𑁧𑁨. 𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁨𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀅𑀦𑀸𑀘𑀸𑀭𑀁 𑀆𑀘𑀭𑀢𑀻𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀢𑀺. 𑀓𑀺𑀁 𑀦𑀼 𑀔𑁄 𑀦𑀸𑀫𑀸𑀢𑀺 𑀯𑀫𑁆𑀪𑀦𑀯𑀘𑀦𑀫𑁂𑀢𑀁. 𑀅𑀳𑀁 𑀔𑁄 𑀦𑀸𑀫𑀸𑀢𑀺 𑀉𑀓𑁆𑀓𑀁𑀲𑀯𑀘𑀦𑀁. 𑀢𑀼𑀫𑁆𑀳𑁂 𑀯𑀤𑁂𑀬𑁆𑀬𑀦𑁆𑀢𑀺 ‘‘𑀇𑀤𑀁 𑀓𑀭𑁄𑀣, 𑀇𑀤𑀁 𑀫𑀸 𑀓𑀭𑁄𑀣𑀸’’𑀢𑀺 𑀅𑀳𑀁 𑀢𑀼𑀫𑁆𑀳𑁂 𑀯𑀢𑁆𑀢𑀼𑀁 𑀅𑀭𑀳𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀪𑀕𑀯𑀸 𑀓𑀡𑁆𑀝𑀓𑀁 𑀆𑀭𑀼𑀬𑁆𑀳 𑀫𑀬𑀸 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄𑀢𑀺𑀏𑀯𑀫𑀸𑀤𑀺𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳. ‘‘𑀅𑀫𑁆𑀳𑀸𑀓𑀁 𑀥𑀫𑁆𑀫𑁄’’𑀢𑀺 𑀯𑀢𑁆𑀯𑀸 𑀧𑀦 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑁂 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀫𑁆𑀳𑀸𑀓𑀁 𑀅𑀬𑁆𑀬𑀧𑀼𑀢𑁆𑀢𑁂𑀦 𑀥𑀫𑁆𑀫𑁄 𑀅𑀪𑀺𑀲𑀫𑀺𑀢𑁄’’𑀢𑀺 𑀆𑀳. 𑀬𑀲𑁆𑀫𑀸 𑀅𑀫𑁆𑀳𑀸𑀓𑀁 𑀅𑀬𑁆𑀬𑀧𑀼𑀢𑁆𑀢𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑁄 𑀧𑀝𑀺𑀯𑀺𑀤𑁆𑀥𑁄, 𑀢𑀲𑁆𑀫𑀸 𑀥𑀫𑁆𑀫𑁄𑀧𑀺 𑀅𑀫𑁆𑀳𑀸𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀗𑁆𑀖𑀁 𑀧𑀦 𑀅𑀢𑁆𑀢𑀦𑁄 𑀯𑁂𑀭𑀺𑀧𑀓𑁆𑀔𑁂 𑀞𑀺𑀢𑀁 𑀫𑀜𑁆𑀜𑀫𑀸𑀦𑁄 𑀅𑀫𑁆𑀳𑀸𑀓𑀁 𑀲𑀗𑁆𑀖𑁄𑀢𑀺 𑀦 𑀯𑀤𑀢𑀺. 𑀉𑀧𑀫𑀁 𑀧𑀦 𑀯𑀢𑁆𑀯𑀸 𑀲𑀗𑁆𑀖𑀁 𑀅𑀧𑀲𑀸𑀤𑁂𑀢𑀼𑀓𑀸𑀫𑁄 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀺𑀡𑀓𑀝𑁆𑀞𑀧𑀡𑁆𑀡𑀲𑀝𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀢𑀺𑀢𑀁 𑀢𑀺𑀡𑀓𑀝𑁆𑀞𑀧𑀡𑁆𑀡𑀁. 𑀅𑀣 𑀯𑀸 𑀢𑀺𑀡𑀜𑁆𑀘 𑀦𑀺𑀲𑁆𑀲𑀸𑀭𑀓𑀁 𑀮𑀳𑀼𑀓𑀁 𑀓𑀝𑁆𑀞𑀜𑁆𑀘 𑀢𑀺𑀡𑀓𑀝𑁆𑀞𑀁. 𑀧𑀡𑁆𑀡𑀲𑀝𑀦𑁆𑀢𑀺 𑀧𑀼𑀭𑀸𑀡𑀧𑀡𑁆𑀡𑀁. 𑀉𑀲𑁆𑀲𑀸𑀭𑁂𑀬𑁆𑀬𑀸𑀢𑀺 𑀭𑀸𑀲𑀺𑀁 𑀓𑀭𑁂𑀬𑁆𑀬.

𑀧𑀩𑁆𑀩𑀢𑁂𑀬𑁆𑀬𑀸𑀢𑀺 𑀧𑀩𑁆𑀩𑀢𑀧𑁆𑀧𑀪𑀯𑀸, 𑀲𑀸 𑀳𑀺 𑀲𑀻𑀖𑀲𑁄𑀢𑀸 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑁂𑀯 𑀕𑀡𑁆𑀳𑀸𑀢𑀺. 𑀲𑀗𑁆𑀔𑀲𑁂𑀯𑀸𑀮𑀧𑀡𑀓𑀦𑁆𑀢𑀺 𑀏𑀢𑁆𑀣 𑀲𑀗𑁆𑀔𑁄𑀢𑀺 𑀤𑀻𑀖𑀫𑀽𑀮𑀓𑁄 𑀧𑀡𑁆𑀡𑀲𑁂𑀯𑀸𑀮𑁄 𑀯𑀼𑀘𑁆𑀘𑀢𑀺. 𑀲𑁂𑀯𑀸𑀮𑁄𑀢𑀺 𑀦𑀻𑀮𑀲𑁂𑀯𑀸𑀮𑁄, 𑀅𑀯𑀲𑁂𑀲𑁄 𑀉𑀤𑀓𑀧𑀧𑁆𑀧𑀝𑀓𑀢𑀺𑀮𑀩𑀻𑀚𑀓𑀸𑀤𑀺 𑀲𑀩𑁆𑀩𑁄𑀧𑀺 𑀧𑀡𑀓𑁄𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀏𑀓𑀢𑁄 𑀉𑀲𑁆𑀲𑀸𑀭𑀺𑀢𑀸𑀢𑀺 𑀏𑀓𑀝𑁆𑀞𑀸𑀦𑁂 𑀓𑁂𑀦𑀸𑀧𑀺 𑀲𑀫𑁆𑀧𑀺𑀡𑁆𑀟𑀺𑀢𑀸 𑀭𑀸𑀲𑀻𑀓𑀢𑀸𑀢𑀺 𑀤𑀲𑁆𑀲𑁂𑀢𑀺.

𑁪𑁨𑁫-𑁬. 𑀤𑀼𑀩𑁆𑀩𑀘𑀚𑀸𑀢𑀺𑀓𑁄𑀢𑀺 𑀤𑀼𑀩𑁆𑀩𑀘𑀲𑀪𑀸𑀯𑁄 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀧𑀤𑀪𑀸𑀚𑀦𑁂𑀧𑀺𑀲𑁆𑀲 𑀤𑀼𑀩𑁆𑀩𑀘𑁄𑀢𑀺 𑀤𑀼𑀓𑁆𑀔𑁂𑀦 𑀓𑀺𑀘𑁆𑀙𑁂𑀦 𑀯𑀤𑀺𑀢𑀩𑁆𑀩𑁄, 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀯𑀢𑁆𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀤𑁄𑀯𑀘𑀲𑁆𑀲𑀓𑀭𑀡𑁂𑀳𑀻𑀢𑀺 𑀤𑀼𑀩𑁆𑀩𑀘𑀪𑀸𑀯𑀓𑀭𑀡𑀻𑀬𑁂𑀳𑀺, 𑀬𑁂 𑀥𑀫𑁆𑀫𑀸 𑀤𑀼𑀩𑁆𑀩𑀘𑀁 𑀧𑀼𑀕𑁆𑀕𑀮𑀁 𑀓𑀭𑁄𑀦𑁆𑀢𑀺, 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀢𑁂 𑀧𑀦 ‘‘𑀓𑀢𑀫𑁂 𑀘, 𑀆𑀯𑀼𑀲𑁄, 𑀤𑁄𑀯𑀘𑀲𑁆𑀲𑀓𑀭𑀡𑀸 𑀥𑀫𑁆𑀫𑀸? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀧𑀸𑀧𑀺𑀘𑁆𑀙𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀫𑀸𑀦𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁧𑁮𑁧) 𑀆𑀕𑀢𑀸 𑀧𑀸𑀧𑀺𑀘𑁆𑀙𑀢𑀸, 𑀅𑀢𑁆𑀢𑀼𑀓𑁆𑀓𑀁𑀲𑀓𑀧𑀭𑀯𑀫𑁆𑀪𑀓𑀢𑀸, 𑀓𑁄𑀥𑀦𑀢𑀸, 𑀓𑁄𑀥𑀳𑁂𑀢𑀼 𑀉𑀧𑀦𑀸𑀳𑀺𑀢𑀸, 𑀓𑁄𑀥𑀳𑁂𑀢𑀼𑀅𑀪𑀺𑀲𑀗𑁆𑀕𑀺𑀢𑀸, 𑀓𑁄𑀥𑀳𑁂𑀢𑀼𑀓𑁄𑀥𑀲𑀸𑀫𑀦𑁆𑀢𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑀢𑀸, 𑀘𑁄𑀤𑀓𑀁 𑀧𑀝𑀺𑀧𑁆𑀨𑀭𑀡𑀢𑀸, 𑀘𑁄𑀤𑀓𑀁 𑀅𑀧𑀲𑀸𑀤𑀦𑀢𑀸, 𑀘𑁄𑀤𑀓𑀲𑁆𑀲 𑀧𑀘𑁆𑀘𑀸𑀭𑁄𑀧𑀦𑀢𑀸, 𑀅𑀜𑁆𑀜𑁂𑀦 𑀅𑀜𑁆𑀜𑀁𑀧𑀝𑀺𑀘𑀭𑀡𑀢𑀸, 𑀅𑀧𑀤𑀸𑀦𑁂𑀦 𑀦 𑀲𑀫𑁆𑀧𑀸𑀬𑀦𑀢𑀸, 𑀫𑀓𑁆𑀔𑀺𑀧𑀴𑀸𑀲𑀺𑀢𑀸, 𑀇𑀲𑁆𑀲𑀼𑀓𑀻𑀫𑀘𑁆𑀙𑀭𑀺𑀢𑀸, 𑀲𑀞𑀫𑀸𑀬𑀸𑀯𑀺𑀢𑀸, 𑀣𑀤𑁆𑀥𑀸𑀢𑀺𑀫𑀸𑀦𑀺𑀢𑀸, 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀺𑀆𑀥𑀸𑀦𑀕𑁆𑀕𑀳𑀺𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀺𑀢𑀸𑀢𑀺 𑀏𑀓𑀽𑀦𑀯𑀻𑀲𑀢𑀺 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸.

𑀑𑀯𑀸𑀤𑀁 𑀦𑀓𑁆𑀔𑀫𑀢𑀺 𑀦 𑀲𑀳𑀢𑀻𑀢𑀺 𑀅𑀓𑁆𑀔𑀫𑁄. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀅𑀧𑁆𑀧𑀝𑀺𑀧𑀚𑁆𑀚𑀦𑀢𑁄 𑀧𑀤𑀓𑁆𑀔𑀺𑀡𑁂𑀦 𑀅𑀦𑀼𑀲𑀸𑀲𑀦𑀺𑀁 𑀦 𑀕𑀡𑁆𑀳𑀸𑀢𑀻𑀢𑀺 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻 𑀅𑀦𑀼𑀲𑀸𑀲𑀦𑀺𑀁.

𑀉𑀤𑁆𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑁂𑀲𑀽𑀢𑀺 𑀉𑀤𑁆𑀤𑁂𑀲𑁂 𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀅𑀦𑁆𑀢𑁄𑀕𑀥𑁂𑀲𑀼. ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀺, 𑀲𑁄 𑀆𑀯𑀺𑀓𑀭𑁂𑀬𑁆𑀬𑀸’’𑀢𑀺 𑀏𑀯𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀅𑀦𑁆𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀯𑀢𑁆𑀢𑀫𑀸𑀦𑁂𑀲𑀽𑀢𑀺 𑀅𑀢𑁆𑀣𑁄. 𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑁄𑀢𑀺 𑀲𑀳𑀥𑀫𑁆𑀫𑀺𑀓𑁂𑀦 𑀯𑀼𑀘𑁆𑀘𑀫𑀸𑀦𑁄 𑀓𑀭𑀡𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀧𑀜𑁆𑀘𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀢𑁆𑀢𑀸 𑀢𑁂𑀲𑀁 𑀯𑀸 𑀲𑀦𑁆𑀢𑀓𑀢𑁆𑀢𑀸 𑀲𑀳𑀥𑀫𑁆𑀫𑀺𑀓𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀦 𑀩𑀼𑀤𑁆𑀥𑀧𑀜𑁆𑀜𑀢𑁆𑀢𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀯𑀼𑀘𑁆𑀘𑀫𑀸𑀦𑁄𑀢𑀺 𑀅𑀢𑁆𑀣𑁄.

𑀯𑀺𑀭𑀫𑀣𑀸𑀬𑀲𑁆𑀫𑀦𑁆𑀢𑁄 𑀫𑀫 𑀯𑀘𑀦𑀸𑀬𑀸𑀢𑀺 𑀬𑁂𑀦 𑀯𑀘𑀦𑁂𑀦 𑀫𑀁 𑀯𑀤𑀣, 𑀢𑀢𑁄 𑀫𑀫 𑀯𑀘𑀦𑀢𑁄 𑀯𑀺𑀭𑀫𑀣. 𑀫𑀸 𑀫𑀁 𑀢𑀁 𑀯𑀘𑀦𑀁 𑀯𑀤𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀯𑀤𑀢𑀼 𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀳𑀥𑀫𑁆𑀫𑀺𑀓𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀲𑀳𑀥𑀫𑁆𑀫𑁂𑀦 𑀯𑀸 𑀅𑀜𑁆𑀜𑁂𑀦𑀧𑀺 𑀧𑀸𑀲𑀸𑀤𑀺𑀓𑀪𑀸𑀯𑀲𑀁𑀯𑀢𑁆𑀢𑀦𑀺𑀓𑁂𑀦 𑀯𑀘𑀦𑁂𑀦 𑀯𑀤𑀢𑀼. 𑀬𑀤𑀺𑀤𑀦𑁆𑀢𑀺 𑀯𑀼𑀟𑁆𑀠𑀺𑀓𑀸𑀭𑀡𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁂𑀦 ‘‘𑀬𑀁 𑀇𑀤𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀺𑀢𑀯𑀘𑀦𑀁 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀧𑀦𑀜𑁆𑀘 𑀢𑁂𑀦 𑀅𑀜𑁆𑀜𑀫𑀜𑁆𑀜𑀯𑀘𑀦𑁂𑀦 𑀅𑀜𑁆𑀜𑀫𑀜𑁆𑀜𑀯𑀼𑀝𑁆𑀞𑀸𑀧𑀦𑁂𑀦 𑀘 𑀲𑀁𑀯𑀟𑁆𑀠𑀸 𑀧𑀭𑀺𑀲𑀸’’𑀢𑀺 𑀏𑀯𑀁 𑀧𑀭𑀺𑀲𑀸𑀬 𑀯𑀼𑀟𑁆𑀠𑀺𑀓𑀸𑀭𑀡𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀲𑀗𑁆𑀖𑀪𑁂𑀤𑀲𑀤𑀺𑀲𑀸𑀦𑁂𑀯𑀸𑀢𑀺.

𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.