𑁪. 𑀅𑀝𑁆𑀞𑀓𑀯𑀕𑁆𑀕𑁄

𑁧. 𑀓𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁭𑁩. 𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲𑀸𑀢𑀺 𑀓𑀸𑀫𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀲𑀸𑀯𑀢𑁆𑀣𑀺𑀬𑀸 𑀚𑁂𑀢𑀯𑀦𑀲𑁆𑀲 𑀘 𑀅𑀦𑁆𑀢𑀭𑁂 𑀅𑀘𑀺𑀭𑀯𑀢𑀻𑀦𑀤𑀻𑀢𑀻𑀭𑁂 ‘‘𑀬𑀯𑀁 𑀯𑀧𑀺𑀲𑁆𑀲𑀸𑀫𑀻’’𑀢𑀺 𑀔𑁂𑀢𑁆𑀢𑀁 𑀓𑀲𑀢𑀺. 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀆𑀯𑀚𑁆𑀚𑁂𑀦𑁆𑀢𑁄 𑀅𑀤𑁆𑀤𑀲 𑁋 ‘‘𑀅𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑀯𑀸 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀻’’𑀢𑀺, 𑀧𑀼𑀦 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀆𑀯𑀚𑁆𑀚𑁂𑀦𑁆𑀢𑁄 𑀘𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀅𑀤𑁆𑀤𑀲. ‘‘𑀓𑀤𑀸 𑀧𑀸𑀧𑀼𑀡𑁂𑀬𑁆𑀬𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀲𑀲𑁆𑀲𑁂 𑀯𑀺𑀦𑀝𑁆𑀞𑁂 𑀲𑁄𑀓𑀸𑀪𑀺𑀪𑀽𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸’’𑀢𑀺 𑀅𑀤𑁆𑀤𑀲. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀢𑀤𑀸 𑀏𑀯 𑀩𑁆𑀭𑀸𑀳𑁆𑀫𑀡𑀁 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀺, 𑀦 𑀫𑁂 𑀑𑀯𑀸𑀤𑀁 𑀲𑁄𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀢𑀺. 𑀦𑀸𑀦𑀸𑀭𑀼𑀘𑀺𑀓𑀸 𑀳𑀺 𑀩𑁆𑀭𑀸𑀳𑁆𑀫𑀡𑀸, 𑀳𑀦𑁆𑀤, 𑀦𑀁 𑀇𑀢𑁄 𑀧𑀪𑀼𑀢𑀺𑀬𑁂𑀯 𑀲𑀗𑁆𑀕𑀡𑁆𑀳𑀸𑀫𑀺, 𑀏𑀯𑀁 𑀫𑀬𑀺 𑀫𑀼𑀤𑀼𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀢𑀤𑀸 𑀑𑀯𑀸𑀤𑀁 𑀲𑁄𑀲𑁆𑀲𑀢𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀓𑀺𑀁, 𑀩𑁆𑀭𑀸𑀳𑁆𑀫𑀡, 𑀓𑀭𑁄𑀲𑀻’’𑀢𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀏𑀯𑀁 𑀉𑀘𑁆𑀘𑀸𑀓𑀼𑀮𑀻𑀦𑁄 𑀲𑀫𑀡𑁄 𑀕𑁄𑀢𑀫𑁄 𑀫𑀬𑀸 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀻’’𑀢𑀺 𑀢𑀸𑀯𑀢𑀓𑁂𑀦𑁂𑀯 𑀪𑀕𑀯𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀔𑁂𑀢𑁆𑀢𑀁, 𑀪𑁄 𑀕𑁄𑀢𑀫, 𑀓𑀲𑀸𑀫𑀺 𑀬𑀯𑀁 𑀯𑀧𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀅𑀓𑀸𑀲𑀺, 𑀦 𑀘 𑀅𑀳𑁂𑀢𑀼 𑀅𑀧𑁆𑀧𑀘𑁆𑀘𑀬𑀸 𑀢𑀣𑀸𑀕𑀢𑀸 𑀏𑀯𑀁 𑀓𑀭𑁄𑀦𑁆𑀢𑀺, 𑀳𑀦𑁆𑀤𑀸𑀳𑀫𑁆𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀫𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀣𑁂𑀯 𑀧𑀝𑀺𑀲𑀦𑁆𑀣𑀸𑀭𑀫𑀓𑀸𑀲𑀺. 𑀏𑀯𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀲𑁂𑀲𑀸 𑀘 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑀸. 𑀩𑁆𑀭𑀸𑀳𑁆𑀫𑀡𑁄 𑀅𑀢𑀻𑀯 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺.

𑀅𑀣 𑀪𑀕𑀯𑀸 𑀲𑀫𑁆𑀧𑀚𑁆𑀚𑀫𑀸𑀦𑁂𑀧𑀺 𑀲𑀲𑁆𑀲𑁂 𑀏𑀓𑀤𑀺𑀯𑀲𑀁 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀲𑀸𑀯𑀢𑁆𑀣𑀺𑀢𑁄 𑀚𑁂𑀢𑀯𑀦𑀁 𑀕𑀘𑁆𑀙𑀦𑁆𑀢𑁄 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀳 𑁋 ‘‘𑀲𑀼𑀦𑁆𑀤𑀭𑀁 𑀢𑁂, 𑀩𑁆𑀭𑀸𑀳𑁆𑀫𑀡, 𑀬𑀯𑀓𑁆𑀔𑁂𑀢𑁆𑀢’’𑀦𑁆𑀢𑀺. ‘‘𑀏𑀯𑀁, 𑀪𑁄 𑀕𑁄𑀢𑀫, 𑀲𑀼𑀦𑁆𑀤𑀭𑀁, 𑀲𑀘𑁂 𑀲𑀫𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀼𑀫𑁆𑀳𑀸𑀓𑀫𑁆𑀧𑀺 𑀲𑀁𑀯𑀺𑀪𑀸𑀕𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀬𑀯𑀸 𑀦𑀺𑀧𑁆𑀨𑀚𑁆𑀚𑀺𑀁𑀲𑀼. 𑀢𑀲𑁆𑀲 ‘‘𑀅𑀚𑁆𑀚 𑀯𑀸 𑀲𑁆𑀯𑁂 𑀯𑀸 𑀮𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀼𑀓𑁆𑀓𑀁 𑀓𑀼𑀭𑀼𑀫𑀸𑀦𑀲𑁆𑀲𑁂𑀯 𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀯𑀲𑁆𑀲𑀺. 𑀅𑀘𑀺𑀭𑀯𑀢𑀻 𑀦𑀤𑀻 𑀧𑀽𑀭𑀸 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀬𑀯𑀁 𑀯𑀳𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀩𑁆𑀩𑀭𑀢𑁆𑀢𑀺𑀁 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀧𑀪𑀸𑀢𑁂 𑀦𑀤𑀻𑀢𑀻𑀭𑀁 𑀕𑀢𑁄 𑀲𑀩𑁆𑀩𑀁 𑀲𑀲𑁆𑀲𑀯𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀯𑀺𑀦𑀝𑁆𑀞𑁄𑀫𑁆𑀳𑀺, 𑀓𑀣𑀁 𑀤𑀸𑀦𑀺 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀩𑀮𑀯𑀲𑁄𑀓𑀁 𑀉𑀧𑁆𑀧𑀸𑀤𑁂𑀲𑀺. 𑀪𑀕𑀯𑀸𑀧𑀺 𑀢𑀫𑁂𑀯 𑀭𑀢𑁆𑀢𑀺𑀁 𑀧𑀘𑁆𑀘𑀽𑀲𑀲𑀫𑀬𑁂 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 ‘‘𑀅𑀚𑁆𑀚 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁄’’𑀢𑀺 𑀜𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀲𑁄𑀓𑀸𑀪𑀺𑀪𑀽𑀢𑀁 𑀫𑀁 𑀅𑀲𑁆𑀲𑀸𑀲𑁂𑀢𑀼𑀓𑀸𑀫𑁄 𑀲𑀫𑀡𑁄 𑀕𑁄𑀢𑀫𑁄 𑀆𑀕𑀢𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀦𑀺𑀲𑀻𑀤𑀸𑀧𑁂𑀲𑀺. 𑀪𑀕𑀯𑀸 𑀚𑀸𑀦𑀦𑁆𑀢𑁄𑀯 𑀩𑁆𑀭𑀸𑀳𑁆𑀫𑀡𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀩𑁆𑀭𑀸𑀳𑁆𑀫𑀡 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀯𑀺𑀳𑀸𑀲𑀻’’𑀢𑀺? 𑀆𑀫, 𑀪𑁄 𑀕𑁄𑀢𑀫, 𑀲𑀩𑁆𑀩𑀁 𑀫𑁂 𑀬𑀯𑀓𑁆𑀔𑁂𑀢𑁆𑀢𑀁 𑀉𑀤𑀓𑁂𑀦 𑀯𑀽𑀴𑁆𑀳𑀦𑁆𑀢𑀺. 𑀅𑀣 𑀪𑀕𑀯𑀸 ‘‘𑀦, 𑀩𑁆𑀭𑀸𑀳𑁆𑀫𑀡, 𑀯𑀺𑀧𑀦𑁆𑀦𑁂 𑀤𑁄𑀫𑀦𑀲𑁆𑀲𑀁, 𑀲𑀫𑁆𑀧𑀦𑁆𑀦𑁂 𑀘 𑀲𑁄𑀫𑀦𑀲𑁆𑀲𑀁 𑀓𑀸𑀢𑀩𑁆𑀩𑀁. 𑀓𑀸𑀫𑀸 𑀳𑀺 𑀦𑀸𑀫 𑀲𑀫𑁆𑀧𑀚𑁆𑀚𑀦𑁆𑀢𑀺𑀧𑀺 𑀯𑀺𑀧𑀚𑁆𑀚𑀦𑁆𑀢𑀺𑀧𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀧𑁆𑀧𑀸𑀬𑀁 𑀜𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀯𑀲𑁂𑀦 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺. 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀧𑀤𑀢𑁆𑀣𑀲𑀫𑁆𑀩𑀦𑁆𑀥𑀫𑀢𑁆𑀢𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫, 𑀯𑀺𑀢𑁆𑀣𑀸𑀭𑁄 𑀧𑀦 𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁧) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂, 𑀏𑀯𑀁 𑀇𑀢𑁄 𑀧𑀭𑀁 𑀲𑀩𑁆𑀩𑀲𑀼𑀢𑁆𑀢𑁂𑀲𑀼.

𑀢𑀢𑁆𑀣 𑀓𑀸𑀫𑀦𑁆𑀢𑀺 𑀫𑀦𑀸𑀧𑀺𑀬𑀭𑀽𑀧𑀸𑀤𑀺𑀢𑁂𑀪𑀽𑀫𑀓𑀥𑀫𑁆𑀫𑀲𑀗𑁆𑀔𑀸𑀢𑀁 𑀯𑀢𑁆𑀣𑀼𑀓𑀸𑀫𑀁, 𑀓𑀸𑀫𑀬𑀫𑀸𑀦𑀲𑁆𑀲𑀸𑀢𑀺 𑀇𑀘𑁆𑀙𑀫𑀸𑀦𑀲𑁆𑀲. 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀻𑀢𑀺 𑀢𑀲𑁆𑀲 𑀓𑀸𑀫𑀬𑀫𑀸𑀦𑀲𑁆𑀲 𑀲𑀢𑁆𑀢𑀲𑁆𑀲 𑀢𑀁 𑀓𑀸𑀫𑀲𑀗𑁆𑀔𑀸𑀢𑀁 𑀯𑀢𑁆𑀣𑀼 𑀲𑀫𑀺𑀚𑁆𑀛𑀢𑀺 𑀘𑁂, 𑀲𑀘𑁂 𑀲𑁄 𑀢𑀁 𑀮𑀪𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀻𑀢𑀺 𑀏𑀓𑀁𑀲𑀁 𑀢𑀼𑀝𑁆𑀞𑀘𑀺𑀢𑁆𑀢𑁄 𑀳𑁄𑀢𑀺. 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸. 𑀫𑀘𑁆𑀘𑁄𑀢𑀺 𑀲𑀢𑁆𑀢𑁄. 𑀬𑀤𑀺𑀘𑁆𑀙𑀢𑀻𑀢𑀺 𑀬𑀁 𑀇𑀘𑁆𑀙𑀢𑀺.

𑁭𑁭𑁪. 𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲𑀸𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀸𑀫𑁂 𑀇𑀘𑁆𑀙𑀫𑀸𑀦𑀲𑁆𑀲, 𑀓𑀸𑀫𑁂𑀦 𑀯𑀸 𑀬𑀸𑀬𑀫𑀸𑀦𑀲𑁆𑀲. 𑀙𑀦𑁆𑀤𑀚𑀸𑀢𑀲𑁆𑀲𑀸𑀢𑀺 𑀚𑀸𑀢𑀢𑀡𑁆𑀳𑀲𑁆𑀲. 𑀚𑀦𑁆𑀢𑀼𑀦𑁄𑀢𑀺 𑀲𑀢𑁆𑀢𑀲𑁆𑀲. 𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺 𑀘𑁂. 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻𑀢𑀺 𑀅𑀣 𑀅𑀬𑁄𑀫𑀬𑀸𑀤𑀺𑀦𑀸 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀯𑀺𑀬 𑀧𑀻𑀴𑀻𑀬𑀢𑀺.

𑁭𑁭𑁫. 𑀢𑀢𑀺𑀬𑀕𑀸𑀣𑀸𑀬 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁄 𑀧𑀦 𑀇𑀫𑁂 𑀓𑀸𑀫𑁂 𑀢𑀢𑁆𑀣 𑀙𑀦𑁆𑀤𑀭𑀸𑀕𑀯𑀺𑀓𑁆𑀔𑀫𑁆𑀪𑀦𑁂𑀦 𑀯𑀸 𑀲𑀫𑀼𑀘𑁆𑀙𑁂𑀤𑁂𑀦 𑀯𑀸 𑀅𑀢𑁆𑀢𑀦𑁄 𑀧𑀸𑀤𑁂𑀦 𑀲𑀧𑁆𑀧𑀲𑁆𑀲 𑀲𑀺𑀭𑀁 𑀇𑀯 𑀧𑀭𑀺𑀯𑀚𑁆𑀚𑁂𑀢𑀺. 𑀲𑁄 𑀪𑀺𑀓𑁆𑀔𑀼 𑀲𑀩𑁆𑀩𑀁 𑀮𑁄𑀓𑀁 𑀯𑀺𑀲𑀭𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀸𑀲𑀗𑁆𑀔𑀸𑀢𑀁 𑀢𑀡𑁆𑀳𑀁 𑀲𑀢𑁄 𑀳𑀼𑀢𑁆𑀯𑀸 𑀲𑀫𑀢𑀺𑀯𑀢𑁆𑀢𑀢𑀻𑀢𑀺.

𑁭𑁭𑁬-𑁮. 𑀢𑀢𑁄 𑀧𑀭𑀸𑀲𑀁 𑀢𑀺𑀲𑁆𑀲𑀦𑁆𑀦𑀁 𑀕𑀸𑀣𑀸𑀦𑀁 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁄 𑀏𑀢𑀁 𑀲𑀸𑀮𑀺𑀓𑁆𑀔𑁂𑀢𑁆𑀢𑀸𑀤𑀺𑀁 𑀔𑁂𑀢𑁆𑀢𑀁 𑀯𑀸 𑀖𑀭𑀯𑀢𑁆𑀣𑀸𑀤𑀺𑀁 𑀯𑀢𑁆𑀣𑀼𑀁 𑀯𑀸 𑀓𑀳𑀸𑀧𑀡𑀲𑀗𑁆𑀔𑀸𑀢𑀁 𑀳𑀺𑀭𑀜𑁆𑀜𑀁 𑀯𑀸 𑀕𑁄𑀅𑀲𑁆𑀲𑀪𑁂𑀤𑀁 𑀕𑀯𑀸𑀲𑁆𑀲𑀁 𑀯𑀸 𑀇𑀢𑁆𑀣𑀺𑀲𑀜𑁆𑀜𑀺𑀓𑀸 𑀣𑀺𑀬𑁄 𑀯𑀸 𑀜𑀸𑀢𑀺𑀩𑀦𑁆𑀥𑀯𑀸𑀤𑀻 𑀩𑀦𑁆𑀥𑀽 𑀯𑀸 𑀅𑀜𑁆𑀜𑁂 𑀯𑀸 𑀫𑀦𑀸𑀧𑀺𑀬𑀭𑀽𑀧𑀸𑀤𑀻 𑀧𑀼𑀣𑀼 𑀓𑀸𑀫𑁂 𑀅𑀦𑀼𑀕𑀺𑀚𑁆𑀛𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀅𑀩𑀮𑀲𑀗𑁆𑀔𑀸𑀢𑀸 𑀓𑀺𑀮𑁂𑀲𑀸 𑀩𑀮𑀻𑀬𑀦𑁆𑀢𑀺 𑀲𑀳𑀦𑁆𑀢𑀺 𑀫𑀤𑁆𑀤𑀦𑁆𑀢𑀺, 𑀲𑀤𑁆𑀥𑀸𑀩𑀮𑀸𑀤𑀺𑀯𑀺𑀭𑀳𑁂𑀦 𑀯𑀸 𑀅𑀩𑀮𑀁 𑀢𑀁 𑀧𑀼𑀕𑁆𑀕𑀮𑀁 𑀅𑀩𑀮𑀸 𑀓𑀺𑀮𑁂𑀲𑀸 𑀩𑀮𑀻𑀬𑀦𑁆𑀢𑀺, 𑀅𑀩𑀮𑀢𑁆𑀢𑀸 𑀩𑀮𑀻𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀢𑀁 𑀓𑀸𑀫𑀕𑀺𑀤𑁆𑀥𑀁 𑀓𑀸𑀫𑁂 𑀭𑀓𑁆𑀔𑀦𑁆𑀢𑀁 𑀧𑀭𑀺𑀬𑁂𑀲𑀦𑁆𑀢𑀜𑁆𑀘 𑀲𑀻𑀳𑀸𑀤𑀬𑁄 𑀘 𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀬𑁄 𑀘 𑀅𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀫𑀤𑁆𑀤𑀦𑁆𑀢𑀺, 𑀢𑀢𑁄 𑀅𑀧𑀸𑀓𑀝𑀧𑀭𑀺𑀲𑁆𑀲𑀬𑁂𑀳𑀺 𑀅𑀪𑀺𑀪𑀽𑀢𑀁 𑀢𑀁 𑀧𑀼𑀕𑁆𑀕𑀮𑀁 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀁 𑀪𑀺𑀦𑁆𑀦𑀁 𑀦𑀸𑀯𑀁 𑀉𑀤𑀓𑀁 𑀯𑀺𑀬 𑀅𑀦𑁆𑀯𑁂𑀢𑀺. 𑀢𑀲𑁆𑀫𑀸 𑀓𑀸𑀬𑀕𑀢𑀸𑀲𑀢𑀺𑀆𑀤𑀺𑀪𑀸𑀯𑀦𑀸𑀬 𑀚𑀦𑁆𑀢𑀼 𑀲𑀤𑀸 𑀲𑀢𑁄 𑀳𑀼𑀢𑁆𑀯𑀸 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀭𑀽𑀧𑀸𑀤𑀻𑀲𑀼 𑀯𑀢𑁆𑀣𑀼𑀓𑀸𑀫𑁂𑀲𑀼 𑀲𑀩𑁆𑀩𑀧𑁆𑀧𑀓𑀸𑀭𑀫𑁆𑀧𑀺 𑀓𑀺𑀮𑁂𑀲𑀓𑀸𑀫𑀁 𑀧𑀭𑀺𑀯𑀚𑁆𑀚𑁂𑀦𑁆𑀢𑁄 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂. 𑀏𑀯𑀁 𑀢𑁂 𑀓𑀸𑀫𑁂 𑀧𑀳𑀸𑀬 𑀢𑀧𑁆𑀧𑀳𑀸𑀦𑀓𑀭𑀫𑀕𑁆𑀕𑁂𑀦𑁂𑀯 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀢𑀭𑁂 𑀑𑀖𑀁 𑀢𑀭𑁂𑀬𑁆𑀬 𑀢𑀭𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬. 𑀢𑀢𑁄 𑀬𑀣𑀸 𑀧𑀼𑀭𑀺𑀲𑁄 𑀉𑀤𑀓𑀕𑀭𑀼𑀓𑀁 𑀦𑀸𑀯𑀁 𑀲𑀺𑀜𑁆𑀘𑀺𑀢𑁆𑀯𑀸 𑀮𑀳𑀼𑀓𑀸𑀬 𑀦𑀸𑀯𑀸𑀬 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀸𑀭𑀕𑀽 𑀪𑀯𑁂𑀬𑁆𑀬, 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀏𑀯𑀫𑁂𑀯 𑀅𑀢𑁆𑀢𑀪𑀸𑀯𑀦𑀸𑀯𑀁 𑀓𑀺𑀮𑁂𑀲𑀽𑀤𑀓𑀕𑀭𑀼𑀓𑀁 𑀲𑀺𑀜𑁆𑀘𑀺𑀢𑁆𑀯𑀸 𑀮𑀳𑀼𑀓𑁂𑀦 𑀅𑀢𑁆𑀢𑀪𑀸𑀯𑁂𑀦 𑀧𑀸𑀭𑀕𑀽 𑀪𑀯𑁂𑀬𑁆𑀬, 𑀲𑀩𑁆𑀩𑀥𑀫𑁆𑀫𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄 𑀪𑀯𑁂𑀬𑁆𑀬, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀕𑀘𑁆𑀙𑁂𑀬𑁆𑀬 𑀘, 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀢𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀸𑀳𑁆𑀫𑀡𑁄 𑀘 𑀩𑁆𑀭𑀸𑀳𑁆𑀫𑀡𑀻 𑀘 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀓𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀕𑀼𑀳𑀝𑁆𑀞𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁭𑁯. 𑀲𑀢𑁆𑀢𑁄 𑀕𑀼𑀳𑀸𑀬𑀦𑁆𑀢𑀺 𑀕𑀼𑀳𑀝𑁆𑀞𑀓𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀆𑀬𑀲𑁆𑀫𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄 𑀓𑁄𑀲𑀫𑁆𑀩𑀺𑀬𑀁 𑀕𑀁𑀗𑁆𑀕𑀸𑀢𑀻𑀭𑁂 𑀆𑀯𑀝𑁆𑀝𑀓𑀁 𑀦𑀸𑀫 𑀉𑀢𑁂𑀦𑀲𑁆𑀲 𑀉𑀬𑁆𑀬𑀸𑀦𑀁, 𑀢𑀢𑁆𑀣 𑀅𑀕𑀫𑀸𑀲𑀺 𑀲𑀻𑀢𑀮𑁂 𑀧𑀤𑁂𑀲𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺𑀢𑀼𑀓𑀸𑀫𑁄. 𑀅𑀜𑁆𑀜𑀤𑀸𑀧𑀺 𑀘𑀸𑀬𑀁 𑀕𑀘𑁆𑀙𑀢𑁂𑀯 𑀢𑀢𑁆𑀣 𑀧𑀼𑀩𑁆𑀩𑀸𑀲𑁂𑀯𑀦𑁂𑀦 𑀬𑀣𑀸 𑀕𑀯𑀫𑁆𑀧𑀢𑀺𑀢𑁆𑀣𑁂𑀭𑁄 𑀢𑀸𑀯𑀢𑀺𑀁𑀲𑀪𑀯𑀦𑀦𑁆𑀢𑀺 𑀯𑀼𑀢𑁆𑀢𑀦𑀬𑀫𑁂𑀢𑀁 𑀯𑀗𑁆𑀕𑀻𑀲𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁. 𑀲𑁄 𑀢𑀢𑁆𑀣 𑀕𑀗𑁆𑀕𑀸𑀢𑀻𑀭𑁂 𑀲𑀻𑀢𑀮𑁂 𑀭𑀼𑀓𑁆𑀔𑀫𑀽𑀮𑁂 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀭𑀸𑀚𑀸𑀧𑀺 𑀔𑁄 𑀉𑀢𑁂𑀦𑁄 𑀢𑀁 𑀤𑀺𑀯𑀲𑀁𑀬𑁂𑀯 𑀉𑀬𑁆𑀬𑀸𑀦𑀓𑀻𑀴𑀺𑀓𑀁 𑀕𑀦𑁆𑀢𑁆𑀯𑀸 𑀩𑀳𑀼𑀤𑁂𑀯 𑀤𑀺𑀯𑀲𑀪𑀸𑀕𑀁 𑀦𑀘𑁆𑀘𑀕𑀻𑀢𑀸𑀤𑀻𑀳𑀺 𑀉𑀬𑁆𑀬𑀸𑀦𑁂 𑀓𑀻𑀴𑀺𑀢𑁆𑀯𑀸 𑀧𑀸𑀦𑀫𑀤𑀫𑀢𑁆𑀢𑁄 𑀏𑀓𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀅𑀗𑁆𑀓𑁂 𑀲𑀻𑀲𑀁 𑀓𑀢𑁆𑀯𑀸 𑀲𑀬𑀺. 𑀲𑁂𑀲𑀺𑀢𑁆𑀣𑀺𑀬𑁄 ‘‘𑀲𑀼𑀢𑁆𑀢𑁄 𑀭𑀸𑀚𑀸’’𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀉𑀬𑁆𑀬𑀸𑀦𑁂 𑀧𑀼𑀧𑁆𑀨𑀨𑀮𑀸𑀤𑀻𑀦𑀺 𑀕𑀡𑁆𑀳𑀦𑁆𑀢𑀺𑀬𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 ‘‘𑀫𑀸 𑀲𑀤𑁆𑀤𑀁 𑀅𑀓𑀢𑁆𑀣𑀸’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀦𑀺𑀯𑀸𑀭𑁂𑀢𑁆𑀯𑀸 𑀅𑀧𑁆𑀧𑀲𑀤𑁆𑀤𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀣𑁂𑀭𑀁 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀣𑁂𑀭𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀢𑀸𑀲𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀸 𑀢𑀼𑀝𑁆𑀞𑀸 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀲𑀼𑀡𑀦𑁆𑀢𑀺.

𑀭𑀜𑁆𑀜𑁄 𑀲𑀻𑀲𑀁 𑀅𑀗𑁆𑀓𑁂𑀦𑀸𑀤𑀸𑀬 𑀦𑀺𑀲𑀺𑀦𑁆𑀦𑀺𑀢𑁆𑀣𑀻 ‘‘𑀇𑀫𑀸 𑀫𑀁 𑀑𑀳𑀸𑀬 𑀓𑀻𑀴𑀦𑁆𑀢𑀻’’𑀢𑀺 𑀢𑀸𑀲𑀼 𑀇𑀲𑁆𑀲𑀸𑀧𑀓𑀢𑀸 𑀊𑀭𑀼𑀁 𑀘𑀸𑀮𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀩𑁄𑀥𑁂𑀲𑀺. 𑀭𑀸𑀚𑀸 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀇𑀢𑁆𑀣𑀸𑀕𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀼𑀳𑀺𑀁 𑀇𑀫𑀸 𑀯𑀲𑀮𑀺𑀬𑁄’’𑀢𑀺 𑀆𑀳. 𑀲𑀸 𑀆𑀳 𑁋 ‘‘𑀢𑀼𑀫𑁆𑀳𑁂𑀲𑀼 𑀅𑀩𑀳𑀼𑀓𑀢𑀸 ‘𑀲𑀫𑀡𑀁 𑀭𑀫𑀬𑀺𑀲𑁆𑀲𑀸𑀫𑀸’𑀢𑀺 𑀕𑀢𑀸’’𑀢𑀺. 𑀲𑁄 𑀓𑀼𑀤𑁆𑀥𑁄 𑀣𑁂𑀭𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀢𑀸 𑀇𑀢𑁆𑀣𑀺𑀬𑁄 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀏𑀓𑀘𑁆𑀘𑀸 𑀉𑀝𑁆𑀞𑀳𑀺𑀁𑀲𑀼, 𑀏𑀓𑀘𑁆𑀘𑀸 ‘‘𑀫𑀳𑀸𑀭𑀸𑀚, 𑀧𑀩𑁆𑀩𑀚𑀺𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀸𑀫𑀸’’𑀢𑀺 𑀦 𑀉𑀝𑁆𑀞𑀳𑀺𑀁𑀲𑀼. 𑀲𑁄 𑀢𑁂𑀦 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀼𑀤𑁆𑀥𑁄 𑀣𑁂𑀭𑀁 𑀅𑀯𑀦𑁆𑀤𑀺𑀢𑁆𑀯𑀸𑀯 ‘‘𑀓𑀺𑀫𑀢𑁆𑀣𑀁 𑀆𑀕𑀢𑁄𑀲𑀻’’𑀢𑀺 𑀆𑀳. ‘‘𑀯𑀺𑀯𑁂𑀓𑀢𑁆𑀣𑀁 𑀫𑀳𑀸𑀭𑀸𑀚𑀸’’𑀢𑀺. 𑀲𑁄 ‘‘𑀯𑀺𑀯𑁂𑀓𑀢𑁆𑀣𑀸𑀬 𑀆𑀕𑀢𑀸 𑀏𑀯𑀁 𑀇𑀢𑁆𑀣𑀸𑀕𑀸𑀭𑀧𑀭𑀺𑀯𑀼𑀢𑀸 𑀦𑀺𑀲𑀻𑀤𑀦𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀢𑀯 𑀯𑀺𑀯𑁂𑀓𑀁 𑀓𑀣𑁂𑀳𑀻’’𑀢𑀺 𑀆𑀳. 𑀣𑁂𑀭𑁄 𑀯𑀺𑀲𑀸𑀭𑀤𑁄𑀧𑀺 𑀯𑀺𑀯𑁂𑀓𑀓𑀣𑀸𑀬 ‘‘𑀦𑀸𑀬𑀁 𑀅𑀜𑁆𑀜𑀸𑀢𑀼𑀓𑀸𑀫𑁄 𑀧𑀼𑀘𑁆𑀙𑀢𑀻’’𑀢𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀭𑀸𑀚𑀸 ‘‘𑀲𑀘𑁂 𑀦 𑀓𑀣𑁂𑀲𑀺, 𑀢𑀫𑁆𑀩𑀓𑀺𑀧𑀺𑀮𑁆𑀮𑀺𑀓𑁂𑀳𑀺 𑀢𑀁 𑀔𑀸𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀲𑁄𑀓𑀭𑀼𑀓𑁆𑀔𑁂 𑀢𑀫𑁆𑀩𑀓𑀺𑀧𑀺𑀮𑁆𑀮𑀺𑀓𑀧𑀼𑀝𑀁 𑀕𑀡𑁆𑀳𑀦𑁆𑀢𑁄 𑀅𑀢𑁆𑀢𑀦𑁄𑀯 𑀉𑀧𑀭𑀺 𑀯𑀺𑀓𑀺𑀭𑀺. 𑀲𑁄 𑀲𑀭𑀻𑀭𑀁 𑀧𑀼𑀜𑁆𑀙𑀺𑀢𑁆𑀯𑀸 𑀅𑀜𑁆𑀜𑀁 𑀧𑀼𑀝𑀁 𑀕𑀳𑁂𑀢𑁆𑀯𑀸 𑀣𑁂𑀭𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀣𑁂𑀭𑁄 ‘‘𑀲𑀘𑀸𑀬𑀁 𑀭𑀸𑀚𑀸 𑀫𑀬𑀺 𑀅𑀧𑀭𑀚𑁆𑀛𑁂𑀬𑁆𑀬, 𑀅𑀧𑀸𑀬𑀸𑀪𑀺𑀫𑀼𑀔𑁄 𑀪𑀯𑁂𑀬𑁆𑀬𑀸’’𑀢𑀺 𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄 𑀇𑀤𑁆𑀥𑀺𑀬𑀸 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀕𑀢𑁄.

𑀢𑀢𑁄 𑀇𑀢𑁆𑀣𑀺𑀬𑁄 𑀆𑀳𑀁𑀲𑀼 𑁋 ‘‘𑀫𑀳𑀸𑀭𑀸𑀚, 𑀅𑀜𑁆𑀜𑁂 𑀭𑀸𑀚𑀸𑀦𑁄 𑀈𑀤𑀺𑀲𑀁 𑀧𑀩𑁆𑀩𑀚𑀺𑀢𑀁 𑀤𑀺𑀲𑁆𑀯𑀸 𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑀺, 𑀢𑁆𑀯𑀁 𑀢𑀫𑁆𑀩𑀓𑀺𑀧𑀺𑀮𑁆𑀮𑀺𑀓𑀧𑀼𑀝𑁂𑀦 𑀆𑀲𑀸𑀤𑁂𑀢𑀼𑀁 𑀆𑀭𑀤𑁆𑀥𑁄 𑀅𑀳𑁄𑀲𑀺, 𑀓𑀼𑀮𑀯𑀁𑀲𑀁 𑀦𑀸𑀲𑁂𑀢𑀼𑀁 𑀉𑀝𑁆𑀞𑀺𑀢𑁄’’𑀢𑀺. 𑀲𑁄 𑀅𑀢𑁆𑀢𑀦𑁄 𑀤𑁄𑀲𑀁 𑀜𑀢𑁆𑀯𑀸 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑀁 𑀧𑀼𑀘𑁆𑀙𑀺 𑁋 ‘‘𑀅𑀜𑁆𑀜𑀫𑁆𑀧𑀺 𑀤𑀺𑀯𑀲𑀁 𑀣𑁂𑀭𑁄 𑀇𑀥𑀸𑀕𑀘𑁆𑀙𑀢𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. 𑀢𑁂𑀦 𑀳𑀺 𑀬𑀤𑀸 𑀆𑀕𑀘𑁆𑀙𑀢𑀺, 𑀢𑀤𑀸 𑀫𑁂 𑀆𑀭𑁄𑀘𑁂𑀬𑁆𑀬𑀸𑀲𑀻𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀣𑁂𑀭𑁂 𑀆𑀕𑀢𑁂 𑀆𑀭𑁄𑀘𑁂𑀲𑀺. 𑀭𑀸𑀚𑀸𑀧𑀺 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀸𑀡𑁂𑀳𑀺 𑀲𑀭𑀡𑀁 𑀕𑀢𑁄 𑀅𑀳𑁄𑀲𑀺. 𑀢𑀫𑁆𑀩𑀓𑀺𑀧𑀺𑀮𑁆𑀮𑀺𑀓𑀧𑀼𑀝𑁂𑀦 𑀆𑀲𑀸𑀤𑀺𑀢𑀤𑀺𑀯𑀲𑁂 𑀧𑀦 𑀣𑁂𑀭𑁄 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀧𑀼𑀦 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺𑀬𑀁 𑀉𑀫𑁆𑀫𑀼𑀚𑁆𑀚𑀺. 𑀪𑀕𑀯𑀸𑀧𑀺 𑀔𑁄 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑀬𑀫𑀸𑀦𑁄 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀓𑀺𑀁, 𑀪𑀸𑀭𑀤𑁆𑀯𑀸𑀚, 𑀅𑀓𑀸𑀮𑁂 𑀆𑀕𑀢𑁄𑀲𑀻’’𑀢𑀺 𑀆𑀳. 𑀣𑁂𑀭𑁄 ‘‘𑀆𑀫 𑀪𑀕𑀯𑀸’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀪𑀕𑀯𑀸 ‘‘𑀓𑀺𑀁 𑀓𑀭𑀺𑀲𑁆𑀲𑀢𑀺 𑀢𑀲𑁆𑀲 𑀯𑀺𑀯𑁂𑀓𑀓𑀣𑀸 𑀓𑀸𑀫𑀕𑀼𑀡𑀕𑀺𑀤𑁆𑀥𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄 𑀏𑀯 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀲𑀢𑁆𑀢𑁄𑀢𑀺 𑀮𑀕𑁆𑀕𑁄. 𑀕𑀼𑀳𑀸𑀬𑀦𑁆𑀢𑀺 𑀓𑀸𑀬𑁂. 𑀓𑀸𑀬𑁄 𑀳𑀺 𑀭𑀸𑀕𑀸𑀤𑀻𑀦𑀁 𑀯𑀸𑀴𑀸𑀦𑀁 𑀯𑀲𑀦𑁄𑀓𑀸𑀲𑀢𑁄 ‘‘𑀕𑀼𑀳𑀸’’𑀢𑀺 𑀯𑀼𑀘𑁆𑀘𑀢𑀺. 𑀩𑀳𑀼𑀦𑀸𑀪𑀺𑀙𑀦𑁆𑀦𑁄𑀢𑀺 𑀩𑀳𑀼𑀦𑀸 𑀭𑀸𑀕𑀸𑀤𑀺𑀓𑀺𑀮𑁂𑀲𑀚𑀸𑀮𑁂𑀦 𑀅𑀪𑀺𑀘𑁆𑀙𑀦𑁆𑀦𑁄. 𑀏𑀢𑁂𑀦 𑀅𑀚𑁆𑀛𑀢𑁆𑀢𑀩𑀦𑁆𑀥𑀦𑀁 𑀯𑀼𑀢𑁆𑀢𑀁. 𑀢𑀺𑀝𑁆𑀞𑀦𑁆𑀢𑀺 𑀭𑀸𑀕𑀸𑀤𑀺𑀯𑀲𑁂𑀦 𑀢𑀺𑀝𑁆𑀞𑀦𑁆𑀢𑁄. 𑀦𑀭𑁄𑀢𑀺 𑀲𑀢𑁆𑀢𑁄. 𑀫𑁄𑀳𑀦𑀲𑁆𑀫𑀺𑀁 𑀧𑀕𑀸𑀴𑁆𑀳𑁄𑀢𑀺 𑀫𑁄𑀳𑀦𑀁 𑀯𑀼𑀘𑁆𑀘𑀢𑀺 𑀓𑀸𑀫𑀕𑀼𑀡𑀸. 𑀏𑀢𑁆𑀣 𑀳𑀺 𑀤𑁂𑀯𑀫𑀦𑀼𑀲𑁆𑀲𑀸 𑀫𑀼𑀬𑁆𑀳𑀦𑁆𑀢𑀺, 𑀢𑁂𑀲𑀼 𑀅𑀚𑁆𑀛𑁄𑀕𑀸𑀴𑁆𑀳𑁄 𑀳𑀼𑀢𑁆𑀯𑀸. 𑀏𑀢𑁂𑀦 𑀩𑀳𑀺𑀤𑁆𑀥𑀸𑀩𑀦𑁆𑀥𑀦𑀁 𑀯𑀼𑀢𑁆𑀢𑀁. 𑀤𑀽𑀭𑁂 𑀯𑀺𑀯𑁂𑀓𑀸 𑀳𑀺 𑀢𑀣𑀸𑀯𑀺𑀥𑁄 𑀲𑁄𑀢𑀺 𑀲𑁄 𑀢𑀣𑀸𑀭𑀽𑀧𑁄 𑀦𑀭𑁄 𑀢𑀺𑀯𑀺𑀥𑀸𑀧𑀺 𑀓𑀸𑀬𑀯𑀺𑀯𑁂𑀓𑀸𑀤𑀺𑀓𑀸 𑀯𑀺𑀯𑁂𑀓𑀸 𑀤𑀽𑀭𑁂 𑀅𑀦𑀸𑀲𑀦𑁆𑀦𑁂. 𑀓𑀺𑀁𑀓𑀸𑀭𑀡𑀸? 𑀓𑀸𑀫𑀸 𑀳𑀺 𑀮𑁄𑀓𑁂 𑀦 𑀳𑀺 𑀲𑀼𑀧𑁆𑀧𑀳𑀸𑀬𑀸, 𑀬𑀲𑁆𑀫𑀸 𑀮𑁄𑀓𑁂 𑀓𑀸𑀫𑀸 𑀲𑀼𑀧𑁆𑀧𑀳𑀸𑀬𑀸 𑀦 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁮𑁦. 𑀏𑀯𑀁 𑀧𑀞𑀫𑀕𑀸𑀣𑀸𑀬 ‘‘𑀤𑀽𑀭𑁂 𑀯𑀺𑀯𑁂𑀓𑀸 𑀢𑀣𑀸𑀯𑀺𑀥𑁄’’𑀢𑀺 𑀲𑀸𑀥𑁂𑀢𑁆𑀯𑀸 𑀧𑀼𑀦 𑀢𑀣𑀸𑀯𑀺𑀥𑀸𑀦𑀁 𑀲𑀢𑁆𑀢𑀸𑀦𑀁 𑀥𑀫𑁆𑀫𑀢𑀁 𑀆𑀯𑀺𑀓𑀭𑁄𑀦𑁆𑀢𑁄 ‘‘𑀇𑀘𑁆𑀙𑀸𑀦𑀺𑀤𑀸𑀦𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀇𑀘𑁆𑀙𑀸𑀦𑀺𑀤𑀸𑀦𑀸𑀢𑀺 𑀢𑀡𑁆𑀳𑀸𑀳𑁂𑀢𑀼𑀓𑀸. 𑀪𑀯𑀲𑀸𑀢𑀩𑀤𑁆𑀥𑀸𑀢𑀺 𑀲𑀼𑀔𑀯𑁂𑀤𑀦𑀸𑀤𑀺𑀫𑁆𑀳𑀺 𑀪𑀯𑀲𑀸𑀢𑁂 𑀩𑀤𑁆𑀥𑀸. 𑀢𑁂 𑀤𑀼𑀧𑁆𑀧𑀫𑀼𑀜𑁆𑀘𑀸𑀢𑀺 𑀢𑁂 𑀪𑀯𑀲𑀸𑀢𑀯𑀢𑁆𑀣𑀼𑀪𑀽𑀢𑀸 𑀥𑀫𑁆𑀫𑀸, 𑀢𑁂 𑀯𑀸 𑀢𑀢𑁆𑀣 𑀩𑀤𑁆𑀥𑀸 𑀇𑀘𑁆𑀙𑀸𑀦𑀺𑀤𑀸𑀦𑀸 𑀲𑀢𑁆𑀢𑀸 𑀤𑀼𑀧𑁆𑀧𑀫𑁄𑀘𑀬𑀸. 𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸𑀢𑀺 𑀅𑀜𑁆𑀜𑁂𑀦 𑀘 𑀫𑁄𑀘𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀓𑀸𑀭𑀡𑀯𑀘𑀦𑀁 𑀯𑀸 𑀏𑀢𑀁, 𑀢𑁂 𑀲𑀢𑁆𑀢𑀸 𑀤𑀼𑀧𑁆𑀧𑀫𑀼𑀜𑁆𑀘𑀸. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀜𑁆𑀜𑁂𑀦 𑀫𑁄𑀘𑁂𑀢𑀩𑁆𑀩𑀸 𑀦 𑀳𑁄𑀦𑁆𑀢𑀺. 𑀬𑀤𑀺 𑀧𑀦 𑀫𑀼𑀜𑁆𑀘𑁂𑀬𑁆𑀬𑀼𑀁, 𑀲𑀓𑁂𑀦 𑀣𑀸𑀫𑁂𑀦 𑀫𑀼𑀜𑁆𑀘𑁂𑀬𑁆𑀬𑀼𑀦𑁆𑀢𑀺 𑀅𑀬𑀫𑀲𑁆𑀲 𑀅𑀢𑁆𑀣𑁄. 𑀧𑀘𑁆𑀙𑀸 𑀧𑀼𑀭𑁂 𑀯𑀸𑀧𑀺 𑀅𑀧𑁂𑀓𑁆𑀔𑀫𑀸𑀦𑀸𑀢𑀺 𑀅𑀦𑀸𑀕𑀢𑁂 𑀅𑀢𑀻𑀢𑁂 𑀯𑀸 𑀓𑀸𑀫𑁂 𑀅𑀧𑁂𑀓𑁆𑀔𑀫𑀸𑀦𑀸. 𑀇𑀫𑁂𑀯 𑀓𑀸𑀫𑁂 𑀧𑀼𑀭𑀺𑀫𑁂𑀯 𑀚𑀧𑁆𑀧𑀦𑁆𑀢𑀺 𑀇𑀫𑁂 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀸𑀫𑁂 𑀧𑀼𑀭𑀺𑀫𑁂 𑀯𑀸 𑀤𑀼𑀯𑀺𑀥𑁂𑀧𑀺 𑀅𑀢𑀻𑀢𑀸𑀦𑀸𑀕𑀢𑁂 𑀩𑀮𑀯𑀢𑀡𑁆𑀳𑀸𑀬 𑀧𑀢𑁆𑀣𑀬𑀫𑀸𑀦𑀸. 𑀇𑀫𑁂𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 ‘‘𑀢𑁂 𑀤𑀼𑀧𑁆𑀧𑀫𑀼𑀜𑁆𑀘𑀸 𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸’’𑀢𑀺 𑀇𑀫𑀺𑀦𑀸 𑀲𑀳 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀇𑀢𑀭𑀣𑀸 ‘‘𑀅𑀧𑁂𑀓𑁆𑀔𑀫𑀸𑀦𑀸 𑀚𑀧𑁆𑀧𑀁 𑀓𑀺𑀁 𑀓𑀭𑁄𑀦𑁆𑀢𑀺 𑀓𑀺𑀁 𑀯𑀸 𑀓𑀢𑀸’’𑀢𑀺 𑀦 𑀧𑀜𑁆𑀜𑀸𑀬𑁂𑀬𑁆𑀬𑀼𑀁.

𑁭𑁮𑁧-𑁨. 𑀏𑀯𑀁 𑀧𑀞𑀫𑀕𑀸𑀣𑀸𑀬 ‘‘𑀤𑀽𑀭𑁂 𑀯𑀺𑀯𑁂𑀓𑀸 𑀢𑀣𑀸𑀯𑀺𑀥𑁄’’𑀢𑀺 𑀲𑀸𑀥𑁂𑀢𑁆𑀯𑀸 𑀤𑀼𑀢𑀺𑀬𑀕𑀸𑀣𑀸𑀬 𑀘 𑀢𑀣𑀸𑀯𑀺𑀥𑀸𑀦𑀁 𑀲𑀢𑁆𑀢𑀸𑀦𑀁 𑀥𑀫𑁆𑀫𑀢𑀁 𑀆𑀯𑀺𑀓𑀢𑁆𑀯𑀸 𑀇𑀤𑀸𑀦𑀺 𑀦𑁂𑀲𑀁 𑀧𑀸𑀧𑀓𑀫𑁆𑀫𑀓𑀭𑀡𑀁 𑀆𑀯𑀺𑀓𑀭𑁄𑀦𑁆𑀢𑁄 ‘‘𑀓𑀸𑀫𑁂𑀲𑀼 𑀕𑀺𑀤𑁆𑀥𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑁂 𑀲𑀢𑁆𑀢𑀸 𑀓𑀸𑀫𑁂𑀲𑀼 𑀧𑀭𑀺𑀪𑁄𑀕𑀢𑀡𑁆𑀳𑀸𑀬 𑀕𑀺𑀤𑁆𑀥𑀸 𑀧𑀭𑀺𑀬𑁂𑀲𑀦𑀸𑀤𑀺𑀫𑀦𑀼𑀬𑀼𑀢𑁆𑀢𑀢𑁆𑀢𑀸 𑀧𑀲𑀼𑀢𑀸 𑀲𑀫𑁆𑀫𑁄𑀳𑀫𑀸𑀧𑀦𑁆𑀦𑀢𑁆𑀢𑀸 𑀧𑀫𑀽𑀴𑁆𑀳𑀸 𑀅𑀯𑀕𑀫𑀦𑀢𑀸𑀬 𑀫𑀘𑁆𑀙𑀭𑀺𑀢𑀸𑀬 𑀩𑀼𑀤𑁆𑀥𑀸𑀤𑀻𑀦𑀁 𑀯𑀘𑀦𑀁 𑀅𑀦𑀸𑀤𑀺𑀬𑀦𑀢𑀸𑀬 𑀘 𑀅𑀯𑀤𑀸𑀦𑀺𑀬𑀸. 𑀓𑀸𑀬𑀯𑀺𑀲𑀫𑀸𑀤𑀺𑀫𑁆𑀳𑀺 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀸 𑀅𑀦𑁆𑀢𑀓𑀸𑀮𑁂 𑀫𑀭𑀡𑀤𑀼𑀓𑁆𑀔𑀽𑀧𑀦𑀻𑀢𑀸 ‘‘𑀓𑀺𑀁𑀲𑀽 𑀪𑀯𑀺𑀲𑁆𑀲𑀸𑀫 𑀇𑀢𑁄 𑀘𑀼𑀢𑀸𑀲𑁂’’𑀢𑀺 𑀧𑀭𑀺𑀤𑁂𑀯𑀬𑀦𑁆𑀢𑀻𑀢𑀺. 𑀬𑀲𑁆𑀫𑀸 𑀏𑀢𑀤𑁂𑀯, 𑀢𑀲𑁆𑀫𑀸 𑀳𑀺 𑀲𑀺𑀓𑁆𑀔𑁂𑀣…𑀧𑁂… 𑀫𑀸𑀳𑀼 𑀥𑀻𑀭𑀸𑀢𑀺. 𑀢𑀢𑁆𑀣 𑀲𑀺𑀓𑁆𑀔𑁂𑀣𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀆𑀧𑀚𑁆𑀚𑁂𑀬𑁆𑀬. 𑀇𑀥𑁂𑀯𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀲𑀸𑀲𑀦𑁂. 𑀲𑁂𑀲𑀫𑀼𑀢𑁆𑀢𑀸𑀦𑀫𑁂𑀯.

𑁭𑁮𑁩. 𑀇𑀤𑀸𑀦𑀺 𑀬𑁂 𑀢𑀣𑀸 𑀦 𑀓𑀭𑁄𑀦𑁆𑀢𑀺, 𑀢𑁂𑀲𑀁 𑀩𑁆𑀬𑀲𑀦𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀲𑁆𑀲𑀸𑀫𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀲𑁆𑀲𑀸𑀫𑀻𑀢𑀺 𑀫𑀁𑀲𑀘𑀓𑁆𑀔𑀼𑀆𑀤𑀻𑀳𑀺 𑀧𑁂𑀓𑁆𑀔𑀸𑀫𑀺. 𑀮𑁄𑀓𑁂𑀢𑀺 𑀅𑀧𑀸𑀬𑀸𑀤𑀺𑀫𑁆𑀳𑀺. 𑀧𑀭𑀺𑀨𑀦𑁆𑀤𑀫𑀸𑀦𑀦𑁆𑀢𑀺 𑀇𑀢𑁄 𑀘𑀺𑀢𑁄 𑀘 𑀨𑀦𑁆𑀤𑀫𑀸𑀦𑀁. 𑀧𑀚𑀁 𑀇𑀫𑀦𑁆𑀢𑀺 𑀇𑀫𑀁 𑀲𑀢𑁆𑀢𑀓𑀸𑀬𑀁. 𑀢𑀡𑁆𑀳𑀕𑀢𑀦𑁆𑀢𑀺 𑀢𑀡𑁆𑀳𑀸𑀬 𑀕𑀢𑀁 𑀅𑀪𑀺𑀪𑀽𑀢𑀁, 𑀦𑀺𑀧𑀸𑀢𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀯𑁂𑀲𑀽𑀢𑀺 𑀓𑀸𑀫𑀪𑀯𑀸𑀤𑀻𑀲𑀼. 𑀳𑀻𑀦𑀸 𑀦𑀭𑀸𑀢𑀺 𑀳𑀻𑀦𑀓𑀫𑁆𑀫𑀦𑁆𑀢𑀸 𑀦𑀭𑀸. 𑀫𑀘𑁆𑀘𑀼𑀫𑀼𑀔𑁂 𑀮𑀧𑀦𑁆𑀢𑀻𑀢𑀺 𑀅𑀦𑁆𑀢𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀫𑀭𑀡𑀫𑀼𑀔𑁂 𑀧𑀭𑀺𑀤𑁂𑀯𑀦𑁆𑀢𑀺. 𑀅𑀯𑀻𑀢𑀢𑀡𑁆𑀳𑀸𑀲𑁂𑀢𑀺 𑀅𑀯𑀺𑀕𑀢𑀢𑀡𑁆𑀳𑀸. 𑀪𑀯𑀸𑀪𑀯𑁂𑀲𑀽𑀢𑀺 𑀓𑀸𑀫𑀪𑀯𑀸𑀤𑀻𑀲𑀼. 𑀅𑀣 𑀯𑀸 𑀪𑀯𑀸𑀪𑀯𑁂𑀲𑀽𑀢𑀺 𑀪𑀯𑀪𑀯𑁂𑀲𑀼, 𑀧𑀼𑀦𑀧𑁆𑀧𑀼𑀦𑀪𑀯𑁂𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁮𑁪. 𑀇𑀤𑀸𑀦𑀺 𑀬𑀲𑁆𑀫𑀸 𑀅𑀯𑀻𑀢𑀢𑀡𑁆𑀳𑀸 𑀏𑀯𑀁 𑀨𑀦𑁆𑀤𑀦𑁆𑀢𑀺 𑀘 𑀮𑀧𑀦𑁆𑀢𑀺 𑀘, 𑀢𑀲𑁆𑀫𑀸 𑀢𑀡𑁆𑀳𑀸𑀯𑀺𑀦𑀬𑁂 𑀲𑀫𑀸𑀤𑀧𑁂𑀦𑁆𑀢𑁄 ‘‘𑀫𑀫𑀸𑀬𑀺𑀢𑁂’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀫𑀫𑀸𑀬𑀺𑀢𑁂𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀫𑀢𑁆𑀢𑁂𑀳𑀺 ‘‘𑀫𑀫’’𑀦𑁆𑀢𑀺 𑀧𑀭𑀺𑀕𑁆𑀕𑀳𑀺𑀢𑁂 𑀯𑀢𑁆𑀣𑀼𑀲𑁆𑀫𑀺𑀁. 𑀧𑀲𑁆𑀲𑀣𑀸𑀢𑀺 𑀲𑁄𑀢𑀸𑀭𑁂 𑀆𑀮𑀧𑀦𑁆𑀢𑁄 𑀆𑀳. 𑀏𑀢𑀫𑁆𑀧𑀻𑀢𑀺 𑀏𑀢𑀫𑁆𑀧𑀺 𑀆𑀤𑀻𑀦𑀯𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁭𑁮𑁫. 𑀏𑀯𑀫𑁂𑀢𑁆𑀣 𑀧𑀞𑀫𑀕𑀸𑀣𑀸𑀬 𑀅𑀲𑁆𑀲𑀸𑀤𑀁, 𑀢𑀢𑁄 𑀧𑀭𑀸𑀳𑀺 𑀘𑀢𑀽𑀳𑀺 𑀆𑀤𑀻𑀦𑀯𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀉𑀧𑀸𑀬𑀁 𑀦𑀺𑀲𑁆𑀲𑀭𑀡𑀁 𑀦𑀺𑀲𑁆𑀲𑀭𑀡𑀸𑀦𑀺𑀲𑀁𑀲𑀜𑁆𑀘 𑀤𑀲𑁆𑀲𑁂𑀢𑀼𑀁 𑀲𑀩𑁆𑀩𑀸𑀳𑀺 𑀯𑀸 𑀏𑀢𑀸𑀳𑀺 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀪𑁄𑀲𑀼 𑀅𑀦𑁆𑀢𑁂𑀲𑀽’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀉𑀪𑁄𑀲𑀼 𑀅𑀦𑁆𑀢𑁂𑀲𑀽𑀢𑀺 𑀨𑀲𑁆𑀲𑀨𑀲𑁆𑀲𑀲𑀫𑀼𑀤𑀬𑀸𑀤𑀻𑀲𑀼 𑀤𑁆𑀯𑀻𑀲𑀼 𑀧𑀭𑀺𑀘𑁆𑀙𑁂𑀤𑁂𑀲𑀼. 𑀯𑀺𑀦𑁂𑀬𑁆𑀬 𑀙𑀦𑁆𑀤𑀦𑁆𑀢𑀺 𑀙𑀦𑁆𑀤𑀭𑀸𑀕𑀁 𑀯𑀺𑀦𑁂𑀢𑁆𑀯𑀸. 𑀨𑀲𑁆𑀲𑀁 𑀧𑀭𑀺𑀜𑁆𑀜𑀸𑀬𑀸𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀨𑀲𑁆𑀲𑀁, 𑀨𑀲𑁆𑀲𑀸𑀦𑀼𑀲𑀸𑀭𑁂𑀦 𑀯𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑁂 𑀲𑀩𑁆𑀩𑁂𑀧𑀺 𑀅𑀭𑀽𑀧𑀥𑀫𑁆𑀫𑁂, 𑀢𑁂𑀲𑀁 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀲𑁂𑀦 𑀭𑀽𑀧𑀥𑀫𑁆𑀫𑁂 𑀘𑀸𑀢𑀺 𑀲𑀓𑀮𑀫𑁆𑀧𑀺 𑀦𑀸𑀫𑀭𑀽𑀧𑀁 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀅𑀦𑀸𑀦𑀼𑀕𑀺𑀤𑁆𑀥𑁄𑀢𑀺 𑀭𑀽𑀧𑀸𑀤𑀻𑀲𑀼 𑀲𑀩𑁆𑀩𑀥𑀫𑁆𑀫𑁂𑀲𑀼 𑀅𑀕𑀺𑀤𑁆𑀥𑁄. 𑀬𑀤𑀢𑁆𑀢𑀕𑀭𑀳𑀻 𑀢𑀤𑀓𑀼𑀩𑁆𑀩𑀫𑀸𑀦𑁄𑀢𑀺 𑀬𑀁 𑀅𑀢𑁆𑀢𑀦𑀸 𑀕𑀭𑀳𑀢𑀺, 𑀢𑀁 𑀅𑀓𑀼𑀭𑀼𑀫𑀸𑀦𑁄. 𑀦𑀮𑀺𑀧𑁆𑀧𑀢𑀻 𑀤𑀺𑀝𑁆𑀞𑀲𑀼𑀢𑁂𑀲𑀼 𑀥𑀻𑀭𑁄𑀢𑀺 𑀲𑁄 𑀏𑀯𑀭𑀽𑀧𑁄 𑀥𑀺𑀢𑀺𑀲𑀫𑁆𑀧𑀦𑁆𑀦𑁄 𑀥𑀻𑀭𑁄 𑀤𑀺𑀝𑁆𑀞𑁂𑀲𑀼 𑀘 𑀲𑀼𑀢𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀤𑁆𑀯𑀺𑀦𑁆𑀦𑀁 𑀮𑁂𑀧𑀸𑀦𑀁 𑀏𑀓𑁂𑀦𑀧𑀺 𑀮𑁂𑀧𑁂𑀦 𑀦 𑀮𑀺𑀧𑁆𑀧𑀢𑀺. 𑀆𑀓𑀸𑀲𑀫𑀺𑀯 𑀦𑀺𑀭𑀼𑀧𑀮𑀺𑀢𑁆𑀢𑁄 𑀅𑀘𑁆𑀘𑀦𑁆𑀢𑀯𑁄𑀤𑀸𑀦𑀧𑁆𑀧𑀢𑁆𑀢𑁄 𑀳𑁄𑀢𑀺.

𑁭𑁮𑁬. 𑀲𑀜𑁆𑀜𑀁 𑀧𑀭𑀺𑀜𑁆𑀜𑀸𑀢𑀺 𑀕𑀸𑀣𑀸𑀬 𑀧𑀦 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀦 𑀓𑁂𑀯𑀮𑀜𑁆𑀘 𑀨𑀲𑁆𑀲𑀫𑁂𑀯, 𑀅𑀧𑀺𑀘 𑀔𑁄 𑀧𑀦 𑀓𑀸𑀫𑀲𑀜𑁆𑀜𑀸𑀤𑀺𑀪𑁂𑀤𑀁 𑀲𑀜𑁆𑀜𑀫𑁆𑀧𑀺, 𑀲𑀜𑁆𑀜𑀸𑀦𑀼𑀲𑀸𑀭𑁂𑀦 𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀸𑀫𑀭𑀽𑀧𑀁 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀯𑀺𑀢𑀭𑁂𑀬𑁆𑀬 𑀑𑀖𑀁, 𑀢𑀢𑁄 𑀲𑁄 𑀢𑀺𑀡𑁆𑀡𑁄𑀖𑁄 𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀮𑁂𑀧𑀧𑁆𑀧𑀳𑀸𑀦𑁂𑀦 𑀦𑁄𑀧𑀮𑀺𑀢𑁆𑀢𑁄 𑀔𑀻𑀡𑀸𑀲𑀯𑀫𑀼𑀦𑀺 𑀭𑀸𑀕𑀸𑀤𑀺𑀲𑀮𑁆𑀮𑀸𑀦𑀁 𑀅𑀩𑁆𑀩𑀽𑀴𑁆𑀳𑀢𑁆𑀢𑀸 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀅𑀧𑁆𑀧𑀫𑀢𑁆𑀢𑁄 𑀘𑀭𑀁, 𑀧𑀼𑀩𑁆𑀩𑀪𑀸𑀕𑁂 𑀯𑀸 𑀅𑀧𑁆𑀧𑀫𑀢𑁆𑀢𑁄 𑀘𑀭𑀁 𑀢𑁂𑀦 𑀅𑀧𑁆𑀧𑀫𑀸𑀤𑀘𑀸𑀭𑁂𑀦 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄 𑀳𑀼𑀢𑁆𑀯𑀸 𑀲𑀓𑀧𑀭𑀢𑁆𑀢𑀪𑀸𑀯𑀸𑀤𑀺𑀪𑁂𑀤𑀁 𑀦𑀸𑀲𑀻𑀲𑀢𑀻 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘, 𑀅𑀜𑁆𑀜𑀤𑀢𑁆𑀣𑀼 𑀘𑀭𑀺𑀫𑀘𑀺𑀢𑁆𑀢𑀦𑀺𑀭𑁄𑀥𑀸 𑀦𑀺𑀭𑀼𑀧𑀸𑀤𑀸𑀦𑁄 𑀚𑀸𑀢𑀯𑁂𑀤𑁄𑀯 𑀧𑀭𑀺𑀦𑀺𑀩𑁆𑀩𑀸𑀢𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺 𑀥𑀫𑁆𑀫𑀦𑁂𑀢𑁆𑀢𑀺𑀝𑁆𑀞𑀧𑀦𑀫𑁂𑀯 𑀓𑀭𑁄𑀦𑁆𑀢𑁄, 𑀦 𑀉𑀢𑁆𑀢𑀭𑀺𑀁 𑀇𑀫𑀸𑀬 𑀤𑁂𑀲𑀦𑀸𑀬 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀉𑀧𑁆𑀧𑀸𑀤𑁂𑀲𑀺 𑀔𑀻𑀡𑀸𑀲𑀯𑀲𑁆𑀲 𑀤𑁂𑀲𑀺𑀢𑀢𑁆𑀢𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀕𑀼𑀳𑀝𑁆𑀞𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀼𑀝𑁆𑀞𑀝𑁆𑀞𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁮𑁭. 𑀯𑀤𑀦𑁆𑀢𑀺 𑀯𑁂 𑀤𑀼𑀝𑁆𑀞𑀫𑀦𑀸𑀧𑀻𑀢𑀺 𑀤𑀼𑀝𑁆𑀞𑀝𑁆𑀞𑀓𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀆𑀤𑀺𑀕𑀸𑀣𑀸𑀬 𑀢𑀸𑀯 𑀉𑀧𑁆𑀧𑀢𑁆𑀢𑀺 𑁋 𑀫𑀼𑀦𑀺𑀲𑀼𑀢𑁆𑀢𑀦𑀬𑁂𑀦 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀉𑀧𑁆𑀧𑀦𑁆𑀦𑀮𑀸𑀪𑀲𑀓𑁆𑀓𑀸𑀭𑀁 𑀅𑀲𑀳𑀫𑀸𑀦𑀸 𑀢𑀺𑀢𑁆𑀣𑀺𑀬𑀸 𑀲𑀼𑀦𑁆𑀤𑀭𑀺𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀉𑀬𑁆𑀬𑁄𑀚𑁂𑀲𑀼𑀁. 𑀲𑀸 𑀓𑀺𑀭 𑀚𑀦𑀧𑀤𑀓𑀮𑁆𑀬𑀸𑀡𑀻 𑀲𑁂𑀢𑀯𑀢𑁆𑀣𑀧𑀭𑀺𑀩𑁆𑀩𑀸𑀚𑀺𑀓𑀸𑀯 𑀅𑀳𑁄𑀲𑀺. 𑀲𑀸 𑀲𑀼𑀦𑁆𑀳𑀸𑀢𑀸 𑀲𑀼𑀦𑀺𑀯𑀢𑁆𑀣𑀸 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀯𑀺𑀪𑀽𑀲𑀺𑀢𑀸 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀸𑀯𑀢𑁆𑀣𑀺𑀯𑀸𑀲𑀻𑀦𑀁 𑀚𑁂𑀢𑀯𑀦𑀢𑁄 𑀦𑀺𑀓𑁆𑀔𑀫𑀦𑀯𑁂𑀮𑀸𑀬 𑀲𑀸𑀯𑀢𑁆𑀣𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑁂𑀢𑀯𑀦𑀸𑀪𑀺𑀫𑀼𑀔𑀻 𑀕𑀘𑁆𑀙𑀢𑀺. 𑀫𑀦𑀼𑀲𑁆𑀲𑁂𑀳𑀺 𑀘 ‘‘𑀓𑀼𑀳𑀺𑀁 𑀕𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀺𑀢𑀸 ‘‘𑀲𑀫𑀡𑀁 𑀕𑁄𑀢𑀫𑀁 𑀲𑀸𑀯𑀓𑁂 𑀘𑀲𑁆𑀲 𑀭𑀫𑀬𑀺𑀢𑀼𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀯𑀸 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀯𑀺𑀘𑀭𑀺𑀢𑁆𑀯𑀸 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀧𑀺𑀤𑀳𑀺𑀢𑁂 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀪𑀸𑀢𑁂 𑀧𑀼𑀦 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀲𑀫𑀻𑀧𑁂 𑀧𑀼𑀧𑁆𑀨𑀸𑀦𑀺 𑀯𑀺𑀘𑀺𑀦𑀦𑁆𑀢𑀻 𑀯𑀺𑀬 𑀘𑀭𑀢𑀺. 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀆𑀕𑀢𑁂𑀳𑀺 𑀘 𑀫𑀦𑀼𑀲𑁆𑀲𑁂𑀳𑀺 ‘‘𑀓𑀺𑀫𑀢𑁆𑀣𑀁 𑀆𑀕𑀢𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀢𑀸 𑀬𑀁𑀓𑀺𑀜𑁆𑀘𑀺𑀤𑁂𑀯 𑀪𑀡𑀢𑀺. 𑀏𑀯𑀁 𑀅𑀟𑁆𑀠𑀫𑀸𑀲𑀫𑀢𑁆𑀢𑁂 𑀯𑀻𑀢𑀺𑀓𑁆𑀓𑀦𑁆𑀢𑁂 𑀢𑀺𑀢𑁆𑀣𑀺𑀬𑀸 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀧𑀭𑀺𑀔𑀸𑀢𑀝𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀪𑀸𑀢𑁂 ‘‘𑀲𑀼𑀦𑁆𑀤𑀭𑀺𑀁 𑀦 𑀧𑀲𑁆𑀲𑀸𑀫𑀸’’𑀢𑀺 𑀓𑁄𑀮𑀸𑀳𑀮𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀘 𑀆𑀭𑁄𑀘𑁂𑀢𑁆𑀯𑀸 𑀢𑁂𑀦 𑀅𑀦𑀼𑀜𑁆𑀜𑀸𑀢𑀸 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀘𑀺𑀦𑀦𑁆𑀢𑀸 𑀯𑀺𑀬 𑀢𑀁 𑀦𑀺𑀓𑁆𑀔𑀺𑀢𑁆𑀢𑀝𑁆𑀞𑀸𑀦𑀸 𑀉𑀤𑁆𑀥𑀭𑀺𑀢𑁆𑀯𑀸 𑀫𑀜𑁆𑀘𑀓𑀁 𑀆𑀭𑁄𑀧𑁂𑀢𑁆𑀯𑀸 𑀦𑀕𑀭𑀁 𑀅𑀪𑀺𑀳𑀭𑀺𑀢𑁆𑀯𑀸 𑀉𑀧𑀓𑁆𑀓𑁄𑀲𑀁 𑀅𑀓𑀁𑀲𑀼. 𑀲𑀩𑁆𑀩𑀁 𑀧𑀸𑀴𑀺𑀬𑀁 (𑀉𑀤𑀸. 𑁩𑁮) 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀪𑀕𑀯𑀸 𑀢𑀁 𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 ‘‘𑀢𑀺𑀢𑁆𑀣𑀺𑀬𑀸 𑀅𑀚𑁆𑀚 𑀅𑀬𑀲𑀁 𑀉𑀧𑁆𑀧𑀸𑀤𑁂𑀲𑁆𑀲𑀦𑁆𑀢𑀻’’𑀢𑀺 𑀜𑀢𑁆𑀯𑀸 ‘‘𑀢𑁂𑀲𑀁 𑀲𑀤𑁆𑀤𑀳𑀺𑀢𑁆𑀯𑀸 𑀫𑀸𑀤𑀺𑀲𑁂 𑀘𑀺𑀢𑁆𑀢𑀁 𑀧𑀓𑁄𑀧𑁂𑀢𑁆𑀯𑀸 𑀫𑀳𑀸𑀚𑀦𑁄 𑀅𑀧𑀸𑀬𑀸𑀪𑀺𑀫𑀼𑀔𑁄 𑀫𑀸 𑀅𑀳𑁄𑀲𑀻’’𑀢𑀺 𑀕𑀦𑁆𑀥𑀓𑀼𑀝𑀺𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀬𑀁𑀬𑁂𑀯 𑀅𑀘𑁆𑀙𑀺, 𑀦 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀪𑀺𑀓𑁆𑀔𑀽 𑀧𑀦 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑀁 𑀤𑀺𑀲𑁆𑀯𑀸 𑀧𑀼𑀩𑁆𑀩𑀲𑀤𑀺𑀲𑀫𑁂𑀯 𑀧𑀯𑀺𑀲𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀅𑀓𑁆𑀓𑁄𑀲𑀺𑀁𑀲𑀼. 𑀅𑀣 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀢𑀺𑀢𑁆𑀣𑀺𑀬𑁂𑀳𑀺, 𑀪𑀦𑁆𑀢𑁂, 𑀫𑀳𑀸𑀅𑀬𑀲𑁄 𑀉𑀧𑁆𑀧𑀸𑀤𑀺𑀢𑁄, 𑀦 𑀲𑀓𑁆𑀓𑀸 𑀇𑀥 𑀯𑀲𑀺𑀢𑀼𑀁, 𑀯𑀺𑀧𑀼𑀮𑁄 𑀚𑀫𑁆𑀩𑀼𑀤𑀻𑀧𑁄, 𑀅𑀜𑁆𑀜𑀢𑁆𑀣 𑀕𑀘𑁆𑀙𑀸𑀫𑀸’’𑀢𑀺 𑀆𑀳. 𑀢𑀢𑁆𑀣𑀧𑀺 𑀅𑀬𑀲𑁂 𑀉𑀝𑁆𑀞𑀺𑀢𑁂 𑀓𑀼𑀳𑀺𑀁 𑀕𑀫𑀺𑀲𑁆𑀲𑀲𑀺 𑀆𑀦𑀦𑁆𑀤𑀸𑀢𑀺? ‘‘𑀅𑀜𑁆𑀜𑀁 𑀦𑀕𑀭𑀁 𑀪𑀕𑀯𑀸’’𑀢𑀺. 𑀅𑀣 𑀪𑀕𑀯𑀸 ‘‘𑀆𑀕𑀫𑁂𑀳𑀺, 𑀆𑀦𑀦𑁆𑀤, 𑀲𑀢𑁆𑀢𑀸𑀳𑀫𑁂𑀯𑀸𑀬𑀁 𑀲𑀤𑁆𑀤𑁄 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀬𑁂𑀳𑀺 𑀅𑀬𑀲𑁄 𑀓𑀢𑁄, 𑀢𑁂𑀲𑀁𑀬𑁂𑀯 𑀉𑀧𑀭𑀺 𑀧𑀢𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 ‘‘𑀯𑀤𑀦𑁆𑀢𑀺 𑀯𑁂’’𑀢𑀺 𑀇𑀫𑀁 𑀕𑀸𑀣𑀫𑀪𑀸𑀲𑀺.

𑀢𑀢𑁆𑀣 𑀯𑀤𑀦𑁆𑀢𑀻𑀢𑀺 𑀪𑀕𑀯𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀉𑀧𑀯𑀤𑀦𑁆𑀢𑀺. 𑀤𑀼𑀝𑁆𑀞𑀫𑀦𑀸𑀧𑀺 𑀏𑀓𑁂 𑀅𑀣𑁄𑀧𑀺 𑀯𑁂 𑀲𑀘𑁆𑀘𑀫𑀦𑀸𑀢𑀺 𑀏𑀓𑀘𑁆𑀘𑁂 𑀤𑀼𑀝𑁆𑀞𑀘𑀺𑀢𑁆𑀢𑀸, 𑀏𑀓𑀘𑁆𑀘𑁂 𑀢𑀣𑀲𑀜𑁆𑀜𑀺𑀦𑁄𑀧𑀺 𑀳𑀼𑀢𑁆𑀯𑀸, 𑀢𑀺𑀢𑁆𑀣𑀺𑀬𑀸 𑀤𑀼𑀝𑁆𑀞𑀘𑀺𑀢𑁆𑀢𑀸, 𑀬𑁂 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀤𑁆𑀤𑀳𑀺𑀁𑀲𑀼, 𑀢𑁂 𑀲𑀘𑁆𑀘𑀫𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀸𑀤𑀜𑁆𑀘 𑀚𑀸𑀢𑀦𑁆𑀢𑀺 𑀏𑀢𑀁 𑀅𑀓𑁆𑀓𑁄𑀲𑀯𑀸𑀤𑀁 𑀉𑀧𑁆𑀧𑀦𑁆𑀦𑀁. 𑀫𑀼𑀦𑀺 𑀦𑁄 𑀉𑀧𑁂𑀢𑀻𑀢𑀺 𑀅𑀓𑀸𑀭𑀓𑀢𑀸𑀬 𑀘 𑀅𑀓𑀼𑀧𑁆𑀧𑀦𑀢𑀸𑀬 𑀘 𑀩𑀼𑀤𑁆𑀥𑀫𑀼𑀦𑀺 𑀦 𑀉𑀧𑁂𑀢𑀺. 𑀢𑀲𑁆𑀫𑀸 𑀫𑀼𑀦𑀻 𑀦𑀢𑁆𑀣𑀺 𑀔𑀺𑀮𑁄 𑀓𑀼𑀳𑀺𑀜𑁆𑀘𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀅𑀬𑀁 𑀫𑀼𑀦𑀺 𑀭𑀸𑀕𑀸𑀤𑀺𑀔𑀺𑀮𑁂𑀳𑀺 𑀦𑀢𑁆𑀣𑀺 𑀔𑀺𑀮𑁄 𑀓𑀼𑀳𑀺𑀜𑁆𑀘𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁭𑁮𑁮. 𑀇𑀫𑀜𑁆𑀘 𑀕𑀸𑀣𑀁 𑀯𑀢𑁆𑀯𑀸 𑀪𑀕𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀧𑀼𑀘𑁆𑀙𑀺, ‘‘𑀏𑀯𑀁 𑀔𑀼𑀁𑀲𑁂𑀢𑁆𑀯𑀸 𑀯𑀫𑁆𑀪𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀪𑀺𑀓𑁆𑀔𑀽, 𑀆𑀦𑀦𑁆𑀤, 𑀓𑀺𑀁 𑀯𑀤𑀦𑁆𑀢𑀻’’𑀢𑀺. 𑀦 𑀓𑀺𑀜𑁆𑀘𑀺 𑀪𑀕𑀯𑀸𑀢𑀺. ‘‘𑀦, 𑀆𑀦𑀦𑁆𑀤, ‘𑀅𑀳𑀁 𑀲𑀻𑀮𑀯𑀸’𑀢𑀺 𑀲𑀩𑁆𑀩𑀢𑁆𑀣 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩𑀁, 𑀮𑁄𑀓𑁂 𑀳𑀺 𑀦𑀸𑀪𑀸𑀲𑀫𑀸𑀦𑀁 𑀚𑀸𑀦𑀦𑁆𑀢𑀺 𑀫𑀺𑀲𑁆𑀲𑀁 𑀩𑀸𑀮𑁂𑀳𑀺 𑀧𑀡𑁆𑀟𑀺𑀢’’𑀦𑁆𑀢𑀺 𑀯𑀢𑁆𑀯𑀸, ‘‘𑀪𑀺𑀓𑁆𑀔𑀽, 𑀆𑀦𑀦𑁆𑀤, 𑀢𑁂 𑀫𑀦𑀼𑀲𑁆𑀲𑁂 𑀏𑀯𑀁 𑀧𑀝𑀺𑀘𑁄𑀤𑁂𑀦𑁆𑀢𑀽’’𑀢𑀺 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 ‘‘𑀅𑀪𑀽𑀢𑀯𑀸𑀤𑀻 𑀦𑀺𑀭𑀬𑀁 𑀉𑀧𑁂𑀢𑀻’’𑀢𑀺 𑀇𑀫𑀁 𑀕𑀸𑀣𑀫𑀪𑀸𑀲𑀺. 𑀣𑁂𑀭𑁄 𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀳 𑁋 ‘‘𑀫𑀦𑀼𑀲𑁆𑀲𑀸 𑀢𑀼𑀫𑁆𑀳𑁂𑀳𑀺 𑀇𑀫𑀸𑀬 𑀕𑀸𑀣𑀸𑀬 𑀧𑀝𑀺𑀘𑁄𑀤𑁂𑀢𑀩𑁆𑀩𑀸’’𑀢𑀺. 𑀪𑀺𑀓𑁆𑀔𑀽 𑀢𑀣𑀸 𑀅𑀓𑀁𑀲𑀼. 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀭𑀸𑀚𑀸𑀧𑀺 𑀭𑀸𑀚𑀧𑀼𑀭𑀺𑀲𑁂 𑀲𑀩𑁆𑀩𑀢𑁄 𑀧𑁂𑀲𑁂𑀢𑁆𑀯𑀸 𑀬𑁂𑀲𑀁 𑀥𑀼𑀢𑁆𑀢𑀸𑀦𑀁 𑀮𑀜𑁆𑀚𑀁 𑀤𑀢𑁆𑀯𑀸 𑀢𑀺𑀢𑁆𑀣𑀺𑀬𑀸 𑀢𑀁 𑀫𑀸𑀭𑀸𑀧𑁂𑀲𑀼𑀁, 𑀢𑁂 𑀕𑀳𑁂𑀢𑁆𑀯𑀸 𑀦𑀺𑀕𑁆𑀕𑀬𑁆𑀳 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀢𑀺𑀢𑁆𑀣𑀺𑀬𑁂 𑀧𑀭𑀺𑀪𑀸𑀲𑀺. 𑀫𑀦𑀼𑀲𑁆𑀲𑀸𑀧𑀺 𑀢𑀺𑀢𑁆𑀣𑀺𑀬𑁂 𑀤𑀺𑀲𑁆𑀯𑀸 𑀮𑁂𑀟𑁆𑀟𑀼𑀦𑀸 𑀧𑀳𑀭𑀦𑁆𑀢𑀺, 𑀧𑀁𑀲𑀼𑀦𑀸 𑀑𑀓𑀺𑀭𑀦𑁆𑀢𑀺 ‘‘𑀪𑀕𑀯𑀢𑁄 𑀅𑀬𑀲𑀁 𑀉𑀧𑁆𑀧𑀸𑀤𑁂𑀲𑀼’’𑀦𑁆𑀢𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀢𑀁 𑀤𑀺𑀲𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺, 𑀪𑀕𑀯𑀸 𑀣𑁂𑀭𑀲𑁆𑀲 𑀇𑀫𑀁 𑀕𑀸𑀣𑀫𑀪𑀸𑀲𑀺 ‘‘𑀲𑀓𑀜𑁆𑀳𑀺 𑀤𑀺𑀝𑁆𑀞𑀺𑀁…𑀧𑁂… 𑀯𑀤𑁂𑀬𑁆𑀬𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀸𑀬𑀁 𑀤𑀺𑀝𑁆𑀞𑀺 𑀢𑀺𑀢𑁆𑀣𑀺𑀬𑀚𑀦𑀲𑁆𑀲 ‘‘𑀲𑀼𑀦𑁆𑀤𑀭𑀺𑀁 𑀫𑀸𑀭𑁂𑀢𑁆𑀯𑀸 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀅𑀯𑀡𑁆𑀡𑀁 𑀧𑀓𑀸𑀲𑁂𑀢𑁆𑀯𑀸 𑀏𑀢𑁂𑀦𑀼𑀧𑀸𑀬𑁂𑀦 𑀮𑀤𑁆𑀥𑀁 𑀲𑀓𑁆𑀓𑀸𑀭𑀁 𑀲𑀸𑀤𑀺𑀬𑀺𑀲𑁆𑀲𑀸𑀫𑀸’’𑀢𑀺, 𑀲𑁄 𑀢𑀁 𑀤𑀺𑀝𑁆𑀞𑀺𑀁 𑀓𑀣𑀁 𑀅𑀢𑀺𑀓𑁆𑀓𑀫𑁂𑀬𑁆𑀬, 𑀅𑀣 𑀔𑁄 𑀲𑁄 𑀅𑀬𑀲𑁄 𑀢𑀫𑁂𑀯 𑀢𑀺𑀢𑁆𑀣𑀺𑀬𑀚𑀦𑀁 𑀧𑀘𑁆𑀘𑀸𑀕𑀢𑁄 𑀢𑀁 𑀤𑀺𑀝𑁆𑀞𑀺𑀁 𑀅𑀘𑁆𑀘𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁. 𑀬𑁄 𑀯𑀸 𑀲𑀲𑁆𑀲𑀢𑀸𑀤𑀺𑀯𑀸𑀤𑀻, 𑀲𑁄𑀧𑀺 𑀲𑀓𑀁 𑀤𑀺𑀝𑁆𑀞𑀺𑀁 𑀓𑀣𑀁 𑀅𑀘𑁆𑀘𑀬𑁂𑀬𑁆𑀬 𑀢𑁂𑀦 𑀤𑀺𑀝𑁆𑀞𑀺𑀘𑁆𑀙𑀦𑁆𑀤𑁂𑀦 𑀅𑀦𑀼𑀦𑀻𑀢𑁄 𑀢𑀸𑀬 𑀘 𑀤𑀺𑀝𑁆𑀞𑀺𑀭𑀼𑀘𑀺𑀬𑀸 𑀦𑀺𑀯𑀺𑀝𑁆𑀞𑁄, 𑀅𑀧𑀺𑀘 𑀔𑁄 𑀧𑀦 𑀲𑀬𑀁 𑀲𑀫𑀢𑁆𑀢𑀸𑀦𑀺 𑀧𑀓𑀼𑀩𑁆𑀩𑀫𑀸𑀦𑁄 𑀅𑀢𑁆𑀢𑀦𑀸𑀯 𑀧𑀭𑀺𑀧𑀼𑀡𑁆𑀡𑀸𑀦𑀺 𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀓𑀭𑁄𑀦𑁆𑀢𑁄 𑀬𑀣𑀸 𑀚𑀸𑀦𑁂𑀬𑁆𑀬, 𑀢𑀣𑁂𑀯 𑀯𑀤𑁂𑀬𑁆𑀬𑀸𑀢𑀺.

𑁭𑁮𑁯. 𑀅𑀣 𑀭𑀸𑀚𑀸 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀢𑀁 𑀓𑀼𑀡𑀧𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀆𑀳 𑁋 ‘‘𑀦𑀦𑀼, 𑀪𑀦𑁆𑀢𑁂, 𑀈𑀤𑀺𑀲𑁂 𑀅𑀬𑀲𑁂 𑀉𑀧𑁆𑀧𑀦𑁆𑀦𑁂 𑀫𑀬𑁆𑀳𑀫𑁆𑀧𑀺 𑀆𑀭𑁄𑀘𑁂𑀢𑀩𑁆𑀩𑀁 𑀲𑀺𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸, ‘‘𑀦, 𑀫𑀳𑀸𑀭𑀸𑀚, ‘𑀅𑀳𑀁 𑀲𑀻𑀮𑀯𑀸 𑀕𑀼𑀡𑀲𑀫𑁆𑀧𑀦𑁆𑀦𑁄’𑀢𑀺 𑀧𑀭𑁂𑀲𑀁 𑀆𑀭𑁄𑀘𑁂𑀢𑀼𑀁 𑀅𑀭𑀺𑀬𑀸𑀦𑀁 𑀧𑀢𑀺𑀭𑀽𑀧’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 ‘‘𑀬𑁄 𑀅𑀢𑁆𑀢𑀦𑁄 𑀲𑀻𑀮𑀯𑀢𑀸𑀦𑀻’’𑀢𑀺 𑀅𑀯𑀲𑁂𑀲𑀕𑀸𑀣𑀸𑀬𑁄 𑀅𑀪𑀸𑀲𑀺.

𑀢𑀢𑁆𑀣 𑀲𑀻𑀮𑀯𑀢𑀸𑀦𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀸𑀤𑀻𑀦𑀺 𑀲𑀻𑀮𑀸𑀦𑀺 𑀆𑀭𑀜𑁆𑀜𑀺𑀓𑀸𑀤𑀻𑀦𑀺 𑀥𑀼𑀢𑀗𑁆𑀕𑀯𑀢𑀸𑀦𑀺 𑀘. 𑀅𑀦𑀸𑀦𑀼𑀧𑀼𑀝𑁆𑀞𑁄𑀢𑀺 𑀅𑀧𑀼𑀘𑁆𑀙𑀺𑀢𑁄. 𑀧𑀸𑀯𑀸𑀢𑀺 𑀯𑀤𑀢𑀺. 𑀅𑀦𑀭𑀺𑀬𑀥𑀫𑁆𑀫𑀁 𑀓𑀼𑀲𑀮𑀸 𑀢𑀫𑀸𑀳𑀼, 𑀬𑁄 𑀆𑀢𑀼𑀫𑀸𑀦𑀁 𑀲𑀬𑀫𑁂𑀯 𑀧𑀸𑀯𑀸𑀢𑀺 𑀬𑁄 𑀏𑀯𑀁 𑀅𑀢𑁆𑀢𑀸𑀦𑀁 𑀲𑀬𑀫𑁂𑀯 𑀯𑀤𑀢𑀺, 𑀢𑀲𑁆𑀲 𑀢𑀁 𑀯𑀸𑀤𑀁 ‘‘𑀅𑀦𑀭𑀺𑀬𑀥𑀫𑁆𑀫𑁄 𑀏𑀲𑁄’’𑀢𑀺 𑀓𑀼𑀲𑀮𑀸 𑀏𑀯𑀁 𑀓𑀣𑁂𑀦𑁆𑀢𑀺.

𑁭𑁯𑁦. 𑀲𑀦𑁆𑀢𑁄𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀽𑀧𑀲𑀫𑁂𑀦 𑀲𑀦𑁆𑀢𑁄, 𑀢𑀣𑀸 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄. 𑀇𑀢𑀺𑀳𑀦𑁆𑀢𑀺 𑀲𑀻𑀮𑁂𑀲𑀼 𑀅𑀓𑀢𑁆𑀣𑀫𑀸𑀦𑁄𑀢𑀺 ‘‘𑀅𑀳𑀫𑀲𑁆𑀫𑀺 𑀲𑀻𑀮𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀇𑀢𑀺 𑀲𑀻𑀮𑁂𑀲𑀼 𑀅𑀓𑀢𑁆𑀣𑀫𑀸𑀦𑁄, 𑀲𑀻𑀮𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀽𑀧𑀦𑀸𑀬𑀺𑀓𑀁 𑀯𑀸𑀘𑀁 𑀅𑀪𑀸𑀲𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀫𑀭𑀺𑀬𑀥𑀫𑁆𑀫𑀁 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺 𑀢𑀲𑁆𑀲 𑀢𑀁 𑀅𑀓𑀢𑁆𑀣𑀦𑀁 ‘‘𑀅𑀭𑀺𑀬𑀥𑀫𑁆𑀫𑁄 𑀏𑀲𑁄’’𑀢𑀺 𑀩𑀼𑀤𑁆𑀥𑀸𑀤𑀬𑁄 𑀔𑀦𑁆𑀥𑀸𑀤𑀺𑀓𑀼𑀲𑀮𑀸 𑀯𑀤𑀦𑁆𑀢𑀺. 𑀬𑀲𑁆𑀲𑀼𑀲𑁆𑀲𑀤𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂𑀢𑀺 𑀬𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀭𑀸𑀕𑀸𑀤𑀬𑁄 𑀲𑀢𑁆𑀢 𑀉𑀲𑁆𑀲𑀤𑀸 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂 𑀦𑀢𑁆𑀣𑀺, 𑀢𑀲𑁆𑀲 𑀢𑀁 𑀅𑀓𑀢𑁆𑀣𑀦𑀁 ‘‘𑀅𑀭𑀺𑀬𑀥𑀫𑁆𑀫𑁄 𑀏𑀲𑁄’’𑀢𑀺 𑀏𑀯𑀁 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁭𑁯𑁧. 𑀏𑀯𑀁 𑀔𑀻𑀡𑀸𑀲𑀯𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀁 𑀧𑀝𑀺𑀧𑀢𑁆𑀢𑀺𑀁 𑀭𑀜𑁆𑀜𑁄 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀧𑀓𑀧𑁆𑀧𑀺𑀢𑀸 𑀲𑀗𑁆𑀔𑀢𑀸’’𑀢𑀺. 𑀢𑀢𑁆𑀣 𑀧𑀓𑀧𑁆𑀧𑀺𑀢𑀸𑀢𑀺 𑀧𑀭𑀺𑀓𑀧𑁆𑀧𑀺𑀢𑀸. 𑀲𑀗𑁆𑀔𑀢𑀸𑀢𑀺 𑀧𑀘𑁆𑀘𑀬𑀸𑀪𑀺𑀲𑀗𑁆𑀔𑀢𑀸. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲. 𑀥𑀫𑁆𑀫𑀸𑀢𑀺 𑀤𑀺𑀝𑁆𑀞𑀺𑀬𑁄. 𑀧𑀼𑀭𑀓𑁆𑀔𑀢𑀸𑀢𑀺 𑀧𑀼𑀭𑀢𑁄 𑀓𑀢𑀸. 𑀲𑀦𑁆𑀢𑀻𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀅𑀯𑀻𑀯𑀤𑀸𑀢𑀸𑀢𑀺 𑀅𑀯𑁄𑀤𑀸𑀢𑀸. 𑀬𑀤𑀢𑁆𑀢𑀦𑀺 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁, 𑀢𑀁 𑀦𑀺𑀲𑁆𑀲𑀺𑀢𑁄 𑀓𑀼𑀧𑁆𑀧𑀧𑀝𑀺𑀘𑁆𑀘𑀲𑀦𑁆𑀢𑀺𑀦𑁆𑀢𑀺 𑀬𑀲𑁆𑀲𑁂𑀢𑁂 𑀤𑀺𑀝𑁆𑀞𑀺𑀥𑀫𑁆𑀫𑀸 𑀧𑀼𑀭𑀓𑁆𑀔𑀢𑀸 𑀅𑀯𑁄𑀤𑀸𑀢𑀸 𑀲𑀦𑁆𑀢𑀺, 𑀲𑁄 𑀏𑀯𑀁𑀯𑀺𑀥𑁄 𑀬𑀲𑁆𑀫𑀸 𑀅𑀢𑁆𑀢𑀦𑀺 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀥𑀫𑁆𑀫𑀺𑀓𑀜𑁆𑀘 𑀲𑀓𑁆𑀓𑀸𑀭𑀸𑀤𑀺𑀁, 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀕𑀢𑀺𑀯𑀺𑀲𑁂𑀲𑀸𑀤𑀺𑀁 𑀆𑀦𑀺𑀲𑀁𑀲𑀁 𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀜𑁆𑀘 𑀆𑀦𑀺𑀲𑀁𑀲𑀁, 𑀢𑀜𑁆𑀘 𑀓𑀼𑀧𑁆𑀧𑀢𑀸𑀬 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀢𑀸𑀬 𑀘 𑀲𑀫𑁆𑀫𑀼𑀢𑀺𑀲𑀦𑁆𑀢𑀺𑀢𑀸𑀬 𑀘 𑀓𑀼𑀧𑁆𑀧𑀧𑀝𑀺𑀘𑁆𑀘𑀲𑀦𑁆𑀢𑀺𑀲𑀗𑁆𑀔𑀸𑀢𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀺𑀢𑁄𑀯 𑀳𑁄𑀢𑀺, 𑀲𑁄 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀅𑀢𑁆𑀢𑀸𑀦𑀁 𑀯𑀸 𑀉𑀓𑁆𑀓𑀁𑀲𑁂𑀬𑁆𑀬 𑀧𑀭𑁂 𑀯𑀸 𑀯𑀫𑁆𑀪𑁂𑀬𑁆𑀬 𑀅𑀪𑀽𑀢𑁂𑀳𑀺𑀧𑀺 𑀕𑀼𑀡𑀤𑁄𑀲𑁂𑀳𑀺.

𑁭𑁯𑁨. 𑀏𑀯𑀁 𑀦𑀺𑀲𑁆𑀲𑀺𑀢𑁂𑀦 𑀘 𑀤𑀺𑀝𑁆𑀞𑀻𑀦𑀺𑀯𑁂𑀲𑀸…𑀧𑁂… 𑀆𑀤𑀺𑀬𑀢𑀻 𑀘 𑀥𑀫𑁆𑀫𑀦𑁆𑀢𑀺. 𑀢𑀢𑁆𑀣 𑀤𑀺𑀝𑁆𑀞𑀻𑀦𑀺𑀯𑁂𑀲𑀸𑀢𑀺 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀲𑀗𑁆𑀔𑀸𑀢𑀸𑀦𑀺 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑀸𑀦𑀺. 𑀦 𑀳𑀺 𑀲𑁆𑀯𑀸𑀢𑀺𑀯𑀢𑁆𑀢𑀸𑀢𑀺 𑀲𑀼𑀔𑁂𑀦 𑀅𑀢𑀺𑀯𑀢𑁆𑀢𑀺𑀢𑀩𑁆𑀩𑀸 𑀦 𑀳𑁄𑀦𑁆𑀢𑀺. 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀥𑀫𑁆𑀫𑁂𑀲𑀼 𑀢𑀁 𑀢𑀁 𑀲𑀫𑀼𑀕𑁆𑀕𑀳𑀺𑀢𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀥𑀫𑁆𑀫𑀁 𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀧𑀯𑀢𑁆𑀢𑀢𑁆𑀢𑀸 𑀤𑀺𑀝𑁆𑀞𑀺𑀦𑀺𑀯𑁂𑀲𑀸 𑀦 𑀳𑀺 𑀲𑁆𑀯𑀸𑀢𑀺𑀯𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀦𑀭𑁄 𑀢𑁂𑀲𑀼 𑀦𑀺𑀯𑁂𑀲𑀦𑁂𑀲𑀼, 𑀦𑀺𑀭𑀲𑁆𑀲𑀢𑀻 𑀆𑀤𑀺𑀬𑀢𑀻 𑀘 𑀥𑀫𑁆𑀫𑀦𑁆𑀢𑀺 𑀬𑀲𑁆𑀫𑀸 𑀦 𑀳𑀺 𑀲𑁆𑀯𑀸𑀢𑀺𑀯𑀢𑁆𑀢𑀸, 𑀢𑀲𑁆𑀫𑀸 𑀦𑀭𑁄 𑀢𑁂𑀲𑀼𑀬𑁂𑀯 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑁂𑀲𑀼 𑀅𑀚𑀲𑀻𑀮𑀕𑁄𑀲𑀻𑀮𑀓𑀼𑀓𑁆𑀓𑀼𑀭𑀲𑀻𑀮𑀧𑀜𑁆𑀘𑀸𑀢𑀧𑀫𑀭𑀼𑀧𑁆𑀧𑀧𑀸𑀢𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀓𑀡𑁆𑀝𑀓𑀸𑀧𑀲𑁆𑀲𑀬𑀸𑀤𑀺𑀪𑁂𑀤𑀁 𑀲𑀢𑁆𑀣𑀸𑀭𑀥𑀫𑁆𑀫𑀓𑁆𑀔𑀸𑀦𑀕𑀡𑀸𑀤𑀺𑀪𑁂𑀤𑀜𑁆𑀘 𑀢𑀁 𑀢𑀁 𑀥𑀫𑁆𑀫𑀁 𑀦𑀺𑀭𑀲𑁆𑀲𑀢𑀺 𑀘 𑀆𑀤𑀺𑀬𑀢𑀺 𑀘 𑀚𑀳𑀢𑀺 𑀘 𑀕𑀡𑁆𑀳𑀸𑀢𑀺 𑀘 𑀯𑀦𑀫𑀓𑁆𑀓𑀝𑁄 𑀯𑀺𑀬 𑀢𑀁 𑀢𑀁 𑀲𑀸𑀔𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀦𑀺𑀭𑀲𑁆𑀲𑀦𑁆𑀢𑁄 𑀘 𑀆𑀤𑀺𑀬𑀦𑁆𑀢𑁄 𑀘 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀢𑁆𑀢𑀸 𑀅𑀲𑀦𑁆𑀢𑁂𑀳𑀺𑀧𑀺 𑀕𑀼𑀡𑀤𑁄𑀲𑁂𑀳𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀬𑀲𑀸𑀬𑀲𑀁 𑀉𑀧𑁆𑀧𑀸𑀤𑁂𑀬𑁆𑀬.

𑁭𑁯𑁩. 𑀬𑁄 𑀧𑀦𑀸𑀬𑀁 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀸𑀤𑀺𑀤𑁄𑀲𑀥𑀼𑀦𑀦𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀥𑁄𑀦𑁄, 𑀢𑀲𑁆𑀲 𑀥𑁄𑀦𑀲𑁆𑀲 𑀳𑀺…𑀧𑁂… 𑀅𑀦𑀽𑀧𑀬𑁄 𑀲𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀥𑁄𑀦𑀥𑀫𑁆𑀫𑀲𑀫𑀦𑁆𑀦𑀸𑀕𑀫𑀸 𑀥𑁄𑀦𑀲𑁆𑀲 𑀥𑀼𑀢𑀲𑀩𑁆𑀩𑀧𑀸𑀧𑀲𑁆𑀲 𑀅𑀭𑀳𑀢𑁄 𑀓𑀢𑁆𑀣𑀘𑀺 𑀮𑁄𑀓𑁂 𑀢𑁂𑀲𑀼 𑀢𑁂𑀲𑀼 𑀪𑀯𑁂𑀲𑀼 𑀧𑀓𑀧𑁆𑀧𑀺𑀢𑀸 𑀤𑀺𑀝𑁆𑀞𑀺 𑀦𑀢𑁆𑀣𑀺, 𑀲𑁄 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀅𑀪𑀸𑀯𑁂𑀦, 𑀬𑀸𑀬 𑀘 𑀅𑀢𑁆𑀢𑀦𑀸 𑀓𑀢𑀁 𑀧𑀸𑀧𑀓𑀫𑁆𑀫𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀸 𑀢𑀺𑀢𑁆𑀣𑀺𑀬𑀸 𑀫𑀸𑀬𑀸𑀬 𑀫𑀸𑀦𑁂𑀦 𑀯𑀸 𑀏𑀢𑀁 𑀅𑀕𑀢𑀺𑀁 𑀕𑀘𑁆𑀙𑀦𑁆𑀢𑀺, 𑀢𑀫𑁆𑀧𑀺 𑀫𑀸𑀬𑀜𑁆𑀘 𑀫𑀸𑀦𑀜𑁆𑀘 𑀧𑀳𑀸𑀬 𑀥𑁄𑀦𑁄 𑀭𑀸𑀕𑀸𑀤𑀻𑀦𑀁 𑀤𑁄𑀲𑀸𑀦𑀁 𑀓𑁂𑀦 𑀕𑀘𑁆𑀙𑁂𑀬𑁆𑀬, 𑀤𑀺𑀝𑁆𑀞𑀥𑀫𑁆𑀫𑁂 𑀲𑀫𑁆𑀧𑀭𑀸𑀬𑁂 𑀯𑀸 𑀦𑀺𑀭𑀬𑀸𑀤𑀻𑀲𑀼 𑀕𑀢𑀺𑀯𑀺𑀲𑁂𑀲𑁂𑀲𑀼 𑀓𑁂𑀦 𑀲𑀗𑁆𑀔𑀁 𑀕𑀘𑁆𑀙𑁂𑀬𑁆𑀬, 𑀅𑀦𑀽𑀧𑀬𑁄 𑀲𑁄, 𑀲𑁄 𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀉𑀧𑀬𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀪𑀸𑀯𑁂𑀦 𑀅𑀦𑀽𑀧𑀬𑁄𑀢𑀺.

𑁭𑁯𑁪. 𑀬𑁄 𑀧𑀦 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀪𑀸𑀯𑁂𑀦 𑀉𑀧𑀬𑁄 𑀳𑁄𑀢𑀺, 𑀲𑁄 𑀉𑀧𑀬𑁄 𑀳𑀺…𑀧𑁂… 𑀤𑀺𑀝𑁆𑀞𑀺𑀫𑀺𑀥𑁂𑀯 𑀲𑀩𑁆𑀩𑀦𑁆𑀢𑀺. 𑀢𑀢𑁆𑀣 𑀉𑀧𑀬𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀺𑀢𑁄. 𑀥𑀫𑁆𑀫𑁂𑀲𑀼 𑀉𑀧𑁂𑀢𑀺 𑀯𑀸𑀤𑀦𑁆𑀢𑀺 ‘‘𑀭𑀢𑁆𑀢𑁄’’𑀢𑀺 𑀯𑀸 ‘‘𑀤𑀼𑀝𑁆𑀞𑁄’’𑀢𑀺 𑀯𑀸 𑀏𑀯𑀁 𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀉𑀧𑁂𑀢𑀺 𑀯𑀸𑀤𑀁. 𑀅𑀦𑀽𑀧𑀬𑀁 𑀓𑁂𑀦 𑀓𑀣𑀁 𑀯𑀤𑁂𑀬𑁆𑀬𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀳𑀸𑀦𑁂𑀦 𑀅𑀦𑀽𑀧𑀬𑀁 𑀔𑀻𑀡𑀸𑀲𑀯𑀁 𑀓𑁂𑀦 𑀭𑀸𑀕𑁂𑀦 𑀯𑀸 𑀤𑁄𑀲𑁂𑀦 𑀯𑀸 𑀓𑀣𑀁 ‘‘𑀭𑀢𑁆𑀢𑁄’’𑀢𑀺 𑀯𑀸 ‘‘𑀤𑀼𑀝𑁆𑀞𑁄’’𑀢𑀺 𑀯𑀸 𑀯𑀤𑁂𑀬𑁆𑀬, 𑀏𑀯𑀁 𑀅𑀦𑀼𑀧𑀯𑀚𑁆𑀚𑁄 𑀘 𑀲𑁄 𑀓𑀺𑀁 𑀢𑀺𑀢𑁆𑀣𑀺𑀬𑀸 𑀯𑀺𑀬 𑀓𑀢𑀧𑀝𑀺𑀘𑁆𑀙𑀸𑀤𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀢𑀸 𑀦𑀺𑀭𑀢𑁆𑀢𑀸 𑀦 𑀳𑀺 𑀢𑀲𑁆𑀲 𑀅𑀢𑁆𑀣𑀻𑀢𑀺 𑀢𑀲𑁆𑀲 𑀳𑀺 𑀅𑀢𑁆𑀢𑀤𑀺𑀝𑁆𑀞𑀺 𑀯𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀯𑀸 𑀦𑀢𑁆𑀣𑀺, 𑀕𑀳𑀡𑀁 𑀫𑀼𑀜𑁆𑀘𑀦𑀁 𑀯𑀸𑀧𑀺 𑀅𑀢𑁆𑀢𑀦𑀺𑀭𑀢𑁆𑀢𑀲𑀜𑁆𑀜𑀺𑀢𑀁 𑀦𑀢𑁆𑀣𑀺. 𑀓𑀺𑀁𑀓𑀸𑀭𑀡𑀸 𑀦𑀢𑁆𑀣𑀻𑀢𑀺 𑀘𑁂? 𑀅𑀥𑁄𑀲𑀺 𑀲𑁄 𑀤𑀺𑀝𑁆𑀞𑀺𑀫𑀺𑀥𑁂𑀯 𑀲𑀩𑁆𑀩𑀁, 𑀬𑀲𑁆𑀫𑀸 𑀲𑁄 𑀇𑀥𑁂𑀯 𑀅𑀢𑁆𑀢𑀪𑀸𑀯𑁂 𑀜𑀸𑀡𑀯𑀸𑀢𑁂𑀦 𑀲𑀩𑁆𑀩𑀁 𑀤𑀺𑀝𑁆𑀞𑀺𑀕𑀢𑀁 𑀅𑀥𑁄𑀲𑀺, 𑀧𑀚𑀳𑀺, 𑀯𑀺𑀦𑁄𑀤𑁂𑀲𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀅𑀢𑁆𑀢𑀫𑀦𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀤𑀼𑀝𑁆𑀞𑀝𑁆𑀞𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀼𑀤𑁆𑀥𑀝𑁆𑀞𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯𑁫. 𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀦𑁆𑀢𑀺 𑀲𑀼𑀤𑁆𑀥𑀝𑁆𑀞𑀓𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀢𑀻𑀢𑁂 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀸𑀭𑀸𑀡𑀲𑀺𑀯𑀸𑀲𑀻 𑀅𑀜𑁆𑀜𑀢𑀭𑁄 𑀓𑀼𑀝𑀼𑀫𑁆𑀩𑀺𑀓𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀧𑀘𑁆𑀘𑀦𑁆𑀢𑀚𑀦𑀧𑀤𑀁 𑀅𑀕𑀫𑀸𑀲𑀺 𑀪𑀡𑁆𑀟𑀕𑁆𑀕𑀳𑀡𑀢𑁆𑀣𑀁. 𑀢𑀢𑁆𑀣 𑀯𑀦𑀘𑀭𑀓𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀁 𑀓𑀢𑁆𑀯𑀸 𑀢𑀲𑁆𑀲 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀘𑁆𑀘𑀺, 𑀢𑁂 𑀲𑀫𑁆𑀫, 𑀘𑀦𑁆𑀤𑀦𑀲𑀸𑀭𑀁 𑀤𑀺𑀝𑁆𑀞𑀧𑀼𑀩𑁆𑀩’’𑀦𑁆𑀢𑀺? ‘‘𑀆𑀫 𑀲𑀸𑀫𑀻’’𑀢𑀺 𑀘 𑀯𑀼𑀢𑁆𑀢𑁂 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀘𑀦𑁆𑀤𑀦𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑀲𑀓𑀝𑀸𑀦𑀺 𑀘𑀦𑁆𑀤𑀦𑀲𑀸𑀭𑀲𑁆𑀲 𑀧𑀽𑀭𑁂𑀢𑁆𑀯𑀸 𑀢𑀫𑁆𑀧𑀺 𑀯𑀦𑀘𑀭𑀓𑀁 ‘‘𑀬𑀤𑀸, 𑀲𑀫𑁆𑀫, 𑀩𑀸𑀭𑀸𑀡𑀲𑀺𑀁 𑀆𑀕𑀘𑁆𑀙𑀲𑀺, 𑀢𑀤𑀸 𑀘𑀦𑁆𑀤𑀦𑀲𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀩𑀸𑀭𑀸𑀡𑀲𑀺𑀁𑀬𑁂𑀯 𑀅𑀕𑀫𑀸𑀲𑀺. 𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀲𑁄𑀧𑀺 𑀯𑀦𑀘𑀭𑀓𑁄 𑀘𑀦𑁆𑀤𑀦𑀲𑀸𑀭𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀖𑀭𑀁 𑀅𑀕𑀫𑀸𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀲𑀩𑁆𑀩𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀘𑀦𑁆𑀤𑀦𑀲𑀸𑀭𑀁 𑀧𑀺𑀲𑀸𑀧𑁂𑀢𑁆𑀯𑀸 𑀲𑀫𑀼𑀕𑁆𑀕𑀁 𑀧𑀽𑀭𑁂𑀢𑁆𑀯𑀸 ‘‘𑀕𑀘𑁆𑀙, 𑀲𑀫𑁆𑀫, 𑀦𑁆𑀳𑀸𑀬𑀺𑀢𑁆𑀯𑀸 𑀆𑀕𑀘𑁆𑀙𑀸’’𑀢𑀺 𑀅𑀢𑁆𑀢𑀦𑁄 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀦𑁆𑀳𑀸𑀦𑀢𑀺𑀢𑁆𑀣𑀁 𑀧𑁂𑀲𑁂𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀩𑀸𑀭𑀸𑀡𑀲𑀺𑀬𑀁 𑀉𑀲𑁆𑀲𑀯𑁄 𑀳𑁄𑀢𑀺. 𑀅𑀣 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀧𑀸𑀢𑁄𑀯 𑀤𑀸𑀦𑀁 𑀤𑀢𑁆𑀯𑀸 𑀲𑀸𑀬𑀁 𑀲𑀼𑀤𑁆𑀥𑀯𑀢𑁆𑀣𑀦𑀺𑀯𑀢𑁆𑀣𑀸 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀫𑀳𑀸𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑀼𑀁 𑀕𑀘𑁆𑀙𑀦𑁆𑀢𑀺. 𑀲𑁄 𑀯𑀦𑀘𑀭𑀓𑁄 𑀢𑁂 𑀤𑀺𑀲𑁆𑀯𑀸 ‘‘𑀫𑀳𑀸𑀚𑀦𑁄 𑀓𑀼𑀳𑀺𑀁 𑀕𑀘𑁆𑀙𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀯𑀺𑀳𑀸𑀭𑀁 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬𑀸’’𑀢𑀺 𑀘 𑀲𑀼𑀢𑁆𑀯𑀸 𑀲𑀬𑀫𑁆𑀧𑀺 𑀅𑀕𑀫𑀸𑀲𑀺. 𑀢𑀢𑁆𑀣 𑀫𑀦𑀼𑀲𑁆𑀲𑁂 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀤𑀻𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀘𑁂𑀢𑀺𑀬𑁂 𑀧𑀽𑀚𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀓𑀺𑀜𑁆𑀘𑀺 𑀘𑀺𑀢𑁆𑀭𑀁 𑀓𑀸𑀢𑀼𑀁 𑀅𑀚𑀸𑀦𑀦𑁆𑀢𑁄 𑀢𑀁 𑀘𑀦𑁆𑀤𑀦𑀁 𑀕𑀳𑁂𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑁂 𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀦𑀁. 𑀉𑀧𑀭𑀺 𑀓𑀁𑀲𑀧𑀸𑀢𑀺𑀫𑀢𑁆𑀢𑀁 𑀫𑀡𑁆𑀟𑀮𑀁 𑀅𑀓𑀸𑀲𑀺. 𑀅𑀣 𑀢𑀢𑁆𑀣 𑀲𑀽𑀭𑀺𑀬𑀼𑀕𑁆𑀕𑀫𑀦𑀯𑁂𑀮𑀸𑀬𑀁 𑀲𑀽𑀭𑀺𑀬𑀭𑀲𑁆𑀫𑀺𑀬𑁄 𑀉𑀝𑁆𑀞𑀳𑀺𑀁𑀲𑀼. 𑀲𑁄 𑀢𑀁 𑀤𑀺𑀲𑁆𑀯𑀸 𑀧𑀲𑀻𑀤𑀺, 𑀧𑀢𑁆𑀣𑀦𑀜𑁆𑀘 𑀅𑀓𑀸𑀲𑀺 ‘‘𑀬𑀢𑁆𑀣 𑀬𑀢𑁆𑀣 𑀦𑀺𑀩𑁆𑀩𑀢𑁆𑀢𑀸𑀫𑀺, 𑀈𑀤𑀺𑀲𑀸 𑀫𑁂 𑀭𑀲𑁆𑀫𑀺𑀬𑁄 𑀉𑀭𑁂 𑀉𑀝𑁆𑀞𑀳𑀦𑁆𑀢𑀽’’𑀢𑀺. 𑀲𑁄 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀉𑀭𑁂 𑀭𑀲𑁆𑀫𑀺𑀬𑁄 𑀉𑀝𑁆𑀞𑀳𑀺𑀁𑀲𑀼, 𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀬𑀲𑁆𑀲 𑀉𑀭𑀫𑀡𑁆𑀟𑀮𑀁 𑀯𑀺𑀭𑁄𑀘𑀢𑀺, ‘‘𑀘𑀦𑁆𑀤𑀸𑀪𑁄 𑀤𑁂𑀯𑀧𑀼𑀢𑁆𑀢𑁄’’𑀢𑁆𑀯𑁂𑀯 𑀘 𑀦𑀁 𑀲𑀜𑁆𑀚𑀸𑀦𑀺𑀁𑀲𑀼.

𑀲𑁄 𑀢𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀙𑀲𑀼 𑀤𑁂𑀯𑀮𑁄𑀓𑁂𑀲𑀼 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀔𑁂𑀧𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀉𑀧𑁆𑀧𑀦𑁆𑀦𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀣𑁂𑀯𑀲𑁆𑀲 𑀉𑀭𑁂 𑀘𑀦𑁆𑀤𑀫𑀡𑁆𑀟𑀮𑀲𑀤𑀺𑀲𑀁 𑀭𑀲𑁆𑀫𑀺𑀫𑀡𑁆𑀟𑀮𑀁 𑀅𑀳𑁄𑀲𑀺. 𑀦𑀸𑀫𑀓𑀭𑀡𑀤𑀺𑀯𑀲𑁂 𑀘𑀲𑁆𑀲 𑀫𑀗𑁆𑀕𑀮𑀁 𑀓𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸 𑀢𑀁 𑀫𑀡𑁆𑀟𑀮𑀁 𑀤𑀺𑀲𑁆𑀯𑀸 ‘‘𑀥𑀜𑁆𑀜𑀧𑀼𑀜𑁆𑀜𑀮𑀓𑁆𑀔𑀡𑁄 𑀅𑀬𑀁 𑀓𑀼𑀫𑀸𑀭𑁄’’𑀢𑀺 𑀯𑀺𑀫𑁆𑀳𑀺𑀢𑀸 ‘‘𑀘𑀦𑁆𑀤𑀸𑀪𑁄’’ 𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀢𑀁 𑀯𑀬𑀧𑁆𑀧𑀢𑁆𑀢𑀁 𑀩𑁆𑀭𑀸𑀳𑁆𑀫𑀡𑀸 𑀕𑀳𑁂𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀭𑀢𑁆𑀢𑀓𑀜𑁆𑀘𑀼𑀓𑀁 𑀧𑀸𑀭𑀼𑀧𑀸𑀧𑁂𑀢𑁆𑀯𑀸 𑀭𑀣𑁂 𑀆𑀭𑁄𑀧𑁂𑀢𑁆𑀯𑀸 ‘‘𑀫𑀳𑀸𑀩𑁆𑀭𑀳𑁆𑀫𑀸 𑀅𑀬’’𑀦𑁆𑀢𑀺 𑀧𑀽𑀚𑁂𑀢𑁆𑀯𑀸 ‘‘𑀬𑁄 𑀘𑀦𑁆𑀤𑀸𑀪𑀁 𑀧𑀲𑁆𑀲𑀢𑀺, 𑀲𑁄 𑀬𑀲𑀥𑀦𑀸𑀤𑀻𑀦𑀺 𑀮𑀪𑀢𑀺, 𑀲𑀫𑁆𑀧𑀭𑀸𑀬𑀜𑁆𑀘 𑀲𑀕𑁆𑀕𑀁 𑀕𑀘𑁆𑀙𑀢𑀻’’𑀢𑀺 𑀉𑀕𑁆𑀖𑁄𑀲𑁂𑀦𑁆𑀢𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀆𑀳𑀺𑀡𑁆𑀟𑀦𑁆𑀢𑀺. 𑀕𑀢𑀕𑀢𑀝𑁆𑀞𑀸𑀦𑁂 𑀫𑀦𑀼𑀲𑁆𑀲𑀸 ‘‘𑀏𑀲 𑀓𑀺𑀭 𑀪𑁄 𑀘𑀦𑁆𑀤𑀸𑀪𑁄 𑀦𑀸𑀫, 𑀬𑁄 𑀏𑀢𑀁 𑀧𑀲𑁆𑀲𑀢𑀺, 𑀲𑁄 𑀬𑀲𑀥𑀦𑀲𑀕𑁆𑀕𑀸𑀤𑀻𑀦𑀺 𑀮𑀪𑀢𑀻’’𑀢𑀺 𑀉𑀧𑀭𑀽𑀧𑀭𑀺 𑀆𑀕𑀘𑁆𑀙𑀦𑁆𑀢𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑁄 𑀘𑀮𑀺. 𑀩𑁆𑀭𑀸𑀳𑁆𑀫𑀡𑀸 𑀢𑀼𑀘𑁆𑀙𑀳𑀢𑁆𑀣𑀓𑀸𑀦𑀁 𑀆𑀕𑀢𑀸𑀦𑀁 𑀦 𑀤𑀲𑁆𑀲𑁂𑀦𑁆𑀢𑀺, 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀕𑀳𑁂𑀢𑁆𑀯𑀸 𑀆𑀕𑀢𑀸𑀦𑀫𑁂𑀯 𑀤𑀲𑁆𑀲𑁂𑀦𑁆𑀢𑀺. 𑀏𑀯𑀁 𑀘𑀦𑁆𑀤𑀸𑀪𑀁 𑀕𑀳𑁂𑀢𑁆𑀯𑀸 𑀅𑀦𑀼𑀯𑀺𑀘𑀭𑀦𑁆𑀢𑀸 𑀩𑁆𑀭𑀸𑀳𑁆𑀫𑀡𑀸 𑀓𑀫𑁂𑀦 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑀸.

𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀆𑀕𑀦𑁆𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀩𑀳𑀼𑀚𑀦𑀳𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄. 𑀅𑀣 𑀘𑀦𑁆𑀤𑀸𑀪𑁄 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀲𑀫𑀼𑀤𑁆𑀤𑀧𑀓𑁆𑀔𑀦𑁆𑀢𑀓𑀼𑀦𑁆𑀦𑀤𑀻 𑀯𑀺𑀬 𑀅𑀧𑀸𑀓𑀝𑁄 𑀅𑀳𑁄𑀲𑀺, 𑀘𑀦𑁆𑀤𑀸𑀪𑁄𑀢𑀺 𑀪𑀡𑀦𑁆𑀢𑁄𑀧𑀺 𑀦𑀢𑁆𑀣𑀺. 𑀲𑁄 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀸𑀚𑀦𑀓𑀸𑀬𑀁 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀆𑀤𑀸𑀬 𑀚𑁂𑀢𑀯𑀦𑀸𑀪𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀼𑀳𑀺𑀁 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀲𑁄 𑀩𑀳𑀼𑀚𑀦𑀳𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀁 𑀲𑁄𑀢𑀼𑀁 𑀚𑁂𑀢𑀯𑀦𑀁 𑀕𑀘𑁆𑀙𑀸𑀫𑀸’’𑀢𑀺 𑀘 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀲𑁄𑀧𑀺 𑀩𑁆𑀭𑀸𑀳𑁆𑀫𑀡𑀕𑀡𑀧𑀭𑀺𑀯𑀼𑀢𑁄 𑀢𑀢𑁆𑀣𑁂𑀯 𑀅𑀕𑀫𑀸𑀲𑀺. 𑀪𑀕𑀯𑀸 𑀘 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀲𑀪𑀸𑀬𑀁 𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄𑀯 𑀳𑁄𑀢𑀺. 𑀘𑀦𑁆𑀤𑀸𑀪𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑁆𑀫 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀢𑀸𑀯𑀤𑁂𑀯 𑀘𑀲𑁆𑀲 𑀲𑁄 𑀆𑀮𑁄𑀓𑁄 𑀅𑀦𑁆𑀢𑀭𑀳𑀺𑀢𑁄. 𑀩𑀼𑀤𑁆𑀥𑀸𑀮𑁄𑀓𑀲𑁆𑀲 𑀳𑀺 𑀲𑀫𑀻𑀧𑁂 𑀅𑀲𑀻𑀢𑀺𑀳𑀢𑁆𑀣𑀩𑁆𑀪𑀦𑁆𑀢𑀭𑁂 𑀅𑀜𑁆𑀜𑁄 𑀆𑀮𑁄𑀓𑁄 𑀦𑀸𑀪𑀺𑀪𑁄𑀢𑀺. 𑀲𑁄 ‘‘𑀆𑀮𑁄𑀓𑁄 𑀫𑁂 𑀦𑀝𑁆𑀞𑁄’’𑀢𑀺 𑀦𑀺𑀲𑀻𑀤𑀺𑀢𑁆𑀯𑀸𑀯 𑀉𑀝𑁆𑀞𑀸𑀲𑀺, 𑀉𑀝𑁆𑀞𑀳𑀺𑀢𑁆𑀯𑀸 𑀘 𑀕𑀦𑁆𑀢𑀼𑀫𑀸𑀭𑀤𑁆𑀥𑁄. 𑀅𑀣 𑀦𑀁 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀆𑀳 𑁋 ‘‘𑀓𑀺𑀁 𑀪𑁄 𑀘𑀦𑁆𑀤𑀸𑀪, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀪𑀻𑀢𑁄 𑀕𑀘𑁆𑀙𑀲𑀻’’𑀢𑀺. 𑀦𑀸𑀳𑀁 𑀪𑀻𑀢𑁄 𑀕𑀘𑁆𑀙𑀸𑀫𑀺, 𑀅𑀧𑀺𑀘 𑀫𑁂 𑀇𑀫𑀲𑁆𑀲 𑀢𑁂𑀚𑁂𑀦 𑀆𑀮𑁄𑀓𑁄 𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀧𑀼𑀦𑀤𑁂𑀯 𑀪𑀕𑀯𑀢𑁄 𑀧𑀼𑀭𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀤𑀢𑀮𑀸 𑀧𑀝𑁆𑀞𑀸𑀬 𑀬𑀸𑀯 𑀓𑁂𑀲𑀕𑁆𑀕𑀸 𑀭𑀽𑀧𑀭𑀁𑀲𑀺𑀮𑀓𑁆𑀔𑀡𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀫𑀳𑁂𑀲𑀓𑁆𑀔𑁄 𑀲𑀫𑀡𑁄 𑀕𑁄𑀢𑀫𑁄, 𑀫𑀫 𑀉𑀭𑁂 𑀅𑀧𑁆𑀧𑀫𑀢𑁆𑀢𑀓𑁄 𑀆𑀮𑁄𑀓𑁄 𑀉𑀝𑁆𑀞𑀺𑀢𑁄, 𑀢𑀸𑀯𑀢𑀓𑁂𑀦𑀧𑀺 𑀫𑀁 𑀕𑀳𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀯𑀺𑀘𑀭𑀦𑁆𑀢𑀺. 𑀏𑀯𑀁 𑀯𑀭𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀦𑁂𑀯 𑀫𑀸𑀦𑁄 𑀉𑀧𑁆𑀧𑀦𑁆𑀦𑁄, 𑀅𑀤𑁆𑀥𑀸 𑀅𑀬𑀁 𑀅𑀦𑁄𑀫𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀅𑀢𑀺𑀯𑀺𑀬 𑀧𑀲𑀦𑁆𑀦𑀘𑀺𑀢𑁆𑀢𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀪𑀕𑀯𑀸 𑀅𑀜𑁆𑀜𑀢𑀭𑀁 𑀣𑁂𑀭𑀁 𑀆𑀡𑀸𑀧𑁂𑀲𑀺 𑁋 ‘‘𑀧𑀩𑁆𑀩𑀸𑀚𑁂𑀳𑀺 𑀦’’𑀦𑁆𑀢𑀺. 𑀲𑁄 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀲𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀦 𑀘𑀺𑀭𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 ‘‘𑀘𑀦𑁆𑀤𑀸𑀪𑀢𑁆𑀣𑁂𑀭𑁄’’𑀢𑀺 𑀯𑀺𑀲𑁆𑀲𑀼𑀢𑁄 𑀅𑀳𑁄𑀲𑀺. 𑀢𑀁 𑀆𑀭𑀩𑁆𑀪 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀬𑁂 𑀘𑀦𑁆𑀤𑀸𑀪𑀁 𑀅𑀤𑁆𑀤𑀲𑀁𑀲𑀼. 𑀢𑁂 𑀬𑀲𑀁 𑀯𑀸 𑀥𑀦𑀁 𑀯𑀸 𑀮𑀪𑀺𑀁𑀲𑀼, 𑀲𑀕𑁆𑀕𑀁 𑀯𑀸 𑀕𑀘𑁆𑀙𑀺𑀁𑀲𑀼, 𑀯𑀺𑀲𑀼𑀤𑁆𑀥𑀺𑀁 𑀯𑀸 𑀧𑀸𑀧𑀼𑀡𑀺𑀁𑀲𑀼 𑀢𑁂𑀦 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀭𑀽𑀧𑀤𑀲𑁆𑀲𑀦𑁂𑀦𑀸’’𑀢𑀺. 𑀪𑀕𑀯𑀸 𑀢𑀲𑁆𑀲𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯𑀢𑁆𑀣𑁄 𑁋 𑀦, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑁂𑀦 𑀤𑀲𑁆𑀲𑀦𑁂𑀦 𑀲𑀼𑀤𑁆𑀥𑀺 𑀳𑁄𑀢𑀺. 𑀅𑀧𑀺𑀘 𑀔𑁄 𑀓𑀺𑀮𑁂𑀲𑀫𑀮𑀺𑀦𑀢𑁆𑀢𑀸 𑀅𑀲𑀼𑀤𑁆𑀥𑀁, 𑀓𑀺𑀮𑁂𑀲𑀭𑁄𑀕𑀸𑀦𑀁 𑀅𑀯𑀺𑀕𑀫𑀸 𑀲𑀭𑁄𑀕𑀫𑁂𑀯 𑀘𑀦𑁆𑀤𑀸𑀪𑀁 𑀩𑁆𑀭𑀸𑀳𑁆𑀫𑀡𑀁 𑀅𑀜𑁆𑀜𑀁 𑀯𑀸 𑀏𑀯𑀭𑀽𑀧𑀁 𑀤𑀺𑀲𑁆𑀯𑀸 𑀤𑀺𑀝𑁆𑀞𑀺𑀕𑀢𑀺𑀓𑁄 𑀩𑀸𑀮𑁄 𑀅𑀪𑀺𑀚𑀸𑀦𑀸𑀢𑀺 ‘‘𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀁 𑀧𑀭𑀫𑀁 𑀅𑀭𑁄𑀕𑀁, 𑀢𑁂𑀦 𑀘 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀦 𑀤𑀲𑁆𑀲𑀦𑁂𑀦 𑀲𑀁𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀻’’𑀢𑀺, 𑀲𑁄 𑀏𑀯𑀁 𑀅𑀪𑀺𑀚𑀸𑀦𑀦𑁆𑀢𑁄 𑀢𑀁 𑀤𑀲𑁆𑀲𑀦𑀁 ‘‘𑀧𑀭𑀫’’𑀦𑁆𑀢𑀺 𑀜𑀢𑁆𑀯𑀸 𑀢𑀲𑁆𑀫𑀺𑀁 𑀤𑀲𑁆𑀲𑀦𑁂 𑀲𑀼𑀤𑁆𑀥𑀸𑀦𑀼𑀧𑀲𑁆𑀲𑀻 𑀲𑀫𑀸𑀦𑁄 𑀢𑀁 𑀤𑀲𑁆𑀲𑀦𑀁 ‘‘𑀫𑀕𑁆𑀕𑀜𑀸𑀡’’𑀦𑁆𑀢𑀺 𑀧𑀘𑁆𑀘𑁂𑀢𑀺. 𑀢𑀁 𑀧𑀦 𑀫𑀕𑁆𑀕𑀜𑀸𑀡𑀁 𑀦 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀤𑀺𑀝𑁆𑀞𑁂𑀦 𑀘𑁂 𑀲𑀼𑀤𑁆𑀥𑀻’’𑀢𑀺 𑀤𑀼𑀢𑀺𑀬𑀕𑀸𑀣𑀁.

𑁭𑁯𑁬. 𑀢𑀲𑁆𑀲𑀢𑁆𑀣𑁄 𑁋 𑀢𑁂𑀦 𑀭𑀽𑀧𑀤𑀲𑁆𑀲𑀦𑀲𑀗𑁆𑀔𑀸𑀢𑁂𑀦 𑀤𑀺𑀝𑁆𑀞𑁂𑀦 𑀬𑀤𑀺 𑀓𑀺𑀮𑁂𑀲𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺. 𑀢𑁂𑀦 𑀯𑀸 𑀜𑀸𑀡𑁂𑀦 𑀲𑁄 𑀬𑀤𑀺 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀁 𑀧𑀚𑀳𑀸𑀢𑀺. 𑀏𑀯𑀁 𑀲𑀦𑁆𑀢𑁂 𑀅𑀭𑀺𑀬𑀫𑀕𑁆𑀕𑀢𑁄 𑀅𑀜𑁆𑀜𑁂𑀦 𑀅𑀲𑀼𑀤𑁆𑀥𑀺𑀫𑀕𑁆𑀕𑁂𑀦𑁂𑀯 𑀲𑁄 𑀲𑀼𑀚𑁆𑀛𑀢𑀺, 𑀭𑀸𑀕𑀸𑀤𑀻𑀳𑀺 𑀉𑀧𑀥𑀻𑀳𑀺 𑀲𑀉𑀧𑀥𑀺𑀓𑁄 𑀏𑀯 𑀲𑀫𑀸𑀦𑁄 𑀲𑀼𑀚𑁆𑀛𑀢𑀻𑀢𑀺 𑀆𑀧𑀦𑁆𑀦𑀁 𑀳𑁄𑀢𑀺, 𑀦 𑀘 𑀏𑀯𑀁𑀯𑀺𑀥𑁄 𑀲𑀼𑀚𑁆𑀛𑀢𑀺. 𑀢𑀲𑁆𑀫𑀸 𑀤𑀺𑀝𑁆𑀞𑀻 𑀳𑀺 𑀦𑀁 𑀧𑀸𑀯 𑀢𑀣𑀸 𑀯𑀤𑀸𑀦𑀁, 𑀲𑀸 𑀦𑀁 𑀤𑀺𑀝𑁆𑀞𑀺𑀬𑁂𑀯 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀅𑀬’’𑀦𑁆𑀢𑀺 𑀓𑀣𑁂𑀢𑀺 𑀤𑀺𑀝𑁆𑀞𑀺𑀅𑀦𑀼𑀭𑀽𑀧𑀁 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀣𑀸 𑀢𑀣𑀸 𑀯𑀤𑀦𑁆𑀢𑀺.

𑁭𑁯𑁭. 𑀦 𑀩𑁆𑀭𑀸𑀳𑁆𑀫𑀡𑁄𑀢𑀺 𑀢𑀢𑀺𑀬𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀧𑀦 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀲𑁄 𑀫𑀕𑁆𑀕𑁂𑀦 𑀅𑀥𑀺𑀕𑀢𑀸𑀲𑀯𑀓𑁆𑀔𑀬𑁄 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄 𑀅𑀭𑀺𑀬𑀫𑀕𑁆𑀕𑀜𑀸𑀡𑀢𑁄 𑀅𑀜𑁆𑀜𑁂𑀦 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀭𑀽𑀧𑀲𑀗𑁆𑀔𑀸𑀢𑁂 𑀤𑀺𑀝𑁆𑀞𑁂 𑀢𑀣𑀸𑀯𑀺𑀥𑀲𑀤𑁆𑀤𑀲𑀗𑁆𑀔𑀸𑀢𑁂 𑀲𑀼𑀢𑁂 𑀅𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑁂 𑀲𑀻𑀮𑁂 𑀳𑀢𑁆𑀣𑀺𑀯𑀢𑀸𑀤𑀺𑀪𑁂𑀤𑁂 𑀯𑀢𑁂 𑀧𑀣𑀯𑀺𑀆𑀤𑀺𑀪𑁂𑀤𑁂 𑀫𑀼𑀢𑁂 𑀘 𑀉𑀧𑁆𑀧𑀦𑁆𑀦𑁂𑀦 𑀫𑀺𑀘𑁆𑀙𑀸𑀜𑀸𑀡𑁂𑀦 𑀲𑀼𑀤𑁆𑀥𑀺𑀁 𑀦 𑀆𑀳. 𑀲𑁂𑀲𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑁄 𑀳𑀺 𑀢𑁂𑀥𑀸𑀢𑀼𑀓𑀧𑀼𑀜𑁆𑀜𑁂 𑀲𑀩𑁆𑀩𑀲𑁆𑀫𑀺𑀜𑁆𑀘 𑀧𑀸𑀧𑁂 𑀅𑀦𑀽𑀧𑀮𑀺𑀢𑁆𑀢𑁄, 𑀢𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀢𑁆𑀢𑀤𑀺𑀝𑁆𑀞𑀺𑀬𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀸 𑀕𑀳𑀡𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀢𑁆𑀢𑀜𑁆𑀚𑀳𑁄, 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀓𑀭𑀡𑀢𑁄 𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀦𑀁 𑀏𑀯𑀁 𑀧𑀲𑀁𑀲𑀦𑁆𑀢𑁄 𑀆𑀳. 𑀲𑀩𑁆𑀩𑀲𑁆𑀲𑁂𑀯 𑀘𑀲𑁆𑀲 𑀧𑀼𑀭𑀺𑀫𑀧𑀸𑀤𑁂𑀦 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀧𑀼𑀜𑁆𑀜𑁂 𑀘 𑀧𑀸𑀧𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄, 𑀅𑀢𑁆𑀢𑀜𑁆𑀚𑀳𑁄 𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄, 𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳𑀸𑀢𑀺.

𑁭𑁯𑁮. 𑀏𑀯𑀁 𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳𑀸𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀬𑁂 𑀤𑀺𑀝𑁆𑀞𑀺𑀕𑀢𑀺𑀓𑀸 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀁 𑀩𑁆𑀭𑀼𑀯𑀦𑁆𑀢𑀺, 𑀢𑁂𑀲𑀁 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀅𑀦𑀺𑀩𑁆𑀩𑀸𑀳𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀭𑀺𑀫𑀁 𑀧𑀳𑀸𑀬𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑁂 𑀳𑀺 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀯𑀸𑀤𑀸 𑀲𑀫𑀸𑀦𑀸𑀧𑀺 𑀬𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀳𑀻𑀦𑀢𑁆𑀢𑀸 𑀕𑀳𑀡𑀫𑀼𑀜𑁆𑀘𑀦𑀁 𑀳𑁄𑀢𑀺. 𑀢𑀸𑀬 𑀧𑀼𑀭𑀺𑀫𑀁 𑀲𑀢𑁆𑀣𑀸𑀭𑀸𑀤𑀺𑀁 𑀧𑀳𑀸𑀬 𑀅𑀧𑀭𑀁 𑀦𑀺𑀲𑁆𑀲𑀺𑀢𑀸 𑀏𑀚𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀅𑀦𑀼𑀕𑀢𑀸 𑀅𑀪𑀺𑀪𑀽𑀢𑀸 𑀭𑀸𑀕𑀸𑀤𑀺𑀪𑁂𑀤𑀁 𑀦 𑀢𑀭𑀦𑁆𑀢𑀺 𑀲𑀗𑁆𑀕𑀁, 𑀢𑀜𑁆𑀘 𑀅𑀢𑀭𑀦𑁆𑀢𑀸 𑀢𑀁 𑀢𑀁 𑀥𑀫𑁆𑀫𑀁 𑀉𑀕𑁆𑀕𑀡𑁆𑀳𑀦𑁆𑀢𑀺 𑀘 𑀦𑀺𑀭𑀲𑁆𑀲𑀚𑀦𑁆𑀢𑀺 𑀘 𑀫𑀓𑁆𑀓𑀝𑁄𑀯 𑀲𑀸𑀔𑀦𑁆𑀢𑀺.

𑁭𑁯𑁯. 𑀧𑀜𑁆𑀘𑀫𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑁋 𑀬𑁄 𑀘 𑀲𑁄 ‘‘𑀤𑀺𑀝𑁆𑀞𑀻 𑀳𑀺 𑀦𑀁 𑀧𑀸𑀯 𑀢𑀣𑀸 𑀯𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁄, 𑀲𑁄 𑀲𑀬𑀁 𑀲𑀫𑀸𑀤𑀸𑀬𑀸𑀢𑀺. 𑀢𑀢𑁆𑀣 𑀲𑀬𑀦𑁆𑀢𑀺 𑀲𑀸𑀫𑀁. 𑀲𑀫𑀸𑀤𑀸𑀬𑀸𑀢𑀺 𑀕𑀳𑁂𑀢𑁆𑀯𑀸. 𑀯𑀢𑀸𑀦𑀻𑀢𑀺 𑀳𑀢𑁆𑀣𑀺𑀯𑀢𑀸𑀤𑀻𑀦𑀺. 𑀉𑀘𑁆𑀘𑀸𑀯𑀘𑀦𑁆𑀢𑀺 𑀅𑀧𑀭𑀸𑀧𑀭𑀁 𑀳𑀻𑀦𑀧𑀡𑀻𑀢𑀁 𑀯𑀸 𑀲𑀢𑁆𑀣𑀸𑀭𑀢𑁄 𑀲𑀢𑁆𑀣𑀸𑀭𑀸𑀤𑀺𑀁. 𑀲𑀜𑁆𑀜𑀲𑀢𑁆𑀢𑁄𑀢𑀺 𑀓𑀸𑀫𑀲𑀜𑁆𑀜𑀸𑀤𑀻𑀲𑀼 𑀮𑀕𑁆𑀕𑁄. 𑀯𑀺𑀤𑁆𑀯𑀸 𑀘 𑀯𑁂𑀤𑁂𑀳𑀺 𑀲𑀫𑁂𑀘𑁆𑀘 𑀥𑀫𑁆𑀫𑀦𑁆𑀢𑀺 𑀧𑀭𑀫𑀢𑁆𑀣𑀯𑀺𑀤𑁆𑀯𑀸 𑀘 𑀅𑀭𑀳𑀸 𑀘𑀢𑀽𑀳𑀺 𑀫𑀕𑁆𑀕𑀜𑀸𑀡𑀯𑁂𑀤𑁂𑀳𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀅𑀪𑀺𑀲𑀫𑁂𑀘𑁆𑀘𑀸𑀢𑀺. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁮𑁦𑁦. 𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄, 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁𑀯 𑀲𑀼𑀢𑀁 𑀫𑀼𑀢𑀁 𑀯𑀸𑀢𑀺 𑀲𑁄𑀪𑀽𑀭𑀺𑀧𑀜𑁆𑀜𑁄 𑀔𑀻𑀡𑀸𑀲𑀯𑁄 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑀫𑀼𑀢𑀁 𑀯𑀸 𑀢𑁂𑀲𑀼 𑀲𑀩𑁆𑀩𑀥𑀫𑁆𑀫𑁂𑀲𑀼 𑀫𑀸𑀭𑀲𑁂𑀦𑀁 𑀯𑀺𑀦𑀸𑀲𑁂𑀢𑁆𑀯𑀸 𑀞𑀺𑀢𑀪𑀸𑀯𑁂𑀦 𑀯𑀺𑀲𑁂𑀦𑀺𑀪𑀽𑀢𑁄. 𑀢𑀫𑁂𑀯𑀤𑀲𑁆𑀲𑀺𑀦𑁆𑀢𑀺 𑀢𑀁 𑀏𑀯𑀁 𑀯𑀺𑀲𑀼𑀤𑁆𑀥𑀤𑀲𑁆𑀲𑀺𑀁. 𑀯𑀺𑀯𑀝𑀁 𑀘𑀭𑀦𑁆𑀢𑀦𑁆𑀢𑀺𑀢𑀡𑁆𑀳𑀘𑁆𑀙𑀤𑀦𑀸𑀤𑀺𑀯𑀺𑀕𑀫𑁂𑀦 𑀯𑀺𑀯𑀝𑀁 𑀳𑀼𑀢𑁆𑀯𑀸 𑀘𑀭𑀦𑁆𑀢𑀁. 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺𑀁 𑀯𑀺𑀓𑀧𑁆𑀧𑀬𑁂𑀬𑁆𑀬𑀸𑀢𑀺 𑀓𑁂𑀦 𑀇𑀥 𑀮𑁄𑀓𑁂 𑀢𑀡𑁆𑀳𑀸𑀓𑀧𑁆𑀧𑁂𑀦 𑀯𑀸 𑀤𑀺𑀝𑁆𑀞𑀺𑀓𑀧𑁆𑀧𑁂𑀦 𑀯𑀸 𑀓𑁄𑀘𑀺 𑀯𑀺𑀓𑀧𑁆𑀧𑁂𑀬𑁆𑀬, 𑀢𑁂𑀲𑀁 𑀯𑀸 𑀧𑀳𑀻𑀦𑀢𑁆𑀢𑀸 𑀭𑀸𑀕𑀸𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦𑀸𑀢𑀺.

𑁮𑁦𑁧. 𑀦 𑀓𑀧𑁆𑀧𑀬𑀦𑁆𑀢𑀻𑀢𑀺 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑁄 𑀘 𑁋 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀢𑁂 𑀳𑀺 𑀢𑀸𑀤𑀺𑀲𑀸 𑀲𑀦𑁆𑀢𑁄 𑀤𑁆𑀯𑀺𑀦𑁆𑀦𑀁 𑀓𑀧𑁆𑀧𑀸𑀦𑀁 𑀧𑀼𑀭𑁂𑀓𑁆𑀔𑀸𑀭𑀸𑀦𑀜𑁆𑀘 𑀓𑁂𑀦𑀘𑀺 𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺, 𑀧𑀭𑀫𑀢𑁆𑀣𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀺𑀅𑀥𑀺𑀕𑀢𑀢𑁆𑀢𑀸 𑀅𑀦𑀘𑁆𑀘𑀦𑁆𑀢𑀲𑀼𑀤𑁆𑀥𑀺𑀁𑀬𑁂𑀯 𑀅𑀓𑀺𑀭𑀺𑀬𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀅𑀘𑁆𑀘𑀦𑁆𑀢 𑀲𑀼𑀤𑁆𑀥𑀻𑀢𑀺 𑀦 𑀢𑁂 𑀯𑀤𑀦𑁆𑀢𑀺. 𑀆𑀤𑀸𑀦𑀕𑀦𑁆𑀣𑀁 𑀕𑀣𑀺𑀢𑀁 𑀯𑀺𑀲𑀚𑁆𑀚𑀸𑀢𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀭𑀽𑀧𑀸𑀤𑀻𑀦𑀁 𑀆𑀤𑀸𑀬𑀓𑀢𑁆𑀢𑀸 𑀆𑀤𑀸𑀦𑀕𑀦𑁆𑀣𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀕𑀣𑀺𑀢𑀁 𑀩𑀤𑁆𑀥𑀁 𑀅𑀭𑀺𑀬𑀫𑀕𑁆𑀕𑀲𑀢𑁆𑀣𑁂𑀦 𑀯𑀺𑀲𑀚𑁆𑀚 𑀙𑀺𑀦𑁆𑀤𑀺𑀢𑁆𑀯𑀸. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁮𑁦𑁨. 𑀲𑀻𑀫𑀸𑀢𑀺𑀕𑁄𑀢𑀺 𑀕𑀸𑀣𑀸 𑀏𑀓𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀯𑀼𑀢𑁆𑀢𑀸. 𑀧𑀼𑀩𑁆𑀩𑀲𑀤𑀺𑀲𑁄 𑀏𑀯 𑀧𑀦𑀲𑁆𑀲𑀸 𑀲𑀫𑁆𑀩𑀦𑁆𑀥𑁄, 𑀲𑁄 𑀏𑀯𑀁 𑀅𑀢𑁆𑀣𑀯𑀡𑁆𑀡𑀦𑀸𑀬 𑀲𑀤𑁆𑀥𑀺𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀲𑁄 𑀈𑀤𑀺𑀲𑁄 𑀪𑀽𑀭𑀺𑀧𑀜𑁆𑀜𑁄 𑀘𑀢𑀼𑀦𑁆𑀦𑀁 𑀓𑀺𑀮𑁂𑀲𑀲𑀻𑀫𑀸𑀦𑀁 𑀅𑀢𑀻𑀢𑀢𑁆𑀢𑀸 𑀲𑀻𑀫𑀸𑀢𑀺𑀕𑁄 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀘 𑀩𑁆𑀭𑀸𑀳𑁆𑀫𑀡𑁄, 𑀇𑀢𑁆𑀣𑀫𑁆𑀪𑀽𑀢𑀲𑁆𑀲 𑀘 𑀢𑀲𑁆𑀲 𑀦𑀢𑁆𑀣𑀺 𑀧𑀭𑀘𑀺𑀢𑁆𑀢𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀳𑀺 𑀜𑀢𑁆𑀯𑀸 𑀯𑀸 𑀫𑀁𑀲𑀘𑀓𑁆𑀔𑀼𑀤𑀺𑀩𑁆𑀩𑀘𑀓𑁆𑀔𑀽𑀳𑀺 𑀤𑀺𑀲𑁆𑀯𑀸 𑀯𑀸 𑀓𑀺𑀜𑁆𑀘𑀺 𑀲𑀫𑀼𑀕𑁆𑀕𑀳𑀻𑀢𑀁, 𑀅𑀪𑀺𑀦𑀺𑀯𑀺𑀝𑁆𑀞𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀘 𑀓𑀸𑀫𑀭𑀸𑀕𑀸𑀪𑀸𑀯𑀢𑁄 𑀦 𑀭𑀸𑀕𑀭𑀸𑀕𑀻, 𑀭𑀽𑀧𑀸𑀭𑀽𑀧𑀭𑀸𑀕𑀸𑀪𑀸𑀯𑀢𑁄 𑀦 𑀯𑀺𑀭𑀸𑀕𑀭𑀢𑁆𑀢𑁄. 𑀬𑀢𑁄 𑀏𑀯𑀁𑀯𑀺𑀥𑀲𑁆𑀲 ‘‘𑀇𑀤𑀁 𑀧𑀭’’𑀦𑁆𑀢𑀺 𑀓𑀺𑀜𑁆𑀘𑀺 𑀇𑀥 𑀉𑀕𑁆𑀕𑀳𑀺𑀢𑀁 𑀦𑀢𑁆𑀣𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀲𑀼𑀤𑁆𑀥𑀝𑁆𑀞𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀭𑀫𑀝𑁆𑀞𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦𑁩. 𑀧𑀭𑀫𑀦𑁆𑀢𑀺 𑀤𑀺𑀝𑁆𑀞𑀻𑀲𑀽𑀢𑀺 𑀧𑀭𑀫𑀝𑁆𑀞𑀓𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀁 𑀤𑀻𑀧𑁂𑀦𑁆𑀢𑀸 ‘‘𑀇𑀤𑀁 𑀧𑀭𑀫𑀁, 𑀇𑀤𑀁 𑀧𑀭𑀫’’𑀦𑁆𑀢𑀺 𑀓𑀮𑀳𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀲𑀫𑁆𑀩𑀳𑀼𑀮𑁂 𑀚𑀘𑁆𑀘𑀦𑁆𑀥𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀇𑀫𑁂𑀲𑀁 𑀳𑀢𑁆𑀣𑀺𑀁 𑀤𑀲𑁆𑀲𑁂𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀭𑀸𑀚𑀧𑀼𑀭𑀺𑀲𑀸 𑀅𑀦𑁆𑀥𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀳𑀢𑁆𑀣𑀺𑀁 𑀧𑀼𑀭𑀢𑁄 𑀲𑀬𑀸𑀧𑁂𑀢𑁆𑀯𑀸 ‘‘𑀧𑀲𑁆𑀲𑀣𑀸’’𑀢𑀺 𑀆𑀳𑀁𑀲𑀼. 𑀢𑁂 𑀳𑀢𑁆𑀣𑀺𑀲𑁆𑀲 𑀏𑀓𑀫𑁂𑀓𑀁 𑀅𑀗𑁆𑀕𑀁 𑀧𑀭𑀸𑀫𑀲𑀺𑀁𑀲𑀼. 𑀢𑀢𑁄 𑀭𑀜𑁆𑀜𑀸 ‘‘𑀓𑀻𑀤𑀺𑀲𑁄, 𑀪𑀡𑁂, 𑀳𑀢𑁆𑀣𑀻’’𑀢𑀺 𑀧𑀼𑀝𑁆𑀞𑁄 𑀬𑁄 𑀲𑁄𑀡𑁆𑀟𑀁 𑀧𑀭𑀸𑀫𑀲𑀺, 𑀲𑁄 ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀦𑀗𑁆𑀕𑀮𑀻𑀲𑀸’’𑀢𑀺 𑀪𑀡𑀺. 𑀬𑁂 𑀤𑀦𑁆𑀢𑀸𑀤𑀻𑀦𑀺 𑀧𑀭𑀸𑀫𑀲𑀺𑀁𑀲𑀼, 𑀢𑁂 𑀇𑀢𑀭𑀁 ‘‘𑀫𑀸 𑀪𑁄 𑀭𑀜𑁆𑀜𑁄 𑀧𑀼𑀭𑀢𑁄 𑀫𑀼𑀲𑀸 𑀪𑀡𑀻’’𑀢𑀺 𑀧𑀭𑀺𑀪𑀸𑀲𑀺𑀢𑁆𑀯𑀸 ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀪𑀺𑀢𑁆𑀢𑀺𑀔𑀺𑀮𑁄’’𑀢𑀺𑀆𑀤𑀻𑀦𑀺 𑀆𑀳𑀁𑀲𑀼. 𑀭𑀸𑀚𑀸 𑀢𑀁 𑀲𑀩𑁆𑀩𑀁 𑀲𑀼𑀢𑁆𑀯𑀸 ‘‘𑀈𑀤𑀺𑀲𑁄 𑀢𑀼𑀫𑁆𑀳𑀸𑀓𑀁 𑀲𑀫𑀬𑁄’’𑀢𑀺 𑀢𑀺𑀢𑁆𑀣𑀺𑀬𑁂 𑀉𑀬𑁆𑀬𑁄𑀚𑁂𑀲𑀺. 𑀅𑀜𑁆𑀜𑀢𑀭𑁄 𑀧𑀺𑀡𑁆𑀟𑀘𑀸𑀭𑀺𑀓𑁄 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀲𑁆𑀲𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀬𑀣𑀸, 𑀪𑀺𑀓𑁆𑀔𑀯𑁂, 𑀚𑀘𑁆𑀘𑀦𑁆𑀥𑀸 𑀳𑀢𑁆𑀣𑀺𑀁 𑀅𑀚𑀸𑀦𑀦𑁆𑀢𑀸 𑀢𑀁 𑀢𑀁 𑀅𑀗𑁆𑀕𑀁 𑀧𑀭𑀸𑀫𑀲𑀺𑀢𑁆𑀯𑀸 𑀯𑀺𑀯𑀤𑀺𑀁𑀲𑀼, 𑀏𑀯𑀁 𑀢𑀺𑀢𑁆𑀣𑀺𑀬𑀸 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀥𑀫𑁆𑀫𑀁 𑀅𑀚𑀸𑀦𑀦𑁆𑀢𑀸 𑀢𑀁 𑀢𑀁 𑀤𑀺𑀝𑁆𑀞𑀺𑀁 𑀧𑀭𑀸𑀫𑀲𑀺𑀢𑁆𑀯𑀸 𑀯𑀺𑀯𑀤𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀧𑀭𑀫𑀦𑁆𑀢𑀺 𑀤𑀺𑀝𑁆𑀞𑀻𑀲𑀼 𑀧𑀭𑀺𑀩𑁆𑀩𑀲𑀸𑀦𑁄𑀢𑀺 ‘‘𑀇𑀤𑀁 𑀧𑀭𑀫’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀲𑀓𑀸𑀬 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀯𑀲𑀫𑀸𑀦𑁄. 𑀬𑀤𑀼𑀢𑁆𑀢𑀭𑀺 𑀓𑀼𑀭𑀼𑀢𑁂𑀢𑀺 𑀬𑀁 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀸𑀤𑀺𑀁 𑀲𑁂𑀝𑁆𑀞𑀁 𑀓𑀭𑁄𑀢𑀺. 𑀳𑀻𑀦𑀸𑀢𑀺 𑀅𑀜𑁆𑀜𑁂 𑀢𑀢𑁄 𑀲𑀩𑁆𑀩𑀫𑀸𑀳𑀸𑀢𑀺 𑀢𑀁 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀸𑀤𑀺𑀁 𑀞𑀧𑁂𑀢𑁆𑀯𑀸 𑀢𑀢𑁄 𑀅𑀜𑁆𑀜𑁂 𑀲𑀩𑁆𑀩𑁂 ‘‘𑀳𑀻𑀦𑀸 𑀇𑀫𑁂’’𑀢𑀺 𑀆𑀳. 𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀅𑀯𑀻𑀢𑀺𑀯𑀢𑁆𑀢𑁄𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀲𑁄 𑀤𑀺𑀝𑁆𑀞𑀺𑀓𑀮𑀳𑁂 𑀅𑀯𑀻𑀢𑀺𑀯𑀢𑁆𑀢𑁄𑀯 𑀳𑁄𑀢𑀺.

𑁮𑁦𑁪. 𑀤𑀼𑀢𑀺𑀬𑀕𑀸𑀣𑀸𑀬 𑀅𑀢𑁆𑀣𑁄 𑁋 𑀏𑀯𑀁 𑀅𑀯𑀻𑀢𑀺𑀯𑀢𑁆𑀢𑁄 𑀘 𑀬𑀁 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂𑀢𑀺 𑀏𑀢𑁂𑀲𑀼 𑀯𑀢𑁆𑀣𑀽𑀲𑀼 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂 𑀅𑀢𑁆𑀢𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀆𑀦𑀺𑀲𑀁𑀲𑀁 𑀧𑀲𑁆𑀲𑀢𑀺. 𑀢𑀤𑁂𑀯 𑀲𑁄 𑀢𑀢𑁆𑀣 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀆𑀦𑀺𑀲𑀁𑀲𑀁 ‘‘𑀇𑀤𑀁 𑀲𑁂𑀝𑁆𑀞’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑀁 𑀲𑀩𑁆𑀩𑀁 𑀧𑀭𑀲𑀢𑁆𑀣𑀸𑀭𑀸𑀤𑀺𑀓𑀁 𑀦𑀺𑀳𑀻𑀦𑀢𑁄 𑀧𑀲𑁆𑀲𑀢𑀺.

𑁮𑁦𑁫. 𑀢𑀢𑀺𑀬𑀕𑀸𑀣𑀸𑀬 𑀅𑀢𑁆𑀣𑁄 𑁋 𑀏𑀯𑀁 𑀧𑀲𑁆𑀲𑀢𑁄 𑀘𑀲𑁆𑀲 𑀬𑀁 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀸𑀤𑀺𑀁 𑀦𑀺𑀲𑁆𑀲𑀺𑀢𑁄 𑀅𑀜𑁆𑀜𑀁 𑀧𑀭𑀲𑀢𑁆𑀣𑀸𑀭𑀸𑀤𑀺𑀁 𑀳𑀻𑀦𑀁 𑀧𑀲𑁆𑀲𑀢𑀺 𑀢𑀁 𑀧𑀦 𑀤𑀲𑁆𑀲𑀦𑀁 𑀕𑀦𑁆𑀣𑀫𑁂𑀯 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀩𑀦𑁆𑀥𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀫𑀸 𑀏𑀢𑀤𑁂𑀯, 𑀢𑀲𑁆𑀫𑀸 𑀳𑀺 𑀤𑀺𑀝𑁆𑀞𑀁𑀯 𑀲𑀼𑀢𑀁 𑀫𑀼𑀢𑀁 𑀯𑀸 𑀲𑀻𑀮𑀩𑁆𑀩𑀢𑀁 𑀪𑀺𑀓𑁆𑀔𑀼 𑀦 𑀦𑀺𑀲𑁆𑀲𑀬𑁂𑀬𑁆𑀬, 𑀦𑀸𑀪𑀺𑀦𑀺𑀯𑁂𑀲𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁮𑁦𑁬. 𑀘𑀢𑀼𑀢𑁆𑀣𑀕𑀸𑀣𑀸𑀬 𑀅𑀢𑁆𑀣𑁄 𑁋 𑀦 𑀓𑁂𑀯𑀮𑀁 𑀤𑀺𑀝𑁆𑀞𑀲𑀼𑀢𑀸𑀤𑀺𑀁 𑀦 𑀦𑀺𑀲𑁆𑀲𑀬𑁂𑀬𑁆𑀬, 𑀅𑀧𑀺𑀘 𑀔𑁄 𑀧𑀦 𑀅𑀲𑀜𑁆𑀚𑀸𑀢𑀁 𑀉𑀧𑀭𑀽𑀧𑀭𑀺 𑀤𑀺𑀝𑁆𑀞𑀺𑀫𑁆𑀧𑀺 𑀮𑁄𑀓𑀲𑁆𑀫𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬, 𑀦 𑀚𑀦𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀻𑀤𑀺𑀲𑀁? 𑀜𑀸𑀡𑁂𑀦 𑀯𑀸 𑀲𑀻𑀮𑀯𑀢𑁂𑀦 𑀯𑀸𑀧𑀺, 𑀲𑀫𑀸𑀧𑀢𑁆𑀢𑀺𑀜𑀸𑀡𑀸𑀤𑀺𑀦𑀸 𑀜𑀸𑀡𑁂𑀦 𑀯𑀸 𑀲𑀻𑀮𑀯𑀢𑁂𑀦 𑀯𑀸 𑀬𑀸 𑀓𑀧𑁆𑀧𑀺𑀬𑀢𑀺, 𑀏𑀢𑀁 𑀤𑀺𑀝𑁆𑀞𑀺𑀁 𑀦 𑀓𑀧𑁆𑀧𑁂𑀬𑁆𑀬. 𑀦 𑀓𑁂𑀯𑀮𑀜𑁆𑀘 𑀤𑀺𑀝𑁆𑀞𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬, 𑀅𑀧𑀺𑀘 𑀔𑁄 𑀧𑀦 𑀫𑀸𑀦𑁂𑀦𑀧𑀺 𑀚𑀸𑀢𑀺𑀆𑀤𑀻𑀳𑀺 𑀯𑀢𑁆𑀣𑀽𑀳𑀺 𑀲𑀫𑁄𑀢𑀺 𑀅𑀢𑁆𑀢𑀸𑀦𑀫𑀦𑀽𑀧𑀦𑁂𑀬𑁆𑀬, 𑀳𑀻𑀦𑁄 𑀦 𑀫𑀜𑁆𑀜𑁂𑀣 𑀯𑀺𑀲𑁂𑀲𑀺 𑀯𑀸𑀧𑀻𑀢𑀺.

𑁮𑁦𑁭. 𑀧𑀜𑁆𑀘𑀫𑀕𑀸𑀣𑀸𑀬 𑀅𑀢𑁆𑀣𑁄 𑁋 𑀏𑀯𑀜𑁆𑀳𑀺 𑀤𑀺𑀝𑁆𑀞𑀺𑀁 𑀅𑀓𑀧𑁆𑀧𑁂𑀦𑁆𑀢𑁄 𑀅𑀫𑀜𑁆𑀜𑀫𑀸𑀦𑁄 𑀘 𑀅𑀢𑁆𑀢𑀁 𑀧𑀳𑀸𑀬 𑀅𑀦𑀼𑀧𑀸𑀤𑀺𑀬𑀸𑀦𑁄 𑀇𑀥 𑀯𑀸 𑀬𑀁 𑀧𑀼𑀩𑁆𑀩𑁂 𑀕𑀳𑀺𑀢𑀁, 𑀢𑀁 𑀧𑀳𑀸𑀬 𑀅𑀧𑀭𑀁 𑀅𑀕𑁆𑀕𑀡𑁆𑀳𑀦𑁆𑀢𑁄 𑀢𑀲𑁆𑀫𑀺𑀫𑁆𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀜𑀸𑀡𑁂 𑀤𑀼𑀯𑀺𑀥𑀁 𑀦𑀺𑀲𑁆𑀲𑀬𑀁 𑀦𑁄 𑀓𑀭𑁄𑀢𑀺. 𑀅𑀓𑀭𑁄𑀦𑁆𑀢𑁄 𑀘 𑀲 𑀯𑁂 𑀯𑀺𑀬𑀢𑁆𑀢𑁂𑀲𑀼 𑀦𑀸𑀦𑀸𑀤𑀺𑀝𑁆𑀞𑀺𑀯𑀲𑁂𑀦 𑀪𑀺𑀦𑁆𑀦𑁂𑀲𑀼 𑀲𑀢𑁆𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻 𑀙𑀦𑁆𑀤𑀸𑀤𑀺𑀯𑀲𑁂𑀦 𑀅𑀕𑀘𑁆𑀙𑀦𑀥𑀫𑁆𑀫𑁄 𑀳𑀼𑀢𑁆𑀯𑀸 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀻𑀲𑀼 𑀓𑀺𑀜𑁆𑀘𑀺𑀧𑀺 𑀤𑀺𑀝𑁆𑀞𑀺𑀁 𑀦 𑀧𑀘𑁆𑀘𑁂𑀢𑀺, 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁮𑁦𑁮-𑁧𑁦. 𑀇𑀤𑀸𑀦𑀺 𑀬𑁄 𑀲𑁄 𑀇𑀫𑀸𑀬 𑀕𑀸𑀣𑀸𑀬 𑀯𑀼𑀢𑁆𑀢𑁄 𑀔𑀻𑀡𑀸𑀲𑀯𑁄, 𑀢𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 ‘‘𑀬𑀲𑁆𑀲𑀽𑀪𑀬𑀦𑁆𑀢𑁂’’𑀢𑀺𑀆𑀤𑀺𑀓𑀸 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀆𑀳. 𑀢𑀢𑁆𑀣 𑀉𑀪𑀬𑀦𑁆𑀢𑁂𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀨𑀲𑁆𑀲𑀸𑀤𑀺𑀪𑁂𑀤𑁂. 𑀧𑀡𑀺𑀥𑀻𑀢𑀺 𑀢𑀡𑁆𑀳𑀸. 𑀪𑀯𑀸𑀪𑀯𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀪𑀯𑀸𑀬. 𑀇𑀥 𑀯𑀸 𑀳𑀼𑀭𑀁 𑀯𑀸𑀢𑀺 𑀲𑀓𑀢𑁆𑀢𑀪𑀸𑀯𑀸𑀤𑀺𑀪𑁂𑀤𑁂 𑀇𑀥 𑀯𑀸 𑀧𑀭𑀢𑁆𑀢𑀪𑀸𑀯𑀸𑀤𑀺𑀪𑁂𑀤𑁂 𑀧𑀭𑀢𑁆𑀣 𑀯𑀸. 𑀤𑀺𑀝𑁆𑀞𑁂 𑀯𑀸𑀢𑀺 𑀤𑀺𑀝𑁆𑀞𑀲𑀼𑀤𑁆𑀥𑀺𑀬𑀸 𑀯𑀸. 𑀏𑀲 𑀦𑀬𑁄 𑀲𑀼𑀢𑀸𑀤𑀻𑀲𑀼. 𑀲𑀜𑁆𑀜𑀸𑀢𑀺 𑀲𑀜𑁆𑀜𑀸𑀲𑀫𑀼𑀝𑁆𑀞𑀸𑀧𑀺𑀓𑀸 𑀤𑀺𑀝𑁆𑀞𑀺. 𑀥𑀫𑁆𑀫𑀸𑀧𑀺 𑀢𑁂𑀲𑀁 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀥𑀫𑁆𑀫𑀸𑀧𑀺 𑀢𑁂𑀲𑀁 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀏𑀯𑀁 𑀦 𑀧𑀝𑀺𑀘𑁆𑀙𑀺𑀢𑀸. 𑀧𑀸𑀭𑀗𑁆𑀕𑀢𑁄 𑀦 𑀧𑀘𑁆𑀘𑁂𑀢𑀺 𑀢𑀸𑀤𑀻𑀢𑀺 𑀦𑀺𑀩𑁆𑀩𑀸𑀦𑀧𑀸𑀭𑀁 𑀕𑀢𑁄 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑁂 𑀓𑀺𑀮𑁂𑀲𑁂 𑀧𑀼𑀦 𑀦𑀸𑀕𑀘𑁆𑀙𑀢𑀺, 𑀧𑀜𑁆𑀘𑀳𑀺 𑀘 𑀆𑀓𑀸𑀭𑁂𑀳𑀺 𑀢𑀸𑀤𑀻 𑀳𑁄𑀢𑀻𑀢𑀺. 𑀲𑁂𑀲𑀁 𑀧𑀸𑀓𑀝𑀫𑁂𑀯𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀧𑀭𑀫𑀝𑁆𑀞𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀚𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧𑁧. 𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀦𑁆𑀢𑀺 𑀚𑀭𑀸𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀬𑀸𑀦𑀺 𑀢𑀸𑀦𑀺 𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑀸𑀭𑁄𑀕𑁆𑀬𑀲𑀫𑁆𑀧𑀸𑀤𑀦𑀁 𑀅𑀦𑀼𑀧𑁆𑀧𑀦𑁆𑀦𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁 𑀯𑁂𑀦𑁂𑀬𑁆𑀬𑀤𑀫𑀦𑀁 𑀢𑀣𑀸𑀭𑀽𑀧𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀚𑀸𑀢𑀓𑀸𑀤𑀺𑀓𑀣𑀦𑀦𑁆𑀢𑀺𑀆𑀤𑀻𑀦𑀺 𑀚𑀦𑀧𑀤𑀘𑀸𑀭𑀺𑀓𑀸𑀦𑀺𑀫𑀺𑀢𑁆𑀢𑀸𑀦𑀺, 𑀢𑀸𑀦𑀺 𑀲𑀫𑀯𑁂𑀓𑁆𑀔𑀺𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀲𑀸𑀬𑀁 𑀲𑀸𑀓𑁂𑀢𑀁 𑀅𑀦𑀼𑀧𑁆𑀧𑀢𑁆𑀢𑁄 𑀅𑀜𑁆𑀚𑀦𑀯𑀦𑀁 𑀧𑀸𑀯𑀺𑀲𑀺. 𑀲𑀸𑀓𑁂𑀢𑀯𑀸𑀲𑀺𑀦𑁄 𑀲𑀼𑀢𑁆𑀯𑀸 ‘‘𑀅𑀓𑀸𑀮𑁄 𑀇𑀤𑀸𑀦𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’’𑀢𑀺 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀽𑀚𑀦𑀯𑀦𑁆𑀤𑀦𑀲𑀫𑁆𑀫𑁄𑀤𑀦𑀸𑀤𑀻𑀦𑀺 𑀓𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼 𑀬𑀸𑀯 𑀪𑀕𑀯𑀢𑁄 𑀕𑀸𑀫𑀧𑁆𑀧𑀯𑁂𑀲𑀦𑀯𑁂𑀮𑀸, 𑀅𑀣 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑀁 𑀅𑀜𑁆𑀜𑀢𑀭𑁄 𑀲𑀸𑀓𑁂𑀢𑀓𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀦𑀕𑀭𑀸 𑀦𑀺𑀓𑁆𑀔𑀦𑁆𑀢𑁄 𑀦𑀕𑀭𑀤𑁆𑀯𑀸𑀭𑁂 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀘𑀺𑀭𑀤𑀺𑀝𑁆𑀞𑁄𑀲𑀺, 𑀧𑀼𑀢𑁆𑀢, 𑀫𑀬𑀸’’𑀢𑀺 𑀧𑀭𑀺𑀤𑁂𑀯𑀬𑀫𑀸𑀦𑁄 𑀅𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀪𑀕𑀯𑀸 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀲𑀺 𑁋 ‘‘𑀅𑀬𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑁄 𑀬𑀁 𑀇𑀘𑁆𑀙𑀢𑀺, 𑀢𑀁 𑀓𑀭𑁄𑀢𑀼, 𑀦 𑀯𑀸𑀭𑁂𑀢𑀩𑁆𑀩𑁄’’𑀢𑀺.

𑀩𑁆𑀭𑀸𑀳𑁆𑀫𑀡𑁄𑀧𑀺 𑀯𑀘𑁆𑀙𑀕𑀺𑀤𑁆𑀥𑀺𑀦𑀻𑀯 𑀕𑀸𑀯𑀻 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀓𑀸𑀬𑀁 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀤𑀓𑁆𑀔𑀺𑀡𑀢𑁄 𑀘 𑀯𑀸𑀫𑀢𑁄 𑀘𑀸𑀢𑀺 𑀲𑀫𑀦𑁆𑀢𑀸 𑀆𑀮𑀺𑀗𑁆𑀕𑀺 ‘‘𑀘𑀺𑀭𑀤𑀺𑀝𑁆𑀞𑁄𑀲𑀺, 𑀧𑀼𑀢𑁆𑀢, 𑀘𑀺𑀭𑀁 𑀯𑀺𑀦𑀸 𑀅𑀳𑁄𑀲𑀻’’𑀢𑀺 𑀪𑀡𑀦𑁆𑀢𑁄. 𑀬𑀤𑀺 𑀧𑀦 𑀲𑁄 𑀢𑀣𑀸 𑀓𑀸𑀢𑀼𑀁 𑀦 𑀮𑀪𑁂𑀬𑁆𑀬, 𑀳𑀤𑀬𑀁 𑀨𑀸𑀮𑁂𑀢𑁆𑀯𑀸 𑀫𑀭𑁂𑀬𑁆𑀬. 𑀲𑁄 𑀪𑀕𑀯𑀦𑁆𑀢𑀁 𑀅𑀯𑁄𑀘 𑁋 ‘‘𑀪𑀕𑀯𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀆𑀕𑀢𑀪𑀺𑀓𑁆𑀔𑀽𑀦𑀁 𑀅𑀳𑀫𑁂𑀯 𑀪𑀺𑀓𑁆𑀔𑀁 𑀤𑀸𑀢𑀼𑀁 𑀲𑀫𑀢𑁆𑀣𑁄, 𑀫𑀫𑁂𑀯 𑀅𑀦𑀼𑀕𑁆𑀕𑀳𑀁 𑀓𑀭𑁄𑀣𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑁂𑀲𑁂𑀲𑀺 𑁋 ‘‘𑀧𑀼𑀢𑁆𑀢𑁄 𑀫𑁂 𑀆𑀕𑀢𑁄, 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑀩𑁆𑀩’’𑀦𑁆𑀢𑀺. 𑀲𑀸 𑀢𑀣𑀸 𑀓𑀢𑁆𑀯𑀸 𑀆𑀕𑀫𑀦𑀁 𑀧𑀲𑁆𑀲𑀦𑁆𑀢𑀻 𑀞𑀺𑀢𑀸 𑀪𑀕𑀯𑀦𑁆𑀢𑀁 𑀅𑀦𑁆𑀢𑀭𑀯𑀻𑀣𑀺𑀬𑀁𑀬𑁂𑀯 𑀤𑀺𑀲𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀘𑀺𑀭𑀤𑀺𑀝𑁆𑀞𑁄𑀲𑀺, 𑀧𑀼𑀢𑁆𑀢, 𑀫𑀬𑀸’’𑀢𑀺 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀖𑀭𑀁 𑀅𑀢𑀺𑀦𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀪𑁄𑀚𑁂𑀲𑀺. 𑀪𑀼𑀢𑁆𑀢𑀸𑀯𑀺𑀦𑁄 𑀩𑁆𑀭𑀸𑀳𑁆𑀫𑀡𑁄 𑀧𑀢𑁆𑀢𑀁 𑀅𑀧𑀦𑀸𑀫𑁂𑀲𑀺. 𑀪𑀕𑀯𑀸 𑀢𑁂𑀲𑀁 𑀲𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀉𑀪𑁄𑀧𑀺 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁. 𑀅𑀣 𑀪𑀕𑀯𑀦𑁆𑀢𑀁 𑀬𑀸𑀘𑀺𑀁𑀲𑀼 𑁋 ‘‘𑀬𑀸𑀯, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀁 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺, 𑀅𑀫𑁆𑀳𑀸𑀓𑀁𑀬𑁂𑀯 𑀖𑀭𑁂 𑀪𑀺𑀓𑁆𑀔𑀸 𑀕𑀳𑁂𑀢𑀩𑁆𑀩𑀸’’𑀢𑀺. 𑀪𑀕𑀯𑀸 ‘‘𑀦 𑀩𑀼𑀤𑁆𑀥𑀸 𑀏𑀯𑀁 𑀏𑀓𑀁 𑀦𑀺𑀩𑀤𑁆𑀥𑀝𑁆𑀞𑀸𑀦𑀁𑀬𑁂𑀯 𑀕𑀘𑁆𑀙𑀦𑁆𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀢𑁂 𑀆𑀳𑀁𑀲𑀼 𑁋 ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸𑀧𑀺 𑀢𑀼𑀫𑁆𑀳𑁂 𑀇𑀥𑁂𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀘𑁆𑀙𑀣𑀸’’𑀢𑀺. 𑀪𑀕𑀯𑀸 𑀢𑁂𑀲𑀁 𑀅𑀦𑀼𑀕𑁆𑀕𑀳𑀢𑁆𑀣𑀸𑀬 𑀢𑀣𑀸 𑀅𑀓𑀸𑀲𑀺. 𑀫𑀦𑀼𑀲𑁆𑀲𑀸 𑀩𑁆𑀭𑀸𑀳𑁆𑀫𑀡𑀜𑁆𑀘 𑀩𑁆𑀭𑀸𑀳𑁆𑀫𑀡𑀺𑀜𑁆𑀘 ‘‘𑀩𑀼𑀤𑁆𑀥𑀧𑀺𑀢𑀸 𑀩𑀼𑀤𑁆𑀥𑀫𑀸𑀢𑀸’’ 𑀢𑁆𑀯𑁂𑀯 𑀯𑁄𑀳𑀭𑀺𑀁𑀲𑀼. 𑀢𑀫𑁆𑀧𑀺 𑀓𑀼𑀮𑀁 ‘‘𑀩𑀼𑀤𑁆𑀥𑀓𑀼𑀮’’𑀦𑁆𑀢𑀺 𑀦𑀸𑀫𑀁 𑀮𑀪𑀺.

𑀆𑀦𑀦𑁆𑀤𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺 𑁋 ‘‘𑀅𑀳𑀁 𑀪𑀕𑀯𑀢𑁄 𑀫𑀸𑀢𑀸𑀧𑀺𑀢𑀭𑁄 𑀚𑀸𑀦𑀸𑀫𑀺, 𑀇𑀫𑁂 𑀧𑀦 𑀓𑀲𑁆𑀫𑀸 𑀯𑀤𑀦𑁆𑀢𑀺 ‘𑀅𑀳𑀁 𑀩𑀼𑀤𑁆𑀥𑀫𑀸𑀢𑀸 𑀅𑀳𑀁 𑀩𑀼𑀤𑁆𑀥𑀧𑀺𑀢𑀸’’’𑀢𑀺. 𑀪𑀕𑀯𑀸 𑀆𑀳 𑁋 ‘‘𑀦𑀺𑀭𑀦𑁆𑀢𑀭𑀁 𑀫𑁂, 𑀆𑀦𑀦𑁆𑀤, 𑀩𑁆𑀭𑀸𑀳𑁆𑀫𑀡𑀻 𑀘 𑀩𑁆𑀭𑀸𑀳𑁆𑀫𑀡𑁄 𑀘 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀸𑀢𑀸𑀧𑀺𑀢𑀭𑁄 𑀅𑀳𑁂𑀲𑀼𑀁, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀸𑀢𑀸𑀧𑀺𑀢𑀽𑀦𑀁 𑀚𑁂𑀝𑁆𑀞𑀓𑀸, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀓𑀦𑀺𑀝𑁆𑀞𑀓𑀸. 𑀢𑁂 𑀧𑀼𑀩𑁆𑀩𑀲𑀺𑀦𑁂𑀳𑁂𑀦𑁂𑀯 𑀓𑀣𑁂𑀦𑁆𑀢𑀻’’𑀢𑀺 𑀇𑀫𑀜𑁆𑀘 𑀕𑀸𑀣𑀫𑀪𑀸𑀲𑀺 𑁋

‘‘𑀧𑀼𑀩𑁆𑀩𑁂𑀯 𑀲𑀦𑁆𑀦𑀺𑀯𑀸𑀲𑁂𑀦, 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑀺𑀢𑁂𑀦 𑀯𑀸;

𑀏𑀯𑀁 𑀢𑀁 𑀚𑀸𑀬𑀢𑁂 𑀧𑁂𑀫𑀁, 𑀉𑀧𑁆𑀧𑀮𑀁𑀯 𑀬𑀣𑁄𑀤𑀓𑁂’’𑀢𑀺. (𑀚𑀸. 𑁧.𑁨.𑁧𑁭𑁪);

𑀢𑀢𑁄 𑀪𑀕𑀯𑀸 𑀲𑀸𑀓𑁂𑀢𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀧𑀼𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀲𑀸𑀯𑀢𑁆𑀣𑀺𑀫𑁂𑀯 𑀅𑀕𑀫𑀸𑀲𑀺. 𑀲𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀘 𑀩𑁆𑀭𑀸𑀳𑁆𑀫𑀡𑀻 𑀘 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀢𑀺𑀭𑀽𑀧𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑁂𑀲𑀫𑀕𑁆𑀕𑁂 𑀧𑀸𑀧𑀼𑀡𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼. 𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑀸 𑀲𑀦𑁆𑀦𑀺𑀧𑀢𑀺𑀁𑀲𑀼 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀓𑁂 𑀲𑀓𑁆𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄 𑀉𑀧𑀸𑀲𑀓𑀸𑀧𑀺 𑀲𑀦𑁆𑀦𑀺𑀧𑀢𑀺𑀁𑀲𑀼 𑀉𑀧𑀸𑀲𑀺𑀓𑀸𑀬𑁄 𑀘 ‘‘𑀅𑀫𑁆𑀳𑀸𑀓𑀁 𑀲𑀳𑀥𑀫𑁆𑀫𑀺𑀓𑁂 𑀲𑀓𑁆𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀓𑀫𑁆𑀩𑀮𑀓𑀽𑀝𑀸𑀕𑀸𑀭𑀁 𑀆𑀭𑁄𑀧𑁂𑀢𑁆𑀯𑀸 𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑀸 𑀦𑀕𑀭𑀸 𑀦𑀺𑀓𑁆𑀔𑀸𑀫𑁂𑀲𑀼𑀁.

𑀪𑀕𑀯𑀸𑀧𑀺 𑀢𑀁 𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑁂𑀲𑀁 𑀧𑀭𑀺𑀦𑀺𑀩𑁆𑀩𑀸𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀢𑀢𑁆𑀣 𑀫𑀬𑀺 𑀕𑀢𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀩𑀳𑀼𑀚𑀦𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀢𑁄 𑀆𑀕𑀦𑁆𑀢𑁆𑀯𑀸 𑀆𑀴𑀸𑀳𑀦𑀫𑁂𑀯 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 ‘‘𑀫𑀸𑀢𑀸𑀧𑀺𑀢𑀽𑀦𑀁 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀢𑀼𑀓𑀸𑀫𑁄 𑀪𑀕𑀯𑀸 𑀆𑀕𑀢𑁄’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀦𑀸𑀕𑀭𑀸𑀧𑀺 𑀓𑀽𑀝𑀸𑀕𑀸𑀭𑀁 𑀧𑀽𑀚𑁂𑀦𑁆𑀢𑀸 𑀆𑀴𑀸𑀳𑀦𑀁 𑀆𑀦𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀕𑀳𑀝𑁆𑀞𑀅𑀭𑀺𑀬𑀲𑀸𑀯𑀓𑀸 𑀓𑀣𑀁 𑀧𑀽𑀚𑁂𑀢𑀩𑁆𑀩𑀸’’𑀢𑀺. 𑀪𑀕𑀯𑀸 ‘‘𑀬𑀣𑀸 𑀅𑀲𑁂𑀓𑁆𑀔𑀸 𑀧𑀽𑀚𑀺𑀬𑀦𑁆𑀢𑀺, 𑀢𑀣𑀸 𑀧𑀽𑀚𑁂𑀢𑀩𑁆𑀩𑀸 𑀇𑀫𑁂’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀢𑁂𑀲𑀁 𑀅𑀲𑁂𑀓𑁆𑀔𑀫𑀼𑀦𑀺𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀳𑀺𑀁𑀲𑀓𑀸 𑀬𑁂 𑀫𑀼𑀦𑀬𑁄, 𑀦𑀺𑀘𑁆𑀘𑀁 𑀓𑀸𑀬𑁂𑀦 𑀲𑀁𑀯𑀼𑀢𑀸;

𑀢𑁂 𑀬𑀦𑁆𑀢𑀺 𑀅𑀘𑁆𑀘𑀼𑀢𑀁 𑀞𑀸𑀦𑀁, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀭𑁂’’𑀢𑀺. (𑀥. 𑀧. 𑁨𑁨𑁫);

𑀢𑀜𑁆𑀘 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀁 𑀇𑀤𑀦𑁆𑀢𑀺 ‘‘𑀇𑀤𑀁 𑀯𑀢 𑀫𑀦𑀼𑀲𑁆𑀲𑀸𑀦𑀁 𑀚𑀻𑀯𑀺𑀢𑀁 𑀅𑀧𑁆𑀧𑀁 𑀧𑀭𑀺𑀢𑁆𑀢𑀁 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬 𑀲𑀭𑀲𑀧𑀭𑀺𑀢𑁆𑀢𑀢𑀸𑀬𑀸’’𑀢𑀺 𑀲𑀮𑁆𑀮𑀲𑀼𑀢𑁆𑀢𑁂𑀧𑀺 𑀯𑀼𑀢𑁆𑀢𑀦𑀬𑀫𑁂𑀢𑀁. 𑀑𑀭𑀁 𑀯𑀲𑁆𑀲𑀲𑀢𑀸𑀧𑀺 𑀫𑀺𑀬𑁆𑀬𑀢𑀻𑀢𑀺 𑀯𑀲𑁆𑀲𑀲𑀢𑀸 𑀑𑀭𑀁 𑀓𑀮𑀮𑀸𑀤𑀺𑀓𑀸𑀮𑁂𑀧𑀺 𑀫𑀺𑀬𑁆𑀬𑀢𑀺. 𑀅𑀢𑀺𑀘𑁆𑀘𑀸𑀢𑀺 𑀯𑀲𑁆𑀲𑀲𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀚𑀭𑀲𑀸𑀧𑀺 𑀫𑀺𑀬𑁆𑀬𑀢𑀻𑀢𑀺 𑀚𑀭𑀸𑀬𑀧𑀺 𑀫𑀺𑀬𑁆𑀬𑀢𑀺.

𑁮𑁧𑁨-𑁬. 𑀫𑀫𑀸𑀬𑀺𑀢𑁂𑀢𑀺 𑀫𑀫𑀸𑀬𑀺𑀢𑀯𑀢𑁆𑀣𑀼𑀓𑀸𑀭𑀡𑀸. 𑀯𑀺𑀦𑀸𑀪𑀸𑀯𑀲𑀦𑁆𑀢𑀫𑁂𑀯𑀺𑀤𑀦𑁆𑀢𑀺 𑀲𑀦𑁆𑀢𑀯𑀺𑀦𑀸𑀪𑀸𑀯𑀁 𑀯𑀺𑀚𑁆𑀚𑀫𑀸𑀦𑀯𑀺𑀦𑀸𑀪𑀸𑀯𑀫𑁂𑀯 𑀇𑀤𑀁, 𑀦 𑀲𑀓𑁆𑀓𑀸 𑀅𑀯𑀺𑀦𑀸𑀪𑀸𑀯𑁂𑀦 𑀪𑀯𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀸𑀫𑀓𑁄𑀢𑀺 𑀫𑀫 𑀉𑀧𑀸𑀲𑀓𑁄 𑀪𑀺𑀓𑁆𑀔𑀼 𑀯𑀸𑀢𑀺 𑀲𑀗𑁆𑀔𑀁 𑀕𑀢𑁄, 𑀩𑀼𑀤𑁆𑀥𑀸𑀤𑀻𑀦𑀺 𑀯𑀸 𑀯𑀢𑁆𑀣𑀽𑀦𑀺 𑀫𑀫𑀸𑀬𑀫𑀸𑀦𑁄. 𑀲𑀗𑁆𑀕𑀢𑀦𑁆𑀢𑀺 𑀲𑀫𑀸𑀕𑀢𑀁 𑀤𑀺𑀝𑁆𑀞𑀧𑀼𑀩𑁆𑀩𑀁 𑀯𑀸. 𑀧𑀺𑀬𑀸𑀬𑀺𑀢𑀦𑁆𑀢𑀺 𑀧𑀺𑀬𑀁 𑀓𑀢𑀁. 𑀦𑀸𑀫𑀁𑀬𑁂𑀯𑀸𑀯𑀲𑀺𑀲𑁆𑀲𑀢𑀺 𑀅𑀓𑁆𑀔𑁂𑀬𑁆𑀬𑀦𑁆𑀢𑀺 𑀲𑀩𑁆𑀩𑀁 𑀭𑀽𑀧𑀸𑀤𑀺𑀥𑀫𑁆𑀫𑀚𑀸𑀢𑀁 𑀧𑀳𑀻𑀬𑀢𑀺, 𑀦𑀸𑀫𑀫𑀢𑁆𑀢𑀫𑁂𑀯 𑀢𑀼 𑀅𑀯𑀲𑀺𑀲𑁆𑀲𑀢𑀺 ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑁄, 𑀥𑀫𑁆𑀫𑀭𑀓𑁆𑀔𑀺𑀢𑁄’’𑀢𑀺 𑀏𑀯𑀁 𑀲𑀗𑁆𑀔𑀸𑀢𑀼𑀁 𑀓𑀣𑁂𑀢𑀼𑀁. 𑀫𑀼𑀦𑀬𑁄𑀢𑀺 𑀔𑀻𑀡𑀸𑀲𑀯𑀫𑀼𑀦𑀬𑁄. 𑀔𑁂𑀫𑀤𑀲𑁆𑀲𑀺𑀦𑁄𑀢𑀺 𑀦𑀺𑀩𑁆𑀩𑀸𑀦𑀤𑀲𑁆𑀲𑀺𑀦𑁄.

𑁮𑁧𑁭. 𑀲𑀢𑁆𑀢𑀫𑀕𑀸𑀣𑀸 𑀏𑀯𑀁 𑀫𑀭𑀡𑀩𑁆𑀪𑀸𑀳𑀢𑁂 𑀮𑁄𑀓𑁂 𑀅𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀢𑀢𑁆𑀣 𑀧𑀢𑀺𑀮𑀻𑀦𑀘𑀭𑀲𑁆𑀲𑀸𑀢𑀺 𑀢𑀢𑁄 𑀢𑀢𑁄 𑀧𑀢𑀺𑀮𑀻𑀦𑀁 𑀘𑀺𑀢𑁆𑀢𑀁 𑀓𑀢𑁆𑀯𑀸 𑀘𑀭𑀦𑁆𑀢𑀲𑁆𑀲. 𑀪𑀺𑀓𑁆𑀔𑀼𑀦𑁄𑀢𑀺 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑁂𑀓𑁆𑀔𑀲𑁆𑀲 𑀯𑀸. 𑀲𑀸𑀫𑀕𑁆𑀕𑀺𑀬𑀫𑀸𑀳𑀼 𑀢𑀲𑁆𑀲𑀢𑀁,𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂𑀢𑀺 𑀢𑀲𑁆𑀲𑁂𑀢𑀁 𑀧𑀢𑀺𑀭𑀽𑀧𑀫𑀸𑀳𑀼, 𑀬𑁄 𑀏𑀯𑀁𑀧𑀝𑀺𑀧𑀦𑁆𑀦𑁄 𑀦𑀺𑀭𑀬𑀸𑀤𑀺𑀪𑁂𑀤𑁂 𑀪𑀯𑀦𑁂 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀬𑁆𑀬. 𑀏𑀯𑀜𑁆𑀳𑀺 𑀲𑁄 𑀇𑀫𑀫𑁆𑀳𑀸 𑀫𑀭𑀡𑀸 𑀫𑀼𑀘𑁆𑀘𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁧𑁮-𑁨𑁦. 𑀇𑀤𑀸𑀦𑀺 𑀬𑁄 ‘‘𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂’’𑀢𑀺 𑀏𑀯𑀁 𑀔𑀻𑀡𑀸𑀲𑀯𑁄 𑀯𑀺𑀪𑀸𑀯𑀺𑀢𑁄, 𑀢𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 𑀇𑀢𑁄 𑀧𑀭𑀸 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀆𑀳. 𑀢𑀢𑁆𑀣 𑀲𑀩𑁆𑀩𑀢𑁆𑀣𑀸𑀢𑀺 𑀤𑁆𑀯𑀸𑀤𑀲𑀲𑀼 𑀆𑀬𑀢𑀦𑁂𑀲𑀼. 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀁 𑀫𑀼𑀢𑁂𑀲𑀼 𑀯𑀸𑀢𑀺 𑀏𑀢𑁆𑀣 𑀧𑀦 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀁, 𑀏𑀢𑁆𑀣 𑀯𑀸 𑀫𑀼𑀢𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀏𑀯𑀁 𑀫𑀼𑀦𑀺 𑀦 𑀉𑀧𑀮𑀺𑀫𑁆𑀧𑀢𑀻𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀥𑁄𑀦𑁄 𑀦 𑀳𑀺 𑀢𑁂𑀦 𑀫𑀜𑁆𑀜𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀁 𑀫𑀼𑀢𑁂𑀲𑀼 𑀯𑀸𑀢𑀺 𑀅𑀢𑁆𑀭𑀸𑀧𑀺 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑁆𑀢𑀁, 𑀢𑁂𑀦 𑀯𑀢𑁆𑀣𑀼𑀦𑀸 𑀦 𑀫𑀜𑁆𑀜𑀢𑀺, 𑀫𑀼𑀢𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀦 𑀫𑀜𑁆𑀜𑀢𑀻𑀢𑀺 𑀏𑀯𑀫𑁂𑀯 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀳𑀺 𑀲𑁄 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀻𑀢𑀺. 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀯𑀺𑀬 𑀦 𑀭𑀚𑁆𑀚𑀢𑀺, 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁂𑀓𑁆𑀔𑀸 𑀯𑀺𑀬 𑀦 𑀯𑀺𑀭𑀚𑁆𑀚𑀢𑀺, 𑀭𑀸𑀕𑀲𑁆𑀲 𑀧𑀦 𑀔𑀻𑀡𑀢𑁆𑀢𑀸 ‘‘𑀯𑀺𑀭𑀸𑀕𑁄’’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀚𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨𑁧. 𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀸 𑀦𑀸𑀫 𑀤𑁆𑀯𑁂 𑀲𑀳𑀸𑀬𑀸 𑀲𑀸𑀯𑀢𑁆𑀣𑀺𑀁 𑀅𑀕𑀫𑀁𑀲𑀼. 𑀢𑁂 𑀲𑀸𑀬𑀦𑁆𑀳𑀲𑀫𑀬𑀁 𑀫𑀳𑀸𑀚𑀦𑀁 𑀚𑁂𑀢𑀯𑀦𑀸𑀪𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀼𑀳𑀺𑀁 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀢𑀢𑁄 𑀢𑁂𑀳𑀺 ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀩𑀳𑀼𑀚𑀦𑀳𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀁 𑀲𑁄𑀢𑀼𑀁 𑀚𑁂𑀢𑀯𑀦𑀁 𑀕𑀘𑁆𑀙𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀫𑀬𑀫𑁆𑀧𑀺 𑀲𑁄𑀲𑁆𑀲𑀸𑀫𑀸’’𑀢𑀺 𑀅𑀕𑀫𑀁𑀲𑀼. 𑀢𑁂 𑀅𑀯𑀜𑁆𑀛𑀥𑀫𑁆𑀫𑀤𑁂𑀲𑀓𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀭𑀺𑀲𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑀸𑀯 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀦 𑀲𑀓𑁆𑀓𑀸 𑀅𑀕𑀸𑀭𑀫𑀚𑁆𑀛𑁂 𑀞𑀺𑀢𑁂𑀦𑀸𑀬𑀁 𑀥𑀫𑁆𑀫𑁄 𑀧𑀭𑀺𑀧𑀽𑀭𑁂𑀢𑀼’’𑀦𑁆𑀢𑀺. 𑀅𑀣 𑀧𑀓𑁆𑀓𑀦𑁆𑀢𑁂 𑀫𑀳𑀸𑀚𑀦𑁂 𑀪𑀕𑀯𑀦𑁆𑀢𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀪𑀕𑀯𑀸 ‘‘𑀇𑀫𑁂 𑀧𑀩𑁆𑀩𑀸𑀚𑁂𑀳𑀻’’𑀢𑀺 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀲𑀺. 𑀲𑁄 𑀢𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸 𑀅𑀭𑀜𑁆𑀜𑀯𑀸𑀲𑀁 𑀕𑀦𑁆𑀢𑀼𑀫𑀸𑀭𑀤𑁆𑀥𑁄. 𑀫𑁂𑀢𑁆𑀢𑁂𑀬𑁆𑀬𑁄 𑀢𑀺𑀲𑁆𑀲𑀁 𑀆𑀳 𑁋 ‘‘𑀆𑀯𑀼𑀲𑁄, 𑀉𑀧𑀚𑁆𑀛𑀸𑀬𑁄 𑀅𑀭𑀜𑁆𑀜𑀁 𑀕𑀘𑁆𑀙𑀢𑀺, 𑀫𑀬𑀫𑁆𑀧𑀺 𑀕𑀘𑁆𑀙𑀸𑀫𑀸’’𑀢𑀺. 𑀢𑀺𑀲𑁆𑀲𑁄 ‘‘𑀅𑀮𑀁 𑀆𑀯𑀼𑀲𑁄, 𑀪𑀕𑀯𑀢𑁄 𑀤𑀲𑁆𑀲𑀦𑀁 𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀅𑀳𑀁 𑀧𑀺𑀳𑁂𑀫𑀺, 𑀕𑀘𑁆𑀙 𑀢𑁆𑀯’’𑀦𑁆𑀢𑀺 𑀯𑀢𑁆𑀯𑀸 𑀦 𑀅𑀕𑀫𑀸𑀲𑀺. 𑀫𑁂𑀢𑁆𑀢𑁂𑀬𑁆𑀬𑁄 𑀉𑀧𑀚𑁆𑀛𑀸𑀬𑁂𑀦 𑀲𑀳 𑀕𑀦𑁆𑀢𑁆𑀯𑀸 𑀅𑀭𑀜𑁆𑀜𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺 𑀲𑀤𑁆𑀥𑀺𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺. 𑀢𑀺𑀲𑁆𑀲𑀲𑁆𑀲𑀸𑀧𑀺 𑀚𑁂𑀝𑁆𑀞𑀪𑀸𑀢𑀸 𑀩𑁆𑀬𑀸𑀥𑀺𑀦𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀢𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀕𑀸𑀫𑀁 𑀅𑀕𑀫𑀸𑀲𑀺, 𑀢𑀢𑁆𑀭 𑀦𑀁 𑀜𑀸𑀢𑀓𑀸 𑀧𑀮𑁄𑀪𑁂𑀢𑁆𑀯𑀸 𑀉𑀧𑁆𑀧𑀩𑁆𑀩𑀸𑀚𑁂𑀲𑀼𑀁. 𑀫𑁂𑀢𑁆𑀢𑁂𑀬𑁆𑀬𑁄𑀧𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀲𑀤𑁆𑀥𑀺𑀁 𑀲𑀸𑀯𑀢𑁆𑀣𑀺𑀁 𑀆𑀕𑀢𑁄. 𑀅𑀣 𑀪𑀕𑀯𑀸 𑀯𑀼𑀢𑁆𑀣𑀯𑀲𑁆𑀲𑁄 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀢𑀁 𑀕𑀸𑀫𑀁 𑀧𑀸𑀧𑀼𑀡𑀺. 𑀢𑀢𑁆𑀣 𑀫𑁂𑀢𑁆𑀢𑁂𑀬𑁆𑀬𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁, 𑀪𑀦𑁆𑀢𑁂, 𑀕𑀸𑀫𑁂 𑀫𑀫 𑀕𑀺𑀳𑀺𑀲𑀳𑀸𑀬𑁄 𑀅𑀢𑁆𑀣𑀺, 𑀫𑀼𑀳𑀼𑀢𑁆𑀢𑀁 𑀢𑀸𑀯 𑀆𑀕𑀫𑁂𑀣 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺 𑀯𑀢𑁆𑀯𑀸 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀦𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀢𑀲𑁆𑀲𑀢𑁆𑀣𑀸𑀬 𑀆𑀤𑀺𑀕𑀸𑀣𑀸𑀬 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑀲𑁆𑀲 𑀪𑀕𑀯𑀸 𑀩𑁆𑀬𑀸𑀓𑀭𑁄𑀦𑁆𑀢𑁄 𑀅𑀯𑀲𑁂𑀲𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀅𑀬𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺.

𑀢𑀢𑁆𑀣 𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀬𑀼𑀢𑁆𑀢𑀲𑁆𑀲. 𑀇𑀢𑀻𑀢𑀺 𑀏𑀯𑀫𑀸𑀳. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁, 𑀢𑀺𑀲𑁆𑀲𑁄𑀢𑀺 𑀦𑀸𑀫𑀁 𑀢𑀲𑁆𑀲 𑀣𑁂𑀭𑀲𑁆𑀲. 𑀲𑁄 𑀳𑀺 𑀢𑀺𑀲𑁆𑀲𑁄𑀢𑀺 𑀦𑀸𑀫𑁂𑀦. 𑀫𑁂𑀢𑁆𑀢𑁂𑀬𑁆𑀬𑁄𑀢𑀺 𑀕𑁄𑀢𑁆𑀢𑀁, 𑀕𑁄𑀢𑁆𑀢𑀯𑀲𑁂𑀦𑁂𑀯 𑀘𑁂𑀲 𑀧𑀸𑀓𑀝𑁄 𑀅𑀳𑁄𑀲𑀺. 𑀢𑀲𑁆𑀫𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀁 ‘‘𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀸 𑀦𑀸𑀫 𑀤𑁆𑀯𑁂 𑀲𑀳𑀸𑀬𑀸’’𑀢𑀺. 𑀯𑀺𑀖𑀸𑀢𑀦𑁆𑀢𑀺 𑀉𑀧𑀖𑀸𑀢𑀁. 𑀩𑁆𑀭𑀽𑀳𑀻𑀢𑀺 𑀆𑀘𑀺𑀓𑁆𑀔. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁, 𑀦𑀺𑀤𑀼𑀓𑁆𑀔𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀢𑁆𑀯𑀸𑀦 𑀢𑀯 𑀲𑀸𑀲𑀦𑀦𑁆𑀢𑀺 𑀢𑀯 𑀯𑀘𑀦𑀁 𑀲𑀼𑀢𑁆𑀯𑀸. 𑀯𑀺𑀯𑁂𑀓𑁂 𑀲𑀺𑀓𑁆𑀔𑀺𑀲𑁆𑀲𑀸𑀫𑀲𑁂𑀢𑀺 𑀲𑀳𑀸𑀬𑀁 𑀆𑀭𑀩𑁆𑀪 𑀥𑀫𑁆𑀫𑀤𑁂𑀲𑀦𑀁 𑀬𑀸𑀘𑀦𑁆𑀢𑁄 𑀪𑀡𑀢𑀺. 𑀲𑁄 𑀧𑀦 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑁄𑀬𑁂𑀯.

𑁮𑁨𑁨. 𑀫𑀼𑀲𑁆𑀲𑀢𑁂 𑀯𑀸𑀧𑀺 𑀲𑀸𑀲𑀦𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀢𑁄 𑀤𑀼𑀯𑀺𑀥𑀫𑁆𑀧𑀺 𑀲𑀸𑀲𑀦𑀁 𑀦𑀲𑁆𑀲𑀢𑀺. 𑀯𑀸𑀧𑀻𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑀁. 𑀏𑀢𑀁 𑀢𑀲𑁆𑀫𑀺𑀁 𑀅𑀦𑀸𑀭𑀺𑀬𑀦𑁆𑀢𑀺 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀏𑀢𑀁 𑀅𑀦𑀭𑀺𑀬𑀁, 𑀬𑀤𑀺𑀤𑀁 𑀫𑀺𑀘𑁆𑀙𑀸𑀧𑀝𑀺𑀧𑀤𑀸.

𑁮𑁨𑁩. 𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦𑀸𑀢𑀺 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀯𑀸 𑀕𑀡𑀯𑁄𑀲𑁆𑀲𑀕𑁆𑀕𑀝𑁆𑀞𑁂𑀦 𑀯𑀸 𑀧𑀼𑀩𑁆𑀩𑁂 𑀏𑀓𑁄 𑀯𑀺𑀳𑀭𑀺𑀢𑁆𑀯𑀸. 𑀬𑀸𑀦𑀁 𑀪𑀦𑁆𑀢𑀁𑀯 𑀢𑀁 𑀮𑁄𑀓𑁂, 𑀳𑀻𑀦𑀫𑀸𑀳𑀼 𑀧𑀼𑀣𑀼𑀚𑁆𑀚𑀦𑀦𑁆𑀢𑀺 𑀢𑀁 𑀯𑀺𑀩𑁆𑀪𑀦𑁆𑀢𑀓𑀁 𑀧𑀼𑀕𑁆𑀕𑀮𑀁 𑀬𑀣𑀸 𑀳𑀢𑁆𑀣𑀺𑀬𑀸𑀦𑀸𑀤𑀺𑀬𑀸𑀦𑀁 𑀅𑀤𑀦𑁆𑀢𑀁 𑀯𑀺𑀲𑀫𑀁 𑀆𑀭𑁄𑀳𑀢𑀺, 𑀆𑀭𑁄𑀳𑀓𑀫𑁆𑀧𑀺 𑀪𑀜𑁆𑀚𑀢𑀺, 𑀧𑀧𑀸𑀢𑁂𑀧𑀺 𑀧𑀧𑀢𑀢𑀺. 𑀏𑀯𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀺𑀲𑀫𑀸𑀭𑁄𑀳𑀦𑁂𑀦 𑀦𑀭𑀓𑀸𑀤𑀻𑀲𑀼, 𑀅𑀢𑁆𑀣𑀪𑀜𑁆𑀚𑀦𑁂𑀦 𑀚𑀸𑀢𑀺𑀧𑀧𑀸𑀢𑀸𑀤𑀻𑀲𑀼 𑀧𑀧𑀢𑀦𑁂𑀦 𑀘 𑀬𑀸𑀦𑀁 𑀪𑀦𑁆𑀢𑀁𑀯 𑀆𑀳𑀼 𑀳𑀻𑀦𑀁 𑀧𑀼𑀣𑀼𑀚𑁆𑀚𑀦𑀜𑁆𑀘 𑀆𑀳𑀽𑀢𑀺.

𑁮𑁨𑁪-𑁫. 𑀬𑀲𑁄 𑀓𑀺𑀢𑁆𑀢𑀺 𑀘𑀸𑀢𑀺 𑀮𑀸𑀪𑀲𑀓𑁆𑀓𑀸𑀭𑁄 𑀧𑀲𑀁𑀲𑀸 𑀘. 𑀧𑀼𑀩𑁆𑀩𑁂𑀢𑀺 𑀧𑀩𑁆𑀩𑀚𑀺𑀢𑀪𑀸𑀯𑁂. 𑀳𑀸𑀬𑀢𑁂 𑀯𑀸𑀧𑀺 𑀢𑀲𑁆𑀲 𑀲𑀸𑀢𑀺 𑀢𑀲𑁆𑀲 𑀯𑀺𑀩𑁆𑀪𑀦𑁆𑀢𑀓𑀲𑁆𑀲 𑀲𑀢𑁄 𑀲𑁄 𑀘 𑀬𑀲𑁄 𑀲𑀸 𑀘 𑀓𑀺𑀢𑁆𑀢𑀺 𑀳𑀸𑀬𑀢𑀺. 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀢𑀺 𑀏𑀢𑀫𑁆𑀧𑀺 𑀧𑀼𑀩𑁆𑀩𑁂 𑀬𑀲𑀓𑀺𑀢𑁆𑀢𑀻𑀦𑀁 𑀪𑀸𑀯𑀁 𑀧𑀘𑁆𑀙𑀸 𑀘 𑀳𑀸𑀦𑀺𑀁 𑀤𑀺𑀲𑁆𑀯𑀸. 𑀲𑀺𑀓𑁆𑀔𑁂𑀣 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑁂𑀣. 𑀓𑀺𑀁 𑀓𑀸𑀭𑀡𑀁? 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂, 𑀫𑁂𑀣𑀼𑀦𑀧𑁆𑀧𑀳𑀸𑀦𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀳𑀺 𑀫𑁂𑀣𑀼𑀦𑀁 𑀦 𑀯𑀺𑀧𑁆𑀧𑀚𑀳𑀢𑀺, 𑀲𑀗𑁆𑀓𑀧𑁆𑀧𑁂𑀳𑀺…𑀧𑁂… 𑀢𑀣𑀸𑀯𑀺𑀥𑁄. 𑀢𑀢𑁆𑀣 𑀧𑀭𑁂𑀢𑁄𑀢𑀺 𑀲𑀫𑀦𑁆𑀦𑀸𑀕𑀢𑁄. 𑀧𑀭𑁂𑀲𑀁 𑀦𑀺𑀕𑁆𑀖𑁄𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸𑀤𑀻𑀦𑀁 𑀦𑀺𑀦𑁆𑀤𑀸𑀯𑀘𑀦𑀁. 𑀫𑀗𑁆𑀓𑀼 𑀳𑁄𑀢𑀻𑀢𑀺 𑀤𑀼𑀫𑁆𑀫𑀦𑁄 𑀳𑁄𑀢𑀺.

𑁮𑁨𑁬. 𑀇𑀢𑁄 𑀧𑀭𑀸 𑀕𑀸𑀣𑀸 𑀧𑀸𑀓𑀝𑀲𑀫𑁆𑀩𑀦𑁆𑀥𑀸 𑀏𑀯. 𑀢𑀸𑀲𑀼 𑀲𑀢𑁆𑀣𑀸𑀦𑀻𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺. 𑀢𑀸𑀦𑀺 𑀳𑀺 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀙𑁂𑀤𑀦𑀝𑁆𑀞𑁂𑀦 ‘‘𑀲𑀢𑁆𑀣𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀲𑀼 𑀘𑀸𑀬𑀁 𑀯𑀺𑀲𑁂𑀲𑀢𑁄 𑀘𑁄𑀤𑀺𑀢𑁄 𑀫𑀼𑀲𑀸𑀯𑀘𑀦𑀲𑀢𑁆𑀣𑀸𑀦𑁂𑀯 𑀓𑀭𑁄𑀢𑀺 𑁋 ‘‘𑀇𑀫𑀺𑀦𑀸 𑀓𑀸𑀭𑀡𑁂𑀦𑀸𑀳𑀁 𑀯𑀺𑀩𑁆𑀪𑀦𑁆𑀢𑁄’’𑀢𑀺 𑀪𑀡𑀦𑁆𑀢𑁄. 𑀢𑁂𑀦𑁂𑀯𑀸𑀳 𑁋 ‘‘𑀏𑀲 𑀔𑁆𑀯𑀲𑁆𑀲 𑀫𑀳𑀸𑀕𑁂𑀥𑁄, 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀻’’𑀢𑀺. 𑀢𑀢𑁆𑀣 𑀏𑀲 𑀔𑁆𑀯𑀲𑁆𑀲𑀸𑀢𑀺 𑀏𑀲 𑀔𑁄 𑀅𑀲𑁆𑀲. 𑀫𑀳𑀸𑀕𑁂𑀥𑁄𑀢𑀺 𑀫𑀳𑀸𑀩𑀦𑁆𑀥𑀦𑀁. 𑀓𑀢𑀫𑁄𑀢𑀺 𑀘𑁂? 𑀬𑀤𑀺𑀤𑀁 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀺, 𑀲𑁆𑀯𑀸𑀲𑁆𑀲 𑀫𑀼𑀲𑀸𑀯𑀸𑀤𑀚𑁆𑀛𑁄𑀕𑀸𑀳𑁄 𑀫𑀳𑀸𑀕𑁂𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁮𑁨𑁭. 𑀫𑀦𑁆𑀤𑁄𑀯 𑀧𑀭𑀺𑀓𑀺𑀲𑁆𑀲𑀢𑀻𑀢𑀺 𑀧𑀸𑀡𑀯𑀥𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀢𑀢𑁄𑀦𑀺𑀤𑀸𑀦𑀜𑁆𑀘 𑀤𑀼𑀓𑁆𑀔𑀫𑀦𑀼𑀪𑁄𑀦𑁆𑀢𑁄 𑀪𑁄𑀕𑀧𑀭𑀺𑀬𑁂𑀲𑀦𑀭𑀓𑁆𑀔𑀦𑀸𑀦𑀺 𑀘 𑀓𑀭𑁄𑀦𑁆𑀢𑁄 𑀫𑁄𑀫𑀽𑀳𑁄 𑀯𑀺𑀬 𑀧𑀭𑀺𑀓𑀺𑀮𑀺𑀲𑁆𑀲𑀢𑀺.

𑁮𑁨𑁮-𑁯. ‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀫𑀼𑀦𑀺 𑀧𑀼𑀩𑁆𑀩𑀸𑀧𑀭𑁂 𑀇𑀥𑀸’’𑀢𑀺 𑀏𑀢𑀁 ‘‘𑀬𑀲𑁄 𑀓𑀺𑀢𑁆𑀢𑀺 𑀘 𑀬𑀸 𑀧𑀼𑀩𑁆𑀩𑁂, 𑀳𑀸𑀬𑀢𑁂𑀯𑀸𑀧𑀺 𑀢𑀲𑁆𑀲 𑀲𑀸’’𑀢𑀺 𑀇𑀢𑁄 𑀧𑀪𑀼𑀢𑀺 𑀯𑀼𑀢𑁆𑀢𑁂 𑀧𑀼𑀩𑁆𑀩𑀸𑀧𑀭𑁂 𑀇𑀥 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀼𑀩𑁆𑀩𑀢𑁄 𑀅𑀧𑀭𑁂 𑀲𑀫𑀡𑀪𑀸𑀯𑀢𑁄 𑀯𑀺𑀩𑁆𑀪𑀦𑁆𑀢𑀓𑀪𑀸𑀯𑁂 𑀆𑀤𑀻𑀦𑀯𑀁 𑀫𑀼𑀦𑀺 𑀜𑀢𑁆𑀯𑀸. 𑀏𑀢𑀤𑀭𑀺𑀬𑀸𑀦𑀫𑀼𑀢𑁆𑀢𑀫𑀦𑁆𑀢𑀺 𑀬𑀤𑀺𑀤𑀁 𑀯𑀺𑀯𑁂𑀓𑀘𑀭𑀺𑀬𑀸, 𑀏𑀢𑀁 𑀩𑀼𑀤𑁆𑀥𑀸𑀤𑀻𑀦𑀁 𑀅𑀭𑀺𑀬𑀸𑀦𑀁 𑀉𑀢𑁆𑀢𑀫𑀁, 𑀢𑀲𑁆𑀫𑀸 𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀢𑁂𑀦 𑀲𑁂𑀝𑁆𑀞𑁄 𑀫𑀜𑁆𑀜𑁂𑀣𑀸𑀢𑀺 𑀢𑁂𑀦 𑀘 𑀯𑀺𑀯𑁂𑀓𑁂𑀦 𑀦 𑀅𑀢𑁆𑀢𑀸𑀦𑀁 ‘‘𑀲𑁂𑀝𑁆𑀞𑁄 𑀅𑀳’’𑀦𑁆𑀢𑀺 𑀫𑀜𑁆𑀜𑁂𑀬𑁆𑀬, 𑀢𑁂𑀦 𑀣𑀤𑁆𑀥𑁄 𑀦 𑀪𑀯𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁮𑁩𑁦. 𑀭𑀺𑀢𑁆𑀢𑀲𑁆𑀲𑀸𑀢𑀺 𑀯𑀺𑀯𑀺𑀢𑁆𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀯𑀺𑀭𑀳𑀺𑀢𑀲𑁆𑀲. 𑀑𑀖𑀢𑀺𑀡𑁆𑀡𑀲𑁆𑀲 𑀧𑀺𑀳𑀬𑀦𑁆𑀢𑀺, 𑀓𑀸𑀫𑁂𑀲𑀼 𑀕𑀥𑀺𑀢𑀸 𑀧𑀚𑀸𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀮𑀕𑁆𑀕𑀸 𑀲𑀢𑁆𑀢𑀸 𑀢𑀲𑁆𑀲 𑀘𑀢𑀼𑀭𑁄𑀖𑀢𑀺𑀡𑁆𑀡𑀲𑁆𑀲 𑀧𑀺𑀳𑀬𑀦𑁆𑀢𑀺 𑀇𑀡𑀸𑀬𑀺𑀓𑀸 𑀯𑀺𑀬 𑀆𑀡𑀡𑁆𑀬𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀢𑀺𑀲𑁆𑀲𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀲𑀽𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩𑁧. 𑀇𑀥𑁂𑀯 𑀲𑀼𑀤𑁆𑀥𑀻𑀢𑀺 𑀧𑀲𑀽𑀭𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀧𑀲𑀽𑀭𑁄 𑀦𑀸𑀫 𑀧𑀭𑀺𑀩𑁆𑀩𑀸𑀚𑀓𑁄 𑀫𑀳𑀸𑀯𑀸𑀤𑀻, 𑀲𑁄 ‘‘𑀅𑀳𑀫𑀲𑁆𑀫𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀯𑀸𑀤𑁂𑀦 𑀅𑀕𑁆𑀕𑁄, 𑀢𑀲𑁆𑀫𑀸 𑀬𑀣𑀸 𑀚𑀫𑁆𑀩𑀼𑀤𑀻𑀧𑀲𑁆𑀲 𑀚𑀫𑁆𑀩𑀼𑀧𑀜𑁆𑀜𑀸𑀡𑀁, 𑀏𑀯𑀁 𑀫𑀫𑀸𑀧𑀺 𑀪𑀯𑀺𑀢𑀼𑀁 𑀅𑀭𑀳𑀢𑀻’’𑀢𑀺 𑀚𑀫𑁆𑀩𑀼𑀲𑀸𑀔𑀁 𑀥𑀚𑀁 𑀓𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀝𑀺𑀯𑀸𑀤𑀁 𑀅𑀦𑀸𑀲𑀸𑀤𑁂𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀆𑀕𑀦𑁆𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀯𑀸𑀮𑀺𑀓𑀢𑁆𑀣𑀮𑀁 𑀓𑀢𑁆𑀯𑀸 𑀢𑀢𑁆𑀣 𑀲𑀸𑀔𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 ‘‘𑀬𑁄 𑀫𑀬𑀸 𑀲𑀤𑁆𑀥𑀺𑀁 𑀯𑀸𑀤𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄, 𑀲𑁄 𑀇𑀫𑀁 𑀲𑀸𑀔𑀁 𑀪𑀜𑁆𑀚𑀢𑀽’’𑀢𑀺 𑀯𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺. 𑀢𑀁 𑀞𑀸𑀦𑀁 𑀫𑀳𑀸𑀚𑀦𑁄 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀸𑀯𑀢𑁆𑀣𑀺𑀢𑁄 𑀦𑀺𑀓𑁆𑀔𑀫𑀢𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀲𑀫𑁆𑀩𑀳𑀼𑀮𑁂 𑀕𑀸𑀫𑀤𑀸𑀭𑀓𑁂 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀏𑀢𑀁 𑀤𑀸𑀭𑀓𑀸’’𑀢𑀺, 𑀢𑁂 𑀲𑀩𑁆𑀩𑀁 𑀆𑀘𑀺𑀓𑁆𑀔𑀺𑀁𑀲𑀼. ‘‘𑀢𑁂𑀦 𑀳𑀺 𑀦𑀁 𑀢𑀼𑀫𑁆𑀳𑁂 𑀉𑀤𑁆𑀥𑀭𑀺𑀢𑁆𑀯𑀸 𑀧𑀸𑀤𑁂𑀳𑀺 𑀪𑀜𑁆𑀚𑀣, ‘𑀯𑀸𑀤𑀢𑁆𑀣𑀺𑀓𑁄 𑀯𑀺𑀳𑀸𑀭𑀁 𑀆𑀕𑀘𑁆𑀙𑀢𑀽’𑀢𑀺 𑀘 𑀪𑀡𑀣𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀧𑀭𑀺𑀩𑁆𑀩𑀸𑀚𑀓𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀆𑀕𑀦𑁆𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀪𑀕𑁆𑀕𑀁 𑀲𑀸𑀔𑀁 𑀤𑀺𑀲𑁆𑀯𑀸 ‘‘𑀓𑁂𑀦𑀺𑀤𑀁 𑀓𑀸𑀭𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀩𑀼𑀤𑁆𑀥𑀲𑀸𑀯𑀓𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦𑀸’’𑀢𑀺 𑀘 𑀯𑀼𑀢𑁆𑀢𑁂 𑀧𑀫𑀼𑀤𑀺𑀢𑁄 𑀳𑀼𑀢𑁆𑀯𑀸 ‘‘𑀅𑀚𑁆𑀚 𑀫𑀫 𑀚𑀬𑀁 𑀲𑀫𑀡𑀲𑁆𑀲 𑀘 𑀧𑀭𑀸𑀚𑀬𑀁 𑀧𑀡𑁆𑀟𑀺𑀢𑀸 𑀧𑀲𑁆𑀲𑀦𑁆𑀢𑀽’’𑀢𑀺 𑀧𑀜𑁆𑀳𑀯𑀻𑀫𑀁𑀲𑀓𑁂 𑀓𑀸𑀭𑀡𑀺𑀓𑁂 𑀆𑀦𑁂𑀢𑀼𑀁 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 𑀯𑀻𑀣𑀺𑀲𑀺𑀗𑁆𑀖𑀸𑀝𑀓𑀘𑀘𑁆𑀘𑀭𑁂𑀲𑀼 𑀯𑀺𑀘𑀭𑀦𑁆𑀢𑁄 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀕𑁆𑀕𑀲𑀸𑀯𑀓𑁂𑀦 𑀲𑀳 𑀯𑀸𑀤𑁂 𑀧𑀜𑁆𑀜𑀸𑀧𑀝𑀺𑀪𑀸𑀦𑀁 𑀲𑁄𑀢𑀼𑀓𑀸𑀫𑀸 𑀪𑁄𑀦𑁆𑀢𑁄 𑀦𑀺𑀓𑁆𑀔𑀫𑀦𑁆𑀢𑀽’’𑀢𑀺 𑀉𑀕𑁆𑀖𑁄𑀲𑁂𑀲𑀺. ‘‘𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀲𑁄𑀲𑁆𑀲𑀸𑀫𑀸’’𑀢𑀺 𑀲𑀸𑀲𑀦𑁂 𑀧𑀲𑀦𑁆𑀦𑀸𑀧𑀺 𑀅𑀧𑁆𑀧𑀲𑀦𑁆𑀦𑀸𑀧𑀺 𑀩𑀳𑀽 𑀫𑀦𑀼𑀲𑁆𑀲𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀢𑀢𑁄 𑀧𑀲𑀽𑀭𑁄 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 ‘‘𑀏𑀯𑀁 𑀯𑀼𑀢𑁆𑀢𑁂 𑀏𑀯𑀁 𑀪𑀡𑀺𑀲𑁆𑀲𑀸𑀫𑀻’’𑀢𑀺𑀆𑀤𑀻𑀦𑀺 𑀯𑀺𑀢𑀓𑁆𑀓𑁂𑀦𑁆𑀢𑁄 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀣𑁂𑀭𑁄 ‘‘𑀯𑀺𑀳𑀸𑀭𑁂 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑁄 𑀚𑀦𑀩𑁆𑀬𑀸𑀓𑀼𑀮𑀜𑁆𑀘 𑀫𑀸 𑀅𑀳𑁄𑀲𑀻’’𑀢𑀺 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀺.

𑀧𑀭𑀺𑀩𑁆𑀩𑀸𑀚𑀓𑁄 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑁆𑀯𑀁, 𑀪𑁄, 𑀧𑀩𑁆𑀩𑀚𑀺𑀢, 𑀫𑀬𑁆𑀳𑀁 𑀚𑀫𑁆𑀩𑀼𑀥𑀚𑀁 𑀪𑀜𑁆𑀚𑀸𑀧𑁂𑀲𑀻’’𑀢𑀺 𑀆𑀳. ‘‘𑀆𑀫 𑀧𑀭𑀺𑀩𑁆𑀩𑀸𑀚𑀓𑀸’’𑀢𑀺 𑀘 𑀯𑀼𑀢𑁆𑀢𑁂 ‘‘𑀳𑁄𑀢𑀼 𑀦𑁄, 𑀪𑁄, 𑀓𑀸𑀘𑀺 𑀓𑀣𑀸𑀧𑀯𑀢𑁆𑀢𑀻’’𑀢𑀺 𑀆𑀳. ‘‘𑀳𑁄𑀢𑀼 𑀧𑀭𑀺𑀩𑁆𑀩𑀸𑀚𑀓𑀸’’𑀢𑀺 𑀘 𑀣𑁂𑀭𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 ‘‘𑀢𑁆𑀯𑀁, 𑀲𑀫𑀡, 𑀧𑀼𑀘𑁆𑀙, 𑀅𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀢𑁄 𑀦𑀁 𑀣𑁂𑀭𑁄 𑀅𑀯𑀘 ‘‘𑀓𑀺𑀁, 𑀧𑀭𑀺𑀩𑁆𑀩𑀸𑀚𑀓, 𑀤𑀼𑀓𑁆𑀓𑀭𑀁 𑀧𑀼𑀘𑁆𑀙𑀸, 𑀉𑀤𑀸𑀳𑀼 𑀯𑀺𑀲𑁆𑀲𑀚𑁆𑀚𑀦’’𑀦𑁆𑀢𑀺. 𑀯𑀺𑀲𑁆𑀲𑀚𑁆𑀚𑀦𑀁 𑀪𑁄, 𑀧𑀩𑁆𑀩𑀚𑀺𑀢, 𑀧𑀼𑀘𑁆𑀙𑀸𑀬 𑀓𑀺𑀁 𑀤𑀼𑀓𑁆𑀓𑀭𑀁. 𑀢𑀁 𑀬𑁄 𑀳𑀺 𑀓𑁄𑀘𑀺 𑀬𑀁𑀓𑀺𑀜𑁆𑀘𑀺 𑀧𑀼𑀘𑁆𑀙𑀢𑀻𑀢𑀺. ‘‘𑀢𑁂𑀦 𑀳𑀺, 𑀧𑀭𑀺𑀩𑁆𑀩𑀸𑀚𑀓, 𑀢𑁆𑀯𑀁 𑀧𑀼𑀘𑁆𑀙, 𑀅𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀲𑀸𑀥𑀼𑀭𑀽𑀧𑁄 𑀪𑀺𑀓𑁆𑀔𑀼 𑀞𑀸𑀦𑁂 𑀲𑀸𑀔𑀁 𑀪𑀜𑁆𑀚𑀸𑀧𑁂𑀲𑀻’’𑀢𑀺 𑀯𑀺𑀫𑁆𑀳𑀺𑀢𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑁄 𑀧𑀼𑀭𑀺𑀲𑀲𑁆𑀲 𑀓𑀸𑀫𑁄’’𑀢𑀺. ‘‘𑀲𑀗𑁆𑀓𑀧𑁆𑀧𑀭𑀸𑀕𑁄 𑀧𑀼𑀭𑀺𑀲𑀲𑁆𑀲 𑀓𑀸𑀫𑁄’’𑀢𑀺 (𑀅. 𑀦𑀺. 𑁬.𑁬𑁩) 𑀣𑁂𑀭𑁄 𑀆𑀳. 𑀲𑁄 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁂 𑀯𑀺𑀭𑀼𑀤𑁆𑀥𑀲𑀜𑁆𑀜𑀻 𑀳𑀼𑀢𑁆𑀯𑀸 𑀧𑀭𑀸𑀚𑀬𑀁 𑀆𑀭𑁄𑀧𑁂𑀢𑀼𑀓𑀸𑀫𑁄 𑀆𑀳 𑁋 ‘‘𑀘𑀺𑀢𑁆𑀭𑀯𑀺𑀘𑀺𑀢𑁆𑀭𑀸𑀭𑀫𑁆𑀫𑀡𑀁 𑀧𑀦 𑀪𑁄, 𑀧𑀩𑁆𑀩𑀚𑀺𑀢, 𑀧𑀼𑀭𑀺𑀲𑀲𑁆𑀲 𑀓𑀸𑀫𑀁 𑀦 𑀯𑀤𑁂𑀲𑀻’’𑀢𑀺? ‘‘𑀆𑀫, 𑀧𑀭𑀺𑀩𑁆𑀩𑀸𑀚𑀓, 𑀦 𑀯𑀤𑁂𑀫𑀻’’𑀢𑀺. 𑀢𑀢𑁄 𑀦𑀁 𑀧𑀭𑀺𑀩𑁆𑀩𑀸𑀚𑀓𑁄 𑀬𑀸𑀯 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀜𑁆𑀜𑀁 𑀓𑀸𑀭𑀸𑀧𑁂𑀢𑁆𑀯𑀸 ‘‘𑀲𑀼𑀡𑀦𑁆𑀢𑀼 𑀪𑁄𑀦𑁆𑀢𑁄 𑀲𑀫𑀡𑀲𑁆𑀲 𑀯𑀸𑀤𑁂 𑀤𑁄𑀲’’𑀦𑁆𑀢𑀺 𑀧𑀜𑁆𑀳𑀯𑀻𑀫𑀁𑀲𑀓𑁂 𑀆𑀮𑀧𑀺𑀢𑁆𑀯𑀸 𑀆𑀳 𑁋 ‘‘𑀪𑁄, 𑀧𑀩𑁆𑀩𑀚𑀺𑀢, 𑀢𑀼𑀫𑁆𑀳𑀸𑀓𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑀻’’𑀢𑀺? ‘‘𑀆𑀫, 𑀧𑀭𑀺𑀩𑁆𑀩𑀸𑀚𑀓, 𑀯𑀺𑀳𑀭𑀦𑁆𑀢𑀻’’𑀢𑀺. ‘‘𑀢𑁂 𑀢𑀢𑁆𑀣 𑀯𑀺𑀳𑀭𑀦𑁆𑀢𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀦𑁆𑀢𑀻’’𑀢𑀺? ‘‘𑀆𑀫, 𑀧𑀭𑀺𑀩𑁆𑀩𑀸𑀚𑀓, 𑀧𑀼𑀣𑀼𑀚𑁆𑀚𑀦𑀸 𑀲𑀳𑀲𑀸 𑀯𑀺𑀢𑀓𑁆𑀓𑁂𑀦𑁆𑀢𑀻’’𑀢𑀺. ‘‘𑀬𑀤𑀺 𑀏𑀯𑀁 𑀢𑁂𑀲𑀁 𑀲𑀫𑀡𑀪𑀸𑀯𑁄 𑀓𑀼𑀢𑁄? 𑀦𑀦𑀼 𑀢𑁂 𑀅𑀕𑀸𑀭𑀺𑀓𑀸 𑀓𑀸𑀫𑀪𑁄𑀕𑀺𑀦𑁄 𑀳𑁄𑀦𑁆𑀢𑀻’’𑀢𑀺 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑁋

‘‘𑀦 𑀢𑁂 𑀯𑁂 𑀓𑀸𑀫𑀸 𑀬𑀸𑀦𑀺 𑀘𑀺𑀢𑁆𑀭𑀸𑀦𑀺 𑀮𑁄𑀓𑁂,

𑀲𑀗𑁆𑀓𑀧𑁆𑀧𑀭𑀸𑀕𑀜𑁆𑀘 𑀯𑀤𑁂𑀲𑀺 𑀓𑀸𑀫𑀁;

𑀲𑀗𑁆𑀓𑀧𑁆𑀧𑀬𑀁 𑀅𑀓𑀼𑀲𑀮𑁂 𑀯𑀺𑀢𑀓𑁆𑀓𑁂,

𑀪𑀺𑀓𑁆𑀔𑀼𑀧𑀺 𑀢𑁂 𑀳𑁂𑀲𑁆𑀲𑀢𑀺 𑀓𑀸𑀫𑀪𑁄𑀕𑀻’’𑀢𑀺. (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁩𑁪);

𑀅𑀣 𑀣𑁂𑀭𑁄 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀸𑀤𑁂 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀓𑀺𑀁, 𑀧𑀭𑀺𑀩𑁆𑀩𑀸𑀚𑀓, 𑀲𑀗𑁆𑀓𑀧𑁆𑀧𑀭𑀸𑀕𑀁 𑀧𑀼𑀭𑀺𑀲𑀲𑁆𑀲 𑀓𑀸𑀫𑀁 𑀦 𑀯𑀤𑁂𑀲𑀺, 𑀘𑀺𑀢𑁆𑀭𑀯𑀺𑀘𑀺𑀢𑁆𑀭𑀸𑀭𑀫𑁆𑀫𑀡𑀁 𑀯𑀤𑁂𑀲𑀻’’𑀢𑀺? ‘‘𑀆𑀫, 𑀪𑁄, 𑀧𑀩𑁆𑀩𑀚𑀺𑀢𑀸’’𑀢𑀺. 𑀢𑀢𑁄 𑀦𑀁 𑀣𑁂𑀭𑁄 𑀬𑀸𑀯 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀜𑁆𑀜𑀁 𑀓𑀸𑀭𑀸𑀧𑁂𑀢𑁆𑀯𑀸 ‘‘𑀲𑀼𑀡𑀸𑀣, 𑀆𑀯𑀼𑀲𑁄, 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀸𑀤𑁂 𑀤𑁄𑀲’’𑀦𑁆𑀢𑀺 𑀧𑀜𑁆𑀳𑀯𑀻𑀫𑀁𑀲𑀓𑁂 𑀆𑀮𑀧𑀺𑀢𑁆𑀯𑀸 𑀆𑀳 𑁋 ‘‘𑀆𑀯𑀼𑀲𑁄 𑀧𑀲𑀽𑀭, 𑀢𑀯 𑀲𑀢𑁆𑀣𑀸 𑀅𑀢𑁆𑀣𑀻’’𑀢𑀺? ‘‘𑀆𑀫, 𑀧𑀩𑁆𑀩𑀚𑀺𑀢, 𑀅𑀢𑁆𑀣𑀻’’𑀢𑀺. ‘‘𑀲𑁄 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀭𑀽𑀧𑀸𑀭𑀫𑁆𑀫𑀡𑀁 𑀧𑀲𑁆𑀲𑀢𑀺 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀦𑀺 𑀯𑀸 𑀲𑁂𑀯𑀢𑀻’’𑀢𑀺? ‘‘𑀆𑀫, 𑀧𑀩𑁆𑀩𑀚𑀺𑀢, 𑀲𑁂𑀯𑀢𑀻’’𑀢𑀺. ‘‘𑀬𑀤𑀺 𑀏𑀯𑀁 𑀢𑀲𑁆𑀲 𑀲𑀢𑁆𑀣𑀼𑀪𑀸𑀯𑁄 𑀓𑀼𑀢𑁄, 𑀦𑀦𑀼 𑀲𑁄 𑀅𑀕𑀸𑀭𑀺𑀓𑁄 𑀓𑀸𑀫𑀪𑁄𑀕𑀻 𑀳𑁄𑀢𑀻’’𑀢𑀺 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑁋

‘‘𑀢𑁂 𑀯𑁂 𑀓𑀸𑀫𑀸 𑀬𑀸𑀦𑀺 𑀘𑀺𑀢𑁆𑀭𑀸𑀦𑀺 𑀮𑁄𑀓𑁂,

𑀲𑀗𑁆𑀓𑀧𑁆𑀧𑀭𑀸𑀕𑀁 𑀦 𑀯𑀤𑁂𑀲𑀺 𑀓𑀸𑀫𑀁;

𑀧𑀲𑁆𑀲𑀦𑁆𑀢𑁄 𑀭𑀽𑀧𑀸𑀦𑀺 𑀫𑀦𑁄𑀭𑀫𑀸𑀦𑀺,

𑀲𑀼𑀡𑀦𑁆𑀢𑁄 𑀲𑀤𑁆𑀤𑀸𑀦𑀺 𑀫𑀦𑁄𑀭𑀫𑀸𑀦𑀺.

‘‘𑀖𑀸𑀬𑀦𑁆𑀢𑁄 𑀕𑀦𑁆𑀥𑀸𑀦𑀺 𑀫𑀦𑁄𑀭𑀫𑀸𑀦𑀺,

𑀲𑀸𑀬𑀦𑁆𑀢𑁄 𑀭𑀲𑀸𑀦𑀺 𑀫𑀦𑁄𑀭𑀫𑀸𑀦𑀺;

𑀨𑀼𑀲𑀦𑁆𑀢𑁄 𑀨𑀲𑁆𑀲𑀸𑀦𑀺 𑀫𑀦𑁄𑀭𑀫𑀸𑀦𑀺,

𑀲𑀢𑁆𑀣𑀸𑀧𑀺 𑀢𑁂 𑀳𑁂𑀲𑁆𑀲𑀢𑀺 𑀓𑀸𑀫𑀪𑁄𑀕𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀦𑀺𑀧𑁆𑀧𑀝𑀺𑀪𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀅𑀬𑀁 𑀧𑀩𑁆𑀩𑀚𑀺𑀢𑁄 𑀫𑀳𑀸𑀯𑀸𑀤𑀻, 𑀇𑀫𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀸𑀤𑀲𑀢𑁆𑀣𑀁 𑀲𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀚𑁂𑀢𑀯𑀦𑀁 𑀧𑀯𑀺𑀝𑁆𑀞𑁄 𑀢𑀢𑁆𑀣 𑀮𑀸𑀮𑀼𑀤𑀸𑀬𑀺𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀓𑀸𑀬𑀽𑀧𑀧𑀦𑁆𑀦𑀁 𑀲𑀭𑀻𑀭𑀸𑀓𑀸𑀭𑀸𑀓𑀧𑁆𑀧𑁂𑀲𑀼 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀪𑀺𑀓𑁆𑀔𑀼 𑀫𑀳𑀸𑀧𑀜𑁆𑀜𑁄 𑀫𑀳𑀸𑀯𑀸𑀤𑀻’’𑀢𑀺 𑀫𑀦𑁆𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀁 𑀯𑀸𑀤𑁂𑀦 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀮𑀺𑀗𑁆𑀕𑁂𑀦 𑀢𑀁𑀬𑁂𑀯 𑀢𑀺𑀢𑁆𑀣𑀸𑀬𑀢𑀦𑀁 𑀧𑀓𑁆𑀓𑀫𑀺𑀢𑁆𑀯𑀸 𑀧𑀼𑀦 ‘‘𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀯𑀸𑀤𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀉𑀕𑁆𑀖𑁄𑀲𑁂𑀢𑁆𑀯𑀸 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 ‘‘𑀏𑀯𑀁 𑀲𑀫𑀡𑀁 𑀕𑁄𑀢𑀫𑀁 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 ‘‘𑀅𑀬𑀁 𑀅𑀪𑀸𑀚𑀦𑀪𑀽𑀢𑁄’’𑀢𑀺 𑀫𑀼𑀔𑀩𑀦𑁆𑀥𑀫𑀲𑁆𑀲 𑀅𑀓𑀸𑀲𑀺. 𑀲𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀽𑀕𑁄 𑀯𑀺𑀬 𑀦𑀺𑀲𑀻𑀤𑀺. 𑀫𑀦𑀼𑀲𑁆𑀲𑀸 ‘‘𑀇𑀤𑀸𑀦𑀺 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀧𑀼𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀫𑀼𑀔𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 ‘‘𑀯𑀤𑁂𑀳𑀺, 𑀪𑁄 𑀧𑀲𑀽𑀭, 𑀯𑀤𑁂𑀳𑀺, 𑀪𑁄 𑀧𑀲𑀽𑀭𑀸’’𑀢𑀺 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸 𑀅𑀳𑁂𑀲𑀼𑀁. 𑀅𑀣 𑀪𑀕𑀯𑀸 ‘‘𑀓𑀺𑀁 𑀧𑀲𑀽𑀭𑁄 𑀯𑀤𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀲𑀼𑀢𑁆𑀢𑀁 𑀅𑀪𑀸𑀲𑀺.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀅𑀬𑀁 𑀲𑀗𑁆𑀔𑁂𑀧𑁄 𑁋 𑀇𑀫𑁂 𑀤𑀺𑀝𑁆𑀞𑀺𑀕𑀢𑀺𑀓𑀸 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀁 𑀲𑀦𑁆𑀥𑀸𑀬 𑀇𑀥𑁂𑀯 𑀲𑀼𑀤𑁆𑀥𑀻 𑀇𑀢𑀺 𑀯𑀸𑀤𑀬𑀦𑁆𑀢𑀺 𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀼. 𑀏𑀯𑀁 𑀲𑀦𑁆𑀢𑁂 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀸𑀤𑀻𑀦𑀺 𑀦𑀺𑀲𑁆𑀲𑀺𑀢𑀸 𑀢𑀢𑁆𑀣𑁂𑀯 ‘‘𑀏𑀲 𑀯𑀸𑀤𑁄 𑀲𑀼𑀪𑁄’’𑀢𑀺 𑀏𑀯𑀁 𑀲𑀼𑀪𑀁 𑀯𑀤𑀸𑀦𑀸 𑀳𑀼𑀢𑁆𑀯𑀸 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺𑀆𑀤𑀻𑀲𑀼 𑀧𑀘𑁆𑀘𑁂𑀓𑀲𑀘𑁆𑀘𑁂𑀲𑀼 𑀦𑀺𑀯𑀺𑀝𑁆𑀞𑀸.

𑁮𑁩𑁨. 𑀏𑀯𑀁 𑀦𑀺𑀯𑀺𑀝𑁆𑀞𑀸 𑀘 𑁋 𑀢𑁂 𑀯𑀸𑀤𑀓𑀸𑀫𑀸𑀢𑀺 𑀕𑀸𑀣𑀸. 𑀢𑀢𑁆𑀣 𑀩𑀸𑀮𑀁 𑀤𑀳𑀦𑁆𑀢𑀻 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 ‘‘𑀅𑀬𑀁 𑀩𑀸𑀮𑁄 𑀅𑀬𑀁 𑀩𑀸𑀮𑁄’’𑀢𑀺 𑀏𑀯𑀁 𑀤𑁆𑀯𑁂𑀧𑀺 𑀚𑀦𑀸 𑀅𑀜𑁆𑀜𑀫𑀜𑁆𑀜𑀁 𑀩𑀸𑀮𑀁 𑀤𑀳𑀦𑁆𑀢𑀺, 𑀩𑀸𑀮𑀢𑁄 𑀧𑀲𑁆𑀲𑀦𑁆𑀢𑀺. 𑀯𑀤𑀦𑁆𑀢𑀺 𑀢𑁂 𑀅𑀜𑁆𑀜𑀲𑀺𑀢𑀸 𑀓𑀣𑁄𑀚𑁆𑀚𑀦𑁆𑀢𑀺 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀢𑁆𑀣𑀸𑀭𑀸𑀤𑀺𑀁 𑀦𑀺𑀲𑁆𑀲𑀺𑀢𑀸 𑀓𑀮𑀳𑀁 𑀯𑀤𑀦𑁆𑀢𑀺. 𑀧𑀲𑀁𑀲𑀓𑀸𑀫𑀸 𑀓𑀼𑀲𑀮𑀸 𑀯𑀤𑀸𑀦𑀸𑀢𑀺 𑀧𑀲𑀁𑀲𑀢𑁆𑀣𑀺𑀓𑀸 𑀉𑀪𑁄𑀧𑀺 ‘‘𑀫𑀬𑀁 𑀓𑀼𑀲𑀮𑀯𑀸𑀤𑀸 𑀧𑀡𑁆𑀟𑀺𑀢𑀯𑀸𑀤𑀸’’𑀢𑀺 𑀏𑀯𑀁𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸.

𑁮𑁩𑁩. 𑀏𑀯𑀁 𑀯𑀤𑀸𑀦𑁂𑀲𑀼 𑀘 𑀢𑁂𑀲𑀼 𑀏𑀓𑁄 𑀦𑀺𑀬𑀫𑀢𑁄 𑀏𑀯 𑁋 𑀬𑀼𑀢𑁆𑀢𑁄 𑀓𑀣𑀸𑀬𑀦𑁆𑀢𑀺 𑀕𑀸𑀣𑀸. 𑀢𑀢𑁆𑀣 𑀬𑀼𑀢𑁆𑀢𑁄 𑀓𑀣𑀸𑀬𑀦𑁆𑀢𑀺 𑀯𑀺𑀯𑀸𑀤𑀓𑀣𑀸𑀬 𑀉𑀲𑁆𑀲𑀼𑀓𑁆𑀓𑁄. 𑀧𑀲𑀁𑀲𑀫𑀺𑀘𑁆𑀙𑀁 𑀯𑀺𑀦𑀺𑀖𑀸𑀢𑀺 𑀳𑁄𑀢𑀻𑀢𑀺 𑀅𑀢𑁆𑀢𑀦𑁄 𑀧𑀲𑀁𑀲𑀁 𑀇𑀘𑁆𑀙𑀦𑁆𑀢𑁄 ‘‘𑀓𑀣𑀁 𑀦𑀼 𑀔𑁄 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀩𑁆𑀩𑁂𑀯 𑀲𑀮𑁆𑀮𑀸𑀧𑀸 𑀓𑀣𑀁𑀓𑀣𑀻 𑀯𑀺𑀦𑀺𑀖𑀸𑀢𑀻 𑀳𑁄𑀢𑀺. 𑀅𑀧𑀸𑀳𑀢𑀲𑁆𑀫𑀺𑀦𑁆𑀢𑀺 𑀧𑀜𑁆𑀳𑀯𑀻𑀫𑀁𑀲𑀓𑁂𑀳𑀺 ‘‘𑀅𑀢𑁆𑀣𑀸𑀧𑀕𑀢𑀁 𑀢𑁂 𑀪𑀡𑀺𑀢𑀁, 𑀩𑁆𑀬𑀜𑁆𑀚𑀦𑀸𑀧𑀕𑀢𑀁 𑀢𑁂 𑀪𑀡𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀧𑀳𑀸𑀭𑀺𑀢𑁂 𑀯𑀸𑀤𑁂. 𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀻𑀢𑀺 𑀏𑀯𑀁 𑀅𑀧𑀸𑀳𑀢𑀲𑁆𑀫𑀺𑀜𑁆𑀘 𑀯𑀸𑀤𑁂 𑀉𑀧𑁆𑀧𑀦𑁆𑀦𑀸𑀬 𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀺. 𑀭𑀦𑁆𑀥𑀫𑁂𑀲𑀻𑀢𑀺 𑀧𑀭𑀲𑁆𑀲 𑀭𑀦𑁆𑀥𑀫𑁂𑀯 𑀕𑀯𑁂𑀲𑀦𑁆𑀢𑁄.

𑁮𑁩𑁪. 𑀦 𑀓𑁂𑀯𑀮𑀜𑁆𑀘 𑀓𑀼𑀧𑁆𑀧𑀢𑀺, 𑀅𑀧𑀺𑀘 𑀔𑁄 𑀧𑀦 𑀬𑀫𑀲𑁆𑀲 𑀯𑀸𑀤𑀦𑁆𑀢𑀺 𑀕𑀸𑀣𑀸. 𑀢𑀢𑁆𑀣 𑀧𑀭𑀺𑀳𑀻𑀦𑀫𑀸𑀳𑀼 𑀅𑀧𑀸𑀳𑀢𑀦𑁆𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀤𑀺𑀢𑁄 𑀅𑀧𑀸𑀳𑀢𑀁 𑀧𑀭𑀺𑀳𑀻𑀦𑀁 𑀯𑀤𑀦𑁆𑀢𑀺. 𑀧𑀭𑀺𑀤𑁂𑀯𑀢𑀻𑀢𑀺 𑀢𑀢𑁄 𑀦𑀺𑀫𑀺𑀢𑁆𑀢𑀁 𑀲𑁄 ‘‘𑀅𑀜𑁆𑀜𑀁 𑀫𑀬𑀸 𑀆𑀯𑀚𑁆𑀚𑀺𑀢’’𑀦𑁆𑀢𑀺𑀆𑀤𑀻𑀳𑀺 𑀯𑀺𑀧𑁆𑀧𑀮𑀧𑀢𑀺. 𑀲𑁄𑀘𑀢𑀻𑀢𑀺 ‘‘𑀢𑀲𑁆𑀲 𑀚𑀬𑁄’’𑀢𑀺𑀆𑀤𑀻𑀦𑀺 𑀆𑀭𑀩𑁆𑀪 𑀲𑁄𑀘𑀢𑀺. 𑀉𑀧𑀘𑁆𑀘𑀕𑀸 𑀫𑀦𑁆𑀢𑀺 𑀅𑀦𑀼𑀢𑁆𑀣𑀼𑀦𑀸𑀢𑀻𑀢𑀺 ‘‘𑀲𑁄 𑀫𑀁 𑀯𑀸𑀤𑁂𑀦 𑀯𑀸𑀤𑀁 𑀅𑀢𑀺𑀓𑁆𑀓𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀼𑀝𑁆𑀞𑀼𑀢𑀭𑀁 𑀯𑀺𑀧𑁆𑀧𑀮𑀧𑀢𑀺.

𑁮𑁩𑁫. 𑀏𑀢𑁂 𑀯𑀺𑀯𑀸𑀤𑀸 𑀲𑀫𑀡𑁂𑀲𑀽𑀢𑀺 𑀏𑀢𑁆𑀣 𑀧𑀦 𑀲𑀫𑀡𑀸 𑀯𑀼𑀘𑁆𑀘𑀦𑁆𑀢𑀺 𑀩𑀸𑀳𑀺𑀭𑀧𑀭𑀺𑀩𑁆𑀩𑀸𑀚𑀓𑀸. 𑀏𑀢𑁂𑀲𑀼 𑀉𑀕𑁆𑀖𑀸𑀢𑀺 𑀦𑀺𑀖𑀸𑀢𑀺 𑀳𑁄𑀢𑀻𑀢𑀺 𑀏𑀢𑁂𑀲𑀼 𑀯𑀸𑀤𑁂𑀲𑀼 𑀚𑀬𑀧𑀭𑀸𑀚𑀬𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀉𑀕𑁆𑀖𑀸𑀢𑀁 𑀦𑀺𑀖𑀸𑀢𑀜𑁆𑀘 𑀧𑀸𑀧𑀼𑀡𑀦𑁆𑀢𑁄 𑀉𑀕𑁆𑀖𑀸𑀢𑀻 𑀦𑀺𑀖𑀸𑀢𑀻 𑀘 𑀳𑁄𑀢𑀺. 𑀯𑀺𑀭𑀫𑁂 𑀓𑀣𑁄𑀚𑁆𑀚𑀦𑁆𑀢𑀺 𑀧𑀚𑀳𑁂𑀬𑁆𑀬 𑀓𑀮𑀳𑀁. 𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺 𑀧𑀲𑀁𑀲𑀮𑀸𑀪𑀸𑀢𑀺 𑀦 𑀳𑀺 𑀏𑀢𑁆𑀣 𑀧𑀲𑀁𑀲𑀮𑀸𑀪𑀢𑁄 𑀅𑀜𑁆𑀜𑁄 𑀅𑀢𑁆𑀣𑁄 𑀅𑀢𑁆𑀣𑀺.

𑁮𑁩𑁬-𑁭. 𑀙𑀝𑁆𑀞𑀕𑀸𑀣𑀸𑀬 𑀅𑀢𑁆𑀣𑁄 𑁋 𑀬𑀲𑁆𑀫𑀸 𑀘 𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺 𑀧𑀲𑀁𑀲𑀮𑀸𑀪𑀸, 𑀢𑀲𑁆𑀫𑀸 𑀧𑀭𑀫𑀁 𑀮𑀸𑀪𑀁 𑀮𑀪𑀦𑁆𑀢𑁄𑀧𑀺 ‘‘𑀲𑀼𑀦𑁆𑀤𑀭𑁄 𑀅𑀬’’𑀦𑁆𑀢𑀺 𑀢𑀢𑁆𑀣 𑀤𑀺𑀝𑁆𑀞𑀺𑀬𑀸 𑀧𑀲𑀁𑀲𑀺𑀢𑁄 𑀯𑀸 𑀧𑀦 𑀳𑁄𑀢𑀺 𑀢𑀁 𑀯𑀸𑀤𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀤𑀻𑀧𑁂𑀢𑁆𑀯𑀸, 𑀢𑀢𑁄 𑀲𑁄 𑀢𑁂𑀦 𑀚𑀬𑀢𑁆𑀣𑁂𑀦 𑀢𑀼𑀝𑁆𑀞𑀺𑀁 𑀯𑀸 𑀤𑀦𑁆𑀢𑀯𑀺𑀤𑀁𑀲𑀓𑀁 𑀯𑀸 𑀆𑀧𑀚𑁆𑀚𑀦𑁆𑀢𑁄 𑀳𑀲𑀢𑀺, 𑀫𑀸𑀦𑁂𑀦 𑀘 𑀉𑀡𑁆𑀡𑀫𑀢𑀺. 𑀓𑀺𑀁 𑀓𑀸𑀭𑀡𑀁? 𑀬𑀲𑁆𑀫𑀸 𑀢𑀁 𑀚𑀬𑀢𑁆𑀣𑀁 𑀧𑀧𑁆𑀧𑀼𑀬𑁆𑀬 𑀬𑀣𑀸𑀫𑀸𑀦𑁄 𑀚𑀸𑀢𑁄, 𑀏𑀯𑀁 𑀉𑀡𑁆𑀡𑀫𑀢𑁄 𑀘 𑀬𑀸 𑀉𑀡𑁆𑀡𑀢𑀻𑀢𑀺 𑀕𑀸𑀣𑀸. 𑀢𑀢𑁆𑀣 𑀫𑀸𑀦𑀸𑀢𑀺𑀫𑀸𑀦𑀁 𑀯𑀤𑀢𑁂 𑀧𑀦𑁂𑀲𑁄𑀢𑀺 𑀏𑀲𑁄 𑀧𑀦 𑀢𑀁 𑀉𑀡𑁆𑀡𑀢𑀺𑀁 ‘‘𑀯𑀺𑀖𑀸𑀢𑀪𑀽𑀫𑀻’’𑀢𑀺 𑀅𑀩𑀼𑀚𑁆𑀛𑀫𑀸𑀦𑁄 𑀫𑀸𑀦𑀜𑁆𑀘 𑀅𑀢𑀺𑀫𑀸𑀦𑀜𑁆𑀘 𑀯𑀤𑀢𑀺𑀬𑁂𑀯.

𑁮𑁩𑁮. 𑀏𑀯𑀁 𑀯𑀸𑀤𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀯𑀸𑀤𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 ‘‘𑀲𑀽𑀭𑁄’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀭𑀸𑀚𑀔𑀸𑀤𑀸𑀬𑀸𑀢𑀺 𑀭𑀸𑀚𑀔𑀸𑀤𑀦𑀻𑀬𑁂𑀦, 𑀪𑀢𑁆𑀢𑀯𑁂𑀢𑀦𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀪𑀺𑀕𑀚𑁆𑀚𑀫𑁂𑀢𑀺 𑀧𑀝𑀺𑀲𑀽𑀭𑀫𑀺𑀘𑁆𑀙𑀦𑁆𑀢𑀺 𑀬𑀣𑀸 𑀲𑁄 𑀧𑀝𑀺𑀲𑀽𑀭𑀁 𑀇𑀘𑁆𑀙𑀦𑁆𑀢𑁄 𑀅𑀪𑀺𑀕𑀚𑁆𑀚𑀦𑁆𑀢𑁄 𑀏𑀢𑀺, 𑀏𑀯𑀁 𑀤𑀺𑀝𑁆𑀞𑀺𑀕𑀢𑀺𑀓𑁄 𑀤𑀺𑀝𑁆𑀞𑀺𑀕𑀢𑀺𑀓𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑁂𑀦𑁂𑀯 𑀲𑁄, 𑀢𑁂𑀦 𑀧𑀮𑁂𑀳𑀻𑀢𑀺 𑀬𑁂𑀦 𑀲𑁄 𑀢𑀼𑀬𑁆𑀳𑀁 𑀧𑀝𑀺𑀲𑀽𑀭𑁄, 𑀢𑁂𑀦 𑀕𑀘𑁆𑀙. 𑀧𑀼𑀩𑁆𑀩𑁂𑀯 𑀦𑀢𑁆𑀣𑀺 𑀬𑀤𑀺𑀤𑀁 𑀬𑀼𑀥𑀸𑀬𑀸𑀢𑀺 𑀬𑀁 𑀧𑀦 𑀇𑀤𑀁 𑀓𑀺𑀮𑁂𑀲𑀚𑀸𑀢𑀁 𑀬𑀼𑀤𑁆𑀥𑀸𑀬 𑀲𑀺𑀬𑀸, 𑀢𑀁 𑀏𑀢𑀁 𑀧𑀼𑀩𑁆𑀩𑁂𑀯 𑀦𑀢𑁆𑀣𑀺, 𑀩𑁄𑀥𑀺𑀫𑀽𑀮𑁂𑀬𑁂𑀯 𑀧𑀳𑀻𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀲𑀕𑀸𑀣𑀸 𑀧𑀸𑀓𑀝𑀲𑀫𑁆𑀩𑀦𑁆𑀥𑀸𑀬𑁂𑀯.

𑁮𑁩𑁯-𑁪𑁦. 𑀢𑀢𑁆𑀣 𑀯𑀺𑀯𑀸𑀤𑀬𑀦𑁆𑀢𑀻𑀢𑀺 𑀯𑀺𑀯𑀤𑀦𑁆𑀢𑀺. 𑀧𑀝𑀺𑀲𑁂𑀦𑀺𑀓𑀢𑁆𑀢𑀸𑀢𑀺 𑀧𑀝𑀺𑀮𑁄𑀫𑀓𑀸𑀭𑀓𑁄. 𑀯𑀺𑀲𑁂𑀦𑀺𑀓𑀢𑁆𑀯𑀸𑀢𑀺 𑀓𑀺𑀮𑁂𑀲𑀲𑁂𑀦𑀁 𑀯𑀺𑀦𑀸𑀲𑁂𑀢𑁆𑀯𑀸. 𑀓𑀺𑀁 𑀮𑀪𑁂𑀣𑁄𑀢𑀺 𑀧𑀝𑀺𑀫𑀮𑁆𑀮𑀁 𑀓𑀺𑀁 𑀮𑀪𑀺𑀲𑁆𑀲𑀲𑀺. 𑀧𑀲𑀽𑀭𑀸𑀢𑀺 𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀮𑀧𑀢𑀺. 𑀬𑁂𑀲𑀻𑀥 𑀦𑀢𑁆𑀣𑀻𑀢𑀺 𑀬𑁂𑀲𑀁 𑀇𑀥 𑀦𑀢𑁆𑀣𑀺.

𑁮𑁪𑁧. 𑀧𑀯𑀺𑀢𑀓𑁆𑀓𑀦𑁆𑀢𑀺 ‘‘𑀚𑀬𑁄 𑀦𑀼 𑀔𑁄 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀤𑀻𑀦𑀺 𑀯𑀺𑀢𑀓𑁆𑀓𑁂𑀦𑁆𑀢𑁄. 𑀥𑁄𑀦𑁂𑀦 𑀬𑀼𑀕𑀁 𑀲𑀫𑀸𑀕𑀫𑀸𑀢𑀺 𑀥𑀼𑀢𑀓𑀺𑀮𑁂𑀲𑁂𑀦 𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀬𑀼𑀕𑀕𑁆𑀕𑀸𑀳𑀁 𑀲𑀫𑀸𑀧𑀦𑁆𑀦𑁄. 𑀦 𑀳𑀺 𑀢𑁆𑀯𑀁 𑀲𑀓𑁆𑀔𑀲𑀺 𑀲𑀫𑁆𑀧𑀬𑀸𑀢𑀯𑁂𑀢𑀺 𑀓𑁄𑀢𑁆𑀣𑀼𑀓𑀸𑀤𑀬𑁄 𑀯𑀺𑀬 𑀲𑀻𑀳𑀸𑀤𑀻𑀳𑀺, 𑀥𑁄𑀦𑁂𑀦 𑀲𑀳 𑀬𑀼𑀕𑀁 𑀕𑀳𑁂𑀢𑁆𑀯𑀸 𑀏𑀓𑀧𑀤𑀫𑁆𑀧𑀺 𑀲𑀫𑁆𑀧𑀬𑀸𑀢𑀼𑀁 𑀬𑀼𑀕𑀕𑁆𑀕𑀸𑀳𑀫𑁂𑀯 𑀯𑀸 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀲𑀻𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀧𑀲𑀽𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁪𑁨. 𑀤𑀺𑀲𑁆𑀯𑀸𑀦 𑀢𑀡𑁆𑀳𑀦𑁆𑀢𑀺 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀧𑀘𑁆𑀘𑀽𑀲𑀲𑀫𑀬𑁂 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀓𑀼𑀭𑀽𑀲𑀼 𑀓𑀫𑁆𑀫𑀸𑀲𑀥𑀫𑁆𑀫𑀦𑀺𑀕𑀫𑀯𑀸𑀲𑀺𑀦𑁄 𑀫𑀸𑀕𑀡𑁆𑀟𑀺𑀬𑀲𑁆𑀲 𑀦𑀸𑀫 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀧𑀚𑀸𑀧𑀢𑀺𑀓𑀲𑁆𑀲 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀢𑀸𑀯𑀤𑁂𑀯 𑀲𑀸𑀯𑀢𑁆𑀣𑀺𑀢𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀫𑁆𑀫𑀸𑀲𑀥𑀫𑁆𑀫𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀦𑀺𑀲𑀻𑀤𑀺 𑀲𑀼𑀯𑀡𑁆𑀡𑁄𑀪𑀸𑀲𑀁 𑀫𑀼𑀜𑁆𑀘𑀫𑀸𑀦𑁄. 𑀫𑀸𑀕𑀡𑁆𑀟𑀺𑀬𑁄𑀧𑀺 𑀢𑀗𑁆𑀔𑀡𑀁 𑀢𑀢𑁆𑀣 𑀫𑀼𑀔𑀥𑁄𑀯𑀦𑀢𑁆𑀣𑀁 𑀕𑀢𑁄 𑀲𑀼𑀯𑀡𑁆𑀡𑁄𑀪𑀸𑀲𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀇𑀢𑁄 𑀘𑀺𑀢𑁄 𑀘 𑀧𑁂𑀓𑁆𑀔𑀫𑀸𑀦𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀢𑀲𑁆𑀲 𑀓𑀺𑀭 𑀥𑀻𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀸, 𑀢𑀁 𑀩𑀳𑀽 𑀔𑀢𑁆𑀢𑀺𑀬𑀓𑀼𑀫𑀸𑀭𑀸𑀤𑀬𑁄 𑀯𑀸𑀭𑀬𑀦𑁆𑀢𑀸 𑀦 𑀮𑀪𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀏𑀯𑀁𑀮𑀤𑁆𑀥𑀺𑀓𑁄 𑀳𑁄𑀢𑀺 ‘‘𑀲𑀫𑀡𑀲𑁆𑀲𑁂𑀯 𑀦𑀁 𑀲𑀼𑀯𑀡𑁆𑀡𑀯𑀡𑁆𑀡𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑁂 𑀥𑀻𑀢𑀸𑀬 𑀲𑀫𑀸𑀦𑀯𑀡𑁆𑀡𑁄, 𑀇𑀫𑀲𑁆𑀲 𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀲𑁆𑀫𑀸 𑀤𑀺𑀲𑁆𑀯𑀸𑀯 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀲𑁄 𑀯𑁂𑀕𑁂𑀦 𑀖𑀭𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀁 𑀆𑀳 𑁋 ‘‘𑀪𑁄𑀢𑀺 𑀪𑁄𑀢𑀺 𑀫𑀬𑀸 𑀥𑀻𑀢𑀸𑀬 𑀲𑀫𑀸𑀦𑀯𑀡𑁆𑀡𑁄 𑀧𑀼𑀭𑀺𑀲𑁄 𑀤𑀺𑀝𑁆𑀞𑁄, 𑀅𑀮𑀗𑁆𑀓𑀭𑁄𑀳𑀺 𑀤𑀸𑀭𑀺𑀓𑀁, 𑀢𑀲𑁆𑀲 𑀦𑀁 𑀤𑀲𑁆𑀲𑀸𑀫𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑀺𑀬𑀸 𑀤𑀸𑀭𑀺𑀓𑀁 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀯𑀢𑁆𑀣𑀧𑀼𑀧𑁆𑀨𑀸𑀮𑀗𑁆𑀓𑀸𑀭𑀸𑀤𑀻𑀳𑀺 𑀅𑀮𑀗𑁆𑀓𑀭𑁄𑀦𑁆𑀢𑀺𑀬𑀸 𑀏𑀯 𑀪𑀕𑀯𑀢𑁄 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸 𑀲𑀫𑁆𑀧𑀢𑁆𑀢𑀸. 𑀅𑀣 𑀪𑀕𑀯𑀸 𑀓𑀫𑁆𑀫𑀸𑀲𑀥𑀫𑁆𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺.

𑀢𑁂𑀧𑀺 𑀔𑁄 𑀥𑀻𑀢𑀭𑀁 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀦𑀺𑀲𑀺𑀦𑁆𑀦𑁄𑀓𑀸𑀲𑀁 𑀅𑀕𑀫𑀁𑀲𑀼. 𑀢𑀢𑁆𑀣 𑀪𑀕𑀯𑀦𑁆𑀢𑀁 𑀅𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀻 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀦𑁆𑀢𑀻 𑀪𑀕𑀯𑀢𑁄 𑀦𑀺𑀲𑀚𑁆𑀚𑀝𑁆𑀞𑀸𑀦𑀁 𑀢𑀺𑀡𑀲𑀦𑁆𑀣𑀸𑀭𑀓𑀁 𑀅𑀤𑁆𑀤𑀲. 𑀩𑀼𑀤𑁆𑀥𑀸𑀦𑀜𑁆𑀘 𑀅𑀥𑀺𑀝𑁆𑀞𑀸𑀦𑀩𑀮𑁂𑀦 𑀦𑀺𑀲𑀺𑀦𑁆𑀦𑁄𑀓𑀸𑀲𑁄 𑀧𑀤𑀦𑀺𑀓𑁆𑀔𑁂𑀧𑁄 𑀘 𑀅𑀩𑁆𑀬𑀸𑀓𑀼𑀮𑀸 𑀳𑁄𑀦𑁆𑀢𑀺. 𑀲𑀸 𑀩𑁆𑀭𑀸𑀳𑁆𑀫𑀡𑀁 𑀆𑀳 𑁋 ‘‘𑀏𑀲, 𑀩𑁆𑀭𑀸𑀳𑁆𑀫𑀡, 𑀢𑀲𑁆𑀲 𑀢𑀺𑀡𑀲𑀦𑁆𑀣𑀸𑀭𑁄’’𑀢𑀺? ‘‘𑀆𑀫, 𑀪𑁄𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀅𑀫𑁆𑀳𑀸𑀓𑀁 𑀆𑀕𑀫𑀦𑀓𑀫𑁆𑀫𑀁 𑀦 𑀲𑀫𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. ‘‘𑀓𑀲𑁆𑀫𑀸 𑀪𑁄𑀢𑀻’’𑀢𑀺? ‘‘𑀧𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀅𑀩𑁆𑀬𑀸𑀓𑀼𑀮𑁄 𑀢𑀺𑀡𑀲𑀦𑁆𑀣𑀸𑀭𑁄, 𑀦𑁂𑀲𑁄 𑀓𑀸𑀫𑀪𑁄𑀕𑀺𑀦𑁄 𑀧𑀭𑀺𑀪𑀼𑀢𑁆𑀢𑁄’’𑀢𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀫𑀸, 𑀪𑁄𑀢𑀺 𑀫𑀗𑁆𑀕𑀮𑁂 𑀧𑀭𑀺𑀬𑁂𑀲𑀺𑀬𑀫𑀸𑀦𑁂 𑀅𑀯𑀫𑀗𑁆𑀕𑀮𑀁 𑀅𑀪𑀡𑀻’’𑀢𑀺 𑀆𑀳. 𑀧𑀼𑀦𑀧𑀺 𑀩𑁆𑀭𑀸𑀳𑁆𑀫𑀡𑀻 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑀻 𑀪𑀕𑀯𑀢𑁄 𑀧𑀤𑀦𑀺𑀓𑁆𑀔𑁂𑀧𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀆𑀳 ‘‘𑀅𑀬𑀁 𑀢𑀲𑁆𑀲 𑀧𑀤𑀦𑀺𑀓𑁆𑀔𑁂𑀧𑁄’’𑀢𑀺? ‘‘𑀆𑀫, 𑀪𑁄𑀢𑀻’’𑀢𑀺. ‘‘𑀧𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀧𑀤𑀦𑀺𑀓𑁆𑀔𑁂𑀧𑀁, 𑀦𑀸𑀬𑀁 𑀲𑀢𑁆𑀢𑁄 𑀓𑀸𑀫𑁂𑀲𑀼 𑀕𑀥𑀺𑀢𑁄’’𑀢𑀺. ‘‘𑀓𑀣𑀁 𑀢𑁆𑀯𑀁 𑀪𑁄𑀢𑀺 𑀚𑀸𑀦𑀸𑀲𑀻’’𑀢𑀺 𑀘 𑀯𑀼𑀢𑁆𑀢𑀸 𑀅𑀢𑁆𑀢𑀦𑁄 𑀜𑀸𑀡𑀩𑀮𑀁 𑀤𑀲𑁆𑀲𑁂𑀦𑁆𑀢𑀻 𑀆𑀳 𑁋

‘‘𑀭𑀢𑁆𑀢𑀲𑁆𑀲 𑀳𑀺 𑀉𑀓𑁆𑀓𑀼𑀝𑀺𑀓𑀁 𑀧𑀤𑀁 𑀪𑀯𑁂,

𑀤𑀼𑀝𑁆𑀞𑀲𑁆𑀲 𑀳𑁄𑀢𑀺 𑀅𑀦𑀼𑀓𑀟𑁆𑀠𑀺𑀢𑀁 𑀧𑀤𑀁;

𑀫𑀽𑀴𑁆𑀳𑀲𑁆𑀲 𑀳𑁄𑀢𑀺 𑀲𑀳𑀲𑀸𑀦𑀼𑀧𑀻𑀴𑀺𑀢𑀁,

𑀯𑀺𑀯𑀝𑁆𑀝𑀘𑁆𑀙𑀤𑀲𑁆𑀲 𑀇𑀤𑀫𑀻𑀤𑀺𑀲𑀁 𑀧𑀤’’𑀦𑁆𑀢𑀺. (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁬𑁦-𑁨𑁬𑁧; 𑀥. 𑀧. 𑀅𑀝𑁆𑀞. 𑁧.𑁨 𑀲𑀸𑀫𑀸𑀯𑀢𑀻𑀯𑀢𑁆𑀣𑀼; 𑀯𑀺𑀲𑀼𑀤𑁆𑀥𑀺. 𑁧.𑁪𑁫);

𑀅𑀬𑀜𑁆𑀘𑀭𑀳𑀺 𑀢𑁂𑀲𑀁 𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀅𑀣 𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀢𑀫𑁂𑀯 𑀯𑀦𑀲𑀡𑁆𑀟𑀁 𑀆𑀕𑀢𑁄. 𑀩𑁆𑀭𑀸𑀳𑁆𑀫𑀡𑀻 𑀪𑀕𑀯𑀢𑁄 𑀯𑀭𑀮𑀓𑁆𑀔𑀡𑀔𑀘𑀺𑀢𑀁 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑀁 𑀭𑀽𑀧𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀆𑀳 𑁋 ‘‘𑀏𑀲 𑀢𑀬𑀸, 𑀩𑁆𑀭𑀸𑀳𑁆𑀫𑀡, 𑀤𑀺𑀝𑁆𑀞𑁄’’𑀢𑀺? ‘‘𑀆𑀫 𑀪𑁄𑀢𑀻’’𑀢𑀺. ‘‘𑀆𑀕𑀢𑀓𑀫𑁆𑀫𑀁 𑀦 𑀲𑀫𑁆𑀧𑀚𑁆𑀚𑀺𑀲𑁆𑀲𑀢𑁂𑀯, 𑀏𑀯𑀭𑀽𑀧𑁄 𑀦𑀸𑀫 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺. 𑀢𑁂𑀲𑀁 𑀏𑀯𑀁 𑀯𑀤𑀦𑁆𑀢𑀸𑀦𑀜𑁆𑀜𑁂𑀯 𑀪𑀕𑀯𑀸 𑀢𑀺𑀡𑀲𑀦𑁆𑀣𑀸𑀭𑀓𑁂 𑀦𑀺𑀲𑀻𑀤𑀺. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀥𑀻𑀢𑀭𑀁 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀓𑀫𑀡𑁆𑀟𑀮𑀼𑀁 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑁄, 𑀧𑀩𑁆𑀩𑀚𑀺𑀢, 𑀢𑁆𑀯𑀜𑁆𑀘 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀬𑀜𑁆𑀘 𑀤𑀸𑀭𑀺𑀓𑀸, 𑀅𑀦𑀼𑀘𑁆𑀙𑀯𑀺𑀓𑀸 𑀏𑀲𑀸 𑀢𑀯, 𑀇𑀫𑀸𑀳𑀁 𑀪𑁄𑀢𑁄 𑀪𑀭𑀺𑀬𑀁 𑀧𑁄𑀲𑀸𑀯𑀦𑀢𑁆𑀣𑀸𑀬 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀤𑀸𑀢𑀼𑀓𑀸𑀫𑁄 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀁 𑀅𑀦𑀸𑀮𑀧𑀺𑀢𑁆𑀯𑀸 𑀅𑀜𑁆𑀜𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀫𑀸𑀦𑁄 𑀯𑀺𑀬 ‘‘𑀤𑀺𑀲𑁆𑀯𑀸𑀦 𑀢𑀡𑁆𑀳’’𑀦𑁆𑀢𑀺 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀦𑀸𑀦𑀸𑀭𑀽𑀧𑀸𑀦𑀺 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀅𑀪𑀺𑀓𑀸𑀫𑀫𑀸𑀕𑀢𑀁 𑀫𑀸𑀭𑀥𑀻𑀢𑀭𑀁 𑀤𑀺𑀲𑁆𑀯𑀸𑀦 𑀢𑀡𑁆𑀳𑀁 𑀅𑀭𑀢𑀺𑀁 𑀭𑀕𑀜𑁆𑀘 𑀙𑀦𑁆𑀤𑀫𑀢𑁆𑀢𑀫𑁆𑀧𑀺 𑀫𑁂 𑀫𑁂𑀣𑀼𑀦𑀲𑁆𑀫𑀺𑀁 𑀦𑀸𑀳𑁄𑀲𑀺, 𑀓𑀺𑀫𑁂𑀯𑀺𑀤𑀁 𑀇𑀫𑀺𑀲𑁆𑀲𑀸 𑀤𑀸𑀭𑀺𑀓𑀸𑀬 𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑀁 𑀭𑀽𑀧𑀁 𑀤𑀺𑀲𑁆𑀯𑀸 𑀪𑀯𑀺𑀲𑁆𑀲𑀢𑀺 𑀲𑀩𑁆𑀩𑀣𑀸 𑀧𑀸𑀤𑀸𑀧𑀺 𑀦𑀁 𑀲𑀫𑁆𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑁂, 𑀓𑀼𑀢𑁄𑀦𑁂𑀦 𑀲𑀁𑀯𑀲𑀺𑀢𑀼𑀦𑁆𑀢𑀺.

𑁮𑁪𑁩. 𑀢𑀢𑁄 𑀫𑀸𑀕𑀡𑁆𑀟𑀺𑀬𑁄 ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀫𑀸𑀦𑀼𑀲𑀓𑁂 𑀓𑀸𑀫𑁂 𑀧𑀳𑀸𑀬 𑀤𑀺𑀩𑁆𑀩𑀓𑀸𑀫𑀢𑁆𑀣𑀸𑀬 𑀧𑀩𑁆𑀩𑀚𑀦𑁆𑀢𑀺, 𑀅𑀬𑀜𑁆𑀘 𑀤𑀺𑀩𑁆𑀩𑁂𑀧𑀺 𑀓𑀸𑀫𑁂 𑀦 𑀇𑀘𑁆𑀙𑀢𑀺, 𑀇𑀤𑀫𑁆𑀧𑀺 𑀇𑀢𑁆𑀣𑀺𑀭𑀢𑀦𑀁, 𑀓𑀸 𑀦𑀼 𑀅𑀲𑁆𑀲 𑀤𑀺𑀝𑁆𑀞𑀻’’𑀢𑀺 𑀧𑀼𑀘𑁆𑀙𑀺𑀢𑀼𑀁 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀏𑀢𑀸𑀤𑀺𑀲𑀁 𑀘𑁂 𑀭𑀢𑀦𑀦𑁆𑀢𑀺 𑀤𑀺𑀩𑁆𑀩𑀺𑀢𑁆𑀣𑀺𑀭𑀢𑀦𑀁 𑀲𑀦𑁆𑀥𑀸𑀬 𑀪𑀡𑀢𑀺, 𑀦𑀸𑀭𑀺𑀦𑁆𑀢𑀺 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀲𑀦𑁆𑀥𑀸𑀬. 𑀤𑀺𑀝𑁆𑀞𑀺𑀕𑀢𑀁 𑀲𑀻𑀮𑀯𑀢𑀁 𑀦𑀼 𑀚𑀻𑀯𑀺𑀢𑀦𑁆𑀢𑀺 𑀤𑀺𑀝𑁆𑀞𑀺𑀜𑁆𑀘 𑀲𑀻𑀮𑀜𑁆𑀘 𑀯𑀢𑀜𑁆𑀘 𑀚𑀻𑀯𑀺𑀢𑀜𑁆𑀘. 𑀪𑀯𑀽𑀧𑀧𑀢𑁆𑀢𑀺𑀜𑁆𑀘 𑀯𑀤𑁂𑀲𑀺 𑀓𑀻𑀤𑀺𑀲𑀦𑁆𑀢𑀺 𑀅𑀢𑁆𑀢𑀦𑁄 𑀪𑀯𑀽𑀧𑀧𑀢𑁆𑀢𑀺𑀜𑁆𑀘 𑀓𑀻𑀤𑀺𑀲𑀁 𑀯𑀤𑀲𑀻𑀢𑀺.

𑁮𑁪𑁪. 𑀇𑀢𑁄 𑀧𑀭𑀸 𑀤𑁆𑀯𑁂 𑀕𑀸𑀣𑀸 𑀯𑀺𑀲𑀚𑁆𑀚𑀦𑀧𑀼𑀘𑁆𑀙𑀸𑀦𑀬𑁂𑀦 𑀧𑀯𑀢𑁆𑀢𑀢𑁆𑀢𑀸 𑀧𑀸𑀓𑀝𑀲𑀫𑁆𑀩𑀦𑁆𑀥𑀸𑀬𑁂𑀯. 𑀢𑀸𑀲𑀼 𑀧𑀞𑀫𑀕𑀸𑀣𑀸𑀬 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑀲𑁆𑀲 𑀫𑀬𑁆𑀳𑀁, 𑀫𑀸𑀕𑀡𑁆𑀟𑀺𑀬, 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑀺𑀦𑀺𑀢𑁆𑀯𑀸 ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀏𑀯𑀁 𑀇𑀤𑀁 𑀯𑀤𑀸𑀫𑀻𑀢𑀺 𑀲𑀫𑀼𑀕𑁆𑀕𑀳𑀺𑀢𑀁 𑀦 𑀳𑁄𑀢𑀺 𑀦𑀢𑁆𑀣𑀺 𑀦 𑀯𑀺𑀚𑁆𑀚𑀢𑀺. 𑀓𑀺𑀁𑀓𑀸𑀭𑀡𑀸? 𑀅𑀳𑀜𑁆𑀳𑀺 𑀧𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑀻𑀲𑀼 𑀆𑀤𑀻𑀦𑀯𑀁 𑀓𑀜𑁆𑀘𑀺 𑀤𑀺𑀝𑁆𑀞𑀺𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀯𑀺𑀘𑀺𑀦𑀦𑁆𑀢𑁄 𑀅𑀚𑁆𑀛𑀢𑁆𑀢𑀁 𑀭𑀸𑀕𑀸𑀤𑀻𑀦𑀁 𑀲𑀦𑁆𑀢𑀺𑀪𑀸𑀯𑁂𑀦 𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀫𑁂𑀯 𑀅𑀤𑁆𑀤𑀲𑀦𑁆𑀢𑀺.

𑁮𑁪𑁫. 𑀤𑀼𑀢𑀺𑀬𑀕𑀸𑀣𑀸𑀬 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀸𑀦𑀺𑀫𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀢𑁂𑀳𑀺 𑀢𑁂𑀳𑀺 𑀲𑀢𑁆𑀢𑁂𑀳𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀕𑀳𑀺𑀢𑀢𑁆𑀢𑀸 𑀯𑀺𑀦𑀺𑀘𑁆𑀙𑀬𑀸𑀢𑀺 𑀘 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀅𑀪𑀺𑀲𑀗𑁆𑀔𑀢𑀪𑀸𑀯𑀸𑀤𑀺𑀦𑀸 𑀦𑀬𑁂𑀦 𑀧𑀓𑀧𑁆𑀧𑀺𑀢𑀸𑀦𑀺 𑀘𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀢𑁆𑀯𑀁 𑀫𑀼𑀦𑀺 𑀤𑀺𑀝𑁆𑀞𑀺𑀕𑀢𑀥𑀫𑁆𑀫𑁂 𑀅𑀕𑁆𑀕𑀳𑁂𑀢𑁆𑀯𑀸 𑀅𑀚𑁆𑀛𑀢𑁆𑀢𑀲𑀦𑁆𑀢𑀻𑀢𑀺 𑀬𑀫𑁂𑀢𑀫𑀢𑁆𑀣𑀁 𑀩𑁆𑀭𑀽𑀲𑀺, 𑀆𑀘𑀺𑀓𑁆𑀔 𑀫𑁂, 𑀓𑀣𑀁 𑀦𑀼 𑀥𑀻𑀭𑁂𑀳𑀺 𑀧𑀯𑁂𑀤𑀺𑀢𑀁 𑀓𑀣𑀁 𑀧𑀓𑀸𑀲𑀺𑀢𑀁 𑀥𑀻𑀭𑁂𑀳𑀺 𑀢𑀁 𑀧𑀤𑀦𑁆𑀢𑀺.

𑁮𑁪𑁬. 𑀅𑀣𑀲𑁆𑀲 𑀪𑀕𑀯𑀸 𑀬𑀣𑀸 𑀬𑁂𑀦 𑀉𑀧𑀸𑀬𑁂𑀦 𑀢𑀁 𑀧𑀤𑀁 𑀥𑀻𑀭𑁂𑀳𑀺 𑀧𑀓𑀸𑀲𑀺𑀢𑀁, 𑀢𑀁 𑀉𑀧𑀸𑀬𑀁 𑀲𑀧𑀝𑀺𑀧𑀓𑁆𑀔𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀤𑀺𑀝𑁆𑀞𑀺𑀬𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 ‘‘𑀦 𑀤𑀺𑀝𑁆𑀞𑀺𑀬𑀸’’𑀢𑀺𑀆𑀤𑀻𑀳𑀺 𑀤𑀺𑀝𑁆𑀞𑀺𑀲𑀼𑀢𑀺𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑀩𑀸𑀳𑀺𑀭𑀲𑀻𑀮𑀩𑁆𑀩𑀢𑀸𑀦𑀺 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀲𑀼𑀤𑁆𑀥𑀺𑀫𑀸𑀳𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀆𑀳-𑀲𑀤𑁆𑀤𑀁 𑀲𑀩𑁆𑀩𑀢𑁆𑀣 𑀦𑀓𑀸𑀭𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀧𑀼𑀭𑀺𑀲𑀩𑁆𑀬𑀢𑁆𑀢𑀬𑀁 𑀓𑀢𑁆𑀯𑀸 ‘‘𑀤𑀺𑀝𑁆𑀞𑀺𑀬𑀸 𑀲𑀼𑀤𑁆𑀥𑀺𑀁 𑀦𑀸𑀳𑀁 𑀓𑀣𑁂𑀫𑀻’’𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀢𑁆𑀢𑀭𑀧𑀤𑁂𑀲𑀼𑀧𑀺. 𑀢𑀢𑁆𑀣 𑀘 𑀅𑀤𑀺𑀝𑁆𑀞𑀺𑀬𑀸 𑀦𑀸𑀳𑀸𑀢𑀺 𑀤𑀲𑀯𑀢𑁆𑀣𑀼𑀓𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀯𑀺𑀦𑀸 𑀦 𑀓𑀣𑁂𑀫𑀺. 𑀢𑀣𑀸 𑀅𑀲𑁆𑀲𑀼𑀢𑀺𑀬𑀸𑀢𑀺 𑀦𑀯𑀗𑁆𑀕𑀁 𑀲𑀯𑀦𑀁 𑀯𑀺𑀦𑀸. 𑀅𑀜𑀸𑀡𑀸𑀢𑀺 𑀓𑀫𑁆𑀫𑀲𑁆𑀲 𑀓𑀢𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀁 𑀯𑀺𑀦𑀸. 𑀅𑀲𑀻𑀮𑀢𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀁 𑀯𑀺𑀦𑀸. 𑀅𑀩𑁆𑀩𑀢𑀸𑀢𑀺 𑀥𑀼𑀢𑀗𑁆𑀕𑀯𑀢𑀁 𑀯𑀺𑀦𑀸. 𑀦𑁄𑀧𑀺 𑀢𑁂𑀦𑀸𑀢𑀺 𑀢𑁂𑀲𑀼 𑀏𑀓𑀫𑁂𑀓𑁂𑀦 𑀤𑀺𑀝𑁆𑀞𑀺𑀆𑀤𑀺𑀫𑀢𑁆𑀢𑁂𑀦𑀸𑀧𑀺 𑀦𑁄 𑀓𑀣𑁂𑀫𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁂 𑀘 𑀦𑀺𑀲𑁆𑀲𑀚𑁆𑀚 𑀅𑀦𑀼𑀕𑁆𑀕𑀳𑀸𑀬𑀸𑀢𑀺 𑀏𑀢𑁂 𑀘 𑀧𑀼𑀭𑀺𑀫𑁂 𑀤𑀺𑀝𑁆𑀞𑀺𑀆𑀤𑀺𑀪𑁂𑀤𑁂 𑀓𑀡𑁆𑀳𑀧𑀓𑁆𑀔𑀺𑀬𑁂 𑀥𑀫𑁆𑀫𑁂 𑀲𑀫𑀼𑀕𑁆𑀖𑀸𑀢𑀓𑀭𑀡𑁂𑀦 𑀦𑀺𑀲𑁆𑀲𑀚𑁆𑀚, 𑀧𑀘𑁆𑀙𑀺𑀫𑁂 𑀅𑀤𑀺𑀝𑁆𑀞𑀺𑀆𑀤𑀺𑀪𑁂𑀤𑁂 𑀲𑀼𑀓𑁆𑀓𑀧𑀓𑁆𑀔𑀺𑀬𑁂 𑀅𑀢𑀫𑁆𑀫𑀬𑀢𑀸𑀧𑀚𑁆𑀚𑀦𑁂𑀦 𑀅𑀦𑀼𑀕𑁆𑀕𑀳𑀸𑀬. 𑀲𑀦𑁆𑀢𑁄 𑀅𑀦𑀺𑀲𑁆𑀲𑀸𑀬 𑀪𑀯𑀁 𑀦 𑀚𑀧𑁆𑀧𑁂𑀢𑀺 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀭𑀸𑀕𑀸𑀤𑀺𑀯𑀽𑀧𑀲𑀫𑁂𑀦 𑀲𑀦𑁆𑀢𑁄 𑀘𑀓𑁆𑀔𑀸𑀤𑀻𑀲𑀼 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀦𑀺𑀲𑁆𑀲𑀸𑀬 𑀏𑀓𑀫𑁆𑀧𑀺 𑀪𑀯𑀁 𑀅𑀧𑀺𑀳𑁂𑀢𑀼𑀁 𑀅𑀧𑀢𑁆𑀣𑁂𑀢𑀼𑀁 𑀲𑀫𑀢𑁆𑀣𑁄 𑀲𑀺𑀬𑀸, 𑀅𑀬𑀫𑀲𑁆𑀲 𑀅𑀚𑁆𑀛𑀢𑁆𑀢𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁪𑁭. 𑀏𑀯𑀁 𑀯𑀼𑀢𑁆𑀢𑁂 𑀯𑀘𑀦𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀫𑀸𑀕𑀡𑁆𑀟𑀺𑀬𑁄 ‘‘𑀦𑁄 𑀘𑁂 𑀓𑀺𑀭𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀤𑀺𑀝𑁆𑀞𑀸𑀤𑀻𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀓𑀡𑁆𑀳𑀧𑀓𑁆𑀔𑀺𑀬𑀸𑀦𑀺𑀬𑁂𑀯 𑀧𑀦 𑀲𑀦𑁆𑀥𑀸𑀬 𑀉𑀪𑀬𑀢𑁆𑀭𑀸𑀧𑀺 𑀆𑀳. 𑀆𑀳-𑀲𑀤𑁆𑀤𑀁 𑀧𑀦 𑀦𑁄𑀘𑁂𑀓𑀺𑀭-𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 ‘‘𑀦𑁄 𑀘𑁂 𑀓𑀺𑀭𑀸𑀳 𑀦𑁄 𑀘𑁂 𑀓𑀺𑀭 𑀓𑀣𑁂𑀲𑀻’’𑀢𑀺 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑁄𑀫𑀼𑀳𑀦𑁆𑀢𑀺 𑀅𑀢𑀺𑀫𑀽𑀴𑁆𑀳𑀁, 𑀫𑁄𑀳𑀦𑀁 𑀯𑀸. 𑀧𑀘𑁆𑀘𑁂𑀦𑁆𑀢𑀻𑀢𑀺 𑀚𑀸𑀦𑀦𑁆𑀢𑀺.

𑁮𑁪𑁮. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀧𑀼𑀘𑁆𑀙𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀤𑀺𑀝𑁆𑀞𑀺𑀜𑁆𑀘 𑀦𑀺𑀲𑁆𑀲𑀸𑀬𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑁆𑀯𑀁, 𑀫𑀸𑀕𑀡𑁆𑀟𑀺𑀬, 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀧𑀼𑀦𑀧𑁆𑀧𑀼𑀦𑀁 𑀧𑀼𑀘𑁆𑀙𑀫𑀸𑀦𑁄 𑀬𑀸𑀦𑀺 𑀢𑁂 𑀤𑀺𑀝𑁆𑀞𑀺𑀕𑀢𑀸𑀦𑀺 𑀲𑀫𑀼𑀕𑁆𑀕𑀳𑀺𑀢𑀸𑀦𑀺, 𑀢𑁂𑀲𑁆𑀯𑁂𑀯 𑀲𑀫𑀼𑀕𑁆𑀕𑀳𑀻𑀢𑁂𑀲𑀼 𑀏𑀯𑀁 𑀧𑀫𑁄𑀳𑀁 𑀆𑀕𑀢𑁄, 𑀇𑀢𑁄 𑀘 𑀫𑀬𑀸 𑀯𑀼𑀢𑁆𑀢𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀢𑁄 𑀧𑀝𑀺𑀧𑀢𑁆𑀢𑀺𑀢𑁄 𑀥𑀫𑁆𑀫𑀤𑁂𑀲𑀦𑀢𑁄 𑀯𑀸 𑀅𑀡𑀼𑀫𑁆𑀧𑀺 𑀬𑀼𑀢𑁆𑀢𑀲𑀜𑁆𑀜𑀁 𑀦 𑀧𑀲𑁆𑀲𑀲𑀺, 𑀢𑁂𑀦 𑀓𑀸𑀭𑀡𑁂𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀁 𑀫𑁄𑀫𑀼𑀳𑀢𑁄 𑀧𑀲𑁆𑀲𑀲𑀻𑀢𑀺.

𑁮𑁪𑁯. 𑀏𑀯𑀁 𑀲𑀫𑀼𑀕𑁆𑀕𑀳𑀺𑀢𑁂𑀲𑀼 𑀧𑀫𑁄𑀳𑁂𑀦 𑀫𑀸𑀕𑀡𑁆𑀟𑀺𑀬𑀲𑁆𑀲 𑀯𑀺𑀯𑀸𑀤𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀼 𑀅𑀜𑁆𑀜𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀯𑀺𑀕𑀢𑀧𑁆𑀧𑀫𑁄𑀳𑀲𑁆𑀲 𑀅𑀢𑁆𑀢𑀦𑁄 𑀦𑀺𑀩𑁆𑀩𑀺𑀯𑀸𑀤𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁄 𑀯𑀺𑀲𑁂𑀲𑀻’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀏𑀯𑀁 𑀢𑀺𑀯𑀺𑀥𑀫𑀸𑀦𑁂𑀦 𑀯𑀸 𑀤𑀺𑀝𑁆𑀞𑀺𑀬𑀸 𑀯𑀸 𑀫𑀜𑁆𑀜𑀢𑀺, 𑀲𑁄 𑀢𑁂𑀦 𑀫𑀸𑀦𑁂𑀦 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀢𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀺𑀯𑀤𑁂𑀬𑁆𑀬. 𑀬𑁄 𑀧𑀦 𑀅𑀫𑁆𑀳𑀸𑀤𑀺𑀲𑁄 𑀇𑀫𑀸𑀲𑀼 𑀢𑀻𑀲𑀼 𑀯𑀺𑀥𑀸𑀲𑀼 𑀅𑀯𑀺𑀓𑀫𑁆𑀧𑀫𑀸𑀦𑁄, 𑀲𑀫𑁄 𑀯𑀺𑀲𑁂𑀲𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀺, 𑀦 𑀘 𑀳𑀻𑀦𑁄𑀢𑀺 𑀧𑀸𑀞𑀲𑁂𑀲𑁄.

𑁮𑁫𑁦. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀲𑀘𑁆𑀘𑀦𑁆𑀢𑀺 𑀲𑁄𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀲𑁄 𑀏𑀯𑀭𑀽𑀧𑁄 𑀧𑀳𑀻𑀦𑀫𑀸𑀦𑀤𑀺𑀝𑁆𑀞𑀺𑀓𑁄 𑀫𑀸𑀤𑀺𑀲𑁄 𑀩𑀸𑀳𑀺𑀢𑀧𑀸𑀧𑀢𑁆𑀢𑀸𑀤𑀺𑀦𑀸 𑀦𑀬𑁂𑀦 𑀩𑁆𑀭𑀸𑀳𑁆𑀫𑀡𑁄 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀓𑀺𑀁 𑀯𑀤𑁂𑀬𑁆𑀬 𑀓𑀺𑀁 𑀯𑀢𑁆𑀣𑀼𑀁 𑀪𑀡𑁂𑀬𑁆𑀬, 𑀓𑁂𑀦 𑀯𑀸 𑀓𑀸𑀭𑀡𑁂𑀦 𑀪𑀡𑁂𑀬𑁆𑀬, ‘‘𑀫𑀬𑁆𑀳𑀁 𑀲𑀘𑁆𑀘𑀁, 𑀢𑀼𑀬𑁆𑀳𑀁 𑀫𑀼𑀲𑀸’’𑀢𑀺 𑀯𑀸 𑀓𑁂𑀦 𑀫𑀸𑀦𑁂𑀦 𑀤𑀺𑀝𑁆𑀞𑀺𑀬𑀸 𑀧𑀼𑀕𑁆𑀕𑀮𑁂𑀦 𑀯𑀸 𑀯𑀺𑀯𑀤𑁂𑀬𑁆𑀬? 𑀬𑀲𑁆𑀫𑀺𑀁 𑀫𑀸𑀤𑀺𑀲𑁂 𑀔𑀻𑀡𑀸𑀲𑀯𑁂 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀧𑀯𑀢𑁆𑀢𑀺𑀬𑀸 𑀲𑀫𑀁 𑀯𑀸, 𑀇𑀢𑀭𑀤𑁆𑀯𑀬𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀸 𑀯𑀺𑀲𑀫𑀁 𑀯𑀸 𑀫𑀜𑁆𑀜𑀺𑀢𑀁 𑀦𑀢𑁆𑀣𑀺, 𑀲𑁄 𑀲𑀫𑀸𑀦𑀸𑀤𑀻𑀲𑀼 𑀓𑁂𑀦 𑀯𑀸𑀤𑀁 𑀧𑀝𑀺𑀲𑀁𑀬𑀼𑀚𑁂𑀬𑁆𑀬 𑀧𑀝𑀺𑀧𑁆𑀨𑀭𑁂𑀬𑁆𑀬𑀸𑀢𑀺. 𑀦𑀦𑀼 𑀏𑀓𑀁𑀲𑁂𑀦𑁂𑀯 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑁋 𑀑𑀓𑀁 𑀧𑀳𑀸𑀬𑀸𑀢𑀺 𑀕𑀸𑀣𑀸?

𑁮𑁫𑁧. 𑀢𑀢𑁆𑀣 𑀑𑀓𑀁 𑀧𑀳𑀸𑀬𑀸𑀢𑀺 𑀭𑀽𑀧𑀯𑀢𑁆𑀣𑀸𑀤𑀺𑀯𑀺𑀜𑁆𑀜𑀸𑀡𑀲𑁆𑀲 𑀑𑀓𑀸𑀲𑀁 𑀢𑀢𑁆𑀭 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀙𑀟𑁆𑀟𑁂𑀢𑁆𑀯𑀸. 𑀅𑀦𑀺𑀓𑁂𑀢𑀲𑀸𑀭𑀻𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀸𑀤𑀻𑀦𑀺 𑀢𑀡𑁆𑀳𑀸𑀯𑀲𑁂𑀦 𑀅𑀲𑀭𑀦𑁆𑀢𑁄. 𑀕𑀸𑀫𑁂 𑀅𑀓𑀼𑀩𑁆𑀩𑀁 𑀫𑀼𑀦𑀺 𑀲𑀦𑁆𑀣𑀯𑀸𑀦𑀻𑀢𑀺 𑀕𑀸𑀫𑁂 𑀕𑀺𑀳𑀺𑀲𑀦𑁆𑀣𑀯𑀸𑀦𑀺 𑀅𑀓𑀭𑁄𑀦𑁆𑀢𑁄. 𑀓𑀸𑀫𑁂𑀳𑀺 𑀭𑀺𑀢𑁆𑀢𑁄𑀢𑀺 𑀓𑀸𑀫𑁂𑀲𑀼 𑀙𑀦𑁆𑀤𑀭𑀸𑀕𑀸𑀪𑀸𑀯𑁂𑀦 𑀲𑀩𑁆𑀩𑀓𑀸𑀫𑁂𑀳𑀺 𑀧𑀼𑀣𑀼𑀪𑀽𑀢𑁄. 𑀅𑀧𑀼𑀭𑁂𑀓𑁆𑀔𑀭𑀸𑀦𑁄𑀢𑀺 𑀆𑀬𑀢𑀺𑀁 𑀅𑀢𑁆𑀢𑀪𑀸𑀯𑀁 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄. 𑀓𑀣𑀁 𑀦 𑀯𑀺𑀕𑁆𑀕𑀬𑁆𑀳 𑀚𑀦𑁂𑀦 𑀓𑀬𑀺𑀭𑀸𑀢𑀺 𑀚𑀦𑁂𑀦 𑀲𑀤𑁆𑀥𑀺𑀁 𑀯𑀺𑀕𑁆𑀕𑀸𑀳𑀺𑀓𑀓𑀣𑀁 𑀦 𑀓𑀣𑁂𑀬𑁆𑀬. 𑀲𑁄 𑀏𑀯𑀭𑀽𑀧𑁄 𑁋 𑀬𑁂𑀳𑀺 𑀯𑀺𑀯𑀺𑀢𑁆𑀢𑁄𑀢𑀺 𑀕𑀸𑀣𑀸.

𑁮𑁫𑁨. 𑀢𑀢𑁆𑀣 𑀬𑁂𑀳𑀻𑀢𑀺 𑀬𑁂𑀳𑀺 𑀤𑀺𑀝𑁆𑀞𑀺𑀕𑀢𑁂𑀳𑀺. 𑀯𑀺𑀯𑀺𑀢𑁆𑀢𑁄 𑀯𑀺𑀘𑀭𑁂𑀬𑁆𑀬𑀸𑀢𑀺 𑀭𑀺𑀢𑁆𑀢𑁄 𑀘𑀭𑁂𑀬𑁆𑀬. 𑀦 𑀢𑀸𑀦𑀺 𑀉𑀕𑁆𑀕𑀬𑁆𑀳 𑀯𑀤𑁂𑀬𑁆𑀬 𑀦𑀸𑀕𑁄𑀢𑀺 ‘‘𑀆𑀕𑀼𑀁 𑀦 𑀓𑀭𑁄𑀢𑀻’’𑀢𑀺𑀆𑀤𑀺𑀦𑀸 (𑀘𑀽𑀴𑀦𑀺. 𑀪𑀤𑁆𑀭𑀸𑀯𑀼𑀥𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁭𑁦; 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁨) 𑀦𑀬𑁂𑀦 𑀦𑀸𑀕𑁄 𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀦 𑀯𑀤𑁂𑀬𑁆𑀬. 𑀚𑀮𑀫𑁆𑀩𑀼𑀚𑀦𑁆𑀢𑀺 𑀚𑀮𑀲𑀜𑁆𑀜𑀺𑀢𑁂 𑀅𑀫𑁆𑀩𑀼𑀫𑁆𑀳𑀺 𑀚𑀸𑀢𑀁 𑀓𑀡𑁆𑀝𑀓𑀦𑀸𑀴𑀁 𑀯𑀸𑀭𑀺𑀚𑀁, 𑀧𑀤𑀼𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀚𑀮𑁂𑀦 𑀧𑀗𑁆𑀓𑁂𑀦 𑀘 𑀦𑀽𑀧𑀮𑀺𑀢𑁆𑀢𑀦𑁆𑀢𑀺 𑀢𑀁 𑀧𑀤𑀼𑀫𑀁 𑀬𑀣𑀸 𑀚𑀮𑁂𑀦 𑀘 𑀧𑀗𑁆𑀓𑁂𑀦 𑀘 𑀅𑀦𑀼𑀧𑀮𑀺𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀫𑀼𑀦𑀺 𑀲𑀦𑁆𑀢𑀺𑀯𑀸𑀤𑁄 𑀅𑀕𑀺𑀤𑁆𑀥𑁄𑀢𑀺 𑀏𑀯𑀁 𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀯𑀸𑀤𑁄 𑀫𑀼𑀦𑀺 𑀕𑁂𑀥𑀸𑀪𑀸𑀯𑁂𑀦 𑀅𑀕𑀺𑀤𑁆𑀥𑁄. 𑀓𑀸𑀫𑁂 𑀘 𑀮𑁄𑀓𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄𑀢𑀺 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂 𑀅𑀧𑀸𑀬𑀸𑀤𑀺𑀓𑁂 𑀘 𑀮𑁄𑀓𑁂 𑀤𑁆𑀯𑀻𑀳𑀺𑀧𑀺 𑀮𑁂𑀧𑁂𑀳𑀺 𑀅𑀦𑀼𑀧𑀮𑀺𑀢𑁆𑀢𑁄 𑀳𑁄𑀢𑀺.

𑁮𑁫𑁩. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀦 𑀯𑁂𑀤𑀕𑀽𑀢𑀺 𑀕𑀸𑀣𑀸. 𑀢𑀢𑁆𑀣 𑀦 𑀯𑁂𑀤𑀕𑀽 𑀤𑀺𑀝𑁆𑀞𑀺𑀬𑀸𑀬𑀓𑁄𑀢𑀺 𑀘𑀢𑀼𑀫𑀕𑁆𑀕𑀯𑁂𑀤𑀕𑀽 𑀫𑀸𑀤𑀺𑀲𑁄 𑀤𑀺𑀝𑁆𑀞𑀺𑀬𑀸𑀬𑀓𑁄 𑀦 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸 𑀕𑀘𑁆𑀙𑀦𑁆𑀢𑁄 𑀯𑀸, 𑀢𑀁 𑀲𑀸𑀭𑀢𑁄 𑀧𑀘𑁆𑀘𑁂𑀦𑁆𑀢𑁄 𑀯𑀸 𑀦 𑀳𑁄𑀢𑀺. 𑀢𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀬𑀸𑀬𑀢𑀻𑀢𑀺 𑀬𑀸𑀬𑀓𑁄, 𑀓𑀭𑀡𑀯𑀘𑀦𑁂𑀦 𑀤𑀺𑀝𑁆𑀞𑀺𑀬𑀸 𑀬𑀸𑀢𑀻𑀢𑀺 𑀤𑀺𑀝𑁆𑀞𑀺𑀬𑀸𑀬𑀓𑁄. 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑁂𑀦 𑀤𑀺𑀝𑁆𑀞𑀺𑀬𑀸 𑀬𑀸𑀢𑀻𑀢𑀺𑀧𑀺 𑀤𑀺𑀝𑁆𑀞𑀺𑀬𑀸𑀬𑀓𑁄. 𑀦 𑀫𑀼𑀢𑀺𑀬𑀸 𑀲 𑀫𑀸𑀦𑀫𑁂𑀢𑀻𑀢𑀺 𑀫𑀼𑀢𑀭𑀽𑀧𑀸𑀤𑀺𑀪𑁂𑀤𑀸𑀬 𑀫𑀼𑀢𑀺𑀬𑀸𑀧𑀺 𑀲𑁄 𑀫𑀸𑀦𑀁 𑀦 𑀏𑀢𑀺. 𑀦 𑀳𑀺 𑀢𑀫𑁆𑀫𑀬𑁄 𑀲𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀢𑀫𑁆𑀫𑀬𑁄 𑀳𑁄𑀢𑀺 𑀢𑀧𑁆𑀧𑀭𑀸𑀬𑀡𑁄, 𑀅𑀬𑀁 𑀧𑀦 𑀦 𑀢𑀸𑀤𑀺𑀲𑁄. 𑀦 𑀓𑀫𑁆𑀫𑀼𑀦𑀸 𑀦𑁄𑀧𑀺 𑀲𑀼𑀢𑁂𑀦 𑀦𑁂𑀬𑁆𑀬𑁄𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀦𑀸 𑀓𑀫𑁆𑀫𑀼𑀦𑀸 𑀯𑀸 𑀲𑀼𑀢𑀲𑀼𑀤𑁆𑀥𑀺𑀆𑀤𑀺𑀦𑀸 𑀲𑀼𑀢𑁂𑀦 𑀯𑀸 𑀲𑁄 𑀦𑁂𑀢𑀩𑁆𑀩𑁄 𑀦 𑀳𑁄𑀢𑀺. 𑀅𑀦𑀽𑀧𑀦𑀻𑀢𑁄 𑀲 𑀦𑀺𑀯𑁂𑀲𑀦𑁂𑀲𑀽𑀢𑀺 𑀲𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀉𑀧𑀬𑀸𑀦𑀁 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑁂𑀲𑀼 𑀅𑀦𑀽𑀧𑀦𑀻𑀢𑁄. 𑀢𑀲𑁆𑀲 𑀘 𑀏𑀯𑀁𑀯𑀺𑀥𑀲𑁆𑀲 𑁋 𑀲𑀜𑁆𑀜𑀸𑀯𑀺𑀭𑀢𑁆𑀢𑀲𑁆𑀲𑀸𑀢𑀺 𑀕𑀸𑀣𑀸.

𑁮𑁫𑁪. 𑀢𑀢𑁆𑀣 𑀲𑀜𑁆𑀜𑀸𑀯𑀺𑀭𑀢𑁆𑀢𑀲𑁆𑀲𑀸𑀢𑀺 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀪𑀸𑀯𑀦𑀸𑀬 𑀧𑀳𑀻𑀦𑀓𑀸𑀫𑀸𑀤𑀺𑀲𑀜𑁆𑀜𑀲𑁆𑀲. 𑀇𑀫𑀺𑀦𑀸 𑀧𑀤𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀲𑀫𑀣𑀬𑀸𑀦𑀺𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀪𑀸𑀯𑀦𑀸𑀬 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀲𑁆𑀲. 𑀇𑀫𑀺𑀦𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀜𑁆𑀜𑀜𑁆𑀘 𑀤𑀺𑀝𑁆𑀞𑀺𑀜𑁆𑀘 𑀬𑁂 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀖𑀝𑁆𑀝𑀬𑀦𑁆𑀢𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂𑀢𑀺 𑀬𑁂 𑀓𑀸𑀫𑀲𑀜𑁆𑀜𑀸𑀤𑀺𑀓𑀁 𑀲𑀜𑁆𑀜𑀁 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀯𑀺𑀲𑁂𑀲𑀢𑁄 𑀕𑀳𑀝𑁆𑀞𑀸 𑀓𑀸𑀫𑀸𑀥𑀺𑀓𑀭𑀡𑀁, 𑀬𑁂 𑀘 𑀤𑀺𑀝𑁆𑀞𑀺𑀁 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀯𑀺𑀲𑁂𑀲𑀢𑁄 𑀧𑀩𑁆𑀩𑀚𑀺𑀢𑀸 𑀥𑀫𑁆𑀫𑀸𑀥𑀺𑀓𑀭𑀡𑀁 𑀅𑀜𑁆𑀜𑀫𑀜𑁆𑀜𑀁 𑀖𑀝𑁆𑀝𑁂𑀦𑁆𑀢𑀸 𑀯𑀺𑀘𑀭𑀦𑁆𑀢𑀻𑀢𑀺. 𑀲𑁂𑀲𑀫𑁂𑀢𑁆𑀣 𑀬𑀁 𑀅𑀯𑀼𑀢𑁆𑀢𑀁, 𑀢𑀁 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀸𑀳𑁆𑀫𑀡𑁄 𑀘 𑀩𑁆𑀭𑀸𑀳𑁆𑀫𑀡𑀻 𑀘 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫𑁫. 𑀓𑀣𑀁𑀤𑀲𑁆𑀲𑀻𑀢𑀺 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀇𑀢𑁄 𑀧𑀭𑁂𑀲𑀜𑁆𑀘 𑀧𑀜𑁆𑀘𑀦𑁆𑀦𑀁 𑀓𑀮𑀳𑀯𑀺𑀯𑀸𑀤𑀘𑀽𑀴𑀩𑁆𑀬𑀽𑀳𑀫𑀳𑀸𑀩𑁆𑀬𑀽𑀳𑀢𑀼𑀯𑀝𑀓𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀸𑀦𑀁 𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀻𑀬𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀸𑀫𑀜𑁆𑀜𑀢𑁄 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀯𑀺𑀲𑁂𑀲𑀢𑁄 𑀧𑀦 𑀬𑀣𑁂𑀯 𑀢𑀲𑁆𑀫𑀺𑀁 𑀫𑀳𑀸𑀲𑀫𑀬𑁂 𑀭𑀸𑀕𑀘𑀭𑀺𑀢𑀤𑁂𑀯𑀢𑀸𑀦𑀁 𑀲𑀧𑁆𑀧𑀸𑀬𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀻𑀬𑀲𑀼𑀢𑁆𑀢𑀫𑀪𑀸𑀲𑀺, 𑀏𑀯𑀁 𑀢𑀲𑁆𑀫𑀺𑀁𑀬𑁂𑀯 𑀫𑀳𑀸𑀲𑀫𑀬𑁂 ‘‘𑀓𑀺𑀁 𑀦𑀼 𑀔𑁄 𑀧𑀼𑀭𑀸 𑀲𑀭𑀻𑀭𑀪𑁂𑀤𑀸 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀦𑀁 𑀤𑁂𑀯𑀢𑀸𑀦𑀁 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀢𑀸𑀲𑀁 𑀅𑀦𑀼𑀕𑁆𑀕𑀳𑀢𑁆𑀣𑀁 𑀅𑀟𑁆𑀠𑀢𑁂𑀴𑀲𑀪𑀺𑀓𑁆𑀔𑀼𑀲𑀢𑀧𑀭𑀺𑀯𑀸𑀭𑀁 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀆𑀓𑀸𑀲𑁂𑀦 𑀆𑀦𑁂𑀢𑁆𑀯𑀸 𑀢𑁂𑀦 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀧𑀼𑀘𑁆𑀙𑀸𑀬 𑀢𑀸𑀯 𑀲𑁄 𑀦𑀺𑀫𑁆𑀫𑀺𑀢𑁄 𑀓𑀣𑀁𑀤𑀲𑁆𑀲𑀻𑀢𑀺 𑀅𑀥𑀺𑀧𑀜𑁆𑀜𑀁 𑀓𑀣𑀁𑀲𑀻𑀮𑁄𑀢𑀺 𑀅𑀥𑀺𑀲𑀻𑀮𑀁, 𑀉𑀧𑀲𑀦𑁆𑀢𑁄𑀢𑀺 𑀅𑀥𑀺𑀘𑀺𑀢𑁆𑀢𑀁 𑀧𑀼𑀘𑁆𑀙𑀢𑀺. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁮𑁫𑁬. 𑀯𑀺𑀲𑁆𑀲𑀚𑁆𑀚𑀦𑁂 𑀧𑀦 𑀪𑀕𑀯𑀸 𑀲𑀭𑀽𑀧𑁂𑀦 𑀅𑀥𑀺𑀧𑀜𑁆𑀜𑀸𑀤𑀻𑀦𑀺 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀅𑀥𑀺𑀧𑀜𑁆𑀜𑀸𑀤𑀺𑀧𑁆𑀧𑀪𑀸𑀯𑁂𑀦 𑀬𑁂𑀲𑀁 𑀓𑀺𑀮𑁂𑀲𑀸𑀦𑀁 𑀉𑀧𑀲𑀫𑀸 ‘‘𑀉𑀧𑀲𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀦𑀸𑀦𑀸𑀤𑁂𑀯𑀢𑀸𑀦𑀁 𑀆𑀲𑀬𑀸𑀦𑀼𑀮𑁄𑀫𑁂𑀦 𑀢𑁂𑀲𑀁 𑀉𑀧𑀲𑀫𑀫𑁂𑀯 𑀤𑀻𑀧𑁂𑀦𑁆𑀢𑁄 ‘‘𑀯𑀻𑀢𑀢𑀡𑁆𑀳𑁄’’𑀢𑀺𑀆𑀤𑀺𑀓𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀆𑀤𑀺𑀢𑁄 𑀅𑀝𑁆𑀞𑀦𑁆𑀦𑀁 𑀕𑀸𑀣𑀸𑀦𑀁 ‘‘𑀢𑀁 𑀩𑁆𑀭𑀽𑀫𑀺 𑀉𑀧𑀲𑀦𑁆𑀢𑁄’’𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁄 𑀧𑀭𑀸𑀲𑀁 ‘‘𑀲 𑀯𑁂 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑀧𑀘𑁆𑀙𑀺𑀫𑁂𑀦 𑀧𑀤𑁂𑀦.

𑀅𑀦𑀼𑀧𑀤𑀯𑀡𑁆𑀡𑀦𑀸𑀦𑀬𑁂𑀦 𑀘 𑁋 𑀯𑀻𑀢𑀢𑀡𑁆𑀳𑁄 𑀧𑀼𑀭𑀸 𑀪𑁂𑀤𑀸𑀢𑀺 𑀬𑁄 𑀲𑀭𑀻𑀭𑀪𑁂𑀤𑀸 𑀧𑀼𑀩𑁆𑀩𑀫𑁂𑀯 𑀧𑀳𑀻𑀦𑀢𑀡𑁆𑀳𑁄. 𑀧𑀼𑀩𑁆𑀩𑀫𑀦𑁆𑀢𑀫𑀦𑀺𑀲𑁆𑀲𑀺𑀢𑁄𑀢𑀺 𑀅𑀢𑀻𑀢𑀤𑁆𑀥𑀸𑀤𑀺𑀪𑁂𑀤𑀁 𑀧𑀼𑀩𑁆𑀩𑀦𑁆𑀢𑀫𑀦𑀺𑀲𑁆𑀲𑀺𑀢𑁄. 𑀯𑁂𑀫𑀚𑁆𑀛𑁂𑀦𑀼𑀧𑀲𑀗𑁆𑀔𑁂𑀬𑁆𑀬𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀅𑀤𑁆𑀥𑀦𑀺 ‘‘𑀭𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦 𑀉𑀧𑀲𑀗𑁆𑀔𑀸𑀢𑀩𑁆𑀩𑁄. 𑀢𑀲𑁆𑀲 𑀦𑀢𑁆𑀣𑀺 𑀧𑀼𑀭𑀓𑁆𑀔𑀢𑀦𑁆𑀢𑀺 𑀢𑀲𑁆𑀲 𑀅𑀭𑀳𑀢𑁄 𑀤𑁆𑀯𑀺𑀦𑁆𑀦𑀁 𑀧𑀼𑀭𑁂𑀓𑁆𑀔𑀸𑀭𑀸𑀦𑀁 𑀅𑀪𑀸𑀯𑀸 𑀅𑀦𑀸𑀕𑀢𑁂 𑀅𑀤𑁆𑀥𑀦𑀺 𑀧𑀼𑀭𑀓𑁆𑀔𑀢𑀫𑁆𑀧𑀺 𑀦𑀢𑁆𑀣𑀺, 𑀢𑀁 𑀩𑁆𑀭𑀽𑀫𑀺 𑀉𑀧𑀲𑀦𑁆𑀢𑁄𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀇𑀢𑁄 𑀧𑀭𑀁 𑀧𑀦 𑀬𑁄𑀚𑀦𑀁 𑀅𑀤𑀲𑁆𑀲𑁂𑀢𑁆𑀯𑀸 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀁𑀬𑁂𑀯 𑀓𑀭𑀺𑀲𑁆𑀲𑀸𑀫.

𑁮𑁫𑁭. 𑀅𑀲𑀦𑁆𑀢𑀸𑀲𑀻𑀢𑀺 𑀢𑁂𑀦 𑀢𑁂𑀦 𑀅𑀮𑀸𑀪𑀓𑁂𑀦 𑀅𑀲𑀦𑁆𑀢𑀲𑀦𑁆𑀢𑁄. 𑀅𑀯𑀺𑀓𑀢𑁆𑀣𑀻𑀢𑀺 𑀲𑀻𑀮𑀸𑀤𑀻𑀳𑀺 𑀅𑀯𑀺𑀓𑀢𑁆𑀣𑀦𑀲𑀻𑀮𑁄. 𑀅𑀓𑀼𑀓𑁆𑀓𑀼𑀘𑁄𑀢𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑀸𑀤𑀺𑀯𑀺𑀭𑀳𑀺𑀢𑁄. 𑀫𑀦𑁆𑀢𑀪𑀸𑀡𑀻𑀢𑀺 𑀫𑀦𑁆𑀢𑀸𑀬 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀸𑀘𑀁 𑀪𑀸𑀲𑀺𑀢𑀸. 𑀅𑀦𑀼𑀤𑁆𑀥𑀢𑁄𑀢𑀺 𑀉𑀤𑁆𑀥𑀘𑁆𑀘𑀯𑀺𑀭𑀳𑀺𑀢𑁄. 𑀲 𑀯𑁂 𑀯𑀸𑀘𑀸𑀬𑀢𑁄𑀢𑀺 𑀲𑁄 𑀯𑀸𑀘𑀸𑀬 𑀬𑀢𑁄 𑀲𑀁𑀬𑀢𑁄 𑀘𑀢𑀼𑀤𑁄𑀲𑀯𑀺𑀭𑀳𑀺𑀢𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

𑁮𑁫𑁮. 𑀦𑀺𑀭𑀸𑀲𑀢𑁆𑀢𑀻𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀯𑀺𑀯𑁂𑀓𑀤𑀲𑁆𑀲𑀻 𑀨𑀲𑁆𑀲𑁂𑀲𑀽𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀻𑀲𑀼 𑀅𑀢𑁆𑀢𑀸𑀤𑀺𑀪𑀸𑀯𑀯𑀺𑀯𑁂𑀓𑀁 𑀧𑀲𑁆𑀲𑀢𑀺. 𑀤𑀺𑀝𑁆𑀞𑀻𑀲𑀼 𑀘 𑀦 𑀦𑀻𑀬𑀢𑀻𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀻𑀲𑀼 𑀓𑀸𑀬𑀘𑀺 𑀤𑀺𑀝𑁆𑀞𑀺𑀬𑀸 𑀦 𑀦𑀻𑀬𑀢𑀺.