𑁮. 𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑁄

𑁧-𑁨-𑁩. 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁧𑁯. 𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑀲𑁆𑀲 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀸𑀦𑀺 𑀢𑀻𑀡𑀺 𑀢𑀻𑀳𑀺 𑀕𑀺𑀳𑀺𑀕𑀢𑀲𑀺𑀓𑁆𑀔𑀸𑀧𑀤𑁂𑀳𑀺 𑀲𑀤𑀺𑀲𑀸𑀦𑀺. 𑀬𑀸 𑀧𑀦 𑀢𑀸 𑀲𑀩𑁆𑀩𑀧𑀞𑀫𑀸 𑀤𑁆𑀯𑁂 𑀫𑀳𑀸𑀲𑀺𑀓𑁆𑀔𑀫𑀸𑀦𑀸, 𑀢𑀸 𑀅𑀢𑀺𑀓𑁆𑀓𑀦𑁆𑀢𑀯𑀻𑀲𑀢𑀺𑀯𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀸 𑀕𑀺𑀳𑀺𑀕𑀢𑀸 𑀯𑀸 𑀳𑁄𑀦𑁆𑀢𑀼 𑀅𑀕𑀺𑀳𑀺𑀕𑀢𑀸 𑀯𑀸, 𑀲𑀺𑀓𑁆𑀔𑀫𑀸𑀦𑀸 𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀸, 𑀕𑀺𑀳𑀺𑀕𑀢𑀸𑀢𑀺 𑀯𑀸 𑀓𑀼𑀫𑀸𑀭𑀺𑀪𑀽𑀢𑀸𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸. 𑀕𑀺𑀳𑀺𑀕𑀢𑀸𑀬 𑀤𑀲𑀯𑀲𑁆𑀲𑀓𑀸𑀮𑁂 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀢𑁆𑀯𑀸 𑀤𑁆𑀯𑀸𑀤𑀲𑀯𑀲𑁆𑀲𑀓𑀸𑀮𑁂 𑀉𑀧𑀲𑀫𑁆𑀧𑀤𑀸 𑀓𑀸𑀢𑀩𑁆𑀩𑀸. 𑀏𑀓𑀸𑀤𑀲𑀯𑀲𑁆𑀲𑀓𑀸𑀮𑁂 𑀤𑀢𑁆𑀯𑀸 𑀢𑁂𑀭𑀲𑀯𑀲𑁆𑀲𑀓𑀸𑀮𑁂 𑀓𑀸𑀢𑀩𑁆𑀩𑀸, 𑀤𑁆𑀯𑀸𑀤𑀲𑀢𑁂𑀭𑀲𑀘𑀼𑀤𑁆𑀤𑀲𑀧𑀦𑁆𑀦𑀭𑀲𑀲𑁄𑀴𑀲𑀲𑀢𑁆𑀢𑀭𑀲𑀅𑀝𑁆𑀞𑀸𑀭𑀲𑀯𑀲𑁆𑀲𑀓𑀸𑀮𑁂 𑀲𑀫𑁆𑀫𑀼𑀢𑀺𑀁 𑀤𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂 𑀉𑀧𑀲𑀫𑁆𑀧𑀤𑀸 𑀓𑀸𑀢𑀩𑁆𑀩𑀸. 𑀅𑀝𑁆𑀞𑀸𑀭𑀲𑀯𑀲𑁆𑀲𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘 𑀧𑀦𑀸𑀬𑀁 𑀕𑀺𑀳𑀺𑀕𑀢𑀸𑀢𑀺𑀧𑀺 𑀓𑀼𑀫𑀸𑀭𑀺𑀪𑀽𑀢𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀓𑀼𑀫𑀸𑀭𑀺𑀪𑀽𑀢𑀸 𑀧𑀦 𑀕𑀺𑀳𑀺𑀕𑀢𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀓𑀼𑀫𑀸𑀭𑀺𑀪𑀽𑀢𑀸 𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀸. 𑀫𑀳𑀸𑀲𑀺𑀓𑁆𑀔𑀫𑀸𑀦𑀸 𑀧𑀦 𑀕𑀺𑀳𑀺𑀕𑀢𑀸𑀢𑀺𑀧𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑀼𑀫𑀸𑀭𑀺𑀪𑀽𑀢𑀸𑀢𑀺𑀧𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀤𑀸𑀦𑀯𑀲𑁂𑀦 𑀧𑀦 𑀢𑀺𑀲𑁆𑀲𑁄𑀧𑀺 𑀲𑀺𑀓𑁆𑀔𑀫𑀸𑀦𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀸𑀦𑀺.

𑁪-𑁫-𑁬. 𑀘𑀢𑀼𑀢𑁆𑀣𑀧𑀜𑁆𑀘𑀫𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁩𑁬. 𑀘𑀢𑀼𑀢𑁆𑀣𑀧𑀜𑁆𑀘𑀫𑀙𑀝𑁆𑀞𑁂𑀲𑀼 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀩𑁆𑀩𑀸𑀦𑀺 𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀺 𑀘𑀢𑀼𑀢𑁆𑀣𑀁 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺. 𑀧𑀜𑁆𑀘𑀫𑀁 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺. 𑀬𑀜𑁆𑀘𑁂𑀢𑁆𑀣 𑀲𑀗𑁆𑀖𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀙𑀝𑁆𑀞𑀁 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺. 𑀬𑀁 𑀧𑀦𑁂𑀢𑁆𑀣 ‘‘𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀘𑀢𑀼𑀢𑁆𑀣𑀧𑀜𑁆𑀘𑀫𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀸𑀦𑀺

𑁭. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁫𑁦. 𑀲𑀢𑁆𑀢𑀫𑁂 𑁋 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯. 𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁.

𑁮. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁫𑁪. 𑀅𑀝𑁆𑀞𑀫𑁂𑀧𑀺 𑁋 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺𑀧𑀺 𑀅𑀦𑀦𑁆𑀢𑀭𑀲𑀤𑀺𑀲𑀸𑀦𑁂𑀯𑀸𑀢𑀺.

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁.

𑁯. 𑀦𑀯𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁫𑁮. 𑀦𑀯𑀫𑁂 𑁋 𑀲𑁄𑀓𑀸𑀯𑀸𑀲𑀦𑁆𑀢𑀺 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸 𑀅𑀕𑀘𑁆𑀙𑀫𑀸𑀦𑀸 𑀧𑀼𑀭𑀺𑀲𑀸𑀦𑀁 𑀅𑀦𑁆𑀢𑁄 𑀲𑁄𑀓𑀁 𑀧𑀯𑁂𑀲𑁂𑀢𑀻𑀢𑀺 𑀲𑁄𑀓𑀸𑀯𑀸𑀲𑀸, 𑀢𑀁 𑀲𑁄𑀓𑀸𑀯𑀸𑀲𑀁. 𑀢𑁂𑀦𑁂𑀯𑀸𑀳 𑁋 ‘‘𑀲𑁄𑀓𑀸𑀯𑀸𑀲𑀸 𑀦𑀸𑀫 𑀧𑀭𑁂𑀲𑀁 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺. 𑀅𑀣 𑀯𑀸 𑀖𑀭𑀁 𑀯𑀺𑀬 𑀖𑀭𑀲𑀸𑀫𑀺𑀓𑀸, 𑀅𑀬𑀫𑁆𑀧𑀺 𑀧𑀼𑀭𑀺𑀲𑀲𑀫𑀸𑀕𑀫𑀁 𑀅𑀮𑀪𑀫𑀸𑀦𑀸 𑀲𑁄𑀓𑀁 𑀆𑀯𑀺𑀲𑀢𑀺. 𑀇𑀢𑀺 𑀬𑀁 𑀆𑀯𑀺𑀲𑀢𑀺, 𑀲𑁆𑀯𑀸𑀲𑁆𑀲𑀸 𑀆𑀯𑀸𑀲𑁄 𑀳𑁄𑀢𑀻𑀢𑀺 𑀲𑁄𑀓𑀸𑀯𑀸𑀲𑀸. 𑀢𑁂𑀦𑀸𑀳 𑁋 ‘‘𑀲𑁄𑀓𑀁 𑀆𑀯𑀺𑀲𑀢𑀻’’𑀢𑀺. 𑀅𑀚𑀸𑀦𑀦𑁆𑀢𑀻𑀢𑀺 𑀏𑀤𑀺𑀲𑀸 𑀅𑀬𑀦𑁆𑀢𑀺 𑀅𑀚𑀸𑀦𑀫𑀸𑀦𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀦𑀯𑀫𑀲𑀺𑀓𑁆𑀔𑀸𑀧𑀤𑀁.

𑁧𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁬𑁪. 𑀤𑀲𑀫𑁂 𑁋 𑀅𑀦𑀸𑀧𑀼𑀘𑁆𑀙𑀸𑀢𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸. 𑀪𑀺𑀓𑁆𑀔𑀼𑀦𑀻𑀳𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀆𑀧𑀼𑀘𑁆𑀙𑀺𑀢𑀩𑁆𑀩𑀁 𑁋 𑀧𑀩𑁆𑀩𑀚𑁆𑀚𑀸𑀓𑀸𑀮𑁂 𑀘 𑀉𑀧𑀲𑀫𑁆𑀧𑀤𑀸𑀓𑀸𑀮𑁂 𑀘, 𑀪𑀺𑀓𑁆𑀔𑀽𑀦𑀁 𑀧𑀦 𑀲𑀓𑀺𑀁 𑀆𑀧𑀼𑀘𑁆𑀙𑀺𑀢𑁂𑀧𑀺 𑀯𑀝𑁆𑀝𑀢𑀺.

𑁧𑁧𑁬𑁫. 𑀅𑀚𑀸𑀦𑀦𑁆𑀢𑀻𑀢𑀺 𑀫𑀸𑀢𑀸𑀤𑀻𑀦𑀁 𑀅𑀢𑁆𑀣𑀺𑀪𑀸𑀯𑀁 𑀅𑀚𑀸𑀦𑀦𑁆𑀢𑀻. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀇𑀤𑀁 𑀅𑀧𑀼𑀩𑁆𑀩𑀲𑀫𑀼𑀝𑁆𑀞𑀸𑀦𑀲𑀻𑀲𑀁. 𑀘𑀢𑀼𑀲𑀫𑀼𑀝𑁆𑀞𑀸𑀦𑀁 𑁋 𑀯𑀸𑀘𑀢𑁄 𑀓𑀸𑀬𑀯𑀸𑀘𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀓𑀣𑀁? 𑀅𑀩𑁆𑀪𑀸𑀦𑀓𑀫𑁆𑀫𑀸𑀤𑀻𑀲𑀼 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀔𑀡𑁆𑀟𑀲𑀻𑀫𑀸𑀬𑀁 𑀦𑀺𑀲𑀺𑀦𑁆𑀦𑀸 ‘‘𑀧𑀓𑁆𑀓𑁄𑀲𑀣 𑀲𑀺𑀓𑁆𑀔𑀫𑀸𑀦𑀁, 𑀇𑀥𑁂𑀯 𑀦𑀁 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀸’’𑀢𑀺 𑀉𑀧𑀲𑀫𑁆𑀧𑀸𑀤𑁂𑀢𑀺; 𑀏𑀯𑀁 𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀉𑀧𑀲𑁆𑀲𑀬𑀢𑁄 𑀧𑀝𑁆𑀞𑀸𑀬 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀯𑀢𑁆𑀯𑀸 𑀔𑀡𑁆𑀟𑀲𑀻𑀫𑀁 𑀕𑀘𑁆𑀙𑀦𑁆𑀢𑀺𑀬𑀸 𑀓𑀸𑀬𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀤𑁆𑀯𑀻𑀲𑀼𑀧𑀺 𑀞𑀸𑀦𑁂𑀲𑀼 𑀧𑀡𑁆𑀡𑀢𑁆𑀢𑀺𑀪𑀸𑀯𑀁 𑀚𑀸𑀦𑀺𑀢𑁆𑀯𑀸𑀯 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑀺𑀬𑀸 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀅𑀦𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑀦𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀤𑀲𑀫𑀲𑀺𑀓𑁆𑀔𑀸𑀧𑀤𑀁.

𑁧𑁧. 𑀏𑀓𑀸𑀤𑀲𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁬𑁭-𑁮. 𑀏𑀓𑀸𑀤𑀲𑀫𑁂 𑁋 𑀧𑀸𑀭𑀺𑀯𑀸𑀲𑀺𑀓𑀙𑀦𑁆𑀤𑀤𑀸𑀦𑁂𑀦𑀸𑀢𑀺 𑀧𑀸𑀭𑀺𑀯𑀸𑀲𑀺𑀬𑁂𑀦 𑀙𑀦𑁆𑀤𑀤𑀸𑀦𑁂𑀦. 𑀢𑀢𑁆𑀣 𑀘𑀢𑀼𑀩𑁆𑀩𑀺𑀥𑀁 𑀧𑀸𑀭𑀺𑀯𑀸𑀲𑀺𑀬𑀁 𑁋 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁, 𑀭𑀢𑁆𑀢𑀺𑀧𑀸𑀭𑀺𑀯𑀸𑀲𑀺𑀬𑀁, 𑀙𑀦𑁆𑀤𑀧𑀸𑀭𑀺𑀯𑀸𑀲𑀺𑀬𑀁, 𑀅𑀚𑁆𑀛𑀸𑀲𑀬𑀧𑀸𑀭𑀺𑀯𑀸𑀲𑀺𑀬𑀦𑁆𑀢𑀺. 𑀢𑀢𑁆𑀣 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁 𑀦𑀸𑀫 𑀪𑀺𑀓𑁆𑀔𑀽 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀅𑀣 𑀫𑁂𑀖𑁄 𑀯𑀸 𑀉𑀝𑁆𑀞𑀸𑀢𑀺, 𑀉𑀲𑁆𑀲𑀸𑀭𑀡𑀸 𑀯𑀸 𑀓𑀭𑀺𑀬𑀢𑀺, 𑀫𑀦𑀼𑀲𑁆𑀲𑀸 𑀯𑀸 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀺, 𑀪𑀺𑀓𑁆𑀔𑀽 ‘‘𑀅𑀦𑁄𑀓𑀸𑀲𑀸 𑀫𑀬𑀁 𑀅𑀜𑁆𑀜𑀢𑁆𑀭 𑀕𑀘𑁆𑀙𑀸𑀫𑀸’’𑀢𑀺 𑀙𑀦𑁆𑀤𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀉𑀝𑁆𑀞𑀳𑀦𑁆𑀢𑀺. 𑀇𑀤𑀁 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁. 𑀓𑀺𑀜𑁆𑀘𑀸𑀧𑀺 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁, 𑀙𑀦𑁆𑀤𑀲𑁆𑀲 𑀧𑀦 𑀅𑀯𑀺𑀲𑁆𑀲𑀝𑁆𑀞𑀢𑁆𑀢𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀧𑀼𑀦 𑀪𑀺𑀓𑁆𑀔𑀽 ‘‘𑀉𑀧𑁄𑀲𑀣𑀸𑀤𑀻𑀦𑀺 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀭𑀢𑁆𑀢𑀺𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀬𑀸𑀯 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀢𑀸𑀯 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀏𑀓𑀁 𑀅𑀚𑁆𑀛𑁂𑀲𑀦𑁆𑀢𑀺, 𑀢𑀲𑁆𑀫𑀺𑀁 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁂𑀬𑁂𑀯 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺. 𑀲𑀘𑁂 ‘‘𑀘𑀸𑀢𑀼𑀤𑁆𑀤𑀲𑀺𑀓𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀲𑀺𑀦𑁆𑀦𑀸 ‘‘𑀧𑀦𑁆𑀦𑀭𑀲𑁄’’𑀢𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦𑁆𑀦𑀭𑀲𑀺𑀓𑀁 𑀓𑀸𑀢𑀼𑀁 𑀦𑀺𑀲𑀺𑀦𑁆𑀦𑀸 𑀧𑀸𑀝𑀺𑀧𑀤𑁂 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀜𑁆𑀜𑀁 𑀧𑀦 𑀲𑀗𑁆𑀖𑀓𑀺𑀘𑁆𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀇𑀤𑀁 𑀭𑀢𑁆𑀢𑀺𑀧𑀸𑀭𑀺𑀯𑀸𑀲𑀺𑀬𑀁 𑀦𑀸𑀫.

𑀧𑀼𑀦 𑀪𑀺𑀓𑁆𑀔𑀽 ‘‘𑀓𑀺𑀜𑁆𑀘𑀺𑀤𑁂𑀯 𑀅𑀩𑁆𑀪𑀸𑀦𑀸𑀤𑀺𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀢𑀢𑁆𑀭𑁂𑀓𑁄 𑀦𑀓𑁆𑀔𑀢𑁆𑀢𑀧𑀸𑀞𑀓𑁄 𑀪𑀺𑀓𑁆𑀔𑀼 𑀏𑀯𑀁 𑀯𑀤𑀢𑀺 𑁋 ‘‘𑀅𑀚𑁆𑀚 𑀦𑀓𑁆𑀔𑀢𑁆𑀢𑀁 𑀤𑀸𑀭𑀼𑀡𑀁, 𑀫𑀸 𑀇𑀫𑀁 𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺. 𑀢𑁂 𑀢𑀲𑁆𑀲 𑀯𑀘𑀦𑁂𑀦 𑀙𑀦𑁆𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀣𑀜𑁆𑀜𑁄 𑀆𑀕𑀦𑁆𑀢𑁆𑀯𑀸 ‘‘𑀦𑀓𑁆𑀔𑀢𑁆𑀢𑀁 𑀧𑀝𑀺𑀫𑀸𑀦𑁂𑀦𑁆𑀢𑀁 𑀅𑀢𑁆𑀣𑁄 𑀩𑀸𑀮𑀁 𑀉𑀧𑀘𑁆𑀘𑀕𑀸’’𑀢𑀺 (𑀚𑀸. 𑁧.𑁧.𑁪𑁯) 𑀯𑀢𑁆𑀯𑀸 ‘‘𑀓𑀺𑀁 𑀦𑀓𑁆𑀔𑀢𑁆𑀢𑁂𑀦 𑀓𑀭𑁄𑀣𑀸’’𑀢𑀺 𑀯𑀤𑀢𑀺. 𑀇𑀤𑀁 𑀙𑀦𑁆𑀤𑀧𑀸𑀭𑀺𑀯𑀸𑀲𑀺𑀬𑀜𑁆𑀘𑁂𑀯 𑀅𑀚𑁆𑀛𑀸𑀲𑀬𑀧𑀸𑀭𑀺𑀯𑀸𑀲𑀺𑀬𑀜𑁆𑀘. 𑀏𑀢𑀲𑁆𑀫𑀺𑀁 𑀧𑀸𑀭𑀺𑀯𑀸𑀲𑀺𑀬𑁂 𑀧𑀼𑀦 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀅𑀦𑀸𑀦𑁂𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺.

𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬𑀸𑀢𑀺 𑀙𑀦𑁆𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀙𑀦𑁆𑀤𑀯𑀺𑀲𑁆𑀲𑀚𑁆𑀚𑀦𑀫𑀢𑁆𑀢𑁂𑀦𑁂𑀯 𑀯𑀸 𑀉𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬.

𑁧𑁧𑁬𑁯. 𑀅𑀦𑀸𑀧𑀢𑁆𑀢𑀺 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬𑀸𑀢𑀺 𑀙𑀦𑁆𑀤𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀯𑀼𑀝𑁆𑀞𑀺𑀢𑀸𑀬 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀏𑀓𑀸𑀤𑀲𑀫𑀲𑀺𑀓𑁆𑀔𑀸𑀧𑀤𑀁.

𑁧𑁨. 𑀤𑁆𑀯𑀸𑀤𑀲𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁭𑁦. 𑀤𑁆𑀯𑀸𑀤𑀲𑀫𑁂 𑁋 𑀉𑀧𑀲𑁆𑀲𑀬𑁄 𑀦 𑀲𑀫𑁆𑀫𑀢𑀻𑀢𑀺 𑀯𑀲𑀦𑁄𑀓𑀸𑀲𑁄 𑀦𑀧𑁆𑀧𑀳𑁄𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀦𑀦𑁆𑀢𑀭𑀲𑀤𑀺𑀲𑀸𑀦𑁂𑀯𑀸𑀢𑀺.

𑀤𑁆𑀯𑀸𑀤𑀲𑀫𑀲𑀺𑀓𑁆𑀔𑀸𑀧𑀤𑀁.

𑁧𑁩. 𑀢𑁂𑀭𑀲𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁭𑁫. 𑀢𑁂𑀭𑀲𑀫𑁂 𑁋 𑀏𑀓𑀁 𑀯𑀲𑁆𑀲𑀁 𑀤𑁆𑀯𑁂𑀢𑀺 𑀏𑀓𑀦𑁆𑀢𑀭𑀺𑀓𑁂 𑀏𑀓𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺𑀧𑀺 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯𑀸𑀢𑀺.

𑀢𑁂𑀭𑀲𑀫𑀲𑀺𑀓𑁆𑀔𑀸𑀧𑀤𑀁.

𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑁄 𑀅𑀝𑁆𑀞𑀫𑁄.