𑁧𑁧. 𑀤𑀼𑀢𑀺𑀬𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁧𑁭-𑁮. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀤𑀼𑀢𑀺𑀬𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀅𑀦𑀼𑀯𑀢𑁆𑀢𑀓𑀸𑀢𑀺 𑀢𑀲𑁆𑀲 𑀤𑀺𑀝𑁆𑀞𑀺𑀔𑀦𑁆𑀢𑀺𑀭𑀼𑀘𑀺𑀕𑁆𑀕𑀳𑀡𑁂𑀦 𑀅𑀦𑀼𑀧𑀝𑀺𑀧𑀚𑁆𑀚𑀦𑀓𑀸. 𑀯𑀕𑁆𑀕𑀁 𑀅𑀲𑀸𑀫𑀕𑁆𑀕𑀺𑀧𑀓𑁆𑀔𑀺𑀬𑀯𑀘𑀦𑀁 𑀯𑀤𑀦𑁆𑀢𑀻𑀢𑀺 𑀯𑀕𑁆𑀕𑀯𑀸𑀤𑀓𑀸. 𑀧𑀤𑀪𑀸𑀚𑀦𑁂 𑀧𑀦 ‘‘𑀢𑀲𑁆𑀲 𑀯𑀡𑁆𑀡𑀸𑀬 𑀧𑀓𑁆𑀔𑀸𑀬 𑀞𑀺𑀢𑀸 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑀲𑁆𑀲 𑀯𑀡𑁆𑀡𑀢𑁆𑀣𑀸𑀬 𑀘 𑀧𑀓𑁆𑀔𑀯𑀼𑀟𑁆𑀠𑀺𑀅𑀢𑁆𑀣𑀸𑀬 𑀘 𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀬𑁂 𑀳𑀺 𑀯𑀕𑁆𑀕𑀯𑀸𑀤𑀓𑀸, 𑀢𑁂 𑀦𑀺𑀬𑀫𑁂𑀦 𑀈𑀤𑀺𑀲𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀢𑀺𑀡𑁆𑀡𑀁 𑀉𑀤𑁆𑀥𑀁 𑀓𑀫𑁆𑀫𑀸𑀭𑀳𑀸 𑀦 𑀳𑁄𑀦𑁆𑀢𑀺, 𑀦 𑀳𑀺 𑀲𑀗𑁆𑀖𑁄 𑀲𑀗𑁆𑀖𑀲𑁆𑀲 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸𑀢𑀺 𑀯𑀼𑀢𑁆𑀢𑀁.

𑀚𑀸𑀦𑀸𑀢𑀺 𑀦𑁄𑀢𑀺 𑀅𑀫𑁆𑀳𑀸𑀓𑀁 𑀙𑀦𑁆𑀤𑀸𑀤𑀻𑀦𑀺 𑀚𑀸𑀦𑀸𑀢𑀺. 𑀪𑀸𑀲𑀢𑀻𑀢𑀺 ‘‘𑀏𑀯𑀁 𑀓𑀭𑁄𑀫𑀸’’𑀢𑀺 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀪𑀸𑀲𑀢𑀺. 𑀅𑀫𑁆𑀳𑀸𑀓𑀫𑁆𑀧𑁂𑀢𑀁 𑀔𑀫𑀢𑀻𑀢𑀺 𑀬𑀁 𑀲𑁄 𑀓𑀭𑁄𑀢𑀺, 𑀏𑀢𑀁 𑀅𑀫𑁆𑀳𑀸𑀓𑀫𑁆𑀧𑀺 𑀭𑀼𑀘𑁆𑀘𑀢𑀺.

𑀲𑀫𑁂𑀢𑀸𑀬𑀲𑁆𑀫𑀦𑁆𑀢𑀸𑀦𑀁 𑀲𑀗𑁆𑀖𑁂𑀦𑀸𑀢𑀺 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀁 𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀲𑀫𑁂𑀢𑀼 𑀲𑀫𑀸𑀕𑀘𑁆𑀙𑀢𑀼, 𑀏𑀓𑀻𑀪𑀸𑀯𑀁 𑀬𑀸𑀢𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘 𑀧𑀸𑀓𑀝𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺𑀧𑀺 𑀧𑀞𑀫𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀸𑀦𑁂𑀯𑀸𑀢𑀺.

𑀤𑀼𑀢𑀺𑀬𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.