𑁧𑁩. 𑀫𑀳𑀸𑀩𑁆𑀬𑀽𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁦𑁨. 𑀬𑁂 𑀓𑁂𑀘𑀺𑀫𑁂𑀢𑀺 𑀫𑀳𑀸𑀩𑁆𑀬𑀽𑀳𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀇𑀤𑀫𑁆𑀧𑀺 𑀢𑀲𑁆𑀫𑀺𑀁𑀬𑁂𑀯 𑀫𑀳𑀸𑀲𑀫𑀬𑁂 ‘‘𑀓𑀺𑀁 𑀦𑀼 𑀔𑁄 𑀇𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸 𑀯𑀺𑀜𑁆𑀜𑀽𑀦𑀁 𑀲𑀦𑁆𑀢𑀺𑀓𑀸 𑀦𑀺𑀦𑁆𑀤𑀫𑁂𑀯 𑀮𑀪𑀦𑁆𑀢𑀺, 𑀉𑀤𑀸𑀳𑀼 𑀧𑀲𑀁𑀲𑀫𑁆𑀧𑀻’’𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀦𑀁 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀢𑀫𑀢𑁆𑀣𑀁 𑀆𑀯𑀺𑀓𑀸𑀢𑀼𑀁 𑀧𑀼𑀭𑀺𑀫𑀦𑀬𑁂𑀦 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑁆𑀯𑀸𑀦𑀬𑀦𑁆𑀢𑀻𑀢𑀺 𑀅𑀦𑀼 𑀆𑀦𑀬𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀆𑀳𑀭𑀦𑁆𑀢𑀺.

𑁯𑁦𑁩. 𑀇𑀤𑀸𑀦𑀺 𑀬𑀲𑁆𑀫𑀸 𑀢𑁂 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀯𑀤𑀦𑁆𑀢𑀸 𑀤𑀺𑀝𑁆𑀞𑀺𑀕𑀢𑀺𑀓𑀸 𑀯𑀸𑀤𑀺𑀦𑁄 𑀓𑀤𑀸𑀘𑀺 𑀓𑀢𑁆𑀣𑀘𑀺 𑀧𑀲𑀁𑀲𑀫𑁆𑀧𑀺 𑀮𑀪𑀦𑁆𑀢𑀺, 𑀬𑀁 𑀏𑀢𑀁 𑀧𑀲𑀁𑀲𑀸𑀲𑀗𑁆𑀔𑀸𑀢𑀁 𑀯𑀸𑀤𑀨𑀮𑀁, 𑀢𑀁 𑀅𑀧𑁆𑀧𑀁 𑀭𑀸𑀕𑀸𑀤𑀻𑀦𑀁 𑀲𑀫𑀸𑀬 𑀲𑀫𑀢𑁆𑀣𑀁 𑀦 𑀳𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀤𑀼𑀢𑀺𑀬𑁂 𑀦𑀺𑀦𑁆𑀤𑀸𑀨𑀮𑁂, 𑀢𑀲𑁆𑀫𑀸 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀢𑀸𑀯 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀫𑀸𑀳. ‘‘𑀅𑀧𑁆𑀧𑀜𑁆𑀳𑀺 𑀏𑀢𑀁 𑀦 𑀅𑀮𑀁 𑀲𑀫𑀸𑀬, 𑀤𑀼𑀯𑁂 𑀯𑀺𑀯𑀸𑀤𑀲𑁆𑀲 𑀨𑀮𑀸𑀦𑀺 𑀩𑁆𑀭𑀽𑀫𑀻’’𑀢𑀺𑀆𑀤𑀺. 𑀢𑀢𑁆𑀣 𑀤𑀼𑀯𑁂 𑀯𑀺𑀯𑀸𑀤𑀲𑁆𑀲 𑀨𑀮𑀸𑀦𑀻𑀢𑀺 𑀦𑀺𑀦𑁆𑀤𑀸 𑀧𑀲𑀁𑀲𑀸 𑀘, 𑀚𑀬𑀧𑀭𑀸𑀚𑀬𑀸𑀤𑀻𑀦𑀺 𑀯𑀸 𑀢𑀁𑀲𑀪𑀸𑀕𑀸𑀦𑀺. 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀢𑀺 ‘‘𑀦𑀺𑀦𑁆𑀤𑀸 𑀅𑀦𑀺𑀝𑁆𑀞𑀸 𑀏𑀯, 𑀧𑀲𑀁𑀲𑀸 𑀦𑀸𑀮𑀁 𑀲𑀫𑀸𑀬𑀸’’𑀢𑀺 𑀏𑀢𑀫𑁆𑀧𑀺 𑀯𑀺𑀯𑀸𑀤𑀨𑀮𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸. 𑀔𑁂𑀫𑀸𑀪𑀺𑀧𑀲𑁆𑀲𑀁 𑀅𑀯𑀺𑀯𑀸𑀤𑀪𑀽𑀫𑀺𑀦𑁆𑀢𑀺 𑀅𑀯𑀺𑀯𑀸𑀤𑀪𑀽𑀫𑀺𑀁 𑀦𑀺𑀩𑁆𑀩𑀸𑀦𑀁 ‘‘𑀔𑁂𑀫’’𑀦𑁆𑀢𑀺 𑀧𑀲𑁆𑀲𑀫𑀸𑀦𑁄.

𑁯𑁦𑁪. 𑀏𑀯𑀜𑁆𑀳𑀺 𑀅𑀯𑀺𑀯𑀤𑀫𑀸𑀦𑁄 𑁋 𑀬𑀸 𑀓𑀸𑀘𑀺𑀫𑀸𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀫𑁆𑀫𑀼𑀢𑀺𑀬𑁄𑀢𑀺 𑀤𑀺𑀝𑁆𑀞𑀺𑀬𑁄. 𑀧𑀼𑀣𑀼𑀚𑁆𑀚𑀸𑀢𑀺 𑀧𑀼𑀣𑀼𑀚𑁆𑀚𑀦𑀲𑀫𑁆𑀪𑀯𑀸. 𑀲𑁄 𑀉𑀧𑀬𑀁 𑀓𑀺𑀫𑁂𑀬𑁆𑀬𑀸𑀢𑀺 𑀲𑁄 𑀉𑀧𑀕𑀦𑁆𑀢𑀩𑁆𑀩𑀝𑁆𑀞𑁂𑀦 𑀉𑀧𑀬𑀁 𑀭𑀽𑀧𑀸𑀤𑀻𑀲𑀼 𑀏𑀓𑀫𑁆𑀧𑀺 𑀥𑀫𑁆𑀫𑀁 𑀓𑀺𑀁 𑀉𑀧𑁂𑀬𑁆𑀬, 𑀓𑁂𑀦 𑀯𑀸 𑀓𑀸𑀭𑀡𑁂𑀦 𑀉𑀧𑁂𑀬𑁆𑀬. 𑀤𑀺𑀝𑁆𑀞𑁂 𑀲𑀼𑀢𑁂 𑀔𑀦𑁆𑀢𑀺𑀫𑀓𑀼𑀩𑁆𑀩𑀫𑀸𑀦𑁄𑀢𑀺 𑀤𑀺𑀝𑁆𑀞𑀲𑀼𑀢𑀲𑀼𑀤𑁆𑀥𑀻𑀲𑀼 𑀧𑁂𑀫𑀁 𑀅𑀓𑀭𑁄𑀦𑁆𑀢𑁄.

𑁯𑁦𑁫. 𑀇𑀢𑁄 𑀩𑀸𑀳𑀺𑀭𑀸 𑀧𑀦 𑁋 𑀲𑀻𑀮𑀼𑀢𑁆𑀢𑀫𑀸𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀲𑀻𑀮𑀁𑀬𑁂𑀯 ‘‘𑀉𑀢𑁆𑀢𑀫’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀲𑀻𑀮𑀼𑀢𑁆𑀢𑀫𑀸 𑀏𑀓𑁂 𑀪𑁄𑀦𑁆𑀢𑁄 𑀲𑀁𑀬𑀫𑀫𑀢𑁆𑀢𑁂𑀦 𑀲𑀼𑀤𑁆𑀥𑀺𑀁 𑀯𑀤𑀦𑁆𑀢𑀺, 𑀳𑀢𑁆𑀣𑀺𑀯𑀢𑀸𑀤𑀺𑀜𑁆𑀘 𑀯𑀢𑀁 𑀲𑀫𑀸𑀤𑀸𑀬 𑀉𑀧𑀝𑁆𑀞𑀺𑀢𑀸, 𑀇𑀥𑁂𑀯 𑀤𑀺𑀝𑁆𑀞𑀺𑀬𑀁 𑀅𑀲𑁆𑀲 𑀲𑀢𑁆𑀣𑀼𑀦𑁄 𑀲𑀼𑀤𑁆𑀥𑀺𑀦𑁆𑀢𑀺 𑀪𑀯𑀽𑀧𑀦𑀻𑀢𑀸 𑀪𑀯𑀚𑁆𑀛𑁄𑀲𑀺𑀢𑀸 𑀲𑀫𑀸𑀦𑀸 𑀯𑀤𑀦𑁆𑀢𑀺, 𑀅𑀧𑀺𑀘 𑀢𑁂 𑀓𑀼𑀲𑀮𑀸 𑀯𑀤𑀸𑀦𑀸 ‘‘𑀓𑀼𑀲𑀮𑀸 𑀫𑀬’’𑀦𑁆𑀢𑀺 𑀏𑀯𑀁 𑀯𑀸𑀤𑀸.

𑁯𑁦𑁬. 𑀏𑀯𑀁 𑀲𑀻𑀮𑀼𑀢𑁆𑀢𑀫𑁂𑀲𑀼 𑀘 𑀢𑁂𑀲𑀼 𑀢𑀣𑀸 𑀧𑀝𑀺𑀧𑀦𑁆𑀦𑁄 𑀬𑁄 𑀓𑁄𑀘𑀺 𑁋 𑀲𑀘𑁂 𑀘𑀼𑀢𑁄𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀲𑀘𑁂 𑀢𑀢𑁄 𑀲𑀻𑀮𑀯𑀢𑀢𑁄 𑀧𑀭𑀯𑀺𑀘𑁆𑀙𑀦𑁆𑀤𑀦𑁂𑀦 𑀯𑀸 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀯𑀸 𑀘𑀼𑀢𑁄 𑀳𑁄𑀢𑀺, 𑀲𑁄 𑀢𑀁 𑀲𑀻𑀮𑀩𑁆𑀩𑀢𑀸𑀤𑀺𑀓𑀫𑁆𑀫𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀓𑀫𑁆𑀫𑀁 𑀯𑀸 𑀯𑀺𑀭𑀸𑀥𑀬𑀺𑀢𑁆𑀯𑀸 𑀧𑀯𑁂𑀥𑀢𑀻. 𑀦 𑀓𑁂𑀯𑀮𑀜𑁆𑀘 𑀯𑁂𑀥𑀢𑀺, 𑀅𑀧𑀺𑀘 𑀔𑁄 𑀢𑀁 𑀲𑀻𑀮𑀩𑁆𑀩𑀢𑀲𑀼𑀤𑁆𑀥𑀺𑀁 𑀧𑀚𑀧𑁆𑀧𑀢𑀻 𑀘 𑀯𑀺𑀧𑁆𑀧𑀮𑀧𑀢𑀺 𑀧𑀢𑁆𑀣𑀬𑀢𑀻 𑀘. 𑀓𑀺𑀫𑀺𑀯? 𑀲𑀢𑁆𑀣𑀸𑀯 𑀳𑀻𑀦𑁄 𑀧𑀯𑀲𑀁 𑀖𑀭𑀫𑁆𑀳𑀸. 𑀖𑀭𑀫𑁆𑀳𑀸 𑀧𑀯𑀲𑀦𑁆𑀢𑁄 𑀲𑀢𑁆𑀣𑀢𑁄 𑀳𑀻𑀦𑁄 𑀬𑀣𑀸 𑀢𑀁 𑀖𑀭𑀁 𑀯𑀸 𑀲𑀢𑁆𑀣𑀁 𑀯𑀸 𑀧𑀢𑁆𑀣𑁂𑀬𑁆𑀬𑀸𑀢𑀺.

𑁯𑁦𑁭. 𑀏𑀯𑀁 𑀧𑀦 𑀲𑀻𑀮𑀼𑀢𑁆𑀢𑀫𑀸𑀦𑀁 𑀯𑁂𑀥𑀓𑀸𑀭𑀡𑀁 𑀅𑀭𑀺𑀬𑀲𑀸𑀯𑀓𑁄 𑁋 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀦𑁆𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀸𑀯𑀚𑁆𑀚𑀦𑀯𑀚𑁆𑀚𑀦𑁆𑀢𑀺 𑀲𑀩𑁆𑀩𑀸𑀓𑀼𑀲𑀮𑀁 𑀮𑁄𑀓𑀺𑀬𑀓𑀼𑀲𑀮𑀜𑁆𑀘. 𑀏𑀢𑀁 𑀲𑀼𑀤𑁆𑀥𑀺𑀁 𑀅𑀲𑀼𑀤𑁆𑀥𑀺𑀦𑁆𑀢𑀺 𑀅𑀧𑀢𑁆𑀣𑀬𑀸𑀦𑁄𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀸𑀤𑀺𑀪𑁂𑀤𑀁 𑀏𑀢𑀁 𑀲𑀼𑀤𑁆𑀥𑀺𑀁, 𑀅𑀓𑀼𑀲𑀮𑀸𑀤𑀺𑀪𑁂𑀤𑀁 𑀅𑀲𑀼𑀤𑁆𑀥𑀺𑀜𑁆𑀘 𑀅𑀧𑀢𑁆𑀣𑀬𑀫𑀸𑀦𑁄. 𑀯𑀺𑀭𑀢𑁄 𑀘𑀭𑁂𑀢𑀺 𑀲𑀼𑀤𑁆𑀥𑀺𑀬𑀸 𑀅𑀲𑀼𑀤𑁆𑀥𑀺𑀬𑀸 𑀘 𑀯𑀺𑀭𑀢𑁄 𑀘𑀭𑁂𑀬𑁆𑀬. 𑀲𑀦𑁆𑀢𑀺𑀫𑀦𑀼𑀕𑁆𑀕𑀳𑀸𑀬𑀸𑀢𑀺 𑀤𑀺𑀝𑁆𑀞𑀺𑀁 𑀅𑀕𑀳𑁂𑀢𑁆𑀯𑀸.

𑁯𑁦𑁮. 𑀏𑀯𑀁 𑀇𑀢𑁄 𑀩𑀸𑀳𑀺𑀭𑀓𑁂 𑀲𑀻𑀮𑀼𑀢𑁆𑀢𑀫𑁂 𑀲𑀁𑀬𑀫𑁂𑀦 𑀯𑀺𑀲𑀼𑀤𑁆𑀥𑀺𑀯𑀸𑀤𑁂 𑀢𑁂𑀲𑀁 𑀯𑀺𑀖𑀸𑀢𑀁 𑀲𑀻𑀮𑀩𑁆𑀩𑀢𑀧𑁆𑀧𑀳𑀸𑀬𑀺𑀦𑁄 𑀅𑀭𑀳𑀢𑁄 𑀘 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀜𑁆𑀜𑀣𑀸𑀧𑀺 𑀲𑀼𑀤𑁆𑀥𑀺𑀯𑀸𑀤𑁂 𑀩𑀸𑀳𑀺𑀭𑀓𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀫𑀽𑀧𑀦𑀺𑀲𑁆𑀲𑀸𑀬𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀲𑀦𑁆𑀢𑀜𑁆𑀜𑁂𑀧𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸, 𑀢𑁂 𑀚𑀺𑀕𑀼𑀘𑁆𑀙𑀺𑀢𑀁 𑀅𑀫𑀭𑀦𑁆𑀢𑀧𑀁 𑀯𑀸 𑀤𑀺𑀝𑁆𑀞𑀲𑀼𑀤𑁆𑀥𑀺𑀆𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑀁 𑀉𑀧𑀦𑀺𑀲𑁆𑀲𑀸𑀬 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀬𑀸 𑀯𑀸 𑀉𑀤𑁆𑀥𑀁𑀲𑀭𑀸 𑀳𑀼𑀢𑁆𑀯𑀸 𑀪𑀯𑀸𑀪𑀯𑁂𑀲𑀼 𑀅𑀯𑀻𑀢𑀢𑀡𑁆𑀳𑀸𑀲𑁂 𑀲𑀼𑀤𑁆𑀥𑀺𑀫𑀦𑀼𑀢𑁆𑀣𑀼𑀦𑀦𑁆𑀢𑀺 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀻𑀢𑀺.

𑁯𑁦𑁯. 𑀏𑀯𑀁 𑀢𑁂𑀲𑀁 𑀅𑀯𑀻𑀢𑀢𑀡𑁆𑀳𑀸𑀦𑀁 𑀲𑀼𑀤𑁆𑀥𑀺𑀁 𑀅𑀦𑀼𑀢𑁆𑀣𑀼𑀦𑀦𑁆𑀢𑀸𑀦𑀁 𑀬𑁄𑀧𑀺 𑀲𑀼𑀤𑁆𑀥𑀺𑀧𑁆𑀧𑀢𑁆𑀢𑀫𑁂𑀯 𑀅𑀢𑁆𑀢𑀸𑀦𑀁 𑀫𑀜𑁆𑀜𑁂𑀬𑁆𑀬, 𑀢𑀲𑁆𑀲𑀧𑀺 𑀅𑀯𑀻𑀢𑀢𑀡𑁆𑀳𑀢𑁆𑀢𑀸 𑀪𑀯𑀸𑀪𑀯𑁂𑀲𑀼 𑀢𑀁 𑀢𑀁 𑀯𑀢𑁆𑀣𑀼𑀁 𑀧𑀢𑁆𑀣𑀬𑀫𑀸𑀦𑀲𑁆𑀲 𑀳𑀺 𑀚𑀧𑁆𑀧𑀺𑀢𑀸𑀦𑀺 𑀧𑀼𑀦𑀧𑁆𑀧𑀼𑀦𑀁 𑀳𑁄𑀦𑁆𑀢𑀺𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀡𑁆𑀳𑀸 𑀳𑀺 𑀆𑀲𑁂𑀯𑀺𑀢𑀸 𑀢𑀡𑁆𑀳𑀁 𑀯𑀟𑁆𑀠𑀬𑀢𑁂𑀯. 𑀦 𑀓𑁂𑀯𑀮𑀜𑁆𑀘 𑀚𑀧𑁆𑀧𑀺𑀢𑀸𑀦𑀺, 𑀧𑀯𑁂𑀥𑀺𑀢𑀁 𑀯𑀸𑀧𑀺 𑀧𑀓𑀧𑁆𑀧𑀺𑀢𑁂𑀲𑀼, 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀘𑀲𑁆𑀲 𑀧𑀓𑀧𑁆𑀧𑀺𑀢𑁂𑀲𑀼 𑀯𑀢𑁆𑀣𑀽𑀲𑀼 𑀧𑀯𑁂𑀥𑀺𑀢𑀫𑁆𑀧𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀯𑀸𑀪𑀯𑁂𑀲𑀼 𑀧𑀦 𑀯𑀻𑀢𑀢𑀡𑁆𑀳𑀢𑁆𑀢𑀸 𑀆𑀬𑀢𑀺𑀁 𑀘𑀼𑀢𑀽𑀧𑀧𑀸𑀢𑁄 𑀇𑀥 𑀬𑀲𑁆𑀲 𑀦𑀢𑁆𑀣𑀺, 𑀲𑀓𑁂𑀦 𑀯𑁂𑀥𑁂𑀬𑁆𑀬 𑀓𑀼𑀳𑀺𑀁𑀯 𑀚𑀧𑁆𑀧𑁂𑀢𑀺 𑀅𑀬𑀫𑁂𑀢𑀺𑀲𑁆𑀲𑀸 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑀫𑁂𑀯.

𑁯𑁧𑁦-𑁧𑁧. 𑀬𑀫𑀸𑀳𑀽𑀢𑀺 𑀧𑀼𑀘𑁆𑀙𑀸𑀕𑀸𑀣𑀸. 𑀇𑀤𑀸𑀦𑀺 𑀬𑀲𑁆𑀫𑀸 𑀏𑀓𑁄𑀧𑀺 𑀏𑀢𑁆𑀣 𑀯𑀸𑀤𑁄 𑀲𑀘𑁆𑀘𑁄 𑀦𑀢𑁆𑀣𑀺, 𑀓𑁂𑀯𑀮𑀁 𑀤𑀺𑀝𑁆𑀞𑀺𑀫𑀢𑁆𑀢𑀓𑁂𑀦 𑀳𑀺 𑀢𑁂 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀓𑀜𑁆𑀳𑀻’’𑀢𑀺 𑀇𑀫𑀁 𑀢𑀸𑀯 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀫𑁆𑀫𑀼𑀢𑀺𑀦𑁆𑀢𑀺 𑀤𑀺𑀝𑁆𑀞𑀺𑀁.

𑁯𑁧𑁨. 𑀏𑀯𑀫𑁂𑀢𑁂𑀲𑀼 𑀲𑀓𑀁 𑀥𑀫𑁆𑀫𑀁 𑀧𑀭𑀺𑀧𑀼𑀡𑁆𑀡𑀁 𑀩𑁆𑀭𑀼𑀯𑀦𑁆𑀢𑁂𑀲𑀼 𑀅𑀜𑁆𑀜𑀲𑁆𑀲 𑀧𑀦 𑀥𑀫𑁆𑀫𑀁 ‘‘𑀳𑀻𑀦’’𑀦𑁆𑀢𑀺 𑀯𑀤𑀦𑁆𑀢𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑁋 𑀧𑀭𑀲𑁆𑀲 𑀘𑁂 𑀯𑀫𑁆𑀪𑀬𑀺𑀢𑁂𑀦 𑀳𑀻𑀦𑁄𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺 𑀧𑀭𑀲𑁆𑀲 𑀦𑀺𑀦𑁆𑀤𑀺𑀢𑀓𑀸𑀭𑀡𑀸 𑀳𑀻𑀦𑁄 𑀪𑀯𑁂𑀬𑁆𑀬, 𑀦 𑀓𑁄𑀘𑀺 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀕𑁆𑀕𑁄 𑀪𑀯𑁂𑀬𑁆𑀬. 𑀓𑀺𑀁 𑀓𑀸𑀭𑀡𑀁? 𑀧𑀼𑀣𑀽 𑀳𑀺 𑀅𑀜𑁆𑀜𑀲𑁆𑀲 𑀯𑀤𑀦𑁆𑀢𑀺 𑀥𑀫𑁆𑀫𑀁, 𑀦𑀺𑀳𑀻𑀦𑀢𑁄 𑀲𑀩𑁆𑀩𑁂𑀯 𑀢𑁂 𑀲𑀫𑁆𑀳𑀺 𑀤𑀴𑁆𑀳𑀁 𑀯𑀤𑀸𑀦𑀸 𑀲𑀓𑀥𑀫𑁆𑀫𑁂 𑀤𑀴𑁆𑀳𑀯𑀸𑀤𑀸 𑀏𑀯.

𑁯𑁧𑁩. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀲𑀤𑁆𑀥𑀫𑁆𑀫𑀧𑀽𑀚𑀸𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀢𑁂 𑀘 𑀢𑀺𑀢𑁆𑀣𑀺𑀬𑀸 𑀬𑀣𑀸 𑀧𑀲𑀁𑀲𑀦𑁆𑀢𑀺 𑀲𑀓𑀸𑀬𑀦𑀸𑀦𑀺, 𑀲𑀤𑁆𑀥𑀫𑁆𑀫𑀧𑀽𑀚𑀸𑀧𑀺 𑀦𑁂𑀲𑀁 𑀢𑀣𑁂𑀯 𑀯𑀢𑁆𑀢𑀢𑀺. 𑀢𑁂 𑀳𑀺 𑀅𑀢𑀺𑀯𑀺𑀬 𑀲𑀢𑁆𑀣𑀸𑀭𑀸𑀤𑀻𑀦𑀺 𑀲𑀓𑁆𑀓𑀭𑁄𑀦𑁆𑀢𑀺. 𑀢𑀢𑁆𑀣 𑀬𑀤𑀺 𑀢𑁂 𑀧𑀫𑀸𑀡𑀸 𑀲𑀺𑀬𑀼𑀁, 𑀏𑀯𑀁 𑀲𑀦𑁆𑀢𑁂 𑀲𑀩𑁆𑀩𑁂𑀯 𑀯𑀸𑀤𑀸 𑀢𑀣𑀺𑀬𑀸 𑀪𑀯𑁂𑀬𑁆𑀬𑀼𑀁. 𑀓𑀺𑀁 𑀓𑀸𑀭𑀡𑀁? 𑀲𑀼𑀤𑁆𑀥𑀻 𑀳𑀺 𑀦𑁂𑀲𑀁 𑀧𑀘𑁆𑀘𑀢𑁆𑀢𑀫𑁂𑀯, 𑀦 𑀲𑀸 𑀅𑀜𑁆𑀜𑀢𑁆𑀭 𑀲𑀺𑀚𑁆𑀛𑀢𑀺, 𑀦𑀸𑀧𑀺 𑀧𑀭𑀫𑀢𑁆𑀣𑀢𑁄. 𑀅𑀢𑁆𑀢𑀦𑀺 𑀤𑀺𑀝𑁆𑀞𑀺𑀕𑀸𑀳𑀫𑀢𑁆𑀢𑀫𑁂𑀯 𑀳𑀺 𑀢𑀁 𑀢𑁂𑀲𑀁 𑀧𑀭𑀧𑀘𑁆𑀘𑀬𑀦𑁂𑀬𑁆𑀬𑀩𑀼𑀤𑁆𑀥𑀻𑀦𑀁.

𑁯𑁧𑁪. 𑀬𑁄 𑀯𑀸 𑀧𑀦 𑀯𑀺𑀧𑀭𑀻𑀢𑁄 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄, 𑀢𑀲𑁆𑀲 𑁋 𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀦𑁂𑀬𑁆𑀬𑀫𑀢𑁆𑀣𑀻𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 (𑀥. 𑀧. 𑁨𑁭𑁭; 𑀦𑁂𑀢𑁆𑀢𑀺. 𑁫) 𑀦𑀬𑁂𑀦 𑀲𑀼𑀤𑀺𑀝𑁆𑀞𑀢𑁆𑀢𑀸 𑀧𑀭𑁂𑀦 𑀦𑁂𑀢𑀩𑁆𑀩𑀁 𑀜𑀸𑀡𑀁 𑀦𑀢𑁆𑀣𑀺, 𑀤𑀺𑀝𑁆𑀞𑀺𑀥𑀫𑁆𑀫𑁂𑀲𑀼 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀲𑀫𑀼𑀕𑁆𑀕𑀳𑀻𑀢𑀫𑁆𑀧𑀺 𑀦𑀢𑁆𑀣𑀺. 𑀢𑀁𑀓𑀸𑀭𑀡𑀸 𑀲𑁄 𑀤𑀺𑀝𑁆𑀞𑀺𑀓𑀮𑀳𑀸𑀦𑀺 𑀅𑀢𑀻𑀢𑁄, 𑀦 𑀘 𑀲𑁄 𑀲𑁂𑀝𑁆𑀞𑀢𑁄 𑀧𑀲𑁆𑀲𑀢𑀺 𑀥𑀫𑁆𑀫𑀫𑀜𑁆𑀜𑀁 𑀅𑀜𑁆𑀜𑀢𑁆𑀭 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀳𑀺.

𑁯𑁧𑁫. 𑀚𑀸𑀦𑀸𑀫𑀻𑀢𑀺 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑁄 𑀘 𑁋 𑀏𑀯𑀁 𑀢𑀸𑀯 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑁄 𑀦 𑀳𑀺 𑀲𑁂𑀝𑁆𑀞𑀢𑁄 𑀧𑀲𑁆𑀲𑀢𑀺 𑀥𑀫𑁆𑀫𑀫𑀜𑁆𑀜𑀁, 𑀅𑀜𑁆𑀜𑁂 𑀧𑀦 𑀢𑀺𑀢𑁆𑀣𑀺𑀬𑀸 𑀧𑀭𑀘𑀺𑀢𑁆𑀢𑀜𑀸𑀡𑀸𑀤𑀻𑀳𑀺 𑀚𑀸𑀦𑀦𑁆𑀢𑀸 𑀧𑀲𑁆𑀲𑀦𑁆𑀢𑀸𑀧𑀺 ‘‘𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺 𑀢𑀣𑁂𑀯 𑀏𑀢’’𑀦𑁆𑀢𑀺 𑀏𑀯𑀁 𑀯𑀤𑀦𑁆𑀢𑀸𑀧𑀺 𑀘 𑀤𑀺𑀝𑁆𑀞𑀺𑀬𑀸 𑀲𑀼𑀤𑁆𑀥𑀺𑀁 𑀧𑀘𑁆𑀘𑁂𑀦𑁆𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑁂𑀲𑀼 𑀏𑀓𑁄𑀧𑀺 𑀅𑀤𑁆𑀤𑀓𑁆𑀔𑀺 𑀘𑁂 𑀅𑀤𑁆𑀤𑀲 𑀘𑁂𑀧𑀺 𑀢𑁂𑀦 𑀧𑀭𑀘𑀺𑀢𑁆𑀢𑀜𑀸𑀡𑀸𑀤𑀺𑀦𑀸 𑀬𑀣𑀸𑀪𑀽𑀢𑀁 𑀅𑀢𑁆𑀣𑀁, 𑀓𑀺𑀜𑁆𑀳𑀺 𑀢𑀼𑀫𑀲𑁆𑀲 𑀢𑁂𑀦 𑀢𑀲𑁆𑀲 𑀢𑁂𑀦 𑀤𑀲𑁆𑀲𑀦𑁂𑀦 𑀓𑀺𑀁 𑀓𑀢𑀁, 𑀓𑀺𑀁 𑀤𑀼𑀓𑁆𑀔𑀧𑀭𑀺𑀜𑁆𑀜𑀸 𑀲𑀸𑀥𑀺𑀢𑀸, 𑀉𑀤𑀸𑀳𑀼 𑀲𑀫𑀼𑀤𑀬𑀧𑀳𑀸𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑀁, 𑀬𑀢𑁄 𑀲𑀩𑁆𑀩𑀣𑀸𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀁 𑀢𑁂 𑀢𑀺𑀢𑁆𑀣𑀺𑀬𑀸 𑀅𑀜𑁆𑀜𑁂𑀦𑁂𑀯 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁, 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀸 𑀢𑁂 𑀢𑀺𑀢𑁆𑀣𑀺𑀬𑁂 𑀩𑀼𑀤𑁆𑀥𑀸𑀤𑀬𑁄 𑀅𑀜𑁆𑀜𑁂𑀦𑁂𑀯 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀦𑁆𑀢𑀺.

𑁯𑁧𑁬. 𑀧𑀲𑁆𑀲𑀁 𑀦𑀭𑁄𑀢𑀺 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑁄 𑀘. 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀬𑁆𑀯𑀸𑀬𑀁 𑀧𑀭𑀘𑀺𑀢𑁆𑀢𑀜𑀸𑀡𑀸𑀤𑀻𑀳𑀺 𑀅𑀤𑁆𑀤𑀓𑁆𑀔𑀺, 𑀲𑁄 𑀧𑀲𑁆𑀲𑀁 𑀦𑀭𑁄 𑀤𑀓𑁆𑀔𑀢𑀺 𑀦𑀸𑀫𑀭𑀽𑀧𑀁, 𑀦 𑀢𑀢𑁄 𑀧𑀭𑀁 𑀤𑀺𑀲𑁆𑀯𑀸𑀦 𑀯𑀸 𑀜𑀲𑁆𑀲𑀢𑀺 𑀢𑀸𑀦𑀺𑀫𑁂𑀯 𑀦𑀸𑀫𑀭𑀽𑀧𑀸𑀦𑀺 𑀦𑀺𑀘𑁆𑀘𑀢𑁄 𑀲𑀼𑀔𑀢𑁄 𑀯𑀸 𑀦 𑀅𑀜𑁆𑀜𑀣𑀸. 𑀲𑁄 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀓𑀸𑀫𑀁 𑀩𑀳𑀼𑀁 𑀧𑀲𑁆𑀲𑀢𑀼 𑀅𑀧𑁆𑀧𑀓𑀁 𑀯𑀸 𑀦𑀸𑀫𑀭𑀽𑀧𑀁 𑀦𑀺𑀘𑁆𑀘𑀢𑁄 𑀲𑀼𑀔𑀢𑁄 𑀘, 𑀅𑀣𑀲𑁆𑀲 𑀏𑀯𑀭𑀽𑀧𑁂𑀦 𑀤𑀲𑁆𑀲𑀦𑁂𑀦 𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺.

𑁯𑁧𑁭. 𑀦𑀺𑀯𑀺𑀲𑁆𑀲𑀯𑀸𑀤𑀻𑀢𑀺 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑁄 𑀘 𑁋 𑀢𑁂𑀦 𑀘 𑀤𑀲𑁆𑀲𑀦𑁂𑀦 𑀲𑀼𑀤𑁆𑀥𑀺𑀬𑀸 𑀅𑀲𑀢𑀺𑀬𑀸𑀧𑀺 𑀬𑁄 ‘‘𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺 𑀢𑀣𑁂𑀯 𑀏𑀢’’𑀦𑁆𑀢𑀺 𑀏𑀯𑀁 𑀦𑀺𑀯𑀺𑀲𑁆𑀲𑀯𑀸𑀤𑀻, 𑀏𑀢𑀁 𑀯𑀸 𑀤𑀲𑁆𑀲𑀦𑀁 𑀧𑀝𑀺𑀘𑁆𑀘 𑀤𑀺𑀝𑁆𑀞𑀺𑀬𑀸 𑀲𑀼𑀤𑁆𑀥𑀺𑀁 𑀧𑀘𑁆𑀘𑁂𑀦𑁆𑀢𑁄 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀏𑀯𑀁 𑀦𑀺𑀯𑀺𑀲𑁆𑀲𑀯𑀸𑀤𑀻, 𑀲𑁄 𑀲𑀼𑀩𑁆𑀩𑀺𑀦𑀬𑁄 𑀦 𑀳𑁄𑀢𑀺 𑀢𑀁 𑀢𑀣𑀸 𑀧𑀓𑀧𑁆𑀧𑀺𑀢𑀁 𑀅𑀪𑀺𑀲𑀗𑁆𑀔𑀢𑀁 𑀤𑀺𑀝𑁆𑀞𑀺𑀁 𑀧𑀼𑀭𑁂𑀓𑁆𑀔𑀭𑀸𑀦𑁄. 𑀲𑁄 𑀳𑀺 𑀬𑀁 𑀲𑀢𑁆𑀣𑀸𑀭𑀸𑀤𑀺𑀁 𑀦𑀺𑀲𑁆𑀲𑀺𑀢𑁄, 𑀢𑀢𑁆𑀣𑁂𑀯 𑀲𑀼𑀪𑀁 𑀯𑀤𑀸𑀦𑁄 𑀲𑀼𑀤𑁆𑀥𑀺𑀁 𑀯𑀤𑁄, ‘‘𑀧𑀭𑀺𑀲𑀼𑀤𑁆𑀥𑀯𑀸𑀤𑁄 𑀧𑀭𑀺𑀲𑀼𑀤𑁆𑀥𑀤𑀲𑁆𑀲𑀦𑁄 𑀯𑀸 𑀅𑀳’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀫𑀜𑁆𑀜𑀫𑀸𑀦𑁄 𑀢𑀢𑁆𑀣 𑀢𑀣𑀤𑁆𑀤𑀲𑀸 𑀲𑁄, 𑀢𑀢𑁆𑀣 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀯𑀺𑀧𑀭𑀻𑀢𑀫𑁂𑀯 𑀲𑁄 𑀅𑀤𑁆𑀤𑀲. 𑀬𑀣𑀸 𑀲𑀸 𑀤𑀺𑀝𑁆𑀞𑀺 𑀧𑀯𑀢𑁆𑀢𑀢𑀺, 𑀢𑀣𑁂𑀯 𑀦𑀁 𑀅𑀤𑁆𑀤𑀲, 𑀦 𑀅𑀜𑁆𑀜𑀣𑀸 𑀧𑀲𑁆𑀲𑀺𑀢𑀼𑀁 𑀇𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁯𑁧𑁮. 𑀏𑀯𑀁 𑀧𑀓𑀧𑁆𑀧𑀺𑀢𑀁 𑀤𑀺𑀝𑁆𑀞𑀺𑀁 𑀧𑀼𑀭𑁂𑀓𑁆𑀔𑀭𑀸𑀦𑁂𑀲𑀼 𑀢𑀺𑀢𑁆𑀣𑀺𑀬𑁂𑀲𑀼 𑁋 𑀦 𑀩𑁆𑀭𑀸𑀳𑁆𑀫𑀡𑁄 𑀓𑀧𑁆𑀧𑀫𑀼𑀧𑁂𑀢𑀺 𑀲𑀗𑁆𑀔𑀸𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀗𑁆𑀔𑀸𑀢𑀺 𑀲𑀗𑁆𑀔𑀸𑀬, 𑀚𑀸𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀧𑀺 𑀜𑀸𑀡𑀩𑀦𑁆𑀥𑀽𑀢𑀺 𑀲𑀫𑀸𑀧𑀢𑁆𑀢𑀺𑀜𑀸𑀡𑀸𑀤𑀺𑀦𑀸 𑀅𑀓𑀢𑀢𑀡𑁆𑀳𑀸𑀤𑀺𑀝𑁆𑀞𑀺𑀩𑀦𑁆𑀥𑀼. 𑀢𑀢𑁆𑀣 𑀯𑀺𑀕𑁆𑀕𑀳𑁄 𑁋 𑀦𑀸𑀧𑀺 𑀅𑀲𑁆𑀲 𑀜𑀸𑀡𑁂𑀦 𑀓𑀢𑁄 𑀩𑀦𑁆𑀥𑀼 𑀅𑀢𑁆𑀣𑀻𑀢𑀺 𑀦𑀧𑀺 𑀜𑀸𑀡𑀩𑀦𑁆𑀥𑀼. 𑀲𑀫𑁆𑀫𑀼𑀢𑀺𑀬𑁄𑀢𑀺 𑀤𑀺𑀝𑁆𑀞𑀺𑀲𑀫𑁆𑀫𑀼𑀢𑀺𑀬𑁄. 𑀧𑀼𑀣𑀼𑀚𑁆𑀚𑀸𑀢𑀺 𑀧𑀼𑀣𑀼𑀚𑁆𑀚𑀦𑀲𑀫𑁆𑀪𑀯𑀸. 𑀉𑀕𑁆𑀕𑀳𑀡𑀦𑁆𑀢𑀺 𑀫𑀜𑁆𑀜𑁂𑀢𑀺 𑀉𑀕𑁆𑀕𑀳𑀡𑀦𑁆𑀢𑀺 𑀅𑀜𑁆𑀜𑁂, 𑀅𑀜𑁆𑀜𑁂 𑀢𑀸 𑀲𑀫𑁆𑀫𑀼𑀢𑀺𑀬𑁄 𑀉𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁯𑁧𑁯. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀯𑀺𑀲𑁆𑀲𑀚𑁆𑀚 𑀕𑀦𑁆𑀣𑀸𑀦𑀻𑀢𑀺 𑀕𑀸𑀣𑀸. 𑀢𑀢𑁆𑀣 𑀅𑀦𑀼𑀕𑁆𑀕𑀳𑁄𑀢𑀺 𑀉𑀕𑁆𑀕𑀳𑀡𑀯𑀺𑀭𑀳𑀺𑀢𑁄, 𑀲𑁄𑀧𑀺 𑀦𑀸𑀲𑁆𑀲 𑀉𑀕𑁆𑀕𑀳𑁄𑀢𑀺 𑀅𑀦𑀼𑀕𑁆𑀕𑀳𑁄, 𑀦 𑀯𑀸 𑀉𑀕𑁆𑀕𑀡𑁆𑀳𑀸𑀢𑀻𑀢𑀺 𑀅𑀦𑀼𑀕𑁆𑀕𑀳𑁄.

𑁯𑁨𑁦. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀲𑁄 𑀏𑀯𑀭𑀽𑀧𑁄 𑁋 𑀧𑀼𑀩𑁆𑀩𑀸𑀲𑀯𑁂𑀢𑀺 𑀕𑀸𑀣𑀸. 𑀢𑀢𑁆𑀣 𑀧𑀼𑀩𑁆𑀩𑀸𑀲𑀯𑁂𑀢𑀺 𑀅𑀢𑀻𑀢𑀭𑀽𑀧𑀸𑀤𑀻𑀦𑀺 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀫𑀸𑀦𑀥𑀫𑁆𑀫𑁂 𑀓𑀺𑀮𑁂𑀲𑁂. 𑀦𑀯𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀸𑀤𑀻𑀦𑀺 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀫𑀸𑀦𑀥𑀫𑁆𑀫𑁂. 𑀦 𑀙𑀦𑁆𑀤𑀕𑀽𑀢𑀺 𑀙𑀦𑁆𑀤𑀸𑀤𑀺𑀯𑀲𑁂𑀦 𑀦 𑀕𑀘𑁆𑀙𑀢𑀺. 𑀅𑀦𑀢𑁆𑀢𑀕𑀭𑀳𑀻𑀢𑀺 𑀓𑀢𑀸𑀓𑀢𑀯𑀲𑁂𑀦 𑀅𑀢𑁆𑀢𑀸𑀦𑀁 𑀅𑀕𑀭𑀳𑀦𑁆𑀢𑁄.

𑁯𑁨𑁧. 𑀏𑀯𑀁 𑀅𑀦𑀢𑁆𑀢𑀕𑀭𑀳𑀻 𑀘 𑁋 𑀲 𑀲𑀩𑁆𑀩𑀥𑀫𑁆𑀫𑁂𑀲𑀽𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀩𑁆𑀩𑀥𑀫𑁆𑀫𑁂𑀲𑀽𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀥𑀫𑁆𑀫𑁂𑀲𑀼 ‘‘𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯𑀸’’𑀢𑀺 𑀏𑀯𑀁𑀧𑀪𑁂𑀤𑁂𑀲𑀼. 𑀧𑀦𑁆𑀦𑀪𑀸𑀭𑁄𑀢𑀺 𑀧𑀢𑀺𑀢𑀪𑀸𑀭𑁄. 𑀦 𑀓𑀧𑁆𑀧𑁂𑀢𑀻𑀢𑀺 𑀦 𑀓𑀧𑁆𑀧𑀺𑀬𑁄, 𑀤𑀼𑀯𑀺𑀥𑀫𑁆𑀧𑀺 𑀓𑀧𑁆𑀧𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀦𑀽𑀧𑀭𑀢𑁄𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁂𑀓𑁆𑀔𑀸 𑀯𑀺𑀬 𑀉𑀧𑀭𑀢𑀺𑀲𑀫𑀗𑁆𑀕𑀻𑀧𑀺 𑀦 𑀳𑁄𑀢𑀺. 𑀦 𑀧𑀢𑁆𑀣𑀺𑀬𑁄𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀢𑀡𑁆𑀳𑀸 𑀳𑀺 𑀧𑀢𑁆𑀣𑀺𑀬𑀢𑀻𑀢𑀺 𑀧𑀢𑁆𑀣𑀺𑀬𑀸, 𑀦𑀸𑀲𑁆𑀲 𑀧𑀢𑁆𑀣𑀺𑀬𑀸𑀢𑀺 𑀦 𑀧𑀢𑁆𑀣𑀺𑀬𑁄𑀢𑀺. 𑀲𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺 𑀦 𑀯𑀼𑀢𑁆𑀢𑀁. 𑀏𑀯𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑁂 𑀯𑀼𑀢𑁆𑀢𑀲𑀤𑀺𑀲𑁄 𑀏𑀯𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀫𑀳𑀸𑀩𑁆𑀬𑀽𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.