𑁧. 𑀮𑀲𑀼𑀡𑀯𑀕𑁆𑀕𑁄

𑁧. 𑀧𑀞𑀫𑀮𑀲𑀼𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀺𑀁𑀲𑀓𑀸𑀦𑀦𑁆𑀢𑀭𑀁 𑀥𑀫𑁆𑀫𑀸, 𑀙𑀲𑀝𑁆𑀞𑀺𑀲𑀢𑀲𑀗𑁆𑀕𑀳𑀸;

𑀲𑀗𑁆𑀕𑀻𑀢𑀸 𑀬𑁂 𑀅𑀬𑀁 𑀤𑀸𑀦𑀺, 𑀳𑁄𑀢𑀺 𑀢𑁂𑀲𑀫𑁆𑀧𑀺 𑀯𑀡𑁆𑀡𑀦𑀸.

𑁭𑁯𑁩. 𑀢𑀢𑁆𑀣 𑀮𑀲𑀼𑀡𑀯𑀕𑁆𑀕𑀲𑁆𑀲 𑀢𑀸𑀯 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀤𑁆𑀯𑁂 𑀢𑀬𑁄 𑀪𑀡𑁆𑀟𑀺𑀓𑁂𑀢𑀺 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀧𑁄𑀝𑁆𑀝𑀮𑀺𑀓𑁂; 𑀲𑀫𑁆𑀧𑀼𑀡𑁆𑀡𑀫𑀺𑀜𑁆𑀚𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀦 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸𑀢𑀺 𑀧𑀫𑀸𑀡𑀁 𑀅𑀚𑀸𑀦𑀺𑀢𑁆𑀯𑀸 𑀔𑁂𑀢𑁆𑀢𑀧𑀸𑀮𑀲𑁆𑀲 𑀯𑀸𑀭𑁂𑀦𑁆𑀢𑀲𑁆𑀲 𑀩𑀳𑀼𑀁 𑀮𑀲𑀼𑀡𑀁 𑀳𑀭𑀸𑀧𑁂𑀲𑀺.

𑀅𑀜𑁆𑀜𑀢𑀭𑀁 𑀳𑀁𑀲𑀬𑁄𑀦𑀺𑀦𑁆𑀢𑀺 𑀲𑀼𑀯𑀡𑁆𑀡𑀳𑀁𑀲𑀬𑁄𑀦𑀺𑀁. 𑀲𑁄 𑀢𑀸𑀲𑀁 𑀏𑀓𑁂𑀓𑀦𑁆𑀢𑀺 𑀲𑁄 𑀳𑀁𑀲𑁄 𑀚𑀸𑀢𑀺𑀲𑁆𑀲𑀭𑁄 𑀅𑀳𑁄𑀲𑀺, 𑀅𑀣 𑀧𑀼𑀩𑁆𑀩𑀲𑀺𑀦𑁂𑀳𑁂𑀦 𑀆𑀕𑀦𑁆𑀢𑁆𑀯𑀸 𑀢𑀸𑀲𑀁 𑀏𑀓𑁂𑀓𑀁 𑀧𑀢𑁆𑀢𑀁 𑀤𑁂𑀢𑀺, 𑀢𑀁 𑀢𑀸𑀧𑀦𑀢𑀸𑀮𑀦𑀘𑁆𑀙𑁂𑀤𑀦𑀓𑁆𑀔𑀫𑀁 𑀲𑀼𑀯𑀡𑁆𑀡𑀫𑁂𑀯 𑀳𑁄𑀢𑀺.

𑁭𑁯𑁫. 𑀫𑀸𑀕𑀥𑀓𑀦𑁆𑀢𑀺 𑀫𑀕𑀥𑁂𑀲𑀼 𑀚𑀸𑀢𑀁. 𑀫𑀕𑀥𑀭𑀝𑁆𑀞𑁂 𑀚𑀸𑀢𑀮𑀲𑀼𑀡𑀫𑁂𑀯 𑀳𑀺 𑀇𑀥 𑀮𑀲𑀼𑀡𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀫𑁆𑀧𑀺 𑀪𑀡𑁆𑀟𑀺𑀓𑀮𑀲𑀼𑀡𑀫𑁂𑀯, 𑀦 𑀏𑀓𑀤𑁆𑀯𑀺𑀢𑀺𑀫𑀺𑀜𑁆𑀚𑀓𑀁. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀚𑀸𑀢𑀤𑁂𑀲𑀁 𑀅𑀯𑀢𑁆𑀯𑀸 ‘‘𑀫𑀸𑀕𑀥𑀓𑀁 𑀦𑀸𑀫 𑀪𑀡𑁆𑀟𑀺𑀓𑀮𑀲𑀼𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂𑀢𑀺 𑀏𑀢𑁆𑀣 𑀲𑀘𑁂 𑀤𑁆𑀯𑁂 𑀢𑀬𑁄 𑀪𑀡𑁆𑀟𑀺𑀓𑁂 𑀏𑀓𑀢𑁄𑀬𑁂𑀯 𑀲𑀗𑁆𑀔𑀸𑀤𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀢𑀺, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀪𑀺𑀦𑁆𑀤𑀺𑀢𑁆𑀯𑀸 𑀏𑀓𑁂𑀓𑀁 𑀫𑀺𑀜𑁆𑀚𑀁 𑀔𑀸𑀤𑀦𑁆𑀢𑀺𑀬𑀸 𑀧𑀦 𑀧𑀬𑁄𑀕𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺.

𑁭𑁯𑁭. 𑀧𑀮𑀡𑁆𑀟𑀼𑀓𑀸𑀤𑀻𑀦𑀁 𑀯𑀡𑁆𑀡𑁂𑀦 𑀯𑀸 𑀫𑀺𑀜𑁆𑀚𑀸𑀬 𑀯𑀸 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀯𑀡𑁆𑀡𑁂𑀦 𑀢𑀸𑀯 𑀧𑀮𑀡𑁆𑀟𑀼𑀓𑁄 𑀧𑀡𑁆𑀟𑀼𑀯𑀡𑁆𑀡𑁄 𑀳𑁄𑀢𑀺. 𑀪𑀜𑁆𑀚𑀦𑀓𑁄 𑀮𑁄𑀳𑀺𑀢𑀯𑀡𑁆𑀡𑁄. 𑀳𑀭𑀺𑀢𑀓𑁄 𑀳𑀭𑀺𑀢𑀧𑀡𑁆𑀡𑀯𑀡𑁆𑀡𑁄. 𑀫𑀺𑀜𑁆𑀚𑀸𑀬 𑀧𑀦 𑀧𑀮𑀡𑁆𑀟𑀼𑀓𑀲𑁆𑀲 𑀏𑀓𑀸 𑀫𑀺𑀜𑁆𑀚𑀸 𑀳𑁄𑀢𑀺, 𑀪𑀜𑁆𑀚𑀦𑀓𑀲𑁆𑀲 𑀤𑁆𑀯𑁂, 𑀳𑀭𑀺𑀢𑀓𑀲𑁆𑀲 𑀢𑀺𑀲𑁆𑀲𑁄. 𑀘𑀸𑀧𑀮𑀲𑀼𑀡𑁄 𑀅𑀫𑀺𑀜𑁆𑀚𑀓𑁄, 𑀅𑀗𑁆𑀓𑀼𑀭𑀫𑀢𑁆𑀢𑀫𑁂𑀯 𑀳𑀺 𑀢𑀲𑁆𑀲 𑀳𑁄𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀧𑀦 ‘‘𑀧𑀮𑀡𑁆𑀟𑀼𑀓𑀲𑁆𑀲 𑀢𑀻𑀡𑀺 𑀫𑀺𑀜𑁆𑀚𑀸𑀦𑀺, 𑀪𑀜𑁆𑀚𑀦𑀓𑀲𑁆𑀲 𑀤𑁆𑀯𑁂, 𑀳𑀭𑀺𑀢𑀓𑀲𑁆𑀲 𑀏𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁂 𑀧𑀮𑀡𑁆𑀟𑀼𑀓𑀸𑀤𑀬𑁄 𑀲𑀪𑀸𑀯𑁂𑀦𑁂𑀯 𑀯𑀝𑁆𑀝𑀦𑁆𑀢𑀺. 𑀲𑀽𑀧𑀲𑀫𑁆𑀧𑀸𑀓𑀸𑀤𑀻𑀲𑀼 𑀧𑀦 𑀫𑀸𑀕𑀥𑀓𑀫𑁆𑀧𑀺 𑀯𑀝𑁆𑀝𑀢𑀺. 𑀢𑀜𑁆𑀳𑀺 𑀧𑀘𑁆𑀘𑀫𑀸𑀦𑁂𑀲𑀼 𑀫𑀼𑀕𑁆𑀕𑀲𑀽𑀧𑀸𑀤𑀻𑀲𑀼 𑀯𑀸 𑀫𑀘𑁆𑀙𑀫𑀁𑀲𑀯𑀺𑀓𑀢𑀺𑀬𑀸 𑀯𑀸 𑀢𑁂𑀮𑀸𑀤𑀻𑀲𑀼 𑀯𑀸 𑀩𑀤𑀭𑀲𑀸𑀴𑀯𑀸𑀤𑀻𑀲𑀼 𑀯𑀸 𑀅𑀫𑁆𑀩𑀺𑀮𑀲𑀸𑀓𑀸𑀤𑀻𑀲𑀼 𑀯𑀸 𑀉𑀢𑁆𑀢𑀭𑀺𑀪𑀗𑁆𑀕𑁂𑀲𑀼 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀦𑁆𑀢𑀫𑀲𑁄 𑀬𑀸𑀕𑀼𑀪𑀢𑁆𑀢𑁂𑀧𑀺 𑀧𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀮𑀲𑀼𑀡𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀁.

𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁯𑁯. 𑀤𑀼𑀢𑀺𑀬𑁂 𑁋 𑀲𑀫𑁆𑀩𑀸𑀥𑁂𑀢𑀺 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑁂. 𑀢𑀲𑁆𑀲 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 𑀧𑀦 ‘‘𑀉𑀪𑁄 𑀉𑀧𑀓𑀘𑁆𑀙𑀓𑀸 𑀫𑀼𑀢𑁆𑀢𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀓𑀫𑁆𑀧𑀺 𑀮𑁄𑀫𑀦𑁆𑀢𑀺 𑀓𑀢𑁆𑀢𑀭𑀺𑀬𑀸 𑀯𑀸 𑀲𑀡𑁆𑀟𑀸𑀲𑀓𑁂𑀦 𑀯𑀸 𑀔𑀼𑀭𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀏𑀓𑀧𑀬𑁄𑀕𑁂𑀦 𑀯𑀸 𑀦𑀸𑀦𑀸𑀧𑀬𑁄𑀕𑁂𑀦 𑀯𑀸 𑀏𑀓𑀁 𑀯𑀸 𑀩𑀳𑀽𑀦𑀺 𑀯𑀸 𑀲𑀁𑀳𑀭𑀸𑀧𑁂𑀦𑁆𑀢𑀺𑀬𑀸 𑀧𑀬𑁄𑀕𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀦 𑀮𑁄𑀫𑀕𑀡𑀦𑀸𑀬.

𑁮𑁦𑁧. 𑀆𑀩𑀸𑀥𑀧𑀘𑁆𑀘𑀬𑀸𑀢𑀺 𑀓𑀡𑁆𑀟𑀼𑀓𑀘𑁆𑀙𑀼𑀆𑀤𑀺𑀆𑀩𑀸𑀥𑀧𑀘𑁆𑀘𑀬𑀸 𑀲𑀁𑀳𑀭𑀸𑀧𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀘𑀢𑀼𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀢𑁄 𑀓𑀸𑀬𑀯𑀸𑀘𑀢𑁄 𑀓𑀸𑀬𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁.

𑁩. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁦𑁩-𑁪. 𑀢𑀢𑀺𑀬𑁂 𑁋 𑀢𑀮𑀖𑀸𑀢𑀓𑁂𑀢𑀺 𑀫𑀼𑀢𑁆𑀢𑀓𑀭𑀡𑀢𑀮𑀖𑀸𑀢𑀦𑁂. 𑀅𑀦𑁆𑀢𑀫𑀲𑁄 𑀉𑀧𑁆𑀧𑀮𑀧𑀢𑁆𑀢𑁂𑀦𑀸𑀧𑀻𑀢𑀺 𑀏𑀢𑁆𑀣 𑀧𑀢𑁆𑀢𑀁 𑀢𑀸𑀯 𑀫𑀳𑀦𑁆𑀢𑀁, 𑀓𑁂𑀲𑀭𑁂𑀦𑀸𑀧𑀺 𑀧𑀳𑀸𑀭𑀁 𑀤𑁂𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑁂𑀯.

𑁮𑁦𑁫. 𑀆𑀩𑀸𑀥𑀧𑀘𑁆𑀘𑀬𑀸𑀢𑀺 𑀕𑀡𑁆𑀟𑀁 𑀯𑀸 𑀯𑀡𑀁 𑀯𑀸 𑀧𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁.

𑁪. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁦𑁬. 𑀘𑀢𑀼𑀢𑁆𑀣𑁂 𑁋 𑀧𑀼𑀭𑀸𑀡𑀭𑀸𑀚𑁄𑀭𑁄𑀥𑀸𑀢𑀺 𑀧𑀼𑀭𑀸𑀡𑁂 𑀕𑀺𑀳𑀺𑀪𑀸𑀯𑁂 𑀭𑀜𑁆𑀜𑁄 𑀑𑀭𑁄𑀥𑀸. 𑀘𑀺𑀭𑀸𑀘𑀺𑀭𑀁 𑀕𑀘𑁆𑀙𑀢𑀻𑀢𑀺 𑀘𑀺𑀭𑁂𑀦 𑀘𑀺𑀭𑁂𑀦 𑀕𑀘𑁆𑀙𑀢𑀺. 𑀥𑀸𑀭𑁂𑀣𑀸𑀢𑀺 𑀲𑀓𑁆𑀓𑁄𑀣. 𑀓𑀲𑁆𑀲𑀺𑀤𑀁 𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑁂 𑀅𑀦𑀸𑀭𑁄𑀘𑀺𑀢𑁂𑀧𑀺 𑀏𑀢𑀸 𑀫𑀬𑀺 𑀆𑀲𑀗𑁆𑀓𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 𑀏𑀯𑀫𑀸𑀳 𑁋 ‘‘𑀫𑀬𑁆𑀳𑀺𑀤𑀁 𑀓𑀫𑁆𑀫’’𑀦𑁆𑀢𑀺.

𑁮𑁦𑁭. 𑀚𑀢𑀼𑀫𑀝𑁆𑀞𑀓𑁂𑀢𑀺 𑀚𑀢𑀼𑀦𑀸 𑀓𑀢𑁂 𑀫𑀝𑁆𑀞𑀤𑀡𑁆𑀟𑀓𑁂. 𑀯𑀢𑁆𑀣𑀼𑀯𑀲𑁂𑀦𑁂𑀯𑁂𑀢𑀁 𑀯𑀼𑀢𑁆𑀢𑀁, 𑀬𑀁𑀓𑀺𑀜𑁆𑀘𑀺 𑀧𑀦 𑀤𑀡𑁆𑀟𑀓𑀁 𑀧𑀯𑁂𑀲𑁂𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑁂𑀯. 𑀢𑁂𑀦𑀸𑀳 𑁋 ‘‘𑀅𑀦𑁆𑀢𑀫𑀲𑁄 𑀉𑀧𑁆𑀧𑀮𑀧𑀢𑁆𑀢𑀫𑁆𑀧𑀺 𑀫𑀼𑀢𑁆𑀢𑀓𑀭𑀡𑀁 𑀧𑀯𑁂𑀲𑁂𑀢𑀻’’𑀢𑀺. 𑀏𑀢𑀫𑁆𑀧𑀺 𑀘 𑀅𑀢𑀺𑀫𑀳𑀦𑁆𑀢𑀁, 𑀓𑁂𑀲𑀭𑀫𑀢𑁆𑀢𑀫𑁆𑀧𑀺 𑀧𑀦 𑀧𑀯𑁂𑀲𑁂𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀏𑀯. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀢𑀮𑀖𑀸𑀢𑀓𑁂 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯𑀸𑀢𑀺.

𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁.

𑁫. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁧𑁦. 𑀧𑀜𑁆𑀘𑀫𑁂 𑁋 𑀅𑀢𑀺𑀕𑀫𑁆𑀪𑀻𑀭𑀁 𑀉𑀤𑀓𑀲𑀼𑀤𑁆𑀥𑀺𑀓𑀁 𑀆𑀤𑀺𑀬𑀦𑁆𑀢𑀻𑀢𑀺 𑀅𑀢𑀺𑀅𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸 𑀉𑀤𑀓𑁂𑀦 𑀥𑁄𑀯𑀦𑀁 𑀓𑀼𑀭𑀼𑀫𑀸𑀦𑀸.

𑁮𑁧𑁨. 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀸𑀫𑁂𑀢𑀻𑀢𑀺 𑀯𑀺𑀢𑁆𑀣𑀸𑀭𑀢𑁄 𑀢𑀢𑀺𑀬𑀁 𑀯𑀸 𑀘𑀢𑀼𑀢𑁆𑀣𑀁 𑀯𑀸 𑀅𑀗𑁆𑀕𑀼𑀮𑀁 𑀕𑀫𑁆𑀪𑀻𑀭𑀢𑁄 𑀤𑁆𑀯𑀺𑀦𑁆𑀦𑀁 𑀧𑀩𑁆𑀩𑀸𑀦𑀁 𑀉𑀧𑀭𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑁂𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀧𑀘𑁆𑀘𑀭𑀺𑀬𑀁 𑁋 ‘‘𑀏𑀓𑀺𑀲𑁆𑀲𑀸 𑀅𑀗𑁆𑀕𑀼𑀮𑀺𑀬𑀸 𑀢𑀻𑀡𑀺 𑀧𑀩𑁆𑀩𑀸𑀦𑀺 𑀆𑀤𑀸𑀢𑀼𑀁 𑀦 𑀮𑀪𑀢𑀺, 𑀢𑀺𑀡𑁆𑀡𑀁 𑀯𑀸 𑀘𑀢𑀼𑀦𑁆𑀦𑀁 𑀯𑀸 𑀏𑀓𑁂𑀓𑀫𑁆𑀧𑀺 𑀧𑀩𑁆𑀩𑀁 𑀆𑀤𑀸𑀢𑀼𑀁 𑀦 𑀮𑀪𑀢𑀻’’𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺𑀧𑀺 𑀢𑀮𑀖𑀸𑀢𑀓𑁂 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯𑀸𑀢𑀺.

𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁.

𑁬. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁧𑁫. 𑀙𑀝𑁆𑀞𑁂 𑁋 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀦𑁆𑀢𑀺 𑀪𑀢𑁆𑀢𑀓𑀺𑀘𑁆𑀘𑀁. 𑀧𑀸𑀦𑀻𑀬𑁂𑀦 𑀘 𑀯𑀺𑀥𑀽𑀧𑀦𑁂𑀦 𑀘 𑀉𑀧𑀢𑀺𑀝𑁆𑀞𑀺𑀢𑁆𑀯𑀸𑀢𑀺 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑀁 𑀏𑀓𑁂𑀦 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀩𑀻𑀚𑀫𑀸𑀦𑀸 𑀲𑀫𑀻𑀧𑁂 𑀞𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀸𑀯𑀤𑀢𑀻𑀢𑀺 𑀧𑀼𑀩𑁆𑀩𑁂𑀧𑀺 𑀢𑀼𑀫𑁆𑀳𑁂 𑀏𑀯𑀁 𑀪𑀼𑀜𑁆𑀚𑀣, 𑀅𑀳𑀁 𑀏𑀯𑀁 𑀉𑀧𑀝𑁆𑀞𑀸𑀦𑀁 𑀓𑀭𑁄𑀫𑀻’’𑀢𑀺 𑀧𑀩𑁆𑀩𑀚𑀺𑀢𑀘𑀸𑀭𑀺𑀢𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑁂𑀳𑀲𑁆𑀲𑀺𑀢𑀓𑀣𑀁 𑀓𑀣𑁂𑀢𑀻𑀢𑀺 𑀅𑀢𑁆𑀣𑁄.

𑁮𑁧𑁭. 𑀬𑀁𑀓𑀺𑀜𑁆𑀘𑀺 𑀧𑀸𑀦𑀻𑀬𑀦𑁆𑀢𑀺 𑀲𑀼𑀤𑁆𑀥𑀉𑀤𑀓𑀁 𑀯𑀸 𑀳𑁄𑀢𑀼, 𑀢𑀓𑁆𑀓𑀤𑀥𑀺𑀫𑀢𑁆𑀣𑀼𑀭𑀲𑀔𑀻𑀭𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁. 𑀬𑀸 𑀓𑀸𑀘𑀺 𑀩𑀻𑀚𑀦𑀻𑀢𑀺 𑀅𑀦𑁆𑀢𑀫𑀲𑁄 𑀘𑀻𑀯𑀭𑀓𑀡𑁆𑀡𑁄𑀧𑀺. 𑀳𑀢𑁆𑀣𑀧𑀸𑀲𑁂 𑀢𑀺𑀝𑁆𑀞𑀢𑀺 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀇𑀥 𑀞𑀸𑀦𑀧𑀘𑁆𑀘𑀬𑀸𑀯 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀧𑀳𑀸𑀭𑀧𑀘𑁆𑀘𑀬𑀸 𑀧𑀦 𑀔𑀦𑁆𑀥𑀓𑁂 𑀤𑀼𑀓𑁆𑀓𑀝𑀁 𑀧𑀜𑁆𑀜𑀢𑁆𑀢𑀁.

𑁮𑁧𑁯. 𑀤𑁂𑀢𑀺 𑀤𑀸𑀧𑁂𑀢𑀻𑀢𑀺 𑀧𑀸𑀦𑀻𑀬𑀁 𑀯𑀸 𑀲𑀽𑀧𑀸𑀤𑀺𑀁 𑀯𑀸 𑀇𑀫𑀁 𑀧𑀺𑀯𑀣, 𑀇𑀫𑀺𑀦𑀸 𑀪𑀼𑀜𑁆𑀚𑀣𑀸𑀢𑀺 𑀤𑁂𑀢𑀺; 𑀢𑀸𑀮𑀯𑀡𑁆𑀝𑀁 𑀇𑀫𑀺𑀦𑀸 𑀩𑀻𑀚𑀦𑁆𑀢𑀸 𑀪𑀼𑀜𑁆𑀚𑀣𑀸𑀢𑀺 𑀤𑁂𑀢𑀺; 𑀅𑀜𑁆𑀜𑁂𑀦 𑀯𑀸 𑀉𑀪𑀬𑀫𑁆𑀧𑀺 𑀤𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀆𑀡𑀸𑀧𑁂𑀢𑀻𑀢𑀺 𑀉𑀧𑀢𑀺𑀝𑁆𑀞𑀦𑀢𑁆𑀣𑀁 𑀲𑀸𑀫𑀡𑁂𑀭𑀺𑀁 𑀆𑀡𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁.

𑁭. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁨𑁨. 𑀲𑀢𑁆𑀢𑀫𑁂 𑁋 𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀇𑀤𑀁 𑀧𑀬𑁄𑀕𑀤𑀼𑀓𑁆𑀓𑀝𑀁 𑀦𑀸𑀫, 𑀢𑀲𑁆𑀫𑀸 𑀦 𑀓𑁂𑀯𑀮𑀁 𑀧𑀝𑀺𑀕𑁆𑀕𑀳𑀡𑁂𑀬𑁂𑀯 𑀳𑁄𑀢𑀺, 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀦 𑀅𑀭𑀜𑁆𑀜𑀢𑁄 𑀆𑀳𑀭𑀡𑁂𑀧𑀺 𑀲𑀼𑀓𑁆𑀔𑀸𑀧𑀦𑁂𑀧𑀺 𑀯𑀤𑁆𑀤𑀮𑀺𑀤𑀺𑀯𑀲𑁂 𑀪𑀚𑁆𑀚𑀦𑀢𑁆𑀣𑀸𑀬 𑀉𑀤𑁆𑀥𑀦𑀲𑀚𑁆𑀚𑀦𑁂𑀧𑀺 𑀓𑀧𑀮𑁆𑀮𑀲𑀚𑁆𑀚𑀦𑁂𑀧𑀺 𑀤𑀩𑁆𑀩𑀺𑀲𑀚𑁆𑀚𑀦𑁂𑀧𑀺 𑀤𑀸𑀭𑀽𑀦𑀺 𑀆𑀤𑀸𑀬 𑀅𑀕𑁆𑀕𑀺𑀓𑀭𑀡𑁂𑀧𑀺 𑀓𑀧𑀮𑁆𑀮𑀫𑁆𑀳𑀺 𑀥𑀜𑁆𑀜𑀧𑀓𑁆𑀔𑀺𑀧𑀦𑁂𑀧𑀺 𑀤𑀩𑁆𑀩𑀺𑀬𑀸 𑀲𑀗𑁆𑀖𑀝𑁆𑀝𑀦𑁂𑀲𑀼𑀧𑀺 𑀓𑁄𑀝𑁆𑀝𑀦𑀢𑁆𑀣𑀁 𑀉𑀤𑀼𑀓𑁆𑀔𑀮𑀫𑀼𑀲𑀮𑀸𑀤𑀺𑀲𑀚𑁆𑀚𑀦𑁂𑀲𑀼𑀧𑀺 𑀓𑁄𑀝𑁆𑀝𑀦𑀧𑀧𑁆𑀨𑁄𑀝𑀦𑀥𑁄𑀯𑀦𑀸𑀤𑀻𑀲𑀼𑀧𑀺 𑀬𑀸𑀯 𑀫𑀼𑀔𑁂 𑀞𑀧𑁂𑀢𑁆𑀯𑀸 𑀅𑀚𑁆𑀛𑁄𑀳𑀭𑀡𑀢𑁆𑀣𑀁 𑀤𑀦𑁆𑀢𑁂𑀳𑀺 𑀲𑀗𑁆𑀔𑀸𑀤𑀢𑀺, 𑀢𑀸𑀯 𑀲𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀸𑀦𑀺, 𑀅𑀚𑁆𑀛𑁄𑀳𑀭𑀡𑀓𑀸𑀮𑁂 𑀧𑀦 𑀅𑀚𑁆𑀛𑁄𑀳𑀭𑀡𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀏𑀢𑁆𑀣 𑀘 𑀯𑀺𑀜𑁆𑀜𑀢𑁆𑀢𑀺 𑀘𑁂𑀯 𑀪𑁄𑀚𑀦𑀜𑁆𑀘 𑀧𑀫𑀸𑀡𑀁. 𑀢𑀲𑁆𑀫𑀸 𑀲𑀬𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀅𑀜𑁆𑀜𑀸𑀬 𑀪𑀚𑁆𑀚𑀦𑀓𑁄𑀝𑁆𑀝𑀦𑀧𑀘𑀦𑀸𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺𑀬𑀸𑀧𑀺 𑀆𑀧𑀢𑁆𑀢𑀺. 𑀅𑀜𑁆𑀜𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀲𑀬𑀁 𑀪𑀚𑁆𑀚𑀦𑀸𑀤𑀻𑀦𑀺 𑀓𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺𑀬𑀸𑀧𑀺 𑀆𑀧𑀢𑁆𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀯𑀼𑀢𑁆𑀢𑀁 𑁋 ‘‘𑀇𑀤𑀁 𑀆𑀫𑀓𑀥𑀜𑁆𑀜𑀁 𑀦𑀸𑀫 𑀫𑀸𑀢𑀭𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀫𑁂𑀯, 𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑀁 𑀲𑀬𑀁 𑀪𑀚𑁆𑀚𑀦𑀸𑀤𑀻𑀦𑀺 𑀓𑀢𑁆𑀯𑀸 𑀯𑀸 𑀓𑀸𑀭𑀸𑀧𑁂𑀢𑁆𑀯𑀸 𑀯𑀸 𑀪𑀼𑀜𑁆𑀚𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀅𑀜𑁆𑀜𑀸𑀬 𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑀁 𑀲𑀬𑀁 𑀯𑀸 𑀪𑀚𑁆𑀚𑀦𑀸𑀤𑀻𑀦𑀺 𑀓𑀢𑁆𑀯𑀸 𑀢𑀸𑀬 𑀯𑀸 𑀓𑀸𑀭𑀸𑀧𑁂𑀢𑁆𑀯𑀸 𑀅𑀜𑁆𑀜𑀸𑀬 𑀯𑀸 𑀓𑀸𑀭𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺𑀬𑀸𑀧𑀺 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺. 𑀧𑀼𑀦𑀧𑀺 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀸𑀬 𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑀁, 𑀲𑀬𑀁 𑀪𑀚𑁆𑀚𑀦𑀸𑀤𑀻𑀦𑀺 𑀓𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀪𑀚𑁆𑀚𑀦𑀸𑀤𑀻𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺𑀬𑀸 𑀧𑀦 𑀤𑀼𑀓𑁆𑀓𑀝’’𑀦𑁆𑀢𑀺. 𑀢𑀁 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀁 𑀳𑁄𑀢𑀺, 𑀦 𑀳𑀺 𑀪𑀚𑁆𑀚𑀦𑀸𑀤𑀻𑀦𑀁 𑀓𑀭𑀡𑁂 𑀯𑀸 𑀓𑀸𑀭𑀸𑀧𑀦𑁂 𑀯𑀸 𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀜𑁆𑀜𑀸𑀬 𑀯𑀺𑀜𑁆𑀜𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀺𑀬𑀸 𑀤𑀼𑀓𑁆𑀓𑀝’’𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁.

𑁮𑁨𑁩. 𑀆𑀩𑀸𑀥𑀧𑀘𑁆𑀘𑀬𑀸𑀢𑀺 𑀲𑁂𑀤𑀓𑀫𑁆𑀫𑀸𑀤𑀻𑀦𑀁 𑀅𑀢𑁆𑀣𑀸𑀬 𑀥𑀜𑁆𑀜𑀯𑀺𑀜𑁆𑀜𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. ‘‘𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀩𑁆𑀪𑀫𑀸𑀦𑀁 𑀧𑀦 𑀦𑀯𑀓𑀫𑁆𑀫𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀅𑀧𑀭𑀡𑁆𑀡𑀁 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀞𑀧𑁂𑀢𑁆𑀯𑀸 𑀲𑀢𑁆𑀢 𑀥𑀜𑁆𑀜𑀸𑀦𑀺 𑀫𑀼𑀕𑁆𑀕𑀫𑀸𑀲𑀸𑀤𑀺𑀁 𑀯𑀸 𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀸𑀤𑀺𑀁 𑀯𑀸 𑀅𑀜𑁆𑀜𑀁 𑀬𑀁𑀓𑀺𑀜𑁆𑀘𑀺 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀆𑀫𑀓𑀥𑀜𑁆𑀜𑀁 𑀧𑀦 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀦 𑀯𑀝𑁆𑀝𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀘𑀢𑀼𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀢𑁄 𑀓𑀸𑀬𑀯𑀸𑀘𑀢𑁄 𑀓𑀸𑀬𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁.

𑁮. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁨𑁪. 𑀅𑀝𑁆𑀞𑀫𑁂 𑁋 𑀦𑀺𑀩𑁆𑀩𑀺𑀝𑁆𑀞𑁄 𑀭𑀸𑀚𑀪𑀝𑁄 𑀭𑀜𑁆𑀜𑁄 𑀪𑀢𑀺 𑀓𑁂𑀡𑀺 𑀏𑀢𑁂𑀦𑀸𑀢𑀺 𑀦𑀺𑀩𑁆𑀩𑀺𑀝𑁆𑀞𑀭𑀸𑀚𑀪𑀝𑁄, 𑀏𑀓𑀁 𑀞𑀸𑀦𑀦𑁆𑀢𑀭𑀁 𑀓𑁂𑀡𑀺𑀬𑀸 𑀕𑀳𑁂𑀢𑁆𑀯𑀸 𑀢𑀢𑁄 𑀮𑀤𑁆𑀥𑀉𑀤𑀬𑁄𑀢𑀺 𑀅𑀢𑁆𑀣𑁄. 𑀢𑀜𑁆𑀜𑁂𑀯 𑀪𑀝𑀧𑀣𑀁 𑀬𑀸𑀘𑀺𑀲𑁆𑀲𑀸𑀫𑀻𑀢𑀺 𑀭𑀜𑁆𑀜𑁄 𑀓𑁂𑀡𑀺𑀁 𑀤𑀢𑁆𑀯𑀸 𑀧𑀼𑀦 𑀢𑀁𑀬𑁂𑀯 𑀞𑀸𑀦𑀦𑁆𑀢𑀭𑀁 𑀬𑀸𑀘𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀦𑁆𑀢𑁄. 𑀧𑀭𑀺𑀪𑀸𑀲𑀻𑀢𑀺 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 ‘‘𑀫𑀸 𑀧𑀼𑀦 𑀏𑀯𑀁 𑀓𑀭𑀺𑀢𑁆𑀣𑀸’’𑀢𑀺 𑀲𑀦𑁆𑀢𑀚𑁆𑀚𑁂𑀲𑀺.

𑁮𑁨𑁬. 𑀲𑀬𑀁 𑀙𑀟𑁆𑀟𑁂𑀢𑀻𑀢𑀺 𑀘𑀢𑁆𑀢𑀸𑀭𑀺𑀧𑀺 𑀯𑀢𑁆𑀣𑀽𑀦𑀺 𑀏𑀓𑀧𑀬𑁄𑀕𑁂𑀦 𑀙𑀟𑁆𑀟𑁂𑀦𑁆𑀢𑀺𑀬𑀸 𑀏𑀓𑀸𑀯 𑀆𑀧𑀢𑁆𑀢𑀺, 𑀧𑀸𑀝𑁂𑀓𑁆𑀓𑀁 𑀙𑀟𑁆𑀟𑁂𑀦𑁆𑀢𑀺𑀬𑀸 𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄. 𑀆𑀡𑀢𑁆𑀢𑀺𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀤𑀦𑁆𑀢𑀓𑀝𑁆𑀞𑀙𑀟𑁆𑀟𑀦𑁂𑀧𑀺 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀪𑀺𑀓𑁆𑀔𑀼𑀲𑁆𑀲 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀙𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁.

𑁯. 𑀦𑀯𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁩𑁦-𑁨. 𑀦𑀯𑀫𑁂 𑁋 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀭𑁄𑀧𑀺𑀫𑀦𑁆𑀢𑀺 𑀔𑁂𑀢𑁆𑀢𑀁 𑀯𑀸 𑀳𑁄𑀢𑀼 𑀦𑀸𑀴𑀺𑀓𑁂𑀭𑀸𑀤𑀺𑀆𑀭𑀸𑀫𑁄 𑀯𑀸, 𑀬𑀢𑁆𑀣 𑀓𑀢𑁆𑀣𑀘𑀺 𑀭𑁄𑀧𑀺𑀫𑀳𑀭𑀺𑀢𑀝𑁆𑀞𑀸𑀦𑁂 𑀏𑀢𑀸𑀦𑀺 𑀯𑀢𑁆𑀣𑀽𑀦𑀺 𑀙𑀟𑁆𑀟𑁂𑀦𑁆𑀢𑀺𑀬𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀧𑀢𑁆𑀢𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀔𑁂𑀢𑁆𑀢𑁂 𑀯𑀸 𑀆𑀭𑀸𑀫𑁂 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀫𑀸𑀦𑀸 𑀉𑀘𑁆𑀙𑀼𑀆𑀤𑀻𑀦𑀺 𑀯𑀸 𑀔𑀸𑀤𑀦𑁆𑀢𑀻; 𑀕𑀘𑁆𑀙𑀫𑀸𑀦𑀸 𑀉𑀘𑁆𑀙𑀺𑀝𑁆𑀞𑁄𑀤𑀓𑀘𑀮𑀓𑀸𑀤𑀻𑀦𑀺 𑀳𑀭𑀺𑀢𑀝𑁆𑀞𑀸𑀦𑁂 𑀙𑀟𑁆𑀟𑁂𑀢𑀺, 𑀅𑀦𑁆𑀢𑀫𑀲𑁄 𑀉𑀤𑀓𑀁 𑀧𑀺𑀯𑀺𑀢𑁆𑀯𑀸 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀦𑀸𑀴𑀺𑀓𑁂𑀭𑀫𑁆𑀧𑀺 𑀙𑀟𑁆𑀟𑁂𑀢𑀺, 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁. 𑀓𑀲𑀺𑀢𑀝𑁆𑀞𑀸𑀦𑁂 𑀧𑀦 𑀦𑀺𑀓𑁆𑀔𑀺𑀢𑁆𑀢𑀩𑀻𑀚𑁂 𑀬𑀸𑀯 𑀅𑀗𑁆𑀓𑀼𑀭𑀁 𑀦 𑀉𑀝𑁆𑀞𑀳𑀢𑀺, 𑀢𑀸𑀯 𑀲𑀩𑁆𑀩𑁂𑀲𑀁 𑀤𑀼𑀓𑁆𑀓𑀝𑀁. 𑀅𑀦𑀺𑀓𑁆𑀔𑀺𑀢𑁆𑀢𑀩𑀻𑀚𑁂𑀲𑀼 𑀔𑁂𑀢𑁆𑀢𑀓𑁄𑀡𑀸𑀤𑀻𑀲𑀼 𑀯𑀸 𑀅𑀲𑀜𑁆𑀚𑀸𑀢𑀭𑁄𑀧𑀺𑀫𑁂𑀲𑀼 𑀔𑁂𑀢𑁆𑀢𑀫𑀭𑀺𑀬𑀸𑀤𑀸𑀤𑀻𑀲𑀼 𑀯𑀸 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀓𑀘𑀯𑀭𑀙𑀟𑁆𑀟𑀦𑀝𑁆𑀞𑀸𑀦𑁂𑀧𑀺 𑀯𑀝𑁆𑀝𑀢𑀺. 𑀙𑀟𑁆𑀟𑀺𑀢𑀔𑁂𑀢𑁆𑀢𑁂𑀢𑀺 𑀫𑀦𑀼𑀲𑁆𑀲𑁂𑀲𑀼 𑀲𑀲𑁆𑀲𑀁 𑀉𑀤𑁆𑀥𑀭𑀺𑀢𑁆𑀯𑀸 𑀕𑀢𑁂𑀲𑀼 𑀙𑀟𑁆𑀟𑀺𑀢𑀔𑁂𑀢𑁆𑀢𑀁 𑀦𑀸𑀫 𑀳𑁄𑀢𑀺, 𑀢𑀢𑁆𑀣 𑀯𑀝𑁆𑀝𑀢𑀺. 𑀬𑀢𑁆𑀣 𑀧𑀦 𑀮𑀸𑀬𑀺𑀢𑀫𑁆𑀧𑀺 𑀧𑀼𑀩𑁆𑀩𑀡𑁆𑀡𑀸𑀤𑀺 𑀧𑀼𑀦 𑀉𑀝𑁆𑀞𑀳𑀺𑀲𑁆𑀲𑀢𑀻𑀢𑀺 𑀭𑀓𑁆𑀔𑀦𑁆𑀢𑀺, 𑀢𑀢𑁆𑀣 𑀬𑀣𑀸𑀯𑀢𑁆𑀣𑀼𑀓𑀫𑁂𑀯. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀙𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀸𑀓𑀺𑀭𑀺𑀬𑀁…𑀧𑁂… 𑀢𑀺𑀯𑁂𑀤𑀦𑀦𑁆𑀢𑀺.

𑀦𑀯𑀫𑀲𑀺𑀓𑁆𑀔𑀸𑀧𑀤𑀁.

𑁧𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁩𑁫. 𑀤𑀲𑀫𑁂 𑁋 𑀬𑀁𑀓𑀺𑀜𑁆𑀘𑀺 𑀦𑀘𑁆𑀘𑀦𑁆𑀢𑀺 𑀦𑀝𑀸𑀤𑀬𑁄 𑀯𑀸 𑀦𑀘𑁆𑀘𑀦𑁆𑀢𑀼 𑀲𑁄𑀡𑁆𑀟𑀸 𑀯𑀸, 𑀅𑀦𑁆𑀢𑀫𑀲𑁄 𑀫𑁄𑀭𑀲𑀼𑀯𑀫𑀓𑁆𑀓𑀝𑀸𑀤𑀬𑁄𑀧𑀺, 𑀲𑀩𑁆𑀩𑀫𑁆𑀧𑁂𑀢𑀁 𑀦𑀘𑁆𑀘𑀫𑁂𑀯. 𑀬𑀁𑀓𑀺𑀜𑁆𑀘𑀺 𑀕𑀻𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀦𑀝𑀸𑀤𑀻𑀦𑀁 𑀯𑀸 𑀕𑀻𑀢𑀁 𑀳𑁄𑀢𑀼, 𑀅𑀭𑀺𑀬𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀭𑀢𑀦𑀢𑁆𑀢𑀬𑀕𑀼𑀡𑀽𑀧𑀲𑀁𑀳𑀺𑀢𑀁 𑀲𑀸𑀥𑀼𑀓𑀻𑀴𑀺𑀢𑀕𑀻𑀢𑀁 𑀯𑀸 𑀅𑀲𑀁𑀬𑀢𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀪𑀸𑀡𑀓𑀕𑀻𑀢𑀁 𑀯𑀸, 𑀲𑀩𑁆𑀩𑀫𑁆𑀧𑁂𑀢𑀁 𑀕𑀻𑀢𑀫𑁂𑀯. 𑀬𑀁𑀓𑀺𑀜𑁆𑀘𑀺 𑀯𑀸𑀤𑀺𑀢𑀦𑁆𑀢𑀺 𑀢𑀦𑁆𑀢𑀺𑀩𑀤𑁆𑀥𑀸𑀤𑀺𑀯𑀸𑀤𑀦𑀻𑀬𑀪𑀡𑁆𑀟𑀯𑀸𑀤𑀺𑀢𑀁 𑀯𑀸 𑀳𑁄𑀢𑀼, 𑀓𑀼𑀝𑀪𑁂𑀭𑀺𑀯𑀸𑀤𑀺𑀢𑀁 𑀯𑀸, 𑀅𑀦𑁆𑀢𑀫𑀲𑁄 𑀉𑀤𑀓𑀪𑁂𑀭𑀺𑀯𑀸𑀤𑀺𑀢𑀫𑁆𑀧𑀺, 𑀲𑀩𑁆𑀩𑀫𑁆𑀧𑁂𑀢𑀁 𑀯𑀸𑀤𑀺𑀢𑀫𑁂𑀯.

𑁮𑁩𑁬. 𑀤𑀲𑁆𑀲𑀦𑀸𑀬 𑀕𑀘𑁆𑀙𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀧𑀤𑀯𑀸𑀭𑀕𑀡𑀦𑀸𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀬𑀢𑁆𑀣 𑀞𑀺𑀢𑀸 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸𑀢𑀺 𑀏𑀓𑀧𑀬𑁄𑀕𑁂𑀦 𑀑𑀮𑁄𑀓𑁂𑀦𑁆𑀢𑀻 𑀧𑀲𑁆𑀲𑀢𑀺, 𑀢𑁂𑀲𑀁𑀬𑁂𑀯 𑀕𑀻𑀢𑀯𑀸𑀤𑀺𑀢𑀁 𑀲𑀼𑀡𑀸𑀢𑀺, 𑀏𑀓𑀫𑁂𑀯 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀧𑀦 𑀏𑀓𑀁 𑀤𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀦𑀘𑁆𑀘𑀁 𑀧𑀲𑁆𑀲𑀢𑀺, 𑀧𑀼𑀦 𑀅𑀜𑁆𑀜𑀢𑁄 𑀑𑀮𑁄𑀓𑁂𑀢𑁆𑀯𑀸 𑀕𑀸𑀬𑀦𑁆𑀢𑁂 𑀧𑀲𑁆𑀲𑀢𑀺 𑀅𑀜𑁆𑀜𑀢𑁄 𑀯𑀸𑀤𑁂𑀦𑁆𑀢𑁂, 𑀧𑀸𑀝𑁂𑀓𑁆𑀓𑀸 𑀆𑀧𑀢𑁆𑀢𑀺𑀬𑁄. 𑀪𑀺𑀓𑁆𑀔𑀼𑀦𑀻 𑀲𑀬𑀫𑁆𑀧𑀺 𑀦𑀘𑁆𑀘𑀺𑀢𑀼𑀁 𑀯𑀸 𑀕𑀸𑀬𑀺𑀢𑀼𑀁 𑀯𑀸 𑀯𑀸𑀤𑀺𑀢𑀼𑀁 𑀯𑀸 𑀦 𑀮𑀪𑀢𑀺, 𑀅𑀜𑁆𑀜𑁂 ‘‘𑀦𑀘𑁆𑀘, 𑀕𑀸𑀬, 𑀯𑀸𑀤𑁂𑀳𑀻’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀦 𑀮𑀪𑀢𑀺. ‘‘𑀘𑁂𑀢𑀺𑀬𑀲𑁆𑀲 𑀉𑀧𑀳𑀸𑀭𑀁 𑀤𑁂𑀣, 𑀉𑀧𑀸𑀲𑀓𑀸’’𑀢𑀺 𑀯𑀢𑁆𑀢𑀼𑀫𑁆𑀧𑀺 ‘‘𑀢𑀼𑀫𑁆𑀳𑀸𑀓𑀁 𑀘𑁂𑀢𑀺𑀬𑀲𑁆𑀲 𑀉𑀧𑀝𑁆𑀞𑀸𑀦𑀁 𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀫𑁆𑀧𑀺 𑀦 𑀮𑀪𑀢𑀺. 𑀲𑀩𑁆𑀩𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁. ‘‘𑀢𑀼𑀫𑁆𑀳𑀸𑀓𑀁 𑀘𑁂𑀢𑀺𑀬𑀲𑁆𑀲 𑀉𑀧𑀝𑁆𑀞𑀸𑀦𑀁 𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀉𑀧𑀝𑁆𑀞𑀸𑀦𑀓𑀭𑀡𑀁 𑀦𑀸𑀫 𑀲𑀼𑀦𑁆𑀤𑀭’’𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑁮𑁩𑁭. 𑀆𑀭𑀸𑀫𑁂 𑀞𑀺𑀢𑀸𑀢𑀺 𑀆𑀭𑀸𑀫𑁂 𑀞𑀢𑁆𑀯𑀸 𑀅𑀦𑁆𑀢𑀭𑀸𑀭𑀸𑀫𑁂 𑀯𑀸 𑀩𑀳𑀺𑀆𑀭𑀸𑀫𑁂 𑀯𑀸 𑀦𑀘𑁆𑀘𑀸𑀤𑀻𑀦𑀺 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸, 𑀅𑀦𑀸𑀧𑀢𑁆𑀢𑀺. 𑀲𑀢𑀺 𑀓𑀭𑀡𑀻𑀬𑁂𑀢𑀺 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀁 𑀯𑀸 𑀅𑀢𑁆𑀣𑀸𑀬 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸, 𑀅𑀦𑀸𑀧𑀢𑁆𑀢𑀺. 𑀆𑀧𑀤𑀸𑀲𑀽𑀢𑀺 𑀢𑀸𑀤𑀺𑀲𑁂𑀦 𑀉𑀧𑀤𑁆𑀤𑀯𑁂𑀦 𑀉𑀧𑀤𑁆𑀤𑀼𑀢𑀸 𑀲𑀫𑀚𑁆𑀚𑀝𑁆𑀞𑀸𑀦𑀁 𑀧𑀯𑀺𑀲𑀢𑀺, 𑀏𑀯𑀁 𑀧𑀯𑀺𑀲𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺𑀬𑀸 𑀯𑀸 𑀲𑀼𑀡𑀦𑁆𑀢𑀺𑀬𑀸 𑀯𑀸 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀤𑀲𑀫𑀲𑀺𑀓𑁆𑀔𑀸𑀧𑀤𑀁.

𑀮𑀲𑀼𑀡𑀯𑀕𑁆𑀕𑁄 𑀧𑀞𑀫𑁄.