𑁪. 𑀪𑁄𑀚𑀦𑀯𑀕𑁆𑀕𑁄
𑁧. 𑀆𑀯𑀲𑀣𑀧𑀺𑀡𑁆𑀟𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸
𑁨𑁦𑁩. 𑀪𑁄𑀚𑀦𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀆𑀯𑀲𑀣𑀧𑀺𑀡𑁆𑀟𑁄𑀢𑀺 𑀆𑀯𑀲𑀣𑁂 𑀧𑀺𑀡𑁆𑀟𑁄. 𑀲𑀫𑀦𑁆𑀢𑀸 𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀤𑁆𑀥𑀺𑀓𑀕𑀺𑀮𑀸𑀦𑀕𑀩𑁆𑀪𑀺𑀦𑀺𑀧𑀩𑁆𑀩𑀚𑀺𑀢𑀸𑀦𑀁 𑀬𑀣𑀸𑀦𑀼𑀭𑀽𑀧𑀁 𑀧𑀜𑁆𑀜𑀢𑁆𑀢𑀫𑀜𑁆𑀘𑀧𑀻𑀞𑀁 𑀅𑀦𑁂𑀓𑀕𑀩𑁆𑀪𑀧𑀫𑀼𑀔𑀧𑀭𑀺𑀘𑁆𑀙𑁂𑀤𑀁 𑀆𑀯𑀲𑀣𑀁 𑀓𑀢𑁆𑀯𑀸 𑀢𑀢𑁆𑀣 𑀧𑀼𑀜𑁆𑀜𑀓𑀸𑀫𑀢𑀸𑀬 𑀧𑀺𑀡𑁆𑀟𑁄 𑀧𑀜𑁆𑀜𑀢𑁆𑀢𑁄 𑀳𑁄𑀢𑀺, 𑀬𑀸𑀕𑀼𑀪𑀢𑁆𑀢𑀪𑁂𑀲𑀚𑁆𑀚𑀸𑀤𑀺 𑀲𑀩𑁆𑀩𑀁 𑀢𑁂𑀲𑀁 𑀢𑁂𑀲𑀁 𑀤𑀸𑀦𑀢𑁆𑀣𑀸𑀬 𑀞𑀧𑀺𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀳𑀺𑀬𑁆𑀬𑁄𑀧𑀻𑀢𑀺 𑀲𑁆𑀯𑁂𑀧𑀺. 𑀅𑀧𑀲𑀓𑁆𑀓𑀦𑁆𑀢𑀻𑀢𑀺 𑀅𑀧𑀕𑀘𑁆𑀙𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀻𑀢𑀺 𑀢𑀺𑀢𑁆𑀣𑀺𑀬𑁂 𑀅𑀧𑀲𑁆𑀲𑀦𑁆𑀢𑀸 ‘‘𑀢𑀺𑀢𑁆𑀣𑀺𑀬𑀸 𑀓𑀼𑀳𑀺𑀁 𑀕𑀢𑀸’’‘‘𑀇𑀫𑁂 𑀧𑀲𑁆𑀲𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑀸’’𑀢𑀺 𑀲𑀼𑀢𑁆𑀯𑀸 𑀉𑀚𑁆𑀛𑀸𑀬𑀦𑁆𑀢𑀺. 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀓𑀭𑁄𑀦𑁆𑀢𑁄, 𑀅𑀓𑀧𑁆𑀧𑀺𑀬𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀦𑁆𑀢𑁄𑀢𑀺 𑀅𑀢𑁆𑀣𑁄.
𑁨𑁦𑁬. 𑀲𑀓𑁆𑀓𑁄𑀢𑀺 𑀢𑀫𑁆𑀳𑀸 𑀆𑀯𑀲𑀣𑀸 𑀧𑀓𑁆𑀓𑀫𑀺𑀢𑀼𑀦𑁆𑀢𑀺 𑀅𑀤𑁆𑀥𑀬𑁄𑀚𑀦𑀁 𑀯𑀸 𑀬𑁄𑀚𑀦𑀁 𑀯𑀸 𑀕𑀦𑁆𑀢𑀼𑀁 𑀲𑀓𑁆𑀓𑁄𑀢𑀺. 𑀦 𑀲𑀓𑁆𑀓𑁄𑀢𑀻𑀢𑀺 𑀏𑀢𑁆𑀢𑀓𑀫𑁂𑀯 𑀦 𑀲𑀓𑁆𑀓𑁄𑀢𑀺. 𑀅𑀦𑁄𑀤𑀺𑀲𑁆𑀲𑀸𑀢𑀺 𑀇𑀫𑁂𑀲𑀁𑀬𑁂𑀯 𑀯𑀸 𑀏𑀢𑁆𑀢𑀓𑀸𑀦𑀁𑀬𑁂𑀯 𑀯𑀸𑀢𑀺 𑀏𑀓𑀁 𑀧𑀸𑀲𑀡𑁆𑀟𑀁 𑀅𑀦𑀼𑀤𑁆𑀤𑀺𑀲𑀺𑀢𑁆𑀯𑀸 𑀲𑀩𑁆𑀩𑁂𑀲𑀁 𑀧𑀜𑁆𑀜𑀢𑁆𑀢𑁄 𑀳𑁄𑀢𑀺. 𑀬𑀸𑀯𑀤𑀢𑁆𑀣𑁄𑀢𑀺 𑀪𑁄𑀚𑀦𑀫𑁆𑀧𑀺 𑀏𑀢𑁆𑀢𑀓𑀦𑁆𑀢𑀺 𑀅𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑁄 𑀧𑀜𑁆𑀜𑀢𑁆𑀢𑁄 𑀳𑁄𑀢𑀺. 𑀲𑀓𑀺𑀁 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀤𑀼𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀝𑀺𑀕𑁆𑀕𑀳𑀡𑁂 𑀤𑀼𑀓𑁆𑀓𑀝𑀁, 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀧𑀸𑀘𑀺𑀢𑁆𑀢𑀺𑀬𑀁.
𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀏𑀓𑀓𑀼𑀮𑁂𑀦 𑀯𑀸 𑀦𑀸𑀦𑀸𑀓𑀼𑀮𑁂𑀳𑀺 𑀯𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀸 𑀦𑀸𑀦𑀸𑀞𑀸𑀦𑁂𑀲𑀼 𑀯𑀸 ‘‘𑀅𑀚𑁆𑀚 𑀏𑀓𑀲𑁆𑀫𑀺𑀁; 𑀲𑁆𑀯𑁂 𑀏𑀓𑀲𑁆𑀫𑀺’’𑀦𑁆𑀢𑀺 𑀏𑀯𑀁 𑀅𑀦𑀺𑀬𑀫𑀺𑀢𑀝𑁆𑀞𑀸𑀦𑁂 𑀯𑀸 𑀧𑀜𑁆𑀜𑀢𑁆𑀢𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀦𑀸𑀦𑀸𑀓𑀼𑀮𑁂𑀳𑀺 𑀧𑀦 𑀦𑀸𑀦𑀸𑀞𑀸𑀦𑁂𑀲𑀼 𑀧𑀜𑁆𑀜𑀢𑁆𑀢𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀅𑀜𑁆𑀜𑀢𑁆𑀣 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀝𑀺𑀧𑀸𑀝𑀺𑀁 𑀧𑀦 𑀔𑁂𑀧𑁂𑀢𑁆𑀯𑀸 𑀧𑀼𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀏𑀓𑀧𑀽𑀕𑀦𑀸𑀦𑀸𑀧𑀽𑀕𑀏𑀓𑀕𑀸𑀫𑀦𑀸𑀦𑀸𑀕𑀸𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑁄𑀧𑀺 𑀏𑀓𑀓𑀼𑀮𑀲𑁆𑀲 𑀯𑀸 𑀦𑀸𑀦𑀸𑀓𑀼𑀮𑀸𑀦𑀁 𑀯𑀸 𑀏𑀓𑀢𑁄 𑀧𑀜𑁆𑀜𑀢𑁆𑀢𑁄 𑀢𑀡𑁆𑀟𑀼𑀮𑀸𑀤𑀻𑀦𑀁 𑀅𑀪𑀸𑀯𑁂𑀦 𑀅𑀦𑁆𑀢𑀭𑀦𑁆𑀢𑀭𑀸 𑀙𑀺𑀚𑁆𑀚𑀢𑀺, 𑀲𑁄𑀧𑀺 𑀦 𑀪𑀼𑀜𑁆𑀚𑀺𑀢𑀩𑁆𑀩𑁄. 𑀲𑀘𑁂 𑀧𑀦 ‘‘𑀦 𑀲𑀓𑁆𑀓𑁄𑀫 𑀤𑀸𑀢𑀼’’𑀦𑁆𑀢𑀺 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀦 𑀓𑀮𑁆𑀬𑀸𑀡𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀤𑀸𑀢𑀼𑀁 𑀆𑀭𑀪𑀦𑁆𑀢𑀺, 𑀏𑀢𑀁 𑀧𑀼𑀦 𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁.
𑁨𑁦𑁮. 𑀅𑀦𑀸𑀧𑀢𑁆𑀢𑀺 𑀕𑀺𑀮𑀸𑀦𑀲𑁆𑀲𑀸𑀢𑀺 𑀕𑀺𑀮𑀸𑀦𑀲𑁆𑀲 𑀅𑀦𑀼𑀯𑀲𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀕𑀘𑁆𑀙𑀦𑁆𑀢𑁄 𑀯𑀸𑀢𑀺 𑀬𑁄 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀤𑀺𑀯𑀲𑀁 𑀕𑀢𑀝𑁆𑀞𑀸𑀦𑁂 𑀘 𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀢𑀺, 𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀆𑀕𑀘𑁆𑀙𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄𑀧𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀤𑀺𑀯𑀲𑀁 𑀆𑀕𑀢𑀝𑁆𑀞𑀸𑀦𑁂 𑀘 𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀺𑀢𑀼𑀁 𑀮𑀪𑀢𑀺. 𑀕𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀲𑁆𑀲 𑀦𑀤𑀻 𑀯𑀸 𑀧𑀽𑀭𑀢𑀺 𑀘𑁄𑀭𑀸𑀤𑀺𑀪𑀬𑀁 𑀯𑀸 𑀳𑁄𑀢𑀺, 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀔𑁂𑀫𑀪𑀸𑀯𑀁 𑀜𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀧𑀼𑀦 𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀺𑀢𑀼𑀁 𑀮𑀪𑀢𑀻𑀢𑀺 𑀲𑀩𑁆𑀩𑀫𑀺𑀤𑀁 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀯𑀼𑀢𑁆𑀢𑀁. 𑀑𑀤𑀺𑀲𑁆𑀲 𑀧𑀜𑁆𑀜𑀢𑁆𑀢𑁄 𑀳𑁄𑀢𑀻𑀢𑀺 𑀪𑀺𑀓𑁆𑀔𑀽𑀦𑀁𑀬𑁂𑀯 𑀅𑀢𑁆𑀣𑀸𑀬 𑀉𑀤𑁆𑀤𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁄 𑀳𑁄𑀢𑀺. 𑀦 𑀬𑀸𑀯𑀤𑀢𑁆𑀣𑁄𑀢𑀺 𑀬𑀸𑀯𑀤𑀢𑁆𑀣𑀁 𑀧𑀜𑁆𑀜𑀢𑁆𑀢𑁄 𑀦 𑀳𑁄𑀢𑀺, 𑀣𑁄𑀓𑀁 𑀣𑁄𑀓𑀁 𑀮𑀩𑁆𑀪𑀢𑀺, 𑀢𑀸𑀤𑀺𑀲𑀁 𑀦𑀺𑀘𑁆𑀘𑀫𑁆𑀧𑀺 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀜𑁆𑀘 𑀪𑁄𑀚𑀦𑀸𑀦𑀺 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣𑀸𑀢𑀺 𑀬𑀸𑀕𑀼𑀔𑀚𑁆𑀚𑀓𑀨𑀮𑀸𑀨𑀮𑀸𑀤𑀺𑀪𑁂𑀤𑁂 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀺. 𑀬𑀸𑀕𑀼𑀆𑀤𑀻𑀦𑀺 𑀳𑀺 𑀦𑀺𑀘𑁆𑀘𑀫𑁆𑀧𑀺 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀢𑁄 𑀘 𑀓𑀸𑀬𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.
𑀆𑀯𑀲𑀣𑀧𑀺𑀡𑁆𑀟𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀁.
𑁨. 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸
𑁨𑁦𑁯. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑁋 𑀧𑀭𑀺𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑁄𑀢𑀺 𑀲𑁄 𑀓𑀺𑀭 𑀅𑀚𑀸𑀢𑀲𑀢𑁆𑀢𑀼𑀦𑀸 𑀭𑀸𑀚𑀸𑀦𑀁 𑀫𑀸𑀭𑀸𑀧𑁂𑀢𑁆𑀯𑀸𑀧𑀺 𑀅𑀪𑀺𑀫𑀸𑀭𑁂 𑀬𑁄𑀚𑁂𑀢𑁆𑀯𑀸𑀧𑀺 𑀭𑀼𑀳𑀺𑀭𑀼𑀧𑁆𑀧𑀸𑀤𑀁 𑀓𑀢𑁆𑀯𑀸𑀧𑀺 𑀕𑀼𑀴𑁆𑀳𑀧𑀝𑀺𑀘𑁆𑀙𑀦𑁆𑀦𑁄 𑀅𑀳𑁄𑀲𑀺. 𑀬𑀤𑀸 𑀧𑀦 𑀤𑀺𑀯𑀸𑀬𑁂𑀯 𑀥𑀦𑀧𑀸𑀮𑀓𑀁 𑀧𑀬𑁄𑀚𑁂𑀲𑀺, 𑀢𑀤𑀸 𑀧𑀸𑀓𑀝𑁄 𑀚𑀸𑀢𑁄. ‘‘𑀓𑀣𑀁 𑀤𑁂𑀯𑀤𑀢𑁆𑀢𑁄 𑀳𑀢𑁆𑀣𑀺𑀁 𑀧𑀬𑁄𑀚𑁂𑀲𑀻’’𑀢𑀺 𑀧𑀭𑀺𑀓𑀣𑀸𑀬 𑀉𑀧𑁆𑀧𑀦𑁆𑀦𑀸𑀬 ‘‘𑀦 𑀓𑁂𑀯𑀮𑀁 𑀳𑀢𑁆𑀣𑀺𑀁 𑀧𑀬𑁄𑀚𑁂𑀲𑀺, 𑀭𑀸𑀚𑀸𑀦𑀫𑁆𑀧𑀺 𑀫𑀸𑀭𑀸𑀧𑁂𑀲𑀺, 𑀅𑀪𑀺𑀫𑀸𑀭𑁂𑀧𑀺 𑀧𑁂𑀲𑁂𑀲𑀺, 𑀲𑀺𑀮𑀫𑁆𑀧𑀺 𑀧𑀯𑀺𑀚𑁆𑀛𑀺, 𑀧𑀸𑀧𑁄 𑀤𑁂𑀯𑀤𑀢𑁆𑀢𑁄’’𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺. ‘‘𑀓𑁂𑀦 𑀲𑀤𑁆𑀥𑀺𑀁 𑀇𑀤𑀁 𑀓𑀫𑁆𑀫𑀫𑀓𑀸𑀲𑀻’’𑀢𑀺 𑀘 𑀯𑀼𑀢𑁆𑀢𑁂 ‘‘𑀭𑀜𑁆𑀜𑀸 𑀅𑀚𑀸𑀢𑀲𑀢𑁆𑀢𑀼𑀦𑀸’’𑀢𑀺 𑀆𑀳𑀁𑀲𑀼. 𑀢𑀢𑁄 𑀦𑀸𑀕𑀭𑀸 ‘‘𑀓𑀣𑀜𑁆𑀳𑀺 𑀦𑀸𑀫 𑀭𑀸𑀚𑀸 𑀏𑀯𑀭𑀽𑀧𑀁 𑀘𑁄𑀭𑀁 𑀲𑀸𑀲𑀦𑀓𑀡𑁆𑀝𑀓𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀲𑁆𑀲𑀢𑀻’’𑀢𑀺 𑀉𑀝𑁆𑀞𑀳𑀺𑀁𑀲𑀼. 𑀭𑀸𑀚𑀸 𑀦𑀕𑀭𑀲𑀗𑁆𑀔𑁄𑀪𑀁 𑀜𑀢𑁆𑀯𑀸 𑀤𑁂𑀯𑀤𑀢𑁆𑀢𑀁 𑀦𑀻𑀳𑀭𑀺. 𑀢𑀢𑁄 𑀧𑀝𑁆𑀞𑀸𑀬 𑀘𑀲𑁆𑀲 𑀧𑀜𑁆𑀘𑀣𑀸𑀮𑀺𑀧𑀸𑀓𑀲𑀢𑀸𑀦𑀺 𑀉𑀧𑀘𑁆𑀙𑀺𑀦𑁆𑀤𑀺, 𑀉𑀧𑀝𑁆𑀞𑀸𑀦𑀫𑁆𑀧𑀺𑀲𑁆𑀲 𑀦 𑀅𑀕𑀫𑀸𑀲𑀺, 𑀅𑀜𑁆𑀜𑁂𑀧𑀺𑀲𑁆𑀲 𑀫𑀦𑀼𑀲𑁆𑀲𑀸 𑀦 𑀓𑀺𑀜𑁆𑀘𑀺 𑀤𑀸𑀢𑀩𑁆𑀩𑀁 𑀯𑀸 𑀓𑀸𑀢𑀩𑁆𑀩𑀁 𑀯𑀸 𑀫𑀜𑁆𑀜𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀭𑀺𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑁄’’𑀢𑀺. 𑀓𑀼𑀮𑁂𑀲𑀼 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀻𑀢𑀺 ‘‘𑀫𑀸 𑀫𑁂 𑀕𑀡𑁄 𑀪𑀺𑀚𑁆𑀚𑀻’’𑀢𑀺 𑀧𑀭𑀺𑀲𑀁 𑀧𑁄𑀲𑁂𑀦𑁆𑀢𑁄 ‘‘𑀢𑁆𑀯𑀁 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀢𑁆𑀢𑀁 𑀤𑁂𑀳𑀺, 𑀢𑁆𑀯𑀁 𑀤𑁆𑀯𑀺𑀦𑁆𑀦’’𑀦𑁆𑀢𑀺 𑀏𑀯𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀲𑀧𑀭𑀺𑀲𑁄 𑀓𑀼𑀮𑁂𑀲𑀼 𑀪𑀼𑀜𑁆𑀚𑀢𑀺.
𑁨𑁧𑁧. 𑀘𑀻𑀯𑀭𑀁 𑀧𑀭𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀪𑀢𑁆𑀢𑀁 𑀅𑀕𑀡𑁆𑀳𑀦𑁆𑀢𑀸𑀦𑀁 𑀘𑀻𑀯𑀭𑀁 𑀦 𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀧𑀭𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.
𑁨𑁧𑁨. 𑀘𑀻𑀯𑀭𑀓𑀸𑀭𑀓𑁂 𑀪𑀺𑀓𑁆𑀔𑀽 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑁂𑀦𑁆𑀢𑀻𑀢𑀺 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀘𑀺𑀭𑁂𑀦 𑀘𑀻𑀯𑀭𑀁 𑀦𑀺𑀝𑁆𑀞𑀸𑀧𑁂𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀏𑀯𑀁 𑀮𑀳𑀼𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀼𑀜𑁆𑀜𑀓𑀸𑀫𑀢𑀸𑀬 𑀦𑀺𑀫𑀦𑁆𑀢𑁂𑀦𑁆𑀢𑀺.
𑁨𑁧𑁫. 𑀦𑀸𑀦𑀸𑀯𑁂𑀭𑀚𑁆𑀚𑀓𑁂𑀢𑀺 𑀦𑀸𑀦𑀸𑀯𑀺𑀥𑁂𑀳𑀺 𑀅𑀜𑁆𑀜𑀭𑀚𑁆𑀚𑁂𑀳𑀺 𑀆𑀕𑀢𑁂. ‘‘𑀦𑀸𑀦𑀸𑀯𑀺𑀭𑀚𑁆𑀚𑀓𑁂’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄.
𑁨𑁧𑁭-𑁮. 𑀕𑀡𑀪𑁄𑀚𑀦𑁂𑀢𑀺 𑀕𑀡𑀲𑁆𑀲 𑀪𑁄𑀚𑀦𑁂. 𑀇𑀥 𑀘 𑀕𑀡𑁄 𑀦𑀸𑀫 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀆𑀤𑀺𑀁 𑀓𑀢𑁆𑀯𑀸 𑀢𑀢𑀼𑀢𑁆𑀢𑀭𑀺𑀁 𑀪𑀺𑀓𑁆𑀔𑀽 𑀅𑀥𑀺𑀧𑁆𑀧𑁂𑀢𑀸, 𑀢𑁂𑀦𑁂𑀯 𑀲𑀩𑁆𑀩𑀦𑁆𑀢𑀺𑀫𑀁 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀢𑁆𑀣 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽…𑀧𑁂… 𑀏𑀢𑀁 𑀕𑀡𑀪𑁄𑀚𑀦𑀁 𑀦𑀸𑀫𑀸’’𑀢𑀺. 𑀢𑀁 𑀧𑀦𑁂𑀢𑀁 𑀕𑀡𑀪𑁄𑀚𑀦𑀁 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀧𑀲𑀯𑀢𑀺 𑀦𑀺𑀫𑀦𑁆𑀢𑀦𑀢𑁄 𑀯𑀸 𑀯𑀺𑀜𑁆𑀜𑀢𑁆𑀢𑀺𑀢𑁄 𑀯𑀸. 𑀓𑀣𑀁 𑀦𑀺𑀫𑀦𑁆𑀢𑀦𑀢𑁄 𑀧𑀲𑀯𑀢𑀺? 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀑𑀤𑀦𑁂𑀦 𑀦𑀺𑀫𑀦𑁆𑀢𑁂𑀫𑀺, 𑀑𑀤𑀦𑀁 𑀫𑁂 𑀕𑀡𑁆𑀳𑀣 𑀆𑀓𑀗𑁆𑀔𑀣 𑀑𑀮𑁄𑀓𑁂𑀣 𑀅𑀥𑀺𑀯𑀸𑀲𑁂𑀣 𑀧𑀝𑀺𑀫𑀸𑀦𑁂𑀣𑀸’’𑀢𑀺 𑀏𑀯𑀁 𑀬𑁂𑀦 𑀓𑁂𑀦𑀘𑀺 𑀯𑁂𑀯𑀘𑀦𑁂𑀦 𑀯𑀸 𑀪𑀸𑀲𑀦𑁆𑀢𑀭𑁂𑀦 𑀯𑀸 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑀺. 𑀏𑀯𑀁 𑀏𑀓𑀢𑁄 𑀦𑀺𑀫𑀦𑁆𑀢𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀅𑀚𑁆𑀚𑀢𑀦𑀸𑀬 𑀯𑀸 𑀲𑁆𑀯𑀸𑀢𑀦𑀸𑀬 𑀯𑀸 𑀏𑀓𑀢𑁄 𑀕𑀘𑁆𑀙𑀦𑁆𑀢𑀺, 𑀏𑀓𑀢𑁄 𑀕𑀡𑁆𑀳𑀦𑁆𑀢𑀺, 𑀏𑀓𑀢𑁄 𑀪𑀼𑀜𑁆𑀚𑀦𑁆𑀢𑀺, 𑀕𑀡𑀪𑁄𑀚𑀦𑀁 𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀆𑀧𑀢𑁆𑀢𑀺. 𑀏𑀓𑀢𑁄 𑀦𑀺𑀫𑀦𑁆𑀢𑀺𑀢𑀸 𑀏𑀓𑀢𑁄 𑀯𑀸 𑀦𑀸𑀦𑀢𑁄 𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀓𑀢𑁄 𑀕𑀡𑁆𑀳𑀦𑁆𑀢𑀺, 𑀦𑀸𑀦𑀢𑁄 𑀪𑀼𑀜𑁆𑀚𑀦𑁆𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀧𑀝𑀺𑀕𑁆𑀕𑀳𑀡𑀫𑁂𑀯 𑀳𑀺 𑀏𑀢𑁆𑀣 𑀧𑀫𑀸𑀡𑀁. 𑀏𑀓𑀢𑁄 𑀦𑀺𑀫𑀦𑁆𑀢𑀺𑀢𑀸 𑀏𑀓𑀢𑁄 𑀯𑀸 𑀦𑀸𑀦𑀢𑁄 𑀯𑀸 𑀕𑀘𑁆𑀙𑀦𑁆𑀢𑀺, 𑀦𑀸𑀦𑀢𑁄 𑀕𑀡𑁆𑀳𑀦𑁆𑀢𑀺, 𑀏𑀓𑀢𑁄 𑀯𑀸 𑀦𑀸𑀦𑀢𑁄 𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺. 𑀘𑀢𑁆𑀢𑀸𑀭𑀺 𑀧𑀭𑀺𑀯𑁂𑀡𑀸𑀦𑀺 𑀯𑀸 𑀯𑀺𑀳𑀸𑀭𑁂 𑀯𑀸 𑀕𑀦𑁆𑀢𑁆𑀯𑀸 𑀦𑀸𑀦𑀢𑁄 𑀦𑀺𑀫𑀦𑁆𑀢𑀺𑀢𑀸 𑀏𑀓𑀝𑁆𑀞𑀸𑀦𑁂 𑀞𑀺𑀢𑁂𑀲𑀼𑀬𑁂𑀯 𑀯𑀸 𑀏𑀓𑁄 𑀧𑀼𑀢𑁆𑀢𑁂𑀦 𑀏𑀓𑁄 𑀧𑀺𑀢𑀭𑀸𑀢𑀺 𑀏𑀯𑀫𑁆𑀧𑀺 𑀦𑀸𑀦𑀢𑁄 𑀦𑀺𑀫𑀦𑁆𑀢𑀺𑀢𑀸 𑀏𑀓𑀢𑁄 𑀯𑀸 𑀦𑀸𑀦𑀢𑁄 𑀯𑀸 𑀕𑀘𑁆𑀙𑀦𑁆𑀢𑀼, 𑀏𑀓𑀢𑁄 𑀯𑀸 𑀦𑀸𑀦𑀢𑁄 𑀯𑀸 𑀪𑀼𑀜𑁆𑀚𑀦𑁆𑀢𑀼, 𑀲𑀘𑁂 𑀏𑀓𑀢𑁄 𑀕𑀡𑁆𑀳𑀦𑁆𑀢𑀺, 𑀕𑀡𑀪𑁄𑀚𑀦𑀁 𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀆𑀧𑀢𑁆𑀢𑀺. 𑀏𑀯𑀁 𑀢𑀸𑀯 𑀦𑀺𑀫𑀦𑁆𑀢𑀦𑀢𑁄 𑀧𑀲𑀯𑀢𑀺.
𑀓𑀣𑀁 𑀯𑀺𑀜𑁆𑀜𑀢𑁆𑀢𑀺𑀢𑁄? 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀏𑀓𑀢𑁄 𑀞𑀺𑀢𑀸 𑀯𑀸 𑀦𑀺𑀲𑀺𑀦𑁆𑀦𑀸 𑀯𑀸 𑀉𑀧𑀸𑀲𑀓𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀘𑀢𑀼𑀦𑁆𑀦𑀫𑁆𑀧𑀺 𑀪𑀢𑁆𑀢𑀁 𑀤𑁂𑀳𑀻’’𑀢𑀺 𑀯𑀸 𑀯𑀺𑀜𑁆𑀜𑀸𑀧𑁂𑀬𑁆𑀬𑀼𑀁, 𑀧𑀸𑀝𑁂𑀓𑁆𑀓𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀤𑁂𑀳𑀺, 𑀫𑀬𑁆𑀳𑀁 𑀤𑁂𑀳𑀻’’𑀢𑀺 𑀏𑀯𑀁 𑀏𑀓𑀢𑁄 𑀯𑀸 𑀦𑀸𑀦𑀢𑁄 𑀯𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀏𑀓𑀢𑁄 𑀯𑀸 𑀕𑀘𑁆𑀙𑀦𑁆𑀢𑀼 𑀦𑀸𑀦𑀢𑁄 𑀯𑀸, 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸𑀧𑀺 𑀏𑀓𑀢𑁄 𑀯𑀸 𑀪𑀼𑀜𑁆𑀚𑀦𑁆𑀢𑀼 𑀦𑀸𑀦𑀢𑁄 𑀯𑀸, 𑀲𑀘𑁂 𑀏𑀓𑀢𑁄 𑀕𑀡𑁆𑀳𑀦𑁆𑀢𑀺, 𑀕𑀡𑀪𑁄𑀚𑀦𑀁 𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀆𑀧𑀢𑁆𑀢𑀺. 𑀏𑀯𑀁 𑀯𑀺𑀜𑁆𑀜𑀢𑁆𑀢𑀺𑀢𑁄 𑀧𑀲𑀯𑀢𑀺.
𑀧𑀸𑀤𑀸𑀧𑀺 𑀨𑀮𑀺𑀢𑀸𑀢𑀺 𑀬𑀣𑀸 𑀫𑀳𑀸𑀘𑀫𑁆𑀫𑀲𑁆𑀲 𑀧𑀭𑀢𑁄 𑀫𑀁𑀲𑀁 𑀤𑀺𑀲𑁆𑀲𑀢𑀺; 𑀏𑀯𑀁 𑀨𑀸𑀮𑀺𑀢𑀸, 𑀯𑀸𑀮𑀺𑀓𑀸𑀬 𑀯𑀸 𑀲𑀓𑁆𑀔𑀭𑀸𑀬 𑀯𑀸 𑀧𑀳𑀝𑀫𑀢𑁆𑀢𑁂 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀦 𑀲𑀓𑁆𑀓𑀸 𑀳𑁄𑀢𑀺 𑀅𑀦𑁆𑀢𑁄𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁. 𑀈𑀤𑀺𑀲𑁂 𑀕𑁂𑀮𑀜𑁆𑀜𑁂 𑀕𑀺𑀮𑀸𑀦𑀲𑀫𑀬𑁄𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀮𑁂𑀲𑀓𑀧𑁆𑀧𑀺𑀬𑀁 𑀓𑀸𑀢𑀩𑁆𑀩𑀁.
𑀘𑀻𑀯𑀭𑁂 𑀓𑀬𑀺𑀭𑀫𑀸𑀦𑁂𑀢𑀺 𑀬𑀤𑀸 𑀲𑀸𑀝𑀓𑀜𑁆𑀘 𑀲𑀼𑀢𑁆𑀢𑀜𑁆𑀘 𑀮𑀪𑀺𑀢𑁆𑀯𑀸 𑀘𑀻𑀯𑀭𑀁 𑀓𑀭𑁄𑀦𑁆𑀢𑀺 𑀢𑀤𑀸; 𑀯𑀺𑀲𑀼𑀜𑁆𑀳𑀺 𑀘𑀻𑀯𑀭𑀓𑀸𑀭𑀲𑀫𑀬𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀬𑁄 𑀢𑀢𑁆𑀣 𑀘𑀻𑀯𑀭𑁂 𑀓𑀢𑁆𑀢𑀩𑁆𑀩𑀁 𑀬𑀁𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀫𑀳𑀸𑀧𑀘𑁆𑀘𑀭𑀺𑀬𑀜𑁆𑀳𑀺 ‘‘𑀅𑀦𑁆𑀢𑀫𑀲𑁄 𑀲𑀽𑀘𑀺𑀯𑁂𑀥𑀦𑀓𑁄’’𑀢𑀺𑀧𑀺 𑀯𑀼𑀢𑁆𑀢𑀁, 𑀢𑁂𑀦 𑀘𑀻𑀯𑀭𑀓𑀸𑀭𑀲𑀫𑀬𑁄𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀯𑀺𑀢𑁆𑀣𑀸𑀭𑁂𑀦𑁂𑀯 𑀯𑀼𑀢𑁆𑀢𑀁. 𑀬𑁄 𑀘𑀻𑀯𑀭𑀁 𑀯𑀺𑀘𑀸𑀭𑁂𑀢𑀺, 𑀙𑀺𑀦𑁆𑀤𑀢𑀺, 𑀫𑁄𑀖𑀲𑀼𑀢𑁆𑀢𑀁 𑀞𑀧𑁂𑀢𑀺, 𑀆𑀕𑀦𑁆𑀢𑀼𑀓𑀧𑀝𑁆𑀝𑀁 𑀞𑀧𑁂𑀢𑀺, 𑀧𑀘𑁆𑀘𑀸𑀕𑀢𑀁 𑀲𑀺𑀩𑁆𑀩𑀢𑀺, 𑀆𑀕𑀦𑁆𑀢𑀼𑀓𑀧𑀝𑁆𑀝𑀁 𑀩𑀦𑁆𑀥𑀢𑀺, 𑀅𑀦𑀼𑀯𑀸𑀢𑀁 𑀙𑀺𑀦𑁆𑀤𑀢𑀺 𑀖𑀝𑁆𑀝𑁂𑀢𑀺 𑀆𑀭𑁄𑀧𑁂𑀢𑀺, 𑀢𑀢𑁆𑀣 𑀧𑀘𑁆𑀘𑀸𑀕𑀢𑀁 𑀲𑀺𑀩𑁆𑀩𑀢𑀺, 𑀲𑀼𑀢𑁆𑀢𑀁 𑀓𑀭𑁄𑀢𑀺 𑀯𑀮𑁂𑀢𑀺, 𑀧𑀺𑀧𑁆𑀨𑀮𑀺𑀓𑀁 𑀦𑀺𑀲𑁂𑀢𑀺, 𑀧𑀭𑀺𑀯𑀢𑁆𑀢𑀦𑀁 𑀓𑀭𑁄𑀢𑀺, 𑀲𑀩𑁆𑀩𑁄𑀧𑀺 𑀘𑀻𑀯𑀭𑀁 𑀓𑀭𑁄𑀢𑀺𑀬𑁂𑀯𑀸𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀧𑀦 𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑁄 𑀚𑀸𑀢𑀓𑀁 𑀯𑀸 𑀥𑀫𑁆𑀫𑀧𑀤𑀁 𑀯𑀸 𑀓𑀣𑁂𑀢𑀺, 𑀅𑀬𑀁 𑀦 𑀘𑀻𑀯𑀭𑀓𑀸𑀭𑀓𑁄. 𑀏𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀁 𑀕𑀡𑀪𑁄𑀚𑀦𑁂 𑀅𑀦𑀸𑀧𑀢𑁆𑀢𑀻𑀢𑀺.
𑀅𑀤𑁆𑀥𑀬𑁄𑀚𑀦𑀦𑁆𑀢𑀺 𑀏𑀢𑁆𑀢𑀓𑀫𑁆𑀧𑀺 𑀅𑀤𑁆𑀥𑀸𑀦𑀁 𑀕𑀦𑁆𑀢𑀼𑀓𑀸𑀫𑁂𑀦. 𑀬𑁄 𑀧𑀦 𑀤𑀽𑀭𑀁 𑀕𑀦𑁆𑀢𑀼𑀓𑀸𑀫𑁄, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀕𑀘𑁆𑀙𑀦𑁆𑀢𑁂𑀦𑀸𑀢𑀺 𑀅𑀤𑁆𑀥𑀸𑀦𑀁 𑀕𑀘𑁆𑀙𑀦𑁆𑀢𑁂𑀦, 𑀅𑀤𑁆𑀥𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀕𑀸𑀯𑀼𑀢𑁂𑀧𑀺 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀕𑀢𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀕𑀢𑁂𑀦 𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦𑀸𑀯𑀸𑀪𑀺𑀭𑀼𑀳𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀅𑀪𑀺𑀭𑀼𑀴𑁆𑀳𑁂𑀦 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸𑀧𑀺 𑀬𑀸𑀯 𑀦 𑀑𑀭𑁄𑀳𑀢𑀺 𑀢𑀸𑀯 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑁂 𑀆𑀕𑀢𑁂𑀢𑀺 𑀅𑀬𑀁 𑀅𑀦𑁆𑀢𑀺𑀫𑀧𑀭𑀺𑀘𑁆𑀙𑁂𑀤𑁄, 𑀘𑀢𑀼𑀢𑁆𑀣𑁂𑀧𑀺 𑀆𑀕𑀢𑁂 𑀬𑀢𑁆𑀣 𑀦 𑀬𑀸𑀧𑁂𑀦𑁆𑀢𑀺; 𑀲𑁄 𑀫𑀳𑀸𑀲𑀫𑀬𑁄. 𑀬𑀢𑁆𑀣 𑀧𑀦 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑀸𑀤𑀺𑀲𑁂 𑀓𑀸𑀮𑁂 ‘‘𑀫𑀳𑀸𑀲𑀫𑀬𑁄’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀓𑁄𑀘𑀺 𑀧𑀭𑀺𑀩𑁆𑀩𑀸𑀚𑀓𑀲𑀫𑀸𑀧𑀦𑁆𑀦𑁄𑀢𑀺 𑀲𑀳𑀥𑀫𑁆𑀫𑀺𑀓𑁂𑀲𑀼 𑀯𑀸 𑀢𑀺𑀢𑁆𑀣𑀺𑀬𑁂𑀲𑀼 𑀯𑀸 𑀅𑀜𑁆𑀜𑀢𑀭𑁄, 𑀏𑀢𑁂𑀲𑀜𑁆𑀳𑀺 𑀬𑁂𑀦 𑀓𑁂𑀦𑀘𑀺 𑀓𑀢𑁂 𑀪𑀢𑁆𑀢𑁂 ‘‘𑀲𑀫𑀡𑀪𑀢𑁆𑀢𑀲𑀫𑀬𑁄’’𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀁.
𑁨𑁨𑁦. 𑀅𑀦𑀸𑀧𑀢𑁆𑀢𑀺 𑀲𑀫𑀬𑁂𑀢𑀺 𑀲𑀢𑁆𑀢𑀲𑀼 𑀲𑀫𑀬𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀦𑀸𑀧𑀢𑁆𑀢𑀺. 𑀤𑁆𑀯𑁂 𑀢𑀬𑁄 𑀏𑀓𑀢𑁄𑀢𑀺 𑀬𑁂𑀧𑀺 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀺𑀢𑁆𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀏𑀓𑀢𑁄 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀅𑀦𑀸𑀧𑀢𑁆𑀢𑀺.
𑀢𑀢𑁆𑀣 𑀅𑀦𑀺𑀫𑀦𑁆𑀢𑀺𑀢𑀘𑀢𑀼𑀢𑁆𑀣𑀁, 𑀧𑀺𑀡𑁆𑀟𑀧𑀸𑀢𑀺𑀓𑀘𑀢𑀼𑀢𑁆𑀣𑀁, 𑀅𑀦𑀼𑀧𑀲𑀫𑁆𑀧𑀦𑁆𑀦𑀘𑀢𑀼𑀢𑁆𑀣𑀁, 𑀧𑀢𑁆𑀢𑀘𑀢𑀼𑀢𑁆𑀣𑀁, 𑀕𑀺𑀮𑀸𑀦𑀘𑀢𑀼𑀢𑁆𑀣𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? 𑀇𑀥𑁂𑀓𑀘𑁆𑀘𑁄 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀢𑀺. 𑀢𑁂𑀲𑀼 𑀢𑀬𑁄 𑀕𑀢𑀸, 𑀏𑀓𑁄 𑀦 𑀕𑀢𑁄. 𑀉𑀧𑀸𑀲𑀓𑁄 ‘‘𑀏𑀓𑁄 𑀪𑀦𑁆𑀢𑁂 𑀣𑁂𑀭𑁄 𑀓𑀼𑀳𑀺’’𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀦𑀸𑀕𑀢𑁄 𑀉𑀧𑀸𑀲𑀓𑀸𑀢𑀺. 𑀲𑁄 𑀅𑀜𑁆𑀜𑀁 𑀢𑀗𑁆𑀔𑀡𑀧𑁆𑀧𑀢𑁆𑀢𑀁 𑀓𑀜𑁆𑀘𑀺 ‘‘𑀏𑀳𑀺 𑀪𑀦𑁆𑀢𑁂’’𑀢𑀺 𑀧𑀯𑁂𑀲𑁂𑀢𑁆𑀯𑀸 𑀘𑀢𑀼𑀦𑁆𑀦𑀫𑁆𑀧𑀺 𑀪𑀢𑁆𑀢𑀁 𑀤𑁂𑀢𑀺, 𑀲𑀩𑁆𑀩𑁂𑀲𑀁 𑀅𑀦𑀸𑀧𑀢𑁆𑀢𑀺. 𑀓𑀲𑁆𑀫𑀸? 𑀕𑀡𑀧𑀽𑀭𑀓𑀲𑁆𑀲 𑀅𑀦𑀺𑀫𑀦𑁆𑀢𑀺𑀢𑀢𑁆𑀢𑀸. 𑀢𑀬𑁄 𑀏𑀯 𑀳𑀺 𑀢𑀢𑁆𑀣 𑀦𑀺𑀫𑀦𑁆𑀢𑀺𑀢𑀸 𑀕𑀡𑁆𑀳𑀺𑀁𑀲𑀼, 𑀢𑁂𑀳𑀺 𑀕𑀡𑁄 𑀦 𑀧𑀽𑀭𑀢𑀺, 𑀕𑀡𑀧𑀽𑀭𑀓𑁄 𑀘 𑀅𑀦𑀺𑀫𑀦𑁆𑀢𑀺𑀢𑁄, 𑀢𑁂𑀦 𑀕𑀡𑁄 𑀪𑀺𑀚𑁆𑀚𑀢𑀻𑀢𑀺 𑀇𑀤𑀁 𑀅𑀦𑀺𑀫𑀦𑁆𑀢𑀺𑀢𑀘𑀢𑀼𑀢𑁆𑀣𑀁.
𑀧𑀺𑀡𑁆𑀟𑀧𑀸𑀢𑀺𑀓𑀘𑀢𑀼𑀢𑁆𑀣𑁂 𑁋 𑀦𑀺𑀫𑀦𑁆𑀢𑀦𑀓𑀸𑀮𑁂 𑀏𑀓𑁄 𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑁄𑀢𑀺, 𑀲𑁄 𑀦𑀸𑀥𑀺𑀯𑀸𑀲𑁂𑀢𑀺. 𑀕𑀫𑀦𑀯𑁂𑀮𑀸𑀬 𑀧𑀦 ‘‘𑀏𑀳𑀺 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀅𑀦𑀥𑀺𑀯𑀸𑀲𑀺𑀢𑀢𑁆𑀢𑀸 𑀅𑀦𑀸𑀕𑀘𑁆𑀙𑀦𑁆𑀢𑀫𑁆𑀧𑀺 ‘‘𑀏𑀣 𑀪𑀺𑀓𑁆𑀔𑀁 𑀮𑀘𑁆𑀙𑀣𑀸’’𑀢𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀲𑁄 𑀢𑀁 𑀕𑀡𑀁 𑀪𑀺𑀦𑁆𑀤𑀢𑀺. 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀅𑀦𑀸𑀧𑀢𑁆𑀢𑀺.
𑀅𑀦𑀼𑀧𑀲𑀫𑁆𑀧𑀦𑁆𑀦𑀘𑀢𑀼𑀢𑁆𑀣𑁂 𑁋 𑀲𑀸𑀫𑀡𑁂𑀭𑁂𑀦 𑀲𑀤𑁆𑀥𑀺𑀁 𑀦𑀺𑀫𑀦𑁆𑀢𑀺𑀢𑀸 𑀳𑁄𑀦𑁆𑀢𑀺, 𑀲𑁄𑀧𑀺 𑀕𑀡𑀁 𑀪𑀺𑀦𑁆𑀤𑀢𑀺.
𑀧𑀢𑁆𑀢𑀘𑀢𑀼𑀢𑁆𑀣𑁂 𑁋 𑀏𑀓𑁄 𑀲𑀬𑀁 𑀅𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀧𑁂𑀲𑁂𑀢𑀺; 𑀏𑀯𑀫𑁆𑀧𑀺 𑀕𑀡𑁄 𑀪𑀺𑀚𑁆𑀚𑀢𑀺. 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀅𑀦𑀸𑀧𑀢𑁆𑀢𑀺.
𑀕𑀺𑀮𑀸𑀦𑀘𑀢𑀼𑀢𑁆𑀣𑁂 𑁋 𑀕𑀺𑀮𑀸𑀦𑁂𑀦 𑀲𑀤𑁆𑀥𑀺𑀁 𑀦𑀺𑀫𑀦𑁆𑀢𑀺𑀢𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀕𑀺𑀮𑀸𑀦𑀲𑁆𑀲𑁂𑀯 𑀅𑀦𑀸𑀧𑀢𑁆𑀢𑀺, 𑀇𑀢𑀭𑁂𑀲𑀁 𑀧𑀦 𑀕𑀡𑀧𑀽𑀭𑀓𑁄 𑀳𑁄𑀢𑀺. 𑀦 𑀳𑀺 𑀕𑀺𑀮𑀸𑀦𑁂𑀦 𑀕𑀡𑁄 𑀪𑀺𑀚𑁆𑀚𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀆𑀧𑀢𑁆𑀢𑀺𑀬𑁂𑀯. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁.
𑀲𑀫𑀬𑀮𑀤𑁆𑀥𑀓𑁄 𑀲𑀬𑀫𑁂𑀯 𑀫𑀼𑀘𑁆𑀘𑀢𑀺, 𑀲𑁂𑀲𑀸𑀦𑀁 𑀕𑀡𑀧𑀽𑀭𑀓𑀢𑁆𑀢𑀸 𑀆𑀧𑀢𑁆𑀢𑀺𑀓𑀭𑁄 𑀳𑁄𑀢𑀺. 𑀢𑀲𑁆𑀫𑀸 𑀘𑀻𑀯𑀭𑀤𑀸𑀦𑀲𑀫𑀬𑀮𑀤𑁆𑀥𑀓𑀸𑀤𑀻𑀦𑀫𑁆𑀧𑀺 𑀯𑀲𑁂𑀦 𑀘𑀢𑀼𑀓𑁆𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀘𑁂 𑀧𑀦 𑀅𑀥𑀺𑀯𑀸𑀲𑁂𑀢𑁆𑀯𑀸 𑀕𑀢𑁂𑀲𑀼𑀧𑀺 𑀘𑀢𑀽𑀲𑀼 𑀚𑀦𑁂𑀲𑀼 𑀏𑀓𑁄 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀕𑀡𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺, 𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀣𑀸’’𑀢𑀺 𑀯𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀸𑀯𑀲𑀸𑀦𑁂 𑀪𑀢𑁆𑀢𑀢𑁆𑀣𑀸𑀬 𑀧𑀢𑁆𑀢𑀁 𑀕𑀡𑁆𑀳𑀦𑁆𑀢𑀸𑀦𑀁 𑀅𑀤𑀢𑁆𑀯𑀸 ‘‘𑀇𑀫𑁂 𑀢𑀸𑀯 𑀪𑀺𑀓𑁆𑀔𑀽 𑀪𑁄𑀚𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀣, 𑀅𑀳𑀁 𑀧𑀘𑁆𑀙𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀦𑁆𑀦𑁄. 𑀢𑁂𑀲𑀼 𑀪𑀼𑀢𑁆𑀯𑀸 𑀕𑀢𑁂𑀲𑀼 ‘‘𑀤𑁂𑀣 𑀪𑀦𑁆𑀢𑁂 𑀧𑀢𑁆𑀢’’𑀦𑁆𑀢𑀺 𑀉𑀧𑀸𑀲𑀓𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀪𑀢𑁆𑀢𑁂 𑀤𑀺𑀦𑁆𑀦𑁂 𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀕𑀘𑁆𑀙𑀢𑀺, 𑀲𑀩𑁆𑀩𑁂𑀲𑀁 𑀅𑀦𑀸𑀧𑀢𑁆𑀢𑀺. 𑀧𑀜𑁆𑀘𑀦𑁆𑀦𑀜𑁆𑀳𑀺 𑀪𑁄𑀚𑀦𑀸𑀦𑀁𑀬𑁂𑀯 𑀯𑀲𑁂𑀦 𑀕𑀡𑀪𑁄𑀚𑀦𑁂 𑀯𑀺𑀲𑀗𑁆𑀓𑁂𑀢𑀁 𑀦𑀢𑁆𑀣𑀺. 𑀑𑀤𑀦𑁂𑀦 𑀦𑀺𑀫𑀦𑁆𑀢𑀺𑀢𑀸 𑀓𑀼𑀫𑁆𑀫𑀸𑀲𑀁 𑀕𑀡𑁆𑀳𑀦𑁆𑀢𑀸𑀧𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺. 𑀢𑀸𑀦𑀺 𑀘 𑀢𑁂𑀳𑀺 𑀏𑀓𑀢𑁄 𑀦 𑀕𑀳𑀺𑀢𑀸𑀦𑀺. 𑀬𑀸𑀕𑀼𑀆𑀤𑀻𑀲𑀼 𑀧𑀦 𑀯𑀺𑀲𑀗𑁆𑀓𑁂𑀢𑀁 𑀳𑁄𑀢𑀺, 𑀢𑀸𑀦𑀺 𑀢𑁂𑀳𑀺 𑀏𑀓𑀢𑁄 𑀕𑀳𑀺𑀢𑀸𑀦𑀻𑀢𑀺. 𑀏𑀯𑀁 𑀏𑀓𑁄 𑀧𑀡𑁆𑀟𑀺𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀺.
𑀢𑀲𑁆𑀫𑀸 𑀲𑀘𑁂 𑀓𑁄𑀘𑀺 𑀲𑀗𑁆𑀖𑀪𑀢𑁆𑀢𑀁 𑀓𑀢𑁆𑀢𑀼𑀓𑀸𑀫𑁂𑀦 𑀦𑀺𑀫𑀦𑁆𑀢𑀦𑀢𑁆𑀣𑀸𑀬 𑀧𑁂𑀲𑀺𑀢𑁄 𑀯𑀺𑀳𑀸𑀭𑀁 𑀆𑀕𑀫𑁆𑀫 ‘‘𑀪𑀦𑁆𑀢𑁂, 𑀲𑁆𑀯𑁂 𑀅𑀫𑁆𑀳𑀸𑀓𑀁 𑀖𑀭𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀅𑀯𑀢𑁆𑀯𑀸 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀸 ‘‘𑀲𑀗𑁆𑀖𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀸 ‘‘𑀲𑀗𑁆𑀖𑁄 𑀪𑀢𑁆𑀢𑀁 𑀕𑀡𑁆𑀳𑀸𑀢𑀽’’𑀢𑀺 𑀯𑀸 𑀯𑀤𑀢𑀺, 𑀪𑀢𑁆𑀢𑀼𑀤𑁆𑀤𑁂𑀲𑀓𑁂𑀦 𑀧𑀡𑁆𑀟𑀺𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀦𑁂𑀫𑀦𑁆𑀢𑀦𑀺𑀓𑀸 𑀕𑀡𑀪𑁄𑀚𑀦𑀢𑁄 𑀧𑀺𑀡𑁆𑀟𑀧𑀸𑀢𑀺𑀓𑀸 𑀘 𑀥𑀼𑀢𑀗𑁆𑀕𑀪𑁂𑀤𑀢𑁄 𑀫𑁄𑀘𑁂𑀢𑀩𑁆𑀩𑀸. 𑀓𑀣𑀁? 𑀏𑀯𑀁 𑀢𑀸𑀯 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑁆𑀯𑁂 𑀦 𑀲𑀓𑁆𑀓𑀸 𑀉𑀧𑀸𑀲𑀓𑀸’’𑀢𑀺. ‘‘𑀧𑀼𑀦𑀤𑀺𑀯𑀲𑁂, 𑀪𑀦𑁆𑀢𑁂’’𑀢𑀺. ‘‘𑀧𑀼𑀦𑀤𑀺𑀯𑀲𑁂𑀧𑀺 𑀦 𑀲𑀓𑁆𑀓𑀸’’𑀢𑀺. 𑀏𑀯𑀁 𑀬𑀸𑀯 𑀅𑀤𑁆𑀥𑀫𑀸𑀲𑀫𑁆𑀧𑀺 𑀳𑀭𑀺𑀢𑁆𑀯𑀸 𑀧𑀼𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀢𑁆𑀯𑀁 𑀓𑀺𑀁 𑀅𑀯𑀘𑀸’’𑀢𑀺? 𑀲𑀘𑁂 𑀧𑀼𑀦𑀧𑀺 ‘‘𑀲𑀗𑁆𑀖𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀢𑀢𑁄 ‘‘𑀇𑀫𑀁 𑀢𑀸𑀯 𑀉𑀧𑀸𑀲𑀓 𑀧𑀼𑀧𑁆𑀨𑀁 𑀓𑀧𑁆𑀧𑀺𑀬𑀁 𑀓𑀭𑁄𑀳𑀺, 𑀇𑀫𑀁 𑀢𑀺𑀡’’𑀦𑁆𑀢𑀺 𑀏𑀯𑀁 𑀯𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀧𑀼𑀦 ‘‘𑀓𑀺𑀁 𑀓𑀣𑀬𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀲𑀘𑁂 𑀧𑀼𑀦𑀧𑀺 𑀢𑀣𑁂𑀯 𑀯𑀤𑀢𑀺, ‘‘𑀆𑀯𑀼𑀲𑁄, 𑀢𑁆𑀯𑀁 𑀧𑀺𑀡𑁆𑀟𑀧𑀸𑀢𑀺𑀓𑁂 𑀯𑀸 𑀫𑀳𑀸𑀣𑁂𑀭𑁂 𑀯𑀸 𑀦 𑀮𑀘𑁆𑀙𑀲𑀺, 𑀲𑀸𑀫𑀡𑁂𑀭𑁂 𑀮𑀘𑁆𑀙𑀲𑀻’’𑀢𑀺 𑀯𑀢𑁆𑀢𑀩𑁆𑀩𑁄. ‘‘𑀦𑀦𑀼, 𑀪𑀦𑁆𑀢𑁂 𑀅𑀲𑀼𑀓𑀲𑁆𑀫𑀺𑀜𑁆𑀘 𑀅𑀲𑀼𑀓𑀲𑁆𑀫𑀺𑀜𑁆𑀘 𑀕𑀸𑀫𑁂 𑀪𑀤𑀦𑁆𑀢𑁂 𑀪𑁄𑀚𑁂𑀲𑀼𑀁, 𑀅𑀳𑀁 𑀓𑀲𑁆𑀫𑀸 𑀦 𑀮𑀪𑀸𑀫𑀻’’𑀢𑀺 𑀘 𑀯𑀼𑀢𑁆𑀢𑁂 ‘‘𑀢𑁂 𑀦𑀺𑀫𑀦𑁆𑀢𑁂𑀢𑀼𑀁 𑀚𑀸𑀦𑀦𑁆𑀢𑀺, 𑀢𑁆𑀯𑀁 𑀦 𑀚𑀸𑀦𑀸𑀲𑀻’’𑀢𑀺. 𑀢𑁂 𑀓𑀣𑀁 𑀦𑀺𑀫𑀦𑁆𑀢𑁂𑀲𑀼𑀁 𑀪𑀦𑁆𑀢𑁂𑀢𑀺? 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. 𑀲𑀘𑁂 𑀲𑁄𑀧𑀺 𑀢𑀣𑁂𑀯 𑀯𑀤𑀢𑀺, 𑀯𑀝𑁆𑀝𑀢𑀺. 𑀅𑀣 𑀧𑀼𑀦𑀧𑀺 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, ‘‘𑀦 𑀤𑀸𑀦𑀺 𑀢𑁆𑀯𑀁, 𑀆𑀯𑀼𑀲𑁄, 𑀩𑀳𑀽 𑀪𑀺𑀓𑁆𑀔𑀽 𑀮𑀘𑁆𑀙𑀲𑀺, 𑀢𑀬𑁄 𑀏𑀯 𑀮𑀘𑁆𑀙𑀲𑀻’’𑀢𑀺 𑀯𑀢𑁆𑀢𑀩𑁆𑀩𑁄. ‘‘𑀦𑀦𑀼, 𑀪𑀦𑁆𑀢𑁂, 𑀅𑀲𑀼𑀓𑀲𑁆𑀫𑀺𑀜𑁆𑀘 𑀅𑀲𑀼𑀓𑀲𑁆𑀫𑀺𑀜𑁆𑀘 𑀕𑀸𑀫𑁂 𑀲𑀓𑀮𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀪𑁄𑀚𑁂𑀲𑀼𑀁, 𑀅𑀳𑀁 𑀓𑀲𑁆𑀫𑀸 𑀦 𑀮𑀪𑀸𑀫𑀻’’𑀢𑀺? ‘‘𑀢𑁆𑀯𑀁 𑀦𑀺𑀫𑀦𑁆𑀢𑁂𑀢𑀼𑀁 𑀦 𑀚𑀸𑀦𑀸𑀲𑀻’’𑀢𑀺. ‘‘𑀢𑁂 𑀓𑀣𑀁 𑀦𑀺𑀫𑀦𑁆𑀢𑁂𑀲𑀼’’𑀦𑁆𑀢𑀺? 𑀢𑁂 ‘‘𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀆𑀳𑀁𑀲𑀽𑀢𑀺. 𑀲𑀘𑁂 𑀲𑁄𑀧𑀺 ‘‘𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺. 𑀅𑀣 𑀧𑀼𑀦𑀧𑀺 ‘‘𑀪𑀢𑁆𑀢𑀫𑁂𑀯𑀸’’𑀢𑀺 𑀯𑀤𑀢𑀺, 𑀢𑀢𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀕𑀘𑁆𑀙 𑀢𑁆𑀯𑀁, 𑀦𑀢𑁆𑀣𑀫𑁆𑀳𑀸𑀓𑀁 𑀢𑀯 𑀪𑀢𑁆𑀢𑁂𑀦𑀢𑁆𑀣𑁄, 𑀦𑀺𑀩𑀤𑁆𑀥𑀕𑁄𑀘𑀭𑁄 𑀏𑀲 𑀅𑀫𑁆𑀳𑀸𑀓𑀁, 𑀫𑀬𑀫𑁂𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑀁 ‘‘𑀘𑀭𑀣, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀆𑀕𑀢𑀁 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀓𑀺𑀁 𑀪𑁄 𑀮𑀤𑁆𑀥𑀸 𑀪𑀺𑀓𑁆𑀔𑀽’’𑀢𑀺. ‘‘𑀓𑀺𑀁 𑀏𑀢𑁂𑀦 𑀩𑀳𑀼 𑀏𑀢𑁆𑀣 𑀯𑀢𑁆𑀢𑀩𑁆𑀩𑀁, ‘𑀣𑁂𑀭𑀸 𑀲𑁆𑀯𑁂 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’𑀢𑀺 𑀆𑀳𑀁𑀲𑀼. 𑀫𑀸 𑀤𑀸𑀦𑀺 𑀢𑀼𑀫𑁆𑀳𑁂 𑀧𑀫𑀚𑁆𑀚𑀺𑀢𑁆𑀣𑀸’’𑀢𑀺. 𑀤𑀼𑀢𑀺𑀬𑀤𑀺𑀯𑀲𑁂 𑀘𑁂𑀢𑀺𑀬𑀯𑀢𑁆𑀢𑀁 𑀓𑀢𑁆𑀯𑀸 𑀞𑀺𑀢𑀸 𑀪𑀺𑀓𑁆𑀔𑀽 𑀲𑀗𑁆𑀖𑀢𑁆𑀣𑁂𑀭𑁂𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀆𑀯𑀼𑀲𑁄, 𑀥𑀼𑀭𑀕𑀸𑀫𑁂 𑀲𑀗𑁆𑀖𑀪𑀢𑁆𑀢𑀁 𑀅𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑁄 𑀧𑀦 𑀅𑀕𑀫𑀸𑀲𑀺, 𑀕𑀘𑁆𑀙𑀸𑀫 𑀥𑀼𑀭𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’’𑀢𑀺. 𑀪𑀺𑀓𑁆𑀔𑀽𑀳𑀺 𑀣𑁂𑀭𑀲𑁆𑀲 𑀯𑀘𑀦𑀁 𑀓𑀸𑀢𑀩𑁆𑀩𑀁, 𑀦 𑀤𑀼𑀩𑁆𑀩𑀘𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀕𑀸𑀫𑀤𑁆𑀯𑀸𑀭𑁂 𑀅𑀝𑁆𑀞𑀢𑁆𑀯𑀸𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁. 𑀢𑁂𑀲𑀼 𑀧𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀦𑁆𑀢𑁂𑀲𑀼 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀆𑀲𑀦𑀲𑀸𑀮𑀸𑀬 𑀪𑀢𑁆𑀢𑀁 𑀞𑀧𑁂𑀢𑁆𑀯𑀸 𑀭𑀣𑀺𑀓𑀸𑀲𑀼 𑀆𑀳𑀺𑀡𑁆𑀟𑀦𑁆𑀢𑀸 𑀆𑀭𑁄𑀘𑁂𑀦𑁆𑀢𑀺 𑁋 ‘‘𑀆𑀲𑀦𑀲𑀸𑀮𑀸𑀬, 𑀪𑀦𑁆𑀢𑁂, 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀦 𑀯𑀝𑁆𑀝𑀢𑀺.
𑀅𑀣 𑀧𑀦 𑀪𑀢𑁆𑀢𑀁 𑀆𑀤𑀸𑀬 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, 𑀧𑀝𑀺𑀓𑀘𑁆𑀘𑁂𑀯 𑀯𑀸 𑀯𑀺𑀳𑀸𑀭𑀁 𑀅𑀪𑀺𑀳𑀭𑀺𑀢𑁆𑀯𑀸 𑀧𑀢𑀺𑀭𑀽𑀧𑁂 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀆𑀕𑀢𑀸𑀕𑀢𑀸𑀦𑀁 𑀤𑁂𑀦𑁆𑀢𑀺, 𑀅𑀬𑀁 𑀅𑀪𑀺𑀳𑀝𑀪𑀺𑀓𑁆𑀔𑀸 𑀦𑀸𑀫 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀪𑀢𑁆𑀢𑀲𑀸𑀮𑀸𑀬 𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀢𑀁 𑀢𑀁 𑀧𑀭𑀺𑀯𑁂𑀡𑀁 𑀧𑀳𑀺𑀡𑀦𑁆𑀢𑀺 ‘‘𑀪𑀢𑁆𑀢𑀲𑀸𑀮𑀸𑀬 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺, 𑀦 𑀯𑀝𑁆𑀝𑀢𑀺. 𑀬𑁂 𑀧𑀦 𑀫𑀦𑀼𑀲𑁆𑀲𑀸 𑀧𑀺𑀡𑁆𑀟𑀘𑀸𑀭𑀺𑀓𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀆𑀲𑀦𑀲𑀸𑀮𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀦𑁆𑀢𑀺, 𑀦 𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀬𑁂 𑀧𑀦 𑀕𑀸𑀫𑁂 𑀪𑀺𑀓𑁆𑀔𑀁 𑀅𑀮𑀪𑀺𑀢𑁆𑀯𑀸 𑀕𑀸𑀫𑀢𑁄 𑀦𑀺𑀓𑁆𑀔𑀫𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀪𑀦𑁆𑀢𑁂 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, 𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸, 𑀦 𑀯𑀸 𑀦𑀺𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 ‘‘𑀦𑀺𑀯𑀢𑁆𑀢𑀣, 𑀪𑀦𑁆𑀢𑁂, 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, ‘‘𑀦𑀺𑀯𑀢𑁆𑀢𑀣𑀸’’𑀢𑀺 𑀯𑀼𑀢𑁆𑀢𑀧𑀤𑁂 𑀦𑀺𑀯𑀢𑁆𑀢𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀦𑀺𑀯𑀢𑁆𑀢𑀣 𑀪𑀦𑁆𑀢𑁂, 𑀖𑀭𑁂 𑀪𑀢𑁆𑀢𑀁 𑀓𑀢𑀁, 𑀕𑀸𑀫𑁂 𑀪𑀢𑁆𑀢𑀁 𑀓𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀕𑁂𑀳𑁂 𑀘 𑀕𑀸𑀫𑁂 𑀘 𑀪𑀢𑁆𑀢𑀁 𑀦𑀸𑀫 𑀬𑀲𑁆𑀲 𑀓𑀲𑁆𑀲𑀘𑀺 𑀳𑁄𑀢𑀻𑀢𑀺 𑀦𑀺𑀯𑀢𑁆𑀢𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀦𑀺𑀯𑀢𑁆𑀢𑀣, 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀯𑀤𑀦𑁆𑀢𑀺, 𑀦𑀺𑀯𑀢𑁆𑀢𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀆𑀲𑀦𑀲𑀸𑀮𑀢𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀦𑀺𑀓𑁆𑀔𑀫𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀦𑀺𑀲𑀻𑀤𑀣 𑀪𑀦𑁆𑀢𑁂 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀘𑁆𑀘𑀪𑀢𑁆𑀢𑀦𑁆𑀢𑀺 𑀥𑀼𑀯𑀪𑀢𑁆𑀢𑀁 𑀯𑀼𑀘𑁆𑀘𑀢𑀺. ‘‘𑀦𑀺𑀘𑁆𑀘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, 𑀩𑀳𑀽𑀦𑀫𑁆𑀧𑀺 𑀏𑀓𑀢𑁄 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀮𑀸𑀓𑀪𑀢𑁆𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.
𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.
𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀤𑀼𑀢𑀺𑀬𑀁.
𑁩. 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸
𑁨𑁨𑁧. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑁋 𑀦 𑀔𑁄 𑀇𑀤𑀁 𑀑𑀭𑀓𑀁 𑀪𑀯𑀺𑀲𑁆𑀲𑀢𑀺, 𑀬𑀣𑀬𑀺𑀫𑁂 𑀫𑀦𑀼𑀲𑁆𑀲𑀸 𑀲𑀓𑁆𑀓𑀘𑁆𑀘𑀁 𑀪𑀢𑁆𑀢𑀁 𑀓𑀭𑁄𑀦𑁆𑀢𑀻𑀢𑀺, 𑀬𑁂𑀦 𑀦𑀺𑀬𑀸𑀫𑁂𑀦 𑀇𑀫𑁂 𑀫𑀦𑀼𑀲𑁆𑀲𑀸 𑀲𑀓𑁆𑀓𑀘𑁆𑀘𑀁 𑀪𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀢𑁂𑀦 𑀜𑀸𑀬𑀢𑀺 𑁋 ‘‘𑀇𑀤𑀁 𑀲𑀸𑀲𑀦𑀁 𑀇𑀤𑀁 𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑁂 𑀲𑀗𑁆𑀖𑁂 𑀤𑀸𑀦𑀁 𑀦 𑀔𑁄 𑀑𑀭𑀓𑀁 𑀪𑀯𑀺𑀲𑁆𑀲𑀢𑀺, 𑀧𑀭𑀺𑀢𑁆𑀢𑀁 𑀮𑀸𑀫𑀓𑀁 𑀦𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺. 𑀓𑀺𑀭𑀧𑀢𑀺𑀓𑁄𑀢𑀺 𑀏𑀢𑁆𑀣 ‘‘𑀓𑀺𑀭𑁄’’𑀢𑀺 𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀦𑀸𑀫𑀁; 𑀅𑀥𑀺𑀧𑀘𑁆𑀘𑀝𑁆𑀞𑁂𑀦 𑀧𑀦 ‘‘𑀓𑀺𑀭𑀧𑀢𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀓𑀺𑀭 𑀇𑀲𑁆𑀲𑀭𑁄 𑀅𑀥𑀺𑀧𑀢𑀺 𑀫𑀸𑀲𑀉𑀢𑀼𑀲𑀁𑀯𑀘𑁆𑀙𑀭𑀦𑀺𑀬𑀸𑀫𑁂𑀦 𑀯𑁂𑀢𑀦𑀁 𑀤𑀢𑁆𑀯𑀸 𑀓𑀫𑁆𑀫𑀓𑀸𑀭𑀓𑁂 𑀓𑀫𑁆𑀫𑀁 𑀓𑀸𑀭𑁂𑀢𑀺. 𑀩𑀤𑀭𑀸 𑀧𑀝𑀺𑀬𑀢𑁆𑀢𑀸𑀢𑀺 𑀉𑀧𑀘𑀸𑀭𑀯𑀲𑁂𑀦 𑀯𑀤𑀢𑀺. 𑀩𑀤𑀭𑀫𑀺𑀲𑁆𑀲𑁂𑀦𑀸𑀢𑀺 𑀩𑀤𑀭𑀲𑀸𑀴𑀯𑁂𑀦.
𑁨𑁨𑁨. 𑀉𑀲𑁆𑀲𑀽𑀭𑁂 𑀆𑀳𑀭𑀺𑀬𑀺𑀢𑁆𑀣𑀸𑀢𑀺 𑀅𑀢𑀺𑀤𑀺𑀯𑀸 𑀆𑀳𑀭𑀺𑀬𑀺𑀢𑁆𑀣.
𑁨𑁨𑁬. 𑀫𑀬𑁆𑀳𑀁 𑀪𑀢𑁆𑀢𑀧𑀘𑁆𑀘𑀸𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻𑀢𑀺 𑀅𑀬𑀁 𑀪𑀢𑁆𑀢𑀯𑀺𑀓𑀧𑁆𑀧𑀦𑀸 𑀦𑀸𑀫 𑀲𑀫𑁆𑀫𑀼𑀔𑀸𑀧𑀺 𑀧𑀭𑀫𑁆𑀫𑀼𑀔𑀸𑀧𑀺 𑀯𑀝𑁆𑀝𑀢𑀺. 𑀲𑀫𑁆𑀫𑀼𑀔𑀸 𑀤𑀺𑀲𑁆𑀯𑀸 ‘‘𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀅𑀤𑀺𑀲𑁆𑀯𑀸 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀧𑀦 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀯 𑀯𑀼𑀢𑁆𑀢𑀸. 𑀲𑀸 𑀘𑀸𑀬𑀁 𑀬𑀲𑁆𑀫𑀸 𑀯𑀺𑀦𑀬𑀓𑀫𑁆𑀫𑁂𑀦 𑀲𑀗𑁆𑀕𑀳𑀺𑀢𑀸, 𑀢𑀲𑁆𑀫𑀸 𑀪𑀕𑀯𑀢𑁄 𑀯𑀺𑀓𑀧𑁆𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀪𑀕𑀯𑀢𑀺 𑀳𑀺 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁂𑀧𑀺 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁂𑀧𑀺 𑀲𑀗𑁆𑀖𑁂𑀦 𑀕𑀡𑀧𑁆𑀧𑀳𑁄𑀦𑀓𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀢𑀁 𑀢𑀁 𑀓𑀫𑁆𑀫𑀁 𑀓𑀢𑀁 𑀲𑀼𑀓𑀢𑀫𑁂𑀯 𑀳𑁄𑀢𑀺, 𑀪𑀕𑀯𑀸 𑀦𑁂𑀯 𑀓𑀫𑁆𑀫𑀁 𑀓𑁄𑀧𑁂𑀢𑀺; 𑀦 𑀲𑀫𑁆𑀧𑀸𑀤𑁂𑀢𑀺. 𑀦 𑀓𑁄𑀧𑁂𑀢𑀺 𑀥𑀫𑁆𑀫𑀺𑀲𑁆𑀲𑀭𑀢𑁆𑀢𑀸, 𑀦 𑀲𑀫𑁆𑀧𑀸𑀤𑁂𑀢𑀺 𑀅𑀕𑀡𑀧𑀽𑀭𑀓𑀢𑁆𑀢𑀸.
𑁨𑁨𑁯. 𑀤𑁆𑀯𑁂 𑀢𑀬𑁄 𑀦𑀺𑀫𑀦𑁆𑀢𑀦𑁂 𑀏𑀓𑀢𑁄 𑀪𑀼𑀜𑁆𑀚𑀢𑀻𑀢𑀺 𑀤𑁆𑀯𑁂 𑀢𑀻𑀡𑀺 𑀦𑀺𑀫𑀦𑁆𑀢𑀦𑀸𑀦𑀺 𑀏𑀓𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀺𑀲𑁆𑀲𑁂𑀢𑁆𑀯𑀸 𑀏𑀓𑀁 𑀓𑀢𑁆𑀯𑀸 𑀪𑀼𑀜𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀢𑀻𑀡𑀺 𑀓𑀼𑀮𑀸𑀦𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀆𑀳𑀭𑀺𑀢𑁆𑀯𑀸 𑀪𑀢𑁆𑀢𑀁 𑀆𑀓𑀺𑀭𑀦𑁆𑀢𑀺, 𑀲𑀽𑀧𑀩𑁆𑀬𑀜𑁆𑀚𑀦𑀁 𑀆𑀓𑀺𑀭𑀦𑁆𑀢𑀺, 𑀏𑀓𑀫𑀺𑀲𑁆𑀲𑀓𑀁 𑀳𑁄𑀢𑀺, 𑀏𑀢𑁆𑀣 𑀅𑀦𑀸𑀧𑀢𑁆𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀫𑀽𑀮𑀦𑀺𑀫𑀦𑁆𑀢𑀦𑀁 𑀳𑁂𑀝𑁆𑀞𑀸 𑀳𑁄𑀢𑀺, 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀉𑀧𑀭𑀺, 𑀢𑀁 𑀉𑀧𑀭𑀺𑀢𑁄 𑀧𑀝𑁆𑀞𑀸𑀬 𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺. 𑀳𑀢𑁆𑀣𑀁 𑀧𑀦 𑀅𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸 𑀧𑀞𑀫𑀦𑀺𑀫𑀦𑁆𑀢𑀦𑀢𑁄 𑀏𑀓𑀫𑁆𑀧𑀺 𑀓𑀩𑀴𑀁 𑀉𑀤𑁆𑀥𑀭𑀺𑀢𑁆𑀯𑀸 𑀪𑀼𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀣𑀸 𑀢𑀣𑀸 𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑀘𑁂𑀧𑀺 𑀢𑀢𑁆𑀣 𑀔𑀻𑀭𑀁 𑀯𑀸 𑀭𑀲𑀁 𑀯𑀸 𑀆𑀓𑀺𑀭𑀦𑁆𑀢𑀺, 𑀬𑁂𑀦 𑀅𑀚𑁆𑀛𑁄𑀢𑁆𑀣𑀢𑀁 𑀪𑀢𑁆𑀢𑀁 𑀏𑀓𑀭𑀲𑀁 𑀳𑁄𑀢𑀺, 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀁 𑁋 ‘‘𑀔𑀻𑀭𑀪𑀢𑁆𑀢𑀁 𑀯𑀸 𑀭𑀲𑀪𑀢𑁆𑀢𑀁 𑀯𑀸 𑀮𑀪𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀢𑀢𑁆𑀣𑁂𑀯 𑀅𑀜𑁆𑀜𑁂𑀧𑀺 𑀔𑀻𑀭𑀪𑀢𑁆𑀢𑀁 𑀯𑀸 𑀭𑀲𑀪𑀢𑁆𑀢𑀁 𑀯𑀸 𑀆𑀓𑀺𑀭𑀦𑁆𑀢𑀺, 𑀔𑀻𑀭𑀁 𑀯𑀸 𑀭𑀲𑀁 𑀯𑀸 𑀧𑀺𑀯𑀢𑁄 𑀅𑀦𑀸𑀧𑀢𑁆𑀢𑀺. 𑀪𑀼𑀜𑁆𑀚𑀦𑁆𑀢𑁂𑀦 𑀧𑀦 𑀧𑀞𑀫𑀁 𑀮𑀤𑁆𑀥𑀫𑀁𑀲𑀔𑀡𑁆𑀟𑀁 𑀯𑀸 𑀪𑀢𑁆𑀢𑀧𑀺𑀡𑁆𑀟𑀁 𑀯𑀸 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀧𑁆𑀧𑀺𑀧𑀸𑀬𑀸𑀲𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺.
𑀫𑀳𑀸𑀉𑀧𑀸𑀲𑀓𑁄 𑀪𑀺𑀓𑁆𑀔𑀼𑀁 𑀦𑀺𑀫𑀦𑁆𑀢𑁂𑀢𑀺, 𑀢𑀲𑁆𑀲 𑀓𑀼𑀮𑀁 𑀉𑀧𑀕𑀢𑀲𑁆𑀲 𑀉𑀧𑀸𑀲𑀓𑁄𑀧𑀺 𑀢𑀲𑁆𑀲 𑀧𑀼𑀢𑁆𑀢𑀤𑀸𑀭𑀪𑀸𑀢𑀺𑀓𑀪𑀕𑀺𑀦𑀺𑀆𑀤𑀬𑁄𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀆𑀳𑀭𑀺𑀢𑁆𑀯𑀸 𑀧𑀢𑁆𑀢𑁂 𑀧𑀓𑁆𑀔𑀺𑀧𑀦𑁆𑀢𑀺, 𑀉𑀧𑀸𑀲𑀓𑁂𑀦 𑀧𑀞𑀫𑀁 𑀤𑀺𑀦𑁆𑀦𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀮𑀤𑁆𑀥𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀧𑀦 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 ‘‘𑀲𑀘𑁂 𑀧𑀸𑀝𑁂𑀓𑁆𑀓𑀁 𑀧𑀘𑀦𑁆𑀢𑀺, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀓𑁆𑀓𑀪𑀢𑁆𑀢𑀢𑁄 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀢𑀢𑁆𑀣 𑀧𑀘𑁆𑀙𑀸 𑀆𑀳𑀝𑀁 𑀧𑀞𑀫𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀬𑀤𑀺 𑀧𑀦 𑀲𑀩𑁆𑀩𑁂𑀲𑀁 𑀏𑀓𑁄𑀯 𑀧𑀸𑀓𑁄 𑀳𑁄𑀢𑀺, 𑀧𑀭𑀫𑁆𑀧𑀭𑀪𑁄𑀚𑀦𑀁 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀉𑀧𑀸𑀲𑀓𑁄 𑀦𑀺𑀫𑀦𑁆𑀢𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑀺, 𑀅𑀜𑁆𑀜𑁄 𑀫𑀦𑀼𑀲𑁆𑀲𑁄 𑀧𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀦 𑀤𑀸𑀢𑀩𑁆𑀩𑀁. 𑀓𑀺𑀁 𑀪𑀦𑁆𑀢𑁂 𑀦 𑀤𑁂𑀣𑀸𑀢𑀺? 𑀦𑀦𑀼 𑀉𑀧𑀸𑀲𑀓 𑀢𑀬𑀸 𑀦𑀺𑀫𑀦𑁆𑀢𑀺𑀢𑀫𑁆𑀳𑀸𑀢𑀺! 𑀳𑁄𑀢𑀼 𑀪𑀦𑁆𑀢𑁂, 𑀮𑀤𑁆𑀥𑀁 𑀮𑀤𑁆𑀥𑀁 𑀪𑀼𑀜𑁆𑀚𑀣𑀸𑀢𑀺 𑀯𑀤𑀢𑀺, 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀜𑁆𑀜𑁂𑀦 𑀆𑀳𑀭𑀺𑀢𑁆𑀯𑀸 𑀪𑀢𑁆𑀢𑁂 𑀤𑀺𑀦𑁆𑀦𑁂 𑀆𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁.
𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸 ‘‘𑀲𑁆𑀯𑁂𑀧𑀺 𑀪𑀦𑁆𑀢𑁂 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀲𑀩𑁆𑀩𑁂 𑀦𑀺𑀫𑀦𑁆𑀢𑁂𑀦𑁆𑀢𑀺, 𑀧𑀼𑀦𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀮𑀤𑁆𑀥𑀁 𑀮𑀤𑁆𑀥𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀲𑀩𑁆𑀩𑁂𑀳𑀺 𑀦𑀺𑀫𑀦𑁆𑀢𑀺𑀢𑀢𑁆𑀢𑀸. 𑀏𑀓𑁄 𑀪𑀺𑀓𑁆𑀔𑀼 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀪𑀢𑁆𑀢𑀁 𑀮𑀪𑀢𑀺, 𑀢𑀫𑀜𑁆𑀜𑁄 𑀉𑀧𑀸𑀲𑀓𑁄 𑀦𑀺𑀫𑀦𑁆𑀢𑁂𑀢𑁆𑀯𑀸 𑀖𑀭𑁂 𑀦𑀺𑀲𑀻𑀤𑀸𑀧𑁂𑀢𑀺, 𑀦 𑀘 𑀢𑀸𑀯 𑀪𑀢𑁆𑀢𑀁 𑀲𑀫𑁆𑀧𑀚𑁆𑀚𑀢𑀺. 𑀲𑀘𑁂 𑀲𑁄 𑀪𑀺𑀓𑁆𑀔𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺. 𑀅𑀪𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 ‘‘𑀓𑀺𑀁 𑀪𑀦𑁆𑀢𑁂 𑀦 𑀪𑀼𑀜𑁆𑀚𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑀬𑀸 𑀦𑀺𑀫𑀦𑁆𑀢𑀺𑀢𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀮𑀤𑁆𑀥𑀁 𑀮𑀤𑁆𑀥𑀁 𑀪𑀼𑀜𑁆𑀚𑀣 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁄 𑀪𑀼𑀜𑁆𑀚𑀢𑀺, 𑀯𑀝𑁆𑀝𑀢𑀺.
𑀲𑀓𑀮𑁂𑀦 𑀕𑀸𑀫𑁂𑀦𑀸𑀢𑀺 𑀲𑀓𑀮𑁂𑀦 𑀕𑀸𑀫𑁂𑀦 𑀏𑀓𑀢𑁄 𑀳𑀼𑀢𑁆𑀯𑀸 𑀦𑀺𑀫𑀦𑁆𑀢𑀺𑀢𑀲𑁆𑀲𑁂𑀯 𑀬𑀢𑁆𑀣 𑀓𑀢𑁆𑀣𑀘𑀺 𑀪𑀼𑀜𑁆𑀚𑀢𑁄 𑀅𑀦𑀸𑀧𑀢𑁆𑀢𑀺. 𑀧𑀽𑀕𑁂𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀫𑀦𑁆𑀢𑀺𑀬𑀫𑀸𑀦𑁄 𑀪𑀺𑀓𑁆𑀔𑀁 𑀕𑀳𑁂𑀲𑁆𑀲𑀸𑀫𑀻𑀢𑀺 𑀪𑀡𑀢𑀻𑀢𑀺 ‘‘𑀪𑀢𑁆𑀢𑀁 𑀕𑀡𑁆𑀳𑀸’’𑀢𑀺 𑀦𑀺𑀫𑀦𑁆𑀢𑀺𑀬𑀫𑀸𑀦𑁄 ‘‘𑀦 𑀫𑀬𑁆𑀳𑀁 𑀢𑀯 𑀪𑀢𑁆𑀢𑁂𑀦𑀢𑁆𑀣𑁄, 𑀪𑀺𑀓𑁆𑀔𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺. 𑀏𑀢𑁆𑀣 𑀧𑀦 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀆𑀳 𑁋 ‘‘𑀏𑀯𑀁 𑀯𑀤𑀦𑁆𑀢𑁄 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀅𑀦𑀺𑀫𑀦𑁆𑀢𑀦𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀪𑀼𑀜𑁆𑀚𑀦𑀢𑁆𑀣𑀸𑀬 𑀧𑀦 𑀑𑀓𑀸𑀲𑁄 𑀓𑀢𑁄 𑀳𑁄𑀢𑀻𑀢𑀺 𑀦𑁂𑀯 𑀕𑀡𑀪𑁄𑀚𑀦𑀢𑁄 𑀦 𑀘𑀸𑀭𑀺𑀢𑁆𑀢𑀢𑁄 𑀫𑀼𑀘𑁆𑀘𑀢𑀻’’𑀢𑀺. 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳 𑁋 ‘‘𑀬𑀤𑀕𑁆𑀕𑁂𑀦 𑀅𑀦𑀺𑀫𑀦𑁆𑀢𑀦𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀤𑀕𑁆𑀕𑁂𑀦 𑀦𑁂𑀯 𑀕𑀡𑀪𑁄𑀚𑀦𑀁 𑀦 𑀘𑀸𑀭𑀺𑀢𑁆𑀢𑀁 𑀳𑁄𑀢𑀻’’𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.
𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀸𑀓𑀺𑀭𑀺𑀬𑀁 𑀏𑀢𑁆𑀣 𑀳𑀺 𑀪𑁄𑀚𑀦𑀁 𑀓𑀺𑀭𑀺𑀬𑀸, 𑀅𑀯𑀺𑀓𑀧𑁆𑀧𑀦𑀁 𑀅𑀓𑀺𑀭𑀺𑀬𑀸, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.
𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀢𑀢𑀺𑀬𑀁.
𑁪. 𑀓𑀸𑀡𑀫𑀸𑀢𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸
𑁨𑁩𑁦. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑁂 𑁋 𑀓𑀸𑀡𑀫𑀸𑀢𑀸𑀢𑀺 𑀓𑀸𑀡𑀸𑀬 𑀫𑀸𑀢𑀸. 𑀲𑀸 𑀓𑀺𑀭𑀲𑁆𑀲𑀸 𑀥𑀻𑀢𑀸 𑀅𑀪𑀺𑀭𑀽𑀧𑀸 𑀅𑀳𑁄𑀲𑀺, 𑀬𑁂 𑀬𑁂 𑀢𑀁 𑀧𑀲𑁆𑀲𑀦𑁆𑀢𑀺, 𑀢𑁂 𑀢𑁂 𑀭𑀸𑀕𑁂𑀦 𑀓𑀸𑀡𑀸 𑀳𑁄𑀦𑁆𑀢𑀺, 𑀭𑀸𑀕𑀦𑁆𑀥𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀧𑀭𑁂𑀲𑀁 𑀓𑀸𑀡𑀪𑀸𑀯𑀓𑀭𑀡𑀢𑁄 ‘‘𑀓𑀸𑀡𑀸’’𑀢𑀺 𑀯𑀺𑀲𑁆𑀲𑀼𑀢𑀸 𑀅𑀳𑁄𑀲𑀺. 𑀢𑀲𑁆𑀲𑀸 𑀯𑀲𑁂𑀦 𑀫𑀸𑀢𑀸𑀧𑀺𑀲𑁆𑀲𑀸 ‘‘𑀓𑀸𑀡𑀫𑀸𑀢𑀸’’𑀢𑀺 𑀧𑀸𑀓𑀝𑀸 𑀚𑀸𑀢𑀸. 𑀆𑀕𑀢𑀦𑁆𑀢𑀺 𑀆𑀕𑀫𑀦𑀁. 𑀓𑀺𑀲𑁆𑀫𑀺𑀁 𑀯𑀺𑀬𑀸𑀢𑀺 𑀓𑀻𑀤𑀺𑀲𑀁 𑀯𑀺𑀬; 𑀮𑀚𑁆𑀚𑀦𑀓𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀺𑀢𑁆𑀢𑀳𑀢𑁆𑀣𑀁 𑀕𑀦𑁆𑀢𑀼𑀦𑁆𑀢𑀺 𑀭𑀺𑀢𑁆𑀢𑀸 𑀳𑀢𑁆𑀣𑀸 𑀅𑀲𑁆𑀫𑀺𑀁 𑀕𑀫𑀦𑁂 𑀢𑀤𑀺𑀤𑀁 𑀭𑀺𑀢𑁆𑀢𑀳𑀢𑁆𑀣𑀁, 𑀢𑀁 𑀭𑀺𑀢𑁆𑀢𑀳𑀢𑁆𑀣𑀁 𑀕𑀫𑀦𑀁 𑀕𑀦𑁆𑀢𑀼𑀁 𑀮𑀚𑁆𑀚𑀦𑀓𑀁 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀻𑀢𑀺 𑀉𑀧𑀸𑀲𑀺𑀓𑀸 𑀅𑀭𑀺𑀬𑀲𑀸𑀯𑀺𑀓𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀲𑀦𑁆𑀢𑀁 𑀅𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀢𑀸𑀯 𑀤𑀸𑀧𑁂𑀲𑀺, 𑀬𑀸𑀯 𑀲𑀩𑁆𑀩𑀁 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀺. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀏𑀢𑁆𑀣 𑀓𑀸𑀡𑀸𑀧𑀺 𑀫𑀸𑀢𑀼 𑀅𑀢𑁆𑀣𑀸𑀬 𑀤𑁂𑀲𑀺𑀬𑀫𑀸𑀦𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀦𑁆𑀦𑀸 𑀅𑀳𑁄𑀲𑀺. 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀻𑀢𑀺 𑀆𑀲𑀦𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀕𑀢𑁄. 𑀲𑁄𑀧𑀺 𑀧𑀼𑀭𑀺𑀲𑁄 ‘‘𑀲𑀢𑁆𑀣𑀸 𑀓𑀺𑀭 𑀓𑀸𑀡𑀫𑀸𑀢𑀸𑀬 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀻’’𑀢𑀺 𑀲𑀼𑀢𑁆𑀯𑀸 𑀓𑀸𑀡𑀁 𑀆𑀦𑁂𑀢𑁆𑀯𑀸 𑀧𑀓𑀢𑀺𑀝𑁆𑀞𑀸𑀦𑁂𑀬𑁂𑀯 𑀞𑀧𑁂𑀲𑀺.
𑁨𑁩𑁧. 𑀇𑀫𑀲𑁆𑀫𑀺𑀁 𑀧𑀦 𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀅𑀧𑁆𑀧𑀜𑁆𑀜𑀢𑁆𑀢𑁂𑀬𑁂𑀯 𑀲𑀺𑀓𑁆𑀔𑀸𑀧𑀤𑁂 𑀧𑀸𑀣𑁂𑀬𑁆𑀬𑀯𑀢𑁆𑀣𑀼 𑀉𑀤𑀧𑀸𑀤𑀺, 𑀢𑀲𑁆𑀫𑀸 𑀅𑀦𑀦𑁆𑀢𑀭𑀫𑁂𑀯 𑀘𑁂𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄𑀧𑀺 𑀘 𑀉𑀧𑀸𑀲𑀓𑁄 𑀅𑀭𑀺𑀬𑀲𑀸𑀯𑀓𑀢𑁆𑀢𑀸 𑀲𑀩𑁆𑀩𑀫𑁂𑀯 𑀤𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀻’’𑀢𑀺.
𑁨𑁩𑁩. 𑀬𑀁𑀓𑀺𑀜𑁆𑀘𑀺 𑀧𑀳𑁂𑀡𑀓𑀢𑁆𑀣𑀸𑀬𑀸𑀢𑀺 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬 𑀧𑀝𑀺𑀬𑀢𑁆𑀢𑀁 𑀬𑀁𑀓𑀺𑀜𑁆𑀘𑀺 𑀅𑀢𑀺𑀭𑀲𑀓𑀫𑁄𑀤𑀓𑀲𑀓𑁆𑀔𑀮𑀺𑀓𑀸𑀤𑀺 𑀲𑀩𑁆𑀩𑀁 𑀇𑀥 𑀧𑀽𑀯𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀬𑀁𑀓𑀺𑀜𑁆𑀘𑀺 𑀧𑀸𑀣𑁂𑀬𑁆𑀬𑀢𑁆𑀣𑀸𑀬𑀸𑀢𑀺 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑀢𑁆𑀣𑀸𑀬 𑀧𑀝𑀺𑀬𑀢𑁆𑀢𑀁 𑀬𑀁𑀓𑀺𑀜𑁆𑀘𑀺 𑀩𑀤𑁆𑀥𑀲𑀢𑁆𑀢𑀼𑀅𑀩𑀤𑁆𑀥𑀲𑀢𑁆𑀢𑀼𑀢𑀺𑀮𑀢𑀡𑁆𑀟𑀼𑀮𑀸𑀤𑀺 𑀲𑀩𑁆𑀩𑀁 𑀇𑀥 𑀫𑀦𑁆𑀣𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀢𑁄 𑀘𑁂 𑀉𑀢𑁆𑀢𑀭𑀺𑀦𑁆𑀢𑀺 𑀲𑀘𑁂𑀧𑀺 𑀢𑀢𑀺𑀬𑀁 𑀧𑀢𑁆𑀢𑀁 𑀣𑀽𑀧𑀻𑀓𑀢𑀁 𑀕𑀡𑁆𑀳𑀸𑀢𑀺, 𑀧𑀽𑀯𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀁.
𑀤𑁆𑀯𑀢𑁆𑀢𑀺𑀧𑀢𑁆𑀢𑀧𑀽𑀭𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀫𑀼𑀔𑀯𑀝𑁆𑀝𑀺𑀬𑀸 𑀳𑁂𑀝𑁆𑀞𑀺𑀫𑀮𑁂𑀔𑀸𑀬 𑀲𑀫𑀧𑀽𑀭𑁂 𑀧𑀢𑁆𑀢𑁂 𑀕𑀳𑁂𑀢𑁆𑀯𑀸. 𑀅𑀫𑀼𑀢𑁆𑀭 𑀫𑀬𑀸 𑀤𑁆𑀯𑀢𑁆𑀢𑀺𑀧𑀢𑁆𑀢𑀧𑀽𑀭𑀸𑀢𑀺 𑀏𑀢𑁆𑀣 𑀲𑀘𑁂 𑀤𑁆𑀯𑁂 𑀕𑀳𑀺𑀢𑀸, ‘‘𑀅𑀢𑁆𑀭 𑀫𑀬𑀸 𑀤𑁆𑀯𑁂 𑀧𑀢𑁆𑀢𑀧𑀽𑀭𑀸 𑀧𑀝𑀺𑀕𑁆𑀕𑀳𑀺𑀢𑀸, 𑀢𑁆𑀯𑀁 𑀏𑀓𑀁 𑀕𑀡𑁆𑀳𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑁂𑀦𑀸𑀧𑀺 𑀅𑀜𑁆𑀜𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀧𑀞𑀫𑀁 𑀆𑀕𑀢𑁂𑀦 𑀤𑁆𑀯𑁂 𑀧𑀢𑁆𑀢𑀧𑀽𑀭𑀸 𑀕𑀳𑀺𑀢𑀸, 𑀫𑀬𑀸 𑀏𑀓𑁄, 𑀫𑀸 𑀢𑁆𑀯𑀁 𑀕𑀡𑁆𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀬𑁂𑀦 𑀧𑀞𑀫𑀁 𑀏𑀓𑁄 𑀕𑀳𑀺𑀢𑁄, 𑀢𑀲𑁆𑀲𑀸𑀧𑀺 𑀧𑀭𑀫𑁆𑀧𑀭𑀸𑀭𑁄𑀘𑀦𑁂 𑀏𑀲𑁂𑀯 𑀦𑀬𑁄. 𑀬𑁂𑀦 𑀧𑀦 𑀲𑀬𑀫𑁂𑀯 𑀢𑀬𑁄 𑀕𑀳𑀺𑀢𑀸, 𑀢𑁂𑀦 𑀅𑀜𑁆𑀜𑀁 𑀤𑀺𑀲𑁆𑀯𑀸 ‘‘𑀫𑀸 𑀔𑁄 𑀏𑀢𑁆𑀣 𑀧𑀝𑀺𑀕𑁆𑀕𑀡𑁆𑀳𑀺’’ 𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀁. 𑀧𑀝𑀺𑀓𑁆𑀓𑀫𑀦𑀁 𑀦𑀻𑀳𑀭𑀺𑀢𑁆𑀯𑀸𑀢𑀺 𑀆𑀲𑀦𑀲𑀸𑀮𑀁 𑀳𑀭𑀺𑀢𑁆𑀯𑀸, 𑀆𑀲𑀦𑀲𑀸𑀮𑀁 𑀕𑀘𑁆𑀙𑀦𑁆𑀢𑁂𑀦 𑀘 𑀙𑀟𑁆𑀟𑀺𑀢𑀲𑀸𑀮𑀸 𑀦 𑀕𑀦𑁆𑀢𑀩𑁆𑀩𑀸. 𑀬𑀢𑁆𑀣 𑀫𑀳𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀲𑀻𑀤𑀢𑀺, 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀬𑀸 𑀮𑀤𑁆𑀥𑀝𑁆𑀞𑀸𑀦𑀢𑁄 𑀆𑀲𑀦𑁆𑀦𑀸 𑀆𑀲𑀦𑀲𑀸𑀮𑀸, 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀅𑀢𑁆𑀢𑀦𑁄 ‘𑀲𑀦𑁆𑀤𑀺𑀝𑁆𑀞𑀸𑀦𑀁 𑀯𑀸 𑀲𑀫𑁆𑀪𑀢𑁆𑀢𑀸𑀦𑀁 𑀯𑀸 𑀏𑀓𑀦𑀺𑀓𑀸𑀬𑀺𑀓𑀸𑀦𑀁 𑀯𑀸 𑀤𑀲𑁆𑀲𑀸𑀫𑀻’𑀢𑀺 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀦 𑀮𑀩𑁆𑀪𑀢𑀺. 𑀲𑀘𑁂 𑀧𑀦𑀲𑁆𑀲 𑀦𑀺𑀩𑀤𑁆𑀥𑀦𑀺𑀲𑀻𑀤𑀦𑀝𑁆𑀞𑀸𑀦𑀁 𑀳𑁄𑀢𑀺, 𑀤𑀽𑀭𑀫𑁆𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺.
𑀲𑀁𑀯𑀺𑀪𑀚𑀺𑀢𑀩𑁆𑀩𑀦𑁆𑀢𑀺 𑀲𑀘𑁂 𑀢𑀬𑁄 𑀧𑀢𑁆𑀢𑀧𑀽𑀭𑀸 𑀕𑀳𑀺𑀢𑀸, 𑀏𑀓𑀁 𑀅𑀢𑁆𑀢𑀦𑁄 𑀞𑀧𑁂𑀢𑁆𑀯𑀸 𑀤𑁆𑀯𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩𑀸. 𑀲𑀘𑁆𑀘𑁂 𑀤𑁆𑀯𑁂 𑀕𑀳𑀺𑀢𑀸, 𑀏𑀓𑀁 𑀅𑀢𑁆𑀢𑀦𑁄 𑀞𑀧𑁂𑀢𑁆𑀯𑀸 𑀏𑀓𑁄 𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩𑁄, 𑀬𑀣𑀸𑀫𑀺𑀢𑁆𑀢𑀁 𑀧𑀦 𑀤𑀸𑀢𑀼𑀁 𑀦 𑀮𑀩𑁆𑀪𑀢𑀺. 𑀬𑁂𑀦 𑀏𑀓𑁄 𑀕𑀳𑀺𑀢𑁄, 𑀦 𑀢𑁂𑀦 𑀓𑀺𑀜𑁆𑀘𑀺 𑀅𑀓𑀸𑀫𑀸 𑀤𑀸𑀢𑀩𑁆𑀩𑀁, 𑀬𑀣𑀸𑀭𑀼𑀘𑀺 𑀓𑀸𑀢𑀩𑁆𑀩𑀁.
𑁨𑁩𑁫. 𑀕𑀫𑀦𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁂𑀢𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀉𑀧𑀤𑁆𑀤𑀯𑀁 𑀯𑀸 𑀤𑀺𑀲𑁆𑀯𑀸 𑀅𑀦𑀢𑁆𑀣𑀺𑀓𑀢𑀸𑀬 𑀯𑀸 ‘‘𑀫𑀬𑀁 𑀇𑀤𑀸𑀦𑀺 𑀦 𑀧𑁂𑀲𑀺𑀲𑁆𑀲𑀸𑀫, 𑀦 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀕𑀫𑀦𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁂 𑀉𑀧𑀘𑁆𑀙𑀺𑀦𑁆𑀦𑁂. 𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦𑀦𑁆𑀢𑀺 𑀏𑀢𑁂𑀲𑀁 𑀩𑀳𑀼𑀫𑁆𑀧𑀺 𑀤𑁂𑀦𑁆𑀢𑀸𑀦𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦 ‘‘𑀢𑁂𑀲𑀫𑁆𑀧𑀺 𑀧𑀸𑀣𑁂𑀬𑁆𑀬𑀧𑀳𑁂𑀡𑀓𑀢𑁆𑀣𑀸𑀬 𑀧𑀝𑀺𑀬𑀢𑁆𑀢𑀢𑁄 𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.
𑀙𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.
𑀓𑀸𑀡𑀫𑀸𑀢𑀸𑀲𑀺𑀓𑁆𑀔𑀸𑀧𑀤𑀁 𑀘𑀢𑀼𑀢𑁆𑀣𑀁.
𑁫. 𑀧𑀞𑀫𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸
𑁨𑁩𑁬. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑁂 𑁋 𑀪𑀺𑀓𑁆𑀔𑀽 𑀪𑀼𑀢𑁆𑀢𑀸𑀯𑀻 𑀧𑀯𑀸𑀭𑀺𑀢𑀸𑀢𑀺 𑀩𑁆𑀭𑀸𑀳𑁆𑀫𑀡𑁂𑀦 ‘‘𑀕𑀡𑁆𑀳𑀣, 𑀪𑀦𑁆𑀢𑁂, 𑀬𑀸𑀯 𑀇𑀘𑁆𑀙𑀣𑀸’’𑀢𑀺 𑀏𑀯𑀁 𑀬𑀸𑀯𑀤𑀢𑁆𑀣𑀧𑀯𑀸𑀭𑀡𑀸𑀬, 𑀲𑀬𑀜𑁆𑀘 ‘‘𑀅𑀮𑀁, 𑀆𑀯𑀼𑀲𑁄, 𑀣𑁄𑀓𑀁 𑀣𑁄𑀓𑀁 𑀤𑁂𑀳𑀻’’𑀢𑀺 𑀏𑀯𑀁 𑀧𑀝𑀺𑀓𑁆𑀔𑁂𑀧𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸. 𑀧𑀝𑀺𑀯𑀺𑀲𑁆𑀲𑀓𑁂𑀢𑀺 𑀲𑀸𑀫𑀦𑁆𑀢𑀖𑀭𑀯𑀸𑀲𑀺𑀓𑁂.
𑁨𑁩𑁭. 𑀓𑀸𑀓𑁄𑀭𑀯𑀲𑀤𑁆𑀤𑀦𑁆𑀢𑀺 𑀓𑀸𑀓𑀸𑀦𑀁 𑀑𑀭𑀯𑀲𑀤𑁆𑀤𑀁; 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀯𑀺𑀭𑀯𑀦𑁆𑀢𑀸𑀦𑀁 𑀲𑀤𑁆𑀤𑀁. 𑀅𑀮𑀫𑁂𑀢𑀁 𑀲𑀩𑁆𑀩𑀦𑁆𑀢𑀺 𑀏𑀢𑁆𑀣 𑀢𑀺𑀓𑀸𑀭𑀁 𑀅𑀯𑀢𑁆𑀯𑀸𑀯 ‘‘𑀅𑀮𑀫𑁂𑀢𑀁 𑀲𑀩𑁆𑀩𑀁’’ 𑀏𑀢𑁆𑀢𑀓𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.
𑁨𑁩𑁮-𑁯. 𑀪𑀼𑀢𑁆𑀢𑀸𑀯𑀻𑀢𑀺 𑀪𑀼𑀢𑁆𑀢𑀯𑀸. 𑀢𑀢𑁆𑀣 𑀘 𑀬𑀲𑁆𑀫𑀸 𑀬𑁂𑀦 𑀏𑀓𑀫𑁆𑀧𑀺 𑀲𑀺𑀢𑁆𑀣𑀁 𑀲𑀗𑁆𑀔𑀸𑀤𑀺𑀢𑁆𑀯𑀸 𑀯𑀸 𑀅𑀲𑀗𑁆𑀔𑀸𑀤𑀺𑀢𑁆𑀯𑀸 𑀯𑀸 𑀅𑀚𑁆𑀛𑁄𑀳𑀭𑀺𑀢𑀁 𑀳𑁄𑀢𑀺, 𑀲𑁄 ‘‘𑀪𑀼𑀢𑁆𑀢𑀸𑀯𑀻’’𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀪𑀼𑀢𑁆𑀢𑀸𑀯𑀻 𑀦𑀸𑀫 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀯𑀸𑀭𑀺𑀢𑁄𑀢𑀺 𑀓𑀢𑀧𑀯𑀸𑀭𑀡𑁄, 𑀓𑀢𑀧𑀝𑀺𑀓𑁆𑀔𑁂𑀧𑁄. 𑀲𑁄𑀧𑀺 𑀘 𑀬𑀲𑁆𑀫𑀸 𑀦 𑀧𑀝𑀺𑀓𑁆𑀔𑁂𑀧𑀫𑀢𑁆𑀢𑁂𑀦, 𑀅𑀣 𑀔𑁄 𑀧𑀜𑁆𑀘𑀗𑁆𑀕𑀯𑀲𑁂𑀦, 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀧𑀯𑀸𑀭𑀺𑀢𑁄 𑀦𑀸𑀫 𑀅𑀲𑀦𑀁 𑀧𑀜𑁆𑀜𑀸𑀬𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀸 ‘‘𑀅𑀲𑀦𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀧𑁆𑀧𑀓𑀢𑀪𑁄𑀚𑀦𑁄, ‘‘𑀧𑀯𑀸𑀭𑀺𑀢𑁄’’𑀢𑀺 𑀯𑀼𑀢𑁆𑀢𑁄. 𑀬𑁄 𑀘 𑀯𑀺𑀧𑁆𑀧𑀓𑀢𑀪𑁄𑀚𑀦𑁄, 𑀢𑁂𑀦 𑀓𑀺𑀜𑁆𑀘𑀺 𑀪𑀼𑀢𑁆𑀢𑀁, 𑀓𑀺𑀜𑁆𑀘𑀺 𑀅𑀪𑀼𑀢𑁆𑀢𑀁, 𑀬𑀜𑁆𑀘 𑀪𑀼𑀢𑁆𑀢𑀁; 𑀢𑀁 𑀲𑀦𑁆𑀥𑀸𑀬 ‘‘𑀪𑀼𑀢𑁆𑀢𑀸𑀯𑀻’’𑀢𑀺𑀧𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀪𑀼𑀢𑁆𑀢𑀸𑀯𑀻𑀯𑀘𑀦𑁂𑀦 𑀯𑀺𑀲𑀼𑀁 𑀓𑀜𑁆𑀘𑀺 𑀅𑀢𑁆𑀣𑀲𑀺𑀤𑁆𑀥𑀺𑀁 𑀦 𑀧𑀲𑁆𑀲𑀸𑀫. ‘‘𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁, 𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀻’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁬𑁧-𑁬𑁨) 𑀧𑀦 𑀤𑀺𑀭𑀢𑁆𑀢𑀸𑀤𑀺𑀯𑀘𑀦𑀁 𑀯𑀺𑀬 𑀧𑀯𑀸𑀭𑀺𑀢𑀧𑀤𑀲𑁆𑀲 𑀧𑀭𑀺𑀯𑀸𑀭𑀓𑀪𑀸𑀯𑁂𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀬 𑀘𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.
𑀅𑀲𑀦𑀁 𑀧𑀜𑁆𑀜𑀸𑀬𑀢𑀻𑀢𑀺𑀆𑀤𑀻𑀲𑀼 𑀯𑀺𑀧𑁆𑀧𑀓𑀢𑀪𑁄𑀚𑀦𑀁 𑀤𑀺𑀲𑁆𑀲𑀢𑀺, 𑀪𑀼𑀜𑁆𑀚𑀫𑀸𑀦𑁄 𑀘𑁂𑀲𑁄 𑀧𑀼𑀕𑁆𑀕𑀮𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀪𑁄𑀚𑀦𑀁 𑀧𑀜𑁆𑀜𑀸𑀬𑀢𑀻𑀢𑀺 𑀧𑀯𑀸𑀭𑀡𑀧𑁆𑀧𑀳𑁄𑀦𑀓𑀪𑁄𑀚𑀦𑀁 𑀤𑀺𑀲𑁆𑀲𑀢𑀺. 𑀑𑀤𑀦𑀸𑀤𑀻𑀦𑀁 𑀘𑁂 𑀅𑀜𑁆𑀜𑀢𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀪𑁄𑀚𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀳𑀢𑁆𑀣𑀧𑀸𑀲𑁂 𑀞𑀺𑀢𑁄𑀢𑀺 𑀧𑀯𑀸𑀭𑀡𑀧𑁆𑀧𑀳𑁄𑀦𑀓𑀁 𑀪𑁄𑀚𑀦𑀁 𑀕𑀡𑁆𑀳𑀺𑀢𑁆𑀯𑀸 𑀤𑀸𑀬𑀓𑁄 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀧𑁆𑀧𑀫𑀸𑀡𑁂 𑀑𑀓𑀸𑀲𑁂 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀳𑀭𑀢𑀻𑀢𑀺 𑀲𑁄 𑀘𑁂 𑀤𑀸𑀬𑀓𑁄 𑀢𑀲𑁆𑀲 𑀢𑀁 𑀪𑀢𑁆𑀢𑀁 𑀓𑀸𑀬𑁂𑀦 𑀅𑀪𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀓𑁆𑀔𑁂𑀧𑁄 𑀧𑀜𑁆𑀜𑀸𑀬𑀢𑀻𑀢𑀺 𑀧𑀝𑀺𑀓𑁆𑀔𑁂𑀧𑁄 𑀤𑀺𑀲𑁆𑀲𑀢𑀺; 𑀢𑀜𑁆𑀘𑁂 𑀅𑀪𑀺𑀳𑀝𑀁 𑀲𑁄 𑀪𑀺𑀓𑁆𑀔𑀼 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀜𑁆𑀘𑀦𑁆𑀦𑀁 𑀅𑀗𑁆𑀕𑀸𑀦𑀁 𑀯𑀲𑁂𑀦 𑀧𑀯𑀸𑀭𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋
‘‘𑀧𑀜𑁆𑀘𑀳𑀺 𑀉𑀧𑀸𑀮𑀺 𑀆𑀓𑀸𑀭𑁂𑀳𑀺 𑀧𑀯𑀸𑀭𑀡𑀸 𑀧𑀜𑁆𑀜𑀸𑀬𑀢𑀺 𑁋 𑀅𑀲𑀦𑀁 𑀧𑀜𑁆𑀜𑀸𑀬𑀢𑀺, 𑀪𑁄𑀚𑀦𑀁 𑀧𑀜𑁆𑀜𑀸𑀬𑀢𑀺, 𑀳𑀢𑁆𑀣𑀧𑀸𑀲𑁂 𑀞𑀺𑀢𑁄, 𑀅𑀪𑀺𑀳𑀭𑀢𑀺, 𑀧𑀝𑀺𑀓𑁆𑀔𑁂𑀧𑁄 𑀧𑀜𑁆𑀜𑀸𑀬𑀢𑀻’’𑀢𑀺 (𑀧𑀭𑀺. 𑁪𑁨𑁮).
𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 ‘‘𑀅𑀲𑀦’’𑀦𑁆𑀢𑀺𑀆𑀤𑀻𑀲𑀼 𑀢𑀸𑀯 𑀬𑀜𑁆𑀘 𑀅𑀲𑁆𑀦𑀸𑀢𑀺 𑀬𑀜𑁆𑀘 𑀪𑁄𑀚𑀦𑀁 𑀳𑀢𑁆𑀣𑀧𑀸𑀲𑁂 𑀞𑀺𑀢𑁂𑀦 𑀅𑀪𑀺𑀳𑀝𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀢𑀁 ‘‘𑀑𑀤𑀦𑁄, 𑀓𑀼𑀫𑁆𑀫𑀸𑀲𑁄, 𑀲𑀢𑁆𑀢𑀼, 𑀫𑀘𑁆𑀙𑁄, 𑀫𑀁𑀲’’𑀦𑁆𑀢𑀺 𑀇𑀫𑁂𑀲𑀁 𑀅𑀜𑁆𑀜𑀢𑀭𑀫𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀑𑀤𑀦𑁄 𑀦𑀸𑀫 𑁋 𑀲𑀸𑀮𑀺, 𑀯𑀻𑀳𑀺, 𑀬𑀯𑁄, 𑀕𑁄𑀥𑀼𑀫𑁄, 𑀓𑀗𑁆𑀕𑀼, 𑀯𑀭𑀓𑁄, 𑀓𑀼𑀤𑁆𑀭𑀽𑀲𑀓𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁 𑀢𑀡𑁆𑀟𑀼𑀮𑁂𑀳𑀺 𑀦𑀺𑀩𑁆𑀩𑀢𑁆𑀢𑁄. 𑀢𑀢𑁆𑀣 ‘‘𑀲𑀸𑀮𑀻’’𑀢𑀺 𑀅𑀦𑁆𑀢𑀫𑀲𑁄 𑀦𑀻𑀯𑀸𑀭𑀁 𑀉𑀧𑀸𑀤𑀸𑀬 𑀲𑀩𑁆𑀩𑀸𑀧𑀺 𑀲𑀸𑀮𑀺𑀚𑀸𑀢𑀺. ‘‘𑀯𑀻𑀳𑀻’’𑀢𑀺 𑀲𑀩𑁆𑀩𑀸𑀧𑀺 𑀯𑀻𑀳𑀺𑀚𑀸𑀢𑀺. ‘‘𑀬𑀯𑀕𑁄𑀥𑀼𑀫𑁂𑀲𑀼’’ 𑀪𑁂𑀤𑁄 𑀦𑀢𑁆𑀣𑀺. ‘‘𑀓𑀗𑁆𑀕𑀽’’𑀢𑀺 𑀲𑁂𑀢𑀭𑀢𑁆𑀢𑀓𑀸𑀴𑀪𑁂𑀤𑀸 𑀲𑀩𑁆𑀩𑀸𑀧𑀺 𑀓𑀗𑁆𑀕𑀼𑀚𑀸𑀢𑀺. ‘‘𑀯𑀭𑀓𑁄’’𑀢𑀺 𑀅𑀦𑁆𑀢𑀫𑀲𑁄 𑀯𑀭𑀓𑀘𑁄𑀭𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑀸 𑀲𑁂𑀢𑀯𑀡𑁆𑀡𑀸 𑀯𑀭𑀓𑀚𑀸𑀢𑀺. ‘‘𑀓𑀼𑀤𑁆𑀭𑀽𑀲𑀓𑁄’’𑀢𑀺 𑀓𑀸𑀴𑀓𑁄 𑀤𑁆𑀭𑀯𑁄 𑀘𑁂𑀯 𑀲𑀸𑀫𑀸𑀓𑀸𑀤𑀺𑀪𑁂𑀤𑀸 𑀘 𑀲𑀩𑁆𑀩𑀸𑀧𑀺 𑀢𑀺𑀡𑀥𑀜𑁆𑀜𑀚𑀸𑀢𑀺.
𑀦𑀻𑀯𑀸𑀭𑀯𑀭𑀓𑀘𑁄𑀭𑀓𑀸 𑀘𑁂𑀢𑁆𑀣 ‘‘𑀥𑀜𑁆𑀜𑀸𑀦𑀼𑀮𑁄𑀫𑀸’’𑀢𑀺 𑀯𑀤𑀦𑁆𑀢𑀺. 𑀥𑀜𑁆𑀜𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀥𑀜𑁆𑀜𑀸𑀦𑀼𑀮𑁄𑀫𑀸𑀦𑀺 𑀯𑀸, 𑀏𑀢𑁂𑀲𑀁 𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀦𑀁 𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁 𑀢𑀡𑁆𑀟𑀼𑀮𑁂 𑀕𑀳𑁂𑀢𑁆𑀯𑀸 ‘‘𑀪𑀢𑁆𑀢𑀁 𑀧𑀘𑀺𑀲𑁆𑀲𑀸𑀫𑀸’’𑀢𑀺 𑀯𑀸 ‘‘𑀬𑀸𑀕𑀼𑀁 𑀧𑀘𑀺𑀲𑁆𑀲𑀸𑀫𑀸’’𑀢𑀺 𑀯𑀸 ‘‘𑀅𑀫𑁆𑀩𑀺𑀮𑀧𑀸𑀬𑀸𑀲𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀧𑀘𑀺𑀲𑁆𑀲𑀸𑀫𑀸’’𑀢𑀺 𑀯𑀸 𑀬𑀁𑀓𑀺𑀜𑁆𑀘𑀺 𑀲𑀦𑁆𑀥𑀸𑀬 𑀧𑀘𑀦𑁆𑀢𑀼, 𑀲𑀘𑁂 𑀉𑀡𑁆𑀳𑀁 𑀲𑀻𑀢𑀮𑀁 𑀯𑀸 𑀪𑀼𑀜𑁆𑀚𑀦𑁆𑀢𑀸𑀦𑀁 𑀪𑁄𑀚𑀦𑀓𑀸𑀮𑁂 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑁂 𑀑𑀥𑀺 𑀧𑀜𑁆𑀜𑀸𑀬𑀢𑀺, 𑀑𑀤𑀦𑀲𑀗𑁆𑀕𑀳𑀫𑁂𑀯 𑀕𑀘𑁆𑀙𑀢𑀺, 𑀧𑀯𑀸𑀭𑀡𑀁 𑀚𑀦𑁂𑀢𑀺. 𑀲𑀘𑁂 𑀑𑀥𑀺 𑀦 𑀧𑀜𑁆𑀜𑀸𑀬𑀢𑀺, 𑀬𑀸𑀕𑀼𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀧𑀯𑀸𑀭𑀡𑀁 𑀦 𑀚𑀦𑁂𑀢𑀺.
𑀬𑁄𑀧𑀺 𑀧𑀸𑀬𑀸𑀲𑁄 𑀯𑀸 𑀧𑀡𑁆𑀡𑀨𑀮𑀓𑀴𑀻𑀭𑀫𑀺𑀲𑁆𑀲𑀓𑀸 𑀅𑀫𑁆𑀩𑀺𑀮𑀬𑀸𑀕𑀼 𑀯𑀸 𑀉𑀤𑁆𑀥𑀦𑀢𑁄 𑀑𑀢𑀸𑀭𑀺𑀢𑀫𑀢𑁆𑀢𑀸 𑀅𑀩𑁆𑀪𑀼𑀡𑁆𑀳𑀸 𑀳𑁄𑀢𑀺, 𑀆𑀯𑀚𑁆𑀚𑀺𑀢𑁆𑀯𑀸 𑀧𑀺𑀯𑀺𑀢𑀼𑀁 𑀲𑀓𑁆𑀓𑀸, 𑀳𑀢𑁆𑀣𑁂𑀦 𑀕𑀳𑀺𑀢𑁄𑀓𑀸𑀲𑁂𑀧𑀺 𑀑𑀥𑀺𑀁 𑀦 𑀤𑀲𑁆𑀲𑁂𑀢𑀺, 𑀧𑀯𑀸𑀭𑀡𑀁 𑀦 𑀚𑀦𑁂𑀢𑀺. 𑀲𑀘𑁂 𑀧𑀦 𑀉𑀲𑀼𑀫𑀸𑀬 𑀯𑀺𑀕𑀢𑀸𑀬 𑀲𑀻𑀢𑀮𑀻𑀪𑀽𑀢𑀸 𑀖𑀦𑀪𑀸𑀯𑀁 𑀕𑀘𑁆𑀙𑀢𑀺, 𑀑𑀥𑀺𑀁 𑀤𑀲𑁆𑀲𑁂𑀢𑀺, 𑀧𑀼𑀦 𑀧𑀯𑀸𑀭𑀡𑀁 𑀚𑀦𑁂𑀢𑀺. 𑀧𑀼𑀩𑁆𑀩𑁂 𑀢𑀦𑀼𑀪𑀸𑀯𑁄 𑀦 𑀭𑀓𑁆𑀔𑀢𑀺. 𑀲𑀘𑁂𑀧𑀺 𑀤𑀥𑀺𑀢𑀓𑁆𑀓𑀸𑀤𑀻𑀦𑀺 𑀆𑀭𑁄𑀧𑁂𑀢𑁆𑀯𑀸 𑀩𑀳𑀼𑀧𑀡𑁆𑀡𑀨𑀮𑀓𑀴𑀻𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀝𑁆𑀞𑀺𑀫𑀢𑁆𑀢𑀸𑀧𑀺 𑀢𑀡𑁆𑀟𑀼𑀮𑀸 𑀧𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀪𑁄𑀚𑀦𑀓𑀸𑀮𑁂 𑀘𑁂 𑀑𑀥𑀺 𑀧𑀜𑁆𑀜𑀸𑀬𑀢𑀺, 𑀧𑀯𑀸𑀭𑀡𑀁 𑀚𑀦𑁂𑀢𑀺. 𑀅𑀬𑀸𑀕𑀼𑀓𑁂 𑀦𑀺𑀫𑀦𑁆𑀢𑀦𑁂 ‘‘𑀬𑀸𑀕𑀼𑀁 𑀤𑀲𑁆𑀲𑀸𑀫𑀸’’𑀢𑀺 𑀪𑀢𑁆𑀢𑁂 𑀉𑀤𑀓𑀓𑀜𑁆𑀚𑀺𑀓𑀔𑀻𑀭𑀸𑀤𑀻𑀦𑀺 𑀆𑀓𑀺𑀭𑀺𑀢𑁆𑀯𑀸 ‘‘𑀬𑀸𑀕𑀼𑀁 𑀕𑀡𑁆𑀳𑀣𑀸’’𑀢𑀺 𑀤𑁂𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀢𑀦𑀼𑀓𑀸 𑀳𑁄𑀦𑁆𑀢𑀺, 𑀧𑀯𑀸𑀭𑀡𑀁 𑀚𑀦𑁂𑀢𑀺𑀬𑁂𑀯. 𑀲𑀘𑁂 𑀧𑀦 𑀧𑀓𑁆𑀓𑀼𑀣𑀺𑀢𑁂𑀲𑀼 𑀉𑀤𑀓𑀸𑀤𑀻𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀬𑀸𑀕𑀼𑀲𑀗𑁆𑀕𑀳𑀫𑁂𑀯 𑀕𑀘𑁆𑀙𑀢𑀺. 𑀬𑀸𑀕𑀼𑀲𑀗𑁆𑀕𑀳𑀁 𑀕𑀢𑁂𑀧𑀺 𑀢𑀲𑁆𑀫𑀺𑀁 𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀬𑀢𑁆𑀣 𑀫𑀘𑁆𑀙𑀫𑀁𑀲𑀁 𑀧𑀓𑁆𑀔𑀺𑀧𑀦𑁆𑀢𑀺, 𑀲𑀘𑁂 𑀲𑀸𑀲𑀧𑀫𑀢𑁆𑀢𑀫𑁆𑀧𑀺 𑀫𑀘𑁆𑀙𑀫𑀁𑀲𑀔𑀡𑁆𑀟𑀁 𑀯𑀸 𑀦𑁆𑀳𑀸𑀭𑀼 𑀯𑀸 𑀧𑀜𑁆𑀜𑀸𑀬𑀢𑀺, 𑀧𑀯𑀸𑀭𑀡𑀁 𑀚𑀦𑁂𑀢𑀺.
𑀲𑀼𑀤𑁆𑀥𑀭𑀲𑀓𑁄 𑀧𑀦 𑀭𑀲𑀓𑀬𑀸𑀕𑀼 𑀯𑀸 𑀦 𑀚𑀦𑁂𑀢𑀺. 𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀥𑀜𑁆𑀜𑀸𑀦𑀁 𑀢𑀡𑁆𑀟𑀼𑀮𑁂 𑀅𑀜𑁆𑀜𑁂𑀳𑀺 𑀯𑁂𑀡𑀼𑀢𑀡𑁆𑀟𑀼𑀮𑀸𑀤𑀻𑀳𑀺 𑀯𑀸 𑀓𑀦𑁆𑀤𑀫𑀽𑀮𑀨𑀮𑁂𑀳𑀺 𑀯𑀸 𑀬𑁂𑀳𑀺 𑀓𑁂𑀳𑀺𑀘𑀺 𑀓𑀢𑀁 𑀪𑀢𑁆𑀢𑀫𑁆𑀧𑀺 𑀧𑀯𑀸𑀭𑀡𑀁 𑀦 𑀚𑀦𑁂𑀢𑀺, 𑀧𑀕𑁂𑀯 𑀖𑀦𑀬𑀸𑀕𑀼. 𑀲𑀘𑁂 𑀧𑀦𑁂𑀢𑁆𑀣 𑀫𑀘𑁆𑀙𑀫𑀁𑀲𑀁 𑀧𑀓𑁆𑀔𑀺𑀧𑀦𑁆𑀢𑀺, 𑀚𑀦𑁂𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 ‘‘𑀧𑀼𑀧𑁆𑀨𑀅𑀢𑁆𑀣𑀸𑀬 𑀪𑀢𑁆𑀢𑀫𑁆𑀧𑀺 𑀧𑀯𑀸𑀭𑀡𑀁 𑀚𑀦𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀼𑀧𑁆𑀨𑀺𑀅𑀢𑁆𑀣𑀸𑀬 𑀪𑀢𑁆𑀢𑀁 𑀦𑀸𑀫 𑀧𑀼𑀧𑁆𑀨𑀺𑀔𑀚𑁆𑀚𑀓𑀢𑁆𑀣𑀸𑀬 𑀓𑀼𑀣𑀺𑀢𑀢𑀽𑀤𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑁂𑀤𑀺𑀢𑀢𑀡𑁆𑀟𑀼𑀮𑀸 𑀯𑀼𑀘𑁆𑀘𑀦𑁆𑀢𑀺. 𑀲𑀘𑁂 𑀧𑀦 𑀢𑁂 𑀢𑀡𑁆𑀟𑀼𑀮𑁂 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀔𑀸𑀤𑀦𑁆𑀢𑀺, 𑀯𑀝𑁆𑀝𑀢𑀺; 𑀦𑁂𑀯 𑀲𑀢𑁆𑀢𑀼𑀲𑀗𑁆𑀔𑁆𑀬𑀁 𑀦 𑀪𑀢𑁆𑀢𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀧𑀼𑀦 𑀢𑁂𑀳𑀺 𑀓𑀢𑀪𑀢𑁆𑀢𑀁 𑀧𑀯𑀸𑀭𑁂𑀢𑀺𑀬𑁂𑀯. 𑀢𑁂 𑀢𑀡𑁆𑀟𑀼𑀮𑁂 𑀲𑀧𑁆𑀧𑀺𑀢𑁂𑀮𑀸𑀤𑀻𑀲𑀼 𑀯𑀸 𑀧𑀘𑀦𑁆𑀢𑀺, 𑀧𑀽𑀯𑀁 𑀯𑀸 𑀓𑀭𑁄𑀦𑁆𑀢𑀺, 𑀦 𑀧𑀯𑀸𑀭𑁂𑀦𑁆𑀢𑀺. 𑀧𑀼𑀣𑀼𑀓𑀸 𑀯𑀸 𑀢𑀸𑀳𑀺 𑀓𑀢𑀲𑀢𑁆𑀢𑀼𑀪𑀢𑁆𑀢𑀸𑀤𑀻𑀦𑀺 𑀯𑀸 𑀦 𑀧𑀯𑀸𑀭𑁂𑀦𑁆𑀢𑀺.
𑀓𑀼𑀫𑁆𑀫𑀸𑀲𑁄 𑀦𑀸𑀫 𑀬𑀯𑁂𑀳𑀺 𑀓𑀢𑀓𑀼𑀫𑁆𑀫𑀸𑀲𑁄. 𑀅𑀜𑁆𑀜𑁂𑀳𑀺 𑀧𑀦 𑀫𑀼𑀕𑁆𑀕𑀸𑀤𑀻𑀳𑀺 𑀓𑀢𑀓𑀼𑀫𑁆𑀫𑀸𑀲𑁄 𑀧𑀯𑀸𑀭𑀡𑀁 𑀦 𑀚𑀦𑁂𑀢𑀺. 𑀲𑀢𑁆𑀢𑀼 𑀦𑀸𑀫 𑀲𑀸𑀮𑀺𑀯𑀻𑀳𑀺𑀬𑀯𑁂𑀳𑀺 𑀓𑀢𑀲𑀢𑁆𑀢𑀼. 𑀓𑀗𑁆𑀕𑀼𑀯𑀭𑀓𑀓𑀼𑀤𑁆𑀭𑀽𑀲𑀓𑀲𑀻𑀲𑀸𑀦𑀺𑀧𑀺 𑀪𑀚𑁆𑀚𑀺𑀢𑁆𑀯𑀸 𑀈𑀲𑀓𑀁 𑀓𑁄𑀝𑁆𑀝𑁂𑀢𑁆𑀯𑀸 𑀣𑀼𑀲𑁂 𑀧𑀮𑀸𑀧𑁂𑀢𑁆𑀯𑀸 𑀧𑀼𑀦 𑀤𑀴𑁆𑀳𑀁 𑀓𑁄𑀝𑁆𑀝𑁂𑀢𑁆𑀯𑀸 𑀘𑀼𑀡𑁆𑀡𑀁 𑀓𑀭𑁄𑀦𑁆𑀢𑀺. 𑀲𑀘𑁂𑀧𑀺 𑀢𑀁 𑀅𑀮𑁆𑀮𑀢𑁆𑀢𑀸 𑀏𑀓𑀸𑀩𑀤𑁆𑀥𑀁 𑀳𑁄𑀢𑀺, 𑀲𑀢𑁆𑀢𑀼𑀲𑀗𑁆𑀕𑀳𑀫𑁂𑀯 𑀕𑀘𑁆𑀙𑀢𑀺. 𑀔𑀭𑀧𑀸𑀓𑀪𑀚𑁆𑀚𑀺𑀢𑀸𑀦𑀁 𑀯𑀻𑀳𑀻𑀦𑀁 𑀢𑀡𑁆𑀟𑀼𑀮𑁂 𑀓𑁄𑀝𑁆𑀝𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀢𑀫𑁆𑀧𑀺 𑀘𑀼𑀡𑁆𑀡𑀁 𑀲𑀢𑁆𑀢𑀼𑀲𑀗𑁆𑀕𑀳𑀫𑁂𑀯 𑀕𑀘𑁆𑀙𑀢𑀺. 𑀲𑀫𑀧𑀸𑀓𑀪𑀚𑁆𑀚𑀺𑀢𑀸𑀦𑀁 𑀧𑀦 𑀯𑀻𑀳𑀻𑀦𑀁 𑀯𑀸 𑀯𑀻𑀳𑀺𑀧𑀮𑀸𑀧𑀸𑀦𑀁 𑀯𑀸 𑀢𑀡𑁆𑀟𑀼𑀮𑀸 𑀪𑀚𑁆𑀚𑀺𑀢𑀢𑀡𑁆𑀟𑀼𑀮𑀸 𑀏𑀯 𑀯𑀸 𑀦 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀲𑀁 𑀧𑀦 𑀢𑀡𑁆𑀟𑀼𑀮𑀸𑀤𑀻𑀦𑀁 𑀘𑀼𑀡𑁆𑀡𑀁 𑀧𑀯𑀸𑀭𑁂𑀢𑀺. 𑀔𑀭𑀧𑀸𑀓𑀪𑀚𑁆𑀚𑀺𑀢𑀸𑀦𑀁 𑀯𑀻𑀳𑀻𑀦𑀁 𑀓𑀼𑀡𑁆𑀟𑀓𑀫𑁆𑀧𑀺 𑀧𑀯𑀸𑀭𑁂𑀢𑀺. 𑀲𑀫𑀧𑀸𑀓𑀪𑀚𑁆𑀚𑀺𑀢𑀸𑀦𑀁 𑀧𑀦 𑀆𑀢𑀧𑀲𑀼𑀓𑁆𑀔𑀸𑀦𑀁 𑀯𑀸 𑀓𑀼𑀡𑁆𑀟𑀓𑀁 𑀦 𑀧𑀯𑀸𑀭𑁂𑀢𑀺. 𑀮𑀸𑀚𑀸 𑀯𑀸 𑀢𑁂𑀳𑀺 𑀓𑀢𑀪𑀢𑁆𑀢𑀲𑀢𑁆𑀢𑀼𑀆𑀤𑀻𑀦𑀺 𑀯𑀸 𑀦 𑀧𑀯𑀸𑀭𑁂𑀦𑁆𑀢𑀺. 𑀪𑀚𑁆𑀚𑀺𑀢𑀧𑀺𑀝𑁆𑀞𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀲𑀼𑀤𑁆𑀥𑀔𑀚𑁆𑀚𑀓𑀁 𑀯𑀸 𑀦 𑀧𑀯𑀸𑀭𑁂𑀢𑀺. 𑀫𑀘𑁆𑀙𑀫𑀁𑀲𑀧𑀽𑀭𑀺𑀢𑀔𑀚𑁆𑀚𑀓𑀁 𑀧𑀦 𑀲𑀢𑁆𑀢𑀼𑀫𑁄𑀤𑀓𑁄 𑀯𑀸 𑀧𑀯𑀸𑀭𑁂𑀢𑀺. 𑀫𑀘𑁆𑀙𑁄 𑀫𑀁𑀲𑀜𑁆𑀘 𑀧𑀸𑀓𑀝𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀘𑁂𑀧𑀺 𑀬𑀸𑀕𑀼𑀁 𑀧𑀺𑀯𑀦𑁆𑀢𑀲𑁆𑀲 𑀬𑀸𑀕𑀼𑀲𑀺𑀢𑁆𑀣𑀫𑀢𑁆𑀢𑀸𑀦𑁂𑀯 𑀤𑁆𑀯𑁂 𑀫𑀘𑁆𑀙𑀔𑀡𑁆𑀟𑀸𑀦𑀺 𑀯𑀸 𑀫𑀁𑀲𑀔𑀡𑁆𑀟𑀸𑀦𑀺 𑀯𑀸 𑀏𑀓𑀪𑀸𑀚𑀦𑁂 𑀯𑀸 𑀦𑀸𑀦𑀸𑀪𑀸𑀚𑀦𑁂 𑀯𑀸 𑀤𑁂𑀦𑁆𑀢𑀺, 𑀢𑀸𑀦𑀺 𑀘𑁂 𑀅𑀔𑀸𑀤𑀦𑁆𑀢𑁄 𑀅𑀜𑁆𑀜𑀁 𑀬𑀁𑀓𑀺𑀜𑁆𑀘𑀺 𑀧𑀯𑀸𑀭𑀡𑀧𑁆𑀧𑀳𑁄𑀦𑀓𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺. 𑀢𑀢𑁄 𑀏𑀓𑀁 𑀔𑀸𑀤𑀺𑀢𑀁, 𑀏𑀓𑀁 𑀳𑀢𑁆𑀣𑁂 𑀯𑀸 𑀧𑀢𑁆𑀢𑁂 𑀯𑀸 𑀳𑁄𑀢𑀺, 𑀲𑁄 𑀘𑁂 𑀅𑀜𑁆𑀜𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀸𑀭𑁂𑀢𑀺. 𑀤𑁆𑀯𑁂𑀧𑀺 𑀔𑀸𑀤𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀫𑀼𑀔𑁂 𑀲𑀸𑀲𑀧𑀫𑀢𑁆𑀢𑀫𑁆𑀧𑀺 𑀅𑀯𑀲𑀺𑀝𑁆𑀞𑀁 𑀦𑀢𑁆𑀣𑀺, 𑀲𑀘𑁂𑀧𑀺 𑀅𑀜𑁆𑀜𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺.
𑀓𑀧𑁆𑀧𑀺𑀬𑀫𑀁𑀲𑀁 𑀔𑀸𑀤𑀦𑁆𑀢𑁄 𑀓𑀧𑁆𑀧𑀺𑀬𑀫𑀁𑀲𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀸𑀭𑁂𑀢𑀺. 𑀓𑀧𑁆𑀧𑀺𑀬𑀫𑀁𑀲𑀁 𑀔𑀸𑀤𑀦𑁆𑀢𑁄 𑀅𑀓𑀧𑁆𑀧𑀺𑀬𑀫𑀁𑀲𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀅𑀯𑀢𑁆𑀣𑀼𑀢𑀸𑀬. 𑀬𑀜𑁆𑀳𑀺 𑀪𑀺𑀓𑁆𑀔𑀼𑀦𑁄 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀁𑀬𑁂𑀯 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀳𑁄𑀢𑀺. 𑀇𑀤𑀁 𑀧𑀦 𑀚𑀸𑀦𑀦𑁆𑀢𑁄 𑀅𑀓𑀧𑁆𑀧𑀺𑀬𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀢𑀺, 𑀅𑀚𑀸𑀦𑀦𑁆𑀢𑁄𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀝𑁆𑀞𑀸𑀦𑁂 𑀞𑀺𑀢𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺 𑀦𑀸𑀫, 𑀢𑀲𑁆𑀫𑀸 𑀦 𑀧𑀯𑀸𑀭𑁂𑀢𑀺. 𑀲𑀘𑁂 𑀧𑀦 𑀅𑀓𑀧𑁆𑀧𑀺𑀬𑀫𑀁𑀲𑀁 𑀔𑀸𑀤𑀦𑁆𑀢𑁄 𑀓𑀧𑁆𑀧𑀺𑀬𑀫𑀁𑀲𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀯𑀢𑁆𑀣𑀼𑀢𑀸𑀬. 𑀬𑀜𑁆𑀳𑀺 𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀧𑀯𑀸𑀭𑀡𑀸𑀬 𑀯𑀢𑁆𑀣𑀼. 𑀬𑀁 𑀧𑀦 𑀔𑀸𑀤𑀢𑀺, 𑀢𑀁 𑀓𑀺𑀜𑁆𑀘𑀸𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀝𑁆𑀞𑀸𑀦𑁂 𑀞𑀺𑀢𑀁, 𑀔𑀸𑀤𑀺𑀬𑀫𑀸𑀦𑀁 𑀧𑀦 𑀫𑀁𑀲𑀪𑀸𑀯𑀁 𑀦 𑀚𑀳𑀢𑀺, 𑀢𑀲𑁆𑀫𑀸 𑀧𑀯𑀸𑀭𑁂𑀢𑀺. 𑀅𑀓𑀧𑁆𑀧𑀺𑀬𑀫𑀁𑀲𑀁 𑀔𑀸𑀤𑀦𑁆𑀢𑁄 𑀅𑀓𑀧𑁆𑀧𑀺𑀬𑀫𑀁𑀲𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦 𑀧𑀯𑀸𑀭𑁂𑀢𑀺. 𑀓𑀧𑁆𑀧𑀺𑀬𑀫𑀁𑀲𑀁 𑀯𑀸 𑀅𑀓𑀧𑁆𑀧𑀺𑀬𑀫𑀁𑀲𑀁 𑀯𑀸 𑀔𑀸𑀤𑀦𑁆𑀢𑁄 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀬𑀁𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀪𑁄𑀚𑀦𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀸𑀭𑁂𑀢𑀺. 𑀓𑀼𑀮𑀤𑀽𑀲𑀓𑀯𑁂𑀚𑁆𑀚𑀓𑀫𑁆𑀫𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀭𑁄𑀘𑀦𑀲𑀸𑀤𑀺𑀢𑀭𑀽𑀧𑀺𑀬𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀁 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑀁 𑀅𑀦𑁂𑀲𑀦𑀸𑀬 𑀉𑀧𑁆𑀧𑀦𑁆𑀦𑀁 𑀅𑀓𑀧𑁆𑀧𑀺𑀬𑀪𑁄𑀚𑀦𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺. 𑀓𑀧𑁆𑀧𑀺𑀬𑀪𑁄𑀚𑀦𑀁 𑀯𑀸 𑀅𑀓𑀧𑁆𑀧𑀺𑀬𑀪𑁄𑀚𑀦𑀁 𑀯𑀸 𑀪𑀼𑀜𑁆𑀚𑀦𑁆𑀢𑁄𑀧𑀺 𑀓𑀧𑁆𑀧𑀺𑀬𑀪𑁄𑀚𑀦𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀸𑀭𑁂𑀢𑀺. 𑀅𑀓𑀧𑁆𑀧𑀺𑀬𑀪𑁄𑀚𑀦𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀻𑀢𑀺 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁.
𑀏𑀯𑀁 ‘‘𑀅𑀲𑀦’’𑀦𑁆𑀢𑀺𑀆𑀤𑀻𑀲𑀼 𑀬𑀜𑁆𑀘 𑀅𑀲𑁆𑀦𑀸𑀢𑀺, 𑀬𑀜𑁆𑀘 𑀪𑁄𑀚𑀦𑀁 𑀳𑀢𑁆𑀣𑀧𑀸𑀲𑁂 𑀞𑀺𑀢𑁂𑀦 𑀅𑀪𑀺𑀳𑀝𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀧𑀯𑀸𑀭𑀡𑀁 𑀆𑀧𑀚𑁆𑀚𑀢𑀺, 𑀢𑀁 𑀜𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸 𑀆𑀧𑀚𑁆𑀚𑀢𑀺, 𑀢𑀲𑁆𑀲 𑀚𑀸𑀦𑀦𑀢𑁆𑀣𑀁 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 ‘‘‘𑀅𑀲𑀦𑀁 𑀪𑁄𑀚𑀦’𑀦𑁆𑀢𑀺 𑀏𑀢𑁆𑀣 𑀢𑀸𑀯 𑀬𑁂𑀦 𑀏𑀓𑀲𑀺𑀢𑁆𑀣𑀫𑁆𑀧𑀺 𑀅𑀚𑁆𑀛𑁄𑀳𑀝𑀁 𑀳𑁄𑀢𑀺, 𑀲𑁄 𑀲𑀘𑁂 𑀧𑀢𑁆𑀢𑀫𑀼𑀔𑀳𑀢𑁆𑀣𑀸𑀦𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀜𑁆𑀘𑀲𑀼 𑀪𑁄𑀚𑀦𑁂𑀲𑀼 𑀏𑀓𑀲𑁆𑀫𑀺𑀫𑁆𑀧𑀺 𑀲𑀢𑀺 𑀅𑀜𑁆𑀜𑀁 𑀧𑀜𑁆𑀘𑀲𑀼 𑀪𑁄𑀚𑀦𑁂𑀲𑀼 𑀏𑀓𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀸𑀭𑁂𑀢𑀺. 𑀓𑀢𑁆𑀣𑀘𑀺 𑀪𑁄𑀚𑀦𑀁 𑀦𑀢𑁆𑀣𑀺, 𑀆𑀫𑀺𑀲𑀕𑀦𑁆𑀥𑀫𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀦 𑀧𑀯𑀸𑀭𑁂𑀢𑀺. 𑀫𑀼𑀔𑁂 𑀘 𑀳𑀢𑁆𑀣𑁂 𑀘 𑀪𑁄𑀚𑀦𑀁 𑀦𑀢𑁆𑀣𑀺, 𑀧𑀢𑁆𑀢𑁂 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀧𑀦 𑀆𑀲𑀦𑁂 𑀦 𑀪𑀼𑀜𑁆𑀚𑀺𑀢𑀼𑀓𑀸𑀫𑁄, 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀓𑀸𑀫𑁄, 𑀅𑀜𑁆𑀜𑀲𑁆𑀲 𑀯𑀸 𑀤𑀸𑀢𑀼𑀓𑀸𑀫𑁄, 𑀢𑀲𑁆𑀫𑀺𑀁 𑀘𑁂 𑀅𑀦𑁆𑀢𑀭𑁂 𑀪𑁄𑀚𑀦𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀯𑀺𑀧𑁆𑀧𑀓𑀢𑀪𑁄𑀚𑀦𑀪𑀸𑀯𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸. 𑀬𑁄𑀧𑀺 𑀅𑀜𑁆𑀜𑀢𑁆𑀭 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀫𑀼𑀔𑁂 𑀪𑀢𑁆𑀢𑀁 𑀕𑀺𑀮𑀺𑀢𑁆𑀯𑀸 𑀲𑁂𑀲𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀜𑁆𑀜𑀁 𑀪𑁄𑀚𑀦𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀢𑀲𑁆𑀲𑀸𑀧𑀺 𑀧𑀯𑀸𑀭𑀡𑀸 𑀦 𑀳𑁄𑀢𑀻’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀬𑀣𑀸 𑀘 𑀧𑀢𑁆𑀢𑁂; 𑀏𑀯𑀁 𑀳𑀢𑁆𑀣𑁂𑀧𑀺. 𑀫𑀼𑀔𑁂𑀧𑀺 𑀯𑀸 𑀯𑀺𑀚𑁆𑀚𑀫𑀸𑀦𑀪𑁄𑀚𑀦𑀁 𑀲𑀘𑁂 𑀅𑀦𑀚𑁆𑀛𑁄𑀳𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀫𑀺𑀜𑁆𑀘 𑀔𑀡𑁂 𑀅𑀜𑁆𑀜𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀧𑀤𑁂 𑀯𑀼𑀢𑁆𑀢𑀮𑀓𑁆𑀔𑀡𑀁 𑀲𑀩𑁆𑀩𑀢𑁆𑀣 𑀯𑁂𑀤𑀺𑀢𑀩𑁆𑀩𑀁 𑀳𑁄𑀢𑀺. 𑀅𑀧𑀺𑀘 𑀓𑀼𑀭𑀼𑀦𑁆𑀤𑀺𑀬𑀁 𑀏𑀲 𑀦𑀬𑁄 𑀤𑀲𑁆𑀲𑀺𑀢𑁄𑀬𑁂𑀯. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀫𑀼𑀔𑁂 𑀪𑀢𑁆𑀢𑀁 𑀕𑀺𑀮𑀺𑀢𑀁, 𑀳𑀢𑁆𑀣𑁂 𑀪𑀢𑁆𑀢𑀁 𑀯𑀺𑀖𑀸𑀲𑀸𑀤𑀲𑁆𑀲 𑀤𑀸𑀢𑀼𑀓𑀸𑀫𑁄, 𑀧𑀢𑁆𑀢𑁂 𑀪𑀢𑁆𑀢𑀁 𑀪𑀺𑀓𑁆𑀔𑀼𑀲𑁆𑀲 𑀤𑀸𑀢𑀼𑀓𑀸𑀫𑁄, 𑀲𑀘𑁂 𑀢𑀲𑁆𑀫𑀺𑀁 𑀔𑀡𑁂 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀻’’𑀢𑀺. 𑀳𑀢𑁆𑀣𑀧𑀸𑀲𑁂 𑀞𑀺𑀢𑁄𑀢𑀺 𑀏𑀢𑁆𑀣 𑀧𑀦 𑀲𑀘𑁂 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀆𑀲𑀦𑀲𑁆𑀲 𑀧𑀘𑁆𑀙𑀺𑀫𑀦𑁆𑀢𑀢𑁄 𑀧𑀝𑁆𑀞𑀸𑀬, 𑀲𑀘𑁂 𑀞𑀺𑀢𑁄, 𑀧𑀡𑁆𑀳𑀺𑀅𑀦𑁆𑀢𑀢𑁄 𑀧𑀝𑁆𑀞𑀸𑀬, 𑀲𑀘𑁂 𑀦𑀺𑀧𑀦𑁆𑀦𑁄, 𑀬𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄, 𑀢𑀲𑁆𑀲 𑀧𑀸𑀭𑀺𑀫𑀦𑁆𑀢𑀢𑁄 𑀧𑀝𑁆𑀞𑀸𑀬, 𑀤𑀸𑀬𑀓𑀲𑁆𑀲 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸 𑀞𑀺𑀢𑀲𑁆𑀲 𑀯𑀸 𑀦𑀺𑀧𑀦𑁆𑀦𑀲𑁆𑀲 𑀯𑀸 𑀞𑀧𑁂𑀢𑁆𑀯𑀸 𑀧𑀲𑀸𑀭𑀺𑀢𑀳𑀢𑁆𑀣𑀁 𑀬𑀁 𑀆𑀲𑀦𑁆𑀦𑀢𑀭𑀁 𑀅𑀗𑁆𑀕𑀁, 𑀢𑀲𑁆𑀲 𑀑𑀭𑀺𑀫𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑁄 ‘‘𑀳𑀢𑁆𑀣𑀧𑀸𑀲𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀺𑀁 𑀞𑀢𑁆𑀯𑀸 𑀅𑀪𑀺𑀳𑀝𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲𑁂𑀯 𑀧𑀯𑀸𑀭𑀡𑀸 𑀳𑁄𑀢𑀺, 𑀦 𑀢𑀢𑁄 𑀧𑀭𑀁.
𑀅𑀪𑀺𑀳𑀭𑀢𑀻𑀢𑀺 𑀳𑀢𑁆𑀣𑀧𑀸𑀲𑀩𑁆𑀪𑀦𑁆𑀢𑀭𑁂 𑀞𑀺𑀢𑁄 𑀕𑀳𑀡𑀢𑁆𑀣𑀁 𑀉𑀧𑀦𑀸𑀫𑁂𑀢𑀺. 𑀲𑀘𑁂 𑀧𑀦 𑀅𑀦𑀦𑁆𑀢𑀭𑀦𑀺𑀲𑀺𑀦𑁆𑀦𑁄𑀧𑀺 𑀪𑀺𑀓𑁆𑀔𑀼 𑀳𑀢𑁆𑀣𑁂 𑀯𑀸 𑀊𑀭𑀽𑀲𑀼 𑀯𑀸 𑀆𑀥𑀸𑀭𑀓𑁂 𑀯𑀸 𑀞𑀺𑀢𑀧𑀢𑁆𑀢𑀁 𑀅𑀦𑀪𑀺𑀳𑀭𑀺𑀢𑁆𑀯𑀸𑀯 ‘‘𑀪𑀢𑁆𑀢𑀁 𑀕𑀡𑁆𑀳𑀸’’𑀢𑀺 𑀯𑀤𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀦𑀢𑁆𑀣𑀺. 𑀪𑀢𑁆𑀢𑀧𑀘𑁆𑀙𑀺𑀁 𑀆𑀦𑁂𑀢𑁆𑀯𑀸 𑀧𑀼𑀭𑀢𑁄 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 ‘‘𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀈𑀲𑀓𑀁 𑀧𑀦 𑀉𑀤𑁆𑀥𑀭𑀺𑀢𑁆𑀯𑀸 𑀯𑀸 𑀅𑀧𑀦𑀸𑀫𑁂𑀢𑁆𑀯𑀸 𑀯𑀸 ‘‘𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀳𑁄𑀢𑀺. 𑀣𑁂𑀭𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀣𑁂𑀭𑁄 𑀤𑀽𑀭𑁂 𑀦𑀺𑀲𑀺𑀦𑁆𑀦𑀲𑁆𑀲 𑀤𑀳𑀭𑀪𑀺𑀓𑁆𑀔𑀼𑀲𑁆𑀲 𑀧𑀢𑁆𑀢𑀁 𑀧𑁂𑀲𑁂𑀢𑁆𑀯𑀸 ‘‘𑀇𑀢𑁄 𑀑𑀤𑀦𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑀺, 𑀕𑀡𑁆𑀳𑀺𑀢𑁆𑀯𑀸 𑀧𑀦 𑀕𑀢𑁄 𑀢𑀼𑀡𑁆𑀳𑀻 𑀢𑀺𑀝𑁆𑀞𑀢𑀺, 𑀤𑀳𑀭𑁄 ‘‘𑀅𑀮𑀁 𑀫𑀬𑁆𑀳’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀣𑁂𑀭𑀲𑁆𑀲 𑀤𑀽𑀭𑀪𑀸𑀯𑀢𑁄 𑀤𑀽𑀢𑀲𑁆𑀲 𑀘 𑀅𑀦𑀪𑀺𑀳𑀭𑀡𑀢𑁄𑀢𑀺. 𑀲𑀘𑁂 𑀧𑀦 𑀕𑀳𑁂𑀢𑁆𑀯𑀸 𑀆𑀕𑀢𑁄 𑀪𑀺𑀓𑁆𑀔𑀼 ‘‘𑀇𑀤𑀁 𑀪𑀢𑁆𑀢𑀁 𑀕𑀡𑁆𑀳𑀸’’𑀢𑀺 𑀯𑀤𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀳𑁄𑀢𑀺.
𑀧𑀭𑀺𑀯𑁂𑀲𑀦𑀸𑀬 𑀏𑀓𑁄 𑀏𑀓𑁂𑀦 𑀳𑀢𑁆𑀣𑁂𑀦 𑀑𑀤𑀦𑀧𑀘𑁆𑀙𑀺𑀁 𑀏𑀓𑁂𑀦 𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀭𑀺𑀯𑀺𑀲𑀢𑀺, 𑀢𑀢𑁆𑀭 𑀘𑁂 𑀅𑀜𑁆𑀜𑁄 𑀆𑀕𑀦𑁆𑀢𑁆𑀯𑀸 ‘‘𑀅𑀳𑀁 𑀧𑀘𑁆𑀙𑀺𑀁 𑀥𑀸𑀭𑁂𑀲𑁆𑀲𑀸𑀫𑀺, 𑀢𑁆𑀯𑀁 𑀑𑀤𑀦𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀕𑀳𑀺𑀢𑀫𑀢𑁆𑀢𑀓𑀫𑁂𑀯 𑀓𑀭𑁄𑀢𑀺, 𑀧𑀭𑀺𑀯𑁂𑀲𑀓𑁄 𑀏𑀯 𑀧𑀦 𑀢𑀁 𑀥𑀸𑀭𑁂𑀢𑀺, 𑀢𑀲𑁆𑀫𑀸 𑀲𑀸 𑀅𑀪𑀺𑀳𑀝𑀸𑀯 𑀳𑁄𑀢𑀺. 𑀢𑀢𑁄 𑀤𑀸𑀢𑀼𑀓𑀸𑀫𑀢𑀸𑀬 𑀕𑀡𑁆𑀳𑀦𑁆𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀧𑀯𑀸𑀭𑀡𑀸 𑀳𑁄𑀢𑀺. 𑀲𑀘𑁂 𑀧𑀦 𑀧𑀭𑀺𑀯𑀺𑀲𑀓𑁂𑀦 𑀨𑀼𑀝𑁆𑀞𑀫𑀢𑁆𑀢𑀸𑀯 𑀳𑁄𑀢𑀺, 𑀇𑀢𑀭𑁄𑀯 𑀦𑀁 𑀥𑀸𑀭𑁂𑀢𑀺, 𑀢𑀢𑁄 𑀤𑀸𑀢𑀼𑀓𑀸𑀫𑀢𑀸𑀬 𑀕𑀡𑁆𑀳𑀦𑁆𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀧𑀯𑀸𑀭𑀡𑀸 𑀦 𑀳𑁄𑀢𑀺. 𑀓𑀝𑀘𑁆𑀙𑀼𑀦𑀸 𑀉𑀤𑁆𑀥𑀝𑀪𑀢𑁆𑀢𑁂 𑀧𑀦 𑀳𑁄𑀢𑀺. 𑀓𑀝𑀘𑁆𑀙𑀼𑀅𑀪𑀺𑀳𑀸𑀭𑁄𑀬𑁂𑀯 𑀳𑀺 𑀢𑀲𑁆𑀲 𑀅𑀪𑀺𑀳𑀸𑀭𑁄. 𑀤𑁆𑀯𑀺𑀦𑁆𑀦𑀁 𑀲𑀫𑀪𑀸𑀭𑁂𑀧𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀧𑀯𑀸𑀭𑁂𑀢𑀺𑀬𑁂𑀯𑀸𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀅𑀦𑀦𑁆𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀢𑁆𑀢𑁂 𑀤𑀺𑀬𑁆𑀬𑀫𑀸𑀦𑁂 𑀇𑀢𑀭𑁄 𑀧𑀢𑁆𑀢𑀁 𑀳𑀢𑁆𑀣𑁂𑀳𑀺 𑀧𑀺𑀤𑀳𑀢𑀺, 𑀧𑀯𑀸𑀭𑀡𑀸 𑀦𑀢𑁆𑀣𑀺. 𑀓𑀲𑁆𑀫𑀸? 𑀅𑀜𑁆𑀜𑀲𑁆𑀲 𑀅𑀪𑀺𑀳𑀝𑁂 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸.
𑀧𑀝𑀺𑀓𑁆𑀔𑁂𑀧𑁄 𑀧𑀜𑁆𑀜𑀸𑀬𑀢𑀻𑀢𑀺 𑀏𑀢𑁆𑀣 𑀯𑀸𑀘𑀸𑀬 𑀅𑀪𑀺𑀳𑀝𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀦𑀢𑁆𑀣𑀺. 𑀓𑀸𑀬𑁂𑀦 𑀅𑀪𑀺𑀳𑀝𑀁 𑀧𑀦 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀧𑀯𑀸𑀭𑀡𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.
𑀢𑀢𑁆𑀣 𑀓𑀸𑀬𑁂𑀦 𑀧𑀝𑀺𑀓𑁆𑀔𑁂𑀧𑁄 𑀦𑀸𑀫 𑀅𑀗𑁆𑀕𑀼𑀮𑀺𑀁 𑀯𑀸 𑀳𑀢𑁆𑀣𑀁 𑀯𑀸 𑀫𑀘𑁆𑀙𑀺𑀓𑀩𑀻𑀚𑀦𑀺𑀁 𑀯𑀸 𑀘𑀻𑀯𑀭𑀓𑀡𑁆𑀡𑀁 𑀯𑀸 𑀘𑀸𑀮𑁂𑀢𑀺, 𑀪𑀫𑀼𑀓𑀸𑀬 𑀯𑀸 𑀆𑀓𑀸𑀭𑀁 𑀓𑀭𑁄𑀢𑀺, 𑀓𑀼𑀤𑁆𑀥𑁄 𑀯𑀸 𑀑𑀮𑁄𑀓𑁂𑀢𑀺, 𑀯𑀸𑀘𑀸𑀬 𑀧𑀝𑀺𑀓𑁆𑀔𑁂𑀧𑁄 𑀦𑀸𑀫 ‘‘𑀅𑀮’’𑀦𑁆𑀢𑀺 𑀯𑀸, ‘‘𑀦 𑀕𑀡𑁆𑀳𑀸𑀫𑀻’’𑀢𑀺 𑀯𑀸, ‘‘𑀫𑀸 𑀆𑀓𑀺𑀭𑀸’’𑀢𑀺 𑀯𑀸, ‘‘𑀅𑀧𑀕𑀘𑁆𑀙𑀸’’𑀢𑀺 𑀯𑀸 𑀯𑀤𑀢𑀺; 𑀏𑀯𑀁 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑁂 𑀧𑀯𑀸𑀭𑀡𑀸 𑀳𑁄𑀢𑀺.
𑀏𑀓𑁄 𑀅𑀪𑀺𑀳𑀝𑁂 𑀪𑀢𑁆𑀢𑁂 𑀧𑀯𑀸𑀭𑀡𑀸𑀬 𑀪𑀻𑀢𑁄 𑀳𑀢𑁆𑀣 𑀅𑀧𑀦𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀢𑁆𑀢𑁂 𑀑𑀤𑀦𑀁 𑀆𑀓𑀺𑀭𑀦𑁆𑀢𑀁 ‘‘𑀆𑀓𑀺𑀭 𑀆𑀓𑀺𑀭 𑀓𑁄𑀝𑁆𑀝𑁂𑀢𑁆𑀯𑀸 𑀧𑀽𑀭𑁂𑀳𑀻’’𑀢𑀺 𑀯𑀤𑀢𑀺, 𑀏𑀢𑁆𑀣 𑀓𑀣𑀦𑁆𑀢𑀺? 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀢𑀸𑀯 ‘‘𑀅𑀦𑀸𑀓𑀺𑀭𑀡𑀢𑁆𑀣𑀸𑀬 𑀯𑀼𑀢𑁆𑀢𑀢𑁆𑀢𑀸 𑀧𑀯𑀸𑀭𑀡𑀸 𑀳𑁄𑀢𑀻’’𑀢𑀺 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦 ‘‘‘𑀆𑀓𑀺𑀭 𑀧𑀽𑀭𑁂𑀳𑀻’𑀢𑀺 𑀯𑀤𑀦𑁆𑀢𑀲𑁆𑀲 𑀦𑀸𑀫 ‘𑀓𑀲𑁆𑀲𑀘𑀺 𑀧𑀯𑀸𑀭𑀡𑀸 𑀅𑀢𑁆𑀣𑀻’𑀢𑀺 𑀯𑀢𑁆𑀯𑀸 ‘𑀦 𑀧𑀯𑀸𑀭𑁂𑀢𑀻’’’𑀢𑀺 𑀆𑀳. 𑀅𑀧𑀭𑁄 𑀪𑀢𑁆𑀢𑀁 𑀅𑀪𑀺𑀳𑀭𑀦𑁆𑀢𑀁 𑀪𑀺𑀓𑁆𑀔𑀼𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀓𑀺𑀁 𑀆𑀯𑀼𑀲𑁄 𑀇𑀢𑁄𑀧𑀺 𑀓𑀺𑀜𑁆𑀘𑀺 𑀕𑀡𑁆𑀳𑀺𑀲𑁆𑀲𑀲𑀺, 𑀤𑀫𑁆𑀫𑀺 𑀢𑁂 𑀓𑀺𑀜𑁆𑀘𑀻’’𑀢𑀺 𑀆𑀳. 𑀢𑀢𑁆𑀭𑀸𑀧𑀺 ‘‘‘𑀏𑀯𑀁 𑀦𑀸𑀕𑀫𑀺𑀲𑁆𑀲𑀢𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘𑀧𑀯𑀸𑀭𑀡𑀸 𑀳𑁄𑀢𑀻’’’𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦 ‘‘‘𑀕𑀡𑁆𑀳𑀺𑀲𑁆𑀲𑀲𑀻’𑀢𑀺 𑀯𑀤𑀦𑁆𑀢𑀲𑁆𑀲 𑀦𑀸𑀫 ‘𑀓𑀲𑁆𑀲𑀘𑀺 𑀧𑀯𑀸𑀭𑀡𑀸 𑀅𑀢𑁆𑀣𑀻’𑀢𑀺 𑀯𑀢𑁆𑀯𑀸 ‘𑀦 𑀧𑀯𑀸𑀭𑁂𑀢𑀻’’’𑀢𑀺 𑀆𑀳.
𑀏𑀓𑁄 𑀲𑀫𑀁𑀲𑀓𑀁 𑀭𑀲𑀁 𑀅𑀪𑀺𑀳𑀭𑀺𑀢𑁆𑀯𑀸 ‘‘𑀭𑀲𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀢𑀁 𑀲𑀼𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀦𑀢𑁆𑀣𑀺. ‘‘𑀫𑀘𑁆𑀙𑀭𑀲𑀁 𑀫𑀁𑀲𑀭𑀲’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀝𑀺𑀓𑁆𑀔𑀺𑀧𑀢𑁄 𑀳𑁄𑀢𑀺, ‘‘𑀇𑀤𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀳𑁄𑀢𑀺𑀬𑁂𑀯. 𑀫𑀁𑀲𑀁 𑀯𑀺𑀲𑀼𑀁 𑀓𑀢𑁆𑀯𑀸 ‘‘𑀫𑀁𑀲𑀭𑀲𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀢𑀢𑁆𑀣 𑀘𑁂 𑀲𑀸𑀲𑀧𑀫𑀢𑁆𑀢𑀫𑁆𑀧𑀺 𑀫𑀁𑀲𑀔𑀡𑁆𑀟𑀁 𑀅𑀢𑁆𑀣𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀳𑁄𑀢𑀺. 𑀲𑀘𑁂 𑀧𑀦 𑀧𑀭𑀺𑀲𑁆𑀲𑀸𑀯𑀺𑀢𑁄 𑀳𑁄𑀢𑀺, ‘‘𑀯𑀝𑁆𑀝𑀢𑀻’’𑀢𑀺 𑀅𑀪𑀬𑀢𑁆𑀣𑁂𑀭𑁄 𑀆𑀳.
𑀫𑀁𑀲𑀭𑀲𑁂𑀦 𑀆𑀧𑀼𑀘𑁆𑀙𑀦𑁆𑀢𑀁 𑀫𑀳𑀸𑀣𑁂𑀭𑁄 ‘‘𑀫𑀼𑀳𑀼𑀢𑁆𑀢𑀁 𑀆𑀕𑀫𑁂𑀳𑀻’’𑀢𑀺 𑀯𑀢𑁆𑀯𑀸 ‘‘𑀣𑀸𑀮𑀓𑀁 𑀆𑀯𑀼𑀲𑁄 𑀆𑀳𑀭𑀸’’𑀢𑀺 𑀆𑀳. 𑀏𑀢𑁆𑀣 𑀓𑀣𑀦𑁆𑀢𑀺? 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀢𑀸𑀯 ‘‘𑀅𑀪𑀺𑀳𑀸𑀭𑀓𑀲𑁆𑀲 𑀕𑀫𑀦𑀁 𑀧𑀞𑀫𑀁 𑀉𑀧𑀘𑁆𑀙𑀺𑀦𑁆𑀦𑀁, 𑀢𑀲𑁆𑀫𑀸 𑀧𑀯𑀸𑀭𑁂𑀢𑀻’’𑀢𑀺 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦 ‘‘𑀅𑀬𑀁 𑀓𑀼𑀳𑀺𑀁 𑀕𑀘𑁆𑀙𑀢𑀺, 𑀓𑀻𑀤𑀺𑀲𑀁 𑀏𑀢𑀲𑁆𑀲 𑀕𑀫𑀦𑀁, 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀦𑀸𑀫 𑀧𑀯𑀸𑀭𑀡𑀸 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀦 𑀧𑀯𑀸𑀭𑁂𑀢𑀻’’𑀢𑀺 𑀆𑀳. 𑀓𑀴𑀻𑀭𑀧𑀦𑀲𑀸𑀤𑀻𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀫𑀁𑀲𑀁 𑀧𑀘𑀦𑁆𑀢𑀺, 𑀢𑀁 𑀕𑀳𑁂𑀢𑁆𑀯𑀸 ‘‘𑀓𑀴𑀻𑀭𑀲𑀽𑀧𑀁 𑀕𑀡𑁆𑀳𑀣, 𑀧𑀦𑀲𑀩𑁆𑀬𑀜𑁆𑀚𑀦𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, 𑀏𑀯𑀫𑁆𑀧𑀺 𑀦 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀅𑀧𑀯𑀸𑀭𑀡𑀸𑀭𑀳𑀲𑁆𑀲 𑀦𑀸𑀫𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀲𑀘𑁂 𑀧𑀦 ‘‘𑀫𑀘𑁆𑀙𑀲𑀽𑀧𑀁 𑀫𑀁𑀲𑀲𑀽𑀧’’𑀦𑁆𑀢𑀺 𑀯𑀸 ‘‘𑀇𑀫𑀁 𑀕𑀡𑁆𑀳𑀣𑀸’’𑀢𑀺 𑀯𑀸 𑀯𑀤𑀦𑁆𑀢𑀺, 𑀧𑀯𑀸𑀭𑁂𑀢𑀺. 𑀫𑀁𑀲𑀓𑀭𑀫𑁆𑀩𑀓𑁄 𑀦𑀸𑀫 𑀳𑁄𑀢𑀺, 𑀢𑀁 𑀤𑀸𑀢𑀼𑀓𑀸𑀫𑁄𑀧𑀺 ‘‘𑀓𑀭𑀫𑁆𑀩𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺; 𑀦 𑀧𑀯𑀸𑀭𑁂𑀢𑀺. ‘‘𑀫𑀁𑀲𑀓𑀭𑀫𑁆𑀩𑀓’’𑀦𑁆𑀢𑀺 𑀯𑀸 ‘‘𑀇𑀤’’𑀦𑁆𑀢𑀺 𑀯𑀸 𑀯𑀼𑀢𑁆𑀢𑁂 𑀧𑀦 𑀧𑀯𑀸𑀭𑁂𑀢𑀺. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑁂𑀲𑀼 𑀫𑀘𑁆𑀙𑀫𑀁𑀲𑀫𑀺𑀲𑁆𑀲𑀓𑁂𑀲𑀼.
𑀬𑁄 𑀧𑀦 𑀦𑀺𑀫𑀦𑁆𑀢𑀦𑁂 𑀪𑀼𑀜𑁆𑀚𑀫𑀸𑀦𑁄 𑀫𑀁𑀲𑀁 𑀅𑀪𑀺𑀳𑀝𑀁 ‘‘𑀉𑀤𑁆𑀤𑀺𑀲𑁆𑀲 𑀓𑀢’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀸𑀭𑀺𑀢𑁄𑀯 𑀳𑁄𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀫𑀺𑀲𑁆𑀲𑀓𑀓𑀣𑀸 𑀧𑀦 𑀓𑀼𑀭𑀼𑀦𑁆𑀤𑀺𑀬𑀁 𑀲𑀼𑀝𑁆𑀞𑀼 𑀯𑀼𑀢𑁆𑀢𑀸. 𑀏𑀯𑀜𑁆𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁 𑁋 𑀧𑀺𑀡𑁆𑀟𑀧𑀸𑀢𑀘𑀸𑀭𑀺𑀓𑁄 𑀪𑀺𑀓𑁆𑀔𑀼 𑀪𑀢𑁆𑀢𑀫𑀺𑀲𑁆𑀲𑀓𑀁 𑀬𑀸𑀕𑀼𑀁 𑀆𑀳𑀭𑀺𑀢𑁆𑀯𑀸 ‘‘𑀬𑀸𑀕𑀼𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀦 𑀧𑀯𑀸𑀭𑁂𑀢𑀺. ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀬𑁂𑀦𑀸𑀧𑀼𑀘𑁆𑀙𑀺𑀢𑁄, 𑀢𑀲𑁆𑀲 𑀅𑀢𑁆𑀣𑀺𑀢𑀸𑀬. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀬𑀸𑀕𑀼𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀢𑀢𑁆𑀭 𑀘𑁂 𑀬𑀸𑀕𑀼 𑀩𑀳𑀼𑀢𑀭𑀸 𑀯𑀸 𑀳𑁄𑀢𑀺 𑀲𑀫𑀲𑀫𑀸 𑀯𑀸, 𑀦 𑀧𑀯𑀸𑀭𑁂𑀢𑀺. 𑀬𑀸𑀕𑀼 𑀫𑀦𑁆𑀤𑀸, 𑀪𑀢𑁆𑀢𑀁 𑀩𑀳𑀼𑀢𑀭𑀁, 𑀧𑀯𑀸𑀭𑁂𑀢𑀺. 𑀇𑀤𑀜𑁆𑀘 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁, 𑀓𑀸𑀭𑀡𑀁 𑀧𑀦𑁂𑀢𑁆𑀣 𑀤𑀼𑀤𑁆𑀤𑀲𑀁. ‘‘𑀪𑀢𑁆𑀢𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀪𑀢𑁆𑀢𑀁 𑀩𑀳𑀼𑀓𑀁 𑀯𑀸 𑀲𑀫𑀁 𑀯𑀸 𑀅𑀧𑁆𑀧𑀢𑀭𑀁 𑀯𑀸 𑀳𑁄𑀢𑀺, 𑀧𑀯𑀸𑀭𑁂𑀢𑀺𑀬𑁂𑀯. 𑀪𑀢𑁆𑀢𑀁 𑀯𑀸 𑀬𑀸𑀕𑀼𑀁 𑀯𑀸 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀢𑀢𑁆𑀭 𑀘𑁂 𑀪𑀢𑁆𑀢𑀁 𑀩𑀳𑀼𑀢𑀭𑀁 𑀯𑀸 𑀲𑀫𑀓𑀁 𑀯𑀸 𑀳𑁄𑀢𑀺, 𑀧𑀯𑀸𑀭𑁂𑀢𑀺. 𑀅𑀧𑁆𑀧𑀢𑀭𑀁 𑀦 𑀧𑀯𑀸𑀭𑁂𑀢𑀺. 𑀇𑀤𑀜𑁆𑀘 𑀓𑀭𑀫𑁆𑀩𑀓𑁂𑀦 𑀦 𑀲𑀫𑀸𑀦𑁂𑀢𑀩𑁆𑀩𑀁. 𑀓𑀭𑀫𑁆𑀩𑀓𑁄 𑀳𑀺 𑀫𑀁𑀲𑀫𑀺𑀲𑁆𑀲𑀓𑁄𑀧𑀺 𑀳𑁄𑀢𑀺 𑀅𑀫𑀁𑀲𑀫𑀺𑀲𑁆𑀲𑀓𑁄𑀧𑀺, 𑀢𑀲𑁆𑀫𑀸 ‘‘𑀓𑀭𑀫𑁆𑀩𑀓’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀯𑀸𑀭𑀡𑀸 𑀦𑀢𑁆𑀣𑀺. 𑀇𑀤𑀁 𑀧𑀦 𑀪𑀢𑁆𑀢𑀫𑀺𑀲𑁆𑀲𑀓𑀫𑁂𑀯. 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀯𑀸𑀭𑀡𑀸 𑀳𑁄𑀢𑀺. 𑀩𑀳𑀼𑀭𑀲𑁂 𑀪𑀢𑁆𑀢𑁂 𑀭𑀲𑀁, 𑀩𑀳𑀼𑀔𑀻𑀭𑁂 𑀔𑀻𑀭𑀁 𑀩𑀳𑀼𑀲𑀧𑁆𑀧𑀺𑀫𑁆𑀳𑀺 𑀘 𑀧𑀸𑀬𑀸𑀲𑁂 𑀲𑀧𑁆𑀧𑀺𑀁 𑀕𑀡𑁆𑀳𑀣𑀸𑀢𑀺 𑀯𑀺𑀲𑀼𑀁 𑀓𑀢𑁆𑀯𑀸 𑀤𑁂𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀦𑀢𑁆𑀣𑀺.
𑀬𑁄 𑀧𑀦 𑀕𑀘𑁆𑀙𑀦𑁆𑀢𑁄 𑀧𑀯𑀸𑀭𑁂𑀢𑀺, 𑀲𑁄 𑀕𑀘𑁆𑀙𑀦𑁆𑀢𑁄𑀯 𑀪𑀼𑀜𑁆𑀚𑀺𑀢𑀼𑀁 𑀮𑀪𑀢𑀺. 𑀓𑀤𑁆𑀤𑀫𑀁 𑀯𑀸 𑀉𑀤𑀓𑀁 𑀯𑀸 𑀧𑀢𑁆𑀯𑀸 𑀞𑀺𑀢𑁂𑀦 𑀅𑀢𑀺𑀭𑀺𑀢𑁆𑀢𑀁 𑀓𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀅𑀦𑁆𑀢𑀭𑀸 𑀦𑀤𑀻 𑀧𑀽𑀭𑀸 𑀳𑁄𑀢𑀺, 𑀦𑀤𑀻𑀢𑀻𑀭𑁂 𑀕𑀼𑀫𑁆𑀩𑀁 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀅𑀣 𑀦𑀸𑀯𑀸 𑀯𑀸 𑀲𑁂𑀢𑀼 𑀯𑀸 𑀅𑀢𑁆𑀣𑀺, 𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸𑀧𑀺 𑀘𑀗𑁆𑀓𑀫𑀦𑁆𑀢𑁂𑀦𑀯 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀕𑀫𑀦𑀁 𑀦 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁. 𑀬𑀸𑀦𑁂 𑀯𑀸 𑀳𑀢𑁆𑀣𑀺𑀅𑀲𑁆𑀲𑀧𑀺𑀝𑁆𑀞𑁂 𑀯𑀸 𑀘𑀦𑁆𑀤𑀫𑀡𑁆𑀟𑀮𑁂 𑀯𑀸 𑀲𑀽𑀭𑀺𑀬𑀫𑀡𑁆𑀟𑀮𑁂 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀧𑀯𑀸𑀭𑀺𑀢𑁂𑀦 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀁, 𑀢𑀸𑀯 𑀢𑁂𑀲𑀼 𑀕𑀘𑁆𑀙𑀦𑁆𑀢𑁂𑀲𑀼𑀧𑀺 𑀦𑀺𑀲𑀺𑀦𑁆𑀦𑁂𑀦𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀞𑀺𑀢𑁄 𑀧𑀯𑀸𑀭𑁂𑀢𑀺, 𑀞𑀺𑀢𑁂𑀦𑁂𑀯, 𑀬𑁄 𑀦𑀺𑀲𑀺𑀦𑁆𑀦𑁄 𑀧𑀯𑀸𑀭𑁂𑀢𑀺, 𑀦𑀺𑀲𑀺𑀦𑁆𑀦𑁂𑀦𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀢𑀁 𑀢𑀁 𑀇𑀭𑀺𑀬𑀸𑀧𑀣𑀁 𑀓𑁄𑀧𑁂𑀦𑁆𑀢𑁂𑀦 𑀅𑀢𑀺𑀭𑀺𑀢𑁆𑀢𑀁 𑀓𑀸𑀭𑁂𑀢𑀩𑁆𑀩𑀁. 𑀬𑁄 𑀉𑀓𑁆𑀓𑀼𑀝𑀺𑀓𑁄 𑀦𑀺𑀲𑀻𑀤𑀺𑀢𑁆𑀯𑀸 𑀧𑀯𑀸𑀭𑁂𑀢𑀺, 𑀢𑁂𑀦 𑀉𑀓𑁆𑀓𑀼𑀝𑀺𑀓𑁂𑀦𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀢𑀲𑁆𑀲 𑀧𑀦 𑀳𑁂𑀝𑁆𑀞𑀸 𑀧𑀮𑀸𑀮𑀧𑀻𑀞𑀁 𑀯𑀸 𑀓𑀺𑀜𑁆𑀘𑀺 𑀯𑀸 𑀦𑀺𑀲𑀻𑀤𑀦𑀓𑀁 𑀤𑀸𑀢𑀩𑁆𑀩𑀁. 𑀧𑀻𑀞𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀯𑀸𑀭𑀺𑀢𑁂𑀦 𑀆𑀲𑀦𑀁 𑀅𑀘𑀸𑀮𑁂𑀢𑁆𑀯𑀸𑀯 𑀘𑀢𑀲𑁆𑀲𑁄 𑀤𑀺𑀲𑀸 𑀧𑀭𑀺𑀯𑀢𑁆𑀢𑀦𑁆𑀢𑁂𑀦 𑀪𑀼𑀜𑁆𑀚𑀺𑀢𑀼𑀁 𑀮𑀩𑁆𑀪𑀢𑀺. 𑀫𑀜𑁆𑀘𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀯𑀸𑀭𑀺𑀢𑁂𑀦 𑀇𑀢𑁄 𑀯𑀸 𑀏𑀢𑁆𑀢𑁄 𑀯𑀸 𑀲𑀁𑀲𑀭𑀺𑀢𑀼𑀁 𑀦 𑀮𑀩𑁆𑀪𑀢𑀺. 𑀲𑀘𑁂 𑀧𑀦 𑀦𑀁 𑀲𑀳 𑀫𑀜𑁆𑀘𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀢𑁆𑀭 𑀦𑁂𑀦𑁆𑀢𑀺, 𑀯𑀝𑁆𑀝𑀢𑀺. 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀯𑀸𑀭𑀺𑀢𑁂𑀦 𑀦𑀺𑀧𑀦𑁆𑀦𑁂𑀦𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀧𑀭𑀺𑀯𑀢𑁆𑀢𑀦𑁆𑀢𑁂𑀦 𑀬𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄, 𑀢𑀲𑁆𑀲 𑀞𑀸𑀦𑀁 𑀦𑀸𑀢𑀺𑀓𑁆𑀓𑀫𑁂𑀢𑀩𑁆𑀩𑀁.
𑀅𑀦𑀢𑀺𑀭𑀺𑀢𑁆𑀢𑀦𑁆𑀢𑀺 𑀦 𑀅𑀢𑀺𑀭𑀺𑀢𑁆𑀢𑀁; 𑀦 𑀅𑀥𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀬𑀲𑁆𑀫𑀸 𑀓𑀧𑁆𑀧𑀺𑀬𑀓𑀢𑀸𑀤𑀻𑀳𑀺 𑀲𑀢𑁆𑀢𑀳𑀺 𑀯𑀺𑀦𑀬𑀓𑀫𑁆𑀫𑀸𑀓𑀸𑀭𑁂𑀳𑀺 𑀅𑀓𑀢𑀁 𑀯𑀸 𑀕𑀺𑀮𑀸𑀦𑀲𑁆𑀲 𑀅𑀦𑀥𑀺𑀓𑀁 𑀯𑀸 𑀳𑁄𑀢𑀺, 𑀢𑀲𑁆𑀫𑀸 𑀧𑀤𑀪𑀸𑀚𑀦𑁂 ‘‘𑀅𑀓𑀧𑁆𑀧𑀺𑀬𑀓𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀓𑀧𑁆𑀧𑀺𑀬𑀓𑀢𑀦𑁆𑀢𑀺 𑀬𑀁 𑀢𑀢𑁆𑀣 𑀨𑀮𑀁 𑀯𑀸 𑀓𑀦𑁆𑀤𑀫𑀽𑀮𑀸𑀤𑀺 𑀯𑀸 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀓𑀧𑁆𑀧𑀺𑀬𑀁 𑀅𑀓𑀢𑀁; 𑀬𑀜𑁆𑀘 𑀅𑀓𑀧𑁆𑀧𑀺𑀬𑀫𑀁𑀲𑀁 𑀯𑀸 𑀅𑀓𑀧𑁆𑀧𑀺𑀬𑀪𑁄𑀚𑀦𑀁 𑀯𑀸, 𑀏𑀢𑀁 𑀅𑀓𑀧𑁆𑀧𑀺𑀬𑀁 𑀦𑀸𑀫. 𑀢𑀁 𑀅𑀓𑀧𑁆𑀧𑀺𑀬𑀁 ‘‘𑀅𑀮𑀫𑁂𑀢𑀁 𑀲𑀩𑁆𑀩’’𑀦𑁆𑀢𑀺 𑀏𑀯𑀁 𑀅𑀢𑀺𑀭𑀺𑀢𑁆𑀢𑀁 𑀓𑀢𑀫𑁆𑀧𑀺 𑀅𑀓𑀧𑁆𑀧𑀺𑀬𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀢𑀦𑁆𑀢𑀺 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁𑀬𑁂𑀯 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀢𑀺𑀭𑀺𑀢𑁆𑀢𑀁 𑀓𑀢𑀁. 𑀅𑀦𑀼𑀘𑁆𑀘𑀸𑀭𑀺𑀢𑀓𑀢𑀦𑁆𑀢𑀺 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑀼𑀁 𑀆𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀈𑀲𑀓𑀫𑁆𑀧𑀺 𑀅𑀦𑀼𑀓𑁆𑀔𑀺𑀢𑁆𑀢𑀁 𑀯𑀸 𑀅𑀦𑀧𑀦𑀸𑀫𑀺𑀢𑀁 𑀯𑀸 𑀓𑀢𑀁. 𑀅𑀳𑀢𑁆𑀣𑀧𑀸𑀲𑁂 𑀓𑀢𑀦𑁆𑀢𑀺 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑀼𑀁 𑀆𑀕𑀢𑀲𑁆𑀲 𑀳𑀢𑁆𑀣𑀧𑀸𑀲𑀢𑁄 𑀩𑀳𑀺 𑀞𑀺𑀢𑁂𑀦 𑀓𑀢𑀁. 𑀅𑀪𑀼𑀢𑁆𑀢𑀸𑀯𑀺𑀦𑀸 𑀓𑀢𑀦𑁆𑀢𑀺 𑀬𑁄 ‘‘𑀅𑀮𑀫𑁂𑀢𑀁 𑀲𑀩𑁆𑀩’’𑀦𑁆𑀢𑀺 𑀅𑀢𑀺𑀭𑀺𑀢𑁆𑀢𑀁 𑀓𑀭𑁄𑀢𑀺, 𑀢𑁂𑀦 𑀧𑀯𑀸𑀭𑀡𑀧𑁆𑀧𑀳𑁄𑀦𑀓𑀁 𑀪𑁄𑀚𑀦𑀁 𑀅𑀪𑀼𑀢𑁆𑀢𑁂𑀦 𑀓𑀢𑀁. 𑀪𑀼𑀢𑁆𑀢𑀸𑀯𑀺𑀦𑀸 𑀧𑀯𑀸𑀭𑀺𑀢𑁂𑀦 𑀆𑀲𑀦𑀸 𑀯𑀼𑀝𑁆𑀞𑀺𑀢𑁂𑀦 𑀓𑀢𑀦𑁆𑀢𑀺 𑀇𑀤𑀁 𑀉𑀢𑁆𑀢𑀸𑀦𑀫𑁂𑀯. 𑀅𑀮𑀫𑁂𑀢𑀁 𑀲𑀩𑁆𑀩𑀦𑁆𑀢𑀺 𑀅𑀯𑀼𑀢𑁆𑀢𑀦𑁆𑀢𑀺 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀏𑀯𑀁 𑀅𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀺 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀯𑀺𑀦𑀬𑀓𑀫𑁆𑀫𑀸𑀓𑀸𑀭𑁂𑀳𑀺 𑀬𑀁 𑀅𑀢𑀺𑀭𑀺𑀢𑁆𑀢𑀁 𑀓𑀧𑁆𑀧𑀺𑀬𑀁 𑀅𑀓𑀢𑀁, 𑀬𑀜𑁆𑀘 𑀦 𑀕𑀺𑀮𑀸𑀦𑀸𑀢𑀺𑀭𑀺𑀢𑁆𑀢𑀁, 𑀢𑀤𑀼𑀪𑀬𑀫𑁆𑀧𑀺 𑀅𑀦𑀢𑀺𑀭𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.
𑀅𑀢𑀺𑀭𑀺𑀢𑁆𑀢𑀁 𑀧𑀦 𑀢𑀲𑁆𑀲𑁂𑀯 𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀺𑀘𑁂𑀢𑁆𑀣 𑀪𑀼𑀢𑁆𑀢𑀸𑀯𑀺𑀦𑀸 𑀓𑀢𑀁 𑀳𑁄𑀢𑀻𑀢𑀺 𑀅𑀦𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑀲𑁆𑀲 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑀢𑁄 𑀏𑀓𑀫𑁆𑀧𑀺 𑀲𑀺𑀢𑁆𑀣𑀁 𑀯𑀸 𑀫𑀁𑀲𑀳𑀻𑀭𑀁 𑀯𑀸 𑀔𑀸𑀤𑀺𑀢𑁆𑀯𑀸 𑀓𑀢𑀫𑁆𑀧𑀺 𑀪𑀼𑀢𑁆𑀢𑀸𑀯𑀺𑀦𑀸𑀯 𑀓𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀲𑀦𑀸 𑀅𑀯𑀼𑀝𑁆𑀞𑀺𑀢𑁂𑀦𑀸𑀢𑀺 𑀏𑀢𑁆𑀣 𑀧𑀦 𑀅𑀲𑀫𑁆𑀫𑁄𑀳𑀢𑁆𑀣𑀁 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀤𑁆𑀯𑁂 𑀪𑀺𑀓𑁆𑀔𑀽 𑀧𑀸𑀢𑁄𑀯 𑀪𑀼𑀜𑁆𑀚𑀫𑀸𑀦𑀸 𑀧𑀯𑀸𑀭𑀺𑀢𑀸 𑀳𑁄𑀦𑁆𑀢𑀺 𑁋 𑀏𑀓𑁂𑀦 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀇𑀢𑀭𑁂𑀦 𑀦𑀺𑀘𑁆𑀘𑀪𑀢𑁆𑀢𑀁 𑀯𑀸 𑀲𑀮𑀸𑀓𑀪𑀢𑁆𑀢𑀁 𑀯𑀸 𑀆𑀦𑁂𑀢𑁆𑀯𑀸 𑀉𑀧𑀟𑁆𑀠𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑁂 𑀆𑀓𑀺𑀭𑀺𑀢𑁆𑀯𑀸 𑀳𑀢𑁆𑀣𑀁 𑀥𑁄𑀯𑀺𑀢𑁆𑀯𑀸 𑀲𑁂𑀲𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀬𑀜𑁆𑀳𑀺 𑀢𑀲𑁆𑀲 𑀳𑀢𑁆𑀣𑁂 𑀮𑀕𑁆𑀕𑀁, 𑀢𑀁 𑀅𑀓𑀧𑁆𑀧𑀺𑀬𑀁 𑀳𑁄𑀢𑀺. 𑀲𑀘𑁂 𑀧𑀦 𑀧𑀞𑀫𑀁 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼 𑀲𑀬𑀫𑁂𑀯 𑀢𑀲𑁆𑀲 𑀧𑀢𑁆𑀢𑀢𑁄 𑀳𑀢𑁆𑀣𑁂𑀦 𑀕𑀡𑁆𑀳𑀸𑀢𑀺, 𑀳𑀢𑁆𑀣𑀥𑁄𑀯𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀘𑁂 𑀧𑀦 𑀏𑀯𑀁 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀼𑀦 𑀓𑀺𑀜𑁆𑀘𑀺 𑀩𑁆𑀬𑀜𑁆𑀚𑀦𑀁 𑀯𑀸 𑀔𑀸𑀤𑀦𑀻𑀬𑀁 𑀯𑀸 𑀧𑀢𑁆𑀢𑁂 𑀆𑀓𑀺𑀭𑀦𑁆𑀢𑀺, 𑀬𑁂𑀦 𑀧𑀞𑀫𑀁 𑀓𑀧𑁆𑀧𑀺𑀬𑀁 𑀓𑀢𑀁, 𑀲𑁄 𑀧𑀼𑀦 𑀓𑀸𑀢𑀼𑀁 𑀦 𑀮𑀪𑀢𑀺. 𑀬𑁂𑀦 𑀅𑀓𑀢𑀁, 𑀢𑁂𑀦 𑀓𑀸𑀢𑀩𑁆𑀩𑀁. 𑀬𑀜𑁆𑀘 𑀅𑀓𑀢𑀁, 𑀢𑀁 𑀓𑀸𑀢𑀩𑁆𑀩𑀁. ‘‘𑀬𑁂𑀦 𑀅𑀓𑀢’’𑀦𑁆𑀢𑀺 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀬𑁂𑀦 𑀧𑀞𑀫𑀁 𑀦 𑀓𑀢𑀁, 𑀢𑁂𑀦 𑀓𑀸𑀢𑀩𑁆𑀩𑀁. ‘‘𑀬𑀜𑁆𑀘 𑀅𑀓𑀢’’𑀦𑁆𑀢𑀺 𑀬𑁂𑀦 𑀧𑀞𑀫𑀁 𑀓𑀧𑁆𑀧𑀺𑀬𑀁 𑀓𑀢𑀁, 𑀢𑁂𑀦𑀸𑀧𑀺 𑀬𑀁 𑀅𑀓𑀢𑀁 𑀢𑀁 𑀓𑀸𑀢𑀩𑁆𑀩𑀁. 𑀧𑀞𑀫𑀪𑀸𑀚𑀦𑁂 𑀧𑀦 𑀓𑀸𑀢𑀼𑀁 𑀦 𑀮𑀩𑁆𑀪𑀢𑀺. 𑀢𑀢𑁆𑀣 𑀳𑀺 𑀓𑀭𑀺𑀬𑀫𑀸𑀦𑀁 𑀧𑀞𑀫𑀁 𑀓𑀢𑁂𑀦 𑀲𑀤𑁆𑀥𑀺𑀁 𑀓𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀅𑀜𑁆𑀜𑀲𑁆𑀫𑀺𑀁 𑀪𑀸𑀚𑀦𑁂 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀓𑀢𑀁 𑀧𑀦 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀞𑀫𑀁 𑀓𑀢𑁂𑀦 𑀲𑀤𑁆𑀥𑀺𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.
𑀓𑀧𑁆𑀧𑀺𑀬𑀁 𑀓𑀭𑁄𑀦𑁆𑀢𑁂𑀦 𑀘 𑀦 𑀓𑁂𑀯𑀮𑀁 𑀧𑀢𑁆𑀢𑁂𑀬𑁂𑀯, 𑀓𑀼𑀡𑁆𑀟𑁂𑀧𑀺 𑀧𑀘𑁆𑀙𑀺𑀬𑀫𑁆𑀧𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀑𑀦𑀸𑀫𑀺𑀢𑀪𑀸𑀚𑀦𑁂 𑀓𑀸𑀢𑀩𑁆𑀩𑀁. 𑀢𑀁 𑀲𑀘𑁂𑀧𑀺 𑀪𑀺𑀓𑁆𑀔𑀼𑀲𑀢𑀁 𑀧𑀯𑀸𑀭𑀺𑀢𑀁 𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀧𑁆𑀧𑀯𑀸𑀭𑀺𑀢𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀬𑁂𑀦 𑀧𑀦 𑀓𑀧𑁆𑀧𑀺𑀬𑀁 𑀓𑀢𑀁, 𑀢𑀲𑁆𑀲 𑀦 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀧𑀯𑀸𑀭𑁂𑀢𑁆𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀯𑀲𑁆𑀲𑀁 𑀪𑀼𑀜𑁆𑀚𑀦𑀓𑁂 𑀫𑀗𑁆𑀕𑀮𑀦𑀺𑀫𑀦𑁆𑀢𑀦𑁂 𑀦𑀺𑀲𑀻𑀤𑀸𑀧𑁂𑀦𑁆𑀢𑀺, 𑀅𑀢𑀺𑀭𑀺𑀢𑁆𑀢𑀁 𑀓𑀸𑀭𑁂𑀢𑁆𑀯𑀸𑀯 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀢𑀢𑁆𑀣 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀦𑀢𑁆𑀣𑀺, 𑀆𑀲𑀦𑀲𑀸𑀮𑀁 𑀯𑀸 𑀯𑀺𑀳𑀸𑀭𑀁 𑀯𑀸 𑀧𑀢𑁆𑀢𑀁 𑀧𑁂𑀲𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑀁. 𑀓𑀧𑁆𑀧𑀺𑀬𑀁 𑀓𑀭𑁄𑀦𑁆𑀢𑁂𑀦 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀳𑀢𑁆𑀣𑁂 𑀞𑀺𑀢𑀁 𑀦 𑀓𑀸𑀢𑀩𑁆𑀩𑀁. 𑀲𑀘𑁂 𑀆𑀲𑀦𑀲𑀸𑀮𑀸𑀬𑀁 𑀅𑀩𑁆𑀬𑀢𑁆𑀢𑁄 𑀪𑀺𑀓𑁆𑀔𑀼 𑀳𑁄𑀢𑀺, 𑀲𑀬𑀁 𑀕𑀦𑁆𑀢𑁆𑀯𑀸 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀆𑀦𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁.
𑀕𑀺𑀮𑀸𑀦𑀸𑀢𑀺𑀭𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀬𑀁 𑀕𑀺𑀮𑀸𑀦𑀲𑁆𑀲 𑀪𑀼𑀢𑁆𑀢𑀸𑀯𑀲𑁂𑀲𑀁 𑀳𑁄𑀢𑀺, 𑀢𑀁 𑀕𑀺𑀮𑀸𑀦𑀸𑀢𑀺𑀭𑀺𑀢𑁆𑀢𑀁; 𑀅𑀣 𑀔𑁄 𑀬𑀁𑀓𑀺𑀜𑁆𑀘𑀺 𑀕𑀺𑀮𑀸𑀦𑀁 𑀉𑀤𑁆𑀤𑀺𑀲𑁆𑀲 𑀅𑀚𑁆𑀚 𑀯𑀸 𑀲𑁆𑀯𑁂 𑀯𑀸 𑀬𑀤𑀸 𑀯𑀸 𑀇𑀘𑁆𑀙𑀢𑀺, 𑀢𑀤𑀸 𑀔𑀸𑀤𑀺𑀲𑁆𑀲𑀢𑀻𑀢𑀺 𑀆𑀳𑀝𑀁, 𑀢𑀁 𑀲𑀩𑁆𑀩𑀁 ‘‘𑀕𑀺𑀮𑀸𑀦𑀸𑀢𑀺𑀭𑀺𑀢𑁆𑀢’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀬𑀸𑀫𑀓𑀸𑀮𑀺𑀓𑀸𑀤𑀻𑀲𑀼 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀤𑀼𑀓𑁆𑀓𑀝𑀁, 𑀢𑀁 𑀅𑀲𑀁𑀲𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀆𑀫𑀺𑀲𑀲𑀁𑀲𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀆𑀳𑀸𑀭𑀢𑁆𑀣𑀸𑀬𑀧𑀺 𑀅𑀦𑀸𑀳𑀸𑀭𑀢𑁆𑀣𑀸𑀬𑀧𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀚𑁆𑀛𑁄𑀳𑀭𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.
𑁨𑁪𑁧. 𑀲𑀢𑀺 𑀧𑀘𑁆𑀘𑀬𑁂𑀢𑀺 𑀬𑀸𑀫𑀓𑀸𑀮𑀺𑀓𑀁 𑀧𑀺𑀧𑀸𑀲𑀸𑀬 𑀲𑀢𑀺 𑀧𑀺𑀧𑀸𑀲𑀘𑁆𑀙𑁂𑀤𑀦𑀢𑁆𑀣𑀁, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀜𑁆𑀘 𑀢𑁂𑀦 𑀢𑁂𑀦 𑀉𑀧𑀲𑀫𑁂𑀢𑀩𑁆𑀩𑀓𑁂 𑀆𑀩𑀸𑀥𑁂 𑀲𑀢𑀺 𑀢𑀲𑁆𑀲 𑀉𑀧𑀲𑀫𑀦𑀢𑁆𑀣𑀁 𑀧𑀭𑀺𑀪𑀼𑀜𑁆𑀚𑀢𑁄 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.
𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.
𑀧𑀞𑀫𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀘𑀫𑀁.
𑁬. 𑀤𑀼𑀢𑀺𑀬𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸
𑁨𑁪𑁨. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑁂 𑁋 𑀅𑀦𑀸𑀘𑀸𑀭𑀁 𑀆𑀘𑀭𑀢𑀻𑀢𑀺 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀢𑀺. 𑀉𑀧𑀦𑀦𑁆𑀥𑀻𑀢𑀺 𑀉𑀧𑀦𑀸𑀳𑀁 𑀚𑀦𑁂𑀦𑁆𑀢𑁄 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀢𑁆𑀢𑀦𑁄 𑀓𑁄𑀥𑀁 𑀩𑀦𑁆𑀥𑀺; 𑀧𑀼𑀦𑀧𑁆𑀧𑀼𑀦𑀁 𑀆𑀖𑀸𑀢𑀁 𑀚𑀦𑁂𑀲𑀻𑀢𑀺 𑀅𑀢𑁆𑀣𑁄. 𑀉𑀧𑀦𑀤𑁆𑀥𑁄 𑀪𑀺𑀓𑁆𑀔𑀽𑀢𑀺 𑀲𑁄 𑀚𑀦𑀺𑀢𑀉𑀧𑀦𑀸𑀳𑁄 𑀪𑀺𑀓𑁆𑀔𑀼.
𑁨𑁪𑁩. 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀬𑁆𑀬𑀸𑀢𑀺 𑀅𑀪𑀺𑀳𑀭𑀺𑀢𑁆𑀯𑀸 ‘‘𑀳𑀦𑁆𑀤 𑀪𑀺𑀓𑁆𑀔𑀼 𑀔𑀸𑀤 𑀯𑀸 𑀪𑀼𑀜𑁆𑀚 𑀯𑀸’’𑀢𑀺 𑀏𑀯𑀁 𑀧𑀯𑀸𑀭𑁂𑀬𑁆𑀬. 𑀧𑀤𑀪𑀸𑀚𑀦𑁂 𑀧𑀦 ‘‘𑀳𑀦𑁆𑀤 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀲𑀸𑀥𑀸𑀭𑀡𑀫𑁂𑀯 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑀡𑀸𑀬 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀯𑀢𑀓𑀁 𑀇𑀘𑁆𑀙𑀲𑀺 𑀢𑀸𑀯𑀢𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑀁. 𑀚𑀸𑀦𑀦𑁆𑀢𑀺 𑀧𑀯𑀸𑀭𑀺𑀢𑀪𑀸𑀯𑀁 𑀚𑀸𑀦𑀦𑁆𑀢𑁄. 𑀢𑀁 𑀧𑀦𑀲𑁆𑀲 𑀚𑀸𑀦𑀦𑀁 𑀬𑀲𑁆𑀫𑀸 𑀢𑀻𑀳𑀸𑀓𑀸𑀭𑁂𑀳𑀺 𑀳𑁄𑀢𑀺, 𑀢𑀲𑁆𑀫𑀸 ‘‘𑀚𑀸𑀦𑀸𑀢𑀺 𑀦𑀸𑀫 𑀲𑀸𑀫𑀁 𑀯𑀸 𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀆𑀲𑀸𑀤𑀦𑀸𑀧𑁂𑀓𑁆𑀔𑁄𑀢𑀺 𑀆𑀲𑀸𑀤𑀦𑀁 𑀘𑁄𑀤𑀦𑀁 𑀫𑀗𑁆𑀓𑀼𑀓𑀭𑀡𑀪𑀸𑀯𑀁 𑀅𑀧𑁂𑀓𑁆𑀔𑀫𑀸𑀦𑁄.
𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀬𑀲𑁆𑀲 𑀅𑀪𑀺𑀳𑀝𑀁 𑀢𑀲𑁆𑀫𑀺𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁂 𑀅𑀪𑀺𑀳𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁. 𑀇𑀢𑀭𑀲𑁆𑀲 𑀧𑀦 𑀲𑀩𑁆𑀩𑁄 𑀆𑀧𑀢𑁆𑀢𑀺𑀪𑁂𑀤𑁄 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑁄, 𑀇𑀫𑀲𑁆𑀫𑀺𑀁 𑀧𑀦 𑀲𑀺𑀓𑁆𑀔𑀸𑀧𑀤𑁂 𑀲𑀩𑁆𑀩𑀸 𑀆𑀧𑀢𑁆𑀢𑀺𑀬𑁄 𑀅𑀪𑀺𑀳𑀸𑀭𑀓𑀲𑁆𑀲𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀧𑀸𑀓𑀝𑀫𑁂𑀯.
𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.
𑀤𑀼𑀢𑀺𑀬𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑀁 𑀙𑀝𑁆𑀞𑀁.
𑁭. 𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸
𑁨𑁪𑁭. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑁂 𑁋 𑀕𑀺𑀭𑀕𑁆𑀕𑀲𑀫𑀚𑁆𑀚𑁄𑀢𑀺 𑀕𑀺𑀭𑀺𑀫𑁆𑀳𑀺 𑀅𑀕𑁆𑀕𑀲𑀫𑀚𑁆𑀚𑁄, 𑀕𑀺𑀭𑀺𑀲𑁆𑀲 𑀯𑀸 𑀅𑀕𑁆𑀕𑀤𑁂𑀲𑁂 𑀲𑀫𑀚𑁆𑀚𑁄. 𑀲𑁄 𑀓𑀺𑀭 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀪𑀯𑀺𑀲𑁆𑀲𑀢𑀻𑀢𑀺 𑀦𑀕𑀭𑁂 𑀖𑁄𑀲𑀦𑀸 𑀓𑀭𑀺𑀬𑀢𑀺, 𑀦𑀕𑀭𑀲𑁆𑀲 𑀩𑀳𑀺𑀤𑁆𑀥𑀸 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀧𑀩𑁆𑀩𑀢𑀘𑁆𑀙𑀸𑀬𑀸𑀬 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀢𑀺, 𑀅𑀦𑁂𑀓𑀧𑁆𑀧𑀓𑀸𑀭𑀸𑀦𑀺 𑀦𑀝𑀦𑀸𑀝𑀓𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑁂𑀲𑀁 𑀤𑀲𑁆𑀲𑀦𑀢𑁆𑀣𑀁 𑀫𑀜𑁆𑀘𑀸𑀢𑀺𑀫𑀜𑁆𑀘𑁂 𑀩𑀦𑁆𑀥𑀦𑁆𑀢𑀺. 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀤𑀳𑀭𑀸𑀯 𑀉𑀧𑀲𑀫𑁆𑀧𑀦𑁆𑀦𑀸, 𑀢𑁂 ‘‘𑀦𑀸𑀝𑀓𑀸𑀦𑀺 𑀆𑀯𑀼𑀲𑁄 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀢𑀢𑁆𑀣 𑀅𑀕𑀫𑀁𑀲𑀼. 𑀅𑀣 𑀦𑁂𑀲𑀁 𑀜𑀸𑀢𑀓𑀸 ‘‘𑀅𑀫𑁆𑀳𑀸𑀓𑀁 𑀅𑀬𑁆𑀬𑀸 𑀆𑀕𑀢𑀸’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 𑀦𑁆𑀳𑀸𑀧𑁂𑀢𑁆𑀯𑀸 𑀯𑀺𑀮𑀺𑀫𑁆𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 𑀧𑀽𑀯𑀔𑀸𑀤𑀦𑀻𑀬𑀸𑀤𑀺𑀁 𑀳𑀢𑁆𑀣𑁂 𑀅𑀤𑀁𑀲𑀼. 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀫𑀦𑀼𑀲𑁆𑀲𑀸 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀧𑀲𑁆𑀲𑀺𑀢𑁆𑀯𑀸’’𑀢𑀺𑀆𑀤𑀺.
𑁨𑁪𑁮-𑁯. 𑀯𑀺𑀓𑀸𑀮𑁂𑀢𑀺 𑀯𑀺𑀕𑀢𑁂 𑀓𑀸𑀮𑁂. 𑀓𑀸𑀮𑁄𑀢𑀺 𑀪𑀺𑀓𑁆𑀔𑀽𑀦𑀁 𑀪𑁄𑀚𑀦𑀓𑀸𑀮𑁄 𑀅𑀥𑀺𑀧𑁆𑀧𑁂𑀢𑁄, 𑀲𑁄 𑀘 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀫𑀚𑁆𑀛𑀦𑁆𑀳𑀺𑀓𑁄, 𑀢𑀲𑁆𑀫𑀺𑀁 𑀯𑀻𑀢𑀺𑀯𑀢𑁆𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀯𑀺𑀓𑀸𑀮𑁄 𑀦𑀸𑀫 𑀫𑀚𑁆𑀛𑀦𑁆𑀳𑀺𑀓𑁂 𑀯𑀻𑀢𑀺𑀯𑀢𑁆𑀢𑁂 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸’’𑀢𑀺 𑀯𑀼𑀢𑁆𑀢𑀁, 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑁄𑀧𑀺 𑀓𑀸𑀮𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀔𑀸𑀤𑀺𑀢𑀼𑀁 𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀸 𑀦 𑀲𑀓𑁆𑀓𑀸, 𑀲𑀳𑀲𑀸 𑀧𑀺𑀯𑀺𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬, 𑀓𑀼𑀓𑁆𑀓𑀼𑀘𑁆𑀘𑀓𑁂𑀦 𑀧𑀦 𑀦 𑀓𑀢𑁆𑀢𑀩𑁆𑀩𑀁. 𑀓𑀸𑀮𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀢𑁆𑀣𑀜𑁆𑀘 𑀓𑀸𑀮𑀢𑁆𑀣𑀫𑁆𑀪𑁄 𑀬𑁄𑀚𑁂𑀢𑀩𑁆𑀩𑁄, 𑀓𑀸𑀮𑀦𑁆𑀢𑀭𑁂𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁.
𑀅𑀯𑀲𑁂𑀲𑀁 𑀔𑀸𑀤𑀦𑀻𑀬𑀁 𑀦𑀸𑀫𑀸𑀢𑀺 𑀏𑀢𑁆𑀣 𑀬𑀁 𑀢𑀸𑀯 𑀲𑀓𑁆𑀔𑀮𑀺𑀫𑁄𑀤𑀓𑀸𑀤𑀺𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀫𑀬𑀁, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀬𑀫𑁆𑀧𑀺 𑀯𑀦𑀫𑀽𑀮𑀸𑀤𑀺𑀧𑁆𑀧𑀪𑁂𑀤𑀁 𑀆𑀫𑀺𑀲𑀕𑀢𑀺𑀓𑀁 𑀳𑁄𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀽𑀮𑀔𑀸𑀤𑀦𑀻𑀬𑀁 𑀓𑀦𑁆𑀤𑀔𑀸𑀤𑀦𑀻𑀬𑀁 𑀫𑀽𑀴𑀸𑀮𑀔𑀸𑀤𑀦𑀻𑀬𑀁 𑀫𑀢𑁆𑀣𑀓𑀔𑀸𑀤𑀦𑀻𑀬𑀁 𑀔𑀦𑁆𑀥𑀔𑀸𑀤𑀦𑀻𑀬𑀁 𑀢𑀘𑀔𑀸𑀤𑀦𑀻𑀬𑀁 𑀧𑀢𑁆𑀢𑀔𑀸𑀤𑀦𑀻𑀬𑀁 𑀧𑀼𑀧𑁆𑀨𑀔𑀸𑀤𑀦𑀻𑀬𑀁 𑀨𑀮𑀔𑀸𑀤𑀦𑀻𑀬𑀁 𑀅𑀝𑁆𑀞𑀺𑀔𑀸𑀤𑀦𑀻𑀬𑀁 𑀧𑀺𑀝𑁆𑀞𑀔𑀸𑀤𑀦𑀻𑀬𑀁 𑀦𑀺𑀬𑁆𑀬𑀸𑀲𑀔𑀸𑀤𑀦𑀻𑀬𑀦𑁆𑀢𑀺, 𑀇𑀤𑀫𑁆𑀧𑀺 𑀔𑀸𑀤𑀦𑀻𑀬𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺.
𑀢𑀢𑁆𑀣 𑀧𑀦 𑀆𑀫𑀺𑀲𑀕𑀢𑀺𑀓𑀲𑀮𑁆𑀮𑀓𑁆𑀔𑀡𑀢𑁆𑀣𑀁 𑀇𑀤𑀁 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁 𑁋 𑀫𑀽𑀮𑀔𑀸𑀤𑀦𑀻𑀬𑁂 𑀢𑀸𑀯 𑀫𑀽𑀮𑀓𑀫𑀽𑀮𑀁 𑀔𑀸𑀭𑀓𑀫𑀽𑀮𑀁 𑀘𑀘𑁆𑀘𑀼𑀫𑀽𑀮𑀁 𑀢𑀫𑁆𑀩𑀓𑀫𑀽𑀮𑀁 𑀢𑀡𑁆𑀟𑀼𑀮𑁂𑀬𑁆𑀬𑀓𑀫𑀽𑀮𑀁 𑀯𑀢𑁆𑀣𑀼𑀮𑁂𑀬𑁆𑀬𑀓𑀫𑀽𑀮𑀁 𑀯𑀚𑀓𑀮𑀺𑀫𑀽𑀮𑀁 𑀚𑀚𑁆𑀛𑀭𑀻𑀫𑀽𑀮𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀲𑀽𑀧𑁂𑀬𑁆𑀬𑀧𑀡𑁆𑀡𑀫𑀽𑀮𑀸𑀦𑀺 𑀆𑀫𑀺𑀲𑀕𑀢𑀺𑀓𑀸𑀦𑀺. 𑀏𑀢𑁆𑀣 𑀘 𑀯𑀚𑀓𑀮𑀺𑀫𑀽𑀮𑁂 𑀚𑀭𑀝𑁆𑀞𑀁 𑀙𑀺𑀦𑁆𑀤𑀺𑀢𑁆𑀯𑀸 𑀙𑀟𑁆𑀟𑁂𑀦𑁆𑀢𑀺, 𑀢𑀁 𑀬𑀸𑀯𑀚𑀻𑀯𑀺𑀓𑀁 𑀳𑁄𑀢𑀺. 𑀅𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀏𑀢𑁂𑀦𑁂𑀯 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀫𑀽𑀮𑀓𑀔𑀸𑀭𑀓𑀚𑀚𑁆𑀛𑀭𑀻𑀫𑀽𑀮𑀸𑀦𑀁 𑀧𑀦 𑀚𑀭𑀝𑁆𑀞𑀸𑀦𑀺𑀧𑀺 𑀆𑀫𑀺𑀲𑀕𑀢𑀺𑀓𑀸𑀦𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀬𑀸𑀦𑀺 𑀧𑀦 𑀧𑀸𑀴𑀺𑀬𑀁 𑁋
‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀳𑀮𑀺𑀤𑁆𑀤𑀺𑀁 𑀲𑀺𑀗𑁆𑀕𑀺𑀯𑁂𑀭𑀁 𑀯𑀘𑀁 𑀯𑀘𑀢𑁆𑀢𑀁 𑀅𑀢𑀺𑀯𑀺𑀲𑀁 𑀓𑀝𑀼𑀓𑀭𑁄𑀳𑀺𑀡𑀺𑀁 𑀉𑀲𑀻𑀭𑀁 𑀪𑀤𑁆𑀤𑀫𑀼𑀢𑁆𑀢𑀓𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀫𑀽𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀻’’𑀢𑀺 (𑀫𑀳𑀸𑀯. 𑁨𑁬𑁩) 𑁋
𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀬𑀸𑀯𑀚𑀻𑀯𑀺𑀓𑀸𑀦𑀺. 𑀢𑁂𑀲𑀁 𑀘𑀽𑀴𑀧𑀜𑁆𑀘𑀫𑀽𑀮𑀁 𑀫𑀳𑀸𑀧𑀜𑁆𑀘𑀫𑀽𑀮𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀕𑀡𑀺𑀬𑀫𑀸𑀦𑀸𑀦𑀁 𑀕𑀡𑀦𑀸𑀬 𑀅𑀦𑁆𑀢𑁄 𑀦𑀢𑁆𑀣𑀺. 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀸𑀪𑀸𑀯𑁄𑀬𑁂𑀯 𑀧𑀦 𑀢𑁂𑀲𑀁 𑀮𑀓𑁆𑀔𑀡𑀁. 𑀢𑀲𑁆𑀫𑀸 𑀬𑀁𑀓𑀺𑀜𑁆𑀘𑀺 𑀫𑀽𑀮𑀁 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀢𑀺, 𑀢𑀁 𑀬𑀸𑀯𑀓𑀸𑀮𑀺𑀓𑀁; 𑀇𑀢𑀭𑀁 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀲𑀼 𑀩𑀳𑀼𑀁 𑀯𑀢𑁆𑀯𑀸𑀧𑀺 𑀳𑀺 𑀇𑀫𑀲𑁆𑀫𑀺𑀁𑀬𑁂𑀯 𑀮𑀓𑁆𑀔𑀡𑁂 𑀞𑀸𑀢𑀩𑁆𑀩𑀁. 𑀦𑀸𑀫𑀲𑀜𑁆𑀜𑀸𑀲𑀼 𑀧𑀦 𑀯𑀼𑀘𑁆𑀘𑀫𑀸𑀦𑀸𑀲𑀼 𑀢𑀁 𑀢𑀁 𑀦𑀸𑀫𑀁 𑀅𑀚𑀸𑀦𑀦𑁆𑀢𑀸𑀦𑀁 𑀲𑀫𑁆𑀫𑁄𑀳𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀦𑀸𑀫𑀲𑀜𑁆𑀜𑀸𑀬 𑀆𑀤𑀭𑀁 𑀅𑀓𑀢𑁆𑀯𑀸 𑀮𑀓𑁆𑀔𑀡𑀫𑁂𑀯 𑀤𑀲𑁆𑀲𑀺𑀢𑀁.
𑀬𑀣𑀸 𑀘 𑀫𑀽𑀮𑁂; 𑀏𑀯𑀁 𑀓𑀦𑁆𑀤𑀸𑀤𑀻𑀲𑀼𑀧𑀺 𑀬𑀁 𑀮𑀓𑁆𑀔𑀡𑀁 𑀤𑀲𑁆𑀲𑀺𑀢𑀁, 𑀢𑀲𑁆𑀲𑁂𑀯 𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀜𑁆𑀘 𑀢𑀁 𑀧𑀸𑀴𑀺𑀬𑀁 𑀳𑀮𑀺𑀤𑁆𑀤𑀸𑀤𑀺 𑀅𑀝𑁆𑀞𑀯𑀺𑀥𑀁 𑀯𑀼𑀢𑁆𑀢𑀁, 𑀢𑀲𑁆𑀲 𑀔𑀦𑁆𑀥𑀢𑀘𑀧𑀼𑀧𑁆𑀨𑀨𑀮𑀫𑁆𑀧𑀺 𑀲𑀩𑁆𑀩𑀁 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀯𑀼𑀢𑁆𑀢𑀁.
𑀓𑀦𑁆𑀤𑀔𑀸𑀤𑀦𑀻𑀬𑁂 𑀤𑀼𑀯𑀺𑀥𑁄 𑀓𑀦𑁆𑀤𑁄 𑁋 𑀤𑀻𑀖𑁄 𑀘 𑀭𑀲𑁆𑀲𑁄 𑀘 𑀪𑀺𑀲𑀓𑀺𑀁𑀲𑀼𑀓𑀓𑀦𑁆𑀤𑀸𑀤𑀺 𑀯𑀝𑁆𑀝𑁄 𑀉𑀧𑁆𑀧𑀮𑀓𑀲𑁂𑀭𑀼𑀓𑀓𑀦𑁆𑀤𑀸𑀤𑀺, 𑀬𑀁 ‘‘𑀕𑀡𑁆𑀞𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀲𑀩𑁆𑀩𑁂𑀲𑀁 𑀓𑀦𑁆𑀤𑀸𑀦𑀁 𑀚𑀺𑀡𑁆𑀡𑀚𑀭𑀝𑁆𑀞𑀸𑀦𑀜𑁆𑀘 𑀙𑀮𑁆𑀮𑀺 𑀘 𑀲𑀼𑀔𑀼𑀫𑀫𑀽𑀮𑀸𑀦𑀺 𑀘 𑀬𑀸𑀯𑀚𑀻𑀯𑀺𑀓𑀸𑀦𑀺. 𑀢𑀭𑀼𑀡𑁄 𑀧𑀦 𑀲𑀼𑀔𑀔𑀸𑀤𑀦𑀻𑀬𑁄, 𑀲𑀸𑀮𑀓𑀮𑁆𑀬𑀸𑀡𑀻𑀧𑁄𑀢𑀓𑀓𑀦𑁆𑀤𑁄 𑀓𑀺𑀁𑀲𑀼𑀓𑀧𑁄𑀢𑀓𑀓𑀦𑁆𑀤𑁄 𑀅𑀫𑁆𑀩𑀸𑀝𑀓𑀓𑀦𑁆𑀤𑁄 𑀓𑁂𑀢𑀓𑀓𑀦𑁆𑀤𑁄 𑀫𑀸𑀮𑀼𑀯𑀓𑀦𑁆𑀤𑁄 𑀪𑀺𑀲𑀲𑀗𑁆𑀔𑀸𑀢𑁄 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀓𑀦𑁆𑀤𑁄 𑀧𑀺𑀡𑁆𑀟𑀸𑀮𑀼𑀫𑀲𑀸𑀮𑀼𑀆𑀤𑀬𑁄 𑀘 𑀔𑀻𑀭𑀯𑀮𑁆𑀮𑀺𑀓𑀦𑁆𑀤𑁄 𑀆𑀮𑀼𑀯𑀓𑀦𑁆𑀤𑁄 𑀲𑀺𑀕𑁆𑀕𑀼𑀓𑀦𑁆𑀤𑁄 𑀢𑀸𑀮𑀓𑀦𑁆𑀤𑁄 𑀦𑀻𑀮𑀼𑀧𑁆𑀧𑀮𑀭𑀢𑁆𑀢𑀼𑀧𑁆𑀧𑀮𑀓𑀼𑀫𑀼𑀤𑀲𑁄𑀕𑀦𑁆𑀥𑀺𑀓𑀸𑀦𑀁 𑀓𑀦𑁆𑀤𑀸 𑀓𑀤𑀮𑀺𑀓𑀦𑁆𑀤𑁄 𑀯𑁂𑀴𑀼𑀓𑀦𑁆𑀤𑁄 𑀓𑀲𑁂𑀭𑀼𑀓𑀓𑀦𑁆𑀤𑁄𑀢𑀺 𑀏𑀯𑀫𑀸𑀤𑀬𑁄 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀜𑁆𑀘 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑀓𑀦𑁆𑀤𑀸 𑀬𑀸𑀯𑀓𑀸𑀮𑀺𑀓𑀸.
𑀔𑀻𑀭𑀯𑀮𑁆𑀮𑀺𑀓𑀦𑁆𑀤𑁄 𑀅𑀥𑁄𑀢𑁄 𑀬𑀸𑀯𑀚𑀻𑀯𑀺𑀓𑁄, 𑀥𑁄𑀢𑁄 𑀬𑀸𑀯𑀓𑀸𑀮𑀺𑀓𑁄. 𑀔𑀻𑀭𑀓𑀸𑀓𑁄𑀮𑀻𑀚𑀻𑀯𑀺𑀓𑀉𑀲𑀪𑀓𑀮𑀲𑀼𑀡𑀸𑀤𑀺𑀓𑀦𑁆𑀤𑀸 𑀧𑀦 𑀬𑀸𑀯𑀚𑀻𑀯𑀺𑀓𑀸. 𑀢𑁂 𑀧𑀸𑀴𑀺𑀬𑀁 𑁋 ‘‘𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀫𑀽𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀻’’𑀢𑀺 𑀏𑀯𑀁 𑀫𑀽𑀮𑀪𑁂𑀲𑀚𑁆𑀚𑀲𑀗𑁆𑀕𑀳𑁂𑀦𑁂𑀯 𑀲𑀗𑁆𑀕𑀳𑀺𑀢𑀸.
𑀫𑀽𑀴𑀸𑀮𑀔𑀸𑀤𑀦𑀻𑀬𑁂 𑀧𑀦 𑀧𑀤𑀼𑀫𑀫𑀽𑀴𑀸𑀮𑀁 𑀧𑀼𑀡𑁆𑀟𑀭𑀻𑀓𑀫𑀼𑀴𑀸𑀮𑀲𑀤𑀺𑀲𑀫𑁂𑀯. 𑀏𑀭𑀓𑀫𑀽𑀮𑀁 𑀓𑀦𑁆𑀤𑀼𑀮𑀫𑀽𑀮𑀦𑁆𑀢𑀺 𑀏𑀯𑀫𑀸𑀤𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀜𑁆𑀘 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑀫𑀼𑀴𑀸𑀮𑀁 𑀬𑀸𑀯𑀓𑀸𑀮𑀺𑀓𑀁. 𑀳𑀮𑀺𑀤𑁆𑀤𑀺𑀲𑀺𑀗𑁆𑀕𑀺𑀯𑁂𑀭𑀫𑀓𑀘𑀺𑀘𑀢𑀼𑀭𑀲𑁆𑀲𑀯𑀮𑁆𑀮𑀺𑀓𑁂𑀢𑀓𑀢𑀸𑀮𑀳𑀺𑀦𑁆𑀢𑀸𑀮𑀓𑀼𑀦𑁆𑀢𑀸𑀮𑀦𑀸𑀴𑀺𑀓𑁂𑀭𑀧𑀽𑀕𑀭𑀼𑀓𑁆𑀔𑀸𑀤𑀺𑀫𑀼𑀴𑀸𑀮𑀁 𑀧𑀦 𑀬𑀸𑀯𑀚𑀻𑀯𑀺𑀓𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀧𑀸𑀴𑀺𑀬𑀁 𑁋 ‘‘𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀫𑀽𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀻’’𑀢𑀺 (𑀫𑀳𑀸𑀯. 𑁨𑁬𑁩) 𑀏𑀯𑀁 𑀫𑀽𑀮𑀪𑁂𑀲𑀚𑁆𑀚𑀲𑀗𑁆𑀕𑀳𑁂𑀦𑁂𑀯 𑀲𑀗𑁆𑀕𑀳𑀺𑀢𑀁.
𑀫𑀢𑁆𑀣𑀓𑀔𑀸𑀤𑀦𑀻𑀬𑁂 𑀢𑀸𑀮𑀳𑀺𑀦𑁆𑀢𑀸𑀮𑀓𑀼𑀦𑁆𑀢𑀸𑀮𑀓𑁂𑀢𑀓𑀦𑀸𑀴𑀺𑀓𑁂𑀭𑀧𑀽𑀕𑀭𑀼𑀓𑁆𑀔𑀔𑀚𑁆𑀚𑀽𑀭𑀻𑀯𑁂𑀢𑁆𑀢𑀏𑀭𑀓𑀓𑀤𑀮𑀻𑀦𑀁 𑀓𑀴𑀻𑀭𑀲𑀗𑁆𑀔𑀸𑀢𑀸 𑀫𑀢𑁆𑀣𑀓𑀸 𑀯𑁂𑀡𑀼𑀓𑀴𑀻𑀭𑁄 𑀦𑀴𑀓𑀴𑀻𑀭𑁄 𑀉𑀘𑁆𑀙𑀼𑀓𑀴𑀻𑀭𑁄 𑀫𑀽𑀮𑀓𑀓𑀴𑀻𑀭𑁄 𑀲𑀸𑀲𑀧𑀓𑀴𑀻𑀭𑁄 𑀲𑀢𑀸𑀯𑀭𑀺𑀓𑀴𑀻𑀭𑁄 𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁 𑀓𑀴𑀻𑀭𑀸𑀢𑀺 𑀏𑀯𑀫𑀸𑀤𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑁄 𑀭𑀼𑀓𑁆𑀔𑀯𑀮𑁆𑀮𑀺𑀆𑀤𑀻𑀦𑀁 𑀫𑀢𑁆𑀣𑀓𑁄 𑀬𑀸𑀯𑀓𑀸𑀮𑀺𑀓𑁄. 𑀳𑀮𑀺𑀤𑁆𑀤𑀺𑀲𑀺𑀗𑁆𑀕𑀺𑀯𑁂𑀭𑀯𑀘𑀫𑀓𑀘𑀺𑀮𑀲𑀼𑀡𑀸𑀦𑀁𑀓𑀴𑀻𑀭𑀸 𑀢𑀸𑀮𑀳𑀺𑀦𑁆𑀢𑀸𑀮𑀓𑀼𑀦𑁆𑀢𑀸𑀮𑀦𑀸𑀴𑀺𑀓𑁂𑀭𑀓𑀴𑀻𑀭𑀸𑀦𑀜𑁆𑀘 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑀺𑀢𑁄 𑀚𑀭𑀝𑁆𑀞𑀩𑀼𑀦𑁆𑀤𑁄 𑀬𑀸𑀯𑀚𑀻𑀯𑀺𑀓𑁄.
𑀔𑀦𑁆𑀥𑀔𑀸𑀤𑀦𑀻𑀬𑁂 𑀅𑀦𑁆𑀢𑁄𑀧𑀣𑀯𑀻𑀕𑀢𑁄 𑀲𑀸𑀮𑀓𑀮𑁆𑀬𑀸𑀡𑀻𑀔𑀦𑁆𑀥𑁄 𑀉𑀘𑁆𑀙𑀼𑀔𑀦𑁆𑀥𑁄 𑀦𑀻𑀮𑀼𑀧𑁆𑀧𑀮𑀭𑀢𑁆𑀢𑀼𑀧𑁆𑀧𑀮𑀓𑀼𑀫𑀼𑀤𑀲𑁄𑀕𑀦𑁆𑀥𑀺𑀓𑀸𑀦𑀁 𑀔𑀦𑁆𑀥𑀓𑀸𑀢𑀺 𑀏𑀯𑀫𑀸𑀤𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑁄 𑀔𑀦𑁆𑀥𑁄 𑀬𑀸𑀯𑀓𑀸𑀮𑀺𑀓𑁄. 𑀉𑀧𑁆𑀧𑀮𑀚𑀸𑀢𑀻𑀦𑀁 𑀧𑀡𑁆𑀡𑀤𑀡𑁆𑀟𑀓𑁄 𑀧𑀤𑀼𑀫𑀚𑀸𑀢𑀻𑀦𑀁 𑀲𑀩𑁆𑀩𑁄𑀧𑀺 𑀤𑀡𑁆𑀟𑀓𑁄 𑀓𑀸𑀭𑀯𑀺𑀦𑁆𑀤𑀓𑀤𑀡𑁆𑀟𑀸𑀤𑀬𑁄 𑀘 𑀅𑀯𑀲𑁂𑀲𑀲𑀩𑁆𑀩𑀔𑀦𑁆𑀥𑀸 𑀬𑀸𑀯𑀚𑀻𑀯𑀺𑀓𑀸.
𑀢𑀘𑀔𑀸𑀤𑀦𑀻𑀬𑁂 𑀉𑀘𑁆𑀙𑀼𑀢𑀘𑁄𑀯 𑀏𑀓𑁄 𑀬𑀸𑀯𑀓𑀸𑀮𑀺𑀓𑁄, 𑀲𑁄𑀧𑀺 𑀲𑀭𑀲𑁄. 𑀲𑁂𑀲𑁄 𑀲𑀩𑁆𑀩𑁄 𑀬𑀸𑀯𑀚𑀻𑀯𑀺𑀓𑁄. 𑀢𑁂𑀲𑀁 𑀧𑀦 𑀫𑀢𑁆𑀣𑀓𑀔𑀦𑁆𑀥𑀢𑀘𑀸𑀦𑀁 𑀢𑀺𑀡𑁆𑀡𑀁 𑀧𑀸𑀴𑀺𑀬𑀁 𑀓𑀲𑀸𑀯𑀪𑁂𑀲𑀚𑁆𑀚𑁂𑀦 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋
‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀲𑀸𑀯𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑀺𑀫𑁆𑀩𑀓𑀲𑀸𑀯𑀁, 𑀓𑀼𑀝𑀚𑀓𑀲𑀸𑀯𑀁, 𑀧𑀝𑁄𑀮𑀓𑀲𑀸𑀯𑀁, 𑀨𑀕𑁆𑀕𑀯𑀓𑀲𑀸𑀯𑀁 𑀦𑀢𑁆𑀢𑀫𑀸𑀮𑀓𑀲𑀸𑀯𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀓𑀲𑀸𑀯𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀻’’𑀢𑀺 (𑀫𑀳𑀸𑀯. 𑁨𑁬𑁩).
𑀏𑀢𑁆𑀣 𑀳𑀺 𑀏𑀢𑁂𑀲𑀫𑁆𑀧𑀺 𑀲𑀗𑁆𑀕𑀳𑁄 𑀲𑀺𑀚𑁆𑀛𑀢𑀺. 𑀯𑀼𑀢𑁆𑀢𑀓𑀲𑀸𑀯𑀸𑀦𑀺 𑀘 𑀲𑀩𑁆𑀩𑀸𑀦𑀺 𑀓𑀧𑁆𑀧𑀺𑀬𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.
𑀧𑀢𑁆𑀢𑀔𑀸𑀤𑀦𑀻𑀬𑁂 𑀫𑀽𑀮𑀓𑀁 𑀔𑀸𑀭𑀓𑁄 𑀘𑀘𑁆𑀘𑀼 𑀢𑀫𑁆𑀩𑀓𑁄 𑀢𑀡𑁆𑀟𑀼𑀮𑁂𑀬𑁆𑀬𑀓𑁄 𑀧𑀧𑀼𑀦𑁆𑀦𑀸𑀕𑁄 𑀯𑀢𑁆𑀣𑀼𑀮𑁂𑀬𑁆𑀬𑀓𑁄 𑀯𑀚𑀓𑀮𑀺 𑀚𑀚𑁆𑀛𑀭𑀻 𑀲𑁂𑀮𑁆𑀮𑀼 𑀲𑀺𑀕𑁆𑀕𑀼 𑀓𑀸𑀲𑀫𑀤𑁆𑀤𑀓𑁄 𑀉𑀫𑁆𑀫𑀸 𑀘𑀻𑀦𑀫𑀼𑀕𑁆𑀕𑁄 𑀫𑀸𑀲𑁄 𑀭𑀸𑀚𑀫𑀸𑀲𑁄 𑀞𑀧𑁂𑀢𑁆𑀯𑀸 𑀫𑀳𑀸𑀦𑀺𑀧𑁆𑀨𑀸𑀯𑀁 𑀅𑀯𑀲𑁂𑀲𑀦𑀺𑀧𑁆𑀨𑀸𑀯𑁄 𑀅𑀕𑁆𑀕𑀺𑀫𑀦𑁆𑀣𑁄 𑀲𑀼𑀦𑀺𑀲𑀦𑁆𑀦𑀓𑁄 𑀲𑁂𑀢𑀯𑀭𑀡𑁄 𑀦𑀸𑀴𑀺𑀓𑀸 𑀪𑀽𑀫𑀺𑀬𑀁 𑀚𑀸𑀢𑀮𑁄𑀡𑀻𑀢𑀺 𑀏𑀢𑁂𑀲𑀁 𑀧𑀢𑁆𑀢𑀸𑀦𑀺 𑀅𑀜𑁆𑀜𑀸𑀦𑀺 𑀘 𑀏𑀯𑀭𑀽𑀧𑀸𑀦𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑀸𑀦𑀺 𑀧𑀢𑁆𑀢𑀸𑀦𑀺 𑀏𑀓𑀁𑀲𑁂𑀦 𑀬𑀸𑀯𑀓𑀸𑀮𑀺𑀓𑀸𑀦𑀺. 𑀬𑀸 𑀧𑀦𑀜𑁆𑀜𑀸 𑀫𑀳𑀸𑀦𑀔𑀧𑀺𑀝𑁆𑀞𑀺𑀫𑀢𑁆𑀢𑀸 𑀧𑀡𑁆𑀡𑀮𑁄𑀡𑀺 𑀭𑀼𑀓𑁆𑀔𑁂 𑀘 𑀕𑀘𑁆𑀙𑁂 𑀘 𑀆𑀭𑁄𑀳𑀢𑀺, 𑀢𑀲𑁆𑀲𑀸 𑀧𑀢𑁆𑀢𑀁 𑀬𑀸𑀯𑀚𑀻𑀯𑀺𑀓𑀁. 𑀩𑁆𑀭𑀳𑁆𑀫𑀻𑀧𑀢𑁆𑀢𑀜𑁆𑀘 𑀬𑀸𑀯𑀓𑀸𑀮𑀺𑀓𑀦𑁆𑀢𑀺 𑀤𑀻𑀧𑀯𑀸𑀲𑀺𑀦𑁄 𑀯𑀤𑀦𑁆𑀢𑀺. 𑀅𑀫𑁆𑀩𑀧𑀮𑁆𑀮𑀯𑀁 𑀬𑀸𑀯𑀓𑀸𑀮𑀺𑀓𑀁, 𑀅𑀲𑁄𑀓𑀧𑀮𑁆𑀮𑀯𑀁 𑀧𑀦 𑀬𑀸𑀯𑀚𑀻𑀯𑀺𑀓𑀁.
𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺 𑀧𑀸𑀴𑀺𑀬𑀁 𑁋
‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀡𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑀺𑀫𑁆𑀩𑀧𑀡𑁆𑀡𑀁 𑀓𑀼𑀝𑀚𑀧𑀡𑁆𑀡𑀁 𑀧𑀝𑁄𑀮𑀧𑀡𑁆𑀡𑀁 𑀲𑀼𑀮𑀲𑀺𑀧𑀡𑁆𑀡𑀁 𑀓𑀧𑁆𑀧𑀸𑀲𑀓𑀧𑀡𑁆𑀡𑀁 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀧𑀡𑁆𑀡𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺 𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀻’’𑀢𑀺 (𑀫𑀳𑀸𑀯. 𑁨𑁬𑁩) 𑁋
𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀬𑀸𑀯𑀚𑀻𑀯𑀺𑀓𑀸𑀦𑀺. 𑀦 𑀓𑁂𑀯𑀮𑀜𑁆𑀘 𑀧𑀡𑁆𑀡𑀸𑀦𑀺𑀬𑁂𑀯 𑀢𑁂𑀲𑀁 𑀧𑀼𑀧𑁆𑀨𑀨𑀮𑀸𑀤𑀻𑀦𑀺𑀧𑀺 𑀬𑀸𑀯𑀚𑀻𑀯𑀺𑀓𑀸𑀦𑀺. 𑀧𑀡𑁆𑀡𑀸𑀦𑀁 𑀨𑀕𑁆𑀕𑀯𑀧𑀡𑁆𑀡𑀁 𑀅𑀚𑁆𑀚𑀼𑀓𑀧𑀡𑁆𑀡𑀁 𑀨𑀡𑀺𑀚𑁆𑀚𑀓𑀧𑀡𑁆𑀡𑀁 𑀧𑀝𑁄𑀮𑀧𑀡𑁆𑀡𑀁 𑀢𑀫𑁆𑀩𑀽𑀮𑀧𑀡𑁆𑀡𑀁 𑀧𑀤𑀼𑀫𑀺𑀦𑀺𑀧𑀡𑁆𑀡𑀦𑁆𑀢𑀺 𑀏𑀯𑀁 𑀕𑀡𑀦𑀯𑀲𑁂𑀦 𑀅𑀦𑁆𑀢𑁄 𑀦𑀢𑁆𑀣𑀺.
𑀧𑀼𑀧𑁆𑀨𑀔𑀸𑀤𑀦𑀻𑀬𑁂 𑀫𑀽𑀮𑀓𑀧𑀼𑀧𑁆𑀨𑀁 𑀔𑀸𑀭𑀓𑀧𑀼𑀧𑁆𑀨𑀁 𑀘𑀘𑁆𑀘𑀼𑀧𑀼𑀧𑁆𑀨𑀁 𑀢𑀫𑁆𑀩𑀓𑀧𑀼𑀧𑁆𑀨𑀁 𑀯𑀚𑀓𑀮𑀺𑀧𑀼𑀧𑁆𑀨𑀁 𑀚𑀚𑁆𑀛𑀭𑀻𑀧𑀼𑀧𑁆𑀨𑀁 𑀘𑀽𑀴𑀦𑀺𑀧𑁆𑀨𑀸𑀯𑀧𑀼𑀧𑁆𑀨𑀁 𑀫𑀳𑀸𑀦𑀺𑀧𑁆𑀨𑀸𑀯𑀧𑀼𑀧𑁆𑀨𑀁 𑀓𑀲𑁂𑀭𑀼𑀓𑀧𑀼𑀧𑁆𑀨𑀁 𑀦𑀸𑀴𑀺𑀓𑁂𑀭𑀢𑀸𑀮𑀓𑁂𑀢𑀓𑀸𑀦𑀁 𑀢𑀭𑀼𑀡𑀧𑀼𑀧𑁆𑀨𑀸𑀦𑀺 𑀲𑁂𑀢𑀯𑀭𑀡𑀧𑀼𑀧𑁆𑀨𑀁 𑀲𑀺𑀕𑁆𑀕𑀼𑀧𑀼𑀧𑁆𑀨𑀁 𑀉𑀧𑁆𑀧𑀮𑀧𑀤𑀼𑀫𑀚𑀸𑀢𑀺𑀓𑀸𑀦𑀁 𑀧𑀼𑀧𑁆𑀨𑀸𑀦𑀺 𑀓𑀡𑁆𑀡𑀺𑀓𑀫𑀢𑁆𑀢𑀁 𑀅𑀕𑀦𑁆𑀥𑀺𑀓𑀧𑀼𑀧𑁆𑀨𑀁 𑀓𑀴𑀻𑀭𑀧𑀼𑀧𑁆𑀨𑀁 𑀚𑀻𑀯𑀦𑁆𑀢𑀻𑀧𑀼𑀧𑁆𑀨𑀦𑁆𑀢𑀺 𑀏𑀯𑀫𑀸𑀤𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑀧𑀼𑀧𑁆𑀨𑀁 𑀬𑀸𑀯𑀓𑀸𑀮𑀺𑀓𑀁. 𑀅𑀲𑁄𑀓𑀩𑀓𑀼𑀮𑀓𑀼𑀬𑁆𑀬𑀓𑀧𑀼𑀦𑁆𑀦𑀸𑀕𑀘𑀫𑁆𑀧𑀓𑀚𑀸𑀢𑀺𑀓𑀡𑀯𑀻𑀭𑀓𑀡𑀺𑀓𑀸𑀭𑀓𑀼𑀦𑁆𑀤𑀦𑀯𑀫𑀸𑀮𑀺𑀓𑀫𑀮𑁆𑀮𑀺𑀓𑀸𑀤𑀻𑀦𑀁 𑀧𑀦 𑀧𑀼𑀧𑁆𑀨𑀁 𑀬𑀸𑀯𑀚𑀻𑀯𑀺𑀓𑀁 𑀢𑀲𑁆𑀲 𑀕𑀡𑀦𑀸𑀬 𑀅𑀦𑁆𑀢𑁄 𑀦𑀢𑁆𑀣𑀺. 𑀧𑀸𑀴𑀺𑀬𑀁 𑀧𑀦𑀲𑁆𑀲 𑀓𑀲𑀸𑀯𑀪𑁂𑀲𑀚𑁆𑀚𑁂𑀦𑁂𑀯 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.
𑀨𑀮𑀔𑀸𑀤𑀦𑀻𑀬𑁂 𑀧𑀦𑀲𑀮𑀩𑀼𑀚𑀢𑀸𑀮𑀦𑀸𑀴𑀺𑀓𑁂𑀭𑀅𑀫𑁆𑀩𑀚𑀫𑁆𑀩𑀽𑀅𑀫𑁆𑀩𑀸𑀝𑀓𑀢𑀺𑀦𑁆𑀢𑀺𑀡𑀺𑀓𑀫𑀸𑀢𑀼𑀮𑀼𑀗𑁆𑀕𑀓𑀧𑀺𑀢𑁆𑀣𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀧𑀼𑀲𑁆𑀲𑀨𑀮𑀢𑀺𑀫𑁆𑀩𑀭𑀽𑀲𑀓𑀢𑀺𑀧𑀼𑀲𑀯𑀸𑀢𑀺𑀗𑁆𑀕𑀡𑀘𑁄𑀘𑀫𑁄𑀘𑀫𑀥𑀼𑀓𑀸𑀤𑀻𑀦𑀁 𑀨𑀮𑀸𑀦𑀺 𑀬𑀸𑀦𑀺 𑀮𑁄𑀓𑁂 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀬𑀸𑀯𑀓𑀸𑀮𑀺𑀓𑀸𑀦𑀺. 𑀦𑀸𑀫𑀕𑀡𑀦𑀯𑀲𑁂𑀦 𑀦𑁂𑀲𑀁 𑀦 𑀲𑀓𑁆𑀓𑀸 𑀧𑀭𑀺𑀬𑀦𑁆𑀢𑀁 𑀤𑀲𑁆𑀲𑁂𑀢𑀼𑀁. 𑀬𑀸𑀦𑀺 𑀧𑀦 𑀧𑀸𑀴𑀺𑀬𑀁 𑁋
‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀨𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑁋 𑀩𑀺𑀮𑀗𑁆𑀕𑀁, 𑀧𑀺𑀧𑁆𑀨𑀮𑀺𑀁, 𑀫𑀭𑀺𑀘𑀁, 𑀳𑀭𑀻𑀢𑀓𑀁, 𑀯𑀺𑀪𑀻𑀢𑀓𑀁, 𑀆𑀫𑀮𑀓𑀁, 𑀕𑁄𑀝𑁆𑀞𑀨𑀮𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀨𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺 𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀻’’𑀢𑀺 (𑀫𑀳𑀸𑀯. 𑁨𑁬𑁩) 𑁋
𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀬𑀸𑀯𑀚𑀻𑀯𑀺𑀓𑀸𑀦𑀺. 𑀢𑁂𑀲𑀫𑁆𑀧𑀺 𑀅𑀧𑀭𑀺𑀧𑀓𑁆𑀓𑀸𑀦𑀺 𑀅𑀘𑁆𑀙𑀺𑀯 𑀩𑀺𑀫𑁆𑀩𑀯𑀭𑀡𑀓𑁂𑀢𑀓𑀓𑀸𑀲𑁆𑀫𑀭𑀻𑀆𑀤𑀻𑀦𑀁 𑀨𑀮𑀸𑀦𑀺 𑀚𑀸𑀢𑀺𑀨𑀮𑀁 𑀓𑀝𑀼𑀓𑀨𑀮𑀁 𑀏𑀴𑀸 𑀢𑀓𑁆𑀓𑁄𑀮𑀦𑁆𑀢𑀺 𑀏𑀯𑀁 𑀦𑀸𑀫𑀯𑀲𑁂𑀦 𑀦 𑀲𑀓𑁆𑀓𑀸 𑀧𑀭𑀺𑀬𑀦𑁆𑀢𑀁 𑀤𑀲𑁆𑀲𑁂𑀢𑀼𑀁.
𑀅𑀝𑁆𑀞𑀺𑀔𑀸𑀤𑀦𑀻𑀬𑁂 𑀮𑀩𑀼𑀚𑀝𑁆𑀞𑀺 𑀧𑀦𑀲𑀝𑁆𑀞𑀺 𑀅𑀫𑁆𑀩𑀸𑀝𑀓𑀝𑁆𑀞𑀺 𑀲𑀸𑀮𑀝𑁆𑀞𑀺 𑀔𑀚𑁆𑀚𑀽𑀭𑀻𑀓𑁂𑀢𑀓𑀢𑀺𑀫𑁆𑀩𑀭𑀽𑀲𑀓𑀸𑀦𑀁 𑀢𑀭𑀼𑀡𑀨𑀮𑀝𑁆𑀞𑀺 𑀢𑀺𑀦𑁆𑀢𑀺𑀡𑀺𑀓𑀝𑁆𑀞𑀺 𑀩𑀺𑀫𑁆𑀩𑀨𑀮𑀝𑁆𑀞𑀺 𑀉𑀧𑁆𑀧𑀮 𑀧𑀤𑀼𑀫𑀚𑀸𑀢𑀻𑀦𑀁 𑀧𑁄𑀓𑁆𑀔𑀭𑀝𑁆𑀞𑀻𑀢𑀺 𑀏𑀯𑀫𑀸𑀤𑀻𑀦𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀫𑀦𑀼𑀲𑁆𑀲𑀸𑀦𑀁 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑀸𑀦𑀺 𑀅𑀝𑁆𑀞𑀻𑀦𑀺 𑀬𑀸𑀯𑀓𑀸𑀮𑀺𑀓𑀸𑀦𑀺. 𑀫𑀥𑀼𑀓𑀝𑁆𑀞𑀺 𑀧𑀼𑀦𑁆𑀦𑀸𑀕𑀝𑁆𑀞𑀺 𑀳𑀭𑀻𑀢𑀓𑀸𑀤𑀻𑀦𑀁 𑀅𑀝𑁆𑀞𑀻𑀦𑀺 𑀲𑀺𑀤𑁆𑀥𑀢𑁆𑀣𑀓𑀝𑁆𑀞𑀺 𑀭𑀸𑀚𑀺𑀓𑀝𑁆𑀞𑀻𑀢𑀺 𑀏𑀯𑀫𑀸𑀤𑀻𑀦𑀺 𑀅𑀝𑁆𑀞𑀻𑀦𑀺 𑀬𑀸𑀯𑀚𑀻𑀯𑀺𑀓𑀸𑀦𑀺. 𑀢𑁂𑀲𑀁 𑀧𑀸𑀴𑀺𑀬𑀁 𑀨𑀮𑀪𑁂𑀲𑀚𑁆𑀚𑁂𑀦𑁂𑀯 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.
𑀧𑀺𑀝𑁆𑀞𑀔𑀸𑀤𑀦𑀻𑀬𑁂 𑀲𑀢𑁆𑀢𑀦𑁆𑀦𑀁 𑀢𑀸𑀯 𑀥𑀜𑁆𑀜𑀸𑀦𑀁 𑀥𑀜𑁆𑀜𑀸𑀦𑀼𑀮𑁄𑀫𑀸𑀦𑀁 𑀅𑀧𑀭𑀡𑁆𑀡𑀸𑀦𑀜𑁆𑀘 𑀧𑀺𑀝𑁆𑀞𑀁 𑀧𑀦𑀲𑀧𑀺𑀝𑁆𑀞𑀁 𑀮𑀩𑀼𑀚𑀧𑀺𑀝𑁆𑀞𑀁 𑀅𑀫𑁆𑀩𑀸𑀝𑀓𑀧𑀺𑀝𑁆𑀞𑀁 𑀲𑀸𑀮𑀧𑀺𑀝𑁆𑀞𑀁 𑀥𑁄𑀢𑀓𑀢𑀸𑀮𑀧𑀺𑀝𑁆𑀞𑀜𑁆𑀘 𑀔𑀻𑀭𑀯𑀮𑁆𑀮𑀺𑀧𑀺𑀝𑁆𑀞𑀜𑁆𑀘𑀸𑀢𑀺 𑀏𑀯𑀫𑀸𑀤𑀻𑀦𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑀸𑀦𑀺 𑀧𑀺𑀝𑁆𑀞𑀸𑀦𑀺 𑀬𑀸𑀯𑀓𑀸𑀮𑀺𑀓𑀸𑀦𑀺. 𑀅𑀥𑁄𑀢𑀓𑀁 𑀢𑀸𑀮𑀧𑀺𑀝𑁆𑀞𑀁 𑀔𑀻𑀭𑀯𑀮𑁆𑀮𑀺𑀧𑀺𑀝𑁆𑀞𑀁 𑀅𑀲𑁆𑀲𑀕𑀦𑁆𑀥𑀸𑀤𑀺𑀧𑀺𑀝𑁆𑀞𑀸𑀦𑀺 𑀘 𑀬𑀸𑀯𑀚𑀻𑀯𑀺𑀓𑀸𑀦𑀺. 𑀢𑁂𑀲𑀁 𑀧𑀸𑀴𑀺𑀬𑀁 𑀓𑀲𑀸𑀯𑁂𑀳𑀺 𑀘 𑀫𑀽𑀮𑀨𑀮𑁂𑀳𑀺 𑀘 𑀲𑀗𑁆𑀖𑀳𑁄 𑀯𑁂𑀤𑀺𑀢𑀩𑁆𑀩𑁄.
𑀦𑀺𑀬𑁆𑀬𑀸𑀲𑀔𑀸𑀤𑀦𑀻𑀬𑁂 𑀏𑀓𑁄 𑀉𑀘𑁆𑀙𑀼𑀦𑀺𑀬𑁆𑀬𑀸𑀲𑁄𑀯 𑀲𑀢𑁆𑀢𑀸𑀳𑀓𑀸𑀮𑀺𑀓𑁄. 𑀲𑁂𑀲𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀚𑀢𑀽𑀦𑀺 𑀪𑁂𑀲𑀚𑁆𑀚𑀸𑀦𑀺 𑁋 𑀳𑀺𑀗𑁆𑀕𑀼𑀁 𑀳𑀺𑀗𑁆𑀕𑀼𑀚𑀢𑀼𑀁 𑀳𑀺𑀗𑁆𑀕𑀼𑀲𑀺𑀧𑀸𑀝𑀺𑀓𑀁 𑀢𑀓𑀁 𑀢𑀓𑀧𑀢𑁆𑀢𑀺𑀁 𑀢𑀓𑀧𑀡𑁆𑀡𑀺𑀁 𑀲𑀚𑁆𑀚𑀼𑀮𑀲𑀁 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀚𑀢𑀽𑀦𑀺 𑀪𑁂𑀲𑀚𑁆𑀚𑀸𑀦𑀻’’𑀢𑀺 (𑀫𑀳𑀸𑀯. 𑁨𑁬𑁩) 𑀏𑀯𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑀺𑀬𑁆𑀬𑀸𑀲𑀸 𑀬𑀸𑀯𑀚𑀻𑀯𑀺𑀓𑀸. 𑀢𑀢𑁆𑀣 𑀬𑁂𑀯𑀸𑀧𑀦𑀓𑀯𑀲𑁂𑀦 𑀲𑀗𑁆𑀕𑀳𑀺𑀢𑀸𑀦𑀁 𑀅𑀫𑁆𑀩𑀦𑀺𑀬𑁆𑀬𑀸𑀲𑁄 𑀓𑀡𑀺𑀓𑀸𑀭𑀦𑀺𑀬𑁆𑀬𑀸𑀲𑁄𑀢𑀺 𑀏𑀯𑀁 𑀦𑀸𑀫𑀯𑀲𑁂𑀦 𑀦 𑀲𑀓𑁆𑀓𑀸 𑀧𑀭𑀺𑀬𑀦𑁆𑀢𑀁 𑀤𑀲𑁆𑀲𑁂𑀢𑀼𑀁. 𑀏𑀯𑀁 𑀇𑀫𑁂𑀲𑀼 𑀫𑀽𑀮𑀔𑀸𑀤𑀦𑀻𑀬𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀬𑀸𑀯𑀓𑀸𑀮𑀺𑀓𑀁, 𑀲𑀩𑁆𑀩𑀫𑁆𑀧𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀅𑀯𑀲𑁂𑀲𑀁 𑀔𑀸𑀤𑀦𑀻𑀬𑀁 𑀦𑀸𑀫𑀸’’𑀢𑀺 𑀲𑀗𑁆𑀕𑀳𑀺𑀢𑀁.
𑀪𑁄𑀚𑀦𑀻𑀬𑀁 𑀦𑀸𑀫 𑀧𑀜𑁆𑀘 𑀪𑁄𑀚𑀦𑀸𑀦𑀻𑀢𑀺𑀆𑀤𑀺𑀫𑁆𑀳𑀺 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀁 𑀯𑀼𑀢𑁆𑀢𑀫𑁂𑀯. 𑀔𑀸𑀤𑀺𑀲𑁆𑀲𑀸𑀫𑀺 𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺, 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀬𑁄 𑀪𑀺𑀓𑁆𑀔𑀼 𑀯𑀺𑀓𑀸𑀮𑁂 𑀏𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀜𑁆𑀘 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑁂 𑀢𑀸𑀯 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.
𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀢𑁄 𑀘 𑀓𑀸𑀬𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.
𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀲𑀢𑁆𑀢𑀫𑀁.
𑁮. 𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸
𑁨𑁫𑁨. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀩𑁂𑀮𑀝𑁆𑀞𑀲𑀻𑀲𑁄 𑀦𑀸𑀫 𑀚𑀝𑀺𑀮𑀲𑀳𑀲𑁆𑀲𑀩𑁆𑀪𑀦𑁆𑀢𑀭𑁄 𑀫𑀳𑀸𑀣𑁂𑀭𑁄. 𑀅𑀭𑀜𑁆𑀜𑁂 𑀯𑀺𑀳𑀭𑀢𑀻𑀢𑀺 𑀚𑁂𑀢𑀯𑀦𑀲𑁆𑀲 𑀅𑀯𑀺𑀤𑀽𑀭𑁂 𑀧𑀥𑀸𑀦𑀖𑀭𑁂 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑀢𑀺. 𑀲𑀼𑀓𑁆𑀔𑀓𑀼𑀭𑀦𑁆𑀢𑀺 𑀅𑀲𑀽𑀧𑀩𑁆𑀬𑀜𑁆𑀚𑀦𑀁 𑀑𑀤𑀦𑀁. 𑀲𑁄 𑀓𑀺𑀭 𑀅𑀦𑁆𑀢𑁄𑀕𑀸𑀫𑁂 𑀪𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀢𑀸𑀤𑀺𑀲𑀁 𑀑𑀤𑀦𑀁 𑀆𑀳𑀭𑀢𑀺, 𑀢𑀜𑁆𑀘 𑀔𑁄 𑀅𑀧𑁆𑀧𑀺𑀘𑁆𑀙𑀢𑀸𑀬, 𑀦 𑀧𑀘𑁆𑀘𑀬𑀕𑀺𑀤𑁆𑀥𑀢𑀸𑀬. 𑀣𑁂𑀭𑁄 𑀓𑀺𑀭 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀢𑀢𑁄 𑀧𑀼𑀦 𑀲𑀢𑁆𑀢𑀸𑀳𑀁 𑀲𑀫𑀸𑀧𑀢𑁆𑀢𑀺𑀬𑀸 𑀦𑀺𑀲𑀻𑀤𑀢𑀺. 𑀏𑀯𑀁 𑀤𑁆𑀯𑁂𑀧𑀺 𑀢𑀻𑀡𑀺𑀧𑀺 𑀘𑀢𑁆𑀢𑀸𑀭𑀺𑀧𑀺 𑀲𑀢𑁆𑀢𑀸𑀳𑀸𑀦𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀘𑀺𑀭𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀻’’𑀢𑀺.
𑁨𑁫𑁩. 𑀓𑀸𑀭𑁄 𑀓𑀭𑀡𑀁 𑀓𑀺𑀭𑀺𑀬𑀸𑀢𑀺 𑀅𑀢𑁆𑀣𑀢𑁄 𑀏𑀓𑀁, 𑀲𑀦𑁆𑀦𑀺𑀥𑀺𑀓𑀸𑀭𑁄 𑀅𑀲𑁆𑀲𑀸𑀢𑀺 𑀲𑀦𑁆𑀦𑀺𑀥𑀺𑀓𑀸𑀭𑀁; 𑀲𑀦𑁆𑀦𑀺𑀥𑀺𑀓𑀸𑀭𑀫𑁂𑀯 𑀲𑀦𑁆𑀦𑀺𑀥𑀺𑀓𑀸𑀭𑀓𑀁. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀭𑀢𑁆𑀢𑀁 𑀯𑀻𑀢𑀺𑀦𑀸𑀫𑀺𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀁 𑁋 ‘‘𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀦𑀸𑀫 𑀅𑀚𑁆𑀚 𑀧𑀝𑀺𑀕𑁆𑀕𑀳𑀺𑀢𑀁 𑀅𑀧𑀭𑀚𑁆𑀚𑀽’’𑀢𑀺.
𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀯𑀁 𑀲𑀦𑁆𑀦𑀺𑀥𑀺𑀓𑀢𑀁 𑀬𑀁𑀓𑀺𑀜𑁆𑀘𑀺 𑀬𑀸𑀯𑀓𑀸𑀮𑀺𑀓𑀁 𑀯𑀸 𑀬𑀸𑀫𑀓𑀸𑀮𑀺𑀓𑀁 𑀯𑀸 𑀅𑀚𑁆𑀛𑁄𑀳𑀭𑀺𑀢𑀼𑀓𑀸𑀫𑀢𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑁂 𑀢𑀸𑀯 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀚𑁆𑀛𑁄𑀳𑀭𑀢𑁄 𑀧𑀦 𑀏𑀓𑀫𑁂𑀓𑀲𑁆𑀫𑀺𑀁 𑀅𑀚𑁆𑀛𑁄𑀳𑀸𑀭𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂𑀧𑀺 𑀧𑀢𑁆𑀢𑁄 𑀤𑀼𑀤𑁆𑀥𑁄𑀢𑁄 𑀳𑁄𑀢𑀺, 𑀬𑀁 𑀅𑀗𑁆𑀕𑀼𑀮𑀺𑀬𑀸 𑀖𑀁𑀲𑀦𑁆𑀢𑀲𑁆𑀲 𑀮𑁂𑀔𑀸 𑀧𑀜𑁆𑀜𑀸𑀬𑀢𑀺, 𑀕𑀡𑁆𑀞𑀺𑀓𑀧𑀢𑁆𑀢𑀲𑁆𑀲 𑀯𑀸 𑀕𑀡𑁆𑀞𑀺𑀓𑀦𑁆𑀢𑀭𑁂 𑀲𑁆𑀦𑁂𑀳𑁄 𑀧𑀯𑀺𑀝𑁆𑀞𑁄 𑀳𑁄𑀢𑀺, 𑀲𑁄 𑀉𑀡𑁆𑀳𑁂 𑀑𑀢𑀸𑀧𑁂𑀦𑁆𑀢𑀲𑁆𑀲 𑀧𑀕𑁆𑀖𑀭𑀢𑀺, 𑀉𑀡𑁆𑀳𑀬𑀸𑀕𑀼𑀬𑀸 𑀯𑀸 𑀕𑀳𑀺𑀢𑀸𑀬 𑀲𑀦𑁆𑀤𑀺𑀲𑁆𑀲𑀢𑀺, 𑀢𑀸𑀤𑀺𑀲𑁂 𑀧𑀢𑁆𑀢𑁂𑀧𑀺 𑀧𑀼𑀦𑀤𑀺𑀯𑀲𑁂 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀲𑁆𑀫𑀸 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀧𑀼𑀦 𑀢𑀢𑁆𑀣 𑀅𑀘𑁆𑀙𑁄𑀤𑀓𑀁 𑀯𑀸 𑀆𑀲𑀺𑀜𑁆𑀘𑀺𑀢𑁆𑀯𑀸 𑀅𑀗𑁆𑀕𑀼𑀮𑀺𑀬𑀸 𑀯𑀸 𑀖𑀁𑀲𑀺𑀢𑁆𑀯𑀸 𑀦𑀺𑀲𑁆𑀦𑁂𑀳𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄. 𑀲𑀘𑁂 𑀳𑀺 𑀉𑀤𑀓𑁂 𑀯𑀸 𑀲𑁆𑀦𑁂𑀳𑀪𑀸𑀯𑁄 𑀧𑀢𑁆𑀢𑁂 𑀯𑀸 𑀅𑀗𑁆𑀕𑀼𑀮𑀺𑀮𑁂𑀔𑀸 𑀧𑀜𑁆𑀜𑀸𑀬𑀢𑀺, 𑀤𑀼𑀤𑁆𑀥𑁄𑀢𑁄 𑀳𑁄𑀢𑀺. 𑀢𑁂𑀮𑀯𑀡𑁆𑀡𑀧𑀢𑁆𑀢𑁂 𑀧𑀦 𑀅𑀗𑁆𑀕𑀼𑀮𑀺𑀮𑁂𑀔𑀸 𑀧𑀜𑁆𑀜𑀸𑀬𑀢𑀺, 𑀲𑀸 𑀅𑀩𑁆𑀩𑁄𑀳𑀸𑀭𑀺𑀓𑀸. 𑀬𑀁 𑀪𑀺𑀓𑁆𑀔𑀽 𑀦𑀺𑀭𑀧𑁂𑀓𑁆𑀔𑀸 𑀲𑀸𑀫𑀡𑁂𑀭𑀸𑀦𑀁 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀢𑀜𑁆𑀘𑁂 𑀲𑀸𑀫𑀡𑁂𑀭𑀸 𑀦𑀺𑀤𑀳𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀲𑀩𑁆𑀩𑀁 𑀯𑀝𑁆𑀝𑀢𑀺. 𑀲𑀬𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀧𑀭𑀺𑀘𑁆𑀘𑀢𑁆𑀢𑀫𑁂𑀯 𑀳𑀺 𑀤𑀼𑀢𑀺𑀬𑀤𑀺𑀯𑀲𑁂 𑀦 𑀯𑀝𑁆𑀝𑀢𑀺. 𑀢𑀢𑁄 𑀳𑀺 𑀏𑀓𑀲𑀺𑀢𑁆𑀣𑀫𑁆𑀧𑀺 𑀅𑀚𑁆𑀛𑁄𑀳𑀭𑀢𑁄 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.
𑀅𑀓𑀧𑁆𑀧𑀺𑀬𑀫𑀁𑀲𑁂𑀲𑀼 𑀫𑀦𑀼𑀲𑁆𑀲𑀫𑀁𑀲𑁂 𑀣𑀼𑀮𑁆𑀮𑀘𑁆𑀘𑀬𑁂𑀦 𑀲𑀤𑁆𑀯𑀺𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀯𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁. 𑀬𑀸𑀫𑀓𑀸𑀮𑀺𑀓𑀁 𑀲𑀢𑀺 𑀧𑀘𑁆𑀘𑀬𑁂 𑀅𑀚𑁆𑀛𑁄𑀳𑀭𑀢𑁄 𑀧𑀸𑀘𑀺𑀢𑁆𑀢𑀺𑀬𑀁. 𑀆𑀳𑀸𑀭𑀢𑁆𑀣𑀸𑀬 𑀅𑀚𑁆𑀛𑁄𑀳𑀭𑀢𑁄 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀧𑀯𑀸𑀭𑀺𑀢𑁄 𑀳𑀼𑀢𑁆𑀯𑀸 𑀅𑀦𑀢𑀺𑀭𑀺𑀢𑁆𑀢𑀓𑀢𑀁 𑀅𑀚𑁆𑀛𑁄𑀳𑀭𑀢𑀺, 𑀧𑀓𑀢𑀺𑀆𑀫𑀺𑀲𑁂 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀫𑀦𑀼𑀲𑁆𑀲𑀫𑀁𑀲𑁂 𑀣𑀼𑀮𑁆𑀮𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀤𑁆𑀯𑁂, 𑀲𑁂𑀲𑀅𑀓𑀧𑁆𑀧𑀺𑀬𑀫𑀁𑀲𑁂 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁, 𑀬𑀸𑀫𑀓𑀸𑀮𑀺𑀓𑀁 𑀲𑀢𑀺 𑀧𑀘𑁆𑀘𑀬𑁂 𑀲𑀸𑀫𑀺𑀲𑁂𑀦 𑀫𑀼𑀔𑁂𑀦 𑀅𑀚𑁆𑀛𑁄𑀳𑀭𑀢𑁄 𑀤𑁆𑀯𑁂, 𑀦𑀺𑀭𑀸𑀫𑀺𑀲𑁂𑀦 𑀏𑀓𑀫𑁂𑀯. 𑀆𑀳𑀸𑀭𑀢𑁆𑀣𑀸𑀬 𑀅𑀚𑁆𑀛𑁄𑀳𑀭𑀢𑁄 𑀯𑀺𑀓𑀧𑁆𑀧𑀤𑁆𑀯𑀬𑁂𑀧𑀺 𑀤𑀼𑀓𑁆𑀓𑀝𑀁 𑀯𑀟𑁆𑀠𑀢𑀺. 𑀲𑀘𑁂 𑀯𑀺𑀓𑀸𑀮𑁂 𑀅𑀚𑁆𑀛𑁄𑀳𑀭𑀢𑀺, 𑀧𑀓𑀢𑀺𑀪𑁄𑀚𑀦𑁂 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀘 𑀯𑀺𑀓𑀸𑀮𑀪𑁄𑀚𑀦𑀧𑀘𑁆𑀘𑀬𑀸 𑀘 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀅𑀓𑀧𑁆𑀧𑀺𑀬𑀫𑀁𑀲𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀤𑀼𑀓𑁆𑀓𑀝𑀜𑁆𑀘 𑀯𑀟𑁆𑀠𑀢𑀺. 𑀬𑀸𑀫𑀓𑀸𑀮𑀺𑀓𑁂𑀲𑀼 𑀯𑀺𑀓𑀸𑀮𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀺, 𑀅𑀦𑀢𑀺𑀭𑀺𑀢𑁆𑀢𑀧𑀘𑁆𑀘𑀬𑀸 𑀧𑀦 𑀯𑀺𑀓𑀸𑀮𑁂 𑀲𑀩𑁆𑀩𑀯𑀺𑀓𑀧𑁆𑀧𑁂𑀲𑀼 𑀅𑀦𑀸𑀧𑀢𑁆𑀢𑀺.
𑁨𑁫𑁫. 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀁 𑀆𑀳𑀸𑀭𑀢𑁆𑀣𑀸𑀬𑀸𑀢𑀺 𑀆𑀳𑀸𑀭𑀢𑁆𑀣𑀸𑀬 𑀧𑀝𑀺𑀕𑁆𑀕𑀡𑁆𑀳𑀢𑁄 𑀧𑀝𑀺𑀕𑁆𑀕𑀳𑀡𑀧𑀘𑁆𑀘𑀬𑀸 𑀢𑀸𑀯 𑀤𑀼𑀓𑁆𑀓𑀝𑀁, 𑀅𑀚𑁆𑀛𑁄𑀳𑀭𑀢𑁄 𑀧𑀦 𑀲𑀘𑁂 𑀦𑀺𑀭𑀸𑀫𑀺𑀲𑀁 𑀳𑁄𑀢𑀺, 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀤𑀼𑀓𑁆𑀓𑀝𑀁. 𑀅𑀣 𑀆𑀫𑀺𑀲𑀲𑀁𑀲𑀝𑁆𑀞𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀁 𑀳𑁄𑀢𑀺, 𑀬𑀣𑀸𑀯𑀢𑁆𑀣𑀼𑀓𑀁 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.
𑁨𑁫𑁬. 𑀅𑀦𑀸𑀧𑀢𑁆𑀢𑀺 𑀬𑀸𑀯𑀓𑀸𑀮𑀺𑀓𑀦𑁆𑀢𑀺𑀆𑀤𑀺𑀫𑁆𑀳𑀺 𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀬𑀸𑀯 𑀫𑀚𑁆𑀛𑀦𑁆𑀢𑀺𑀓𑀲𑀗𑁆𑀔𑀸𑀢𑁄 𑀓𑀸𑀮𑁄, 𑀢𑀸𑀯 𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀬𑀸𑀯𑀓𑀸𑀮𑀺𑀓𑀁. 𑀲𑀤𑁆𑀥𑀺𑀁 𑀅𑀦𑀼𑀮𑁄𑀫𑀧𑀸𑀦𑁂𑀳𑀺 𑀅𑀝𑁆𑀞𑀯𑀺𑀥𑀁 𑀧𑀸𑀦𑀁 𑀬𑀸𑀯 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑀬𑀸𑀫𑀲𑀗𑁆𑀔𑀸𑀢𑁄 𑀬𑀸𑀫𑁄, 𑀢𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀬𑀸𑀫𑁄 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀬𑀸𑀫𑀓𑀸𑀮𑀺𑀓𑀁. 𑀲𑀧𑁆𑀧𑀺𑀆𑀤𑀺 𑀧𑀜𑁆𑀘𑀯𑀺𑀥𑀁 𑀪𑁂𑀲𑀚𑁆𑀚𑀁 𑀲𑀢𑁆𑀢𑀸𑀳𑀁 𑀦𑀺𑀥𑁂𑀢𑀩𑁆𑀩𑀢𑁄 𑀲𑀢𑁆𑀢𑀸𑀳𑁄 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀁. 𑀞𑀧𑁂𑀢𑁆𑀯𑀸 𑀉𑀤𑀓𑀁 𑀅𑀯𑀲𑁂𑀲𑀁 𑀲𑀩𑁆𑀩𑀫𑁆𑀧𑀺 𑀬𑀸𑀯𑀚𑀻𑀯𑀁 𑀧𑀭𑀺𑀳𑀭𑀺𑀢𑁆𑀯𑀸 𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀬𑀸𑀯𑀚𑀻𑀯𑀓𑀦𑁆𑀢𑀺 𑀯𑀼𑀘𑁆𑀘𑀢𑀺.
𑀢𑀢𑁆𑀣 𑀅𑀭𑀼𑀡𑁄𑀤𑀬𑁂𑀯 𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀯𑀓𑀸𑀮𑀺𑀓𑀁 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀦𑀺𑀤𑀳𑀺𑀢𑁆𑀯𑀸 𑀬𑀸𑀯𑀓𑀸𑀮𑁄 𑀦𑀸𑀢𑀺𑀓𑁆𑀓𑀫𑀢𑀺 𑀢𑀸𑀯, 𑀬𑀸𑀫𑀓𑀸𑀮𑀺𑀓𑀁 𑀏𑀓𑀁 𑀅𑀳𑁄𑀭𑀢𑁆𑀢𑀁, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀲𑀢𑁆𑀢𑀭𑀢𑁆𑀢𑀁, 𑀇𑀢𑀭𑀁 𑀲𑀢𑀺 𑀧𑀘𑁆𑀘𑀬𑁂, 𑀬𑀸𑀯𑀚𑀻𑀯𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀸𑀦𑀓𑀣𑀸 𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑀓𑀣𑀸 ‘‘𑀓𑀧𑁆𑀧𑀢𑀺 𑀦𑀼 𑀔𑁄 𑀬𑀸𑀯𑀓𑀸𑀮𑀺𑀓𑁂𑀦 𑀬𑀸𑀫𑀓𑀸𑀮𑀺𑀓’’𑀦𑁆𑀢𑀺𑀆𑀤𑀺𑀓𑀣𑀸 𑀘 𑀓𑀧𑁆𑀧𑀺𑀬𑀪𑀽𑀫𑀺𑀓𑀣𑀸 𑀘 𑀯𑀺𑀢𑁆𑀣𑀸𑀭𑀺𑀢𑀸, 𑀢𑀁 𑀫𑀬𑀁 𑀆𑀕𑀢𑀝𑁆𑀞𑀸𑀦𑁂𑀬𑁂𑀯 𑀓𑀣𑀬𑀺𑀲𑁆𑀲𑀸𑀫.
𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀢𑁄 𑀘 𑀓𑀸𑀬𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.
𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀁 𑀅𑀝𑁆𑀞𑀫𑀁.
𑁯. 𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸
𑁨𑁫𑁭. 𑀦𑀯𑀫𑀲𑀺𑀓𑁆𑀔𑀸𑀧𑀤𑁂 𑁋 𑀧𑀡𑀻𑀢𑀪𑁄𑀚𑀦𑀸𑀦𑀻𑀢𑀺 𑀉𑀢𑁆𑀢𑀫𑀪𑁄𑀚𑀦𑀸𑀦𑀺. 𑀓𑀲𑁆𑀲 𑀲𑀫𑁆𑀧𑀦𑁆𑀦𑀁 𑀦 𑀫𑀦𑀸𑀧𑀦𑁆𑀢𑀺 𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀁 𑀓𑀲𑁆𑀲 𑀦 𑀧𑀺𑀬𑀁. 𑀲𑀸𑀤𑀼𑀦𑁆𑀢𑀺 𑀲𑀼𑀭𑀲𑀁.
𑁨𑁫𑁯. 𑀬𑁄 𑀧𑀦 𑀪𑀺𑀓𑁆𑀔𑀼 𑀏𑀯𑀭𑀽𑀧𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬𑀸𑀢𑀺 𑀏𑀢𑁆𑀣 𑀲𑀼𑀤𑁆𑀥𑀸𑀦𑀺 𑀲𑀧𑁆𑀧𑀺𑀆𑀤𑀻𑀦𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀧𑀸𑀘𑀺𑀢𑁆𑀢𑀺𑀬𑀁 𑀦𑀸𑀧𑀚𑁆𑀚𑀢𑀺, 𑀲𑁂𑀔𑀺𑀬𑁂𑀲𑀼 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺, 𑀑𑀤𑀦𑀲𑀁𑀲𑀝𑁆𑀞𑀸𑀦𑀺 𑀧𑀦 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀅𑀬𑀁 𑀓𑀺𑀭𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯 𑀘 ‘‘𑀧𑀡𑀻𑀢𑀸𑀦𑀻’’𑀢𑀺 𑀅𑀯𑀢𑁆𑀯𑀸 ‘‘𑀧𑀡𑀻𑀢𑀪𑁄𑀚𑀦𑀸𑀦𑀻’’𑀢𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑀁. ‘‘𑀧𑀡𑀻𑀢𑀸𑀦𑀻’’𑀢𑀺 𑀳𑀺 𑀯𑀼𑀢𑁆𑀢𑁂 𑀲𑀧𑁆𑀧𑀺𑀆𑀤𑀻𑀦𑀁𑀬𑁂𑀯 𑀕𑀳𑀡𑀁 𑀳𑁄𑀢𑀺, ‘‘𑀧𑀡𑀻𑀢𑀪𑁄𑀚𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀡𑀻𑀢𑀲𑀁𑀲𑀝𑁆𑀞𑀸𑀦𑀺 𑀲𑀢𑁆𑀢𑀥𑀜𑁆𑀜𑀦𑀺𑀩𑁆𑀩𑀢𑁆𑀢𑀸𑀦𑀺 𑀪𑁄𑀚𑀦𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀻𑀢𑀺 𑀅𑀬𑀫𑀢𑁆𑀣𑁄 𑀧𑀜𑁆𑀜𑀸𑀬𑀢𑀺.
𑀇𑀤𑀸𑀦𑀺 𑀯𑀺𑀜𑁆𑀜𑀸𑀧𑁂𑀢𑀺 𑀧𑀬𑁄𑀕𑁂 𑀤𑀼𑀓𑁆𑀓𑀝𑀦𑁆𑀢𑀺𑀆𑀤𑀻𑀲𑀼 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 ‘‘𑀲𑀧𑁆𑀧𑀺𑀦𑀸 𑀪𑀢𑁆𑀢𑀁 𑀤𑁂𑀳𑀺, 𑀲𑀧𑁆𑀧𑀺𑀁 𑀆𑀓𑀺𑀭𑀺𑀢𑁆𑀯𑀸 𑀤𑁂𑀳𑀺, 𑀲𑀧𑁆𑀧𑀺𑀫𑀺𑀲𑁆𑀲𑀓𑀁 𑀓𑀢𑁆𑀯𑀸 𑀤𑁂𑀳𑀺, 𑀲𑀳𑀲𑀧𑁆𑀧𑀺𑀦𑀸 𑀤𑁂𑀳𑀺, 𑀲𑀧𑁆𑀧𑀺𑀜𑁆𑀘 𑀪𑀢𑁆𑀢𑀜𑁆𑀘 𑀤𑁂𑀳𑀻’’𑀢𑀺 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀧𑀝𑀺𑀕𑁆𑀕𑀳𑀡𑁂 𑀤𑀼𑀓𑁆𑀓𑀝𑀁, 𑀅𑀚𑁆𑀛𑁄𑀳𑀸𑀭𑁂 𑀧𑀸𑀘𑀺𑀢𑁆𑀢𑀺𑀬𑀁. ‘‘𑀲𑀧𑁆𑀧𑀺𑀪𑀢𑁆𑀢𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀬𑀲𑁆𑀫𑀸 𑀲𑀸𑀮𑀺𑀪𑀢𑁆𑀢𑀁 𑀯𑀺𑀬 𑀲𑀧𑁆𑀧𑀺𑀪𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺; 𑀢𑀲𑁆𑀫𑀸 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝𑀫𑁂𑀯 𑀯𑁂𑀤𑀺𑀢𑀩𑁆𑀩𑀁.
𑀲𑀘𑁂 𑀧𑀦 ‘‘𑀲𑀧𑁆𑀧𑀺𑀦𑀸 𑀪𑀢𑁆𑀢𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀪𑀢𑁆𑀢𑀁 𑀤𑀢𑁆𑀯𑀸 ‘‘𑀲𑀧𑁆𑀧𑀺𑀁 𑀓𑀢𑁆𑀯𑀸 𑀪𑀼𑀜𑁆𑀚𑀸’’𑀢𑀺 𑀦𑀯𑀦𑀻𑀢𑀁 𑀯𑀸 𑀔𑀻𑀭𑀁 𑀯𑀸 𑀤𑀥𑀺𑀁 𑀯𑀸 𑀤𑁂𑀢𑀺, 𑀫𑀽𑀮𑀁 𑀯𑀸 𑀧𑀦 𑀤𑁂𑀢𑀺, ‘‘𑀇𑀫𑀺𑀦𑀸 𑀲𑀧𑁆𑀧𑀺𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀸’’𑀢𑀺 𑀬𑀣𑀸𑀯𑀢𑁆𑀣𑀼𑀓𑀫𑁂𑀯. ‘‘𑀕𑁄𑀲𑀧𑁆𑀧𑀺𑀦𑀸 𑀪𑀢𑁆𑀢𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀕𑁄𑀲𑀧𑁆𑀧𑀺𑀦𑀸 𑀯𑀸 𑀤𑁂𑀢𑀼, 𑀕𑁄𑀲𑀧𑁆𑀧𑀺𑀫𑁆𑀳𑀺 𑀅𑀲𑀢𑀺, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀕𑁄𑀦𑀯𑀦𑀻𑀢𑀸𑀤𑀻𑀦𑀺 𑀯𑀸 𑀕𑀸𑀯𑀺𑀁𑀬𑁂𑀯 𑀯𑀸 𑀤𑁂𑀢𑀼 ‘‘𑀇𑀢𑁄 𑀲𑀧𑁆𑀧𑀺𑀦𑀸 𑀪𑀼𑀜𑁆𑀚𑀸’’𑀢𑀺 𑀬𑀣𑀸𑀯𑀢𑁆𑀣𑀼𑀓𑀫𑁂𑀯. 𑀲𑀘𑁂 𑀧𑀦 𑀕𑁄𑀲𑀧𑁆𑀧𑀺𑀦𑀸 𑀬𑀸𑀘𑀺𑀢𑁄 𑀅𑀚𑀺𑀬𑀸 𑀲𑀧𑁆𑀧𑀺𑀆𑀤𑀻𑀳𑀺 𑀤𑁂𑀢𑀺, 𑀯𑀺𑀲𑀗𑁆𑀓𑁂𑀢𑀁. 𑀏𑀯𑀜𑁆𑀳𑀺 𑀲𑀢𑀺 𑀅𑀜𑁆𑀜𑀁 𑀬𑀸𑀘𑀺𑀢𑁂𑀦 𑀅𑀜𑁆𑀜𑀁 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀺. 𑀏𑀲 𑀦𑀬𑁄 𑀅𑀚𑀺𑀬𑀸 𑀲𑀧𑁆𑀧𑀺𑀦𑀸 𑀤𑁂𑀳𑀻𑀢𑀺 𑀆𑀤𑀻𑀲𑀼𑀧𑀺.
‘‘𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀅𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸 𑀤𑁂𑀢𑀺, 𑀯𑀺𑀲𑀗𑁆𑀓𑁂𑀢𑀫𑁂𑀯. ‘‘𑀅𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸𑀢𑀺 𑀯𑀼𑀢𑁆𑀢𑁂 𑀅𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸 𑀤𑁂𑀢𑀺, 𑀧𑀝𑀺𑀕𑁆𑀕𑀳𑀡𑁂𑀧𑀺 𑀧𑀭𑀺𑀪𑁄𑀕𑁂𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀅𑀓𑀧𑁆𑀧𑀺𑀬𑀲𑀧𑁆𑀧𑀺𑀫𑁆𑀳𑀺 𑀅𑀲𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀓𑀧𑁆𑀧𑀺𑀬𑀦𑀯𑀦𑀻𑀢𑀸𑀤𑀻𑀦𑀺 𑀤𑁂𑀢𑀺 ‘‘𑀲𑀧𑁆𑀧𑀺𑀁 𑀓𑀢𑁆𑀯𑀸 𑀪𑀼𑀜𑁆𑀚𑀸’’𑀢𑀺 𑀅𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸𑀯 𑀤𑀺𑀦𑁆𑀦𑀁 𑀳𑁄𑀢𑀺. ‘‘𑀅𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸’’𑀢𑀺 𑀯𑀼𑀢𑁆𑀢𑁂 𑀓𑀧𑁆𑀧𑀺𑀬𑁂𑀦 𑀤𑁂𑀢𑀺, 𑀯𑀺𑀲𑀗𑁆𑀓𑁂𑀢𑀁. ‘‘𑀲𑀧𑁆𑀧𑀺𑀦𑀸’’𑀢𑀺 𑀯𑀼𑀢𑁆𑀢𑁂 𑀲𑁂𑀲𑁂𑀲𑀼 𑀦𑀯𑀦𑀻𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑁂𑀦 𑀤𑁂𑀢𑀺, 𑀯𑀺𑀲𑀗𑁆𑀓𑁂𑀢𑀫𑁂𑀯. 𑀏𑀲 𑀦𑀬𑁄 𑀦𑀯𑀦𑀻𑀢𑁂𑀦 𑀤𑁂𑀳𑀻𑀢𑀺𑀆𑀤𑀻𑀲𑀼𑀧𑀺. 𑀬𑁂𑀦 𑀬𑁂𑀦 𑀳𑀺 𑀯𑀺𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀢𑀲𑁆𑀫𑀺𑀁 𑀯𑀸 𑀢𑀲𑁆𑀲 𑀫𑀽𑀮𑁂 𑀯𑀸 𑀮𑀤𑁆𑀥𑁂, 𑀢𑀁 𑀢𑀁 𑀮𑀤𑁆𑀥𑀫𑁂𑀯 𑀳𑁄𑀢𑀺.
𑀲𑀘𑁂 𑀧𑀦 𑀅𑀜𑁆𑀜𑀁 𑀧𑀸𑀴𑀺𑀬𑀸 𑀆𑀕𑀢𑀁 𑀯𑀸 𑀅𑀦𑀸𑀕𑀢𑀁 𑀯𑀸 𑀤𑁂𑀦𑁆𑀢𑀺, 𑀯𑀺𑀲𑀗𑁆𑀓𑁂𑀢𑀁. 𑀧𑀸𑀴𑀺𑀬𑀁 𑀆𑀕𑀢𑀦𑀯𑀦𑀻𑀢𑀸𑀤𑀻𑀦𑀺 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀳𑀺 𑀦𑀯𑀦𑀻𑀢𑀸𑀤𑀻𑀳𑀺 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀬𑀣𑀸 𑀘 ‘‘𑀲𑀧𑁆𑀧𑀺𑀪𑀢𑁆𑀢𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀲𑀸𑀮𑀺𑀪𑀢𑁆𑀢𑀲𑁆𑀲 𑀯𑀺𑀬 𑀲𑀧𑁆𑀧𑀺𑀪𑀢𑁆𑀢𑀲𑁆𑀲 𑀅𑀪𑀸𑀯𑀸 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀦𑀯𑀦𑀻𑀢𑀪𑀢𑁆𑀢𑀁 𑀤𑁂𑀳𑀻𑀢𑀺𑀆𑀤𑀻𑀲𑀼𑀧𑀺. 𑀧𑀝𑀺𑀧𑀸𑀝𑀺𑀬𑀸 𑀏𑀓𑀫𑁂𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁂𑀧𑀺 𑀳𑀺 𑀅𑀬𑀫𑁂𑀯𑀢𑁆𑀣𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸, 𑀲𑁄 𑀘 𑀲𑀗𑁆𑀔𑁂𑀧𑁂𑀦𑀧𑀺 𑀲𑀓𑁆𑀓𑀸 𑀜𑀸𑀢𑀼𑀁, 𑀓𑀺𑀁 𑀢𑀢𑁆𑀣 𑀯𑀺𑀢𑁆𑀣𑀸𑀭𑁂𑀦? 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀲 𑀦𑀬𑁄 𑀦𑀯𑀦𑀻𑀢𑁂𑀦 𑀤𑁂𑀳𑀻𑀢𑀺𑀆𑀤𑀻𑀲𑀼𑀧𑀻’’𑀢𑀺.
𑀲𑀘𑁂 𑀧𑀦 𑀲𑀩𑁆𑀩𑁂𑀳𑀺𑀧𑀺 𑀲𑀧𑁆𑀧𑀺𑀆𑀤𑀻𑀳𑀺 𑀏𑀓𑀝𑁆𑀞𑀸𑀦𑁂 𑀯𑀸 𑀦𑀸𑀦𑀸𑀝𑁆𑀞𑀸𑀦𑁂 𑀯𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀧𑀝𑀺𑀮𑀤𑁆𑀥𑀁 𑀏𑀓𑀪𑀸𑀚𑀦𑁂 𑀆𑀓𑀺𑀭𑀺𑀢𑁆𑀯𑀸 𑀏𑀓𑀭𑀲𑀁 𑀓𑀢𑁆𑀯𑀸 𑀢𑀢𑁄 𑀓𑀼𑀲𑀕𑁆𑀕𑁂𑀦𑀸𑀧𑀺 𑀚𑀺𑀯𑁆𑀳𑀕𑁆𑀕𑁂 𑀩𑀺𑀦𑁆𑀤𑀼𑀁 𑀞𑀧𑁂𑀢𑁆𑀯𑀸 𑀅𑀚𑁆𑀛𑁄𑀳𑀭𑀢𑀺, 𑀦𑀯 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀆𑀧𑀚𑁆𑀚𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀧𑀭𑀺𑀯𑀸𑀭𑁂 𑁋
‘‘𑀓𑀸𑀬𑀺𑀓𑀸𑀦𑀺 𑀦 𑀯𑀸𑀘𑀲𑀺𑀓𑀸𑀦𑀺,
𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;
𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀆𑀧𑀚𑁆𑀚𑁂𑀬𑁆𑀬 𑀏𑀓𑀢𑁄,
𑀧𑀜𑁆𑀳𑀸𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁮𑁧);
𑁨𑁬𑁧. 𑀅𑀕𑀺𑀮𑀸𑀦𑁄 𑀕𑀺𑀮𑀸𑀦𑀲𑀜𑁆𑀜𑀻𑀢𑀺 𑀏𑀢𑁆𑀣 𑀲𑀘𑁂 𑀕𑀺𑀮𑀸𑀦𑀲𑀜𑁆𑀜𑀻𑀧𑀺 𑀳𑀼𑀢𑁆𑀯𑀸 𑀪𑁂𑀲𑀚𑁆𑀚𑀢𑁆𑀣𑀸𑀬 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺 𑀯𑀺𑀜𑁆𑀜𑀸𑀧𑁂𑀢𑀺, 𑀫𑀳𑀸𑀦𑀸𑀫𑀲𑀺𑀓𑁆𑀔𑀸𑀧𑀤𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀦𑀯 𑀧𑀡𑀻𑀢𑀪𑁄𑀚𑀦𑀸𑀦𑀺 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀧𑀦 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀪𑀺𑀓𑁆𑀔𑀼𑀦𑀻𑀦𑀁 𑀧𑀦 𑀏𑀢𑀸𑀦𑀺 𑀧𑀸𑀝𑀺𑀤𑁂𑀲𑀦𑀻𑀬𑀯𑀢𑁆𑀣𑀽𑀦𑀺 𑀳𑁄𑀦𑁆𑀢𑀺, 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀬𑀁 𑀉𑀪𑀬𑁂𑀲𑀫𑁆𑀧𑀺 𑀲𑁂𑀔𑀧𑀡𑁆𑀡𑀢𑁆𑀢𑀺𑀤𑀼𑀓𑁆𑀓𑀝𑀫𑁂𑀯. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.
𑀘𑀢𑀼𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀢𑁄 𑀓𑀸𑀬𑀯𑀸𑀘𑀢𑁄 𑀓𑀸𑀬𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺,
𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.
𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀦𑀯𑀫𑀁.
𑁧𑁦. 𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸
𑁨𑁬𑁩. 𑀤𑀲𑀫𑀲𑀺𑀓𑁆𑀔𑀸𑀧𑀤𑁂 𑁋 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀦𑁆𑀢𑀫𑀲𑁄 𑀤𑀦𑁆𑀢𑀓𑀝𑁆𑀞𑀫𑁆𑀧𑀺 𑀲𑀩𑁆𑀩𑀁 𑀧𑀁𑀲𑀼𑀓𑀽𑀮𑀫𑁂𑀯 𑀅𑀲𑁆𑀲𑀸𑀢𑀺 𑀲𑀩𑁆𑀩𑀧𑀁𑀲𑀼𑀓𑀽𑀮𑀺𑀓𑁄. 𑀲𑁄 𑀓𑀺𑀭 𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀪𑀸𑀚𑀦𑀫𑁂𑀯 𑀧𑀢𑁆𑀢𑀁 𑀓𑀢𑁆𑀯𑀸 𑀢𑀢𑁆𑀣 𑀙𑀟𑁆𑀟𑀺𑀢𑀘𑁄𑀴𑀓𑁂𑀳𑁂𑀯 𑀘𑀻𑀯𑀭𑀁 𑀓𑀢𑁆𑀯𑀸 𑀢𑀢𑁆𑀣 𑀙𑀟𑁆𑀟𑀺𑀢𑀫𑀜𑁆𑀘𑀧𑀻𑀞𑀓𑀸𑀦𑀺𑀬𑁂𑀯 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺. 𑀅𑀬𑁆𑀬𑀯𑁄𑀲𑀸𑀝𑀺𑀢𑀓𑀸𑀦𑀻𑀢𑀺 𑀏𑀢𑁆𑀣 𑀅𑀬𑁆𑀬𑀸 𑀯𑀼𑀘𑁆𑀘𑀦𑁆𑀢𑀺 𑀓𑀸𑀮𑀗𑁆𑀓𑀢𑀸 𑀧𑀺𑀢𑀺𑀧𑀺𑀢𑀸𑀫𑀳𑀸. 𑀯𑁄𑀲𑀸𑀝𑀺𑀢𑀓𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 𑀢𑁂𑀲𑀁 𑀅𑀢𑁆𑀣𑀸𑀬 𑀲𑀼𑀲𑀸𑀦𑀸𑀤𑀻𑀲𑀼 𑀙𑀟𑁆𑀟𑀺𑀢𑀓𑀸𑀦𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀦𑀺; 𑀫𑀦𑀼𑀲𑁆𑀲𑀸 𑀓𑀺𑀭 𑀓𑀸𑀮𑀗𑁆𑀓𑀢𑁂 𑀜𑀸𑀢𑀓𑁂 𑀉𑀤𑁆𑀤𑀺𑀲𑁆𑀲 𑀬𑀁 𑀢𑁂𑀲𑀁 𑀲𑀚𑀻𑀯𑀓𑀸𑀮𑁂 𑀧𑀺𑀬𑀁 𑀳𑁄𑀢𑀺, 𑀢𑀁 𑀏𑀢𑁂𑀲𑀼 𑀲𑀼𑀲𑀸𑀦𑀸𑀤𑀻𑀲𑀼 𑀧𑀺𑀡𑁆𑀟𑀁 𑀧𑀺𑀡𑁆𑀟𑀁 𑀓𑀢𑁆𑀯𑀸 ‘‘𑀜𑀸𑀢𑀓𑀸 𑀦𑁄 𑀧𑀭𑀺𑀪𑀼𑀜𑁆𑀚𑀦𑁆𑀢𑀽𑀢𑀺 𑀞𑀧𑁂𑀦𑁆𑀢𑀺. 𑀲𑁄 𑀪𑀺𑀓𑁆𑀔𑀼 𑀢𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀅𑀜𑁆𑀜𑀁 𑀧𑀡𑀻𑀢𑀫𑁆𑀧𑀺 𑀤𑀺𑀬𑁆𑀬𑀫𑀸𑀦𑀁 𑀦 𑀇𑀘𑁆𑀙𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀼𑀲𑀸𑀦𑁂𑀧𑀺 𑀭𑀼𑀓𑁆𑀔𑀫𑀽𑀮𑁂𑀧𑀺 𑀉𑀫𑁆𑀫𑀸𑀭𑁂𑀧𑀺 𑀅𑀬𑁆𑀬𑀯𑁄𑀲𑀸𑀝𑀺𑀢𑀓𑀸𑀦𑀺 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺. 𑀣𑁂𑀭𑁄𑀢𑀺 𑀣𑀺𑀭𑁄 𑀖𑀦𑀩𑀤𑁆𑀥𑁄. 𑀯𑀞𑀭𑁄𑀢𑀺 𑀣𑀽𑀮𑁄; 𑀣𑀽𑀮𑁄 𑀘 𑀖𑀦𑀲𑀭𑀻𑀭𑁄 𑀘𑀸𑀬𑀁 𑀪𑀺𑀓𑁆𑀔𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀦𑀼𑀲𑁆𑀲𑀫𑀁𑀲𑀁 𑀫𑀜𑁆𑀜𑁂 𑀔𑀸𑀤𑀢𑀻𑀢𑀺 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀢𑀻𑀢𑀺 𑀦𑀁 𑀲𑀮𑁆𑀮𑀓𑁆𑀔𑁂𑀫; 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀦𑁆𑀢𑀸 𑀳𑀺 𑀈𑀤𑀺𑀲𑀸 𑀪𑀯𑀦𑁆𑀢𑀻𑀢𑀺 𑀅𑀬𑀁 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄.
𑁨𑁬𑁪. 𑀉𑀤𑀓𑀤𑀦𑁆𑀢𑀧𑁄𑀦𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀻𑀢𑀺 𑀏𑀢𑁆𑀣 𑀢𑁂 𑀪𑀺𑀓𑁆𑀔𑀽 ‘‘𑀅𑀤𑀺𑀦𑁆𑀦𑀁 𑀫𑀼𑀔𑀤𑁆𑀯𑀸𑀭𑀁 𑀆𑀳𑀸𑀭𑀁 𑀆𑀳𑀭𑁂𑀬𑁆𑀬𑀸’’𑀢𑀺 𑀧𑀤𑀲𑁆𑀲 𑀲𑀫𑁆𑀫𑀸 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀲𑀼𑀁, 𑀪𑀕𑀯𑀸 𑀧𑀦 𑀬𑀣𑀸𑀉𑀧𑁆𑀧𑀦𑁆𑀦𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀲𑁂𑀦 𑀧𑀺𑀢𑀸 𑀯𑀺𑀬 𑀤𑀸𑀭𑀓𑁂 𑀢𑁂 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀦𑁆𑀢𑁄 𑀅𑀦𑀼𑀧𑀜𑁆𑀜𑀢𑁆𑀢𑀺𑀁 𑀞𑀧𑁂𑀲𑀺.
𑁨𑁬𑁫. 𑀅𑀤𑀺𑀦𑁆𑀦𑀦𑁆𑀢𑀺 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀓𑀸𑀬𑀓𑀸𑀬𑀧𑀝𑀺𑀩𑀤𑁆𑀥𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀦 𑀤𑀺𑀦𑁆𑀦𑀁. 𑀏𑀢𑀤𑁂𑀯 𑀳𑀺 𑀲𑀦𑁆𑀥𑀸𑀬 𑀧𑀤𑀪𑀸𑀚𑀦𑁂 ‘‘𑀅𑀤𑀺𑀦𑁆𑀦𑀁 𑀦𑀸𑀫 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑁂 𑀧𑀦 ‘‘𑀅𑀤𑀺𑀦𑁆𑀦𑀁 𑀦𑀸𑀫 𑀧𑀭𑀧𑀭𑀺𑀕𑁆𑀕𑀳𑀺𑀢𑀓𑀁 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀤𑀺𑀦𑁆𑀦𑀦𑁆𑀢𑀺 𑀇𑀤𑀁 𑀧𑀦 𑀢𑀲𑁆𑀲𑁂𑀯 𑀅𑀤𑀺𑀦𑁆𑀦𑀲𑁆𑀲 𑀧𑀝𑀺𑀧𑀓𑁆𑀔𑀯𑀲𑁂𑀦 𑀮𑀓𑁆𑀔𑀡𑀤𑀲𑁆𑀲𑀦𑀢𑁆𑀣𑀁 𑀉𑀤𑁆𑀥𑀝𑀁. 𑀦𑀺𑀤𑁆𑀤𑁂𑀲𑁂 𑀘𑀲𑁆𑀲 ‘‘𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀯𑀸 𑀤𑁂𑀦𑁆𑀢𑁂’’𑀢𑀺 𑀏𑀯𑀁 𑀅𑀜𑁆𑀜𑀲𑁆𑀫𑀺𑀁 𑀤𑀤𑀫𑀸𑀦𑁂 ‘‘𑀳𑀢𑁆𑀣𑀧𑀸𑀲𑁂 𑀞𑀺𑀢𑁄 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀢𑀁 𑀏𑀯𑀁 𑀤𑀺𑀬𑁆𑀬𑀫𑀸𑀦𑀁 𑀅𑀦𑁆𑀢𑀫𑀲𑁄 𑀭𑀣𑀭𑁂𑀡𑀼𑀫𑁆𑀧𑀺 𑀲𑀘𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀮𑀓𑁆𑀔𑀡𑁂 𑀳𑀢𑁆𑀣𑀧𑀸𑀲𑁂 𑀞𑀺𑀢𑁄 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀏𑀢𑀁 𑀏𑀯𑀁 𑀧𑀝𑀺𑀕𑁆𑀕𑀳𑀺𑀢𑀁 𑀤𑀺𑀦𑁆𑀦𑀁 𑀦𑀸𑀫 𑀯𑀼𑀘𑁆𑀘𑀢𑀺. 𑀦 ‘‘𑀇𑀤𑀁 𑀕𑀡𑁆𑀳, 𑀇𑀤𑀁 𑀢𑀯 𑀳𑁄𑀢𑀽’’𑀢𑀺𑀆𑀤𑀺𑀯𑀘𑀦𑁂𑀦 𑀦𑀺𑀲𑁆𑀲𑀝𑁆𑀞𑀁.
𑀢𑀢𑁆𑀣 𑀓𑀸𑀬𑁂𑀦𑀸𑀢𑀺 𑀳𑀢𑁆𑀣𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦; 𑀅𑀦𑁆𑀢𑀫𑀲𑁄 𑀧𑀸𑀤𑀗𑁆𑀕𑀼𑀮𑀺𑀬𑀸𑀧𑀺 𑀤𑀺𑀬𑁆𑀬𑀫𑀸𑀦𑀁 𑀓𑀸𑀬𑁂𑀦 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺, 𑀧𑀝𑀺𑀕𑁆𑀕𑀳𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀦 𑀓𑁂𑀦𑀘𑀺 𑀳𑀺 𑀲𑀭𑀻𑀭𑀸𑀯𑀬𑀯𑁂𑀦 𑀕𑀳𑀺𑀢𑀁 𑀓𑀸𑀬𑁂𑀦 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀲𑀘𑁂𑀧𑀺 𑀦𑀢𑁆𑀣𑀼𑀓𑀭𑀡𑀺𑀬𑀸 𑀤𑀺𑀬𑁆𑀬𑀫𑀸𑀦𑀁 𑀦𑀸𑀲𑀸𑀧𑀼𑀝𑁂𑀦 𑀅𑀓𑀮𑁆𑀮𑀓𑁄 𑀯𑀸 𑀫𑀼𑀔𑁂𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀆𑀪𑁄𑀕𑀫𑀢𑁆𑀢𑀫𑁂𑀯 𑀳𑀺 𑀏𑀢𑁆𑀣 𑀧𑀫𑀸𑀡𑀦𑁆𑀢𑀺 𑀅𑀬𑀁 𑀦𑀬𑁄 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑁄. 𑀓𑀸𑀬𑀧𑀝𑀺𑀩𑀤𑁆𑀥𑁂𑀦𑀸𑀢𑀺 𑀓𑀝𑀘𑁆𑀙𑀼𑀆𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀉𑀧𑀓𑀭𑀡𑁂𑀦 𑀤𑀺𑀦𑁆𑀦𑀁 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀧𑀝𑀺𑀕𑁆𑀕𑀳𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀧𑀝𑀺𑀩𑀤𑁆𑀥𑁂𑀦 𑀧𑀢𑁆𑀢𑀣𑀸𑀮𑀓𑀸𑀤𑀺𑀦𑀸 𑀕𑀳𑀺𑀢𑀁 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀦𑀺𑀲𑁆𑀲𑀕𑁆𑀕𑀺𑀬𑁂𑀦𑀸𑀢𑀺 𑀓𑀸𑀬𑀢𑁄 𑀘 𑀓𑀸𑀬𑀧𑀝𑀺𑀩𑀤𑁆𑀥𑀢𑁄 𑀘 𑀫𑁄𑀘𑁂𑀢𑁆𑀯𑀸 𑀳𑀢𑁆𑀣𑀧𑀸𑀲𑁂 𑀞𑀺𑀢𑀲𑁆𑀲 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀸𑀢𑀺𑀬𑀫𑀸𑀦𑀫𑁆𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀧𑀬𑁄𑀕𑁂𑀦 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀅𑀬𑀁 𑀢𑀸𑀯 𑀧𑀸𑀴𑀺𑀯𑀡𑁆𑀡𑀦𑀸.
𑀅𑀬𑀁 𑀧𑀦𑁂𑀢𑁆𑀣 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄 𑁋 𑀧𑀜𑁆𑀘𑀗𑁆𑀕𑁂𑀳𑀺 𑀧𑀝𑀺𑀕𑁆𑀕𑀳𑀡𑀁 𑀭𑀼𑀳𑀢𑀺 𑁋 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀘𑁆𑀘𑀸𑀭𑀡𑀫𑀢𑁆𑀢𑀁 𑀳𑁄𑀢𑀺, 𑀳𑀢𑁆𑀣𑀧𑀸𑀲𑁄 𑀧𑀜𑁆𑀜𑀸𑀬𑀢𑀺, 𑀅𑀪𑀺𑀳𑀸𑀭𑁄 𑀧𑀜𑁆𑀜𑀸𑀬𑀢𑀺, 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑁄 𑀯𑀸 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀯𑀸 𑀤𑁂𑀢𑀺, 𑀢𑀁 𑀘𑁂 𑀪𑀺𑀓𑁆𑀔𑀼 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀧𑀜𑁆𑀘𑀳𑀗𑁆𑀕𑁂𑀳𑀺 𑀧𑀝𑀺𑀕𑁆𑀕𑀳𑀡𑀁 𑀭𑀼𑀳𑀢𑀺.
𑀢𑀢𑁆𑀣 𑀞𑀺𑀢𑀦𑀺𑀲𑀺𑀦𑁆𑀦𑀦𑀺𑀧𑀦𑁆𑀦𑀸𑀦𑀁 𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀳𑀢𑁆𑀣𑀧𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀘𑁂 𑀧𑀦 𑀤𑀸𑀬𑀓𑀧𑀝𑀺𑀕𑁆𑀕𑀸𑀳𑀓𑁂𑀲𑀼 𑀏𑀓𑁄 𑀆𑀓𑀸𑀲𑁂 𑀳𑁄𑀢𑀺, 𑀏𑀓𑁄 𑀪𑀽𑀫𑀺𑀬𑀁, 𑀪𑀽𑀫𑀝𑁆𑀞𑀲𑁆𑀲 𑀘 𑀲𑀻𑀲𑁂𑀦 𑀆𑀓𑀸𑀲𑀝𑁆𑀞𑀲𑁆𑀲 𑀘 𑀞𑀧𑁂𑀢𑁆𑀯𑀸 𑀤𑀸𑀢𑀼𑀁 𑀯𑀸 𑀕𑀳𑁂𑀢𑀼𑀁 𑀯𑀸 𑀧𑀲𑀸𑀭𑀺𑀢𑀳𑀢𑁆𑀣𑀁, 𑀬𑀁 𑀆𑀲𑀦𑁆𑀦𑀢𑀭𑀁 𑀅𑀗𑁆𑀕𑀁, 𑀢𑀲𑁆𑀲 𑀑𑀭𑀺𑀫𑀦𑁆𑀢𑁂𑀦 𑀳𑀢𑁆𑀣𑀧𑀸𑀲𑀧𑁆𑀧𑀫𑀸𑀡𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁. 𑀲𑀘𑁂𑀧𑀺 𑀏𑀓𑁄 𑀓𑀽𑀧𑁂 𑀳𑁄𑀢𑀺, 𑀏𑀓𑁄 𑀓𑀽𑀧𑀢𑀝𑁂, 𑀏𑀓𑁄 𑀯𑀸 𑀧𑀦 𑀭𑀼𑀓𑁆𑀔𑁂, 𑀏𑀓𑁄 𑀧𑀣𑀯𑀺𑀬𑀁, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀳𑀢𑁆𑀣𑀧𑀸𑀲𑀧𑁆𑀧𑀫𑀸𑀡𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁. 𑀏𑀯𑀭𑀽𑀧𑁂 𑀳𑀢𑁆𑀣𑀧𑀸𑀲𑁂 𑀞𑀢𑁆𑀯𑀸 𑀲𑀘𑁂𑀧𑀺 𑀧𑀓𑁆𑀔𑀻 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀳𑀢𑁆𑀣𑀻 𑀯𑀸 𑀲𑁄𑀡𑁆𑀟𑀸𑀬 𑀕𑀳𑁂𑀢𑁆𑀯𑀸 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀤𑁂𑀢𑀺, 𑀧𑀝𑀺𑀕𑁆𑀕𑀳𑀡𑀁 𑀭𑀼𑀳𑀢𑀺. 𑀲𑀘𑁂 𑀧𑀦 𑀅𑀤𑁆𑀥𑀝𑁆𑀞𑀫𑀭𑀢𑀦𑀲𑁆𑀲𑀸𑀧𑀺 𑀳𑀢𑁆𑀣𑀺𑀦𑁄 𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑁄, 𑀢𑁂𑀦 𑀲𑁄𑀡𑁆𑀟𑀸𑀬 𑀤𑀺𑀬𑁆𑀬𑀫𑀸𑀦𑀁 𑀕𑀡𑁆𑀳𑀸𑀢𑀺, 𑀯𑀝𑁆𑀝𑀢𑀺𑀬𑁂𑀯.
𑀏𑀓𑁄 𑀩𑀳𑀽𑀦𑀺 𑀪𑀢𑁆𑀢𑀩𑁆𑀬𑀜𑁆𑀚𑀦𑀪𑀸𑀚𑀦𑀸𑀦𑀺 𑀲𑀻𑀲𑁂 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀞𑀺𑀢𑀓𑁄𑀯 𑀕𑀡𑁆𑀳𑀣𑀸𑀢𑀺 𑀯𑀤𑀢𑀺, 𑀦 𑀢𑀸𑀯 𑀅𑀪𑀺𑀳𑀸𑀭𑁄 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀦 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀈𑀲𑀓𑀫𑁆𑀧𑀺 𑀑𑀦𑀫𑀢𑀺, 𑀪𑀺𑀓𑁆𑀔𑀼𑀦𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀳𑁂𑀝𑁆𑀞𑀺𑀫𑀪𑀸𑀚𑀦𑀁 𑀏𑀓𑀤𑁂𑀲𑁂𑀦𑀸𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑀪𑀸𑀚𑀦𑀸𑀦𑀺 𑀧𑀝𑀺𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀑𑀭𑁄𑀧𑁂𑀢𑁆𑀯𑀸 𑀯𑀸 𑀉𑀕𑁆𑀖𑀸𑀝𑁂𑀢𑁆𑀯𑀸 𑀯𑀸 𑀬𑀁 𑀇𑀘𑁆𑀙𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀪𑀢𑁆𑀢𑀧𑀘𑁆𑀙𑀺𑀆𑀤𑀺𑀫𑁆𑀳𑀺 𑀧𑀦 𑀏𑀓𑀪𑀸𑀚𑀦𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀓𑀸𑀚𑁂𑀦 𑀪𑀢𑁆𑀢𑀁 𑀳𑀭𑀦𑁆𑀢𑁄𑀧𑀺 𑀲𑀘𑁂 𑀓𑀸𑀚𑀁 𑀑𑀦𑀸𑀫𑁂𑀢𑁆𑀯𑀸 𑀤𑁂𑀢𑀺, 𑀯𑀝𑁆𑀝𑀢𑀺. 𑀢𑀺𑀁𑀲𑀳𑀢𑁆𑀣𑁄 𑀯𑁂𑀡𑀼 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀕𑀼𑀴𑀓𑀼𑀫𑁆𑀪𑁄 𑀩𑀤𑁆𑀥𑁄, 𑀏𑀓𑀲𑁆𑀫𑀺𑀁 𑀲𑀧𑁆𑀧𑀺𑀓𑀼𑀫𑁆𑀪𑁄, 𑀢𑀜𑁆𑀘𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑀩𑁆𑀩𑀁 𑀧𑀝𑀺𑀕𑁆𑀕𑀳𑀺𑀢𑀫𑁂𑀯. 𑀉𑀘𑁆𑀙𑀼𑀬𑀦𑁆𑀢𑀤𑁄𑀡𑀺𑀢𑁄 𑀧𑀕𑁆𑀖𑀭𑀦𑁆𑀢𑀫𑁂𑀯 𑀭𑀲𑀁 𑀕𑀡𑁆𑀳𑀣𑀸𑀢𑀺 𑀯𑀤𑀢𑀺, 𑀅𑀪𑀺𑀳𑀸𑀭𑁄 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀦 𑀕𑀳𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀳𑀢𑁆𑀣𑁂𑀦 𑀉𑀲𑁆𑀲𑀺𑀜𑁆𑀘𑀺𑀢𑁆𑀯𑀸 𑀉𑀲𑁆𑀲𑀺𑀜𑁆𑀘𑀺𑀢𑁆𑀯𑀸 𑀤𑁂𑀢𑀺, 𑀯𑀝𑁆𑀝𑀢𑀺.
𑀩𑀳𑀽 𑀧𑀢𑁆𑀢𑀸 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀓𑀝𑀲𑀸𑀭𑀓𑁂 𑀯𑀸 𑀤𑁄𑀡𑀺𑀬𑀁 𑀯𑀸 𑀨𑀮𑀓𑁂 𑀯𑀸 𑀞𑀧𑀺𑀢𑀸 𑀳𑁄𑀦𑁆𑀢𑀺, 𑀬𑀢𑁆𑀣 𑀞𑀺𑀢𑀲𑁆𑀲 𑀤𑀸𑀬𑀓𑁄 𑀳𑀢𑁆𑀣𑀧𑀸𑀲𑁂 𑀳𑁄𑀢𑀺, 𑀢𑀢𑁆𑀣 𑀞𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑀲𑀜𑁆𑀜𑀸𑀬 𑀫𑀜𑁆𑀘𑀸𑀤𑀻𑀦𑀺 𑀅𑀗𑁆𑀕𑀼𑀮𑀺𑀬𑀸𑀧𑀺 𑀨𑀼𑀲𑀺𑀢𑁆𑀯𑀸 𑀞𑀺𑀢𑁂𑀦 𑀯𑀸 𑀦𑀺𑀲𑀺𑀦𑁆𑀦𑁂𑀦 𑀯𑀸 𑀦𑀺𑀧𑀦𑁆𑀦𑁂𑀦 𑀯𑀸 𑀬𑀁 𑀢𑁂𑀲𑀼 𑀧𑀢𑁆𑀢𑁂𑀲𑀼 𑀤𑀺𑀬𑁆𑀬𑀢𑀺, 𑀢𑀁 𑀲𑀩𑁆𑀩𑀁 𑀧𑀝𑀺𑀕𑁆𑀕𑀳𑀺𑀢𑀁 𑀳𑁄𑀢𑀺. 𑀲𑀘𑁂𑀧𑀺 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺 𑀫𑀜𑁆𑀘𑀸𑀤𑀻𑀦𑀺 𑀆𑀭𑀼𑀳𑀺𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀲𑀘𑁂 𑀧𑀦 𑀫𑀜𑁆𑀘𑀸𑀤𑀻𑀦𑀺 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀫𑀜𑁆𑀘𑁂 𑀦𑀺𑀲𑀻𑀤𑀢𑀺, 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.
𑀧𑀣𑀯𑀺𑀬𑀁 𑀧𑀦 𑀲𑀘𑁂𑀧𑀺 𑀓𑀼𑀘𑁆𑀙𑀺𑀬𑀸 𑀓𑀼𑀘𑁆𑀙𑀺𑀁 𑀆𑀳𑀘𑁆𑀘 𑀞𑀺𑀢𑀸 𑀳𑁄𑀦𑁆𑀢𑀺, 𑀬𑀁 𑀬𑀁 𑀅𑀗𑁆𑀕𑀼𑀮𑀺𑀬𑀸 𑀯𑀸 𑀲𑀽𑀘𑀺𑀬𑀸 𑀯𑀸 𑀨𑀼𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀤𑀺𑀬𑁆𑀬𑀫𑀸𑀦𑀫𑁂𑀯 𑀧𑀝𑀺𑀕𑁆𑀕𑀳𑀺𑀢𑀁 𑀳𑁄𑀢𑀺. ‘‘𑀬𑀢𑁆𑀣 𑀓𑀢𑁆𑀣𑀘𑀺 𑀫𑀳𑀸𑀓𑀝𑀲𑀸𑀭𑀳𑀢𑁆𑀣𑀢𑁆𑀣𑀭𑀡𑀸𑀤𑀻𑀲𑀼 𑀞𑀧𑀺𑀢𑀧𑀢𑁆𑀢𑁂 𑀧𑀝𑀺𑀕𑁆𑀕𑀳𑀡𑀁 𑀦 𑀭𑀼𑀳𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀳𑀢𑁆𑀣𑀧𑀸𑀲𑀸𑀢𑀺𑀓𑁆𑀓𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀳𑀢𑁆𑀣𑀧𑀸𑀲𑁂 𑀧𑀦 𑀲𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀝𑁆𑀝𑀢𑀺 𑀅𑀜𑁆𑀜𑀢𑁆𑀭 𑀢𑀢𑁆𑀣𑀚𑀸𑀢𑀓𑀸.
𑀢𑀢𑁆𑀣𑀚𑀸𑀢𑀓𑁂 𑀧𑀦 𑀧𑀤𑀼𑀫𑀺𑀦𑀺𑀧𑀡𑁆𑀡𑁂 𑀯𑀸 𑀓𑀺𑀁𑀲𑀼𑀓𑀧𑀡𑁆𑀡𑀸𑀤𑀺𑀫𑁆𑀳𑀺 𑀯𑀸 𑀦 𑀯𑀝𑁆𑀝𑀢𑀺. 𑀦 𑀳𑀺 𑀢𑀁 𑀓𑀸𑀬𑀧𑀝𑀺𑀩𑀤𑁆𑀥𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀬𑀣𑀸 𑀘 𑀢𑀢𑁆𑀣𑀚𑀸𑀢𑀓𑁂; 𑀏𑀯𑀁 𑀔𑀸𑀡𑀼𑀓𑁂 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀫𑀜𑁆𑀘𑀸𑀤𑀺𑀫𑁆𑀳𑀺 𑀅𑀲𑀁𑀳𑀸𑀭𑀺𑀫𑁂 𑀨𑀮𑀓𑁂 𑀯𑀸 𑀧𑀸𑀲𑀸𑀡𑁂 𑀯𑀸 𑀦 𑀭𑀼𑀳𑀢𑀺𑀬𑁂𑀯, 𑀢𑁂𑀧𑀺 𑀳𑀺 𑀢𑀢𑁆𑀣𑀚𑀸𑀢𑀓𑀲𑀗𑁆𑀔𑁂𑀧𑀼𑀧𑀕𑀸 𑀳𑁄𑀦𑁆𑀢𑀺. 𑀪𑀽𑀫𑀺𑀬𑀁 𑀅𑀢𑁆𑀣𑀢𑁂𑀲𑀼 𑀲𑀼𑀔𑀼𑀫𑁂𑀲𑀼 𑀢𑀺𑀦𑁆𑀢𑀺𑀡𑀺𑀓𑀸𑀤𑀺𑀧𑀡𑁆𑀡𑁂𑀲𑀼𑀧𑀺 𑀧𑀝𑀺𑀕𑁆𑀕𑀳𑀡𑀁 𑀦 𑀭𑀼𑀳𑀢𑀺, 𑀦 𑀳𑀺 𑀢𑀸𑀦𑀺 𑀲𑀦𑁆𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑀸𑀦𑀻𑀢𑀺. 𑀫𑀳𑀦𑁆𑀢𑁂𑀲𑀼 𑀧𑀦 𑀧𑀤𑀼𑀫𑀺𑀦𑀺𑀧𑀡𑁆𑀡𑀸𑀤𑀻𑀲𑀼 𑀭𑀼𑀳𑀢𑀺. 𑀲𑀘𑁂 𑀳𑀢𑁆𑀣𑀧𑀸𑀲𑀁 𑀅𑀢𑀺𑀓𑁆𑀓𑀫𑁆𑀫 𑀞𑀺𑀢𑁄 𑀤𑀻𑀖𑀤𑀡𑁆𑀟𑀓𑁂𑀦 𑀉𑀴𑀼𑀗𑁆𑀓𑁂𑀦 𑀤𑁂𑀢𑀺, 𑀆𑀕𑀦𑁆𑀢𑁆𑀯𑀸 𑀤𑁂𑀳𑀻𑀢𑀺 𑀯𑀢𑁆𑀢𑀩𑁆𑀩𑁄. 𑀯𑀘𑀦𑀁 𑀅𑀲𑀼𑀢𑁆𑀯𑀸 𑀯𑀸 𑀅𑀦𑀸𑀤𑀺𑀬𑀺𑀢𑁆𑀯𑀸 𑀯𑀸 𑀧𑀢𑁆𑀢𑁂 𑀆𑀓𑀺𑀭𑀢𑀺𑀬𑁂𑀯, 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀤𑀽𑀭𑁂 𑀞𑀢𑁆𑀯𑀸 𑀪𑀢𑁆𑀢𑀧𑀺𑀡𑁆𑀟𑀁 𑀔𑀺𑀧𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄.
𑀲𑀘𑁂 𑀧𑀢𑁆𑀢𑀢𑁆𑀣𑀯𑀺𑀓𑀢𑁄 𑀦𑀻𑀳𑀭𑀺𑀬𑀫𑀸𑀦𑁂 𑀧𑀢𑁆𑀢𑁂 𑀭𑀚𑀦𑀘𑀼𑀡𑁆𑀡𑀸𑀦𑀺 𑀳𑁄𑀦𑁆𑀢𑀺, 𑀲𑀢𑀺 𑀉𑀤𑀓𑁂 𑀥𑁄𑀯𑀺𑀢𑀩𑁆𑀩𑁄, 𑀅𑀲𑀢𑀺 𑀭𑀚𑀦𑀘𑀼𑀡𑁆𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁. 𑀲𑀘𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲 𑀭𑀚𑀁 𑀧𑀢𑀢𑀺, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀸 𑀕𑀡𑁆𑀳𑀺𑀢𑀩𑁆𑀩𑀸. 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀢𑁄 𑀯𑀺𑀦𑀬𑀤𑀼𑀓𑁆𑀓𑀝𑀁. 𑀢𑀁 𑀧𑀦 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀢𑁄 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀧𑀦 ‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀯𑀘𑀦𑀁 𑀅𑀲𑀼𑀢𑁆𑀯𑀸 𑀯𑀸 𑀅𑀦𑀸𑀤𑀺𑀬𑀺𑀢𑁆𑀯𑀸 𑀯𑀸 𑀪𑀺𑀓𑁆𑀔𑀁 𑀤𑁂𑀦𑁆𑀢𑀺𑀬𑁂𑀯, 𑀯𑀺𑀦𑀬𑀤𑀼𑀓𑁆𑀓𑀝𑀁 𑀦𑀢𑁆𑀣𑀺, 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑀸 𑀪𑀺𑀓𑁆𑀔𑀸 𑀕𑀳𑁂𑀢𑀩𑁆𑀩𑀸.