𑁨. 𑀅𑀦𑁆𑀥𑀓𑀸𑀭𑀯𑀕𑁆𑀕𑁄

𑁧. 𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁩𑁯. 𑀅𑀦𑁆𑀥𑀓𑀸𑀭𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀅𑀧𑁆𑀧𑀤𑀻𑀧𑁂𑀢𑀺 𑀧𑀤𑀻𑀧𑀘𑀦𑁆𑀤𑀲𑀽𑀭𑀺𑀬𑀅𑀕𑁆𑀕𑀻𑀲𑀼 𑀏𑀓𑁂𑀦𑀸𑀧𑀺 𑀅𑀦𑁄𑀪𑀸𑀲𑀺𑀢𑁂. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀅𑀦𑀸𑀮𑁄𑀓𑁂’’𑀢𑀺 𑀯𑀼𑀢𑁆𑀢𑀁. 𑀲𑀮𑁆𑀮𑀧𑁂𑀬𑁆𑀬 𑀯𑀸𑀢𑀺 𑀕𑁂𑀳𑀲𑁆𑀲𑀺𑀢𑀓𑀣𑀁 𑀓𑀣𑁂𑀬𑁆𑀬.

𑁮𑁪𑁧. 𑀅𑀭𑀳𑁄𑀧𑁂𑀓𑁆𑀔𑀸 𑀅𑀜𑁆𑀜𑀯𑀺𑀳𑀺𑀢𑀸𑀢𑀺 𑀦 𑀭𑀳𑁄𑀅𑀲𑁆𑀲𑀸𑀤𑀸𑀧𑁂𑀓𑁆𑀔𑀸 𑀭𑀳𑁄𑀅𑀲𑁆𑀲𑀸𑀤𑀢𑁄 𑀅𑀜𑁆𑀜𑀯𑀺𑀳𑀺𑀢𑀸𑀯 𑀳𑀼𑀢𑁆𑀯𑀸 𑀜𑀸𑀢𑀺𑀁 𑀯𑀸 𑀧𑀼𑀘𑁆𑀙𑀢𑀺, 𑀤𑀸𑀦𑁂 𑀯𑀸 𑀧𑀽𑀚𑀸𑀬 𑀯𑀸 𑀫𑀦𑁆𑀢𑁂𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀦𑁆𑀢𑀺.

𑀧𑀞𑀫𑀲𑀺𑀓𑁆𑀔𑀸𑀧𑀤𑀁.

𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁪𑁨. 𑀤𑀼𑀢𑀺𑀬𑁂 𑁋 𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂𑀢𑀺 𑀇𑀤𑀫𑁂𑀯 𑀦𑀸𑀦𑀁. 𑀲𑁂𑀲𑀁 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁.

𑁩. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁪𑁬. 𑀢𑀢𑀺𑀬𑁂 𑁋 𑀅𑀚𑁆𑀛𑁄𑀓𑀸𑀲𑁂𑀢𑀺 𑀦𑀸𑀦𑀁, 𑀲𑁂𑀲𑀁 𑀲𑀩𑁆𑀩𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁.

𑁪. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁫𑁦-𑁩. 𑀘𑀢𑀼𑀢𑁆𑀣𑁂 𑁋 𑀦𑀺𑀓𑀡𑁆𑀡𑀺𑀓𑀦𑁆𑀢𑀺 𑀓𑀡𑁆𑀡𑀫𑀽𑀮𑀁 𑀯𑀼𑀘𑁆𑀘𑀢𑀺; 𑀓𑀡𑁆𑀡𑀫𑀽𑀮𑁂 𑀚𑀧𑁆𑀧𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀢𑀺 𑀓𑀭𑀡𑀻𑀬𑁂𑀢𑀺 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀁 𑀆𑀳𑀭𑀡𑀢𑁆𑀣𑀸𑀬 𑀯𑀺𑀳𑀸𑀭𑁂 𑀯𑀸 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀧𑀝𑀺𑀲𑀸𑀫𑀦𑀢𑁆𑀣𑀸𑀬. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀼𑀭𑀺𑀫𑀲𑀤𑀺𑀲𑀸𑀦𑁂𑀯𑀸𑀢𑀺.

𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁.

𑁫. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁫𑁪. 𑀧𑀜𑁆𑀘𑀫𑁂 𑁋 𑀖𑀭𑀁 𑀲𑁄𑀥𑁂𑀦𑁆𑀢𑀸𑀢𑀺 𑀢𑁂𑀲𑀁 𑀓𑀺𑀭 𑀏𑀢𑀤𑀳𑁄𑀲𑀺 𑁋 ‘‘𑀣𑁂𑀭𑀺𑀬𑀸 𑀓𑁄𑀘𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀯𑀻𑀢𑀺𑀓𑁆𑀓𑀫𑁄 𑀦 𑀤𑀺𑀲𑁆𑀲𑀢𑀺, 𑀖𑀭𑀫𑁆𑀧𑀺 𑀢𑀸𑀯 𑀲𑁄𑀥𑁂𑀫𑀸’’𑀢𑀺, 𑀢𑀢𑁄 𑀖𑀭𑀁 𑀲𑁄𑀥𑁂𑀦𑁆𑀢𑀸 𑀦𑀁 𑀅𑀤𑁆𑀤𑀲𑀁𑀲𑀼.

𑁮𑁫𑁬. 𑀅𑀦𑁄𑀯𑀲𑁆𑀲𑀓𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸𑀢𑀺 𑀧𑀞𑀫𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁, 𑀉𑀧𑀘𑀸𑀭𑀸𑀢𑀺𑀓𑁆𑀓𑀫𑁂 𑀏𑀲𑁂𑀯 𑀦𑀬𑁄.

𑁮𑁫𑁮. 𑀕𑀺𑀮𑀸𑀦𑀸𑀬𑀸𑀢𑀺 𑀬𑀸 𑀢𑀸𑀤𑀺𑀲𑁂𑀦 𑀕𑁂𑀮𑀜𑁆𑀜𑁂𑀦 𑀆𑀧𑀼𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀆𑀧𑀤𑀸𑀲𑀽𑀢𑀺 𑀖𑀭𑁂 𑀅𑀕𑁆𑀕𑀺 𑀯𑀸 𑀉𑀝𑁆𑀞𑀺𑀢𑁄 𑀳𑁄𑀢𑀺, 𑀘𑁄𑀭𑀸 𑀯𑀸; 𑀏𑀯𑀭𑀽𑀧𑁂 𑀉𑀧𑀤𑁆𑀤𑀯𑁂 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁.

𑁬. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁬𑁦. 𑀙𑀝𑁆𑀞𑁂 𑁋 𑀅𑀪𑀺𑀦𑀺𑀲𑀻𑀤𑁂𑀬𑁆𑀬𑀸𑀢𑀺 𑀦𑀺𑀲𑀻𑀤𑁂𑀬𑁆𑀬. 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑀸 𑀏𑀓𑀸 𑀆𑀧𑀢𑁆𑀢𑀺, 𑀅𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑀸 𑀏𑀓𑀸, 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑀸 𑀤𑁆𑀯𑁂.

𑁮𑁬𑁩. 𑀥𑀼𑀯𑀧𑀜𑁆𑀜𑀢𑁆𑀢𑁂𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀢𑁆𑀣𑀸𑀬 𑀦𑀺𑀘𑁆𑀘𑀧𑀜𑁆𑀜𑀢𑁆𑀢𑁂. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁…𑀧𑁂… 𑀢𑀺𑀯𑁂𑀤𑀦𑀦𑁆𑀢𑀺.

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁.

𑁭. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁬𑁪. 𑀲𑀢𑁆𑀢𑀫𑁂𑀧𑀺 𑁋 𑀲𑀩𑁆𑀩𑀁 𑀙𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁.

𑁮. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁬𑁯. 𑀅𑀝𑁆𑀞𑀫𑁂 𑁋 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯. 𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁.

𑁯. 𑀦𑀯𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁭𑁫. 𑀦𑀯𑀫𑁂 𑁋 𑀅𑀪𑀺𑀲𑀧𑁂𑀬𑁆𑀬𑀸𑀢𑀺 𑀲𑀧𑀣𑀁 𑀓𑀭𑁂𑀬𑁆𑀬. 𑀦𑀺𑀭𑀬𑁂𑀦 𑀅𑀪𑀺𑀲𑀧𑀢𑀺 𑀦𑀸𑀫 ‘‘𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸𑀫𑀺, 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸𑀫𑀺, 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀼, 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀢𑀽’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀅𑀓𑁆𑀓𑁄𑀲𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀅𑀪𑀺𑀲𑀧𑀢𑀺 𑀦𑀸𑀫 ‘‘𑀕𑀺𑀳𑀺𑀦𑀻 𑀳𑁄𑀫𑀺, 𑀑𑀤𑀸𑀢𑀯𑀢𑁆𑀣𑀸 𑀳𑁄𑀫𑀺, 𑀧𑀭𑀺𑀩𑁆𑀩𑀸𑀚𑀺𑀓𑀸 𑀳𑁄𑀫𑀺, 𑀇𑀢𑀭𑀸 𑀯𑀸 𑀏𑀤𑀺𑀲𑀸 𑀳𑁄𑀢𑀽’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀅𑀓𑁆𑀓𑁄𑀲𑀢𑀺; 𑀯𑀸𑀘𑀸𑀬 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀞𑀧𑁂𑀢𑁆𑀯𑀸 𑀧𑀦 𑀦𑀺𑀭𑀬𑀜𑁆𑀘 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 ‘‘𑀲𑀼𑀦𑀔𑀻 𑀲𑀽𑀓𑀭𑀻 𑀓𑀸𑀡𑀸 𑀓𑀼𑀡𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀓𑁆𑀓𑁄𑀲𑀦𑁆𑀢𑀺𑀬𑀸 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀁.

𑁮𑁭𑁮. 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑀸𑀬𑀸𑀢𑀺 𑀅𑀝𑁆𑀞𑀓𑀣𑀁 𑀓𑀣𑁂𑀦𑁆𑀢𑀺𑀬𑀸. 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑀸𑀬𑀸𑀢𑀺 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑀺𑀬𑀸. 𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀸𑀬𑀸𑀢𑀺 ‘‘𑀇𑀤𑀸𑀦𑀺𑀧𑀺 𑀢𑁆𑀯𑀁 𑀏𑀤𑀺𑀲𑀸, 𑀲𑀸𑀥𑀼 𑀯𑀺𑀭𑀫𑀲𑁆𑀲𑀼, 𑀦𑁄 𑀘𑁂 𑀯𑀺𑀭𑀫𑀲𑀺, 𑀅𑀤𑁆𑀥𑀸 𑀧𑀼𑀦 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀲𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀲𑀻’’𑀢𑀺 𑀏𑀯𑀁 𑀅𑀦𑀼𑀲𑀸𑀲𑀦𑀺𑀬𑀁 𑀞𑀢𑁆𑀯𑀸 𑀯𑀤𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀦𑀯𑀫𑀲𑀺𑀓𑁆𑀔𑀸𑀧𑀤𑀁.

𑁧𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁭𑁯. 𑀤𑀲𑀫𑁂 𑁋 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯. 𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀓𑀫𑁆𑀫𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀤𑀲𑀫𑀲𑀺𑀓𑁆𑀔𑀸𑀧𑀤𑀁.

𑀅𑀦𑁆𑀥𑀓𑀸𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.