𑁬. 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁪𑁨. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀆𑀴𑀯𑀓𑀸𑀢𑀺 𑀆𑀴𑀯𑀺𑀭𑀝𑁆𑀞𑁂 𑀚𑀸𑀢𑀸 𑀤𑀸𑀭𑀓𑀸 𑀆𑀴𑀯𑀓𑀸 𑀦𑀸𑀫, 𑀢𑁂 𑀧𑀩𑁆𑀩𑀚𑀺𑀢𑀓𑀸𑀮𑁂𑀧𑀺 ‘‘𑀆𑀴𑀯𑀓𑀸’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀁𑀲𑀼. 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀆𑀴𑀯𑀓𑀸 𑀪𑀺𑀓𑁆𑀔𑀽’’𑀢𑀺. 𑀲𑀜𑁆𑀜𑀸𑀘𑀺𑀓𑀸𑀬𑁄𑀢𑀺 𑀲𑀬𑀁 𑀬𑀸𑀘𑀺𑀢𑁆𑀯𑀸 𑀕𑀳𑀺𑀢𑀽𑀧𑀓𑀭𑀡𑀸𑀬𑁄. 𑀓𑀸𑀭𑀸𑀧𑁂𑀦𑁆𑀢𑀻𑀢𑀺 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀢𑁂 𑀓𑀺𑀭 𑀲𑀸𑀲𑀦𑁂 𑀯𑀺𑀧𑀲𑁆𑀲𑀦𑀸𑀥𑀼𑀭𑀜𑁆𑀘 𑀕𑀦𑁆𑀣𑀥𑀼𑀭𑀜𑁆𑀘𑀸𑀢𑀺 𑀤𑁆𑀯𑁂𑀧𑀺 𑀥𑀼𑀭𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀦𑀯𑀓𑀫𑁆𑀫𑀫𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀧𑀕𑁆𑀕𑀡𑁆𑀳𑀺𑀁𑀲𑀼. 𑀅𑀲𑁆𑀲𑀸𑀫𑀺𑀓𑀸𑀬𑁄𑀢𑀺 𑀅𑀦𑀺𑀲𑁆𑀲𑀭𑀸𑀬𑁄, 𑀓𑀸𑀭𑁂𑀢𑀸 𑀤𑀸𑀬𑀓𑁂𑀦 𑀯𑀺𑀭𑀳𑀺𑀢𑀸𑀬𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀸𑀬𑁄𑀢𑀺 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀆𑀭𑀤𑁆𑀥𑀸𑀬𑁄𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀫𑀸𑀡𑀺𑀓𑀸𑀬𑁄𑀢𑀺 ‘‘𑀏𑀢𑁆𑀢𑀓𑁂𑀦 𑀦𑀺𑀝𑁆𑀞𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑀧𑁆𑀧𑀫𑀸𑀡𑀸𑀬𑁄, 𑀯𑀼𑀤𑁆𑀥𑀺𑀧𑁆𑀧𑀫𑀸𑀡𑀸𑀬𑁄 𑀯𑀸 𑀫𑀳𑀦𑁆𑀢𑀧𑁆𑀧𑀫𑀸𑀡𑀸𑀬𑁄𑀢𑀺 𑀅𑀢𑁆𑀣𑁄.

𑀬𑀸𑀘𑀦𑀸 𑀏𑀯 𑀩𑀳𑀼𑀮𑀸 𑀏𑀢𑁂𑀲𑀁 𑀫𑀦𑁆𑀤𑀁 𑀅𑀜𑁆𑀜𑀁 𑀓𑀫𑁆𑀫𑀦𑁆𑀢𑀺 𑀬𑀸𑀘𑀦𑀩𑀳𑀼𑀮𑀸. 𑀏𑀯𑀁 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀣𑀢𑁄 𑀧𑀦𑁂𑀢𑁆𑀣 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺, 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 ‘‘𑀧𑀼𑀭𑀺𑀲𑀁 𑀤𑁂𑀣, 𑀧𑀼𑀭𑀺𑀲𑀢𑁆𑀣𑀓𑀭𑀁 𑀤𑁂𑀣𑀸’’𑀢𑀺 𑀬𑀸𑀘𑀦𑁆𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀧𑀼𑀭𑀺𑀲𑀁 𑀬𑀸𑀘𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀳𑀸𑀬𑀢𑁆𑀣𑀸𑀬 𑀓𑀫𑁆𑀫𑀓𑀭𑀡𑀢𑁆𑀣𑀸𑀬 ‘‘𑀧𑀼𑀭𑀺𑀲𑀁 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀭𑀺𑀲𑀢𑁆𑀣𑀓𑀭𑀦𑁆𑀢𑀺 𑀧𑀼𑀭𑀺𑀲𑁂𑀦 𑀓𑀸𑀢𑀩𑁆𑀩𑀁 𑀳𑀢𑁆𑀣𑀓𑀫𑁆𑀫𑀁 𑀯𑀼𑀘𑁆𑀘𑀢𑀺, 𑀢𑀁 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀳𑀢𑁆𑀣𑀓𑀫𑁆𑀫𑀁 𑀦𑀸𑀫 𑀓𑀺𑀜𑁆𑀘𑀺 𑀯𑀢𑁆𑀣𑀼 𑀦 𑀳𑁄𑀢𑀺, 𑀢𑀲𑁆𑀫𑀸 𑀞𑀧𑁂𑀢𑁆𑀯𑀸 𑀫𑀺𑀕𑀮𑀼𑀤𑁆𑀤𑀓𑀫𑀘𑁆𑀙𑀩𑀦𑁆𑀥𑀓𑀸𑀤𑀻𑀦𑀁 𑀲𑀓𑀓𑀫𑁆𑀫𑀁 𑀅𑀯𑀲𑁂𑀲𑀁 𑀲𑀩𑁆𑀩𑀁 𑀓𑀧𑁆𑀧𑀺𑀬𑀁. ‘‘𑀓𑀺𑀁, 𑀪𑀦𑁆𑀢𑁂, 𑀆𑀕𑀢𑀢𑁆𑀣 𑀓𑁂𑀦 𑀓𑀫𑁆𑀫’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁂 𑀯𑀸 𑀅𑀧𑀼𑀘𑁆𑀙𑀺𑀢𑁂 𑀯𑀸 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺, 𑀯𑀺𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑀸 𑀤𑁄𑀲𑁄 𑀦𑀢𑁆𑀣𑀺. 𑀢𑀲𑁆𑀫𑀸 𑀫𑀺𑀕𑀮𑀼𑀤𑁆𑀤𑀓𑀸𑀤𑀬𑁄 𑀲𑀓𑀓𑀫𑁆𑀫𑀁 𑀦 𑀬𑀸𑀘𑀺𑀢𑀩𑁆𑀩𑀸, ‘‘𑀳𑀢𑁆𑀣𑀓𑀫𑁆𑀫𑀁 𑀤𑁂𑀣𑀸’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸𑀧𑀺 𑀦 𑀬𑀸𑀘𑀺𑀢𑀩𑁆𑀩𑀸; 𑀏𑀯𑀁 𑀬𑀸𑀘𑀺𑀢𑀸 𑀳𑀺 𑀢𑁂 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀪𑀺𑀓𑁆𑀔𑀽 𑀉𑀬𑁆𑀬𑁄𑀚𑁂𑀢𑁆𑀯𑀸 𑀫𑀺𑀕𑁂𑀧𑀺 𑀫𑀸𑀭𑁂𑀢𑁆𑀯𑀸 𑀆𑀳𑀭𑁂𑀬𑁆𑀬𑀼𑀁. 𑀦𑀺𑀬𑀫𑁂𑀢𑁆𑀯𑀸 𑀧𑀦 ‘‘𑀯𑀺𑀳𑀸𑀭𑁂 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀢𑀢𑁆𑀣 𑀳𑀢𑁆𑀣𑀓𑀫𑁆𑀫𑀁 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑀩𑁆𑀩𑀸. 𑀨𑀸𑀮𑀦𑀗𑁆𑀕𑀮𑀸𑀤𑀻𑀦𑀺 𑀉𑀧𑀓𑀭𑀡𑀸𑀦𑀺 𑀕𑀳𑁂𑀢𑁆𑀯𑀸 𑀓𑀲𑀺𑀢𑀼𑀁 𑀯𑀸 𑀯𑀧𑀺𑀢𑀼𑀁 𑀯𑀸 𑀮𑀸𑀬𑀺𑀢𑀼𑀁 𑀯𑀸 𑀕𑀘𑁆𑀙𑀦𑁆𑀢𑀁 𑀲𑀓𑀺𑀘𑁆𑀘𑀧𑀲𑀼𑀢𑀫𑁆𑀧𑀺 𑀓𑀲𑁆𑀲𑀓𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑁂𑀯. 𑀬𑁄 𑀧𑀦 𑀯𑀺𑀖𑀸𑀲𑀸𑀤𑁄 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀦𑀺𑀓𑁆𑀓𑀫𑁆𑀫𑁄 𑀦𑀺𑀭𑀢𑁆𑀣𑀓𑀓𑀣𑀁 𑀓𑀣𑁂𑀦𑁆𑀢𑁄 𑀦𑀺𑀤𑁆𑀤𑀸𑀬𑀦𑁆𑀢𑁄 𑀯𑀸 𑀯𑀺𑀳𑀭𑀢𑀺, 𑀏𑀯𑀭𑀽𑀧𑀁 𑀅𑀬𑀸𑀘𑀺𑀢𑁆𑀯𑀸𑀧𑀺 ‘‘𑀏𑀳𑀺 𑀭𑁂 𑀇𑀤𑀁 𑀯𑀸 𑀇𑀤𑀁 𑀯𑀸 𑀓𑀭𑁄𑀳𑀻’’𑀢𑀺 𑀬𑀤𑀺𑀘𑁆𑀙𑀓𑀁 𑀓𑀸𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺.

𑀳𑀢𑁆𑀣𑀓𑀫𑁆𑀫𑀲𑁆𑀲 𑀧𑀦 𑀲𑀩𑁆𑀩𑀓𑀧𑁆𑀧𑀺𑀬𑀪𑀸𑀯𑀤𑀻𑀧𑀦𑀢𑁆𑀣𑀁 𑀇𑀫𑀁 𑀦𑀬𑀁 𑀓𑀣𑁂𑀦𑁆𑀢𑀺. 𑀲𑀘𑁂 𑀳𑀺 𑀪𑀺𑀓𑁆𑀔𑀼 𑀧𑀸𑀲𑀸𑀤𑀁 𑀓𑀸𑀭𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀣𑀫𑁆𑀪𑀢𑁆𑀣𑀸𑀬 𑀧𑀸𑀲𑀸𑀡𑀓𑁄𑀝𑁆𑀝𑀓𑀸𑀦𑀁 𑀖𑀭𑀁 𑀕𑀦𑁆𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 ‘‘𑀳𑀢𑁆𑀣𑀓𑀫𑁆𑀫𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺 𑀉𑀧𑀸𑀲𑀓𑀸’’𑀢𑀺. 𑀓𑀺𑀁 𑀓𑀸𑀢𑀩𑁆𑀩𑀁, 𑀪𑀦𑁆𑀢𑁂,𑀢𑀺? 𑀧𑀸𑀲𑀸𑀡𑀢𑁆𑀣𑀫𑁆𑀪𑀸 𑀉𑀤𑁆𑀥𑀭𑀺𑀢𑁆𑀯𑀸 𑀤𑀸𑀢𑀩𑁆𑀩𑀸𑀢𑀺. 𑀲𑀘𑁂 𑀢𑁂 𑀉𑀤𑁆𑀥𑀭𑀺𑀢𑁆𑀯𑀸 𑀯𑀸 𑀤𑁂𑀦𑁆𑀢𑀺, 𑀉𑀤𑁆𑀥𑀭𑀺𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑁂 𑀅𑀢𑁆𑀢𑀦𑁄 𑀣𑀫𑁆𑀪𑁂 𑀯𑀸 𑀤𑁂𑀦𑁆𑀢𑀺, 𑀯𑀝𑁆𑀝𑀢𑀺. 𑀅𑀣𑀸𑀧𑀺 𑀯𑀤𑀦𑁆𑀢𑀺 𑁋 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀳𑀢𑁆𑀣𑀓𑀫𑁆𑀫𑀁 𑀓𑀸𑀢𑀼𑀁 𑀔𑀡𑁄 𑀦𑀢𑁆𑀣𑀺, 𑀅𑀜𑁆𑀜𑀁 𑀉𑀤𑁆𑀥𑀭𑀸𑀧𑁂𑀣, 𑀢𑀲𑁆𑀲 𑀫𑀽𑀮𑀁 𑀤𑀲𑁆𑀲𑀸𑀫𑀸’’𑀢𑀺 𑀉𑀤𑁆𑀥𑀭𑀸𑀧𑁂𑀢𑁆𑀯𑀸 ‘‘𑀧𑀸𑀲𑀸𑀡𑀢𑁆𑀣𑀫𑁆𑀪𑁂 𑀉𑀤𑁆𑀥𑀝𑀫𑀦𑀼𑀲𑁆𑀲𑀸𑀦𑀁 𑀫𑀽𑀮𑀁 𑀤𑁂𑀣𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀧𑀸𑀲𑀸𑀤𑀤𑀸𑀭𑀽𑀦𑀁 𑀅𑀢𑁆𑀣𑀸𑀬 𑀯𑀟𑁆𑀠𑀓𑀻𑀦𑀁 𑀲𑀦𑁆𑀢𑀺𑀓𑀁 𑀇𑀝𑁆𑀞𑀓𑀢𑁆𑀣𑀸𑀬 𑀇𑀝𑁆𑀞𑀓𑀯𑀟𑁆𑀠𑀓𑀻𑀦𑀁 𑀙𑀤𑀦𑀢𑁆𑀣𑀸𑀬 𑀕𑁂𑀳𑀘𑁆𑀙𑀸𑀤𑀓𑀸𑀦𑀁 𑀘𑀺𑀢𑁆𑀢𑀓𑀫𑁆𑀫𑀢𑁆𑀣𑀸𑀬 𑀘𑀺𑀢𑁆𑀢𑀓𑀸𑀭𑀸𑀦𑀦𑁆𑀢𑀺 𑀬𑁂𑀦 𑀬𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀸𑀬 𑀢𑁂𑀲𑀁 𑀢𑁂𑀲𑀁 𑀲𑀺𑀧𑁆𑀧𑀓𑀸𑀭𑀓𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀳𑀢𑁆𑀣𑀓𑀫𑁆𑀫𑀬𑀸𑀘𑀦𑀯𑀲𑁂𑀦 𑀘 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀯𑀸 𑀪𑀢𑁆𑀢𑀯𑁂𑀢𑀦𑀸𑀦𑀼𑀧𑁆𑀧𑀤𑀸𑀦𑁂𑀦 𑀯𑀸 𑀮𑀤𑁆𑀥𑀫𑁆𑀧𑀺 𑀲𑀩𑁆𑀩𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀭𑀜𑁆𑀜𑀢𑁄 𑀆𑀳𑀭𑀸𑀧𑁂𑀦𑁆𑀢𑁂𑀦 𑀘 𑀲𑀩𑁆𑀩𑀁 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀁 𑀆𑀳𑀭𑀸𑀧𑁂𑀢𑀩𑁆𑀩𑀁.

𑀦 𑀓𑁂𑀯𑀮𑀜𑁆𑀘 𑀧𑀸𑀲𑀸𑀤𑀁 𑀓𑀸𑀭𑁂𑀢𑀼𑀓𑀸𑀫𑁂𑀦 𑀫𑀜𑁆𑀘𑀧𑀻𑀞𑀧𑀢𑁆𑀢𑀧𑀭𑀺𑀲𑁆𑀲𑀸𑀯𑀦𑀥𑀫𑀓𑀭𑀓𑀘𑀻𑀯𑀭𑀸𑀤𑀻𑀦𑀺 𑀓𑀸𑀭𑀸𑀧𑁂𑀢𑀼𑀓𑀸𑀫𑁂𑀦𑀸𑀧𑀺 𑀤𑀸𑀭𑀼𑀮𑁄𑀳𑀲𑀼𑀢𑁆𑀢𑀸𑀤𑀻𑀦𑀺 𑀮𑀪𑀺𑀢𑁆𑀯𑀸 𑀢𑁂 𑀢𑁂 𑀲𑀺𑀧𑁆𑀧𑀓𑀸𑀭𑀓𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑀩𑁆𑀩𑀁. 𑀳𑀢𑁆𑀣𑀓𑀫𑁆𑀫𑀬𑀸𑀘𑀦𑀯𑀲𑁂𑀦 𑀘 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀯𑀸 𑀪𑀢𑁆𑀢𑀯𑁂𑀢𑀦𑀸𑀦𑀼𑀧𑁆𑀧𑀤𑀸𑀦𑁂𑀦 𑀯𑀸 𑀮𑀤𑁆𑀥𑀫𑁆𑀧𑀺 𑀲𑀩𑁆𑀩𑀁 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀓𑀸𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺, 𑀪𑀢𑁆𑀢𑀯𑁂𑀢𑀦𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀅𑀓𑀧𑁆𑀧𑀺𑀬𑀓𑀳𑀸𑀧𑀡𑀸𑀤𑀺 𑀦 𑀤𑀸𑀢𑀩𑁆𑀩𑀁. 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀢𑀡𑁆𑀟𑀼𑀮𑀸𑀤𑀻𑀦𑀺 𑀧𑀭𑀺𑀬𑁂𑀲𑀺𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺.

𑀳𑀢𑁆𑀣𑀓𑀫𑁆𑀫𑀯𑀲𑁂𑀦 𑀧𑀢𑁆𑀢𑀁 𑀓𑀸𑀭𑁂𑀢𑁆𑀯𑀸 𑀢𑀣𑁂𑀯 𑀧𑀸𑀘𑁂𑀢𑁆𑀯𑀸 𑀦𑀯𑀧𑀓𑁆𑀓𑀲𑁆𑀲 𑀧𑀢𑁆𑀢𑀲𑁆𑀲 𑀧𑀼𑀜𑁆𑀙𑀦𑀢𑁂𑀮𑀢𑁆𑀣𑀸𑀬 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀝𑁆𑀞𑁂𑀦 ‘‘𑀪𑀺𑀓𑁆𑀔𑀸𑀬 𑀆𑀕𑀢𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀸𑀕𑀼𑀬𑀸 𑀯𑀸 𑀪𑀢𑁆𑀢𑁂 𑀯𑀸 𑀆𑀦𑀻𑀢𑁂 𑀳𑀢𑁆𑀣𑁂𑀦 𑀧𑀢𑁆𑀢𑁄 𑀧𑀺𑀥𑀸𑀢𑀩𑁆𑀩𑁄. 𑀲𑀘𑁂 𑀉𑀧𑀸𑀲𑀺𑀓𑀸 ‘‘𑀓𑀺𑀁, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀢𑀺, ‘‘𑀦𑀯𑀧𑀓𑁆𑀓𑁄 𑀧𑀢𑁆𑀢𑁄 𑀧𑀼𑀜𑁆𑀙𑀦𑀢𑁂𑀮𑁂𑀦 𑀅𑀢𑁆𑀣𑁄’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀲𑀸 ‘‘𑀤𑁂𑀳𑀺, 𑀪𑀦𑁆𑀢𑁂’’𑀢𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑁂𑀮𑁂𑀦 𑀧𑀼𑀜𑁆𑀙𑀺𑀢𑁆𑀯𑀸 𑀬𑀸𑀕𑀼𑀬𑀸 𑀯𑀸 𑀪𑀢𑁆𑀢𑀲𑁆𑀲 𑀯𑀸 𑀧𑀽𑀭𑁂𑀢𑁆𑀯𑀸 𑀤𑁂𑀢𑀺, 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 𑀦 𑀳𑁄𑀢𑀺, 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺.

𑀪𑀺𑀓𑁆𑀔𑀽 𑀧𑀕𑁂𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀆𑀲𑀦𑀁 𑀅𑀧𑀲𑁆𑀲𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺. 𑀢𑀢𑁆𑀭 𑀘𑁂 𑀉𑀧𑀸𑀲𑀓𑀸 𑀪𑀺𑀓𑁆𑀔𑀽 𑀞𑀺𑀢𑁂 𑀤𑀺𑀲𑁆𑀯𑀸 𑀲𑀬𑀫𑁂𑀯 𑀆𑀲𑀦𑀸𑀦𑀺 𑀆𑀳𑀭𑀸𑀧𑁂𑀦𑁆𑀢𑀺, 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀳𑀺 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀅𑀦𑀸𑀧𑀼𑀘𑁆𑀙𑀸 𑀕𑀢𑀸𑀦𑀫𑁆𑀧𑀺 𑀦𑀝𑁆𑀞𑀁 𑀕𑀻𑀯𑀸 𑀦 𑀳𑁄𑀢𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀫𑀦𑀁 𑀧𑀦 𑀯𑀢𑁆𑀢𑀁. 𑀲𑀘𑁂 𑀪𑀺𑀓𑁆𑀔𑀽𑀳𑀺 ‘‘𑀆𑀲𑀦𑀸𑀦𑀺 𑀆𑀳𑀭𑀣𑀸’’𑀢𑀺 𑀯𑀼𑀢𑁆𑀢𑁂𑀳𑀺 𑀆𑀳𑀝𑀸𑀦𑀺 𑀳𑁄𑀦𑁆𑀢𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁. 𑀅𑀦𑀸𑀧𑀼𑀘𑁆𑀙𑀸 𑀕𑀢𑀸𑀦𑀁 𑀯𑀢𑁆𑀢𑀪𑁂𑀤𑁄 𑀘 𑀦𑀝𑁆𑀞𑀜𑁆𑀘 𑀕𑀻𑀯𑀸𑀢𑀺. 𑀅𑀢𑁆𑀣𑀭𑀡𑀓𑁄𑀚𑀯𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀫𑀓𑁆𑀔𑀺𑀓𑀸𑀬𑁄 𑀩𑀳𑀼𑀓𑀸 𑀳𑁄𑀦𑁆𑀢𑀺, ‘‘𑀫𑀓𑁆𑀔𑀺𑀓𑀸𑀩𑀻𑀚𑀦𑀺𑀁 𑀆𑀳𑀭𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀼𑀘𑀺𑀫𑀦𑁆𑀤𑀲𑀸𑀔𑀸𑀤𑀻𑀦𑀺 𑀆𑀳𑀭𑀦𑁆𑀢𑀺, 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀺. 𑀆𑀲𑀦𑀲𑀸𑀮𑀸𑀬 𑀉𑀤𑀓𑀪𑀸𑀚𑀦𑀁 𑀭𑀺𑀢𑁆𑀢𑀁 𑀳𑁄𑀢𑀺, ‘‘𑀥𑀫𑀓𑀭𑀡𑀁 𑀕𑀡𑁆𑀳𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀥𑀫𑀓𑀭𑀓𑀜𑁆𑀳𑀺 𑀭𑀺𑀢𑁆𑀢𑀪𑀸𑀚𑀦𑁂 𑀧𑀓𑁆𑀔𑀺𑀧𑀦𑁆𑀢𑁄 𑀪𑀺𑀦𑁆𑀤𑁂𑀬𑁆𑀬 ‘‘𑀦𑀤𑀺𑀁 𑀯𑀸 𑀢𑀴𑀸𑀓𑀁 𑀯𑀸 𑀕𑀦𑁆𑀢𑁆𑀯𑀸 𑀧𑀦 𑀉𑀤𑀓𑀁 𑀆𑀳𑀭𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀕𑁂𑀳𑀢𑁄 𑀆𑀳𑀭𑀸’’𑀢𑀺 𑀦𑁂𑀯 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀦 𑀆𑀳𑀝𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀆𑀲𑀦𑀲𑀸𑀮𑀸𑀬𑀁 𑀯𑀸 𑀅𑀭𑀜𑁆𑀜𑀓𑁂 𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁂𑀳𑀺 𑀢𑀢𑁆𑀣𑀚𑀸𑀢𑀓𑀁 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀁 𑀬𑀁𑀓𑀺𑀜𑁆𑀘𑀺 𑀉𑀢𑁆𑀢𑀭𑀺𑀪𑀗𑁆𑀕𑀸𑀭𑀳𑀁 𑀧𑀢𑁆𑀢𑀁 𑀯𑀸 𑀨𑀮𑀁 𑀯𑀸 𑀲𑀘𑁂 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀁 𑀆𑀳𑀭𑀸𑀧𑁂𑀢𑀺, 𑀳𑀢𑁆𑀣𑀓𑀫𑁆𑀫𑀯𑀲𑁂𑀦 𑀆𑀳𑀭𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀮𑀚𑁆𑀚𑀻𑀳𑀺 𑀧𑀦 𑀪𑀺𑀓𑁆𑀔𑀽𑀳𑀺 𑀯𑀸 𑀲𑀸𑀫𑀡𑁂𑀭𑁂𑀳𑀺 𑀯𑀸 𑀳𑀢𑁆𑀣𑀓𑀫𑁆𑀫𑀁 𑀦 𑀓𑀸𑀭𑁂𑀢𑀩𑁆𑀩𑀁. 𑀅𑀬𑀁 𑀢𑀸𑀯 𑀧𑀼𑀭𑀺𑀲𑀢𑁆𑀣𑀓𑀭𑁂 𑀦𑀬𑁄.

𑀕𑁄𑀡𑀁 𑀧𑀦 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀆𑀳𑀭𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀆𑀳𑀭𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀜𑀸𑀢𑀺𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄𑀧𑀺 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀬𑀸𑀘𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀸𑀯𑀓𑀸𑀮𑀺𑀓𑀦𑀬𑁂𑀦 𑀲𑀩𑁆𑀩𑀢𑁆𑀣 𑀯𑀝𑁆𑀝𑀢𑀺. 𑀏𑀯𑀁 𑀆𑀳𑀭𑀸𑀧𑀺𑀢𑀜𑁆𑀘 𑀕𑁄𑀡𑀁 𑀭𑀓𑁆𑀔𑀺𑀢𑁆𑀯𑀸 𑀚𑀕𑁆𑀕𑀺𑀢𑁆𑀯𑀸 𑀲𑀸𑀫𑀺𑀓𑀸 𑀧𑀝𑀺𑀘𑁆𑀙𑀸𑀧𑁂𑀢𑀩𑁆𑀩𑀸. 𑀲𑀘𑀲𑁆𑀲 𑀧𑀸𑀤𑁄 𑀯𑀸 𑀲𑀺𑀗𑁆𑀕𑀁 𑀯𑀸 𑀪𑀺𑀚𑁆𑀚𑀢𑀺 𑀯𑀸 𑀦𑀲𑁆𑀲𑀢𑀺 𑀯𑀸 𑀲𑀸𑀫𑀺𑀓𑀸 𑀘𑁂 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀕𑀻𑀯𑀸 𑀳𑁄𑀢𑀺. 𑀲𑀘𑁂 ‘‘𑀢𑀼𑀫𑁆𑀳𑀸𑀓𑀁𑀬𑁂𑀯 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. ‘‘𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀆𑀭𑀸𑀫𑀺𑀓𑀸𑀦𑀁 𑀆𑀘𑀺𑀓𑁆𑀔𑀣 𑀚𑀕𑁆𑀕𑀦𑀢𑁆𑀣𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁.

‘‘𑀲𑀓𑀝𑀁 𑀤𑁂𑀣𑀸’’𑀢𑀺𑀧𑀺 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀯𑀺𑀜𑁆𑀜𑀢𑁆𑀢𑀺𑀏𑀯 𑀳𑁄𑀢𑀺 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀜𑀸𑀢𑀺𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀧𑀦 𑀯𑀝𑁆𑀝𑀢𑀺, 𑀢𑀸𑀯𑀓𑀸𑀮𑀺𑀓𑀁 𑀯𑀝𑁆𑀝𑀢𑀺 𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀤𑀸𑀢𑀩𑁆𑀩𑀁. 𑀲𑀘𑁂 𑀦𑁂𑀫𑀺𑀬𑀸𑀤𑀻𑀦𑀺 𑀪𑀺𑀚𑁆𑀚𑀦𑁆𑀢𑀺 𑀧𑀸𑀓𑀢𑀺𑀓𑀸𑀦𑀺 𑀓𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀦𑀝𑁆𑀞𑁂 𑀕𑀻𑀯𑀸 𑀳𑁄𑀢𑀺. ‘‘𑀢𑀼𑀫𑁆𑀳𑀸𑀓𑀫𑁂𑀯 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 𑀤𑀸𑀭𑀼𑀪𑀡𑁆𑀟𑀁 𑀦𑀸𑀫 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀲 𑀦𑀬𑁄 𑀯𑀸𑀲𑀺𑀨𑀭𑀲𑀼𑀓𑀼𑀞𑀸𑀭𑀻𑀓𑀼𑀤𑀸𑀮𑀦𑀺𑀔𑀸𑀤𑀦𑁂𑀲𑀼. 𑀯𑀮𑁆𑀮𑀺𑀆𑀤𑀻𑀲𑀼 𑀘 𑀧𑀭𑀧𑀭𑀺𑀕𑁆𑀕𑀳𑀺𑀢𑁂𑀲𑀼. 𑀕𑀭𑀼𑀪𑀡𑁆𑀟𑀧𑁆𑀧𑀳𑁄𑀦𑀓𑁂𑀲𑀼𑀬𑁂𑀯 𑀘 𑀯𑀮𑁆𑀮𑀺𑀆𑀤𑀻𑀲𑀼 𑀯𑀺𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀦 𑀢𑀢𑁄 𑀑𑀭𑀁.

𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀁 𑀧𑀦 𑀬𑀁𑀓𑀺𑀜𑁆𑀘𑀺 𑀆𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀭𑀓𑁆𑀔𑀺𑀢𑀕𑁄𑀧𑀺𑀢𑀝𑁆𑀞𑀸𑀦𑁂𑀬𑁂𑀯 𑀳𑀺 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 𑀯𑀼𑀘𑁆𑀘𑀢𑀺. 𑀲𑀸 𑀤𑁆𑀯𑀻𑀲𑀼 𑀧𑀘𑁆𑀘𑀬𑁂𑀲𑀼 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺, 𑀲𑁂𑀦𑀸𑀲𑀦𑀧𑀘𑁆𑀘𑀬𑁂 𑀧𑀦 ‘‘𑀆𑀳𑀭 𑀤𑁂𑀳𑀻’’𑀢𑀺 𑀯𑀺𑀜𑁆𑀜𑀢𑁆𑀢𑀺𑀫𑀢𑁆𑀢𑀫𑁂𑀯 𑀦 𑀯𑀝𑁆𑀝𑀢𑀺, 𑀧𑀭𑀺𑀓𑀣𑁄𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀦𑀺 𑀯𑀝𑁆𑀝𑀦𑁆𑀢𑀺. 𑀢𑀢𑁆𑀣 𑀉𑀧𑁄𑀲𑀣𑀸𑀕𑀸𑀭𑀁 𑀯𑀸 𑀪𑁄𑀚𑀦𑀲𑀸𑀮𑀁 𑀯𑀸 𑀅𑀜𑁆𑀜𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀲𑁂𑀦𑀸𑀲𑀦𑀁 𑀇𑀘𑁆𑀙𑀢𑁄 ‘‘𑀇𑀫𑀲𑁆𑀫𑀺𑀁 𑀯𑀢 𑀑𑀓𑀸𑀲𑁂 𑀏𑀯𑀭𑀽𑀧𑀁 𑀲𑁂𑀦𑀸𑀲𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀸 ‘‘𑀬𑀼𑀢𑁆𑀢’’𑀦𑁆𑀢𑀺 𑀯𑀸 ‘‘𑀅𑀦𑀼𑀭𑀽𑀧’’𑀦𑁆𑀢𑀺 𑀯𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀘𑀦𑀁 𑀧𑀭𑀺𑀓𑀣𑀸 𑀦𑀸𑀫. ‘‘𑀉𑀧𑀸𑀲𑀓𑀸 𑀢𑀼𑀫𑁆𑀳𑁂 𑀓𑀼𑀳𑀺𑀁 𑀯𑀲𑀣𑀸’’𑀢𑀺? ‘‘𑀧𑀸𑀲𑀸𑀤𑁂, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀪𑀺𑀓𑁆𑀔𑀽𑀦𑀁 𑀧𑀦 𑀉𑀧𑀸𑀲𑀓𑀸 𑀧𑀸𑀲𑀸𑀤𑁄 𑀦 𑀯𑀝𑁆𑀝𑀢𑀻’’𑀢𑀺 𑀏𑀯𑀫𑀸𑀤𑀺𑀯𑀘𑀦𑀁 𑀑𑀪𑀸𑀲𑁄 𑀦𑀸𑀫. 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀭𑀚𑁆𑀚𑀼𑀁 𑀧𑀲𑀸𑀭𑁂𑀢𑀺, 𑀔𑀻𑀮𑁂 𑀆𑀓𑁄𑀝𑀸𑀧𑁂𑀢𑀺. ‘‘𑀓𑀺𑀁 𑀇𑀤𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀇𑀥 𑀆𑀯𑀸𑀲𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀫𑀸𑀤𑀺𑀓𑀭𑀡𑀁 𑀧𑀦 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫. 𑀕𑀺𑀮𑀸𑀦𑀧𑀘𑁆𑀘𑀬𑁂 𑀧𑀦 𑀯𑀺𑀜𑁆𑀜𑀢𑁆𑀢𑀺𑀧𑀺 𑀯𑀝𑁆𑀝𑀢𑀺, 𑀧𑀕𑁂𑀯 𑀧𑀭𑀺𑀓𑀣𑀸𑀤𑀻𑀦𑀺.

𑀫𑀦𑀼𑀲𑁆𑀲𑀸 𑀉𑀧𑀤𑁆𑀤𑀼𑀢𑀸 𑀬𑀸𑀘𑀦𑀸𑀬 𑀉𑀧𑀤𑁆𑀤𑀼𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑀸𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀢𑀸𑀬 𑀬𑀸𑀘𑀦𑀸𑀬 𑀘 𑀯𑀺𑀜𑁆𑀜𑀢𑁆𑀢𑀺𑀬𑀸 𑀘 𑀧𑀻𑀴𑀺𑀢𑀸. 𑀉𑀩𑁆𑀩𑀺𑀚𑁆𑀚𑀦𑁆𑀢𑀺𑀧𑀻𑀢𑀺 ‘‘𑀓𑀺𑀁 𑀦𑀼 𑀆𑀳𑀭𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺 𑀉𑀩𑁆𑀩𑁂𑀕𑀁 𑀇𑀜𑁆𑀚𑀦𑀁 𑀘𑀮𑀦𑀁 𑀧𑀝𑀺𑀮𑀪𑀦𑁆𑀢𑀺. 𑀉𑀢𑁆𑀢𑀲𑀦𑁆𑀢𑀺𑀧𑀻𑀢𑀺 𑀅𑀳𑀺𑀁 𑀯𑀺𑀬 𑀤𑀺𑀲𑁆𑀯𑀸 𑀲𑀳𑀲𑀸 𑀢𑀲𑀺𑀢𑁆𑀯𑀸 𑀉𑀓𑁆𑀓𑀫𑀦𑁆𑀢𑀺. 𑀧𑀮𑀸𑀬𑀦𑁆𑀢𑀺𑀧𑀻𑀢𑀺 𑀤𑀽𑀭𑀢𑁄𑀯 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑀦𑁆𑀢𑀺. 𑀅𑀜𑁆𑀜𑁂𑀦𑀧𑀺 𑀕𑀘𑁆𑀙𑀦𑁆𑀢𑀻𑀢𑀺 𑀬𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸 𑀢𑀁 𑀧𑀳𑀸𑀬 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀸𑀫𑀁 𑀯𑀸 𑀤𑀓𑁆𑀔𑀺𑀡𑀁 𑀯𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀤𑁆𑀯𑀸𑀭𑀫𑁆𑀧𑀺 𑀣𑀓𑁂𑀦𑁆𑀢𑀺.

𑁩𑁪𑁪. 𑀪𑀽𑀢𑀧𑀼𑀩𑁆𑀩𑀁 𑀪𑀺𑀓𑁆𑀔𑀯𑁂𑀢𑀺 𑀇𑀢𑀺 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀕𑀭𑀳𑀺𑀢𑁆𑀯𑀸 𑀢𑀤𑀦𑀼𑀭𑀽𑀧𑀜𑁆𑀘 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀧𑀼𑀦𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀤𑁄𑀲𑀁 𑀧𑀸𑀓𑀝𑀁 𑀓𑀼𑀭𑀼𑀫𑀸𑀦𑁄 𑀇𑀫𑀺𑀦𑀸 ‘‘𑀪𑀽𑀢𑀧𑀼𑀩𑁆𑀩𑀁 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀤𑀲𑁆𑀲𑁂𑀲𑀺. 𑀢𑀢𑁆𑀣 𑀫𑀡𑀺𑀓𑀡𑁆𑀞𑁄𑀢𑀺 𑀲𑁄 𑀓𑀺𑀭 𑀦𑀸𑀕𑀭𑀸𑀚𑀸 𑀲𑀩𑁆𑀩𑀓𑀸𑀫𑀤𑀤𑀁 𑀫𑀳𑀕𑁆𑀖𑀁 𑀫𑀡𑀺𑀁 𑀓𑀡𑁆𑀞𑁂 𑀧𑀺𑀮𑀦𑁆𑀥𑀺𑀢𑁆𑀯𑀸 𑀘𑀭𑀢𑀺, 𑀢𑀲𑁆𑀫𑀸 ‘‘𑀫𑀡𑀺𑀓𑀡𑁆𑀞𑁄’’ 𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀉𑀧𑀭𑀺𑀫𑀼𑀤𑁆𑀥𑀦𑀺 𑀫𑀳𑀦𑁆𑀢𑀁 𑀨𑀡𑀁 𑀓𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀻𑀢𑀺 𑀲𑁄 𑀓𑀺𑀭 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀇𑀲𑀻𑀦𑀁 𑀓𑀦𑀺𑀝𑁆𑀞𑁄 𑀇𑀲𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀅𑀳𑁄𑀲𑀺, 𑀢𑀲𑁆𑀫𑀸 𑀦𑀸𑀕𑀭𑀸𑀚𑀸 𑀦𑀤𑀺𑀢𑁄 𑀉𑀢𑁆𑀢𑀭𑀺𑀢𑁆𑀯𑀸 𑀤𑁂𑀯𑀯𑀡𑁆𑀡𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀢𑁆𑀯𑀸 𑀢𑀁 𑀤𑁂𑀯𑀯𑀡𑁆𑀡𑀁 𑀧𑀳𑀸𑀬 𑀲𑀓𑀯𑀡𑁆𑀡𑀫𑁂𑀯 𑀉𑀧𑀕𑀦𑁆𑀢𑁆𑀯𑀸 𑀢𑀁 𑀇𑀲𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑁄 𑀉𑀧𑀭𑀺𑀫𑀼𑀤𑁆𑀥𑀦𑀺 𑀫𑀳𑀦𑁆𑀢𑀁 𑀨𑀡𑀁 𑀓𑀭𑀺𑀢𑁆𑀯𑀸 𑀙𑀢𑁆𑀢𑀁 𑀯𑀺𑀬 𑀥𑀸𑀭𑀬𑀫𑀸𑀦𑁄 𑀫𑀼𑀳𑀼𑀢𑁆𑀢𑀁 𑀞𑀢𑁆𑀯𑀸 𑀧𑀓𑁆𑀓𑀫𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑀭𑀺𑀫𑀼𑀤𑁆𑀥𑀦𑀺 𑀫𑀳𑀦𑁆𑀢𑀁 𑀨𑀡𑀁 𑀓𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀻’’𑀢𑀺. 𑀫𑀡𑀺𑀫𑀲𑁆𑀲 𑀓𑀡𑁆𑀞𑁂 𑀧𑀺𑀮𑀦𑁆𑀥𑀦𑀦𑁆𑀢𑀺 𑀫𑀡𑀺𑀁 𑀅𑀲𑁆𑀲 𑀓𑀡𑁆𑀞𑁂 𑀧𑀺𑀮𑀦𑁆𑀥𑀺𑀢𑀁, 𑀆𑀫𑀼𑀓𑁆𑀓𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀻𑀢𑀺 𑀢𑁂𑀦 𑀤𑁂𑀯𑀯𑀡𑁆𑀡𑁂𑀦 𑀆𑀕𑀦𑁆𑀢𑁆𑀯𑀸 𑀢𑀸𑀧𑀲𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀫𑀸𑀦𑁄 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀅𑀝𑁆𑀞𑀸𑀲𑀺.

𑀫𑀫𑀦𑁆𑀦𑀧𑀸𑀦𑀦𑁆𑀢𑀺 𑀫𑀫 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘. 𑀯𑀺𑀧𑀼𑀮𑀦𑁆𑀢𑀺 𑀩𑀳𑀼𑀮𑀁. 𑀉𑀴𑀸𑀭𑀦𑁆𑀢𑀺 𑀧𑀡𑀻𑀢𑀁. 𑀅𑀢𑀺𑀬𑀸𑀘𑀓𑁄𑀲𑀻𑀢𑀺 𑀅𑀢𑀺𑀯𑀺𑀬 𑀬𑀸𑀘𑀓𑁄, 𑀅𑀲𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀲𑀽𑀢𑀺 𑀢𑀭𑀼𑀡𑁄, 𑀣𑀸𑀫𑀲𑀫𑁆𑀧𑀦𑁆𑀦𑁄 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀧𑀼𑀭𑀺𑀲𑁄. 𑀲𑀓𑁆𑀔𑀭𑀸 𑀯𑀼𑀘𑁆𑀘𑀢𑀺 𑀓𑀸𑀴𑀲𑀺𑀮𑀸, 𑀢𑀢𑁆𑀣 𑀥𑁄𑀢𑁄 𑀅𑀲𑀺 ‘‘𑀲𑀓𑁆𑀔𑀭𑀥𑁄𑀢𑁄 𑀦𑀸𑀫𑀸’’𑀢𑀺 𑀯𑀼𑀘𑁆𑀘𑀢𑀺, 𑀲𑀓𑁆𑀔𑀭𑀥𑁄𑀢𑁄 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑀸𑀢𑀺 𑀲𑀓𑁆𑀔𑀭𑀥𑁄𑀢𑀧𑀸𑀡𑀺, 𑀧𑀸𑀲𑀸𑀡𑁂 𑀥𑁄𑀢𑀦𑀺𑀲𑀺𑀢𑀔𑀕𑁆𑀕𑀳𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀲𑁄 𑀅𑀲𑀺𑀳𑀢𑁆𑀣𑁄 𑀧𑀼𑀭𑀺𑀲𑁄 𑀢𑀸𑀲𑁂𑀬𑁆𑀬, 𑀏𑀯𑀁 𑀢𑀸𑀲𑁂𑀲𑀺 𑀫𑀁 𑀲𑁂𑀮𑀁 𑀬𑀸𑀘𑀫𑀸𑀦𑁄, 𑀫𑀡𑀺𑀁 𑀬𑀸𑀘𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀦 𑀢𑀁 𑀬𑀸𑀘𑁂𑀢𑀺 𑀢𑀁 𑀦 𑀬𑀸𑀘𑁂𑀬𑁆𑀬. 𑀓𑀢𑀭𑀁? 𑀬𑀲𑁆𑀲 𑀧𑀺𑀬𑀁 𑀚𑀺𑀕𑀻𑀲𑁂𑀢𑀺 𑀬𑀁 𑀅𑀲𑁆𑀲 𑀲𑀢𑁆𑀢𑀲𑁆𑀲 𑀧𑀺𑀬𑀦𑁆𑀢𑀺 𑀚𑀸𑀦𑁂𑀬𑁆𑀬.

𑀓𑀺𑀫𑀗𑁆𑀕𑀁 𑀧𑀦 𑀫𑀦𑀼𑀲𑁆𑀲𑀪𑀽𑀢𑀸𑀦𑀦𑁆𑀢𑀺 𑀫𑀦𑀼𑀲𑁆𑀲𑀪𑀽𑀢𑀸𑀦𑀁 𑀅𑀫𑀦𑀸𑀧𑀸𑀢𑀺 𑀓𑀺𑀫𑁂𑀯𑁂𑀢𑁆𑀣 𑀯𑀢𑁆𑀢𑀩𑁆𑀩𑀁.

𑁩𑁪𑁫. 𑀲𑀓𑀼𑀡𑀲𑀗𑁆𑀖𑀲𑁆𑀲 𑀲𑀤𑁆𑀤𑁂𑀦 𑀉𑀩𑁆𑀩𑀸𑀴𑁆𑀳𑁄𑀢𑀺 𑀲𑁄 𑀓𑀺𑀭 𑀲𑀓𑀼𑀡𑀲𑀗𑁆𑀖𑁄 𑀧𑀞𑀫𑀬𑀸𑀫𑀜𑁆𑀘 𑀧𑀘𑁆𑀙𑀺𑀫𑀬𑀸𑀫𑀜𑁆𑀘 𑀦𑀺𑀭𑀦𑁆𑀢𑀭𑀁 𑀲𑀤𑁆𑀤𑀫𑁂𑀯 𑀓𑀭𑁄𑀢𑀺, 𑀲𑁄 𑀪𑀺𑀓𑁆𑀔𑀼 𑀢𑁂𑀦 𑀲𑀤𑁆𑀤𑁂𑀦 𑀧𑀻𑀴𑀺𑀢𑁄 𑀳𑀼𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑁂𑀦𑀸𑀳 𑁋 ‘‘𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺.

𑀓𑀼𑀢𑁄 𑀘 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀕𑀘𑁆𑀙𑀲𑀻𑀢𑀺 𑀏𑀢𑁆𑀣 𑀦𑀺𑀲𑀺𑀦𑁆𑀦𑁄 𑀲𑁄 𑀪𑀺𑀓𑁆𑀔𑀼 𑀦 𑀆𑀕𑀘𑁆𑀙𑀢𑀺 𑀯𑀢𑁆𑀢𑀫𑀸𑀦𑀲𑀫𑀻𑀧𑁂 𑀧𑀦 𑀏𑀯𑀁 𑀯𑀢𑁆𑀢𑀼𑀁 𑀮𑀩𑁆𑀪𑀢𑀺. 𑀢𑁂𑀦𑀸𑀳 𑁋 ‘‘𑀓𑀼𑀢𑁄 𑀘 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀕𑀘𑁆𑀙𑀲𑀻’’𑀢𑀺, 𑀓𑀼𑀢𑁄 𑀆𑀕𑀢𑁄𑀲𑀻𑀢𑀺 𑀅𑀢𑁆𑀣𑁄. 𑀢𑀢𑁄 𑀅𑀳𑀁 𑀪𑀕𑀯𑀸 𑀆𑀕𑀘𑁆𑀙𑀸𑀫𑀻𑀢𑀺 𑀏𑀢𑁆𑀣𑀸𑀧𑀺 𑀲𑁄 𑀏𑀯 𑀦𑀬𑁄. 𑀉𑀩𑁆𑀩𑀸𑀴𑁆𑀳𑁄𑀢𑀺 𑀧𑀻𑀴𑀺𑀢𑁄, 𑀉𑀓𑁆𑀓𑀡𑁆𑀞𑀸𑀧𑀺𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀲𑁄 𑀲𑀓𑀼𑀡𑀲𑀗𑁆𑀖𑁄 ‘‘𑀪𑀺𑀓𑁆𑀔𑀼 𑀧𑀢𑁆𑀢𑀁 𑀬𑀸𑀘𑀢𑀻’’𑀢𑀺 𑀏𑀢𑁆𑀣 𑀦 𑀢𑁂 𑀲𑀓𑀼𑀡𑀸 𑀪𑀺𑀓𑁆𑀔𑀼𑀦𑁄 𑀯𑀘𑀦𑀁 𑀚𑀸𑀦𑀦𑁆𑀢𑀺, 𑀪𑀕𑀯𑀸 𑀧𑀦 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀬𑀣𑀸 𑀚𑀸𑀦𑀦𑁆𑀢𑀺 𑀢𑀣𑀸 𑀅𑀓𑀸𑀲𑀺.

𑁩𑁪𑁬. 𑀅𑀧𑀸𑀳𑀁 𑀢𑁂 𑀦 𑀚𑀸𑀦𑀸𑀫𑀻𑀢𑀺 𑀅𑀧𑀺 𑀅𑀳𑀁 𑀢𑁂 𑀚𑀦𑁂 ‘‘𑀓𑁂 𑀯𑀸 𑀇𑀫𑁂, 𑀓𑀲𑁆𑀲 𑀯𑀸 𑀇𑀫𑁂’’𑀢𑀺 𑀦 𑀚𑀸𑀦𑀸𑀫𑀺. 𑀲𑀗𑁆𑀕𑀫𑁆𑀫 𑀬𑀸𑀘𑀦𑁆𑀢𑀻𑀢𑀺 𑀲𑀫𑀸𑀕𑀦𑁆𑀢𑁆𑀯𑀸 𑀯𑀕𑁆𑀕𑀯𑀕𑁆𑀕𑀸 𑀳𑀼𑀢𑁆𑀯𑀸 𑀬𑀸𑀘𑀦𑁆𑀢𑀺. 𑀬𑀸𑀘𑀓𑁄 𑀅𑀧𑁆𑀧𑀺𑀬𑁄 𑀳𑁄𑀢𑀻𑀢𑀺 𑀬𑁄 𑀬𑀸𑀘𑀢𑀺 𑀲𑁄 𑀅𑀧𑁆𑀧𑀺𑀬𑁄 𑀳𑁄𑀢𑀺. 𑀬𑀸𑀘𑀁 𑀅𑀤𑀤𑀫𑀧𑁆𑀧𑀺𑀬𑁄𑀢𑀺 𑀬𑀸𑀘𑀦𑁆𑀢𑀺 𑀬𑀸𑀘𑀺𑀢𑀁 𑀯𑀼𑀘𑁆𑀘𑀢𑀺, 𑀬𑀸𑀘𑀺𑀢𑀫𑀢𑁆𑀣𑀁 𑀅𑀤𑀤𑀦𑁆𑀢𑁄𑀧𑀺 𑀅𑀧𑁆𑀧𑀺𑀬𑁄 𑀳𑁄𑀢𑀺. 𑀅𑀣 𑀯𑀸 𑀬𑀸𑀘𑀦𑁆𑀢𑀺 𑀬𑀸𑀘𑀦𑁆𑀢𑀲𑁆𑀲, 𑀅𑀤𑀤𑀫𑀧𑁆𑀧𑀺𑀬𑁄𑀢𑀺 𑀅𑀤𑁂𑀦𑁆𑀢𑁄 𑀅𑀧𑁆𑀧𑀺𑀬𑁄 𑀳𑁄𑀢𑀺. 𑀫𑀸 𑀫𑁂 𑀯𑀺𑀤𑁂𑀲𑁆𑀲𑀦𑀸 𑀅𑀳𑀽𑀢𑀺 𑀫𑀸 𑀫𑁂 𑀅𑀧𑁆𑀧𑀺𑀬𑀪𑀸𑀯𑁄 𑀅𑀳𑀼, 𑀅𑀳𑀁 𑀯𑀸 𑀢𑀯, 𑀢𑁆𑀯𑀁 𑀯𑀸 𑀫𑀫 𑀯𑀺𑀤𑁂𑀲𑁆𑀲𑁄 𑀅𑀧𑁆𑀧𑀺𑀬𑁄 𑀫𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑁩𑁪𑁭. 𑀤𑀼𑀲𑁆𑀲𑀁𑀳𑀭𑀸𑀦𑀻𑀢𑀺 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀳𑀺 𑀉𑀧𑀸𑀬𑁂𑀳𑀺 𑀤𑀼𑀓𑁆𑀔𑁂𑀦 𑀲𑀁𑀳𑀭𑀡𑀻𑀬𑀸𑀦𑀺.

𑁩𑁪𑁮-𑁯. 𑀲𑀜𑁆𑀜𑀸𑀘𑀺𑀓𑀸𑀬 𑀧𑀦 𑀪𑀺𑀓𑁆𑀔𑀼𑀦𑀸𑀢𑀺 𑀏𑀢𑁆𑀣 𑀲𑀜𑁆𑀜𑀸𑀘𑀺𑀓𑀸 𑀦𑀸𑀫 𑀲𑀬𑀁 𑀧𑀯𑀢𑁆𑀢𑀺𑀢𑀬𑀸𑀘𑀦𑀸 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘‘𑀲𑀜𑁆𑀜𑀸𑀘𑀺𑀓𑀸𑀬𑀸’’𑀢𑀺 𑀅𑀢𑁆𑀢𑀦𑁄 𑀬𑀸𑀘𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀬𑀁 𑀬𑀸𑀘𑀺𑀢𑀓𑁂𑀳𑀺 𑀉𑀧𑀓𑀭𑀡𑁂𑀳𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀲𑀸 𑀲𑀬𑀁𑀬𑀸𑀘𑀺𑀢𑀓𑁂𑀳𑀺 𑀓𑀬𑀺𑀭𑀫𑀸𑀦𑀸 𑀲𑀬𑀁 𑀬𑀸𑀘𑀺𑀢𑁆𑀯𑀸 𑀓𑀬𑀺𑀭𑀫𑀸𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀅𑀢𑁆𑀣𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀬𑀁 𑀬𑀸𑀘𑀺𑀢𑁆𑀯𑀸 𑀧𑀼𑀭𑀺𑀲𑀫𑁆𑀧𑀻’’𑀢𑀺 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁.

𑀉𑀮𑁆𑀮𑀺𑀢𑁆𑀢𑀸𑀢𑀺 𑀅𑀦𑁆𑀢𑁄𑀮𑀺𑀢𑁆𑀢𑀸. 𑀅𑀯𑀮𑀺𑀢𑁆𑀢𑀸𑀢𑀺 𑀩𑀳𑀺𑀮𑀺𑀢𑁆𑀢𑀸. 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸𑀢𑀺 𑀅𑀦𑁆𑀢𑀭𑀩𑀸𑀳𑀺𑀭𑀮𑀺𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀸𑀭𑀬𑀫𑀸𑀦𑁂𑀦𑀸𑀢𑀺 𑀇𑀫𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀓𑀸𑀭𑀸𑀧𑁂𑀦𑁆𑀢𑁂𑀦𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀏𑀯𑀜𑁆𑀳𑀺 𑀩𑁆𑀬𑀜𑁆𑀚𑀦𑀁 𑀲𑀫𑁂𑀢𑀺. 𑀬𑀲𑁆𑀫𑀸 𑀧𑀦 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀭𑁄𑀦𑁆𑀢𑁂𑀦𑀸𑀧𑀺 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀓𑀭𑁄𑀦𑁆𑀢𑁄 𑀯𑀸 𑀳𑁄𑀢𑀼 𑀓𑀸𑀭𑀸𑀧𑁂𑀦𑁆𑀢𑁄 𑀯𑀸 𑀉𑀪𑁄𑀧𑁂𑀢𑁂 ‘‘𑀓𑀸𑀭𑀬𑀫𑀸𑀦𑁂𑀦𑀸’’𑀢𑀺 𑀇𑀫𑀺𑀦𑀸𑀯 𑀧𑀤𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀭𑁄𑀦𑁆𑀢𑁄 𑀯𑀸 𑀓𑀸𑀭𑀸𑀧𑁂𑀦𑁆𑀢𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀧𑀦 𑀓𑀭𑁄𑀦𑁆𑀢𑁂𑀦 𑀯𑀸 𑀓𑀸𑀭𑀸𑀧𑁂𑀦𑁆𑀢𑁂𑀦 𑀯𑀸𑀢𑀺 𑀯𑀤𑁂𑀬𑁆𑀬, 𑀩𑁆𑀬𑀜𑁆𑀚𑀦𑀁 𑀯𑀺𑀮𑁄𑀫𑀺𑀢𑀁 𑀪𑀯𑁂𑀬𑁆𑀬, 𑀦 𑀳𑀺 𑀓𑀸𑀭𑀸𑀧𑁂𑀦𑁆𑀢𑁄 𑀓𑀭𑁄𑀦𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀫𑀢𑁆𑀢𑀫𑁂𑀯𑁂𑀢𑁆𑀣 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀢𑁆𑀢𑀼𑀤𑁆𑀤𑁂𑀲𑀦𑁆𑀢𑀺 ‘‘𑀫𑀬𑁆𑀳𑀁 𑀏𑀲𑀸’’𑀢𑀺 𑀏𑀯𑀁 𑀅𑀢𑁆𑀢𑀸 𑀉𑀤𑁆𑀤𑁂𑀲𑁄 𑀅𑀲𑁆𑀲𑀸𑀢𑀺 𑀅𑀢𑁆𑀢𑀼𑀤𑁆𑀤𑁂𑀲𑀸, 𑀢𑀁 𑀅𑀢𑁆𑀢𑀼𑀤𑁆𑀤𑁂𑀲𑀁. 𑀬𑀲𑁆𑀫𑀸 𑀧𑀦 𑀬𑀲𑁆𑀲𑀸 𑀅𑀢𑁆𑀢𑀸 𑀉𑀤𑁆𑀤𑁂𑀲𑁄 𑀲𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀳𑁄𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀢𑀼𑀤𑁆𑀤𑁂𑀲𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬𑀸’’𑀢𑀺 𑀆𑀳. 𑀧𑀫𑀸𑀡𑀺𑀓𑀸 𑀓𑀸𑀭𑁂𑀢𑀩𑁆𑀩𑀸𑀢𑀺 𑀧𑀫𑀸𑀡𑀬𑀼𑀢𑁆𑀢𑀸 𑀓𑀸𑀭𑁂𑀢𑀩𑁆𑀩𑀸. 𑀢𑀢𑁆𑀭𑀺𑀤𑀁 𑀧𑀫𑀸𑀡𑀦𑁆𑀢𑀺 𑀢𑀲𑁆𑀲𑀸 𑀓𑀼𑀝𑀺𑀬𑀸 𑀇𑀤𑀁 𑀧𑀫𑀸𑀡𑀁. 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸𑀢𑀺 𑀲𑀼𑀕𑀢𑀯𑀺𑀤𑀢𑁆𑀣𑀺 𑀦𑀸𑀫 𑀇𑀤𑀸𑀦𑀺 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀺𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄 𑀯𑀟𑁆𑀠𑀓𑀻𑀳𑀢𑁆𑀣𑁂𑀦 𑀤𑀺𑀬𑀟𑁆𑀠𑁄 𑀳𑀢𑁆𑀣𑁄 𑀳𑁄𑀢𑀺. 𑀩𑀸𑀳𑀺𑀭𑀺𑀫𑁂𑀦 𑀫𑀸𑀦𑁂𑀦𑀸𑀢𑀺 𑀓𑀼𑀝𑀺𑀬𑀸 𑀩𑀳𑀺𑀓𑀼𑀝𑁆𑀝𑀫𑀸𑀦𑁂𑀦 𑀤𑁆𑀯𑀸𑀤𑀲 𑀯𑀺𑀤𑀢𑁆𑀣𑀺𑀬𑁄, 𑀫𑀺𑀦𑀦𑁆𑀢𑁂𑀦 𑀧𑀦 𑀲𑀩𑁆𑀩𑀧𑀞𑀫𑀁 𑀤𑀺𑀦𑁆𑀦𑁄 𑀫𑀳𑀸𑀫𑀢𑁆𑀢𑀺𑀓𑀧𑀭𑀺𑀬𑀦𑁆𑀢𑁄 𑀦 𑀕𑀳𑁂𑀢𑀩𑁆𑀩𑁄. 𑀣𑀼𑀲𑀧𑀺𑀡𑁆𑀟𑀧𑀭𑀺𑀬𑀦𑁆𑀢𑁂𑀦 𑀫𑀺𑀦𑀺𑀢𑀩𑁆𑀩𑀁. 𑀣𑀼𑀲𑀧𑀺𑀡𑁆𑀟𑀲𑁆𑀲𑀉𑀧𑀭𑀺 𑀲𑁂𑀢𑀓𑀫𑁆𑀫𑀁 𑀅𑀩𑁆𑀩𑁄𑀳𑀸𑀭𑀺𑀓𑀁. 𑀲𑀘𑁂 𑀣𑀼𑀲𑀧𑀺𑀡𑁆𑀟𑁂𑀦 𑀅𑀦𑀢𑁆𑀣𑀺𑀓𑁄 𑀫𑀳𑀸𑀫𑀢𑁆𑀢𑀺𑀓𑀸𑀬 𑀏𑀯 𑀦𑀺𑀝𑁆𑀞𑀸𑀧𑁂𑀢𑀺, 𑀫𑀳𑀸𑀫𑀢𑁆𑀢𑀺𑀓𑀸𑀯 𑀧𑀭𑀺𑀘𑁆𑀙𑁂𑀤𑁄.

𑀢𑀺𑀭𑀺𑀬𑀦𑁆𑀢𑀺 𑀯𑀺𑀢𑁆𑀣𑀸𑀭𑀢𑁄. 𑀲𑀢𑁆𑀢𑀸𑀢𑀺 𑀲𑀢𑁆𑀢 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑁄. 𑀅𑀦𑁆𑀢𑀭𑀸𑀢𑀺 𑀇𑀫𑀲𑁆𑀲 𑀧𑀦 𑀅𑀬𑀁 𑀦𑀺𑀤𑁆𑀤𑁂𑀲𑁄, ‘‘𑀅𑀩𑁆𑀪𑀦𑁆𑀢𑀭𑀺𑀫𑁂𑀦 𑀫𑀸𑀦𑁂𑀦𑀸’’𑀢𑀺, 𑀓𑀼𑀝𑁆𑀝𑀲𑁆𑀲 𑀩𑀳𑀺 𑀅𑀦𑁆𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀺𑀫𑁂𑀦 𑀅𑀦𑁆𑀢𑁂𑀦 𑀫𑀺𑀦𑀺𑀬𑀫𑀸𑀦𑁂 𑀢𑀺𑀭𑀺𑀬𑀁 𑀲𑀢𑁆𑀢 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑁄 𑀧𑀫𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑁄 𑀧𑀦 𑀮𑁂𑀲𑀁 𑀑𑀟𑁆𑀟𑁂𑀦𑁆𑀢𑁄 𑀬𑀣𑀸𑀯𑀼𑀢𑁆𑀢𑀧𑁆𑀧𑀫𑀸𑀡𑀫𑁂𑀯 𑀓𑀭𑀺𑀲𑁆𑀲𑀸𑀫𑀻𑀢𑀺 𑀤𑀻𑀖𑀢𑁄 𑀏𑀓𑀸𑀤𑀲 𑀯𑀺𑀤𑀢𑁆𑀣𑀺𑀬𑁄 𑀢𑀺𑀭𑀺𑀬𑀁 𑀅𑀝𑁆𑀞 𑀯𑀺𑀤𑀢𑁆𑀣𑀺𑀬𑁄, 𑀤𑀻𑀖𑀢𑁄 𑀯𑀸 𑀢𑁂𑀭𑀲 𑀯𑀺𑀤𑀢𑁆𑀣𑀺𑀬𑁄 𑀢𑀺𑀭𑀺𑀬𑀁 𑀙 𑀯𑀺𑀤𑀢𑁆𑀣𑀺𑀬𑁄 𑀓𑀭𑁂𑀬𑁆𑀬, 𑀦 𑀯𑀝𑁆𑀝𑀢𑀺. 𑀏𑀓𑀢𑁄𑀪𑀸𑀕𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀳𑀺 𑀧𑀫𑀸𑀡𑀁 𑀅𑀢𑀺𑀓𑁆𑀓𑀦𑁆𑀢𑀫𑁂𑀯 𑀳𑁄𑀢𑀺. 𑀢𑀺𑀝𑁆𑀞𑀢𑀼 𑀯𑀺𑀤𑀢𑁆𑀣𑀺, 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀤𑀻𑀖𑀢𑁄 𑀯𑀸 𑀳𑀸𑀧𑁂𑀢𑁆𑀯𑀸 𑀢𑀺𑀭𑀺𑀬𑀁 𑀢𑀺𑀭𑀺𑀬𑀢𑁄 𑀯𑀸 𑀳𑀸𑀧𑁂𑀢𑁆𑀯𑀸 𑀤𑀻𑀖𑀁 𑀯𑀟𑁆𑀠𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑁄 𑀧𑀦 𑀯𑀸𑀤𑁄 𑀉𑀪𑀢𑁄 𑀯𑀟𑁆𑀠𑀦𑁂? 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀆𑀬𑀸𑀫𑀢𑁄 𑀯𑀸 𑀯𑀺𑀢𑁆𑀣𑀸𑀭𑀢𑁄 𑀯𑀸 𑀅𑀦𑁆𑀢𑀫𑀲𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸 𑀧𑀬𑁄𑀕𑁂 𑀤𑀼𑀓𑁆𑀓𑀝’’𑀦𑁆𑀢𑀺𑀆𑀤𑀺 (𑀧𑀸𑀭𑀸. 𑁩𑁫𑁩). 𑀬𑀣𑀸𑀯𑀼𑀢𑁆𑀢𑀧𑁆𑀧𑀫𑀸𑀡𑀸 𑀏𑀯 𑀧𑀦 𑀯𑀝𑁆𑀝𑀢𑀺. 𑀬𑀸 𑀧𑀦 𑀤𑀻𑀖𑀢𑁄 𑀲𑀝𑁆𑀞𑀺𑀳𑀢𑁆𑀣𑀸𑀧𑀺 𑀳𑁄𑀢𑀺 𑀢𑀺𑀭𑀺𑀬𑀁 𑀢𑀺𑀳𑀢𑁆𑀣𑀸 𑀯𑀸 𑀊𑀦𑀓𑀘𑀢𑀼𑀳𑀢𑁆𑀣𑀸 𑀯𑀸 𑀬𑀢𑁆𑀣 𑀧𑀫𑀸𑀡𑀬𑀼𑀢𑁆𑀢𑁄 𑀫𑀜𑁆𑀘𑁄 𑀇𑀢𑁄 𑀘𑀺𑀢𑁄 𑀘 𑀦 𑀧𑀭𑀺𑀯𑀢𑁆𑀢𑀢𑀺, 𑀅𑀬𑀁 𑀓𑀼𑀝𑀻𑀢𑀺 𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀘𑀢𑀼𑀳𑀢𑁆𑀣𑀯𑀺𑀢𑁆𑀣𑀸𑀭𑀸 𑀯𑀼𑀢𑁆𑀢𑀸, 𑀢𑀢𑁄 𑀳𑁂𑀝𑁆𑀞𑀸 𑀅𑀓𑀼𑀝𑀺. 𑀧𑀫𑀸𑀡𑀺𑀓𑀸𑀧𑀺 𑀧𑀦 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀯𑀸 𑀲𑀸𑀭𑀫𑁆𑀪𑀸 𑀯𑀸 𑀅𑀧𑀭𑀺𑀓𑁆𑀓𑀫𑀦𑀸 𑀯𑀸 𑀦 𑀯𑀝𑁆𑀝𑀢𑀺. 𑀧𑀫𑀸𑀡𑀺𑀓𑀸 𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀅𑀦𑀸𑀭𑀫𑁆𑀪𑀸 𑀲𑀧𑀭𑀺𑀓𑁆𑀓𑀫𑀦𑀸𑀯 𑀯𑀝𑁆𑀝𑀢𑀺. 𑀧𑀫𑀸𑀡𑀢𑁄 𑀊𑀦𑀢𑀭𑀫𑁆𑀧𑀺 𑀘𑀢𑀼𑀳𑀢𑁆𑀣𑀁 𑀧𑀜𑁆𑀘𑀳𑀢𑁆𑀣𑀫𑁆𑀧𑀺 𑀓𑀭𑁄𑀦𑁆𑀢𑁂𑀦 𑀤𑁂𑀲𑀺𑀢𑀯𑀢𑁆𑀣𑀼𑀓𑀸𑀯 𑀓𑀸𑀭𑁂𑀢𑀩𑁆𑀩𑀸. 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀜𑁆𑀘 𑀧𑀦 𑀓𑀭𑁄𑀦𑁆𑀢𑁄 𑀮𑁂𑀧𑀧𑀭𑀺𑀬𑁄𑀲𑀸𑀦𑁂 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺.

𑀢𑀢𑁆𑀣 𑀮𑁂𑀧𑁄 𑀘 𑀅𑀮𑁂𑀧𑁄 𑀘 𑀮𑁂𑀧𑁄𑀓𑀸𑀲𑁄 𑀘 𑀅𑀮𑁂𑀧𑁄𑀓𑀸𑀲𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀮𑁂𑀧𑁄𑀢𑀺 𑀤𑁆𑀯𑁂 𑀮𑁂𑀧𑀸 𑁋 𑀫𑀢𑁆𑀢𑀺𑀓𑀸𑀮𑁂𑀧𑁄 𑀘 𑀲𑀼𑀥𑀸𑀮𑁂𑀧𑁄 𑀘. 𑀞𑀧𑁂𑀢𑁆𑀯𑀸 𑀧𑀦 𑀇𑀫𑁂 𑀤𑁆𑀯𑁂 𑀮𑁂𑀧𑁂 𑀅𑀯𑀲𑁂𑀲𑁄 𑀪𑀲𑁆𑀫𑀕𑁄𑀫𑀬𑀸𑀤𑀺𑀪𑁂𑀤𑁄 𑀮𑁂𑀧𑁄, 𑀅𑀮𑁂𑀧𑁄. 𑀲𑀘𑁂𑀧𑀺 𑀓𑀮𑀮𑀮𑁂𑀧𑁄 𑀳𑁄𑀢𑀺, 𑀅𑀮𑀧𑁄 𑀏𑀯. 𑀮𑁂𑀧𑁄𑀓𑀸𑀲𑁄𑀢𑀺 𑀪𑀺𑀢𑁆𑀢𑀺𑀬𑁄 𑀘𑁂𑀯 𑀙𑀤𑀦𑀜𑁆𑀘, 𑀞𑀧𑁂𑀢𑁆𑀯𑀸 𑀧𑀦 𑀪𑀺𑀢𑁆𑀢𑀺𑀘𑁆𑀙𑀤𑀦𑁂 𑀅𑀯𑀲𑁂𑀲𑁄 𑀣𑀫𑁆𑀪𑀢𑀼𑀮𑀸𑀧𑀺𑀝𑁆𑀞𑀲𑀗𑁆𑀖𑀸𑀝𑀯𑀸𑀢𑀧𑀸𑀦𑀥𑀽𑀫𑀘𑁆𑀙𑀺𑀤𑁆𑀤𑀸𑀤𑀺 𑀅𑀮𑁂𑀧𑀸𑀭𑀳𑁄 𑀑𑀓𑀸𑀲𑁄 𑀲𑀩𑁆𑀩𑁄𑀧𑀺 𑀅𑀮𑁂𑀧𑁄𑀓𑀸𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀪𑀺𑀓𑁆𑀔𑀽 𑀅𑀪𑀺𑀦𑁂𑀢𑀩𑁆𑀩𑀸 𑀯𑀢𑁆𑀣𑀼𑀤𑁂𑀲𑀦𑀸𑀬𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀓𑀼𑀝𑀺𑀁 𑀓𑀸𑀭𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀢𑁆𑀣 𑀯𑀢𑁆𑀣𑀼𑀤𑁂𑀲𑀦𑀢𑁆𑀣𑀸𑀬 𑀪𑀺𑀓𑁆𑀔𑀽 𑀦𑁂𑀢𑀩𑁆𑀩𑀸. 𑀢𑁂𑀦 𑀓𑀼𑀝𑀺𑀓𑀸𑀭𑀓𑁂𑀦𑀸𑀢𑀺𑀆𑀤𑀺 𑀧𑀦 𑀬𑁂𑀦 𑀯𑀺𑀥𑀺𑀦𑀸 𑀢𑁂 𑀪𑀺𑀓𑁆𑀔𑀽 𑀅𑀪𑀺𑀦𑁂𑀢𑀩𑁆𑀩𑀸, 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀼𑀝𑀺𑀯𑀢𑁆𑀣𑀼𑀁 𑀲𑁄𑀥𑁂𑀢𑁆𑀯𑀸𑀢𑀺 𑀦 𑀯𑀺𑀲𑀫𑀁 𑀅𑀭𑀜𑁆𑀜𑀁 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁, 𑀓𑀼𑀝𑀺𑀯𑀢𑁆𑀣𑀼𑀁 𑀧𑀦 𑀧𑀞𑀫𑀫𑁂𑀯 𑀲𑁄𑀥𑁂𑀢𑁆𑀯𑀸 𑀲𑀫𑀢𑀮𑀁 𑀲𑀻𑀫𑀫𑀡𑁆𑀟𑀮𑀲𑀤𑀺𑀲𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺𑀢𑁆𑀯𑀸 𑀦𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄𑀢𑀺 𑀲𑀗𑁆𑀖𑁄 𑀏𑀯𑀁 𑀯𑀢𑁆𑀢𑀩𑁆𑀩𑁄 𑀅𑀲𑁆𑀲. 𑀧𑀭𑀢𑁄 𑀧𑀦 ‘‘𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸’’𑀢𑀺 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. 𑀦𑁄 𑀘𑁂 𑀲𑀩𑁆𑀩𑁄 𑀲𑀗𑁆𑀖𑁄 𑀉𑀲𑁆𑀲𑀳𑀢𑀻𑀢𑀺 𑀲𑀘𑁂 𑀲𑀩𑁆𑀩𑁄 𑀲𑀗𑁆𑀖𑁄 𑀦 𑀇𑀘𑁆𑀙𑀢𑀺, 𑀲𑀚𑁆𑀛𑀸𑀬𑀫𑀦𑀲𑀺𑀓𑀸𑀭𑀸𑀤𑀻𑀲𑀼 𑀉𑀬𑁆𑀬𑀼𑀢𑁆𑀢𑀸 𑀢𑁂 𑀢𑁂 𑀪𑀺𑀓𑁆𑀔𑀽 𑀳𑁄𑀦𑁆𑀢𑀺. 𑀲𑀸𑀭𑀫𑁆𑀪𑀁 𑀅𑀦𑀸𑀭𑀫𑁆𑀪𑀦𑁆𑀢𑀺 𑀲𑀉𑀧𑀤𑁆𑀤𑀯𑀁 𑀅𑀦𑀼𑀧𑀤𑁆𑀤𑀯𑀁. 𑀲𑀧𑀭𑀺𑀓𑁆𑀓𑀫𑀦𑀁 𑀅𑀧𑀭𑀺𑀓𑁆𑀓𑀫𑀦𑀦𑁆𑀢𑀺 𑀲𑀉𑀧𑀘𑀸𑀭𑀁 𑀅𑀦𑀼𑀧𑀘𑀸𑀭𑀁.

𑀧𑀢𑁆𑀢𑀓𑀮𑁆𑀮𑀦𑁆𑀢𑀺 𑀧𑀢𑁆𑀢𑁄 𑀓𑀸𑀮𑁄 𑀇𑀫𑀲𑁆𑀲 𑀑𑀮𑁄𑀓𑀦𑀲𑁆𑀲𑀸𑀢𑀺 𑀧𑀢𑁆𑀢𑀓𑀸𑀮𑀁, 𑀧𑀢𑁆𑀢𑀓𑀸𑀮𑀫𑁂𑀯 𑀧𑀢𑁆𑀢𑀓𑀮𑁆𑀮𑀁. 𑀇𑀤𑀜𑁆𑀘 𑀯𑀢𑁆𑀣𑀼𑀁𑀑𑀮𑁄𑀓𑀦𑀢𑁆𑀣𑀸𑀬 𑀲𑀫𑁆𑀫𑀼𑀢𑀺𑀓𑀫𑁆𑀫𑀁 𑀅𑀦𑀼𑀲𑀸𑀯𑀦𑀸𑀦𑀬𑁂𑀦 𑀑𑀮𑁄𑀓𑁂𑀢𑁆𑀯𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀧𑀭𑀢𑁄 𑀧𑀦 𑀯𑀢𑁆𑀣𑀼𑀤𑁂𑀲𑀦𑀸𑀓𑀫𑁆𑀫𑀁 𑀬𑀣𑀸𑀯𑀼𑀢𑁆𑀢𑀸𑀬 𑀏𑀯 𑀜𑀢𑁆𑀢𑀺𑀬𑀸 𑀘 𑀅𑀦𑀼𑀲𑀸𑀯𑀦𑀸𑀬 𑀘 𑀓𑀸𑀢𑀩𑁆𑀩𑀁, 𑀑𑀮𑁄𑀓𑁂𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺.

𑁩𑁫𑁩. 𑀓𑀺𑀧𑀺𑀮𑁆𑀮𑀺𑀓𑀸𑀦𑀦𑁆𑀢𑀺 𑀭𑀢𑁆𑀢𑀓𑀸𑀴𑀧𑀺𑀗𑁆𑀕𑀮𑀸𑀤𑀺𑀪𑁂𑀤𑀸𑀦𑀁 𑀬𑀸𑀲𑀁 𑀓𑀸𑀲𑀜𑁆𑀘𑀺 𑀓𑀺𑀧𑀺𑀮𑁆𑀮𑀺𑀓𑀸𑀦𑀁. 𑀓𑀺𑀧𑀻𑀮𑁆𑀮𑀓𑀸𑀦𑀦𑁆𑀢𑀺𑀧𑀺 𑀧𑀸𑀞𑁄. 𑀆𑀲𑀬𑁄𑀢𑀺 𑀦𑀺𑀩𑀤𑁆𑀥𑀯𑀲𑀦𑀝𑁆𑀞𑀸𑀦𑀁, 𑀬𑀣𑀸 𑀘 𑀓𑀺𑀧𑀺𑀮𑁆𑀮𑀺𑀓𑀸𑀦𑀁 𑀏𑀯𑀁 𑀉𑀧𑀘𑀺𑀓𑀸𑀤𑀻𑀦𑀫𑁆𑀧𑀺 𑀦𑀺𑀩𑀤𑁆𑀥𑀯𑀲𑀦𑀝𑁆𑀞𑀸𑀦𑀁𑀬𑁂𑀯 𑀆𑀲𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀢𑁆𑀣 𑀧𑀦 𑀢𑁂 𑀕𑁄𑀘𑀭𑀢𑁆𑀣𑀸𑀬 𑀆𑀕𑀦𑁆𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀲𑀩𑁆𑀩𑁂𑀲𑀫𑁆𑀧𑀺 𑀢𑀸𑀤𑀺𑀲𑁄 𑀲𑀜𑁆𑀘𑀭𑀡𑀧𑁆𑀧𑀤𑁂𑀲𑁄 𑀅𑀯𑀸𑀭𑀺𑀢𑁄, 𑀢𑀲𑁆𑀫𑀸 𑀢𑀢𑁆𑀣 𑀅𑀧𑀦𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀇𑀫𑀸𑀦𑀺 𑀢𑀸𑀯 𑀙 𑀞𑀸𑀦𑀸𑀦𑀺𑀲𑀢𑁆𑀢𑀸𑀦𑀼𑀤𑁆𑀤𑀬𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺.

𑀳𑀢𑁆𑀣𑀻𑀦𑀁 𑀯𑀸𑀢𑀺 𑀳𑀢𑁆𑀣𑀻𑀦𑀁 𑀧𑀦 𑀦𑀺𑀩𑀤𑁆𑀥𑀯𑀲𑀦𑀝𑁆𑀞𑀸𑀦𑀫𑁆𑀧𑀺 𑀦𑀺𑀩𑀤𑁆𑀥𑀕𑁄𑀘𑀭𑀝𑁆𑀞𑀸𑀦𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀲𑀻𑀳𑀸𑀤𑀻𑀦𑀁 𑀆𑀲𑀬𑁄 𑀘 𑀕𑁄𑀘𑀭𑀸𑀬 𑀧𑀓𑁆𑀓𑀫𑀦𑁆𑀢𑀸𑀦𑀁 𑀦𑀺𑀩𑀤𑁆𑀥𑀕𑀫𑀦𑀫𑀕𑁆𑀕𑁄 𑀘 𑀦 𑀯𑀝𑁆𑀝𑀢𑀺. 𑀏𑀢𑁂𑀲𑀁 𑀕𑁄𑀘𑀭𑀪𑀽𑀫𑀺 𑀦 𑀕𑀳𑀺𑀢𑀸. 𑀬𑁂𑀲𑀁 𑀓𑁂𑀲𑀜𑁆𑀘𑀻𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀯𑀸𑀴𑀸𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁. 𑀇𑀫𑀸𑀦𑀺 𑀲𑀢𑁆𑀢 𑀞𑀸𑀦𑀸𑀦𑀺 𑀲𑀧𑁆𑀧𑀝𑀺𑀪𑀬𑀸𑀦𑀺 𑀪𑀺𑀓𑁆𑀔𑀽𑀦𑀁 𑀆𑀭𑁄𑀕𑁆𑀬𑀢𑁆𑀣𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺. 𑀲𑁂𑀲𑀸𑀦𑀺 𑀦𑀸𑀦𑀸𑀉𑀧𑀤𑁆𑀤𑀯𑁂𑀳𑀺 𑀲𑀉𑀧𑀤𑁆𑀤𑀯𑀸𑀦𑀺. 𑀢𑀢𑁆𑀣 𑀧𑀼𑀩𑁆𑀩𑀡𑁆𑀡𑀦𑀺𑀲𑁆𑀲𑀺𑀢𑀦𑁆𑀢𑀺 𑀧𑀼𑀩𑁆𑀩𑀡𑁆𑀡𑀁 𑀦𑀺𑀲𑁆𑀲𑀺𑀢𑀁 𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁 𑀯𑀺𑀭𑀼𑀳𑀦𑀓𑀔𑁂𑀢𑁆𑀢𑀲𑀸𑀫𑀦𑁆𑀢𑀸 𑀞𑀺𑀢𑀁. 𑀏𑀲𑁂𑀯 𑀦𑀬𑁄 𑀅𑀧𑀭𑀡𑁆𑀡𑀦𑀺𑀲𑁆𑀲𑀺𑀢𑀸𑀤𑀻𑀲𑀼𑀧𑀺. 𑀏𑀢𑁆𑀣 𑀧𑀦 𑀅𑀩𑁆𑀪𑀸𑀖𑀸𑀢𑀦𑁆𑀢𑀺 𑀓𑀸𑀭𑀡𑀸𑀖𑀭𑀁 𑀯𑁂𑀭𑀺𑀖𑀭𑀁, 𑀘𑁄𑀭𑀸𑀦𑀁 𑀫𑀸𑀭𑀡𑀢𑁆𑀣𑀸𑀬 𑀓𑀢𑀦𑁆𑀢𑀺 𑀓𑀼𑀭𑀼𑀦𑁆𑀤𑀺𑀆𑀤𑀻𑀲𑀼.

𑀆𑀖𑀸𑀢𑀦𑀦𑁆𑀢𑀺 𑀥𑀫𑁆𑀫𑀕𑀦𑁆𑀥𑀺𑀓𑀸 𑀯𑀼𑀘𑁆𑀘𑀢𑀺. 𑀲𑀼𑀲𑀸𑀦𑀦𑁆𑀢𑀺 𑀫𑀳𑀸𑀲𑀼𑀲𑀸𑀦𑀁. 𑀲𑀁𑀲𑀭𑀡𑀦𑁆𑀢𑀺 𑀅𑀦𑀺𑀩𑁆𑀩𑀺𑀚𑁆𑀛𑀕𑀫𑀦𑀻𑀬𑁄 𑀕𑀢𑀧𑀘𑁆𑀘𑀸𑀕𑀢𑀫𑀕𑁆𑀕𑁄 𑀯𑀼𑀘𑁆𑀘𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀦 𑀲𑀓𑁆𑀓𑀸 𑀳𑁄𑀢𑀺 𑀬𑀣𑀸𑀬𑀼𑀢𑁆𑀢𑁂𑀦 𑀲𑀓𑀝𑁂𑀦𑀸𑀢𑀺 𑀤𑁆𑀯𑀻𑀳𑀺 𑀩𑀮𑀺𑀩𑀤𑁆𑀤𑁂𑀳𑀺 𑀬𑀼𑀢𑁆𑀢𑁂𑀦 𑀲𑀓𑀝𑁂𑀦 𑀏𑀓𑀁 𑀘𑀓𑁆𑀓𑀁 𑀦𑀺𑀩𑁆𑀩𑁄𑀤𑀓𑀧𑀢𑀦𑀝𑁆𑀞𑀸𑀦𑁂 𑀏𑀓𑀁 𑀩𑀳𑀺 𑀓𑀢𑁆𑀯𑀸 𑀆𑀯𑀺𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀘𑀢𑀽𑀳𑀺 𑀬𑀼𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀫𑀦𑁆𑀢𑀸 𑀦𑀺𑀲𑁆𑀲𑁂𑀡𑀺𑀬𑀸 𑀅𑀦𑀼𑀧𑀭𑀺𑀕𑀦𑁆𑀢𑀼𑀦𑁆𑀢𑀺 𑀦𑀺𑀲𑁆𑀲𑁂𑀡𑀺𑀬𑀁 𑀞𑀢𑁆𑀯𑀸 𑀕𑁂𑀳𑀁 𑀙𑀸𑀤𑁂𑀦𑁆𑀢𑁂𑀳𑀺 𑀦 𑀲𑀓𑁆𑀓𑀸 𑀳𑁄𑀢𑀺 𑀲𑀫𑀦𑁆𑀢𑀸 𑀦𑀺𑀲𑁆𑀲𑁂𑀡𑀺𑀬𑀸 𑀆𑀯𑀺𑀚𑁆𑀚𑀺𑀢𑀼𑀁. 𑀇𑀢𑀺 𑀏𑀯𑀭𑀽𑀧𑁂 𑀲𑀸𑀭𑀫𑁆𑀪𑁂 𑀘 𑀅𑀧𑀭𑀺𑀓𑁆𑀓𑀫𑀦𑁂 𑀘 𑀞𑀸𑀦𑁂 𑀦 𑀓𑀸𑀭𑁂𑀢𑀩𑁆𑀩𑀸. 𑀅𑀦𑀸𑀭𑀫𑁆𑀪𑁂 𑀧𑀦 𑀲𑀧𑀭𑀺𑀓𑁆𑀓𑀫𑀦𑁂 𑀓𑀸𑀭𑁂𑀢𑀩𑁆𑀩𑀸, 𑀢𑀁 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯.

𑀧𑀼𑀦 𑀲𑀜𑁆𑀜𑀸𑀘𑀺𑀓𑀸 𑀦𑀸𑀫𑀸𑀢𑀺 𑀏𑀯𑀫𑀸𑀤𑀺 ‘‘𑀲𑀸𑀭𑀫𑁆𑀪𑁂 𑀘𑁂 𑀪𑀺𑀓𑁆𑀔𑀼 𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑀭𑀺𑀓𑁆𑀓𑀫𑀦𑁂 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀸𑀭𑁂𑀬𑁆𑀬𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀲𑀁𑀬𑀸𑀘𑀺𑀓𑀸𑀤𑀻𑀦𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀧𑀬𑁄𑀕𑁂 𑀤𑀼𑀓𑁆𑀓𑀝𑀦𑁆𑀢𑀺 𑀏𑀯𑀁 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀯𑀸 𑀓𑀼𑀝𑀺𑀁 𑀓𑀸𑀭𑁂𑀲𑁆𑀲𑀸𑀫𑀻𑀢𑀺 𑀅𑀭𑀜𑁆𑀜𑀢𑁄 𑀭𑀼𑀓𑁆𑀔𑀸 𑀳𑀭𑀡𑀢𑁆𑀣𑀸𑀬 𑀯𑀸𑀲𑀺𑀁 𑀯𑀸 𑀨𑀭𑀲𑀼𑀁 𑀯𑀸 𑀦𑀺𑀲𑁂𑀢𑀺 𑀤𑀼𑀓𑁆𑀓𑀝𑀁, 𑀅𑀭𑀜𑁆𑀜𑀁 𑀧𑀯𑀺𑀲𑀢𑀺 𑀤𑀼𑀓𑁆𑀓𑀝𑀁, 𑀢𑀢𑁆𑀣 𑀅𑀮𑁆𑀮𑀢𑀺𑀡𑀸𑀦𑀺 𑀙𑀺𑀦𑁆𑀤𑀢𑀺 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀼𑀓𑁆𑀔𑀸𑀦𑀺 𑀙𑀺𑀦𑁆𑀤𑀢𑀺 𑀤𑀼𑀓𑁆𑀓𑀝𑀁. 𑀭𑀼𑀓𑁆𑀔𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀽𑀫𑀺𑀁 𑀲𑁄𑀥𑁂𑀢𑀺 𑀔𑀡𑀢𑀺, 𑀧𑀁𑀲𑀼𑀁 𑀉𑀤𑁆𑀥𑀭𑀢𑀺, 𑀘𑀺𑀦𑀸𑀢𑀺; 𑀏𑀯𑀁 𑀬𑀸𑀯 𑀧𑀸𑀘𑀻𑀭𑀁 𑀩𑀦𑁆𑀥𑀢𑀺 𑀢𑀸𑀯 𑀧𑀼𑀩𑁆𑀩𑀧𑀬𑁄𑀕𑁄 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀼𑀩𑁆𑀩𑀧𑀬𑁄𑀕𑁂 𑀲𑀩𑁆𑀩𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀤𑀼𑀓𑁆𑀓𑀝𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀁, 𑀢𑀢𑁄 𑀧𑀝𑁆𑀞𑀸𑀬 𑀲𑀳𑀧𑀬𑁄𑀕𑁄 𑀦𑀸𑀫. 𑀢𑀢𑁆𑀣 𑀣𑀫𑁆𑀪𑁂𑀳𑀺 𑀓𑀸𑀢𑀩𑁆𑀩𑀸𑀬 𑀣𑀫𑁆𑀪𑀁 𑀉𑀲𑁆𑀲𑀸𑀧𑁂𑀢𑀺, 𑀤𑀼𑀓𑁆𑀓𑀝𑀁. 𑀇𑀝𑁆𑀞𑀓𑀸𑀳𑀺 𑀘𑀺𑀦𑀺𑀢𑀩𑁆𑀩𑀸𑀬 𑀇𑀝𑁆𑀞𑀓𑀁 𑀆𑀘𑀺𑀦𑀸𑀢𑀺, 𑀤𑀼𑀓𑁆𑀓𑀝𑀁. 𑀏𑀯𑀁 𑀬𑀁 𑀬𑀁 𑀉𑀧𑀓𑀭𑀡𑀁 𑀬𑁄𑀚𑁂𑀢𑀺, 𑀲𑀩𑁆𑀩𑀢𑁆𑀣 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀢𑀘𑁆𑀙𑀦𑁆𑀢𑀲𑁆𑀲 𑀳𑀢𑁆𑀣𑀯𑀸𑀭𑁂 𑀳𑀢𑁆𑀣𑀯𑀸𑀭𑁂 𑀢𑀤𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀁. 𑀏𑀯𑀁 𑀓𑀢𑀁 𑀧𑀦 𑀤𑀸𑀭𑀼𑀓𑀼𑀝𑁆𑀝𑀺𑀓𑀁 𑀯𑀸 𑀇𑀝𑁆𑀞𑀓𑀓𑀼𑀝𑁆𑀝𑀺𑀓𑀁 𑀯𑀸 𑀲𑀺𑀮𑀸𑀓𑀼𑀝𑁆𑀝𑀺𑀓𑀁 𑀯𑀸 𑀅𑀦𑁆𑀢𑀫𑀲𑁄 𑀧𑀡𑁆𑀡𑀲𑀸𑀮𑀫𑁆𑀧𑀺 𑀲𑀪𑀺𑀢𑁆𑀢𑀺𑀘𑁆𑀙𑀤𑀦𑀁 𑀮𑀺𑀫𑁆𑀧𑀺𑀲𑁆𑀲𑀸𑀫𑀻𑀢𑀺 𑀲𑀼𑀥𑀸𑀬 𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸 𑀮𑀺𑀫𑁆𑀧𑀦𑁆𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀬𑀸𑀯 𑀣𑀼𑀮𑁆𑀮𑀘𑁆𑀘𑀬𑀁 𑀦 𑀳𑁄𑀢𑀺, 𑀢𑀸𑀯 𑀤𑀼𑀓𑁆𑀓𑀝𑀁. 𑀏𑀢𑀁 𑀧𑀦 𑀤𑀼𑀓𑁆𑀓𑀝𑀁 𑀫𑀳𑀸𑀮𑁂𑀧𑁂𑀦𑁂𑀯 𑀯𑀝𑁆𑀝𑀢𑀺, 𑀲𑁂𑀢𑀭𑀢𑁆𑀢𑀯𑀡𑁆𑀡𑀓𑀭𑀡𑁂 𑀯𑀸 𑀘𑀺𑀢𑁆𑀢𑀓𑀫𑁆𑀫𑁂 𑀯𑀸 𑀅𑀦𑀸𑀧𑀢𑁆𑀢𑀺.

𑀏𑀓𑀁 𑀧𑀺𑀡𑁆𑀟𑀁 𑀅𑀦𑀸𑀕𑀢𑁂𑀢𑀺 𑀬𑁄 𑀲𑀩𑁆𑀩𑀧𑀘𑁆𑀙𑀺𑀫𑁄 𑀏𑀓𑁄 𑀮𑁂𑀧𑀧𑀺𑀡𑁆𑀟𑁄, 𑀢𑀁 𑀏𑀓𑀁 𑀧𑀺𑀡𑁆𑀟𑀁 𑀅𑀲𑀫𑁆𑀧𑀢𑁆𑀢𑁂 𑀓𑀼𑀝𑀺𑀓𑀫𑁆𑀫𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀇𑀤𑀸𑀦𑀺 𑀤𑁆𑀯𑀻𑀳𑀺 𑀧𑀺𑀡𑁆𑀟𑁂𑀳𑀺 𑀦𑀺𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀢𑀻𑀢𑀺 𑀢𑁂𑀲𑀼 𑀧𑀞𑀫𑀧𑀺𑀡𑁆𑀟𑀤𑀸𑀦𑁂 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺.

𑀢𑀲𑁆𑀫𑀺𑀁 𑀧𑀺𑀡𑁆𑀟𑁂 𑀆𑀕𑀢𑁂𑀢𑀺 𑀬𑀁 𑀏𑀓𑀁 𑀧𑀺𑀡𑁆𑀟𑀁 𑀅𑀦𑀸𑀕𑀢𑁂 𑀓𑀼𑀝𑀺𑀓𑀫𑁆𑀫𑁂 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀯𑀲𑀸𑀦𑀧𑀺𑀡𑁆𑀟𑁂 𑀆𑀕𑀢𑁂 𑀤𑀺𑀦𑁆𑀦𑁂 𑀞𑀧𑀺𑀢𑁂 𑀮𑁂𑀧𑀲𑁆𑀲 𑀖𑀝𑀺𑀢𑀢𑁆𑀢𑀸 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀏𑀯𑀁 𑀮𑁂𑀫𑁆𑀧𑀦𑁆𑀢𑀲𑁆𑀲 𑀘 𑀅𑀦𑁆𑀢𑁄𑀮𑁂𑀧𑁂 𑀯𑀸 𑀅𑀦𑁆𑀢𑁄𑀮𑁂𑀧𑁂𑀦 𑀲𑀤𑁆𑀥𑀺𑀁 𑀪𑀺𑀢𑁆𑀢𑀺𑀜𑁆𑀘 𑀙𑀤𑀦𑀜𑁆𑀘 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀖𑀝𑀺𑀢𑁂 𑀩𑀳𑀺𑀮𑁂𑀧𑁂 𑀯𑀸 𑀩𑀳𑀺𑀮𑁂𑀧𑁂𑀦 𑀲𑀤𑁆𑀥𑀺𑀁 𑀖𑀝𑀺𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑀘𑁂 𑀧𑀦 𑀤𑁆𑀯𑀸𑀭𑀩𑀤𑁆𑀥𑀁 𑀯𑀸 𑀯𑀸𑀢𑀧𑀸𑀦𑀁 𑀯𑀸 𑀅𑀝𑁆𑀞𑀧𑁂𑀢𑁆𑀯𑀸𑀯 𑀫𑀢𑁆𑀢𑀺𑀓𑀸𑀬 𑀮𑀺𑀫𑁆𑀧𑀢𑀺, 𑀢𑀲𑁆𑀫𑀺𑀜𑁆𑀘 𑀢𑀲𑁆𑀲𑁄𑀓𑀸𑀲𑀁 𑀧𑀼𑀦 𑀯𑀟𑁆𑀠𑁂𑀢𑁆𑀯𑀸 𑀯𑀸 𑀅𑀯𑀟𑁆𑀠𑁂𑀢𑁆𑀯𑀸 𑀯𑀸 𑀞𑀧𑀺𑀢𑁂 𑀮𑁂𑀧𑁄 𑀦 𑀖𑀝𑀻𑀬𑀢𑀺 𑀭𑀓𑁆𑀔𑀢𑀺 𑀢𑀸𑀯, 𑀧𑀼𑀦 𑀮𑀺𑀫𑁆𑀧𑀦𑁆𑀢𑀲𑁆𑀲 𑀧𑀦 𑀖𑀝𑀺𑀢𑀫𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑀘𑁂 𑀢𑀁 𑀞𑀧𑀺𑀬𑀫𑀸𑀦𑀁 𑀧𑀞𑀫𑀁 𑀤𑀺𑀦𑁆𑀦𑀮𑁂𑀧𑁂𑀦 𑀲𑀤𑁆𑀥𑀺𑀁 𑀦𑀺𑀭𑀦𑁆𑀢𑀭𑀫𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀧𑀞𑀫𑀫𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀉𑀧𑀘𑀺𑀓𑀸𑀫𑁄𑀘𑀦𑀢𑁆𑀣𑀁 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑁂𑀦 𑀅𑀧𑁆𑀧𑀢𑁆𑀢𑀘𑁆𑀙𑀤𑀦𑀁 𑀓𑀢𑁆𑀯𑀸 𑀪𑀺𑀢𑁆𑀢𑀺𑀁 𑀮𑀺𑀫𑁆𑀧𑀢𑀺, 𑀅𑀦𑀸𑀧𑀢𑁆𑀢𑀺. 𑀉𑀧𑀘𑀺𑀓𑀸𑀫𑁄𑀘𑀦𑀢𑁆𑀣𑀫𑁂𑀯 𑀳𑁂𑀝𑁆𑀞𑀸 𑀧𑀸𑀲𑀸𑀡𑀓𑀼𑀝𑁆𑀝𑀁 𑀓𑀢𑁆𑀯𑀸 𑀢𑀁 𑀅𑀮𑀺𑀫𑁆𑀧𑀺𑀢𑁆𑀯𑀸 𑀉𑀧𑀭𑀺 𑀮𑀺𑀫𑁆𑀧𑀢𑀺, 𑀮𑁂𑀧𑁄 𑀦 𑀖𑀝𑀺𑀬𑀢𑀺 𑀦𑀸𑀫, 𑀅𑀦𑀸𑀧𑀢𑁆𑀢𑀺𑀬𑁂𑀯.

𑀇𑀝𑁆𑀞𑀓𑀓𑀼𑀝𑁆𑀝𑀺𑀓𑀸𑀬 𑀇𑀝𑁆𑀞𑀓𑀸𑀳𑀺𑀬𑁂𑀯 𑀯𑀸𑀢𑀧𑀸𑀦𑁂 𑀘 𑀥𑀽𑀫𑀦𑁂𑀢𑁆𑀢𑀸𑀦𑀺 𑀘 𑀓𑀭𑁄𑀢𑀺, 𑀮𑁂𑀧𑀖𑀝𑀦𑁂𑀦𑁂𑀯 𑀆𑀧𑀢𑁆𑀢𑀺. 𑀧𑀡𑁆𑀡𑀲𑀸𑀮𑀁 𑀮𑀺𑀫𑁆𑀧𑀢𑀺, 𑀮𑁂𑀧𑀖𑀝𑀦𑁂𑀦𑁂𑀯 𑀆𑀧𑀢𑁆𑀢𑀺. 𑀢𑀢𑁆𑀣 𑀆𑀮𑁄𑀓𑀢𑁆𑀣𑀸𑀬 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀮𑀺𑀫𑁆𑀧𑀢𑀺, 𑀮𑁂𑀧𑁄 𑀦 𑀖𑀝𑀻𑀬𑀢𑀺 𑀦𑀸𑀫, 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀲𑀘𑁂 ‘‘𑀯𑀸𑀢𑀧𑀸𑀦𑀁 𑀮𑀤𑁆𑀥𑀸 𑀏𑀢𑁆𑀣 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀓𑀭𑁄𑀢𑀺, 𑀯𑀸𑀢𑀧𑀸𑀦𑁂 𑀞𑀧𑀺𑀢𑁂 𑀮𑁂𑀧𑀖𑀝𑀦𑁂𑀦 𑀆𑀧𑀢𑁆𑀢𑀺. 𑀲𑀘𑁂 𑀫𑀢𑁆𑀢𑀺𑀓𑀸𑀬 𑀓𑀼𑀝𑁆𑀝𑀁 𑀓𑀭𑁄𑀢𑀺, 𑀙𑀤𑀦𑀮𑁂𑀧𑁂𑀦 𑀲𑀤𑁆𑀥𑀺𑀁 𑀖𑀝𑀦𑁂 𑀆𑀧𑀢𑁆𑀢𑀺. 𑀏𑀓𑁄 𑀏𑀓𑀧𑀺𑀡𑁆𑀟𑀸𑀯𑀲𑁂𑀲𑀁 𑀓𑀢𑁆𑀯𑀸 𑀞𑀧𑁂𑀢𑀺, 𑀅𑀜𑁆𑀜𑁄 𑀢𑀁 𑀤𑀺𑀲𑁆𑀯𑀸 ‘‘𑀤𑀼𑀓𑁆𑀓𑀢𑀁 𑀇𑀤’’𑀦𑁆𑀢𑀺 𑀯𑀢𑁆𑀢𑀲𑀻𑀲𑁂𑀦 𑀮𑀺𑀫𑁆𑀧𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺.

𑁩𑁫𑁪. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀻𑀢𑀺 𑀏𑀯𑀫𑀸𑀤𑀻𑀦𑀺 𑀙𑀢𑁆𑀢𑀺𑀁𑀲 𑀘𑀢𑀼𑀓𑁆𑀓𑀸𑀦𑀺 𑀆𑀧𑀢𑁆𑀢𑀺𑀪𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺, 𑀢𑀢𑁆𑀣 𑀲𑀸𑀭𑀫𑁆𑀪𑀸𑀬 𑀤𑀼𑀓𑁆𑀓𑀝𑀁, 𑀅𑀧𑀭𑀺𑀓𑁆𑀓𑀫𑀦𑀸𑀬 𑀤𑀼𑀓𑁆𑀓𑀝𑀁, 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀏𑀢𑁂𑀲𑀁 𑀯𑀲𑁂𑀦 𑀯𑁄𑀫𑀺𑀲𑁆𑀲𑀓𑀸𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑁩𑁫𑁫. 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀦𑁆𑀢𑀺𑀆𑀤𑀻𑀲𑀼 𑀘 𑀤𑁆𑀯𑀻𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁬𑁧. 𑀲𑁄 𑀘𑁂 𑀯𑀺𑀧𑁆𑀧𑀓𑀢𑁂 𑀆𑀕𑀘𑁆𑀙𑀢𑀻𑀢𑀺𑀆𑀤𑀻𑀲𑀼 𑀧𑀦 𑀅𑀬𑀁 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄. 𑀲𑁄𑀢𑀺 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑀪𑀺𑀓𑁆𑀔𑀼. 𑀯𑀺𑀧𑁆𑀧𑀓𑀢𑁂𑀢𑀺 𑀅𑀦𑀺𑀝𑁆𑀞𑀺𑀢𑁂 𑀓𑀼𑀝𑀺𑀓𑀫𑁆𑀫𑁂. 𑀅𑀜𑁆𑀜𑀲𑁆𑀲 𑀯𑀸 𑀤𑀸𑀢𑀩𑁆𑀩𑀸𑀢𑀺 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀘𑀚𑀺𑀢𑁆𑀯𑀸 𑀤𑀸𑀢𑀩𑁆𑀩𑀸. 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀢𑀩𑁆𑀩𑀸𑀢𑀺 𑀓𑀺𑀢𑁆𑀢𑀓𑁂𑀦 𑀪𑀺𑀦𑁆𑀦𑀸 𑀳𑁄𑀢𑀺, 𑀲𑀘𑁂 𑀣𑀫𑁆𑀪𑀸 𑀪𑀽𑀫𑀺𑀬𑀁 𑀦𑀺𑀔𑀸𑀢𑀸, 𑀉𑀤𑁆𑀥𑀭𑀺𑀢𑀩𑁆𑀩𑀸. 𑀲𑀘𑁂 𑀧𑀸𑀲𑀸𑀡𑀸𑀦𑀁 𑀉𑀧𑀭𑀺 𑀞𑀧𑀺𑀢𑀸, 𑀅𑀧𑀦𑁂𑀢𑀩𑁆𑀩𑀸. 𑀇𑀝𑁆𑀞𑀓𑀘𑀺𑀢𑀸𑀬 𑀬𑀸𑀯 𑀫𑀗𑁆𑀕𑀮𑀺𑀝𑁆𑀞𑀓𑀸 𑀢𑀸𑀯 𑀓𑀼𑀝𑁆𑀝𑀸 𑀅𑀧𑀘𑀺𑀦𑀺𑀢𑀩𑁆𑀩𑀸. 𑀲𑀗𑁆𑀔𑁂𑀧𑀢𑁄 𑀪𑀽𑀫𑀺𑀲𑀫𑀁 𑀓𑀢𑁆𑀯𑀸 𑀯𑀺𑀦𑀸𑀲𑀺𑀢𑀸 𑀪𑀺𑀦𑁆𑀦𑀸 𑀳𑁄𑀢𑀺, 𑀪𑀽𑀫𑀺𑀢𑁄 𑀉𑀧𑀭𑀺 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑁂𑀧𑀺 𑀞𑀺𑀢𑁂 𑀅𑀪𑀺𑀦𑁆𑀦𑀸𑀯. 𑀲𑁂𑀲𑀁 𑀲𑀩𑁆𑀩𑀘𑀢𑀼𑀓𑁆𑀓𑁂𑀲𑀼 𑀧𑀸𑀓𑀝𑀫𑁂𑀯. 𑀦 𑀳𑁂𑀢𑁆𑀣 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀢𑁆𑀣𑀺, 𑀬𑀁 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀁 𑀲𑀺𑀬𑀸.

𑁩𑁬𑁩. 𑀅𑀢𑁆𑀢𑀦𑀸 𑀯𑀺𑀧𑁆𑀧𑀓𑀢𑀦𑁆𑀢𑀺𑀆𑀤𑀻𑀲𑀼 𑀧𑀦 𑀅𑀢𑁆𑀢𑀦𑀸 𑀆𑀭𑀤𑁆𑀥𑀁 𑀓𑀼𑀝𑀺𑀁. 𑀅𑀢𑁆𑀢𑀦𑀸 𑀧𑀭𑀺𑀬𑁄𑀲𑀸𑀧𑁂𑀢𑀻𑀢𑀺 𑀫𑀳𑀸𑀫𑀢𑁆𑀢𑀺𑀓𑀸𑀬 𑀯𑀸 𑀣𑀼𑀲𑀫𑀢𑁆𑀢𑀺𑀓𑀸𑀬 𑀯𑀸 𑀬𑀸𑀬 𑀓𑀢𑀁 𑀧𑀭𑀺𑀬𑁄𑀲𑀺𑀢𑀪𑀸𑀯𑀁 𑀧𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀸𑀬 𑀅𑀯𑀲𑀸𑀦𑀧𑀺𑀡𑁆𑀟𑀁 𑀤𑁂𑀦𑁆𑀢𑁄 𑀧𑀭𑀺𑀬𑁄𑀲𑀸𑀧𑁂𑀢𑀺.

𑀧𑀭𑁂𑀳𑀺 𑀧𑀭𑀺𑀬𑁄𑀲𑀸𑀧𑁂𑀢𑀻𑀢𑀺 𑀅𑀢𑁆𑀢𑀦𑁄𑀯 𑀅𑀢𑁆𑀣𑀸𑀬 𑀧𑀭𑁂𑀳𑀺 𑀧𑀭𑀺𑀬𑁄𑀲𑀸𑀧𑁂𑀢𑀺. 𑀅𑀢𑁆𑀢𑀦𑀸 𑀯𑀸 𑀳𑀺 𑀯𑀺𑀧𑁆𑀧𑀓𑀢𑀸 𑀳𑁄𑀢𑀼 𑀧𑀭𑁂𑀳𑀺 𑀯𑀸 𑀉𑀪𑀬𑁂𑀳𑀺 𑀯𑀸, 𑀢𑀁 𑀘𑁂 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀅𑀢𑁆𑀢𑀦𑀸 𑀯𑀸 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀧𑀭𑁂𑀳𑀺 𑀯𑀸 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀅𑀢𑁆𑀢𑀦𑀸 𑀘 𑀧𑀭𑁂𑀳𑀺 𑀘𑀸𑀢𑀺 𑀬𑀼𑀕𑀦𑀤𑁆𑀥𑀁 𑀯𑀸 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄𑀬𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄.

𑀓𑀼𑀭𑀼𑀦𑁆𑀤𑀺𑀬𑀁𑀧𑀦 𑀯𑀼𑀢𑁆𑀢𑀁 𑁋 ‘‘𑀤𑁆𑀯𑁂 𑀢𑀬𑁄 𑀪𑀺𑀓𑁆𑀔𑀽 ‘𑀏𑀓𑀢𑁄 𑀯𑀲𑀺𑀲𑁆𑀲𑀸𑀫𑀸’𑀢𑀺 𑀓𑀭𑁄𑀦𑁆𑀢𑀺, 𑀭𑀓𑁆𑀔𑀢𑀺 𑀢𑀸𑀯, 𑀅𑀯𑀺𑀪𑀢𑁆𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. ‘𑀇𑀤𑀁 𑀞𑀸𑀦𑀁 𑀢𑀯, 𑀇𑀤𑀁 𑀫𑀫𑀸’𑀢𑀺 𑀯𑀺𑀪𑀚𑀺𑀢𑁆𑀯𑀸 𑀓𑀭𑁄𑀦𑁆𑀢𑀺 𑀆𑀧𑀢𑁆𑀢𑀺. 𑀲𑀸𑀫𑀡𑁂𑀭𑁄 𑀘 𑀪𑀺𑀓𑁆𑀔𑀼 𑀘 𑀏𑀓𑀢𑁄 𑀓𑀭𑁄𑀦𑁆𑀢𑀺, 𑀬𑀸𑀯 𑀅𑀯𑀺𑀪𑀢𑁆𑀢𑀸 𑀢𑀸𑀯 𑀭𑀓𑁆𑀔𑀢𑀺. 𑀧𑀼𑀭𑀺𑀫𑀦𑀬𑁂𑀦 𑀯𑀺𑀪𑀚𑀺𑀢𑁆𑀯𑀸 𑀓𑀭𑁄𑀦𑁆𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀆𑀧𑀢𑁆𑀢𑀻’’𑀢𑀺.

𑁩𑁬𑁪. 𑀅𑀦𑀸𑀧𑀢𑁆𑀢𑀺 𑀮𑁂𑀡𑁂𑀢𑀺𑀆𑀤𑀻𑀲𑀼 𑀮𑁂𑀡𑀁 𑀫𑀳𑀦𑁆𑀢𑀫𑁆𑀧𑀺 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀦 𑀳𑁂𑀢𑁆𑀣 𑀮𑁂𑀧𑁄 𑀖𑀝𑀻𑀬𑀢𑀺. 𑀕𑀼𑀳𑀫𑁆𑀧𑀺 𑀇𑀝𑁆𑀞𑀓𑀸𑀕𑀼𑀳𑀁 𑀯𑀸 𑀲𑀺𑀮𑀸𑀕𑀼𑀳𑀁 𑀯𑀸 𑀤𑀸𑀭𑀼𑀕𑀼𑀳𑀁 𑀯𑀸 𑀪𑀽𑀫𑀺𑀕𑀼𑀳𑀁 𑀯𑀸 𑀫𑀳𑀦𑁆𑀢𑀫𑁆𑀧𑀺 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀢𑀺𑀡𑀓𑀼𑀝𑀺𑀓𑀸𑀬𑀸𑀢𑀺 𑀲𑀢𑁆𑀢𑀪𑀽𑀫𑀺𑀓𑁄𑀧𑀺 𑀧𑀸𑀲𑀸𑀤𑁄 𑀢𑀺𑀡𑀧𑀡𑁆𑀡𑀘𑁆𑀙𑀤𑀦𑁄 ‘‘𑀢𑀺𑀡𑀓𑀼𑀝𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀓𑀼𑀓𑁆𑀓𑀼𑀝𑀘𑁆𑀙𑀺𑀓𑀕𑁂𑀳𑀦𑁆𑀢𑀺 𑀙𑀤𑀦𑀁 𑀤𑀡𑁆𑀟𑀓𑁂𑀳𑀺 𑀚𑀸𑀮𑀩𑀤𑁆𑀥𑀁 𑀓𑀢𑁆𑀯𑀸 𑀢𑀺𑀡𑁂𑀳𑀺 𑀯𑀸 𑀧𑀡𑁆𑀡𑁂𑀳𑀺 𑀯𑀸 𑀙𑀸𑀤𑀺𑀢𑀓𑀼𑀝𑀺𑀓𑀸𑀯 𑀯𑀼𑀢𑁆𑀢𑀸, 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺. 𑀫𑀳𑀦𑁆𑀢𑀫𑁆𑀧𑀺 𑀢𑀺𑀡𑀘𑁆𑀙𑀤𑀦𑀕𑁂𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀉𑀮𑁆𑀮𑀺𑀢𑁆𑀢𑀸𑀤𑀺𑀪𑀸𑀯𑁄 𑀏𑀯 𑀳𑀺 𑀓𑀼𑀝𑀺𑀬𑀸 𑀮𑀓𑁆𑀔𑀡𑀁, 𑀲𑁄 𑀘 𑀙𑀤𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀘𑀗𑁆𑀓𑀫𑀦𑀲𑀸𑀮𑀸𑀬𑀁 𑀢𑀺𑀡𑀘𑀼𑀡𑁆𑀡𑀁 𑀧𑀭𑀺𑀧𑀢𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀕𑀼𑀫𑁆𑀨𑁂𑀢𑁆𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀓𑀸𑀢𑀼’’𑀦𑁆𑀢𑀺𑀆𑀤𑀻𑀦𑀺 (𑀘𑀽𑀴𑀯. 𑁨𑁬𑁦) 𑀘𑁂𑀢𑁆𑀣 𑀲𑀸𑀥𑀓𑀸𑀦𑀺, 𑀢𑀲𑁆𑀫𑀸 𑀉𑀪𑀢𑁄 𑀧𑀓𑁆𑀔𑀁 𑀯𑀸 𑀓𑀽𑀝𑀩𑀤𑁆𑀥𑀁 𑀯𑀸 𑀯𑀝𑁆𑀝𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸 𑀬𑀁 ‘‘𑀇𑀫𑀁 𑀏𑀢𑀲𑁆𑀲 𑀕𑁂𑀳𑀲𑁆𑀲 𑀙𑀤𑀦’’𑀦𑁆𑀢𑀺 𑀙𑀤𑀦𑀲𑀗𑁆𑀔𑁂𑀧𑁂𑀦 𑀓𑀢𑀁 𑀳𑁄𑀢𑀺, 𑀢𑀲𑁆𑀲 𑀪𑀺𑀢𑁆𑀢𑀺𑀮𑁂𑀧𑁂𑀦 𑀲𑀤𑁆𑀥𑀺𑀁 𑀮𑁂𑀧𑁂 𑀖𑀝𑀺𑀢𑁂 𑀆𑀧𑀢𑁆𑀢𑀺. 𑀲𑀘𑁂 𑀧𑀦 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀘𑁆𑀙𑀤𑀦𑀲𑁆𑀲 𑀕𑁂𑀳𑀲𑁆𑀲 𑀮𑁂𑀧𑀭𑀓𑁆𑀔𑀡𑀢𑁆𑀣𑀁 𑀉𑀧𑀭𑀺 𑀢𑀺𑀡𑁂𑀦 𑀙𑀸𑀤𑁂𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀢𑀺𑀡𑀓𑀼𑀝𑀺 𑀦𑀸𑀫 𑀦 𑀳𑁄𑀢𑀺. 𑀓𑀺𑀁 𑀧𑀦𑁂𑀢𑁆𑀣 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀧𑁆𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀧𑀘𑁆𑀘𑀬𑀸𑀯 𑀅𑀦𑀸𑀧𑀢𑁆𑀢𑀺, 𑀉𑀤𑀸𑀳𑀼 𑀲𑀸𑀭𑀫𑁆𑀪𑀅𑀧𑀭𑀺𑀓𑁆𑀓𑀫𑀦𑀧𑀘𑁆𑀘𑀬𑀸𑀧𑀻𑀢𑀺 𑀲𑀩𑁆𑀩𑀢𑁆𑀣𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀢𑀣𑀸 𑀳𑀺 𑀢𑀸𑀤𑀺𑀲𑀁 𑀓𑀼𑀝𑀺𑀁 𑀲𑀦𑁆𑀥𑀸𑀬 𑀧𑀭𑀺𑀯𑀸𑀭𑁂 𑀯𑀼𑀢𑁆𑀢𑀁 𑁋

‘‘𑀪𑀺𑀓𑁆𑀔𑀼 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀭𑁄𑀢𑀺;

𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁;

𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁 𑀅𑀦𑀸𑀧𑀢𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁭𑁯);

𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸𑀢𑀺 𑀓𑀼𑀝𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀫𑁆𑀧𑀺 𑀓𑀼𑀝𑀺𑀁 𑀅𑀜𑁆𑀜𑀲𑁆𑀲 𑀉𑀧𑀚𑁆𑀛𑀸𑀬𑀲𑁆𑀲 𑀯𑀸 𑀆𑀘𑀭𑀺𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀅𑀢𑁆𑀣𑀸𑀬 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀬𑀁 𑀧𑀦 ‘‘𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦’’𑀦𑁆𑀢𑀺𑀆𑀤𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁, 𑀢𑀁 𑀬𑀣𑀸𑀲𑀫𑀸𑀤𑀺𑀝𑁆𑀞𑀸𑀬 𑀅𑀓𑀭𑀡𑀧𑀘𑁆𑀘𑀬𑀸 𑀯𑀼𑀢𑁆𑀢𑀁.

𑀯𑀸𑀲𑀸𑀕𑀸𑀭𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣𑀸𑀢𑀺 𑀅𑀢𑁆𑀢𑀦𑁄 𑀯𑀲𑀦𑀢𑁆𑀣𑀸𑀬 𑀅𑀕𑀸𑀭𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀉𑀧𑁄𑀲𑀣𑀸𑀕𑀸𑀭𑀁 𑀯𑀸 𑀚𑀦𑁆𑀢𑀸𑀖𑀭𑀁 𑀯𑀸 𑀪𑁄𑀚𑀦𑀲𑀸𑀮𑀸 𑀯𑀸 𑀅𑀕𑁆𑀕𑀺𑀲𑀸𑀮𑀸 𑀯𑀸 𑀪𑀯𑀺𑀲𑁆𑀲𑀢𑀻𑀢𑀺 𑀓𑀸𑀭𑁂𑀢𑀺, 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀺. 𑀲𑀘𑁂𑀧𑀺𑀲𑁆𑀲 𑀳𑁄𑀢𑀺 ‘‘𑀉𑀧𑁄𑀲𑀣𑀸𑀕𑀸𑀭𑀜𑁆𑀘 𑀪𑀯𑀺𑀲𑁆𑀲𑀢𑀺, 𑀅𑀳𑀜𑁆𑀘 𑀯𑀲𑀺𑀲𑁆𑀲𑀸𑀫𑀺 𑀚𑀦𑁆𑀢𑀸𑀖𑀭𑀜𑁆𑀘 𑀪𑁄𑀚𑀦𑀲𑀸𑀮𑀸 𑀘 𑀅𑀕𑁆𑀕𑀺𑀲𑀸𑀮𑀸 𑀘 𑀪𑀯𑀺𑀲𑁆𑀲𑀢𑀺, 𑀅𑀳𑀜𑁆𑀘 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀭𑀺𑀢𑁂𑀧𑀺 𑀆𑀦𑀸𑀧𑀢𑁆𑀢𑀺𑀬𑁂𑀯. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀯𑀸𑀲𑀸𑀕𑀸𑀭𑀢𑁆𑀣𑀸𑀬 𑀓𑀭𑁄𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀉𑀫𑁆𑀫𑀢𑁆𑀢𑀓𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀸𑀦𑀜𑁆𑀘 𑀆𑀴𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀧𑀢𑁆𑀢𑀺.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀙𑀲𑀫𑀼𑀝𑁆𑀞𑀸𑀦𑀁 𑀓𑀺𑀭𑀺𑀬𑀜𑁆𑀘 𑀓𑀺𑀭𑀺𑀬𑀸𑀓𑀺𑀭𑀺𑀬𑀜𑁆𑀘, 𑀇𑀤𑀜𑁆𑀳𑀺 𑀯𑀢𑁆𑀣𑀼𑀁 𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀓𑀭𑁄𑀢𑁄 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀯𑀢𑁆𑀣𑀼𑀁 𑀅𑀤𑁂𑀲𑀸𑀧𑁂𑀢𑁆𑀯𑀸 𑀓𑀭𑁄𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.