𑁧𑁬. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁬𑁨. 𑀦 𑀫𑁂 𑀤𑀺𑀝𑁆𑀞𑁄𑀢𑀺 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀁, ‘‘𑀣𑁂𑀭𑀧𑀜𑁆𑀳𑀲𑀼𑀢𑁆𑀢’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀓𑀸 𑀉𑀧𑁆𑀧𑀢𑁆𑀢𑀺? 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺 𑁋 𑀭𑀸𑀚𑀕𑀳𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀘𑀦𑁆𑀤𑀦𑀖𑀝𑀺𑀓𑀸𑀬 𑀧𑀝𑀺𑀮𑀸𑀪𑀁 𑀆𑀤𑀺𑀁 𑀓𑀢𑁆𑀯𑀸 𑀢𑀸𑀬 𑀘𑀦𑁆𑀤𑀦𑀖𑀝𑀺𑀓𑀸𑀬 𑀓𑀢𑀲𑁆𑀲 𑀧𑀢𑁆𑀢𑀲𑁆𑀲 𑀆𑀓𑀸𑀲𑁂 𑀉𑀲𑁆𑀲𑀸𑀧𑀦𑀁 𑀆𑀬𑀲𑁆𑀫𑀢𑁄 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀲𑁆𑀲 𑀇𑀤𑁆𑀥𑀺𑀬𑀸 𑀧𑀢𑁆𑀢𑀕𑁆𑀕𑀳𑀡𑀁, 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀸𑀯𑀓𑀸𑀦𑀁 𑀇𑀤𑁆𑀥𑀺𑀧𑀝𑀺𑀓𑁆𑀔𑁂𑀧𑁄, 𑀢𑀺𑀢𑁆𑀣𑀺𑀬𑀸𑀦𑀁 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀢𑀼𑀓𑀸𑀫𑀢𑀸, 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀁, 𑀪𑀕𑀯𑀢𑁄 𑀲𑀸𑀯𑀢𑁆𑀣𑀺𑀕𑀫𑀦𑀁, 𑀢𑀺𑀢𑁆𑀣𑀺𑀬𑀸𑀦𑀼𑀩𑀦𑁆𑀥𑀦𑀁, 𑀲𑀸𑀯𑀢𑁆𑀣𑀺𑀬𑀁 𑀧𑀲𑁂𑀦𑀤𑀺𑀦𑁄 𑀩𑀼𑀤𑁆𑀥𑀽𑀧𑀕𑀫𑀦𑀁 𑀓𑀡𑁆𑀟𑀫𑁆𑀩𑀧𑀸𑀢𑀼𑀪𑀸𑀯𑁄, 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀢𑀺𑀢𑁆𑀣𑀺𑀬𑀚𑀬𑀢𑁆𑀣𑀁 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀼𑀲𑁆𑀲𑀼𑀓𑁆𑀓𑀦𑀺𑀯𑀸𑀭𑀡𑀁, 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀁, 𑀓𑀢𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀪𑀕𑀯𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑀕𑀫𑀦𑀁, 𑀢𑀢𑁆𑀣 𑀢𑁂𑀫𑀸𑀲𑀁 𑀥𑀫𑁆𑀫𑀤𑁂𑀲𑀦𑀸, 𑀆𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀦 𑀬𑀸𑀘𑀺𑀢𑀲𑁆𑀲 𑀤𑁂𑀯𑀮𑁄𑀓𑀢𑁄 𑀲𑀗𑁆𑀓𑀲𑁆𑀲𑀦𑀕𑀭𑁂 𑀑𑀭𑁄𑀳𑀡𑀦𑁆𑀢𑀺 𑀇𑀫𑀸𑀦𑀺 𑀯𑀢𑁆𑀣𑀽𑀦𑀺 𑀅𑀦𑁆𑀢𑀭𑀦𑁆𑀢𑀭𑁂 𑀘 𑀚𑀸𑀢𑀓𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀬𑀸𑀯 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀳𑀺 𑀧𑀽𑀚𑀺𑀬𑀫𑀸𑀦𑁄 𑀪𑀕𑀯𑀸 𑀫𑀚𑁆𑀛𑁂 𑀫𑀡𑀺𑀫𑀬𑁂𑀦 𑀲𑁄𑀧𑀸𑀦𑁂𑀦 𑀲𑀗𑁆𑀓𑀲𑁆𑀲𑀦𑀕𑀭𑁂 𑀑𑀭𑀼𑀬𑁆𑀳 𑀲𑁄𑀧𑀸𑀦𑀓𑀴𑁂𑀯𑀭𑁂 𑀅𑀝𑁆𑀞𑀸𑀲𑀺 𑁋

‘‘𑀬𑁂 𑀛𑀸𑀦𑀧𑁆𑀧𑀲𑀼𑀢𑀸 𑀥𑀻𑀭𑀸, 𑀦𑁂𑀓𑁆𑀔𑀫𑁆𑀫𑀽𑀧𑀲𑀫𑁂 𑀭𑀢𑀸;

𑀤𑁂𑀯𑀸𑀧𑀺 𑀢𑁂𑀲𑀁 𑀧𑀺𑀳𑀬𑀦𑁆𑀢𑀺, 𑀲𑀫𑁆𑀩𑀼𑀤𑁆𑀥𑀸𑀦𑀁 𑀲𑀢𑀻𑀫𑀢’’𑀦𑁆𑀢𑀺. (𑀥. 𑀧. 𑁧𑁮𑁧) 𑁋

𑀇𑀫𑀺𑀲𑁆𑀲𑀸 𑀥𑀫𑁆𑀫𑀧𑀤𑀕𑀸𑀣𑀸𑀬 𑀯𑀼𑀘𑁆𑀘𑀫𑀸𑀦𑀸𑀬 𑀯𑀼𑀢𑁆𑀢𑀸. 𑀲𑁄𑀧𑀸𑀦𑀓𑀴𑁂𑀯𑀭𑁂 𑀞𑀺𑀢𑀁 𑀧𑀦 𑀪𑀕𑀯𑀦𑁆𑀢𑀁 𑀲𑀩𑁆𑀩𑀧𑀞𑀫𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀯𑀦𑁆𑀤𑀺, 𑀢𑀢𑁄 𑀉𑀧𑁆𑀧𑀮𑀯𑀡𑁆𑀡𑀸 𑀪𑀺𑀓𑁆𑀔𑀼𑀦𑀻, 𑀅𑀣𑀸𑀧𑀭𑁄 𑀚𑀦𑀓𑀸𑀬𑁄. 𑀢𑀢𑁆𑀭 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀺𑀲𑁆𑀲𑀁 𑀧𑀭𑀺𑀲𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑁄 𑀇𑀤𑁆𑀥𑀺𑀬𑀸 𑀅𑀕𑁆𑀕𑁄𑀢𑀺 𑀧𑀸𑀓𑀝𑁄, 𑀅𑀦𑀼𑀭𑀼𑀤𑁆𑀥𑁄 𑀤𑀺𑀩𑁆𑀩𑀘𑀓𑁆𑀔𑀼𑀦𑀸, 𑀧𑀼𑀡𑁆𑀡𑁄 𑀥𑀫𑁆𑀫𑀓𑀣𑀺𑀓𑀢𑁆𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢𑀁 𑀧𑀦𑀸𑀬𑀁 𑀧𑀭𑀺𑀲𑀸 𑀦 𑀓𑁂𑀦𑀘𑀺 𑀕𑀼𑀡𑁂𑀦 𑀏𑀯𑀁 𑀅𑀕𑁆𑀕𑁄𑀢𑀺 𑀚𑀸𑀦𑀸𑀢𑀺, 𑀬𑀁𑀦𑀽𑀦𑀸𑀳𑀁 𑀲𑀸𑀭𑀺𑀧𑀼𑀢𑁆𑀢𑀁 𑀧𑀜𑁆𑀜𑀸𑀕𑀼𑀡𑁂𑀦 𑀧𑀓𑀸𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀣𑁂𑀭𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀣𑁂𑀭𑁄 𑀪𑀕𑀯𑀢𑀸 𑀧𑀼𑀘𑁆𑀙𑀺𑀢𑀁 𑀧𑀼𑀘𑁆𑀙𑀺𑀢𑀁 𑀧𑀼𑀣𑀼𑀚𑁆𑀚𑀦𑀧𑀜𑁆𑀳𑀁, 𑀲𑁂𑀓𑁆𑀔𑀧𑀜𑁆𑀳𑀁, 𑀅𑀲𑁂𑀓𑁆𑀔𑀧𑀜𑁆𑀳𑀜𑁆𑀘, 𑀲𑀩𑁆𑀩𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀤𑀸 𑀦𑀁 𑀚𑀦𑁄 ‘‘𑀧𑀜𑁆𑀜𑀸𑀬 𑀅𑀕𑁆𑀕𑁄’’𑀢𑀺 𑀅𑀜𑁆𑀜𑀸𑀲𑀺. 𑀅𑀣 𑀪𑀕𑀯𑀸 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀦 𑀇𑀤𑀸𑀦𑁂𑀯 𑀧𑀜𑁆𑀜𑀸𑀬 𑀅𑀕𑁆𑀕𑁄, 𑀅𑀢𑀻𑀢𑁂𑀧𑀺 𑀧𑀜𑁆𑀜𑀸𑀬 𑀅𑀕𑁆𑀕𑁄’’𑀢𑀺 𑀚𑀸𑀢𑀓𑀁 𑀆𑀦𑁂𑀲𑀺.

𑀅𑀢𑀻𑀢𑁂 𑀧𑀭𑁄𑀲𑀳𑀲𑁆𑀲𑀸 𑀇𑀲𑀬𑁄 𑀯𑀦𑀫𑀽𑀮𑀨𑀮𑀸𑀳𑀸𑀭𑀸 𑀧𑀩𑁆𑀩𑀢𑀧𑀸𑀤𑁂 𑀯𑀲𑀦𑁆𑀢𑀺. 𑀢𑁂𑀲𑀁 𑀆𑀘𑀭𑀺𑀬𑀲𑁆𑀲 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀉𑀧𑀝𑁆𑀞𑀸𑀦𑀸𑀦𑀺 𑀯𑀢𑁆𑀢𑀦𑁆𑀢𑀺. 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀻 ‘‘𑀲𑀧𑁆𑀧𑀸𑀬𑀪𑁂𑀲𑀚𑁆𑀚𑀁 𑀆𑀳𑀭𑀺𑀲𑁆𑀲𑀸𑀫𑀺, 𑀆𑀘𑀭𑀺𑀬𑀁 𑀅𑀧𑁆𑀧𑀫𑀢𑁆𑀢𑀸 𑀉𑀧𑀝𑁆𑀞𑀳𑀣𑀸’’𑀢𑀺 𑀯𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀅𑀦𑀸𑀕𑀢𑁂𑀬𑁂𑀯 𑀆𑀘𑀭𑀺𑀬𑁄 𑀓𑀸𑀮𑀫𑀓𑀸𑀲𑀺. 𑀢𑀁 ‘‘𑀇𑀤𑀸𑀦𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀸 𑀲𑀫𑀸𑀧𑀢𑁆𑀢𑀺𑀫𑀸𑀭𑀩𑁆𑀪 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺, 𑀅𑀦𑁆𑀢𑁂𑀯𑀸𑀲𑀺𑀦𑁄 ‘‘𑀦𑀢𑁆𑀣𑀺 𑀆𑀘𑀭𑀺𑀬𑀲𑁆𑀲 𑀅𑀥𑀺𑀕𑀫𑁄’’𑀢𑀺 𑀅𑀕𑁆𑀕𑀳𑁂𑀲𑀼𑀁. 𑀅𑀣 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀻 𑀪𑁂𑀲𑀚𑁆𑀚𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀢𑀁 𑀓𑀸𑀮𑀓𑀢𑀁 𑀤𑀺𑀲𑁆𑀯𑀸 𑀆𑀘𑀭𑀺𑀬𑀁 ‘‘𑀓𑀺𑀜𑁆𑀘𑀺 𑀧𑀼𑀘𑁆𑀙𑀺𑀢𑁆𑀣𑀸’’𑀢𑀺 𑀆𑀳. 𑀆𑀫 𑀧𑀼𑀘𑁆𑀙𑀺𑀫𑁆𑀳𑀸, ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀆𑀳, 𑀦 𑀓𑀺𑀜𑁆𑀘𑀺 𑀆𑀘𑀭𑀺𑀬𑁂𑀦 𑀅𑀥𑀺𑀕𑀢𑀦𑁆𑀢𑀺. 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀯𑀤𑀦𑁆𑀢𑁄 𑀆𑀘𑀭𑀺𑀬𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀧𑀯𑁂𑀤𑁂𑀲𑀺, 𑀲𑀓𑁆𑀓𑀸𑀢𑀩𑁆𑀩𑁄 𑀆𑀘𑀭𑀺𑀬𑁄𑀢𑀺.

‘‘𑀧𑀭𑁄𑀲𑀳𑀲𑁆𑀲𑀫𑁆𑀧𑀺 𑀲𑀫𑀸𑀕𑀢𑀸𑀦𑀁,

𑀓𑀦𑁆𑀤𑁂𑀬𑁆𑀬𑀼𑀁 𑀢𑁂 𑀯𑀲𑁆𑀲𑀲𑀢𑀁 𑀅𑀧𑀜𑁆𑀜𑀸;

𑀏𑀓𑁄𑀧𑀺 𑀲𑁂𑀬𑁆𑀬𑁄 𑀧𑀼𑀭𑀺𑀲𑁄 𑀲𑀧𑀜𑁆𑀜𑁄,

𑀬𑁄 𑀪𑀸𑀲𑀺𑀢𑀲𑁆𑀲 𑀯𑀺𑀚𑀸𑀦𑀸𑀢𑀺 𑀅𑀢𑁆𑀣’’𑀦𑁆𑀢𑀺. (𑀚𑀸. 𑁧.𑁧.𑁯𑁯);

𑀓𑀣𑀺𑀢𑁂 𑀘 𑀧𑀦 𑀪𑀕𑀯𑀢𑀸 𑀚𑀸𑀢𑀓𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀫𑀢𑁆𑀣𑀸𑀬 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑀕𑁄𑀘𑀭𑀲𑀻𑀮𑀯𑀢𑀸𑀤𑀻𑀦𑀺 𑀧𑀼𑀘𑁆𑀙𑀺𑀢𑀼𑀁 ‘‘𑀦 𑀫𑁂 𑀤𑀺𑀝𑁆𑀞𑁄 𑀇𑀢𑁄 𑀧𑀼𑀩𑁆𑀩𑁂’’𑀢𑀺 𑀇𑀫𑀁 𑀣𑀼𑀢𑀺𑀕𑀸𑀣𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀝𑁆𑀞 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀪𑀕𑀯𑀸 𑀢𑀢𑁄 𑀧𑀭𑀸 𑀲𑁂𑀲𑀕𑀸𑀣𑀸𑀢𑀺.

𑀢𑀢𑁆𑀣 𑀇𑀢𑁄 𑀧𑀼𑀩𑁆𑀩𑁂𑀢𑀺 𑀇𑀢𑁄 𑀲𑀗𑁆𑀓𑀲𑁆𑀲𑀦𑀕𑀭𑁂 𑀑𑀢𑀭𑀡𑀢𑁄 𑀧𑀼𑀩𑁆𑀩𑁂. 𑀯𑀕𑁆𑀕𑀼𑀯𑀤𑁄𑀢𑀺 𑀲𑀼𑀦𑁆𑀤𑀭𑀯𑀤𑁄. 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄𑀢𑀺 𑀢𑀼𑀲𑀺𑀢𑀓𑀸𑀬𑀸 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀆𑀕𑀢𑀢𑁆𑀢𑀸 𑀢𑀼𑀲𑀺𑀢𑀸 𑀆𑀕𑀢𑁄, 𑀕𑀡𑀸𑀘𑀭𑀺𑀬𑀢𑁆𑀢𑀸 𑀕𑀡𑀻. 𑀲𑀦𑁆𑀢𑀼𑀝𑁆𑀞𑀝𑁆𑀞𑁂𑀦 𑀯𑀸 𑀢𑀼𑀲𑀺𑀢𑀲𑀗𑁆𑀔𑀸𑀢𑀸 𑀤𑁂𑀯𑀮𑁄𑀓𑀸 𑀕𑀡𑀺𑀁 𑀆𑀕𑀢𑁄 𑀢𑀼𑀲𑀺𑀢𑀸𑀦𑀁 𑀯𑀸 𑀅𑀭𑀳𑀦𑁆𑀢𑀸𑀦𑀁 𑀕𑀡𑀺𑀁 𑀆𑀕𑀢𑁄𑀢𑀺.

𑁯𑁬𑁩. 𑀤𑀼𑀢𑀺𑀬𑀕𑀸𑀣𑀸𑀬 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀬𑀣𑀸 𑀤𑀺𑀲𑁆𑀲𑀢𑀻𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀯𑀺𑀬 𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀤𑀺𑀲𑁆𑀲𑀢𑀺. 𑀬𑀣𑀸 𑀯𑀸 𑀤𑀺𑀲𑁆𑀲𑀢𑀻𑀢𑀺 𑀢𑀘𑁆𑀙𑀢𑁄 𑀅𑀯𑀺𑀧𑀭𑀻𑀢𑀢𑁄 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸𑀢𑀺 𑀉𑀢𑁆𑀢𑀫𑀘𑀓𑁆𑀔𑀼. 𑀏𑀓𑁄𑀢𑀺 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑀸𑀤𑀻𑀳𑀺 𑀏𑀓𑁄. 𑀭𑀢𑀺𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑀭𑀢𑀺𑀆𑀤𑀺𑀁.

𑁯𑁬𑁪. 𑀢𑀢𑀺𑀬𑀕𑀸𑀣𑀸𑀬 𑀩𑀳𑀽𑀦𑀫𑀺𑀥 𑀩𑀤𑁆𑀥𑀸𑀦𑀦𑁆𑀢𑀺 𑀇𑀥 𑀩𑀳𑀽𑀦𑀁 𑀔𑀢𑁆𑀢𑀺𑀬𑀸𑀤𑀻𑀦𑀁 𑀲𑀺𑀲𑁆𑀲𑀸𑀦𑀁. 𑀲𑀺𑀲𑁆𑀲𑀸 𑀳𑀺 𑀆𑀘𑀭𑀺𑀬𑁂 𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑁆𑀢𑀸 ‘‘𑀩𑀤𑁆𑀥𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀦𑁆𑀢𑀺 𑀅𑀢𑁆𑀣𑀺𑀓𑁄 𑀧𑀜𑁆𑀳𑁂𑀦 𑀆𑀕𑀢𑁄𑀫𑁆𑀳𑀺, 𑀅𑀢𑁆𑀣𑀺𑀓𑀸𑀦𑀁 𑀯𑀸 𑀧𑀜𑁆𑀳𑁂𑀦 𑀆𑀕𑀫𑀦𑀁, 𑀧𑀜𑁆𑀳𑁂𑀦 𑀅𑀢𑁆𑀣𑀺 𑀆𑀕𑀫𑀦𑀁 𑀯𑀸𑀢𑀺.

𑁯𑁬𑁫. 𑀘𑀢𑀼𑀢𑁆𑀣𑀕𑀸𑀣𑀸𑀬 𑀯𑀺𑀚𑀺𑀕𑀼𑀘𑁆𑀙𑀢𑁄𑀢𑀺 𑀚𑀸𑀢𑀺𑀆𑀤𑀻𑀳𑀺 𑀅𑀝𑁆𑀝𑀻𑀬𑀢𑁄 𑀭𑀺𑀢𑁆𑀢𑀫𑀸𑀲𑀦𑀦𑁆𑀢𑀺 𑀯𑀺𑀯𑀺𑀢𑁆𑀢𑀁 𑀫𑀜𑁆𑀘𑀧𑀻𑀞𑀁. 𑀧𑀩𑁆𑀩𑀢𑀸𑀦𑀁 𑀕𑀼𑀳𑀸𑀲𑀼 𑀯𑀸𑀢𑀺 𑀧𑀩𑁆𑀩𑀢𑀕𑀼𑀳𑀸𑀲𑀼 𑀯𑀸 𑀭𑀺𑀢𑁆𑀢𑀫𑀸𑀲𑀦𑀁 𑀪𑀚𑀢𑁄𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑁯𑁬𑁬. 𑀧𑀜𑁆𑀘𑀫𑀕𑀸𑀣𑀸𑀬 𑀉𑀘𑁆𑀘𑀸𑀯𑀘𑁂𑀲𑀽𑀢𑀺 𑀳𑀻𑀦𑀧𑀡𑀻𑀢𑁂𑀲𑀼. 𑀲𑀬𑀦𑁂𑀲𑀽𑀢𑀺 𑀯𑀺𑀳𑀸𑀭𑀸𑀤𑀻𑀲𑀼 𑀲𑁂𑀦𑀸𑀲𑀦𑁂𑀲𑀼. 𑀓𑀻𑀯𑀦𑁆𑀢𑁄 𑀢𑀢𑁆𑀣 𑀪𑁂𑀭𑀯𑀸𑀢𑀺 𑀓𑀺𑀢𑁆𑀢𑀓𑀸 𑀢𑀢𑁆𑀣 𑀪𑀬𑀓𑀸𑀭𑀡𑀸. ‘‘𑀓𑀼𑀯𑀦𑁆𑀢𑁄’’𑀢𑀺𑀧𑀺 𑀧𑀸𑀞𑁄, 𑀓𑀽𑀚𑀦𑁆𑀢𑁄𑀢𑀺 𑀘𑀲𑁆𑀲 𑀅𑀢𑁆𑀣𑁄. 𑀦 𑀧𑀦 𑀧𑀼𑀩𑁆𑀩𑁂𑀦𑀸𑀧𑀭𑀁 𑀲𑀦𑁆𑀥𑀺𑀬𑀢𑀺.

𑁯𑁬𑁭. 𑀙𑀝𑁆𑀞𑀕𑀸𑀣𑀸𑀬 𑀓𑀢𑀻 𑀧𑀭𑀺𑀲𑁆𑀲𑀬𑀸𑀢𑀺 𑀓𑀺𑀢𑁆𑀢𑀓𑀸 𑀉𑀧𑀤𑁆𑀤𑀯𑀸. 𑀅𑀕𑀢𑀁 𑀤𑀺𑀲𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀅𑀕𑀢𑀧𑀼𑀩𑁆𑀩𑀢𑁆𑀢𑀸 𑀅𑀕𑀢𑀁 𑀢𑀣𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁄 𑀤𑀺𑀲𑀸 𑀘𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀕𑀢𑀁 𑀤𑀺𑀲’’𑀦𑁆𑀢𑀺. 𑀅𑀪𑀺𑀲𑀫𑁆𑀪𑀯𑁂𑀢𑀺 𑀅𑀪𑀺𑀪𑀯𑁂𑀬𑁆𑀬. 𑀧𑀦𑁆𑀢𑀫𑁆𑀳𑀻𑀢𑀺 𑀧𑀭𑀺𑀬𑀦𑁆𑀢𑁂.

𑁯𑁬𑁮-𑁯. 𑀲𑀢𑁆𑀢𑀫𑀕𑀸𑀣𑀸𑀬 𑀓𑁆𑀬𑀸𑀲𑁆𑀲 𑀩𑁆𑀬𑀧𑁆𑀧𑀣𑀬𑁄 𑀅𑀲𑁆𑀲𑀽𑀢𑀺 𑀓𑀻𑀤𑀺𑀲𑀸𑀦𑀺 𑀢𑀲𑁆𑀲 𑀯𑀘𑀦𑀸𑀦𑀺 𑀅𑀲𑁆𑀲𑀼. 𑀅𑀝𑁆𑀞𑀫𑀕𑀸𑀣𑀸𑀬 𑀏𑀓𑁄𑀤𑀺 𑀦𑀺𑀧𑀓𑁄𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑁄 𑀧𑀡𑁆𑀟𑀺𑀢𑁄.

𑁯𑁭𑁦. 𑀏𑀯𑀁 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀢𑀻𑀳𑀺 𑀕𑀸𑀣𑀸𑀳𑀺 𑀪𑀕𑀯𑀦𑁆𑀢𑀁 𑀣𑁄𑀫𑁂𑀢𑁆𑀯𑀸 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑁋 𑀧𑀜𑁆𑀘𑀲𑀢𑀸𑀦𑀁 𑀲𑀺𑀲𑁆𑀲𑀸𑀦𑀫𑀢𑁆𑀣𑀸𑀬 𑀲𑁂𑀦𑀸𑀲𑀦𑀕𑁄𑀘𑀭𑀲𑀻𑀮𑀯𑀢𑀸𑀤𑀻𑀦𑀺 𑀧𑀼𑀘𑁆𑀙𑀺𑀢𑁄 𑀪𑀕𑀯𑀸 𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 ‘‘𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀲𑁆𑀲𑀚𑁆𑀚𑀦𑀫𑀸𑀭𑀤𑁆𑀥𑁄. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯𑀢𑁆𑀣𑁄 𑁋 𑀚𑀸𑀢𑀺𑀆𑀤𑀻𑀳𑀺 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀲𑁆𑀲 𑀭𑀺𑀢𑁆𑀢𑀸𑀲𑀦𑀁 𑀲𑀬𑀦𑀁 𑀲𑁂𑀯𑀢𑁄 𑀘𑁂 𑀲𑀫𑁆𑀩𑁄𑀥𑀺𑀓𑀸𑀫𑀲𑁆𑀲 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑁄 𑀬𑀤𑀺𑀤𑀁 𑀨𑀸𑀲𑀼 𑀬𑁄 𑀨𑀸𑀲𑀼𑀯𑀺𑀳𑀸𑀭𑁄 𑀬𑀣𑀸𑀦𑀼𑀥𑀫𑁆𑀫𑀁 𑀬𑁄 𑀘 𑀅𑀦𑀼𑀥𑀫𑁆𑀫𑁄, 𑀢𑀁 𑀢𑁂 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦𑀁 𑀬𑀣𑀸 𑀧𑀚𑀸𑀦𑀦𑁆𑀢𑁄 𑀯𑀤𑁂𑀬𑁆𑀬, 𑀏𑀯𑀁 𑀯𑀤𑀸𑀫𑀻𑀢𑀺.

𑁯𑁭𑁧. 𑀤𑀼𑀢𑀺𑀬𑀕𑀸𑀣𑀸𑀬 𑀧𑀭𑀺𑀬𑀦𑁆𑀢𑀘𑀸𑀭𑀻𑀢𑀺 𑀲𑀻𑀮𑀸𑀤𑀻𑀲𑀼 𑀘𑀢𑀽𑀲𑀼 𑀧𑀭𑀺𑀬𑀦𑁆𑀢𑁂𑀲𑀼 𑀘𑀭𑀫𑀸𑀦𑁄. 𑀟𑀁𑀲𑀸𑀥𑀺𑀧𑀸𑀢𑀸𑀦𑀦𑁆𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸𑀦𑀜𑁆𑀘 𑀲𑁂𑀲𑀫𑀓𑁆𑀔𑀺𑀓𑀸𑀦𑀜𑁆𑀘. 𑀲𑁂𑀲𑀫𑀓𑁆𑀔𑀺𑀓𑀸 𑀳𑀺 𑀢𑀢𑁄 𑀢𑀢𑁄 𑀅𑀥𑀺𑀧𑀢𑀺𑀢𑁆𑀯𑀸 𑀔𑀸𑀤𑀦𑁆𑀢𑀺, 𑀢𑀲𑁆𑀫𑀸 ‘‘𑀅𑀥𑀺𑀧𑀸𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀦𑀼𑀲𑁆𑀲𑀨𑀲𑁆𑀲𑀸𑀦𑀦𑁆𑀢𑀺 𑀘𑁄𑀭𑀸𑀤𑀺𑀨𑀲𑁆𑀲𑀸𑀦𑀁.

𑁯𑁭𑁨. 𑀢𑀢𑀺𑀬𑀕𑀸𑀣𑀸𑀬 𑀧𑀭𑀥𑀫𑁆𑀫𑀺𑀓𑀸 𑀦𑀸𑀫 𑀲𑀢𑁆𑀢 𑀲𑀳𑀥𑀫𑁆𑀫𑀺𑀓𑀯𑀚𑁆𑀚𑀸 𑀲𑀩𑁆𑀩𑁂𑀧𑀺 𑀩𑀸𑀳𑀺𑀭𑀓𑀸. 𑀓𑀼𑀲𑀮𑀸𑀦𑀼𑀏𑀲𑀻𑀢𑀺 𑀓𑀼𑀲𑀮𑀥𑀫𑁆𑀫𑁂 𑀅𑀦𑁆𑀯𑁂𑀲𑀫𑀸𑀦𑁄.

𑁯𑁭𑁩. 𑀘𑀢𑀼𑀢𑁆𑀣𑀕𑀸𑀣𑀸𑀬 𑀆𑀢𑀗𑁆𑀓𑀨𑀲𑁆𑀲𑁂𑀦𑀸𑀢𑀺 𑀭𑁄𑀕𑀨𑀲𑁆𑀲𑁂𑀦. 𑀲𑀻𑀢𑀁 𑀅𑀢𑀼𑀡𑁆𑀳𑀦𑁆𑀢𑀺 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘. 𑀲𑁄 𑀢𑁂𑀳𑀺 𑀨𑀼𑀝𑁆𑀞𑁄 𑀩𑀳𑀼𑀥𑀸𑀢𑀺 𑀲𑁄 𑀢𑁂𑀳𑀺 𑀆𑀢𑀗𑁆𑀓𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀺 𑀨𑀼𑀝𑁆𑀞𑁄 𑀲𑀫𑀸𑀦𑁄𑀧𑀺. 𑀅𑀦𑁄𑀓𑁄𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀦𑁄𑀓𑀸𑀲𑀪𑀽𑀢𑁄.

𑁯𑁭𑁪. 𑀏𑀯𑀁 ‘‘𑀪𑀺𑀓𑁆𑀔𑀼𑀦𑁄 𑀯𑀺𑀚𑀺𑀕𑀼𑀘𑁆𑀙𑀢𑁄’’𑀢𑀺𑀆𑀤𑀻𑀳𑀺 𑀢𑀻𑀳𑀺 𑀕𑀸𑀣𑀸𑀳𑀺 𑀧𑀼𑀝𑁆𑀞𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀓𑁆𑀬𑀸𑀲𑁆𑀲 𑀩𑁆𑀬𑀧𑁆𑀧𑀣𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀝𑁆𑀞𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 ‘‘𑀣𑁂𑀬𑁆𑀬𑀁 𑀦 𑀓𑀸𑀭𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀨𑀲𑁆𑀲𑁂𑀢𑀺 𑀨𑀭𑁂𑀬𑁆𑀬. 𑀬𑀤𑀸𑀯𑀺𑀮𑀢𑁆𑀢𑀁 𑀫𑀦𑀲𑁄 𑀯𑀺𑀚𑀜𑁆𑀜𑀸𑀢𑀺 𑀬𑀁 𑀘𑀺𑀢𑁆𑀢𑀲𑁆𑀲 𑀆𑀯𑀺𑀮𑀢𑁆𑀢𑀁 𑀯𑀺𑀚𑀸𑀦𑁂𑀬𑁆𑀬, 𑀢𑀁 𑀲𑀩𑁆𑀩𑀁 ‘‘𑀓𑀡𑁆𑀳𑀲𑁆𑀲 𑀧𑀓𑁆𑀔𑁄’’𑀢𑀺 𑀯𑀺𑀦𑁄𑀤𑀬𑁂𑀬𑁆𑀬.

𑁯𑁭𑁫. 𑀫𑀽𑀮𑀫𑁆𑀧𑀺 𑀢𑁂𑀲𑀁 𑀧𑀮𑀺𑀔𑀜𑁆𑀜 𑀢𑀺𑀝𑁆𑀞𑁂𑀢𑀺 𑀢𑁂𑀲𑀁 𑀓𑁄𑀥𑀸𑀢𑀺𑀫𑀸𑀦𑀸𑀦𑀁 𑀬𑀁 𑀅𑀯𑀺𑀚𑁆𑀚𑀸𑀤𑀺𑀓𑀁 𑀫𑀽𑀮𑀁, 𑀢𑀫𑁆𑀧𑀺 𑀧𑀮𑀺𑀔𑀡𑀺𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬. 𑀅𑀤𑁆𑀥𑀸 𑀪𑀯𑀦𑁆𑀢𑁄 𑀅𑀪𑀺𑀲𑀫𑁆𑀪𑀯𑁂𑀬𑁆𑀬𑀸𑀢𑀺 𑀏𑀯𑀁 𑀧𑀺𑀬𑀧𑁆𑀧𑀺𑀬𑀁 𑀅𑀪𑀺𑀪𑀯𑀦𑁆𑀢𑁄 𑀏𑀓𑀁𑀲𑁂𑀦𑁂𑀯 𑀅𑀪𑀺𑀪𑀯𑁂𑀬𑁆𑀬, 𑀦 𑀢𑀢𑁆𑀭 𑀲𑀺𑀣𑀺𑀮𑀁 𑀧𑀭𑀓𑁆𑀓𑀫𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁯𑁭𑁬. 𑀧𑀜𑁆𑀜𑀁 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀧𑀜𑁆𑀜𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸. 𑀓𑀮𑁆𑀬𑀸𑀡𑀧𑀻𑀢𑀻𑀢𑀺 𑀓𑀮𑁆𑀬𑀸𑀡𑀸𑀬 𑀧𑀻𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀘𑀢𑀼𑀭𑁄 𑀲𑀳𑁂𑀣 𑀧𑀭𑀺𑀤𑁂𑀯𑀥𑀫𑁆𑀫𑁂𑀢𑀺 𑀅𑀦𑀦𑁆𑀢𑀭𑀕𑀸𑀣𑀸𑀬 𑀯𑀼𑀘𑁆𑀘𑀫𑀸𑀦𑁂 𑀧𑀭𑀺𑀤𑁂𑀯𑀦𑀻𑀬𑀥𑀫𑁆𑀫𑁂 𑀲𑀳𑁂𑀬𑁆𑀬.

𑁯𑁭𑁭. 𑀓𑀺𑀁𑀲𑀽 𑀅𑀲𑀺𑀲𑁆𑀲𑀸𑀫𑀻𑀢𑀺 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀺. 𑀓𑀼𑀯𑀁 𑀯𑀸 𑀅𑀲𑀺𑀲𑁆𑀲𑀦𑁆𑀢𑀺 𑀓𑀼𑀳𑀺𑀁 𑀯𑀸 𑀅𑀲𑀺𑀲𑁆𑀲𑀸𑀫𑀺. 𑀤𑀼𑀓𑁆𑀔𑀁 𑀯𑀢 𑀲𑁂𑀢𑁆𑀣 𑀓𑁆𑀯𑀚𑁆𑀚 𑀲𑁂𑀲𑁆𑀲𑀦𑁆𑀢𑀺 𑀇𑀫𑀁 𑀭𑀢𑁆𑀢𑀺𑀁 𑀤𑀼𑀓𑁆𑀔𑀁 𑀲𑀬𑀺𑀁, 𑀅𑀚𑁆𑀚 𑀆𑀕𑀫𑀦𑀭𑀢𑁆𑀢𑀺𑀁 𑀓𑀢𑁆𑀣 𑀲𑀬𑀺𑀲𑁆𑀲𑀁. 𑀏𑀢𑁂 𑀯𑀺𑀢𑀓𑁆𑀓𑁂𑀢𑀺 𑀏𑀢𑁂 𑀧𑀺𑀡𑁆𑀟𑀧𑀸𑀢𑀦𑀺𑀲𑁆𑀲𑀺𑀢𑁂 𑀤𑁆𑀯𑁂, 𑀲𑁂𑀦𑀸𑀲𑀦𑀦𑀺𑀲𑁆𑀲𑀺𑀢𑁂 𑀤𑁆𑀯𑁂𑀢𑀺 𑀘𑀢𑁆𑀢𑀸𑀭𑁄 𑀯𑀺𑀢𑀓𑁆𑀓𑁂. 𑀅𑀦𑀺𑀓𑁂𑀢𑀘𑀸𑀭𑀻𑀢𑀺 𑀅𑀧𑀮𑀺𑀩𑁄𑀥𑀘𑀸𑀭𑀻 𑀦𑀺𑀢𑁆𑀢𑀡𑁆𑀳𑀘𑀸𑀭𑀻.

𑁯𑁭𑁮. 𑀓𑀸𑀮𑁂𑀢𑀺 𑀧𑀺𑀡𑁆𑀟𑀧𑀸𑀢𑀓𑀸𑀮𑁂 𑀧𑀺𑀡𑁆𑀟𑀧𑀸𑀢𑀲𑀗𑁆𑀔𑀸𑀢𑀁 𑀅𑀦𑁆𑀦𑀁 𑀯𑀸 𑀘𑀻𑀯𑀭𑀓𑀸𑀮𑁂 𑀘𑀻𑀯𑀭𑀲𑀗𑁆𑀔𑀸𑀢𑀁 𑀯𑀲𑀦𑀁 𑀯𑀸 𑀮𑀤𑁆𑀥𑀸 𑀥𑀫𑁆𑀫𑁂𑀦 𑀲𑀫𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀢𑁆𑀢𑀁 𑀲𑁄 𑀚𑀜𑁆𑀜𑀸𑀢𑀺 𑀧𑀝𑀺𑀕𑁆𑀕𑀳𑀡𑁂 𑀘 𑀧𑀭𑀺𑀪𑁄𑀕𑁂 𑀘 𑀲𑁄 𑀧𑀫𑀸𑀡𑀁 𑀚𑀸𑀦𑁂𑀬𑁆𑀬. 𑀇𑀥𑀸𑀢𑀺 𑀲𑀸𑀲𑀦𑁂, 𑀦𑀺𑀧𑀸𑀢𑀫𑀢𑁆𑀢𑀫𑁂𑀯 𑀯𑀸 𑀏𑀢𑀁. 𑀢𑁄𑀲𑀦𑀢𑁆𑀣𑀦𑁆𑀢𑀺 𑀲𑀦𑁆𑀢𑁄𑀲𑀢𑁆𑀣𑀁, 𑀏𑀢𑀤𑀢𑁆𑀣𑀁 𑀫𑀢𑁆𑀢𑀁 𑀚𑀸𑀦𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀢𑁂𑀲𑀼 𑀕𑀼𑀢𑁆𑀢𑁄𑀢𑀺 𑀲𑁄 𑀪𑀺𑀓𑁆𑀔𑀼 𑀢𑁂𑀲𑀼 𑀧𑀘𑁆𑀘𑀬𑁂𑀲𑀼 𑀕𑀼𑀢𑁆𑀢𑁄. 𑀬𑀢𑀘𑀸𑀭𑀻𑀢𑀺 𑀲𑀁𑀬𑀢𑀯𑀺𑀳𑀸𑀭𑁄, 𑀭𑀓𑁆𑀔𑀺𑀢𑀺𑀭𑀺𑀬𑀸𑀧𑀣𑁄 𑀭𑀓𑁆𑀔𑀺𑀢𑀓𑀸𑀬𑀯𑀘𑀻𑀫𑀦𑁄𑀤𑁆𑀯𑀸𑀭𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀬𑀢𑀺𑀘𑀸𑀭𑀻’’𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀭𑀼𑀲𑀺𑀢𑁄𑀢𑀺 𑀭𑁄𑀲𑀺𑀢𑁄, 𑀖𑀝𑁆𑀝𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁯𑁭𑁯. 𑀛𑀸𑀦𑀸𑀦𑀼𑀬𑀼𑀢𑁆𑀢𑁄𑀢𑀺 𑀅𑀦𑀼𑀧𑀦𑁆𑀦𑀼𑀧𑁆𑀧𑀸𑀤𑀦𑁂𑀦 𑀉𑀧𑁆𑀧𑀦𑁆𑀦𑀸𑀲𑁂𑀯𑀦𑁂𑀦 𑀘 𑀛𑀸𑀦𑁂 𑀅𑀦𑀼𑀬𑀼𑀢𑁆𑀢𑁄. 𑀉𑀧𑁂𑀓𑁆𑀔𑀫𑀸𑀭𑀩𑁆𑀪 𑀲𑀫𑀸𑀳𑀺𑀢𑀢𑁆𑀢𑁄𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑁄. 𑀢𑀓𑁆𑀓𑀸𑀲𑀬𑀁 𑀓𑀼𑀓𑁆𑀓𑀼𑀘𑁆𑀘𑀺𑀬𑀽𑀧𑀙𑀺𑀦𑁆𑀤𑁂𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀁 𑀢𑀓𑁆𑀓𑀜𑁆𑀘, 𑀓𑀸𑀫𑀲𑀜𑁆𑀜𑀸𑀤𑀺𑀁 𑀢𑀲𑁆𑀲 𑀢𑀓𑁆𑀓𑀲𑁆𑀲 𑀆𑀲𑀬𑀜𑁆𑀘, 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀸𑀤𑀺𑀁 𑀓𑀼𑀓𑁆𑀓𑀼𑀘𑁆𑀘𑀺𑀬𑀜𑁆𑀘 𑀉𑀧𑀘𑁆𑀙𑀺𑀦𑁆𑀤𑁂𑀬𑁆𑀬.

𑁯𑁮𑁦. 𑀘𑀼𑀤𑀺𑀢𑁄 𑀯𑀘𑀻𑀪𑀺 𑀲𑀢𑀺𑀫𑀸𑀪𑀺𑀦𑀦𑁆𑀤𑁂𑀢𑀺 𑀉𑀧𑀚𑁆𑀛𑀸𑀬𑀸𑀤𑀻𑀳𑀺 𑀯𑀸𑀘𑀸𑀳𑀺 𑀘𑁄𑀤𑀺𑀢𑁄 𑀲𑀫𑀸𑀦𑁄 𑀲𑀢𑀺𑀫𑀸 𑀳𑀼𑀢𑁆𑀯𑀸 𑀢𑀁 𑀘𑁄𑀤𑀦𑀁 𑀅𑀪𑀺𑀦𑀦𑁆𑀤𑁂𑀬𑁆𑀬. 𑀯𑀸𑀘𑀁 𑀧𑀫𑀼𑀜𑁆𑀘𑁂 𑀓𑀼𑀲𑀮𑀦𑁆𑀢𑀺 𑀜𑀸𑀡𑀲𑀫𑀼𑀝𑁆𑀞𑀺𑀢𑀁 𑀯𑀸𑀘𑀁 𑀧𑀫𑀼𑀜𑁆𑀘𑁂𑀬𑁆𑀬. 𑀦𑀸𑀢𑀺𑀯𑁂𑀮𑀦𑁆𑀢𑀺 𑀅𑀢𑀺𑀯𑁂𑀮𑀁 𑀧𑀦 𑀯𑀸𑀘𑀁 𑀓𑀸𑀮𑀯𑁂𑀮𑀜𑁆𑀘 𑀲𑀻𑀮𑀯𑁂𑀮𑀜𑁆𑀘 𑀅𑀢𑀺𑀓𑁆𑀓𑀦𑁆𑀢𑀁 𑀦𑀧𑁆𑀧𑀫𑀼𑀜𑁆𑀘𑁂𑀬𑁆𑀬. 𑀚𑀦𑀯𑀸𑀤𑀥𑀫𑁆𑀫𑀸𑀬𑀸𑀢𑀺 𑀚𑀦𑀯𑀸𑀤𑀓𑀣𑀸𑀬. 𑀦 𑀘𑁂𑀢𑀬𑁂𑀬𑁆𑀬𑀸𑀢𑀺 𑀘𑁂𑀢𑀦𑀁 𑀦 𑀉𑀧𑁆𑀧𑀸𑀤𑁂𑀬𑁆𑀬.

𑁯𑁮𑁧. 𑀅𑀣𑀸𑀧𑀭𑀦𑁆𑀢𑀺 𑀅𑀣 𑀇𑀤𑀸𑀦𑀺 𑀇𑀢𑁄 𑀧𑀭𑀫𑁆𑀧𑀺. 𑀧𑀜𑁆𑀘 𑀭𑀚𑀸𑀦𑀻𑀢𑀺 𑀭𑀽𑀧𑀭𑀸𑀕𑀸𑀤𑀻𑀦𑀺 𑀧𑀜𑁆𑀘 𑀭𑀚𑀸𑀦𑀺. 𑀬𑁂𑀲𑀁 𑀲𑀢𑀻𑀫𑀸 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂𑀢𑀺 𑀬𑁂𑀲𑀁 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀳𑀼𑀢𑁆𑀯𑀸 𑀯𑀺𑀦𑀬𑀦𑀢𑁆𑀣𑀁 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑁂𑀬𑁆𑀬. 𑀏𑀯𑀁 𑀲𑀺𑀓𑁆𑀔𑀦𑁆𑀢𑁄 𑀳𑀺 𑀭𑀽𑀧𑁂𑀲𑀼…𑀧𑁂… 𑀨𑀲𑁆𑀲𑁂𑀲𑀼 𑀲𑀳𑁂𑀣 𑀭𑀸𑀕𑀁, 𑀦 𑀅𑀜𑁆𑀜𑁂𑀢𑀺.

𑁯𑁮𑁨. 𑀢𑀢𑁄 𑀲𑁄 𑀢𑁂𑀲𑀁 𑀯𑀺𑀦𑀬𑀸𑀬 𑀲𑀺𑀓𑁆𑀔𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑁋 𑀏𑀢𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀕𑀸𑀣𑀸. 𑀢𑀢𑁆𑀣 𑀏𑀢𑁂𑀲𑀽𑀢𑀺 𑀭𑀽𑀧𑀸𑀤𑀻𑀲𑀼. 𑀓𑀸𑀮𑁂𑀦 𑀲𑁄 𑀲𑀫𑁆𑀫𑀸 𑀥𑀫𑁆𑀫𑀁 𑀧𑀭𑀺𑀯𑀻𑀫𑀁𑀲𑀫𑀸𑀦𑁄𑀢𑀺 𑀲𑁄 𑀪𑀺𑀓𑁆𑀔𑀼 𑀬𑁆𑀯𑀸𑀬𑀁 ‘‘𑀉𑀤𑁆𑀥𑀢𑁂 𑀘𑀺𑀢𑁆𑀢𑁂 𑀲𑀫𑀸𑀥𑀺𑀲𑁆𑀲 𑀓𑀸𑀮𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀸𑀮𑁄 𑀯𑀼𑀢𑁆𑀢𑁄, 𑀢𑁂𑀦 𑀓𑀸𑀮𑁂𑀦 𑀲𑀩𑁆𑀩𑀁 𑀲𑀗𑁆𑀔𑀢𑀥𑀫𑁆𑀫𑀁 𑀅𑀦𑀺𑀘𑁆𑀘𑀸𑀤𑀺𑀦𑀬𑁂𑀦 𑀧𑀭𑀺𑀯𑀻𑀫𑀁𑀲𑀫𑀸𑀦𑁄. 𑀏𑀓𑁄𑀤𑀺𑀪𑀽𑀢𑁄 𑀯𑀺𑀳𑀦𑁂 𑀢𑀫𑀁 𑀲𑁄𑀢𑀺 𑀲𑁄 𑀏𑀓𑀕𑁆𑀕𑀘𑀺𑀢𑁆𑀢𑁄 𑀲𑀩𑁆𑀩𑀁 𑀫𑁄𑀳𑀸𑀤𑀺𑀢𑀫𑀁 𑀯𑀺𑀳𑀦𑁂𑀬𑁆𑀬. 𑀦𑀢𑁆𑀣𑀺 𑀏𑀢𑁆𑀣 𑀲𑀁𑀲𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀢𑀺𑀁𑀲𑀓𑁄𑀝𑀺𑀲𑀗𑁆𑀔𑁆𑀬𑀸𑀦𑀜𑁆𑀘 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀘 𑀘𑀢𑀼𑀢𑁆𑀣𑁄 𑀯𑀕𑁆𑀕𑁄 𑀅𑀢𑁆𑀣𑀯𑀡𑁆𑀡𑀦𑀸𑀦𑀬𑀢𑁄, 𑀦𑀸𑀫𑁂𑀦

𑀅𑀝𑁆𑀞𑀓𑀯𑀕𑁆𑀕𑁄𑀢𑀺.