𑁧𑁪. 𑀢𑀼𑀯𑀝𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁨𑁨. 𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀢𑀼𑀯𑀝𑀓𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀇𑀤𑀫𑁆𑀧𑀺 𑀢𑀲𑁆𑀫𑀺𑀁𑀬𑁂𑀯 𑀫𑀳𑀸𑀲𑀫𑀬𑁂 ‘‘𑀓𑀸 𑀦𑀼 𑀔𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀧𑀝𑀺𑀧𑀢𑁆𑀢𑀻’’𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀦𑀁 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀢𑀢𑁆𑀣 𑀆𑀤𑀺𑀕𑀸𑀣𑀸𑀬 𑀢𑀸𑀯 𑀧𑀼𑀘𑁆𑀙𑀸𑀫𑀻𑀢𑀺 𑀏𑀢𑁆𑀣 𑀅𑀤𑀺𑀝𑁆𑀞𑀚𑁄𑀢𑀦𑀸𑀤𑀺𑀯𑀲𑁂𑀦 𑀧𑀼𑀘𑁆𑀙𑀸 𑀯𑀺𑀪𑀚𑀺𑀢𑀸. 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑁆𑀢𑀺 𑀆𑀤𑀺𑀘𑁆𑀘𑀲𑁆𑀲 𑀕𑁄𑀢𑁆𑀢𑀩𑀦𑁆𑀥𑀼𑀁. 𑀯𑀺𑀯𑁂𑀓𑀁 𑀲𑀦𑁆𑀢𑀺𑀧𑀤𑀜𑁆𑀘𑀸𑀢𑀺 𑀯𑀺𑀯𑁂𑀓𑀜𑁆𑀘 𑀲𑀦𑁆𑀢𑀺𑀧𑀤𑀜𑁆𑀘. 𑀓𑀣𑀁 𑀤𑀺𑀲𑁆𑀯𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀤𑀺𑀲𑁆𑀯𑀸, 𑀓𑀣𑀁 𑀧𑀯𑀢𑁆𑀢𑀤𑀲𑁆𑀲𑀦𑁄 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁯𑁨𑁩. 𑀅𑀣 𑀪𑀕𑀯𑀸 𑀬𑀲𑁆𑀫𑀸 𑀬𑀣𑀸 𑀧𑀲𑁆𑀲𑀦𑁆𑀢𑁄 𑀓𑀺𑀮𑁂𑀲𑁂 𑀉𑀧𑀭𑀼𑀦𑁆𑀥𑀢𑀺, 𑀢𑀣𑀸 𑀧𑀯𑀢𑁆𑀢𑀤𑀲𑁆𑀲𑀦𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀆𑀯𑀺𑀓𑀭𑁄𑀦𑁆𑀢𑁄 𑀦𑀸𑀦𑀧𑁆𑀧𑀓𑀸𑀭𑁂𑀦 𑀢𑀁 𑀤𑁂𑀯𑀧𑀭𑀺𑀲𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑁂 𑀦𑀺𑀬𑁄𑀚𑁂𑀦𑁆𑀢𑁄 ‘‘𑀫𑀽𑀮𑀁 𑀧𑀧𑀜𑁆𑀘𑀲𑀗𑁆𑀔𑀸𑀬𑀸’’𑀢𑀺 𑀆𑀭𑀪𑀺𑀢𑁆𑀯𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀆𑀤𑀺𑀕𑀸𑀣𑀸𑀬 𑀢𑀸𑀯 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀧𑀧𑀜𑁆𑀘𑀸𑀢𑀺 𑀲𑀗𑁆𑀔𑀸𑀢𑀢𑁆𑀢𑀸 𑀧𑀧𑀜𑁆𑀘𑀸 𑀏𑀯 𑀧𑀧𑀜𑁆𑀘𑀲𑀗𑁆𑀔𑀸. 𑀢𑀲𑁆𑀲𑀸 𑀅𑀯𑀺𑀚𑁆𑀚𑀸𑀤𑀬𑁄 𑀓𑀺𑀮𑁂𑀲𑀸 𑀫𑀽𑀮𑀁, 𑀢𑀁 𑀧𑀧𑀜𑁆𑀘𑀲𑀗𑁆𑀔𑀸𑀬 𑀫𑀽𑀮𑀁 𑀅𑀲𑁆𑀫𑀻𑀢𑀺 𑀧𑀯𑀢𑁆𑀢𑀫𑀸𑀦𑀜𑁆𑀘 𑀲𑀩𑁆𑀩𑀁 𑀫𑀦𑁆𑀢𑀸𑀬 𑀉𑀧𑀭𑀼𑀦𑁆𑀥𑁂. 𑀬𑀸 𑀓𑀸𑀘𑀺 𑀅𑀚𑁆𑀛𑀢𑁆𑀢𑀁 𑀢𑀡𑁆𑀳𑀸 𑀉𑀧𑀚𑁆𑀚𑁂𑀬𑁆𑀬𑀼𑀁, 𑀢𑀸𑀲𑀁 𑀯𑀺𑀦𑀬𑀸 𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀳𑀼𑀢𑁆𑀯𑀸 𑀲𑀺𑀓𑁆𑀔𑁂𑀬𑁆𑀬𑀸𑀢𑀺.

𑁯𑁨𑁪. 𑀏𑀯𑀁 𑀢𑀸𑀯 𑀧𑀞𑀫𑀕𑀸𑀣𑀸𑀬 𑀏𑀯 𑀢𑀺𑀲𑀺𑀓𑁆𑀔𑀸𑀬𑀼𑀢𑁆𑀢𑀁 𑀤𑁂𑀲𑀦𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑁂𑀢𑁆𑀯𑀸 𑀧𑀼𑀦 𑀫𑀸𑀦𑀧𑁆𑀧𑀳𑀸𑀦𑀯𑀲𑁂𑀦 𑀤𑁂𑀲𑁂𑀢𑀼𑀁 ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀥𑀫𑁆𑀫𑀫𑀪𑀺𑀚𑀜𑁆𑀜𑀸 𑀅𑀚𑁆𑀛𑀢𑁆𑀢𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀉𑀘𑁆𑀘𑀸𑀓𑀼𑀮𑀻𑀦𑀢𑀸𑀤𑀺𑀓𑀁 𑀅𑀢𑁆𑀢𑀦𑁄 𑀕𑀼𑀡𑀁 𑀚𑀸𑀦𑁂𑀬𑁆𑀬 𑀅𑀣 𑀯𑀸𑀧𑀺 𑀩𑀳𑀺𑀤𑁆𑀥𑀸𑀢𑀺 𑀅𑀣 𑀯𑀸 𑀩𑀳𑀺𑀤𑁆𑀥𑀸𑀧𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀸 𑀕𑀼𑀡𑀁 𑀚𑀸𑀦𑁂𑀬𑁆𑀬. 𑀦 𑀢𑁂𑀦 𑀣𑀸𑀫𑀁 𑀓𑀼𑀩𑁆𑀩𑁂𑀣𑀸𑀢𑀺 𑀢𑁂𑀦 𑀕𑀼𑀡𑁂𑀦 𑀣𑀸𑀫𑀁 𑀦 𑀓𑀭𑁂𑀬𑁆𑀬.

𑁯𑁨𑁫. 𑀇𑀤𑀸𑀦𑀺𑀲𑁆𑀲 𑀅𑀓𑀭𑀡𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁂𑀬𑁆𑀬𑁄 𑀦 𑀢𑁂𑀦𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑁂𑀦 𑀘 𑀫𑀸𑀦𑁂𑀦 ‘‘𑀲𑁂𑀬𑁆𑀬𑁄𑀳’’𑀦𑁆𑀢𑀺 𑀯𑀸 ‘‘𑀦𑀻𑀘𑁄𑀳’’𑀦𑁆𑀢𑀺 𑀯𑀸 ‘‘𑀲𑀭𑀺𑀓𑁆𑀔𑁄𑀳’’𑀦𑁆𑀢𑀺 𑀯𑀸𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑁂𑀳𑀺 𑀘 𑀉𑀘𑁆𑀘𑀸𑀓𑀼𑀮𑀻𑀦𑀢𑀸𑀤𑀻𑀳𑀺 𑀕𑀼𑀡𑁂𑀳𑀺 𑀨𑀼𑀝𑁆𑀞𑁄 𑀅𑀦𑁂𑀓𑀭𑀽𑀧𑁂𑀳𑀺 ‘‘𑀅𑀳𑀁 𑀉𑀘𑁆𑀘𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀢𑀸𑀦𑀁 𑀯𑀺𑀓𑀧𑁆𑀧𑁂𑀦𑁆𑀢𑁄 𑀦 𑀢𑀺𑀝𑁆𑀞𑁂𑀬𑁆𑀬.

𑁯𑁨𑁬. 𑀏𑀯𑀁 𑀫𑀸𑀦𑀧𑁆𑀧𑀳𑀸𑀦𑀯𑀲𑁂𑀦𑀧𑀺 𑀤𑁂𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀩𑁆𑀩𑀓𑀺𑀮𑁂𑀲𑀽𑀧𑀲𑀫𑀯𑀲𑁂𑀦𑀧𑀺 𑀤𑁂𑀲𑁂𑀢𑀼𑀁 ‘‘𑀅𑀚𑁆𑀛𑀢𑁆𑀢𑀫𑁂𑀯𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀫𑁂𑀯𑀼𑀧𑀲𑀫𑁂𑀢𑀺 𑀅𑀢𑁆𑀢𑀦𑀺 𑀏𑀯 𑀭𑀸𑀕𑀸𑀤𑀺𑀲𑀩𑁆𑀩𑀓𑀺𑀮𑁂𑀲𑁂 𑀉𑀧𑀲𑀫𑁂𑀬𑁆𑀬. 𑀦 𑀅𑀜𑁆𑀜𑀢𑁄 𑀪𑀺𑀓𑁆𑀔𑀼 𑀲𑀦𑁆𑀢𑀺𑀫𑁂𑀲𑁂𑀬𑁆𑀬𑀸𑀢𑀺 𑀞𑀧𑁂𑀢𑁆𑀯𑀸 𑀘 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀺 𑀅𑀜𑁆𑀜𑁂𑀦 𑀉𑀧𑀸𑀬𑁂𑀦 𑀲𑀦𑁆𑀢𑀺𑀁 𑀦 𑀧𑀭𑀺𑀬𑁂𑀲𑁂𑀬𑁆𑀬. 𑀓𑀼𑀢𑁄 𑀦𑀺𑀭𑀢𑁆𑀢𑀸 𑀯𑀸𑀢𑀺 𑀦𑀺𑀭𑀢𑁆𑀢𑀸 𑀓𑀼𑀢𑁄 𑀏𑀯.

𑁯𑁨𑁭. 𑀇𑀤𑀸𑀦𑀺 𑀅𑀚𑁆𑀛𑀢𑁆𑀢𑀁 𑀉𑀧𑀲𑀦𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀢𑀸𑀤𑀺𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀚𑁆𑀛𑁂 𑀬𑀣𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀉𑀧𑀭𑀺𑀫𑀳𑁂𑀝𑁆𑀞𑀺𑀫𑀪𑀸𑀕𑀸𑀦𑀁 𑀯𑁂𑀫𑀚𑁆𑀛𑀲𑀗𑁆𑀔𑀸𑀢𑁂 𑀘𑀢𑀼𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑁂 𑀫𑀚𑁆𑀛𑁂 𑀧𑀩𑁆𑀩𑀢𑀦𑁆𑀢𑀭𑁂 𑀞𑀺𑀢𑀲𑁆𑀲 𑀯𑀸 𑀫𑀚𑁆𑀛𑁂 𑀲𑀫𑀼𑀤𑁆𑀤𑀲𑁆𑀲 𑀊𑀫𑀺 𑀦 𑀚𑀸𑀬𑀢𑀺, 𑀞𑀺𑀢𑁄𑀯 𑀲𑁄 𑀳𑁄𑀢𑀺 𑀅𑀯𑀺𑀓𑀫𑁆𑀧𑀫𑀸𑀦𑁄, 𑀏𑀯𑀁 𑀅𑀦𑁂𑀚𑁄 𑀔𑀻𑀡𑀸𑀲𑀯𑁄 𑀮𑀸𑀪𑀸𑀤𑀻𑀲𑀼 𑀞𑀺𑀢𑁄 𑀅𑀲𑁆𑀲 𑀅𑀯𑀺𑀓𑀫𑁆𑀧𑀫𑀸𑀦𑁄, 𑀲𑁄 𑀢𑀸𑀤𑀺𑀲𑁄 𑀭𑀸𑀕𑀸𑀤𑀺𑀉𑀲𑁆𑀲𑀤𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀻𑀢𑀺.

𑁯𑁨𑁮. 𑀇𑀤𑀸𑀦𑀺 𑀏𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀺𑀢𑀁 𑀥𑀫𑁆𑀫𑀤𑁂𑀲𑀦𑀁 𑀅𑀩𑁆𑀪𑀦𑀼𑀫𑁄𑀤𑀦𑁆𑀢𑁄 𑀢𑀲𑁆𑀲 𑀘 𑀅𑀭𑀳𑀢𑁆𑀢𑀲𑁆𑀲 𑀆𑀤𑀺𑀧𑀝𑀺𑀧𑀤𑀁 𑀧𑀼𑀘𑁆𑀙𑀦𑁆𑀢𑁄 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁄 ‘‘𑀅𑀓𑀺𑀢𑁆𑀢𑀬𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀓𑀺𑀢𑁆𑀢𑀬𑀻𑀢𑀺 𑀆𑀘𑀺𑀓𑁆𑀔𑀺. 𑀯𑀺𑀯𑀝𑀘𑀓𑁆𑀔𑀽𑀢𑀺 𑀯𑀺𑀯𑀝𑁂𑀳𑀺 𑀅𑀦𑀸𑀯𑀭𑀡𑁂𑀳𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀲𑀓𑁆𑀔𑀺𑀥𑀫𑁆𑀫𑀦𑁆𑀢𑀺 𑀲𑀬𑀁 𑀅𑀪𑀺𑀜𑁆𑀜𑀸𑀢𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀥𑀫𑁆𑀫𑀁. 𑀧𑀭𑀺𑀲𑁆𑀲𑀬𑀯𑀺𑀦𑀬𑀦𑁆𑀢𑀺 𑀧𑀭𑀺𑀲𑁆𑀲𑀬𑀯𑀺𑀦𑀬𑀦𑀁. 𑀧𑀝𑀺𑀧𑀤𑀁 𑀯𑀤𑁂𑀳𑀻𑀢𑀺 𑀇𑀤𑀸𑀦𑀺 𑀧𑀝𑀺𑀧𑀢𑁆𑀢𑀺𑀁 𑀯𑀤𑁂𑀳𑀺. 𑀪𑀤𑁆𑀤𑀦𑁆𑀢𑁂𑀢𑀺 ‘‘𑀪𑀤𑁆𑀤𑀁 𑀢𑀯 𑀅𑀢𑁆𑀣𑀽’’𑀢𑀺 𑀪𑀕𑀯𑀦𑁆𑀢𑀁 𑀆𑀮𑀧𑀦𑁆𑀢𑁄 𑀆𑀳. 𑀅𑀣 𑀯𑀸 𑀪𑀤𑁆𑀤𑀁 𑀲𑀼𑀦𑁆𑀤𑀭𑀁 𑀢𑀯 𑀧𑀝𑀺𑀧𑀤𑀁 𑀯𑀤𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀢𑀺𑀫𑁄𑀓𑁆𑀔𑀁 𑀅𑀣 𑀯𑀸𑀧𑀺 𑀲𑀫𑀸𑀥𑀺𑀦𑁆𑀢𑀺 𑀢𑀫𑁂𑀯 𑀧𑀝𑀺𑀧𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙𑀢𑀺. 𑀧𑀝𑀺𑀧𑀤𑀦𑁆𑀢𑀺 𑀏𑀢𑁂𑀦 𑀯𑀸 𑀫𑀕𑁆𑀕𑀁 𑀧𑀼𑀘𑁆𑀙𑀢𑀺. 𑀇𑀢𑀭𑁂𑀳𑀺 𑀲𑀻𑀮𑀁 𑀲𑀫𑀸𑀥𑀺𑀜𑁆𑀘 𑀧𑀼𑀘𑁆𑀙𑀢𑀺.

𑁯𑁨𑁯-𑁩𑁦. 𑀅𑀣𑀲𑁆𑀲 𑀪𑀕𑀯𑀸 𑀬𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀲𑀻𑀮𑀲𑁆𑀲 𑀭𑀓𑁆𑀔𑀸, 𑀬𑀲𑁆𑀫𑀸 𑀯𑀸 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀤𑁂𑀲𑀺𑀬𑀫𑀸𑀦𑀸 𑀅𑀬𑀁 𑀤𑁂𑀲𑀦𑀸 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀲𑀧𑁆𑀧𑀸𑀬𑀸, 𑀢𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀢𑁄 𑀧𑀪𑀼𑀢𑀺 𑀧𑀝𑀺𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀓𑁆𑀔𑀽𑀳𑀻’’𑀢𑀺𑀆𑀤𑀺𑀫𑀸𑀭𑀤𑁆𑀥𑁄. 𑀢𑀢𑁆𑀣 𑀘𑀓𑁆𑀔𑀽𑀳𑀺 𑀦𑁂𑀯 𑀮𑁄𑀮𑀲𑁆𑀲𑀸𑀢𑀺 𑀅𑀤𑀺𑀝𑁆𑀞𑀤𑀓𑁆𑀔𑀺𑀢𑀩𑁆𑀩𑀸𑀤𑀺𑀯𑀲𑁂𑀦 𑀘𑀓𑁆𑀔𑀽𑀳𑀺 𑀮𑁄𑀮𑁄 𑀦𑁂𑀯𑀲𑁆𑀲. 𑀕𑀸𑀫𑀓𑀣𑀸𑀬 𑀆𑀯𑀭𑀬𑁂 𑀲𑁄𑀢𑀦𑁆𑀢𑀺 𑀢𑀺𑀭𑀘𑁆𑀙𑀸𑀦𑀓𑀣𑀸𑀢𑁄 𑀲𑁄𑀢𑀁 𑀆𑀯𑀭𑁂𑀬𑁆𑀬. 𑀨𑀲𑁆𑀲𑁂𑀦𑀸𑀢𑀺 𑀭𑁄𑀕𑀨𑀲𑁆𑀲𑁂𑀦. 𑀪𑀯𑀜𑁆𑀘𑀦𑀸𑀪𑀺𑀚𑀧𑁆𑀧𑁂𑀬𑁆𑀬𑀸𑀢𑀺 𑀢𑀲𑁆𑀲 𑀨𑀲𑁆𑀲𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀸𑀬 𑀓𑀸𑀫𑀪𑀯𑀸𑀤𑀺𑀪𑀯𑀜𑁆𑀘 𑀦 𑀧𑀢𑁆𑀣𑁂𑀬𑁆𑀬. 𑀪𑁂𑀭𑀯𑁂𑀲𑀼 𑀘 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬𑀸𑀢𑀺 𑀢𑀲𑁆𑀲 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑀪𑀽𑀢𑁂𑀲𑀼 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀲𑀼 𑀪𑁂𑀭𑀯𑁂𑀲𑀼 𑀘 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬, 𑀅𑀯𑀲𑁂𑀲𑁂𑀲𑀼 𑀯𑀸 𑀖𑀸𑀦𑀺𑀦𑁆𑀤𑁆𑀭𑀺𑀬𑀫𑀦𑀺𑀦𑁆𑀤𑁆𑀭𑀺𑀬𑀯𑀺𑀲𑀬𑁂𑀲𑀼 𑀦𑀧𑁆𑀧𑀯𑁂𑀥𑁂𑀬𑁆𑀬. 𑀏𑀯𑀁 𑀧𑀭𑀺𑀧𑀽𑀭𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀧𑀼𑀭𑀺𑀫𑁂𑀳𑀺 𑀯𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀫𑀺𑀦𑀸 ‘‘𑀅𑀭𑀜𑁆𑀜𑁂 𑀯𑀲𑀢𑀸 𑀪𑁂𑀭𑀯𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀦 𑀯𑁂𑀥𑀺𑀢𑀩𑁆𑀩’’𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁯𑁩𑁧. 𑀮𑀤𑁆𑀥𑀸 𑀦 𑀲𑀦𑁆𑀦𑀺𑀥𑀺𑀁 𑀓𑀬𑀺𑀭𑀸𑀢𑀺 𑀏𑀢𑁂𑀲𑀁 𑀅𑀦𑁆𑀦𑀸𑀤𑀻𑀦𑀁 𑀬𑀁𑀓𑀺𑀜𑁆𑀘𑀺 𑀥𑀫𑁆𑀫𑁂𑀦 𑀮𑀪𑀺𑀢𑁆𑀯𑀸 ‘‘𑀅𑀭𑀜𑁆𑀜𑁂 𑀘 𑀲𑁂𑀦𑀸𑀲𑀦𑁂 𑀯𑀲𑀢𑀸 𑀲𑀤𑀸 𑀤𑀼𑀮𑁆𑀮𑀪’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀦𑁆𑀦𑀺𑀥𑀺𑀁 𑀦 𑀓𑀭𑁂𑀬𑁆𑀬.

𑁯𑁩𑁨. 𑀛𑀸𑀬𑀻 𑀦 𑀧𑀸𑀤𑀮𑁄𑀮𑀲𑁆𑀲𑀸𑀢𑀺 𑀛𑀸𑀦𑀸𑀪𑀺𑀭𑀢𑁄 𑀘 𑀦 𑀧𑀸𑀤𑀮𑁄𑀮𑁄 𑀅𑀲𑁆𑀲. 𑀯𑀺𑀭𑀫𑁂 𑀓𑀼𑀓𑁆𑀓𑀼𑀘𑁆𑀘𑀸 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸𑀢𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀸𑀤𑀺𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀦𑁄𑀤𑁂𑀬𑁆𑀬. 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸𑀬 𑀘𑁂𑀢𑁆𑀣 𑀦𑀧𑁆𑀧𑀫𑀚𑁆𑀚𑁂𑀬𑁆𑀬.

𑁯𑁩𑁩. 𑀢𑀦𑁆𑀤𑀺𑀁 𑀫𑀸𑀬𑀁 𑀳𑀲𑁆𑀲𑀁 𑀔𑀺𑀟𑁆𑀟𑀦𑁆𑀢𑀺 𑀆𑀮𑀲𑀺𑀬𑀜𑁆𑀘 𑀫𑀸𑀬𑀜𑁆𑀘 𑀳𑀲𑁆𑀲𑀜𑁆𑀘 𑀓𑀸𑀬𑀺𑀓𑀘𑁂𑀢𑀲𑀺𑀓𑀔𑀺𑀟𑁆𑀟𑀜𑁆𑀘. 𑀲𑀯𑀺𑀪𑀽𑀲𑀦𑁆𑀢𑀺 𑀲𑀤𑁆𑀥𑀺𑀁 𑀯𑀺𑀪𑀽𑀲𑀸𑀬.

𑁯𑁩𑁪-𑁭. 𑀆𑀣𑀩𑁆𑀩𑀡𑀦𑁆𑀢𑀺 𑀆𑀣𑀩𑁆𑀩𑀡𑀺𑀓𑀫𑀦𑁆𑀢𑀧𑁆𑀧𑀬𑁄𑀕𑀁. 𑀲𑀼𑀧𑀺𑀦𑀦𑁆𑀢𑀺 𑀲𑀼𑀧𑀺𑀦𑀲𑀢𑁆𑀣𑀁. 𑀮𑀓𑁆𑀔𑀡𑀦𑁆𑀢𑀺 𑀫𑀡𑀺𑀮𑀓𑁆𑀔𑀡𑀸𑀤𑀺𑀁. 𑀦𑁄 𑀯𑀺𑀤𑀳𑁂𑀢𑀺 𑀦𑀧𑁆𑀧𑀬𑁄𑀚𑁂𑀬𑁆𑀬. 𑀯𑀺𑀭𑀼𑀢𑀦𑁆𑀢𑀺 𑀫𑀺𑀕𑀸𑀤𑀻𑀦𑀁 𑀯𑀲𑁆𑀲𑀺𑀢𑀁. 𑀧𑁂𑀲𑀼𑀡𑀺𑀬𑀦𑁆𑀢𑀺 𑀧𑁂𑀲𑀼𑀜𑁆𑀜𑀁. 𑀓𑀬𑀯𑀺𑀓𑁆𑀓𑀬𑁂𑀢𑀺 𑀧𑀜𑁆𑀘𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺 𑀲𑀤𑁆𑀥𑀺𑀁 𑀯𑀜𑁆𑀘𑀦𑀸𑀯𑀲𑁂𑀦 𑀯𑀸 𑀉𑀤𑀬𑀧𑀢𑁆𑀣𑀦𑀸𑀯𑀲𑁂𑀦 𑀯𑀸 𑀦 𑀢𑀺𑀝𑁆𑀞𑁂𑀬𑁆𑀬. 𑀉𑀧𑀯𑀸𑀤𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬𑀸𑀢𑀺 𑀉𑀧𑀯𑀸𑀤𑀓𑀭𑁂 𑀓𑀺𑀮𑁂𑀲𑁂 𑀅𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀅𑀢𑁆𑀢𑀦𑀺 𑀧𑀭𑁂𑀳𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀉𑀧𑀯𑀸𑀤𑀁 𑀦 𑀚𑀦𑁂𑀬𑁆𑀬. 𑀕𑀸𑀫𑁂 𑀘 𑀦𑀸𑀪𑀺𑀲𑀚𑁆𑀚𑁂𑀬𑁆𑀬𑀸𑀢𑀺 𑀕𑀸𑀫𑁂 𑀘 𑀕𑀺𑀳𑀺𑀲𑀁𑀲𑀕𑁆𑀕𑀸𑀤𑀻𑀳𑀺 𑀦𑀸𑀪𑀺𑀲𑀚𑁆𑀚𑁂𑀬𑁆𑀬. 𑀮𑀸𑀪𑀓𑀫𑁆𑀬𑀸 𑀚𑀦𑀁 𑀦 𑀮𑀧𑀬𑁂𑀬𑁆𑀬𑀸𑀢𑀺 𑀮𑀸𑀪𑀓𑀸𑀫𑀢𑀸𑀬 𑀚𑀦𑀁 𑀦𑀸𑀮𑀧𑀬𑁂𑀬𑁆𑀬. 𑀧𑀬𑀼𑀢𑁆𑀢𑀦𑁆𑀢𑀺 𑀘𑀻𑀯𑀭𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀁, 𑀢𑀤𑀢𑁆𑀣𑀁 𑀯𑀸 𑀧𑀬𑁄𑀚𑀺𑀢𑀁.

𑁯𑁩𑁮-𑁯. 𑀫𑁄𑀲𑀯𑀚𑁆𑀚𑁂 𑀦 𑀦𑀻𑀬𑁂𑀣𑀸𑀢𑀺 𑀫𑀼𑀲𑀸𑀯𑀸𑀤𑁂 𑀦 𑀦𑀻𑀬𑁂𑀣. 𑀚𑀻𑀯𑀺𑀢𑁂𑀦𑀸𑀢𑀺 𑀚𑀻𑀯𑀺𑀓𑀸𑀬. 𑀲𑀼𑀢𑁆𑀯𑀸 𑀭𑀼𑀲𑀺𑀢𑁄 𑀩𑀳𑀼𑀁 𑀯𑀸𑀘𑀁, 𑀲𑀫𑀡𑀸𑀦𑀁 𑀯𑀸 𑀧𑀼𑀣𑀼𑀚𑀦𑀸𑀦𑀦𑁆𑀢𑀺 𑀭𑀼𑀲𑀺𑀢𑁄 𑀖𑀝𑁆𑀝𑀺𑀢𑁄 𑀧𑀭𑁂𑀳𑀺 𑀢𑁂𑀲 𑀲𑀫𑀡𑀸𑀦𑀁 𑀯𑀸 𑀔𑀢𑁆𑀢𑀺𑀬𑀸𑀤𑀺𑀪𑁂𑀤𑀸𑀦𑀁 𑀯𑀸 𑀅𑀜𑁆𑀜𑁂𑀲𑀁 𑀧𑀼𑀣𑀼𑀚𑀦𑀸𑀦𑀁 𑀩𑀳𑀼𑀫𑁆𑀧𑀺 𑀅𑀦𑀺𑀝𑁆𑀞𑀯𑀸𑀘𑀁 𑀲𑀼𑀢𑁆𑀯𑀸. 𑀦 𑀧𑀝𑀺𑀯𑀚𑁆𑀚𑀸𑀢𑀺 𑀦 𑀧𑀝𑀺𑀯𑀤𑁂𑀬𑁆𑀬. 𑀓𑀺𑀁 𑀓𑀸𑀭𑀡𑀁? 𑀦 𑀳𑀺 𑀲𑀦𑁆𑀢𑁄 𑀧𑀝𑀺𑀲𑁂𑀦𑀺𑀓𑀭𑁄𑀦𑁆𑀢𑀺.

𑁯𑁪𑁦. 𑀏𑀢𑀜𑁆𑀘 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀲𑀩𑁆𑀩𑀫𑁂𑀢𑀁 𑀬𑀣𑀸𑀯𑀼𑀢𑁆𑀢𑀁 𑀥𑀫𑁆𑀫𑀁 𑀜𑀢𑁆𑀯𑀸. 𑀯𑀺𑀘𑀺𑀦𑀦𑁆𑀢𑀺 𑀯𑀺𑀘𑀺𑀦𑀦𑁆𑀢𑁄. 𑀲𑀦𑁆𑀢𑀻𑀢𑀺 𑀦𑀺𑀩𑁆𑀩𑀼𑀢𑀺𑀁 𑀜𑀢𑁆𑀯𑀸𑀢𑀺 𑀦𑀺𑀩𑁆𑀩𑀼𑀢𑀺𑀁 𑀭𑀸𑀕𑀸𑀤𑀻𑀦𑀁 𑀲𑀦𑁆𑀢𑀻𑀢𑀺 𑀜𑀢𑁆𑀯𑀸.

𑁯𑁪𑁧. 𑀓𑀺𑀁𑀓𑀸𑀭𑀡𑀸 𑀦𑀧𑁆𑀧𑀫𑀚𑁆𑀚𑁂𑀇𑀢𑀺 𑀘𑁂 𑁋 𑀅𑀪𑀺𑀪𑀽 𑀳𑀺 𑀲𑁄𑀢𑀺 𑀕𑀸𑀣𑀸. 𑀢𑀢𑁆𑀣 𑀅𑀪𑀺𑀪𑀽𑀢𑀺 𑀭𑀽𑀧𑀸𑀤𑀻𑀦𑀁 𑀅𑀪𑀺𑀪𑀯𑀺𑀢𑀸. 𑀅𑀦𑀪𑀺𑀪𑀽𑀢𑁄𑀢𑀺 𑀢𑁂𑀳𑀺 𑀅𑀦𑀪𑀺𑀪𑀽𑀢𑁄. 𑀲𑀓𑁆𑀔𑀺𑀥𑀫𑁆𑀫𑀫𑀦𑀻𑀢𑀺𑀳𑀫𑀤𑀲𑁆𑀲𑀻𑀢𑀺 𑀧𑀘𑁆𑀘𑀓𑁆𑀔𑀫𑁂𑀯 𑀅𑀦𑀻𑀢𑀺𑀳𑀁 𑀥𑀫𑁆𑀫𑀫𑀤𑁆𑀤𑀓𑁆𑀔𑀺. 𑀲𑀤𑀸 𑀦𑀫𑀲𑁆𑀲𑀫𑀦𑀼𑀲𑀺𑀓𑁆𑀔𑁂𑀢𑀺 𑀲𑀤𑀸 𑀦𑀫𑀲𑁆𑀲𑀦𑁆𑀢𑁄 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀲𑀺𑀓𑁆𑀔𑁂𑀬𑁆𑀬. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀓𑁂𑀯𑀮𑀁 𑀧𑀦 𑀏𑀢𑁆𑀣 ‘‘𑀘𑀓𑁆𑀔𑀽𑀳𑀺 𑀦𑁂𑀯 𑀮𑁄𑀮𑁄’’𑀢𑀺𑀆𑀤𑀻𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄, ‘‘𑀅𑀦𑁆𑀦𑀸𑀦𑀫𑀣𑁄 𑀧𑀸𑀦𑀸𑀦’’𑀦𑁆𑀢𑀺𑀆𑀤𑀻𑀳𑀺 𑀲𑀦𑁆𑀦𑀺𑀥𑀺𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀻𑀮𑀁, 𑀫𑁂𑀣𑀼𑀦𑀫𑁄𑀲𑀯𑀚𑁆𑀚𑀧𑁂𑀲𑀼𑀡𑀺𑀬𑀸𑀤𑀻𑀳𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁, ‘‘𑀆𑀣𑀩𑁆𑀩𑀡𑀁 𑀲𑀼𑀧𑀺𑀦𑀁 𑀮𑀓𑁆𑀔𑀡’’𑀦𑁆𑀢𑀺𑀆𑀤𑀻𑀳𑀺 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, ‘‘𑀛𑀸𑀬𑀻 𑀅𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀥𑀺, ‘‘𑀯𑀺𑀘𑀺𑀦𑀁 𑀪𑀺𑀓𑁆𑀔𑀽’’𑀢𑀺 𑀇𑀫𑀺𑀦𑀸 𑀧𑀜𑁆𑀜𑀸, ‘‘𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂’’𑀢𑀺 𑀇𑀫𑀺𑀦𑀸 𑀧𑀼𑀦 𑀲𑀗𑁆𑀔𑁂𑀧𑀢𑁄 𑀢𑀺𑀲𑁆𑀲𑁄𑀧𑀺 𑀲𑀺𑀓𑁆𑀔𑀸, ‘‘𑀅𑀣 𑀆𑀲𑀦𑁂𑀲𑀼 𑀲𑀬𑀦𑁂𑀲𑀼, 𑀅𑀧𑁆𑀧𑀲𑀤𑁆𑀤𑁂𑀲𑀼 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬, 𑀦𑀺𑀤𑁆𑀤𑀁 𑀦 𑀩𑀳𑀼𑀮𑀻𑀓𑀭𑁂𑀬𑁆𑀬𑀸’’𑀢𑀺𑀆𑀤𑀻𑀳𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀦𑀁 𑀉𑀧𑀓𑀸𑀭𑀸𑀧𑀓𑀸𑀭𑀲𑀗𑁆𑀕𑀡𑁆𑀳𑀦𑀯𑀺𑀦𑁄𑀤𑀦𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺. 𑀏𑀯𑀁 𑀪𑀕𑀯𑀸 𑀦𑀺𑀫𑁆𑀫𑀺𑀢𑀲𑁆𑀲 𑀧𑀭𑀺𑀧𑀼𑀡𑁆𑀡𑀧𑀝𑀺𑀧𑀤𑀁 𑀯𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑁂 𑀯𑀼𑀢𑁆𑀢𑀲𑀤𑀺𑀲𑁄𑀬𑁂𑀯𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀢𑀼𑀯𑀝𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.