𑁧𑁨. 𑀘𑀽𑀴𑀩𑁆𑀬𑀽𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮𑁫-𑁬. 𑀲𑀓𑀁𑀲𑀓𑀁𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸𑀢𑀺 𑀘𑀽𑀴𑀩𑁆𑀬𑀽𑀳𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀇𑀤𑀫𑁆𑀧𑀺 𑀢𑀲𑁆𑀫𑀺𑀁𑀬𑁂𑀯 𑀫𑀳𑀸𑀲𑀫𑀬𑁂 ‘‘𑀲𑀩𑁆𑀩𑁂𑀧𑀺 𑀇𑀫𑁂 𑀤𑀺𑀝𑁆𑀞𑀺𑀕𑀢𑀺𑀓𑀸 ‘𑀲𑀸𑀥𑀼𑀭𑀽𑀧𑀫𑁆𑀳𑀸’𑀢𑀺 𑀪𑀡𑀦𑁆𑀢𑀺, 𑀓𑀺𑀁 𑀦𑀼 𑀔𑁄 𑀲𑀸𑀥𑀼𑀭𑀽𑀧𑀸𑀯 𑀇𑀫𑁂 𑀅𑀢𑁆𑀢𑀦𑁄𑀬𑁂𑀯 𑀤𑀺𑀝𑁆𑀞𑀺𑀬𑀸 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀺 𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀻’’𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀦𑀁 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀢𑀢𑁆𑀣 𑀆𑀤𑀺𑀢𑁄 𑀤𑁆𑀯𑁂𑀧𑀺 𑀕𑀸𑀣𑀸 𑀧𑀼𑀘𑁆𑀙𑀸𑀕𑀸𑀣𑀸𑀬𑁂𑀯. 𑀢𑀸𑀲𑀼 𑀲𑀓𑀁𑀲𑀓𑀁𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀯𑀲𑀫𑀸𑀦𑀸. 𑀯𑀺𑀕𑁆𑀕𑀬𑁆𑀳 𑀦𑀸𑀦𑀸 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺 𑀤𑀺𑀝𑁆𑀞𑀺𑀩𑀮𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸, 𑀢𑀢𑁆𑀣 ‘‘𑀓𑀼𑀲𑀮𑀸𑀫𑁆𑀳𑀸’’𑀢𑀺 𑀧𑀝𑀺𑀚𑀸𑀦𑀫𑀸𑀦𑀸 𑀧𑀼𑀣𑀼 𑀧𑀼𑀣𑀼 𑀯𑀤𑀦𑁆𑀢𑀺 𑀏𑀓𑀁 𑀦 𑀯𑀤𑀦𑁆𑀢𑀺. 𑀬𑁄 𑀏𑀯𑀁 𑀚𑀸𑀦𑀸𑀢𑀺 𑀲 𑀯𑁂𑀤𑀺 𑀥𑀫𑁆𑀫𑀁 𑀇𑀤𑀁 𑀧𑀝𑀺𑀓𑁄𑀲𑀫𑀓𑁂𑀯𑀮𑀻 𑀲𑁄𑀢𑀺 𑀢𑀜𑁆𑀘 𑀤𑀺𑀝𑁆𑀞𑀺𑀁 𑀲𑀦𑁆𑀥𑀸𑀬 𑀬𑁄 𑀏𑀯𑀁 𑀚𑀸𑀦𑀸𑀢𑀺, 𑀲𑁄 𑀥𑀫𑁆𑀫𑀁 𑀯𑁂𑀤𑀺. 𑀇𑀤𑀁 𑀧𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑁄 𑀳𑀻𑀦𑁄 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀩𑀸𑀮𑁄𑀢𑀺 𑀳𑀻𑀦𑁄. 𑀅𑀓𑁆𑀓𑀼𑀲𑀮𑁄𑀢𑀺 𑀅𑀯𑀺𑀤𑁆𑀯𑀸.

𑁮𑁮𑁭-𑁮. 𑀇𑀤𑀸𑀦𑀺 𑀢𑀺𑀲𑁆𑀲𑁄 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸 𑀳𑁄𑀦𑁆𑀢𑀺. 𑀢𑀸 𑀧𑀼𑀭𑀺𑀫𑀟𑁆𑀠𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀧𑀘𑁆𑀙𑀺𑀫𑀟𑁆𑀠𑁂𑀦 𑀧𑀝𑀺𑀩𑁆𑀬𑀽𑀳𑀺𑀢𑁆𑀯𑀸 𑀞𑀺𑀢𑀸. 𑀢𑁂𑀦 𑀩𑁆𑀬𑀽𑀳𑁂𑀦 𑀉𑀢𑁆𑀢𑀭𑀲𑀼𑀢𑁆𑀢𑀢𑁄 𑀘 𑀅𑀧𑁆𑀧𑀓𑀢𑁆𑀢𑀸 𑀇𑀤𑀁 𑀲𑀼𑀢𑁆𑀢𑀁 ‘‘𑀘𑀽𑀴𑀩𑁆𑀬𑀽𑀳’’𑀦𑁆𑀢𑀺 𑀦𑀸𑀫𑀁 𑀮𑀪𑀢𑀺. 𑀢𑀢𑁆𑀣 𑀧𑀭𑀲𑁆𑀲 𑀘𑁂 𑀥𑀫𑁆𑀫𑀦𑁆𑀢𑀺 𑀧𑀭𑀲𑁆𑀲 𑀤𑀺𑀝𑁆𑀞𑀺𑀁. 𑀲𑀩𑁆𑀩𑁂𑀯 𑀩𑀸𑀮𑀸𑀢𑀺 𑀏𑀯𑀁 𑀲𑀦𑁆𑀢𑁂 𑀲𑀩𑁆𑀩𑁂𑀯 𑀇𑀫𑁂 𑀩𑀸𑀮𑀸 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀁 𑀓𑀸𑀭𑀡𑀁? 𑀲𑀩𑁆𑀩𑁂𑀯𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸𑀢𑀺 𑀲𑀦𑁆𑀤𑀺𑀝𑁆𑀞𑀺𑀬𑀸 𑀘𑁂𑀯 𑀦 𑀯𑀻𑀯𑀤𑀸𑀢𑀸. 𑀲𑀁𑀲𑀼𑀤𑁆𑀥𑀧𑀜𑁆𑀜𑀸 𑀓𑀼𑀲𑀮𑀸 𑀫𑀼𑀢𑀻𑀫𑀸𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀦 𑀯𑀺𑀯𑀤𑀸𑀢𑀸 𑀦 𑀯𑁄𑀤𑀸𑀢𑀸 𑀲𑀁𑀓𑀺𑀮𑀺𑀝𑁆𑀞𑀸𑀯 𑀲𑀫𑀸𑀦𑀸 𑀲𑀁𑀲𑀼𑀤𑁆𑀥𑀧𑀜𑁆𑀜𑀸 𑀘 𑀓𑀼𑀲𑀮𑀸 𑀘 𑀫𑀼𑀢𑀺𑀫𑀦𑁆𑀢𑁄 𑀘 𑀢𑁂 𑀳𑁄𑀦𑁆𑀢𑀺 𑀘𑁂. 𑀅𑀣 𑀯𑀸 ‘‘𑀲𑀦𑁆𑀤𑀺𑀝𑁆𑀞𑀺𑀬𑀸 𑀘𑁂 𑀧𑀦 𑀯𑀻𑀯𑀤𑀸𑀢𑀸’’ 𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀲𑀓𑀸𑀬 𑀧𑀦 𑀤𑀺𑀝𑁆𑀞𑀺𑀬𑀸 𑀯𑁄𑀤𑀸𑀢𑀸 𑀲𑀁𑀲𑀼𑀤𑁆𑀥𑀧𑀜𑁆𑀜𑀸 𑀓𑀼𑀲𑀮𑀸 𑀫𑀼𑀢𑀺𑀫𑀦𑁆𑀢𑁄 𑀳𑁄𑀦𑁆𑀢𑀺 𑀘𑁂. 𑀦 𑀢𑁂𑀲𑀁 𑀓𑁄𑀘𑀻𑀢𑀺 𑀏𑀯𑀁 𑀲𑀦𑁆𑀢𑁂 𑀢𑁂𑀲𑀁 𑀏𑀓𑁄𑀧𑀺 𑀳𑀻𑀦𑀧𑀜𑁆𑀜𑁄 𑀦 𑀳𑁄𑀢𑀺. 𑀓𑀺𑀁𑀓𑀸𑀭𑀡𑀸? 𑀤𑀺𑀝𑁆𑀞𑀻 𑀳𑀺 𑀢𑁂𑀲𑀫𑁆𑀧𑀺 𑀢𑀣𑀸 𑀲𑀫𑀢𑁆𑀢𑀸, 𑀬𑀣𑀸 𑀇𑀢𑀭𑁂𑀲𑀦𑁆𑀢𑀺.

𑁮𑁮𑁯. 𑀦 𑀯𑀸𑀳𑀫𑁂𑀢𑀦𑁆𑀢𑀺 𑀕𑀸𑀣𑀸𑀬 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀁 𑀢𑁂 𑀫𑀺𑀣𑀼 𑀤𑁆𑀯𑁂 𑀤𑁆𑀯𑁂 𑀚𑀦𑀸 𑀅𑀜𑁆𑀜𑀫𑀜𑁆𑀜𑀁 ‘‘𑀩𑀸𑀮𑁄’’𑀢𑀺 𑀆𑀳𑀼, 𑀅𑀳𑀁 𑀏𑀢𑀁 𑀢𑀣𑀺𑀬𑀁 𑀢𑀘𑁆𑀙𑀦𑁆𑀢𑀺 𑀦𑁂𑀯 𑀩𑁆𑀭𑀽𑀫𑀺. 𑀓𑀺𑀁𑀓𑀸𑀭𑀡𑀸? 𑀬𑀲𑁆𑀫𑀸 𑀲𑀩𑁆𑀩𑁂 𑀢𑁂 𑀲𑀓𑀁 𑀲𑀓𑀁 𑀤𑀺𑀝𑁆𑀞𑀺𑀁 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀓𑀁𑀲𑀼. 𑀢𑁂𑀦 𑀘 𑀓𑀸𑀭𑀡𑁂𑀦 𑀧𑀭𑀁 ‘‘𑀩𑀸𑀮𑁄’’𑀢𑀺 𑀤𑀳𑀦𑁆𑀢𑀺. 𑀏𑀢𑁆𑀣 𑀘 ‘‘𑀢𑀣𑀺𑀬’’𑀦𑁆𑀢𑀺 ‘‘𑀓𑀣𑀺𑀯’’𑀦𑁆𑀢𑀺 𑀤𑁆𑀯𑁂𑀧𑀺 𑀧𑀸𑀞𑀸.

𑁮𑁯𑁦. 𑀬𑀫𑀸𑀳𑀽𑀢𑀺 𑀧𑀼𑀘𑁆𑀙𑀸𑀕𑀸𑀣𑀸𑀬 𑀬𑀁 𑀤𑀺𑀝𑁆𑀞𑀺𑀲𑀘𑁆𑀘𑀁 𑀢𑀣𑀺𑀬𑀦𑁆𑀢𑀺 𑀏𑀓𑁂 𑀆𑀳𑀼.

𑁮𑁯𑁧. 𑀏𑀓𑀜𑁆𑀳𑀺 𑀲𑀘𑁆𑀘𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬 𑀏𑀓𑀁 𑀲𑀘𑁆𑀘𑀁 𑀦𑀺𑀭𑁄𑀥𑁄 𑀫𑀕𑁆𑀕𑁄 𑀯𑀸. 𑀬𑀲𑁆𑀫𑀺𑀁 𑀧𑀚𑀸 𑀦𑁄 𑀯𑀺𑀯𑀤𑁂 𑀧𑀚𑀸𑀦𑀦𑁆𑀢𑀺 𑀬𑀫𑁆𑀳𑀺 𑀲𑀘𑁆𑀘𑁂 𑀧𑀚𑀸𑀦𑀦𑁆𑀢𑁄 𑀧𑀚𑀸 𑀦𑁄 𑀯𑀺𑀯𑀤𑁂𑀬𑁆𑀬. 𑀲𑀬𑀁 𑀣𑀼𑀦𑀦𑁆𑀢𑀻𑀢𑀺 𑀅𑀢𑁆𑀢𑀦𑀸 𑀯𑀤𑀦𑁆𑀢𑀺.

𑁮𑁯𑁨. 𑀓𑀲𑁆𑀫𑀸 𑀦𑀽𑀢𑀺 𑀧𑀼𑀘𑁆𑀙𑀸𑀕𑀸𑀣𑀸𑀬 𑀧𑀯𑀸𑀤𑀺𑀬𑀸𑀲𑁂𑀢𑀺 𑀯𑀸𑀤𑀺𑀦𑁄. 𑀉𑀤𑀸𑀳𑀼 𑀢𑁂 𑀢𑀓𑁆𑀓𑀫𑀦𑀼𑀲𑁆𑀲𑀭𑀦𑁆𑀢𑀻𑀢𑀺 𑀢𑁂 𑀯𑀸𑀤𑀺𑀦𑁄 𑀉𑀤𑀸𑀳𑀼 𑀅𑀢𑁆𑀢𑀦𑁄 𑀢𑀓𑁆𑀓𑀫𑀢𑁆𑀢𑀁 𑀅𑀦𑀼𑀕𑀘𑁆𑀙𑀦𑁆𑀢𑀺.

𑁮𑁯𑁩. 𑀦 𑀳𑁂𑀯𑀸𑀢𑀺 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬 𑀅𑀜𑁆𑀜𑀢𑁆𑀭 𑀲𑀜𑁆𑀜𑀸𑀬 𑀦𑀺𑀘𑁆𑀘𑀸𑀦𑀻𑀢𑀺 𑀞𑀧𑁂𑀢𑁆𑀯𑀸 𑀲𑀜𑁆𑀜𑀸𑀫𑀢𑁆𑀢𑁂𑀦 𑀦𑀺𑀘𑁆𑀘𑀦𑁆𑀢𑀺 𑀕𑀳𑀺𑀢𑀕𑁆𑀕𑀳𑀡𑀸𑀦𑀺. 𑀢𑀓𑁆𑀓𑀜𑁆𑀘 𑀤𑀺𑀝𑁆𑀞𑀻𑀲𑀼 𑀧𑀓𑀧𑁆𑀧𑀬𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀫𑀢𑁆𑀢𑀁 𑀤𑀺𑀝𑁆𑀞𑀻𑀲𑀼 𑀚𑀦𑁂𑀢𑁆𑀯𑀸. 𑀬𑀲𑁆𑀫𑀸 𑀧𑀦 𑀤𑀺𑀝𑁆𑀞𑀻𑀲𑀼 𑀯𑀺𑀢𑀓𑁆𑀓𑀁 𑀚𑀦𑁂𑀦𑁆𑀢𑀸 𑀤𑀺𑀝𑁆𑀞𑀺𑀬𑁄𑀧𑀺 𑀚𑀦𑁂𑀦𑁆𑀢𑀺, 𑀢𑀲𑁆𑀫𑀸 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀺𑀕𑀢𑀸𑀦𑀺 𑀚𑀦𑁂𑀦𑁆𑀢𑀺 𑀲𑀜𑁆𑀚𑀦𑁂𑀦𑁆𑀢𑀻’’𑀢𑀺𑀆𑀤𑀺 (𑀫𑀳𑀸𑀦𑀺. 𑁧𑁨𑁧).

𑁮𑁯𑁪-𑁫. 𑀇𑀤𑀸𑀦𑀺 𑀏𑀯𑀁 𑀦𑀸𑀦𑀸𑀲𑀘𑁆𑀘𑁂𑀲𑀼 𑀅𑀲𑀦𑁆𑀢𑁂𑀲𑀼 𑀢𑀓𑁆𑀓𑀫𑀢𑁆𑀢𑀫𑀦𑀼𑀲𑁆𑀲𑀭𑀦𑁆𑀢𑀸𑀦𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀝𑁆𑀞𑁂 𑀲𑀼𑀢𑁂’’𑀢𑀺𑀆𑀤𑀺𑀓𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀤𑀺𑀝𑁆𑀞𑁂𑀢𑀺 𑀤𑀺𑀝𑁆𑀞𑀁, 𑀤𑀺𑀝𑁆𑀞𑀲𑀼𑀤𑁆𑀥𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲 𑀦𑀬𑁄 𑀲𑀼𑀢𑀸𑀤𑀻𑀲𑀼. 𑀏𑀢𑁂 𑀘 𑀦𑀺𑀲𑁆𑀲𑀸𑀬 𑀯𑀺𑀫𑀸𑀦𑀤𑀲𑁆𑀲𑀻𑀢𑀺 𑀏𑀢𑁂 𑀤𑀺𑀝𑁆𑀞𑀺𑀥𑀫𑁆𑀫𑁂 𑀦𑀺𑀲𑁆𑀲𑀬𑀺𑀢𑁆𑀯𑀸 𑀲𑀼𑀤𑁆𑀥𑀺𑀪𑀸𑀯𑀲𑀗𑁆𑀔𑀸𑀢𑀁 𑀯𑀺𑀫𑀸𑀦𑀁 𑀅𑀲𑀫𑁆𑀫𑀸𑀦𑀁 𑀧𑀲𑁆𑀲𑀦𑁆𑀢𑁄𑀧𑀺. 𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀧𑀳𑀲𑁆𑀲𑀫𑀸𑀦𑁄, 𑀩𑀸𑀮𑁄 𑀧𑀭𑁄 𑀅𑀓𑁆𑀓𑀼𑀲𑀮𑁄𑀢𑀺 𑀘𑀸𑀳𑀸𑀢𑀺 𑀏𑀯𑀁 𑀯𑀺𑀫𑀸𑀦𑀤𑀲𑁆𑀲𑀻𑀧𑀺 𑀢𑀲𑁆𑀫𑀺𑀁 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀢𑀼𑀝𑁆𑀞𑀺𑀚𑀸𑀢𑁄 𑀳𑀸𑀲𑀚𑀸𑀢𑁄 𑀳𑀼𑀢𑁆𑀯𑀸 ‘‘𑀧𑀭𑁄 𑀳𑀻𑀦𑁄 𑀘 𑀅𑀯𑀺𑀤𑁆𑀯𑀸 𑀘𑀸’’𑀢𑀺 𑀏𑀯𑀁 𑀯𑀤𑀢𑀺𑀬𑁂𑀯. 𑀏𑀯𑀁 𑀲𑀦𑁆𑀢𑁂 𑀬𑁂𑀦𑁂𑀯𑀸𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀬𑀫𑀢𑁆𑀢𑀦𑀸𑀢𑀺 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁. 𑀯𑀺𑀫𑀸𑀦𑁂𑀢𑀻𑀢𑀺 𑀕𑀭𑀳𑀢𑀺. 𑀢𑀤𑁂𑀯 𑀧𑀸𑀯𑀸𑀢𑀺 𑀢𑀤𑁂𑀯 𑀯𑀘𑀦𑀁 𑀤𑀺𑀝𑁆𑀞𑀺𑀁 𑀯𑀤𑀢𑀺, 𑀢𑀁 𑀯𑀸 𑀧𑀼𑀕𑁆𑀕𑀮𑀁.

𑁮𑁯𑁬. 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑀸𑀢𑀺 𑀕𑀸𑀣𑀸𑀬𑀢𑁆𑀣𑁄 𑁋 𑀲𑁄 𑀏𑀯𑀁 𑀢𑀸𑀬 𑀮𑀓𑁆𑀔𑀡𑀸𑀢𑀺𑀲𑀸𑀭𑀺𑀦𑀺𑀬𑀸 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑀸 𑀲𑀫𑀢𑁆𑀢𑁄 𑀧𑀼𑀡𑁆𑀡𑁄 𑀉𑀤𑁆𑀥𑀼𑀫𑀸𑀢𑁄, 𑀢𑁂𑀦 𑀘 𑀤𑀺𑀝𑁆𑀞𑀺𑀫𑀸𑀦𑁂𑀦 𑀫𑀢𑁆𑀢𑁄 ‘‘𑀧𑀭𑀺𑀧𑀼𑀡𑁆𑀡𑁄 𑀅𑀳𑀁 𑀓𑁂𑀯𑀮𑀻’’𑀢𑀺 𑀏𑀯𑀁 𑀧𑀭𑀺𑀧𑀼𑀡𑁆𑀡𑀫𑀸𑀦𑀻 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀫𑀦𑀲𑀸 ‘‘𑀅𑀳𑀁 𑀧𑀡𑁆𑀟𑀺𑀢𑁄’’𑀢𑀺 𑀅𑀪𑀺𑀲𑀺𑀜𑁆𑀘𑀢𑀺. 𑀓𑀺𑀁𑀓𑀸𑀭𑀡𑀸? 𑀤𑀺𑀝𑁆𑀞𑀻 𑀳𑀺 𑀲𑀸 𑀢𑀲𑁆𑀲 𑀢𑀣𑀸 𑀲𑀫𑀢𑁆𑀢𑀸𑀢𑀺.

𑁮𑁯𑁭. 𑀧𑀭𑀲𑁆𑀲 𑀘𑁂𑀢𑀺 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑁄 𑀘 𑁋 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀬𑁄 𑀲𑁄 𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀧𑀳𑀲𑁆𑀲𑀫𑀸𑀦𑁄 ‘‘𑀩𑀸𑀮𑁄 𑀧𑀭𑁄 𑀅𑀓𑁆𑀓𑀼𑀲𑀮𑁄’’𑀢𑀺 𑀘𑀸𑀳. 𑀢𑀲𑁆𑀲 𑀧𑀭𑀲𑁆𑀲 𑀘𑁂 𑀳𑀺 𑀯𑀘𑀲𑀸 𑀲𑁄 𑀢𑁂𑀦 𑀯𑀼𑀘𑁆𑀘𑀫𑀸𑀦𑁄 𑀦𑀺𑀳𑀻𑀦𑁄 𑀳𑁄𑀢𑀺. 𑀢𑀼𑀫𑁄 𑀲𑀳𑀸 𑀳𑁄𑀢𑀺 𑀦𑀺𑀳𑀻𑀦𑀧𑀜𑁆𑀜𑁄, 𑀲𑁄𑀧𑀺 𑀢𑁂𑀦𑁂𑀯 𑀲𑀳 𑀦𑀺𑀳𑀻𑀦𑀧𑀜𑁆𑀜𑁄 𑀳𑁄𑀢𑀺. 𑀲𑁄𑀧𑀺 𑀳𑀺 𑀦𑀁 ‘‘𑀩𑀸𑀮𑁄’’𑀢𑀺 𑀯𑀤𑀢𑀺. 𑀅𑀣𑀲𑁆𑀲 𑀯𑀘𑀦𑀁 𑀅𑀧𑁆𑀧𑀫𑀸𑀡𑀁, 𑀲𑁄 𑀧𑀦 𑀲𑀬𑀫𑁂𑀯 𑀯𑁂𑀤𑀕𑀽 𑀘 𑀥𑀻𑀭𑁄 𑀘 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂 𑀦 𑀓𑁄𑀘𑀺 𑀩𑀸𑀮𑁄 𑀲𑀫𑀡𑁂𑀲𑀼 𑀅𑀢𑁆𑀣𑀺. 𑀲𑀩𑁆𑀩𑁂𑀧𑀺 𑀳𑀺 𑀢𑁂 𑀅𑀢𑁆𑀢𑀦𑁄 𑀇𑀘𑁆𑀙𑀸𑀬 𑀧𑀡𑁆𑀟𑀺𑀢𑀸.

𑁮𑁯𑁮. 𑀅𑀜𑁆𑀜𑀁 𑀇𑀢𑁄𑀢𑀺 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑁄 𑀘 𑁋 ‘‘𑀅𑀣 𑀘𑁂 𑀲𑀬𑀁 𑀯𑁂𑀤𑀕𑀽 𑀳𑁄𑀢𑀺 𑀥𑀻𑀭𑁄, 𑀦 𑀓𑁄𑀘𑀺 𑀩𑀸𑀮𑁄 𑀲𑀫𑀡𑁂𑀲𑀼 𑀅𑀢𑁆𑀣𑀻’’𑀢𑀺 𑀏𑀯𑀜𑁆𑀳𑀺 𑀯𑀼𑀢𑁆𑀢𑁂𑀧𑀺 𑀲𑀺𑀬𑀸 𑀓𑀲𑁆𑀲𑀘𑀺 ‘‘𑀓𑀲𑁆𑀫𑀸’’𑀢𑀺. 𑀢𑀢𑁆𑀣 𑀯𑀼𑀘𑁆𑀘𑀢𑁂 𑁋 𑀬𑀲𑁆𑀫𑀸 𑀅𑀜𑁆𑀜𑀁 𑀇𑀢𑁄 𑀬𑀸𑀪𑀺𑀯𑀤𑀦𑁆𑀢𑀺 𑀥𑀫𑁆𑀫𑀁 𑀅𑀧𑀭𑀤𑁆𑀥𑀸 𑀲𑀼𑀤𑁆𑀥𑀺𑀫𑀓𑁂𑀯𑀮𑀻 𑀢𑁂, 𑀏𑀯𑀫𑁆𑀧𑀺 𑀢𑀺𑀢𑁆𑀣𑀺𑀬𑀸 𑀧𑀼𑀣𑀼𑀲𑁄 𑀯𑀤𑀦𑁆𑀢𑀺, 𑀬𑁂 𑀇𑀢𑁄 𑀅𑀜𑁆𑀜𑀁 𑀤𑀺𑀝𑁆𑀞𑀺𑀁 𑀅𑀪𑀺𑀯𑀤𑀦𑁆𑀢𑀺, 𑀬𑁂 𑀅𑀧𑀭𑀤𑁆𑀥𑀸 𑀯𑀺𑀭𑀤𑁆𑀥𑀸 𑀲𑀼𑀤𑁆𑀥𑀺𑀫𑀕𑁆𑀕𑀁, 𑀅𑀓𑁂𑀯𑀮𑀺𑀦𑁄 𑀘 𑀢𑁂𑀢𑀺 𑀏𑀯𑀁 𑀧𑀼𑀣𑀼𑀢𑀺𑀢𑁆𑀣𑀺𑀬𑀸 𑀬𑀲𑁆𑀫𑀸 𑀯𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀯𑀁 𑀯𑀤𑀦𑁆𑀢𑀻𑀢𑀺 𑀘𑁂? 𑀲𑀦𑁆𑀤𑀺𑀝𑁆𑀞𑀺𑀭𑀸𑀕𑁂𑀦 𑀳𑀺 𑀢𑁂 𑀪𑀺𑀭𑀢𑁆𑀢𑀸, 𑀬𑀲𑁆𑀫𑀸 𑀲𑀓𑁂𑀦 𑀤𑀺𑀝𑁆𑀞𑀺𑀭𑀸𑀕𑁂𑀦 𑀅𑀪𑀺𑀭𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁮𑁯𑁯-𑁯𑁦𑁦. 𑀏𑀯𑀁 𑀅𑀪𑀺𑀭𑀢𑁆𑀢𑀸 𑀘 𑁋 𑀇𑀥𑁂𑀯 𑀲𑀼𑀤𑁆𑀥𑀺𑀦𑁆𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀓𑀸𑀬𑀦𑁂𑀢𑀺 𑀲𑀓𑀫𑀕𑁆𑀕𑁂 𑀤𑀴𑁆𑀳𑀁 𑀯𑀤𑀸𑀦𑀸𑀢𑀺 𑀤𑀴𑁆𑀳𑀯𑀸𑀤𑀸. 𑀏𑀯𑀜𑁆𑀘 𑀤𑀴𑁆𑀳𑀯𑀸𑀤𑁂𑀲𑀼 𑀢𑁂𑀲𑀼 𑀬𑁄 𑀓𑁄𑀘𑀺 𑀢𑀺𑀢𑁆𑀣𑀺𑀬𑁄 𑀲𑀓𑀸𑀬𑀦𑁂 𑀯𑀸𑀧𑀺 𑀤𑀴𑁆𑀳𑀁 𑀯𑀤𑀸𑀦𑁄 𑀓𑀫𑁂𑀢𑁆𑀣 𑀩𑀸𑀮𑁄𑀢𑀺 𑀧𑀭𑀁 𑀤𑀳𑁂𑀬𑁆𑀬, 𑀲𑀗𑁆𑀔𑁂𑀧𑀢𑁄 𑀢𑀢𑁆𑀣 𑀲𑀲𑁆𑀲𑀢𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑁂 𑀯𑀺𑀢𑁆𑀣𑀸𑀭𑀢𑁄 𑀯𑀸 𑀦𑀢𑁆𑀣𑀺𑀓𑀇𑀲𑁆𑀲𑀭𑀓𑀸𑀭𑀡𑀦𑀺𑀬𑀢𑀸𑀤𑀺𑀪𑁂𑀤𑁂 𑀲𑀓𑁂 𑀆𑀬𑀢𑀦𑁂 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀤𑀴𑁆𑀳𑀁 𑀯𑀤𑀸𑀦𑁄 𑀓𑀁 𑀧𑀭𑀁 𑀏𑀢𑁆𑀣 𑀤𑀺𑀝𑁆𑀞𑀺𑀕𑀢𑁂 ‘‘𑀩𑀸𑀮𑁄’’𑀢𑀺 𑀲𑀳 𑀥𑀫𑁆𑀫𑁂𑀦 𑀧𑀲𑁆𑀲𑁂𑀬𑁆𑀬, 𑀦𑀦𑀼 𑀲𑀩𑁆𑀩𑁄𑀧𑀺 𑀢𑀲𑁆𑀲 𑀫𑀢𑁂𑀦 𑀧𑀡𑁆𑀟𑀺𑀢𑁄 𑀏𑀯 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀏𑀯 𑀘. 𑀏𑀯𑀁 𑀲𑀦𑁆𑀢𑁂 𑀘 𑀲𑀬𑀫𑁂𑀯 𑀲𑁄 𑀫𑁂𑀥𑀕𑀫𑀸𑀯𑀳𑁂𑀬𑁆𑀬 𑀧𑀭𑀁 𑀯𑀤𑀁 𑀩𑀸𑀮𑀫𑀲𑀼𑀤𑁆𑀥𑀺𑀥𑀫𑁆𑀫𑀁, 𑀲𑁄𑀧𑀺 𑀧𑀭𑀁 ‘‘𑀩𑀸𑀮𑁄 𑀘 𑀅𑀲𑀼𑀤𑁆𑀥𑀺𑀥𑀫𑁆𑀫𑁄 𑀘 𑀅𑀬’’𑀦𑁆𑀢𑀺 𑀯𑀤𑀦𑁆𑀢𑁄 𑀅𑀢𑁆𑀢𑀦𑀸𑀯 𑀓𑀮𑀳𑀁 𑀆𑀯𑀳𑁂𑀬𑁆𑀬. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀩𑁆𑀩𑁄𑀧𑀺 𑀢𑀲𑁆𑀲 𑀫𑀢𑁂𑀦 𑀧𑀡𑁆𑀟𑀺𑀢𑁄 𑀏𑀯 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀏𑀯 𑀘.

𑁯𑁦𑁧. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀲𑀬𑀁 𑀧𑀫𑀸𑀬 𑀉𑀤𑁆𑀥𑀁𑀲 𑀮𑁄𑀓𑀲𑁆𑀫𑀺𑀁 𑀯𑀺𑀯𑀸𑀤𑀫𑁂𑀢𑀺, 𑀤𑀺𑀝𑁆𑀞𑀺𑀬𑀁 𑀞𑀢𑁆𑀯𑀸 𑀲𑀬𑀜𑁆𑀘 𑀲𑀢𑁆𑀣𑀸𑀭𑀸𑀤𑀻𑀦𑀺 𑀫𑀺𑀦𑀺𑀢𑁆𑀯𑀸 𑀲𑁄 𑀪𑀺𑀬𑁆𑀬𑁄 𑀯𑀺𑀯𑀸𑀤𑀫𑁂𑀢𑀻𑀢𑀺. 𑀏𑀯𑀁 𑀧𑀦 𑀯𑀺𑀦𑀺𑀘𑁆𑀙𑀬𑁂𑀲𑀼 𑀆𑀤𑀻𑀦𑀯𑀁 𑀜𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑁂𑀦 𑀳𑀺𑀢𑁆𑀯𑀸𑀦 𑀲𑀩𑁆𑀩𑀸𑀦𑀺 𑀯𑀺𑀦𑀺𑀘𑁆𑀙𑀬𑀸𑀦𑀺 𑀦 𑀫𑁂𑀥𑀕𑀁 𑀓𑀼𑀩𑁆𑀩𑀢𑀺 𑀚𑀦𑁆𑀢𑀼 𑀮𑁄𑀓𑁂𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑁂 𑀯𑀼𑀢𑁆𑀢𑀲𑀤𑀺𑀲𑁄 𑀏𑀯𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀘𑀽𑀴𑀩𑁆𑀬𑀽𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.