𑁬. 𑀲𑀼𑀭𑀸𑀧𑀸𑀦𑀯𑀕𑁆𑀕𑁄

𑁧. 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁨𑁬. 𑀲𑀼𑀭𑀸𑀧𑀸𑀦𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀪𑀤𑁆𑀤𑀯𑀢𑀺𑀓𑀸𑀢𑀺 𑀏𑀓𑁄 𑀕𑀸𑀫𑁄, 𑀲𑁄 𑀪𑀤𑁆𑀤𑀺𑀓𑀸𑀬 𑀯𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀏𑀢𑀁 𑀦𑀸𑀫 𑀮𑀪𑀺. 𑀧𑀣𑀸𑀯𑀺𑀦𑁄𑀢𑀺 𑀅𑀤𑁆𑀥𑀺𑀓𑀸. 𑀢𑁂𑀚𑀲𑀸 𑀢𑁂𑀚𑀦𑁆𑀢𑀺 𑀅𑀢𑁆𑀢𑀦𑁄 𑀢𑁂𑀚𑀲𑀸 𑀆𑀦𑀼𑀪𑀸𑀯𑁂𑀦 𑀦𑀸𑀕𑀲𑁆𑀲 𑀢𑁂𑀚𑀁. 𑀓𑀸𑀧𑁄𑀢𑀺𑀓𑀸𑀢𑀺 𑀓𑀧𑁄𑀢𑀧𑀸𑀤𑀲𑀫𑀯𑀡𑁆𑀡𑀭𑀢𑁆𑀢𑁄𑀪𑀸𑀲𑀸. 𑀧𑀲𑀦𑁆𑀦𑀸𑀢𑀺 𑀲𑀼𑀭𑀸𑀫𑀡𑁆𑀟𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀦𑀦𑀼𑀘𑁆𑀙𑀯𑀺𑀬𑀁 𑀪𑀺𑀓𑁆𑀔𑀯𑁂 𑀲𑀸𑀕𑀢𑀲𑁆𑀲𑀸𑀢𑀺 𑀧𑀜𑁆𑀘𑀸𑀪𑀺𑀜𑁆𑀜𑀲𑁆𑀲 𑀲𑀢𑁄 𑀫𑀚𑁆𑀚𑀧𑀸𑀦𑀁 𑀦𑀸𑀫 𑀦 𑀅𑀦𑀼𑀘𑁆𑀙𑀯𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁨𑁮. 𑀧𑀼𑀧𑁆𑀨𑀸𑀲𑀯𑁄 𑀦𑀸𑀫 𑀫𑀥𑀼𑀓𑀧𑀼𑀧𑁆𑀨𑀸𑀤𑀻𑀦𑀁 𑀭𑀲𑁂𑀦 𑀓𑀢𑁄. 𑀨𑀮𑀸𑀲𑀯𑁄 𑀦𑀸𑀫 𑀫𑀼𑀤𑁆𑀤𑀺𑀓𑀨𑀮𑀸𑀤𑀻𑀦𑀺 𑀫𑀤𑁆𑀤𑀺𑀢𑁆𑀯𑀸 𑀢𑁂𑀲𑀁 𑀭𑀲𑁂𑀦 𑀓𑀢𑁄. 𑀫𑀥𑁆𑀯𑀸𑀲𑀯𑁄 𑀦𑀸𑀫 𑀫𑀼𑀤𑁆𑀤𑀺𑀓𑀸𑀦𑀁 𑀚𑀸𑀢𑀺𑀭𑀲𑁂𑀦 𑀓𑀢𑁄; 𑀫𑀓𑁆𑀔𑀺𑀓𑀫𑀥𑀼𑀦𑀸𑀧𑀺 𑀓𑀭𑀺𑀬𑀢𑀻𑀢𑀺 𑀯𑀤𑀦𑁆𑀢𑀺. 𑀕𑀼𑀴𑀸𑀲𑀯𑁄 𑀦𑀸𑀫 𑀉𑀘𑁆𑀙𑀼𑀭𑀲𑀸𑀤𑀻𑀳𑀺 𑀓𑀭𑀺𑀬𑀢𑀺. 𑀲𑀼𑀭𑀸 𑀦𑀸𑀫 𑀧𑀺𑀝𑁆𑀞𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸; 𑀦𑀸𑀴𑀺𑀓𑁂𑀭𑀸𑀤𑀻𑀦𑀫𑁆𑀧𑀺 𑀭𑀲𑁂𑀦 𑀓𑀢𑀸 𑀲𑀼𑀭𑀸𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀢𑀲𑁆𑀲𑀸𑀬𑁂𑀯 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸𑀬 𑀫𑀡𑁆𑀟𑁂 𑀕𑀳𑀺𑀢𑁂 𑀫𑁂𑀭𑀬𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀯𑀤𑀦𑁆𑀢𑀺. 𑀅𑀦𑁆𑀢𑀫𑀲𑁄 𑀓𑀼𑀲𑀕𑁆𑀕𑁂𑀦𑀧𑀺 𑀧𑀺𑀯𑀢𑀻𑀢𑀺 𑀏𑀢𑀁 𑀲𑀼𑀭𑀁 𑀯𑀸 𑀫𑁂𑀭𑀬𑀁 𑀯𑀸 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀓𑀼𑀲𑀕𑁆𑀕𑁂𑀦 𑀧𑀺𑀯𑀢𑁄𑀧𑀺 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀏𑀓𑁂𑀦 𑀧𑀦 𑀧𑀬𑁄𑀕𑁂𑀦 𑀩𑀳𑀼𑀫𑁆𑀧𑀺 𑀧𑀺𑀯𑀦𑁆𑀢𑀲𑁆𑀲 𑀏𑀓𑀸 𑀆𑀧𑀢𑁆𑀢𑀺. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀺𑀯𑀢𑁄 𑀧𑀬𑁄𑀕𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄.

𑁩𑁨𑁯. 𑀅𑀫𑀚𑁆𑀚𑀜𑁆𑀘 𑀳𑁄𑀢𑀺 𑀫𑀚𑁆𑀚𑀯𑀡𑁆𑀡𑀁 𑀫𑀚𑁆𑀚𑀕𑀦𑁆𑀥𑀁 𑀫𑀚𑁆𑀚𑀭𑀲𑀦𑁆𑀢𑀺 𑀮𑁄𑀡𑀲𑁄𑀯𑀻𑀭𑀓𑀁 𑀯𑀸 𑀲𑀼𑀢𑁆𑀢𑀁 𑀯𑀸 𑀳𑁄𑀢𑀺. 𑀲𑀽𑀧𑀲𑀫𑁆𑀧𑀸𑀓𑁂𑀢𑀺 𑀯𑀸𑀲𑀕𑀸𑀳𑀸𑀧𑀦𑀢𑁆𑀣𑀁 𑀈𑀲𑀓𑀁 𑀫𑀚𑁆𑀚𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀽𑀧𑀁 𑀧𑀘𑀦𑁆𑀢𑀺, 𑀢𑀲𑁆𑀫𑀺𑀁 𑀅𑀦𑀸𑀧𑀢𑁆𑀢𑀺. 𑀫𑀁𑀲𑀲𑀫𑁆𑀧𑀸𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀮𑀁 𑀧𑀦 𑀯𑀸𑀢𑀪𑁂𑀲𑀚𑁆𑀚𑀢𑁆𑀣𑀁 𑀫𑀚𑁆𑀚𑁂𑀦 𑀲𑀤𑁆𑀥𑀺𑀁 𑀧𑀘𑀦𑁆𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀅𑀦𑀢𑀺𑀓𑁆𑀔𑀺𑀢𑁆𑀢𑀫𑀚𑁆𑀚𑁂𑀬𑁂𑀯 𑀅𑀦𑀸𑀧𑀢𑁆𑀢𑀺, 𑀬𑀁 𑀧𑀦 𑀅𑀢𑀺𑀓𑁆𑀔𑀺𑀢𑁆𑀢𑀫𑀚𑁆𑀚𑀁 𑀳𑁄𑀢𑀺, 𑀏𑀢𑁆𑀣 𑀫𑀚𑁆𑀚𑀲𑁆𑀲 𑀯𑀡𑁆𑀡𑀕𑀦𑁆𑀥𑀭𑀲𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀢𑀲𑁆𑀫𑀺𑀁 𑀆𑀧𑀢𑁆𑀢𑀺𑀬𑁂𑀯. 𑀅𑀫𑀚𑁆𑀚𑀁 𑀅𑀭𑀺𑀝𑁆𑀞𑀦𑁆𑀢𑀺 𑀬𑁄 𑀅𑀭𑀺𑀝𑁆𑀞𑁄 𑀫𑀚𑁆𑀚𑀁 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀦𑀸𑀧𑀢𑁆𑀢𑀺. 𑀆𑀫𑀮𑀓𑀸𑀤𑀻𑀦𑀁𑀬𑁂𑀯 𑀓𑀺𑀭 𑀭𑀲𑁂𑀦 𑀅𑀭𑀺𑀝𑁆𑀞𑀁 𑀓𑀭𑁄𑀦𑁆𑀢𑀺, 𑀲𑁄 𑀫𑀚𑁆𑀚𑀯𑀡𑁆𑀡𑀕𑀦𑁆𑀥𑀭𑀲𑁄𑀬𑁂𑀯 𑀳𑁄𑀢𑀺, 𑀦 𑀘 𑀫𑀚𑁆𑀚𑀁; 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀬𑁄 𑀧𑀦 𑀲𑀫𑁆𑀪𑀸𑀭𑀧𑀓𑁆𑀔𑀺𑀢𑁆𑀢𑁄, 𑀲𑁄 𑀫𑀚𑁆𑀚𑀁 𑀳𑁄𑀢𑀺, 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀦 𑀯𑀝𑁆𑀝𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺. 𑀯𑀢𑁆𑀣𑀼𑀅𑀚𑀸𑀦𑀦𑀢𑀸𑀬 𑀘𑁂𑀢𑁆𑀣 𑀅𑀘𑀺𑀢𑁆𑀢𑀓𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀅𑀓𑀼𑀲𑀮𑁂𑀦𑁂𑀯 𑀧𑀸𑀢𑀩𑁆𑀩𑀢𑀸𑀬 𑀮𑁄𑀓𑀯𑀚𑁆𑀚𑀢𑀸𑀢𑀺.

𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀁.

𑁨. 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁩𑁦. 𑀤𑀼𑀢𑀺𑀬𑁂 𑁋 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁂𑀦𑀸𑀢𑀺 𑀅𑀗𑁆𑀕𑀼𑀮𑀻𑀳𑀺 𑀉𑀧𑀓𑀘𑁆𑀙𑀓𑀸𑀤𑀺𑀖𑀝𑁆𑀝𑀦𑀁 𑀯𑀼𑀘𑁆𑀘𑀢𑀺. 𑀉𑀢𑁆𑀢𑀲𑀦𑁆𑀢𑁄𑀢𑀺 𑀅𑀢𑀺𑀳𑀸𑀲𑁂𑀦 𑀓𑀺𑀮𑀫𑀦𑁆𑀢𑁄. 𑀅𑀦𑀲𑁆𑀲𑀸𑀲𑀓𑁄𑀢𑀺 𑀉𑀧𑀘𑁆𑀙𑀺𑀦𑁆𑀦𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑀜𑁆𑀘𑀸𑀭𑁄 𑀳𑀼𑀢𑁆𑀯𑀸. 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀓𑀸𑀬𑁂𑀦 𑀓𑀸𑀬𑀦𑁆𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼𑀦𑀻𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀞𑀺𑀢𑀸, 𑀢𑀫𑁆𑀧𑀺 𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑁂𑀦 𑀨𑀼𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀦𑁆𑀢𑀺.

𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑀲𑀺𑀓𑁆𑀔𑀸𑀧𑀤𑀁 𑀤𑀼𑀢𑀺𑀬𑀁.

𑁩. 𑀳𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁩𑁫. 𑀢𑀢𑀺𑀬𑁂 𑁋 𑀅𑀧𑁆𑀧𑀓𑀢𑀜𑁆𑀜𑀼𑀦𑁄𑀢𑀺 𑀬𑀁 𑀪𑀕𑀯𑀢𑀸 𑀧𑀓𑀢𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀦 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁩𑁬. 𑀉𑀤𑀓𑁂 𑀳𑀲𑀥𑀫𑁆𑀫𑁂𑀢𑀺 𑀉𑀤𑀓𑀓𑀻𑀴𑀺𑀓𑀸 𑀯𑀼𑀘𑁆𑀘𑀢𑀺. 𑀉𑀧𑀭𑀺𑀕𑁄𑀧𑁆𑀨𑀓𑁂𑀢𑀺 𑀕𑁄𑀧𑁆𑀨𑀓𑀸𑀦𑀁 𑀉𑀧𑀭𑀺𑀪𑀸𑀕𑀧𑁆𑀧𑀫𑀸𑀡𑁂. 𑀳𑀲𑀸𑀥𑀺𑀧𑁆𑀧𑀸𑀬𑁄𑀢𑀺 𑀓𑀻𑀴𑀸𑀥𑀺𑀧𑁆𑀧𑀸𑀬𑁄. 𑀦𑀺𑀫𑀼𑀚𑁆𑀚𑀢𑀺 𑀯𑀸𑀢𑀺𑀆𑀤𑀻𑀲𑀼 𑀦𑀺𑀫𑀼𑀚𑁆𑀚𑀦𑀢𑁆𑀣𑀸𑀬 𑀑𑀭𑁄𑀳𑀦𑁆𑀢𑀲𑁆𑀲 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀁. 𑀦𑀺𑀫𑀼𑀚𑁆𑀚𑀦𑀼𑀫𑁆𑀫𑀼𑀚𑁆𑀚𑀦𑁂𑀲𑀼 𑀧𑀬𑁄𑀕𑁂 𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀅𑀦𑁆𑀢𑁄𑀉𑀤𑀓𑁂𑀬𑁂𑀯 𑀕𑀘𑁆𑀙𑀦𑁆𑀢𑀲𑁆𑀲 𑀳𑀢𑁆𑀣𑀯𑀸𑀭𑀧𑀤𑀯𑀸𑀭𑁂𑀲𑀼 𑀲𑀩𑁆𑀩𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀮𑀯𑀢𑀻𑀢𑀺 𑀢𑀭𑀢𑀺. 𑀳𑀢𑁆𑀣𑁂𑀳𑀺 𑀢𑀭𑀦𑁆𑀢𑀲𑁆𑀲 𑀳𑀢𑁆𑀣𑀯𑀸𑀭𑁂 𑀳𑀢𑁆𑀣𑀯𑀸𑀭𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀸𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀦 𑀬𑁂𑀦 𑀅𑀗𑁆𑀕𑁂𑀦 𑀢𑀭𑀢𑀺, 𑀢𑀲𑁆𑀲 𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀻𑀭𑀢𑁄 𑀯𑀸 𑀭𑀼𑀓𑁆𑀔𑀢𑁄 𑀯𑀸 𑀉𑀤𑀓𑁂 𑀧𑀢𑀢𑀺, 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀦𑀸𑀯𑀸𑀬 𑀓𑀻𑀴𑀢𑀻𑀢𑀺 𑀨𑀺𑀬𑀸𑀭𑀺𑀢𑁆𑀢𑀸𑀤𑀻𑀳𑀺 𑀦𑀸𑀯𑀁 𑀧𑀸𑀚𑁂𑀦𑁆𑀢𑁄 𑀯𑀸 𑀢𑀻𑀭𑁂 𑀉𑀲𑁆𑀲𑀸𑀭𑁂𑀦𑁆𑀢𑁄 𑀯𑀸 𑀦𑀸𑀯𑀸𑀬 𑀓𑀻𑀴𑀢𑀺, 𑀤𑀼𑀓𑁆𑀓𑀝𑀁.

𑀳𑀢𑁆𑀣𑁂𑀦 𑀯𑀸𑀢𑀺𑀆𑀤𑀻𑀲𑀼𑀧𑀺 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀓𑁂𑀘𑀺 𑀳𑀢𑁆𑀣𑁂𑀦 𑀉𑀤𑀓𑁂 𑀔𑀺𑀢𑁆𑀢𑀸𑀬 𑀓𑀣𑀮𑀸𑀬 𑀧𑀢𑀦𑀼𑀧𑁆𑀧𑀢𑀦𑀯𑀸𑀭𑁂𑀲𑀼 𑀤𑀼𑀓𑁆𑀓𑀝𑀁 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣 𑀳𑀺 𑀏𑀓𑀧𑀬𑁄𑀕𑀢𑁆𑀢𑀸 𑀏𑀓𑀫𑁂𑀯 𑀤𑀼𑀓𑁆𑀓𑀝𑀁, 𑀅𑀧𑀺𑀘 𑀉𑀧𑀭𑀺𑀕𑁄𑀧𑁆𑀨𑀓𑁂 𑀯𑀼𑀢𑁆𑀢𑀸𑀦𑀺 𑀉𑀫𑁆𑀫𑀼𑀚𑁆𑀚𑀦𑀸𑀤𑀻𑀦𑀺 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀦 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀯𑀸 𑀅𑀦𑁄𑀢𑀭𑀺𑀢𑁆𑀯𑀸 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀁 𑀉𑀤𑀓𑀁 𑀅𑀦𑁆𑀢𑀫𑀲𑁄 𑀩𑀺𑀦𑁆𑀤𑀼𑀁 𑀕𑀳𑁂𑀢𑁆𑀯𑀸 𑀔𑀺𑀧𑀦𑀓𑀻𑀴𑀸𑀬𑀧𑀺 𑀓𑀻𑀴𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯, 𑀅𑀢𑁆𑀣𑀚𑁄𑀢𑀓𑀁 𑀧𑀦 𑀅𑀓𑁆𑀔𑀭𑀁 𑀮𑀺𑀔𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀳𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀁 𑀢𑀢𑀺𑀬𑀁.

𑁪. 𑀅𑀦𑀸𑀤𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁪𑁨. 𑀘𑀢𑀼𑀢𑁆𑀣𑁂 𑁋 𑀓𑀣𑀸𑀬𑀁 𑀦𑀲𑁆𑀲𑁂𑀬𑁆𑀬𑀸𑀢𑀺 𑀓𑀣𑀁 𑀅𑀬𑀁 𑀥𑀫𑁆𑀫𑁄 𑀢𑀦𑁆𑀢𑀺 𑀧𑀯𑁂𑀡𑀻 𑀦𑀲𑁆𑀲𑁂𑀬𑁆𑀬. 𑀢𑀁 𑀯𑀸 𑀦 𑀲𑀺𑀓𑁆𑀔𑀺𑀢𑀼𑀓𑀸𑀫𑁄𑀢𑀺 𑀬𑁂𑀦 𑀧𑀜𑁆𑀜𑀢𑁆𑀢𑁂𑀦 𑀯𑀼𑀘𑁆𑀘𑀢𑀺, 𑀢𑀁 𑀧𑀜𑁆𑀜𑀢𑁆𑀢𑀁 𑀦 𑀲𑀺𑀓𑁆𑀔𑀺𑀢𑀼𑀓𑀸𑀫𑁄. 𑀅𑀧𑀜𑁆𑀜𑀢𑁆𑀢𑁂𑀦𑀸𑀢𑀺 𑀲𑀼𑀢𑁆𑀢𑁂 𑀯𑀸 𑀅𑀪𑀺𑀥𑀫𑁆𑀫𑁂 𑀯𑀸 𑀆𑀕𑀢𑁂𑀦.

𑁩𑁪𑁪. 𑀏𑀯𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀸𑀦𑀁 𑀉𑀕𑁆𑀕𑀳𑁄𑀢𑀺 𑀏𑀢𑁆𑀣 𑀕𑀸𑀭𑀬𑁆𑀳𑁄 𑀆𑀘𑀭𑀺𑀬𑀼𑀕𑁆𑀕𑀳𑁄 𑀦 𑀕𑀳𑁂𑀢𑀩𑁆𑀩𑁄; 𑀧𑀯𑁂𑀡𑀺𑀬𑀸 𑀆𑀕𑀢𑁄 𑀆𑀘𑀭𑀺𑀬𑀼𑀕𑁆𑀕𑀳𑁄𑀯 𑀕𑀳𑁂𑀢𑀩𑁆𑀩𑁄. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀮𑁄𑀓𑀯𑀚𑁆𑀚𑁂 𑀆𑀘𑀭𑀺𑀬𑀼𑀕𑁆𑀕𑀳𑁄 𑀦 𑀯𑀝𑁆𑀝𑀢𑀺, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂 𑀧𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 ‘‘𑀲𑀼𑀢𑁆𑀢𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀜𑁆𑀘 𑀉𑀕𑁆𑀕𑀳𑀺𑀢𑀓𑀸𑀦𑀁𑀬𑁂𑀯 𑀆𑀘𑀭𑀺𑀬𑀸𑀦𑀁 𑀉𑀕𑁆𑀕𑀳𑁄 𑀧𑀫𑀸𑀡𑀁, 𑀅𑀚𑀸𑀦𑀦𑁆𑀢𑀸𑀦𑀁 𑀓𑀣𑀸 𑀅𑀧𑁆𑀧𑀫𑀸𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀲𑀩𑁆𑀩𑀁 𑀧𑀯𑁂𑀡𑀺𑀬𑀸 𑀆𑀕𑀢𑁂𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀅𑀦𑀸𑀤𑀭𑀺𑀬𑀲𑀺𑀓𑁆𑀔𑀸𑀧𑀤𑀁 𑀘𑀢𑀼𑀢𑁆𑀣𑀁.

𑁫. 𑀪𑀺𑀁𑀲𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁪𑁫. 𑀧𑀜𑁆𑀘𑀫𑁂 𑁋 𑀭𑀽𑀧𑀽𑀧𑀳𑀸𑀭𑀸𑀤𑀬𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀦𑀸𑀤𑀭𑀺𑀬𑀲𑀤𑀺𑀲𑀸𑀦𑁂𑀯𑀸𑀢𑀺.

𑀪𑀺𑀁𑀲𑀸𑀧𑀦𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀘𑀫𑀁.

𑁬. 𑀚𑁄𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁫𑁦. 𑀙𑀝𑁆𑀞𑁂 𑁋 𑀪𑀕𑁆𑀕𑀸𑀢𑀺 𑀚𑀦𑀧𑀤𑀲𑁆𑀲 𑀦𑀸𑀫𑀁. 𑀲𑀁𑀲𑀼𑀫𑀸𑀭𑀕𑀺𑀭𑀦𑁆𑀢𑀺 𑀦𑀕𑀭𑀲𑁆𑀲. 𑀪𑁂𑀲𑀓𑀴𑀸𑀯𑀦𑀦𑁆𑀢𑀺 𑀢𑀦𑁆𑀦𑀺𑀲𑁆𑀲𑀺𑀢𑀯𑀦𑀲𑁆𑀲. 𑀢𑀁 𑀧𑀦 𑀫𑀺𑀕𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬 𑀤𑀺𑀦𑁆𑀦𑀢𑁆𑀢𑀸 𑀫𑀺𑀕𑀤𑀸𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀸𑀤𑀳𑀺𑀢𑁆𑀯𑀸𑀢𑀺 𑀚𑀸𑀮𑁂𑀢𑁆𑀯𑀸. 𑀧𑀭𑀺𑀧𑀸𑀢𑁂𑀲𑀻𑀢𑀺 𑀅𑀦𑀼𑀩𑀦𑁆𑀥𑀺.

𑁩𑁫𑁨. 𑀧𑀤𑀻𑀧𑁂𑀧𑀻𑀢𑀺 𑀧𑀤𑀻𑀧𑀼𑀚𑁆𑀚𑀮𑀦𑁂𑀧𑀺. 𑀚𑁄𑀢𑀺𑀓𑁂𑀧𑀻𑀢𑀺 𑀧𑀢𑁆𑀢𑀧𑀘𑀦𑀲𑁂𑀤𑀓𑀫𑁆𑀫𑀸𑀤𑀻𑀲𑀼 𑀚𑁄𑀢𑀺𑀓𑀭𑀡𑁂. 𑀢𑀣𑀸𑀭𑀽𑀧𑀧𑀘𑁆𑀘𑀬𑀸𑀢𑀺 𑀧𑀤𑀻𑀧𑀸𑀤𑀺𑀧𑀘𑁆𑀘𑀬𑀸.

𑁩𑁫𑁪-𑁫. 𑀲𑀬𑀁 𑀲𑀫𑀸𑀤𑀳𑀢𑀻𑀢𑀺 𑀏𑀢𑁆𑀣 𑀚𑁄𑀢𑀺𑀁 𑀲𑀫𑀸𑀤𑀳𑀺𑀢𑀼𑀓𑀸𑀫𑀢𑀸𑀬 𑀅𑀭𑀡𑀺𑀲𑀡𑁆𑀞𑀧𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀚𑀸𑀮𑀸 𑀦 𑀉𑀝𑁆𑀞𑀳𑀢𑀺, 𑀢𑀸𑀯 𑀲𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁. 𑀧𑀝𑀺𑀮𑀸𑀢𑀁 𑀉𑀓𑁆𑀔𑀺𑀧𑀢𑀻𑀢𑀺 𑀤𑀬𑁆𑀳𑀫𑀸𑀦𑀁 𑀅𑀮𑀸𑀢𑀁 𑀧𑀢𑀺𑀢𑀁 𑀉𑀓𑁆𑀔𑀺𑀧𑀢𑀺, 𑀧𑀼𑀦 𑀬𑀣𑀸𑀞𑀸𑀦𑁂 𑀞𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀯𑀺𑀚𑁆𑀛𑀸𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀔𑀺𑀧𑀦𑁆𑀢𑀲𑁆𑀲𑁂𑀯 𑀤𑀼𑀓𑁆𑀓𑀝𑀁, 𑀯𑀺𑀚𑁆𑀛𑀸𑀢𑀁 𑀧𑀼𑀦 𑀚𑀸𑀮𑀸𑀧𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.

𑁩𑁫𑁬. 𑀢𑀣𑀸𑀭𑀽𑀧𑀧𑀘𑁆𑀘𑀬𑀸𑀢𑀺 𑀞𑀧𑁂𑀢𑁆𑀯𑀸 𑀧𑀤𑀻𑀧𑀸𑀤𑀻𑀦𑀺 𑀅𑀜𑁆𑀜𑁂𑀦𑀧𑀺 𑀢𑀣𑀸𑀭𑀽𑀧𑁂𑀦 𑀧𑀘𑁆𑀘𑀬𑁂𑀦 𑀲𑀫𑀸𑀤𑀳𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀆𑀧𑀤𑀸𑀲𑀽𑀢𑀺 𑀤𑀼𑀝𑁆𑀞𑀯𑀸𑀴𑀫𑀺𑀕𑀅𑀫𑀦𑀼𑀲𑁆𑀲𑁂𑀳𑀺 𑀉𑀧𑀤𑁆𑀤𑀯𑁄 𑀳𑁄𑀢𑀺, 𑀢𑀢𑁆𑀣 𑀲𑀫𑀸𑀤𑀳𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀙𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀚𑁄𑀢𑀺𑀲𑀺𑀓𑁆𑀔𑀸𑀧𑀤𑀁 𑀙𑀝𑁆𑀞𑀁.

𑁭. 𑀦𑀳𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁬𑁪. 𑀲𑀢𑁆𑀢𑀫𑁂 𑁋 𑀘𑀼𑀡𑁆𑀡𑁂𑀦 𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸𑀢𑀺 𑀏𑀢𑁆𑀣 𑀘𑀼𑀡𑁆𑀡𑀫𑀢𑁆𑀢𑀺𑀓𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁.

𑁩𑁬𑁬. 𑀧𑀸𑀭𑀁 𑀕𑀘𑁆𑀙𑀦𑁆𑀢𑁄 𑀦𑁆𑀳𑀸𑀬𑀢𑀻𑀢𑀺 𑀏𑀢𑁆𑀣 𑀲𑀼𑀓𑁆𑀔𑀸𑀬 𑀦𑀤𑀺𑀬𑀸 𑀯𑀸𑀮𑀺𑀓𑀁 𑀉𑀓𑁆𑀓𑀺𑀭𑀺𑀢𑁆𑀯𑀸 𑀓𑀢𑀆𑀯𑀸𑀝𑀓𑁂𑀲𑀼𑀧𑀺 𑀦𑁆𑀳𑀸𑀬𑀺𑀢𑀼𑀁 𑀯𑀝𑁆𑀝𑀢𑀺. 𑀆𑀧𑀤𑀸𑀲𑀽𑀢𑀺 𑀪𑀫𑀭𑀸𑀤𑀻𑀳𑀺 𑀅𑀦𑀼𑀩𑀤𑁆𑀥𑀲𑁆𑀲 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀦𑀳𑀸𑀦𑀲𑀺𑀓𑁆𑀔𑀸𑀧𑀤𑀁 𑀲𑀢𑁆𑀢𑀫𑀁.

𑁮. 𑀤𑀼𑀩𑁆𑀩𑀡𑁆𑀡𑀓𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁬𑁮-𑁯. 𑀅𑀝𑁆𑀞𑀫𑁂 𑁋 𑀦𑀯𑀁 𑀧𑀦 𑀪𑀺𑀓𑁆𑀔𑀼𑀦𑀸 𑀘𑀻𑀯𑀭𑀮𑀸𑀪𑁂𑀦𑀸𑀢𑀺 𑀏𑀢𑁆𑀣 𑀅𑀮𑀪𑀻𑀢𑀺 𑀮𑀪𑁄; 𑀮𑀪𑁄𑀬𑁂𑀯 𑀮𑀸𑀪𑁄. 𑀓𑀺𑀁 𑀅𑀮𑀪𑀺? 𑀘𑀻𑀯𑀭𑀁. 𑀓𑀻𑀤𑀺𑀲𑀁? 𑀦𑀯𑀁. 𑀇𑀢𑀺 ‘‘𑀦𑀯𑀘𑀻𑀯𑀭𑀮𑀸𑀪𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀅𑀓𑀢𑁆𑀯𑀸 ‘‘𑀦𑀯𑀘𑀻𑀯𑀭𑀮𑀸𑀪𑁂𑀦𑀸’’𑀢𑀺 𑀯𑀼𑀢𑁆𑀢𑀁; 𑀧𑀝𑀺𑀮𑀤𑁆𑀥𑀦𑀯𑀘𑀻𑀯𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀚𑁆𑀛𑁂 𑀞𑀺𑀢𑀧𑀤𑀤𑁆𑀯𑀬𑁂 𑀧𑀦𑀸𑀢𑀺 𑀦𑀺𑀧𑀸𑀢𑁄. 𑀪𑀺𑀓𑁆𑀔𑀼𑀦𑀸𑀢𑀺 𑀬𑁂𑀦 𑀮𑀤𑁆𑀥𑀁 𑀢𑀲𑁆𑀲 𑀦𑀺𑀤𑀲𑁆𑀲𑀦𑀁. 𑀧𑀤𑀪𑀸𑀚𑀦𑁂 𑀧𑀦 𑀩𑁆𑀬𑀜𑁆𑀚𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀬𑀁 𑀮𑀤𑁆𑀥𑀁 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀻𑀯𑀭𑀁 𑀦𑀸𑀫 𑀙𑀦𑁆𑀦𑀁 𑀘𑀻𑀯𑀭𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀻𑀯𑀭𑀦𑁆𑀢𑀺 𑀏𑀢𑁆𑀣 𑀬𑀁 𑀦𑀺𑀯𑀸𑀲𑁂𑀢𑀼𑀁 𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀸 𑀲𑀓𑁆𑀓𑀸 𑀳𑁄𑀢𑀺, 𑀢𑀤𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 ‘‘𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫’’𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀓𑀁𑀲𑀦𑀻𑀮𑀦𑁆𑀢𑀺 𑀘𑀫𑁆𑀫𑀓𑀸𑀭𑀦𑀻𑀮𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀅𑀬𑁄𑀫𑀮𑀁 𑀮𑁄𑀳𑀫𑀮𑀁 𑀏𑀢𑀁 𑀓𑀁𑀲𑀦𑀻𑀮𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀧𑀮𑀸𑀲𑀦𑀻𑀮𑀦𑁆𑀢𑀺 𑀬𑁄 𑀓𑁄𑀘𑀺 𑀦𑀻𑀮𑀯𑀡𑁆𑀡𑁄 𑀧𑀡𑁆𑀡𑀭𑀲𑁄. 𑀤𑀼𑀩𑁆𑀩𑀡𑁆𑀡𑀓𑀭𑀡𑀁 𑀆𑀤𑀸𑀢𑀩𑁆𑀩𑀦𑁆𑀢𑀺 𑀏𑀢𑀁 𑀓𑀧𑁆𑀧𑀩𑀺𑀦𑁆𑀤𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁; 𑀦 𑀦𑀻𑀮𑀸𑀤𑀻𑀳𑀺 𑀲𑀓𑀮𑀘𑀻𑀯𑀭𑀲𑁆𑀲 𑀤𑀼𑀩𑁆𑀩𑀡𑁆𑀡𑀓𑀭𑀡𑀁. 𑀢𑀜𑁆𑀘 𑀧𑀦 𑀓𑀧𑁆𑀧𑀁 𑀆𑀤𑀺𑀬𑀦𑁆𑀢𑁂𑀦 𑀘𑀻𑀯𑀭𑀁 𑀭𑀚𑀺𑀢𑁆𑀯𑀸 𑀘𑀢𑀽𑀲𑀼 𑀯𑀸 𑀓𑁄𑀡𑁂𑀲𑀼 𑀢𑀻𑀲𑀼 𑀯𑀸 𑀤𑁆𑀯𑀻𑀲𑀼 𑀯𑀸 𑀏𑀓𑀲𑁆𑀫𑀺𑀁 𑀯𑀸 𑀓𑁄𑀡𑁂 𑀫𑁄𑀭𑀲𑁆𑀲 𑀅𑀓𑁆𑀔𑀺𑀫𑀡𑁆𑀟𑀮𑀫𑀢𑁆𑀢𑀁 𑀯𑀸 𑀫𑀗𑁆𑀓𑀼𑀮𑀧𑀺𑀝𑁆𑀞𑀺𑀫𑀢𑁆𑀢𑀁 𑀯𑀸 𑀆𑀤𑀸𑀢𑀩𑁆𑀩𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 ‘‘𑀧𑀢𑁆𑀢𑁂 𑀯𑀸 𑀕𑀡𑁆𑀞𑀺𑀬𑀁 𑀯𑀸 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀧𑀸𑀴𑀺𑀓𑀧𑁆𑀧𑀓𑀡𑁆𑀡𑀺𑀓𑀓𑀧𑁆𑀧𑀸𑀤𑀬𑁄 𑀧𑀦 𑀲𑀩𑁆𑀩𑀢𑁆𑀣 𑀧𑀝𑀺𑀲𑀺𑀤𑁆𑀥𑀸, 𑀢𑀲𑁆𑀫𑀸 𑀞𑀧𑁂𑀢𑁆𑀯𑀸 𑀏𑀓𑀁 𑀯𑀝𑁆𑀝𑀩𑀺𑀦𑁆𑀤𑀼𑀁 𑀅𑀜𑁆𑀜𑁂𑀦 𑀓𑁂𑀦𑀘𑀺𑀧𑀺 𑀯𑀺𑀓𑀸𑀭𑁂𑀦 𑀓𑀧𑁆𑀧𑁄 𑀦 𑀓𑀸𑀢𑀩𑁆𑀩𑁄.

𑁩𑁭𑁧. 𑀅𑀕𑁆𑀕𑀴𑁂𑀢𑀺𑀆𑀤𑀻𑀲𑀼 𑀏𑀢𑀸𑀦𑀺 𑀅𑀕𑁆𑀕𑀴𑀸𑀤𑀻𑀦𑀺 𑀓𑀧𑁆𑀧𑀓𑀢𑀘𑀻𑀯𑀭𑁂 𑀧𑀘𑁆𑀙𑀸 𑀆𑀭𑁄𑀧𑁂𑀢𑁆𑀯𑀸 𑀓𑀧𑁆𑀧𑀓𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁; 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀤𑀼𑀩𑁆𑀩𑀡𑁆𑀡𑀓𑀭𑀡𑀲𑀺𑀓𑁆𑀔𑀸𑀧𑀤𑀁 𑀅𑀝𑁆𑀞𑀫𑀁.

𑁯. 𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁭𑁪. 𑀦𑀯𑀫𑁂 𑁋 𑀢𑀲𑁆𑀲 𑀯𑀸 𑀅𑀤𑀺𑀦𑁆𑀦𑀦𑁆𑀢𑀺 𑀘𑀻𑀯𑀭𑀲𑀸𑀫𑀺𑀓𑀲𑁆𑀲 ‘‘𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺 𑀏𑀯𑀁 𑀯𑀢𑁆𑀯𑀸 𑀅𑀤𑀺𑀦𑁆𑀦𑀁. 𑀢𑀲𑁆𑀲 𑀯𑀸 𑀅𑀯𑀺𑀲𑁆𑀲𑀲𑀦𑁆𑀢𑁄𑀢𑀺 𑀬𑁂𑀦 𑀯𑀺𑀦𑀬𑀓𑀫𑁆𑀫𑀁 𑀓𑀢𑀁, 𑀢𑀲𑁆𑀲 𑀅𑀯𑀺𑀲𑁆𑀲𑀸𑀲𑁂𑀦 𑀯𑀸. 𑀢𑁂𑀦 𑀧𑀦 𑀤𑀺𑀦𑁆𑀦𑀁 𑀯𑀸 𑀢𑀲𑁆𑀲 𑀯𑀺𑀲𑁆𑀲𑀸𑀲𑁂𑀦 𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀢𑀺𑀁𑀲𑀓𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑀁 𑀦𑀯𑀫𑀁.

𑁧𑁦. 𑀘𑀻𑀯𑀭𑀸𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁭𑁭-𑁮𑁧. 𑀤𑀲𑀫𑁂 𑁋 𑀅𑀧𑀦𑀺𑀥𑁂𑀦𑁆𑀢𑀻𑀢𑀺 𑀅𑀧𑀦𑁂𑀢𑁆𑀯𑀸 𑀦𑀺𑀥𑁂𑀦𑁆𑀢𑀺. 𑀳𑀲𑀸𑀧𑁂𑀓𑁆𑀔𑁄𑀢𑀺 𑀳𑀲𑀸𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀧𑀸𑀴𑀺𑀬𑀸 𑀅𑀦𑀸𑀕𑀢𑀁 𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀺𑀁. 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸𑀢𑀺 ‘‘𑀲𑀫𑀡𑁂𑀦 𑀦𑀸𑀫 𑀅𑀦𑀺𑀳𑀺𑀢𑀧𑀭𑀺𑀓𑁆𑀔𑀸𑀭𑁂𑀦 𑀪𑀯𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀏𑀯𑀁 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀤𑀲𑁆𑀲𑀸𑀫𑀻𑀢𑀺 𑀦𑀺𑀓𑁆𑀔𑀺𑀧𑀢𑁄 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀘𑀻𑀯𑀭𑀸𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀁 𑀤𑀲𑀫𑀁.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀲𑀼𑀭𑀸𑀧𑀸𑀦𑀯𑀕𑁆𑀕𑁄 𑀙𑀝𑁆𑀞𑁄.