𑁧𑁧. 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬𑁯. 𑀓𑀼𑀢𑁄 𑀧𑀳𑀽𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸𑀢𑀺 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀇𑀤𑀫𑁆𑀧𑀺 𑀢𑀲𑁆𑀫𑀺𑀁𑀬𑁂𑀯 𑀫𑀳𑀸𑀲𑀫𑀬𑁂 ‘‘𑀓𑀼𑀢𑁄 𑀦𑀼, 𑀔𑁄, 𑀓𑀮𑀳𑀸𑀤𑀬𑁄 𑀅𑀝𑁆𑀞 𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀻’’𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀦𑀁 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀢𑁂 𑀥𑀫𑁆𑀫𑁂 𑀆𑀯𑀺𑀓𑀸𑀢𑀼𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀯𑀼𑀢𑁆𑀢𑀁 𑀢𑀢𑁆𑀣 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀓𑁆𑀓𑀫𑁂𑀦 𑀞𑀺𑀢𑀢𑁆𑀢𑀸 𑀲𑀩𑁆𑀩𑀕𑀸𑀣𑀸 𑀧𑀸𑀓𑀝𑀲𑀫𑁆𑀩𑀦𑁆𑀥𑀸𑀬𑁂𑀯.

𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑀧𑀦𑁂𑀢𑀸𑀲𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀓𑀼𑀢𑁄𑀧𑀳𑀽𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸𑀢𑀺 𑀓𑀮𑀳𑁄 𑀘 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀯𑀺𑀯𑀸𑀤𑁄 𑀘𑀸𑀢𑀺 𑀇𑀫𑁂 𑀓𑀼𑀢𑁄 𑀚𑀸𑀢𑀸. 𑀧𑀭𑀺𑀤𑁂𑀯𑀲𑁄𑀓𑀸 𑀲𑀳𑀫𑀘𑁆𑀙𑀭𑀸 𑀘𑀸𑀢𑀺 𑀧𑀭𑀺𑀤𑁂𑀯𑀲𑁄𑀓𑀸 𑀘 𑀫𑀘𑁆𑀙𑀭𑀸 𑀘 𑀓𑀼𑀢𑁄𑀧𑀳𑀽𑀢𑀸. 𑀫𑀸𑀦𑀸𑀢𑀺𑀫𑀸𑀦𑀸 𑀲𑀳𑀧𑁂𑀲𑀼𑀡𑀸 𑀘𑀸𑀢𑀺 𑀫𑀸𑀦𑀸 𑀘 𑀅𑀢𑀺𑀫𑀸𑀦𑀸 𑀘 𑀧𑁂𑀲𑀼𑀡𑀸 𑀘 𑀓𑀼𑀢𑁄𑀧𑀳𑀽𑀢𑀸. 𑀢𑁂𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀅𑀝𑁆𑀞 𑀓𑀺𑀮𑁂𑀲𑀥𑀫𑁆𑀫𑀸. 𑀢𑀤𑀺𑀗𑁆𑀖 𑀩𑁆𑀭𑀽𑀳𑀻𑀢𑀺 𑀢𑀁 𑀫𑀬𑀸 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀩𑁆𑀭𑀽𑀳𑀺 𑀬𑀸𑀘𑀸𑀫𑀺 𑀢𑀁 𑀅𑀳𑀦𑁆𑀢𑀺. 𑀬𑀸𑀘𑀦𑀢𑁆𑀣𑁄 𑀳𑀺 𑀇𑀗𑁆𑀖𑀸𑀢𑀺 𑀦𑀺𑀧𑀸𑀢𑁄.

𑁮𑁭𑁦. 𑀧𑀺𑀬𑀧𑁆𑀧𑀳𑀽𑀢𑀸𑀢𑀺 𑀧𑀺𑀬𑀯𑀢𑁆𑀣𑀼𑀢𑁄 𑀚𑀸𑀢𑀸. 𑀬𑀼𑀢𑁆𑀢𑀺 𑀧𑀦𑁂𑀢𑁆𑀣 𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁯𑁮) 𑀯𑀼𑀢𑁆𑀢𑀸 𑀏𑀯. 𑀫𑀘𑁆𑀙𑁂𑀭𑀬𑀼𑀢𑁆𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸𑀢𑀺 𑀇𑀫𑀺𑀦𑀸 𑀓𑀮𑀳𑀯𑀺𑀯𑀸𑀤𑀸𑀤𑀻𑀦𑀁 𑀦 𑀓𑁂𑀯𑀮𑀁 𑀧𑀺𑀬𑀯𑀢𑁆𑀣𑀼𑀫𑁂𑀯, 𑀫𑀘𑁆𑀙𑀭𑀺𑀬𑀫𑁆𑀧𑀺 𑀧𑀘𑁆𑀘𑀬𑀁 𑀤𑀲𑁆𑀲𑁂𑀢𑀺. 𑀓𑀮𑀳𑀯𑀺𑀯𑀸𑀤𑀲𑀻𑀲𑁂𑀦 𑀘𑁂𑀢𑁆𑀣 𑀲𑀩𑁆𑀩𑁂𑀧𑀺 𑀢𑁂 𑀥𑀫𑁆𑀫𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀏𑀢𑁂𑀲𑀁 𑀫𑀘𑁆𑀙𑀭𑀺𑀬𑀁, 𑀢𑀣𑀸 𑀧𑁂𑀲𑀼𑀡𑀸𑀦𑀜𑁆𑀘 𑀯𑀺𑀯𑀸𑀤𑀁. 𑀢𑁂𑀦𑀸𑀳 𑁋 ‘‘𑀯𑀺𑀯𑀸𑀤𑀚𑀸𑀢𑁂𑀲𑀼 𑀘 𑀧𑁂𑀲𑀼𑀡𑀸𑀦𑀻’’𑀢𑀺.

𑁮𑁭𑁧. 𑀧𑀺𑀬𑀸𑀲𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑀸 𑀬𑁂 𑀘𑀸𑀧𑀺 𑀮𑁄𑀪𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂𑀢𑀺 ‘‘𑀧𑀺𑀬𑀸 𑀧𑀳𑀽𑀢𑀸 𑀓𑀮𑀳𑀸’’𑀢𑀺 𑀬𑁂 𑀏𑀢𑁆𑀣 𑀯𑀼𑀢𑁆𑀢𑀸. 𑀢𑁂 𑀧𑀺𑀬𑀸 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑀸, 𑀦 𑀓𑁂𑀯𑀮𑀜𑁆𑀘 𑀧𑀺𑀬𑀸, 𑀬𑁂 𑀘𑀸𑀧𑀺 𑀔𑀢𑁆𑀢𑀺𑀬𑀸𑀤𑀬𑁄 𑀮𑁄𑀪𑀸 𑀯𑀺𑀘𑀭𑀦𑁆𑀢𑀺 𑀮𑁄𑀪𑀳𑁂𑀢𑀼𑀓𑀸 𑀮𑁄𑀪𑁂𑀦𑀸𑀪𑀺𑀪𑀽𑀢𑀸 𑀯𑀺𑀘𑀭𑀦𑁆𑀢𑀺, 𑀢𑁂𑀲𑀁 𑀲𑁄 𑀮𑁄𑀪𑁄 𑀘 𑀓𑀼𑀢𑁄𑀦𑀺𑀤𑀸𑀦𑁄𑀢𑀺 𑀤𑁆𑀯𑁂 𑀅𑀢𑁆𑀣𑁂 𑀏𑀓𑀸𑀬 𑀧𑀼𑀘𑁆𑀙𑀸𑀬 𑀧𑀼𑀘𑁆𑀙𑀢𑀺. 𑀆𑀲𑀸 𑀘 𑀦𑀺𑀝𑁆𑀞𑀸 𑀘𑀸𑀢𑀺 𑀆𑀲𑀸 𑀘 𑀢𑀲𑁆𑀲𑀸 𑀆𑀲𑀸𑀬 𑀲𑀫𑀺𑀤𑁆𑀥𑀺 𑀘. 𑀬𑁂 𑀲𑀫𑁆𑀧𑀭𑀸𑀬𑀸𑀬 𑀦𑀭𑀲𑁆𑀲 𑀳𑁄𑀦𑁆𑀢𑀻𑀢𑀺 𑀬𑁂 𑀦𑀭𑀲𑁆𑀲 𑀲𑀫𑁆𑀧𑀭𑀸𑀬𑀸𑀬 𑀳𑁄𑀦𑁆𑀢𑀺, 𑀧𑀭𑀸𑀬𑀦𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑀸 𑀏𑀯𑀸𑀬𑀫𑁆𑀧𑀺 𑀧𑀼𑀘𑁆𑀙𑀸.

𑁮𑁭𑁨. 𑀙𑀦𑁆𑀤𑀸𑀦𑀺𑀤𑀸𑀦𑀸𑀦𑀻𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀙𑀦𑁆𑀤𑀦𑀺𑀤𑀸𑀦𑀸𑀦𑀺. 𑀬𑁂 𑀘𑀸𑀧𑀺 𑀮𑁄𑀪𑀸 𑀯𑀺𑀘𑀭𑀦𑁆𑀢𑀻𑀢𑀺 𑀬𑁂 𑀘𑀸𑀧𑀺 𑀔𑀢𑁆𑀢𑀺𑀬𑀸𑀤𑀬𑁄 𑀮𑁄𑀪𑀸 𑀯𑀺𑀘𑀭𑀦𑁆𑀢𑀺 𑀢𑁂𑀲𑀁 𑀮𑁄𑀪𑁄𑀧𑀺 𑀙𑀦𑁆𑀤𑀦𑀺𑀤𑀸𑀦𑁄𑀢𑀺 𑀤𑁆𑀯𑁂𑀧𑀺 𑀅𑀢𑁆𑀣𑁂 𑀏𑀓𑀢𑁄 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀇𑀢𑁄𑀦𑀺𑀤𑀸𑀦𑀸𑀢𑀺 𑀙𑀦𑁆𑀤𑀦𑀺𑀤𑀸𑀦𑀸 𑀏𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀓𑀼𑀢𑁄𑀦𑀺𑀤𑀸𑀦𑀸 𑀓𑀼𑀢𑁄𑀦𑀺𑀤𑀸𑀦𑀸’’𑀢𑀺 (𑀲𑀼. 𑀦𑀺. 𑁨𑁭𑁩) 𑀏𑀢𑁂𑀲𑀼 𑀘 𑀲𑀤𑁆𑀤𑀲𑀺𑀤𑁆𑀥𑀺 𑀲𑀽𑀘𑀺𑀮𑁄𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑁮𑁭𑁩. 𑀯𑀺𑀦𑀺𑀘𑁆𑀙𑀬𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑀸. 𑀬𑁂 𑀯𑀸𑀧𑀺 𑀥𑀫𑁆𑀫𑀸 𑀲𑀫𑀡𑁂𑀦 𑀯𑀼𑀢𑁆𑀢𑀸𑀢𑀺 𑀬𑁂 𑀘 𑀅𑀜𑁆𑀜𑁂𑀧𑀺 𑀓𑁄𑀥𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀢𑀣𑀸𑀭𑀽𑀧𑀸 𑀯𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀩𑀼𑀤𑁆𑀥𑀲𑀫𑀡𑁂𑀦 𑀯𑀼𑀢𑁆𑀢𑀸, 𑀢𑁂 𑀓𑀼𑀢𑁄𑀧𑀳𑀽𑀢𑀸𑀢𑀺.

𑁮𑁭𑁪. 𑀢𑀫𑀽𑀧𑀦𑀺𑀲𑁆𑀲𑀸𑀬 𑀧𑀳𑁄𑀢𑀺 𑀙𑀦𑁆𑀤𑁄𑀢𑀺 𑀢𑀁 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀁. 𑀢𑀤𑀼𑀪𑀬𑀯𑀢𑁆𑀣𑀼𑀲𑀗𑁆𑀔𑀸𑀢𑀁 𑀲𑀸𑀢𑀸𑀲𑀸𑀢𑀁 𑀉𑀧𑀦𑀺𑀲𑁆𑀲𑀸𑀬 𑀲𑀁𑀬𑁄𑀕𑀯𑀺𑀬𑁄𑀕𑀧𑀢𑁆𑀣𑀦𑀸𑀯𑀲𑁂𑀦 𑀙𑀦𑁆𑀤𑁄 𑀧𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 ‘‘𑀙𑀦𑁆𑀤𑁄 𑀦𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑁄’’𑀢𑀺 𑀅𑀬𑀁 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺. 𑀭𑀽𑀧𑁂𑀲𑀼 𑀤𑀺𑀲𑁆𑀯𑀸 𑀯𑀺𑀪𑀯𑀁 𑀪𑀯𑀜𑁆𑀘𑀸𑀢𑀺 𑀭𑀽𑀧𑁂𑀲𑀼 𑀯𑀬𑀜𑁆𑀘 𑀉𑀧𑁆𑀧𑀸𑀤𑀜𑁆𑀘 𑀤𑀺𑀲𑁆𑀯𑀸. 𑀯𑀺𑀦𑀺𑀘𑁆𑀙𑀬𑀁 𑀓𑀼𑀩𑁆𑀩𑀢𑀺 𑀚𑀦𑁆𑀢𑀼 𑀮𑁄𑀓𑁂𑀢𑀺 𑀅𑀧𑀸𑀬𑀸𑀤𑀺𑀓𑁂 𑀮𑁄𑀓𑁂 𑀅𑀬𑀁 𑀚𑀦𑁆𑀢𑀼 𑀪𑁄𑀕𑀸𑀥𑀺𑀕𑀫𑀦𑀢𑁆𑀣𑀁 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑀁 ‘‘𑀅𑀢𑁆𑀢𑀸 𑀫𑁂 𑀉𑀧𑁆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑀜𑁆𑀘 𑀓𑀼𑀭𑀼𑀢𑁂. 𑀬𑀼𑀢𑁆𑀢𑀺 𑀧𑀦𑁂𑀢𑁆𑀣 𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁧𑁦𑁨) 𑀯𑀼𑀢𑁆𑀢𑀸 𑀏𑀯. 𑀏𑀢𑁆𑀢𑀸𑀯𑀢𑀸 ‘‘𑀯𑀺𑀦𑀺𑀘𑁆𑀙𑀬𑀸 𑀘𑀸𑀧𑀺 𑀓𑀼𑀢𑁄𑀧𑀳𑀽𑀢𑀸’’𑀢𑀺 𑀅𑀬𑀁 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺.

𑁮𑁭𑁫. 𑀏𑀢𑁂𑀧𑀺 𑀥𑀫𑁆𑀫𑀸 𑀤𑁆𑀯𑀬𑀫𑁂𑀯 𑀲𑀦𑁆𑀢𑁂𑀢𑀺 𑀏𑀢𑁂𑀧𑀺 𑀓𑁄𑀥𑀸𑀤𑀬𑁄 𑀥𑀫𑁆𑀫𑀸 𑀲𑀸𑀢𑀸𑀲𑀸𑀢𑀤𑁆𑀯𑀬𑁂 𑀲𑀦𑁆𑀢𑁂 𑀏𑀯 𑀧𑀳𑁄𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀧𑁆𑀧𑀢𑁆𑀢𑀺 𑀘 𑀦𑁂𑀲𑀁 𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁧𑁦𑁩) 𑀯𑀼𑀢𑁆𑀢𑀸𑀬𑁂𑀯. 𑀏𑀢𑁆𑀢𑀸𑀯𑀢𑀸 𑀢𑀢𑀺𑀬𑀧𑀜𑁆𑀳𑁄𑀧𑀺 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺. 𑀇𑀤𑀸𑀦𑀺 𑀬𑁄 𑀏𑀯𑀁 𑀯𑀺𑀲𑁆𑀲𑀚𑁆𑀚𑀺𑀢𑁂𑀲𑀼 𑀏𑀢𑁂𑀲𑀼 𑀧𑀜𑁆𑀳𑁂𑀲𑀼 𑀓𑀣𑀁𑀓𑀣𑀻 𑀪𑀯𑁂𑀬𑁆𑀬, 𑀢𑀲𑁆𑀲 𑀓𑀣𑀁𑀓𑀣𑀸𑀧𑀳𑀸𑀦𑀽𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀓𑀣𑀁𑀓𑀣𑀻 𑀜𑀸𑀡𑀧𑀣𑀸𑀬 𑀲𑀺𑀓𑁆𑀔𑁂’’𑀢𑀺, 𑀜𑀸𑀡𑀤𑀲𑁆𑀲𑀦𑀜𑀸𑀡𑀸𑀥𑀺𑀕𑀫𑀦𑀢𑁆𑀣𑀁 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀁 𑀓𑀸𑀭𑀡𑀁? 𑀜𑀢𑁆𑀯𑀸 𑀧𑀯𑀼𑀢𑁆𑀢𑀸 𑀲𑀫𑀡𑁂𑀦 𑀥𑀫𑁆𑀫𑀸. 𑀩𑀼𑀤𑁆𑀥𑀲𑀫𑀡𑁂𑀦 𑀳𑀺 𑀜𑀢𑁆𑀯𑀸𑀯 𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀦𑀢𑁆𑀣𑀺 𑀢𑀲𑁆𑀲 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀁. 𑀅𑀢𑁆𑀢𑀦𑁄 𑀧𑀦 𑀜𑀸𑀡𑀸𑀪𑀸𑀯𑁂𑀦 𑀢𑁂 𑀅𑀚𑀸𑀦𑀦𑁆𑀢𑁄 𑀦 𑀚𑀸𑀦𑁂𑀬𑁆𑀬, 𑀦 𑀤𑁂𑀲𑀦𑀸 𑀤𑁄𑀲𑁂𑀦, 𑀢𑀲𑁆𑀫𑀸 𑀓𑀣𑀁𑀓𑀣𑀻 𑀜𑀸𑀡𑀧𑀣𑀸𑀬 𑀲𑀺𑀓𑁆𑀔𑁂, 𑀜𑀢𑁆𑀯𑀸 𑀧𑀯𑀼𑀢𑁆𑀢𑀸 𑀲𑀫𑀡𑁂𑀦 𑀥𑀫𑁆𑀫𑀸𑀢𑀺.

𑁮𑁭𑁬-𑁭. 𑀲𑀸𑀢𑀁 𑀅𑀲𑀸𑀢𑀜𑁆𑀘 𑀓𑀼𑀢𑁄𑀦𑀺𑀤𑀸𑀦𑀸𑀢𑀺 𑀏𑀢𑁆𑀣 𑀲𑀸𑀢𑀁 𑀅𑀲𑀸𑀢𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸 𑀏𑀯 𑀅𑀥𑀺𑀧𑁆𑀧𑁂𑀢𑀸. 𑀦 𑀪𑀯𑀦𑁆𑀢𑀺 𑀳𑁂𑀢𑁂𑀢𑀺 𑀦 𑀪𑀯𑀦𑁆𑀢𑀺 𑀏𑀢𑁂. 𑀯𑀺𑀪𑀯𑀁 𑀪𑀯𑀜𑁆𑀘𑀸𑀧𑀺 𑀬𑀫𑁂𑀢𑀫𑀢𑁆𑀣𑀁 𑀏𑀢𑀁 𑀫𑁂 𑀧𑀩𑁆𑀭𑀽𑀳𑀺 𑀬𑀢𑁄𑀦𑀺𑀤𑀸𑀦𑀦𑁆𑀢𑀺 𑀲𑀸𑀢𑀸𑀲𑀸𑀢𑀸𑀦𑀁 𑀯𑀺𑀪𑀯𑀁 𑀪𑀯𑀜𑁆𑀘 𑀏𑀢𑀫𑁆𑀧𑀺 𑀬𑀁 𑀅𑀢𑁆𑀣𑀁. 𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑁄 𑀏𑀢𑁆𑀣 𑀓𑀢𑁄. 𑀇𑀤𑀁 𑀧𑀦 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀸𑀢𑀸𑀲𑀸𑀢𑀸𑀦𑀁 𑀯𑀺𑀪𑀯𑁄 𑀪𑀯𑁄 𑀘𑀸𑀢𑀺 𑀬𑁄 𑀏𑀲 𑀅𑀢𑁆𑀣𑁄, 𑀏𑀯𑀁 𑀫𑁂 𑀧𑀩𑁆𑀭𑀽𑀳𑀺 𑀬𑀢𑁄𑀦𑀺𑀤𑀸𑀦𑀦𑁆𑀢𑀺. 𑀏𑀢𑁆𑀣 𑀘 𑀲𑀸𑀢𑀸𑀲𑀸𑀢𑀸𑀦𑀁 𑀯𑀺𑀪𑀯𑀪𑀯𑀯𑀢𑁆𑀣𑀼𑀓𑀸 𑀯𑀺𑀪𑀯𑀪𑀯𑀤𑀺𑀝𑁆𑀞𑀺𑀬𑁄 𑀏𑀯 𑀯𑀺𑀪𑀯𑀪𑀯𑀸𑀢𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀧𑀓𑁆𑀔𑁂 ‘‘𑀪𑀯𑀤𑀺𑀝𑁆𑀞𑀺𑀧𑀺 𑀨𑀲𑁆𑀲𑀦𑀺𑀤𑀸𑀦𑀸, 𑀯𑀺𑀪𑀯𑀤𑀺𑀝𑁆𑀞𑀺𑀧𑀺 𑀨𑀲𑁆𑀲𑀦𑀺𑀤𑀸𑀦𑀸’’𑀢𑀺 𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁧𑁦𑁫) 𑀯𑀼𑀢𑁆𑀢𑀁. 𑀇𑀢𑁄𑀦𑀺𑀤𑀸𑀦𑀦𑁆𑀢𑀺 𑀨𑀲𑁆𑀲𑀦𑀺𑀤𑀸𑀦𑀁.

𑁮𑁭𑁮. 𑀓𑀺𑀲𑁆𑀫𑀺𑀁 𑀯𑀺𑀪𑀽𑀢𑁂 𑀦 𑀨𑀼𑀲𑀦𑁆𑀢𑀺 𑀨𑀲𑁆𑀲𑀸𑀢𑀺 𑀓𑀺𑀲𑁆𑀫𑀺𑀁 𑀯𑀻𑀢𑀺𑀯𑀢𑁆𑀢𑁂 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀧𑀜𑁆𑀘 𑀨𑀲𑁆𑀲𑀸 𑀦 𑀨𑀼𑀲𑀦𑁆𑀢𑀺.

𑁮𑁭𑁯. 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀧𑀝𑀺𑀘𑁆𑀘𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑀓𑀦𑀸𑀫𑀁 𑀯𑀢𑁆𑀣𑀸𑀭𑀫𑁆𑀫𑀡𑀭𑀽𑀧𑀜𑁆𑀘 𑀧𑀝𑀺𑀘𑁆𑀘. 𑀭𑀽𑀧𑁂 𑀯𑀺𑀪𑀽𑀢𑁂 𑀦 𑀨𑀼𑀲𑀦𑁆𑀢𑀺 𑀨𑀲𑁆𑀲𑀸𑀢𑀺 𑀭𑀽𑀧𑁂 𑀯𑀻𑀢𑀺𑀯𑀢𑁆𑀢𑁂 𑀧𑀜𑁆𑀘 𑀨𑀲𑁆𑀲𑀸 𑀦 𑀨𑀼𑀲𑀦𑁆𑀢𑀺.

𑁮𑁮𑁦. 𑀓𑀣𑀁 𑀲𑀫𑁂𑀢𑀲𑁆𑀲𑀸𑀢𑀺 𑀓𑀣𑀁 𑀧𑀝𑀺𑀧𑀦𑁆𑀦𑀲𑁆𑀲. 𑀯𑀺𑀪𑁄𑀢𑀺 𑀭𑀽𑀧𑀦𑁆𑀢𑀺 𑀭𑀽𑀧 𑀯𑀺𑀪𑀯𑀢𑀺, 𑀦 𑀪𑀯𑁂𑀬𑁆𑀬 𑀯𑀸. 𑀲𑀼𑀔𑀁 𑀤𑀼𑀔𑀜𑁆𑀘𑀸𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀁 𑀭𑀽𑀧𑀫𑁂𑀯 𑀧𑀼𑀘𑁆𑀙𑀢𑀺.

𑁮𑁮𑁧. 𑀦 𑀲𑀜𑁆𑀜𑀲𑀜𑁆𑀜𑀻𑀢𑀺 𑀬𑀣𑀸 𑀲𑀫𑁂𑀢𑀲𑁆𑀲 𑀯𑀺𑀪𑁄𑀢𑀺 𑀭𑀽𑀧𑀁, 𑀲𑁄 𑀧𑀓𑀢𑀺𑀲𑀜𑁆𑀜𑀸𑀬 𑀲𑀜𑁆𑀜𑀻𑀧𑀺 𑀦 𑀳𑁄𑀢𑀺. 𑀦 𑀯𑀺𑀲𑀜𑁆𑀜𑀲𑀜𑁆𑀜𑀻𑀢𑀺 𑀯𑀺𑀲𑀜𑁆𑀜𑀸𑀬𑀧𑀺 𑀯𑀺𑀭𑀽𑀧𑀸𑀬 𑀲𑀜𑁆𑀜𑀸𑀬 𑀲𑀜𑁆𑀜𑀻 𑀦 𑀳𑁄𑀢𑀺 𑀉𑀫𑁆𑀫𑀢𑁆𑀢𑀓𑁄 𑀯𑀸 𑀔𑀺𑀢𑁆𑀢𑀘𑀺𑀢𑁆𑀢𑁄 𑀯𑀸. 𑀦𑁄𑀧𑀺 𑀅𑀲𑀜𑁆𑀜𑀻𑀢𑀺 𑀲𑀜𑁆𑀜𑀸𑀯𑀺𑀭𑀳𑀺𑀢𑁄𑀧𑀺 𑀦 𑀳𑁄𑀢𑀺 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄 𑀯𑀸 𑀅𑀲𑀜𑁆𑀜𑀲𑀢𑁆𑀢𑁄 𑀯𑀸. 𑀦 𑀯𑀺𑀪𑀽𑀢𑀲𑀜𑁆𑀜𑀻𑀢𑀺 ‘‘𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀥 𑀲. 𑁨𑁬𑁫; 𑀯𑀺𑀪. 𑁬𑁦𑁨) 𑀦𑀬𑁂𑀦 𑀲𑀫𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀻𑀧𑀺 𑀦 𑀳𑁄𑀢𑀺 𑀅𑀭𑀽𑀧𑀚𑁆𑀛𑀸𑀦𑀮𑀸𑀪𑀻. 𑀏𑀯𑀁 𑀲𑀫𑁂𑀢𑀲𑁆𑀲 𑀯𑀺𑀪𑁄𑀢𑀺 𑀭𑀽𑀧𑀦𑁆𑀢𑀺 𑀏𑀢𑀲𑁆𑀫𑀺𑀁 𑀲𑀜𑁆𑀜𑀲𑀜𑁆𑀜𑀺𑀢𑀸𑀤𑀺𑀪𑀸𑀯𑁂 𑀅𑀝𑁆𑀞𑀢𑁆𑀯𑀸 𑀬𑀤𑁂𑀢𑀁 𑀯𑀼𑀢𑁆𑀢𑀁 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀢𑁆𑀣𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀻’’𑀢𑀺. 𑀏𑀯𑀁 𑀲𑀫𑁂𑀢𑀲𑁆𑀲 𑀅𑀭𑀽𑀧𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀯𑀺𑀪𑁄𑀢𑀺 𑀭𑀽𑀧𑀁. 𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸𑀢𑀺 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀬𑀸 𑀲𑀜𑁆𑀜𑀸, 𑀢𑀦𑁆𑀦𑀺𑀤𑀸𑀦𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀧𑀜𑁆𑀘𑀸 𑀅𑀧𑁆𑀧𑀳𑀻𑀦𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁮𑁮𑁨-𑁩. 𑀏𑀢𑁆𑀢𑀸𑀯𑀢𑀕𑁆𑀕𑀁 𑀦𑀼 𑀯𑀤𑀦𑁆𑀢𑀺, 𑀳𑁂𑀓𑁂 𑀬𑀓𑁆𑀔𑀲𑁆𑀲 𑀲𑀼𑀤𑁆𑀥𑀺𑀁 𑀇𑀥 𑀧𑀡𑁆𑀟𑀺𑀢𑀸𑀲𑁂. 𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀺 𑀯𑀤𑀦𑁆𑀢𑀺𑀏𑀢𑁆𑀢𑁄𑀢𑀺 𑀏𑀢𑁆𑀢𑀸𑀯𑀢𑀸 𑀦𑀼 𑀇𑀥 𑀧𑀡𑁆𑀟𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀕𑁆𑀕𑀁 𑀲𑀼𑀤𑁆𑀥𑀺𑀁 𑀲𑀢𑁆𑀢𑀲𑁆𑀲 𑀯𑀤𑀦𑁆𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀺 𑀏𑀢𑁆𑀢𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀢𑁄 𑀅𑀥𑀺𑀓𑀁 𑀯𑀤𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀏𑀢𑁆𑀢𑀸𑀯𑀢𑀕𑁆𑀕𑀫𑁆𑀧𑀺 𑀯𑀤𑀦𑁆𑀢𑀺 𑀳𑁂𑀓𑁂𑀢𑀺 𑀏𑀓𑁂 𑀲𑀲𑁆𑀲𑀢𑀯𑀸𑀤𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀡𑁆𑀟𑀺𑀢𑀫𑀸𑀦𑀺𑀦𑁄 𑀏𑀢𑁆𑀢𑀸𑀯𑀢𑀸𑀧𑀺 𑀅𑀕𑁆𑀕𑀁 𑀲𑀼𑀤𑁆𑀥𑀺𑀁 𑀯𑀤𑀦𑁆𑀢𑀺. 𑀢𑁂𑀲𑀁 𑀧𑀦𑁂𑀓𑁂 𑀲𑀫𑀬𑀁 𑀯𑀤𑀦𑁆𑀢𑀻𑀢𑀺 𑀢𑁂𑀲𑀁𑀬𑁂𑀯 𑀏𑀓𑁂 𑀉𑀘𑁆𑀙𑁂𑀤𑀯𑀸𑀤𑀸 𑀲𑀫𑀬𑀁 𑀉𑀘𑁆𑀙𑁂𑀤𑀁 𑀯𑀤𑀦𑁆𑀢𑀺. 𑀅𑀦𑀼𑀧𑀸𑀤𑀺𑀲𑁂𑀲𑁂 𑀓𑀼𑀲𑀮𑀸 𑀯𑀤𑀸𑀦𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑁂 𑀓𑀼𑀲𑀮𑀯𑀸𑀤𑀸 𑀲𑀫𑀸𑀦𑀸.

𑁮𑁮𑁪. 𑀏𑀢𑁂 𑀘 𑀜𑀢𑁆𑀯𑀸 𑀉𑀧𑀦𑀺𑀲𑁆𑀲𑀺𑀢𑀸𑀢𑀺 𑀏𑀢𑁂 𑀘 𑀤𑀺𑀝𑁆𑀞𑀺𑀕𑀢𑀺𑀓𑁂 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄 𑀦𑀺𑀲𑁆𑀲𑀺𑀢𑀸𑀢𑀺 𑀜𑀢𑁆𑀯𑀸. 𑀜𑀢𑁆𑀯𑀸 𑀫𑀼𑀦𑀻 𑀦𑀺𑀲𑁆𑀲𑀬𑁂 𑀲𑁄 𑀯𑀺𑀫𑀁𑀲𑀻𑀢𑀺 𑀦𑀺𑀲𑁆𑀲𑀬𑁂 𑀘 𑀜𑀢𑁆𑀯𑀸 𑀲𑁄 𑀯𑀻𑀫𑀁𑀲𑀻 𑀧𑀡𑁆𑀟𑀺𑀢𑁄 𑀩𑀼𑀤𑁆𑀥𑀫𑀼𑀦𑀺. 𑀜𑀢𑁆𑀯𑀸 𑀯𑀺𑀫𑀼𑀢𑁆𑀢𑁄𑀢𑀺 𑀤𑀼𑀓𑁆𑀔𑀸𑀦𑀺𑀘𑁆𑀘𑀸𑀤𑀺𑀢𑁄 𑀥𑀫𑁆𑀫𑁂 𑀜𑀢𑁆𑀯𑀸 𑀯𑀺𑀫𑀼𑀢𑁆𑀢𑁄. 𑀪𑀯𑀸𑀪𑀯𑀸𑀬 𑀦 𑀲𑀫𑁂𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑀧𑀢𑁆𑀢𑀺𑀬𑀸 𑀦 𑀲𑀫𑀸𑀕𑀘𑁆𑀙𑀢𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑁂 𑀯𑀼𑀢𑁆𑀢𑀲𑀤𑀺𑀲𑁄𑀬𑁂𑀯𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.