𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁧. 𑀧𑀸𑀭𑀸𑀚𑀺𑀓𑀓𑀡𑁆𑀟𑀁 (𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀯𑀡𑁆𑀡𑀦𑀸)

𑀬𑁄 𑀪𑀺𑀓𑁆𑀔𑀽𑀦𑀁 𑀯𑀺𑀪𑀗𑁆𑀕𑀲𑁆𑀲, 𑀲𑀗𑁆𑀕𑀳𑀺𑀢𑁄 𑀅𑀦𑀦𑁆𑀢𑀭𑀁;

𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀪𑀗𑁆𑀕𑀲𑁆𑀲, 𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄.

𑀧𑀢𑁆𑀢𑁄 𑀬𑀢𑁄 𑀢𑀢𑁄 𑀢𑀲𑁆𑀲, 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀁;

𑀓𑀸𑀢𑀼𑀁 𑀧𑀸𑀭𑀸𑀚𑀺𑀓𑁂 𑀢𑀸𑀯, 𑀳𑁄𑀢𑀺 𑀲𑀁𑀯𑀡𑁆𑀡𑀦𑀸 𑀅𑀬𑀁.

𑁧. 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁫𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… 𑀲𑀸𑀴𑁆𑀳𑁄 𑀫𑀺𑀕𑀸𑀭𑀦𑀢𑁆𑀢𑀸𑀢𑀺 𑀏𑀢𑁆𑀣 𑀲𑀸𑀴𑁆𑀳𑁄𑀢𑀺 𑀢𑀲𑁆𑀲 𑀦𑀸𑀫𑀁; 𑀫𑀺𑀕𑀸𑀭𑀫𑀸𑀢𑀼𑀬𑀸 𑀧𑀦 𑀦𑀢𑁆𑀢𑀸 𑀳𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀫𑀺𑀕𑀸𑀭𑀦𑀢𑁆𑀢𑀸’’𑀢𑀺. 𑀦𑀯𑀓𑀫𑁆𑀫𑀺𑀓𑀦𑁆𑀢𑀺 𑀦𑀯𑀓𑀫𑁆𑀫𑀸𑀥𑀺𑀝𑁆𑀞𑀸𑀬𑀺𑀓𑀁. 𑀧𑀡𑁆𑀟𑀺𑀢𑀸𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀩𑁆𑀬𑀢𑁆𑀢𑀸𑀢𑀺 𑀯𑁂𑀬𑁆𑀬𑀢𑁆𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀫𑁂𑀥𑀸𑀯𑀺𑀦𑀻𑀢𑀺 𑀧𑀸𑀴𑀺𑀕𑁆𑀕𑀳𑀡𑁂 𑀲𑀢𑀺𑀧𑀼𑀩𑁆𑀩𑀗𑁆𑀕𑀫𑀸𑀬 𑀧𑀜𑁆𑀜𑀸𑀬 𑀅𑀢𑁆𑀣𑀕𑁆𑀕𑀳𑀡𑁂 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀤𑀓𑁆𑀔𑀸𑀢𑀺 𑀙𑁂𑀓𑀸; 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀲𑀻𑀖𑀁 𑀓𑀢𑁆𑀢𑀩𑁆𑀩𑀓𑀸𑀭𑀺𑀦𑀻𑀢𑀺 𑀅𑀢𑁆𑀣𑁄. 𑀅𑀦𑀮𑀲𑀸𑀢𑀺 𑀆𑀮𑀲𑀺𑀬𑀯𑀺𑀭𑀳𑀺𑀢𑀸. 𑀢𑀢𑁆𑀭𑀼𑀧𑀸𑀬𑀸𑀬𑀸𑀢𑀺 𑀢𑁂𑀲𑀼 𑀢𑁂𑀲𑀼 𑀓𑀫𑁆𑀫𑁂𑀲𑀼 𑀉𑀧𑀸𑀬𑀪𑀽𑀢𑀸𑀬. 𑀯𑀻𑀫𑀁𑀲𑀸𑀬𑀸𑀢𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑀼𑀧𑀧𑀭𑀺𑀓𑁆𑀔𑀸𑀬. 𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀅𑀮𑀁 𑀓𑀸𑀢𑀼𑀦𑁆𑀢𑀺 𑀲𑀫𑀢𑁆𑀣𑀸 𑀢𑀁 𑀢𑀁 𑀓𑀫𑁆𑀫𑀁 𑀓𑀸𑀢𑀼𑀁. 𑀅𑀮𑀁 𑀲𑀁𑀯𑀺𑀥𑀸𑀢𑀼𑀦𑁆𑀢𑀺 𑀏𑀯𑀜𑁆𑀘 𑀏𑀯𑀜𑁆𑀘 𑀇𑀤𑀁 𑀳𑁄𑀢𑀽𑀢𑀺 𑀏𑀯𑀁 𑀲𑀁𑀯𑀺𑀤𑀳𑀺𑀢𑀼𑀫𑁆𑀧𑀺 𑀲𑀫𑀢𑁆𑀣𑀸. 𑀓𑀢𑀸𑀓𑀢𑀁 𑀚𑀸𑀦𑀺𑀢𑀼𑀦𑁆𑀢𑀺 𑀓𑀢𑀜𑁆𑀘 𑀅𑀓𑀢𑀜𑁆𑀘 𑀚𑀸𑀦𑀺𑀢𑀼𑀁. 𑀢𑁂𑀢𑀺 𑀢𑁂 𑀉𑀪𑁄; 𑀲𑀸 𑀘 𑀲𑀼𑀦𑁆𑀤𑀭𑀻𑀦𑀦𑁆𑀤𑀸 𑀲𑁄 𑀘 𑀲𑀸𑀴𑁆𑀳𑁄𑀢𑀺 𑀅𑀢𑁆𑀣𑁄. 𑀪𑀢𑁆𑀢𑀕𑁆𑀕𑁂𑀢𑀺 𑀧𑀭𑀺𑀯𑁂𑀲𑀦𑀝𑁆𑀞𑀸𑀦𑁂. 𑀦𑀺𑀓𑀽𑀝𑁂𑀢𑀺 𑀓𑁄𑀡𑀲𑀤𑀺𑀲𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑁂 𑀕𑀫𑁆𑀪𑀻𑀭𑁂. 𑀯𑀺𑀲𑁆𑀲𑀭𑁄 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀯𑀺𑀭𑀽𑀧𑁄 𑀫𑁂 𑀲𑀭𑁄 𑀪𑀯𑀺𑀲𑁆𑀲𑀢𑀺; 𑀯𑀺𑀧𑁆𑀧𑀓𑀸𑀭𑀲𑀤𑁆𑀤𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀢𑀺𑀫𑀸𑀦𑁂𑀦𑁆𑀢𑀻𑀢𑀺 𑀅𑀧𑁂𑀓𑁆𑀔𑀫𑀸𑀦𑀸. 𑀓𑁆𑀬𑀸𑀳𑀦𑁆𑀢𑀺 𑀓𑀺𑀁 𑀅𑀳𑀁. 𑀚𑀭𑀸𑀤𑀼𑀩𑁆𑀩𑀮𑀸𑀢𑀺 𑀚𑀭𑀸𑀬 𑀤𑀼𑀩𑁆𑀩𑀮𑀸. 𑀘𑀭𑀡𑀕𑀺𑀮𑀸𑀦𑀸𑀢𑀺 𑀧𑀸𑀤𑀭𑁄𑀕𑁂𑀦 𑀲𑀫𑀦𑁆𑀦𑀸𑀕𑀢𑀸.

𑁬𑁫𑁭-𑁮. 𑀅𑀯𑀲𑁆𑀲𑀼𑀢𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀅𑀯𑀲𑁆𑀲𑀼𑀢𑀸; 𑀢𑀺𑀦𑁆𑀢𑀸 𑀓𑀺𑀮𑀺𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀧𑀤𑀪𑀸𑀚𑀦𑁂 𑀧𑀦𑀲𑁆𑀲 𑀢𑀫𑁂𑀯 𑀭𑀸𑀕𑀁 𑀕𑀳𑁂𑀢𑁆𑀯𑀸 ‘‘𑀲𑀸𑀭𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀭𑀢𑁆𑀢𑀸𑀢𑀺 𑀯𑀢𑁆𑀣𑀁 𑀯𑀺𑀬 𑀭𑀗𑁆𑀕𑀚𑀸𑀢𑁂𑀦 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀲𑀼𑀝𑁆𑀞𑀼 𑀭𑀢𑁆𑀢𑀸. 𑀅𑀧𑁂𑀓𑁆𑀔𑀯𑀢𑀻𑀢𑀺 𑀢𑀲𑁆𑀲𑁂𑀯 𑀭𑀸𑀕𑀲𑁆𑀲 𑀯𑀲𑁂𑀦 𑀢𑀲𑁆𑀫𑀺𑀁 𑀧𑀼𑀭𑀺𑀲𑁂 𑀧𑀯𑀢𑁆𑀢𑀸𑀬 𑀅𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸𑀢𑀺 𑀢𑁂𑀦 𑀭𑀸𑀕𑁂𑀦 𑀢𑀲𑁆𑀫𑀺𑀁 𑀧𑀼𑀭𑀺𑀲𑁂 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀘𑀺𑀢𑁆𑀢𑀸 𑀯𑀺𑀬. 𑀏𑀲 𑀦𑀬𑁄 𑀤𑀼𑀢𑀺𑀬𑀧𑀤𑀯𑀺𑀪𑀗𑁆𑀕𑁂𑀧𑀺. 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀧𑀼𑀭𑀺𑀲𑀲𑀗𑁆𑀔𑀸𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀅𑀥𑀓𑁆𑀔𑀓𑀦𑁆𑀢𑀺 𑀅𑀓𑁆𑀔𑀓𑀸𑀦𑀁 𑀅𑀥𑁄. 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀦𑁆𑀢𑀺 𑀚𑀸𑀡𑀼𑀫𑀡𑁆𑀟𑀮𑀸𑀦𑀁 𑀉𑀧𑀭𑀺. 𑀧𑀤𑀪𑀸𑀚𑀦𑁂 𑀧𑀦 𑀧𑀤𑀧𑀝𑀺𑀧𑀸𑀝𑀺𑀬𑀸 𑀏𑀯 ‘‘𑀳𑁂𑀝𑁆𑀞𑀓𑁆𑀔𑀓𑀁 𑀉𑀧𑀭𑀺𑀚𑀸𑀡𑀼𑀫𑀡𑁆𑀟𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀉𑀩𑁆𑀪𑀓𑀧𑁆𑀧𑀭𑀫𑁆𑀧𑀺 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑁂𑀦𑁂𑀯 𑀲𑀗𑁆𑀕𑀳𑀺𑀢𑀁. 𑀲𑁂𑀲𑀁 𑀫𑀳𑀸𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀭𑀺𑀫𑀸𑀬𑁄 𑀉𑀧𑀸𑀤𑀸𑀬𑀸𑀢𑀺 𑀲𑀸𑀥𑀸𑀭𑀡𑀧𑀸𑀭𑀸𑀚𑀺𑀓𑁂𑀳𑀺 𑀧𑀸𑀭𑀸𑀚𑀺𑀓𑀸𑀬𑁄 𑀘𑀢𑀲𑁆𑀲𑁄 𑀉𑀧𑀸𑀤𑀸𑀬𑀸𑀢𑀺 𑀅𑀢𑁆𑀣𑁄. 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸𑀢𑀺 𑀇𑀤𑀁 𑀧𑀦 𑀇𑀫𑀺𑀲𑁆𑀲𑀸 𑀧𑀸𑀭𑀸𑀚𑀺𑀓𑀸𑀬 𑀦𑀸𑀫𑀫𑀢𑁆𑀢𑀁, 𑀢𑀲𑁆𑀫𑀸 𑀧𑀤𑀪𑀸𑀚𑀦𑁂 𑀦 𑀯𑀺𑀘𑀸𑀭𑀺𑀢𑀁.

𑁬𑁫𑁯. 𑀏𑀯𑀁 𑀉𑀤𑁆𑀤𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀧𑀤𑀸𑀦𑀼𑀓𑁆𑀓𑀫𑁂𑀦 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀅𑀯𑀲𑁆𑀲𑀼𑀢𑀸𑀤𑀺𑀪𑁂𑀤𑁂𑀦 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀪𑀢𑁄𑀅𑀯𑀲𑁆𑀲𑀼𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀪𑀢𑁄𑀅𑀯𑀲𑁆𑀲𑀼𑀢𑁂𑀢𑀺 𑀉𑀪𑀢𑁄𑀅𑀯𑀲𑁆𑀲𑀯𑁂; 𑀪𑀺𑀓𑁆𑀔𑀼𑀦𑀺𑀬𑀸 𑀘𑁂𑀯 𑀧𑀼𑀭𑀺𑀲𑀲𑁆𑀲 𑀘 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀅𑀯𑀲𑁆𑀲𑀼𑀢𑀪𑀸𑀯𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀬𑁂𑀦 𑀓𑀸𑀬𑀁 𑀆𑀫𑀲𑀢𑀻𑀢𑀺 𑀪𑀺𑀓𑁆𑀔𑀼𑀦𑀻 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂𑀦 𑀓𑀸𑀬𑁂𑀦 𑀧𑀼𑀭𑀺𑀲𑀲𑁆𑀲 𑀬𑀁𑀓𑀺𑀜𑁆𑀘𑀺 𑀓𑀸𑀬𑀁 𑀧𑀼𑀭𑀺𑀲𑁄 𑀯𑀸 𑀬𑁂𑀦 𑀓𑁂𑀦𑀘𑀺 𑀓𑀸𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀁 𑀓𑀸𑀬𑀁 𑀆𑀫𑀲𑀢𑀺, 𑀉𑀪𑀬𑀣𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀁. 𑀓𑀸𑀬𑁂𑀦 𑀓𑀸𑀬𑀧𑀝𑀺𑀩𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀧𑀼𑀭𑀺𑀲𑀲𑁆𑀲 𑀓𑀸𑀬𑀧𑀝𑀺𑀩𑀤𑁆𑀥𑀁. 𑀆𑀫𑀲𑀢𑀻𑀢𑀺 𑀏𑀢𑁆𑀣 𑀲𑀬𑀁 𑀯𑀸 𑀆𑀫𑀲𑀢𑀼, 𑀢𑀲𑁆𑀲 𑀯𑀸 𑀆𑀫𑀲𑀦𑀁 𑀲𑀸𑀤𑀺𑀬𑀢𑀼, 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑀦𑁆𑀢𑀺 𑀅𑀢𑁆𑀢𑀦𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀧𑀼𑀭𑀺𑀲𑀲𑁆𑀲 𑀓𑀸𑀬𑀁. 𑀆𑀫𑀲𑀢𑀻𑀢𑀺 𑀇𑀥𑀸𑀧𑀺 𑀲𑀬𑀁 𑀯𑀸 𑀆𑀫𑀲𑀢𑀼, 𑀢𑀲𑁆𑀲 𑀯𑀸 𑀆𑀫𑀲𑀦𑀁 𑀲𑀸𑀤𑀺𑀬𑀢𑀼, 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀅𑀯𑀲𑁂𑀲𑀧𑀤𑁂𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀘𑁂 𑀧𑀦 𑀪𑀺𑀓𑁆𑀔𑀼 𑀘𑁂𑀯 𑀪𑀺𑀓𑁆𑀔𑀼𑀦𑀻 𑀘 𑀳𑁄𑀢𑀺, 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑀻 𑀆𑀫𑀲𑀢𑀺, 𑀪𑀺𑀓𑁆𑀔𑀼 𑀦𑀺𑀘𑁆𑀘𑀮𑁄 𑀳𑀼𑀢𑁆𑀯𑀸 𑀘𑀺𑀢𑁆𑀢𑁂𑀦 𑀲𑀸𑀤𑀺𑀬𑀢𑀺, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀦 𑀓𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀪𑀺𑀓𑁆𑀔𑀼 𑀆𑀫𑀲𑀢𑀺, 𑀪𑀺𑀓𑁆𑀔𑀼𑀦𑀻 𑀦𑀺𑀘𑁆𑀘𑀮𑀸 𑀳𑀼𑀢𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀅𑀥𑀺𑀯𑀸𑀲𑁂𑀢𑀺, 𑀓𑀸𑀬𑀗𑁆𑀕𑀁 𑀅𑀘𑁄𑀧𑀬𑀫𑀸𑀦𑀸𑀧𑀺 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀧𑀸𑀭𑀸𑀚𑀺𑀓𑁂𑀦, 𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑁂𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑁂𑀦, 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀤𑀼𑀓𑁆𑀓𑀝𑁂𑀦 𑀓𑀸𑀭𑁂𑀢𑀩𑁆𑀩𑀸. 𑀓𑀲𑁆𑀫𑀸? ‘‘𑀓𑀸𑀬𑀲𑀁𑀲𑀕𑁆𑀕𑀁 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀅𑀬𑀁 𑀅𑀝𑁆𑀞𑀓𑀣𑀸𑀲𑀼 𑀯𑀺𑀦𑀺𑀘𑁆𑀙𑀬𑁄. 𑀏𑀯𑀁 𑀧𑀦 𑀲𑀢𑀺 𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀦𑀢𑀸 𑀦 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀩𑁆𑀩𑀳𑀼𑀮𑀦𑀬𑁂𑀦 𑀲𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬𑁬𑁦. 𑀉𑀩𑁆𑀪𑀓𑁆𑀔𑀓𑀦𑁆𑀢𑀺 𑀅𑀓𑁆𑀔𑀓𑀸𑀦𑀁 𑀉𑀧𑀭𑀺. 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑀦𑁆𑀢𑀺 𑀚𑀸𑀡𑀼𑀫𑀡𑁆𑀟𑀮𑀸𑀦𑀁 𑀳𑁂𑀝𑁆𑀞𑀸. 𑀏𑀢𑁆𑀣 𑀘 𑀅𑀥𑁄𑀓𑀧𑁆𑀧𑀭𑀫𑁆𑀧𑀺 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑁂𑀦𑁂𑀯 𑀲𑀗𑁆𑀕𑀳𑀺𑀢𑀁.

𑁬𑁬𑁨. 𑀏𑀓𑀢𑁄𑀅𑀯𑀲𑁆𑀲𑀼𑀢𑁂𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀏𑀓𑀢𑁄𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑀸 𑀏𑀯 𑀅𑀯𑀲𑁆𑀲𑀼𑀢𑁂 𑀲𑀢𑀺 𑀅𑀬𑀁 𑀆𑀧𑀢𑁆𑀢𑀺𑀪𑁂𑀤𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀸𑀬𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀺𑀦𑀺𑀘𑁆𑀙𑀬𑁄 𑁋 𑀪𑀺𑀓𑁆𑀔𑀼𑀦𑀻 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀅𑀯𑀲𑁆𑀲𑀼𑀢𑀸, 𑀧𑀼𑀭𑀺𑀲𑁄𑀧𑀺 𑀢𑀣𑁂𑀯. 𑀅𑀥𑀓𑁆𑀔𑀓𑁂 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑁂 𑀓𑀸𑀬𑀧𑁆𑀧𑀤𑁂𑀲𑁂 𑀓𑀸𑀬𑀲𑀁𑀲𑀕𑁆𑀕𑀲𑀸𑀤𑀺𑀬𑀦𑁂 𑀲𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀁. 𑀪𑀺𑀓𑁆𑀔𑀼𑀦𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄, 𑀧𑀼𑀭𑀺𑀲𑀲𑁆𑀲 𑀫𑁂𑀣𑀼𑀦𑀭𑀸𑀕𑁄 𑀯𑀸 𑀕𑁂𑀳𑀲𑁆𑀲𑀺𑀢𑀧𑁂𑀫𑀁 𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑀁 𑀯𑀸 𑀳𑁄𑀢𑀼, 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀪𑀺𑀓𑁆𑀔𑀼𑀦𑀺𑀬𑀸 𑀫𑁂𑀣𑀼𑀦𑀭𑀸𑀕𑁄, 𑀧𑀼𑀭𑀺𑀲𑀲𑁆𑀲 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄 𑀯𑀸 𑀫𑁂𑀣𑀼𑀦𑀭𑀸𑀕𑁄 𑀯𑀸 𑀕𑀳𑁂𑀲𑁆𑀲𑀺𑀢𑀧𑁂𑀫𑀁 𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑀁 𑀯𑀸 𑀳𑁄𑀢𑀼, 𑀤𑀼𑀓𑁆𑀓𑀝𑀁. 𑀪𑀺𑀓𑁆𑀔𑀼𑀦𑀺𑀬𑀸 𑀕𑁂𑀳𑀲𑁆𑀲𑀺𑀢𑀧𑁂𑀫𑀁, 𑀧𑀼𑀭𑀺𑀲𑀲𑁆𑀲 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀬𑀁 𑀯𑀸 𑀢𑀁 𑀯𑀸 𑀳𑁄𑀢𑀼, 𑀤𑀼𑀓𑁆𑀓𑀝𑀫𑁂𑀯. 𑀪𑀺𑀓𑁆𑀔𑀼𑀦𑀺𑀬𑀸 𑀲𑀼𑀤𑁆𑀥𑀘𑀺𑀢𑁆𑀢𑀁, 𑀧𑀼𑀭𑀺𑀲𑀲𑁆𑀲 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀬𑀁 𑀯𑀸 𑀢𑀁 𑀯𑀸 𑀳𑁄𑀢𑀼, 𑀅𑀦𑀸𑀧𑀢𑁆𑀢𑀺.

𑀲𑀘𑁂 𑀧𑀦 𑀪𑀺𑀓𑁆𑀔𑀼 𑀘𑁂𑀯 𑀳𑁄𑀢𑀺 𑀪𑀺𑀓𑁆𑀔𑀼𑀦𑀻 𑀘 𑀉𑀪𑀺𑀦𑁆𑀦𑀁 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄, 𑀪𑀺𑀓𑁆𑀔𑀼𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀁. 𑀪𑀺𑀓𑁆𑀔𑀼𑀦𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄, 𑀪𑀺𑀓𑁆𑀔𑀼𑀲𑁆𑀲 𑀫𑁂𑀣𑀼𑀦𑀭𑀸𑀕𑁄 𑀯𑀸 𑀕𑁂𑀳𑀲𑁆𑀲𑀺𑀢𑀧𑁂𑀫𑀁 𑀯𑀸, 𑀪𑀺𑀓𑁆𑀔𑀼𑀦𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀁. 𑀉𑀪𑀺𑀦𑁆𑀦𑀁 𑀫𑁂𑀣𑀼𑀦𑀭𑀸𑀕𑁄 𑀯𑀸 𑀕𑁂𑀳𑀲𑁆𑀲𑀺𑀢𑀧𑁂𑀫𑀁 𑀯𑀸, 𑀉𑀪𑀺𑀦𑁆𑀦𑀫𑁆𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀬𑀲𑁆𑀲 𑀬𑀢𑁆𑀣 𑀲𑀼𑀤𑁆𑀥𑀘𑀺𑀢𑁆𑀢𑀁, 𑀢𑀲𑁆𑀲 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺. 𑀉𑀪𑀺𑀦𑁆𑀦𑀫𑁆𑀧𑀺 𑀲𑀼𑀤𑁆𑀥𑀘𑀺𑀢𑁆𑀢𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺.

𑁬𑁬𑁩. 𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘𑀸𑀢𑀺𑀆𑀤𑀻𑀲𑀼 𑀯𑀺𑀭𑀚𑁆𑀛𑀺𑀢𑁆𑀯𑀸 𑀯𑀸 𑀆𑀫𑀲𑀦𑁆𑀢𑀺𑀬𑀸 𑀅𑀜𑁆𑀜𑀯𑀺𑀳𑀺𑀢𑀸𑀬 𑀯𑀸 ‘‘𑀅𑀬𑀁 𑀧𑀼𑀭𑀺𑀲𑁄 𑀯𑀸 𑀇𑀢𑁆𑀣𑀻 𑀯𑀸’’𑀢𑀺 𑀅𑀚𑀸𑀦𑀦𑁆𑀢𑀺𑀬𑀸 𑀯𑀸 𑀢𑁂𑀦 𑀨𑀼𑀝𑁆𑀞𑀸𑀬𑀧𑀺 𑀢𑀁 𑀨𑀲𑁆𑀲𑀁 𑀅𑀲𑀸𑀤𑀺𑀬𑀦𑁆𑀢𑀺𑀬𑀸 𑀯𑀸 𑀆𑀫𑀲𑀦𑁂𑀧𑀺 𑀲𑀢𑀺 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀦𑁆𑀢𑀺.

𑀧𑀞𑀫𑀧𑀸𑀭𑀸𑀚𑀺𑀓𑀁.

𑁨. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁬𑁪. 𑀤𑀼𑀢𑀺𑀬𑁂 𑀧𑀸𑀭𑀸𑀚𑀺𑀓𑁂 𑁋 𑀓𑀘𑁆𑀘𑀺 𑀦𑁄 𑀲𑀸𑀢𑀺 𑀓𑀘𑁆𑀘𑀺 𑀦𑀼 𑀲𑀸. 𑀅𑀯𑀡𑁆𑀡𑁄𑀢𑀺 𑀅𑀕𑀼𑀡𑁄. 𑀅𑀓𑀺𑀢𑁆𑀢𑀻𑀢𑀺 𑀦𑀺𑀦𑁆𑀤𑀸. 𑀅𑀬𑀲𑁄𑀢𑀺 𑀧𑀭𑀺𑀯𑀸𑀭𑀯𑀺𑀧𑀢𑁆𑀢𑀺; 𑀧𑀭𑀫𑁆𑀫𑀼𑀔𑀕𑀭𑀳𑀸 𑀯𑀸.

𑁬𑁬𑁫. 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀸𑀢𑀺 𑀇𑀤𑀫𑁆𑀧𑀺 𑀇𑀫𑀺𑀲𑁆𑀲𑀸 𑀧𑀸𑀭𑀸𑀚𑀺𑀓𑀸𑀬 𑀦𑀸𑀫𑀫𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀧𑀤𑀪𑀸𑀚𑀦𑁂 𑀦 𑀯𑀺𑀘𑀸𑀭𑀺𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁬𑁬𑁬. 𑀲𑀸 𑀯𑀸 𑀆𑀭𑁄𑀘𑁂𑀢𑀻𑀢𑀺 𑀬𑀸 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸, 𑀲𑀸 𑀲𑀬𑀁 𑀆𑀭𑁄𑀘𑁂𑀢𑀺. 𑀅𑀝𑁆𑀞𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀅𑀜𑁆𑀜𑀢𑀭𑀦𑁆𑀢𑀺 𑀪𑀺𑀓𑁆𑀔𑀽𑀳𑀺 𑀲𑀸𑀥𑀸𑀭𑀡𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀸𑀥𑀸𑀭𑀡𑀸𑀦𑀜𑁆𑀘 𑀘𑀢𑀼𑀦𑁆𑀦𑀫𑁂𑀯 𑀅𑀜𑁆𑀜𑀢𑀭𑀁. 𑀇𑀤𑀜𑁆𑀘 𑀧𑀸𑀭𑀸𑀚𑀺𑀓𑀁 𑀧𑀘𑁆𑀙𑀸 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 ‘‘𑀅𑀝𑁆𑀞𑀦𑁆𑀦’’𑀦𑁆𑀢𑀺 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁. 𑀧𑀼𑀭𑀺𑀫𑁂𑀦 𑀧𑀦 𑀲𑀤𑁆𑀥𑀺𑀁 𑀬𑀼𑀕𑀴𑀢𑁆𑀢𑀸 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀞𑀧𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀢𑀺 𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂. 𑀯𑀺𑀢𑁆𑀣𑀸𑀭𑀓𑀣𑀸 𑀧𑀦𑁂𑀢𑁆𑀣 𑀲𑀧𑁆𑀧𑀸𑀡𑀓𑀯𑀕𑁆𑀕𑀫𑁆𑀳𑀺 𑀤𑀼𑀝𑁆𑀞𑀼𑀮𑁆𑀮𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀭 𑀳𑀺 𑀧𑀸𑀘𑀺𑀢𑁆𑀢𑀺𑀬𑀁, 𑀇𑀥 𑀧𑀸𑀭𑀸𑀚𑀺𑀓𑀦𑁆𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀸𑀢𑀺 𑀇𑀤𑀫𑁆𑀧𑀺𑀇𑀫𑀺𑀲𑁆𑀲𑀸 𑀧𑀸𑀭𑀸𑀚𑀺𑀓𑀸𑀬 𑀦𑀸𑀫𑀫𑀢𑁆𑀣𑀸𑀫𑁂𑀯, 𑀢𑀲𑁆𑀫𑀸 𑀧𑀤𑀪𑀸𑀚𑀦𑁂 𑀦 𑀯𑀺𑀘𑀸𑀭𑀺𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀅𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀁.

𑁩. 𑀢𑀢𑀺𑀬𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁬𑁯. 𑀢𑀢𑀺𑀬𑁂 𑁋 𑀥𑀫𑁆𑀫𑁂𑀦𑀸𑀢𑀺 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸. 𑀯𑀺𑀦𑀬𑁂𑀦𑀸𑀢𑀺 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸. 𑀧𑀤𑀪𑀸𑀚𑀦𑀁 𑀧𑀦𑀲𑁆𑀲 ‘‘𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀉𑀓𑁆𑀔𑀺𑀢𑁆𑀢𑁄 𑀲𑀼𑀉𑀓𑁆𑀔𑀺𑀢𑁆𑀢𑁄 𑀳𑁄𑀢𑀻’’𑀢𑀺 𑀇𑀫𑀁𑀅𑀥𑀺𑀧𑁆𑀧𑀸𑀬𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀲𑀢𑁆𑀣𑀼𑀲𑀸𑀲𑀦𑁂𑀦𑀸𑀢𑀺 𑀜𑀢𑁆𑀢𑀺𑀲𑀫𑁆𑀧𑀤𑀸𑀬 𑀘𑁂𑀯 𑀅𑀦𑀼𑀲𑀸𑀯𑀦𑀲𑀫𑁆𑀧𑀤𑀸𑀬 𑀘. 𑀧𑀤𑀪𑀸𑀚𑀦𑁂 𑀧𑀦𑀲𑁆𑀲 ‘‘𑀚𑀺𑀦𑀲𑀸𑀲𑀦𑁂𑀦 𑀩𑀼𑀤𑁆𑀥𑀲𑀸𑀲𑀦𑁂𑀦𑀸’’𑀢𑀺 𑀯𑁂𑀯𑀘𑀦𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀁. 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸𑀢𑀺𑀆𑀤𑀻𑀲𑀼 𑀬𑁂𑀦 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀢𑀁, 𑀢𑀁 𑀲𑀗𑁆𑀖𑀁 𑀯𑀸 𑀢𑀢𑁆𑀣 𑀲𑀫𑁆𑀩𑀳𑀼𑀮𑀧𑀼𑀕𑁆𑀕𑀮𑀲𑀗𑁆𑀔𑀸𑀢𑀁 𑀕𑀡𑀁 𑀯𑀸, 𑀏𑀓𑀧𑀼𑀕𑁆𑀕𑀮𑀁 𑀯𑀸 𑀢𑀁 𑀓𑀫𑁆𑀫𑀁 𑀯𑀸 𑀦 𑀆𑀤𑀺𑀬𑀢𑀺, 𑀦 𑀅𑀦𑀼𑀯𑀢𑁆𑀢𑀢𑀺, 𑀦 𑀢𑀢𑁆𑀣 𑀆𑀤𑀭𑀁 𑀚𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀸𑀦𑀲𑀁𑀯𑀸𑀲𑀓𑀸 𑀪𑀺𑀓𑁆𑀔𑀽 𑀯𑀼𑀘𑁆𑀘𑀦𑁆𑀢𑀺 𑀲𑀳𑀸𑀬𑀸, 𑀲𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀦𑀢𑁆𑀣𑀻𑀢𑀺 𑀏𑀢𑁆𑀣 ‘‘𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄 𑀲𑀫𑀲𑀺𑀓𑁆𑀔𑀢𑀸’’𑀢𑀺 𑀅𑀬𑀁 𑀢𑀸𑀯 𑀲𑀁𑀯𑀸𑀲𑁄; 𑀲𑀫𑀸𑀦𑁄 𑀲𑀁𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀸.𑀏𑀯𑀭𑀽𑀧𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀲𑁆𑀲 𑀢𑀲𑁆𑀫𑀺𑀁 𑀲𑀁𑀯𑀸𑀲𑁂 𑀲𑀳 𑀅𑀬𑀦𑀪𑀸𑀯𑁂𑀦 𑀲𑀳𑀸𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀤𑀸𑀦𑀺 𑀬𑁂𑀦 𑀲𑀁𑀯𑀸𑀲𑁂𑀦 𑀢𑁂 𑀲𑀫𑀸𑀦𑀲𑀁𑀯𑀸𑀲𑀓𑀸𑀢𑀺 𑀯𑀼𑀢𑁆𑀢𑀸, 𑀲𑁄 𑀲𑀁𑀯𑀸𑀲𑁄 𑀢𑀲𑁆𑀲 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀢𑁂𑀳𑀺 𑀲𑀤𑁆𑀥𑀺𑀁 𑀦𑀢𑁆𑀣𑀺. 𑀬𑁂𑀳𑀺 𑀘 𑀲𑀤𑁆𑀥𑀺𑀁 𑀢𑀲𑁆𑀲 𑀲𑁄 𑀲𑀁𑀯𑀸𑀲𑁄 𑀦𑀢𑁆𑀣𑀺, 𑀦 𑀢𑁂𑀦 𑀢𑁂 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀲𑀳𑀸𑀬𑀸 𑀓𑀢𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀫𑀸𑀦𑀲𑀁𑀯𑀸𑀲𑀓𑀸 𑀪𑀺𑀓𑁆𑀔𑀽 𑀯𑀼𑀘𑁆𑀘𑀦𑁆𑀢𑀺 𑀲𑀳𑀸𑀬𑀸, 𑀲𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀦𑀢𑁆𑀣𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀓𑀢𑀲𑀳𑀸𑀬𑁄’’𑀢𑀺. 𑀲𑁂𑀲𑀁 𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀅𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀢𑀢𑀺𑀬𑀧𑀸𑀭𑀸𑀚𑀺𑀓𑀁.

𑁪. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁭𑁫. 𑀘𑀢𑀼𑀢𑁆𑀣𑁂 𑁋 𑀅𑀯𑀲𑁆𑀲𑀼𑀢𑀸𑀢𑀺 𑀮𑁄𑀓𑀲𑁆𑀲𑀸𑀤𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀅𑀯𑀲𑁆𑀲𑀼𑀢𑀸. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀳𑀢𑁆𑀣𑀕𑁆𑀕𑀳𑀡𑀁 𑀯𑀸𑀢𑀺𑀆𑀤𑀻𑀲𑀼 𑀧𑀦 𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁂𑀦 𑀳𑀢𑁆𑀣𑁂 𑀕𑀳𑀡𑀁 𑀓𑀢𑀁, 𑀢𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀳𑀢𑁆𑀣𑀕𑁆𑀕𑀳𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀲𑁂𑀯 𑀦𑀬𑁄 𑀲𑀗𑁆𑀖𑀸𑀝𑀺𑀓𑀡𑁆𑀡𑀕𑁆𑀕𑀳𑀡𑁂𑀧𑀺. 𑀳𑀢𑁆𑀣𑀕𑁆𑀕𑀳𑀡𑀦𑁆𑀢𑀺 𑀏𑀢𑁆𑀣 𑀘 𑀳𑀢𑁆𑀣𑀕𑁆𑀕𑀳𑀡𑀜𑁆𑀘 𑀅𑀜𑁆𑀜𑀫𑁆𑀧𑀺 𑀅𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀕𑀳𑀡𑀜𑁆𑀘 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀳𑀢𑁆𑀣𑀕𑁆𑀕𑀳𑀡𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀳𑀢𑁆𑀣𑀕𑁆𑀕𑀳𑀡𑀁 𑀯𑀸 𑀲𑀸𑀤𑀺𑀬𑁂𑀬𑁆𑀬𑀸𑀢𑀺 𑀳𑀢𑁆𑀣𑁄 𑀦𑀸𑀫 𑀓𑀧𑁆𑀧𑀭𑀁 𑀉𑀧𑀸𑀤𑀸𑀬 𑀬𑀸𑀯 𑀅𑀕𑁆𑀕𑀦𑀔𑀸, 𑀏𑀢𑀲𑁆𑀲 𑀅𑀲𑀤𑁆𑀥𑀫𑁆𑀫𑀲𑁆𑀲 𑀧𑀝𑀺𑀲𑁂𑀯𑀦𑀢𑁆𑀣𑀸𑀬 𑀉𑀩𑁆𑀪𑀓𑁆𑀔𑀓𑀁 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑀁 𑀕𑀳𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀅𑀲𑀤𑁆𑀥𑀫𑁆𑀫𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀫𑁂𑀣𑀼𑀦𑀥𑀫𑁆𑀫𑁄. 𑀦 𑀳𑀺 𑀫𑁂𑀣𑀼𑀦𑀲𑁆𑀲 𑀲𑀸𑀫𑀦𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀺. ‘‘𑀯𑀺𑀜𑁆𑀜𑀽 𑀧𑀝𑀺𑀩𑀮𑁄 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀺𑀢𑀼𑀦𑁆𑀢𑀺 𑀯𑀘𑀦𑀫𑁆𑀧𑀺 𑀘𑁂𑀢𑁆𑀣 𑀲𑀸𑀥𑀓𑀁.

‘‘𑀢𑀺𑀲𑁆𑀲𑀺𑀢𑁆𑀣𑀺𑀬𑁄 𑀫𑁂𑀣𑀼𑀦𑀁 𑀢𑀁 𑀦 𑀲𑁂𑀯𑁂,

𑀢𑀬𑁄 𑀧𑀼𑀭𑀺𑀲𑁂 𑀢𑀬𑁄 𑀘 𑀅𑀦𑀭𑀺𑀬𑀧𑀡𑁆𑀟𑀓𑁂;

𑀦 𑀘𑀸𑀘𑀭𑁂 𑀫𑁂𑀣𑀼𑀦𑀁 𑀩𑁆𑀬𑀜𑁆𑀚𑀦𑀲𑁆𑀫𑀺𑀁,

𑀙𑁂𑀚𑁆𑀚𑀸 𑀲𑀺𑀬𑀸 𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁮𑁧);

𑀇𑀫𑀸𑀬 𑀧𑀭𑀺𑀯𑀸𑀭𑁂 𑀯𑀼𑀢𑁆𑀢𑀸𑀬 𑀲𑁂𑀤𑀫𑁄𑀘𑀓𑀕𑀸𑀣𑀸𑀬 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂? 𑀦; 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑀢𑁆𑀢𑀸. 𑀧𑀭𑀺𑀯𑀸𑀭𑁂𑀬𑁂𑀯 𑀳𑀺 ‘‘𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 ‘‘𑀯𑀡𑁆𑀡𑀸𑀯𑀡𑁆𑀡𑁄 𑀓𑀸𑀬𑀲𑀁𑀲𑀕𑁆𑀕𑁄 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀕𑀫𑀦𑀼𑀧𑁆𑀧𑀸𑀤𑀦’’𑀦𑁆𑀢𑀺 𑀏𑀯𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀤𑀻𑀦𑀺 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑁄𑀢𑀺 𑀯𑀼𑀢𑁆𑀢𑀸𑀦𑀺. 𑀢𑀲𑁆𑀫𑀸 𑀓𑀸𑀬𑀲𑀁𑀲𑀕𑁆𑀕𑁄 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑀢𑁆𑀢𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀇𑀢𑀺 𑀙𑁂𑀚𑁆𑀚𑀸 𑀲𑀺𑀬𑀸 𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 ‘‘𑀲𑀗𑁆𑀓𑁂𑀢𑀁 𑀯𑀸 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀏𑀢𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀆𑀕𑀘𑁆𑀙𑀸’’𑀢𑀺. 𑀏𑀯𑀁𑀦𑀸𑀫𑀓𑀁 𑀞𑀸𑀦𑀁 𑀆𑀕𑀘𑁆𑀙𑀸𑀢𑀺 𑀅𑀢𑁆𑀣𑁄.

𑁬𑁭𑁬. 𑀅𑀝𑁆𑀞𑀫𑀁 𑀯𑀢𑁆𑀣𑀼𑀁 𑀧𑀭𑀺𑀧𑀽𑀭𑁂𑀦𑁆𑀢𑀻 𑀅𑀲𑁆𑀲𑀫𑀡𑀻 𑀳𑁄𑀢𑀻𑀢𑀺 𑀅𑀦𑀼𑀮𑁄𑀫𑀢𑁄 𑀯𑀸 𑀧𑀝𑀺𑀮𑁄𑀫𑀢𑁄 𑀯𑀸 𑀏𑀓𑀦𑁆𑀢𑀭𑀺𑀓𑀸𑀬 𑀯𑀸 𑀬𑁂𑀦 𑀢𑁂𑀦 𑀦𑀬𑁂𑀦 𑀅𑀝𑁆𑀞𑀫𑀁 𑀯𑀢𑁆𑀣𑀼𑀁 𑀧𑀭𑀺𑀧𑀽𑀭𑁂𑀦𑁆𑀢𑀻𑀬𑁂𑀯 𑀅𑀲𑁆𑀲𑀫𑀡𑀻 𑀳𑁄𑀢𑀺. 𑀬𑀸 𑀧𑀦 𑀏𑀓𑀁 𑀯𑀸 𑀯𑀢𑁆𑀣𑀼𑀁 𑀲𑀢𑁆𑀢 𑀯𑀸 𑀯𑀢𑁆𑀣𑀽𑀦𑀺 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀧𑀽𑀭𑁂𑀢𑀺, 𑀦𑁂𑀯 𑀅𑀲𑁆𑀲𑀫𑀡𑀻 𑀳𑁄𑀢𑀺. 𑀆𑀧𑀦𑁆𑀦𑀸 𑀆𑀧𑀢𑁆𑀢𑀺𑀬𑁄 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀅𑀧𑀺𑀘𑁂𑀢𑁆𑀣 𑀕𑀡𑀦𑀽𑀧𑀺𑀓𑀸 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀢𑁆𑀣𑀸𑀧𑀢𑁆𑀢𑀺 𑀤𑁂𑀲𑀺𑀢𑀸 𑀕𑀡𑀦𑀽𑀧𑀺𑀓𑀸, 𑀅𑀢𑁆𑀣𑀸𑀧𑀢𑁆𑀢𑀺 𑀤𑁂𑀲𑀺𑀢𑀸 𑀦 𑀕𑀡𑀦𑀽𑀧𑀺𑀓𑀸’’𑀢𑀺. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀇𑀤𑀸𑀦𑀺 𑀦𑀸𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀤𑁂𑀲𑀺𑀢𑀸 𑀕𑀡𑀦𑀽𑀧𑀺𑀓𑀸 𑀤𑁂𑀲𑀺𑀢𑀕𑀡𑀦𑀁 𑀉𑀧𑁂𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀺. 𑀢𑀲𑁆𑀫𑀸 𑀬𑀸 𑀏𑀓𑀁 𑀆𑀧𑀦𑁆𑀦𑀸 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀤𑁂𑀲𑁂𑀢𑁆𑀯𑀸 𑀧𑀼𑀦 𑀓𑀺𑀮𑁂𑀲𑀯𑀲𑁂𑀦 𑀆𑀧𑀚𑁆𑀚𑀢𑀺, 𑀧𑀼𑀦 𑀤𑁂𑀲𑁂𑀢𑀺, 𑀏𑀯𑀁 𑀅𑀝𑁆𑀞 𑀯𑀢𑁆𑀣𑀽𑀦𑀺 𑀧𑀽𑀭𑁂𑀦𑁆𑀢𑀻𑀧𑀺 𑀧𑀸𑀭𑀸𑀚𑀺𑀓𑀸 𑀦 𑀳𑁄𑀢𑀺. 𑀬𑀸 𑀧𑀦 𑀆𑀧𑀚𑁆𑀚𑀺𑀢𑁆𑀯𑀸 𑀧𑀼𑀦𑀧𑀺 𑀅𑀜𑁆𑀜𑀁 𑀯𑀢𑁆𑀣𑀼𑀁 𑀆𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀲𑀉𑀲𑁆𑀲𑀸𑀳𑀸𑀯 𑀤𑁂𑀲𑁂𑀢𑀺, 𑀢𑀲𑁆𑀲𑀸 𑀲𑀸 𑀆𑀧𑀢𑁆𑀢𑀺 𑀦𑀕𑀡𑀦𑀽𑀧𑀺𑀓𑀸, 𑀤𑁂𑀲𑀺𑀢𑀸𑀧𑀺 𑀅𑀤𑁂𑀲𑀺𑀢𑀸 𑀳𑁄𑀢𑀺, 𑀤𑁂𑀲𑀺𑀢𑀕𑀡𑀦𑀁 𑀦 𑀕𑀘𑁆𑀙𑀢𑀺, 𑀧𑀸𑀭𑀸𑀚𑀺𑀓𑀲𑁆𑀲𑁂𑀯 𑀅𑀗𑁆𑀕𑀁 𑀳𑁄𑀢𑀺. 𑀅𑀝𑁆𑀞𑀫𑁂 𑀯𑀢𑁆𑀣𑀼𑀫𑁆𑀳𑀺 𑀧𑀭𑀺𑀧𑀼𑀡𑁆𑀡𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀸 𑀳𑁄𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀦𑁆𑀢𑀺.

𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀁.

𑀉𑀤𑁆𑀤𑀺𑀝𑁆𑀞𑀸 𑀔𑁄 𑀅𑀬𑁆𑀬𑀸𑀬𑁄 𑀅𑀝𑁆𑀞 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸𑀢𑀺 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀸 𑀲𑀸𑀥𑀸𑀭𑀡𑀸 𑀘𑀢𑁆𑀢𑀸𑀭𑁄 𑀇𑀫𑁂 𑀘 𑀘𑀢𑁆𑀢𑀸𑀭𑁄𑀢𑀺 𑀏𑀯𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀫𑀕𑁆𑀕𑁂𑀦 𑀉𑀤𑁆𑀤𑀺𑀝𑁆𑀞𑀸 𑀔𑁄 𑀅𑀬𑁆𑀬𑀸𑀬𑁄 𑀅𑀝𑁆𑀞 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀁 𑀫𑀳𑀸𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂

𑀧𑀸𑀭𑀸𑀚𑀺𑀓𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀭𑀸𑀚𑀺𑀓𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.

𑁨. 𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀁 (𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀯𑀡𑁆𑀡𑀦𑀸)

𑁧. 𑀧𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀸𑀭𑀸𑀚𑀺𑀓𑀸𑀦𑀦𑁆𑀢𑀭𑀲𑁆𑀲, 𑀅𑀬𑀁 𑀤𑀸𑀦𑀺 𑀪𑀯𑀺𑀲𑁆𑀲𑀢𑀺;

𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀲𑁆𑀲, 𑀅𑀦𑀼𑀢𑁆𑀢𑀸𑀦𑀢𑁆𑀣𑀯𑀡𑁆𑀡𑀦𑀸.

𑁬𑁭𑁮. 𑀉𑀤𑁄𑀲𑀺𑀢𑀦𑁆𑀢𑀺 𑀪𑀡𑁆𑀟𑀲𑀸𑀮𑀸. 𑀫𑀸𑀬𑁆𑀬𑁄 𑀏𑀯𑀁 𑀅𑀯𑀘𑀸𑀢𑀺 𑀅𑀬𑁆𑀬𑁄 𑀫𑀸 𑀏𑀯𑀁 𑀅𑀯𑀘. 𑀅𑀧𑀺𑀦𑀸𑀬𑁆𑀬𑀸𑀢𑀺 𑀅𑀧𑀺𑀦𑀼 𑀅𑀬𑁆𑀬𑀸. 𑀅𑀘𑁆𑀘𑀸𑀯𑀤𑀣𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀤𑀣; 𑀅𑀓𑁆𑀓𑁄𑀲𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁬𑁭𑁯. 𑀉𑀲𑁆𑀲𑀬𑀯𑀸𑀤𑀺𑀓𑀸𑀢𑀺 𑀫𑀸𑀦𑀼𑀲𑁆𑀲𑀬𑀯𑀲𑁂𑀦 𑀓𑁄𑀥𑀼𑀲𑁆𑀲𑀬𑀯𑀲𑁂𑀦 𑀯𑀺𑀯𑀤𑀫𑀸𑀦𑀸. 𑀬𑀲𑁆𑀫𑀸 𑀧𑀦 𑀲𑀸 𑀅𑀢𑁆𑀣𑀢𑁄 𑀅𑀝𑁆𑀝𑀓𑀸𑀭𑀺𑀓𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀉𑀲𑁆𑀲𑀬𑀯𑀸𑀤𑀺𑀓𑀸 𑀦𑀸𑀫 𑀅𑀟𑁆𑀟𑀓𑀸𑀭𑀺𑀓𑀸 𑀯𑀼𑀘𑁆𑀘𑀢𑀻’’𑀢𑀺 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀅𑀟𑁆𑀟𑁄𑀢𑀺 𑀯𑁄𑀳𑀸𑀭𑀺𑀓𑀯𑀺𑀦𑀺𑀘𑁆𑀙𑀬𑁄 𑀯𑀼𑀘𑁆𑀘𑀢𑀺, 𑀬𑀁 𑀧𑀩𑁆𑀩𑀚𑀺𑀢𑀸 ‘‘𑀅𑀥𑀺𑀓𑀭𑀡’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀤𑀼𑀢𑀺𑀬𑀁 𑀯𑀸 𑀧𑀭𑀺𑀬𑁂𑀲𑀢𑀻𑀢𑀺 𑀲𑀓𑁆𑀔𑀺𑀁 𑀯𑀸 𑀲𑀳𑀸𑀬𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀤𑀼𑀓𑁆𑀓𑀝𑀁. 𑀕𑀘𑁆𑀙𑀢𑀺 𑀯𑀸𑀢𑀺 𑀉𑀧𑀲𑁆𑀲𑀬𑁄 𑀯𑀸 𑀳𑁄𑀢𑀼 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑁄 𑀯𑀸, 𑀬𑀢𑁆𑀣 𑀞𑀺𑀢𑀸𑀬 ‘‘𑀅𑀟𑁆𑀟𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀯𑁄𑀳𑀸𑀭𑀺𑀓𑀸𑀦𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀺𑀬𑀸 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀁. 𑀏𑀓𑀲𑁆𑀲 𑀆𑀭𑁄𑀘𑁂𑀢𑀻𑀢𑀺 𑀤𑁆𑀯𑀻𑀲𑀼 𑀚𑀦𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀏𑀓𑀲𑁆𑀲 𑀓𑀣𑀁 𑀬𑁄 𑀓𑁄𑀘𑀺 𑀯𑁄𑀳𑀸𑀭𑀺𑀓𑀸𑀦𑀁 𑀆𑀭𑁄𑀘𑁂𑀢𑀺. 𑀤𑀼𑀢𑀺𑀬𑀲𑁆𑀲 𑀆𑀭𑁄𑀘𑁂𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀅𑀬𑀁 𑀧𑀦𑁂𑀢𑁆𑀣 𑀅𑀲𑀫𑁆𑀫𑁄𑀳𑀢𑁆𑀣𑀸𑀬 𑀯𑀺𑀢𑁆𑀣𑀸𑀭𑀓𑀣𑀸 𑁋 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀦𑁆𑀢𑀫𑀲𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀆𑀕𑀢𑁂𑀧𑀺 𑀯𑁄𑀳𑀸𑀭𑀺𑀓𑁂 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀦𑀻 𑀅𑀢𑁆𑀢𑀦𑁄 𑀓𑀣𑀁 𑀆𑀭𑁄𑀘𑁂𑀢𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀤𑀼𑀓𑁆𑀓𑀝𑀁. 𑀉𑀧𑀸𑀲𑀓𑁄 𑀅𑀢𑁆𑀢𑀦𑁄 𑀓𑀣𑀁 𑀆𑀭𑁄𑀘𑁂𑀢𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀞𑀫𑀁 𑀉𑀧𑀸𑀲𑀓𑁄 𑀅𑀢𑁆𑀢𑀦𑁄 𑀓𑀣𑀁 𑀆𑀭𑁄𑀘𑁂𑀢𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀤𑀼𑀓𑁆𑀓𑀝𑀁. 𑀅𑀣 𑀲𑀸 𑀅𑀢𑁆𑀢𑀦𑁄 𑀓𑀣𑀁 𑀆𑀭𑁄𑀘𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀪𑀺𑀓𑁆𑀔𑀼𑀦𑀻 𑀉𑀧𑀸𑀲𑀓𑀁 𑀯𑀤𑀢𑀺 𑁋 ‘‘𑀫𑀫 𑀘 𑀢𑀯 𑀘 𑀓𑀣𑀁 𑀢𑁆𑀯𑀁𑀬𑁂𑀯 𑀆𑀭𑁄𑀘𑁂𑀳𑀻’’𑀢𑀺, 𑀲𑁄 𑀅𑀢𑁆𑀢𑀦𑁄 𑀯𑀸 𑀓𑀣𑀁 𑀧𑀞𑀫𑀁 𑀆𑀭𑁄𑀘𑁂𑀢𑀼 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸, 𑀧𑀞𑀫𑀸𑀭𑁄𑀘𑀦𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑀸𑀭𑁄𑀘𑀦𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀉𑀧𑀸𑀲𑀓𑁄 𑀪𑀺𑀓𑁆𑀔𑀼𑀦𑀺𑀁 𑀯𑀤𑀢𑀺 𑁋 ‘‘𑀫𑀫 𑀘 𑀢𑀯 𑀘 𑀓𑀣𑀁 𑀢𑁆𑀯𑀁𑀬𑁂𑀯 𑀆𑀭𑁄𑀘𑁂𑀳𑀻’’𑀢𑀺, 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀪𑀺𑀓𑁆𑀔𑀼𑀦𑀻 𑀓𑀧𑁆𑀧𑀺𑀬𑀓𑀸𑀭𑀓𑁂𑀦 𑀓𑀣𑀸𑀧𑁂𑀢𑀺, 𑀢𑀢𑁆𑀣 𑀓𑀧𑁆𑀧𑀺𑀬𑀓𑀸𑀭𑀓𑁄 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀓𑀣𑀁 𑀧𑀞𑀫𑀁 𑀆𑀭𑁄𑀘𑁂𑀢𑀼, 𑀇𑀢𑀭𑁄 𑀯𑀸 𑀅𑀢𑁆𑀢𑀦𑁄 𑀓𑀣𑀁, 𑀓𑀧𑁆𑀧𑀺𑀬𑀓𑀸𑀭𑀓𑁄 𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀓𑀣𑀁, 𑀇𑀢𑀭𑁄 𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀓𑀣𑀁 𑀆𑀭𑁄𑀘𑁂𑀢𑀼, 𑀬𑀣𑀸 𑀯𑀸 𑀢𑀣𑀸 𑀯𑀸 𑀆𑀭𑁄𑀘𑀺𑀬𑀫𑀸𑀦𑁂 𑀧𑀞𑀫𑁂 𑀆𑀭𑁄𑀘𑀦𑁂 𑀪𑀺𑀓𑁆𑀔𑀼𑀦𑀺𑀬𑀸 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀬𑀣𑀸 𑀯𑀸 𑀢𑀣𑀸 𑀯𑀸 𑀆𑀭𑁄𑀘𑀺𑀢𑀁 𑀧𑀦 𑀉𑀪𑀺𑀦𑁆𑀦𑀫𑁆𑀧𑀺 𑀓𑀣𑀁 𑀲𑀼𑀢𑁆𑀯𑀸 𑀯𑁄𑀳𑀸𑀭𑀺𑀓𑁂𑀳𑀺 𑀯𑀺𑀦𑀺𑀘𑁆𑀙𑀬𑁂 𑀓𑀢𑁂 𑀅𑀟𑁆𑀟𑀧𑀭𑀺𑀬𑁄𑀲𑀸𑀦𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀟𑁆𑀟𑀧𑀭𑀺𑀬𑁄𑀲𑀸𑀦𑁂 𑀪𑀺𑀓𑁆𑀔𑀼𑀦𑀺𑀬𑀸 𑀚𑀬𑁂𑀧𑀺 𑀧𑀭𑀸𑀚𑀬𑁂𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑀘𑁂 𑀧𑀦 𑀕𑀢𑀺𑀕𑀢𑀁 𑀅𑀥𑀺𑀓𑀭𑀡𑀁 𑀳𑁄𑀢𑀺, 𑀲𑀼𑀢𑀧𑀼𑀩𑁆𑀩𑀁 𑀯𑁄𑀳𑀸𑀭𑀺𑀓𑁂𑀳𑀺. 𑀅𑀣 𑀢𑁂 𑀪𑀺𑀓𑁆𑀔𑀼𑀦𑀺𑀜𑁆𑀘 𑀅𑀟𑁆𑀟𑀓𑀸𑀭𑀓𑀜𑁆𑀘 𑀤𑀺𑀲𑁆𑀯𑀸𑀯 ‘‘𑀢𑀼𑀫𑁆𑀳𑀸𑀓𑀁 𑀓𑀣𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀚𑀸𑀦𑀸𑀫 𑀫𑀬𑀁 𑀏𑀢𑁆𑀣 𑀧𑀯𑀢𑁆𑀢𑀺’’𑀦𑁆𑀢𑀺 𑀲𑀬𑀫𑁂𑀯 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀏𑀯𑀭𑀽𑀧𑁂 𑀅𑀟𑁆𑀟𑀧𑀭𑀺𑀬𑁄𑀲𑀸𑀦𑁂𑀧𑀺 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑀸𑀧𑀢𑁆𑀢𑀺.

𑀧𑀞𑀫𑀁 𑀆𑀧𑀢𑁆𑀢𑀺 𑀏𑀢𑀲𑁆𑀲𑀸𑀢𑀺 𑀧𑀞𑀫𑀸𑀧𑀢𑁆𑀢𑀺𑀓𑁄; 𑀯𑀻𑀢𑀺𑀓𑁆𑀓𑀫𑀓𑁆𑀔𑀡𑁂𑀬𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄, 𑀢𑀁 𑀧𑀞𑀫𑀸𑀧𑀢𑁆𑀢𑀺𑀓𑀁. 𑀧𑀤𑀪𑀸𑀚𑀦𑁂 𑀧𑀦 𑀅𑀥𑀺𑀧𑁆𑀧𑀸𑀬𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀳 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑀸 𑀆𑀧𑀚𑁆𑀚𑀢𑀺 𑀅𑀲𑀫𑀦𑀼𑀪𑀸𑀲𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀲𑀳 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑀸 𑀬𑀁 𑀪𑀺𑀓𑁆𑀔𑀼𑀦𑀻 𑀆𑀧𑀚𑁆𑀚𑀢𑀺, 𑀦 𑀢𑀢𑀺𑀬𑀸𑀬 𑀲𑀫𑀦𑀼𑀪𑀸𑀲𑀦𑀸𑀬, 𑀅𑀬𑀁 𑀧𑀞𑀫𑀫𑁂𑀯 𑀲𑀳 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀧𑀞𑀫𑀸𑀧𑀢𑁆𑀢𑀺𑀓𑁄𑀢𑀺. 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀢𑁄 𑀦𑀺𑀲𑁆𑀲𑀸𑀭𑁂𑀢𑀻𑀢𑀺 𑀦𑀺𑀲𑁆𑀲𑀸𑀭𑀡𑀻𑀬𑁄; 𑀢𑀁 𑀦𑀺𑀲𑁆𑀲𑀸𑀭𑀡𑀻𑀬𑀁. 𑀧𑀤𑀪𑀸𑀚𑀦𑁂 𑀧𑀦 𑀅𑀥𑀺𑀧𑁆𑀧𑀸𑀬𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀖𑀫𑁆𑀳𑀸 𑀦𑀺𑀲𑁆𑀲𑀸𑀭𑀻𑀬𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀁 𑀆𑀧𑀦𑁆𑀦𑀸 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑀢𑁄 𑀦𑀺𑀲𑁆𑀲𑀸𑀭𑀻𑀬𑀢𑀺, 𑀲𑁄 𑀦𑀺𑀲𑁆𑀲𑀸𑀭𑀡𑀻𑀬𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦 𑀳𑀺 𑀲𑁄 𑀏𑀯 𑀥𑀫𑁆𑀫𑁄 𑀲𑀗𑁆𑀖𑀫𑁆𑀳𑀸 𑀓𑁂𑀦𑀘𑀺 𑀦𑀺𑀲𑁆𑀲𑀸𑀭𑀻𑀬𑀢𑀺. 𑀢𑁂𑀦 𑀧𑀦 𑀥𑀫𑁆𑀫𑁂𑀦 𑀪𑀺𑀓𑁆𑀔𑀼𑀦𑀻 𑀦𑀺𑀲𑁆𑀲𑀸𑀭𑀻𑀬𑀢𑀺, 𑀢𑀲𑁆𑀫𑀸 𑀲𑁄 𑀦𑀺𑀲𑁆𑀲𑀸𑀭𑁂𑀢𑀻𑀢𑀺 𑀦𑀺𑀲𑁆𑀲𑀸𑀭𑀡𑀻𑀬𑁄.

𑀆𑀓𑀟𑁆𑀠𑀺𑀬𑀫𑀸𑀦𑀸 𑀕𑀘𑁆𑀙𑀢𑀻𑀢𑀺 𑀅𑀟𑁆𑀟𑀓𑀸𑀭𑀓𑀫𑀦𑀼𑀲𑁆𑀲𑁂𑀳𑀺 𑀲𑀬𑀁 𑀯𑀸 𑀆𑀕𑀦𑁆𑀢𑁆𑀯𑀸 𑀤𑀽𑀢𑀁 𑀯𑀸 𑀧𑁂𑀲𑁂𑀢𑁆𑀯𑀸 𑀏𑀳𑀻𑀢𑀺 𑀯𑀼𑀘𑁆𑀘𑀫𑀸𑀦𑀸 𑀯𑁄𑀳𑀸𑀭𑀺𑀓𑀸𑀦𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺, 𑀢𑀢𑁄 𑀅𑀟𑁆𑀟𑀓𑀸𑀭𑀓𑁄 𑀅𑀢𑁆𑀢𑀦𑁄 𑀯𑀸 𑀓𑀣𑀁 𑀧𑀞𑀫𑀁 𑀆𑀭𑁄𑀘𑁂𑀢𑀼 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸, 𑀦𑁂𑀯 𑀧𑀞𑀫𑀸𑀭𑁄𑀘𑀦𑁂 𑀤𑀼𑀓𑁆𑀓𑀝𑀁, 𑀦 𑀤𑀼𑀢𑀺𑀬𑀸𑀭𑁄𑀘𑀦𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀅𑀫𑀘𑁆𑀘𑁂𑀳𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀓𑀢𑁂 𑀅𑀟𑁆𑀟𑀧𑀭𑀺𑀬𑁄𑀲𑀸𑀦𑁂𑀧𑀺 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀲𑀘𑁂𑀧𑀺 𑀅𑀟𑁆𑀟𑀓𑀸𑀭𑀓𑁄 𑀪𑀺𑀓𑁆𑀔𑀼𑀦𑀺𑀁 𑀯𑀤𑀢𑀺 ‘‘𑀫𑀫 𑀘 𑀢𑀯 𑀘 𑀓𑀣𑀁 𑀢𑁆𑀯𑀫𑁂𑀯 𑀓𑀣𑁂𑀳𑀻’’𑀢𑀺; 𑀓𑀣𑁂𑀦𑁆𑀢𑀺𑀬𑀸𑀧𑀺 𑀓𑀣𑀁 𑀲𑀼𑀢𑁆𑀯𑀸 𑀓𑀢𑁂 𑀅𑀟𑁆𑀟𑀧𑀭𑀺𑀬𑁄𑀲𑀸𑀦𑁂𑀧𑀺 𑀅𑀦𑀸𑀧𑀢𑁆𑀢𑀺𑀬𑁂𑀯.

𑀭𑀓𑁆𑀔𑀁 𑀬𑀸𑀘𑀢𑀻𑀢𑀺 𑀥𑀫𑁆𑀫𑀺𑀓𑀁 𑀭𑀓𑁆𑀔𑀁 𑀬𑀸𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀇𑀤𑀸𑀦𑀺 𑀬𑀣𑀸𑀬𑀸𑀘𑀺𑀢𑀸 𑀭𑀓𑁆𑀔𑀸 𑀥𑀫𑁆𑀫𑀺𑀓𑀸 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀦𑁄𑀤𑀺𑀲𑁆𑀲 𑀆𑀘𑀺𑀓𑁆𑀔𑀢𑀻𑀢𑀺 𑀆𑀳. 𑀢𑀢𑁆𑀣 𑀅𑀢𑀻𑀢𑀁 𑀆𑀭𑀩𑁆𑀪 𑀅𑀢𑁆𑀣𑀺 𑀑𑀤𑀺𑀲𑁆𑀲𑀆𑀘𑀺𑀓𑁆𑀔𑀦𑀸, 𑀅𑀢𑁆𑀣𑀺 𑀅𑀦𑁄𑀤𑀺𑀲𑁆𑀲𑀆𑀘𑀺𑀓𑁆𑀔𑀦𑀸, 𑀅𑀦𑀸𑀕𑀢𑀁 𑀆𑀭𑀩𑁆𑀪𑀸𑀧𑀺 𑀅𑀢𑁆𑀣𑀺 𑀑𑀤𑀺𑀲𑁆𑀲𑀆𑀘𑀺𑀓𑁆𑀔𑀦𑀸, 𑀅𑀢𑁆𑀣𑀺 𑀅𑀦𑁄𑀤𑀺𑀲𑁆𑀲𑀆𑀘𑀺𑀓𑁆𑀔𑀦𑀸.

𑀓𑀣𑀁 𑀅𑀢𑀻𑀢𑀁 𑀆𑀭𑀩𑁆𑀪 𑀑𑀤𑀺𑀲𑁆𑀲𑀆𑀘𑀺𑀓𑁆𑀔𑀦𑀸 𑀳𑁄𑀢𑀺? 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂 𑀕𑀸𑀫𑀤𑀸𑀭𑀓𑀸 𑀥𑀼𑀢𑁆𑀢𑀸𑀤𑀬𑁄 𑀯𑀸 𑀬𑁂 𑀓𑁂𑀘𑀺 𑀅𑀦𑀸𑀘𑀸𑀭𑀁 𑀯𑀸 𑀆𑀘𑀭𑀦𑁆𑀢𑀺, 𑀭𑀼𑀓𑁆𑀔𑀁 𑀯𑀸 𑀙𑀺𑀦𑁆𑀤𑀦𑁆𑀢𑀺, 𑀨𑀮𑀸𑀨𑀮𑀁 𑀯𑀸 𑀳𑀭𑀦𑁆𑀢𑀺, 𑀧𑀭𑀺𑀓𑁆𑀔𑀸𑀭𑁂 𑀯𑀸 𑀅𑀘𑁆𑀙𑀺𑀦𑁆𑀤𑀦𑁆𑀢𑀺. 𑀪𑀺𑀓𑁆𑀔𑀼𑀦𑀻 𑀯𑁄𑀳𑀸𑀭𑀺𑀓𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀉𑀧𑀲𑁆𑀲𑀬𑁂 𑀇𑀤𑀁 𑀦𑀸𑀫 𑀓𑀢’’𑀦𑁆𑀢𑀺 𑀯𑀤𑀢𑀺. ‘‘𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀲𑀼𑀓𑁂𑀦 𑀘 𑀅𑀲𑀼𑀓𑁂𑀦 𑀘𑀸’’𑀢𑀺 𑀆𑀘𑀺𑀓𑁆𑀔𑀢𑀺. 𑀏𑀯𑀁 𑀅𑀢𑀻𑀢𑀁 𑀆𑀭𑀩𑁆𑀪 𑀑𑀤𑀺𑀲𑁆𑀲𑀆𑀘𑀺𑀓𑁆𑀔𑀦𑀸 𑀳𑁄𑀢𑀺, 𑀲𑀸 𑀦 𑀯𑀝𑁆𑀝𑀢𑀺. 𑀢𑀜𑁆𑀘𑁂 𑀲𑀼𑀢𑁆𑀯𑀸 𑀢𑁂 𑀯𑁄𑀳𑀸𑀭𑀺𑀓𑀸 𑀢𑁂𑀲𑀁 𑀤𑀡𑁆𑀟𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑀁 𑀪𑀺𑀓𑁆𑀔𑀼𑀦𑀺𑀬𑀸 𑀕𑀻𑀯𑀸 𑀳𑁄𑀢𑀺. 𑀤𑀡𑁆𑀟𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀧𑀺 𑀲𑀢𑀺 𑀕𑀻𑀯𑀸𑀬𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀢𑀲𑁆𑀲 𑀤𑀡𑁆𑀟𑀁 𑀕𑀡𑁆𑀳𑀣𑀸𑀢𑀺 𑀯𑀤𑀢𑀺, 𑀧𑀜𑁆𑀘𑀫𑀸𑀲𑀓𑀫𑀢𑁆𑀢𑁂 𑀕𑀳𑀺𑀢𑁂 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺.

‘‘𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀅𑀲𑀼𑀓𑁂𑀦𑀸𑀢𑀺 𑀯𑀢𑁆𑀢𑀼𑀁 𑀅𑀫𑁆𑀳𑀸𑀓𑀁 𑀦 𑀯𑀝𑁆𑀝𑀢𑀺, 𑀢𑀼𑀫𑁆𑀳𑁂𑀬𑁂𑀯 𑀚𑀸𑀦𑀺𑀲𑁆𑀲𑀣. 𑀓𑁂𑀯𑀮𑀜𑁆𑀳𑀺 𑀫𑀬𑀁 𑀭𑀓𑁆𑀔𑀁 𑀬𑀸𑀘𑀸𑀫, 𑀢𑀁 𑀦𑁄 𑀤𑁂𑀣, 𑀅𑀯𑀳𑀝𑀪𑀡𑁆𑀟𑀜𑁆𑀘 𑀆𑀳𑀭𑀸𑀧𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀅𑀦𑁄𑀤𑀺𑀲𑁆𑀲 𑀆𑀘𑀺𑀓𑁆𑀔𑀦𑀸 𑀳𑁄𑀢𑀺, 𑀲𑀸 𑀯𑀝𑁆𑀝𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀲𑀘𑁂𑀧𑀺 𑀢𑁂 𑀯𑁄𑀳𑀸𑀭𑀺𑀓𑀸 𑀓𑀸𑀭𑀓𑁂 𑀕𑀯𑁂𑀲𑀺𑀢𑁆𑀯𑀸 𑀢𑁂𑀲𑀁 𑀤𑀡𑁆𑀟𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀫𑁆𑀧𑀺 𑀕𑀳𑀺𑀢𑀁 𑀪𑀺𑀓𑁆𑀔𑀼𑀦𑀺𑀬𑀸, 𑀦𑁂𑀯 𑀕𑀻𑀯𑀸 𑀦 𑀆𑀧𑀢𑁆𑀢𑀺.

𑀧𑀭𑀺𑀓𑁆𑀔𑀸𑀭𑀁 𑀳𑀭𑀦𑁆𑀢𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀅𑀦𑀢𑁆𑀣𑀓𑀸𑀫𑀢𑀸𑀬 𑀘𑁄𑀭𑁄 𑀘𑁄𑀭𑁄𑀢𑀺 𑀯𑀢𑁆𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀳𑀺 𑀬𑀁 𑀢𑁂𑀲𑀁 𑀤𑀡𑁆𑀟𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑀫𑁆𑀧𑀺 𑀪𑀺𑀓𑁆𑀔𑀼𑀦𑀺𑀬𑀸 𑀕𑀻𑀯𑀸 𑀳𑁄𑀢𑀺. 𑀅𑀢𑁆𑀢𑀦𑁄 𑀯𑀘𑀦𑀓𑀭𑀁 𑀧𑀦 ‘‘𑀇𑀫𑀺𑀦𑀸 𑀫𑁂 𑀧𑀭𑀺𑀓𑁆𑀔𑀸𑀭𑁄 𑀕𑀳𑀺𑀢𑁄, 𑀢𑀁 𑀆𑀳𑀭𑀸𑀧𑁂𑀳𑀺, 𑀫𑀸 𑀘𑀲𑁆𑀲 𑀤𑀡𑁆𑀟𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀤𑀸𑀲𑀤𑀸𑀲𑀻𑀯𑀸𑀧𑀺𑀆𑀤𑀻𑀦𑀁 𑀅𑀢𑁆𑀣𑀸𑀬 𑀅𑀟𑁆𑀟𑀁 𑀓𑀭𑁄𑀦𑁆𑀢𑀺, 𑀅𑀬𑀁 𑀅𑀓𑀧𑁆𑀧𑀺𑀬𑀅𑀟𑁆𑀟𑁄 𑀦𑀸𑀫, 𑀦 𑀯𑀝𑁆𑀝𑀢𑀺.

𑀓𑀣𑀁 𑀅𑀦𑀸𑀕𑀢𑀁 𑀆𑀭𑀩𑁆𑀪 𑀑𑀤𑀺𑀲𑁆𑀲𑀆𑀘𑀺𑀓𑁆𑀔𑀦𑀸 𑀳𑁄𑀢𑀺? 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀭𑁂𑀳𑀺 𑀅𑀦𑀸𑀘𑀸𑀭𑀸𑀤𑀻𑀲𑀼 𑀓𑀢𑁂𑀲𑀼 𑀪𑀺𑀓𑁆𑀔𑀼𑀦𑀻 𑀯𑁄𑀳𑀸𑀭𑀺𑀓𑁂 𑀏𑀯𑀁 𑀯𑀤𑀢𑀺 ‘‘𑀅𑀫𑁆𑀳𑀸𑀓𑀁 𑀉𑀧𑀲𑁆𑀲𑀬𑁂 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀦𑁆𑀢𑀺, 𑀭𑀓𑁆𑀔𑀁 𑀦𑁄 𑀤𑁂𑀣 𑀆𑀬𑀢𑀺𑀁 𑀅𑀓𑀭𑀡𑀢𑁆𑀣𑀸𑀬𑀸’’𑀢𑀺. ‘‘𑀓𑁂𑀦 𑀏𑀯𑀁 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀘 ‘‘𑀅𑀲𑀼𑀓𑁂𑀦 𑀅𑀲𑀼𑀓𑁂𑀦 𑀘𑀸’’𑀢𑀺 𑀆𑀘𑀺𑀓𑁆𑀔𑀢𑀺. 𑀏𑀯𑀁 𑀅𑀦𑀸𑀕𑀢𑀁 𑀆𑀭𑀩𑁆𑀪 𑀑𑀤𑀺𑀲𑁆𑀲𑀆𑀘𑀺𑀓𑁆𑀔𑀦𑀸 𑀳𑁄𑀢𑀺, 𑀲𑀸𑀧𑀺 𑀦 𑀯𑀝𑁆𑀝𑀢𑀺. 𑀢𑁂𑀲𑀜𑁆𑀳𑀺 𑀤𑀡𑁆𑀟𑁂 𑀓𑀢𑁂 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀩𑁆𑀩𑀁 𑀪𑀺𑀓𑁆𑀔𑀼𑀦𑀺𑀬𑀸 𑀕𑀻𑀯𑀸. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀲𑀘𑁂 𑀧𑀦 𑀯𑁄𑀳𑀸𑀭𑀺𑀓𑀸 ‘‘𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀓𑀭𑁄𑀦𑁆𑀢𑀸𑀦𑀁 𑀇𑀫𑀁 𑀦𑀸𑀫 𑀤𑀡𑁆𑀟𑀁 𑀓𑀭𑁄𑀫𑀸’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀆𑀡𑀸𑀬 𑀅𑀢𑀺𑀝𑁆𑀞𑀫𑀸𑀦𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀤𑀡𑁆𑀟𑀁 𑀓𑀭𑁄𑀦𑁆𑀢𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀦𑁂𑀯 𑀕𑀻𑀯𑀸 𑀦 𑀆𑀧𑀢𑁆𑀢𑀺.

𑀬𑁄 𑀘𑀸𑀬𑀁 𑀪𑀺𑀓𑁆𑀔𑀼𑀦𑀻𑀦𑀁 𑀯𑀼𑀢𑁆𑀢𑁄, 𑀪𑀺𑀓𑁆𑀔𑀽𑀦𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀪𑀺𑀓𑁆𑀔𑀼𑀦𑁄𑀧𑀺 𑀳𑀺 𑀑𑀤𑀺𑀲𑁆𑀲𑀆𑀘𑀺𑀓𑁆𑀔𑀦𑀸 𑀦 𑀯𑀝𑁆𑀝𑀢𑀺. 𑀬𑀁 𑀢𑀣𑀸 𑀆𑀘𑀺𑀓𑁆𑀔𑀺𑀢𑁂 𑀤𑀡𑁆𑀟𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑀁 𑀕𑀻𑀯𑀸 𑀳𑁄𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀡𑁆𑀟𑀁 𑀕𑀡𑁆𑀳𑀸𑀧𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀬𑁄 𑀧𑀦 ‘‘𑀤𑀡𑁆𑀟𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀚𑀸𑀦𑀦𑁆𑀢𑁄𑀧𑀺 𑀅𑀦𑁄𑀤𑀺𑀲𑁆𑀲 𑀓𑀣𑁂𑀢𑀺, 𑀢𑁂 𑀘 𑀧𑀭𑀺𑀬𑁂𑀲𑀺𑀢𑁆𑀯𑀸 𑀤𑀡𑁆𑀟𑀁 𑀓𑀭𑁄𑀦𑁆𑀢𑀺𑀬𑁂𑀯, 𑀦 𑀤𑁄𑀲𑁄. 𑀯𑀺𑀳𑀸𑀭𑀲𑀻𑀫𑀸𑀬 𑀭𑀼𑀓𑁆𑀔𑀸𑀤𑀻𑀦𑀺 𑀙𑀺𑀦𑁆𑀤𑀦𑁆𑀢𑀸𑀦𑀁 𑀯𑀸𑀲𑀺𑀨𑀭𑀲𑀼𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀸𑀲𑀸𑀡𑁂𑀳𑀺 𑀓𑁄𑀝𑁆𑀝𑁂𑀦𑁆𑀢𑀺, 𑀦 𑀯𑀝𑁆𑀝𑀢𑀺. 𑀲𑀘𑁂 𑀥𑀸𑀭𑀸 𑀪𑀺𑀚𑁆𑀚𑀢𑀺, 𑀓𑀸𑀭𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀸. 𑀉𑀧𑀥𑀸𑀯𑀺𑀢𑁆𑀯𑀸 𑀢𑁂𑀲𑀁 𑀧𑀭𑀺𑀓𑁆𑀔𑀸𑀭𑁂 𑀕𑀡𑁆𑀳𑀦𑁆𑀢𑀺, 𑀢𑀫𑁆𑀧𑀺 𑀦 𑀓𑀸𑀢𑀩𑁆𑀩𑀁, 𑀮𑀳𑀼𑀧𑀭𑀺𑀯𑀢𑁆𑀢𑀜𑁆𑀳𑀺 𑀘𑀺𑀢𑁆𑀢𑀁, 𑀣𑁂𑀬𑁆𑀬𑀘𑁂𑀢𑀦𑀸𑀬 𑀉𑀧𑁆𑀧𑀦𑁆𑀦𑀸𑀬 𑀫𑀽𑀮𑀘𑁆𑀙𑁂𑀚𑁆𑀚𑀫𑁆𑀧𑀺 𑀕𑀘𑁆𑀙𑁂𑀬𑁆𑀬. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀲𑀢𑁆𑀢𑀭𑀲𑀓𑁂 𑀧𑀞𑀫𑀲𑀺𑀓𑁆𑀔𑀸𑀧𑀤𑀁.

𑁨. 𑀤𑀼𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁮𑁨. 𑀤𑀼𑀢𑀺𑀬𑁂 𑁋 𑀯𑀭𑀪𑀡𑁆𑀟𑀦𑁆𑀢𑀺 𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀸𑀤𑀺 𑀫𑀳𑀕𑁆𑀖𑀪𑀡𑁆𑀟𑀁.

𑁬𑁮𑁩. 𑀅𑀦𑀧𑀮𑁄𑀓𑁂𑀢𑁆𑀯𑀸𑀢𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸. 𑀕𑀡𑀁 𑀯𑀸𑀢𑀺 𑀫𑀮𑁆𑀮𑀕𑀡𑀪𑀝𑀺𑀧𑀼𑀢𑁆𑀢𑀕𑀡𑀸𑀤𑀺𑀓𑀁. 𑀧𑀽𑀕𑀦𑁆𑀢𑀺 𑀥𑀫𑁆𑀫𑀕𑀡𑀁. 𑀲𑁂𑀡𑀺𑀦𑁆𑀢𑀺 𑀕𑀦𑁆𑀥𑀺𑀓𑀲𑁂𑀡𑀺𑀤𑀼𑀲𑁆𑀲𑀺𑀓𑀲𑁂𑀡𑀺𑀆𑀤𑀺𑀓𑀁. 𑀬𑀢𑁆𑀣 𑀬𑀢𑁆𑀣 𑀳𑀺 𑀭𑀸𑀚𑀸𑀦𑁄 𑀕𑀡𑀸𑀤𑀻𑀦𑀁 𑀕𑀸𑀫𑀦𑀺𑀕𑀫𑁂 𑀦𑀺𑀬𑁆𑀬𑀸𑀢𑁂𑀦𑁆𑀢𑀺 ‘‘𑀢𑀼𑀫𑁆𑀳𑁂𑀯 𑀏𑀢𑁆𑀣 𑀅𑀦𑀼𑀲𑀸𑀲𑀣𑀸’’𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑁂 𑀏𑀯 𑀇𑀲𑁆𑀲𑀭𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀭𑀸𑀚𑀸𑀦𑀁 𑀯𑀸 𑀕𑀡𑀸𑀤𑀺𑀓𑁂 𑀯𑀸 𑀆𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀆𑀧𑀼𑀘𑁆𑀙𑀺𑀢𑀩𑁆𑀩𑁄𑀯. 𑀞𑀧𑁂𑀢𑁆𑀯𑀸 𑀓𑀧𑁆𑀧𑀦𑁆𑀢𑀺 𑀢𑀺𑀢𑁆𑀣𑀺𑀬𑁂𑀲𑀼 𑀯𑀸 𑀅𑀜𑁆𑀜𑀪𑀺𑀓𑁆𑀔𑀼𑀦𑀻𑀲𑀼 𑀯𑀸 𑀧𑀩𑁆𑀩𑀚𑀺𑀢𑀧𑀼𑀩𑁆𑀩𑀁 𑀓𑀧𑁆𑀧𑀕𑀢𑀺𑀓𑀁 𑀞𑀧𑁂𑀢𑁆𑀯𑀸𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀘𑁄𑀭𑀻𑀯𑀼𑀝𑁆𑀞𑀸𑀧𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀧𑀓𑁆𑀓𑀦𑁆𑀢𑀸𑀲𑀼 𑀪𑀺𑀓𑁆𑀔𑀼𑀦𑀻𑀲𑀼 𑀅𑀕𑀦𑁆𑀢𑁆𑀯𑀸 𑀔𑀡𑁆𑀟𑀲𑀻𑀫𑀁 𑀬𑀣𑀸𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀓𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀔𑀡𑁆𑀟𑀲𑀻𑀫𑀁 𑀯𑀸 𑀦𑀤𑀺𑀁 𑀯𑀸 𑀕𑀦𑁆𑀢𑁆𑀯𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀅𑀦𑀸𑀧𑀼𑀘𑁆𑀙𑀸 𑀯𑀼𑀝𑁆𑀞𑀸𑀧𑀦𑀯𑀲𑁂𑀦 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁.

𑁩. 𑀢𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁯𑁨. 𑀢𑀢𑀺𑀬𑁂 𑁋 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸𑀢𑀺 𑀏𑀢𑁆𑀣 𑀏𑀓𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀦𑁆𑀢𑀺 𑀏𑀢𑁆𑀣 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀏𑀓𑁂𑀦 𑀧𑀸𑀤𑁂𑀦 𑀅𑀢𑀺𑀓𑁆𑀓𑀫𑀢𑀺 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀧𑀺𑀘𑁂𑀢𑁆𑀣 𑀲𑀓𑀕𑀸𑀫𑀢𑁄 𑀦𑀺𑀓𑁆𑀔𑀫𑀦𑁆𑀢𑀺𑀬𑀸 𑀕𑀸𑀫𑀦𑁆𑀢𑀭𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀺, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀦 𑀕𑀸𑀫𑀦𑁆𑀢𑀭𑀁 𑀕𑀘𑁆𑀙𑀦𑁆𑀢𑀺𑀬𑀸 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀁, 𑀏𑀓𑁂𑀦 𑀧𑀸𑀤𑁂𑀦 𑀇𑀢𑀭𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑁂 𑀯𑀸 𑀉𑀧𑀘𑀸𑀭𑁂 𑀯𑀸 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀦 𑀲𑀓𑀕𑀸𑀫𑀁 𑀧𑀯𑀺𑀲𑀦𑁆𑀢𑀺𑀬𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀔𑀡𑁆𑀟𑀧𑀸𑀓𑀸𑀭𑁂𑀦 𑀯𑀸 𑀯𑀢𑀺𑀙𑀺𑀤𑁆𑀤𑁂𑀦 𑀯𑀸 𑀪𑀺𑀓𑁆𑀔𑀼𑀦𑀺𑀯𑀺𑀳𑀸𑀭𑀪𑀽𑀫𑀺𑀬𑁂𑀯 𑀲𑀓𑁆𑀓𑀸 𑀳𑁄𑀢𑀺 𑀧𑀯𑀺𑀲𑀺𑀢𑀼𑀁, 𑀏𑀯𑀁 𑀧𑀯𑀺𑀲𑀫𑀸𑀦𑀸𑀬 𑀓𑀧𑁆𑀧𑀺𑀬𑀪𑀽𑀫𑀺𑀁 𑀦𑀸𑀫 𑀧𑀯𑀺𑀝𑁆𑀞𑀸 𑀳𑁄𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀳𑀢𑁆𑀣𑀺𑀧𑀺𑀝𑁆𑀞𑀺𑀆𑀤𑀻𑀳𑀺 𑀯𑀸 𑀇𑀤𑁆𑀥𑀺𑀬𑀸 𑀯𑀸 𑀧𑀯𑀺𑀲𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀧𑀤𑀲𑀸 𑀕𑀫𑀦𑀫𑁂𑀯 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀢𑁂𑀦𑁂𑀯 ‘‘𑀧𑀞𑀫𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸’’𑀢𑀺𑀆𑀤𑀺𑀫𑀸𑀳.

𑀤𑁆𑀯𑁂 𑀕𑀸𑀫𑀸 𑀪𑀺𑀓𑁆𑀔𑀼𑀦𑀺𑀯𑀺𑀳𑀸𑀭𑁂𑀦 𑀲𑀫𑁆𑀩𑀤𑁆𑀥𑀯𑀢𑀺𑀓𑀸 𑀳𑁄𑀦𑁆𑀢𑀺, 𑀬𑀲𑁆𑀫𑀺𑀁 𑀕𑀸𑀫𑁂 𑀪𑀺𑀓𑁆𑀔𑀼𑀦𑀺𑀯𑀺𑀳𑀸𑀭𑁄, 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀼𑀦 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀘𑁂 𑀯𑀺𑀳𑀸𑀭𑀫𑀚𑁆𑀛𑁂𑀦 𑀇𑀢𑀭𑀲𑁆𑀲 𑀕𑀸𑀫𑀲𑁆𑀲 𑀫𑀕𑁆𑀕𑁄 𑀅𑀢𑁆𑀣𑀺, 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁄 𑀧𑀦 𑀕𑀸𑀫𑀢𑁄 𑀢𑁂𑀦𑁂𑀯 𑀫𑀕𑁆𑀕𑁂𑀦 𑀧𑀘𑁆𑀘𑀸𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀕𑀸𑀫𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀕𑀘𑁆𑀙𑀢𑀺, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀧𑀢𑁆𑀢𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀓𑀕𑀸𑀫𑀢𑁄 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀦𑁆𑀢𑀸𑀬 𑀧𑀼𑀦 𑀧𑀯𑀺𑀲𑀦𑀓𑀸𑀮𑁂 𑀳𑀢𑁆𑀣𑀺 𑀯𑀸 𑀫𑀼𑀘𑁆𑀘𑀢𑀺, 𑀉𑀲𑁆𑀲𑀸𑀭𑀡𑀸 𑀯𑀸 𑀳𑁄𑀢𑀺, 𑀇𑀢𑀭𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀳𑀲𑀸 𑀕𑀸𑀫𑀁 𑀧𑀯𑀺𑀲𑀦𑁆𑀢𑀺, 𑀬𑀸𑀯 𑀅𑀜𑁆𑀜𑀸 𑀪𑀺𑀓𑁆𑀔𑀼𑀦𑀻 𑀆𑀕𑀘𑁆𑀙𑀢𑀺, 𑀢𑀸𑀯 𑀩𑀳𑀺𑀕𑀸𑀫𑀤𑁆𑀯𑀸𑀭𑁂 𑀞𑀸𑀢𑀩𑁆𑀩𑀁. 𑀲𑀘𑁂 𑀦 𑀆𑀕𑀘𑁆𑀙𑀢𑀺, 𑀤𑀼𑀢𑀺𑀬𑀺𑀓𑀸 𑀪𑀺𑀓𑁆𑀔𑀼𑀦𑀻 𑀧𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀢𑀺, 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀺.

𑀧𑀼𑀩𑁆𑀩𑁂 𑀫𑀳𑀸𑀕𑀸𑀫𑁄 𑀳𑁄𑀢𑀺, 𑀫𑀚𑁆𑀛𑁂 𑀪𑀺𑀓𑁆𑀔𑀼𑀦𑀺𑀯𑀺𑀳𑀸𑀭𑁄. 𑀧𑀘𑁆𑀙𑀸 𑀢𑀁 𑀕𑀸𑀫𑀁 𑀘𑀢𑁆𑀢𑀸𑀭𑁄 𑀚𑀦𑀸 𑀮𑀪𑀺𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀢𑀺𑀧𑀭𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀯𑀺𑀳𑀸𑀭𑀢𑁄 𑀏𑀓𑀁 𑀕𑀸𑀫𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁄 𑀅𑀧𑀭𑀁 𑀕𑀸𑀫𑀁 𑀤𑁆𑀯𑀸𑀭𑁂𑀦 𑀯𑀸 𑀯𑀢𑀺𑀙𑀺𑀤𑁆𑀤𑁂𑀦 𑀯𑀸 𑀧𑀯𑀺𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀼𑀦 𑀯𑀺𑀳𑀸𑀭𑀫𑁂𑀯 𑀧𑀘𑁆𑀘𑀸𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀯𑀺𑀳𑀸𑀭𑀲𑁆𑀲 𑀘𑀢𑀼𑀕𑀸𑀫𑀲𑀸𑀥𑀸𑀭𑀡𑀢𑁆𑀢𑀸.

𑀅𑀦𑁆𑀢𑀭𑀯𑀸𑀲𑀓𑁄 𑀢𑁂𑀫𑀺𑀬𑀢𑀻𑀢𑀺 𑀬𑀢𑁆𑀣 𑀬𑀣𑀸 𑀢𑀺𑀫𑀡𑁆𑀟𑀮𑀧𑀝𑀺𑀘𑁆𑀙𑀸𑀤𑀦𑀁 𑀳𑁄𑀢𑀺; 𑀏𑀯𑀁 𑀦𑀺𑀯𑀢𑁆𑀣𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀲𑁆𑀲𑀓𑀸𑀮𑁂 𑀢𑀺𑀢𑁆𑀣𑁂𑀦 𑀯𑀸 𑀅𑀢𑀺𑀢𑁆𑀣𑁂𑀦 𑀯𑀸 𑀑𑀢𑀭𑀺𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀢𑁆𑀢𑀭𑀦𑁆𑀢𑀺𑀬𑀸 𑀏𑀓𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀅𑀦𑁆𑀢𑀭𑀯𑀸𑀲𑀓𑁄 𑀢𑁂𑀫𑀺𑀬𑀢𑀺. 𑀲𑁂𑀲𑀁 𑀦𑀤𑀻𑀮𑀓𑁆𑀔𑀡𑀁 𑀦𑀤𑀻𑀦𑀺𑀫𑀺𑀢𑁆𑀢𑀓𑀣𑀸𑀬 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀏𑀯𑀭𑀽𑀧𑀁 𑀦𑀤𑀺𑀁 𑀢𑀺𑀢𑁆𑀣𑁂𑀦 𑀯𑀸 𑀅𑀢𑀺𑀢𑁆𑀣𑁂𑀦 𑀯𑀸 𑀑𑀢𑀭𑀺𑀢𑁆𑀯𑀸 𑀉𑀢𑁆𑀢𑀭𑀡𑀓𑀸𑀮𑁂 𑀧𑀞𑀫𑀁 𑀧𑀸𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀻𑀭𑁂 𑀞𑀧𑁂𑀦𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑀧𑀸𑀤𑀼𑀤𑁆𑀥𑀸𑀭𑁂 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑁂𑀢𑀼𑀦𑀸 𑀕𑀘𑁆𑀙𑀢𑀺, 𑀅𑀦𑀸𑀧𑀢𑁆𑀢𑀺. 𑀧𑀤𑀲𑀸 𑀑𑀢𑀭𑀺𑀢𑁆𑀯𑀸 𑀉𑀢𑁆𑀢𑀭𑀡𑀓𑀸𑀮𑁂 𑀲𑁂𑀢𑀼𑀁 𑀆𑀭𑁄𑀳𑀺𑀢𑁆𑀯𑀸 𑀉𑀢𑁆𑀢𑀭𑀦𑁆𑀢𑀺𑀬𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀲𑁂𑀢𑀼𑀦𑀸 𑀧𑀦 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑀡𑀓𑀸𑀮𑁂 𑀧𑀤𑀲𑀸 𑀕𑀘𑁆𑀙𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑁂𑀯. 𑀬𑀸𑀦𑀦𑀸𑀯𑀸𑀆𑀓𑀸𑀲𑀕𑀫𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀑𑀭𑀺𑀫𑀢𑀻𑀭𑀢𑁄 𑀧𑀦 𑀧𑀭𑀢𑀻𑀭𑀫𑁂𑀯 𑀅𑀓𑁆𑀓𑀫𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀭𑀚𑀦𑀓𑀫𑁆𑀫𑀢𑁆𑀣𑀁 𑀕𑀦𑁆𑀢𑁆𑀯𑀸 𑀤𑀸𑀭𑀼𑀲𑀗𑁆𑀓𑀟𑁆𑀠𑀦𑀸𑀤𑀺𑀓𑀺𑀘𑁆𑀘𑁂𑀦 𑀤𑁆𑀯𑁂 𑀢𑀺𑀲𑁆𑀲𑁄 𑀉𑀪𑀬𑀢𑀻𑀭𑁂𑀲𑀼 𑀯𑀺𑀘𑀭𑀦𑁆𑀢𑀺, 𑀯𑀝𑁆𑀝𑀢𑀺. 𑀲𑀘𑁂 𑀧𑀦𑁂𑀢𑁆𑀣 𑀓𑀸𑀘𑀺 𑀓𑀮𑀳𑀁 𑀓𑀢𑁆𑀯𑀸 𑀇𑀢𑀭𑀁 𑀢𑀻𑀭𑀁 𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺. 𑀤𑁆𑀯𑁂 𑀏𑀓𑀢𑁄 𑀉𑀢𑁆𑀢𑀭𑀦𑁆𑀢𑀺, 𑀏𑀓𑀸 𑀫𑀚𑁆𑀛𑁂 𑀦𑀤𑀺𑀬𑀸 𑀓𑀮𑀳𑀁 𑀓𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀭𑀺𑀫𑀢𑀻𑀭𑀫𑁂𑀯 𑀆𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺. 𑀇𑀢𑀭𑀺𑀲𑁆𑀲𑀸 𑀧𑀦 𑀅𑀬𑀁 𑀧𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀞𑀺𑀢𑀸 𑀳𑁄𑀢𑀺, 𑀢𑀲𑁆𑀫𑀸 𑀧𑀭𑀢𑀻𑀭𑀁 𑀕𑀘𑁆𑀙𑀦𑁆𑀢𑀺𑀬𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀦𑁆𑀳𑀸𑀬𑀺𑀢𑀼𑀁 𑀯𑀸 𑀧𑀸𑀢𑀼𑀁 𑀯𑀸 𑀑𑀢𑀺𑀡𑁆𑀡𑀸 𑀢𑀫𑁂𑀯 𑀢𑀻𑀭𑀁 𑀧𑀘𑁆𑀘𑀼𑀢𑁆𑀢𑀭𑀢𑀺, 𑀅𑀦𑀸𑀧𑀢𑁆𑀢𑀺.

𑀲𑀳 𑀅𑀭𑀼𑀡𑀼𑀕𑁆𑀕𑀫𑀦𑀸𑀢𑀺 𑀏𑀢𑁆𑀣 𑀲𑀘𑁂 𑀲𑀚𑁆𑀛𑀸𑀬𑀁 𑀯𑀸 𑀧𑀥𑀸𑀦𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀼𑀭𑀼𑀫𑀸𑀦𑀸 𑀧𑀼𑀭𑁂𑀅𑀭𑀼𑀡𑁂𑀬𑁂𑀯 𑀤𑀼𑀢𑀺𑀬𑀺𑀓𑀸𑀬 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀆𑀪𑁄𑀕𑀁 𑀓𑀭𑁄𑀢𑀺, 𑀅𑀚𑀸𑀦𑀦𑁆𑀢𑀺𑀬𑀸 𑀏𑀯 𑀘𑀲𑁆𑀲𑀸 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀣 𑀧𑀦 ‘‘𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀇𑀥𑁂𑀯 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀅𑀦𑀸𑀪𑁄𑀕𑁂𑀦 𑀯𑀸 𑀯𑀺𑀳𑀸𑀭𑀲𑁆𑀲 𑀏𑀓𑀤𑁂𑀲𑁂 𑀅𑀘𑁆𑀙𑀢𑀺, 𑀤𑀼𑀢𑀺𑀬𑀺𑀓𑀸𑀬 𑀳𑀢𑁆𑀣𑀧𑀸𑀲𑀁 𑀦 𑀑𑀢𑀭𑀢𑀺, 𑀅𑀭𑀼𑀡𑀼𑀕𑁆𑀕𑀫𑀦𑁂 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀳𑀢𑁆𑀣𑀧𑀸𑀲𑁄𑀬𑁂𑀯 𑀳𑀺 𑀇𑀥 𑀧𑀫𑀸𑀡𑀁, 𑀳𑀢𑁆𑀣𑀧𑀸𑀲𑀸𑀢𑀺𑀓𑁆𑀓𑀫𑁂 𑀏𑀓𑀕𑀩𑁆𑀪𑁄𑀧𑀺 𑀦 𑀭𑀓𑁆𑀔𑀢𑀺.

𑀅𑀕𑀸𑀫𑀓𑁂 𑀅𑀭𑀜𑁆𑀜𑁂𑀢𑀺 𑀏𑀢𑁆𑀣 ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀮𑀓𑁆𑀔𑀡𑀫𑁂𑀯 𑀅𑀭𑀜𑁆𑀜𑀁. 𑀢𑀁 𑀧𑀦𑁂𑀢𑀁 𑀓𑁂𑀯𑀮𑀁 𑀕𑀸𑀫𑀸𑀪𑀸𑀯𑁂𑀦 ‘‘𑀅𑀕𑀸𑀫𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀯𑀺𑀜𑁆𑀛𑀸𑀝𑀯𑀺𑀲𑀤𑀺𑀲𑀢𑀸𑀬. 𑀢𑀸𑀤𑀺𑀲𑁂 𑀅𑀭𑀜𑁆𑀜𑁂 𑀑𑀓𑁆𑀓𑀦𑁆𑀢𑁂 𑀤𑀲𑁆𑀲𑀦𑀽𑀧𑀘𑀸𑀭𑁂 𑀯𑀺𑀚𑀳𑀺𑀢𑁂 𑀲𑀘𑁂𑀧𑀺 𑀲𑀯𑀦𑀽𑀧𑀘𑀸𑀭𑁄 𑀅𑀢𑁆𑀣𑀺, 𑀆𑀧𑀢𑁆𑀢𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀪𑀺𑀓𑁆𑀔𑀼𑀦𑀻𑀲𑀼 𑀫𑀳𑀸𑀩𑁄𑀥𑀺𑀅𑀗𑁆𑀕𑀡𑀁 𑀧𑀯𑀺𑀲𑀦𑁆𑀢𑀻𑀲𑀼 𑀏𑀓𑀸 𑀩𑀳𑀺 𑀢𑀺𑀝𑁆𑀞𑀢𑀺, 𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀺. 𑀮𑁄𑀳𑀧𑀸𑀲𑀸𑀤𑀁 𑀧𑀯𑀺𑀲𑀦𑁆𑀢𑀻𑀲𑀼𑀧𑀺 𑀧𑀭𑀺𑀯𑁂𑀡𑀁 𑀧𑀯𑀺𑀲𑀦𑁆𑀢𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀳𑀸𑀘𑁂𑀢𑀺𑀬𑀁 𑀯𑀦𑁆𑀤𑀫𑀸𑀦𑀸𑀲𑀼 𑀏𑀓𑀸 𑀉𑀢𑁆𑀢𑀭𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀺. 𑀣𑀽𑀧𑀸𑀭𑀸𑀫𑀁 𑀧𑀯𑀺𑀲𑀦𑁆𑀢𑀻𑀲𑀼 𑀏𑀓𑀸 𑀩𑀳𑀺 𑀢𑀺𑀝𑁆𑀞𑀢𑀺, 𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀻’’𑀢𑀺. 𑀏𑀢𑁆𑀣 𑀘 𑀤𑀲𑁆𑀲𑀦𑀽𑀧𑀘𑀸𑀭𑁄 𑀦𑀸𑀫 𑀬𑀢𑁆𑀣 𑀞𑀺𑀢𑀁 𑀤𑀼𑀢𑀺𑀬𑀺𑀓𑀸 𑀧𑀲𑁆𑀲𑀢𑀺. 𑀲𑀘𑁂 𑀧𑀦 𑀲𑀸𑀡𑀺𑀧𑀸𑀓𑀸𑀭𑀦𑁆𑀢𑀭𑀺𑀓𑀸𑀧𑀺 𑀳𑁄𑀢𑀺, 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀺𑀚𑀳𑀢𑀺 𑀦𑀸𑀫. 𑀲𑀯𑀦𑀽𑀧𑀘𑀸𑀭𑁄 𑀦𑀸𑀫 𑀬𑀢𑁆𑀣 𑀞𑀺𑀢𑀸 𑀫𑀕𑁆𑀕𑀫𑀽𑀴𑁆𑀳𑀲𑀤𑁆𑀤𑁂𑀦 𑀯𑀺𑀬 𑀥𑀫𑁆𑀫𑀲𑀯𑀦𑀸𑀭𑁄𑀘𑀦𑀲𑀤𑁆𑀤𑁂𑀦 𑀯𑀺𑀬 𑀘 ‘‘𑀅𑀬𑁆𑀬𑁂’’𑀢𑀺 𑀲𑀤𑁆𑀤𑀸𑀬𑀦𑁆𑀢𑀺𑀬𑀸 𑀲𑀤𑁆𑀤𑀁 𑀲𑀼𑀡𑀸𑀢𑀺. 𑀅𑀚𑁆𑀛𑁄𑀓𑀸𑀲𑁂 𑀤𑀽𑀭𑁂𑀧𑀺 𑀤𑀲𑁆𑀲𑀦𑀽𑀧𑀘𑀸𑀭𑁄 𑀦𑀸𑀫 𑀳𑁄𑀢𑀺. 𑀲𑁄 𑀏𑀯𑀭𑀽𑀧𑁂 𑀲𑀯𑀦𑀽𑀧𑀘𑀸𑀭𑁂 𑀯𑀺𑀚𑀳𑀺𑀢𑁂 𑀦 𑀭𑀓𑁆𑀔𑀢𑀺, 𑀯𑀺𑀚𑀳𑀺𑀢𑀫𑀢𑁆𑀢𑁂𑀯 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀏𑀓𑀸 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀻 𑀑𑀳𑀻𑀬𑀢𑀺. 𑀲𑀉𑀲𑁆𑀲𑀸𑀳𑀸 𑀘𑁂 𑀳𑀼𑀢𑁆𑀯𑀸 𑀇𑀤𑀸𑀦𑀺 𑀧𑀸𑀧𑀼𑀡𑀺𑀲𑁆𑀲𑀸𑀫𑀻𑀢𑀺 𑀅𑀦𑀼𑀩𑀦𑁆𑀥𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀧𑀼𑀭𑀺𑀫𑀸𑀬𑁄 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀺, 𑀧𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀤𑁆𑀯𑀺𑀦𑁆𑀦𑀁 𑀕𑀘𑁆𑀙𑀦𑁆𑀢𑀻𑀦𑀁 𑀏𑀓𑀸 𑀅𑀦𑀼𑀩𑀦𑁆𑀥𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 ‘‘𑀕𑀘𑁆𑀙𑀢𑀼 𑀅𑀬’’𑀦𑁆𑀢𑀺 𑀑𑀳𑀻𑀬𑀢𑀺, 𑀇𑀢𑀭𑀸𑀧𑀺 ‘‘𑀑𑀳𑀻𑀬𑀢𑀼 𑀅𑀬’’𑀦𑁆𑀢𑀺, 𑀕𑀘𑁆𑀙𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀆𑀧𑀢𑁆𑀢𑀺. 𑀲𑀘𑁂 𑀧𑀦 𑀕𑀘𑁆𑀙𑀦𑁆𑀢𑀻𑀲𑀼 𑀧𑀼𑀭𑀺𑀫𑀸𑀧𑀺 𑀅𑀜𑁆𑀜𑀁 𑀫𑀕𑁆𑀕𑀁 𑀕𑀡𑁆𑀳𑀸𑀢𑀺, 𑀧𑀘𑁆𑀙𑀺𑀫𑀸𑀧𑀺 𑀅𑀜𑁆𑀜𑀁, 𑀏𑀓𑀸 𑀏𑀓𑀺𑀲𑁆𑀲𑀸 𑀧𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺.

𑁬𑁯𑁩. 𑀧𑀓𑁆𑀔𑀲𑀗𑁆𑀓𑀦𑁆𑀢𑀸 𑀯𑀸𑀢𑀺 𑀢𑀺𑀢𑁆𑀣𑀸𑀬𑀢𑀦𑀁 𑀲𑀗𑁆𑀓𑀦𑁆𑀢𑀸, 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁.

𑁪. 𑀘𑀢𑀼𑀢𑁆𑀣𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁯𑁪-𑁮. 𑀘𑀢𑀼𑀢𑁆𑀣𑁂 𑁋 𑀧𑀸𑀤𑀧𑀻𑀞𑀁 𑀦𑀸𑀫 𑀥𑁄𑀢𑀧𑀸𑀤𑀝𑁆𑀞𑀧𑀦𑀓𑀁. 𑀧𑀸𑀤𑀓𑀞𑀮𑀺𑀓𑀸 𑀦𑀸𑀫 𑀅𑀥𑁄𑀢𑀧𑀸𑀤𑀝𑁆𑀞𑀧𑀦𑀓𑀁. 𑀅𑀦𑀜𑁆𑀜𑀸𑀬 𑀕𑀡𑀲𑁆𑀲 𑀙𑀦𑁆𑀤𑀦𑁆𑀢𑀺 𑀢𑀲𑁆𑀲𑁂𑀯 𑀓𑀸𑀭𑀓𑀕𑀡𑀲𑁆𑀲 𑀙𑀦𑁆𑀤𑀁 𑀅𑀚𑀸𑀦𑀺𑀢𑁆𑀯𑀸. 𑀯𑀢𑁆𑀢𑁂 𑀯𑀢𑁆𑀢𑀦𑁆𑀢𑀺𑀦𑁆𑀢𑀺 𑀢𑁂𑀘𑀢𑁆𑀢𑀸𑀮𑀻𑀲𑀧𑁆𑀧𑀪𑁂𑀤𑁂 𑀦𑁂𑀢𑁆𑀣𑀸𑀭𑀯𑀢𑁆𑀢𑁂 𑀯𑀢𑁆𑀢𑀫𑀸𑀦𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁.

𑁫. 𑀧𑀜𑁆𑀘𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁦𑁧. 𑀧𑀜𑁆𑀘𑀫𑁂 𑁋 𑀏𑀓𑀢𑁄 𑀅𑀯𑀲𑁆𑀲𑀼𑀢𑁂𑀢𑀺 𑀏𑀢𑁆𑀣 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀅𑀯𑀲𑁆𑀲𑀼𑀢𑀪𑀸𑀯𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦𑁂𑀢𑀁 𑀦 𑀯𑀼𑀢𑁆𑀢𑀁, 𑀢𑀁 𑀧𑀸𑀴𑀺𑀬𑀸 𑀲𑀫𑁂𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀦𑁆𑀢𑀺.

𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁.

𑁬. 𑀙𑀝𑁆𑀞𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁦𑁫-𑁬. 𑀙𑀝𑁆𑀞𑁂 𑁋 𑀬𑀢𑁄 𑀢𑁆𑀯𑀦𑁆𑀢𑀺 𑀬𑀲𑁆𑀫𑀸 𑀢𑁆𑀯𑀁. 𑀉𑀬𑁆𑀬𑁄𑀚𑁂𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺𑀆𑀤𑀺𑀓𑀸 𑀲𑀗𑁆𑀖𑀸𑀤𑀺𑀲𑁂𑀲𑀧𑀭𑀺𑀬𑁄𑀲𑀸𑀦𑀸 𑀆𑀧𑀢𑁆𑀢𑀺𑀬𑁄 𑀓𑀲𑁆𑀲𑀸 𑀳𑁄𑀦𑁆𑀢𑀻𑀢𑀺? 𑀉𑀬𑁆𑀬𑁄𑀚𑀺𑀓𑀸𑀬. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀧𑀭𑀺𑀯𑀸𑀭𑁂𑀧𑀺 𑁋

‘‘𑀦 𑀤𑁂𑀢𑀺 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀧𑀝𑀺𑀕𑁆𑀕𑀳𑁄 𑀢𑁂𑀦 𑀦 𑀯𑀺𑀚𑁆𑀚𑀢𑀺;

𑀆𑀧𑀚𑁆𑀚𑀢𑀺 𑀕𑀭𑀼𑀓𑀁 𑀦 𑀮𑀳𑀼𑀓𑀁, 𑀢𑀜𑁆𑀘 𑀧𑀭𑀺𑀪𑁄𑀕𑀧𑀘𑁆𑀘𑀬𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁮𑁧);

𑀅𑀬𑀜𑁆𑀳𑀺 𑀕𑀸𑀣𑀸 𑀇𑀫𑀁 𑀉𑀬𑁆𑀬𑁄𑀚𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀇𑀢𑀭𑀺𑀲𑁆𑀲𑀸 𑀧𑀦 𑀆𑀧𑀢𑁆𑀢𑀺𑀪𑁂𑀤𑁄 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀺𑀪𑀢𑁆𑀢𑁄𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁.

𑁭. 𑀲𑀢𑁆𑀢𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁦𑁯. 𑀲𑀢𑁆𑀢𑀫𑁂 𑁋 𑀬𑀸𑀯𑀢𑀢𑀺𑀬𑀓𑀧𑀤𑀢𑁆𑀣𑁄 𑀫𑀳𑀸𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁.

𑁮. 𑀅𑀝𑁆𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁧𑁫. 𑀅𑀝𑁆𑀞𑀫𑁂 𑁋 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀥𑀺𑀓𑀭𑀡𑁂𑀢𑀺 𑀘𑀢𑀼𑀦𑁆𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁. 𑀧𑀤𑀪𑀸𑀚𑀦𑁂 𑀧𑀦 𑀓𑁂𑀯𑀮𑀁 𑀅𑀥𑀺𑀓𑀭𑀡𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀥𑀺𑀓𑀭𑀡𑀁 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀻𑀢𑀺.

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁.

𑁯. 𑀦𑀯𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁨𑁩. 𑀦𑀯𑀫𑁂 𑁋 𑀲𑀁𑀲𑀝𑁆𑀞𑀸𑀢𑀺 𑀫𑀺𑀲𑁆𑀲𑀻𑀪𑀽𑀢𑀸. 𑀅𑀦𑀦𑀼𑀮𑁄𑀫𑀺𑀓𑁂𑀦𑀸𑀢𑀺 𑀧𑀩𑁆𑀩𑀚𑀺𑀢𑀸𑀦𑀁 𑀅𑀦𑀦𑀼𑀮𑁄𑀫𑁂𑀦 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦. 𑀲𑀁𑀲𑀝𑁆𑀞𑀸𑀢𑀺 𑀕𑀺𑀳𑀻𑀦𑀁 𑀓𑁄𑀝𑁆𑀝𑀦𑀧𑀘𑀦𑀕𑀦𑁆𑀥𑀧𑀺𑀲𑀦𑀫𑀸𑀮𑀸𑀕𑀦𑁆𑀣𑀦𑀸𑀤𑀺𑀦𑀸 𑀓𑀸𑀬𑀺𑀓𑁂𑀦 𑀲𑀸𑀲𑀦𑀧𑀝𑀺𑀲𑀸𑀲𑀦𑀸𑀳𑀭𑀡𑀲𑀜𑁆𑀘𑀭𑀺𑀢𑁆𑀢𑀸𑀤𑀺𑀦𑀸 𑀯𑀸𑀘𑀲𑀺𑀓𑁂𑀦 𑀘 𑀲𑀁𑀲𑀝𑁆𑀞𑀸. 𑀧𑀸𑀧𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀏𑀢𑀸𑀲𑀦𑁆𑀢𑀺 𑀧𑀸𑀧𑀲𑀤𑁆𑀤𑀸. 𑀧𑀸𑀧𑁄 𑀆𑀚𑀻𑀯𑀲𑀗𑁆𑀔𑀸𑀢𑁄 𑀲𑀺𑀮𑁄𑀓𑁄 𑀏𑀢𑀸𑀲𑀦𑁆𑀢𑀺 𑀧𑀸𑀧𑀲𑀺𑀮𑁄𑀓𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀻𑀢𑀺.

𑀦𑀯𑀫𑀲𑀺𑀓𑁆𑀔𑀸𑀧𑀤𑀁.

𑁧𑁦. 𑀤𑀲𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁨𑁭. 𑀤𑀲𑀫𑁂 𑁋 𑀏𑀯𑀸𑀘𑀸𑀭𑀸𑀢𑀺 𑀏𑀯𑀁𑀆𑀘𑀸𑀭𑀸. 𑀬𑀸𑀤𑀺𑀲𑁄 𑀢𑀼𑀫𑁆𑀳𑀸𑀓𑀁 𑀆𑀘𑀸𑀭𑁄, 𑀢𑀸𑀤𑀺𑀲𑀸 𑀆𑀘𑀸𑀭𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀉𑀜𑁆𑀜𑀸𑀬𑀸𑀢𑀺 𑀅𑀯𑀜𑁆𑀜𑀸𑀬 𑀦𑀻𑀘𑀁 𑀓𑀢𑁆𑀯𑀸 𑀚𑀸𑀦𑀦𑀸𑀬. 𑀧𑀭𑀺𑀪𑀯𑁂𑀦𑀸𑀢𑀺 𑀓𑀺𑀁 𑀇𑀫𑀸 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀏𑀯𑀁 𑀧𑀭𑀺𑀪𑀯𑀺𑀢𑁆𑀯𑀸 𑀚𑀸𑀦𑀦𑁂𑀦. 𑀅𑀓𑁆𑀔𑀦𑁆𑀢𑀺𑀬𑀸𑀢𑀺 𑀅𑀲𑀳𑀦𑀢𑀸𑀬; 𑀓𑁄𑀥𑁂𑀦𑀸𑀢𑀺 𑀅𑀢𑁆𑀣𑁄. 𑀯𑁂𑀪𑀲𑁆𑀲𑀺𑀬𑀸𑀢𑀺 𑀩𑀮𑀯𑀪𑀲𑁆𑀲𑀪𑀸𑀯𑁂𑀦; 𑀅𑀢𑁆𑀢𑀦𑁄 𑀩𑀮𑀧𑁆𑀧𑀓𑀸𑀲𑀦𑁂𑀦 𑀲𑀫𑀼𑀢𑁆𑀭𑀸𑀲𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀤𑀼𑀩𑁆𑀩𑀮𑁆𑀬𑀸𑀢𑀺 𑀢𑀼𑀫𑁆𑀳𑀸𑀓𑀁 𑀤𑀼𑀩𑁆𑀩𑀮𑀪𑀸𑀯𑁂𑀦. 𑀲𑀩𑁆𑀩𑀢𑁆𑀣 𑀉𑀜𑁆𑀜𑀸𑀬 𑀘 𑀧𑀭𑀺𑀪𑀯𑁂𑀦 𑀘𑀸𑀢𑀺 𑀏𑀯𑀁 𑀲𑀫𑀼𑀘𑁆𑀘𑀬𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀯𑀺𑀘𑁆𑀘𑀣𑀸𑀢𑀺 𑀯𑀺𑀦𑀸 𑀳𑁄𑀣. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀻𑀢𑀺.

𑀤𑀲𑀫𑀲𑀺𑀓𑁆𑀔𑀸𑀧𑀤𑀁.

𑀉𑀤𑁆𑀤𑀺𑀝𑁆𑀞𑀸 𑀔𑁄 𑀅𑀬𑁆𑀬𑀸𑀬𑁄 𑀲𑀢𑁆𑀢𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸𑀢𑀺 𑀏𑀢𑁆𑀣 𑀙𑀦𑁆𑀦𑀁 𑀧𑀞𑀫𑀸𑀧𑀢𑁆𑀢𑀺𑀓𑀸𑀦𑀁 𑀅𑀦𑀦𑁆𑀢𑀭𑀸 𑀲𑀜𑁆𑀘𑀭𑀺𑀢𑁆𑀢𑀁, 𑀤𑁆𑀯𑁂 𑀤𑀼𑀝𑁆𑀞𑀤𑁄𑀲𑀸𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀫𑀳𑀸𑀯𑀺𑀪𑀗𑁆𑀕𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀯 𑀧𑀞𑀫𑀸𑀧𑀢𑁆𑀢𑀺𑀓𑀸, 𑀘𑀢𑀼𑀦𑁆𑀦𑀁 𑀬𑀸𑀯𑀢𑀢𑀺𑀬𑀓𑀸𑀦𑀁 𑀅𑀦𑀦𑁆𑀢𑀭𑀸 𑀫𑀳𑀸𑀯𑀺𑀪𑀗𑁆𑀕𑀢𑁄𑀧𑀺 𑀘𑀢𑁆𑀢𑀸𑀭𑁄 𑀬𑀸𑀯𑀢𑀢𑀺𑀬𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀝𑁆𑀞 𑀬𑀸𑀯𑀢𑀢𑀺𑀬𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀲𑀩𑁆𑀩𑁂𑀧𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀫𑀕𑁆𑀕𑁂𑀦 𑀉𑀤𑁆𑀤𑀺𑀝𑁆𑀞𑀸 𑀔𑁄 𑀅𑀬𑁆𑀬𑀸𑀬𑁄 𑀲𑀢𑁆𑀢𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸 𑀥𑀫𑁆𑀫𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯 𑀅𑀜𑁆𑀜𑀢𑁆𑀭 𑀧𑀓𑁆𑀔𑀫𑀸𑀦𑀢𑁆𑀢𑀸. 𑀢𑀁 𑀧𑀦 𑀔𑀦𑁆𑀥𑀓𑁂 𑀯𑀺𑀢𑁆𑀣𑀸𑀭𑁂𑀦 𑀯𑀡𑁆𑀡𑀬𑀺𑀲𑁆𑀲𑀸𑀫𑀸𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂

𑀲𑀢𑁆𑀢𑀭𑀲𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.

𑁩. 𑀦𑀺𑀲𑁆𑀲𑀕𑁆𑀕𑀺𑀬𑀓𑀡𑁆𑀟𑀁 (𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀯𑀡𑁆𑀡𑀦𑀸)

𑀧𑀞𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀥𑀫𑁆𑀫𑀸, 𑀪𑀺𑀓𑁆𑀔𑀼𑀦𑀻𑀦𑀁 𑀧𑀓𑀸𑀲𑀺𑀢𑀸;

𑀬𑁂 𑀢𑁂𑀲𑀁 𑀤𑀸𑀦𑀺 𑀪𑀯𑀢𑀺, 𑀅𑀬𑀁 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄.

𑁭𑁩𑁩. 𑀆𑀫𑀢𑁆𑀢𑀺𑀓𑀸𑀧𑀡𑀦𑁆𑀢𑀺 𑀅𑀫𑀢𑁆𑀢𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 𑀪𑀸𑀚𑀦𑀸𑀦𑀺; 𑀢𑀸𑀦𑀺 𑀬𑁂 𑀯𑀺𑀓𑁆𑀓𑀺𑀡𑀦𑁆𑀢𑀺, 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀆𑀫𑀢𑁆𑀢𑀺𑀓𑀸; 𑀢𑁂𑀲𑀁 𑀆𑀧𑀡𑁄 𑀆𑀫𑀢𑁆𑀢𑀺𑀓𑀸𑀧𑀡𑁄; 𑀢𑀁 𑀯𑀸 𑀧𑀲𑀸𑀭𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁭𑁩𑁪. 𑀧𑀢𑁆𑀢𑀲𑀦𑁆𑀦𑀺𑀘𑀬𑀁 𑀓𑀭𑁂𑀬𑁆𑀬𑀸𑀢𑀺 𑀧𑀢𑁆𑀢𑀲𑀦𑁆𑀦𑀺𑀥𑀺𑀁 𑀓𑀭𑁂𑀬𑁆𑀬; 𑀏𑀓𑀸𑀳𑀁 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸 𑀯𑀸 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀸 𑀧𑀢𑁆𑀢𑀁 𑀞𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀫𑀳𑀸𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁂𑀯 𑀳𑀺 𑀯𑀺𑀲𑁂𑀲𑁄 𑁋 𑀢𑀢𑁆𑀣 𑀤𑀲𑀸𑀳𑀁 𑀧𑀭𑀺𑀳𑀸𑀭𑁄, 𑀇𑀥 𑀏𑀓𑀸𑀳𑀫𑁆𑀧𑀺 𑀦𑀢𑁆𑀣𑀺. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀇𑀤𑀫𑁆𑀧𑀺 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀅𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀧𑀞𑀫𑀲𑀺𑀓𑁆𑀔𑀸𑀧𑀤𑀁.

𑀤𑀼𑀢𑀺𑀬𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁩𑁮. 𑀤𑀼𑀢𑀺𑀬𑁂 𑁋 𑀤𑀼𑀘𑁆𑀘𑁄𑀴𑀸𑀢𑀺 𑀯𑀺𑀭𑀽𑀧𑀘𑁄𑀴𑀸; 𑀚𑀺𑀡𑁆𑀡𑀘𑁄𑀴𑀸𑀢𑀺 𑀅𑀢𑁆𑀣𑁄. 𑀅𑀧𑀬𑁆𑀬𑀸𑀳𑀻𑀢𑀺 𑀅𑀧𑀺 𑀅𑀬𑁆𑀬𑀸𑀳𑀺.

𑁭𑁪𑁦. 𑀆𑀤𑀺𑀲𑁆𑀲 𑀤𑀺𑀦𑁆𑀦𑀦𑁆𑀢𑀺 𑀲𑀫𑁆𑀧𑀢𑁆𑀢𑀸 𑀪𑀸𑀚𑁂𑀦𑁆𑀢𑀽𑀢𑀺 𑀯𑀢𑁆𑀯𑀸𑀧𑀺 𑀇𑀤𑀁 𑀕𑀡𑀲𑁆𑀲 𑀇𑀤𑀁 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀻𑀢𑀺 𑀯𑀢𑁆𑀯𑀸 𑀯𑀸 𑀤𑀸𑀢𑀼𑀓𑀫𑁆𑀬𑀢𑀸𑀬 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀯𑀸 𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀏𑀢𑀁 𑀲𑀩𑁆𑀩𑀫𑁆𑀧𑀺 𑀅𑀓𑀸𑀮𑀘𑀻𑀯𑀭𑀁. 𑀅𑀬𑁆𑀬𑀸𑀬 𑀤𑀫𑁆𑀫𑀻𑀢𑀺 𑀏𑀯𑀁 𑀧𑀝𑀺𑀮𑀤𑁆𑀥𑀁 𑀧𑀦 𑀬𑀣𑀸𑀤𑀸𑀦𑁂𑀬𑁂𑀯 𑀉𑀧𑀦𑁂𑀢𑀩𑁆𑀩𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁.

𑀢𑀢𑀺𑀬𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁪𑁩-𑁫. 𑀢𑀢𑀺𑀬𑁂 𑁋 𑀳𑀦𑁆𑀤𑀸𑀢𑀺 𑀕𑀡𑁆𑀳. 𑀲𑀬𑀁 𑀅𑀘𑁆𑀙𑀺𑀦𑁆𑀤𑀢𑀻𑀢𑀺 𑀏𑀓𑀁 𑀤𑀢𑁆𑀯𑀸 𑀏𑀓𑀁 𑀅𑀘𑁆𑀙𑀺𑀦𑁆𑀤𑀦𑁆𑀢𑀺𑀬𑀸 𑀏𑀓𑀁 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀩𑀳𑀽𑀲𑀼 𑀩𑀳𑀽𑀦𑀺. 𑀲𑀘𑁂 𑀲𑀁𑀳𑀭𑀺𑀢𑁆𑀯𑀸 𑀞𑀧𑀺𑀢𑀸𑀦𑀺 𑀏𑀓𑀢𑁄 𑀅𑀘𑁆𑀙𑀺𑀦𑁆𑀤𑀢𑀺, 𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄. 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁂𑀲𑀼 𑀧𑀦 𑀏𑀓𑀸𑀯 𑀆𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁.

𑀘𑀢𑀼𑀢𑁆𑀣𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁪𑁮. 𑀘𑀢𑀼𑀢𑁆𑀣𑁂 𑁋 𑀓𑀬𑁂𑀦𑀸𑀢𑀺 𑀫𑀽𑀮𑁂𑀦. 𑀦 𑀫𑁂 𑀆𑀯𑀼𑀲𑁄 𑀲𑀧𑁆𑀧𑀺𑀦𑀸 𑀅𑀢𑁆𑀣𑁄; 𑀢𑁂𑀮𑁂𑀦 𑀫𑁂 𑀅𑀢𑁆𑀣𑁄𑀢𑀺 𑀇𑀤𑀁 𑀓𑀺𑀭 𑀲𑀸 𑀆𑀳𑀝𑀲𑀧𑁆𑀧𑀺𑀁 𑀤𑀢𑁆𑀯𑀸 𑀢𑁂𑀮𑀫𑁆𑀧𑀺 𑀆𑀳𑀭𑀺𑀲𑁆𑀲𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 𑀆𑀳. 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀚𑀸𑀦𑀸𑀧𑁂𑀢𑁆𑀯𑀸; 𑀇𑀤𑀁 𑀦𑀸𑀫 𑀆𑀳𑀭𑀸𑀢𑀺 𑀬𑀸𑀘𑀺𑀢𑁆𑀯𑀸 𑀯𑀸.

𑁭𑁫𑁨. 𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀬𑀁 𑀧𑀞𑀫𑀁 𑀯𑀺𑀜𑁆𑀜𑀢𑁆𑀢𑀁 𑀢𑀁 𑀣𑁄𑀓𑀁 𑀦𑀧𑁆𑀧𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀦 𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀜𑁆𑀘 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀲𑀘𑁂 𑀧𑀞𑀫𑀁 𑀲𑀧𑁆𑀧𑀺𑀯𑀺𑀜𑁆𑀜𑀢𑁆𑀢𑀁, 𑀬𑀫𑀓𑀁 𑀧𑀘𑀺𑀢𑀩𑁆𑀩𑀦𑁆𑀢𑀺 𑀘 𑀯𑁂𑀚𑁆𑀚𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑁂𑀮𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀢𑀢𑁄 𑀢𑁂𑀮𑁂𑀦𑀸𑀧𑀺 𑀫𑁂 𑀅𑀢𑁆𑀣𑁄𑀢𑀺 𑀏𑀯𑀁 𑀅𑀜𑁆𑀜𑀜𑁆𑀘 𑀯𑀺𑀜𑁆𑀜𑀸𑀧𑁂𑀢𑀺. 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀘𑁂 𑀓𑀳𑀸𑀧𑀡𑀲𑁆𑀲 𑀲𑀧𑁆𑀧𑀺 𑀆𑀪𑀢𑀁 𑀳𑁄𑀢𑀺, 𑀇𑀫𑀺𑀦𑀸 𑀫𑀽𑀮𑁂𑀦 𑀤𑀺𑀕𑀼𑀡𑀁 𑀢𑁂𑀮𑀁 𑀮𑀩𑁆𑀪𑀢𑀺, 𑀢𑁂𑀦𑀸𑀧𑀺 𑀘 𑀇𑀤𑀁 𑀓𑀺𑀘𑁆𑀘𑀁 𑀦𑀺𑀧𑁆𑀨𑀚𑁆𑀚𑀢𑀺, 𑀢𑀲𑁆𑀫𑀸 𑀢𑁂𑀮𑀁 𑀆𑀳𑀭𑀸𑀢𑀺 𑀏𑀯𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀜𑁆𑀜𑀸𑀧𑁂𑀢𑀻𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀙𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁.

𑀧𑀜𑁆𑀘𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁫𑁩. 𑀧𑀜𑁆𑀘𑀫𑁂 𑁋 𑀦 𑀫𑁂 𑀲𑀺𑀓𑁆𑀔𑀫𑀸𑀦𑁂𑀢𑀺 𑀇𑀤𑀁 𑀓𑀺𑀭 𑀲𑀸 𑀓𑀼𑀮𑀥𑀻𑀢𑀸 ‘‘𑀅𑀬𑀁 𑀅𑀤𑁆𑀥𑀸 𑀏𑀯𑀁 𑀯𑀼𑀢𑁆𑀢𑀸 𑀇𑀤𑀁 𑀢𑁂𑀮𑀁 𑀞𑀧𑁂𑀢𑁆𑀯𑀸 𑀲𑀧𑁆𑀧𑀺𑀫𑁆𑀧𑀺 𑀫𑁂 𑀅𑀢𑁆𑀢𑀦𑁄 𑀓𑀼𑀮𑀖𑀭𑀸 𑀆𑀳𑀭𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸 𑀆𑀳. 𑀘𑁂𑀢𑀸𑀧𑁂𑀢𑁆𑀯𑀸𑀢𑀺 𑀚𑀸𑀦𑀸𑀧𑁂𑀢𑁆𑀯𑀸 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀘𑀢𑀼𑀢𑁆𑀣𑀲𑀤𑀺𑀲𑀫𑁂𑀯𑀸𑀢𑀺.

𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁.

𑀙𑀝𑁆𑀞𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁫𑁮. 𑀙𑀝𑁆𑀞𑁂 𑁋 𑀙𑀦𑁆𑀤𑀓𑀦𑁆𑀢𑀺 ‘‘𑀇𑀤𑀁 𑀦𑀸𑀫 𑀥𑀫𑁆𑀫𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫, 𑀬𑀁 𑀲𑀓𑁆𑀓𑁄𑀣; 𑀢𑀁 𑀤𑁂𑀣𑀸’’𑀢𑀺 𑀏𑀯𑀁 𑀧𑀭𑁂𑀲𑀁 𑀙𑀦𑁆𑀤𑀜𑁆𑀘 𑀭𑀼𑀘𑀺𑀜𑁆𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀳𑀺𑀢𑀧𑀭𑀺𑀓𑁆𑀔𑀸𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀜𑁆𑀜𑀤𑀢𑁆𑀣𑀺𑀓𑁂𑀦𑀸𑀢𑀺 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀤𑀺𑀦𑁆𑀦𑁂𑀦. 𑀅𑀜𑁆𑀜𑀼𑀤𑁆𑀤𑀺𑀲𑀺𑀓𑁂𑀦𑀸𑀢𑀺 𑀅𑀜𑁆𑀜𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀺𑀦𑁆𑀦𑁂𑀦. 𑀲𑀗𑁆𑀖𑀺𑀓𑁂𑀦𑀸𑀢𑀺 𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑁂𑀦.

𑁭𑁬𑁨. 𑀲𑁂𑀲𑀓𑀁 𑀉𑀧𑀦𑁂𑀢𑀻𑀢𑀺 𑀬𑀤𑀢𑁆𑀣𑀸𑀬 𑀤𑀺𑀦𑁆𑀦𑁄, 𑀢𑀁 𑀘𑁂𑀢𑀸𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀉𑀧𑀦𑁂𑀢𑀺. 𑀲𑀸𑀫𑀺𑀓𑁂 𑀅𑀧𑀮𑁄𑀓𑁂𑀢𑁆𑀯𑀸𑀢𑀺 ‘‘𑀢𑀼𑀫𑁆𑀳𑁂𑀳𑀺 𑀘𑀻𑀯𑀭𑀢𑁆𑀣𑀸𑀬 𑀤𑀺𑀦𑁆𑀦𑁄, 𑀅𑀫𑁆𑀳𑀸𑀓𑀜𑁆𑀘 𑀘𑀻𑀯𑀭𑀁 𑀅𑀢𑁆𑀣𑀺, 𑀢𑁂𑀮𑀸𑀤𑀻𑀳𑀺 𑀧𑀦 𑀅𑀢𑁆𑀣𑁄’’𑀢𑀺 𑀏𑀯𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀉𑀧𑀦𑁂𑀢𑀺. 𑀆𑀧𑀤𑀸𑀲𑀽𑀢𑀺 𑀢𑀣𑀸𑀭𑀽𑀧𑁂𑀲𑀼 𑀉𑀧𑀤𑁆𑀤𑀯𑁂𑀲𑀼; 𑀪𑀺𑀓𑁆𑀔𑀼𑀦𑀺𑀬𑁄 𑀯𑀺𑀳𑀸𑀭𑀁 𑀙𑀟𑁆𑀟𑁂𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀬𑀁 𑀯𑀸 𑀢𑀁 𑀯𑀸 𑀘𑁂𑀢𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀙𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁.

𑀲𑀢𑁆𑀢𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁬𑁪. 𑀲𑀢𑁆𑀢𑀫𑁂 𑁋 𑀲𑀜𑁆𑀜𑀸𑀘𑀺𑀓𑁂𑀦𑀸𑀢𑀺 𑀲𑀬𑀁 𑀬𑀸𑀘𑀺𑀢𑀓𑁂𑀦. 𑀏𑀢𑀤𑁂𑀯𑁂𑀢𑁆𑀣 𑀦𑀸𑀦𑀸𑀓𑀭𑀡𑀁. 𑀲𑁂𑀲𑀁 𑀙𑀝𑁆𑀞𑀲𑀤𑀺𑀲𑀫𑁂𑀯𑀸𑀢𑀺.

𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁.

𑀅𑀝𑁆𑀞𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁬𑁯. 𑀅𑀝𑁆𑀞𑀫𑁂 𑁋 𑀫𑀳𑀸𑀚𑀦𑀺𑀓𑁂𑀦𑀸𑀢𑀺 𑀕𑀡𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑁂𑀦. 𑀏𑀢𑀤𑁂𑀯𑁂𑀢𑁆𑀣 𑀦𑀸𑀦𑀸𑀓𑀭𑀡𑀁.

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁.

𑀦𑀯𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁭𑁪. 𑀦𑀯𑀫𑀲𑀺𑀓𑁆𑀔𑀸𑀧𑀤𑁂 𑁋 𑀲𑀜𑁆𑀜𑀸𑀘𑀺𑀓𑁂𑀦𑀸𑀢𑀺 𑀇𑀤𑀁 𑀧𑀤𑀁 𑀇𑀢𑁄 𑀅𑀥𑀺𑀓𑀢𑀭𑀁.

𑀦𑀯𑀫𑀲𑀺𑀓𑁆𑀔𑀸𑀧𑀤𑀁.

𑀤𑀲𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸