𑁬. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁧𑁫. 𑀙𑀝𑁆𑀞𑁂 𑁋 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀦𑁆𑀢𑀺 𑀪𑀢𑁆𑀢𑀓𑀺𑀘𑁆𑀘𑀁. 𑀧𑀸𑀦𑀻𑀬𑁂𑀦 𑀘 𑀯𑀺𑀥𑀽𑀧𑀦𑁂𑀦 𑀘 𑀉𑀧𑀢𑀺𑀝𑁆𑀞𑀺𑀢𑁆𑀯𑀸𑀢𑀺 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑀁 𑀏𑀓𑁂𑀦 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀩𑀻𑀚𑀫𑀸𑀦𑀸 𑀲𑀫𑀻𑀧𑁂 𑀞𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀸𑀯𑀤𑀢𑀻𑀢𑀺 𑀧𑀼𑀩𑁆𑀩𑁂𑀧𑀺 𑀢𑀼𑀫𑁆𑀳𑁂 𑀏𑀯𑀁 𑀪𑀼𑀜𑁆𑀚𑀣, 𑀅𑀳𑀁 𑀏𑀯𑀁 𑀉𑀧𑀝𑁆𑀞𑀸𑀦𑀁 𑀓𑀭𑁄𑀫𑀻’’𑀢𑀺 𑀧𑀩𑁆𑀩𑀚𑀺𑀢𑀘𑀸𑀭𑀺𑀢𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑁂𑀳𑀲𑁆𑀲𑀺𑀢𑀓𑀣𑀁 𑀓𑀣𑁂𑀢𑀻𑀢𑀺 𑀅𑀢𑁆𑀣𑁄.

𑁮𑁧𑁭. 𑀬𑀁𑀓𑀺𑀜𑁆𑀘𑀺 𑀧𑀸𑀦𑀻𑀬𑀦𑁆𑀢𑀺 𑀲𑀼𑀤𑁆𑀥𑀉𑀤𑀓𑀁 𑀯𑀸 𑀳𑁄𑀢𑀼, 𑀢𑀓𑁆𑀓𑀤𑀥𑀺𑀫𑀢𑁆𑀣𑀼𑀭𑀲𑀔𑀻𑀭𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁. 𑀬𑀸 𑀓𑀸𑀘𑀺 𑀩𑀻𑀚𑀦𑀻𑀢𑀺 𑀅𑀦𑁆𑀢𑀫𑀲𑁄 𑀘𑀻𑀯𑀭𑀓𑀡𑁆𑀡𑁄𑀧𑀺. 𑀳𑀢𑁆𑀣𑀧𑀸𑀲𑁂 𑀢𑀺𑀝𑁆𑀞𑀢𑀺 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀇𑀥 𑀞𑀸𑀦𑀧𑀘𑁆𑀘𑀬𑀸𑀯 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀧𑀳𑀸𑀭𑀧𑀘𑁆𑀘𑀬𑀸 𑀧𑀦 𑀔𑀦𑁆𑀥𑀓𑁂 𑀤𑀼𑀓𑁆𑀓𑀝𑀁 𑀧𑀜𑁆𑀜𑀢𑁆𑀢𑀁.

𑁮𑁧𑁯. 𑀤𑁂𑀢𑀺 𑀤𑀸𑀧𑁂𑀢𑀻𑀢𑀺 𑀧𑀸𑀦𑀻𑀬𑀁 𑀯𑀸 𑀲𑀽𑀧𑀸𑀤𑀺𑀁 𑀯𑀸 𑀇𑀫𑀁 𑀧𑀺𑀯𑀣, 𑀇𑀫𑀺𑀦𑀸 𑀪𑀼𑀜𑁆𑀚𑀣𑀸𑀢𑀺 𑀤𑁂𑀢𑀺; 𑀢𑀸𑀮𑀯𑀡𑁆𑀝𑀁 𑀇𑀫𑀺𑀦𑀸 𑀩𑀻𑀚𑀦𑁆𑀢𑀸 𑀪𑀼𑀜𑁆𑀚𑀣𑀸𑀢𑀺 𑀤𑁂𑀢𑀺; 𑀅𑀜𑁆𑀜𑁂𑀦 𑀯𑀸 𑀉𑀪𑀬𑀫𑁆𑀧𑀺 𑀤𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀆𑀡𑀸𑀧𑁂𑀢𑀻𑀢𑀺 𑀉𑀧𑀢𑀺𑀝𑁆𑀞𑀦𑀢𑁆𑀣𑀁 𑀲𑀸𑀫𑀡𑁂𑀭𑀺𑀁 𑀆𑀡𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁.