𑁧𑁫. 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁪𑁨. 𑀅𑀢𑁆𑀢𑀤𑀡𑁆𑀟𑀸 𑀪𑀬𑀁 𑀚𑀸𑀢𑀦𑁆𑀢𑀺 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀬𑁄 𑀲𑁄 𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀻𑀬𑀲𑀼𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀁 𑀯𑀼𑀘𑁆𑀘𑀫𑀸𑀦𑀸𑀬 𑀲𑀸𑀓𑀺𑀬𑀓𑁄𑀮𑀺𑀬𑀸𑀦𑀁 𑀉𑀤𑀓𑀁 𑀧𑀝𑀺𑀘𑁆𑀘 𑀓𑀮𑀳𑁄 𑀯𑀡𑁆𑀡𑀺𑀢𑁄, 𑀢𑀁 𑀜𑀢𑁆𑀯𑀸 𑀪𑀕𑀯𑀸 ‘‘𑀜𑀸𑀢𑀓𑀸 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀳𑀦𑁆𑀤 𑀦𑁂 𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀤𑁆𑀯𑀺𑀦𑁆𑀦𑀁 𑀲𑁂𑀦𑀸𑀦𑀁 𑀫𑀚𑁆𑀛𑁂 𑀞𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬𑀢𑁆𑀣𑁄 𑁋 𑀬𑀁 𑀮𑁄𑀓𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀯𑀸 𑀲𑀫𑁆𑀧𑀭𑀸𑀬𑀺𑀓𑀁 𑀯𑀸 𑀪𑀬𑀁 𑀚𑀸𑀢𑀁, 𑀢𑀁 𑀲𑀩𑁆𑀩𑀁 𑀅𑀢𑁆𑀢𑀤𑀡𑁆𑀟𑀸 𑀪𑀬𑀁 𑀚𑀸𑀢𑀁 𑀅𑀢𑁆𑀢𑀦𑁄 𑀤𑀼𑀘𑁆𑀘𑀭𑀺𑀢𑀓𑀸𑀭𑀡𑀸 𑀚𑀸𑀢𑀁, 𑀏𑀯𑀁 𑀲𑀦𑁆𑀢𑁂𑀧𑀺 𑀚𑀦𑀁 𑀧𑀲𑁆𑀲𑀣 𑀫𑁂𑀥𑀕𑀁, 𑀇𑀫𑀁 𑀲𑀸𑀓𑀺𑀬𑀸𑀤𑀺𑀚𑀦𑀁 𑀧𑀲𑁆𑀲𑀣 𑀅𑀜𑁆𑀜𑀫𑀜𑁆𑀜𑀁 𑀫𑁂𑀥𑀕𑀁 𑀳𑀺𑀁𑀲𑀓𑀁 𑀩𑀸𑀥𑀓𑀦𑁆𑀢𑀺. 𑀏𑀯𑀁 𑀢𑀁 𑀧𑀝𑀺𑀯𑀺𑀭𑀼𑀤𑁆𑀥𑀁 𑀯𑀺𑀧𑁆𑀧𑀝𑀺𑀧𑀦𑁆𑀦𑀁 𑀚𑀦𑀁 𑀧𑀭𑀺𑀪𑀸𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀢𑀲𑁆𑀲 𑀲𑀁𑀯𑁂𑀕𑀁 𑀚𑀦𑁂𑀢𑀼𑀁 𑀆𑀳 ‘‘𑀲𑀁𑀯𑁂𑀕𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀬𑀣𑀸 𑀲𑀁𑀯𑀺𑀚𑀺𑀢𑀁 𑀫𑀬𑀸’’𑀢𑀺, 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑁂𑀦𑁂𑀯 𑀲𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁯𑁪𑁩. 𑀇𑀤𑀸𑀦𑀺 𑀬𑀣𑀸𑀦𑁂𑀦 𑀲𑀁𑀯𑀺𑀚𑀺𑀢𑀁, 𑀢𑀁 𑀧𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀨𑀦𑁆𑀤𑀫𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀨𑀦𑁆𑀤𑀫𑀸𑀦𑀦𑁆𑀢𑀺 𑀢𑀡𑁆𑀳𑀸𑀤𑀻𑀳𑀺 𑀓𑀫𑁆𑀧𑀫𑀸𑀦𑀁. 𑀅𑀧𑁆𑀧𑁄𑀤𑀓𑁂𑀢𑀺 𑀅𑀧𑁆𑀧𑀉𑀤𑀓𑁂. 𑀅𑀜𑁆𑀜𑀫𑀜𑁆𑀜𑁂𑀳𑀺 𑀩𑁆𑀬𑀸𑀭𑀼𑀤𑁆𑀥𑁂 𑀤𑀺𑀲𑁆𑀯𑀸𑀢𑀺 𑀦𑀸𑀦𑀸𑀲𑀢𑁆𑀢𑁂 𑀘 𑀅𑀜𑁆𑀜𑀫𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀯𑀺𑀭𑀼𑀤𑁆𑀥𑁂 𑀤𑀺𑀲𑁆𑀯𑀸. 𑀫𑀁 𑀪𑀬𑀫𑀸𑀯𑀺𑀲𑀻𑀢𑀺 𑀫𑀁 𑀪𑀬𑀁 𑀧𑀯𑀺𑀝𑁆𑀞𑀁.

𑁯𑁪𑁪. 𑀲𑀫𑀦𑁆𑀢𑀫𑀲𑀸𑀭𑁄 𑀮𑁄𑀓𑁄𑀢𑀺 𑀦𑀺𑀭𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀫𑀦𑁆𑀢𑀢𑁄 𑀮𑁄𑀓𑁄 𑀅𑀲𑀸𑀭𑁄 𑀦𑀺𑀘𑁆𑀘𑀲𑀸𑀭𑀸𑀤𑀺𑀭𑀳𑀺𑀢𑁄. 𑀤𑀺𑀲𑀸 𑀲𑀩𑁆𑀩𑀸 𑀲𑀫𑁂𑀭𑀺𑀢𑀸𑀢𑀺 𑀲𑀩𑁆𑀩𑀸 𑀤𑀺𑀲𑀸 𑀅𑀦𑀺𑀘𑁆𑀘𑀢𑀸𑀬 𑀓𑀫𑁆𑀧𑀺𑀢𑀸. 𑀇𑀘𑁆𑀙𑀁 𑀪𑀯𑀦𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀢𑀸𑀡𑀁 𑀇𑀘𑁆𑀙𑀦𑁆𑀢𑁄. 𑀦𑀸𑀤𑁆𑀤𑀲𑀸𑀲𑀺𑀁 𑀅𑀦𑁄𑀲𑀺𑀢𑀦𑁆𑀢𑀺 𑀓𑀺𑀜𑁆𑀘𑀺 𑀞𑀸𑀦𑀁 𑀚𑀭𑀸𑀤𑀻𑀳𑀺 𑀅𑀦𑀚𑁆𑀛𑀸𑀯𑀼𑀢𑁆𑀣𑀁 𑀦𑀸𑀤𑁆𑀤𑀓𑁆𑀔𑀺𑀁.

𑁯𑁪𑁫. 𑀑𑀲𑀸𑀦𑁂𑀢𑁆𑀯𑁂𑀯 𑀩𑁆𑀬𑀸𑀭𑀼𑀤𑁆𑀥𑁂, 𑀤𑀺𑀲𑁆𑀯𑀸 𑀫𑁂 𑀅𑀭𑀢𑀻 𑀅𑀳𑀽𑀢𑀺 𑀬𑁄𑀩𑁆𑀩𑀜𑁆𑀜𑀸𑀤𑀻𑀦𑀁 𑀑𑀲𑀸𑀦𑁂 𑀏𑀯 𑀅𑀦𑁆𑀢𑀕𑀫𑀓𑁂 𑀏𑀯 𑀯𑀺𑀦𑀸𑀲𑀓𑁂 𑀏𑀯 𑀚𑀭𑀸𑀤𑀻𑀳𑀺 𑀩𑁆𑀬𑀸𑀭𑀼𑀤𑁆𑀥𑁂 𑀆𑀳𑀢𑀘𑀺𑀢𑁆𑀢𑁂 𑀲𑀢𑁆𑀢𑁂 𑀤𑀺𑀲𑁆𑀯𑀸 𑀅𑀭𑀢𑀺 𑀫𑁂 𑀅𑀳𑁄𑀲𑀺. 𑀅𑀣𑁂𑀢𑁆𑀣 𑀲𑀮𑁆𑀮𑀦𑁆𑀢𑀺 𑀅𑀣 𑀏𑀢𑁂𑀲𑀼 𑀲𑀢𑁆𑀢𑁂𑀲𑀼 𑀭𑀸𑀕𑀸𑀤𑀺𑀲𑀮𑁆𑀮𑀁. 𑀳𑀤𑀬𑀦𑀺𑀲𑁆𑀲𑀺𑀢𑀦𑁆𑀢𑀺 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀁.

𑁯𑁪𑁬. ‘‘𑀓𑀣𑀁𑀆𑀦𑀼𑀪𑀸𑀯𑀁 𑀲𑀮𑁆𑀮’’𑀦𑁆𑀢𑀺 𑀘𑁂 𑁋 𑀬𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄𑀢𑀺 𑀕𑀸𑀣𑀸. 𑀢𑀢𑁆𑀣 𑀤𑀺𑀲𑀸 𑀲𑀩𑁆𑀩𑀸 𑀯𑀺𑀥𑀸𑀯𑀢𑀻𑀢𑀺 𑀲𑀩𑁆𑀩𑀸 𑀤𑀼𑀘𑁆𑀘𑀭𑀺𑀢𑀤𑀺𑀲𑀸𑀧𑀺 𑀧𑀼𑀭𑀢𑁆𑀣𑀺𑀫𑀸𑀤𑀺𑀤𑀺𑀲𑀸𑀯𑀺𑀤𑀺𑀲𑀸𑀧𑀺 𑀥𑀸𑀯𑀢𑀺. 𑀢𑀫𑁂𑀯 𑀲𑀮𑁆𑀮𑀫𑀩𑁆𑀩𑀼𑀬𑁆𑀳, 𑀦 𑀥𑀸𑀯𑀢𑀺 𑀦 𑀲𑀻𑀤𑀢𑀻𑀢𑀺 𑀢𑀫𑁂𑀯 𑀲𑀮𑁆𑀮𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀸 𑀘 𑀤𑀺𑀲𑀸 𑀦 𑀥𑀸𑀯𑀢𑀺, 𑀘𑀢𑀼𑀭𑁄𑀖𑁂 𑀘 𑀦 𑀲𑀻𑀤𑀢𑀻𑀢𑀺.

𑁯𑁪𑁭. 𑀏𑀯𑀁𑀫𑀳𑀸𑀦𑀼𑀪𑀸𑀯𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁂𑀲𑁆𑀯𑀧𑀺 𑀘 𑀲𑀢𑁆𑀢𑁂𑀲𑀼 𑁋 𑀢𑀢𑁆𑀣 𑀲𑀺𑀓𑁆𑀔𑀸𑀦𑀼𑀕𑀻𑀬𑀦𑁆𑀢𑀺, 𑀬𑀸𑀦𑀺 𑀮𑁄𑀓𑁂 𑀕𑀥𑀺𑀢𑀸𑀦𑀻𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀮𑁄𑀓𑁂 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀧𑀝𑀺𑀮𑀸𑀪𑀸𑀬 𑀕𑀺𑀚𑁆𑀛𑀦𑁆𑀢𑀻𑀢𑀺 𑀓𑀢𑁆𑀯𑀸 ‘‘𑀕𑀥𑀺𑀢𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀘𑀺𑀭𑀓𑀸𑀮𑀸𑀲𑁂𑀯𑀺𑀢𑀢𑁆𑀢𑀸 𑀯𑀸 ‘‘𑀕𑀥𑀺𑀢𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀢𑁆𑀣 𑀢𑀁 𑀦𑀺𑀫𑀺𑀢𑁆𑀢𑀁 𑀳𑀢𑁆𑀣𑀺𑀲𑀺𑀓𑁆𑀔𑀸𑀤𑀺𑀓𑀸 𑀅𑀦𑁂𑀓𑀸 𑀲𑀺𑀓𑁆𑀔𑀸 𑀓𑀣𑀻𑀬𑀦𑁆𑀢𑀺 𑀉𑀕𑁆𑀕𑀬𑁆𑀳𑀦𑁆𑀢𑀺 𑀯𑀸. 𑀧𑀲𑁆𑀲𑀣 𑀬𑀸𑀯 𑀧𑀫𑀢𑁆𑀢𑁄 𑀯𑀸𑀬𑀁 𑀮𑁄𑀓𑁄, 𑀬𑀢𑁄 𑀧𑀡𑁆𑀟𑀺𑀢𑁄 𑀓𑀼𑀮𑀧𑀼𑀢𑁆𑀢𑁄 𑀢𑁂𑀲𑀼 𑀯𑀸 𑀕𑀥𑀺𑀢𑁂𑀲𑀼 𑀢𑀸𑀲𑀼 𑀯𑀸 𑀲𑀺𑀓𑁆𑀔𑀸𑀲𑀼 𑀅𑀥𑀺𑀫𑀼𑀢𑁆𑀢𑁄 𑀦 𑀲𑀺𑀬𑀸, 𑀅𑀜𑁆𑀜𑀤𑀢𑁆𑀣𑀼 𑀅𑀦𑀺𑀘𑁆𑀘𑀸𑀤𑀺𑀤𑀲𑁆𑀲𑀦𑁂𑀦 𑀦𑀺𑀩𑁆𑀩𑀺𑀚𑁆𑀛 𑀲𑀩𑁆𑀩𑀲𑁄 𑀓𑀸𑀫𑁂 𑀅𑀢𑁆𑀢𑀦𑁄 𑀦𑀺𑀩𑁆𑀩𑀸𑀦𑀫𑁂𑀯 𑀲𑀺𑀓𑁆𑀔𑁂𑀢𑀺.

𑁯𑁪𑁮. 𑀇𑀤𑀸𑀦𑀺 𑀬𑀣𑀸 𑀦𑀺𑀩𑁆𑀩𑀸𑀦𑀸𑀬 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁆𑀘𑁄 𑀲𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀘𑁆𑀘𑁄𑀢𑀺 𑀯𑀸𑀘𑀸𑀲𑀘𑁆𑀘𑁂𑀦 𑀜𑀸𑀡𑀲𑀘𑁆𑀘𑁂𑀦 𑀫𑀕𑁆𑀕𑀲𑀘𑁆𑀘𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀭𑀺𑀢𑁆𑀢𑀧𑁂𑀲𑀼𑀡𑁄𑀢𑀺 𑀧𑀳𑀻𑀦𑀧𑁂𑀲𑀼𑀡𑁄. 𑀯𑁂𑀯𑀺𑀘𑁆𑀙𑀦𑁆𑀢𑀺 𑀫𑀘𑁆𑀙𑀭𑀺𑀬𑀁.

𑁯𑁪𑁯. 𑀦𑀺𑀤𑁆𑀤𑀁 𑀢𑀦𑁆𑀤𑀺𑀁 𑀲𑀳𑁂 𑀣𑀻𑀦𑀦𑁆𑀢𑀺 𑀧𑀘𑀮𑀸𑀬𑀺𑀓𑀜𑁆𑀘 𑀓𑀸𑀬𑀸𑀮𑀲𑀺𑀬𑀜𑁆𑀘 𑀘𑀺𑀢𑁆𑀢𑀸𑀮𑀲𑀺𑀬𑀜𑁆𑀘𑀸𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑁂 𑀅𑀪𑀺𑀪𑀯𑁂𑀬𑁆𑀬. 𑀦𑀺𑀩𑁆𑀩𑀸𑀦𑀫𑀦𑀲𑁄𑀢𑀺 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀘𑀺𑀢𑁆𑀢𑁄.

𑁯𑁫𑁦-𑁫𑁧. 𑀲𑀸𑀳𑀲𑀸𑀢𑀺 𑀭𑀢𑁆𑀢𑀲𑁆𑀲 𑀭𑀸𑀕𑀘𑀭𑀺𑀬𑀸𑀤𑀺𑀪𑁂𑀤𑀸 𑀲𑀸𑀳𑀲𑀓𑀭𑀡𑀸. 𑀧𑀼𑀭𑀸𑀡𑀁 𑀦𑀸𑀪𑀺𑀦𑀦𑁆𑀤𑁂𑀬𑁆𑀬𑀸𑀢𑀺 𑀅𑀢𑀻𑀢𑀭𑀽𑀧𑀸𑀤𑀺𑀁 𑀦𑀸𑀪𑀺𑀦𑀦𑁆𑀤𑁂𑀬𑁆𑀬. 𑀦𑀯𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂. 𑀳𑀺𑀬𑁆𑀬𑀫𑀸𑀦𑁂𑀢𑀺 𑀯𑀺𑀦𑀲𑁆𑀲𑀫𑀸𑀦𑁂. 𑀆𑀓𑀸𑀲𑀁 𑀦 𑀲𑀺𑀢𑁄 𑀲𑀺𑀬𑀸𑀢𑀺 𑀢𑀡𑁆𑀳𑀸𑀦𑀺𑀲𑁆𑀲𑀺𑀢𑁄 𑀦 𑀪𑀯𑁂𑀬𑁆𑀬. 𑀢𑀡𑁆𑀳𑀸 𑀳𑀺 𑀭𑀽𑀧𑀸𑀤𑀻𑀦𑀁 𑀆𑀓𑀸𑀲𑀦𑀢𑁄 ‘‘𑀆𑀓𑀸𑀲𑁄’’𑀢𑀺 𑀯𑀼𑀘𑁆𑀘𑀢𑀺.

𑁯𑁫𑁨. ‘‘𑀓𑀺𑀁𑀓𑀸𑀭𑀡𑀸 𑀆𑀓𑀸𑀲𑀁 𑀦 𑀲𑀺𑀢𑁄 𑀲𑀺𑀬𑀸’’𑀢𑀺 𑀘𑁂 𑁋 ‘‘𑀕𑁂𑀥𑀁 𑀩𑁆𑀭𑀽𑀫𑀻’’𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀅𑀳𑀜𑁆𑀳𑀺 𑀇𑀫𑀁 𑀆𑀓𑀸𑀲𑀲𑀗𑁆𑀔𑀸𑀢𑀁 𑀢𑀡𑁆𑀳𑀁 𑀭𑀽𑀧𑀸𑀤𑀻𑀲𑀼 𑀕𑀺𑀚𑁆𑀛𑀦𑀢𑁄 𑀕𑁂𑀥𑀁 𑀩𑁆𑀭𑀽𑀫𑀺 ‘‘𑀕𑁂𑀥𑁄’’𑀢𑀺 𑀯𑀤𑀸𑀫𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀅𑀯𑀳𑀦𑀦𑀝𑁆𑀞𑁂𑀦 ‘‘𑀑𑀖𑁄’’𑀢𑀺 𑀘 𑀆𑀚𑀯𑀦𑀝𑁆𑀞𑁂𑀦 ‘‘𑀆𑀚𑀯’’𑀦𑁆𑀢𑀺 𑀘 ‘‘𑀇𑀤𑀁 𑀫𑀬𑁆𑀳𑀁, 𑀇𑀤𑀁 𑀫𑀬𑁆𑀳’’𑀦𑁆𑀢𑀺 𑀚𑀧𑁆𑀧𑀓𑀸𑀭𑀡𑀢𑁄 ‘‘𑀚𑀧𑁆𑀧𑀦’’𑀦𑁆𑀢𑀺 𑀘 𑀤𑀼𑀫𑁆𑀫𑀼𑀜𑁆𑀘𑀦𑀝𑁆𑀞𑁂𑀦 ‘‘𑀆𑀭𑀫𑁆𑀫𑀡’’𑀦𑁆𑀢𑀺 𑀘 𑀓𑀫𑁆𑀧𑀓𑀭𑀡𑁂𑀦 ‘‘𑀧𑀓𑀫𑁆𑀧𑀦’’𑀦𑁆𑀢𑀺 𑀘 𑀩𑁆𑀭𑀽𑀫𑀺, 𑀏𑀲𑀸 𑀘 𑀮𑁄𑀓𑀲𑁆𑀲 𑀧𑀮𑀺𑀩𑁄𑀥𑀝𑁆𑀞𑁂𑀦 𑀤𑀼𑀭𑀢𑀺𑀓𑁆𑀓𑀫𑀦𑀻𑀬𑀝𑁆𑀞𑁂𑀦 𑀘 𑀓𑀸𑀫𑀧𑀗𑁆𑀓𑁄 𑀤𑀼𑀭𑀘𑁆𑀘𑀬𑁄𑀢𑀺. ‘‘𑀆𑀓𑀸𑀲𑀁 𑀦 𑀲𑀺𑀢𑁄 𑀲𑀺𑀬𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀯𑀸 ‘‘𑀓𑀺𑀫𑁂𑀢𑀁 𑀆𑀓𑀸𑀲’’𑀦𑁆𑀢𑀺 𑀘𑁂? 𑀕𑁂𑀥𑀁 𑀩𑁆𑀭𑀽𑀫𑀻𑀢𑀺. 𑀏𑀯𑀫𑁆𑀧𑀺 𑀢𑀲𑁆𑀲𑀸 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀤𑀬𑁄𑀚𑀦𑀸 𑁋 𑀆𑀓𑀸𑀲𑀦𑁆𑀢𑀺 𑀕𑁂𑀥𑀁 𑀩𑁆𑀭𑀽𑀫𑀻𑀢𑀺. 𑀢𑀣𑀸 𑀬𑁆𑀯𑀸𑀬𑀁 𑀫𑀳𑁄𑀖𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀩𑁆𑀭𑀽𑀫𑀺, 𑀆𑀚𑀯𑀁 𑀩𑁆𑀭𑀽𑀫𑀺, 𑀚𑀧𑁆𑀧𑀦𑀁 𑀩𑁆𑀭𑀽𑀫𑀺, 𑀧𑀓𑀫𑁆𑀧𑀦𑀁 𑀩𑁆𑀭𑀽𑀫𑀺, 𑀬𑁆𑀯𑀸𑀬𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀓𑀸𑀫𑀧𑀗𑁆𑀓𑁄 𑀤𑀼𑀭𑀘𑁆𑀘𑀬𑁄, 𑀢𑀁 𑀩𑁆𑀭𑀽𑀫𑀻𑀢𑀺.

𑁯𑁫𑁩. 𑀏𑀯𑀫𑁂𑀢𑀁 𑀕𑁂𑀥𑀸𑀤𑀺𑀧𑀭𑀺𑀬𑀸𑀬𑀁 𑀆𑀓𑀸𑀲𑀁 𑀅𑀦𑀺𑀲𑁆𑀲𑀺𑀢𑁄 𑁋 𑀲𑀘𑁆𑀘𑀸 𑀅𑀯𑁄𑀓𑁆𑀓𑀫𑁆𑀫𑀸𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀢𑀺𑀯𑀺𑀥𑀸𑀧𑀺 𑀲𑀘𑁆𑀘𑀸 𑀅𑀯𑁄𑀓𑁆𑀓𑀫𑁆𑀫 𑀫𑁄𑀦𑁂𑀬𑁆𑀬𑀧𑁆𑀧𑀢𑁆𑀢𑀺𑀬𑀸 𑀫𑀼𑀦𑀻𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄 𑀦𑀺𑀩𑁆𑀩𑀸𑀦𑀢𑁆𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀲 𑀯𑁂 𑀏𑀯𑀭𑀽𑀧𑁄 𑀲𑀩𑁆𑀩𑀸𑀦𑀺 𑀆𑀬𑀢𑀦𑀸𑀦𑀺 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 ‘‘𑀲𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑁯𑁫𑁪. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀲 𑀯𑁂 𑀯𑀺𑀤𑁆𑀯𑀸𑀢𑀺 𑀕𑀸𑀣𑀸. 𑀢𑀢𑁆𑀣 𑀜𑀢𑁆𑀯𑀸 𑀥𑀫𑁆𑀫𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀺𑀦𑀬𑁂𑀦 𑀲𑀗𑁆𑀔𑀢𑀥𑀫𑁆𑀫𑀁 𑀜𑀢𑁆𑀯𑀸. 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀇𑀭𑀺𑀬𑀸𑀦𑁄𑀢𑀺 𑀅𑀲𑀫𑁆𑀫𑀸𑀇𑀭𑀺𑀬𑀦𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀇𑀭𑀺𑀬𑀫𑀸𑀦𑁄.

𑁯𑁫𑁫. 𑀏𑀯𑀁 𑀅𑀧𑀺𑀳𑁂𑀦𑁆𑀢𑁄 𑀘 𑁋 𑀬𑁄𑀥 𑀓𑀸𑀫𑁂𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀗𑁆𑀕𑀦𑁆𑀢𑀺 𑀲𑀢𑁆𑀢𑀯𑀺𑀥𑀁 𑀲𑀗𑁆𑀕𑀜𑁆𑀘 𑀬𑁄 𑀅𑀘𑁆𑀘𑀢𑀭𑀺 𑀦𑀸𑀚𑁆𑀛𑁂𑀢𑀻𑀢𑀺 𑀦𑀸𑀪𑀺𑀚𑁆𑀛𑀸𑀬𑀢𑀺.

𑁯𑁫𑁬. 𑀢𑀲𑁆𑀫𑀸 𑀢𑀼𑀫𑁆𑀳𑁂𑀲𑀼𑀧𑀺 𑀬𑁄 𑀏𑀯𑀭𑀽𑀧𑁄 𑀳𑁄𑀢𑀼𑀫𑀺𑀘𑁆𑀙𑀢𑀺, 𑀢𑀁 𑀯𑀤𑀸𑀫𑀺 𑁋 𑀬𑀁 𑀧𑀼𑀩𑁆𑀩𑁂𑀢𑀺 𑀕𑀸𑀣𑀸. 𑀢𑀢𑁆𑀣 𑀬𑀁 𑀧𑀼𑀩𑁆𑀩𑁂𑀢𑀺 𑀅𑀢𑀻𑀢𑁂 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀥𑀫𑁆𑀫𑀁 𑀓𑀺𑀮𑁂𑀲𑀚𑀸𑀢𑀁 𑀅𑀢𑀻𑀢𑀓𑀫𑁆𑀫𑀜𑁆𑀘. 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀦𑁆𑀢𑀺 𑀅𑀦𑀸𑀕𑀢𑁂𑀧𑀺 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀥𑀫𑁆𑀫𑀁 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀁 𑀫𑀸𑀳𑀼. 𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀻𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑀸𑀤𑀺𑀥𑀫𑁆𑀫𑁂𑀧𑀺 𑀦 𑀕𑀳𑁂𑀲𑁆𑀲𑀲𑀺 𑀘𑁂.

𑁯𑁫𑁭. 𑀏𑀯𑀁 ‘‘𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻’’𑀢𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀭𑀳𑀢𑁄 𑀣𑀼𑀢𑀺𑀯𑀲𑁂𑀦 𑀇𑀢𑁄 𑀧𑀭𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀲𑀩𑁆𑀩𑀲𑁄𑀢𑀺 𑀕𑀸𑀣𑀸𑀬 𑀫𑀫𑀸𑀬𑀺𑀢𑀦𑁆𑀢𑀺 𑀫𑀫𑀢𑁆𑀢𑀓𑀭𑀡𑀁, ‘‘𑀫𑀫 𑀇𑀤’’𑀦𑁆𑀢𑀺 𑀕𑀳𑀺𑀢𑀁 𑀯𑀸 𑀯𑀢𑁆𑀣𑀼. 𑀅𑀲𑀢𑀸 𑀘 𑀦 𑀲𑁄𑀘𑀢𑀻𑀢𑀺 𑀅𑀯𑀺𑀚𑁆𑀚𑀫𑀸𑀦𑀓𑀸𑀭𑀡𑀸 𑀅𑀲𑀦𑁆𑀢𑀓𑀸𑀭𑀡𑀸 𑀦 𑀲𑁄𑀘𑀢𑀺. 𑀦 𑀚𑀻𑀬𑀢𑀻𑀢𑀺 𑀚𑀸𑀦𑀺𑀫𑁆𑀧𑀺 𑀦 𑀕𑀘𑁆𑀙𑀢𑀺.

𑁯𑁫𑁮-𑁯. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀬𑀲𑁆𑀲 𑀦𑀢𑁆𑀣𑀻𑀢𑀺 𑀕𑀸𑀣𑀸. 𑀢𑀢𑁆𑀣 𑀓𑀺𑀜𑁆𑀘𑀦𑀦𑁆𑀢𑀺 𑀓𑀺𑀜𑁆𑀘𑀺 𑀭𑀽𑀧𑀸𑀤𑀺𑀥𑀫𑁆𑀫𑀚𑀸𑀢𑀁. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀅𑀦𑀺𑀝𑁆𑀞𑀼𑀭𑀻𑀢𑀺 𑀕𑀸𑀣𑀸. 𑀢𑀢𑁆𑀣 𑀅𑀦𑀺𑀝𑁆𑀞𑀼𑀭𑀻𑀢𑀺 𑀅𑀦𑀺𑀲𑁆𑀲𑀼𑀓𑀻. ‘‘𑀅𑀦𑀺𑀤𑁆𑀥𑀼𑀭𑀻’’𑀢𑀺𑀧𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀲𑀩𑁆𑀩𑀥𑀻 𑀲𑀫𑁄𑀢𑀺 𑀲𑀩𑁆𑀩𑀢𑁆𑀣 𑀲𑀫𑁄, 𑀉𑀧𑁂𑀓𑁆𑀔𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁄 𑀲𑁄 ‘‘𑀦𑀢𑁆𑀣𑀺 𑀫𑁂’’𑀢𑀺 𑀦 𑀲𑁄𑀘𑀢𑀺, 𑀢𑀫𑀳𑀁 𑀅𑀯𑀺𑀓𑀫𑁆𑀧𑀺𑀦𑀁 𑀧𑀼𑀕𑁆𑀕𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀅𑀦𑀺𑀝𑁆𑀞𑀼𑀭𑀻 𑀅𑀦𑀦𑀼𑀕𑀺𑀤𑁆𑀥𑁄 𑀅𑀦𑁂𑀚𑁄 𑀲𑀩𑁆𑀩𑀥𑀺 𑀲𑀫𑁄𑀢𑀺 𑀇𑀫𑀁 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀘𑀢𑀼𑀩𑁆𑀩𑀺𑀥𑀫𑀸𑀦𑀺𑀲𑀁𑀲𑀁 𑀩𑁆𑀭𑀽𑀫𑀻𑀢𑀺.

𑁯𑁬𑁦. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀅𑀦𑁂𑀚𑀲𑁆𑀲𑀸𑀢𑀺 𑀕𑀸𑀣𑀸. 𑀢𑀢𑁆𑀣 𑀦𑀺𑀲𑀗𑁆𑀔𑀢𑀻𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀲𑀼 𑀬𑁄 𑀓𑁄𑀘𑀺 𑀲𑀗𑁆𑀔𑀸𑀭𑁄. 𑀲𑁄 𑀳𑀺 𑀬𑀲𑁆𑀫𑀸 𑀦𑀺𑀲𑀗𑁆𑀔𑀭𑀺𑀬𑀢𑀺 𑀦𑀺𑀲𑀗𑁆𑀔𑀭𑁄𑀢𑀺 𑀯𑀸, 𑀢𑀲𑁆𑀫𑀸 ‘‘𑀦𑀺𑀲𑀗𑁆𑀔𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀬𑀸𑀭𑀫𑁆𑀪𑀸𑀢𑀺 𑀯𑀺𑀯𑀺𑀥𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀓𑀸 𑀆𑀭𑀫𑁆𑀪𑀸. 𑀔𑁂𑀫𑀁 𑀧𑀲𑁆𑀲𑀢𑀺 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑀢𑁆𑀣 𑀅𑀪𑀬𑀫𑁂𑀯 𑀧𑀲𑁆𑀲𑀢𑀺.

𑁯𑁬𑁧. 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀦 𑀲𑀫𑁂𑀲𑀽𑀢𑀺 𑀕𑀸𑀣𑀸. 𑀢𑀢𑁆𑀣 𑀦 𑀯𑀤𑀢𑁂𑀢𑀺 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀫𑀸𑀦𑀯𑀲𑁂𑀦 𑀲𑀫𑁂𑀲𑀼𑀧𑀺 𑀅𑀢𑁆𑀢𑀸𑀦𑀁 𑀦 𑀯𑀤𑀢𑀺 𑀑𑀫𑁂𑀲𑀼𑀧𑀺 𑀉𑀲𑁆𑀲𑁂𑀲𑀼𑀧𑀺. 𑀦𑀸𑀤𑁂𑀢𑀺 𑀦 𑀦𑀺𑀭𑀲𑁆𑀲𑀢𑀻𑀢𑀺 𑀭𑀽𑀧𑀸𑀤𑀻𑀲𑀼 𑀓𑀜𑁆𑀘𑀺 𑀥𑀫𑁆𑀫𑀁 𑀦 𑀕𑀡𑁆𑀳𑀸𑀢𑀺; 𑀦 𑀦𑀺𑀲𑁆𑀲𑀚𑁆𑀚𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯. 𑀏𑀯𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀲𑀢𑀸 𑀲𑀸𑀓𑀺𑀬𑀓𑀼𑀫𑀸𑀭𑀸 𑀘 𑀓𑁄𑀮𑀺𑀬𑀓𑀼𑀫𑀸𑀭𑀸 𑀘 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑀸, 𑀢𑁂 𑀕𑀳𑁂𑀢𑁆𑀯𑀸 𑀪𑀕𑀯𑀸 𑀫𑀳𑀸𑀯𑀦𑀁 𑀧𑀸𑀯𑀺𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.