𑁫. 𑀅𑀘𑁂𑀮𑀓𑀯𑀕𑁆𑀕𑁄

𑁧. 𑀅𑀘𑁂𑀮𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁬𑁯. 𑀅𑀘𑁂𑀮𑀓𑀯𑀕𑁆𑀕𑀲𑁆𑀲 𑁯 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀧𑀭𑀺𑀯𑁂𑀲𑀦𑀦𑁆𑀢𑀺 𑀧𑀭𑀺𑀯𑀺𑀲𑀦𑀝𑁆𑀞𑀸𑀦𑀁. 𑀧𑀭𑀺𑀩𑁆𑀩𑀸𑀚𑀓𑀲𑀫𑀸𑀧𑀦𑁆𑀦𑁄𑀢𑀺 𑀧𑀩𑁆𑀩𑀚𑁆𑀚𑀁 𑀲𑀫𑀸𑀧𑀦𑁆𑀦𑁄. 𑀤𑁂𑀢𑀺 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀲𑀫𑀢𑀺𑀢𑁆𑀢𑀺𑀓𑀁 𑀬𑀸𑀕𑀼𑀧𑀢𑁆𑀢𑀁 𑀏𑀓𑀧𑀬𑁄𑀕𑁂𑀦 𑀤𑁂𑀢𑀺, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀯𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀯𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀢𑀺, 𑀧𑀬𑁄𑀕𑁂 𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀏𑀲𑁂𑀯 𑀦𑀬𑁄 𑀧𑀽𑀯𑀪𑀢𑁆𑀢𑀸𑀤𑀻𑀲𑀼. 𑀢𑀺𑀢𑁆𑀣𑀺𑀬𑁂 𑀅𑀢𑀺𑀢𑁆𑀣𑀺𑀬𑀲𑀜𑁆𑀜𑀻𑀢𑀺 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀢𑀺𑀢𑁆𑀣𑀺𑀬𑁂𑀲𑀼 𑀧𑀩𑁆𑀩𑀚𑀢𑀺, 𑀢𑁂𑀲𑀁 𑀫𑀸𑀢𑀸𑀧𑀺𑀢𑀼𑀲𑀜𑁆𑀜𑀸𑀬 𑀤𑁂𑀦𑁆𑀢𑀲𑁆𑀲𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀳𑁄𑀢𑀺. 𑀤𑀸𑀧𑁂𑀢𑀻𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀤𑀸𑀧𑁂𑀢𑀺.

𑁨𑁭𑁩. 𑀉𑀧𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀢𑀻𑀢𑀺 𑀢𑀣𑀸𑀭𑀽𑀧𑁂 𑀪𑀸𑀚𑀦𑁂 𑀞𑀧𑁂𑀢𑁆𑀯𑀸 𑀢𑀁 𑀪𑀸𑀚𑀦𑀁 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀢𑀺, 𑀢𑁂𑀲𑀁 𑀯𑀸 𑀪𑀸𑀚𑀦𑀁 𑀦𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀢𑀢𑁆𑀣 𑀤𑁂𑀢𑀺, 𑀧𑀢𑁆𑀢𑀁 𑀆𑀥𑀸𑀭𑀓𑁂 𑀯𑀸 𑀪𑀽𑀫𑀺𑀬𑀁 𑀯𑀸 𑀞𑀧𑁂𑀢𑁆𑀯𑀸𑀧𑀺 ‘‘𑀇𑀢𑁄 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀢𑀺𑀢𑁆𑀣𑀺𑀬𑁄 𑀯𑀤𑀢𑀺 ‘‘𑀫𑀬𑁆𑀳𑀁 𑀦𑀸𑀫 𑀇𑀤𑀁 𑀲𑀦𑁆𑀢𑀓𑀁, 𑀇𑀥 𑀦 𑀆𑀓𑀺𑀭𑀣𑀸’’𑀢𑀺 𑀆𑀓𑀺𑀭𑀺𑀢𑀩𑁆𑀩𑀁. 𑀢𑀲𑁆𑀲 𑀲𑀦𑁆𑀢𑀓𑀢𑁆𑀢𑀸 𑀲𑀳𑀢𑁆𑀣𑀸 𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀅𑀘𑁂𑀮𑀓𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀁.

𑁨. 𑀉𑀬𑁆𑀬𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁭𑁪. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑁋 𑀧𑀝𑀺𑀓𑁆𑀓𑀫𑀦𑁂𑀧𑀻𑀢𑀺 𑀆𑀲𑀦𑀲𑀸𑀮𑀸𑀬𑀫𑁆𑀧𑀺. 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀦𑁆𑀢𑀺 𑀪𑀢𑁆𑀢𑀓𑀺𑀘𑁆𑀘𑀁. 𑀦 𑀲𑀫𑁆𑀪𑀸𑀯𑁂𑀲𑀻𑀢𑀺 𑀦 𑀧𑀸𑀧𑀼𑀡𑀺.

𑁨𑁭𑁬. 𑀅𑀦𑀸𑀘𑀸𑀭𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑀯𑀻𑀢𑀺𑀓𑁆𑀓𑀫𑀁. 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀸 𑀲𑀯𑀦𑀽𑀧𑀘𑀸𑀭𑀁 𑀯𑀸 𑀯𑀺𑀚𑀳𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀬𑀤𑀺 𑀞𑀺𑀢𑁄 𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸 𑀉𑀬𑁆𑀬𑁄𑀚𑁂𑀢𑀺; 𑀬𑁄 𑀉𑀬𑁆𑀬𑁄𑀚𑀺𑀢𑁄, 𑀲𑁄 𑀯𑀺𑀚𑀳𑀢𑀺, 𑀢𑀲𑁆𑀲 𑀘 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀺𑀁 𑀧𑀦 𑀯𑀺𑀚𑀳𑀦𑁆𑀢𑁂𑀧𑀺 𑀅𑀢𑁆𑀣𑀢𑁄 𑀇𑀢𑀭𑁂𑀦 𑀯𑀺𑀚𑀳𑀺𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀬𑁄 𑀉𑀬𑁆𑀬𑁄𑀚𑁂𑀢𑀺, 𑀢𑀲𑁆𑀲𑁂𑀯𑀸𑀬𑀁 𑀆𑀧𑀢𑁆𑀢𑀺. 𑀢𑀢𑁆𑀣 𑀲𑀘𑁂 𑀉𑀧𑀘𑀸𑀭𑀩𑁆𑀪𑀦𑁆𑀢𑀭𑁂 𑀏𑀓𑁄 𑀧𑀸𑀤𑁄 𑀳𑁄𑀢𑀺, 𑀤𑀼𑀓𑁆𑀓𑀝𑀁. 𑀲𑀻𑀫𑀸𑀢𑀺𑀓𑁆𑀓𑀫𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀏𑀢𑁆𑀣 𑀘 𑀤𑀲𑁆𑀲𑀦𑀽𑀧𑀘𑀸𑀭𑀲𑁆𑀲 𑀅𑀩𑁆𑀪𑁄𑀓𑀸𑀲𑁂 𑀤𑁆𑀯𑀸𑀤𑀲𑀳𑀢𑁆𑀣𑀧𑁆𑀧𑀫𑀸𑀡𑀁, 𑀢𑀣𑀸 𑀲𑀯𑀦𑀽𑀧𑀘𑀸𑀭𑀲𑁆𑀲. 𑀲𑀘𑁂 𑀧𑀦 𑀅𑀦𑁆𑀢𑀭𑀸 𑀓𑀼𑀝𑁆𑀝𑀤𑁆𑀯𑀸𑀭𑀧𑀸𑀓𑀸𑀭𑀸𑀤𑀬𑁄 𑀳𑁄𑀦𑁆𑀢𑀺, 𑀢𑁂𑀳𑀺 𑀅𑀦𑁆𑀢𑀭𑀺𑀢𑀪𑀸𑀯𑁄 𑀤𑀲𑁆𑀲𑀦𑀽𑀧𑀘𑀸𑀭𑀸𑀢𑀺𑀓𑁆𑀓𑀫𑁄, 𑀢𑀲𑁆𑀲 𑀯𑀲𑁂𑀦 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦 𑀅𑀜𑁆𑀜𑁄 𑀓𑁄𑀘𑀺 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑀦𑀸𑀘𑀸𑀭𑀁 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀦 𑀳𑁄𑀢𑀺.

𑁨𑁭𑁭. 𑀓𑀮𑀺𑀲𑀸𑀲𑀦𑀁 𑀆𑀭𑁄𑀧𑁂𑀢𑀻𑀢𑀺 ‘‘𑀓𑀮𑀻’’𑀢𑀺 𑀓𑁄𑀥𑁄; 𑀢𑀲𑁆𑀲 𑀲𑀸𑀲𑀦𑀁 𑀆𑀭𑁄𑀧𑁂𑀢𑀺; 𑀓𑁄𑀥𑀲𑁆𑀲 𑀆𑀡𑀁 𑀆𑀭𑁄𑀧𑁂𑀢𑀺; 𑀓𑁄𑀥𑀯𑀲𑁂𑀦 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀧𑀲𑁆𑀲𑀣 𑀪𑁄 𑀇𑀫𑀲𑁆𑀲 𑀞𑀸𑀦𑀁, 𑀦𑀺𑀲𑀚𑁆𑀚𑀁 𑀆𑀮𑁄𑀓𑀺𑀢𑀁 𑀯𑀺𑀮𑁄𑀓𑀺𑀢𑀁 𑀔𑀸𑀡𑀼𑀓𑁄 𑀯𑀺𑀬 𑀢𑀺𑀝𑁆𑀞𑀢𑀺, 𑀲𑀼𑀦𑀔𑁄 𑀯𑀺𑀬 𑀦𑀺𑀲𑀻𑀤𑀢𑀺, 𑀫𑀓𑁆𑀓𑀝𑁄 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀢𑀻’’𑀢𑀺 𑀏𑀯𑀁 𑀅𑀫𑀦𑀸𑀧𑀯𑀘𑀦𑀁 𑀯𑀤𑀢𑀺 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀺𑀦𑀸𑀧𑀺 𑀉𑀩𑁆𑀩𑀸𑀴𑁆𑀳𑁄 𑀧𑀓𑁆𑀓𑀫𑁂𑀬𑁆𑀬𑀸’’𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀉𑀬𑁆𑀬𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀤𑀼𑀢𑀺𑀬𑀁.

𑁩. 𑀲𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁭𑁯. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑁋 𑀲𑀬𑀦𑀺𑀖𑀭𑁂𑀢𑀺 𑀲𑀬𑀦𑀺𑀬𑀖𑀭𑁂. 𑀬𑀢𑁄 𑀅𑀬𑁆𑀬𑀲𑁆𑀲 𑀪𑀺𑀓𑁆𑀔𑀸 𑀤𑀺𑀦𑁆𑀦𑀸𑀢𑀺 𑀬𑀲𑁆𑀫𑀸 𑀪𑀺𑀓𑁆𑀔𑀸 𑀤𑀺𑀦𑁆𑀦𑀸, 𑀬𑀁 𑀆𑀕𑀢𑁂𑀦 𑀮𑀤𑁆𑀥𑀩𑁆𑀩𑀁 𑀢𑀁 𑀯𑁄 𑀮𑀤𑁆𑀥𑀁; 𑀕𑀘𑁆𑀙𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀬𑀼𑀝𑁆𑀞𑀺𑀢𑁄𑀢𑀺 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁄; 𑀫𑁂𑀣𑀼𑀦𑀸𑀥𑀺𑀧𑁆𑀧𑀸𑀬𑁄𑀢𑀺 𑀅𑀢𑁆𑀣𑁄.

𑁨𑁮𑁦. 𑀲𑀳 𑀉𑀪𑁄𑀳𑀺 𑀚𑀦𑁂𑀳𑀻𑀢𑀺 𑀲𑀪𑁄𑀚𑀦𑀁; 𑀢𑀲𑁆𑀫𑀺𑀁 𑀲𑀪𑁄𑀚𑀦𑁂. 𑀅𑀣 𑀯𑀸 𑀲𑀪𑁄𑀚𑀦𑁂𑀢𑀺 𑀲𑀪𑁄𑀕𑁂. 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀲𑁆𑀲 𑀳𑀺 𑀧𑀼𑀭𑀺𑀲𑀲𑁆𑀲 𑀇𑀢𑁆𑀣𑀻 𑀪𑁄𑀕𑁄 𑀇𑀢𑁆𑀣𑀺𑀬𑀸 𑀘 𑀧𑀼𑀭𑀺𑀲𑁄. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 𑁋 ‘‘𑀇𑀢𑁆𑀣𑀻 𑀘𑁂𑀯 𑀳𑁄𑀢𑀺 𑀧𑀼𑀭𑀺𑀲𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀳𑀮𑁆𑀮𑀓𑁂 𑀖𑀭𑁂𑀢𑀺 𑀫𑀳𑀮𑁆𑀮𑀓𑁂 𑀲𑀬𑀦𑀺𑀖𑀭𑁂. 𑀧𑀺𑀝𑁆𑀞𑀲𑀗𑁆𑀖𑀸𑀝𑀲𑁆𑀲 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸𑀢𑀺 𑀢𑀲𑁆𑀲 𑀲𑀬𑀦𑀺𑀖𑀭𑁂 𑀕𑀩𑁆𑀪𑀲𑁆𑀲 𑀬𑁄 𑀧𑀺𑀝𑁆𑀞𑀲𑀗𑁆𑀖𑀸𑀝𑁄, 𑀢𑀲𑁆𑀲 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸; 𑀅𑀦𑁆𑀢𑁄𑀲𑀬𑀦𑀲𑁆𑀲 𑀆𑀲𑀦𑁆𑀦𑁂 𑀞𑀸𑀦𑁂 𑀦𑀺𑀲𑀻𑀤𑀢𑀻𑀢𑀺 𑀅𑀢𑁆𑀣𑁄. 𑀈𑀤𑀺𑀲𑀜𑁆𑀘 𑀲𑀬𑀦𑀺𑀖𑀭𑀁 𑀫𑀳𑀸𑀘𑀢𑀼𑀲𑁆𑀲𑀸𑀮𑀸𑀤𑀻𑀲𑀼 𑀳𑁄𑀢𑀺. 𑀧𑀺𑀝𑁆𑀞𑀺𑀯𑀁𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀇𑀫𑀺𑀦𑀸 𑀫𑀚𑁆𑀛𑀸𑀢𑀺𑀓𑁆𑀓𑀫𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀬𑀣𑀸 𑀯𑀸 𑀢𑀣𑀸 𑀯𑀸 𑀓𑀢𑀲𑁆𑀲 𑀔𑀼𑀤𑁆𑀤𑀓𑀲𑁆𑀲 𑀲𑀬𑀦𑀺𑀖𑀭𑀲𑁆𑀲 𑀫𑀚𑁆𑀛𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀦𑁆𑀢𑀺.

𑀲𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀢𑀢𑀺𑀬𑀁.

𑁨𑁮𑁪. 𑀘𑀢𑀼𑀢𑁆𑀣𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑁂𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀅𑀦𑀺𑀬𑀢𑀤𑁆𑀯𑀬𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀬𑀣𑀸 𑀘 𑀲𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁, 𑀏𑀯𑀫𑁂𑀢𑀸𑀦𑀺𑀧𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀸𑀦𑁂𑀯𑀸𑀢𑀺.

𑀭𑀳𑁄𑀧𑀝𑀺𑀘𑁆𑀙𑀦𑁆𑀦𑀲𑀺𑀓𑁆𑀔𑀸𑀧𑀤𑀁 𑀘𑀢𑀼𑀢𑁆𑀣𑀁, 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀘𑀫𑀁.

𑁬. 𑀘𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁯𑁪. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑁂 𑁋 𑀤𑁂𑀣𑀸𑀯𑀼𑀲𑁄 𑀪𑀢𑁆𑀢𑀦𑁆𑀢𑀺 𑀏𑀢𑁆𑀣 𑀢𑀁 𑀓𑀺𑀭 𑀪𑀢𑁆𑀢𑀁 𑀅𑀪𑀺𑀳𑀝𑀁 𑀅𑀳𑁄𑀲𑀺, 𑀢𑀲𑁆𑀫𑀸 𑀏𑀯𑀫𑀸𑀳𑀁𑀲𑀼. 𑀅𑀦𑀪𑀺𑀳𑀝𑁂 𑀧𑀦 𑀏𑀯𑀁 𑀯𑀢𑁆𑀢𑀼𑀁 𑀦 𑀮𑀩𑁆𑀪𑀢𑀺, 𑀧𑀬𑀼𑀢𑁆𑀢𑀯𑀸𑀘𑀸 𑀳𑁄𑀢𑀺.

𑁨𑁯𑁫. 𑀢𑁂𑀦 𑀳𑀺 𑀪𑀺𑀓𑁆𑀔𑀯𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀣𑀸𑀢𑀺 𑀇𑀤𑀁 𑀧𑀦 𑀪𑀕𑀯𑀸 𑀓𑀼𑀮𑀲𑁆𑀲 𑀲𑀤𑁆𑀥𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀆𑀳. 𑀬𑀤𑀺 ‘‘𑀪𑀸𑀚𑁂𑀢𑁆𑀯𑀸 𑀔𑀸𑀤𑀣𑀸’’𑀢𑀺 𑀯𑀤𑁂𑀬𑁆𑀬, 𑀫𑀦𑀼𑀲𑁆𑀲𑀸𑀦𑀁 𑀧𑀲𑀸𑀤𑀜𑁆𑀜𑀣𑀢𑁆𑀢𑀁 𑀲𑀺𑀬𑀸. 𑀉𑀲𑁆𑀲𑀸𑀭𑀺𑀬𑀺𑀢𑁆𑀣𑀸𑀢𑀺 𑀧𑀝𑀺𑀳𑀭𑀺𑀬𑀺𑀢𑁆𑀣; 𑀖𑀭𑀁𑀬𑁂𑀯 𑀦𑀁 𑀕𑀳𑁂𑀢𑁆𑀯𑀸 𑀅𑀕𑀫𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁯𑁮. 𑀲𑀦𑁆𑀢𑀁 𑀪𑀺𑀓𑁆𑀔𑀼𑀦𑁆𑀢𑀺 𑀏𑀢𑁆𑀣 𑀓𑀺𑀢𑁆𑀢𑀸𑀯𑀢𑀸 𑀲𑀦𑁆𑀢𑁄 𑀳𑁄𑀢𑀺, 𑀓𑀺𑀢𑁆𑀢𑀸𑀯𑀢𑀸 𑀅𑀲𑀦𑁆𑀢𑁄𑀢𑀺? 𑀅𑀦𑁆𑀢𑁄𑀯𑀺𑀳𑀸𑀭𑁂 𑀬𑀢𑁆𑀣 𑀞𑀺𑀢𑀲𑁆𑀲 𑀓𑀼𑀮𑀸𑀦𑀺 𑀧𑀬𑀺𑀭𑀼𑀧𑀸𑀲𑀦𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀢𑁄 𑀧𑀝𑁆𑀞𑀸𑀬 𑀬𑀁 𑀧𑀲𑁆𑀲𑁂 𑀯𑀸 𑀅𑀪𑀺𑀫𑀼𑀔𑁂 𑀯𑀸 𑀧𑀲𑁆𑀲𑀢𑀺, 𑀬𑀲𑁆𑀲 𑀲𑀓𑁆𑀓𑀸 𑀳𑁄𑀢𑀺 𑀧𑀓𑀢𑀺𑀯𑀘𑀦𑁂𑀦 𑀆𑀭𑁄𑀘𑁂𑀢𑀼𑀁, 𑀅𑀬𑀁 𑀲𑀦𑁆𑀢𑁄 𑀦𑀸𑀫. 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀭𑁄𑀘𑀦𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺. 𑀬𑁄 𑀳𑀺 𑀏𑀯𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑁄, 𑀲𑁄 𑀅𑀲𑀦𑁆𑀢𑁄𑀬𑁂𑀯. 𑀅𑀧𑀺𑀘 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀬𑀁 𑀧𑀲𑁆𑀲𑀢𑀺, 𑀲𑁄 𑀆𑀧𑀼𑀘𑁆𑀙𑀺𑀢𑀩𑁆𑀩𑁄. 𑀦𑁄 𑀘𑁂 𑀧𑀲𑁆𑀲𑀢𑀺, 𑀅𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀧𑀯𑀺𑀝𑁆𑀞𑁄 𑀦𑀸𑀫 𑀳𑁄𑀢𑀺.

𑁩𑁦𑁨. 𑀅𑀦𑁆𑀢𑀭𑀸𑀭𑀸𑀫𑀦𑁆𑀢𑀺 𑀅𑀦𑁆𑀢𑁄𑀕𑀸𑀫𑁂 𑀯𑀺𑀳𑀸𑀭𑁄 𑀳𑁄𑀢𑀺, 𑀢𑀁 𑀕𑀘𑁆𑀙𑀢𑀺. 𑀪𑀢𑁆𑀢𑀺𑀬𑀖𑀭𑀦𑁆𑀢𑀺 𑀦𑀺𑀫𑀦𑁆𑀢𑀺𑀢𑀖𑀭𑀁 𑀯𑀸 𑀲𑀮𑀸𑀓𑀪𑀢𑁆𑀢𑀸𑀤𑀺𑀤𑀸𑀬𑀓𑀸𑀦𑀁 𑀯𑀸 𑀖𑀭𑀁. 𑀆𑀧𑀤𑀸𑀲𑀽𑀢𑀺 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁂𑀲𑀼 𑀲𑀢𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀸𑀓𑀺𑀭𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀘𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀙𑀝𑁆𑀞𑀁.

𑁭. 𑀫𑀳𑀸𑀦𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁦𑁩. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑁂 𑁋 𑀫𑀳𑀸𑀦𑀸𑀫𑁄 𑀦𑀸𑀫 𑀪𑀕𑀯𑀢𑁄 𑀘𑀽𑀴𑀧𑀺𑀢𑀼𑀧𑀼𑀢𑁆𑀢𑁄 𑀫𑀸𑀲𑀫𑀢𑁆𑀢𑁂𑀦 𑀫𑀳𑀮𑁆𑀮𑀓𑀢𑀭𑁄 𑀤𑁆𑀯𑀻𑀲𑀼 𑀨𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑁄 𑀅𑀭𑀺𑀬𑀲𑀸𑀯𑀓𑁄. 𑀪𑁂𑀲𑀚𑁆𑀚𑀁 𑀉𑀲𑁆𑀲𑀦𑁆𑀦𑀁 𑀳𑁄𑀢𑀻𑀢𑀺 𑀯𑀚𑀢𑁄 𑀆𑀳𑀭𑀺𑀢𑁆𑀯𑀸 𑀞𑀧𑀺𑀢𑀲𑀧𑁆𑀧𑀺 𑀩𑀳𑀼 𑀳𑁄𑀢𑀺.

𑁩𑁦𑁬. 𑀲𑀸𑀤𑀺𑀢𑀩𑁆𑀩𑀸𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀭𑁄𑀕𑁄 𑀦𑀢𑁆𑀣𑀻𑀢𑀺 𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸; 𑀭𑁄𑀕𑁂 𑀲𑀢𑀺 𑀯𑀺𑀜𑁆𑀜𑀸𑀧𑁂𑀲𑁆𑀲𑀸𑀫𑀻𑀢𑀺 𑀅𑀥𑀺𑀯𑀸𑀲𑁂𑀢𑀩𑁆𑀩𑀸. 𑀏𑀢𑁆𑀢𑀓𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀧𑀯𑀸𑀭𑁂𑀫𑀻𑀢𑀺 𑀦𑀸𑀫𑀯𑀲𑁂𑀦 𑀲𑀧𑁆𑀧𑀺𑀢𑁂𑀮𑀸𑀤𑀻𑀲𑀼 𑀤𑁆𑀯𑀻𑀳𑀺 𑀢𑀻𑀳𑀺 𑀯𑀸 𑀧𑀭𑀺𑀫𑀸𑀡𑀯𑀲𑁂𑀦 𑀧𑀢𑁆𑀣𑁂𑀦 𑀦𑀸𑀴𑀺𑀬𑀸 𑀆𑀴𑁆𑀳𑀓𑁂𑀦𑀸𑀢𑀺 𑀯𑀸.𑀅𑀜𑁆𑀜𑀁 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀲𑀧𑁆𑀧𑀺𑀦𑀸 𑀧𑀯𑀸𑀭𑀺𑀢𑁄 𑀢𑁂𑀮𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀆𑀴𑁆𑀳𑀓𑁂𑀦 𑀧𑀯𑀸𑀭𑀺𑀢𑁄 𑀤𑁄𑀡𑀁. 𑀦 𑀪𑁂𑀲𑀚𑁆𑀚𑁂𑀦 𑀓𑀭𑀡𑀻𑀬𑁂𑀦𑀸𑀢𑀺 𑀫𑀺𑀲𑁆𑀲𑀓𑀪𑀢𑁆𑀢𑁂𑀦𑀧𑀺 𑀘𑁂 𑀬𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀪𑁂𑀲𑀚𑁆𑀚𑀓𑀭𑀡𑀻𑀬𑀁 𑀦𑀸𑀫 𑀳𑁄𑀢𑀺.

𑁩𑁧𑁦. 𑀧𑀯𑀸𑀭𑀺𑀢𑀸𑀦𑀦𑁆𑀢𑀺 𑀬𑁂 𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑀸𑀬 𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸; 𑀢𑁂𑀲𑀁 𑀧𑀯𑀸𑀭𑀺𑀢𑀸𑀦𑀼𑀭𑀽𑀧𑁂𑀦 𑀯𑀺𑀜𑁆𑀜𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀲𑀗𑁆𑀖𑀯𑀲𑁂𑀦 𑀧𑀯𑀸𑀭𑀺𑀢𑁂𑀲𑀼 𑀧𑀦 𑀧𑀫𑀸𑀡𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀫𑁂𑀯𑀸𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀙𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀫𑀳𑀸𑀦𑀸𑀫𑀲𑀺𑀓𑁆𑀔𑀸𑀧𑀤𑀁 𑀲𑀢𑁆𑀢𑀫𑀁.

𑁮. 𑀉𑀬𑁆𑀬𑀼𑀢𑁆𑀢𑀲𑁂𑀦𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁧𑁧. 𑀅𑀝𑁆𑀞𑀫𑁂 𑁋 𑀅𑀩𑁆𑀪𑀼𑀬𑁆𑀬𑀸𑀢𑁄𑀢𑀺 𑀅𑀪𑀺𑀉𑀬𑁆𑀬𑀸𑀢𑁄; 𑀧𑀭𑀲𑁂𑀦𑀁 𑀅𑀪𑀺𑀫𑀼𑀔𑁄 𑀕𑀫𑀺𑀲𑁆𑀲𑀸𑀫𑀻𑀢𑀺 𑀦𑀕𑀭𑀢𑁄 𑀦𑀺𑀕𑁆𑀕𑀢𑁄𑀢𑀺 𑀅𑀢𑁆𑀣𑁄. 𑀉𑀬𑁆𑀬𑀼𑀢𑁆𑀢𑀦𑁆𑀢𑀺 𑀓𑀢𑀉𑀬𑁆𑀬𑁄𑀕𑀁; 𑀕𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁩𑁧𑁪. 𑀤𑁆𑀯𑀸𑀤𑀲𑀧𑀼𑀭𑀺𑀲𑁄 𑀳𑀢𑁆𑀣𑀻𑀢𑀺 𑀘𑀢𑁆𑀢𑀸𑀭𑁄 𑀆𑀭𑁄𑀳𑀓𑀸 𑀏𑀓𑁂𑀓𑀧𑀸𑀤𑀭𑀓𑁆𑀔𑀓𑀸 𑀤𑁆𑀯𑁂 𑀤𑁆𑀯𑁂𑀢𑀺 𑀏𑀯𑀁 𑀤𑁆𑀯𑀸𑀤𑀲𑀧𑀼𑀭𑀺𑀲𑁄 𑀳𑁄𑀢𑀺. 𑀢𑀺𑀧𑀼𑀭𑀺𑀲𑁄 𑀅𑀲𑁆𑀲𑁄𑀢𑀺 𑀏𑀓𑁄 𑀆𑀭𑁄𑀳𑀓𑁄 𑀤𑁆𑀯𑁂 𑀧𑀸𑀤𑀭𑀓𑁆𑀔𑀓𑀸𑀢𑀺 𑀏𑀯𑀁 𑀢𑀺𑀧𑀼𑀭𑀺𑀲𑁄 𑀳𑁄𑀢𑀺. 𑀘𑀢𑀼𑀧𑀼𑀭𑀺𑀲𑁄 𑀭𑀣𑁄𑀢𑀺 𑀏𑀓𑁄 𑀲𑀸𑀭𑀣𑀺 𑀏𑀓𑁄 𑀬𑁄𑀥𑁄 𑀤𑁆𑀯𑁂 𑀆𑀡𑀺𑀭𑀓𑁆𑀔𑀓𑀸𑀢𑀺 𑀏𑀯𑀁 𑀘𑀢𑀼𑀧𑀼𑀭𑀺𑀲𑁄 𑀳𑁄𑀢𑀺. 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀸 𑀲𑀭𑀳𑀢𑁆𑀣𑀸𑀢𑀺 𑀆𑀯𑀼𑀥𑀳𑀢𑁆𑀣𑀸 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀸𑀢𑀺 𑀅𑀬𑀁 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀸 𑀲𑁂𑀦𑀸 𑀦𑀸𑀫. 𑀈𑀤𑀺𑀲𑀁 𑀲𑁂𑀦𑀁 𑀤𑀲𑁆𑀲𑀦𑀸𑀬 𑀕𑀘𑁆𑀙𑀢𑁄 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀁. 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀺𑀚𑀳𑀺𑀢𑁆𑀯𑀸𑀢𑀺 𑀓𑁂𑀦𑀘𑀺 𑀅𑀦𑁆𑀢𑀭𑀺𑀢𑀸 𑀯𑀸 𑀦𑀺𑀦𑁆𑀦𑀁 𑀑𑀭𑀼𑀴𑁆𑀳𑀸 𑀯𑀸 𑀦 𑀤𑀺𑀲𑁆𑀲𑀢𑀺; 𑀇𑀥 𑀞𑀢𑁆𑀯𑀸 𑀦 𑀲𑀓𑁆𑀓𑀸 𑀤𑀝𑁆𑀞𑀼𑀦𑁆𑀢𑀺 𑀅𑀜𑁆𑀜𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀲𑁆𑀲𑀢𑁄 𑀧𑀬𑁄𑀕𑁂 𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄.

𑁩𑁧𑁫. 𑀏𑀓𑀫𑁂𑀓𑀦𑁆𑀢𑀺 𑀳𑀢𑁆𑀣𑀺𑀆𑀤𑀻𑀲𑀼 𑀘𑀢𑀽𑀲𑀼 𑀅𑀗𑁆𑀕𑁂𑀲𑀼 𑀏𑀓𑀫𑁂𑀓𑀁; 𑀅𑀦𑁆𑀢𑀫𑀲𑁄 𑀏𑀓𑀧𑀼𑀭𑀺𑀲𑀸𑀭𑀼𑀴𑁆𑀳𑀓𑀳𑀢𑁆𑀣𑀺𑀫𑁆𑀧𑀺 𑀏𑀓𑀫𑁆𑀧𑀺 𑀲𑀭𑀳𑀢𑁆𑀣𑀁 𑀧𑀼𑀭𑀺𑀲𑀁. 𑀅𑀦𑀼𑀬𑁆𑀬𑀼𑀢𑁆𑀢𑀸 𑀦𑀸𑀫 𑀭𑀸𑀚𑀸 𑀉𑀬𑁆𑀬𑀸𑀦𑀁 𑀯𑀸 𑀦𑀤𑀺𑀁 𑀯𑀸 𑀕𑀘𑁆𑀙𑀢𑀺; 𑀏𑀯𑀁 𑀅𑀦𑀼𑀬𑁆𑀬𑀼𑀢𑁆𑀢𑀸 𑀳𑁄𑀢𑀺.

𑁩𑁧𑁬. 𑀆𑀧𑀤𑀸𑀲𑀽𑀢𑀺 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁂𑀲𑀼 𑀲𑀢𑀺 𑀏𑀢𑁆𑀣 𑀕𑀢𑁄 𑀫𑀼𑀜𑁆𑀘𑀺𑀲𑁆𑀲𑀸𑀫𑀻𑀢𑀺 𑀕𑀘𑁆𑀙𑀢𑁄 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀉𑀬𑁆𑀬𑀼𑀢𑁆𑀢𑀲𑁂𑀦𑀸𑀲𑀺𑀓𑁆𑀔𑀸𑀧𑀤𑀁 𑀅𑀝𑁆𑀞𑀫𑀁.

𑁯. 𑀲𑁂𑀦𑀸𑀯𑀸𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁧𑁯. 𑀦𑀯𑀫𑁂 𑁋 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀲𑁂𑀦𑀸𑀬 𑀯𑀲𑀢𑀻𑀢𑀺 𑀢𑀺𑀝𑁆𑀞𑀢𑀼 𑀯𑀸 𑀦𑀺𑀲𑀻𑀤𑀢𑀼 𑀯𑀸 𑀲𑀬𑀢𑀼 𑀯𑀸 𑀲𑀘𑁂𑀧𑀺 𑀆𑀓𑀸𑀲𑁂 𑀇𑀤𑁆𑀥𑀺𑀬𑀸 𑀓𑀜𑁆𑀘𑀺 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀢𑀺, 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀲𑁂𑀦𑀸 𑀯𑀸 𑀧𑀝𑀺𑀲𑁂𑀦𑀸𑀬 𑀭𑀼𑀤𑁆𑀥𑀸 𑀳𑁄𑀢𑀻𑀢𑀺 𑀬𑀣𑀸 𑀲𑀜𑁆𑀘𑀸𑀭𑁄 𑀙𑀺𑀚𑁆𑀚𑀢𑀺; 𑀏𑀯𑀁 𑀭𑀼𑀤𑁆𑀥𑀸 𑀳𑁄𑀢𑀺. 𑀧𑀮𑀺𑀩𑀼𑀤𑁆𑀥𑁄𑀢𑀺 𑀯𑁂𑀭𑀺𑀓𑁂𑀦 𑀯𑀸 𑀇𑀲𑁆𑀲𑀭𑁂𑀦 𑀯𑀸 𑀭𑀼𑀤𑁆𑀥𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀲𑁂𑀦𑀸𑀯𑀸𑀲𑀲𑀺𑀓𑁆𑀔𑀸𑀧𑀤𑀁 𑀦𑀯𑀫𑀁.

𑁧𑁦. 𑀉𑀬𑁆𑀬𑁄𑀥𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁨𑁨. 𑀤𑀲𑀫𑁂 𑁋 𑀉𑀕𑁆𑀕𑀦𑁆𑀢𑁆𑀯𑀸 𑀉𑀕𑁆𑀕𑀦𑁆𑀢𑁆𑀯𑀸 𑀏𑀢𑁆𑀣 𑀬𑀼𑀚𑁆𑀛𑀦𑁆𑀢𑀻𑀢𑀺 𑀉𑀬𑁆𑀬𑁄𑀥𑀺𑀓𑀁; 𑀲𑀫𑁆𑀧𑀳𑀸𑀭𑀝𑁆𑀞𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀩𑀮𑀲𑁆𑀲 𑀅𑀕𑁆𑀕𑀁 𑀚𑀸𑀦𑀦𑁆𑀢𑀺 𑀏𑀢𑁆𑀣𑀸𑀢𑀺 𑀩𑀮𑀕𑁆𑀕𑀁; 𑀩𑀮𑀕𑀡𑀦𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀦𑀸𑀬 𑀯𑀺𑀬𑀽𑀳𑀁 𑀲𑁂𑀦𑀸𑀩𑁆𑀬𑀽𑀳𑀁; 𑀲𑁂𑀦𑀸𑀦𑀺𑀯𑁂𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀬𑁄 𑀳𑀢𑁆𑀣𑀻 𑀧𑀘𑁆𑀙𑀺𑀫𑀁 𑀳𑀢𑁆𑀣𑀸𑀦𑀻𑀓𑀦𑁆𑀢𑀺 𑀬𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄 𑀤𑁆𑀯𑀸𑀤𑀲𑀧𑀼𑀭𑀺𑀲𑁄 𑀳𑀢𑁆𑀣𑀻𑀢𑀺 𑀢𑁂𑀦 𑀳𑀢𑁆𑀣𑀺𑀦𑀸 𑀢𑀬𑁄 𑀳𑀢𑁆𑀣𑀻. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀉𑀬𑁆𑀬𑀼𑀢𑁆𑀢𑀲𑁂𑀦𑀸𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀻𑀢𑀺.

𑀉𑀬𑁆𑀬𑁄𑀥𑀺𑀓𑀲𑀺𑀓𑁆𑀔𑀸𑀧𑀤𑀁 𑀤𑀲𑀫𑀁.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀅𑀘𑁂𑀮𑀓𑀯𑀕𑁆𑀕𑁄 𑀧𑀜𑁆𑀘𑀫𑁄.