𑁧𑁩. 𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁩𑁧. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀦𑀸𑀫𑀸𑀢𑀺 𑀅𑀲𑁆𑀲𑀚𑀺 𑀘𑁂𑀯 𑀧𑀼𑀦𑀩𑁆𑀩𑀲𑀼𑀓𑁄 𑀘. 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀆𑀯𑀸𑀲𑀺𑀓𑀸 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣 𑀆𑀯𑀸𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀆𑀯𑀸𑀲𑀺𑀓𑀸. ‘‘𑀆𑀯𑀸𑀲𑁄’’𑀢𑀺 𑀯𑀺𑀳𑀸𑀭𑁄 𑀯𑀼𑀘𑁆𑀘𑀢𑀺. 𑀲𑁄 𑀬𑁂𑀲𑀁 𑀆𑀬𑀢𑁆𑀢𑁄 𑀦𑀯𑀓𑀫𑁆𑀫𑀓𑀭𑀡𑀧𑀼𑀭𑀸𑀡𑀧𑀝𑀺𑀲𑀗𑁆𑀔𑀭𑀡𑀸𑀤𑀺𑀪𑀸𑀭𑀳𑀸𑀭𑀢𑀸𑀬, 𑀢𑁂 𑀆𑀯𑀸𑀲𑀺𑀓𑀸. 𑀬𑁂 𑀧𑀦 𑀓𑁂𑀯𑀮𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑀺, 𑀢𑁂 𑀦𑁂𑀯𑀸𑀲𑀺𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀫𑁂 𑀆𑀯𑀸𑀲𑀺𑀓𑀸 𑀅𑀳𑁂𑀲𑀼𑀁. 𑀅𑀮𑀚𑁆𑀚𑀺𑀦𑁄 𑀧𑀸𑀧𑀪𑀺𑀓𑁆𑀔𑀽𑀢𑀺 𑀦𑀺𑀮𑁆𑀮𑀚𑁆𑀚𑀸 𑀮𑀸𑀫𑀓𑀪𑀺𑀓𑁆𑀔𑀽, 𑀢𑁂 𑀳𑀺 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀚𑁂𑀝𑁆𑀞𑀓𑀙𑀩𑁆𑀩𑀕𑁆𑀕𑀺𑀬𑀸.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀙 𑀚𑀦𑀸 𑀲𑀳𑀸𑀬𑀓𑀸 ‘‘𑀓𑀲𑀺𑀓𑀫𑁆𑀫𑀸𑀤𑀻𑀦𑀺 𑀤𑀼𑀓𑁆𑀓𑀭𑀸𑀦𑀺, 𑀳𑀦𑁆𑀤 𑀫𑀬𑀁 𑀲𑀫𑁆𑀫𑀸 𑀧𑀩𑁆𑀩𑀚𑀸𑀫! 𑀧𑀩𑁆𑀩𑀚𑀦𑁆𑀢𑁂𑀳𑀺 𑀘 𑀉𑀧𑁆𑀧𑀦𑁆𑀦𑁂 𑀓𑀺𑀘𑁆𑀘𑁂 𑀦𑀺𑀢𑁆𑀣𑀭𑀡𑀓𑀝𑁆𑀞𑀸𑀦𑁂 𑀧𑀩𑁆𑀩𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀢𑁂 𑀧𑀜𑁆𑀘𑀯𑀲𑁆𑀲𑀸 𑀳𑀼𑀢𑁆𑀯𑀸 𑀫𑀸𑀢𑀺𑀓𑀁 𑀧𑀕𑀼𑀡𑀁 𑀓𑀢𑁆𑀯𑀸 𑀫𑀦𑁆𑀢𑀬𑀺𑀁𑀲𑀼 ‘‘𑀚𑀦𑀧𑀤𑁄 𑀦𑀸𑀫 𑀓𑀤𑀸𑀘𑀺 𑀲𑀼𑀪𑀺𑀓𑁆𑀔𑁄 𑀳𑁄𑀢𑀺 𑀓𑀤𑀸𑀘𑀺 𑀤𑀼𑀩𑁆𑀪𑀺𑀓𑁆𑀔𑁄, 𑀫𑀬𑀁 𑀫𑀸 𑀏𑀓𑀝𑁆𑀞𑀸𑀦𑁂 𑀯𑀲𑀺𑀫𑁆𑀳, 𑀢𑀻𑀲𑀼 𑀞𑀸𑀦𑁂𑀲𑀼 𑀯𑀲𑀸𑀫𑀸’’𑀢𑀺. 𑀢𑀢𑁄 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑁂 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄, 𑀲𑀸𑀯𑀢𑁆𑀣𑀺 𑀦𑀸𑀫 𑀲𑀢𑁆𑀢𑀧𑀜𑁆𑀜𑀸𑀲𑀸𑀬 𑀓𑀼𑀮𑀲𑀢𑀲𑀳𑀲𑁆𑀲𑁂𑀳𑀺 𑀅𑀚𑁆𑀛𑀸𑀯𑀼𑀢𑁆𑀣𑀸, 𑀅𑀲𑀻𑀢𑀺𑀕𑀸𑀫𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀸𑀦𑀁 𑀢𑀺𑀬𑁄𑀚𑀦𑀲𑀢𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀓𑀸𑀲𑀺𑀓𑁄𑀲𑀮𑀭𑀝𑁆𑀞𑀸𑀦𑀁 𑀆𑀬𑀫𑀼𑀔𑀪𑀽𑀢𑀸, 𑀢𑀢𑁆𑀭 𑀢𑀼𑀫𑁆𑀳𑁂 𑀥𑀼𑀭𑀝𑁆𑀞𑀸𑀦𑁂𑀬𑁂𑀯 𑀧𑀭𑀺𑀯𑁂𑀡𑀸𑀦𑀺 𑀓𑀸𑀭𑁂𑀢𑁆𑀯𑀸 𑀅𑀫𑁆𑀩𑀧𑀦𑀲𑀦𑀸𑀴𑀺𑀓𑁂𑀭𑀸𑀤𑀻𑀦𑀺 𑀭𑁄𑀧𑁂𑀢𑁆𑀯𑀸 𑀧𑀼𑀧𑁆𑀨𑁂𑀳𑀺 𑀘 𑀨𑀮𑁂𑀳𑀺 𑀘 𑀓𑀼𑀮𑀸𑀦𑀺 𑀲𑀗𑁆𑀕𑀡𑁆𑀳𑀦𑁆𑀢𑀸 𑀓𑀼𑀮𑀤𑀸𑀭𑀓𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑀭𑀺𑀲𑀁 𑀯𑀟𑁆𑀠𑁂𑀣𑀸’’𑀢𑀺.

𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑁂 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄, 𑀭𑀸𑀚𑀕𑀳𑀁 𑀦𑀸𑀫 𑀅𑀝𑁆𑀞𑀸𑀭𑀲𑀳𑀺 𑀫𑀦𑀼𑀲𑁆𑀲𑀓𑁄𑀝𑀻𑀳𑀺 𑀅𑀚𑁆𑀛𑀸𑀯𑀼𑀢𑁆𑀣𑀁 𑀅𑀲𑀻𑀢𑀺𑀕𑀸𑀫𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀸𑀦𑀁 𑀢𑀺𑀬𑁄𑀚𑀦𑀲𑀢𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀗𑁆𑀕𑀫𑀕𑀥𑀭𑀝𑁆𑀞𑀸𑀦𑀁 𑀆𑀬𑀫𑀼𑀔𑀪𑀽𑀢𑀁, 𑀢𑀢𑁆𑀭 𑀢𑀼𑀫𑁆𑀳𑁂 𑀥𑀼𑀭𑀝𑁆𑀞𑀸𑀦𑁂𑀬𑁂𑀯…𑀧𑁂… 𑀧𑀭𑀺𑀲𑀁 𑀯𑀟𑁆𑀠𑁂𑀣𑀸’’𑀢𑀺.

𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄, 𑀓𑀻𑀝𑀸𑀕𑀺𑀭𑀺 𑀦𑀸𑀫 𑀤𑁆𑀯𑀻𑀳𑀺 𑀫𑁂𑀖𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑁄 𑀢𑀻𑀡𑀺 𑀲𑀲𑁆𑀲𑀸𑀦𑀺 𑀧𑀲𑀯𑀦𑁆𑀢𑀺, 𑀢𑀢𑁆𑀭 𑀢𑀼𑀫𑁆𑀳𑁂 𑀥𑀼𑀭𑀝𑁆𑀞𑀸𑀦𑁂𑀬𑁂𑀯 𑀧𑀭𑀺𑀯𑁂𑀡𑀸𑀦𑀺 𑀓𑀸𑀭𑁂𑀢𑁆𑀯𑀸…𑀧𑁂… 𑀧𑀭𑀺𑀲𑀁 𑀯𑀟𑁆𑀠𑁂𑀣𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀲 𑀧𑀓𑁆𑀔𑀲𑁆𑀲 𑀧𑀜𑁆𑀘 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀧𑀭𑀺𑀯𑀸𑀭𑀸, 𑀏𑀯𑀁 𑀲𑀫𑀥𑀺𑀓𑀁 𑀤𑀺𑀬𑀟𑁆𑀠𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀳𑁄𑀢𑀺. 𑀢𑀢𑁆𑀭 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀲𑀧𑀭𑀺𑀯𑀸𑀭𑀸 𑀲𑀻𑀮𑀯𑀦𑁆𑀢𑁄𑀯 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀚𑀦𑀧𑀤𑀘𑀸𑀭𑀺𑀓𑀫𑁆𑀧𑀺 𑀘𑀭𑀦𑁆𑀢𑀺, 𑀢𑁂 𑀅𑀓𑀢𑀯𑀢𑁆𑀣𑀼𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀧𑀦 𑀦 𑀫𑀤𑁆𑀤𑀦𑁆𑀢𑀺, 𑀇𑀢𑀭𑁂 𑀲𑀩𑁆𑀩𑁂 𑀅𑀮𑀚𑁆𑀚𑀺𑀦𑁄 𑀅𑀓𑀢𑀯𑀢𑁆𑀣𑀼𑀜𑁆𑀘 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘 𑀫𑀤𑁆𑀤𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀮𑀚𑁆𑀚𑀺𑀦𑁄 𑀧𑀸𑀧𑀪𑀺𑀓𑁆𑀔𑀽’’𑀢𑀺.

𑀏𑀯𑀭𑀽𑀧𑀦𑁆𑀢𑀺 𑀏𑀯𑀁𑀚𑀸𑀢𑀺𑀓𑀁. 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀻𑀢𑀺 𑀅𑀦𑀸𑀘𑀭𑀺𑀢𑀩𑁆𑀩𑀁 𑀆𑀘𑀭𑀦𑁆𑀢𑀺, 𑀅𑀓𑀸𑀢𑀩𑁆𑀩𑀁 𑀓𑀭𑁄𑀦𑁆𑀢𑀺. 𑀫𑀸𑀮𑀸𑀯𑀘𑁆𑀙𑀦𑁆𑀢𑀺 𑀢𑀭𑀼𑀡𑀧𑀼𑀧𑁆𑀨𑀭𑀼𑀓𑁆𑀔𑀁, 𑀢𑀭𑀼𑀡𑀓𑀸 𑀳𑀺 𑀧𑀼𑀧𑁆𑀨𑀭𑀼𑀓𑁆𑀔𑀸𑀧𑀺 𑀧𑀼𑀧𑁆𑀨𑀕𑀘𑁆𑀙𑀸𑀧𑀺 𑀫𑀸𑀮𑀸𑀯𑀘𑁆𑀙𑀸 𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀘 𑀅𑀦𑁂𑀓𑀧𑁆𑀧𑀓𑀸𑀭𑀁 𑀫𑀸𑀮𑀸𑀯𑀘𑁆𑀙𑀁 𑀲𑀬𑀫𑁆𑀧𑀺 𑀭𑁄𑀧𑁂𑀦𑁆𑀢𑀺, 𑀅𑀜𑁆𑀜𑁂𑀦𑀧𑀺 𑀭𑁄𑀧𑀸𑀧𑁂𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺𑀧𑀺 𑀭𑁄𑀧𑀸𑀧𑁂𑀦𑁆𑀢𑀺𑀧𑀻’’𑀢𑀺. 𑀲𑀺𑀜𑁆𑀘𑀦𑁆𑀢𑀻𑀢𑀺 𑀲𑀬𑀫𑁂𑀯 𑀉𑀤𑀓𑁂𑀦 𑀲𑀺𑀜𑁆𑀘𑀦𑁆𑀢𑀺. 𑀲𑀺𑀜𑁆𑀘𑀸𑀧𑁂𑀦𑁆𑀢𑀻𑀢𑀺 𑀅𑀜𑁆𑀜𑁂𑀦𑀧𑀺 𑀲𑀺𑀜𑁆𑀘𑀸𑀧𑁂𑀦𑁆𑀢𑀺.

𑀏𑀢𑁆𑀣 𑀧𑀦 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁄 𑀓𑀧𑁆𑀧𑀺𑀬𑀯𑁄𑀳𑀸𑀭𑁄 𑀧𑀭𑀺𑀬𑀸𑀬𑁄 𑀑𑀪𑀸𑀲𑁄 𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀚𑀸𑀦𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁄 𑀦𑀸𑀫 𑀅𑀮𑁆𑀮𑀳𑀭𑀺𑀢𑀸𑀦𑀁 𑀓𑁄𑀝𑁆𑀝𑀦𑀁 𑀓𑁄𑀝𑁆𑀝𑀸𑀧𑀦𑀁, 𑀆𑀯𑀸𑀝𑀲𑁆𑀲 𑀔𑀡𑀦𑀁 𑀔𑀡𑀸𑀧𑀦𑀁, 𑀫𑀸𑀮𑀸𑀯𑀘𑁆𑀙𑀲𑁆𑀲 𑀭𑁄𑀧𑀦𑀁 𑀭𑁄𑀧𑀸𑀧𑀦𑀁, 𑀆𑀴𑀺𑀬𑀸 𑀩𑀦𑁆𑀥𑀦𑀁 𑀩𑀦𑁆𑀥𑀸𑀧𑀦𑀁, 𑀉𑀤𑀓𑀲𑁆𑀲 𑀲𑁂𑀘𑀦𑀁 𑀲𑁂𑀘𑀸𑀧𑀦𑀁, 𑀫𑀸𑀢𑀺𑀓𑀸𑀬 𑀲𑀫𑁆𑀫𑀼𑀔𑀓𑀭𑀡𑀁 𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦𑀁 𑀳𑀢𑁆𑀣𑀫𑀼𑀔𑀧𑀸𑀤𑀥𑁄𑀯𑀦𑀦𑁆𑀳𑀸𑀦𑁄𑀤𑀓𑀲𑀺𑀜𑁆𑀘𑀦𑀦𑁆𑀢𑀺. 𑀓𑀧𑁆𑀧𑀺𑀬𑀯𑁄𑀳𑀸𑀭𑁄 𑀦𑀸𑀫 ‘‘𑀇𑀫𑀁 𑀭𑀼𑀓𑁆𑀔𑀁 𑀚𑀸𑀦, 𑀇𑀫𑀁 𑀆𑀯𑀸𑀝𑀁 𑀚𑀸𑀦, 𑀇𑀫𑀁 𑀫𑀸𑀮𑀸𑀯𑀘𑁆𑀙𑀁 𑀚𑀸𑀦, 𑀏𑀢𑁆𑀣 𑀉𑀤𑀓𑀁 𑀚𑀸𑀦𑀸’’𑀢𑀺 𑀯𑀘𑀦𑀁 𑀲𑀼𑀓𑁆𑀔𑀫𑀸𑀢𑀺𑀓𑀸𑀬 𑀉𑀚𑀼𑀓𑀭𑀡𑀜𑁆𑀘. 𑀧𑀭𑀺𑀬𑀸𑀬𑁄 𑀦𑀸𑀫 ‘‘𑀧𑀡𑁆𑀟𑀺𑀢𑁂𑀦 𑀦𑀸𑀫 𑀫𑀸𑀮𑀸𑀯𑀘𑁆𑀙𑀸𑀤𑀬𑁄 𑀭𑁄𑀧𑀸𑀧𑁂𑀢𑀩𑁆𑀩𑀸 𑀦𑀘𑀺𑀭𑀲𑁆𑀲𑁂𑀯 𑀉𑀧𑀓𑀸𑀭𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀁. 𑀑𑀪𑀸𑀲𑁄 𑀦𑀸𑀫 𑀓𑀼𑀤𑀸𑀮𑀔𑀡𑀺𑀢𑁆𑀢𑀸𑀤𑀻𑀦𑀺 𑀘 𑀫𑀸𑀮𑀸𑀯𑀘𑁆𑀙𑁂 𑀘 𑀕𑀳𑁂𑀢𑁆𑀯𑀸 𑀞𑀸𑀦𑀁, 𑀏𑀯𑀁 𑀞𑀺𑀢𑀜𑁆𑀳𑀺 𑀲𑀸𑀫𑀡𑁂𑀭𑀸𑀤𑀬𑁄 𑀤𑀺𑀲𑁆𑀯𑀸 𑀣𑁂𑀭𑁄 𑀓𑀸𑀭𑀸𑀧𑁂𑀢𑀼𑀓𑀸𑀫𑁄𑀢𑀺 𑀕𑀦𑁆𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫 𑀓𑀼𑀤𑀸𑀮-𑀔𑀡𑀺𑀢𑁆𑀢𑀺-𑀯𑀸𑀲𑀺-𑀨𑀭𑀲𑀼-𑀉𑀤𑀓𑀪𑀸𑀚𑀦𑀸𑀦𑀺 𑀆𑀳𑀭𑀺𑀢𑁆𑀯𑀸 𑀲𑀫𑀻𑀧𑁂 𑀞𑀧𑀦𑀁.

𑀇𑀫𑀸𑀦𑀺 𑀧𑀜𑁆𑀘𑀧𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀭𑁄𑀧𑀦𑁂 𑀦 𑀯𑀝𑁆𑀝𑀦𑁆𑀢𑀺, 𑀨𑀮𑀧𑀭𑀺𑀪𑁄𑀕𑀢𑁆𑀣𑀸𑀬 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑁄𑀳𑀸𑀭𑀤𑁆𑀯𑀬𑀫𑁂𑀯 𑀦 𑀯𑀝𑁆𑀝𑀢𑀺, 𑀇𑀢𑀭𑀢𑁆𑀢𑀬𑀁 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀓𑀧𑁆𑀧𑀺𑀬𑀯𑁄𑀳𑀸𑀭𑁄𑀧𑀺 𑀯𑀝𑁆𑀝𑀢𑀺. 𑀬𑀜𑁆𑀘 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀢𑁆𑀣𑀸𑀬 𑀯𑀝𑁆𑀝𑀢𑀺, 𑀢𑀁 𑀅𑀜𑁆𑀜𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀅𑀢𑁆𑀣𑀸𑀬𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑀆𑀭𑀸𑀫𑀢𑁆𑀣𑀸𑀬 𑀧𑀦 𑀯𑀦𑀢𑁆𑀣𑀸𑀬𑀘 𑀙𑀸𑀬𑀢𑁆𑀣𑀸𑀬 𑀘 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑀫𑀢𑁆𑀢𑀫𑁂𑀯 𑀦 𑀘 𑀯𑀝𑁆𑀝𑀢𑀺, 𑀲𑁂𑀲𑀁 𑀯𑀝𑁆𑀝𑀢𑀺, 𑀦 𑀓𑁂𑀯𑀮𑀜𑁆𑀘 𑀲𑁂𑀲𑀁 𑀬𑀁𑀓𑀺𑀜𑁆𑀘𑀺 𑀫𑀸𑀢𑀺𑀓𑀫𑁆𑀧𑀺 𑀉𑀚𑀼𑀁 𑀓𑀸𑀢𑀼𑀁 𑀓𑀧𑁆𑀧𑀺𑀬𑀉𑀤𑀓𑀁 𑀲𑀺𑀜𑁆𑀘𑀺𑀢𑀼𑀁 𑀦𑁆𑀳𑀸𑀦𑀓𑁄𑀝𑁆𑀞𑀓𑀁 𑀓𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀳𑀢𑁆𑀣𑀧𑀸𑀤𑀫𑀼𑀔𑀥𑁄𑀯𑀦𑀼𑀤𑀓𑀸𑀦𑀺 𑀘 𑀢𑀢𑁆𑀣 𑀙𑀟𑁆𑀟𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀓𑀼𑀭𑀼𑀦𑁆𑀤𑀺𑀬𑀜𑁆𑀘 ‘‘𑀓𑀧𑁆𑀧𑀺𑀬𑀧𑀣𑀯𑀺𑀬𑀁 𑀲𑀬𑀁 𑀭𑁄𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 𑀧𑀦 𑀭𑁄𑀧𑀺𑀢𑀲𑁆𑀲 𑀯𑀸 𑀭𑁄𑀧𑀸𑀧𑀺𑀢𑀲𑁆𑀲 𑀯𑀸 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑀑𑀘𑀺𑀦𑀦𑀑𑀘𑀺𑀦𑀸𑀧𑀦𑁂 𑀧𑀓𑀢𑀺𑀬𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀁. 𑀓𑀼𑀮𑀤𑀽𑀲𑀦𑀢𑁆𑀣𑀸𑀬 𑀧𑀦 𑀧𑀸𑀘𑀺𑀢𑁆𑀢𑀺𑀬𑀜𑁆𑀘𑁂𑀯 𑀤𑀼𑀓𑁆𑀓𑀝𑀜𑁆𑀘. 𑀕𑀦𑁆𑀣𑀦𑀸𑀤𑀻𑀲𑀼 𑀘 𑀉𑀭𑀘𑁆𑀙𑀤𑀧𑀭𑀺𑀬𑁄𑀲𑀸𑀦𑁂𑀲𑀼 𑀓𑀼𑀮𑀤𑀽𑀲𑀦𑀢𑁆𑀣𑀸𑀬 𑀅𑀜𑁆𑀜𑀢𑁆𑀣𑀸𑀬 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯. 𑀓𑀲𑁆𑀫𑀸? 𑀅𑀦𑀸𑀘𑀸𑀭𑀢𑁆𑀢𑀸, ‘‘𑀧𑀸𑀧𑀲𑀫𑀸𑀘𑀸𑀭𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑀸𑀧𑀲𑀫𑀸𑀘𑀸𑀭𑀢𑁆𑀢𑀸 𑀘. 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 𑀭𑀼𑀓𑁆𑀔𑀭𑁄𑀧𑀦𑁂 𑀯𑀺𑀬 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬 𑀓𑀲𑁆𑀫𑀸 𑀦 𑀅𑀦𑀸𑀧𑀢𑁆𑀢𑀻𑀢𑀺 𑀘𑁂? 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀬𑀣𑀸 𑀳𑀺 𑀢𑀢𑁆𑀣 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀧𑀭𑀺𑀬𑀸𑀬𑀸𑀤𑀻𑀳𑀺 𑀘 𑀅𑀦𑀸𑀧𑀢𑁆𑀢𑀺 𑀢𑀣𑀸 𑀯𑀢𑁆𑀣𑀼𑀧𑀽𑀚𑀢𑁆𑀣𑀸𑀬𑀧𑀺 𑀅𑀦𑀸𑀧𑀢𑁆𑀢𑀺𑀬𑁂𑀯.

𑀦𑀦𑀼 𑀘 𑀢𑀢𑁆𑀣 ‘‘𑀓𑀧𑁆𑀧𑀺𑀬𑀧𑀣𑀯𑀺𑀬𑀁 𑀲𑀬𑀁 𑀭𑁄𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀢𑁆𑀢𑀁, 𑀦 𑀧𑀦 𑀫𑀳𑀸𑀅𑀝𑁆𑀞𑀓𑀣𑀸𑀬𑀁. 𑀅𑀣𑀸𑀧𑀺 𑀫𑀜𑁆𑀜𑁂𑀬𑁆𑀬𑀸𑀲𑀺 𑀇𑀢𑀭𑀸𑀲𑀼 𑀯𑀼𑀢𑁆𑀢𑀫𑁆𑀧𑀺 𑀧𑀫𑀸𑀡𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀜𑁆𑀘 𑀓𑀧𑁆𑀧𑀺𑀬𑀉𑀤𑀓𑀲𑁂𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀓𑀣𑀦𑁆𑀢𑀺? 𑀢𑀫𑁆𑀧𑀺 𑀦 𑀯𑀺𑀭𑀼𑀚𑁆𑀛𑀢𑀺. 𑀢𑀢𑁆𑀭 𑀳𑀺 𑀅𑀯𑀺𑀲𑁂𑀲𑁂𑀦 ‘‘𑀭𑀼𑀓𑁆𑀔𑀁 𑀭𑁄𑀧𑁂𑀦𑁆𑀢𑀺𑀧𑀺 𑀭𑁄𑀧𑀸𑀧𑁂𑀦𑁆𑀢𑀺𑀧𑀺, 𑀲𑀺𑀜𑁆𑀘𑀦𑁆𑀢𑀺𑀧𑀺 𑀲𑀺𑀜𑁆𑀘𑀸𑀧𑁂𑀦𑁆𑀢𑀺𑀧𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀫𑀸𑀮𑀸𑀯𑀘𑁆𑀙’’𑀦𑁆𑀢𑀺 𑀯𑀤𑀦𑁆𑀢𑁄 𑀜𑀸𑀧𑁂𑀢𑀺 ‘‘𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀧𑀼𑀧𑁆𑀨𑀨𑀮𑀽𑀧𑀕𑀫𑁂𑀯 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁, 𑀅𑀜𑁆𑀜𑀢𑁆𑀭 𑀧𑀦 𑀧𑀭𑀺𑀬𑀸𑀬𑁄 𑀅𑀢𑁆𑀣𑀻’’𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀧𑀭𑀺𑀬𑀸𑀬𑀁, 𑀇𑀥 𑀘 𑀧𑀭𑀺𑀬𑀸𑀬𑀸𑀪𑀸𑀯𑀁 𑀜𑀢𑁆𑀯𑀸 𑀬𑀁 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀼𑀢𑁆𑀢𑀫𑁂𑀯. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀩𑀼𑀤𑁆𑀥𑁂𑀦 𑀥𑀫𑁆𑀫𑁄 𑀯𑀺𑀦𑀬𑁄 𑀘 𑀯𑀼𑀢𑁆𑀢𑁄;

𑀬𑁄 𑀢𑀲𑁆𑀲 𑀧𑀼𑀢𑁆𑀢𑁂𑀳𑀺 𑀢𑀣𑁂𑀯 𑀜𑀸𑀢𑁄;

𑀲𑁄 𑀬𑁂𑀳𑀺 𑀢𑁂𑀲𑀁 𑀫𑀢𑀺𑀫𑀘𑁆𑀘𑀚𑀦𑁆𑀢𑀸;

𑀬𑀲𑁆𑀫𑀸 𑀧𑀼𑀭𑁂 𑀅𑀝𑁆𑀞𑀓𑀣𑀸 𑀅𑀓𑀁𑀲𑀼.

‘‘𑀢𑀲𑁆𑀫𑀸 𑀳𑀺 𑀬𑀁 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁;

𑀢𑀁 𑀯𑀚𑁆𑀚𑀬𑀺𑀢𑁆𑀯𑀸𑀦 𑀧𑀫𑀸𑀤𑀮𑁂𑀔𑀁;

𑀲𑀩𑁆𑀩𑀫𑁆𑀧𑀺 𑀲𑀺𑀓𑁆𑀔𑀸𑀲𑀼 𑀲𑀕𑀸𑀭𑀯𑀸𑀦𑀁;

𑀬𑀲𑁆𑀫𑀸 𑀧𑀫𑀸𑀡𑀁 𑀇𑀥 𑀧𑀡𑁆𑀟𑀺𑀢𑀸𑀦’’𑀦𑁆𑀢𑀺.

𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀲𑀺𑀬𑀸 𑀬𑀤𑀺 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬𑀧𑀺 𑀕𑀦𑁆𑀣𑀸𑀦𑀸𑀤𑀻𑀲𑀼 𑀆𑀧𑀢𑁆𑀢𑀺, 𑀳𑀭𑀡𑀸𑀤𑀻𑀲𑀼 𑀓𑀲𑁆𑀫𑀸 𑀅𑀦𑀸𑀧𑀢𑁆𑀢𑀻𑀢𑀺? 𑀓𑀼𑀮𑀺𑀢𑁆𑀣𑀻𑀆𑀤𑀻𑀦𑀁 𑀅𑀢𑁆𑀣𑀸𑀬 𑀳𑀭𑀡𑀢𑁄 𑀳𑀭𑀡𑀸𑀥𑀺𑀓𑀸𑀭𑁂 𑀳𑀺 𑀯𑀺𑀲𑁂𑀲𑁂𑀢𑁆𑀯𑀸 𑀢𑁂 𑀓𑀼𑀮𑀺𑀢𑁆𑀣𑀻𑀦𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀩𑀼𑀤𑁆𑀥𑀸𑀤𑀻𑀦𑀁 𑀅𑀢𑁆𑀣𑀸𑀬 𑀳𑀭𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀢𑀢𑁆𑀣 𑀏𑀓𑀢𑁄𑀯𑀡𑁆𑀝𑀺𑀓𑀦𑁆𑀢𑀺 𑀧𑀼𑀧𑁆𑀨𑀸𑀦𑀁 𑀯𑀡𑁆𑀝𑁂 𑀏𑀓𑀢𑁄 𑀓𑀢𑁆𑀯𑀸 𑀓𑀢𑀫𑀸𑀮𑀁. 𑀉𑀪𑀢𑁄𑀯𑀡𑁆𑀝𑀺𑀓𑀦𑁆𑀢𑀺 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺 𑀧𑀼𑀧𑁆𑀨𑀯𑀡𑁆𑀝𑁂 𑀓𑀢𑁆𑀯𑀸 𑀓𑀢𑀫𑀸𑀮𑀁. 𑀫𑀜𑁆𑀚𑀭𑀺𑀓𑀦𑁆𑀢𑀺𑀆𑀤𑀻𑀲𑀼 𑀧𑀦 𑀫𑀜𑁆𑀚𑀭𑀻 𑀯𑀺𑀬 𑀓𑀢𑀸 𑀧𑀼𑀧𑁆𑀨𑀯𑀺𑀓𑀢𑀺 𑀫𑀜𑁆𑀚𑀭𑀺𑀓𑀸𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀥𑀽𑀢𑀺𑀓𑀸𑀢𑀺 𑀲𑀽𑀘𑀺𑀬𑀸 𑀯𑀸 𑀲𑀮𑀸𑀓𑀸𑀬 𑀯𑀸 𑀲𑀺𑀦𑁆𑀤𑀼𑀯𑀸𑀭𑀧𑀼𑀧𑁆𑀨𑀸𑀤𑀻𑀦𑀺 𑀯𑀺𑀚𑁆𑀛𑀺𑀢𑁆𑀯𑀸 𑀓𑀢𑀸. 𑀯𑀝𑀁𑀲𑀓𑁄𑀢𑀺 𑀯𑀢𑀁𑀲𑀓𑁄. 𑀆𑀯𑁂𑀴𑀸𑀢𑀺 𑀓𑀡𑁆𑀡𑀺𑀓𑀸. 𑀉𑀭𑀘𑁆𑀙𑀤𑁄𑀢𑀺 𑀳𑀸𑀭𑀲𑀤𑀺𑀲𑀁 𑀉𑀭𑁂 𑀞𑀧𑀦𑀓𑀧𑀼𑀧𑁆𑀨𑀤𑀸𑀫𑀁. 𑀅𑀬𑀁 𑀢𑀸𑀯 𑀏𑀢𑁆𑀣 𑀧𑀤𑀯𑀡𑁆𑀡𑀦𑀸.

𑀅𑀬𑀁 𑀧𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀺𑀢𑁆𑀣𑀸𑀭𑁂𑀦 𑀆𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑁄. 𑀓𑀼𑀮𑀤𑀽𑀲𑀦𑀢𑁆𑀣𑀸𑀬 𑀅𑀓𑀧𑁆𑀧𑀺𑀬𑀧𑀣𑀯𑀺𑀬𑀁 𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀜𑁆𑀘𑁂𑀯 𑀤𑀼𑀓𑁆𑀓𑀝𑀜𑁆𑀘, 𑀢𑀣𑀸 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀭𑁄𑀧𑀸𑀧𑁂𑀦𑁆𑀢𑀲𑁆𑀲. 𑀓𑀧𑁆𑀧𑀺𑀬𑀧𑀣𑀯𑀺𑀬𑀁 𑀭𑁄𑀧𑀦𑁂𑀧𑀺 𑀭𑁄𑀧𑀸𑀧𑀦𑁂𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀉𑀪𑀬𑀢𑁆𑀣𑀸𑀧𑀺 𑀲𑀓𑀺𑀁 𑀆𑀡𑀢𑁆𑀢𑀺𑀬𑀸 𑀩𑀳𑀼𑀦𑁆𑀦𑀫𑁆𑀧𑀺 𑀭𑁄𑀧𑀦𑁂 𑀏𑀓𑀫𑁂𑀯 𑀲𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀁 𑀯𑀸 𑀲𑀼𑀤𑁆𑀥𑀤𑀼𑀓𑁆𑀓𑀝𑀁 𑀯𑀸 𑀳𑁄𑀢𑀺. 𑀧𑀭𑀺𑀪𑁄𑀕𑀢𑁆𑀣𑀸𑀬 𑀳𑀺 𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀯𑀸 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀭𑁄𑀧𑀸𑀧𑀦𑁂 𑀅𑀦𑀸𑀧𑀢𑁆𑀢𑀺. 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬𑀧𑀺 𑀅𑀓𑀧𑁆𑀧𑀺𑀬𑀧𑀣𑀯𑀺𑀬𑀁 𑀭𑁄𑀧𑁂𑀦𑁆𑀢𑀲𑁆𑀲 𑀯𑀸 𑀅𑀓𑀧𑁆𑀧𑀺𑀬𑀯𑀘𑀦𑁂𑀦 𑀭𑁄𑀧𑀸𑀧𑁂𑀦𑁆𑀢𑀲𑁆𑀲 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀬𑀁 𑀧𑀦 𑀦𑀬𑁄 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀦 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑁄, 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀺𑀪𑀢𑁆𑀢𑁄𑀢𑀺.

𑀲𑀺𑀜𑁆𑀘𑀦𑀲𑀺𑀜𑁆𑀘𑀸𑀧𑀦𑁂 𑀧𑀦 𑀅𑀓𑀧𑁆𑀧𑀺𑀬𑀉𑀤𑀓𑁂𑀦 𑀲𑀩𑁆𑀩𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀁, 𑀓𑀼𑀮𑀤𑀽𑀲𑀦𑀧𑀭𑀺𑀪𑁄𑀕𑀢𑁆𑀣𑀸𑀬 𑀤𑀼𑀓𑁆𑀓𑀝𑀫𑁆𑀧𑀺. 𑀓𑀧𑁆𑀧𑀺𑀬𑁂𑀦 𑀢𑁂𑀲𑀁𑀬𑁂𑀯 𑀤𑁆𑀯𑀺𑀦𑁆𑀦𑀫𑀢𑁆𑀣𑀸𑀬 𑀤𑀼𑀓𑁆𑀓𑀝𑀁. 𑀧𑀭𑀺𑀪𑁄𑀕𑀢𑁆𑀣𑀸𑀬 𑀘𑁂𑀢𑁆𑀣 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀲𑀺𑀜𑁆𑀘𑀸𑀧𑀦𑁂 𑀅𑀦𑀸𑀧𑀢𑁆𑀢𑀺. 𑀆𑀧𑀢𑁆𑀢𑀺𑀝𑁆𑀞𑀸𑀦𑁂 𑀧𑀦 𑀥𑀸𑀭𑀸𑀯𑀘𑁆𑀙𑁂𑀤𑀯𑀲𑁂𑀦 𑀧𑀬𑁄𑀕𑀩𑀳𑀼𑀮𑀢𑀸𑀬 𑀆𑀧𑀢𑁆𑀢𑀺𑀩𑀳𑀼𑀮𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀼𑀮𑀤𑀽𑀲𑀦𑀢𑁆𑀣𑀸𑀬 𑀑𑀘𑀺𑀦𑀦𑁂 𑀧𑀼𑀧𑁆𑀨𑀕𑀡𑀦𑀸𑀬 𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀅𑀜𑁆𑀜𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀸𑀦𑁂𑀯. 𑀩𑀳𑀽𑀦𑀺 𑀧𑀦 𑀧𑀼𑀧𑁆𑀨𑀸𑀦𑀺 𑀏𑀓𑀧𑀬𑁄𑀕𑁂𑀦 𑀑𑀘𑀺𑀦𑀦𑁆𑀢𑁄 𑀧𑀬𑁄𑀕𑀯𑀲𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀑𑀘𑀺𑀦𑀸𑀧𑀦𑁂 𑀓𑀼𑀮𑀤𑀽𑀲𑀦𑀢𑁆𑀣𑀸𑀬 𑀲𑀓𑀺𑀁 𑀆𑀡𑀢𑁆𑀢𑁄 𑀩𑀳𑀼𑀫𑁆𑀧𑀺 𑀑𑀘𑀺𑀦𑀢𑀺, 𑀏𑀓𑀫𑁂𑀯 𑀲𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀁, 𑀅𑀜𑁆𑀜𑀢𑁆𑀭 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.

𑀕𑀦𑁆𑀣𑀦𑀸𑀤𑀻𑀲𑀼 𑀲𑀩𑁆𑀩𑀸𑀧𑀺 𑀙 𑀧𑀼𑀧𑁆𑀨𑀯𑀺𑀓𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸 𑁋 𑀕𑀦𑁆𑀣𑀺𑀫𑀁, 𑀕𑁄𑀧𑁆𑀨𑀺𑀫𑀁, 𑀯𑁂𑀥𑀺𑀫𑀁, 𑀯𑁂𑀞𑀺𑀫𑀁, 𑀧𑀽𑀭𑀺𑀫𑀁, 𑀯𑀸𑀬𑀺𑀫𑀦𑁆𑀢𑀺. 𑀢𑀢𑁆𑀣 ‘‘𑀕𑀦𑁆𑀣𑀺𑀫𑀁’’ 𑀦𑀸𑀫 𑀲𑀤𑀡𑁆𑀟𑀓𑁂𑀲𑀼 𑀯𑀸 𑀉𑀧𑁆𑀧𑀮𑀧𑀤𑀼𑀫𑀸𑀤𑀻𑀲𑀼 𑀅𑀜𑁆𑀜𑁂𑀲𑀼 𑀯𑀸 𑀤𑀻𑀖𑀯𑀡𑁆𑀝𑁂𑀲𑀼 𑀧𑀼𑀧𑁆𑀨𑁂𑀲𑀼 𑀤𑀝𑁆𑀞𑀩𑁆𑀩𑀁. 𑀤𑀡𑁆𑀟𑀓𑁂𑀦 𑀤𑀡𑁆𑀟𑀓𑀁 𑀯𑀡𑁆𑀝𑁂𑀦 𑀯𑀸 𑀯𑀡𑁆𑀝𑀁 𑀕𑀦𑁆𑀣𑁂𑀢𑁆𑀯𑀸 𑀓𑀢𑀫𑁂𑀯 𑀳𑀺 𑀕𑀦𑁆𑀣𑀺𑀫𑀁. 𑀢𑀁 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀓𑀸𑀢𑀼𑀫𑁆𑀧𑀺 𑀅𑀓𑀧𑁆𑀧𑀺𑀬𑀯𑀘𑀦𑁂𑀦 𑀓𑀸𑀭𑀸𑀧𑁂𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀏𑀯𑀁 𑀚𑀸𑀦, 𑀏𑀯𑀁 𑀓𑀢𑁂 𑀲𑁄𑀪𑁂𑀬𑁆𑀬, 𑀬𑀣𑀸 𑀏𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀦 𑀯𑀺𑀓𑀺𑀭𑀺𑀬𑀦𑁆𑀢𑀺 𑀢𑀣𑀸 𑀓𑀭𑁄𑀳𑀻𑀢𑀺𑀆𑀤𑀺𑀦𑀸 𑀧𑀦 𑀓𑀧𑁆𑀧𑀺𑀬𑀯𑀘𑀦𑁂𑀦 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀺.

‘‘𑀕𑁄𑀧𑁆𑀨𑀺𑀫𑀁’’ 𑀦𑀸𑀫 𑀲𑀼𑀢𑁆𑀢𑁂𑀦 𑀯𑀸 𑀯𑀸𑀓𑀸𑀤𑀻𑀳𑀺 𑀯𑀸 𑀯𑀲𑁆𑀲𑀺𑀓𑀧𑀼𑀧𑁆𑀨𑀸𑀤𑀻𑀦𑀁 𑀏𑀓𑀢𑁄𑀯𑀡𑁆𑀝𑀺𑀓𑀉𑀪𑀢𑁄𑀯𑀡𑁆𑀝𑀺𑀓𑀫𑀸𑀮𑀸𑀯𑀲𑁂𑀦 𑀕𑁄𑀧𑁆𑀨𑀦𑀁, 𑀯𑀸𑀓𑀁 𑀯𑀸 𑀭𑀚𑁆𑀚𑀼𑀁 𑀯𑀸 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀢𑀢𑁆𑀣 𑀅𑀯𑀡𑁆𑀝𑀓𑀸𑀦𑀺 𑀦𑀻𑀧𑀧𑀼𑀧𑁆𑀨𑀸𑀤𑀻𑀦𑀺 𑀧𑀯𑁂𑀲𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀩𑀦𑁆𑀥𑀦𑁆𑀢𑀺, 𑀏𑀢𑀫𑁆𑀧𑀺 𑀕𑁄𑀧𑁆𑀨𑀺𑀫𑀫𑁂𑀯. 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦 𑀯𑀝𑁆𑀝𑀢𑀺.

‘‘𑀯𑁂𑀥𑀺𑀫𑀁’’ 𑀦𑀸𑀫 𑀲𑀯𑀡𑁆𑀝𑀓𑀸𑀦𑀺 𑀯𑀲𑁆𑀲𑀺𑀓𑀧𑀼𑀧𑁆𑀨𑀸𑀤𑀻𑀦𑀺 𑀯𑀡𑁆𑀝𑁂𑀲𑀼, 𑀅𑀯𑀡𑁆𑀝𑀓𑀸𑀦𑀺 𑀯𑀸 𑀯𑀓𑀼𑀮𑀧𑀼𑀧𑁆𑀨𑀸𑀤𑀻𑀦𑀺 𑀅𑀦𑁆𑀢𑁄𑀙𑀺𑀤𑁆𑀤𑁂 𑀲𑀽𑀘𑀺𑀢𑀸𑀮𑀳𑀻𑀭𑀸𑀤𑀻𑀳𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀆𑀯𑀼𑀦𑀦𑁆𑀢𑀺, 𑀏𑀢𑀁 𑀯𑁂𑀥𑀺𑀫𑀁 𑀦𑀸𑀫, 𑀢𑀫𑁆𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦 𑀯𑀝𑁆𑀝𑀢𑀺. 𑀓𑁂𑀘𑀺 𑀧𑀦 𑀓𑀤𑀮𑀺𑀓𑁆𑀔𑀦𑁆𑀥𑀫𑁆𑀳𑀺 𑀓𑀡𑁆𑀝𑀓𑁂 𑀯𑀸 𑀢𑀸𑀮𑀳𑀻𑀭𑀸𑀤𑀻𑀦𑀺 𑀯𑀸 𑀧𑀯𑁂𑀲𑁂𑀢𑁆𑀯𑀸 𑀢𑀢𑁆𑀣 𑀧𑀼𑀧𑁆𑀨𑀸𑀦𑀺 𑀯𑀺𑀚𑁆𑀛𑀺𑀢𑁆𑀯𑀸 𑀞𑀧𑁂𑀦𑁆𑀢𑀺, 𑀓𑁂𑀘𑀺 𑀓𑀡𑁆𑀝𑀓𑀲𑀸𑀔𑀸𑀲𑀼, 𑀓𑁂𑀘𑀺 𑀧𑀼𑀧𑁆𑀨𑀘𑁆𑀙𑀢𑁆𑀢𑀧𑀼𑀧𑁆𑀨𑀓𑀽𑀝𑀸𑀕𑀸𑀭𑀓𑀭𑀡𑀢𑁆𑀣𑀁 𑀙𑀢𑁆𑀢𑁂 𑀘 𑀪𑀺𑀢𑁆𑀢𑀺𑀬𑀜𑁆𑀘 𑀧𑀯𑁂𑀲𑁂𑀢𑁆𑀯𑀸 𑀞𑀧𑀺𑀢𑀓𑀡𑁆𑀝𑀓𑁂𑀲𑀼, 𑀓𑁂𑀘𑀺 𑀥𑀫𑁆𑀫𑀸𑀲𑀦𑀯𑀺𑀢𑀸𑀦𑁂 𑀩𑀤𑁆𑀥𑀓𑀡𑁆𑀝𑀓𑁂𑀲𑀼, 𑀓𑁂𑀘𑀺 𑀓𑀡𑀺𑀓𑀸𑀭𑀧𑀼𑀧𑁆𑀨𑀸𑀤𑀻𑀦𑀺 𑀲𑀮𑀸𑀓𑀸𑀳𑀺 𑀯𑀺𑀚𑁆𑀛𑀦𑁆𑀢𑀺, 𑀙𑀢𑁆𑀢𑀸𑀥𑀺𑀙𑀢𑁆𑀢𑀁 𑀯𑀺𑀬 𑀘 𑀓𑀭𑁄𑀦𑁆𑀢𑀺, 𑀢𑀁 𑀅𑀢𑀺𑀑𑀴𑀸𑀭𑀺𑀓𑀫𑁂𑀯. 𑀧𑀼𑀧𑁆𑀨𑀯𑀺𑀚𑁆𑀛𑀦𑀢𑁆𑀣𑀁 𑀧𑀦 𑀥𑀫𑁆𑀫𑀸𑀲𑀦𑀯𑀺𑀢𑀸𑀦𑁂 𑀓𑀡𑁆𑀝𑀓𑀫𑁆𑀧𑀺 𑀩𑀦𑁆𑀥𑀺𑀢𑀼𑀁 𑀓𑀡𑁆𑀝𑀓𑀸𑀤𑀻𑀳𑀺 𑀯𑀸 𑀏𑀓𑀧𑀼𑀧𑁆𑀨𑀫𑁆𑀧𑀺 𑀯𑀺𑀚𑁆𑀛𑀺𑀢𑀼𑀁 𑀧𑀼𑀧𑁆𑀨𑁂𑀬𑁂𑀯 𑀯𑀸 𑀧𑀼𑀧𑁆𑀨𑀁 𑀧𑀯𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀚𑀸𑀮𑀯𑀺𑀢𑀸𑀦𑀯𑁂𑀤𑀺𑀓-𑀦𑀸𑀕𑀤𑀦𑁆𑀢𑀓 𑀧𑀼𑀧𑁆𑀨𑀧𑀝𑀺𑀘𑁆𑀙𑀓𑀢𑀸𑀮𑀧𑀡𑁆𑀡𑀕𑀼𑀴𑀓𑀸𑀤𑀻𑀦𑀁 𑀧𑀦 𑀙𑀺𑀤𑁆𑀤𑁂𑀲𑀼 𑀅𑀲𑁄𑀓𑀧𑀺𑀡𑁆𑀟𑀺𑀬𑀸 𑀯𑀸 𑀅𑀦𑁆𑀢𑀭𑁂𑀲𑀼 𑀧𑀼𑀧𑁆𑀨𑀸𑀦𑀺 𑀧𑀯𑁂𑀲𑁂𑀢𑀼𑀁 𑀦 𑀤𑁄𑀲𑁄. 𑀏𑀢𑀁 𑀯𑁂𑀥𑀺𑀫𑀁 𑀦𑀸𑀫 𑀦 𑀳𑁄𑀢𑀺. 𑀥𑀫𑁆𑀫𑀭𑀚𑁆𑀚𑀼𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄.

‘‘𑀯𑁂𑀞𑀺𑀫𑀁’’ 𑀦𑀸𑀫 𑀧𑀼𑀧𑁆𑀨𑀤𑀸𑀫𑀧𑀼𑀧𑁆𑀨𑀳𑀢𑁆𑀣𑀓𑁂𑀲𑀼 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀳𑀺 𑀫𑀢𑁆𑀣𑀓𑀤𑀸𑀫𑀁 𑀓𑀭𑁄𑀦𑁆𑀢𑀸 𑀳𑁂𑀝𑁆𑀞𑀸 𑀖𑀝𑀓𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀧𑀼𑀧𑁆𑀨𑁂𑀳𑀺 𑀯𑁂𑀞𑁂𑀦𑁆𑀢𑀺, 𑀓𑁂𑀘𑀺 𑀅𑀝𑁆𑀞𑀝𑁆𑀞 𑀯𑀸 𑀤𑀲 𑀤𑀲 𑀯𑀸 𑀉𑀧𑁆𑀧𑀮𑀧𑀼𑀧𑁆𑀨𑀸𑀤𑀻𑀦𑀺 𑀲𑀼𑀢𑁆𑀢𑁂𑀦 𑀯𑀸 𑀯𑀸𑀓𑁂𑀦 𑀯𑀸 𑀤𑀡𑁆𑀟𑀓𑁂𑀲𑀼 𑀩𑀦𑁆𑀥𑀺𑀢𑁆𑀯𑀸 𑀉𑀧𑁆𑀧𑀮𑀳𑀢𑁆𑀣𑀓𑁂 𑀯𑀸 𑀧𑀤𑀼𑀫𑀳𑀢𑁆𑀣𑀓𑁂 𑀯𑀸 𑀓𑀭𑁄𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦 𑀯𑀝𑁆𑀝𑀢𑀺. 𑀲𑀸𑀫𑀡𑁂𑀭𑁂𑀳𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀣𑀮𑁂 𑀞𑀧𑀺𑀢𑀉𑀧𑁆𑀧𑀮𑀸𑀤𑀻𑀦𑀺 𑀓𑀸𑀲𑀸𑀯𑁂𑀦 𑀪𑀡𑁆𑀟𑀺𑀓𑀫𑁆𑀧𑀺 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑁂𑀲𑀁𑀬𑁂𑀯 𑀧𑀦 𑀯𑀸𑀓𑁂𑀦 𑀯𑀸 𑀤𑀡𑁆𑀟𑀓𑁂𑀦 𑀯𑀸 𑀩𑀦𑁆𑀥𑀺𑀢𑀼𑀁 𑀅𑀁𑀲𑀪𑀡𑁆𑀟𑀺𑀓𑀁 𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀅𑀁𑀲𑀪𑀡𑁆𑀟𑀺𑀓𑀸 𑀦𑀸𑀫 𑀔𑀦𑁆𑀥𑁂 𑀞𑀧𑀺𑀢𑀓𑀸𑀲𑀸𑀯𑀲𑁆𑀲 𑀉𑀪𑁄 𑀅𑀦𑁆𑀢𑁂 𑀆𑀳𑀭𑀺𑀢𑁆𑀯𑀸 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀧𑀲𑀺𑀩𑁆𑀩𑀓𑁂 𑀯𑀺𑀬 𑀧𑀼𑀧𑁆𑀨𑀸𑀦𑀺 𑀧𑀓𑁆𑀔𑀺𑀧𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀁𑀲𑀪𑀡𑁆𑀟𑀺𑀓𑀸, 𑀏𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀤𑀡𑁆𑀟𑀓𑁂𑀳𑀺 𑀧𑀤𑀼𑀫𑀺𑀦𑀺𑀧𑀡𑁆𑀡𑀁 𑀯𑀺𑀚𑁆𑀛𑀺𑀢𑁆𑀯𑀸 𑀉𑀧𑁆𑀧𑀮𑀸𑀤𑀻𑀦𑀺 𑀧𑀡𑁆𑀡𑁂𑀦 𑀯𑁂𑀞𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀢𑀢𑁆𑀭𑀸𑀧𑀺 𑀧𑀼𑀧𑁆𑀨𑀸𑀦𑀁 𑀉𑀧𑀭𑀺 𑀧𑀤𑀼𑀫𑀺𑀦𑀺𑀧𑀡𑁆𑀡𑀫𑁂𑀯 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀳𑁂𑀝𑁆𑀞𑀸 𑀤𑀡𑁆𑀟𑀓𑀁 𑀧𑀦 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀺.

‘‘𑀧𑀽𑀭𑀺𑀫𑀁’’ 𑀦𑀸𑀫 𑀫𑀸𑀮𑀸𑀕𑀼𑀡𑁂 𑀘 𑀧𑀼𑀧𑁆𑀨𑀧𑀝𑁂 𑀘 𑀤𑀝𑁆𑀞𑀩𑁆𑀩𑀁. 𑀬𑁄 𑀳𑀺 𑀫𑀸𑀮𑀸𑀕𑀼𑀡𑁂𑀦 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀯𑁂𑀤𑀺𑀓𑀁 𑀯𑀸 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀧𑀼𑀦 𑀆𑀦𑁂𑀢𑁆𑀯𑀸 𑀧𑀽𑀭𑀺𑀫𑀞𑀸𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀏𑀢𑁆𑀢𑀸𑀯𑀢𑀸𑀧𑀺 𑀧𑀽𑀭𑀺𑀫𑀁 𑀦𑀸𑀫 𑀳𑁄𑀢𑀺. 𑀓𑁄 𑀧𑀦 𑀯𑀸𑀤𑁄 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑀲𑁆𑀲, 𑀦𑀸𑀕𑀤𑀦𑁆𑀢-𑀓𑀦𑁆𑀢𑀭𑁂𑀳𑀺 𑀧𑀯𑁂𑀲𑁂𑀢𑁆𑀯𑀸 𑀳𑀭𑀦𑁆𑀢𑁄 𑀑𑀮𑀫𑁆𑀩𑀓𑀁 𑀓𑀢𑁆𑀯𑀸 𑀧𑀼𑀦 𑀦𑀸𑀕𑀤𑀦𑁆𑀢𑀓𑀁 𑀧𑀭𑀺𑀓𑁆𑀔𑀺𑀧𑀢𑀺, 𑀏𑀢𑀫𑁆𑀧𑀺 𑀧𑀽𑀭𑀺𑀫𑀁 𑀦𑀸𑀫. 𑀦𑀸𑀕𑀤𑀦𑁆𑀢𑀓𑁂 𑀧𑀦 𑀧𑀼𑀧𑁆𑀨𑀯𑀮𑀬𑀁 𑀧𑀯𑁂𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀸𑀮𑀸𑀕𑀼𑀡𑁂𑀳𑀺 𑀧𑀼𑀧𑁆𑀨𑀧𑀝𑀁 𑀓𑀭𑁄𑀦𑁆𑀢𑀺. 𑀢𑀢𑁆𑀭𑀸𑀧𑀺 𑀏𑀓𑀫𑁂𑀯 𑀫𑀸𑀮𑀸𑀕𑀼𑀡𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀦 𑀧𑀘𑁆𑀘𑀸𑀳𑀭𑀢𑁄 𑀧𑀽𑀭𑀺𑀫𑀫𑁂𑀯 𑀳𑁄𑀢𑀺, 𑀢𑀁 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦 𑀯𑀝𑁆𑀝𑀢𑀺. 𑀫𑀸𑀮𑀸𑀕𑀼𑀡𑁂𑀳𑀺 𑀧𑀦 𑀩𑀳𑀽𑀳𑀺𑀧𑀺 𑀓𑀢𑀁 𑀧𑀼𑀧𑁆𑀨𑀤𑀸𑀫𑀁 𑀮𑀪𑀺𑀢𑁆𑀯𑀸 𑀆𑀲𑀦𑀫𑀢𑁆𑀣𑀓𑀸𑀤𑀻𑀲𑀼 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀢𑀺𑀤𑀻𑀖𑀁 𑀧𑀦 𑀫𑀸𑀮𑀸𑀕𑀼𑀡𑀁 𑀏𑀓𑀯𑀸𑀭𑀁 𑀳𑀭𑀺𑀢𑁆𑀯𑀸 𑀯𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀧𑀼𑀦 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑀸𑀧𑀺 𑀢𑀣𑁂𑀯 𑀓𑀸𑀢𑀼𑀁 𑀯𑀝𑁆𑀝𑀢𑀺.

‘‘𑀯𑀸𑀬𑀺𑀫𑀁’’ 𑀦𑀸𑀫 𑀧𑀼𑀧𑁆𑀨𑀚𑀸𑀮𑀧𑀼𑀧𑁆𑀨𑀧𑀝𑀧𑀼𑀧𑁆𑀨𑀭𑀽𑀧𑁂𑀲𑀼 𑀤𑀝𑁆𑀞𑀩𑁆𑀩𑀁. 𑀘𑁂𑀢𑀺𑀬𑁂𑀲𑀼 𑀧𑀼𑀧𑁆𑀨𑀚𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀏𑀓𑀫𑁂𑀓𑀫𑁆𑀳𑀺 𑀚𑀸𑀮𑀘𑁆𑀙𑀺𑀤𑁆𑀤𑁂 𑀤𑀼𑀓𑁆𑀓𑀝𑀁. 𑀪𑀺𑀢𑁆𑀢𑀺𑀘𑁆𑀙𑀢𑁆𑀢𑀩𑁄𑀥𑀺𑀢𑁆𑀣𑀫𑁆𑀪𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀧𑁆𑀨𑀧𑀝𑀁 𑀧𑀦 𑀧𑀭𑁂𑀳𑀺 𑀧𑀽𑀭𑀺𑀢𑀫𑁆𑀧𑀺 𑀯𑀸𑀬𑀺𑀢𑀼𑀁 𑀦 𑀮𑀩𑁆𑀪𑀢𑀺. 𑀕𑁄𑀧𑁆𑀨𑀺𑀫𑀧𑀼𑀧𑁆𑀨𑁂𑀳𑁂𑀯 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀭𑀽𑀧𑀓𑀸𑀦𑀺 𑀓𑀭𑁄𑀦𑁆𑀢𑀺, 𑀢𑀸𑀦𑀺𑀧𑀺 𑀯𑀸𑀬𑀺𑀫𑀝𑁆𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺. 𑀅𑀜𑁆𑀜𑁂𑀳𑀺 𑀓𑀢𑀧𑀭𑀺𑀘𑁆𑀙𑁂𑀤𑁂 𑀧𑀦 𑀧𑀼𑀧𑁆𑀨𑀸𑀦𑀺 𑀞𑀧𑁂𑀦𑁆𑀢𑁂𑀦 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀭𑀽𑀧𑀓𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀓𑀮𑀫𑁆𑀩𑀓𑁂𑀦 𑀅𑀟𑁆𑀠𑀘𑀦𑁆𑀤𑀓𑁂𑀦 𑀘 𑀲𑀤𑁆𑀥𑀺𑀁 𑀅𑀝𑁆𑀞𑀧𑀼𑀧𑁆𑀨𑀯𑀺𑀓𑀢𑀺𑀬𑁄 𑀯𑀼𑀢𑁆𑀢𑀸. 𑀢𑀢𑁆𑀣 𑀓𑀮𑀫𑁆𑀩𑀓𑁄𑀢𑀺 𑀅𑀟𑁆𑀠𑀘𑀦𑁆𑀤𑀓𑀦𑁆𑀢𑀭𑁂 𑀖𑀝𑀺𑀓𑀤𑀸𑀫𑀑𑀮𑀫𑁆𑀩𑀓𑁄 𑀯𑀼𑀢𑁆𑀢𑁄. ‘‘𑀅𑀟𑁆𑀠𑀘𑀦𑁆𑀤𑀓𑁄’’𑀢𑀺 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑁂𑀦 𑀫𑀸𑀮𑀸𑀕𑀼𑀡𑀧𑀭𑀺𑀓𑁆𑀔𑁂𑀧𑁄. 𑀢𑀤𑀼𑀪𑀬𑀫𑁆𑀧𑀺 𑀧𑀽𑀭𑀺𑀫𑁂𑀬𑁂𑀯 𑀧𑀯𑀺𑀝𑁆𑀞𑀁. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀤𑁆𑀯𑁂 𑀢𑀬𑁄 𑀫𑀸𑀮𑀸𑀕𑀼𑀡𑁂 𑀏𑀓𑀢𑁄 𑀓𑀢𑁆𑀯𑀸 𑀧𑀼𑀧𑁆𑀨𑀤𑀸𑀫𑀓𑀭𑀡𑀫𑁆𑀧𑀺 𑀯𑀸𑀬𑀺𑀫𑀁𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀇𑀥 𑀧𑀽𑀭𑀺𑀫𑀝𑁆𑀞𑀸𑀦𑁂𑀬𑁂𑀯 𑀧𑀯𑀺𑀝𑁆𑀞𑀁, 𑀦 𑀓𑁂𑀯𑀮𑀜𑁆𑀘 𑀧𑀼𑀧𑁆𑀨𑀕𑀼𑀴𑀤𑀸𑀫𑀫𑁂𑀯 𑀧𑀺𑀝𑁆𑀞𑀫𑀬𑀤𑀸𑀫𑀫𑁆𑀧𑀺 𑀕𑁂𑀡𑁆𑀟𑀼𑀓𑀧𑀼𑀧𑁆𑀨𑀤𑀸𑀫𑀫𑁆𑀧𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁, 𑀔𑀭𑀧𑀢𑁆𑀢𑀤𑀸𑀫𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀲𑁆𑀲 𑀲𑀸𑀥𑀸𑀭𑀡𑀢𑁆𑀢𑀸 𑀪𑀺𑀓𑁆𑀔𑀽𑀦𑀫𑁆𑀧𑀺 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 𑀦𑁂𑀯 𑀓𑀸𑀢𑀼𑀁 𑀦 𑀓𑀸𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀽𑀚𑀸𑀦𑀺𑀫𑀺𑀢𑁆𑀢𑀁 𑀧𑀦 𑀓𑀧𑁆𑀧𑀺𑀬𑀯𑀘𑀦𑀁 𑀲𑀩𑁆𑀩𑀢𑁆𑀣 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀧𑀭𑀺𑀬𑀸𑀬𑀑𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀦𑀺 𑀯𑀝𑁆𑀝𑀦𑁆𑀢𑀺𑀬𑁂𑀯.

𑀢𑀼𑀯𑀝𑁆𑀝𑁂𑀦𑁆𑀢𑀻𑀢𑀺 𑀦𑀺𑀧𑀚𑁆𑀚𑀦𑁆𑀢𑀺. 𑀮𑀸𑀲𑁂𑀦𑁆𑀢𑀻𑀢𑀺 𑀧𑀻𑀢𑀺𑀬𑀸 𑀉𑀧𑁆𑀧𑀺𑀮𑀯𑀫𑀸𑀦𑀸 𑀯𑀺𑀬 𑀉𑀝𑁆𑀞𑀳𑀺𑀢𑁆𑀯𑀸 𑀮𑀸𑀲𑀺𑀬𑀦𑀸𑀝𑀓𑀁 𑀦𑀸𑀝𑁂𑀦𑁆𑀢𑀺, 𑀭𑁂𑀘𑀓𑀁 𑀤𑁂𑀦𑁆𑀢𑀺. 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀦𑁆𑀢𑀻𑀢𑀺 𑀬𑀤𑀸 𑀦𑀸𑀝𑀓𑀺𑀢𑁆𑀣𑀻 𑀦𑀘𑁆𑀘𑀢𑀺, 𑀢𑀤𑀸 𑀢𑁂𑀧𑀺 𑀢𑀲𑁆𑀲𑀸 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀕𑀘𑁆𑀙𑀦𑁆𑀢𑀸 𑀦𑀘𑁆𑀘𑀦𑁆𑀢𑀺. 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀕𑀸𑀬𑀦𑁆𑀢𑀻𑀢𑀺 𑀬𑀤𑀸 𑀲𑀸 𑀦𑀘𑁆𑀘𑀢𑀺, 𑀢𑀤𑀸 𑀦𑀘𑁆𑀘𑀸𑀦𑀼𑀭𑀽𑀧𑀁 𑀕𑀸𑀬𑀦𑁆𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀝𑁆𑀞𑀧𑀤𑁂𑀧𑀺 𑀓𑀻𑀴𑀦𑁆𑀢𑀻𑀢𑀺 𑀅𑀝𑁆𑀞𑀧𑀤𑀨𑀮𑀓𑁂 𑀚𑀽𑀢𑀁 𑀓𑀻𑀴𑀦𑁆𑀢𑀺. 𑀢𑀣𑀸 𑀤𑀲𑀧𑀤𑁂, 𑀆𑀓𑀸𑀲𑁂𑀧𑀻𑀢𑀺 𑀅𑀝𑁆𑀞𑀧𑀤𑀤𑀲𑀧𑀤𑁂𑀲𑀼 𑀯𑀺𑀬 𑀆𑀓𑀸𑀲𑁂𑀬𑁂𑀯 𑀓𑀻𑀴𑀦𑁆𑀢𑀺. 𑀧𑀭𑀺𑀳𑀸𑀭𑀧𑀣𑁂𑀧𑀻𑀢𑀺 𑀪𑀽𑀫𑀺𑀬𑀁 𑀦𑀸𑀦𑀸𑀧𑀣𑀫𑀡𑁆𑀟𑀮𑀁 𑀓𑀢𑁆𑀯𑀸 𑀢𑀢𑁆𑀣 𑀧𑀭𑀺𑀳𑀭𑀺𑀢𑀩𑁆𑀩𑀧𑀣𑀁 𑀧𑀭𑀺𑀳𑀭𑀦𑁆𑀢𑀸 𑀓𑀻𑀴𑀦𑁆𑀢𑀺. 𑀲𑀦𑁆𑀢𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀻𑀢𑀺 𑀲𑀦𑁆𑀢𑀺𑀓𑀓𑀻𑀴𑀸𑀬 𑀓𑀻𑀴𑀦𑁆𑀢𑀺, 𑀏𑀓𑀚𑁆𑀛𑀁 𑀞𑀧𑀺𑀢𑀸 𑀲𑀸𑀭𑀺𑀬𑁄 𑀯𑀸 𑀧𑀸𑀲𑀸𑀡𑀲𑀓𑁆𑀔𑀭𑀸𑀬𑁄 𑀯𑀸 𑀅𑀘𑀸𑀮𑁂𑀦𑁆𑀢𑀸 𑀦𑀔𑁂𑀦𑁂𑀯 𑀅𑀧𑀦𑁂𑀦𑁆𑀢𑀺 𑀘 𑀉𑀧𑀦𑁂𑀦𑁆𑀢𑀺 𑀘, 𑀲𑀘𑁂 𑀢𑀢𑁆𑀣 𑀓𑀸𑀘𑀺 𑀘𑀮𑀢𑀺, 𑀧𑀭𑀸𑀚𑀬𑁄 𑀳𑁄𑀢𑀺. 𑀔𑀮𑀺𑀓𑀸𑀬𑀸𑀢𑀺 𑀚𑀽𑀢𑀨𑀮𑀓𑁂 𑀧𑀸𑀲𑀓𑀓𑀻𑀴𑀸𑀬 𑀓𑀻𑀴𑀦𑁆𑀢𑀺. 𑀖𑀝𑀺𑀓𑀸𑀬𑀸𑀢𑀺 𑀖𑀝𑀺𑀓𑀸 𑀯𑀼𑀘𑁆𑀘𑀢𑀺 𑀤𑀡𑁆𑀟𑀓𑀓𑀻𑀴𑀸, 𑀢𑀸𑀬 𑀓𑀻𑀴𑀦𑁆𑀢𑀺. 𑀤𑀻𑀖𑀤𑀡𑁆𑀟𑀓𑁂𑀦 𑀭𑀲𑁆𑀲𑀤𑀡𑁆𑀟𑀓𑀁 𑀧𑀳𑀭𑀦𑁆𑀢𑀸 𑀯𑀺𑀘𑀭𑀦𑁆𑀢𑀺.

𑀲𑀮𑀸𑀓𑀳𑀢𑁆𑀣𑁂𑀦𑀸𑀢𑀺 𑀮𑀸𑀔𑀸𑀬 𑀯𑀸 𑀫𑀜𑁆𑀚𑀝𑁆𑀞𑀺𑀬𑀸 𑀯𑀸 𑀧𑀺𑀝𑁆𑀞𑀉𑀤𑀓𑁂 𑀯𑀸 𑀲𑀮𑀸𑀓𑀳𑀢𑁆𑀣𑀁 𑀢𑁂𑀫𑁂𑀢𑁆𑀯𑀸 ‘‘𑀓𑀺𑀁 𑀳𑁄𑀢𑀽’’𑀢𑀺 𑀪𑀽𑀫𑀺𑀬𑀁 𑀯𑀸 𑀪𑀺𑀢𑁆𑀢𑀺𑀬𑀁 𑀯𑀸 𑀢𑀁 𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀭𑀽𑀧𑀸𑀦𑀺 𑀤𑀲𑁆𑀲𑁂𑀦𑁆𑀢𑀸 𑀓𑀻𑀴𑀦𑁆𑀢𑀺. 𑀅𑀓𑁆𑀔𑁂𑀦𑀸𑀢𑀺 𑀕𑀼𑀴𑁂𑀦. 𑀧𑀗𑁆𑀕𑀘𑀻𑀭𑁂𑀦𑀸𑀢𑀺 𑀧𑀗𑁆𑀕𑀘𑀻𑀭𑀁 𑀯𑀼𑀘𑁆𑀘𑀢𑀺 𑀧𑀡𑁆𑀡𑀦𑀸𑀴𑀺𑀓𑀸, 𑀢𑀁 𑀥𑀫𑀦𑁆𑀢𑀸 𑀓𑀻𑀴𑀦𑁆𑀢𑀺. 𑀯𑀗𑁆𑀓𑀓𑁂𑀦𑀸𑀢𑀺 𑀕𑀸𑀫𑀤𑀸𑀭𑀓𑀸𑀦𑀁 𑀓𑀻𑀴𑀦𑀓𑁂𑀦 𑀔𑀼𑀤𑁆𑀤𑀓𑀦𑀗𑁆𑀕𑀮𑁂𑀦. 𑀫𑁄𑀓𑁆𑀔𑀘𑀺𑀓𑀸𑀬𑀸𑀢𑀺 𑀫𑁄𑀓𑁆𑀔𑀘𑀺𑀓𑀸 𑀯𑀼𑀘𑁆𑀘𑀢𑀺 𑀲𑀫𑁆𑀧𑀭𑀺𑀯𑀢𑁆𑀢𑀓𑀓𑀻𑀴𑀸, 𑀆𑀓𑀸𑀲𑁂 𑀯𑀸 𑀤𑀡𑁆𑀟𑀁 𑀕𑀳𑁂𑀢𑁆𑀯𑀸, 𑀪𑀽𑀫𑀺𑀬𑀁 𑀯𑀸 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀳𑁂𑀝𑁆𑀞𑀼𑀧𑀭𑀺𑀬𑀪𑀸𑀯𑁂𑀦 𑀧𑀭𑀺𑀯𑀢𑁆𑀢𑀦𑁆𑀢𑀸 𑀓𑀻𑀴𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀘𑀺𑀗𑁆𑀕𑀼𑀮𑀓𑁂𑀦𑀸𑀢𑀺 𑀘𑀺𑀗𑁆𑀕𑀼𑀮𑀓𑀁 𑀯𑀼𑀘𑁆𑀘𑀢𑀺 𑀢𑀸𑀮𑀧𑀡𑁆𑀡𑀸𑀤𑀻𑀳𑀺 𑀓𑀢𑀁 𑀯𑀸𑀢𑀧𑁆𑀧𑀳𑀸𑀭𑁂𑀦 𑀧𑀭𑀺𑀩𑁆𑀪𑀫𑀦𑀘𑀓𑁆𑀓𑀁, 𑀢𑁂𑀦 𑀓𑀻𑀴𑀦𑁆𑀢𑀺. 𑀧𑀢𑁆𑀢𑀸𑀴𑁆𑀳𑀓𑁂𑀦𑀸𑀢𑀺 𑀧𑀢𑁆𑀢𑀸𑀴𑁆𑀳𑀓𑀁 𑀯𑀼𑀘𑁆𑀘𑀢𑀺 𑀧𑀡𑁆𑀡𑀦𑀸𑀴𑀺, 𑀢𑀸𑀬 𑀯𑀸𑀮𑀺𑀓𑀸𑀤𑀻𑀦𑀺 𑀫𑀺𑀦𑀦𑁆𑀢𑀸 𑀓𑀻𑀴𑀦𑁆𑀢𑀺. 𑀭𑀣𑀓𑁂𑀦𑀸𑀢𑀺 𑀔𑀼𑀤𑁆𑀤𑀓𑀭𑀣𑁂𑀦. 𑀥𑀦𑀼𑀓𑁂𑀦𑀸𑀢𑀺 𑀔𑀼𑀤𑁆𑀤𑀓𑀥𑀦𑀼𑀦𑀸.

𑀅𑀓𑁆𑀔𑀭𑀺𑀓𑀸𑀬𑀸𑀢𑀺 𑀅𑀓𑁆𑀔𑀭𑀺𑀓𑀸 𑀯𑀼𑀘𑁆𑀘𑀢𑀺 𑀆𑀓𑀸𑀲𑁂 𑀯𑀸 𑀧𑀺𑀝𑁆𑀞𑀺𑀬𑀁 𑀯𑀸 𑀅𑀓𑁆𑀔𑀭𑀚𑀸𑀦𑀦𑀓𑀻𑀴𑀸, 𑀢𑀸𑀬 𑀓𑀻𑀴𑀦𑁆𑀢𑀺. 𑀫𑀦𑁂𑀲𑀺𑀓𑀸𑀬𑀸𑀢𑀺 𑀫𑀦𑁂𑀲𑀺𑀓𑀸 𑀯𑀼𑀘𑁆𑀘𑀢𑀺 𑀫𑀦𑀲𑀸 𑀘𑀺𑀦𑁆𑀢𑀺𑀢𑀚𑀸𑀦𑀦𑀓𑀻𑀴𑀸, 𑀢𑀸𑀬 𑀓𑀻𑀴𑀦𑁆𑀢𑀺. 𑀬𑀣𑀸𑀯𑀚𑁆𑀚𑁂𑀦𑀸𑀢𑀺 𑀬𑀣𑀸𑀯𑀚𑁆𑀚𑀁 𑀯𑀼𑀘𑁆𑀘𑀢𑀺 𑀓𑀸𑀡𑀓𑀼𑀡𑀺𑀓𑀔𑀜𑁆𑀚𑀸𑀤𑀻𑀦𑀁 𑀬𑀁 𑀬𑀁 𑀯𑀚𑁆𑀚𑀁 𑀢𑀁 𑀢𑀁 𑀧𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀦𑀓𑀻𑀴𑀸 𑀢𑀸𑀬 𑀓𑀻𑀴𑀦𑁆𑀢𑀺, 𑀯𑁂𑀮𑀫𑁆𑀪𑀓𑀸 𑀯𑀺𑀬. 𑀳𑀢𑁆𑀣𑀺𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀻𑀢𑀺 𑀳𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀬𑀁 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀢𑀁 𑀲𑀺𑀓𑁆𑀔𑀦𑁆𑀢𑀺. 𑀏𑀲𑁂𑀯 𑀦𑀬𑁄 𑀅𑀲𑁆𑀲𑀸𑀤𑀻𑀲𑀼. 𑀥𑀸𑀯𑀦𑁆𑀢𑀺𑀧𑀻𑀢𑀺 𑀧𑀭𑀫𑁆𑀫𑀼𑀔𑀸 𑀕𑀘𑁆𑀙𑀦𑁆𑀢𑀸 𑀥𑀸𑀯𑀦𑁆𑀢𑀺. 𑀆𑀥𑀸𑀯𑀦𑁆𑀢𑀺𑀧𑀻𑀢𑀺 𑀬𑀢𑁆𑀢𑀓𑀁 𑀥𑀸𑀯𑀦𑁆𑀢𑀺, 𑀢𑀢𑁆𑀢𑀓𑀫𑁂𑀯 𑀅𑀪𑀺𑀫𑀼𑀔𑀸 𑀧𑀼𑀦 𑀆𑀕𑀘𑁆𑀙𑀦𑁆𑀢𑀸 𑀆𑀥𑀸𑀯𑀦𑁆𑀢𑀺. 𑀦𑀺𑀩𑁆𑀩𑀼𑀚𑁆𑀛𑀦𑁆𑀢𑀻𑀢𑀺 𑀫𑀮𑁆𑀮𑀬𑀼𑀤𑁆𑀥𑀁 𑀓𑀭𑁄𑀦𑁆𑀢𑀺. 𑀦𑀮𑀸𑀝𑀺𑀓𑀫𑁆𑀧𑀺 𑀤𑁂𑀦𑁆𑀢𑀻𑀢𑀺 ‘‘𑀲𑀸𑀥𑀼, 𑀲𑀸𑀥𑀼, 𑀪𑀕𑀺𑀦𑀻’’𑀢𑀺 𑀅𑀢𑁆𑀢𑀦𑁄 𑀦𑀮𑀸𑀝𑁂 𑀅𑀗𑁆𑀕𑀼𑀮𑀺𑀁 𑀞𑀧𑁂𑀢𑁆𑀯𑀸 𑀢𑀲𑁆𑀲𑀸 𑀦𑀮𑀸𑀝𑁂 𑀞𑀧𑁂𑀦𑁆𑀢𑀺. 𑀯𑀺𑀯𑀺𑀥𑀫𑁆𑀧𑀺 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀻𑀢𑀺 𑀅𑀜𑁆𑀜𑀫𑁆𑀧𑀺 𑀧𑀸𑀴𑀺𑀬𑀁 𑀅𑀦𑀸𑀕𑀢𑀁 𑀫𑀼𑀔𑀟𑀺𑀡𑁆𑀟𑀺𑀫𑀸𑀤𑀺𑀯𑀺𑀯𑀺𑀥𑀁 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺.

𑁪𑁩𑁨. 𑀧𑀸𑀲𑀸𑀤𑀺𑀓𑁂𑀦𑀸𑀢𑀺 𑀧𑀲𑀸𑀤𑀸𑀯𑀳𑁂𑀦, 𑀲𑀸𑀭𑀼𑀧𑁆𑀧𑁂𑀦 𑀲𑀫𑀡𑀸𑀦𑀼𑀘𑁆𑀙𑀯𑀺𑀓𑁂𑀦. 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀕𑀫𑀦𑁂𑀦. 𑀧𑀝𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀦𑀺𑀯𑀢𑁆𑀢𑀦𑁂𑀦. 𑀆𑀮𑁄𑀓𑀺𑀢𑁂𑀦𑀸𑀢𑀺 𑀧𑀼𑀭𑀢𑁄 𑀤𑀲𑁆𑀲𑀦𑁂𑀦. 𑀯𑀺𑀮𑁄𑀓𑀺𑀢𑁂𑀦𑀸𑀢𑀺 𑀇𑀢𑁄 𑀘𑀺𑀢𑁄 𑀘 𑀤𑀲𑁆𑀲𑀦𑁂𑀦. 𑀲𑀫𑀺𑀜𑁆𑀚𑀺𑀢𑁂𑀦𑀸𑀢𑀺 𑀧𑀩𑁆𑀩𑀲𑀗𑁆𑀓𑁄𑀘𑀦𑁂𑀦. 𑀧𑀲𑀸𑀭𑀺𑀢𑁂𑀦𑀸𑀢𑀺 𑀢𑁂𑀲𑀁𑀬𑁂𑀯 𑀧𑀲𑀸𑀭𑀡𑁂𑀦. 𑀲𑀩𑁆𑀩𑀢𑁆𑀣 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀳𑀺 𑀅𑀪𑀺𑀲𑀗𑁆𑀔𑀢𑀢𑁆𑀢𑀸 𑀧𑀸𑀲𑀸𑀤𑀺𑀓 𑀅𑀪𑀺𑀓𑁆𑀓𑀦𑁆𑀢-𑀧𑀝𑀺𑀓𑁆𑀓𑀦𑁆𑀢-𑀆𑀮𑁄𑀓𑀺𑀢-𑀯𑀺𑀮𑁄𑀓𑀺𑀢-𑀲𑀫𑀺𑀜𑁆𑀚𑀺𑀢-𑀧𑀲𑀸𑀭𑀺𑀢𑁄 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽𑀢𑀺 𑀳𑁂𑀝𑁆𑀞𑀸-𑀔𑀺𑀢𑁆𑀢𑀘𑀓𑁆𑀔𑀼. 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄𑀢𑀺 𑀢𑀸𑀬 𑀧𑀸𑀲𑀸𑀤𑀺𑀓𑀅𑀪𑀺𑀓𑁆𑀓𑀦𑁆𑀢𑀸𑀤𑀺𑀢𑀸𑀬 𑀲𑀫𑁆𑀧𑀦𑁆𑀦𑀇𑀭𑀺𑀬𑀸𑀧𑀣𑁄.

𑀓𑁆𑀯𑀸𑀬𑀦𑁆𑀢𑀺 𑀓𑁄 𑀅𑀬𑀁. 𑀅𑀩𑀮𑀩𑀮𑁄 𑀯𑀺𑀬𑀸𑀢𑀺 𑀅𑀩𑀮𑁄 𑀓𑀺𑀭 𑀩𑁄𑀦𑁆𑀤𑁄 𑀯𑀼𑀘𑁆𑀘𑀢𑀺, 𑀅𑀢𑀺𑀲𑀬𑀢𑁆𑀣𑁂 𑀘 𑀇𑀤𑀁 𑀆𑀫𑁂𑀟𑀺𑀢𑀁, 𑀢𑀲𑁆𑀫𑀸 𑀅𑀢𑀺𑀩𑁄𑀦𑁆𑀤𑁄 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀦𑁆𑀤𑀫𑀦𑁆𑀤𑁄𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀦𑀁 𑀅𑀦𑀼𑀤𑁆𑀥𑀢𑀢𑀸𑀬 𑀅𑀢𑀺𑀫𑀦𑁆𑀤𑁄. 𑀅𑀢𑀺𑀲𑀡𑁆𑀳𑁄𑀢𑀺 𑀏𑀯𑀁 𑀕𑀼𑀡𑀫𑁂𑀯 𑀤𑁄𑀲𑀢𑁄 𑀤𑀲𑁆𑀲𑁂𑀦𑁆𑀢𑀺. 𑀪𑀸𑀓𑀼𑀝𑀺𑀓𑀪𑀸𑀓𑀼𑀝𑀺𑀓𑁄 𑀯𑀺𑀬𑀸𑀢𑀺 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀢𑀸𑀬 𑀪𑀓𑀼𑀝𑀺𑀁 𑀓𑀢𑁆𑀯𑀸 𑀲𑀗𑁆𑀓𑀼𑀝𑀺𑀢𑀫𑀼𑀔𑁄 𑀓𑀼𑀧𑀺𑀢𑁄 𑀯𑀺𑀬 𑀯𑀺𑀘𑀭𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 𑀯𑀤𑀦𑁆𑀢𑀺. 𑀲𑀡𑁆𑀳𑀸𑀢𑀺 𑀦𑀺𑀧𑀼𑀡𑀸, ‘‘𑀅𑀫𑁆𑀫 𑀢𑀸𑀢 𑀪𑀕𑀺𑀦𑀻’’𑀢𑀺 𑀏𑀯𑀁 𑀉𑀧𑀸𑀲𑀓𑀚𑀦𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀉𑀧𑀦𑁂𑀢𑀼𑀁 𑀙𑁂𑀓𑀸, 𑀦 𑀬𑀣𑀸 𑀅𑀬𑀁; 𑀏𑀯𑀁 𑀅𑀩𑀮𑀩𑀮𑁄 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀔𑀺𑀮𑀸𑀢𑀺 𑀲𑀸𑀔𑀮𑁆𑀬𑁂𑀦 𑀬𑀼𑀢𑁆𑀢𑀸. 𑀲𑀼𑀔𑀲𑀫𑁆𑀪𑀸𑀲𑀸𑀢𑀺 𑀇𑀤𑀁 𑀧𑀼𑀭𑀺𑀫𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀬𑁂𑀲𑀜𑁆𑀳𑀺 𑀲𑀼𑀔𑀲𑀫𑁆𑀪𑀸𑀲𑀸 𑀲𑀫𑁆𑀫𑁄𑀤𑀦𑀻𑀬𑀓𑀣𑀸 𑀦𑁂𑀮𑀸 𑀳𑁄𑀢𑀺 𑀓𑀡𑁆𑀡𑀲𑀼𑀔𑀸, 𑀢𑁂 𑀲𑀔𑀺𑀮𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦𑀸𑀳𑀁𑀲𑀼 𑁋 ‘‘𑀲𑀔𑀺𑀮𑀸 𑀲𑀼𑀔𑀲𑀫𑁆𑀪𑀸𑀲𑀸’’𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀫𑁆𑀳𑀸𑀓𑀁 𑀅𑀬𑁆𑀬𑀸 𑀉𑀧𑀸𑀲𑀓𑁂 𑀤𑀺𑀲𑁆𑀯𑀸 𑀫𑀥𑀼𑀭𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀣𑁂𑀦𑁆𑀢𑀺, 𑀢𑀲𑁆𑀫𑀸 𑀲𑀔𑀺𑀮𑀸 𑀲𑀼𑀔𑀲𑀫𑁆𑀪𑀸𑀲𑀸, 𑀦 𑀬𑀣𑀸 𑀅𑀬𑀁; 𑀏𑀯𑀁 𑀫𑀦𑁆𑀤𑀫𑀦𑁆𑀤𑀸 𑀯𑀺𑀬𑀸𑀢𑀺. 𑀫𑀺𑀳𑀺𑀢𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀫𑀺𑀳𑀺𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀏𑀢𑁂𑀲𑀁 𑀯𑀘𑀦𑀲𑁆𑀲𑀸𑀢𑀺 𑀫𑀺𑀳𑀺𑀢𑀧𑀼𑀩𑁆𑀩𑀗𑁆𑀕𑀫𑀸, 𑀧𑀞𑀫𑀁 𑀲𑀺𑀢𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀳𑀺𑀲𑁆𑀯𑀸𑀕𑀢𑀯𑀸𑀤𑀺𑀦𑁄𑀢𑀺 𑀉𑀧𑀸𑀲𑀓𑀁 𑀤𑀺𑀲𑁆𑀯𑀸 ‘‘𑀏𑀳𑀺 𑀲𑁆𑀯𑀸𑀕𑀢𑀁 𑀢𑀯𑀸’’𑀢𑀺 𑀏𑀯𑀁𑀯𑀸𑀤𑀺𑀦𑁄, 𑀦 𑀬𑀣𑀸 𑀅𑀬𑀁; 𑀏𑀯𑀁 𑀲𑀗𑁆𑀓𑀼𑀝𑀺𑀢𑀫𑀼𑀔𑀢𑀸𑀬 𑀪𑀸𑀓𑀼𑀝𑀺𑀓𑀪𑀸𑀓𑀼𑀝𑀺𑀓𑀸 𑀯𑀺𑀬 𑀏𑀯𑀁 𑀫𑀺𑀳𑀺𑀢𑀧𑀼𑀩𑁆𑀩𑀗𑁆𑀕𑀫𑀸𑀤𑀺𑀢𑀸𑀬 𑀅𑀪𑀸𑀓𑀼𑀝𑀺𑀓𑀪𑀸𑀯𑀁 𑀅𑀢𑁆𑀣𑀢𑁄 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀲𑀭𑀽𑀧𑁂𑀦𑀧𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳𑀁𑀲𑀼 𑁋 ‘‘𑀅𑀪𑀸𑀓𑀼𑀝𑀺𑀓𑀸 𑀉𑀢𑁆𑀢𑀸𑀦𑀫𑀼𑀔𑀸 𑀧𑀼𑀩𑁆𑀩𑀪𑀸𑀲𑀺𑀦𑁄’’𑀢𑀺. 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀸 𑀢𑀺𑀡𑁆𑀡𑀫𑁆𑀧𑀺 𑀆𑀓𑀸𑀭𑀸𑀦𑀁 𑀅𑀪𑀸𑀯𑀤𑀲𑁆𑀲𑀦𑀫𑁂𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? 𑀏𑀢𑁆𑀣 𑀳𑀺 ‘‘𑀅𑀪𑀸𑀓𑀼𑀝𑀺𑀓𑀸’’𑀢𑀺 𑀇𑀫𑀺𑀦𑀸 𑀪𑀸𑀓𑀼𑀝𑀺𑀓𑀪𑀸𑀓𑀼𑀝𑀺𑀓𑀸𑀓𑀸𑀭𑀲𑁆𑀲 𑀅𑀪𑀸𑀯𑁄 𑀤𑀲𑁆𑀲𑀺𑀢𑁄. ‘‘𑀉𑀢𑁆𑀢𑀸𑀦𑀫𑀼𑀔𑀸’’𑀢𑀺 𑀇𑀫𑀺𑀦𑀸 𑀫𑀦𑁆𑀤𑀫𑀦𑁆𑀤𑀸𑀓𑀸𑀭𑀲𑁆𑀲, 𑀬𑁂 𑀳𑀺 𑀘𑀓𑁆𑀔𑀽𑀦𑀺 𑀉𑀫𑁆𑀫𑀺𑀮𑁂𑀢𑁆𑀯𑀸 𑀆𑀮𑁄𑀓𑀦𑁂𑀦 𑀉𑀢𑁆𑀢𑀸𑀦𑀫𑀼𑀔𑀸 𑀳𑁄𑀦𑁆𑀢𑀺, 𑀦 𑀢𑁂 𑀫𑀦𑁆𑀤𑀫𑀦𑁆𑀤𑀸. 𑀧𑀼𑀩𑁆𑀩𑀪𑀸𑀲𑀺𑀦𑁄𑀢𑀺 𑀇𑀫𑀺𑀦𑀸 𑀅𑀩𑀮𑀩𑀮𑀸𑀓𑀸𑀭𑀲𑁆𑀲 𑀅𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀬𑁂 𑀳𑀺 𑀆𑀪𑀸𑀲𑀦𑀓𑀼𑀲𑀮𑀢𑀸𑀬 ‘‘𑀅𑀫𑁆𑀫 𑀢𑀸𑀢𑀸’’𑀢𑀺 𑀧𑀞𑀫𑀢𑀭𑀁 𑀆𑀪𑀸𑀲𑀦𑁆𑀢𑀺, 𑀦 𑀢𑁂 𑀅𑀩𑀮𑀩𑀮𑀸𑀢𑀺.

𑀏𑀳𑀺, 𑀪𑀦𑁆𑀢𑁂, 𑀖𑀭𑀁 𑀕𑀫𑀺𑀲𑁆𑀲𑀸𑀫𑀸𑀢𑀺 𑀲𑁄 𑀓𑀺𑀭 𑀉𑀧𑀸𑀲𑀓𑁄 ‘‘𑀦 𑀔𑁄, 𑀆𑀯𑀼𑀲𑁄, 𑀧𑀺𑀡𑁆𑀟𑁄 𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑀼𑀫𑁆𑀳𑀸𑀓𑀁 𑀪𑀺𑀓𑁆𑀔𑀽𑀳𑀺𑀬𑁂𑀯 𑀏𑀢𑀁 𑀓𑀢𑀁, 𑀲𑀓𑀮𑀫𑁆𑀧𑀺 𑀕𑀸𑀫𑀁 𑀯𑀺𑀘𑀭𑀦𑁆𑀢𑀸 𑀦 𑀮𑀘𑁆𑀙𑀣𑀸’’𑀢𑀺 𑀯𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀤𑀸𑀢𑀼𑀓𑀸𑀫𑁄 ‘‘𑀏𑀳𑀺, 𑀪𑀦𑁆𑀢𑁂, 𑀖𑀭𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀓𑀺𑀁 𑀧𑀦𑀸𑀬𑀁 𑀧𑀬𑀼𑀢𑁆𑀢𑀯𑀸𑀘𑀸 𑀳𑁄𑀢𑀺, 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀧𑀼𑀘𑁆𑀙𑀺𑀢𑀧𑀜𑁆𑀳𑁄 𑀦𑀸𑀫𑀸𑀬𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀇𑀤𑀸𑀦𑀺 𑀘𑁂𑀧𑀺 𑀧𑀼𑀩𑁆𑀩𑀡𑁆𑀳𑁂 𑀯𑀸 𑀲𑀸𑀬𑀦𑁆𑀳𑁂 𑀯𑀸 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀓𑁄𑀘𑀺 𑀧𑀼𑀘𑁆𑀙𑁂𑀬𑁆𑀬 𑁋 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀘𑀭𑀣𑀸’’𑀢𑀺? 𑀬𑁂𑀦𑀢𑁆𑀣𑁂𑀦 𑀘𑀭𑀢𑀺, 𑀢𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀮𑀤𑁆𑀥𑀁 𑀦 𑀮𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀘𑁂 𑀦 𑀮𑀤𑁆𑀥𑀁, ‘‘𑀦 𑀮𑀤𑁆𑀥’’𑀦𑁆𑀢𑀺 𑀯𑀢𑁆𑀯𑀸 𑀬𑀁 𑀲𑁄 𑀤𑁂𑀢𑀺, 𑀢𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀤𑀼𑀝𑁆𑀞𑁄𑀢𑀺 𑀦 𑀧𑀲𑀸𑀤𑀸𑀤𑀻𑀦𑀁 𑀯𑀺𑀦𑀸𑀲𑁂𑀦 𑀤𑀼𑀝𑁆𑀞𑁄, 𑀧𑀼𑀕𑁆𑀕𑀮𑀯𑀲𑁂𑀦 𑀤𑀼𑀝𑁆𑀞𑁄. 𑀤𑀸𑀦𑀧𑀣𑀸𑀦𑀻𑀢𑀺 𑀤𑀸𑀦𑀸𑀦𑀺𑀬𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀅𑀣 𑀯𑀸 𑀤𑀸𑀦𑀧𑀣𑀸𑀦𑀻𑀢𑀺 𑀤𑀸𑀦𑀦𑀺𑀩𑀤𑁆𑀥𑀸𑀦𑀺 𑀤𑀸𑀦𑀯𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀘𑁆𑀙𑀺𑀦𑁆𑀦𑀸𑀦𑀻𑀢𑀺 𑀤𑀸𑀬𑀓𑁂𑀳𑀺 𑀉𑀧𑀘𑁆𑀙𑀺𑀦𑁆𑀦𑀸𑀦𑀺, 𑀦 𑀢𑁂 𑀢𑀸𑀦𑀺 𑀏𑀢𑀭𑀳𑀺 𑀤𑁂𑀦𑁆𑀢𑀺. 𑀭𑀺𑀜𑁆𑀘𑀦𑁆𑀢𑀻𑀢𑀺 𑀯𑀺𑀲𑀼𑀁 𑀳𑁄𑀦𑁆𑀢𑀺 𑀦𑀸𑀦𑀸 𑀳𑁄𑀦𑁆𑀢𑀺, 𑀧𑀓𑁆𑀓𑀫𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀡𑁆𑀞𑀳𑁂𑀬𑁆𑀬𑀸𑀢𑀺 𑀲𑀫𑁆𑀫𑀸 𑀢𑀺𑀝𑁆𑀞𑁂𑀬𑁆𑀬, 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀢𑀺𑀝𑁆𑀞𑀸 𑀪𑀯𑁂𑀬𑁆𑀬.

𑀏𑀯𑀫𑀸𑀯𑀼𑀲𑁄𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀲𑀤𑁆𑀥𑀲𑁆𑀲 𑀧𑀲𑀦𑁆𑀦𑀲𑁆𑀲 𑀉𑀧𑀸𑀲𑀓𑀲𑁆𑀲 𑀲𑀸𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀏𑀯𑀭𑀽𑀧𑀁 𑀓𑀺𑀭 𑀲𑀸𑀲𑀦𑀁 𑀓𑀧𑁆𑀧𑀺𑀬𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 ‘‘𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀯𑀦𑁆𑀤𑀣𑀸’’𑀢𑀺 𑀯𑀸 ‘‘𑀘𑁂𑀢𑀺𑀬𑀁 𑀧𑀝𑀺𑀫𑀁 𑀩𑁄𑀥𑀺𑀁 𑀲𑀗𑁆𑀖𑀢𑁆𑀣𑁂𑀭𑀁 𑀯𑀦𑁆𑀤𑀣𑀸’’𑀢𑀺 𑀯𑀸 ‘‘𑀘𑁂𑀢𑀺𑀬𑁂 𑀕𑀦𑁆𑀥𑀧𑀽𑀚𑀁 𑀓𑀭𑁄𑀣, 𑀧𑀼𑀧𑁆𑀨𑀧𑀽𑀚𑀁 𑀓𑀭𑁄𑀣𑀸’’𑀢𑀺 𑀯𑀸 ‘‘𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀸𑀢𑁂𑀣, 𑀤𑀸𑀦𑀁 𑀤𑀲𑁆𑀲𑀸𑀫, 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀸𑀢𑀺 𑀯𑀸 𑀈𑀤𑀺𑀲𑁂𑀲𑀼 𑀲𑀸𑀲𑀦𑁂𑀲𑀼 𑀓𑀼𑀓𑁆𑀓𑀼𑀘𑁆𑀘𑀁 𑀦 𑀓𑀸𑀢𑀩𑁆𑀩𑀁. 𑀓𑀧𑁆𑀧𑀺𑀬𑀲𑀸𑀲𑀦𑀸𑀦𑀺 𑀏𑀢𑀸𑀦𑀺 𑀦 𑀕𑀺𑀳𑀻𑀦𑀁 𑀕𑀺𑀳𑀺𑀓𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀻𑀢𑀺. 𑀓𑀼𑀢𑁄 𑀘 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀕𑀘𑁆𑀙𑀲𑀻𑀢𑀺 𑀦𑀺𑀲𑀺𑀦𑁆𑀦𑁄 𑀲𑁄 𑀪𑀺𑀓𑁆𑀔𑀼 𑀦 𑀆𑀕𑀘𑁆𑀙𑀢𑀺 𑀅𑀢𑁆𑀣𑀢𑁄 𑀧𑀦 𑀆𑀕𑀢𑁄 𑀳𑁄𑀢𑀺; 𑀏𑀯𑀁 𑀲𑀦𑁆𑀢𑁂𑀧𑀺 𑀯𑀢𑁆𑀢𑀫𑀸𑀦𑀲𑀫𑀻𑀧𑁂 𑀯𑀢𑁆𑀢𑀫𑀸𑀦𑀯𑀘𑀦𑀁 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀦 𑀤𑁄𑀲𑁄. 𑀧𑀭𑀺𑀬𑁄𑀲𑀸𑀦𑁂 ‘‘𑀢𑀢𑁄 𑀅𑀳𑀁 𑀪𑀕𑀯𑀸 𑀆𑀕𑀘𑁆𑀙𑀸𑀫𑀻’’𑀢𑀺 𑀏𑀢𑁆𑀣𑀸𑀧𑀺 𑀯𑀘𑀦𑁂 𑀏𑀲𑁂𑀯 𑀦𑀬𑁄.

𑁪𑁩𑁩. 𑀧𑀞𑀫𑀁 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀘𑁄𑀤𑁂𑀢𑀩𑁆𑀩𑀸𑀢𑀺 ‘‘𑀫𑀬𑀁 𑀢𑀼𑀫𑁆𑀳𑁂 𑀯𑀢𑁆𑀢𑀼𑀓𑀸𑀫𑀸’’𑀢𑀺 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀯𑀢𑁆𑀣𑀼𑀦𑀸 𑀘 𑀆𑀧𑀢𑁆𑀢𑀺𑀬𑀸 𑀘 𑀘𑁄𑀤𑁂𑀢𑀩𑁆𑀩𑀸. 𑀘𑁄𑀤𑁂𑀢𑁆𑀯𑀸 𑀬𑀁 𑀦 𑀲𑀭𑀦𑁆𑀢𑀺, 𑀢𑀁 𑀲𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀯𑀢𑁆𑀣𑀼𑀜𑁆𑀘 𑀆𑀧𑀢𑁆𑀢𑀺𑀜𑁆𑀘 𑀧𑀝𑀺𑀚𑀸𑀦𑀦𑁆𑀢𑀺, 𑀆𑀧𑀢𑁆𑀢𑀺𑀫𑁂𑀯 𑀯𑀸 𑀧𑀝𑀺𑀚𑀸𑀦𑀦𑁆𑀢𑀺, 𑀦 𑀯𑀢𑁆𑀣𑀼𑀁, 𑀆𑀧𑀢𑁆𑀢𑀺𑀁 𑀭𑁄𑀧𑁂𑀢𑀩𑁆𑀩𑀸. 𑀅𑀣 𑀯𑀢𑁆𑀣𑀼𑀫𑁂𑀯 𑀧𑀝𑀺𑀚𑀸𑀦𑀦𑁆𑀢𑀺, 𑀦𑀸𑀧𑀢𑁆𑀢𑀺𑀁; 𑀏𑀯𑀫𑁆𑀧𑀺 ‘‘𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀬𑀁 𑀦𑀸𑀫 𑀆𑀧𑀢𑁆𑀢𑀻’’𑀢𑀺 𑀭𑁄𑀧𑁂𑀢𑀩𑁆𑀩𑀸 𑀏𑀯. 𑀬𑀤𑀺 𑀦𑁂𑀯 𑀯𑀢𑁆𑀣𑀼𑀁, 𑀦𑀸𑀧𑀢𑁆𑀢𑀺𑀁 𑀧𑀝𑀺𑀚𑀸𑀦𑀦𑁆𑀢𑀺, 𑀆𑀧𑀢𑁆𑀢𑀺𑀁 𑀦 𑀭𑁄𑀧𑁂𑀢𑀩𑁆𑀩𑀸 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄. 𑀬𑀣𑀸𑀧𑀝𑀺𑀜𑁆𑀜𑀸𑀬 𑀧𑀦 𑀆𑀧𑀢𑁆𑀢𑀺𑀁 𑀭𑁄𑀧𑁂𑀢𑁆𑀯𑀸; 𑀏𑀯𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸’’𑀢𑀺𑀆𑀤𑀺𑀫𑀸𑀳, 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀏𑀯𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁂𑀦 𑀪𑀺𑀓𑁆𑀔𑀼𑀦𑀸 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀦 𑀬𑀲𑁆𑀫𑀺𑀁 𑀕𑀸𑀫𑁂 𑀓𑀼𑀮𑀤𑀽𑀲𑀓𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀸 𑀢𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦 𑀯𑀲𑀺𑀢𑀩𑁆𑀩𑀁. 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀦 𑀲𑀸𑀫𑀦𑁆𑀢𑀕𑀸𑀫𑁂𑀧𑀺 𑀧𑀺𑀡𑁆𑀟𑀸𑀬 𑀦 𑀘𑀭𑀺𑀢𑀩𑁆𑀩𑀁. 𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀧𑀺 𑀯𑀲𑀦𑁆𑀢𑁂𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀦 𑀘𑀭𑀺𑀢𑀩𑁆𑀩𑀁. 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀦 ‘‘𑀪𑀦𑁆𑀢𑁂 𑀦𑀕𑀭𑀁 𑀦𑀸𑀫 𑀫𑀳𑀦𑁆𑀢𑀁 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀫𑁆𑀧𑀺 𑀳𑁄𑀢𑀻’’𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀯𑀼𑀢𑁆𑀢𑁄 ‘‘𑀬𑀲𑁆𑀲𑀸 𑀯𑀻𑀣𑀺𑀬𑀸 𑀓𑀼𑀮𑀤𑀽𑀲𑀓𑀓𑀫𑁆𑀫𑀁 𑀓𑀢𑀁 𑀢𑀢𑁆𑀣𑁂𑀯 𑀯𑀸𑀭𑀺𑀢’’𑀦𑁆𑀢𑀺 𑀆𑀳. 𑀢𑀢𑁄 ‘‘𑀯𑀻𑀣𑀺𑀧𑀺 𑀫𑀳𑀢𑀻 𑀦𑀕𑀭𑀧𑁆𑀧𑀫𑀸𑀡𑀸𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁄 ‘‘𑀬𑀲𑁆𑀲𑀸 𑀖𑀭𑀧𑀝𑀺𑀧𑀸𑀝𑀺𑀬𑀸’’𑀢𑀺 𑀆𑀳, ‘‘𑀖𑀭𑀧𑀝𑀺𑀧𑀸𑀝𑀻𑀧𑀺 𑀯𑀻𑀣𑀺𑀧𑁆𑀧𑀫𑀸𑀡𑀸𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀲𑀢𑁆𑀢 𑀖𑀭𑀸𑀦𑀺 𑀯𑀸𑀭𑀺𑀢𑀸𑀦𑀻’’𑀢𑀺 𑀆𑀳. 𑀢𑀁 𑀧𑀦 𑀲𑀩𑁆𑀩𑀁 𑀣𑁂𑀭𑀲𑁆𑀲 𑀫𑀦𑁄𑀭𑀣𑀫𑀢𑁆𑀢𑀫𑁂𑀯. 𑀲𑀘𑁂𑀧𑀺 𑀯𑀺𑀳𑀸𑀭𑁄 𑀢𑀺𑀬𑁄𑀚𑀦𑀧𑀭𑀫𑁄 𑀳𑁄𑀢𑀺 𑀤𑁆𑀯𑀸𑀤𑀲𑀬𑁄𑀚𑀦𑀧𑀭𑀫𑀜𑁆𑀘 𑀦𑀕𑀭𑀁, 𑀦𑁂𑀯 𑀯𑀺𑀳𑀸𑀭𑁂 𑀯𑀲𑀺𑀢𑀼𑀁 𑀮𑀩𑁆𑀪𑀢𑀺, 𑀦 𑀦𑀕𑀭𑁂 𑀘𑀭𑀺𑀢𑀼𑀦𑁆𑀢𑀺.

𑁪𑁩𑁫. 𑀢𑁂 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀸𑀢𑀺 𑀓𑀣𑀁 𑀲𑀗𑁆𑀖𑁄 𑀢𑁂𑀲𑀁 𑀓𑀫𑁆𑀫𑀁 𑀅𑀓𑀸𑀲𑀺? 𑀦 𑀕𑀦𑁆𑀢𑁆𑀯𑀸𑀯 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀓𑀸𑀲𑀺, 𑀅𑀣 𑀔𑁄 𑀓𑀼𑀮𑁂𑀳𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀗𑁆𑀖𑀪𑀢𑁆𑀢𑁂𑀲𑀼 𑀓𑀬𑀺𑀭𑀫𑀸𑀦𑁂𑀲𑀼 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀣𑁂𑀭𑀸 𑀲𑀫𑀡𑀧𑀝𑀺𑀧𑀤𑀁 𑀓𑀣𑁂𑀢𑁆𑀯𑀸 ‘‘𑀅𑀬𑀁 𑀲𑀫𑀡𑁄, 𑀅𑀬𑀁 𑀅𑀲𑁆𑀲𑀫𑀡𑁄’’𑀢𑀺 𑀫𑀦𑀼𑀲𑁆𑀲𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀏𑀓𑀁 𑀤𑁆𑀯𑁂 𑀪𑀺𑀓𑁆𑀔𑀽 𑀲𑀻𑀫𑀁 𑀧𑀯𑁂 𑀲𑁂𑀢𑁆𑀯𑀸 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀲𑀩𑁆𑀩𑁂𑀲𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀅𑀓𑀁𑀲𑀽𑀢𑀺. 𑀏𑀯𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀲𑁆𑀲 𑀘 𑀅𑀝𑁆𑀞𑀸𑀭𑀲 𑀯𑀢𑁆𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀬𑀸𑀘𑀦𑁆𑀢𑀲𑁆𑀲 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀫𑁆𑀫𑁂𑀦𑀸𑀧𑀺 𑀘 𑀢𑁂𑀦 𑀬𑁂𑀲𑀼 𑀓𑀼𑀮𑁂𑀲𑀼 𑀧𑀼𑀩𑁆𑀩𑁂 𑀓𑀼𑀮𑀤𑀽𑀲𑀓𑀓𑀫𑁆𑀫𑀁 𑀓𑀢𑀁, 𑀢𑀢𑁄 𑀧𑀘𑁆𑀘𑀬𑀸 𑀦 𑀕𑀳𑁂𑀢𑀩𑁆𑀩𑀸, 𑀆𑀲𑀯𑀓𑁆𑀔𑀬𑀧𑁆𑀧𑀢𑁆𑀢𑁂𑀦𑀸𑀧𑀺 𑀦 𑀕𑀳𑁂𑀢𑀩𑁆𑀩𑀸, 𑀅𑀓𑀧𑁆𑀧𑀺𑀬𑀸𑀯 𑀳𑁄𑀦𑁆𑀢𑀺. ‘‘𑀓𑀲𑁆𑀫𑀸 𑀦 𑀕𑀡𑁆𑀳𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁂𑀦 ‘‘𑀧𑀼𑀩𑁆𑀩𑁂 𑀏𑀯𑀁 𑀓𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑁂, 𑀲𑀘𑁂 𑀯𑀤𑀦𑁆𑀢𑀺 ‘‘𑀦 𑀫𑀬𑀁 𑀢𑁂𑀦 𑀓𑀸𑀭𑀡𑁂𑀦 𑀤𑁂𑀫 𑀇𑀤𑀸𑀦𑀺 𑀲𑀻𑀮𑀯𑀦𑁆𑀢𑀢𑀸𑀬 𑀤𑁂𑀫𑀸’’𑀢𑀺 𑀕𑀳𑁂𑀢𑀩𑁆𑀩𑀸. 𑀧𑀓𑀢𑀺𑀬𑀸 𑀤𑀸𑀦𑀝𑁆𑀞𑀸𑀦𑁂𑀬𑁂𑀯 𑀓𑀼𑀮𑀤𑀽𑀲𑀓𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺. 𑀢𑀢𑁄 𑀧𑀓𑀢𑀺𑀤𑀸𑀦𑀫𑁂𑀯 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀬𑀁 𑀯𑀟𑁆𑀠𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀢𑀁 𑀦 𑀯𑀝𑁆𑀝𑀢𑀺.

𑀦 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀻𑀢𑀺 𑀢𑁂 𑀧𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀅𑀝𑁆𑀞𑀸𑀭𑀲𑀲𑀼 𑀯𑀢𑁆𑀢𑁂𑀲𑀼 𑀲𑀫𑁆𑀫𑀸 𑀦 𑀯𑀢𑁆𑀢𑀦𑁆𑀢𑀺. 𑀦 𑀮𑁄𑀫𑀁 𑀧𑀸𑀢𑁂𑀦𑁆𑀢𑀻𑀢𑀺 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑁆𑀧𑀝𑀺𑀧𑀚𑁆𑀚𑀦𑀢𑀸𑀬 𑀦 𑀧𑀦𑁆𑀦𑀮𑁄𑀫𑀸 𑀳𑁄𑀦𑁆𑀢𑀺. 𑀦 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀦𑀺𑀢𑁆𑀣𑀭𑀡𑀫𑀕𑁆𑀕𑀁 𑀦 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀦 𑀪𑀺𑀓𑁆𑀔𑀽 𑀔𑀫𑀸𑀧𑁂𑀦𑁆𑀢𑀻𑀢𑀺 ‘‘𑀤𑀼𑀓𑁆𑀓𑀝𑀁, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺, 𑀦 𑀧𑀼𑀦 𑀏𑀯𑀁 𑀓𑀭𑀺𑀲𑁆𑀲𑀸𑀫, 𑀔𑀫𑀣 𑀅𑀫𑁆𑀳𑀸𑀓’’𑀦𑁆𑀢𑀺 𑀏𑀯𑀁 𑀪𑀺𑀓𑁆𑀔𑀽𑀦𑀁 𑀔𑀫𑀸𑀧𑀦𑀁 𑀦 𑀓𑀭𑁄𑀦𑁆𑀢𑀺. 𑀅𑀓𑁆𑀓𑁄𑀲𑀦𑁆𑀢𑀻𑀢𑀺 𑀓𑀸𑀭𑀓𑀲𑀗𑁆𑀖𑀁 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑁆𑀢𑀺. 𑀧𑀭𑀺𑀪𑀸𑀲𑀦𑁆𑀢𑀻𑀢𑀺 𑀪𑀬𑀁 𑀦𑁂𑀲𑀁 𑀤𑀲𑁆𑀲𑁂𑀦𑁆𑀢𑀺. 𑀙𑀦𑁆𑀤𑀕𑀸𑀫𑀺𑀢𑀸…𑀧𑁂… 𑀪𑀬𑀕𑀸𑀫𑀺𑀢𑀸 𑀧𑀸𑀧𑁂𑀦𑁆𑀢𑀻𑀢𑀺 𑀏𑀢𑁂 𑀙𑀦𑁆𑀤𑀕𑀸𑀫𑀺𑀦𑁄 𑀘…𑀧𑁂… 𑀪𑀬𑀕𑀸𑀫𑀺𑀦𑁄 𑀘𑀸𑀢𑀺 𑀏𑀯𑀁 𑀙𑀦𑁆𑀤𑀕𑀸𑀫𑀺𑀢𑀸𑀬𑀧𑀺…𑀧𑁂… 𑀪𑀬𑀕𑀸𑀫𑀺𑀢𑀸𑀬𑀧𑀺 𑀧𑀸𑀧𑁂𑀦𑁆𑀢𑀺, 𑀬𑁄𑀚𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀓𑁆𑀓𑀫𑀦𑁆𑀢𑀻𑀢𑀺 𑀢𑁂𑀲𑀁 𑀧𑀭𑀺𑀯𑀸𑀭𑁂𑀲𑀼 𑀧𑀜𑁆𑀘𑀲𑀼 𑀲𑀫𑀡𑀲𑀢𑁂𑀲𑀼 𑀏𑀓𑀘𑁆𑀘𑁂 𑀤𑀺𑀲𑀸 𑀧𑀓𑁆𑀓𑀫𑀦𑁆𑀢𑀺. 𑀯𑀺𑀩𑁆𑀪𑀫𑀦𑁆𑀢𑀻𑀢𑀺 𑀏𑀓𑀘𑁆𑀘𑁂 𑀕𑀺𑀳𑀻 𑀳𑁄𑀦𑁆𑀢𑀺. 𑀓𑀣𑀜𑁆𑀳𑀺 𑀦𑀸𑀫 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽𑀢𑀺 𑀏𑀢𑁆𑀣 𑀤𑁆𑀯𑀺𑀦𑁆𑀦𑀁 𑀧𑀫𑁄𑀓𑁆𑀔𑀸𑀦𑀁 𑀯𑀲𑁂𑀦 𑀲𑀩𑁆𑀩𑁂𑀧𑀺 ‘‘𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸’’𑀢𑀺 𑀯𑀼𑀢𑁆𑀢𑀸.

𑁪𑁩𑁬-𑁭. 𑀕𑀸𑀫𑀁 𑀯𑀸𑀢𑀺 𑀏𑀢𑁆𑀣 𑀦𑀕𑀭𑀫𑁆𑀧𑀺 𑀕𑀸𑀫𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀁. 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀕𑀸𑀫𑁄𑀧𑀺 𑀦𑀺𑀕𑀫𑁄𑀧𑀺 𑀦𑀕𑀭𑀫𑁆𑀧𑀺 𑀕𑀸𑀫𑁄 𑀘𑁂𑀯 𑀦𑀺𑀕𑀫𑁄 𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑁄 𑀲𑀆𑀧𑀡𑁄 𑀦𑀺𑀕𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀼𑀮𑀸𑀦𑀺 𑀤𑀽𑀲𑁂𑀢𑀻𑀢𑀺 𑀓𑀼𑀮𑀤𑀽𑀲𑀓𑁄. 𑀤𑀽𑀲𑁂𑀦𑁆𑀢𑁄 𑀘 𑀦 𑀅𑀲𑀼𑀘𑀺𑀓𑀤𑁆𑀤𑀫𑀸𑀤𑀻𑀳𑀺 𑀤𑀽𑀲𑁂𑀢𑀺, 𑀅𑀣 𑀔𑁄 𑀅𑀢𑁆𑀢𑀦𑁄 𑀤𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀢𑁂𑀲𑀁 𑀧𑀲𑀸𑀤𑀁 𑀯𑀺𑀦𑀸𑀲𑁂𑀢𑀺. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀧𑀼𑀧𑁆𑀨𑁂𑀦 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀳𑀭𑀺𑀢𑁆𑀯𑀸 𑀯𑀸 𑀳𑀭𑀸𑀧𑁂𑀢𑁆𑀯𑀸 𑀯𑀸 𑀧𑀓𑁆𑀓𑁄𑀲𑀺𑀢𑁆𑀯𑀸 𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀯𑀸 𑀲𑀬𑀁 𑀯𑀸 𑀉𑀧𑀕𑀢𑀸𑀦𑀁 𑀬𑀁𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀼𑀧𑁆𑀨𑀁 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀤𑁂𑀢𑀺, 𑀤𑀼𑀓𑁆𑀓𑀝𑀁. 𑀧𑀭𑀲𑀦𑁆𑀢𑀓𑀁 𑀤𑁂𑀢𑀺, 𑀤𑀼𑀓𑁆𑀓𑀝𑀫𑁂𑀯. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀤𑁂𑀢𑀺, 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀏𑀲𑁂𑀯 𑀦𑀬𑁄 𑀲𑀗𑁆𑀖𑀺𑀓𑁂𑀧𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀲𑁂𑀦𑀸𑀲𑀦𑀢𑁆𑀣𑀸𑀬 𑀦𑀺𑀬𑀸𑀫𑀺𑀢𑀁 𑀇𑀲𑁆𑀲𑀭𑀯𑀢𑀸𑀬 𑀤𑀤𑀢𑁄 𑀣𑀼𑀮𑁆𑀮𑀘𑁆𑀘𑀬𑀁.

𑀧𑀼𑀧𑁆𑀨𑀁 𑀦𑀸𑀫 𑀓𑀲𑁆𑀲 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀓𑀲𑁆𑀲 𑀦 𑀯𑀝𑁆𑀝𑀢𑀻𑀢𑀺? 𑀫𑀸𑀢𑀸𑀧𑀺𑀢𑀽𑀦𑁆𑀦𑀁 𑀢𑀸𑀯 𑀳𑀭𑀺𑀢𑁆𑀯𑀸𑀧𑀺 𑀳𑀭𑀸𑀧𑁂𑀢𑁆𑀯𑀸𑀧𑀺 𑀧𑀓𑁆𑀓𑁄𑀲𑀺𑀢𑁆𑀯𑀸𑀧𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀲𑁂𑀲𑀜𑀸𑀢𑀓𑀸𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸𑀯. 𑀢𑀜𑁆𑀘 𑀔𑁄 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬, 𑀫𑀡𑁆𑀟𑀦𑀢𑁆𑀣𑀸𑀬 𑀧𑀦 𑀲𑀺𑀯𑀮𑀺𑀗𑁆𑀕𑀸𑀤𑀺𑀧𑀽𑀚𑀦𑀢𑁆𑀣𑀸𑀬 𑀯𑀸 𑀓𑀲𑁆𑀲𑀘𑀺𑀧𑀺 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀳𑀭𑀸𑀧𑁂𑀦𑁆𑀢𑁂𑀦 𑀜𑀸𑀢𑀺𑀲𑀸𑀫𑀡𑁂𑀭𑁂𑀳𑁂𑀯 𑀳𑀭𑀸𑀧𑁂𑀢𑀩𑁆𑀩𑀁. 𑀇𑀢𑀭𑁂 𑀧𑀦 𑀬𑀤𑀺 𑀲𑀬𑀫𑁂𑀯 𑀇𑀘𑁆𑀙𑀦𑁆𑀢𑀺, 𑀯𑀝𑁆𑀝𑀢𑀺. 𑀲𑀫𑁆𑀫𑀢𑁂𑀦 𑀧𑀼𑀧𑁆𑀨𑀪𑀸𑀚𑀓𑁂𑀦 𑀪𑀸𑀚𑀦𑀓𑀸𑀮𑁂 𑀲𑀫𑁆𑀧𑀢𑁆𑀢𑀸𑀦𑀁 𑀲𑀸𑀫𑀡𑁂𑀭𑀸𑀦𑀁 𑀉𑀧𑀟𑁆𑀠𑀪𑀸𑀕𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀲𑀫𑁆𑀧𑀢𑁆𑀢𑀕𑀺𑀳𑀻𑀦𑀁 𑀉𑀧𑀟𑁆𑀠𑀪𑀸𑀕𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 ‘‘𑀘𑀽𑀴𑀓𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀲𑀫𑁆𑀫𑀢𑁂𑀦 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀁.

𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀲𑀕𑀸𑀭𑀯𑀸 𑀲𑀸𑀫𑀡𑁂𑀭𑀸 𑀩𑀳𑀽𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀺𑀢𑁆𑀯𑀸 𑀭𑀸𑀲𑀺𑀁 𑀓𑀢𑁆𑀯𑀸 𑀞𑀧𑁂𑀦𑁆𑀢𑀺, 𑀣𑁂𑀭𑀸 𑀧𑀸𑀢𑁄𑀯 𑀲𑀫𑁆𑀧𑀢𑁆𑀢𑀸𑀦𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀉𑀧𑀸𑀲𑀓𑀸𑀦𑀁 𑀯𑀸 ‘‘𑀢𑁆𑀯𑀁 𑀇𑀤𑀁 𑀕𑀡𑁆𑀳, 𑀢𑁆𑀯𑀁 𑀇𑀤𑀁 𑀕𑀡𑁆𑀳𑀸’’𑀢𑀺 𑀤𑁂𑀦𑁆𑀢𑀺, 𑀧𑀼𑀧𑁆𑀨𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀺. ‘‘𑀘𑁂𑀢𑀺𑀬𑀁 𑀧𑀽𑀚𑁂𑀲𑁆𑀲𑀸𑀫𑀸’’𑀢𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀸𑀧𑀺 𑀧𑀽𑀚𑀁 𑀓𑀭𑁄𑀦𑁆𑀢𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀧𑀢𑁆𑀢𑀸𑀦𑀁 𑀘𑁂𑀢𑀺𑀬𑀧𑀽𑀚𑀦𑀢𑁆𑀣𑀸𑀬 𑀤𑁂𑀦𑁆𑀢𑀺, 𑀏𑀢𑀫𑁆𑀧𑀺 𑀧𑀼𑀧𑁆𑀨𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀺. 𑀉𑀧𑀸𑀲𑀓𑁂 𑀅𑀓𑁆𑀓𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀯𑀺𑀳𑀸𑀭𑁂 𑀓𑀡𑀺𑀓𑀸𑀭𑀧𑀼𑀧𑁆𑀨𑀸𑀤𑀻𑀦𑀺 𑀅𑀢𑁆𑀣𑀺, 𑀉𑀧𑀸𑀲𑀓𑀸 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀧𑀽𑀚𑁂𑀣𑀸’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀽 𑀧𑀼𑀧𑁆𑀨𑀧𑀽𑀚𑀁 𑀓𑀢𑁆𑀯𑀸 𑀤𑀺𑀯𑀸𑀢𑀭𑀁 𑀕𑀸𑀫𑀁 𑀧𑀯𑀺𑀝𑁆𑀞𑁂 ‘‘𑀓𑀺𑀁, 𑀪𑀦𑁆𑀢𑁂, 𑀅𑀢𑀺𑀤𑀺𑀯𑀸 𑀧𑀯𑀺𑀝𑁆𑀞𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀺, ‘‘𑀯𑀺𑀳𑀸𑀭𑁂 𑀩𑀳𑀽𑀦𑀺 𑀧𑀼𑀧𑁆𑀨𑀸𑀦𑀺 𑀧𑀽𑀚𑀁 𑀅𑀓𑀭𑀺𑀫𑁆𑀳𑀸’’𑀢𑀺 𑀯𑀤𑀦𑁆𑀢𑀺. 𑀫𑀦𑀼𑀲𑁆𑀲𑀸 ‘‘𑀩𑀳𑀽𑀦𑀺 𑀓𑀺𑀭 𑀯𑀺𑀳𑀸𑀭𑁂 𑀧𑀼𑀧𑁆𑀨𑀸𑀦𑀻’’𑀢𑀺 𑀧𑀼𑀦𑀤𑀺𑀯𑀲𑁂 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀧𑀽𑀚𑀜𑁆𑀘 𑀓𑀭𑁄𑀦𑁆𑀢𑀺, 𑀤𑀸𑀦𑀜𑁆𑀘 𑀤𑁂𑀦𑁆𑀢𑀺, 𑀯𑀝𑁆𑀝𑀢𑀺. 𑀫𑀦𑀼𑀲𑁆𑀲𑀸 ‘‘𑀫𑀬𑀁, 𑀪𑀦𑁆𑀢𑁂, 𑀅𑀲𑀼𑀓𑀤𑀺𑀯𑀲𑀁 𑀦𑀸𑀫 𑀧𑀽𑀚𑁂𑀲𑁆𑀲𑀸𑀫𑀸’’𑀢𑀺 𑀧𑀼𑀧𑁆𑀨𑀯𑀸𑀭𑀁 𑀬𑀸𑀘𑀺𑀢𑁆𑀯𑀸 𑀅𑀦𑀼𑀜𑁆𑀜𑀸𑀢𑀤𑀺𑀯𑀲𑁂 𑀆𑀕𑀘𑁆𑀙𑀦𑁆𑀢𑀺, 𑀲𑀸𑀫𑀡𑁂𑀭𑁂𑀳𑀺 𑀘 𑀧𑀕𑁂𑀯 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 𑀞𑀧𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑁂 𑀭𑀼𑀓𑁆𑀔𑁂𑀲𑀼 𑀧𑀼𑀧𑁆𑀨𑀸𑀦𑀺 𑀅𑀧𑀲𑁆𑀲𑀦𑁆𑀢𑀸 ‘‘𑀓𑀼𑀳𑀺𑀁, 𑀪𑀦𑁆𑀢𑁂, 𑀧𑀼𑀧𑁆𑀨𑀸𑀦𑀻’’𑀢𑀺 𑀯𑀤𑀦𑁆𑀢𑀺, 𑀲𑀸𑀫𑀡𑁂𑀭𑁂𑀳𑀺 𑀑𑀘𑀺𑀦𑀺𑀢𑁆𑀯𑀸 𑀞𑀧𑀺𑀢𑀸𑀦𑀺 𑀢𑀼𑀫𑁆𑀳𑁂 𑀧𑀦 𑀧𑀽𑀚𑁂𑀢𑁆𑀯𑀸 𑀕𑀘𑁆𑀙𑀣, 𑀲𑀗𑁆𑀖𑁄 𑀅𑀜𑁆𑀜𑀁 𑀤𑀺𑀯𑀲𑀁 𑀧𑀽𑀚𑁂𑀲𑁆𑀲𑀢𑀻𑀢𑀺. 𑀢𑁂 𑀧𑀽𑀚𑁂𑀢𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀓𑀼𑀭𑀼𑀦𑁆𑀤𑀺𑀬𑀜𑁆𑀘 ‘‘𑀣𑁂𑀭𑀸 𑀲𑀸𑀫𑀡𑁂𑀭𑁂𑀳𑀺 𑀤𑀸𑀧𑁂𑀢𑀼𑀁 𑀦 𑀮𑀪𑀦𑁆𑀢𑀺. 𑀲𑀘𑁂 𑀲𑀬𑀫𑁂𑀯 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀢𑁂𑀲𑀁 𑀤𑁂𑀦𑁆𑀢𑀺, 𑀯𑀝𑁆𑀝𑀢𑀺. 𑀣𑁂𑀭𑁂𑀳𑀺 𑀧𑀦 ‘𑀲𑀸𑀫𑀡𑁂𑀭𑁂𑀳𑀺 𑀑𑀘𑀺𑀦𑀺𑀢𑁆𑀯𑀸 𑀞𑀧𑀺𑀢𑀸𑀦𑀻’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀧𑀼𑀧𑁆𑀨𑀯𑀸𑀭𑀁 𑀬𑀸𑀘𑀺𑀢𑁆𑀯𑀸 𑀅𑀦𑁄𑀘𑀺𑀢𑁂𑀲𑀼 𑀧𑀼𑀧𑁆𑀨𑁂𑀲𑀼 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀲𑀸𑀫𑀡𑁂𑀭𑁂 ‘‘𑀑𑀘𑀺𑀦𑀺𑀢𑁆𑀯𑀸 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺. 𑀜𑀸𑀢𑀓𑀲𑀸𑀫𑀡𑁂𑀭𑀸𑀦𑀁𑀬𑁂𑀯 𑀑𑀘𑀺𑀦𑀺𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀅𑀜𑁆𑀜𑀸𑀢𑀓𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀭𑀼𑀓𑁆𑀔𑀲𑀸𑀔𑀸𑀬 𑀞𑀧𑁂𑀦𑁆𑀢𑀺, 𑀦 𑀑𑀭𑁄𑀳𑀺𑀢𑁆𑀯𑀸 𑀧𑀮𑀸𑀬𑀺𑀢𑀩𑁆𑀩𑀁, 𑀑𑀘𑀺𑀦𑀺𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀓𑁄𑀘𑀺 𑀥𑀫𑁆𑀫𑀓𑀣𑀺𑀓𑁄 ‘‘𑀩𑀳𑀽𑀦𑀺 𑀉𑀧𑀸𑀲𑀓𑀸 𑀯𑀺𑀳𑀸𑀭𑁂 𑀧𑀼𑀧𑁆𑀨𑀸𑀦𑀺 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀧𑀽𑀚𑀁 𑀓𑀭𑁄𑀣𑀸’’𑀢𑀺 𑀯𑀤𑀢𑀺, 𑀢𑀲𑁆𑀲𑁂𑀯 𑀦 𑀓𑀧𑁆𑀧𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀜𑁆𑀘 𑀓𑀼𑀭𑀼𑀦𑁆𑀤𑀺𑀬𑀜𑁆𑀘 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀢𑀁 𑀅𑀓𑀧𑁆𑀧𑀺𑀬𑀁 𑀦 𑀯𑀝𑁆𑀝𑀢𑀻’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁.

𑀨𑀮𑀫𑁆𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀫𑀸𑀢𑀸𑀧𑀺𑀢𑀽𑀦𑀁𑀜𑁆𑀘 𑀲𑁂𑀲𑀜𑀸𑀢𑀓𑀸𑀦𑀜𑁆𑀘 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀧𑀦 𑀤𑁂𑀦𑁆𑀢𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀧𑀭𑀲𑀦𑁆𑀢𑀓𑁂 𑀲𑀗𑁆𑀖𑀺𑀓𑁂 𑀲𑁂𑀦𑀸𑀲𑀦𑀢𑁆𑀣𑀸𑀬 𑀦𑀺𑀬𑀸𑀫𑀺𑀢𑁂 𑀘 𑀤𑀼𑀓𑁆𑀓𑀝𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁𑀬𑁂𑀯 𑀕𑀺𑀮𑀸𑀦𑀫𑀦𑀼𑀲𑁆𑀲𑀸𑀦𑀁 𑀯𑀸 𑀲𑀫𑁆𑀧𑀢𑁆𑀢𑀇𑀲𑁆𑀲𑀭𑀸𑀦𑀁 𑀯𑀸 𑀔𑀻𑀡𑀧𑀭𑀺𑀩𑁆𑀩𑀬𑀸𑀦𑀁 𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀨𑀮𑀤𑀸𑀦𑀁 𑀦 𑀳𑁄𑀢𑀺. 𑀨𑀮𑀪𑀸𑀚𑀓𑁂𑀦𑀸𑀧𑀺 𑀲𑀫𑁆𑀫𑀢𑁂𑀦 𑀲𑀗𑁆𑀖𑀲𑁆𑀲 𑀨𑀮𑀪𑀸𑀚𑀦𑀓𑀸𑀮𑁂 𑀲𑀫𑁆𑀧𑀢𑁆𑀢𑀫𑀦𑀼𑀲𑁆𑀲𑀸𑀦𑀁 𑀉𑀧𑀟𑁆𑀠𑀪𑀸𑀕𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀅𑀲𑀫𑁆𑀫𑀢𑁂𑀦 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀲𑀗𑁆𑀖𑀸𑀭𑀸𑀫𑁂𑀧𑀺 𑀨𑀮𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀭𑀼𑀓𑁆𑀔𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀓𑀢𑀺𑀓𑀸 𑀓𑀸𑀢𑀩𑁆𑀩𑀸. 𑀢𑀢𑁄 𑀕𑀺𑀮𑀸𑀦𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀜𑁆𑀜𑁂𑀲𑀁 𑀯𑀸 𑀨𑀮𑀁 𑀬𑀸𑀘𑀦𑁆𑀢𑀸𑀦𑀁 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀨𑀮𑀸𑀦𑀺 𑀤𑀸𑀢𑀩𑁆𑀩𑀸𑀦𑀺. 𑀭𑀼𑀓𑁆𑀔𑀸 𑀯𑀸 𑀤𑀲𑁆𑀲𑁂𑀢𑀩𑁆𑀩𑀸 ‘‘𑀇𑀢𑁄 𑀕𑀳𑁂𑀢𑀼𑀁 𑀮𑀩𑁆𑀪𑀢𑀻’’𑀢𑀺. ‘‘𑀇𑀖 𑀨𑀮𑀸𑀦𑀺 𑀲𑀼𑀦𑁆𑀤𑀭𑀸𑀦𑀺, 𑀇𑀢𑁄 𑀕𑀡𑁆𑀳𑀣𑀸’’𑀢𑀺 𑀏𑀯𑀁 𑀧𑀦 𑀦 𑀯𑀢𑁆𑀢𑀩𑁆𑀩𑀁.

𑀘𑀼𑀡𑁆𑀡𑁂𑀦𑀸𑀢𑀺 𑀏𑀢𑁆𑀣 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀲𑀺𑀭𑀻𑀲𑀘𑀼𑀡𑁆𑀡𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀲𑀸𑀯𑀁 𑀬𑀁𑀓𑀺𑀜𑁆𑀘𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀤𑁂𑀢𑀺, 𑀤𑀼𑀓𑁆𑀓𑀝𑀁. 𑀧𑀭𑀲𑀦𑁆𑀢𑀓𑀸𑀤𑀻𑀲𑀼𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀇𑀥 𑀲𑀗𑁆𑀖𑀲𑁆𑀲 𑀭𑀓𑁆𑀔𑀺𑀢𑀕𑁄𑀧𑀺𑀢𑀸𑀧𑀺 𑀭𑀼𑀓𑁆𑀔𑀘𑁆𑀙𑀮𑁆𑀮𑀺 𑀕𑀭𑀼𑀪𑀡𑁆𑀟𑀫𑁂𑀯. 𑀫𑀢𑁆𑀢𑀺𑀓𑀤𑀦𑁆𑀢𑀓𑀝𑁆𑀞𑀯𑁂𑀴𑀽𑀲𑀼𑀧𑀺 𑀕𑀭𑀼𑀪𑀡𑁆𑀟𑀽𑀧𑀕𑀁 𑀜𑀢𑁆𑀯𑀸 𑀘𑀼𑀡𑁆𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀡𑁆𑀡𑀤𑀸𑀦𑀁 𑀧𑀦 𑀏𑀢𑁆𑀣 𑀦 𑀆𑀕𑀢𑀁, 𑀢𑀫𑁆𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀢𑁄𑀧𑀺 𑀕𑀭𑀼𑀪𑀡𑁆𑀟𑀯𑀺𑀦𑀺𑀘𑁆𑀙𑀬𑁂 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀦 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀯𑁂𑀚𑁆𑀚𑀺𑀓𑀸𑀬 𑀯𑀸𑀢𑀺 𑀏𑀢𑁆𑀣 𑀯𑁂𑀚𑁆𑀚𑀓𑀫𑁆𑀫𑀯𑀺𑀥𑀺 𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀚𑀗𑁆𑀖𑀧𑁂𑀲𑀦𑀺𑀓𑁂𑀦𑀸𑀢𑀺 𑀏𑀢𑁆𑀣 𑀚𑀗𑁆𑀖𑀧𑁂𑀲𑀦𑀺𑀬𑀦𑁆𑀢𑀺 𑀕𑀺𑀳𑀻𑀦𑀁 𑀤𑀽𑀢𑁂𑀬𑁆𑀬𑀲𑀸𑀲𑀦𑀳𑀭𑀡𑀓𑀫𑁆𑀫𑀁 𑀯𑀼𑀘𑁆𑀘𑀢𑀺, 𑀢𑀁 𑀦 𑀓𑀸𑀢𑀩𑁆𑀩𑀁. 𑀕𑀺𑀳𑀻𑀦𑀜𑁆𑀳𑀺 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀁. 𑀢𑀁 𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑀲𑁆𑀲𑀸𑀧𑀺 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀤𑀼𑀓𑁆𑀓𑀝𑀁. 𑀧𑀞𑀫𑀁 𑀲𑀸𑀲𑀦𑀁 𑀅𑀕𑁆𑀕𑀳𑁂𑀢𑁆𑀯𑀸𑀧𑀺 𑀧𑀘𑁆𑀙𑀸 ‘‘𑀅𑀬𑀁 𑀤𑀸𑀦𑀺 𑀲𑁄 𑀕𑀸𑀫𑁄 𑀳𑀦𑁆𑀤 𑀢𑀁 𑀲𑀸𑀲𑀦𑀁 𑀆𑀭𑁄𑀘𑁂𑀫𑀻’’𑀢𑀺 𑀫𑀕𑁆𑀕𑀸 𑀑𑀓𑁆𑀓𑀫𑀦𑁆𑀢𑀲𑁆𑀲𑀸𑀧𑀺 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀁. 𑀲𑀸𑀲𑀦𑀁 𑀆𑀭𑁄𑀘𑁂𑀢𑁆𑀯𑀸 𑀮𑀤𑁆𑀥𑀪𑁄𑀚𑀦𑀁 𑀪𑀼𑀜𑁆𑀚𑀢𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀤𑀼𑀓𑁆𑀓𑀝𑀁. 𑀲𑀸𑀲𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀆𑀕𑀢𑁂𑀦 𑀧𑀦 ‘‘𑀪𑀦𑁆𑀢𑁂 𑀢𑀲𑁆𑀫𑀺𑀁 𑀕𑀸𑀫𑁂 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀓𑀸 𑀧𑀯𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀬𑀫𑀸𑀦𑁂𑀦 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀼𑀘𑁆𑀙𑀺𑀢𑀧𑀜𑁆𑀳𑁂 𑀤𑁄𑀲𑁄 𑀦𑀢𑁆𑀣𑀺. 𑀧𑀜𑁆𑀘𑀦𑁆𑀦𑀁 𑀧𑀦 𑀲𑀳𑀥𑀫𑁆𑀫𑀺𑀓𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀧𑀡𑁆𑀟𑀼𑀧𑀮𑀸𑀲𑀲𑁆𑀲 𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲 𑀘 𑀲𑀸𑀲𑀦𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺, 𑀕𑀺𑀳𑀻𑀦𑀜𑁆𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀓𑀧𑁆𑀧𑀺𑀬𑀲𑀸𑀲𑀦𑀁. 𑀇𑀤𑀜𑁆𑀳𑀺 𑀚𑀗𑁆𑀖𑀧𑁂𑀲𑀦𑀺𑀬𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺. 𑀇𑀫𑁂𑀳𑀺 𑀧𑀦 𑀅𑀝𑁆𑀞𑀳𑀺 𑀓𑀼𑀮𑀤𑀽𑀲𑀓𑀓𑀫𑁆𑀫𑁂𑀳𑀺 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀸 𑀧𑀜𑁆𑀘𑀦𑁆𑀦𑀫𑁆𑀧𑀺 𑀲𑀳𑀥𑀫𑁆𑀫𑀺𑀓𑀸𑀦𑀁 𑀦 𑀓𑀧𑁆𑀧𑀦𑁆𑀢𑀺, 𑀅𑀪𑀽𑀢𑀸𑀭𑁄𑀘𑀦𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁂𑀳𑀺 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀲𑀤𑀺𑀲𑀸𑀯 𑀳𑁄𑀦𑁆𑀢𑀺.

𑀧𑀸𑀧𑀸 𑀲𑀫𑀸𑀘𑀸𑀭𑀸 𑀅𑀲𑁆𑀲𑀸𑀢𑀺 𑀧𑀸𑀧𑀲𑀫𑀸𑀘𑀸𑀭𑁄. 𑀢𑁂 𑀧𑀦 𑀬𑀲𑁆𑀫𑀸 𑀫𑀸𑀮𑀸𑀯𑀘𑁆𑀙𑀭𑁄𑀧𑀦𑀸𑀤𑀬𑁄 𑀇𑀥 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 ‘‘𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺𑀧𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀢𑀺𑀭𑁄𑀓𑁆𑀔𑀸𑀢𑀺 𑀧𑀭𑀫𑁆𑀫𑀼𑀔𑀸. 𑀓𑀼𑀮𑀸𑀦𑀺 𑀘 𑀢𑁂𑀦 𑀤𑀼𑀝𑁆𑀞𑀸𑀦𑀻𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀫𑀸 ‘‘𑀓𑀼𑀮𑀸𑀦𑀻’’𑀢𑀺 𑀯𑁄𑀳𑀸𑀭𑀫𑀢𑁆𑀢𑀫𑁂𑀢𑀁, 𑀅𑀢𑁆𑀣𑀢𑁄 𑀳𑀺 𑀫𑀦𑀼𑀲𑁆𑀲𑀸 𑀢𑁂𑀦 𑀤𑀼𑀝𑁆𑀞𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀧𑀼𑀩𑁆𑀩𑁂 𑀲𑀤𑁆𑀥𑀸 𑀳𑀼𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀙𑀦𑁆𑀤𑀕𑀸𑀫𑀺𑀦𑁄𑀢𑀺 𑀙𑀦𑁆𑀤𑁂𑀦 𑀕𑀘𑁆𑀙𑀦𑁆𑀢𑀻𑀢𑀺 𑀙𑀦𑁆𑀤𑀕𑀸𑀫𑀺𑀦𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼. 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑁄 𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬𑀸𑀢𑀺 𑀏𑀢𑁆𑀣 𑀓𑀼𑀮𑀤𑀽𑀲𑀓𑀓𑀫𑁆𑀫𑁂𑀦 𑀤𑀼𑀓𑁆𑀓𑀝𑀫𑁂𑀯. 𑀬𑀁 𑀧𑀦 𑀲𑁄 𑀲𑀗𑁆𑀖𑀁 𑀧𑀭𑀺𑀪𑀯𑀺𑀢𑁆𑀯𑀸 ‘‘𑀙𑀦𑁆𑀤𑀕𑀸𑀫𑀺𑀦𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺𑀧𑀺 𑀧𑀞𑀫𑀲𑀗𑁆𑀖𑀪𑁂𑀤𑀲𑀤𑀺𑀲𑀸𑀦𑁂𑀯𑀸𑀢𑀺.

𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀯𑀡𑁆𑀡𑀦𑀸

𑁪𑁪𑁨. 𑀉𑀤𑁆𑀤𑀺𑀝𑁆𑀞𑀸 𑀔𑁄…𑀧𑁂… 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻𑀢𑀺 𑀏𑀢𑁆𑀣 𑀧𑀞𑀫𑀁 𑀆𑀧𑀢𑁆𑀢𑀺 𑀏𑀢𑁂𑀲𑀦𑁆𑀢𑀺 𑀧𑀞𑀫𑀸𑀧𑀢𑁆𑀢𑀺𑀓𑀸, 𑀧𑀞𑀫𑀁 𑀯𑀻𑀢𑀺𑀓𑁆𑀓𑀫𑀓𑁆𑀔𑀡𑁂𑀬𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀇𑀢𑀭𑁂 𑀧𑀦 𑀬𑀣𑀸 𑀢𑀢𑀺𑀬𑁂 𑀘𑀢𑀼𑀢𑁆𑀣𑁂 𑀘 𑀤𑀺𑀯𑀲𑁂 𑀳𑁄𑀢𑀻𑀢𑀺 𑀚𑀭𑁄 ‘‘𑀢𑀢𑀺𑀬𑀓𑁄 𑀘𑀢𑀼𑀢𑁆𑀣𑀓𑁄’’𑀢𑀺 𑀘 𑀯𑀼𑀘𑁆𑀘𑀢𑀺; 𑀏𑀯𑀁 𑀬𑀸𑀯𑀢𑀢𑀺𑀬𑁂 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑁂 𑀳𑁄𑀦𑁆𑀢𑀻𑀢𑀺 𑀬𑀸𑀯𑀢𑀢𑀺𑀬𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀸𑀯𑀢𑀻𑀳𑀁 𑀚𑀸𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀬𑀢𑁆𑀢𑀓𑀸𑀦𑀺 𑀅𑀳𑀸𑀦𑀺 𑀚𑀸𑀦𑀦𑁆𑀢𑁄 𑀧𑀝𑀺𑀘𑁆𑀙𑀸𑀤𑁂𑀢𑀺, ‘‘𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀦𑀸𑀭𑁄𑀘𑁂𑀢𑀺. 𑀢𑀸𑀯𑀢𑀻𑀳𑀦𑁆𑀢𑀺 𑀢𑀢𑁆𑀢𑀓𑀸𑀦𑀺 𑀅𑀳𑀸𑀦𑀺. 𑀅𑀓𑀸𑀫𑀸 𑀧𑀭𑀺𑀯𑀢𑁆𑀣𑀩𑁆𑀩𑀦𑁆𑀢𑀺 𑀦 𑀓𑀸𑀫𑁂𑀦, 𑀦 𑀯𑀲𑁂𑀦, 𑀅𑀣 𑀔𑁄 𑀅𑀓𑀸𑀫𑁂𑀦 𑀅𑀯𑀲𑁂𑀦 𑀧𑀭𑀺𑀯𑀸𑀲𑀁 𑀲𑀫𑀸𑀤𑀸𑀬 𑀯𑀢𑁆𑀣𑀩𑁆𑀩𑀁. 𑀉𑀢𑁆𑀢𑀭𑀺 𑀙𑀸𑀭𑀢𑁆𑀢𑀦𑁆𑀢𑀺 𑀧𑀭𑀺𑀯𑀸𑀲𑀢𑁄 𑀉𑀢𑁆𑀢𑀭𑀺 𑀙 𑀭𑀢𑁆𑀢𑀺𑀬𑁄. 𑀪𑀺𑀓𑁆𑀔𑀼𑀫𑀸𑀦𑀢𑁆𑀢𑀸𑀬𑀸𑀢𑀺 𑀪𑀺𑀓𑁆𑀔𑀽𑀦𑀁 𑀫𑀸𑀦𑀦𑀪𑀸𑀯𑀸𑀬, 𑀆𑀭𑀸𑀥𑀦𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀻𑀲𑀢𑀺𑀲𑀗𑁆𑀖𑁄 𑀕𑀡𑁄 𑀅𑀲𑁆𑀲𑀸𑀢𑀺 𑀯𑀻𑀲𑀢𑀺𑀕𑀡𑁄. 𑀢𑀢𑁆𑀭𑀸𑀢𑀺 𑀬𑀢𑁆𑀭 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀯𑀻𑀲𑀢𑀺𑀕𑀡𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀢𑁆𑀣𑀺 𑀢𑀢𑁆𑀭. 𑀅𑀩𑁆𑀪𑁂𑀢𑀩𑁆𑀩𑁄𑀢𑀺 𑀅𑀪𑀺𑀏𑀢𑀩𑁆𑀩𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄, 𑀅𑀩𑁆𑀪𑀸𑀦𑀓𑀫𑁆𑀫𑀯𑀲𑁂𑀦 𑀑𑀲𑀸𑀭𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀯𑁆𑀳𑀸𑀢𑀩𑁆𑀩𑁄𑀢𑀺 𑀯𑀸 𑀅𑀢𑁆𑀣𑁄. 𑀅𑀦𑀩𑁆𑀪𑀺𑀢𑁄𑀢𑀺 𑀦 𑀅𑀩𑁆𑀪𑀺𑀢𑁄, 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁄, 𑀅𑀓𑀢𑀩𑁆𑀪𑀸𑀦𑀓𑀫𑁆𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀦𑀯𑁆𑀳𑀸𑀢𑁄𑀢𑀺 𑀯𑀸 𑀅𑀢𑁆𑀣𑁄. 𑀲𑀸𑀫𑀻𑀘𑀻𑀢𑀺 𑀅𑀦𑀼𑀥𑀫𑁆𑀫𑀢𑀸, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀦𑀼𑀕𑀢𑀸 𑀑𑀯𑀸𑀤𑀸𑀦𑀼𑀲𑀸𑀲𑀦𑀻, 𑀲𑀸𑀫𑀻𑀘𑀺 𑀥𑀫𑁆𑀫𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀢𑁂𑀭𑀲𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.