𑁫. 𑀧𑀸𑀭𑀸𑀬𑀦𑀯𑀕𑁆𑀕𑁄

𑀯𑀢𑁆𑀣𑀼𑀕𑀸𑀣𑀸𑀯𑀡𑁆𑀡𑀦𑀸

𑁯𑁮𑁩. 𑀓𑁄𑀲𑀮𑀸𑀦𑀁 𑀧𑀼𑀭𑀸 𑀭𑀫𑁆𑀫𑀸𑀢𑀺 𑀧𑀸𑀭𑀸𑀬𑀦𑀯𑀕𑁆𑀕𑀲𑁆𑀲 𑀯𑀢𑁆𑀣𑀼𑀕𑀸𑀣𑀸. 𑀢𑀸𑀲𑀁 𑀉𑀧𑁆𑀧𑀢𑁆𑀢𑀺 𑁋 𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀯𑀸𑀲𑀻 𑀏𑀓𑁄 𑀭𑀼𑀓𑁆𑀔𑀯𑀟𑁆𑀠𑀓𑀻 𑀲𑀓𑁂 𑀆𑀘𑀭𑀺𑀬𑀓𑁂 𑀅𑀤𑀼𑀢𑀺𑀬𑁄, 𑀢𑀲𑁆𑀲 𑀲𑁄𑀴𑀲 𑀲𑀺𑀲𑁆𑀲𑀸, 𑀏𑀓𑀫𑁂𑀓𑀲𑁆𑀲 𑀲𑀳𑀲𑁆𑀲𑀁 𑀅𑀦𑁆𑀢𑁂𑀯𑀸𑀲𑀺𑀓𑀸. 𑀏𑀯𑀁 𑀢𑁂 𑀲𑀢𑁆𑀢𑀭𑀲𑀸𑀥𑀺𑀓𑀲𑁄𑀴𑀲𑀲𑀳𑀲𑁆𑀲𑀸 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀦𑁄 𑀲𑀩𑁆𑀩𑁂𑀧𑀺 𑀩𑀸𑀭𑀸𑀡𑀲𑀺𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀸 𑀧𑀩𑁆𑀩𑀢𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑁂 𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀦𑀸𑀦𑀸𑀧𑀸𑀲𑀸𑀤𑀯𑀺𑀓𑀢𑀺𑀬𑁄 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑁆𑀯𑀸 𑀕𑀗𑁆𑀕𑀸𑀬 𑀩𑀸𑀭𑀸𑀡𑀲𑀺𑀁 𑀆𑀦𑁂𑀢𑁆𑀯𑀸 𑀲𑀘𑁂 𑀭𑀸𑀚𑀸 𑀅𑀢𑁆𑀣𑀺𑀓𑁄 𑀳𑁄𑀢𑀺, 𑀭𑀜𑁆𑀜𑁄, 𑀏𑀓𑀪𑀽𑀫𑀺𑀓𑀁 𑀯𑀸…𑀧𑁂… 𑀲𑀢𑁆𑀢𑀪𑀽𑀫𑀺𑀓𑀁 𑀯𑀸 𑀧𑀸𑀲𑀸𑀤𑀁 𑀬𑁄𑀚𑁂𑀢𑁆𑀯𑀸 𑀤𑁂𑀦𑁆𑀢𑀺. 𑀦𑁄 𑀘𑁂, 𑀅𑀜𑁆𑀜𑁂𑀲𑀫𑁆𑀧𑀺 𑀯𑀺𑀓𑀺𑀡𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀦𑁆𑀢𑀺. 𑀅𑀣 𑀦𑁂𑀲𑀁 𑀏𑀓𑀤𑀺𑀯𑀲𑀁 𑀆𑀘𑀭𑀺𑀬𑁄 ‘‘𑀦 𑀲𑀓𑁆𑀓𑀸 𑀯𑀟𑁆𑀠𑀓𑀺𑀓𑀫𑁆𑀫𑁂𑀦 𑀦𑀺𑀘𑁆𑀘𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀼𑀁, 𑀤𑀼𑀓𑁆𑀓𑀭𑀜𑁆𑀳𑀺 𑀚𑀭𑀸𑀓𑀸𑀮𑁂 𑀏𑀢𑀁 𑀓𑀫𑁆𑀫’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢𑀸, 𑀉𑀤𑀼𑀫𑁆𑀩𑀭𑀸𑀤𑀬𑁄, 𑀅𑀧𑁆𑀧𑀲𑀸𑀭𑀭𑀼𑀓𑁆𑀔𑁂 𑀆𑀦𑁂𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀆𑀦𑀬𑀺𑀁𑀲𑀼. 𑀲𑁄 𑀢𑁂𑀳𑀺 𑀓𑀝𑁆𑀞𑀲𑀓𑀼𑀡𑀁 𑀓𑀢𑁆𑀯𑀸 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀬𑀦𑁆𑀢𑀁 𑀧𑀽𑀭𑁂𑀲𑀺. 𑀓𑀝𑁆𑀞𑀲𑀓𑀼𑀡𑁄 𑀲𑀼𑀧𑀡𑁆𑀡𑀭𑀸𑀚𑀸 𑀯𑀺𑀬 𑀆𑀓𑀸𑀲𑀁 𑀮𑀗𑁆𑀖𑀺𑀢𑁆𑀯𑀸 𑀯𑀦𑀲𑁆𑀲 𑀉𑀧𑀭𑀺 𑀘𑀭𑀺𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀻𑀦𑀁 𑀧𑀼𑀭𑀢𑁄 𑀑𑀭𑀼𑀳𑀺. 𑀅𑀣 𑀆𑀘𑀭𑀺𑀬𑁄 𑀲𑀺𑀲𑁆𑀲𑁂 𑀆𑀳 𑁋 ‘‘𑀢𑀸𑀢𑀸, 𑀈𑀤𑀺𑀲𑀸𑀦𑀺 𑀓𑀝𑁆𑀞𑀯𑀸𑀳𑀦𑀸𑀦𑀺 𑀓𑀢𑁆𑀯𑀸 𑀲𑀓𑁆𑀓𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀕𑀳𑁂𑀢𑀼𑀁, 𑀢𑀼𑀫𑁆𑀳𑁂𑀧𑀺, 𑀢𑀸𑀢𑀸, 𑀏𑀢𑀸𑀦𑀺 𑀓𑀭𑁄𑀣, 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀚𑀻𑀯𑀺𑀲𑁆𑀲𑀸𑀫, 𑀤𑀼𑀓𑁆𑀔𑀁 𑀯𑀟𑁆𑀠𑀓𑀺𑀲𑀺𑀧𑁆𑀧𑁂𑀦 𑀚𑀻𑀯𑀺𑀢𑀼’’𑀦𑁆𑀢𑀺. 𑀢𑁂 𑀢𑀣𑀸 𑀓𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀧𑀝𑀺𑀯𑁂𑀤𑁂𑀲𑀼𑀁. 𑀢𑀢𑁄 𑀦𑁂 𑀆𑀘𑀭𑀺𑀬𑁄 𑀆𑀳 𑁋 ‘‘𑀓𑀢𑀫𑀁, 𑀢𑀸𑀢𑀸, 𑀭𑀚𑁆𑀚𑀁 𑀕𑀡𑁆𑀳𑀸𑀫𑀸’’𑀢𑀺? ‘‘𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀆𑀘𑀭𑀺𑀬𑀸’’𑀢𑀺. ‘‘𑀅𑀮𑀁, 𑀢𑀸𑀢𑀸, 𑀫𑀸 𑀏𑀢𑀁 𑀭𑀼𑀘𑁆𑀘𑀺, 𑀫𑀬𑀜𑁆𑀳𑀺 𑀢𑀁 𑀕𑀳𑁂𑀢𑁆𑀯𑀸𑀧𑀺 ‘𑀯𑀟𑁆𑀠𑀓𑀺𑀭𑀸𑀚𑀸 𑀯𑀟𑁆𑀠𑀓𑀺𑀬𑀼𑀯𑀭𑀸𑀚𑀸’𑀢𑀺 𑀯𑀟𑁆𑀠𑀓𑀺𑀯𑀸𑀤𑀸 𑀦 𑀫𑀼𑀘𑁆𑀘𑀺𑀲𑁆𑀲𑀸𑀫, 𑀫𑀳𑀦𑁆𑀢𑁄 𑀚𑀫𑁆𑀩𑀼𑀤𑀻𑀧𑁄, 𑀅𑀜𑁆𑀜𑀢𑁆𑀣 𑀕𑀘𑁆𑀙𑀸𑀫𑀸’’𑀢𑀺.

𑀢𑀢𑁄 𑀲𑀧𑀼𑀢𑁆𑀢𑀤𑀸𑀭𑀸 𑀓𑀝𑁆𑀞𑀯𑀸𑀳𑀦𑀸𑀦𑀺, 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀚𑁆𑀚𑀸𑀯𑀼𑀥𑀸 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀸𑀪𑀺𑀫𑀼𑀔𑀸 𑀕𑀦𑁆𑀢𑁆𑀯𑀸 𑀳𑀺𑀫𑀯𑀢𑀺 𑀅𑀜𑁆𑀜𑀢𑀭𑀁 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀲𑀦𑁂𑀬𑁂𑀯 𑀧𑀘𑁆𑀘𑀼𑀝𑁆𑀞𑀳𑀁𑀲𑀼. 𑀢𑁂 𑀢𑀢𑁆𑀣 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀲𑁄 ‘‘𑀓𑀝𑁆𑀞𑀯𑀸𑀳𑀦𑁄 𑀭𑀸𑀚𑀸’’𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺. 𑀢𑀫𑁆𑀧𑀺 𑀦𑀕𑀭𑀁 𑀢𑁂𑀦 𑀕𑀳𑀺𑀢𑀢𑁆𑀢𑀸 ‘‘𑀓𑀝𑁆𑀞𑀯𑀸𑀳𑀦𑀦𑀕𑀭’’𑀦𑁆𑀢𑁆𑀯𑁂𑀯 𑀦𑀸𑀫𑀁 𑀮𑀪𑀺, 𑀢𑀣𑀸 𑀲𑀓𑀮𑀭𑀝𑁆𑀞𑀫𑁆𑀧𑀺. 𑀓𑀝𑁆𑀞𑀯𑀸𑀳𑀦𑁄 𑀭𑀸𑀚𑀸 𑀥𑀫𑁆𑀫𑀺𑀓𑁄 𑀅𑀳𑁄𑀲𑀺, 𑀢𑀣𑀸 𑀬𑀼𑀯𑀭𑀸𑀚𑀸 𑀅𑀫𑀘𑁆𑀘𑀝𑁆𑀞𑀸𑀦𑁂𑀲𑀼 𑀘 𑀞𑀧𑀺𑀢𑀸 𑀲𑁄𑀴𑀲 𑀲𑀺𑀲𑁆𑀲𑀸. 𑀢𑀁 𑀭𑀝𑁆𑀞𑀁 𑀭𑀜𑁆𑀜𑀸 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀗𑁆𑀕𑀬𑁆𑀳𑀫𑀸𑀦𑀁 𑀅𑀢𑀺𑀯𑀺𑀬 𑀇𑀤𑁆𑀥𑀁 𑀨𑀻𑀢𑀁 𑀦𑀺𑀭𑀼𑀧𑀤𑁆𑀤𑀯𑀜𑁆𑀘 𑀅𑀳𑁄𑀲𑀺. 𑀦𑀸𑀕𑀭𑀸 𑀚𑀸𑀦𑀧𑀤𑀸 𑀭𑀸𑀚𑀸𑀦𑀜𑁆𑀘 𑀭𑀸𑀚𑀧𑀭𑀺𑀲𑀜𑁆𑀘 𑀅𑀢𑀺𑀯𑀺𑀬 𑀫𑀫𑀸𑀬𑀺𑀁𑀲𑀼 ‘‘𑀪𑀤𑁆𑀤𑀓𑁄 𑀦𑁄 𑀭𑀸𑀚𑀸 𑀮𑀤𑁆𑀥𑁄, 𑀪𑀤𑁆𑀤𑀺𑀓𑀸 𑀭𑀸𑀚𑀧𑀭𑀺𑀲𑀸’’𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀫𑀚𑁆𑀛𑀺𑀫𑀤𑁂𑀲𑀢𑁄 𑀯𑀸𑀡𑀺𑀚𑀸 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀓𑀝𑁆𑀞𑀯𑀸𑀳𑀦𑀦𑀕𑀭𑀁 𑀆𑀕𑀫𑀁𑀲𑀼 𑀧𑀡𑁆𑀡𑀸𑀓𑀸𑀭𑀜𑁆𑀘 𑀕𑀳𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁆𑀲𑀺𑀁𑀲𑀼. 𑀭𑀸𑀚𑀸 ‘‘𑀓𑀼𑀢𑁄 𑀆𑀕𑀢𑀢𑁆𑀣𑀸’’𑀢𑀺 𑀲𑀩𑁆𑀩𑀁 𑀧𑀼𑀘𑁆𑀙𑀺. ‘‘𑀩𑀸𑀭𑀸𑀡𑀲𑀺𑀢𑁄 𑀤𑁂𑀯𑀸’’𑀢𑀺. 𑀲𑁄 𑀢𑀢𑁆𑀣 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑁋 ‘‘𑀢𑀼𑀫𑁆𑀳𑀸𑀓𑀁 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀫𑀫 𑀫𑀺𑀢𑁆𑀢𑀪𑀸𑀯𑀁 𑀓𑀭𑁄𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀲𑁄 𑀢𑁂𑀲𑀁 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀕𑀫𑀦𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀧𑀼𑀦 𑀆𑀤𑀭𑁂𑀦 𑀯𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑁂 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀓𑀝𑁆𑀞𑀯𑀸𑀳𑀦𑀭𑀝𑁆𑀞𑀸 𑀆𑀕𑀢𑀸𑀦𑀁 𑀯𑀸𑀡𑀺𑀚𑀓𑀸𑀦𑀁 𑀅𑀚𑁆𑀚𑀢𑀕𑁆𑀕𑁂 𑀲𑀼𑀗𑁆𑀓𑀁 𑀫𑀼𑀜𑁆𑀘𑀸𑀫𑀻’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 ‘‘𑀅𑀢𑁆𑀣𑀼 𑀫𑁂 𑀓𑀝𑁆𑀞𑀯𑀸𑀳𑀦𑁄 𑀫𑀺𑀢𑁆𑀢𑁄’’𑀢𑀺 𑀤𑁆𑀯𑁂𑀧𑀺 𑀅𑀤𑀺𑀝𑁆𑀞𑀫𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀓𑀝𑁆𑀞𑀯𑀸𑀳𑀦𑁄𑀧𑀺 𑀘 𑀲𑀓𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀅𑀚𑁆𑀚𑀢𑀕𑁆𑀕𑁂 𑀩𑀸𑀭𑀸𑀡𑀲𑀺𑀢𑁄 𑀆𑀕𑀢𑀸𑀦𑀁 𑀯𑀸𑀡𑀺𑀚𑀓𑀸𑀦𑀁 𑀲𑀼𑀗𑁆𑀓𑀁 𑀫𑀼𑀜𑁆𑀘𑀸𑀫𑀺, 𑀧𑀭𑀺𑀩𑁆𑀩𑀬𑁄 𑀘 𑀦𑁂𑀲𑀁 𑀤𑀸𑀢𑀩𑁆𑀩𑁄’’𑀢𑀺. 𑀢𑀢𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀓𑀝𑁆𑀞𑀯𑀸𑀳𑀦𑀲𑁆𑀲 𑀮𑁂𑀔𑀁 𑀧𑁂𑀲𑁂𑀲𑀺 ‘‘𑀲𑀘𑁂 𑀢𑀲𑁆𑀫𑀺𑀁 𑀚𑀦𑀧𑀤𑁂 𑀤𑀝𑁆𑀞𑀼𑀁 𑀯𑀸 𑀲𑁄𑀢𑀼𑀁 𑀯𑀸 𑀅𑀭𑀳𑀭𑀽𑀧𑀁 𑀓𑀺𑀜𑁆𑀘𑀺 𑀅𑀘𑁆𑀙𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀫𑁆𑀳𑁂𑀧𑀺 𑀤𑀓𑁆𑀔𑀸𑀧𑁂𑀢𑀼 𑀘 𑀲𑀸𑀯𑁂𑀢𑀼 𑀘𑀸’’𑀢𑀺. 𑀲𑁄𑀧𑀺𑀲𑁆𑀲 𑀢𑀣𑁂𑀯 𑀧𑀝𑀺𑀮𑁂𑀔𑀁 𑀧𑁂𑀲𑁂𑀲𑀺. 𑀏𑀯𑀁 𑀢𑁂𑀲𑀁 𑀓𑀢𑀺𑀓𑀁 𑀓𑀢𑁆𑀯𑀸 𑀯𑀲𑀦𑁆𑀢𑀸𑀦𑀁 𑀓𑀤𑀸𑀘𑀺 𑀓𑀝𑁆𑀞𑀯𑀸𑀳𑀦𑀲𑁆𑀲 𑀅𑀢𑀺𑀫𑀳𑀕𑁆𑀖𑀸 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀸 𑀓𑀫𑁆𑀩𑀮𑀸 𑀉𑀧𑁆𑀧𑀚𑁆𑀚𑀺𑀁𑀲𑀼 𑀩𑀸𑀮𑀲𑀽𑀭𑀺𑀬𑀭𑀲𑁆𑀫𑀺𑀲𑀤𑀺𑀲𑀸 𑀯𑀡𑁆𑀡𑁂𑀦. 𑀢𑁂 𑀤𑀺𑀲𑁆𑀯𑀸 𑀭𑀸𑀚𑀸 ‘‘𑀫𑀫 𑀲𑀳𑀸𑀬𑀲𑁆𑀲 𑀧𑁂𑀲𑁂𑀫𑀻’’𑀢𑀺 𑀤𑀦𑁆𑀢𑀓𑀸𑀭𑁂𑀳𑀺 𑀅𑀝𑁆𑀞 𑀤𑀦𑁆𑀢𑀓𑀭𑀡𑁆𑀟𑀓𑁂 𑀮𑀺𑀔𑀸𑀧𑁂𑀢𑁆𑀯𑀸 𑀢𑁂𑀲𑀼 𑀓𑀭𑀡𑁆𑀟𑀓𑁂𑀲𑀼 𑀢𑁂 𑀓𑀫𑁆𑀩𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀮𑀸𑀔𑀸𑀘𑀭𑀺𑀬𑁂𑀳𑀺 𑀩𑀳𑀺 𑀮𑀸𑀔𑀸𑀕𑁄𑀴𑀓𑀲𑀤𑀺𑀲𑁂 𑀓𑀸𑀭𑀸𑀧𑁂𑀢𑁆𑀯𑀸 𑀅𑀝𑁆𑀞𑀧𑀺 𑀮𑀸𑀔𑀸𑀕𑁄𑀴𑀓𑁂 𑀲𑀫𑀼𑀕𑁆𑀕𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸 𑀭𑀸𑀚𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑁂𑀢𑁆𑀯𑀸 ‘‘𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀤𑁂𑀣𑀸’’𑀢𑀺 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺. 𑀮𑁂𑀔𑀜𑁆𑀘 𑀅𑀤𑀸𑀲𑀺 ‘‘𑀅𑀬𑀁 𑀧𑀡𑁆𑀡𑀸𑀓𑀸𑀭𑁄 𑀦𑀕𑀭𑀫𑀚𑁆𑀛𑁂 𑀅𑀫𑀘𑁆𑀘𑀧𑀭𑀺𑀯𑀼𑀢𑁂𑀦 𑀧𑁂𑀓𑁆𑀔𑀺𑀢𑀩𑁆𑀩𑁄’’𑀢𑀺.

𑀢𑁂 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀤𑀁𑀲𑀼. 𑀲𑁄 𑀮𑁂𑀔𑀁 𑀯𑀸𑀘𑁂𑀢𑁆𑀯𑀸 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀦𑀕𑀭𑀫𑀚𑁆𑀛𑁂 𑀭𑀸𑀚𑀗𑁆𑀕𑀡𑁂 𑀮𑀜𑁆𑀙𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀺𑀯𑁂𑀞𑀦𑀁 𑀅𑀧𑀦𑁂𑀢𑁆𑀯𑀸 𑀲𑀫𑀼𑀕𑁆𑀕𑀁 𑀯𑀺𑀯𑀭𑀺𑀢𑁆𑀯𑀸 𑀅𑀝𑁆𑀞 𑀮𑀸𑀔𑀸𑀕𑁄𑀴𑀓𑁂 𑀤𑀺𑀲𑁆𑀯𑀸 ‘‘𑀫𑀫 𑀲𑀳𑀸𑀬𑁄 𑀮𑀸𑀔𑀸𑀕𑁄𑀴𑀓𑁂𑀳𑀺 𑀓𑀻𑀴𑀦𑀓𑀩𑀸𑀮𑀓𑀸𑀦𑀁 𑀯𑀺𑀬 𑀫𑀬𑁆𑀳𑀁 𑀮𑀸𑀔𑀸𑀕𑁄𑀴𑀓𑁂 𑀧𑁂𑀲𑁂𑀲𑀻’’𑀢𑀺 𑀫𑀗𑁆𑀓𑀼 𑀳𑀼𑀢𑁆𑀯𑀸 𑀏𑀓𑀁 𑀮𑀸𑀔𑀸𑀕𑁄𑀴𑀓𑀁 𑀅𑀢𑁆𑀢𑀦𑁄 𑀦𑀺𑀲𑀺𑀦𑁆𑀦𑀸𑀲𑀦𑁂 𑀧𑀳𑀭𑀺. 𑀢𑀸𑀯𑀤𑁂𑀯 𑀮𑀸𑀔𑀸 𑀧𑀭𑀺𑀧𑀢𑀺, 𑀤𑀦𑁆𑀢𑀓𑀭𑀡𑁆𑀟𑀓𑁄 𑀯𑀺𑀯𑀭𑀁 𑀤𑀢𑁆𑀯𑀸 𑀤𑁆𑀯𑁂𑀪𑀸𑀕𑁄 𑀅𑀳𑁄𑀲𑀺. 𑀲𑁄 𑀅𑀩𑁆𑀪𑀦𑁆𑀢𑀭𑁂 𑀓𑀫𑁆𑀩𑀮𑀁 𑀤𑀺𑀲𑁆𑀯𑀸 𑀇𑀢𑀭𑁂𑀧𑀺 𑀯𑀺𑀯𑀭𑀺 𑀲𑀩𑁆𑀩𑀢𑁆𑀣 𑀢𑀣𑁂𑀯 𑀅𑀳𑁄𑀲𑀺. 𑀏𑀓𑀫𑁂𑀓𑁄 𑀓𑀫𑁆𑀩𑀮𑁄 𑀤𑀻𑀖𑀢𑁄 𑀲𑁄𑀴𑀲𑀳𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀅𑀝𑁆𑀞𑀳𑀢𑁆𑀣𑁄. 𑀧𑀲𑀸𑀭𑀺𑀢𑁂 𑀓𑀫𑁆𑀩𑀮𑁂 𑀭𑀸𑀚𑀗𑁆𑀕𑀡𑀁 𑀲𑀽𑀭𑀺𑀬𑀧𑁆𑀧𑀪𑀸𑀬 𑀑𑀪𑀸𑀲𑀺𑀢𑀫𑀺𑀯 𑀅𑀳𑁄𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀚𑀦𑁄 𑀅𑀗𑁆𑀕𑀼𑀮𑀺𑀬𑁄 𑀯𑀺𑀥𑀼𑀦𑀺, 𑀘𑁂𑀮𑀼𑀓𑁆𑀔𑁂𑀧𑀜𑁆𑀘 𑀅𑀓𑀸𑀲𑀺, ‘‘𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀅𑀤𑀺𑀝𑁆𑀞𑀲𑀳𑀸𑀬𑁄 𑀓𑀝𑁆𑀞𑀯𑀸𑀳𑀦𑀭𑀸𑀚𑀸 𑀏𑀯𑀭𑀽𑀧𑀁 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀲𑀺, 𑀬𑀼𑀢𑁆𑀢𑀁 𑀏𑀯𑀭𑀽𑀧𑀁 𑀫𑀺𑀢𑁆𑀢𑀁 𑀓𑀸𑀢𑀼’’𑀦𑁆𑀢𑀺 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀭𑀸𑀚𑀸 𑀯𑁄𑀳𑀸𑀭𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀓𑀫𑁂𑀓𑀁 𑀓𑀫𑁆𑀩𑀮𑀁 𑀅𑀕𑁆𑀖𑀸𑀧𑁂𑀲𑀺, 𑀲𑀩𑁆𑀩𑁂𑀧𑀺 𑀅𑀦𑀕𑁆𑀖𑀸 𑀅𑀳𑁂𑀲𑀼𑀁. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀘𑁆𑀙𑀸 𑀧𑁂𑀲𑁂𑀦𑁆𑀢𑁂𑀦 𑀧𑀞𑀫𑀁 𑀧𑁂𑀲𑀺𑀢𑀧𑀡𑁆𑀡𑀸𑀓𑀸𑀭𑀢𑁄 𑀅𑀢𑀺𑀭𑁂𑀓𑀁 𑀧𑁂𑀲𑁂𑀢𑀼𑀁 𑀯𑀝𑁆𑀝𑀢𑀺, 𑀲𑀳𑀸𑀬𑁂𑀦 𑀘 𑀫𑁂 𑀅𑀦𑀕𑁆𑀖𑁄 𑀧𑀡𑁆𑀡𑀸𑀓𑀸𑀭𑁄 𑀧𑁂𑀲𑀺𑀢𑁄, 𑀓𑀺𑀁 𑀦𑀼, 𑀔𑁄, 𑀅𑀳𑀁 𑀲𑀳𑀸𑀬𑀲𑁆𑀲 𑀧𑁂𑀲𑁂𑀬𑁆𑀬’’𑀦𑁆𑀢𑀺? 𑀢𑁂𑀦 𑀘 𑀲𑀫𑀬𑁂𑀦 𑀓𑀲𑁆𑀲𑀧𑁄 𑀪𑀕𑀯𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺. 𑀅𑀣 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋 ‘‘𑀯𑀢𑁆𑀣𑀼𑀢𑁆𑀢𑀬𑀭𑀢𑀦𑀢𑁄 𑀅𑀜𑁆𑀜𑀁 𑀉𑀢𑁆𑀢𑀫𑀭𑀢𑀦𑀁 𑀦𑀢𑁆𑀣𑀺, 𑀳𑀦𑁆𑀤𑀸𑀳𑀁 𑀯𑀢𑁆𑀣𑀼𑀢𑁆𑀢𑀬𑀭𑀢𑀦𑀲𑁆𑀲 𑀉𑀧𑁆𑀧𑀦𑁆𑀦𑀪𑀸𑀯𑀁 𑀲𑀳𑀸𑀬𑀲𑁆𑀲 𑀧𑁂𑀲𑁂𑀫𑀻’’𑀢𑀺. 𑀲𑁄 𑁋

‘‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀳𑀺𑀢𑀸𑀬 𑀲𑀩𑁆𑀩𑀧𑀸𑀡𑀺𑀦𑀁;

𑀥𑀫𑁆𑀫𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀲𑀼𑀔𑀸𑀬 𑀲𑀩𑁆𑀩𑀧𑀸𑀡𑀺𑀦𑀁;

𑀲𑀗𑁆𑀖𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭’’𑀦𑁆𑀢𑀺. 𑁋

𑀇𑀫𑀁 𑀕𑀸𑀣𑀁, 𑀬𑀸𑀯 𑀅𑀭𑀳𑀢𑁆𑀢𑀁, 𑀢𑀸𑀯 𑀏𑀓𑀪𑀺𑀓𑁆𑀔𑀼𑀲𑁆𑀲 𑀧𑀝𑀺𑀧𑀢𑁆𑀢𑀺𑀜𑁆𑀘 𑀲𑀼𑀯𑀡𑁆𑀡𑀧𑀝𑁆𑀝𑁂 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 𑀮𑀺𑀔𑀸𑀧𑁂𑀢𑁆𑀯𑀸 𑀲𑀢𑁆𑀢𑀭𑀢𑀦𑀫𑀬𑁂 𑀲𑀫𑀼𑀕𑁆𑀕𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀲𑀫𑀼𑀕𑁆𑀕𑀁 𑀫𑀡𑀺𑀫𑀬𑁂 𑀲𑀫𑀼𑀕𑁆𑀕𑁂, 𑀫𑀡𑀺𑀫𑀬𑀁 𑀫𑀲𑀸𑀭𑀕𑀮𑁆𑀮𑀫𑀬𑁂, 𑀫𑀲𑀸𑀭𑀕𑀮𑁆𑀮𑀫𑀬𑀁 𑀮𑁄𑀳𑀺𑀢𑀗𑁆𑀕𑀫𑀬𑁂, 𑀮𑁄𑀳𑀺𑀢𑀗𑁆𑀕𑀫𑀬𑀁, 𑀲𑀼𑀯𑀡𑁆𑀡𑀫𑀬𑁂, 𑀲𑀼𑀯𑀡𑁆𑀡𑀫𑀬𑀁 𑀭𑀚𑀢𑀫𑀬𑁂, 𑀭𑀚𑀢𑀫𑀬𑀁 𑀤𑀦𑁆𑀢𑀫𑀬𑁂, 𑀤𑀦𑁆𑀢𑀫𑀬𑀁 𑀲𑀸𑀭𑀫𑀬𑁂, 𑀲𑀸𑀭𑀫𑀬𑀁 𑀲𑀫𑀼𑀕𑁆𑀕𑀁 𑀧𑁂𑀴𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑁂𑀴𑀁 𑀤𑀼𑀲𑁆𑀲𑁂𑀦 𑀯𑁂𑀞𑁂𑀢𑁆𑀯𑀸 𑀮𑀜𑁆𑀙𑁂𑀢𑁆𑀯𑀸 𑀫𑀢𑁆𑀢𑀯𑀭𑀯𑀸𑀭𑀡𑀁 𑀲𑁄𑀯𑀡𑁆𑀡𑀤𑁆𑀥𑀚𑀁 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭 𑀳𑁂𑀫𑀚𑀸𑀮𑀲𑀜𑁆𑀙𑀦𑁆𑀦𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀲𑀼𑀧𑀭𑀺 𑀧𑀮𑁆𑀮𑀗𑁆𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑁂 𑀧𑁂𑀴𑀁 𑀆𑀭𑁄𑀧𑁂𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑁂𑀦 𑀥𑀸𑀭𑀺𑀬𑀫𑀸𑀦𑁂𑀦 𑀲𑀩𑁆𑀩𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀸𑀬 𑀓𑀭𑀺𑀬𑀫𑀸𑀦𑀸𑀬 𑀲𑀩𑁆𑀩𑀢𑀸𑀴𑀸𑀯𑀘𑀭𑁂𑀳𑀺 𑀣𑀼𑀢𑀺𑀲𑀢𑀸𑀦𑀺 𑀕𑀸𑀬𑀫𑀸𑀦𑁂𑀳𑀺 𑀬𑀸𑀯 𑀅𑀢𑁆𑀢𑀦𑁄 𑀭𑀚𑁆𑀚𑀲𑀻𑀫𑀸, 𑀢𑀸𑀯 𑀫𑀕𑁆𑀕𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀲𑀬𑀫𑁂𑀯 𑀦𑁂𑀲𑀺. 𑀢𑀢𑁆𑀭 𑀘 𑀞𑀢𑁆𑀯𑀸 𑀲𑀸𑀫𑀦𑁆𑀢𑀭𑀸𑀚𑀽𑀦𑀁 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀲𑀺 𑁋 ‘‘𑀏𑀯𑀁 𑀲𑀓𑁆𑀓𑀭𑁄𑀦𑁆𑀢𑁂𑀳𑀺 𑀅𑀬𑀁 𑀧𑀡𑁆𑀡𑀸𑀓𑀸𑀭𑁄 𑀧𑁂𑀲𑁂𑀢𑀩𑁆𑀩𑁄’’𑀢𑀺. 𑀢𑀁 𑀲𑀼𑀢𑁆𑀯𑀸 𑀢𑁂 𑀢𑁂 𑀭𑀸𑀚𑀸𑀦𑁄 𑀧𑀝𑀺𑀫𑀕𑁆𑀕𑀁 𑀆𑀕𑀦𑁆𑀢𑁆𑀯𑀸 𑀬𑀸𑀯 𑀓𑀝𑁆𑀞𑀯𑀸𑀳𑀦𑀲𑁆𑀲 𑀭𑀚𑁆𑀚𑀲𑀻𑀫𑀸, 𑀢𑀸𑀯 𑀦𑀬𑀺𑀁𑀲𑀼.

𑀓𑀝𑁆𑀞𑀯𑀸𑀳𑀦𑁄𑀧𑀺 𑀲𑀼𑀢𑁆𑀯𑀸 𑀧𑀝𑀺𑀫𑀕𑁆𑀕𑀁 𑀆𑀕𑀦𑁆𑀢𑁆𑀯𑀸 𑀢𑀣𑁂𑀯 𑀧𑀽𑀚𑁂𑀦𑁆𑀢𑁄 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀅𑀫𑀘𑁆𑀘𑁂 𑀘 𑀦𑀸𑀕𑀭𑁂 𑀘 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀧𑀮𑀺𑀯𑁂𑀞𑀦𑀤𑀼𑀲𑁆𑀲𑀁 𑀅𑀧𑀦𑁂𑀢𑁆𑀯𑀸 𑀧𑁂𑀴𑀁 𑀯𑀺𑀯𑀭𑀺𑀢𑁆𑀯𑀸 𑀧𑁂𑀴𑀸𑀬 𑀲𑀫𑀼𑀕𑁆𑀕𑀁 𑀧𑀲𑁆𑀲𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀩𑁆𑀩𑀲𑀫𑀼𑀕𑁆𑀕𑁂 𑀯𑀺𑀯𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑁂𑀔𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀳𑀺 𑀅𑀢𑀺𑀤𑀼𑀮𑁆𑀮𑀪𑀁 𑀫𑀫 𑀲𑀳𑀸𑀬𑁄 𑀧𑀡𑁆𑀡𑀸𑀓𑀸𑀭𑀭𑀢𑀦𑀁 𑀧𑁂𑀲𑁂𑀲𑀻’’𑀢𑀺 𑀅𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 ‘‘𑀅𑀲𑀼𑀢𑀧𑀼𑀩𑁆𑀩𑀁 𑀯𑀢 𑀲𑀼𑀡𑀺𑀫𑁆𑀳𑀸 ‘𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’𑀢𑀺, 𑀬𑀁𑀦𑀽𑀦𑀸𑀳𑀁 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀜𑁆𑀘 𑀧𑀲𑁆𑀲𑁂𑀬𑁆𑀬𑀁 𑀥𑀫𑁆𑀫𑀜𑁆𑀘 𑀲𑀼𑀡𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀫𑀘𑁆𑀘𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀭𑀢𑀦𑀸𑀦𑀺 𑀓𑀺𑀭 𑀮𑁄𑀓𑁂 𑀉𑀧𑁆𑀧𑀦𑁆𑀦𑀸𑀦𑀺, 𑀓𑀺𑀁 𑀓𑀸𑀢𑀩𑁆𑀩𑀁 𑀫𑀜𑁆𑀜𑀣𑀸’’𑀢𑀺. 𑀢𑁂 𑀆𑀳𑀁𑀲𑀼 𑁋 ‘‘𑀇𑀥𑁂𑀯 𑀢𑀼𑀫𑁆𑀳𑁂, 𑀫𑀳𑀸𑀭𑀸𑀚, 𑀳𑁄𑀣, 𑀫𑀬𑀁 𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑀺𑀁 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺.

𑀢𑀢𑁄 𑀲𑁄𑀴𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀲𑁄𑀴𑀲 𑀅𑀫𑀘𑁆𑀘𑀸 𑀭𑀸𑀚𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 ‘‘𑀬𑀤𑀺 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀧𑀼𑀦 𑀤𑀲𑁆𑀲𑀦𑀁 𑀦𑀢𑁆𑀣𑀺, 𑀬𑀤𑀺 𑀦 𑀉𑀧𑁆𑀧𑀦𑁆𑀦𑁄, 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀕𑁆𑀕𑀢𑀸. 𑀭𑀜𑁆𑀜𑁄 𑀧𑀦 𑀪𑀸𑀕𑀺𑀦𑁂𑀬𑁆𑀬𑁄 𑀧𑀘𑁆𑀙𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀳𑀫𑁆𑀧𑀺 𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀢𑀸𑀢, 𑀢𑁆𑀯𑀁 𑀢𑀢𑁆𑀣 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀜𑀢𑁆𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀫𑀫 𑀆𑀭𑁄𑀘𑁂𑀳𑀻𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀲𑀩𑁆𑀩𑀢𑁆𑀣 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀢𑁆𑀢𑀸. 𑀅𑀲𑀫𑁆𑀧𑀢𑁆𑀢𑁂𑀲𑁆𑀯𑁂𑀯 𑀘 𑀢𑁂𑀲𑀼 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑁂 ‘‘𑀓𑁄 𑀩𑀼𑀤𑁆𑀥𑁄, 𑀓𑀼𑀳𑀺𑀁 𑀩𑀼𑀤𑁆𑀥𑁄’’𑀢𑀺 𑀲𑀓𑀮𑀯𑀺𑀳𑀸𑀭𑀁 𑀆𑀳𑀺𑀡𑁆𑀟𑀦𑁆𑀢𑀸 𑀲𑀫𑁆𑀫𑀼𑀔𑀲𑀸𑀯𑀓𑁂 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺𑀁𑀲𑀼. 𑀢𑁂 𑀦𑁂𑀲𑀁 ‘‘𑀩𑀼𑀤𑁆𑀥𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺 𑀆𑀘𑀺𑀓𑁆𑀔𑀺𑀁𑀲𑀼. 𑀢𑁂 ‘‘𑀅𑀳𑁄 𑀤𑀽𑀭𑀤𑁆𑀥𑀸𑀦𑀁 𑀆𑀕𑀦𑁆𑀢𑁆𑀯𑀸 𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀦 𑀮𑀪𑀺𑀫𑁆𑀳𑀸’’𑀢𑀺 𑀧𑀭𑀺𑀤𑁂𑀯𑀫𑀸𑀦𑀸 ‘‘𑀓𑀺𑀁, 𑀪𑀦𑁆𑀢𑁂, 𑀓𑁄𑀘𑀺 𑀪𑀕𑀯𑀢𑀸 𑀤𑀺𑀦𑁆𑀦𑀑𑀯𑀸𑀤𑁄 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀆𑀫, 𑀉𑀧𑀸𑀲𑀓𑀸 𑀅𑀢𑁆𑀣𑀺, 𑀲𑀭𑀡𑀢𑁆𑀢𑀬𑁂 𑀧𑀢𑀺𑀝𑁆𑀞𑀸𑀢𑀩𑁆𑀩𑀁, 𑀧𑀜𑁆𑀘𑀲𑀻𑀮𑀸𑀦𑀺 𑀲𑀫𑀸𑀤𑀸𑀢𑀩𑁆𑀩𑀸𑀦𑀺, 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀉𑀧𑁄𑀲𑀣𑁄 𑀉𑀧𑀯𑀲𑀺𑀢𑀩𑁆𑀩𑁄, 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀧𑀩𑁆𑀩𑀚𑀺𑀢𑀩𑁆𑀩𑀦𑁆𑀢𑀺. 𑀢𑁂 𑀲𑀼𑀢𑁆𑀯𑀸 𑀢𑀁 𑀪𑀸𑀕𑀺𑀦𑁂𑀬𑁆𑀬𑀁 𑀅𑀫𑀘𑁆𑀘𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂 𑀧𑀩𑁆𑀩𑀚𑀺𑀁𑀲𑀼. 𑀪𑀸𑀕𑀺𑀦𑁂𑀬𑁆𑀬𑁄 𑀧𑀭𑀺𑀪𑁄𑀕𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀓𑀝𑁆𑀞𑀯𑀸𑀳𑀦𑀭𑀝𑁆𑀞𑀸𑀪𑀺𑀫𑀼𑀔𑁄 𑀧𑀓𑁆𑀓𑀸𑀫𑀺. 𑀧𑀭𑀺𑀪𑁄𑀕𑀥𑀸𑀢𑀼 𑀦𑀸𑀫 𑀩𑁄𑀥𑀺𑀭𑀼𑀓𑁆𑀔𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀺. 𑀅𑀬𑀁 𑀧𑀦 𑀪𑀕𑀯𑀢𑁄 𑀥𑀫𑁆𑀫𑀓𑀭𑀡𑀁 𑀥𑀫𑁆𑀫𑀥𑀭𑀁 𑀯𑀺𑀦𑀬𑀥𑀭𑀫𑁂𑀓𑀁 𑀣𑁂𑀭𑀜𑁆𑀘 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀅𑀦𑀼𑀧𑀼𑀩𑁆𑀩𑁂𑀦 𑀘 𑀦𑀕𑀭𑀁 𑀕𑀦𑁆𑀢𑁆𑀯𑀸 ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀘 𑀧𑀭𑀺𑀦𑀺𑀩𑁆𑀩𑀼𑀢𑁆𑀢𑁄 𑀘𑀸’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀪𑀕𑀯𑀢𑀸 𑀤𑀺𑀦𑁆𑀦𑁄𑀯𑀸𑀤𑀁 𑀆𑀘𑀺𑀓𑁆𑀔𑀺. 𑀭𑀸𑀚𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑀁 𑀭𑁄𑀧𑁂𑀢𑁆𑀯𑀸 𑀲𑀭𑀡𑀢𑁆𑀢𑀬𑁂 𑀧𑀜𑁆𑀘𑀲𑀼 𑀘 𑀦𑀺𑀘𑁆𑀘𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀬 𑀅𑀝𑁆𑀞𑀗𑁆𑀕𑀼𑀧𑁂𑀢𑀁 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑁄 𑀤𑀸𑀦𑀸𑀤𑀻𑀦𑀺 𑀤𑁂𑀦𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀧𑀺 𑀲𑁄𑀴𑀲𑀲𑀳𑀲𑁆𑀲𑀸 𑀧𑀩𑁆𑀩𑀚𑀺𑀢𑁆𑀯𑀸 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀁 𑀓𑀢𑁆𑀯𑀸 𑀢𑀲𑁆𑀲𑁂𑀯 𑀭𑀜𑁆𑀜𑁄 𑀧𑀭𑀺𑀯𑀸𑀭𑀸 𑀲𑀫𑁆𑀧𑀚𑁆𑀚𑀺𑀁𑀲𑀼.

𑀢𑁂 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀮𑁄𑀓𑁂 𑀔𑁂𑀧𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀅𑀦𑀼𑀧𑁆𑀧𑀦𑁆𑀦𑁂𑀬𑁂𑀯 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀆𑀘𑀭𑀺𑀬𑁄 𑀧𑀲𑁂𑀦𑀤𑀺𑀭𑀜𑁆𑀜𑁄 𑀧𑀺𑀢𑀼 𑀧𑀼𑀭𑁄𑀳𑀺𑀢𑀲𑁆𑀲 𑀧𑀼𑀢𑁆𑀢𑁄 𑀚𑀸𑀢𑁄 𑀦𑀸𑀫𑁂𑀦 ‘‘𑀩𑀸𑀯𑀭𑀻’’𑀢𑀺, 𑀢𑀻𑀳𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽, 𑀧𑀺𑀢𑀼𑀦𑁄 𑀘 𑀅𑀘𑁆𑀘𑀬𑁂𑀦 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀅𑀯𑀲𑁂𑀲𑀸𑀧𑀺 𑀲𑁄𑀴𑀲𑀸𑀥𑀺𑀓𑀲𑁄𑀴𑀲𑀲𑀳𑀲𑁆𑀲𑀸 𑀢𑀢𑁆𑀣𑁂𑀯 𑀲𑀸𑀯𑀢𑁆𑀣𑀺𑀬𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀸. 𑀢𑁂𑀲𑀼 𑀲𑁄𑀴𑀲 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀦𑁄 𑀩𑀸𑀯𑀭𑀺𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀲𑀼𑀁, 𑀇𑀢𑀭𑁂 𑀲𑁄𑀴𑀲𑀲𑀳𑀲𑁆𑀲𑀸 𑀢𑁂𑀲𑀁𑀬𑁂𑀯 𑀲𑀦𑁆𑀢𑀺𑀓𑁂𑀢𑀺 𑀏𑀯𑀁 𑀢𑁂 𑀧𑀼𑀦𑀧𑀺 𑀲𑀩𑁆𑀩𑁂 𑀲𑀫𑀸𑀕𑀘𑁆𑀙𑀺𑀁𑀲𑀼. 𑀫𑀳𑀸𑀓𑁄𑀲𑀮𑀭𑀸𑀚𑀸𑀧𑀺 𑀓𑀸𑀮𑀫𑀓𑀸𑀲𑀺, 𑀢𑀢𑁄 𑀧𑀲𑁂𑀦𑀤𑀺𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀩𑀸𑀯𑀭𑀻 𑀢𑀲𑁆𑀲𑀸𑀧𑀺 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺. 𑀭𑀸𑀚𑀸 𑀧𑀺𑀢𑀭𑀸 𑀤𑀺𑀦𑁆𑀦𑀜𑁆𑀘 𑀅𑀜𑁆𑀜𑀜𑁆𑀘 𑀪𑁄𑀕𑀁 𑀩𑀸𑀯𑀭𑀺𑀲𑁆𑀲 𑀅𑀤𑀸𑀲𑀺. 𑀲𑁄 𑀳𑀺 𑀤𑀳𑀭𑀓𑀸𑀮𑁂 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀲𑀺. 𑀢𑀢𑁄 𑀩𑀸𑀯𑀭𑀻 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀆𑀘𑀭𑀺𑀬, 𑀢𑀼𑀫𑁆𑀳𑁂𑀲𑀼 𑀞𑀺𑀢𑁂𑀲𑀼 𑀫𑀫 𑀧𑀺𑀢𑀸 𑀞𑀺𑀢𑁄 𑀯𑀺𑀬 𑀳𑁄𑀢𑀺, 𑀫𑀸 𑀧𑀩𑁆𑀩𑀚𑀺𑀢𑁆𑀣𑀸’’𑀢𑀺. ‘‘𑀅𑀮𑀁, 𑀫𑀳𑀸𑀭𑀸𑀚, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀭𑀸𑀚𑀸 𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀲𑀸𑀬𑀁 𑀧𑀸𑀢𑀁 𑀫𑀫 𑀤𑀲𑁆𑀲𑀦𑀝𑁆𑀞𑀸𑀦𑁂 𑀭𑀸𑀚𑀼𑀬𑁆𑀬𑀸𑀦𑁂 𑀧𑀩𑁆𑀩𑀚𑀣𑀸’’𑀢𑀺 𑀬𑀸𑀘𑀺. 𑀆𑀘𑀭𑀺𑀬𑁄 𑀲𑁄𑀴𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁂𑀳𑀺 𑀲𑁄𑀴𑀲𑀳𑀺 𑀲𑀺𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺, 𑀭𑀸𑀚𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀢𑀺. 𑀲𑀸𑀬𑀁 𑀧𑀸𑀢𑀜𑁆𑀘𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀅𑀦𑁆𑀢𑁂𑀯𑀸𑀲𑀺𑀦𑁄 𑀆𑀘𑀭𑀺𑀬𑀁 𑀆𑀳𑀁𑀲𑀼 𑁋 ‘‘𑀦𑀕𑀭𑀲𑀫𑀻𑀧𑁂 𑀯𑀸𑀲𑁄 𑀦𑀸𑀫 𑀫𑀳𑀸𑀧𑀮𑀺𑀩𑁄𑀥𑁄, 𑀯𑀺𑀚𑀦𑀲𑀫𑁆𑀧𑀸𑀢𑀁 𑀆𑀘𑀭𑀺𑀬 𑀑𑀓𑀸𑀲𑀁 𑀕𑀘𑁆𑀙𑀸𑀫, 𑀧𑀦𑁆𑀢𑀲𑁂𑀦𑀸𑀲𑀦𑀯𑀸𑀲𑁄 𑀦𑀸𑀫 𑀩𑀳𑀽𑀧𑀓𑀸𑀭𑁄 𑀧𑀩𑁆𑀩𑀚𑀺𑀢𑀸𑀦’’𑀦𑁆𑀢𑀺. 𑀆𑀘𑀭𑀺𑀬𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸𑀭𑁂𑀢𑁆𑀯𑀸 𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀤𑁆𑀯𑁂𑀲𑀢𑀲𑀳𑀲𑁆𑀲𑀸𑀦𑀺 𑀓𑀳𑀸𑀧𑀡𑀸𑀦𑀺 𑀤𑀢𑁆𑀯𑀸 𑀤𑁆𑀯𑁂 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺 ‘‘𑀬𑀢𑁆𑀣 𑀇𑀲𑀺𑀕𑀡𑁄 𑀯𑀸𑀲𑀁 𑀇𑀘𑁆𑀙𑀢𑀺, 𑀢𑀢𑁆𑀣 𑀅𑀲𑁆𑀲𑀫𑀁 𑀓𑀢𑁆𑀯𑀸 𑀤𑁂𑀣𑀸’’𑀢𑀺. 𑀢𑀢𑁄 𑀆𑀘𑀭𑀺𑀬𑁄 𑀲𑁄𑀴𑀲𑀸𑀥𑀺𑀓𑀲𑁄𑀴𑀲𑀲𑀳𑀲𑁆𑀲𑀚𑀝𑀺𑀮𑀧𑀭𑀺𑀯𑀼𑀢𑁄 𑀅𑀫𑀘𑁆𑀘𑁂𑀳𑀺 𑀅𑀦𑀼𑀕𑁆𑀕𑀳𑀫𑀸𑀦𑁄 𑀉𑀢𑁆𑀢𑀭𑀚𑀦𑀧𑀤𑀸 𑀤𑀓𑁆𑀔𑀺𑀡𑀚𑀦𑀧𑀤𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀢𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀗𑁆𑀕𑀻𑀢𑀺𑀓𑀸𑀮𑁂 𑀧𑀸𑀭𑀸𑀬𑀦𑀯𑀕𑁆𑀕𑀲𑁆𑀲 𑀦𑀺𑀤𑀸𑀦𑀁 𑀆𑀭𑁄𑀧𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺.

𑀢𑀢𑁆𑀣 𑀓𑁄𑀲𑀮𑀸𑀦𑀁 𑀧𑀼𑀭𑀸𑀢𑀺 𑀓𑁄𑀲𑀮𑀭𑀝𑁆𑀞𑀲𑁆𑀲 𑀦𑀕𑀭𑀸, 𑀲𑀸𑀯𑀢𑁆𑀣𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀓𑀺𑀜𑁆𑀘𑀜𑁆𑀜𑀦𑁆𑀢𑀺 𑀅𑀓𑀺𑀜𑁆𑀘𑀦𑀪𑀸𑀯𑀁, 𑀧𑀭𑀺𑀕𑁆𑀕𑀳𑀽𑀧𑀓𑀭𑀡𑀯𑀺𑀯𑁂𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁯𑁮𑁪. 𑀲𑁄 𑀅𑀲𑁆𑀲𑀓𑀲𑁆𑀲 𑀯𑀺𑀲𑀬𑁂, 𑀅𑀴𑀓𑀲𑁆𑀲 𑀲𑀫𑀸𑀲𑀦𑁂𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀅𑀲𑁆𑀲𑀓𑀲𑁆𑀲 𑀘 𑀅𑀴𑀓𑀲𑁆𑀲 𑀘𑀸𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀭𑀸𑀚𑀽𑀦𑀁 𑀲𑀫𑀸𑀲𑀦𑁆𑀦𑁂 𑀯𑀺𑀲𑀬𑁂 𑀆𑀲𑀦𑁆𑀦𑁂 𑀭𑀝𑁆𑀞𑁂, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀭𑀝𑁆𑀞𑀸𑀦𑀁 𑀫𑀚𑁆𑀛𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑁄𑀥𑀸𑀯𑀭𑀻 𑀓𑀽𑀮𑁂𑀢𑀺 𑀕𑁄𑀥𑀸𑀯𑀭𑀺𑀬𑀸 𑀦𑀤𑀺𑀬𑀸 𑀓𑀽𑀮𑁂. 𑀬𑀢𑁆𑀣 𑀕𑁄𑀥𑀸𑀯𑀭𑀻 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺𑀢𑁆𑀯𑀸 𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑀁 𑀅𑀦𑁆𑀢𑀭𑀤𑀻𑀧𑀫𑀓𑀸𑀲𑀺 𑀲𑀩𑁆𑀩𑀁 𑀓𑀧𑀺𑀝𑁆𑀞𑀯𑀦𑀲𑀜𑁆𑀙𑀦𑁆𑀦𑀁, 𑀬𑀢𑁆𑀣 𑀧𑀼𑀩𑁆𑀩𑁂𑀲𑀭𑀪𑀗𑁆𑀕𑀸𑀤𑀬𑁄 𑀯𑀲𑀺𑀁𑀲𑀼, 𑀢𑀲𑁆𑀫𑀺𑀁 𑀤𑁂𑀲𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄 𑀓𑀺𑀭 𑀢𑀁 𑀧𑀤𑁂𑀲𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀧𑀼𑀩𑁆𑀩𑀲𑀫𑀡𑀸𑀮𑀬𑁄 𑀧𑀩𑁆𑀩𑀚𑀺𑀢𑀲𑀸𑀭𑀼𑀧𑁆𑀧’’𑀦𑁆𑀢𑀺 𑀅𑀫𑀘𑁆𑀘𑀸𑀦𑀁 𑀦𑀺𑀯𑁂𑀤𑁂𑀲𑀺. 𑀅𑀫𑀘𑁆𑀘𑀸 𑀪𑀽𑀫𑀺𑀕𑁆𑀕𑀳𑀡𑀢𑁆𑀣𑀁 𑀅𑀲𑁆𑀲𑀓𑀭𑀜𑁆𑀜𑁄 𑀲𑀢𑀲𑀳𑀲𑁆𑀲𑀁, 𑀅𑀴𑀓𑀭𑀜𑁆𑀜𑁄 𑀲𑀢𑀲𑀳𑀲𑁆𑀲𑀁 𑀅𑀤𑀁𑀲𑀼. 𑀢𑁂 𑀢𑀜𑁆𑀘 𑀧𑀤𑁂𑀲𑀁 𑀅𑀜𑁆𑀜𑀜𑁆𑀘 𑀤𑁆𑀯𑀺𑀬𑁄𑀚𑀦𑀫𑀢𑁆𑀢𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀧𑀜𑁆𑀘𑀬𑁄𑀚𑀦𑀫𑀢𑁆𑀢𑀁 𑀧𑀤𑁂𑀲𑀁 𑀅𑀤𑀁𑀲𑀼. 𑀢𑁂𑀲𑀁 𑀓𑀺𑀭 𑀭𑀚𑁆𑀚𑀲𑀻𑀫𑀦𑁆𑀢𑀭𑁂 𑀲𑁄 𑀧𑀤𑁂𑀲𑁄 𑀳𑁄𑀢𑀺. 𑀅𑀫𑀘𑁆𑀘𑀸 𑀢𑀢𑁆𑀣 𑀅𑀲𑁆𑀲𑀫𑀁 𑀓𑀸𑀭𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀢𑁄 𑀘 𑀅𑀜𑁆𑀜𑀫𑁆𑀧𑀺 𑀥𑀦𑀁 𑀆𑀳𑀭𑀸𑀧𑁂𑀢𑁆𑀯𑀸 𑀕𑁄𑀘𑀭𑀕𑀸𑀫𑀁 𑀦𑀺𑀯𑁂𑀲𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀉𑀜𑁆𑀙𑁂 𑀦 𑀘 𑀨𑀮𑁂𑀦 𑀘𑀸𑀢𑀺 𑀉𑀜𑁆𑀙𑀸𑀘𑀭𑀺𑀬𑀸𑀬 𑀘 𑀯𑀦𑀫𑀽𑀮𑀨𑀮𑁂𑀦 𑀘. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀲𑁆𑀲𑁂𑀯 𑀉𑀧𑀦𑀺𑀲𑁆𑀲𑀸𑀬, 𑀕𑀸𑀫𑁄 𑀘 𑀯𑀺𑀧𑀼𑀮𑁄 𑀅𑀳𑀽’’𑀢𑀺.

𑁯𑁮𑁫. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀕𑁄𑀥𑀸𑀯𑀭𑀻𑀓𑀽𑀮𑀲𑁆𑀲, 𑀢𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀉𑀧𑀬𑁄𑀕𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁, 𑀢𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀚𑀸𑀢𑁂𑀦 𑀆𑀬𑁂𑀦, 𑀫𑀳𑀸𑀬𑀜𑁆𑀜𑀫𑀓𑀧𑁆𑀧𑀬𑀻𑀢𑀺 𑀢𑀲𑁆𑀫𑀺𑀁 𑀕𑀸𑀫𑁂 𑀓𑀲𑀺𑀓𑀫𑁆𑀫𑀸𑀤𑀺𑀦𑀸 𑀲𑀢𑀲𑀳𑀲𑁆𑀲𑀁 𑀆𑀬𑁄 𑀉𑀧𑁆𑀧𑀚𑁆𑀚𑀺, 𑀢𑀁 𑀕𑀳𑁂𑀢𑁆𑀯𑀸 𑀓𑀼𑀝𑀼𑀫𑁆𑀩𑀺𑀓𑀸 𑀭𑀜𑁆𑀜𑁄 𑀅𑀲𑁆𑀲𑀓𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼 ‘‘𑀲𑀸𑀤𑀺𑀬𑀢𑀼 𑀤𑁂𑀯𑁄 𑀆𑀬’’𑀦𑁆𑀢𑀺. 𑀲𑁄 ‘‘𑀦𑀸𑀳𑀁 𑀲𑀸𑀤𑀺𑀬𑀸𑀫𑀺, 𑀆𑀘𑀭𑀺𑀬𑀲𑁆𑀲𑁂𑀯 𑀉𑀧𑀦𑁂𑀣𑀸’’𑀢𑀺 𑀆𑀳. 𑀆𑀘𑀭𑀺𑀬𑁄𑀧𑀺 𑀢𑀁 𑀅𑀢𑁆𑀢𑀦𑁄 𑀅𑀕𑁆𑀕𑀳𑁂𑀢𑁆𑀯𑀸 𑀤𑀸𑀦𑀬𑀜𑁆𑀜𑀁 𑀅𑀓𑀧𑁆𑀧𑀬𑀺. 𑀏𑀯𑀁 𑀲𑁄 𑀲𑀁𑀯𑀘𑁆𑀙𑀭𑁂 𑀲𑀁𑀯𑀘𑁆𑀙𑀭𑁂 𑀤𑀸𑀦𑀫𑀤𑀸𑀲𑀺.

𑁯𑁮𑁬. 𑀫𑀳𑀸𑀬𑀜𑁆𑀜𑀦𑁆𑀢𑀺 𑀕𑀸𑀣𑀸𑀬𑀢𑁆𑀣𑁄 𑁋 𑀲𑁄 𑀏𑀯𑀁 𑀲𑀁𑀯𑀘𑁆𑀙𑀭𑁂 𑀲𑀁𑀯𑀘𑁆𑀙𑀭𑁂 𑀤𑀸𑀦𑀬𑀜𑁆𑀜𑀁 𑀬𑀚𑀦𑁆𑀢𑁄 𑀏𑀓𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀢𑀁 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀢𑀢𑁄 𑀕𑀸𑀫𑀸 𑀦𑀺𑀓𑁆𑀔𑀫𑁆𑀫 𑀧𑀼𑀦 𑀧𑀸𑀯𑀺𑀲𑀺 𑀅𑀲𑁆𑀲𑀫𑀁. 𑀧𑀯𑀺𑀝𑁆𑀞𑁄 𑀘 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀲𑀼𑀝𑁆𑀞𑀼 𑀤𑀺𑀦𑁆𑀦’’𑀦𑁆𑀢𑀺 𑀤𑀸𑀦𑀁 𑀅𑀦𑀼𑀫𑀚𑁆𑀚𑀦𑁆𑀢𑁄 𑀦𑀺𑀲𑀻𑀤𑀺. 𑀏𑀯𑀁 𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀫𑁆𑀳𑀺 𑀢𑀭𑀼𑀡𑀸𑀬 𑀩𑁆𑀭𑀸𑀳𑁆𑀫𑀡𑀺𑀬𑀸 𑀖𑀭𑁂 𑀓𑀫𑁆𑀫𑀁 𑀅𑀓𑀸𑀢𑀼𑀓𑀸𑀫𑀸𑀬 ‘‘𑀏𑀲𑁄, 𑀩𑁆𑀭𑀸𑀳𑁆𑀫𑀡, 𑀩𑀸𑀯𑀭𑀻 𑀕𑁄𑀥𑀸𑀯𑀭𑀻𑀢𑀻𑀭𑁂 𑀅𑀦𑀼𑀲𑀁𑀯𑀘𑁆𑀙𑀭𑀁 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀕𑀘𑁆𑀙 𑀢𑀢𑁄 𑀧𑀜𑁆𑀘𑀲𑀢𑀸𑀦𑀺 𑀬𑀸𑀘𑀺𑀢𑁆𑀯𑀸 𑀤𑀸𑀲𑀺𑀁 𑀫𑁂 𑀆𑀦𑁂𑀳𑀻’’𑀢𑀺 𑀧𑁂𑀲𑀺𑀢𑁄 𑀅𑀜𑁆𑀜𑁄 𑀆𑀕𑀜𑁆𑀙𑀺 𑀩𑁆𑀭𑀸𑀳𑁆𑀫𑀡𑁄𑀢𑀺.

𑁯𑁮𑁭-𑁮. 𑀉𑀕𑁆𑀖𑀝𑁆𑀝𑀧𑀸𑀤𑁄𑀢𑀺 𑀫𑀕𑁆𑀕𑀕𑀫𑀦𑁂𑀦 𑀖𑀝𑁆𑀝𑀧𑀸𑀤𑀢𑀮𑁄, 𑀧𑀡𑁆𑀳𑀺𑀓𑀸𑀬 𑀯𑀸 𑀧𑀡𑁆𑀳𑀺𑀓𑀁, 𑀕𑁄𑀧𑁆𑀨𑀓𑁂𑀦 𑀯𑀸 𑀕𑁄𑀧𑁆𑀨𑀓𑀁, 𑀚𑀡𑁆𑀡𑀼𑀓𑁂𑀦 𑀯𑀸 𑀚𑀡𑁆𑀡𑀼𑀓𑀁 𑀆𑀳𑀘𑁆𑀘 𑀖𑀝𑁆𑀝𑀧𑀸𑀤𑁄. 𑀲𑀼𑀔𑀜𑁆𑀘 𑀓𑀼𑀲𑀮𑀁 𑀧𑀼𑀘𑁆𑀙𑀻𑀢𑀺 𑀲𑀼𑀔𑀜𑁆𑀘 𑀓𑀼𑀲𑀮𑀜𑁆𑀘 𑀧𑀼𑀘𑁆𑀙𑀺 ‘‘𑀓𑀘𑁆𑀘𑀺 𑀢𑁂, 𑀩𑁆𑀭𑀸𑀳𑁆𑀫𑀡, 𑀲𑀼𑀔𑀁, 𑀓𑀘𑁆𑀘𑀺 𑀓𑀼𑀲𑀮’’𑀦𑁆𑀢𑀺.

𑁯𑁮𑁯-𑁯𑁧. 𑀅𑀦𑀼𑀚𑀸𑀦𑀸𑀳𑀻𑀢𑀺 𑀅𑀦𑀼𑀫𑀜𑁆𑀜𑀸𑀳𑀺 𑀲𑀤𑁆𑀤𑀳𑀸𑀳𑀺. 𑀲𑀢𑁆𑀢𑀥𑀸𑀢𑀺 𑀲𑀢𑁆𑀢𑀯𑀺𑀥𑁂𑀦. 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸𑀢𑀺 𑀕𑁄𑀫𑀬𑀯𑀦𑀧𑀼𑀧𑁆𑀨𑀓𑀼𑀲𑀢𑀺𑀡𑀸𑀤𑀻𑀦𑀺 𑀆𑀤𑀸𑀬 𑀲𑀻𑀖𑀁 𑀲𑀻𑀖𑀁 𑀩𑀸𑀯𑀭𑀺𑀲𑁆𑀲 𑀅𑀲𑁆𑀲𑀫𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀕𑁄𑀫𑀬𑁂𑀦 𑀪𑀽𑀫𑀺𑀁 𑀉𑀧𑀮𑀺𑀫𑁆𑀧𑀺𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀢𑀺𑀡𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀯𑀸𑀫𑀧𑀸𑀤𑀁 𑀓𑀫𑀡𑁆𑀟𑀮𑀽𑀤𑀓𑁂𑀦 𑀥𑁄𑀯𑀺𑀢𑁆𑀯𑀸 𑀲𑀢𑁆𑀢𑀧𑀸𑀤𑀫𑀢𑁆𑀢𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀤𑀢𑀮𑁂 𑀧𑀭𑀸𑀫𑀲𑀦𑁆𑀢𑁄 𑀏𑀯𑀭𑀽𑀧𑀁 𑀓𑀼𑀳𑀦𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑁂𑀭𑀯𑀁 𑀲𑁄 𑀅𑀓𑀺𑀢𑁆𑀢𑀬𑀻𑀢𑀺 𑀪𑀬𑀚𑀦𑀓𑀁 𑀯𑀘𑀦𑀁 𑀅𑀓𑀺𑀢𑁆𑀢𑀬𑀺, ‘‘𑀲𑀘𑁂 𑀫𑁂 𑀬𑀸𑀘𑀫𑀸𑀦𑀲𑁆𑀲𑀸’’𑀢𑀺 𑀇𑀫𑀁 𑀕𑀸𑀣𑀫𑀪𑀸𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀓𑁆𑀔𑀺𑀢𑁄𑀢𑀺 𑀤𑁄𑀫𑀦𑀲𑁆𑀲𑀚𑀸𑀢𑁄.

𑁯𑁯𑁨-𑁪. 𑀉𑀲𑁆𑀲𑀼𑀲𑁆𑀲𑀢𑀻𑀢𑀺 𑀢𑀲𑁆𑀲 𑀢𑀁 𑀯𑀘𑀦𑀁 𑀓𑀤𑀸𑀘𑀺 𑀲𑀘𑁆𑀘𑀁 𑀪𑀯𑁂𑀬𑁆𑀬𑀸𑀢𑀺 𑀫𑀜𑁆𑀜𑀫𑀸𑀦𑁄 𑀲𑀼𑀲𑁆𑀲𑀢𑀺. 𑀤𑁂𑀯𑀢𑀸𑀢𑀺 𑀅𑀲𑁆𑀲𑀫𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀏𑀯. 𑀫𑀼𑀤𑁆𑀥𑀦𑀺 𑀫𑀼𑀤𑁆𑀥𑀧𑀸𑀢𑁂 𑀯𑀸𑀢𑀺 𑀫𑀼𑀤𑁆𑀥𑁂 𑀯𑀸 𑀫𑀼𑀤𑁆𑀥𑀧𑀸𑀢𑁂 𑀯𑀸.

𑁯𑁯𑁫-𑁬. 𑀪𑁄𑀢𑀻 𑀘𑀭𑀳𑀺 𑀚𑀸𑀦𑀸𑀢𑀻𑀢𑀺 𑀪𑁄𑀢𑀻 𑀘𑁂 𑀚𑀸𑀦𑀸𑀢𑀺. 𑀫𑀼𑀤𑁆𑀥𑀸𑀥𑀺𑀧𑀸𑀢𑀜𑁆𑀘𑀸𑀢𑀺 𑀫𑀼𑀤𑁆𑀥𑀧𑀸𑀢𑀜𑁆𑀘. 𑀜𑀸𑀡𑀫𑁂𑀢𑁆𑀣𑀸𑀢𑀺 𑀜𑀸𑀡𑀁 𑀫𑁂 𑀏𑀢𑁆𑀣.

𑁯𑁯𑁮. 𑀧𑀼𑀭𑀸𑀢𑀺 𑀏𑀓𑀽𑀦𑀢𑀺𑀁𑀲𑀯𑀲𑁆𑀲𑀯𑀬𑀓𑀸𑀮𑁂. 𑀩𑀸𑀯𑀭𑀺𑀩𑁆𑀭𑀸𑀳𑁆𑀫𑀡𑁂 𑀧𑀦 𑀕𑁄𑀥𑀸𑀯𑀭𑀻𑀢𑀻𑀭𑁂 𑀯𑀲𑀫𑀸𑀦𑁂 𑀅𑀝𑁆𑀞𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀅𑀧𑀘𑁆𑀘𑁄𑀢𑀺 𑀅𑀦𑀼𑀯𑀁𑀲𑁄.

𑁯𑁯𑁯. 𑀲𑀩𑁆𑀩𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄𑀢𑀺 𑀲𑀩𑁆𑀩𑀸𑀪𑀺𑀜𑁆𑀜𑀸𑀬 𑀩𑀮𑀧𑁆𑀧𑀢𑁆𑀢𑁄, 𑀲𑀩𑁆𑀩𑀸 𑀯𑀸 𑀅𑀪𑀺𑀜𑁆𑀜𑀸𑀬𑁄 𑀘 𑀩𑀮𑀸𑀦𑀺 𑀘 𑀧𑀢𑁆𑀢𑁄. 𑀯𑀺𑀫𑀼𑀢𑁆𑀢𑁄𑀢𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄.

𑁧𑁦𑁦𑁧-𑁩. 𑀲𑁄𑀓𑀲𑁆𑀲𑀸𑀢𑀺 𑀲𑁄𑀓𑁄 𑀅𑀲𑁆𑀲. 𑀧𑀳𑀽𑀢𑀧𑀜𑁆𑀜𑁄𑀢𑀺 𑀫𑀳𑀸𑀧𑀜𑁆𑀜𑁄. 𑀯𑀭𑀪𑀽𑀭𑀺𑀫𑁂𑀥𑀲𑁄𑀢𑀺 𑀉𑀢𑁆𑀢𑀫𑀯𑀺𑀧𑀼𑀮𑀧𑀜𑁆𑀜𑁄 𑀪𑀽𑀢𑁂 𑀅𑀪𑀺𑀭𑀢𑀯𑀭𑀧𑀜𑁆𑀜𑁄 𑀯𑀸. 𑀯𑀺𑀥𑀼𑀭𑁄𑀢𑀺 𑀯𑀺𑀕𑀢𑀥𑀼𑀭𑁄, 𑀅𑀧𑁆𑀧𑀝𑀺𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁦𑁦𑁪-𑁯. 𑀫𑀦𑁆𑀢𑀧𑀸𑀭𑀕𑁂𑀢𑀺 𑀯𑁂𑀤𑀧𑀸𑀭𑀕𑁂. 𑀧𑀲𑁆𑀲𑀯𑁆𑀳𑁄𑀢𑀺 𑀧𑀲𑁆𑀲𑀣 𑀅𑀚𑀸𑀦𑀢𑀦𑁆𑀢𑀺 𑀅𑀚𑀸𑀦𑀦𑁆𑀢𑀸𑀦𑀁. 𑀮𑀓𑁆𑀔𑀡𑀸𑀢𑀺 𑀮𑀓𑁆𑀔𑀡𑀸𑀦𑀺. 𑀩𑁆𑀬𑀸𑀓𑁆𑀔𑀸𑀢𑀸𑀢𑀺 𑀓𑀣𑀺𑀢𑀸𑀦𑀺, 𑀯𑀺𑀢𑁆𑀣𑀸𑀭𑀺𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀢𑁆𑀢𑀸𑀢𑀺 𑀲𑀫𑀢𑁆𑀢𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑁂𑀦 𑀫𑀦𑀼𑀲𑀸𑀲𑀢𑀻𑀢𑀺 𑀥𑀫𑁆𑀫𑁂𑀦 𑀅𑀦𑀼𑀲𑀸𑀲𑀢𑀺.

𑁧𑁦𑁧𑁧. 𑀚𑀸𑀢𑀺𑀁 𑀕𑁄𑀢𑁆𑀢𑀜𑁆𑀘 𑀮𑀓𑁆𑀔𑀡𑀦𑁆𑀢𑀺 ‘‘𑀓𑀻𑀯 𑀘𑀺𑀭𑀁 𑀚𑀸𑀢𑁄’’𑀢𑀺 𑀫𑀫 𑀚𑀸𑀢𑀺𑀜𑁆𑀘 𑀕𑁄𑀢𑁆𑀢𑀜𑁆𑀘 𑀮𑀓𑁆𑀔𑀡𑀜𑁆𑀘. 𑀫𑀦𑁆𑀢𑁂 𑀲𑀺𑀲𑁆𑀲𑁂𑀢𑀺 𑀫𑀬𑀸 𑀧𑀭𑀺𑀘𑀺𑀢𑀯𑁂𑀤𑁂 𑀘 𑀫𑀫 𑀲𑀺𑀲𑁆𑀲𑁂 𑀘. 𑀫𑀦𑀲𑀸𑀬𑁂𑀯 𑀧𑀼𑀘𑁆𑀙𑀣𑀸𑀢𑀺 𑀇𑀫𑁂 𑀲𑀢𑁆𑀢 𑀧𑀜𑁆𑀳𑁂 𑀘𑀺𑀢𑁆𑀢𑁂𑀦𑁂𑀯 𑀧𑀼𑀘𑁆𑀙𑀣.

𑁧𑁦𑁧𑁩-𑁮. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄𑀢𑀺 𑀏𑀓𑁄𑀬𑁂𑀯 𑀏𑀲 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑁄. 𑀤𑀼𑀪𑀬𑁄𑀢𑀺 𑀉𑀪𑁄. 𑀧𑀘𑁆𑀘𑁂𑀓𑀕𑀡𑀺𑀦𑁄𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀡𑀯𑀦𑁆𑀢𑁄. 𑀧𑀼𑀩𑁆𑀩𑀯𑀸𑀲𑀦𑀯𑀸𑀲𑀺𑀢𑀸𑀢𑀺 𑀧𑀼𑀩𑁆𑀩𑁂 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸. 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀧𑀼𑀜𑁆𑀜𑀯𑀸𑀲𑀦𑀸𑀬 𑀯𑀸𑀲𑀺𑀢𑀘𑀺𑀢𑁆𑀢𑀸. 𑀧𑀼𑀭𑀫𑀸𑀳𑀺𑀲𑁆𑀲𑀢𑀺𑀦𑁆𑀢𑀺 𑀫𑀸𑀳𑀺𑀲𑁆𑀲𑀢𑀺𑀦𑀸𑀫𑀺𑀓𑀁 𑀧𑀼𑀭𑀁, 𑀦𑀕𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀜𑁆𑀘 𑀦𑀕𑀭𑀁 𑀧𑀯𑀺𑀝𑁆𑀞𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀏𑀯𑀁 𑀲𑀩𑁆𑀩𑀢𑁆𑀣. 𑀕𑁄𑀦𑀤𑁆𑀥𑀦𑁆𑀢𑀺 𑀕𑁄𑀥𑀧𑀼𑀭𑀲𑁆𑀲 𑀦𑀸𑀫𑀁. 𑀯𑀦𑀲𑀯𑁆𑀳𑀬𑀦𑁆𑀢𑀺 𑀧𑀯𑀦𑀦𑀕𑀭𑀁 𑀯𑀼𑀘𑁆𑀘𑀢𑀺, ‘‘𑀯𑀦𑀲𑀸𑀯𑀢𑁆𑀣𑀺’’𑀦𑁆𑀢𑀺 𑀏𑀓𑁂. 𑀏𑀯𑀁 𑀯𑀦𑀲𑀸𑀯𑀢𑁆𑀣𑀺𑀢𑁄 𑀓𑁄𑀲𑀫𑁆𑀩𑀺𑀁, 𑀓𑁄𑀲𑀫𑁆𑀩𑀺𑀢𑁄 𑀘 𑀲𑀸𑀓𑁂𑀢𑀁 𑀅𑀦𑀼𑀧𑁆𑀧𑀢𑁆𑀢𑀸𑀦𑀁 𑀓𑀺𑀭 𑀢𑁂𑀲𑀁 𑀲𑁄𑀴𑀲𑀦𑁆𑀦𑀁 𑀚𑀝𑀺𑀮𑀸𑀦𑀁 𑀙𑀬𑁄𑀚𑀦𑀫𑀢𑁆𑀢𑀸 𑀧𑀭𑀺𑀲𑀸 𑀅𑀳𑁄𑀲𑀺.

𑁧𑁦𑁧𑁯. 𑀅𑀣 𑀪𑀕𑀯𑀸 ‘‘𑀩𑀸𑀯𑀭𑀺𑀲𑁆𑀲 𑀚𑀝𑀺𑀮𑀸 𑀫𑀳𑀸𑀚𑀦𑀁 𑀲𑀁𑀯𑀟𑁆𑀠𑁂𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀺, 𑀦 𑀘 𑀢𑀸𑀯 𑀦𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀺, 𑀦𑀸𑀧𑀺 𑀅𑀬𑀁 𑀤𑁂𑀲𑁄 𑀲𑀧𑁆𑀧𑀸𑀬𑁄, 𑀫𑀕𑀥𑀔𑁂𑀢𑁆𑀢𑁂 𑀧𑀦 𑀢𑁂𑀲𑀁 𑀧𑀸𑀲𑀸𑀡𑀓𑀘𑁂𑀢𑀺𑀬𑀁 𑀲𑀧𑁆𑀧𑀸𑀬𑀁. 𑀢𑀢𑁆𑀭 𑀳𑀺 𑀫𑀬𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑀦𑀕𑀭𑀸𑀦𑀺 𑀘 𑀧𑀯𑀺𑀲𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀸 𑀩𑀳𑀼𑀢𑀭𑁂𑀦 𑀚𑀦𑁂𑀦 𑀆𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀸𑀯𑀢𑁆𑀣𑀺𑀢𑁄 𑀭𑀸𑀚𑀕𑀳𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀢𑁂𑀧𑀺 𑀚𑀝𑀺𑀮𑀸 𑀲𑀸𑀯𑀢𑁆𑀣𑀺𑀁 𑀆𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀓𑁄 𑀩𑀼𑀤𑁆𑀥𑁄, 𑀓𑀼𑀳𑀺𑀁 𑀩𑀼𑀤𑁆𑀥𑁄’’𑀢𑀺 𑀯𑀺𑀘𑀺𑀦𑀦𑁆𑀢𑀸 𑀕𑀦𑁆𑀥𑀓𑀼𑀝𑀺𑀫𑀽𑀮𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀧𑀤𑀦𑀺𑀓𑁆𑀔𑁂𑀧𑀁 𑀤𑀺𑀲𑁆𑀯𑀸 ‘‘𑀭𑀢𑁆𑀢𑀲𑁆𑀲 𑀳𑀺 𑀉𑀓𑁆𑀓𑀼𑀝𑀺𑀓𑀁 𑀧𑀤𑀁 𑀪𑀯𑁂…𑀧𑁂… 𑀯𑀺𑀯𑀝𑁆𑀝𑀘𑁆𑀙𑀤𑀲𑁆𑀲 𑀇𑀤𑀫𑀻𑀤𑀺𑀲𑀁 𑀧𑀤’’𑀦𑁆𑀢𑀺 (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁬𑁦-𑁨𑁬𑁧; 𑀥. 𑀧. 𑀅𑀝𑁆𑀞. 𑁧.𑁨𑁦 𑀲𑀸𑀫𑀸𑀯𑀢𑀻𑀯𑀢𑁆𑀣𑀼; 𑀯𑀺𑀲𑀼𑀤𑁆𑀥𑀺. 𑁧.𑁪𑁫) ‘‘𑀲𑀩𑁆𑀩𑀜𑁆𑀜𑀼 𑀩𑀼𑀤𑁆𑀥𑁄’’𑀢𑀺 𑀦𑀺𑀝𑁆𑀞𑀁 𑀕𑀢𑀸. 𑀪𑀕𑀯𑀸𑀧𑀺 𑀅𑀦𑀼𑀧𑀼𑀩𑁆𑀩𑁂𑀦 𑀲𑁂𑀢𑀩𑁆𑀬𑀓𑀧𑀺𑀮𑀯𑀢𑁆𑀣𑀼𑀆𑀤𑀻𑀦𑀺 𑀦𑀕𑀭𑀸𑀦𑀺 𑀧𑀯𑀺𑀲𑀺𑀢𑁆𑀯𑀸 𑀫𑀳𑀸𑀚𑀦𑀁 𑀲𑀁𑀯𑀟𑁆𑀠𑁂𑀦𑁆𑀢𑁄 𑀧𑀸𑀲𑀸𑀡𑀓𑀘𑁂𑀢𑀺𑀬𑀁 𑀕𑀢𑁄. 𑀚𑀝𑀺𑀮𑀸𑀧𑀺 𑀢𑀸𑀯𑀤𑁂𑀯 𑀲𑀸𑀯𑀢𑁆𑀣𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀦𑀕𑀭𑀸𑀦𑀺 𑀧𑀯𑀺𑀲𑀺𑀢𑁆𑀯𑀸 𑀧𑀸𑀲𑀸𑀡𑀓𑀘𑁂𑀢𑀺𑀬𑀫𑁂𑀯 𑀅𑀕𑀫𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑁄𑀲𑀫𑁆𑀩𑀺𑀜𑁆𑀘𑀸𑀧𑀺 𑀲𑀸𑀓𑁂𑀢𑀁, 𑀲𑀸𑀯𑀢𑁆𑀣𑀺𑀜𑁆𑀘 𑀧𑀼𑀭𑀼𑀢𑁆𑀢𑀫𑀁. 𑀲𑁂𑀢𑀩𑁆𑀬𑀁 𑀓𑀧𑀺𑀮𑀯𑀢𑁆𑀣𑀼’’𑀦𑁆𑀢𑀺𑀆𑀤𑀺.

𑁧𑁦𑁨𑁦. 𑀢𑀢𑁆𑀣 𑀫𑀸𑀕𑀥𑀁 𑀧𑀼𑀭𑀦𑁆𑀢𑀺 𑀫𑀕𑀥𑀧𑀼𑀭𑀁 𑀭𑀸𑀚𑀕𑀳𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀲𑀸𑀡𑀓𑀁 𑀘𑁂𑀢𑀺𑀬𑀦𑁆𑀢𑀺 𑀫𑀳𑀢𑁄 𑀧𑀸𑀲𑀸𑀡𑀲𑁆𑀲 𑀉𑀧𑀭𑀺 𑀧𑀼𑀩𑁆𑀩𑁂 𑀤𑁂𑀯𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀉𑀧𑁆𑀧𑀦𑁆𑀦𑁂 𑀧𑀦 𑀪𑀕𑀯𑀢𑀺 𑀯𑀺𑀳𑀸𑀭𑁄 𑀚𑀸𑀢𑁄. 𑀲𑁄 𑀢𑁂𑀦𑁂𑀯 𑀧𑀼𑀭𑀺𑀫𑀯𑁄𑀳𑀸𑀭𑁂𑀦 ‘‘𑀧𑀸𑀲𑀸𑀡𑀓𑀁 𑀘𑁂𑀢𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁦𑁨𑁧. 𑀢𑀲𑀺𑀢𑁄𑀯𑀼𑀤𑀓𑀦𑁆𑀢𑀺 𑀢𑁂 𑀳𑀺 𑀚𑀝𑀺𑀮𑀸 𑀯𑁂𑀕𑀲𑀸 𑀪𑀕𑀯𑀦𑁆𑀢𑀁 𑀅𑀦𑀼𑀩𑀦𑁆𑀥𑀫𑀸𑀦𑀸 𑀲𑀸𑀬𑀁 𑀕𑀢𑀫𑀕𑁆𑀕𑀁 𑀧𑀸𑀢𑁄, 𑀧𑀸𑀢𑁄 𑀕𑀢𑀫𑀕𑁆𑀕𑀜𑁆𑀘 𑀲𑀸𑀬𑀁 𑀕𑀘𑁆𑀙𑀦𑁆𑀢𑀸 ‘‘𑀏𑀢𑁆𑀣 𑀪𑀕𑀯𑀸’’𑀢𑀺 𑀲𑀼𑀢𑁆𑀯𑀸 𑀅𑀢𑀺𑀯𑀺𑀬 𑀧𑀻𑀢𑀺𑀧𑀸𑀫𑁄𑀚𑁆𑀚𑀚𑀸𑀢𑀸 𑀢𑀁 𑀘𑁂𑀢𑀺𑀬𑀁 𑀅𑀪𑀺𑀭𑀼𑀳𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀼𑀭𑀺𑀢𑀸 𑀧𑀩𑁆𑀩𑀢𑀫𑀸𑀭𑀼𑀳𑀼’’𑀦𑁆𑀢𑀺.

𑁧𑁦𑁨𑁪. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀳𑀝𑁆𑀞𑁄𑀢𑀺 𑀢𑀲𑁆𑀫𑀺𑀁 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂 𑀲𑀓𑁆𑀓𑁂𑀦 𑀫𑀸𑀧𑀺𑀢𑀫𑀳𑀸𑀫𑀡𑁆𑀟𑀧𑁂 𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀘𑁆𑀘𑀺 𑀇𑀲𑀬𑁄 𑀔𑀫𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀪𑀕𑀯𑀢𑀸 𑀧𑀝𑀺𑀲𑀫𑁆𑀫𑁄𑀤𑀦𑀻𑀬𑁂 𑀓𑀢𑁂 ‘‘𑀔𑀫𑀦𑀻𑀬𑀁 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀻𑀳𑀺 𑀲𑀬𑀫𑁆𑀧𑀺 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀅𑀚𑀺𑀢𑁄 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀻 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀳𑀝𑁆𑀞𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀫𑀦𑁄𑀧𑀜𑁆𑀳𑁂 𑀧𑀼𑀘𑁆𑀙𑀺.

𑁧𑁦𑁨𑁫. 𑀢𑀢𑁆𑀣 𑀆𑀤𑀺𑀲𑁆𑀲𑀸𑀢𑀺 ‘‘𑀓𑀢𑀺𑀯𑀲𑁆𑀲𑁄’’𑀢𑀺 𑀏𑀯𑀁 𑀉𑀤𑁆𑀤𑀺𑀲𑁆𑀲. 𑀚𑀫𑁆𑀫𑀦𑀦𑁆𑀢𑀺 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀚𑀸𑀢𑀺𑀁 𑀩𑁆𑀭𑀽𑀳𑀻’’𑀢𑀺 𑀧𑀼𑀘𑁆𑀙𑀢𑀺. 𑀧𑀸𑀭𑀫𑀺𑀦𑁆𑀢𑀺 𑀦𑀺𑀝𑁆𑀞𑀸𑀕𑀫𑀦𑀁.

𑁧𑁦𑁨𑁬-𑁭. 𑀯𑀻𑀲𑀁 𑀯𑀲𑁆𑀲𑀲𑀢𑀦𑁆𑀢𑀺 𑀯𑀻𑀲𑀢𑀺𑀯𑀲𑁆𑀲𑀸𑀥𑀺𑀓𑀁 𑀯𑀲𑁆𑀲𑀲𑀢𑀁. 𑀮𑀓𑁆𑀔𑀡𑁂𑀢𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂. 𑀏𑀢𑀲𑁆𑀫𑀺𑀁 𑀇𑀢𑁄 𑀧𑀭𑁂𑀲𑀼 𑀘 𑀇𑀢𑀺𑀳𑀸𑀲𑀸𑀤𑀻𑀲𑀼 𑀅𑀦𑀯𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄 𑀧𑀭𑀧𑀤𑀁 𑀯𑀸 𑀆𑀦𑁂𑀢𑁆𑀯𑀸 𑀢𑁂𑀲𑀼 𑀧𑀸𑀭𑀫𑀺𑀁 𑀕𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀜𑁆𑀘𑀲𑀢𑀸𑀦𑀺 𑀯𑀸𑀘𑁂𑀢𑀻𑀢𑀺 𑀧𑀓𑀢𑀺𑀅𑀮𑀲𑀤𑀼𑀫𑁆𑀫𑁂𑀥𑀫𑀸𑀡𑀯𑀓𑀸𑀦𑀁 𑀧𑀜𑁆𑀘𑀲𑀢𑀸𑀦𑀺 𑀲𑀬𑀁 𑀫𑀦𑁆𑀢𑁂 𑀯𑀸𑀘𑁂𑀢𑀺. 𑀲𑀥𑀫𑁆𑀫𑁂𑀢𑀺 𑀏𑀓𑁂 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁂, 𑀢𑁂𑀯𑀺𑀚𑁆𑀚𑀓𑁂 𑀧𑀸𑀯𑀘𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁦𑁨𑁮. 𑀮𑀓𑁆𑀔𑀡𑀸𑀦𑀁 𑀧𑀯𑀺𑀘𑀬𑀦𑁆𑀢𑀺 𑀮𑀓𑁆𑀔𑀡𑀸𑀦𑀁 𑀯𑀺𑀢𑁆𑀣𑀸𑀭𑀁, ‘‘𑀓𑀢𑀫𑀸𑀦𑀺 𑀢𑀸𑀦𑀺𑀲𑁆𑀲 𑀕𑀢𑁆𑀢𑁂 𑀢𑀻𑀡𑀺 𑀮𑀓𑁆𑀔𑀡𑀸𑀦𑀻’’𑀢𑀺 𑀧𑀼𑀘𑁆𑀙𑀢𑀺.

𑁧𑁦𑁩𑁦-𑁩𑁧. 𑀧𑀼𑀘𑁆𑀙𑀜𑁆𑀳𑀻𑀢𑀺 𑀧𑀼𑀘𑁆𑀙𑀫𑀸𑀦𑀁 𑀓𑀫𑁂𑀢𑀁 𑀧𑀝𑀺𑀪𑀸𑀲𑀢𑀻𑀢𑀺 𑀤𑁂𑀯𑀸𑀤𑀻𑀲𑀼 𑀓𑀁 𑀧𑀼𑀕𑁆𑀕𑀮𑀁 𑀏𑀢𑀁 𑀧𑀜𑁆𑀳𑀯𑀘𑀦𑀁 𑀧𑀝𑀺𑀪𑀸𑀲𑀢𑀻𑀢𑀺.

𑁧𑁦𑁩𑁨-𑁩𑁩. 𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀧𑀜𑁆𑀘𑀦𑁆𑀦𑀁 𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀅𑀯𑀲𑁂𑀲𑁂 𑀤𑁆𑀯𑁂 𑀧𑀼𑀘𑁆𑀙𑀦𑁆𑀢𑁄 ‘‘𑀫𑀼𑀤𑁆𑀥𑀁 𑀫𑀼𑀤𑁆𑀥𑀸𑀥𑀺𑀧𑀸𑀢𑀜𑁆𑀘𑀸’’𑀢𑀺 𑀆𑀳. 𑀅𑀣𑀲𑁆𑀲 𑀪𑀕𑀯𑀸 𑀢𑁂 𑀩𑁆𑀬𑀸𑀓𑀭𑁄𑀦𑁆𑀢𑁄 ‘‘𑀅𑀯𑀺𑀚𑁆𑀚𑀸 𑀫𑀼𑀤𑁆𑀥𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀪𑀽𑀢𑀸 𑀅𑀯𑀺𑀚𑁆𑀚𑀸 𑀲𑀁𑀲𑀸𑀭𑀲𑁆𑀲 𑀲𑀻𑀲𑀁, 𑀢𑀲𑁆𑀫𑀸 ‘‘𑀅𑀯𑀺𑀚𑁆𑀚𑀸 𑀫𑀼𑀤𑁆𑀥𑀸’’𑀢𑀺 𑀆𑀳. 𑀬𑀲𑁆𑀫𑀸 𑀘 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀸 𑀅𑀢𑁆𑀢𑀦𑀸 𑀲𑀳𑀚𑀸𑀢𑁂𑀳𑀺 𑀲𑀤𑁆𑀥𑀸𑀲𑀢𑀺𑀲𑀫𑀸𑀥𑀺𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀯𑀻𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑀪𑀸𑀯𑀫𑀼𑀧𑀕𑀢𑀢𑁆𑀢𑀸 𑀢𑀁 𑀫𑀼𑀤𑁆𑀥𑀁 𑀅𑀥𑀺𑀧𑀸𑀢𑁂𑀢𑀺, 𑀢𑀲𑁆𑀫𑀸 ‘‘𑀥𑀺𑀚𑁆𑀚𑀸 𑀫𑀼𑀤𑁆𑀥𑀸𑀥𑀺𑀧𑀸𑀢𑀺𑀦𑀻’’𑀢𑀺𑀆𑀤𑀺𑀫𑀸𑀳.

𑁧𑁦𑁩𑁪-𑁮. 𑀢𑀢𑁄 𑀯𑁂𑀤𑁂𑀦 𑀫𑀳𑀢𑀸𑀢𑀺 𑀅𑀣 𑀇𑀫𑀁 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀬 𑀫𑀳𑀸𑀧𑀻𑀢𑀺𑀬𑀸 𑀲𑀦𑁆𑀣𑀫𑁆𑀪𑀺𑀢𑁆𑀯𑀸 𑀅𑀮𑀻𑀦𑀪𑀸𑀯𑀁, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀉𑀤𑀕𑁆𑀕𑀁 𑀧𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀢𑀺𑀢𑁆𑀯𑀸 𑀘 ‘‘𑀩𑀸𑀯𑀭𑀻’’𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀅𑀣 𑀦𑀁 𑀅𑀦𑀼𑀓𑀫𑁆𑀧𑀫𑀸𑀦𑁄 𑀪𑀕𑀯𑀸 ‘‘𑀲𑀼𑀔𑀺𑀢𑁄’’𑀢𑀺 𑀕𑀸𑀣𑀫𑀸𑀳. 𑀯𑀢𑁆𑀯𑀸 𑀘 ‘‘𑀩𑀸𑀯𑀭𑀺𑀲𑁆𑀲 𑀘𑀸’’𑀢𑀺 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀺. 𑀢𑀢𑁆𑀣 𑀲𑀩𑁆𑀩𑁂𑀲𑀦𑁆𑀢𑀺 𑀅𑀦𑀯𑀲𑁂𑀲𑀸𑀦𑀁 𑀲𑁄𑀴𑀲𑀲𑀳𑀲𑁆𑀲𑀸𑀦𑀁. 𑀢𑀢𑁆𑀣 𑀧𑀼𑀘𑁆𑀙𑀺 𑀢𑀣𑀸𑀕𑀢𑀦𑁆𑀢𑀺 𑀢𑀢𑁆𑀣 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂, 𑀢𑀢𑁆𑀣 𑀯𑀸 𑀧𑀭𑀺𑀲𑀸𑀬, 𑀢𑁂𑀲𑀼 𑀯𑀸 𑀧𑀯𑀸𑀭𑀺𑀢𑁂𑀲𑀼 𑀅𑀚𑀺𑀢𑁄 𑀧𑀞𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀻𑀢𑀺. 𑀲𑁂𑀲𑀁 𑀲𑀩𑁆𑀩𑀕𑀸𑀣𑀸𑀲𑀼 𑀧𑀸𑀓𑀝𑀫𑁂𑀯𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀯𑀢𑁆𑀣𑀼𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀅𑀚𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩𑁯. 𑀢𑀲𑁆𑀫𑀺𑀁 𑀧𑀦 𑀧𑀜𑁆𑀳𑁂 𑀦𑀺𑀯𑀼𑀢𑁄𑀢𑀺 𑀧𑀝𑀺𑀘𑁆𑀙𑀸𑀤𑀺𑀢𑁄. 𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻𑀢𑀺 𑀓𑀺𑀁 𑀅𑀲𑁆𑀲 𑀮𑁄𑀓𑀲𑁆𑀲 𑀅𑀪𑀺𑀮𑁂𑀧𑀦𑀁 𑀯𑀤𑁂𑀲𑀺.

𑁧𑁦𑁪𑁦. 𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀻𑀢𑀺 𑀫𑀘𑁆𑀙𑀭𑀺𑀬𑀳𑁂𑀢𑀼 𑀘 𑀧𑀫𑀸𑀤𑀳𑁂𑀢𑀼 𑀘 𑀦𑀧𑁆𑀧𑀓𑀸𑀲𑀢𑀺. 𑀫𑀘𑁆𑀙𑀭𑀺𑀬𑀁 𑀳𑀺𑀲𑁆𑀲 𑀤𑀸𑀦𑀸𑀤𑀺𑀕𑀼𑀡𑁂𑀳𑀺 𑀧𑀓𑀸𑀲𑀺𑀢𑀼𑀁 𑀦 𑀤𑁂𑀢𑀺, 𑀧𑀫𑀸𑀤𑁄 𑀲𑀻𑀮𑀸𑀤𑀻𑀳𑀺. 𑀚𑀧𑁆𑀧𑀸𑀪𑀺𑀮𑁂𑀧𑀦𑀦𑁆𑀢𑀺 𑀢𑀡𑁆𑀳𑀸 𑀅𑀲𑁆𑀲 𑀮𑁄𑀓𑀲𑁆𑀲 𑀫𑀓𑁆𑀓𑀝𑀮𑁂𑀧𑁄 𑀯𑀺𑀬 𑀫𑀓𑁆𑀓𑀝𑀲𑁆𑀲 𑀅𑀪𑀺𑀮𑁂𑀧𑀦𑀁. 𑀤𑀼𑀓𑁆𑀔𑀦𑁆𑀢𑀺 𑀚𑀸𑀢𑀺𑀆𑀤𑀺𑀓𑀁 𑀤𑀼𑀓𑁆𑀔𑀁.

𑁧𑁦𑁪𑁧. 𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸𑀢𑀺 𑀲𑀩𑁆𑀩𑁂𑀲𑀼 𑀭𑀽𑀧𑀸𑀤𑀺𑀆𑀬𑀢𑀦𑁂𑀲𑀼 𑀢𑀡𑁆𑀳𑀸𑀤𑀺𑀓𑀸 𑀲𑁄𑀢𑀸 𑀲𑀦𑁆𑀤𑀦𑁆𑀢𑀺. 𑀓𑀺𑀁 𑀦𑀺𑀯𑀸𑀭𑀡𑀦𑁆𑀢𑀺 𑀢𑁂𑀲𑀁 𑀓𑀺𑀁 𑀆𑀯𑀭𑀡𑀁 𑀓𑀸 𑀭𑀓𑁆𑀔𑀸𑀢𑀺? 𑀲𑀁𑀯𑀭𑀁 𑀩𑁆𑀭𑀽𑀳𑀻𑀢𑀺 𑀢𑀁 𑀢𑁂𑀲𑀁 𑀦𑀺𑀯𑀸𑀭𑀡𑀲𑀗𑁆𑀔𑀸𑀢𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺. 𑀏𑀢𑁂𑀦 𑀲𑀸𑀯𑀲𑁂𑀲𑀧𑁆𑀧𑀳𑀸𑀦𑀁 𑀧𑀼𑀘𑁆𑀙𑀢𑀺. 𑀓𑁂𑀦 𑀲𑁄𑀢𑀸 𑀧𑀺𑀥𑀺𑀬𑁆𑀬𑀭𑁂𑀢𑀺 𑀓𑁂𑀦 𑀥𑀫𑁆𑀫𑁂𑀦 𑀏𑀢𑁂 𑀲𑁄𑀢𑀸 𑀧𑀺𑀥𑀺𑀬𑁆𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺. 𑀏𑀢𑁂𑀦 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀁 𑀧𑀼𑀘𑁆𑀙𑀢𑀺.

𑁧𑁦𑁪𑁨. 𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀬𑀼𑀢𑁆𑀢𑀸. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀦𑁂𑀲𑀫𑀸𑀦𑀸 𑀲𑀢𑀺 𑀢𑁂𑀲𑀁 𑀲𑁄𑀢𑀸𑀦𑀁 𑀦𑀺𑀯𑀸𑀭𑀡𑀁. 𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀻𑀢𑀺 𑀢𑀫𑁂𑀯𑀸𑀳𑀁 𑀲𑀢𑀺𑀁 𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂𑀢𑀺 𑀭𑀽𑀧𑀸𑀤𑀻𑀲𑀼 𑀧𑀦 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀯𑁂𑀥𑀲𑀸𑀥𑀺𑀓𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀏𑀢𑁂 𑀲𑁄𑀢𑀸 𑀲𑀩𑁆𑀩𑀲𑁄 𑀧𑀺𑀥𑀺𑀬𑁆𑀬𑀦𑁆𑀢𑀻𑀢𑀺.

𑁧𑁦𑁪𑁩. 𑀧𑀜𑁆𑀜𑀸 𑀘𑁂𑀯𑀸𑀢𑀺 𑀧𑀜𑁆𑀳𑀕𑀸𑀣𑀸𑀬, 𑀬𑀸 𑀘𑀸𑀬𑀁 𑀢𑀬𑀸 𑀯𑀼𑀢𑁆𑀢𑀸 𑀧𑀜𑁆𑀜𑀸 𑀬𑀸 𑀘 𑀲𑀢𑀺, 𑀬𑀜𑁆𑀘 𑀢𑀤𑀯𑀲𑁂𑀲𑀁 𑀦𑀸𑀫𑀭𑀽𑀧𑀁, 𑀏𑀢𑀁 𑀲𑀩𑁆𑀩𑀫𑁆𑀧𑀺 𑀓𑀢𑁆𑀣 𑀦𑀺𑀭𑀼𑀚𑁆𑀛𑀢𑀺, 𑀏𑀢𑀁 𑀫𑁂 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀩𑁆𑀭𑀽𑀳𑀻𑀢𑀺 𑀏𑀯𑀁 𑀲𑀗𑁆𑀔𑁂𑀧𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁦𑁪𑁪. 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬 𑀧𑀦𑀲𑁆𑀲 𑀬𑀲𑁆𑀫𑀸 𑀧𑀜𑁆𑀜𑀸𑀲𑀢𑀺𑀬𑁄 𑀦𑀸𑀫𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑀸 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀁 𑀫𑀁 𑀢𑁆𑀯𑀁, 𑀅𑀚𑀺𑀢, 𑀏𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 ‘‘𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺, 𑀢𑀁 𑀢𑁂 𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺, 𑀢𑀁 𑀯𑀤𑀦𑁆𑀢𑁄 𑀯𑀤𑀸𑀫𑀺, 𑀢𑀲𑁆𑀲, 𑀢𑀲𑁆𑀲 𑀳𑀺 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀲𑀳𑁂𑀯 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺. 𑀏𑀢𑁆𑀣𑁂𑀯 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂 𑀦𑀺𑀭𑀼𑀚𑁆𑀛𑀢𑀺 𑀏𑀢𑀁, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀢𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺. 𑀢𑀁 𑀦𑀸𑀢𑀺𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁦𑁪𑁫. 𑀏𑀢𑁆𑀢𑀸𑀯𑀢𑀸 𑀘 ‘‘𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀇𑀫𑀺𑀦𑀸 𑀧𑀓𑀸𑀲𑀺𑀢𑀁 𑀤𑀼𑀓𑁆𑀔𑀲𑀘𑁆𑀘𑀁, ‘‘𑀬𑀸𑀦𑀺 𑀲𑁄𑀢𑀸𑀦𑀻’’𑀢𑀺 𑀇𑀫𑀺𑀦𑀸 𑀲𑀫𑀼𑀤𑀬𑀲𑀘𑁆𑀘𑀁 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂𑀢𑀺 𑀇𑀫𑀺𑀦𑀸 𑀫𑀕𑁆𑀕𑀲𑀘𑁆𑀘𑀁, ‘‘𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺 𑀇𑀫𑀺𑀦𑀸 𑀦𑀺𑀭𑁄𑀥𑀲𑀘𑁆𑀘𑀦𑁆𑀢𑀺 𑀏𑀯𑀁 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀼𑀢𑁆𑀯𑀸𑀧𑀺 𑀅𑀭𑀺𑀬𑀪𑀽𑀫𑀺𑀁 𑀅𑀦𑀥𑀺𑀕𑀢𑁄 𑀧𑀼𑀦 𑀲𑁂𑀔𑀸𑀲𑁂𑀔𑀧𑀝𑀺𑀧𑀤𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀗𑁆𑀔𑀸𑀢𑀥𑀫𑁆𑀫𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀭𑀺𑀯𑀻𑀫𑀁𑀲𑀺𑀢𑀥𑀫𑁆𑀫𑀸, 𑀅𑀭𑀳𑀢𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑁂𑀔𑀸𑀢𑀺 𑀲𑀻𑀮𑀸𑀤𑀻𑀦𑀺 𑀲𑀺𑀓𑁆𑀔𑀫𑀸𑀦𑀸 𑀅𑀯𑀲𑁂𑀲𑀸 𑀅𑀭𑀺𑀬𑀧𑀼𑀕𑁆𑀕𑀮𑀸. 𑀧𑀼𑀣𑀽𑀢𑀺 𑀩𑀳𑀽 𑀲𑀢𑁆𑀢𑀚𑀦𑀸. 𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀻𑀢𑀺 𑀢𑁂𑀲𑀁 𑀫𑁂 𑀲𑁂𑀔𑀸𑀲𑁂𑀔𑀸𑀦𑀁 𑀦𑀺𑀧𑀓𑁄 𑀧𑀡𑁆𑀟𑀺𑀢𑁄 𑀢𑁆𑀯𑀁 𑀧𑀼𑀝𑁆𑀞𑁄 𑀧𑀝𑀺𑀧𑀢𑁆𑀢𑀺𑀁 𑀩𑁆𑀭𑀽𑀳𑀻𑀢𑀺.

𑁧𑁦𑁪𑁬. 𑀅𑀣𑀲𑁆𑀲 𑀪𑀕𑀯𑀸 𑀬𑀲𑁆𑀫𑀸 𑀲𑁂𑀔𑁂𑀦 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑀸 𑀧𑀳𑀸𑀢𑀩𑁆𑀩𑀸 𑀏𑀯, 𑀢𑀲𑁆𑀫𑀸 ‘‘𑀓𑀸𑀫𑁂𑀲𑀽’’𑀢𑀺 𑀉𑀧𑀟𑁆𑀠𑀕𑀸𑀣𑀸𑀬 𑀲𑁂𑀔𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀯𑀢𑁆𑀣𑀼 ‘‘𑀓𑀸𑀫𑁂𑀲𑀼’’ 𑀓𑀺𑀮𑁂𑀲𑀓𑀸𑀫𑁂𑀦 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀬𑁄 𑀘 𑀫𑀦𑀲𑁄 𑀆𑀯𑀺𑀮𑀪𑀸𑀯𑀓𑀭𑁂 𑀥𑀫𑁆𑀫𑁂 𑀧𑀚𑀳𑀦𑁆𑀢𑁄 𑀫𑀦𑀲𑀸 𑀦𑀸𑀯𑀺𑀮𑁄 𑀲𑀺𑀬𑀸𑀢𑀺. 𑀬𑀲𑁆𑀫𑀸 𑀧𑀦 𑀅𑀲𑁂𑀔𑁄 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀭𑀺𑀢𑀼𑀮𑀺𑀢𑀢𑁆𑀢𑀸 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑁂𑀲𑀼 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀆𑀤𑀻𑀳𑀺 𑀘 𑀲𑀢𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀻𑀦𑀁 𑀪𑀺𑀦𑁆𑀦𑀢𑁆𑀢𑀸 𑀪𑀺𑀓𑁆𑀔𑀼𑀪𑀸𑀯𑀁 𑀧𑀢𑁆𑀢𑁄 𑀘 𑀳𑀼𑀢𑁆𑀯𑀸 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀧𑀭𑀺𑀩𑁆𑀩𑀚𑀢𑀺, 𑀢𑀲𑁆𑀫𑀸 ‘‘𑀓𑀼𑀲𑀮𑁄’’𑀢𑀺 𑀉𑀧𑀟𑁆𑀠𑀕𑀸𑀣𑀸𑀬 𑀅𑀲𑁂𑀔𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀚𑀺𑀢𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺 𑀲𑀤𑁆𑀥𑀺𑀁 𑀅𑀦𑁆𑀢𑁂𑀯𑀸𑀲𑀺𑀲𑀳𑀲𑁆𑀲𑁂𑀦, 𑀅𑀜𑁆𑀜𑁂𑀲𑀜𑁆𑀘 𑀅𑀦𑁂𑀓𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺. 𑀲𑀳 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀘 𑀆𑀬𑀲𑁆𑀫𑀢𑁄 𑀅𑀚𑀺𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀲𑀳𑀲𑁆𑀲𑀲𑁆𑀲 𑀘 𑀅𑀚𑀺𑀦𑀚𑀝𑀸𑀯𑀸𑀓𑀘𑀻𑀭𑀸𑀤𑀻𑀦𑀺 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀲𑀩𑁆𑀩𑁂𑀯 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸, 𑀤𑁆𑀯𑀗𑁆𑀕𑀼𑀮𑀓𑁂𑀲𑀸 𑀏𑀳𑀺𑀪𑀺𑀓𑁆𑀔𑀽 𑀳𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑀸 𑀧𑀜𑁆𑀚𑀮𑀺𑀓𑀸 𑀦𑀺𑀲𑀻𑀤𑀺𑀁𑀲𑀽𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀅𑀚𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪𑁭. 𑀓𑁄𑀥 𑀲𑀦𑁆𑀢𑀼𑀲𑁆𑀲𑀺𑀢𑁄𑀢𑀺 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀲𑀩𑁆𑀩𑀲𑀼𑀢𑁆𑀢𑀸𑀦𑀁 𑀧𑀼𑀘𑁆𑀙𑀸𑀯𑀲𑀺𑀓𑀸 𑀏𑀯 𑀉𑀧𑁆𑀧𑀢𑁆𑀢𑀺. 𑀢𑁂 𑀳𑀺 𑀩𑁆𑀭𑀸𑀳𑁆𑀫𑀡𑀸 ‘‘𑀓𑀢𑀸𑀯𑀓𑀸𑀲𑀸 𑀧𑀼𑀘𑁆𑀙𑀯𑁆𑀳𑁄’’𑀢𑀺 𑀪𑀕𑀯𑀢𑀸 𑀧𑀯𑀸𑀭𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀁𑀲𑀬𑀁 𑀧𑀼𑀘𑁆𑀙𑀺𑀁𑀲𑀼. 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀘 𑀢𑁂𑀲𑀁 𑀪𑀕𑀯𑀸 𑀩𑁆𑀬𑀸𑀓𑀸𑀲𑀺. 𑀏𑀯𑀁 𑀧𑀼𑀘𑁆𑀙𑀸𑀯𑀲𑀺𑀓𑀸𑀦𑁂𑀯𑁂𑀢𑀸𑀦𑀺 𑀲𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀦𑀺𑀝𑁆𑀞𑀺𑀢𑁂 𑀧𑀦 𑀅𑀚𑀺𑀢𑀧𑀜𑁆𑀳𑁂 ‘‘𑀓𑀣𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻’’𑀢𑀺 (𑀲𑀼. 𑀦𑀺. 𑁧𑁧𑁨𑁪; 𑀘𑀽𑀴𑀦𑀺. 𑀧𑀺𑀗𑁆𑀕𑀺𑀬𑀫𑀸𑀡𑀯𑀧𑀼𑀘𑁆𑀙𑀸 𑁧𑁪𑁪) 𑀏𑀯𑀁 𑀫𑁄𑀖𑀭𑀸𑀚𑀸 𑀧𑀼𑀘𑁆𑀙𑀺𑀢𑀼𑀁 𑀆𑀭𑀪𑀺. 𑀢𑀁 ‘‘𑀦 𑀢𑀸𑀯𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀧𑀸𑀓𑀁 𑀕𑀢𑀸𑀦𑀻’’𑀢𑀺 𑀜𑀢𑁆𑀯𑀸 𑀪𑀕𑀯𑀸 ‘‘𑀢𑀺𑀝𑁆𑀞 𑀢𑁆𑀯𑀁, 𑀫𑁄𑀖𑀭𑀸𑀚, 𑀅𑀜𑁆𑀜𑁄 𑀧𑀼𑀘𑁆𑀙𑀢𑀽’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀢𑀢𑁄 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄 𑀅𑀢𑁆𑀢𑀦𑁄 𑀲𑀁𑀲𑀬𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑁄𑀥𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑁄𑀥 𑀲𑀦𑁆𑀢𑀼𑀲𑁆𑀲𑀺𑀢𑁄𑀢𑀺 𑀓𑁄 𑀇𑀥 𑀢𑀼𑀝𑁆𑀞𑁄. 𑀇𑀜𑁆𑀚𑀺𑀢𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺. 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬𑀸𑀢𑀺 𑀉𑀪𑁄 𑀅𑀦𑁆𑀢𑁂 𑀅𑀪𑀺𑀚𑀸𑀦𑀺𑀢𑁆𑀯𑀸. 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀻𑀢𑀺 𑀧𑀜𑁆𑀜𑀸𑀬 𑀦 𑀮𑀺𑀧𑁆𑀧𑀢𑀺.

𑁧𑁦𑁪𑁮-𑁯. 𑀢𑀲𑁆𑀲𑁂𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀪𑀕𑀯𑀸 ‘‘𑀓𑀸𑀫𑁂𑀲𑀽’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀓𑀸𑀫𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀢𑀺 𑀓𑀸𑀫𑀦𑀺𑀫𑀺𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸, 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀦𑁆𑀢𑀼𑀲𑀺𑀢𑀁 𑀤𑀲𑁆𑀲𑁂𑀢𑀺, ‘‘𑀯𑀻𑀢𑀢𑀡𑁆𑀳𑁄’’𑀢𑀺𑀆𑀤𑀻𑀳𑀺 𑀅𑀦𑀺𑀜𑁆𑀚𑀺𑀢𑀁. 𑀢𑀢𑁆𑀣 𑀲𑀗𑁆𑀔𑀸𑀬 𑀦𑀺𑀩𑁆𑀩𑀼𑀢𑁄𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀥𑀫𑁆𑀫𑁂 𑀯𑀻𑀫𑀁𑀲𑀺𑀢𑁆𑀯𑀸 𑀭𑀸𑀕𑀸𑀤𑀺𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑁄. 𑀲𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀫𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀬𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺 𑀲𑀤𑁆𑀥𑀺𑀁 𑀅𑀦𑁆𑀢𑁂𑀯𑀸𑀲𑀺𑀲𑀳𑀲𑁆𑀲𑁂𑀦, 𑀅𑀜𑁆𑀜𑁂𑀲𑀜𑁆𑀘 𑀅𑀦𑁂𑀓𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺. 𑀲𑁂𑀲𑀁 𑀧𑀼𑀩𑁆𑀩𑀲𑀤𑀺𑀲𑀫𑁂𑀯𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀼𑀡𑁆𑀡𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫𑁦. 𑀅𑀦𑁂𑀚𑀦𑁆𑀢𑀺 𑀧𑀼𑀡𑁆𑀡𑀓𑀲𑀼𑀢𑁆𑀢𑀁. 𑀇𑀫𑀫𑁆𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀫𑁄𑀖𑀭𑀸𑀚𑀸𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀽𑀮𑀤𑀲𑁆𑀲𑀸𑀯𑀺𑀦𑁆𑀢𑀺 𑀅𑀓𑀼𑀲𑀮𑀫𑀽𑀮𑀸𑀤𑀺𑀤𑀲𑁆𑀲𑀸𑀯𑀺𑀁. 𑀇𑀲𑀬𑁄𑀢𑀺 𑀇𑀲𑀺𑀦𑀸𑀫𑀓𑀸 𑀚𑀝𑀺𑀮𑀸. 𑀬𑀜𑁆𑀜𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀁. 𑀅𑀓𑀧𑁆𑀧𑀬𑀺𑀁𑀲𑀽𑀢𑀺 𑀧𑀭𑀺𑀬𑁂𑀲𑀦𑁆𑀢𑀺.

𑁧𑁦𑁫𑁧. 𑀆𑀲𑀻𑀲𑀫𑀸𑀦𑀸𑀢𑀺 𑀭𑀽𑀧𑀸𑀤𑀻𑀦𑀺 𑀧𑀢𑁆𑀣𑀬𑀫𑀸𑀦𑀸. 𑀇𑀢𑁆𑀣𑀢𑁆𑀢𑀦𑁆𑀢𑀺 𑀇𑀢𑁆𑀣𑀪𑀸𑀯𑀜𑁆𑀘 𑀧𑀢𑁆𑀣𑀬𑀫𑀸𑀦𑀸, 𑀫𑀦𑀼𑀲𑁆𑀲𑀸𑀤𑀺𑀪𑀸𑀯𑀁 𑀇𑀘𑁆𑀙𑀦𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀭𑀁 𑀲𑀺𑀢𑀸𑀢𑀺 𑀚𑀭𑀁 𑀦𑀺𑀲𑁆𑀲𑀺𑀢𑀸. 𑀚𑀭𑀸𑀫𑀼𑀔𑁂𑀦 𑀘𑁂𑀢𑁆𑀣 𑀲𑀩𑁆𑀩𑀯𑀝𑁆𑀝𑀤𑀼𑀓𑁆𑀔𑀁 𑀯𑀼𑀢𑁆𑀢𑀁. 𑀢𑁂𑀦 𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀺𑀢𑀸 𑀢𑀢𑁄 𑀅𑀧𑀭𑀺𑀫𑀼𑀘𑁆𑀘𑀫𑀸𑀦𑀸 𑀏𑀯 𑀓𑀧𑁆𑀧𑀬𑀺𑀁𑀲𑀽𑀢𑀺 𑀤𑀻𑀧𑁂𑀢𑀺.

𑁧𑁦𑁫𑁨. 𑀓𑀘𑁆𑀘𑀺𑀲𑁆𑀲𑀼 𑀢𑁂 𑀪𑀕𑀯𑀸 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸, 𑀅𑀢𑀸𑀭𑀼𑀁 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲𑀸𑀢𑀺 𑀏𑀢𑁆𑀣 𑀬𑀜𑁆𑀜𑁄𑀬𑁂𑀯 𑀬𑀜𑁆𑀜𑀧𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀘𑁆𑀘𑀺 𑀢𑁂 𑀬𑀜𑁆𑀜𑁂 𑀅𑀧𑁆𑀧𑀫𑀢𑁆𑀢𑀸 𑀳𑀼𑀢𑁆𑀯𑀸 𑀬𑀜𑁆𑀜𑀁 𑀓𑀧𑁆𑀧𑀬𑀦𑁆𑀢𑀸 𑀯𑀝𑁆𑀝𑀤𑀼𑀓𑁆𑀔𑀫𑀢𑀭𑀺𑀁𑀲𑀽𑀢𑀺.

𑁧𑁦𑁫𑁩. 𑀆𑀲𑀻𑀲𑀦𑁆𑀢𑀻𑀢𑀺 𑀭𑀽𑀧𑀧𑀝𑀺𑀮𑀸𑀪𑀸𑀤𑀬𑁄 𑀧𑀢𑁆𑀣𑁂𑀦𑁆𑀢𑀺. 𑀣𑁄𑀫𑀬𑀦𑁆𑀢𑀻𑀢𑀺 ‘‘𑀲𑀼𑀬𑀺𑀝𑁆𑀞𑀁 𑀲𑀼𑀘𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀜𑁆𑀜𑀸𑀤𑀻𑀦𑀺 𑀧𑀲𑀁𑀲𑀦𑁆𑀢𑀺. 𑀅𑀪𑀺𑀚𑀧𑁆𑀧𑀦𑁆𑀢𑀻𑀢𑀺 𑀭𑀽𑀧𑀸𑀤𑀺𑀧𑀝𑀺𑀮𑀸𑀪𑀸𑀬 𑀯𑀸𑀘𑀁 𑀪𑀺𑀦𑁆𑀤𑀦𑁆𑀢𑀺. 𑀚𑀼𑀳𑀦𑁆𑀢𑀻𑀢𑀺 𑀤𑁂𑀦𑁆𑀢𑀺. 𑀓𑀸𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀧𑀝𑀺𑀘𑁆𑀘 𑀮𑀸𑀪𑀦𑁆𑀢𑀺 𑀭𑀽𑀧𑀸𑀤𑀺𑀧𑀝𑀺𑀮𑀸𑀪𑀁 𑀧𑀝𑀺𑀘𑁆𑀘 𑀧𑀼𑀦𑀧𑁆𑀧𑀼𑀦𑀁 𑀓𑀸𑀫𑁂 𑀏𑀯 𑀅𑀪𑀺𑀚𑀧𑁆𑀧𑀦𑁆𑀢𑀺, ‘‘𑀅𑀳𑁄 𑀯𑀢 𑀅𑀫𑁆𑀳𑀸𑀓𑀁 𑀲𑀺𑀬𑀼’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀡𑁆𑀳𑀜𑁆𑀘 𑀢𑀢𑁆𑀣 𑀯𑀟𑁆𑀠𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀸𑀚𑀬𑁄𑀕𑀸𑀢𑀺 𑀬𑀸𑀕𑀸𑀥𑀺𑀫𑀼𑀢𑁆𑀢𑀸. 𑀪𑀯𑀭𑀸𑀕𑀭𑀢𑁆𑀢𑀸𑀢𑀺 𑀏𑀯𑀫𑀺𑀫𑁂𑀳𑀺 𑀆𑀲𑀻𑀲𑀦𑀸𑀤𑀻𑀳𑀺 𑀪𑀯𑀭𑀸𑀕𑁂𑀦𑁂𑀯 𑀭𑀢𑁆𑀢𑀸, 𑀪𑀯𑀭𑀸𑀕𑀭𑀢𑁆𑀢𑀸 𑀯𑀸 𑀳𑀼𑀢𑁆𑀯𑀸 𑀏𑀢𑀸𑀦𑀺 𑀆𑀲𑀻𑀲𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀆𑀤𑀺𑀯𑀝𑁆𑀝𑀤𑀼𑀓𑁆𑀔𑀁 𑀦 𑀉𑀢𑁆𑀢𑀭𑀺𑀁𑀲𑀽𑀢𑀺.

𑁧𑁦𑁫𑁪-𑁫. 𑀅𑀣𑀓𑁄𑀘𑀭𑀳𑀻𑀢𑀺 𑀅𑀣 𑀇𑀤𑀸𑀦𑀺 𑀓𑁄 𑀅𑀜𑁆𑀜𑁄 𑀅𑀢𑀸𑀭𑀻𑀢𑀺. 𑀲𑀗𑁆𑀔𑀸𑀬𑀸𑀢𑀺 𑀜𑀸𑀡𑁂𑀦 𑀯𑀻𑀫𑀁𑀲𑀺𑀢𑁆𑀯𑀸. 𑀧𑀭𑁄𑀧𑀭𑀸𑀦𑀻𑀢𑀺 𑀧𑀭𑀸𑀦𑀺 𑀘 𑀑𑀭𑀸𑀦𑀺 𑀘, 𑀧𑀭𑀢𑁆𑀢𑀪𑀸𑀯𑀲𑀓𑀢𑁆𑀢𑀪𑀸𑀯𑀸𑀤𑀻𑀦𑀺 𑀧𑀭𑀸𑀦𑀺 𑀘 𑀑𑀭𑀸𑀦𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀥𑀽𑀫𑁄𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀥𑀽𑀫𑀯𑀺𑀭𑀳𑀺𑀢𑁄. 𑀅𑀦𑀻𑀖𑁄𑀢𑀺 𑀭𑀸𑀕𑀸𑀤𑀺𑀈𑀖𑀯𑀺𑀭𑀳𑀺𑀢𑁄. 𑀅𑀢𑀸𑀭𑀺 𑀲𑁄𑀢𑀺 𑀲𑁄 𑀏𑀯𑀭𑀽𑀧𑁄 𑀅𑀭𑀳𑀸 𑀚𑀸𑀢𑀺𑀚𑀭𑀁 𑀅𑀢𑀸𑀭𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀫𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀬𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺 𑀲𑀤𑁆𑀥𑀺𑀁 𑀅𑀦𑁆𑀢𑁂𑀯𑀸𑀲𑀺𑀲𑀳𑀲𑁆𑀲𑁂𑀦, 𑀅𑀜𑁆𑀜𑁂𑀲𑀜𑁆𑀘 𑀅𑀦𑁂𑀓𑀲𑀢𑀸𑀦𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺. 𑀲𑁂𑀲𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀧𑀼𑀡𑁆𑀡𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑁂𑀢𑁆𑀢𑀕𑀽𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫𑁬. 𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀫𑁂𑀢𑁆𑀢𑀕𑀼𑀲𑀼𑀢𑁆𑀢𑀁. 𑀢𑀢𑁆𑀣 𑀫𑀜𑁆𑀜𑀸𑀫𑀺 𑀢𑀁 𑀯𑁂𑀤𑀕𑀼𑀁 𑀪𑀸𑀯𑀺𑀢𑀢𑁆𑀢𑀦𑁆𑀢𑀺 ‘‘𑀅𑀬𑀁 𑀯𑁂𑀤𑀕𑀽’’𑀢𑀺 𑀘 ‘‘𑀪𑀸𑀯𑀺𑀢𑀢𑁆𑀢𑁄’’𑀢𑀺 𑀘 𑀏𑀯𑀁 𑀢𑀁 𑀫𑀜𑁆𑀜𑀸𑀫𑀺.

𑁧𑁦𑁫𑁭. 𑀅𑀧𑀼𑀘𑁆𑀙𑀲𑀻𑀢𑀺 𑀏𑀢𑁆𑀣 𑀅-𑀇𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄, 𑀧𑀼𑀘𑁆𑀙𑀲𑀺𑀘𑁆𑀘𑁂𑀯 𑀅𑀢𑁆𑀣𑁄. 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦𑀦𑁆𑀢𑀺 𑀬𑀣𑀸 𑀧𑀚𑀸𑀦𑀦𑁆𑀢𑁄 𑀆𑀘𑀺𑀓𑁆𑀔𑀢𑀺, 𑀏𑀯𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺. 𑀉𑀧𑀥𑀺𑀦𑀺𑀤𑀸𑀦𑀸 𑀧𑀪𑀯𑀦𑁆𑀢𑀺 𑀤𑀼𑀓𑁆𑀔𑀸𑀢𑀺 𑀢𑀡𑁆𑀳𑀸𑀤𑀺𑀉𑀧𑀥𑀺𑀦𑀺𑀤𑀸𑀦𑀸 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀯𑀺𑀲𑁂𑀲𑀸 𑀧𑀪𑀯𑀦𑁆𑀢𑀺.

𑁧𑁦𑁫𑁮. 𑀏𑀯𑀁 𑀉𑀧𑀥𑀺𑀦𑀺𑀤𑀸𑀦𑀢𑁄 𑀧𑀪𑀯𑀦𑁆𑀢𑁂𑀲𑀼 𑀤𑀼𑀓𑁆𑀔𑁂𑀲𑀼 𑁋 𑀬𑁄 𑀯𑁂 𑀅𑀯𑀺𑀤𑁆𑀯𑀸𑀢𑀺 𑀕𑀸𑀣𑀸. 𑀢𑀢𑁆𑀣 𑀧𑀚𑀸𑀦𑀦𑁆𑀢𑀺 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀚𑀸𑀦𑀦𑁆𑀢𑁄. 𑀤𑀼𑀓𑁆𑀔𑀲𑁆𑀲𑀚𑀸𑀢𑀺𑀧𑁆𑀧𑀪𑀯𑀸𑀦𑀼𑀧𑀲𑁆𑀲𑀻𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀚𑀸𑀢𑀺𑀓𑀸𑀭𑀡𑀁 ‘‘𑀉𑀧𑀥𑀻’’𑀢𑀺 𑀅𑀦𑀼𑀧𑀲𑁆𑀲𑀦𑁆𑀢𑁄.

𑁧𑁦𑁫𑁯. 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘𑀸𑀢𑀺 𑀲𑁄𑀓𑀜𑁆𑀘 𑀧𑀭𑀺𑀤𑁂𑀯𑀜𑁆𑀘. 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺 𑀬𑀣𑀸 𑀬𑀣𑀸 𑀲𑀢𑁆𑀢𑀸 𑀚𑀸𑀦𑀦𑁆𑀢𑀺, 𑀢𑀣𑀸 𑀢𑀣𑀸 𑀧𑀜𑁆𑀜𑀸𑀧𑀦𑀯𑀲𑁂𑀦 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺.

𑁧𑁦𑁬𑁦-𑁬𑁧. 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀥𑀫𑁆𑀫𑀦𑁆𑀢𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀥𑀫𑁆𑀫𑀜𑁆𑀘 𑀢𑁂 𑀤𑁂𑀲𑀬𑀺𑀲𑁆𑀲𑀸𑀫𑀺. 𑀤𑀺𑀝𑁆𑀞𑁂 𑀥𑀫𑁆𑀫𑁂𑀢𑀺 𑀤𑀺𑀝𑁆𑀞𑁂 𑀤𑀼𑀓𑁆𑀔𑀸𑀤𑀺𑀥𑀫𑁆𑀫𑁂, 𑀇𑀫𑀲𑁆𑀫𑀺𑀁𑀬𑁂𑀯 𑀯𑀸 𑀅𑀢𑁆𑀢𑀪𑀸𑀯𑁂. 𑀅𑀦𑀻𑀢𑀺𑀳𑀦𑁆𑀢𑀺 𑀅𑀢𑁆𑀢𑀧𑀘𑁆𑀘𑀓𑁆𑀔𑀁. 𑀬𑀁 𑀯𑀺𑀤𑀺𑀢𑁆𑀯𑀸𑀢𑀺 𑀬𑀁 𑀥𑀫𑁆𑀫𑀁 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑁆𑀫𑀲𑀦𑁆𑀢𑁄 𑀯𑀺𑀤𑀺𑀢𑁆𑀯𑀸. 𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀻𑀢𑀺 𑀢𑀁 𑀯𑀼𑀢𑁆𑀢𑀧𑀓𑀸𑀭𑀥𑀫𑁆𑀫𑀚𑁄𑀢𑀓𑀁 𑀢𑀯 𑀯𑀘𑀦𑀁 𑀅𑀳𑀁 𑀧𑀢𑁆𑀣𑀬𑀸𑀫𑀺. 𑀥𑀫𑁆𑀫𑀫𑀼𑀢𑁆𑀢𑀫𑀦𑁆𑀢𑀺 𑀢𑀜𑁆𑀘 𑀥𑀫𑁆𑀫𑀫𑀼𑀢𑁆𑀢𑀫𑀁 𑀅𑀪𑀺𑀦𑀦𑁆𑀤𑀸𑀫𑀻𑀢𑀺.

𑁧𑁦𑁬𑁨. 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀏𑀢𑁆𑀣 𑀉𑀤𑁆𑀥𑀦𑁆𑀢𑀺 𑀅𑀦𑀸𑀕𑀢𑀤𑁆𑀥𑀸 𑀯𑀼𑀘𑁆𑀘𑀢𑀺, 𑀅𑀥𑁄𑀢𑀺 𑀅𑀢𑀻𑀢𑀤𑁆𑀥𑀸, 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀸. 𑀏𑀢𑁂𑀲𑀼 𑀦𑀦𑁆𑀤𑀺𑀜𑁆𑀘 𑀦𑀺𑀯𑁂𑀲𑀦𑀜𑁆𑀘, 𑀧𑀦𑀼𑀚𑁆𑀚 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀢𑁂𑀲𑀼 𑀉𑀤𑁆𑀥𑀸𑀤𑀻𑀲𑀼 𑀢𑀡𑁆𑀳𑀜𑁆𑀘 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑀜𑁆𑀘 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀜𑁆𑀘 𑀧𑀦𑀼𑀤𑁂𑀳𑀺, 𑀧𑀦𑀼𑀤𑀺𑀢𑁆𑀯𑀸 𑀘 𑀪𑀯𑁂 𑀦 𑀢𑀺𑀝𑁆𑀞𑁂, 𑀏𑀯𑀁 𑀲𑀦𑁆𑀢𑁂 𑀤𑀼𑀯𑀺𑀥𑁂𑀧𑀺 𑀪𑀯𑁂 𑀦 𑀢𑀺𑀝𑁆𑀞𑁂𑀬𑁆𑀬. 𑀏𑀯𑀁 𑀢𑀸𑀯 𑀧𑀦𑀼𑀚𑁆𑀚𑀲𑀤𑁆𑀤𑀲𑁆𑀲 𑀧𑀦𑀼𑀤𑁂𑀳𑀻𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀲𑀫𑁆𑀩𑀦𑁆𑀥𑁄, 𑀧𑀦𑀼𑀤𑀺𑀢𑁆𑀯𑀸𑀢𑀺 𑀏𑀢𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀪𑀯𑁂 𑀦 𑀢𑀺𑀝𑁆𑀞𑁂𑀢𑀺 𑀅𑀬𑀫𑁂𑀯 𑀲𑀫𑁆𑀩𑀦𑁆𑀥𑁄. 𑀏𑀢𑀸𑀦𑀺 𑀦𑀦𑁆𑀤𑀺𑀦𑀺𑀯𑁂𑀲𑀦𑀯𑀺𑀜𑁆𑀜𑀸𑀡𑀸𑀦𑀺 𑀧𑀦𑀼𑀤𑀺𑀢𑁆𑀯𑀸 𑀤𑀼𑀯𑀺𑀥𑁂𑀧𑀺 𑀪𑀯𑁂 𑀦 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁦𑁬𑁩-𑁪. 𑀏𑀢𑀸𑀦𑀺 𑀯𑀺𑀦𑁄𑀤𑁂𑀢𑁆𑀯𑀸 𑀪𑀯𑁂 𑀅𑀢𑀺𑀝𑁆𑀞𑀦𑁆𑀢𑁄 𑀏𑀲𑁄 𑁋 𑀏𑀯𑀁𑀯𑀺𑀳𑀸𑀭𑀻𑀢𑀺 𑀕𑀸𑀣𑀸. 𑀢𑀢𑁆𑀣 𑀇𑀥𑁂𑀯𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀲𑀸𑀲𑀦𑁂, 𑀇𑀫𑀲𑁆𑀫𑀺𑀁𑀬𑁂𑀯 𑀯𑀸 𑀅𑀢𑁆𑀢𑀪𑀸𑀯𑁂. 𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓𑀦𑁆𑀢𑀺 𑀏𑀢𑁆𑀣 𑀅𑀦𑀼𑀧𑀥𑀺𑀓𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀁 𑀲𑀦𑁆𑀥𑀸𑀬 𑀪𑀕𑀯𑀦𑁆𑀢𑀁 𑀆𑀮𑀧𑀦𑁆𑀢𑁄 𑀆𑀳 𑁋 ‘‘𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓’’𑀦𑁆𑀢𑀺.

𑁧𑁦𑁬𑁫. 𑀦 𑀓𑁂𑀯𑀮𑀁 𑀤𑀼𑀓𑁆𑀔𑀫𑁂𑀯 𑀧𑀳𑀸𑀲𑀺 𑁋 𑀢𑁂 𑀘𑀸𑀧𑀻𑀢𑀺 𑀕𑀸𑀣𑀸. 𑀢𑀢𑁆𑀣 𑀅𑀝𑁆𑀞𑀺𑀢𑀦𑁆𑀢𑀺 𑀲𑀓𑁆𑀓𑀘𑁆𑀘𑀁, 𑀲𑀤𑀸 𑀯𑀸. 𑀢𑀁 𑀢𑀁 𑀦𑀫𑀲𑁆𑀲𑀸𑀫𑀻𑀢𑀺 𑀢𑀲𑁆𑀫𑀸 𑀢𑀁 𑀦𑀫𑀲𑁆𑀲𑀸𑀫𑀺. 𑀲𑀫𑁂𑀘𑁆𑀘𑀸𑀢𑀺 𑀉𑀧𑀕𑀦𑁆𑀢𑁆𑀯𑀸. 𑀦𑀸𑀕𑀸𑀢𑀺 𑀪𑀕𑀯𑀦𑁆𑀢𑀁 𑀆𑀮𑀧𑀦𑁆𑀢𑁄 𑀆𑀳.

𑁧𑁦𑁬𑁬. 𑀇𑀤𑀸𑀦𑀺 𑀢𑀁 𑀪𑀕𑀯𑀸 ‘‘𑀅𑀤𑁆𑀥𑀸 𑀳𑀺 𑀪𑀕𑀯𑀸 𑀧𑀳𑀸𑀲𑀺 𑀤𑀼𑀓𑁆𑀔’’𑀦𑁆𑀢𑀺 𑀏𑀯𑀁 𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀯𑀺𑀤𑀺𑀢𑁄𑀧𑀺 𑀅𑀢𑁆𑀢𑀸𑀦𑀁 𑀅𑀦𑀼𑀧𑀦𑁂𑀢𑁆𑀯𑀸𑀯 𑀧𑀳𑀻𑀦𑀤𑀼𑀓𑁆𑀔𑁂𑀦 𑀧𑀼𑀕𑁆𑀕𑀮𑁂𑀦 𑀑𑀯𑀤𑀦𑁆𑀢𑁄 ‘‘𑀬𑀁 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀁 𑀢𑁆𑀯𑀁 𑀅𑀪𑀺𑀚𑀸𑀦𑀦𑁆𑀢𑁄 ‘‘𑀅𑀬𑀁 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄, 𑀯𑁂𑀤𑁂𑀳𑀺 𑀕𑀢𑀢𑁆𑀢𑀸 𑀯𑁂𑀤𑀕𑀽, 𑀓𑀺𑀜𑁆𑀘𑀦𑀸𑀪𑀸𑀯𑁂𑀦 𑀅𑀓𑀺𑀜𑁆𑀘𑀦𑁄, 𑀓𑀸𑀫𑁂𑀲𑀼 𑀘 𑀪𑀯𑁂𑀲𑀼 𑀘 𑀅𑀲𑀢𑁆𑀢𑀢𑁆𑀢𑀸 𑀓𑀸𑀫𑀪𑀯𑁂 𑀅𑀲𑀢𑁆𑀢𑁄’’𑀢𑀺 𑀚𑀜𑁆𑀜𑀸 𑀚𑀸𑀦𑁂𑀬𑁆𑀬𑀸𑀲𑀺. 𑀅𑀤𑁆𑀥𑀸 𑀳𑀺 𑀲𑁄 𑀇𑀫𑀁 𑀑𑀖𑀁 𑀅𑀢𑀸𑀭𑀺, 𑀢𑀺𑀡𑁆𑀡𑁄 𑀘 𑀧𑀸𑀭𑀁 𑀅𑀔𑀺𑀮𑁄 𑀅𑀓𑀗𑁆𑀔𑁄.

𑁧𑁦𑁬𑁭. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀯𑀺𑀤𑁆𑀯𑀸 𑀘 𑀬𑁄𑀢𑀺 𑀕𑀸𑀣𑀸. 𑀢𑀢𑁆𑀣 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂, 𑀅𑀢𑁆𑀢𑀪𑀸𑀯𑁂 𑀯𑀸. 𑀯𑀺𑀲𑀚𑁆𑀚𑀸𑀢𑀺 𑀯𑁄𑀲𑁆𑀲𑀚𑁆𑀚𑀺𑀢𑁆𑀯𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀫𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀯𑀼𑀢𑁆𑀢𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀫𑁂𑀢𑁆𑀢𑀕𑀽𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀥𑁄𑀢𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁬𑁮-𑁯. 𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀥𑁄𑀢𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀻𑀢𑀺 𑀯𑀸𑀘𑀁 𑀅𑀪𑀺𑀓𑀗𑁆𑀔𑀸𑀫𑀺. 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀭𑀸𑀕𑀸𑀤𑀻𑀦𑀁 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀅𑀥𑀺𑀲𑀻𑀮𑀸𑀤𑀻𑀦𑀺 𑀲𑀺𑀓𑁆𑀔𑁂𑀬𑁆𑀬. 𑀇𑀢𑁄𑀢𑀺 𑀫𑀫 𑀫𑀼𑀔𑀢𑁄.

𑁧𑁦𑁭𑁦. 𑀏𑀯𑀁 𑀯𑀼𑀢𑁆𑀢𑁂 𑀅𑀢𑁆𑀢𑀫𑀦𑁄 𑀥𑁄𑀢𑀓𑁄 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀫𑀸𑀦𑁄 𑀓𑀣𑀁𑀓𑀣𑀸𑀧𑀫𑁄𑀓𑁆𑀔𑀁 𑀬𑀸𑀘𑀦𑁆𑀢𑁄 ‘‘𑀧𑀲𑁆𑀲𑀸𑀫𑀳’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀲𑁆𑀲𑀸𑀫𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑀧𑀲𑁆𑀲𑀸𑀫𑀺 𑀅𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂. 𑀢𑀁 𑀢𑀁 𑀦𑀫𑀲𑁆𑀲𑀸𑀫𑀻𑀢𑀺 𑀢𑀁 𑀏𑀯𑀭𑀽𑀧𑀁 𑀦𑀫𑀲𑁆𑀲𑀸𑀫𑀺. 𑀧𑀫𑀼𑀜𑁆𑀘𑀸𑀢𑀺 𑀧𑀫𑁄𑀘𑁂𑀳𑀺.

𑁧𑁦𑁭𑁧. 𑀅𑀣𑀲𑁆𑀲 𑀪𑀕𑀯𑀸 𑀅𑀢𑁆𑀢𑀸𑀥𑀻𑀦𑀫𑁂𑀯 𑀓𑀣𑀁𑀓𑀣𑀸𑀧𑀫𑁄𑀓𑁆𑀔𑀁 𑀑𑀖𑀢𑀭𑀡𑀫𑀼𑀔𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸𑀳’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀻𑀢𑀺 𑀅𑀳𑀁 𑀦 𑀲𑀳𑀺𑀲𑁆𑀲𑀸𑀫𑀺 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀦 𑀯𑀸𑀬𑀫𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀫𑁄𑀘𑀦𑀸𑀬𑀸𑀢𑀺 𑀧𑀫𑀸𑀘𑁂𑀢𑀼𑀁. 𑀓𑀣𑀁𑀓𑀣𑀺𑀦𑁆𑀢𑀺 𑀲𑀓𑀗𑁆𑀔𑀁. 𑀢𑀭𑁂𑀲𑀻𑀢𑀺 𑀢𑀭𑁂𑀬𑁆𑀬𑀸𑀲𑀺.

𑁧𑁦𑁭𑁨-𑁫. 𑀏𑀯𑀁 𑀯𑀼𑀢𑁆𑀢𑁂 𑀅𑀢𑁆𑀢𑀫𑀦𑀢𑀭𑁄 𑀥𑁄𑀢𑀓𑁄 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀫𑀸𑀦𑁄 𑀅𑀦𑀼𑀲𑀸𑀲𑀦𑀺𑀁 𑀬𑀸𑀘𑀦𑁆𑀢𑁄 ‘‘𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀩𑁆𑀭𑀳𑁆𑀫𑀸𑀢𑀺 𑀲𑁂𑀝𑁆𑀞𑀯𑀘𑀦𑀫𑁂𑀢𑀁. 𑀢𑁂𑀦 𑀪𑀕𑀯𑀦𑁆𑀢𑀁 𑀆𑀫𑀦𑁆𑀢𑀬𑀫𑀸𑀦𑁄 𑀆𑀳 𑁋 ‘‘𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂’’𑀢𑀺. 𑀯𑀺𑀯𑁂𑀓𑀥𑀫𑁆𑀫𑀦𑁆𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀯𑁂𑀓𑀦𑀺𑀩𑁆𑀩𑀸𑀦𑀥𑀫𑁆𑀫𑀁. 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄𑀢𑀺 𑀦𑀸𑀦𑀧𑁆𑀧𑀓𑀸𑀭𑀢𑀁 𑀅𑀦𑀸𑀧𑀚𑁆𑀚𑀫𑀸𑀦𑁄. 𑀇𑀥𑁂𑀯 𑀲𑀦𑁆𑀢𑁄𑀢𑀺 𑀇𑀥𑁂𑀯 𑀲𑀫𑀸𑀦𑁄. 𑀅𑀲𑀺𑀢𑁄𑀢𑀺 𑀅𑀦𑀺𑀲𑁆𑀲𑀺𑀢𑁄. 𑀇𑀢𑁄 𑀧𑀭𑀸 𑀤𑁆𑀯𑁂 𑀕𑀸𑀣𑀸 𑀫𑁂𑀢𑁆𑀢𑀕𑀼𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀸 𑀏𑀯. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀥𑀫𑁆𑀫𑀁, 𑀇𑀥 𑀲𑀦𑁆𑀢𑀺𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀢𑀢𑀺𑀬𑀕𑀸𑀣𑀸𑀬𑀧𑀺 𑀧𑀼𑀩𑁆𑀩𑀟𑁆𑀠𑀁 𑀢𑀢𑁆𑀣 𑀯𑀼𑀢𑀦𑀬𑀫𑁂𑀯 𑀅𑀧𑀭𑀟𑁆𑀠𑁂 𑀲𑀗𑁆𑀕𑁄𑀢𑀺 𑀲𑀚𑁆𑀚𑀦𑀝𑁆𑀞𑀸𑀦𑀁, 𑀮𑀕𑁆𑀕𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀫𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀯𑀼𑀢𑁆𑀢𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀥𑁄𑀢𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀉𑀧𑀲𑀻𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁭𑁬. 𑀏𑀓𑁄 𑀅𑀳𑀦𑁆𑀢𑀺 𑀉𑀧𑀲𑀻𑀯𑀲𑀼𑀢𑁆𑀢𑀁. 𑀢𑀢𑁆𑀣 𑀫𑀳𑀦𑁆𑀢𑀫𑁄𑀖𑀦𑁆𑀢𑀺 𑀫𑀳𑀦𑁆𑀢𑀁 𑀑𑀖𑀁. 𑀅𑀦𑀺𑀲𑁆𑀲𑀺𑀢𑁄𑀢𑀺 𑀧𑀼𑀕𑁆𑀕𑀮𑀁 𑀯𑀸 𑀥𑀫𑁆𑀫𑀁 𑀯𑀸 𑀅𑀦𑀺𑀲𑁆𑀲𑀺𑀢𑁄. 𑀦𑁄 𑀯𑀺𑀲𑀳𑀸𑀫𑀻𑀢𑀺 𑀦 𑀲𑀓𑁆𑀓𑁄𑀫𑀺. 𑀆𑀭𑀫𑁆𑀫𑀡𑀦𑁆𑀢𑀺 𑀦𑀺𑀲𑁆𑀲𑀬𑀁. 𑀬𑀁 𑀦𑀺𑀲𑁆𑀲𑀺𑀢𑁄𑀢𑀺 𑀬𑀁 𑀧𑀼𑀕𑁆𑀕𑀮𑀁 𑀯𑀸 𑀥𑀫𑁆𑀫𑀁 𑀯𑀸 𑀦𑀺𑀲𑁆𑀲𑀺𑀢𑁄.

𑁧𑁦𑁭𑁭. 𑀇𑀤𑀸𑀦𑀺 𑀬𑀲𑁆𑀫𑀸 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀮𑀸𑀪𑀻 𑀢𑀜𑁆𑀘 𑀲𑀦𑁆𑀢𑀫𑁆𑀧𑀺 𑀦𑀺𑀲𑁆𑀲𑀬𑀁 𑀦 𑀚𑀸𑀦𑀸𑀢𑀺, 𑀢𑁂𑀦𑀲𑁆𑀲 𑀪𑀕𑀯𑀸 𑀢𑀜𑁆𑀘 𑀦𑀺𑀲𑁆𑀲𑀬𑀁 𑀉𑀢𑁆𑀢𑀭𑀺 𑀘 𑀦𑀺𑀬𑁆𑀬𑀸𑀦𑀧𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀓𑀺𑀜𑁆𑀘𑀜𑁆𑀜’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑁂𑀓𑁆𑀔𑀫𑀸𑀦𑁄𑀢𑀺 𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀲𑀢𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀲𑁆𑀲𑀫𑀸𑀦𑁄. 𑀦𑀢𑁆𑀣𑀻𑀢𑀺 𑀦𑀺𑀲𑁆𑀲𑀸𑀬𑀸𑀢𑀺 𑀢𑀁 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀧𑀯𑀢𑁆𑀢𑀲𑀫𑀸𑀧𑀢𑁆𑀢𑀺𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀢𑀭𑀲𑁆𑀲𑀼 𑀑𑀖𑀦𑁆𑀢𑀺 𑀢𑀢𑁄 𑀧𑀪𑀼𑀢𑀺 𑀧𑀯𑀢𑁆𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀬𑀣𑀸𑀦𑀼𑀭𑀽𑀧𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀑𑀖𑀁 𑀢𑀭𑀲𑁆𑀲𑀼. 𑀓𑀣𑀸𑀳𑀻𑀢𑀺 𑀓𑀣𑀁𑀓𑀣𑀸𑀳𑀺. 𑀢𑀡𑁆𑀳𑀓𑁆𑀔𑀬𑀁 𑀦𑀢𑁆𑀢𑀫𑀳𑀸𑀪𑀺𑀧𑀲𑁆𑀲𑀸𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀦𑀺𑀩𑁆𑀩𑀸𑀦𑀁 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀧𑀲𑁆𑀲. 𑀏𑀢𑁂𑀦𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀓𑀣𑁂𑀢𑀺.

𑁧𑁦𑁭𑁮-𑁯. 𑀇𑀤𑀸𑀦𑀺 ‘‘𑀓𑀸𑀫𑁂 𑀧𑀳𑀸𑀬𑀸’’𑀢𑀺 𑀲𑀼𑀢𑁆𑀯𑀸 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀅𑀢𑁆𑀢𑀦𑀸 𑀧𑀳𑀻𑀦𑁂 𑀓𑀸𑀫𑁂 𑀲𑀫𑁆𑀧𑀲𑁆𑀲𑀫𑀸𑀦𑁄 ‘‘𑀲𑀩𑁆𑀩𑁂𑀲𑀽’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀳𑀺𑀢𑁆𑀯𑀸 𑀫𑀜𑁆𑀜𑀦𑁆𑀢𑀺 𑀅𑀜𑁆𑀜𑀁 𑀢𑀢𑁄 𑀳𑁂𑀝𑁆𑀞𑀸 𑀙𑀩𑁆𑀩𑀺𑀥𑀫𑁆𑀧𑀺 𑀲𑀫𑀸𑀧𑀢𑁆𑀢𑀺𑀁 𑀳𑀺𑀢𑁆𑀯𑀸. 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁂 𑀧𑀭𑀫𑁂𑀢𑀺 𑀲𑀢𑁆𑀢𑀲𑀼 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁂𑀲𑀼 𑀉𑀢𑁆𑀢𑀫𑁂 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂. 𑀢𑀺𑀝𑁆𑀞𑁂 𑀦𑀼 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀢𑀢𑁆𑀣 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀩𑁆𑀭𑀳𑁆𑀫𑀮𑁄𑀓𑁂 𑀅𑀯𑀺𑀕𑀘𑁆𑀙𑀫𑀸𑀦𑁄 𑀢𑀺𑀝𑁆𑀞𑁂𑀬𑁆𑀬 𑀦𑀽𑀢𑀺 𑀧𑀼𑀘𑁆𑀙𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀲𑀝𑁆𑀞𑀺𑀓𑀧𑁆𑀧𑀲𑀳𑀲𑁆𑀲𑀫𑀢𑁆𑀢𑀁𑀬𑁂𑀯 𑀞𑀸𑀦𑀁 𑀅𑀦𑀼𑀚𑀸𑀦𑀦𑁆𑀢𑁄 𑀢𑀢𑀺𑀬𑀕𑀸𑀣𑀫𑀸𑀳.

𑁧𑁦𑁮𑁦. 𑀏𑀯𑀁 𑀢𑀲𑁆𑀲 𑀢𑀢𑁆𑀣 𑀞𑀸𑀦𑀁 𑀲𑀼𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀲𑀲𑁆𑀲𑀢𑀼𑀘𑁆𑀙𑁂𑀤𑀪𑀸𑀯𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀢𑀺𑀝𑁆𑀞𑁂 𑀘𑁂’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀽𑀕𑀫𑁆𑀧𑀺 𑀯𑀲𑁆𑀲𑀸𑀦𑀦𑁆𑀢𑀺 𑀅𑀦𑁂𑀓𑀲𑀗𑁆𑀔𑁆𑀬𑀫𑁆𑀧𑀺 𑀯𑀲𑁆𑀲𑀸𑀦𑀁, 𑀕𑀡𑀭𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀽𑀕𑀫𑁆𑀧𑀺 𑀯𑀲𑁆𑀲𑀸𑀦𑀻’’𑀢𑀺𑀧𑀺 𑀧𑀸𑀞𑁄, 𑀢𑀢𑁆𑀣 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁂𑀦 𑀲𑀸𑀫𑀺𑀯𑀘𑀦𑀲𑁆𑀲 𑀧𑀘𑁆𑀘𑀢𑁆𑀢𑀯𑀘𑀦𑀁 𑀓𑀢𑁆𑀢𑀩𑁆𑀩𑀁, 𑀧𑀽𑀕𑀦𑁆𑀢𑀺 𑀯𑀸 𑀏𑀢𑀲𑁆𑀲 𑀩𑀳𑀽𑀦𑀻𑀢𑀺 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. ‘‘𑀧𑀽𑀕𑀸𑀦𑀻’’𑀢𑀺 𑀯𑀸𑀧𑀺 𑀧𑀞𑀦𑁆𑀢𑀺, 𑀧𑀼𑀭𑀺𑀫𑀧𑀸𑀞𑁄𑀬𑁂𑀯 𑀲𑀩𑁆𑀩𑀲𑀼𑀦𑁆𑀤𑀭𑁄. 𑀢𑀢𑁆𑀣𑁂𑀯 𑀲𑁄 𑀲𑀻𑀢𑀺 𑀲𑀺𑀬𑀸 𑀯𑀺𑀫𑀼𑀢𑁆𑀢𑁄𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀢𑀢𑁆𑀣𑁂𑀯𑀸𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀦𑀸𑀦𑀸𑀤𑀼𑀓𑁆𑀔𑁂𑀳𑀺 𑀯𑀺𑀫𑀼𑀢𑁆𑀢𑁄 𑀲𑀻𑀢𑀺𑀪𑀸𑀯𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬, 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀲𑀲𑁆𑀲𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀯𑁂𑀣 𑀯𑀺𑀜𑁆𑀜𑀸𑀡𑀁 𑀢𑀣𑀸𑀯𑀺𑀥𑀲𑁆𑀲𑀸𑀢𑀺 𑀉𑀤𑀸𑀳𑀼 𑀢𑀣𑀸𑀯𑀺𑀥𑀲𑁆𑀲 𑀯𑀺𑀜𑁆𑀜𑀸𑀡𑀁 𑀅𑀦𑀼𑀧𑀸𑀤𑀸𑀬 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬𑀸𑀢𑀺 𑀉𑀘𑁆𑀙𑁂𑀤𑀁 𑀧𑀼𑀘𑁆𑀙𑀢𑀺, 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁆𑀣𑀁 𑀯𑀸𑀧𑀺 𑀪𑀯𑁂𑀬𑁆𑀬𑀸𑀢𑀺 𑀧𑀝𑀺𑀲𑀦𑁆𑀥𑀺𑀫𑁆𑀧𑀺 𑀢𑀲𑁆𑀲 𑀧𑀼𑀘𑁆𑀙𑀢𑀺.

𑁧𑁦𑁮𑁧. 𑀅𑀣𑀲𑁆𑀲 𑀪𑀕𑀯𑀸 𑀉𑀘𑁆𑀙𑁂𑀤𑀲𑀲𑁆𑀲𑀢𑀁 𑀅𑀦𑀼𑀧𑀕𑀫𑁆𑀫 𑀢𑀢𑁆𑀣 𑀉𑀧𑁆𑀧𑀦𑁆𑀦𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀦𑀼𑀧𑀸𑀤𑀸𑀬 𑀧𑀭𑀺𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀘𑁆𑀘𑀻 𑀬𑀣𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀢𑁆𑀣𑀁 𑀧𑀮𑁂𑀢𑀻𑀢𑀺 𑀅𑀢𑁆𑀣𑀁 𑀕𑀘𑁆𑀙𑀢𑀺. 𑀦 𑀉𑀧𑁂𑀢𑀺 𑀲𑀗𑁆𑀔𑀦𑁆𑀢𑀺 ‘‘𑀅𑀲𑀼𑀓𑀁 𑀦𑀸𑀫 𑀤𑀺𑀲𑀁 𑀕𑀢𑁄’’𑀢𑀺 𑀯𑁄𑀳𑀸𑀭𑀁 𑀦 𑀕𑀘𑁆𑀙𑀢𑀺. 𑀏𑀯𑀁 𑀫𑀼𑀦𑀻 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄𑀢𑀺 𑀏𑀯𑀁 𑀢𑀢𑁆𑀣 𑀉𑀧𑁆𑀧𑀦𑁆𑀦𑁄 𑀲𑁂𑀓𑁆𑀔𑀫𑀼𑀦𑀺 𑀧𑀓𑀢𑀺𑀬𑀸 𑀧𑀼𑀩𑁆𑀩𑁂𑀯 𑀭𑀽𑀧𑀓𑀸𑀬𑀸 𑀯𑀺𑀫𑀼𑀢𑁆𑀢𑁄 𑀢𑀢𑁆𑀣 𑀘𑀢𑀼𑀢𑁆𑀣𑀫𑀕𑁆𑀕𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀥𑀫𑁆𑀫𑀓𑀸𑀬𑀲𑁆𑀲 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀧𑀼𑀦 𑀦𑀸𑀫𑀓𑀸𑀬𑀸𑀧𑀺 𑀯𑀺𑀫𑀼𑀢𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀔𑀻𑀡𑀸𑀲𑀯𑁄 𑀳𑀼𑀢𑁆𑀯𑀸 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀧𑀮𑁂𑀢𑀺, 𑀦 𑀉𑀧𑁂𑀢𑀺 𑀲𑀗𑁆𑀔𑀁 ‘‘𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸’’𑀢𑀺 𑀏𑀯𑀫𑀸𑀤𑀺𑀓𑀁.

𑁧𑁦𑁮𑁨. 𑀇𑀤𑀸𑀦𑀺 ‘‘𑀅𑀢𑁆𑀣𑀁 𑀧𑀮𑁂𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀲𑁆𑀲 𑀬𑁄𑀦𑀺𑀲𑁄 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 ‘‘𑀅𑀢𑁆𑀣𑀗𑁆𑀕𑀢𑁄 𑀲𑁄’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀲𑁄 𑀅𑀢𑁆𑀣𑀗𑁆𑀕𑀢𑁄 𑀉𑀤𑀸𑀳𑀼 𑀦𑀢𑁆𑀣𑀺, 𑀉𑀤𑀸𑀳𑀼 𑀯𑁂 𑀲𑀲𑁆𑀲𑀢𑀺𑀬𑀸 𑀲𑀲𑁆𑀲𑀢𑀪𑀸𑀯𑁂𑀦 𑀅𑀭𑁄𑀕𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑁄𑀢𑀺 𑀏𑀯𑀁 𑀢𑀁 𑀫𑁂 𑀫𑀼𑀦𑀻 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺. 𑀓𑀺𑀁 𑀓𑀸𑀭𑀡𑀁? 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺.

𑁧𑁦𑁮𑁩. 𑀅𑀣𑀲𑁆𑀲 𑀪𑀕𑀯𑀸 𑀢𑀣𑀸 𑀅𑀯𑀢𑁆𑀢𑀩𑁆𑀩𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀗𑁆𑀕𑀢𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀢𑁆𑀣𑀗𑁆𑀕𑀢𑀲𑁆𑀲𑀸𑀢𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲. 𑀦 𑀧𑀫𑀸𑀡𑀫𑀢𑁆𑀣𑀻𑀢𑀺 𑀭𑀽𑀧𑀸𑀤𑀺𑀧𑁆𑀧𑀫𑀸𑀡𑀁 𑀦𑀢𑁆𑀣𑀺. 𑀬𑁂𑀦 𑀦𑀁 𑀯𑀚𑁆𑀚𑀼𑀦𑁆𑀢𑀺 𑀬𑁂𑀦 𑀭𑀸𑀕𑀸𑀤𑀺𑀦𑀸 𑀦𑀁 𑀯𑀤𑁂𑀬𑁆𑀬𑀼𑀁. 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀲𑀩𑁆𑀩𑁂𑀲𑀼 𑀔𑀦𑁆𑀥𑀸𑀤𑀺𑀥𑀫𑁆𑀫𑁂𑀲𑀼. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀫𑀁 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀯𑀼𑀢𑁆𑀢𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀉𑀧𑀲𑀻𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁮𑁪-𑁫. 𑀲𑀦𑁆𑀢𑀺 𑀮𑁄𑀓𑁂𑀢𑀺 𑀦𑀦𑁆𑀤𑀲𑀼𑀢𑁆𑀢𑀁. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀅𑀢𑁆𑀣𑁄 𑁋 𑀮𑁄𑀓𑁂 𑀔𑀢𑁆𑀢𑀺𑀬𑀸𑀤𑀬𑁄 𑀚𑀦𑀸 𑀆𑀚𑀻𑀯𑀓𑀦𑀺𑀕𑀡𑁆𑀞𑀸𑀤𑀺𑀓𑁂 𑀲𑀦𑁆𑀥𑀸𑀬 ‘‘𑀲𑀦𑁆𑀢𑀺 𑀫𑀼𑀦𑀬𑁄’’𑀢𑀺 𑀯𑀤𑀦𑁆𑀢𑀺, 𑀢𑀬𑀺𑀤𑀁 𑀓𑀣𑀁𑀲𑀽𑀢𑀺 𑀓𑀺𑀁 𑀦𑀼 𑀔𑁄 𑀢𑁂 𑀲𑀫𑀸𑀧𑀢𑁆𑀢𑀺𑀜𑀸𑀡𑀸𑀤𑀺𑀦𑀸 𑀜𑀸𑀡𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀜𑀸𑀡𑀽𑀧𑀧𑀦𑁆𑀦𑀁 𑀦𑁄 𑀫𑀼𑀦𑀺𑀁 𑀯𑀤𑀦𑁆𑀢𑀺, 𑀏𑀯𑀁𑀯𑀺𑀥𑀁 𑀦𑀼 𑀯𑀤𑀦𑁆𑀢𑀺, 𑀉𑀤𑀸𑀳𑀼 𑀯𑁂 𑀦𑀸𑀦𑀧𑁆𑀧𑀓𑀸𑀭𑀓𑁂𑀦 𑀮𑀽𑀔𑀚𑀻𑀯𑀺𑀢𑀲𑀗𑁆𑀔𑀸𑀢𑁂𑀦 𑀚𑀻𑀯𑀺𑀢𑁂𑀦𑀽𑀧𑀧𑀦𑁆𑀦𑀦𑁆𑀢𑀺 𑀅𑀣𑀲𑁆𑀲 𑀪𑀕𑀯𑀸 𑀢𑀤𑀼𑀪𑀬𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀦𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀤𑀺𑀝𑁆𑀞𑀺𑀬𑀸’’𑀢𑀺 𑀕𑀸𑀣𑀫𑀸𑀳.

𑁧𑁦𑁮𑁬-𑁭. 𑀇𑀤𑀸𑀦𑀺 ‘‘𑀤𑀺𑀝𑁆𑀞𑀸𑀤𑀻𑀳𑀺 𑀲𑀼𑀤𑁆𑀥𑀻’’𑀢𑀺 𑀯𑀤𑀦𑁆𑀢𑀸𑀦𑀁 𑀯𑀸𑀤𑁂 𑀓𑀗𑁆𑀔𑀸𑀧𑀳𑀸𑀦𑀢𑁆𑀣𑀁 ‘‘𑀬𑁂 𑀓𑁂𑀘𑀺𑀫𑁂’’𑀢𑀺 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀅𑀦𑁂𑀓𑀭𑀽𑀧𑁂𑀦𑀸𑀢𑀺 𑀓𑁄𑀢𑀽𑀳𑀮𑀫𑀗𑁆𑀕𑀮𑀸𑀤𑀺𑀦𑀸. 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀸𑀢𑀺 𑀢𑀢𑁆𑀣 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀕𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀸. 𑀅𑀣𑀲𑁆𑀲 𑀢𑀣𑀸 𑀲𑀼𑀤𑁆𑀥𑀺𑀅𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀪𑀕𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳.

𑁧𑁦𑁮𑁮-𑁯𑁦. 𑀏𑀯𑀁 ‘‘𑀦𑀸𑀢𑀭𑀺𑀁𑀲𑀽’’𑀢𑀺 𑀲𑀼𑀢𑁆𑀯𑀸 𑀇𑀤𑀸𑀦𑀺 𑀬𑁄 𑀅𑀢𑀭𑀺, 𑀢𑀁 𑀲𑁄𑀢𑀼𑀓𑀸𑀫𑁄 ‘‘𑀬𑁂 𑀓𑁂𑀘𑀺𑀫𑁂’’𑀢𑀺 𑀧𑀼𑀘𑁆𑀙𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀑𑀖𑀢𑀺𑀡𑁆𑀡𑀫𑀼𑀔𑁂𑀦 𑀚𑀸𑀢𑀺𑀚𑀭𑀸𑀢𑀺𑀡𑁆𑀡𑁂 𑀤𑀲𑁆𑀲𑁂𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀦𑀺𑀯𑀼𑀢𑀸𑀢𑀺 𑀑𑀯𑀼𑀝𑀸 𑀧𑀭𑀺𑀬𑁄𑀦𑀤𑁆𑀥𑀸. 𑀬𑁂𑀲𑀻𑀥𑀸𑀢𑀺 𑀬𑁂𑀲𑀼 𑀇𑀥. 𑀏𑀢𑁆𑀣 𑀘 𑀲𑀼-𑀇𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬𑀸𑀢𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀢𑀡𑁆𑀳𑀁 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀦 𑀦𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀫𑀸𑀦𑁄 ‘‘𑀏𑀢𑀸𑀪𑀺𑀦𑀦𑁆𑀤𑀸𑀫𑀻’’𑀢𑀺 𑀕𑀸𑀣𑀫𑀸𑀳. 𑀇𑀥𑀸𑀧𑀺 𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀳𑁂𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯𑁧-𑁪. 𑀬𑁂 𑀫𑁂 𑀧𑀼𑀩𑁆𑀩𑁂𑀢𑀺 𑀳𑁂𑀫𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀽𑀢𑀺 𑀬𑁂 𑀩𑀸𑀯𑀭𑀺𑀆𑀤𑀬𑁄 𑀧𑀼𑀩𑁆𑀩𑁂 𑀫𑀬𑁆𑀳𑀁 𑀲𑀓𑀁 𑀮𑀤𑁆𑀥𑀺𑀁 𑀯𑀺𑀬𑀸𑀓𑀁𑀲𑀼. 𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸𑀢𑀺 𑀕𑁄𑀢𑀫𑀲𑀸𑀲𑀦𑀸 𑀧𑀼𑀩𑁆𑀩𑀢𑀭𑀁. 𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀯𑀟𑁆𑀠𑀦𑀁. 𑀢𑀡𑁆𑀳𑀸𑀦𑀺𑀕𑁆𑀖𑀸𑀢𑀦𑀦𑁆𑀢𑀺 𑀢𑀡𑁆𑀳𑀸𑀯𑀺𑀦𑀸𑀲𑀦𑀁. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀥𑀫𑁆𑀫𑀁 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀇𑀥𑀸’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸𑀢𑀺 𑀏𑀢𑀁 𑀦𑀺𑀩𑁆𑀩𑀸𑀦𑀧𑀤𑀫𑀘𑁆𑀘𑀼𑀢𑀁 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀧𑀲𑁆𑀲𑀦𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀚𑀸𑀦𑀺𑀢𑁆𑀯𑀸 𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀆𑀤𑀻𑀳𑀺 𑀲𑀢𑀸. 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸𑀢𑀺 𑀯𑀺𑀤𑀺𑀢𑀥𑀫𑁆𑀫𑀢𑁆𑀢𑀸, 𑀤𑀺𑀝𑁆𑀞𑀥𑀫𑁆𑀫𑀢𑁆𑀢𑀸, 𑀭𑀸𑀕𑀸𑀤𑀺𑀦𑀺𑀩𑁆𑀩𑀸𑀦𑁂𑀦 𑀘 𑀅𑀪𑀺𑀦𑀺𑀩𑁆𑀩𑀼𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀫𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀼𑀩𑁆𑀩𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀳𑁂𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀢𑁄𑀤𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯𑁫. 𑀬𑀲𑁆𑀫𑀺𑀁 𑀓𑀸𑀫𑀸𑀢𑀺 𑀢𑁄𑀤𑁂𑀬𑁆𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀓𑀻𑀤𑀺𑀲𑁄𑀢𑀺 𑀢𑀲𑁆𑀲 𑀓𑀻𑀤𑀺𑀲𑁄 𑀯𑀺𑀫𑁄𑀓𑁆𑀔𑁄 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀧𑀼𑀘𑁆𑀙𑀢𑀺. 𑀇𑀤𑀸𑀦𑀺 𑀢𑀲𑁆𑀲 𑀅𑀜𑁆𑀜𑀯𑀺𑀫𑁄𑀓𑁆𑀔𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀦𑀸𑀧𑀭𑁄𑀢𑀺 𑀢𑀲𑁆𑀲 𑀅𑀜𑁆𑀜𑁄 𑀯𑀺𑀫𑁄𑀓𑁆𑀔𑁄 𑀦𑀢𑁆𑀣𑀺.

𑁧𑁦𑁯𑁭-𑁮. 𑀏𑀯𑀁 ‘‘𑀢𑀡𑁆𑀳𑀓𑁆𑀔𑀬𑁄 𑀏𑀯 𑀯𑀺𑀫𑁄𑀓𑁆𑀔𑁄’’𑀢𑀺 𑀯𑀼𑀢𑁆𑀢𑁂𑀧𑀺 𑀢𑀫𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 ‘‘𑀦𑀺𑀭𑀸𑀲𑀲𑁄 𑀲𑁄 𑀉𑀤 𑀆𑀲𑀲𑀸𑀦𑁄’’𑀢𑀺 𑀧𑀼𑀦 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀉𑀤 𑀧𑀜𑁆𑀜𑀓𑀧𑁆𑀧𑀻𑀢𑀺 𑀉𑀤𑀸𑀳𑀼 𑀲𑀫𑀸𑀧𑀢𑁆𑀢𑀺𑀜𑀸𑀡𑀸𑀤𑀺𑀦𑀸 𑀜𑀸𑀡𑁂𑀦 𑀢𑀡𑁆𑀳𑀸𑀓𑀧𑁆𑀧𑀁 𑀯𑀸 𑀤𑀺𑀝𑁆𑀞𑀺𑀓𑀧𑁆𑀧𑀁 𑀯𑀸 𑀓𑀧𑁆𑀧𑀬𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀆𑀘𑀺𑀓𑁆𑀔𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀸𑀫𑀪𑀯𑁂𑀢𑀺 𑀓𑀸𑀫𑁂 𑀘 𑀪𑀯𑁂 𑀘. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀫𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀼𑀩𑁆𑀩𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀢𑁄𑀤𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯𑁯. 𑀫𑀚𑁆𑀛𑁂 𑀲𑀭𑀲𑁆𑀫𑀺𑀦𑁆𑀢𑀺 𑀓𑀧𑁆𑀧𑀲𑀼𑀢𑁆𑀢𑀁. 𑀢𑀢𑁆𑀣 𑀫𑀚𑁆𑀛𑁂 𑀲𑀭𑀲𑁆𑀫𑀺𑀦𑁆𑀢𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑁄𑀝𑀺𑀧𑀜𑁆𑀜𑀸𑀡𑀸𑀪𑀸𑀯𑀢𑁄 𑀫𑀚𑁆𑀛𑀪𑀽𑀢𑁂 𑀲𑀁𑀲𑀸𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀺𑀝𑁆𑀞𑀢𑀦𑁆𑀢𑀺 𑀢𑀺𑀝𑁆𑀞𑀫𑀸𑀦𑀸𑀦𑀁. 𑀬𑀣𑀸𑀬𑀺𑀤𑀁 𑀦𑀸𑀧𑀭𑀁 𑀲𑀺𑀬𑀸𑀢𑀺 𑀬𑀣𑀸 𑀇𑀤𑀁 𑀤𑀼𑀓𑁆𑀔𑀁 𑀧𑀼𑀦 𑀦 𑀪𑀯𑁂𑀬𑁆𑀬.

𑁧𑁧𑁦𑁧-𑁨. 𑀅𑀣𑀲𑁆𑀲 𑀪𑀕𑀯𑀸 𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀅𑀓𑀺𑀜𑁆𑀘𑀦𑀦𑁆𑀢𑀺 𑀓𑀺𑀜𑁆𑀘𑀦𑀧𑀝𑀺𑀧𑀓𑁆𑀔𑀁. 𑀅𑀦𑀸𑀤𑀸𑀦𑀦𑁆𑀢𑀺 𑀆𑀤𑀸𑀦𑀧𑀝𑀺𑀧𑀓𑁆𑀔𑀁, 𑀓𑀺𑀜𑁆𑀘𑀦𑀸𑀤𑀸𑀦𑀯𑀽𑀧𑀲𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀸𑀧𑀭𑀦𑁆𑀢𑀺 𑀅𑀧𑀭𑀧𑀝𑀺𑀪𑀸𑀕𑀤𑀻𑀧𑀯𑀺𑀭𑀳𑀺𑀢𑀁, 𑀲𑁂𑀝𑁆𑀞𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀢𑁂 𑀫𑀸𑀭𑀲𑁆𑀲 𑀧𑀤𑁆𑀥𑀕𑀽𑀢𑀺 𑀢𑁂 𑀫𑀸𑀭𑀲𑁆𑀲 𑀧𑀤𑁆𑀥𑀘𑀭𑀸 𑀧𑀭𑀺𑀘𑀸𑀭𑀓𑀸 𑀲𑀺𑀲𑁆𑀲𑀸 𑀦 𑀳𑁄𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀫𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀼𑀩𑁆𑀩𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀓𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀚𑀢𑀼𑀓𑀡𑁆𑀡𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦𑁩-𑁪. 𑀲𑀼𑀢𑁆𑀯𑀸𑀦𑀳𑀦𑁆𑀢𑀺 𑀚𑀢𑀼𑀓𑀡𑁆𑀡𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀢𑁆𑀯𑀸𑀦𑀳𑀁 𑀯𑀻𑀭𑀫𑀓𑀸𑀫𑀓𑀸𑀫𑀺𑀦𑁆𑀢𑀺 𑀅𑀳𑀁 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀻𑀭𑀁 𑀓𑀸𑀫𑀸𑀦𑀁 𑀅𑀓𑀸𑀫𑀦𑀢𑁄 𑀅𑀓𑀸𑀫𑀓𑀸𑀫𑀺𑀁 𑀩𑀼𑀤𑁆𑀥𑀁 𑀲𑀼𑀢𑁆𑀯𑀸. 𑀅𑀓𑀸𑀫𑀫𑀸𑀕𑀫𑀦𑁆𑀢𑀺 𑀦𑀺𑀓𑁆𑀓𑀸𑀫𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺𑀢𑀼𑀁 𑀆𑀕𑀢𑁄𑀫𑁆𑀳𑀺. 𑀲𑀳𑀚𑀦𑁂𑀢𑁆𑀢𑀸𑀢𑀺 𑀲𑀳𑀚𑀸𑀢𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀘𑀓𑁆𑀔𑀼. 𑀬𑀣𑀸𑀢𑀘𑁆𑀙𑀦𑁆𑀢𑀺 𑀬𑀣𑀸𑀢𑀣𑀁. 𑀩𑁆𑀭𑀽𑀳𑀺 𑀫𑁂𑀢𑀺 𑀧𑀼𑀦 𑀬𑀸𑀘𑀦𑁆𑀢𑁄 𑀪𑀡𑀢𑀺. 𑀬𑀸𑀘𑀦𑁆𑀢𑁄 𑀳𑀺 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑁆𑀧𑀺 𑀪𑀡𑁂𑀬𑁆𑀬, 𑀓𑁄 𑀧𑀦 𑀯𑀸𑀤𑁄 𑀤𑁆𑀯𑀺𑀓𑁆𑀔𑀢𑁆𑀢𑀼𑀁. 𑀢𑁂𑀚𑀻 𑀢𑁂𑀚𑀲𑀸𑀢𑀺 𑀢𑁂𑀚𑁂𑀦 𑀲𑀫𑀦𑁆𑀦𑀸𑀕𑀢𑁄 𑀢𑁂𑀚𑀲𑀸 𑀅𑀪𑀺𑀪𑀼𑀬𑁆𑀬. 𑀬𑀫𑀳𑀁 𑀯𑀺𑀚𑀜𑁆𑀜𑀁 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀦𑁆𑀢𑀺 𑀬𑀫𑀳𑀁 𑀚𑀸𑀢𑀺𑀚𑀭𑀸𑀦𑀁 𑀧𑀳𑀸𑀦𑀪𑀽𑀢𑀁 𑀥𑀫𑁆𑀫𑀁 𑀇𑀥𑁂𑀯 𑀚𑀸𑀦𑁂𑀬𑁆𑀬𑀁.

𑁧𑁧𑁦𑁫-𑁭. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀥𑀫𑁆𑀫𑀫𑀸𑀘𑀺𑀓𑁆𑀔𑀦𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 ‘‘𑀔𑁂𑀫’’𑀦𑁆𑀢𑀺 𑀤𑀺𑀲𑁆𑀯𑀸. 𑀉𑀕𑁆𑀕𑀳𑀺𑀢𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀕𑀳𑀺𑀢𑀁. 𑀦𑀺𑀭𑀢𑁆𑀢𑀁 𑀯𑀸𑀢𑀺 𑀦𑀺𑀭𑀲𑁆𑀲𑀺𑀢𑀩𑁆𑀩𑀁 𑀯𑀸, 𑀫𑀼𑀜𑁆𑀘𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀸 𑀢𑁂 𑀯𑀺𑀚𑁆𑀚𑀺𑀢𑁆𑀣𑀸𑀢𑀺 𑀫𑀸 𑀢𑁂 𑀅𑀳𑁄𑀲𑀺. 𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀁 𑀯𑀸𑀧𑀺 𑀢𑁂 𑀫𑀸 𑀯𑀺𑀚𑁆𑀚𑀺𑀢𑁆𑀣. 𑀧𑀼𑀩𑁆𑀩𑁂𑀢𑀺 𑀅𑀢𑀻𑀢𑁂 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀸. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀪𑀕𑀯𑀸 𑀚𑀢𑀼𑀓𑀡𑁆𑀡𑀺𑀁 𑀆𑀮𑀧𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀫𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀼𑀩𑁆𑀩𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀚𑀢𑀼𑀓𑀡𑁆𑀡𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀪𑀤𑁆𑀭𑀸𑀯𑀼𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦𑁮-𑁯. 𑀑𑀓𑀜𑁆𑀚𑀳𑀦𑁆𑀢𑀺 𑀪𑀤𑁆𑀭𑀸𑀯𑀼𑀥𑀲𑀼𑀢𑁆𑀢𑀁. 𑀢𑀢𑁆𑀣 𑀑𑀓𑀜𑁆𑀚𑀳𑀦𑁆𑀢𑀺 𑀆𑀮𑀬𑀁 𑀚𑀳𑀁. 𑀢𑀡𑁆𑀳𑀘𑁆𑀙𑀺𑀤𑀦𑁆𑀢𑀺 𑀙𑀢𑀡𑁆𑀳𑀸𑀓𑀸𑀬𑀘𑁆𑀙𑀺𑀤𑀁. 𑀅𑀦𑁂𑀚𑀦𑁆𑀢𑀺 𑀮𑁄𑀓𑀥𑀫𑁆𑀫𑁂𑀲𑀼 𑀦𑀺𑀓𑁆𑀓𑀫𑁆𑀧𑀁. 𑀦𑀦𑁆𑀤𑀺𑀜𑁆𑀚𑀳𑀦𑁆𑀢𑀺 𑀅𑀦𑀸𑀕𑀢𑀭𑀽𑀧𑀸𑀤𑀺𑀧𑀢𑁆𑀣𑀦𑀸𑀚𑀳𑀁. 𑀏𑀓𑀸 𑀏𑀯 𑀳𑀺 𑀢𑀡𑁆𑀳𑀸 𑀣𑀼𑀢𑀺𑀯𑀲𑁂𑀦 𑀇𑀥 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀼𑀢𑁆𑀢𑀸. 𑀓𑀧𑁆𑀧𑀜𑁆𑀚𑀳𑀦𑁆𑀢𑀺 𑀤𑀼𑀯𑀺𑀥𑀓𑀧𑁆𑀧𑀚𑀳𑀁. 𑀅𑀪𑀺𑀬𑀸𑀘𑁂𑀢𑀺 𑀅𑀢𑀺𑀯𑀺𑀬 𑀬𑀸𑀘𑀸𑀫𑀺. 𑀲𑀼𑀢𑁆𑀯𑀸𑀦 𑀦𑀸𑀕𑀲𑁆𑀲 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 𑀇𑀢𑁄𑀢𑀺 𑀦𑀸𑀕𑀲𑁆𑀲 𑀢𑀯 𑀪𑀕𑀯𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀇𑀢𑁄 𑀧𑀸𑀲𑀸𑀡𑀓𑀘𑁂𑀢𑀺𑀬𑀢𑁄 𑀩𑀳𑀽 𑀚𑀦𑀸 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀚𑀦𑀧𑀤𑁂𑀳𑀺 𑀲𑀗𑁆𑀕𑀢𑀸𑀢𑀺 𑀅𑀗𑁆𑀕𑀸𑀤𑀻𑀳𑀺 𑀚𑀦𑀧𑀤𑁂𑀳𑀺 𑀇𑀥 𑀲𑀫𑀸𑀕𑀢𑀸. 𑀯𑀺𑀬𑀸𑀓𑀭𑁄𑀳𑀻𑀢𑀺 𑀥𑀫𑁆𑀫𑀁 𑀤𑁂𑀲𑁂𑀳𑀺.

𑁧𑁧𑁧𑁦. 𑀅𑀣𑀲𑁆𑀲 𑀆𑀲𑀬𑀸𑀦𑀼𑀮𑁄𑀫𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀪𑀕𑀯𑀸 𑀤𑁆𑀯𑁂 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀆𑀤𑀸𑀦𑀢𑀡𑁆𑀳𑀦𑁆𑀢𑀺 𑀭𑀽𑀧𑀸𑀤𑀻𑀦𑀁 𑀆𑀤𑀸𑀬𑀺𑀓𑀁 𑀕𑀳𑀡𑀢𑀡𑁆𑀳𑀁, 𑀢𑀡𑁆𑀳𑀼𑀧𑀸𑀤𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀁 𑀬𑀜𑁆𑀳𑀺 𑀮𑁄𑀓𑀲𑁆𑀫𑀺𑀫𑀼𑀧𑀸𑀤𑀺𑀬𑀦𑁆𑀢𑀻𑀢𑀺 𑀏𑀢𑁂𑀲𑀼 𑀉𑀤𑁆𑀥𑀸𑀤𑀺𑀪𑁂𑀤𑁂𑀲𑀼 𑀬𑀁 𑀬𑀁 𑀕𑀡𑁆𑀳𑀦𑁆𑀢𑀺. 𑀢𑁂𑀦𑁂𑀯 𑀫𑀸𑀭𑁄 𑀅𑀦𑁆𑀯𑁂𑀢𑀺 𑀚𑀦𑁆𑀢𑀼𑀦𑁆𑀢𑀺 𑀢𑁂𑀦𑁂𑀯 𑀉𑀧𑀸𑀤𑀸𑀦𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀦𑀺𑀩𑁆𑀩𑀢𑁆𑀢𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀦𑁆𑀥𑀫𑀸𑀭𑁄 𑀢𑀁 𑀲𑀢𑁆𑀢𑀁 𑀅𑀦𑀼𑀕𑀘𑁆𑀙𑀢𑀺.

𑁧𑁧𑁧𑁧. 𑀢𑀲𑁆𑀫𑀸 𑀧𑀚𑀸𑀦𑀦𑁆𑀢𑀺 𑀢𑀲𑁆𑀫𑀸 𑀏𑀢𑀫𑀸𑀤𑀻𑀦𑀯𑀁 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀸 𑀲𑀗𑁆𑀔𑀸𑀭𑁂 𑀚𑀸𑀦𑀦𑁆𑀢𑁄. 𑀆𑀤𑀸𑀦𑀲𑀢𑁆𑀢𑁂 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄, 𑀧𑀚𑀁 𑀇𑀫𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀯𑀺𑀲𑀢𑁆𑀢𑀦𑁆𑀢𑀺 𑀆𑀤𑀸𑀢𑀩𑁆𑀩𑀝𑁆𑀞𑁂𑀦 𑀆𑀤𑀸𑀦𑁂𑀲𑀼 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑁂 𑀲𑀩𑁆𑀩𑀮𑁄𑀓𑁂 𑀇𑀫𑀁 𑀧𑀚𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀮𑀕𑁆𑀕𑀁 𑀧𑁂𑀓𑁆𑀔𑀫𑀸𑀦𑁄. 𑀆𑀤𑀸𑀦𑀲𑀢𑁆𑀢𑁂 𑀯𑀸 𑀆𑀤𑀸𑀦𑀸𑀪𑀺𑀦𑀺𑀯𑀺𑀝𑁆𑀞𑁂 𑀧𑀼𑀕𑁆𑀕𑀮𑁂 𑀆𑀤𑀸𑀦𑀲𑀗𑁆𑀕𑀳𑁂𑀢𑀼𑀜𑁆𑀘 𑀇𑀫𑀁 𑀧𑀚𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀮𑀕𑁆𑀕𑀁 𑀢𑀢𑁄 𑀯𑀻𑀢𑀺𑀓𑁆𑀓𑀫𑀺𑀢𑀼𑀁 𑀅𑀲𑀫𑀢𑁆𑀣𑀁 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄 𑀓𑀺𑀜𑁆𑀘𑀦𑀁 𑀲𑀩𑁆𑀩𑀮𑁄𑀓𑁂 𑀦 𑀉𑀧𑁆𑀧𑀸𑀤𑀺𑀬𑁂𑀣𑀸𑀢𑀺 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀫𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀼𑀩𑁆𑀩𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀪𑀤𑁆𑀭𑀸𑀯𑀼𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀉𑀤𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧𑁨-𑁩. 𑀛𑀸𑀬𑀺𑀦𑁆𑀢𑀺 𑀉𑀤𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀦𑁆𑀢𑀺 𑀧𑀜𑁆𑀜𑀸𑀦𑀼𑀪𑀸𑀯𑀦𑀺𑀚𑁆𑀛𑀸𑀢𑀁 𑀯𑀺𑀫𑁄𑀓𑁆𑀔𑀁 𑀧𑀼𑀘𑁆𑀙𑀢𑀺. 𑀅𑀣 𑀪𑀕𑀯𑀸 𑀬𑀲𑁆𑀫𑀸 𑀉𑀤𑀬𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀮𑀸𑀪𑀻, 𑀢𑀲𑁆𑀫𑀸𑀲𑁆𑀲 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀤𑀲𑁆𑀲𑁂𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀧𑀳𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀸𑀦𑀦𑁆𑀢𑀺 𑀬𑀫𑀺𑀤𑀁 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀧𑁆𑀧𑀳𑀸𑀦𑀁, 𑀢𑀫𑁆𑀧𑀺 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀫𑀺. 𑀏𑀯𑀁 𑀲𑀩𑁆𑀩𑀧𑀤𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑁧𑁧𑁧𑁪. 𑀉𑀧𑁂𑀓𑁆𑀔𑀸𑀲𑀢𑀺𑀲𑀁𑀲𑀼𑀤𑁆𑀥𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀉𑀧𑁂𑀓𑁆𑀔𑀸𑀲𑀢𑀻𑀳𑀺 𑀲𑀁𑀲𑀼𑀤𑁆𑀥𑀁. 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀫𑀺𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀫𑁄𑀓𑁆𑀔𑁂 𑀞𑀢𑁆𑀯𑀸 𑀛𑀸𑀦𑀗𑁆𑀕𑀸𑀦𑀺 𑀯𑀺𑀧𑀲𑁆𑀲𑀺𑀢𑁆𑀯𑀸 𑀅𑀥𑀺𑀕𑀢𑀁 𑀅𑀭𑀳𑀢𑁆𑀢𑀯𑀺𑀫𑁄𑀓𑁆𑀔𑀁 𑀯𑀤𑀢𑀺. 𑀅𑀭𑀳𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀳𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀺𑀪𑁂𑀤𑁄 𑀥𑀫𑁆𑀫𑀢𑀓𑁆𑀓𑁄 𑀧𑀼𑀭𑁂𑀚𑀯𑁄 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯’’𑀦𑁆𑀢𑀺. 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀦𑁆𑀢𑀺 𑀏𑀢𑀫𑁂𑀯 𑀘 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀅𑀯𑀺𑀚𑁆𑀚𑀸𑀧𑀪𑁂𑀤𑀦𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀦𑀺𑀲𑁆𑀲𑀸𑀬 𑀚𑀸𑀢𑀢𑁆𑀢𑀸 𑀓𑀸𑀭𑀡𑁄𑀧𑀘𑀸𑀭𑁂𑀦 ‘‘𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦’’𑀦𑁆𑀢𑀺 𑀧𑀩𑁆𑀭𑀽𑀫𑀻𑀢𑀺.

𑁧𑁧𑁧𑁫-𑁬. 𑀏𑀯𑀁 𑀅𑀯𑀺𑀚𑁆𑀚𑀸𑀧𑀪𑁂𑀤𑀦𑀯𑀘𑀦𑁂𑀦 𑀯𑀼𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀲𑀼𑀢𑁆𑀯𑀸 ‘‘𑀢𑀁 𑀓𑀺𑀲𑁆𑀲 𑀯𑀺𑀧𑁆𑀧𑀳𑀸𑀦𑁂𑀦 𑀯𑀼𑀘𑁆𑀘𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀺𑀁𑀲𑀼 𑀲𑀁𑀬𑁄𑀚𑀦𑁄’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀺𑀁𑀲𑀼 𑀲𑀁𑀬𑁄𑀚𑀦𑁄𑀢𑀺 𑀓𑀺𑀁 𑀲𑀁𑀬𑁄𑀚𑀦𑁄. 𑀯𑀺𑀘𑀸𑀭𑀡𑀦𑁆𑀢𑀺 𑀯𑀺𑀘𑀭𑀡𑀓𑀸𑀭𑀡𑀁. 𑀓𑀺𑀲𑁆𑀲𑀲𑁆𑀲 𑀯𑀺𑀧𑁆𑀧𑀳𑀸𑀦𑁂𑀦𑀸𑀢𑀺 𑀓𑀺𑀁 𑀦𑀸𑀫𑀓𑀲𑁆𑀲 𑀅𑀲𑁆𑀲 𑀥𑀫𑁆𑀫𑀲𑁆𑀲 𑀯𑀺𑀧𑁆𑀧𑀳𑀸𑀦𑁂𑀦. 𑀅𑀣𑀲𑁆𑀲 𑀪𑀕𑀯𑀸 𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 ‘‘𑀦𑀦𑁆𑀤𑀺𑀲𑀁𑀬𑁄𑀚𑀦𑁄’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀯𑀺𑀢𑀓𑁆𑀓𑀲𑁆𑀲𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁄 𑀯𑀺𑀢𑀓𑁆𑀓𑁄 𑀅𑀲𑁆𑀲.

𑁧𑁧𑁧𑁭-𑁮. 𑀇𑀤𑀸𑀦𑀺 𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀫𑀕𑁆𑀕𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀣𑀁 𑀲𑀢𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁. 𑀅𑀣𑀲𑁆𑀲 𑀫𑀕𑁆𑀕𑀁 𑀓𑀣𑁂𑀦𑁆𑀢𑁄 𑀪𑀕𑀯𑀸 ‘‘𑀅𑀚𑁆𑀛𑀢𑁆𑀢𑀜𑁆𑀘𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀏𑀯𑀁 𑀲𑀢𑀲𑁆𑀲𑀸𑀢𑀺 𑀏𑀯𑀁 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀫𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀼𑀩𑁆𑀩𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀉𑀤𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀧𑁄𑀲𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧𑁯-𑁨𑁦. 𑀬𑁄 𑀅𑀢𑀻𑀢𑀦𑁆𑀢𑀺 𑀧𑁄𑀲𑀸𑀮𑀲𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀅𑀢𑀻𑀢𑀁 𑀆𑀤𑀺𑀲𑀢𑀻𑀢𑀺 𑀬𑁄 𑀪𑀕𑀯𑀸 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 ‘‘𑀏𑀓𑀫𑁆𑀧𑀺 𑀚𑀸𑀢𑀺’’𑀦𑁆𑀢𑀺𑀆𑀤𑀺𑀪𑁂𑀤𑀁 𑀅𑀢𑀻𑀢𑀁 𑀆𑀤𑀺𑀲𑀢𑀺. 𑀯𑀺𑀪𑀽𑀢𑀭𑀽𑀧𑀲𑀜𑁆𑀜𑀺𑀲𑁆𑀲𑀸𑀢𑀺 𑀲𑀫𑀢𑀺𑀓𑁆𑀓𑀦𑁆𑀢𑀭𑀽𑀧𑀲𑀜𑁆𑀜𑀺𑀲𑁆𑀲. 𑀲𑀩𑁆𑀩𑀓𑀸𑀬𑀧𑁆𑀧𑀳𑀸𑀬𑀺𑀦𑁄𑀢𑀺 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀲𑀩𑁆𑀩𑀭𑀽𑀧𑀓𑀸𑀬𑀧𑁆𑀧𑀳𑀸𑀬𑀺𑀦𑁄, 𑀧𑀳𑀻𑀦𑀭𑀽𑀧𑀪𑀯𑀧𑀝𑀺𑀲𑀦𑁆𑀥𑀺𑀓𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀧𑀲𑁆𑀲𑀢𑁄𑀢𑀺 𑀯𑀺𑀜𑁆𑀜𑀸𑀡𑀸𑀪𑀸𑀯𑀯𑀺𑀧𑀲𑁆𑀲𑀦𑁂𑀦 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀧𑀲𑁆𑀲𑀢𑁄, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀮𑀸𑀪𑀺𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀜𑀸𑀡𑀁 𑀲𑀓𑁆𑀓𑀸𑀦𑀼𑀧𑀼𑀘𑁆𑀙𑀸𑀫𑀻𑀢𑀺 𑀲𑀓𑁆𑀓𑀸𑀢𑀺 𑀪𑀕𑀯𑀦𑁆𑀢𑀁 𑀆𑀮𑀧𑀦𑁆𑀢𑁄 𑀆𑀳. 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀜𑀸𑀡𑀁 𑀧𑀼𑀘𑁆𑀙𑀸𑀫𑀺, 𑀓𑀻𑀤𑀺𑀲𑀁 𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺. 𑀓𑀣𑀁 𑀦𑁂𑀬𑁆𑀬𑁄𑀢𑀺 𑀓𑀣𑀁 𑀲𑁄 𑀦𑁂𑀢𑀩𑁆𑀩𑁄, 𑀓𑀣𑀫𑀲𑁆𑀲 𑀉𑀢𑁆𑀢𑀭𑀺𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺.

𑁧𑁧𑁨𑁧. 𑀅𑀣𑀲𑁆𑀲 𑀪𑀕𑀯𑀸 𑀢𑀸𑀤𑀺𑀲𑁂 𑀧𑀼𑀕𑁆𑀕𑀮𑁂 𑀅𑀢𑁆𑀢𑀦𑁄 𑀅𑀧𑁆𑀧𑀝𑀺𑀳𑀢𑀜𑀸𑀡𑀢𑀁 𑀧𑀓𑀸𑀲𑁂𑀢𑁆𑀯𑀸 𑀢𑀁 𑀜𑀸𑀡𑀁 𑀩𑁆𑀬𑀸𑀓𑀸𑀢𑀼𑀁 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀲𑀩𑁆𑀩𑀸, 𑀅𑀪𑀺𑀚𑀸𑀦𑀁 𑀢𑀣𑀸𑀕𑀢𑁄𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀘𑀢𑀲𑁆𑀲𑁄 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀢𑁆𑀢𑀸𑀢𑀺 𑀏𑀯𑀁 𑀲𑀩𑁆𑀩𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀅𑀪𑀺𑀚𑀸𑀦𑀦𑁆𑀢𑁄 𑀢𑀣𑀸𑀕𑀢𑁄. 𑀢𑀺𑀝𑁆𑀞𑀦𑁆𑀢𑀫𑁂𑀦𑀁 𑀚𑀸𑀦𑀸𑀢𑀻𑀢𑀺 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀢𑀺𑀝𑁆𑀞𑀦𑁆𑀢𑀁 𑀏𑀢𑀁 𑀧𑀼𑀕𑁆𑀕𑀮𑀁 𑀚𑀸𑀦𑀸𑀢𑀺 ‘‘𑀆𑀬𑀢𑀺𑀁 𑀅𑀬𑀁 𑀏𑀯𑀁𑀕𑀢𑀺𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀯𑀺𑀫𑀼𑀢𑁆𑀢𑀦𑁆𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸𑀤𑀻𑀲𑀼 𑀅𑀥𑀺𑀫𑀼𑀢𑁆𑀢𑀁. 𑀢𑀧𑁆𑀧𑀭𑀸𑀬𑀡𑀦𑁆𑀢𑀺 𑀢𑀫𑁆𑀫𑀬𑀁.

𑁧𑁧𑁨𑁨. 𑀆𑀓𑀺𑀜𑁆𑀘𑀜𑁆𑀜𑀲𑀫𑁆𑀪𑀯𑀁 𑀜𑀢𑁆𑀯𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀚𑀦𑀓𑀁 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀁 𑀜𑀢𑁆𑀯𑀸 ‘‘𑀓𑀺𑀦𑁆𑀢𑀺 𑀧𑀮𑀺𑀩𑁄𑀥𑁄 𑀅𑀬’’𑀦𑁆𑀢𑀺. 𑀦𑀦𑁆𑀤𑀻 𑀲𑀁𑀬𑁄𑀚𑀦𑀁 𑀇𑀢𑀻𑀢𑀺 𑀬𑀸 𑀘 𑀢𑀢𑁆𑀣 𑀅𑀭𑀽𑀧𑀭𑀸𑀕𑀲𑀗𑁆𑀔𑀸𑀢𑀸 𑀦𑀦𑁆𑀤𑀻, 𑀢𑀜𑁆𑀘 𑀲𑀁𑀬𑁄𑀚𑀦𑀁 𑀇𑀢𑀺 𑀜𑀢𑁆𑀯𑀸. 𑀢𑀢𑁄 𑀢𑀢𑁆𑀣 𑀯𑀺𑀧𑀲𑁆𑀲𑀢𑀻𑀢𑀺 𑀢𑀢𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀢𑀺. 𑀏𑀢𑀁 𑀜𑀸𑀡𑀁 𑀢𑀣𑀁 𑀢𑀲𑁆𑀲𑀸𑀢𑀺 𑀏𑀢𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀯𑀁 𑀯𑀺𑀧𑀲𑁆𑀲𑀢𑁄 𑀅𑀦𑀼𑀓𑁆𑀓𑀫𑁂𑀦𑁂𑀯 𑀉𑀧𑁆𑀧𑀦𑁆𑀦𑀁 𑀅𑀭𑀳𑀢𑁆𑀢𑀜𑀸𑀡𑀁 𑀅𑀯𑀺𑀧𑀭𑀻𑀢𑀁. 𑀯𑀼𑀲𑀻𑀫𑀢𑁄𑀢𑀺 𑀯𑀼𑀲𑀺𑀢𑀯𑀦𑁆𑀢𑀲𑁆𑀲. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.