫𑀺𑀓𑁄. 𑀲𑁄 𑀘 𑀔𑁄 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑀲𑁆𑀲𑁂𑀯, 𑀦 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀲𑁆𑀲. 𑀦 𑀳𑀺 𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀓𑀢𑀁. 𑀓𑀣𑀫𑀺𑀤𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀘𑁂? 𑀲𑀼𑀢𑁆𑀢𑀢𑁄. 𑀬𑀣𑀸 𑀳𑀺 ‘‘𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀺, 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀧𑀭𑀺𑀯𑀸𑀭𑁂 (𑀧𑀭𑀺. 𑁧𑁨𑁧) 𑀆𑀕𑀢𑀢𑁆𑀢𑀸 𑀅𑀭𑀺𑀝𑁆𑀞𑀲𑁆𑀲 𑀓𑀫𑁆𑀫𑀁 𑀓𑀢𑀦𑁆𑀢𑀺 𑀧𑀜𑁆𑀜𑀸𑀬𑀢𑀺, 𑀦 𑀢𑀣𑀸 𑀤𑁂𑀯𑀤𑀢𑁆𑀢𑀲𑁆𑀲. 𑀅𑀣𑀸𑀧𑀺𑀲𑁆𑀲 𑀓𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀓𑁄𑀘𑀺 𑀅𑀢𑁆𑀢𑀦𑁄 𑀭𑀼𑀘𑀺𑀫𑀢𑁆𑀢𑁂𑀦 𑀯𑀤𑁂𑀬𑁆𑀬, 𑀢𑀣𑀸𑀧𑀺 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁂 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀅𑀦𑀸𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀦 𑀳𑀺 𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀅𑀜𑁆𑀜𑀢𑁆𑀭 𑀉𑀤𑁆𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁄 𑀅𑀦𑀸𑀧𑀢𑁆𑀢𑀺 𑀦𑀸𑀫 𑀤𑀺𑀲𑁆𑀲𑀢𑀺. 𑀬𑀫𑁆𑀧𑀺 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀦𑀸𑀧𑀢𑁆𑀢𑀺𑀬𑀁 ‘‘𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀺𑀢𑀁, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀁. 𑀧𑀫𑀸𑀤𑀮𑀺𑀔𑀺𑀢𑀪𑀸𑀯𑁄 𑀘𑀲𑁆𑀲 ‘‘𑀧𑀞𑀫𑀁 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀘𑁄𑀤𑁂𑀢𑀩𑁆𑀩𑁄, 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑀩𑁆𑀩𑁄, 𑀲𑀸𑀭𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀭𑁄𑀧𑁂𑀢𑀩𑁆𑀩𑁄’’𑀢𑀺 (𑀘𑀽𑀴𑀯. 𑁬𑁫) 𑀏𑀯𑀁 𑀓𑀫𑁆𑀫𑀓𑁆𑀔𑀦𑁆𑀥𑀓𑁂 𑀆𑀧𑀢𑁆𑀢𑀺𑀭𑁄𑀧𑀦𑀯𑀘𑀦𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀺 𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁂 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀤𑁂𑀯𑀤𑀢𑁆𑀢𑀲𑁆𑀲 𑀬𑀲𑁆𑀫𑀸 𑀢𑀁 𑀓𑀫𑁆𑀫𑀁 𑀦 𑀓𑀢𑀁, 𑀢𑀲𑁆𑀫𑀸𑀲𑁆𑀲 𑀆𑀧𑀢𑁆𑀢𑀺𑀬𑁂𑀯 𑀦 𑀚𑀸𑀢𑀸. 𑀲𑀺𑀓𑁆𑀔𑀸𑀧𑀤𑀁 𑀧𑀦 𑀢𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 ‘‘𑀆𑀤𑀺𑀓𑀫𑁆𑀫𑀺𑀓𑁄’’𑀢𑀺 𑀯𑀼𑀢𑁆𑀢𑁄. 𑀇𑀢𑀺 𑀆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄𑀬𑁂𑀯𑀲𑁆𑀲 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀲𑀸 𑀧𑀦𑁂𑀲𑀸 𑀓𑀺𑀜𑁆𑀘𑀸𑀧𑀺 𑀅𑀲𑀫𑀦𑀼𑀪𑀸𑀲𑀦𑁆𑀢𑀲𑁆𑀲𑀸𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑀸, 𑀬𑀲𑁆𑀫𑀸 𑀧𑀦 𑀅𑀲𑀫𑀦𑀼𑀪𑀸𑀲𑀦𑁆𑀢𑁄 𑀦𑀸𑀫 𑀬𑀲𑁆𑀲 𑀓𑁂𑀯𑀮𑀁 𑀲𑀫𑀦𑀼𑀪𑀸𑀲𑀦𑀁 𑀦 𑀓𑀭𑁄𑀦𑁆𑀢𑀺, 𑀲𑁄 𑀯𑀼𑀘𑁆𑀘𑀢𑀺, 𑀦 𑀆𑀤𑀺𑀓𑀫𑁆𑀫𑀺𑀓𑁄. 𑀅𑀬𑀜𑁆𑀘 𑀤𑁂𑀯𑀤𑀢𑁆𑀢𑁄 𑀆𑀤𑀺𑀓𑀫𑁆𑀫𑀺𑀓𑁄𑀬𑁂𑀯, 𑀢𑀲𑁆𑀫𑀸 ‘‘𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦𑀼𑀧𑀸𑀬𑁂𑀦 𑀞𑀧𑁂𑀢𑁆𑀯𑀸 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀲𑀩𑁆𑀩𑀲𑀫𑀦𑀼𑀪𑀸𑀲𑀦𑀸𑀲𑀼 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀢𑀺𑀯𑀗𑁆𑀕𑀺𑀓𑀁 𑀏𑀓𑀲𑀫𑀼𑀝𑁆𑀞𑀸𑀦𑀁, 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀁 𑀦𑀸𑀫𑀫𑁂𑀢𑀁, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀫𑀻𑀢𑀺 𑀓𑀸𑀬𑀯𑀺𑀓𑀸𑀭𑀁 𑀯𑀸 𑀯𑀘𑀻𑀪𑁂𑀤𑀁 𑀯𑀸 𑀅𑀓𑀭𑁄𑀦𑁆𑀢𑀲𑁆𑀲𑁂𑀯 𑀧𑀦 𑀆𑀧𑀚𑁆𑀚𑀦𑀢𑁄 𑀅𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀧𑀞𑀫𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.