𑁩. 𑀦𑀕𑁆𑀕𑀯𑀕𑁆𑀕𑁄

𑁧. 𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁮𑁩-𑁬. 𑀦𑀕𑁆𑀕𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀡𑁆𑀡𑁂𑀦𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀘𑀺𑀡𑁆𑀡𑁂𑀦; 𑀅𑀣 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀭𑀡𑁂𑀦𑀸𑀢𑀺; 𑀏𑀯𑀁 𑀓𑀭𑀡𑀢𑁆𑀣𑁂 𑀯𑀸 𑀲𑀸𑀫𑀺𑀅𑀢𑁆𑀣𑁂 𑀯𑀸 𑀉𑀧𑀬𑁄𑀕𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀺𑀓𑀸𑀬𑀸𑀢𑀺 𑀇𑀤𑀁 𑀉𑀤𑀓𑀲𑀸𑀝𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀅𑀜𑁆𑀜𑀁 𑀘𑀻𑀯𑀭𑀁. 𑀢𑀲𑁆𑀫𑀸 𑀉𑀤𑀓𑀲𑀸𑀝𑀺𑀓𑀸𑀬 𑀅𑀘𑁆𑀙𑀺𑀦𑁆𑀦𑀸𑀬 𑀯𑀸 𑀦𑀝𑁆𑀞𑀸𑀬 𑀯𑀸 𑀦𑀕𑁆𑀕𑀸𑀬 𑀦𑁆𑀳𑀸𑀬𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀲𑀘𑁂𑀧𑀺 𑀉𑀤𑀓𑀲𑀸𑀝𑀺𑀓𑀘𑀻𑀯𑀭𑀁 𑀫𑀳𑀕𑁆𑀖𑀁 𑀳𑁄𑀢𑀺, 𑀦 𑀲𑀓𑁆𑀓𑀸 𑀦𑀺𑀯𑀸𑀲𑁂𑀢𑁆𑀯𑀸 𑀩𑀳𑀺 𑀕𑀦𑁆𑀢𑀼𑀁, 𑀏𑀯𑀫𑁆𑀧𑀺 𑀦𑀕𑁆𑀕𑀸𑀬 𑀦𑁆𑀳𑀸𑀬𑀺𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀧𑀞𑀫𑀲𑀺𑀓𑁆𑀔𑀸𑀧𑀤𑀁.

𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁮𑁭. 𑀤𑀼𑀢𑀺𑀬𑁂 𑁋 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯. 𑀙𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁.

𑁩. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁯𑁩-𑁪. 𑀢𑀢𑀺𑀬𑁂 𑁋 𑀅𑀦𑀦𑁆𑀢𑀭𑀸𑀬𑀺𑀓𑀺𑀦𑀻𑀢𑀺 𑀤𑀲𑀲𑀼 𑀅𑀦𑁆𑀢𑀭𑀸𑀬𑁂𑀲𑀼 𑀏𑀓𑁂𑀦𑀧𑀺 𑀅𑀦𑁆𑀢𑀭𑀸𑀬𑁂𑀦 𑀅𑀦𑀦𑁆𑀢𑀭𑀸𑀬𑀸. 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀘𑁂𑀧𑀺 𑀧𑀘𑁆𑀙𑀸 𑀲𑀺𑀩𑁆𑀩𑀢𑀺, 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦𑀁 𑁋 𑀅𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁.

𑁪. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁯𑁮-𑁯. 𑀘𑀢𑀼𑀢𑁆𑀣𑁂 𑁋 𑀧𑀜𑁆𑀘 𑀅𑀳𑀸𑀦𑀺 𑀧𑀜𑁆𑀘𑀸𑀳𑀁, 𑀧𑀜𑁆𑀘𑀸𑀳𑀫𑁂𑀯 𑀧𑀜𑁆𑀘𑀸𑀳𑀺𑀓𑀁. 𑀲𑀗𑁆𑀖𑀸𑀝𑀻𑀦𑀁 𑀘𑀸𑀭𑁄 𑀲𑀗𑁆𑀖𑀸𑀝𑀺𑀘𑀸𑀭𑁄; 𑀧𑀭𑀺𑀪𑁄𑀕𑀯𑀲𑁂𑀦 𑀯𑀸 𑀑𑀢𑀸𑀧𑀦𑀯𑀲𑁂𑀦 𑀯𑀸 𑀲𑀗𑁆𑀖𑀝𑀺𑀢𑀝𑁆𑀞𑁂𑀦 𑀲𑀗𑁆𑀖𑀸𑀝𑀻𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀧𑀜𑁆𑀘𑀦𑁆𑀦𑀁 𑀘𑀻𑀯𑀭𑀸𑀦𑀁 𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀬𑁂𑀯 𑀧𑀤𑀪𑀸𑀚𑀦𑁂 ‘‘𑀧𑀜𑁆𑀘𑀫𑀁 𑀤𑀺𑀯𑀲𑀁 𑀧𑀜𑁆𑀘 𑀘𑀻𑀯𑀭𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀏𑀢𑁆𑀣 𑀘 𑀏𑀓𑀲𑁆𑀫𑀺𑀁 𑀘𑀻𑀯𑀭𑁂 𑀏𑀓𑀸 𑀆𑀧𑀢𑁆𑀢𑀺; 𑀧𑀜𑁆𑀘𑀲𑀼 𑀧𑀜𑁆𑀘.

𑁯𑁦𑁦. 𑀆𑀧𑀤𑀸𑀲𑀽𑀢𑀺 𑀫𑀳𑀕𑁆𑀖𑀁 𑀘𑀻𑀯𑀭𑀁, 𑀦 𑀲𑀓𑁆𑀓𑀸 𑀳𑁄𑀢𑀺 𑀘𑁄𑀭𑀪𑀬𑀸𑀤𑀻𑀲𑀼 𑀧𑀭𑀺𑀪𑀼𑀜𑁆𑀚𑀺𑀢𑀼𑀁; 𑀏𑀯𑀭𑀽𑀧𑁂 𑀉𑀧𑀤𑁆𑀤𑀯𑁂 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀅𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁.

𑁫. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁦𑁩. 𑀧𑀜𑁆𑀘𑀫𑁂 𑁋 𑀘𑀻𑀯𑀭𑀲𑀗𑁆𑀓𑀫𑀦𑀻𑀬𑀦𑁆𑀢𑀺 𑀲𑀗𑁆𑀓𑀫𑁂𑀢𑀩𑁆𑀩𑀁 𑀘𑀻𑀯𑀭𑀁; 𑀅𑀜𑁆𑀜𑀺𑀲𑁆𑀲𑀸 𑀲𑀦𑁆𑀢𑀓𑀁 𑀅𑀦𑀸𑀧𑀼𑀘𑁆𑀙𑀸 𑀕𑀳𑀺𑀢𑀁 𑀧𑀼𑀦 𑀧𑀝𑀺𑀤𑀸𑀢𑀩𑁆𑀩𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑁄.

𑁯𑁦𑁬. 𑀆𑀧𑀤𑀸𑀲𑀽𑀢𑀺 𑀲𑀘𑁂 𑀅𑀧𑀸𑀭𑀼𑀢𑀁 𑀯𑀸 𑀅𑀦𑀺𑀯𑀢𑁆𑀣𑀁 𑀯𑀸 𑀘𑁄𑀭𑀸 𑀳𑀭𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀥𑀸𑀭𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁.

𑁬. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁦𑁯-𑁧𑁦. 𑀙𑀝𑁆𑀞𑁂 𑁋 𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀣𑀸𑀮𑀓𑀸𑀤𑀻𑀦𑀁 𑀯𑀸 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁. 𑀆𑀦𑀺𑀲𑀁𑀲𑀦𑁆𑀢𑀺 ‘‘𑀓𑀺𑀢𑁆𑀢𑀓𑀁 𑀅𑀕𑁆𑀖𑀦𑀓𑀁 𑀤𑀸𑀢𑀼𑀓𑀸𑀫𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀢𑀺, ‘‘𑀏𑀢𑁆𑀢𑀓𑀁 𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺, ‘‘𑀆𑀕𑀫𑁂𑀣 𑀢𑀸𑀯, 𑀇𑀤𑀸𑀦𑀺 𑀯𑀢𑁆𑀣𑀁 𑀫𑀳𑀕𑁆𑀖𑀁, 𑀓𑀢𑀺𑀧𑀸𑀳𑁂𑀦 𑀓𑀧𑁆𑀧𑀸𑀲𑁂 𑀆𑀕𑀢𑁂 𑀲𑀫𑀕𑁆𑀖𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀯𑀢𑁆𑀯𑀸 𑀦𑀺𑀯𑀸𑀭𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁.

𑁭. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁧𑁧. 𑀲𑀢𑁆𑀢𑀫𑁂 𑁋 𑀧𑀓𑁆𑀓𑀫𑀺𑀁𑀲𑀽𑀢𑀺 𑀅𑀜𑁆𑀜𑀸𑀲𑀫𑁆𑀧𑀺 𑀆𑀕𑀫𑀦𑀁 𑀆𑀕𑀫𑁂𑀦𑁆𑀢𑀻 ‘‘𑀅𑀤𑁆𑀥𑀸 𑀅𑀫𑁆𑀳𑀸𑀓𑀫𑁆𑀧𑀺 𑀆𑀕𑀫𑁂𑀲𑁆𑀲𑀢𑀻’’𑀢𑀺 𑀢𑀢𑁆𑀣 𑀢𑀢𑁆𑀣 𑀅𑀕𑀫𑀁𑀲𑀼. 𑀧𑀝𑀺𑀩𑀸𑀳𑁂𑀬𑁆𑀬𑀸𑀢𑀺 𑀧𑀝𑀺𑀲𑁂𑀥𑁂𑀬𑁆𑀬.

𑁯𑁧𑁫. 𑀆𑀦𑀺𑀲𑀁𑀲𑀦𑁆𑀢𑀺 ‘‘𑀏𑀓𑀺𑀲𑁆𑀲𑀸 𑀏𑀓𑀁 𑀲𑀸𑀝𑀓𑀁 𑀦𑀧𑁆𑀧𑀳𑁄𑀢𑀺, 𑀆𑀕𑀫𑁂𑀣 𑀢𑀸𑀯, 𑀓𑀢𑀺𑀧𑀸𑀳𑁂𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀢𑁄 𑀪𑀸𑀚𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀩𑀸𑀳𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁.

𑁮. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁧𑁬-𑁮. 𑀅𑀝𑁆𑀞𑀫𑁂 𑁋 𑀦𑀝𑀸 𑀦𑀸𑀫 𑀬𑁂 𑀦𑀸𑀝𑀓𑀁 𑀦𑀸𑀝𑁂𑀦𑁆𑀢𑀺. 𑀦𑀝𑀓𑀸 𑀦𑀸𑀫 𑀬𑁂 𑀦𑀘𑁆𑀘𑀦𑁆𑀢𑀺. 𑀮𑀗𑁆𑀖𑀓𑀸 𑀦𑀸𑀫 𑀬𑁂 𑀯𑀁𑀲𑀯𑀭𑀢𑁆𑀢𑀸𑀤𑀻𑀲𑀼 𑀮𑀗𑁆𑀖𑀦𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀲𑁄𑀓𑀚𑁆𑀛𑀸𑀬𑀺𑀓𑀸 𑀦𑀸𑀫 𑀫𑀸𑀬𑀸𑀓𑀸𑀭𑀸. 𑀓𑀼𑀫𑁆𑀪𑀣𑀽𑀡𑀺𑀓𑀸 𑀦𑀸𑀫 𑀖𑀝𑀓𑁂𑀦 𑀓𑀻𑀴𑀦𑀓𑀸; 𑀩𑀺𑀫𑁆𑀩𑀺𑀲𑀓𑀯𑀸𑀤𑀓𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀤𑁂𑀢𑀺 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀏𑀢𑁆𑀣 𑀘𑀻𑀯𑀭𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀙𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁.

𑁯. 𑀦𑀯𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁨𑁧-𑁪. 𑀦𑀯𑀫𑁂 𑁋 𑀤𑀼𑀩𑁆𑀩𑀮𑀘𑀻𑀯𑀭𑀧𑀘𑁆𑀘𑀸𑀲𑀸𑀬𑀸𑀢𑀺 𑀤𑀼𑀩𑁆𑀩𑀮𑀸𑀬 𑀘𑀻𑀯𑀭𑀧𑀘𑁆𑀘𑀸𑀲𑀸𑀬. 𑀆𑀦𑀺𑀲𑀁𑀲𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 ‘‘𑀦 𑀫𑀬𑀁 𑀅𑀬𑁆𑀬𑁂 𑀲𑀓𑁆𑀓𑁄𑀫𑀸’’𑀢𑀺 𑀯𑀤𑀦𑁆𑀢𑀺, ‘‘𑀇𑀤𑀸𑀦𑀺 𑀧𑀦 𑀢𑁂𑀲𑀁 𑀓𑀧𑁆𑀧𑀸𑀲𑁄 𑀆𑀕𑀫𑀺𑀲𑁆𑀲𑀢𑀺, 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀧𑀼𑀭𑀺𑀲𑁄 𑀆𑀕𑀫𑀺𑀲𑁆𑀲𑀢𑀺, 𑀅𑀤𑁆𑀥𑀸 𑀤𑀲𑁆𑀲𑀢𑀻’’𑀢𑀺 𑀏𑀯𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀸𑀭𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀦𑀯𑀫𑀲𑀺𑀓𑁆𑀔𑀸𑀧𑀤𑀁.

𑁧𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁨𑁭. 𑀤𑀲𑀫𑁂 𑁋 𑀓𑀣𑀺𑀦𑀼𑀤𑁆𑀥𑀸𑀭𑀁 𑀦 𑀤𑀲𑁆𑀲𑀦𑁆𑀢𑀻𑀢𑀺 𑀓𑀻𑀤𑀺𑀲𑁄 𑀓𑀣𑀺𑀦𑀼𑀤𑁆𑀥𑀸𑀭𑁄 𑀤𑀸𑀢𑀩𑁆𑀩𑁄, 𑀓𑀻𑀤𑀺𑀲𑁄 𑀦 𑀤𑀸𑀢𑀩𑁆𑀩𑁄𑀢𑀺? 𑀬𑀲𑁆𑀲 𑀅𑀢𑁆𑀣𑀸𑀭𑀫𑀽𑀮𑀓𑁄 𑀆𑀦𑀺𑀲𑀁𑀲𑁄 𑀫𑀳𑀸, 𑀉𑀩𑁆𑀪𑀸𑀭𑀫𑀽𑀮𑀓𑁄 𑀅𑀧𑁆𑀧𑁄, 𑀏𑀯𑀭𑀽𑀧𑁄 𑀦 𑀤𑀸𑀢𑀩𑁆𑀩𑁄. 𑀬𑀲𑁆𑀲 𑀧𑀦 𑀅𑀢𑁆𑀣𑀸𑀭𑀫𑀽𑀮𑀓𑁄 𑀆𑀦𑀺𑀲𑀁𑀲𑁄 𑀅𑀧𑁆𑀧𑁄, 𑀉𑀩𑁆𑀪𑀸𑀭𑀫𑀽𑀮𑀓𑁄 𑀫𑀳𑀸, 𑀏𑀯𑀭𑀽𑀧𑁄 𑀤𑀸𑀢𑀩𑁆𑀩𑁄. 𑀲𑀫𑀸𑀦𑀺𑀲𑀁𑀲𑁄𑀧𑀺 𑀲𑀤𑁆𑀥𑀸𑀧𑀭𑀺𑀧𑀸𑀮𑀦𑀢𑁆𑀣𑀁 𑀤𑀸𑀢𑀩𑁆𑀩𑁄𑀯.

𑁯𑁩𑁧. 𑀆𑀦𑀺𑀲𑀁𑀲𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀚𑀺𑀡𑁆𑀡𑀘𑀻𑀯𑀭𑁄, 𑀓𑀣𑀺𑀦𑀸𑀦𑀺𑀲𑀁𑀲𑀫𑀽𑀮𑀓𑁄 𑀫𑀳𑀸𑀮𑀸𑀪𑁄𑀢𑀺 𑀏𑀯𑀭𑀽𑀧𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀩𑀸𑀳𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀤𑀲𑀫𑀲𑀺𑀓𑁆𑀔𑀸𑀧𑀤𑀁.

𑀦𑀕𑁆𑀕𑀯𑀕𑁆𑀕𑁄 𑀢𑀢𑀺𑀬𑁄.