𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸

(𑀤𑀼𑀢𑀺𑀬𑁄 𑀪𑀸𑀕𑁄)

𑁨. 𑀘𑀽𑀴𑀯𑀕𑁆𑀕𑁄

𑁪. 𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀗𑁆𑀕𑀮𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀚𑀫𑁆𑀩𑀼𑀤𑀻𑀧𑁂 𑀓𑀺𑀭 𑀢𑀢𑁆𑀣 𑀢𑀢𑁆𑀣 𑀦𑀕𑀭𑀤𑁆𑀯𑀸𑀭𑀲𑀦𑁆𑀣𑀸𑀕𑀸𑀭𑀲𑀪𑀸𑀤𑀻𑀲𑀼 𑀫𑀳𑀸𑀚𑀦𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀤𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀲𑀻𑀢𑀸𑀳𑀭𑀡𑀸𑀤𑀺𑀩𑀸𑀳𑀺𑀭𑀓𑀓𑀣𑀁 𑀓𑀣𑀸𑀧𑁂𑀦𑁆𑀢𑀺, 𑀏𑀓𑁂𑀓𑀸 𑀓𑀣𑀸 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀦𑀺𑀝𑁆𑀞𑀸𑀢𑀺. 𑀢𑀢𑁆𑀣 𑀏𑀓𑀤𑀺𑀯𑀲𑀁 𑀫𑀗𑁆𑀕𑀮𑀓𑀣𑀸 𑀲𑀫𑀼𑀝𑁆𑀞𑀸𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀫𑀗𑁆𑀕𑀮𑀁, 𑀓𑀺𑀁 𑀤𑀺𑀝𑁆𑀞𑀁 𑀫𑀗𑁆𑀕𑀮𑀁, 𑀲𑀼𑀢𑀁 𑀫𑀗𑁆𑀕𑀮𑀁, 𑀫𑀼𑀢𑀁 𑀫𑀗𑁆𑀕𑀮𑀁, 𑀓𑁄 𑀫𑀗𑁆𑀕𑀮𑀁 𑀚𑀸𑀦𑀸𑀢𑀻’’𑀢𑀺?

𑀅𑀣 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁄 𑀦𑀸𑀫𑁂𑀓𑁄 𑀧𑀼𑀭𑀺𑀲𑁄 𑀆𑀳 𑁋 ‘‘𑀅𑀳𑀁 𑀫𑀗𑁆𑀕𑀮𑀁 𑀚𑀸𑀦𑀸𑀫𑀺, 𑀤𑀺𑀝𑁆𑀞𑀁 𑀮𑁄𑀓𑁂 𑀫𑀗𑁆𑀕𑀮𑀁, 𑀤𑀺𑀝𑁆𑀞𑀁 𑀦𑀸𑀫 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀁 𑀭𑀽𑀧𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀘𑀸𑀢𑀓𑀲𑀓𑀼𑀡𑀁 𑀯𑀸 𑀧𑀲𑁆𑀲𑀢𑀺, 𑀩𑁂𑀮𑀼𑀯𑀮𑀝𑁆𑀞𑀺𑀁 𑀯𑀸 𑀕𑀩𑁆𑀪𑀺𑀦𑀺𑀁 𑀯𑀸 𑀓𑀼𑀫𑀸𑀭𑀓𑁂 𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂 𑀧𑀼𑀡𑁆𑀡𑀖𑀝𑀁 𑀯𑀸 𑀅𑀮𑁆𑀮𑀭𑁄𑀳𑀺𑀢𑀫𑀘𑁆𑀙𑀁 𑀯𑀸 𑀆𑀚𑀜𑁆𑀜𑀁 𑀯𑀸 𑀆𑀚𑀜𑁆𑀜𑀭𑀣𑀁 𑀯𑀸 𑀉𑀲𑀪𑀁 𑀯𑀸 𑀕𑀸𑀯𑀺𑀁 𑀯𑀸 𑀓𑀧𑀺𑀮𑀁 𑀯𑀸, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀏𑀯𑀭𑀽𑀧𑀁 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀁 𑀭𑀽𑀧𑀁 𑀧𑀲𑁆𑀲𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀫𑀗𑁆𑀕𑀮’’𑀦𑁆𑀢𑀺. 𑀢𑀲𑁆𑀲 𑀯𑀘𑀦𑀁 𑀏𑀓𑀘𑁆𑀘𑁂 𑀅𑀕𑁆𑀕𑀳𑁂𑀲𑀼𑀁, 𑀏𑀓𑀘𑁆𑀘𑁂 𑀦𑀸𑀕𑁆𑀕𑀳𑁂𑀲𑀼𑀁. 𑀬𑁂 𑀦𑀸𑀕𑁆𑀕𑀳𑁂𑀲𑀼𑀁, 𑀢𑁂 𑀢𑁂𑀦 𑀲𑀳 𑀯𑀺𑀯𑀤𑀺𑀁𑀲𑀼.

𑀅𑀣 𑀲𑀼𑀢𑀫𑀗𑁆𑀕𑀮𑀺𑀓𑁄 𑀦𑀸𑀫𑁂𑀓𑁄 𑀧𑀼𑀭𑀺𑀲𑁄 𑀆𑀳 𑁋 ‘‘𑀘𑀓𑁆𑀔𑀼 𑀦𑀸𑀫𑁂𑀢𑀁, 𑀪𑁄, 𑀲𑀼𑀘𑀺𑀫𑁆𑀧𑀺 𑀅𑀲𑀼𑀘𑀺𑀫𑁆𑀧𑀺 𑀧𑀲𑁆𑀲𑀢𑀺, 𑀢𑀣𑀸 𑀲𑀼𑀦𑁆𑀤𑀭𑀫𑁆𑀧𑀺 𑀅𑀲𑀼𑀦𑁆𑀤𑀭𑀫𑁆𑀧𑀺, 𑀫𑀦𑀸𑀧𑀫𑁆𑀧𑀺 𑀅𑀫𑀦𑀸𑀧𑀫𑁆𑀧𑀺. 𑀬𑀤𑀺 𑀢𑁂𑀦 𑀤𑀺𑀝𑁆𑀞𑀁 𑀫𑀗𑁆𑀕𑀮𑀁 𑀲𑀺𑀬𑀸, 𑀲𑀩𑁆𑀩𑀫𑁆𑀧𑀺 𑀫𑀗𑁆𑀕𑀮𑀁 𑀲𑀺𑀬𑀸, 𑀢𑀲𑁆𑀫𑀸 𑀦 𑀤𑀺𑀝𑁆𑀞𑀁 𑀫𑀗𑁆𑀕𑀮𑀁, 𑀅𑀧𑀺𑀘 𑀔𑁄 𑀧𑀦 𑀲𑀼𑀢𑀁 𑀫𑀗𑁆𑀕𑀮𑀁, 𑀲𑀼𑀢𑀁 𑀦𑀸𑀫 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑁄 𑀲𑀤𑁆𑀤𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀯𑀟𑁆𑀠𑀸𑀢𑀺 𑀯𑀸 𑀯𑀟𑁆𑀠𑀫𑀸𑀦𑀸𑀢𑀺 𑀯𑀸 𑀧𑀼𑀡𑁆𑀡𑀸𑀢𑀺 𑀯𑀸 𑀨𑀼𑀲𑁆𑀲𑀸𑀢𑀺 𑀯𑀸 𑀲𑀼𑀫𑀦𑀸𑀢𑀺 𑀯𑀸 𑀲𑀺𑀭𑀻𑀢𑀺 𑀯𑀸 𑀲𑀺𑀭𑀺𑀯𑀟𑁆𑀠𑀸𑀢𑀺 𑀯𑀸 𑀅𑀚𑁆𑀚 𑀲𑀼𑀦𑀓𑁆𑀔𑀢𑁆𑀢𑀁 𑀲𑀼𑀫𑀼𑀳𑀼𑀢𑁆𑀢𑀁 𑀲𑀼𑀤𑀺𑀯𑀲𑀁 𑀲𑀼𑀫𑀗𑁆𑀕𑀮𑀦𑁆𑀢𑀺 𑀏𑀯𑀭𑀽𑀧𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀁 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀼𑀢𑀫𑀗𑁆𑀕𑀮’’𑀦𑁆𑀢𑀺. 𑀢𑀲𑁆𑀲𑀧𑀺 𑀯𑀘𑀦𑀁 𑀏𑀓𑀘𑁆𑀘𑁂 𑀅𑀕𑁆𑀕𑀳𑁂𑀲𑀼𑀁, 𑀏𑀓𑀘𑁆𑀘𑁂 𑀦𑀸𑀕𑁆𑀕𑀳𑁂𑀲𑀼𑀁. 𑀬𑁂 𑀦𑀸𑀕𑁆𑀕𑀳𑁂𑀲𑀼𑀁, 𑀢𑁂 𑀢𑁂𑀦 𑀲𑀳 𑀯𑀺𑀯𑀤𑀺𑀁𑀲𑀼.

𑀅𑀣 𑀫𑀼𑀢𑀫𑀗𑁆𑀕𑀮𑀺𑀓𑁄 𑀦𑀸𑀫𑁂𑀓𑁄 𑀧𑀼𑀭𑀺𑀲𑁄 𑀆𑀳 𑁋 ‘‘𑀲𑁄𑀢𑀫𑁆𑀧𑀺 𑀳𑀺 𑀦𑀸𑀫𑁂𑀢𑀁 𑀪𑁄 𑀲𑀸𑀥𑀼𑀫𑁆𑀧𑀺 𑀅𑀲𑀸𑀥𑀼𑀫𑁆𑀧𑀺 𑀫𑀦𑀸𑀧𑀫𑁆𑀧𑀺 𑀅𑀫𑀦𑀸𑀧𑀫𑁆𑀧𑀺 𑀲𑀼𑀡𑀸𑀢𑀺. 𑀬𑀤𑀺 𑀢𑁂𑀦 𑀲𑀼𑀢𑀁 𑀫𑀗𑁆𑀕𑀮𑀁 𑀲𑀺𑀬𑀸, 𑀲𑀩𑁆𑀩𑀫𑁆𑀧𑀺 𑀫𑀗𑁆𑀕𑀮𑀁 𑀲𑀺𑀬𑀸, 𑀢𑀲𑁆𑀫𑀸 𑀦 𑀲𑀼𑀢𑀁 𑀫𑀗𑁆𑀕𑀮𑀁, 𑀅𑀧𑀺𑀘 𑀔𑁄 𑀧𑀦 𑀫𑀼𑀢𑀁 𑀫𑀗𑁆𑀕𑀮𑀁, 𑀫𑀼𑀢𑀁 𑀦𑀸𑀫 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀁 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀧𑀤𑀼𑀫𑀕𑀦𑁆𑀥𑀸𑀤𑀺𑀧𑀼𑀧𑁆𑀨𑀕𑀦𑁆𑀥𑀁 𑀯𑀸 𑀖𑀸𑀬𑀢𑀺, 𑀨𑀼𑀲𑁆𑀲𑀤𑀦𑁆𑀢𑀓𑀝𑁆𑀞𑀁 𑀯𑀸 𑀔𑀸𑀤𑀢𑀺, 𑀧𑀣𑀯𑀺𑀁 𑀯𑀸 𑀆𑀫𑀲𑀢𑀺, 𑀳𑀭𑀺𑀢𑀲𑀲𑁆𑀲𑀁 𑀯𑀸 𑀅𑀮𑁆𑀮𑀕𑁄𑀫𑀬𑀁 𑀯𑀸 𑀓𑀘𑁆𑀙𑀧𑀁 𑀯𑀸 𑀢𑀺𑀮𑀯𑀸𑀳𑀁 𑀯𑀸 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀆𑀫𑀲𑀢𑀺, 𑀨𑀼𑀲𑁆𑀲𑀫𑀢𑁆𑀢𑀺𑀓𑀸𑀬 𑀯𑀸 𑀲𑀫𑁆𑀫𑀸 𑀮𑀺𑀫𑁆𑀧𑀢𑀺, 𑀨𑀼𑀲𑁆𑀲𑀲𑀸𑀝𑀓𑀁 𑀯𑀸 𑀦𑀺𑀯𑀸𑀲𑁂𑀢𑀺, 𑀨𑀼𑀲𑁆𑀲𑀯𑁂𑀞𑀦𑀁 𑀯𑀸 𑀥𑀸𑀭𑁂𑀢𑀺, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀏𑀯𑀭𑀽𑀧𑀁 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀁 𑀕𑀦𑁆𑀥𑀁 𑀯𑀸 𑀖𑀸𑀬𑀢𑀺, 𑀭𑀲𑀁 𑀯𑀸 𑀲𑀸𑀬𑀢𑀺, 𑀨𑁄𑀝𑁆𑀞𑀩𑁆𑀩𑀁 𑀯𑀸 𑀨𑀼𑀲𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀼𑀢𑀫𑀗𑁆𑀕𑀮’’𑀦𑁆𑀢𑀺. 𑀢𑀲𑁆𑀲𑀧𑀺 𑀯𑀘𑀦𑀁 𑀏𑀓𑀘𑁆𑀘𑁂 𑀅𑀕𑁆𑀕𑀳𑁂𑀲𑀼𑀁, 𑀏𑀓𑀘𑁆𑀘𑁂 𑀦𑀸𑀕𑁆𑀕𑀳𑁂𑀲𑀼𑀁.

𑀢𑀢𑁆𑀣 𑀦 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁄 𑀲𑀼𑀢𑀫𑀼𑀢𑀫𑀗𑁆𑀕𑀮𑀺𑀓𑁂 𑀅𑀲𑀓𑁆𑀔𑀺 𑀲𑀜𑁆𑀜𑀸𑀧𑁂𑀢𑀼𑀁. 𑀦 𑀢𑁂𑀲𑀁 𑀅𑀜𑁆𑀜𑀢𑀭𑁄 𑀇𑀢𑀭𑁂 𑀤𑁆𑀯𑁂. 𑀢𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀬𑁂 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀲𑁆𑀲 𑀯𑀘𑀦𑀁 𑀕𑀡𑁆𑀳𑀺𑀁𑀲𑀼, 𑀢𑁂 ‘‘𑀤𑀺𑀝𑁆𑀞𑀁𑀬𑁂𑀯 𑀫𑀗𑁆𑀕𑀮’’𑀦𑁆𑀢𑀺 𑀕𑀢𑀸. 𑀬𑁂 𑀲𑀼𑀢𑀫𑀼𑀢𑀫𑀗𑁆𑀕𑀮𑀺𑀓𑀸𑀦𑀁 𑀯𑀘𑀦𑀁 𑀕𑀡𑁆𑀳𑀺𑀁𑀲𑀼, 𑀢𑁂 ‘‘𑀲𑀼𑀢𑀁𑀬𑁂𑀯 𑀫𑀼𑀢𑀁𑀬𑁂𑀯 𑀫𑀗𑁆𑀕𑀮’’𑀦𑁆𑀢𑀺 𑀕𑀢𑀸. 𑀏𑀯𑀫𑀬𑀁 𑀫𑀗𑁆𑀕𑀮𑀓𑀣𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑀸 𑀚𑀸𑀢𑀸.

𑀅𑀣 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀫𑀦𑀼𑀲𑁆𑀲𑀸 𑀕𑀼𑀫𑁆𑀩𑀕𑀼𑀫𑁆𑀩𑀸 𑀳𑀼𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀫𑀗𑁆𑀕𑀮’’𑀦𑁆𑀢𑀺 𑀫𑀗𑁆𑀕𑀮𑀸𑀦𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀆𑀭𑀓𑁆𑀔𑀤𑁂𑀯𑀢𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀢𑀣𑁂𑀯 𑀫𑀗𑁆𑀕𑀮𑀸𑀦𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀪𑀼𑀫𑁆𑀫𑀤𑁂𑀯𑀢𑀸 𑀫𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀅𑀣 𑀢𑀢𑁄 𑀲𑀼𑀢𑁆𑀯𑀸 𑀪𑀼𑀫𑁆𑀫𑀤𑁂𑀯𑀢𑀸𑀧𑀺 𑀢𑀣𑁂𑀯 𑀫𑀗𑁆𑀕𑀮𑀸𑀦𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀢𑀸𑀲𑀫𑁆𑀧𑀺 𑀤𑁂𑀯𑀢𑀸𑀦𑀁 𑀆𑀓𑀸𑀲𑀝𑁆𑀞𑀤𑁂𑀯𑀢𑀸 𑀫𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀆𑀓𑀸𑀲𑀝𑁆𑀞𑀤𑁂𑀯𑀢𑀸𑀦𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀢𑀸. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀬𑀸𑀯 𑀲𑀼𑀤𑀲𑁆𑀲𑀻𑀤𑁂𑀯𑀢𑀸𑀦𑀁 𑀅𑀓𑀦𑀺𑀝𑁆𑀞𑀤𑁂𑀯𑀢𑀸 𑀫𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀅𑀣 𑀢𑀢𑁄 𑀲𑀼𑀢𑁆𑀯𑀸 𑀅𑀓𑀦𑀺𑀝𑁆𑀞𑀤𑁂𑀯𑀢𑀸𑀧𑀺 𑀢𑀣𑁂𑀯 𑀕𑀼𑀫𑁆𑀩𑀕𑀼𑀫𑁆𑀩𑀸 𑀳𑀼𑀢𑁆𑀯𑀸 𑀫𑀗𑁆𑀕𑀮𑀸𑀦𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀏𑀯𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑀢𑁆𑀣 𑀫𑀗𑁆𑀕𑀮𑀘𑀺𑀦𑁆𑀢𑀸 𑀉𑀤𑀧𑀸𑀤𑀺. 𑀉𑀧𑁆𑀧𑀦𑁆𑀦𑀸 𑀘 𑀲𑀸 ‘‘𑀇𑀤𑀁 𑀫𑀗𑁆𑀕𑀮𑀁 𑀇𑀤𑀁 𑀫𑀗𑁆𑀕𑀮’’𑀦𑁆𑀢𑀺 𑀯𑀺𑀦𑀺𑀘𑁆𑀙𑀺𑀬𑀫𑀸𑀦𑀸𑀧𑀺 𑀅𑀧𑁆𑀧𑀢𑁆𑀢𑀸 𑀏𑀯 𑀯𑀺𑀦𑀺𑀘𑁆𑀙𑀬𑀁 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀅𑀝𑁆𑀞𑀸𑀲𑀺. 𑀲𑀩𑁆𑀩𑁂 𑀫𑀦𑀼𑀲𑁆𑀲𑀸 𑀘 𑀤𑁂𑀯𑀸 𑀘 𑀩𑁆𑀭𑀳𑁆𑀫𑀸𑀦𑁄 𑀘 𑀞𑀧𑁂𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁂 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀲𑁂𑀦 𑀢𑀺𑀥𑀸 𑀪𑀺𑀦𑁆𑀦𑀸. 𑀏𑀓𑁄𑀧𑀺 ‘‘𑀇𑀤𑀫𑁂𑀯 𑀫𑀗𑁆𑀕𑀮’’𑀦𑁆𑀢𑀺 𑀬𑀣𑀸𑀪𑀼𑀘𑁆𑀘𑀢𑁄 𑀦𑀺𑀝𑁆𑀞𑀗𑁆𑀕𑀢𑁄 𑀦𑀸𑀳𑁄𑀲𑀺, 𑀫𑀗𑁆𑀕𑀮𑀓𑁄𑀮𑀸𑀳𑀮𑀁 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺.

𑀓𑁄𑀮𑀸𑀳𑀮𑀁 𑀦𑀸𑀫 𑀧𑀜𑁆𑀘𑀯𑀺𑀥𑀁 𑁋 𑀓𑀧𑁆𑀧𑀓𑁄𑀮𑀸𑀳𑀮𑀁, 𑀘𑀓𑁆𑀓𑀯𑀢𑁆𑀢𑀺𑀓𑁄𑀮𑀸𑀳𑀮𑀁, 𑀩𑀼𑀤𑁆𑀥𑀓𑁄𑀮𑀸𑀳𑀮𑀁, 𑀫𑀗𑁆𑀕𑀮𑀓𑁄𑀮𑀸𑀳𑀮𑀁, 𑀫𑁄𑀦𑁂𑀬𑁆𑀬𑀓𑁄𑀮𑀸𑀳𑀮𑀦𑁆𑀢𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀤𑁂𑀯𑀸 𑀫𑀼𑀢𑁆𑀢𑀲𑀺𑀭𑀸 𑀯𑀺𑀓𑀺𑀡𑁆𑀡𑀓𑁂𑀲𑀸 𑀭𑀼𑀤𑀫𑁆𑀫𑀼𑀔𑀸 𑀅𑀲𑁆𑀲𑀽𑀦𑀺 𑀳𑀢𑁆𑀣𑁂𑀳𑀺 𑀧𑀼𑀜𑁆𑀙𑀫𑀸𑀦𑀸 𑀭𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀅𑀢𑀺𑀯𑀺𑀬 𑀯𑀺𑀭𑀽𑀧𑀯𑁂𑀲𑀥𑀸𑀭𑀺𑀦𑁄 𑀳𑀼𑀢𑁆𑀯𑀸, ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀓𑀧𑁆𑀧𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀮𑁄𑀓𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀺, 𑀫𑀳𑀸𑀲𑀫𑀼𑀤𑁆𑀤𑁄 𑀲𑀼𑀲𑁆𑀲𑀺𑀲𑁆𑀲𑀢𑀺, 𑀅𑀬𑀜𑁆𑀘 𑀫𑀳𑀸𑀧𑀣𑀯𑀻 𑀲𑀺𑀦𑁂𑀭𑀼 𑀘 𑀧𑀩𑁆𑀩𑀢𑀭𑀸𑀚𑀸 𑀉𑀟𑁆𑀠𑀬𑁆𑀳𑀺𑀲𑁆𑀲𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀢𑀺, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀮𑁄𑀓𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀺. 𑀫𑁂𑀢𑁆𑀢𑀁, 𑀫𑀸𑀭𑀺𑀲𑀸, 𑀪𑀸𑀯𑁂𑀣, 𑀓𑀭𑀼𑀡𑀁 𑀫𑀼𑀤𑀺𑀢𑀁 𑀉𑀧𑁂𑀓𑁆𑀔𑀁, 𑀫𑀸𑀭𑀺𑀲𑀸, 𑀪𑀸𑀯𑁂𑀣, 𑀫𑀸𑀢𑀭𑀁 𑀉𑀧𑀝𑁆𑀞𑀳𑀣, 𑀧𑀺𑀢𑀭𑀁 𑀉𑀧𑀝𑁆𑀞𑀳𑀣, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀳𑁄𑀣, 𑀚𑀸𑀕𑀭𑀣 𑀫𑀸 𑀧𑀫𑀸𑀤𑀢𑁆𑀣𑀸’’𑀢𑀺 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺. 𑀇𑀤𑀁 𑀓𑀧𑁆𑀧𑀓𑁄𑀮𑀸𑀳𑀮𑀁 𑀦𑀸𑀫.

𑀓𑀸𑀫𑀸𑀯𑀘𑀭𑀤𑁂𑀯𑀸𑀬𑁂𑀯 ‘‘𑀯𑀲𑁆𑀲𑀲𑀢𑀲𑁆𑀲𑀘𑁆𑀘𑀬𑁂𑀦 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺. 𑀇𑀤𑀁 𑀘𑀓𑁆𑀓𑀯𑀢𑁆𑀢𑀺𑀓𑁄𑀮𑀸𑀳𑀮𑀁 𑀦𑀸𑀫.

𑀲𑀼𑀤𑁆𑀥𑀸𑀯𑀸𑀲𑀸 𑀧𑀦 𑀤𑁂𑀯𑀸 𑀩𑁆𑀭𑀳𑁆𑀫𑀸𑀪𑀭𑀡𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀯𑁂𑀞𑀦𑀁 𑀲𑀻𑀲𑁂 𑀓𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀩𑀼𑀤𑁆𑀥𑀕𑀼𑀡𑀯𑀸𑀤𑀺𑀦𑁄 ‘‘𑀯𑀲𑁆𑀲𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺. 𑀇𑀤𑀁 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀦𑀸𑀫.

𑀲𑀼𑀤𑁆𑀥𑀸𑀯𑀸𑀲𑀸 𑀏𑀯 𑀤𑁂𑀯𑀸 𑀫𑀦𑀼𑀲𑁆𑀲𑀸𑀦𑀁 𑀘𑀺𑀢𑁆𑀢𑀁 𑀜𑀢𑁆𑀯𑀸 ‘‘𑀤𑁆𑀯𑀸𑀤𑀲𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀗𑁆𑀕𑀮𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺. 𑀇𑀤𑀁 𑀫𑀗𑁆𑀕𑀮𑀓𑁄𑀮𑀸𑀳𑀮𑀁 𑀦𑀸𑀫.

𑀲𑀼𑀤𑁆𑀥𑀸𑀯𑀸𑀲𑀸 𑀏𑀯 𑀤𑁂𑀯𑀸 ‘‘𑀲𑀢𑁆𑀢𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑀸𑀕𑀫𑁆𑀫 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀧𑀼𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺. 𑀇𑀤𑀁 𑀫𑁄𑀦𑁂𑀬𑁆𑀬𑀓𑁄𑀮𑀸𑀳𑀮𑀁 𑀦𑀸𑀫. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀓𑁄𑀮𑀸𑀳𑀮𑁂𑀲𑀼 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀺𑀯𑀲𑁂𑀦 𑀢𑀺𑀥𑀸 𑀪𑀺𑀦𑁆𑀦𑁂𑀲𑀼 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀇𑀤𑀁 𑀫𑀗𑁆𑀕𑀮𑀓𑁄𑀮𑀸𑀳𑀮𑀁 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺.

𑀅𑀣 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀯𑀺𑀘𑀺𑀦𑀺𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀫𑀗𑁆𑀕𑀮𑀸𑀦𑀺 𑀅𑀮𑀪𑀫𑀸𑀦𑁂𑀲𑀼 𑀤𑁆𑀯𑀸𑀤𑀲𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀸𑀯𑀢𑀺𑀁𑀲𑀓𑀸𑀬𑀺𑀓𑀸 𑀤𑁂𑀯𑀢𑀸 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫, 𑀫𑀸𑀭𑀺𑀲𑀸, 𑀖𑀭𑀲𑀸𑀫𑀺𑀓𑁄 𑀅𑀦𑁆𑀢𑁄𑀖𑀭𑀚𑀦𑀸𑀦𑀁, 𑀕𑀸𑀫𑀲𑀸𑀫𑀺𑀓𑁄 𑀕𑀸𑀫𑀯𑀸𑀲𑀻𑀦𑀁, 𑀭𑀸𑀚𑀸 𑀲𑀩𑁆𑀩𑀫𑀦𑀼𑀲𑁆𑀲𑀸𑀦𑀁, 𑀏𑀯𑀫𑁂𑀯𑀁 𑀅𑀬𑀁 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀫𑁆𑀳𑀸𑀓𑀁 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀬𑀤𑀺𑀤𑀁 𑀧𑀼𑀜𑁆𑀜𑁂𑀦 𑀢𑁂𑀚𑁂𑀦 𑀇𑀲𑁆𑀲𑀭𑀺𑀬𑁂𑀦 𑀧𑀜𑁆𑀜𑀸𑀬 𑀤𑁆𑀯𑀺𑀦𑁆𑀦𑀁 𑀤𑁂𑀯𑀮𑁄𑀓𑀸𑀦𑀁 𑀅𑀥𑀺𑀧𑀢𑀺. 𑀬𑀁𑀦𑀽𑀦 𑀫𑀬𑀁 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀸𑀫𑀸’’𑀢𑀺. 𑀢𑀸 𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀢𑀗𑁆𑀔𑀡𑀸𑀦𑀼𑀭𑀽𑀧𑀦𑀺𑀯𑀸𑀲𑀦𑀸𑀪𑀭𑀡𑀲𑀲𑁆𑀲𑀺𑀭𑀺𑀓𑀲𑀭𑀻𑀭𑀁 𑀅𑀟𑁆𑀠𑀢𑁂𑀬𑁆𑀬𑀓𑁄𑀝𑀺𑀅𑀘𑁆𑀙𑀭𑀸𑀕𑀡𑀧𑀭𑀺𑀯𑀼𑀢𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀯𑀭𑀸𑀲𑀦𑁂 𑀦𑀺𑀲𑀺𑀦𑁆𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑀕𑁆𑀖𑁂, 𑀫𑀸𑀭𑀺𑀲, 𑀚𑀸𑀦𑁂𑀬𑁆𑀬𑀸𑀲𑀺, 𑀏𑀢𑀭𑀳𑀺 𑀫𑀗𑁆𑀕𑀮𑀧𑀜𑁆𑀳𑀸 𑀲𑀫𑀼𑀝𑁆𑀞𑀺𑀢𑀸, 𑀏𑀓𑁂 𑀤𑀺𑀝𑁆𑀞𑀁 𑀫𑀗𑁆𑀕𑀮𑀦𑁆𑀢𑀺 𑀯𑀤𑀦𑁆𑀢𑀺, 𑀏𑀓𑁂 𑀲𑀼𑀢𑀁 𑀫𑀗𑁆𑀕𑀮𑀦𑁆𑀢𑀺 𑀯𑀤𑀦𑁆𑀢𑀺, 𑀏𑀓𑁂 𑀫𑀼𑀢𑀁 𑀫𑀗𑁆𑀕𑀮𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀫𑀬𑀜𑁆𑀘 𑀅𑀜𑁆𑀜𑁂 𑀘 𑀅𑀦𑀺𑀝𑁆𑀞𑀗𑁆𑀕𑀢𑀸, 𑀲𑀸𑀥𑀼 𑀯𑀢 𑀦𑁄 𑀢𑁆𑀯𑀁 𑀬𑀸𑀣𑀸𑀯𑀢𑁄 𑀩𑁆𑀬𑀸𑀓𑀭𑁄𑀳𑀻’’𑀢𑀺. 𑀤𑁂𑀯𑀭𑀸𑀚𑀸 𑀧𑀓𑀢𑀺𑀬𑀸𑀧𑀺 𑀧𑀜𑁆𑀜𑀯𑀸 ‘‘𑀅𑀬𑀁 𑀫𑀗𑁆𑀕𑀮𑀓𑀣𑀸 𑀓𑀢𑁆𑀣 𑀧𑀞𑀫𑀁 𑀲𑀫𑀼𑀝𑁆𑀞𑀺𑀢𑀸’’𑀢𑀺 𑀆𑀳. ‘‘𑀫𑀬𑀁 𑀤𑁂𑀯 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀅𑀲𑁆𑀲𑀼𑀫𑁆𑀳𑀸’’𑀢𑀺 𑀆𑀳𑀁𑀲𑀼. 𑀢𑀢𑁄 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀆𑀓𑀸𑀲𑀝𑁆𑀞𑀤𑁂𑀯𑀢𑀸𑀦𑀁, 𑀆𑀓𑀸𑀲𑀝𑁆𑀞𑀤𑁂𑀯𑀢𑀸 𑀪𑀼𑀫𑁆𑀫𑀤𑁂𑀯𑀢𑀸𑀦𑀁, 𑀪𑀼𑀫𑁆𑀫𑀤𑁂𑀯𑀢𑀸 𑀫𑀦𑀼𑀲𑁆𑀲𑀸𑀭𑀓𑁆𑀔𑀤𑁂𑀯𑀢𑀸𑀦𑀁, 𑀫𑀦𑀼𑀲𑁆𑀲𑀸𑀭𑀓𑁆𑀔𑀤𑁂𑀯𑀢𑀸 ‘‘𑀫𑀦𑀼𑀲𑁆𑀲𑀮𑁄𑀓𑁂 𑀲𑀫𑀼𑀝𑁆𑀞𑀺𑀢𑀸’’𑀢𑀺 𑀆𑀳𑀁𑀲𑀼.

𑀅𑀣 𑀤𑁂𑀯𑀸𑀦𑀫𑀺𑀦𑁆𑀤𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀢𑁆𑀣 𑀯𑀲𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀫𑀦𑀼𑀲𑁆𑀲𑀮𑁄𑀓𑁂, 𑀤𑁂𑀯𑀸’’𑀢𑀺 𑀆𑀳𑀁𑀲𑀼. ‘‘𑀢𑀁 𑀪𑀕𑀯𑀦𑁆𑀢𑀁 𑀓𑁄𑀘𑀺 𑀧𑀼𑀘𑁆𑀙𑀻’’𑀢𑀺 𑀆𑀳. ‘‘𑀦 𑀓𑁄𑀘𑀺 𑀤𑁂𑀯𑀸’’𑀢𑀺. ‘‘𑀓𑀺𑀁 𑀦𑀼 𑀔𑁄 𑀦𑀸𑀫 𑀢𑀼𑀫𑁆𑀳𑁂 𑀫𑀸𑀭𑀺𑀲𑀸 𑀅𑀕𑁆𑀕𑀺𑀁 𑀙𑀟𑁆𑀟𑁂𑀢𑁆𑀯𑀸 𑀔𑀚𑁆𑀚𑁄𑀧𑀦𑀓𑀁 𑀉𑀚𑁆𑀚𑀸𑀮𑁂𑀣, 𑀬𑁂 𑀅𑀦𑀯𑀲𑁂𑀲𑀫𑀗𑁆𑀕𑀮𑀤𑁂𑀲𑀓𑀁 𑀢𑀁 𑀪𑀕𑀯𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑀫𑀜𑁆𑀜𑀣? 𑀆𑀕𑀘𑁆𑀙𑀣, 𑀫𑀸𑀭𑀺𑀲𑀸, 𑀢𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀸𑀫, 𑀅𑀤𑁆𑀥𑀸 𑀲𑀲𑁆𑀲𑀺𑀭𑀺𑀓𑀁 𑀧𑀜𑁆𑀳𑀩𑁆𑀬𑀸𑀓𑀭𑀡𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀏𑀓𑀁 𑀤𑁂𑀯𑀧𑀼𑀢𑁆𑀢𑀁 𑀆𑀡𑀸𑀧𑁂𑀲𑀺 𑁋 ‘‘𑀢𑁆𑀯𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀸’’𑀢𑀺. 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀢𑀗𑁆𑀔𑀡𑀸𑀦𑀼𑀭𑀽𑀧𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀢𑁆𑀢𑀸𑀦𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀯𑀺𑀚𑁆𑀚𑀼𑀭𑀺𑀯 𑀯𑀺𑀚𑁆𑀚𑁄𑀢𑀫𑀸𑀦𑁄 𑀤𑁂𑀯𑀕𑀡𑀧𑀭𑀺𑀯𑀼𑀢𑁄 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀢𑁆𑀯𑀸 𑀫𑀗𑁆𑀕𑀮𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀢𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺𑀆𑀤𑀻𑀦𑀫𑀢𑁆𑀣𑁄 𑀲𑀗𑁆𑀔𑁂𑀧𑀢𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄, 𑀯𑀺𑀢𑁆𑀣𑀸𑀭𑀁 𑀧𑀦 𑀇𑀘𑁆𑀙𑀦𑁆𑀢𑁂𑀳𑀺 𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑁄. 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑁂 𑀘 ‘‘𑀫𑀕𑀥𑁂𑀲𑀼 𑀯𑀺𑀳𑀭𑀢𑀺 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀁 𑀏𑀓𑀦𑀸𑀴𑀸𑀬𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂’’𑀢𑀺 𑀯𑀼𑀢𑁆𑀢𑀁, 𑀇𑀥 ‘‘𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’’𑀢𑀺. 𑀢𑀲𑁆𑀫𑀸 ‘‘𑀲𑀸𑀯𑀢𑁆𑀣𑀺𑀬’’𑀦𑁆𑀢𑀺 𑀇𑀫𑀁 𑀧𑀤𑀁 𑀆𑀤𑀺𑀁 𑀓𑀢𑁆𑀯𑀸 𑀇𑀥 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫.

𑀲𑁂𑀬𑁆𑀬𑀣𑀺𑀤𑀁, 𑀲𑀸𑀯𑀢𑁆𑀣𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀁 𑀓𑀺𑀭 𑀲𑀯𑀢𑁆𑀣𑀲𑁆𑀲 𑀦𑀸𑀫 𑀇𑀲𑀺𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀬𑀣𑀸 𑀓𑀼𑀲𑀫𑁆𑀩𑀲𑁆𑀲 𑀦𑀺𑀯𑀸𑀲𑁄 𑀓𑁄𑀲𑀫𑁆𑀩𑀻, 𑀓𑀸𑀓𑀡𑁆𑀟𑀲𑁆𑀲 𑀦𑀺𑀯𑀸𑀲𑁄 𑀓𑀸𑀓𑀡𑁆𑀟𑀻𑀢𑀺, 𑀏𑀯𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 ‘‘𑀲𑀸𑀯𑀢𑁆𑀣𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑁄𑀭𑀸𑀡𑀸 𑀧𑀦 𑀯𑀡𑁆𑀡𑀬𑀦𑁆𑀢𑀺 𑁋 𑀬𑀲𑁆𑀫𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀢𑁆𑀣𑀲𑀫𑀸𑀬𑁄𑀕𑁂 ‘‘𑀓𑀺𑀁𑀪𑀡𑁆𑀟𑀫𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀢𑁂 ‘‘𑀲𑀩𑁆𑀩𑀫𑀢𑁆𑀣𑀻’’𑀢𑀺 𑀆𑀳𑀁𑀲𑀼, 𑀢𑀲𑁆𑀫𑀸 𑀢𑀁 𑀯𑀘𑀦𑀫𑀼𑀧𑀸𑀤𑀸𑀬 ‘‘𑀲𑀸𑀯𑀢𑁆𑀣𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲𑀁 𑀲𑀸𑀯𑀢𑁆𑀣𑀺𑀬𑀁. 𑀏𑀢𑁂𑀦𑀲𑁆𑀲 𑀕𑁄𑀘𑀭𑀕𑀸𑀫𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀚𑁂𑀢𑁄 𑀦𑀸𑀫 𑀭𑀸𑀚𑀓𑀼𑀫𑀸𑀭𑁄, 𑀢𑁂𑀦 𑀭𑁄𑀧𑀺𑀢𑀲𑀁𑀯𑀟𑁆𑀠𑀺𑀢𑀢𑁆𑀢𑀸 𑀢𑀲𑁆𑀲 𑀚𑁂𑀢𑀲𑁆𑀲 𑀯𑀦𑀦𑁆𑀢𑀺 𑀚𑁂𑀢𑀯𑀦𑀁, 𑀢𑀲𑁆𑀫𑀺𑀁 𑀚𑁂𑀢𑀯𑀦𑁂. 𑀅𑀦𑀸𑀣𑀸𑀦𑀁 𑀧𑀺𑀡𑁆𑀟𑁄 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄, 𑀢𑀲𑁆𑀲 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲. 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀕𑀳𑀧𑀢𑀺𑀦𑀸 𑀘𑀢𑀼𑀧𑀡𑁆𑀡𑀸𑀲𑀓𑁄𑀝𑀺𑀧𑀭𑀺𑀘𑁆𑀘𑀸𑀕𑁂𑀦 𑀦𑀺𑀝𑁆𑀞𑀸𑀧𑀺𑀢𑀸𑀭𑀸𑀫𑁂𑀢𑀺 𑀅𑀢𑁆𑀣𑁄. 𑀏𑀢𑁂𑀦𑀲𑁆𑀲 𑀧𑀩𑁆𑀩𑀚𑀺𑀢𑀸𑀦𑀼𑀭𑀽𑀧𑀦𑀺𑀯𑀸𑀲𑁄𑀓𑀸𑀲𑁄 𑀤𑀻𑀧𑀺𑀢𑁄 𑀳𑁄𑀢𑀺.

𑀅𑀣𑀸𑀢𑀺 𑀅𑀯𑀺𑀘𑁆𑀙𑁂𑀤𑀢𑁆𑀣𑁂, 𑀔𑁄𑀢𑀺 𑀅𑀥𑀺𑀓𑀸𑀭𑀦𑁆𑀢𑀭𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁂𑀦 𑀅𑀯𑀺𑀘𑁆𑀙𑀺𑀦𑁆𑀦𑁂𑀬𑁂𑀯 𑀢𑀢𑁆𑀣 𑀪𑀕𑀯𑀢𑁄 𑀯𑀺𑀳𑀸𑀭𑁂 ‘‘𑀇𑀤𑀫𑀥𑀺𑀓𑀸𑀭𑀦𑁆𑀢𑀭𑀁 𑀉𑀤𑀧𑀸𑀤𑀻’’𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀁 𑀢𑀦𑁆𑀢𑀺? 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸𑀢𑀺𑀆𑀤𑀺. 𑀢𑀢𑁆𑀣 𑀅𑀜𑁆𑀜𑀢𑀭𑀸𑀢𑀺 𑀅𑀦𑀺𑀬𑀫𑀺𑀢𑀦𑀺𑀤𑁆𑀤𑁂𑀲𑁄. 𑀲𑀸 𑀳𑀺 𑀦𑀸𑀫𑀕𑁄𑀢𑁆𑀢𑀢𑁄 𑀅𑀧𑀸𑀓𑀝𑀸, 𑀢𑀲𑁆𑀫𑀸 ‘‘𑀅𑀜𑁆𑀜𑀢𑀭𑀸’’𑀢𑀺 𑀯𑀼𑀢𑁆𑀢𑀸. 𑀤𑁂𑀯𑁄 𑀏𑀯 𑀤𑁂𑀯𑀢𑀸, 𑀇𑀢𑁆𑀣𑀺𑀧𑀼𑀭𑀺𑀲𑀲𑀸𑀥𑀸𑀭𑀡𑀫𑁂𑀢𑀁. 𑀇𑀥 𑀧𑀦 𑀧𑀼𑀭𑀺𑀲𑁄 𑀏𑀯 𑀲𑁄 𑀤𑁂𑀯𑀧𑀼𑀢𑁆𑀢𑁄, 𑀓𑀺𑀦𑁆𑀢𑀼 𑀲𑀸𑀥𑀸𑀭𑀡𑀦𑀸𑀫𑀯𑀲𑁂𑀦 ‘‘𑀤𑁂𑀯𑀢𑀸’’𑀢𑀺 𑀯𑀼𑀢𑁆𑀢𑁄.

𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀔𑀬𑀲𑀼𑀦𑁆𑀤𑀭𑀸𑀪𑀺𑀭𑀽𑀧𑀅𑀩𑁆𑀪𑀦𑀼𑀫𑁄𑀤𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀉𑀤𑁆𑀤𑀺𑀲𑀢𑀼, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀘𑀽𑀴𑀯. 𑁩𑁮𑁩; 𑀅. 𑀦𑀺. 𑁮.𑁨𑁦; 𑀉𑀤𑀸. 𑁪𑁫) 𑀔𑀬𑁂 𑀤𑀺𑀲𑁆𑀲𑀢𑀺. ‘‘𑀅𑀬𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁪.𑁧𑁦𑁦) 𑀲𑀼𑀦𑁆𑀤𑀭𑁂.

‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺. (𑀯𑀺. 𑀯. 𑁮𑁫𑁭) 𑁋

𑀏𑀯𑀫𑀸𑀤𑀻𑀲𑀼 𑀅𑀪𑀺𑀭𑀽𑀧𑁂. ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁨.𑁧𑁬; 𑀧𑀸𑀭𑀸. 𑁧𑁫) 𑀅𑀩𑁆𑀪𑀦𑀼𑀫𑁄𑀤𑀦𑁂. 𑀇𑀥 𑀧𑀦 𑀔𑀬𑁂. 𑀢𑁂𑀦 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸, 𑀧𑀭𑀺𑀓𑁆𑀔𑀻𑀡𑀸𑀬 𑀭𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸𑀢𑀺 𑀏𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀅𑀪𑀺𑀭𑀽𑀧𑁂, 𑀯𑀡𑁆𑀡𑀲𑀤𑁆𑀤𑁄 𑀧𑀦 𑀙𑀯𑀺𑀣𑀼𑀢𑀺𑀓𑀼𑀮𑀯𑀕𑁆𑀕𑀓𑀸𑀭𑀡𑀲𑀡𑁆𑀞𑀸𑀦𑀧𑁆𑀧𑀫𑀸𑀡𑀭𑀽𑀧𑀸𑀬𑀢𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄𑀲𑀺 𑀪𑀕𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁨.𑁩𑁯𑁯; 𑀲𑀼. 𑀦𑀺. 𑁫𑁫𑁩) 𑀙𑀯𑀺𑀬𑀁. ‘‘𑀓𑀤𑀸 𑀲𑀜𑁆𑀜𑀽𑀴𑁆𑀳𑀸 𑀧𑀦 𑀢𑁂, 𑀕𑀳𑀧𑀢𑀺, 𑀇𑀫𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁨.𑁭𑁭) 𑀣𑀼𑀢𑀺𑀬𑀁. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑁄 𑀕𑁄𑀢𑀫, 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁩.𑁧𑁧𑁫) 𑀓𑀼𑀮𑀯𑀕𑁆𑀕𑁂. ‘‘𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀕𑀦𑁆𑀥𑀢𑁆𑀣𑁂𑀦𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁩𑁪) 𑀓𑀸𑀭𑀡𑁂. ‘‘𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁩𑁮) 𑀲𑀡𑁆𑀞𑀸𑀦𑁂. ‘‘𑀢𑀬𑁄 𑀧𑀢𑁆𑀢𑀲𑁆𑀲 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀧𑀫𑀸𑀡𑁂. ‘‘𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀭𑀽𑀧𑀸𑀬𑀢𑀦𑁂. 𑀲𑁄 𑀇𑀥 𑀙𑀯𑀺𑀬𑀁 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀅𑀪𑀺𑀭𑀽𑀧𑀘𑁆𑀙𑀯𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀏𑀢𑁆𑀣 𑀓𑁂𑀯𑀮𑀲𑀤𑁆𑀤𑁄 𑀅𑀦𑀯𑀲𑁂𑀲𑀬𑁂𑀪𑀼𑀬𑁆𑀬𑀅𑀩𑁆𑀬𑀸𑀫𑀺𑀲𑁆𑀲𑀅𑀦𑀢𑀺𑀭𑁂𑀓𑀤𑀴𑁆𑀳𑀢𑁆𑀣𑀯𑀺𑀲𑀁𑀬𑁄𑀕𑀸𑀤𑀺𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲 ‘‘𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁫; 𑀧𑀸𑀭𑀸. 𑁧) 𑀅𑀦𑀯𑀲𑁂𑀲𑀢𑀸 𑀅𑀢𑁆𑀣𑁄. ‘‘𑀓𑁂𑀯𑀮𑀓𑀧𑁆𑀧𑀸 𑀘 𑀅𑀗𑁆𑀕𑀫𑀸𑀕𑀥𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫𑀳𑀸𑀯. 𑁪𑁩) 𑀬𑁂𑀪𑀼𑀬𑁆𑀬𑀢𑀸. ‘‘𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀯𑀺𑀪. 𑁨𑁨𑁫) 𑀅𑀩𑁆𑀬𑀸𑀫𑀺𑀲𑁆𑀲𑀢𑀸. ‘‘𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫𑀳𑀸𑀯. 𑁨𑁪𑁪) 𑀅𑀦𑀢𑀺𑀭𑁂𑀓𑀢𑀸. ‘‘𑀆𑀬𑀲𑁆𑀫𑀢𑁄 𑀪𑀦𑁆𑀢𑁂 𑀅𑀦𑀼𑀭𑀼𑀤𑁆𑀥𑀲𑁆𑀲 𑀩𑀸𑀳𑀺𑀓𑁄 𑀦𑀸𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀓𑁂𑀯𑀮𑀓𑀧𑁆𑀧𑀁 𑀲𑀗𑁆𑀖𑀪𑁂𑀤𑀸𑀬 𑀞𑀺𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁪.𑁨𑁪𑁩) 𑀤𑀴𑁆𑀳𑀢𑁆𑀣𑀢𑀸. ‘‘𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁩.𑁫𑁭) 𑀯𑀺𑀲𑀁𑀬𑁄𑀕𑁄. 𑀇𑀥 𑀧𑀦𑀲𑁆𑀲 𑀅𑀦𑀯𑀲𑁂𑀲𑀢𑁄 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄.

𑀓𑀧𑁆𑀧𑀲𑀤𑁆𑀤𑁄 𑀧𑀦𑀸𑀬𑀁 𑀅𑀪𑀺𑀲𑀤𑁆𑀤𑀳𑀦𑀯𑁄𑀳𑀸𑀭𑀓𑀸𑀮𑀧𑀜𑁆𑀜𑀢𑁆𑀢𑀺𑀙𑁂𑀤𑀦𑀯𑀺𑀓𑀧𑁆𑀧𑀮𑁂𑀲𑀲𑀫𑀦𑁆𑀢𑀪𑀸𑀯𑀸𑀤𑀺𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲 ‘‘𑀑𑀓𑀧𑁆𑀧𑀦𑀺𑀬𑀫𑁂𑀢𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲, 𑀬𑀢𑀸 𑀢𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀅𑀪𑀺𑀲𑀤𑁆𑀤𑀳𑀦𑀫𑀢𑁆𑀣𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀘𑀽𑀴𑀯. 𑁨𑁫𑁦) 𑀯𑁄𑀳𑀸𑀭𑁄. ‘‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀓𑀸𑀮𑁄. ‘‘𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀼. 𑀦𑀺. 𑁧𑁦𑁯𑁮; 𑀘𑀽𑀴𑀦𑀺. 𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸 𑁧𑁧𑁭) 𑀧𑀜𑁆𑀜𑀢𑁆𑀢𑀺. ‘‘𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽’’𑀢𑀺 𑀏𑀯𑀫𑀸𑀤𑀻𑀲𑀼 (𑀚𑀸. 𑁨.𑁨𑁨.𑁧𑁩𑁬𑁮) 𑀙𑁂𑀤𑀦𑀁. ‘‘𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀘𑀽𑀴𑀯. 𑁪𑁪𑁬) 𑀯𑀺𑀓𑀧𑁆𑀧𑁄. ‘‘𑀅𑀢𑁆𑀣𑀺 𑀓𑀧𑁆𑀧𑁄 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁮.𑁮𑁦) 𑀮𑁂𑀲𑁄. ‘‘𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁯𑁪) 𑀲𑀫𑀦𑁆𑀢𑀪𑀸𑀯𑁄. 𑀇𑀥 𑀧𑀦𑀲𑁆𑀲 𑀲𑀫𑀦𑁆𑀢𑀪𑀸𑀯𑁄 𑀅𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀬𑀢𑁄 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀦𑁆𑀢𑀺 𑀏𑀢𑁆𑀣 𑀅𑀦𑀯𑀲𑁂𑀲𑀁 𑀲𑀫𑀦𑁆𑀢𑀢𑁄 𑀚𑁂𑀢𑀯𑀦𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀑𑀪𑀸𑀲𑁂𑀢𑁆𑀯𑀸𑀢𑀺 𑀆𑀪𑀸𑀬 𑀨𑀭𑀺𑀢𑁆𑀯𑀸, 𑀘𑀦𑁆𑀤𑀺𑀫𑀸 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀧𑀚𑁆𑀚𑁄𑀢𑀁 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀬𑀢𑁄 𑀬𑀢𑁆𑀣 𑀪𑀕𑀯𑀸, 𑀢𑀢𑁆𑀣 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑁂𑀦 𑀯𑀸 𑀓𑀸𑀭𑀡𑁂𑀦 𑀪𑀕𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀦 𑀘 𑀓𑀸𑀭𑀡𑁂𑀦 𑀪𑀕𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄? 𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀸𑀥𑀺𑀧𑁆𑀧𑀸𑀬𑁂𑀦 𑀲𑀸𑀤𑀼𑀨𑀮𑀽𑀧𑀪𑁄𑀕𑀸𑀥𑀺𑀧𑁆𑀧𑀸𑀬𑁂𑀦 𑀤𑀺𑀚𑀕𑀡𑁂𑀳𑀺 𑀦𑀺𑀘𑁆𑀘𑀨𑀮𑀺𑀢𑀫𑀳𑀸𑀭𑀼𑀓𑁆𑀔𑁄 𑀯𑀺𑀬. 𑀉𑀧𑀲𑀗𑁆𑀓𑀫𑀻𑀢𑀺 𑀘 𑀕𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦𑀁. 𑀅𑀣 𑀯𑀸 𑀏𑀯𑀁 𑀕𑀢𑀸 𑀢𑀢𑁄 𑀆𑀲𑀦𑁆𑀦𑀢𑀭𑀁 𑀞𑀸𑀦𑀁 𑀪𑀕𑀯𑀢𑁄 𑀲𑀫𑀻𑀧𑀲𑀗𑁆𑀔𑀸𑀢𑀁 𑀕𑀦𑁆𑀢𑁆𑀯𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸𑀢𑀺 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀡𑀫𑀺𑀢𑁆𑀯𑀸 𑀦𑀫𑀲𑁆𑀲𑀺𑀢𑁆𑀯𑀸.

𑀏𑀓𑀫𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀏𑀓𑁄𑀓𑀸𑀲𑀁 𑀏𑀓𑀧𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀉𑀧𑀬𑁄𑀕𑀯𑀘𑀦𑀁. 𑀅𑀝𑁆𑀞𑀸𑀲𑀻𑀢𑀺 𑀦𑀺𑀲𑀚𑁆𑀚𑀸𑀤𑀺𑀧𑀝𑀺𑀓𑁆𑀔𑁂𑀧𑁄, 𑀞𑀸𑀦𑀁 𑀓𑀧𑁆𑀧𑁂𑀲𑀺, 𑀞𑀺𑀢𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑀓𑀣𑀁 𑀞𑀺𑀢𑀸 𑀧𑀦 𑀲𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀅𑀳𑀽𑀢𑀺?

‘‘𑀦 𑀧𑀘𑁆𑀙𑀢𑁄 𑀦 𑀧𑀼𑀭𑀢𑁄, 𑀦𑀸𑀧𑀺 𑀆𑀲𑀦𑁆𑀦𑀤𑀽𑀭𑀢𑁄;

𑀦 𑀓𑀘𑁆𑀙𑁂 𑀦𑁄𑀧𑀺 𑀧𑀝𑀺𑀯𑀸𑀢𑁂, 𑀦 𑀘𑀸𑀧𑀺 𑀑𑀡𑀢𑀼𑀡𑁆𑀡𑀢𑁂;

𑀇𑀫𑁂 𑀤𑁄𑀲𑁂 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀅𑀳𑀽’’𑀢𑀺.

𑀓𑀲𑁆𑀫𑀸 𑀧𑀦𑀸𑀬𑀁 𑀅𑀝𑁆𑀞𑀸𑀲𑀺 𑀏𑀯, 𑀦 𑀦𑀺𑀲𑀻𑀤𑀻𑀢𑀺? 𑀮𑀳𑀼𑀁 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑀢𑀸𑀬. 𑀤𑁂𑀯𑀢𑀸 𑀳𑀺 𑀓𑀜𑁆𑀘𑀺𑀤𑁂𑀯 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀲𑀼𑀘𑀺𑀧𑀼𑀭𑀺𑀲𑁄 𑀯𑀺𑀬 𑀯𑀘𑁆𑀘𑀝𑁆𑀞𑀸𑀦𑀁 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀦𑁆𑀢𑀺. 𑀧𑀓𑀢𑀺𑀬𑀸 𑀧𑀦𑁂𑀢𑀸𑀲𑀁 𑀬𑁄𑀚𑀦𑀲𑀢𑀢𑁄 𑀧𑀪𑀼𑀢𑀺 𑀫𑀦𑀼𑀲𑁆𑀲𑀮𑁄𑀓𑁄 𑀤𑀼𑀕𑁆𑀕𑀦𑁆𑀥𑀢𑀸𑀬 𑀧𑀝𑀺𑀓𑀽𑀮𑁄 𑀳𑁄𑀢𑀺, 𑀦 𑀢𑀢𑁆𑀣 𑀅𑀪𑀺𑀭𑀫𑀦𑁆𑀢𑀺. 𑀢𑁂𑀦 𑀲𑀸 𑀆𑀕𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀮𑀳𑀼𑀁 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑀢𑀸𑀬 𑀦 𑀦𑀺𑀲𑀻𑀤𑀺. 𑀬𑀲𑁆𑀲 𑀘 𑀕𑀫𑀦𑀸𑀤𑀺𑀇𑀭𑀺𑀬𑀸𑀧𑀣𑀧𑀭𑀺𑀲𑁆𑀲𑀫𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁 𑀦𑀺𑀲𑀻𑀤𑀦𑁆𑀢𑀺, 𑀲𑁄 𑀤𑁂𑀯𑀸𑀦𑀁 𑀧𑀭𑀺𑀲𑁆𑀲𑀫𑁄 𑀦𑀢𑁆𑀣𑀺, 𑀢𑀲𑁆𑀫𑀸𑀧𑀺 𑀦 𑀦𑀺𑀲𑀻𑀤𑀺. 𑀬𑁂 𑀘 𑀫𑀳𑀸𑀲𑀸𑀯𑀓𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸, 𑀢𑁂 𑀧𑀢𑀺𑀫𑀸𑀦𑁂𑀲𑀺, 𑀢𑀲𑁆𑀫𑀸𑀧𑀺 𑀦 𑀦𑀺𑀲𑀻𑀤𑀺. 𑀅𑀧𑀺𑀘 𑀪𑀕𑀯𑀢𑀺 𑀕𑀸𑀭𑀯𑁂𑀦𑁂𑀯 𑀦 𑀦𑀺𑀲𑀻𑀤𑀺. 𑀤𑁂𑀯𑀸𑀦𑀜𑁆𑀳𑀺 𑀦𑀺𑀲𑀻𑀤𑀺𑀢𑀼𑀓𑀸𑀫𑀸𑀦𑀁 𑀆𑀲𑀦𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀁 𑀅𑀦𑀺𑀘𑁆𑀙𑀫𑀸𑀦𑀸 𑀦𑀺𑀲𑀚𑁆𑀚𑀸𑀬 𑀘𑀺𑀢𑁆𑀢𑀫𑁆𑀧𑀺 𑀅𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺.

𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸𑀢𑀺 𑀏𑀯𑀁 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸. 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀻𑀢𑀺 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀓𑁆𑀔𑀭𑀧𑀤𑀦𑀺𑀬𑀫𑀺𑀢𑀕𑀦𑁆𑀣𑀺𑀢𑁂𑀦 𑀯𑀘𑀦𑁂𑀦 𑀅𑀪𑀸𑀲𑀻𑀢𑀺 𑀅𑀢𑁆𑀣𑁄.

𑁨𑁬𑁧. 𑀢𑀢𑁆𑀣 𑀩𑀳𑀽𑀢𑀺 𑀅𑀦𑀺𑀬𑀫𑀺𑀢𑀲𑀗𑁆𑀔𑁆𑀬𑀸𑀦𑀺𑀤𑁆𑀤𑁂𑀲𑁄. 𑀢𑁂𑀦 𑀅𑀦𑁂𑀓𑀲𑀢𑀸 𑀅𑀦𑁂𑀓𑀲𑀳𑀲𑁆𑀲𑀸 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸, 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀓𑀻𑀴𑀦𑁆𑀢𑀺, 𑀅𑀢𑁆𑀢𑀦𑁄 𑀯𑀸 𑀲𑀺𑀭𑀺𑀬𑀸 𑀚𑁄𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀢𑀺𑀯𑀺𑀥𑀸 𑀤𑁂𑀯𑀸 𑀲𑀫𑁆𑀫𑀼𑀢𑀺𑀉𑀧𑀧𑀢𑁆𑀢𑀺𑀯𑀺𑀲𑀼𑀤𑁆𑀥𑀺𑀯𑀲𑁂𑀦. 𑀬𑀣𑀸𑀳 𑁋

‘‘𑀤𑁂𑀯𑀸𑀢𑀺 𑀢𑀬𑁄 𑀤𑁂𑀯𑀸 𑀲𑀫𑁆𑀫𑀼𑀢𑀺𑀤𑁂𑀯𑀸, 𑀉𑀧𑀧𑀢𑁆𑀢𑀺𑀤𑁂𑀯𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀸. 𑀢𑀢𑁆𑀣 𑀲𑀫𑁆𑀫𑀼𑀢𑀺𑀤𑁂𑀯𑀸 𑀦𑀸𑀫 𑀭𑀸𑀚𑀸𑀦𑁄, 𑀤𑁂𑀯𑀺𑀬𑁄, 𑀭𑀸𑀚𑀓𑀼𑀫𑀸𑀭𑀸. 𑀉𑀧𑀧𑀢𑁆𑀢𑀺𑀤𑁂𑀯𑀸 𑀦𑀸𑀫 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀤𑁂𑀯𑁂 𑀉𑀧𑀸𑀤𑀸𑀬 𑀢𑀤𑀼𑀢𑁆𑀢𑀭𑀺𑀤𑁂𑀯𑀸. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀦𑀸𑀫 𑀅𑀭𑀳𑀦𑁆𑀢𑁄 𑀯𑀼𑀘𑁆𑀘𑀦𑁆𑀢𑀻’’𑀢𑀺 (𑀘𑀽𑀴𑀦𑀺. 𑀥𑁄𑀢𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁩𑁨, 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁧𑁯).

𑀢𑁂𑀲𑀼 𑀇𑀥 𑀉𑀧𑀧𑀢𑁆𑀢𑀺𑀤𑁂𑀯𑀸 𑀅𑀥𑀺𑀧𑁆𑀧𑁂𑀢𑀸. 𑀫𑀦𑀼𑀦𑁄 𑀅𑀧𑀘𑁆𑀘𑀸𑀢𑀺 𑀫𑀦𑀼𑀲𑁆𑀲𑀸. 𑀧𑁄𑀭𑀸𑀡𑀸 𑀧𑀦 𑀪𑀡𑀦𑁆𑀢𑀺 𑁋 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀫𑀦𑀼𑀲𑁆𑀲𑀸. 𑀢𑁂 𑀚𑀫𑁆𑀩𑀼𑀤𑀻𑀧𑀓𑀸, 𑀅𑀧𑀭𑀕𑁄𑀬𑀸𑀦𑀓𑀸, 𑀉𑀢𑁆𑀢𑀭𑀓𑀼𑀭𑀼𑀓𑀸, 𑀧𑀼𑀩𑁆𑀩𑀯𑀺𑀤𑁂𑀳𑀓𑀸𑀢𑀺 𑀘𑀢𑀼𑀩𑁆𑀩𑀺𑀥𑀸. 𑀇𑀥 𑀚𑀫𑁆𑀩𑀼𑀤𑀻𑀧𑀓𑀸 𑀅𑀥𑀺𑀧𑁆𑀧𑁂𑀢𑀸. 𑀫𑀗𑁆𑀕𑀮𑀦𑁆𑀢𑀺 𑀇𑀫𑁂𑀳𑀺 𑀲𑀢𑁆𑀢𑀸𑀢𑀺 𑀫𑀗𑁆𑀕𑀮𑀸𑀦𑀺, 𑀇𑀤𑁆𑀥𑀺𑀁 𑀯𑀼𑀤𑁆𑀥𑀺𑀜𑁆𑀘 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀘𑀺𑀦𑁆𑀢𑀬𑀼𑀦𑁆𑀢𑀺 𑀘𑀺𑀦𑁆𑀢𑁂𑀲𑀼𑀁. 𑀆𑀓𑀗𑁆𑀔𑀫𑀸𑀦𑀸𑀢𑀺 𑀇𑀘𑁆𑀙𑀫𑀸𑀦𑀸 𑀧𑀢𑁆𑀣𑀬𑀫𑀸𑀦𑀸 𑀧𑀺𑀳𑀬𑀫𑀸𑀦𑀸. 𑀲𑁄𑀢𑁆𑀣𑀸𑀦𑀦𑁆𑀢𑀺 𑀲𑁄𑀢𑁆𑀣𑀺𑀪𑀸𑀯𑀁, 𑀲𑀩𑁆𑀩𑁂𑀲𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀲𑁄𑀪𑀦𑀸𑀦𑀁 𑀲𑀼𑀦𑁆𑀤𑀭𑀸𑀦𑀁 𑀓𑀮𑁆𑀬𑀸𑀡𑀸𑀦𑀁 𑀥𑀫𑁆𑀫𑀸𑀦𑀫𑀢𑁆𑀣𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑁆𑀭𑀽𑀳𑀻𑀢𑀺 𑀤𑁂𑀲𑁂𑀳𑀺 𑀧𑀓𑀸𑀲𑁂𑀳𑀺 𑀆𑀘𑀺𑀓𑁆𑀔 𑀯𑀺𑀯𑀭 𑀯𑀺𑀪𑀚 𑀉𑀢𑁆𑀢𑀸𑀦𑀻𑀓𑀭𑁄𑀳𑀺. 𑀫𑀗𑁆𑀕𑀮𑀦𑁆𑀢𑀺 𑀇𑀤𑁆𑀥𑀺𑀓𑀸𑀭𑀡𑀁 𑀯𑀼𑀤𑁆𑀥𑀺𑀓𑀸𑀭𑀡𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀓𑀸𑀭𑀡𑀁. 𑀉𑀢𑁆𑀢𑀫𑀦𑁆𑀢𑀺 𑀯𑀺𑀲𑀺𑀝𑁆𑀞𑀁 𑀧𑀯𑀭𑀁 𑀲𑀩𑁆𑀩𑀮𑁄𑀓𑀳𑀺𑀢𑀲𑀼𑀔𑀸𑀯𑀳𑀦𑁆𑀢𑀺 𑀅𑀬𑀁 𑀕𑀸𑀣𑀸𑀬 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸.

𑀅𑀬𑀁 𑀧𑀦 𑀧𑀺𑀡𑁆𑀟𑀢𑁆𑀣𑁄 𑁋 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀢𑀸 𑀫𑀗𑁆𑀕𑀮𑀧𑀜𑁆𑀳𑀁 𑀲𑁄𑀢𑀼𑀓𑀸𑀫𑀢𑀸𑀬 𑀇𑀫𑀲𑁆𑀫𑀺𑀁 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀏𑀓𑀯𑀸𑀮𑀕𑁆𑀕𑀓𑁄𑀝𑀺𑀑𑀓𑀸𑀲𑀫𑀢𑁆𑀢𑁂 𑀤𑀲𑀧𑀺 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀧𑀜𑁆𑀜𑀸𑀲𑀫𑁆𑀧𑀺 𑀲𑀝𑁆𑀞𑀺𑀧𑀺 𑀲𑀢𑁆𑀢𑀢𑀺𑀧𑀺 𑀅𑀲𑀻𑀢𑀺𑀧𑀺 𑀲𑀼𑀔𑀼𑀫𑀢𑁆𑀢𑀪𑀸𑀯𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀲𑀩𑁆𑀩𑀤𑁂𑀯𑀫𑀸𑀭𑀩𑁆𑀭𑀳𑁆𑀫𑀸𑀦𑁄 𑀲𑀺𑀭𑀺𑀬𑀸 𑀘 𑀢𑁂𑀚𑀲𑀸 𑀘 𑀅𑀥𑀺𑀕𑀬𑁆𑀳 𑀯𑀺𑀭𑁄𑀘𑀫𑀸𑀦𑀁 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀤𑀺𑀲𑁆𑀯𑀸 𑀢𑀲𑁆𑀫𑀺𑀁 𑀘 𑀲𑀫𑀬𑁂 𑀅𑀦𑀸𑀕𑀢𑀸𑀦𑀫𑁆𑀧𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀮𑁆𑀮𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀆𑀳 𑁋 ‘‘𑀩𑀳𑀽 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘, 𑀫𑀗𑁆𑀕𑀮𑀸𑀦𑀺 𑀅𑀘𑀺𑀦𑁆𑀢𑀬𑀼𑀁, 𑀆𑀓𑀗𑁆𑀔𑀫𑀸𑀦𑀸 𑀲𑁄𑀢𑁆𑀣𑀸𑀦𑀁 𑀅𑀢𑁆𑀢𑀦𑁄 𑀲𑁄𑀢𑁆𑀣𑀺𑀪𑀸𑀯𑀁 𑀇𑀘𑁆𑀙𑀦𑁆𑀢𑀸, 𑀩𑁆𑀭𑀽𑀳𑀺 𑀫𑀗𑁆𑀕𑀮𑀫𑀼𑀢𑁆𑀢𑀫𑀁, 𑀢𑁂𑀲𑀁 𑀤𑁂𑀯𑀸𑀦𑀁 𑀅𑀦𑀼𑀫𑀢𑀺𑀬𑀸 𑀫𑀦𑀼𑀲𑁆𑀲𑀸𑀦𑀜𑁆𑀘 𑀅𑀦𑀼𑀕𑁆𑀕𑀳𑁂𑀦 𑀫𑀬𑀸 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀬𑀁 𑀲𑀩𑁆𑀩𑁂𑀲𑀫𑁂𑀯 𑀅𑀫𑁆𑀳𑀸𑀓𑀁 𑀏𑀓𑀦𑁆𑀢𑀳𑀺𑀢𑀲𑀼𑀔𑀸𑀯𑀳𑀦𑀢𑁄 𑀉𑀢𑁆𑀢𑀫𑀁 𑀫𑀗𑁆𑀕𑀮𑀁, 𑀢𑀁 𑀦𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀩𑁆𑀭𑀽𑀳𑀺 𑀪𑀕𑀯𑀸’’𑀢𑀺.

𑁨𑁬𑁨. 𑀏𑀯𑀫𑁂𑀢𑀁 𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀪𑀕𑀯𑀸 ‘‘𑀅𑀲𑁂𑀯𑀦𑀸 𑀘 𑀩𑀸𑀮𑀸𑀦’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀲𑁂𑀯𑀦𑀸𑀢𑀺 𑀅𑀪𑀚𑀦𑀸 𑀅𑀧𑀬𑀺𑀭𑀼𑀧𑀸𑀲𑀦𑀸. 𑀩𑀸𑀮𑀸𑀦𑀦𑁆𑀢𑀺 𑀩𑀮𑀦𑁆𑀢𑀺 𑀅𑀲𑁆𑀲𑀲𑀦𑁆𑀢𑀻𑀢𑀺 𑀩𑀸𑀮𑀸, 𑀅𑀲𑁆𑀲𑀲𑀺𑀢𑀧𑀲𑁆𑀲𑀲𑀺𑀢𑀫𑀢𑁆𑀢𑁂𑀦 𑀚𑀻𑀯𑀦𑁆𑀢𑀺, 𑀦 𑀧𑀜𑁆𑀜𑀸𑀚𑀻𑀯𑀺𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀁 𑀩𑀸𑀮𑀸𑀦𑀁 𑀧𑀡𑁆𑀟𑀺𑀢𑀸𑀦𑀦𑁆𑀢𑀺 𑀧𑀡𑁆𑀟𑀦𑁆𑀢𑀻𑀢𑀺 𑀧𑀡𑁆𑀟𑀺𑀢𑀸, 𑀲𑀦𑁆𑀤𑀺𑀝𑁆𑀞𑀺𑀓𑀲𑀫𑁆𑀧𑀭𑀸𑀬𑀺𑀓𑁂𑀲𑀼 𑀅𑀢𑁆𑀣𑁂𑀲𑀼 𑀜𑀸𑀡𑀕𑀢𑀺𑀬𑀸 𑀕𑀘𑁆𑀙𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀁 𑀧𑀡𑁆𑀟𑀺𑀢𑀸𑀦𑀁. 𑀲𑁂𑀯𑀦𑀸𑀢𑀺 𑀪𑀚𑀦𑀸 𑀧𑀬𑀺𑀭𑀼𑀧𑀸𑀲𑀦𑀸 𑀢𑀁𑀲𑀳𑀸𑀬𑀢𑀸 𑀢𑀁𑀲𑀫𑁆𑀧𑀯𑀗𑁆𑀓𑀢𑀸. 𑀧𑀽𑀚𑀸𑀢𑀺 𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀸. 𑀧𑀽𑀚𑀦𑁂𑀬𑁆𑀬𑀸𑀦𑀦𑁆𑀢𑀺 𑀧𑀽𑀚𑀸𑀭𑀳𑀸𑀦𑀁. 𑀏𑀢𑀁 𑀫𑀗𑁆𑀕𑀮𑀫𑀼𑀢𑁆𑀢𑀫𑀦𑁆𑀢𑀺 𑀬𑀸 𑀘 𑀩𑀸𑀮𑀸𑀦𑀁 𑀅𑀲𑁂𑀯𑀦𑀸, 𑀬𑀸 𑀘 𑀧𑀡𑁆𑀟𑀺𑀢𑀸𑀦𑀁 𑀲𑁂𑀯𑀦𑀸, 𑀬𑀸 𑀘 𑀧𑀽𑀚𑀦𑁂𑀬𑁆𑀬𑀸𑀦𑀁 𑀧𑀽𑀚𑀸, 𑀢𑀁 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀆𑀳 𑀏𑀢𑀁 𑀫𑀗𑁆𑀕𑀮𑀫𑀼𑀢𑁆𑀢𑀫𑀦𑁆𑀢𑀺. 𑀬𑀁 𑀢𑀬𑀸 𑀧𑀼𑀝𑁆𑀞𑀁 ‘‘𑀩𑁆𑀭𑀽𑀳𑀺 𑀫𑀗𑁆𑀕𑀮𑀫𑀼𑀢𑁆𑀢𑀫’’𑀦𑁆𑀢𑀺, 𑀏𑀢𑁆𑀣 𑀢𑀸𑀯 𑀏𑀢𑀁 𑀫𑀗𑁆𑀕𑀮𑀫𑀼𑀢𑁆𑀢𑀫𑀦𑁆𑀢𑀺 𑀕𑀡𑁆𑀳𑀸𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀫𑁂𑀢𑀺𑀲𑁆𑀲𑀸 𑀕𑀸𑀣𑀸𑀬 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 𑀧𑀦𑀲𑁆𑀲𑀸 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀏𑀯𑀫𑁂𑀢𑀁 𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀪𑀕𑀯𑀸 𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀘𑀢𑀼𑀩𑁆𑀩𑀺𑀥𑀸 𑀓𑀣𑀸 𑀧𑀼𑀘𑁆𑀙𑀺𑀢𑀓𑀣𑀸, 𑀅𑀧𑀼𑀘𑁆𑀙𑀺𑀢𑀓𑀣𑀸, 𑀲𑀸𑀦𑀼𑀲𑀦𑁆𑀥𑀺𑀓𑀣𑀸, 𑀅𑀦𑀦𑀼𑀲𑀦𑁆𑀥𑀺𑀓𑀣𑀸𑀢𑀺. 𑀢𑀢𑁆𑀣 ‘‘𑀧𑀼𑀘𑁆𑀙𑀸𑀫𑀺 𑀢𑀁, 𑀕𑁄𑀢𑀫, 𑀪𑀽𑀭𑀺𑀧𑀜𑁆𑀜𑀁, 𑀓𑀣𑀁𑀓𑀭𑁄 𑀲𑀸𑀯𑀓𑁄 𑀲𑀸𑀥𑀼 𑀳𑁄𑀢𑀻’’𑀢𑀺 (𑀲𑀼. 𑀦𑀺. 𑁩𑁭𑁮) 𑀘, ‘‘𑀓𑀣𑀁 𑀦𑀼 𑀢𑁆𑀯𑀁, 𑀫𑀸𑀭𑀺𑀲, 𑀑𑀖𑀫𑀢𑀭𑀻’’𑀢𑀺 (𑀲𑀁. 𑀦𑀺. 𑁧.𑁧) 𑀘 𑀏𑀯𑀫𑀸𑀤𑀻𑀲𑀼 𑀧𑀼𑀘𑁆𑀙𑀺𑀢𑁂𑀦 𑀓𑀣𑀺𑀓𑀸 𑀧𑀼𑀘𑁆𑀙𑀺𑀢𑀓𑀣𑀸. ‘‘𑀬𑀁 𑀧𑀭𑁂 𑀲𑀼𑀔𑀢𑁄 𑀆𑀳𑀼, 𑀢𑀤𑀭𑀺𑀬𑀸 𑀆𑀳𑀼 𑀤𑀼𑀓𑁆𑀔𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀼. 𑀦𑀺. 𑁭𑁬𑁭) 𑀅𑀧𑀼𑀘𑁆𑀙𑀺𑀢𑁂𑀦 𑀅𑀢𑁆𑀢𑀚𑁆𑀛𑀸𑀲𑀬𑀯𑀲𑁂𑀦𑁂𑀯 𑀓𑀣𑀺𑀢𑀸 𑀅𑀧𑀼𑀘𑁆𑀙𑀺𑀢𑀓𑀣𑀸. 𑀲𑀩𑁆𑀩𑀸𑀧𑀺 𑀩𑀼𑀤𑁆𑀥𑀸𑀦𑀁 𑀓𑀣𑀸 ‘‘𑀲𑀦𑀺𑀤𑀸𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀻’’𑀢𑀺 (𑀅. 𑀦𑀺. 𑁩.𑁧𑁨𑁬; 𑀓𑀣𑀸. 𑁮𑁦𑁬) 𑀯𑀘𑀦𑀢𑁄 𑀲𑀸𑀦𑀼𑀲𑀦𑁆𑀥𑀺𑀓𑀣𑀸. 𑀅𑀦𑀦𑀼𑀲𑀦𑁆𑀥𑀺𑀓𑀣𑀸 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀦𑀢𑁆𑀣𑀺. 𑀏𑀯𑀫𑁂𑀢𑀸𑀲𑀼 𑀓𑀣𑀸𑀲𑀼 𑀅𑀬𑀁 𑀤𑁂𑀯𑀧𑀼𑀢𑁆𑀢𑁂𑀦 𑀧𑀼𑀘𑁆𑀙𑀺𑀢𑁂𑀦 𑀪𑀕𑀯𑀢𑀸 𑀓𑀣𑀺𑀢𑀢𑁆𑀢𑀸 𑀧𑀼𑀘𑁆𑀙𑀺𑀢𑀓𑀣𑀸. 𑀧𑀼𑀘𑁆𑀙𑀺𑀢𑀓𑀣𑀸𑀬𑀜𑁆𑀘 𑀬𑀣𑀸 𑀙𑁂𑀓𑁄 𑀧𑀼𑀭𑀺𑀲𑁄 𑀓𑀼𑀲𑀮𑁄 𑀫𑀕𑁆𑀕𑀲𑁆𑀲, 𑀓𑀼𑀲𑀮𑁄 𑀅𑀫𑀕𑁆𑀕𑀲𑁆𑀲, 𑀫𑀕𑁆𑀕𑀁 𑀧𑀼𑀝𑁆𑀞𑁄 𑀧𑀞𑀫𑀁 𑀯𑀺𑀚𑀳𑀺𑀢𑀩𑁆𑀩𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀘𑁆𑀙𑀸 𑀕𑀳𑁂𑀢𑀩𑁆𑀩𑀁 𑀆𑀘𑀺𑀓𑁆𑀔𑀢𑀺 𑁋 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀤𑁆𑀯𑁂𑀥𑀸𑀧𑀣𑁄 𑀳𑁄𑀢𑀺, 𑀢𑀢𑁆𑀣 𑀯𑀸𑀫𑀁 𑀫𑀼𑀜𑁆𑀘𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀕𑀡𑁆𑀳𑀣𑀸’’𑀢𑀺, 𑀏𑀯𑀁 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑁂𑀲𑀼 𑀅𑀲𑁂𑀯𑀺𑀢𑀩𑁆𑀩𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀲𑁂𑀯𑀺𑀢𑀩𑁆𑀩𑀁 𑀆𑀘𑀺𑀓𑁆𑀔𑀢𑀺. 𑀪𑀕𑀯𑀸 𑀘 𑀫𑀕𑁆𑀕𑀓𑀼𑀲𑀮𑀧𑀼𑀭𑀺𑀲𑀲𑀤𑀺𑀲𑁄. 𑀬𑀣𑀸𑀳 𑁋

‘‘𑀧𑀼𑀭𑀺𑀲𑁄 𑀫𑀕𑁆𑀕𑀓𑀼𑀲𑀮𑁄𑀢𑀺 𑀔𑁄, 𑀢𑀺𑀲𑁆𑀲, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 (𑀲𑀁. 𑀦𑀺. 𑁩.𑁮𑁪).

𑀲𑁄 𑀳𑀺 𑀓𑀼𑀲𑀮𑁄 𑀇𑀫𑀲𑁆𑀲 𑀮𑁄𑀓𑀲𑁆𑀲, 𑀓𑀼𑀲𑀮𑁄 𑀧𑀭𑀲𑁆𑀲 𑀮𑁄𑀓𑀲𑁆𑀲, 𑀓𑀼𑀲𑀮𑁄 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲, 𑀓𑀼𑀲𑀮𑁄 𑀅𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲, 𑀓𑀼𑀲𑀮𑁄 𑀫𑀸𑀭𑀥𑁂𑀬𑁆𑀬𑀲𑁆𑀲, 𑀓𑀼𑀲𑀮𑁄 𑀅𑀫𑀸𑀭𑀥𑁂𑀬𑁆𑀬𑀲𑁆𑀲𑀸𑀢𑀺. 𑀢𑀲𑁆𑀫𑀸 𑀧𑀞𑀫𑀁 𑀅𑀲𑁂𑀯𑀺𑀢𑀩𑁆𑀩𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀲𑁂𑀯𑀺𑀢𑀩𑁆𑀩𑀁 𑀆𑀘𑀺𑀓𑁆𑀔𑀦𑁆𑀢𑁄 𑀆𑀳 𑁋 ‘‘𑀅𑀲𑁂𑀯𑀦𑀸 𑀘 𑀩𑀸𑀮𑀸𑀦𑀁, 𑀧𑀡𑁆𑀟𑀺𑀢𑀸𑀦𑀜𑁆𑀘 𑀲𑁂𑀯𑀦𑀸’’𑀢𑀺. 𑀯𑀺𑀚𑀳𑀺𑀢𑀩𑁆𑀩𑀫𑀕𑁆𑀕𑁄 𑀯𑀺𑀬 𑀳𑀺 𑀧𑀞𑀫𑀁 𑀩𑀸𑀮𑀸 𑀦 𑀲𑁂𑀯𑀺𑀢𑀩𑁆𑀩𑀸 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑀸, 𑀢𑀢𑁄 𑀕𑀳𑁂𑀢𑀩𑁆𑀩𑀫𑀕𑁆𑀕𑁄 𑀯𑀺𑀬 𑀧𑀡𑁆𑀟𑀺𑀢𑀸 𑀲𑁂𑀯𑀺𑀢𑀩𑁆𑀩𑀸 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑀸𑀢𑀺.

𑀓𑀲𑁆𑀫𑀸 𑀧𑀦 𑀪𑀕𑀯𑀢𑀸 𑀫𑀗𑁆𑀕𑀮𑀁 𑀓𑀣𑁂𑀦𑁆𑀢𑁂𑀦 𑀧𑀞𑀫𑀁 𑀩𑀸𑀮𑀸𑀦𑀁 𑀅𑀲𑁂𑀯𑀦𑀸 𑀧𑀡𑁆𑀟𑀺𑀢𑀸𑀦𑀜𑁆𑀘 𑀲𑁂𑀯𑀦𑀸 𑀓𑀣𑀺𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑀲𑁆𑀫𑀸 𑀇𑀫𑀁 𑀤𑀺𑀝𑁆𑀞𑀸𑀤𑀻𑀲𑀼 𑀫𑀗𑁆𑀕𑀮𑀤𑀺𑀝𑁆𑀞𑀺𑀁 𑀩𑀸𑀮𑀲𑁂𑀯𑀦𑀸𑀬 𑀤𑁂𑀯𑀫𑀦𑀼𑀲𑁆𑀲𑀸 𑀕𑀡𑁆𑀳𑀺𑀁𑀲𑀼, 𑀲𑀸 𑀘 𑀅𑀫𑀗𑁆𑀕𑀮𑀁, 𑀢𑀲𑁆𑀫𑀸 𑀦𑁂𑀲𑀁 𑀢𑀁 𑀇𑀥𑀮𑁄𑀓𑀢𑁆𑀣𑀧𑀭𑀮𑁄𑀓𑀢𑁆𑀣𑀪𑀜𑁆𑀚𑀓𑀁 𑀅𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀁𑀲𑀕𑁆𑀕𑀁 𑀕𑀭𑀳𑀦𑁆𑀢𑁂𑀦 𑀉𑀪𑀬𑀮𑁄𑀓𑀢𑁆𑀣𑀲𑀸𑀥𑀓𑀜𑁆𑀘 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀁𑀲𑀕𑁆𑀕𑀁 𑀧𑀲𑀁𑀲𑀦𑁆𑀢𑁂𑀦 𑀪𑀕𑀯𑀢𑀸 𑀧𑀞𑀫𑀁 𑀩𑀸𑀮𑀸𑀦𑀁 𑀅𑀲𑁂𑀯𑀦𑀸 𑀧𑀡𑁆𑀟𑀺𑀢𑀸𑀦𑀜𑁆𑀘 𑀲𑁂𑀯𑀦𑀸 𑀓𑀣𑀺𑀢𑀸𑀢𑀺.

𑀢𑀢𑁆𑀣 𑀩𑀸𑀮𑀸 𑀦𑀸𑀫 𑀬𑁂 𑀓𑁂𑀘𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀓𑀫𑁆𑀫𑀧𑀣𑀲𑀫𑀦𑁆𑀦𑀸𑀕𑀢𑀸 𑀲𑀢𑁆𑀢𑀸. 𑀢𑁂 𑀢𑀻𑀳𑀸𑀓𑀸𑀭𑁂𑀳𑀺 𑀚𑀸𑀦𑀺𑀢𑀩𑁆𑀩𑀸. 𑀬𑀣𑀸𑀳 𑁋 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀩𑀸𑀮𑀮𑀓𑁆𑀔𑀡𑀸𑀦𑀻’’𑀢𑀺 (𑀅. 𑀦𑀺. 𑁩.𑁩; 𑀫. 𑀦𑀺. 𑁩.𑁨𑁪𑁬) 𑀲𑀼𑀢𑁆𑀢𑀁. 𑀅𑀧𑀺𑀘 𑀧𑀽𑀭𑀡𑀓𑀲𑁆𑀲𑀧𑀸𑀤𑀬𑁄 𑀙 𑀲𑀢𑁆𑀣𑀸𑀭𑁄 𑀤𑁂𑀯𑀤𑀢𑁆𑀢𑀓𑁄𑀓𑀸𑀮𑀺𑀓𑀓𑀝𑀫𑁄𑀤𑀓𑀢𑀺𑀲𑁆𑀲𑀔𑀡𑁆𑀟𑀤𑁂𑀯𑀺𑀬𑀸𑀧𑀼𑀢𑁆𑀢𑀲𑀫𑀼𑀤𑁆𑀤𑀤𑀢𑁆𑀢𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀤𑀬𑁄 𑀅𑀢𑀻𑀢𑀓𑀸𑀮𑁂 𑀘 𑀤𑀻𑀖𑀯𑀺𑀤𑀲𑁆𑀲 𑀪𑀸𑀢𑀸𑀢𑀺 𑀇𑀫𑁂 𑀅𑀜𑁆𑀜𑁂 𑀘 𑀏𑀯𑀭𑀽𑀧𑀸 𑀲𑀢𑁆𑀢𑀸 𑀩𑀸𑀮𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑁂 𑀅𑀕𑁆𑀕𑀺𑀧𑀤𑀺𑀢𑁆𑀢𑀫𑀺𑀯 𑀅𑀗𑁆𑀕𑀸𑀭𑀁 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀢𑁆𑀢𑀸𑀦𑀜𑁆𑀘 𑀅𑀢𑁆𑀢𑀦𑁄 𑀯𑀘𑀦𑀓𑀸𑀭𑀓𑁂 𑀘 𑀯𑀺𑀦𑀸𑀲𑁂𑀦𑁆𑀢𑀺, 𑀬𑀣𑀸 𑀤𑀻𑀖𑀯𑀺𑀤𑀲𑁆𑀲 𑀪𑀸𑀢𑀸 𑀘𑀢𑀼𑀩𑀼𑀤𑁆𑀥𑀦𑁆𑀢𑀭𑀁 𑀲𑀝𑁆𑀞𑀺𑀬𑁄𑀚𑀦𑀫𑀢𑁆𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀉𑀢𑁆𑀢𑀸𑀦𑁄 𑀧𑀢𑀺𑀢𑁄 𑀫𑀳𑀸𑀦𑀺𑀭𑀬𑁂 𑀧𑀘𑁆𑀘𑀢𑀺, 𑀬𑀣𑀸 𑀘 𑀢𑀲𑁆𑀲 𑀤𑀺𑀝𑁆𑀞𑀺𑀁 𑀅𑀪𑀺𑀭𑀼𑀘𑀺𑀓𑀸𑀦𑀺 𑀧𑀜𑁆𑀘 𑀓𑀼𑀮𑀲𑀢𑀸𑀦𑀺 𑀢𑀲𑁆𑀲𑁂𑀯 𑀲𑀳𑀩𑁆𑀬𑀢𑀁 𑀉𑀧𑀧𑀦𑁆𑀦𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀦𑁆𑀢𑀺. 𑀯𑀼𑀢𑁆𑀢𑀁 𑀳𑁂𑀢𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀦𑀴𑀸𑀕𑀸𑀭𑀸 𑀯𑀸 𑀢𑀺𑀡𑀸𑀕𑀸𑀭𑀸 𑀯𑀸 𑀅𑀕𑁆𑀕𑀺 𑀫𑀼𑀢𑁆𑀢𑁄 𑀓𑀽𑀝𑀸𑀕𑀸𑀭𑀸𑀦𑀺𑀧𑀺 𑀟𑀳𑀢𑀺 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸𑀦𑀺 𑀦𑀺𑀯𑀸𑀢𑀸𑀦𑀺 𑀨𑀼𑀲𑀺𑀢𑀕𑁆𑀕𑀴𑀸𑀦𑀺 𑀧𑀺𑀳𑀺𑀢𑀯𑀸𑀢𑀧𑀸𑀦𑀸𑀦𑀺, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀓𑀸𑀦𑀺𑀘𑀺 𑀪𑀬𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀩𑀸𑀮𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑁄 𑀧𑀡𑁆𑀟𑀺𑀢𑀢𑁄. 𑀬𑁂 𑀓𑁂𑀘𑀺 𑀉𑀧𑀤𑁆𑀤𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺…𑀧𑁂… 𑀬𑁂 𑀓𑁂𑀘𑀺 𑀉𑀧𑀲𑀕𑁆𑀕𑀸…𑀧𑁂… 𑀦𑁄 𑀧𑀡𑁆𑀟𑀺𑀢𑀢𑁄. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀝𑀺𑀪𑀬𑁄 𑀩𑀸𑀮𑁄, 𑀅𑀧𑁆𑀧𑀝𑀺𑀪𑀬𑁄 𑀧𑀡𑁆𑀟𑀺𑀢𑁄. 𑀲𑀉𑀧𑀤𑁆𑀤𑀯𑁄 𑀩𑀸𑀮𑁄, 𑀅𑀦𑀼𑀧𑀤𑁆𑀤𑀯𑁄 𑀧𑀡𑁆𑀟𑀺𑀢𑁄, 𑀲𑀉𑀧𑀲𑀕𑁆𑀕𑁄 𑀩𑀸𑀮𑁄, 𑀅𑀦𑀼𑀧𑀲𑀕𑁆𑀕𑁄 𑀧𑀡𑁆𑀟𑀺𑀢𑁄’’𑀢𑀺 (𑀅. 𑀦𑀺. 𑁩.𑁧).

𑀅𑀧𑀺𑀘 𑀧𑀽𑀢𑀺𑀫𑀘𑁆𑀙𑀲𑀤𑀺𑀲𑁄 𑀩𑀸𑀮𑁄, 𑀧𑀽𑀢𑀺𑀫𑀘𑁆𑀙𑀩𑀦𑁆𑀥𑀧𑀢𑁆𑀢𑀧𑀼𑀝𑀲𑀤𑀺𑀲𑁄 𑀳𑁄𑀢𑀺 𑀢𑀤𑀼𑀧𑀲𑁂𑀯𑀻, 𑀙𑀟𑁆𑀟𑀦𑀻𑀬𑀢𑀁 𑀚𑀺𑀕𑀼𑀘𑁆𑀙𑀦𑀻𑀬𑀢𑀜𑁆𑀘 𑀆𑀧𑀚𑁆𑀚𑀢𑀺 𑀯𑀺𑀜𑁆𑀜𑀽𑀦𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀧𑀽𑀢𑀺𑀫𑀘𑁆𑀙𑀁 𑀓𑀼𑀲𑀕𑁆𑀕𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀓𑀼𑀲𑀸𑀧𑀺 𑀧𑀽𑀢𑀻 𑀯𑀸𑀬𑀦𑁆𑀢𑀺, 𑀏𑀯𑀁 𑀩𑀸𑀮𑀽𑀧𑀲𑁂𑀯𑀦𑀸’’𑀢𑀺. (𑀇𑀢𑀺𑀯𑀼. 𑁭𑁬; 𑀚𑀸. 𑁧.𑁧𑁫.𑁧𑁮𑁩; 𑁨.𑁨𑁨.𑁧𑁨𑁫𑁭);

𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑁄 𑀘𑀸𑀧𑀺 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀯𑀭𑁂 𑀤𑀺𑀬𑁆𑀬𑀫𑀸𑀦𑁂 𑀏𑀯𑀫𑀸𑀳 𑁋

‘‘𑀩𑀸𑀮𑀁 𑀦 𑀧𑀲𑁆𑀲𑁂 𑀦 𑀲𑀼𑀡𑁂, 𑀦 𑀘 𑀩𑀸𑀮𑁂𑀦 𑀲𑀁𑀯𑀲𑁂;

𑀩𑀸𑀮𑁂𑀦𑀮𑁆𑀮𑀸𑀧𑀲𑀮𑁆𑀮𑀸𑀧𑀁, 𑀦 𑀓𑀭𑁂 𑀦 𑀘 𑀭𑁄𑀘𑀬𑁂.

‘‘𑀓𑀺𑀦𑁆𑀦𑀼 𑀢𑁂 𑀅𑀓𑀭𑀁 𑀩𑀸𑀮𑁄, 𑀯𑀤 𑀓𑀲𑁆𑀲𑀧 𑀓𑀸𑀭𑀡𑀁;

𑀓𑁂𑀦 𑀓𑀲𑁆𑀲𑀧 𑀩𑀸𑀮𑀲𑁆𑀲, 𑀤𑀲𑁆𑀲𑀦𑀁 𑀦𑀸𑀪𑀺𑀓𑀗𑁆𑀔𑀲𑀺.

‘‘𑀅𑀦𑀬𑀁 𑀦𑀬𑀢𑀺 𑀤𑀼𑀫𑁆𑀫𑁂𑀥𑁄, 𑀅𑀥𑀼𑀭𑀸𑀬𑀁 𑀦𑀺𑀬𑀼𑀜𑁆𑀚𑀢𑀺;

𑀤𑀼𑀦𑁆𑀦𑀬𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀧𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀦 𑀚𑀸𑀦𑀸𑀢𑀺, 𑀲𑀸𑀥𑀼 𑀢𑀲𑁆𑀲 𑀅𑀤𑀲𑁆𑀲𑀦’’𑀦𑁆𑀢𑀺. (𑀚𑀸. 𑁧.𑁧𑁩.𑁯𑁦-𑁯𑁨);

𑀏𑀯𑀁 𑀪𑀕𑀯𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀸𑀮𑀽𑀧𑀲𑁂𑀯𑀦𑀁 𑀕𑀭𑀳𑀦𑁆𑀢𑁄 𑀩𑀸𑀮𑀸𑀦𑀁 𑀅𑀲𑁂𑀯𑀦𑀁 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀧𑀡𑁆𑀟𑀺𑀢𑀲𑁂𑀯𑀦𑀁 𑀧𑀲𑀁𑀲𑀦𑁆𑀢𑁄 ‘‘𑀧𑀡𑁆𑀟𑀺𑀢𑀸𑀦𑀜𑁆𑀘 𑀲𑁂𑀯𑀦𑀸 𑀫𑀗𑁆𑀕𑀮’’𑀦𑁆𑀢𑀺 𑀆𑀳. 𑀢𑀢𑁆𑀣 𑀧𑀡𑁆𑀟𑀺𑀢𑀸 𑀦𑀸𑀫 𑀬𑁂 𑀓𑁂𑀘𑀺 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀺𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀲𑀫𑀦𑁆𑀦𑀸𑀕𑀢𑀸 𑀲𑀢𑁆𑀢𑀸, 𑀢𑁂 𑀢𑀻𑀳𑀸𑀓𑀸𑀭𑁂𑀳𑀺 𑀚𑀸𑀦𑀺𑀢𑀩𑁆𑀩𑀸. 𑀬𑀣𑀸𑀳 𑁋 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀲𑁆𑀲 𑀧𑀡𑁆𑀟𑀺𑀢𑀮𑀓𑁆𑀔𑀡𑀸𑀦𑀻’’𑀢𑀺 (𑀅. 𑀦𑀺. 𑁩.𑁩; 𑀫. 𑀦𑀺. 𑁩.𑁨𑁫𑁩) 𑀯𑀼𑀢𑁆𑀢𑀁. 𑀅𑀧𑀺𑀘 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸 𑀅𑀜𑁆𑀜𑁂 𑀘 𑀢𑀣𑀸𑀕𑀢𑀲𑁆𑀲 𑀲𑀸𑀯𑀓𑀸 𑀲𑀼𑀦𑁂𑀢𑁆𑀢𑀫𑀳𑀸𑀕𑁄𑀯𑀺𑀦𑁆𑀤𑀯𑀺𑀥𑀼𑀭𑀲𑀭𑀪𑀗𑁆𑀕𑀫𑀳𑁄𑀲𑀥𑀲𑀼𑀢𑀲𑁄𑀫𑀦𑀺𑀫𑀺𑀭𑀸𑀚- 𑀅𑀬𑁄𑀖𑀭𑀓𑀼𑀫𑀸𑀭𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑀸𑀤𑀬𑁄 𑀘 𑀧𑀡𑁆𑀟𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑁂 𑀪𑀬𑁂 𑀯𑀺𑀬 𑀭𑀓𑁆𑀔𑀸, 𑀅𑀦𑁆𑀥𑀓𑀸𑀭𑁂 𑀯𑀺𑀬 𑀧𑀤𑀻𑀧𑁄, 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀤𑀼𑀓𑁆𑀔𑀸𑀪𑀺𑀪𑀯𑁂 𑀯𑀺𑀬 𑀅𑀦𑁆𑀦𑀧𑀸𑀦𑀸𑀤𑀺𑀧𑀝𑀺𑀮𑀸𑀪𑁄, 𑀅𑀢𑁆𑀢𑀦𑁄 𑀯𑀘𑀦𑀓𑀭𑀸𑀦𑀁 𑀲𑀩𑁆𑀩𑀪𑀬𑀉𑀧𑀤𑁆𑀤𑀯𑀽𑀧𑀲𑀕𑁆𑀕𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀸 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀢𑀣𑀸𑀕𑀢𑀁 𑀆𑀕𑀫𑁆𑀫 𑀅𑀲𑀗𑁆𑀔𑁆𑀬𑁂𑀬𑁆𑀬𑀸 𑀅𑀧𑀭𑀺𑀫𑀸𑀡𑀸 𑀤𑁂𑀯𑀫𑀦𑀼𑀲𑁆𑀲𑀸 𑀆𑀲𑀯𑀓𑁆𑀔𑀬𑀁 𑀧𑀢𑁆𑀢𑀸, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀸, 𑀤𑁂𑀯𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀸, 𑀲𑀼𑀕𑀢𑀺𑀮𑁄𑀓𑁂 𑀉𑀧𑁆𑀧𑀦𑁆𑀦𑀸. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀣𑁂𑀭𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺 𑀓𑀼𑀮𑀲𑀳𑀲𑁆𑀲𑀸𑀦𑀺 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀢𑀣𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀫𑀳𑀸𑀓𑀲𑁆𑀲𑀧𑀧𑁆𑀧𑀪𑀼𑀢𑀻𑀲𑀼 𑀲𑀩𑁆𑀩𑀫𑀳𑀸𑀲𑀸𑀯𑀓𑁂𑀲𑀼, 𑀲𑀼𑀦𑁂𑀢𑁆𑀢𑀲𑁆𑀲 𑀲𑀢𑁆𑀣𑀼𑀦𑁄 𑀲𑀸𑀯𑀓𑀸 𑀅𑀧𑁆𑀧𑁂𑀓𑀘𑁆𑀘𑁂 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁…𑀧𑁂… 𑀅𑀧𑁆𑀧𑁂𑀓𑀘𑁆𑀘𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀦𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀢𑁄 𑀪𑀬𑀁, 𑀦𑀢𑁆𑀣𑀺 𑀧𑀡𑁆𑀟𑀺𑀢𑀢𑁄 𑀉𑀧𑀤𑁆𑀤𑀯𑁄, 𑀦𑀢𑁆𑀣𑀺 𑀧𑀡𑁆𑀟𑀺𑀢𑀢𑁄 𑀉𑀧𑀲𑀕𑁆𑀕𑁄’’𑀢𑀺 (𑀅. 𑀦𑀺. 𑁩.𑁧).

𑀅𑀧𑀺𑀘 𑀢𑀕𑀭𑀫𑀸𑀮𑀸𑀤𑀺𑀕𑀦𑁆𑀥𑀪𑀡𑁆𑀟𑀲𑀤𑀺𑀲𑁄 𑀧𑀡𑁆𑀟𑀺𑀢𑁄, 𑀢𑀕𑀭𑀫𑀸𑀮𑀸𑀤𑀺𑀕𑀦𑁆𑀥𑀪𑀡𑁆𑀟𑀧𑀮𑀺𑀯𑁂𑀞𑀦𑀧𑀢𑁆𑀢𑀲𑀤𑀺𑀲𑁄 𑀳𑁄𑀢𑀺 𑀢𑀤𑀼𑀧𑀲𑁂𑀯𑀻, 𑀪𑀸𑀯𑀦𑀻𑀬𑀢𑀁 𑀫𑀦𑀼𑀜𑁆𑀜𑀢𑀜𑁆𑀘 𑀆𑀧𑀚𑁆𑀚𑀢𑀺 𑀯𑀺𑀜𑁆𑀜𑀽𑀦𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀢𑀕𑀭𑀜𑁆𑀘 𑀧𑀮𑀸𑀲𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀧𑀢𑁆𑀢𑀸𑀧𑀺 𑀲𑀼𑀭𑀪𑀻 𑀯𑀸𑀬𑀦𑁆𑀢𑀺, 𑀏𑀯𑀁 𑀥𑀻𑀭𑀽𑀧𑀲𑁂𑀯𑀦𑀸’’𑀢𑀺. (𑀇𑀢𑀺𑀯𑀼. 𑁭𑁬; 𑀚𑀸. 𑁧.𑁧𑁫.𑁧𑁮𑁪; 𑁨.𑁨𑁨.𑁧𑁨𑁫𑁮);

𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑁄 𑀘𑀸𑀧𑀺 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀯𑀭𑁂 𑀤𑀺𑀬𑁆𑀬𑀫𑀸𑀦𑁂 𑀏𑀯𑀫𑀸𑀳 𑁋

‘‘𑀥𑀻𑀭𑀁 𑀧𑀲𑁆𑀲𑁂 𑀲𑀼𑀡𑁂 𑀥𑀻𑀭𑀁, 𑀥𑀻𑀭𑁂𑀦 𑀲𑀳 𑀲𑀁𑀯𑀲𑁂;

𑀥𑀻𑀭𑁂𑀦𑀮𑁆𑀮𑀸𑀧𑀲𑀮𑁆𑀮𑀸𑀧𑀁, 𑀢𑀁 𑀓𑀭𑁂 𑀢𑀜𑁆𑀘 𑀭𑁄𑀘𑀬𑁂.

‘‘𑀓𑀺𑀦𑁆𑀦𑀼 𑀢𑁂 𑀅𑀓𑀭𑀁 𑀥𑀻𑀭𑁄, 𑀯𑀤 𑀓𑀲𑁆𑀲𑀧 𑀓𑀸𑀭𑀡𑀁;

𑀓𑁂𑀦 𑀓𑀲𑁆𑀲𑀧 𑀥𑀻𑀭𑀲𑁆𑀲, 𑀤𑀲𑁆𑀲𑀦𑀁 𑀅𑀪𑀺𑀓𑀗𑁆𑀔𑀲𑀺.

‘‘𑀦𑀬𑀁 𑀦𑀬𑀢𑀺 𑀫𑁂𑀥𑀸𑀯𑀻, 𑀅𑀥𑀼𑀭𑀸𑀬𑀁 𑀦 𑀬𑀼𑀜𑁆𑀚𑀢𑀺;

𑀲𑀼𑀦𑀬𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀦 𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀧𑀚𑀸𑀦𑀸𑀢𑀺, 𑀲𑀸𑀥𑀼 𑀢𑁂𑀦 𑀲𑀫𑀸𑀕𑀫𑁄’’𑀢𑀺. (𑀚𑀸. 𑁧.𑁧𑁩.𑁯𑁪-𑁯𑁬);

𑀏𑀯𑀁 𑀪𑀕𑀯𑀸 𑀲𑀩𑁆𑀩𑀸𑀓𑀸𑀭𑁂𑀦 𑀧𑀡𑁆𑀟𑀺𑀢𑀲𑁂𑀯𑀦𑀁 𑀧𑀲𑀁𑀲𑀦𑁆𑀢𑁄, 𑀧𑀡𑁆𑀟𑀺𑀢𑀸𑀦𑀁 𑀲𑁂𑀯𑀦𑀁 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀸𑀬 𑀩𑀸𑀮𑀸𑀦𑀁 𑀅𑀲𑁂𑀯𑀦𑀸𑀬 𑀧𑀡𑁆𑀟𑀺𑀢𑀸𑀦𑀁 𑀲𑁂𑀯𑀦𑀸𑀬 𑀘 𑀅𑀦𑀼𑀧𑀼𑀩𑁆𑀩𑁂𑀦 𑀧𑀽𑀚𑀦𑁂𑀬𑁆𑀬𑀪𑀸𑀯𑀁 𑀉𑀧𑀕𑀢𑀸𑀦𑀁 𑀧𑀽𑀚𑀁 𑀧𑀲𑀁𑀲𑀦𑁆𑀢𑁄 ‘‘𑀧𑀽𑀚𑀸 𑀘 𑀧𑀽𑀚𑀦𑁂𑀬𑁆𑀬𑀸𑀦𑀁 𑀏𑀢𑀁 𑀫𑀗𑁆𑀕𑀮𑀫𑀼𑀢𑁆𑀢𑀫’’𑀦𑁆𑀢𑀺 𑀆𑀳. 𑀢𑀢𑁆𑀣 𑀧𑀽𑀚𑀦𑁂𑀬𑁆𑀬𑀸 𑀦𑀸𑀫 𑀲𑀩𑁆𑀩𑀤𑁄𑀲𑀯𑀺𑀭𑀳𑀺𑀢𑀢𑁆𑀢𑀸 𑀲𑀩𑁆𑀩𑀕𑀼𑀡𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄, 𑀢𑀢𑁄 𑀧𑀘𑁆𑀙𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀭𑀺𑀬𑀲𑀸𑀯𑀓𑀸 𑀘. 𑀢𑁂𑀲𑀜𑁆𑀳𑀺 𑀧𑀽𑀚𑀸 𑀅𑀧𑁆𑀧𑀓𑀸𑀧𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺, 𑀲𑀼𑀫𑀦𑀫𑀸𑀮𑀸𑀓𑀸𑀭𑀫𑀮𑁆𑀮𑀺𑀓𑀸𑀤𑀬𑁄 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀢𑀢𑁆𑀣𑁂𑀓𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀪𑀡𑀸𑀫. 𑀪𑀕𑀯𑀸 𑀓𑀺𑀭 𑀏𑀓𑀤𑀺𑀯𑀲𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣 𑀔𑁄 𑀲𑀼𑀫𑀦𑀫𑀸𑀮𑀸𑀓𑀸𑀭𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀅𑀤𑁆𑀤𑀲 𑀪𑀕𑀯𑀦𑁆𑀢𑀁 𑀦𑀕𑀭𑀤𑁆𑀯𑀸𑀭𑀁 𑀅𑀦𑀼𑀧𑁆𑀧𑀢𑁆𑀢𑀁 𑀧𑀸𑀲𑀸𑀤𑀺𑀓𑀁 𑀧𑀲𑀸𑀤𑀦𑀻𑀬𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀁 𑀩𑀼𑀤𑁆𑀥𑀲𑀺𑀭𑀺𑀬𑀸 𑀚𑀮𑀦𑁆𑀢𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀭𑀸𑀚𑀸 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀤𑀤𑁂𑀬𑁆𑀬, 𑀢𑀜𑁆𑀘 𑀇𑀥𑀮𑁄𑀓𑀫𑀢𑁆𑀢𑀫𑁂𑀯 𑀲𑀼𑀔𑀁 𑀪𑀯𑁂𑀬𑁆𑀬, 𑀪𑀕𑀯𑀢𑁄 𑀧𑀦 𑀧𑀽𑀚𑀸 𑀅𑀧𑁆𑀧𑀫𑁂𑀬𑁆𑀬𑀅𑀲𑀗𑁆𑀔𑁆𑀬𑁂𑀬𑁆𑀬𑀨𑀮𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀲𑀼𑀔𑀸𑀯𑀳𑀸 𑀳𑁄𑀢𑀺. 𑀳𑀦𑁆𑀤𑀸𑀳𑀁 𑀇𑀫𑁂𑀳𑀺 𑀧𑀼𑀧𑁆𑀨𑁂𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑁂𑀫𑀻’’𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄 𑀏𑀓𑀁 𑀧𑀼𑀧𑁆𑀨𑀫𑀼𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀧𑀝𑀺𑀫𑀼𑀔𑀁 𑀔𑀺𑀧𑀺, 𑀧𑀼𑀧𑁆𑀨𑀸𑀦𑀺 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀉𑀧𑀭𑀺 𑀫𑀸𑀮𑀸𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀫𑀸𑀮𑀸𑀓𑀸𑀭𑁄 𑀢𑀁 𑀆𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀢𑀭𑀘𑀺𑀢𑁆𑀢𑁄 𑀧𑀼𑀦 𑀏𑀓𑀁 𑀧𑀼𑀧𑁆𑀨𑀫𑀼𑀝𑁆𑀞𑀺𑀁 𑀔𑀺𑀧𑀺, 𑀢𑀸𑀦𑀺 𑀕𑀦𑁆𑀢𑁆𑀯𑀸 𑀫𑀸𑀮𑀸𑀓𑀜𑁆𑀘𑀼𑀓𑁄 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀏𑀯𑀁 𑀅𑀝𑁆𑀞 𑀧𑀼𑀧𑁆𑀨𑀫𑀼𑀝𑁆𑀞𑀺𑀬𑁄 𑀔𑀺𑀧𑀺, 𑀢𑀸𑀦𑀺 𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀓𑀽𑀝𑀸𑀕𑀸𑀭𑀁 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀪𑀕𑀯𑀸 𑀅𑀦𑁆𑀢𑁄𑀓𑀽𑀝𑀸𑀕𑀸𑀭𑁂 𑀯𑀺𑀬 𑀅𑀳𑁄𑀲𑀺, 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺. 𑀪𑀕𑀯𑀸 𑀫𑀸𑀮𑀸𑀓𑀸𑀭𑀁 𑀧𑀲𑁆𑀲𑀦𑁆𑀢𑁄 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 ‘‘𑀦 𑀩𑀼𑀤𑁆𑀥𑀸 𑀅𑀳𑁂𑀢𑀼 𑀅𑀧𑁆𑀧𑀘𑁆𑀘𑀬𑀸 𑀲𑀺𑀢𑀁 𑀧𑀸𑀢𑀼𑀓𑀭𑁄𑀦𑁆𑀢𑀻’’𑀢𑀺 𑀲𑀺𑀢𑀓𑀸𑀭𑀡𑀁 𑀧𑀼𑀘𑁆𑀙𑀺. 𑀪𑀕𑀯𑀸 𑀆𑀳 𑁋 ‘‘𑀏𑀲𑁄, 𑀆𑀦𑀦𑁆𑀤, 𑀫𑀸𑀮𑀸𑀓𑀸𑀭𑁄 𑀇𑀫𑀺𑀲𑁆𑀲𑀸 𑀧𑀽𑀚𑀸𑀬 𑀆𑀦𑀼𑀪𑀸𑀯𑁂𑀦 𑀲𑀢𑀲𑀳𑀲𑁆𑀲𑀓𑀧𑁆𑀧𑁂 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀺𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀲𑀼𑀫𑀦𑀺𑀲𑁆𑀲𑀭𑁄 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀯𑀘𑀦𑀧𑀭𑀺𑀬𑁄𑀲𑀸𑀦𑁂 𑀘 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀢𑀜𑁆𑀘 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺;

𑀬𑀲𑁆𑀲 𑀧𑀢𑀻𑀢𑁄 𑀲𑀼𑀫𑀦𑁄, 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀻’’𑀢𑀺. (𑀥. 𑀧. 𑁬𑁮);

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀏𑀯𑀁 𑀅𑀧𑁆𑀧𑀓𑀸𑀧𑀺 𑀢𑁂𑀲𑀁 𑀧𑀽𑀚𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀘 𑀆𑀫𑀺𑀲𑀧𑀽𑀚𑀸𑀯 𑀓𑁄 𑀧𑀦 𑀯𑀸𑀤𑁄 𑀧𑀝𑀺𑀧𑀢𑁆𑀢𑀺𑀧𑀽𑀚𑀸𑀬. 𑀬𑀢𑁄 𑀬𑁂 𑀓𑀼𑀮𑀧𑀼𑀢𑁆𑀢𑀸 𑀲𑀭𑀡𑀕𑀫𑀦𑁂𑀦 𑀲𑀺𑀓𑁆𑀔𑀸𑀧𑀤𑀧𑀝𑀺𑀕𑁆𑀕𑀳𑀡𑁂𑀦 𑀉𑀧𑁄𑀲𑀣𑀗𑁆𑀕𑀲𑀫𑀸𑀤𑀸𑀦𑁂𑀦 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀻𑀳𑀺 𑀘 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑁂𑀦𑁆𑀢𑀺, 𑀓𑁄 𑀢𑁂𑀲𑀁 𑀧𑀽𑀚𑀸𑀬 𑀨𑀮𑀁 𑀯𑀡𑁆𑀡𑀬𑀺𑀲𑁆𑀲𑀢𑀺. 𑀢𑁂 𑀳𑀺 𑀢𑀣𑀸𑀕𑀢𑀁 𑀧𑀭𑀫𑀸𑀬 𑀧𑀽𑀚𑀸𑀬 𑀧𑀽𑀚𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀸. 𑀬𑀣𑀸𑀳 𑁋

‘‘𑀬𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀉𑀧𑀸𑀲𑀓𑁄 𑀯𑀸 𑀉𑀧𑀸𑀲𑀺𑀓𑀸 𑀯𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀦𑁆𑀦𑁄 𑀯𑀺𑀳𑀭𑀢𑀺 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀅𑀦𑀼𑀥𑀫𑁆𑀫𑀘𑀸𑀭𑀻, 𑀲𑁄 𑀢𑀣𑀸𑀕𑀢𑀁 𑀲𑀓𑁆𑀓𑀭𑁄𑀢𑀺 𑀕𑀭𑀼𑀁 𑀓𑀭𑁄𑀢𑀺 𑀫𑀸𑀦𑁂𑀢𑀺 𑀧𑀽𑀚𑁂𑀢𑀺 𑀅𑀧𑀘𑀺𑀬𑀢𑀺 𑀧𑀭𑀫𑀸𑀬 𑀧𑀽𑀚𑀸𑀬𑀸’’𑀢𑀺.

𑀏𑀢𑁂𑀦𑀸𑀦𑀼𑀲𑀸𑀭𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀭𑀺𑀬𑀲𑀸𑀯𑀓𑀸𑀦𑀫𑁆𑀧𑀺 𑀧𑀽𑀚𑀸𑀬 𑀳𑀺𑀢𑀲𑀼𑀔𑀸𑀯𑀳𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀺𑀘 𑀕𑀳𑀝𑁆𑀞𑀸𑀦𑀁 𑀓𑀦𑀺𑀝𑁆𑀞𑀲𑁆𑀲 𑀚𑁂𑀝𑁆𑀞𑁄 𑀪𑀸𑀢𑀸𑀧𑀺 𑀪𑀕𑀺𑀦𑀻𑀧𑀺 𑀧𑀽𑀚𑀦𑁂𑀬𑁆𑀬𑀸, 𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄, 𑀓𑀼𑀮𑀯𑀥𑀽𑀦𑀁 𑀲𑀸𑀫𑀺𑀓𑀲𑀲𑁆𑀲𑀼𑀲𑀲𑀼𑀭𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀧𑀽𑀚𑀦𑁂𑀬𑁆𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁂𑀲𑀫𑁆𑀧𑀺 𑀳𑀺 𑀧𑀽𑀚𑀸 𑀓𑀼𑀲𑀮𑀥𑀫𑁆𑀫𑀲𑀗𑁆𑀔𑀸𑀢𑀢𑁆𑀢𑀸 𑀆𑀬𑀼𑀆𑀤𑀺𑀯𑀟𑁆𑀠𑀺𑀳𑁂𑀢𑀼𑀢𑁆𑀢𑀸 𑀘 𑀫𑀗𑁆𑀕𑀮𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑁂 𑀫𑀢𑁆𑀢𑁂𑀬𑁆𑀬𑀸 𑀪𑀯𑀺𑀲𑁆𑀲𑀦𑁆𑀢𑀺 𑀧𑁂𑀢𑁆𑀢𑁂𑀬𑁆𑀬𑀸 𑀲𑀸𑀫𑀜𑁆𑀜𑀸 𑀩𑁆𑀭𑀳𑁆𑀫𑀜𑁆𑀜𑀸 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄, 𑀇𑀤𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀦𑁆𑀢𑀺. 𑀢𑁂 𑀢𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼 𑀆𑀬𑀼𑀦𑀸𑀧𑀺 𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀯𑀡𑁆𑀡𑁂𑀦𑀧𑀺 𑀯𑀟𑁆𑀠𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺.

𑀏𑀯𑀫𑁂𑀢𑀺𑀲𑁆𑀲𑀸 𑀕𑀸𑀣𑀸𑀬 𑀩𑀸𑀮𑀸𑀦𑀁 𑀅𑀲𑁂𑀯𑀦𑀸 𑀧𑀡𑁆𑀟𑀺𑀢𑀸𑀦𑀁 𑀲𑁂𑀯𑀦𑀸 𑀧𑀽𑀚𑀦𑁂𑀬𑁆𑀬𑀸𑀦𑀁 𑀧𑀽𑀚𑀸𑀢𑀺 𑀢𑀻𑀡𑀺 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀩𑀸𑀮𑀸𑀦𑀁 𑀅𑀲𑁂𑀯𑀦𑀸 𑀩𑀸𑀮𑀲𑁂𑀯𑀦𑀧𑀘𑁆𑀘𑀬𑀪𑀬𑀸𑀤𑀺𑀧𑀭𑀺𑀢𑁆𑀢𑀸𑀡𑁂𑀦 𑀉𑀪𑀬𑀮𑁄𑀓𑀳𑀺𑀢𑀳𑁂𑀢𑀼𑀢𑁆𑀢𑀸 𑀧𑀡𑁆𑀟𑀺𑀢𑀸𑀦𑀁 𑀲𑁂𑀯𑀦𑀸 𑀧𑀽𑀚𑀦𑁂𑀬𑁆𑀬𑀸𑀦𑀁 𑀧𑀽𑀚𑀸 𑀘 𑀢𑀸𑀲𑀁 𑀨𑀮𑀯𑀺𑀪𑀽𑀢𑀺𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀩𑁆𑀩𑀸𑀦𑀲𑀼𑀕𑀢𑀺𑀳𑁂𑀢𑀼𑀢𑁆𑀢𑀸 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀢𑁄 𑀧𑀭𑀁 𑀢𑀼 𑀫𑀸𑀢𑀺𑀓𑀁 𑀅𑀤𑀲𑁆𑀲𑁂𑀢𑁆𑀯𑀸 𑀏𑀯 𑀬𑀁 𑀬𑀢𑁆𑀣 𑀫𑀗𑁆𑀕𑀮𑀁, 𑀢𑀁 𑀯𑀯𑀢𑁆𑀣𑀧𑁂𑀲𑁆𑀲𑀸𑀫, 𑀢𑀲𑁆𑀲 𑀘 𑀫𑀗𑁆𑀕𑀮𑀢𑁆𑀢𑀁 𑀯𑀺𑀪𑀸𑀯𑀬𑀺𑀲𑁆𑀲𑀸𑀫𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀅𑀲𑁂𑀯𑀦𑀸 𑀘 𑀩𑀸𑀮𑀸𑀦𑀦𑁆𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

𑁨𑁬𑁩. 𑀏𑀯𑀁 𑀪𑀕𑀯𑀸 ‘‘𑀩𑁆𑀭𑀽𑀳𑀺 𑀫𑀗𑁆𑀕𑀮𑀫𑀼𑀢𑁆𑀢𑀫’’𑀦𑁆𑀢𑀺 𑀏𑀓𑀁 𑀅𑀚𑁆𑀛𑁂𑀲𑀺𑀢𑁄𑀧𑀺 𑀅𑀧𑁆𑀧𑀁 𑀬𑀸𑀘𑀺𑀢𑁄 𑀩𑀳𑀼𑀤𑀸𑀬𑀓𑁄 𑀉𑀴𑀸𑀭𑀧𑀼𑀭𑀺𑀲𑁄 𑀯𑀺𑀬 𑀏𑀓𑀸𑀬 𑀕𑀸𑀣𑀸𑀬 𑀢𑀻𑀡𑀺 𑀫𑀗𑁆𑀕𑀮𑀸𑀦𑀺 𑀯𑀢𑁆𑀯𑀸 𑀢𑀢𑁄 𑀉𑀢𑁆𑀢𑀭𑀺𑀧𑀺 𑀤𑁂𑀯𑀢𑀸𑀦𑀁 𑀲𑁄𑀢𑀼𑀓𑀸𑀫𑀢𑀸𑀬 𑀫𑀗𑁆𑀕𑀮𑀸𑀦𑀜𑁆𑀘 𑀅𑀢𑁆𑀣𑀺𑀢𑀸𑀬 𑀬𑁂𑀲𑀁 𑀬𑁂𑀲𑀁 𑀬𑀁 𑀬𑀁 𑀅𑀦𑀼𑀓𑀽𑀮𑀁, 𑀢𑁂 𑀢𑁂 𑀲𑀢𑁆𑀢𑁂 𑀢𑀢𑁆𑀣 𑀢𑀢𑁆𑀣 𑀫𑀗𑁆𑀕𑀮𑁂 𑀦𑀺𑀬𑁄𑀚𑁂𑀢𑀼𑀓𑀸𑀫𑀢𑀸𑀬 𑀘 ‘‘𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀘𑀸’’𑀢𑀺𑀆𑀤𑀻𑀳𑀺 𑀕𑀸𑀣𑀸𑀳𑀺 𑀧𑀼𑀦𑀧𑀺 𑀅𑀦𑁂𑀓𑀸𑀦𑀺 𑀫𑀗𑁆𑀕𑀮𑀸𑀦𑀺 𑀯𑀢𑁆𑀢𑀼𑀫𑀸𑀭𑀤𑁆𑀥𑁄.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀧𑀢𑀺𑀭𑀽𑀧𑁄𑀢𑀺 𑀅𑀦𑀼𑀘𑁆𑀙𑀯𑀺𑀓𑁄. 𑀤𑁂𑀲𑁄𑀢𑀺 𑀕𑀸𑀫𑁄𑀧𑀺 𑀦𑀺𑀕𑀫𑁄𑀧𑀺 𑀦𑀕𑀭𑀫𑁆𑀧𑀺 𑀚𑀦𑀧𑀤𑁄𑀧𑀺 𑀬𑁄 𑀓𑁄𑀘𑀺 𑀲𑀢𑁆𑀢𑀸𑀦𑀁 𑀦𑀺𑀯𑀸𑀲𑁄𑀓𑀸𑀲𑁄. 𑀯𑀸𑀲𑁄𑀢𑀺 𑀢𑀢𑁆𑀣 𑀦𑀺𑀯𑀸𑀲𑁄. 𑀧𑀼𑀩𑁆𑀩𑁂𑀢𑀺 𑀧𑀼𑀭𑀸 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼. 𑀓𑀢𑀧𑀼𑀜𑁆𑀜𑀢𑀸𑀢𑀺 𑀉𑀧𑀘𑀺𑀢𑀓𑀼𑀲𑀮𑀢𑀸. 𑀅𑀢𑁆𑀢𑀸𑀢𑀺 𑀘𑀺𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀲𑀓𑀮𑁄 𑀯𑀸 𑀅𑀢𑁆𑀢𑀪𑀸𑀯𑁄. 𑀲𑀫𑁆𑀫𑀸𑀧𑀡𑀺𑀥𑀻𑀢𑀺 𑀢𑀲𑁆𑀲 𑀅𑀢𑁆𑀢𑀦𑁄 𑀲𑀫𑁆𑀫𑀸 𑀧𑀡𑀺𑀥𑀸𑀦𑀁 𑀦𑀺𑀬𑀼𑀜𑁆𑀚𑀦𑀁, 𑀞𑀧𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑀧𑀢𑀺𑀭𑀽𑀧𑀤𑁂𑀲𑁄 𑀦𑀸𑀫 𑀬𑀢𑁆𑀣 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀯𑀺𑀳𑀭𑀦𑁆𑀢𑀺, 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀓𑀺𑀭𑀺𑀬𑀸𑀯𑀢𑁆𑀣𑀽𑀦𑀺 𑀯𑀢𑁆𑀢𑀦𑁆𑀢𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼 𑀲𑀸𑀲𑀦𑀁 𑀤𑀺𑀧𑁆𑀧𑀢𑀺. 𑀢𑀢𑁆𑀣 𑀦𑀺𑀯𑀸𑀲𑁄 𑀲𑀢𑁆𑀢𑀸𑀦𑀁 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀧𑀘𑁆𑀘𑀬𑀢𑁆𑀢𑀸 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀻𑀳𑀴𑀤𑀻𑀧𑀧𑀯𑀺𑀝𑁆𑀞𑀓𑁂𑀯𑀝𑁆𑀝𑀸𑀤𑀬𑁄 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀅𑀧𑀭𑁄 𑀦𑀬𑁄 𑁋 𑀧𑀢𑀺𑀭𑀽𑀧𑀤𑁂𑀲𑁄 𑀦𑀸𑀫 𑀪𑀕𑀯𑀢𑁄 𑀩𑁄𑀥𑀺𑀫𑀡𑁆𑀟𑀧𑁆𑀧𑀤𑁂𑀲𑁄, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀺𑀢𑀧𑁆𑀧𑀤𑁂𑀲𑁄, 𑀤𑁆𑀯𑀸𑀤𑀲𑀬𑁄𑀚𑀦𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀲𑀩𑁆𑀩𑀢𑀺𑀢𑁆𑀣𑀺𑀬𑀫𑀢𑀁 𑀪𑀺𑀦𑁆𑀤𑀺𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀤𑀲𑁆𑀲𑀺𑀢𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑀧𑁆𑀧𑀤𑁂𑀲𑁄, 𑀤𑁂𑀯𑁄𑀭𑁄𑀳𑀦𑀧𑁆𑀧𑀤𑁂𑀲𑁄, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀲𑀸𑀯𑀢𑁆𑀣𑀺𑀭𑀸𑀚𑀕𑀳𑀸𑀤𑀺𑀩𑀼𑀤𑁆𑀥𑀸𑀤𑀺𑀯𑀸𑀲𑀧𑁆𑀧𑀤𑁂𑀲𑁄. 𑀢𑀢𑁆𑀣 𑀦𑀺𑀯𑀸𑀲𑁄 𑀲𑀢𑁆𑀢𑀸𑀦𑀁 𑀙𑀅𑀦𑀼𑀢𑁆𑀢𑀭𑀺𑀬𑀧𑀝𑀺𑀮𑀸𑀪𑀧𑀘𑁆𑀘𑀬𑀢𑁄 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀅𑀧𑀭𑁄 𑀦𑀬𑁄 𑁋 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀚𑀗𑁆𑀕𑀮𑀁 𑀦𑀸𑀫 𑀦𑀺𑀕𑀫𑁄, 𑀢𑀲𑁆𑀲 𑀅𑀧𑀭𑁂𑀦 𑀫𑀳𑀸𑀲𑀸𑀮𑀸, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀤𑀓𑁆𑀔𑀺𑀡𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀮𑁆𑀮𑀯𑀢𑀻 𑀦𑀸𑀫 𑀦𑀤𑀻, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑁂𑀢𑀓𑀡𑁆𑀡𑀺𑀓𑀁 𑀦𑀸𑀫 𑀦𑀺𑀕𑀫𑁄, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀣𑀽𑀡𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀲𑀺𑀭𑀤𑁆𑀥𑀚𑁄 𑀦𑀸𑀫 𑀧𑀩𑁆𑀩𑀢𑁄, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂 (𑀫𑀳𑀸𑀯. 𑁨𑁫𑁯). 𑀅𑀬𑀁 𑀫𑀚𑁆𑀛𑀺𑀫𑀧𑁆𑀧𑀤𑁂𑀲𑁄 𑀆𑀬𑀸𑀫𑁂𑀦 𑀢𑀻𑀡𑀺 𑀬𑁄𑀚𑀦𑀲𑀢𑀸𑀦𑀺, 𑀯𑀺𑀢𑁆𑀣𑀸𑀭𑁂𑀦 𑀅𑀟𑁆𑀠𑀢𑁂𑀬𑁆𑀬𑀸𑀦𑀺, 𑀧𑀭𑀺𑀓𑁆𑀔𑁂𑀧𑁂𑀦 𑀦𑀯𑀬𑁄𑀚𑀦𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀏𑀲𑁄 𑀧𑀢𑀺𑀭𑀽𑀧𑀤𑁂𑀲𑁄 𑀦𑀸𑀫.

𑀏𑀢𑁆𑀣 𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀁 𑀤𑁆𑀯𑀺𑀲𑀳𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀤𑀻𑀧𑀸𑀦𑀜𑁆𑀘 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀓𑀸𑀭𑀓𑀸 𑀘𑀓𑁆𑀓𑀯𑀢𑁆𑀢𑀻 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀫𑀳𑀸𑀲𑀸𑀯𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀘𑀢𑁆𑀢𑀸𑀭𑀺 𑀅𑀝𑁆𑀞 𑀲𑁄𑀴𑀲 𑀯𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀲𑀢𑁆𑀢𑀸 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀑𑀯𑀸𑀤𑀁 𑀕𑀳𑁂𑀢𑁆𑀯𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀬 𑀲𑀕𑁆𑀕𑀧𑀭𑀸𑀬𑀡𑀸 𑀳𑁄𑀦𑁆𑀢𑀺, 𑀢𑀣𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀑𑀯𑀸𑀤𑁂 𑀧𑀢𑀺𑀝𑁆𑀞𑀸𑀬. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀧𑀦 𑀑𑀯𑀸𑀤𑁂 𑀧𑀢𑀺𑀝𑁆𑀞𑀸𑀬 𑀲𑀕𑁆𑀕𑀧𑀭𑀸𑀬𑀡𑀸 𑀦𑀺𑀩𑁆𑀩𑀸𑀦𑀧𑀭𑀸𑀬𑀡𑀸 𑀘 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀯𑀸𑀲𑁄 𑀇𑀫𑀸𑀲𑀁 𑀲𑀫𑁆𑀧𑀢𑁆𑀢𑀻𑀦𑀁 𑀧𑀘𑁆𑀘𑀬𑀢𑁄 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀢𑀸 𑀦𑀸𑀫 𑀅𑀢𑀻𑀢𑀚𑀸𑀢𑀺𑀬𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑁂 𑀆𑀭𑀩𑁆𑀪 𑀉𑀧𑀘𑀺𑀢𑀓𑀼𑀲𑀮𑀢𑀸, 𑀲𑀸𑀧𑀺 𑀫𑀗𑁆𑀕𑀮𑀁. 𑀓𑀲𑁆𑀫𑀸? 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀲𑀫𑁆𑀫𑀼𑀔𑀢𑁄 𑀤𑀲𑁆𑀲𑁂𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀯𑀸 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀯𑀸 𑀲𑀫𑁆𑀫𑀼𑀔𑀸 𑀲𑀼𑀢𑀸𑀬 𑀘𑀢𑀼𑀧𑁆𑀧𑀤𑀺𑀓𑀸𑀬𑀧𑀺 𑀕𑀸𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑀻𑀢𑀺 𑀓𑀢𑁆𑀯𑀸. 𑀬𑁄 𑀘 𑀫𑀦𑀼𑀲𑁆𑀲𑁄 𑀧𑀼𑀩𑁆𑀩𑁂 𑀓𑀢𑀸𑀥𑀺𑀓𑀸𑀭𑁄 𑀉𑀲𑁆𑀲𑀦𑁆𑀦𑀓𑀼𑀲𑀮𑀫𑀽𑀮𑁄 𑀳𑁄𑀢𑀺, 𑀲𑁄 𑀢𑁂𑀦𑁂𑀯 𑀓𑀼𑀲𑀮𑀫𑀽𑀮𑁂𑀦 𑀯𑀺𑀧𑀲𑁆𑀲𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀆𑀲𑀯𑀓𑁆𑀔𑀬𑀁 𑀧𑀸𑀧𑀼𑀡𑀸𑀢𑀺 𑀬𑀣𑀸 𑀭𑀸𑀚𑀸 𑀫𑀳𑀸𑀓𑀧𑁆𑀧𑀺𑀦𑁄 𑀅𑀕𑁆𑀕𑀫𑀳𑁂𑀲𑀻 𑀘. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀸 𑀫𑀗𑁆𑀕𑀮’’𑀦𑁆𑀢𑀺.

𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺 𑀦𑀸𑀫 𑀇𑀥𑁂𑀓𑀘𑁆𑀘𑁄 𑀅𑀢𑁆𑀢𑀸𑀦𑀁 𑀤𑀼𑀲𑁆𑀲𑀻𑀮𑀁 𑀲𑀻𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀅𑀲𑁆𑀲𑀤𑁆𑀥𑀁 𑀲𑀤𑁆𑀥𑀸𑀲𑀫𑁆𑀧𑀤𑀸𑀬 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀫𑀘𑁆𑀙𑀭𑀺𑀁 𑀘𑀸𑀕𑀲𑀫𑁆𑀧𑀤𑀸𑀬 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀻’’𑀢𑀺. 𑀏𑀲𑁄 𑀘 𑀫𑀗𑁆𑀕𑀮𑀁. 𑀓𑀲𑁆𑀫𑀸? 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀯𑁂𑀭𑀧𑁆𑀧𑀳𑀸𑀦𑀯𑀺𑀯𑀺𑀥𑀸𑀦𑀺𑀲𑀁𑀲𑀸𑀥𑀺𑀕𑀫𑀳𑁂𑀢𑀼𑀢𑁄𑀢𑀺.

𑀏𑀯𑀁 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄, 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀸, 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀻𑀢𑀺 𑀢𑀻𑀡𑀺𑀬𑁂𑀯 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀫𑀗𑁆𑀕𑀮𑀢𑁆𑀢𑀜𑁆𑀘 𑀦𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀺𑀢𑀫𑁂𑀯𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀘𑀸𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

𑁨𑁬𑁪. 𑀇𑀤𑀸𑀦𑀺 𑀩𑀸𑀳𑀼𑀲𑀘𑁆𑀘𑀜𑁆𑀘𑀸𑀢𑀺 𑀏𑀢𑁆𑀣 𑀩𑀸𑀳𑀼𑀲𑀘𑁆𑀘𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀪𑀸𑀯𑁄. 𑀲𑀺𑀧𑁆𑀧𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀳𑀢𑁆𑀣𑀓𑁄𑀲𑀮𑁆𑀮𑀁. 𑀯𑀺𑀦𑀬𑁄𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀯𑀺𑀦𑀬𑀦𑀁. 𑀲𑀼𑀲𑀺𑀓𑁆𑀔𑀺𑀢𑁄𑀢𑀺 𑀲𑀼𑀝𑁆𑀞𑀼 𑀲𑀺𑀓𑁆𑀔𑀺𑀢𑁄. 𑀲𑀼𑀪𑀸𑀲𑀺𑀢𑀸𑀢𑀺 𑀲𑀼𑀝𑁆𑀞𑀼 𑀪𑀸𑀲𑀺𑀢𑀸. 𑀬𑀸𑀢𑀺 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑁄. 𑀯𑀸𑀘𑀸𑀢𑀺 𑀕𑀺𑀭𑀸 𑀩𑁆𑀬𑀧𑁆𑀧𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺. 𑀅𑀬𑀫𑁂𑀢𑁆𑀣 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀩𑀸𑀳𑀼𑀲𑀘𑁆𑀘𑀁 𑀦𑀸𑀫 𑀬𑀁 𑀢𑀁 ‘‘𑀲𑀼𑀢𑀥𑀭𑁄 𑀳𑁄𑀢𑀺 𑀲𑀼𑀢𑀲𑀦𑁆𑀦𑀺𑀘𑀬𑁄’’𑀢𑀺 (𑀫. 𑀦𑀺. 𑁧.𑁩𑁩𑁯; 𑀅. 𑀦𑀺. 𑁪.𑁨𑁨) 𑀘 ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀓𑀁 𑀲𑀼𑀢𑀁 𑀳𑁄𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡’’𑀦𑁆𑀢𑀺 (𑀅. 𑀦𑀺. 𑁪.𑁬) 𑀘 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑀥𑀭𑀢𑁆𑀢𑀁 𑀯𑀡𑁆𑀡𑀺𑀢𑀁, 𑀢𑀁 𑀅𑀓𑀼𑀲𑀮𑀧𑁆𑀧𑀳𑀸𑀦𑀓𑀼𑀲𑀮𑀸𑀥𑀺𑀕𑀫𑀳𑁂𑀢𑀼𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀫𑀢𑁆𑀣𑀲𑀘𑁆𑀘𑀲𑀘𑁆𑀙𑀺𑀓𑀺𑀭𑀺𑀬𑀳𑁂𑀢𑀼𑀢𑁄 𑀘 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺, 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺, 𑀲𑀼𑀤𑁆𑀥𑀫𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁭.𑁬𑁭).

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋

‘‘𑀥𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀫𑀼𑀧𑀧𑀭𑀺𑀓𑁆𑀔𑀢𑀺, 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑁄 𑀥𑀫𑁆𑀫𑀸 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺, 𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀲𑀢𑀺 𑀙𑀦𑁆𑀤𑁄 𑀚𑀸𑀬𑀢𑀺, 𑀙𑀦𑁆𑀤𑀚𑀸𑀢𑁄 𑀉𑀲𑁆𑀲𑀳𑀢𑀺, 𑀉𑀲𑁆𑀲𑀳𑀦𑁆𑀢𑁄 𑀢𑀼𑀮𑀬𑀢𑀺, 𑀢𑀼𑀮𑀬𑀦𑁆𑀢𑁄 𑀧𑀤𑀳𑀢𑀺, 𑀧𑀤𑀳𑀦𑁆𑀢𑁄 𑀓𑀸𑀬𑁂𑀦 𑀘𑁂𑀯 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀧𑀜𑁆𑀜𑀸𑀬 𑀘 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁨.𑁪𑁩𑁨).

𑀅𑀧𑀺𑀘 𑀅𑀕𑀸𑀭𑀺𑀓𑀩𑀸𑀳𑀼𑀲𑀘𑁆𑀘𑀫𑁆𑀧𑀺 𑀬𑀁 𑀅𑀦𑀯𑀚𑁆𑀚𑀁, 𑀢𑀁 𑀉𑀪𑀬𑀮𑁄𑀓𑀳𑀺𑀢𑀲𑀼𑀔𑀸𑀯𑀳𑀦𑀢𑁄 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀺𑀧𑁆𑀧𑀁 𑀦𑀸𑀫 𑀅𑀕𑀸𑀭𑀺𑀓𑀲𑀺𑀧𑁆𑀧𑀜𑁆𑀘 𑀅𑀦𑀕𑀸𑀭𑀺𑀓𑀲𑀺𑀧𑁆𑀧𑀜𑁆𑀘. 𑀢𑀢𑁆𑀣 𑀅𑀕𑀸𑀭𑀺𑀓𑀲𑀺𑀧𑁆𑀧𑀁 𑀦𑀸𑀫 𑀬𑀁 𑀧𑀭𑀽𑀧𑀭𑁄𑀥𑀯𑀺𑀭𑀳𑀺𑀢𑀁 𑀅𑀓𑀼𑀲𑀮𑀯𑀺𑀯𑀚𑁆𑀚𑀺𑀢𑀁 𑀫𑀡𑀺𑀓𑀸𑀭𑀲𑀼𑀯𑀡𑁆𑀡𑀓𑀸𑀭𑀓𑀫𑁆𑀫𑀸𑀤𑀺, 𑀢𑀁 𑀇𑀥𑀮𑁄𑀓𑀢𑁆𑀣𑀸𑀯𑀳𑀦𑀢𑁄 𑀫𑀗𑁆𑀕𑀮𑀁. 𑀅𑀦𑀕𑀸𑀭𑀺𑀓𑀲𑀺𑀧𑁆𑀧𑀁 𑀦𑀸𑀫 𑀘𑀻𑀯𑀭𑀯𑀺𑀘𑀸𑀭𑀡𑀲𑀺𑀩𑁆𑀩𑀦𑀸𑀤𑀺 𑀲𑀫𑀡𑀧𑀭𑀺𑀓𑁆𑀔𑀸𑀭𑀸𑀪𑀺𑀲𑀗𑁆𑀔𑀭𑀡𑀁, 𑀬𑀁 𑀢𑀁 ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀸𑀦𑀺 𑀢𑀸𑀦𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀉𑀘𑁆𑀘𑀸𑀯𑀘𑀸𑀦𑀺 𑀓𑀺𑀁𑀓𑀭𑀡𑀻𑀬𑀸𑀦𑀺, 𑀢𑀢𑁆𑀣 𑀤𑀓𑁆𑀔𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀲𑀁𑀯𑀡𑁆𑀡𑀺𑀢𑀁, 𑀬𑀁 ‘‘𑀦𑀸𑀣𑀓𑀭𑀡𑁄 𑀥𑀫𑁆𑀫𑁄’’𑀢𑀺 (𑀤𑀻. 𑀦𑀺. 𑁩.𑁩𑁪𑁫; 𑀅. 𑀦𑀺. 𑁧𑁦.𑁧𑁭) 𑀘 𑀯𑀼𑀢𑁆𑀢𑀁, 𑀢𑀁 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀉𑀪𑀬𑀮𑁄𑀓𑀳𑀺𑀢𑀲𑀼𑀔𑀸𑀯𑀳𑀦𑀢𑁄 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀦𑀬𑁄 𑀦𑀸𑀫 𑀅𑀕𑀸𑀭𑀺𑀓𑀯𑀺𑀦𑀬𑁄 𑀘 𑀅𑀦𑀕𑀸𑀭𑀺𑀓𑀯𑀺𑀦𑀬𑁄 𑀘. 𑀢𑀢𑁆𑀣 𑀅𑀕𑀸𑀭𑀺𑀓𑀯𑀺𑀦𑀬𑁄 𑀦𑀸𑀫 𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀯𑀺𑀭𑀫𑀡𑀁, 𑀲𑁄 𑀢𑀢𑁆𑀣 𑀅𑀲𑀁𑀓𑀺𑀮𑁂𑀲𑀸𑀧𑀚𑁆𑀚𑀦𑁂𑀦 𑀆𑀘𑀸𑀭𑀕𑀼𑀡𑀯𑀯𑀢𑁆𑀣𑀸𑀦𑁂𑀦 𑀘 𑀲𑀼𑀲𑀺𑀓𑁆𑀔𑀺𑀢𑁄 𑀉𑀪𑀬𑀮𑁄𑀓𑀳𑀺𑀢𑀲𑀼𑀔𑀸𑀯𑀳𑀦𑀢𑁄 𑀫𑀗𑁆𑀕𑀮𑀁. 𑀅𑀦𑀕𑀸𑀭𑀺𑀓𑀯𑀺𑀦𑀬𑁄 𑀦𑀸𑀫 𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀅𑀦𑀸𑀧𑀚𑁆𑀚𑀦𑀁, 𑀲𑁄𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀼𑀲𑀺𑀓𑁆𑀔𑀺𑀢𑁄. 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀯𑀸 𑀅𑀦𑀕𑀸𑀭𑀺𑀓𑀯𑀺𑀦𑀬𑁄. 𑀲𑁄 𑀬𑀣𑀸 𑀢𑀢𑁆𑀣 𑀧𑀢𑀺𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀲𑀺𑀓𑁆𑀔𑀦𑁂𑀦 𑀲𑀼𑀲𑀺𑀓𑁆𑀔𑀺𑀢𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀥𑀺𑀕𑀫𑀳𑁂𑀢𑀼𑀢𑁄 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀪𑀸𑀲𑀺𑀢𑀸 𑀯𑀸𑀘𑀸 𑀦𑀸𑀫 𑀫𑀼𑀲𑀸𑀯𑀸𑀤𑀸𑀤𑀺𑀤𑁄𑀲𑀯𑀺𑀭𑀳𑀺𑀢𑀸 𑀯𑀸𑀘𑀸. 𑀬𑀣𑀸𑀳 𑁋 ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀲𑀼𑀪𑀸𑀲𑀺𑀢𑀸 𑀳𑁄𑀢𑀻’’𑀢𑀺. 𑀅𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑀸𑀘𑀸 𑀏𑀯 𑀯𑀸 𑀲𑀼𑀪𑀸𑀲𑀺𑀢𑀸. 𑀬𑀣𑀸𑀳 𑁋

‘‘𑀲𑀼𑀪𑀸𑀲𑀺𑀢𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄,

𑀥𑀫𑁆𑀫𑀁 𑀪𑀡𑁂 𑀦𑀸𑀥𑀫𑁆𑀫𑀁 𑀢𑀁 𑀤𑀼𑀢𑀺𑀬𑀁;

𑀧𑀺𑀬𑀁 𑀪𑀡𑁂 𑀦𑀸𑀧𑁆𑀧𑀺𑀬𑀁 𑀢𑀁 𑀢𑀢𑀺𑀬𑀁,

𑀲𑀘𑁆𑀘𑀁 𑀪𑀡𑁂 𑀦𑀸𑀮𑀺𑀓𑀁 𑀢𑀁 𑀘𑀢𑀼𑀢𑁆𑀣’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁧𑁩; 𑀲𑀼. 𑀦𑀺. 𑁪𑁫𑁨);

𑀅𑀬𑀫𑁆𑀧𑀺 𑀉𑀪𑀬𑀮𑁄𑀓𑀳𑀺𑀢𑀲𑀼𑀔𑀸𑀯𑀳𑀦𑀢𑁄 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀘 𑀅𑀬𑀁 𑀯𑀺𑀦𑀬𑀧𑀭𑀺𑀬𑀸𑀧𑀦𑁆𑀦𑀸 𑀏𑀯, 𑀢𑀲𑁆𑀫𑀸 𑀯𑀺𑀦𑀬𑀕𑁆𑀕𑀳𑀡𑁂𑀦 𑀏𑀢𑀁 𑀅𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀦𑀬𑁄 𑀲𑀗𑁆𑀕𑀳𑁂𑀢𑀩𑁆𑀩𑁄. 𑀅𑀣𑀯𑀸 𑀓𑀺𑀁 𑀇𑀫𑀺𑀦𑀸 𑀧𑀭𑀺𑀲𑁆𑀲𑀫𑁂𑀦 𑀧𑀭𑁂𑀲𑀁 𑀥𑀫𑁆𑀫𑀤𑁂𑀲𑀦𑀸𑀯𑀸𑀘𑀸 𑀇𑀥 ‘‘𑀲𑀼𑀪𑀸𑀲𑀺𑀢𑀸 𑀯𑀸𑀘𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀳𑀺 𑀬𑀣𑀸 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄, 𑀏𑀯𑀁 𑀲𑀢𑁆𑀢𑀸𑀦𑀁 𑀉𑀪𑀬𑀮𑁄𑀓𑀳𑀺𑀢𑀲𑀼𑀔𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀧𑀘𑁆𑀘𑀬𑀢𑁄 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀳 𑀘 𑁋

‘‘𑀬𑀁 𑀩𑀼𑀤𑁆𑀥𑁄 𑀪𑀸𑀲𑀢𑀺 𑀯𑀸𑀘𑀁, 𑀔𑁂𑀫𑀁 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬, 𑀲𑀸 𑀯𑁂 𑀯𑀸𑀘𑀸𑀦𑀫𑀼𑀢𑁆𑀢𑀫𑀸’’𑀢𑀺. (𑀲𑀁. 𑀦𑀺. 𑁧.𑁨𑁧𑁩; 𑀲𑀼. 𑀦𑀺. 𑁪𑁫𑁬);

𑀏𑀯𑀁 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀩𑀸𑀳𑀼𑀲𑀘𑁆𑀘𑀁, 𑀲𑀺𑀧𑁆𑀧𑀁, 𑀯𑀺𑀦𑀬𑁄 𑀲𑀼𑀲𑀺𑀓𑁆𑀔𑀺𑀢𑁄, 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸𑀢𑀺 𑀘𑀢𑁆𑀢𑀸𑀭𑀺 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀫𑀗𑁆𑀕𑀮𑀢𑁆𑀢𑀜𑁆𑀘 𑀦𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀺𑀢𑀫𑁂𑀯𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀩𑀸𑀳𑀼𑀲𑀘𑁆𑀘𑀜𑁆𑀘𑀸𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

𑁨𑁬𑁫. 𑀇𑀤𑀸𑀦𑀺 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 𑀫𑀸𑀢𑀼 𑀘 𑀧𑀺𑀢𑀼 𑀘𑀸𑀢𑀺 𑀫𑀸𑀢𑀸𑀧𑀺𑀢𑀼. 𑀉𑀧𑀝𑁆𑀞𑀸𑀦𑀦𑁆𑀢𑀺 𑀉𑀧𑀝𑁆𑀞𑀳𑀦𑀁. 𑀧𑀼𑀢𑁆𑀢𑀸𑀦𑀜𑁆𑀘 𑀤𑀸𑀭𑀸𑀦𑀜𑁆𑀘𑀸𑀢𑀺 𑀧𑀼𑀢𑁆𑀢𑀤𑀸𑀭𑀲𑁆𑀲. 𑀲𑀗𑁆𑀕𑀡𑁆𑀳𑀦𑀁 𑀲𑀗𑁆𑀕𑀳𑁄. 𑀦 𑀆𑀓𑀼𑀮𑀸 𑀅𑀦𑀸𑀓𑀼𑀮𑀸. 𑀓𑀫𑁆𑀫𑀸𑀦𑀺 𑀏𑀯 𑀓𑀫𑁆𑀫𑀦𑁆𑀢𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀅𑀬𑀁 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀫𑀸𑀢𑀸 𑀦𑀸𑀫 𑀚𑀦𑀺𑀓𑀸 𑀯𑀼𑀘𑁆𑀘𑀢𑀺, 𑀢𑀣𑀸 𑀧𑀺𑀢𑀸. 𑀉𑀧𑀝𑁆𑀞𑀸𑀦𑀁 𑀦𑀸𑀫 𑀧𑀸𑀤𑀥𑁄𑀯𑀦𑀲𑀫𑁆𑀩𑀸𑀳𑀦𑀉𑀘𑁆𑀙𑀸𑀤𑀦𑀦𑁆𑀳𑀸𑀧𑀦𑁂𑀳𑀺 𑀘𑀢𑀼𑀧𑀘𑁆𑀘𑀬𑀲𑀫𑁆𑀧𑀤𑀸𑀦𑁂𑀦 𑀘 𑀉𑀧𑀓𑀸𑀭𑀓𑀭𑀡𑀁. 𑀢𑀢𑁆𑀣 𑀬𑀲𑁆𑀫𑀸 𑀫𑀸𑀢𑀸𑀧𑀺𑀢𑀭𑁄 𑀩𑀳𑀽𑀧𑀓𑀸𑀭𑀸 𑀧𑀼𑀢𑁆𑀢𑀸𑀦𑀁 𑀅𑀢𑁆𑀣𑀓𑀸𑀫𑀸 𑀅𑀦𑀼𑀓𑀫𑁆𑀧𑀓𑀸, 𑀬𑀁 𑀧𑀼𑀢𑁆𑀢𑀓𑁂 𑀩𑀳𑀺 𑀓𑀻𑀴𑀺𑀢𑁆𑀯𑀸 𑀧𑀁𑀲𑀼𑀫𑀓𑁆𑀔𑀺𑀢𑀲𑀭𑀻𑀭𑀓𑁂 𑀆𑀕𑀢𑁂 𑀤𑀺𑀲𑁆𑀯𑀸 𑀧𑀁𑀲𑀼𑀓𑀁 𑀧𑀼𑀜𑁆𑀙𑀺𑀢𑁆𑀯𑀸 𑀫𑀢𑁆𑀣𑀓𑀁 𑀉𑀧𑀲𑀺𑀗𑁆𑀖𑀸𑀬𑀦𑁆𑀢𑀸 𑀧𑀭𑀺𑀘𑀼𑀫𑁆𑀩𑀦𑁆𑀢𑀸 𑀘 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀯𑀲𑁆𑀲𑀲𑀢𑀫𑁆𑀧𑀺 𑀫𑀸𑀢𑀸𑀧𑀺𑀢𑀭𑁄 𑀲𑀻𑀲𑁂𑀦 𑀧𑀭𑀺𑀳𑀭𑀦𑁆𑀢𑀸 𑀧𑀼𑀢𑁆𑀢𑀸 𑀢𑁂𑀲𑀁 𑀧𑀝𑀺𑀓𑀸𑀭𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀸. 𑀬𑀲𑁆𑀫𑀸 𑀘 𑀢𑁂 𑀆𑀧𑀸𑀤𑀓𑀸 𑀧𑁄𑀲𑀓𑀸 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄 𑀩𑁆𑀭𑀳𑁆𑀫𑀲𑀫𑁆𑀫𑀢𑀸 𑀧𑀼𑀩𑁆𑀩𑀸𑀘𑀭𑀺𑀬𑀲𑀫𑁆𑀫𑀢𑀸, 𑀢𑀲𑁆𑀫𑀸 𑀢𑁂𑀲𑀁 𑀉𑀧𑀝𑁆𑀞𑀸𑀦𑀁 𑀇𑀥 𑀧𑀲𑀁𑀲𑀁 𑀧𑁂𑀘𑁆𑀘 𑀲𑀕𑁆𑀕𑀲𑀼𑀔𑀜𑁆𑀘 𑀆𑀯𑀳𑀢𑀺, 𑀢𑁂𑀦 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀩𑁆𑀭𑀳𑁆𑀫𑀸𑀢𑀺 𑀫𑀸𑀢𑀸𑀧𑀺𑀢𑀭𑁄, 𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀯𑀼𑀘𑁆𑀘𑀭𑁂;

𑀆𑀳𑀼𑀦𑁂𑀬𑁆𑀬𑀸 𑀘 𑀧𑀼𑀢𑁆𑀢𑀸𑀦𑀁, 𑀧𑀚𑀸𑀬 𑀅𑀦𑀼𑀓𑀫𑁆𑀧𑀓𑀸.

‘‘𑀢𑀲𑁆𑀫𑀸 𑀳𑀺 𑀦𑁂 𑀦𑀫𑀲𑁆𑀲𑁂𑀬𑁆𑀬, 𑀲𑀓𑁆𑀓𑀭𑁂𑀬𑁆𑀬 𑀘 𑀧𑀡𑁆𑀟𑀺𑀢𑁄;

𑀅𑀦𑁆𑀦𑁂𑀦 𑀅𑀣 𑀧𑀸𑀦𑁂𑀦, 𑀯𑀢𑁆𑀣𑁂𑀦 𑀲𑀬𑀦𑁂𑀦 𑀘.

‘‘𑀉𑀘𑁆𑀙𑀸𑀤𑀦𑁂𑀦 𑀦𑁆𑀳𑀸𑀧𑀦𑁂𑀦, 𑀧𑀸𑀤𑀸𑀦𑀁 𑀥𑁄𑀯𑀦𑁂𑀦 𑀘;

𑀢𑀸𑀬 𑀦𑀁 𑀧𑀸𑀭𑀺𑀘𑀭𑀺𑀬𑀸𑀬, 𑀫𑀸𑀢𑀸𑀧𑀺𑀢𑀽𑀲𑀼 𑀧𑀡𑁆𑀟𑀺𑀢𑀸;

𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺. (𑀅. 𑀦𑀺. 𑁩.𑁩𑁧; 𑀇𑀢𑀺𑀯𑀼. 𑁧𑁦𑁬; 𑀚𑀸. 𑁨.𑁨𑁦.𑁧𑁮𑁧-𑁧𑁮𑁩);

𑀅𑀧𑀭𑁄 𑀦𑀬𑁄 𑁋 𑀉𑀧𑀝𑁆𑀞𑀸𑀦𑀁 𑀦𑀸𑀫 𑀪𑀭𑀡𑀓𑀺𑀘𑁆𑀘𑀓𑀭𑀡𑀓𑀼𑀮𑀯𑀁𑀲𑀝𑁆𑀞𑀧𑀦𑀸𑀤𑀺𑀧𑀜𑁆𑀘𑀯𑀺𑀥𑀁, 𑀢𑀁 𑀧𑀸𑀧𑀦𑀺𑀯𑀸𑀭𑀡𑀸𑀤𑀺𑀧𑀜𑁆𑀘𑀯𑀺𑀥𑀤𑀺𑀝𑁆𑀞𑀥𑀫𑁆𑀫𑀺𑀓𑀳𑀺𑀢𑀳𑁂𑀢𑀼𑀢𑁄 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀧𑀜𑁆𑀘𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀧𑀼𑀢𑁆𑀢𑁂𑀦 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀘𑁆𑀘𑀼𑀧𑀝𑁆𑀞𑀸𑀢𑀩𑁆𑀩𑀸 ‘𑀪𑀢𑁄 𑀦𑁂 𑀪𑀭𑀺𑀲𑁆𑀲𑀸𑀫𑀺, 𑀓𑀺𑀘𑁆𑀘𑀁 𑀦𑁂𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀼𑀮𑀯𑀁𑀲𑀁 𑀞𑀧𑁂𑀲𑁆𑀲𑀸𑀫𑀺, 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀺, 𑀅𑀣 𑀯𑀸 𑀧𑀦 𑀧𑁂𑀢𑀸𑀦𑀁 𑀓𑀸𑀮𑀓𑀢𑀸𑀦𑀁 𑀤𑀓𑁆𑀔𑀺𑀡𑀁 𑀅𑀦𑀼𑀧𑁆𑀧𑀤𑀲𑁆𑀲𑀸𑀫𑀻’𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀧𑀼𑀢𑁆𑀢𑁂𑀦 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑀺, 𑀧𑀸𑀧𑀸 𑀦𑀺𑀯𑀸𑀭𑁂𑀦𑁆𑀢𑀺, 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀦𑁆𑀢𑀺, 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀧𑀢𑀺𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑁂𑀦𑁆𑀢𑀺, 𑀲𑀫𑀬𑁂 𑀤𑀸𑀬𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁩.𑁨𑁬𑁭).

𑀅𑀧𑀺𑀘 𑀬𑁄 𑀫𑀸𑀢𑀸𑀧𑀺𑀢𑀭𑁄 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀧𑀲𑀸𑀤𑀼𑀧𑁆𑀧𑀸𑀤𑀦𑁂𑀦 𑀲𑀻𑀮𑀲𑀫𑀸𑀤𑀸𑀧𑀦𑁂𑀦 𑀧𑀩𑁆𑀩𑀚𑁆𑀚𑀸𑀬 𑀯𑀸 𑀉𑀧𑀝𑁆𑀞𑀳𑀢𑀺, 𑀅𑀬𑀁 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀓𑀸𑀦𑀁 𑀅𑀕𑁆𑀕𑁄, 𑀢𑀲𑁆𑀲 𑀢𑀁 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀁 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀲𑁆𑀲 𑀉𑀧𑀓𑀸𑀭𑀲𑁆𑀲 𑀧𑀘𑁆𑀘𑀼𑀧𑀓𑀸𑀭𑀪𑀽𑀢𑀁 𑀅𑀦𑁂𑀓𑁂𑀲𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀸𑀦𑀜𑁆𑀘 𑀅𑀢𑁆𑀣𑀸𑀦𑀁 𑀧𑀤𑀝𑁆𑀞𑀸𑀦𑀢𑁄 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀧𑀼𑀢𑁆𑀢𑀤𑀸𑀭𑀲𑁆𑀲𑀸𑀢𑀺 𑀏𑀢𑁆𑀣 𑀅𑀢𑁆𑀢𑀦𑀸 𑀚𑀦𑀺𑀢𑀸 𑀧𑀼𑀢𑁆𑀢𑀸𑀧𑀺 𑀥𑀻𑀢𑀭𑁄𑀧𑀺 ‘‘𑀧𑀼𑀢𑁆𑀢𑀸’’ 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀤𑀸𑀭𑀸𑀢𑀺 𑀯𑀻𑀲𑀢𑀺𑀬𑀸 𑀪𑀭𑀺𑀬𑀸𑀦𑀁 𑀬𑀸 𑀓𑀸𑀘𑀺 𑀪𑀭𑀺𑀬𑀸. 𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘 𑀧𑀼𑀢𑁆𑀢𑀤𑀸𑀭𑀁, 𑀢𑀲𑁆𑀲 𑀧𑀼𑀢𑁆𑀢𑀤𑀸𑀭𑀲𑁆𑀲. 𑀲𑀗𑁆𑀕𑀳𑁄𑀢𑀺 𑀲𑀫𑁆𑀫𑀸𑀦𑀦𑀸𑀤𑀻𑀳𑀺 𑀉𑀧𑀓𑀸𑀭𑀓𑀭𑀡𑀁. 𑀢𑀁 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀢𑀸𑀤𑀺𑀤𑀺𑀝𑁆𑀞𑀥𑀫𑁆𑀫𑀺𑀓𑀳𑀺𑀢𑀳𑁂𑀢𑀼𑀢𑁄 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀧𑀘𑁆𑀙𑀺𑀫𑀸 𑀤𑀺𑀲𑀸 𑀧𑀼𑀢𑁆𑀢𑀤𑀸𑀭𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺 (𑀤𑀻. 𑀦𑀺. 𑁩.𑁨𑁬𑁬) 𑀏𑀢𑁆𑀣 𑀉𑀤𑁆𑀤𑀺𑀝𑁆𑀞𑀁 𑀧𑀼𑀢𑁆𑀢𑀤𑀸𑀭𑀁 𑀪𑀭𑀺𑀬𑀸𑀲𑀤𑁆𑀤𑁂𑀦 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑁋

‘‘𑀧𑀜𑁆𑀘𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀲𑀸𑀫𑀺𑀓𑁂𑀦 𑀧𑀘𑁆𑀙𑀺𑀫𑀸 𑀤𑀺𑀲𑀸 𑀪𑀭𑀺𑀬𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀩𑁆𑀩𑀸, 𑀲𑀫𑁆𑀫𑀸𑀦𑀦𑀸𑀬 𑀅𑀦𑀯𑀫𑀸𑀦𑀦𑀸𑀬 𑀅𑀦𑀢𑀺𑀘𑀭𑀺𑀬𑀸𑀬 𑀇𑀲𑁆𑀲𑀭𑀺𑀬𑀯𑁄𑀲𑁆𑀲𑀕𑁆𑀕𑁂𑀦 𑀅𑀮𑀗𑁆𑀓𑀸𑀭𑀸𑀦𑀼𑀧𑁆𑀧𑀤𑀸𑀦𑁂𑀦. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀲𑀸𑀫𑀺𑀓𑁂𑀦 𑀧𑀘𑁆𑀙𑀺𑀫𑀸 𑀤𑀺𑀲𑀸 𑀪𑀭𑀺𑀬𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀲𑀸𑀫𑀺𑀓𑀁 𑀅𑀦𑀼𑀓𑀫𑁆𑀧𑀢𑀺, 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀸 𑀘 𑀳𑁄𑀢𑀺, 𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑀸 𑀘, 𑀅𑀦𑀢𑀺𑀘𑀸𑀭𑀺𑀦𑀻 𑀘, 𑀲𑀫𑁆𑀪𑀢𑀜𑁆𑀘 𑀅𑀦𑀼𑀭𑀓𑁆𑀔𑀢𑀺, 𑀤𑀓𑁆𑀔𑀸 𑀘 𑀳𑁄𑀢𑀺 𑀅𑀦𑀮𑀲𑀸 𑀲𑀩𑁆𑀩𑀓𑀺𑀘𑁆𑀘𑁂𑀲𑀽’’𑀢𑀺 (𑀤𑀻. 𑀦𑀺. 𑁩.𑁨𑁬𑁯).

𑀅𑀬𑀁 𑀯𑀸 𑀅𑀧𑀭𑁄 𑀦𑀬𑁄 𑁋 𑀲𑀗𑁆𑀕𑀳𑁄𑀢𑀺 𑀥𑀫𑁆𑀫𑀺𑀓𑀸𑀳𑀺 𑀤𑀸𑀦𑀧𑀺𑀬𑀯𑀸𑀘𑀅𑀢𑁆𑀣𑀘𑀭𑀺𑀬𑀸𑀳𑀺 𑀲𑀗𑁆𑀕𑀡𑁆𑀳𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀧𑀭𑀺𑀩𑁆𑀩𑀬𑀤𑀸𑀦𑀁, 𑀦𑀓𑁆𑀔𑀢𑁆𑀢𑀤𑀺𑀯𑀲𑁂𑀲𑀼 𑀦𑀓𑁆𑀔𑀢𑁆𑀢𑀤𑀲𑁆𑀲𑀸𑀧𑀦𑀁, 𑀫𑀗𑁆𑀕𑀮𑀤𑀺𑀯𑀲𑁂𑀲𑀼 𑀫𑀗𑁆𑀕𑀮𑀓𑀭𑀡𑀁, 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑁂𑀲𑀼 𑀅𑀢𑁆𑀣𑁂𑀲𑀼 𑀑𑀯𑀸𑀤𑀸𑀦𑀼𑀲𑀸𑀲𑀦𑀦𑁆𑀢𑀺. 𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀺𑀝𑁆𑀞𑀥𑀫𑁆𑀫𑀺𑀓𑀳𑀺𑀢𑀳𑁂𑀢𑀼𑀢𑁄 𑀲𑀫𑁆𑀧𑀭𑀸𑀬𑀺𑀓𑀳𑀺𑀢𑀳𑁂𑀢𑀼𑀢𑁄 𑀤𑁂𑀯𑀢𑀸𑀳𑀺𑀧𑀺 𑀦𑀫𑀲𑁆𑀲𑀦𑀻𑀬𑀪𑀸𑀯𑀳𑁂𑀢𑀼𑀢𑁄 𑀘 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑁋

‘‘𑀬𑁂 𑀕𑀳𑀝𑁆𑀞𑀸 𑀧𑀼𑀜𑁆𑀜𑀓𑀭𑀸, 𑀲𑀻𑀮𑀯𑀦𑁆𑀢𑁄 𑀉𑀧𑀸𑀲𑀓𑀸;

𑀥𑀫𑁆𑀫𑁂𑀦 𑀤𑀸𑀭𑀁 𑀧𑁄𑀲𑁂𑀦𑁆𑀢𑀺, 𑀢𑁂 𑀦𑀫𑀲𑁆𑀲𑀸𑀫𑀺 𑀫𑀸𑀢𑀮𑀻’’𑀢𑀺. (𑀲𑀁. 𑀦𑀺. 𑁧.𑁨𑁬𑁪);

𑀅𑀦𑀸𑀓𑀼𑀮𑀸 𑀓𑀫𑁆𑀫𑀦𑁆𑀢𑀸 𑀦𑀸𑀫 𑀓𑀸𑀮𑀜𑁆𑀜𑀼𑀢𑀸𑀬 𑀧𑀢𑀺𑀭𑀽𑀧𑀓𑀸𑀭𑀺𑀢𑀸𑀬 𑀅𑀦𑀮𑀲𑀢𑀸𑀬 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑁆𑀧𑀤𑀸𑀬 𑀅𑀩𑁆𑀬𑀲𑀦𑀻𑀬𑀢𑀸𑀬 𑀘 𑀓𑀸𑀮𑀸𑀢𑀺𑀓𑁆𑀓𑀫𑀦𑀅𑀧𑁆𑀧𑀢𑀺𑀭𑀽𑀧𑀓𑀭𑀡𑀸𑀓𑀭𑀡𑀲𑀺𑀣𑀺𑀮𑀓𑀭𑀡𑀸𑀤𑀺𑀆𑀓𑀼𑀮𑀪𑀸𑀯𑀯𑀺𑀭𑀳𑀺𑀢𑀸 𑀓𑀲𑀺𑀕𑁄𑀭𑀓𑁆𑀔𑀯𑀡𑀺𑀚𑁆𑀚𑀸𑀤𑀬𑁄 𑀓𑀫𑁆𑀫𑀦𑁆𑀢𑀸. 𑀏𑀢𑁂 𑀅𑀢𑁆𑀢𑀦𑁄 𑀯𑀸 𑀧𑀼𑀢𑁆𑀢𑀤𑀸𑀭𑀲𑁆𑀲 𑀯𑀸 𑀤𑀸𑀲𑀓𑀫𑁆𑀫𑀓𑀭𑀸𑀦𑀁 𑀯𑀸 𑀩𑁆𑀬𑀢𑁆𑀢𑀢𑀸𑀬 𑀏𑀯𑀁 𑀧𑀬𑁄𑀚𑀺𑀢𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀥𑀦𑀥𑀜𑁆𑀜𑀯𑀼𑀟𑁆𑀠𑀺𑀧𑀝𑀺𑀮𑀸𑀪𑀳𑁂𑀢𑀼𑀢𑁄 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑀼𑀢𑁆𑀢𑀸. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀧𑀢𑀺𑀭𑀽𑀧𑀓𑀸𑀭𑀻 𑀥𑀼𑀭𑀯𑀸, 𑀉𑀝𑁆𑀞𑀸𑀢𑀸 𑀯𑀺𑀦𑁆𑀤𑀢𑁂 𑀥𑀦’’𑀦𑁆𑀢𑀺. (𑀲𑀼. 𑀦𑀺. 𑁧𑁮𑁯; 𑀲𑀁. 𑀦𑀺. 𑁧.𑁨𑁪𑁬) 𑀘;

‘‘𑀦 𑀤𑀺𑀯𑀸 𑀲𑁄𑀧𑁆𑀧𑀲𑀻𑀮𑁂𑀦, 𑀭𑀢𑁆𑀢𑀺𑀫𑀼𑀝𑁆𑀞𑀸𑀦𑀤𑁂𑀲𑁆𑀲𑀺𑀦𑀸;

𑀦𑀺𑀘𑁆𑀘𑀁 𑀫𑀢𑁆𑀢𑁂𑀦 𑀲𑁄𑀡𑁆𑀟𑁂𑀦, 𑀲𑀓𑁆𑀓𑀸 𑀆𑀯𑀲𑀺𑀢𑀼𑀁 𑀖𑀭𑀁.

‘‘𑀅𑀢𑀺𑀲𑀻𑀢𑀁 𑀅𑀢𑀺𑀉𑀡𑁆𑀳𑀁, 𑀅𑀢𑀺𑀲𑀸𑀬𑀫𑀺𑀤𑀁 𑀅𑀳𑀼;

𑀇𑀢𑀺 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀦𑁆𑀢𑁂, 𑀅𑀢𑁆𑀣𑀸 𑀅𑀘𑁆𑀘𑁂𑀦𑁆𑀢𑀺 𑀫𑀸𑀡𑀯𑁂.

‘‘𑀬𑁄𑀥 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘, 𑀢𑀺𑀡𑀸 𑀪𑀺𑀬𑁆𑀬𑁄 𑀦 𑀫𑀜𑁆𑀜𑀢𑀺;

𑀓𑀭𑀁 𑀧𑀼𑀭𑀺𑀲𑀓𑀺𑀘𑁆𑀘𑀸𑀦𑀺, 𑀲𑁄 𑀲𑀼𑀔𑀸 𑀦 𑀯𑀺𑀳𑀸𑀬𑀢𑀻’’𑀢𑀺. 𑀘 (𑀤𑀻. 𑀦𑀺. 𑁩.𑁨𑁫𑁩);

‘‘𑀪𑁄𑀕𑁂 𑀲𑀁𑀳𑀭𑀫𑀸𑀦𑀲𑁆𑀲, 𑀪𑀫𑀭𑀲𑁆𑀲𑁂𑀯 𑀇𑀭𑀻𑀬𑀢𑁄;

𑀪𑁄𑀕𑀸 𑀲𑀦𑁆𑀦𑀺𑀘𑀬𑀁 𑀬𑀦𑁆𑀢𑀺, 𑀯𑀫𑁆𑀫𑀺𑀓𑁄𑀯𑀽𑀧𑀘𑀻𑀬𑀢𑀻’’𑀢𑀺. (𑀤𑀻. 𑀦𑀺. 𑁩.𑁨𑁬𑁫) 𑁋

𑀘 𑀏𑀯𑀫𑀸𑀤𑀺.

𑀏𑀯𑀁 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀫𑀸𑀢𑀼𑀧𑀝𑁆𑀞𑀸𑀦𑀁, 𑀧𑀺𑀢𑀼𑀧𑀝𑁆𑀞𑀸𑀦𑀁, 𑀧𑀼𑀢𑁆𑀢𑀤𑀸𑀭𑀲𑁆𑀲 𑀲𑀗𑁆𑀕𑀳𑁄, 𑀅𑀦𑀸𑀓𑀼𑀮𑀸 𑀘 𑀓𑀫𑁆𑀫𑀦𑁆𑀢𑀸𑀢𑀺 𑀘𑀢𑁆𑀢𑀸𑀭𑀺 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀧𑀼𑀢𑁆𑀢𑀤𑀸𑀭𑀲𑁆𑀲 𑀲𑀗𑁆𑀕𑀳𑀁 𑀯𑀸 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀧𑀜𑁆𑀘, 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀁 𑀯𑀸 𑀏𑀓𑀫𑁂𑀯 𑀓𑀢𑁆𑀯𑀸 𑀢𑀻𑀡𑀺. 𑀫𑀗𑁆𑀕𑀮𑀢𑁆𑀢𑀜𑁆𑀘 𑀦𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀺𑀢𑀫𑁂𑀯𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀦𑁆𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

𑁨𑁬𑁬. 𑀇𑀤𑀸𑀦𑀺 𑀤𑀸𑀦𑀜𑁆𑀘𑀸𑀢𑀺 𑀏𑀢𑁆𑀣 𑀤𑀻𑀬𑀢𑁂 𑀇𑀫𑀺𑀦𑀸𑀢𑀺 𑀤𑀸𑀦𑀁, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀭𑀲𑁆𑀲 𑀧𑀝𑀺𑀧𑀸𑀤𑀻𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀲𑁆𑀲 𑀘𑀭𑀺𑀬𑀸, 𑀥𑀫𑁆𑀫𑀸 𑀯𑀸 𑀅𑀦𑀧𑁂𑀢𑀸 𑀘𑀭𑀺𑀬𑀸 𑀥𑀫𑁆𑀫𑀘𑀭𑀺𑀬𑀸. 𑀜𑀸𑀬𑀦𑁆𑀢𑁂 ‘‘𑀅𑀫𑁆𑀳𑀸𑀓𑀁 𑀇𑀫𑁂’’𑀢𑀺 𑀜𑀸𑀢𑀓𑀸. 𑀦 𑀅𑀯𑀚𑁆𑀚𑀸𑀦𑀺 𑀅𑀦𑀯𑀚𑁆𑀚𑀸𑀦𑀺, 𑀅𑀦𑀺𑀦𑁆𑀤𑀺𑀢𑀸𑀦𑀺 𑀅𑀕𑀭𑀳𑀺𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀅𑀬𑀁 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀤𑀸𑀦𑀁 𑀦𑀸𑀫 𑀧𑀭𑀁 𑀉𑀤𑁆𑀤𑀺𑀲𑁆𑀲 𑀲𑀼𑀩𑀼𑀤𑁆𑀥𑀺𑀧𑀼𑀩𑁆𑀩𑀺𑀓𑀸 𑀅𑀦𑁆𑀦𑀸𑀤𑀺𑀤𑀲𑀤𑀸𑀦𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑀸 𑀅𑀮𑁄𑀪𑁄. 𑀅𑀮𑁄𑀪𑁂𑀦 𑀳𑀺 𑀢𑀁 𑀯𑀢𑁆𑀣𑀼𑀁 𑀧𑀭𑀲𑁆𑀲 𑀧𑀝𑀺𑀧𑀸𑀤𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀻𑀬𑀢𑁂 𑀇𑀫𑀺𑀦𑀸𑀢𑀺 𑀤𑀸𑀦’’𑀦𑁆𑀢𑀺. 𑀢𑀁 𑀩𑀳𑀼𑀚𑀦𑀧𑀺𑀬𑀫𑀦𑀸𑀧𑀢𑀸𑀤𑀻𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀨𑀮𑀯𑀺𑀲𑁂𑀲𑀸𑀦𑀁 𑀅𑀥𑀺𑀕𑀫𑀳𑁂𑀢𑀼𑀢𑁄 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀤𑀸𑀬𑀓𑁄 𑀲𑀻𑀳 𑀤𑀸𑀦𑀧𑀢𑀺 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄’’𑀢𑀺 𑀏𑀯𑀫𑀸𑀤𑀻𑀦𑀺 𑀘𑁂𑀢𑁆𑀣 𑀲𑀼𑀢𑁆𑀢𑀸𑀦𑀺 (𑀅. 𑀦𑀺. 𑁫.𑁩𑁪) 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀸𑀦𑀺.

𑀅𑀧𑀭𑁄 𑀦𑀬𑁄 𑁋 𑀤𑀸𑀦𑀁 𑀦𑀸𑀫 𑀤𑀼𑀯𑀺𑀥𑀁 𑀆𑀫𑀺𑀲𑀤𑀸𑀦𑀜𑁆𑀘, 𑀥𑀫𑁆𑀫𑀤𑀸𑀦𑀜𑁆𑀘. 𑀢𑀢𑁆𑀣 𑀆𑀫𑀺𑀲𑀤𑀸𑀦𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯. 𑀇𑀥𑀮𑁄𑀓𑀧𑀭𑀮𑁄𑀓𑀤𑀼𑀓𑁆𑀔𑀓𑁆𑀔𑀬𑀲𑀼𑀔𑀸𑀯𑀳𑀲𑁆𑀲 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀭𑁂𑀲𑀁 𑀳𑀺𑀢𑀓𑀸𑀫𑀢𑀸𑀬 𑀤𑁂𑀲𑀦𑀸 𑀥𑀫𑁆𑀫𑀤𑀸𑀦𑀁. 𑀇𑀫𑁂𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀤𑀸𑀦𑀸𑀦𑀁 𑀏𑀢𑀤𑁂𑀯 𑀅𑀕𑁆𑀕𑀁. 𑀬𑀣𑀸𑀳 𑁋

‘‘𑀲𑀩𑁆𑀩𑀤𑀸𑀦𑀁 𑀥𑀫𑁆𑀫𑀤𑀸𑀦𑀁 𑀚𑀺𑀦𑀸𑀢𑀺,

𑀲𑀩𑁆𑀩𑀭𑀲𑀁 𑀥𑀫𑁆𑀫𑀭𑀲𑁄 𑀚𑀺𑀦𑀸𑀢𑀺;

𑀲𑀩𑁆𑀩𑀭𑀢𑀺𑀁 𑀥𑀫𑁆𑀫𑀭𑀢𑀻 𑀚𑀺𑀦𑀸𑀢𑀺,

𑀢𑀡𑁆𑀳𑀓𑁆𑀔𑀬𑁄 𑀲𑀩𑁆𑀩𑀤𑀼𑀓𑁆𑀔𑀁 𑀚𑀺𑀦𑀸𑀢𑀻’’𑀢𑀺. (𑀥. 𑀧. 𑁩𑁫𑁪);

𑀢𑀢𑁆𑀣 𑀆𑀫𑀺𑀲𑀤𑀸𑀦𑀲𑁆𑀲 𑀫𑀗𑁆𑀕𑀮𑀢𑁆𑀢𑀁 𑀯𑀼𑀢𑁆𑀢𑀫𑁂𑀯. 𑀥𑀫𑁆𑀫𑀤𑀸𑀦𑀁 𑀧𑀦 𑀬𑀲𑁆𑀫𑀸 𑀅𑀢𑁆𑀣𑀧𑀝𑀺𑀲𑀁𑀯𑁂𑀤𑀺𑀢𑀸𑀤𑀻𑀦𑀁 𑀕𑀼𑀡𑀸𑀦𑀁 𑀧𑀤𑀝𑁆𑀞𑀸𑀦𑀁, 𑀢𑀲𑁆𑀫𑀸 ‘‘𑀫𑀗𑁆𑀕𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋