𑁧𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁬𑁪. 𑀤𑀲𑀫𑁂 𑁋 𑀅𑀦𑀸𑀧𑀼𑀘𑁆𑀙𑀸𑀢𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸. 𑀪𑀺𑀓𑁆𑀔𑀼𑀦𑀻𑀳𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀆𑀧𑀼𑀘𑁆𑀙𑀺𑀢𑀩𑁆𑀩𑀁 𑁋 𑀧𑀩𑁆𑀩𑀚𑁆𑀚𑀸𑀓𑀸𑀮𑁂 𑀘 𑀉𑀧𑀲𑀫𑁆𑀧𑀤𑀸𑀓𑀸𑀮𑁂 𑀘, 𑀪𑀺𑀓𑁆𑀔𑀽𑀦𑀁 𑀧𑀦 𑀲𑀓𑀺𑀁 𑀆𑀧𑀼𑀘𑁆𑀙𑀺𑀢𑁂𑀧𑀺 𑀯𑀝𑁆𑀝𑀢𑀺.

𑁧𑁧𑁬𑁫. 𑀅𑀚𑀸𑀦𑀦𑁆𑀢𑀻𑀢𑀺 𑀫𑀸𑀢𑀸𑀤𑀻𑀦𑀁 𑀅𑀢𑁆𑀣𑀺𑀪𑀸𑀯𑀁 𑀅𑀚𑀸𑀦𑀦𑁆𑀢𑀻. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀇𑀤𑀁 𑀅𑀧𑀼𑀩𑁆𑀩𑀲𑀫𑀼𑀝𑁆𑀞𑀸𑀦𑀲𑀻𑀲𑀁. 𑀘𑀢𑀼𑀲𑀫𑀼𑀝𑁆𑀞𑀸𑀦𑀁 𑁋 𑀯𑀸𑀘𑀢𑁄 𑀓𑀸𑀬𑀯𑀸𑀘𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀓𑀣𑀁? 𑀅𑀩𑁆𑀪𑀸𑀦𑀓𑀫𑁆𑀫𑀸𑀤𑀻𑀲𑀼 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀔𑀡𑁆𑀟𑀲𑀻𑀫𑀸𑀬𑀁 𑀦𑀺𑀲𑀺𑀦𑁆𑀦𑀸 ‘‘𑀧𑀓𑁆𑀓𑁄𑀲𑀣 𑀲𑀺𑀓𑁆𑀔𑀫𑀸𑀦𑀁, 𑀇𑀥𑁂𑀯 𑀦𑀁 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀸’’𑀢𑀺 𑀉𑀧𑀲𑀫𑁆𑀧𑀸𑀤𑁂𑀢𑀺; 𑀏𑀯𑀁 𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀉𑀧𑀲𑁆𑀲𑀬𑀢𑁄 𑀧𑀝𑁆𑀞𑀸𑀬 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀯𑀢𑁆𑀯𑀸 𑀔𑀡𑁆𑀟𑀲𑀻𑀫𑀁 𑀕𑀘𑁆𑀙𑀦𑁆𑀢𑀺𑀬𑀸 𑀓𑀸𑀬𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀤𑁆𑀯𑀻𑀲𑀼𑀧𑀺 𑀞𑀸𑀦𑁂𑀲𑀼 𑀧𑀡𑁆𑀡𑀢𑁆𑀢𑀺𑀪𑀸𑀯𑀁 𑀚𑀸𑀦𑀺𑀢𑁆𑀯𑀸𑀯 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑀺𑀬𑀸 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀅𑀦𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑀦𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀤𑀲𑀫𑀲𑀺𑀓𑁆𑀔𑀸𑀧𑀤𑀁.