𑁭. 𑀲𑀧𑁆𑀧𑀸𑀡𑀓𑀯𑀕𑁆𑀕𑁄

𑁧. 𑀲𑀜𑁆𑀘𑀺𑀘𑁆𑀘𑀧𑀸𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁮𑁨. 𑀲𑀧𑁆𑀧𑀸𑀡𑀓𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀇𑀲𑁆𑀲𑀸𑀲𑁄 𑀳𑁄𑀢𑀻𑀢𑀺 𑀕𑀺𑀳𑀺𑀓𑀸𑀮𑁂 𑀥𑀦𑀼𑀕𑁆𑀕𑀳𑀸𑀘𑀭𑀺𑀬𑁄 𑀳𑁄𑀢𑀺. 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸𑀢𑀺 𑀚𑀻𑀯𑀺𑀢𑀸 𑀯𑀺𑀬𑁄𑀚𑀺𑀢𑀸.

𑀲𑀺𑀓𑁆𑀔𑀸𑀧𑀤𑁂𑀧𑀺 𑀯𑁄𑀭𑁄𑀧𑁂𑀬𑁆𑀬𑀸𑀢𑀺 𑀯𑀺𑀬𑁄𑀚𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀯𑁄𑀳𑀸𑀭𑀫𑀢𑁆𑀢𑀫𑁂𑀯𑁂𑀢𑀁; 𑀦 𑀳𑁂𑀢𑁆𑀣 𑀓𑀺𑀜𑁆𑀘𑀺 𑀯𑀺𑀬𑁄𑀚𑀺𑀢𑁂 𑀲𑀻𑀲𑀸𑀮𑀗𑁆𑀓𑀸𑀭𑁂 𑀲𑀻𑀲𑀁 𑀯𑀺𑀬 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑁂 𑀧𑀸𑀡𑁂𑀧𑀺 𑀚𑀻𑀯𑀺𑀢𑀁 𑀦𑀸𑀫 𑀯𑀺𑀲𑀼𑀁 𑀢𑀺𑀝𑁆𑀞𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀅𑀦𑁆𑀢𑀭𑀥𑀸𑀦𑀫𑁂𑀯 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀧𑀤𑀪𑀸𑀚𑀦𑁂 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀘𑁆𑀙𑀺𑀦𑁆𑀤𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀜𑁆𑀘 𑀲𑀺𑀓𑁆𑀔𑀸𑀧𑀤𑁂 𑀢𑀺𑀭𑀘𑁆𑀙𑀸𑀦𑀕𑀢𑁄𑀬𑁂𑀯 ‘‘𑀧𑀸𑀡𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀁 𑀔𑀼𑀤𑁆𑀤𑀓𑀫𑁆𑀧𑀺 𑀫𑀳𑀦𑁆𑀢𑀫𑁆𑀧𑀺 𑀫𑀸𑀭𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺. 𑀫𑀳𑀦𑁆𑀢𑁂 𑀧𑀦 𑀉𑀧𑀓𑁆𑀓𑀫𑀫𑀳𑀦𑁆𑀢𑀢𑁆𑀢𑀸 𑀅𑀓𑀼𑀲𑀮𑀫𑀳𑀢𑁆𑀢𑀁 𑀳𑁄𑀢𑀺. 𑀧𑀸𑀡𑁂 𑀧𑀸𑀡𑀲𑀜𑁆𑀜𑀻𑀢𑀺 𑀅𑀦𑁆𑀢𑀫𑀲𑁄 𑀫𑀜𑁆𑀘𑀧𑀻𑀞𑀁 𑀲𑁄𑀥𑁂𑀦𑁆𑀢𑁄 𑀫𑀗𑁆𑀕𑀼𑀮𑀩𑀻𑀚𑀓𑁂𑀧𑀺 𑀧𑀸𑀡𑀲𑀜𑁆𑀜𑀻 𑀦𑀺𑀓𑁆𑀓𑀸𑀭𑀼𑀡𑀺𑀓𑀢𑀸𑀬 𑀢𑀁 𑀪𑀺𑀦𑁆𑀤𑀦𑁆𑀢𑁄 𑀅𑀧𑀦𑁂𑀢𑀺, 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀲𑁆𑀫𑀸 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀓𑀸𑀭𑀼𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁂𑀦 𑀯𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀲𑁂𑀲𑀁 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀻𑀢𑀺.

𑀲𑀜𑁆𑀘𑀺𑀘𑁆𑀘𑀧𑀸𑀡𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀁.

𑁨. 𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁮𑁭. 𑀤𑀼𑀢𑀺𑀬𑁂 𑁋 𑀲𑀧𑁆𑀧𑀸𑀡𑀓𑀦𑁆𑀢𑀺 𑀬𑁂 𑀧𑀸𑀡𑀓𑀸 𑀧𑀭𑀺𑀪𑁄𑀕𑁂𑀦 𑀫𑀭𑀦𑁆𑀢𑀺, 𑀢𑁂𑀳𑀺 𑀧𑀸𑀡𑀓𑁂𑀳𑀺 𑀲𑀧𑁆𑀧𑀸𑀡𑀓𑀁, 𑀢𑀸𑀤𑀺𑀲𑀜𑁆𑀳𑀺 𑀚𑀸𑀦𑀁 𑀧𑀭𑀺𑀪𑀼𑀜𑁆𑀚𑀢𑁄 𑀧𑀬𑁄𑀕𑁂 𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀢𑁆𑀢𑀧𑀽𑀭𑀫𑁆𑀧𑀺 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀧𑀬𑁄𑀕𑁂𑀦 𑀧𑀺𑀯𑀢𑁄 𑀏𑀓𑀸 𑀆𑀧𑀢𑁆𑀢𑀺. 𑀢𑀸𑀤𑀺𑀲𑁂𑀦 𑀉𑀤𑀓𑁂𑀦 𑀲𑀸𑀫𑀺𑀲𑀁 𑀧𑀢𑁆𑀢𑀁 𑀆𑀯𑀺𑀜𑁆𑀙𑀺𑀢𑁆𑀯𑀸 𑀥𑁄𑀯𑀢𑁄𑀧𑀺 𑀢𑀸𑀤𑀺𑀲𑁂 𑀉𑀤𑀓𑁂 𑀉𑀡𑁆𑀳𑀬𑀸𑀕𑀼𑀧𑀢𑁆𑀢𑀁 𑀦𑀺𑀩𑁆𑀩𑀸𑀧𑀬𑀢𑁄𑀧𑀺 𑀢𑀁 𑀉𑀤𑀓𑀁 𑀳𑀢𑁆𑀣𑁂𑀦 𑀯𑀸 𑀉𑀴𑀼𑀗𑁆𑀓𑁂𑀦 𑀯𑀸 𑀕𑀳𑁂𑀢𑁆𑀯𑀸 𑀦𑁆𑀳𑀸𑀬𑀢𑁄𑀧𑀺 𑀧𑀬𑁄𑀕𑁂 𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀉𑀤𑀓𑀲𑁄𑀡𑁆𑀟𑀺𑀁 𑀯𑀸 𑀧𑁄𑀓𑁆𑀔𑀭𑀡𑀺𑀁 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀩𑀳𑀺𑀦𑀺𑀓𑁆𑀔𑀫𑀦𑀢𑁆𑀣𑀸𑀬 𑀯𑀻𑀘𑀺𑀁 𑀉𑀝𑁆𑀞𑀸𑀧𑀬𑀢𑁄𑀧𑀺. 𑀲𑁄𑀡𑁆𑀟𑀺𑀁 𑀯𑀸 𑀧𑁄𑀓𑁆𑀔𑀭𑀡𑀺𑀁 𑀯𑀸 𑀲𑁄𑀥𑁂𑀦𑁆𑀢𑁂𑀳𑀺 𑀢𑀢𑁄 𑀕𑀳𑀺𑀢𑀉𑀤𑀓𑀁 𑀉𑀤𑀓𑁂𑀬𑁂𑀯 𑀆𑀲𑀺𑀜𑁆𑀘𑀺𑀢𑀩𑁆𑀩𑀁. 𑀲𑀫𑀻𑀧𑀫𑁆𑀳𑀺 𑀉𑀤𑀓𑁂 𑀅𑀲𑀢𑀺 𑀓𑀧𑁆𑀧𑀺𑀬𑀉𑀤𑀓𑀲𑁆𑀲 𑀅𑀝𑁆𑀞 𑀯𑀸 𑀤𑀲 𑀯𑀸 𑀖𑀝𑁂 𑀉𑀤𑀓𑀲𑀡𑁆𑀞𑀸𑀦𑀓𑀧𑁆𑀧𑀤𑁂𑀲𑁂 𑀆𑀲𑀺𑀜𑁆𑀘𑀺𑀢𑁆𑀯𑀸 𑀢𑀢𑁆𑀣 𑀆𑀲𑀺𑀜𑁆𑀘𑀺𑀢𑀩𑁆𑀩𑀁. ‘‘𑀧𑀯𑀝𑁆𑀝𑀺𑀢𑁆𑀯𑀸 𑀉𑀤𑀓𑁂 𑀧𑀢𑀺𑀲𑁆𑀲𑀢𑀻’’𑀢𑀺 𑀉𑀡𑁆𑀳𑀧𑀸𑀲𑀸𑀡𑁂 𑀉𑀤𑀓𑀁 𑀦𑀸𑀲𑀺𑀜𑁆𑀘𑀺𑀢𑀩𑁆𑀩𑀁. 𑀓𑀧𑁆𑀧𑀺𑀬𑀉𑀤𑀓𑁂𑀦 𑀧𑀦 𑀧𑀸𑀲𑀸𑀡𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀆𑀲𑀺𑀜𑁆𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁,

𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺. 𑀏𑀢𑁆𑀣 𑀘 𑀧𑀝𑀗𑁆𑀕𑀧𑀸𑀡𑀓𑀸𑀦𑀁 𑀧𑀢𑀦𑀁 𑀜𑀢𑁆𑀯𑀸𑀧𑀺 𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀤𑀻𑀧𑀚𑀸𑀮𑀦𑁂 𑀯𑀺𑀬 𑀲𑀧𑁆𑀧𑀸𑀡𑀓𑀪𑀸𑀯𑀁 𑀜𑀢𑁆𑀯𑀸𑀧𑀺 𑀉𑀤𑀓𑀲𑀜𑁆𑀜𑀸𑀬 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀁 𑀤𑀼𑀢𑀺𑀬𑀁.

𑁩. 𑀉𑀓𑁆𑀓𑁄𑀝𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁯𑁨. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑁋 𑀉𑀓𑁆𑀓𑁄𑀝𑁂𑀦𑁆𑀢𑀻𑀢𑀺 𑀢𑀲𑁆𑀲 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀓𑀢𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀉𑀘𑁆𑀘𑀸𑀮𑁂𑀦𑁆𑀢𑀺; 𑀬𑀣𑀸𑀧𑀢𑀺𑀝𑁆𑀞𑀺𑀢𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀤𑁂𑀦𑁆𑀢𑀺.

𑁩𑁯𑁩. 𑀬𑀣𑀸𑀥𑀫𑁆𑀫𑀦𑁆𑀢𑀺 𑀬𑁄 𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀯𑀽𑀧𑀲𑀫𑀦𑀸𑀬 𑀥𑀫𑁆𑀫𑁄 𑀯𑀼𑀢𑁆𑀢𑁄, 𑀢𑁂𑀦𑁂𑀯 𑀥𑀫𑁆𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀦𑀺𑀳𑀢𑀸𑀥𑀺𑀓𑀭𑀡𑀦𑁆𑀢𑀺 𑀦𑀺𑀳𑀢𑀁 𑀅𑀥𑀺𑀓𑀭𑀡𑀁; 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀥𑀫𑁆𑀫𑁂𑀦𑁂𑀯 𑀯𑀽𑀧𑀲𑀫𑀺𑀢𑀁 𑀅𑀥𑀺𑀓𑀭𑀡𑀦𑁆𑀢𑀺 𑀅𑀢𑁆𑀣𑁄.

𑁩𑁯𑁫. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻𑀢𑀺 𑀬𑁂𑀦 𑀓𑀫𑁆𑀫𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑀺𑀢𑀁, 𑀢𑀜𑁆𑀘𑁂 𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀥𑀫𑁆𑀫𑀓𑀫𑁆𑀫𑁂 𑀅𑀬𑀫𑁆𑀧𑀺 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻 𑀳𑀼𑀢𑁆𑀯𑀸 𑀬𑀤𑀺 𑀉𑀓𑁆𑀓𑁄𑀝𑁂𑀢𑀺, 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀦𑀬𑁂𑀦 𑀲𑁂𑀲𑀧𑀤𑀸𑀦𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 ‘‘𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀢𑀺 𑀉𑀓𑁆𑀓𑁄𑀝𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀯𑀸𑀭𑁂 𑀯𑀼𑀢𑁆𑀢𑁄. 𑀅𑀝𑁆𑀞𑀓𑀣𑀸𑀲𑀼 𑀢𑀁 𑀲𑀩𑁆𑀩𑀁 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲𑁂𑀯𑀢𑁆𑀣𑁄 𑀯𑀡𑁆𑀡𑀺𑀢𑁄. 𑀫𑀬𑀁 𑀧𑀦 𑀢𑀁 𑀢𑀢𑁆𑀣𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀇𑀥 𑀆𑀳𑀭𑀺𑀢𑁆𑀯𑀸 𑀯𑀡𑁆𑀡𑀺𑀬𑀫𑀸𑀦𑁂 𑀳𑀺 𑀲𑀼𑀝𑁆𑀞𑀼𑀢𑀭𑀁 𑀲𑀫𑁆𑀫𑁄𑀳𑁄 𑀪𑀯𑁂𑀬𑁆𑀬𑀸𑀢𑀺 𑀦 𑀯𑀡𑁆𑀡𑀬𑀺𑀫𑁆𑀳. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀉𑀓𑁆𑀓𑁄𑀝𑀦𑀲𑀺𑀓𑁆𑀔𑀸𑀧𑀤𑀁 𑀢𑀢𑀺𑀬𑀁.

𑁪. 𑀤𑀼𑀝𑁆𑀞𑀼𑀮𑁆𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁯𑁯. 𑀘𑀢𑀼𑀢𑁆𑀣𑁂 𑁋 𑀤𑀼𑀝𑁆𑀞𑀼𑀮𑁆𑀮𑀸 𑀦𑀸𑀫 𑀆𑀧𑀢𑁆𑀢𑀻𑀢𑀺 𑀏𑀢𑁆𑀣 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀤𑀲𑁆𑀲𑀺𑀢𑀸𑀦𑀺, 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺 𑀧𑀦 𑀅𑀥𑀺𑀧𑁆𑀧𑁂𑀢𑀸, 𑀢𑀁 𑀙𑀸𑀤𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀢𑀺 𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂. 𑀲𑀘𑁂𑀧𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀸 𑀆𑀭𑁄𑀘𑁂𑀢𑀺, 𑀦 𑀭𑀓𑁆𑀔𑀢𑀺; 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀬𑁂𑀯 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀘𑁂 𑀧𑀦 𑀏𑀯𑀁 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀫𑁂𑀯 𑀅𑀜𑁆𑀜𑀲𑁆𑀲 𑀆𑀭𑁄𑀘𑁂𑀢𑀺, 𑀲𑁄𑀧𑀺 𑀅𑀜𑁆𑀜𑀲𑁆𑀲𑀸𑀢𑀺 𑀏𑀢𑁂𑀦𑀼𑀧𑀸𑀬𑁂𑀦 𑀲𑀫𑀡𑀲𑀢𑀫𑁆𑀧𑀺 𑀲𑀫𑀡𑀲𑀳𑀲𑁆𑀲𑀫𑁆𑀧𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺𑀬𑁂𑀯 𑀢𑀸𑀯, 𑀬𑀸𑀯 𑀓𑁄𑀝𑀺 𑀦 𑀙𑀺𑀚𑁆𑀚𑀢𑀺. 𑀓𑀤𑀸 𑀧𑀦 𑀓𑁄𑀝𑀺 𑀙𑀺𑀚𑁆𑀚𑀢𑀻𑀢𑀺? 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀢𑀸𑀯 𑀯𑀤𑀢𑀺 𑁋 ‘‘𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀏𑀓𑀲𑁆𑀲 𑀆𑀭𑁄𑀘𑁂𑀢𑀺, 𑀲𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀲𑁆𑀲𑁂𑀯 𑀆𑀭𑁄𑀘𑁂𑀢𑀺; 𑀏𑀯𑀁 𑀓𑁄𑀝𑀺 𑀙𑀺𑀚𑁆𑀚𑀢𑀻’’𑀢𑀺. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀅𑀬𑀜𑁆𑀳𑀺 𑀯𑀢𑁆𑀣𑀼𑀧𑀼𑀕𑁆𑀕𑀮𑁄𑀬𑁂𑀯. 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀧𑀦 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀭𑁄𑀘𑁂𑀢𑀺, 𑀅𑀬𑀁 𑀅𑀜𑁆𑀜𑀲𑁆𑀲 𑀆𑀭𑁄𑀘𑁂𑀢𑀺, 𑀲𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀬𑁂𑀦𑀲𑁆𑀲 𑀆𑀭𑁄𑀘𑀺𑀢𑀁, 𑀢𑀲𑁆𑀲𑁂𑀯 𑀆𑀭𑁄𑀘𑁂𑀢𑀺; 𑀏𑀯𑀁 𑀢𑀢𑀺𑀬𑁂𑀦 𑀧𑀼𑀕𑁆𑀕𑀮𑁂𑀦 𑀤𑀼𑀢𑀺𑀬𑀲𑁆𑀲 𑀆𑀭𑁄𑀘𑀺𑀢𑁂 𑀓𑁄𑀝𑀺 𑀙𑀺𑀦𑁆𑀦𑀸 𑀳𑁄𑀢𑀻’’𑀢𑀺.

𑁪𑁦𑁦. 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀦𑁆𑀢𑀺 𑀅𑀯𑀲𑁂𑀲𑁂 𑀧𑀜𑁆𑀘𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀁 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀁 𑀯𑀸 𑀅𑀚𑁆𑀛𑀸𑀘𑀸𑀭𑀦𑁆𑀢𑀺 𑀏𑀢𑁆𑀣 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀘 𑀓𑀸𑀬𑀲𑀁𑀲𑀕𑁆𑀕𑁄 𑀘𑀸𑀢𑀺 𑀅𑀬𑀁 𑀤𑀼𑀝𑁆𑀞𑀼𑀮𑁆𑀮𑀅𑀚𑁆𑀛𑀸𑀘𑀸𑀭𑁄 𑀦𑀸𑀫. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀅𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀤𑀼𑀝𑁆𑀞𑀼𑀮𑁆𑀮𑀲𑀺𑀓𑁆𑀔𑀸𑀧𑀤𑀁 𑀘𑀢𑀼𑀢𑁆𑀣𑀁.

𑁫. 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁦𑁨. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑁂 𑁋 𑀅𑀗𑁆𑀕𑀼𑀮𑀺𑀬𑁄 𑀤𑀼𑀓𑁆𑀔𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀓𑁆𑀔𑀭𑀸𑀦𑀺 𑀮𑀺𑀔𑀦𑁆𑀢𑀲𑁆𑀲 𑀅𑀗𑁆𑀕𑀼𑀮𑀺𑀬𑁄 𑀤𑀼𑀓𑁆𑀔𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀘𑀺𑀦𑁆𑀢𑁂𑀲𑀼𑀁. 𑀉𑀭𑀲𑁆𑀲 𑀤𑀼𑀓𑁆𑀔𑁄𑀢𑀺 𑀕𑀡𑀦𑀁 𑀲𑀺𑀓𑁆𑀔𑀦𑁆𑀢𑁂𑀦 𑀩𑀳𑀼𑀁 𑀘𑀺𑀦𑁆𑀢𑁂𑀢𑀩𑁆𑀩𑀁 𑀳𑁄𑀢𑀺, 𑀢𑁂𑀦𑀲𑁆𑀲 𑀉𑀭𑁄 𑀤𑀼𑀓𑁆𑀔𑁄 𑀪𑀯𑀺𑀲𑁆𑀲𑀢𑀻𑀢𑀺 𑀫𑀜𑁆𑀜𑀺𑀁𑀲𑀼. 𑀅𑀓𑁆𑀔𑀻𑀦𑀺 𑀤𑀼𑀓𑁆𑀔𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀭𑀽𑀧𑀲𑀼𑀢𑁆𑀢𑀁 𑀲𑀺𑀓𑁆𑀔𑀦𑁆𑀢𑁂𑀦 𑀓𑀳𑀸𑀧𑀡𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀲𑁆𑀲𑀺𑀢𑀩𑁆𑀩𑀸 𑀳𑁄𑀦𑁆𑀢𑀺, 𑀢𑁂𑀦𑀲𑁆𑀲 𑀅𑀓𑁆𑀔𑀻𑀦𑀺 𑀤𑀼𑀓𑁆𑀔𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀫𑀜𑁆𑀜𑀺𑀁𑀲𑀼. 𑀟𑀁𑀲𑀸𑀤𑀻𑀲𑀼 𑀟𑀁𑀲𑀸𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸𑀬𑁄. 𑀤𑀼𑀓𑁆𑀔𑀸𑀦𑀦𑁆𑀢𑀺 𑀤𑀼𑀓𑁆𑀔𑀫𑀸𑀦𑀁. 𑀢𑀺𑀩𑁆𑀩𑀸𑀦𑀦𑁆𑀢𑀺 𑀩𑀳𑀮𑀸𑀦𑀁. 𑀔𑀭𑀸𑀦𑀦𑁆𑀢𑀺 𑀢𑀺𑀔𑀺𑀡𑀸𑀦𑀁. 𑀓𑀝𑀼𑀓𑀸𑀦𑀦𑁆𑀢𑀺 𑀨𑀭𑀼𑀲𑀸𑀦𑀁; 𑀅𑀫𑀦𑀸𑀧𑀢𑀸𑀬 𑀯𑀸 𑀓𑀝𑀼𑀓𑀭𑀲𑀲𑀤𑀺𑀲𑀸𑀦𑀁. 𑀅𑀲𑀸𑀢𑀸𑀦𑀦𑁆𑀢𑀺 𑀅𑀫𑀥𑀼𑀭𑀸𑀦𑀁. 𑀧𑀸𑀡𑀳𑀭𑀸𑀦𑀦𑁆𑀢𑀺 𑀚𑀻𑀯𑀺𑀢𑀳𑀭𑀸𑀦𑀁.

𑁪𑁦𑁪. 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀻𑀢𑀺 𑀦𑀯𑀁 𑀲𑀻𑀫𑀁 𑀩𑀦𑁆𑀥𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑀺𑀦𑁆𑀤𑀦𑁂𑀧𑀺 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄; 𑀕𑀩𑁆𑀪𑀯𑀻𑀲𑁄𑀧𑀺 𑀳𑀺 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑁂 𑀕𑀘𑁆𑀙𑀢𑀺. 𑀬𑀣𑀸𑀳 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀕𑀩𑁆𑀪𑀯𑀻𑀲𑁄 𑀉𑀧𑀲𑀫𑁆𑀧𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀓𑀼𑀫𑀸𑀭𑀓𑀲𑁆𑀲𑀧𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁, 𑀦 𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀧𑀼𑀕𑁆𑀕𑀮𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀢𑀺. 𑀅𑀳𑀜𑁆𑀘𑀫𑁆𑀳𑀺 𑀕𑀩𑁆𑀪𑀯𑀻𑀲𑁄 𑀉𑀧𑀲𑀫𑁆𑀧𑀦𑁆𑀦𑁄. 𑀉𑀧𑀲𑀫𑁆𑀧𑀦𑁆𑀦𑁄 𑀦𑀼𑀔𑁄𑀫𑁆𑀳𑀺, 𑀦𑀦𑀼 𑀔𑁄 𑀉𑀧𑀲𑀫𑁆𑀧𑀦𑁆𑀦𑁄’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀬𑀁 𑀪𑀺𑀓𑁆𑀔𑀯𑁂 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀧𑀞𑀫𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀧𑀞𑀫𑀁 𑀯𑀺𑀜𑁆𑀜𑀸𑀡𑀁 𑀧𑀸𑀢𑀼𑀪𑀽𑀢𑀁 𑀢𑀤𑀼𑀧𑀸𑀤𑀸𑀬 𑀲𑀸𑀯𑀲𑁆𑀲 𑀚𑀸𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀩𑁆𑀪𑀯𑀻𑀲𑀁 𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁨𑁪).

𑀢𑀢𑁆𑀣 𑀬𑁄 𑀤𑁆𑀯𑀸𑀤𑀲𑀫𑀸𑀲𑁂 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀯𑀲𑀺𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀚𑀸𑀢𑁄, 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀏𑀓𑀽𑀦𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀫𑀳𑀸𑀧𑀯𑀸𑀭𑀡𑀸, 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀸𑀝𑀺𑀧𑀤𑁂 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀏𑀢𑁂𑀦𑀼𑀧𑀸𑀬𑁂𑀦 𑀳𑀸𑀬𑀦𑀯𑀟𑁆𑀠𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀧𑀦 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀁 𑀲𑀸𑀫𑀡𑁂𑀭𑀁 𑀦𑀺𑀓𑁆𑀔𑀫𑀦𑀻𑀬𑀧𑀼𑀡𑁆𑀡𑀫𑀸𑀲𑀺𑀁 𑀅𑀢𑀺𑀓𑁆𑀓𑀫𑁆𑀫 𑀧𑀸𑀝𑀺𑀧𑀤𑀤𑀺𑀯𑀲𑁂 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺, 𑀢𑀁 𑀓𑀲𑁆𑀫𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀏𑀓𑀲𑁆𑀫𑀺𑀁 𑀯𑀲𑁆𑀲𑁂 𑀙 𑀘𑀸𑀢𑀼𑀤𑁆𑀤𑀲𑀺𑀓𑀉𑀧𑁄𑀲𑀣𑀸 𑀳𑁄𑀦𑁆𑀢𑀺. 𑀇𑀢𑀺 𑀯𑀻𑀲𑀢𑀺𑀬𑀸 𑀯𑀲𑁆𑀲𑁂𑀲𑀼 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀧𑀭𑀺𑀳𑀸𑀬𑀦𑁆𑀢𑀺. 𑀭𑀸𑀚𑀸𑀦𑁄 𑀢𑀢𑀺𑀬𑁂 𑀢𑀢𑀺𑀬𑁂 𑀯𑀲𑁆𑀲𑁂 𑀯𑀲𑁆𑀲𑀁 𑀉𑀓𑁆𑀓𑀟𑁆𑀠𑀦𑁆𑀢𑀺. 𑀇𑀢𑀺 𑀅𑀝𑁆𑀞𑀸𑀭𑀲𑀲𑀼 𑀯𑀲𑁆𑀲𑁂𑀲𑀼 𑀙 𑀫𑀸𑀲𑀸 𑀯𑀟𑁆𑀠𑀦𑁆𑀢𑀺, 𑀢𑀢𑁄 𑀉𑀧𑁄𑀲𑀣𑀯𑀲𑁂𑀦 𑀧𑀭𑀺𑀳𑀻𑀦𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀧𑀦𑁂𑀢𑁆𑀯𑀸 𑀤𑁆𑀯𑁂 𑀫𑀸𑀲𑀸 𑀅𑀯𑀲𑁂𑀲𑀸 𑀳𑁄𑀦𑁆𑀢𑀺, 𑀢𑁂 𑀤𑁆𑀯𑁂 𑀫𑀸𑀲𑁂 𑀕𑀳𑁂𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀳𑁄𑀦𑁆𑀢𑀻𑀢𑀺 𑀦𑀺𑀓𑁆𑀓𑀗𑁆𑀔𑀸 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀦𑀻𑀬𑀧𑀼𑀡𑁆𑀡𑀫𑀸𑀲𑀺𑀁 𑀅𑀢𑀺𑀓𑁆𑀓𑀫𑁆𑀫 𑀧𑀸𑀝𑀺𑀧𑀤𑁂 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀏𑀢𑁆𑀣 𑀧𑀦 𑀬𑁄 𑀧𑀯𑀸𑀭𑁂𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑁄 𑀪𑀯𑀺𑀲𑁆𑀲𑀢𑀺, 𑀢𑀁 𑀲𑀦𑁆𑀥𑀸𑀬 ‘‘𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑁄 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀤𑁆𑀯𑀸𑀤𑀲𑀫𑀸𑀲𑁂 𑀯𑀲𑀺, 𑀲𑁄 𑀏𑀓𑀯𑀻𑀲𑀢𑀺𑀯𑀲𑁆𑀲𑁄 𑀳𑁄𑀢𑀺. 𑀬𑁄 𑀲𑀢𑁆𑀢𑀫𑀸𑀲𑁂 𑀯𑀲𑀺, 𑀲𑁄 𑀲𑀢𑁆𑀢𑀫𑀸𑀲𑀸𑀥𑀺𑀓𑀯𑀻𑀲𑀢𑀺𑀯𑀲𑁆𑀲𑁄. 𑀙𑀫𑀸𑀲𑀚𑀸𑀢𑁄 𑀧𑀦 𑀦 𑀚𑀻𑀯𑀢𑀺.

𑁪𑁦𑁬. 𑀅𑀦𑀸𑀧𑀢𑁆𑀢𑀺 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀲𑀜𑁆𑀜𑀻𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀧𑀼𑀕𑁆𑀕𑀮𑁄 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀯 𑀳𑁄𑀢𑀺. 𑀲𑀘𑁂 𑀧𑀦 𑀲𑁄 𑀤𑀲𑀯𑀲𑁆𑀲𑀘𑁆𑀘𑀬𑁂𑀦 𑀅𑀜𑁆𑀜𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀢𑀜𑁆𑀘𑁂 𑀫𑀼𑀜𑁆𑀘𑀺𑀢𑁆𑀯𑀸 𑀕𑀡𑁄 𑀧𑀽𑀭𑀢𑀺, 𑀲𑀽𑀧𑀲𑀫𑁆𑀧𑀦𑁆𑀦𑁄. 𑀲𑁄𑀧𑀺 𑀘 𑀬𑀸𑀯 𑀦 𑀚𑀸𑀦𑀸𑀢𑀺, 𑀢𑀸𑀯𑀲𑁆𑀲 𑀦𑁂𑀯 𑀲𑀕𑁆𑀕𑀦𑁆𑀢𑀭𑀸𑀬𑁄 𑀦 𑀫𑁄𑀓𑁆𑀔𑀦𑁆𑀢𑀭𑀸𑀬𑁄, 𑀜𑀢𑁆𑀯𑀸 𑀧𑀦 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑀺𑀢𑀩𑁆𑀩𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁,

𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀘𑀫𑀁.

𑁬. 𑀣𑁂𑀬𑁆𑀬𑀲𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁦𑁭. 𑀙𑀝𑁆𑀞𑁂 𑁋 𑀧𑀝𑀺𑀬𑀸𑀮𑁄𑀓𑀦𑁆𑀢𑀺 𑀲𑀽𑀭𑀺𑀬𑀸𑀮𑁄𑀓𑀲𑁆𑀲 𑀧𑀝𑀺𑀫𑀼𑀔𑀁; 𑀧𑀘𑁆𑀙𑀺𑀫𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀺𑀬𑀸𑀢𑀺 𑀲𑀼𑀗𑁆𑀓𑀝𑁆𑀞𑀸𑀦𑁂 𑀓𑀫𑁆𑀫𑀺𑀓𑀸.

𑁪𑁦𑁯. 𑀭𑀸𑀚𑀸𑀦𑀁 𑀯𑀸 𑀣𑁂𑀬𑁆𑀬𑀁 𑀕𑀘𑁆𑀙𑀦𑁆𑀢𑀻𑀢𑀺 𑀭𑀸𑀚𑀸𑀦𑀁 𑀯𑀸 𑀣𑁂𑀦𑁂𑀢𑁆𑀯𑀸 𑀯𑀜𑁆𑀘𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀓𑀁 𑀓𑀺𑀜𑁆𑀘𑀺 𑀕𑀳𑁂𑀢𑁆𑀯𑀸 𑀇𑀤𑀸𑀦𑀺 𑀦 𑀢𑀲𑁆𑀲 𑀤𑀲𑁆𑀲𑀸𑀫𑀸𑀢𑀺 𑀕𑀘𑁆𑀙𑀦𑁆𑀢𑀺.

𑁪𑁧𑁧. 𑀯𑀺𑀲𑀗𑁆𑀓𑁂𑀢𑁂𑀦𑀸𑀢𑀺 𑀓𑀸𑀮𑀯𑀺𑀲𑀗𑁆𑀓𑁂𑀢𑁂𑀦 𑀤𑀺𑀯𑀲𑀯𑀺𑀲𑀗𑁆𑀓𑁂𑀢𑁂𑀦 𑀘 𑀕𑀘𑁆𑀙𑀢𑁄 𑀅𑀦𑀸𑀧𑀢𑁆𑀢𑀺. 𑀫𑀕𑁆𑀕𑀯𑀺𑀲𑀗𑁆𑀓𑁂𑀢𑁂𑀦 𑀧𑀦 𑀅𑀝𑀯𑀺𑀯𑀺𑀲𑀗𑁆𑀓𑁂𑀢𑁂𑀦 𑀯𑀸 𑀆𑀧𑀢𑁆𑀢𑀺𑀬𑁂𑀯. 𑀲𑁂𑀲𑀫𑁂𑀢𑁆𑀣 𑀪𑀺𑀓𑁆𑀔𑀼𑀦𑀺𑀯𑀕𑁆𑀕𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀣𑁂𑀬𑁆𑀬𑀲𑀢𑁆𑀣𑀲𑀺𑀓𑁆𑀔𑀸𑀧𑀤𑀁 𑀙𑀝𑁆𑀞𑀁.

𑁭. 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁧𑁨. 𑀲𑀢𑁆𑀢𑀫𑁂 𑁋 𑀧𑀥𑀽𑀧𑁂𑀦𑁆𑀢𑁄 𑀦𑀺𑀲𑀻𑀤𑀻𑀢𑀺 𑀧𑀚𑁆𑀛𑀸𑀬𑀦𑁆𑀢𑁄 𑀅𑀢𑁆𑀢𑀸𑀦𑀁𑀬𑁂𑀯 𑀧𑀭𑀺𑀪𑀸𑀲𑀦𑁆𑀢𑁄 𑀦𑀺𑀲𑀻𑀤𑀺. 𑀦𑀸𑀬𑁆𑀬𑁄 𑀲𑁄 𑀪𑀺𑀓𑁆𑀔𑀼 𑀫𑀁 𑀦𑀺𑀧𑁆𑀧𑀸𑀢𑁂𑀲𑀻𑀢𑀺 𑀅𑀬𑁆𑀬𑁄 𑀅𑀬𑀁 𑀪𑀺𑀓𑁆𑀔𑀼 𑀫𑀁 𑀦 𑀦𑀺𑀓𑁆𑀔𑀸𑀫𑁂𑀲𑀺; 𑀦 𑀫𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀻𑀢𑀺.

𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀁 𑀲𑀢𑁆𑀢𑀫𑀁.

𑁮. 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁧𑁭. 𑀅𑀝𑁆𑀞𑀫𑁂 𑁋 𑀕𑀤𑁆𑀥𑁂 𑀩𑀸𑀥𑀬𑀺𑀁𑀲𑀽𑀢𑀺 𑀕𑀤𑁆𑀥𑀩𑀸𑀥𑀺𑀦𑁄; 𑀕𑀤𑁆𑀥𑀩𑀸𑀥𑀺𑀦𑁄 𑀧𑀼𑀩𑁆𑀩𑀧𑀼𑀭𑀺𑀲𑀸 𑀅𑀲𑁆𑀲𑀸𑀢𑀺 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄, 𑀢𑀲𑁆𑀲 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲 𑀕𑀺𑀚𑁆𑀛𑀖𑀸𑀢𑀓𑀓𑀼𑀮𑀧𑁆𑀧𑀲𑀼𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀺𑀓𑀸. 𑀢𑁂 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀉𑀧𑀯𑀸𑀤𑀆𑀡𑀸𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀧𑀜𑁆𑀘𑀯𑀺𑀥𑀸. 𑀢𑀢𑁆𑀣 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀸 𑀓𑀫𑁆𑀫𑀦𑁆𑀢𑀭𑀸𑀬𑀺𑀓𑀸 𑀦𑀸𑀫. 𑀢𑀣𑀸 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑀓𑀫𑁆𑀫𑀁, 𑀢𑀁 𑀧𑀦 𑀫𑁄𑀓𑁆𑀔𑀲𑁆𑀲𑁂𑀯 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀦 𑀲𑀕𑁆𑀕𑀲𑁆𑀲. 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑀸 𑀓𑀺𑀮𑁂𑀲𑀦𑁆𑀢𑀭𑀸𑀬𑀺𑀓𑀸 𑀦𑀸𑀫. 𑀧𑀡𑁆𑀟𑀓𑀢𑀺𑀭𑀘𑁆𑀙𑀸𑀦𑀕𑀢𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀥𑀫𑁆𑀫𑀸 𑀯𑀺𑀧𑀸𑀓𑀦𑁆𑀢𑀭𑀸𑀬𑀺𑀓𑀸 𑀦𑀸𑀫. 𑀅𑀭𑀺𑀬𑀽𑀧𑀯𑀸𑀤𑀸 𑀉𑀧𑀯𑀸𑀤𑀦𑁆𑀢𑀭𑀸𑀬𑀺𑀓𑀸 𑀦𑀸𑀫, 𑀢𑁂 𑀧𑀦 𑀬𑀸𑀯 𑀅𑀭𑀺𑀬𑁂 𑀦 𑀔𑀫𑀸𑀧𑁂𑀦𑁆𑀢𑀺 𑀢𑀸𑀯𑀤𑁂𑀯, 𑀦 𑀢𑀢𑁄 𑀧𑀭𑀁. 𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀸 𑀆𑀧𑀢𑁆𑀢𑀺𑀬𑁄 𑀆𑀡𑀸𑀯𑀻𑀢𑀺𑀓𑁆𑀓𑀫𑀦𑁆𑀢𑀭𑀸𑀬𑀺𑀓𑀸 𑀦𑀸𑀫, 𑀢𑀸𑀧𑀺 𑀬𑀸𑀯 𑀪𑀺𑀓𑁆𑀔𑀼𑀪𑀸𑀯𑀁 𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀦 𑀯𑀼𑀝𑁆𑀞𑀸𑀢𑀺 𑀯𑀸 𑀦 𑀤𑁂𑀲𑁂𑀢𑀺 𑀯𑀸 𑀢𑀸𑀯𑀤𑁂𑀯, 𑀦 𑀢𑀢𑁄 𑀧𑀭𑀁.

𑀢𑀢𑁆𑀭𑀸𑀬𑀁 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀓𑀣𑀺𑀓𑁄 𑀲𑁂𑀲𑀦𑁆𑀢𑀭𑀸𑀬𑀺𑀓𑁂 𑀚𑀸𑀦𑀸𑀢𑀺, 𑀯𑀺𑀦𑀬𑁂 𑀧𑀦 𑀅𑀓𑁄𑀯𑀺𑀤𑀢𑁆𑀢𑀸 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀦𑁆𑀢𑀭𑀸𑀬𑀺𑀓𑁂 𑀦 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀭𑀳𑁄𑀕𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀆𑀕𑀸𑀭𑀺𑀓𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀲𑁄𑀢𑀸𑀧𑀦𑁆𑀦𑀸𑀧𑀺 𑀲𑀓𑀤𑀸𑀕𑀸𑀫𑀺𑀦𑁄𑀧𑀺 𑀅𑀦𑀸𑀕𑀸𑀫𑀺𑀦𑁄𑀧𑀺 𑀳𑁄𑀦𑁆𑀢𑀺, 𑀪𑀺𑀓𑁆𑀔𑀽𑀧𑀺 𑀫𑀦𑀸𑀧𑀺𑀓𑀸𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀦𑁆𑀢𑀺…𑀧𑁂… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑁂 𑀨𑁄𑀝𑁆𑀞𑀩𑁆𑀩𑁂 𑀨𑀼𑀲𑀦𑁆𑀢𑀺, 𑀫𑀼𑀤𑀼𑀓𑀸𑀦𑀺 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀻𑀦𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀏𑀢𑀁 𑀲𑀩𑁆𑀩𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸 𑀇𑀢𑁆𑀣𑀺𑀭𑀽𑀧𑀸…𑀧𑁂… 𑀇𑀢𑁆𑀣𑀺𑀨𑁄𑀝𑁆𑀞𑀩𑁆𑀩𑀸 𑀏𑀯 𑀦 𑀯𑀝𑁆𑀝𑀦𑁆𑀢𑀺, 𑀏𑀢𑁂𑀧𑀺 𑀯𑀝𑁆𑀝𑀦𑁆𑀢𑀻’’𑀢𑀺. 𑀏𑀯𑀁 𑀭𑀲𑁂𑀦 𑀭𑀲𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀜𑁆𑀘 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀜𑁆𑀘 𑀏𑀓𑀁 𑀓𑀢𑁆𑀯𑀸 𑀣𑀽𑀮𑀯𑀸𑀓𑁂𑀳𑀺 𑀲𑀤𑁆𑀥𑀺𑀁 𑀅𑀢𑀺𑀲𑀼𑀔𑀼𑀫𑀲𑀼𑀢𑁆𑀢𑀁 𑀖𑀝𑁂𑀦𑁆𑀢𑁄 𑀯𑀺𑀬 𑀲𑀸𑀲𑀧𑁂𑀦 𑀲𑀤𑁆𑀥𑀺𑀁 𑀲𑀺𑀦𑁂𑀭𑀼𑀁 𑀉𑀧𑀲𑀁𑀳𑀭𑀦𑁆𑀢𑁄 𑀯𑀺𑀬 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀓𑀺𑀁 𑀪𑀕𑀯𑀢𑀸 𑀫𑀳𑀸𑀲𑀫𑀼𑀤𑁆𑀤𑀁 𑀩𑀦𑁆𑀥𑀦𑁆𑀢𑁂𑀦 𑀯𑀺𑀬 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦 𑀧𑀞𑀫𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀁, 𑀦𑀢𑁆𑀣𑀺 𑀏𑀢𑁆𑀣 𑀤𑁄𑀲𑁄’’𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀚𑁆𑀛𑀦𑁆𑀢𑁄 𑀪𑀩𑁆𑀩𑀧𑀼𑀕𑁆𑀕𑀮𑀸𑀦𑀁 𑀆𑀲𑀁 𑀙𑀺𑀦𑁆𑀤𑀦𑁆𑀢𑁄 𑀚𑀺𑀦𑀲𑁆𑀲 𑀆𑀡𑀸𑀘𑀓𑁆𑀓𑁂 𑀧𑀳𑀸𑀭𑀫𑀤𑀸𑀲𑀺. 𑀢𑁂𑀦𑀸𑀳 𑁋 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀻’’𑀢𑀺𑀆𑀤𑀺.

𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸𑀢𑀺𑀆𑀤𑀺𑀫𑁆𑀳𑀺 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀅𑀧𑁆𑀧𑀲𑁆𑀲𑀸𑀤𑀝𑁆𑀞𑁂𑀦. 𑀫𑀁𑀲𑀧𑁂𑀲𑀽𑀧𑀫𑀸 𑀩𑀳𑀼𑀲𑀸𑀥𑀸𑀭𑀡𑀝𑁆𑀞𑁂𑀦. 𑀢𑀺𑀡𑀼𑀓𑁆𑀓𑀽𑀧𑀫𑀸 𑀅𑀦𑀼𑀤𑀳𑀦𑀝𑁆𑀞𑁂𑀦. 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀫𑀳𑀸𑀪𑀺𑀢𑀸𑀧𑀦𑀝𑁆𑀞𑁂𑀦. 𑀲𑀼𑀧𑀺𑀦𑀓𑀽𑀧𑀫𑀸 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀝𑁆𑀞𑁂𑀦. 𑀬𑀸𑀘𑀺𑀢𑀓𑀽𑀧𑀫𑀸 𑀢𑀸𑀯𑀓𑀸𑀮𑀺𑀓𑀝𑁆𑀞𑁂𑀦. 𑀭𑀼𑀓𑁆𑀔𑀨𑀮𑀽𑀧𑀫𑀸 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀧𑀮𑀺𑀪𑀜𑁆𑀚𑀦𑀝𑁆𑀞𑁂𑀦. 𑀅𑀲𑀺𑀲𑀽𑀦𑀽𑀧𑀫𑀸 𑀅𑀥𑀺𑀓𑀼𑀝𑁆𑀝𑀦𑀝𑁆𑀞𑁂𑀦. 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦. 𑀲𑀧𑁆𑀧𑀲𑀺𑀭𑀽𑀧𑀫𑀸 𑀲𑀸𑀲𑀗𑁆𑀓𑀲𑀧𑁆𑀧𑀝𑀺𑀪𑀬𑀝𑁆𑀞𑁂𑀦𑀸𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑁧.𑁨𑁩𑁪 𑀆𑀤𑀬𑁄; 𑁨.𑁪𑁨 𑀆𑀤𑀬𑁄) 𑀕𑀳𑁂𑀢𑀩𑁆𑀩𑁄. 𑀏𑀯𑀁 𑀩𑁆𑀬𑀸𑀔𑁄𑀢𑀺 𑀏𑀯𑀁 𑀯𑀺𑀬 𑀔𑁄. 𑀲𑁂𑀲𑀫𑁂𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯.

𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀅𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀅𑀝𑁆𑀞𑀫𑀁.

𑁯. 𑀉𑀓𑁆𑀔𑀺𑀢𑁆𑀢𑀲𑀫𑁆𑀪𑁄𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁨𑁪-𑁫. 𑀦𑀯𑀫𑁂 𑁋 𑀅𑀓𑀝𑀸𑀦𑀼𑀥𑀫𑁆𑀫𑁂𑀦𑀸𑀢𑀺 𑀅𑀦𑀼𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀅𑀦𑀼𑀮𑁄𑀫𑀯𑀢𑁆𑀢𑀁 𑀤𑀺𑀲𑁆𑀯𑀸 𑀓𑀢𑀸 𑀑𑀲𑀸𑀭𑀡𑀸; 𑀲𑁄 𑀑𑀲𑀸𑀭𑀡𑀲𑀗𑁆𑀔𑀸𑀢𑁄 𑀅𑀦𑀼𑀥𑀫𑁆𑀫𑁄 𑀬𑀲𑁆𑀲 𑀦 𑀓𑀢𑁄, 𑀅𑀬𑀁 𑀅𑀓𑀝𑀸𑀦𑀼𑀥𑀫𑁆𑀫𑁄 𑀦𑀸𑀫, 𑀢𑀸𑀤𑀺𑀲𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀅𑀓𑀝𑀸𑀦𑀼𑀥𑀫𑁆𑀫𑁄 𑀦𑀸𑀫 𑀉𑀓𑁆𑀔𑀺𑀢𑁆𑀢𑁄 𑀅𑀦𑁄𑀲𑀸𑀭𑀺𑀢𑁄’’𑀢𑀺 𑀯𑀼𑀢𑁆𑀢𑀁.

𑀤𑁂𑀢𑀺 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀸𑀢𑀺 𑀏𑀓𑀧𑀬𑁄𑀕𑁂𑀦 𑀩𑀳𑀼𑀫𑁆𑀧𑀺 𑀤𑀤𑀢𑁄 𑀯𑀸 𑀕𑀡𑁆𑀳𑀢𑁄 𑀯𑀸 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀦𑁆𑀢𑀲𑁆𑀲 𑀘 𑀕𑀡𑁆𑀳𑀦𑁆𑀢𑀲𑁆𑀲 𑀘 𑀧𑀬𑁄𑀕𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀉𑀓𑁆𑀔𑀺𑀢𑁆𑀢𑀲𑀫𑁆𑀪𑁄𑀕𑀲𑀺𑀓𑁆𑀔𑀸𑀧𑀤𑀁 𑀦𑀯𑀫𑀁.

𑁧𑁦. 𑀓𑀡𑁆𑀝𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁨𑁮. 𑀤𑀲𑀫𑁂 𑁋 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀅𑀭𑀺𑀝𑁆𑀞𑀲𑁆𑀲 𑀯𑀺𑀬 𑀏𑀢𑀲𑁆𑀲𑀸𑀧𑀺 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀁. 𑀦𑀸𑀲𑁂𑀢𑀽𑀢𑀺 𑀏𑀢𑁆𑀣 𑀢𑀺𑀯𑀺𑀥𑀸 𑀦𑀸𑀲𑀦𑀸 𑁋 𑀲𑀁𑀯𑀸𑀲𑀦𑀸𑀲𑀦𑀸, 𑀮𑀺𑀗𑁆𑀕𑀦𑀸𑀲𑀦𑀸, 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸𑀢𑀺. 𑀢𑀢𑁆𑀣 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑀸𑀤𑀻𑀲𑀼 𑀉𑀓𑁆𑀔𑁂𑀧𑀦𑀸 𑀲𑀁𑀯𑀸𑀲𑀦𑀸𑀲𑀦𑀸 𑀦𑀸𑀫. ‘‘𑀤𑀽𑀲𑀓𑁄 𑀦𑀸𑀲𑁂𑀢𑀩𑁆𑀩𑁄 (𑀧𑀸𑀭𑀸. 𑁬𑁬) 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸’’𑀢𑀺 (𑀧𑀸𑀭𑀸. 𑁩𑁮𑁪) 𑀅𑀬𑀁 𑀮𑀺𑀗𑁆𑀕𑀦𑀸𑀲𑀦𑀸 𑀦𑀸𑀫. ‘‘𑀅𑀚𑁆𑀚𑀢𑀕𑁆𑀕𑁂 𑀢𑁂 𑀆𑀯𑀼𑀲𑁄 𑀲𑀫𑀡𑀼𑀤𑁆𑀤𑁂𑀲 𑀦 𑀘𑁂𑀯 𑀲𑁄 𑀪𑀕𑀯𑀸 𑀲𑀢𑁆𑀣𑀸 𑀅𑀧𑀤𑀺𑀲𑀺𑀢𑀩𑁆𑀩𑁄’’𑀢𑀺 𑀅𑀬𑀁 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸 𑀦𑀸𑀫. 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦𑀸𑀳 𑁋 ‘‘𑀏𑀯𑀜𑁆𑀘 𑀧𑀦 𑀪𑀺𑀓𑁆𑀔𑀯𑁂 𑀦𑀸𑀲𑁂𑀢𑀩𑁆𑀩𑁄…𑀧𑁂… 𑀯𑀺𑀦𑀲𑁆𑀲𑀸’’𑀢𑀺. 𑀢𑀢𑁆𑀣 𑀘𑀭𑀸𑀢𑀺 𑀕𑀘𑁆𑀙. 𑀧𑀺𑀭𑁂𑀢𑀺 𑀧𑀭 𑀅𑀫𑀸𑀫𑀓. 𑀯𑀺𑀦𑀲𑁆𑀲𑀸𑀢𑀺 𑀦𑀲𑁆𑀲; 𑀬𑀢𑁆𑀣 𑀢𑁂 𑀦 𑀧𑀲𑁆𑀲𑀸𑀫, 𑀢𑀢𑁆𑀣 𑀕𑀘𑁆𑀙𑀸𑀢𑀺.

𑁪𑁨𑁯. 𑀉𑀧𑀮𑀸𑀧𑁂𑀬𑁆𑀬𑀸𑀢𑀺 𑀲𑀗𑁆𑀕𑀡𑁆𑀳𑁂𑀬𑁆𑀬. 𑀉𑀧𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀢𑁂𑀦 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀦𑀁 𑀓𑀸𑀭𑀸𑀧𑁂𑀬𑁆𑀬. 𑀲𑁂𑀲𑀁 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀻𑀢𑀺.

𑀓𑀡𑁆𑀝𑀓𑀲𑀺𑀓𑁆𑀔𑀸𑀧𑀤𑀁 𑀤𑀲𑀫𑀁.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀲𑀧𑁆𑀧𑀸𑀡𑀓𑀯𑀕𑁆𑀕𑁄 𑀲𑀢𑁆𑀢𑀫𑁄.