𑁫. 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁯𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀲𑀜𑁆𑀘𑀭𑀺𑀢𑁆𑀢𑀁. 𑀢𑀢𑁆𑀣 𑀧𑀡𑁆𑀟𑀺𑀢𑀸𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸 𑀕𑀢𑀺𑀫𑀦𑁆𑀢𑀸. 𑀩𑁆𑀬𑀢𑁆𑀢𑀸𑀢𑀺 𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀉𑀧𑀸𑀬𑁂𑀦 𑀲𑀫𑀦𑁆𑀦𑀸𑀕𑀢𑀸 𑀉𑀧𑀸𑀬𑀜𑁆𑀜𑀽 𑀯𑀺𑀲𑀸𑀭𑀤𑀸. 𑀫𑁂𑀥𑀸𑀯𑀺𑀦𑀻𑀢𑀺 𑀫𑁂𑀥𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀤𑀺𑀝𑁆𑀞𑀁 𑀤𑀺𑀝𑁆𑀞𑀁 𑀓𑀭𑁄𑀢𑀺. 𑀤𑀓𑁆𑀔𑀸𑀢𑀺 𑀙𑁂𑀓𑀸. 𑀅𑀦𑀮𑀲𑀸𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀸. 𑀙𑀦𑁆𑀦𑀸𑀢𑀺 𑀅𑀦𑀼𑀘𑁆𑀙𑀯𑀺𑀓𑀸.

𑀓𑀺𑀲𑁆𑀫𑀺𑀁 𑀯𑀺𑀬𑀸𑀢𑀺 𑀓𑀺𑀘𑁆𑀙𑀁 𑀯𑀺𑀬 𑀓𑀺𑀮𑁂𑀲𑁄 𑀯𑀺𑀬, 𑀳𑀺𑀭𑀺 𑀯𑀺𑀬 𑀅𑀫𑁆𑀳𑀸𑀓𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀼𑀫𑀸𑀭𑀺𑀓𑀸𑀬 𑀯𑀢𑁆𑀢𑀼𑀦𑁆𑀢𑀺 ‘‘𑀇𑀫𑀁 𑀢𑀼𑀫𑁆𑀳𑁂 𑀕𑀡𑁆𑀳𑀣𑀸’’𑀢𑀺 𑀓𑀼𑀫𑀸𑀭𑀺𑀓𑀸𑀬 𑀓𑀸𑀭𑀡𑀸 𑀯𑀢𑁆𑀢𑀼𑀁.

𑀆𑀯𑀸𑀳𑀸𑀤𑀻𑀲𑀼 𑀆𑀯𑀸𑀳𑁄𑀢𑀺 𑀤𑀸𑀭𑀓𑀲𑁆𑀲 𑀧𑀭𑀓𑀼𑀮𑀢𑁄 𑀤𑀸𑀭𑀺𑀓𑀸𑀬 𑀆𑀳𑀭𑀡𑀁. 𑀯𑀺𑀯𑀸𑀳𑁄𑀢𑀺 𑀅𑀢𑁆𑀢𑀦𑁄 𑀤𑀸𑀭𑀺𑀓𑀸𑀬 𑀧𑀭𑀓𑀼𑀮𑀧𑁂𑀲𑀦𑀁. 𑀯𑀸𑀭𑁂𑀬𑁆𑀬𑀦𑁆𑀢𑀺 ‘‘𑀤𑁂𑀣 𑀦𑁄 𑀤𑀸𑀭𑀓𑀲𑁆𑀲 𑀤𑀸𑀭𑀺𑀓’’𑀦𑁆𑀢𑀺 𑀬𑀸𑀘𑀦𑀁, 𑀤𑀺𑀯𑀲𑀦𑀓𑁆𑀔𑀢𑁆𑀢𑀫𑀼𑀳𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀓𑀭𑀡𑀁 𑀯𑀸.

𑁨𑁯𑁭. 𑀧𑀼𑀭𑀸𑀡𑀕𑀡𑀓𑀺𑀬𑀸𑀢𑀺 𑀏𑀓𑀲𑁆𑀲 𑀕𑀡𑀓𑀲𑁆𑀲 𑀪𑀭𑀺𑀬𑀸𑀬, 𑀲𑀸 𑀢𑀲𑁆𑀫𑀺𑀁 𑀚𑀻𑀯𑀫𑀸𑀦𑁂 𑀕𑀡𑀓𑀻𑀢𑀺 𑀧𑀜𑁆𑀜𑀸𑀬𑀺𑀢𑁆𑀣, 𑀫𑀢𑁂 𑀧𑀦 𑀧𑀼𑀭𑀸𑀡𑀕𑀡𑀓𑀻𑀢𑀺 𑀲𑀗𑁆𑀔𑀁 𑀕𑀢𑀸. 𑀢𑀺𑀭𑁄𑀕𑀸𑀫𑁄𑀢𑀺 𑀩𑀳𑀺𑀕𑀸𑀫𑁄, 𑀅𑀜𑁆𑀜𑁄 𑀕𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀦𑀼𑀲𑁆𑀲𑀸𑀢𑀺 𑀉𑀤𑀸𑀬𑀺𑀲𑁆𑀲 𑀇𑀫𑀁 𑀲𑀜𑁆𑀘𑀭𑀺𑀢𑁆𑀢𑀓𑀫𑁆𑀫𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑀪𑀸𑀯𑀁 𑀚𑀸𑀦𑀦𑀓𑀫𑀦𑀼𑀲𑁆𑀲𑀸.

𑀲𑀼𑀡𑀺𑀲𑀪𑁄𑀕𑁂𑀦𑀸𑀢𑀺 𑀬𑁂𑀦 𑀪𑁄𑀕𑁂𑀦 𑀲𑀼𑀡𑀺𑀲𑀸 𑀪𑀼𑀜𑁆𑀚𑀺𑀢𑀩𑁆𑀩𑀸 𑀳𑁄𑀢𑀺 𑀭𑀦𑁆𑀥𑀸𑀧𑀦𑀧𑀘𑀸𑀧𑀦𑀧𑀅𑀯𑁂𑀲𑀦𑀸𑀤𑀺𑀦𑀸, 𑀢𑁂𑀦 𑀪𑀼𑀜𑁆𑀚𑀺𑀁𑀲𑀼. 𑀢𑀢𑁄 𑀅𑀧𑀭𑁂𑀦 𑀤𑀸𑀲𑀺𑀪𑁄𑀕𑁂𑀦𑀸𑀢𑀺 𑀫𑀸𑀲𑀸𑀢𑀺𑀓𑁆𑀓𑀫𑁂 𑀬𑁂𑀦 𑀪𑁄𑀕𑁂𑀦 𑀤𑀸𑀲𑀻 𑀪𑀼𑀜𑁆𑀚𑀺𑀢𑀩𑁆𑀩𑀸 𑀳𑁄𑀢𑀺 𑀔𑁂𑀢𑁆𑀢𑀓𑀫𑁆𑀫𑀓𑀘𑀯𑀭𑀙𑀟𑁆𑀟𑀦𑀉𑀤𑀓𑀸𑀳𑀭𑀡𑀸𑀤𑀺𑀦𑀸, 𑀢𑁂𑀦 𑀪𑀼𑀜𑁆𑀚𑀺𑀁𑀲𑀼. 𑀤𑀼𑀕𑁆𑀕𑀢𑀸𑀢𑀺 𑀤𑀮𑀺𑀤𑁆𑀤𑀸, 𑀬𑀢𑁆𑀣 𑀯𑀸 𑀕𑀢𑀸 𑀤𑀼𑀕𑁆𑀕𑀢𑀸 𑀳𑁄𑀢𑀺 𑀢𑀸𑀤𑀺𑀲𑀁 𑀓𑀼𑀮𑀁 𑀕𑀢𑀸. 𑀫𑀸𑀬𑁆𑀬𑁄 𑀇𑀫𑀁 𑀓𑀼𑀫𑀸𑀭𑀺𑀓𑀦𑁆𑀢𑀺 𑀫𑀸 𑀅𑀬𑁆𑀬𑁄 𑀇𑀫𑀁 𑀓𑀼𑀫𑀸𑀭𑀺𑀓𑀁. 𑀆𑀳𑀸𑀭𑀽𑀧𑀳𑀸𑀭𑁄𑀢𑀺 𑀆𑀳𑀸𑀭𑁄 𑀘 𑀉𑀧𑀳𑀸𑀭𑁄 𑀘 𑀕𑀳𑀡𑀜𑁆𑀘 𑀤𑀸𑀦𑀜𑁆𑀘, 𑀦 𑀅𑀫𑁆𑀳𑁂𑀳𑀺 𑀓𑀺𑀜𑁆𑀘𑀺 𑀆𑀳𑀝𑀁 𑀦 𑀉𑀧𑀸𑀳𑀝𑀁 𑀢𑀬𑀸 𑀲𑀤𑁆𑀥𑀺𑀁 𑀓𑀬𑀯𑀺𑀓𑁆𑀓𑀬𑁄 𑀯𑁄𑀳𑀸𑀭𑁄 𑀅𑀫𑁆𑀳𑀸𑀓𑀁 𑀦𑀢𑁆𑀣𑀻𑀢𑀺 𑀤𑀻𑀧𑁂𑀦𑁆𑀢𑀺. 𑀲𑀫𑀡𑁂𑀦 𑀪𑀯𑀺𑀢𑀩𑁆𑀩𑀁 𑀅𑀩𑁆𑀬𑀸𑀯𑀝𑁂𑀦, 𑀲𑀫𑀡𑁄 𑀅𑀲𑁆𑀲 𑀲𑀼𑀲𑀫𑀡𑁄𑀢𑀺 𑀲𑀫𑀡𑁂𑀦 𑀦𑀸𑀫 𑀈𑀤𑀺𑀲𑁂𑀲𑀼 𑀓𑀫𑁆𑀫𑁂𑀲𑀼 𑀅𑀩𑁆𑀬𑀸𑀯𑀝𑁂𑀦 𑀅𑀩𑁆𑀬𑀸𑀧𑀸𑀭𑁂𑀦 𑀪𑀯𑀺𑀢𑀩𑁆𑀩𑀁, 𑀏𑀯𑀁 𑀪𑀯𑀦𑁆𑀢𑁄 𑀳𑀺 𑀲𑀫𑀡𑁄 𑀲𑀼𑀲𑀫𑀡𑁄 𑀅𑀲𑁆𑀲𑀸𑀢𑀺, 𑀏𑀯𑀁 𑀦𑀁 𑀅𑀧𑀲𑀸𑀤𑁂𑀢𑁆𑀯𑀸 ‘‘𑀕𑀘𑁆𑀙 𑀢𑁆𑀯𑀁 𑀦 𑀫𑀬𑀁 𑀢𑀁 𑀚𑀸𑀦𑀸𑀫𑀸’’𑀢𑀺 𑀆𑀳𑀁𑀲𑀼.

𑁨𑁯𑁮. 𑀲𑀚𑁆𑀚𑀺𑀢𑁄𑀢𑀺 𑀲𑀩𑁆𑀩𑀽𑀧𑀓𑀭𑀡𑀲𑀫𑁆𑀧𑀦𑁆𑀦𑁄 𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑁄 𑀯𑀸.

𑁩𑁦𑁦. 𑀥𑀼𑀢𑁆𑀢𑀸𑀢𑀺 𑀇𑀢𑁆𑀣𑀺𑀥𑀼𑀢𑁆𑀢𑀸. 𑀧𑀭𑀺𑀘𑀸𑀭𑁂𑀦𑁆𑀢𑀸𑀢𑀺 𑀫𑀦𑀸𑀧𑀺𑀬𑁂𑀲𑀼 𑀭𑀽𑀧𑀸𑀤𑀻𑀲𑀼 𑀇𑀢𑁄 𑀘𑀺𑀢𑁄 𑀘 𑀲𑀫𑀦𑁆𑀢𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀸𑀭𑁂𑀦𑁆𑀢𑀸, 𑀓𑀻𑀴𑀦𑁆𑀢𑀸 𑀅𑀪𑀺𑀭𑀫𑀦𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀩𑁆𑀪𑀼𑀢𑀫𑀓𑀁𑀲𑀽𑀢𑀺 𑀬𑀤𑀺 𑀓𑀭𑀺𑀲𑁆𑀲𑀢𑀺 𑀢𑁆𑀯𑀁 𑀏𑀢𑁆𑀢𑀓𑀁 𑀚𑀺𑀢𑁄, 𑀬𑀤𑀺 𑀦 𑀓𑀭𑀺𑀲𑁆𑀲𑀢𑀺 𑀅𑀳𑀁 𑀏𑀢𑁆𑀢𑀓𑀦𑁆𑀢𑀺 𑀧𑀡𑀫𑀓𑀁𑀲𑀼. 𑀪𑀺𑀓𑁆𑀔𑀽𑀦𑀁 𑀧𑀦 𑀅𑀩𑁆𑀪𑀼𑀢𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑁄 𑀓𑀭𑁄𑀢𑀺 𑀧𑀭𑀸𑀚𑀺𑀢𑁂𑀦 𑀤𑀸𑀢𑀩𑁆𑀩𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁.

𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑁄 𑀉𑀤𑀸𑀬𑀻 𑀢𑀗𑁆𑀔𑀡𑀺𑀓𑀦𑁆𑀢𑀺 𑀏𑀢𑁆𑀣 𑀢𑀗𑁆𑀔𑀡𑁄𑀢𑀺 𑀅𑀘𑀺𑀭𑀓𑀸𑀮𑁄 𑀯𑀼𑀘𑁆𑀘𑀢𑀺. 𑀢𑀗𑁆𑀔𑀡𑀺𑀓𑀦𑁆𑀢𑀺 𑀅𑀘𑀺𑀭𑀓𑀸𑀮𑀸𑀥𑀺𑀓𑀸𑀭𑀺𑀓𑀁.

𑁩𑁦𑁧. 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸𑀢𑀺 𑀲𑀜𑁆𑀘𑀭𑀡𑀪𑀸𑀯𑀁 𑀲𑀫𑀸𑀧𑀚𑁆𑀚𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑁂𑀦 𑀓𑁂𑀦𑀘𑀺 𑀧𑁂𑀲𑀺𑀢𑁂𑀦 𑀓𑀢𑁆𑀣𑀘𑀺 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺, 𑀧𑀭𑀢𑁄 𑀘 ‘‘𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀫𑀢𑀺’’𑀦𑁆𑀢𑀺 𑀆𑀤𑀺𑀯𑀘𑀦𑀢𑁄 𑀇𑀥 𑀇𑀢𑁆𑀣𑀺𑀧𑀼𑀭𑀺𑀲𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀢𑁆𑀣𑀺𑀬𑀸 𑀯𑀸 𑀧𑀳𑀺𑀢𑁄 𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑁂 𑀕𑀘𑁆𑀙𑀢𑀺, 𑀧𑀼𑀭𑀺𑀲𑁂𑀦 𑀯𑀸 𑀧𑀳𑀺𑀢𑁄 𑀇𑀢𑁆𑀣𑀺𑀬𑀸 𑀲𑀦𑁆𑀢𑀺𑀓𑁂 𑀕𑀘𑁆𑀙𑀢𑀻’’𑀢𑀺 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀯𑀸 𑀇𑀢𑁆𑀣𑀺𑀫𑀢𑀺𑀦𑁆𑀢𑀺 𑀏𑀢𑁆𑀣 𑀆𑀭𑁄𑀘𑁂𑀬𑁆𑀬𑀸𑀢𑀺 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄, 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀧𑀼𑀭𑀺𑀲𑀲𑁆𑀲 𑀫𑀢𑀺𑀁 𑀇𑀢𑁆𑀣𑀺𑀬𑀸 𑀆𑀭𑁄𑀘𑁂𑀢𑀺, 𑀇𑀢𑁆𑀣𑀺𑀬𑀸 𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑁂𑀢𑀻’’𑀢𑀺 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀬𑀤𑀢𑁆𑀣𑀁 𑀢𑀁 𑀢𑁂𑀲𑀁 𑀫𑀢𑀺𑀁 𑀅𑀥𑀺𑀧𑁆𑀧𑀸𑀬𑀁 𑀅𑀚𑁆𑀛𑀸𑀲𑀬𑀁 𑀙𑀦𑁆𑀤𑀁 𑀭𑀼𑀘𑀺𑀁 𑀆𑀭𑁄𑀘𑁂𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀚𑀸𑀬𑀢𑁆𑀢𑀦𑁂 𑀯𑀸 𑀚𑀸𑀭𑀢𑁆𑀢𑀦𑁂 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀸𑀬𑀢𑁆𑀢𑀦𑁂𑀢𑀺 𑀚𑀸𑀬𑀸𑀪𑀸𑀯𑁂. 𑀚𑀸𑀭𑀢𑁆𑀢𑀦𑁂𑀢𑀺 𑀚𑀸𑀭𑀪𑀸𑀯𑁂. 𑀧𑀼𑀭𑀺𑀲𑀲𑁆𑀲 𑀳𑀺 𑀫𑀢𑀺𑀁 𑀇𑀢𑁆𑀣𑀺𑀬𑀸 𑀆𑀭𑁄𑀘𑁂𑀦𑁆𑀢𑁄 𑀚𑀸𑀬𑀢𑁆𑀢𑀦𑁂 𑀆𑀭𑁄𑀘𑁂𑀢𑀺, 𑀇𑀢𑁆𑀣𑀺𑀬𑀸 𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑁂𑀦𑁆𑀢𑁄 𑀚𑀸𑀭𑀢𑁆𑀢𑀦𑁂 𑀆𑀭𑁄𑀘𑁂𑀢𑀺; 𑀅𑀧𑀺𑀘 𑀧𑀼𑀭𑀺𑀲𑀲𑁆𑀲𑁂𑀯 𑀫𑀢𑀺𑀁 𑀇𑀢𑁆𑀣𑀺𑀬𑀸 𑀆𑀭𑁄𑀘𑁂𑀦𑁆𑀢𑁄 𑀚𑀸𑀬𑀢𑁆𑀢𑀦𑁂 𑀯𑀸 𑀆𑀭𑁄𑀘𑁂𑀢𑀺 𑀦𑀺𑀩𑀤𑁆𑀥𑀪𑀭𑀺𑀬𑀸𑀪𑀸𑀯𑁂, 𑀚𑀸𑀭𑀢𑁆𑀢𑀦𑁂 𑀯𑀸 𑀫𑀺𑀘𑁆𑀙𑀸𑀘𑀸𑀭𑀪𑀸𑀯𑁂. 𑀬𑀲𑁆𑀫𑀸 𑀧𑀦𑁂𑀢𑀁 𑀆𑀭𑁄𑀘𑁂𑀦𑁆𑀢𑁂𑀦 ‘‘𑀢𑁆𑀯𑀁 𑀓𑀺𑀭𑀲𑁆𑀲 𑀚𑀸𑀬𑀸 𑀪𑀯𑀺𑀲𑁆𑀲𑀲𑀻’’𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀯𑀢𑁆𑀢𑀩𑁆𑀩𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀬𑀢𑁆𑀢𑀦𑁂 𑀯𑀸𑀢𑀺 𑀚𑀸𑀬𑀸 𑀪𑀯𑀺𑀲𑁆𑀲𑀲𑀺, 𑀚𑀸𑀭𑀢𑁆𑀢𑀦𑁂 𑀯𑀸𑀢𑀺 𑀚𑀸𑀭𑀻 𑀪𑀯𑀺𑀲𑁆𑀲𑀲𑀻’’𑀢𑀺 𑀅𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀏𑀢𑁂𑀦𑁂𑀯 𑀘 𑀉𑀧𑀸𑀬𑁂𑀦 𑀇𑀢𑁆𑀣𑀺𑀬𑀸 𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑀦𑁂𑀧𑀺 𑀧𑀢𑀺 𑀪𑀯𑀺𑀲𑁆𑀲𑀲𑀺, 𑀲𑀸𑀫𑀺𑀓𑁄 𑀪𑀯𑀺𑀲𑁆𑀲𑀲𑀺, 𑀚𑀸𑀭𑁄 𑀪𑀯𑀺𑀲𑁆𑀲𑀲𑀻𑀢𑀺 𑀯𑀢𑁆𑀢𑀩𑁆𑀩𑀢𑀸𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀦𑁆𑀢𑀫𑀲𑁄 𑀢𑀗𑁆𑀔𑀡𑀺𑀓𑀸𑀬𑀧𑀻𑀢𑀺 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀬𑀸 𑀅𑀬𑀁 𑀢𑀗𑁆𑀔𑀡𑁂 𑀫𑀼𑀳𑀼𑀢𑁆𑀢𑀫𑀢𑁆𑀢𑁂 𑀧𑀝𑀺𑀲𑀁𑀯𑀲𑀺𑀢𑀩𑁆𑀩𑀢𑁄 𑀢𑀗𑁆𑀔𑀡𑀺𑀓𑀸𑀢𑀺 𑀯𑀼𑀘𑁆𑀘𑀢𑀺, 𑀫𑀼𑀳𑀼𑀢𑁆𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀧𑀺 ‘‘𑀫𑀼𑀳𑀼𑀢𑁆𑀢𑀺𑀓𑀸 𑀪𑀯𑀺𑀲𑁆𑀲𑀲𑀻’’𑀢𑀺 𑀏𑀯𑀁 𑀧𑀼𑀭𑀺𑀲𑀫𑀢𑀺𑀁 𑀆𑀭𑁄𑀘𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 ‘‘𑀫𑀼𑀳𑀼𑀢𑁆𑀢𑀺𑀓𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀏𑀯𑀁 𑀧𑀼𑀭𑀺𑀲𑀲𑁆𑀲 𑀇𑀢𑁆𑀣𑀺𑀫𑀢𑀺𑀁 𑀆𑀭𑁄𑀘𑁂𑀦𑁆𑀢𑁄𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁦𑁩. 𑀇𑀤𑀸𑀦𑀺 ‘‘𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀫𑀢𑀺’’𑀦𑁆𑀢𑀺 𑀏𑀢𑁆𑀣 𑀅𑀥𑀺𑀧𑁆𑀧𑁂𑀢𑀸 𑀇𑀢𑁆𑀣𑀺𑀬𑁄 𑀧𑀪𑁂𑀤𑀢𑁄 𑀤𑀲𑁆𑀲𑁂𑀢𑁆𑀯𑀸 𑀢𑀸𑀲𑀼 𑀲𑀜𑁆𑀘𑀭𑀺𑀢𑁆𑀢𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀲 𑀇𑀢𑁆𑀣𑀺𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀸𑀢𑀼𑀭𑀓𑁆𑀔𑀺𑀢𑀸𑀢𑀺 𑀫𑀸𑀢𑀭𑀸 𑀭𑀓𑁆𑀔𑀺𑀢𑀸. 𑀬𑀣𑀸 𑀧𑀼𑀭𑀺𑀲𑁂𑀦 𑀲𑀁𑀯𑀸𑀲𑀁 𑀦 𑀓𑀧𑁆𑀧𑁂𑀢𑀺, 𑀏𑀯𑀁 𑀫𑀸𑀢𑀭𑀸 𑀭𑀓𑁆𑀔𑀺𑀢𑀸, 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂𑀧𑀺 𑀯𑀼𑀢𑁆𑀢𑀁 𑁋 ‘‘𑀫𑀸𑀢𑀸 𑀭𑀓𑁆𑀔𑀢𑀺 𑀕𑁄𑀧𑁂𑀢𑀺 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀢𑀺 𑀯𑀲𑀁 𑀯𑀢𑁆𑀢𑁂𑀢𑀻’’𑀢𑀺. 𑀢𑀢𑁆𑀣 𑀭𑀓𑁆𑀔𑀢𑀻𑀢𑀺 𑀓𑀢𑁆𑀣𑀘𑀺 𑀕𑀦𑁆𑀢𑀼𑀁 𑀦 𑀤𑁂𑀢𑀺. 𑀕𑁄𑀧𑁂𑀢𑀻𑀢𑀺 𑀬𑀣𑀸 𑀅𑀜𑁆𑀜𑁂 𑀦 𑀧𑀲𑁆𑀲𑀦𑁆𑀢𑀺, 𑀏𑀯𑀁 𑀕𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑀺. 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀢𑀻𑀢𑀺 𑀲𑁂𑀭𑀺𑀯𑀺𑀳𑀸𑀭𑀫𑀲𑁆𑀲𑀸 𑀦𑀺𑀲𑁂𑀥𑁂𑀦𑁆𑀢𑀻 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀯𑀲𑀁 𑀯𑀢𑁆𑀢𑁂𑀢𑀻𑀢𑀺 ‘‘𑀇𑀤𑀁 𑀓𑀭𑁄𑀳𑀺, 𑀇𑀤𑀁 𑀫𑀸 𑀅𑀓𑀸𑀲𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀯𑀲𑀁 𑀢𑀲𑁆𑀲𑀸 𑀉𑀧𑀭𑀺 𑀯𑀢𑁆𑀢𑁂𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀧𑀺𑀢𑀼𑀭𑀓𑁆𑀔𑀺𑀢𑀸𑀤𑀬𑁄𑀧𑀺 𑀜𑀸𑀢𑀩𑁆𑀩𑀸. 𑀕𑁄𑀢𑁆𑀢𑀁 𑀯𑀸 𑀥𑀫𑁆𑀫𑁄 𑀯𑀸 𑀦 𑀭𑀓𑁆𑀔𑀢𑀺, 𑀲𑀕𑁄𑀢𑁆𑀢𑁂𑀳𑀺 𑀧𑀦 𑀲𑀳𑀥𑀫𑁆𑀫𑀺𑀓𑁂𑀳𑀺 𑀘 𑀏𑀓𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁂𑀳𑀺 𑀏𑀓𑀕𑀡𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀘 𑀭𑀓𑁆𑀔𑀺𑀢𑀸 ‘‘𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀧𑀤𑀸𑀦𑀁 ‘‘𑀲𑀕𑁄𑀢𑁆𑀢𑀸 𑀭𑀓𑁆𑀔𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁.

𑀲𑀳 𑀆𑀭𑀓𑁆𑀔𑁂𑀦𑀸𑀢𑀺 𑀲𑀸𑀭𑀓𑁆𑀔𑀸. 𑀲𑀳 𑀧𑀭𑀺𑀤𑀡𑁆𑀟𑁂𑀦𑀸𑀢𑀺 𑀲𑀧𑀭𑀺𑀤𑀡𑁆𑀟𑀸. 𑀢𑀸𑀲𑀁 𑀦𑀺𑀤𑁆𑀤𑁂𑀲𑀸 𑀧𑀸𑀓𑀝𑀸𑀯. 𑀇𑀫𑀸𑀲𑀼 𑀤𑀲𑀲𑀼 𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀫𑁂𑀯 𑀧𑀼𑀭𑀺𑀲𑀦𑁆𑀢𑀭𑀁 𑀕𑀘𑁆𑀙𑀦𑁆𑀢𑀻𑀦𑀁 𑀫𑀺𑀘𑁆𑀙𑀸𑀘𑀸𑀭𑁄 𑀳𑁄𑀢𑀺, 𑀦 𑀇𑀢𑀭𑀸𑀲𑀁.

𑀥𑀦𑀓𑁆𑀓𑀻𑀢𑀸𑀤𑀻𑀲𑀼 𑀅𑀧𑁆𑀧𑁂𑀦 𑀯𑀸 𑀩𑀳𑀼𑀦𑀸 𑀯𑀸 𑀥𑀦𑁂𑀦 𑀓𑀻𑀢𑀸 𑀥𑀦𑀓𑁆𑀓𑀻𑀢𑀸. 𑀬𑀲𑁆𑀫𑀸 𑀧𑀦 𑀲𑀸 𑀦 𑀓𑀻𑀢𑀫𑀢𑁆𑀢𑀸 𑀏𑀯 𑀲𑀁𑀯𑀸𑀲𑀢𑁆𑀣𑀸𑀬 𑀧𑀦 𑀓𑀻𑀢𑀢𑁆𑀢𑀸 𑀪𑀭𑀺𑀬𑀸, 𑀢𑀲𑁆𑀫𑀸𑀲𑁆𑀲 𑀦𑀺𑀤𑁆𑀤𑁂𑀲𑁂 𑀥𑀦𑁂𑀦 𑀓𑀺𑀡𑀺𑀢𑁆𑀯𑀸 𑀯𑀸𑀲𑁂𑀢𑀻𑀢𑀺 𑀯𑀼𑀢𑁆𑀢𑀁.

𑀙𑀦𑁆𑀤𑁂𑀦 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀯𑀲𑀢𑀻𑀢𑀺 𑀙𑀦𑁆𑀤𑀯𑀸𑀲𑀺𑀦𑀻. 𑀬𑀲𑁆𑀫𑀸 𑀧𑀦 𑀲𑀸 𑀦 𑀅𑀢𑁆𑀢𑀦𑁄 𑀙𑀦𑁆𑀤𑀫𑀢𑁆𑀢𑁂𑀦𑁂𑀯 𑀪𑀭𑀺𑀬𑀸 𑀳𑁄𑀢𑀺 𑀧𑀼𑀭𑀺𑀲𑁂𑀦 𑀧𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸, 𑀢𑀲𑁆𑀫𑀸𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀧𑀺𑀬𑁄 𑀧𑀺𑀬𑀁 𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁.

𑀪𑁄𑀕𑁂𑀦 𑀯𑀲𑀢𑀻𑀢𑀺 𑀪𑁄𑀕𑀯𑀸𑀲𑀺𑀦𑀻. 𑀉𑀤𑀼𑀓𑁆𑀔𑀮𑀫𑀼𑀲𑀮𑀸𑀤𑀺𑀖𑀭𑀽𑀧𑀓𑀭𑀡𑀁 𑀮𑀪𑀺𑀢𑁆𑀯𑀸 𑀪𑀭𑀺𑀬𑀸𑀪𑀸𑀯𑀁 𑀕𑀘𑁆𑀙𑀦𑁆𑀢𑀺𑀬𑀸 𑀚𑀦𑀧𑀤𑀺𑀢𑁆𑀣𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁.

𑀧𑀝𑁂𑀦 𑀯𑀲𑀢𑀻𑀢𑀺 𑀧𑀝𑀯𑀸𑀲𑀺𑀦𑀻. 𑀦𑀺𑀯𑀸𑀲𑀦𑀫𑀢𑁆𑀢𑀫𑁆𑀧𑀺 𑀧𑀸𑀯𑀼𑀭𑀡𑀫𑀢𑁆𑀢𑀫𑁆𑀧𑀺 𑀮𑀪𑀺𑀢𑁆𑀯𑀸 𑀪𑀭𑀺𑀬𑀸𑀪𑀸𑀯𑀁 𑀉𑀧𑀕𑀘𑁆𑀙𑀦𑁆𑀢𑀺𑀬𑀸 𑀤𑀮𑀺𑀤𑁆𑀤𑀺𑀢𑁆𑀣𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁.

𑀑𑀤𑀧𑀢𑁆𑀢𑀓𑀺𑀦𑀻𑀢𑀺 𑀉𑀪𑀺𑀦𑁆𑀦𑀁 𑀏𑀓𑀺𑀲𑁆𑀲𑀸 𑀉𑀤𑀓𑀧𑀸𑀢𑀺𑀬𑀸 𑀳𑀢𑁆𑀣𑁂 𑀑𑀢𑀸𑀭𑁂𑀢𑁆𑀯𑀸 ‘‘𑀇𑀤𑀁 𑀉𑀤𑀓𑀁 𑀯𑀺𑀬 𑀲𑀁𑀲𑀝𑁆𑀞𑀸 𑀅𑀪𑁂𑀚𑁆𑀚𑀸 𑀳𑁄𑀣𑀸’’𑀢𑀺 𑀯𑀢𑁆𑀯𑀸 𑀧𑀭𑀺𑀕𑁆𑀕𑀳𑀺𑀢𑀸𑀬 𑀯𑁄𑀳𑀸𑀭𑀦𑀸𑀫𑀫𑁂𑀢𑀁, 𑀦𑀺𑀤𑁆𑀤𑁂𑀲𑁂𑀧𑀺𑀲𑁆𑀲 ‘‘𑀢𑀸𑀬 𑀲𑀳 𑀉𑀤𑀓𑀧𑀢𑁆𑀢𑀁 𑀆𑀫𑀲𑀺𑀢𑁆𑀯𑀸 𑀢𑀁 𑀯𑀸𑀲𑁂𑀢𑀻’’𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀑𑀪𑀝𑀁 𑀑𑀭𑁄𑀧𑀺𑀢𑀁 𑀘𑀼𑀫𑁆𑀩𑀝𑀫𑀲𑁆𑀲𑀸𑀢𑀺 𑀑𑀪𑀝𑀘𑀼𑀫𑁆𑀩𑀝𑀸, 𑀓𑀝𑁆𑀞𑀳𑀸𑀭𑀺𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑀸, 𑀬𑀲𑁆𑀲𑀸 𑀲𑀻𑀲𑀢𑁄 𑀘𑀼𑀫𑁆𑀩𑀝𑀁 𑀑𑀭𑁄𑀧𑁂𑀢𑁆𑀯𑀸 𑀖𑀭𑁂 𑀯𑀸𑀲𑁂𑀢𑀺, 𑀢𑀲𑁆𑀲𑀸 𑀏𑀢𑀁 𑀅𑀥𑀺𑀯𑀘𑀦𑀁.

𑀤𑀸𑀲𑀻 𑀘𑀸𑀢𑀺 𑀅𑀢𑁆𑀢𑀦𑁄𑀬𑁂𑀯 𑀤𑀸𑀲𑀻 𑀘 𑀳𑁄𑀢𑀺 𑀪𑀭𑀺𑀬𑀸 𑀘.

𑀓𑀫𑁆𑀫𑀓𑀸𑀭𑀻 𑀦𑀸𑀫 𑀕𑁂𑀳𑁂 𑀪𑀢𑀺𑀬𑀸 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀸𑀬 𑀲𑀤𑁆𑀥𑀺𑀁 𑀓𑁄𑀘𑀺 𑀖𑀭𑀸𑀯𑀸𑀲𑀁 𑀓𑀧𑁆𑀧𑁂𑀢𑀺 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀅𑀦𑀢𑁆𑀣𑀺𑀓𑁄 𑀳𑀼𑀢𑁆𑀯𑀸. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘𑀸’’𑀢𑀺.

𑀥𑀚𑁂𑀦 𑀆𑀳𑀝𑀸 𑀥𑀚𑀸𑀳𑀝𑀸, 𑀉𑀲𑁆𑀲𑀺𑀢𑀤𑁆𑀥𑀚𑀸𑀬 𑀲𑁂𑀦𑀸𑀬 𑀕𑀦𑁆𑀢𑁆𑀯𑀸 𑀧𑀭𑀯𑀺𑀲𑀬𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀆𑀦𑀻𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀁 𑀓𑁄𑀘𑀺 𑀪𑀭𑀺𑀬𑀁 𑀓𑀭𑁄𑀢𑀺, 𑀅𑀬𑀁 𑀥𑀚𑀸𑀳𑀝𑀸 𑀦𑀸𑀫. 𑀫𑀼𑀳𑀼𑀢𑁆𑀢𑀺𑀓𑀸 𑀯𑀼𑀢𑁆𑀢𑀦𑀬𑀸𑀏𑀯, 𑀏𑀢𑀸𑀲𑀁 𑀤𑀲𑀦𑁆𑀦𑀫𑁆𑀧𑀺 𑀧𑀼𑀭𑀺𑀲𑀦𑁆𑀢𑀭𑀕𑀫𑀦𑁂 𑀫𑀺𑀘𑁆𑀙𑀸𑀘𑀸𑀭𑁄 𑀳𑁄𑀢𑀺. 𑀧𑀼𑀭𑀺𑀲𑀸𑀦𑀁 𑀧𑀦 𑀯𑀻𑀲𑀢𑀺𑀬𑀸𑀧𑀺 𑀏𑀢𑀸𑀲𑀼 𑀫𑀺𑀘𑁆𑀙𑀸𑀘𑀸𑀭𑁄 𑀳𑁄𑀢𑀺, 𑀪𑀺𑀓𑁆𑀔𑀼𑀦𑁄 𑀘 𑀲𑀜𑁆𑀘𑀭𑀺𑀢𑁆𑀢𑀁 𑀳𑁄𑀢𑀻𑀢𑀺.

𑁩𑁦𑁫. 𑀇𑀤𑀸𑀦𑀺 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀻𑀢𑀺𑀆𑀤𑀻𑀲𑀼 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺, 𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀯𑀘𑀦𑀁 ‘‘𑀲𑀸𑀥𑀼 𑀉𑀧𑀸𑀲𑀓𑀸’’𑀢𑀺 𑀯𑀸 ‘‘𑀳𑁄𑀢𑀽’’𑀢𑀺 𑀯𑀸 ‘‘𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀸 𑀲𑀻𑀲𑀓𑀫𑁆𑀧𑀦𑀸𑀤𑀻𑀳𑀺 𑀯𑀸 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀯𑀻𑀫𑀁𑀲𑀢𑀻𑀢𑀺 𑀏𑀯𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀲𑀸𑀲𑀦𑀁 𑀆𑀭𑁄𑀘𑁂𑀢𑀺. 𑀧𑀘𑁆𑀘𑀸𑀳𑀭𑀢𑀻𑀢𑀺 𑀢𑁂𑀦 𑀆𑀭𑁄𑀘𑀺𑀢𑁂 𑀲𑀸 𑀇𑀢𑁆𑀣𑀻 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀼 𑀯𑀸 𑀧𑀝𑀺𑀓𑁆𑀔𑀺𑀧𑀢𑀼 𑀯𑀸 𑀮𑀚𑁆𑀚𑀸𑀬 𑀯𑀸 𑀢𑀼𑀡𑁆𑀳𑀻 𑀳𑁄𑀢𑀼, 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑀺.

𑀏𑀢𑁆𑀢𑀸𑀯𑀢𑀸 𑀇𑀫𑀸𑀬 𑀧𑀝𑀺𑀕𑁆𑀕𑀳𑀡𑀸𑀭𑁄𑀘𑀦𑀧𑀘𑁆𑀘𑀸𑀳𑀭𑀡𑀲𑀗𑁆𑀔𑀸𑀢𑀸𑀬 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀺. 𑀲𑀸 𑀧𑀦 𑀢𑀲𑁆𑀲 𑀪𑀭𑀺𑀬𑀸 𑀳𑁄𑀢𑀼 𑀯𑀸 𑀫𑀸 𑀯𑀸, 𑀅𑀓𑀸𑀭𑀡𑀫𑁂𑀢𑀁. 𑀲𑀘𑁂 𑀧𑀦 𑀲𑁄 𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀲𑀦𑁆𑀢𑀺𑀓𑀁 𑀧𑁂𑀲𑀺𑀢𑁄 𑀢𑀁 𑀅𑀤𑀺𑀲𑁆𑀯𑀸 𑀢𑀲𑁆𑀲𑀸 𑀫𑀸𑀢𑀼𑀬𑀸 𑀢𑀁 𑀲𑀸𑀲𑀦𑀁 𑀆𑀭𑁄𑀘𑁂𑀢𑀺, 𑀩𑀳𑀺𑀤𑁆𑀥𑀸 𑀯𑀺𑀫𑀝𑁆𑀞𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀲𑀗𑁆𑀓𑁂𑀢𑀦𑁆𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀧𑀦 𑀫𑀸𑀢𑀸 𑀯𑀸 𑀳𑁄𑀢𑀼 𑀧𑀺𑀢𑀸 𑀯𑀸 𑀅𑀦𑁆𑀢𑀫𑀲𑁄 𑀕𑁂𑀳𑀤𑀸𑀲𑀻𑀧𑀺 𑀅𑀜𑁆𑀜𑁄 𑀯𑀸𑀧𑀺 𑀬𑁄 𑀓𑁄𑀘𑀺 𑀢𑀁 𑀓𑀺𑀭𑀺𑀬𑀁 𑀲𑀫𑁆𑀧𑀸𑀤𑁂𑀲𑁆𑀲𑀢𑀺, 𑀢𑀲𑁆𑀲 𑀯𑀼𑀢𑁆𑀢𑁂𑀧𑀺 𑀯𑀺𑀫𑀝𑁆𑀞𑀁 𑀦𑀸𑀫 𑀦 𑀳𑁄𑀢𑀺, 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀓𑀸𑀮𑁂 𑀆𑀧𑀢𑁆𑀢𑀺𑀬𑁂𑀯.

𑀦𑀦𑀼 𑀬𑀣𑀸 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀢𑁆𑀢𑀼𑀓𑀸𑀫𑁄 𑀯𑀺𑀭𑀚𑁆𑀛𑀺𑀢𑁆𑀯𑀸 ‘‘𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀤𑁂𑀬𑁆𑀬 𑀧𑀘𑁆𑀘𑀓𑁆𑀔𑀸𑀢𑀸𑀯𑀲𑁆𑀲 𑀲𑀺𑀓𑁆𑀔𑀸. 𑀬𑀣𑀸 𑀯𑀸 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺 𑀯𑀢𑁆𑀢𑀼𑀓𑀸𑀫𑁄 𑀯𑀺𑀭𑀚𑁆𑀛𑀺𑀢𑁆𑀯𑀸 ‘‘𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺 𑀯𑀤𑁂𑀬𑁆𑀬 𑀆𑀧𑀦𑁆𑀦𑁄𑀯𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀆𑀳. 𑀢𑀁 𑀧𑀦𑁂𑀢𑀁 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀅𑀦𑁆𑀢𑁂𑀯𑀸𑀲𑀺𑀁 𑀯𑀻𑀫𑀁𑀲𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀫𑁂𑀢𑀺, 𑀢𑀲𑁆𑀫𑀸 𑀲𑀼𑀪𑀸𑀲𑀺𑀢𑀁.

𑀬𑀣𑀸 𑀘 ‘‘𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀻’’𑀢𑀺 𑀯𑀼𑀢𑁆𑀢𑀲𑁆𑀲 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀆𑀭𑁄𑀘𑁂𑀢𑀼𑀁 𑀲𑀫𑀢𑁆𑀣𑀸𑀦𑀁 𑀫𑀸𑀢𑀸𑀤𑀻𑀦𑀫𑁆𑀧𑀺 𑀯𑀤𑀢𑁄 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀺, 𑀏𑀯𑀫𑁂𑀯 ‘‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀙𑀦𑁆𑀤𑀯𑀸𑀲𑀺𑀦𑀻’’𑀢𑀺 𑀏𑀯𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑁂𑀲𑀼 𑀙𑀦𑁆𑀤𑀯𑀸𑀲𑀺𑀦𑀺𑀆𑀤𑀻𑀲𑀼 𑀯𑀘𑀦𑁂𑀲𑀼 𑀅𑀜𑁆𑀜𑀢𑀭𑀯𑀲𑁂𑀦 𑀯𑀸 𑀅𑀯𑀼𑀢𑁆𑀢𑁂𑀲𑀼𑀧𑀺 ‘‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀚𑀸𑀬𑀸 𑀧𑀚𑀸𑀧𑀢𑀺 𑀧𑀼𑀢𑁆𑀢𑀫𑀸𑀢𑀸 𑀖𑀭𑀡𑀻 𑀖𑀭𑀲𑀸𑀫𑀺𑀦𑀻 𑀪𑀢𑁆𑀢𑀭𑀦𑁆𑀥𑀺𑀓𑀸 𑀲𑀼𑀲𑁆𑀲𑀽𑀲𑀺𑀓𑀸 𑀧𑀭𑀺𑀘𑀸𑀭𑀺𑀓𑀸’’𑀢𑀺𑀏𑀯𑀫𑀸𑀤𑀻𑀲𑀼 𑀲𑀁𑀯𑀸𑀲𑀧𑀭𑀺𑀤𑀻𑀧𑀓𑁂𑀲𑀼 𑀯𑀘𑀦𑁂𑀲𑀼 𑀅𑀜𑁆𑀜𑀢𑀭𑀯𑀲𑁂𑀦 𑀯𑀸 𑀯𑀤𑀦𑁆𑀢𑀲𑁆𑀲𑀸𑀧𑀺 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀺 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑁂𑀯. ‘‘𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀻’’𑀢𑀺 𑀧𑁂𑀲𑀺𑀢𑀲𑁆𑀲 𑀧𑀦 𑀕𑀦𑁆𑀢𑁆𑀯𑀸 𑀅𑀜𑁆𑀜𑀸𑀲𑀼 𑀧𑀺𑀢𑀼𑀭𑀓𑁆𑀔𑀺𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀯𑀤𑀦𑁆𑀢𑀲𑁆𑀲 𑀯𑀺𑀲𑀗𑁆𑀓𑁂𑀢𑀁. 𑀏𑀲 𑀦𑀬𑁄 ‘‘𑀧𑀺𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀻’’𑀢𑀺𑀆𑀤𑀻𑀲𑀼𑀧𑀺.

𑀓𑁂𑀯𑀮𑀜𑁆𑀳𑁂𑀢𑁆𑀣 𑀏𑀓𑀫𑀽𑀮𑀓𑀤𑀼𑀫𑀽𑀮𑀓𑀸𑀤𑀺𑀯𑀲𑁂𑀦 ‘‘𑀧𑀼𑀭𑀺𑀲𑀲𑁆𑀲 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺, 𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀻’’𑀢𑀺 𑀏𑀯𑀫𑀸𑀤𑀻𑀦𑀁 𑀫𑀽𑀮𑀝𑁆𑀞𑀸𑀦𑀜𑁆𑀘 𑀯𑀲𑁂𑀦 𑀧𑁂𑀬𑁆𑀬𑀸𑀮𑀪𑁂𑀤𑁄𑀬𑁂𑀯 𑀯𑀺𑀲𑁂𑀲𑁄. 𑀲𑁄𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀦𑀸𑀲𑁆𑀲 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 𑀆𑀤𑀭𑀁 𑀓𑀭𑀺𑀫𑁆𑀳.

𑁩𑁩𑁮. 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺𑀆𑀤𑀻𑀲𑀼 𑀧𑀦 𑀤𑁆𑀯𑀻𑀲𑀼 𑀘𑀢𑀼𑀓𑁆𑀓𑁂𑀲𑀼 𑀧𑀞𑀫𑀘𑀢𑀼𑀓𑁆𑀓𑁂 𑀆𑀤𑀺𑀧𑀤𑁂𑀦 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀫𑀚𑁆𑀛𑁂 𑀤𑁆𑀯𑀻𑀳𑀺 𑀤𑀼𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀅𑀦𑁆𑀢𑁂 𑀏𑀓𑁂𑀦 𑀏𑀓𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑀼𑀢𑀺𑀬𑀘𑀢𑀼𑀓𑁆𑀓𑁂 𑀆𑀤𑀺𑀧𑀤𑁂𑀦 𑀤𑀼𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀫𑀚𑁆𑀛𑁂 𑀤𑁆𑀯𑀻𑀳𑀺 𑀏𑀓𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀅𑀦𑁆𑀢𑁂 𑀏𑀓𑁂𑀦 𑀅𑀗𑁆𑀕𑀸𑀪𑀸𑀯𑀢𑁄 𑀅𑀦𑀸𑀧𑀢𑁆𑀢𑀺. 𑀢𑀢𑁆𑀣 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀆𑀡𑀸𑀧𑀓𑀲𑁆𑀲 𑀲𑀸𑀲𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀯𑀻𑀫𑀁𑀲𑀢𑀻𑀢𑀺 𑀧𑀳𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀆𑀭𑁄𑀘𑁂𑀢𑀺. 𑀧𑀘𑁆𑀘𑀸𑀳𑀭𑀢𑀻𑀢𑀺 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀫𑀽𑀮𑀝𑁆𑀞𑀲𑁆𑀲 𑀆𑀭𑁄𑀘𑁂𑀢𑀺.

𑀦 𑀧𑀘𑁆𑀘𑀸𑀳𑀭𑀢𑀻𑀢𑀺 𑀆𑀭𑁄𑀘𑁂𑀢𑁆𑀯𑀸 𑀏𑀢𑁆𑀢𑁄𑀯 𑀧𑀓𑁆𑀓𑀫𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀦 𑀯𑀻𑀫𑀁𑀲𑀢𑀻𑀢𑀺 𑀧𑀼𑀭𑀺𑀲𑁂𑀦 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀕𑀦𑁆𑀢𑁆𑀯𑀸 𑀩𑁆𑀭𑀽𑀳𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀲𑀸𑀥𑀽’’𑀢𑀺 𑀢𑀲𑁆𑀲 𑀲𑀸𑀲𑀦𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀁 𑀧𑀫𑀼𑀲𑁆𑀲𑀺𑀢𑁆𑀯𑀸 𑀯𑀸 𑀅𑀧𑁆𑀧𑀫𑀼𑀲𑁆𑀲𑀺𑀢𑁆𑀯𑀸 𑀯𑀸 𑀅𑀜𑁆𑀜𑁂𑀦 𑀓𑀭𑀡𑀻𑀬𑁂𑀦 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀓𑀣𑀁 𑀓𑀣𑁂𑀦𑁆𑀢𑁄 𑀦𑀺𑀲𑀻𑀤𑀢𑀺, 𑀏𑀢𑁆𑀢𑀸𑀯𑀢𑀸 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀦 𑀯𑀻𑀫𑀁𑀲𑀢𑀺 𑀦𑀸𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀦𑀁 𑀲𑀸 𑀇𑀢𑁆𑀣𑀻 𑀲𑀬𑀫𑁂𑀯 𑀯𑀤𑀢𑀺 ‘‘𑀢𑀼𑀫𑁆𑀳𑀸𑀓𑀁 𑀓𑀺𑀭 𑀉𑀧𑀝𑁆𑀞𑀸𑀓𑁄 𑀫𑀁 𑀕𑁂𑀳𑁂 𑀓𑀸𑀢𑀼𑀓𑀸𑀫𑁄’’𑀢𑀺 𑀏𑀯𑀁 𑀯𑀢𑁆𑀯𑀸 𑀘 ‘‘𑀅𑀳𑀁 𑀢𑀲𑁆𑀲 𑀪𑀭𑀺𑀬𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀦 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀯𑀤𑀢𑀺. 𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄𑀯 𑀉𑀝𑁆𑀞𑀸𑀬𑀸𑀲𑀦𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑀺, 𑀏𑀢𑁆𑀢𑀸𑀯𑀢𑀸 ‘‘𑀦 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺 𑀦𑀸𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀦 𑀯𑀻𑀫𑀁𑀲𑀢𑀺 𑀦 𑀧𑀘𑁆𑀘𑀸𑀳𑀭𑀢𑀻𑀢𑀺 𑀓𑁂𑀯𑀮𑀁 𑀲𑀸𑀲𑀦𑀸𑀭𑁄𑀘𑀦𑀓𑀸𑀮𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺𑀬𑁂𑀯, 𑀇𑀢𑀭𑀁 𑀧𑀦 𑀤𑁆𑀯𑀬𑀁 𑀦 𑀓𑀭𑁄𑀢𑀺.

𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀻𑀢𑀺 𑀓𑁄𑀘𑀺 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀲𑁆𑀲 𑀞𑀺𑀢𑀝𑁆𑀞𑀸𑀦𑁂 𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀯𑀸 𑀢𑀣𑀸𑀭𑀽𑀧𑀺𑀁 𑀓𑀣𑀁 𑀓𑀣𑁂𑀢𑀺, 𑀪𑀺𑀓𑁆𑀔𑀼 𑀢𑁂𑀦 𑀅𑀧𑁆𑀧𑀳𑀺𑀢𑁄𑀧𑀺 𑀧𑀳𑀺𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀇𑀢𑁆𑀣𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀻𑀫𑀁𑀲𑀺𑀢𑁆𑀯𑀸 𑀢𑀲𑁆𑀲𑀸 𑀭𑀼𑀘𑀺𑀁 𑀯𑀸 𑀅𑀭𑀼𑀘𑀺𑀁 𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀇𑀫𑀲𑁆𑀲 𑀆𑀭𑁄𑀘𑁂𑀢𑀺. 𑀢𑁂𑀦𑁂𑀯 𑀦𑀬𑁂𑀦 𑀯𑀻𑀫𑀁𑀲𑀺𑀢𑁆𑀯𑀸 𑀅𑀧𑀘𑁆𑀘𑀸𑀳𑀭𑀦𑁆𑀢𑁄 ‘‘𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀦 𑀧𑀘𑁆𑀘𑀸𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯 𑀦𑀬𑁂𑀦 𑀕𑀢𑁄 𑀅𑀯𑀻𑀫𑀁𑀲𑀺𑀢𑁆𑀯𑀸 𑀢𑀸𑀬 𑀲𑀫𑀼𑀝𑁆𑀞𑀸𑀧𑀺𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀧𑀞𑀫𑀘𑀢𑀼𑀓𑁆𑀓𑀲𑁆𑀲 𑀢𑀢𑀺𑀬𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀆𑀕𑀦𑁆𑀢𑁆𑀯𑀸 𑀇𑀫𑀲𑁆𑀲 𑀆𑀭𑁄𑀘𑁂𑀦𑁆𑀢𑁄 ‘‘𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀦 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀘𑀢𑀼𑀢𑁆𑀣𑀧𑀤𑀁 𑀧𑀸𑀓𑀝𑀫𑁂𑀯.

𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀡𑀸𑀧𑁂𑀢𑀻𑀢𑀺𑀆𑀤𑀺𑀦𑀬𑀸 𑀧𑀸𑀓𑀝𑀸𑀬𑁂𑀯. 𑀬𑀣𑀸 𑀧𑀦 𑀲𑀫𑁆𑀩𑀳𑀼𑀮𑀸𑀧𑀺 𑀏𑀓𑀯𑀢𑁆𑀣𑀼𑀫𑁆𑀳𑀺 𑀆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀏𑀓𑀲𑁆𑀲𑀧𑀺 𑀲𑀫𑁆𑀩𑀳𑀼𑀮𑀯𑀢𑁆𑀣𑀽𑀲𑀼 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁? 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀺 ‘‘𑀕𑀘𑁆𑀙, 𑀪𑀦𑁆𑀢𑁂, 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀧𑀸𑀲𑀸𑀤𑁂 𑀲𑀝𑁆𑀞𑀺𑀫𑀢𑁆𑀢𑀸 𑀯𑀸 𑀲𑀢𑁆𑀢𑀢𑀺𑀫𑀢𑁆𑀢𑀸 𑀯𑀸 𑀇𑀢𑁆𑀣𑀺𑀬𑁄 𑀞𑀺𑀢𑀸 𑀢𑀸 𑀯𑀤𑁂𑀳𑀺, 𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄’’𑀢𑀺. 𑀲𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑁆𑀯𑀸 𑀧𑀼𑀦 𑀢𑀁 𑀲𑀸𑀲𑀦𑀁 𑀧𑀘𑁆𑀘𑀸𑀳𑀭𑀢𑀺. 𑀬𑀢𑁆𑀢𑀓𑀸 𑀇𑀢𑁆𑀣𑀺𑀬𑁄 𑀢𑀢𑁆𑀢𑀓𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂𑀧𑀺 𑁋

‘‘𑀧𑀤𑀯𑀻𑀢𑀺𑀳𑀸𑀭𑀫𑀢𑁆𑀢𑁂𑀦, 𑀯𑀸𑀘𑀸𑀬 𑀪𑀡𑀺𑀢𑁂𑀦 𑀘;

𑀲𑀩𑁆𑀩𑀸𑀦𑀺 𑀕𑀭𑀼𑀓𑀸𑀦𑀺 𑀲𑀧𑁆𑀧𑀝𑀺𑀓𑀫𑁆𑀫𑀸𑀦𑀺;

𑀘𑀢𑀼𑀲𑀝𑁆𑀞𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑁂𑀬𑁆𑀬 𑀏𑀓𑀢𑁄;

𑀧𑀜𑁆𑀳𑀸𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁮𑁦);

𑀇𑀫𑀁 𑀓𑀺𑀭 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀅𑀬𑀁 𑀧𑀜𑁆𑀳𑁄 𑀯𑀼𑀢𑁆𑀢𑁄. 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬 𑀘𑁂𑀢𑁆𑀣 ‘‘𑀘𑀢𑀼𑀲𑀝𑁆𑀞𑀺 𑀆𑀧𑀢𑁆𑀢𑀺𑀬𑁄’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀓𑀭𑁄𑀦𑁆𑀢𑁄 𑀧𑀦 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀆𑀧𑀚𑁆𑀚𑀢𑀻𑀢𑀺. 𑀬𑀣𑀸 𑀘 𑀏𑀓𑁂𑀦 𑀧𑁂𑀲𑀺𑀢𑀲𑁆𑀲 𑀏𑀓𑀲𑁆𑀲 𑀲𑀫𑁆𑀩𑀳𑀼𑀮𑀸𑀲𑀼 𑀇𑀢𑁆𑀣𑀻𑀲𑀼 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄, 𑀏𑀯𑀁 𑀏𑀓𑁄 𑀧𑀼𑀭𑀺𑀲𑁄 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀏𑀓𑀺𑀲𑁆𑀲𑀸 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑀺, 𑀲𑀩𑁆𑀩𑁂𑀲𑀁 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀏𑀓𑁄 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀲𑀫𑁆𑀩𑀳𑀼𑀮𑀸𑀦𑀁 𑀇𑀢𑁆𑀣𑀻𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑀺, 𑀇𑀢𑁆𑀣𑀺𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀸. 𑀲𑀫𑁆𑀩𑀳𑀼𑀮𑀸 𑀧𑀼𑀭𑀺𑀲𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀏𑀓𑀺𑀲𑁆𑀲𑀸 𑀲𑀦𑁆𑀢𑀺𑀓𑀁 𑀧𑁂𑀲𑁂𑀦𑁆𑀢𑀺, 𑀧𑀼𑀭𑀺𑀲𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀸. 𑀲𑀫𑁆𑀩𑀳𑀼𑀮𑀸 𑀏𑀓𑀁 𑀲𑀫𑁆𑀩𑀳𑀼𑀮𑀸𑀦𑀁 𑀇𑀢𑁆𑀣𑀻𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀦𑁆𑀢𑀺, 𑀯𑀢𑁆𑀣𑀼𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀸. 𑀲𑀫𑁆𑀩𑀳𑀼𑀮𑀸 𑀲𑀫𑁆𑀩𑀳𑀼𑀮𑁂 𑀏𑀓𑀺𑀲𑁆𑀲𑀸 𑀲𑀦𑁆𑀢𑀺𑀓𑀁 𑀧𑁂𑀲𑁂𑀦𑁆𑀢𑀺, 𑀯𑀢𑁆𑀣𑀼𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀸. 𑀲𑀫𑁆𑀩𑀳𑀼𑀮𑀸 𑀧𑀼𑀭𑀺𑀲𑀸 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀲𑀫𑁆𑀩𑀳𑀼𑀮𑀸𑀦𑀁 𑀇𑀢𑁆𑀣𑀻𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀦𑁆𑀢𑀺, 𑀯𑀢𑁆𑀣𑀼𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀸. 𑀏𑀲 𑀦𑀬𑁄 ‘‘𑀏𑀓𑀸 𑀇𑀢𑁆𑀣𑀻 𑀏𑀓𑀁 𑀪𑀺𑀓𑁆𑀔𑀼’’𑀦𑁆𑀢𑀺𑀆𑀤𑀻𑀲𑀼𑀧𑀺. 𑀏𑀢𑁆𑀣 𑀘 𑀲𑀪𑀸𑀕𑀯𑀺𑀪𑀸𑀕𑀢𑀸 𑀦𑀸𑀫 𑀅𑀧𑁆𑀧𑀫𑀸𑀡𑀁, 𑀫𑀸𑀢𑀸𑀧𑀺𑀢𑀼𑀦𑀫𑁆𑀧𑀺 𑀧𑀜𑁆𑀘𑀲𑀳𑀥𑀫𑁆𑀫𑀺𑀓𑀸𑀦𑀫𑁆𑀧𑀺 𑀲𑀜𑁆𑀘𑀭𑀺𑀢𑁆𑀢𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀺 𑀕𑀘𑁆𑀙 𑀪𑀦𑁆𑀢𑁂𑀢𑀺 𑀘𑀢𑀼𑀓𑁆𑀓𑀁 𑀅𑀗𑁆𑀕𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀘𑁆𑀙𑀺𑀫𑀧𑀤𑁂 𑀅𑀦𑁆𑀢𑁂𑀯𑀸𑀲𑀻 𑀯𑀻𑀫𑀁𑀲𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀧𑀘𑁆𑀘𑀸𑀳𑀭𑀢𑀻𑀢𑀺 𑀆𑀕𑀦𑁆𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀅𑀦𑀸𑀭𑁄𑀘𑁂𑀢𑁆𑀯𑀸 𑀏𑀢𑁆𑀢𑁄𑀯 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑁂𑀢𑀺. 𑀆𑀧𑀢𑁆𑀢𑀺 𑀉𑀪𑀺𑀦𑁆𑀦𑀁 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸𑀢𑀺 𑀆𑀘𑀭𑀺𑀬𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀘 𑀯𑀻𑀫𑀁𑀲𑀸𑀧𑀺𑀢𑀢𑁆𑀢𑀸 𑀘 𑀤𑁆𑀯𑀻𑀳𑀗𑁆𑀕𑁂𑀳𑀺 𑀣𑀼𑀮𑁆𑀮𑀘𑁆𑀘𑀬𑀁, 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀯𑀻𑀫𑀁𑀲𑀺𑀢𑀢𑁆𑀢𑀸 𑀘 𑀧𑀘𑁆𑀘𑀸𑀳𑀝𑀢𑁆𑀢𑀸 𑀘 𑀤𑁆𑀯𑀻𑀳𑀗𑁆𑀕𑁂𑀳𑀺 𑀣𑀼𑀮𑁆𑀮𑀘𑁆𑀘𑀬𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁩𑁩𑁯. 𑀕𑀘𑁆𑀙𑀦𑁆𑀢𑁄 𑀲𑀫𑁆𑀧𑀸𑀤𑁂𑀢𑀻𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀘𑁂𑀯 𑀯𑀻𑀫𑀁𑀲𑀢𑀺 𑀘. 𑀆𑀕𑀘𑁆𑀙𑀦𑁆𑀢𑁄 𑀯𑀺𑀲𑀁𑀯𑀸𑀤𑁂𑀢𑀻𑀢𑀺 𑀦 𑀧𑀘𑁆𑀘𑀸𑀳𑀭𑀢𑀺. 𑀕𑀘𑁆𑀙𑀦𑁆𑀢𑁄 𑀯𑀺𑀲𑀁𑀯𑀸𑀤𑁂𑀢𑀻𑀢𑀺 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀆𑀕𑀘𑁆𑀙𑀦𑁆𑀢𑁄 𑀲𑀫𑁆𑀧𑀸𑀤𑁂𑀢𑀻𑀢𑀺 𑀯𑀻𑀫𑀁𑀲𑀢𑀺 𑀘𑁂𑀯 𑀧𑀘𑁆𑀘𑀸𑀳𑀭𑀢𑀺 𑀘. 𑀏𑀯𑀁 𑀉𑀪𑀬𑀢𑁆𑀣 𑀤𑁆𑀯𑀻𑀳𑀗𑁆𑀕𑁂𑀳𑀺 𑀣𑀼𑀮𑁆𑀮𑀘𑁆𑀘𑀬𑀁. 𑀢𑀢𑀺𑀬𑀧𑀤𑁂 𑀆𑀧𑀢𑁆𑀢𑀺, 𑀘𑀢𑀼𑀢𑁆𑀣𑁂 𑀅𑀦𑀸𑀧𑀢𑁆𑀢𑀺.

𑁩𑁪𑁦. 𑀅𑀦𑀸𑀧𑀢𑁆𑀢𑀺 𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀕𑀺𑀮𑀸𑀦𑀲𑁆𑀲 𑀯𑀸 𑀓𑀭𑀡𑀻𑀬𑁂𑀦 𑀕𑀘𑁆𑀙𑀢𑀺 𑀉𑀫𑁆𑀫𑀢𑁆𑀢𑀓𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀧𑁄𑀲𑀣𑀸𑀕𑀸𑀭𑀁 𑀯𑀸 𑀓𑀺𑀜𑁆𑀘𑀺 𑀯𑀸 𑀯𑀺𑀧𑁆𑀧𑀓𑀢𑀁 𑀳𑁄𑀢𑀺. 𑀢𑀢𑁆𑀣 𑀓𑀸𑀭𑀼𑀓𑀸𑀦𑀁 𑀪𑀢𑁆𑀢𑀯𑁂𑀢𑀦𑀢𑁆𑀣𑀸𑀬 𑀉𑀧𑀸𑀲𑀓𑁄 𑀯𑀸 𑀉𑀧𑀸𑀲𑀺𑀓𑀸𑀬 𑀲𑀦𑁆𑀢𑀺𑀓𑀁 𑀪𑀺𑀓𑁆𑀔𑀼𑀁 𑀧𑀳𑀺𑀡𑁂𑀬𑁆𑀬, 𑀉𑀁𑀧𑀸𑀲𑀺𑀓𑀸 𑀯𑀸 𑀉𑀧𑀸𑀲𑀓𑀲𑁆𑀲, 𑀏𑀯𑀭𑀽𑀧𑁂𑀦 𑀲𑀗𑁆𑀖𑀲𑁆𑀲 𑀓𑀭𑀡𑀻𑀬𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀘𑁂𑀢𑀺𑀬𑀓𑀫𑁆𑀫𑁂 𑀓𑀬𑀺𑀭𑀫𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀕𑀺𑀮𑀸𑀦𑀲𑁆𑀲 𑀪𑁂𑀲𑀚𑁆𑀚𑀢𑁆𑀣𑀸𑀬𑀧𑀺 𑀉𑀧𑀸𑀲𑀓𑁂𑀦 𑀯𑀸 𑀉𑀧𑀸𑀲𑀺𑀓𑀸𑀬 𑀲𑀦𑁆𑀢𑀺𑀓𑀁 𑀉𑀧𑀸𑀲𑀺𑀓𑀸𑀬 𑀯𑀸 𑀉𑀧𑀸𑀲𑀓𑀲𑁆𑀲 𑀲𑀦𑁆𑀢𑀺𑀓𑀁 𑀧𑀳𑀺𑀢𑀲𑁆𑀲 𑀕𑀘𑁆𑀙𑀢𑁄 𑀅𑀦𑀸𑀧𑀢𑁆𑀢𑀺. 𑀉𑀫𑁆𑀫𑀢𑁆𑀢𑀓𑀆𑀤𑀺𑀓𑀫𑁆𑀫𑀺𑀓𑀸 𑀯𑀼𑀢𑁆𑀢𑀦𑀬𑀸 𑀏𑀯.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀙𑀲𑀫𑀼𑀝𑁆𑀞𑀸𑀦𑀁, 𑀲𑀻𑀲𑀼𑀓𑁆𑀔𑀺𑀧𑀦𑀸𑀤𑀺𑀦𑀸 𑀓𑀸𑀬𑀯𑀺𑀓𑀸𑀭𑁂𑀦 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀳𑀢𑁆𑀣𑀫𑀼𑀤𑁆𑀤𑀸𑀬 𑀯𑀻𑀫𑀁𑀲𑀺𑀢𑁆𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀳𑀢𑁆𑀣𑀫𑀼𑀤𑁆𑀤𑀸𑀬 𑀏𑀯 𑀆𑀭𑁄𑀘𑁂𑀦𑁆𑀢𑀲𑁆𑀲 𑀓𑀸𑀬𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀆𑀲𑀦𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 ‘‘𑀇𑀢𑁆𑀣𑀦𑁆𑀦𑀸𑀫𑀸 𑀆𑀕𑀫𑀺𑀲𑁆𑀲𑀢𑀺, 𑀢𑀲𑁆𑀲𑀸 𑀘𑀺𑀢𑁆𑀢𑀁 𑀚𑀸𑀦𑁂𑀬𑁆𑀬𑀸𑀣𑀸’’𑀢𑀺 𑀓𑁂𑀦𑀘𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀁 𑀆𑀕𑀢𑀁 𑀯𑀢𑁆𑀯𑀸 𑀢𑀲𑁆𑀲𑀸 𑀕𑀢𑀸𑀬 𑀧𑀼𑀦 𑀢𑀲𑁆𑀫𑀺𑀁 𑀧𑀼𑀭𑀺𑀲𑁂 𑀆𑀕𑀢𑁂 𑀆𑀭𑁄𑀘𑁂𑀦𑁆𑀢𑀲𑁆𑀲 𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀯𑀸𑀘𑀸𑀬 ‘‘𑀲𑀸𑀥𑀽’’𑀢𑀺 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑁂𑀦 𑀓𑀭𑀡𑀻𑀬𑁂𑀦 𑀢𑀲𑁆𑀲𑀸 𑀖𑀭𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑁆𑀣 𑀯𑀸 𑀕𑀫𑀦𑀓𑀸𑀮𑁂 𑀢𑀁 𑀤𑀺𑀲𑁆𑀯𑀸 𑀯𑀘𑀻𑀪𑁂𑀤𑁂𑀦𑁂𑀯 𑀯𑀻𑀫𑀁𑀲𑀺𑀢𑁆𑀯𑀸 𑀧𑀼𑀦 𑀅𑀜𑁆𑀜𑁂𑀦𑁂𑀯 𑀓𑀭𑀡𑀻𑀬𑁂𑀦 𑀢𑀢𑁄 𑀅𑀧𑀓𑁆𑀓𑀫𑁆𑀫 𑀓𑀤𑀸𑀘𑀺𑀤𑁂𑀯 𑀢𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀧𑀺 𑀯𑀸𑀘𑀢𑁄𑀯 𑀲𑀫𑀼𑀝𑁆𑀞𑀸𑀢𑀺. 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀲𑁆𑀲 𑀧𑀦 𑀔𑀻𑀡𑀸𑀲𑀯𑀲𑁆𑀲𑀸𑀧𑀺 𑀓𑀸𑀬𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀓𑀣𑀁? 𑀲𑀘𑁂 𑀳𑀺𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀓𑀼𑀚𑁆𑀛𑀺𑀢𑁆𑀯𑀸 𑀅𑀮𑀁𑀯𑀘𑀦𑀻𑀬𑀸 𑀳𑁄𑀦𑁆𑀢𑀺, 𑀢𑀜𑁆𑀘 𑀪𑀺𑀓𑁆𑀔𑀼𑀁 𑀖𑀭𑀁 𑀉𑀧𑀕𑀢𑀁 𑀣𑁂𑀭𑀧𑀺𑀢𑀸 𑀯𑀤𑀢𑀺 ‘‘𑀫𑀸𑀢𑀸 𑀢𑁂 𑀢𑀸𑀢 𑀫𑀁 𑀫𑀳𑀮𑁆𑀮𑀓𑀁 𑀙𑀟𑁆𑀟𑁂𑀢𑁆𑀯𑀸 𑀜𑀸𑀢𑀺𑀓𑀼𑀮𑀁 𑀕𑀢𑀸, 𑀕𑀘𑁆𑀙 𑀢𑀁 𑀫𑀁 𑀉𑀧𑀝𑁆𑀞𑀸𑀢𑀼𑀁 𑀧𑁂𑀲𑁂𑀳𑀻’’𑀢𑀺. 𑀲𑁄 𑀘𑁂 𑀕𑀦𑁆𑀢𑁆𑀯𑀸 𑀢𑀁 𑀯𑀢𑁆𑀯𑀸 𑀧𑀼𑀦 𑀧𑀺𑀢𑀼𑀦𑁄 𑀢𑀲𑁆𑀲𑀸 𑀆𑀕𑀫𑀦𑀁 𑀯𑀸 𑀅𑀦𑀸𑀕𑀫𑀦𑀁 𑀯𑀸 𑀆𑀭𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀇𑀫𑀸𑀦𑀺 𑀢𑀻𑀡𑀺 𑀅𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀸𑀦𑀺.

𑀧𑀡𑁆𑀡𑀢𑁆𑀢𑀺𑀁 𑀧𑀦 𑀚𑀸𑀦𑀺𑀢𑁆𑀯𑀸 𑀏𑀢𑁂𑀳𑁂𑀯 𑀢𑀻𑀳𑀺 𑀦𑀬𑁂𑀳𑀺 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑁄 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀇𑀫𑀸𑀦𑀺 𑀢𑀻𑀡𑀺 𑀧𑀡𑁆𑀡𑀢𑁆𑀢𑀺𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀸𑀦𑀺. 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀓𑀼𑀲𑀮𑀸𑀤𑀺𑀯𑀲𑁂𑀦 𑀘𑁂𑀢𑁆𑀣 𑀢𑀻𑀡𑀺 𑀘𑀺𑀢𑁆𑀢𑀸𑀦𑀺, 𑀲𑀼𑀔𑀸𑀤𑀺𑀯𑀲𑁂𑀦 𑀢𑀺𑀲𑁆𑀲𑁄 𑀯𑁂𑀤𑀦𑀸𑀢𑀺.

𑁩𑁪𑁧. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀆𑀤𑀺𑀢𑁄 𑀯𑀢𑁆𑀣𑀼𑀧𑀜𑁆𑀘𑀓𑁂 𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑀢𑁆𑀢𑀸 𑀤𑀼𑀓𑁆𑀓𑀝𑀁.

𑀓𑀮𑀳𑀯𑀢𑁆𑀣𑀼𑀲𑁆𑀫𑀺𑀁 𑀲𑀫𑁆𑀫𑁄𑀤𑀦𑀻𑀬𑀁 𑀅𑀓𑀸𑀲𑀻𑀢𑀺 𑀢𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀧𑀼𑀦 𑀕𑁂𑀳𑀕𑀫𑀦𑀻𑀬𑀁

𑀅𑀓𑀸𑀲𑀺. 𑀦𑀸𑀮𑀁𑀯𑀘𑀦𑀻𑀬𑀸𑀢𑀺 𑀦 𑀧𑀭𑀺𑀘𑁆𑀘𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀸 𑀳𑀺 𑀬𑀣𑀸 𑀬𑀣𑀸 𑀬𑁂𑀲𑀼 𑀬𑁂𑀲𑀼 𑀚𑀦𑀧𑀤𑁂𑀲𑀼 𑀧𑀭𑀺𑀘𑁆𑀘𑀢𑁆𑀢𑀸 𑀧𑀭𑀺𑀘𑁆𑀘𑀢𑁆𑀢𑀸𑀯 𑀳𑁄𑀢𑀺, 𑀪𑀭𑀺𑀬𑀸𑀪𑀸𑀯𑀁 𑀅𑀢𑀺𑀓𑁆𑀓𑀫𑀢𑀺, 𑀅𑀬𑀁 ‘‘𑀅𑀮𑀁𑀯𑀘𑀦𑀻𑀬𑀸’’𑀢𑀺 𑀯𑀼𑀘𑁆𑀘𑀢𑀺. 𑀏𑀲𑀸 𑀧𑀦 𑀦 𑀅𑀮𑀁𑀯𑀘𑀦𑀻𑀬𑀸 𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀓𑀮𑀳𑀁 𑀓𑀢𑁆𑀯𑀸 𑀕𑀢𑀸, 𑀢𑁂𑀦𑁂𑀯𑁂𑀢𑁆𑀣 𑀪𑀕𑀯𑀸 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀆𑀳. 𑀬𑀲𑁆𑀫𑀸 𑀧𑀦 𑀓𑀸𑀬𑀲𑀁𑀲𑀕𑁆𑀕𑁂 𑀬𑀓𑁆𑀔𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀤𑀼𑀝𑁆𑀞𑀼𑀮𑁆𑀮𑀸𑀤𑀻𑀲𑀼𑀧𑀺 𑀬𑀓𑁆𑀔𑀺𑀧𑁂𑀢𑀺𑀬𑁄 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀝𑁆𑀞𑀓𑀣𑀸𑀲𑀼 𑀧𑀦𑁂𑀢𑀁 𑀦 𑀯𑀺𑀘𑀸𑀭𑀺𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.