𑁧𑁦. 𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁬𑁩. 𑀤𑀲𑀫𑀲𑀺𑀓𑁆𑀔𑀸𑀧𑀤𑁂 𑁋 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀦𑁆𑀢𑀫𑀲𑁄 𑀤𑀦𑁆𑀢𑀓𑀝𑁆𑀞𑀫𑁆𑀧𑀺 𑀲𑀩𑁆𑀩𑀁 𑀧𑀁𑀲𑀼𑀓𑀽𑀮𑀫𑁂𑀯 𑀅𑀲𑁆𑀲𑀸𑀢𑀺 𑀲𑀩𑁆𑀩𑀧𑀁𑀲𑀼𑀓𑀽𑀮𑀺𑀓𑁄. 𑀲𑁄 𑀓𑀺𑀭 𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀪𑀸𑀚𑀦𑀫𑁂𑀯 𑀧𑀢𑁆𑀢𑀁 𑀓𑀢𑁆𑀯𑀸 𑀢𑀢𑁆𑀣 𑀙𑀟𑁆𑀟𑀺𑀢𑀘𑁄𑀴𑀓𑁂𑀳𑁂𑀯 𑀘𑀻𑀯𑀭𑀁 𑀓𑀢𑁆𑀯𑀸 𑀢𑀢𑁆𑀣 𑀙𑀟𑁆𑀟𑀺𑀢𑀫𑀜𑁆𑀘𑀧𑀻𑀞𑀓𑀸𑀦𑀺𑀬𑁂𑀯 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺. 𑀅𑀬𑁆𑀬𑀯𑁄𑀲𑀸𑀝𑀺𑀢𑀓𑀸𑀦𑀻𑀢𑀺 𑀏𑀢𑁆𑀣 𑀅𑀬𑁆𑀬𑀸 𑀯𑀼𑀘𑁆𑀘𑀦𑁆𑀢𑀺 𑀓𑀸𑀮𑀗𑁆𑀓𑀢𑀸 𑀧𑀺𑀢𑀺𑀧𑀺𑀢𑀸𑀫𑀳𑀸. 𑀯𑁄𑀲𑀸𑀝𑀺𑀢𑀓𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 𑀢𑁂𑀲𑀁 𑀅𑀢𑁆𑀣𑀸𑀬 𑀲𑀼𑀲𑀸𑀦𑀸𑀤𑀻𑀲𑀼 𑀙𑀟𑁆𑀟𑀺𑀢𑀓𑀸𑀦𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀦𑀺; 𑀫𑀦𑀼𑀲𑁆𑀲𑀸 𑀓𑀺𑀭 𑀓𑀸𑀮𑀗𑁆𑀓𑀢𑁂 𑀜𑀸𑀢𑀓𑁂 𑀉𑀤𑁆𑀤𑀺𑀲𑁆𑀲 𑀬𑀁 𑀢𑁂𑀲𑀁 𑀲𑀚𑀻𑀯𑀓𑀸𑀮𑁂 𑀧𑀺𑀬𑀁 𑀳𑁄𑀢𑀺, 𑀢𑀁 𑀏𑀢𑁂𑀲𑀼 𑀲𑀼𑀲𑀸𑀦𑀸𑀤𑀻𑀲𑀼 𑀧𑀺𑀡𑁆𑀟𑀁 𑀧𑀺𑀡𑁆𑀟𑀁 𑀓𑀢𑁆𑀯𑀸 ‘‘𑀜𑀸𑀢𑀓𑀸 𑀦𑁄 𑀧𑀭𑀺𑀪𑀼𑀜𑁆𑀚𑀦𑁆𑀢𑀽𑀢𑀺 𑀞𑀧𑁂𑀦𑁆𑀢𑀺. 𑀲𑁄 𑀪𑀺𑀓𑁆𑀔𑀼 𑀢𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀅𑀜𑁆𑀜𑀁 𑀧𑀡𑀻𑀢𑀫𑁆𑀧𑀺 𑀤𑀺𑀬𑁆𑀬𑀫𑀸𑀦𑀁 𑀦 𑀇𑀘𑁆𑀙𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀼𑀲𑀸𑀦𑁂𑀧𑀺 𑀭𑀼𑀓𑁆𑀔𑀫𑀽𑀮𑁂𑀧𑀺 𑀉𑀫𑁆𑀫𑀸𑀭𑁂𑀧𑀺 𑀅𑀬𑁆𑀬𑀯𑁄𑀲𑀸𑀝𑀺𑀢𑀓𑀸𑀦𑀺 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺. 𑀣𑁂𑀭𑁄𑀢𑀺 𑀣𑀺𑀭𑁄 𑀖𑀦𑀩𑀤𑁆𑀥𑁄. 𑀯𑀞𑀭𑁄𑀢𑀺 𑀣𑀽𑀮𑁄; 𑀣𑀽𑀮𑁄 𑀘 𑀖𑀦𑀲𑀭𑀻𑀭𑁄 𑀘𑀸𑀬𑀁 𑀪𑀺𑀓𑁆𑀔𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀦𑀼𑀲𑁆𑀲𑀫𑀁𑀲𑀁 𑀫𑀜𑁆𑀜𑁂 𑀔𑀸𑀤𑀢𑀻𑀢𑀺 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀢𑀻𑀢𑀺 𑀦𑀁 𑀲𑀮𑁆𑀮𑀓𑁆𑀔𑁂𑀫; 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀦𑁆𑀢𑀸 𑀳𑀺 𑀈𑀤𑀺𑀲𑀸 𑀪𑀯𑀦𑁆𑀢𑀻𑀢𑀺 𑀅𑀬𑀁 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄.

𑁨𑁬𑁪. 𑀉𑀤𑀓𑀤𑀦𑁆𑀢𑀧𑁄𑀦𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀻𑀢𑀺 𑀏𑀢𑁆𑀣 𑀢𑁂 𑀪𑀺𑀓𑁆𑀔𑀽 ‘‘𑀅𑀤𑀺𑀦𑁆𑀦𑀁 𑀫𑀼𑀔𑀤𑁆𑀯𑀸𑀭𑀁 𑀆𑀳𑀸𑀭𑀁 𑀆𑀳𑀭𑁂𑀬𑁆𑀬𑀸’’𑀢𑀺 𑀧𑀤𑀲𑁆𑀲 𑀲𑀫𑁆𑀫𑀸 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀲𑀼𑀁, 𑀪𑀕𑀯𑀸 𑀧𑀦 𑀬𑀣𑀸𑀉𑀧𑁆𑀧𑀦𑁆𑀦𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀲𑁂𑀦 𑀧𑀺𑀢𑀸 𑀯𑀺𑀬 𑀤𑀸𑀭𑀓𑁂 𑀢𑁂 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀦𑁆𑀢𑁄 𑀅𑀦𑀼𑀧𑀜𑁆𑀜𑀢𑁆𑀢𑀺𑀁 𑀞𑀧𑁂𑀲𑀺.

𑁨𑁬𑁫. 𑀅𑀤𑀺𑀦𑁆𑀦𑀦𑁆𑀢𑀺 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀓𑀸𑀬𑀓𑀸𑀬𑀧𑀝𑀺𑀩𑀤𑁆𑀥𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀦 𑀤𑀺𑀦𑁆𑀦𑀁. 𑀏𑀢𑀤𑁂𑀯 𑀳𑀺 𑀲𑀦𑁆𑀥𑀸𑀬 𑀧𑀤𑀪𑀸𑀚𑀦𑁂 ‘‘𑀅𑀤𑀺𑀦𑁆𑀦𑀁 𑀦𑀸𑀫 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑁂 𑀧𑀦 ‘‘𑀅𑀤𑀺𑀦𑁆𑀦𑀁 𑀦𑀸𑀫 𑀧𑀭𑀧𑀭𑀺𑀕𑁆𑀕𑀳𑀺𑀢𑀓𑀁 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀤𑀺𑀦𑁆𑀦𑀦𑁆𑀢𑀺 𑀇𑀤𑀁 𑀧𑀦 𑀢𑀲𑁆𑀲𑁂𑀯 𑀅𑀤𑀺𑀦𑁆𑀦𑀲𑁆𑀲 𑀧𑀝𑀺𑀧𑀓𑁆𑀔𑀯𑀲𑁂𑀦 𑀮𑀓𑁆𑀔𑀡𑀤𑀲𑁆𑀲𑀦𑀢𑁆𑀣𑀁 𑀉𑀤𑁆𑀥𑀝𑀁. 𑀦𑀺𑀤𑁆𑀤𑁂𑀲𑁂 𑀘𑀲𑁆𑀲 ‘‘𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀯𑀸 𑀤𑁂𑀦𑁆𑀢𑁂’’𑀢𑀺 𑀏𑀯𑀁 𑀅𑀜𑁆𑀜𑀲𑁆𑀫𑀺𑀁 𑀤𑀤𑀫𑀸𑀦𑁂 ‘‘𑀳𑀢𑁆𑀣𑀧𑀸𑀲𑁂 𑀞𑀺𑀢𑁄 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀢𑀁 𑀏𑀯𑀁 𑀤𑀺𑀬𑁆𑀬𑀫𑀸𑀦𑀁 𑀅𑀦𑁆𑀢𑀫𑀲𑁄 𑀭𑀣𑀭𑁂𑀡𑀼𑀫𑁆𑀧𑀺 𑀲𑀘𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀮𑀓𑁆𑀔𑀡𑁂 𑀳𑀢𑁆𑀣𑀧𑀸𑀲𑁂 𑀞𑀺𑀢𑁄 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀏𑀢𑀁 𑀏𑀯𑀁 𑀧𑀝𑀺𑀕𑁆𑀕𑀳𑀺𑀢𑀁 𑀤𑀺𑀦𑁆𑀦𑀁 𑀦𑀸𑀫 𑀯𑀼𑀘𑁆𑀘𑀢𑀺. 𑀦 ‘‘𑀇𑀤𑀁 𑀕𑀡𑁆𑀳, 𑀇𑀤𑀁 𑀢𑀯 𑀳𑁄𑀢𑀽’’𑀢𑀺𑀆𑀤𑀺𑀯𑀘𑀦𑁂𑀦 𑀦𑀺𑀲𑁆𑀲𑀝𑁆𑀞𑀁.

𑀢𑀢𑁆𑀣 𑀓𑀸𑀬𑁂𑀦𑀸𑀢𑀺 𑀳𑀢𑁆𑀣𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦; 𑀅𑀦𑁆𑀢𑀫𑀲𑁄 𑀧𑀸𑀤𑀗𑁆𑀕𑀼𑀮𑀺𑀬𑀸𑀧𑀺 𑀤𑀺𑀬𑁆𑀬𑀫𑀸𑀦𑀁 𑀓𑀸𑀬𑁂𑀦 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺, 𑀧𑀝𑀺𑀕𑁆𑀕𑀳𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀦 𑀓𑁂𑀦𑀘𑀺 𑀳𑀺 𑀲𑀭𑀻𑀭𑀸𑀯𑀬𑀯𑁂𑀦 𑀕𑀳𑀺𑀢𑀁 𑀓𑀸𑀬𑁂𑀦 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀲𑀘𑁂𑀧𑀺 𑀦𑀢𑁆𑀣𑀼𑀓𑀭𑀡𑀺𑀬𑀸 𑀤𑀺𑀬𑁆𑀬𑀫𑀸𑀦𑀁 𑀦𑀸𑀲𑀸𑀧𑀼𑀝𑁂𑀦 𑀅𑀓𑀮𑁆𑀮𑀓𑁄 𑀯𑀸 𑀫𑀼𑀔𑁂𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀆𑀪𑁄𑀕𑀫𑀢𑁆𑀢𑀫𑁂𑀯 𑀳𑀺 𑀏𑀢𑁆𑀣 𑀧𑀫𑀸𑀡𑀦𑁆𑀢𑀺 𑀅𑀬𑀁 𑀦𑀬𑁄 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑁄. 𑀓𑀸𑀬𑀧𑀝𑀺𑀩𑀤𑁆𑀥𑁂𑀦𑀸𑀢𑀺 𑀓𑀝𑀘𑁆𑀙𑀼𑀆𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀉𑀧𑀓𑀭𑀡𑁂𑀦 𑀤𑀺𑀦𑁆𑀦𑀁 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀧𑀝𑀺𑀕𑁆𑀕𑀳𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀧𑀝𑀺𑀩𑀤𑁆𑀥𑁂𑀦 𑀧𑀢𑁆𑀢𑀣𑀸𑀮𑀓𑀸𑀤𑀺𑀦𑀸 𑀕𑀳𑀺𑀢𑀁 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀦𑀺𑀲𑁆𑀲𑀕𑁆𑀕𑀺𑀬𑁂𑀦𑀸𑀢𑀺 𑀓𑀸𑀬𑀢𑁄 𑀘 𑀓𑀸𑀬𑀧𑀝𑀺𑀩𑀤𑁆𑀥𑀢𑁄 𑀘 𑀫𑁄𑀘𑁂𑀢𑁆𑀯𑀸 𑀳𑀢𑁆𑀣𑀧𑀸𑀲𑁂 𑀞𑀺𑀢𑀲𑁆𑀲 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀸𑀢𑀺𑀬𑀫𑀸𑀦𑀫𑁆𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀧𑀬𑁄𑀕𑁂𑀦 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀅𑀬𑀁 𑀢𑀸𑀯 𑀧𑀸𑀴𑀺𑀯𑀡𑁆𑀡𑀦𑀸.

𑀅𑀬𑀁 𑀧𑀦𑁂𑀢𑁆𑀣 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄 𑁋 𑀧𑀜𑁆𑀘𑀗𑁆𑀕𑁂𑀳𑀺 𑀧𑀝𑀺𑀕𑁆𑀕𑀳𑀡𑀁 𑀭𑀼𑀳𑀢𑀺 𑁋 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀘𑁆𑀘𑀸𑀭𑀡𑀫𑀢𑁆𑀢𑀁 𑀳𑁄𑀢𑀺, 𑀳𑀢𑁆𑀣𑀧𑀸𑀲𑁄 𑀧𑀜𑁆𑀜𑀸𑀬𑀢𑀺, 𑀅𑀪𑀺𑀳𑀸𑀭𑁄 𑀧𑀜𑁆𑀜𑀸𑀬𑀢𑀺, 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑁄 𑀯𑀸 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀯𑀸 𑀤𑁂𑀢𑀺, 𑀢𑀁 𑀘𑁂 𑀪𑀺𑀓𑁆𑀔𑀼 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀧𑀜𑁆𑀘𑀳𑀗𑁆𑀕𑁂𑀳𑀺 𑀧𑀝𑀺𑀕𑁆𑀕𑀳𑀡𑀁 𑀭𑀼𑀳𑀢𑀺.

𑀢𑀢𑁆𑀣 𑀞𑀺𑀢𑀦𑀺𑀲𑀺𑀦𑁆𑀦𑀦𑀺𑀧𑀦𑁆𑀦𑀸𑀦𑀁 𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀳𑀢𑁆𑀣𑀧𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀘𑁂 𑀧𑀦 𑀤𑀸𑀬𑀓𑀧𑀝𑀺𑀕𑁆𑀕𑀸𑀳𑀓𑁂𑀲𑀼 𑀏𑀓𑁄 𑀆𑀓𑀸𑀲𑁂 𑀳𑁄𑀢𑀺, 𑀏𑀓𑁄 𑀪𑀽𑀫𑀺𑀬𑀁, 𑀪𑀽𑀫𑀝𑁆𑀞𑀲𑁆𑀲 𑀘 𑀲𑀻𑀲𑁂𑀦 𑀆𑀓𑀸𑀲𑀝𑁆𑀞𑀲𑁆𑀲 𑀘 𑀞𑀧𑁂𑀢𑁆𑀯𑀸 𑀤𑀸𑀢𑀼𑀁 𑀯𑀸 𑀕𑀳𑁂𑀢𑀼𑀁 𑀯𑀸 𑀧𑀲𑀸𑀭𑀺𑀢𑀳𑀢𑁆𑀣𑀁, 𑀬𑀁 𑀆𑀲𑀦𑁆𑀦𑀢𑀭𑀁 𑀅𑀗𑁆𑀕𑀁, 𑀢𑀲𑁆𑀲 𑀑𑀭𑀺𑀫𑀦𑁆𑀢𑁂𑀦 𑀳𑀢𑁆𑀣𑀧𑀸𑀲𑀧𑁆𑀧𑀫𑀸𑀡𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁. 𑀲𑀘𑁂𑀧𑀺 𑀏𑀓𑁄 𑀓𑀽𑀧𑁂 𑀳𑁄𑀢𑀺, 𑀏𑀓𑁄 𑀓𑀽𑀧𑀢𑀝𑁂, 𑀏𑀓𑁄 𑀯𑀸 𑀧𑀦 𑀭𑀼𑀓𑁆𑀔𑁂, 𑀏𑀓𑁄 𑀧𑀣𑀯𑀺𑀬𑀁, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀳𑀢𑁆𑀣𑀧𑀸𑀲𑀧𑁆𑀧𑀫𑀸𑀡𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁. 𑀏𑀯𑀭𑀽𑀧𑁂 𑀳𑀢𑁆𑀣𑀧𑀸𑀲𑁂 𑀞𑀢𑁆𑀯𑀸 𑀲𑀘𑁂𑀧𑀺 𑀧𑀓𑁆𑀔𑀻 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀳𑀢𑁆𑀣𑀻 𑀯𑀸 𑀲𑁄𑀡𑁆𑀟𑀸𑀬 𑀕𑀳𑁂𑀢𑁆𑀯𑀸 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀤𑁂𑀢𑀺, 𑀧𑀝𑀺𑀕𑁆𑀕𑀳𑀡𑀁 𑀭𑀼𑀳𑀢𑀺. 𑀲𑀘𑁂 𑀧𑀦 𑀅𑀤𑁆𑀥𑀝𑁆𑀞𑀫𑀭𑀢𑀦𑀲𑁆𑀲𑀸𑀧𑀺 𑀳𑀢𑁆𑀣𑀺𑀦𑁄 𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑁄, 𑀢𑁂𑀦 𑀲𑁄𑀡𑁆𑀟𑀸𑀬 𑀤𑀺𑀬𑁆𑀬𑀫𑀸𑀦𑀁 𑀕𑀡𑁆𑀳𑀸𑀢𑀺, 𑀯𑀝𑁆𑀝𑀢𑀺𑀬𑁂𑀯.

𑀏𑀓𑁄 𑀩𑀳𑀽𑀦𑀺 𑀪𑀢𑁆𑀢𑀩𑁆𑀬𑀜𑁆𑀚𑀦𑀪𑀸𑀚𑀦𑀸𑀦𑀺 𑀲𑀻𑀲𑁂 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀞𑀺𑀢𑀓𑁄𑀯 𑀕𑀡𑁆𑀳𑀣𑀸𑀢𑀺 𑀯𑀤𑀢𑀺, 𑀦 𑀢𑀸𑀯 𑀅𑀪𑀺𑀳𑀸𑀭𑁄 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀦 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀈𑀲𑀓𑀫𑁆𑀧𑀺 𑀑𑀦𑀫𑀢𑀺, 𑀪𑀺𑀓𑁆𑀔𑀼𑀦𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀳𑁂𑀝𑁆𑀞𑀺𑀫𑀪𑀸𑀚𑀦𑀁 𑀏𑀓𑀤𑁂𑀲𑁂𑀦𑀸𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑀪𑀸𑀚𑀦𑀸𑀦𑀺 𑀧𑀝𑀺𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀑𑀭𑁄𑀧𑁂𑀢𑁆𑀯𑀸 𑀯𑀸 𑀉𑀕𑁆𑀖𑀸𑀝𑁂𑀢𑁆𑀯𑀸 𑀯𑀸 𑀬𑀁 𑀇𑀘𑁆𑀙𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀪𑀢𑁆𑀢𑀧𑀘𑁆𑀙𑀺𑀆𑀤𑀺𑀫𑁆𑀳𑀺 𑀧𑀦 𑀏𑀓𑀪𑀸𑀚𑀦𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀓𑀸𑀚𑁂𑀦 𑀪𑀢𑁆𑀢𑀁 𑀳𑀭𑀦𑁆𑀢𑁄𑀧𑀺 𑀲𑀘𑁂 𑀓𑀸𑀚𑀁 𑀑𑀦𑀸𑀫𑁂𑀢𑁆𑀯𑀸 𑀤𑁂𑀢𑀺, 𑀯𑀝𑁆𑀝𑀢𑀺. 𑀢𑀺𑀁𑀲𑀳𑀢𑁆𑀣𑁄 𑀯𑁂𑀡𑀼 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀕𑀼𑀴𑀓𑀼𑀫𑁆𑀪𑁄 𑀩𑀤𑁆𑀥𑁄, 𑀏𑀓𑀲𑁆𑀫𑀺𑀁 𑀲𑀧𑁆𑀧𑀺𑀓𑀼𑀫𑁆𑀪𑁄, 𑀢𑀜𑁆𑀘𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑀩𑁆𑀩𑀁 𑀧𑀝𑀺𑀕𑁆𑀕𑀳𑀺𑀢𑀫𑁂𑀯. 𑀉𑀘𑁆𑀙𑀼𑀬𑀦𑁆𑀢𑀤𑁄𑀡𑀺𑀢𑁄 𑀧𑀕𑁆𑀖𑀭𑀦𑁆𑀢𑀫𑁂𑀯 𑀭𑀲𑀁 𑀕𑀡𑁆𑀳𑀣𑀸𑀢𑀺 𑀯𑀤𑀢𑀺, 𑀅𑀪𑀺𑀳𑀸𑀭𑁄 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀦 𑀕𑀳𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀳𑀢𑁆𑀣𑁂𑀦 𑀉𑀲𑁆𑀲𑀺𑀜𑁆𑀘𑀺𑀢𑁆𑀯𑀸 𑀉𑀲𑁆𑀲𑀺𑀜𑁆𑀘𑀺𑀢𑁆𑀯𑀸 𑀤𑁂𑀢𑀺, 𑀯𑀝𑁆𑀝𑀢𑀺.

𑀩𑀳𑀽 𑀧𑀢𑁆𑀢𑀸 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀓𑀝𑀲𑀸𑀭𑀓𑁂 𑀯𑀸 𑀤𑁄𑀡𑀺𑀬𑀁 𑀯𑀸 𑀨𑀮𑀓𑁂 𑀯𑀸 𑀞𑀧𑀺𑀢𑀸 𑀳𑁄𑀦𑁆𑀢𑀺, 𑀬𑀢𑁆𑀣 𑀞𑀺𑀢𑀲𑁆𑀲 𑀤𑀸𑀬𑀓𑁄 𑀳𑀢𑁆𑀣𑀧𑀸𑀲𑁂 𑀳𑁄𑀢𑀺, 𑀢𑀢𑁆𑀣 𑀞𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑀲𑀜𑁆𑀜𑀸𑀬 𑀫𑀜𑁆𑀘𑀸𑀤𑀻𑀦𑀺 𑀅𑀗𑁆𑀕𑀼𑀮𑀺𑀬𑀸𑀧𑀺 𑀨𑀼𑀲𑀺𑀢𑁆𑀯𑀸 𑀞𑀺𑀢𑁂𑀦 𑀯𑀸 𑀦𑀺𑀲𑀺𑀦𑁆𑀦𑁂𑀦 𑀯𑀸 𑀦𑀺𑀧𑀦𑁆𑀦𑁂𑀦 𑀯𑀸 𑀬𑀁 𑀢𑁂𑀲𑀼 𑀧𑀢𑁆𑀢𑁂𑀲𑀼 𑀤𑀺𑀬𑁆𑀬𑀢𑀺, 𑀢𑀁 𑀲𑀩𑁆𑀩𑀁 𑀧𑀝𑀺𑀕𑁆𑀕𑀳𑀺𑀢𑀁 𑀳𑁄𑀢𑀺. 𑀲𑀘𑁂𑀧𑀺 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺 𑀫𑀜𑁆𑀘𑀸𑀤𑀻𑀦𑀺 𑀆𑀭𑀼𑀳𑀺𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀲𑀘𑁂 𑀧𑀦 𑀫𑀜𑁆𑀘𑀸𑀤𑀻𑀦𑀺 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀫𑀜𑁆𑀘𑁂 𑀦𑀺𑀲𑀻𑀤𑀢𑀺, 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀧𑀣𑀯𑀺𑀬𑀁 𑀧𑀦 𑀲𑀘𑁂𑀧𑀺 𑀓𑀼𑀘𑁆𑀙𑀺𑀬𑀸 𑀓𑀼𑀘𑁆𑀙𑀺𑀁 𑀆𑀳𑀘𑁆𑀘 𑀞𑀺𑀢𑀸 𑀳𑁄𑀦𑁆𑀢𑀺, 𑀬𑀁 𑀬𑀁 𑀅𑀗𑁆𑀕𑀼𑀮𑀺𑀬𑀸 𑀯𑀸 𑀲𑀽𑀘𑀺𑀬𑀸 𑀯𑀸 𑀨𑀼𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀤𑀺𑀬𑁆𑀬𑀫𑀸𑀦𑀫𑁂𑀯 𑀧𑀝𑀺𑀕𑁆𑀕𑀳𑀺𑀢𑀁 𑀳𑁄𑀢𑀺. ‘‘𑀬𑀢𑁆𑀣 𑀓𑀢𑁆𑀣𑀘𑀺 𑀫𑀳𑀸𑀓𑀝𑀲𑀸𑀭𑀳𑀢𑁆𑀣𑀢𑁆𑀣𑀭𑀡𑀸𑀤𑀻𑀲𑀼 𑀞𑀧𑀺𑀢𑀧𑀢𑁆𑀢𑁂 𑀧𑀝𑀺𑀕𑁆𑀕𑀳𑀡𑀁 𑀦 𑀭𑀼𑀳𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀳𑀢𑁆𑀣𑀧𑀸𑀲𑀸𑀢𑀺𑀓𑁆𑀓𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀳𑀢𑁆𑀣𑀧𑀸𑀲𑁂 𑀧𑀦 𑀲𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀝𑁆𑀝𑀢𑀺 𑀅𑀜𑁆𑀜𑀢𑁆𑀭 𑀢𑀢𑁆𑀣𑀚𑀸𑀢𑀓𑀸.

𑀢𑀢𑁆𑀣𑀚𑀸𑀢𑀓𑁂 𑀧𑀦 𑀧𑀤𑀼𑀫𑀺𑀦𑀺𑀧𑀡𑁆𑀡𑁂 𑀯𑀸 𑀓𑀺𑀁𑀲𑀼𑀓𑀧𑀡𑁆𑀡𑀸𑀤𑀺𑀫𑁆𑀳𑀺 𑀯𑀸 𑀦 𑀯𑀝𑁆𑀝𑀢𑀺. 𑀦 𑀳𑀺 𑀢𑀁 𑀓𑀸𑀬𑀧𑀝𑀺𑀩𑀤𑁆𑀥𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀬𑀣𑀸 𑀘 𑀢𑀢𑁆𑀣𑀚𑀸𑀢𑀓𑁂; 𑀏𑀯𑀁 𑀔𑀸𑀡𑀼𑀓𑁂 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀫𑀜𑁆𑀘𑀸𑀤𑀺𑀫𑁆𑀳𑀺 𑀅𑀲𑀁𑀳𑀸𑀭𑀺𑀫𑁂 𑀨𑀮𑀓𑁂 𑀯𑀸 𑀧𑀸𑀲𑀸𑀡𑁂 𑀯𑀸 𑀦 𑀭𑀼𑀳𑀢𑀺𑀬𑁂𑀯, 𑀢𑁂𑀧𑀺 𑀳𑀺 𑀢𑀢𑁆𑀣𑀚𑀸𑀢𑀓𑀲𑀗𑁆𑀔𑁂𑀧𑀼𑀧𑀕𑀸 𑀳𑁄𑀦𑁆𑀢𑀺. 𑀪𑀽𑀫𑀺𑀬𑀁 𑀅𑀢𑁆𑀣𑀢𑁂𑀲𑀼 𑀲𑀼𑀔𑀼𑀫𑁂𑀲𑀼 𑀢𑀺𑀦𑁆𑀢𑀺𑀡𑀺𑀓𑀸𑀤𑀺𑀧𑀡𑁆𑀡𑁂𑀲𑀼𑀧𑀺 𑀧𑀝𑀺𑀕𑁆𑀕𑀳𑀡𑀁 𑀦 𑀭𑀼𑀳𑀢𑀺, 𑀦 𑀳𑀺 𑀢𑀸𑀦𑀺 𑀲𑀦𑁆𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑀸𑀦𑀻𑀢𑀺. 𑀫𑀳𑀦𑁆𑀢𑁂𑀲𑀼 𑀧𑀦 𑀧𑀤𑀼𑀫𑀺𑀦𑀺𑀧𑀡𑁆𑀡𑀸𑀤𑀻𑀲𑀼 𑀭𑀼𑀳𑀢𑀺. 𑀲𑀘𑁂 𑀳𑀢𑁆𑀣𑀧𑀸𑀲𑀁 𑀅𑀢𑀺𑀓𑁆𑀓𑀫𑁆𑀫 𑀞𑀺𑀢𑁄 𑀤𑀻𑀖𑀤𑀡𑁆𑀟𑀓𑁂𑀦 𑀉𑀴𑀼𑀗𑁆𑀓𑁂𑀦 𑀤𑁂𑀢𑀺, 𑀆𑀕𑀦𑁆𑀢𑁆𑀯𑀸 𑀤𑁂𑀳𑀻𑀢𑀺 𑀯𑀢𑁆𑀢𑀩𑁆𑀩𑁄. 𑀯𑀘𑀦𑀁 𑀅𑀲𑀼𑀢𑁆𑀯𑀸 𑀯𑀸 𑀅𑀦𑀸𑀤𑀺𑀬𑀺𑀢𑁆𑀯𑀸 𑀯𑀸 𑀧𑀢𑁆𑀢𑁂 𑀆𑀓𑀺𑀭𑀢𑀺𑀬𑁂𑀯, 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀤𑀽𑀭𑁂 𑀞𑀢𑁆𑀯𑀸 𑀪𑀢𑁆𑀢𑀧𑀺𑀡𑁆𑀟𑀁 𑀔𑀺𑀧𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑀘𑁂 𑀧𑀢𑁆𑀢𑀢𑁆𑀣𑀯𑀺𑀓𑀢𑁄 𑀦𑀻𑀳𑀭𑀺𑀬𑀫𑀸𑀦𑁂 𑀧𑀢𑁆𑀢𑁂 𑀭𑀚𑀦𑀘𑀼𑀡𑁆𑀡𑀸𑀦𑀺 𑀳𑁄𑀦𑁆𑀢𑀺, 𑀲𑀢𑀺 𑀉𑀤𑀓𑁂 𑀥𑁄𑀯𑀺𑀢𑀩𑁆𑀩𑁄, 𑀅𑀲𑀢𑀺 𑀭𑀚𑀦𑀘𑀼𑀡𑁆𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁. 𑀲𑀘𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲 𑀭𑀚𑀁 𑀧𑀢𑀢𑀺, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀸 𑀕𑀡𑁆𑀳𑀺𑀢𑀩𑁆𑀩𑀸. 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀢𑁄 𑀯𑀺𑀦𑀬𑀤𑀼𑀓𑁆𑀓𑀝𑀁. 𑀢𑀁 𑀧𑀦 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀢𑁄 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀧𑀦 ‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀯𑀘𑀦𑀁 𑀅𑀲𑀼𑀢𑁆𑀯𑀸 𑀯𑀸 𑀅𑀦𑀸𑀤𑀺𑀬𑀺𑀢𑁆𑀯𑀸 𑀯𑀸 𑀪𑀺𑀓𑁆𑀔𑀁 𑀤𑁂𑀦𑁆𑀢𑀺𑀬𑁂𑀯, 𑀯𑀺𑀦𑀬𑀤𑀼𑀓𑁆𑀓𑀝𑀁 𑀦𑀢𑁆𑀣𑀺, 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑀸 𑀪𑀺𑀓𑁆𑀔𑀸 𑀕𑀳𑁂𑀢𑀩𑁆𑀩𑀸.

𑀲𑀘𑁂 𑀫𑀳𑀸𑀯𑀸𑀢𑁄 𑀢𑀢𑁄 𑀢𑀢𑁄 𑀭𑀚𑀁 𑀧𑀸𑀢𑁂𑀢𑀺, 𑀦 𑀲𑀓𑁆𑀓𑀸 𑀳𑁄𑀢𑀺 𑀪𑀺𑀓𑁆𑀔𑀁 𑀕𑀳𑁂𑀢𑀼𑀁, ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀯𑀺𑀳𑀸𑀭𑀁 𑀯𑀸 𑀆𑀲𑀦𑀲𑀸𑀮𑀁 𑀯𑀸 𑀕𑀦𑁆𑀢𑁆𑀯𑀸 𑀢𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀢𑁆𑀯𑀸 𑀧𑀼𑀦 𑀢𑁂𑀦 𑀤𑀺𑀦𑁆𑀦𑀁 𑀯𑀸 𑀢𑀲𑁆𑀲 𑀯𑀺𑀲𑁆𑀲𑀸𑀲𑁂𑀦 𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀲𑀘𑁂 𑀪𑀺𑀓𑁆𑀔𑀸𑀘𑀸𑀭𑁂 𑀲𑀭𑀚𑀁 𑀧𑀢𑁆𑀢𑀁 𑀪𑀺𑀓𑁆𑀔𑀼𑀲𑁆𑀲 𑀤𑁂𑀢𑀺, 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀇𑀫𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀁 𑀯𑀸 𑀕𑀡𑁆𑀳𑁂𑀬𑁆𑀬𑀸𑀲𑀺, 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸𑀲𑀺 𑀯𑀸’’𑀢𑀺 𑀢𑁂𑀦 𑀢𑀣𑀸 𑀓𑀸𑀢𑀩𑁆𑀩𑀁. 𑀲𑀘𑁂 𑀭𑀚𑀁 𑀉𑀧𑀭𑀺 𑀉𑀧𑁆𑀧𑀺𑀮𑀯𑀢𑀺, 𑀓𑀜𑁆𑀚𑀺𑀓𑀁 𑀧𑀯𑀸𑀳𑁂𑀢𑁆𑀯𑀸 𑀲𑁂𑀲𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀅𑀦𑁆𑀢𑁄 𑀧𑀯𑀺𑀝𑁆𑀞𑀁 𑀳𑁄𑀢𑀺, 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀅𑀲𑀢𑀺 𑀳𑀢𑁆𑀣𑀢𑁄 𑀅𑀫𑁄𑀘𑁂𑀦𑁆𑀢𑁂𑀦, 𑀬𑀢𑁆𑀣 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀅𑀢𑁆𑀣𑀺 𑀢𑀢𑁆𑀣 𑀦𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀲𑀼𑀓𑁆𑀔𑀪𑀢𑁆𑀢𑁂 𑀧𑀢𑀺𑀢𑀭𑀚𑀁 𑀅𑀧𑀦𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀅𑀢𑀺𑀲𑀼𑀔𑀼𑀫𑀁 𑀳𑁄𑀢𑀺, 𑀉𑀧𑀭𑀺𑀪𑀢𑁆𑀢𑁂𑀦 𑀲𑀤𑁆𑀥𑀺𑀁 𑀅𑀧𑀦𑁂𑀢𑀩𑁆𑀩𑀁, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑀸𑀕𑀼𑀁 𑀯𑀸 𑀲𑀽𑀧𑀁 𑀯𑀸 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀆𑀮𑀼𑀮𑁂𑀦𑁆𑀢𑀸𑀦𑀁 𑀪𑀸𑀚𑀦𑀢𑁄 𑀨𑀼𑀲𑀺𑀢𑀸𑀦𑀺 𑀉𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑁂 𑀧𑀢𑀦𑁆𑀢𑀺, 𑀧𑀢𑁆𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄.

𑀉𑀴𑀼𑀗𑁆𑀓𑁂𑀦 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀸𑀦𑀁 𑀧𑀞𑀫𑀢𑀭𑀁 𑀉𑀴𑀼𑀗𑁆𑀓𑀢𑁄 𑀣𑁂𑀯𑀸 𑀧𑀢𑁆𑀢𑁂 𑀧𑀢𑀦𑁆𑀢𑀺, 𑀲𑀼𑀧𑀢𑀺𑀢𑀸, 𑀅𑀪𑀺𑀳𑀝𑀢𑁆𑀢𑀸 𑀤𑁄𑀲𑁄 𑀦𑀢𑁆𑀣𑀺. 𑀲𑀘𑁂𑀧𑀺 𑀘𑀭𑀼𑀓𑁂𑀦 𑀪𑀢𑁆𑀢𑁂 𑀆𑀓𑀺𑀭𑀺𑀬𑀫𑀸𑀦𑁂 𑀘𑀭𑀼𑀓𑀢𑁄 𑀫𑀲𑀺 𑀯𑀸 𑀙𑀸𑀭𑀺𑀓𑀸 𑀯𑀸 𑀧𑀢𑀢𑀺, 𑀅𑀪𑀺𑀳𑀝𑀢𑁆𑀢𑀸 𑀦𑁂𑀯𑀢𑁆𑀣𑀺 𑀤𑁄𑀲𑁄. 𑀅𑀦𑀦𑁆𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀺𑀬𑁆𑀬𑀫𑀸𑀦𑀁 𑀧𑀢𑁆𑀢𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀇𑀢𑀭𑀲𑁆𑀲 𑀧𑀢𑁆𑀢𑁂 𑀧𑀢𑀢𑀺, 𑀲𑀼𑀧𑀢𑀺𑀢𑀁. 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑀺 𑀢𑀁 𑀳𑁄𑀢𑀺.

𑀲𑀘𑁂 𑀚𑀚𑁆𑀛𑀭𑀺𑀲𑀸𑀔𑀸𑀤𑀺𑀁 𑀨𑀸𑀮𑁂𑀢𑁆𑀯𑀸 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀦𑁆𑀢𑀸𑀦𑀁 𑀲𑀸𑀔𑀢𑁄 𑀨𑀼𑀲𑀺𑀢𑀸𑀦𑀺 𑀅𑀜𑁆𑀜𑀲𑁆𑀲 𑀧𑀢𑁆𑀢𑁂 𑀧𑀢𑀦𑁆𑀢𑀺, 𑀧𑀢𑁆𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄. 𑀬𑀲𑁆𑀲 𑀧𑀢𑁆𑀢𑀲𑁆𑀲 𑀉𑀧𑀭𑀺 𑀨𑀸𑀮𑁂𑀦𑁆𑀢𑀺, 𑀢𑀲𑁆𑀲 𑀧𑀢𑁆𑀢𑁂 𑀧𑀢𑀺𑀢𑁂𑀲𑀼 𑀤𑀸𑀢𑀼𑀓𑀸𑀫𑀢𑀸𑀬 𑀅𑀪𑀺𑀳𑀝𑀢𑁆𑀢𑀸 𑀤𑁄𑀲𑁄 𑀦𑀢𑁆𑀣𑀺. 𑀧𑀸𑀬𑀸𑀲𑀲𑁆𑀲 𑀧𑀽𑀭𑁂𑀢𑁆𑀯𑀸 𑀧𑀢𑁆𑀢𑀁 𑀤𑁂𑀦𑁆𑀢𑀺, 𑀉𑀡𑁆𑀳𑀢𑁆𑀢𑀸 𑀳𑁂𑀝𑁆𑀞𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀼𑀔𑀯𑀝𑁆𑀝𑀺𑀬𑀸𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀢𑀣𑀸𑀧𑀺 𑀦 𑀲𑀓𑁆𑀓𑁄𑀢𑀺, 𑀆𑀥𑀸𑀭𑀓𑁂𑀦 𑀕𑀡𑁆𑀳𑀺𑀢𑀩𑁆𑀩𑁄.

𑀆𑀲𑀦𑀲𑀸𑀮𑀸𑀬 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀦𑁂𑀯 𑀆𑀳𑀭𑀺𑀬𑀫𑀸𑀦𑀁 𑀦 𑀤𑀺𑀬𑁆𑀬𑀫𑀸𑀦𑀁 𑀚𑀸𑀦𑀸𑀢𑀺, 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀳𑁄𑀢𑀺. 𑀲𑀘𑁂 𑀧𑀦 𑀆𑀪𑁄𑀕𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀲𑁄 𑀳𑀢𑁆𑀣𑁂𑀦 𑀆𑀥𑀸𑀭𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀸𑀤𑁂𑀦 𑀧𑁂𑀮𑁆𑀮𑁂𑀢𑁆𑀯𑀸 𑀦𑀺𑀤𑁆𑀤𑀸𑀬𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀧𑀸𑀤𑁂𑀦 𑀆𑀥𑀸𑀭𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀚𑀸𑀕𑀭𑀦𑁆𑀢𑀲𑁆𑀲𑀧𑀺 𑀅𑀦𑀸𑀤𑀭𑀧𑀝𑀺𑀕𑁆𑀕𑀳𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀦 𑀓𑀸𑀢𑀩𑁆𑀩𑀁. 𑀓𑁂𑀘𑀺 𑀏𑀯𑀁 𑀆𑀥𑀸𑀭𑀓𑁂𑀦 𑀧𑀝𑀺𑀕𑁆𑀕𑀳𑀡𑀁 𑀓𑀸𑀬𑀧𑀝𑀺𑀩𑀤𑁆𑀥𑀧𑀝𑀺𑀩𑀤𑁆𑀥𑁂𑀦 𑀧𑀝𑀺𑀕𑁆𑀕𑀳𑀡𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀁 𑀢𑁂𑀲𑀁 𑀯𑀘𑀦𑀫𑀢𑁆𑀢𑀫𑁂𑀯. 𑀅𑀢𑁆𑀣𑀢𑁄 𑀧𑀦 𑀲𑀩𑁆𑀩𑀫𑁆𑀧𑁂𑀢𑀁 𑀓𑀸𑀬𑀧𑀝𑀺𑀩𑀤𑁆𑀥𑀫𑁂𑀯 𑀳𑁄𑀢𑀺. 𑀓𑀸𑀬𑀲𑀁𑀲𑀕𑁆𑀕𑁂𑀧𑀺 𑀘𑁂𑀲 𑀦𑀬𑁄 𑀤𑀲𑁆𑀲𑀺𑀢𑁄𑀯. 𑀬𑀫𑁆𑀧𑀺 𑀪𑀺𑀓𑁆𑀔𑀼𑀲𑁆𑀲 𑀤𑀺𑀬𑁆𑀬𑀫𑀸𑀦𑀁 𑀧𑀢𑀢𑀺, 𑀢𑀫𑁆𑀧𑀺 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁆𑀭𑀺𑀤𑀁 𑀲𑀼𑀢𑁆𑀢𑀁 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀁 𑀤𑀺𑀬𑁆𑀬𑀫𑀸𑀦𑀁 𑀧𑀢𑀢𑀺, 𑀢𑀁 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀧𑀭𑀺𑀘𑁆𑀘𑀢𑁆𑀢𑀁 𑀢𑀁, 𑀪𑀺𑀓𑁆𑀔𑀯𑁂, 𑀤𑀸𑀬𑀓𑁂𑀳𑀻’’𑀢𑀺 (𑀘𑀽𑀴𑀯. 𑁨𑁭𑁩).

𑀇𑀤𑀜𑁆𑀘 𑀧𑀦 𑀲𑀼𑀢𑁆𑀢𑀁 𑀦𑁂𑀬𑁆𑀬𑀢𑁆𑀣𑀁. 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀬𑀁 𑀤𑀺𑀬𑁆𑀬𑀫𑀸𑀦𑀁 𑀤𑀸𑀬𑀓𑀲𑁆𑀲 𑀳𑀢𑁆𑀣𑀢𑁄 𑀧𑀭𑀺𑀕𑀴𑀺𑀢𑁆𑀯𑀸 𑀲𑀼𑀤𑁆𑀥𑀸𑀬 𑀯𑀸 𑀪𑀽𑀫𑀺𑀬𑀸 𑀧𑀤𑀼𑀫𑀺𑀦𑀺𑀧𑀡𑁆𑀡𑀯𑀢𑁆𑀣𑀓𑀝𑀲𑀸𑀭𑀓𑀸𑀤𑀻𑀲𑀼 𑀯𑀸 𑀧𑀢𑀢𑀺, 𑀢𑀁 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀁 𑀧𑀦 𑀲𑀭𑀚𑀸𑀬 𑀪𑀽𑀫𑀺𑀬𑀸 𑀧𑀢𑀢𑀺, 𑀢𑀁 𑀭𑀚𑀁 𑀧𑀼𑀜𑁆𑀙𑀺𑀢𑁆𑀯𑀸 𑀯𑀸 𑀥𑁄𑀯𑀺𑀢𑁆𑀯𑀸 𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀧𑀯𑀝𑁆𑀝𑀦𑁆𑀢𑀁 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺, 𑀢𑁂𑀦 𑀆𑀳𑀭𑀸𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀲𑀘𑁂 𑀢𑀁 𑀪𑀺𑀓𑁆𑀔𑀼𑀁 𑀯𑀤𑀢𑀺 ‘‘𑀢𑁆𑀯𑀁𑀬𑁂𑀯 𑀔𑀸𑀤𑀸’’𑀢𑀺 𑀢𑀲𑁆𑀲𑀸𑀧𑀺 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀸𑀡𑀢𑁆𑀢𑁂𑀦 𑀧𑀦 𑀢𑁂𑀦 𑀦 𑀕𑀳𑁂𑀢𑀩𑁆𑀩𑀁. 𑀅𑀦𑀸𑀡𑀢𑁆𑀢𑁂𑀦𑀸𑀧𑀺 ‘‘𑀇𑀢𑀭𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀢𑀁 𑀇𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺? 𑀪𑀕𑀯𑀢𑀸 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸. 𑀪𑀕𑀯𑀢𑀸 𑀳𑀺 ‘‘𑀲𑀸𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀯𑀤𑀦𑁆𑀢𑁂𑀦 𑀬𑀲𑁆𑀲𑁂𑀯 𑀢𑀁 𑀤𑀺𑀬𑁆𑀬𑀫𑀸𑀦𑀁 𑀧𑀢𑀢𑀺, 𑀢𑀲𑁆𑀲 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀫𑁆𑀧𑀺 𑀢𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑁄 𑀅𑀦𑀼𑀜𑁆𑀜𑀸𑀢𑁄. ‘‘𑀧𑀭𑀺𑀘𑁆𑀘𑀢𑁆𑀢𑀁 𑀢𑀁 𑀪𑀺𑀓𑁆𑀔𑀯𑁂 𑀤𑀸𑀬𑀓𑁂𑀳𑀻’’𑀢𑀺 𑀯𑀘𑀦𑁂𑀦 𑀧𑀦𑁂𑀢𑁆𑀣 𑀧𑀭𑀲𑀦𑁆𑀢𑀓𑀸𑀪𑀸𑀯𑁄 𑀤𑀻𑀧𑀺𑀢𑁄. 𑀢𑀲𑁆𑀫𑀸 𑀅𑀜𑁆𑀜𑀲𑁆𑀲 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀲𑁆𑀲 𑀧𑀦 𑀆𑀡𑀢𑁆𑀢𑀺𑀬𑀸 𑀯𑀝𑁆𑀝𑀢𑀻𑀢𑀺 𑀅𑀬𑀁 𑀓𑀺𑀭𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀬𑀲𑁆𑀫𑀸 𑀘 𑀢𑀁 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀢𑁆𑀢𑀸 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 𑀬𑀣𑀸𑀞𑀺𑀢𑀁𑀬𑁂𑀯 𑀅𑀦𑀸𑀫𑀲𑀺𑀢𑁆𑀯𑀸 𑀓𑁂𑀦𑀘𑀺 𑀧𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀁 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀧𑀭𑀺𑀪𑀼𑀜𑁆𑀘𑀺𑀢𑀼𑀁 𑀯𑀝𑁆𑀝𑀢𑀺, 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀺. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀢𑀁𑀤𑀺𑀯𑀲𑀁𑀬𑁂𑀯 𑀳𑀺 𑀢𑀲𑁆𑀲 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑁄 𑀅𑀦𑀼𑀜𑁆𑀜𑀸𑀢𑁄, 𑀦 𑀢𑀢𑁄 𑀧𑀭𑀦𑁆𑀢𑀺 𑀅𑀬𑀫𑁆𑀧𑀺 𑀓𑀺𑀭𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 𑀅𑀩𑁆𑀩𑁄𑀳𑀸𑀭𑀺𑀓𑀦𑀬𑁄 𑀯𑀼𑀘𑁆𑀘𑀢𑀺 𑁋 𑀪𑀼𑀜𑁆𑀚𑀦𑁆𑀢𑀸𑀦𑀜𑁆𑀳𑀺 𑀤𑀦𑁆𑀢𑀸 𑀔𑀺𑀬𑁆𑀬𑀦𑁆𑀢𑀺, 𑀦𑀔𑀸 𑀔𑀺𑀬𑁆𑀬𑀦𑁆𑀢𑀺, 𑀧𑀢𑁆𑀢𑀲𑁆𑀲 𑀯𑀡𑁆𑀡𑁄 𑀔𑀺𑀬𑁆𑀬𑀢𑀺, 𑀲𑀩𑁆𑀩𑀁 𑀅𑀩𑁆𑀩𑁄𑀳𑀸𑀭𑀺𑀓𑀁. 𑀬𑀫𑁆𑀧𑀺 𑀲𑀢𑁆𑀣𑀓𑁂𑀦 𑀉𑀘𑁆𑀙𑀼𑀆𑀤𑀻𑀲𑀼 𑀨𑀸𑀮𑀺𑀢𑁂𑀲𑀼 𑀫𑀮𑀁 𑀧𑀜𑁆𑀜𑀸𑀬𑀢𑀺, 𑀏𑀢𑀁 𑀦𑀯𑀲𑀫𑀼𑀝𑁆𑀞𑀺𑀢𑀁 𑀦𑀸𑀫 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀢𑁆𑀣𑀓𑀁 𑀥𑁄𑀯𑀺𑀢𑁆𑀯𑀸 𑀨𑀸𑀮𑀺𑀢𑁂𑀲𑀼 𑀫𑀮𑀁 𑀦 𑀧𑀜𑁆𑀜𑀸𑀬𑀢𑀺, 𑀮𑁄𑀳𑀕𑀦𑁆𑀥𑀫𑀢𑁆𑀢𑀁 𑀳𑁄𑀢𑀺, 𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀁. 𑀬𑀫𑁆𑀧𑀺 𑀲𑀢𑁆𑀣𑀓𑀁 𑀕𑀳𑁂𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑀺, 𑀢𑁂𑀦 𑀨𑀸𑀮𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀦 𑀳𑀺 𑀢𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀧𑀭𑀺𑀳𑀭𑀦𑁆𑀢𑀻𑀢𑀺. 𑀫𑀽𑀮𑀪𑁂𑀲𑀚𑁆𑀚𑀸𑀤𑀻𑀦𑀺 𑀧𑀺𑀲𑀦𑁆𑀢𑀸𑀦𑀁 𑀯𑀸 𑀓𑁄𑀝𑁆𑀝𑁂𑀦𑁆𑀢𑀸𑀦𑀁 𑀯𑀸 𑀦𑀺𑀲𑀤𑀦𑀺𑀲𑀤𑀧𑁄𑀢𑀓𑀉𑀤𑀼𑀓𑁆𑀔𑀮𑀫𑀼𑀲𑀮𑀸𑀤𑀻𑀦𑀺 𑀔𑀺𑀬𑁆𑀬𑀦𑁆𑀢𑀺, 𑀧𑀭𑀺𑀳𑀭𑀡𑀓𑀯𑀸𑀲𑀺𑀁 𑀢𑀸𑀧𑁂𑀢𑁆𑀯𑀸 𑀪𑁂𑀲𑀚𑁆𑀚𑀢𑁆𑀣𑀸𑀬 𑀢𑀓𑁆𑀓𑁂 𑀯𑀸 𑀔𑀻𑀭𑁂 𑀯𑀸 𑀧𑀓𑁆𑀔𑀺𑀧𑀦𑁆𑀢𑀺, 𑀢𑀢𑁆𑀣 𑀦𑀻𑀮𑀺𑀓𑀸 𑀧𑀜𑁆𑀜𑀸𑀬𑀢𑀺. 𑀲𑀢𑁆𑀣𑀓𑁂 𑀯𑀼𑀢𑁆𑀢𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄. 𑀆𑀫𑀓𑀢𑀓𑁆𑀓𑀸𑀤𑀻𑀲𑀼 𑀧𑀦 𑀲𑀬𑀁 𑀦 𑀧𑀓𑁆𑀔𑀺𑀧𑀺𑀢𑀩𑁆𑀩𑀸. 𑀧𑀓𑁆𑀔𑀺𑀧𑀢𑀺 𑀘𑁂, 𑀲𑀸𑀫𑀧𑀸𑀓𑀢𑁄 𑀦 𑀫𑀼𑀘𑁆𑀘𑀢𑀺.

𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲 𑀲𑀭𑀻𑀭𑀢𑁄 𑀯𑀸 𑀘𑀻𑀯𑀭𑀢𑁄 𑀯𑀸 𑀓𑀺𑀮𑀺𑀝𑁆𑀞𑀉𑀤𑀓𑀁 𑀧𑀢𑁆𑀢𑁂 𑀧𑀢𑀢𑀺, 𑀢𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀢𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀲𑀢𑁆𑀢𑀸𑀳𑀁 𑀯𑀲𑁆𑀲𑀦𑁆𑀢𑁂 𑀤𑁂𑀯𑁂 𑀲𑀼𑀤𑁆𑀥𑀁 𑀉𑀤𑀓𑀁 𑀳𑁄𑀢𑀺, 𑀅𑀩𑁆𑀪𑁄𑀓𑀸𑀲𑀢𑁄 𑀯𑀸 𑀧𑀢𑀢𑀺, 𑀯𑀝𑁆𑀝𑀢𑀺. 𑀲𑀸𑀫𑀡𑁂𑀭𑀲𑁆𑀲 𑀑𑀤𑀦𑀁 𑀤𑁂𑀦𑁆𑀢𑁂𑀦 𑀢𑀲𑁆𑀲 𑀧𑀢𑁆𑀢𑀕𑀢𑀁 𑀅𑀘𑁆𑀙𑀼𑀧𑀦𑁆𑀢𑁂𑀦𑁂𑀯 𑀤𑀸𑀢𑀩𑁆𑀩𑁄. 𑀧𑀢𑁆𑀢𑁄 𑀯𑀸𑀲𑁆𑀲 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄. 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑁂 𑀑𑀤𑀦𑀁 𑀙𑀼𑀧𑀺𑀢𑁆𑀯𑀸 𑀧𑀼𑀦 𑀅𑀢𑁆𑀢𑀦𑁄 𑀧𑀢𑁆𑀢𑁂 𑀑𑀤𑀦𑀁 𑀕𑀡𑁆𑀳𑀦𑁆𑀢𑀲𑁆𑀲 𑀉𑀕𑁆𑀕𑀳𑀺𑀢𑀓𑁄 𑀳𑁄𑀢𑀺.

𑀲𑀘𑁂 𑀧𑀦 𑀤𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀆𑀳𑀭 𑀲𑀸𑀫𑀡𑁂𑀭 𑀧𑀢𑁆𑀢𑀁, 𑀑𑀤𑀦𑀁 𑀕𑀡𑁆𑀳𑀸’’𑀢𑀺 𑀯𑀤𑀢𑀺, 𑀇𑀢𑀭𑁄 𑀘 ‘‘𑀅𑀮𑀁 𑀫𑀬𑁆𑀳’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀼𑀦 𑀢𑀯𑁂𑀯𑁂𑀢𑀁 𑀫𑀬𑀸 𑀧𑀭𑀺𑀘𑁆𑀘𑀢𑁆𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑁂𑀧𑀺 ‘‘𑀦 𑀫𑀬𑁆𑀳𑀁 𑀏𑀢𑁂𑀦𑀢𑁆𑀣𑁄’’𑀢𑀺 𑀯𑀤𑀢𑀺. 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀧𑀭𑀺𑀘𑁆𑀘𑀚𑀢𑀼, 𑀬𑀸𑀯 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺.

𑀲𑀘𑁂 𑀧𑀦 𑀆𑀥𑀸𑀭𑀓𑁂 𑀞𑀺𑀢𑀁 𑀦𑀺𑀭𑀧𑁂𑀓𑁆𑀔𑁄 ‘‘𑀕𑀡𑁆𑀳𑀸’’𑀢𑀺 𑀯𑀤𑀢𑀺, 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀲𑀸𑀧𑁂𑀓𑁆𑀔𑁄 𑀆𑀥𑀸𑀭𑀓𑁂 𑀧𑀢𑁆𑀢𑀁 𑀞𑀧𑁂𑀢𑁆𑀯𑀸 ‘‘𑀏𑀢𑁆𑀢𑁄 𑀧𑀽𑀯𑀁 𑀯𑀸 𑀪𑀢𑁆𑀢𑀁 𑀯𑀸 𑀕𑀡𑁆𑀳𑀸’’𑀢𑀺 𑀲𑀸𑀫𑀡𑁂𑀭𑀁 𑀯𑀤𑀢𑀺, 𑀲𑀸𑀫𑀡𑁂𑀭𑁄 𑀳𑀢𑁆𑀣𑀁 𑀥𑁄𑀯𑀺𑀢𑁆𑀯𑀸 𑀲𑀘𑁂𑀧𑀺 𑀲𑀢𑀓𑁆𑀔𑀢𑁆𑀢𑀼𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀕𑀢𑀁 𑀅𑀨𑀼𑀲𑀦𑁆𑀢𑁄𑀯 𑀅𑀢𑁆𑀢𑀦𑁄 𑀧𑀢𑁆𑀢𑁂 𑀧𑀓𑁆𑀔𑀺𑀧𑀢𑀺, 𑀧𑀼𑀦 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀬𑀤𑀺 𑀧𑀦 𑀅𑀢𑁆𑀢𑀦𑁄 𑀧𑀢𑁆𑀢𑀕𑀢𑀁 𑀨𑀼𑀲𑀺𑀢𑁆𑀯𑀸 𑀢𑀢𑁄 𑀕𑀡𑁆𑀳𑀸𑀢𑀺, 𑀲𑀸𑀫𑀡𑁂𑀭𑀲𑀦𑁆𑀢𑀓𑁂𑀦 𑀲𑀁𑀲𑀝𑁆𑀞𑀁 𑀳𑁄𑀢𑀺, 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀲𑀘𑁂𑀧𑀺 𑀕𑀬𑁆𑀳𑀫𑀸𑀦𑀁 𑀙𑀺𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀧𑀢𑀢𑀺, 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀁 ‘‘𑀏𑀓𑀁 𑀪𑀢𑁆𑀢𑀧𑀺𑀡𑁆𑀟𑀁 𑀕𑀡𑁆𑀳, 𑀏𑀓𑀁 𑀧𑀽𑀯𑀁 𑀕𑀡𑁆𑀳, 𑀇𑀫𑀲𑁆𑀲 𑀕𑀼𑀴𑀧𑀺𑀡𑁆𑀟𑀲𑁆𑀲 𑀏𑀢𑁆𑀢𑀓𑀁 𑀧𑀤𑁂𑀲𑀁 𑀕𑀡𑁆𑀳𑀸’’𑀢𑀺 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑁂 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀢𑀲𑁆𑀫𑀸 𑀬𑀁 𑀲𑀸𑀫𑀡𑁂𑀭𑀲𑁆𑀲 𑀧𑀢𑁆𑀢𑁂 𑀧𑀢𑀢𑀺, 𑀢𑀤𑁂𑀯 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀺. 𑀳𑀢𑁆𑀣𑀕𑀢𑀁 𑀧𑀦 𑀬𑀸𑀯 𑀲𑀸𑀫𑀡𑁂𑀭𑁄 𑀯𑀸 ‘‘𑀅𑀮’’𑀦𑁆𑀢𑀺 𑀦 𑀑𑀭𑀫𑀢𑀺, 𑀪𑀺𑀓𑁆𑀔𑀼 𑀯𑀸 𑀦 𑀯𑀸𑀭𑁂𑀢𑀺, 𑀢𑀸𑀯 𑀪𑀺𑀓𑁆𑀔𑀼𑀲𑁆𑀲𑁂𑀯 𑀲𑀦𑁆𑀢𑀓𑀁, 𑀢𑀲𑁆𑀫𑀸 𑀧𑀝𑀺𑀕𑁆𑀕𑀳𑀡𑀁 𑀦 𑀯𑀺𑀚𑀳𑀢𑀺.

𑀲𑀘𑁂 𑀅𑀢𑁆𑀢𑀦𑁄 𑀯𑀸 𑀪𑀺𑀓𑁆𑀔𑀽𑀦𑀁 𑀯𑀸 𑀬𑀸𑀕𑀼𑀧𑀘𑀦𑀓𑀪𑀸𑀚𑀦𑁂 𑀓𑁂𑀲𑀜𑁆𑀘𑀺 𑀅𑀢𑁆𑀣𑀸𑀬 𑀑𑀤𑀦𑀁 𑀧𑀓𑁆𑀔𑀺𑀧𑀢𑀺, ‘‘𑀲𑀸𑀫𑀡𑁂𑀭, 𑀪𑀸𑀚𑀦𑀲𑁆𑀲 𑀉𑀧𑀭𑀺 𑀳𑀢𑁆𑀣𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑁂 𑀧𑀓𑁆𑀔𑀺𑀧𑀺𑀢𑀩𑁆𑀩𑀁, 𑀢𑀲𑁆𑀲 𑀳𑀢𑁆𑀣𑀢𑁄 𑀪𑀸𑀚𑀦𑁂 𑀧𑀢𑀺𑀢𑀜𑁆𑀳𑀺 𑀤𑀼𑀢𑀺𑀬𑀤𑀺𑀯𑀲𑁂 𑀪𑀸𑀚𑀦𑀲𑁆𑀲 𑀅𑀓𑀧𑁆𑀧𑀺𑀬𑀪𑀸𑀯𑀁 𑀦 𑀓𑀭𑁄𑀢𑀺, 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸. 𑀲𑀘𑁂 𑀏𑀯𑀁 𑀅𑀓𑀢𑁆𑀯𑀸 𑀧𑀓𑁆𑀔𑀺𑀧𑀢𑀺, 𑀧𑀢𑁆𑀢𑀫𑀺𑀯 𑀪𑀸𑀚𑀦𑀁 𑀦𑀺𑀭𑀸𑀫𑀺𑀲𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀤𑀸𑀬𑀓𑀸 𑀬𑀸𑀕𑀼𑀓𑀼𑀝𑀁 𑀞𑀧𑁂𑀢𑁆𑀯𑀸 𑀕𑀢𑀸, 𑀢𑀁 𑀤𑀳𑀭𑀲𑀸𑀫𑀡𑁂𑀭𑁄 𑀧𑀝𑀺𑀕𑁆𑀕𑀡𑁆𑀳𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀪𑀺𑀓𑁆𑀔𑀼 𑀧𑀢𑁆𑀢𑀁 𑀉𑀧𑀦𑀸𑀫𑁂𑀢𑀺, 𑀲𑀸𑀫𑀡𑁂𑀭𑁄 𑀓𑀼𑀝𑀲𑁆𑀲 𑀕𑀻𑀯𑀁 𑀧𑀢𑁆𑀢𑀲𑁆𑀲 𑀫𑀼𑀔𑀯𑀝𑁆𑀝𑀺𑀬𑀁 𑀞𑀧𑁂𑀢𑁆𑀯𑀸 𑀆𑀯𑀚𑁆𑀚𑁂𑀢𑀺, 𑀧𑀢𑁆𑀢𑀕𑀢𑀸 𑀬𑀸𑀕𑀼 𑀧𑀝𑀺𑀕𑁆𑀕𑀳𑀺𑀢𑀸𑀯 𑀳𑁄𑀢𑀺. 𑀅𑀣 𑀯𑀸 𑀪𑀺𑀓𑁆𑀔𑀼 𑀪𑀽𑀫𑀺𑀬𑀁 𑀳𑀢𑁆𑀣𑀁 𑀞𑀧𑁂𑀢𑀺, 𑀲𑀸𑀫𑀡𑁂𑀭𑁄 𑀧𑀯𑀝𑁆𑀝𑁂𑀢𑁆𑀯𑀸 𑀢𑀢𑁆𑀣 𑀆𑀭𑁄𑀧𑁂𑀢𑀺, 𑀯𑀝𑁆𑀝𑀢𑀺. 𑀧𑀽𑀯𑀧𑀘𑁆𑀙𑀺𑀪𑀢𑁆𑀢𑀧𑀘𑁆𑀙𑀺𑀉𑀘𑁆𑀙𑀼𑀪𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀘𑁂 𑀧𑀝𑀺𑀕𑁆𑀕𑀳𑀡𑀽𑀧𑀕𑀁 𑀪𑀸𑀭𑀁 𑀤𑁆𑀯𑁂 𑀢𑀬𑁄 𑀲𑀸𑀫𑀡𑁂𑀭𑀸 𑀤𑁂𑀦𑁆𑀢𑀺, 𑀏𑀓𑁂𑀦 𑀯𑀸 𑀩𑀮𑀯𑀢𑀸 𑀉𑀓𑁆𑀔𑀺𑀢𑁆𑀢𑀁 𑀤𑁆𑀯𑁂 𑀢𑀬𑁄 𑀪𑀺𑀓𑁆𑀔𑀽 𑀕𑀡𑁆𑀳𑀦𑁆𑀢𑀺, 𑀯𑀝𑁆𑀝𑀢𑀺. 𑀫𑀜𑁆𑀘𑀲𑁆𑀲 𑀯𑀸 𑀧𑀻𑀞𑀲𑁆𑀲 𑀯𑀸 𑀧𑀸𑀤𑁂 𑀢𑁂𑀮𑀖𑀝𑀁 𑀯𑀸 𑀨𑀸𑀡𑀺𑀢𑀖𑀝𑀁 𑀯𑀸 𑀦𑀯𑀦𑀻𑀢𑀖𑀝𑀁 𑀯𑀸 𑀮𑀕𑁆𑀕𑁂𑀦𑁆𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀫𑀜𑁆𑀘𑁂𑀧𑀺 𑀧𑀻𑀞𑁂𑀧𑀺 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀉𑀕𑁆𑀕𑀳𑀺𑀢𑀓𑀁 𑀦𑀸𑀫 𑀦 𑀳𑁄𑀢𑀺.

𑀦𑀸𑀕𑀤𑀦𑁆𑀢𑀓𑁂 𑀯𑀸 𑀅𑀗𑁆𑀓𑀼𑀲𑀓𑁂 𑀯𑀸 𑀤𑁆𑀯𑁂 𑀢𑁂𑀮𑀖𑀝𑀸 𑀮𑀕𑁆𑀕𑀺𑀢𑀸 𑀳𑁄𑀦𑁆𑀢𑀺, 𑀉𑀧𑀭𑀺 𑀧𑀝𑀺𑀕𑁆𑀕𑀳𑀺𑀢𑀓𑁄 𑀳𑁂𑀝𑁆𑀞𑀸 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑁄, 𑀉𑀧𑀭𑀺𑀫𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀳𑁂𑀝𑁆𑀞𑀸 𑀧𑀝𑀺𑀕𑁆𑀕𑀳𑀺𑀢𑀓𑁄 𑀉𑀧𑀭𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑁄, 𑀉𑀧𑀭𑀺𑀫𑀁 𑀕𑀳𑁂𑀢𑁆𑀯𑀸 𑀇𑀢𑀭𑀁 𑀕𑀡𑁆𑀳𑀢𑁄 𑀉𑀧𑀭𑀺𑀫𑁄 𑀉𑀕𑁆𑀕𑀳𑀺𑀢𑀓𑁄 𑀳𑁄𑀢𑀺. 𑀳𑁂𑀝𑁆𑀞𑀸𑀫𑀜𑁆𑀘𑁂 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀢𑁂𑀮𑀣𑀸𑀮𑀓𑀁 𑀳𑁄𑀢𑀺, 𑀢𑀁 𑀘𑁂 𑀲𑀫𑁆𑀫𑀚𑁆𑀚𑀦𑁆𑀢𑁄 𑀲𑀫𑁆𑀫𑀼𑀜𑁆𑀚𑀦𑀺𑀬𑀸 𑀖𑀝𑁆𑀝𑁂𑀢𑀺, 𑀉𑀕𑁆𑀕𑀳𑀺𑀢𑀓𑀁 𑀦 𑀳𑁄𑀢𑀺. 𑀧𑀝𑀺𑀕𑁆𑀕𑀳𑀺𑀢𑀓𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀕𑀳𑁂𑀢𑁆𑀯𑀸 𑀜𑀢𑁆𑀯𑀸 𑀧𑀼𑀦 𑀞𑀧𑁂𑀢𑀺, 𑀉𑀕𑁆𑀕𑀳𑀺𑀢𑀓𑀁 𑀦 𑀳𑁄𑀢𑀺. 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀲𑀜𑁆𑀚𑀸𑀦𑀸𑀢𑀺, 𑀩𑀳𑀺 𑀅𑀝𑁆𑀞𑀧𑁂𑀢𑁆𑀯𑀸 𑀳𑀭𑀺𑀢𑁆𑀯𑀸 𑀢𑀢𑁆𑀣𑁂𑀯 𑀞𑀧𑁂𑀢𑀩𑁆𑀩𑀁, 𑀦𑀢𑁆𑀣𑀺 𑀤𑁄𑀲𑁄. 𑀲𑀘𑁂 𑀧𑀦 𑀧𑀼𑀩𑁆𑀩𑁂 𑀯𑀺𑀯𑀭𑀺𑀢𑁆𑀯𑀸 𑀞𑀧𑀺𑀢𑀁 𑀦 𑀧𑀺𑀤𑀳𑀺𑀢𑀩𑁆𑀩𑀁; 𑀬𑀣𑀸 𑀧𑀼𑀩𑁆𑀩𑁂 𑀞𑀺𑀢𑀁 𑀢𑀣𑁂𑀯 𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀩𑀳𑀺 𑀞𑀧𑁂𑀢𑀺, 𑀧𑀼𑀦 𑀦 𑀙𑀼𑀧𑀺𑀢𑀩𑁆𑀩𑀁.

𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀭𑁄𑀳𑀦𑁆𑀢𑁄 𑀦𑀺𑀲𑁆𑀲𑁂𑀡𑀺𑀫𑀚𑁆𑀛𑁂 𑀲𑀜𑁆𑀚𑀸𑀦𑀸𑀢𑀺, 𑀅𑀦𑁄𑀓𑀸𑀲𑀢𑁆𑀢𑀸 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀳𑀭𑀺𑀢𑁆𑀯𑀸 𑀞𑀧𑁂𑀢𑀩𑁆𑀩𑀁. 𑀧𑀝𑀺𑀕𑁆𑀕𑀳𑀺𑀢𑀓𑁂 𑀢𑁂𑀮𑀸𑀤𑀺𑀫𑁆𑀳𑀺 𑀓𑀡𑁆𑀡𑀓𑀁 𑀉𑀝𑁆𑀞𑁂𑀢𑀺, 𑀲𑀺𑀗𑁆𑀕𑀺𑀯𑁂𑀭𑀸𑀤𑀺𑀫𑁆𑀳𑀺 𑀖𑀦𑀘𑀼𑀡𑁆𑀡𑀁, 𑀢𑀁𑀲𑀫𑀼𑀝𑁆𑀞𑀸𑀦𑀫𑁂𑀯 𑀦𑀸𑀫𑁂𑀢𑀁, 𑀧𑀼𑀦 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺.

𑀢𑀸𑀮𑀁 𑀯𑀸 𑀦𑀸𑀴𑀺𑀓𑁂𑀭𑀁 𑀯𑀸 𑀆𑀭𑀼𑀴𑁆𑀳𑁄 𑀬𑁄𑀢𑁆𑀢𑁂𑀦 𑀨𑀮𑀧𑀺𑀡𑁆𑀟𑀺𑀁 𑀑𑀢𑀸𑀭𑁂𑀢𑁆𑀯𑀸 𑀉𑀧𑀭𑀺 𑀞𑀺𑀢𑁄𑀯 𑀕𑀡𑁆𑀳𑀣𑀸𑀢𑀺 𑀯𑀤𑀢𑀺, 𑀦 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀅𑀜𑁆𑀜𑁄 𑀪𑀽𑀫𑀺𑀬𑀁 𑀞𑀺𑀢𑁄 𑀬𑁄𑀢𑁆𑀢𑀧𑀸𑀲𑀓𑁂 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀢𑀺, 𑀯𑀝𑁆𑀝𑀢𑀺. 𑀲𑀨𑀮𑀁 𑀫𑀳𑀸𑀲𑀸𑀔𑀁 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑁆𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀨𑀮𑀸𑀦𑀺 𑀧𑀝𑀺𑀕𑁆𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀅𑀦𑁆𑀢𑁄𑀯𑀢𑀺𑀬𑀁 𑀞𑀢𑁆𑀯𑀸 𑀯𑀢𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀉𑀘𑁆𑀙𑀼𑀁 𑀯𑀸 𑀢𑀺𑀫𑁆𑀩𑀭𑀽𑀲𑀓𑀁 𑀯𑀸 𑀤𑁂𑀦𑁆𑀢𑀺, 𑀳𑀢𑁆𑀣𑀧𑀸𑀲𑁂 𑀲𑀢𑀺 𑀯𑀝𑁆𑀝𑀢𑀺. 𑀯𑀢𑀺𑀤𑀡𑁆𑀟𑀓𑁂𑀲𑀼 𑀅𑀧𑁆𑀧𑀳𑀭𑀺𑀢𑁆𑀯𑀸 𑀦𑀺𑀕𑁆𑀕𑀢𑀁 𑀕𑀡𑁆𑀳𑀦𑁆𑀢𑀲𑁆𑀲 𑀯𑀝𑁆𑀝𑀢𑀺. 𑀧𑀳𑀭𑀺𑀢𑁆𑀯𑀸 𑀦𑀺𑀕𑁆𑀕𑀢𑁂 𑀅𑀝𑁆𑀞𑀓𑀣𑀸𑀲𑀼 𑀤𑁄𑀲𑁄 𑀦 𑀤𑀲𑁆𑀲𑀺𑀢𑁄. 𑀫𑀬𑀁 𑀧𑀦 𑀬𑀁 𑀞𑀸𑀦𑀁 𑀧𑀳𑀝𑀁, 𑀢𑀢𑁄 𑀲𑀬𑀁𑀧𑀢𑀺𑀢𑀫𑁂𑀯 𑀳𑁄𑀢𑀻𑀢𑀺 𑀢𑀓𑁆𑀓𑀬𑀸𑀫. 𑀢𑀲𑁆𑀫𑀺𑀫𑁆𑀧𑀺 𑀅𑀝𑁆𑀞𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀬𑀼𑀚𑁆𑀚𑀢𑀺, 𑀲𑀼𑀗𑁆𑀓𑀖𑀸𑀢𑀢𑁄 𑀧𑀯𑀝𑁆𑀝𑁂𑀢𑁆𑀯𑀸 𑀩𑀳𑀺𑀧𑀢𑀺𑀢𑀪𑀡𑁆𑀟𑀁 𑀯𑀺𑀬. 𑀯𑀢𑀺𑀁 𑀯𑀸 𑀧𑀸𑀓𑀸𑀭𑀁 𑀯𑀸 𑀮𑀗𑁆𑀖𑀸𑀧𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀲𑀘𑁂 𑀧𑀦 𑀦 𑀧𑀼𑀣𑀼𑀮𑁄 𑀧𑀸𑀓𑀸𑀭𑁄, 𑀅𑀦𑁆𑀢𑁄𑀧𑀸𑀓𑀸𑀭𑁂 𑀘 𑀩𑀳𑀺𑀧𑀸𑀓𑀸𑀭𑁂 𑀘 𑀞𑀺𑀢𑀲𑁆𑀲 𑀳𑀢𑁆𑀣𑀧𑀸𑀲𑁄 𑀧𑀳𑁄𑀢𑀺, 𑀳𑀢𑁆𑀣𑀲𑀢𑀫𑁆𑀧𑀺 𑀉𑀤𑁆𑀥𑀁 𑀕𑀦𑁆𑀢𑁆𑀯𑀸 𑀲𑀫𑁆𑀧𑀢𑁆𑀢𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀪𑀺𑀓𑁆𑀔𑀼 𑀕𑀺𑀮𑀸𑀦𑀁 𑀲𑀸𑀫𑀡𑁂𑀭𑀁 𑀔𑀦𑁆𑀥𑁂𑀦 𑀯𑀳𑀢𑀺, 𑀲𑁄 𑀨𑀮𑀸𑀨𑀮𑀁 𑀤𑀺𑀲𑁆𑀯𑀸 𑀕𑀳𑁂𑀢𑁆𑀯𑀸 𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑁄𑀯 𑀤𑁂𑀢𑀺, 𑀯𑀝𑁆𑀝𑀢𑀺. 𑀅𑀧𑀭𑁄 𑀪𑀺𑀓𑁆𑀔𑀼𑀁 𑀯𑀳𑀦𑁆𑀢𑁄 𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀢𑀺, 𑀯𑀝𑁆𑀝𑀢𑀺𑀬𑁂𑀯.

𑀪𑀺𑀓𑁆𑀔𑀼 𑀨𑀮𑀺𑀦𑀺𑀁 𑀲𑀸𑀔𑀁 𑀙𑀸𑀬𑀢𑁆𑀣𑀸𑀬 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀨𑀮𑀸𑀦𑀺 𑀔𑀸𑀤𑀺𑀢𑀼𑀁 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀧𑀝𑀺𑀕𑁆𑀕𑀳𑀸𑀧𑁂𑀢𑁆𑀯𑀸 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀘𑁆𑀙𑀺𑀓𑀯𑀸𑀭𑀡𑀢𑁆𑀣𑀁 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑁆𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀔𑀸𑀤𑀺𑀢𑀼𑀓𑀸𑀫𑁄 𑀘𑁂 𑀳𑁄𑀢𑀺, 𑀫𑀽𑀮𑀧𑀝𑀺𑀕𑁆𑀕𑀳𑀡𑀫𑁂𑀯 𑀯𑀝𑁆𑀝𑀢𑀺, 𑀔𑀸𑀤𑀦𑁆𑀢𑀲𑁆𑀲 𑀦𑀢𑁆𑀣𑀺 𑀤𑁄𑀲𑁄.

𑀪𑀺𑀓𑁆𑀔𑀼 𑀧𑀝𑀺𑀕𑁆𑀕𑀳𑀡𑀸𑀭𑀳𑀁 𑀪𑀡𑁆𑀟𑀁 𑀫𑀦𑀼𑀲𑁆𑀲𑀸𑀦𑀁 𑀬𑀸𑀦𑁂 𑀞𑀧𑁂𑀢𑁆𑀯𑀸 𑀫𑀕𑁆𑀕𑀁 𑀕𑀘𑁆𑀙𑀢𑀺, 𑀬𑀸𑀦𑀁 𑀓𑀤𑁆𑀤𑀫𑁂 𑀮𑀕𑁆𑀕𑀢𑀺, 𑀤𑀳𑀭𑁄 𑀘𑀓𑁆𑀓𑀁 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀢𑀺, 𑀯𑀝𑁆𑀝𑀢𑀺, 𑀉𑀕𑁆𑀕𑀳𑀺𑀢𑀓𑀁 𑀦𑀸𑀫 𑀦 𑀳𑁄𑀢𑀺. 𑀦𑀸𑀯𑀸𑀬 𑀞𑀧𑁂𑀢𑁆𑀯𑀸 𑀦𑀸𑀯𑀁 𑀅𑀭𑀺𑀢𑁆𑀢𑁂𑀦 𑀯𑀸 𑀧𑀸𑀚𑁂𑀢𑀺, 𑀳𑀢𑁆𑀣𑁂𑀦 𑀯𑀸 𑀓𑀟𑁆𑀠𑀢𑀺, 𑀯𑀝𑁆𑀝𑀢𑀺. 𑀉𑀴𑀼𑀫𑁆𑀧𑁂𑀧𑀺 𑀏𑀲𑁂𑀯 𑀦𑀬𑁄. 𑀘𑀸𑀝𑀺𑀬𑀁 𑀓𑀼𑀡𑁆𑀟𑀓𑁂 𑀯𑀸 𑀞𑀧𑁂𑀢𑁆𑀯𑀸𑀧𑀺 𑀢𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀕𑀸𑀳𑀸𑀧𑁂𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀢𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀢𑀁 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀢𑀭𑀺𑀢𑀼𑀁 𑀯𑀝𑁆𑀝𑀢𑀺.

𑀉𑀧𑀸𑀲𑀓𑀸 𑀕𑀫𑀺𑀓𑀪𑀺𑀓𑁆𑀔𑀽𑀦𑀁 𑀧𑀸𑀣𑁂𑀬𑁆𑀬𑀢𑀡𑁆𑀟𑀼𑀮𑁂 𑀤𑁂𑀦𑁆𑀢𑀺. 𑀲𑀸𑀫𑀡𑁂𑀭𑀸 𑀪𑀺𑀓𑁆𑀔𑀽𑀦𑀁 𑀢𑀡𑁆𑀟𑀼𑀮𑁂 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀢𑀡𑁆𑀟𑀼𑀮𑁂 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀪𑀺𑀓𑁆𑀔𑀽 𑀢𑁂𑀲𑀁 𑀢𑀡𑁆𑀟𑀼𑀮𑁂 𑀕𑀡𑁆𑀳𑀦𑁆𑀢𑀺. 𑀲𑀸𑀫𑀡𑁂𑀭𑀸 𑀅𑀢𑁆𑀢𑀦𑀸 𑀕𑀳𑀺𑀢𑀢𑀡𑁆𑀟𑀼𑀮𑁂𑀲𑀼 𑀔𑀻𑀡𑁂𑀲𑀼 𑀇𑀢𑀭𑁂𑀳𑀺 𑀢𑀡𑁆𑀟𑀼𑀮𑁂𑀳𑀺 𑀬𑀸𑀕𑀼𑀁 𑀧𑀘𑀺𑀢𑁆𑀯𑀸 𑀲𑀩𑁆𑀩𑁂𑀲𑀁 𑀧𑀢𑁆𑀢𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑁆𑀯𑀸 𑀬𑀸𑀕𑀼𑀁 𑀆𑀓𑀺𑀭𑀦𑁆𑀢𑀺. 𑀧𑀡𑁆𑀟𑀺𑀢𑁄 𑀲𑀸𑀫𑀡𑁂𑀭𑁄 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀤𑁂𑀢𑀺, 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀅𑀦𑀼𑀣𑁂𑀭𑀲𑁆𑀲𑀸𑀢𑀺 𑀏𑀯𑀁 𑀲𑀩𑁆𑀩𑀸𑀦𑀺 𑀧𑀭𑀺𑀯𑀢𑁆𑀢𑁂𑀢𑀺, 𑀲𑀩𑁆𑀩𑁂𑀳𑀺 𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀓𑀁 𑀪𑀼𑀢𑁆𑀢𑀁 𑀳𑁄𑀢𑀺, 𑀯𑀝𑁆𑀝𑀢𑀺.

𑀲𑀘𑁂𑀧𑀺 𑀲𑀸𑀫𑀡𑁂𑀭𑁄 𑀅𑀧𑀡𑁆𑀟𑀺𑀢𑁄 𑀳𑁄𑀢𑀺, 𑀅𑀢𑁆𑀢𑀦𑁄 𑀧𑀢𑁆𑀢𑁂 𑀬𑀸𑀕𑀼𑀁 𑀲𑀬𑀫𑁂𑀯 𑀧𑀸𑀢𑀼𑀁 𑀆𑀭𑀪𑀢𑀺, ‘‘𑀆𑀯𑀼𑀲𑁄 𑀢𑀼𑀬𑁆𑀳𑀁 𑀬𑀸𑀕𑀼𑀁 𑀫𑀬𑁆𑀳𑀁 𑀤𑁂𑀳𑀻’’𑀢𑀺 𑀏𑀯𑀁 𑀣𑁂𑀭𑁂𑀳𑀺 𑀧𑀝𑀺𑀧𑀸𑀝𑀺𑀬𑀸 𑀬𑀸𑀘𑀺𑀢𑁆𑀯𑀸𑀧𑀺 𑀧𑀺𑀯𑀺𑀢𑀼𑀁 𑀯𑀝𑁆𑀝𑀢𑀺, 𑀲𑀩𑁆𑀩𑁂𑀳𑀺 𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀓𑀫𑁂𑀯 𑀪𑀼𑀢𑁆𑀢𑀁 𑀳𑁄𑀢𑀺, 𑀦𑁂𑀯 𑀉𑀕𑁆𑀕𑀳𑀺𑀢𑀧𑀘𑁆𑀘𑀬𑀸 𑀦 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀯𑀚𑁆𑀚𑀁 𑀨𑀼𑀲𑀦𑁆𑀢𑀺. 𑀏𑀢𑁆𑀣 𑀧𑀦 𑀫𑀸𑀢𑀸𑀧𑀺𑀢𑀽𑀦𑀁 𑀢𑁂𑀮𑀸𑀤𑀻𑀦𑀺 𑀙𑀸𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 𑀲𑀸𑀔𑀸𑀤𑀻𑀦𑀺 𑀘 𑀳𑀭𑀦𑁆𑀢𑀸𑀦𑀁 𑀇𑀫𑁂𑀲𑀜𑁆𑀘 𑀯𑀺𑀲𑁂𑀲𑁄 𑀦 𑀤𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀓𑀸𑀭𑀡𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁.

𑀲𑀸𑀫𑀡𑁂𑀭𑁄 𑀪𑀢𑁆𑀢𑀁 𑀧𑀘𑀺𑀢𑀼𑀓𑀸𑀫𑁄 𑀢𑀡𑁆𑀟𑀼𑀮𑁂 𑀥𑁄𑀯𑀺𑀢𑁆𑀯𑀸 𑀦𑀺𑀘𑁆𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀪𑀺𑀓𑁆𑀔𑀼𑀦𑀸 𑀢𑀡𑁆𑀟𑀼𑀮𑁂 𑀘 𑀪𑀸𑀚𑀦𑀜𑁆𑀘 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀡𑁆𑀟𑀼𑀮𑁂 𑀥𑁄𑀯𑀺𑀢𑁆𑀯𑀸 𑀦𑀺𑀘𑁆𑀘𑀸𑀮𑁂𑀢𑁆𑀯𑀸 𑀪𑀸𑀚𑀦𑀁 𑀉𑀤𑁆𑀥𑀦𑀁 𑀆𑀭𑁄𑀧𑁂𑀢𑀩𑁆𑀩𑀁, 𑀅𑀕𑁆𑀕𑀺 𑀦 𑀓𑀸𑀢𑀩𑁆𑀩𑁄, 𑀧𑀓𑁆𑀓𑀓𑀸𑀮𑁂 𑀯𑀺𑀯𑀭𑀺𑀢𑁆𑀯𑀸 𑀧𑀓𑁆𑀓𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄. 𑀲𑀘𑁂 𑀤𑀼𑀧𑁆𑀧𑀓𑁆𑀓𑀁 𑀳𑁄𑀢𑀺, 𑀧𑀸𑀓𑀢𑁆𑀣𑀸𑀬 𑀧𑀺𑀤𑀳𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀭𑀚𑀲𑁆𑀲 𑀯𑀸 𑀙𑀸𑀭𑀺𑀓𑀸𑀬 𑀯𑀸 𑀅𑀧𑀢𑀦𑀢𑁆𑀣𑀸𑀬 𑀯𑀝𑁆𑀝𑀢𑀺, 𑀧𑀓𑁆𑀓𑀓𑀸𑀮𑁂 𑀆𑀭𑁄𑀧𑁂𑀢𑀼𑀫𑁆𑀧𑀺 𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀼𑀦 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺.

𑀲𑀸𑀫𑀡𑁂𑀭𑁄 𑀧𑀝𑀺𑀩𑀮𑁄 𑀧𑀘𑀺𑀢𑀼𑀁, 𑀔𑀡𑁄 𑀧𑀦𑀲𑁆𑀲 𑀦𑀢𑁆𑀣𑀺, 𑀓𑀢𑁆𑀣𑀘𑀺 𑀕𑀦𑁆𑀢𑀼𑀓𑀸𑀫𑁄. 𑀪𑀺𑀓𑁆𑀔𑀼𑀦𑀸 𑀲𑀢𑀡𑁆𑀟𑀼𑀮𑁄𑀤𑀓𑀪𑀸𑀚𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀉𑀤𑁆𑀥𑀦𑀁 𑀆𑀭𑁄𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀕𑀘𑁆𑀙𑀸𑀳𑀻𑀢𑀺 𑀯𑀢𑁆𑀢𑀩𑁆𑀩𑁄. 𑀢𑀢𑁄 𑀧𑀭𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀩𑁆𑀩𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀪𑀺𑀓𑁆𑀔𑀼 𑀬𑀸𑀕𑀼𑀅𑀢𑁆𑀣𑀸𑀬 𑀲𑀼𑀤𑁆𑀥𑀁 𑀪𑀸𑀚𑀦𑀁 𑀆𑀭𑁄𑀧𑁂𑀢𑁆𑀯𑀸 𑀉𑀤𑀓𑀁 𑀢𑀸𑀧𑁂𑀢𑀺, 𑀯𑀝𑁆𑀝𑀢𑀺. 𑀢𑀢𑁆𑀢𑁂 𑀉𑀤𑀓𑁂 𑀲𑀸𑀫𑀡𑁂𑀭𑁄 𑀢𑀡𑁆𑀟𑀼𑀮𑁂 𑀧𑀓𑁆𑀔𑀺𑀧𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼𑀦𑀸 𑀅𑀕𑁆𑀕𑀺 𑀦 𑀓𑀸𑀢𑀩𑁆𑀩𑁄. 𑀧𑀓𑁆𑀓𑀬𑀸𑀕𑀼𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀸𑀢𑀼𑀁 𑀯𑀝𑁆𑀝𑀢𑀺.

𑀲𑀸𑀫𑀡𑁂𑀭𑁄 𑀬𑀸𑀕𑀼𑀁 𑀧𑀘𑀢𑀺, 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀓𑁄 𑀪𑀺𑀓𑁆𑀔𑀼 𑀓𑀻𑀴𑀦𑁆𑀢𑁄 𑀪𑀸𑀚𑀦𑀁 𑀆𑀫𑀲𑀢𑀺, 𑀧𑀺𑀥𑀸𑀦𑀁 𑀆𑀫𑀲𑀢𑀺, 𑀉𑀕𑁆𑀕𑀢𑀁 𑀨𑁂𑀡𑀁 𑀙𑀺𑀦𑁆𑀤𑀺𑀢𑁆𑀯𑀸 𑀳𑀭𑀢𑀺, 𑀢𑀲𑁆𑀲𑁂𑀯 𑀧𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀤𑀼𑀭𑀼𑀧𑀘𑀺𑀡𑁆𑀡𑀁 𑀦𑀸𑀫 𑀳𑁄𑀢𑀺. 𑀲𑀘𑁂 𑀧𑀦 𑀤𑀩𑁆𑀩𑀺𑀁 𑀯𑀸 𑀉𑀴𑀼𑀗𑁆𑀓𑀁 𑀯𑀸 𑀕𑀳𑁂𑀢𑁆𑀯𑀸 𑀅𑀦𑀼𑀓𑁆𑀔𑀺𑀧𑀦𑁆𑀢𑁄 𑀆𑀮𑀼𑀴𑁂𑀢𑀺, 𑀲𑀩𑁆𑀩𑁂𑀲𑀁 𑀦 𑀯𑀝𑁆𑀝𑀢𑀺, 𑀲𑀸𑀫𑀧𑀸𑀓𑀜𑁆𑀘𑁂𑀯 𑀳𑁄𑀢𑀺 𑀤𑀼𑀭𑀼𑀧𑀘𑀺𑀡𑁆𑀡𑀜𑁆𑀘. 𑀲𑀘𑁂 𑀉𑀓𑁆𑀔𑀺𑀧𑀢𑀺, 𑀉𑀕𑁆𑀕𑀳𑀺𑀢𑀓𑀫𑁆𑀧𑀺 𑀳𑁄𑀢𑀺.

𑀪𑀺𑀓𑁆𑀔𑀼𑀦𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀆𑀥𑀸𑀭𑀓𑁂 𑀧𑀢𑁆𑀢𑁄 𑀞𑀧𑀺𑀢𑁄 𑀳𑁄𑀢𑀺, 𑀢𑀢𑁆𑀭 𑀘𑁂 𑀅𑀜𑁆𑀜𑁄 𑀮𑁄𑀮𑀪𑀺𑀓𑁆𑀔𑀼 𑀓𑀻𑀴𑀦𑁆𑀢𑁄 𑀧𑀢𑁆𑀢𑀁 𑀆𑀫𑀲𑀢𑀺, 𑀧𑀢𑁆𑀢𑀧𑀺𑀥𑀸𑀦𑀁 𑀆𑀫𑀲𑀢𑀺, 𑀢𑀲𑁆𑀲𑁂𑀯 𑀢𑀢𑁄 𑀮𑀤𑁆𑀥𑀁 𑀪𑀢𑁆𑀢𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀧𑀢𑁆𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀢𑀺, 𑀲𑀩𑁆𑀩𑁂𑀲𑀁 𑀦 𑀯𑀝𑁆𑀝𑀢𑀺. 𑀢𑀢𑁆𑀣𑀚𑀸𑀢𑀓𑀨𑀮𑀸𑀦𑀺 𑀲𑀸𑀔𑀸𑀬 𑀯𑀸 𑀯𑀮𑁆𑀮𑀺𑀬𑀸 𑀯𑀸 𑀕𑀳𑁂𑀢𑁆𑀯𑀸 𑀘𑀸𑀮𑁂𑀢𑀺, 𑀢𑀲𑁆𑀲𑁂𑀯 𑀢𑀢𑁄 𑀮𑀤𑁆𑀥𑀁 𑀨𑀮𑀁 𑀦 𑀯𑀝𑁆𑀝𑀢𑀺, 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀜𑁆𑀘 𑀆𑀧𑀚𑁆𑀚𑀢𑀺. 𑀨𑀮𑀭𑀼𑀓𑁆𑀔𑀁 𑀧𑀦 𑀅𑀧𑀲𑁆𑀲𑀬𑀺𑀢𑀼𑀁 𑀯𑀸 𑀢𑀢𑁆𑀣 𑀓𑀡𑁆𑀟𑀓𑁂 𑀯𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺, 𑀤𑀼𑀭𑀼𑀧𑀘𑀺𑀡𑁆𑀡𑀁 𑀦 𑀳𑁄𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁.

𑀅𑀭𑀜𑁆𑀜𑁂 𑀧𑀢𑀺𑀢𑀁 𑀧𑀦 𑀅𑀫𑁆𑀩𑀨𑀮𑀸𑀤𑀺𑀁 𑀤𑀺𑀲𑁆𑀯𑀸 𑀲𑀸𑀫𑀡𑁂𑀭𑀲𑁆𑀲 𑀤𑀲𑁆𑀲𑀸𑀫𑀻𑀢𑀺 𑀆𑀳𑀭𑀺𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀻𑀳𑀯𑀺𑀖𑀸𑀲𑀸𑀤𑀺𑀁 𑀤𑀺𑀲𑁆𑀯𑀸𑀧𑀺 𑀲𑀸𑀫𑀡𑁂𑀭𑀲𑁆𑀲 𑀤𑀲𑁆𑀲𑀸𑀫𑀻𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀸 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀸 𑀆𑀳𑀭𑀺𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀲𑀓𑁆𑀓𑁄𑀢𑀺 𑀯𑀺𑀢𑀓𑁆𑀓𑀁 𑀲𑁄𑀥𑁂𑀢𑀼𑀁, 𑀢𑀢𑁄 𑀮𑀤𑁆𑀥𑀁 𑀔𑀸𑀤𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀦𑁂𑀯 𑀆𑀫𑀓𑀫𑀁𑀲𑀧𑀝𑀺𑀕𑁆𑀕𑀳𑀡𑀧𑀘𑁆𑀘𑀬𑀸 𑀦 𑀉𑀕𑁆𑀕𑀳𑀺𑀢𑀓𑀧𑀘𑁆𑀘𑀬𑀸 𑀯𑀚𑁆𑀚𑀁 𑀨𑀼𑀲𑀢𑀺.

𑀫𑀸𑀢𑀸𑀧𑀺𑀢𑀽𑀦𑀁 𑀅𑀢𑁆𑀣𑀸𑀬 𑀢𑁂𑀮𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀩𑁆𑀬𑀸𑀥𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀬𑀁 𑀇𑀘𑁆𑀙𑀢𑀺, 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀫𑀽𑀮𑁂𑀧𑀺 𑀧𑀝𑀺𑀕𑁆𑀕𑀳𑀺𑀢𑀁 𑀳𑁄𑀢𑀺, 𑀧𑀼𑀦 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀫𑀸𑀢𑀸𑀧𑀺𑀢𑀽𑀦𑀁 𑀢𑀡𑁆𑀟𑀼𑀮𑁂 𑀆𑀳𑀭𑀺𑀢𑁆𑀯𑀸 𑀤𑁂𑀢𑀺, 𑀢𑁂 𑀢𑀢𑁄𑀬𑁂𑀯 𑀬𑀸𑀕𑀼𑀆𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀲𑁆𑀲 𑀤𑁂𑀦𑁆𑀢𑀺, 𑀯𑀝𑁆𑀝𑀢𑀺 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀯𑀸 𑀉𑀕𑁆𑀕𑀳𑀺𑀢𑀓𑀧𑀘𑁆𑀘𑀬𑀸 𑀯𑀸 𑀤𑁄𑀲𑁄 𑀦𑀢𑁆𑀣𑀺.

𑀪𑀺𑀓𑁆𑀔𑀼 𑀧𑀺𑀤𑀳𑀺𑀢𑁆𑀯𑀸 𑀉𑀤𑀓𑀁 𑀢𑀸𑀧𑁂𑀢𑀺, 𑀬𑀸𑀯 𑀧𑀭𑀺𑀓𑁆𑀔𑀬𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦𑁂𑀢𑁆𑀣 𑀙𑀸𑀭𑀺𑀓𑀸 𑀧𑀢𑀢𑀺, 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀤𑀻𑀖𑀲𑀡𑁆𑀟𑀸𑀲𑁂𑀦 𑀣𑀸𑀮𑀓𑀁 𑀕𑀳𑁂𑀢𑁆𑀯𑀸 𑀢𑁂𑀮𑀁 𑀧𑀘𑀦𑁆𑀢𑀲𑁆𑀲 𑀙𑀸𑀭𑀺𑀓𑀸 𑀧𑀢𑀢𑀺, 𑀳𑀢𑁆𑀣𑁂𑀦 𑀅𑀫𑀼𑀜𑁆𑀘𑀦𑁆𑀢𑁂𑀦𑁂𑀯 𑀧𑀘𑀺𑀢𑁆𑀯𑀸 𑀑𑀢𑀸𑀭𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀅𑀗𑁆𑀕𑀸𑀭𑀸𑀧𑀺 𑀤𑀸𑀭𑀽𑀦𑀺 𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀸𑀦𑀺, 𑀫𑀽𑀮𑀧𑀝𑀺𑀕𑁆𑀕𑀳𑀡𑀫𑁂𑀯 𑀯𑀝𑁆𑀝𑀢𑀺.

𑀪𑀺𑀓𑁆𑀔𑀼 𑀉𑀘𑁆𑀙𑀼𑀁 𑀔𑀸𑀤𑀢𑀺, 𑀲𑀸𑀫𑀡𑁂𑀭𑁄 ‘‘𑀫𑀬𑁆𑀳𑀫𑁆𑀧𑀺 𑀤𑁂𑀣𑀸’’𑀢𑀺 𑀯𑀤𑀢𑀺. ‘‘𑀇𑀢𑁄 𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀸’’𑀢𑀺 𑀯𑀼𑀢𑁆𑀢𑁄 𑀕𑀡𑁆𑀳𑀸𑀢𑀺, 𑀅𑀯𑀲𑁂𑀲𑁂 𑀧𑀼𑀦 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀕𑀼𑀴𑀧𑀺𑀡𑁆𑀟𑀓𑀁 𑀔𑀸𑀤𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀢𑁆𑀢𑁄𑀓𑀸𑀲𑀢𑁄 𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑀸𑀯𑀲𑁂𑀲𑀜𑁆𑀳𑀺 𑀅𑀚𑀳𑀺𑀢𑀧𑀝𑀺𑀕𑁆𑀕𑀳𑀡𑀫𑁂𑀯 𑀳𑁄𑀢𑀺.

𑀪𑀺𑀓𑁆𑀔𑀼 𑀕𑀼𑀴𑀁 𑀪𑀸𑀚𑁂𑀦𑁆𑀢𑁄 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑁄𑀝𑁆𑀞𑀸𑀲𑁂 𑀓𑀭𑁄𑀢𑀺, 𑀪𑀺𑀓𑁆𑀔𑀽𑀧𑀺 𑀲𑀸𑀫𑀡𑁂𑀭𑀸𑀧𑀺 𑀆𑀕𑀦𑁆𑀢𑁆𑀯𑀸 𑀏𑀓𑀕𑀳𑀡𑁂𑀦𑁂𑀯 𑀏𑀓𑀫𑁂𑀓𑀁 𑀓𑁄𑀝𑁆𑀞𑀸𑀲𑀁 𑀕𑀡𑁆𑀳𑀦𑁆𑀢𑀺, 𑀕𑀳𑀺𑀢𑀸𑀯𑀲𑁂𑀲𑀁 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀲𑀘𑁂 𑀮𑁄𑀮𑀲𑀸𑀫𑀡𑁂𑀭𑁄 𑀕𑀡𑁆𑀳𑀺𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀼𑀦 𑀞𑀧𑁂𑀢𑀺, 𑀢𑀲𑁆𑀲 𑀕𑀳𑀺𑀢𑀸𑀯𑀲𑁂𑀲𑀁 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀳𑁄𑀢𑀺.

𑀪𑀺𑀓𑁆𑀔𑀼 𑀥𑀽𑀫𑀯𑀝𑁆𑀝𑀺𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀥𑀽𑀫𑀁 𑀧𑀺𑀯𑀢𑀺, 𑀫𑀼𑀔𑀜𑁆𑀘 𑀓𑀡𑁆𑀞𑁄 𑀘 𑀫𑀦𑁄𑀲𑀺𑀮𑀸𑀬 𑀮𑀺𑀢𑁆𑀢𑁄 𑀯𑀺𑀬 𑀳𑁄𑀢𑀺, 𑀬𑀸𑀯𑀓𑀸𑀮𑀺𑀓𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀬𑀸𑀯𑀓𑀸𑀮𑀺𑀓𑁂𑀦 𑀬𑀸𑀯𑀚𑀻𑀯𑀺𑀓𑀲𑀁𑀲𑀕𑁆𑀕𑁂 𑀤𑁄𑀲𑁄 𑀦𑀢𑁆𑀣𑀺.

𑀧𑀢𑁆𑀢𑀁 𑀯𑀸 𑀭𑀚𑀦𑀁 𑀯𑀸 𑀧𑀘𑀦𑁆𑀢𑀲𑁆𑀲 𑀓𑀡𑁆𑀡𑀦𑀸𑀲𑀫𑀼𑀔𑀘𑁆𑀙𑀺𑀤𑁆𑀤𑁂𑀳𑀺 𑀥𑀽𑀫𑁄 𑀧𑀯𑀺𑀲𑀢𑀺, 𑀩𑁆𑀬𑀸𑀥𑀺𑀧𑀘𑁆𑀘𑀬𑀸 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀉𑀧𑀲𑀺𑀗𑁆𑀖𑀢𑀺, 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸 𑀯𑀝𑁆𑀝𑀢𑀺. 𑀪𑀢𑁆𑀢𑀼𑀕𑁆𑀕𑀸𑀭𑁄 𑀢𑀸𑀮𑀼𑀁 𑀆𑀳𑀘𑁆𑀘 𑀅𑀦𑁆𑀢𑁄𑀬𑁂𑀯 𑀧𑀯𑀺𑀲𑀢𑀺, 𑀅𑀯𑀺𑀲𑀬𑀢𑁆𑀢𑀸 𑀯𑀝𑁆𑀝𑀢𑀺. 𑀫𑀼𑀔𑀁 𑀧𑀯𑀺𑀝𑁆𑀞𑀁 𑀧𑀦 𑀅𑀚𑁆𑀛𑁄𑀳𑀭𑀢𑁄 𑀯𑀺𑀓𑀸𑀮𑁂 𑀆𑀧𑀢𑁆𑀢𑀺. 𑀤𑀦𑁆𑀢𑀦𑁆𑀢𑀭𑁂 𑀮𑀕𑁆𑀕𑀲𑁆𑀲 𑀆𑀫𑀺𑀲𑀲𑁆𑀲 𑀭𑀲𑁄 𑀧𑀯𑀺𑀲𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀲𑀘𑁂 𑀲𑀼𑀔𑀼𑀫𑀁 𑀆𑀫𑀺𑀲𑀁 𑀳𑁄𑀢𑀺, 𑀭𑀲𑁄 𑀦 𑀧𑀜𑁆𑀜𑀸𑀬𑀢𑀺, 𑀅𑀩𑁆𑀩𑁄𑀳𑀸𑀭𑀺𑀓𑀧𑀓𑁆𑀔𑀁 𑀪𑀚𑀢𑀺.

𑀉𑀧𑀓𑀝𑁆𑀞𑁂 𑀓𑀸𑀮𑁂 𑀦𑀺𑀭𑀼𑀤𑀓𑀝𑁆𑀞𑀸𑀦𑁂 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀓𑀓𑁆𑀔𑀸𑀭𑁂𑀢𑁆𑀯𑀸 𑀤𑁆𑀯𑁂 𑀢𑀬𑁄 𑀔𑁂𑀴𑀧𑀺𑀡𑁆𑀟𑁂 𑀧𑀸𑀢𑁂𑀢𑁆𑀯𑀸 𑀉𑀤𑀓𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑀩𑁆𑀩𑀁. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀲𑀺𑀗𑁆𑀕𑀺𑀯𑁂𑀭𑀸𑀤𑀻𑀦𑀁 𑀅𑀗𑁆𑀓𑀼𑀭𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀧𑀼𑀦 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀮𑁄𑀡𑁂 𑀅𑀲𑀢𑀺 𑀲𑀫𑀼𑀤𑁆𑀤𑁄𑀤𑀓𑁂𑀦 𑀮𑁄𑀡𑀓𑀺𑀘𑁆𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀁 𑀮𑁄𑀡𑁄𑀤𑀓𑀁 𑀮𑁄𑀡𑀁 𑀳𑁄𑀢𑀺, 𑀮𑁄𑀡𑀁 𑀯𑀸 𑀉𑀤𑀓𑀁 𑀳𑁄𑀢𑀺, 𑀭𑀲𑁄 𑀯𑀸 𑀨𑀸𑀡𑀺𑀢𑀁 𑀳𑁄𑀢𑀺, 𑀨𑀸𑀡𑀺𑀢𑀁 𑀯𑀸 𑀭𑀲𑁄 𑀳𑁄𑀢𑀺, 𑀫𑀽𑀮𑀧𑀝𑀺𑀕𑁆𑀕𑀳𑀡𑀫𑁂𑀯 𑀯𑀝𑁆𑀝𑀢𑀺. 𑀳𑀺𑀫𑀓𑀭𑀓𑀸 𑀉𑀤𑀓𑀕𑀢𑀺𑀓𑀸 𑀏𑀯. 𑀧𑀭𑀺𑀳𑀸𑀭𑀺𑀓𑁂𑀦 𑀓𑀢𑀓𑀝𑁆𑀞𑀺𑀦𑀸 𑀉𑀤𑀓𑀁 𑀧𑀲𑀸𑀤𑁂𑀦𑁆𑀢𑀺, 𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀁, 𑀆𑀫𑀺𑀲𑁂𑀦 𑀲𑀤𑁆𑀥𑀺𑀁 𑀯𑀝𑁆𑀝𑀢𑀺. 𑀆𑀫𑀺𑀲𑀕𑀢𑀺𑀓𑁂𑀳𑀺 𑀓𑀧𑀺𑀢𑁆𑀣𑀨𑀮𑀸𑀤𑀻𑀳𑀺 𑀧𑀲𑀸𑀤𑀺𑀢𑀁 𑀧𑀼𑀭𑁂𑀪𑀢𑁆𑀢𑀫𑁂𑀯 𑀯𑀝𑁆𑀝𑀢𑀺.

𑀧𑁄𑀓𑁆𑀔𑀭𑀡𑀻𑀆𑀤𑀻𑀲𑀼 𑀉𑀤𑀓𑀁 𑀩𑀳𑀮𑀁 𑀳𑁄𑀢𑀺, 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀫𑀼𑀔𑁂 𑀘 𑀳𑀢𑁆𑀣𑁂 𑀘 𑀮𑀕𑁆𑀕𑀢𑀺, 𑀦 𑀯𑀝𑁆𑀝𑀢𑀺, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀔𑁂𑀢𑁆𑀢𑁂𑀲𑀼 𑀓𑀲𑀺𑀢𑀝𑁆𑀞𑀸𑀦𑁂 𑀩𑀳𑀮𑀁 𑀉𑀤𑀓𑀁 𑀳𑁄𑀢𑀺, 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀲𑀦𑁆𑀤𑀺𑀢𑁆𑀯𑀸 𑀓𑀦𑁆𑀤𑀭𑀸𑀤𑀻𑀦𑀺 𑀧𑀯𑀺𑀲𑀺𑀢𑁆𑀯𑀸 𑀦𑀤𑀺𑀁 𑀧𑀽𑀭𑁂𑀢𑀺, 𑀯𑀝𑁆𑀝𑀢𑀺. 𑀓𑀓𑀼𑀥𑀲𑁄𑀩𑁆𑀪𑀸𑀤𑀬𑁄 𑀳𑁄𑀦𑁆𑀢𑀺, 𑀭𑀼𑀓𑁆𑀔𑀢𑁄 𑀧𑀢𑀺𑀢𑁂𑀳𑀺 𑀧𑀼𑀧𑁆𑀨𑁂𑀳𑀺 𑀲𑀜𑁆𑀙𑀦𑁆𑀦𑁄𑀤𑀓𑀸, 𑀲𑀘𑁂 𑀧𑀼𑀧𑁆𑀨𑀭𑀲𑁄 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀧𑀭𑀺𑀢𑁆𑀢𑀁 𑀉𑀤𑀓𑀁 𑀳𑁄𑀢𑀺, 𑀭𑀲𑁄 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀧𑀩𑁆𑀩𑀢𑀓𑀦𑁆𑀤𑀭𑀸𑀤𑀻𑀲𑀼 𑀓𑀸𑀴𑀯𑀡𑁆𑀡𑀧𑀡𑁆𑀡𑀲𑀜𑁆𑀙𑀦𑁆𑀦𑀉𑀤𑀓𑁂𑀧𑀺 𑀏𑀲𑁂𑀯 𑀦𑀬𑁄.

𑀧𑀸𑀦𑀻𑀬𑀖𑀝𑁂 𑀲𑀭𑁂𑀡𑀼𑀓𑀸𑀦𑀺 𑀯𑀸 𑀲𑀯𑀡𑁆𑀝𑀔𑀻𑀭𑀸𑀦𑀺 𑀯𑀸 𑀧𑀼𑀧𑁆𑀨𑀸𑀦𑀺 𑀧𑀓𑁆𑀔𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀧𑀼𑀧𑁆𑀨𑀸𑀦𑀺 𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀺. 𑀧𑀸𑀝𑀮𑀺𑀘𑀫𑁆𑀧𑀓𑀫𑀮𑁆𑀮𑀺𑀓𑀸 𑀧𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀯𑀸𑀲𑀫𑀢𑁆𑀢𑀁 𑀢𑀺𑀝𑁆𑀞𑀢𑀺 𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀁, 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀆𑀫𑀺𑀲𑁂𑀦 𑀲𑀤𑁆𑀥𑀺𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀦𑀸 𑀞𑀧𑀺𑀢𑀧𑀼𑀧𑁆𑀨𑀯𑀸𑀲𑀺𑀢𑀓𑀧𑀸𑀦𑀻𑀬𑀢𑁄 𑀲𑀸𑀫𑀡𑁂𑀭𑁄 𑀧𑀸𑀦𑀻𑀬𑀁 𑀕𑀳𑁂𑀢𑁆𑀯𑀸 𑀧𑀻𑀢𑀸𑀯𑀲𑁂𑀲𑀁 𑀢𑀢𑁆𑀣𑁂𑀯 𑀆𑀓𑀺𑀭𑀢𑀺, 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀧𑀤𑀼𑀫𑀲𑀭𑀸𑀤𑀻𑀲𑀼 𑀉𑀤𑀓𑀁 𑀲𑀦𑁆𑀣𑀭𑀺𑀢𑁆𑀯𑀸 𑀞𑀺𑀢𑀁 𑀧𑀼𑀧𑁆𑀨𑀭𑁂𑀡𑀼𑀁 𑀖𑀝𑁂𑀦 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀉𑀤𑀓𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀁 𑀤𑀦𑁆𑀢𑀓𑀝𑁆𑀞𑀁 𑀳𑁄𑀢𑀺, 𑀲𑀘𑁂 𑀢𑀲𑁆𑀲 𑀭𑀲𑀁 𑀧𑀺𑀯𑀺𑀢𑀼𑀓𑀸𑀫𑁄, 𑀫𑀽𑀮𑀧𑀝𑀺𑀕𑁆𑀕𑀳𑀡𑀫𑁂𑀯 𑀯𑀝𑁆𑀝𑀢𑀺. 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀅𑀚𑀸𑀦𑀦𑁆𑀢𑀲𑁆𑀲 𑀭𑀲𑁂 𑀧𑀯𑀺𑀝𑁆𑀞𑁂𑀧𑀺 𑀆𑀧𑀢𑁆𑀢𑀺𑀬𑁂𑀯. 𑀅𑀘𑀺𑀢𑁆𑀢𑀓𑀜𑁆𑀳𑀺 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁.

𑀫𑀳𑀸𑀪𑀽𑀢𑁂𑀲𑀼 𑀓𑀺𑀁 𑀯𑀝𑁆𑀝𑀢𑀺, 𑀓𑀺𑀁 𑀦 𑀯𑀝𑁆𑀝𑀢𑀻𑀢𑀺? 𑀔𑀻𑀭𑀁 𑀢𑀸𑀯 𑀯𑀝𑁆𑀝𑀢𑀺, 𑀓𑀧𑁆𑀧𑀺𑀬𑀫𑀁𑀲𑀔𑀻𑀭𑀁 𑀯𑀸 𑀅𑀓𑀧𑁆𑀧𑀺𑀬𑀫𑀁𑀲𑀔𑀻𑀭𑀁 𑀯𑀸 𑀳𑁄𑀢𑀼, 𑀧𑀺𑀯𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀲𑁆𑀲𑀼 𑀔𑁂𑀴𑁄 𑀲𑀺𑀗𑁆𑀖𑀸𑀡𑀺𑀓𑀸 𑀫𑀼𑀢𑁆𑀢𑀁 𑀓𑀭𑀻𑀲𑀁 𑀲𑁂𑀫𑁆𑀳𑀁 𑀤𑀦𑁆𑀢𑀫𑀮𑀁 𑀅𑀓𑁆𑀔𑀺𑀕𑀽𑀣𑀓𑁄 𑀓𑀡𑁆𑀡𑀕𑀽𑀣𑀓𑁄 𑀲𑀭𑀻𑀭𑁂 𑀉𑀝𑁆𑀞𑀺𑀢𑀮𑁄𑀡𑀦𑁆𑀢𑀺 𑀇𑀤𑀁 𑀲𑀩𑁆𑀩𑀁 𑀯𑀝𑁆𑀝𑀢𑀺. 𑀬𑀁 𑀧𑀦𑁂𑀢𑁆𑀣 𑀞𑀸𑀦𑀢𑁄 𑀘𑀯𑀺𑀢𑁆𑀯𑀸 𑀧𑀢𑁆𑀢𑁂 𑀯𑀸 𑀳𑀢𑁆𑀣𑁂 𑀯𑀸 𑀧𑀢𑀢𑀺, 𑀢𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀅𑀗𑁆𑀕𑀮𑀕𑁆𑀕𑀁 𑀧𑀝𑀺𑀕𑁆𑀕𑀳𑀺𑀢𑀓𑀫𑁂𑀯. 𑀉𑀡𑁆𑀳𑀁𑀧𑀸𑀬𑀸𑀲𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀲𑁂𑀤𑁄 𑀅𑀗𑁆𑀕𑀼𑀮𑀺𑀅𑀦𑀼𑀲𑀸𑀭𑁂𑀦 𑀏𑀓𑀸𑀩𑀤𑁆𑀥𑁄𑀯 𑀳𑀼𑀢𑁆𑀯𑀸 𑀧𑀸𑀬𑀸𑀲𑁂 𑀲𑀦𑁆𑀢𑀺𑀝𑁆𑀞𑀢𑀺, 𑀧𑀺𑀡𑁆𑀟𑀸𑀬 𑀯𑀸 𑀘𑀭𑀦𑁆𑀢𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀲𑁆𑀲 𑀫𑀼𑀔𑀯𑀝𑁆𑀝𑀺𑀁𑀢𑁄 𑀯𑀸 𑀧𑀢𑁆𑀢𑀢𑀮𑀁 𑀑𑀭𑁄𑀳𑀢𑀺, 𑀏𑀢𑁆𑀣 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀛𑀸𑀫𑀫𑀳𑀸𑀪𑀽𑀢𑁂𑀲𑀼 𑀇𑀤𑀁 𑀦𑀸𑀫 𑀦 𑀯𑀝𑁆𑀝𑀢𑀻𑀢𑀺 𑀦𑀢𑁆𑀣𑀺, 𑀤𑀼𑀚𑁆𑀛𑀸𑀧𑀺𑀢𑀁 𑀧𑀦 𑀦 𑀯𑀝𑁆𑀝𑀢𑀺. 𑀲𑀼𑀚𑁆𑀛𑀸𑀧𑀺𑀢𑀁 𑀫𑀦𑀼𑀲𑁆𑀲𑀝𑁆𑀞𑀺𑀫𑁆𑀧𑀺 𑀘𑀼𑀡𑁆𑀡𑀁 𑀓𑀢𑁆𑀯𑀸 𑀮𑁂𑀳𑁂 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀺.

𑀘𑀢𑁆𑀢𑀸𑀭𑀺 𑀫𑀳𑀸𑀯𑀺𑀓𑀝𑀸𑀦𑀺 𑀅𑀲𑀢𑀺 𑀓𑀧𑁆𑀧𑀺𑀬𑀓𑀸𑀭𑀓𑁂 𑀲𑀸𑀫𑀫𑁆𑀧𑀺 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀣 𑀘 𑀤𑀼𑀩𑁆𑀩𑀘𑁄𑀧𑀺 𑀅𑀲𑀫𑀢𑁆𑀣𑁄𑀧𑀺 𑀓𑀧𑁆𑀧𑀺𑀬𑀓𑀸𑀭𑀓𑁄 𑀅𑀲𑀦𑁆𑀢𑀧𑀓𑁆𑀔𑁂𑀬𑁂𑀯 𑀢𑀺𑀝𑁆𑀞𑀢𑀺. 𑀙𑀸𑀭𑀺𑀓𑀸𑀬 𑀅𑀲𑀢𑀺 𑀲𑀼𑀓𑁆𑀔𑀤𑀸𑀭𑀼𑀁 𑀛𑀸𑀧𑁂𑀢𑁆𑀯𑀸 𑀙𑀸𑀭𑀺𑀓𑀸 𑀕𑀳𑁂𑀢𑀩𑁆𑀩𑀸. 𑀲𑀼𑀓𑁆𑀔𑀤𑀸𑀭𑀼𑀫𑁆𑀳𑀺 𑀅𑀲𑀢𑀺 𑀅𑀮𑁆𑀮𑀤𑀸𑀭𑀼𑀁 𑀭𑀼𑀓𑁆𑀔𑀢𑁄 𑀙𑀺𑀦𑁆𑀤𑀺𑀢𑁆𑀯𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀇𑀤𑀁 𑀧𑀦 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀫𑀳𑀸𑀯𑀺𑀓𑀝𑀁 𑀓𑀸𑀮𑁄𑀤𑀺𑀲𑁆𑀲𑀁 𑀦𑀸𑀫 𑀲𑀧𑁆𑀧𑀤𑀝𑁆𑀞𑀓𑁆𑀔𑀡𑁂𑀬𑁂𑀯 𑀯𑀝𑁆𑀝𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀢𑁄 𑀘 𑀓𑀸𑀬𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑀁 𑀤𑀲𑀫𑀁.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀪𑁄𑀚𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.