𑁭. 𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁬𑁫. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀓𑁄𑀲𑀫𑁆𑀩𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀖𑁄𑀲𑀺𑀢𑀸𑀭𑀸𑀫𑁂𑀢𑀺 𑀖𑁄𑀲𑀺𑀢𑀲𑁆𑀲 𑀆𑀭𑀸𑀫𑁂. 𑀖𑁄𑀲𑀺𑀢𑀦𑀸𑀫𑀓𑁂𑀦 𑀓𑀺𑀭 𑀲𑁂𑀝𑁆𑀞𑀺𑀦𑀸 𑀲𑁄 𑀓𑀸𑀭𑀺𑀢𑁄, 𑀢𑀲𑁆𑀫𑀸 ‘‘𑀖𑁄𑀲𑀺𑀢𑀸𑀭𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀙𑀦𑁆𑀦𑀲𑁆𑀲𑀸𑀢𑀺 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀉𑀧𑀝𑁆𑀞𑀸𑀓𑀙𑀦𑁆𑀦𑀲𑁆𑀲. 𑀯𑀺𑀳𑀸𑀭𑀯𑀢𑁆𑀣𑀼𑀁, 𑀪𑀦𑁆𑀢𑁂, 𑀚𑀸𑀦𑀸𑀳𑀻𑀢𑀺 𑀯𑀺𑀳𑀸𑀭𑀲𑁆𑀲 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁, 𑀪𑀦𑁆𑀢𑁂, 𑀚𑀸𑀦𑀸𑀳𑀺. 𑀏𑀢𑁆𑀣 𑀘 𑀯𑀺𑀳𑀸𑀭𑁄𑀢𑀺 𑀦 𑀲𑀓𑀮𑀯𑀺𑀳𑀸𑀭𑁄, 𑀏𑀓𑁄 𑀆𑀯𑀸𑀲𑁄, 𑀢𑁂𑀦𑁂𑀯𑀸𑀳 𑁋 ‘‘𑀅𑀬𑁆𑀬𑀲𑁆𑀲 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀲𑁆𑀲𑀸𑀫𑀻’’𑀢𑀺.

𑀘𑁂𑀢𑀺𑀬𑀭𑀼𑀓𑁆𑀔𑀦𑁆𑀢𑀺 𑀏𑀢𑁆𑀣 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀘𑁂𑀢𑀺𑀬𑀁, 𑀧𑀽𑀚𑀸𑀭𑀳𑀸𑀦𑀁 𑀤𑁂𑀯𑀝𑁆𑀞𑀸𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, ‘‘𑀘𑁂𑀢𑀺𑀬’’𑀦𑁆𑀢𑀺 𑀲𑀫𑁆𑀫𑀢𑀁 𑀭𑀼𑀓𑁆𑀔𑀁 𑀘𑁂𑀢𑀺𑀬𑀭𑀼𑀓𑁆𑀔𑀁. 𑀕𑀸𑀫𑁂𑀦 𑀧𑀽𑀚𑀺𑀢𑀁 𑀕𑀸𑀫𑀲𑁆𑀲 𑀯𑀸 𑀧𑀽𑀚𑀺𑀢𑀦𑁆𑀢𑀺 𑀕𑀸𑀫𑀧𑀽𑀚𑀺𑀢𑀁. 𑀏𑀲𑁂𑀯 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀅𑀧𑀺𑀘𑁂𑀢𑁆𑀣 𑀚𑀦𑀧𑀤𑁄𑀢𑀺 𑀏𑀓𑀲𑁆𑀲 𑀭𑀜𑁆𑀜𑁄 𑀭𑀚𑁆𑀚𑁂 𑀏𑀓𑁂𑀓𑁄 𑀓𑁄𑀝𑁆𑀞𑀸𑀲𑁄. 𑀭𑀝𑁆𑀞𑀦𑁆𑀢𑀺 𑀲𑀓𑀮𑀭𑀚𑁆𑀚𑀁 𑀯𑁂𑀤𑀺𑀢𑀩𑁆𑀩𑀁, 𑀲𑀓𑀮𑀭𑀚𑁆𑀚𑀫𑁆𑀧𑀺 𑀳𑀺 𑀓𑀤𑀸𑀘𑀺 𑀓𑀤𑀸𑀘𑀺 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀽𑀚𑀁 𑀓𑀭𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀝𑁆𑀞𑀧𑀽𑀚𑀺𑀢’’𑀦𑁆𑀢𑀺. 𑀏𑀓𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀚𑀻𑀯𑀲𑀜𑁆𑀜𑀺𑀦𑁄𑀢𑀺 𑀲𑀢𑁆𑀢𑀲𑀜𑁆𑀜𑀺𑀦𑁄.

𑁩𑁬𑁬. 𑀫𑀳𑀮𑁆𑀮𑀓𑀦𑁆𑀢𑀺 𑀲𑀲𑁆𑀲𑀸𑀫𑀺𑀓𑀪𑀸𑀯𑁂𑀦 𑀲𑀁𑀬𑀸𑀘𑀺𑀓𑀓𑀼𑀝𑀺𑀢𑁄 𑀫𑀳𑀦𑁆𑀢𑀪𑀸𑀯𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀳𑀮𑁆𑀮𑀓𑁄. 𑀬𑀲𑁆𑀫𑀸 𑀯𑀸 𑀯𑀢𑁆𑀣𑀼𑀁 𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀫𑁂𑀦𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀧𑀫𑀸𑀡𑀫𑀳𑀦𑁆𑀢𑀢𑀸𑀬𑀧𑀺 𑀫𑀳𑀮𑁆𑀮𑀓𑁄, 𑀢𑀁 𑀫𑀳𑀮𑁆𑀮𑀓𑀁. 𑀬𑀲𑁆𑀫𑀸 𑀧𑀦𑀲𑁆𑀲 𑀢𑀁 𑀧𑀫𑀸𑀡𑀫𑀳𑀢𑁆𑀢𑀁 𑀲𑀲𑁆𑀲𑀸𑀫𑀺𑀓𑀢𑁆𑀢𑀸𑀯 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀁 ‘‘𑀫𑀳𑀮𑁆𑀮𑀓𑁄 𑀦𑀸𑀫 𑀯𑀺𑀳𑀸𑀭𑁄 𑀲𑀲𑁆𑀲𑀸𑀫𑀺𑀓𑁄 𑀯𑀼𑀘𑁆𑀘𑀢𑀻’’𑀢𑀺 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀁 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀺. 𑀲𑀲𑁆𑀲𑀸𑀫𑀺𑀓𑀪𑀸𑀯𑀫𑀢𑁆𑀢𑀫𑁂𑀯 𑀳𑀺 𑀏𑀢𑁆𑀣 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀦𑀸𑀪𑀸𑀯𑁄 𑀧𑀫𑀸𑀡𑀦𑀺𑀬𑀫𑀸𑀪𑀸𑀯𑁄 𑀘 𑀯𑀺𑀲𑁂𑀲𑁄, 𑀧𑀫𑀸𑀡𑀦𑀺𑀬𑀫𑀸𑀪𑀸𑀯𑀸 𑀘 𑀘𑀢𑀼𑀓𑁆𑀓𑀧𑀸𑀭𑀺𑀳𑀸𑀦𑀻𑀢𑀺.

𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.