𑁪. 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁯𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀅𑀢𑁆𑀢𑀓𑀸𑀫𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀓𑀼𑀮𑀽𑀧𑀓𑁄𑀢𑀺 𑀓𑀼𑀮𑀧𑀬𑀺𑀭𑀼𑀧𑀸𑀲𑀦𑀓𑁄 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀢𑁆𑀣𑀸𑀬 𑀓𑀼𑀮𑀽𑀧𑀲𑀗𑁆𑀓𑀫𑀦𑁂 𑀦𑀺𑀘𑁆𑀘𑀧𑁆𑀧𑀬𑀼𑀢𑁆𑀢𑁄.

𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀘𑀻𑀯𑀭𑀜𑁆𑀘 𑀧𑀺𑀡𑁆𑀟𑀧𑀸𑀢𑀜𑁆𑀘 𑀲𑁂𑀦𑀸𑀲𑀦𑀜𑁆𑀘 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀜𑁆𑀘. 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀘𑁂𑀢𑁆𑀣 𑀧𑀢𑀺𑀓𑀭𑀡𑀢𑁆𑀣𑁂𑀦 𑀧𑀘𑁆𑀘𑀬𑁄, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀧𑁆𑀧𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀪𑀺𑀲𑀓𑁆𑀓𑀲𑁆𑀲 𑀓𑀫𑁆𑀫𑀁 𑀢𑁂𑀦 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺 𑀪𑁂𑀲𑀚𑁆𑀚𑀁. 𑀕𑀺𑀮𑀸𑀦𑀧𑀘𑁆𑀘𑀬𑁄𑀯 𑀪𑁂𑀲𑀚𑁆𑀚𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀁, 𑀬𑀁𑀓𑀺𑀜𑁆𑀘𑀺 𑀕𑀺𑀮𑀸𑀦𑀲𑁆𑀲 𑀲𑀧𑁆𑀧𑀸𑀬𑀁 𑀪𑀺𑀲𑀓𑁆𑀓𑀓𑀫𑁆𑀫𑀁 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀓𑁆𑀔𑀸𑀭𑁄𑀢𑀺 𑀧𑀦 ‘‘𑀲𑀢𑁆𑀢𑀳𑀺 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁭.𑁬𑁭) 𑀧𑀭𑀺𑀯𑀸𑀭𑁄 𑀯𑀼𑀘𑁆𑀘𑀢𑀺. ‘‘𑀭𑀣𑁄 𑀲𑀻𑀲𑀧𑀭𑀺𑀓𑁆𑀔𑀸𑀭𑁄 𑀛𑀸𑀦𑀓𑁆𑀔𑁄 𑀘𑀓𑁆𑀓𑀯𑀻𑀭𑀺𑀬𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁪) 𑀅𑀮𑀗𑁆𑀓𑀸𑀭𑁄. ‘‘𑀬𑁂 𑀘𑀺𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸’’𑀢𑀺𑀆𑀤𑀻𑀲𑀼 (𑀭𑁄. 𑀦𑀺. 𑁧.𑁧.𑁧𑁯𑁧) 𑀲𑀫𑁆𑀪𑀸𑀭𑁄. 𑀇𑀥 𑀧𑀦 𑀲𑀫𑁆𑀪𑀸𑀭𑁄𑀧𑀺 𑀧𑀭𑀺𑀯𑀸𑀭𑁄𑀧𑀺 𑀯𑀝𑁆𑀝𑀢𑀺. 𑀢𑀜𑁆𑀳𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀁 𑀚𑀻𑀯𑀺𑀢𑀲𑁆𑀲 𑀧𑀭𑀺𑀯𑀸𑀭𑁄𑀧𑀺 𑀳𑁄𑀢𑀺 𑀚𑀻𑀯𑀺𑀢𑀯𑀺𑀦𑀸𑀲𑀓𑀸𑀩𑀸𑀥𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀁 𑀅𑀤𑀢𑁆𑀯𑀸 𑀭𑀓𑁆𑀔𑀡𑀢𑁄, 𑀲𑀫𑁆𑀪𑀸𑀭𑁄𑀧𑀺 𑀬𑀣𑀸 𑀘𑀺𑀭𑀁 𑀧𑀯𑀢𑁆𑀢𑀢𑀺 𑀏𑀯𑀫𑀲𑁆𑀲 𑀓𑀸𑀭𑀡𑀪𑀸𑀯𑀢𑁄, 𑀢𑀲𑁆𑀫𑀸 𑀧𑀭𑀺𑀓𑁆𑀔𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀜𑁆𑀘 𑀢𑀁 𑀧𑀭𑀺𑀓𑁆𑀔𑀸𑀭𑁄 𑀘𑀸𑀢𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁄, 𑀢𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀯𑀲𑀮𑀦𑁆𑀢𑀺 𑀳𑀻𑀦𑀁 𑀮𑀸𑀫𑀓𑀁. 𑀅𑀣 𑀯𑀸 𑀯𑀲𑁆𑀲𑀢𑀻𑀢𑀺 𑀯𑀲𑀮𑁄, 𑀧𑀕𑁆𑀖𑀭𑀢𑀻𑀢𑀺 𑀅𑀢𑁆𑀣𑁄, 𑀢𑀁 𑀯𑀲𑀮𑀁, 𑀅𑀲𑀼𑀘𑀺𑀧𑀕𑁆𑀖𑀭𑀡𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀝𑁆𑀞𑀼𑀳𑀺𑀢𑁆𑀯𑀸𑀢𑀺 𑀔𑁂𑀴𑀁 𑀧𑀸𑀢𑁂𑀢𑁆𑀯𑀸.

𑀓𑀲𑁆𑀲𑀸𑀳𑀁 𑀓𑁂𑀦 𑀳𑀸𑀬𑀸𑀫𑀻𑀢𑀺 𑀅𑀳𑀁 𑀓𑀲𑁆𑀲𑀸 𑀅𑀜𑁆𑀜𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀓𑁂𑀦 𑀪𑁄𑀕𑁂𑀦 𑀯𑀸 𑀅𑀮𑀗𑁆𑀓𑀸𑀭𑁂𑀦 𑀯𑀸 𑀭𑀽𑀧𑁂𑀦 𑀯𑀸 𑀧𑀭𑀺𑀳𑀸𑀬𑀸𑀫𑀺, 𑀓𑀸 𑀦𑀸𑀫 𑀫𑀬𑀸 𑀉𑀢𑁆𑀢𑀭𑀺𑀢𑀭𑀸𑀢𑀺 𑀤𑀻𑀧𑁂𑀢𑀺.

𑁨𑁯𑁧. 𑀲𑀦𑁆𑀢𑀺𑀓𑁂𑀢𑀺 𑀉𑀧𑀘𑀸𑀭𑁂 𑀞𑀢𑁆𑀯𑀸 𑀲𑀸𑀫𑀦𑁆𑀢𑀸 𑀅𑀯𑀺𑀤𑀽𑀭𑁂, 𑀧𑀤𑀪𑀸𑀚𑀦𑁂𑀧𑀺 𑀅𑀬𑀫𑁂𑀯𑀅𑀢𑁆𑀣𑁄 𑀤𑀻𑀧𑀺𑀢𑁄. 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦 𑀧𑀸𑀭𑀺𑀘𑀭𑀺𑀬𑀸 𑀓𑀸𑀫𑀧𑀸𑀭𑀺𑀘𑀭𑀺𑀬𑀸. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀫𑀧𑀸𑀭𑀺𑀘𑀭𑀺𑀬𑀸 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀅𑀢𑁆𑀢𑀦𑀸 𑀯𑀸 𑀓𑀸𑀫𑀺𑀢𑀸 𑀇𑀘𑁆𑀙𑀺𑀢𑀸𑀢𑀺 𑀅𑀢𑁆𑀢𑀓𑀸𑀫𑀸, 𑀲𑀬𑀁 𑀫𑁂𑀣𑀼𑀦𑀭𑀸𑀕𑀯𑀲𑁂𑀦 𑀧𑀢𑁆𑀣𑀺𑀢𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀓𑀸𑀫𑀸 𑀘 𑀲𑀸 𑀧𑀸𑀭𑀺𑀘𑀭𑀺𑀬𑀸 𑀘𑀸𑀢𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀢𑀲𑁆𑀲𑀸 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬. 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀸𑀢𑀺 𑀕𑀼𑀡𑀁 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀬𑁆𑀬.

𑀢𑀢𑁆𑀭 𑀬𑀲𑁆𑀫𑀸 ‘‘𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀫𑀧𑀸𑀭𑀺𑀘𑀭𑀺𑀬𑀸’’𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀓𑀸𑀫𑁄 𑀘𑁂𑀯 𑀳𑁂𑀢𑀼 𑀘 𑀧𑀸𑀭𑀺𑀘𑀭𑀺𑀬𑀸 𑀘 𑀅𑀢𑁆𑀣𑁄, 𑀲𑁂𑀲𑀁 𑀩𑁆𑀬𑀜𑁆𑀚𑀦𑀁. ‘‘𑀅𑀢𑁆𑀢𑀓𑀸𑀫𑀸 𑀘 𑀲𑀸 𑀧𑀸𑀭𑀺𑀘𑀭𑀺𑀬𑀸 𑀘𑀸𑀢𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸’’𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀥𑀺𑀧𑁆𑀧𑀸𑀬𑁄 𑀘𑁂𑀯 𑀧𑀸𑀭𑀺𑀘𑀭𑀺𑀬𑀸 𑀘𑀸𑀢𑀺 𑀅𑀢𑁆𑀣𑁄, 𑀲𑁂𑀲𑀁 𑀩𑁆𑀬𑀜𑁆𑀚𑀦𑀁. 𑀢𑀲𑁆𑀫𑀸 𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸 𑀅𑀢𑁆𑀣𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀦𑁄 𑀓𑀸𑀫𑀁 𑀅𑀢𑁆𑀢𑀦𑁄 𑀳𑁂𑀢𑀼𑀁 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬’’𑀦𑁆𑀢𑀺 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. ‘‘𑀅𑀢𑁆𑀢𑀦𑁄 𑀓𑀸𑀫𑀁 𑀅𑀢𑁆𑀢𑀦𑁄 𑀳𑁂𑀢𑀼𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀚𑀸𑀦𑀺𑀲𑁆𑀲𑀦𑁆𑀢𑀺 𑀧𑀡𑁆𑀟𑀺𑀢𑀸 ‘‘𑀏𑀢𑁆𑀢𑀸𑀯𑀢𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀫𑀧𑀸𑀭𑀺𑀘𑀭𑀺𑀬𑀸 𑀯𑀼𑀢𑁆𑀢𑀸’’𑀢𑀺. ‘‘𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀚𑀸𑀦𑀺𑀲𑁆𑀲𑀦𑁆𑀢𑀺 ‘‘𑀏𑀢𑁆𑀢𑀸𑀯𑀢𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀓𑀸𑀫𑀺𑀢𑀝𑁆𑀞𑁂𑀦 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸 𑀯𑀼𑀢𑁆𑀢𑀸’’𑀢𑀺.

𑀇𑀤𑀸𑀦𑀺 𑀢𑀲𑁆𑀲𑀸 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀪𑀸𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑀤𑀕𑁆𑀕’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀤𑁆𑀤𑁂𑀲𑀢𑁄𑀧𑀺 𑀦𑀺𑀤𑁆𑀤𑁂𑀲𑀢𑁄𑀧𑀺 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀅𑀬𑀁 𑀧𑀦𑁂𑀢𑁆𑀣 𑀧𑀤𑀲𑀫𑁆𑀩𑀦𑁆𑀥𑁄 𑀘 𑀆𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑁄 𑀘 𑁋 𑀏𑀢𑀤𑀕𑁆𑀕𑀁…𑀧𑁂… 𑀧𑀭𑀺𑀘𑀭𑁂𑀬𑁆𑀬𑀸𑀢𑀺 𑀬𑀸 𑀫𑀸𑀤𑀺𑀲𑀁 𑀲𑀻𑀮𑀯𑀦𑁆𑀢𑀁 𑀓𑀮𑁆𑀬𑀸𑀡𑀥𑀫𑁆𑀫𑀁 𑀩𑁆𑀭𑀳𑁆𑀫𑀘𑀸𑀭𑀺𑀁 𑀏𑀢𑁂𑀦 𑀥𑀫𑁆𑀫𑁂𑀦 𑀧𑀭𑀺𑀘𑀭𑁂𑀬𑁆𑀬, 𑀢𑀲𑁆𑀲𑀸 𑀏𑀯𑀁 𑀫𑀸𑀤𑀺𑀲𑀁 𑀧𑀭𑀺𑀘𑀭𑀦𑁆𑀢𑀺𑀬𑀸 𑀬𑀸 𑀅𑀬𑀁 𑀧𑀸𑀭𑀺𑀘𑀭𑀺𑀬𑀸 𑀦𑀸𑀫, 𑀏𑀢𑀤𑀕𑁆𑀕𑀁 𑀧𑀸𑀭𑀺𑀘𑀭𑀺𑀬𑀸𑀦𑀦𑁆𑀢𑀺.

𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀏𑀯𑀁 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀦𑁆𑀢𑁄 𑀘 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑁂𑀦 𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑁂𑀦𑁂𑀯 𑀯𑀘𑀦𑁂𑀦 𑀬𑁄 𑀪𑀸𑀲𑁂𑀬𑁆𑀬, 𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑀇𑀥𑀸𑀦𑀺 𑀬𑀲𑁆𑀫𑀸 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑁂𑀦𑁂𑀯 𑀪𑀸𑀲𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 ‘‘𑀅𑀳𑀫𑁆𑀧𑀺 𑀔𑀢𑁆𑀢𑀺𑀬𑁄, 𑀢𑁆𑀯𑀫𑁆𑀧𑀺 𑀔𑀢𑁆𑀢𑀺𑀬𑀸, 𑀅𑀭𑀳𑀢𑀺 𑀔𑀢𑁆𑀢𑀺𑀬𑀸 𑀔𑀢𑁆𑀢𑀺𑀬𑀲𑁆𑀲 𑀤𑀸𑀢𑀼𑀁 𑀲𑀫𑀚𑀸𑀢𑀺𑀓𑀢𑁆𑀢𑀸’’𑀢𑀺 𑀏𑀯𑀫𑀸𑀤𑀻𑀳𑀺 𑀯𑀘𑀦𑁂𑀳𑀺 𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀫𑀸𑀦𑀲𑁆𑀲𑀸𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦𑀢𑁆𑀣𑀺. ‘‘𑀅𑀳𑀫𑁆𑀧𑀺 𑀔𑀢𑁆𑀢𑀺𑀬𑁄’’𑀢𑀺𑀆𑀤𑀺𑀓𑁂 𑀧𑀦 𑀩𑀳𑀽𑀧𑀺 𑀧𑀭𑀺𑀬𑀸𑀬𑁂 𑀯𑀢𑁆𑀯𑀸 ‘‘𑀅𑀭𑀳𑀲𑀺 𑀢𑁆𑀯𑀁 𑀫𑀬𑁆𑀳𑀁 𑀫𑁂𑀣𑀼𑀦𑀥𑀫𑁆𑀫𑀁 𑀤𑀸𑀢𑀼’’𑀦𑁆𑀢𑀺 𑀏𑀯𑀁 𑀫𑁂𑀣𑀼𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂𑀦𑁂𑀯 𑀪𑀸𑀲𑀫𑀸𑀦𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑀇𑀢𑁆𑀣𑀻 𑀘 𑀳𑁄𑀢𑀻𑀢𑀺𑀆𑀤𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀥 𑀉𑀤𑀸𑀬𑀺𑀢𑁆𑀣𑁂𑀭𑁄 𑀆𑀤𑀺𑀓𑀫𑁆𑀫𑀺𑀓𑁄, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀲𑀫𑀼𑀝𑁆𑀞𑀸𑀦𑀸𑀤𑀺 𑀲𑀩𑁆𑀩𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀤𑀺𑀲𑀁. 𑀯𑀺𑀦𑀻𑀢𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯𑀸𑀢𑀺.

𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.