𑁮. 𑀧𑀞𑀫𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁮𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂𑀢𑀺 𑀯𑁂𑀴𑀼𑀯𑀦𑀦𑁆𑀢𑀺 𑀢𑀲𑁆𑀲 𑀉𑀬𑁆𑀬𑀸𑀦𑀲𑁆𑀲 𑀦𑀸𑀫𑀁, 𑀢𑀁 𑀓𑀺𑀭 𑀯𑁂𑀴𑀼𑀳𑀺 𑀘 𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀳𑁄𑀲𑀺 𑀅𑀝𑁆𑀞𑀸𑀭𑀲𑀳𑀢𑁆𑀣𑁂𑀦 𑀘 𑀧𑀸𑀓𑀸𑀭𑁂𑀦 𑀕𑁄𑀧𑀼𑀭𑀝𑁆𑀝𑀸𑀮𑀓𑀬𑀼𑀢𑁆𑀢𑀁 𑀦𑀻𑀮𑁄𑀪𑀸𑀲𑀁 𑀫𑀦𑁄𑀭𑀫𑀁 𑀢𑁂𑀦 ‘‘𑀯𑁂𑀴𑀼𑀯𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀓𑀮𑀦𑁆𑀤𑀓𑀸𑀦𑀜𑁆𑀘𑁂𑀢𑁆𑀣 𑀦𑀺𑀯𑀸𑀧𑀁 𑀅𑀤𑀁𑀲𑀼 𑀢𑁂𑀦 ‘‘𑀓𑀮𑀦𑁆𑀤𑀓𑀦𑀺𑀯𑀸𑀧’’𑀢𑀺 𑀯𑀼𑀘𑁆𑀘𑀢𑀺.

𑀧𑀼𑀩𑁆𑀩𑁂 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀢𑀢𑁆𑀣 𑀉𑀬𑁆𑀬𑀸𑀦𑀓𑀻𑀴𑀦𑀢𑁆𑀣𑀁 𑀆𑀕𑀢𑁄, 𑀲𑀼𑀭𑀸𑀫𑀤𑁂𑀦 𑀫𑀢𑁆𑀢𑁄 𑀤𑀺𑀯𑀸𑀲𑁂𑀬𑁆𑀬𑀁 𑀲𑀼𑀧𑀺, 𑀧𑀭𑀺𑀚𑀦𑁄𑀧𑀺𑀲𑁆𑀲 𑀲𑀼𑀢𑁆𑀢𑁄 𑀭𑀸𑀚𑀸𑀢𑀺 𑀧𑀼𑀧𑁆𑀨𑀨𑀮𑀸𑀤𑀻𑀳𑀺 𑀧𑀮𑁄𑀪𑀺𑀬𑀫𑀸𑀦𑁄 𑀇𑀢𑁄 𑀘𑀺𑀢𑁄 𑀘 𑀧𑀓𑁆𑀓𑀫𑀺. 𑀅𑀣 𑀲𑀼𑀭𑀸𑀕𑀦𑁆𑀥𑁂𑀦 𑀅𑀜𑁆𑀜𑀢𑀭𑀲𑁆𑀫𑀸 𑀲𑀼𑀲𑀺𑀭𑀭𑀼𑀓𑁆𑀔𑀸 𑀓𑀡𑁆𑀳𑀲𑀧𑁆𑀧𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀜𑁆𑀜𑁄 𑀅𑀪𑀺𑀫𑀼𑀔𑁄 𑀆𑀕𑀘𑁆𑀙𑀢𑀺, 𑀢𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀤𑁂𑀯𑀢𑀸 ‘‘𑀭𑀜𑁆𑀜𑁄 𑀚𑀻𑀯𑀺𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀓𑀸𑀴𑀓𑀯𑁂𑀲𑁂𑀦 𑀆𑀕𑀦𑁆𑀢𑁆𑀯𑀸 𑀓𑀡𑁆𑀡𑀫𑀽𑀮𑁂 𑀲𑀤𑁆𑀤𑀫𑀓𑀸𑀲𑀺, 𑀭𑀸𑀚𑀸 𑀧𑀝𑀺𑀩𑀼𑀚𑁆𑀛𑀺, 𑀓𑀡𑁆𑀳𑀲𑀧𑁆𑀧𑁄 𑀦𑀺𑀯𑀢𑁆𑀢𑁄, 𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀸𑀬 𑀓𑀸𑀴𑀓𑀸𑀬 𑀫𑀫 𑀚𑀻𑀯𑀺𑀢𑀁 𑀤𑀺𑀦𑁆𑀦’’𑀦𑁆𑀢𑀺 𑀓𑀸𑀴𑀓𑀸𑀦𑀁 𑀢𑀢𑁆𑀣 𑀦𑀺𑀯𑀸𑀧𑀁 𑀧𑀝𑁆𑀞𑀧𑁂𑀲𑀺, 𑀅𑀪𑀬𑀖𑁄𑀲𑀦𑀜𑁆𑀘 𑀖𑁄𑀲𑀸𑀧𑁂𑀲𑀺, 𑀢𑀲𑁆𑀫𑀸 𑀢𑀁 𑀢𑀢𑁄𑀧𑀪𑀼𑀢𑀺 𑀓𑀮𑀦𑁆𑀤𑀓𑀦𑀺𑀯𑀸𑀧𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁. 𑀓𑀮𑀦𑁆𑀤𑀓𑀸𑀢𑀺 𑀳𑀺 𑀓𑀸𑀴𑀓𑀸𑀦𑀁 𑀏𑀢𑀁 𑀦𑀸𑀫𑀁.

𑀤𑀩𑁆𑀩𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀫𑀮𑁆𑀮𑀧𑀼𑀢𑁆𑀢𑁄𑀢𑀺 𑀫𑀮𑁆𑀮𑀭𑀸𑀚𑀲𑁆𑀲 𑀧𑀼𑀢𑁆𑀢𑁄. 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀦𑁆𑀢𑀺 𑀣𑁂𑀭𑁄 𑀓𑀺𑀭 𑀲𑀢𑁆𑀢𑀯𑀲𑁆𑀲𑀺𑀓𑁄𑀯 𑀲𑀁𑀯𑁂𑀕𑀁 𑀮𑀪𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀁𑀓𑀺𑀜𑁆𑀘𑀺 𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩𑀁 𑀲𑀩𑁆𑀩𑀁 𑀢𑁂𑀦 𑀅𑀦𑀼𑀧𑁆𑀧𑀢𑁆𑀢𑀦𑁆𑀢𑀺 𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩𑀁 𑀦𑀸𑀫 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀙 𑀅𑀪𑀺𑀜𑁆𑀜𑀸, 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀢𑀺 𑀇𑀤𑀁 𑀕𑀼𑀡𑀚𑀸𑀢𑀁, 𑀢𑀁 𑀲𑀩𑁆𑀩𑀁 𑀢𑁂𑀦 𑀅𑀦𑀼𑀧𑁆𑀧𑀢𑁆𑀢𑀁 𑀳𑁄𑀢𑀺. 𑀦𑀢𑁆𑀣𑀺 𑀘𑀲𑁆𑀲 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼, 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺, 𑀲𑁄𑀴𑀲𑀯𑀺𑀥𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀢𑀢𑁆𑀢𑀸 𑀇𑀤𑀸𑀦𑀺𑀲𑁆𑀲 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀁 𑀦𑀢𑁆𑀣𑀺. 𑀓𑀢𑀲𑁆𑀲 𑀯𑀸 𑀧𑀢𑀺𑀘𑀬𑁄𑀢𑀺 𑀢𑀲𑁆𑀲𑁂𑀯 𑀓𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀧𑀼𑀦 𑀯𑀟𑁆𑀠𑀦𑀫𑁆𑀧𑀺 𑀦𑀢𑁆𑀣𑀺, 𑀥𑁄𑀢𑀲𑁆𑀲 𑀯𑀺𑀬 𑀯𑀢𑁆𑀣𑀲𑁆𑀲 𑀧𑀝𑀺𑀥𑁄𑀯𑀦𑀁 𑀧𑀺𑀲𑀺𑀢𑀲𑁆𑀲 𑀯𑀺𑀬 𑀕𑀦𑁆𑀥𑀲𑁆𑀲 𑀧𑀝𑀺𑀧𑀺𑀲𑀦𑀁, 𑀧𑀼𑀧𑁆𑀨𑀺𑀢𑀲𑁆𑀲 𑀯𑀺𑀬 𑀘 𑀧𑀼𑀧𑁆𑀨𑀲𑁆𑀲 𑀧𑀝𑀺𑀧𑀼𑀧𑁆𑀨𑀦𑀦𑁆𑀢𑀺. 𑀭𑀳𑁄𑀕𑀢𑀲𑁆𑀲𑀸𑀢𑀺 𑀭𑀳𑀲𑀺 𑀕𑀢𑀲𑁆𑀲. 𑀧𑀝𑀺𑀲𑀮𑁆𑀮𑀻𑀦𑀲𑁆𑀲𑀸𑀢𑀺 𑀢𑀢𑁄 𑀢𑀢𑁄 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀲𑀮𑁆𑀮𑀻𑀦𑀲𑁆𑀲, 𑀏𑀓𑀻𑀪𑀸𑀯𑀁 𑀕𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀦𑁆𑀦𑀽𑀦𑀸𑀳𑀁 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀜𑁆𑀘 𑀧𑀜𑁆𑀜𑀧𑁂𑀬𑁆𑀬𑀁 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑁂𑀬𑁆𑀬’’𑀦𑁆𑀢𑀺 𑀣𑁂𑀭𑁄 𑀓𑀺𑀭 𑀅𑀢𑁆𑀢𑀦𑁄 𑀓𑀢𑀓𑀺𑀘𑁆𑀘𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀳𑀁 𑀇𑀫𑀁 𑀅𑀦𑁆𑀢𑀺𑀫𑀲𑀭𑀻𑀭𑀁 𑀥𑀸𑀭𑁂𑀫𑀺, 𑀢𑀜𑁆𑀘 𑀔𑁄 𑀯𑀸𑀢𑀫𑀼𑀔𑁂 𑀞𑀺𑀢 𑀧𑀤𑀻𑀧𑁄 𑀯𑀺𑀬 𑀅𑀦𑀺𑀘𑁆𑀘𑀢𑀸𑀫𑀼𑀔𑁂 𑀞𑀺𑀢𑀁, 𑀦𑀘𑀺𑀭𑀲𑁆𑀲𑁂𑀯 𑀦𑀺𑀩𑁆𑀩𑀸𑀬𑀦𑀥𑀫𑁆𑀫𑀁 𑀬𑀸𑀯 𑀦 𑀦𑀺𑀩𑁆𑀩𑀸𑀬𑀢𑀺 𑀢𑀸𑀯 𑀓𑀺𑀦𑁆𑀦𑀼 𑀔𑁄 𑀅𑀳𑀁 𑀲𑀗𑁆𑀖𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀢𑀺𑀭𑁄𑀭𑀝𑁆𑀞𑁂𑀲𑀼 𑀩𑀳𑀽 𑀓𑀼𑀮𑀧𑀼𑀢𑁆𑀢𑀸 𑀪𑀕𑀯𑀦𑁆𑀢𑀁 𑀅𑀤𑀺𑀲𑁆𑀯𑀸𑀯 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀪𑀕𑀯𑀦𑁆𑀢𑀁 ‘𑀧𑀲𑁆𑀲𑀺𑀲𑁆𑀲𑀸𑀫 𑀘𑁂𑀯 𑀯𑀦𑁆𑀤𑀺𑀲𑁆𑀲𑀸𑀫 𑀘𑀸’𑀢𑀺 𑀤𑀽𑀭𑀢𑁄𑀧𑀺 𑀆𑀕𑀘𑁆𑀙𑀦𑁆𑀢𑀺, 𑀢𑀢𑁆𑀭 𑀬𑁂𑀲𑀁 𑀲𑁂𑀦𑀸𑀲𑀦𑀁 𑀦𑀧𑁆𑀧𑀳𑁄𑀢𑀺, 𑀢𑁂 𑀲𑀺𑀮𑀸𑀧𑀝𑁆𑀝𑀓𑁂𑀧𑀺 𑀲𑁂𑀬𑁆𑀬𑀁 𑀓𑀧𑁆𑀧𑁂𑀦𑁆𑀢𑀺. 𑀧𑀳𑁄𑀫𑀺 𑀔𑁄 𑀧𑀦𑀸𑀳𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀇𑀘𑁆𑀙𑀸𑀯𑀲𑁂𑀦 𑀧𑀸𑀲𑀸𑀤𑀯𑀺𑀳𑀸𑀭𑀅𑀟𑁆𑀠𑀬𑁄𑀕𑀸𑀤𑀻𑀦𑀺 𑀫𑀜𑁆𑀘𑀧𑀻𑀞𑀓𑀢𑁆𑀣𑀭𑀡𑀸𑀤𑀻𑀦𑀺 𑀘 𑀲𑁂𑀦𑀸𑀲𑁂𑀦𑀸𑀦𑀺 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀤𑀸𑀢𑀼𑀁. 𑀧𑀼𑀦𑀤𑀺𑀯𑀲𑁂 𑀘𑁂𑀢𑁆𑀣 𑀏𑀓𑀘𑁆𑀘𑁂 𑀅𑀢𑀺𑀯𑀺𑀬 𑀓𑀺𑀮𑀦𑁆𑀢𑀭𑀽𑀧𑀸 𑀳𑁄𑀦𑁆𑀢𑀺, 𑀢𑁂 𑀕𑀸𑀭𑀯𑁂𑀦 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀞𑀢𑁆𑀯𑀸 𑀪𑀢𑁆𑀢𑀸𑀦𑀺𑀧𑀺 𑀦 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑀺, 𑀅𑀳𑀁 𑀔𑁄 𑀧𑀦 𑀦𑁂𑀲𑀁 𑀪𑀢𑁆𑀢𑀸𑀦𑀺𑀧𑀺 𑀉𑀤𑁆𑀤𑀺𑀲𑀺𑀢𑀼𑀁 𑀧𑀳𑁄𑀫𑀻’’𑀢𑀺. 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀦𑁆𑀢𑀲𑁆𑀲 ‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀦𑁆𑀦𑀽𑀦𑀸𑀳𑀁 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀜𑁆𑀘 𑀧𑀜𑁆𑀜𑀧𑁂𑀬𑁆𑀬𑀁 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑁂𑀬𑁆𑀬’’𑀦𑁆𑀢𑀺.

𑀦𑀦𑀼 𑀘 𑀇𑀫𑀸𑀦𑀺 𑀤𑁆𑀯𑁂 𑀞𑀸𑀦𑀸𑀦𑀺 𑀪𑀲𑁆𑀲𑀸𑀭𑀸𑀫𑀢𑀸𑀤𑀺𑀫𑀦𑀼𑀬𑀼𑀢𑁆𑀢𑀲𑁆𑀲 𑀬𑀼𑀢𑁆𑀢𑀸𑀦𑀺, 𑀅𑀬𑀜𑁆𑀘 𑀔𑀻𑀡𑀸𑀲𑀯𑁄 𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑁄, 𑀇𑀫𑀲𑁆𑀲 𑀓𑀲𑁆𑀫𑀸 𑀇𑀫𑀸𑀦𑀺 𑀧𑀝𑀺𑀪𑀁𑀲𑀽𑀢𑀺? 𑀧𑀼𑀩𑁆𑀩𑀧𑀢𑁆𑀣𑀦𑀸𑀬 𑀘𑁄𑀤𑀺𑀢𑀢𑁆𑀢𑀸. 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀓𑀺𑀭 𑀇𑀫𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑀸 𑀲𑀸𑀯𑀓𑀸 𑀳𑁄𑀦𑁆𑀢𑀺𑀬𑁂𑀯. 𑀅𑀬𑀜𑁆𑀘 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀇𑀫𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀅𑀝𑁆𑀞𑀲𑀝𑁆𑀞𑀺𑀬𑀸 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀪𑀕𑀯𑀦𑁆𑀢𑀁 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑁂 𑀅𑀳𑀫𑁆𑀧𑀺 𑀇𑀢𑁆𑀣𑀦𑁆𑀦𑀸𑀫𑁄 𑀢𑀼𑀫𑁆𑀳𑀸𑀓𑀁 𑀲𑀸𑀯𑀓𑁄 𑀯𑀺𑀬 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑁄 𑀘 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀘 𑀅𑀲𑁆𑀲’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀪𑀕𑀯𑀸 𑀅𑀦𑀸𑀕𑀢𑀁𑀲𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀅𑀤𑁆𑀤𑀲, 𑀤𑀺𑀲𑁆𑀯𑀸 𑀘 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀤𑀸 𑀢𑁆𑀯𑀁 𑀤𑀩𑁆𑀩𑁄 𑀦𑀸𑀫 𑀫𑀮𑁆𑀮𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀲𑀺, 𑀇𑀫𑀜𑁆𑀘 𑀞𑀸𑀦𑀦𑁆𑀢𑀭𑀁 𑀮𑀘𑁆𑀙𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄 𑀢𑀢𑁄𑀧𑀪𑀼𑀢𑀺 𑀤𑀸𑀦𑀲𑀻𑀮𑀸𑀤𑀻𑀦𑀺 𑀧𑀽𑀭𑀬𑀫𑀸𑀦𑁄 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀢𑁂𑀦 𑀪𑀕𑀯𑀢𑀸 𑀩𑁆𑀬𑀸𑀓𑀢𑀲𑀤𑀺𑀲𑀫𑁂𑀯 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀅𑀣𑀲𑁆𑀲 𑀭𑀳𑁄𑀕𑀢𑀲𑁆𑀲 ‘‘𑀓𑀺𑀦𑁆𑀦𑀼 𑀔𑁄 𑀅𑀳𑀁 𑀲𑀗𑁆𑀖𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑀬𑀢𑁄 𑀢𑀸𑀬 𑀧𑀼𑀩𑁆𑀩𑀧𑀢𑁆𑀣𑀦𑀸𑀬 𑀘𑁄𑀤𑀺𑀢𑀢𑁆𑀢𑀸 𑀇𑀫𑀸𑀦𑀺 𑀤𑁆𑀯𑁂 𑀞𑀸𑀦𑀸𑀦𑀺 𑀧𑀝𑀺𑀪𑀁𑀲𑀽𑀢𑀺.

𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀅𑀦𑀺𑀲𑁆𑀲𑀭𑁄𑀲𑁆𑀫𑀺 𑀅𑀢𑁆𑀢𑀦𑀺, 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀯𑀲𑀸𑀫𑀺, 𑀲𑀘𑁂 𑀫𑀁 𑀪𑀕𑀯𑀸 𑀅𑀦𑀼𑀚𑀸𑀦𑀺𑀲𑁆𑀲𑀢𑀺, 𑀇𑀫𑀸𑀦𑀺 𑀤𑁆𑀯𑁂 𑀞𑀸𑀦𑀸𑀦𑀺 𑀲𑀫𑀸𑀤𑀺𑀬𑀺𑀲𑁆𑀲𑀸𑀫𑀻’’𑀢𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄…𑀧𑁂… 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺. 𑀅𑀣 𑀦𑀁 𑀪𑀕𑀯𑀸 ‘‘𑀲𑀸𑀥𑀼 𑀲𑀸𑀥𑀼 𑀤𑀩𑁆𑀩𑀸’’𑀢𑀺 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀬𑀲𑁆𑀫𑀸 𑀅𑀭𑀳𑀢𑀺 𑀏𑀯𑀭𑀽𑀧𑁄 𑀅𑀕𑀢𑀺𑀕𑀫𑀦𑀧𑀭𑀺𑀩𑀸𑀳𑀺𑀭𑁄 𑀪𑀺𑀓𑁆𑀔𑀼 𑀇𑀫𑀸𑀦𑀺 𑀤𑁆𑀯𑁂 𑀞𑀸𑀦𑀸𑀦𑀺 𑀯𑀺𑀘𑀸𑀭𑁂𑀢𑀼𑀁, 𑀢𑀲𑁆𑀫𑀸 ‘‘𑀢𑁂𑀦 𑀳𑀺 𑀢𑁆𑀯𑀁 𑀤𑀩𑁆𑀩 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀜𑁆𑀘 𑀧𑀜𑁆𑀜𑀧𑁂𑀳𑀺 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑀸’’𑀢𑀺 𑀆𑀳. 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀻𑀢𑀺 𑀪𑀕𑀯𑀢𑁄 𑀯𑀘𑀦𑀁 𑀧𑀢𑀺𑀅𑀲𑁆𑀲𑁄𑀲𑀺 𑀅𑀪𑀺𑀫𑀼𑀔𑁄 𑀅𑀲𑁆𑀲𑁄𑀲𑀺, 𑀲𑀫𑁆𑀧𑀝𑀺𑀘𑁆𑀙𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀞𑀫𑀁 𑀤𑀩𑁆𑀩𑁄 𑀬𑀸𑀘𑀺𑀢𑀩𑁆𑀩𑁄𑀢𑀺 𑀓𑀲𑁆𑀫𑀸 𑀪𑀕𑀯𑀸 𑀬𑀸𑀘𑀸𑀧𑁂𑀢𑀺? 𑀕𑀭𑀳𑀫𑁄𑀘𑀦𑀢𑁆𑀣𑀁. 𑀧𑀲𑁆𑀲𑀢𑀺 𑀳𑀺 𑀪𑀕𑀯𑀸 ‘‘𑀅𑀦𑀸𑀕𑀢𑁂 𑀤𑀩𑁆𑀩𑀲𑁆𑀲 𑀇𑀫𑀁 𑀞𑀸𑀦𑀁 𑀦𑀺𑀲𑁆𑀲𑀸𑀬 𑀫𑁂𑀢𑁆𑀢𑀺𑀬𑀪𑀼𑀫𑀚𑀓𑀸𑀦𑀁 𑀯𑀲𑁂𑀦 𑀫𑀳𑀸𑀉𑀧𑀤𑁆𑀤𑀯𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀢𑁆𑀭 𑀓𑁂𑀘𑀺 𑀕𑀭𑀳𑀺𑀲𑁆𑀲𑀦𑁆𑀢𑀺 ‘𑀅𑀬𑀁 𑀢𑀼𑀡𑁆𑀳𑀻𑀪𑀽𑀢𑁄 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀓𑀲𑁆𑀫𑀸 𑀈𑀤𑀺𑀲𑀁 𑀞𑀸𑀦𑀁 𑀯𑀺𑀘𑀸𑀭𑁂𑀢𑀻’𑀢𑀺. 𑀢𑀢𑁄 𑀅𑀜𑁆𑀜𑁂 𑀯𑀓𑁆𑀔𑀦𑁆𑀢𑀺 ‘𑀓𑁄 𑀇𑀫𑀲𑁆𑀲 𑀤𑁄𑀲𑁄 𑀏𑀢𑁂𑀳𑁂𑀯 𑀬𑀸𑀘𑀺𑀢𑁆𑀯𑀸 𑀞𑀧𑀺𑀢𑁄’𑀢𑀺 𑀏𑀯𑀁 𑀕𑀭𑀳𑀢𑁄 𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀕𑀭𑀳𑀫𑁄𑀘𑀦𑀢𑁆𑀣𑀁 𑀬𑀸𑀘𑀸𑀧𑁂𑀢𑁆𑀯𑀸𑀧𑀺 𑀧𑀼𑀦 𑀬𑀲𑁆𑀫𑀸 𑀅𑀲𑀫𑁆𑀫𑀢𑁂 𑀪𑀺𑀓𑁆𑀔𑀼𑀲𑁆𑀫𑀺𑀁 𑀲𑀗𑁆𑀖𑀫𑀚𑁆𑀛𑁂 𑀓𑀺𑀜𑁆𑀘𑀺 𑀓𑀣𑀬𑀫𑀸𑀦𑁂 𑀔𑀺𑀬𑁆𑀬𑀦𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 ‘‘𑀅𑀬𑀁 𑀓𑀲𑁆𑀫𑀸 𑀲𑀗𑁆𑀖𑀫𑀚𑁆𑀛𑁂 𑀉𑀘𑁆𑀘𑀸𑀲𑀤𑁆𑀤𑀁 𑀓𑀭𑁄𑀢𑀺, 𑀇𑀲𑁆𑀲𑀭𑀺𑀬𑀁 𑀤𑀲𑁆𑀲𑁂𑀢𑀻’’𑀢𑀺. 𑀲𑀫𑁆𑀫𑀢𑁂 𑀧𑀦 𑀓𑀣𑁂𑀦𑁆𑀢𑁂 ‘‘𑀫𑀸𑀬𑀲𑁆𑀫𑀦𑁆𑀢𑁄 𑀓𑀺𑀜𑁆𑀘𑀺 𑀅𑀯𑀘𑀼𑀢𑁆𑀣, 𑀲𑀫𑁆𑀫𑀢𑁄 𑀅𑀬𑀁, 𑀓𑀣𑁂𑀢𑀼 𑀬𑀣𑀸𑀲𑀼𑀔’’𑀦𑁆𑀢𑀺 𑀯𑀢𑁆𑀢𑀸𑀭𑁄 𑀪𑀯𑀦𑁆𑀢𑀺. 𑀅𑀲𑀫𑁆𑀫𑀢𑀜𑁆𑀘 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀲𑁆𑀲 𑀮𑀳𑀼𑀓𑀸 𑀆𑀧𑀢𑁆𑀢𑀺 𑀳𑁄𑀢𑀺 𑀤𑀼𑀓𑁆𑀓𑀝𑀫𑀢𑁆𑀢𑀸. 𑀲𑀫𑁆𑀫𑀢𑀁 𑀧𑀦 𑀅𑀩𑁆𑀪𑀸𑀘𑀺𑀓𑁆𑀔𑀢𑁄 𑀕𑀭𑀼𑀓𑀢𑀭𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀳𑁄𑀢𑀺. 𑀅𑀣 𑀲𑀫𑁆𑀫𑀢𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀕𑀭𑀼𑀓𑀪𑀸𑀯𑁂𑀦 𑀯𑁂𑀭𑀻𑀳𑀺𑀧𑀺 𑀤𑀼𑀧𑁆𑀧𑀥𑀁𑀲𑀺𑀬𑀢𑀭𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀲𑀫𑁆𑀫𑀦𑁆𑀦𑀸𑀧𑁂𑀢𑀼𑀁 ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑀺𑀁 𑀧𑀦 𑀤𑁆𑀯𑁂 𑀲𑀫𑁆𑀫𑀼𑀢𑀺𑀬𑁄 𑀏𑀓𑀲𑁆𑀲 𑀤𑀸𑀢𑀼𑀁 𑀯𑀝𑁆𑀝𑀦𑁆𑀢𑀻𑀢𑀺? 𑀦 𑀓𑁂𑀯𑀮𑀁 𑀤𑁆𑀯𑁂, 𑀲𑀘𑁂 𑀧𑀳𑁄𑀢𑀺, 𑀢𑁂𑀭𑀲𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀅𑀧𑁆𑀧𑀳𑁄𑀦𑁆𑀢𑀸𑀦𑀁 𑀧𑀦 𑀏𑀓𑀸𑀧𑀺 𑀤𑁆𑀯𑀺𑀦𑁆𑀦𑀁 𑀯𑀸 𑀢𑀺𑀡𑁆𑀡𑀁 𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺.

𑁩𑁮𑁨. 𑀲𑀪𑀸𑀕𑀸𑀦𑀦𑁆𑀢𑀺 𑀕𑀼𑀡𑀲𑀪𑀸𑀕𑀸𑀦𑀁, 𑀦 𑀫𑀺𑀢𑁆𑀢𑀲𑀦𑁆𑀣𑀯𑀲𑀪𑀸𑀕𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀬𑁂 𑀢𑁂 𑀪𑀺𑀓𑁆𑀔𑀽 𑀲𑀼𑀢𑁆𑀢𑀦𑁆𑀢𑀺𑀓𑀸 𑀢𑁂𑀲𑀁 𑀏𑀓𑀚𑁆𑀛’’𑀦𑁆𑀢𑀺𑀆𑀤𑀺. 𑀬𑀸𑀯𑀢𑀺𑀓𑀸 𑀳𑀺 𑀲𑀼𑀢𑁆𑀢𑀦𑁆𑀢𑀺𑀓𑀸 𑀳𑁄𑀦𑁆𑀢𑀺, 𑀢𑁂 𑀉𑀘𑁆𑀘𑀺𑀦𑀺𑀢𑁆𑀯𑀸 𑀏𑀓𑀢𑁄 𑀢𑁂𑀲𑀁 𑀅𑀦𑀼𑀭𑀽𑀧𑀫𑁂𑀯 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺; 𑀏𑀯𑀁 𑀲𑁂𑀲𑀸𑀦𑀁. 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀸𑀢𑀺 𑀓𑀸𑀬𑀲𑁆𑀲 𑀤𑀴𑁆𑀳𑀻𑀪𑀸𑀯𑀓𑀭𑀡𑀩𑀳𑀼𑀮𑀸, 𑀓𑀸𑀬𑀧𑁄𑀲𑀦𑀩𑀳𑀼𑀮𑀸𑀢𑀺 𑀅𑀢𑁆𑀣𑁄. 𑀇𑀫𑀸𑀬𑀧𑀺𑀫𑁂 𑀆𑀬𑀲𑁆𑀫𑀦𑁆𑀢𑁄 𑀭𑀢𑀺𑀬𑀸𑀢𑀺 𑀇𑀫𑀸𑀬 𑀲𑀕𑁆𑀕𑀫𑀕𑁆𑀕𑀲𑁆𑀲 𑀢𑀺𑀭𑀘𑁆𑀙𑀸𑀦𑀪𑀽𑀢𑀸𑀬 𑀢𑀺𑀭𑀘𑁆𑀙𑀸𑀦𑀓𑀣𑀸𑀭𑀢𑀺𑀬𑀸. 𑀅𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀳𑀭𑀺𑀲𑁆𑀲𑀦𑁆𑀢𑀺.

𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑁂𑀦𑁂𑀯𑀸𑀮𑁄𑀓𑁂𑀦𑀸𑀢𑀺 𑀢𑁂𑀚𑁄𑀓𑀲𑀺𑀡𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀪𑀺𑀜𑁆𑀜𑀸𑀜𑀸𑀡𑁂𑀦 𑀅𑀗𑁆𑀕𑀼𑀮𑀺𑀚𑀮𑀦𑀁 𑀅𑀥𑀺𑀝𑁆𑀞𑀸𑀬 𑀢𑁂𑀦𑁂𑀯 𑀢𑁂𑀚𑁄𑀥𑀸𑀢𑀼𑀲𑀫𑀸𑀧𑀢𑁆𑀢𑀺𑀚𑀦𑀺𑀢𑁂𑀦 𑀅𑀗𑁆𑀕𑀼𑀮𑀺𑀚𑀸𑀮𑀸𑀮𑁄𑀓𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦 𑀣𑁂𑀭𑀲𑁆𑀲 𑀆𑀦𑀼𑀪𑀸𑀯𑁄 𑀦𑀘𑀺𑀭𑀲𑁆𑀲𑁂𑀯 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑁄 𑀅𑀳𑁄𑀲𑀺, 𑀢𑀁 𑀲𑀼𑀢𑁆𑀯𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀝𑁆𑀞𑀼𑀓𑀸𑀫𑀸 𑀅𑀧𑀺𑀲𑀼 𑀪𑀺𑀓𑁆𑀔𑀽 𑀲𑀜𑁆𑀘𑀺𑀘𑁆𑀘 𑀯𑀺𑀓𑀸𑀮𑁂 𑀆𑀕𑀘𑁆𑀙𑀦𑁆𑀢𑀺. 𑀢𑁂 𑀲𑀜𑁆𑀘𑀺𑀘𑁆𑀘 𑀤𑀽𑀭𑁂 𑀅𑀧𑀤𑀺𑀲𑀦𑁆𑀢𑀻𑀢𑀺 𑀚𑀸𑀦𑀦𑁆𑀢𑀸𑀯 𑀤𑀽𑀭𑁂 𑀅𑀧𑀤𑀺𑀲𑀦𑁆𑀢𑀺. 𑀓𑀣𑀁? ‘‘𑀅𑀫𑁆𑀳𑀸𑀓𑀁 𑀆𑀯𑀼𑀲𑁄 𑀤𑀩𑁆𑀩 𑀕𑀺𑀚𑁆𑀛𑀓𑀽𑀝𑁂’’𑀢𑀺 𑀇𑀫𑀺𑀦𑀸 𑀦𑀬𑁂𑀦.

𑀅𑀗𑁆𑀕𑀼𑀮𑀺𑀬𑀸 𑀚𑀮𑀫𑀸𑀦𑀸𑀬 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀢𑀻𑀢𑀺 𑀲𑀘𑁂 𑀏𑀓𑁄 𑀪𑀺𑀓𑁆𑀔𑀼 𑀳𑁄𑀢𑀺, 𑀲𑀬𑀫𑁂𑀯 𑀕𑀘𑁆𑀙𑀢𑀺. 𑀲𑀘𑁂 𑀩𑀳𑀽 𑀳𑁄𑀦𑁆𑀢𑀺, 𑀩𑀳𑀽 𑀅𑀢𑁆𑀢𑀪𑀸𑀯𑁂 𑀦𑀺𑀫𑁆𑀫𑀺𑀦𑀸𑀢𑀺. 𑀲𑀩𑁆𑀩𑁂 𑀅𑀢𑁆𑀢𑀦𑀸 𑀲𑀤𑀺𑀲𑀸 𑀏𑀯 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀦𑁆𑀢𑀺.

𑀅𑀬𑀁 𑀫𑀜𑁆𑀘𑁄𑀢𑀺𑀆𑀤𑀻𑀲𑀼 𑀧𑀦 𑀣𑁂𑀭𑁂 ‘‘𑀅𑀬𑀁 𑀫𑀜𑁆𑀘𑁄’’𑀢𑀺 𑀯𑀤𑀦𑁆𑀢𑁂 𑀦𑀺𑀫𑁆𑀫𑀺𑀢𑀸𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑀢𑀕𑀢𑀝𑁆𑀞𑀸𑀦𑁂 ‘‘𑀅𑀬𑀁 𑀫𑀜𑁆𑀘𑁄’’𑀢𑀺 𑀯𑀤𑀦𑁆𑀢𑀺; 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼. 𑀅𑀬𑀜𑁆𑀳𑀺 𑀦𑀺𑀫𑁆𑀫𑀺𑀢𑀸𑀦𑀁 𑀥𑀫𑁆𑀫𑀢𑀸 𑁋

‘‘𑀏𑀓𑀲𑁆𑀫𑀺𑀁 𑀪𑀸𑀲𑀫𑀸𑀦𑀲𑁆𑀫𑀺𑀁, 𑀲𑀩𑁆𑀩𑁂 𑀪𑀸𑀲𑀦𑁆𑀢𑀺 𑀦𑀺𑀫𑁆𑀫𑀺𑀢𑀸;

𑀏𑀓𑀲𑁆𑀫𑀺𑀁 𑀢𑀼𑀡𑁆𑀳𑀺𑀫𑀸𑀲𑀻𑀦𑁂, 𑀲𑀩𑁆𑀩𑁂 𑀢𑀼𑀡𑁆𑀳𑀻 𑀪𑀯𑀦𑁆𑀢𑀺 𑀢𑁂’’𑀢𑀺.

𑀬𑀲𑁆𑀫𑀺𑀁 𑀧𑀦 𑀯𑀺𑀳𑀸𑀭𑁂 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀦 𑀧𑀭𑀺𑀧𑀽𑀭𑀦𑁆𑀢𑀺, 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀧𑀽𑀭𑁂𑀦𑁆𑀢𑀺. 𑀢𑁂𑀦 𑀦𑀺𑀫𑁆𑀫𑀺𑀢𑀸𑀦𑀁 𑀅𑀯𑀢𑁆𑀣𑀼𑀓𑀯𑀘𑀦𑀁 𑀦 𑀳𑁄𑀢𑀺.

𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀧𑀼𑀦𑀤𑁂𑀯 𑀯𑁂𑀴𑀼𑀯𑀦𑀁 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀚𑀦𑀧𑀤𑀓𑀣𑀁 𑀓𑀣𑁂𑀦𑁆𑀢𑁄 𑀦 𑀦𑀺𑀲𑀻𑀤𑀢𑀺, 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀧𑀘𑁆𑀘𑀸𑀕𑀘𑁆𑀙𑀢𑀺.

𑁩𑁮𑁩. 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀢𑀺 𑀫𑁂𑀢𑁆𑀢𑀺𑀬𑁄 𑀘𑁂𑀯 𑀪𑀽𑀫𑀚𑀓𑁄 𑀘, 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀅𑀕𑁆𑀕𑀧𑀼𑀭𑀺𑀲𑀸 𑀏𑀢𑁂. 𑀮𑀸𑀫𑀓𑀸𑀦𑀺 𑀘 𑀪𑀢𑁆𑀢𑀸𑀦𑀻𑀢𑀺 𑀲𑁂𑀦𑀸𑀲𑀦𑀸𑀦𑀺 𑀢𑀸𑀯 𑀦𑀯𑀓𑀸𑀦𑀁 𑀮𑀸𑀫𑀓𑀸𑀦𑀺 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀦𑀘𑁆𑀙𑀭𑀺𑀬𑀫𑁂𑀢𑀁. 𑀪𑀢𑁆𑀢𑀸𑀦𑀺 𑀧𑀦 𑀲𑀮𑀸𑀓𑀸𑀬𑁄 𑀧𑀘𑁆𑀙𑀺𑀬𑀁 𑀯𑀸 𑀘𑀻𑀯𑀭𑀪𑁄𑀕𑁂 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀮𑁄𑀴𑁂𑀢𑁆𑀯𑀸 𑀏𑀓𑀫𑁂𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀢𑀸𑀦𑀺𑀧𑀺 𑀢𑁂𑀲𑀁 𑀫𑀦𑁆𑀤𑀧𑀼𑀜𑀢𑀸𑀬 𑀮𑀸𑀫𑀓𑀸𑀦𑀺 𑀲𑀩𑁆𑀩𑀧𑀘𑁆𑀙𑀺𑀫𑀸𑀦𑁂𑀯 𑀧𑀸𑀧𑀼𑀡𑀦𑁆𑀢𑀺. 𑀬𑀫𑁆𑀧𑀺 𑀏𑀓𑀘𑀸𑀭𑀺𑀓𑀪𑀢𑁆𑀢𑀁 𑀳𑁄𑀢𑀺, 𑀢𑀫𑁆𑀧𑀺 𑀏𑀢𑁂𑀲𑀁 𑀧𑀢𑁆𑀢𑀤𑀺𑀯𑀲𑁂 𑀮𑀸𑀫𑀓𑀁 𑀯𑀸 𑀳𑁄𑀢𑀺, 𑀏𑀢𑁂 𑀯𑀸 𑀤𑀺𑀲𑁆𑀯𑀸𑀯 𑀧𑀡𑀻𑀢𑀁 𑀅𑀤𑀢𑁆𑀯𑀸 𑀮𑀸𑀫𑀓𑀫𑁂𑀯 𑀤𑁂𑀦𑁆𑀢𑀺.

𑀅𑀪𑀺𑀲𑀗𑁆𑀔𑀸𑀭𑀺𑀓𑀦𑁆𑀢𑀺 𑀦𑀸𑀦𑀸𑀲𑀫𑁆𑀪𑀸𑀭𑁂𑀳𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀓𑀢𑀁 𑀲𑀼𑀲𑀚𑁆𑀚𑀺𑀢𑀁, 𑀲𑀼𑀲𑀫𑁆𑀧𑀸𑀤𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀡𑀸𑀚𑀓𑀦𑁆𑀢𑀺 𑀲𑀓𑀼𑀡𑁆𑀟𑀓𑀪𑀢𑁆𑀢𑀁. 𑀩𑀺𑀮𑀗𑁆𑀕𑀤𑀼𑀢𑀺𑀬𑀦𑁆𑀢𑀺 𑀓𑀜𑁆𑀚𑀺𑀓𑀤𑀼𑀢𑀺𑀬𑀁.

𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑁄𑀢𑀺 𑀓𑀮𑁆𑀬𑀸𑀡𑀁 𑀲𑀼𑀦𑁆𑀤𑀭𑀁 𑀅𑀢𑀺𑀯𑀺𑀬 𑀧𑀡𑀻𑀢𑀁 𑀪𑀢𑁆𑀢𑀫𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑁄, 𑀧𑀡𑀻𑀢𑀤𑀸𑀬𑀓𑀢𑁆𑀢𑀸 𑀪𑀢𑁆𑀢𑁂𑀦𑁂𑀯 𑀧𑀜𑁆𑀜𑀸𑀢𑁄. 𑀘𑀢𑀼𑀓𑁆𑀓𑀪𑀢𑁆𑀢𑀁 𑀤𑁂𑀢𑀻𑀢𑀺 𑀘𑀢𑁆𑀢𑀸𑀭𑀺 𑀪𑀢𑁆𑀢𑀸𑀦𑀺 𑀤𑁂𑀢𑀺, 𑀢𑀤𑁆𑀥𑀺𑀢𑀯𑁄𑀳𑀸𑀭𑁂𑀦 𑀧𑀦 ‘‘𑀘𑀢𑀼𑀓𑁆𑀓𑀪𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑀢𑀺𑀝𑁆𑀞𑀺𑀢𑁆𑀯𑀸 𑀧𑀭𑀺𑀯𑀺𑀲𑀢𑀻𑀢𑀺 𑀲𑀩𑁆𑀩𑀓𑀫𑁆𑀫𑀦𑁆𑀢𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀦𑁆𑀢𑀁 𑀧𑀽𑀚𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀲𑀫𑀻𑀧𑁂 𑀞𑀢𑁆𑀯𑀸 𑀧𑀭𑀺𑀯𑀺𑀲𑀢𑀺. 𑀑𑀤𑀦𑁂𑀦 𑀧𑀼𑀘𑁆𑀙𑀦𑁆𑀢𑀻𑀢𑀺 𑀑𑀤𑀦𑀳𑀢𑁆𑀣𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁 𑀪𑀦𑁆𑀢𑁂 𑀑𑀤𑀦𑀁 𑀤𑁂𑀫𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀺, 𑀏𑀯𑀁 𑀓𑀭𑀡𑀢𑁆𑀣𑁂𑀬𑁂𑀯 𑀓𑀭𑀡𑀯𑀘𑀦𑀁 𑀳𑁄𑀢𑀺. 𑀏𑀲 𑀦𑀬𑁄 𑀲𑀽𑀧𑀸𑀤𑀻𑀲𑀼.

𑀲𑁆𑀯𑀸𑀢𑀦𑀸𑀬𑀸𑀢𑀺 𑀲𑁆𑀯𑁂 𑀪𑀯𑁄 𑀪𑀢𑁆𑀢𑀧𑀭𑀺𑀪𑁄𑀕𑁄 𑀲𑁆𑀯𑀸𑀢𑀦𑁄 𑀢𑀲𑁆𑀲𑀢𑁆𑀣𑀸𑀬, 𑀲𑁆𑀯𑀸𑀢𑀦𑀸𑀬 𑀲𑁆𑀯𑁂 𑀓𑀢𑁆𑀢𑀩𑁆𑀩𑀲𑁆𑀲 𑀪𑀢𑁆𑀢𑀧𑀭𑀺𑀪𑁄𑀕𑀲𑁆𑀲𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀤𑁆𑀤𑀺𑀝𑁆𑀞𑀁 𑀳𑁄𑀢𑀻𑀢𑀺 𑀧𑀸𑀧𑁂𑀢𑁆𑀯𑀸 𑀤𑀺𑀦𑁆𑀦𑀁 𑀳𑁄𑀢𑀺. 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀦𑀁 𑀔𑁄 𑀕𑀳𑀧𑀢𑀻𑀢𑀺 𑀇𑀤𑀁 𑀣𑁂𑀭𑁄 𑀅𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀆𑀳. 𑀏𑀯𑀁𑀩𑀮𑀯𑀢𑀻 𑀳𑀺 𑀢𑁂𑀲𑀁 𑀫𑀦𑁆𑀤𑀧𑀼𑀜𑁆𑀜𑀢𑀸, 𑀬𑀁 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀅𑀲𑀫𑀦𑁆𑀦𑀸𑀳𑀸𑀭𑁄 𑀳𑁄𑀢𑀺. 𑀬𑁂 𑀚𑁂𑀢𑀺 𑀏𑀢𑁆𑀣 𑀚𑁂𑀢𑀺 𑀤𑀸𑀲𑀺𑀁 𑀆𑀮𑀧𑀢𑀺.

𑀳𑀺𑀬𑁆𑀬𑁄 𑀔𑁄 𑀆𑀯𑀼𑀲𑁄 𑀅𑀫𑁆𑀳𑀸𑀓𑀦𑁆𑀢𑀺 𑀭𑀢𑁆𑀢𑀺𑀁 𑀲𑀫𑁆𑀫𑀦𑁆𑀢𑀬𑀫𑀸𑀦𑀸 𑀅𑀢𑀻𑀢𑀁 𑀤𑀺𑀯𑀲𑀪𑀸𑀕𑀁 𑀲𑀦𑁆𑀥𑀸𑀬 ‘‘𑀳𑀺𑀬𑁆𑀬𑁄’’𑀢𑀺 𑀯𑀤𑀦𑁆𑀢𑀺. 𑀦 𑀘𑀺𑀢𑁆𑀢𑀭𑀽𑀧𑀦𑁆𑀢𑀺 𑀦 𑀘𑀺𑀢𑁆𑀢𑀸𑀦𑀼𑀭𑀽𑀧𑀁, 𑀬𑀣𑀸 𑀧𑀼𑀩𑁆𑀩𑁂 𑀬𑀢𑁆𑀢𑀓𑀁 𑀇𑀘𑁆𑀙𑀦𑁆𑀢𑀺, 𑀢𑀢𑁆𑀢𑀓𑀁 𑀲𑀼𑀧𑀦𑁆𑀢𑀺, 𑀦 𑀏𑀯𑀁 𑀲𑀼𑀧𑀺𑀁𑀲𑀼, 𑀅𑀧𑁆𑀧𑀓𑀫𑁂𑀯 𑀲𑀼𑀧𑀺𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀩𑀳𑀸𑀭𑀸𑀫𑀓𑁄𑀝𑁆𑀞𑀓𑁂𑀢𑀺 𑀯𑁂𑀴𑀼𑀯𑀦𑀯𑀺𑀳𑀸𑀭𑀲𑁆𑀲 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂. 𑀧𑀢𑁆𑀢𑀓𑁆𑀔𑀦𑁆𑀥𑀸𑀢𑀺 𑀧𑀢𑀺𑀢𑀓𑁆𑀔𑀦𑁆𑀥𑀸 𑀔𑀦𑁆𑀥𑀝𑁆𑀞𑀺𑀓𑀁 𑀦𑀸𑀫𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸. 𑀧𑀚𑁆𑀛𑀸𑀬𑀦𑁆𑀢𑀸𑀢𑀺 𑀧𑀥𑀽𑀧𑀸𑀬𑀦𑁆𑀢𑀸.

𑀬𑀢𑁄 𑀦𑀺𑀯𑀸𑀢𑀁 𑀢𑀢𑁄 𑀲𑀯𑀸𑀢𑀦𑁆𑀢𑀺 𑀬𑀢𑁆𑀣 𑀦𑀺𑀯𑀸𑀢𑀁 𑀅𑀧𑁆𑀧𑀓𑁄𑀧𑀺 𑀯𑀸𑀢𑁄 𑀦𑀢𑁆𑀣𑀺, 𑀢𑀢𑁆𑀣 𑀫𑀳𑀸𑀯𑀸𑀢𑁄 𑀉𑀝𑁆𑀞𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀤𑀓𑀁 𑀫𑀜𑁆𑀜𑁂 𑀆𑀤𑀺𑀢𑁆𑀢𑀦𑁆𑀢𑀺 𑀉𑀤𑀓𑀁 𑀯𑀺𑀬 𑀆𑀤𑀺𑀢𑁆𑀢𑀁.

𑁩𑁮𑁪. 𑀲𑀭𑀲𑀺 𑀢𑁆𑀯𑀁 𑀤𑀩𑁆𑀩 𑀏𑀯𑀭𑀽𑀧𑀁 𑀓𑀢𑁆𑀢𑀸𑀢𑀺 𑀢𑁆𑀯𑀁 𑀤𑀩𑁆𑀩 𑀏𑀯𑀭𑀽𑀧𑀁 𑀓𑀢𑁆𑀢𑀸 𑀲𑀭𑀲𑀺. 𑀅𑀣 𑀯𑀸 𑀲𑀭𑀲𑀺 𑀢𑁆𑀯𑀁 𑀤𑀩𑁆𑀩 𑀏𑀯𑀭𑀽𑀧𑀁 𑀬𑀣𑀸𑀬𑀁 𑀪𑀺𑀓𑁆𑀔𑀼𑀦𑀻 𑀆𑀳, 𑀓𑀢𑁆𑀢𑀸 𑀥𑀸𑀲𑀺 𑀏𑀯𑀭𑀽𑀧𑀁, 𑀬𑀣𑀸𑀬𑀁 𑀪𑀺𑀓𑁆𑀔𑀼𑀦𑀻 𑀆𑀳𑀸𑀢𑀺 𑀏𑀯𑀁 𑀬𑁄𑀚𑁂𑀢𑁆𑀯𑀸𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑁂 𑀧𑀦 ‘‘𑀓𑀢𑁆𑀯𑀸’’𑀢𑀺 𑀧𑀞𑀦𑁆𑀢𑀺 𑀢𑁂𑀲𑀁 𑀉𑀚𑀼𑀓𑀫𑁂𑀯.

𑀬𑀣𑀸 𑀫𑀁 𑀪𑀦𑁆𑀢𑁂 𑀪𑀕𑀯𑀸 𑀚𑀸𑀦𑀸𑀢𑀻𑀢𑀺 𑀣𑁂𑀭𑁄 𑀓𑀺𑀁 𑀤𑀲𑁆𑀲𑁂𑀢𑀺. 𑀪𑀕𑀯𑀸 𑀪𑀦𑁆𑀢𑁂 𑀲𑀩𑁆𑀩𑀜𑁆𑀜𑀽, 𑀅𑀳𑀜𑁆𑀘 𑀔𑀻𑀡𑀸𑀲𑀯𑁄, 𑀦𑀢𑁆𑀣𑀺 𑀫𑀬𑁆𑀳𑀁 𑀯𑀢𑁆𑀣𑀼𑀧𑀝𑀺𑀲𑁂𑀯𑀦𑀸, 𑀢𑀁 𑀫𑀁 𑀪𑀕𑀯𑀸 𑀚𑀸𑀦𑀸𑀢𑀺, 𑀢𑀢𑁆𑀭𑀸𑀳𑀁 𑀓𑀺𑀁 𑀯𑀓𑁆𑀔𑀸𑀫𑀺, 𑀬𑀣𑀸 𑀫𑀁 𑀪𑀕𑀯𑀸 𑀚𑀸𑀦𑀸𑀢𑀺 𑀢𑀣𑁂𑀯𑀸𑀳𑀁 𑀤𑀝𑁆𑀞𑀩𑁆𑀩𑁄𑀢𑀺.

𑀦 𑀔𑁄 𑀤𑀩𑁆𑀩 𑀤𑀩𑁆𑀩𑀸 𑀏𑀯𑀁 𑀦𑀺𑀩𑁆𑀩𑁂𑀞𑁂𑀦𑁆𑀢𑀻𑀢𑀺 𑀏𑀢𑁆𑀣 𑀦 𑀔𑁄 𑀤𑀩𑁆𑀩 𑀧𑀡𑁆𑀟𑀺𑀢𑀸 𑀬𑀣𑀸 𑀢𑁆𑀯𑀁 𑀧𑀭𑀧𑁆𑀧𑀘𑁆𑀘𑀬𑁂𑀦 𑀦𑀺𑀩𑁆𑀩𑁂𑀞𑁂𑀲𑀺, 𑀏𑀯𑀁 𑀦𑀺𑀩𑁆𑀩𑁂𑀞𑁂𑀦𑁆𑀢𑀺; 𑀅𑀧𑀺 𑀘 𑀔𑁄 𑀬𑀤𑁂𑀯 𑀲𑀸𑀫𑀁 𑀜𑀸𑀢𑀁 𑀢𑁂𑀦 𑀦𑀺𑀩𑁆𑀩𑁂𑀞𑁂𑀦𑁆𑀢𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀘𑁂 𑀢𑀬𑀸 𑀓𑀢𑀁 𑀓𑀢𑀦𑁆𑀢𑀺 𑀇𑀫𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀺? 𑀦 𑀳𑀺 𑀲𑀓𑁆𑀓𑀸 𑀧𑀭𑀺𑀲𑀩𑀮𑁂𑀦 𑀯𑀸 𑀧𑀓𑁆𑀔𑀼𑀧𑀢𑁆𑀣𑀫𑁆𑀪𑁂𑀦 𑀯𑀸 𑀅𑀓𑀸𑀭𑀓𑁄 𑀓𑀸𑀭𑀓𑁄 𑀓𑀸𑀢𑀼𑀁, 𑀓𑀸𑀭𑀓𑁄 𑀯𑀸 𑀅𑀓𑀸𑀭𑀓𑁄 𑀓𑀸𑀢𑀼𑀁, 𑀢𑀲𑁆𑀫𑀸 𑀬𑀁 𑀲𑀬𑀁 𑀓𑀢𑀁 𑀯𑀸 𑀅𑀓𑀢𑀁 𑀯𑀸 𑀢𑀤𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀚𑀸𑀦𑀦𑁆𑀢𑁄𑀧𑀺 ‘‘𑀅𑀳𑀁 𑀚𑀸𑀦𑀸𑀫𑀺, 𑀔𑀻𑀡𑀸𑀲𑀯𑁄 𑀢𑁆𑀯𑀁; 𑀦𑀢𑁆𑀣𑀺 𑀢𑀼𑀬𑁆𑀳𑀁 𑀤𑁄𑀲𑁄, 𑀅𑀬𑀁 𑀪𑀺𑀓𑁆𑀔𑀼𑀦𑀻 𑀫𑀼𑀲𑀸𑀯𑀸𑀤𑀺𑀦𑀻’’𑀢𑀺 𑀦𑀸𑀯𑁄𑀘𑀸𑀢𑀺? 𑀧𑀭𑀸𑀦𑀼𑀤𑁆𑀤𑀬𑀢𑀸𑀬. 𑀲𑀘𑁂 𑀳𑀺 𑀪𑀕𑀯𑀸 𑀬𑀁 𑀬𑀁 𑀚𑀸𑀦𑀸𑀢𑀺 𑀢𑀁 𑀢𑀁 𑀯𑀤𑁂𑀬𑁆𑀬, 𑀅𑀜𑁆𑀜𑁂𑀦 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁂𑀦 𑀧𑀼𑀝𑁆𑀞𑁂𑀦 ‘‘𑀅𑀳𑀁 𑀚𑀸𑀦𑀸𑀫𑀺 𑀢𑁆𑀯𑀁 𑀧𑀸𑀭𑀸𑀚𑀺𑀓𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 ‘‘𑀅𑀬𑀁 𑀧𑀼𑀩𑁆𑀩𑁂 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀲𑀼𑀤𑁆𑀥𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀫𑀁 𑀅𑀲𑀼𑀤𑁆𑀥𑀁 𑀓𑀭𑁄𑀢𑀺; 𑀓𑀲𑁆𑀲 𑀤𑀸𑀦𑀺 𑀓𑀺𑀁 𑀯𑀤𑀸𑀫𑀺, 𑀬𑀢𑁆𑀭 𑀲𑀢𑁆𑀣𑀸𑀧𑀺 𑀲𑀸𑀯𑀓𑁂𑀲𑀼 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺; 𑀓𑀼𑀢𑁄 𑀇𑀫𑀲𑁆𑀲 𑀲𑀩𑁆𑀩𑀜𑁆𑀜𑀼𑀪𑀸𑀯𑁄’’𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀅𑀧𑀸𑀬𑀽𑀧𑀕𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀪𑀕𑀯𑀸 𑀇𑀫𑀸𑀬 𑀧𑀭𑀸𑀦𑀼𑀤𑁆𑀤𑀬𑀢𑀸𑀬 𑀚𑀸𑀦𑀦𑁆𑀢𑁄𑀧𑀺 𑀦𑀸𑀯𑁄𑀘.

𑀓𑀺𑀜𑁆𑀘 𑀪𑀺𑀬𑁆𑀬𑁄 𑀉𑀧𑀯𑀸𑀤𑀧𑀭𑀺𑀯𑀚𑁆𑀚𑀦𑀢𑁄𑀧𑀺 𑀦𑀸𑀯𑁄𑀘. 𑀬𑀤𑀺 𑀳𑀺 𑀪𑀕𑀯𑀸 𑀏𑀯𑀁 𑀯𑀤𑁂𑀬𑁆𑀬, 𑀏𑀯𑀁 𑀉𑀧𑀯𑀸𑀤𑁄 𑀪𑀯𑁂𑀬𑁆𑀬 ‘‘𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀪𑀸𑀭𑀺𑀬𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀦 𑀲𑀓𑁆𑀔𑀺𑀁 𑀮𑀪𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑁄’’𑀢𑀺. 𑀇𑀤𑀜𑁆𑀘 𑀯𑀼𑀝𑁆𑀞𑀸𑀦𑀮𑀓𑁆𑀔𑀡𑀁 𑀫𑀜𑁆𑀜𑀫𑀸𑀦𑀸 ‘‘𑀩𑀼𑀤𑁆𑀥𑀓𑀸𑀮𑁂𑀧𑀺 𑀲𑀓𑁆𑀔𑀺𑀦𑀸 𑀲𑀼𑀤𑁆𑀥𑀺 𑀯𑀸 𑀅𑀲𑀼𑀤𑁆𑀥𑀺 𑀯𑀸 𑀳𑁄𑀢𑀺 𑀫𑀬𑀁 𑀚𑀸𑀦𑀸𑀫, 𑀅𑀬𑀁 𑀧𑀼𑀕𑁆𑀕𑀮𑁄 𑀅𑀲𑀼𑀤𑁆𑀥𑁄’’𑀢𑀺 𑀏𑀯𑀁 𑀧𑀸𑀧𑀪𑀺𑀓𑁆𑀔𑀽 𑀮𑀚𑁆𑀚𑀺𑀫𑁆𑀧𑀺 𑀯𑀺𑀦𑀸𑀲𑁂𑀬𑁆𑀬𑀼𑀦𑁆𑀢𑀺. 𑀅𑀧𑀺𑀘 𑀅𑀦𑀸𑀕𑀢𑁂𑀧𑀺 𑀪𑀺𑀓𑁆𑀔𑀽 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 ‘‘𑀲𑀘𑁂 𑀢𑀬𑀸 𑀓𑀢𑀁, ‘𑀓𑀢’𑀦𑁆𑀢𑀺 𑀯𑀤𑁂𑀳𑀻’’𑀢𑀺 𑀮𑀚𑁆𑀚𑀻𑀦𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀦𑀬𑀮𑀓𑁆𑀔𑀡𑁂 𑀢𑀦𑁆𑀢𑀺𑀁 𑀞𑀧𑁂𑀦𑁆𑀢𑁄 ‘‘𑀅𑀳𑀁 𑀚𑀸𑀦𑀸𑀫𑀻’’𑀢𑀺 𑀅𑀯𑀢𑁆𑀯𑀸𑀯 ‘‘𑀲𑀘𑁂 𑀢𑀬𑀸 𑀓𑀢𑀁, ‘𑀓𑀢’𑀦𑁆𑀢𑀺 𑀯𑀤𑁂𑀳𑀻’’𑀢𑀺 𑀆𑀳.

𑀦𑀸𑀪𑀺𑀚𑀸𑀦𑀸𑀫𑀺 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀸𑀢𑀺 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀦 𑀅𑀪𑀺𑀚𑀸𑀦𑀸𑀫𑀺, 𑀦 𑀧𑀝𑀺𑀲𑁂𑀯𑀺𑀢𑀸 𑀅𑀳𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀧𑀝𑀺𑀲𑁂𑀯𑀺𑀢𑀸 𑀳𑀼𑀢𑁆𑀯𑀸 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀦 𑀚𑀸𑀦𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁂 𑀧𑀦 ‘‘𑀧𑀝𑀺𑀲𑁂𑀯𑀺𑀢𑁆𑀯𑀸’’𑀢𑀺 𑀧𑀞𑀦𑁆𑀢𑀺 𑀢𑁂𑀲𑀁 𑀉𑀚𑀼𑀓𑀫𑁂𑀯. 𑀧𑀕𑁂𑀯 𑀚𑀸𑀕𑀭𑁄𑀢𑀺 𑀚𑀸𑀕𑀭𑀦𑁆𑀢𑁄 𑀧𑀦 𑀧𑀞𑀫𑀁𑀬𑁂𑀯 𑀦 𑀚𑀸𑀦𑀸𑀫𑀻𑀢𑀺.

𑀢𑁂𑀦 𑀳𑀺 𑀪𑀺𑀓𑁆𑀔𑀯𑁂 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸𑀢𑀺 𑀬𑀲𑁆𑀫𑀸 𑀤𑀩𑁆𑀩𑀲𑁆𑀲 𑀘 𑀇𑀫𑀺𑀲𑁆𑀲𑀸 𑀘 𑀯𑀘𑀦𑀁 𑀦 𑀖𑀝𑀻𑀬𑀢𑀺 𑀢𑀲𑁆𑀫𑀸 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 𑀢𑀺𑀲𑁆𑀲𑁄 𑀦𑀸𑀲𑀦𑀸 𑁋 𑀮𑀺𑀗𑁆𑀕𑀦𑀸𑀲𑀦𑀸, 𑀲𑀁𑀯𑀸𑀲𑀦𑀸𑀲𑀦𑀸, 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸𑀢𑀺. 𑀢𑀸𑀲𑀼 ‘‘𑀤𑀽𑀲𑀓𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑁬𑁬) 𑀅𑀬𑀁 ‘‘𑀮𑀺𑀗𑁆𑀕𑀦𑀸𑀲𑀦𑀸’’. 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀅𑀬𑀁 ‘‘𑀲𑀁𑀯𑀸𑀲𑀦𑀸𑀲𑀦𑀸’’. ‘‘𑀘𑀭 𑀧𑀺𑀭𑁂 𑀯𑀺𑀦𑀲𑁆𑀲𑀸’’𑀢𑀺 (𑀧𑀸𑀘𑀺. 𑁪𑁨𑁯) 𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀅𑀬𑀁 ‘‘𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸’’. 𑀇𑀥 𑀧𑀦 𑀮𑀺𑀗𑁆𑀕𑀦𑀸𑀲𑀦𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸’’𑀢𑀺.

𑀇𑀫𑁂 𑀘 𑀪𑀺𑀓𑁆𑀔𑀽 𑀅𑀦𑀼𑀬𑀼𑀜𑁆𑀚𑀣𑀸𑀢𑀺 𑀇𑀫𑀺𑀦𑀸 𑀇𑀫𑀁 𑀤𑀻𑀧𑁂𑀢𑀺 ‘‘𑀅𑀬𑀁 𑀪𑀺𑀓𑁆𑀔𑀼𑀦𑀻 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀓𑀸𑀭𑀺𑀓𑀸 𑀅𑀤𑁆𑀥𑀸 𑀅𑀜𑁆𑀜𑁂𑀳𑀺 𑀉𑀬𑁆𑀬𑁄𑀚𑀺𑀢𑀸, 𑀢𑀲𑁆𑀫𑀸 𑀬𑁂𑀳𑀺 𑀉𑀬𑁆𑀬𑁄𑀚𑀺𑀢𑀸 𑀇𑀫𑁂 𑀪𑀺𑀓𑁆𑀔𑀽 𑀅𑀦𑀼𑀬𑀼𑀜𑁆𑀚𑀣 𑀕𑀯𑁂𑀲𑀣 𑀚𑀸𑀦𑀸𑀣𑀸’’𑀢𑀺.

𑀓𑀺𑀁 𑀧𑀦 𑀪𑀕𑀯𑀢𑀸 𑀫𑁂𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀻 𑀧𑀝𑀺𑀜𑁆𑀜𑀸𑀬 𑀦𑀸𑀲𑀺𑀢𑀸 𑀅𑀧𑁆𑀧𑀝𑀺𑀜𑁆𑀜𑀸𑀬 𑀦𑀸𑀲𑀺𑀢𑀸𑀢𑀺, 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀢𑀸𑀯 𑀧𑀝𑀺𑀜𑁆𑀜𑀸𑀬 𑀦𑀸𑀲𑀺𑀢𑀸, 𑀣𑁂𑀭𑁄 𑀓𑀸𑀭𑀓𑁄 𑀳𑁄𑀢𑀺 𑀲𑀤𑁄𑀲𑁄? 𑀅𑀣 𑀅𑀧𑁆𑀧𑀝𑀺𑀜𑁆𑀜𑀸𑀬, 𑀣𑁂𑀭𑁄 𑀅𑀓𑀸𑀭𑀓𑁄 𑀳𑁄𑀢𑀺 𑀦𑀺𑀤𑁆𑀤𑁄𑀲𑁄.

𑀪𑀸𑀢𑀺𑀬𑀭𑀸𑀚𑀓𑀸𑀮𑁂𑀧𑀺 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀜𑁆𑀘 𑀅𑀪𑀬𑀕𑀺𑀭𑀺𑀯𑀸𑀲𑀻𑀦𑀜𑁆𑀘 𑀣𑁂𑀭𑀸𑀦𑀁 𑀇𑀫𑀲𑁆𑀫𑀺𑀁𑀬𑁂𑀯 𑀧𑀤𑁂 𑀯𑀺𑀯𑀸𑀤𑁄 𑀅𑀳𑁄𑀲𑀺. 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄𑀧𑀺 𑀅𑀢𑁆𑀢𑀦𑁄 𑀲𑀼𑀢𑁆𑀢𑀁 𑀯𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀣𑁂𑀭𑁄 𑀓𑀸𑀭𑀓𑁄 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄𑀧𑀺 𑀅𑀢𑁆𑀢𑀦𑁄 𑀲𑀼𑀢𑁆𑀢𑀁 𑀯𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀣𑁂𑀭𑁄 𑀓𑀸𑀭𑀓𑁄 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀧𑀜𑁆𑀳𑁄 𑀦 𑀙𑀺𑀚𑁆𑀚𑀢𑀺. 𑀭𑀸𑀚𑀸 𑀲𑀼𑀢𑁆𑀯𑀸 𑀣𑁂𑀭𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀤𑀻𑀖𑀓𑀸𑀭𑀸𑀬𑀦𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑀁 𑀅𑀫𑀘𑁆𑀘𑀁 ‘‘𑀣𑁂𑀭𑀸𑀦𑀁 𑀓𑀣𑀁 𑀲𑀼𑀡𑀸𑀳𑀻’’𑀢𑀺 𑀆𑀡𑀸𑀧𑁂𑀲𑀺. 𑀅𑀫𑀘𑁆𑀘𑁄 𑀓𑀺𑀭 𑀧𑀡𑁆𑀟𑀺𑀢𑁄 𑀪𑀸𑀲𑀦𑁆𑀢𑀭𑀓𑀼𑀲𑀮𑁄 𑀲𑁄 𑀆𑀳 𑁋 ‘‘𑀯𑀤𑀦𑁆𑀢𑀼 𑀢𑀸𑀯 𑀣𑁂𑀭𑀸 𑀲𑀼𑀢𑁆𑀢’’𑀦𑁆𑀢𑀺. 𑀢𑀢𑁄 𑀅𑀪𑀬𑀕𑀺𑀭𑀺𑀣𑁂𑀭𑀸 𑀅𑀢𑁆𑀢𑀦𑁄 𑀲𑀼𑀢𑁆𑀢𑀁 𑀯𑀤𑀺𑀁𑀲𑀼 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀲𑀓𑀸𑀬 𑀧𑀝𑀺𑀜𑁆𑀜𑀸𑀬 𑀦𑀸𑀲𑁂𑀣𑀸’’𑀢𑀺. 𑀅𑀫𑀘𑁆𑀘𑁄 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀣𑁂𑀭𑁄 𑀓𑀸𑀭𑀓𑁄 𑀳𑁄𑀢𑀺 𑀲𑀤𑁄𑀲𑁄’’𑀢𑀺 𑀆𑀳. 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄𑀧𑀺 𑀅𑀢𑁆𑀢𑀦𑁄 𑀲𑀼𑀢𑁆𑀢𑀁 𑀯𑀤𑀺𑀁𑀲𑀼 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸’’𑀢𑀺. 𑀅𑀫𑀘𑁆𑀘𑁄 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀣𑁂𑀭𑁄 𑀅𑀓𑀸𑀭𑀓𑁄 𑀳𑁄𑀢𑀺 𑀦𑀺𑀤𑁆𑀤𑁄𑀲𑁄’’𑀢𑀺 𑀆𑀳. 𑀓𑀺𑀁 𑀧𑀦𑁂𑀢𑁆𑀣 𑀬𑀼𑀢𑁆𑀢𑀁? 𑀬𑀁 𑀧𑀘𑁆𑀙𑀸 𑀯𑀼𑀢𑁆𑀢𑀁 𑀯𑀺𑀘𑀸𑀭𑀺𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀅𑀫𑀽𑀮𑀓𑁂𑀦 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄; 𑀪𑀺𑀓𑁆𑀔𑀼𑀦𑀺𑀁 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀤𑀼𑀓𑁆𑀓𑀝𑀁. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀬𑀁 𑀯𑀺𑀘𑀸𑀭𑀡𑀸, 𑀧𑀼𑀭𑀺𑀫𑀦𑀬𑁂 𑀢𑀸𑀯 𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯 𑀬𑀼𑀚𑁆𑀚𑀢𑀺. 𑀬𑀣𑀸 𑀲𑀢𑀺𑀧𑀺 𑀫𑀼𑀲𑀸𑀯𑀸𑀤𑁂 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀼𑀲𑁆𑀫𑀺𑀁 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀲𑀢𑀺𑀧𑀺 𑀘 𑀫𑀼𑀲𑀸𑀯𑀸𑀤𑁂 𑀅𑀲𑀼𑀤𑁆𑀥𑀁 𑀲𑀼𑀤𑁆𑀥𑀤𑀺𑀝𑁆𑀞𑀺𑀦𑁄 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁂𑀦 𑀯𑀤𑀦𑁆𑀢𑀲𑁆𑀲 𑀑𑀫𑀲𑀯𑀸𑀤𑁂𑀦𑁂𑀯 𑀧𑀸𑀘𑀺𑀢𑁆𑀢𑀺𑀬𑀁, 𑀦 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂𑀦; 𑀏𑀯𑀁 𑀇𑀥𑀸𑀧𑀺 𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑀢𑁆𑀢𑀸 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀁 𑀦 𑀬𑀼𑀚𑁆𑀚𑀢𑀺, 𑀤𑀼𑀓𑁆𑀓𑀝𑀫𑁂𑀯 𑀬𑀼𑀢𑁆𑀢𑀁. 𑀧𑀘𑁆𑀙𑀺𑀫𑀦𑀬𑁂𑀧𑀺 𑀫𑀼𑀲𑀸𑀯𑀸𑀤𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀬𑀼𑀚𑁆𑀚𑀢𑀺, 𑀯𑀘𑀦𑀧𑁆𑀧𑀫𑀸𑀡𑀢𑁄 𑀳𑀺 𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑁂𑀦 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀲𑁆𑀫𑀺𑀁 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑀲𑁆𑀲 𑀘 𑀑𑀫𑀲𑀯𑀸𑀤𑁄. 𑀪𑀺𑀓𑁆𑀔𑀼𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑀺𑀬𑀸 𑀤𑀼𑀓𑁆𑀓𑀝𑀦𑁆𑀢𑀺𑀯𑀘𑀦𑀁 𑀦𑀢𑁆𑀣𑀺, 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀘𑀦𑀫𑀢𑁆𑀣𑀺, 𑀢𑀲𑁆𑀫𑀸 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀬𑀼𑀚𑁆𑀚𑀢𑀺.

𑀢𑀢𑁆𑀭 𑀧𑀦 𑀇𑀤𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁 𑁋 ‘‘𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑁂 𑀅𑀲𑀢𑀺 𑀧𑀸𑀘𑀺𑀢𑁆𑀢𑀺𑀬𑀁, 𑀢𑀲𑁆𑀫𑀺𑀁 𑀲𑀢𑀺 𑀓𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺? 𑀢𑀢𑁆𑀭 𑀬𑀲𑁆𑀫𑀸 𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑁂 𑀲𑀺𑀤𑁆𑀥𑁂𑀧𑀺 𑀅𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀼𑀤𑁆𑀥𑀁𑀲𑀦𑁂 𑀯𑀺𑀲𑀼𑀁 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑁂 𑀲𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀑𑀓𑀸𑀲𑁄 𑀦 𑀤𑀺𑀲𑁆𑀲𑀢𑀺, 𑀦 𑀘 𑀲𑀓𑁆𑀓𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀬𑀸 𑀪𑀯𑀺𑀢𑀼𑀦𑁆𑀢𑀺 𑀧𑀼𑀭𑀺𑀫𑀦𑀬𑁄𑀯𑁂𑀢𑁆𑀣 𑀧𑀭𑀺𑀲𑀼𑀤𑁆𑀥𑀢𑀭𑁄 𑀔𑀸𑀬𑀢𑀺. 𑀢𑀣𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀺𑀁 𑀅𑀫𑀽𑀮𑀓𑁂𑀦 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀅𑀦𑀼𑀤𑁆𑀥𑀁𑀲𑁂𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀪𑀺𑀓𑁆𑀔𑀼𑀁 𑀅𑀦𑀼𑀤𑁆𑀥𑀁𑀲𑁂𑀢𑀺 𑀤𑀼𑀓𑁆𑀓𑀝𑀁, 𑀢𑀢𑁆𑀭 𑀲𑀗𑁆𑀖𑀸𑀤𑀺𑀲𑁂𑀲𑁄 𑀯𑀼𑀝𑁆𑀞𑀸𑀦𑀕𑀸𑀫𑀻 𑀤𑀼𑀓𑁆𑀓𑀝𑀁, 𑀤𑁂𑀲𑀦𑀸𑀕𑀸𑀫𑀻 𑀏𑀢𑁂𑀳𑀺 𑀦𑀸𑀲𑀦𑀸 𑀦𑀢𑁆𑀣𑀺. 𑀬𑀲𑁆𑀫𑀸 𑀧𑀦 𑀲𑀸 𑀧𑀓𑀢𑀺𑀬𑀸𑀯 𑀤𑀼𑀲𑁆𑀲𑀻𑀮𑀸 𑀧𑀸𑀧𑀪𑀺𑀓𑁆𑀔𑀼𑀦𑀻 𑀇𑀤𑀸𑀦𑀺 𑀘 𑀲𑀬𑀫𑁂𑀯 ‘‘𑀤𑀼𑀲𑁆𑀲𑀻𑀮𑀸𑀫𑁆𑀳𑀻’’𑀢𑀺 𑀯𑀤𑀢𑀺 𑀢𑀲𑁆𑀫𑀸 𑀦𑀁 𑀪𑀕𑀯𑀸 𑀅𑀲𑀼𑀤𑁆𑀥𑀢𑁆𑀢𑀸𑀬𑁂𑀯 𑀦𑀸𑀲𑁂𑀲𑀻𑀢𑀺.

𑀅𑀣 𑀔𑁄 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀢𑀺 𑀏𑀯𑀁 ‘‘𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣, 𑀇𑀫𑁂 𑀘 𑀪𑀺𑀓𑁆𑀔𑀽 𑀅𑀦𑀼𑀬𑀼𑀜𑁆𑀚𑀣𑀸’’𑀢𑀺 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁂 𑀪𑀕𑀯𑀢𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 ‘‘𑀤𑁂𑀣 𑀤𑀸𑀦𑀺 𑀇𑀫𑀺𑀲𑁆𑀲𑀸 𑀲𑁂𑀢𑀓𑀸𑀦𑀻’’𑀢𑀺 𑀦𑀸𑀲𑀺𑀬𑀫𑀸𑀦𑀁 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀤𑀺𑀲𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀢𑀁 𑀫𑁄𑀘𑁂𑀢𑀼𑀓𑀸𑀫𑀢𑀸𑀬 𑀅𑀢𑁆𑀢𑀦𑁄 𑀅𑀧𑀭𑀸𑀥𑀁 𑀆𑀯𑀺𑀓𑀭𑀺𑀁𑀲𑀼, 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀔𑁄 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁩𑁮𑁫-𑁬. 𑀤𑀼𑀝𑁆𑀞𑁄 𑀤𑁄𑀲𑁄𑀢𑀺 𑀤𑀽𑀲𑀺𑀢𑁄 𑀘𑁂𑀯 𑀤𑀽𑀲𑀓𑁄 𑀘. 𑀉𑀧𑁆𑀧𑀦𑁆𑀦𑁂 𑀳𑀺 𑀤𑁄𑀲𑁂 𑀧𑀼𑀕𑁆𑀕𑀮𑁄 𑀢𑁂𑀦 𑀤𑁄𑀲𑁂𑀦 𑀤𑀽𑀲𑀺𑀢𑁄 𑀳𑁄𑀢𑀺 𑀧𑀓𑀢𑀺𑀪𑀸𑀯𑀁 𑀚𑀳𑀸𑀧𑀺𑀢𑁄, 𑀢𑀲𑁆𑀫𑀸 ‘‘𑀤𑀼𑀝𑁆𑀞𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀜𑁆𑀘 𑀤𑀽𑀲𑁂𑀢𑀺 𑀯𑀺𑀦𑀸𑀲𑁂𑀢𑀺, 𑀢𑀲𑁆𑀫𑀸 ‘‘𑀤𑁄𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 ‘‘𑀤𑀼𑀝𑁆𑀞𑁄 𑀤𑁄𑀲𑁄’’𑀢𑀺 𑀏𑀓𑀲𑁆𑀲𑁂𑀯𑁂𑀢𑀁 𑀧𑀼𑀕𑁆𑀕𑀮𑀲𑁆𑀲 𑀆𑀓𑀸𑀭𑀦𑀸𑀦𑀢𑁆𑀢𑁂𑀦 𑀦𑀺𑀤𑀲𑁆𑀲𑀦𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀝𑁆𑀞𑁄 𑀤𑁄𑀲𑁄𑀢𑀺 𑀤𑀽𑀲𑀺𑀢𑁄 𑀘𑁂𑀯 𑀤𑀽𑀲𑀓𑁄 𑀘𑀸’’𑀢𑀺 𑀢𑀢𑁆𑀣 𑀲𑀤𑁆𑀤𑀮𑀓𑁆𑀔𑀡𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀲𑁄 ‘‘𑀤𑀼𑀝𑁆𑀞𑁄 𑀤𑁄𑀲𑁄’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄 𑀧𑀝𑀺𑀖𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀓𑀼𑀧𑀺𑀢𑀸𑀤𑀺𑀪𑀸𑀯𑁂 𑀞𑀺𑀢𑁄𑀯 𑀳𑁄𑀢𑀺, 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀓𑀼𑀧𑀺𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀼𑀧𑀺𑀢𑁄𑀢𑀺 𑀓𑀼𑀧𑁆𑀧𑀪𑀸𑀯𑀁 𑀧𑀓𑀢𑀺𑀢𑁄 𑀘𑀯𑀦𑀪𑀸𑀯𑀁 𑀧𑀢𑁆𑀢𑁄. 𑀅𑀦𑀢𑁆𑀢𑀫𑀦𑁄𑀢𑀺 𑀦 𑀲𑀓𑀫𑀦𑁄 𑀅𑀢𑁆𑀢𑀦𑁄 𑀯𑀲𑁂 𑀅𑀝𑁆𑀞𑀺𑀢𑀘𑀺𑀢𑁆𑀢𑁄; 𑀅𑀧𑀺𑀘 𑀧𑀻𑀢𑀺𑀲𑀼𑀔𑁂𑀳𑀺 𑀦 𑀅𑀢𑁆𑀢𑀫𑀦𑁄 𑀦 𑀅𑀢𑁆𑀢𑀘𑀺𑀢𑁆𑀢𑁄𑀢𑀺 𑀅𑀦𑀢𑁆𑀢𑀫𑀦𑁄. 𑀅𑀦𑀪𑀺𑀭𑀤𑁆𑀥𑁄𑀢𑀺 𑀦 𑀲𑀼𑀔𑀺𑀢𑁄 𑀦 𑀯𑀸 𑀧𑀲𑀸𑀤𑀺𑀢𑁄𑀢𑀺 𑀅𑀦𑀪𑀺𑀭𑀤𑁆𑀥𑁄. 𑀧𑀝𑀺𑀖𑁂𑀦 𑀆𑀳𑀢𑀁 𑀘𑀺𑀢𑁆𑀢𑀫𑀲𑁆𑀲𑀸𑀢𑀺 𑀆𑀳𑀢𑀘𑀺𑀢𑁆𑀢𑁄. 𑀘𑀺𑀢𑁆𑀢𑀣𑀤𑁆𑀥𑀪𑀸𑀯𑀘𑀺𑀢𑁆𑀢𑀓𑀘𑀯𑀭𑀲𑀗𑁆𑀔𑀸𑀢𑀁 𑀧𑀝𑀺𑀖𑀔𑀻𑀮𑀁 𑀚𑀸𑀢𑀫𑀲𑁆𑀲𑀸𑀢𑀺 𑀔𑀺𑀮𑀚𑀸𑀢𑁄. 𑀅𑀧𑁆𑀧𑀢𑀻𑀢𑁄𑀢𑀺 𑀦𑀧𑁆𑀧𑀢𑀻𑀢𑁄 𑀧𑀻𑀢𑀺𑀲𑀼𑀔𑀸𑀤𑀻𑀳𑀺 𑀯𑀚𑁆𑀚𑀺𑀢𑁄, 𑀦 𑀅𑀪𑀺𑀲𑀝𑁄𑀢𑀺 𑀅𑀢𑁆𑀣𑁄. 𑀧𑀤𑀪𑀸𑀚𑀦𑁂 𑀧𑀦 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀯𑀲𑁂𑀦 𑀅𑀧𑁆𑀧𑀢𑀻𑀢𑁄 𑀳𑁄𑀢𑀺, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦 𑀘 𑀓𑁄𑀧𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀢𑁂𑀦 𑀘 𑀓𑁄𑀧𑁂𑀦𑀸𑀢𑀺 𑀬𑁂𑀦 𑀤𑀼𑀝𑁆𑀞𑁄𑀢𑀺 𑀘 𑀓𑀼𑀧𑀺𑀢𑁄𑀢𑀺 𑀘 𑀯𑀼𑀢𑁆𑀢𑁄 𑀉𑀪𑀬𑀫𑁆𑀧𑀺 𑀳𑁂𑀢𑀁 𑀧𑀓𑀢𑀺𑀪𑀸𑀯𑀁 𑀚𑀳𑀸𑀧𑀦𑀢𑁄 𑀏𑀓𑀸𑀓𑀸𑀭𑀁 𑀳𑁄𑀢𑀺. 𑀢𑁂𑀦 𑀘 𑀤𑁄𑀲𑁂𑀦𑀸𑀢𑀺 𑀬𑁂𑀦 ‘‘𑀤𑁄𑀲𑁄’’𑀢𑀺 𑀯𑀼𑀢𑁆𑀢𑁄. 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀫𑁂𑀯 𑀤𑀲𑁆𑀲𑁂𑀢𑀺.

𑀢𑀸𑀬 𑀘 𑀅𑀦𑀢𑁆𑀢𑀫𑀦𑀢𑀸𑀬𑀸𑀢𑀺 𑀬𑀸𑀬 ‘‘𑀅𑀦𑀢𑁆𑀢𑀫𑀦𑁄’’𑀢𑀺 𑀯𑀼𑀢𑁆𑀢𑁄. 𑀢𑀸𑀬 𑀘 𑀅𑀦𑀪𑀺𑀭𑀤𑁆𑀥𑀺𑀬𑀸𑀢𑀺 𑀬𑀸𑀬 ‘‘𑀅𑀦𑀪𑀺𑀭𑀤𑁆𑀥𑁄’’𑀢𑀺 𑀯𑀼𑀢𑁆𑀢𑁄. 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀺.

𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦𑀸𑀢𑀺 𑀏𑀢𑁆𑀣 𑀦𑀸𑀲𑁆𑀲 𑀫𑀽𑀮𑀦𑁆𑀢𑀺 𑀅𑀫𑀽𑀮𑀓𑀁, 𑀢𑀁 𑀧𑀦𑀲𑁆𑀲 𑀅𑀫𑀽𑀮𑀓𑀢𑁆𑀢𑀁 𑀬𑀲𑁆𑀫𑀸 𑀘𑁄𑀤𑀓𑀯𑀲𑁂𑀦 𑀅𑀥𑀺𑀧𑁆𑀧𑁂𑀢𑀁, 𑀦 𑀘𑀼𑀤𑀺𑀢𑀓𑀯𑀲𑁂𑀦. 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀧𑀤𑀪𑀸𑀚𑀦𑁂 ‘‘𑀅𑀫𑀽𑀮𑀓𑀁 𑀦𑀸𑀫 𑀅𑀤𑀺𑀝𑁆𑀞𑀁 𑀅𑀲𑀼𑀢𑀁 𑀅𑀧𑀭𑀺𑀲𑀗𑁆𑀓𑀺𑀢’’𑀦𑁆𑀢𑀺 𑀆𑀳. 𑀢𑁂𑀦 𑀇𑀫𑀁 𑀤𑀻𑀧𑁂𑀢𑀺 ‘‘𑀬𑀁 𑀧𑀸𑀭𑀸𑀚𑀺𑀓𑀁 𑀘𑁄𑀤𑀓𑁂𑀦 𑀘𑀼𑀤𑀺𑀢𑀓𑀫𑁆𑀳𑀺 𑀧𑀼𑀕𑁆𑀕𑀮𑁂 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑀦 𑀧𑀭𑀺𑀲𑀗𑁆𑀓𑀺𑀢𑀁 𑀇𑀤𑀁 𑀏𑀢𑁂𑀲𑀁 𑀤𑀲𑁆𑀲𑀦𑀲𑀯𑀦𑀧𑀭𑀺𑀲𑀗𑁆𑀓𑀸𑀲𑀗𑁆𑀔𑀸𑀢𑀸𑀦𑀁 𑀫𑀽𑀮𑀸𑀦𑀁 𑀅𑀪𑀸𑀯𑀢𑁄 𑀅𑀫𑀽𑀮𑀓𑀁 𑀦𑀸𑀫, 𑀢𑀁 𑀧𑀦 𑀲𑁄 𑀆𑀧𑀦𑁆𑀦𑁄 𑀯𑀸 𑀳𑁄𑀢𑀼 𑀅𑀦𑀸𑀧𑀦𑁆𑀦𑁄 𑀯𑀸 𑀏𑀢𑀁 𑀇𑀥 𑀅𑀧𑁆𑀧𑀫𑀸𑀡𑀦𑁆𑀢𑀺.

𑀢𑀢𑁆𑀣 𑀅𑀤𑀺𑀝𑁆𑀞𑀁 𑀦𑀸𑀫 𑀅𑀢𑁆𑀢𑀦𑁄 𑀧𑀲𑀸𑀤𑀘𑀓𑁆𑀔𑀼𑀦𑀸 𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸 𑀅𑀤𑀺𑀝𑁆𑀞𑀁. 𑀅𑀲𑀼𑀢𑀁 𑀦𑀸𑀫 𑀢𑀣𑁂𑀯 𑀓𑁂𑀦𑀘𑀺 𑀯𑀼𑀘𑁆𑀘𑀫𑀸𑀦𑀁 𑀦 𑀲𑀼𑀢𑀁. 𑀅𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫 𑀘𑀺𑀢𑁆𑀢𑁂𑀦 𑀅𑀧𑀭𑀺𑀲𑀗𑁆𑀓𑀺𑀢𑀁.

‘‘𑀤𑀺𑀝𑁆𑀞𑀁’’ 𑀦𑀸𑀫 𑀅𑀢𑁆𑀢𑀦𑀸 𑀯𑀸 𑀧𑀭𑁂𑀦 𑀯𑀸 𑀧𑀲𑀸𑀤𑀘𑀓𑁆𑀔𑀼𑀦𑀸 𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸 𑀤𑀺𑀝𑁆𑀞𑀁. ‘‘𑀲𑀼𑀢𑀁’’ 𑀦𑀸𑀫 𑀢𑀣𑁂𑀯 𑀲𑀼𑀢𑀁. ‘‘𑀧𑀭𑀺𑀲𑀗𑁆𑀓𑀺𑀢’’𑀫𑁆𑀧𑀺 𑀅𑀢𑁆𑀢𑀦𑀸 𑀯𑀸 𑀧𑀭𑁂𑀦 𑀯𑀸 𑀧𑀭𑀺𑀲𑀗𑁆𑀓𑀺𑀢𑀁. 𑀢𑀢𑁆𑀣 𑀅𑀢𑁆𑀢𑀦𑀸 𑀤𑀺𑀝𑁆𑀞𑀁 𑀤𑀺𑀝𑁆𑀞𑀫𑁂𑀯, 𑀧𑀭𑁂𑀳𑀺 𑀤𑀺𑀝𑁆𑀞𑀁 𑀅𑀢𑁆𑀢𑀦𑀸 𑀲𑀼𑀢𑀁, 𑀧𑀭𑁂𑀳𑀺 𑀲𑀼𑀢𑀁, 𑀧𑀭𑁂𑀳𑀺 𑀧𑀭𑀺𑀲𑀗𑁆𑀓𑀺𑀢𑀦𑁆𑀢𑀺 𑀇𑀤𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀅𑀢𑁆𑀢𑀦𑀸 𑀲𑀼𑀢𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀺.

𑀧𑀭𑀺𑀲𑀗𑁆𑀓𑀺𑀢𑀁 𑀧𑀦 𑀢𑀺𑀯𑀺𑀥𑀁 𑁋 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁, 𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁, 𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀦𑁆𑀢𑀺. 𑀢𑀢𑁆𑀣 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫 𑀏𑀓𑁄 𑀪𑀺𑀓𑁆𑀔𑀼 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂𑀦 𑀕𑀸𑀫𑀲𑀫𑀻𑀧𑁂 𑀏𑀓𑀁 𑀕𑀼𑀫𑁆𑀩𑀁 𑀧𑀯𑀺𑀝𑁆𑀞𑁄, 𑀅𑀜𑁆𑀜𑀢𑀭𑀸𑀧𑀺 𑀇𑀢𑁆𑀣𑀻 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀢𑀁 𑀕𑀼𑀫𑁆𑀩𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀯𑀢𑁆𑀢𑀸, 𑀦𑀸𑀧𑀺 𑀪𑀺𑀓𑁆𑀔𑀼 𑀇𑀢𑁆𑀣𑀺𑀁 𑀅𑀤𑁆𑀤𑀲; 𑀦 𑀇𑀢𑁆𑀣𑀻 𑀪𑀺𑀓𑁆𑀔𑀼𑀁, 𑀅𑀤𑀺𑀲𑁆𑀯𑀸𑀯 𑀉𑀪𑁄𑀧𑀺 𑀬𑀣𑀸𑀭𑀼𑀘𑀺𑀁 𑀧𑀓𑁆𑀓𑀦𑁆𑀢𑀸, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀉𑀪𑀺𑀦𑁆𑀦𑀁 𑀢𑀢𑁄 𑀦𑀺𑀓𑁆𑀔𑀫𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀅𑀤𑁆𑀥𑀸 𑀇𑀫𑁂𑀲𑀁 𑀓𑀢𑀁 𑀯𑀸 𑀓𑀭𑀺𑀲𑁆𑀲𑀦𑁆𑀢𑀺 𑀯𑀸’’𑀢𑀺 𑀧𑀭𑀺𑀲𑀗𑁆𑀓𑀢𑀺, 𑀇𑀤𑀁 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫.

𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫 𑀇𑀥𑁂𑀓𑀘𑁆𑀘𑁄 𑀅𑀦𑁆𑀥𑀓𑀸𑀭𑁂 𑀯𑀸 𑀧𑀝𑀺𑀘𑁆𑀙𑀦𑁆𑀦𑁂 𑀯𑀸 𑀑𑀓𑀸𑀲𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀦𑁄 𑀢𑀸𑀤𑀺𑀲𑀁 𑀧𑀝𑀺𑀲𑀦𑁆𑀣𑀸𑀭𑀯𑀘𑀦𑀁 𑀲𑀼𑀡𑀸𑀢𑀺, 𑀲𑀫𑀻𑀧𑁂 𑀅𑀜𑁆𑀜𑀁 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 ‘‘𑀅𑀢𑁆𑀣𑀺 𑀦𑀢𑁆𑀣𑀻’’𑀢𑀺 𑀦 𑀚𑀸𑀦𑀸𑀢𑀺, 𑀲𑁄 ‘‘𑀅𑀤𑁆𑀥𑀸 𑀇𑀫𑁂𑀲𑀁 𑀓𑀢𑀁 𑀯𑀸 𑀓𑀭𑀺𑀲𑁆𑀲𑀦𑁆𑀢𑀺 𑀯𑀸’’𑀢𑀺 𑀧𑀭𑀺𑀲𑀗𑁆𑀓𑀢𑀺, 𑀇𑀤𑀁 𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫.

𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫 𑀲𑀫𑁆𑀩𑀳𑀼𑀮𑀸 𑀥𑀼𑀢𑁆𑀢𑀸 𑀭𑀢𑁆𑀢𑀺𑀪𑀸𑀕𑁂 𑀧𑀼𑀧𑁆𑀨𑀕𑀦𑁆𑀥𑀫𑀁𑀲𑀲𑀼𑀭𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀇𑀢𑁆𑀣𑀻𑀳𑀺 𑀲𑀤𑁆𑀥𑀺𑀁 𑀏𑀓𑀁 𑀧𑀘𑁆𑀘𑀦𑁆𑀢𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀫𑀡𑁆𑀟𑀧𑁂 𑀯𑀸 𑀪𑁄𑀚𑀦𑀲𑀸𑀮𑀸𑀤𑀻𑀲𑀼 𑀯𑀸 𑀬𑀣𑀸𑀲𑀼𑀔𑀁 𑀓𑀻𑀴𑀺𑀢𑁆𑀯𑀸 𑀧𑀼𑀧𑁆𑀨𑀸𑀤𑀻𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀕𑀢𑀸, 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀽 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀲𑀺𑀤𑀁 𑀓𑀫𑁆𑀫’’𑀦𑁆𑀢𑀺 𑀯𑀺𑀘𑀺𑀦𑀦𑁆𑀢𑀺. 𑀢𑀢𑁆𑀭 𑀘 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀧𑀕𑁂𑀯 𑀯𑀼𑀝𑁆𑀞𑀳𑀺𑀢𑁆𑀯𑀸 𑀯𑀢𑁆𑀢𑀲𑀻𑀲𑁂𑀦 𑀫𑀡𑁆𑀟𑀧𑀁 𑀯𑀸 𑀪𑁄𑀚𑀦𑀲𑀸𑀮𑀁 𑀯𑀸 𑀧𑀝𑀺𑀚𑀕𑁆𑀕𑀦𑁆𑀢𑁂𑀦 𑀧𑀼𑀧𑁆𑀨𑀸𑀤𑀻𑀦𑀺 𑀆𑀫𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀓𑁂𑀦𑀘𑀺 𑀉𑀧𑀝𑁆𑀞𑀸𑀓𑀓𑀼𑀮𑀢𑁄 𑀆𑀪𑀢𑁂𑀳𑀺 𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀸 𑀓𑀢𑀸 𑀳𑁄𑀢𑀺, 𑀓𑁂𑀦𑀘𑀺 𑀪𑁂𑀲𑀚𑁆𑀚𑀢𑁆𑀣𑀁 𑀅𑀭𑀺𑀝𑁆𑀞𑀁 𑀧𑀻𑀢𑀁 𑀳𑁄𑀢𑀺, 𑀅𑀣 𑀢𑁂 ‘‘𑀓𑀲𑁆𑀲𑀺𑀤𑀁 𑀓𑀫𑁆𑀫’’𑀦𑁆𑀢𑀺 𑀯𑀺𑀘𑀺𑀦𑀦𑁆𑀢𑀸 𑀪𑀺𑀓𑁆𑀔𑀽 𑀢𑁂𑀲𑀁 𑀳𑀢𑁆𑀣𑀕𑀦𑁆𑀥𑀜𑁆𑀘 𑀫𑀼𑀔𑀕𑀦𑁆𑀥𑀜𑁆𑀘 𑀖𑀸𑀬𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀧𑀭𑀺𑀲𑀗𑁆𑀓𑀦𑁆𑀢𑀺, 𑀇𑀤𑀁 𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫.

𑀢𑀢𑁆𑀣 𑀤𑀺𑀝𑁆𑀞𑀁 𑀅𑀢𑁆𑀣𑀺 𑀲𑀫𑀽𑀮𑀓𑀁, 𑀅𑀢𑁆𑀣𑀺 𑀅𑀫𑀽𑀮𑀓𑀁; 𑀤𑀺𑀝𑁆𑀞𑀫𑁂𑀯 𑀅𑀢𑁆𑀣𑀺 𑀲𑀜𑁆𑀜𑀸𑀲𑀫𑀽𑀮𑀓𑀁, 𑀅𑀢𑁆𑀣𑀺 𑀲𑀜𑁆𑀜𑀸𑀅𑀫𑀽𑀮𑀓𑀁. 𑀏𑀲 𑀦𑀬𑁄 𑀲𑀼𑀢𑁂𑀧𑀺. 𑀧𑀭𑀺𑀲𑀗𑁆𑀓𑀺𑀢𑁂 𑀧𑀦 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀅𑀢𑁆𑀣𑀺 𑀲𑀫𑀽𑀮𑀓𑀁, 𑀅𑀢𑁆𑀣𑀺 𑀅𑀫𑀽𑀮𑀓𑀁; 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀫𑁂𑀯 𑀅𑀢𑁆𑀣𑀺 𑀲𑀜𑁆𑀜𑀸𑀲𑀫𑀽𑀮𑀓𑀁, 𑀅𑀢𑁆𑀣𑀺 𑀲𑀜𑁆𑀜𑀸𑀅𑀫𑀽𑀮𑀓𑀁. 𑀏𑀲 𑀦𑀬𑁄 𑀲𑀼𑀢𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑁂𑀲𑀼. 𑀢𑀢𑁆𑀣 𑀤𑀺𑀝𑁆𑀞𑀁 𑀲𑀫𑀽𑀮𑀓𑀁 𑀦𑀸𑀫 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀦𑁆𑀢𑀁 𑀤𑀺𑀲𑁆𑀯𑀸𑀯 ‘‘𑀤𑀺𑀝𑁆𑀞𑁄 𑀫𑀬𑀸’’𑀢𑀺 𑀯𑀤𑀢𑀺, 𑀅𑀫𑀽𑀮𑀓𑀁 𑀦𑀸𑀫 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑀢𑁄 𑀦𑀺𑀓𑁆𑀔𑀫𑀦𑁆𑀢𑀁 𑀤𑀺𑀲𑁆𑀯𑀸 𑀯𑀻𑀢𑀺𑀓𑁆𑀓𑀫𑀁 𑀅𑀤𑀺𑀲𑁆𑀯𑀸 ‘‘𑀤𑀺𑀝𑁆𑀞𑁄 𑀫𑀬𑀸’’𑀢𑀺 𑀯𑀤𑀢𑀺. 𑀤𑀺𑀝𑁆𑀞𑀫𑁂𑀯 𑀲𑀜𑁆𑀜𑀸𑀲𑀫𑀽𑀮𑀓𑀁 𑀦𑀸𑀫 𑀤𑀺𑀲𑁆𑀯𑀸𑀯 𑀤𑀺𑀝𑁆𑀞𑀲𑀜𑁆𑀜𑀻 𑀳𑀼𑀢𑁆𑀯𑀸 𑀘𑁄𑀤𑁂𑀢𑀺, 𑀲𑀜𑁆𑀜𑀸𑀅𑀫𑀽𑀮𑀓𑀁 𑀦𑀸𑀫 𑀧𑀼𑀩𑁆𑀩𑁂 𑀧𑀸𑀭𑀸𑀚𑀺𑀓𑀯𑀻𑀢𑀺𑀓𑁆𑀓𑀫𑀁 𑀤𑀺𑀲𑁆𑀯𑀸 𑀧𑀘𑁆𑀙𑀸 𑀅𑀤𑀺𑀝𑁆𑀞𑀲𑀜𑁆𑀜𑀻 𑀚𑀸𑀢𑁄, 𑀲𑁄 𑀲𑀜𑁆𑀜𑀸𑀬 𑀅𑀫𑀽𑀮𑀓𑀁 𑀓𑀢𑁆𑀯𑀸 ‘‘𑀤𑀺𑀝𑁆𑀞𑁄 𑀫𑀬𑀸’’𑀢𑀺 𑀘𑁄𑀤𑁂𑀢𑀺. 𑀏𑀢𑁂𑀦 𑀦𑀬𑁂𑀦 𑀲𑀼𑀢𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀸𑀦𑀺𑀧𑀺 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀘 𑀲𑀩𑁆𑀩𑀧𑁆𑀧𑀓𑀸𑀭𑁂𑀡𑀸𑀧𑀺 𑀲𑀫𑀽𑀮𑀓𑁂𑀦 𑀯𑀸 𑀲𑀜𑁆𑀜𑀸𑀲𑀫𑀽𑀮𑀓𑁂𑀦 𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀅𑀫𑀽𑀮𑀓𑁂𑀦 𑀯𑀸 𑀧𑀦 𑀲𑀜𑁆𑀜𑀸𑀅𑀫𑀽𑀮𑀓𑁂𑀦 𑀯𑀸 𑀘𑁄𑀤𑁂𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺.

𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸𑀢𑀺 𑀥𑀁𑀲𑁂𑀬𑁆𑀬 𑀧𑀥𑀁𑀲𑁂𑀬𑁆𑀬 𑀅𑀪𑀺𑀪𑀯𑁂𑀬𑁆𑀬 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬. 𑀢𑀁 𑀧𑀦 𑀅𑀦𑀼𑀤𑁆𑀥𑀁𑀲𑀦𑀁 𑀬𑀲𑁆𑀫𑀸 𑀅𑀢𑁆𑀢𑀦𑀸 𑀘𑁄𑀤𑁂𑀦𑁆𑀢𑁄𑀧𑀺 𑀧𑀭𑁂𑀦 𑀘𑁄𑀤𑀸𑀧𑁂𑀦𑁆𑀢𑁄𑀧𑀺 𑀓𑀭𑁄𑀢𑀺𑀬𑁂𑀯, 𑀢𑀲𑁆𑀫𑀸𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀘𑁄𑀤𑁂𑀢𑀺 𑀯𑀸 𑀘𑁄𑀤𑀸𑀧𑁂𑀢𑀺 𑀯𑀸’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀘𑁄𑀤𑁂𑀢𑀻𑀢𑀺 ‘‘𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑁄𑀲𑀻’’𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀲𑀬𑀁 𑀘𑁄𑀤𑁂𑀢𑀺, 𑀢𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀘𑁄𑀤𑀸𑀧𑁂𑀢𑀻𑀢𑀺 𑀅𑀢𑁆𑀢𑀦𑀸 𑀲𑀫𑀻𑀧𑁂 𑀞𑀢𑁆𑀯𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼 𑀆𑀡𑀸𑀧𑁂𑀢𑀺, 𑀲𑁄 𑀢𑀲𑁆𑀲 𑀯𑀘𑀦𑁂𑀦 𑀢𑀁 𑀘𑁄𑀤𑁂𑀢𑀺, 𑀘𑁄𑀤𑀸𑀧𑀓𑀲𑁆𑀲𑁂𑀯 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀣 𑀲𑁄𑀧𑀺 ‘‘𑀫𑀬𑀸 𑀤𑀺𑀝𑁆𑀞𑀁 𑀲𑀼𑀢𑀁 𑀅𑀢𑁆𑀣𑀻’’𑀢𑀺 𑀘𑁄𑀤𑁂𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀚𑀦𑀸𑀦𑀁 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀘𑁄𑀤𑀦𑀸𑀧𑁆𑀧𑀪𑁂𑀤𑀓𑁄𑀲𑀮𑁆𑀮𑀢𑁆𑀣𑀁 𑀧𑀦𑁂𑀢𑁆𑀣 𑀏𑀓𑀯𑀢𑁆𑀣𑀼𑀏𑀓𑀘𑁄𑀤𑀓𑀸𑀤𑀺𑀘𑀢𑀼𑀓𑁆𑀓𑀁 𑀢𑀸𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀏𑀓𑁄 𑀪𑀺𑀓𑁆𑀔𑀼 𑀏𑀓𑀁 𑀪𑀺𑀓𑁆𑀔𑀼𑀁 𑀏𑀓𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀢𑀺, 𑀇𑀫𑀺𑀲𑁆𑀲𑀸 𑀘𑁄𑀤𑀦𑀸𑀬 𑀏𑀓𑀁 𑀯𑀢𑁆𑀣𑀼 𑀏𑀓𑁄 𑀘𑁄𑀤𑀓𑁄. 𑀲𑀫𑁆𑀩𑀳𑀼𑀮𑀸 𑀏𑀓𑀁 𑀏𑀓𑀯𑀢𑁆𑀣𑀼𑀦𑀸 𑀘𑁄𑀤𑁂𑀦𑁆𑀢𑀺, 𑀧𑀜𑁆𑀘𑀲𑀢𑀸 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀧𑁆𑀧𑀫𑀼𑀔𑀸 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀫𑀺𑀯, 𑀇𑀫𑀺𑀲𑁆𑀲𑀸 𑀘𑁄𑀤𑀦𑀸𑀬 𑀏𑀓𑀁 𑀯𑀢𑁆𑀣𑀼 𑀦𑀸𑀦𑀸𑀘𑁄𑀤𑀓𑀸. 𑀏𑀓𑁄 𑀪𑀺𑀓𑁆𑀔𑀼 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀫𑁆𑀩𑀳𑀼𑀮𑁂𑀳𑀺 𑀯𑀢𑁆𑀣𑀽𑀳𑀺 𑀘𑁄𑀤𑁂𑀢𑀺, 𑀇𑀫𑀺𑀲𑁆𑀲𑀸 𑀘𑁄𑀤𑀦𑀸𑀬 𑀦𑀸𑀦𑀸𑀯𑀢𑁆𑀣𑀽𑀦𑀺 𑀏𑀓𑁄 𑀘𑁄𑀤𑀓𑁄. 𑀲𑀫𑁆𑀩𑀳𑀼𑀮𑀸 𑀲𑀫𑁆𑀩𑀳𑀼𑀮𑁂 𑀲𑀫𑁆𑀩𑀳𑀼𑀮𑁂𑀳𑀺 𑀯𑀢𑁆𑀣𑀽𑀳𑀺 𑀘𑁄𑀤𑁂𑀦𑁆𑀢𑀺, 𑀇𑀫𑀺𑀲𑁆𑀲𑀸 𑀘𑁄𑀤𑀦𑀸𑀬 𑀦𑀸𑀦𑀸𑀯𑀢𑁆𑀣𑀽𑀦𑀺 𑀦𑀸𑀦𑀸𑀘𑁄𑀤𑀓𑀸.

𑀘𑁄𑀤𑁂𑀢𑀼𑀁 𑀧𑀦 𑀓𑁄 𑀮𑀪𑀢𑀺, 𑀓𑁄 𑀦 𑀮𑀪𑀢𑀻𑀢𑀺? 𑀤𑀼𑀩𑁆𑀩𑀮𑀘𑁄𑀤𑀓𑀯𑀘𑀦𑀁 𑀢𑀸𑀯 𑀕𑀳𑁂𑀢𑁆𑀯𑀸 𑀓𑁄𑀘𑀺 𑀦 𑀮𑀪𑀢𑀺. 𑀤𑀼𑀩𑁆𑀩𑀮𑀘𑁄𑀤𑀓𑁄 𑀦𑀸𑀫 𑀲𑀫𑁆𑀩𑀳𑀼𑀮𑁂𑀲𑀼 𑀓𑀣𑀸𑀲𑀮𑁆𑀮𑀸𑀧𑁂𑀦 𑀦𑀺𑀲𑀺𑀦𑁆𑀦𑁂𑀲𑀼 𑀏𑀓𑁄 𑀏𑀓𑀁 𑀆𑀭𑀩𑁆𑀪 𑀅𑀦𑁄𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀁 𑀓𑀣𑁂𑀢𑀺, 𑀅𑀜𑁆𑀜𑁄 𑀢𑀁 𑀲𑀼𑀢𑁆𑀯𑀸 𑀇𑀢𑀭𑀲𑁆𑀲 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀺. 𑀲𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑁆𑀯𑀁 𑀓𑀺𑀭 𑀫𑀁 𑀇𑀤𑀜𑁆𑀘𑀺𑀤𑀜𑁆𑀘 𑀯𑀤𑀲𑀻’’𑀢𑀺 𑀯𑀤𑀢𑀺. 𑀲𑁄 ‘‘𑀦𑀸𑀳𑀁 𑀏𑀯𑀭𑀽𑀧𑀁 𑀚𑀸𑀦𑀸𑀫𑀺, 𑀓𑀣𑀸𑀧𑀯𑀢𑁆𑀢𑀺𑀬𑀁 𑀧𑀦 𑀫𑀬𑀸 𑀅𑀦𑁄𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀫𑀢𑁆𑀣𑀺, 𑀲𑀘𑁂 𑀅𑀳𑀁 𑀢𑀯 𑀇𑀫𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀁 𑀚𑀸𑀦𑁂𑀬𑁆𑀬𑀁, 𑀏𑀢𑁆𑀢𑀓𑀫𑁆𑀧𑀺 𑀦 𑀓𑀣𑁂𑀬𑁆𑀬’’𑀦𑁆𑀢𑀺 𑀅𑀬𑀁 𑀤𑀼𑀩𑁆𑀩𑀮𑀘𑁄𑀤𑀓𑁄. 𑀢𑀲𑁆𑀲𑁂𑀢𑀁 𑀓𑀣𑀸𑀲𑀮𑁆𑀮𑀸𑀧𑀁 𑀕𑀳𑁂𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀓𑁄𑀘𑀺 𑀘𑁄𑀤𑁂𑀢𑀼𑀁 𑀦 𑀮𑀪𑀢𑀺. 𑀏𑀢𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀯𑀸 𑀪𑀺𑀓𑁆𑀔𑀼𑀦𑀺𑀁 𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑀸 𑀘 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀫𑁂𑀯 𑀘𑁄𑀤𑁂𑀢𑀼𑀁 𑀮𑀪𑀢𑀻𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀧𑀦 ‘‘𑀧𑀜𑁆𑀘𑀧𑀺 𑀲𑀳𑀥𑀫𑁆𑀫𑀺𑀓𑀸 𑀮𑀪𑀦𑁆𑀢𑀻’’𑀢𑀺 𑀆𑀳. 𑀕𑁄𑀤𑀢𑁆𑀢𑀢𑁆𑀣𑁂𑀭𑁄 𑀧𑀦 ‘‘𑀦 𑀓𑁄𑀘𑀺 𑀦 𑀮𑀪𑀢𑀻’’𑀢𑀺 𑀯𑀢𑁆𑀯𑀸 ‘‘𑀪𑀺𑀓𑁆𑀔𑀼𑀲𑁆𑀲 𑀲𑀼𑀢𑁆𑀯𑀸 𑀘𑁄𑀤𑁂𑀢𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀼𑀢𑁆𑀯𑀸 𑀘𑁄𑀤𑁂𑀢𑀺…𑀧𑁂… 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦𑀁 𑀲𑀼𑀢𑁆𑀯𑀸 𑀘𑁄𑀤𑁂𑀢𑀻’’𑀢𑀺 𑀇𑀤𑀁 𑀲𑀼𑀢𑁆𑀢𑀫𑀸𑀳𑀭𑀺. 𑀢𑀺𑀡𑁆𑀡𑀫𑁆𑀧𑀺 𑀣𑁂𑀭𑀸𑀦𑀁 𑀯𑀸𑀤𑁂 𑀘𑀼𑀤𑀺𑀢𑀓𑀲𑁆𑀲𑁂𑀯 𑀧𑀝𑀺𑀜𑁆𑀜𑀸𑀬 𑀓𑀸𑀭𑁂𑀢𑀩𑁆𑀩𑁄.

𑀅𑀬𑀁 𑀧𑀦 𑀘𑁄𑀤𑀦𑀸 𑀦𑀸𑀫 𑀤𑀽𑀢𑀁 𑀯𑀸 𑀧𑀡𑁆𑀡𑀁 𑀯𑀸 𑀲𑀸𑀲𑀦𑀁 𑀯𑀸 𑀧𑁂𑀲𑁂𑀢𑁆𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀲𑀻𑀲𑀁 𑀦 𑀏𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀧𑀦 𑀲𑀫𑀻𑀧𑁂 𑀞𑀢𑁆𑀯𑀸𑀯 𑀳𑀢𑁆𑀣𑀫𑀼𑀤𑁆𑀤𑀸𑀬 𑀯𑀸 𑀯𑀘𑀻𑀪𑁂𑀤𑁂𑀦 𑀯𑀸 𑀘𑁄𑀤𑁂𑀦𑁆𑀢𑀲𑁆𑀲𑁂𑀯 𑀲𑀻𑀲𑀁 𑀏𑀢𑀺. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀫𑁂𑀯 𑀳𑀺 𑀳𑀢𑁆𑀣𑀫𑀼𑀤𑁆𑀤𑀸𑀬 𑀲𑀻𑀲𑀁 𑀦 𑀏𑀢𑀺, 𑀇𑀤𑀁 𑀧𑀦 𑀅𑀦𑀼𑀤𑁆𑀥𑀁𑀲𑀦𑀁 𑀅𑀪𑀽𑀢𑀸𑀭𑁄𑀘𑀦𑀜𑁆𑀘 𑀏𑀢𑀺𑀬𑁂𑀯. 𑀬𑁄 𑀧𑀦 𑀤𑁆𑀯𑀺𑀦𑁆𑀦𑀁 𑀞𑀺𑀢𑀝𑁆𑀞𑀸𑀦𑁂 𑀏𑀓𑀁 𑀦𑀺𑀬𑀫𑁂𑀢𑁆𑀯𑀸 𑀘𑁄𑀤𑁂𑀢𑀺, 𑀲𑁄 𑀘𑁂 𑀚𑀸𑀦𑀸𑀢𑀺, 𑀲𑀻𑀲𑀁 𑀏𑀢𑀺. 𑀇𑀢𑀭𑁄 𑀚𑀸𑀦𑀸𑀢𑀺, 𑀲𑀻𑀲𑀁 𑀦 𑀏𑀢𑀺. 𑀤𑁆𑀯𑁂𑀧𑀺 𑀦𑀺𑀬𑀫𑁂𑀢𑁆𑀯𑀸 𑀘𑁄𑀤𑁂𑀢𑀺, 𑀏𑀓𑁄 𑀯𑀸 𑀚𑀸𑀦𑀸𑀢𑀼 𑀤𑁆𑀯𑁂 𑀯𑀸, 𑀲𑀻𑀲𑀁 𑀏𑀢𑀺𑀬𑁂𑀯. 𑀏𑀲𑀯 𑀦𑀬𑁄 𑀲𑀫𑁆𑀩𑀳𑀼𑀮𑁂𑀲𑀼. 𑀢𑀗𑁆𑀔𑀡𑁂𑀬𑁂𑀯 𑀘 𑀚𑀸𑀦𑀦𑀁 𑀦𑀸𑀫 𑀤𑀼𑀓𑁆𑀓𑀭𑀁, 𑀲𑀫𑀬𑁂𑀦 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀢𑁂 𑀧𑀦 𑀜𑀸𑀢𑀫𑁂𑀯 𑀳𑁄𑀢𑀺. 𑀧𑀘𑁆𑀙𑀸 𑀘𑁂 𑀚𑀸𑀦𑀸𑀢𑀺, 𑀲𑀻𑀲𑀁 𑀦 𑀏𑀢𑀺. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀅𑀪𑀽𑀢𑀸𑀭𑁄𑀘𑀦𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸-𑀅𑀢𑁆𑀢𑀓𑀸𑀫-𑀤𑀼𑀝𑁆𑀞𑀤𑁄𑀲𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀲𑀩𑁆𑀩𑀸𑀦𑁂𑀯 𑀳𑀺 𑀇𑀫𑀸𑀦𑀺 𑀏𑀓𑀧𑀭𑀺𑀘𑁆𑀙𑁂𑀤𑀸𑀦𑀺.

𑀏𑀯𑀁 𑀓𑀸𑀬𑀯𑀸𑀘𑀸𑀯𑀲𑁂𑀦 𑀘𑀸𑀬𑀁 𑀤𑀼𑀯𑀺𑀥𑀸𑀧𑀺 𑀘𑁄𑀤𑀦𑀸. 𑀧𑀼𑀦 𑀤𑀺𑀝𑁆𑀞𑀘𑁄𑀤𑀦𑀸, 𑀲𑀼𑀢𑀘𑁄𑀤𑀦𑀸, 𑀧𑀭𑀺𑀲𑀗𑁆𑀓𑀺𑀢𑀘𑁄𑀤𑀦𑀸𑀢𑀺 𑀢𑀺𑀯𑀺𑀥𑀸 𑀳𑁄𑀢𑀺. 𑀅𑀧𑀭𑀸𑀧𑀺 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺 𑁋 𑀲𑀻𑀮𑀯𑀺𑀧𑀢𑁆𑀢𑀺𑀘𑁄𑀤𑀦𑀸, 𑀆𑀘𑀸𑀭𑀯𑀺𑀧𑀢𑁆𑀢𑀺𑀘𑁄𑀤𑀦𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀘𑁄𑀤𑀦𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺𑀘𑁄𑀤𑀦𑀸𑀢𑀺. 𑀢𑀢𑁆𑀣 𑀕𑀭𑀼𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀯𑀲𑁂𑀦 𑀲𑀻𑀮𑀯𑀺𑀧𑀢𑁆𑀢𑀺𑀘𑁄𑀤𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀲𑁂𑀲𑀸𑀦𑀁 𑀯𑀲𑁂𑀦 𑀆𑀘𑀸𑀭𑀯𑀺𑀧𑀢𑁆𑀢𑀺𑀘𑁄𑀤𑀦𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀅𑀦𑁆𑀢𑀕𑁆𑀕𑀸𑀳𑀺𑀓𑀤𑀺𑀝𑁆𑀞𑀺𑀯𑀲𑁂𑀦 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀘𑁄𑀤𑀦𑀸, 𑀆𑀚𑀻𑀯𑀳𑁂𑀢𑀼 𑀧𑀜𑁆𑀜𑀢𑁆𑀢𑀸𑀦𑀁 𑀙𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀲𑁂𑀦 𑀆𑀚𑀻𑀯𑀯𑀺𑀧𑀢𑁆𑀢𑀺𑀘𑁄𑀤𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀭𑀸𑀧𑀺 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺 𑁋 𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑀸, 𑀆𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀸, 𑀲𑀁𑀯𑀸𑀲𑀧𑀝𑀺𑀓𑁆𑀔𑁂𑀧𑁄, 𑀲𑀸𑀫𑀻𑀘𑀺𑀧𑀝𑀺𑀓𑁆𑀔𑁂𑀧𑁄𑀢𑀺. 𑀢𑀢𑁆𑀣 𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑀸 𑀦𑀸𑀫 ‘‘𑀢𑁆𑀯𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀣, 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺𑀢𑁆𑀣, 𑀫𑀦𑀼𑀲𑁆𑀲𑀁 𑀖𑀸𑀢𑀬𑀺𑀢𑁆𑀣, 𑀅𑀪𑀽𑀢𑀁 𑀆𑀭𑁄𑀘𑀬𑀺𑀢𑁆𑀣𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸. 𑀆𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀸 𑀦𑀸𑀫 ‘‘𑀢𑁆𑀯𑀁 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺 𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀸. 𑀲𑀁𑀯𑀸𑀲𑀧𑀝𑀺𑀓𑁆𑀔𑁂𑀧𑁄 𑀦𑀸𑀫 ‘‘𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸; 𑀏𑀢𑁆𑀢𑀸𑀯𑀢𑀸 𑀧𑀦 𑀲𑀻𑀲𑀁 𑀦 𑀏𑀢𑀺, ‘‘𑀅𑀲𑁆𑀲𑀫𑀡𑁄𑀲𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀻’’𑀢𑀺𑀆𑀤𑀺𑀯𑀘𑀦𑁂𑀳𑀺 𑀲𑀤𑁆𑀥𑀺𑀁 𑀖𑀝𑀺𑀢𑁂𑀬𑁂𑀯 𑀲𑀻𑀲𑀁 𑀏𑀢𑀺. 𑀲𑀸𑀫𑀻𑀘𑀺𑀧𑀝𑀺𑀓𑁆𑀔𑁂𑀧𑁄 𑀦𑀸𑀫 𑀅𑀪𑀺𑀯𑀸𑀤𑀦-𑀧𑀘𑁆𑀘𑀼𑀝𑁆𑀞𑀸𑀦-𑀅𑀜𑁆𑀚𑀮𑀺𑀓𑀫𑁆𑀫-𑀩𑀻𑀚𑀦𑀸𑀤𑀺𑀓𑀫𑁆𑀫𑀸𑀦𑀁 𑀅𑀓𑀭𑀡𑀁. 𑀢𑀁 𑀧𑀝𑀺𑀧𑀸𑀝𑀺𑀬𑀸 𑀯𑀦𑁆𑀤𑀦𑀸𑀤𑀻𑀦𑀺 𑀓𑀭𑁄𑀢𑁄 𑀏𑀓𑀲𑁆𑀲 𑀅𑀓𑀢𑁆𑀯𑀸 𑀲𑁂𑀲𑀸𑀦𑀁 𑀓𑀭𑀡𑀓𑀸𑀮𑁂 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀘 𑀘𑁄𑀤𑀦𑀸 𑀦𑀸𑀫 𑀳𑁄𑀢𑀺, 𑀆𑀧𑀢𑁆𑀢𑀺 𑀧𑀦 𑀲𑀻𑀲𑀁 𑀦 𑀏𑀢𑀺. ‘‘𑀓𑀲𑁆𑀫𑀸 𑀫𑀫 𑀯𑀦𑁆𑀤𑀦𑀸𑀤𑀻𑀦𑀺 𑀦 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁂 𑀧𑀦 ‘‘𑀅𑀲𑁆𑀲𑀫𑀡𑁄𑀲𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀻’’𑀢𑀺𑀆𑀤𑀺𑀯𑀘𑀦𑁂𑀳𑀺 𑀲𑀤𑁆𑀥𑀺𑀁 𑀖𑀝𑀺𑀢𑁂𑀬𑁂𑀯 𑀲𑀻𑀲𑀁 𑀏𑀢𑀺. 𑀬𑀸𑀕𑀼𑀪𑀢𑁆𑀢𑀸𑀤𑀺𑀦𑀸 𑀧𑀦 𑀬𑀁 𑀇𑀘𑁆𑀙𑀢𑀺 𑀢𑀁 𑀆𑀧𑀼𑀘𑁆𑀙𑀢𑀺, 𑀦 𑀢𑀸𑀯𑀢𑀸 𑀘𑁄𑀤𑀦𑀸 𑀳𑁄𑀢𑀺.

𑀅𑀧𑀭𑀸𑀧𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑁂 ‘‘𑀏𑀓𑀁, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁 𑀏𑀓𑀁 𑀥𑀫𑁆𑀫𑀺𑀓’’𑀦𑁆𑀢𑀺 𑀆𑀤𑀺𑀁 ‘‘𑀓𑀢𑁆𑀯𑀸 𑀬𑀸𑀯 𑀤𑀲 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺 𑀤𑀲 𑀥𑀫𑁆𑀫𑀺𑀓𑀸𑀦𑀻’’𑀢𑀺 (𑀘𑀽𑀴𑀯. 𑁩𑁮𑁭) 𑀏𑀯𑀁 𑀅𑀥𑀫𑁆𑀫𑀺𑀓𑀸 𑀧𑀜𑁆𑀘𑀧𑀜𑁆𑀜𑀸𑀲 𑀥𑀫𑁆𑀫𑀺𑀓𑀸 𑀧𑀜𑁆𑀘𑀧𑀜𑁆𑀜𑀸𑀲𑀸𑀢𑀺 𑀤𑀲𑀼𑀢𑁆𑀢𑀭𑀲𑀢𑀁 𑀘𑁄𑀤𑀦𑀸 𑀯𑀼𑀢𑁆𑀢𑀸. 𑀢𑀸 𑀤𑀺𑀝𑁆𑀞𑁂𑀦 𑀘𑁄𑀤𑁂𑀦𑁆𑀢𑀲𑁆𑀲 𑀤𑀲𑀼𑀢𑁆𑀢𑀭𑀲𑀢𑀁, 𑀲𑀼𑀢𑁂𑀦 𑀘𑁄𑀤𑁂𑀦𑁆𑀢𑀲𑁆𑀲 𑀤𑀲𑀼𑀢𑁆𑀢𑀭𑀲𑀢𑀁, 𑀧𑀭𑀺𑀲𑀗𑁆𑀓𑀺𑀢𑁂𑀦 𑀘𑁄𑀤𑁂𑀦𑁆𑀢𑀲𑁆𑀲 𑀤𑀲𑀼𑀢𑁆𑀢𑀭𑀲𑀢𑀦𑁆𑀢𑀺 𑀢𑀺𑀁𑀲𑀸𑀦𑀺 𑀢𑀻𑀡𑀺 𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀓𑀸𑀬𑁂𑀦 𑀘𑁄𑀤𑁂𑀦𑁆𑀢𑀲𑁆𑀲, 𑀯𑀸𑀘𑀸𑀬 𑀘𑁄𑀤𑁂𑀦𑁆𑀢𑀲𑁆𑀲, 𑀓𑀸𑀬𑀯𑀸𑀘𑀸𑀳𑀺 𑀘𑁄𑀤𑁂𑀦𑁆𑀢𑀲𑁆𑀲𑀸𑀢𑀺 𑀢𑀺𑀕𑀼𑀡𑀸𑀦𑀺 𑀓𑀢𑀸𑀦𑀺 𑀦𑀯𑀼𑀢𑀸𑀦𑀺 𑀦𑀯 𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀅𑀢𑁆𑀢𑀦𑀸 𑀘𑁄𑀤𑁂𑀦𑁆𑀢𑀲𑁆𑀲𑀸𑀧𑀺 𑀧𑀭𑁂𑀦 𑀘𑁄𑀤𑀸𑀧𑁂𑀦𑁆𑀢𑀲𑁆𑀲𑀸𑀧𑀺 𑀢𑀢𑁆𑀢𑀓𑀸𑀦𑁂𑀯𑀸𑀢𑀺 𑀯𑀻𑀲𑀢𑀺𑀊𑀦𑀸𑀦𑀺 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺, 𑀧𑀼𑀦 𑀤𑀺𑀝𑁆𑀞𑀸𑀤𑀺𑀪𑁂𑀤𑁂 𑀲𑀫𑀽𑀮𑀓𑀸𑀫𑀽𑀮𑀓𑀯𑀲𑁂𑀦 𑀅𑀦𑁂𑀓𑀲𑀳𑀲𑁆𑀲𑀸 𑀘𑁄𑀤𑀦𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸 𑀅𑀝𑁆𑀞𑀓𑀣𑀸𑀬 ‘‘𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀓𑀸𑀫𑁂𑀦 𑀉𑀧𑀸𑀮𑀺 𑀪𑀺𑀓𑁆𑀔𑀼𑀦𑀸 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁩𑁯𑁮) 𑀘 ‘‘𑀘𑁄𑀤𑀓𑁂𑀦 𑀉𑀧𑀸𑀮𑀺 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀧𑀜𑁆𑀘 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑁄 𑀘𑁄𑀤𑁂𑀢𑀩𑁆𑀩𑁄’’𑀢𑀺 (𑀘𑀽𑀴𑀯. 𑁩𑁯𑁯) 𑀘 𑀏𑀯𑀁 𑀉𑀧𑀸𑀮𑀺𑀧𑀜𑁆𑀘𑀓𑀸𑀤𑀻𑀲𑀼 𑀯𑀼𑀢𑁆𑀢𑀸𑀦𑀺 𑀩𑀳𑀽𑀦𑀺 𑀲𑀼𑀢𑁆𑀢𑀸𑀦𑀺 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀸𑀤𑀸𑀦𑀮𑀓𑁆𑀔𑀡𑀜𑁆𑀘 𑀘𑁄𑀤𑀓𑀯𑀢𑁆𑀢𑀜𑁆𑀘 𑀘𑀼𑀤𑀺𑀢𑀓𑀯𑀢𑁆𑀢𑀜𑁆𑀘 𑀲𑀗𑁆𑀖𑁂𑀦 𑀓𑀸𑀢𑀩𑁆𑀩𑀓𑀺𑀘𑁆𑀘𑀜𑁆𑀘 𑀅𑀦𑀼𑀯𑀺𑀚𑁆𑀚𑀓𑀯𑀢𑁆𑀢𑀜𑁆𑀘 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑀺𑀢𑀁, 𑀢𑀁 𑀫𑀬𑀁 𑀬𑀣𑀸𑀆𑀕𑀢𑀝𑁆𑀞𑀸𑀦𑁂𑀬𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀲𑀼 𑀧𑀦 𑀇𑀫𑀸𑀲𑀼 𑀘𑁄𑀤𑀦𑀸𑀲𑀼 𑀬𑀸𑀬 𑀓𑀸𑀬𑀘𑀺 𑀘𑁄𑀤𑀦𑀸𑀬 𑀯𑀲𑁂𑀦 𑀲𑀗𑁆𑀖𑀫𑀚𑁆𑀛𑁂 𑀑𑀲𑀝𑁂 𑀯𑀢𑁆𑀣𑀼𑀲𑁆𑀫𑀺𑀁 𑀘𑀼𑀤𑀺𑀢𑀓𑀘𑁄𑀤𑀓𑀸 𑀯𑀢𑁆𑀢𑀩𑁆𑀩𑀸 ‘‘𑀢𑀼𑀫𑁆𑀳𑁂 𑀅𑀫𑁆𑀳𑀸𑀓𑀁 𑀯𑀺𑀦𑀺𑀘𑁆𑀙𑀬𑁂𑀦 𑀢𑀼𑀝𑁆𑀞𑀸 𑀪𑀯𑀺𑀲𑁆𑀲𑀣𑀸’’𑀢𑀺. 𑀲𑀘𑁂 ‘‘𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀲𑀗𑁆𑀖𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀅𑀣 𑀧𑀦 ‘‘𑀯𑀺𑀦𑀺𑀘𑁆𑀙𑀺𑀦𑀣 𑀢𑀸𑀯, 𑀪𑀦𑁆𑀢𑁂, 𑀲𑀘𑁂 𑀅𑀫𑁆𑀳𑀸𑀓𑀁 𑀔𑀫𑀺𑀲𑁆𑀲𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀺. ‘‘𑀘𑁂𑀢𑀺𑀬𑀁 𑀢𑀸𑀯 𑀯𑀦𑁆𑀤𑀣𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀤𑀻𑀖𑀲𑀼𑀢𑁆𑀢𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. 𑀢𑁂 𑀘𑁂 𑀘𑀺𑀭𑀭𑀢𑁆𑀢𑀁 𑀓𑀺𑀮𑀦𑁆𑀢𑀸 𑀧𑀓𑁆𑀓𑀦𑁆𑀢𑀧𑀭𑀺𑀲𑀸 𑀉𑀧𑀘𑁆𑀙𑀺𑀦𑁆𑀦𑀧𑀓𑁆𑀔𑀸 𑀳𑀼𑀢𑁆𑀯𑀸 𑀧𑀼𑀦 𑀬𑀸𑀘𑀦𑁆𑀢𑀺, 𑀬𑀸𑀯𑀢𑀢𑀺𑀬𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀤𑀸 𑀦𑀺𑀫𑁆𑀫𑀤𑀸 𑀳𑁄𑀦𑁆𑀢𑀺 𑀢𑀤𑀸 𑀦𑁂𑀲𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁂𑀳𑀺 𑀘 𑀲𑀘𑁂 𑀅𑀮𑀚𑁆𑀚𑀼𑀲𑁆𑀲𑀦𑁆𑀦𑀸 𑀳𑁄𑀢𑀺, 𑀧𑀭𑀺𑀲𑀸 𑀉𑀩𑁆𑀩𑀸𑀳𑀺𑀓𑀸𑀬 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀲𑀘𑁂 𑀩𑀸𑀮𑀼𑀲𑁆𑀲𑀦𑁆𑀦𑀸 𑀳𑁄𑀢𑀺 𑀧𑀭𑀺𑀲𑀸 ‘‘𑀢𑀼𑀫𑁆𑀳𑀸𑀓𑀁 𑀲𑀪𑀸𑀕𑁂 𑀯𑀺𑀦𑀬𑀥𑀭𑁂 𑀧𑀭𑀺𑀬𑁂𑀲𑀣𑀸’’𑀢𑀺 𑀯𑀺𑀦𑀬𑀥𑀭𑁂 𑀧𑀭𑀺𑀬𑁂𑀲𑀸𑀧𑁂𑀢𑁆𑀯𑀸 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑀢𑀺, 𑀢𑀣𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀁.

𑀢𑀢𑁆𑀣 𑀘 ‘‘𑀥𑀫𑁆𑀫𑁄’’𑀢𑀺 𑀪𑀽𑀢𑀁 𑀯𑀢𑁆𑀣𑀼. ‘‘𑀯𑀺𑀦𑀬𑁄’’𑀢𑀺 𑀘𑁄𑀤𑀦𑀸 𑀲𑀸𑀭𑀡𑀸 𑀘. ‘‘𑀲𑀢𑁆𑀣𑀼𑀲𑀸𑀲𑀦’’𑀦𑁆𑀢𑀺 𑀜𑀢𑁆𑀢𑀺𑀲𑀫𑁆𑀧𑀤𑀸 𑀘 𑀅𑀦𑀼𑀲𑀸𑀯𑀦𑀲𑀫𑁆𑀧𑀤𑀸 𑀘. 𑀢𑀲𑁆𑀫𑀸 𑀘𑁄𑀤𑀓𑁂𑀦 𑀯𑀢𑁆𑀣𑀼𑀲𑁆𑀫𑀺𑀁 𑀆𑀭𑁄𑀘𑀺𑀢𑁂 𑀘𑀼𑀤𑀺𑀢𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀲𑀦𑁆𑀢𑀫𑁂𑀢𑀁, 𑀦𑁄’’𑀢𑀺. 𑀏𑀯𑀁 𑀯𑀢𑁆𑀣𑀼𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀘 𑀜𑀢𑁆𑀢𑀺𑀲𑀫𑁆𑀧𑀤𑀸𑀬 𑀅𑀦𑀼𑀲𑀸𑀯𑀦𑀲𑀫𑁆𑀧𑀤𑀸𑀬 𑀘 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀁. 𑀢𑀢𑁆𑀭 𑀘𑁂 𑀅𑀮𑀚𑁆𑀚𑀻 𑀮𑀚𑁆𑀚𑀺𑀁 𑀘𑁄𑀤𑁂𑀢𑀺, 𑀲𑁄 𑀘 𑀅𑀮𑀚𑁆𑀚𑀻 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀦𑀸𑀲𑁆𑀲 𑀦𑀬𑁄 𑀤𑀸𑀢𑀩𑁆𑀩𑁄. 𑀏𑀯𑀁 𑀧𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀓𑀺𑀫𑁆𑀳𑀺 𑀦𑀁 𑀘𑁄𑀤𑁂𑀲𑀻’’𑀢𑀺? 𑀅𑀤𑁆𑀥𑀸 𑀲𑁄 𑀯𑀓𑁆𑀔𑀢𑀺 𑁋 ‘‘𑀓𑀺𑀫𑀺𑀤𑀁, 𑀪𑀦𑁆𑀢𑁂, 𑀓𑀺𑀫𑁆𑀳𑀺 𑀦𑀁 𑀦𑀸𑀫𑀸’’𑀢𑀺. 𑀢𑁆𑀯𑀁 𑀓𑀺𑀫𑁆𑀳𑀺 𑀦𑀫𑁆𑀧𑀺 𑀦 𑀚𑀸𑀦𑀸𑀲𑀺, 𑀦 𑀬𑀼𑀢𑁆𑀢𑀁 𑀢𑀬𑀸 𑀏𑀯𑀭𑀽𑀧𑁂𑀦 𑀩𑀸𑀮𑁂𑀦 𑀧𑀭𑀁 𑀘𑁄𑀤𑁂𑀢𑀼𑀦𑁆𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑁄 𑀦𑀸𑀲𑁆𑀲 𑀅𑀦𑀼𑀬𑁄𑀕𑁄 𑀤𑀸𑀢𑀩𑁆𑀩𑁄. 𑀲𑀘𑁂 𑀧𑀦 𑀲𑁄 𑀅𑀮𑀚𑁆𑀚𑀻 𑀧𑀡𑁆𑀟𑀺𑀢𑁄 𑀳𑁄𑀢𑀺 𑀩𑁆𑀬𑀢𑁆𑀢𑁄 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀢𑀺 𑀏𑀢𑀲𑁆𑀲 𑀅𑀦𑀼𑀬𑁄𑀕𑀁 𑀤𑀢𑁆𑀯𑀸 𑀮𑀚𑁆𑀚𑀺𑀲𑁆𑀲𑁂𑀯 𑀧𑀝𑀺𑀜𑁆𑀜𑀸𑀬 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁.

𑀲𑀘𑁂 𑀮𑀚𑁆𑀚𑀻 𑀅𑀮𑀚𑁆𑀚𑀺𑀁 𑀘𑁄𑀤𑁂𑀢𑀺, 𑀲𑁄 𑀘 𑀮𑀚𑁆𑀚𑀻 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄, 𑀦 𑀲𑀓𑁆𑀓𑁄𑀢𑀺 𑀅𑀦𑀼𑀬𑁄𑀕𑀁 𑀤𑀸𑀢𑀼𑀁. 𑀢𑀲𑁆𑀲 𑀦𑀬𑁄 𑀤𑀸𑀢𑀩𑁆𑀩𑁄 𑁋 ‘‘𑀓𑀺𑀫𑁆𑀳𑀺 𑀦𑀁 𑀘𑁄𑀤𑁂𑀲𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀆𑀤𑀻𑀲𑀼 𑀯𑀸 𑀏𑀓𑀺𑀲𑁆𑀲𑀸’’𑀢𑀺. 𑀓𑀲𑁆𑀫𑀸 𑀧𑀦 𑀇𑀫𑀲𑁆𑀲𑁂𑀯 𑀏𑀯𑀁 𑀦𑀬𑁄 𑀤𑀸𑀢𑀩𑁆𑀩𑁄, 𑀦 𑀇𑀢𑀭𑀲𑁆𑀲? 𑀦𑀦𑀼 𑀦 𑀬𑀼𑀢𑁆𑀢𑀁 𑀯𑀺𑀦𑀬𑀥𑀭𑀸𑀦𑀁 𑀅𑀕𑀢𑀺𑀕𑀫𑀦𑀦𑁆𑀢𑀺? 𑀦 𑀬𑀼𑀢𑁆𑀢𑀫𑁂𑀯. 𑀇𑀤𑀁 𑀧𑀦 𑀅𑀕𑀢𑀺𑀕𑀫𑀦𑀁 𑀦 𑀳𑁄𑀢𑀺, 𑀥𑀫𑁆𑀫𑀸𑀦𑀼𑀕𑁆𑀕𑀳𑁄 𑀦𑀸𑀫 𑀏𑀲𑁄 𑀅𑀮𑀚𑁆𑀚𑀺𑀦𑀺𑀕𑁆𑀕𑀳𑀢𑁆𑀣𑀸𑀬 𑀳𑀺 𑀮𑀚𑁆𑀚𑀺𑀧𑀕𑁆𑀕𑀳𑀢𑁆𑀣𑀸𑀬 𑀘 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀢𑀢𑁆𑀭 𑀅𑀮𑀚𑁆𑀚𑀻 𑀦𑀬𑀁 𑀮𑀪𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀏𑀳𑀻𑀢𑀺, 𑀮𑀚𑁆𑀚𑀻 𑀧𑀦 𑀦𑀬𑀁 𑀮𑀪𑀺𑀢𑁆𑀯𑀸 𑀤𑀺𑀝𑁆𑀞𑁂 𑀤𑀺𑀝𑁆𑀞𑀲𑀦𑁆𑀢𑀸𑀦𑁂𑀦, 𑀲𑀼𑀢𑁂 𑀲𑀼𑀢𑀲𑀦𑁆𑀢𑀸𑀦𑁂𑀦 𑀧𑀢𑀺𑀝𑁆𑀞𑀸𑀬 𑀓𑀣𑁂𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀥𑀫𑁆𑀫𑀸𑀦𑀼𑀕𑁆𑀕𑀳𑁄 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀲𑁄 𑀮𑀚𑁆𑀚𑀻 𑀧𑀡𑁆𑀟𑀺𑀢𑁄 𑀳𑁄𑀢𑀺 𑀩𑁆𑀬𑀢𑁆𑀢𑁄, 𑀧𑀢𑀺𑀝𑁆𑀞𑀸𑀬 𑀓𑀣𑁂𑀢𑀺, 𑀅𑀮𑀚𑁆𑀚𑀻 𑀘 ‘‘𑀏𑀢𑀫𑁆𑀧𑀺 𑀦𑀢𑁆𑀣𑀺, 𑀏𑀢𑀫𑁆𑀧𑀺 𑀦𑀢𑁆𑀣𑀻’’𑀢𑀺 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺, 𑀅𑀮𑀚𑁆𑀚𑀺𑀲𑁆𑀲 𑀧𑀝𑀺𑀜𑁆𑀜𑀸𑀬 𑀏𑀯 𑀓𑀸𑀢𑀩𑁆𑀩𑀁.

𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀜𑁆𑀘 𑀇𑀤𑀁 𑀯𑀢𑁆𑀣𑀼 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀓𑀺𑀭 𑀮𑁄𑀳𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀸 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀁 𑀓𑀣𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲 𑀯𑀼𑀝𑁆𑀞𑀸𑀦𑀲𑀫𑀬𑁂 𑀤𑁆𑀯𑁂 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸 𑀓𑀣𑀁 𑀧𑀯𑀢𑁆𑀢𑁂𑀲𑀼𑀁. 𑀏𑀓𑁄 ‘‘𑀏𑀢𑀫𑁆𑀧𑀺 𑀦𑀢𑁆𑀣𑀺, 𑀏𑀢𑀫𑁆𑀧𑀺 𑀦𑀢𑁆𑀣𑀻’’𑀢𑀺 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺. 𑀅𑀣 𑀅𑀧𑁆𑀧𑀸𑀯𑀲𑁂𑀲𑁂 𑀧𑀞𑀫𑀬𑀸𑀫𑁂 𑀣𑁂𑀭𑀲𑁆𑀲 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 ‘‘𑀅𑀬𑀁 𑀧𑀢𑀺𑀝𑁆𑀞𑀸𑀬 𑀓𑀣𑁂𑀢𑀺, 𑀅𑀬𑀁 𑀧𑀦 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺, 𑀩𑀳𑀽𑀦𑀺 𑀘 𑀯𑀢𑁆𑀣𑀽𑀦𑀺 𑀑𑀲𑀝𑀸𑀦𑀺 𑀅𑀤𑁆𑀥𑀸 𑀏𑀢𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀲𑀼𑀤𑁆𑀥𑀮𑀤𑁆𑀥𑀺 𑀉𑀧𑁆𑀧𑀦𑁆𑀦𑀸. 𑀢𑀢𑁄 𑀩𑀻𑀚𑀦𑀻𑀤𑀡𑁆𑀟𑀓𑁂𑀦 𑀧𑀸𑀤𑀓𑀣𑀮𑀺𑀓𑀸𑀬 𑀲𑀜𑁆𑀜𑀁 𑀤𑀢𑁆𑀯𑀸 ‘‘𑀅𑀳𑀁 𑀆𑀯𑀼𑀲𑁄 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀅𑀦𑀦𑀼𑀘𑁆𑀙𑀯𑀺𑀓𑁄 𑀅𑀜𑁆𑀜𑁂𑀦 𑀯𑀺𑀦𑀺𑀘𑁆𑀙𑀺𑀦𑀸𑀧𑁂𑀳𑀻’’𑀢𑀺 𑀆𑀳. 𑀓𑀲𑁆𑀫𑀸 𑀪𑀦𑁆𑀢𑁂𑀢𑀺? 𑀣𑁂𑀭𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺, 𑀘𑀼𑀤𑀺𑀢𑀓𑀧𑀼𑀕𑁆𑀕𑀮𑀲𑁆𑀲 𑀓𑀸𑀬𑁂 𑀟𑀸𑀳𑁄 𑀉𑀝𑁆𑀞𑀺𑀢𑁄, 𑀢𑀢𑁄 𑀲𑁄 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀅𑀦𑀼𑀭𑀽𑀧𑁂𑀦 𑀯𑀺𑀦𑀬𑀥𑀭𑁂𑀦 𑀦𑀸𑀫 𑀢𑀼𑀫𑁆𑀳𑀸𑀤𑀺𑀲𑁂𑀦𑁂𑀯 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺. 𑀘𑁄𑀤𑀓𑁂𑀦 𑀘 𑀈𑀤𑀺𑀲𑁂𑀦𑁂𑀯 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀲𑁂𑀢𑀓𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 ‘‘𑀘𑀺𑀭𑀁 𑀓𑀺𑀮𑀫𑀺𑀢𑀢𑁆𑀣 𑀫𑀬𑀸’’𑀢𑀺 𑀔𑀫𑀸𑀧𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀏𑀯𑀁 𑀮𑀚𑁆𑀚𑀺𑀦𑀸 𑀘𑁄𑀤𑀺𑀬𑀫𑀸𑀦𑁄 𑀅𑀮𑀚𑁆𑀚𑀻 𑀩𑀳𑀽𑀲𑀼𑀧𑀺 𑀯𑀢𑁆𑀣𑀽𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺, 𑀲𑁄 𑀦𑁂𑀯 ‘‘𑀲𑀼𑀤𑁆𑀥𑁄’’𑀢𑀺 𑀯𑀢𑁆𑀢𑀩𑁆𑀩𑁄 𑀦 ‘‘𑀅𑀲𑀼𑀤𑁆𑀥𑁄’’𑀢𑀺. 𑀚𑀻𑀯𑀫𑀢𑀓𑁄 𑀦𑀸𑀫 𑀆𑀫𑀓𑀧𑀽𑀢𑀺𑀓𑁄 𑀦𑀸𑀫 𑀘𑁂𑀲.

𑀲𑀘𑁂 𑀧𑀦𑀲𑁆𑀲 𑀅𑀜𑁆𑀜𑀫𑁆𑀧𑀺 𑀢𑀸𑀤𑀺𑀲𑀁 𑀯𑀢𑁆𑀣𑀼𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀢𑀣𑀸 𑀦𑀸𑀲𑀺𑀢𑀓𑁄𑀯 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀧𑀦 𑀅𑀮𑀚𑁆𑀚𑀻𑀬𑁂𑀯 𑀅𑀮𑀚𑁆𑀚𑀺𑀁 𑀘𑁄𑀤𑁂𑀢𑀺, 𑀲𑁄 𑀯𑀢𑁆𑀢𑀩𑁆𑀩𑁄 ‘‘𑀆𑀯𑀼𑀲𑁄 𑀢𑀯 𑀯𑀘𑀦𑁂𑀦𑀸𑀬𑀁 𑀓𑀺𑀁 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺 𑀇𑀢𑀭𑀫𑁆𑀧𑀺 𑀢𑀣𑁂𑀯 𑀯𑀢𑁆𑀯𑀸 𑀉𑀪𑁄𑀧𑀺 ‘‘𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑀸 𑀳𑀼𑀢𑁆𑀯𑀸 𑀚𑀻𑀯𑀣𑀸’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀩𑁆𑀩𑀸, 𑀲𑀻𑀮𑀢𑁆𑀣𑀸𑀬 𑀢𑁂𑀲𑀁 𑀯𑀺𑀦𑀺𑀘𑁆𑀙𑀬𑁄 𑀦 𑀓𑀸𑀢𑀩𑁆𑀩𑁄. 𑀧𑀢𑁆𑀢𑀘𑀻𑀯𑀭𑀧𑀭𑀺𑀯𑁂𑀡𑀸𑀤𑀺𑀅𑀢𑁆𑀣𑀸𑀬 𑀧𑀦 𑀧𑀢𑀺𑀭𑀽𑀧𑀁 𑀲𑀓𑁆𑀔𑀺𑀁 𑀮𑀪𑀺𑀢𑁆𑀯𑀸 𑀓𑀸𑀢𑀩𑁆𑀩𑁄.

𑀅𑀣 𑀮𑀚𑁆𑀚𑀻 𑀮𑀚𑁆𑀚𑀺𑀁 𑀘𑁄𑀤𑁂𑀢𑀺, 𑀯𑀺𑀯𑀸𑀤𑁄 𑀘 𑀦𑁂𑀲𑀁 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀧𑁆𑀧𑀫𑀢𑁆𑀢𑀓𑁄 𑀳𑁄𑀢𑀺, 𑀲𑀜𑁆𑀜𑀸𑀧𑁂𑀢𑁆𑀯𑀸 ‘‘𑀫𑀸 𑀏𑀯𑀁 𑀓𑀭𑁄𑀣𑀸’’𑀢𑀺 𑀅𑀘𑁆𑀘𑀬𑀁 𑀤𑁂𑀲𑀸𑀧𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀩𑁆𑀩𑀸. 𑀅𑀣 𑀧𑀦𑁂𑀢𑁆𑀣 𑀘𑀼𑀤𑀺𑀢𑀓𑁂𑀦 𑀲𑀳𑀲𑀸 𑀯𑀺𑀭𑀤𑁆𑀥𑀁 𑀳𑁄𑀢𑀺, 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀮𑀚𑁆𑀚𑀻 𑀦𑀸𑀫 𑀦𑀢𑁆𑀣𑀺. 𑀲𑁄 𑀘 𑀧𑀓𑁆𑀔𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺, ‘‘𑀫𑀬𑀁 𑀲𑀤𑁆𑀤𑀳𑀸𑀫, 𑀫𑀬𑀁 𑀲𑀤𑁆𑀤𑀳𑀸𑀫𑀸’’𑀢𑀺 𑀩𑀳𑀽 𑀉𑀝𑁆𑀞𑀳𑀦𑁆𑀢𑀺. 𑀲𑁄 𑀢𑁂𑀲𑀁 𑀧𑀝𑀺𑀜𑁆𑀜𑀸𑀬 𑀏𑀓𑀯𑀸𑀭𑀁 𑀤𑁆𑀯𑁂𑀯𑀸𑀭𑀁 𑀲𑀼𑀤𑁆𑀥𑁄 𑀳𑁄𑀢𑀼. 𑀅𑀣 𑀧𑀦 𑀯𑀺𑀭𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀯𑀺𑀦𑀺𑀘𑁆𑀙𑀬𑁄 𑀦 𑀤𑀸𑀢𑀩𑁆𑀩𑁄.

𑀏𑀯𑀁 𑀬𑀸𑀬 𑀓𑀸𑀬𑀘𑀺 𑀘𑁄𑀤𑀦𑀸𑀬 𑀯𑀲𑁂𑀦 𑀲𑀗𑁆𑀖𑀫𑀚𑁆𑀛𑁂 𑀑𑀲𑀝𑁂 𑀯𑀢𑁆𑀣𑀼𑀲𑁆𑀫𑀺𑀁 𑀘𑀼𑀤𑀺𑀢𑀓𑀘𑁄𑀤𑀓𑁂𑀲𑀼 𑀧𑀝𑀺𑀧𑀢𑁆𑀢𑀺𑀁 𑀜𑀢𑁆𑀯𑀸 𑀢𑀲𑁆𑀲𑀸𑀬𑁂𑀯 𑀘𑁄𑀤𑀦𑀸𑀬 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀚𑀸𑀦𑀦𑀢𑁆𑀣𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀤𑀻𑀦𑀁 𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁 𑀘𑁄𑀤𑀦𑀸𑀬 𑀓𑁄 𑀆𑀤𑀺, 𑀓𑀺𑀁 𑀫𑀚𑁆𑀛𑁂, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁? 𑀘𑁄𑀤𑀦𑀸𑀬 ‘‘𑀅𑀳𑀁 𑀢𑀁 𑀯𑀢𑁆𑀢𑀼𑀓𑀸𑀫𑁄, 𑀓𑀭𑁄𑀢𑀼 𑀫𑁂 𑀆𑀬𑀲𑁆𑀫𑀸 𑀑𑀓𑀸𑀲’’𑀦𑁆𑀢𑀺 𑀏𑀯𑀁 𑀑𑀓𑀸𑀲𑀓𑀫𑁆𑀫𑀁 𑀆𑀤𑀺, 𑀑𑀢𑀺𑀡𑁆𑀡𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑁄 𑀫𑀚𑁆𑀛𑁂, 𑀆𑀧𑀢𑁆𑀢𑀺𑀬𑀁 𑀯𑀸 𑀅𑀦𑀸𑀧𑀢𑁆𑀢𑀺𑀬𑀁 𑀯𑀸 𑀧𑀢𑀺𑀝𑁆𑀞𑀸𑀧𑀦𑁂𑀦 𑀲𑀫𑀣𑁄 𑀧𑀭𑀺𑀬𑁄𑀲𑀸𑀦𑀁.

𑀘𑁄𑀤𑀦𑀸𑀬 𑀓𑀢𑀺 𑀫𑀽𑀮𑀸𑀦𑀺, 𑀓𑀢𑀺 𑀯𑀢𑁆𑀣𑀽𑀦𑀺, 𑀓𑀢𑀺 𑀪𑀽𑀫𑀺𑀬𑁄? 𑀘𑁄𑀤𑀦𑀸𑀬 𑀤𑁆𑀯𑁂 𑀫𑀽𑀮𑀸𑀦𑀺 𑁋 𑀲𑀫𑀽𑀮𑀺𑀓𑀸 𑀯𑀸 𑀅𑀫𑀽𑀮𑀺𑀓𑀸 𑀯𑀸; 𑀢𑀻𑀡𑀺 𑀯𑀢𑁆𑀣𑀽𑀦𑀺 𑁋 𑀤𑀺𑀝𑁆𑀞𑀁, 𑀲𑀼𑀢𑀁, 𑀧𑀭𑀺𑀲𑀗𑁆𑀓𑀺𑀢𑀁; 𑀧𑀜𑁆𑀘 𑀪𑀽𑀫𑀺𑀬𑁄 𑁋 𑀓𑀸𑀮𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀓𑀸𑀮𑁂𑀦, 𑀪𑀽𑀢𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀪𑀽𑀢𑁂𑀦, 𑀲𑀡𑁆𑀳𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀨𑀭𑀼𑀲𑁂𑀦, 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑁂𑀦, 𑀫𑁂𑀢𑁆𑀢𑀘𑀺𑀢𑁆𑀢𑁄 𑀯𑀓𑁆𑀔𑀸𑀫𑀺 𑀦𑁄 𑀤𑁄𑀲𑀦𑁆𑀢𑀭𑁄𑀢𑀺. 𑀇𑀫𑀸𑀬 𑀘 𑀧𑀦 𑀘𑁄𑀤𑀦𑀸𑀬 𑀘𑁄𑀤𑀓𑁂𑀦 𑀧𑀼𑀕𑁆𑀕𑀮𑁂𑀦 ‘‘𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄 𑀦𑀼 𑀔𑁄𑀫𑁆𑀳𑀻’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁩𑁯𑁯) 𑀦𑀬𑁂𑀦 𑀉𑀧𑀸𑀮𑀺𑀧𑀜𑁆𑀘𑀓𑁂 𑀯𑀼𑀢𑁆𑀢𑁂𑀲𑀼 𑀧𑀦𑁆𑀦𑀭𑀲𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀢𑀩𑁆𑀩𑀁, 𑀘𑀼𑀤𑀺𑀢𑀓𑁂𑀦 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀢𑀩𑁆𑀩𑀁 𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑁂 𑀘𑀸𑀢𑀺.

𑀅𑀧𑁆𑀧𑁂𑀯 𑀦𑀸𑀫 𑀦𑀁 𑀇𑀫𑀫𑁆𑀳𑀸 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀬𑁆𑀬𑀦𑁆𑀢𑀺 𑀅𑀧𑀺 𑀏𑀯 𑀦𑀸𑀫 𑀦𑀁 𑀧𑀼𑀕𑁆𑀕𑀮𑀁 𑀇𑀫𑀫𑁆𑀳𑀸 𑀲𑁂𑀝𑁆𑀞𑀘𑀭𑀺𑀬𑀸 𑀘𑀸𑀯𑁂𑀬𑁆𑀬𑀁, ‘‘𑀲𑀸𑀥𑀼 𑀯𑀢𑀲𑁆𑀲 𑀲𑀘𑀸𑀳𑀁 𑀇𑀫𑀁 𑀧𑀼𑀕𑁆𑀕𑀮𑀁 𑀇𑀫𑀫𑁆𑀳𑀸 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀬𑁆𑀬’’𑀦𑁆𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁𑀳𑁄𑀢𑀺. 𑀧𑀤𑀪𑀸𑀚𑀦𑁂 𑀧𑀦 ‘‘𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀬𑁆𑀬’’𑀦𑁆𑀢𑀺 𑀇𑀫𑀲𑁆𑀲𑁂𑀯 𑀧𑀭𑀺𑀬𑀸𑀬𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀺𑀓𑁆𑀔𑀼𑀪𑀸𑀯𑀸 𑀘𑀸𑀯𑁂𑀬𑁆𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀔𑀡𑀸𑀤𑀻𑀦𑀺 𑀲𑀫𑀬𑀯𑁂𑀯𑀘𑀦𑀸𑀦𑀺. 𑀢𑀁 𑀔𑀡𑀁 𑀢𑀁 𑀮𑀬𑀁 𑀢𑀁 𑀫𑀼𑀳𑀼𑀢𑁆𑀢𑀁 𑀯𑀻𑀢𑀺𑀯𑀢𑁆𑀢𑁂𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀢𑀲𑁆𑀫𑀺𑀁 𑀮𑀬𑁂 𑀢𑀲𑁆𑀫𑀺𑀁 𑀫𑀼𑀳𑀼𑀢𑁆𑀢𑁂 𑀯𑀻𑀢𑀺𑀯𑀢𑁆𑀢𑁂. 𑀪𑀼𑀫𑁆𑀫𑀧𑁆𑀧𑀢𑁆𑀢𑀺𑀬𑀸 𑀳𑀺 𑀇𑀤𑀁 𑀉𑀧𑀬𑁄𑀕𑀯𑀘𑀦𑀁.

𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑀦𑀺𑀤𑁆𑀤𑁂𑀲𑁂 𑀬𑁂𑀦 𑀯𑀢𑁆𑀣𑀼𑀦𑀸 𑀅𑀦𑀼𑀤𑁆𑀥𑀁𑀲𑀺𑀢𑁄 𑀳𑁄𑀢𑀻𑀢𑀺 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑀯𑀢𑁆𑀣𑀽𑀲𑀼 𑀬𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑀓𑁂𑀦 𑀘𑀼𑀤𑀺𑀢𑀓𑁄 𑀅𑀦𑀼𑀤𑁆𑀥𑀁𑀲𑀺𑀢𑁄 𑀅𑀪𑀺𑀪𑀽𑀢𑁄 𑀅𑀚𑁆𑀛𑁄𑀢𑁆𑀣𑀝𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄𑀢𑀺 𑀢𑀲𑁆𑀫𑀺𑀁 𑀘𑁄𑀤𑀓𑁂𑀦 𑀯𑀼𑀢𑁆𑀢𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀘𑁄𑀤𑀓𑁄 𑀅𑀦𑀼𑀯𑀺𑀚𑁆𑀚𑀓𑁂𑀦 ‘‘𑀓𑀺𑀁 𑀢𑁂 𑀤𑀺𑀝𑁆𑀞𑀁, 𑀓𑀺𑀦𑁆𑀢𑀺 𑀢𑁂 𑀤𑀺𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀼𑀯𑀺𑀚𑁆𑀚𑀺𑀬𑀫𑀸𑀦𑁄 𑀯𑀻𑀫𑀁𑀲𑀺𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁄.

𑀅𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑀦𑀺𑀤𑁆𑀤𑁂𑀲𑁂 𑀦 𑀓𑁂𑀦𑀘𑀺 𑀯𑀼𑀘𑁆𑀘𑀫𑀸𑀦𑁄𑀢𑀺 𑀅𑀦𑀼𑀯𑀺𑀚𑁆𑀚𑀓𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺, 𑀅𑀣 𑀯𑀸 𑀤𑀺𑀝𑁆𑀞𑀸𑀤𑀻𑀲𑀼 𑀯𑀢𑁆𑀣𑀽𑀲𑀼 𑀓𑁂𑀦𑀘𑀺 𑀅𑀯𑀼𑀘𑁆𑀘𑀫𑀸𑀦𑁄. 𑀏𑀢𑁂𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀫𑀸𑀢𑀺𑀓𑀸𑀧𑀤𑀸𑀦𑀁 𑀧𑀭𑀢𑁄 ‘‘𑀪𑀺𑀓𑁆𑀔𑀼 𑀘 𑀤𑁄𑀲𑀁 𑀧𑀢𑀺𑀝𑁆𑀞𑀸𑀢𑀻’’𑀢𑀺𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀏𑀯𑀁 𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄 𑀯𑀸 𑀅𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄 𑀯𑀸 𑀪𑀺𑀓𑁆𑀔𑀼 𑀘 𑀤𑁄𑀲𑀁 𑀧𑀢𑀺𑀝𑁆𑀞𑀸𑀢𑀺 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀺 𑀧𑀝𑀺𑀚𑀸𑀦𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺. 𑀇𑀤𑀜𑁆𑀘 𑀅𑀫𑀽𑀮𑀓𑀪𑀸𑀯𑀲𑁆𑀲 𑀧𑀸𑀓𑀝𑀓𑀸𑀮𑀤𑀲𑁆𑀲𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀁. 𑀆𑀧𑀢𑁆𑀢𑀺𑀁 𑀧𑀦 𑀅𑀦𑀼𑀤𑁆𑀥𑀁𑀲𑀺𑀢𑀓𑁆𑀔𑀡𑁂𑀬𑁂𑀯 𑀆𑀧𑀚𑁆𑀚𑀢𑀺.

𑀇𑀤𑀸𑀦𑀺 ‘‘𑀅𑀫𑀽𑀮𑀓𑀜𑁆𑀘𑁂𑀯 𑀢𑀁 𑀅𑀥𑀺𑀓𑀭𑀡𑀁 𑀳𑁄𑀢𑀻’’𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀅𑀫𑀽𑀮𑀓𑀮𑀓𑁆𑀔𑀡𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀁 𑀅𑀯𑀢𑁆𑀯𑀸 𑀅𑀧𑀼𑀩𑁆𑀩𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀥𑀺𑀓𑀭𑀡𑀁 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀅𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀝𑁆𑀞𑁂𑀦 𑀏𑀓𑀫𑁆𑀧𑀺 𑀯𑀢𑁆𑀣𑀼𑀯𑀲𑁂𑀦 𑀦𑀸𑀦𑀸 𑀳𑁄𑀢𑀺, 𑀢𑁂𑀦𑀲𑁆𑀲 𑀢𑀁 𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡’’𑀦𑁆𑀢𑀺𑀆𑀤𑀺𑀫𑀸𑀳. 𑀓𑁄 𑀧𑀦 𑀲𑁄 𑀅𑀥𑀺𑀓𑀭𑀡𑀝𑁆𑀞𑁄, 𑀬𑁂𑀦𑁂𑀢𑀁 𑀏𑀓𑀁 𑀳𑁄𑀢𑀻𑀢𑀺? 𑀲𑀫𑀣𑁂𑀳𑀺 𑀅𑀥𑀺𑀓𑀭𑀡𑀻𑀬𑀢𑀸. 𑀢𑀲𑁆𑀫𑀸 𑀬𑀁 𑀅𑀥𑀺𑀓𑀺𑀘𑁆𑀘 𑀆𑀭𑀩𑁆𑀪 𑀧𑀝𑀺𑀘𑁆𑀘 𑀲𑀦𑁆𑀥𑀸𑀬 𑀲𑀫𑀣𑀸 𑀯𑀢𑁆𑀢𑀦𑁆𑀢𑀺, 𑀢𑀁 ‘‘𑀅𑀥𑀺𑀓𑀭𑀡’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀝𑁆𑀞𑀓𑀣𑀸𑀲𑀼 𑀧𑀦 𑀯𑀼𑀢𑁆𑀢𑀁 𑁋 ‘‘𑀅𑀥𑀺𑀓𑀭𑀡𑀦𑁆𑀢𑀺 𑀓𑁂𑀘𑀺 𑀕𑀸𑀳𑀁 𑀯𑀤𑀦𑁆𑀢𑀺, 𑀓𑁂𑀘𑀺 𑀘𑁂𑀢𑀦𑀁, 𑀓𑁂𑀘𑀺 𑀅𑀓𑁆𑀔𑀦𑁆𑀢𑀺𑀁 𑀓𑁂𑀘𑀺 𑀯𑁄𑀳𑀸𑀭𑀁, 𑀓𑁂𑀘𑀺 𑀧𑀡𑁆𑀡𑀢𑁆𑀢𑀺’’𑀦𑁆𑀢𑀺. 𑀧𑀼𑀦 𑀏𑀯𑀁 𑀯𑀺𑀘𑀸𑀭𑀺𑀢𑀁 ‘‘𑀬𑀤𑀺 𑀕𑀸𑀳𑁄 𑀅𑀥𑀺𑀓𑀭𑀡𑀁 𑀦𑀸𑀫, 𑀏𑀓𑁄 𑀅𑀢𑁆𑀢𑀸𑀤𑀸𑀦𑀁 𑀕𑀳𑁂𑀢𑁆𑀯𑀸 𑀲𑀪𑀸𑀕𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑁄 𑀢𑀢𑁆𑀣 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀧𑀼𑀦 𑀘𑀚𑀢𑀺, 𑀢𑀲𑁆𑀲 𑀢𑀁 𑀅𑀥𑀺𑀓𑀭𑀡𑀁 𑀲𑀫𑀣𑀧𑁆𑀧𑀢𑁆𑀢𑀁 𑀪𑀯𑀺𑀲𑁆𑀲𑀢𑀺. 𑀬𑀤𑀺 𑀘𑁂𑀢𑀦𑀸 𑀅𑀥𑀺𑀓𑀭𑀡𑀁, ‘‘𑀇𑀤𑀁 𑀅𑀢𑁆𑀢𑀸𑀤𑀸𑀦𑀁 𑀕𑀡𑁆𑀳𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀸 𑀘𑁂𑀢𑀦𑀸 𑀦𑀺𑀭𑀼𑀚𑁆𑀛𑀢𑀺. 𑀬𑀤𑀺 𑀅𑀓𑁆𑀔𑀦𑁆𑀢𑀺 𑀅𑀥𑀺𑀓𑀭𑀡𑀁, 𑀅𑀓𑁆𑀔𑀦𑁆𑀢𑀺𑀬𑀸 𑀅𑀢𑁆𑀢𑀸𑀤𑀸𑀦𑀁 𑀕𑀳𑁂𑀢𑁆𑀯𑀸𑀧𑀺 𑀅𑀧𑀭𑀪𑀸𑀕𑁂 𑀯𑀺𑀦𑀺𑀘𑁆𑀙𑀬𑀁 𑀅𑀮𑀪𑀫𑀸𑀦𑁄 𑀯𑀸 𑀔𑀫𑀸𑀧𑀺𑀢𑁄 𑀯𑀸 𑀘𑀚𑀢𑀺. 𑀬𑀤𑀺 𑀯𑁄𑀳𑀸𑀭𑁄 𑀅𑀥𑀺𑀓𑀭𑀡𑀁, 𑀓𑀣𑁂𑀦𑁆𑀢𑁄 𑀆𑀳𑀺𑀡𑁆𑀟𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀢𑀼𑀡𑁆𑀳𑀻 𑀳𑁄𑀢𑀺 𑀦𑀺𑀭𑀯𑁄, 𑀏𑀯𑀫𑀲𑁆𑀲 𑀢𑀁 𑀅𑀥𑀺𑀓𑀭𑀡𑀁 𑀲𑀫𑀣𑀧𑁆𑀧𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀧𑀡𑁆𑀡𑀢𑁆𑀢𑀺 𑀅𑀥𑀺𑀓𑀭𑀡𑀦𑁆𑀢𑀺.

𑀢𑀁 𑀧𑀦𑁂𑀢𑀁 ‘‘𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀢𑀩𑁆𑀪𑀸𑀕𑀺𑀬𑀸…𑀧𑁂… 𑀏𑀯𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀢𑀩𑁆𑀪𑀸𑀕𑀺𑀬𑀦𑁆𑀢𑀺 𑀘 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀘 𑀏𑀯𑀫𑀸𑀤𑀻𑀳𑀺 𑀯𑀺𑀭𑀼𑀚𑁆𑀛𑀢𑀺. 𑀦 𑀳𑀺 𑀢𑁂 𑀧𑀡𑁆𑀡𑀢𑁆𑀢𑀺𑀬𑀸 𑀓𑀼𑀲𑀮𑀸𑀤𑀺𑀪𑀸𑀯𑀁 𑀇𑀘𑁆𑀙𑀦𑁆𑀢𑀺, 𑀦 𑀘 ‘‘𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦𑀸’’𑀢𑀺 𑀏𑀢𑁆𑀣 𑀆𑀕𑀢𑁄 𑀧𑀸𑀭𑀸𑀚𑀺𑀓𑀥𑀫𑁆𑀫𑁄 𑀧𑀡𑁆𑀡𑀢𑁆𑀢𑀺 𑀦𑀸𑀫 𑀳𑁄𑀢𑀺. 𑀓𑀲𑁆𑀫𑀸? 𑀅𑀘𑁆𑀘𑀦𑁆𑀢𑀅𑀓𑀼𑀲𑀮𑀢𑁆𑀢𑀸. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺 (𑀧𑀭𑀺. 𑁩𑁦𑁩).

𑀬𑀜𑁆𑀘𑁂𑀢𑀁 ‘‘𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦𑀸’’𑀢𑀺 𑀏𑀢𑁆𑀣 𑀅𑀫𑀽𑀮𑀓𑀁 𑀧𑀸𑀭𑀸𑀚𑀺𑀓𑀁 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀲𑁆𑀲𑁂𑀯𑀸𑀬𑀁 ‘‘𑀅𑀫𑀽𑀮𑀓𑀜𑁆𑀘𑁂𑀯 𑀢𑀁 𑀅𑀥𑀺𑀓𑀭𑀡𑀁 𑀳𑁄𑀢𑀻’’𑀢𑀺 𑀧𑀝𑀺𑀦𑀺𑀤𑁆𑀤𑁂𑀲𑁄, 𑀦 𑀧𑀡𑁆𑀡𑀢𑁆𑀢𑀺𑀬𑀸 𑀦 𑀳𑀺 𑀅𑀜𑁆𑀜𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀅𑀜𑁆𑀜𑀁 𑀧𑀝𑀺𑀦𑀺𑀤𑁆𑀤𑀺𑀲𑀢𑀺. 𑀬𑀲𑁆𑀫𑀸 𑀧𑀦 𑀬𑀸𑀬 𑀧𑀡𑁆𑀡𑀢𑁆𑀢𑀺𑀬𑀸 𑀬𑁂𑀦 𑀅𑀪𑀺𑀮𑀸𑀧𑁂𑀦 𑀘𑁄𑀤𑀓𑁂𑀦 𑀲𑁄 𑀧𑀼𑀕𑁆𑀕𑀮𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀜𑁆𑀜𑀢𑁆𑀢𑁄, 𑀧𑀸𑀭𑀸𑀚𑀺𑀓𑀲𑀗𑁆𑀔𑀸𑀢𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀅𑀫𑀽𑀮𑀓𑀢𑁆𑀢𑀸 𑀲𑀸𑀧𑀺 𑀧𑀜𑁆𑀜𑀢𑁆𑀢𑀺 𑀅𑀫𑀽𑀮𑀺𑀓𑀸 𑀳𑁄𑀢𑀺, 𑀅𑀥𑀺𑀓𑀭𑀡𑁂 𑀧𑀯𑀢𑁆𑀢𑀢𑁆𑀢𑀸 𑀘 𑀅𑀥𑀺𑀓𑀭𑀡𑀁. 𑀢𑀲𑁆𑀫𑀸 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀧𑀡𑁆𑀡𑀢𑁆𑀢𑀺 ‘‘𑀅𑀥𑀺𑀓𑀭𑀡’’𑀦𑁆𑀢𑀺 𑀬𑀼𑀚𑁆𑀚𑁂𑀬𑁆𑀬, 𑀬𑀲𑁆𑀫𑀸 𑀯𑀸 𑀬𑀁 𑀅𑀫𑀽𑀮𑀓𑀁 𑀦𑀸𑀫 𑀅𑀥𑀺𑀓𑀭𑀡𑀁 𑀢𑀁 𑀲𑀪𑀸𑀯𑀢𑁄 𑀦𑀢𑁆𑀣𑀺, 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀫𑁂𑀯 𑀅𑀢𑁆𑀣𑀺. 𑀢𑀲𑁆𑀫𑀸𑀧𑀺 𑀧𑀡𑁆𑀡𑀢𑁆𑀢𑀺 𑀅𑀥𑀺𑀓𑀭𑀡𑀦𑁆𑀢𑀺 𑀬𑀼𑀚𑁆𑀚𑁂𑀬𑁆𑀬. 𑀢𑀜𑁆𑀘 𑀔𑁄 𑀇𑀥𑁂𑀯 𑀦 𑀲𑀩𑁆𑀩𑀢𑁆𑀣. 𑀦 𑀳𑀺 𑀯𑀺𑀯𑀸𑀤𑀸𑀤𑀻𑀦𑀁 𑀧𑀡𑁆𑀡𑀢𑁆𑀢𑀺 𑀅𑀥𑀺𑀓𑀭𑀡𑀁. 𑀅𑀥𑀺𑀓𑀭𑀡𑀝𑁆𑀞𑁄 𑀧𑀦 𑀢𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀫𑀣𑁂𑀳𑀺 𑀅𑀥𑀺𑀓𑀭𑀡𑀻𑀬𑀢𑀸. 𑀇𑀢𑀺 𑀇𑀫𑀺𑀦𑀸 𑀅𑀥𑀺𑀓𑀭𑀡𑀝𑁆𑀞𑁂𑀦 𑀇𑀥𑁂𑀓𑀘𑁆𑀘𑁄 𑀯𑀺𑀯𑀸𑀤𑁄 𑀯𑀺𑀯𑀸𑀤𑁄 𑀘𑁂𑀯 𑀅𑀥𑀺𑀓𑀭𑀡𑀜𑁆𑀘𑀸𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼.

𑀢𑀢𑁆𑀣 ‘‘𑀇𑀥 𑀪𑀺𑀓𑁆𑀔𑀽 𑀯𑀺𑀯𑀤𑀦𑁆𑀢𑀺 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸’’𑀢𑀺 𑀏𑀯𑀁 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. ‘‘𑀇𑀥 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀦𑀼𑀯𑀤𑀦𑁆𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸’’𑀢𑀺 𑀏𑀯𑀁 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄 𑀅𑀦𑀼𑀯𑀸𑀤𑁄 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁. ‘‘𑀧𑀜𑁆𑀘𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡’’𑀦𑁆𑀢𑀺 𑀏𑀯𑀁 𑀆𑀧𑀢𑁆𑀢𑀺𑀬𑁂𑀯 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. ‘‘𑀬𑀸 𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑀬𑀢𑀸 𑀓𑀭𑀡𑀻𑀬𑀢𑀸 𑀅𑀧𑀮𑁄𑀓𑀦𑀓𑀫𑁆𑀫𑀁 𑀜𑀢𑁆𑀢𑀺𑀓𑀫𑁆𑀫𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫’’𑀦𑁆𑀢𑀺 (𑀘𑀽𑀴𑀯. 𑁨𑁧𑁫) 𑀏𑀯𑀁 𑀘𑀢𑀼𑀩𑁆𑀩𑀺𑀥𑀁 𑀲𑀗𑁆𑀖𑀓𑀺𑀘𑁆𑀘𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀲𑁂𑀲𑀸𑀦𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀏𑀢𑁆𑀢𑀓𑀸 𑀳𑀺 𑀅𑀥𑀺𑀓𑀭𑀡𑀲𑀤𑁆𑀤𑀲𑁆𑀲 𑀅𑀢𑁆𑀣𑀸. 𑀢𑁂𑀲𑀼 𑀧𑀸𑀭𑀸𑀚𑀺𑀓𑀫𑁂𑀯 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀤𑀺𑀝𑁆𑀞𑀸𑀤𑀻𑀳𑀺 𑀫𑀽𑀮𑁂𑀳𑀺 𑀅𑀫𑀽𑀮𑀓𑀜𑁆𑀘𑁂𑀯 𑀅𑀥𑀺𑀓𑀭𑀡𑀁 𑀳𑁄𑀢𑀺. 𑀅𑀬𑀜𑁆𑀘 𑀪𑀺𑀓𑁆𑀔𑀼 𑀤𑁄𑀲𑀁 𑀧𑀢𑀺𑀝𑁆𑀞𑀸𑀢𑀺, 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀺 ‘‘𑀢𑀼𑀘𑁆𑀙𑀓𑀁 𑀫𑀬𑀸 𑀪𑀡𑀺𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀧𑀝𑀺𑀚𑀸𑀦𑀸𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀤𑁆𑀥𑀁𑀲𑀺𑀢𑀓𑁆𑀔𑀡𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀅𑀬𑀁 𑀢𑀸𑀯𑀲𑁆𑀲 𑀲𑀧𑀤𑀸𑀦𑀼𑀓𑁆𑀓𑀫𑀦𑀺𑀤𑁆𑀤𑁂𑀲𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀢𑁆𑀣𑁄.

𑁩𑁮𑁭. 𑀇𑀤𑀸𑀦𑀺 𑀬𑀸𑀦𑀺 𑀢𑀸𑀦𑀺 𑀲𑀗𑁆𑀔𑁂𑀧𑀢𑁄 𑀤𑀺𑀝𑁆𑀞𑀸𑀤𑀻𑀦𑀺 𑀘𑁄𑀤𑀦𑀸𑀯𑀢𑁆𑀣𑀽𑀦𑀺 𑀯𑀼𑀢𑁆𑀢𑀸𑀦𑀺, 𑀢𑁂𑀲𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀆𑀧𑀢𑁆𑀢𑀺𑀁 𑀭𑁄𑀧𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀤𑀺𑀝𑁆𑀞𑀲𑁆𑀲 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀤𑀺𑀝𑁆𑀞𑀲𑁆𑀲 𑀳𑁄𑀢𑀻𑀢𑀺 𑀅𑀤𑀺𑀝𑁆𑀞𑁄 𑀅𑀲𑁆𑀲 𑀳𑁄𑀢𑀺. 𑀏𑀢𑁂𑀦 𑀘𑁄𑀤𑀓𑁂𑀦 𑀅𑀤𑀺𑀝𑁆𑀞𑁄 𑀳𑁄𑀢𑀺, 𑀲𑁄 𑀧𑀼𑀕𑁆𑀕𑀮𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀅𑀲𑀼𑀢𑀲𑁆𑀲 𑀳𑁄𑀢𑀻𑀢𑀺𑀆𑀤𑀻𑀲𑀼𑀧𑀺.

𑀤𑀺𑀝𑁆𑀞𑁄 𑀫𑀬𑀸𑀢𑀺 𑀤𑀺𑀝𑁆𑀞𑁄𑀲𑀺 𑀫𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀲𑀼𑀢𑁄 𑀫𑀬𑀸𑀢𑀺𑀆𑀤𑀻𑀲𑀼𑀧𑀺. 𑀲𑁂𑀲𑀁 𑀅𑀤𑀺𑀝𑁆𑀞𑀫𑀽𑀮𑀓𑁂 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀤𑀺𑀝𑁆𑀞𑀫𑀽𑀮𑀓𑁂 𑀧𑀦 𑀢𑀜𑁆𑀘𑁂 𑀘𑁄𑀤𑁂𑀢𑀺 ‘‘𑀲𑀼𑀢𑁄 𑀫𑀬𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀲𑀼𑀢𑁆𑀢𑀸𑀤𑀻𑀦𑀁 𑀆𑀪𑀸𑀯𑁂𑀦 𑀅𑀫𑀽𑀮𑀓𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀩𑁆𑀩𑀲𑁆𑀫𑀺𑀁𑀬𑁂𑀯 𑀘 𑀇𑀫𑀲𑁆𑀫𑀺𑀁 𑀘𑁄𑀤𑀓𑀯𑀸𑀭𑁂 𑀬𑀣𑀸 𑀇𑀥𑀸𑀕𑀢𑁂𑀲𑀼 ‘‘𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀻’’𑀢𑀺 𑀇𑀫𑁂𑀲𑀼 𑀯𑀘𑀦𑁂𑀲𑀼 𑀏𑀓𑁂𑀓𑀲𑁆𑀲 𑀯𑀲𑁂𑀦 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀺, 𑀏𑀯𑀁 𑀅𑀜𑁆𑀜𑀢𑁆𑀭 𑀆𑀕𑀢𑁂𑀲𑀼 ‘‘𑀤𑀼𑀲𑁆𑀲𑀻𑀮𑁄, 𑀧𑀸𑀧𑀥𑀫𑁆𑀫𑁄, 𑀅𑀲𑀼𑀘𑀺𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄, 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄, 𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄, 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄, 𑀅𑀦𑁆𑀢𑁄𑀧𑀽𑀢𑀺, 𑀅𑀯𑀲𑁆𑀲𑀼𑀢𑁄, 𑀓𑀲𑀫𑁆𑀩𑀼𑀚𑀸𑀢𑁄’’𑀢𑀺 𑀇𑀫𑁂𑀲𑀼𑀧𑀺 𑀯𑀘𑀦𑁂𑀲𑀼 𑀏𑀓𑁂𑀓𑀲𑁆𑀲 𑀯𑀲𑁂𑀦 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀺𑀬𑁂𑀯.

‘‘𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺 𑀇𑀫𑀸𑀦𑀺 𑀧𑀦 𑀲𑀼𑀤𑁆𑀥𑀸𑀦𑀺 𑀲𑀻𑀲𑀁 𑀦 𑀏𑀦𑁆𑀢𑀺, ‘‘𑀤𑀼𑀲𑁆𑀲𑀻𑀮𑁄𑀲𑀺 𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸’’𑀢𑀺 𑀏𑀯𑀁 𑀤𑀼𑀲𑁆𑀲𑀻𑀮𑀸𑀤𑀺𑀧𑀤𑁂𑀲𑀼 𑀧𑀦 ‘‘𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀻’’𑀢𑀺𑀆𑀤𑀺𑀧𑀤𑁂𑀲𑀼 𑀯𑀸 𑀬𑁂𑀦 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀖𑀝𑀺𑀢𑀸𑀦𑁂𑀯 𑀲𑀻𑀲𑀁 𑀏𑀦𑁆𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑀓𑀭𑀸𑀦𑀺 𑀳𑁄𑀦𑁆𑀢𑀺.

𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀦 𑀓𑁂𑀯𑀮𑀁 𑀇𑀥 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸𑀦𑀺 ‘𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄’𑀢𑀺𑀆𑀤𑀺𑀧𑀤𑀸𑀦𑁂𑀯 𑀲𑀻𑀲𑀁 𑀏𑀦𑁆𑀢𑀺, ‘𑀓𑁄𑀡𑁆𑀞𑁄𑀲𑀺 𑀫𑀳𑀸𑀲𑀸𑀫𑀡𑁂𑀭𑁄𑀲𑀺, 𑀫𑀳𑀸𑀉𑀧𑀸𑀲𑀓𑁄𑀲𑀺, 𑀚𑁂𑀝𑁆𑀞𑀩𑁆𑀩𑀢𑀺𑀓𑁄𑀲𑀺, 𑀦𑀺𑀕𑀡𑁆𑀞𑁄𑀲𑀺, 𑀆𑀚𑀻𑀯𑀓𑁄𑀲𑀺, 𑀢𑀸𑀧𑀲𑁄𑀲𑀺, 𑀧𑀭𑀺𑀩𑁆𑀩𑀸𑀚𑀓𑁄𑀲𑀺, 𑀧𑀡𑁆𑀟𑀓𑁄𑀲𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄𑀲𑀺, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄𑀲𑀺, 𑀢𑀺𑀭𑀘𑁆𑀙𑀸𑀦𑀕𑀢𑁄𑀲𑀺, 𑀫𑀸𑀢𑀼𑀖𑀸𑀢𑀓𑁄𑀲𑀺, 𑀧𑀺𑀢𑀼𑀖𑀸𑀢𑀓𑁄𑀲𑀺, 𑀅𑀭𑀳𑀦𑁆𑀢𑀖𑀸𑀢𑀓𑁄𑀲𑀺, 𑀲𑀗𑁆𑀖𑀪𑁂𑀤𑀓𑁄𑀲𑀺, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄𑀲𑀺, 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄𑀲𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀑𑀲𑀻’𑀢𑀺 𑀇𑀫𑀸𑀦𑀺𑀧𑀺 𑀲𑀻𑀲𑀁 𑀏𑀦𑁆𑀢𑀺𑀬𑁂𑀯𑀸’’𑀢𑀺. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄𑀬𑁂𑀯 𑀘 ‘‘𑀤𑀺𑀝𑁆𑀞𑁂 𑀯𑁂𑀫𑀢𑀺𑀓𑁄𑀢𑀺𑀆𑀤𑀻𑀲𑀼 𑀬𑀤𑀕𑁆𑀕𑁂𑀦 𑀯𑁂𑀫𑀢𑀺𑀓𑁄 𑀢𑀤𑀕𑁆𑀕𑁂𑀦 𑀦𑁄 𑀓𑀧𑁆𑀧𑁂𑀢𑀺, 𑀬𑀤𑀕𑁆𑀕𑁂𑀦 𑀦𑁄 𑀓𑀧𑁆𑀧𑁂𑀢𑀺 𑀢𑀤𑀕𑁆𑀕𑁂𑀦 𑀦𑀲𑁆𑀲𑀭𑀢𑀺, 𑀬𑀤𑀕𑁆𑀕𑁂𑀦 𑀦𑀲𑁆𑀲𑀭𑀢𑀺 𑀢𑀤𑀕𑁆𑀕𑁂𑀦 𑀧𑀫𑀼𑀝𑁆𑀞𑁄 𑀳𑁄𑀢𑀻’’𑀢𑀺 𑀯𑀤𑀢𑀺.

𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀧𑀦 𑀏𑀓𑁂𑀓𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀘𑀢𑀼𑀦𑁆𑀦𑀫𑁆𑀧𑀺 𑀧𑀸𑀝𑁂𑀓𑁆𑀓𑀁 𑀦𑀬𑀁 𑀤𑀲𑁆𑀲𑁂𑀢𑀺. 𑀓𑀣𑀁? 𑀤𑀺𑀝𑁆𑀞𑁂 𑀯𑁂𑀫𑀢𑀺𑀓𑁄𑀢𑀺 𑀅𑀬𑀁 𑀢𑀸𑀯 𑀤𑀲𑁆𑀲𑀦𑁂 𑀯𑀸 𑀯𑁂𑀫𑀢𑀺𑀓𑁄 𑀳𑁄𑀢𑀺 𑀧𑀼𑀕𑁆𑀕𑀮𑁂 𑀯𑀸, 𑀢𑀢𑁆𑀣 ‘‘𑀤𑀺𑀝𑁆𑀞𑁄 𑀦𑀼𑀔𑁄 𑀫𑀬𑀸 𑀦 𑀤𑀺𑀝𑁆𑀞𑁄’’𑀢𑀺 𑀏𑀯𑀁 𑀤𑀲𑁆𑀲𑀦𑁂 𑀯𑁂𑀫𑀢𑀺𑀓𑁄 𑀳𑁄𑀢𑀺. ‘‘𑀅𑀬𑀁 𑀦𑀼𑀔𑁄 𑀫𑀬𑀸 𑀤𑀺𑀝𑁆𑀞𑁄 𑀅𑀜𑁆𑀜𑁄’’𑀢𑀺 𑀏𑀯𑀁 𑀧𑀼𑀕𑁆𑀕𑀮𑁂 𑀯𑁂𑀫𑀢𑀺𑀓𑁄 𑀳𑁄𑀢𑀺. 𑀏𑀯𑀁 𑀤𑀲𑁆𑀲𑀦𑀁 𑀯𑀸 𑀦𑁄 𑀓𑀧𑁆𑀧𑁂𑀢𑀺 𑀧𑀼𑀕𑁆𑀕𑀮𑀁 𑀯𑀸, 𑀤𑀲𑁆𑀲𑀦𑀁 𑀯𑀸 𑀦𑀲𑁆𑀲𑀭𑀢𑀺 𑀧𑀼𑀕𑁆𑀕𑀮𑀁 𑀯𑀸, 𑀤𑀲𑁆𑀲𑀦𑀁 𑀯𑀸 𑀧𑀫𑀼𑀝𑁆𑀞𑁄 𑀳𑁄𑀢𑀺 𑀧𑀼𑀕𑁆𑀕𑀮𑀁 𑀯𑀸. 𑀏𑀢𑁆𑀣 𑀘 𑀯𑁂𑀫𑀢𑀺𑀓𑁄𑀢𑀺 𑀯𑀺𑀫𑀢𑀺𑀚𑀸𑀢𑁄. 𑀦𑁄 𑀓𑀧𑁆𑀧𑁂𑀢𑀻𑀢𑀺 𑀦 𑀲𑀤𑁆𑀤𑀳𑀢𑀺. 𑀦𑀲𑁆𑀲𑀭𑀢𑀻𑀢𑀺 𑀅𑀲𑀸𑀭𑀺𑀬𑀫𑀸𑀦𑁄 𑀦𑀲𑁆𑀲𑀭𑀢𑀺. 𑀬𑀤𑀸 𑀧𑀦 𑀢𑀁 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀪𑀦𑁆𑀢𑁂 𑀞𑀸𑀦𑁂 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂’’𑀢𑀺 𑀲𑀸𑀭𑁂𑀦𑁆𑀢𑀺 𑀢𑀤𑀸 𑀲𑀭𑀢𑀺. 𑀧𑀫𑀼𑀝𑁆𑀞𑁄𑀢𑀺 𑀬𑁄 𑀢𑁂𑀳𑀺 𑀢𑁂𑀳𑀺 𑀉𑀧𑀸𑀬𑁂𑀳𑀺 𑀲𑀸𑀭𑀺𑀬𑀫𑀸𑀦𑁄𑀧𑀺 𑀦𑀲𑁆𑀲𑀭𑀢𑀺𑀬𑁂𑀯𑀸𑀢𑀺. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀘𑁄𑀤𑀸𑀧𑀓𑀯𑀸𑀭𑁄𑀧𑀺 𑀯𑁂𑀤𑀺𑀢𑀩𑁆𑀩𑁄, 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 ‘‘𑀫𑀬𑀸’’𑀢𑀺 𑀧𑀭𑀺𑀳𑀻𑀦𑀁, 𑀲𑁂𑀲𑀁 𑀘𑁄𑀤𑀓𑀯𑀸𑀭𑀲𑀤𑀺𑀲𑀫𑁂𑀯.

𑁩𑁮𑁯. 𑀢𑀢𑁄 𑀧𑀭𑀁 𑀆𑀧𑀢𑁆𑀢𑀺𑀪𑁂𑀤𑀁 𑀅𑀦𑀸𑀧𑀢𑁆𑀢𑀺𑀪𑁂𑀤𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀼𑀤𑁆𑀥𑁂 𑀲𑀼𑀤𑁆𑀥𑀤𑀺𑀝𑁆𑀞𑀻’’𑀢𑀺𑀆𑀤𑀺𑀓𑀁 𑀘𑀢𑀼𑀓𑁆𑀓𑀁 𑀞𑀧𑁂𑀢𑁆𑀯𑀸 𑀏𑀓𑀫𑁂𑀓𑀁 𑀧𑀤𑀁 𑀘𑀢𑀽𑀳𑀺 𑀘𑀢𑀽𑀳𑀺 𑀪𑁂𑀤𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀁 𑀲𑀩𑁆𑀩𑀁 𑀧𑀸𑀴𑀺𑀦𑀬𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁. 𑀓𑁂𑀯𑀮𑀁 𑀳𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀳𑀺 𑀅𑀥𑀺𑀧𑁆𑀧𑀸𑀬𑁄 𑀦𑀸𑀫 𑁋 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁄, 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁄, 𑀓𑀫𑁆𑀫𑀸𑀥𑀺𑀧𑁆𑀧𑀸𑀬𑁄, 𑀯𑀼𑀝𑁆𑀞𑀸𑀦𑀸𑀥𑀺𑀧𑁆𑀧𑀸𑀬𑁄, 𑀉𑀧𑁄𑀲𑀣𑀧𑀯𑀸𑀭𑀡𑀝𑁆𑀞𑀧𑀦𑀸𑀥𑀺𑀧𑁆𑀧𑀸𑀬𑁄, 𑀅𑀦𑀼𑀯𑀺𑀚𑁆𑀚𑀦𑀸𑀥𑀺𑀧𑁆𑀧𑀸𑀬𑁄, 𑀥𑀫𑁆𑀫𑀓𑀣𑀸𑀥𑀺𑀧𑁆𑀧𑀸𑀬𑁄𑀢𑀺 𑀅𑀦𑁂𑀓𑀯𑀺𑀥𑁄. 𑀢𑀢𑁆𑀣 𑀧𑀼𑀭𑀺𑀫𑁂𑀲𑀼 𑀘𑀢𑀽𑀲𑀼 𑀅𑀥𑀺𑀧𑁆𑀧𑀸𑀬𑁂𑀲𑀼 𑀑𑀓𑀸𑀲𑀁 𑀅𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸𑀧𑀺 𑀘 𑀲𑀫𑁆𑀫𑀼𑀔𑀸 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁂𑀦 𑀯𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀲𑀫𑁆𑀫𑀼𑀔𑀸 𑀧𑀦 𑀲𑀢𑁆𑀢𑀳𑀺𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀅𑀲𑀫𑁆𑀫𑀼𑀔𑀸 𑀏𑀯 𑀲𑀢𑁆𑀢𑀯𑀺𑀥𑀫𑁆𑀧𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯.

𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀯𑀼𑀝𑁆𑀞𑀸𑀦𑀸𑀥𑀺𑀧𑁆𑀧𑀸𑀬𑁂𑀦 ‘𑀢𑁆𑀯𑀁 𑀇𑀫𑀁 𑀦𑀸𑀫 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀢𑀁 𑀧𑀝𑀺𑀓𑀭𑁄𑀳𑀻’𑀢𑀺 𑀯𑀤𑀦𑁆𑀢𑀲𑁆𑀲 𑀑𑀓𑀸𑀲𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣𑁂𑀯 𑀧𑀦 ‘‘𑀉𑀧𑁄𑀲𑀣𑀧𑀯𑀸𑀭𑀡𑀁 𑀞𑀧𑁂𑀦𑁆𑀢𑀲𑁆𑀲 𑀑𑀓𑀸𑀲𑀓𑀫𑁆𑀫𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀞𑀧𑀦𑀓𑁆𑀔𑁂𑀢𑁆𑀢𑀁 𑀧𑀦 𑀚𑀸𑀦𑀺𑀢𑀩𑁆𑀩𑀁. ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄 𑀅𑀚𑁆𑀚𑀼𑀧𑁄𑀲𑀣𑁄 𑀧𑀦𑁆𑀦𑀭𑀲𑁄 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬’’𑀢𑀺 𑀏𑀢𑀲𑁆𑀫𑀺𑀜𑁆𑀳𑀺 𑀭𑁂-𑀓𑀸𑀭𑁂 𑀅𑀦𑀢𑀺𑀓𑁆𑀓𑀦𑁆𑀢𑁂𑀬𑁂𑀯 𑀞𑀧𑁂𑀢𑀼𑀁 𑀮𑀩𑁆𑀪𑀢𑀺. 𑀢𑀢𑁄 𑀧𑀭𑀁 𑀧𑀦 𑀬𑁆𑀬-𑀓𑀸𑀭𑁂 𑀧𑀢𑁆𑀢𑁂 𑀦 𑀮𑀩𑁆𑀪𑀢𑀺. 𑀏𑀲 𑀦𑀬𑁄 𑀧𑀯𑀸𑀭𑀡𑀸𑀬. 𑀅𑀦𑀼𑀯𑀺𑀚𑁆𑀚𑀓𑀲𑁆𑀲𑀸𑀧𑀺 𑀑𑀲𑀝𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀢𑁆𑀣𑁂𑀢𑀁 𑀢𑀯𑀸’’𑀢𑀺 𑀅𑀦𑀼𑀯𑀺𑀚𑁆𑀚𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀤𑀦𑁆𑀢𑀲𑁆𑀲 𑀑𑀓𑀸𑀲𑀓𑀫𑁆𑀫𑀁 𑀦𑀢𑁆𑀣𑀺.

𑀥𑀫𑁆𑀫𑀓𑀣𑀺𑀓𑀲𑁆𑀲𑀸𑀧𑀺 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀬𑁄 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀢𑀺, 𑀅𑀬𑀁 𑀪𑀺𑀓𑁆𑀔𑀼 𑀅𑀲𑁆𑀲𑀫𑀡𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑁄𑀤𑀺𑀲𑁆𑀲 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲 𑀑𑀓𑀸𑀲𑀓𑀫𑁆𑀫𑀁 𑀦𑀢𑁆𑀣𑀺. 𑀲𑀘𑁂 𑀧𑀦 𑀑𑀤𑀺𑀲𑁆𑀲 𑀦𑀺𑀬𑀫𑁂𑀢𑁆𑀯𑀸 ‘‘𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘 𑀅𑀲𑁆𑀲𑀫𑀡𑁄 𑀅𑀦𑀼𑀧𑀸𑀲𑀓𑁄’’𑀢𑀺 𑀓𑀣𑁂𑀢𑀺, 𑀥𑀫𑁆𑀫𑀸𑀲𑀦𑀢𑁄 𑀑𑀭𑁄𑀳𑀺𑀢𑁆𑀯𑀸 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀬𑀁 𑀧𑀦 𑀢𑀢𑁆𑀣 𑀢𑀢𑁆𑀣 ‘‘𑀅𑀦𑁄𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁 𑀢𑀲𑁆𑀲 𑀑𑀓𑀸𑀲𑀁 𑀅𑀓𑀸𑀭𑀸𑀧𑁂𑀢𑁆𑀯𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀳𑀺 𑀓𑁄𑀘𑀺 𑀅𑀦𑁄𑀓𑀸𑀲𑁄 𑀦𑀸𑀫 𑀅𑀢𑁆𑀣𑀺, 𑀬𑀫𑁄𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀑𑀓𑀸𑀲𑀁 𑀧𑀦 𑀅𑀓𑀸𑀭𑀸𑀧𑁂𑀢𑁆𑀯𑀸 𑀆𑀧𑀚𑁆𑀚𑀢𑀻𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀧𑀞𑀫𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.